(И́ну слу́жбу зри день сей ниже)

И па́мять свята́го священному́ченика Евфи́мия, епи́скопа Сарди́йскаго

Слу́жба его́ поется на пове́черии.

ВЕ́ЧЕР

Стихологии не быва́ет, кроме́ неде́ли. На Го́споди, воззва́х: стихи́ры пра́здника на 6, глас 2: Прииди́те, возра́дуемся: Го́споду Иису́су: Ца́рство Твое́: Что Тебе́ принесе́м: (зри день 25-й).

Сла́ва, и ны́не, глас 6:

Слава в Вы́шних Бо́гу,/ и на земли́ мир,/ днесь восприе́млет Вифлее́м Седя́щаго при́сно со Отце́м,/ днесь А́нгели Младе́нца рожде́ннаго боголе́пно славосло́вят:/ сла́ва в Вы́шних Бо́гу,/ и на земли́ мир,/ в челове́цех благоволе́ние.

Вход. Проки́мен, глас 7: Кто Бог ве́лий, я́ко Бог наш?/ Ты еси́ Бог, творя́й чудеса́.

Стих 1: Сказа́л еси́ в лю́дех си́лу твою́ и изба́вил еси́ мы́шцею Твое́ю лю́ди Твоя́.

Стих 2: И рех: ны́не нача́х, сия́ изме́на десни́цы Вы́шняго.

Стих 3: Помяну́х дела́ Госпо́дня, я́ко помяну от нача́ла чудеса́ Твоя́.

А́ще есть суббо́та, ве́чер поем проки́мен: Госпо́дь воцари́ся, в ле́поту облече́ся: (со стихи его́).

А вели́кий проки́мен: Кто Бог ве́лий, я́ко Бог наш: со стихи его́ поется тогда́ в на́вечерии пра́здника; дневный же оставля́ется. Посем ектения́.

На стихо́вне стихи́ры самогла́сны, глас 8.

Иоа́нна мона́ха: Пресла́вное та́инство устроя́ется днесь,/ обновля́ется естество́, и Бог Челове́к быва́ет,/ е́же бе пребы́сть, и е́же не бе прия́т,/ ни смеше́ния претерпе́в, ниже́ разделе́ния.

Стих: Из чре́ва пре́жде денни́цы роди́х Тя,/ кля́тся Госпо́дь и не раскается.

Го́споди, в Вифлее́м прише́д,/ в верте́п всели́лся еси́,/ Не́бо престо́л име́я,/ в я́слех положи́лся еси́,/ его́же во́инства окружа́ют А́нгел,/ па́стырем снизше́л еси́,/ да спасе́ши, я́ко Милосе́рд, род наш, сла́ва Тебе́.

Стих: Рече́ Госпо́дь Го́сподеви моему́:/ седи́ одесну́ю Мене́.

Ка́ко изреку вели́кое та́инство?/ Безпло́тный воплоща́ется,/ Сло́во одебелева́ет,/ Неви́димый ви́дится,/ и Неосяза́емый осяза́ется,/ и Безнача́льный начина́ется./ Сын Бо́жий Сын Челове́чь быва́ет,/ Иису́с Христо́с вчера́ и днесь, То́йже и во ве́ки.

Сла́ва, и ны́не, глас то́йже:

В Вифлее́м стеко́шася па́стырие,/ и́стиннаго возвеща́юще Па́стыря,/ седя́щаго на Херуви́мех/ и возлежа́щаго в я́слех Младе́нца зрак восприи́мша нас ра́ди,/ Го́споди, сла́ва Тебе́.

Тропа́рь пра́здника, глас 4:

Рождество́ Твое́, Христе́ Бо́же наш,/ возсия́ ми́рови свет ра́зума,/ в нем бо звезда́м служа́щий/ звездо́ю уча́хуся/ Тебе́ кла́нятися, Со́лнцу Пра́вды,/ и Тебе́ ве́дети с высоты́ восто́ка./ Го́споди, сла́ва Тебе́.

Тропа́рь Богоро́дицы, глас 4:

Пречи́стая Богома́ти, Богоро́дице,/ Собо́р Твой честны́й украше́н многоразли́чными добро́тами,/ да́ры Ти прино́сят, Госпоже́, мно́ги мирсти́и лю́дие,/ у́зы на́ша гре́шныя раздери́ Свое́ю ми́лостию/ и спаси́ ду́ши на́ша.

Кано́н священному́ченику на пове́черии поется во ин день. Глас 4, его́же краегранесие: Рожде́нный тя Христо́с пелена́ми венча́ет, о́тче. Феофа́ново.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Припев: Священному́чениче Евфи́мие, моли́ Бо́га о нас.

Рожде́нному присносу́щему Го́споду и пелена́ми пови́тому/ спови́вся я́звенными ра́нами, благоче́стно поклони́лся еси́/ и к Нему́, Евфи́мие, со бла́году́шием отше́л еси́.

В я́слех поло́жся, Госпо́дь, дар Рождества́,/ твои́х крове́й, о́тче, ка́пли/ и ран твои́х я́звы па́че зла́та, и лива́на, и па́че сми́рны прия́т.

Зла́то у́бо от волхво́в прие́млет ро́ждся Госпо́дь,/ е́же к Нему́ любо́вь твою́, святи́телю, приле́жную, и тве́рдость,/ и кре́пость при́снаго терпе́ния твоего́.

Сме́ртию сме́рти Влады́чней подо́бяся,/ Влады́чни возгласи́л еси́ гла́сы,/ о убива́ющих тя све́тло моля́ся, священноявле́нне всече́стне.

Богоро́дичен: Из Тебе́, Благослове́нная, днесь всех Творе́ц пло́тию ражда́ется по нам/ и пелена́ми повива́ется,/ пови́вый мо́ре мгло́ю, Ма́ти Присноде́во.

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Гное́ния му́ченическая вме́сто лива́на, и зла́та, и сми́рны же/ я́ко святи́тель прине́сл еси́ в Вифлее́ме ро́ждшемуся Христу́.

Стефа́на подо́бник, первому́ченика Христо́ва, был еси́,/ о спасе́нии убива́ющих тя моля́ся, Евфи́мие.

Тве́рдостию ума́ и до́блестию души́ обличи́л еси́ злочести́ваго Ле́онта,/ на Спа́са шата́ющагося.

Соблю́л еси́ приле́жно Спа́сову за́поведь, преподо́бне,/ и ду́шу положи́л еси́ по твои́х друзе́х, Евфи́мие.

Богоро́дичен: Село́, вмести́мое Невмести́маго Соде́теля, была́ еси́,/ сего́ пло́тию вмести́вши, Обра́дованная Всенепоро́чная.

Песнь 4

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Зауша́емь по лицу́, от Боже́ственныя благода́ти просвети́ся/ и слове́с му́дростию был еси́ соприча́стник Христу́, всеблаже́нне,/ нас ра́ди зауше́нному пло́тию.

Свяще́нства че́сти не постыде́вшеся,/ и седи́н честны́х не усра́мльшеся,/ и ста́рости твоея́ не почествова́вше, безу́мнии/ неми́лостивно тя ураня́ху.

Пелена́ми пови́тому и в я́слех возлежа́щему Изба́вителю, Евфи́мие,/ многоце́нен дар, о́тче, прине́сл еси́:/ честну́ю кровь твою́, любо́вию за него́ излия́нную.

Богоро́дичен: Невеще́ственная существа́ соде́лавый,/ пло́тию я́ко Челове́к из Тебе́, Богома́ти, днесь ражда́ется./ тому́ воспое́м:/ сла́ва в Вы́шних Христу́ Бо́гу.

Песнь 5

Ирмо́с: Ты, Го́споди, мой Свет,/ в ми́р прише́л еси́,/ Свет Святы́й, обраща́яи из мра́чна неве́дения/ ве́рою воспева́ющия Тя.

Тебе́ одушевле́н о́браз, Спа́се, прино́сится,/ поче́тший о́браз честна́го те́ла Твоего́ и воображе́ние теле́сное.

Тебе́, Влады́ко, па́стырь благоду́шия тезоимени́т,/ ра́ны телесе́ Твоего́ нося́ на свое́м те́ле, прино́сится.

Огнь погаси́л еси́ я́рости беззако́нных, Евфи́мие,/ излия́нием непра́ведно пролия́нных твои́х крове́й,/ свяще́ннейший преблаже́нне.

Богоро́дичен: Рече́ние ста тле́ния,/ Де́ва бо нетле́нно родила́ есть,/ истле́вшее челове́ческое естество́ от тли Свобо́ждшаго.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Обнаже́нием всех, Спа́сове наготе́ уподо́блься, о́тче, и ра́нам,/ боле́зни претерпе́в, твою́ кровь того́ Кро́ви спроли́ял еси́.

Любо́вь, и наде́жду, и ве́ру Богому́дренну, во ве́ки пребыва́ющую,/ доброде́тельми обогати́вся, Рожде́нному от Де́вы дароно́сиши,/ всеблаже́нне Евфи́мие.

Зако́нно Христу́ служи́в, Боже́ственное священноде́йство Сло́ва,/ мзду́ сего́, о́тче Богоглаго́ливе, прия́л еси́,/ е́же тебе́ сконча́тися кро́вию.

Богоро́дичен: Созда́вый по о́бразу Своему́ челове́ка,/ за мно́гое благоутро́бие обновля́ет сего́,/ из Тебе́, Де́во Богома́ти, соверше́нно в того́ оде́явся.

Седа́лен, глас 1.

Подо́бен: Гроб Твой, Спа́се:

Прине́сл еси́ Христу́, от Де́вы рожде́нному, Евфи́мие му́дре,/ я́ко волсви́ да́ры, пострада́в терпели́внейше, святи́телю, кровь твою́./ Те́мже прия́л еси́ сугу́б вене́ц побе́ды/ и предстои́ши Всесвяте́й Тро́ице, моля́ спасти́ся нам.

Песнь 7

Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Свяще́нства, свяще́ннейше, Богода́нное пома́зание,/ смеси́в с кро́вию твое́ю, свяще́ннее показа́л еси́:/ благослове́н еси́, Бо́же мой, зовы́й,/ в хра́ме сла́вы Твоея́, Го́споди.

Поста́вив но́ги на ка́мени ве́ры,/ все́ми прило́ги, всеблаже́нне, искуше́ний непревраще́н пребы́л еси́,/ благослове́н еси́, Бо́же мой, зовы́й,/ в хра́ме сла́вы Твоея́, Го́споди.

Спривле́кл еси́ благода́ть Боже́ственнаго первому́ченика,/ его́же показа́лся еси́ изря́днейший подража́тель,/ благослове́ньми возме́здия дая́ убива́ющим тя неми́лостивно, всеблаже́нне Евфи́мие.

Богоро́дичен: Вы́шняго освяще́нное Боже́ственное селе́ние, ра́дуйся:/ Тобо́ю бо даде́ся ра́дость, Богоро́дице, зову́щим:/ благослове́нна Ты в жена́х еси́, Всенепоро́чная Влады́чице.

Песнь 8

Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.

Стал еси́ на суди́щи, кре́пко подвиза́лся, о́тче Евфи́мие:/ соверше́ннейшему бо преде́лу любве́ поучи́лся еси́,/ я́ко изво́лил еси́ умре́ти за дру́ги твоя́, вопию́щия:/ благослови́те, вся дела́ Госпо́дня, Го́спода.

Све́тел и сло́вом и умо́м,/ све́тлу стяжа́л еси́ ду́шу, све́тло лице́,/ ны́не же светле́е был еси́ да́же до кро́ве, Евфи́мие,/ царе́м богоненави́стным проти́влься и вопия́:/ благослови́те, вся дела́ Госпо́дня, Го́спода.

Нападо́ша, блаже́нне, на тя кре́пции земли́,/ умертви́ти тя беззако́ннейшая де́лающии;/ но ты, простира́яся к ро́ждшемуся Изба́вителю от Де́вы Чи́стыя, взыва́л еси́:/ благослови́те, вся дела́ Госпо́дня, Го́спода.

Богоро́дичен: Се ны́не оскуде́ я́ве от Иу́дова коле́на князь и игу́мен:/ Ты бо, Всенепоро́чная, родила́ еси́, я́же тому́ пе́рвее угото́вана,/ ча́яние язы́ков, Христа́, ему́же пое́м:/ благослови́те, вся дела́ Госпо́дня, Го́спода.

Песнь 9

Ирмо́с: Ка́мень нерукосе́чный/ от несеко́мыя горы, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

К тишайшему приста́нищу преста́вился еси́, о́тче, от су́щих зде:/ я́коже бо вра́бий²⁸, изба́вился еси́ от се́ти ловя́щих тя,/ благослови́ Изб́а́вльшаго, священному́чениче бла́году́шнейше.

Све́ту, с высоты́ я́вльшуся восто́ка, просвеще́н/ и светоявле́нием звезды́, от Иу́ды ны́не возсия́вшия,/ преесте́ственно сия́я, ко Влады́це изше́л еси́.

Ра́йския ны́не широты́ ликоходи́ти сподо́бился еси́,/ иде́же блаже́нных све́тлость и святы́х ра́дование,/ я́ко страда́льца, Евфи́мие, тя побе́доносна прия́ша.

Име́я к Бо́гу дерзнове́ние, я́ко святи́тель же и му́ченик,/ ны́не от настоя́щия зимы́ Це́ркви тишину́ испроси́/ и согреше́ний оста́вле́ние тя пою́щим, всеблаже́нне.

Богоро́дичен: Жезл прозя́бла еси́ из ко́рене Иессе́ова, Богороди́тельнице,/ цвет Божества́, Христа́, нам ро́ждши, Пречи́стая, днесь,/ я́ко Бо́га Невмести́маго и ны́не я́ко Младе́нца повива́емаго.

Стихи́ры, глас 8.

Подо́бен: О, пресла́внаго чудесе́:

Еще́ кро́вию капая/ и облия́н те́плою и па́ры испуща́я кро́ви,/ Христу́ предста́л еси́, Богоглаго́ливе Евфи́мие,/ твои́х у́бо ран, о́тче, я́звы/ в моли́твы ме́сто ны́не прости́рая,/ тому́ моли́ся за пою́щия тя/ и приле́жно, блаже́нне, моли́ о па́стве твое́й.

Дар прине́сл еси́, преподо́бне,/ ро́ждшемуся Христу́ и пло́тию младе́нствовавшу:/ седи́ну че́стну, укра́шену дарова́ньми святи́тельства, о́тче,/ и кро́вию очервле́ну твоего́ страда́ния;/ ве́ру Правосла́вну,/ и наде́жду усе́рдну и нерасте́рзну и́стинно,/ и непоколе́бленну любо́вь, преподо́бне.

Язы́к, дви́жимь Ду́хом,/ и веща́ющ я́ве и́стины уче́ния,/ Богода́нною благода́тию боголе́пно иска́пающ,/ благоче́стия цевни́ца Боговеща́нна,/ Правосла́вия основа́ние недви́жимо,/ уста́ медото́чна, сокро́вище прему́дрости,/ Це́рквей труба́ велегла́сна/ показа́лся еси́, преподо́бне.

Сла́ва, и ны́не, Богоро́дичен:

Плоть прие́м от крове́й Твои́х, Преве́чный Бог/ Тя Предста́тельницу показа́ челове́ком, Чи́стая,/ те́мже изба́ви рабы́ Твоя́/ от вся́кия ну́жды и обстоя́ния/ и сете́й вселука́ваго врага́/ и осия́ния причасти́тися сподо́би избра́нных,/ вся сла́вящия и покланя́ющияся Тебе́.

Подоба́ет ве́дати, я́ко в попра́зднство Христо́ва Рождества и Богоявле́ния, пове́черие поется ма́лое, без кано́на Богоро́дична. На пове́черии к 26 числу, по Досто́йне, и по трисвято́м, глаго́лем конда́к Богоро́дицы, Собо́ру: И́же пре́жде денни́цы:

На полунощнице глаго́лем кафизму обы́чную.

По 1-м трисвято́м вме́сто: Се Жени́х: глаго́лем тропа́рь пра́здника: Рождество́ Твое, Христе́ Бо́же наш:

По 2-м трисвято́м глаго́лем конда́к Богоро́дицы: И́же пре́жде денни́цы:

та́же, Го́споди, поми́луй, 12, и отпу́ст. моли́твы же, Помяни́, Господи: не глаго́лем.

НА У́ТРЕНИ

На Бог Госпо́дь: тропа́рь пра́здника трижды.

По 1-й стихологии седа́лен, глас 1.

Подо́бен: Ка́мени запеча́тану:

Иису́су ро́ждшуся в Вифлее́ме Иуде́йстем,/ тварь просвети́ся, позна́вши Зижди́теля;/ удиви́шася А́нгельстии ли́цы, зря́ще Влады́ку на земли́, зрак ра́бий прие́мша/ и от Отца́ неразлу́чна су́ща./ Сла́ва вопло́щшемуся Бо́гу;/ сла́ва Рожде́нному на земли́;/ сла́ва Благоволи́вшему спасти́ род наш.

Сла́ва, и ны́не, то́йже.

И чтем сло́во Епифания Ки́прскаго, похвалу́ Пресвяты́я Богоро́дицы, на три части.

По 2-й стихологии седа́лен, глас 4.

Подо́бен: Удиви́ся Ио́сиф:

Что чуди́шися, Мариа́м?/ Что ужаса́ет е́же в Тебе́?/ Я́ко безле́тна Сы́на в ле́та роди́х, рече́:/ рожде́ннаго зача́тия не навы́кши, безму́жна есмь/ и ка́ко рожду́ Сы́на?/ Безсе́менно рожде́ние кто ви́де?/ Иде́же бо Бог хо́щет, побежда́ется естества́ чин, я́коже пи́шет:/ Христо́с роди́ся пре́жде па́дший возста́вити о́браз.

Сла́ва, и ны́не, то́йже.

Кано́ны пра́здника, ирмосы́ обою́ кано́нов по два́жды; тропари же на 12. Катава́сия, ирмосы́ обою́ кано́нов.

По 3-й пе́сни, конда́к пра́здника: Де́ва днесь: и и́кос, и ипакои́.

По 6-й пе́сни Конда́к, глас 6:

И́же пре́жде денни́цы от Отца́ без ма́тере роди́выйся,/ на земли́ без отца́ воплоти́ся днесь из Тебе́./ Те́мже звезда́ благовеству́ет волхво́м,/ А́нгели же с па́стырьми пою́т/ несказа́нное Рождество́ Твое́, Благода́тная.

И́кос:

Невозде́ланный Грозд возрасти́вшая, та́йный Виногра́де,/ я́ко на ве́твиих, на объя́тиих ноша́ше и глаго́лаше:/ Ты еси́ Плод Мой,/ Ты еси́ Жи́знь Моя́./ Отне́леже позна́х, я́ко и е́же бех, есмь./ Ты Мой Бог:/ печа́ть бо де́вства Моего́ зря́щи неразруши́му,/ пропове́дую Тя, непрело́жнаго Сло́ва плоть бы́вша./ Не вем се́мене, вем Тя, Реши́теля тле́ния:/ чи́ста бо есмь, Тебе́ проше́дшу из Мене́,/ я́коже бо обре́т, оста́вил еси́ утро́бу мою́, зря́щи ю це́лу./ Сего́ ра́ди сликовству́ет вся тварь, вопию́щи Мне:/ ра́дуйся, Благода́тная.

И чтем пролог.

На 9-й пе́сни Честне́йшую: не поем, но поем припевы, я́коже на самый пра́здник.

Свети́лен:

Посети́л ны есть свы́ше Спас наш, Восто́к восто́ков,/ и су́щий во тьме и се́ни обрето́хом и́стину,/ и́бо от Де́вы роди́ся Госпо́дь. Трижды

На хвали́тех стихи́ры пра́здника на 4, глас 4: Весели́теся, пра́веднии: Богоро́дице Дево: Прииди́те, воспои́м Ма́терь Спа́сову: Оте́ц благоизво́ли (зри день 25-й).

Сла́ва, глас 6:

Днесь неви́димое Естество́ челове́ком от Де́вы совокупля́ется./ Днесь безме́рное существо́ в Вифлее́ме пелена́ми обвива́ется./ Днесь Бог звездо́ю волхвы́ в поклоне́ние приво́дит,/ провозвеща́я Свое́ тридне́вное погребе́ние,/ я́ко в зла́те, и сми́рне, и лива́не./ Ему́же пое́м:/ воплоти́выйся от Де́вы, Христе́ Бо́же, спаси́ ду́ши на́ша.

И ны́не, глас 2. Иоа́нна мона́ха:

Днесь Христо́с в Вифлее́ме ражда́ется от Де́вы,/ днесь Безнача́льный начина́ется,/ и Сло́во воплоща́ется./ Си́лы Небе́сныя ра́дуются,/ и земля́ с челове́ки весели́тся,/ волсви́ Влады́це да́ры прино́сят,/ па́стырие рожде́нному дивя́тся./ Мы же непреста́нно вопие́м:/ сла́ва в Вы́шних Бо́гу, и на земли́ мир,/ в челове́цех бла́гово́ление.

Славосло́вие вели́кое. По трисвято́м тропа́рь пра́здника, и ектении́, и отпу́ст. И час 1, и конечный отпу́ст.

На часех тропа́рь пра́здника, конда́к Богоро́дицы: И́же пре́жде денни́цы:

НА ЛИТУРГИ́И

Блаже́нны от кано́нов пра́здника, пе́сни 3-я и 6-я. По входе: Спаси́ ны, Сы́не Бо́жий, рожде́йся от Де́вы, пою́щия Ти: аллилу́ия. Си́це поем и до отдания пра́здника.

Тропа́рь пра́здника: Рождество́ Твое́, Христе́ Бо́же наш:

Сла́ва, и ны́не, конда́к: И́же пре́жде денни́цы:

Та́же трисвято́е. Проки́мен, глас 3, песнь Богоро́дицы: Вели́чит душа́ Моя́ Го́спода:

Стих: Я́ко призре́ на смире́ние рабы́ Своей:

Апо́стол к Евре́ем, зача́ло 306.

Аллилу́ия, глас 8: Воскресни́, Го́споди, в поко́й Твой:

Стих: Кля́тся Госпо́дь Дави́ду и́стиною и не отве́ржется ея́.

Ева́нгелие от Матфе́я, зача́ло 4. Прича́стен: Избавле́ние посла́ Госпо́дь лю́дем Свои́м.

Ину слу́жбу на Собо́р Пресвяты́я Богоро́дицы зри ниже́ уста́ва.

Подоба́ет ве́дати, я́ко а́ще случи́тся Рождество́ Христо́во в неде́лю:

Не соверша́ем па́мяти святы́х Богооте́ц во гряду́щую неде́лю, занеже нача́ло прия́ти январю месяцу и пра́здник Христо́ва Рождества́ уже́ отдается; но соверша́ем сию́ неде́лю в 26 декабря́ месяца, наутрие пра́здника, в понеде́льник, поем же си́це.

В неде́лю ве́чера, на Го́споди, воззва́х: стихи́ры на 6: пра́здника 3, глас 2: Прииди́те, возра́дуемся Го́сподеви: и святы́х 3, глас 1, Подо́бен:

Небе́сных чино́в: Богоотца́ вси:

Сла́ва, святы́х, глас 6: Па́мять соверша́ем:

И ны́не, пра́здника, глас то́йже: Сла́ва в Вы́шних:

Вход. Проки́мен вели́кий, глас 7: Кто Бог велий: со стихи его́ и ектении.

На стихо́вне стихи́ры пра́здника самогла́сны 3, глас 8, с припевы их.

Сла́ва, глас 6: Свяще́нных па́мять:

И ны́не, пра́здника.

Тропа́рь святы́х, глас 2: Благовеству́й, Ио́сифе:

Сла́ва, и ны́не, пра́здника. На пове́черии по трисвято́м конда́к Богоотцев:

Сла́ва, и ны́не, Богоро́дицы: И́же пре́жде денни́цы:

НА УТРЕНИ

на Бог Госпо́дь: тропа́рь пра́здника два́жды:

Сла́ва, святы́х:

И ны́не, пра́здника.

По кафизмах седа́льны пра́здника и чтем во Ева́нгелии толковом, Неде́ля по Рождестве́ Христо́ве.

Кано́н пра́здника 1-й со ирмосо́м на 6, ирмосы́ по два́жды, тропари на 4: и други́й кано́н пра́здника на 4: и святы́х на 4. Катава́сия, ирмосы́ обою кано́нов. По 3-й пе́сни, конда́к Богоро́дицы, глас 6:

И́же пре́жде денни́цы: и и́кос его́, и седа́лен святы́х.

Сла́ва, и ны́не, пра́здника, и чте́ние.

По 6-й пе́сни конда́к святы́х: Весе́лия днесь: и и́кос. И чтем Пролог.

На 9-й пе́сни, Честне́йшую: не поем, но поем припевы пра́здника. Свети́лен святы́х, два́жды.

Сла́ва, и ны́не, пра́здника.

На хва́литех стихи́ры пра́здника на 4, глас 4, самогла́сны.

Сла́ва, святы́х, глас 8: Кровь и огнь:

И ны́не, пра́здника, глас 2: Днесь Христо́с:

Славосло́вие вели́кое. По трисвято́м тропа́рь святы́х.

Сла́ва, и ны́не, пра́здника. Ектении́, и отпу́ст, и час 1-й, и конечный отпу́ст.

На часех тропа́рь пра́здника.

Сла́ва, святы́х, и ны́не, Богоро́дичен часов.

По О́тче наш: конда́к Богоро́дицы: И́же пре́жде денни́цы: и святы́х конда́к, пременя́юще, глаго́лем.

На Литурги́и: Блаже́нны от кано́на пра́здника песнь 3-я, на 4 и святы́х песнь 6-я, на 4.

По входе тропа́рь пра́здника и святы́х. Сла́ва, конда́к святы́х. И ны́не, Богоро́дицы: И́же пре́жде денни́цы:

Проки́мен, глас 3, песнь Богоро́дицы: Вели́чит душа́ Моя́ Го́спода:

Стих: Яко призре́ на смире́ние рабы́ Своея́:

Други́й, святы́х, глас 4: Ди́вен Бог во святы́х Свои́х, Бог Изра́илев.

Апо́стол ко Евре́ем, зача́ло 306. Други́й Апо́стол святы́х, к Гала́том, зача́ло 200.

Аллилу́ия, Богоро́дицы, глас 8: Воскресни, Го́споди, в поко́й Твой:

Стих: Помяни́, Го́споди, Дави́да: Ева́нгелие же еди́но Богоро́дицы, и святы́х, от Матфе́я, зача́ло 4.

Прича́стен: Избавле́ние посла́ Госпо́дь лю́дем Свои́м:

Други́й: Ра́дуйтеся.

Суббо́та по Рождестве́ Христо́ве:

На Литурги́и: проки́мен, глас 4: Помяну и́мя Твое́/ во вся́ком ро́де и ро́де.

Стих: Слы́ши, Дщи, и виждь:

Апо́стол к Тимофею, зача́ло 288.

Аллилу́ия, глас 8: Воскресни́, Го́споди, в поко́й Твой: Ева́нгелие от Матфе́я, зача́ло 46. Прича́стен: Ча́шу спасе́ния прии́му:

Неде́ля по Рождестве́ Христо́ве.

Па́мять сотворя́ем святы́х пра́ведных Ио́сифа Обру́чника, и Дави́да царя́, и Иа́кова, бра́та Бо́жия.

Подоба́ет ве́дати, а́ще по Рождестве́ Христо́ве неде́ля сия́ случи́тся в 26, и в 27, и в 28, и в 29, и в 30, поем си́це. В суббо́ту на ма́лой вече́рни по обы́чаю.

На вели́цей вече́рни по кафизме, на Го́споди, воззва́х: стихи́ры воскресны 3, и пра́здника 4, и святы́х 3, глас 1.

Подо́бен: Небе́сных чино́в: Богоотца́ вси восхва́лим:

Сла́ва, глас 6: Па́мять соверша́ем:

И ны́не, Богоро́дичен гла́са. Вход. Проки́мен дне. На литии́ стихи́ры пра́здника, поемыя на самый пра́здник.

Сла́ва, и ны́не, пра́здника.

На стихо́вне стихи́ры Окто́иха по алфавиту.

Сла́ва, глас 6: Свяще́нных па́мять:

И ны́не, пра́здника.

На благослове́нии хлебов тропа́рь пра́здника: Рождество́ Твое́, Христе́ Бо́же наш: два́жды, и святы́х еди́ножды, глас 2: Благовеству́й, Ио́сифе:

и чте́ние. А идеже несть всено́щнаго, на пове́черии по Досто́йне и по трисвято́м конда́к Богоотцев.

Сла́ва, и ны́не, пра́здника.

НА УТРЕНИ

на Бог Госпо́дь: тропа́рь воскресе́н два́жды.

Сла́ва, святы́х.

И ны́не, пра́здника. По обы́чных кафизмах седа́льны воскресны, с Богоро́дичны их и чте́ние во Ева́нгелии толковом от Матфе́я, Неде́ля по Рождестве́ Христо́ве. По непоро́чных тропари их. Ипакои́ гла́са. И чте́ние во Ева́нгелии толковом, неде́ля ряд.

Степе́нна и проки́мен гла́са.

Вся́кое дыха́ние: Ева́нгелие воскресное, и Воскресе́ние Христо́во: По 50-м псалме́ стихи́ра воскресна.

Кано́н воскресе́н со ирмосо́м на 4, и Богоро́дицы на 2, и пра́здника на 4, и Богоотцев на 4. (А́ще же в 26 день, и поем кано́н воскресе́н со ирмосо́м на 4, и пра́здника оба кано́на на 6, и Богоотцев на 4.) Катава́сия пра́здника: Христо́с ражда́ется:

По 3-й пе́сни конда́к и и́кос пра́здника и седа́лен святы́х, глас 3. Подо́бен: Де́ва днесь: Ио́сифа пра́веднаго:

Сла́ва, глас то́йже: Де́ва роди́ Творца́:

И ны́не: Лик проро́ческий: и чте́ние.

По 6-й пе́сни конда́к святы́х, глас 3. Подо́бен: Де́ва днесь: Весе́лия днесь Дави́д исполня́ется: и и́кос, и чтем Пролог.

На 9-й пе́сни поем: Честне́йшую: Свети́лен воскресе́н.

Сла́ва, святы́х, Подо́бен: Со ученики́: Со Иа́ковом воспое́м:

И ны́не, пра́здника.

На хва́литех стихи́ры воскресны 4, и пра́здника самогла́сны 4, глас 4: Весели́теся, пра́веднии: с припевы их.

Сла́ва, святы́х, глас 8: Кровь и огнь:

И ны́не, Преблагослове́нна еси́, Богоро́дице:

Славосло́вие вели́кое. По трисвято́м тропа́рь воскресе́н. Ектении, и отпу́ст, и стихи́ра Ева́нгельская по своему́ чину, и час 1, и конечный отпу́ст.

На часех тропа́рь воскресе́н.

Сла́ва, пра́здника.

И ны́не, Богоро́дичен часов, святы́х же тропа́рь и пра́здника, пременя́юще, глаго́лем.

По О́тче наш: конда́к пра́здника, и святы́х, пременя́юще же, глаго́лем.

На Литурги́и: Блаже́нны гла́са на 4, и пра́здника рядовая песнь, на 4, и святы́х песнь 6-я, на 4.

По входе тропа́рь воскресе́н, и пра́здника, и святы́х. 

Сла́ва, конда́к святы́х.

И ны́не, пра́здника.

Проки́мен гла́са и святы́х, глас 4: Ди́вен Бог во святы́х Свои́х,/ Бог Изра́илев.

Апо́стол к Гала́том, зача́ло 200.

Аллилу́ия, глас 4: Помяни́, Го́споди, Дави́да:

Ева́нгелие от Матфе́я, зача́ло 4, и потом ряд неде́ли.

Прича́стен: Хвали́те Го́спода:

Други́й: Ра́дуйтеся, пра́веднии, о Го́споде:

И́на слу́жба на Собо́р Пресвяты́я Богоро́дицы

ВЕ́ЧЕР

Стихо́логия не быва́ет труда́ ра́ди бде́ннаго. а́ще ли прилучи́тся во и́мя Богоро́дицы храм, то поем Блаже́н муж:

На Го́споди, воззва́х: стихи́ры пра́здника и Богоро́дицы, самогла́сны, глас 4:

Из Тебе́ изы́дет Царь спасти́ ны́не лю́ди Своя́,/ Ио́сифом ди́вным от Бо́га сохраня́емей,/ и́же Чи́стыя Богоотрокови́цы храни́тель бысть,/ в Ней бо яви́ся Бо́жий свет и сла́дость,/ источа́я нему́тный исто́чник в безсе́меннем Рождестве́,/ Де́во Отрокови́це, па́че естества́ безму́жная.

Мари́е Богоро́дице, Защи́тница еси́ ве́рным,/ Храни́тельница бы́вши па́че ума́,/ изми́ нас от напа́сти су́щия/ и глаго́лы Свои́ми от враг изба́ви и сохрани́/ пло́тию с челове́ки Соедини́вшемуся без боле́зни,/ Ада́ма обнови́вшему.

Христо́с роди́ся от Богоро́дицы,/ что чуди́шися, Мари́е?/ Прииди́те, ви́дим разу́мения Христо́ва,/ я́ко Безле́тна Сы́на в ле́то породи́х, – рече́ Мари́я,/ ви́дяще Тя, зача́тию не навы́кшу,/ зна́ху са́ми А́нгели,/ я́ко рожде́нный Младе́нец Сей Бог есть.

Что ужаса́ет Тя, Богоро́дице?/ И ка́ко рожд́ Сы́на, без му́жа бо есмь?/ Безсе́менное рожде́ние кто ви́де?/ а́ще бо хо́щет Бог,/ то и побежда́ет естества́ чин.

Кто не диви́тся, я́ко в ложесна́ всели́ся/ Держа́й вся́ческая во́лею,/ яви́ла еси́ нам, Госпоже́, ве́лию ми́лость Свою́,/ Де́во Ма́ти, спа́саеши всех нас.

Сла́ва, глас то́йже:

Богоро́дице, некрадо́мое сокро́вище жи́зненное,/ Влады́чице, от вся́кия беды́ вра́жия изба́ви нас,/ Пречи́стая, спаси́ нас Свои́м милосе́рдием,/ грехо́в и страсте́й смуще́ния диа́вольскаго изба́ви, Влады́чице.

И ны́не, пра́здника. Вход. Проки́мен вели́кий.

И чте́ния. Бы́тия́ чте́ние (глава 28):

Изы́де Иа́ков от студенца́ кля́твеннаго/ и и́де в Харра́нь./ И обре́те ме́сто, и спа та́мо,/ за́йде бо со́лнце,/ и взят от ка́мения ме́ста того́, и положи́ возгла́вие себе́,/ и спа на ме́сте о́ном; и сон ви́де:/ и се ле́ствица утвержде́на на земли́,/ ея́же глава досяза́ше до небе́с,/ и А́нгели Бо́жии восхожда́ху и нисхожда́ху по ней./ Госпо́дь же утвержда́шеся на ней, и рече́:/ Аз Бог Авраа́мов, отца́ твоего́,/ и Бог Исаа́ков, не бо́йся,/ земля́, иде́же ты спи́ши на ней,/ тебе́ дам ю и се́мени твоему́./ И бу́дет се́мя твое́, я́ко песок земны́й,/ и распространи́тся на мо́ре, и ли́ву, и се́вер, и на восто́ки./ И возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́, а́може а́ще пои́деши./ И возвращу́ тя в зе́млю сию,/ я́ко не и́мам тебе́ оста́вите,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́ и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ несть сие́, но дом Бо́жий,/ и сия́ врата́ небе́сная.

Проро́чества Иезекии́лева чте́ние (главы́ 43 и 44):

Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего и я́же спасе́ния ва́шего,/ и прии́му вы, – глаго́лет Адонаи́ Госпо́дь./ И обрати́ мя на путь врат святы́х вне́шних, зря́щих на восто́ки,/ и сия́ бя́ху затворе́на./ И рече Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их,/ я́ко Госпо́дь Бог Изра́илев про́йдет ими, и бу́дут затворе́на./ Я́ко игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х, су́щих к се́веру, пря́мо хра́му,/ и ви́дех, и се испо́лнь сла́вы храм Госпо́день.

При́тчей чте́ние (глава 9):

Прему́дрость созда́ себе́ дом/ и утверди́ столпо́в седмь./ Закла́ своя́ же́ртвенная, и раствори́ в ча́ши свое́й вино́,/ и угото́ва свою́ трапе́зу./ Посла́ своя́ рабы́, созыва́ющи с высо́ким пропове́данием на ча́шу, глаго́лющи:/ и́же есть безу́мен, да уклони́тся ко мне,/ и тре́бующим ума́ рече́:/ прииди́те, яди́те мой хлеб и пи́йте вино́,/ е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживете́,/ и испра́вите ра́зум в ве́дении./ Наказу́яй злы́я, прии́мет себе́ безче́стие,/ облича́яй же нечести́ваго, опоро́чит себе́,/ обличе́ние бо нечести́вому – ра́ны ему́./ Не облича́й злых да не возненави́дят тебе́,/ облича́й прему́дра, и возлю́бит тя./ Даждь прему́дрому вину́, и прему́дрший бу́дет,/ сказуй пра́ведному, и приложи́т приима́ти./ Нача́ло прему́дрости – страх Госпо́день, и сове́т святы́х – ра́зум./ Разуме́ти бо зако́н по́мысла есть блага́го,/ сим бо о́бразом мно́гое поживе́ши вре́мя,/ и прило́жатся тебе́ ле́та живота́.

На стихо́вне стихи́ры пра́здника.

Сла́ва, Богоро́дицы, глас 1:

Богоро́дице Де́во, Бо́жия Ма́ти,/ пала́то одушевле́нная,/ родила́ еси́ Безпло́тнаго, да обогати́т обнища́вшего,/ разу́мным рабо́м долготерпели́вое поклоне́ние подае́ши, Госпоже́,/ свобожде́ние животу́ и уста́в есте́ственный обновля́вши,/ дивлю́ся вели́кому Твоему́ та́инству,/ си́лою Свое́ю спаси́ ду́ши на́ша.

И ны́не, пра́здника.

Тропа́рь Богоро́дицы, глас 4:

Пречи́стая Богома́ти, Богоро́дице,/ Собо́р Твой честны́й укра́шен многора́зличными добро́тами,/ да́ры Ти прино́сят, Госпоже́, мно́ги мирсти́и лю́дие,/ у́зы на́ша гре́шныя раздери́ Свое́ю ми́лостию/ и спаси́ ду́ши на́ша.

Тропа́рь пра́здника, глас 4:

Рождество́ Твое́, Христе́ Бо́же наш,/ возсия́ ми́рови свет ра́зума,/ в нем бо звезда́м служа́щии/ звездо́ю уча́хуся/ Тебе́ кла́нятися, Со́лнцу Пра́вды,/ и Тебе́ ве́дети с высоты́ восто́ка./ Го́споди, сла́ва Тебе́.

НА У́ТРЕНИ

На Бог Госпо́дь: тропа́рь пра́здника, два́жды. Сла́ва, и ны́не, Пречи́стей.

По 1-м и 2-м стихословиях и по полиеле́е седа́льны пра́здника. Велича́ние и степе́нна Богоро́дицы.

По 50-м псалме́ стихи́ра самогла́сна, глас 6:

В нача́ле су́щее Сло́во Бо́жие/ пло́тию ро́ждши, Богоро́дице Де́во,/ во́инства А́нгельская, на земли́ ви́девше, удиви́шася,/ па́стырие Небе́сную весть Ро́ждшемуся вопия́ху./ С ни́ми же и мы Тя,/ я́ко Ма́терь Христа́ Бо́га, велича́ем.

Кано́ны пра́здника два на 8 и Пречи́стей на 6, глас 4.

Песнь 1

Ирмо́с: Отве́рзу уста́ моя́,/ и напо́лнятся ду́ха,/ и сло́во отры́гну Цари́це Ма́тери,/ и я́влю́ся, све́тло торжеству́яу/ и воспою́, ра́дуяся, Тоя́ чудеса́.

Ка́ко ражда́еши, Цари́це, ка́ко. Огнь нося́щи, не опали́ся,/ я́коже купина́ горя́ше, и неопаля́ема, образу́ющи Тя,/ и вои́стинну рождества́ Твоего́ та́йну ка́жет о́браз.

Из Тебе́, Пречи́стая, днесь всех Творе́ц плотски́ ражда́ется по нас,/ пелена́ми повива́ется, пови́вый мо́ре мгло́ю, Ма́ти Присноде́во.

Вифлее́ме, ра́дуйся, и Еде́ме,/ днесь ра́йския пи́щи отверза́ет ми вход дре́во Живо́тное –/ роди́ся Христо́с.

Тя, вмести́лище Сло́ва, Богоро́дице,/ я́ко мы́сленную ле́ствицу, по не́йже сни́де Бог,/ да нас обожи́т, на Не́бо возводя́,/ вси у́бо досто́йно похва́лим Тя.

Песнь 3

Ирмо́с: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Да ра́дуются Небеса́, и́же всех Творец прихо́дит,/ в Вифлее́ме ро́ждся, ви́дим бысть и повива́ем,/ да грехо́в на́ших ю́зы разреша́ются милосе́рдием Твои́м, Христе́ Бо́же наш.

Село́ вме́стно невмести́му Зижди́телю бысть,/ сего́ пло́тию вме́щши, Обра́дованная Пресвята́я Де́во.

Возвели́чил Тя есть Бог, во чре́ве Твое́м всели́вся, Непоро́чная,/ и на́шу нищету́ прии́м днесь,/ и́же всем челове́ком власть дав ча́дом Бо́жиим бы́ти нам.

Утро́бу нося́щи нам высоту́ и широту́, Богоро́дице,/ в не́йже Бог наш всели́ся,/ Ада́м Сей, Госпо́дь, возведе́ ны на дре́внюю красоту́,/ ю́же от нас прия́т, и обожи́.

Конда́к и И́кос пра́здника.

Седа́лен Богоро́дицы, глас 4:

Пречи́стая Де́во Богоро́дице,/ не опали́ся, Госпоже́, на правосла́вное христиа́нство, я́ко образу́ющу Тя./ Ты отверза́еши нам путь Живо́тный./ Вси у́бо есмы́, гре́шнии, ра́дуемся и весели́мся Твоему́ честно́му Собо́ру,/ на́шу не́мощь, Госпоже́, посети́ и спаси́ нас всех.

Сла́ва, и ны́не, седа́лен пра́здника.

Песнь 4

Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твоей.

Безпло́тный воплоща́ется, и начина́ется Безле́тный,/ от Деви́цы Ин яви́тся,/ Соверше́нный ви́дим есть неви́дением,/ Осяже́нный держи́м есть я́ко Челове́к.

И́же невеще́ственная существа́ соде́лав,/ пло́тски, я́ко Челове́к, из Тебе́, Богома́ти, днесь ражда́ется./ тому́ воспои́м: сла́ва си́ле Твоей, Го́споди.

Безпло́тных чино́в мно́жества воспе́ша Тя, рожде́ннаго от Отца́,/ волсви́ поклони́шася;/ вся же земля́ с на́ми просла́вится:/ Христо́с от Деви́цы роди́ся.

Безнача́льный Бог Сло́во освяти́л есть утро́бу Ти, Деви́це,/ естество́ обнови́л есть истле́вшее,/ разреши́ в ней сосу́ды дре́вняго Ада́ма и спасе́ род наш.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ ми́р подава́ющая.

Удиви́шася днесь вся тварь,/ я́ко ви́дети Тя, су́щаго во Оте́ческих недрех,/ на ру́ку Ма́тери Твоея́ воплоще́нна носи́ма/ и сосце́м пита́ема, пита́ющаго вся.

Стремле́ние уста́вила еси́ тле́ния, Де́во,/ Бо́га бо без истле́ния родила́ еси́/ истле́вшее естество́ челове́ческое от тли Свобо́ждшаго.

Па́стырие, свиря́йте, воспева́йте, А́нгели,/ и, волсви́, да́ры принеси́те,/ пусты́ня – я́сли, земля́ – верте́п.

Огнь неопа́льный, Пречи́стая, Ты Моисе́ови позна́ся – виде́ние купины́,/ обра́зно Рождество́ Твое́ проявля́я Влады́ка в Сина́и.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от нея́ ро́ждшагося Бо́га сла́вим.

Вифлее́ме, ра́дуйся, гра́де Дави́дов,/ Христо́с бо, прии́м смире́ние, нам дая́ о́браз,/ в верте́пе ражда́ется и ны́не Младе́нец Бо́жий быва́ет.

Созда́вый по о́бразу Своему́ челове́ка/ за мно́гое милосе́рдие обновля́ет сего́ из Тебе́, Де́во Бо́гомати,/ и соверше́нно в того́ обле́кся.

Присноживы́й Све́те, жезл Дави́дов из ко́рене Иессе́ова,/ отню́дь без отца́ из Ма́тере,/ от Тебе́ Христо́с роди́ся, Богоро́дице.

Кио́т Тя нарече́ вели́кий Дави́д,/ руно́ – Гедео́н, на не́же, я́ко дождь, Христо́с сни́де,/ я́ко жезл из ко́рене прозя́бше Иессе́ова, Христо́с от Де́вы.

Конда́к, глас 6:

И́же пре́жде денни́цы от Отца́ без ма́тере роди́выйся,/ на земли́ без отца́ воплоти́ся днесь из Тебе́./ Те́мже звезда́ благовеству́ет волхво́м,/ А́нгели же с па́стырьми пою́т/ несказа́нное Рождество́ Твое́, Благода́тная.

И́кос:

Невозде́ланный Грозд во́зрасти́вшая, та́йный Виногра́де,/ я́ко на ве́твиих, на объя́тиих ноша́ше и глаго́лаше:/ Ты еси́ Плод Мой,/ Ты еси́ Жи́знь Моя́./ Отне́леже позна́х, я́ко и е́же бех, есмь./ Ты Мой Бог:/ печа́ть бо де́вства Моего́ зря́щи неразруши́му,/ пропове́дую Тя, Непрело́жнаго Сло́ва плоть бы́вша./ Не вем се́мене, вем Тя, Реши́теля тле́ния:/ чи́ста бо есмь, Тебе́ проше́дшу из Мене́,/ я́коже бо обре́т, оста́вил еси́ утро́бу мою́, зря́щи ю це́лу./ Сего́ ра́ди сликовству́ет вся тварь, вопию́щи Мне:/ ра́дуйся, Благода́тная.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

В Вифлее́ме Христо́с ражда́ется, по проро́честву:/ ты, Вифлее́ме, земля́ Иу́дова, До́ме Евфра́фов,/ не́си мал во влады́ках, а́ще и мал в гра́дех,/ из тебе́ издыдет Царь спасти́ лю́ди Своя́.

Ны́не молю́ Тя, Ма́ти Присноде́во, Обра́дованная, Пресвята́я,/ Невеще́ственное существо́ родила́ еси́ – челове́ческое естество́, Де́во Ма́ти,/ и́же созда́вшаго челове́ка,/ уста́вила еси́ нам нетле́ннаго Христа́, Бо́га на́шего.

В Вифлее́м прииди́те,/ вше́дше, вкуси́м разуме́ния Христо́ва,/ ту бо яви́ся Бо́жий свет и сла́дость,/ источа́я нему́тный исто́чник и́стиннаго просвеще́ния,/ па́че ума́ Бо́га ро́ждши, Чи́стая.

Безму́жная Мари́е, Защи́тнице ве́рным,/ изми́ от напа́сти чту́щия Тя,/ изба́ви и сохрани́ без боле́зни,/ вреда́ от врага́, ви́димаго же и неви́димаго.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,і/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозно́сите его́ во вся ве́ки.

В верте́пе повива́емаго и в я́слех Христа́ ви́дяще,/ стяза́хуся А́нгели, глаго́люще:/ что Се Отроча́, Бог Сый,/ я́ко Младе́нец на́ми ви́дим есть, в пелена́х лежа́щ?

Се ны́не оскуде́ я́ве от Иу́дова коле́на князь и влады́ка,/ Ты бо, Пренепоро́чная, родила́ еси́,/ его́же дре́вле чу́дно есть ча́яти язы́ком, Христа́,/ ему́же пое́м: благослови́те, вся дела́ Госпо́дня, Го́спода.

Кто, слы́шав, не диви́тся, я́ко в ложесна́ все́лься Бог,/ я́ко Младе́нца без стра́сти и тле́ния Де́ва родила́ есть?/ О́ле бога́тства Твоего́ милосе́рдия,/ о́ле глубины́ та́йны!/ Содержа́й вся во́лею яви́лся есть.

Богопечатле́нное некрадо́мое сокро́вище жи́зни. Влады́чице, Де́во Ма́ти,/ без отца́ из Тебе́ воплоти́ся./ Ста́до су́щее того́ Твои́ми Ма́терними моли́твами от вся́кия беды вра́жия избавля́й.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умов естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

На Тебе́, осени́в, Неразлу́чен, Сопресто́лен Отцу́ и Сы́ну,/ Дух Пресвяты́й почи́л есть,/ Пречи́стую Богома́терь всем показа́ Тя.

Жезл прозя́бла еси́ из ко́рене Иессе́ова, Богороди́тельнице,/ Цвет Божества́, Христа́, нам поро́ждали, Пречи́стая, днесь,/ я́ко Бо́га невмести́маго, ны́не же я́ко Младе́нца повива́ема.

Восто́к свы́ше посети́л есть Христо́с,/ су́щих во тьме и се́ни сме́ртней,/ спаси́ ны Свои́м милосе́рдием, я́ко Благ.

Град и чту́щия Тя,/ А́гница, ро́ждшая Пе́рваго Па́стыря,/ от бед, и тли, и грехо́в, и страсте́й изба́ви, Влады́чице.

Свети́лен Богоро́дицы:

О Госпоже́ Цари́це, Ма́ти Бо́жия,/ Собо́р Твой бысть со святы́ми,/ я́ко Невеще́ственное существо́ родила́ еси́,/ ны́не же изба́ви нас от грехопаде́ний на́ших,/ моли́, Ма́ти, всегда́ непреста́нно и спаси́ ду́ши на́ша.

Сла́ва и ны́не, пра́здника.

На хвали́тех стихи́ры пра́здника и Богоро́дицы, глас 7:

Де́во Пресвята́я, Бо́жия одушевле́нная пала́то,/ в Небе́сных Невмести́маго в Себе́ вмести́вшая,/ его́же в верте́пе родила́ еси́,/ па́че ума́ обнища́вша, плоть бы́вша/ неодержа́но го́рькою зло́бою/ вкуше́ния попо́лзшагося.

Написа́ся в рабе́х ке́сарева повеле́ния ра́ди,/ гряде́ши пода́ти обоже́ние, живо́т и избавле́ние/ благоразу́мным рабо́м, Долготерпели́ве,/ покланя́емся рождеству́ спасе́нному/ и нищете всех Обо́гащающаго.

Рождество́ непостижи́мое:/ уста́вы есте́ственныя обновля́вши, Сы́ну глаго́люще:/ Ча́до Любе́зное,/ дивлю́ся вели́кому Твоему́ та́инству,/ ка́ко, в верте́пе роди́вся от Де́вы Чи́стыя,/ си́лою твори́ши вся́ческая хоте́нием?

О блаже́нное Отрокови́цы чре́во!/ я́же мы́сленне Небесе́ бо́льши показа́ся,/ его́же бо не вмести́т Не́бо,/ того́ ты обде́ржиши, нося́щи./ О блаже́нная сосца́ Твоя́, Деви́це!/ Цвет пита́ла еси́, Пита́ющаго вся́ко дыха́ние,/ Христо́с в Твоей утро́бе быв,/ Безму́жная Отрокови́це.

Сла́ва, глас 6:

Днесь Неви́димое Естество́/ челове́ком от Де́вы совокупля́ется./ Днесь Безме́рное существо́ в Вифлее́ме пелена́ми обвива́ется./ Днесь Бог звездо́ю волхвы́ в поклоне́ние приво́дит,/ провозвеща́я Свое́ тридне́вное погребе́ние,/ я́ко в зла́те, и сми́рне, и лива́не./ ему́же пое́м:/ воплоти́выйся от Де́вы, Христе́ Бо́же, спаси́ ду́ши на́ша.

И ны́не, глас 2:

Иоа́нна мона́ха: Днесь Христо́с в Вифлее́ме ражда́ется от Де́вы,/ днесь Безнача́льный начина́ется, и Сло́во воплоща́ется./ Си́лы Небе́сныя ра́дуются,/ и земля́ с челове́ки весели́тся,/ волсви́ Влады́це да́ры прино́сят,/ па́стырие Рожде́нному дивя́тся./ Мы же непреста́нно вопие́м:/ сла́ва в Вы́шних Бо́гу, и на земли́ мир,/ в челове́цех бла́гово́ление.

Славосло́вие вели́кое.

На Литурги́и слу́жба вся Пречи́стей.