Ведомо да есть, я́ко а́ще случи́тся па́мять святы́х сих в Неде́лю пра́отец, вку́пе возсле́дование и му́чеников пое́тся.

ВЕ́ЧЕР

Блаже́н муж: На Го́споди, воззва́х: стихи́ры на 6, глас 4.

Подо́бен: Дал еси́ зна́мение:

Сияет па́мять/ страстотерпца Твоего́, Господи, Евстрати́я,/ я́ко со́лнце, све́тлостию/ скры́вшаго непобеди́мыми словесы́ многобо́жие,/ я́коже несве́тлу сень, упражня́ему от ве́ры,/ и четы́ри сострада́льцы/ и соо́бщники сотво́ршаго./ И́хже ра́ди нам да́руй очище́ние,/ я́ко Челове́колюбец.

Ка́мение позна́ти/ Твое́ Влады́чество/ Евстра́тий сло́весное устро́и,/ ощути́ти си́лу в пло́ти свое́й твою́ пону́дивша,/ я́же от мук стра́шных отложи́ти внеза́пно ра́ны/ и, лжу погубля́юща,/ богосло́вити Тя усты́,/ Иису́се Всеси́льне,/ Спа́се душ на́ших.

Словесы́, и страда́нии,/ и многообра́зными лише́ньми жи́зни/ показа́ша любо́вь святи́и/ к тебе́ соверше́ну, непоколеби́му,/ со Евстра́ти́ем му́дрым/ и Авксе́нтием подвиза́вшиися/ Оре́ст и Марда́рий/ со Евге́нием сла́внии,/ тех моли́твами, Го́споди, спаси́ ду́ши на́ша.

И́ны стихи́ры, глас то́йже.

Подо́бен: Я́ко до́бля:

Я́ко до́бре во́инствовав Царю́ сил,/ тебе́ сама́го, Евстра́тие,/ пре́дал еси́ во́льно на муче́ние/ и ну́ждную смерть,/ приводя́ с собо́ю лик му́чеников, блаже́нне./ С ни́миже пострада́л еси́/ и побе́ды прия́л еси́ венцы́;/ с те́ми моли́ся/ о нас, всесла́вне.

Богому́дрый Евстра́тий,/ до́блий Авксе́нтий,/ сла́вный Евге́ний и Марда́рий/ со Оре́стом до́бльствоваша, враги́ победи́вше/ и возсия́вше я́ве, я́ко зве́зды многосве́тлы,/ уясни́ша ве́рных сердца́/ и пре́лести отгна́ша тьму/ светозаре́нием ду́ха.

Неосла́бно бие́мь,/ и огне́м изнуря́емь,/ и в сапоги́ желе́зны, всему́дре, пригвожда́емь,/ и в путе́х гони́мь,/ в темни́це заключа́емь/ и, я́ко же́ртва чиста́, в пещи́ пеко́мь,/ прине́слся еси́ тебе́ ра́ди Поже́ршемуся,/ я́ко благово́нно сожже́ние на Вы́шнюю трапе́зу,/ му́чениче Евстра́тие.

Сла́ва, глас 6:

Прииди́те, мучениколю́бцы,/ Христо́вых страда́льцев в пе́снех почти́м,/ Евстра́тия, непобеди́маго му́ченика,/ Авксе́нтия, и Евге́ния, и Марда́рия, и Оре́ста,/ пятоза́рный му́чеников лик,/ и́же до́бре подвиза́вшеся на неви́димаго врага́,/ и, венцы́ побе́дными увязе́ни,/ моля́тся Христу́ о и́же ве́рою и любо́вию соверша́ющих па́мять их.

И ны́не, Богоро́дичен: Кто Тебе́ не ублажи́т:

Проки́мен дне, и чте́ния 3.

Проро́чества Иса́иина чте́ние (глава 43):

Та́ко глаго́лет Госпо́дь:/ вси язы́цы собра́шася вку́пе,/ и соберу́тся кня́зи от них,/ кто возвести́т сия́ в них?/ Или́ я́же от нача́ла, кто слы́шана сотвори́т вам?/ Да приведу́т свиде́тели своя́ и опра́вдятся,/ и да услы́шат, и да реку́т и́стину./ Бу́дите Ми свиде́тели, и Аз Свиде́тель,/ глаго́лет Госпо́дь Бог, и о́трок, его́же избра́х,/ да позна́ете, и ве́руете Ми, и разуме́ете, я́ко Аз есмь;/ пре́жде Мене́ не бысть ин бог и по Мне не бу́дет./ Аз есмь Бог, и несть, ра́зве Мене́, спаса́яй./ Аз возвести́х и спасо́х, уничижи́х, и не бе в вас чу́ждий./ Вы Мне свиде́тели, и Аз Госпо́дь Бог./ И еще́ от нача́ла Аз есмь,/ и несть от рук Мои́х избавля́яй;/ сотворю́, и кто отврати́т то?/ Си́це глаго́лет Госпо́дь Бог,/ избавля́яй вас Святы́й Изра́илев.

Прему́дрости Соломо́новы чте́ние (глава 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озло́бление исхо́д их,/ и е́же от нас ше́ствие сокруше́ние;/ они́ же суть в ми́ре./ и́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле наказа́ни бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т:/ су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава 5):

Пра́ведницы во ве́ки живу́т,/ и в Го́споде мзда их,/ и попече́ние их у Вы́шняго./ Сего́ ра́ди прии́мут ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́ и вооружи́т тварь в месть враго́м./ Облече́тся в броня́ пра́вды и возложи́т шлем суд нелицеме́рен./ Прии́мет щит непобеди́мый преподо́бне,/ поостри́т же напра́сный гнев во ору́жие,/ спобо́рет же с ним ми́р на безу́мныя./ По́йдут праволу́чныя стре́лы мо́лниины/ и, я́ко от благокругла́ лу́ка о́блаков, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ реки же потопя́т я на́гло./ Сопроти́в ста́нет им Дух си́лы/ и, я́ко ви́хор, ра́звеет их./ И опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щим мно́жества и гордя́щимся о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

На стихо́вне стихи́ры, глас 5.

Подо́бен: Ра́дуйся:

Столп све́тлоявле́н, страда́льче,/ и́же му́дрости испуща́я све́тлость,/ воздви́глся еси́ на высоту́ терпе́ния, му́дре,/ и к све́ту напра́вился еси́ ра́зума,/ нас Боже́ственными твои́ми све́тлыми, Евстра́тие,/ му́дрыми словесы́ озаря́я, сла́вне,/ твое́ю любо́вию окриляемых, блаже́нне./ Те́мже и похвала́ми твою́ па́мять чту́ще, му́чениче,/ от любве́ Боже́ственнаго Человеколю́бия про́сим улучи́ти твои́ми моли́твами/ и ми́ру дарова́ти ве́лию ми́лость.

Стих: Воззваша пра́веднии,/ и Госпо́дь услы́ша их.

Добро́тою и сла́достию и́стинною/ напо́лнена ча́ша му́дрости твоея́,/ вино́ благочести́я в сладча́йших, му́дре,/ и оби́льных словесе́х излия́л еси́,/ и́миже наслажда́еми, и́стинно в нему́тное/ и сла́дкое та́инственно возво́димся зна́ние Боже́ственное Влады́ки, Евстра́тие./ Те́мже и похвала́ми твоя́ страда́ния чту́ще ве́рою и любо́вию,/ Боже́ственнаго Человеколю́бия про́сим улучи́ти твои́ми моли́твами/ и ми́ру дарова́ти ве́лию ми́лость.

Стих: Мно́ги ско́рби пра́ведным,/ и от всех их изба́вит я Госпо́дь.

Полк му́ченический светоза́рный,/ победоно́сный, све́тлый и пяточи́сленный/ да почти́тся похвала́ми,/ притяжа́в све́тлаго верхо́вника и́стинно Евстра́тия,/ те́пле изобличи́вша е́ллинския же́ртвы,/ христиа́ном же Боговеща́нная уче́ния утверди́вша сло́весными веле́ньми./ Сего́ у́бо восхва́лим, налия́вшаго му́дрости ча́шу/ и духо́вно нас веселя́ща, Христа́ моля́ща,/ подаю́щаго ми́ру ве́лию ми́лость.

Сла́ва, глас то́йже:

Му́чащих свире́пства не убоя́вшеся,/ па́че Христо́ву ве́ру я́сне пропове́давше,/ строга́ния мно́гая и му́ки претерпе́сте,/ Евстра́тие и Авксе́нтие,/ Евге́ние и Оре́сте и сла́вный Марда́рие./ Те́мже моли́теся Царю́ и Бо́гу о нас,/ ве́рою соверша́ющих па́мять вашу.

И ны́не, Богоро́дичен:

Блажи́м Тя, Богоро́дице Де́во,/ и сла́вим Тя, ве́рнии, по до́лгу,/ град непоколеби́мый,/ сте́ну необори́мую,/ тве́рдую Предста́тельницу и прибе́жище душ на́ших.

Тропа́рь, глас 4:

Му́ченик всечестны́х све́тлость,/ пяточи́сленных страстоте́рпцев воспое́м,/ сла́ву земны́х презре́вших,/ со́лнца све́тлаго Евстра́тия,/ прему́драго вити́ю со страда́льцы,/ на огнь и му́ки дерзну́вших за всех Царя́ Христа́/ и от Престо́ла того́ сла́вы по́честьми венце́в обдаре́нных./ Тех моли́твами, Христе́ Бо́же,// спаси́ ду́ши на́ша.

Сла́ва, и ны́не, Богоро́дичен: Е́же от ве́ка утае́нное:

НА УТРЕНИ

По 1-й стихологии, седа́лен, глас 4.

Подо́бен: Ско́ро предвари́:

Му́жеством ве́ры в броня́ обле́кся,/ му́дростию Боже́ственною вооружи́вся благоче́стно, Евстра́тие сла́вне,/ вся диа́воли победи́л еси́ полки́/ и обличи́л еси́ безбо́жных не́мощную де́рзость,/ я́ко име́я дерзнове́ние к Бо́гу, моли́ спасти́ся нам.

Сла́ва, и ны́не, Богоро́дичен:

Мно́гими согреше́ньми аз, блу́дный, ум омрач́ив,/ вопию́ тве́рдому Твоему́ заступле́нию:/ просвети́, Богоро́дице, души́ мое́й зе́ницы,/ возсия́й ми покая́ния све́тлую зарю́/ и облецы́ мя во ору́жие све́та, Богоро́ди́тельнице Чи́стая.

По 2-й стихологии седа́лен, глас 4:

Ору́жием слове́с твои́х мучи́теля уязви́л еси́,/ воево́да́ быв христоно́сных люде́й, Евстра́тие Богому́дре:/ облиста́л еси́ заря́ми чуде́с ми́ру,/ вене́ц же исплете́ся твое́й главе́ свы́ше./ Те́мже и в па́мяти твое́й Христа́ прославля́ем.

Сла́ва, и ны́не, Богоро́дичен:

Пое́м Тя, Богоневе́сто, Ма́ти Христа́ Бо́га,/ сла́вяще Рождество́ Твое́ непостижи́мое,/ и́мже изба́вихомся от ле́сти диа́воли/ и вся́ких бед, Богоро́дице Влады́чице, и ве́рно вопие́м:/ поми́луй ста́до Твое́, Еди́на Всепе́тая.

По полиеле́и, седа́лен, глас 8.

Подо́бен: Прему́дрости:

Трои́ческою ве́рою утве́рждся,/ и́стины пра́щею воору́жся, ле́сти низложи́л еси́ инопле́менную де́рзость/ и вра́жий восхи́тил еси́ слове́с меч,/ тем ссекл еси́ лжи́вое противле́ние./ Сего́ ра́ди побе́дами обличи́в лесть, те́лом у́мерл еси́/ и ду́хом ожи́л еси́, страстоте́рпче Евстра́тие./ моли́ Христа́ Бо́га/ грехо́в оставле́ние дарова́ти пра́зднующим любо́вию святу́ю па́мять твою́.

Сла́ва, и ны́не, Богоро́дичен:

В напа́сти многоплете́нныя впад от враг ви́димых и неви́димых,/ бу́рею одержи́мь безчи́сленных согреше́ний мои́х,/ и я́ко к те́плому заступле́нию и покро́ву моему́, Чи́стая,/ ко приста́нищу притека́ю Твоея́ бла́гости./ Те́мже, Пречи́стая, из Тебе́ Воплоще́нному безсе́менно моли́ся приле́жно/ о всех рабе́х Твои́х, непреста́нно моля́щихтися, Богоро́дице Пречи́стая,/ моля́щи его́ при́сно согреше́ний оставле́ние дарова́ти/ воспева́ющим досто́йно сла́ву твою́.

Степе́нна, 1-й антифо́н 4-го гла́са. Проки́мен, глас 4: Воззва́ша пра́веднии,/ и Госпо́дь услы́ша их.

Стих: Мно́ги ско́рби пра́ведным, и от всех их изба́вит я Госпо́дь. Вся́кое дыха́ние:

Ева́нгелие от Матфе́я, зача́ло 36.

По 50-м псалме́ стихи́ра, глас 1. Самогла́сна:

Пяточи́сленный лик святы́х восхва́лим, лю́дие,/ Спа́са воспева́юще Христа́,/ Евстра́тия терпеливоду́шнаго и тве́рдаго страстоте́рпца,/ с ним Авксе́нтия, Евге́ния, Марда́рия и Оре́ста:/ си́и бо, по ве́ре пострада́вше,/ треволне́ния попра́ша вра́жия/ и Спа́су мо́лятся очище́ние и оставле́ние грехо́в дарова́ти ве́рою соверша́ющим па́мять их.

Кано́н Богоро́дицы со ирмосо́м на 6 и святы́х два, на 8. Кано́н первый Иоа́нна мона́ха, глас 4.

Песнь 1

Ирмо́с:

Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Разда́ваяй на Небесе́х да́ры су́щим на земли́ страда́льцем,/ Подвигополо́жник седи́т Христо́с,/ десни́цею Вседержи́тельною Евстра́тия су́щим обою́ду/ Боже́ственныя венцы́ простира́я.

Лик му́ченический пяточи́слен, прииди́те, ви́дим,/ пресве́тлым блиста́ющийся све́том,/ име́яй чинонача́льника возжеле́ннаго Евстра́тия,/ благода́тию Боже́ственною венча́ема.

Пояс земна́го во́инства отреши́вый,/ и́стинному привно́сиши Царю́ страда́ния,/ зна́мение от Христа́, Евстра́тие, чрез Авксе́нтия прие́м.

Богоро́дичен: Село́ вмести́тельно была́ еси́ Боже́ственнаго естества́, Богороди́тельнице Чи́стая./ Тем тя Луки́я возжела́вши,/ де́вственно в след Тебе́ Твоему́ Сы́ну приведе́ся.

Други́й кано́н, глас 6.

Песнь 1

Ирмо́с:

Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу, побе́дную песнь пои́м, вопия́ше.

Небе́сных кругов Царь Дарода́тель председи́т,/ страда́вшим на земли́ со Евстра́тием, Христо́с,/ прости́рая тем побе́ды венцы́.

Песнослове́сный лик Боговенча́нный страда́льцев пяточи́сленных восхва́лим, ве́рнии,/ му́драго Евстра́тия,/ верна иму́ща о Христе́ Боже́ственнаго чинонача́льника.

Во́инства Вы́шняго жела́я, по́честь Евстра́тие, отда́в обра́зно,/ Бо́гу приве́д, му́дре, твою́ жи́знь, свяще́нно очище́н.

Богоро́дичен: Добропобе́дных му́ченик лик, ра́дуяся, пое́т Тя, Чи́стая, и́же побе́ды венец прия́т:/ Тобо́ю бо Не́бо челове́ком бысть вхо́дно,/ я́ко родила́ еси́ па́че ума́ Творца́ Небесе́.

Катава́сия: Христо́с ражда́ется:

Песнь 3

Ирмо́с:

Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Наде́ждею муче́ний, я́коже невеще́ственнаго сокро́вища,/ преесте́ственно был еси́ испо́лнен вся́кия ра́дости,/ всеблаже́нне Евстра́тие.

Му́дростию духо́вною, терпе́нием же напа́стей/ обличи́л еси́, му́чениче Христо́в Авксе́нтие, мучи́тельское безбо́жие.

Я́коже красота́ пресве́тлая Це́ркве ве́рных,/ му́ченицы Христо́выми я́звами, я́ко цве́ты, обложе́ни бы́сте.

Богоро́дичен: Госпо́дственно и и́стинно Тя, Богоро́дицу, ве́рнии чтим:/ Ты бо Бо́га родила́ еси́, плоть бы́вша, Всенепоро́чная.

Ин ирмо́с:

Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Тве́рдостию ума́ упова́ние твое́ все возложи́в, блаже́нне,/ к Вы́шнему́ Бо́гу, наде́ждею ран утеше́ния испо́лнен весь был еси́.

Процве́л еси́ любо́вию Христо́вою, Боже́ственною му́дростию,/ терпе́нием же мук, Авксе́нтие, безу́мие облича́вши гони́телей, на́глость и су́етие.

Неукроти́мый, му́дре, Лиси́ев гнев вмени́ся Тебе́ сон/ и огнь мук си́льных, утве́рждся бо о Христе́, преоби́дел еси́,/ я́коже иному стра́ждущу.

Богоро́дичен: Священнослове́сными Тя гла́сы, Богома́ти Де́во,/ всех вино́вную Вино́вника по нам бы́ти,/ боголе́пно воспева́юще, ве́рнии,ублажа́ем.

Катава́сия: Пре́жде век:

Конда́к, глас 2.

Подо́бен: В моли́твах:

Свети́льник яви́лся еси́ светле́йший во тьме неве́дения седя́щим, страстоте́рпче:/ ве́рою бо, я́ко копие́м, обложи́вся,/ враго́в шата́ния не убоя́лся еси́, Евстра́тие,/ ри́торов сый благоязы́чнейший.

Седа́лен, глас 8.

Подо́бен: Прему́дрости:

Ни меч, ни зве́рие, ни огнь,/ ниже́ и́но что страша́щих чу́вственных,/ отню́д устраши́ти твою́ тве́рдость возмого́ша:/ вра́жию бо попра́в тече́нием си́лу,/ я́ко безстра́стен премину́л еси́ житие́ и Безпло́тен./ Те́мже ве́рным исцеле́ния подава́вши,/ любо́вию притека́ющим в па́мять твою́, свя́те страстоте́рпче Евстра́тие./ Моли́ Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять твою́.

Сла́ва, и ны́не, Богоро́дичен:

Егда́ прии́дет суди́ти всей земли́ всех Влады́ка и Творе́ц,/ овца́м мя причти́ десны́м,осужде́ннаго,/ и кроме́шния тьмы, и вся́каго муче́ния/ Твоего́ непотре́бнаго раба́ исхити́, молю́ся:/ да благода́рно велича́ю бога́тство Твоей бла́гости, Богоро́дице Всенепоро́чная,/ и вопию́ Ти, ра́дуяся:/ моли́ Христа́ Бо́га согреше́ний оставле́ние дарова́ти,/ Тя бо и́мам наде́жду, раб Твой.

Песнь 4

Ирмо́с:

Любве́ ра́ди, Ще́дре, Твоего́ о́браза/ на Кресте́ Твое́м стал еси́,/ и раста́яшася язы́цы:/ Ты бо еси́, Человеколю́бче,/ кре́постъ моя́ и хвале́ние.

Отложи́л еси́ с я́звами пло́ти твоея́ душе́вныя скве́рны,/ стре́лы сокруши́л еси́ лука́ваго зми́я ве́рою, Евстра́тие.

Просла́вися твои́ми ра́нами, страстоте́рпче, Царь Сла́вы/ и неизрече́нныя тя сла́вы си́лою испо́лни чуде́с, Евстра́тие.

Ры́барскому поревнова́в дерзнове́нию,/ му́ченическою мре́жею Влады́це приво́диши му́драго Евге́ния,/ улови́в, Евстра́тие.

Богоро́дичен: Всенепоро́чная и Еди́на Святе́йшая Херуви́мов я́вльшися,/ ду́ши на́ша спаси́ от вся́каго обстоя́ния ве́рою пою́щих Тя.

Ин ирмо́с:

Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Всеси́льный Боже́ственное жела́ние в души́ твое́й вжег,/ чудоде́йственна показа́ изря́дно,/ всеце́лы плотски́я ра́ны твоя́ творя́.

Мре́жею духо́вною ры́барей, му́дре, улови́в,/ приводи́ли царю́ му́драго Евге́ния,/ его́же улови́в, Христу́ приве́л еси́, Евстра́тие.

Гвоздьми́, всему́дре, но́зе разжига́емь,/ муче́нием сапо́г желе́зных, весь себе́ обагри́л еси́,/ Царя́ Иису́са подо́бяся стра́сти.

Богоро́дичен: Необъе́млемый и неизме́нный, Бо́га Отца́ Сло́во,/ измени́вся виде́нием, Пренепоро́чная, из Тебе́ вопло́щаемь,/ обожа́ет человеколю́бно мя челове́ка.

Катава́сия: Жезл из ко́рене:

Песнь 5

Ирмо́с: Ты, Го́споди, мой Свет,/ в ми́р прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Ты, я́коже звезда́ светоно́сная,/ возсия́л еси́ в полце́ му́ченик далечесия́тельно,/ непобеди́мый Евстра́тие.

О, жре́бия блага́го!/ О, ча́сти Богода́нныя!/ О, жены́ добре́йшия,/ сове́том победи́вшия лесть прама́тернюю.

Ты вся кра́сная вмени́л еси́, я́ко уме́ты, Марда́рие,/ победи́в естества́ зако́ны любо́вию страда́ния.

Богоро́дичен: Ум зе́млен Твоего́ па́че ума зача́тия/ не мо́жет разуме́ти, Де́во Ма́ти, Отрокови́це:/ Бо́га бо родила́ еси́.

Ин ирмо́с:

Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Чу́ден, я́коже звезда́, быв Це́ркви,/ издале́ча посреде́ му́ченик возсия́л еси́,/ му́ченическими осия́я заря́ми, Евстра́тие, ми́р па́че со́лнца.

Зарелу́чными сия́нии зарю́ испуща́юща тя ви́дев, Богоглаго́ливый Марда́рий/ тебе́, я́коже а́гнец па́стырю незло́бив, простото́ю се́рдца после́дова.

Превознесе́ся сро́днаго естества́ мужелю́бная жена/ и, разу́мная, и Христолюби́вая, изря́дно предпобежда́ет и соверше́нне,/ пома́завши му́жа к муче́нию.

Богоро́дичен: И́же Богоро́дицу от души́ и Влады́чицу ми́ра, Бла́гая, испове́дающия Тя спаса́й:/ Тя бо Предста́тельницу непобеди́му стяжа́хом,/ су́щую Богороди́тельницу.

Катава́сия: Бог Сый ми́ра:

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Христо́с мне вме́сто всех есть, –/ Марда́рий велегла́сно вопия́ше, – и оте́чество, и честь, и и́мя:/ от Тебе́ бо сему́ научи́хся, Евстра́тие.

Язы́к отре́зан пе́сней непрестае́т,/ отсе́ченныя же твоя́ руки́ к Бо́гу, Евге́ние, возвыша́хуся,/ спасе́ния прося́ще пою́щим па́мять твою́.

Нога́м проверте́нным пове́шен бысть стремгла́в,/ разжже́нными же рожны́ пали́мь по плеще́м,/ дух Влады́це пре́дал еси́, Марда́рие.

Богоро́дичен: Кре́пость Тя обре́тши, Де́во, и твердь,/ страстоте́рпица ра́ны до́блественне терпи́т/ и, ра́дующися, в след Тебе́, всех Влады́це, приво́дится.

Ин ирмо́с:

Жите́йское мо́ре,/ воздви́гаемое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.

Сам вме́сто всех мне Христо́с есть оте́ческих, – возопи́в, о Марда́рие./ Пяте́ сокруше́нней рожны́, разнеже́нным огне́м,/ стрела́ми же ра́мена, ра́дуяся, сконча́лся еси́.

Отре́зан быв, Евге́ние, твой язы́к Христа́ песносло́вити не престае́т,/ руки́ же отсе́чены к Бо́гу, блаже́нне, возвыша́ются,/ пою́щим тя избавле́ния прося́ще.

Я́ко досточу́дна му́жественная твоя́ душа́, всеблагоро́дне Евге́ние,/ сокруше́нным бо ну́ждею твои́м го́ленем,/ дух пре́дал еси́ в ру́це Влады́ки всех, ра́дуяся.

Богоро́дичен: Пречи́стая Влады́чице, ро́ждшая земны́х Ко́рмчию и Го́спода,/ страсте́й мои́х непостоя́нное и лю́тое утиши́ смуще́ние/ и тишину́ пода́ждь се́рдцу моему́.

Катава́сия: Из утро́бы Ио́ну:

Конда́к, глас 3.

Подо́бен: Де́ва днесь:

Вити́йствуя пред беззако́ннующими Боже́ственная,/ бие́ния претерпе́л еси́ му́жественнейшим се́рдцем,/ облиста́л еси́ Богозна́меньми, пречу́дне,/ угаси́л еси́ возвы́шенный пре́лести пла́мень,/ сего́ ра́ди тя че́ствуем, всеблаже́нне му́чениче Христо́в Евстра́тие.

И́кос:

Свяще́нный соверша́ет Це́рковь днесь пра́здник та́инственно,/ све́тло пропове́дающи твоя́ до́блести, боле́зни и труды́,/ я́же па́че естества́ Боже́ственная боре́ния,/ я́же всю́ду ра́ны, и́миже низложи́ многоко́зненнаго,/ сла́ва страда́льцев ве́лия и хвала́,/ му́жества столп, свети́льник всех тя чту́щих благоче́стно,/ врачева́ний сокро́вище, богати́телю ни́щих,/ первопобе́дниче честны́х му́чеников,/ всеблаже́нне му́чениче Христо́в Евстра́тие.

Песнь 7

Ирмо́с: В пещи́ авраа́мстии о́троцы перси́дстей,/ любо́вию благочести́я па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Непрело́жно испове́дания мудрова́ние име́я в Тро́ице че́ствовати Еди́наго Бо́га,/ му́ки преоби́дел еси́, зовя́й:/ благослове́н еси́ в хра́ме сла́вы Твоей, Го́споди.

Я́ко блаже́н в непоро́чном пути́ ходи́л еси́,/ коле́ни благоразу́мно преклони́л еси́ Изба́вителю,/ ду́шу же преда́в Влады́це в руки́,/ я́ко благово́ннейшу же́ртву, Авксе́нтие.

И́же вра́ном Илии́ пи́щу подава́яй Бог,/ Той и о честне́й твое́й главе́ чудотво́ря, жела́ющим откры́,/ я́ко многожела́нное чрежде́ние ми́ру, Авксе́нтие.

Богоро́дичен: Де́во Ма́ти,/ я́ко Чи́сту Тя и нетле́нну Сло́во Чи́стое возлюби́/ и, из Тебе́ вопло́щся, возсозда́ всего́ челове́ка,/ и́же Луки́ю просла́вивый чудесы́.

Ин ирмо́с:

Росода́тельну у́бо пещь/ содела́ А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Победоно́сец к Небе́сному Ца́рству, Авксе́нтие, восте́кл еси́:/ по искуше́нии бо мук многови́дных, Христа́ Бо́га испове́дая,/ сконча́лся еси́ за него́, во главу́ усе́чен.

Пречу́дно есть благоразу́мное, Оре́сте, му́жество твое́,/ на суди́щи бо показу́еши ра́зум,/ ду́шу же Лиси́еву кресто́м унза́еши, поя́:/ благослове́н Бог оте́ц на́ших.

Муче́ния путе́м спу́тника тебе́/ и с тобо́ю теку́ща сою́зника Оре́ста и сострада́льца име́я,/ обогати́л еси́, поя́ с ним:/ благослове́н Бог оте́ц на́ших.

Богоро́дичен: Ю́ноши три пещь не опали́, Рождество́ прообразу́ющи Твое́,/ Боже́ственный бо Огнь Тя не опали́, всели́вся в Тя,/ и вся просвети́ вопи́ти:/ благослове́н Бог оте́ц на́ших.

Катава́сия: О́троцы, благочести́ю:

Песнь 8

Ирмо́с: Ру́це распросте́р, Дании́л/ львов зия́ния в ро́ве затче́,/ о́гненную же си́лу угаси́ша,/ доброде́телию препоя́савшеся,/ благочести́я рачи́тели, о́троцы, взыва́юще:/ благослови́те, вся дела́ Госпо́дня, Го́спода.

Устна́ ра́зверз чи́сто, Боже́ственный привле́кл еси́ Дух, Евстра́тие,/ и душетле́нных у́бо обличи́л еси́ служе́ний не́мощь,/ в Тро́ице же Бо́га чествова́ти взыва́л еси́:/ благослови́те, вся дела́ Госпо́дня, Го́спода.

Му́дрыми наказа́нии твои́ми укрепи́в смысл, му́чениче Евстра́тие,/ на одре́ желе́знем просте́рт быв,/ непобеди́мый Оре́ст вопия́ше разори́телем пла́мене, де́тем подо́бяся:/ благослови́те, вся дела́ Госпо́дня, Го́спода.

Просте́р те́ло терпели́вно, Оре́сте сла́вне,/ ты на одре́ разжже́ннем сопричта́лся еси́ у́бо му́чеников,/ в Го́споде ра́дуяся, воспочи́л же еси́ в ски́ниях Небе́сных, вопия́:/ благослови́те, вся дела́ Госпо́дня, Го́спода.

Богоро́дичен: Яви́лася еси́ превы́шши небе́с, Бо́га Небе́снаго поро́ждши,/ онебеси́вшаго, Всечи́стая, земноро́дных все смеше́ние/ и Луки́и честны́я па́мять уясни́вшаго,/ ему́же вопие́м всегда́:/ благослови́те, вся дела́ Госпо́дня, Го́спода.

Ин ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозноси́м во вся ве́ки.

Еди́наго естества́ Тро́ицы безме́рную си́лу со дерзнове́нием пропове́дая, богосло́вил еси́/ и и́дольское служе́ние су́етное обличи́л еси́,/ всему́дре Евстра́тие, Богому́дре.

Не ве́дый гони́тель терпе́ния твоего́, пла́менным ви́дом устраши́ти тя покуша́шеся,/ ты же, того́ суровство́ оплева́в,/ ра́дуяся, Влады́ку, Евстра́тие, воспева́л еси́.

Веща́нии твои́ми Боже́ственными наказу́емь, Богому́дрый Оре́ст/ на одр вскочи́, игра́я, я́ко а́гнец непоро́чен всесожига́емь, Бо́гу Венцеда́вцу вопия́:/ благослови́те, вся дела́ Госпо́дня, Го́спода.

Богоро́дичен: Пречи́стая Де́во, Ты мя спаси́,/ мое́й не́мощи бу́ди по́мощь,/ скорбе́й мно́гих и лю́тых мя изба́ви,/ да Тя сла́влю, Еди́ну Богоро́дицу.

Катава́сия: Чу́да преесте́ственнаго:

Песнь 9

Ирмо́с: Ка́мень нерукосе́чный/ от несеко́мыя горы, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Боже́ственных причасти́тися тайн возжеле́в, страстоте́рпче,/ и Богоявле́ния светоза́рнаго сподо́битися, блаже́нне Евстра́тие,/ к зову́щему тя на Небеса́, жела́емому прибли́жился еси́ Христу́.

Зело́ веселя́ся, страстоте́рпче,/ ра́достному осужде́нию мучи́тельскаго пребезу́мия,/ По́двигоположника твоего́ велича́л еси́,/ песносло́вя, Евстра́тие, сме́рти разори́теля Христа́.

Прииди́те, мучениколю́бцы вси,/ пре́лести потреби́теля свяще́нными Евге́ния пе́сньми,/ му́драго Оре́ста же и Марда́рия/ и с ни́ми Авксе́нтия со Евстра́тием возвели́чим.

Богоро́дичен: Свет нам возсия́ из ложе́сн Неискусому́жных Твои́х, Де́во,/ его́же светосия́нии Боже́ственно озари́вшися, свет же бысть чу́дная Луки́я,/ Богороди́тельнице Де́во Ма́ти.

Ин

Ирмо́с: Бо́га/ челове́ком невозмо́жно ви́дети,/ на него́же не сме́ют чи́ни А́нгельсти́и взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ его́же велича́юще,/ с Небе́сными во́и Тя ублажа́ем.

Поя, Евстра́тие, жела́емаго и о́бщник Боже́ственных тайн быв,/ Богоявле́ния его́ в темни́це сподо́бился еси́, блаже́нне,/ зову́ща тя к Небе́сней жи́зни Ца́рствия его́.

Укрепи́вся си́лою Христо́вою, Евстра́тие,/ гони́телей ласка́нию посмея́лся еси́, велича́я, сла́вне, Христа́ пе́сньми:/ я́коже бо ю́ноши дре́вле в пещь, ра́дуяся,/ я́ко в кра́сный рай, блаже́нне, внутрь вшел еси́.

Пе́сньми и пе́ньми восхва́лим, вси ве́рнии, Боже́ственный во́ины,/ Авксе́нтия, Евге́ния, вку́пе и Марда́рия,/ сла́внаго Оре́ста и чинонача́льника, и сострада́льца, и наста́вника му́драго Евстра́тия.

Богоро́дичен: Храм, Де́во, ца́рствующаго со Отце́м и Ду́хом Христа́ была́ еси́;/ Тебе́ ра́ди, Чи́стая, хра́мы и мы благода́тию бы́вше,/ сподо́бихомся сынотворе́ния его́ креще́нием.

Катава́сия: Та́инство стра́нное:

Свети́лен.

Подо́бен: Ду́хом во святи́лищи:

Соверши́л еси́ чу́дное страда́ния тече́ние, Евстра́тие блаже́нне,/ и приве́д ку́пно Евге́ния честна́го и му́драго Авксе́нтия, Марда́рия же со Оре́стом,/ и́хже ве́ре и де́рзости удиви́шася челове́честии и а́нгельсти́и собо́ри.

Сла́ва, и ны́не, Богоро́дичен:

Несказа́ннаго Рождества́ Твоего́ была́ еси́, Пренепоро́чная Неве́ста,/ я́ко су́щи честне́йший храм, Богоро́дице:/ Ты бо Преве́чное, в Тя все́льшееся, родила́ еси́ Бо́га Сло́во./ Тем, пою́ще, Рождество́ Твое́ велича́ем,/ о Всенепоро́чная Отрокови́це.

На хвали́тех стихи́ры на 4, глас 3.

Ге́рманово: Ри́торскими словесы́ Христо́в во́ин беззако́нныя ужаси́,/ страда́льческими ра́нами вра́жия си́лы му́жески победи́ Евстра́тий сла́вный/ и тве́рдый страда́лец,/ и́же те́сный и приско́рбный ше́ствовав путь/ и в зе́млю дости́г ве́чныя жи́зни;/ в не́йже и мо́лит Христа́/ дарова́ти нам ве́лию ми́лость.

И́же в Боже́ственней му́дрости я́вльшася филосо́фа/ и в добро́те слове́с показа́вшася ри́тора,/ в свиде́телех вели́каго Евстра́тия страда́льческими похвала́ми увенча́им:/ сво́инство бо сей Христо́в во́ин благочести́вое собра́в,/ во вре́мя бра́ней к по́двигом страда́ния вчиня́я,/ вра́жий восхи́тив меч, сим того́ уязви́./ К нему́же возопии́м:/ му́чеников изря́днейше,/ с пострада́вшими с тобо́ю моли́ Христа́ Бо́га/ о ве́рою соверша́ющих всечестну́то па́мять твою́.

Глас 4. Иоа́нна мона́ха:

Да венча́ются от нас похвала́ми добропобе́днии и́стины свиде́тели:/ Евстра́тий, е́ллинскаго басносмышле́ния обличи́тель/ и христиа́нскаго Богому́дрия пропове́дник;/ Авксе́нтий, и́же му́дростию сло́вес/ и терпе́нием дел мучи́тельское обличи́вый безбо́жие,/ к сим Евге́ний, Бо́гу благопотре́бный/ и мучи́телем непотре́бный спаси́тельнаго ра́ди испове́дания,/ и Оре́ст, и́стинный и чу́дный Царя́ всех во́ин;/ с ни́миже и Марда́рий, голубь незло́бивый,/ му́дрое посрами́вый зми́я благода́тию Христа́ Бо́га/ и Спа́са душ на́ших.

Касси́и мона́хини:

Па́че е́ллинских наказа́ний/ апо́стольскую му́дрость предпочто́ша святи́и му́ченицы,/ кни́ги вити́йския оста́вльше и рыба́рскую навы́кше:/ та́мо бо у́бо благоязы́чие глаго́лам,/ в некни́жных же Богогла́сиих Тро́ическому науча́хуся Богора́зумию./ В не́мже моли́теся/ в ми́ре сохрани́тися душа́м на́шим.

Сла́ва, глас 4, тоя́же Касси́и:

Пятостру́нную цевни́цу/ и пятосве́тлый све́щник Бо́жия Це́ркве,/ Богоно́сныя му́ченики тезоиме́нне воспои́м/ и благоче́стне похва́лим:/ ра́дуйся, и́же до́бре Бо́гом вво́инствованный в Небе́снем во́инстве/ и, вво́инившему тя угоди́в,/ и́же в вити́ях вити́й, Евстра́тие Богому́дре;/ ра́дуйся, и́же тала́нт от Бо́га, тебе́ вве́ренный,/ во́зрастав во мно́жество, Авксе́нтие блаже́нне;/ ра́дуйся, красне́йшая ветвь/ Боже́ственнаго благоро́дия, Евге́ние Богому́дре;/ ра́дуйся, кра́сный о́бразом,/ нра́вом же предо́брый и обоюдоизря́дный,/ и́же в Боже́ственных гора́х пребыва́я весь, всеблаже́нне Оре́сте;/ ра́дуйся, сия́яй прозра́чный би́сере,/ и́же му́ки го́рькия ра́достне претерпе́вый, Марда́рие непобеди́ме;/ ра́дуйся, равночи́сле́нный ли́че му́дрых дев,/ я́же мо́лим вся́каго гне́ва и ско́рби изба́вити/ и неизрече́нныя ва́шея сла́вы соприча́стники сотвори́ти/ ле́тнюю ва́шу па́мять чту́щия.

И ны́не, Богоро́дичен: Иму́ще Тя, Богоро́дице:

Славосло́вие вели́кое. И отпу́ст.

НА ЛИТУРГИ́И

Блаже́нны І-го кано́на песнь 3-я, на 4 и 2-го, песнь 6-я, на 4. Проки́мен, глас 4: Святы́м, и́же суть на земли́ его́,/ удиви́ Госпо́дь вся хоте́ния Своя́ в них.

Стих: Предзре́х Го́спода пре́до мно́ю вы́ну:

Апо́стол ко Ефесе́ем, зача́ло 233.

Аллилу́ия, глас 4: Воззва́ша пра́веднии,/ и Госпо́дь услы́ша их.

Стих: Мно́ги ско́рби пра́ведным:

Ева́нгелие от Луки́, зача́ло 106. Прича́стен: Ра́дуйтеся, пра́веднии, о Го́споде:

НА ВЕЛИ́ЦЕЙ ВЕЧЕ́РНИ

Блаже́н муж: на Го́споди, воззва́х: ставим стихов 8 и поем стихи́ры, глас 2.

Подо́бен: Ки́ими венцы́:

Ки́ими венцы́ увенча́ем Ге́рмана преподо́бнаго,/ алеу́тов наста́вника и апо́стола Правосла́вия?/ Той бо, ро́дину оста́вль,/ к ди́виим лю́дем по́йде/ Христа́ пропове́дати и благочести́е Правосла́вное,/ не убоя́вся, ниже́ устраши́вся, врага́ те́мнаго, но по́мощию благода́ти Боже́ственныя просвети́ наро́д/ и приведе́ я ко Христу́,/ и́же име́яй ве́лию ми́лость.

Ки́ими венцы́ увенча́ем Ге́рмана преподо́бнаго,/ алеу́тов наста́вника и апо́стола Правосла́вия?/ Той бо, Валаа́мский квас ду́ха восприи́м/ и пропове́дуя Ева́нгелие сло́вом и де́лы алеу́том,/ вся плотска́я с пло́тию презре́/ и сле́зными моли́твами, и на тве́рдом лега́ньми,/ и мра́за терпе́ньми, и в посте́ пребыва́ньми,/ наипа́че же любо́вию безме́рною к лю́дем приведе́ я ко Христу́,/ и́же име́яй ве́лию ми́лость.

Ки́ими венцы́ увенча́ем Ге́рмана преподо́бнаго,/ алеу́тов наста́вника и апо́стола Правосла́вия?/ Той бо с по́двигом пусты́нным преподо́бия/ соверши́ де́ло апо́стола Правосла́вия/ и, мно́го потруди́вся и люде́й спас от пре́лести лука́ваго,/ благода́ть получи́ чудотворе́ния:/ огнь угаси́, воды́ наше́ствия воспяти́/ и, коне́ц свой проро́чески предуве́дев,/ по́йде ко Христу́, и́же име́яй ве́лию ми́лость.

И́ны стихи́ры, глас 4,

Подо́бен: Дал еси́ зна́мение:

Дал еси́ зна́мение алеу́том, Го́споди,/ руко́ю преподо́бнаго Ге́рмана,/ я́ко да кре́пко уве́руют в Тя,/ Сы́на Бо́жия и Бо́га,/ и, спа́сшеся от тьмы бесо́вския,/ вни́ти в Свет Твой Невече́рний./ Те́мже Твое́ человеколю́бное смотре́ние сла́вим,/ Иису́се Всеси́льне, Спа́се душ на́ших.

Доше́д до океа́на, преподо́бный Ге́рман, Го́споди,/ нача́т не ры́бу не́водом лови́ти,/ но, я́коже апо́столи Твои́, ду́ши челове́ческия./ И кре́пка бысть лови́тва его́ по́мощию благода́ти Твоей,/ и, извле́к люде́й на тве́рдый брег Правосла́вия,/ просла́вися пред Тобо́ю./ Те́мже Твое человеколю́бное смотре́ние сла́вим,/ Иису́се Всеси́льне, Спа́се душ на́ших.

По́двиг прия́л еси́ благоутро́бно, Го́споди,/ преподо́бнаго Ге́рмана,/ и, благода́тию посо́бствовав ему́,/ соверши́л еси́ его́ в ме́ру во́зраста апо́столов Твои́х,/ и прия́л еси́ во оби́тели Ца́рства Небе́снаго,/ дерзнове́ние дав ему́ моли́тися за лю́ди./ Те́мже Твое́ человеколю́бное смотре́ние сла́вим,/ Иису́се Всеси́льне, Спа́се душ на́ших.

Сла́ва, глас 5:

Посла́вый Госпо́дь апо́столы Своя́/ пропове́дати Ева́нгелие всей тва́ри,/ Той и тя посла́ в после́дняя вре́мена/ пронести́ Правосла́вие алеу́том./ И бысть се́итва се́ющаго с благода́тию,/ и угобзи́ся ни́ва плодоноше́нием,/ я́же пребыва́ет да́же до ны́не, богате́ющи в Го́споде./ Те́мже тя мо́лим, преподо́бне о́тче наш Ге́рмане,/ не преста́й и в пре́дняя моли́твами твои́ми назира́ти люде́й твои́х и всех нас,/ пра́зднующих любо́вию всечестну́ю па́мять твою́.

И ны́не, Богоро́дичен, глас 5: В Чермне́м мо́ри:

Вход. Свете ти́хий:

Проки́мен дне и чте́ния три преподо́бническая (зри день 5-й).

На литии́ стихи́ры самогла́сны, глас 1:

Слы́шав Па́вла, глаго́люща,/ преподо́бне о́тче наш Ге́рмане,/ я́ко плоть похотству́ет на ду́ха,/ потща́лся еси́ ху́ждшее покори́ти лу́чшему/ и плоть порабо́тити ду́ху./ Те́мже вери́г желе́зных ноше́нием/ и тя́жких бреме́н таска́нием томи́л еси́ томя́щую плоть,/ до́ндеже дости́гл еси́ Христа́,/ па́че же Христо́м дости́жен был еси́./ И улучи́л еси́ обеща́нную оста́вльшим вся Христа́ ра́ди стори́чную мзду́ благода́ти на земли́/ и живо́т ве́чный насле́довал еси́.

Сла́ва, глас 5:

Кро́ткий душе́ю, преподо́бне Ге́рмане,/ вме́сто земли́ кро́тких по достоя́нию насле́довал еси́ люде́й алеу́тских,/ гони́мый челове́ки и бе́сы,/ скоре́е в Ца́рство Бо́жие вшел еси́;/ нищ сый душе́ю и те́лом,/ бога́тство Небе́сное получи́л еси́,/ а́лчбу и жа́жду души́ твоея́ пра́вдою Бо́жиею насы́тил еси́,/ чи́стым же се́рдцем твои́м Бо́га незри́мое зрел еси́,/ плач твой моли́твенный Ду́хом Святы́м утеша́л еси́./ Ра́дуйся, преподо́бне, и весели́ся,/ я́ко мзду́ твою́ мно́гую ны́не прие́млеши,/ и о нас моли́ся спасти́ся нам.

И ны́не, Богоро́дичен, глас 2:

Храм и дверь еси́,/ пала́та и престо́л Царе́в,/ Де́во Всечестна́я,/ Е́юже Изба́витель мой Христо́с Госпо́дь/ во тьме спя́щим яви́ся, Со́лнце Сый Пра́вды,/ просвети́ти хотя́, я́же созда́ по о́бразу Своему́ руко́ю Свое́ю./ Те́мже, Всепе́тая, я́ко ма́терне дерзнове́ние к Нему́ стяжа́вшая,/ непреста́нно моли́ спасти́ся душа́м на́шим.

На стихо́вне стихи́ры, глас 2.

Подо́бен: Егда́ от Дре́ва:

Егда́ тя ма́ти твоя́ зача́т во утро́бе,/ тогда́ еще тя Бог, я́ко же дру́гаго Иере́ми́ю,/ знамена́ благоче́стием,/ и, в де́тстве Бо́га усе́рдно любя́,/ в хра́мех его́ вы́ну примета́лся еси́,/ и, вне́мля гла́су Ева́нгелия Христо́ва,/ ми́р оста́вил еси́,/ и под се́нию Се́ргия преподо́бнаго и́ноческий по́двиг на ся восприя́л еси́./ Та́же, сме́ртно поболе́вша за ре́вность твою́ по Бо́зе/ Бо́жия Ма́ти тя чуде́сно исцели́.

Стих: Честна́ пред Го́сподем/ смерть преподо́бных Его́.

Егда́ из ре́вности вя́щшия в свяще́нный Вала́ам прише́л еси́,/ тогда́ и вя́щший по́двиг на ся подъя́л еси́ послуша́ния и смире́ния,/ моли́тве же прилежа́ и посту́ преизли́ха¹³,/ высоту́ дости́гл еси́ зре́лыя доброде́тели./ Те́мже на безмо́лвие в пусты́ни Валаа́мстей ста́рцы тя благослови́ша,/ иде́же с бе́сы побе́дне бра́тися,/ с Го́сподом и со А́нгелы бесе́довати/ и со все́ми святы́ми утеша́тися.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Егда́ Бог восхоте́ алеу́тов просвети́ти све́том Правосла́внаго благоче́стия,/ тогда́ вложи́ в се́рдце А́нгелу Це́ркве Русския/ посла́ти тя та́мо апо́стола и просвети́теля,/ иде́же ты, мно́гая ле́та послужи́в/ и де́ло изря́дное соверши́в,/ дости́гл еси́ побе́дныя венцы́ от Бо́га в Це́ркви его́ Правосла́вней,/ я́же тя в предста́теля люде́й нарица́ет/ и в моли́тву к Бо́гу тя призыва́ет.

Сла́ва, глас то́йже:

Во ю́ности Бо́га всем се́рдцем возлюби́в/ и к Нему́ ду́шу твою́ привяза́в,/ я́ко свя́зна, Той тя поведе́ по словеси́ Своему́,/ а́може и не хоте́л еси́./ Но снабде́ тя си́лою благода́ти Своей,/ во е́же из уст твои́х, я́коже река́ мно́говодная,/ излива́тися прему́дрости Ева́нгелия во уши люде́й неве́рных/ и чудеса́ ди́вная соверша́тися руко́ю твое́ю,/ я́коже бо апо́столом первым обеща́ся,/ си́це и на тя в после́дняя вре́мена испо́лни./ Те́мже ученицы́ твои́ тя просла́виша кре́пким благочести́ем свои́м я́ко учи́теля своего́,/ и Бог тя упоко́и по труде́х со святы́ми,/ и Це́рковь тя призыва́ет в моли́тву к Бо́гу о ми́ре всего́ ми́ра,/ о благостоя́нии Правосла́вия и спасе́нии душ на́ших.

И ны́не, Богоро́дичен, глас 2: О, чудесе́ но́ваго:

Тропа́рь преподо́бнаго, глас 1:

Ло́зу Правосла́вия прине́сл еси́ в Аме́рику из Руси благочести́выя/ и, удобри́в ко́рень по́стническими труда́ми/ и напои́в оби́льне моли́твенными слеза́ми,/ плоды́ прине́сл еси́ – вино́гра́д возлю́бленный,/ Ге́рмане преблаже́нне о́тче наш./ Те́мже и Бог тя просла́ви, я́ко апо́стола преподо́бнаго,/ нетле́нием моще́й и благода́тию чудес,/ от них же почерпа́юще благодея́ния, восхваля́ем тя:/ сла́ва Да́вшему ти кре́пость,/ сла́ва Венча́вшему тя,/ сла́ва Дарова́вшему тя Аме́рице свети́ло Правосла́вия.

Ин тропа́рь, глас 3:

Преподо́бне о́тче наш Ге́рмане,/ пе́рвый свети́льниче, в земли́ на́шей просия́вый,/ прино́сим вси тебе́ похвалы́ сия́,/ ты же, я́ко име́яй дерзнове́ние ко Го́споду,/ бу́ди засту́пник нам, и уте́шитель,/ и Це́ркви на́шея покрови́тель ди́вный,/ да вси со умиле́нием зове́м ти:/ ра́дуйся, о́тче наш Ге́рмане, Аля́ски и всея́ Аме́рики пресла́вный чудотво́рче.

Сла́ва, и ны́не, Богоро́дичен.

На благослове́нии хлебов тропа́рь преподо́бнаго, два́жды, и Богоро́дице Де́во: еди́ножды.

НА У́ТРЕНИ

На Бог Госпо́дь: тропа́рь преподо́бнаго, два́жды, Сла́ва, и ны́не, Богоро́дичен, глас 3.

По 1-м стихосло́вии седа́лен, глас 4.

Подо́бен: Удиви́ся Ио́сиф:

Удиви́хомся вси по́двигу твоему́ пресла́вному,/ ка́ко, с бе́сы бра́вся, победи́л еси́,/ и ка́ко, со А́нгелы бесе́довав, по́льзовался еси́,/ и ка́ко гру́бых люде́й ко Христу́ приве́л еси́, Ге́рмане преподо́бне./ Бо́гу помога́ющему вся соде́яв, на Небе́сную жи́знь беспрепятственно преше́л еси́,/ иде́же ны́не лице́м к лицу безве́стная и тайная Бо́жия зри́ши и о нас мо́лишися.

Сла́ва, и ны́не, Богоро́дичен:

Удиви́ся Ио́сиф, е́же па́че естества́ зря и внима́ше мы́слию,/ и́же на руно́ дождь, в безсе́меннем зача́тии Твое́м, Богоро́дице,/ купину́, огне́м неопали́мую, жезл Ааро́нов прозя́бший,/ и, свиде́тельствуя, обру́чник Твой и храни́тель, свяще́нником взыва́ше:/ Де́ва ражда́ет и по рождестве́ па́ки Де́вою пребыва́ет.

По 2-м стихосло́вии седа́лен, глас 4.

Подо́бен: Ско́ро предвари́:

Е́же от Бо́га зва́ние прие́м,/ оста́вил еси́ отца́ и ма́терь, бога́тство и дом/ и, по стопа́м Го́спода твоего́ ше́ствовав, на ме́сто по́двигов твои́х дости́гл еси́,/ иде́же плоть изнури́в воздержа́нием и люде́й алеу́тских приве́д ко Христу́,/ ны́не прославля́ешися от Бо́га в Це́ркви его́, я́ко преподо́бный апо́стол Христо́в.

Сла́ва, и ны́не, Богоро́дичен:

Пое́м Тя, Богоневе́сто, Ма́ти Христа́ Бо́га,/ сла́вяще Рождество́ Твое́ непостижи́мое,/ И́мже изба́вихомся от ле́сти диа́воли и вся́ких бед, Богоро́дице Влады́чице, и ве́рно вопие́м:/ поми́луй ста́до Твое, еди́на Всепе́тая.

По полиеле́и седа́лен, глас 8.

Подо́бен: Прему́дрости:

Прему́дростию Боже́ственною напои́в твою́ ду́шу от Первоисто́чника, Спа́са на́шего,/ был еси́ исто́чник воды́, теку́щия в живо́т ве́чный, я́коже глаго́лет Госпо́дь./ Тем и напои́л еси́ жа́ждущих сло́ва Бо́жия просты́х и уче́ных,/ и никто́же мо́жаше противуста́ти глаго́лом твои́м Богодухнове́нным./ Сего́ ра́ди вси почита́ем преподо́бнаго апо́стола и согла́сно вопие́м:/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

В напа́сти многоплете́нныя впад от враг ви́димых и неви́димых,/ бу́рею одержи́м безчи́сленных согреше́ний мои́х,/ и я́ко к те́плому заступле́нию и покро́ву моему́, Чи́стая,/ ко приста́нищу притека́ю Твоея́ бла́гости./ Те́мже, Пречи́стая, из Тебе́ воплоще́нному безсе́менно моли́ся приле́жно о всех рабе́х Твои́х,/ непреста́нно моля́щих Ти ся, Богоро́дице Пречи́стая,/ моля́щи его́ при́сно согреше́ний оставле́ние дарова́ти/ воспева́ющим досто́йно сла́ву твою́.

Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных его́.

Стих: Что возда́м Го́сподеви о всех,/ я́же воздаде́ ми. Вся́кое дыха́ние:

Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бне о́тче Ге́рмане,/ во всю зе́млю Алеу́тскую изы́де веща́ние исправле́ний твои́х,/ тем на Небесе́х обре́л еси́ мзду́ трудо́в твои́х,/ де́монския погуби́л еси́ полки́,/ и люде́й твои́х исхити́л еси́ от се́тей их,/ и а́нгельския дости́гл еси́ чи́ны,/ и́хже житию́ без поро́ка поревнова́л еси́./ Дерзнове́ние же име́я ко Христу́ Бо́гу,/ ми́р испроси́ душа́м на́шим.

Кано́н преподо́бнаго, глас 4. его́же краегране́сие: Ге́рмана, Руси и Америки похвалу́, пою́.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Госпо́дь тя избра́, я́коже Моисе́я иногда́, в вождя́ ве́ры алеу́том,/ я́ко да, изве́д я из тьмы фараони́тския,/ введе́ши во свет спаси́тельный вопию́щих:/ Го́сподеви пои́м, сла́вно бо просла́вися.

Еги́пет идолослуже́ния воспла́кася го́рце лише́нием наро́да избра́ннаго,/ и́же тобо́ю проидо́ша скво́зе мо́ре Креще́ния/ в зе́млю обетова́ния Христо́ва, вопию́ще:/ Го́сподеви пои́м, сла́вно бо просла́вися.

Ра́довахуся А́нгели о спасе́нии чад твои́х духо́вных, Ге́рмане преподо́бне,/ я́коже Госпо́дь рече́,/ и́же и прия́т я в лоно Це́ркве Правосла́вныя, воспева́ющих:/ Го́сподеви пои́м, сла́вно бо просла́вися.

Богоро́дичен: Ма́ти Бо́жия Благослове́нная,/ сохраня́й ны, неопятне́нных в бе́лой оде́жди Креще́ния и покая́ния, воспева́ющих:/ Го́сподеви пои́м, сла́вно бо просла́вися.

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Алеу́тов просвети́в, спасл еси́ от неприя́зни врага́,/ ни бога́тством, ни си́лою приобрета́я их,/ но прему́дростию ду́ха, и по́двигом преподо́бия, и про́поведию благоче́стия,/ я́ко несть свят, я́коже Бог наш,/ и несть пра́веден, па́че Го́спода.

Не му́дростию хвали́лся еси́,/ но му́дростию всех учил еси́ благоче́стию,/ люби́ти Христа́, и ве́ровати в него́, и греха́ боя́тися, глаго́ля:/ несть свят, я́коже Бог наш,/ и несть пра́веден, па́че Го́спода.

А́ще и в труде́х и в страда́ниих по́двиг твой соверши́л еси́,/ но ра́дости испо́лнен был еси́,/ на сие́ бо еди́но то́кмо зря, я́ко Бо́жие де́ло твори́ши,/ и я́ко несть свят, я́коже Бог наш,/ и несть пра́веден, па́че Го́спода.

Богоро́дичен: Роди́вши без се́мене му́жняго от Тро́ицы Еди́наго, Богоро́дице Пречи́стая,/ дерзнове́ние и́маши бога́тно помога́ти всем в по́двизе и страда́нии пребыва́ющим и испове́дающим:/ несть свят, я́коже Бог наш,/ и несть пра́веден, па́че Го́спода.

Ин Конда́к, глас 8.

Валаа́ма постри́жник,/ честны́й возлю́бленник Бо́жией Ма́тери бы́вый,/ ревни́тель по́двигов дре́вних подви́жников но́вый,/ моли́тву, я́ко копие́ и щит, прие́мый,/ стра́шен демо́ном и тьме язы́честей ста́вый,/ Ге́рмане преподо́бне, моли́ Христа́ Бо́га спасти́ ду́ши на́ша.

Седа́лен, глас 4.

Подо́бен: Вознесы́йся на Крест:

Вознесе́н быв Христо́м в зва́ние апо́стола/ и испо́лнив де́лом зва́ние сие́,/ ра́дость имел еси́ со дерзнове́нием рещи́ Го́споду:/ се аз и де́ти, я́же ми дал еси́ жребий мой!/ И, прие́м тя во оби́тели апо́столов,/ венце́м тя украси́ ми́лости Своея́,/ и тобо́ю да́рует благода́ть всем, творя́щим любо́вию честну́ю па́мять твою́.

Сла́ва, и ны́не, Богоро́дичен:

Вознесе́ну па́че всех чино́в а́нгельских, ве́мы Тя Хода́таицу пред Бо́гом о нас, Богоро́дице./ Те́мже, припа́дающе пред о́бразом Твои́м честны́м, мо́лим Тя:/ не отста́ви от нас ми́лости Твоея́,/ но всегда́ покрыва́й от вся́каго нахожде́ния вра́жия/ и путеводи́ ны ко приста́нищу небу́рному жи́зни благочести́выя и спасе́ния душа́м.

Песнь 4

Ирмос, глас 6: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

О́вцы твоя́ из родо́в во́лчиих воспита́в,/ ста́ду Христо́ву сопричи́слил еси́ и, до́бро́му Па́стырю Христу́ я вручи́в,/ ми́рною душе́ю взыва́л еси́:/ сла́ва си́ле Твое́й, Го́споди.

Спа́сову доброде́тель, покры́вшую Небеса́, пропове́дал еси́ во вся дни живота́ твоего́/ и хвалы́ его́ испо́лнил еси́ всю зе́млю Алеу́тскую,/ Помо́щнику Бо́гу взыва́я:/ сла́ва си́ле Твое́й, Го́споди.

Си́лою Бо́га твоего́ вся сотвори́в ди́вная и ужа́сная в животе́ твое́м, не возне́слся еси́ мы́слию,/ па́че же смиря́яся, взыва́л еси́ вы́ну:/ сла́ва си́ле Твое́й, Го́споди.

Богоро́дичен: Иму́ще Тя, Ма́ти Бо́га на́шего,/ Хода́таицу за нас пред Судо́м Сы́на Твоего́ Боже́ственнаго,/ любве́ и наде́жды испо́лнены есмы́, взыва́ша:/ сла́ва си́ле Твоей, Го́споди.

Песнь 5

Ирмос, глас 6: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

И́менем Госпо́дним моля́ся непреста́нно,/ нищету́ в бога́тство вмени́л еси́/ и, ду́хом богате́я, я́коже Па́вел, глаго́лал еси́:/ ничто́же име́я, вся содержу́ души́ челове́ческия в Го́споде.

И́же тя в алеу́ты посла́,/ Той тя и утеша́ше на всяк день поспе́шеством Свои́м,/ до́ндеже всех приобре́л еси́ Христу́ и ду́шу твою́ спасл еси́ в Го́споде.

А́ще и еди́н изше́л еси́ на врага́ лука́ваго, я́коже Дави́д на Голиа́фа,/ но си́лою Креста́ низложи́л еси́ его́ паде́нием вели́ким/ и люде́й изба́вил еси́ в Го́споде.

Богоро́дичен: Мо́жеши спа́сати от обстоя́ний вра́жиих, Богоро́дице, и́хже хо́щеши,/ дана́ бо Ти есть благода́ть от Сы́на Твоего́,/ в ни́хже и нас помяни́, Чи́стая.

Песнь 6

Ирмос, глас 6: Жите́йское мо́ре,/ воздви́гаемое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.

Еже люби́ти Бо́га непщева́л еси́ пе́рвое коему́ждо от христиа́н,/ и други́м пропове́дал еси́,/ и сам к сему́ все́ми си́лами подвиза́лся еси́.

Руко́ю кре́пкою нача́в де́ло апо́стольства твоего́,/ до конца́ неотсту́пно соверши́л еси́ е,/ до́ндеже всех ко Христу́ приве́л еси́ и венца́ от Христа́ сподо́бился еси́.

И́стину Христо́ву глубино́ю души́ восприи́м,/ раб был еси́ неключи́м Го́спода твоего́,/ вся бо повеле́нная испо́лнив, ме́ньша всех себе́ смире́нием непщева́л еси́.

Богоро́дичен: Ка́ко не диви́мся Бо́гомужному рождеству́ Твоему́, Пречи́стая?/ я́ко бо Ма́ти безму́жно низвела́ еси́ на зе́млю Спа́са на́шего Иису́са Христа́,/ в Не́мже спаса́емся и жи́знь насле́дствуем.

Конда́к, глас 8.

Подо́бен: Взбра́нной Воево́де:

Взбра́нному Воево́де сво́инствовався,/ в брань вступи́л еси́ на ду́ха зло́бы в по́ле преподо́бия и апо́стольства./ И, пожа́в побе́ды обою́дныя,/ воздвиза́еши нас вопи́ти тебе́:/ ра́дуйся, свя́те Ге́рмане, апо́столе преподо́бный.

И́кос:

Несть на́ша брань проти́ву кро́ви и пло́ти,/ но к духово́м зло́бы поднебе́сным, я́коже рече́ апо́стол./ Сего́ ра́ди обле́к на ся всеору́жие Бо́жие в Валаа́ме/ и, обу́вся до́бре в благове́ствование Правосла́вия,/ отше́л еси́ в Аме́рику, я́ко всеору́жник Бо́жий победи́тельный./ И по́двигом до́брым подвиза́вся, ве́ру Правосла́вную насади́в/ и тече́ние земна́го пути́ сконча́в, вене́ц сла́вы восприя́л еси́ от Бо́га по достоя́нию/ и нас воздвиза́еши вопи́ти тебе́:/ ра́дуйся, свя́те Ге́рмане, апо́столе преподо́бный.

Песнь 7

Ирмос, глас 6: Росода́тельну у́бо пещь/ содела́ А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Из Руси изше́д благочести́выя и в Америку дости́г,/ соверши́л еси́ де́ло апо́стольства и преподо́бия,/ отту́ду же в ве́чное отше́д оте́чество, пое́ши Го́сподеви:/ благослове́н еси́, Бо́же оте́ц на́ших.

Посто́м и моли́твою вла́гу стра́стную пло́ти изсуши́в,/ дух возвы́сил еси́ в ме́ру во́зраста Христо́ва,/ во е́же всем естество́м пе́ти возмо́жеши:/ благослове́н еси́, Бо́же оте́ц на́ших.

Опасно проходя́ путь доброде́тели и не уклоня́яся ни одесну́ю, ни ошу́юю,/ люде́й твои́х води́л еси́ безпоро́чно к Бо́гу,/ и сам дости́гл еси́ Ца́рство, иде́же пое́ши:/ благослове́н еси́, Бо́же оте́ц на́ших.

Богоро́дичен: Христа́ Емману́ила Ма́ти Благослове́нная,/ предста́тельствы Твои́ми всели́ Дух Сы́на Твоего́ в сердца́ на́ша,/ я́ко да с на́ми Бо́га иму́ще, злых свободи́мся и пе́ти вы́ну возмо́жем:/ благослове́н еси́, Бо́же оте́ц на́ших.

Песнь 8

Ирмос, глас 6: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́си́м во вся ве́ки.

Вол, за любо́вь твою́ возлюби́в тя/ и не еди́наго дне не стерпе́в сме́ртнаго лише́ния твоего́,/ сам уби́ся в печа́ли свое́й по тебе́,/ я́ко тварь си́це воспева́я Го́сподеви.

А́нгелы име́л еси́ смоли́твенники в та́йне убо́гия ке́ллии твоей,/ и́же и извести́ша тя о дни и ча́се преставле́ния твоего́/ и прия́ша тя последи́ в ли́ки святы́х воспева́ти во веки Го́сподеви.

Люде́й твои́х возлюби́в па́че всего́ на земли́/ и вся бла́гая им соде́яв, Небе́сная пре́жде и земна́я,/ научи́л еси́ я до́брому благочести́ю,/ во е́же вку́пе с ни́ми зде и та́мо воспева́ти Го́сподеви.

Богоро́дичен: Утро́бу твою́ освяти́ Роди́выйся от Тебе́, Богома́ти,/ и ши́ршую Тя Небе́с сотвори́ благоутро́бием ма́терним,/ и́мже всех нас покрыва́вши от вся́ческих бед, Благода́тная.

Песнь 9

Ирмос, глас 6: Бо́га/ челове́ком невозмо́жно ви́дети,/ на него́же не сме́ют чи́ни а́нгельсти́и взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ его́же велича́юще,/ с Небе́сными во́и Тя ублажа́ем.

Призре́ на смире́ние твое́ Госпо́дь,/ его́же душа́ твоя́ велича́ше/ и о Не́мже дух твой ра́довашеся вся дни живота́ твоего́ на земли́,/ и вознесе́ тя в Ца́рствии Свое́м, я́ко еди́наго от избра́нных Свои́х.

О́бщаго Влады́ку зри́ши ны́не лице́м к лицу./ Не забыва́й у́бо в моли́твах твои́х всех, почита́ющих па́мять твою́,/ но сохраня́й от лю́тых бед и поги́бели ве́чныя.

Ю́ность твоя́ благочести́ва, му́жество твое́ пра́ведно,/ ста́рость твоя́ свя́та и во ве́ки жи́знь блаже́нна./ моли́ у́бо спасти́ся нам.

Богоро́дичен: Парфе́ну Де́ву Тя вси ублажа́ем,/ прама́тернюю кля́тву разруши́вшую Рождество́м Твои́м/ и Ада́мово изгна́ние испра́вившую./ Люде́й у́бо Твои́х сохраня́й змии́ных искуше́ний всемогущим предста́тельством Твои́м/ и введи́ ны в блаже́нство ра́я.

Свети́лен, глас 3.

Подо́бен: Свете неизме́нный:

Свет Боже́ственный возсия́л еси́ алеу́том потемне́нным/ и претвори́л еси́ я из бе́лых волко́в Се́вера в овча́та кро́тка ста́да Христо́ва./ Не преста́й у́бо и ны́не моля́ся, Ге́рмане преподо́бне,/ о назда́нии в Аме́рице Правосла́вия.

Сла́ва, и ны́не, Богоро́дичен:

Све́та невече́рняго нас прича́стники сотвори́ла еси́, Богоро́дице, Боже́ственным Рождество́м Твои́м,/ Бо́га бо роди́вши Челове́ка,/ Кресто́м и сме́ртию и Воскресе́нием его́ победи́тели нас яви́ла еси́ тьмы кроме́шныя/ и насле́дники Ца́рствия Небе́снаго.

На хвали́тех стихи́ры, глас 1.

Подо́бен: Небе́сных чино́в:

Небе́снии чи́ни ра́довахуся,/ зря́ще твой по́двиг терпе́ния неустраши́маго:/ еди́наго бо твои́х споспе́шник уби́ша непокори́вии,/ друзи́и же корабле́м утопа́ше в мо́ри,/ остася ты еди́н среди́ ди́виих люде́й/ и неустраши́мо соверши́ до конца́ де́ло апо́стола.

Апо́стола Па́вла слы́ша, глаго́люща,/ я́ко ему́ послужи́сте ру́це его́ к пропита́нию,/ и ты зе́млю копа́л еси́,/ волу́ лю́бящу, помога́ющу тебе́,/ Ге́рмане преподо́бне,/ и семена́ се́ял еси́, и плоды́ собира́л еси́,/ и́миже не́мощную плоть пита́ти и ни́щую бра́тию.

Го́споду глаго́лющу:/ уразуме́йте и́стину,и и́стина свободи́т вы,/ уразуме́л еси́ и́стину ве́ры и любве́ к Бо́гу,/ и свобо́ду от страсте́й приобре́л еси́,/ и и́ных учил еси́ отроко́в же и ста́рцев,/ всех благоче́стно путеводя́ к све́ту Боже́ственному и спасе́нию.

Обремене́нный ле́ты и труды́,/ я́ко грозд в виногра́де и я́ко клас зре́лый на ни́ве,/ пожа́ тя Бог на поко́й и блаже́нство ра́я Небе́снаго,/ иде́же предстоя́ во сла́ве Престо́лу Всевы́шняго,/ моли́ всем спасти́ся,/ чту́щим любо́вию честну́ю па́мять твою́.

Сла́ва, глас 8:

Царю́ Небе́сный, всем дая́й на земли́ со́лнце и дождь во вре́мя свое́/ и о всех промышля́яй ми́лостию и щедро́тами,/ испо́лнившуся вре́мени посла́л еси́ преподо́бнаго Ге́рмана/ из блаже́ннаго Валаа́ма к алеу́там непросвеще́нным,/ и́же просвети́ти я све́том Твои́м Боже́ственным./ И, дав ему́ благода́ть и кре́пость соверши́ти де́ло Твое́ до конца́,/ прия́л еси́ его́ во оби́тели апо́стол Твои́х и преподо́бных,/ украси́в его́ венце́м пра́вды,/ его́же воздае́ши всем, возлю́бльшим Тя/ де́лателем виногра́да Твоего́ на земли́./ моли́твами у́бо его́ даждь пребы́ти и преумно́житися де́лу его́/ и душа́м спасти́ся, почита́ющим святу́ю па́мять его́.

И ны́не, Богоро́дичен: Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Славосло́вие вели́кое и отпу́ст.

НА ЛИТУРГИ́И

Блаже́нны от кано́на преподо́бнаго, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных его́.

Стих: Что возда́м Го́сподеви о всех,/ я́же воздаде́ ми.

Апо́стол к Галатам, зача́ло 213.

Аллилу́ия, глас 6: Блаже́н муж, боя́йся Го́спода,/ в за́поведех его́ восхо́щет зело́.

Стих: Си́льно на земли́ бу́дет се́мя его́.

Ева́нгелие от Матфе́я, зача́ло 10. Прича́стен: В па́мять ве́чную:

НА МАЛОЙ ВЕЧЕ́РНИ

На Го́споди, воззва́х: стихи́ры на 4, глас 1.

Подо́бен: Прехва́льнии му́ченицы:

О́тче преподо́бне Арка́дие,/ от ю́ности своему́ Влады́це подо́бяся,/ ди́вно житие́ проше́л еси́,/ о́браз подви́жником доброде́телию показа́лся еси́,/ дарова́ние благода́ти от Человеколю́бия Бо́жия в себе́ прие́м./ Те́мже моли́ся/ дарова́ти душа́м на́шим ми́р и ве́лию ми́лость.

О́тче преблаже́нне Арка́дие,/ кто по́двиги и исправле́ния твоя́ испове́сть,/ я́же соверши́л еси́, Христу́ после́дуя?/ не дал бо еси́ сна очи́ма твои́ма,/ пребыва́я при́сно в моли́твах и бде́ниих,/ и́ми же ду́шу от страсте́й свободи́л еси́,/ слеза́ми непреста́нными ю очища́я,/ и ны́не моли́ся/ дарова́ти душа́м на́шим ми́р и ве́лию ми́лость.

О́тче преподо́бне Арка́дие,/ чистоту́ теле́сную и душе́вную добро́ту,/ я́же по о́бразу Бо́жию, от ю́ности свое́й сохрани́л еси́/ и, о́ком ума́ Бо́га зре́ти обучи́вся,/ тому́ служи́л еси́ стра́хом и любо́вию мно́гою,/ после́дуя наста́внику своему́, преподо́бному Ефре́му,/ с ним же моли́ся дарова́ти душа́м на́шим/ ми́р и ве́лию ми́лость.

Сла́ва, глас 6:

Прииди́те, и́нок мно́жества, днесь,/ духо́вно возвесели́мся в наро́читом пра́зднице сем:/ пресве́тлая бо па́мять отца́ на́шего наста́,/ в ню́же соше́дшеся,/ того́ воспои́м, глаго́люще:/ ра́дуйся, Арка́дие пресла́вне,/ на земли́, я́ко А́нгел, исполня́я во́лю Бо́жию, пожи́вый;/ ра́дуйся, ду́ха Свята́го прия́телшце и жили́ще бы́вый./ Ра́дуйся, стране́ на́шей защище́ние и утвержде́ние/ и всему́ гра́ду Торжку́ пресве́тлый свети́льниче;/ ра́дуйся, те́плый со А́нгелы предста́тель о нас ко Го́споду,/ его́же непреста́нно моли́/ дарова́ти душа́м на́шим ми́р и ве́лию ми́лость.

И ны́не: Богоро́дичен: Богоро́дице, Ты еси́ лоза́:

На стихо́вне стихи́ры, глас 2.

Подо́бен: До́ме Евфра́фов:

Дом духо́вный/ был еси́, преподо́бне,/ бденными моли́твами и по́стными по́двигами,/ я́ко благово́нными арома́ты,/ благоукраси́в ду́шу свою́.

Стих: Честна́ пред Го́сподем/ смерть преподо́бных Его́.

Дрема́ния не дал еси́/ очи́ма свои́ма, преподо́бне,/ до́ндеже ду́шу от страсте́й свободи́л еси́/ и возме́здие обре́л еси́,/ со А́нгелы водворе́ние.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Боже́ственным жела́нием/ уязви́вся, преподо́бне,/ житие́ непоро́чно проходи́л еси́,/ до́ндеже унасле́довал еси́/ Ца́рствие Небе́сное.

Сла́ва, глас 8:

И́мяше блаже́нная твоя́ душа́ и непоро́чная/ ду́ха Пресвята́го озаре́ние,/ о́тче преподо́бне Арка́дие,/ от ю́ности бо нося́ соверше́н смысл/ и любо́вию Христо́вою разгара́яся,/ держа́вно над страстьми́ воцари́лся еси́,/ и, ко́зни де́монския кресто́м низложи́в,/ та́ко по́двиг тече́ния своего́ соверши́л еси́,/ и ны́не во свете невече́рнем водворя́ешися,/ Тро́ице со А́нгелы предстоя́./ Те́мже моли́ изба́вится нам ви́димых и неви́димых враг/ и спасти́ся душа́м на́шим.

И ны́не, Богоро́дичен: Влады́чице, приими́ моли́твы раб Твои́х:

Тропа́рь, глас 4: От духо́внаго наста́вника: пи́сан на вели́цей вече́рни.

Сла́ва, и ны́не, Богоро́дичен: Е́же от ве́ка утае́нное:

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры на 8, глас 8.

Подо́бен: О, пресла́внаго чудесе́:

О́тче Арка́дие преподо́бне,/ окрили́в ум к Бо́гу ве́рою,/ ми́ра и я́же в нем возгнуша́лся еси́/ и, крест свой взем,/ Христу́ Бо́гу после́довал еси́,/ те́ло непокори́вое по́двиги воздержа́ния/ му́жественно порабо́тив ду́хови.

Я́коже со́лнце многосве́тло,/ доброде́телей све́том/ и чуде́с сия́ньми/ обре́т Ефре́ма, Арка́дие,/ от того́ просвеще́ние прия́л еси́/ и, те́мныя стра́сти отгна́в, све́тел яви́лся еси́,/ те́мже и к Све́ту Незаходи́мому премину́л еси́,/ о́тче преблаже́нне.

Все житие́ препроводи́л еси́ в безмо́лвии мно́зе,/ и в пла́че, и в слеза́х, и́нок быв и́стинен ве́рою,/ нестяжа́нием укра́шен,/ и воздержа́нием удобре́н,/ и, я́ко стра́не́н и пришле́ц на земли́, явля́я себе́./ Те́мже обре́л еси́/ Небе́сных благи́х наслажде́ние, досточу́дне.

И́ны стихи́ры, глас 8.

Подо́бен: Все упова́ние:

Весь от ю́ности Го́сподеви возло́жся, Арка́дие преподо́бне,/ земну́ю красоту́ и сла́ву нивочто́же вмени́л еси́,/ да Христа́ еди́наго приобря́щеши./ и́го креста́ на ра́мо взем/ и во вся ору́жия Бо́жия оболки́йся,/ оби́тели преподо́бнаго Ефре́ма дости́гл еси́/ и, от него́ о́браза и́ноческаго сподо́блься,/ мно́гим доброде́телем о́браз был еси́./ И ны́не на Небесе́х со А́нгелы Христо́ви предстоя́, Арка́дие о́тче наш,/ моли́ спасти́ся душа́м на́шим.

Па́мять стра́шнаго Христо́ва прише́ствия/ в се́рдце свое́м нося́, Арка́дие преподо́бне,/ разу́мно мимотеку́щих жития́ премину́л еси́/ и, сла́ву маловре́менную презре́в,/ равноа́нгельное житие́ восприя́л еси́:/ на земли́ бо му́жески подвиза́вся,/ потща́лся еси́ плоть покори́ти ду́хови./ Ду́шу же и ум от страсте́й очи́стил еси́,/ ревнова́в житию́ преподо́бнаго Ефре́ма./ С ним же на Небесе́х Престо́лу Влады́чню предстои́ши,/ со дерзнове́нием моля́ся о душа́х на́ших.

Преподо́бне о́тче Арка́дие,/ измла́да возлюби́л еси́ добро́ту Влады́чню/ и, к тому́ жела́ние невозвра́тно име́я,/ оте́чество и род оста́вил еси́,/ бога́тство же и сла́ву возненави́дев,/ Христу́ еди́ному после́довал еси́,/ равноа́нгельно во оби́тели с преподо́бным Ефре́мом пожи́л еси́./ И ны́не на Небесе́х со А́нгелы Христу́ Бо́гу предстои́ши,/ Арка́дие преподо́бне,/ со дерзнове́нием моля́ся о душа́х на́ших.

Сла́ва, глас 2:

Жела́нием бу́дущих благ, преподо́бне, утверди́вся,/ чистото́ю душе́вною спасе́ния пути́ проше́л еси́,/ душегуби́тельнаго и го́рдаго зми́я смире́нием и воздержа́нием уби́л еси́./ Небе́сная же во́инства удиви́л еси́ терпе́нием свои́м,/ чи́стое прия́телшце Пресвято́му Ду́ху, о́тче преподо́бне, быв;/ сего́ ра́ди от Вседержи́тельныя десни́цы венча́лся еси́/ и чуде́с дарова́ний от него́ сподо́бился еси́./ Те́мже моли́ спасти́ся душа́м на́шим.

И ны́не, Богоро́дичен: Пре́йде сень зако́нная:

Вход. Проки́мен дне. Чтения преподо́бническая (зри день 5-й).

На литии́ стихи́ры, глас 1:

Днесь ликовству́ет ра́достно освяще́нная оби́тель/ и хва́лится твои́ми Богоуго́дными дея́нии,/ име́ющи твоя́ святы́я мо́щи, блаже́нне Арка́дие,/ от них же святы́ню почерпа́ем оби́льно,/ подава́ют бо цельбы́ с ве́рою притека́ющим к ним,/ те́мже, просве́щшеся тобо́ю, зове́м:/ сохраня́й, преподо́бне, ста́до твое́/ и моли́ спасти́ся душа́м на́шим.

Глас 8: Па́мять твоя́ во благослове́ниях пребыва́ет,/ преподо́бне о́тче Арка́дие,/ кро́тость бо се́рдца твоего́, уго́дниче Христо́в блаже́нне,/ просия́ в житии́ твое́м изря́днее со́лнечнаго сия́ния./ Честна́я ра́ка свяще́нных моще́й твои́х, я́ко труба́,/ и днесь велегла́сно о добро́тах твои́х свиде́тельствует,/ благоуха́ющи благода́тию Пресвята́го ду́ха,/ и прогоня́юще мрак грехо́вный,/ и нас науча́юще благодари́ти Бо́га,/ тебе́ просла́вльшаго.

Глас 3: Ве́лия сла́ва жития́ твоего́, о́тче наш Арка́дие,/ вся бо земна́я оста́вив, еди́наго Христа́ возлюби́л еси́/ и, тому́ служа́ чи́стою со́вестию,/ на земли́ а́нгельски пожи́л еси́./ Бесо́вская же кова́рства разори́в,/ возше́л еси́ на высоту́ доброде́телей/ и блаже́н еси́, та́ко Христу́ рабо́тав,/ те́мже и мы, в зерца́ле жития́ твоего́ путь к живо́ту́ зря́ще,/ тя непреста́нно ублажа́ем.

Сла́ва, глас 2:

Преподо́бне и Богоно́сне, блаже́нне о́тче наш Арка́дие,/ благ нетле́нных восприя́в жела́ние,/ а́нгельское на земли́ житие́ соверши́л еси́./ Испе́рва небоподо́бну добро́ту о́браза сохрани́в,/ ны́не на Небесе́х водворя́ешися/ и, Бо́гу со дерзнове́нием предстоя́,/ зерца́лом разу́мным чи́сто зри́ши Святу́ю Тро́ицу./ О чту́щих тя ве́рою и любо́вию моли́ся,/ о́тче наш Арка́дие.

И ны́не, Богоро́дичен: О, чудесе́ но́ваго:

На стихо́вне стихи́ры, глас 2.

Подо́бен: До́ме Евфра́фов:

От ю́ности святооте́ческому житию́/ поревнова́в во всем, преподо́бне,/ оста́вил еси́ вся, я́же в ми́ре,/ жите́йская мудрова́ния,/ моля́ о нас Человеколю́бца.

Стих: Честна́ пред Го́сподем/ смерть преподо́бных Его́.

Послуша́ния дея́ние от се́рдца исправля́я, му́дре,/ превы́ше ми́ра и я́же в нем жите́йских показа́лся еси́;/ и сего́ ра́ди в Вы́шних/ со А́нгелы Христу́ предстои́ши,/ о всех моля́ся.

Стих: Что возда́м Го́сподеви о всех,/ я́же воздаде́ ми,

А́ще и юн те́лом,/ преподо́бне Арка́дие,/ но многоле́тных житие́м превозше́л еси́./ Все плотско́е мудрова́ние отри́нув,/ свой ра́зум в послуша́ние Христо́во плени́л еси́.

Сла́ва, глас 8. Самогла́сен:

Помышля́я о́ное житие́ и век бу́дущий несконча́емый,/ век сей, я́ко маловре́менен, оста́вил еси́/ и потща́лся еси́ тле́нными нетле́нная стяжа́ти,/ отню́дуже и те́ло порабо́тил еси́ ду́хови,/ да Христа́ еди́наго приобря́щеши,/ его́ же моли́ спасти́ся всем,/ любо́вию свяще́нную па́мять твою́ почита́ющим.

И ны́не, Богоро́дичен: Безневе́стная Де́во:

Тропа́рь, глас 4:

От духо́внаго наста́вника, отца́ преподо́бнаго Ефре́ма, наставля́емь,/ послуша́ния до́брый рачи́телю, о́тче Арка́дие,/ от мирска́го мяте́жа удали́лся еси́/ и, и́нок быв изря́дный,/ до́брым по́двигом ревну́яй,/ от Христа́ Бо́га прия́л еси́ вене́ц сла́вы Небе́сныя;/ и ны́не вку́пе с преподо́бным отце́м Ефре́мом у Престо́ла Вы́шняго предстоя́,/ о нас моли́ся, изба́витися нам от всех бед и скорбе́й/ и спасти́ся душа́м на́шим.

НА У́ТРЕНИ

На Бог Госпо́дь: тропа́рь преподо́бному Арка́дию, два́жды. Сла́ва, и ны́не, Богоро́дичен: Е́же от ве́ка:

По 1-м стихосло́вии седа́лен, глас 4.

Подо́бен: Яви́лся еси́ днесь:

Разуме́в, я́ко век, и́же на земли́, преходя́щ есть, блаже́нне,/ век он, я́ко не преходя́щий, от се́рдца возлюби́л еси́,/ ему́же и насле́дник яви́лся еси́./ Те́мже о всех нас Христа́ Бо́га моли́,/ в пе́снех, преподо́бне, твою́ па́мять почита́ющих.

Сла́ва, и ны́не, Богоро́дичен:

Обнови́ла еси́, Чи́стая, Боже́ственным Рождество́м Свои́м истле́вшее страстьми́ земноро́дных естество́/ и су́щим ме́ртвым прегреше́ньми жи́знь и нетле́ние породила́ еси́./ Те́мже Тя по до́лгу, Де́во Пречи́стая, вси ублажа́ем.

По 2-м стихосло́вии седа́лен, глас 2.

Подо́бен: Милосе́рдия су́щи:

И́ноческаго жития́ исправле́ния от се́рдца возлюби́в, блаже́нне Арка́дие,/ духо́вному отцу́ послуша́нием и́скренним вда́лся еси́,/ с ни́мже Го́сподеви моли́ся спасти́ся всем нам.

Сла́ва, и ны́не, Богоро́дичен:

Милосе́рдия су́щи исто́чник,/ ми́лости сподо́би нас, Богоро́дице,/ при́зри на лю́ди согреши́вшия,/ яви́, я́ко при́сно, си́лу твою́,/ на Тя бо упова́юще, ра́дуйся, вопие́м Ти,/ я́ко иногда́ Гаврии́л, Безплотных Архистрати́г.

По полиеле́и седа́лен, глас 8.

Подо́бен: Прему́дрости:

Прему́дрости Боже́ственней измла́да навы́к,/ вся, в ми́ре су́етная, возненави́дел еси́, преподо́бне,/ Христа́ же еди́наго возлюби́л еси́;/ отсю́ду же духо́вному отцу́ всеконе́чне в послуша́ние вда́лся еси́/ и мно́гих доброде́телей сокро́вищем обогати́лся еси́ от того́./ С ни́мже моли́ся Го́сподеви, Арка́дие преподо́бне,/ грехо́в проще́ние дарова́ти чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ Огнь бо всели́ся в Тя Божества́/ и я́ко Младе́нца млеко́м пита́вши Зижди́теля и Го́спода./ Те́мже, А́нгельский и челове́ческий род, досто́йно сла́вим пресвято́е Рождество́ Твое́ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти покланя́ющимся ве́рою пресвято́му Рождеству́ Твоему́.

Таже степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных его́.

Стих: Что возда́м Го́сподеви о всех, я́же воздаде́ ми.

Ева́нгелие от Матфе́я, зача́ло 43.

По 50-м псалме́ стихи́ра, глас 6:

Егда́ Боже́ственное наи́тие на́йде на тя, преподо́бне,/ мирска́я возненави́дев, ко Христу́ прилепи́лся еси́/ и, того́ яре́м взем, по стопа́м блаже́ннаго Ефре́ма ходи́ти учи́лся еси́,/ отню́дуже о́браз мно́гим доброде́телию быв,/ воздержа́нием и моли́твами подо́бник своему́ отцу́ яви́лся еси́./ Те́мже мо́лим тя:/ моли́ся, преподо́бне, спасти́ и просвети́ти ду́ши на́ша.

Кано́н Богоро́дице, глас 4, со ирмосо́м на 6 и преподо́бному Арка́дию на 8, глас 2

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Сло́ве Бо́жий, молю́тися:/ даждь ми сло́во и отве́рзи ми устне́, недосто́йному рабу́,/ да восхвалю́ уго́дника Твоего́, преподо́бнаго отца́ Арка́дия,/ я́ко в Тебе́ и Тобо́ю просла́вися.

О́тче преподо́бне Арка́дие,/ приими́ от недосто́йнаго, ю́же воспою́, песнь с любо́вию/ и моли́ за мя, гре́шнаго раба́ твоего́,/ от усе́рдия дерзну́вшаго восхва́лити тя,/ его́ же Христо́с просла́ви.

Си́лою Христо́вою укрепля́емь, преподо́бне Арка́дие,/ вся кова́рства лука́ваго низве́ргл еси́ сле́зными твои́ми моли́твами,/ Богоблаже́нне Арка́дие преподо́бне.

Безстра́стия умо́м просвеще́нным предстои́ши Бо́гу Вседержи́телю,/ от него́же знаме́ния и чудотворе́ния испроси́в, уго́дниче Христо́в, о́тче Арка́дие,/ пресве́тлый яви́ся, я́ко просла́вися.

Богоро́дичен: О, па́че ума́ чуде́с Твои́х, Ма́ти Де́во!/ Бо́жие бо ипоста́сное Сло́во прия́вши во утро́бу твою́,/ родила́ еси́ па́че естества́ Безле́тнаго Сы́на,/ вся́ческая Боже́ственною Свое́ю си́лою прему́дре содержа́ща и окормляюща.

Катава́сия: Христо́с ражда́ется:

Песнь 3

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́бося дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.

Совесть име́л еси́ благу́, преподо́бне о́тче,/ и о́ко серде́чное, взира́ющее к Бо́гу,/ и в послуша́нии до́бре пребы́л еси́ отцу́ своему́, наста́внику преподо́бному Ефре́му,/ с ни́мже ны́не предстоя́ у Престо́ла Вседержи́теля,/ о нас Христу́ Бо́гу моли́ся дарова́ти нам ве́лию ми́лость.

Стягну́в те́ло свое воздержа́нием и чистото́ю,/ в Вы́шняя селе́ния, о́тче, дости́гл еси́/ и на Небесе́х со А́нгелы лику́еши./ Те́мже о нас Христу́ Бо́гу моли́ся,/ от него́ же испроси́ нам ве́лию ми́лость.

Нака́зан Боже́ственными уче́ньми, посту́, и воздержа́нию,/ и вся́кой доброде́тели от отца́ своего́, наста́вника духо́внаго, преподо́бнаго Ефре́ма,/ от млады́х ногте́й навы́кл еси́ и тем Бо́гу угоди́л еси́./ О́тче преподо́бне Арка́дие, моли́ся о душа́х на́ших.

Богоро́дичен: Просвети́, Чи́стая, се́тующее се́рдце мое́,/ при́сно преступле́ньми и жите́йскими мно́гими молва́ми оскверня́емое,/ и не оста́ви мене́ враго́м бы́ти в ра́дость,/ я́ко да просла́влю и любо́вию воспою́ Тя, Всепе́тая.

Седа́лен, глас 8.

Подо́бен: Прему́дрости:

Отре́кся ми́ра и духо́вному наста́внику, преподо́бному Ефре́му, покори́вся,/ а́ще и млад был еси́, о́тче, еди́ны доброде́тели стяжа́в,/ всем и́ноком о́браз был еси́./ Те́мже моли́ся грехо́в оставле́ние пода́ти любо́вию чту́щим тя.

Сла́ва, и ны́не, Богоро́дичен:

Ле́гкий о́блаче, источи́вый ве́рным ро́су Боже́ственную,/ све́щниче златокова́нный, показа́вый всем Свет немерца́ющий,/ Нескве́рная, Непоро́чная, Пречи́стая Влады́чице,/ омраче́нную ду́шу мою́ слепото́ю страсте́й безстра́стия заре́ю просвети́, молю́ся,/ и ум мой в тишине́ укрепи́,/ да по до́лгу сла́влю Тя и любо́вию пою́, Пречи́стая Всенепоро́чная.

Песнь 4

Ирмо́с: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Поще́нием и бде́нием те́ло свое́ изнури́л еси́, о́тче Арка́дие,/ А́нгелов сожи́тельниче, и по́стником ревни́телю, и всем святы́м подража́телю,/ с ни́ми же моли́ Христа́ Бо́га ве́лию и бога́тую ми́лость пода́ти нам.

Чистото́ю и смире́нием Бо́гу угоди́л еси́/ и наста́внику своему́ во всем повину́лся еси́,/ с ни́мже моли́ся, преподо́бне, пода́ти нам ми́р и ве́лию ми́лость.

Да животу́ прича́стник нетле́нному яви́шися,/ вре́менных и тле́нных, о́тче прему́дре, небре́гл еси́/ и, к Бо́гу присту́пль, со дерзнове́нием мо́лишися спасти́ся нам.

Богоро́дичен: Ма́ти Бо́жия Чи́стая,/ страсте́й мои́х сою́зы грехо́вныя, молвы́ и неду́ги отжени́:/ и́маши бо к Нему́ дерзнове́ние и благода́ть ми́ловати ны, Госпоже́ Милосе́рдая,/ Спа́са поро́ждши пло́тию,/ Его́ же непреста́нно моли́ спасти́ся нам.

Песнь 5

Ирмо́с: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, Бо́га не знаю.

Помоли́ся Христу́ Бо́гу, преподо́бне Арка́дие, о приходя́щих к тебе́ с ве́рою и любо́вию/ и ча́ющих в предста́тельстве твое́м грехо́в разреше́ние и неду́гов исцеле́ние получи́ти,/ е́же моли́твами твои́ми подае́ши всем незави́стно.

Измла́да Христу́ после́довав и наста́внику своему́ во всем повину́яся,/ поще́нием и моли́твами проти́ву ко́знем де́монским вооружи́лся еси́/ и сего́ ра́ди был еси́ свети́льник, сия́я чудесы́, Арка́дие,/ испроси́ стране́ на́шей на враги́ побе́ду и душа́м на́шим ве́лию ми́лость.

Сна очи́ма свои́ма не дал еси́, о́тче Арка́дие,/ ни ве́ждома свои́ма дрема́ния, до́ндеже Бо́гу угоди́л еси́,/ в тве́рдом пребыва́я послуша́нии Богому́дрому учи́телю твоему́,/ с ни́мже моли́ся о хваля́щих тя Христу́ Бо́гу на́шему,/ пода́ти нам ми́р и ве́лию ми́лость.

Богоро́дичен: Пло́тию ро́ждши Безпло́тнаго, Богороди́тельнице Пречи́стая,/ теле́сных нас и душе́вных скве́рн омы́й/ окропле́нием Боже́ственныя благода́ти Сы́на Твоего́.

Песнь 6

Ирмо́с: Ко Го́споду от ки́та Ио́на возопи́:/ Ты мя возведи́ из глубины́ а́да, молю́ся,/ да я́ко Изба́вителю во гласе хвале́ния/ и́стины же ду́хом пожру́ Тебе́.

Земна́я и мимотеку́щая, я́ко уме́ты, вмени́в,/ Христа́ еди́наго вожделе́л еси́,/ к Нему́же сою́зом любве́ прибли́зив ду́шу свою́,/ того́ обрести́ потща́лся еси́ ненасыща́емыя добро́ты.

Процве́л в пусты́нных удо́лиях, прехва́льне о́тче наш, я́ко ши́пок благово́нен,/ и, я́коже крин, облагоуха́л еси́ со́вести ве́рных доброде́тельми и чудесы́./ Те́мже, преподо́бне, отжени́ от нас стра́сти смердя́щия.

Жела́нием зе́льным, преблаже́нне, после́довал еси́ Богоно́снаго отца́ Ефре́ма житию́:/ того́ бо учени́к изря́дный был еси́,/ с ни́мже моли́ся Го́сподеви поми́ловати ду́ши на́ша.

Богоро́дичен: Христа́ нам родила́ еси́, Пречи́стая Влады́чице, Богора́дованная Де́во./ Те́мже спаси́ град и лю́ди, на Тя упова́ющия.

Конда́к, глас 2:

К глубина́м Боже́ственнаго ра́зума впери́в ум свой,/ в Небе́сныя оби́тели восте́кл еси́/ и равноа́нгельно житие́, о́тче Арка́дие, на земли́ пожи́л еси́,/ и во всем пови́нулся еси́ духо́вному своему́ настоя́телю и наста́внику, преподо́бному отцу́ Ефре́му,/ и ны́не, вку́пе предстоя́ще у Престо́ла Влады́ки Христа́,/ моли́ся непреста́нно о всех нас.

И́кос:

Услы́шав Христо́в Ева́нгельский глас,/ оста́вив плотска́я мудрова́ния,/ бога́тство и сла́ву ми́ра сего́, я́ко прах, вмени́в,/ от мла́дости после́довав наста́внику и учи́телю своему́ духо́вному отцу́ Ефре́му/ и от того́ вся́кия доброде́тели навы́к,/ и бысть ему́ учени́к до́брым послуша́нием,/ и над страстьми́, я́ко Безпло́тен, подвиза́вся,/ и Безпло́тных ликостоя́нию сочета́вся,/ и́же пода́й ра́зум мне, недосто́йному рабу́ своему́,/ а́ще не ты ми по́даси и не просвети́ши ми ум,/ ка́ко тя восхвалю́ и воспою́, окая́нный?/ Дерза́ю на твое незло́бие и вопию́ си́це:/ ра́дуйся, Небе́сный челове́че и земны́й А́нгеле;/ ра́дуйся, я́ко после́довал духо́вному наста́внику своему́ во всем, посто́м и моли́твами,/ тем вку́пе с ним угоди́в Бо́гу,/ и бы́сте вели́кия свети́льники, сия́юще чудесы́,/ ны́не предстоя́ще у Престо́ла Христа́, Бо́га на́шего,/ моли́теся непреста́нно о всех нас.

Песнь 7

Ирмо́с: Купина́ в горе́ огненеопа́льная/ и росоно́сная пещь халде́йская/ я́ве предписа́ Тя, Богоневе́сто:/ Боже́ственный бо Невеще́ственный/ в веще́ственнем чре́ве Огнь неопа́льно прия́ла еси́./ Те́мже из Тебе́ Ро́ждшемуся пое́м:/ благослове́н еси́, Бо́же оте́ц на́ших.

Я́ко вои́стинну тле́нных оста́вль/ и непостоя́нная ми́ра сего́ за уме́ты вмени́в,/ наста́внику своему́ после́довал еси́,/ те́мже с ним у Престо́ла Бо́жия предстои́ши, моли́ся спасти́ся всем нам.

Я́ко добропло́дная ма́слина, в до́ме Бо́жии, преподо́бне, процве́л еси́,/ еле́ем у́бо ра́дования духо́внаго умаща́й ду́ши любо́вию пою́щих тя,/ преподо́бне о́тче Арка́дие.

Житие́ твое́, о́тче Арка́дие преподо́бне, всече́стне, ди́вно на земли́ показа́л еси́:/ вели́кое бо поще́ние и смире́ние стяжа́л еси́./ Сего́ ра́ди на Небесе́х жи́знь ве́чную со учи́телем свои́м преподо́бным Ефре́мом насле́довал еси́./ Те́мже моли́ся при́сно ко Го́споду, от бед изба́вити ны, пою́щия тя.

Богоро́дичен: Тя Предста́тельницу и́мамы, гре́шнии, о Пресвята́я Де́во:/ Ты бо благопреме́нна к нам твори́ши Сы́на Своего́ и Бо́га на́шего/ ма́терними Твои́ми моли́твами.

Песнь 8

Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте, дела́, я́ко Го́спода/ и превозноси́те во вся ве́ки.

Я́ко свети́льник све́та, ду́шу свою́ сия́ньми доброде́телей украси́в,/ нетле́нный вене́ц от Бо́га прия́л еси́,/ и ны́не со А́нгелы и со учи́телем свои́м Престо́лу его́ предстоя́ще,/ о нас моли́ся, воспева́ющих:/ благослове́н Бог оте́ц на́ших.

Весь от ю́ности Бо́гови освяти́лся еси́/ и к Нему́ доброде́телию прибли́жился еси́,/ тле́нная бо, я́же на земли́, оста́вив,/ Небе́сное обре́л еси́ бога́тство.

Обре́л еси́ возме́здие от Христа́ Бо́га, преподо́бне о́тче Арка́дие,/ ны́не со А́нгелы святы́ми и с наста́вником свои́м, со отце́м Ефре́мом, ликовству́я/ и со все́ми пра́ведными в Небе́сных оби́телех водворя́яся./ моли́ся у́бо ко Го́споду, пода́ти нам ве́лию ми́лость.

Богоро́дичен: Ма́ти Бо́жия Всенепоро́чная, души́ мое́й я́звы исцели́/ и стремле́ние утоли́ стра́стныя пло́ти моея́,/ омраче́нное се́рдце просвети́, ум мой умири́/ и вра́жиих напа́стей изба́ви.

Песнь 9

Ирмо́с: Я́же пре́жде со́лнца свети́льника Бо́га возсия́вшаго,/ плотски́ к нам прише́дшаго из боку́ Деви́чу,/ неизрече́нно воплоти́вшая, Благослове́нная, Всечи́стая,/ Тя, Богоро́дице, велича́ем.

Яви́лся еси́, о́тче Арка́дие, гра́ду на́шему столп непоколеби́м/ и прибе́жище всем, притека́ющим к тебе́:/ исцеле́ния бо благода́ть тобо́ю прие́млем/ и от лю́тых скорбе́й твои́ми моли́твами избавля́емся.

Приими́, святы́й преблаже́нне, о́тче досточу́дне Арка́дие, пе́ние сие́ похва́льное/ и твое́ оте́ческое покажи́ о нас ми́лование:/ не можем бо по досто́инству похвали́ти тя,/ но ели́ко можем, от усердия дерзну́хом.

Еже прино́сим ти, о́тче преподо́бне Арка́дие, пе́ния не пре́зри,/ но приими́ сие́ ми́лостивно/ и моли́ Творца́ на́шего, Влады́ку и Го́спода,/ изба́вити ны от вся́каго преще́ния/ и ми́лость обрести́ в день стра́шнаго его́ испыта́ния.

Богоро́дичен: Богоро́дице Влады́чице,/ мене́, во глубину́ зла сластьми́ плотски́ми и страстьми́ жития́ впа́дша, возста́ви:/ на Тя бо, я́ко Ма́терь Бо́га на́шего, наде́жду и́мам, раб Твой./ Не пре́зри упова́ния на́шего, но сотвори́ спасти́ся всем нам.

Свети́лен:

Святы́ни храм был еси́, преподо́бне,/ и по Боже́ственному прича́стию ра́йский граждани́н,/ в не́мже пита́ешися невозбра́нно дре́ва разу́мнаго и нетле́нныя сла́вы./ Те́мже па́мять твою́, Арка́дие преподо́бне, твори́ще/ и ве́рою и любо́вию хва́ляще тя, мо́лимся:/ моли́ся Го́сподеви спасти́ся всем нам.

Сла́ва, и ны́не, Богоро́дичен:

Ра́дуйся, кля́твы Е́виной разреше́ние;/ ра́дуйся, све́те су́щим во тьме./ Ра́дуйся, хра́ме живы́й жива́го Бо́га;/ ра́дуйся, ве́рным похвало́./ Ра́дуйся, преподо́бным утвержде́ние,/ ра́дуйся, правосла́вным сла́во, Благослове́нная Мари́е.

На хвали́тех стихи́ры, глас 6.

Подо́бен: Все упова́ние:

Вели́кая исправле́ния и по́стнический по́двиг/ вели́каго отца́ и чудотво́рца Ефре́ма,/ Арка́дие блаже́нне,/ привлеко́ша тя жела́нием к по́стническому житию́./ Те́мже, со тща́нием доброде́телем его́ подража́я,/ неукло́нно тому́ после́довал еси́/ и соо́бщник по́двигом до́блественный,/ я́ко учени́к ему́ и́стинен, яви́лся еси́./ И ны́не моли́ся ко Го́споду, преподо́бне,/ поми́ловатися душа́м на́шим.

Дре́во доброве́твенно и благопло́дно,/ на вода́х живо́тных вои́стинну насажде́нно,/ пита́я приходящия и осеня́я опаля́емыя,/ ты еси́, о́тче преподо́бне, напая́емь уче́нии Ефре́ма,/ и́ми же той пита́л есть своя́ ученики́./ Те́мже мо́лим тя:/ осени́ лю́ди христоимени́тыя,/ заступа́я от язы́ческих наше́ствий,/ низлага́я их возста́ния,/ нас же всех в ми́ре упра́ви, Арка́дие,/ твои́ми моли́твами.

Возсия́ днесь пресве́тлая и всепра́зднственная па́мять твоя́,/ пресла́вне Арка́дие,/ созыва́ющи многочи́сленное по́стник сосло́вие/ и преподо́бных ликостоя́ния к похвале́нию./ Те́мже, притека́юще к свяще́нным моще́м твои́м,/ исцеле́ния же да́ры оби́льно прие́мля,/ тебе́ венча́вшаго Христа́ прославля́ем,/ Спа́са душ на́ших.

Сла́ва, глас 2.

Самогла́сен:

Па́мять пра́ведника – ра́дость боя́щимся Го́спода,/ хвала́ бо его́ сла́дость ве́рным есть./ Блаже́н бо вои́стинну, его́ же избра́л и прия́л Госпо́дь./ Темже мы, веселя́щеся, почита́ем преподо́бнаго,/ ему́ же ны́не мо́лимся, я́ко иму́щу дерзнове́ние,/ дарова́ти побе́ду стране́ на́шей на язы́ки проти́вныя,/ и низложи́ти возстаю́щия непра́ведно,/ и пода́ти же ми́р ми́рови, и це́рквам единомы́слие,/ и душа́м на́шим ве́лию ми́лость.

И ны́не: Все упова́ние мое:

НА ЛИТУРГИ́И

Блаже́нны от кано́на пе́сни 3-я и 6-я. Проки́мен: Честна́ пред Го́сподем/ смерть преподо́бных его́.

Стих: Что возда́м Го́сподеви о всех,/ я́же воздаде́ ми.

Апо́стол к Гала́том, зача́ло 213.

Аллилу́ия. Стих: Блаже́н муж, боя́йся Го́спода.

Ева́нгелие от Матфе́я, зача́ло 10. Прича́стен: В па́мять ве́чную:

Тропа́рь, глас 4:

Бы́вый, блаже́нне Марда́рие,/ нестяжа́тель Христа́ ра́ди,/ и того́ за мно́гая твоя́ благодея́ния/ в се́рдце твое́ всели́вый,/ моли́ся о нас, пою́щих тя.

Конда́к, глас 2:

Вы́шних ища́, ни́жних не стяжа́л еси́,/ и колесни́цу о́гненну к Небеси́, нестяжа́ние, себе́ поста́вль,/ со А́нгелы жи́ти сподо́бился еси́./ Марда́рие сла́вне,/ с ни́миже Христа́ Бо́га моли́/ непреста́нно о всех нас.

Тропа́рь, глас 8:

В тебе́, о́тче, изве́стно спасе́ся е́же по о́бразу,/ прии́м бо крест, после́довал еси́ Христу́,/ и де́я, учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней./ Те́мже и со А́нгелы сра́дуется, преподо́бне Арсе́ние, дух твой.

Конда́к, глас 8.

Подо́бен: Взбра́нной:

И́же на земли́ вся оста́вль и Христо́вым стопа́м после́довал еси́ те́пле,/ того́, сла́вне, на ра́мо свое́ честны́й крест взем,/ умертви́л еси́ труды́ по́стническими теле́сная жела́ния, всеблаже́нне./ Тем зове́м ти:/ ра́дуйся, о́тче Арсе́ние.