НА МАЛОЙ ВЕЧЕ́РНИ

На Го́споди, воззва́х: стихи́ры на 4, глас 2:

Ки́ими недосто́йными устна́ми/ восхва́лим ны́не заче́ншуюся Свя́тейшую тва́ри/ и Честне́йшую су́щи Херуви́мов и всех святы́х,/ престо́л ца́рский недви́жимый,/ дом, в нем же всели́ся Вы́шний,/ Спасе́ние ми́ра, Бо́жие Свяще́ние,/ подаю́шу ве́рным, в святе́м зача́тии Ея́, ми́р и ве́лию ми́лость?

Ка́я духо́вная пе́ния/ ны́не принесе́м Ти, Всесвята́я?/ е́же бо в непло́дней/ Твои́м зача́тием весь ми́р освяти́ла еси́,/ и Ада́ма от уз изба́вила еси́,/ и Е́ву от боле́зни свободи́ла еси́./ Те́мже а́нгельсти́и ли́цы спра́зднуют,/ Не́бо и земля́ ра́дуются,/ и совоспле́щут ду́ши пра́ведных,/ пе́сни ве́рно взыва́ющи/ во сла́ву зача́тия Твоего́.

Ка́я стра́шная пе́ния,/ я́же принес́оша Ти тогда́, Де́во?/ Окре́ст зача́тия Твоего́/ отрокови́цы ра́дующася и со стра́хом вопию́ща:/ зача́тся пала́та Царе́ва,/ возсия́вает киво́т свяще́ния,/ две́ри непло́дныя отверза́ются,/ Бо́жия бо дверь благоча́дие доброде́телей вво́дит,/ подаю́щи ми́рови ми́р и ве́лию ми́лость.

Сла́ва, и ны́не, глас то́йже:

Днесь из ко́рене Дави́дова/ ца́рская порфи́ра прозя́бши,/ от Иессе́я израсти́ти начина́ет цвет таи́нственный/ в Нея́же Христо́с Бог наш прозябе́,/ спаса́яй ду́ши на́ша.

На стихо́вне стихи́ры, глас 2.

Подо́бен: До́ме Евфра́фов:

Лик проро́ческий, ра́дуйтеся:/ се бо Анна прозя́ба́ет Плод,/ И́мже проро́чествия ва́ша/ испо́лнитися произы́дут.

Стих: Кля́тся Госпо́дь Дави́ду и́стиною/ и не отве́ржется ея́.

Сра́дуйтеся, коле́на вся,/ непло́дней Анне:/ я́ко Плод чре́ва па́че наде́жды прозяба́ет,/ живота́ на́шего Хода́таицу.

Стих: От плода́ чре́ва Твоего́/ посажду́ на Престо́ле Твое́м.

Концы́ земни́и, весели́теся:/ се бо Творца́ всех Ма́терь/ от непло́днаго чре́ва/ прозяба́ет днесь.

Сла́ва, и ны́не,, подо́бен то́йже: Ра́дуйся, Иоаки́ме,/ и А́нно, ра́дуйся:/ я́ко спасе́ния Хода́таицу/ и ра́дость ми́ра, плодоно́сите днесь.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры на 6, глас 4.

Подо́бен: Зва́нный свы́ше:

Плодородя́щи непло́ды па́че наде́жды/ Де́ву, хотя́щую роди́ти Бо́га пло́тию,/ ра́достию све́тится и лику́ет, ра́дующися,/ велегла́сно взыва́ющи:/ коле́на вся, сра́дуйтеся мне, Изра́илева./ Се во чре́ве нош́у/ и поноше́ние безча́дства отлага́ю,/ я́коже благоизво́ли Соде́тель,/ услы́шав моли́тву мою́,/ и боле́зни се́рдца исцели́/ в жела́емых ми.

И́же от немо́кренна, ка́мене/ источи́вый во́ду,/ плод чре́ву твоему́, А́нно,/ да́рует, Присноде́ву Влады́чицу,/ из Нея́же вода́ спасе́ния хо́щет произы́ти./ Нектому́, я́ко непло́дная земля́,/ пребу́деши на земли́,/ поноше́ние отчуждйла еси́:/ Зе́млю бо возрасти́вши, плодонося́щу Жи́зни Клас,/ поноше́ния отъе́млющий всем челове́ком,/ я́коже благоизво́ли/ за милосе́рдие ми́лости вообрази́тися в чужде́е.

Проро́ческая рече́ния ны́не исполня́ются:/ гора́ бо Свята́я в ложесна́х водружа́ется;/ ле́ствица Боже́ственная насажда́ется;/ престо́л вели́кий Царе́в проуготовля́ется;/ ме́сто украша́ется Боговходи́мое;/ Купина́ Неопали́мая начина́ет прозяба́ти;/ Мирополо́жница Святы́ни уже́ истека́ет,/ непло́дствия ре́ки прости́рающи Богому́дренныя А́нны,/ ю́же ве́рою ублажа́ем.

Сла́ва, и ны́не, глас 2. Ге́рманово:

Недове́домое А́нгелом и челове́ком вели́кое,/ е́же от ве́ка сокрове́нное та́инство пресла́вное:/ днесь в ложесна́х целому́дренныя А́нны/ младоно́сится Мари́я Богоотрокови́ца,/ уготовля́ема во вселе́ние всех Царя́ веко́в/ и во обновле́ние ро́да на́шего./ Юже чи́стою со́вестию умоли́м, вопию́ще к Ней:/ моли́ Сы́на Твоего́ и Бо́га,/ я́ко предста́тельница су́щи нас христиа́н,/ спасти́ ду́ши на́ша.

Вход. Проки́мен дне. И чте́ния.

Бы́тия́ чте́ние  (глава 28):

Изы́де Иа́ков от студенца́ кля́твеннаго,/ и́де в Харра́нь./ И обре́те ме́сто, и спа та́мо,/ за́йде бо со́лнце,/ и взят от ка́мения ме́ста того́, и положи́ возгла́вие себе́,/ и спа на ме́сте о́ном; и сон ви́де:/ и се ле́ствица утвержде́на на земли́,/ ея́же глава досяза́ше до небе́с,/ и А́нгели Бо́жии восхожда́ху и нисхожда́ху по ней./ Госпо́дь же утвержда́шеся на ней и рече́:/ Аз Бог Авраа́мов, отца́ твоего́,/ и Бог Исаа́ков, не бо́йся,/ земля́, иде́же ты спи́ши на ней,/ тебе́ дам ю, и се́мени твоему́./ И бу́дет се́мя твое́, я́ко песок земны́й,/ и распростра́ни́тся на мо́ре, и ли́ву, и се́вер, и на восто́ки./ И возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́, а́може а́ще пои́деши./ И возвращу́ тя в зе́млю сию,/ я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́ и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ несть сие́, но дом Бо́жий,/ и сия́ врата́ небе́сная.

Проро́чества Иезекии́лева чтение (главы́ 43 и 44):

Та́ко глаго́лет Госпо́дь:/ бу́дет от дне осма́го и прочее,/ сотворя́т иере́и на олтари́ всесожже́ния ва́шего, и я́же спасе́ния ва́шего,/ и прииму́ вы, глаго́лет Адонаи́ Госпо́дь./ И обрати́ мя на путь врат святы́х вне́шних,/ зря́щих на восто́ки,/ и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут, и не отве́рзутся,/ и никто́же про́йдет сквозе́ их,/ я́ко Госпо́дь Бог Изра́илев про́йдет и́ми и бу́дут затворе́на./ Я́ко игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х, су́щих к се́веру, пря́мо хра́му,/ и ви́дех, и се испо́лнь сла́вы храм Госпо́день.

При́тчей чтение (глава 9):

Прему́дрость созда́ себе́ дом/ и утверди́ столпо́в седмь./ Закла́ своя́ же́ртвенная, и раствори́ в ча́ши свое́й вино́,/ и угото́ва свою́ трапе́зу./ Посла́ своя́ рабы́, созыва́ющи с высо́ким пропове́данием на ча́шу, глаго́лющи:/ и́же есть безу́мен, да уклони́тся ко мне,/ и тре́бующим ума́ рече́:/ прииди́те, яди́те мой хлеб и пи́йте вино́,/ е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживе́те́,/ и испра́вите ра́зум в ве́дении./ Наказу́яй злы́я, прии́мет себе́ безче́стие,/ облича́яй же нечести́ваго, опоро́чит себе́,/ обличе́ние бо нечести́вому – ра́ны ему́./ Не облича́й злых, да не возненави́дят тебе́;/ облича́й прему́дра, и возлюби́т тя./ Даждь прему́дрому вину́, и прему́дрший бу́дет;/ сказу́й пра́ведному, и приложи́т прии́ма́ти./ Нача́ло прему́дрости – страх Госпо́день, и сове́т святы́х – ра́зум./ Разуме́ти бо зако́н– по́мысла есть блага́го,/ сим бо о́бразом мно́гое поживе́ши вре́мя,/ и прило́жатся тебе́ ле́та живота́.

На литии́ стихи́ры, глас 1:

Весели́теся, пра́веднии Богоотцы́, Иоаки́ме и А́нно, днесь,/ вы бо пронарече́нны бы́сте от всех родо́в/ бы́ти роди́телие ро́ждшия пло́тию Единоро́днаго Сы́на Бо́жия/ Мари́и, Неискусому́жныя Богома́тере,/ и коне́ц пода́ти Тоя́ ра́ди всем зна́мениям же, и та́йнам неизрече́нным,/ и прорече́нием проро́ческим,/ та́инству Сло́ва воплоще́ния./ Весели́ся и ты днесь, проро́ческий ли́че,/ со Дави́дом и Авраа́мом пра́отцы,/ прии́де бо сла́ва пропове́дания ва́шего/ и всеми́рное избавле́ние.

Глас 2:

Днесь О́блак све́тел/ в невла́жной утро́бе составля́ется,/ от него́ же Со́лнце Пра́вды, Христо́с Бог наш, превы́ше естества́ возсия́ет/ просвети́ти во тьме и се́ни сме́ртней седя́щия/ и всем дарова́ти ве́лию ми́лость.

Глас 6:

О чуде́с пресла́вных!/ О веще́й преесте́ственных!/ А́нгел с Небесе́ всечестно́му сою́зу рожде́ние Богоро́дично предвозвеща́ет,/ и неродя́щия непло́ды плодоно́сит Богоотрокови́цу,/ изсо́хшая же утро́ба затворе́нную Вы́шняго дверь прозяба́ет,/ именова́ние безча́дных супру́гов/ в Богооте́ц тезоимени́тство преложи́ся бла́гочадия ра́ди./ Те́мже возопии́м:/ и́же вся содева́яй и то́чию хоте́нием пременя́яй,/ Го́споди, сла́ва Тебе́.

Сла́ва, и ны́не, глас 5:

Ра́дуйся и весели́ся, А́нно, Бо́гом почте́нная,/ я́ко от обеща́ния плодоно́сиши/ от А́нгела ра́дость прии́мшую/ и от неражда́ющия утро́бы прозяба́еши/ от безсе́менныя утро́бы прозя́бшую Садоде́лателя всех./ Блаже́н дом, от него́ же роди́ся;/ блаже́нный ко́рень вои́стинну,/ из него́же произы́де;/ блаже́нный Плод роди́телей, из ни́хже произведе́ся./ Ра́дуйся со Иоаки́мом Богому́дрым:/ вы бо Боже́ственным ма́нием роди́телие вои́стинну показа́стеся/ едины́я в жена́х Бла́гослове́нныя Де́вы и Богома́тере.

На стихо́вне стихи́ры, глас 5.

Подо́бен: Ра́дуйся:

А́нна, Боже́ственная благода́ть,/ иногда́ моля́щися о чаде,/ возопи́ всех Бо́гу и Зижди́телю:/ Адонаи́ Савао́ф, безча́дия ве́си поноше́ние,/ Сам боле́знь се́рдца моего́ разреши́,/ и хля́би утро́бныя разве́рзи,/ и непло́дную плодоно́сну покажи́:/ я́ко да ражда́емое/ дар Ти принесе́м, благосло́вяще,/ пою́ще и единому́дренно сла́вяще Твое́ благоутро́бие,/ и́мже ми́ру дае́тся ве́лия ми́лость.

Стих: Кля́тся Госпо́дь Дави́ду и́стиною/ и не отве́ржется ея́.

Дре́вле моля́щися ве́рно А́нна целому́дренная/ и Бо́га умоля́ющи,/ А́нгельский глас услы́ша,/ изве́ствующий е́й проси́мых Боже́ственное сбытие́./ К не́йже безтеле́сный я́вственно бесе́доваше:/ моле́ние твое́ бо Го́споду прибли́жися,/ не се́туй и от слез отступи́,/ благопло́дна бо бу́деши ма́слина,/ прозяба́ющи ветвь кра́сную – Де́ву,/ я́же цвет процвете́т Христа́ пло́тию,/ подаю́щаго ми́ру ве́лию ми́лость.

Стих: От плода́ чре́ва Твоего́/ посажду́ на престо́ле Твое́м.

Супру́г плодороди́т че́стен Боже́ственную Ю́ницу,/ из Нея́же про́йдет Теле́ц,/ неизрече́нным сло́вом упита́нный вои́стинну,/ за весь ми́р закала́емый./ Тем, ра́дующеся,/ испове́дание непреста́нное во умиле́ние Го́сподеви принося́т/ и вся́ческая по́льзующую име́ти бу́дут./ Сия́ у́бо да ублажи́м/ и ве́рою ликовству́им в зача́тии Боже́ственне,/ я́же от них Бо́га на́шего Ма́тере ражда́емыя,/ Е́юже дае́тся бога́тно ве́лия ми́лость.

Сла́ва, и ны́не, глас 2:

Днесь из ко́рене Дави́дова/ Ца́рская порфи́ра прозя́бши,/ от Иессе́я израстти́ти начина́ет цвет та́инственный,/ в Не́йже Христо́с Бог наш процвете́,/ спаса́яй ду́ши на́ша.

Тропа́рь, глас 4:

Днесь безча́дия у́зы разреша́ются,/ Иоаки́ма бо и А́нну услы́шав, Бог/ па́че наде́жды роди́ти тем я́ве обещава́ет Богоотрокови́цу,/ из Нея́же Сам роди́ся Неопи́санный, Челове́к быв,/ А́нгелом повеле́в вопи́ти Ей:/ ра́дуйся, Благода́тная,/ Госпо́дь с Тобо́ю.

Сей тропа́рь глаго́лется без Богоро́дична.

НА У́ТРЕНИ

На Бог Госпо́дь: тропа́рь три́жды.

По 1-й кафйзме, седа́лен, глас 1.

Подо́бен: Лик А́нгельский:

Но́вое Не́бо во чре́ве А́нны зи́ждется/ Бо́га Вседе́теля повеле́нием,/ из него́же возсия́ет Невече́рнее Со́лнце,/ ми́р весь просвеща́ющее луча́ми Божества́,/ премно́жеством благоутро́бия, Еди́н Человеколю́бец.

Сла́ва, и ны́не, то́йже.

По 2-й кафи́зме, седа́лен, глас 8 и подо́бен то́йже:

Лик проро́ческий пропове́да дре́вле/ Непоро́чную Чи́стую и Богоотрокови́цу Де́ву,/ ю́же А́нна зача́т, непло́ды́ су́щи и безча́дна;/ сию́ днесь весе́лием се́рдца ублажи́м, спа́сшеся ея́ ра́ди,/ я́ко Еди́ну Непоро́чную.

Сла́ва, и ны́не, то́йже.

Велича́ние: Велича́ем Тя,/ Пресвята́я Де́во,/ и чтим святы́х Твои́х роди́телей/ и всесла́вное сла́вим/ зача́тие Твое́.

По полиеле́и седа́лен, глас 4:

Возопи́й, Дави́де, что кля́тся тебе́ Бог?/ я́же не кля́тся, рече́, и испо́лни уже́,/ от плода́ чре́ва моего́ да́вый Деви́цу,/ из нея́ же Соде́тель Христо́с, но́вый Ада́м, роди́ся,/ Царь на престо́ле мое́м,/ и ца́рствует днесь, име́яй ца́рство недви́жимо./ Непло́ды зачина́ет Богоро́дицу/ и Пита́тельницу жи́зни на́шея́.

Степе́нна 1-й антифо́н 4-го гла́са. Проки́мен, глас 4: От плода́ чре́ва твоего́/ посажду́ на престо́ле твое́м.

Стих: Помяни́, Го́споди, Дави́да и всю кро́тость его́.

Ева́нгелие от Луки́, зача́ло 4.

Сла́ва: Моли́твами Богоро́дицы: или́ Сла́ва, глас 8:

Ра́дуйся, естество́ челове́ческое,/ доброде́тельми пре́жде непло́дствующее,/ непло́ды́ бо ны́не зачи́нает/ непло́дствия твоего́ Разреше́ние.

И ны́не, то́йже.

По 50-м псалме́ стихи́ра, глас 6:

Нача́ток спасе́ния на́шего, лю́дие, днесь бысть,/ начина́ется у́бо Де́ва Мариа́м/ и зи́ждется во утро́бе непло́дныя,/ и ми́р с нею обновля́ется./ Весели́тся Иоаки́м со А́нною,/ непло́дствия разреши́ся,/ и Ада́м ра́дуется, от уз свобожда́емь./ С ним же и мы ра́достно к Ней возопии́м:/ ра́дуйся, Обра́дованная, Госпо́дь с Тобо́ю.

Кано́на два святы́я А́нны: 1-й со ирмосо́м на 8, 2-й на 6, глас 1. Творе́ние Андре́ево.

Песнь 1

Ирмо́с:

Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися.

Зача́тие днесь, Богому́драя А́нно, твое́ пра́зднуем,/ я́ко Вмести́вшую нигде́же Вмести́маго зачала́ еси́,/ непло́дных отре́шшися уз.

Пра́ведных услы́шал еси́ моли́тву,/ святы́х испо́лнил еси́ обеща́ние, Го́споди, праоте́ц Твои́х/ и сим дал еси́ плод Тебе́ ро́ждшую, Чи́стую.

А́нна сла́вная ны́не зачина́ет Чи́стую,/ безпло́тнаго заче́ншую Го́спода Преблага́го,/ и роди́ти и́мать пло́тию иму́щую роди́ти Христа́.

От тле́нных возсия́ла еси́, Де́во, ложе́сн;/ в нетле́нне бо чре́ве сла́вы Со́лнце носи́ла еси́,/ бы́вша, я́коже есмы́, кроме́ враще́ния и смеше́ния.

Други́й кано́н, глас то́йже. его́же краегране́сие по алфави́ту.

Песнь 1

Ирмо́с:

Христо́с ражда́ется – сла́вите!/ Христо́с с Небе́с – сря́щите!/ Христо́с на земли́ – возноси́теся!/ По́йте Господе́ви, вся земля́,/ и весе́лием воспо́йте, лю́дие,/ я́ко просла́вися.

Чи́стую Де́ву Богоотрокови́цу,/ Ма́терь бы́ти хотя́щую Созда́теля,/ во чре́ве прие́мши А́нна, ра́достно вопия́ше:/ коле́на вся Изра́илева, сра́дуйтеся мне,/ се бо и аз зача́х.

Кни́гу, ю́же прорече́ проро́к,/ запеча́тану Ду́хом Боже́ственным,/ в ложесна́х свои́х содержа́щи, А́нна всем вопия́ше:/ ю́же вся Списа́ния проявля́ют,/ возвелича́юся аз, прозяба́ющи днесь.

Во чре́ве вмеща́ется и созида́ется храм/ Боже́ственный и спаси́тельный,/ в ложесна́х ма́терних насажда́ется Ле́ствица, я́же к Вы́шним вся челове́ки возводя́щая./ Ея́же зача́тие ве́рно да торжеству́ем.

Катава́сия: Христо́с ражда́ется:

Песнь 3

Ирмо́с:

Да утверди́тся се́рдце мое́ в во́ли Твое́й, Христе́ Бо́же,/ и́же над вода́ми Не́бо утвержде́й второ́е/ и основа́вый на вода́х зе́млю, Всеси́льне.

Плод чре́ва а́ще по́даси мне, – вопия́ше А́нна ко Го́споду, –/ возвели́чуся и Тебе́ принесу́ сей./ Сего́ ра́ди зачина́ет Чи́стую Богома́терь.

Я́же по зако́ну сконча́вши и Бо́гу непоро́чно рабо́тавши,/ чревоно́сиши вои́стинну Законода́вца ро́ждшую, А́нно всечестна́я,/ те́мже тя, ве́рнии, ублажа́ем.

В саду моля́щейся тебе́,/ глас услы́ша высоча́йший, А́нно Богому́драя,/ и плод чре́ву Твоему́ дае́т –/ ра́я Отве́рзшую дверь благода́тию.

Богоро́дичен: Непло́дствующия мы́сли мое́й непло́дие вся́кое отжени́/ и плодоно́сну доброде́тельми ду́шу мою́ покажи́, Всесвята́я Богоро́дице,/ ве́рных по́моще.

Ин ирмо́с:

Пре́жде век от Отца́ рожде́нному нетле́нно Сы́ну/ и в после́дняя от Де́вы/ воплоще́нному безсе́менно,/ Христу́ Бо́гу возопии́м:/ вознесы́й рог наш,/ Свят еси́, Го́споди.

Прие́млет с высоты́ моля́йся Го́споду Иоаки́м вожделе́нное веща́ние,/ предста́вшу А́нгелу ему́ и глаго́лющу:/ отыди́, твоя́ проше́ния, пра́ведне, всех Бог испо́лни.

Призыва́ющи всех Бо́га, А́нна иногда́ в саду стоя́щи,/ предста́вша зря́ше себе́ А́нгела и глаго́люща:/ да не скорби́ши,/ Ма́тери бо Бо́жией ма́ти и́маши бы́ти.

Ревну́ющи А́нне, су́щей пре́жде тебе́,/ моле́ния к Бо́гу принесла́ еси́/ и, безсе́менно прие́мшую Сло́во Невмести́мое,/ Чи́стую во утро́бе зачала́ еси́,/ бла́гочадием твои́м вся ны, А́нно, облагода́тивши.

Седа́лен, глас 4.

Подо́бен: Вознесы́йся:

Иоаки́м свяще́нный и А́нна дар принесо́ша дре́вним свяще́нником/ и не прия́ти бы́ша, непло́ды су́ще,/ мольбу́ принесо́ша Да́телю вся́ческих,/ и, моли́тву их услы́шав, да́рует им су́що Дверь Жи́зни,/ Ея́же свято́е почти́м зача́тие.

Сла́ва, и ны́не.

Подо́бен: Удиви́ся Ио́сиф:

Нескве́рная А́гница и Пречи́стый Черто́г/ от пра́ведников произы́ти ны́не начина́ет, ве́рнии, Богоукраше́нная Мари́я пресла́вно./ Весели́теся про́чее, Не́бо и земля́,/ и вси земноро́дни, совзыгр́айте:/ я́ко сотвори́ днесь пресла́вная Бог,/ во чре́ве, непло́дствующия плод, еди́ну показа́в Де́ву,/ ю́же ве́рно воспое́м.

Песнь 4

Ирмо́с:

Ду́хом прови́дя, проро́че Авваку́ме, Словесе́ вопло́щение,/ пропове́дал еси́, вопия́:/ внегда́ прибли́житися ле́том – познае́шися,/ внегда́ приити́ вре́мени – пока́жешися./ Сла́ва си́ле Твое́й, Го́споди.

О, Боже́ственнаго веща́ния!/ О, стра́ннаго глаго́лания! а́ще и аз зачну́. А́нгелу к ней посла́вшуся, А́нна, удивля́ющися, велегла́сно вопия́ше:/ Бо́гу моему́ сла́ва, творя́щему пресла́вная.

Сра́дуйтеся мне, вся племена́ Изра́илева:/ во утро́бе зача́х но́вое Не́бо,/ из него́же Звезда́ возсия́ет пома́ле спасе́ния – Иису́с Светода́вец, – А́нна, ра́дующися, взыва́ше.

Услы́ша А́ннино Бог стена́ние,/ и внят Госпо́дь моли́тве ея́/ и, безча́дия о́блак разори́в,/ све́том озаря́ет бла́гочадия пресла́вно./ Те́мже зачина́ет Еди́ну Чи́стую.

Богоро́дичен: Де́во Богоро́дице, нескве́рная ски́ние,/ оскверне́ннаго прегреше́ньми очи́сти мя ны́не/ щедро́т Твои́х чисте́йшими кропле́ньми/ и даждь ми ру́ку по́мощи, да зову́:/ сла́ва Тебе́, Чи́стая Богопросла́вленная.

Ин ирмо́с:

Жезл из ко́рене Иессе́ова/ и цвет от него́, Христе́,/ от Де́вы прозя́бл еси́,/ из горы, Хва́льный, приосене́нныя ча́щи/ прише́л еси́, вопло́щся от Неискусому́жныя,/ Невеще́ственный и Бо́же,/ сла́ва си́ле Твое́й, Го́споди.

Отве́рзеся утро́ба твоя́, я́же пре́жде неражда́ющая,/ и прие́млеши, А́нно, О́блак Небе́сный,/ из него́же нам све́тлое, возсия́в, Со́лнце/ вся све́том и́стины озари́/ и глубоку́ю тьму безбо́жия отгна́.

Престо́л огнеобра́зный Бо́жий в ложесна́х Твои́х водрузи́ся,/ на не́мже сед, воспочи́,/ и всех благочести́вых труд отъя́т,/ и чи́стое Богозна́ние водрузи́ на земли́, А́нно блаже́нная, Богоприя́тная.

Се, его́же прорече́ Соломо́н, во утро́бе Одр прия́ла еси́,/ сохраня́емь и́стиннейше И́стинному Царю́/ к Боже́ственному воззва́нию, ро́да челове́ча обраще́нию,/ те́мже тя ра́достно, А́нно, ве́рнии, ублажа́ем.

Песнь 5

Ирмо́с:

Твой ми́р даждь нам,/ Сы́не Бо́жий:/ ино́го бо, ра́зве Тебе́, Бо́га не знае́м,/ и́мя Твое́ имену́ем,/ я́ко Бог живы́х и ме́ртвых еси́.

Из ко́рене прозя́бшая Дави́дова и Иессе́ева,/ А́нна ны́не расти́ти начина́ет Боже́ственный Жезл,/ прозя́бший та́инственный Цвет –/ Христа́, всех Зижди́теля.

Ма́терь бы́вшую мя, – А́нна вопия́ше, – узрят лю́дие и учудя́тся:/ се бо рожду́,/ я́ко благоволи́ соу́зы Разреши́вый непло́дствия моего́.

Отрокови́цу, ю́же зача́х аз,/ проро́честии гла́си издале́ча провозвести́ша,/ гору и дверь непрохо́дную, –/ прера́достно А́нна вопия́ше приходя́щим.

Богоро́дичен: О́блак, и рай, и дверь Тя Све́та,/ трапе́зу, и руно́ ве́мы,/ и ста́мну, внутрь ма́нну нося́щую, сла́дость ми́ра,/ Чи́стая Де́во Ма́ти.

Ин ирмо́с:

Бог Сый мира, Оте́ц щедро́т,/ Вели́каго Сове́та Твоего́ А́нгела,/ ми́р подава́юща, посла́л еси́ нам;/ тем, Богоразу́мия к све́ту наста́вльшеся,/ от но́щи у́тренююще,/ славосло́вим Тя, Человеколю́бче.

Сни́де с горы́ Иоаки́м,/ не скрижа́ли зако́на прие́мый, но ю́же зако́н преднаписа́/ и вся проро́ческая откры́ша рече́ния – Бо́жию Ма́терь Чи́стую,/ и, игра́я, вопия́ше:/ возвели́чися се́рдце мое́.

В ложесна́х я́ко ощути́ А́нна иногда́ насажде́нную благопло́дную Ло́зу,/ из нея́же Грозд процвете́ зре́лый,/ нам вино́ безсме́ртия оби́льно иска́пающий,/ что Ти возда́м, благоутро́бне Го́споди, веща́ше?

Не терпя́ Иоаки́м тварь зре́ти, благоче́стием непло́дствующу,/ непло́дству А́ннину преити́ моля́шеся/ и сию́ возыме́ти Отрокови́цу, из Нея́же Сын даде́ся,/ вся сыноположи́вый Своему́ Отцу́, Высочайший.

Песнь 6

Ирмо́с:

Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́.

Ка́ко вмеща́ется во чре́ве Вмести́вшая Бо́га?/ ка́ко ражда́ется Христа́ Роди́вшая пло́тию?/ ка́ко же сосцами пита́ется, я́же Зижди́теля млеко́м Напои́вшая?

Мольбу́ вашу услы́шав, Бог/ плодови́т плод ны́не да́рует вам,/ всехва́льнии Иоаки́ме и А́нно, днесь.

Чи́стую Голуби́цу заче́нши во чре́ве,/ ра́дости духо́вныя испо́лнися и́стинно,/ принося́щи пе́сни благода́рныя А́нна Бо́гу.

Богоро́дичен: Треволне́ния по́мыслов, и страсте́й наведе́ния,/ и глубина́ грехо́в окая́нную ду́шу мою́ обурева́ют:/ помози́ ми, Свята́я Влады́чице.

Ин ирмо́с:

Из утро́бы Ио́ну младе́нца изблева́ морски́й зверь,/ якова́ прия́т;/ в Де́ву же все́льшееся Сло́во/ и плоть прие́мшее про́йде, сохра́ншее нетле́нну:/ его́же, бо не пострада́ истле́ния,/ Ро́ждшую сохрани́ невре́жде́нну.

Зако́на се́ни я́ве преходя́т:/ се бо заря́ Боже́ственныя благода́ти показу́ется, Де́ва о́блак,/ из него́же све́тлое Божества́ возсия́ет вои́стинну Со́лнце, –/ А́нна,ра́дующися,взыва́ше, Бо́га Изра́илева велича́ющи.

Стра́нное, а́ще и аз зачну, зре́ние, –/ я́же пре́жде непло́дна и неражда́ющая, А́нна глаго́лаше,/ веща́ющаго А́нгела я́ко услы́ша,/ я́ко отроча́ роди́тся, и взыва́ше:/ до́бре блага́го слы́шания, а́ще слове́с сбытие́ бу́дет.

Го́ры и хо́лми, поля́ и мо́ре,/ А́нгельское мно́жество и все естество́ челове́ческое да веселя́тся, –/ Влады́ки бо Боже́ственный храм,/ нача́ток прими́рения прия́т А́нна,/ егда́ ощути́ себе́ саму́ю заче́ншую, веща́ше.

Конда́к, глас 4.

Подо́бен: Яви́лся еси́ днесь:

Пра́зднует днесь вселе́нная А́ннино зача́тие,/ бы́вшее от Бо́га,/ и́бо та породи́ па́че сло́ва Сло́во Ро́ждшую.

И́кос: Иоаки́м чу́дный и А́нна Богому́драя,/ оба живу́ще во вся́ком благоче́стии, по зако́ну Моисе́еву,/ непло́дии бя́ху и моля́хуся Бо́гу все́ю душе́ю, глаго́люще:/ Го́споди Савао́ф Преблаги́й, вся́ческих наде́жда,/ безча́дствия боле́знь и укори́зну ве́си и печа́ль,/ пода́ждь у́бо нам плод из чре́ва,/ и принесе́м того́ в храм Твой – дар свяще́н,/ и приноше́ние испо́лнено, па́че сло́ва Сло́во Ро́ждшую.

Песнь 7

Ирмо́с:

Су́щим в пещи́ отроко́м Твои́м, Спа́се,/ не прикосну́ся, ниже́ стужи́ огнь./ Тогда́ трие́, я́ко еди́неми усты́, поя́ху/ и благословля́ху, глаго́люще:/ благослове́н Бог оте́ц на́ших.

Безча́дства укори́зны убежа́ти моля́ше А́нна всех Влады́ку,/ и сея́ ми́лостивый глас услы́шав,/ Того Ро́ждшую, плод подаде́ той, я́коже благоволи́.

Ца́рская порфи́ра в твое́м чре́ве истка́тися, А́нно, начина́ется,/ ю́же Бог и Царь всех поне́с, челове́ком яви́тся/ и смири́т враги́, борю́щия ны.

Ми́ро благово́нное во утро́бе зачала́ еси́, А́нно,/ ми́ро жи́зни преесте́ственно восприе́мшую – Влады́ку,/ дыха́ньми благода́ти помышле́ния на́ша облагоуха́вшаго.

Богоро́дичен: Я́ко от Тро́ицы Еди́наго Тя, Христе́, сла́вим, я́ко из Де́вы вопло́щся,/ кроме́ враще́ния челове́ческа, вся поне́сл еси́,/ не отступи́в Естества́ Оте́ческаго, Иису́се,/ а́ще и соедини́лся еси́ нам.

Ин ирмо́с:

О́троцы, благоче́стию совоспита́ни,/ злочести́ваго веле́ния небре́гше,/ о́гненнаго преще́ния не убоя́шася,/ но, посреди́ пла́мене стоя́ще, поя́ху:/ отце́в Бо́же, благослове́н еси́.

Огнено́сную дре́вле купину́, Моисе́й на Сина́и ю́же ви́де,/ А́нна зача́т во чре́ве безча́дствия,/ огнь погаша́ющую я́ко не́кое злоче́стие, пою́щим:/ отце́в Бо́же, благослове́н еси́.

Ка́пля твое́й утро́бе пресла́вно ны́не, А́нно, источи́ся,/ я́же Во́ду Жи́зни всю внутрь восприя́ше,/ ороша́ющую ве́рно тому́ зову́щия:/ отце́в Бо́же, благослове́н еси́.

Пте́нчее я́ко узре́ гнездо,/ впери́лася еси́ ду́хом и моли́твою,/ Голуби́цу прия́ла еси́ нескве́рну,/ Суче́ц, нося́щую Христа́, ма́слинный, А́нно,/ мы́сленнаго пото́па нас свобожда́ющий.

Песнь 8

Ирмо́с:

Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки.

Дави́д ю́же прорече́ Цари́цу,/ се, во чре́ве прие́млю, – А́нна вопия́ше, –/ и рожду́ всех Предста́тельницу ве́рных,/ Царя́ Христа́ иму́щую роди́ти.

Земля́, в ню́же всели́ся земли́ Соде́тель,/ Ски́птр Святы́й, но́вый Киво́т,/ Ста́мна ма́нны в ложесна́х ма́тере,/ сего́ Ро́ждшую, начина́ет прозяба́ти.

Купина́ неопа́льная, Све́щник златы́й,/ одушевле́нный Черто́г Го́спода Бо́га,/ честны́й Жезл во чре́ве ма́тере,/ сего́ Ро́ждшую, начина́ет прозяба́ти.

Богоро́дичен: Возста́ви лежа́щаго мя во глубине́ зол,/ ны́не борю́щия мя победи́ враги́./ Уя́звена безме́стными сластьми́, Бла́гая Чи́стая, не пре́зри,/ но уще́дри и спаси́.

Ин

Ирмо́с: Чу́да преесте́ственнаго/ росода́тельная изобрази́ пещь образ:/ не бо, я́же прия́т, пали́т ю́ныя,/ я́ко ниже́ огнь Божества́ – Де́вы,/ в Ню́же вни́де утро́бу./ Тем, воспева́юще, воспое́м:/ да благослови́т тварь вся Го́спода/ и превозно́си́т во вся ве́ки.

Что ми утро́бу соде́лал еси́ безча́дствующу и сосцы́ сухи́я,/ я́коже проре́кл еси́ во пророцех, Влады́ко, –/ вопия́ше А́нна иногда́, –/ безча́дия моего́ укори́зну разреши́/ и даждь ми плод, с ни́мже вопию́:/ да благослови́т тварь вся Го́спода и превозно́си́т во вся ве́ки.

Вни́де в твою́, А́нно, утро́бу Све́щник,/ и́же Свещу́ Боже́ственную та́йно вмести́,/ просвеща́ющую вся́ко дыха́ние сия́нии та́йными Боже́ственнаго зна́ния./ Те́мже, ра́дующися, взыва́ла еси́:/ да благослови́т тварь вся Го́спода и превозно́си́т во вся ве́ки.

Но́сят, я́коже красне́йший ны́не сопру́г, Боже́ственную Ю́ницу,/ из Нея́же Теле́ц кра́сный возсия́, за всех закла́выйся,/ сла́вный Иоаки́м и А́нна, пою́ще:/ да благослови́т тварь вся Го́спода и превозно́си́т во вся ве́ки.

Песнь 9

Ирмо́с: Живоприе́мный исто́чник приснотеку́щий,/ светоно́сный свети́льник благода́ти,/ храм одушевле́нный, сень Пречи́стую,/ Небесе́ и земли́ простра́ннейшую,/ Богоро́дицу, ве́рнии, велича́ем.

Живоприе́мный Исто́чник зачина́ющи, А́нно Богому́драя,/ ра́дость ны́не приими́,/ Храм святы́й внутрь во чре́ве твое́м прие́млющи,/ све́том пра́вды облиста́ему, Созда́теля велича́ющи.

Сопру́г честны́й и пресла́вный,/ Преве́чнаго Сы́на пра́отцы,/ зако́на храни́телие изве́стнии бы́вше,/ нача́ток ра́дости ро́ждшии,/ Иоаки́м же и А́нна почте́ни да бу́дут.

Ю́же Дани́ил Го́ру вели́кую ви́де,/ и Ио́иль Зе́млю святу́ю узре́, Дверь непрохо́дну,/ ин же прорече́ запеча́танный Исто́чник и Боже́ственное руно́, –/ Богоро́дицу Де́ву воспои́м.

Богоро́дичен: Порфи́ра, я́же руно́ обагри́вшая, неизрече́ннаго Сло́ва вопло́щения,/ Кади́льница зла́тая, Трапе́за, на не́йже Хлеб Христо́с возложи́ся, –/ Богоро́дица Де́ва сла́вится.

Ин

Ирмо́с: Та́инство стра́нное ви́жу и пресла́вное:/ Не́бо – вертеп; престо́л Херуви́мский – Де́ву;/ я́сли – вмести́лище,/ в ни́хже возлеже́ Невмести́мый – Христо́с Бог,/ его́же, воспева́юще, велича́ем.

Ликовству́йте вся ду́ши и взыгра́йте:/ ны́не Земля́ созда́ся, я́же плодороди́т неора́нне Клас Жизноно́сный,/ от него́же я́дше, не вза́лчут когда/ бла́госты́ню того́ велича́ющии.

Псалти́рь с гу́слию восприими́, Дави́де, и песновоспо́й:/ се, Киво́т яви́ся Бо́жий,/ его́же предре́кл еси́ я́ве бу́дущий в назда́ние,/ И́мже воста́хом мы от грехопаде́ния.

Я́ко велича́йшия две звезды́, изнесо́сте всесве́тлую Зарю́,/ Я́же возсия́ет вели́кое Со́лнце ми́ру./ Те́мже благохва́лим и сла́вим вас,/ Иоаки́ме и А́нно я́ко Богому́дрыя.

Свети́лен.

Подо́бен: Свете неизме́нный:

Свет Ро́ждшая, всю озаря́ющий тварь,/ днесь начина́ет прозяба́ти А́нна непло́дными ложесны́./ Те́мже стецемся вси,/ и́бо прии́де избавле́ние осужде́ния Е́вина.

Сла́ва, и ны́не, то́йже.

На хвали́тех стихи́ры на 4, глас 1.

Подо́бен: Небе́сных чино́в:

Я́же пре́жде челове́ков естество́ непло́дствующее,/ я́же к Бо́гу наде́жди,/ нача́ток благоче́стия, прозяба́ет Де́ву,/ Е́юже до́брых благопло́дие пропове́дуется,/ в зача́тии сея́ на земли́,/ припода́ти прише́ствию Христо́ву.

Непроходи́мая дверь Царя́ Христа́,/ я́же Бо́жиим сове́том/ в непло́дных ложесна́х зача́тие прие́млет./ Е́йже, на земли́ предлага́емей,/ во́змутся Небе́сная врата́/ и земны́м попу́стят вход.

И́же пре́жде век неизрече́нно/ от Бо́га земны́м пропове́данных/ Боже́ственных и стра́шных та́инств/ нача́ток ве́ры яви́ся,/ Чи́стыя и Богоотрокови́цы зача́тие./ Е́юже де́лом тьмы и страсте́м преста́ти предвозвеща́ет.

Сла́ва, и ны́не, глас 8.

Мала́кса:

Прииди́те, ра́достно днесь,/ всяк чин и во́зраст человеческий,/ со а́нгельскими ли́ки пресла́вное зача́тие Богоро́дицы све́тло пра́зднуем;/ патриа́рси – всех Царя́ Ма́терь;/ проро́цы – ю́же ва́ми пропове́данную;/ пра́отцы – Ю́же от вас Богома́терь;/ старцы – Богоотце́в;/ Богоотцы́ – Богоотрокови́цу;/ де́вы – Присноде́ву;/ ве́рнии– Корень ве́ры;/ свяще́нницы – всесвяще́нный Храм Бо́жий;/ святы́х всех ли́цы – Вину́ собра́ния ва́шего;/ А́нгельская же во́инства – ро́ждшую Влады́ку всея́ тва́ри/ и Спа́са душ на́ших.

Славосло́вие вели́кое.

По трисвято́м тропа́рь еди́ножды и отпу́ст.

НА ЛИТУРГИ́И

Блаже́нны от 1-го кано́на песнь 3-я и от 2-го кано́на песнь 6-я. Проки́мен, глас 4: Ди́вен Бог во святы́х Свои́х,/ Бог Изра́илев.

Стих: В це́рквах благослови́те Бо́га:

Апо́стол к Гала́том, зача́ло 210, от полу.

Аллилу́ия, глас 1: Спасе́ние пра́ведных от Го́спода:

Ева́нгелие от Луки́, зача́ло 36. Прича́стен: Ра́дуйтеся, пра́веднии, о Го́споде: