...
Мінея Місячна,  Грудень

Вересень * Жовтень * Листопад * Грудень * Січень * Лютий * Березень * Квітень * Травень * Червень * Липень * Серпень * Богородичний додаток

← В 6-й день

Грудень

 

В 8-й день →

День 12345678910111213141516171819202122232425262728293031

В 7-й день

ТранслітераціяЦерковнослов’янськаУкраїнська

И́же во святы́х отца́ на́шего Амвро́сия, епи́скопа Медиола́нскаго

Аллилу́ия или́ тропа́рь.

На Го́споди, воззва́х: стихи́ры Амвро́сия, глас 1.

Подо́бен: Небе́сных чино́в:

Влады́чества престо́л украша́я доброде́тельми,/ от вдохнове́ния Боже́ственна/ свяще́ннонача́лие подо́бне прия́л еси́;/ те́мже ве́рен строи́тель благода́ти/ во обои́х, Амвро́сие, быв,/ сугуб вене́ц насле́довал еси́.

В воздержа́нии, и боле́знех, и во бде́ниих мно́зех,/ и моли́твах спротяже́нных/ ду́шу и те́ло очи́стил еси́, Богому́дре,/ сосу́д про́чее избра́н яви́вся Христу́ Бо́гу,/ апо́столом ра́вен я́влься,/ восприя́л еси́ дарова́ния.

Благочести́ваго царя́, согреши́вша иногда́,/ я́ко Дави́да Нафа́н, дерзнове́нием обличи́л еси́,/ Амвро́сие всеблаже́нне, сего́ я́ве отлуче́нию подложи́л еси́/ и, покая́нием наказа́в Боголе́пно,/ сочи́слил еси́ па́стве твое́й.

И́ны стихи́ры Богоро́дицы, глас и подо́бен то́йже: (А́ще Аллилу́ия: си́и стихи́ры пою́тся пре́жде.)

Жезло́м Твоего́ предста́тельства,/ Богороди́тельнице Чи́стая,/ звери́ныя стра́сти окая́нныя души́ мое́й отжени́/ и, отвсю́ду ми́рно к жи́зни мя управля́ющи,/ свято́му ста́ду/ избра́нных Твои́х ове́ц причти́.

Я́ко по́мощница Ты еси́ безпо́мощных челове́ков,/ я́ко наде́жда еси́ всех ненаде́жных,/ реше́ние, Богоро́дице, в лю́тых/ и по́мощь мне бу́ди,/ грехо́в и бед, я́ко ми́лостива,/ избавля́ющи мя, Пречи́стая.

Всегуби́тельных страсте́й мои́х огнепа́льная стремле́ния/ росо́ю Боже́ственною,/ во́льным одожде́нием твои́м угаси́, Де́во;/ да и аз, я́коже о́троцы,/ Бо́га, из Тебе́ рожде́ннаго, благода́рю/ и сла́влю и бла́гословлю благода́ть твою́, Влады́чице.

Сла́ва, и ны́не, Богоро́дичен, глас и подо́бен то́йже:

Нра́вом гнилы́м попо́лзся, ниц лежу́/ и к Твое́й, Де́во, притека́ю тишине́,/ от бу́ри сопроти́вныя/ и искуше́ний многообра́зных мя изба́ви,/ да пою́ твою́ благода́ть непреста́нно,/ Богоро́дице Ма́ти, Присноде́во.

Крестобогоро́дичен. Подо́бен то́йже:

У Креста́ предстоя́щи Сы́на и Бо́га Твоего́/ и долготерпе́ние того́ смотря́ющи,/ глаго́лаше, пла́чущи, Ма́ти Чи́стая:/ увы́ Мне, Ча́до Сладча́йшее,/ что сия́ стра́ждеши непра́ведно, Сло́ве Бо́жий,/ да спасе́ши челове́чество.

На стихо́вне стихи́ры Окто́иха.

Тропа́рь, глас 4:

Пра́вило ве́ры и о́браз кро́тости,/ воздержа́ния учи́теля/ яви́ тя ста́ду твоему́/ я́же веще́й и́стина./ Сего́ ра́ди стяжа́л еси́ смире́нием высо́кая,/ нището́ю бога́тая,/ о́тче Амвро́сие,/ моли́ Христа́ Бо́га,/ спасти́ся душа́м на́шим.

НА У́ТРЕНИ

Оба кано́на Окто́иха. И свята́го кано́н на 4, глас 4, его́же краегране́сие: Всевели́каго Амвро́сия восхвалю́. Творе́ние Ио́сифово.

Песнь 1

Ирмо́с:

Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зными Моисе́овыма рука́ма/ Амали́кову си́лу в пусты́ни победи́л есть.

Боже́ственными светоли́тии, преподо́бне, облиста́емь,/ све́тлое, и светоно́сное, и свято́е твое́ успе́ние/ благоче́стно чту́щия твои́ми моли́твами просвети́.

Сло́во Бо́жие прему́дрости тебе́ сло́во дарова́,/ укра́шенное зна́нием и́стинным, иера́рше Амвро́сие,/ ерети́чествующих безслове́сное отража́я зломы́слие.

Ума́ твоего́ зри́тельное, пребога́те,/ предочи́стив от стра́стныя мглы,/ прия́тно чи́стых блиста́ний Всесвята́го ду́ха соде́лал еси́, всеблаже́нне.

Всему́дрыми и свяще́нными твои́ми догма́ты/ ариему́дрственную отгна́в па́губу,/ я́ко па́стырь, на зла́це упасл еси́ Правосла́вия, всему́дре,/ слове́сныя твоя́ ве́рою о́вцы.

Богоро́дичен: Безсе́менно О́тчею во́лею от Боже́ственнаго ду́ха Бо́жия/ зачала́ еси́ Сы́на и пло́тию родила́ еси́,/ из Отца́ безма́терня и нас ра́ди из Тебе́ безо́тча.

Песнь 3

Ирмо́с: Не му́дростию, и си́лою, и бога́тством хва́лимся,/ но Тобо́ю, О́тчею ипоста́сною му́дростию, Христе́:/ несть бо свят, па́че Тебе́, Человеколю́бче.

Велича́йшу благода́ть от Бо́га прие́м и си́лу,/ твои́м чу́вственным прикоснове́нием разли́чныя стра́сти, о́тче Амвро́сие, исцеля́л еси́ приходя́щих к тебе́.

Науче́н, я́ко иера́рх Боже́ственный, преподо́бне,/ вся́кое разуме́ние Писа́ния/ неве́дущим, о́тче Амвро́сие, неудобопости́жная я́ве уясни́л еси́.

Тебе́, му́дростию духо́вною сия́ющу,/ несмы́сленно прибли́житися де́рзостно скверне́йшую устре́мльшуюся/ скоре́йше умертви́л еси́ Боже́ственным приглаго́ланием.

Богоро́дичен: Род челове́ческий обнови́ла еси́/ Еди́на, ро́ждши естества́ на́шего Соде́теля же и Го́спода,/ те́мже Тя сла́вим, Богора́дованная.

Ин

Конда́к, глас Подо́бен: Взбра́нной:

Изря́дно сло́во жи́зни стяжа́в, о́тче му́дре,/ не усумнеся высоты́ ца́рския, богонаказа́тельне царя́ обличи́ и уму́дрив./ Тем па́че че́стне почте́ся и люде́й свои́х па́ству к Бо́гу наста́ви./ Сего́ ра́ди зове́м ти:/ ра́дуйся, Амвро́сие преди́вне.

Седа́лен, глас 8

Подо́бен: Прему́дрости:

Проро́ка Илию ревнообразу́я и Иоа́нна та́кожде Крести́теля,/ му́жески обличи́л еси́ царя́ беззако́нновавша, иера́рше;/ Престо́л Боже́ственне украси́л еси́ и чуде́с мно́жеством мир обогати́л еси́./ Те́мже, и Боже́ственными Писа́нии науче́н, ве́рныя утверди́л еси́/ и неве́рныя обрати́л еси́, иера́рше Амвро́сие,/ моли́ Христа́ Бо́га прегреше́ний оставле́ние дарова́ти/ пра́зднующим любо́вию святу́ю па́мять твою́.

Сла́ва, и ны́не, Богоро́дичен:

Помышле́ньми поползо́хся лука́выми, во глубину́ впадо́х грехо́вную/ и, стеня, взыва́ю Ти от се́рдца, Пречи́стая:/ на мне удиви́ бога́тую ми́лость,/ и Твоего́ милосе́рдия неизме́рнуто пучи́ну,/ и щедро́т Твои́х неизче́тное бога́тство,/ и даждь ми покая́ние и прегреше́ний проще́ние, да любо́вию взыва́ю Тебе́:/ моли́ Христа́ Бо́га прегреше́ний оставле́ние дарова́ти ми:/ Тя бо наде́жду име́ю, раб Твой.

Крестобогоро́дичен:

А́гнца, и Па́стыря, и Изба́вителя А́гница зря́щи на Кресте́,/ восклица́ше, пла́чущи,и, го́рько рыда́ющи, вопия́ше:/ мир у́бо ра́дуется, прие́мляй Тобо́ю избавле́ние,/ утро́ба же Моя́ гори́т, зря́щи Твое́ распя́тие,/ е́же терпи́ши за милосе́рдие ми́лости./ Долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя стра́сти Твоя́.

Песнь 4

Ирмо́с:

Любве ра́ди, Ще́дре, Твоего́ о́браза/ на Кресте́ Твое́м стал еси́,/ и раста́яшася язы́цы:/ Ты бо еси́, Человеколю́бче,/ кре́пость моя́ и хвале́ние.

Иера́рх показа́лся еси́,/ пома́зався ми́ром свяще́нства, соверша́я свяще́нники,/ всем спаси́тельное да́руя очище́ние.

Соблю́л еси́ па́ству твою́/ от вся́каго вреда проти́вных, блаже́нне,/ и А́риеву лесть всю омрачи́л еси́ сия́нием слове́с твои́х.

Ду́ха си́лою огражде́н,/ лука́выя отгоня́еши зло́бы, всеблаже́нне, ду́хи,/ не терпя́щия твоего́ запреще́ния.

Богоро́дичен: Вся во́лею соде́тельствовавый, соде́тельствуется хотя́ от чи́стых Твои́х крове́й,/ спаса́я ве́дущия Тя, Чи́стую Богома́терь.

Песнь 5

Ирмо́с:

Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Ум, сия́ющ Све́том невеще́ственным, стяжа́в,/ облиста́л еси́ врачева́ний и чуде́с зари́, Амвро́сие блаже́нне.

Воздви́гл еси́ тебе́ сама́го свяще́нное жили́ще ду́ха,/ разори́л еси́ хра́мы и́дольския, Амвро́сие Богодохнове́нне.

Велича́йших доброде́телей светозаре́нием сия́юща,/ постыде́шася ца́рие тебе́/ и преде́ла язы́ка твоего́ не поколеба́ша.

Богоро́дичен: Хоте́нием все му́дре соде́ловая,/ хотя́ обнови́ти челове́ки, Де́во,/ в твою́ утро́бу всели́ся.

Песнь 6

Ирмо́с:

Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Рим твоя́ честна́я благохва́лит исправле́ния:/ я́ко бо звезда́ светови́дна,/ всю́ду лучи́ чуде́с твои́х, иера́рше, испусти́л еси́, ве́рно удивля́емь.

У́треневав ко Христу́, та́мо су́щими светлостьми́и озари́лся еси́ бога́тно,/ и Све́та напо́лнился еси́ Боже́ственнейша,/ и просвеща́вши ве́рно чту́щия тя всегда́.

Те́ло и ду́шу твою́ Бо́гу освяти́в,/ и прия́тно соде́лал еси́ дарова́ний, о́тче, твое́ се́рдце,/ непреста́нно вне́млющее сла́дкому жела́нию.

Богоро́дичен: Исцели́ души́ моея́, Де́во, я́звы,/ осене́нием Твои́м Боже́ственным/ и ум мой просвети́,/ омраче́нный ле́ностию и зло́бою врага́ борца́.

Конда́к, глас 3.

Подо́бен: Боже́ственныя ве́ры:

Боже́ственными догма́ты облиста́я,/ помрачи́л еси́ А́риеву пре́лесть, священнотаи́нниче и па́стырю Амвро́сие;/ чудоде́йствуя же си́лою ду́ха,/ стра́сти разли́чныя я́ве исцели́л еси́, о́тче преподо́бне,/ Христа́ Бо́га моли́ спасти́ся душа́м на́шим.

Песнь 7

Ирмо́с:

В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Боже́ственное веща́ние твои́х догма́тов, о́тче всему́дре,/ я́коже мо́лния, про́йде всю зе́млю/ и чуде́с показа́ньми, я́ко свет, облиста́,/ я́же во мра́це се́рдца́ просвеща́ющее.

Законоположе́нием Спа́са ты после́дуя, о́тче,/ да́нный тебе́ тала́нт, я́ко раб блажа́йший, тщательно умногосугуби́л еси́,/ Влады́чния сподо́бляемь ра́дости.

Изостри́в Богосло́вный твой ум,/ струй свяще́нных догма́тов, я́ко реку́, испусти́л еси́,/ напоя́я ве́рных исполне́ние, священнотаи́нниче о́тче Амвро́сие.

Богоро́дичен: Се, Де́во, во утро́бе Твое́й зачала́ еси́ Сло́во, Отцу́ собезнача́льно,/ и пло́тию породила́ еси́ да́рующее всем воззва́ние,/ су́щим из Ада́ма па́дшим, Всенепоро́чная.

Песнь 8

Ирмо́с:

Ру́це распросте́р, Дани́ил/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.

Умертви́в уды и ме́ртво плотско́е мудрова́ние соде́лав,/ ду́шу оживи́л еси́, преподо́бне,/ и исто́чник чуде́с источи́л еси́ умерщвле́нным от страсте́й,/ жи́знь подаю́щи вопию́щим:/ благослови́те, вся дела́ Госпо́дня, Го́спода.

Уве́дел еси́ преставле́ние, му́дре, е́же от телесе́, Боже́ственным Ду́хом,/ проро́чески бо сие́ су́щим с тобо́ю сказа́л еси́/ и ра́достно на Небеса́, вопия́, восте́кл еси́:/ благослови́те, вся дела́ Госпо́дня, Го́спода.

Те́ло, и се́рдце, и ум предочи́стив от страсте́й смеше́ния,/ огнено́сну лучу́ свы́ше прия́л еси́ ду́ха,/ я́коже Боже́ственнии ученицы́, вопия́, Амвро́сие:/ благослови́те, вся дела́ Госпо́дня, Го́спода.

Богоро́дичен: Яви́лася еси́ превы́шши Небе́с, Бо́га Небе́снаго поро́ждши,/ земна́я, Пречи́стая, Небе́сным совоку́пльшаго/ и позна́ние Свое́ всем подаю́щаго, вопию́щим:/ благослови́те, вся дела́ Госпо́дня, Го́спода.

Песнь 9

Ирмо́с:

Ка́мень нерукосе́чный/ от несеко́мыя горы, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Ви́дел еси́, во изступле́нии быв,/ ве́чныя святы́м, о́тче, лежа́щия по́чести;/ к ни́мже преше́л еси́, восприе́м твои́х трудо́в, сла́вне, воздая́ния, веселя́ся.

Я́ко грозд зрел, Богому́дре,/ в точи́лех Го́рних досто́йно сокро́вищствовался еси́,/ источа́я безсме́ртия вино́, Амвро́сие,/ и врачева́ний дарова́ния благоче́стно к тебе́ притека́ющим.

Тя, зла́тозарный о́тче, Боже́ственнаго ду́ха свети́льник,/ свет благочести́вых уче́ний и врачева́ний лучу́ испуща́ющ/ и ве́рныя просвеща́ющ, велегла́сно ублажа́ем.

Днесве́тлую тя звезду́ Це́рковь стяжа́вши,/ тьмы избега́ет вся́кия, всеблаже́нне, льсти/ и, светлостьми́и свяще́нных твои́х догма́тов озаря́ема, блажи́т тя.

Богоро́дичен: Глас Тебе́ вопие́м, Де́во, ра́достне Арха́нгелов:/ ра́дуйся, прокля́тства разреше́ние лю́тых всех;/ ра́дуйся, избавле́ние,/ земны́я обожи́вшая па́че ума́ Рождество́м Твои́м.

Преподо́бнаго Анто́ния Си́йскаго

НА МАЛОЙ ВЕЧЕ́РНИ

Стихи́ры, глас 1.

Подо́бен: Всехва́льнии му́ченицы:

Жела́я улучи́ти, Анто́ние блаже́нне, Небе́сную добро́ту,/ земна́я вся премину́л еси́/ и, я́ко безпло́тен, по́двизався в маловре́менней жи́зни сей,/ мы́сленныя враги́ кре́пко победи́л еси́ и му́жески,/ име́я посо́бие ору́жие непобеди́мое,/ ра́дуяся, восте́кл еси́ к присножела́емому тебе́ блаже́нству./ Те́мже моли́ся/ дарова́ти душа́м на́шим/ мир и ве́лию ми́лость.

Мирска́го пристра́стия возгнуша́вся,/ су́щая ми́ра, я́ко не су́щая, вмени́л еси́/ и, сего́ ра́ди от всех упраздни́вся,/ безмо́лвно жи́ти избра́л еси́,/ несму́тным умо́м и немяте́жным се́рдцем вы́ну служа́ Бо́гу,/ отону́дуже и сосу́д Свята́го ду́ха обре́лся еси́/ чистоты́ ра́ди души́ твоея́,/ ему́же моли́ся/ поми́ловати ду́ши на́ша.

Боже́ственныя ра́дости и весе́лия духо́внаго/ испо́лнена яви́ся светоно́сная твоя́ па́мять, о́тче Анто́ние,/ отону́дуже духо́вная твоя́ чада,/ ра́достне соше́дшеся, све́тло пра́зднуем,/ Боголе́пну сла́ву воздаю́ще/ прославля́ющему тя Бо́гу,/ ве́дущему прославля́ти святы́я Своя́ уго́дники,/ ему́же моли́ся/ спасти́ ду́ши на́ша.

Сла́ва, глас 8:

Прииди́те, отцы и бра́тия,/ честно́е мона́шеское собра́ние,/ днесь, обстоя́ще, всечестну́ю ико́ну любе́знаго отца́/ благоче́стне лобза́ем/ и, ра́достно пою́ще псало́мская пе́ния,/ во усте́х иму́ще духо́вная словеса́,/ любо́вию принесе́м ему́,/ я́ко вои́стинну мона́шескому удобре́нию и преподо́бных сожи́телю./ И све́тло всепра́зднственная сотворя́юще, си́це рцем:/ ра́дуйся, свети́льниче многосве́тлый,/ возводя́ ко Христу́ мона́хов мно́жество;/ ра́дуйся, похвало́ на́ша и утвержде́ние/ и всем ве́рным благоути́шное приста́нище спасе́ния,/ боля́щих цели́телю,/ Анто́ние, всечестны́й о́тче наш,/ не оста́ви нас си́рых,/ но пребу́ди с на́ми, ча́ды твои́ми, я́коже обеща́лся еси́,/ и не преста́й моля́ся Пресвяте́й Тро́ице,/ я́ко да ми́лостива бу́дет нам о гресе́х на́ших/ и спасе́т ду́ши на́ша.

И ны́не, Богоро́дичен: Влады́чице, приими́ моли́твы:

На стихо́вне стихи́ры, глас 2.

Подо́бен: До́ме Евфра́фов:

Пи́щи ра́йския наслади́тися возжеле́л еси́,/ гла́дом и жа́ждею иста́ил еси́ плоть твою́/ и, сла́вою от Бо́га венча́н бы́ти восхоте́в,/ земну́ю сла́ву преоби́дел еси́;/ от него́же и просла́вился еси́, всеблаже́нне.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Любо́вию Бо́жиею укре́плься, блаже́нне Анто́ние,/ жела́ние пло́ти умертви́л еси́;/ душе́вное же о́ко от помы́сленных прило́г/ свобо́дно к Бо́гу возве́л еси́/ и всего́ себе́ чи́ста предста́вил еси́ Бо́гу.

Стих: Честна́ пред Го́сподем/ сме́рть преподо́бных Его́.

Свети́ло вели́кое яви́ся нам днесь/ свята́я твоя́ па́мять, преподо́бне Анто́ние,/ мир весь просвеща́ющи заря́ми/ изря́дных чуде́с твои́х,/ любо́вию пра́зднующим исцеле́ния неоску́дно подава́ющи.

Сла́ва, и ны́не, Богоро́дичен, глас и подо́бен то́йже:

Го́рнии Тя ли́цы,/ Богоро́дице Де́во,/ пою́т с до́льными,/ славосло́вяще непреста́нно/ Рождество́ Твое́ Пречи́стое.

Тропа́рь пи́сан на вели́цей вече́рни.

Сла́ва, и ны́не, Богоро́дичен: Гаврии́лу веща́вшу:

НА ВЕЛИ́ЦЕЙ ВЕЧЕ́РНИ

Пое́м: Блаже́н муж: 1-й антифо́н. На Го́споди, воззва́х: стихи́ры, глас 6.

Подо́бен: Все отло́жше:

Вся оста́вил еси́,/ к Небе́сным возложи́в ум твой,/ Христа́ Еди́наго в след ходи́ти возлюби́л еси́./ Сего́ ра́ди безмо́лвно жи́ти взыскал еси́,/ уклони́вся в пусты́ню,/ в не́и́же по́двиза́вся,/ житие́ а́нгельское притяжа́л еси́,/ к боре́нию льсти́ваго посто́м и моли́твами вооружи́в себе́,/ искуше́ния мно́га́ претерпе́л еси́,/ и венцы́ нетле́нными обогати́лся еси́./ Благода́ть прие́м от Бо́га,/ исцеля́еши неду́ги разли́чныя,/ тем Пресвято́му Ду́ху, Анто́ние преподо́бне, моли́ся/ поми́ловатися душа́м на́шим.

Весь освяще́н,/ Богоно́сец показа́лся еси́,/ дре́вняго челове́ка совле́кся с по́хотъми́,/ и во Христа́ вои́стинну обле́к себе́,/ духо́вную хра́мину нерукотворе́нную назда́л еси́,/ положи́в основа́ние доброде́телей,/ к высоте́ безстра́стия дости́гл еси́,/ ума́ высо́кое смире́нием возве́л еси́ Бо́гу,/ от него́же зна́ния глубо́кое восприя́л еси́/ проразумева́ти бу́дущая, я́ко настоя́щая,/ и ума́ сокрове́нная челове́ком предглаго́лати./ И ны́не Пресвяте́й Тро́ице, блаже́нне, моли́ся/ о душа́х на́ших.

Зре́ти жела́я мы́сленную добро́ту,/ чу́вственная вся премину́л еси́,/ в слеза́х и воздыха́ниих живя́ дни своя́,/ огорчева́л еси́ плоть твою́ всено́щными бде́нии и ча́стыми коленопреклоне́нии./ И сего́ ра́ди всяк вид доброде́телей проходи́л еси́,/ немощна́я ополче́ния вра́жия обличи́в,/ кре́пкодуш­ным терпе́нием,/ мно́гоболе́зненным страда́нием к неболе́зненным дости́гл еси́,/ иде́же Свет невече́рний/ и А́нгел ликостоя́ние./ С ни́миже, преподо́бне, Христу́ со дерзнове́нием моли́ся/ о спасе́нии душ на́ших.

Ины стихи́ры, глас 4.

Подо́бен: Зва́нный свы́ше:

Егда́ Боже́ственное раче́ние/ на́йде на тя, пребога́те,/ тогда́ тяжесть ми́ра от души́ твоея́ отри́нув,/ ве́трило ума́ я́ко легко́ к Бо́гу впери́л еси́,/ кора́бль твой направля́я в ти́хое приста́нище,/ иде́же и сподо́бился еси́ свята́го о́браза мона́шескаго благоукраше́ния,/ и та́мо учи́телем твои́м наставля́емь,/ о́бразы благоче́стия сия́я,/ благи́ми нра́вы украша́лся,/ свяще́нства, я́ко сосу́д избра́н, сподо́бился еси́./ Тем Христу́ Бо́гу моли́ся/ спасти́ и просвети́ти ду́ши на́ша.

Егда́ любо́вь Бо́жия/ двиза́шеся в се́рдцы твое́м, преблаже́нне,/ тогда́ ми́ра сего́ суету́/ и пре́лестное мудрова́ние в ничто́же вмени́л еси́;/ в пусты́ню пресели́вся,/ и в ней, я́ко безпло́тен,/ до́брым по́двигом подвиза́вся,/ неви́димых враго́в ополче́ния/ терпе́нием твои́м вся победи́л еси́./ Но, ему́же от ю́ности твоей послужи́л еси́,/ Христу́ Бо́гу моли́ся/ спасти́ и просвети́ти ду́ши на́ша.

Егда́ Боже́ственным манове́нием/ показа́ннаго тебе́ в ви́дении узре́в,/ кре́стным зна́мением вооружа́юща тебе́,/ тогда́, преподо́бне Анто́ние,/ и ты, кресто́м вооружи́в себе́,/ вседу́шно Христу́ после́довал еси́/ и, того́ любо́вию прости́рался,/ кро́тость и незло́бие стяжа́л еси́./ Тем и кро́тких зе́млю насле́довал еси́,/ отону́дуже исто́чник целе́ний пролива́еши приходя́щим ти с ве́рою,/ Пресвяте́й Тро́ице моля́ся,/ ю́же моли́/ спасти́ и просвети́ти ду́ши́ на́ша.

Сла́ва, глас 8:

Преподо́бне о́тче Богоблаже́нне Анто́ние,/ жесто́кое твое́ житие́ и труды́, я́же по Бо́гу,/ в безмо́лвием сем уеди́нении, я́ко прия́то быстъ Бо́гу;/ тогда́ вседе́йствием Пресвята́го ду́ха/ стез́ями пра́выми исправля́л еси́ жи́знь твою́,/ и́миже дости́гл еси́/ обрести́ Богода́нен дар светоле́пный,/ свяще́нную мзду́ трудо́в твои́х прему́дрое сниска́ние,/ пречу́дный о́браз Еди́носущныя Тро́ицы:/ к Не́йже хода́тайствы твои́ми моли́твенными,/ душе́вным о́ком взира́я к Бо́жеству Трисве́тлому,/ заря́ми чуде́с, па́че со́лнца, весь мир озари́л еси́,/ тьму де́монов дале́че прогоня́я./ Днесь же и по твое́м преста́влении/ Бо́гу хотя́щу наипа́че просла́вити тя,/ оби́льна исцеле́ния источа́ет с ве́рою приходя́щим к цельбоно́сному твоему́ гро́бу,/ благоуха́ние подая́ Пресвята́го ду́ха./ Те́мже, я́ко име́я дерзнове́ние,/ приле́жно моли́ся Пресвяте́й Тро́ице/ Це́рквам единомышле́ние/ и правосла́вному наро́ду на́шему здра́вие неоску́дное дарова́ти/ и на враги́ кре́пкое одоле́ние/ и спасе́ние испроси́ти душа́м на́шим.

И ны́не. Богоро́дичен: Царь Небе́сный:

Вход, проки́мен дне, чтения 3

(зри день 5-й)

На лити́и стихи́ры, самогла́сны, глас 2:

Стезе́ю при́сноживо́тною при́сно ходи́ти возжеле́л еси́/ бу́дущия ра́ди о́ныя присноблаже́нныя сла́вы;/ того́ ра́ди, в пусты́нях пребыва́я, служи́л еси́ Бо́гу,/ подо́бяся свети́лу о́ному, Вели́кому Анто́нию;/ я́коже бо он, Вели́кий,/ в пусты́нях еги́петских безмо́лвия ра́ди всели́ся,/ та́коже и ты, всеблаже́нне,/ душе́внаго ра́ди безмо́лвия/ теле́сная чу́вства во вну́тренних пусты́нях сих неисхо́дне затвори́л еси́./ Но он у́бо дре́вних святы́х отце́в, в посте́ просия́вших,/ оте́ц и нача́льник бысть;/ ты же, преподо́бне, в после́дния ро́ды сия́/ возсия́л еси́ Богоуго́дным житие́м твои́м,/ оте́ц и нача́льник быв мона́хом./ ему́же бо в житии́ сем насле́дник и ревни́тель был еси́,/ си́це того́ и именова́ние от дел прие́м,/ с ни́мже Пресвяте́й Тро́ице моли́ся/ спасти́ся душа́м на́шим.

Прииди́те, Боголюбе́зное ста́до, мона́шеское собра́ние,/ с празднолюбе́зными чи́нми христиа́нскаго мно́жества/ Богоимени́тых люде́й Бо́жиих/ днесь восхва́лим Христо́ва рачи́теля,/ граждани́на пусты́ннаго,/ мона́хом прему́драго наста́вника,/ пусты́нников похвалу́ святоле́пную,/ Боже́ственныя пе́сни принесе́м ему́./ Сей бо, ре́вность Боже́ственную в се́рдцы прие́м,/ мирску́ю пре́лесть всю оста́вив, Христу́ после́дова,/ труды́ по́стническими простира́яся,/ де́монския па́губы победи́ му́жески/ ду́ха Свята́го ору́жии непобеди́мыми./ Те́мже, возшед на ле́ствицу доброде́телей,/ дости́же круго́в о́ных Небе́сных,/ иде́же Богонача́льным све́том/ со А́нгельскими ли́ки просвеща́лся,/ моли́твенник непреста́нен быва́ет за ду́ши на́ша.

В ти́хое и небу́рное приста́нище безмо́лвия вшед,/ во отхо́дную пусты́ню Боголюбе́зную,/ иде́же с Бо́гом еди́н безмо́лвствовал еси́,/ те́сным путе́м и приско́рбным присноше́ствовав,/ та́мо житие́ А́нгельско проходи́л еси́,/ неудобьпокори́вое пло́ти возрази́в воздержа́нием,/ научи́в сего́ повинова́тися благо́му по́мыслу в хоте́ния Бо́жия./ Те́мже свет безстра́стия возсия́ тебе́,/ в не́мже узре́л еси́ Присносу́щнаго Све́та – Христа́, Бо́га на́шего./ его́же непреста́нно моли́ти мо́лимся/ от вся́ких зол нас изба́вити,/ всечестно́е твое́ успе́ние пра́зднующия,/ и спасти́ ду́ши́ на́ша.

Сла́ва, глас 6:

Ра́дуйтеся и весели́теся о Го́споде,/ Богоизбра́нное ста́до блаже́нное,/ духо́вная ча́да преподо́бнаго,/ я́ко такова́го свети́льника отца́ себе́ иму́ще,/ и ча́да нареко́стеся,/ пресве́тлым житие́м свои́м весь мир озари́вшаго;/ его́же просла́ви Бог/ зна́мении же и чудесы́ Свои́ми пресла́вными,/ оби́льна исцеле́ния неоску́дно да́рующа/ приходя́щим к Нему́ с ве́рою./ Те́мже, обстоя́ще всечестну́ю ико́ну его́,/ мо́лимся ему́, глаго́люще:/ О всеблаже́нне Анто́ние, о́тче наш,/ непреста́нно моли́ Всесвяту́ю Тро́ицу/ ста́до твое́ спасти́/ и ве́рно чту́щих пресвяту́ю па́мять твою́,/ и труды́ твоя́, и терпе́ния любоче́стне име́ющих,/ я́же за Христа́ подъя́л еси́,/ я́ко да Той ми́лостив бу́дет нам/ о гресе́х на́ших в День Су́дный/ и спасе́т ду́ши на́ша.

И ны́не, Богоро́дичен: Творец и Изба́витель:

На стихо́вне стихи́ры, глас 5.

Подо́бен: Ра́дуйся:

Ра́дуйся, всесвяще́нная главо,/ преподо́бне о́тче наш Анто́ние,/ уго́дниче Христо́в присножела́нный,/ Вы́шних сил ревни́телю и собесе́дниче А́нгелов./ На земли́ бо, в пло́ти сый,/ безпло́тных житие́ проходи́л еси́,/ подо́бяся тех житию́ же и нра́ву;/ с ни́миже ны́не в присноблаже́ннем Све́те пребыва́я,/ наслажда́яся зре́ний Боже́ственных,/ Христу́ Бо́гу моли́ся/ мир вселе́нней дарова́ти/ и душа́м на́шим ве́лию ми́лость.

Стих: Честна́ пред Го́сподем/ сме́рть преподо́бных Его́.

Ра́дуйся, свяще́нный ве́рше предо́брый,/ преподо́бным и пра́ведным совсе́льниче единонра́вный;/ тех бо житию́ после́дствовав,/ страсте́й игра́ния, я́ко се́чивом,/ креста́ зна́мением посе́кл еси́,/ Све́том пресве́тлым, Ду́хом Святы́м озаря́емь,/ на све́щнице доброде́телей вся освеща́еши,/ благоче́стия ве́рше преизя́щный,/ укра́шенный дарова́нии Боже́ственными./ Те́мже Христу́ Бо́гу моли́ся/ дарова́ти душа́м на́шим мир и ве́лию ми́лость.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ра́дуйся, свяще́нный наш наста́вниче,/ главо́ предо́брая,/ учени́к твои́х ста́до избра́нное,/ и́хже Боголю́бне в пусты́ни сей собра́л еси́, му́дре,/ о ни́хже труды́ и по́ты прости́рая,/ ду́шу твою́ положи́л еси́,/ не оста́ви, посеща́я,/ и о и́же ве́рою соверша́ющих па́мять твою́ святу́ю/ и любоче́стне почита́ющих всечестны́я твоя́ мо́щи святы́я,/ Христу́ моли́ся/ изба́вити всех нас вся́каго гнева и томле́ния/ и спасе́ние дарова́ти душа́м на́шим.

Сла́ва, глас 8:

Пусты́ня, пре́жде непло́дствующи, ны́не же весели́тся,/ зря́щи в себе́ ста́до мона́хов,/ обстоя́щих всечестны́й гроб пречу́днаго отца́ сего́/ и духо́вно веселя́щихся,/ и́же пра́зднственная торжеству́ют, глаго́лющи:/ ра́дуйся, свети́льниче пресве́тлый,/ и́же, чудесы́ сия́я, озаря́еши ду́ши́ ве́рных;/ ра́дуйся, о́тче всеблаги́й,/ умно́живый ча́да в пусты́ни духо́вных жела́ний, о ни́хже труды́ и по́ты полага́я,/ ду́шу твою́ преда́л еси́ Бо́гу,/ ему́же моли́ся, свя́те Анто́ние,/ о нас, ча́дах твои́х,/ благоче́стне па́мять твою́ пра́зднующих,/ изба́вити от наве́т вра́жиих,/ я́ко да, до́бре сконча́вше жи́знь свою́,/ дерзнове́ние получи́м в день Стра́шнаго испыта́ния.

И ны́не: Безневе́стная Де́во:

Тропа́рь, глас 1:

Жела́нием духо́вным распали́вся/ и мяте́жи мирски́я отри́нув,/ ко еди́ному же Бо́гу любо́вию прилепи́лся еси́/ и, того́ вседу́шне взыску́я,/ во вну́треннюю пусты́ню отше́л еси́, при вода́х всели́вся,/ иде́же во слеза́х и труде́х пребыва́я многоле́тное время,/ в терпе́нии мно́зем житие́ А́нгельское проходи́л еси́/ в наста́влении Боже́ственнаго ра́зума,/ и мно́жество мона́хов собра́л еси́, му́дре,/ и́хже посеща́я, и не оста́ви, Анто́ние преподо́бне, о́тче наш,/ Пресвяте́й Тро́ице моля́ся/ от зол вся́ческих изба́вити и спасти́ ду́ши на́ша.

Сла́ва, и ны́не, Богоро́дичен: Гаврии́лу веща́вшу:

НА У́ТРЕНИ

На Бог Госпо́дь: тропа́рь свята́го два́жды.

Сла́ва, и ны́не, Богоро́дичен.

По 1-м стихосло́вии, седа́лен, глас 8:

Мно́гим воздержа́нием, преподо́бне, жи́знь твою́ украси́в,/ путь показа́л еси́, веду́щий в жи́знь доброде́тели смире́нием:/ мира бо отве́ргся, и вся, я́же в ми́ре кра́сная, преоби́дев,/ Ева́нгельским уче́нием после́довал еси́;/ жесто́ким же житие́м плоть твою́ изнуря́я,/ го́рдаго зми́я воздержа́нием уби́л еси́./ Те́мже, на Небесе́х водворя́яся,/ Трисо́лнечному Бо́жеству предстои́ши, преподо́бне Анто́ние,/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Небе́сную дверь и киво́т,/ пресвяту́ю гору, све́тлый о́блак воспои́м,/ неопали́мую купину́, сло́весный рай,/ Е́вы воззва́ние, вселе́нныя всея́ вели́кое сокро́вище,/ я́ко спасе́ние в Ней соде́лася ми́ру/ и оставле́ние дре́вних согреше́ний./ Сего́ ра́ди вопие́м Ей:/ моли́ся Сы́ну Твоему́ прегреше́ний оставле́ние дарова́ти/ благоче́стно покланя́ющимся всесвято́му Рождеству́ Твоему́.

По 2-м стихосло́вии, седа́лен, глас 4:

От ю́ности взем твой крест,/ благоче́стно Христу́ после́довал еси́, увяди́в плотско́е мудрова́ние воздержа́нием/ и побе́ду взем на диа́вола, над страстьми́ теле́сными воцари́лся еси́./ Те́мже и по кончи́не источа́еши исцеле́ния ве́рою приходя́щим к чудотво́рному о́бразу Всесвяты́я Тро́ицы/ и к твоему́ цельбоно́сному гро́бу./ Анто́ние всече́стне, испроси́ нам ми́лость.

Сла́ва, и ны́не, Богоро́дичен:

Безневе́стная Чи́стая Богоро́дице Де́во,/ Еди́на предста́тельнице ве́рных и покро́в,/ бед, и скорбе́й, и лю́тых обстоя́ний вся изба́ви,/ и́же на Тя упова́ние иму́щия, Отрокови́це,/ и ду́ши на́ша спаси́ Боже́ственными мольба́ми Твои́ми.

По полиеле́и седа́лен, глас 8:

В пусты́ню, преблаже́нне, всели́лся еси́,/ и в ней проходя́ жесто́кое жи́тельство, я́коже безпло́тен,/ жи́знь исправля́я, плоть твою́ умертви́л еси́/ и, поревнова́в Анто́ния Вели́каго изря́дному жи́тельству,/ Тро́ицы служи́тель показа́лся еси́ преизя́щный./ Те́мже к ре́вности Тоя́ Боже́ственней лик мона́шествующих, сла́вне, совокупи́л еси́,/ Богоно́се о́тче наш Анто́ние,/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Де́ву и Еди́ну в жена́х,/ Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ огнь бо всели́ся в Тя Божества́,/ и, я́ко Младе́нца дои́ши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е Рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му Рождеству́ Твоему́.

Степе́нна, 1-й антифо́н 4-го гла́са. Проки́мен: Честна́ пред Го́сподем/ смерть преподо́бных его́. Вся́кое дыха́ние:

Стих: Хвали́те Бо́га во святы́х его́:

Ева́нгелие от Матфе́я, зачало 43.

По 50-м псалме́ стихи́ра, глас 6:

Преблаже́нне о́тче наш Анто́ние,/ егда́ к Бо́гу во отше́ствии твое́м отсю́ду/ Боголюбе́зное собра́ние учени́к твои́х нака́зовал еси́,/ я́ко оте́ц чадолюби́в,/ вели́кую глави́зну соблюда́ти и испо́лнити Боже́ственных проро́к и зако́на, глаго́ля:/ пребыва́йте, ча́да, в соверше́нии духо́внаго ва́шего исполне́ния,/ любо́вь име́ти им к Бо́гу и бли́жнему/ и, ели́ка си́ла, подвиза́тися на о́бщаго врага́,/ внима́ющим своему́ спасе́нию,/ да получа́т бу́дущее присноблаже́нствие./ Но у́бо, всеблаже́нне,/ не преста́й моля́ся Пресвя́тей Тро́ице и нас, чту́щих тя,/ сохрани́ти в любви́ Тоя́, я́ко да получи́м от Нея́ вели́кую ми́лость.

Кано́н Богоро́дице со ирмосо́м на 6.

И свята́го два кано́на на 8.

Первый кано́н, глас 2.

Песнь 1

Ирмо́с:

Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

О Тро́ице Всемилосе́рдая, Бо́же Преблаги́й/ – О́тче, и Сы́не, и Святы́й Ду́ше –/ Трисвято́е Естество́, нему́дрых наказа́телю!/ Пода́ждь про свеще́ние моему́ неразу́мию,/ песнь воспе́ти Твоему́ служи́телю/ в наставле́нии Боже́ственнаго Твоего́ просвеще́ния.

От ма́терня чре́ва прилепи́лся еси́ к Бо́гу, преподо́бне,/ сего́ ра́ди жи́знь сию́ в ничто́же вмени́в,/ крест Госпо́день из ю́ности твоей возжеле́л еси́ носи́ти/ и, вся земна́я возненави́дев, в Небе́сная присноблаже́нствия взира́л еси́.

Ди́вно житие́ твое́, блаже́нне,/ ку́пно же и смире́ние, е́же от ю́ности стяжа́л еси́./ И сего́ ра́ди от всего́ ми́ра отлучи́в себе́/ и А́нгельским о́бразом обле́кся,/ был еси́ мона́х преди́вен, цветя́ в доброде́телех.

Богоро́дичен: Вопло́щся из Пречи́стых ложе́сн Твои́х, Де́во Всечи́стая, Бо́жие Сло́во/ всем изъясни́ Богоразу́мия любо́вь:/ челове́ческое торжество́ ли́ку А́нгельскому совокупи́в,/ в Небе́сная возведе́.

Други́й кано́н преподо́бному, глас 8.

Ирмо́с:

Колесницегони́теля фарао́ня погрузи́,/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Весь Вседержи́телю Бо́гу возложи́в себе́, Богому́дре,/ и, к тому́ жела́нием и любо́вию ум твой впери́в,/ того́ ра́ди безмо́лвная и уедине́нная ме́ста возлюби́л еси́,/ да, со Христо́м пребыва́я, жи́знь ве́чную насле́диши.

Упова́нием на Бо́га всеблага́го укрепля́емь, блаже́нне Анто́ние,/ к бу́дущим благи́м прости́рался еси́/ и твое́й пло́ти неми́лостив, о́тче, был еси́.

Лука́вый враг, опасно ве́дый, я́ко хо́щет тобо́ю изгна́н бы́ти от ме́ста сего́ свята́го,/ се́го ра́ди непра́ведныя челове́ки воздвиза́ет на тя;/ но си́и у́бо, ничто́же сотво́рше, вспять бежа́ша,/ лука́вый же побежде́н бысть ору́жием моли́тв твои́х:/ Бог бо снабдева́ше тя.

Богоро́дичен: Неискусому́жно Христа́ родила́ еси́, су́ща по нам нас ра́ди,/ непреме́нна естество́м, Пречи́стая, и невра́щна во обои́х пребы́вша./ его́же моли́ непреста́нно/ грехо́в мои́х дарова́ти и напа́стей избавле́ние.

Катава́сия: Христо́с ражда́ется:

Песнь 3

Ирмо́с:

Процвела́ есть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием Твои́м,/ в не́йже утверди́ся мое́ се́рдце.

Вели́ко к Бо́гу дерзнове́ние стяжа́л еси́, преподо́бне,/ Присносу́щныя Тро́ицы свято́му о́бразу,/ стяжа́нии трудо́в твои́х благода́ть испроси́ Пресвята́го ду́ха:/ его́же из пла́мене пресла́вно изы́ти сотвори́л еси́ моли́твами твои́ми.

В нача́ле основа́ние доброде́телей, блаже́нне,/ положи́л еси́ в души́ твое́й страх Бо́жий/ и на сем основа́нии назда́л еси́ чи́стыя доброде́тели сохра́нением Бо́жиих за́поведей./ И сего́ ра́ди всели́лся еси́ в ве́чная бла́гая,/ я́же угото́ва Бог боя́щимся его́.

Вре́менных и до́льных возгнуша́вся,/ высо́кая при́сно пребыва́ющая возлюби́л еси́,/ Боже́ственным раче́нием распала́я благолюби́вую твою́ ду́шу,/ и, того́ сотвори́в живу́щаго Бо́га во́лю,/ восприя́л еси́ бла́гая Небе́сная.

Богоро́дичен: Сказу́я иногда́ сокрове́нное та́инство, Отрокови́це,/ Тебе́ дре́вле Гаврии́л зовя́ше:/ ра́дуйся, Бо́жия пала́то,/ в Ню́же всели́вся, обожи́ вся челове́ки я́ко Милосе́рд.

Ин ирмо́с:

Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Утверди́в твоя́ помышле́ния, блаже́нне, упова́нием на Бо́га,/ вра́жиих наве́тов ника́коже убоя́ся,/ но мы́сленных рек стремле́ния, к душе́вней твое́й хра́мине приража́ющаяся,/ возрази́л еси́ о ка́мень терпе́ния.

Жела́я, преподо́бне, насыща́тися приснопребы́вающия сла́дости,/ бы́лии самора́сленными триле́тное вре́мя проводи́л еси́ жи́зни твоей;/ те́мже и ны́не получи́л еси́ трапе́зу о́ну неги́бнущия я́ди,/ но при́сно пребыва́ющия в жи́зни ве́чней.

Во ум прие́м Ца́рствия Небе́снаго ве́чное наслажде́ние,/ земна́я вся пренебре́гл еси́/ и сего́ ра́ди ско́рбная наше́ствия мно́га и изгна́ния/ в жи́зни сей претерпе́л еси́,/ но от всех сих свободи́ тя тебе́ жи́знь ве́чную Дарова́вый.

Богоро́дичен: Твою́ по́мощь пода́ждь ми, рабу́ Твоему́ недосто́йному, Де́во Влады́чице,/ и, вразуми́вши Боже́ственное сие́ начина́ние,/ сотвори́ от недосто́йнаго досто́йная/ и изба́ви бед, и скорбе́й, и прегреше́ний мно́гих,/ я́ко ро́ждши всех избавле́ние.

Седа́лен, глас 3:

Мно́гомяте́жие ми́ра и непостоя́нную суету́, я́ко прах, вмени́в,/ к преми́рным возве́л еси́ ум твой,/ затво́ром безмо́лвия воздержа́в теле́сная чу́вства,/ и, стяжа́в жи́знь а́нгельску, Бо́гу угоди́л еси́,/ де́монов па́губник, страсте́й искорени́тель,/ челове́ков спаси́тель нело́жен был еси́./ Те́мже и нас от тлетво́рных страсте́й изба́ви, мо́лимся, твою́ па́мять при́сно в пе́снех почита́ющих,/ блаже́нне Анто́ние, о́тче наш.

Сла́ва, и ны́не, Богоро́дичен:

Я́ко невозде́ланная, Де́во, лоза́, красне́йший грозд прозя́бла еси́,/ источа́ющ нам вино́ спасе́ния, всех веселя́щее ду́ши же и телеса́./ Те́мже я́ко вину́ Тя до́брых блажа́ще,/ при́сно со А́нгелом вопие́м Ти:/ ра́дуйся, Обра́дованная.

Песнь 4

Ирмо́с:

Пою́ Тя, слу́хом бо, Го́споди, услы́шах и у́жасо́хся:/ до мене́ бо и́деши, мене́ ища́, заблу́ждшаго./ Тем мно́гое Твое́ снизхожде́ние, е́же на мя,/ прославля́ю, Многоми́лостиве.

Коль бла́го положи́л еси́ во уме твое́м,/ е́же прилепля́тися Бо́гу на́шему;/ сего́ ра́ди оста́вив вся, на земли́ су́щая,/ ум твой вседу́шно возложи́л еси́ к Небе́сным оби́телем,/ в безмлвии мно́зе препровожда́л жи́знь твою́,/ да никогда́же отто́ргнешися Сладча́йшаго твоего́ Иису́са.

Смерть па́че всего́ жития́ сего́ избра́л еси́, да Христу́ жи́ти бу́деши,/ сего́ ра́ди в ме́ртвость повседне́вную вдая́лся еси́,/ труды́ по́стническими умерщвля́л еси́ вся у́ды своя́,/ истни́в плоть свою́ посты́ мно́гими.

Помина́я, преподо́бне, после́дний день жи́зни сея́,/ прише́льца вменя́л еси́ себе́ в ми́ре сем бы́ти,/ на всяк день гото́вился еси́ ко исхожде́нию,/ благи́ми де́лы украша́я ду́шу твою́,/ ожида́я прише́ствия Влады́ки твоего́.

Богоро́дичен: Боговиде́нием просве́щся проро́к,/ явле́нно зрит го́ру Бо́жию благослове́нную,/ земны́м украше́ние, Небе́сным славосло́вие Боголе́пное,/ Еди́ну Всепе́тую.

Ин ирмо́с:

Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Пото́ки сле́зными пусты́ни напои́л еси́, блаже́нне,/ се́мя трудо́в твои́х се́я в них./ Те́мже и стори́чный плод ра́достне пожа́л еси́, вопия́:/ сла́ва си́ле Твое́й, Го́споди.

Стена́нием се́рдца и умиле́нием мно́зем жития́ по́прище преше́д, му́дре,/ и в страну́ безстра́стия пресели́ себе́,/ в не́йже Свет прие́м в се́рдцы твое́м, непреста́нно весели́шися,/ неизрече́ннаго Све́та – Христа́ наслажда́яся.

Моля́ся не преста́й, о́тче, о ста́де твое́м,/ его́же мно́гими труды́ и по́ты стяжа́л еси́,/ избавле́ния прося́ злых обстоя́ний и скорбе́й вся́ческих,/ да тя вси, я́ко отца́ чадолюби́ва, непреста́нно воспева́ем.

Богоро́дичен: Ко́рень из чресл ца́рских, Царь всех,/ я́ко су́щу возлюби́в, и вы́шшу Херуви́м и Серафи́м показа́,/ весь, Богоро́дице, всели́ся в Тя.

Песнь 5

Ирмо́с:

Хода́тай Бо́гу и челове́ком был еси́,/ Христе́ Бо́же:/ Тобо́ю бо, Влады́ко, к Светонача́льнику, Отцу́ Твоему́,/ от но́щи неве́дения/ приведе́ние и́мамы.

Я́ко дре́во благора́сленно, при исхо́дищах мно́гих вод насажде́н быв, о́тче,/ ветви́ доброде́телей мно́ги израсти́л еси́,/ под сень твою́ вся прие́мля, хотя́щия спасе́ния.

Пучи́ною слез твои́х мо́ре грехо́вное потопи́л еси́,/ погружа́я ум свой во глубину́ ви́дений Боже́ственных,/ иде́же сокро́венных та́ин я́сно зри́тель быв,/ проре́кл еси́ кому́ждо напосле́док хотя́щая бы́ти им.

Моли́твенник я́ко тепл в жи́зни сей Пресвяте́й Тро́ице был еси́, блаже́нне,/ хода́тайствы твои́ми здра́вие всем подава́я неску́дное./ Тем и ны́не па́че в моли́тву предлага́ем тя,/ прося́ще тобо́ю прия́ти ми́лости и грехо́в оставле́ния.

Богоро́дичен: Мои́х прегреше́ний плени́цу, Влады́чице, расто́ргни,/ Твоего́ Сы́на и Бо́га моля́щи,/ и томя́щий грех, При́сноде́во, низложи́,/ я́ко да пою́ Тя всегда́, Всенепоро́чная, Тобо́ю спа́саемь.

Ин ирмо́с:

Вску́ю мя отри́нул еси́/ от лица́ Твоего́, Свете Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Пи́щи малоприя́тием ску́дным зело́ жела́ние пло́ти обузда́л еси́,/ во всено́щных же славосло́виих Бо́жественных сло́вес/ души́ слове́сное непоро́чно Бо́гу соблю́л еси́.

Ца́рство Небе́сное стяжа́в нището́ю самово́льною,/ отону́дуже источа́еши обильная дарова́ния духо́вных исцеле́ний/ ве́рно почита́ющим всесвятую́ твою́ па́мять.

Свещу́ твою́ духо́вную, чистоты́ свети́ло вжегл еси́, блаже́нне,/ еле́ем ми́лости напоя́я непреста́нно./ Тем дости́гл еси́ Черто́га Небе́снаго, иде́же есть Жени́х Он,/ его́же измла́да возжеле́л еси́.

Богоро́дичен: Храм яви́лася еси́ че́стен, Де́во Ма́ти Мари́е,/ вся́ческая всеси́льно и прему́дро соста́вльшаго Христа́, и очи́стивша, и нося́ща,/ его́же нам ми́лостива сотвори́ ма́терними Твои́ми мольба́ми.

Песнь 6

Ирмо́с:

В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Честно́е те́ло твое́, преподо́бне,/ мно́га исцеле́ния, я́ко исто́чник при́сно кипя́щь,/ источа́ет ве́рою приходя́щим к чудотво́рному о́бразу Всесвяты́я Тро́ицы/ и к цельбоно́сному твоему́ гро́бу.

Непреста́нными твои́ми к Бо́гу, о́тче, моли́твами/ круго́в Небе́сных дости́гл еси́,/ иде́же есть Свет неизрече́нный и наслажде́ние пра́ведных,/ с ни́миже предстои́ши Тро́ице – всех Бо́гу,/ отону́дными светлостьми́ просвеща́яся.

Анто́ние преподо́бне,/ а́ще и напосле́док лет от земли́, я́ко со́лнце, возсия́л еси́,/ но дре́вних оте́ц, пре́жде тебе́ бы́вших,/ че́сти и дара от Бо́га сподо́бился еси́:/ бу́дут бо, – рече́ Госпо́дь,– после́днии пе́рвии.

Богоро́дичен: Возсия́ из Тебе́ Мы́сленное Со́лнце/ и све́тлыя лучи́ своего́ Божества́ всем простре́, Богоро́дице Влады́чице;/ тем Тя вси непреста́нными пе́нии велича́ем.

Ин ирмо́с:

Моли́тву пролию́ ко Го́споду/ и тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

В пусты́нях, я́ко пти́чищь, возгнезди́лся еси́, преподо́бне,/ от всех хотя́ Еди́ному Бо́гу еди́нствовати;/ но, я́ко на све́щнице, я́ве бы́ша всем твоя́ исправле́ния,/ Бо́гу тя прославля́ющу.

Нощь тебе́, я́ко день, блаже́нне, вменя́шеся и день, я́ко нощь./ Не дал еси́ покоя́ телеси́ твоему́, ни сна очесе́м, ни ве́ждом дрема́ния,/ до́ндеже дости́гл еси́ поко́я Небе́снаго.

Сон и сень житие́ сие́, преподо́бне, вмени́л еси́,/ тем, и на ничто́же обраща́лся еси́ су́щих в нем,/ но все твое́ помышле́ние и ду́шу к бу́дущим просте́рл еси́,/ иде́же с преподо́бными все́ми ны́не весели́шися.

Богоро́дичен: Расто́ргни мои́х прегреше́ний рукопи́сание,/ одержа́щих мя печа́лей и страсте́й разреше́ние да́рующи и соблюда́ющи вы́ну неврежде́на, Влады́чице.

Конда́к, глас 8.

Подо́бен: Взбра́нной:

От ю́ности, преподо́бне, плоть твою́ в посте́х и моли́твах истончи́л еси́/ и, крест твой взем, Христу́ после́довал еси́./ Те́мже и к Вы́шним тече́ние ра́достно соверши́л еси́,/ иде́же со всеми святы́ми Свя́тей Тро́ице предстои́ши;/ и ны́не, ста́до твое́ посеща́я,/ помина́й чту́щих пресвяту́ю па́мять твою́,/ да вси благода́рне вопие́м ти:/ ра́дуйся, Богому́дре Анто́ние, наста́вниче пусты́нный.

И́кос:

Ева́нгельскаго гла́са ревни́тель блаже́нне, обре́лся еси́,/ вся бо земна́я вмени́в уме́ты,/ Христо́в после́дователь в жи́зни сей изя́щен был еси́,/ от него́же и ра́зумом обогати́вся дарова́ний Боже́ственных,/ вразуми́ ны веща́ти тебе́ си́цевая:/ ра́дуйся, Богоно́се, Небе́сный челове́че, земны́й А́нгеле;/ ра́дуйся, чи́стый до́ме Пресвята́го ду́ха;/ ра́дуйся, я́ко в жи́зни сей служи́тель Пресвяты́я Тро́ицы был еси́;/ ра́дуйся, я́ко моли́твами твои́ми оби́тель твою́ изба́вил еси́ невре́дну от о́гненнаго возгоре́ния;/ ра́дуйся, я́ко пусты́ню слеза́ми напои́в, многопло́дну сотвори́л еси́;/ ра́дуйся, я́ко всено́щными Боже́ственными песнопе́нии сию́ просвети́л еси́;/ ра́дуйся, я́ко в ней се́мя Боже́ственное мно́готру́дно все́ял еси́,/ его́же уплоди́ Бог во мно́го;/ ра́дуйся, я́ко в той учени́к стада́ собра́в, стра́ху Бо́жию наказа́л еси́;/ ра́дуйся, я́ко моли́твами твои́ми нечи́стии ду́си от челове́к отгони́ми быва́ют;/ ра́дуйся, я́ко непреста́нно мо́лишися Пресвяте́й Тро́ице/ о соверша́ющих благоче́стно па́мять твою́,/ е́же соблюсти́ся от враг ненаве́тным, да зове́м ти:/ ра́дуйся, Богому́дре Анто́ние, пусты́нный наста́вниче.

Песнь 7

Ирмо́с:

Богопроти́вное веле́ние беззако́ннующаго мучи́теля/ высо́к пла́мень вознесло́ есть./ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Смире́н нрав и обы́чай кро́ток име́в, блаже́нне,/ Кроткому Па́стырю – Христу́, я́ко овча́ незло́биво, усе́рдно после́довал еси́./ ему́же непреста́нно пое́ши со избра́нными все́ми:/ оте́ц на́ших Бо́же, благослове́н еси́.

Жела́я наслади́тися Небе́снаго Хлеба – Христа́,/ его́же я́дый никогда́же у́мрет,/ а́лчбою и жа́ждею томи́л еси́ плоть твою́;/ его́же ны́не, о́тче Анто́ние, насыща́лся,/ и нам прича́стником бы́ти О́наго моли́ся.

Свети́ло ми́ра в после́днем ро́де сем Госпо́дь сотвори́ тя, о́тче,/ чу́вственным очесе́м и душе́вным тобо́ю да́рует прозре́ние./ того́ моли́ просвети́ти ны све́том за́поведей Боже́ственных, пою́щия:/ оте́ц на́ших Бо́же, благослове́н еси́.

Богоро́дичен: Обветша́вшия ны го́рьким дре́вле дре́ва вкуше́нием/ и па́дшия преступле́нием, Пречи́стая, обнови́ла еси́, Зижди́теля ро́ждши,/ Сло́во ипоста́сное, Де́во Ма́ти, Влады́чице.

Ин ирмо́с:

От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

Я́ко высо́к ум, преподо́бне, от земны́х всех к Бо́гу име́я,/ высо́к в доброде́телех обре́лся еси́/ и, к Вы́шним тече́ние твое́ испра́вив,/ сла́виши с ни́ми непреста́нными гла́сы Пресвяту́ю Тро́ицу:/ оте́ц на́ших Бо́же, благослове́н еси́.

Ни́щия ми́луя, а́лчущия пита́л еси́, жа́ждущия напая́л еси́./ Тем прия́ тебе́ в ве́чныя кровы тебе́ ра́ди в ни́щих Бы́вый./ ему́ же пое́ши:/ оте́ц на́ших Бо́же, благослове́н еси́.

Не устраши́ тебе́, блаже́нне,/ долгота́ ле́тняя, ни пусты́нное озлобле́ние,/ ни в потре́бных ску́дость, ни разбо́йник на́шествие,/ но еди́но пред очи́ма име́я,/ е́же Христа́ ра́ди смерть прия́ти в пусты́ни сей,/ да Христу́ жи́ти бу́деши.

Богоро́дичен: Украси́лася еси́ де́вства добро́тами/ и Е́вы покры́ла еси́ студ злообра́зный, Христа́ Ро́ждшая,/ одея́ние безсме́ртия да́рующаго Тебе́ чту́щим.

Песнь 8

Ирмо́с:

В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода/ и превозноси́те во вся ве́ки.

Светоно́сная благода́ть и исцеле́ний дарова́ния/ да́шася от Бо́га всей стране́ на́шей, преподо́бне,/ чудотво́рный о́браз Еди́носу́щныя Тро́ицы и твоя́ мо́щи святы́я./ ему́же покланя́ющеся, тя почита́ем.

Я́ко ши́пок сладкоуха́нный, о́тче Анто́ние,/ гроб твой ми́ру обре́теся./ К нему́же вси приходя́щии/ духо́вное благово́ние в сердца́х свои́х от него́ объе́млют,/ бла́гопотре́бное зело́.

Всем всяк, блаже́нне, благоче́стие предложи́л еси́ себе́:/ о́вем у́бо избавле́ние подая́ от вся́ких злых обстоя́ний,/ о́вем же от неду́г здра́вие неоску́дное, о́вем же спасе́ние предлага́я,/ хотя́щим мона́шеское пребыва́ние.

Богоро́дичен: Умертви́, Богоро́дице, многоко́зненнаго врага́,/ всю тварь пре́жде тле́ю умертви́вшаго,/ ны́не же Тобо́ю ме́ртвии на жи́знь взыдо́хом:/ родила́ бо еси́ вои́стинну Жи́знь – Бо́га всех.

Ин ирмо́с:

Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

А́ще и за́йде под зе́млю те́ло твое́,/ но, я́ко со́лнце, днесь возсия́, вся освеща́ющее,/ хваля́щия Христа́ во ве́ки.

Мно́госветлое жития́ твоего́, Богоблаже́ние Анто́ние,/ просвеща́ет душе́вныя о́чи/ и исправля́ет стопы́ к доброде́тели хваля́щих Христа́ во ве́ки.

По сме́рти явле́нием твои́м, я́ко прокаже́ннаго, очи́стил еси́,/ та́ко, блаже́нне, и мене́, уя́звленна грехо́м,/ моли́тв твои́х иссо́пом очи́сти,/ пою́ща Христа́ во ве́ки.

Богоро́дичен: На Тя наде́жду возложи́х, Ма́ти Присноде́во, спасе́ния моего́/ и Тя Предста́тельницу име́ю жи́зни моея́,/ поя́ Христа́ во ве́ки.

Песнь 9

Ирмо́с:

Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Те́сным и приско́рбным на земли́ ше́ствовав путе́м,/ простра́нства Небе́снаго ра́достне дости́гл еси́,/ иде́же зри́ши я́сне Пресвяту́ю Тро́ицу со А́нгельскими ли́ки.

Я́ко зла́то, искуше́но в горни́ле терпе́ния,/ яви́лся еси́, блаже́нне, без вся́каго зло́бы приме́са;/ и того́ ра́ди высоту́ дости́г доброде́телей,/ восприя́л еси́ Пресвята́го ду́ха озаре́ние.

Честна́ вои́стинну смерть твоя́, преподо́бне:/ а́ще бо и преста́вился еси́ от нас,/ но ду́хом неотсту́пно с на́ми пребыва́еши,/ ве́рно почита́ющими тя.

Богоро́дичен: Вся Сотво́ршаго матероле́пно в Твои́х не́дрех носи́вши, Мари́е Де́во,/ от руки́ мя изба́ви борца́,/ я́ко да, спа́саемь Тобо́ю, Твоя́ хвалю вели́чия.

Ин ирмо́с:

Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Еди́наго ле́та ко осми́десятим в тече́нии твое́м не досконча́в, блаже́нне,/ Вы́шнее Ца́рствие восприя́л еси́,/ со Христо́м ца́рствуя во ве́ки.

Оста́вив земну́ю сла́ву, к Небе́сней взя́лся еси́ любо́вию/ и, я́ко А́нгел, в жи́зни сей Бо́гу послужи́в,/ к преми́рным духово́м преста́вился еси́,/ Боже́ственным та́мо све́том просвеща́йся.

Руки́, Анто́ние свя́те, к Пресвяте́й Тро́ице на мольбу́ простри́,/ ми́лостивное прося́, и́же с любо́вию пе́ние Ти сие́ прине́сшим,/ и изба́ви всех напа́стей и бед/ ве́рою соверша́ющих па́мять твою́ святу́ю.

Богоро́дичен: Пе́ние с пе́снию и хвале́ние, исплете́нное от боле́зненны души́,/ принесо́х со стра́хом Тебе́, ро́ждшей Христа́,/ естество́м су́ща Бо́га,/ его́же моля́щи, Богоро́дице, благоприя́тна сотвори́ моле́ния на́ша/ и моли́твами Твои́ми соблю́дй лю́ди Твоя́.

Свети́лен:

Твое́ успе́ние в пе́снех пра́зднующих/ посеща́й моли́твами твои́ми,/ оставле́ние прося́ грехо́вных собла́зн/ и изба́вити всех от разли́чных напа́стей,/ да вси тя прославля́ем, блаже́нне Анто́ние.

Сла́ва, и ны́не, Богоро́дичен:

С Бо́гом упова́ние на Тя, Пречи́стая, возложи́хом, из Тебе́ проше́дшему распя́тому Христу́,/ Твои́ми к Нему́ мольба́ми невре́дны да́же до конца́ сохрани́ ны.

На хвали́тех стихи́ры на 4, глас 8.

Подо́бен: О, пресла́внаго чудесе́:

Преподо́бне о́тче Анто́ние,/ ты, от ю́ности Христу́ после́довати возлюби́в,/ вся, я́же на земли́, мудрова́ния отри́нув,/ по́стническими труды́ Бо́гу угоди́л еси́,/ сла́бое по́мысла пови́нуя ду́ху./ И ны́не на Небесе́х со святы́ми все́ми Тро́ице предстои́ши,/ Боже́ственныя да́ры от Нея́ прие́мля,/ ю́же моли́, блаже́нне,/ о и́же ве́рою пресвяту́ю твою́ па́мять почита́ющих.

Преподо́бне о́тче Анто́ние,/ ты струя́ми слез твои́х/ пусты́ню безпло́дную напои́л еси́,/ и в ней плоды́ преподо́бия и пра́вды израсти́л еси́,/ и сего́ ради́ всыновле́ния дар прия́ти от Бо́га сподо́бился еси́,/ Святы́м Ду́хом просвеща́емь,/ сокрове́нных та́ин я́сно зри́тель обре́лся еси́,/ сбы́тия́ после́дних време́н сказа́тель нело́жен быв./ Те́мже моли́ся, спасти́ ду́ши на́ша.

Преподо́бне о́тче, блаже́нне Анто́ние,/ и́го Христо́во на ра́мо твое́ взем,/ доброде́тели верх усе́рдно дости́гл еси́,/ на не́мже утвержде́на любо́вию Го́спода узре́л еси́,/ восхо́д тебе́ к Небе́сным оби́телем исправля́юща./ ему́же предстои́ши с преподо́бными все́ми,/ моля́ся спасти́ благоче́стне ве́рующия в Пресвяту́ю Тро́ицу/ и любоче́стне почита́ющия/ честны́я мо́щи твоя́ трудолюбе́зныя.

Сла́ва, глас 6:

Ра́дуйся, пусты́не свята́я и Боголюбе́зная,/ израсти́вшая отца́ сего́ досточу́днаго/ и воспита́вшая самора́сленным и свои́ми бы́лии,/ его́же житие́м освяти́вши ложесна́ своя́,/ небу́рное приста́нище всем ве́рным обре́теся:/ той бо просла́ви Бо́га доброде́тельным житие́м свои́м,/ в жи́зни сей ве́рно послужи́в ему́./ Сего́ ра́ди и Бог просла́ви того́ чудесы́ свои́ми Богодарова́нными,/ оби́льна исцеле́ния подава́ет/ почита́ющим с ве́рою святу́ю па́мять его́./ Те́мже и мы, обстоя́ще всечестну́ю ико́ну его́,/ со стра́хом покланя́ющеся,/ благоче́стне целу́ем святы́й о́браз священноле́пнаго его́ подо́бия/ и любе́зно вопие́м к нему́:/ О всеблаже́нне о́тче наш Анто́ние!/ моли́ся неотсту́пно Пресвяте́й Тро́ице,/ во́инству дарова́ти на враги́ посо́бие и кре́пкое одоле́ние/ и христоимени́тыя лю́ди от зол спасти́ вся́ческих и душа́м на́шим испроси́ мир и ве́лию ми́лость.

И ны́не: Богоро́дице, Ты еси́ лоза́:

Славосло́вие вели́кое, и отпу́ст.

НА ЛИТУРГИ́И

Блаже́нны от кано́на свята́го пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных его́.

Стих: Что возда́м Го́сподеви о всех, я́же воздаде́ ми?

Апо́стол к Гала́том, зача́ло 213.

Аллилуи́я, глас 6: Блаже́н муж, боя́йся Го́спода, в за́поведех его́ восхо́щет зело́.

Стих: Си́льно на земли́ бу́дет се́мя его́.

Ева́нгелие от Матфе́я, зача́ло 10. Прича́стен: В па́мять ве́чную бу́дет пра́ведник, от слу́ха зла не у́бои́тся.

Ина слу́жба преподо́бнаго Анто́ния Сийскаго, творе́ние многогре́шнаго Иоа́нна Ру́сина

НА МАЛОЙ ВЕЧЕ́РНИ

Стихи́ры, глас 2.

Подо́бен: Егда́ от Дре́ва:

Егда́ Бог восхоте́ тя избра́ти отвсю́ду,/ озари́ тя, преподо́бне,/ тогда́ вся плотска́я мудрова́ния увяди́л еси́/ и стопа́м Христо́вым после́довал еси́./ Сла́ва еди́ному прему́дрому Бо́гу.

Егда́ зва́нием свы́ше озари́вся,/ тогда́ диа́вола кре́пко удави́л еси́/ му́жеством души́ доброде́тели,/ тем, я́ко на го́ру не́кую, доброде́тели востеце́ ле́гкима крило́ма духо́вныма,/ я́ко оре́л, ко Иерусали́му возлете́./ О о́тче Анто́ние!/ по́стником похвала́ и утвержде́ние.

Егда́ Оте́ц изво́лил есть, и Сын соблаговоли́,/ и Дух Святы́й укрепи́ тя, и обнови́,/ и оби́тель в тебе́ сотвори́ша вои́стинну,/ я́коже рек Влады́ка Свои́ми пресвяты́ми усты́,/ та́ко и соверши́ся:/ ве́руяй в Мя Отце́м Мои́м возлю́блен бу́дет,/ и Аз возлю́блю его́, и явлю́ся ему́,/ и прииду́ к нему́, и оби́тель у него́ сотворю́,/ но вои́стинну, о́тче преподо́бне Анто́ние,/ Свя́тей Тро́ицы, спребыва́ющи с тобо́ю, и Свято́му Ду́ху, де́йствующу в тебе́,/ Ея́же непреста́нно моли́ся спасти́ ду́ши на́ша.

Сла́ва, глас 4:

Прииди́те, вси ве́рнии,/ в па́мять блаже́ннаго отца́ на́шего Анто́ния,/ и сего́ пе́сньми и похвала́ми, я́ко цве́ты, украси́м, глаго́люще:/ ра́дуйся, Анто́ние, наста́вниче до́брый, ско́рый изба́вителю,/ и́же да́льняя, я́ко близ, прови́дя и предыду́щая гада́тельствуя,/ я́ко близ, прорица́я нело́жно,/ земны́й А́нгеле, Небе́сный челове́че,/ зре́лый гро́зде, в точи́лех Боже́ственных положи́ся,/ вино́ источи́л еси́, и жа́жду лю́тую утоли́л еси́,/ и весе́луеши ста́ду твоему́,/ а́ки арома́т, веселя́ ду́ши их и сердца́,/ и ны́не Тро́ице предстоя́ со дерзнове́нием,/ моли́ся дарова́ти душа́м на́шим ве́лию ми́лость.

И ны́не, глас то́йже:

Де́во, бра́ку неиску́сная,/ Влады́чице Богоро́дице,/ и́же ду́шу чи́сту и те́ло нескве́рно иму́щи,/ моли́ся вы́ну е́же из Тебе́ Ро́ждшемуся/ сохрани́ти ста́до Свое́ от всех волк губя́щих,/ моли́ся Сы́ну Своему́, Христу́ Бо́гу на́шему,/ приле́жно со блаже́нным Анто́нием/ спасти́ся душа́м на́шим.

На стихо́вне стихи́ры, глас 3.

Подо́бен: Ве́лия Креста́:

Ве́лий яви́ся ты, Анто́ние,/ и́же в после́днем ро́де просия́вший чудесы́,/ и осиява́ющий за́падныя места́,/ и на восто́к просвеща́яй, а́ки со́лнце, вселе́нную обходя́,/ благода́тию просвеща́я,/ и, ны́не Тро́ице предстоя́,/ моли́шися спасти́ся душа́м на́шим.

Стих: Блаже́н муж, боя́йся Г оспода,/ в за́поведех Его́ восхо́щет зело́.

Ве́лия по́двиги твоя́ и труды́:/ оби́тель прекра́сну Святе́й Тро́ице себе́ соде́лал еси́,/ преподо́бне Богоблаже́нне,/ твори́ши чудеса́ и прого́ниши бе́сы,/ и и́мени твоего́ свята́го дале́че боя́щеся, о́тче Анто́ние,/ за чту́щия тя помоли́ся.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Виде́ние твое́ святоле́пно,/ и чудеса́ твоя́ Богозда́нна,/ стра́шен безу́мным явля́яся/ и ми́лостив ве́рным показу́яся,/ по мо́рю и по су́ху чудеса́ творя́, явля́яся,/ о́тче Анто́ние, Богоблаже́нне.

Сла́ва, глас 7:

Преподо́бне о́тче Анто́ние,/ испе́рва ми́ра возненави́де,/ приле́жно в доброде́телех пости́вся,/ орга́н бысть Пречи́стому Ду́ху,/ те́мже и ны́не, в па́мять твою́ ра́дующеся, рцем:/ ра́дуйся, Анто́ние, честны́й у́ме, в поще́ниих кре́пкий,/ в моли́твах бо́дростный,/ тем и ны́не, блаже́нне, а́ще и те́лом оты́де от нас,/ но ду́хом непреста́нно предстоя́ с на́ми,/ те́мже тя иму́ще к Бо́гу вели́ка хода́тайника,/ не оскудева́й моля́ся Святе́й Тро́ице со дерзнове́нием,/ стране́ побе́ды и одоле́ние на враги́ дарова́ти,/ не преста́й сохраня́я оте́чество свое́ и рог правосла́вных вознося́,/ да твои́ми моли́твами изба́вльшеся от враг душе́вных и теле́сных,/ ра́дующеся, взыва́ем ти:/ ра́дуйся, Анто́ние, похвала́ и утвержде́ние христиа́ном.

И ны́не, Богоро́дичен, глас то́йже:

Де́во Всенепоро́чная, Ма́ти Христа́, Бо́га на́шего,/ Ро́ждшая Бо́га и Сло́во,/ упраздни́ла еси́ вся́кую бесо́вску́ю кознь Свои́м чи́стым и нетле́нным Рождество́м,/ лю́дие бо изба́вльшеся пре́лести Тобо́ю,/ род челове́ческий спасе́н бысть,/ и с Гаврии́лом вопие́м Ти:/ ра́дуйся, Обра́дованная,/ Нетле́нная Чи́стая Ма́ти, Госпо́дь с Тобо́ю.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 6:

Мирски́я суеты́ отри́нув, блаже́нне,/ сень вмени́л еси́,/ и, виде́нием А́нгела, от Бо́га посла́ннаго,/ осене́нием Свята́го ду́ха неизрече́нно озари́вся/ и от него́ взем крест свой,/ после́дова невозвра́тным по́мыслом,/ и от того́ ти́хое и́го восприя́л еси́,/ и отту́ду благода́ть восприя́т, преподо́бне,/ исцеля́ти разли́чныя стра́сти,/ со А́нгелы собесе́дник и преподо́бным сожи́тель,/ моли́ся Го́сподеви, Анто́ние преподо́бне,/ поми́ловатися душа́м на́шим.

Преподо́бне о́тче,/ кто испове́сть труды́ твоя́, и терпе́ние, и боле́зни,/ или́ ки́й язы́к изрече́т к Бо́гу жела́ние и ве́ру, бде́ние и сухояде́ние,/ устна́ми и умо́м соверше́нное безмо́лвие,/ смире́ние нелицеме́рное, моли́тву непреста́нную,/ ху́дость ри́зную, па́мять сме́ртную,/ Анто́ние, о́тче наш, моли́ спасти́ся душа́м на́шим.

Преподо́бне о́тче Анто́ние,/ ты врач душа́м и те́лом яви́ся,/ источа́я неду́жным исцеле́ния ре́ку,/ да́ром же от Бо́га проро́чества укра́шен,/ прорица́ти, я́ко настоя́щая, бу́дущая,/ и моли́твою учени́ка своего́ Филофе́я вооружи́ диа́вола победи́ти,/ хотя́щаго оте́чество твое́ отры́гнути,/ кре́пко того́ потреби́в,/ мы же ти взыва́ем псало́мски, преподо́бне.

Богоно́сне, Богому́дре Анто́ние,/ сла́вы маловре́менныя оста́вль,/ в пусты́нях, и в де́брех, и в непроходи́мых ме́стех ты живы́й яви́ся,/ и Тро́ице, блаже́нне, чи́стый дом быв,/ Ея́же кла́няяся о́бразу,/ и ду́ха Свята́го прия́телище тем бысть,/ тем прия́т от Бо́га власть исцеля́ти неду́ги и прогони́ти бесы,/ живя́шие же в тебе́ Христо́с Бог наш,/ его́же испе́рва возлюби́,/ того́ моли́, Анто́ние преподо́бне,/ спасти́ся душа́м на́шим.

Ины стихи́ры, глас 8.

Подо́бен: О, пресла́внаго чудесе́:

О, и́же па́че ума́ удивле́ние/ неизрече́нному Ти милосе́рдию, Влады́ко Христе́, Царю́,/ и́же показа́л еси́ нам такова́ свети́льника/ в после́днем на́шем ро́де, вели́каго Анто́ния,/ помо́щника и засту́пника земли́ Росси́йстей,/ и чуде́с да́ром сего́ украси́л еси́,/ и ду́ха Твоего́ Свята́го осене́нием проро́чествием всего́ соверши́л еси́,/ о, неизрече́нным Ти судьба́м, Христе́ Человеколю́бче, Царю́,/ его́же моли́твами спаси́ ду́ши на́ша, я́ко Милосе́рд.

О, пресла́вное чудо!/ исто́чник чудесе́м, под земле́ю сокрове́н,/ и луча́ исцеле́ния испуща́ет всем ве́рным,/ от души́ ве́рою к нему́ приходя́щим,/ и ны́не явля́ются всем чудеса́ твоя́ я́ве,/ о Бо́жие дарова́ние, и́же нам, земны́м, дарова́ся,/ его́же моли́твами спаси́ ду́ши на́ша, я́ко Милосе́рд.

О, пресла́вное чудо!/ Де́лателю за́поведей Христо́вых, Анто́ние прехва́льне,/ и по сме́рти, я́ко жив еси́,/ неду́жныя исцеля́еши, и вся, к тебе́ притека́ющия, осиява́еши чудесы́/ и просвеща́еши ду́ши прокаже́нных житие́м,/ Анто́ние преблаже́нне,/ его́же моли́твами спаси́ ду́ши на́ша, я́ко Милосе́рд.

Сла́ва, глас 6:

И́же по о́бразу соблю́д, о́тче, ум влады́ку,/ на стра́сти душетле́нныя хра́брости поста́вив,/ на диа́вола во́инствова по́двиги свои́ми,/ я́ко копие́м не́киим, воздержа́нием твои́м сего́ пробо́л еси́/ и в бре́ннем телеси́ а́нгельски на земли́ пожи́л еси́,/ я́ко заря́ све́тла, Богоуго́дное и Боже́ственное твое́ житие́/ за́падную страну́ просвети́,/ а́ще и ны́не от нас пре́йде к Небе́сным оби́телем,/ но ду́хом непреста́нно с на́ми предстоя́,/ моли́ся, чудотво́рче Анто́ние,/ поми́ловатися душа́м на́шим.

И ны́не, Богоро́дичен по гласу.

Вход. Проки́мен дне и чтения

(зри день 5-й).

На литии́ стихи́ры, глас 6:

Прииди́те, Боже́ственное по́стник сосло́вие,/ прииди́те, вси празднолю́бцы,/ Анто́ния блаже́ннаго, по́стником наста́вника, почти́м/ и сего́ похвала́ми, я́ко не́кими венцы́, укра́сим, си́це глаго́люще:/ ра́дуйся, ду́ха Свята́го прия́телище/ и ни́щим те́плое избавле́ние./ Христо́ву сло́ву, блаже́нне, подража́тель был еси́,/ я́коже рекл еси́ Свои́ми усты́:/ поне́же еди́ному сотвори́сте бра́тий Мои́х ме́ньших, Мне сотвори́сте./ И тому́ блаже́нныя твоя́ ру́це послужи́сте тре́бование и ми́лование,/ те́мже от Христа́ прия́т нетле́нный вене́ц,/ и со все́ми преподо́бными досто́йно ублажа́ем:/ моли́ся, преподо́бне, поми́ловати ду́ши́ на́ша.

Глас 7:

До́браго, и пресла́внаго, и кро́ткаго Учи́теля на́шего Христа́/ глас услы́шав, си́це глаго́лющий:/ и́же кто хо́щет итти́ по Мне,/ да отве́ржется себе́, и во́зьмет крест свой, и после́дует Мне./ Ты же, блаже́нне,/ взем крест свой, после́дова во всем по стопа́м его́,/ претерпева́я ско́рби, бе́ды,/ изгна́ния от ме́ста на ме́сто, и укори́зны,/ и посмея́ние любве́ ра́ди Бо́жия/ и ожида́я от него́ мзду́ трудо́в твои́х – воздая́ние./ И ны́не, преподо́бне, от Вседержи́тельныя руки́ Его́/ венцы́ нетле́нными увязе́ся,/ на Небеси́ похваля́емый и на земли́ сла́вимый,/ Христу́ моли́ся спасти́ ду́ши на́ша.

Глас 6:

Прииди́те, духовнолю́бцы,/ соста́вим торжество́ све́тло блаже́нному Анто́нию,/ в па́мять его́ ра́дующеся, рцем:/ ра́дуйся, Небе́сный челове́че, земны́й А́нгеле,/ и́же житие́ твое́ А́нгели похвали́ша и челове́цы удиви́шася./ И ны́не в па́мять твою́ хвалы́ прино́сим, ра́дующеся, рцем:/ Анто́ние блаже́нне,/ моли́ спасти́ ду́ши на́ша.

Глас 5:

Проро́ка Ио́иля Госпо́дня прорече́ния ны́не сбы́шася:/ излию́ от ду́ха Моего́ на вся́ку плоть./ И ны́не, преподо́бне, излия́ся на тя благода́ть Пресвята́го ду́ха,/ и тем ны́не, просвеща́ем от него́,/ и чудеса́ де́еши, осиява́я, я́ко мо́лния, зе́млю Росси́йскую./ Исцеле́нием струя́ми, я́ко со́лнце второ́е,/ от за́пада на восто́к сия́я по Госпо́дню словеси́:/ та́ко да просвети́тся свет ваш пред челове́ки,/ и да ви́дят до́брая ва́ша дела́,/ да сла́вят Отца́ ва́шего, и́же есть на Небесе́х./ Ты же, преподо́бне, я́ко свети́ло в те́мнем ме́сте, чудесы́ сия́я,/ Христа́ моли́, Анто́ние преподо́бне,/ изба́вити от вся́ких бед ду́ши́ на́ша.

Глас 5:

О, ди́вное чудо!/ и́же Христа́ ра́ди вся оста́вивше, и в пусты́ню всели́вся,/ и храм вели́каго Архиере́я Николы воздви́гше,/ и огра́ды и́ноком созда́вше,/ и не терпя́ враг от Тебе́ надо́лзе досажда́ем/ и святы́ми твои́ми моли́твами отгоня́ем быва́ше, я́ко огне́м не́коим./ Тогда́ подвиза́я лю́ди, подо́бныя ему́,/ и от ме́ста сего́ изгоня́ют тя неми́лостивно,/ я́ко а́гня незло́бива./ Ты же, по Христо́ву сло́ву преселя́яся, я́коже рек:/ а́ще и изго́нят вы из гра́да, бе́гайте в други́й,/ они́ же, у́бо безу́мнии, не разуме́ша ми́лости Бо́жия,/ и́же посети́ их Госпо́дь,/ не возлюби́ша благослове́ние от Го́спода Бо́га/ и от преподо́бных его́, по проро́ку Дави́ду, глаго́лющему:/ возлюби́ кля́тву, и прии́дет ему́,/ не восхоте́ благослове́ние, и удали́ся от него́./ Ты же, преподо́бне, отту́ду на второ́е ме́сто преселя́яся,/ е́же Си́я зово́мое,/ и та́мо це́рковь прекра́сну во и́мя Святы́я Тро́ицы воздви́же/ и забра́ло до́бре и́ночествующим возгради́./ Ниже́ па́ки оставля́ет тя и та́мо диа́вол ра́дуется./ Но Бо́гу попуща́ющу,/ да яви́т тебе́, я́ко вои́стинну еси́ предо́бр его́ слуга,/ и чудеса́ де́еши, огнь свети́лищу каса́ется от наважде́ния диа́вола,/ и я́ко и самому́ основа́нию свети́льному возгоре́тися,/ в ней же Боже́ственный о́браз Живонача́льныя Тро́ицы стоя́ше./ Ты же, преподо́бне, не терпя́ сего́ зре́ти,/ рыда́нием и слеза́ми к Бо́гу взыва́ше:/ о Влады́ко, вску́ю отвраща́еши Лице́ Свое́ от раба́ Твоего́/ и О́браз Свой Боже́ственный от нас отъе́млеши?/ О, чудо! я́ко вско́ре Бо́гу услы́шавшу моле́ние твое́,/ и о́браз Свой, святы́м Свои́м манове́нием/ из огня́ носи́м, среди́ монасты́ря поста́влен был./ Да ви́девше ученицы́ чу́до,/ поревну́ют житию́ твоему́./ Сла́ва Еди́ному Прему́дрому Бо́гу.

Глас 2:

Ве́рою и любо́вию/ я́ко бо и́стиннаго по́стника Анто́ния/ в па́мяти досто́йнаго почти́м,/ я́ко лива́н, благоуха́еши чудесы́./ И по сме́рти, я́ко жив, явля́яся,/ чудесы́ просвеща́я,/ Анто́ние блаже́нне,/ моли́ изба́вити от бед ду́ши́ на́ша.

Глас 1:

Ра́дуется ны́не Не́бо, и земля́,/ и челове́цы, в па́мять твою́ торжеству́юще,/ ра́дуются и Христа́ похваля́юще,/ я́ко такова́го свети́льника да́вшаго нам в после́днем на́шем ро́де,/ и́же чуде́с де́тельми озаря́юще,/ я́ко кедр, в до́му́ Бо́жии насажде́н, Анто́ние, о́тче наш.

Сла́ва, глас 4:

Русская Боже́ственная, и вели́кая, и освяще́нная Це́рковь/ в па́мять твою́ святу́ю напи́вшися уче́нии,/ с благове́рными же и со святи́тели све́тло и ра́достно вопие́т ти:/ ра́дуйся, Анто́ние, наста́вниче по́стником,/ отце́м красото́, чудесе́ де́телю./ И ны́не ра́ка твоя́ Боже́ственная и чудоно́сная,/ я́ко трубо́ю, вопие́т твоя́ Боже́ственная отблагодарова́ния и исцеле́ния неду́жным всем,/ ве́рою приходя́щим к моще́м твои́м/ в па́мять твою́ святу́ю./ Не забу́ди, посеща́я нас,/ и́же ко Го́споду, преподо́бне, твои́ми моли́твами.

И ны́не, Богоро́дичен по гласу.

На стихо́вне стихи́ры, глас 5:

Ра́дуйся, освяще́нная главо́,/ чи́стый у́ме, пло́тный А́нгеле, Небе́сный челове́че, Вы́шняго Иерусали́ма сограждани́не./ Небе́сная жили́ща нетле́нная возлюби́в,/ тле́нная земна́я жили́ща оста́вив,/ Само́му́ Подвигоположникода́вцу востече́,/ досто́йно мзду́ восприима́я трудо́в свои́х,/ и отту́ду, сия́нием Боже́ственным свы́ше озари́вся,/ вселе́нную просвеща́вши, Анто́ние преподо́бне,/ по́стником похвала́ и утвержде́ние.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ра́дуйся, я́ко и по сме́рти жив еси́,/ чудеса́ де́еши и прого́ниши бе́сы,/ и во снех настоя́телю своея́ оби́тели явля́яся,/ и того́ от боле́зни здра́ва сотво́ря́еши,/ тща́ние к це́ркви твори́ти повелева́еши,/ и челове́ку не́коему, на мо́ри пла́вающу, явля́ешися,/ и от потопле́ния и сме́рти го́рькия избавля́еши,/ и зе́млю Росси́йскую чудесы́ удивля́еши,/ по́стником похвала́ и отце́м украше́ние,/ преподо́бным сожи́телю и А́нгелом соприча́стниче,/ Анто́ние, о́тче наш.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Ра́дуйся, Анто́ние, ско́рый помо́щник/ ив бе́дах и в ско́рбех ра́достное утеше́ние,/ неду́гующим исцеле́ние ско́рое,/ безпо́мощным по́мощь, и оби́димым засту́пник,/ и ни́щим Боже́ственное утеше́ние,/ а́лчущим пита́тель,/ иде́же призыва́ем, быва́еши,/ бы́стро предваря́еши и вся ми́лостивно назира́еши./ И ны́не хва́льно и́мя твое́ во всей вселе́нней,/ и моли́твы твоя́ святы́я, я́ко кади́ло, к Бо́гу благоприя́тно восхо́дят,/ Престо́лу его́ свято́му достиза́ющи и того́ нам ми́лостива творя́щи,/ тем и ны́не, блаже́нне Анто́ние,/ моли́ся Христу́ дарова́ти стране́ на́шей побе́ды и на враги́ одоле́ние/ и сохрани́тися вся́кому гра́ду от вся́ких напа́стей и бед/ твои́ми моли́твами, о́тче Анто́ние.

Ины стихи́ры, глас 2.

Подо́бен: До́ме Евфра́фов:

Дом Святе́й Тро́ицы был еси́,/ исто́чник чудесе́м,/ преподо́бным сла́ва и отце́м красота́,/ реку́ весе́лия источа́вши,/ грозд ра́йский,/ вино́ разу́мное источи́л еси́,/ Анто́ние многочуде́сне.

Дом Ду́ху Свято́му был еси́,/ струя́ мно́гих исцеле́ний,/ измыва́я душе́вныя и теле́сныя стра́сти,/ привлече́ мно́гих ду́ши ко спасе́нию, и на па́житех духо́вных до́бре упасе́,/ и ко Христу́ наста́ви тещи́,/ Анто́ние мно́гочуде́сне.

Дом мно́гих чуде́с был еси́,/ Анто́ние преподо́бне преблаже́нне,/ сокро́вище неоскудева́емое,/ чуде́с бе́здна,/ благода́ти Свята́го ду́ха прия́телище, преподо́бне,/ ми́лости пучи́на,/ ве́лий еси́, Анто́ние прехва́льне и мно́гочуде́сне.

Сла́ва, глас 7:

Сра́дуйтеся с на́ми днесь, вся христоимени́тых собра́ния,/ наро́читых Боголю́би́вых люде́й Россййских с первосвяти́телем,/ со архиере́и и епи́скопы,/ свяще́нники же и просты́ми/ и весь во́зраст челове́ческий,/ в па́мять рцем блаже́ннаго отца́ на́шего Анто́ния:/ ра́дуйся, жили́ще Свята́го ду́ха/ и оби́льное благода́ти пода́телище,/ неоску́дная ми́лости пучи́на,/ приста́нище боля́щим ми́лостивное,/ тру́жда́ющимся изба́витель;/ ра́дуйся, Боже́ственная и всечестна́я оби́тель,/ иде́же положи́ся Боже́ственное и свято́е твое́ те́ло./ Тем ра́дуется ста́до мно́жества учени́к твои́х,/ ви́дяще чудеса́ твоя́,/ и хва́лятся тобо́ю па́че бога́тства мно́га,/ име́юще неоскудева́емое сокро́вище;/ ра́дуйся, и́же ве́рою и любо́вию чту́щих и почита́ющих свяще́нную па́мять твою́/ ми́лостивно их назира́еши свои́ми моли́твами,/ не оставля́я, посеща́еши и избавля́еши от вся́ких напа́стей и бед/ твои́ми хода́тайствы и заступле́нии,/ и ны́не, преблаже́нне, взы́де к ве́чным оби́телем,/ к Невече́рнему́ Све́ту, Боже́ственными заря́ми просвеща́ем;/ ра́дуйся, ду́ха Свята́го прия́телище/ и всем ра́достное упова́ние;/ ра́дуйся, я́ко страна́ за́падная тобо́ю весели́тся,/ име́я тя к Бо́гу хода́тая и моли́твенника кре́пка./ И ны́не, блаже́нне, зерца́лом разре́шшимся/ чи́сте смотри́ши Святу́ю Тро́ицу,/ за чту́щая тя, предстоя́, помоли́ся,/ я́ко дерзнове́ния иму́щи к Ней./ Помяни́ нас в свои́х моли́твах, недосто́йных раб,/ и о побе́де на враги́, и о святи́телех,/ и о и́ноцех, и о свяще́нницех,/ и о всем правосла́вном христиа́нстве,/ спасти́ся от всех бед, ви́димых и неви́димых,/ твои́ми к Бо́гу моли́твами, о́тче Анто́ние.

И ны́не, Богоро́дичен.

Тропа́рь, глас 6:

И́же вои́стинну на земли́ тя А́нгела/ и на Небеси́ челове́ка Бо́жия почти́м,/ сию́ жи́знь су́етную оста́вль,/ я́ко вои́стинну преудобре́н во́ин Христа́ Бо́га,/ на стра́сти душепа́губныя подвиза́вся в жи́зни сей су́етней/ бде́нием и поще́нием,/ во всем быв о́браз свои́м учени́ко́м./ Те́мже бо в тя всели́ся Пресвяты́й Дух,/ его́же де́йствием све́тло укра́шен,/ но я́ко име́я дерзнове́ние ко Святе́й Тро́ице,/ помина́й святу́ю оби́тель сию́/ и ста́до свое́, е́же собра́, му́дре,/ и не забу́ди, я́коже обеща́ся,/ посеща́й чад свои́х,/ Анто́ние преподо́бне, о́тче наш.

НА У́ТРЕНИ

По 1-м стихосло́вии седа́лен, глас 4: Боже́ственнаго и Пречи́стаго Анто́ния наста́ днесь па́мять,/ созывает торжество́, ра́дуемся, вопию́ще:/ ра́дуйся, Анто́ние, по́стником похвала́ и утвержде́ние.

Сла́ва, и ны́не, Богоро́дичен, глас 3:

Бо́жие жили́ще, Свята́я Де́во Богоро́дице,/ Ма́ти Безневе́стная Христа́ Бо́га на́шего,/ и́же дла́ньма Свои́ма носи́ла еси́,/ Боже́ственными моли́твами изба́ви нас от вся́кия беды́ и напа́сти,/ воспева́ющих и кла́няющихся Рождеству́ Твоему́.

По 2-м стихосло́вии седа́лен, глас 6:

Я́ко вои́стинну преудобре́н во́ин Христо́в был еси́/ и того́ ти́хое и́го восприя́л еси́,/ мзду́ трудо́в свои́х прия́л еси́ на Небесе́х,/ вене́ц нетле́нный от всех Да́теля, Христа́ Бо́га,/ Влады́ки, Творца́ на́шего,/ того́ моли́ изба́вити от бед ду́ши на́ша.

Сла́ва, и ны́не, Богоро́дичен, глас 5:

Де́ва днесь ко Иерусали́му гряде́т и близ Вифлее́ма есть./ Па́стыри удивля́ются, волсви́ да́ры гото́вят/ явле́нному от Де́вы Христу́ нас ра́ди, тому́ да́ры хотя́ще принести́./ Мы же Ти вопие́м:/ Благослове́нна Ты в жена́х, Всенепоро́чная Влады́чице.

По полиелеи седа́лен, глас 5:

Дре́вле у́бо проро́ка Ио́иля прорече́ния сбы́шася:/ излию́ от ду́ха Моего́ на вся́ку плоть./ Излия́ся на тя благода́ть Свята́го ду́ха и де́йствует в тебе́,/ и ра́ка Боже́ственная твоя́ источа́ет исцеле́ния./ Ра́дуйся, Анто́ние, и́ночествующих удобре́ние.

Сла́ва, и ны́не, Богоро́дичен, глас 7:

Свы́ше Свята́го ду́ха прия́телище, Пресвята́я Де́во,/ и́же в твою́ пресвяту́ю утро́бу всели́ся Сын Твой и Бог наш,/ нас от нетле́ния изба́вил есть, я́ко Человеколю́бец.

По 50-м псалме́ стихи́ра, глас 6:

И́же А́нгелом ра́дость/ и челове́ком на земли́ весе́лие,/ я́ко вои́стинну и́стиннаго по́стником наста́вника,/ отце́м сла́ву, Анто́ния,/ ду́ха Свята́го прия́телище,/ похва́лим, в па́мять его́ ра́дующеся,/ хва́ляще Христа́, и си́це рцем:/ ра́дуйся, Анто́ние блаже́нне,/ моли́ Христа́ поми́ловати ду́ши на́ша.

Кано́н преподо́бному Анто́нию, глас 4:

Ирмо́с:

Под о́блаком све́тлым/ и столпо́м о́гненным наставля́емый,/ проше́д мо́ре/ и сие́ пешеше́ствуяй, я́ко в пусты́ни,/ избра́нный Твой Изра́иль, Христе́,/ побе́дную песнь пое́т Тебе́, Го́споди.

Неизрече́нным Боже́ственным сия́нием просвети́вся, блаже́нне Анто́ние,/ отве́рзи ми, недосто́йному, устне́,/ я́ко да возмогу́ воспе́ти твою́ па́мять,/ и испове́м твоя́ чудеса́, и оттрясу́ мое́ омраче́ние,/ да Христу́, ра́дуяся, взыва́ю исхо́дную песнь, Ти, Г осподи.

И́же сия́нием ду́ха Свята́го ми́ра отреши́ся, преподо́бне,/ оби́тели достиза́еши и та́мо мирска́я мудрова́ния оставля́еши,/ ра́дуяся, крест свой взял еси́, и Влады́це после́довал еси́,/ и отто́ле к де́брем устреми́ся, по проро́ку, глаго́лющему:/ се удали́хся и водвори́хся, бе́гая, в пусты́ни,/ ра́дуяся, взыва́ю исхо́дную песнь Ти, Го́споди.

Любо́вию, блаже́нне, ко Христу́ весь ся сам уязви́,/ арома́том Свято́му Ду́ху положи́ся,/ пшени́ца зре́лая Боже́ственная, в жи́тницах Небе́сных водворя́ешися,/ и́же и преи́де от нас к Небе́сным жили́щем,/ и мо́щи твоя́ Боже́ственная в па́мять твою́ всем подаю́т исцеле́ния, притека́ющим к ра́це моще́й твои́х,/ Анто́ние, удобре́ние Боже́ственное.

Ви́дите блаже́ннаго и преподо́бнаго отца́ на́шего Анто́ния,/ ка́ко на земли́ а́нгельски поживе́/ и, плоть свою́ Христа́ ра́ди изнури́вше,/ весь, я́ко ши́пок, благоуха́ет исцеле́ньми,/ неоску́дно подава́ет их всем ве́рным, приходя́щим к ра́це моще́й его́,/ Анто́ние, по́мощниче те́плый.

Богоро́дичен: И́же в жена́х Чи́стая, Богоро́дице, Благослове́нная Мари́е,/ нескве́рная Отрокови́це, ца́рская Пала́то,/ И́же во утро́бу твою́ всели́ся Бог,/ моли́ся Сы́ну Твоему́ изба́вити нас от вся́каго обстоя́ния,/ да, ра́дующеся, вопие́м Сы́ну Твоему́ исхо́дную песнь, Ти, Го́споди.

Ин кано́н преподо́бнаго, глас 1.

Песнь 1

Ирмо́с:

Спасе́ лю́ди чудоде́йствуяй Влады́ка,/ мо́крую мо́ря во́лну оземлени́в дре́вле;/ во́лею же ро́ждся от Де́вы,/ стезю́ прохо́дну Небесе́ полага́ет нам./ его́же, по су́ществу́ ра́вна же Отцу́ и челове́ком, сла́вим.

Спаси́, преподо́бне, лю́ди согре́шшия, отча́янныя,/ побежде́ны враги́ душе́вными и теле́сными./ Напа́сти умно́жишася, и ско́рби прибли́жишася,/ изми́, Анто́ние блаже́нне, нас от всех бед/ и́же ко Христу́ твои́ми моли́твами.

Уже́ бо прибли́жишася к нам врази́ наши,/ сы́ны диа́воли, христиа́ном ненави́стницы,/ слу́зи сатани́ни, стре́лы угото́виша на ны,/ в бе́здну и ров хотя́ще нас ври́нути, живы́х поглоти́ти./ И несть уже́ нас к тому́ избавля́ющаго никого же./ Услы́ши нас, Анто́ние, помози́ нам.

Бе́ды а́довы, и ско́рби, и боле́зни обыдо́ша нас./ Врази́ наши на ны устреми́шася, и несть помога́ющего./ Анто́ние блаже́нне, свои́ми моли́твами изба́ви нас,/ да не коне́чне изги́бнем, Анто́ние преподо́бне, по́стником удобре́ние.

Богоро́дичен: О Де́во Свята́я,/ вся́ку призира́еши раб Свои́х моли́тву,/ ко и́же воплоще́нному из Тебе́ Сы́ну, Христу́ Бо́гу на́шему, не преста́й моля́ся,/ Ты бо еси́ похвала́ и заступле́ние христиа́ном, Богоро́дице Чи́стая.

Песнь 3

Ирмо́с:

В Го́споде Бо́зе мое́м/ се́рдце мое́ утверди́ся,/ тем немощству́ющии препоя́сашася си́лою.

О Го́споде Бо́зе на́шем утверди́ся се́рдце твое́, преподо́бне,/ невозвра́тным жела́нием после́довал еси́,/ не дал еси́ сна свои́ма очи́ма,/ до́ндеже до приста́нища, блаже́нне, ти́хаго дости́гл еси́,/ и во дворе́х живе́ши Боже́ственных, иде́же глас пра́зднующих весели́т вся,/ и та́мо Престо́лу, преблаже́нне, предстоя́/ и рог правосла́вных вознося́ свои́ми, преподо́бне, моли́твами.

О Христе́ укрепля́ем, вся кова́рства вра́жия, я́ко сеть, раздра́л еси́/ и бо́дренными моли́твами, бде́нием иску́сен яви́ся наста́вник,/ светоно́сным сия́нием просвеща́ем, Тро́ицы предстоя́ Престо́лу,/ о лю́дех на́ших моля́ся и рог вознося́,/ от нас же приими́ ма́лое ти прино́симое пе́ние.

Я́ко вои́стинну благоче́стия наста́вник,/ всем скорбя́щим те́плое утеше́ние,/ боля́щим исцели́тель, проро́чествы укра́шен,/ ученику́ твоему́ не́когда от врага́ побежде́ну бы́ти,/ по́мыслом утаи́ти тща́шеся от Тебе́,/ но ты, я́ко вся прове́де, и сего́ иску́сна и́нока в доброде́телех соверша́еши,/ Анто́ние, отце́м похвала́.

Благода́ть от Бо́га прия́т, о́тче Анто́ние,/ чудеса́ твори́ти и прогони́ти бе́сы от челове́к,/ и́же чудотворе́нием честны́я и святы́я ико́ны, и́же в Тро́ице Го́спода Бо́га на́шего Иису́са Христа́./ Сие́ тебе́ Бог воздая́ние дарова́,/ да яви́т, я́ко вои́стинну уго́дник еси́ его́./ И ны́не Престо́лу ея́ предстоя́,/ со дерзнове́нием моли́ся пода́ти стране́ на́шей побе́ды на враги́./ Ра́дующеся, пое́м ти: ра́дуйся, Анто́ние прехва́льне.

Богоро́дичен: О свяще́нная Де́во, духо́вный хра́ме,/ второ́е не́бо одушевле́нное,/ ца́рская багряни́ца внутрь чре́ва Ти истка́ся,/ Боже́ственная плоть Христа́ Бо́га на́шего,/ его́же моли́ изба́вити от всех обстоя́ний раб Свои́х/ Твои́ми, Де́во, моли́твами.

Ин ирмо́с:

При́зри на пе́ния рабо́в, Благоде́телю,/ врага́ смиря́я вознесе́нную горды́ню,/ нося́й же, Всеви́дче, греха́ превы́шше/ непоколе́блемо утвержде́ныя, Бла́же, певцы́/ основа́нием ве́ры.

Прииди́те, вси ру́сстии наро́ди, ко блаже́нному гро́бу честна́го Анто́ния,/ возопи́йте от души́ со слеза́ми./ Уже́, Анто́ние блаже́нне,/ врази́ на́ши душе́внии побежда́ют./ Предвари́, исхити́ ко Христу́ твои́ми моли́твами, преподо́бне Анто́ние.

Преподо́бне, в па́мять твою́ соше́дшеся, услы́ши нас, озло́бленных грехо́вными страстьми́./ Боже́ственными свои́ми чудесы́, я́ко мо́лниями, Це́рковь свою́ и страну́ свою́ осия́й,/ я́ко да изба́вимся твои́ми моли́твами в день неве́дения.

Богоно́се, со́лнца светле́й наста́ пра́здник твой, всеблаже́нне,/ озаря́я подсо́лнечную чудесы́,/ услы́ши нас, безпо́мощных, моля́щихтися,/ изба́ви нас от враг на́ших и стране́ побе́ды на враги́ дай./ От нас же приими́, а́ще и ма́лое, ти прино́симое моле́ние.

Богоро́дичен: Восхоте́ Бог челове́ческое естество́ обнови́ти,/ и́же иногда́ истле́вшее преступлени́ем Ада́млим,/ прекло́нь небеса ́и сни́де, в твою́, Де́во, нетле́нную утро́бу вселя́ется,/ Херуви́мское носи́ло яви́ся Небе́с ши́рше, Де́во, поноси́вши Зижди́теля Своего́,/ Того́ я́ко Ми́лостива моли́ спасти́ ду́ши́ на́ша.

Седа́лен, глас 6:

Я́ко вои́стинну и́стиннаго по́стника и Боже́ственнаго храбо́рника, ца́рскаго во́ина Анто́ния почти́м./ и́же посто́м, и бде́нием, и моли́твами те́ло свое́ удручи́в,/ от Христа́ вене́ц прия́т преподо́бнический./ И ны́не Престо́лу Святе́й Тро́ицы предстоя́,/ моли́ся изба́вити от бед ду́ши на́ша.

Богоро́дичен:

И́же осене́нием Свята́го ду́ха вопло́щшееся Сло́во Бо́жие во утро́бе Твое́й/ на спасе́ние на́ше воспои́м, ве́рнии,/ и́же честно́е Твое́ Рождество́, Неискусому́жная Отрокови́це, Богоро́дице Де́во,/ спаси́ всех, и́же воспева́ющих и кла́няющихся безсе́менному Рождеству́ Твоему́.

Песнь 4

Ирмо́с:

Твоего́ на земли́ явле́ния, Христе́ Бо́же,/ пропове́дая проро́к прише́ствие,/ с весе́лием вопия́ше:/ сла́ва си́ле Твое́й, Го́споди.

Твои́х услы́шав, преподо́бне, чуде́с ми́лости, кто не удиви́тся?/ и́бо и еще́ жи́ву ти су́щу,/ и от уз вся избавля́еши нереши́мых,/ и бе́сы от челове́к прогони́ши, Анто́ние, те́плый изба́вителю.

Твое́, о́тче, терпе́ние, и моли́твы, и труды́,/ мно́гажды бо от учени́к свои́х отходя́, те́ло свое́ на снеде́ние мши́цам преда́н, глаго́лаше бо о себе́:/ убо́гий Анто́ние,/ а́ще не мо́жеши претерпе́ти худы́я сея́ и ма́лыя мши́цы,/ ка́ко претерпи́ши огнь ве́чный?/ Но ты, о́тче, вся́ческая сла́достию претерпева́я,/ о́браз быв свои́м ученико́м, Анто́ние блаже́нне.

Терпе́ние твое́, блаже́нне, и моли́твы,/ я́ко о́блак, огне́м на Не́бо восхо́дя́,/ тем тя Всеви́дящее Око да́ром проро́чествия украша́ет и чудесы́ просвеща́ет,/ вселе́нную всю озаря́еши и во снех и виде́ниих свои́ми хода́тайствы ми́лостивно назира́еши,/ всяк, и́же приходя́, никто́же тощ отхо́дит от твоея́ честны́я раки,/ исцеле́ние получа́я, Анто́ние чудотво́рче.

Богоро́дичен: Еди́на Благослове́нная Чи́стая Де́во, в жена́х Всенепоро́чная Отрокови́це,/ и́же во утро́бу твою́ всели́ся Христо́с, Бог наш, неизрече́нно из Тебе́ про́йде на избавле́ние на́ше./ Да спасе́т вся́ческая, я́ко Человеколю́бец.

Ин ирмо́с:

Ро́да челове́ча обновле́ние/ дре́вле, поя, проро́к Авааку́м предвозвеща́ет,/ ви́дети неизрече́нно сподо́бився образ:/ млады́й Младе́нец бо из горы́ – Де́вы, изы́де/ люде́й во обновле́ние, Сло́во.

Род челове́ческий по до́лгу тя призыва́ет и блажи́т, Анто́ние,/ попо́лзшихся нас в лю́те беззако́нии,/ моли́твами свои́ми, я́ко ру́ку не́кую, простри́ и изба́ви нас, утопа́ющих лю́те беззако́нии на́шими,/ я́коже иногда́ челове́ка с ло́диею изба́вил еси́,/ та́ко и ны́не предвари́ и спаси́ ны.

Лю́те нам, гре́шным и отча́янным, беззако́нновавшим./ Услы́ши, Анто́ние блаже́нне, исхи́ти нас, преподо́бне, беззако́ний на́ших, да не в коне́ц поги́бнем./ Да, изба́вльшеся твои́ми моли́твами от враг ви́димых и неви́димых,/ ра́дующеся, взыва́ем ти, Анто́ние, те́плый по́мощниче.

О Анто́ние блаже́нне, и́же дар чуде́с прие́м от Бо́га,/ моли́ся Христу́ Бо́гу о непотре́бных и недосто́йных рабе́х твои́х, побежде́ни мы беззако́нии на́шими,/ да не в коне́ц поги́бнем,/ но твои́ми свяще́нными моли́твами изба́вимся от всех враг, ви́димых и неви́димых, Анто́ние прехва́льне.

Богоро́дичен: Пресла́вная Отрокови́це, Ма́ти Христа́ Бо́га на́шего,/ недове́домая глубина́, бра́ку неиску́сная,/ моли́ся Сы́ну Твоему́, Христу́ Бо́гу на́шему,/ и́же из Тебе́ ро́ждшемуся на спасе́ние на́ше,/ да изба́вит нас моли́твами Твои́ми от всех враг, Де́во По́мощнице.

Песнь 5

Ирмо́с:

Просвеще́ние Твое́, Го́споди, низпосли́ нам/ и от мглы прегреше́ний разреши́ ны, Бла́же,/ Твой мир да́руяй.

Просвети́ вся ра́зумом Боже́ственным/ и в пусты́ню всели́ся, Христа́ еди́наго возлюби́л еси́/ и того́ осия́нием Свята́го ду́ха прие́м дар чуде́с,/ избавля́ти вся в ну́ждах, и́же к тебе́ притека́ющия, Анто́ние Богоблаже́нне.

Просве́щся Христо́вым ра́зумом и шаро́вным писа́нием на ико́нах,/ ум к первоо́бразному возводя́ и отту́ду ра́зумом духо́вным и сия́нием Свята́го Ду́ха просвети́вся,/ до конца́ па́губныя стра́сти погуби́л еси́ бо́дренными моли́твами, Анто́ние многочуде́сне.

Просвети́ на́ша по́мыслы и ду́ши Боже́ственными моли́твами/ и отжени́ от нас вся́ку я́зю и всяк неду́г,/ от разли́чных нас неду́г и бед избавля́я,/ везде́ бо призыва́ем: бы́стро предваря́еши/ и, обходя́ вселе́нную, назира́еши чудесы́, Анто́ние моли́твенниче.

Богоро́дичен: Благослове́нная Чи́стая пресла́вная Де́во Богоро́дице, всем По́мощнице,/ и́же в твою́ Боже́ственную утро́бу всели́ся Христо́с, Бог наш,/ неразруши́му сохрани́,/ тем не преста́й моля́щи о пою́щих и хваля́щих Тя,/ Де́во, По́мощнице христиа́ном.

Ин ирмо́с:

Из но́щи дел омраче́нный пре́лести/ очище́ние нам, Христе́,/ бо́дренно ны́не соверша́ющим песнь, я́ко Благоде́телю,/ прииди́, подава́яй удо́бну стезю́,/ по не́йже востека́юще, обря́щем сла́ву.

Из но́щи вопие́м ти, о Анто́ние блаже́нне,/ темнота́ беззако́ния пости́же, и нощь грехо́вная обы́де нас./ Прибли́жихомся ко врато́м а́довым,/ и несть уже́ нам по́мощи./ В бе́здну грехо́вную после́днюю достиго́х,/ услы́ши, блаже́нне, исхити́, возведи́, изба́ви./ А́ще и Христа́ в коне́ц я́рость его́ разжего́хом,/ не оста́ви, Анто́ние блаже́нне,/ не преста́й за ны моли́тися, изба́вити от вся́кия напа́сти твои́ми моли́твами.

Страстьми́ душетле́нными растле́хомся/ и в коне́ц жития́ достиго́хом,/ ум наш изнемо́же, дух иструпи́ся,/ коле́ни оцепене́сте, о́чи исчезо́сте,/ ру́це ослабо́сте, и несть нас избавля́ющего./ И не отри́ни раб свои́х в коне́ц, да не грехи́ на́шими поги́бнем,/ исторгни, предвари́, Анто́ние чудоно́сче.

Во дни и в нощи́ погружа́еми есмы́ грехи́,/ оттряси́, блаже́нне, безбо́жия мглу души́ на́шея/ и бо́дренными си моли́твами озари́ на́ша ду́ши и сердца́./ Да не в коне́ц поги́бнем в беззако́ниих на́ших,/ да не до конца́ облада́ни бу́дем враги́ на́шими,/ ты бо еси́ на́ше избавле́ние.

Богоро́дичен: И́же во днех и в но́щех соблюда́еши вся Свои́ми хода́тайствы, Чи́стая Нескве́рная Де́во,/ и сохраня́еши от напа́сти и от беды́,/ не преста́й моля́ся Сы́ну Си Христу́ и Бо́гу на́шему,/ и́же изба́вити всех, испове́дающих Тя, Чи́стую Богоро́дицу.

Песнь 6

Ирмо́с:

Бу́рею грехо́вною погружа́емь,/ я́ко во чре́ве ки́тове содержи́мь,/ с проро́ком зову́ Ти:/ возведи́ от тли живо́т мой,/ Го́споди, и спаси́ мя.

Бу́ря воста́ша на ны./ Твои́ми моли́твами, преподо́бне, тишину́ сотвори́,/ отгоня́я вся́кий вид вра́жий,/ я́ко да возвели́чится Боже́ственный твой пра́здник,/ да ра́достию и весе́лием торжеству́ем, Анто́ние Богодухнове́нне.

Бу́ря беззако́ний нас пости́гши,/ окрили́ и просвети́ свои́ми моли́твами,/ да спа́саеши вся, и́же к тебе́ притека́ющия,/ и спа́саеши от треволне́ния и бу́ри/ вла́ющия помышле́нии жите́йскими,/ в приста́нища ти́хая окормля́еши/ и ко све́ту ра́зумом Боже́ственным наставля́еши,/ Анто́ние преди́вне, просвеща́я.

Бу́ря бесо́вская се́рдце мое́ возмуща́ет./ Не преда́ждь, Анто́ние блаже́нне, раба́ своего́, я́же к тебе́ притека́ющаго./ Тишину́ пода́ждь души́ и те́лу./ Да не пора́дуется супостат о поги́бели мое́й и па́губе/ и не пожре́т мене́ в пре́лести свое́й./ Предвари́ и спаси́ мя, Анто́ние, изба́вителю Боже́ственный.

Богоро́дичен: Бу́рею Боже́ственной разжени́ належа́щее от врага́ уны́ние, ле́ность души́ моея́,/ и́же Сын Твой и Бог наш нас ра́ди в твою́ Пречи́стую утро́бу всели́ся,/ распя́тие во́льное претерпе́л, и смерть вкуси́, и воскре́с тридне́вно,/ овча́ есмь Боже́ственная его́ ста́да,/ его́же искупи́ честно́ю Свое́ю кро́вию./ Не пре́зри мене́, Де́во Всесвята́я Богоро́дице, Те́плая По́мощнице.

Ин ирмо́с:

Обита́я Ио́на в преиспо́дних морски́х,/ приити́ моля́шеся и бу́рю утоли́ти,/ унзе́н же аз муча́щаго стрело́ю,/ Христу́ воспева́ю, зол губи́телю,/ ско́ро приити́ Тебе́ к мое́й ле́ности.

Пла́вающия беззако́нии свои́ми, уже́ потопля́еми есмы́/ и, я́ко ки́том, пожи́раеми есмы,/ врази́ наши угото́вишася на ны./ Анто́ние, не оста́ви, вску́ю отрева́еши моли́тву на́шу,/ доко́ле не при́зриши на воздыха́ние раб твои́х?/ Ве́лий еси́, блаже́нне,/ и ве́лия чудеса́ твоя́, и препросла́влен еси́, Анто́ние, изба́ви нас.

Пла́мень грехо́вный грехи́ на́шими разпали́ся,/ врази́ наши и окре́стнии ра́дуются о поги́бели на́шей./ И аз ти вопию́:/ бу́ди стена́ нам, от враг на́ших заступле́ние, Анто́ние./ Да не поги́бнем за беззако́ние грех на́ших, прехва́льне Анто́ние.

Пла́вающе в беззако́нии, и несть избавля́ющаго нас,/ осени́, и сохрани́, и воста́ви ны от потоплени́я грехо́вныя бу́ри,/ и возведи́ ко приста́нищу Боже́ственныя во́ли Христо́вы./ Ты бо еси́ по́мощь и утвержде́ние на́ше, Анто́ние достосла́вне.

Богоро́дичен: Потопи́хомся в беззако́ниях свои́х, и несть помога́ющаго,/ Чи́стая Отрокови́це, возста́ни на по́мощь на́шу,/ не преда́ждь достоя́ния Твоего́ сыново́м бесо́вским,/ Ты бо еси́ христиа́ном Засту́пница.

Конда́к, глас 3:

Христа́ еди́наго вожделе́в,/ и к тому́ любо́вию уязви́вся,/ и тому́ неотло́жным путе́м после́довал еси́./ Вся́кое жите́йское наслажде́ние возненави́дев,/ темже, я́ко второ́е со́лнце, чудесы́ сия́я,/ и сего́ ра́ди тя да́ром обогати́ Влады́ка,/ помина́й нас, чту́щих пресве́тлую па́мять твою́, да зове́м ти:/ ра́дуйся, Анто́ние, преподо́бне о́тче наш.

И́кос:

Ева́нгельский глас разуме́в, преподо́бне,/ вся мирска́я, я́ко суету́, вмени́, хотя́ше ми́ра отреши́тися и Христу́ еди́ному сожи́тельствовати./ Те́мже Всеви́дящее Око, с высоты́ на тя на зе́млю призре́в,/ и от и́га рабо́тнаго свобожда́ет тя,/ и от того́ засвя́заннаго разрешает./ Ра́дуйся, я́ко оста́вил еси́ мир и я́же суть в ми́ре,/ до́лу влеку́щая мудрова́ния, я́ко кал, оплева́в./ Ра́дуйся, я́ко дости́же в виде́нии А́нгела Самого́ Го́спода,/ и́же крест твой вручи́в тебе́ и рек ти:/ возьми́ крест свой, гряди́ во след Мене́,/ иди́ и подвиза́йся, не убо́йся ко́зней диа́вольских,/ бу́деши муж жела́ний духо́вных./ И после́довал еси́ Христу́ неразмышле́нным по́мыслом./ Ра́дуйся, я́ко дости́же монастыря́ Пахо́миевы пу́стыни./ И та́мо кре́пце на диа́вола устреми́ся,/ о́бразом а́нгельским просвеще́н,/ и отто́ле хотя́ тя Бог бо́льма чудесы́ просла́вити./ Ме́сто сие́ назна́менует, а́ки пе́рстом,/ и сотворя́ет тебе́ изы́ти из оби́тели./ Ра́дуйся, блаже́нне, бесо́вская ко́зни потреби́в поще́нием, и бде́нием, и моли́твою./ И на сем месте Христа́ просла́вил еси́ и це́рковь во и́мя Святы́я Тро́ицы воздви́гнул еси́./ Ра́дуйся, я́ко запале́ние огня́ уста́вил еси́/ Боже́ственнаго хра́ма, и Святы́я Живонача́льныя Тро́ицы о́браз, из огня́ изше́дши, на ру́це тебе́ да́стся./ Ра́дуйся, я́ко от Бо́га дар прия́т исцеля́ти неду́ги и прогони́ти бе́сы о́бразом Живонача́льныя Тро́ицы./ Ра́дуйся, я́ко да́ром проро́чествия от Бо́га укра́шен/ и учени́ка своего́ Филофе́я от соблажне́ния диа́вола исхити́л еси́./ Ра́дуйся, я́ко те́ло свое́ мши́цам и пауко́м на снеде́ние дал еси́./ Ра́дуйся, я́ко отше́ствие свое́ к Бо́гу предви́дя, ученико́м свои́м предглаго́леши./ Ра́дуйся, я́ко преста́вися к Невече́рнему́ Све́ту и Престо́лу Святы́я Тро́ицы предстои́ши,/ Ея́же за ны непреста́нно моли́./ Ра́дуйся, я́ко и по сме́рти бе́сы прого́ниши и́менем свои́м святы́м./ Ра́дуйся, я́ко челове́ка от потопле́ния изба́вил еси́ на мо́ри с ло́диею./ Ра́дуйся, настоя́теля свое́й оби́тели игу́мена Питири́ма от боле́зни изба́вил еси́/ и к це́ркви тща́ние твори́ти повеле́л еси́./ Ра́дуйся, я́ко духоно́снаго, и преблаже́ннаго, и преподо́бнаго вели́каго Анто́ния житию́ подража́л еси́./ Ра́дуйся, я́ко блаже́ннаго и преподо́бнаго отца́ Се́ргия житию́ после́довал еси́./ Ра́дуйся, и́ноков похвала́ и утвержде́ние и моли́твенник те́плый,/ и́же оте́чество свое́ сохраня́я от враг ненаве́туемо./ Ра́дуйся, А́нгелом сопресто́льник и преподо́бным сожи́тель./ Ра́дуйся, Анто́ние, преподо́бне о́тче наш.

Песнь 7

Ирмо́с:

Благослове́н еси́, Бо́же, в пещи́ о́троцы испове́даху,/ А́нгела же слы́шаху, вопию́ща к ним:/ се услы́шася моле́ние ва́ше.

Боже́ственным светоли́тием ра́зумом просвеще́н,/ духо́вно себе́ окрили́в, на враги́ боре́ния поста́вив кре́пко,/ му́жески подвиза́вся, и новоя́влен чудотво́рец показа́ся, к Христу́ взыва́ющий:/ благослове́н еси́, Го́споди, Бо́же оте́ц на́ших.

Боже́ственная и всечестна́я наста́ па́мять твоя́ днесь, преподо́бне Анто́ние,/ привлача́я ве́рных сердца́ любо́вию чуде́с твои́х/ ве́рно торжествова́ти чудеса́м твои́м/ и, ра́дующеся, Христо́ви взыва́ти:/ благослове́н еси́, Го́споди, Бо́же оте́ц на́ших.

Благослове́н еси́ от Христа́ Бо́га, преподо́бне Анто́ние,/ я́ко уловил еси́ ду́ши мно́гих во спасе́ние/ и, я́ко степе́ньми, от земли́ на Не́бо возводя́ и приводя́ ко Христу́ новым житие́м по́стных собо́ри, Христу́ вопию́щих:/ благослове́н еси́, Го́споди, Бо́же оте́ц на́ших.

Богоро́дичен: Благослове́нная Чи́стая Нетле́нная Отрокови́це,/ и́же на́шему спасе́нию Хода́таица яви́ся./ Огнезра́чный престо́л Боже́ственный, нань же Херуви́ми не мо́гут зре́ти, Тобо́ю нам, Влады́чице, избавле́ние показа́ся./ Те́мже Сы́ну Твоему́ вопие́м:/ благослове́н Бог оте́ц на́ших.

Ин ирмо́с:

Всецаря́ любо́вию уловле́ннии, о́троцы/ укори́ша безчи́сленно яря́щася мучи́теля злобо́жное языковре́дие,/ и́мже пови́нуся огнь мно́гий,/ Влады́це глаго́лющим:/ во ве́ки благослове́н еси́.

Всех Царя́ и Бо́га устыде́ся вочелове́чения прише́ствию,/ и сего́ ра́ди жесто́ким путе́м Небеси́ ше́ствовал еси́,/ и у́зкими и те́сными враты́ широ́кое и простра́нное Ца́рство восприя́л еси́,/ и ны́не, Свя́тей Тро́ицы Престо́лу предстоя́,/ не забу́ди нас, соверша́ющих свяще́нную ти па́мять,/ твои́ми моли́твами, глаго́лем ра́достно Влады́це:/ во ве́ки благослове́н еси́.

Царя́ Небе́снаго Престо́лу предстоя́, блаже́нне,/ непреста́нно моли́ся Це́ркви побе́ды дарова́ти,/ зачина́ющих с ней бра́ни погуби́/ и вся́каго врага́ бори́теля покори́,/ лю́ди от вся́кия беды́ и напа́сти изба́ви свои́ми моли́твами./ Да твои́ми хода́тайствы избавльшеся́ от враг ви́димых и неви́димых, ра́дующеся, Влады́це вопие́м:/ во ве́ки благослове́н еси́.

Ца́рствия ра́ди Небе́снаго ми́ра преоби́дев, сла́вне,/ на земли́ а́нгельски пожи́л еси́./ В се́лех пра́ведных водворя́яся, не оста́ви, не оскуде́вая моли́ся о рабе́х свои́х,/ и́же ве́рно святу́ю ти па́мять соверша́ющих,/ бед, и скорбе́й, и напа́стей изба́вити ста́до твое́, от волк, губя́щих е. Уже́ бо на ны вооружа́ются сы́ны ага́рянстии, стре́лы и лу́ци угото́виша в рука́х свои́х./ Но тех пога́нская на́шествия покори́ нам,/ я́ко да, изба́вльшеся́ от них твои́ми моли́твами, вопие́м Влады́це, глаго́люще:/ во ве́ки благослове́н еси́.

Богоро́дичен: Ца́рское седа́лище, одушевле́нный храм, Бо́жие сло́во, о Де́во,/ одр и пала́та, о Пренепоро́чная,/ о Ма́ти и Де́во Бо́жия, о ми́лостивая Влады́чице,/ возведи́ отча́янных, поста́ви па́дших, Твое́ бо есмь жре́бие,/ не оста́ви раб Твои́х в коне́ц, я́ко ми́лостива еси́,/ умоли́ Сы́на Твоего́ и Бо́га на́шего,/ да ра́достною душе́ю вопие́м:/ во ве́ки благослове́н еси́.

Песнь 8

Ирмо́с:

Во о́бразе А́нгела, я́вльшагося в пещи́ о́гненней песносло́вцем, Христа́ Бо́га по́йте, о́троцы,/ свяще́нницы, благослови́те,/ лю́дие, превозноси́те во вся ве́ки.

И́же во о́бразе А́нгела я́вльшагося тебе́ Бо́га, блаже́нне,/ глаго́люща в виде́нии и крест тебе́ твой да́вша в ру́це, глаго́люща:/ гряди́ по Мне и бу́ди иску́сен и́нок./ Сего́ ра́ди вельми́ подвиза́ся, преподо́бне,/ до́ндеже пучи́ну страсте́й изсуши́л еси́./ Тем и на Небесе́х обре́те мзду́ трудо́в свои́х, Христу́ вопия́ше:/ свяще́нницы, благослови́те, лю́дие, превозноси́те его́ во ве́ки.

И́же во о́бразе А́нгела Христо́ва я́вльшася тебе́, его́же возлюби́л еси́, преподо́бне,/ непреста́нными слеза́ми и моли́твами, до́ндеже я́ве сподо́бися нетле́нному блаже́нству,/ не оскуде́вая, моли́ся о и́же к тебе́ ве́рою призыва́ющих в па́мять твою́./ Ра́дующеся, пое́м Христо́ви:/ свяще́нницы, благослови́те,/ лю́дие, превозноси́те его́ во ве́ки.

И́же во о́бразе А́нгела Влады́це показа́вшу ти ся,/ того́ моли́, преподо́бне, оставле́ние пода́ти прегреше́нием,/ до́лги оста́вити и от лю́тыя беды́ изба́вити,/ мук, душе́вных и теле́сных,/ и враг, ви́димых и неви́димых, супоста́т на́ших отгна́ти/ е́же ко Христу́ твои́ми моли́твами,/ да в па́мять твою́, ра́дующеся, вопие́м Влады́це:/ свяще́нницы, благослови́те,/ лю́дие, превозноси́те его́ во ве́ки.

Богоро́дичен: А́нгелом иногда́ в пещь к де́тем соше́дшаго,/ Свое́ Влады́ка от Тебе́ проявля́ет, Дево, безсе́менное рождество́,/ я́коже бо огнь ю́ных не опали́,/ та́коже и Боже́ственный огнь Пречи́стаго Ти чре́ва не опали́,/ нам Тобо́ю яви́ся спасе́ние,/ и́же иногда́ Е́вою из ра́я изве́ржени бы́хом,/ Тобо́ю Влады́ка Христо́с в рай вся возводя́./ Тем, ра́дующеся, вопие́м:/ свяще́нницы, благослови́те,/ лю́дие, превозноси́те его́ во ве́ки.

Ин ирмо́с:

Утро́бу неопа́льно образу́ют Отрокови́цы/ и́же в ве́тсем опаля́емии ю́ноши,/ преесте́ственно ражда́ющую запечатле́нну./ Обоя́ же, содева́ющи чудоде́йство еди́но,/ лю́ди к пе́нию возста́вляет благода́ть.

У́тро ми возсия́й, преподо́бне,/ и́же помрачи́хся беззако́нии мои́ми лю́те,/ и несть поставля́ющаго мя,/ изба́ви и восхи́ти от волка мы́сленнаго,/ и просвети́ ду́шу мою́ помышле́нии Боже́ственными,/ и к све́ту ра́зума наста́ви.

Го́ре нам, согреши́вшим,/ и несть врача́, избавля́ющаго нас./ Услы́ши, Анто́ние, раб свои́х бе́дующих/ и не пре́зри в напа́стех и ско́рбех,/ изыми́ ны от зол, находя́щих нам, предвари́ и спаси́,/ исто́ргни и исхити́, возста́ви к ра́зуму благоче́стия.

Анто́ние благоче́стне, не пре́зри вопию́щих, до конца́ исчеза́ющих,/ к тебе́ бо прибего́хом, те́плому засту́пнику и помо́щнику на́шему./ Просвети́ на́ше малоу́мие, и нечу́вствие се́рдца на́шего приими́,/ я́ко оте́ц чадолюби́в, и не отри́ни моли́твы на́ша в коне́ц,/ к тебе́ бо прибего́х, те́плому засту́пнику и помо́щнику на́шему.

Богоро́дичен: О пресла́вная Де́во Богоро́дице,/ услы́ши воздыха́ние и сле́зы раб Твои́х,/ смири́хомся в персть и попра́ни бы́хом враги́ на́шими./ Доко́ле поноша́ют врази́ и́мя Сы́на Твоего́, Христа́ Бо́га на́шего, и Твое́,/ доко́ле не услы́шиши стена́ние и воздыха́ние раб Твои́х?/ Да посрамя́тся вси, явля́ющим рабо́м Твои́м зла́я,/ и кре́пость их сокруши́тся от вся́кия си́лы, и разуме́ют вои́стинну,/ я́ко еди́н Бог, Сын Твой, Госпо́дь/ и Ты еди́на, Богоро́дице, По́мощнице Христиа́ном.

Песнь 9

Ирмо́с:

Велича́ем вси/ человеколю́бие Твое́, Христе́, Спа́се наш,/ Сла́во раб Твои́х/ и Ве́нче ве́рных,/ возвели́чивый па́мять Ро́ждшия Тя.

Возвели́чим тя вси, Анто́ние преподо́бне,/ я́ко источа́еши чудеса́ и твори́ши исцеле́ния кому́ждо, к тебе́ притека́ющему,/ никто́ же бо тощ отхо́дит./ И ны́не поми́луй и изба́ви, сохрани́ всех, тебе́ призыва́ющих.

Возвели́чивый и просла́вивый на земли́ тя Христо́с Бог наш,/ я́коже рече́ Свои́ми святы́ми усты́:/ прославля́ющаго Мя просла́влю./ того́ моли́, блаже́нне Анто́ние, изба́вити от напа́стей и треволне́ния/ твою́ воспева́ющих па́мять, блаже́нне.

Воспе́х твою́ всечестну́ю и чудотво́рную равноа́нгельную па́мять/ на ха́ртии чи́стей и нескве́рненней се́рдца своего́./ Зако́н Влады́ки Христа́ Бо́га на́шего написа́л еси́ не на досках ка́менных,/ но на дсках се́рдца своего́./ Бо́га просла́вил еси́ в бре́нном телеси./ А́нгелы удиви́л еси́, челове́ки чудесы́ удиви́л еси́./ О мне же, гре́шнем и недосто́йнем, оскве́рнением и растле́нием умо́м, хода́тай бу́ди тепл в день после́дний,/ да изба́влюся твои́ми моли́твами ча́сти шу́ия/ и ста́ну одесну́ю Влады́ки, Христа́ Бо́га на́шего,/ е́же ти принесо́х от вели́ких ма́лая, Анто́ние, по́мощниче те́плый.

Богоро́дичен: Возвели́чим вси, Пречи́стая, Рождество́ Твое́, Препе́тая,/ и́же из боку́ Твое́ю про́йде Христо́с Бог наш,/ изба́вив от пре́лести диа́воли род челове́ческий,/ мене́ же сохрани́ Свои́ми моли́твами,/ е́же принесо́х Ти от вели́ких ма́лая, Богоро́дице Чи́стая.

Ин ирмо́с:

Люби́ти у́бо нам я́ко безбе́дное стра́хом/ удо́бее молча́ние,/ любо́вию же, Де́во,/ пе́сни тка́ти, спротяже́нно сложе́нныя, неудо́бно есть:/ но и, Ма́ти, си́лу, ели́ко есть произволе́ние, даждь.

Подо́ба́ет у́бо, преподо́бне, твою́ всечестну́ю па́мять торжество́вати/ и весели́тися, Христа́ сла́вяще,/ и́же нам дарова́вшаго свети́льника в после́днем на́шем ро́де,/ досто́йно хва́лим тя, Анто́ние.

Прехва́льне Анто́ние,/ помяни́ святу́ю оби́тель сию, и ста́до учени́к свои́х,/ и мене́, убо́гаго и недосто́йнаго раба́ твоего́ всем, преподо́бне святче Бо́жий,/ я́ко име́еши дерзнове́ние ко Святе́й Тро́ице,/ Ея́же непреста́нно моли́ изба́вити тя пою́щия вся́ких зол.

Преподо́бне Анто́ние,/ в па́мять свою́, и́же ве́рою ея́ соверша́ющих,/ предстоя́щих ти,/ да́руй оставле́ние согреше́нием и от напа́стей и от бед всех свободи́,/ я́ко да просла́вится па́мять твоя́, преподо́бне.

Богоро́дичен: Пресвята́я Де́во,/ бу́ди нам стена́, и по́мощь, и заступле́ние, и Воево́да́,/ и Предста́тель кре́пок от враг на́ших, и ору́жие непобеди́мо,/ я́ко да прославля́ем во вся ве́ки, ами́нь.

Свети́лен, глас 5:

Огне́м сия́ния Боже́ственнаго ра́зума просвети́вся Святы́я Тро́ицы,/ тем тя и Христо́с, я́ко со́лнце, на высоте́ поста́ви воздержа́ния,/ осиява́ти всю вселе́нную чудесы́,/ преподо́бным похвала́, и отце́м красота́,/ и наста́вником удобре́ние, Анто́ние Богодухнове́нне.

На хва́литех стихи́ры, глас 1.

Подо́бен: Прехва́льнии му́ченицы:

Прехва́льне Анто́ние, тя земля́ не потаи́ла есть,/ но Не́бо тя прия́т, и отверзо́шатися ра́йския две́ри,/ и ны́не, внутрь дре́ва живо́тнаго насыща́лся,/ Христо́ви моли́ся/ дарова́ти душа́м на́шим мир и ве́лию ми́лость.

Преподо́бне Анто́ние,/ кто не удиви́тся терпе́нию твоему́ и му́жеству,/ моли́тве же и посту́, и́же сто́йкому твоему́ житию́,/ вся бо, преподо́бне, восприя́тия ра́ди бу́дущия жи́зни,/ я́ко о чуже́м телеси́ претерпева́я./ И ны́не, на Небесе́х со А́нгелы предстоя́ Христо́ви,/ моли́ся дарова́ти душа́м на́шим мир и ве́лию ми́лость.

Преподо́бне и Богоно́сне Анто́ние,/ храм Ду́ху Пресвято́му был еси́,/ и ра́ка твоя́ полна чуде́с яви́ся,/ ученицы́ бо твои́ красу́ются е́ю/ па́че ка́мения прозра́чна, и би́сера,/ и зла́та многоце́ннаго,/ неоску́дно бо подава́еши всем исцеле́ния./ И ны́не пред Престо́лом Влады́ки, всех Творца́, предстои́ши,/ ему́ же моли́ся/ дарова́ти душа́м на́шим мир и ве́лию ми́лость.

Ины стихи́ры, глас 8.

Подо́бен: Что вас нарече́м, святи́и:

Что тя нареку́, Анто́ние?/ Херуви́м ли, я́ко на тебе́ почи́л есть Христо́с?/ Серафи́м ли, я́ко непреста́нно просла́вил еси́ его́?/ А́нгела ли тя нареку́, я́ко а́нгельски пожи́л еси́/ и плоть свою́ возненави́дел еси́?/ Мно́га твоя́ чудеса́, а бо́льша дарова́ния,/ моли́ спасти́ся душа́м на́шим.

Что тя нарече́м, Анто́ние прехва́льне?/ на земли́, я́ко беспло́тен, пожи́л еси́/ и на Небеса ́взы́де, то́чиши исцеле́ния, и твори́ши чудеса́,/ и отго́ниши ду́хи лука́выя от челове́к./ Мно́га твоя́ чудеса́, а бо́льша ти дарова́ния,/ моли́ спасти́ся душа́м на́шим.

Что тя нареку́, Анто́ние прехва́льне?/ кла́дязь неизчерпа́емый чуде́с,/ мо́ре Боже́ственнаго дарова́ния,/ жа́жду лю́тую утоля́ющее и сердца́ веселя́щее,/ тьму лю́тую от души́ отгоня́еши неве́дения/ и просвеща́еши вся све́том ра́зума./ Мно́га твоя́ чудеса́, а бо́льша дарова́ния,/ моли́ся спасти́ся душа́м на́шим.

Сла́ва, глас 7:

Прииди́те, и́ночествующих многочи́сленное по́стник сосло́вие, днесь/ Анто́ния, доброде́тели подража́теля,/ пе́сньми и пе́ньми воспои́м/ и, честну́ю его́ и многоцеле́бную и чудотво́рную ра́ку обстоя́ще,/ любе́зно облобыза́ем, глаго́люще:/ ра́дуйся, пресла́вне Анто́ние,/ отце́м свои́м пресве́тлый свети́льниче;/ ра́дуйся, я́ко чисте́йшему Све́ту совокупи́вся;/ ра́дуйся, я́ко Тро́ицы предстоя́ со А́нгелы,/ ея́ же непреста́нно моли́ о нас, соверша́ющих святу́ю па́мять твою́,/ дарова́ти душа́м на́шим мир и ве́лию ми́лость.

И ны́не, Богоро́дичен по гласу.

Любо́вию, и́же ко свято́му, распала́ем, сего́ ра́ди написа́х втору́ю песнь, да а́ще, кто люби́т свята́го, глаго́лет в келлии, поне́же на Собо́ре святы́ми отцы́ не уста́влено, кроме́ Вели́каго Поста́

Глас 4

Песнь 2

Ирмо́с:

Ви́дите, ви́дите, я́ко Аз есмь Бог, умерщвля́й и животворя́й.

Ви́дите, ви́дите, и́же пожи́вшии Богоуго́дно Бо́гови,/ ка́ко и по сме́рти их Бог прославля́ет,/ па́че же блаже́ннаго отца́ на́шего Анто́ния,/ и́же в бре́нном телеси́ просия́вша,/ о́тче блаже́нне, о нас бу́ди к Бо́гу хода́тай и по́стное вре́мя наста́ви небе́дно прейти́,/ да твои́ми моли́твами, ра́дующеся, дости́гнем тридне́внаго Воскресе́ния.

Ви́дите, ка́ко и́же на земли́ подвиза́вшеся и плоть свою́ ни во что же вмени́вше/ в су́етней и вре́менней сей жи́зни бу́дущия ра́ди жи́зни,/ и́же тех бо́льми чуде́с Христо́с обогати́,/ кольми́ же па́че блаже́ннаго отца́ на́шего Анто́ния Христо́с на земли́ чудесы́ просла́ви,/ о́тче Анто́ние, по́стником удобре́ние.

Ви́дите, ви́дите чудотво́рца и блаже́ннаго отца́ Анто́ния,/ ка́ко на земли́ а́нгельски поживе́ и сего́ ра́ди прие́м от Бо́га дар чуде́с,/ исцеля́ти неду́ги и отгони́ти бе́сы,/ Анто́ние многочуде́сне.

Ви́дите, ви́дите, я́ко Аз есмь Бог,/ от Де́вы воплоти́выйся и роди́выйся на спасе́ние челове́ком,/ да спасу́ мир от пре́лести,/ на крест вознесы́йся, и да ви́дят язы́цы и разуме́ют,/ я́ко Аз есмь избавля́яй, я́ко си́лен, о́бластию Свое́ю.

Ипакои́, глас 6:

Христа́ Влады́ки пронарече́ния соверши́шася,/ я́коже рече́ Свои́ми святы́ми усты́ иуде́ем:/ я́ко оты́мется от вас Ца́рствие Бо́жие и да́стся язы́ку, творя́щему плоды́ его́./ Вои́стинну нам дастся сло́во Бо́жие,/ спасе́ние Росси́йстей земли́, и́же преподо́бных оте́ц плоды́ Бо́гу принесо́шася,/ того́, преподо́бне Анто́ние, Све́ту Невече́рнему́ после́довал еси́.

Стихи́ра Ева́нгельская, глас 6:

Влады́ко Христо́с бла́говеству́ет/ и я́ве глаго́лет всем:/ вся Мне преда́на бы́ша от Отца́ Моего́./ И кто весть, Кто есть Оте́ц/ и Кто есть Сын?/ Никто́же зна́ет Сы́на, то́кмо Оте́ц,/ ни Отца́ кто зна́ет, то́кмо Сын,/ и ему́же а́ще во́лит Сын откры́ти,/ прииди́те ко Мне, вси тружда́ющиися и обремене́ннии,/ и Аз вы упоко́ю,/ и́же Мене́ ра́ди взя́вше и́го Мое́ благо́е,/ и да́рую сим Ца́рство Мое́ Небе́сное./ тому́ моли́ся, блаже́нне Анто́ние,/ спасти́ ду́ши на́ша.

Моли́тва

О всеблаже́нне о́тче наш, преподо́бне Анто́ние, те́плый засту́пниче и по́мощниче с ве́рою призыва́ющим тя, изба́ви нас моли́твами си ко Го́споду от вся́каго обстоя́ния бесо́вскаго и изми́ нас, окая́нных и недосто́йных рабо́в твои́х. О чудотв́орче Анто́ние, от уст па́губнаго зми́я, зия́ющаго пожре́ти нас и свести́ во ад живы́х, прости́ нас, о́тче, ели́ко согреши́хом ти, и и́и нас от греха́ и вся́кия напа́сти, приходя́щия грехо́в ра́ди на́ших. Пода́ждь душа́м на́шим утеше́ния, всади́ в се́рдца́ на́ша страх Суда́ Бо́жия и изба́ви нас от враго́в на́ших, ви́димых и неви́димых, тебе́ бо и́мамы те́пла моли́твенника и засту́пника, и́же в бе́дах су́щии и в грехи́ впа́дшия. Ты бо яви́ся столп благоче́стия, воздержа́ния пра́вило, смиренному́дрия о́браз, целому́дрия наста́вник, убо́гим и сирота́м засту́пник и храни́тель прибега́ющим к тебе́. Кто у́бо по досто́и́нству мо́жет похвали́ти равноа́нгельное твое́ житие́ и кто мо́жет изчести́ твои́х трудо́в по́двизи и сле́зы ко Го́споду, вои́стинну я́ко со́лнца светле́йши возсия́ша твоя́ исправле́ния. Ревни́тель бо бысть всех святы́х преподо́бных и пра́ведных и учи́тель духо́вный, побо́рник, и засту́пник, и моли́твенник, Пресвяте́й Тро́ице предстоя́. Ты я́ко ми́р оста́вил еси́ и я́же в ми́ре, и нас в покая́ние приведи́ ко Го́споду моли́твами си, о́тче всечестне́йший, да и мы сподо́бимся ве́чных благи́х, иде́же наслажда́ешися Небе́сныя сла́вы жела́емаго Иису́са Христа́, И́стиннаго Бо́га на́шего и Сладча́йшаго Влады́ки и Го́спода всех. Ему́же подоба́ет вся́кая сла́ва, честь и поклонение со Безнача́льным его́ Отце́м и Пресвяты́м, и Благи́м, и Животворя́щим его́ Ду́хом, ны́не, и при́сно, и во ве́ки веков. Ами́нь.

Преподо́бнаго отца́ на́шего Ни́ла, и́же на е́зере Селигере, на о́строве, зово́мом Столобно́е

НА МА́ЛОЙ ВЕЧЕ́РНИ

Стихи́ры, глас 1.

Подо́бен: Небе́сных чино́в:

Наста́, Богоно́се,/ со́лнца светле́йший твой пра́здник,/ озаря́ет приходя́щия к тебе́ ве́рою,/ и безсме́ртием облагоуха́ет,/ и душа́м источа́ет исцеле́ние, Ни́ле преподо́бне,/ моли́твенниче о душа́х на́ших.

Чу́вственный стра́сти теле́сныя/ укроти́в воздержа́ния броздами, чудоде́йственниче Ни́ле,/ и, ре́вность Безпло́тных во пло́ти показа́в,/ вся плотска́я жела́ния ду́хови пови́нул еси́./ Тем ны́не в Небе́сных селе́ниих водворя́лся,/ моли́ о душа́х на́ших.

Блаже́нне Ни́ле,/ основа́ние положи́в добро́ де́телей/ и ве́тхаго челове́ка совле́кся с похотьми́,/ во Христа́ облеклся еси́ вои́стинну./ Тем и победи́л еси́, преподо́бне,/ мно́гая враго́в ополче́ния,/ наста́вник мона́хом быв,/ моли́ спасти́ся душа́м на́шим.

Сла́ва, глас 8:

Преподо́бне и Богоно́се о́тче наш Ни́ле,/ ты усе́рдно в пусты́ни подвиза́лся еси́,/ любве́ ра́ди Го́спода своего́ и воздая́ния ра́ди,/ е́же со все́ми святы́ми бу́дущих его́ благ,/ и житие́м свои́м по́стническим,/ я́ко А́нгел на земли́, челове́ки удиви́л еси́,/ бе́сы же и всю си́лу их устраши́л еси́, и воста́ющия на тя злотво́рцы,/ неми́лостивыя разбо́йники по́мощию Бо́жиею посрами́л еси́./ И ны́не, преподо́бне, уго́дниче Христо́в,/ о́тче наш Ни́ле,/ моли́ о нас всеми́лостиваго Бо́га/ пода́ти ми́р ми́рови/ и душа́м на́шим ве́лию ми́лость.

И ны́не, Богоро́дичен.

На стихо́вне стихи́ры, глас 2.

Подо́бен: До́ме Евфра́фов:

Дом и селе́ние Отцу́ Безнача́льному был еси́,/ преподо́бне Ни́ле, о́тче наш,/ того́ моли́ пода́ти ми́р Це́ркви его́/ и душа́м на́шим ве́лию ми́лость.

Стих: Честна́ пред Го́сподем/ смерть преподо́бных Его́.

Дом и оби́тель Безнача́льнаго Отца́/ Единоро́дному Сы́ну был еси́,/ преподо́бне Ни́ле, о́тче наш./ Того́ моли́ душа́м на́шим пода́ти ве́лию ми́лость.

Стих: Блаже́н муж, боя́йся Г оспода,/ в за́поведех Его́ восхо́щет зело́.

Дом и жили́ще Ду́ху Пресвято́му был еси́,/ преподо́бне Ни́ле, отче́ наш./ Того́ моли́ пода́ти ми́р всему́ Правосла́вию/ и душа́м на́шим ве́лию ми́лость.

Сла́ва, подо́бен то́йже:

Дом и пребыва́ние Пресвяте́й и Безнача́льней Тро́ице был еси́,/ преподо́бне Ни́ле, о́тче наш./ Ю́же моли́ ми́р оби́тели твоей пода́ти/ и душа́м на́шим ве́лию ми́лость.

И ны́не, Богоро́дичен. Подо́бен то́йже:

Дом и храм прекра́сен воздви́жен во оби́тели твоей, преподо́бне,/ в похвалу́ и сла́ву Пресвя́тей Богоро́дице Мари́и./ ю́же моли́, преподо́бне о́тче наш Ни́ле,/ пода́ти душа́м на́шим ве́лию ми́лость.

Тропа́рь пи́сан на вели́цей вече́рни

Сла́ва, и ны́не, Богоро́дичен: Е́же от ве́ка утае́нное:

НА ВЕЛИ́ЦЕЙ ВЕЧЕ́РНИ

Пое́м Блаже́н муж: 1-й антифо́н. На Го́споди, воззва́х: стихи́ры на 8, глас 4.

Подо́бен: Я́ко до́бля:

В пусты́ню дости́гл еси́,/ преблаги́м Бо́гом наставля́емь, преподо́бне о́тче Ни́ле,/ я́ко дре́во, при вода́х насажде́н,/ день и нощь поуча́яся в зако́не Госпо́дни,/ плоды́ воздержа́ния принеся́ еси́ Всесвяте́й Тро́ице,/ ю́же, преподо́бне, моли́/ ве́рою притека́ющим к ра́це моще́й твои́х/ благода́ть исцеле́ния дарова́ти,/ и спасти́, и просвети́ти ду́ши на́ша.

В пусты́ню всели́вся,/ преблаги́м Христо́м Бо́гом наставля́емь,/ преподо́бне о́тче Ни́ле,/ в не́йже, я́ко дре́во при вода́х, насади́вся/ и в зако́не Госпо́дни поучи́вся день и нощь,/ плоды́ духо́вныя принеся́ еси́ Христу́ Бо́гу./ его́же моли́ о притека́ющих с ве́рою к ра́це моще́й твои́х/ благода́ть исцеле́ний дарова́ти,/ и спасти́, и просвети́ти ду́ши́ на́ша.

В пусты́ню водвори́лся еси́/ благода́тию Христа́ Бо́га,/ преблаже́нне о́тче Ни́ле,/ в не́йже, я́ко лоза́ бла́гопло́дная,/ при вода́х насажде́н еси́,/ плоды́ Христу́ Бо́гу принося́/ и к жи́зни ве́чней/ наставля́я ве́рою пра́зднующих честну́ю па́мять твою́,/ моли́ Христа́ Бо́га/ от тли и бед изба́витися нам,/ и спасти́, и просвети́ти ду́ши́ на́ша.

Сла́ва, глас 8:

Преподо́бне о́тче Ни́ле,/ ты в зако́не Госпо́дни день и нощь поучи́вся,/ досто́ин быв дре́ва живо́тнаго ветвь бы́ти,/ и плод твой страда́ньми и венцы́ процвете́,/ дерзнове́ние име́я к Подвигополо́жнику Христу́ Бо́гу,/ проси́ и нам очище́ния грехо́в и ве́лия ми́лости.

И ны́не, Богоро́дичен: Царь Небе́сный:

Вход, проки́мен дне и чте́ния 3

(зри день 5-й)

На литии́ стихи́ры, глас 8:

Ра́дуйся, свети́льниче пресве́тлый,/ преподо́бне и Богоно́се о́тче наш Ни́ле,/ ты на земли́, я́ко безпло́тен, пожи́л еси́,/ посто́м и моли́твою Бо́га себе́ ми́лостива сотвори́л еси́/ и дар от него́ прозре́ния и проро́чества прия́л еси́,/ и по преста́влении чудеса́ от святы́х моще́й твои́х,/ я́ко от исто́чника, преизоби́льно источа́ются,/ и с ве́рою приходя́щим,/ разли́чными неду́ги одержи́мии, исцеле́ваются. И ны́не, преподо́бне о́тче наш Ни́ле,/ моли́ о нас Христа́ Бо́га/ пода́ти ми́р ми́рови/ и душа́м на́шим ве́лию ми́лость.

Ра́дуйся, Русския земли́ свети́ло незаходи́мое,/ преподо́бне о́тче наш Ни́ле,/ ты в пусты́ни трина́десять лет/ Го́спода ра́ди своего́ терпели́во подвиза́лся еси́,/ и плотски́я стра́сти воздержа́нием свои́м умертви́л еси́,/ и в ней, мно́го пострада́в/ от нача́льника зло́бы, губи́теля врага́,/ с ним му́жественно брался еси́,/ и по́мощию Бо́жиею, и свое́ю к Бо́гу те́плою ве́рою/ все его́ злокознство, я́ко паучи́ну, до конца́ расто́ргнул еси́,/ и посрами́л еси́ всеси́льною по́мощию Пречи́стыя Богоро́дицы/ прише́дшия на тя злы́я разбо́йники,/ и ны́не, преподо́бне о́тче наш Ни́ле,/ не преста́й о нас моля́ Христа́ Бо́га/ дарова́ти ми́р ми́ру/ и душа́м на́шим ве́лию ми́лость.

Ра́дуйся, преподо́бне о́тче наш Ни́ле,/ ты на о́стров Столобн́ое,/ я́ко на о́блак, ра́дуяся, возше́л еси́/ и на нем моли́твою и посто́м,/ чистото́ю и благогове́нием,/ смире́нием и беззло́бием и все́ми доброде́тельми,/ я́ко А́нгел, подвиза́лся еси́ во вре́менней сей жи́зни:/ два́десять бо и седмь лет препроводи́л еси́,/ соверша́я за́поведи Госпо́дни/ и устрояя себе́ на Небесе́х пала́ты нерукотворе́ны и ве́чны,/ о ни́хже рече́но бысть:/ и́хже око не ви́де, и ухо не слы́ша,/ и на се́рдце челове́ку не взыдо́ша,/ я́же угото́ва Бог лю́бящим его́;/ а́може и пресели́лся еси́ к ве́чным оби́телем онем,/ и прия́т тя Госпо́дь с пра́ведными,/ и́хже житию́ после́довал еси́./ Ра́ка же и святы́я мо́щи твоя́, я́ко мо́ре,/ с ве́рою приходя́щим неоску́дно исцеле́ния излива́ют,/ и мно́зи мно́гия и разли́чныя цельбы́ прие́млют:/ слепи́и прозира́ют, глуси́и слы́шат,/ слуки́я исправля́ются, прокаже́ннии очища́ются,/ неми́и благоглаго́ливи быва́ют,/ бе́си же от челове́к моли́твами твои́ми отбега́ют./ И ны́не, преподо́бне о́тче наш Ни́ле,/ не преста́й моля́ся Христу́ Бо́гу/ о ста́де и о оби́тели свое́й/ и душа́м на́шим пода́ти ми́р и ве́лию ми́лость.

Сла́ва, глас 8:

Что ти принесе́м, преподо́бне,/ я́ко неоску́дно излива́еши тре́бующим благода́ть?/ и́бо те́ло твое́, о́тче,/ чистоты́ жили́ще показа́ся./ Тем и, посеще́нием Свята́го ду́ха озари́вшеся,/ нетле́нно в на́ше благослове́ние соблюда́ется,/ благода́тных луч сия́ний испо́лнено,/ и́хже бе́сове не терпя́т зре́ти, дале́че отбега́ют,/ да́нныя ти благода́ти трепе́щут,/ и́хже от душ на́ших и теле́с отжени́, мо́лимся,/ и ненаве́тны нас при́сно соблюди́/ от тех ла́яния твои́ми моли́твами.

И ны́не, Богоро́дичен: Ра́дуйся, вселе́нныя Похвало́:

На стихо́вне стихи́ры, глас 8.

Подо́бен: О, пресла́внаго чудесе́!

Преподо́бне и Богоно́се о́тче наш Ни́ле,/ ты от ю́ности отве́рглся еси́ ми́ра и сро́дник свои́х/ и прия́л еси́ о́браз А́нгельский и́ноческаго жития́/ во оби́тели свята́го апо́стола и Евангели́ста Иоа́нна Богосло́ва/ и преподо́бнаго отца́ на́шего Са́ввы, и́же в Кри́пцах,/ и в ней подвиза́вся смире́нием и послуша́нием,/ я́ко до́брый во́ин Христо́в./ того́ о нас моли́, преподо́бне, со святы́ми си́ми/ пода́ти грехо́в оставле́ние/ и душа́м на́шим ве́лию ми́лость.

Стих: Честна́ пред Го́сподем/ смерть преподо́бных Его́.

Преподо́бне и равноа́нгельне о́тче наш Ни́ле,/ ты, от ю́ности Христа́ возлюби́в,/ и ле́гкое и́го его́ на ся восприя́л еси́,/ и невозвра́тным по́мыслом после́довал еси́ стопа́м Влады́ки своего́,/ и прия́л еси́ от него́ трудо́м свои́м воздая́ния,/ е́же с Ним пребыва́ние, и со а́нгелы ликова́ние,/ и со все́ми святы́ми ра́дование;/ того́ моли́ о нас, преподо́бне,/ пода́ти грехо́в проще́ние/ и душа́м на́шим ве́лию ми́лость.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Преподо́бне и Богому́дре о́тче наш Ни́ле,/ ты Христа́ ра́ди от ю́ности в пусты́ню всели́лся еси́,/ и в ней, я́ко безпло́тен, на стра́сти плотски́я подвиза́лся еси́/ посто́м, и моли́твою, и святы́м смире́нием,/ и нача́льника зло́бы, врага́,/ с кова́рствы его́ до конца́ низложи́л еси́,/ и ны́не, преподо́бне, предстоя́ у Престо́ла всех Царя́,/ моли́ся о почита́ющих свяще́нную и многора́достную па́мять твою́/ пода́ти грехо́в оставле́ние/ и душа́м на́шим ве́лию ми́лость.

Сла́ва, глас то́йже:

Мона́хов мно́жества,/ наста́вника тя почита́ем, о́тче наш Ни́ле:/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ а́нгелов собесе́дниче, преподо́бных соприча́стниче и пра́ведных;/ с ни́миже моли́ся Го́споду/ поми́ловатися душа́м на́шим.

И ны́не, Богоро́дичен: Безневе́стная Де́во:

На благослове́нии хле́бов тропа́рь свята́го два́жды и Богоро́дице Де́во: еди́ножды.

Тропа́рь, глас 4:

Я́ко свети́льник всесве́тел,/ яви́лся еси́ во о́строве Селиге́ра е́зера,/ преподо́бне о́тче Ни́ле,/ ты бо, крест Христо́в от ю́ности свое́й на ра́мо взем,/ усе́рдно тому́ после́довал еси́,/ чистото́ю Бо́гови прибли́жився,/ отону́дуже и чуде́с дарова́нием обогати́лся еси́./ Тем и мы, притека́юще к ра́це моще́й твои́х, уми́льно глаго́лем:/ о́тче преподо́бне,/ моли́ Христа́ Бо́га/ спасти́ся душа́м на́шим.

НА У́ТРЕНИ

На Бог Госпо́дь: тропа́рь преподо́бному два́жды. Сла́ва, и ны́не, Богоро́дичен.

По 1-м стихосло́вии, седа́лен, глас 4.

Подо́бен: Ско́ро предвари́:

Зва́нию Го́спода своего́ после́довал еси́,/ ми́р оста́вив, и вся, я́же в ми́ре, красова́ния, преблаже́нне Ни́ле,/ претерпе́л еси́ усе́рдно пусты́нное озлобле́ние,/ полки́ же бесо́вския победи́л еси́ му́жески;/ те́мже па́мять твою́ при́сно восхваля́ем пе́сньми ве́рно.

Сла́ва, и ны́не, Богоро́дичен:

Обнови́ла еси́, Чи́стая, Боже́ственным Рождество́м Твои́м/ истле́вшее страстьми́ земноро́дных существо́/ и возста́вила еси́ от сме́рти к жи́зни нетле́ния./ Те́мже Тя по до́лгу блажи́м вси, Де́во Препросла́вленная,/ я́коже прорекла е́си.

По 2-м стихосло́вии, седа́лен, глас 5.

Подо́бен: Собезнача́льное Сло́во:

По́стника Госпо́дня пе́сньми почти́м,/ я́ко умертви́вша вся прило́ги страсте́й/ воздержа́нием тве́рдым и кре́пким терпе́нием вои́стинну,/ и посрами́вша зело́ сопроти́внаго всю горды́ню,/ и ны́не моля́щася Го́сподеви поми́ловатися душа́м на́шим.

Сла́ва, и ны́не, Богоро́дичен:

Стра́шно чу́до зача́тия и несказа́нен о́браз Рождества́/ в Тебе́ позна́ся, Чи́стая Присноде́во,/ ужаса́ет ми ум и удивля́ет помышле́ния;/ сла́ва Твоя́, Богоро́дице, всем простре́ся на спасе́ние душ на́ших.

По полиеле́и седа́лен, глас 1.

Подо́бен: Гроб Твой, Спа́се:

Погре́бл еси́ страсте́й все воста́ние умерщвле́нием пло́ти, свяще́нный о́тче,/ жи́знь безконе́чную по сме́рти прия́л еси́;/ те́мже днесь Христо́ва Це́рковь/ пра́зднует твою́ досточу́днуто па́мять, преподо́бным укра́шение.

Сла́ва, и ны́не, Богоро́дичен:

Наста́ви нас на путь покая́ния,/ уклоня́ющихся при́сно к безпу́тиям зол и Преблага́го Бо́га прогне́вающих,/ Неискусобра́чная Благослове́нная Мари́е,/ прибе́жище отча́янных челове́ков, Бо́жие селе́ние.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем:

Стих: Что возда́м Го́сподеви о всех: Вся́кое дыха́ние: Ева́нгелие от Матфе́я, зача́ло 43.

По 50-м псалме́, стихи́ра, глас 8:

Преподо́бне о́тче Ни́ле,/ ми́ра красоты́ и пи́щи сла́достныя возненави́дев,/ и́ноческое житие́ па́че возлюби́л еси́/ и, А́нгелом собесе́дник быв,/ свети́льник многосве́тлый яви́лся еси́/ чудесми́, я́ко со́лнце, сия́я./ Тем всех нас помина́й,/ соверша́ющих свяще́нную па́мять твою́:/ мы бо ча́да твоя́/ и о́вцы слове́сных ти уче́ний/ и тя на по́мощь призыва́ем,/ прося́ще тобо́ю прия́ти ми́р и ве́лию ми́лость.

Кано́н Богоро́дицы, со ирмосо́м на 6, и свято́му еди́н кано́н, на 8, глас 4.

Песнь 1

Ирмо́с:

Отве́рзу уста́ моя́,/ и наполня́тся ду́ха,/ и сло́во отры́гну Цари́це Ма́тери/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Смири́лся еси́ Христа́ ра́ди, о́тче Ни́ле,/ и, крест взем, оте́чества и сро́дник бе́гал еси́;/ отню́дуже в пусты́ню вшед/ и в ней трудолю́бно подвиза́лся еси́, преподо́бне.

От ю́ности своей, о́тче Ни́ле, ум к Бо́гу впери́в,/ и тле́нными нетле́нная, я́ко до́брый купе́ц, искупи́л еси́,/ те́мже, ны́не соше́дшеся, па́мять твою́ почита́ем.

Христо́вым раче́нием, о́тче Ни́ле, па́че огня́ распала́емь,/ настоя́щая, я́ко ничто́же су́щи, презре́л еси́,/ и того́ ра́ди в поко́ище всели́ся,/ иде́же пра́ведных ду́ши веселя́тся.

Богоро́дичен: Боля́ща исцели́ душе́ю же и те́лом, Влады́чице,/ раба́ Твоего́ блаже́ннаго Ни́ла моле́нием:/ Тебе́ бо Предста́тельницу вси су́щии в печа́лех стяжа́хом,/ я́ко ро́ждшую Спасе́ние на́ше.

Катава́сия: Христо́с ражда́ется:

Песнь 3

Ирмо́с:

Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твоей сла́ве/ венце́в сла́вы сподо́би.

Сна твои́м очесе́м не дал еси́, блаже́нне Ни́ле, ни ве́ждом дрема́ния,/ до́ндеже сподо́бился еси́ пра́ведных селе́ния,/ я́же угото́ва Бог лю́бящим его́.

Бо́дренными твои́ми моли́твами, о́тче Ни́ле,/ и жесто́ким воздержа́нием Бо́гу на земли́ до́бре угоди́л еси́,/ и сего́ ра́ди быв стра́шен враго́м и сла́вен челове́ком.

Ра́йскую жи́знь и та́мо святы́м весе́лие/ всегда́ во у́ме свое́м помышля́я, преподо́бне,/ те́мже во слеза́х и в воздыха́нии всю жи́знь свою́, о́тче Ни́ле, проше́л еси́/ и сего́ ра́ди по сме́рти от Христа́ чудесы́ просла́вися.

Богоро́дичен: Источа́еши исцеле́нием струи́ боля́щим, Де́во, всю́ду:/ Тя бо исто́чник показа́ исцеле́ний, Влады́чице,/ и́же ми́лости Госпо́дь, из Тебе́ рожде́йся па́че ума́.

Седа́лен, глас 4.

Подо́бен: Ско́ро предвари́:

Стра́стное покори́л еси́ плотско́е мудрова́ние/ и ху́ждшее порабо́тил еси́ лу́чшему, о́тче Ни́ле пресла́вне,/ сокруши́л еси́ бесо́вския ко́зни посто́м/ и возсия́л еси́ в ми́ре, я́ко луча́ со́лнечная,/ сия́нии твои́х доброде́телей:/ сего́ ра́ди тя воспева́ем.

Сла́ва, и ны́не, Богоро́дичен:

Стена́ непобеди́мая нам, христиа́ном, еси́, Богоро́дице Де́во,/ к Тебе́ прибега́юще, невреди́ми пребыва́ем/ и, па́ки согреша́юще, и́мамы Тя Моли́твенницу./ Тем, благодаря́ще, вопие́м Ти:/ ра́дуйся, Благода́тная, Госпо́дь с Тобо́ю.

Песнь 4

Ирмо́с:

Седяй в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Житие́ свое́, о́тче Ни́ле, чу́дно на земли́ показа́л еси́,/ вели́ко ноще́ние и смире́ние,/ и сего́ ра́ди на Небесе́х жи́знь ве́чную насле́довал еси́;/ моли́ спасти́ся от бед пою́щим тя.

Симео́на вели́каго, на столпе́ жи́вшаго, житию́ после́дуя, преподо́бне,/ те́мже того́, ели́ко мо́щно, именова́ние от жития́ стяжа́л еси́,/ Ни́ле пребога́те.

Посто́м и моли́твами те́ло твое́, о́тче Ни́ле, изнури́л еси́/ и сего́ ра́ди сподо́бился еси́ ви́дети неизрече́нная бла́гая, я́же святы́м угото́вана,/ с ни́миже, о́тче Ни́ле, о нас моли́ся.

Богоро́дичен: Покро́в, и заступле́ние, и прибе́жище бу́ди ми, Де́во, рабу́ Твоему́,/ исцели́ мя от безме́рных зол, воспева́ти, Пречи́стая:/ сла́ва Рождеству́ Твоему́.

Песнь 5

Ирмо́с:

Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ ми́р подава́ющая.

Чи́сто житие́ твое́ от ю́ности потща́лся еси́, преподо́бне, сохрани́ти;/ те́мже, чистоту́ твою́ ви́дев,/ Пресвяты́й Дух в тя всели́ся.

Я́ко преоби́дев тле́нная,/ ве́чная, о́тче, сподо́бился еси́ прии́ти по нело́жному сло́веси́:/ проси́те и ирии́мете./ Темже, я́ко проси́л, сия́ по досто́инству прия́л еси́.

Ме́сто освяти́ся, на не́мже честны́е мо́щи твоя́ положи́шася, преподо́бне,/ и по мно́гим страна́м прославля́емо есть,/ я́ко в себе́ мо́щи твоя́ иму́щее.

Богоро́дичен: Не преста́й моля́щи, его́же родила́ еси́, Богоневе́сто,/ я́ко Спа́са и Влады́ку,/ разреше́ние ми пода́ти скорбе́й и боле́зней облегче́ние,/ я́ко да прии́му проще́ние, песносло́вя Тя во ве́ки.

Песнь 6

Ирмо́с:

Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Твое́ вели́кое житие́ и чистоту́,/ к сим же безме́рное смире́ние прови́дев, Пресвяты́й Дух/ сла́вна тя, о́тче, показа́;/ те́мже, от сего́ жития́ ко о́ному преше́д,/ получи́л еси́ с пра́ведными та́мо весе́лие.

Днесь наста́вши, свяще́нная па́мять твоя́, преподо́бне Ни́ле,/ весели́т учени́ки́ твоя́, воспева́ющия любо́вию по́двиги твоя́,/ и́же, честно́е твое́ успе́ние сла́вяще, торжеству́ют,/ и́хже моли́твами твои́ми, о́тче, соблю́дй.

Разбойницы иногда́ приидо́ша тебе́ оскорби́ти, преподо́бне,/ но ты, тех лука́вство разуме́в,/ Преве́чнаго Христа́ Бо́га си́лою и Пречи́стыя его́ Ма́тере по́мощию/ сих не́мощны сотвори́л еси́,/ и́же, не могу́ще тебе́ проти́витися, стра́хом отбего́ша,/ побежде́ни па́че бы́вше, не́жели победи́ша.

Богоро́дичен: Твою́ по́мощь даждь ми/ и изба́ви мя от бед, и скорбе́й, и прегреше́ний мои́х,/ я́же всех ро́ждши Избавле́ние.

Конда́к, глас 8:

Оте́чества, преподо́бне, удали́вся,/ в пусты́ню всели́лся еси́,/ и, на о́стров Селиге́ра е́зера возше́д,/ жесто́ко житие́ показа́л еси́,/ и, мно́гих доброде́тельми удиви́в,/ дарова́ния чуде́с от Христа́ прия́л еси́./ Помина́й нас, чту́щих па́мять твою́, да зове́м ти:/ ра́дуйся, Ни́ле, о́тче наш.

И́кос:

Возлюби́в, преподо́бне, Христо́вы Боже́ственныя за́поведи/ и возненави́дев ми́ра сего́ наслажде́ние,/ прите́кл еси́ усе́рдно к тому́/ и был еси́ свети́льник, просвеща́яй концы́ блиста́нием духо́вным./ Тем, припа́дая, молю́ тя:/ просвети́ ми о́чи серде́чныя воспе́ти твоя́ по́двиги,/ поще́ние, бде́ние, сле́зы, боле́зни, изнуре́ние те́ла/ блаже́нный ра́ди бу́дущия жи́зни,/ ея́же ны́не наслажда́лся, моли́ непреста́нно о всех нас.

Песнь 7

Ирмо́с:

Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Источа́ет чудеса́ честна́я ра́ка твоя́, преподо́бне, преизоби́лующи благода́тию,/ ве́рою приходя́щим здра́вие да́рует,/ Христу́ от души́ вопию́щим:/ благослове́н Бог отце́в на́ших.

Дре́вних о́нех и вели́ких отце́в, в посте́ просия́вших,/ житию́ подо́бяся, преподо́бне,/ в пусты́ню всели́лся еси́/ и та́мо в поще́ниих мно́га ле́та пребы́л еси́, Ни́ле, о́тче наш.

Я́ко и́стиннаго и кро́ткаго Пастыренача́льника Христа́/ незло́бивое овча́, о́тче Ни́ле, был еси́./ Те́мже незло́бив хотя́щим тебе́ озло́бити яви́лся еси́, Христу́ вопия́:/ благослове́н Бог отце́в на́ших.

Богоро́дичен: Обощре́ны боле́зни ра́нам мои́м/ от безме́рных мои́х прегреше́ний, Влады́чице,/ веду́т в смерть душе́вную и теле́сную,/ но исхи́ти, я́ко си́льна, вся́ких скорбе́й и неду́г.

Песнь 8

Ирмо́с:

О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те его́ во вся ве́ки.

Изде́тска, преподо́бне о́тче, потща́лся еси́/ свою́ со́весть и се́рдце с душе́ю чи́сто Го́споду предста́вити./ Тем и Христо́с чудесы́ тебе́ прославля́ет, тому́ вопию́ща:/ Го́спода воспева́йте, дела́, и превозноси́те его́ во ве́ки.

Ны́не пусты́ня весе́лием красу́ется, о́тче,/ иму́щи мо́щи твоя́ в себе́, Ни́ле преподо́бне,/ ученицы́ же твои́, твоему́ житию́ ревну́юще,/ о твое́й па́мяти ра́дующеся, Творцу́ вопию́т:/ Го́спода воспева́йте, дела́, и превозноси́те его́ во ве́ки.

В пусты́ню, преподо́бне, иде́же селе́ние име́л еси́,/ прече́стен храм во сла́ву Богоявле́ния Госпо́дня воздви́гл еси́,/ в не́мже прославля́ется Пречи́стое того́ и́мя, и вси вопию́т:/ Го́спода воспева́йте, дела́, и превозноси́те его́ во ве́ки.

Богоро́дичен: Свети́льник Све́та Трисо́лнечнаго су́щи,/ заре́ю благоутро́бия Твоего́ тьму отъими́ прегреше́ний мои́х, Богороди́тельнице,/ избавле́ние ну́ждных боле́зней подаю́щи/ ве́рою превознося́щему Пречи́стое Твое́ Рождество́.

Песнь 9

Ирмо́с:

Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умов естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Бога́тство и пи́ща, похвала́ и ра́дость преподо́бным еси́, Христе́ Бо́же,/ Его́же возлюби́в, преподо́бный Нил/ вся, я́же в ми́ре кра́сная, нивочто́же вмени́;/ те́мже наслажда́ется Твоея́ красоты́ во блаже́нном Све́те.

Страстьми́ коле́блющихся и бу́рею грехо́вною погружа́емых,/ я́ко дерзнове́ние име́яй ко Го́споду, всегда́ сохраня́й,/ благоче́стно тя воспева́ющих и прославля́ющих.

Облиста́в заре́ю, проси́я́л еси́ духо́вно/ и яви́лся еси́ Вы́шнему́ ликостоя́нию све́тел;/ озари́ ми ум, блаже́нне, Трисия́нным Све́том Божества́/ и от страсте́й мя изба́ви моли́твами твои́ми.

Богоро́дичен: Ты еси́ ве́рным похвала́, Безневе́стная,/ Ты заступле́ние и свяще́нное прибе́жище христиа́ном:/ к Сы́ну бо Своему́ и Бо́гу мольбы́ но́сиши, Всенепоро́чная,/ и от бед спа́саеши/ ве́рою и любо́вию Богоро́дицу Чи́стую Тя воспева́ющих и велича́ющих.

Свети́лен.

Подо́бен: Не́бо звезда́ми:

Посто́м тече́ние твое́ соверши́в,/ на Небеса ́возше́л еси́ и Христу́ Бо́гу предстои́ши./ Ни́ле, о́тче преподо́бне,/ за ны моли́ся, те́пле пою́щих тя.

Сла́ва, и ны́не, Богоро́дичен:

Ра́дость неизрече́нную ро́ждши, Го́спода,/ ра́дости Небе́сныя прича́стников всех нас сотвори́,/ Тебе́ почита́ющих, Пречи́стая, и от души́ вопию́щих Ти:/ не забу́ди Твоя́ рабы́, Благослове́нная Мари́е.

На хвали́тех стихи́ры, глас 4.

Подо́бен: Дал еси́ зна́мение:

Светле́йши со́лнца просия́/ всепра́зднственная па́мять твоя́, преподо́бне,/ луча́ми блиста́ющи твои́х доброде́тельных дея́ний/ и озаря́ющи ве́рных чу́вства/ све́том чуде́с твои́х;/ сию́ у́бо пра́зднующе,/ ра́достно тя восхваля́ем и ве́рно ублажа́ем.

Я́коже А́нгел, на земли́ пожи́л еси́,/ воздержа́нием те́ло твое́ увяди́в, сла́вне,/ бде́нием же и па́мятию сме́ртною/ к верхо́вному Богомы́слию возше́л еси́./ Тем и прибли́жился еси́ к Само́му́ Краеуго́льному Ка́меню–Христу́, Бо́гу на́шему.

Стра́сти теле́сныя/ приле́жным моле́нием к Бо́гу/ и воздержа́нием укроти́л еси́,/ зми́я льсти́ваго сле́зными пото́ки умертви́л еси́,/ о́тче преподо́бне,/ и угоди́л еси́ Бо́гу па́че ине́х, досточу́дне;/ тем тя украси́ небе́сными дарова́ньми/ Иису́с Человеколю́бец и Спас душ на́ших.

Сла́ва, глас 5:

Преподо́бне о́тче Ни́ле,/ глас Ева́нгельский Госпо́день услы́шав,/ ми́ра оста́вил еси́ красоту́,/ бога́тство и сла́ву нивочто́же вмени́л еси́,/ всем вопия́, глаго́ля:/ возлюби́те Бо́га и обря́щете благода́ть ве́чную, и ничто́же предпочти́те, па́че любве́ его́,/ да егда́ прии́дет во сла́ве Свое́й,/ обря́щете покой со все́ми святы́ми,/ и́хже моли́твами, Христе́,/ сохрани́ и спаси́ ду́ши на́ша.

И ны́не, Богоро́дичен:

Блажи́м Тя, Богоро́дице Де́во,/ и сла́вим Тя, ве́рнии, по до́лгу град непоколеби́мый, сте́ну необори́му,/ тве́рду Предста́тельницу/ и прибе́жище душа́м на́шим.

Славосло́вие вели́кое. И отпу́ст.

НА ЛИТУРГИ́И

Блаже́нны от кано́на свята́го, пе́сни 3-я и 6-я. Проки́мен глас 7: Честна́ пред Го́сподем/ смерть преподо́бных его́.

Стих: Что возда́м Господе́ви о всех:

Апо́стол к Кори́нфяном, зача́ло 176.

Аллилуйя, глас 6: Блаже́н муж, боя́йся Го́спода:

Ева́нгелие от Луки́, зача́ло 24. Прича́стен: В па́мять ве́чную:

И$же во с™hхъ nтцA нaшегw ґмвр0сіа, є3пjскопа медіолaнскагw:

И# прпdбнагw nц7A нaшегw ґнтHніа, сjйскагw чудотв0рца:

Знайшли помилку