На Го́споди, воззва́х: стихи́ры святы́я Ани́сии 3, глас 4.

Подо́бен: Я́ко до́бля:

Де́вства све́тлостию/ уясни́вшися, всехва́льная,/ муче́ния облиста́ла еси́ по́двиги:/ поклони́тися бо со́лнцу не повину́вшися,/ непра́ведное претерпе́ла еси́ заколе́ние/ и, обагри́вшися кровьми́,/ предста́ла еси́ Со́лнцу сла́вы, венцено́сице,/ и отту́ду испуща́емыми/ озаря́ема светлостьми́.

Серде́чное раче́ние явля́ющи,/ слеза́ми умиле́ния, сла́вная,/ зе́млю омочи́ла еси́/ и власы́ отира́ла еси́ Христо́во подноо́ие,/ помышля́ющи, и Того́ я́ко прису́ща предзря́щи,/ Его́же вожделе́ла еси́,/ и, стопа́м прикаса́ющися мы́слию,/ виде́нии Боже́ственнейшими/ твою́ ду́шу просвети́ла еси́.

И бога́тство расточи́вши,/ и ни́щия удовли́вши,/ уневе́стилася еси́ Нетле́нному Жени́ху́ твоему́/ и, я́коже ве́но, принесла́ еси́ тому́, всесла́вная,/ крове́й то́ки и страсте́й подража́ние,/ я́же претерпе́ла еси́, Ани́сие./ Еди́н в черто́г всели́в тя Вы́шний,/ я́ко страстоте́рпицу и му́ченицу.

И́ны стихи́ры преподо́бный Мела́нии, глас то́йже.

Подо́бен: Зва́нный свы́ше:

А́нгельским лико́м сочта́вшаяся,/ егда́ тя Боже́ственное раче́ние распали́/ и прелете́ти повине́ ви́димых/ безстра́стия ра́ди и чистоты́,/ тогда́ твоего́ супру́га словесы́ улови́ла еси́ Богопоко́рными,/ нестоя́нную отлага́ющи жития́ молву́ теку́щую./ Те́мже с ним, ве́чную обре́тши жи́знь и наслажде́ние,/ мо́лиши Влады́ку спасти́ ду́ши на́ша.

А́нгельское вожделе́вши житие́,/ егда́ сла́дкую пи́щу поплева́ла еси́,/ воздержа́нием упражня́ющися и бде́нием,/ ни́зу лежа́нием и чистото́ю,/ тогда́ чисте́йший сосу́д была́ еси́ ду́ха Боже́ственнаго,/ дарова́нии пресве́тлыми укра́шена тому́, всечестна́я;/ те́мже к ре́вности его́ Боже́ственней привлекла́ еси́ лю́ди/ и привела́ еси́ Влады́це, Мела́ние,/ и Спа́су душ на́ших.

Добро́тами доброде́телей укра́шена,/ егда́ спаси́тельное сло́во испо́лнила еси́,/ расточи́вши, подала́ еси́/ тьмы твоего́ зла́та ни́щим и убо́гим,/ тогда́ Небе́сное бога́тство восприя́ла еси́,/ пра́вдою обогати́вшися во век,/ и нетле́нием, и избавле́нием./ Те́мже чтим твое́ успе́ние/ и приле́жно мо́лим тя:/ моли́ Зижди́теля просвети́ти ду́ши на́ша.

Сла́ва, и ны́не, пра́здника, глас 1:

Сла́ва в Вы́шних Бо́гу,/ в Вифлее́ме слышу от Безпло́тных днесь,/ на земли́ ми́р Благоволи́вшему бы́ти./ ны́не Де́ва Небе́с ши́рши,/ возсия́ бо свет омраче́нным/ и смире́нныя вознесе́, а́нгельски пою́щия:/ сла́ва в Вы́шних Бо́гу.

На стихо́вне стихи́ры, глас 2.

Подо́бен: До́ме Евфра́фов:

Звезда́ от Иа́кова,/ Христо́с возсия́в,/ просвети́ язы́ки/ све́том Богозна́ния,/ того́ славосло́вим.

Стих: Из чре́ва пре́жде денни́цы роди́х Тя,/ кля́тся Госпо́дь и не раска́ется.

Гра́де Дави́дов,/ Вифлее́ме, весели́ся:/ из тебе́ бо, и́же безма́терний,/ безо́тчий воплоти́ся,/ от Де́вы Чи́стыя, Богоотрокови́цы.

Стих: Рече́ Госпо́дь Го́сподеви моему́:/ седи́ одесну́ю Мене.

Сло́во О́тчее,/ плоть прие́мь, роди́ся,/ пелена́ми пови́тся,/ во я́слех возлеже́,/ безслове́сия разреша́я мя.

Сла́ва, и ны́не, глас 1:

По о́бразу и по подо́бию,/ истле́вша преступлени́ем, ви́дев Иису́с,/ приклони́в Небеса́, сни́де/ и всели́ся во утро́бу де́вственную неизме́нно,/ да в ней истле́вшаго Ада́ма обнови́т, зову́ща:/ сла́ва я́вле́нию Твоему́,/ Изба́вителю мой и Бо́же.

Тропа́рь пра́здника, глас 4:

Рождество́ Твое́, Христе́ Бо́же наш,/ возсия́ ми́рови свет ра́зума:/ в нем бо звезда́м служа́щий/ звездо́ю уча́хуся/ Тебе́ кла́нятися, Со́лнцу Пра́вды,/ и Тебе́ ве́дети с высоты́ восто́ка./ Го́споди, сла́ва Тебе́.

Слу́жба свята́го Зо́тика поется на пове́черии

Кано́н, глас 8.

Песнь 1

Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко Еди́н сла́вно просла́вися.

Свы́ше просвети́тися омраче́нней мое́й мы́сли,/ пе́ти тя досто́йно, Зо́тике, Христа́ умоли́.

Житие́м твои́м А́нгелом на земли́, Богому́дре,ревну́я,/ показа́лся еси́ досто́йно,/ жите́йских красо́т гнуша́яся.

Богоро́дичен: Род челове́ческий Тебе́ ра́ди, Де́во, назида́ется,/ Бог бо, Вы́шних не оста́вив, на зе́млю прии́де.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Прииди́те, стра́ннии, днесь,/ ра́достно глас вознесе́м во светле́м сем торже́стве́,/ Зо́тика ублажа́юще.

Поста́вил еси́ дом твой, я́коже Авраа́м ски́нию днесь,/ вся ни́щия прие́млющий и бога́тно пита́ющий.

Богоро́дичен: Бу́рю вся́ку уста́вила еси́ в Рождестве́ Твое́м, Всечи́стая,/ те́мже враги́ ве́рнии побежда́ют, в ми́ре лику́юще.

Седа́лен, глас 5.

Подо́бен: Собезнача́льное Сло́во:

Страсте́й пе́щи, преподо́бне, угаси́л еси́ воздержа́ния росо́ю,/ дарова́нием обогати́вся, врачева́ния от Бо́га, Зо́тике, прия́л еси́/ врачева́ти ве́рных боле́зни лю́тыя и де́монов отгони́ти полки́;/ сего́ ра́ди с весе́лием почита́ем тя.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Светоно́сное торжество́ сие́ преподо́бнаго ны́не просия́ Зо́тика,/ к Рождеству́ Христо́ву призыва́ющи вся на чрежде́ние.

Чудесы́ преле́потствовав, чудеса́ пресла́вная оста́вил еси́ нам,/ честна́я твоя́ исправле́ния на земли́, преблаже́нне, о́браз Боже́ствен.

Богоро́дичен: Очисти́лище обрето́хом Тя, Богороди́тельнице,/ и прибе́жище во бране́х непобеди́мо,/ ве́рнии же держа́ву, Чи́стая, нося́т.

Песнь 5

Ирмо́с: Просвети́ нас повеле́нии Твои́ми, Го́споди/ и мы́шцею Твое́ю высо́кою/ Твой ми́р пода́ждь нам,/ Человеколю́бче.

Украше́ние доброде́тели показа́ся, чу́дне, честна́я твоя́ исправле́ния,/ Боже́ственный дом, наги́х одея́ние.

Прокаже́ние, свяще́нне, исцеля́я, о́тче,/ воздви́гл еси́ враче́бницу твой дом честны́й,/ в не́мже досто́йно всяк неду́г врачу́ется.

Богоро́дичен: Ве́лие и честно́е е́же в Тебе́ я́вльшееся та́инство, Богоро́дице Присноде́во:/ се бо вои́стинну, земни́и, к Бо́гу примири́хомся.

Песнь 6

Ирмо́с: Бе́здна грехо́в и прегреше́ний бу́ря мя смущает/ и во глубину́ ну́жднаго ре́ет мя отча́янияу/ но твою́ кре́пкую ру́ку мне простри́, я́ко Петро́ви,/ о Упра́вителю! и спаси́.

Храм тя, вси ве́рнии, ду́ха ве́мы,/ храм бо всеблаголе́пен твой сотвори́л еси́ дом, пресла́вне,/ в не́мже всяк неду́г моли́твами твои́ми отгоня́ется.

Странноприя́тие на земли́, Авраа́му подо́бяся, поста́вил еси́,/ всеблагоче́стно безкро́вныя прие́мля, наги́я, и мимоходя́щия,/ и хромы́я, и стра́нныя, и ни́щия вводя́.

Богоро́дичен: Не́бо на земли́, Де́во, показа́вый верте́п,/ Небе́сный Тя храм, А́нгельскими окруже́н ли́ки, показа́,/ сла́ва в Вы́шних вопию́щих Твоему́ Рождеству́ ве́рно.

Конда́к, глас 2.

Подо́бен: Тве́рдыя:

За любо́вь Христо́ву, преподо́бне, ни́щия возлюби́в,/ и сих удово́лил еси́,/ и Небе́сное бога́тство ны́не восприя́л еси́, Зо́тике пребога́те./ Сего́ ра́ди вси тя почита́ем,/ соверша́юще па́мять твою́.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Всем преподо́бным сочи́слился еси́/ и лико́м Боже́ственным безтеле́сным, Зо́тике преблаже́нне,/ с ни́миже и взыва́еши:/ благослове́н еси́, Го́споди Бо́же, во ве́ки.

Си́лою и благода́тию, Богому́дре, был еси́ вдов и не́мощны́х,/ сиро́т же оте́ц показа́лся еси́, зовы́й:/ благослове́н еси́, Го́споди Бо́же, во ве́ки.

Богоро́дичен: Кре́пость ва́рваров, Богоро́дице, истреби́ и спаси́ лю́ди Твоя́./ Ве́рныя же утверди́, вопию́щия:/ благослове́н, Всечи́стая, Плод Твоего́ чре́ва.

Песнь 8

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Сия, му́дре, победи́тельная, сия́ исправле́ния,/ и я́же убо́гих и жен сле́зы,/ твой храм показа́ша Небесе́ вы́шший,/ и ца́рствия тебе́ вхо́ды отверзо́ша./ Ве́рою бо вопия́л еси́:/ о́троцы, благослови́те, свяще́нницы, воспо́йте Го́спода,/ лю́дие, превозноси́те во вся ве́ки.

Сна твои́м не дал еси́ очесе́м, досточу́дне,/ ниже́ ве́ждам дрема́ния, Богоприя́тне,/ до́ндеже де́ло Боже́ственное, слове́сный рай Христо́в, до конца́ соверши́л еси́, поя́:/ о́троцы, благослови́те, свяще́нницы, воспо́йте Го́спода/ и превозноси́те во вся ве́ки.

Богоро́дичен: Человеколю́бчем ми́лости Твоея́ к нам прише́л еси́,/ и́же спасе́ния ра́ди быв я́ко Челове́к,/ и в верте́п всели́лся еси́, пелена́ми повива́емь,/ и земноро́дныя от страсте́й воздви́гл еси́, согла́сно пою́щия:/ свяще́нницы, воспо́йте Го́спода,/ лю́дие, превозноси́те во вся ве́ки.

Песнь 9

Ирмо́с: У́жасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком плотски́/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Благода́ть тебе́, о́тче, от Бо́га даде́ся лечи́ти неду́ги,/ ни́щия, и сухи́я, и хромы́я;/ я́же я́ко люби́мичи Христо́вы ве́рно прие́мля, с си́ми ра́дуешися при́сно,/ в не́дрех Авраа́мовых водворя́яся.

Напита́л еси́, о́тче, оби́льно вся́каго стра́нна, и на́га, и мимоходя́ща;/ с патриа́рхи при́сно и с пра́ведными ны́не ра́дуешися све́тло/ иде́же бога́тство и сла́дость,/ иде́же присносу́щное спаса́емых упова́ние,/ иде́же всем бога́тство есть Христо́с.

Богоро́дичен: Я́ко су́щи Ма́ти Бо́жия,/ я́ко Предста́тельница и приста́нище чту́щих Тя,/ я́ко прибе́жище всех, Де́во, притека́ющих к Тебе́,/ я́ко ве́рных же ра́дость,/ и сла́ва, и утвержде́ние, и вене́ц досто́ин,/ лю́ди Твоя́, Богоро́дице, спаса́й.

Стихи́ры, глас 6.

Подо́бен: Тридне́вен:

Я́ко Авраа́м нра́вы, му́дре,/ показа́лся еси́ по обоему́:/ твой дом дово́льное оби́льство отве́рзл еси́ всем,/ подай тре́бующим/ и да́руя ни́щим ми́лость.

Вдов и ни́щих Тя Христо́с показа́ прие́мника,/ вре́дных засту́пника те́пла,/ предста́теля в бе́дах,/ побо́рника и изба́вителя восхваля́ющих, о́тче наш.

Сла́ва, глас то́йже:

Си́лою укрепля́емь и благода́тию украша́емь/ Ро́ждшагося в верте́пе, Зо́тике,/ поще́нием и воздержа́нием стра́сти победи́л еси́/ и прия́л еси́ победи́тельная.

И ны́не, глас то́йже:

Я́ко Младе́нца в я́слех восклони́, Христе́ Бо́же,/ безсе́менно ро́ждшая Тя Де́ва,/ ли́цы же Безпло́тных с высоты́ вопия́ху:/ сла́ва Зижди́телю и Бо́гу всех.

НА У́ТРЕНИ

Тропа́рь пра́здника, трижды.

По 1-й стихо́логии седа́лен, глас 1.

Подо́бен: Ка́мени запеча́тану:

Прему́дрость и ра́зум пре́жде веков Сый,/ Сын, Единосу́щный Отцу́ и Ду́ху,/ восхоте́ в после́дняя вре́мена роди́тися от Де́вы нас ра́ди,/ да спасе́т ми́р от мучи́тельства вра́жия и чужда́го;/ сла́ва Рожде́нному пло́тию,/ сла́ва Благоизво́лившему,/ сла́ва Избавльшему́ нас Рождество́м Свои́м.

Сла́ва, и ны́не, то́йже.

По 2-й стихологии седа́лен, глас 8.

Подо́бен: Повеле́нное:

Да ра́дуется Не́бо, земля́ да весели́тся,/ я́ко роди́ся на земли́ А́гнец Бо́жий, подая́й ми́ру избавле́ние:/ Сло́во, и́же в не́дрех Сый Отца́,/ про́йде из Де́вы без се́мене./ его́же волсви́ дивля́хуся, зря́ще Бо́га во пло́ти,/ па́стырие же взыва́ху:/ сла́ва вои́стинну еди́ному Бо́гу.

Сла́ва, и ны́не, глас то́йже.

Подо́бен: Прему́дрости:

Нетле́нная сла́ва и Боже́ственная,/ из ложе́сн проше́л еси́ де́вственных/ и це́лу соблю́л еси́ и Де́ву ро́ждшую,/ и я́ко престо́л я́сли, в ни́хже роди́вся, почи́л еси́/ и кра́сну пала́ту верте́п показа́л еси́;/ поя́ху Тя па́стырие я́ко Царя́ всех,/ звезда́ же спутеше́ствова Боже́ственный Свет показа́ти волхво́м./ Те́мже вси вопие́м Ти:/ Влады́ко Христе́ Бо́же, прегреше́ний оставле́ние низпосли́/ пра́зднующим ве́рою Твое́ Боже́ственное Рождество́.

Кано́н пра́здника, глас 1, со ирмосо́м на 6, творе́ние кир Иоа́нна (зри день 25-й).

И святы́х два кано́на. Кано́н святы́я Ани́сии, глас 4. Творе́ние Фео́фа́ново.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Пою́щу светоно́сную па́мять твою́, Свет мне низпосли́,/ я́ко Отцу́ Све́тов предстоя́щи в ра́дости, всехва́льная,/ страсте́й мои́х бу́рю твои́ми моли́твами отгоня́щи.

Воздержа́нием душе́вную обнови́ла еси́, Богому́драя, ни́ву,/ муче́ния клас плоди́вши де́лателю, соблю́дшему и кре́пость тебе́ вдохну́вшему,/ де́во му́ченице досточу́дная.

Руце́ твое́й, богате́йше подаю́щей бога́тство тле́нное,/ бога́тотворную приобрела́ еси́ жи́знь, ника́може мимотеку́щую,/ и сокро́вище неистощи́мое, му́ченице, и сла́ву Небе́сную.

Богоро́дичен: Из Тебе́, Неискусобра́чная, днесь вся́ческих Творе́ц плотски́ ражда́ется по нам/ и пелена́ми повива́ется, повива́яй мо́ре мгло́ю,/ Ма́ти Присноде́во.

Кано́н преподо́бныя Мела́нии, глас то́йже. Творе́ние Фео́фа́ново.

Песнь 1

Ирмо́с: Отве́рзу уста́ моя́,/ и напо́лнятся ду́ха,/ и сло́во отры́гну Цари́це Ма́тери,/ и я́влю́ся, све́тло торжеству́я,/ и воспою́, ра́дуяся, Тоя́ чудеса́.

Страсте́й омраче́нием очерне́вша мя всю́ду, просвети́в,/ очи́сти светоно́сными моли́твами преподо́бныЯ Твоея́, Человеколю́бче, Мела́нии/ и, сию́ чтущу, сло́во ми вдохни́.

Те́пле после́довала еси́ тебе́ ра́ди во́льное распя́тие Претерпе́вшему,/ на ра́мех нося́щи, всеблаже́нная, усе́рдно крест твой,/ и сего́ сохрани́ла еси́ опра́вдания.

Роди́телей пристра́стия и пло́ти любосла́стия до конца́ уклони́лася еси́,/ еди́наго вожделе́вши рачи́теля – Христа́, Богому́драя, добро́ты;/ его́же вся жела́ют, Сло́ва причаща́ющиися.

Богоро́дичен: Обнища́вает бога́тый, мене́ обогаща́я Божество́м,/ зле обнища́вшаго невоздержа́нием пе́рвее,/ и Безнача́льный се́ нача́ло прие́млет,/ от Де́вы ражда́емь Богоотрокови́цы.

Песнь 3. Ин. Святы́я Ани́сии

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Добро́ты твоея́ душевныя Творе́ц твой вожделе́в,/ неве́сту тя, вои́стинну добру́ и непоро́чну, му́ченице,/ Себе́ обручи́л есть.

Стра́сти Безстра́стнаго, умертви́вшагося нас ра́ди,/ умерщвле́ние, му́ченице честна́я, лю́бящи,/ му́ченическою умира́еши сме́ртию.

Я́ко заколе́ние духо́вно,/ я́ко же́ртва чиста́ соверше́на Тебе́, Бо́гу, принесе́ся,/ я́же Твой Крест в озлюби́вшая.

Богоро́дичен: Село́ вме́стно Невмести́маго Соде́теля была́ еси́,/ сего́ пло́тию вмести́вши, Обра́дованная Пречи́стая.

Ин. Преподо́бныя Мела́нии

Ирмо́с: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною Му́дростию, Христе́:/ несть бо свят, па́че Тебе́, Человеколю́бче.

Я́же ни́жних отсту́пльше жела́ний,/ все жела́ние дала еси́ благоче́стно произво́лением, сла́вная,/ к бу́дущим то́кмо и ве́чнующим.

Приле́жными моли́твами чу́вствия украси́ла еси́/ и Ду́ха заря́ми светови́дна была́ еси́ вся,/ в телеси́ невеще́ственное житие́ подража́вши.

И веща́ющи, и молча́щи, яви́лася еси́ наказа́ние,/ неутвержде́ных утвержде́ние, мона́шествующих о́браз, Мела́ние Богому́драя;/ те́мже пое́м тя.

Богоро́дичен: Обла́гаяй Небеса ́о́блаки хоте́нием/ повива́ется во́лею, рука́ми Де́вы держи́мь,/ руки́ мя исхища́я борца́.

Конда́к Ани́сии, глас 4:

Наста́ светоно́сный день чуде́сных по́двиг твои́х, страстоте́рпице пресла́вная,/ днесь Бо́жия честна́я Це́рковь пра́зднует и созыва́ет вопи́ти тебе́:/ ра́дуйся, де́во му́ченице Ани́сие всеблаже́нная.

Конда́к Мела́нии, глас 3.

Подо́бен: Де́ва днесь:

Де́вства чистоты́ возлю́бльши и обру́чника к благи́м увеща́вши,/ премно́жество бога́тства расточи́/ в пребыва́ние и́ночествующим, Богоблаже́нная, и оби́тели воздви́же./ Те́мже в Небе́сная оби́тели всели́ся,/ помина́й нас, Мела́ние всечестна́я.

Седа́лен Ани́сии, глас 4.

Подо́бен: Вознесы́йся на Крест:

Над страстьми́ плотски́ми ца́рствующи,/ страстьми́ живо́творными воцари́лася еси́,/ от твоея́ кро́ве обагри́вши, честна́я,/ червлени́цу нетле́нну благоче́стно, Ани́сие;/ те́мже Всецаря́ неве́ста непоро́чна яви́лася еси́./ Но от бед изба́ви нас,/ соверша́ющих сла́вную па́мять твою́.

Сла́ва, Мела́нии, глас то́йже.

Подо́бен: Ско́ро предвари́:

Боже́ственная повеле́ния соверша́ющи со тща́нием,/ расточи́вши, разда́ла еси́ тьмы зла́та твоего́ ни́щим:/ взе́мши же крест твой на ра́мена, Мела́ние,/ вку́пе с твои́м жени́хом после́довала еси́ ве́рою Христу́,/ распе́ншемуся пло́тию, еди́ному Бо́гу на́шему.

И ны́не, пра́здника, глас то́йже:

Боже́ственне весели́тся тварь вся ны́не:/ Христо́с бо Госпо́дь, Бо́жий Сын, от Де́вы ражда́ется Чи́стыя,/ весь челове́ческий род обезсме́ртствуя,/ реш́а же кля́тву прама́тере Е́вы./ Те́мже я́ко Благоде́телю на́шему пе́ние принесе́м.

Песнь 4. Ин. Святы́я Ани́сии

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Живоно́сным твои́м стопа́м после́дующи,/ копие́м в ре́бра уязвля́ется и обраща́емое неле́стно прохо́дит ору́жие/ раба́ Твоя́, Влады́ко Христе́, воспева́ющи Тя.

Муче́ния сия́ющи светлостьми́ и нетле́ния венце́м увя́зшися,/ ра́дующися, предстои́ши Христу́, Жени́ху́ твоему́,/ му́ченице Ани́сие всехва́льная.

Запе́ншаго ле́стию пе́рвую Е́ву,/ му́ченическими противле́ньми побе́ждши, низложи́ла еси́,/ показа́вши некре́пка, Христу́ воспева́ющи:/ сла́ва си́ле Твое́й, Го́споди.

Богоро́дичен: И́же невеще́ственная существа́ Созда́вый,/ теле́сно, я́ко Челове́к, из Тебе́, Богома́ти, днесь ражда́ется,/ тому́ воспои́м:/ сла́ва си́ле Твое́й, Го́споди.

Ин. Преподо́бный Мела́нии

Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ слава, Христе́, си́ле Твое́й.

Воздержа́нием по́хоти плотски́я умертви́вши,/ жи́знь живу́щих име́ла еси́, все́лльшуюся в тя, всечестна́я;/ к не́йже, от земли́ преста́вльшися, всели́лася еси́,/ Ца́рствия Небе́снаго наслажда́ющися.

Мно́гия твоя́ тьмы зла́та разда́вши а́лчущим,/ вои́стинну сия́ скрыва́еши в сокро́вищах, никогда́же ветша́ющих,/ во ве́ки же соблюда́ющим тебе́ дово́льное пребыва́ние.

Ми́лования твоего́ бога́тство я́коже река́ бысть,/ напая́ющи вся́кое ни́щих се́рдце, сла́вная, скве́рну отмыва́ющи нищеты́,/ бога́тство некрадо́мо исхода́тайствующи тебе́ на Небесе́х неистощи́мое.

Богоро́дичен: Похоте́м повину́вся страсте́й, я́коже безслове́сен,/ слове́сен сый, приложи́хся ското́м;/ но, Сло́во поро́ждшая Присносу́щное,/ не пре́зри мене́, всегда́ погиба́ющаго.

Песнь 5. Ин. Святы́я Ани́сии

Ирмо́с: Ты, Го́споди, мой Свет,/ в ми́р прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Тя, Го́споди, исто́чник спасе́ния ве́дящи,/ ча́шу спасе́ния несумне́нным се́рдцем му́ченица Твоя́ испи́.

Ю́ница Христо́ва, Богоприя́тное заколе́ние, Богопринесе́нная же́ртва,/ страстоно́сице Госпо́дня, моли́ спасти́ся нам.

Свет была́ еси́, Све́ту вели́кому ясне́е прибли́жившися,/ и просвеща́еши светоно́сную па́мять твою́ пра́зднующия.

Богоро́дичен: Тя ору́жие непобеди́мое на враги́ предлага́ем,/ Тя утвержде́ние и наде́жду на́шего спасе́ния,/ Богоневе́сто, стяжа́хом.

Ин. Преподо́бныя Мела́нии

Ирмо́с: Нечести́вии не узрят сла́вы Твое́я, Христе́,/ но мы Тя, Единоро́дне,/ Оте́ческия сла́вы Сия́ние Божества́,/ от но́щи у́тренююще, воспева́ем Тя, Человеколю́бче.

Безобра́зныя ви́ды страсте́й до конца́ от души́ острога́вши, честна́я,/ ша́ром воздержа́ния живонаписа́ла еси́ в ней безстра́стие/ и любо́вь нелицеме́рну.

Све́тло, я́ко зерца́ло, бы́вши я́ве,/ светле́ дарова́ния ду́ха Боже́ственнаго, сла́вная, восприя́ла еси́/ и ве́рныя просвети́ла еси́ све́тлостию жития́ твоего́.

Воздержа́нием погаси́вши страсте́й распале́ние,/ огнь возжгла́ еси́ душе́вный, во всем житии́ твое́м блиста́ющися/ и омраче́ния де́монская отража́ющи.

Богоро́дичен: Де́ва роди́ Бо́га Емману́ила во гра́де Вифлее́ме, Еде́м отверза́ющаго,/ дре́вле ми заключе́нный невоздержа́нием сне́ди и ле́стию зми́я.

Песнь 6. Ин. Святы́я Ани́сии

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Му́жеский в же́нстем телеси́ ум восприи́мши,/ к боре́нию враго́в безпло́тных, му́ченице, изшл́ еси́/ и ору́жием терпе́ния ты́я умертви́ла еси́.

Кровными наводне́нии мо́ре изсуши́ла еси́ злове́рия,/ Христо́ву же честну́ю напои́ла еси́ Це́рковь, Ани́сие страстоте́рпице,/ дев похвало́.

Немо́кренно подвиго́в прешла́ еси́ бу́рю непотопле́нно,/ те́мже в приста́нище невла́емо устреми́лася еси́/ и и́стинныя наслажда́ешися тишины́, пресла́вная.

Богоро́дичен: Созда́вый по о́бразу Своему́ челове́ка/ за мно́гое благоутро́бие назидает того́,/ из Тебе́, Де́во Богома́ти, весь в него́ обле́кся.

Ин. Преподо́бныя Мела́нии. Ирмо́с то́йже

Немо́кренно жите́йское прешла еси́ обурева́ние,/ направля́ема манове́нием вся сло́вом Сотво́ршаго,/ и в приста́нище спасе́ния, Мела́ние, дости́гла еси́.

И́скрами те́плаго твоего́ е́же к Го́споду раче́ния/ разжже́нныя стре́лы грехо́вныя вся попали́шася,/ и де́монское злоде́йство до конца́ погубле́но бысть.

Ум твой, к лу́чшему едине́нием обожа́емь,/ су́щия к пло́ти любве́ отлучи́ся манове́нием всеси́льным;/ сего́ ра́ди поще́ния труды́ понесла́ еси́.

Богоро́дичен: Обожа́ет мя от Де́вы рожде́йся Госпо́дь,/ и пелена́ми повива́ется, разреше́ние творя́ мои́х прегреше́ний,/ и вмеща́ется в верте́п,/ и́же все́ми невмести́мый.

Конда́к и и́кос пра́здника.

Песнь 7. Ин. Святы́я Ани́сии

Ирмо́с: Спасый во огни́ Авраа́мския Твоя́ о́троки/ и халде́и уби́в,/ я́же пра́вда пра́ведно уловля́ше,/ препе́тый Го́споди,/ Бо́же оте́ц на́ших, благослове́н еси́.

Твою хра́мину душе́вную, му́ченице,/ мы́сленно водруже́нную испове́данием Христо́вым,/ мучи́ельныя поте́кше пото́ки ника́коже поколеба́ша,/ Бо́же, – вопию́щую, – благослове́н еси́.

Пра́вды Со́лнца, Христа́, ве́дящи, му́ченице,/ не восхоте́ла еси́ злочести́вне пожре́ти со́лнцу,/ повелева́ющу мучи́телю, но пе́ла еси́:/ Бо́же оте́ц на́ших, благослове́н еси́.

От твои́х крове́й свяще́нных омочи́вши себе́ багряни́цу,/ победи́тельным главу́, му́ченице, венце́м венча́ла еси́,/ и Бо́гу ны́не предстои́ши, Царю́ Безсме́ртному, веселя́щися.

Богоро́дичен: Пови́вый не́бо о́блаки, зе́млю же мгло́ю,/ от Твоего́ чре́ва ро́ждся, пелена́ми повива́ется/ и во я́слех полага́ется, Богома́ти Всенепоро́чная,/ спаса́я ве́дущия Тя, Богоро́дицу.

Ин. Преподо́бныя Мела́нии. Ирмо́с то́йже.

С супру́жником Христо́во и́го нося́щи, Богоно́сная,/ обнови́сте моли́тв ра́лом ду́ши и, ни́ву до́брых возде́лавше,/ наслажда́етеся во ве́ки Вы́шния сла́вы.

Я́ко ма́слина, псало́мски в до́му Бо́жии насажде́на,/ умаща́еши та́инственно сердца́, преподо́бная,/ и ли́ца еле́ем боле́зней твои́х ве́рно восхваля́ющих твоя́ по́двиги.

Воздержа́ния ороше́нием угаси́вши страсте́й пе́щи,/ одожде́нием моли́тв врачева́ний пучи́ны источи́ла еси́,/ и страсте́й приверже́ния потопля́ющи, Мела́ние, чту́щих тя.

Богоро́дичен: Руно́ Тя, рече́ Дави́д, я́ко дождь прие́мшу Небе́сный, Чи́стая,/ беззако́ния пото́ки изсуша́ющь/ и ве́рных напоя́ющь смы́слы, грехо́м пресо́хшия.

Песнь 8. Ин. Святы́я Ани́сии

Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.

Вдова́м, сирота́м же, и ни́щим,/ и всем тре́бующим бога́тство расточи́ла еси́,/ Вседержи́теля лю́бящи несомне́нно повеле́ния,/ и муче́ния же честны́я и́щеши ча́ши,/ ю́же испи́вши, уста́вила еси́, де́во честна́я, жела́ния.

Я́ко ве́но, принесла́ еси́ Христу́ пост и сле́зы,/ страсте́й умерщвле́ние и кро́ве проли́тие, ребр прободе́ние:/ не обветша́ющий Сам тем тебе́ вене́ц/ и черто́г нетле́нен подае́т и сла́ву Небе́сную.

Живе́ши со А́нгелы во Све́те, дев с чи́нми,/ и собо́ры му́ченик спра́зднующи,/ лице́ Жениха́ твоего́ к лицу́ зря́щи,/ и све́тлыя сла́вы причаща́ющися, и вопию́щи: благослови́те, вся дела́ Госпо́дня, Го́спода.

Богоро́дичен: Се ны́не оскуде́ я́ве от Иу́дова пле́мене князь и вождь:/ Ты бо, Всенепоро́чная, родила́ еси́,/ я́же тому́ пре́жде отлежа́щая, жда́ние язы́ков, Христа́./ Ему́же пое́м: благослови́те, вся дела́ Госпо́дня, Го́спода.

Ин. Преподо́бный Мела́нии

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те его́ во вся ве́ки.

Храм се́рдце и те́ло Тро́ице Пребоже́ственней соверши́вши,/ Боже́ственныя возсозда́ла еси́ хра́мы, достосла́вная,/ в ни́хже дев чи́ны и мона́шествующих ли́ки совокупи́ла еси́,/ пою́щия согла́сно и превознося́щия Христа́ во вся ве́ки.

Ми́лостынею ми́лость стяжа́ла еси́,/ расточи́вши, дала́ еси́ убо́гим,/ пра́вда твоя́ пребыва́ет, ве́чнующи,/ и е́же от сея́ приобре́тение тебе́ неветша́емое, Мела́ние, Богоно́сице преподо́бная./ Те́мже тя чтим, я́ко вои́стинну победоно́сицу.

Смы́слом, му́жеством, целому́дрием и Боже́ственною пра́вдою блиста́ющи,/ име́ла еси́ вознося́щее тя на высоту́ Небе́сную высокотво́рное смире́ние,/ и́мже низложи́ла еси́, преподо́бная, велича́ваго зми́я:/ тем тя почита́ем, я́ко и́стинную победоно́сицу.

Богоро́дичен: Страсте́й мя смуща́ют треволне́ния,/ глубина́ отча́яния потопля́ет мя,/ спаси́ мя, Всенепоро́чная Ма́ти, и спасу́ся:/ Спа́са бо Го́спода родила́ еси́, во я́слех я́ко Младе́нца положе́на,/ его́же превозно́сим во вся ве́ки.

Песнь 9. Ин. Святы́я Ани́сии

Ирмо́с: Ка́мень нерукосе́чный/ от несеко́мыя горы, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Ка́мению принося́щии че́сти па́че Зижди́теля,/ зре́ти тя, сла́вная, не терпя́ще, Бо́гу возложену́, мече́м ссека́ют,/ сме́ртию Боже́ственное безсме́ртие тебе́ обруча́юще.

Фессалони́тский град твои́ми пелена́ми и страда́ньми, му́ченице, хва́лится, де́во;/ Це́рковь же перворо́дных с пра́ведными и́мать твой дух Боже́ственный, веселя́щийся.

Лива́н, зла́то же и сми́рну/ в Вифлее́ме Рожде́нному волсви́ принесо́ша ве́рою,/ страстоте́рпица же кровь муче́ния излия́ние,/ о нас того́ моля́щи.

Богоро́дичен: Жезл прозя́бла еси́ из ко́рене Иессе́ева, Богороди́тельнице,/ цвет Божества́, Христа́, нам ро́ждши, Всечи́стая, днесь,/ его́же, я́ко Бо́га Невмести́маго/ и ны́не я́ко Младе́нца, пелена́ми повива́ема, велича́ем.

Ин. Преподо́бныя Мела́нии

Ирмо́с: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови Благослове́ние про­цвела́ еси́./ Тем Тя вси велича́ем.

На высоту́ я́ве кра́йняго соверше́нства востекла́ еси́, блаже́нная,/ и пости́гла еси́ чи́ны Безтеле́сных,/ ко и́стинному жела́нию прибли́жившися,/ исто́чник благи́х ны́не прия́ла еси́;/ тем тя вси ублажа́ем.

С ли́ки весели́шися по́стников, воздержа́вшися и стра́сти умертви́вши,/ зри́ши откро́венным лице́м Бо́жию красоту́,/ ю́же пре́жде я́вле́ния стяжа́ла еси́ целому́дрием,/ Мела́ние всеблаже́нная.

Ходи́вши стезе́ю те́сною, простра́ннаго ра́я широты́ дости́гла еси́,/ иде́же ра́дость пра́зднующих, иде́же дре́во жи́зни есть,/ нас непреста́нно помина́ющи, чту́щих твое́ успе́ние.

Богоро́дичен: И́же на плеща́х Херуви́мов стра́шно носи́мый,/ на руку́ ны́не седи́т Отрокови́цы Чи́стыя,/ и пелена́ми повива́ется, разреша́я плени́цы зол на́ших,/ и млеко́м я́ко Младе́нец пита́ется,/ пита́яй вся́кое дыха́ние.

Свети́лен пра́здника:

Посети́л ны есть свы́ше Спас наш, Восто́к восто́ков,/ и су́щии во тьме и се́ни обрето́хом и́стину,/ и́бо от Де́вы роди́ся Госпо́дь.

На стихо́вне стихи́ры, глас 6.

Подо́бен: А́нгельския:

Се А́гнец Бо́жий,/ ми́ра взе́мляй грех я́ко Бог,/ во я́слех возлежи́т я́ко Младе́нец,/ слове́сныя хотя́ изба́вити/ вся́ких страсте́й безслове́сия/ и ве́чнаго томле́ния./ К Нему́же зове́м:/ благослове́н рожде́йся,/ Бо́же наш, сла́ва Тебе́.

Стих: Из чре́ва пре́жде денни́цы роди́х Тя,/ кля́тся Госпо́дь и не раскается.

О, па́че ума́/ и неизглаго́ланных та́инств!/ Ражда́ется Бог на земли́ за благоутро́бие,/ ра́бий о́браз Себе́ Самому́ обложи́в,/ я́ко да от рабо́ты исхи́тит чужда́го/ ве́рою тому́ зову́щия:/ благослове́н рожде́йся,/ Бо́же наш, сла́ва Тебе́.

Стих: Рече́ Госпо́дь Го́сподеви моему́:/ седи́ одесну́ю Мене́.

Станем благогове́йно в дому́ Госпо́дни,/ с восклица́нии воспои́м согла́сно/ сего́ благоутро́бие/ и мно́гое низхожде́ние,/ ка́ко в Вифлее́ме Иуде́йстем/ Младе́нец изво́ли яви́тися?/ И возопии́м:/ благослове́н рожде́йся, Бо́же наш, сла́ва Тебе́.

Сла́ва, и ны́не, подо́бен то́йже:

Со́лнце, Сы́не,/ ка́ко Тя скры́ю пелена́ми?/ Ка́ко Тя млеко́м воздою́,/ всего́ естества́ Пита́теля?/ Ка́ко Тя рука́ми держу́,/ держа́щаго вся́ческая?/ Ка́ко на Тебе́ без стра́ха воззрю́,/ на Него́же не сме́ют зре́ти Многоочи́тии?/ Неискусобра́чная, Христа́ держа́щи, веща́ше.

НА ЛИТУРГИ́И

Блаже́нны пра́здника, песнь 8-я, на 6.

НА МА́ЛОЙ ВЕЧЕ́РНИ

На Го́споди, воззва́х: стихи́ры на 4, глас 6:

Воспои́м Го́сподеви,/ удиви́вшему вся хоте́ния Своя́ во святы́х,/ в ни́хже и су́ща на земли́ его́ просла́вил чудоде́йствии/ уго́дника Своего́ Дании́ла.

Всем благочестному́дрствующим/ зело́ че́стен был еси́,/ я́ко друг Бо́жий, блаже́нне Дании́ле,/ тем оби́тель угото́вася тебе́ в дому́ Отца́ Небе́снаго,/ в не́йже Единоро́дный Сын его́/ с труди́вшимися упокой тя ве́чно.

О́тче Дании́ле,/ уго́дниче, дру́же и слуго́ Госпо́день,/ сый и торжеству́яй та́мо,/ иде́же и Госпо́дь твой,/ помяни́ и нас, обремене́нных греха́ми,/ да и мы, взе́мше и́го Христо́во на себе́,/ научи́мся незло́бию и серде́чному смире́нию/ от Спа́са душ на́ших.

Сла́ва, глас 8:

Днесь све́тится град Переясла́вль,/ прии́де бо его́ свет/ и сла́ва Госпо́дня на нем возсия́,/ днесь похваля́ему пра́веднику веселя́тся лю́дие,/ я́ко просла́ви Бог просла́вившего его́ в телеси́ свое́м и в души́ свое́й./ Те́мже и те́ло его́ соблюде́ нетле́нно нам,/ моля́щимся и прося́щим его́ ра́ди/ от Христа́ Бо́га грехо́в оставле́ния.

И ны́не, Богоро́дичен:

Дух Святы́й, наше́д на Тя,/ и си́ла Вы́шняго, осени́в Тя,/ соде́ла прия́телище невмести́маго Бо́га./ Покажи́ и нас храм свят Уте́шителя Пресвята́го Ду́ха,/ Безневе́стная Дево.

На стихо́вне стихи́ры, глас 2:

Бодрствовал, стоя́л в ве́ре,/ му́жался, утвержда́лся еси́/ и, по́двиг твой над все́ми запечатле́в тве́рдою на Бо́га наде́ждою,/ сконча́л еси́ тече́ние, блаже́нне.

Стих: Честна́ пред Го́сподем/ смерть преподо́бных Его́.

А́ще и заше́л еси́ от нас во гроб,/ усну́в сном сме́рти, блаже́нне,/ оба́че в воскреше́ние пра́ведных просвети́шися, я́ко со́лнце,/ в Ца́рствии Отца́ Небе́снаго.

Стих: Блаже́н муж, боя́йся Го́спода,/ в за́поведех Его́ восхо́щет зело́.

В сию́ за́поведию/ е́же лю́бити Бо́га и бли́жняго,/ весь зако́н и проро́цы ви́сят,/ Христо́с рече́, И́стина;/ ты, рабо́тав Го́сподеви со стра́хом,/ вся сия́ сохрани́л еси́ от ю́ности твоея́, блаже́нне.

Сла́ва, глас 3:

Марфа печа́шеся и мо́лвяше о мно́зе,/ Мари́и небре́гшей о ея́ службе,/ я́ко седя́ше при ногу́ Иису́сову,/ прилежа́ слы́шанию сло́ва Бо́жия;/ сопричти́ и нас избра́вшей благу́ю часть,/ разгоня́я мрак су́еты жите́йския/ твои́ми моли́твами, преподо́бне.

И ны́не, Богоро́дичен:

Да не хва́лится си́льный си́лою свое́ю,/ да не хва́лится бога́тый бога́тством свои́м,/ велича́яся благи́ми ми́ра сего́,/ я́ко ничто́же су́щими,/ но хваля́йся да хва́лится о Тебе́,/ я́ко неотъе́млемой от нас, христиа́н, части,/ Бла́гая Предста́тельница на́ша, Влады́чице.

Та́же Ны́не отпуща́еши: Трисвято́е и по О́тче наш: тропа́рь, пи́сан на вели́цей вече́рни.

Сла́ва, и ны́не, Богоро́дичен.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры на 8, глас 6:

Беззако́нноваша иуде́е, изше́дшии из Еги́пта,/ сли́тием тельца́ в Хори́ве,/ пред ни́мже ядо́ша и пи́ша,/ сего́ ра́ди и гнев Бо́жий взы́де на Изра́иля;/ да не подо́бное что постра́ждем и мы,/ служа́ще мамо́не, а не Бо́гу рабо́тающе,/ ты, свя́те, предста́ни нам,/ да Госпо́дь исто́ргнет ка́менное се́рдце от пло́ти на́шея/ и даст нам се́рдце пло́тяно,/ покая́нием удобопреклоня́ющееся к творе́нию святы́х его́ за́поведей.

Согреши́ша изра́ильтестии лю́дие,/ испроси́вше себе́ царя́,/ и бысть о них предста́тель ве́рен Самуи́л Го́споду во проро́цех;/ согреши́хом и мы, вожделе́вше по́хоть плотску́ю,/ и по́хоть оче́с, и го́рдость жите́йскую,/ но, о блаже́нне,/ я́коже Самуи́л о тех лю́дех,/ си́це о нас помоли́ся,/ да не у́мрем во гресе́х на́ших.

Яви́ся дре́вле от враго́в бе́дствовавшим лю́дем/ моля́йся о о́нех и о святе́м гра́де/ Иереми́я, Бо́жий проро́к,/ и прии́де от Бо́га иуде́ом спасе́ние./ Воста́ша и на ны врази́ наши,/ мир, плоть и диа́вол,/ и оскверни́ша святы́ню хра́ма душе́внаго и теле́снаго,/ но ты, преподо́бне, сый братолю́бец,/ прииди́ к нам и сокруши́, я́ко мече́м, твои́ми моли́твами/ о́ных кова́рства.

Глас 2:

Пока́йтеся – сей глас Предте́чи, вопию́щаго в пусты́ни;/ бу́дите гото́ви, – сей Христа́ Го́спода, веща́ющаго нам;/ на́ше же се́рдце одебеле́, и уши́ма тя́жко слы́шим./ Избра́нниче Бо́жий Дании́ле,/ твои́м предста́тельством наста́ви,/ во е́же возмощи́ нам убежа́ти от суда́ огня́ гее́нскаго,/ и да, сотво́рше плоды́ досто́йны покая́ния,/ благоугожда́им вы́ну пред Го́сподем,/ и́же хо́щет всем спасти́ся, я́ко Милосе́рд.

Сла́ва, глас 8:

Прииди́те, лю́дие,/ восхва́лим му́жа сла́вна/ и отца́ на́шего Дании́ла:/ сей бо смиренному́дрствоваше вы́ну,/ ниже́ хожда́ше в вели́ких, ниже́ в ди́вных па́че себе́,/ но терпе́нием теча́ше на предлежа́вший ему́ по́двиг,/ усе́рдно облобыза́в кро́тость и незло́бие,/ нищету́ же и скорбь./ Сего́ ра́ди Бог си́це искуше́нна обре́те его́, досто́йна Себе́,/ дарова́в ему́ вене́ц пра́вды от руки́ Своея́./ Сей да соблюде́тся и нам,/ и всем, возлю́бльшим я́ле́ние его́,/ не премолчи́, преподо́бне, вопия́ о всех ко Го́споду.

И ны́не, Богоро́дичен гла́са. Вход. Проки́мен дне. И чте́ния.

Прему́дрости Соломо́новы чте́ние (глава 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша в очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ и́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле наказа́ни бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во время посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (главы́ 5, 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бне,/ поостри́т же напра́сный гнев во ору́жие,/ споборе́т же с ним ми́р на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ реки же пото́пят я на́гло./ Сопроти́в ста́нет им дух си́лы,/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щимся о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть/ и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ положи́вше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На литии́ стихи́ры, глас 2:

Ублажи́ша лю́ди,/ и́мже бы́ша храни́лища испо́лнена,/ о́вцы многопло́дны, воло́ве то́лсти/ и и́но попече́ние вся́ческое,/ но ты, преподо́бне,/ ничесо́же от подо́бных сим пожела́л еси́,/ вся приобре́тения ми́ра сего́ вмени́в уме́ты бы́ти./ Те́мже блаже́н вои́стинну,/ я́ко бысть тебе́ Госпо́дь Бог твой,/ ему́же предстоя́ ны́не, моли́ся,/ да Бог ми́ра бу́дет с на́ми.

Горды́ня и бога́тство с велича́нием что по́льзуют?/ сим рабо́тающий беззако́нных исполня́ются стезь и поги́бели,/ пути́ бо Госпо́дня не разуме́ют./ Ты же, блаже́нне, вы́ну Го́рняя му́дрствовавый, а не земна́я,/ на пути́ гре́шных не стал еси́,/ тем и во святы́х жре́бий твой есть./ моли́ Бо́га и нам насле́дити часть благослове́нных.

Сла́ва, глас 1:

Умерщвле́нием, и порабоще́нием,/ и суровым мучи́тельством томя́ те́ло твое́,/ самоизво́льный му́ченик был еси́, преподо́бне о́тче:/ вся возмогл еси́ о укрепля́вшем тя Иису́се Христе́./ И та́ко теки́й, не я́ко безве́стно,/ но наде́ждою бу́дущих благ веселя́ся, рекл Го́сподеви:/ Засту́пник мой еси́ и Прибе́жище/ Бог мой, и упова́ю на него́.

И ны́не, Богоро́дичен гла́са.

На стихо́вне стихи́ры, глас 5:

У́тренюя к Бо́гу, не утруди́лся еси́, блаже́нне,/ я́ко бре́мя понесы́й ле́гкое;/ таково́му тече́нию после́довати и нас вразуми́,/ да пости́гнем прия́ти по́честь от Великодарови́таго Подвигополо́жника/ и Спа́са душ на́ших.

Стих: Честна́ пред Го́сподем/ смерть преподо́бных Его́.

Не уподо́бился еси́ рабу́,/ косне́ние господи́на своего́ наблюда́ющему,/ но твое́ бде́ние бысть гото́вое/ сре́сти Го́спода своего́,/ тем и Госпо́дь введе́ тя в ра́дость неконча́емую.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Го́ре пи́шущим лука́вство!/ го́ре привлача́ющим грехи́,/ я́ко у́жем до́лгим! – вопие́т Иса́ия, –/ сего́ ра́ди и пови́нни суть гне́ву Пра́веднаго Судии́,/ сия́ зла́я возбла́гая, мы, неблагода́рни, воздае́м Го́сподеви./ Сего́ преще́ния изба́ви нас, преподо́бне,/ да мы, покая́нием преме́ньшеся от злых,/ поживе́м в пра́вде и преподо́бии и́стины.

Сла́ва, глас 6:

Днесь све́тлый нам возсия́ день,/ соста́вите пра́здник/ и, веселя́щеся, прииди́те,/ ублажи́м хваля́щася преподо́бнаго во сла́ве/ и ра́дующася на ло́жи свое́м:/ сей бо, вшед в мы́сленный вертогра́д,/ испра́ви вся́кую доброде́тель,/ безпомо́щныя заступи́,/ заблу́ждшия на путь спасе́ния наста́ви,/ ни́щия напита́, си́рым помоществова́,/ и си́це благоуго́ден Бо́гови./ И, возлю́блен быв, преста́вися,/ иде́же све́тится Свет невече́рний.

И ны́не, Богоро́дичен гла́са.

Тропа́рь, глас 3:

От ю́ности, блаже́нне, всего́ себе́ Го́сподеви возложи́в,/ вы́ну повину́яся Бо́гу,/ проти́вяся же диа́волу,/ над страстьми́ грехо́вными воцари́лся еси́,/ тем сам храм Бо́жий быв,/ и оби́тель кра́сну во сла́ву Пресвяты́я Тро́ицы воздви́гнув/ и собра́нное тобо́ю в ней ста́до Христо́во Богоуго́дно упа́сши,/ преста́вился еси́ к ве́чным оби́телем,/ о́тче Дании́ле,/ моли́ Триипоста́снаго во еди́ном су́ществе́ Бо́га спасти́ся душа́м на́шим.

Сла́ва, и ны́не, Богоро́дичен.

НА У́ТРЕНИ

На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 1: Умножа́шеся на тя непра́вда го́рдаго велиа́ра,/ сеть положи́ти умы́слившаго де́явшу ти свое́ спасе́ние;/ ты же, от вся́каго пути́ лука́ва возбрани́в нога́м твои́м,/ всем се́рдцем твои́м испыту́яй за́поведи Госпо́дни,/ те́ми растерза́л еси́ се́ти зло́бнаго искуси́теля./ Даждь и нам безбе́дно мину́ти его́ лови́тельства моли́твами твои́ми, преподо́бне.

Сла́ва, и ны́не, Богоро́дичен:

Приско́рбна есть душа́ моя́ и смущает мя,/ я́ко не упова́ет на Бо́га,/ язы́к же льсти́в, ре́я во отча́яние, глаго́лет ми:/ где есть Бог твой?/ и, си́ми стужа́емаго, и́щет диа́вол поглоти́ти мя./ Влады́чице моя́, рцы души́ мое́й:/ спасе́ние твое́ есмь Аз,/ да, не се́туя, хожду́ и просла́влю заступле́ние твое́.

По 2-м стихосло́вии седа́лен, глас 2:

Не всу́е рыда́ше проро́к Твой, Го́споди,/ я́ко прише́льствие его́ продолжи́ся:/ есть бо искуше́ние житие́ челове́ку на земли́,/ но он свят бе, на́ши же путие́ оскверня́ются на вся́ко вре́мя./ Го́споди, моли́твами Твоего́ уго́дника/ не отве́ржи нас от лица́ Твоего́,/ да не ка́ко обря́щемся, зело́ неключи́ми пред Тобо́ю,/ не сокраща́юще грехи́, но умножа́юще я,/ дел же благи́х не творя́ще.

Сла́ва, и ны́не, Богоро́дичен: Вои́стинну безу́мен есть муж той, и́же рече́т: несть Бог./ Ты, Мари́е, заче́нши, родила́ еси́ Его́,/ в Него́же ве́рующе и упова́юще Нань, мы, христоимени́тии,/ оставле́ние грехо́в получи́ти наде́емся/ Тобо́ю, Благослове́нная в жена́х, Де́во Чи́стая.

По полиеле́и седа́лен, глас 1:

Поноше́ние враго́в, велере́чие ненави́дящих,/ озлобле́ние же и кля́тва их/ и сим подо́бная злая напада́ху на тя,/ но от всех сих изба́ви тя Госпо́дь,/ я́ко непоро́чен быв в пути́, ходи́л еси́ в зако́не его́,/ тем, ублажи́в тя, Пра́ведный Судия́/ о нас моли́твенника соде́ла, преподо́бне.

Сла́ва, и ны́не, Богоро́дичен:

Вся́кая тварь к хвале́нию Сы́на Твоего́ созыва́ется, я́ко рабо́тает ему́,/ а гре́шник не прибли́жится, я́ко прогневля́ет его́;/ аз есмь возненави́девый наказа́ние/ и отве́ргий словеса́ его́ вспять,/ сего́ ра́ди а́ще и пове́даю опра́вдания Госпо́дня, но вску́ю?/ Не оста́ви мене́, Влады́чице моя́,/ вонми́ в по́мощь мою́,/ да бу́дет и мне Сын Твой во спасе́ние.

По 50-м псалме́ стихи́ра, глас 6:

Приклони́л еси́ у́хо твое́/ во глаго́лы уст Христа́ Спаси́теля, ре́кшаго:/ возьми́те и́го Мое́ на себе́./ И быв творе́ц сло́ва, а не то́чию слы́шатель,/ входи́л еси́ у́зкими враты́,/ простра́нная же и широ́кий путь мину́в,/ изво́лил еси́ страда́ти с людьми́ Бо́жиими/ и си́це, день от дне, простира́яся на лу́чшее/ и на соверше́нство восходя́, обре́л еси́ поко́й душе́ твое́й./ Напра́ви стопы́ и на́ша на путь, вводя́щий в живо́т,/ твои́м предста́тельством, блаже́нне.

Кано́н преподо́бнаго, глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь пои́м, вопия́ше.

Благослове́нный Бо́же, в ми́р прише́дый,/ Его́же, кроме́ ино́го, не ча́ем,/ не посрами́ нас от ча́яния на́шего,/ внегда́ призва́ти нам о И́мени Твое́м/ и́мя свята́го Твоего́, призыва́вшаго Тя во и́стине, Дании́ла.

Возбрани́в се́рдцу твоему́ от вся́каго весе́лия,/ ничто́же восхоте́л еси́ на земли́,/ я́ко ра́дование се́рдца твоего́ бя́ху свиде́ния Госпо́дня;/ я́же да насле́дим и мы, моли́твы твоя́/ с на́шими моли́твами соедини́, блаже́нне.

Возжада́ Го́спода душа́ твоя́, преподо́бне,/ и не лиши́лся еси́ от жела́ния твоего́:/ ны́не бо насыща́ешися от пото́ка сла́дости Госпо́дни, во Све́те его́ узрев све́т./ Го́споди, проба́ви ми́лость твою́ и нам, ве́дущим Тя, моли́твами отца́ на́шего.

Богоро́дичен: И́щущии зла́я мне глаго́лют су́етная,/ врази́ же мои укрепля́ются па́че мене́,/ и умножа́ются ненави́дящии мя без пра́вды,/ сего́ ра́ди се́рдце мое смяте́ся толи́ко,/ я́ко оста́ви мя и си́ла моя́./ Но, о всеблагомо́щная Цари́це! помози́ ми,/ да, спасе́н быв Тобо́ю от них, поучу́ся во оправда́ниих Сы́на Твоего́ вы́ну.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Тве́рдым позна́нием Ева́нгельския и́стины име́яй препоя́санны чре́сла твоя́,/ свиде́тельствовался еси́ бы́ти ве́рен о мно́зех, служи́тель Христо́в,/ утверди́ и нас в добро́м по́двизе, придержа́щихся спасе́ния,/ твои́ми моли́твами, преподо́бне.

Оболки́йся в броня́ пра́вды, я́же о Христе́,/ име́л еси́ до́бру со́весть,/ и, прие́м дерзнове́ние к Бо́гу,/ да приступа́ют и вси ве́рнии со дерзнове́нием ко престо́лу благода́ти,/ тайново́дствовал еси́ и уче́нии, и моли́твами твои́ми, блаже́нне.

Над все́ми благи́ми де́лы восприя́вшу тебе́ щит ве́ры,/ ничто́же возмого́ша стре́лы лука́ваго разжже́нныя,/ и, шлем спасе́ния восприя́в, наде́ждно утверди́лся еси́ на ка́мени испове́дания Христо́ва;/ помяни́ и нас, смире́нных и коле́блемых, блаже́нне,/ да обря́щем утеше́ние.

Богоро́дичен: Что стужа́еши ми, душе́ моя́,/ я́ко оте́ц мой и ма́ти моя́ оста́виста мя?/ И по сему́ зна́мению, а́ки отринове́н, преврати́хся па́сти,/ вои́стинну не́си си́ра и отринове́на,/ и́бо отца́ и́маши Бо́га, ма́терь же – Ро́ждшую его́./ Благоутро́бием ея́ гряди́ ко Христу́,/ и Госпо́дь восприи́мет тя.

Седа́лен, глас 2:

Потща́вся себе́ иску́сна поста́вите пред Го́сподем/ де́лателя непосты́дна,/ после́довал еси́ блаже́ннаго Па́вла уче́нию,/ житию́, приве́ту, ве́ре, долготерпе́нию, любви́, терпе́нию./ И си́це на вся́кое де́ло благо́е угото́ван, я́ко свети́льник, поста́вился еси́ на све́щнице,/ да, тобо́ю освеща́еми, мно́зи на путь спасе́ния наста́вятся./ Помоли́ся и о нас, о́тче преподо́бне,/ да даст и нам Бог приити́ в покая́ние и в ра́зум и́стины.

Сла́ва, и ны́не, Богоро́дичен:

В со́бственный вертогра́д вшед,в Тя, Пресвята́я Де́во,/ восприя́т Себе́ плоть от Тебе́,/ со благоуха́нием Божества́ соедине́нную, Сын Твой, Сло́во, и бысть Богочелове́к./ Моли́ его́ бла́гость,/ да всели́тся и в нас, творя́ сердца́ на́ша благоуха́ние Бо́гови в спаса́емых,/ да бу́дем и мы воня́ живо́тная в живо́т.

Песнь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Услажда́я ду́шу твою́ сло́вами зако́на Госпо́дня,/ не удержа́л стремле́ния твоего́ к благочести́ю,/ но, и́мже о́бразом жела́ет еле́нь на исто́чники водны́я,/ бы́стро текл еси́, вопия́:/ си́це жела́ет душа́ моя́ к Тебе́, Бо́же./ Ча́сти с тобо́ю име́ти и нам, твои́м ча́дом, моли́ся, о́тче наш Дании́ле.

Чистото́ю и любо́вию был еси́, я́ко хлеб, сла́док Го́сподеви,/ ходя́ бо досто́йне Бо́гу во вся́ком угожде́нии,/ досто́йно жи́тельствовал еси́ благовествова́нию Христо́ву,/ да и мы во вся́ком деле бла́зе преуспе́ем,/ предста́тельствуй твои́ми моли́твами, о́тче наш преподо́бне.

Виждь, уго́дниче Христо́в, смирени́е на́ше,/ я́ко возвели́чися враг, ища́й поги́бели на́шея,/ сего́ ра́ди и ров изры́, и ископа́ и́;/ ты помоли́ся, да Госпо́дь разори́т сове́т его́,/ и впаде́т в яму, ю́же соде́ла.

Богоро́дичен: Несть ми ослабле́ния,/ зане́ не сотвори́х во́ли Сы́на Твоего́ и не сохрани́х повеле́ний его́,/ и ны́не приклони́ ми у́хо Твое́ в покая́нии, тре́бующему бла́гости, Ма́ти Бо́жия,/ да не осу́дит мя Судия́ Пра́ведный в преиспо́дних земли́:/ на Тя бо упова́ю, о Предста́тельнице моя́!

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Весели́лся еси́ о ре́кших ти: в дом Госпо́день по́йдем,/ иде́же, благочи́нно предстоя́, воздава́л еси́ Вы́шнему́ моли́твы твоя́ за вся челове́ки,/ я́же и мно́го можа́ху, я́ко пра́веднаго./ Поспешеству́й о́ными и нам,/ огражда́я нас от губи́теля,/ ловя́щаго ду́ши на́ша, блаже́нне.

Жив ве́рою Иису́с Христо́вою,/ не свои́х си исќав, но я́же Христа́ Иису́са,/ пости́гнул еси́ в житие́ на Небесе́х,/ иде́же водворя́лся со Христо́м, помина́й нас,/ да и мы, теку́ще, пости́гнем, о́тче наш Дании́ле.

Жела́ние име́яй соедини́тися с Го́сподем,/ рабо́тал еси́ ему́ во и́стине и всем се́рдцем твои́м/ и, си́це прилепля́лся Го́сподеви, еди́н дух был еси́ с Го́сподем,/ днесь же лице́м к лицу́ зря его́,/ покажи́ нас прича́стники Боже́ственнаго лицезре́ния, приснопа́мятне.

Богоро́дичен: Бо́же Спаси́телю мой! коли́ко есть дней раба́ Твоего́?/ когда́ уте́шиши мя? и сотвори́ши ми от гоня́щих мя суд?/ Се бо, обыше́дше, обыдо́ша мя и́же искони́ человекоуби́йцы врази́,/ на мя вся помышле́ния их на зло./ Удержи́ их стремле́ние, сокруши́ че́люсти,/ да, прии́м от них свобо́ду, сохра́ню за́поведи Твоя́,/ Тя с Ро́ждшею при́сно велича́я.

Песнь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.

Серде́чную врзлюби́в пра́вость, ми́р име́л еси́ и святы́ню со все́ми,/ тем ублажи́вся, узре́л еси́ Бо́га,/ его́же Свет присносу́щный да возсия́ет и нам, помоли́ся, преподо́бне.

Ве́рою во Христа́ дела́, я́же Он сотвори́, и ты сотвори́л еси́,/ умно́жив иногда́ хле́бы, блаже́нне, зане́ ми́лостив и сострада́телен быв,/ а́лчущия пита́л еси́,/ и ны́не милосе́рдуй о наро́дех, предстоя́щих и и́щущих Го́спода,/ да не лиша́тся вся́каго бла́га.

Кро́тких зе́млю и смире́нных благода́ть насле́довал еси́,/ го́рдости и тщесла́вия вся́чески удаля́лся,/ и бы́вшу ти восприе́мником чад вели́каго князя, я́ко и́стинный учени́к Иису́са Христа́ к бога́тству не прилага́л еси́ се́рдца,/ но во́льною нището́ю благоугожда́л еси́ пред Ним во вся дни живота́ твоего́,/ о́тче наш Дании́ле.

Богоро́дичен: Сын Твой, Влады́чице, прише́д, не́мощи на́ша понесе́/ и печа́ли преложи́ на ра́дость:/ Жени́ху́ бо прису́щу всем ра́доватися досто́ит, и никому́же пла́кати,/ сея́ ра́дости плоды́ вкуша́ют ве́рующия в Него́./ О́ная чрез печа́ль ве́ка сего́ да не во́змется от нас,/ исто́ргни небреже́ние от серде́ц на́ших, Ма́ти Бо́га Вы́шняго.

Конда́к, Глас 1:

От позна́ния себе́ прише́д в позна́ние Бо́га/ и благоче́стием к Нему́ восприи́м нача́ло чу́вства вну́тренняго,/ ра́зум свой плени́л в послуша́ние ве́ры;/ тем и, по́двигом до́брым подвиза́вся,/ дости́гнул еси́ в ме́ру во́зраста соверше́нна исполне́ния Христо́ва,/ я́ко Бо́жие тяжа́ние, Бо́жие зда́ние, дела́л еси́ бра́шно, не ги́блющее,/ но бра́шно, пребыва́ющее в живо́т ве́чный./ Да бу́дут единоду́шно вси насажде́ние Госпо́дне в сла́ву,/ моли́, блаже́нне, Еди́наго Человеколю́бца Бо́га.

И́кос:

Славен еси́ вои́стинну,/ и тебе́ похвала́ не от челове́к, но от Бо́га,/ челове́к бо быв, по челове́ку не ходи́л еси́,/ но, я́ко слуга́ Христо́в,/ не ду́ха ми́ра сего́ прие́м,/ но ду́ха, и́же от Бо́га,/ не соизво́лил еси́ о я́стии, или́ питии́, или́ оде́жде язы́ков попече́нию,/ благоволи́в же па́че иска́ти Ца́рствия Бо́жия и пра́вды его́,/ вшел еси́ в живо́т ве́чный,/ и нам во е́же насле́дити о́ный, моли́, блаже́нне, Еди́наго Человеколю́бца Бо́га.

Песнь 7

Ирмо́с: Росода́тельну у́бо пещь/ содела́ А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увещ а вопи́ти:/ благослове́н еси́, Бо́же оте́ц на́ших.

Всегда́ имы́й па́мять Христо́вых пресвяты́х страсте́й,/ в ту́южде мысль вооружа́лся еси́ изволе́нием,/ во е́же после́довати стопа́м его́./ И нам па́мять сию́ в се́рдце и во у́ме на́шем водруже́нну име́ти/ моли́ пострада́вшаго за ны Христа́, о́тче Дании́ле.

Христо́с преда́н, я́звен и му́чен бысть за беззако́ние на́ше./ Ты, приобща́лся Христо́вым страсте́м,/ всегда́ ме́ртвость Го́спода Иису́са в те́ле свое́м носи́л еси́,/ и ны́не, просла́вився с Ним, умертви́ на́ши стра́сти, свя́те, твои́ми моли́твами.

Христо́с воста́ за опра́вдание на́ше,/ да ве́ра на́ша и упова́ние бу́дет на Бо́га,/ сия́ обоя, а́ки ко́тву²⁹, име́в души́, тве́рду же и изве́стну,/ пресели́лся еси́, иде́же и Предте́ча о нас вни́де Иису́с,/ да та́мо и мы предста́нем ему́ в ра́дости,/ помяни́ нас, блаже́нне Дании́ле.

Богоро́дичен: Свята́я Мари́е, Ма́ти Бо́га Вы́шняго,/ мы еще́ в сем ми́ре,во зле лежа́щем, есмы́/ и сего́ ра́ди вне стои́м,/ хотя́ще вни́ти внутрь черто́га Небе́снаго./ По отше́ствии на́шем от те́ла благоволи́ нам ви́дети неизрече́нную красоту́ Сы́на Твоего́.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся веки.

Присво́ився Христу́ чрез ве́ру, преподо́бне, не повину́лся еси́ пло́ти,/ но, распя́в ю со страстьми́ и похотьми́/ и к до́брым дела́м устреми́вся,/ собо́ю и и́ных учи́л еси́ Христу́ вопи́ти:/ Тя превозно́сим во вся ве́ки.

Ходи́в ду́хом, плоды́ духо́вныя вкуша́я, блаже́нне,/ и сих наслажда́лся, неукло́нно взира́л еси́ на нача́льника ве́ры и Соверши́теля Иису́са,/ тем и благода́рственно к Нему́ взыва́л еси́:/ Тя превозно́сим во вся ве́ки.

Упова́нием объе́м благода́ть Бо́жию,/ за основа́ние о́наго положи́в заслу́ги Христо́вы/ и богоуго́дно управля́я жи́знь твою́ творе́нием добра́,/ Христу́ ра́достно воспева́л еси́:/ Тя превозно́сим во вся ве́ки.

Богоро́дичен: Тобо́ю, Пресвята́я Де́во, и́же во о́бразе Бо́жии Сый к нам прии́де,/ и, де́лав дела́ посла́вшаго его́,/ у́мре грех на́ших ра́ди,/ и воста́ в тре́тий день, по Писа́нием,/ Тя показа́в Предста́тельницу о нас,/ превознося́щих его́ во вся ве́ки.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Единоро́дному Сы́ну, су́щему в ло́не О́тчи, послужи́л еси́,/ сего́ ра́ди почте́ тя Оте́ц Небе́сный,/ оби́тель у тебе́ сотвори́в с Ним и Пресвяты́м Ду́хом,/ и ны́не у́бо предстоя́ Единосу́щней Тро́ице,/ све́том твои́х моли́тв разжени́ мрак страсте́й от серде́ц на́ших, преподо́бне.

Мзда твоя́ мно́га на Небесе́х, я́ко возлюби́л еси́ мно́го,/ мно́гими скорбьми́ восходя́ к Бо́гу,/ к Нему́же и прибли́жився, призира́й на лю́ди,/ тре́бующия от Бо́га ми́лости, блаже́нне.

О́тче блаже́нне Дании́ле!/ Се твое́ оте́чество, в не́мже воспита́лся еси́./ Се оби́тель твоя́, в не́йже преподо́бно пожи́в,/ многотру́дным твои́м те́лом свя́то почива́еши./ А мы, твои́ чада, к тебе́ приве́ржены есмы́:/ не отступа́й от гра́да, и от нас, я́ко твое́й ча́сти,/ и от призыва́ющих и́мя твое́,/ поле́зная всем хода́тайствуя у Всеми́лостиваго Спа́са Христа́.

Богоро́дичен: А́ще мно́го мо́жет моли́тва пра́веднаго поспешеству́ема,/ Ты, святе́йша су́щи всея́ тва́ри, я́ко Ма́терь Бо́гу, несравне́нно мо́жеши./ При́зри на ны с преподо́бным Дани́илом и испроси́ нам вся бла́гая от Бо́га:/ се бо мы к Тебе́ по Бо́зе, я́ко еди́ной наде́жде, прибега́я,/ во всех напа́стех ра́дости и утеше́ния/ от Тебе́ упова́ем.

Свети́лен:

Человеколю́бием подража́я Тови́ту,/ погребе́нию стра́нных прилежа́л еси́, о́тче Дании́ле./ Попецы́ся и о на́ших душа́х, мо́лим тя, преподо́бне,/ да не бу́дут в попра́ние велиа́ру,/ и́щущему поглоти́ти и низвести́ в бе́здну поги́бели,/ иде́же никто́же испове́стся Бо́гу на́шему.

Богоро́дичен:

Благора́зуме́н есть муж и мудр,/ и́же слы́шит словеса́ Бо́жия и твори́т я,/ и́бо зи́ждет хра́мину душе́вную на ка́мени повеле́ний Госпо́дних,/ а и́же слы́шит и не твори́т я,/ сицевы́й несмы́слен и уро́д,/ я́ко пренебреги́й о основа́нии, утвержда́емом на исполне́нии сло́вес Бо́жиих./ Ты, Влады́чице на́ша,/ нас све́том му́дрости просвети́, Твои́ми моли́твами/ тьму неразу́мия отгна́в от нас,/ да, соблюда́юще в сердца́х на́ших словеса́ Бо́жия,/ творе́нием о́ных досто́йныя принесе́м плоды́.

На хвали́тех стихи́ры, глас 8:

Обле́кся во вся ору́жия Бо́жия,/ возмо́гл еси́ стоя́ти проти́ву ко́знем диа́вольским,/ огражде́н душе́вною наде́ждою/ и духо́вною горя́чностию в моли́тве,/ и, быв но́ва тварь,/ Ду́ха Свята́го всели́л еси́ в се́рдце твое́,/ свиде́тельствовавшаго тя ча́до Бо́жие бы́ти;/ покажи́ и нас храм благоуго́ден ему́,/ твои́ми моли́твами, блаже́нне.

Всего́ возлюби́в Христа́,/ я́ко Бо́га и Челове́ка,/ угожда́л еси́ ему́ бла́готворе́нием,/ вспомоществова́нии, потре́бными бра́тии Его́ меньшей,/ над сим же просия́вшу ти бла́гостию,/ смире́нномудрием, кро́тостию и долготерпе́нием,/ был еси́ я́коже избра́нный Бо́жий, святы́й и возлю́бленный,/ тем и насле́довал еси́ угото́ванное тебе́ Ца́рствие от сложе́ния ми́ра./ И нас, свя́те, обле́кши во утро́бы щедро́т,/ пону́ди вни́ти во о́ное/ благоприя́тными твои́ми моли́твами.

Ходи́в про́чее благообра́зно,/ держа́лся еси́ о́нех, ели́ка суть и́стинна,/ и, испра́вив, ели́ка че́стна,/ утвержда́лся еси́ в пра́ведных,/ дости́гнувшу же ти и объе́мшу, ели́ка пречи́ста,/ с жела́нием упражня́лся еси́ в прелюбе́зных/ и, преспе́в стяжа́нием доброхва́льных,/ вся́кую доброде́тель и вся́кую похвалу́ соверши́л еси́;/ сия́ да помышля́ем и мы,/ лука́вое и проти́вное помышле́ние истребля́я от серде́ц на́ших,/ моли́ Христа́ Бо́га, блаже́нне Дании́ле.

Сла́ва, глас 4:

Коль просла́вился еси́ в сожи́тельстве люде́й,/ в житии́ с бра́тиею вку́пе!/ Сиял бо еси́, я́ко со́лнце, твои́ми уче́нии,/ блюды́й их от паде́ния,/ и, я́ко дуга́, на о́блацех свети́л еси́ твои́ми исправле́нии,/ во все́м сам себе́ подава́я о́браз до́брых дел,/ и отсю́ду был еси́ свети́льник, горя́ и светя́./ Преше́д же от здешних, глаго́ли, о́тче наш,/ в моли́тве к Бо́гу и о нас:/ се аз и де́ти, я́же ми дал еси́, Го́споди,/ спаси́ ду́ши их, Человеколю́бче.

И ны́не, Богоро́дичен:

Молим Тя, Влады́чице,/ сотвори́ моли́твы и моле́ния за ны, рабы́ Твоя́, к Сы́ну Твоему́,/ да, го́рдость вся́кую отло́жше/ и удо́бь обстоя́тельный грех,/ ти́хое и безмо́лвное житие́ поживе́м/ во вся́ком благочести́и и чистоте́.

На Литурги́и слу́жба вся преподо́бническая.