ВЕ́ЧЕР

На Го́споди, воззва́х: стихи́ры на 6, глас 5.

Подо́бен: Ра́дуйся:

Радуйся, архиере́ев пра́вило,/ Це́ркве непоколеби́мое утвержде́ние,/ сла́во правосла́вных,/ чуде́с исто́чниче,/ любве́ струя́ неистощи́мая,/ свети́льниче многосве́тлый,/ ду́ха орга́не,/ у́ме Боже́ственный,/ кро́ткий и незло́бивый,/ и́же простотою и́стинною украша́ем,/ челове́че Небе́сный, земны́й А́нгеле,/ виногра́да де́лателю,/ Христо́в дру́же и́скренний,/ того́ моли́ пода́ти тебе́ чту́щим ве́лию ми́лость.

Кро́ток и насле́дник земли́ ты кро́тких/ вои́стинну показа́лся еси́, Спиридо́не,/ отце́в сла́во,/ и́же жи́лами му́дрых и просты́х твои́х сло́вес Боже́ственною благода́тию/ врага́ вселука́ваго и пребезу́мнаго А́рия удави́л еси́/ и, веле́ние Боже́ственное всем уясни́в,/ ве́рным показа́л еси́,/ и спаси́тельное возвы́сив ду́хом,/ вся же правосла́вныя просвети́в ясне́йше/ Еди́но сла́вити Сло́во,/ я́ко вои́стинну Единосу́щное Отцу́ Пребезнача́льному,/ подаю́щее ми́ру ве́лию ми́лость.

Стра́сти умертви́в плотски́я,/ ме́ртвыя благода́тию Бо́жиею возста́вил еси́,/ и змию́ в зла́то претвори́л еси́,/ и реки́ стремле́ние моли́твою твое́ю, о́тче, обузда́л еси́;/ но́щию же царю́ я́влься бе́дствующему,/ сего́ исцели́л еси́ к се́рдцу прибли́жением,/ Го́споду тя пресла́вно прославля́ющу./ Те́мже велегла́сно твою́ па́мять почита́ем/ и моще́й Боже́ственную и свяще́нную ра́ку чтим,/ из нея́же истека́ет врачева́ний Боже́ственная струя́/ и ве́лия ми́лость.

Сла́ва, глас 1:

Преподо́бне о́тче, блаже́нне Спиридо́не му́дре,/ ме́ртвую, я́коже жи́ву, вопроси́л еси́ любве́ ра́ди Бо́жия;/ змию́ же преложи́л еси́ в зла́то нището́ю обдержи́мому,/ тече́ние же удержа́л еси́ реки́, сострада́тельствовав лю́дем;/ царю́ же предста́л еси́ врач промышле́нием Бо́жиим;/ ме́ртвыя же па́ки возста́вил еси́, я́ко того́ учени́к,/ и ве́ру уясни́л еси́ посреде́ отце́в мно́гих./ Вся у́бо моги́й во укрепля́ющем тя Христе́,/ того́ и ны́не моли́ спасти́ся душа́м на́шим.

И ны́не, Богоро́дичен или́ Крестобогоро́дичен.

Подо́бен: Всехва́льнии му́ченицы:

Заколе́ние Твое́ непра́ведное, Христе́,/ Де́ва зря́щи,/ пла́чущи, вопия́ше Ти:/ Ча́до Сладча́йшее,/ ка́ко без пра́вды умира́еши?/ Ка́ко на Дре́ве ви́сиши,/ И́же всю зе́млю пове́шей на вода́х?/ Не оста́ви Мене́ еди́ну, Благода́телю Многоми́лостиве,/ Ма́терь и рабу́ твою́, молю́ся.

На стихо́вне Окто́иха.

Сла́ва, свята́го, глас 2:

Святи́телей Боже́ственный сосу́д,/ о́тче преподо́бне, Спиридо́не му́дре,/ ты доброде́тельми показа́лся еси́:/ сего́ ра́ди Це́ркве предста́тель быв,/ ересенача́льники изгна́л еси́/ и А́риево хуле́ние собо́рне на зе́млю низложи́л./ Те́мже, чудоде́йствуя де́лом и сло́вом,/ Спа́са моли́ спасти́ся душа́м на́шим.

И ны́не, Богоро́дичен или́ Крестобогоро́дичен.

Подо́бен: Егда́ от Дре́ва:

Дре́ву кре́стному Тя, Иису́се, пригвожде́на зря́щи Неискусобра́чная,/ пла́чущи, глаго́лаше:/ Ча́до Сла́дкое, почто́ оста́вил еси́ Мене́,/ ро́ждшую Тя, еди́ну,/ Све́те Непристу́пный Пребезнача́льнаго Отца́?/ Потщи́ся и просла́вися,/ я́ко да сла́ву получа́т Боже́ственную/ и́же Боже́ственныя стра́сти Твоя́ сла́вящии.

Тропа́рь, глас 1:

Собо́ра Пе́рваго показа́лся еси́ побо́рник и чудотво́рец,/ Богоно́се Спиридо́не, о́тче наш./ Те́мже ме́ртву ты во гро́бе возгласи́в,/ и змию́ в зла́то претвори́л еси́,/ и внегда́ пе́ти тебе́ святы́я моли́твы/ А́нгелы, сослужа́щия тебе́, имел еси́, свяще́ннейший./ Сла́ва Да́вшему тебе́ кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Или сей, глас 4: Пра́вило ве́ры:

Сла́ва, и ны́не, Богоро́дичен.

НА У́ТРЕНИ

Оба кано́на Окто́иха, без мучеиичнов. И свята́го кано́н на 6. Глас 2. Творе́ние Феофа́ново.

Песнь 1

Ирмо́с:

Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть:/ препросла́вленный Госпо́дь сла́вно бо просла́вися.

Кро́тких зе́млю дости́г, о́тче, я́ко кро́ток, и ми́лостив, и чист быв,/ настоя́щую се́рдца моего́ укроти́ бу́рю,/ я́ко да, в тишине́ Боже́ственней быв, песносло́влю тя.

Де́лании Боже́ственными ду́шу, о́тче, очи́стив,/ Богови́ден, Спиридо́не, был еси́/ и Боже́ственнаго Ду́ха пресве́тлым обогати́лся еси́ осия́нием;/ тем озаря́еши чи́сто блажа́щия тя.

От па́ствы, я́коже Дави́д, тя восприе́м, Соде́тель/ слове́сныя тя поста́ви па́ствы па́стыря всеизя́щнейша,/ простото́ю и кро́тостию сия́юща/ и беззло́бием, преподо́бне па́стырю, украша́ема.

Богоро́дичен: Пресвята́я Де́во Чи́стая,/ просвети́ и освяти́ помышле́ния и ду́шу мою́, молю́ся,/ о́блаки разоря́ющи неве́жества моего́ и тьму отъе́млющи грехо́вную,/ я́ко да по до́лгу ублажа́ю Тя.

Песнь 3

Ирмо́с:

На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́бося дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.

Ум твой безстра́стием просвети́в и Боже́ственным смире́нием украси́вся,/ дарова́ния ду́ха прия́л еси́ отгони́ти ду́хи/ и реши́ти неду́ги ве́рно чту́щих тя, свяще́ннейше.

Зми́я началозло́бнаго уби́в,/ нрав сребролю́бный попра́в, ми́луя тре́бующаго, святи́телю,/ зми́я преложи́л еси́ в злату́ю утварь свяще́нными твои́ми моли́твами,/ о́тче преподо́бне.

Возше́л еси́ на го́ру безстра́стия,/ вшел еси́ во храм Боговиде́ния,/ в скрижа́ли же се́рдца твоего́ прия́л еси́ зако́н спаси́тельный,/ я́ко свяще́ннейший и уго́дник при́сный Влады́ки Твоего́.

Богоро́дичен: Уврачи́ стру́пы души́ моея́,/ ум мой, омраче́нный нераде́нием, Богоневе́сто, озари́, да пою́:/ несть непоро́чны, па́че Тебе́, Непоро́чная,/ и несть чи́сты, па́че Тебе́, Влады́чице.

Седа́лен, глас 8.

Подо́бен: Прему́дрости:

От па́ствы ове́ц предста́тельствовати Христо́ве Це́ркви вручи́вся,/ па́стырь Богопроизведе́н ты, Спиридо́не, возсия́л еси́,/ злосла́вия во́лки отгна́л еси́ словесы́ твои́ми, на благочести́я па́жити сию́ воспита́в./ Те́мже посреде́ Богоно́сных отце́в ве́ру утверди́л еси́ му́дростию ду́ха,/ иера́рше блаже́нне, моли́ Христа́ Бо́га, прегреше́ний оставле́ние дарова́ти/ пра́зднующим любо́вию святу́ю па́мять твою́.

Сла́ва, и ны́не, Богоро́дичен. Подо́бен:

Я́ко Всенепоро́чная Неве́сто Творцу́,/ я́ко Неискусому́жная Ма́ти Изба́вителя, прия́телище я́ко су́ща Уте́шителя, Всепе́тая,/ беззако́ния мя су́ща скве́рное оби́телище/ и де́монов игра́лище в разуме́ бы́вша,/ потщи́ся от тех злоде́йства мя изба́вити/ и све́тлое жили́ще доброде́телей соверши́, светоно́сная, нетле́нная./ Отжени́ о́блак страсте́й и Вы́шняго прича́стия сподо́би/ и све́та невече́рняго моли́твами Твои́ми.

Крестобогоро́дичен:

А́гнца, и Па́стыря, и Изба́вителя А́гница зря́щи на Кресте́,/ восклица́ше, пла́чущи, и, го́рько рыда́ющи, вопия́ше:/ ми́р у́бо ра́дуется, прие́мляй Тобо́ю избавле́ние,/ утро́ба же Моя́ гори́т, зря́щи Твое́ распя́тие,/ е́же терпи́ши за милосе́рдие ми́лости./ Долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя стра́сти Твоя́.

Песнь 4

Ирмо́с:

Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

У́гльми Честна́го разже́гся ду́ха,/ страсте́й удобопопаля́емую вещь, всеблаже́нне, поже́гл еси́,/ ми́р же огнесия́ньми доброде́телей твои́х, Спиридо́не, просвети́л еси́.

Умертви́в твоя́ плотска́я дви́жения, Богодохнове́нне,/ ме́ртвыя возста́вил еси́ живо́творным твои́м приглаго́ланием./ Те́мже молю́ тя:/ умерщвле́нную ду́шу мою́, о́тче, оживи́.

Пови́нующися, ме́ртвая тебе́ глас, о́тче, даде́/ и речная стремле́ния твои́ми удержа́шася повеле́нии:/ яви́лся еси́ бо, блаже́нне, чудоде́латель,/ Боже́ственную благода́ть прие́мь.

Богоро́дичен: Проро́цы Твоего́ та́инства глубину́ провозвести́ша недомы́сленную:/ еди́на бо родила́ еси́, Чи́стая, Недоразуме́ваемаго,/ воплоще́нна за милосе́рдие неисповеди́мое.

Песнь 5

Ирмо́с:

Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, Бо́га не знаю.

Река́ су́щих в тебе́ дарова́ний вся́кое напоя́ет, преподо́бне, се́рдце,/ всем да́рует бога́тно здра́вие,/ вся Бо́га к сла́ве возста́вляет, тебе́ просла́вльшаго/ и чудоде́йствы вся́кими почествова́вшаго.

Тя царь земны́й, блаже́нне,/ Царя́ Небе́снаго я́ве позна́ и́скренняго раба́/ и дарова́ний Боже́ственных испо́лненнаго, внегда́ приити́ тебе́ к нему́/ вели́каго врача́ к Бо́гу возвеща́я.

Авраа́мову стра́ннолюбному нраву ты уподо́бився,/ всем дома твоего́ входы отве́рзл еси́,/ и всем всяк был еси́, и промышля́я су́щими во обстоя́нии,/ Спиридо́не блаже́нне.

Богоро́дичен: Но́ва нам породила́ еси́ Младе́нца,/ пре́жде веков, Отрокови́це, рожде́нна от Отца́ Безнача́льна./ его́же умоли́, я́ко Сы́на и Бо́га Твоего́,/ уще́дрити Богоро́дицу Тя, Пречи́стая, душе́ю чи́стою возвеща́ющия.

Песнь 6

Ирмо́с:

В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Зла́то, я́ко кал, тебе́ вмени́ся, па́че зла́та безстра́стием сия́ющу/ и обогати́вшуся, преподо́бне, дарова́нии всезлаты́ми ду́ха.

Чи́сто служа́ Влады́це Твоему́,/ мно́жество име́л еси́, преподо́бне, послуша́ющее Тебе́ а́нгельских сил/ неви́димыми гла́сы, свяще́ннейше.

Пресла́вное, всему́дре, житие́ твое́ ми́ру тя пресла́вна, о́тче, соде́ла./ Те́мже Боже́ственную па́мять твою́,/ ра́дующеся, соверша́ем, пою́щии Тя.

Богоро́дичен: Небе́с ши́рши чре́во Твое́ бысть, Неискусому́жная, Бо́га вмести́вшее,/ нигде́же вмести́маго, Всесвята́я Де́во Богоневе́сто.

Конда́к, глас 2.

Подо́бен: Вы́шних ища́:

Любо́вию Христо́вою уя́зви́вся свяще́ннейший,/ ум впери́в заре́ю ду́ха,/ де́тельным виде́нием твои́м дея́ние обре́л еси́, Богоприя́тне,/ же́ртвениик Боже́ственный быв,/ прося́ всем Боже́ственнаго сия́ния.

И́кос:

Из чре́ва освяще́ннаго иера́рха Госпо́дня, восхва́лим ны́не Спиридо́на,/ благода́ти скрижа́ли прие́мшаго Боже́ственный сла́вы,/ и в чудесе́х пресла́внаго всей тва́ри,/ и я́ко те́пла и самови́дца Боже́ственнаго осия́ния,/ я́ко ни́щих предста́теля и согреша́ющих душево́дца:/ той бо Боже́ственна Престо́лу Христо́ву же́ртва бысть,/ прося́ всем Боже́ственнаго сия́ния.

Песнь 7

Ирмо́с:

Богопроти́вное веле́ние беззако́ннующаго мучи́теля/ высо́к пла́мень вознесло́ есть./ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Моисе́ево незло́бие, Дави́дову кро́тость, И́ова Авси́тидскаго непоро́чное стяжа́в,/ ду́ха был еси́ жили́ще, поя́, свяще́ннейше:/ Сый благослове́н и препросла́влен.

Ороше́ния на главу́ твою́ во вре́мя жа́твы небеса ́ иска́паша, бу́дущее прозна́меноваша:/ Бог бо, я́коже рече́, Боже́ственную па́мять твою́, преподо́бне, просла́ви,/ ве́рныя освяща́я хода́тайством твои́м.

В собо́ре отце́в тя Бог прославля́ет,/ на суде́ словеса́ твоя́ сохра́ньша, блаже́нне,/ я́же ве́рою прине́сл еси́, безслове́снейшаго А́рия обуя́ющая я́ве/ и упраздня́ющая сего́ проти́вле́ние.

Богоро́дичен: Грозд возрасти́ла еси́ неизрече́нным сло́вом,/ я́ко лоза́, Де́во, Еди́наго невозде́ланнаго,/ вино́ источа́юща, вся веселя́щее, вся освяща́юща земны́я/ и вся́ко пия́нство лю́тых отъе́млюща.

Песнь 8

Ирмо́с:

Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

Пещь страсте́й Боже́ственными одожде́ньми Боже́ственнаго Ду́ха погаси́л еси́/ и ро́су источи́л еси́ неду́гов, о́тче, зной отъе́млющую/ ве́рно к тебе́ приходя́щих всегда́, блаже́нне Спиридо́не пребога́те.

Беззло́бив, прав, кро́ток же, и ми́лостив, и незлопа́мятлив был еси́,/ любо́вен, стра́ннолюбец, иера́рх свяще́ннейший,/ му́дростию укра́шен, преподо́бне. Правосла́вия./ Те́мже тя ве́рою почита́ем.

Дре́вле тебе́ глас, я́ко жива́, уме́ршая вопро́шшу ти, о́тче, даде́./ О, чудесе́ изря́дна!/ О, пресла́внаго та́инства!/ О, благода́ти, ю́же получи́л еси́,/ житие́м украша́емь а́нгельским, досточу́дне!

Богоро́дичен: Стра́сти моего́ се́рдца исцели́ ми́лостию Твое́ю, Всепе́тая,/ ум мой умири́, и ду́шу мою́ просвети́,/ и ходи́ти мя возблагопу́тстви на стези́ спаси́тельныя,/ я́ко да при́сно пою́ Тя, Всепе́тая.

Песнь 9

Ирмо́с:

Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Безнача́льна Роди́теля Сы́на я́сно пропове́дал еси́,/ Единосу́щна Отцу́ и Соприсносу́щна,/ посреде́ Богоно́сных отце́в возвели́чився,/ и беззако́ннующих загради́л еси́ уста́,/ святи́телю всеблаже́нне.

Многосве́тлое со́лнце, отце́в украше́ние,/ иере́ев сла́ва, А́нгелов совсе́льниче,/ твою́ светоно́сную па́мять ра́достно ны́не соверша́ющия/ Све́та сподо́би невече́рняго моли́твами твои́ми.

Боже́ственная селе́ния, град Небе́сный, пра́зднующих кра́сный лик/ освяще́нную ду́шу твою́ и доброде́тельми укра́шенную, всеблаже́нне,/ прия́т во гла́се ра́дования.

Богоро́дичен: Ве́лие та́инство па́че ума́ Рождества́ Твоего́ удивля́ет А́нгелы, Богора́дованная,/ наслажда́ет преподо́бных собо́р, свяще́нныя же весели́т отцы́,/ Боже́ственно пою́щия тя, наде́жду душ на́ших.

Свети́лен Окто́иха.

Сла́ва, свята́го.

Подо́бен: Не́бо звезда́ми:

Тя от безслове́сныя па́ствы преведе́ в слове́сную Дух, Богоно́се,/ я́коже Моисе́я и Дави́да, и́хже уподо́бился еси́ нра́ву, Спиридо́не,/ све́те вселе́нныя.

Богоро́дичен: Су́щих от Бо́га ми́ру пода́нных благи́х Ты вина́ была́ еси́, Богоро́дице,/ но и ны́не уми́лостиви о о́бщем спасе́нии благопреме́ннаго Бо́га.

На стихо́вне Окто́иха.

Сла́ва, свята́го, глас 4:

Преподо́бне о́тче, святи́телю прехва́льне,/ апо́стольскаго уче́ния быв испо́лнен/ и Боже́ственнаго Ду́ха жили́ще/ доброде́тельнаго ра́ди жи́тельства показа́вся,/ церко́вный во́лки уче́ньми отгна́л еси́/ и Правосла́вных ве́ру уясни́л еси́,/ столп яви́лся еси́ благочести́я и побо́рник./ Те́мже и, чудоде́йствуя в конце́х,/ змию́ в зла́то преложи́л еси́/ и ме́ртвую к вопроше́нию воздви́гл еси́,/ но, о отце́в досточу́дне и учи́телей собесе́дниче!/ Спа́су моли́ся спасти́ ду́ши на́ша.

И ны́не, Богоро́дичен или́ Крестобогоро́дичен.

Подо́бен: Я́ко до́бля:

Умерщвля́ема ви́дящи Христа́,/ Пречи́стая Влады́чица,/ умерщвля́юща льсти́ваго,/ восклица́ше, го́рце взыва́ющи,/ и́же из утро́бы Тоя́ произше́дшу,/ и, долготерпе́нию его́ чудя́щися, взыва́ше:/ Ча́до Мое́ Любе́знейшее,/ не забу́ди рабы́ Твоея́,/ не закоснй, Человеколю́бче, Мое́ утеше́ние.

НА ЛИТУРГИ́И

Блаже́нны Окто́иха и свята́го песнь 3-я. Проки́мен, глас 1: Уста́ моя́ возглаго́лют прему́дрость,/ и поуче́ние се́рдца моего́ ра́зум.

Стих: Услы́шите сия́, вси язы́цы:

Апо́стол ко Евре́ем, зача́ло 335.

Аллилу́ия, глас 2: Уста́ пра́веднаго поуча́тся прему́дрости:

Стих: Зако́н Бо́га его́: Ева́нгелие от Луки́, зача́ло 24. Прича́стен: В па́мять ве́чную:

НА МАЛОЙ ВЕЧЕ́РНИ

На Го́споди, воззва́х: зри стихи́ры с вели́кой вече́рни

На стихо́вне стихи́ры, глас 2.

Подо́бен: До́ме Евфра́фов:

Дом ду́ха Пресвята́го/ был еси́, о́тче,/ и нас моли́твами твои́ми/ вселе́ние покажи́ Святе́й Тро́ице,/ Богому́дре Ферапо́нте и пребога́те.

Стих: Честна́ пред Го́сподем/ смерть преподо́бных Его́.

Прииди́те, ве́рнии,/ ра́дующеся, вни́дем в це́рковь/ и в весе́лии се́рдца облобыза́ем/ честны́я мо́щи Ферапо́нта Богому́драго,/ да исцеле́ние и грехо́в проще́ние прии́мем моли́твами его́.

Стих: Блаже́н муж, боя́йся Господа,/ в за́поведех Его́ восхо́щет зело́.

Приими́ пе́ние чад свои́х,/ Ферапо́нте о́тче,/ и пою́щим обре́тение моще́й твои́х/ и лю́бящим тя подава́й/ е́же на по́льзу проше́ние.

Сла́ва, и ны́не, Богоро́дичен, подо́бен то́йже:

Вы́шнии ли́цы,/ Богоро́дице Де́во,/ пою́т с ни́жними,/ сла́вяще непреста́нно/ Рождество́ Твое́ Пречестнбе.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры самогла́сны на 8, глас 8:

Боже́ственная и светоно́сная наста́ па́мять днесь,/ и́же в по́стницех вели́каго Ферапо́нта,/ ду́ши и телеса́ веселя́щи./ Те́мже прииди́те, празднолю́бцы,/ я́ко да наслади́мся ны́нешняго торже́ства́,/ се бо на́ше зва́ние прии́де,/ и Русския земли́ удобре́ние,/ и гра́ду Га́личу похвала́ и утвержде́ние,/ снасле́дник бо Христо́в яви́ся,/ и Безпло́тных житию́ подража́тель быв,/ и мо́лится Спа́су всех/ умири́ти ми́р и спасти́ ду́ши на́ша.

Весели́ся и ра́дуйся о Го́споде,/ вели́кий град Га́лич,/ процве́тши в конце́х свои́х но́ваго свети́льника,/ я́коже со́лнце, сия́юща,/ красу́йся и лику́й, Це́ркве Бо́жия,/ мона́хов мно́жества, сра́дуйтеся,/ пра́зднолюбных собо́ри, взыгра́йте с Дави́дом:/ сон че́стен пред Го́сподем смерть преподо́бных его́.

Чи́стое и пречестно́е прия́телище яви́ся Ду́ху Пресвято́му,/ преподо́бне о́тче наш Ферапо́нте,/ Безпло́тных бо во пло́ти житию́ подража́л еси́,/ теле́сная двиза́ния воздержа́нием умертви́в,/ в живоно́сную ме́ртвость обле́клся еси́,/ сего́ ра́ди от Вседержи́тельныя венча́лся еси́ десни́цы/ и чуде́с исцеле́ния от него́ сподо́бился еси́,/ а́ще бо и преста́вился еси́ от земли́,/ но Бо́гови жив предстои́ши/ и зде с на́ми неви́димо водворя́ешися,/ но, я́ко име́я дерзнове́ние,/ моли́ся о душа́х на́ших.

Сла́ва, глас 2:

Прииди́те, мона́хов мно́жества днесь,/ псало́мская пе́ния цве́ти духо́внии принесе́м,/ я́ко вои́стинну мона́шескому удобре́нию/ и блаже́ннаго Васи́лия сожи́телю,/ его́же хваля́ще, си́це рцем:/ ра́дуйся, свети́льниче многосве́тлый,/ возводя́ ко Христу́ мона́хов мно́жество;/ ра́дуйся, Богохрани́мому гра́ду Га́личу похвала́ и утвержде́ние,/ и всем ве́рным благоути́шное приста́нище,/ и очище́ние боля́щим во гресе́х,/ на Боже́ственное тех возводя́ раче́ние./ Тем пречестну́ю и святу́ю твою́ и А́нгелом гове́йную соверша́юще па́мять,/ ра́достно пра́зднуем, преподо́бне о́тче наш Ферапо́нте,/ и Боже́ственнаго Человеколю́бия про́сим получи́ти/ твои́ми к Бо́гу моли́твами,/ и ми́ру умире́ние дарова́ти/ и душа́м на́шим ве́лию ми́лость.

И ны́не, Богоро́дичен: Пре́йде сень:

Таже пареми́и преподо́бническия (зри день 5-й).

На литии́ стихи́ры, глас 5:

О́тче преподо́бне Ферапо́нте,/ возсия́ днесь пресве́тлая и всепра́зднственная па́мять твоя́/ и озаря́ет приходя́щия к тебе́ ве́рою./ Мы же, ча́да твоя́, днесь па́мять твою́ ра́достно пра́зднуем, и ве́рно восхваля́ем,/ и приле́жно ублажа́ем, и тебе́ велича́ем,/ я́ко кре́пким и тве́рдым воздержа́нием до́бре претерпе́в,/ тем же на Небесе́х обре́л еси́ безконе́чную жи́знь/ и чи́сте зри́ши Святу́ю Тро́ицу./ Сей моли́ся/ о и́же ве́рою и любо́вию чту́щих святу́ю па́мять твою́.

О́тче преподо́бне Ферапо́нте,/ до́брыми де́лы на земли́ пожи́л еси́,/ мирску́ю сла́ву оста́вил еси́,/ во дни и в нощи́ в за́поведех Госпо́дних пребы́л еси́,/ и Небе́сную ле́ствицу обре́л еси́,/ и в Го́рнее ца́рство всели́лся еси́,/ весе́лие присносу́щное и сла́ву неувяда́емую,/ бога́тство неистощи́мое и е́же пра́ведных наслажде́ние,/ по́честь трудо́в твои́х восприя́л еси́ от Бо́га, Благоде́теля всех,/ ему́ же ны́не предстои́ши со все́ми святы́ми/ и спаса́й пра́зднующих любо́вию святу́ю па́мять твою́.

Смире́нномудрие име́я,/ кро́ток душе́ю и се́рдцем был еси́,/ еди́ному Бо́гу себе́ возложи́л еси́,/ и те́сным путе́м ше́ствовал еси́,/ посто́м, и моли́твами, и бде́нием,/ а́ще и челове́к естество́м на земли́ был еси́,/ но А́нгельски пожи́л еси́,/ ны́не же на Небесе́х со проро́ки, и апо́столы, и му́ченики, и все́ми святы́ми ликовству́еши,/ предстоя́ Престо́лу Влады́ки Христа́,/ моли́ спасти́ся душа́м на́шим.

Глас 1:

Прииди́те, свяще́нных собо́ри и правосла́вных сосло́вие,/ прииди́те, и́нок совокупле́ние,/ и вни́дем, ра́дующеся, в це́рковь Бо́га на́шего/ и чудотво́рную ра́ку преподо́бнаго обы́мем ра́достно,/ я́ко чуде́с сокро́вище неизъе́млемо,/ и, честны́я его́ мо́щи любо́вию лобыза́юще,/ разли́чных неду́г свободи́мся,/ и душа́м спасе́ние прии́мем, вопию́ще к нему́:/ о всеблаже́нне о́тче Ферапо́нте,/ моли́ Преблага́го Бо́га на́шего/ дарова́ти побе́ду на враги́ стране́ на́шей/ и спасти́ ду́ши на́ша.

Днесь весели́тся Не́бо свы́ше,/ и земля́ ра́дуется с челове́ки,/ и да ликовству́ют у́бо новоизбра́ннии русстии собо́ри,/ и све́тло торжеству́ют и́ноческая совокупле́ния./ Свята́я же Це́рковь Бо́жия и ди́вная в пра́вду,/ я́ко пресве́тлыми заря́ми просвеща́ема,/ мно́гих чуде́с наполня́ющися от честны́х и многоцеле́бных моще́й преподо́бнаго отца́ Ферапо́нта,/ всю вселе́нную созыва́ет похвали́ти по́двиги его́./ Тем вси, соше́дшеся/ и того́ преста́вле́ние в пе́снех и пе́ниих ве́село пра́зднующе,/ воспое́м Христа́ Бо́га на́шего,/ да пода́ст нам моли́твами его́ ми́р и ве́лию ми́лость.

Наста́ днесь све́тлое торжество́/ преставле́ния Богоблаже́ннаго отца́ Ферапо́нта./ Прииди́те, вси ве́рнии,/ Це́рковь Бо́жию пе́сньми венча́ем/ и в ней просла́вим и́же в Тро́ице пева́емаго Бо́га на́шего,/ вопию́ще и глаго́люще:/ Ты дарова́л еси́, Влады́ко,/ Своего́ уго́дника, гра́ду на́шему Га́личу тве́рдую сте́ну,/ и всем росси́йским страна́м кре́пкаго предста́теля показа́л еси́,/ и христоимени́тым лю́дем такова́го чудесопода́теля,/ и неисце́льных неду́г цели́теля,/ и моли́твенника о душа́х на́ших.

Сла́ва, глас 6:

Прииди́те, празднолю́бцы вси,/ свяще́нницы и мона́си/ и вси лю́дие ве́рнии, всяк во́зраст,/ днесь преподо́бнаго отца́ па́мять ве́село пра́зднуем,/ и духо́вно торжеству́ем, и пе́сненно воспои́м:/ ра́дуйся, Васи́лиев собесе́дниче,/ и по́стников подража́телю,/ и пусты́ни сей настоя́телю./ Я́ко твои́м явле́нием сие́ ме́сто обре́теся,/ егда́ яви́лся еси́ духо́вному иеромона́ху Пафну́тию/ и о ме́сте сем возвести́л еси́,/ и по дру́га Адриа́на посла́ти повеле́л еси́,/ от него́ же моли́твами твои́ми и явле́нием твои́м оби́тель сия́ воздви́жеся,/ я́ко в ней препочи́л еси́,/ и мо́щи твоя́ в ней положе́ни суть./ Ра́дуйся, я́ко и по преставле́нии свое́м чудеса́ твори́л еси́,/ о вре́менах лю́тых и мяте́жах, и о прише́ствии инове́рных проре́кл еси́,/ и о гла́де возвести́л еси́,/ я́ко в гла́дное вре́мя а́лчущия лю́ди преко́рмлени суть./ Егда́ же разбо́йницы на оби́тель сию́ устреми́шася/ и хотя́ разори́ти ю и име́ния взяти,/ ты же ю сохрани́л еси́./ Тем же и мы мо́лим тя,/ и пречестну́ю твою́ па́мять пра́зднуем,/ и Боже́ственнаго Человеколю́бия про́сим получи́ти твои́ми к Бо́гу моли́твами,/ и ми́ру ми́р дарова́ти/ и душа́м на́шим ве́лию ми́лость.

И ны́не, Богоро́дичен: Богоро́дице, Ты еси́ лоза́:

На стихо́вне стихи́ры, глас 1.

Подо́бен: Прехва́льнии му́ченицы:

Стопа́м блаже́ннаго Васи́лия после́довал еси́, преподо́бне,/ он бо безмо́лвия ра́ди А́нгелом собесе́дник бы́ти сподо́бися./ Ты же по преставле́нии его́ в пусты́нное ме́сто изво́лил еси́ всели́тися,/ и та́мо житию́ о́наго блаже́ннаго поревнова́л еси́,/ и свет неизрече́нный зре́ти сподо́бился еси́./ С ним же Святе́й Тро́ице предстоя́,/ моли́ спасти́ся душа́м на́шим.

Стих: Честна́ пред Го́сподем/ смерть преподо́бных Его́.

Я́ко пресве́тлое свети́ло, в пусты́нном ме́сте просия́л еси́/ и, я́ко фи́никс, в до́му́ Бо́жии проро́чески процве́л еси́,/ и плод прече́стен, сам себе́, Влады́це/ жи́ву же́ртву без кро́ве прине́сл еси́, о́тче,/ темже тя вси, любо́вию соше́дшеся,/ по досто́инству при́сно ублажа́ем.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Наста́вник свои́м житие́м и́ночествующим, о́тче Ферапо́нте, был еси́,/ себе́ пе́рвее нача́ток Бо́гови принося́,/ воздержа́ния любому́дрием, и смире́ния высо́кими нра́вы,/ и безме́рным поще́нием врага́ смири́л еси́, преподо́бне./ Посо́бствуй у́бо и нам моли́твами твои́ми/ сете́й того́ избы́ти и спасти́ся душа́м на́шим.

Сла́ва, глас 8:

Весели́ся, Богохрани́мый гра́де Га́личу,/ в конце́х бо свои́х прозябе́/ и́же во блаже́нных блаже́ннаго Ферапо́нта./ Сей у́бо, прему́дростию ду́ха Свята́го украси́вся,/ вся́ко воздержа́ние доброде́тельным свои́м житие́м показа́/ и бу́дущия ра́ди жи́зни над Мо́нзою рекою всели́ся,/ ника́коже боя́ся неви́димых враго́в шата́ния,/ а́ще бо и я́ростию зе́льною мно́гажды устремля́хуся./ Он же моли́твами свои́ми,/ я́ко дым, без ве́сти их сотвори́./ О, непоро́чныя души́ и кре́пкаго терпе́ния его́,/ того́ и мы хода́тая приводя́ще,/ мо́лимся Христу́ Бо́гу/ от собла́зн льсти́ваго изба́вити нас и спасти́ ду́ши на́ша.

И ны́не, Богоро́дичен: Безневе́стная Де́во:

Тропа́рь, глас 8:

Любо́вию Христо́вою, Богому́дре, просвети́вся, и доброде́тельми/ сожи́тельствовал еси́ Васи́лию блаже́нному,/ и, вся́кое наслажде́ние плотско́е возненави́дев,/ в пусты́ню всели́лся еси́,/ в ней же вельми́ подвиза́лся еси́, в жи́зни сей вре́менней/ плоть умерщвля́я свою́ в пе́ниих, и во бде́ниих, и в поще́ниих./ Те́мже и Христо́с да́ром чуде́с обогати́ тя,/ но помина́й у́бо нас, чту́щих пресве́тлую па́мять твою́,/ преподо́бне о́тче Ферапо́нте,/ и моли́ Христа́ Бо́га спасти́ся душа́м на́шим.

Сла́ва, и ны́не, Богоро́дичен.

НА У́ТРЕНИ

По 1-м стихосло́вии Седа́лен, глас 4.

Подо́бен: Удиви́ся Ио́сиф:

Собесе́дник и сожи́тель блаже́нному Василию, о́тче, был еси́/ и, того́ стопа́м после́довав,/ я́ко Безпло́тен, на земли́ пожи́л еси́./ Тем и преподо́бным яви́лся еси́ еди́ножи́тель,/ с ни́ми же тебе́ непреста́нно сла́вим.

Сла́ва, и ны́не, Богоро́дичен:

Умертви́ся вся кре́пость моя́ от мно́жества безме́рных зол мои́х,/ и, мно́гими скорбьми́ одержи́м, уже́ отча́яхся./ Но помози́, Влады́чице, Ферапо́нта блаже́ннаго предста́тельством,/ я́ко Ра́дость ро́ждши, пла́чущим утеше́ние.

По 2-м стихосло́вии Седа́лен, глас 4:

Я́ко в дому́ вои́стинну, в пусты́нном ме́сте всели́вся, Богому́дре Ферапо́нте,/ вся́кое озлобле́ние претерпе́л еси́,/ до́брыя де́тели, я́ко фимиа́м благово́нен, в же́ртву благоприя́тну Бо́гови прине́сл еси́./ Тем же дерзнове́ние стяжа́в к Нему́,/ моли́ дарова́ти очище́ние согреше́нием и́же ве́рою хваля́щим святу́ю па́мять твою́.

Сла́ва, и ны́не, Богоро́дичен:

Прибе́жище су́щим в лю́тых обстоя́ниих непосты́дное,/ премене́ние к Бо́гу согреша́ющим, Пречи́стая Влады́чице,/ спаси́ нас от вся́ких бед и скорбе́й,/ обстоя́ния и озло́бления челове́ческа, и стра́шнаго муче́ния, и страсте́й безче́стия,/ несу́мне́нною ве́рою Тя при́сно призыва́ющих, Де́во Всепе́тая.

По полиеле́и седа́лен, глас 8:

Подо́бен: Прему́дрости:

Нищету́ у́бо возлюби́л еси́ па́че бога́тства тле́ннаго/ и сою́зом любве́ привяза́лся еси́ блаже́нному Васи́лию,/ и с ним вся земна́я и мимотеку́щая возненави́дел еси́, блаже́нне./ По преставле́нии же блаже́ннаго пусты́нное озлобле́ние усе́рдно подъя́л еси́,/ те́мже и к ре́вности А́нгельскаго жития́ подви́гл еси́ мно́жество и́ночествующих, преподо́бне о́тче наш Ферапо́нте./ ны́не же на Небесе́х водворя́яся, Трисо́лнечному Божеству́ предстои́ши,/ моли́ у́бо Христа́ Бо́га грехо́в оставле́ние дарова́ти нам и ве́лию ми́лость.

Сла́ва и ны́не, Богоро́дичен:

О Тебе́ ра́дуется, Благода́тная, вся́кая тварь,/ А́нгельский собо́р и челове́ческий род,/ освяще́нный Хра́ме и Раю́ слове́сный,/ де́вственная похвало́, из Нея́же Бог воплоти́ся и Младе́нец бысть, пре́жде век Сый Бог наш:/ ложесна́ бо Твоя́ престо́л сотвори́ и чре́во Твое́ простра́ннее Небе́с соде́ла./ О Тебе́ ра́дуется, Благода́тная, вся́кая тварь, сла́ва Тебе́.

Степе́нна, 1-й антифо́н 4-го гла́са. Проки́мен: Че́стна пред Го́сподем:

Ева́нгелие от Матфе́я, зача́ло 43.

По 50-м псалме́ стихи́ра, глас 6:

Егда́ стра́стнаго мирска́го мра́ка избежа́л еси́, Ферапо́нте преподо́бне,/ тогда́ в сла́внейший ца́рствующий град Москву́ прии́де,/ ко блаже́нному Васи́лию всели́лся еси́, пречу́дне./ И с ним прони́кл еси́ во глубину́ Боже́ственнаго ра́зума./ По преставле́нии же его́ отхо́диши во оби́тель Воздви́жения Честна́го и Животворя́щаго Креста́/ преслову́щаго гра́да Костромы́/ и та́мо сподо́бился еси́ и́ноческий вели́кий о́браз восприя́ти./ Те́мже и, зе́льными труды́ удруча́яся в по́двизех духо́вных,/ я́ко Безпло́тен, подвиза́лся еси́,/ и, я́ко позна́но бысть отце́м той оби́тели,/ жесто́кое твое́ житие́ и труды́, и́же по Бо́зе,/ прославля́ху тя вельми́./ Ты же, оты́де сла́вы челове́ческия,/ всели́лся еси́ в пусты́ню,/ ея́же ма́нием и в явле́ниях повеле́л еси́ воздви́гнути над Мо́нзою рекою,/ иде́же показа́ся зво́ном, А́нгельским пе́нием,/ в ней же живя́ вельми́ трудолюбе́зно./ В де́бри уеди́нялся, моли́лся еси́,/ те́ло свое́ обнажа́я мра́вию и мши́цам/ те́мже и сподо́бился еси́, я́ко прозорли́в, да́льняя проразуме́вати,/ я́ко близ су́щая я́сно глаго́лати,/ и хотя́щее бы́ти за грехи́ челове́ческия/ вре́мя гла́дное и иноплеме́нных наше́ствие проро́чески проре́кл еси́,/ но моли́, о́тче, мо́лимся, изба́вится нам такова́го преще́ния/ и спасти́ся душа́м на́шим.

Кано́н Благове́щению Пресвяты́я Богоро́дицы со ирмосо́м на 6, та́же преподо́бному Ферапо́нту, глас 4.

Песнь 1

Ирмо́с:

Отве́рзу уста́ моя́,/ и напо́лня́тся ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Зе́льным воздержа́нием и труды́, о́тче Ферапо́нте,/ и всено́щным стоя́нием ду́шу свою́ царя́ над страстьми́ теле́сными поста́вил еси́,/ те́мже, духо́вно веселя́щеся, Христа́ пое́м,/ и́же тебе́ такову́ побе́ду дарова́вшаго.

Влады́чнему́ любостра́нству, преподо́бне, подо́бяся,/ сего́ ра́ди и сам стра́нствовати изво́лил еси́, Ферапо́нте,/ те́мже Всеви́дящее О́ко, ви́дев твое́ благо́е произволе́ние,/ да́ром чуде́с обогати́ тя, я́ко пресла́вна.

Душе́вною ти́хостию и любо́вию, я́же к Бо́гу,/ нра́вы и обы́чаи благи́ми украше́на тя ви́дев, твой духо́вный настоя́тель, преподо́бне,/ всем пропове́дует хотя́щая напосле́док тобо́ю бы́ти пресла́вная, Ферапо́нте.

Богоро́дичен: Лю́те погружа́ему в пучи́не страсте́й бу́рею безме́рных мои́х согреше́ний,/ спасе́ния простри́ ми ру́ку/ и возведи́ мя, Влады́чице, из глубины́ зол мои́х.

Песнь 3

Ирмо́с:

Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Пропове́дует до́блия твоя́ по́двиги и па́че трубы́ вопие́т свяще́нная твоя́, о́тче, пусты́ня,/ я́же тобо́ю нача́ло прие́мшая,/ в нея́же твои́м промышле́нием устрои́ся дом Бо́жия Ма́тере,/ а́ще и не гла́сом, вещьми́ же хва́лится, глаго́ля:/ утверди́хся тобо́ю, Го́споди.

Еди́наго Бо́га возлюби́л еси́ и, сего́ крест на ра́мо взем, преподо́бне,/ странноле́пно пожи́л еси́ в посте́х, во бде́ниих же и моли́твах, о́браз быв и́ноком./ Те́мже от Христа́ досто́йно просла́вился еси́.

Плотска́го жела́ния, преподо́бне, отве́ргся,/ го́рдость возненави́дел еси́,/ смире́нию же и нищете́ Васи́лиеве подо́бяся./ Те́мже, преподо́бне, дости́гл еси́ святы́х жили́ща.

Богоро́дичен: Поми́луй, Еди́на Богома́ти,/ поми́луй и уще́дри ду́шу мою́ окая́нную, потопля́емую бесо́вскими прило́ги и страстьми́./ И пре́жде вре́мени исхо́да моего́ си́лою очи́сти ю и умилосе́рдися.

Седа́лен, глас 4.

Подо́бен: Удиви́ся Ио́сиф:

Удиви́ся твой духо́вный оте́ц Адриа́н,/ зря в тебе́ вели́кое воздержа́ние,/ и внима́ше мы́слию хотя́щая от Тебе́ напосле́док бы́ти, о́тче Ферапо́нте,/ ви́дев бо твое, е́же по Бо́зе, житие́,/ вра́жиими прило́ги ника́ко же коле́блемо,/ те́мже и свиде́тельствует, я́ко оте́ц и храни́тель твоему́ житию́, и́ноком пусты́ни свое́й вопия́:/ сей же посреди́ нас ме́ньший ви́дится,/ но последи́ в пусты́ни вели́к свети́льник пребу́дет.

Сла́ва, и ны́не, Богоро́дичен:

Предста́тельница непосты́дная, Богоро́ди́тельнице,/ и моли́твенница гото́вая прибега́ющим к Тебе́,/ да не пре́зриши мене́, Влады́чице, от бед мя изба́ви/ и от всех зол, обурева́ющих ду́шу мою́.

Песнь 4

Ирмо́с:

Неизсле́дный Бо́жий Сове́т,/ е́же от Де́вы воплоще́ния/ Тебе́, Вы́шняго,/ проро́к Авваку́м усмотря́я, зовя́ше:/ сла́ва си́ле Твое́й, Го́споди.

На ме́сте, в нем же лежи́т честно́е и свято́е те́ло твое́, преподо́бне Ферапо́нте,/ мно́га исцеле́ния прие́млют ве́рнии, Христу́ от души́ вопию́ще:/ сла́ва си́ле Твое́й, Го́споди.

Про́мыслом Бо́жиим прише́л еси́ в пусты́ню свою́,/ в ней же живя́, мно́гих ко спасе́нному пути́ наста́вил еси́, Творцу́ воспева́ти:/ сла́ва си́ле Твоей, Го́споди.

В целому́дрии препроводи́в жи́знь свою́, о́тче,/ земна́я Небе́сными измени́в и тле́нная нетле́нными искупи́в,/ те́мже Христу́ пое́ши:/ сла́ва си́ле Твоей, Го́споди.

Богоро́дичен: До́брых всех обнажи́в мя, в зло́бу всего́ облече́,/ и́же дре́вле пра́отцев обнажи́вый первозда́нныя добро́ты./ Ты у́бо, о Богоневе́сто, изба́ви мя кова́рства того́/ и облецы́ светоза́рною оде́ждею доброде́телей.

Песнь 5

Ирмо́с:

Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ ми́р подава́ющая.

Стра́нно твое́ житие́, преподо́бне, ку́пно же и смире́ние, е́же стяжа́л еси́, Ферапо́нте,/ я́ко ни самого́ того́ све́та, и́же в ми́ре от со́лнечнаго сия́ния, досто́йна себе́ зре́ния вмени́л еси́,/ но в де́брех те́мных еди́н уеди́няяся.

Па́мять твою́ свяще́нную творя́щих от вся́ких спаси́ прегреше́ний, печа́лей и напа́стей,/ твое нам да́руй заступле́ние,/ всех Царю́ предстоя́й, о́тче Ферапо́нте.

Богодаро́ванная твоя́ благода́ть, о́тче Ферапо́нте,/ всяк слух челове́ческий удиви́ и научи́, я́же зде мня́щаяся вели́ка,/ я́ко ма́ла и ху́да презре́ти вся и после́довати стопа́м твои́м./ Тем же вопие́м ти:/ моли́, преподо́бне, спасти́ся нам.

Богоро́дичен: Упова́ние мое Ты еси́, Пречи́стая, и спасе́ние, и похвала́./ Те́мже прибега́ю к покро́ву Твоему́./ Не гнуша́йся мене́, грехи́ мно́гими, боле́зньми и скорбьми́ ны́не поглоще́ннаго,/ но, предвари́в, спаси́ мя.

Песнь 6

Ирмо́с:

Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Я́ко пресла́дкий не́кий виногра́д,/ пусты́ня тебе́, о́тче, израсти́вши, пресла́вно тобо́ю красу́ется/ и, ра́дующися, Христа́ прославля́ет,/ и́же тебе́ ей дарова́вшаго.

Нощь, я́ко день, и день, я́ко нощь, тебе́ вменя́шеся, о́тче Ферапо́нте,/ не дал бо еси́ сна, по проро́ку, очи́ма свои́ма,/ ни ве́ждома дрема́ния, ниже́ покою телеси́ твоему́,/ до́ндеже сие́ чи́сто с душе́ю Бо́гови предста́вил еси́.

Ны́не свято́е те́ло твое, преподо́бне, в пусты́не лежа́щее,/ в ней же еще в сей жи́зни всено́щными бде́нии и моли́твами потруди́лся еси́,/ исцеле́ния мно́га источа́ет с ве́рою приходя́щим,/ те́мже мо́лим тя: душе́вное здра́вие подава́й нам, тебе́ сла́вящим.

Богоро́дичен: Твою́ пода́ждь ми по́мощь/ и изба́ви мя от бед и скорбе́й и прегреше́ний мои́х,/ я́же всех ро́ждши при́сное Избавле́ние.

Конда́к, глас 8:

Возложи́в себе́ Бо́гу от ю́ности, преподо́бне,/ того́ па́че всех возлюби́в,/ и тому́ от всея́ души́ любо́вию после́довал еси́,/ тле́нная и кра́сная ми́ра нивочто́же вмени́в, в пусты́ню всели́вся,/ в ней же до́бре подвиза́лся еси́ проти́ву неви́димых враго́в ко́зней/ и, я́ко светоза́рное со́лнце, в конце́х Га́лическия земли́ возсия́л еси́,/ отону́ду же, веселя́ся, преше́л еси́ к Небе́сным оби́телем,/ и ны́не со А́нгелы Влады́чню Престо́лу предстоя́,/ помина́й нас, чту́щих па́мять твою́, да зове́м ти:/ ра́дуйся, Ферапо́нте, о́тче наш.

И́кос:

Ка́ко возмогу́, недосто́йный и пови́нный грехо́м мно́гим,/ по достоя́нию воспе́ти е́же во пло́ти равноа́нгельное житие́ твое́ и пресла́вная чудеса́,/ а́ще у́бо и мно́зи прему́дрии не дости́гнут испове́да́ти мно́гаго твоего́ терпе́ния, и смире́ния, и те́плыя е́же ко Христу́ любве́,/ но оба́че наде́яся на твое беззло́бие, о́тче преподо́бне, си́це вопию́ ти:/ ра́дуйся, Ферапо́нте преподо́бне и Богоно́се, Небе́сный челове́че, земны́й А́нгеле;/ ра́дуйся, я́ко кроме́ ми́ра су́етнаго в пусты́ни жи́ти изво́лил еси́,/ и в ней строи́телю, отцу́ своему́ духо́вному Адриа́ну, оби́тель соста́вите повеле́л еси́,/ и хра́мы пречестны́я Воскресе́ния Христа́ Бо́га на́шего, и Пресвяты́я Богоро́дицы Благове́щения,/ и вели́каго в чудесе́х Никола́я воздви́гнути повеле́л еси́,/ и в них тобо́ю Бог сла́вится;/ ра́дуйся, я́ко измла́да Бо́гу послужи́л еси́, те́сным и приско́рбным путе́м присноше́ствовав,/ и мно́жества и́кон слы́шиши, си́цевая тебе́ глаго́лющих:/ ра́дуйся, спасе́нию на́шему хода́тай,/ и́же до́бре всех упасы́й от наве́т вра́жиих;/ ра́дуйся, посрами́вый бесо́в полки́;/ ра́дуйся, и́ночествующим пресве́тлый свети́льниче и столп терпе́ния;/ ра́дуйся, я́ко на святе́м твое́м преставле́нии воню́ благоуха́ния оби́тели твоея́/ и окре́ст живу́щих на мно́ги дни облагоуха́л еси́;/ ра́дуйся, я́ко и́нока, сле́па су́ща, на святы́я твоя́ мо́щи припа́дша,/ моли́твою свое́ю прозре́ти сотвори́л еси́ и свет ви́дети дарова́л еси́/ и и́на мно́га чудеса́ по преставле́нии свое́м сотвори́л еси́;/ ра́дуйся, гра́ду Га́личу похвала́ и утвержде́ние;/ ра́дуйся, я́ко всем скорбя́щим ми́лость и благоутро́бие отве́рзл еси́,/ и ни́щим засту́пник и корми́тель и уныва́ющим утеше́ние;/ ра́дуйся, я́ко приходя́щих к цельбоно́сному твоему́ гро́бу от наве́т вра́жиих избавля́еши,/ и по́мыслы злы́я от них отгоня́еши,/ и скорбя́щим сла́дкое утеше́ние подае́ши;/ ра́дуйся, ра́дости Боже́ственныя пода́телю и чуде́с исто́чниче к тебе́ притека́ющим./ Ра́дуйся, Ферапо́нте, о́тче наш.

Песнь 7

Ирмо́с:

Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Вели́каго сподви́жника и ревни́теля твоему́ житию́, преподо́бне Ферапо́нте,/ блаже́ннаго Адриа́на стяжа́л еси́,/ его́же и отца́ духо́внаго именова́л еси́,/ и́же равноа́нгельскому твоему́ житию́ после́доваше,/ с ним же в Вы́шних водворя́яся, нас помина́й.

Гра́да и оте́чества своего́ пресе́льник был еси́/ и, в сла́внейший ца́рствующий град Москву́ прише́д Бо́жиим про́мыслом,/ с Васи́лием блаже́нным жи́тельствовал еси́,/ иде́же благода́ть, о́тче, от Го́спода прия́л еси́.

По Боже́ственнем твое́м преставле́нии, о́тче Ферапо́нте, списа́телю, пи́шущу твое́ жити́е и чудеса́/ и в моле́бном спи́сании кано́на в недоуме́нии ему́ бы́вшу,/ ты, о́тче Богоно́се, в виде́нии яви́лся еси́, повелева́я без сомне́ния похва́льная и моле́бная писа́ти и Христо́ви вопи́ти:/ благослове́н Бог оте́ц на́ших.

Богоро́дичен: Челове́ческия напа́сти и сове́ты, Чи́стая, разори́ Боже́ственными Твои́ми моли́твами/ и рабы́ Твоя́ изба́ви мно́гих боле́зненных прегреше́ний,/ я́ко да Присноде́ву Тя ублажа́ем.

Песнь 8

Ирмо́с:

О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те его́ во вся ве́ки.

Блаже́ннаго Васи́лия, преподо́бне Ферапо́нте, смире́нию поревнова́л еси́/ и Христа́ ра́ди смире́нное и жесто́кое житие́ возлюби́л еси́,/ земна́го пристра́стия отрека́яся,/ те́мже и че́сти святы́х сподо́бился еси́/ и с ни́ми пое́ши Го́спода во ве́ки.

Богохрани́мый град Га́лич, и́же в конце́х свое́й о́бласти тебе́ стяжа́вый,/ ра́достию ра́дуется, преподо́бне Ферапо́нте,/ тебе́ бо, я́ко сте́ну име́я тве́рду и столп необори́м,/ и Христа́ воспева́ет, и́же тебе́ се́му дарова́вшаго.

Дерзну́вша у́бо священнои́нока извеще́ние прия́ти о святе́м телеси́ твое́м/ Боже́ственная а́бие си́ла напра́сно порази́,/ но твои́ми моли́твами исцеле́ние получи́./ Те́мже и мы, веселя́щеся, вопие́м:/ Го́спода по́йте, дела́, и превозноси́те его́ во ве́ки.

Не то́кмо в житии́ твое́м, но и по отше́ствии ми́ра/ мно́жайшая чудеса́ от честна́го гро́ба содева́ются приходя́щим с ве́рою, преподо́бне Ферапо́нте,/ вся́кия бо неду́ги прогони́ши си́лою духо́вною и от бед изыма́еши,/ тем непреста́нно вопие́м:/ Го́спода по́йте, дела́, и превозноси́те его́ во ве́ки.

Богоро́дичен: На моле́ние мое́ умилосе́рдися ны́не/ и ра́дость ми в печа́ли ме́сто да́руй,/ да пою́ Тя, Влады́чице, и вопию́ Сы́ну Твоему́:/ Го́спода по́йте, дела́,/ и превозноси́те его́ во ве́ки.

Песнь 9

Ирмо́с:

Всяк земноро́дный/ да взыгра́ется, Ду́хом просвеща́емъ,/ да торжеству́ет же Безпло́тных умов естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Ру́це твои́, преподо́бне Ферапо́нте, е́же к Бо́гу воздея́нием пресла́вно чудоде́йствоваша,/ моли́твами бо твои́ми огнь с Небеси́ свел еси́ во очище́ние ме́ста Пречи́стыя Богоро́дицы,/ Ея́же вси с тобо́ю велича́ем.

Ио́не проро́ку подо́бяся,/ лю́дем пре́жде бытия́ предвозвеща́вши злове́рных на град и на лю́ди наше́ствие,/ сего́ преще́ния и нас изба́вити, преподо́бне, помоли́ся,/ Богоро́дицу Пречи́стую велича́ющих.

Руко́ю мое́ю недосто́йною прино́симое тебе́ с трудо́м хвале́ние, о́тче Ферапо́нте, не пре́зри,/ но приими́ и моли́ Творца́ своего́, Влады́ку и Го́спода,/ бу́дущаго та́мошняго мя изба́вити муче́ния ве́чнаго,/ и́же тебе́ ве́рою почита́ющих.

Певце́в, и́же тебе́, преподо́бне, и́скренно воспева́ющих/ и твою́ па́мять честну́ю, блаже́нне Ферапо́нте, ве́рою прославля́ющих,/ освяти́, и просла́ви, и от бед изба́ви и напа́стей,/ и́же та́мо ве́чнаго, о́тче, муче́ния,/ да тебе́ всегда́ воспева́ем.

Богоро́дичен: Светороди́тельнице Де́во, души́ моея́ о́блак отжени́/ и даждь ми зре́ти чи́сто, Влады́чице, спаси́тельную добро́ту/ и возсия́вшую неизглаго́ланно из Твоея́ Пречи́стыя утро́бы во свет язы́ком, Препе́тая.

Свети́лен:

О и́же твое пресла́вное успе́ние пра́зднующих, блаже́нне,/ моли́ Христа́ Бо́га изба́витися всем от разли́чных напа́стей,/ да вси тебе́ прославля́ем, Ферапо́нте.

Сла́ва, и ны́не, Богоро́дичен:

Тя пе́сньми немо́лчными ублажа́ем, Де́во,/ я́ко от Тро́ицы Еди́наго родила́ еси́, Богоро́дице,/ и но́сиши на Боже́ственную ру́ку Преве́чное Сло́во, непреме́нно и неизме́нно.

На хвали́тех стихи́ры самогла́сны, глас 8:

Вре́менных презря́ и до́льних, Богому́дре,/ высо́кая и пребыва́ющая возлюби́л еси́./ Боже́ственным раче́нием крест бо свой поне́с на ра́ме,/ Ева́нгельски Бо́га возлюби́л еси́,/ поще́нием му́жески победи́в бесо́вския полки́,/ с Небе́сными весели́шися ли́ки, я́ко непобеди́м,/ го́рних жела́я, безконе́чныя жи́зни сподо́бился еси́,/ но моли́ся, Богоно́се Ферапо́нте, Спа́су всех/ умири́ти ми́р и спасти́ ду́ши на́ша.

Прииди́те, стецы́теся, и́ноческая чета́ Боголюби́вая,/ к Боже́ственней па́мяти Ферапо́нта преподо́бнаго./ Сей бо от ю́ны версты́ взят и́го Христо́во на ся,/ тем от него́ прия́т дар чудоде́йствия,/ и в гла́дныя ле́та мно́гих во оби́тели свое́й препита́ти повеле́, приходя́щия в Пречи́стыя дом,/ и во гряду́щее ле́то моли́твою свое́ю/ плодо́м умноже́ния у Христа́ упроси́л есть а́лчущим лю́дем,/ и посмея́вшемуся тебе́ ве́лий неду́г объя́л его́/ и пока́явшемуся ему́ о своем согреше́нии проще́ние подаде́,/ сей моли́твою твое́ю исцеле́ние получи́/ и ве́лию ве́ру к тебе́ стяжа́,/ и ощути́вшей тя жене́ в де́бри запреще́нием свои́м слепоту́ наведе́,/ и пока́явшейся ей моли́твою свое́ю па́ки свет очи́ма ея́ дарова́./ Тем и мы мо́лим тя:/ изба́ви нас от враг ви́димых и неви́димых/ и моли́ся Христу́ Бо́гу/ умири́ти ми́р и спасти́ ду́ши на́ша.

Преподо́бне Ферапо́нте, Богоблаже́нне,/ поучи́вся во дни и в нощи́, за́поведей Госпо́дних/ сподо́бился еси́ обрести́ ле́ствицу Небе́сную,/ по не́йже возше́д, дости́гл еси́ Го́рняго Иерусали́ма,/ и, от боле́зней и трудо́в досто́йную по́честь прие́м,/ со А́нгельскими ли́ки ны́не ра́дуешися,/ и Боже́ственнаго зре́ния Единосу́щныя Тро́ицы наслажда́ешися,/ те́мже и нас помина́й.

Предстоя́ у Престо́ла всех Царя́, Христа́ Бо́га на́шего,/ а́ще бо и теле́сне язы́к твой умолче́,/ но чудеса́ свиде́тельствутот,/ Га́лическая страна́ вельми́ тобо́ю хва́лится/ име́ю бо, – рече́,– тебе́, сокро́вище неистощи́мое./ Сами бо, зря́ще честну́ю ра́ку моще́й твои́х/ и чудеса́ быва́емая,/ прославля́ют просла́вльшаго Го́спода,/ тем, дерзнове́ние име́я к Нему́,/ и нам испроси́ оставле́ние грехо́в и ве́лию ми́лость.

Сла́ва, глас 2:

Прииди́те днесь, ли́цы и́ночестии,/ притеце́м ко гро́бу Ферапо́нта преподо́бнаго,/ моля́щеся Христу́ Бо́гу на́шему,/ прося́ще грехо́в проще́ния,/ стране́ на́шей на враги́ побе́ду и одоле́ние,/ и плене́нным свобожде́ние,/ и ми́ру устрое́ние,/ и це́рквам соеди́не́ние,/ и душа́м на́шим ве́лию ми́лость.

И ны́не, Богоро́дичен: Все упова́ние мое:

Славосло́вие вели́кое. И отпу́ст.

На Литурги́и слу́жба вся преподо́бническая.