АЛЛИЛУ́ИЯ

На Го́споди, воззва́х: стихи́ры, глас 4.

Подо́бен: Дал еси́ зна́мение:

Фирс чу́дный, и Богому́дрый Каллини́к,/ и сла́вный Левки́й,/ Тро́ицу Несозда́нную испове́дающе,/ боле́зни тяжча́йшия и неосла́бныя му́ки/ му́жественнейшим нра́вом претерпе́ша/ и побе́ды венцы́, я́ко побе́доносцы, прия́ша,/ согражда́не бы́вше Невеще́ственных Сил.

Филимо́н вели́кий, А́риа́н пребога́тый,/ му́дрый Аполло́ний/ крове́й тече́ньми многобо́жия угаси́ша пла́мень,/ всю напои́ша зе́млю/ Богозна́ния Боже́ственными струя́ми/ и ту́чами врачева́ний страсте́й изсуша́ют ре́ки/ Боже́ственною благода́тию,/ я́ко те́плии защи́тницы.

Цве́ти красне́йшии в цве́тнице процвето́ша,/ му́ченицы славнии,/ ду́ха испуща́юще Боже́ственное благово́ние/ и мы́сли, благоуха́юще ве́рно/ ле́тнюю па́мять их чту́щих,/ страда́ния, и боре́ния, и блаже́нное сконча́ние./ Его́же ра́ди во све́те невече́рнем обита́ют, ра́дующеся.

И́ны стихи́ры Пресвяте́й Богоро́дице, глас и подо́бен то́йже:

Одожди́ мне, Влады́чице,/ Твоей ми́лости бе́здну/ и опали́вшееся зно́ем страсте́й се́рдце мое́,/ я́ко ми́лостива, напои́, Отрокови́це,/ и умиле́ния ка́пли точи́ти/ непреста́нно сотвори́, молю́ся,/ и́миже утеше́ния сподо́блюся, Чи́стая,/ е́же получи́ти и́мут/ и́же и́скренно пла́кавшиися.

Де́монскими коле́блема прило́ги/ и в ров поги́бели вве́ржена,/ уще́дри, Влады́чице, и утверди́ мя на ка́мени доброде́телей,/ и, сове́ты враго́в разори́вши,/ сподо́би мя твори́ти повеле́ния Сы́на Твоего́ и Бо́га на́шего,/ я́ко да получу́ оставле́ние в день Суда́.

В разбо́йники впадо́х скверноуби́йственныя, Всенепоро́чная,/ и нетле́нныя оде́жды Вы́шния све́тлости/ сих нахожде́ньми совлече́н бых, Отрокови́це,/ и от них неми́лостивно уязви́хся/ и низве́ржен бых в ме́сто озлобле́ния е́ле жив,/ но предвари́, и ру́ку твою́ простри́,/ и воздви́гни мя, молю́ся.

Сла́ва, и ны́не, глас и подо́бен то́йже:

На одре́ низлежу́ уны́ния, Всенепоро́чная,/ и ле́ностно прохожду́ житие́,/ и ужаса́юся конца́ моего́ вре́мене, Богоро́дице,/ да, не я́коже лев, неща́дно расто́ргнет/ смире́нную мою́ ду́шу змий вселука́вый./ Те́мже Твое́ю бла́гостию, пре́жде конца́ предвари́вши,/ к покая́нию мя воздви́гни.

Крестобогоро́дичен.

Подо́бен: Я́ко до́бля:

Распина́ема Христа́ Человеколю́бца ви́дящи, Пречи́стая,/ и ре́бра ископова́ема копие́м,/ пла́чущи, вопии́ше:/ что сие́, Сы́не Мой?/ Что Ти безблагода́тнии лю́дие возда́ша,/ за и́же сотвори́л еси́ до́брая им,/ и тщи́шися безча́дствовати Мя, Вселюбе́знейший?/ Удивля́юся, Благоутрбо́не, Твоему́ во́льному распя́тию.

На стихо́вне Окто́иха.

НА У́ТРЕНИ

О́ба кано́на Окто́иха и святы́х кано́н на 4, глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь пои́м, вопия́ше.

Му́ченическими красота́ми Боже́ственному Престо́лу предстоя́ще/ и Боже́ственными блиста́нии, страстоте́рпцы, сия́юще,/ нас, пою́щих ва́шу па́мять, просвети́те.

Добро́ты Боже́ственныя жела́юще,/ жития́ кра́сная в ничто́же вмени́сте, страстоте́рпцы Христо́вы,/ и, уме́рше те́лом, жи́знь безконе́чную обрести́ сподо́бистеся.

Безбо́жия лесть боголе́пно, страстоте́рпцы му́ченицы, обличи́вше,/ мно́гих боле́зней претерпе́сте разжже́ние/ и безболе́зненную жи́знь ны́не восприя́сте.

Богоро́дичен: Неопи́санное Сло́во, опи́сано бы́вшее те́лом,/ породила́ еси́, Чи́стая,/ его́же моли́ изба́витися тли и страсте́й наведе́ния Тя сла́вя­щим.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Те́ло стру́жуще, лю́те тьмы предста́телие/ по́мысла твоего́ кре́пости не осла́биша,/ любо́вию Боже́ственною си́льне в любви́, Фи́рсе, укрепля́емаго.

Бысть, му́чениче чу́дне, внеза́пная твоя́ вои́стинну ко Го́споду ве́ра,/ е́юже посрами́л еси́ враго́в злове́рие, вопия́, о Филимо́не!/ раб есмь Христо́в.

К боре́нию, му́чениче, врага́ де́рзостне изше́л еси́,/ не щито́м, ни копие́м, но ве́рою тве́рдою Боже́ственне защити́вся,/ и му́жески сего́ на зе́млю низве́ргл еси́.

Богоро́дичен: В двух естества́х Еди́н Святы́я Тро́ицы,/ из чи́стых Твои́х крове́й воплоти́вся, боголе́пно про́йде,/ су́щия из Ада́ма спаса́я, Всечи́стая, бла́гостию.

Седа́лен, глас 4.

Подо́бен: Удиви́ся Ио́сиф:

Благочести́я щитом покрыва́еми до́бре/ и ору́жием Креста́ оде́явшеся тве́рдо,/ ополче́ния низложи́ша мучи́теля му́ченицы Христо́вы досточу́днии/ и, венце́м от него́ увя́зшеся побе́ды,/ лику́ют непреста́нно с Го́рними Си́лами/ и Спа́са моля́т спасти́ ду́ши на́ша.

Сла́ва, и ны́не, Богоро́дичен:

Треволне́нии стра́стными безсо́вестный аз обурева́емь, Чи́стая,/ призыва́ю Тя те́пле:/ да не пре́зриши мене́, окая́ннаго, поги́бнути,/ бе́здну милосе́рдия ро́ждшая,/ ра́зве бо Тебе́ наде́жди не и́мам./ Да не враго́м у́бо обра́дование и смех наде́явыйся на Тя явля́юся,/ и́бо мо́жеши, ели́ка хо́щеши,/ я́ко Ма́ти су́щи всех Бо́га.

Крестобогоро́дичен:

Де́ва и А́гница, ви́девши на Кресте́/ без се́мене из нея́ А́гнца ро́ждшагося и копие́м прободе́на,/ печа́ли уя́звена стрела́ми, вопия́ше, боле́зненно восклица́ющи:/ что но́вое та́инство?/ Ка́ко умира́еши, И́же живота́ Еди́н Госпо́дь?/ Те́мже воскресни́, па́дшаго воздвиза́я пра́отца.

Песнь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Еди́наго благоутро́бнаго, Еди́наго Го́спода и Бо́га всех/ испове́дати му́ченицы возжеле́вше,/ чрез му́ки того́ Ца́рство прия́сте.

Строга́ния теле́сная, о́гненная стремле́ния/ и звере́й, и мо́ря ю́ношески подъя́л еси́, пребога́те,/ си́лою Креста́, му́чениче Фи́рсе, укрепля́емь.

По́двигов ра́нами удобря́яся,/ ду́шу светле́йшу со́лнечнаго сия́ния соде́лал еси́,/ я́ко во́ин Христо́в, страстоте́рпче му́чениче Левки́е.

Богоро́дичен: Ма́терь безму́жну, Де́ву непоро́чну,/ нерастле́нну Отрокови́цу, в жена́х Еди́ну Тя зна́ем,/ Благослове́нная Мари́е, челове́ков исправле́ние.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Боже́ственнейшими богосия́нно, му́ченицы всехва́льнии, заря́ми освяще́ни,/ преидо́сте безбо́жия непостоя́нную пучи́ну/ и к Боже́ственней тишине́ премину́сте.

Влачи́ми по земли́, му́ченицы всехва́льнии, лю́те и му́ками ураня́еми,/ Небе́сных че́сти получи́сте,/ А́нгелов согра́ждане ны́не бы́вше.

Любя́ умре́ти за Христа́, возлю́бльшаго тя я́ве, му́чениче Филимо́не,/ вмени́л еси́ прино́симыя я́звы телеси́ твоему́/ младе́нцев стреля́ния, Богоблаже́нне.

Богоро́дичен: Богоро́дицу Тя от души́, Влады́чице ми́ра Бла́гая, испове́дующия спаса́й:/ Тя бо Предста́тельницу непобеди́му стяжа́хом,/ су́щую Богороди́тельницу.

Песнь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.

Ве́тры дви́жими Боже́ственнаго Ду́ха, му́дрии,/ душе́вная вожде́ния во у́мная приста́нища прера́достно спасо́сте, му́ченицы,/ наслажда́ющеся ку́пно обоже́ния.

На колесни́цу пла́менну все́дше, страда́льцы,/ излия́нною кро́вию к Небесе́м восхи́тистеся и Бо́жию сла́ву получи́сте,/ от него́ венцы́ побе́ды прии́мше.

Филимо́н и Левки́й, Аполло́ний ку́пно и Фирс приснопа́мятный,/ четверйца Боже́ственная и светоза́рная, Тро́ическое осия́ние,/ прича́стием Невеще́ственным обогати́шася.

Богоро́дичен: И́же вся́кия превы́шши мы́сленный – я́ко Бог – и ви́димыя тва́ри, вопло́щся,/ про́йде из Твоего́ чре́ва, соблю́д Тя нетле́нну,/ я́коже была́ еси́ пре́жде рождества́, Ма́ти Де́во.

Конда́к глас 2.

Подо́бен: Тве́рдыя:

Благочести́я ве́ры побо́рницы, злочести́ваго мучи́теля оплева́вше,/ обличи́сте зверообра́зное его́ кровопроли́тие/ и победи́сте того́ я́ростное противле́ние,/ Христо́вою по́мощию укрепля́еми, Фи́рсе и Левки́е,/ с пострада́вшими о нас моли́теся.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Одожде́нии Боже́ственными угаси́сте многобо́жия пещь,/ разже́гшеся Боже́ственною любо́вию прера́достно,/ и ны́не песнопое́те, страда́льцы:/ благослове́н еси́, Бо́же оте́ц на́ших.

Гоня́щаго Боже́ственною улови́вше мре́жею, досточу́днии, извлеко́сте из глубины́ ле́стныя/ и Христу́ приведо́сте, пою́ще те́пле:/ благослове́н еси́, Бо́же оте́ц на́ших.

Поколеба́сте ле́сти основа́ния, неколе́бленно произво́ление показу́юще/ и му́жествен ра́зум, страда́льцы,/ и ны́не песнопое́те благоче́стно:/ благослове́н еси́, Бо́же оте́ц на́ших.

Богоро́дичен: Па́че сло́ва Твое́ зача́тие, Богоневе́сто,/ Бо́га бо Сло́ва родила́ еси́,/ избавля́ющего безслове́сия вся́каго челове́ки и сло́во подаю́щи вопи́ти:/ благослове́н еси́, Бо́же оте́ц на́ших.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́си́м во вся ве́ки.

Щитом благочести́я защити́вся и Крест, я́коже копие́, восприе́м,/ полки́ враг неви́димых ссекл еси́, Фи́рсе доблему́дренне,/ му́чеников Боже́ственная сла́во.

Разжигаем любо́вию Вседержи́теля,/ вшел еси́ му́жественно в му́ченическое суди́ще/ и, терпели́вно пострада́в, расто́ргл еси́ зми́я вели́каго,/ Филимо́не страда́льче.

Погруже́ну показа́в вра́жию си́лу,/ глубино́ю му́жества и терпе́ния твоего́, о Ариа́не,/ Ца́рствия сподо́бился еси́, неподви́жимаго во вся ве́ки.

Богоро́дичен: И́стинную Богоро́дицу испове́дающе Тя,/ я́ко А́нгел, ра́дуйся, вопие́м Ти:/ Еди́на бо Ра́дость на земли́ родила́ еси́, о Обра́дованная, Чи́стая, Благослове́нная!

Песнь 9

Ирмо́с: Бо́га/ челове́ком невозмо́жно ви́дети,/ на него́же не сме́ют чи́ни А́нгельсти́и взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ его́же велича́юще,/ с Небе́сными во́и Тя ублажа́ем.

Христо́ву страсть изобража́юще,/ искуше́ние мно́гих мук претерпе́сте, блаже́ннии;/ глава́ми же усе́чени бы́вше, сопричто́стеся чино́м Небе́сным,/ сла́вою облиста́юще и Боже́ственными луча́ми украша́еми.

Твои́ми кровьми́ багряни́цу омочи́л еси́, Фи́рсе му́дре,/ и в сию́ сла́вно оде́явся:/ и, я́ко скиптр Боже́ственный, держа́ Крест,/ со все́ми страстоно́сцы ра́дуяся, ны́не сца́рствуеши Христу́, Богоблаже́нне.

Ва́шим, блаже́ннии, удиви́шася А́нгельския си́лы по́двигом,/ ра́нам, противле́нием, ну́ждней сме́рти;/ с ни́миже живу́ще, воспомина́ние сотвори́те о соверша́ющих ва́шу па́мять, всехва́льнии.

Богоро́дичен: В подо́бии челове́чи пло́ти из Твоего́ чре́ва Сло́во яви́ся ражда́емое/ и му́чеников мно́жество привлече́, стра́сти претерпе́в, Преблаги́й,/ Чи́стая Де́во Мари́е Богора́дованная.