На Го́споди, воззва́х: стихи́ры Окто́иха 3 и святыя 3, глас 1.

Подо́бен: Небе́сных чино́в:

Претво́ршися пе́рвее любве́, честна́я,/ и утве́рждали де́лом лу́чшим тебе́ по́мыслом,/ изшла́ еси́ от суеты́ сласте́й, блаже́нная, стропо́тства/ и доброде́телей жесто́ким пра́во ше́ствуеши/ восхожде́нием, стра́нствовавши.

Вприста́нище Боже́ственное устреми́вшися,/ ти́хо прешла́ еси́ волн мирски́х мяте́ж,/ души́ же твоея́ кора́бль весь, всечестна́я,/ непогрузи́м везу́щи от сласте́й го́рести,/ та́инственных име́ний полн су́щий.

Боголе́пным подража́нием ты, стра́нствовавши,/ нас ра́ди свы́ше к нам Низше́дшаго возвы́сити па́дшия/ пребыва́еши, му́драя, сро́дником у́бо неве́дома,/ благочести́вым же па́че,/ и Бо́гу, Ксе́ние, всегда́ моля́щися.

Сла́ва, и ны́не, Богоро́дичен:

Препросла́вленна еси́ в ро́дех родо́в,/ Де́во Ма́ти Отрокови́це, Богоро́дице Мари́е,/ ми́ра предста́тельство,/ ро́ждши пло́тию Сы́на Безнача́льнаго Отца́,/ Соприсносу́щна же Ду́ху вои́стинну,/ Его́же моли́ спасти́ся нам.

Крестобогоро́дичен:

Воздви́жена я́ко ви́де на Кресте́ А́гнца/ непоро́чная Де́ва, пла́чущи, вопия́ше:/ сладча́йшее Мое́ Ча́до,/ что но́вое и пресла́вное виде́ние?/ Ка́ко, Содержа́й вся́ческая го́рстию,/ на Дре́ве пригвозди́лся еси́ пло́тию?

Тропа́рь, глас 8:

В тебе́, ма́ти, изве́стно спасе́ся, е́же по о́бразу:/ прии́мши бо крест, после́довала еси́ Христу́/ и, де́ющи, учи́ла еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней./ Те́мже и со А́нгелы сра́дуется, преподо́бная Ксе́ние, дух твой.

На у́трени

О́ба кано́на Окто́иха и святыя на 4, глас 8.

Песнь 1

Ирмо́с: Песнь возсле́м, лю́дие, чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопию́ще:/ пои́м Тебе́, Еди́ному Влады́це.

Стра́ннаго су́ща вся́кия доброде́тели и удали́вшагося от Бо́га дея́ньми безме́стными,/ присво́й мя Сему́ моли́твами твои́ми благоприя́тными,/ Ксе́ние честна́я, преподо́бная,/ твое́ стра́нное житие́ благохва́лящаго.

Огнь тя разжже́ мы́сленный, я́ко вещь удобопа́льну, мирску́ю пре́лесть/ и плотска́го обру́чника отврещи́ся увеща́ ра́зумом му́жественнейшим/ и Го́споду чи́сте уневе́стися.

Стра́нную уразуме́вши Жизнь, на Небесе́х пребыва́ющую и непреходя́щую,/ зва́ние я́ко дея́ние премени́ла еси́/ и потекла́ еси́, я́коже еле́нь жа́ждущий,/ Безсме́ртнаго в след Обру́чника.

Богоро́дичен: Пе́сньми Всечи́стую, ве́рнии, Мари́ю да восхва́лим,/ Богома́терь обра́дованную, покро́в Боже́ственный,/ благоти́шное приста́нище, всех ве́рных спасе́ние.

Песнь 3

Ирмо́с: Утвержде́й сло́вом небеса́/ и зе́млю основа́вый на вода́х мно́гих,/ утверди́ мя к пе́нию славосло́вия Твоего́, Го́споди.

Удержа́ла еси́ раче́ние Боже́ственное чи́стыя души́ твоея́,/ забве́ние прияти́ тя поще́ния боле́зней увеща́, честна́я, и естества́.

Безсме́ртнаго Обру́чника добро́тами наслажда́ема,/ добро́ту пло́ти увяди́ла еси́/ и яви́лася еси́ красне́йша, в Боже́ственный черто́г всели́вшися.

Позлаще́нная кри́ла доброде́телей стяжа́вши,/ к высоте́ Небе́сней возлете́ла еси́, блаже́нная,/ я́ко голуби́ца нетле́нна.

Богоро́дичен: Све́тлый о́блаче мы́сленнаго и пресве́тлаго Со́лнца,/ возсия́вшаго из чре́ва Твоего́, Де́во,/ просвети́ ду́ши пою́щих Тя.

Седален, глас 8.

Подо́бен: Прему́дрости:

За милосе́рдие я́вльшееся на земли́ возлюби́вши Сло́во Бо́га Отца́,/ Тому́ после́довала еси́, я́ко Жениху́, всеблаже́нная,/ и тле́ннаго жениха́ усе́рдно оста́вила еси́,/ оста́вльши же тле́нное бога́тство./ Те́мже, во стра́нстве тезоимени́тно живу́щи,/ стра́сти умертви́ла еси́/ и живы́х восприя́ла еси́ насле́дие, Богодухнове́нная./ Моли́ Христа́ Бо́га прегреше́ний оставле́ние дарова́ти/ пра́зднующим любо́вию святу́ю па́мять твою́.

Сла́ва,и ны́не,Богоро́дичен:

В напа́сти многоплете́нныя впад от враг ви́димых и неви́димых,/ бу́рею одержи́м безчи́сленных прегреше́ний мои́х,/ и я́ко к те́плому заступле́нию и покро́ву моему́, Чи́стая,/ ко приста́нищу притека́ю Твоея́ бла́гости./ Те́мже, Всечи́стая, из Тебе́ Воплоще́нному безсе́менно./ Моли́ся приле́жно о всех рабе́х Твои́х,/ непреста́нно моля́щихтися, Богоро́дице Пречи́стая,/ моля́щи Его́ при́сно прегреше́ний оставле́ние дарова́ти/ воспева́ющим досто́йно сла́ву Твою́.

Крестобогоро́дичен:

А́гнца, и Па́стыря, и Изба́вителя/ А́гница зря́щи на Кресте́, восклица́ше, пла́чущи,/ и, го́рько рыда́ющи, вопия́ше:/ мир у́бо ра́дуется, прие́мляй Тобо́ю избавле́ние,/ утро́ба же Моя́ гори́т, зря́щи Твое́ распя́тие,/ е́же терпиши за милосе́рдие ми́лости./ Долготерпели́ве Го́споди,/ ми́лости бе́здно и исто́чниче неизчерпа́емый,/ умилосе́рдися и да́руй прегреше́ний оставле́ние/ ве́рою пою́щим Боже́ственныя стра́сти Твоя́.

Песнь 4

Ирмо́с: Из горы́ приосене́нныя, Сло́ве, проро́к, еди́ныя Богоро́дицы,/ хотя́ща воплоти́тися богови́дно усмотри́/ и со стра́хом славосло́вяше си́лу Твою́.

Ве́но Христу́ принесла́ еси́ чистоту́,/ умерщвле́ние уде́с и боле́зни воздержа́ния/ и восприя́ла еси́ Небе́сное Ца́рство и ве́чнующее наслажде́ние.

О́браз тебе́ до́брым подаю́щи, привлекла́ еси́ мно́гия ду́ши на спасе́ние,/ отто́ргшися мирска́го пристра́стия,/ Ксе́ние Богому́драя и досточу́дная.

Моча́щи посте́лю слеза́ми, преподо́бная, и с пе́пелом яду́щи хлеб,/ утеше́ние получи́ла еси́ нестаре́ющееся и ра́я наслажде́ние.

Богоро́дичен: Ра́дуйся, от нас, Свята́я Богоро́дице,/ ра́дуйся, Ра́дость ро́ждшая ми́ру,/ ра́дуйся, еди́на защище́ние челове́ков,/ Благослове́нная Богоро́дице Чи́стая.

Песнь 5

Ирмо́с: Мрак души́ моея́ разжени́, Светода́вче Христе́ Бо́же,/ началоро́дную тьму изгна́в бе́здны,/ и дару́й ми свет повеле́ний Твои́х, Сло́ве,/ да, у́тренюя, сла́влю Тя.

Я́ко ю́ница, жела́ющи Па́стыря Боже́ственную добро́ту, взыва́ла еси́:/ где ны́не пасе́ши, Женише́?/ Где почива́еши, рцы ми?/ Жела́ю Твое́ ви́дети преизя́щное виде́ние и распаля́юся всю́ду.

Рачи́тельныя добро́ты Моея́, – вопие́т Жени́х, – и́щущи, честна́я,/ доброде́тельми облиста́вшися, в Небесе́х Мя смотри́:/ та́мо пасу́ Аз и Моя́ призыва́ю всегда́ о́вцы.

Го́рлица красне́йшая, ла́стовица светле́йшая и мы́сленный слави́й,/ ловле́ния прете́кши мы́сленных се́тей, яви́лася еси́, Ксе́ние честна́я,/ и в пожела́нней добро́те Христо́ве, досточу́дная.

Богоро́дичен: Безма́терня горе́, в после́дняя су́щим до́ле,/ ражда́еши без Отца́, осуществова́вшаго, Де́во, на́ше все́ за благоутро́бие мно́гое,/ Его́же моли́ спасти́ от тли пою́щия Тя.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молюся,/ к Тебе́ бо возопи́х, и услы́ши мя,/ Бо́же спасе́ния моего́.

Стра́нное твое́ житие́ и па́че челове́ка поще́ние прославля́я,/ тебе́ ра́ди Стра́нствовавый, сла́вная,/ зна́меньми и чудесы́ пресла́вными и́стинно тя, преподо́бная, украси́.

Кру́гом доброде́телей венча́вшися, востекла́ еси́,/ к Нему́же жела́ла еси́, Христу́,/ кру́гом зве́здным тя па́че ума́ возвеща́ющу бли́жним и да́льным страннообра́зно,/ Ксе́ние сла́вная.

Устрани́вшагося дале́че от за́поведей Бо́га на́шего,/ присво́й мя твои́ми, преподо́бная, мольба́ми/ и стра́нна мя сотвори́ лю́тыя гее́нны/ и страсте́й, содержа́щих мя.

Богоро́дичен: На ра́мех Херуви́мских неопи́санно Седя́й,/ опи́сан в Твое́м чре́ве всели́ся пло́тию, а не Божество́м,/ и из Тебе́ про́йде Спаса́яй челове́чеством

Конда́к, глас 2.

Подо́бен: Крове́й твои́х:

Твою́ страннонра́вную, Ксе́ние, па́мять соверша́юще,/ любо́вию почита́ющия тя, пое́м Христа́,/ во всех тебе́ подаю́щаго кре́пость исцеле́ний,/ Ему́же всегда́ моли́ся о всех нас.

Ин конда́к, глас 4:

И́же во святы́х свята́я/ Христа́ Преблага́го всем се́рдцем возлюби́ла еси́, Богому́драя Ксе́ние сла́вная,/ того́ ра́ди омерзи́ла еси́ мирску́ю сла́дость./ Крест же Его́ взе́мши честны́й,/ возлюби́ пе́ти при́сно: аллилу́йя.

Песнь 7

Ирмо́с: О́троки ороси́вый в пещи́/ и Де́ву сохрани́вый ро́ждшую Тя по рождестве́,/ благослове́н еси́, Бо́же оте́ц на́ших.

Пелена́ми Рим хва́лится,/ Ми́ласса же мно́жае, твоя́ мо́щи стяжа́вши,/ из ни́хже то́чатся чудеса́ ве́рным, Богоневе́сто.

Река́ яви́лася еси́ врачева́ний, страсте́й мо́ре потопля́я песнопою́щих:/ благослове́н еси́, Го́споди – Бо́же оте́ц на́ших.

Успи́ла еси́ стра́сти душетле́нныя во мно́гих бде́ниих, блаже́нная,/ и пра́ведным подо́бным сном усну́ла еси́,/ о ми́ре моля́щися.

Богоро́дичен: Из Тебе́ Воплоти́вшагося па́че сло́ва моля́щи не преста́й, Препе́тая Богоро́дице,/ от сете́й изба́витися вра́жиих душа́м на́шим.

Песнь 8

Ирмо́с: Покрыва́яй вода́ми превы́спренняя Своя́,/ полага́яй мо́рю преде́л песо́к и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,/ я́ко Соде́телю всех во ве́ки.

Обручи́вшися, я́ко писа́ся, еди́ному му́жу, Христу́, кра́сному добро́тою,/ всяк вид доброде́телей благоче́стно навы́кла еси́, сла́вная,/ и в черто́г Боже́ственный всели́ся,/ ве́но прии́мши благода́ть врачева́ний во вся ве́ки.

Душа́ моя́ в след Тебе́ прилепи́ся, Христе́, – вопия́ла еси́ любо́вию:/ я́ко земля́ жа́ждущая,/ Тя, во́ду жи́ву, ищу́, Го́споди,/ Тебе́ ту́чи приноша́ю слез,/ Твоея́ любве́ струе́ю напо́й мя, Спа́се, во вся ве́ки.

Украси́лася еси́, возлю́бльши и́стинно Су́щее Жела́ние,/ просла́вилася еси́, отрокови́це, Препросла́вленному прилепи́вшися Бо́гу,/ ты лик святы́й привела́ еси́ дев Спа́су, тя подража́вших,/ с ни́ми́же в Го́рних лику́еши селе́ниих.

Богоро́дичен: Еди́ну Тя избра́, добро́ту Иа́ковлю, О́тчее Сло́во,/ и посреде́ Тебе́ всели́ся, и, я́ко благоволи́,/ па́че всех кра́сный челове́ков, Всечи́стая, про́йде,/ омрачи́вшееся на́ше очища́я естество́.

Песнь 9

Ирмо́с: Благослове́н Госпо́дь, Бог Изра́илев,/ воздви́гнувый рог спасе́ния нам/ в дому́ Дави́дове, о́трока Своего́,/ в ни́хже посети́ нас Восто́к с высоты́/ и напра́вил ны есть на путь ми́ра.

Не́мощию, сла́вная, некре́пкаго врага́ победи́ла еси́,/ стра́нну проходя́щи жизнь и стра́сти плотски́я умертви́вши,/ и ны́не на Небесе́х живе́ши, иде́же твое́ и́маши и́стинно жи́тельство,/ я́ко чи́стая де́ва.

Благослове́н Госпо́дь, приста́нище ти́хое врачева́ний показа́в честну́ю твою́ ра́ку нам,/ при́сно бе́дствующим пучи́ною и бу́рею страсте́й,/ мона́шествующих славо и дев похвало́,/ Богоно́сная Ксе́ние.

Я́ко де́вства храм,/ я́ко чи́стую голуби́цу, я́ко го́рлицу непоро́чную,/ я́ко неве́сту Христо́ву, кра́сную доброто́ю тя и непоро́чную,/ я́ко о́браз Боже́ственных доброде́телей,/ я́ко верт заключе́н, ве́рнии, почита́ем,/ Богоно́сная Ксе́ние.

Богоро́дичен: Глаго́лом Твои́м после́дующе,/ ро́ди родо́в, Блаже́нная, Тя ублажа́ют при́сно:/ Бо́га бо, и́стинно Блаже́ннаго, родила́ еси́, Чи́стая Де́во,/ вся блаже́нны Тому́ рабо́тающий нело́жно творя́щаго.