ВЕ́ЧЕР

На Го́споди, воззва́х: стихи́ры предпра́зднства 3 и святы́х 3. Предпра́зднства стихи́ры, глас 4.

Подо́бен: Я́ко до́бля:

Предпра́зднственныя пе́сни,/ мы́сли пра́востию,/ Христо́ва Рождества́ предвозгласи́м:/ Отцу́ бо и Ду́ху Сый равноче́стен,/ за милосе́рдие в на́ше оде́явся смеше́ние,/ и́мать роди́тися в Вифлее́ме гра́де;/ его́же Рождество́ несказа́нное/ па́стырие со А́нгелы воспе́ша.

В кимва́лех возгласи́м,/ в пе́снех воскли́кнем:/ Христо́во явле́ние показа́ся,/ проро́ческая пропове́дания коне́ц прия́ша:/ Его́же бо прореко́ша пло́тию челове́ком яви́тися,/ ражда́ется во святе́м верте́пе,/ и в я́слех возлега́ет, я́ко Отроча́,/ и пелена́ми повива́ется, я́ко Младе́нец.

Вифлее́ме, угото́вися,/ Еде́ме, ны́не отве́рзися:/ роди́ти Всесвята́я и́дет;/ Небеса ́да веселя́тся,/ да игра́ют челове́цы:/ в я́слех Жи́знь, в верте́пе бога́тый,/ прихо́дит мно́жества ра́ди ми́лости,/ нищету́ Ада́мову восприи́м/ кроме́ преложе́ния и смеше́ния.

И́ны стихи́ры святы́х му́чеников, глас и подо́бен то́йже:

Десяти́це Богозва́нная/ и свеща́ десятосве́тлая,/ Боже́ственными сия́нии озаря́ющи церко́вное исполне́ние,/ столпи́ непоколе́бленнии,/ зве́зды све́тлыя,/ и́же зе́млю онебеси́вше/ светлостьми́ велича́йших по́двигов,/ похвала́ми свяще́нными велегла́сно да восхва́лятся днесь.

Да похва́лится Феоду́л,/ Зо́тик же и Помпи́й./ Васили́д, Евпо́р, Агафо́пус же и Саторни́н,/ Гела́сий же и Боже́ственный Ева́рест,/ с ни́миже и Евникиа́н/ ны́не да почти́тся пе́сньми,/ всеблаготи́шная су́щим в бу́ри приста́нища,/ и́же пре́лесть обличи́вше/ и вене́ц победи́тельный прие́мше.

Кри́тская прозябе́ния,/ церко́вная утвержде́ния/ и ве́рных неувяда́емая укра́шения,/ ра́йстии сладкодохнове́ннии цве́ти честни́и,/ благоприя́тная Христо́ва и кра́сная заколе́ния/ и возложе́ния Небе́снаго хра́ма,/ десяти́цу Тро́ицы святу́ю/ страстоте́рпцев почти́м.

Сла́ва, глас 3: Предпра́зднственный днесь му́чеников наста́ пра́здник,/ рожде́ственный нам предподпису́ющ день,/ от Со́лнца Со́лнце,/ от Де́вы Бо́га, я́вльшася пло́тию, пропове́дающ,/ десяти́ца му́чеников, в Кри́те кре́пко пострада́вшая,/ венцы́ побе́ды от Небесе́ прия́ша./ К ни́мже возопии́м:/ ли́че святоизбра́нный, моли́те Христа́, святи́и му́ченицы,/ о ве́рою соверша́ющих всечестну́ю па́мять ва́шу.

И ны́не, глас то́йже:

Благоукраси́ся, Вифлее́ме,/ отве́рзеся бо Еде́м;/ гото́вися, Евфра́фо,/ обновля́ется бо Ада́м и Е́ва с ним;/ кля́тва бо разори́ся, спасе́ние ми́ру процвете́,/ и ду́ши пра́ведных украша́ются/ я́ко дар дароно́сия, вме́сто ми́ра пе́ние принося́ще,/ спасе́ние душе́вное и нетле́ние прие́млюще./ Се бо в я́слех возлежа́й/ предповелева́ет песнопе́ние духо́вное соверша́ти вопию́щим непреста́нно:/ Го́споди, сла́ва Тебе́.

На стихо́вне стихи́ры, глас 6.

Подо́бен: Тридне́вен:

Безме́рная му́дрость Бо́жия,/ дом Себе́ па́че ума́ от Де́вы созда́ Христо́с/ и хо́щет в верте́пе и я́слех безелове́сных/ пло́тию роди́тися па́че смы́сла.

Стих: Бог от ю́га прии́дет/ и Святы́й из горы́ приосене́нныя ча́щи.

Яви́лся еси́ проро́ком, Христе́,/ я́ко мо́щно бе ви́дети Тя, Зижди́теля,/ в после́дних же вре́менах всем показа́лся еси́ челове́ком/ во гра́де Вифлее́ме, Челове́к быв.

Стих: Го́споди, услы́шах слух Твой и убоя́хся;/ Го́споди, разуме́х дела́ Твоя́ и ужасо́хся.

Обтече́, возвеща́ющи звезда́/ Со́лнце Пра́вды – Христа́ – звездосло́вцем/ во гра́де Вифлее́ме,/ и А́нгели па́стырем ны́не благовеству́ют,/ с ни́миже потеце́м, Богому́дрии.

Сла́ва, глас 2:

Крит предпра́зднствует днесь Рождество́ Христо́во/ в па́мяти страстоте́рпцев./ Те́мже моли́твами их, Го́споди,/ спаси́ ду́ши на́ша.

И ны́не, глас то́йже:

Се время прибли́жися спасе́ния на́шего,/ гото́вися, верте́пе,/ Де́ва приближа́ется роди́ти;/ Вифлее́ме, земле Иу́дова, красу́йся и весели́ся,/ я́ко из тебе́ возсия́ Госпо́дь наш./ Услы́шите, горы́ и хо́лми/ и окре́стныя стра́ны Иуде́йския,/ я́ко гряде́т Христо́с,/ да спасе́т, его́же созда́, челове́ка,/ я́ко Человеколю́бец.

Тропа́рь му́чеников, глас 3:

Многочу́дный Крит почти́м,/ процве́тший честны́я цве́ты,/ Христо́вы би́серы,/ му́чеников сора́сленых,/ де́сять бо суть число́м, блаже́ннии,/ и́же весь и́дольский наро́д посрами́ша,/ те́мже и венцы́ прия́ша, добледу́шнии.

Сла́ва, и ны́не, предпра́зднства:

Гото́вися, Вифлее́ме,/ отве́рзися всем, Еде́ме,/ красу́йся, Евфра́фо,/ я́ко дре́во живота́ в верте́пе процвете́ от Де́вы:/ рай бо О́ноя чре́во яви́ся мы́сленный,/ в не́мже Боже́ственный сад,/ от него́же я́дше, жи́ви бу́дем,/ не, я́коже Ада́м, у́мрем./ Христо́с ражда́ется пре́жде па́дший возста́вити о́браз.

НА ПОВЕЧЕ́РИИ

Трипе́снец, глас 6. его́же краегране́сие: Предсубб́о́тие же. Ирмо́с по два́жды, тропари́ на 6, последи́ же ирмо́с оба ли́ка вку́пе.

Песнь 5

Ирмо́с: К Тебе́ у́тренюю,/ благоутро́бия ра́ди Себе́ истощи́вшему непрело́жно/ и зрак раба́ от Де́вы носи́вшему,/ Сло́ве Бо́жий./ Ми́р пода́ждь ми, па́дшему,/ Человеколю́бче.

Омы́вше смыслы и предочи́стившеся та́йны причаще́нием стра́шнаго смотре́ния,/ те́лом и душе́ю к Вифлее́му гра́ду взы́дем/ Влады́ку ви́дети ражда́ющася.

Зри́те, друзи, и не бойтеся,/ безу́мный бо И́род всу́е шата́ется Зижди́теля уби́ти ро́ждшася,/ но Той, я́ко жи́знь и смерть содержа́й,/ живе́т и спа́сает мир, я́ко Человеколю́бец.

Песнь 8

Ирмо́с:

Столп зло́бы противобо́жныя/ о́троцы Боже́ственнии обличи́ша;/ на Христа́ же, шата́яся, И́род свире́пеет,/ сове́тует тще́тная,/ уби́ти поуча́вается живота́ Держа́щаго дла́нию,/ Его́же вся тварь благослови́т,/ сла́вящи во ве́ки.

От ве́ждей ле́ности сон вси, ве́рнии, оттрясе́м,/ в моли́тве же побди́м, искуше́ния отража́юще, я́же от лука́ваго,/ и с па́стырьми зри́телие сла́вы яви́мся Христа́ ро́ждшагося,/ его́же вся тварь благослови́т, сла́вящи во ве́ки.

Глубину́ прему́дрости и ра́зума Зижди́телева кто испыта́ет челове́ков?/ Бо́жиих суде́б бе́здну кто прему́др пости́гнет?/ И́хже ра́ди, Небеса преклони́в, с челове́ки Плотоно́сец поживе́,/ Е́гоже вся тварь благослови́т, сла́вящи во ве́ки.

Скве́рну сло́ву от усте́н изы́ти, ве́рнии, возбрани́м,/ поучи́вшеся же, словеса́ Боже́ственная Христу́ ны́не принесе́м,/ разре́шшему ны безслове́сия, в безслове́сных лежа́щему я́слех,/ его́же вся тварь благослови́т, сла́вящи во ве́ки.

Отрица́тися плотски́х страсте́й и ми́ра кра́сных потщи́мся,/ духо́вных же держи́мся попече́ний, Богому́дрии,/ досто́йны себе́ самы́я ражда́ющемуся, представля́юще от дел, Влады́це,/ его́же вся тварь благослови́т, сла́вящи во ве́ки.

Песнь 9

Ирмо́с: Честне́йшую Херуви́м/ и сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.

Па́губное веле́ние вражде́бнаго, смуща́ющаго Рождество́ Иису́сово,/ младе́нцев незло́бивых соде́ла уби́йство;/ мы же ро́ждшагося ве́рою почти́м.

Зако́ны есте́ственныя преоби́дя и заветы Боже́ственныя отме́ща,/ И́род лю́тый ма́тери беззако́нно обезча́дстви/ и младе́нцы уби́ неви́нно за всех Жи́знь.

Язы́ком отве́рзеся еде́мская дверь,/ ражда́ющуся в верте́пе Изба́вителю;/ исто́чник же безсме́ртия жа́ждущим источа́ет Госпо́дь сла́вы,/ Его́же велича́ем.

Окружаху, я́ко престо́л Херуви́мский, А́нгели я́сли,/ верте́п бо Не́бо зря́ху, лежа́щу в нем Влады́це,/ и, сла́ва в Вы́шних Бо́гу, вопия́ху.

Та́же ирмо́с. И покло́н

НА У́ТРЕНИ

На Бог Госпо́дь: тропа́рь предпра́зднства два́жды. Сла́ва, му́чеников. И ны́не, предпра́зднства.

По 1-й стихологии седа́лен, глас 3.

Подо́бен: Боже́ственныя ве́ры:

Ра́дуется днесь Це́рковь,/ пое́т, краси́тся, предпра́зднетвует Спа́сово вои́стинну Рождество́:/ всесвято́е бо соверша́ется торжество́ и в Госпо́дню сла́ву облачи́тся./ Вси воззове́м Христу́ Бо́гу:/ Человеколю́бче, поми́луй ны, пою́щия Тя.

Сла́ва, и ны́не, то́йже.

По 2-й стихологии седа́лен, глас 8.

Подо́бен: Прему́дрости:

Из недр Оте́ческих соше́л еси́/ и несказа́нным истоща́нием ю́же по нам нищету́ восприя́л еси́/ па́че естества́, Человеколю́бче,/ в верте́п всели́тися благоволи́л еси́, Го́споди,/ и, я́ко Младе́нец, сосцы́ пита́ешися, Зижди́тель и Госпо́дь./ Те́мже, звездо́ю наставля́еми, волсви́/ да́ры Тебе́ прино́сят, я́ко Влады́це тва́ри;/ па́стырие и А́нгели дивля́хуся, зову́ще:/ сла́ва в Вы́шних Бо́гу, на зе́млю гряду́щему роди́тися, я́ко Челове́ку.

Сла́ва, и ны́не, то́йже.

Кано́н предпра́зднства со ирмосо́м на 8 и святы́х на 6. Кано́н предпра́зднства, глас 6, его́же краегране́сие по алфави́ту. Ио́сиф.

Песнь 1

Ирмо́с: Волно́ю морско́ю/ Скры́вшаго дре́вле гони́теля, мучи́теля,/ в я́слех Сокрыва́емаго уби́ти и́щет И́род;/ но мы с волхвы́ пои́м:/ Го́сподеви воспои́м,/ сла́вно бо просла́вися.

Князь из Иу́ды оскуде́ уже́,/ ему́же бо завеща́ся, я́коже предписа́ся,/ язы́ков ча́яние – Иису́с Христо́с прии́де/ и в верте́пе ражда́ется кра́йния ра́ди бла́гости.

Вифлее́ме, весели́ся ра́достию:/ в тебе́ бо ражда́ется Христо́с Госпо́дь./ Вселе́нная да игра́ет, прие́млющи избавле́ние,/ да лику́ет вся тварь, пра́зднующи.

Род челове́ческий хотя́ спасти́, Преблаги́й/ во утро́бу всели́ся Неискусобра́чныя Де́вы/ и се роди́тися гряде́т./ Тому́ поклони́мся: сла́вно бо просла́вися.

Ин кано́н святы́х, глас 2, его́же краегране́сие в Богоро́дичнах. Гео́ргия.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Пресве́тлыя днесь лучи́ возсия́ша,/ У́мнаго возвеща́ющия Со́лнца всем того́ в ми́ре/ во пло́ти осия́ние и явле́ние.

Духо́вную днесь предпра́зднственную страстоно́сцы трапе́зу всем предложи́ша,/ та́инственно пита́ющую ны блиста́ньми ражда́ющагося Христа́.

Я́ко све́тлый возсия́вше зве́зды, святи́и,/ у́мному после́довасте сла́вы Со́лнцу во вре́мя по́двигов/ и, сего́ ны́не получи́вше, просвети́стеся.

Ополче́ния вра́жия разори́ша, единоду́шствовавше, му́ченицы/ и победи́тельная от ро́ждшагося в верте́пе Христа́ неизглаго́ланно восприя́ша.

Богоро́дичен: Род челове́ческий хвалу́ Тебе́ предпра́зднственную прино́сит, Богоневе́стная,/ я́ко о́бщия ра́дости Хода́тая и Вино́вника сла́вит ро́ждшагося из Тебе́/ Человеколю́бца.

Песнь 3

Ирмо́с: Тебе́, на вода́х/ пове́сившаго всю зе́млю неодержи́мо,/ тварь, ви́девши в верте́пе ражда́ющася,/ ужа́сно содрога́шеся:/ несть свят, па́че Тебе́,/ Го́споди, зову́щи.

В ра́бий облещи́ся о́браз восхоте́л еси́,/ я́ко да рабо́ты мя лука́ваго изба́виши,/ песносло́влю Твое́ благоутро́бие, Сло́ве, Отцу́ Собезнача́льне и Соприсносу́щне./ Сла́ва смотре́нию Твоему́.

Гряде́т Де́ва Го́спода роди́ти в верте́пе,/ предвари́те, волсви́; па́стырие, ны́не прииди́те; песнь с высоты́, А́нгели, возопи́йте:/ яви́ся челове́ком избавле́ние.

Ища́й мя, заблу́ждшаго, Человеколю́бче,/ и верте́п я́вльшася разбо́йнический де́лы непло́дными,/ в верте́п ны́не прише́л еси́ от Де́вы днесь роди́тися, Влады́ко:/ сла́ва, Сло́ве, прише́ствию Твоему́.

Ин

Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя.

Пелена́ми пови́вся,/ пло́тию ро́ждшееся Сло́во раздра́ ри́зы дре́вняго осужде́ния/ и нас в нетле́ние облече́.

Сонм, прему́дрии, безбо́жия разори́сте/ си́лою во пло́ти я́вльшагося Христа́ Бо́га/ и сего́ любви́ связа́стеся.

Богоро́дичен: Разреши́хомся уз осужде́ния, Зижди́телю, пелена́ми пови́вшуся,/ и оде́ждею облеко́хомся, Богоро́дице, пе́рвыя красоты́.

Конда́к предпра́зднства, глас 3.

Подо́бен: Де́ва днесь:

Де́ва днесь Преве́чное Сло́во/ в верте́пе гряде́т роди́ти неизрече́нно:/ лику́й, вселе́нная, услы́шавши,/ просла́ви со А́нгелы и па́стырьми/ хотя́щаго яви́тися Отроча́ мла́до, Преве́чнаго Бо́га.

И́кос:

О, ужа́снаго вои́стинну и па́че сло́ва чудесе́!/ е́же бы́ти дая́й всем ра́ди бла́гости во чре́во Святы́я Де́вы вни́ти,/ и в верте́пе роди́тися гряде́т, и в я́слех положи́тися./ Звезда́ же сего́ пропове́дует свы́ше волхво́м,/ иду́щим на поклоне́ние Его́ с да́ры, издале́ча привлача́щи,/ со тща́нием после́дующия Валаа́ма прорече́нию, ре́кшаго:/ звезда́ хо́щет провозвести́ти Отроча́ мла́до, Преве́чнаго Бо́га.

Седа́лен святы́х, глас 1.

Подо́бен: Гроб Твой, Спа́се:

Кри́тстии све́тлии и честни́и градоде́ржцы, страда́вше кре́пко,/ победи́ша ве́рою зми́я злонача́льнаго/ и зако́нне венча́ни бы́ша./ Сих днесь достохва́льную па́мять пра́зднуем,/ велегла́сно всех сла́вяще Го́спода.

Сла́ва, и ны́не, предпра́зднства, глас и подо́бен то́йже:

Ра́дуйся, Сио́не, Вифлее́ме, украси́ся,/ всех Содержи́тель, звезду́ предпосла́в, возвести́ Свое́ безме́рное схожде́ние:/ его́же бо трепе́щут Небе́сныя си́лы,/ Сей ражда́ется от Де́вы непревра́щно,/ еди́ный Бог наш.

Песнь 4

Ирмо́с: От Де́вы прише́ствие Твое́ прови́дя, Авваку́м,/ у́жасся, вопия́ше:/ Ты от ю́га, воплоща́яся, прише́л еси́, Изба́вителю,/ Ада́ма отринове́ннаго воззвати.

Светоза́рный о́блак гряде́т/ возсия́ти Христа́ из Ма́терних ложе́сн, Пра́вды Со́лнце,/ всю зе́млю луча́ми Боже́ственными просвеща́ющаго.

Бог челове́ком яви́ся подо́бен, и обнищава́ет пло́тию,/ да нас обогати́т, и в верте́пе ражда́ется:/ сего́, ве́рнии, чи́стым се́рдцем подъи́мем.

Се Христо́с во гра́де ражда́ется Вифлее́ме,/ я́ко да Еде́м нам отве́рзет,/ преслуша́нием пе́рвее зми́я окраде́ния заключе́нный,/ Боже́ственно торжеству́им.

Ин ирмо́с: Услы́шах, Го́споди, слух Твой и убоя́хся,/ разуме́х дела́ Твоя́, и диви́хся, и возопи́х:/ сла́ва си́ле Твое́й, Го́споди.

Небеса ́да ра́дуются, земля́ та́инственнаго да исполни́тся весе́лия:/ Христо́с бо прии́де обнови́ти вся́ческая.

Десяти́ца, провозвеща́ющи страда́льцев рожде́ние Зижди́телево,/ с на́ми лику́ет и сра́дуется.

Христо́во соше́ствие к Небеси́ возвы́си Боже́ственно/ до́блественныя му́ченики страда́нием.

Богоро́дичен: Я́ко о́бщую ра́дость, о Богоро́дице!/ вся тварь пе́сньми Тя почита́ет, предпра́зднствующи.

Песнь 5

Ирмо́с:

К Тебе́ у́тренюю,/ благоутро́бия ра́ди Себе́ истощи́вшему непрело́жно/ и зрак раба́ от Де́вы носи́вшему,/ Сло́ве Бо́жий./ ми́р пода́ждь ми, па́дшему,/ Человеколю́бче.

Се́рдце вся́кое земноро́дных да игра́ет, да весели́тся тварь:/ Госпо́дь ражда́ется из Отрокови́цы Чи́стыя в верте́пе Вифлее́мстем,/ и волсви́ тому́ прино́сят да́ры досто́йныя.

Лю́дие, дре́вле в се́ни сме́ртней седя́щии,/ у́зрите Свет, вам возсия́вший от Де́вы,/ и мно́гаго душесла́достия испо́лнитеся,/ обнища́вшаго Сло́ва велича́юще при́сно.

В ма́лем верте́пе гряде́ши вмести́тися, Невме́стный естество́м,/ я́ко да мя, ума́лившагося преступле́нием, возвели́чиши за ми́лость безме́рную./ Покланя́юся Твоему́ благоутро́бию, Долготерпели́ве.

Ин ирмо́с:

Све́та Пода́телю и веков Творче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го Бо́га не зна́ем.

Ве́ру Христу́, я́ко зла́то,/ и песнопе́ние, я́ко лива́н прия́тен,/ и чи́стую любо́вь, я́ко сми́рну, принесе́м, ве́рнии,/ нас ра́ди роди́тися пло́тию благоволи́вшему.

Защище́ние страда́льцев, в согла́сие собра́вшеся днесь еди́но Христо́во,/ враго́в многообра́зныя низложи́ ко́зни/ и побе́ды по́чести досто́йне прия́ша.

Во пло́ти Христо́во прише́ствие, прему́дрии му́ченицы, уве́девше я́вственно,/ плотску́ю любо́вь отри́нуша./ Те́мже за любо́вь его́ и пострада́ша.

Богоро́дичен: Изба́вльшеся́ пре́лести, Чи́стая, и́дольския,/ Тебе́ ра́ди позна́хом Творца́ и Еди́наго Спа́са./ Тем в того́ рождестве́ Тя любо́вию почита́ем, Пречи́стая.

Песнь 6

Ирмо́с: Бе́здна после́дняя грехо́в обы́де мя/ и, волне́ния не ктому́ терпя́,/ я́ко Ио́на Влады́це вопию́ Ти:/ от тли мя возведи́.

Зако́нов Тя Де́ва плотски́х кроме́, Го́споди, прихо́дит роди́ти в верте́пе/ и во я́слех пло́тию восклони́ти, я́ко Младе́нца.

Стра́нна мя бы́вша от Бо́га преступле́ньми,/ Пребоже́ственный, рожде́йся от Отрокови́цы Неискусобра́чныя ми́лости ра́ди,/ граждани́на Небе́снаго я́вля́ет.

Го́ры же, и хо́лми, и удо́лия, возвесели́теся:/ Госпо́дь бо пло́тию ражда́ется, обновля́яй тварь,/ истле́вшую лука́выми преступле́ньми.

Ин ирмо́с:

В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

С высоты́ нам возсия́вшая за неизрече́нную ми́лостъ восто́чная звезда́,/ возвеща́ющая, привеща́ше, су́щим в ми́ре озаре́ние.

В нощи́ жития́ светя́ще в пучи́не пре́лести ходя́щим,/ све́том Христо́вым упра́висте к Нему́ челове́ки, всеславнии.

Из глубины́ безбо́жия возвлече́ к Бого́ве́дения высоте́ му́ченики/ за неизрече́нную ми́лость в верте́пе рожде́йся,/ я́ко Человеколю́бец.

Ро́ждшагося из Тебе́,/ Богоневе́сто,/ во пло́ти Христа́ Бо́га па́че смы́сла,/ Боже́ственнаго возрожде́ния, земноро́днии, и че́сти сподо́бихомся.

Конда́к, глас 4.

Подо́бен: Яви́лся еси́ днесь:

Денни́ца возсия́ му́чеников/ честно́е страда́льчество предозаря́ющее нам в верте́пе ражда́емаго:/ его́же Де́ва безсе́менно роди́.

И́кос:

От Де́вы нас ра́ди рожде́ннаго в верте́пе Христа́ Жизнода́вца лю́бяще,/ ору́жницы полк воздвиго́ша све́тел на велиа́ра/ и, победи́вше я́вственно, на зе́млю того́ низверго́ша,/ безме́рно сего́ дре́вле хваля́щася./ Те́мже све́тят су́щим во тьме, я́ко свети́ла су́ще мы́сленнаго Со́лнца:/ звезда́ бо у́бо пре́жде волхво́м предста́,/ путеводя́щи в Вифлее́м, град Иу́дов,/ си́и же нам пропове́дают чрез му́ки,/ Его́же Де́ва безсе́менно роди́.

Песнь 7

Ирмо́с: О́троцы в Вавило́не/ пе́щнаго пла́мене не убоя́шася,/ но, посреде́ пла́мене вве́ржени, ороша́еми, поя́ху:/ благослове́н еси́, Го́споди, Бо́же оте́ц на́ших.

Ка́ко Тя мале́йший, Сло́ве, подъи́мет верте́п,/ нището́ю мно́гою нищету́ Ада́мову отъе́мшаго/ и бога́тством Боже́ственныя благода́ти челове́ки обогати́вшаго?

Глаго́лы стра́нныя па́стырие слы́шавше,/ потща́шася Вифлее́м ви́дети/ и в я́слех безслове́сных разреша́ющего безслове́сия вся челове́ки Возлежа́щаго.

Усты́ же и се́рдцем пло́тию приходя́щаго роди́тися Христа́ в верте́пе от Де́вы Отрокови́цы,/ песносло́вити потщи́мся и ве́рно поклони́мся.

Ин ирмо́с:

О́бразу зла́тому, на поле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших.

Бога́тство Своего́ неизрече́ннаго Христо́с Человеколю́бия, пло́тию обнища́в, показа́:/ вочелове́чився бо, отве́рзе благи́х оби́льство, немо́лчно зову́щим:/ благослове́н еси́, Бо́же оте́ц на́ших.

Боже́ственным Христо́вым благово́нием мы́сленне услади́вшеся,/ страстоно́сцы возгнуша́шася сла́дких всех красо́т/ и страда́нием сему́ после́доваша, зову́ще:/ благослове́н еси́, Бо́же оте́ц на́ших.

Же́ртва Христу́ предпра́зднственная, му́дрии, показа́вшеся,/ благоуха́ние страда́ния, я́ко ми́ро, сему́ принесо́сте./ Те́мже мироуха́нием чуде́с вы просла́ви, вопию́щия:/ благослове́н еси́, Бо́же оте́ц на́ших.

Богоро́дичен: Ви́дети чи́стыми мы́сли очесы́ разумева́емую,/ в верте́пе из Тебе́, Всечи́стая, пло́тию ро́ждшагося Бо́га на́шего,/ сла́ву и све́тлость Боже́ственную, Твое́ю сподо́би ны моли́твою,/ ве́рно песносло́вящия Тя.

Песнь 8

Ирмо́с:

За зако́ны оте́ческия/ блаже́ннии в Вавило́не ю́ноши предбе́дствующе,/ царю́ющаго оплева́ша повеле́ние безу́мное/ и, совоку́плены, и́мже не свари́шася огне́м,/ Держа́вствующему досто́йную воспева́ху песнь:/ Го́спода по́йте, дела́,/ и превозноси́те во вся ве́ки.

Па́че сло́ва Еди́наго Го́спода воплоще́ннаго, Отрокови́це,/ и обложе́ннаго челове́ческим подо́бием,/ держа́щи рука́ми, и покланя́ющися, и лобыза́ющи ма́терски,/ Ча́до, – глаго́лала еси́, – Сладча́йшее,/ ка́ко Тя си́це держу, держа́щаго руко́ю всю тварь/ и от руки́ рабо́ты сию́ свобожда́ющаго?

Песносло́вити, Боже́ственнии А́нгели, на земли́ ро́ждшагося угото́витеся;/ волсви́, да́ры, путеводи́ми звездо́ю, принеси́те;/ па́стырие, сего́ потщи́теся ви́дети на ма́терних, я́коже Младе́нца, седя́ща объя́тиих, вопию́ще:/ Го́спода по́йте, дела́, и превозноси́те во вся ве́ки.

Све́та о́блаче, Неискусобра́чная,/ ка́ко пелена́ми повива́еши/ о́блаки одева́ющаго Небеса ́неизглаго́ланным ма́нием?/ Ка́ко в безслове́сных я́слех воскланя́еши/ безслове́сия челове́ки за безме́рную ми́лость избавля́ющаго Влады́ку?/ ему́же вся покланя́ется стра́хом тварь,/ песносло́вящи во вся ве́ки.

Ин ирмо́с:

В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода/ и превозноси́те во вся ве́ки.

Вся тварь нача́тки гото́вит Тебе́, Христе́,/ в верте́пе от Чи́стыя Де́вы иму́щу роди́тися,/ и пое́т хвалу́ предпра́зднственную, Тя славосло́вящи,/ Еди́наго Благоде́теля.

Рожде́нному на земли́ после́дующе Христу́, страстоно́сцы,/ ве́ру предводи́теля, я́коже звезду́ све́тлую, иму́ще, ви́деша/ и принесо́ша да́ры сему́ Боже́ственныя муче́нием.

Си́лою Христо́вою укрепля́еми, прему́дрии,/ наси́лование вра́жие, страстоте́рпцы, побори́сте/ и сего́ не́мо́щна показа́сте,/ песносло́вяще Христа́ во ве́ки вся.

Богоро́дичен: И́же в не́дрех О́тчих,/ на дла́нех ма́терних Твои́х, Богоро́дице, рожде́йся в верте́пе почи́/ и всем, ве́рно пою́щим Тя,/ на Небесе́х отверза́ет Ца́рство.

Песнь 9

Ирмо́с: Не диви́ся ны́не, о Ма́ти,/ ви́дящи я́ко Младе́нца,/ его́же из чре́ва пре́жде денни́цы роди́ Оте́ц,/ возста́вити бо и сопросла́вити/ челове́ческое па́дшее естество́ приидо́х я́вственно,/ ве́рою и любо́вию Тя велича́ющее.

Ра́дуйся, прия́телище, Пречи́стая, ра́дости неизглаго́ланныя:/ се бо гряде́ши роди́ти в верте́пе неизрече́нно Влады́ку,/ хотя́щаго тварь всю, истле́вшую преступле́нием пе́рвее, обнови́ти вои́стинну,/ сего́ песносло́вяще ве́рою, Тя велича́ем.

Ду́ши пра́ведных вси и подзе́мная, ку́пно ра́дуйтеся:/ се бо избавле́ние всех яви́ся, во гра́де

Вифлее́ме ражда́ющееся;/ звезда́ же сего́ возвеща́ет волхво́м, и́щущим благоче́стно,/ его́же и ви́девше в верте́пе, у́жаса испо́лнишася.

Я́ко Не́бо Тя иное воспева́ем, Де́во,/ Пра́вды Со́лнце нам из ложе́сн Пречи́стых хотя́щую возсия́ти у́треннее,/ просвеща́ющее во тьме су́щия сме́рти и тли./ Те́мже до́лжно хвала́ми Тя велича́ем.

Ин ирмо́с:

От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.

Царя́ вся́ческих прише́ствие Боже́ственное, во́инство страда́льцев предте́кшее/ всей тва́ри весе́лия трапе́зу возвеща́ет/ и вся прие́млет ве́рныя, своя́ до́блести предложи́в, я́коже сне́ди.

Я́коже звезду́, ве́ру, страстоте́рпцы Госпо́дни, зря́ще/ и держа́ще тве́рдо к невече́рнему́ Со́лнцу,/ тоя́ ра́ди непреткнове́нно ко Христу́ наста́вистеся, му́дрии,/ и кро́ви сему́ я́ко да́ры принесо́сте.

От нетле́нных злачнико́в, страстоно́сцы, цве́ты поже́нше ра́зума Христо́ва,/ благово́ния его́ напо́лнистеся, пострада́вше,/ и ми́ра благово́ннейшая тому́ муче́нием сами себе́ принесо́сте.

Богоро́дичен: Излия́ся благода́ть, Богоро́дице Де́во, во всех роде́х земноро́дных,/ и чуде́с Твои́х бога́тство истека́ет оби́льно во све́тлей Рождества́ Твоего́ ра́дости/ и богати́т ве́рою и любо́вию Тя сла́вящия.

Свети́лен.

Подо́бен: Со ученики́:

С Феоду́лом венча́ем Зо́тика, Агафопо́да и Саторни́на,/ Помпи́я, вку́пе Евникиа́на, сла́внаго Васили́да,/ Евпо́ра же Боже́ственнаго, и сла́внаго Гела́сия, и Е́ва́реста пе́сньми ра́достно,/ я́ко да моли́твами тех изба́вимся прегреше́ний/ и венцы́ прии́мем от Христа́ Спаси́теля.

Сла́ва, и ны́не, предпра́зднства.

Подо́бен: Жены́, услы́шите:

Та́инство сокрове́нное, А́нгелом несказа́нное,/ Отца́ благоволе́нием и Ду́ха соде́йством хо́щет соверши́тися, потщи́мся:/ Сло́во бо Безнача́льное, нача́ло прие́мь,/ я́ко Челове́к от Де́вы ражда́ется на спасе́ние ми́ра.

На хвали́тех стихи́ры, на 4, глас 6.

Подо́бен: А́нгельския предъиди́те:

Предопределе́нное Отце́м пре́жде век/ и предпропове́данное проро́ки в после́дняя,/ та́инство яви́ся,/ и Бог вочелове́чися,/ плоть прие́м от Де́вы,/ зи́ждется несозда́нный во́лею,/ Сый быва́ет Царь Изра́илев,/ Христо́с прихо́дит.

Пою́ Тя, Царю́, пелена́ми пови́таго,/ реши́ши бо плени́цы мои́х грехопаде́ний/ и сла́вою безсме́ртною/ и нетле́нною почти́в мя,/ всего́ Отцу́ присво́ил еси́,/ соде́тельствуя и воззида́я./ Тем вопию́ Ти:/ Царь Изра́илев,/ Христо́с прихо́дит.

Свет, от Све́та произше́дший/ и от Де́вы возсия́вший/ су́щим на земли́ звездо́ю, ви́девше, звездосло́вцы волсви́/ перси́дскую отлага́ху тьму/ и зве́здную всю пре́лесть/ и в ра́дости ро́ждшемуся Бо́гу поя́ху:/ благослове́н прише́дый Бог наш,/ сла́ва Тебе́.

Злак младе́нческий неи́стовне пожина́ет,/ от му́дрых наруга́н быв И́род волхво́в,/ и ру́ку скве́рноуби́йственну на Тя воздвиза́ти мня́ше,/ но прише́л еси́,/ еги́птяном тьму глубоча́йшую отгоня́,/ с ни́миже пое́м:/ благослове́н прише́дый Бог наш,/ сла́ва Тебе́.

Сла́ва, глас и подо́бен то́йже:

Пой, но́вый Изра́илю, песнь но́ву;/ воспои́ пе́ние Небе́сное о́но;/ весели́ся и красу́йся ра́достию/ и лику́й, принеси́ све́тло пра́зднственная:/ Бог от ю́га пло́тию яви́ся./ То́йже хо́щет/ во Иорда́нских струя́х омы́тися,/ я́ко Челове́к.

И ны́не, подо́бен то́йже:

Яви́лся еси́ на земли́/ и с челове́ки пожи́л еси́,/ ке́саря повеле́ньми с рабы́ написа́лся еси́;/ созда́лся еси́, не преложи́вся, неизме́нен пребы́л еси́,/ весь Сый Бог, а́ще и воплоти́лся еси́./ Сла́ва Твоему́ смотре́нию,/ честь, хвала́, вели́колепи́е/ и ны́не, и во ве́ки, ами́нь.

На стихо́вне стихи́ры, глас 2.

Подо́бен: До́ме Евфра́фов:

Благоуха́й, Сио́не,/ я́сли святы́я:/ в тебе́ бо Влады́ка/ простре́ти и́мать/ лучи́ Своего́ Божества́.

Стих: Бог от ю́га прии́дет/ и Святы́й из горы́ приосене́нныя ча́щи.

Ве́ру вме́сто зла́та,/ любо́вь же, я́ко сми́рну,/ я́ко лива́н, дея́ния/ принесе́м Зижди́телю,/ гряду́щему во Своя́.

Стих: Го́споди, услы́шах слух Твой и убоя́хся;/ Го́споди, разуме́х дела́ Твоя́ и ужасо́хся.

Приближа́ется Христо́с,/ звезда́ предозаря́ет/ Небе́сное мно́жество,/ во́инства приница́ет/ у́мных сил.

Сла́ва, глас 3. Студитово:

До́блии му́ченицы и́стины,/ вас ни ну́жда мучи́тельская, ни ласка́ние пре́лестное,/ ни уде́с отсече́ния, ниже́ сме́ртная преще́ния/ от Боже́ственныя любве́ разлучи́ти возмого́ша./ Тем, дерзнове́ние иму́ще ко Христу́, и́же над все́ми Бо́гу,/ сие́ воздая́ние боле́зненных страда́ний проси́те от Христа́/ прия́ти моли́твами ва́шими и ве́лию ми́лость.

И ны́не, предпра́зднства, глас 8. Анато́лиево:

В Вифлее́ме ражда́ется всех Творец,/ и Еде́м отверза́ет Преве́чный Царь,/ пла́менное ору́жие плещи́ дае́т,/ средосте́ние граде́жа разори́ся;/ Небе́сныя си́лы с земны́ми совокупля́ются,/ Ангели с челове́ки держа́вное торжество́ составля́ют,/ чи́стии Чи́стому пе́ние приноша́ют./ Ви́дим Де́ву, я́ко престо́л сла́вы Херуви́мский,/ вмести́вшую ника́коже вмести́маго Бо́га/ и нося́щую, его́же Серафи́ми со стра́хом прославля́ют,/ я́ко да пода́ст ми́ру ве́лию ми́лость.

НА ЛИТУРГИ́И

Блаже́нны предпра́зднства, песнь 3-я, и му́чеников, песнь 6-я. Проки́мен, глас 4: Святы́м, и́же суть на земли́ Его,/ удиви́ Госпо́дь вся хоте́ния Своя́ в них.

Стих: Предзре́х Го́спода предо мно́ю вы́ну, я́ко одесну́ю мене́ есть, да не подви́жуся.

Апо́стол к Ефесеем, зача́ло 233.

Аллилу́ия. Воззва́ша пра́веднии:

Ева́нгелие от Луки́, зача́ло 106.

Прича́стен: Ра́дуйтеся, пра́веднии, о Го́споде: