На Го́споди, воззва́х: стихи́ры пра́здника, глас 5.

Подо́бен: Ра́дуйся:

Но́сиши Ада́мов зрак во о́бразе, Бо́жий Сый Всесоверше́нный,/ и хо́щеши рука́ми держа́тися,/ руко́ю вся содержа́й си́лою Твое́ю,/ Чи́стая Всенепоро́чная провещава́ше, глаго́лющи:/ ка́ко Тя пелена́ми повию́ я́ко Младе́нца?/ Ка́ко воздою́ Тя, вся́ческая пита́ющаго?/ Ка́ко Твое́й па́че ума́ нищете́ удивлю́ся?/ Ка́ко Тя, Сы́на Моего́, назову́,/ Раба́ Твоя́ ны́не су́щи?/ Пою́, благословлю́ Тя, подаю́щаго ми́ру ве́лию ми́лость.

Младе́нца, воплоща́ема из Нея́,/ Предве́чнаго Бо́га, Всенепоро́чная зря́щи,/ рука́ми держа́щи, и облобыза́ющи ча́сто,/ и ра́дости исполня́ющися, провеща́ваше ему́:/ Бо́же Высоча́йше, Царю́ Неви́димый,/ ка́ко зрю Тя и разуме́ти та́инства не могу́ безме́рныя нищеты Твоея́?/ Верте́п бо, мале́йший и сей чужди́й,/ внутрь вмеща́ет Тя, ро́ждшагося/ и де́вства нереши́вша, ложесна́ соблю́дшаго, я́ко пре́жде рождества́,/ и даю́щаго ве́лию ми́лость.

Сия ра́бски Чи́стая/ ужа́сно же веща́ющи,/ услы́шаше волхво́в, пред верте́пом ку́пно предстоя́щих,/ и к ним рече́:/ Кого и́щете вы?/ Я́ко ви́жду бо, от инода́льныя стра́ны приидо́сте:/ пе́рсский о́браз и мудрова́ние иму́ще,/ стра́нен исхо́д и ше́ствие сотвори́сте;/ и к стра́нствовавшему от высоты́/ и стра́нно в Мя все́льшуся, я́ко весть,/ со тща́нием приидо́сте тому́ поклони́тися,/ да́рующему ми́ру ве́лию ми́лость.

И́ны стихи́ры святы́х, глас 4.

Подо́бен: Я́ко до́бля:

Си́лою вжиля́еми,/ и тве́рдо укрепля́еми,/ и всиля́еми Влады́ки Христа́,/ в не́мощи есте́ственней непобеди́ми яви́стеся, страстоте́рпцы,/ врага́ в по́двизех победи́вше,/ и моли́теся о соверша́ющих святу́ю и светоно́сную ва́шу па́мять,/ великому́ченицы сла́внии.

В словесе́х Фео́фил,/ и в де́лех Дорофе́й, и Мигдо́ний,/ ку́пно и Горго́ний,/ с Секу́ндом же и Петр,/ и И́ндис, до́бльствовавше,/ и врага́ ополче́ния победи́ша, ра́дующеся,/ и моля́т от вся́ких бед изба́вити/ ве́рою соверша́ющия всечестну́ю па́мять их.

Ю́ноши, де́вы,/ ста́рцы и младе́нцы/ еди́ну показа́ша до́блесть./ Те́мже и ра́вная получи́ша возме́здия благода́тию,/ всех Царю́ и Бо́гу спребыва́юще./ Я́же почти́м свяще́нными песнопе́ньми,/ я́ко светоза́рный свети́льники вселе́нныя,/ две тьмы су́щия.

Сла́ва, и ны́не, глас 5:

Да веселя́тся Небеса́,/ и да ра́дуется земля́:/ днесь бо вои́стинну еди́но ста́до бысть А́нгелов и челове́ков./ О, чудесе́! Неви́димый ви́дится,/ Невмести́мый вмеща́ется,/ Сло́во одебелева́ет,/ Сын Бо́жий Сын челове́чь быва́ет,/ и Де́ва Неискусому́жная Ма́ти зрится Бо́жия,/ и Ма́ти по Рождестве́ Де́ва обрета́ется./ Вопло́щшееся Сло́во О́тчее в я́слех возлега́ет,/ и па́стырие пропове́дницы о́бщницы та́инства быва́ют;/ волсви́ от восто́к да́ры приноша́ху,/ звездо́ю наставля́еми,/ ро́ждшемуся Спа́су поклони́шася,/ с ни́миже и мы, празднолю́бцы,/ серде́чная сокро́вища усе́рдно отве́рзше,/ принесе́м ему́ дея́ния бла́гая:/ ве́ру, наде́жду и любо́вь,/ я́ко зла́то, и лива́н, и сми́рну,/ Безпло́тных глас вопию́ще ему́:/ сла́ва в Вы́шних Бо́гу,/ и на земли́ мир,/ в челове́цех благоволе́ние,/ прише́дшему спасти́ от пре́лести весь род наш.

На стихо́вне стихи́ры пра́здника, глас 2.

Подо́бен: До́ме Евфра́фов:

Всего́ боголе́пно/ поне́с от Де́вы/ Ада́ма, Христе́, пе́рваго,/ роди́лся еси́ в верте́пе,/ и в я́слех пелену́емь.

Стих: Из чре́ва пре́жде денни́цы роди́х Тя,/ кля́тся Госпо́дь и не раска́ется.

Пой проро́чески, Дави́де,/ движа́ свире́ль:/ из твои́х бо чресл,/ из ни́хже Богоро́дица,/ Христо́с ражда́ется днесь.

Стих: Рече́ Госпо́дь Го́сподеви моему́:/ седи́ одесну́ю Мене́.

Хвалу́ боголе́пну/ с па́стыри волсви́/ и со А́нгелы сла́ву/ от Де́вы прозя́бшему Бо́гу,/ ве́рнии, принесе́м.

Сла́ва, и ны́не, глас 1:

Сла́ва в Вы́шних Бо́гу,/ в Вифлее́ме слы́шу от Безпло́тных днесь,/ на земли́ ми́р Благоволи́вшему бы́ти./ ны́не Де́ва Небе́с ши́рши:/ возсия́ бо свет омраче́нным/ и смире́нныя возвы́си, а́нгельски пою́щия:/ сла́ва в Вы́шних Бо́гу.

Тропа́рь святы́м, глас 2:

Страстоте́рпцы Госпо́дни,/ блаже́нна земля́, напи́вшаяся кровьми́ ва́шими,/ и свя́та селе́ния, прии́мшая телеса́ ваша:/ в по́двизе бо врага́ победи́сте/ и Христа́ со дерзнове́нием пропове́дасте./ Того́, я́ко бла́га, моли́те/ спасти́ся, мо́лимся, душа́м на́шим.

Сла́ва, и ны́не, пра́здника, глас 4:

Рождество́ Твое́, Христе́ Бо́же наш,/ возсия́ ми́рови свет ра́зума:/ в нем бо звезда́м служа́щии/ звездо́ю уча́хуся/ Тебе́ кла́нятися, Со́лнцу Пра́вды,/ и Тебе́ ве́дети с высоты́ восто́ка./ Го́споди, сла́ва Тебе́.

НА У́ТРЕНИ

Тропа́рь пра́здника, два́жды. Сла́ва, святы́х. И ны́не, пра́здника.

По 1-й стихологии седа́лен, глас 1.

Подо́бен: Ка́мени запеча́тану:

На Престо́ле огнезра́чнем в Вы́шних седя́й/ со Отце́м Безнача́льным и Боже́ственным Твои́м Ду́хом,/ благоволи́л еси́ роди́тися пло́тию от Де́вы Неискусому́жныя, Иису́се;/ сего́ ра́ди и звезда́ Тя от Перси́ды волхво́м показа́./ Сла́ва всеблаго́му Твоему́ сове́ту,/ сла́ва явле́нию Твоему́,/ сла́ва к челове́ком кра́йнему соше́ствию Твоему́.

Сла́ва, и ны́не, то́йже.

По 2-й стихологии седа́лен, глас 3.

Подо́бен: Красоте́ де́вства:

Преве́чнаго и Непостижи́маго, Соприсносу́щнаго Неви́димому Отцу́,/ во утро́бе пло́тски носи́ла еси́, Богоро́дице,/ еди́но и неслия́нное Тро́ицы Божество́;/ просия́ благода́ть Твоя́ в ми́ре, Всепе́тая./ Те́мже непреста́нно вопие́м:/ ра́дуйся, Чи́стая Де́во Ма́ти.

Сла́ва, и ны́не, то́йже.

Кано́н пра́здника второ́й со ирмосо́м на 8. Глас 1. Творе́ние кир Иоа́нна.

И святы́х кано́н на 4, глас 1. его́же краегране́сие: Мно́жество мя спаса́ет добропобе́дных му́чеников. Ио́сиф.

Песнь 1

Ирмо́с: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися.

Мно́жество многочи́сленное честны́х му́чеников,/ мно́жество очи́стите мно́гих прегреше́ний мои́х хода́тайством ва́шим/ и дади́те сло́во воспе́ти ва́ше торжество́.

Свети́ла пресве́тлая Це́ркве,/ добропобе́днии му́ченицы, свои́ми у́ды Христа́ просла́вивше,/ светоно́сною ны́не ва́шею па́мятию просла́вистеся.

Ве́ра Боже́ственная страда́льцев неве́рных безбо́жное мучи́тельство разори́/ и потреби́ де́монское лука́вое противле́ние благода́тию.

Бо́га Всемо́щнаго, плоть прие́мша/ и смерть разруши́вша сме́ртию, му́ченицы, испове́давше,/ умерщвле́ни бы́вше, жи́знь прия́сте непреста́нную.

Богоро́дичен: Пою́ Тя, Всепе́тая Благослове́нная,/ Бо́га препе́таго пло́тию ро́ждшую,/ велича́ющаго страда́льцы, врага́ победи́вшия.

Песнь 3

Ирмо́с:

Да утверди́тся се́рдце мое́ в во́ли Твое́й, Христе́ Бо́же,/ и́же над вода́ми не́бо утвержде́й второ́е/ и основа́вый на вода́х зе́млю, Всеси́льне.

Красне́йше распаля́еми Христо́вою любо́вию, всехва́льнии,/ разже́гшуся огню́ ника́коже убоя́стеся,/ но в нем сконча́вшеся,/ ку́пно просла́вистеся.

Живы́м гла́сом Бо́га пропове́дающе,/ преще́ния безбо́жных не устраши́шася,/ но дете́й глас единому́дренно взыва́юще, всехва́льнии ору́жницы Христо́вы сконча́шася.

Не убои́мся огня́ единора́бнаго,/ до́блии вку́пе взыва́ху, ра́дующеся душе́ю:/ Тебе́ ра́ди умерщвля́емся, уме́ршаго,/ и смерть, Спа́се, упраздни́вшаго.

Богоро́дичен: Да обожи́т челове́чество,/ Бог бысть Челове́к из Тебе́, Де́во Чи́стая, па́че сло́ва и смы́сла:/ сего́ ра́ди Тя согла́сно, ве́рнии, ублажа́ем.

Конда́к, глас 2.

Подо́бен: Тве́рдыя:

Тве́рди душе́ю по ве́ре, святи́и,/ огне́м страда́ние прие́мше, две тьмы страда́лец/ вопию́ще Ро́ждшемуся от Де́вы:/ приими́ всесожже́ния на́ша за Тя,/ я́коже да́ры пе́рсских царе́й, зла́то, и сми́рну, и лива́н,/ Преве́чный Бо́же.

Седа́лен, глас 1.

Подо́бен: Гроб Твой, Спа́се:

Во́инство, в числе́ двою́ тьму му́чеников честву́емо, нам возсия́,/ просвеща́ющее сердца́ и мы́сли благочести́вых ве́ры ра́ди./ Разже́гшеся бо Боже́ственною любо́вию Влады́ки,/ кончи́ну святу́ю огне́м до́блии усе́рдно прия́ша.

Сла́ва, и ны́не, пра́здника, глас и подо́бен то́йже:

Во я́слех нас ра́ди безслове́сных положи́лся еси́,/ Долготерпели́ве Спа́се, младе́нствовав во́лею;/ па́стырие же Тя воспе́ша со А́нгелы, взыва́юще:/ сла́ва и хвала́ на земли́ рожде́нному/ и обожи́вшему земноро́дных существо́,/ Христу́ Бо́гу на́шему.

Песнь 4

Ирмо́с: Услы́шах, Го́споди, слух Твой и убоя́хся,/ разуме́х дела́ Твоя́, – проро́к глаго́лаше, –/ и просла́вих си́лу твою́.

Твое́й любви́ привяза́вше сердца́, Сло́ве,/ страстоте́рпцы, Тебе́ ра́ди умерщвля́еми,/ я́ко а́гнцы непоро́чнии, подража́теле стра́сти Твоея́ яви́шася.

Упра́вивше, святи́и, ко приста́нищу спасе́ния ду́ши ва́ша Ду́хом,/ бу́ри убежа́сте идолонеи́стовства, блаже́ннии.

Непрело́жни яви́стеся в по́двизе муче́ния, непоколеби́ми и неужа́сни,/ гони́телей противле́ние Боже́ственною ве́рою победи́вше.

Богоро́дичен: Изба́вльшеся Рождество́м Твои́м, Благослове́нная, пе́рвыя кля́твы,/ благослове́ние восприя́хом, и жи́знь, и избавле́ние,/ Тя, Богоро́дицу, сла́вящии.

Песнь 5

Ирмо́с: Све́тлый нам возсия́й Свет Присносу́щный,/ у́тренюющим о судьба́х за́поведей Твои́х,/ Влады́ко Человеколю́бче, Христе́, Бо́же наш.

Светоявле́нна па́мять просия́ страстоте́рпец Твои́х и просвети́ земны́я концы́/ чуде́с Боже́ственными раздая́нии, Христе́ Бо́же наш.

Священноде́телие, же́ртву принося́ще,/ заколе́ния соверше́нная принесо́шася, всесожига́еми,/ со все́ми и́ными мно́жайшими му́ченики Христа́ велича́юще.

Хра́ми Бо́жии су́ще, святи́и,/ креще́нием кончи́ну свя́ту вку́пе прия́сте в до́му Боже́ственнем/ и к Небе́сному хра́му взя́стеся.

Богоро́дичен: Да Бог с вы́шними совокупи́т попо́лзшияся преступлени́ем в вели́к ров,/ во твою́ утро́бу всели́ся, Всенепоро́чная,/ и плоть бысть.

Песнь 6

Ирмо́с: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́.

Верховник свяще́нных был еси́ люде́й/ и предпосла́л еси́ я в ра́дости на Небеса́,/ пострада́вший, священному́чениче Анфи́ме сла́вне.

Я́ко зла́то чи́сто посреди́ огня́,/ благоче́стие ва́ше страда́льческое Иису́су позна́ся,/ со́лнца мно́жае облиста́ющее.

Умертви́вшеся пло́тию, жи́знь и́стинную насле́довасте, му́дрии, со Христо́м су́ще,/ показа́вшим вы си́льнейшия мук.

Богоро́дичен: По рождестве́ вои́стинну, я́ко пре́жде рождества́, Мари́е,/ си́лою из Тебе́ вопло́щшагося Иису́са пребыла́ еси́ Де́ва:/ чу́до вои́стинну пресла́вно.

Конда́к и и́кос пра́здника.

Песнь 7

Ирмо́с: Су́щим в пещи́ отроко́м Твои́м, Спа́се,/ не прикосну́ся, ниже́ стужи́, огнь./ Тогда́ трие́, я́ко еди́неми усты́, поя́ху/ и благословля́ху, глаго́лю ще:/ благослове́н Бог оте́ц на́ших.

Смотря́юще еди́на, я́же та́мо, блаже́ннии, пребыва́ющая си́лою Боже́ственною,/ я́коже трие́ в Вавило́не Боже́ственнии о́троцы, огня́ вы́шшии яви́стеся,/ Боже́ственным све́том просвеща́еми.

Глаго́л мучи́телев безслове́сный, му́дрии, поху́ливше, со свяще́нными жена́ми,/ и приноше́ние я́ко и́стинно Боже́ственными младе́нцы,/ приноше́ния всеце́ла Царю́ всех принесо́стеся.

Просвеще́ние зна́ния Христо́ва преднося́щи внутрь души́ всеблагогове́йно,/ те́мный безбо́жия о́блак вои́стинну страда́льцы проидо́сте/ и в Ве́чный Свет приидо́сте.

Богоро́дичен: Вы́шши яви́лася еси́ Небе́с,/ ро́ждшая всех Влады́ку и Бо́га,/ его́же приле́жно моля́щи не преста́й, Всесвята́я Чи́стая,/ спасти́ ве́рою те́плою песносло́вящия Тя.

Песнь 8

Ирмо́с: Песносло́вцы в пещи́ спа́сшаго де́ти/ и громопла́менную прело́жшаго на ро́су,/ Христа́ Бо́га по́йте и превозноси́те во вся ве́ки.

То́чат Боже́ственнаго благово́ния врачева́ние ми́ра му́чеников мо́щи/ и страсте́й смрад отъе́млют ве́рою песносло́вящих Тя, Христа́, во ве́ки.

Яви́стеся, я́ко шипцы́, страда́льцы красне́йшии,/ посреде́ ходя́ще огня́ и усе́рдно зову́ще:/ по́йте и превозноси́те Христа́ во ве́ки.

Ю́ноши, вку́пе и де́вы, и ста́рцы, и ю́нии,/ младе́нцы святи́и, жен же мно́жество безчи́сленное/ Вы́шнее улучи́ша ликова́ние, вку́пе пострада́вше.

Богоро́дичен: Иезекии́ль Тя дверь зрит заключе́нну, Де́во,/ Е́юже про́йде Иису́с, всели́выйся во утро́бе Твое́й/ и плоть от Твои́х крове́й поне́с неслия́нно.

Песнь 9

Ирмо́с: Светоно́сный о́блак, в о́ньже всех Влады́ка,/ я́ко дождь с Небесе́ на руно́, сни́де/ и воплоти́ся нас ра́ди,/ быв Челове́к, Безнача́льный,/ велича́ем вси я́ко Ма́терь Бо́га на́шего Чи́стую.

Я́ко вольнозакла́ннии а́гнцы, всесожго́стеся вку́пе,/ и, я́ко же́ртвы чи́стыя, закла́нному Влады́це о нас, земноро́дных,/ добропобе́днии му́ченицы, приведо́стеся,/ и венцы́ побе́ды досто́йно прия́сте вку́пе.

Со святы́ми проро́ки, с честны́ми апо́столы и с ли́ки избра́нных предстоя́ще А́нгел,/ мно́жество му́чеников свяще́нных, Го́споду моли́теся,/ е́же спасти́ от напа́стей и бед ве́рою блажа́щия вас.

Со́лнечных луч свяще́нная ва́ша па́мять мно́жае сия́ет, страда́льцы,/ де́монскую тьму отгоня́щи при́сно и всех просвеща́ющи, всехва́льнии,/ ве́рою и любо́вию по до́лгу блажа́щия вас.

Богоро́дичен: Свет ро́ждшая Боже́ственный, от Отца́ возсия́вший,/ омраче́нную мою́ ду́шу лестьми́ жития́/ и бы́вшую враго́м, Всенепоро́чная, игра́лище, уще́дри/ и све́том покая́ния спаси́тельнаго сподо́би, Чи́стая.

Свети́лен пра́здника:

Посети́л ны есть свы́ше Спас наш, Восто́к восто́ков,/ и су́щии во тьме и се́ни обрето́хом и́стину,/ и́бо от Де́вы роди́ся Госпо́дь. Два́жды

На стихо́вне стихи́ры, глас 6.

Подо́бен: А́нгельския:

До́ме Евфра́фов,/ Сио́не, гра́де святы́й,/ приими́ с ра́достию Влады́ку всех,/ в Тебе́, от Де́вы па́че сло́ва ражда́ема,/ градонаписа́ти хотя́ща/ ра́я отпа́дшия,/ к Нему́же зове́м:/ благослове́н прише́дый,/ Бо́же наш, сла́ва Тебе́.

Стих: Из чре́ва пре́жде денни́цы роди́х Тя,/ кля́тся Госпо́дь и не раска́ется.

Тя, нас ра́ди по нам я́вльшася, Сло́ве,/ свиря́ющих лик ви́дев в верте́пе/ пелена́ми пови́та,/ в я́слех же лежа́ща,/ пое́т Тя я́ве со А́нгелы:/ сла́ва Бо́гу в Вы́шних./ С ни́миже зове́м:/ благослове́н Рожде́йся,/ Бо́же наш, сла́ва Тебе́.

Стих: Рече́ Госпо́дь Го́сподеви моему́:/ седи́ одесну́ю Мене́.

И́же во проро́цех велегла́сный взыва́ет:/ от Де́вственнаго хо́щет роди́тися чре́ва/ Отроча́ – Влады́ка/ па́че сло́ва и мы́сли,/ А́нгел Сове́та вои́стинну Вели́ка/ и Жизнь живу́щих Сый./ С ни́миже зове́м:/ благослове́н рожде́йся,/ Бо́же наш, сла́ва Тебе́.

Сла́ва, и ны́не, глас 1:

Не́бо и земля́ днесь проро́чески да возвеселя́тся,/ А́нгели и челове́цы духо́вно да торжеству́ют,/ я́ко Бог во пло́ти яви́ся/ су́щим во тьме и се́ни седя́щим,/ рожде́йся от Де́вы;/ верте́п и я́сли прия́ша того́,/ па́стырие чу́до пропове́дуют,/ волсви́ от восто́к в Вифлее́м да́ры прино́сят./ Мы же хвалу́ недосто́йными устна́ми а́нгельски тому́ принесе́м:/ сла́ва в Вы́шних Бо́гу,/ и на земли́ мир,/ прии́де бо ча́яние язы́ков,/ прише́д, спасе́ нас от рабо́ты вра́жия.

НА ЛИТУРГИ́И

Блаже́нны, пе́сни 4-я и 5-я на 6.

Проки́мен, святы́х, глас 5: Ты, Го́споди, сохрани́ши ны/ и соблюде́ши ны от ро́да сего́ и во век.

Стих: Спаси́ мя, Го́споди, я́ко оскуде́ преподо́бный.

Апо́стол к Римляном, зача́ло 96 от полу́. 

Аллилу́ия, глас 4: Воскли́кните Го́сподеви, вся земля́:

Ева́нгелие от Луки́, зача́ло 51 от полу.

Прича́стен: Ра́дуйтеся, пра́веднии, о Го́споде: