НА МАЛОЙ ВЕЧЕ́РНИ

На Го́споди, воззва́х: стихи́ры на 4, глас 4.

Подо́бен: Я́ко до́бля:

Обагре́нии кро́вными украси́вши себе́,/ сла́вная Варва́ро великому́ченице,/ кра́сному добро́тою, де́во отрокови́це,/ нетле́нно совокупи́лася еси́ Жениху́,/ Христу́ Бо́гу на́шему,/ соблю́дающему твое́ де́вство нескве́рно,/ в жили́щах Небе́сных, в черто́зе нерукотворе́ннем, му́ченице.

Обагре́нная кро́вию/ муче́ний за Христа́,/ тому́, я́ко Нетле́нному Жениху́,/ сочета́лася еси́, сла́вная Варва́ро вели́кому́ченице,/ и, де́вство соблю́дши нескве́рно,/ в жили́щах Небе́сных во ве́ки водворя́ешися.

Не соверше́нным телом,/ соверше́нным же ра́зумом/ ве́тхаго зми́я победи́вши,/ сте́рла еси́ его́ главу́, сла́вная, си́лою духо́вною/ и не́мощну того́ кре́пость показа́ла еси́./ Те́мже даде́ся тебе́ вене́ц побе́ды,/ Варва́ро великоимени́тая, Тро́ицы побо́рнице.

Омы́вши, Варва́ро, в Креще́нии ти́ну греха́/ и муче́ньми за Христа́ искуси́вшися,/ я́коже зла́то в горни́ле,/ облекла́ся еси́ багряни́цею великому́ченичества,/ отгна́ла безбо́жия язы́ческаго тьму/ и возсия́ла еси́, всехва́льная, я́коже со́лнце,/ спаси́ чту́щих твоя́ до́блественныя по́двиги/ и па́мять твою́ све́тлую соверша́ющих.

Ка́плями кро́вными убели́вшися,/ возсия́ла еси́, всехва́льная,/ проявле́нно, я́коже со́лнце,/ и отгна́ла еси́ безбо́жия оте́ческаго тьму,/ и того́ от себе́ ти́ну омы́ла еси́ благода́тию Христо́вою,/ великому́ченице Варва́ро,/ спаси́ чту́щих твоя́ до́блественныя по́двиги/ и па́мять твою́ све́тлую соверша́ющих торже́ственне.

Сла́ва, глас 2:

Духо́вным све́том просвеще́на бы́вши бога́тно,/ тле́нное бога́тство возненави́дела еси́,/ еди́но возлю́бльши Небе́сное,/ в му́ченическую же кре́пость я́ве обо́лкшися,/ вы́ю под меч преклони́ла еси́ усе́рдно./ Те́мже и врага́ отца́, посе́кшаго тя, постыди́ла еси́,/ побе́ды венце́м увя́зшися,/ великому́ченице Варва́ро пресла́вная,/ моли́ спасти́ся всем нам.

И ны́не, Богоро́дичен:

На Тя упова́ние, Богоро́дице, возложи́хом,/ ча́яния да не отпаде́м:/ спаси́ нас от бед, По́мощнице недоуме́емым,/ и сопроти́вных сове́ты разори́,/ Ты бо еси́ на́ше спасе́ние, Благослове́нная.

На стихо́вне стихи́ры, глас 2.

Подо́бен: До́ме Евфра́фов:

Варва́ро всесла́вная,/ треми́ око́нцы/ изобрази́вши/ Тро́ичное еди́нство,/ пропове́дала еси́ Еди́наго Бо́га.

Стих: Ди́вен Бог во святы́х Свои́х,/ Бог Изра́илев. Па́че земны́я сла́вы/ и тле́ннаго бога́тства/ Хри́ста возлюби́вши, и к Нему́ кро́вию спе́шно востекла́ еси́, мужему́дренная.

Стих: Святы́м, и́же суть на земли́ его́,/ удиви́ Госпо́дь вся хоте́ния Своя́ в них.

Ве́рою и упова́нием/ окрили́вшися, великому́ченице,/ от земли́ к Небеси́/ возлете́ла еси́/ и со Христо́м ца́рствуеши.

Сла́ва, глас и подо́бен то́йже:

Варва́ра, в главу́ усече́нна,/ со Христо́м ца́рствует,/ оте́ц же и уби́йца,/ гро́мом убит,/ во ад низведе́ся.

И ны́не, Богоро́дичен, глас и подо́бен то́йже:

Влады́чице Бла́гая,/ святи́и Свои́ ру́це/ к Сы́ну Своему́ возде́вши,/ потщи́ся уще́дрити/ рабы́ Своя́.

Тропа́рь зри на вели́цей вече́рни.

Сла́ва, и ны́не, Богоро́дичен: Е́же от ве́ка утае́нное:

НА ВЕЛИЦЕЙ ВЕЧЕ́РНИ

Блаже́н муж: 1-й антифо́н, на Го́споди, воззва́х: стихи́ры на 8, глас 2.

Подо́бен: Егда́ от Дре́ва:

Егда́ на суди́щи стра́шнем/ Иулиани́я зря́щи всеблаже́нная/ му́ченицу сла́вную Варва́ру,/ ра́нами стра́ждущу,/ му́ками же разли́чными те́ло все ссеца́емо,/ те́плыми слеза́ми вопия́ше:/ Сло́ве Бо́жий,/ сея́ о́бщницу мя бы́ти ны́не сподо́би, Человеколю́бче.

Еди́н Варва́ра и́стинно и Иулиани́я/ нрав к бла́гочестию иму́ще святы́я,/ подвиза́шася на врага́ и победи́вше того́ кре́пко,/ сла́вы сподо́бишася от Христа́ Бо́га./ Те́мже губи́тельных страсте́й вред потреби́вше,/ всем ве́рным подаю́т врачева́ния.

Егда́ изрече́ся на тя, му́ченице/ честне́йшая Варва́ро,/ сла́дкая смерть,/ ра́дующися и спеша́щи, тече́ние соверши́ла еси́;/ нечести́ваго же роди́теля рука́ми пребеззако́нными поже́рлася/ и плод Бо́гу принесла́ся еси́./ Те́мже, с му́дрыми де́вами и́стинно лику́ющи, зри́ши Христа́,/ Жениха́ Твоего́, осия́ние.

И́ны стихи́ры преподо́бнаго, глас 8.

Подо́бен: О, пресла́внаго чудесе́:

О́тче Иоа́нне всему́дре,/ Це́рковь Христо́ву уясни́л еси́ пе́сньми,/ Боже́ственнейшая сладкопоя́, всесла́вне,/ де́йством, о́тче, ду́ха,/ твою́ цевни́цу ударя́я,/ всесли́чней Дави́дове подо́бяся,/ е́юже возглаша́я,/ Боже́ственными пе́сньми вся привле́кл еси́.

О́тче Иоа́нне сла́вне,/ мирски́я отсту́пль мяте́жныя молвы́,/ ко Христо́ве прите́кл еси́ тишине́, преподо́бне,/ и виде́нии Боже́ственными и дея́нии,/ всебога́тыми я́ве светлостьми́/ и́стинно обогати́лся еси́,/ и ве́рным препо́дал еси́,/ Боголе́пным сия́я житие́м, блаже́ннейше.

Прииди́те, земноро́днии,/ пе́сньми свяще́нное и че́стное/ преподо́бнаго торжество́ Иоа́нна/ днесь благоче́стно воспои́м:/ сей бо и́стинно Боже́ственнаго осия́ния/ сподо́бися Свет прия́ти./ О, неизрече́ннаго Твоего́ благоутро́бия, Го́споди,/ и́мже мы позна́хом/ сла́вити Тя, Преблага́го.

Сла́ва, глас 6:

Оте́чество, род, име́ние оста́вивши, Варва́ро,/ и нечести́ваго отца́ возненави́девши,/ Бо́га возлюби́ла еси́,/ ему́же уневе́стилася еси́/ и была́ еси́ великоку́пница наречена́,/ того́ моли́ спасти́ся душа́м на́шим.

И ны́не, Богоро́дичен.

А́ще не пое́ши бде́ния, Крестобогоро́дичен.

Подо́бен: Тридне́вен:

Лю́ди беззако́ннейшия,/ без пра́вды пригвожда́ющия Тя на Дре́ве,/ Де́ва и Чи́стая Ма́ти Твоя́ зря́щи,/ я́коже Симео́н прорече́,/ утро́бою, Спа́се, уязвля́шеся.

Вход, проки́мен дне и чте́ния му́ченическая

(зри день 13-й и 5-й).

На литии́ стихи́ры, глас 1.

Красу́йся и весели́ся гра́де Ки́еве,/ ра́дуйся и све́тло торжеству́й, Це́рковь Бо́жия./ Се бо в тебе́ сокро́вище Боже́ственных даро́в неоску́дное яви́ся:/ ра́ка святы́х моще́й великому́ченицы Варва́ры,/ от них же истека́ют ве́рным исцеле́ния/ и подае́тся благода́ть/ ве́рно приходя́щим и чту́щим любо́вию/ святу́ю па́мять ея́.

Я́ко сокро́вище многоце́нное,/ стяжа́вши Це́рковь Росси́йская твоя́ всесвяты́я мо́щи,/ Варва́ро пресла́вная,/ пра́здник честны́й днесь соверша́ет/ и тебе́ све́тло вопие́т:/ ра́дуйся, Варва́ро многострада́льная,/ ра́дуйся, де́вства ви́ссом/ и муче́ния порфи́рою украше́нная,/ ра́дуйся, Христо́ви уневе́стившаяся,/ и с Ним сца́рствующая,/ и моля́щаяся о душа́х на́ших.

Глас 2:

Прииди́те, де́вство чту́щии вси/ и чистоты́ ревни́телие,/ в наро́читый день/ всехва́льныя де́вы му́ченицы Варва́ры/ торже́ственный пра́здник соста́вим/ и в пе́снех воспое́м:/ ди́вен есть во святы́х Бог Изра́илев,/ просла́вивый на земли́ святу́ю Свою́ де́ву Варва́ру/ и му́ченическою диади́мою венча́вый ю./ Те́мже от губи́тельных смерте́й избавля́ет/ ве́рою призыва́ющих ея́ и́мя/ и подае́т ве́лию ми́лость.

А́нгельскую доброде́тель возлюби́вши,/ чистоту́ Жениху́ – Христу́ – нескве́рну сохрани́ла еси́,/ Варва́ро всечестна́я./ Тем и по сме́рти честно́е те́ло твое́,/ нетле́нно сохране́нное,/ во Арха́нгельском хра́ме поло́жено бы́ти сподо́бися,/ исто́чник исцеле́ний на вся́кия стра́сти притека́ющим источа́ющее./ Ты же, со А́нгелы сликовству́ющи,/ мир ве́рным всем испроси́/ и душа́м на́шим ве́лию ми́лость.

Сла́ва, глас 6:

Ве́село ны́не к торжеству́ Богому́дрыя Варва́ры/ сте́кшеся, о мучениколю́бцы,/ сию похвала́ми, я́ко цветы, укра́сим:/ ра́дуйся, вопию́ще,/ со дерзнове́нием Бо́га в Тро́ице Еди́наго пропове́давшая/ и безбо́жие отече́ское обличи́вшая./ Ра́дуйся, отца́ и отечество возненави́девшая,/ и любве́ ра́ди Христо́вы плоть ра́нам вда́вшая,/ и смерть па́че изво́лившая./ Ра́дуйся, Го́рния оби́тели возме́здие боле́знем восприи́мшая/ и со Христо́м ца́рствующая./ его́же и приле́жно моли́/ от вся́каго обстоя́ния и губи́тельныя сме́рти/ и от враго́в нахожде́ния/ град сей и лю́ди невреди́мы сохрани́ти/ и спасти́ ду́ши на́ша.

И ны́не, Богоро́дичен:

Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся, моли́ся, Влады́чице, со святы́ми апо́столы/ поми́ловати ду́ши на́ша.

На стихо́вне стихи́ры, глас 1.

Подо́бен: Небе́сных чино́в:

Отца́ нечести́ваго и ма́терь, Варва́ро, презре́вши,/ Бо́га и Вы́шний Иерусали́м возлюби́ла еси́,/ в не́мже живу́щи ны́не,/ и нам спребыва́ти тебе́/ умоли́ Влады́ку Христа́.

Стих: Ди́вен Бог во святы́х Свои́х,/ Бог Изра́илев.

Ни пристра́стие роди́телей, ни сла́сти,/ ни добро́та теле́сная, ни бога́тство,/ ни му́ки отторго́ша тя от любве́ Зижди́теля,/ его́же нам, великому́ченице, ми́лостива сотвори́.

Стих: Святы́м, и́же суть на земли́ его́,/ удиви́ Госпо́дь вся хоте́ния Своя́ в них.

В Тро́ице Еди́наго Бо́га испове́дующи дерзнове́нно, Варва́ро,/ во главу́ усече́на,/ вене́ц побе́ды свы́ше от Христа́ прия́ла еси́,/ с Ни́мже ны́не ца́рствующи,/ мир всем испроси́.

Сла́ва, глас 2:

Я́ко мно́гоценное ми́ро,/ кровь твою́ принесла́ еси́ Жениху́ Христу́,/ Варва́ро, му́ченице непобеди́мая,/ возме́здие же от него́ прия́ла еси́, вене́ц нетле́нный./ Те́мже и по страда́нии твое́м/ от честны́х моще́й твои́х/ исцеле́ния бога́тно истека́ют ве́рою приходя́щим и чту́щим тя,/ я́же и нам неоску́дно источи́/ и моли́ спасти́ся душа́м на́шим.

И ны́не, Богоро́дичен:

Все упова́ние мое́ на Тя возлага́ю,/ Ма́ти Бо́жия,/ сохрани́ мя под кро́вом Твои́м.

Ина сла́ва, свята́го, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду́ трудо́в твои́х,/ де́монския погуби́л еси́ полки́/ и А́нгельския дости́гл еси́ чи́ны,/ и́хже житию́ непоро́чно поревнова́л еси́./ Дерзнове́ние име́я ко Христу́ Бо́гу,/ мир испроси́ душа́м на́шим.

И ны́не, Богоро́дичен. А́ще не поеши бдения, Крестобогоро́дичен:

Ви́дящи Тя распина́ема, Христе́,/ Тебе́ ро́ждшая вопия́ше:/ что стра́нное е́же ви́жу та́инство, Сы́не Мой,/ ка́ко на Дре́ве умира́еши, пло́тию пове́шен,/ жи́зни Пода́телю?

Тропа́рь святы́я, глас 8:

Варва́ру святу́ю почти́м:/ вра́жия бо се́ти сокруши́/ и, я́ко пти́ца, изба́вися от них/ по́мощию и ору́жием Креста́, всечестна́я.

Ин тропа́рь, глас 4:

А́гнице всеблаже́нная Варва́ро,/ Боже́ственне озари́вшися Све́том Святы́я Тро́ицы Трисо́лнечным/ и в купе́ли утверди́вшися,/ в побежде́ние ле́сти оте́ческия/ ве́ру испове́дала еси́ Христо́ву./ Тем, всечестна́я, свы́ше благода́ть тебе́ дарова́ Бог/ исцеля́ти неду́ги и боле́зни вся./ Его́же моли́, великому́ченице,/ да спасе́т ду́ши на́ша.

Сла́ва, тропа́рь преподо́бнаго, глас 8:

Правосла́вия наста́вниче,/ благоче́стия учи́телю и чистоты́,/ вселе́нныя свети́льниче,/ мона́шествующих Богодохнове́нное удобре́ние, Иоа́нне прему́дре,/ уче́ньми твои́ми вся просвети́л еси́, цевни́це духо́вная,/ моли́ Христа́ Бо́га спасти́ся душа́м на́шим.

И ны́не, Богоро́дичен.

НА У́ТРЕНИ

На Бог Госпо́дь: тропа́рь святы́я два́жды. Сла́ва, преподо́бнаго. И ны́не, Богоро́дичен.

По 1-м стихосло́вии седа́лен, глас 4.

Подо́бен: Я́ко до́бля:

Де́вства добро́тами и муче́ний кровьми́ ду́шу твою́ украси́вши,/ му́ченице сла́вная Варва́ро,/ вручи́лася еси́ Созда́вшему,/ сохраня́ющу тя нетле́нну во век и́стинно,/ о сем ликовству́ющи с во́инствы Арха́нгел и А́нгел,/ апо́стол, проро́к и му́ченик ликостоя́нии, всехва́льная.

Сла́ва, и ны́не, Богоро́дичен:

Я́ко моли́тву неусыпа́ющую,/ мольбу́ пребыва́ющу иму́щи, Пречи́стая, ко Го́споду,/ напа́сти успи́, и во́лны укроти́ окая́нныя моея́ души́,/ и в ско́рби су́щее се́рдце мое́ уте́ши, Отрокови́це, молю́ Тя,/ и облагода́ти ум мой, я́ко да досто́йно Тя просла́влю.

По 2-м стихосло́вии седа́лен, глас 4.

Подо́бен: Я́ко до́бля:

Жениха́ Христа́ Кро́вию освяти́вшися, прехва́льная,/ твое́ю кро́вию украси́ла еси́ плотску́ю оде́жду./ Те́мже обою́ду просве́щшися, прехва́льная Варва́ро,/ све́тлаго сподо́билася еси́ черто́га Его́./ Его́же моли́ от тли и бед изба́вится ве́рою творя́щим всечестну́ю па́мять твою́.

Сла́ва, и ны́не, Богоро́дичен:

Ско́ро приими́, Влады́чице, моли́твы на́ша/ и сия принеси́ Твоему́ Сы́ну и Бо́гу, Госпоже́ Всенепоро́чная./ Изба́ви обстоя́ний к Тебе́ притека́ющия, сокруши́ кова́рства/ и низложи́ де́рзость вооружа́ющихся безбо́жных, Пречи́стая, на рабы́ Твоя́.

По полиеле́и седа́лен, глас 6.

Подо́бен: Рукопи́саннаго о́браза:

Благода́ть чуде́с получи́вши,/ подае́ши исцеле́ния в ну́ждах и избавля́еши вся челове́ки па́губных неду́гов вся́ких./ Те́мже, к твоему́ хра́му притека́юще, воспева́ем твою́ па́мять, зову́ще:/ исхити́ рабы́ твоя́ от па́губных неможе́ний,/ де́во му́ченице Варва́ро,/ к Бо́гу моли́твами твои́ми.

Сла́ва, и ны́не, Богоро́дичен:

Богоро́дице Де́во, моли́ Сы́на Твоего́,/ во́лею пригвожде́ннаго на Кресте́/ и воскре́сшаго из ме́ртвых, Христа́ Бо́га на́шего,/ спасти́ся душа́м на́шим.

Степе́нна 1-й антифо́н 4-го гла́са. Проки́мен, глас 4: Ди́вен Бог во святы́х Свои́х,/ Бог Изра́илев.

Стих: В це́рквах благослови́те Бо́га, Го́спода от исто́чник Изра́илевых. Вся́кое дыха́ние: Ева́нгелие от Матфе́я, зачало 104.

По 50-м псалме́ стихи́ра, глас 6:

Отечество, род и име́ние оста́вивши, Варва́ро,/ и нечести́ваго отца́ возненави́девши,/ Бо́га возлюби́ла еси́,/ ему́же уневе́стилася еси́,/ и была́ еси́ великому́ченица наречена́./ Того́ моли́ спасти́ся душа́м на́шим.

Кано́н Богоро́дицы со ирмосо́м на 6 и святы́х два кано́на. Кано́н святы́я, глас 2.

Песнь 1

Ирмо́с:

Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть:/ препросла́вленный Госпо́дь сла́вно бо просла́вися.

О Тро́ице Пребоже́ственная Честна́я!/ Я́же па́че ума́ дарова́ние Твои́м рабо́м подаю́щи,/ светоно́сную вдохни́ мра́чному моему́ уму́ лучу́/ твою́ похвали́ти му́ченицу Варва́ру при́снопа́мятную.

Похвале́ний всяк преде́л вои́стинну превзы́де/ Твои́х му́ченик сла́ва, Человеколю́бче;/ но, е́же от ве́ры по си́ле прие́м хвале́ние,/ возниспосли́, Влады́ко, бога́тно воздая́ние.

От терно́внаго ко́рене израсте́ ши́пок красне́йший,/ Це́рковь Христо́ву облагово́нстви,/ и червле́нием страда́ния обагри́вшися кро́вию сла́вная Варва́ра,/ ю́же досто́йно воспое́м.

Ин кано́н святы́я глас 8.

Песнь 1

Ирмо́с:

Во́ду проше́д, я́ко су́шу,/ и еги́петскаго зла избежа́в,/ изра́ильтянин, вопия́ше:/ Изба́вителю и Бо́гу на́шему пои́м.

Во́ду нече́стия тиме́нну оста́вивши,/ к воде́ чисти́тельной притекла́ еси́, Варва́ро,/ и на́ша очи́сти сердца, чи́сто пе́ти твоя́ страда́ния.

Водо́ю Креще́ния очи́стившися, великому́ченице,/ Чи́стому Жениху́, Христу́, прилепи́лася еси́,/ ему́же и нас чи́сто присво́й моли́твами твои́ми.

В воде́ пото́пльшему зми́я лука́ваго подо́бящися,/ кро́вию твое́ю страда́льческою вра́жию погрузи́ла еси́ си́лу, страстоно́сице,/ от него́же и нам изба́вится Спа́са умоли́.

Богоро́дичен: Во́ду слез о́чищающую, Пречи́стая, пода́ждь ми/ и, очи́стивши мя от ка́ла беззако́ний,/ чи́ста предста́ви, Богороди́тельнице, Сы́ну Твоему́ и Бо́гу.

Ин кано́н преподо́бнаго, глас и ирмосы перваго кано́на.

Песнь 1

Твоя́ похвалы́ нача́ти хотя́щу ми,/ пода́ждь твой ны́не глас медото́чный, преподо́бне,/ и́мже правосла́вную уясни́л еси́ Це́рковь пе́сньми, о́тче Иоа́нне,/ я́же твою́ почита́ет па́мять.

Я́ко мудр и остроу́мен суди́я,/ изря́днейше су́щих естество́ смотря́я,/ нестоя́щих предразсуди́л еси́ ве́чнующая:/ привре́менными бо измени́л еси́ пребыва́ющая, о́тче Иоа́нне,/ иде́же тя и ны́не Христо́с просла́ви.

Богоро́дичен: Превы́шши яви́лася еси́, Чи́стая, вся́кия тва́ри,/ ви́димыя же и неви́димыя, Присноде́во:/ Зижди́теля бо родила́ еси́,/ я́коже благоволи́ воплоти́тися во утро́бе Твоей,/ его́же со дерзнове́нием моли́ спасти́ пою́щия Тя.

Песнь 3

Ирмо́с:

Процвела́ есть пусты́ня, я́ко крин, Го́споди,/ язы́ческая неплодя́щая, Це́рковь прише́ствием Твои́м,/ в не́йже утверди́ся мое́ се́рдце.

Уя́звляема любо́вию Твое́ю, я́ко женихо́вою, Влады́ко,/ неоде́ржным стремле́нием страстоте́рпица Варва́ра/ все оте́ческое безбо́жие возненави́де.

Ни сла́дости красота́, ни цвет добро́ты, ни бога́тство же,/ ни сла́дости ю́ностныя услади́ша тя, Варва́ро сла́вная,/ Христу́ уневе́стившуюся, до́брая де́во.

К соверше́нным подвиго́м ничто́же яви́ся возбране́ние не́мощи же́нстей,/ ни ю́ность во́зраста, Христе́:/ неви́димою бо Твое́ю си́лою укрепля́ема.

Ин святы́я

Ирмо́с:

Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Небе́снаго кру́га смотря́ющи украше́ние, му́драя де́во Варва́ро,/ Верхотво́рца позна́ла еси́,/ его́же и возлю́бльши, тому́ служи́ти изво́лила еси́./ И нас в любви́ его́ утверди́, мо́лимся.

Небе́снаго Творца́ в Тро́ице пресве́тлое изобразу́ющи естество́,/ три окна́ в ба́не оте́честей изобрази́ти повеле́ла еси́,/ Тро́ическому покланя́тися уча́щи Бо́жеству,/ ему́же и нас ве́чно покланя́тися сподо́би.

Небе́снаго черто́га жела́ющи,/ Небе́сному Жениху́ чистоту́ де́вства твоего́ соблю́ла еси́, вре́меннаго презре́вши./ И мене́ в чистоте́ тому́ служи́ти, му́ченице, укрепи́.

Богоро́дичен: Небе́снаго Творца́, Богоро́дице Всепе́тая, поро́ждши,/ Небе́с простра́ннейша яви́лася еси́./ Мене́ от простра́ннаго пути́ поги́бельна укло́нши, на Небе́сный путь наста́ви, молю́ся.

Преподо́бнаго:

Расточи́л еси́ бога́тство, Бо́гу взаи́м дая́,/ те́мже тебе́ на Небесе́х угото́вася Ца́рство;/ но и ны́не воздая́ние, Иоа́нне, прия́л еси́ мно́гократное.

Прему́дрости тала́нт прие́м,/ дея́ньми украша́я, уясни́л еси́, Иоа́нне, Це́рковь Христо́ву,/ его́же многоусугубля́еши, и житие́ оста́вив.

Богоро́дичен: Чи́ни удиви́шася А́нгельстии, Пречи́стая,/ и челове́ческая устраши́шася сердца́ о Рождестве́ Твое́м./ Те́мже Тя, Богоро́дицу, ве́рою чтим.

Конда́к преподо́бнаго, глас 4.

Подо́бен: Вознесы́йся на Крест:

Песнопи́сца и честна́го Богоглаго́льника,/ Це́ркве наказа́теля и учи́теля/ и враго́в сопротивоборца́ Иоа́нна воспои́м:/ ору́жие бо взем– Крест Госпо́день,/ всю отрази́ ересе́й пре́лесть/ и я́ко те́плый предста́тель к Бо́гу/ всем подае́т прегреше́ний прощение.

И́кос:

Церко́вному наста́внику, и учи́телю, и жерцу́,/ я́ко таи́ннику неизглаго́ланных, возопие́м согла́сно:/ и́же к Бо́гу твои́ми моли́твами отве́рзи уста́ на́ша/ и сподо́би глаго́лати словеса́ уче́ний твои́х,/ ты бо Тро́ице яви́лся еси́ соприча́стник,/ я́ко друго́е со́лнце облиста́я в ми́ре,/ чудесы́ и уче́нии просия́в, я́ко Моисе́й,/ в зако́не Госпо́дни поуча́лся всегда́,/ сло́вом и де́лом был еси́ свети́льник/ и моля́ непреста́нно всем пода́ти прегреше́ний проще́ние.

Седа́лен, глас 3.

Подо́бен: Красоте́ де́вства:

В страда́нии твое́м вся удиви́ла еси́,/ я́ко претерпе́вши мучи́телей ра́ны,/ вяза́ния, му́ки и темни́цы, Варва́ро прехва́льная./ Те́мже и вене́ц с Небесе́ тебе́ даде́ Христо́с,/ к Нему́же, возжеле́вши усе́рдно, притекла́ еси́;/ Той благода́ть подаде́ тебе́, му́ченице,/ врачева́ния источа́ти челове́ком.

Сла́ва, преподо́бнаго, глас то́йже:

Труба́ бла́гогласна освяще́на, свяще́ннейше, нам яви́лся еси́,/ песнопою́щи обра́зно уче́ния Го́спода и Спа́са конце́м,/ и твои́ми словесы́ мир просвети́л еси́, Иоа́нне преподо́бне,/ Христа́ Бо́га моли́ дарова́ти нам ве́лию ми́лость.

И ны́не, Богоро́дичен:

Боже́ственная ски́ния была́ еси́ Сло́ва,/ еди́на Пречи́стая Ма́ти Де́во, чистото́ю А́нгелы превозше́дшая;/ па́че всех мене́, персть бы́вша,/ оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.

А́ще не поеши бдения, Крестобогоро́дичен:

Нескве́рная А́гница Сло́ва, Нетле́нная Де́ва Ма́ти,/ на Кресте́ зря́щи пове́шена из Нея́ без боле́зни прозя́бшаго,/ ма́терски подо́бно рыда́ющи, вопия́ше:/ увы́ Мне, Ча́до Мое́, ка́ко стра́ждеши во́лею,/ хотя́ изба́вити от страсте́й безче́стия челове́ка?

Песнь 4

Ирмо́с:

Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Из Де́вы рождся,/ дарова́л еси́ отрокови́цам де́вам киче́ние низложи́ти льсти́ваго;/ те́мже добропобе́дная Варва́ра сего́ го́рды́ни поруга́ся.

Прама́ти, хитростьми́ льсти́ваго прельсти́вшися пе́рвее,/ пи́щи изгна́на бысть ра́йския;/ Варва́ра же, сему́ поруга́вшися,/ в Небе́снем черто́зе ны́не водворя́ется.

Кресто́м Твои́м сме́рти си́лу разори́л еси́;/ те́мже, телесе́ отрокови́ца, Христе́, не пощаде́вши,/ терпи́т до́блественнейше ра́ны Варва́ра/ тве́рдым умо́м.

Ин святы́я

Ирмо́с:

Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Услы́шавши, Варва́ро, небеса́, пове́дающа сла́ву Бо́жию,/ на земли́ Бо́га сла́вити возжела́ла еси́,/ его́же сла́вы и нас сподо́би.

Услы́шав оте́ц твой тебе́, Вы́шняго Отца́ испове́дующую,/ гоня́ше на убие́ние,/ но не возмо́же отто́ргнута от и́стиннаго Бо́га.

Услы́шавши преще́ния оте́ческая/ и му́ки от него́ терпя́щи, Варва́ро,/ непоколеби́ма пребыла́ еси́/ и мене́ непоколеби́ма в доброде́телех упра́ви.

Богоро́дичен: Услы́ши, Пречи́стая Влады́чице, моле́ние мое́,/ и изба́ви мя от зол,/ и глас благослове́нных, призыва́ющий в Ца́рство, слы́шати удосто́й.

Преподо́бнаго:

Повеле́нию Христо́ву повину́вся, оста́вил еси́ мирску́ю красоту́,/ бога́тство, сла́дость, све́тлость,/ его́же ра́ди, взем твой крест,/ после́довал еси́, Иоа́нне му́дре.

Сообнища́в обнища́вшему Христу́ челове́ческаго ра́ди спасе́ния,/ спросла́вился еси́, я́коже Той обеща́ся,/ и сца́рствуеши же присноца́рствующему, Иоа́нне.

Богоро́дичен: Тя, приста́нище спасе́ния и сте́ну необори́му,/ Богоро́дице Влады́чице, вси ве́рнии ве́мы:/ Ты бо моли́твами Твои́ми от бед избавля́еши ду́ши́ на́ша.

Песнь 5

Ирмо́с:

Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику, Отцу́ Твоему́,/ от но́щи неве́дения/ приведе́ние и́мамы.

Око́нцы треми́ ба́ни просвеща́тися повеле́вши,/ та́инственно написа́ла еси́ креще́ние, Варва́ро,/ Тро́ичным све́том души́ светоно́сное су́щее очище́ние.

Су́щаго Бо́га разже́гшися ре́вностию,/ лжеиме́нных богов скверна́вая оплева́ ли́ца Варва́ра всехва́льная,/ руга́ющися отрокови́ца вне́шнему́ мироде́ржцу.

Неи́стовства лю́таго о́тча укло́ншуюся Варва́ру,/ разсту́пльшися, а́бие гора́ прия́т,/ я́коже дре́вле приснопа́мятную первому́ченицу Фе́клу,/ Христу́ чудоде́йствовавшу.

Ин святы́я

Ирмо́с:

Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.

Просвети́вши свещу́ свою́, му́ченице, ве́рою,/ свеща́ми опали́ти те́ло твое́ преда́ла еси́,/ в черто́г Небе́сный све́тло вни́ти жела́ющи.

Просвеща́хуся ве́рою неве́рием омраче́ннии лю́дие,/ ви́дяще тя, жже́ния, бие́ния,/ ре́зания терпя́щую до́блественне, му́ченице.

Просвети́ мя, о Варва́ро, омраче́ннаго мглою грехо́вною,/ и Све́том Невече́рним осиява́тися, све́тлая де́во, молю́ся, сотвори́.

Богоро́дичен: Просвети́ла еси́ потемне́нное естество́, Богоро́дице,/ Свет и́стинный ро́ждши./ Те́мже и мене́, све́том просвети́вши,/ от мра́чных враг свободи́.

Преподо́бнаго:

Стра́хом Христо́вым, о́тче, утвержда́емь к Боже́ственней жи́зни,/ плотско́е мудрова́ние все покори́л еси́ ду́ху,/ твоя́, Иоа́нне, чу́вства о́чищая.

Очи́стив вся́кия скве́рны те́ло,/ и ум, и ду́шу тщали́во, Богому́дре,/ зарю́ прия́л еси́ трисо́лнечную, Иоа́нне,/ све́тлыми тя бога́тящую дарова́нии.

Богоро́дичен: Моли́ Твоего́ Сы́на и Го́спода, Де́во Чи́стая,/ плене́нным избавле́ние от проти́внаго обстоя́ния,/ на Тя наде́ющимся, ми́рное дарова́ти.

Песнь 6

Ирмо́с:

Во глубине́ грехо́вней содержи́мь е́смь, Спа́се,/ и в пучи́не жите́йстей обурева́емь,/ но, я́коже Ио́ну от зве́ря,/ и мене́ от страсте́й возведи́ и спаси́ мя.

Я́коже обеща́лся еси́ му́дрость дарова́ти, Спа́се, Богонауче́ну/ тебе́ ра́ди стоя́щим пред суди́щем мучи́телей,/ ея́же му́ченица Варва́ра испо́лнися.

Безбо́жных лесть изобличи́ла еси́ сло́вом Богому́дрым, Варва́ро сла́вная,/ терпе́нием же дел мучи́телей мудрова́ния удиви́ла еси́.

Ра́нам неща́дно строга́тися,/ ру́бы же власяны́ми тве́рдо востира́тися Христа́ ра́ди/ непоро́чная страстоте́рпица те́ло преда́де́.

Ин святы́я

Ирмо́с:

Моли́тву пролию́ ко Го́споду/ и тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Моли́тву твою́ страда́льческую услы́шав, Христо́с, Варва́ро,/ в темни́це затворе́нную посети́,/ исцеле́ние от ран подаде́ и на по́двиг укрепи́,/ ты же моя́ ра́ны грехо́вныя уврачу́й, му́ченице, молю́ся.

Моли́твою ти, и страда́льческим тве́рдым терпе́нием,/ и чу́дным исцеле́нием Иулиани́ю от злоче́стия привлекла еси́/ страда́ти с тобо́ю за Христа́,/ привлецы́ и мене́ к Го́рнему́ мудрова́нию, страстоно́сице.

Моли́тву всяк принося́й с ве́рою тебе́, му́ченице,/ и к моща́м твои́м святы́м притека́яй,/ душе́вных страсте́й и теле́сных исцеле́ние ско́ро прие́млет,/ е́же и нам бога́тно подава́й, мо́лимся.

Богоро́дичен: Моли́тву на́шу приими́, Пречи́стая,/ и моли́твою Ти всемо́щною изба́вити нас от враг ви́димых и неви́димых,/ от грехо́в же и вся́кия му́ки моли́,/ его́же родила́ еси́, Челове́колюбца Бо́га.

Преподо́бнаго:

Просвети́вся ду́ха благода́тию,/ Боже́ственных и челове́ческих зна́нием веще́й я́сно обогати́вся,/ тре́бующим, Иоа́нне, незави́стно препо́дал еси́.

Подо́бие лико́м Небе́сным, му́дре,/ Це́рковь правосла́вно украси́л еси́,/ ликостоя́нныя пе́сни приглаша́я Тро́ице Боговеща́нныя.

Богоро́дичен: Неискусому́жно, Де́во, родила́ еси́ и ве́чнуеши Де́ва,/ явля́ющи и́стиннаго Божества́, Сы́на и Бо́га Твоего́, о́бразы.

Конда́к, глас 4.

Подо́бен: Вознесы́йся на Крест:

В Тро́ице благоче́стно пева́емому,/ после́довавши Бо́гу, страстоте́рпице,/ и́дольская притупи́ла еси́ чти́лища;/ посреде́ же по́двига страда́льчествующи, Варва́ро,/ мучи́телей преще́ния не устраши́лася еси́, мужему́дренная,/ велегласно пою́щи при́сно:/ Тро́ицу чту, Еди́но Божество́.

И́кос:

Уневе́стившуюся Христу́ муче́нием Варва́ру,/ соше́дшеся, почти́м досто́йно:/ я́ко да, тоя́ моли́твами па́губы душетле́нныя изба́вльшеся/ и губи́тельства, тру́са и паде́жа, житие́ в ми́ре препрово́дим,/ сподо́бившеся со все́ми святы́ми, от ве́ка Бо́гу благоугоди́вшими,/ ходи́ти во све́те и пе́ти с ни́ми,/ удиви́л еси́, Спа́се, твоя́ ми́лости/ всем челове́ком, ве́рою испове́дающим:/ Тро́ицу чтим, Еди́но Божество́.

Песнь 7

Ирмо́с:

Богопроти́вное веле́ние беззако́ннующаго мучи́теля/ высо́к пла́мень вознесло́ есть./ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

И́же зе́млю погуби́ти и потреби́ти мо́ре мучи́тель, су́етно свире́пствуя,/ я́ко игра́лище, лежи́т Варва́ры отрокови́цы под нога́ми:/ сего́ бо попра́в, Христо́с, я́коже пти́цу ху́ду, связа́.

Ра́нами нестерпи́мыми твоему́ стру́жему те́лу всему́,/ обагре́ну же крове́й ка́плями,/ свеща́ми, претерпе́ла еси́, пали́ма по ре́бром,/ му́ченице всехва́льная,/ Христа́ бла́годарящи, Варва́ро сла́вная.

О, безчелове́чнаго и немилосе́рдаго/ мучи́телей суровства́ и мно́жайшаго безбо́жества!/ Сосцы́ бо му́ченицы, я́коже в мясосе́чнице, лю́те мечи́ отсеца́ху,/ ум утвержда́ющия Подвигополо́жнику Христу́.

Ин святы́я

Ирмо́с:

О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Де́ти евре́йския А́нгел от огня́ неопа́льны сохрани́вый/ и тебе́, Варва́ро, нагу води́му, от студа́ защити́,/ оде́ждою свы́ше обле́к, пою́щую:/ благослове́н еси́, Го́споди Бо́же, во ве́ки.

Де́тское игра́лище вменя́ющи му́ки,/ не пощади́ла еси́ те́ла твоего́,/ е́же бы́ти ему́ за Христа́ стру́жему и о́стро стира́ему, великому́ченице, пою́щи:/ благослове́н еси́, Го́споди Бо́же, во ве́ки.

Дете́й евре́йских и аз подража́я, Варва́ро,/ хвалю Христа́, да́вшаго тебе́ кре́пость,/ ты же мя, на по́двиг доброде́телей укре́пльши,/ оде́ждою Небе́сною облещи́ся сподо́би во ве́ки.

Богоро́дичен: Деторо́дию Твоему́, Де́вою и по рождестве́ пребы́вшу, дивлю́ся, Богоро́дице,/ удиви́ у́бо и на мне ми́лость Сы́на Твоего́,/ да, поми́лован Тобо́ю, пою́:/ благослове́н Бог, ублагослови́вый Тя, Ма́терь Свою́, во ве́ки.

Преподо́бнаго:

Ре́вностию разжига́емь,/ богобо́рных ересе́й вся́кое злоу́мие возрази́л еси́ све́тлыми пи́сании,/ убели́в всем я́сно дре́вле се́янная,/ му́дрыми, о Иоа́нне, напи́санныя то́нко.

Те́пле обличи́л еси́ злоиме́нных учени́ков Ма́нента ху́льное нече́стие,/ разврати́ти покуси́вшееся Це́рковь Христо́ву,/ словесы́ и догма́ты твои́ми, о Иоа́нне,/ я́же счини́л еси́.

Богоро́дичен: Святы́х святе́йшую поразумева́ем Тя,/ я́ко Еди́ну ро́ждшую Бо́га непреме́ннаго,/ Де́во нескве́рная, Ма́ти безневе́стная:/ всем бо источи́ла еси́ ве́рным нетле́ние/ Боже́ственным Рождество́м Твои́м.

Песнь 8

Ирмо́с:

Пещь иногда́ о́гненная в Вавило́не де́йства разделя́ше/ Бо́жиим веле́нием, халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

Яви́ся тебе́ Христо́с во Све́те непристу́пнем,/ заключе́нней, о Варва́ро, в темни́це,/ дерза́ти повелева́я, и ра́ны врачу́я, и ра́дость да́руя:/ те́мже впери́лася еси́ твоего́ Жениха́ раче́нием.

Яви́ся, Христе́, явле́нно прорече́ние Твое́ испо́лнено:/ оте́ц бо ча́до на смерть предае́т,/ самоде́латель же закла́ния быв окая́нный роди́тель Твоея́ му́ченицы./ Те́мже с Небесе́ огне́м истреби́ся.

А́нгел све́тел оде́ждею светови́дною/ тя, Христа́ ра́ди обнаже́нную, честна́я Варва́ро, оде́яше,/ я́коже неве́сту, обходя́щу стра́сти:/ оде́жди бо, му́ченице, совлекла́ся еси́, Боже́ственное прие́мши измене́ние.

Ин святы́я

Ирмо́с:

Победи́тели мучи́теля и пла́мене/ благода́тию Твое́ю бы́вше,/ за́поведем Твои́м зело́ прилежа́ще,/ о́троцы вопия́ху:/ благослови́те, вся дела́ Госпо́дня, Го́спода.

Победи́телие непобеди́мыя твоея́ ве́ры мучи́телие тща́щеся бы́ти,/ сосца́ твоя́ неща́дно отре́зоваху,/ ты же, тве́рдо терпя́щи, млеко́м уче́ния о Бо́зе напои́ла еси́ предстоя́щия/ и благословя́щия Христа́ во ве́ки.

Победи́ла еси́ му́жеством твои́м, му́ченице Варва́ро, вся мучи́тельская ухищре́ния./ моли́ у́бо Влады́ку Христа́, мо́лим тя,/ всем ве́рным на враги́ побе́ду да́ти, пою́щим:/ благослови́те, вся дела́, Го́спода/ и превозноси́те его́ во ве́ки.

Победи́тельница суро́ваго отца́ твоего́ яви́лася еси́, му́ченице:/ он бо Небе́сным огне́м во а́дский огнь низведе́ся,/ ты же на Не́бо возшла́ еси́,/ е́же и мне исхо́да́тайствуй, от огня́ избавля́ющи мя во ве́ки.

Богоро́дичен: Победи́, Пречи́стая, враго́в ви́димых и неви́димых, низложи́ти нас тща́щихся,/ и страсте́й мя вся́ких изба́ви, да пою́ торже́ственне:/ благослови́те, вся дела́, Го́спода/ и превозноси́те Его во ве́ки.

Преподо́бнаго:

Обличи́л еси́ я́ве, треблаже́нне Иоа́нне,/ Несто́риево разделе́ние, Севи́рово слия́ние, единово́льное пребезу́мие,/ ве́ру же единоде́йственну/ сия́ние Правосла́вия всем облиста́в конце́м.

Все́я враг пле́велы обы́чно ерети́ческия в Це́ркви Христо́ве,/ сего́ поклоне́ния отмета́тися во ико́нах честны́х,/ но обре́те не дре́млюща тя, всеблаже́нне Иоа́нне,/ вся́кое се́мя злое искореня́юща.

Богоро́дичен: Ты от Отца́ неразлу́чнаго, во чре́ве бо́гомужно пожи́вшаго,/ безсе́менно зачала́ еси́ и несказа́нно родила́ еси́, Богороди́тельнице Пречи́стая:/ те́мже Тя, спасе́ние всех нас, испове́даем.

Песнь 9

Ирмо́с:

Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Сла́вную иму́щи прия́ти кончи́ну мече́м, Варва́ро, муче́ния твоего́,/ со Иулиани́ею венце́в му́ченических сподо́бльшися,/ глас Боже́ственный услы́шала еси́,/ исполня́ющий моле́ния твоя́.

Твоему́ сочета́вшийся ны́не Всецарю́, Жениху́ Христу́,/ облиста́ющися сла́вою, Варва́ро, Боже́ственнаго све́та/ в Небе́сных черто́зех, певцы́ твоя́ назира́й,/ страсте́й изменя́ющи и приводя́щи живу́щему Бо́гу.

Исполня́я твое́ проше́ние, Варва́ро страстоте́рпице,/ Христо́с врачева́ния подае́т соверша́ющим твою́ ве́рою ле́тнюю па́мять,/ я́ко и́стинно морски́й песок, твоя́ превзыдо́ша благосла́вная чудоде́йства.

Ин святы́я

Ирмо́с:

Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Вои́стинну Бо́га испове́дающи, му́ченице,/ черто́г Небе́сный насле́дила еси́,/ его́же и нас сподо́би,/ да с тобо́ю Христа́ ве́чно велича́ем.

Вои́стинну на тебе́, Варва́ро, испо́лнися Христо́во прорече́ние:/ преда́ст оте́ц ча́до на смерть,/ е́юже ты ве́чный живо́т обрела еси́.

Вои́стинну никто́же, притека́яй к тебе́, страстоно́сице,/ тощ благода́ти твоея́ отхо́дит,/ ея́же и мене́ испо́лни, молю́ся.

Богоро́дичен: Вои́стинну и́стиннаго Бо́га пло́тию, Богоро́дице, родила́ еси́,/ его́же ми́лостива нам в День Суда́ соде́лай,/ да безконе́чно с Ним Тя велича́ем.

Преподо́бнаго:

Научи́л еси́ вся церко́вныя пе́ти сы́ны правосла́вно Еди́ницу в Тро́ице Честну́ю,/ воплоще́ние же Сло́ва Боже́ственное богосло́вити я́ве, Иоа́нне,/ уясня́я неудобопости́жная мно́гим во Свяще́нных Писа́ниих.

Святы́х чи́ны песносло́вив, преподо́бне,/ Чи́стую Богоро́дицу, Христо́ва Предтечу,/ та́же апо́столы, проро́ки с по́стники и му́дрыя учи́тели,/ пра́ведники и му́ченики,/ в тех ны́не водворя́ешися ски́ниих.

Богоро́дичен: Черто́г была́ еси́/ и́же па́че ума́ вопло́щения Сло́ва, Де́во Богороди́тельнице,/ оде́яна сла́вою доброде́телей и испещре́на./ Тем Тя, Всенепоро́чная, Богоро́дицу возвеща́ем.

Свети́лен святы́я.

Подо́бен: Жены́, услы́шите:

Я́ко ши́пок красне́йший,/ из терно́внаго израсла́ еси́ ко́рене, де́во Варва́ро,/ же́ртвою, му́ченице, свяще́ннаго страда́ния обагри́вшися кро́вию./ И ны́не Боже́ственную твою́ па́мять соверша́ющия любо́вию спаса́й от бед.

Сла́ва, преподо́бнаго:

Я́ко Боже́ствен свет, о́тче наш, Це́ркви возсия́л еси́,/ пе́ний твои́х сию све́тлостию облиста́в/ и све́том нра́ва твоего́, и́мже Христо́вы догма́ты явля́еши укра́шены,/ к нему́же не преста́й о нас моля́ся, Иоа́нне.

И ны́не, Богоро́дичен:

Вои́стинну Тя Богоро́дицу испове́дуем, Влады́чице, Тобо́ю спаса́емии:/ и́бо Бо́га неизрече́нно родила́ еси́,/ разори́вшаго Кресто́м смерть/ и к Себе́ привле́кшаго преподо́бных собо́ры,/ с ни́миже восхваля́ем Тя, Де́во.

На хвали́тех стихи́ры святы́я, на 4.

Глас 1. Самогла́сен. Анато́лиево:

Земны́я пи́щи наслажде́ние презре́вши/ и о́тчее бога́тство,/ ку́пно же и сла́ву возненави́девши,/ Небе́снаго Жениха́ возлюби́ла еси́,/ Варва́ро все сла́вная:/ мече́м бо во главу́ отсе́кшися,/ с му́дрыми вошла́ еси́ де́вами к Жениху́ Христу́./ Те́мже и губи́тельный неду́г отгоня́ющи,/ ве́рныя врачу́еши де́йством Свята́го Ду́ха/ и моли́шися непреста́нно о душа́х на́ших.

Глас 2. Византи́ево:

Посрами́ся лука́вый враг,/ от жены́ побежде́н,/ я́ко прама́терь и́мяше де́йство ко греху́:/ от Де́вы бо вопло́щшееся Сло́во О́тчее/ непрело́жно и несме́сно,/ я́ко весть Еди́н Сам,/ кля́тву разруши́ Е́вину и Ада́мову Христо́с,/ венча́вый досто́йно Варва́ру му́ченицу/ и тоя́ ра́ди да́руя ми́ру очще́ние и ве́лию ми́лость.

Богозва́нная му́ченица Варва́ра,/ на суди́щи стра́ждущи, глаго́лаше:/ лю́ты у́бо ны́нешния му́ки, о мучи́телие,/ но ра́достно ве́чныя жи́зни восприя́тие;/ не предпочту́ же отню́д земны́х па́че Небе́сных./ Сего́ ра́ди сецы́те,/ стружи́те пло́ти и огню преда́йте мя,/ ра́дующися, отъиду́ к Жениху́ моему́ Христу́./ Ея́же моли́твами, Христе́ Бо́же,/ ми́лости Твоя́ низпосли́/ и спаси́ ны, тоя́ страда́ния соверша́ющия ве́рно.

Торже́ство́ днесь страстоте́рпицы Варва́ры,/ прииди́те, лю́дие, воспои́м:/ тоя́ бо ниже́ меч, ниже́ огнь, ниже́ и́ная мука,/ ниже́ многоплете́нная велиа́ра ловле́ния победи́ша./ И к ней ве́рою возопие́м:/ Христа́ моли́, доброму́ченице всесла́вная,/ дарова́ти нам ве́лию ми́лость.

Сла́ва, глас 6: Иоа́нна мона́ха:

Страда́льческим ше́ствовавши путе́м,/ прароди́тельнаго избежа́ла еси́ сове́та, Варва́ро всечестна́я,/ и, я́ко у́бо де́ва мудра́, свещу́ нося́щи,/ вошла́ еси́ во дворы́ Го́спода твоего́,/ и, я́ко му́ченица му́жественна,/ благода́ть прия́ла еси́ цели́ти плотски́я стра́сти./ Но и нас, воспева́ющих тя,/ душе́вных боле́зней изба́ви/ к Бо́гу моли́гвами твои́ми.

И ны́не, Богоро́дичен:

Никто́же, притека́яй к Тебе́,/ посрамле́н от Тебе́ исхо́дит, Пречи́стая Богоро́дице Де́во,/ но проси́т благода́ти/ и прие́млет дарова́ние к поле́зному проше́нию.

А́ще не поеши бдения, Крестобогоро́дичен:

Всечи́стая, я́ко ви́де Тебе́,на Кресте́ пове́шена,/ пла́чущи, вопия́ше ма́терски:/ Сы́не Мой и Бо́же Мой,/ сладча́йшее Мое́ Ча́до,/ ка́ко терпи́ши страсть поно́сную?

На стихо́вне Окто́иха.

Сла́ва, преподо́бнаго, глас 8:

Мона́хов мно́жества/ наста́вника тя почита́ем, о́тче наш Иоа́нне./ Твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных;/ с ни́миже моли́ся Го́сподеви/ поми́ловатися душа́м на́шим.

И ны́не, Богоро́дичен или́ Крестобогоро́дичен, глас то́йже.

Подо́бен: О, пресла́внаго чудесе́:

Не терплю, Ча́до, ви́дящи Тя, на Дре́ве усну́вша,/ бо́дрость всем подаю́щаго,/ я́ко да и́же дре́вле преступле́ния плодо́м/ сном поги́бельным усну́вшим/ Боже́ственную и спаси́тельную бо́дрость по́даси,/ Де́ва глаго́лаше, пла́чущи, ю́же велича́ем.

НА ЛИТУРГИ́И

Блаже́нны от кано́на му́ченицы, песнь 3-я и преподо́бнаго песнь 6-я. Проки́мен, глас 4: Ди́вен Бог во святы́х Свои́х,/ Бог Изра́илев.

Стих: В це́рквах благослови́те Бо́га, Го́спода от исто́чник Изра́илевых.

Апо́стол к Гала́том, зачало 208.

Аллилу́ия, глас 1: Терпя́, потерпе́х Го́спода, и внят ми.

Ева́нгелие от Ма́рка, зачало 21. Прича́стен: Ра́дуйтеся, пра́веднии:

Тропа́рь, глас 5:

Уподо́бился еси́ дре́вним отце́м,/ святи́телю о́тче Генна́дие,/ Свяще́нныя Кни́ги собра́в и еретики́ посрами́в,/ ре́вность по Бо́зе показу́я, па́ству огради́л еси́,/ моли́ и ны́не Христа́ Бо́га/ мир Це́ркви дарова́ти/ и спасти́ся душа́м на́шим.

Конда́к, глас 2:

Ве́лия исправле́ния о церко́вном благоле́пии явля́я,/ Правосла́вную ве́ру утверди́л еси́,/ святи́телю о́тче Генна́дие,/ не преста́й моли́тися о нас,/ во Ца́рствии Небе́снем Безсме́ртныя трапе́зы наслажда́яся.