На Го́споди, воззва́х: стихи́ры, глас 4.

Подо́бен: Я́ко до́бли:

Предпра́зднственныя пе́сни благоче́стно предвозгласи́м/ честна́го Креще́ния Бо́га на́шего:/ се бо хо́щет, я́ко Челове́к,/ пло́тьию при́ти́ к Предте́чи Своему́/ и проси́ти Креще́ния спаси́тельнаго/ и назда́ние всех, ве́рою свяще́нно просвеща́емых/ и прича́стников Духа.

Христо́с показу́ется, Бог явля́ется,/ я́коже Дави́д преднаписа́ я́вственнейше,/ и к рабу́, Креще́ния прося́, гряде́т./ Иорда́не реко́, весе́лия испо́лнися;/ земля́ и мо́ре, го́ры и хо́лми,/ и челове́ческая ны́не играи́те сердца́,/ Свет мы́сленный восприе́млюще.

Реку́ ми́ра Тя/ и пото́к, я́коже пи́шет, пи́щи су́ща, Всеси́льне,/ ка́ко Тя ре́чныя струи́ прии́мут, Го́споди,/ восходя́ща нага,/ не́бо облага́ющего о́блаки,/ и обна́жша вся́ку зло́бу вра́жию,/ и нетле́нием земноро́дныя одева́юща?

И́ны стихи́ры свята́го, глас 8.

Подо́бен: О, пресла́внаго чудесе́!

О́тче святи́телю Сильве́стре,/ свяще́нства све́том священнопросвеща́емь,/ ве́рныя просвети́л еси́ светолу́чными уче́нии/ Еди́ницу Естество́м Триипоста́сное Существо́ чествова́ти/ и отгна́л еси́ тьму ересе́й,/ Те́мже светоносную днесь я́сно па́мять твою́,/ ра́дующеся, торжеству́ем.

О́тче Богоно́се Сильве́стре,/ столп яви́лся еси́ о́гнен,/ свяще́нно предводя́ свяще́нный собо́р,/ и о́блак осеня́ющ,/ от еги́петския ле́сти ве́рныя изыма́ющ,/ к Боже́ственней земли́ пренося́щ/ неле́стными твои́ми уче́нии всегда́./ Те́мже благосла́вную и всесвяще́нную/ па́мять твою́ чтим.

О́тче Богоглаго́ливе Сильве́стре,/ струя́ми твои́х моли́тв/ многообра́зного зми́я тве́рдо затвори́л еси́,/ священноудивля́емь, е́ллинов мно́жество Бо́гу приве́л еси́,/евре́ев же суровство́ смири́л еси́,/ чудеса́ ве́лия творя́ пред ни́ми я́ве./ Те́мже тя чтим и ублажа́ем.

Сла́ва, и ны́не, глас 6:

Гряде́т ко Иорда́ну Христо́с Истина/ крести́тися от Иоа́нна/ и глаго́лет к Нему́:/ аз тре́бую от Тебе́ крести́тися./ И Ты ли гряде́ши ко мне?/ Не сме́ю, се́но, прикосну́тися Огню́,/ Ты мя освяти́, Влады́ко,/ Боже́ственным явле́нием Твои́м.

На стихо́вне стихи́ры самогла́сны, глас 1.

Иоа́нна мона́ха:

Све́тел у́бо мимоше́дший пра́здник,/ светле́йший же, Спа́се, приходя́щий:/ он А́нгела име́яше благове́стника,/ и сей Предте́чу обре́те предугото́вителя./ Он кро́вем излива́емым,/ я́ко безча́ден, рыда́ше Вифлее́м,/ и сей вода́м благослове́нным/ многоча́дна познава́ется купе́ль./ Тогда́ звезда́ волхво́м возвести́,/ ны́не же Оте́ц ми́ру Тя показа́./ Воплоти́выйся и паки гряды́й я́ве,/ Го́споди, сла́ва Тебе́.

Глас 2. Стих: Сего́ ра́ди помяну́х Тя/ от земли́ Иорда́нски и Ермонии́мски.

Андре́я Иерусали́мскаго: Па́ки Иису́с мой очища́ется во Иорда́не,/ па́че же очища́ет грехи́ на́ша:/ гряде́т бо вои́стинну на Креще́ние,/ омы́ти хотя́ Ада́мово рукописа́ние./ И рече́ ко Иоа́нну:/ гряди́, послужи́, о Крести́телю,/ та́инства стра́ннаго глави́зне./ Гряди́, простри́ ру́ку твою́ ско́ро/ и прикосни́ся верху́ сте́ршаго зми́еву главу́/ и отве́рзшаго рай,/ его́же затвори́ преступле́ние ле́стию зми́евою,/ вкуше́нием дре́ва иногда́.

Глас 3, Стих: Ви́деша Тя во́ды, Бо́же,/ ви́деша Тя во́ды и убоя́шася.

Я́сен у́бо мимоше́дший пра́здник,/ сла́внейший же настоя́щий день/ во он Спа́су волсви́ поклони́шася,/ в сем же Влады́ку раб сла́вен крести́./ Та́мо па́стырие, свиря́юще², ви́девше и чудя́хуся,/ зде же глас О́тчий Единоро́днаго Сы́на пропове́да.

Сла́ва, и ны́не, глас то́йже:

Прииди́те, вси ве́рныи,/ Иуде́йскую страну́ оста́вивше,/ пре́йдем пусты́ню Иорда́нскую/ и у́зрим днесь та́мо нас ра́ди Я́вльшагося пло́тию,/ Креще́ния прося́ща во струя́х Иорда́нских,/ Крести́теля, отрица́ющася и вопию́ща со стра́хом:/ не сме́ю рукоположи́ти бре́нною дла́нию Огня́./ Иорда́н и мо́ре бежа́ша, Спа́се, и возврати́шася,/ и аз ка́ко положу́ на верх Твой ру́ку,/ Его́же трепе́щут Серафи́ми?/ Побеже́ Иорда́н, я́ко прия́т Елиссе́и́ Илиину́ ми́лоть³./ Ка́ко не за́йде в про́пасть и глубину́ ви́дяи́ на́га Тя во струя́х?/ Ка́ко же не опали́т мя, всего́ от Тебе́ разгара́ема?/ Что косни́ши, Крести́телю, крести́ти Го́спода моего́?/ – Иорда́н вопие́т ко Иоа́нну, -/ что мно́гих возбраня́еши очище́ние?/ Всю тварь освяти́,/ оста́ви освяти́ти и Мене́, и водно́е естество́,/ я́ко на сие́ яви́ся.

Тропа́рь Сильве́стра, глас 4:

Пра́вило ве́ры и о́браз кро́тости,/ воздержа́ния учи́теля/ яви́ тя ста́ду твоему́/ я́же веще́й И́стина./ Сего́ ра́ди стяжа́л еси́ смире́нием высо́кая,/ нището́ю бога́тая,/ о́тче Сильве́стре,/ моли́ Христа́ Бо́га/ спасти́ся душа́м на́шим.

Сла́ва, и ны́не, предпра́зднства, глас то́йже:

Гото́вися, Завулоне,/ и красу́йся, Неффали́ме,/ Иорда́не реко́, ста́ни,/ подыми́, взыгра́я, крести́тися гряду́ща Влады́ку./ Весели́ся, Ада́ме с прама́терию,/ не кры́йта себе́, я́коже в раи́ пре́жде,/ и́бо, на́ги ви́дев вы, яви́ся,/ да облече́т в пе́рвую оде́жду:/ Христо́с яви́ся, всю тварь хотя́ обнови́ти.

На повечерии

Пое́м Трипе́снец. Ирмо́сы по дважды, тропари́ на 6 и последи́ ирмо́с о́ба ли́ка вку́пе. А́ще же двоирмо́сен Трипе́снец, и пое́м 1-го творца́ ирмо́с два́жды, тропари́ же обои́х творцо́в на 6, и последи́ ирмо́с 2-го кано́на о́ба ли́ка вку́пе. Си́це пое́м кано́н и ирмосы́ и на про́чих повече́риях.

Трипе́снец (его́же краегране́сне: Второ́му же), глас 2.

Песнь 1

Ирмо́с: Непроходи́мое волня́щееся мо́ре/ Бо́жиим им Свои́м веле́нием изсуши́вшему/ и пешеше́ствовати сквозе́ е изра́ильтеския лю́ди наста́вльшему,/ Го́сподеви пои́м, сла́вно бо просла́вися.

Припе́в: Сла́ва Тебе́, Бо́же наш, сла́ва Тебе́.

Неизрече́нное Зижди́теля соше́ствие, пе́рвее от Де́вы возсия́вша, мир озари́ло есть:/ Сам же паки Христо́с, друго́е та́инство ны́не соверша́я, гряде́т на Иорда́н/ земны́м в стра́нное возрожде́ние.

Служа́ де́лу стра́шному, предгряде́т ко Иорда́ну Предте́ча ны́не, Словесе́ глас,/ обнища́вшего Ада́ма обогаща́яи́ Божество́м:/ Ду́хом бо богатя́, гряде́т Христо́с да́ром Креще́ния.

Песнь 8

Ирмо́с: Устраши́ся отроко́в благочести́вых/ сообра́знаго души́ нескве́рнаго те́ла/ и устрани́ся воспита́нный в безме́рном веществе́ неутружде́н огнь:/ присноживу́щу же изувя́дшу пла́меню/ ве́чнующая песнь воспева́шеся:/ Го́спода, вся, дела́, по́йте и превозноси́те во вся ве́ки.

Вас, Моя́ сосу́ды избра́нныя, тогда́ позна́ю,/ а́ще Моего́ дарова́ния печа́ть вообрази́тся в вас. -/ Трисия́нный облиста́ющи свет ко Креще́нию,/ Христо́с сло́во рече́ в ле́ности уны́ния пребыва́ющим:/ в сем бо путь спасе́ния пода́м/ и свобожде́ния жизнь всем да́рую.

Чи́на проти́вна в Тебе́ есте́ственнаго есть вещь, соверша́ема ны́не:/ ме́ньшее бо, Твоего́ благослове́ния тре́бую лу́чшаго./ Те́мже убоя́хся верху́ прикосну́тися Твоему́, – Изба́вителю возопи́ Предте́ча:/ неле́по бо, да прибли́жится Огнь се́ну,/Ты мя па́че освяти́, Твоего́ раба́.

Други́й двоепе́снец (его́же краегране́сие: Тре́тиему же), глас то́йже.

Ирмо́с: Веле́нию мучи́телеву:

Уны́ния сон душе́вный оттря́сше,/ серде́чною бо́дростию Гряду́щему очи́стити ду́ши во струя́х возопии́м:/ благослови́те, дела́ Госпо́дня, Го́спода.

Да удовли́тся дея́ние в нас души́ в высо́цем зре́нии,/ я́ко да сугу́бо яви́вшеся све́тли,/ вся очища́ющему Боже́ственными струя́ми Влады́це яви́мся вси.

Тала́нт сло́вом де́ятельным украси́вше в сугу́бом де́лании,/ ве́рою да́вшему Влады́це, ве́рнии, я́ко раби́ принесе́м,/ крести́тися гряду́щему душа́м на обновле́ние.

Вме́сто Сла́ва: глаго́лем: Благослови́м Отца́, и Сы́на, и Свята́го Ду́ха, Го́спода.

А к после́днему тропарю́ глаго́лем: И ны́не: Та́же на схо́де пое́м: Хва́лим, благослови́м, покланя́емся Го́сподеви,/ пою́ще и превознося́ще во вся ве́ки.

И пое́м Ирмо́с: Веле́нию мучи́телеву/ преподо́бнии трие́ о́троцы не повину́вшеся,/ в пещь вве́ржени, Бо́га испове́даху, пою́ще:/ благослови́те, дела́ Госпо́дня, Го́спода.

Песнь 9

Ирмо́с: Возвели́чил еси́, Христе́, ро́ждшую Тя Богоро́дицу,/ от Нея́же, Созда́телю наш, в подобостра́стное нам обле́клся еси́ те́ло,/ на́ших прегреше́ний реши́тельное./ Сию́ ублажа́юще, вси ро́ди, Тебе́ велича́ем.

Скве́рну вся́ку стра́стную оттря́сше,/ досто́йно Креще́ния Боже́ственнаго о́браз приими́те мы́сленно:/ гряде́т бо Зижди́тель очище́ние дарова́ти стра́нное, во струя́х креща́яся,/ всем же но́вое показа́ти измене́ние.

Взира́юще на Христа́, смиря́ющагося во́лею да́же и до ра́бия о́браза,/ под кре́пкую Его́ ру́ку ны́не смири́мся, ду́хом взе́мшеся,/ я́ко да креща́ема Сего́ чи́стыми де́лы почти́м.

Ин

Ирмо́с: Невмести́маго:

Грехо́вную мглу вси отложи́вше,/ чи́сти вся очища́ющему струя́ми Боже́ственными яви́мся Владыце.

Во Иорда́не реце́ крести́тися гряду́щему Христу́, прииди́те, прибли́жимся,/ сле́зными очи́щшеся струя́ми.

Вме́сто Досто́йно: пое́м ирмо́с: Невмести́маго Бо́га во чре́ве вмести́вшая/ и ра́дость ми́ру роди́вшая,/ Тя пое́м. Богоро́дице Де́во.

И покло́н. По трисвято́м конда́к предпра́зднства. Си́це глаго́лем на повече́риях и до пра́здника.

На у́трени

На Бог Госпо́дь: тропарь предпра́зднства, два́жды. Сла́ва, свята́го. И ны́не, предпра́зднства.

По 1-й стихоло́гии седа́лен, глас 1.

Подо́бен: Гроб Твой, Спа́се:

Оде́явся в мою́, Иису́се мой, нищету́,/ предгряде́ши, Тебе́ с рабы́ смеша́я/ и Креще́ния прося́ от раба́, Человеколю́бче./ Те́мже, ви́дев Тя, Иоа́нн вопия́ше:/ ка́ко крещу́ Тя, скве́рны весьма́ не иму́ща, Бо́же Преблаги́й?

Сла́ва, и ны́не, подо́бен то́йже:

Предгряде́т Христо́с бла́гостию к струя́м ре́чным Иорда́нским/ и в тех на́ше обновле́ние соде́лати хо́щет благода́тию./ Боже́ственный Предте́че, Сего́ приими́ ра́дуяся,/ и в вода́х Того́ восхоте́вша омы́й, Еди́наго Человеколю́бца.

По 2-й стихоло́гии седа́лен, глас 4.

Подо́бен: Ско́ро предвари́:

Обнища́в Бога́тый за милосе́рдие мно́гое,/ нас, обнища́вших невоздержа́нием иногда́,/ обогати́ти хотя́, гряде́т вни́ти во Иорда́нския струи́/ и от Иоа́нна я́вственно крести́тися./ Воспои́м, ве́рнии, Того́ кра́йнее смире́ние.

Сла́ва, и ны́не, подо́бен то́йже:

Соверши́ся днесь Иса́ии глас, вопию́щаго:/ угото́вайте путь Госпо́день и стези́ сотвори́те./ Возгласи́ бо, я́коже рече́, пустыннолю́бная труба́, вся созыва́ющи, Иоа́нн Вели́кий./ Те́мже стеце́мся ку́пно и пресла́вная уви́дим.

Кано́н предпра́зднства со ирмосо́м на 8, ирмосы́ по дважды, тропари́ же на 6 и свята́го на 4. Кано́н предпра́зднства (его́же краегране́сие по алфави́ту) Ио́сиф, глас 2.

Песнь 1

Ирмо́с: Непроходи́мое волня́щееся мо́ре/ Бо́жиим Свои́м веле́нием изсуши́вшему/ пешеше́ствовати сквозе́ е изра́ильтеския лю́ди наста́вльшему,/ Го́сподеви пои́м: сла́вно бо просла́вися.

Ве́дый Госпо́дне прише́ствие,/ из пусты́ни прихо́дит Боже́ственный Предте́ча, вопия́ све́тло:/ прибли́жися, яви́ся избавле́ние, пока́йтеся и водою́ очи́ститеся.

Погруже́на мя грехо́в волно́ю, Сло́ве, Отцу́ Собезнача́льне,/ всего́ очи́сти покая́ния кропле́нием,/ и́же Креще́нием Твои́м ве́рным избавле́ние при́сно да́руя за милосе́рдие безме́рное.

Земля́, я́коже пи́шет, Завуло́ня, незаходи́мый ви́девши Свет, озари́ся:/ се бо прии́де на Иорда́нския струи́ и Су́щаго над все́ми Бо́га пое́т, зову́щи:/ Го́сподеви воспои́м, сла́вно бо просла́вися.

Наро́д весь Богоглаго́ливый Предте́ча ви́дя прише́дш, сим веща́ше:/ кто показа́ вам от гряду́щаго гне́ва бежа́ти?/ Сотвори́те покая́ния плоды́, благода́тию спаса́емии.

Ин кано́н свята́го (его́же краегране́сие): Пе́ти тя ве́рою благода́ть даждь, блаже́нне Ио́сиф, глас 8.

Песнь 1

Ирмос: Посе́ченый несеко́маго пресече́,/ и виде́ со́лнце зе́млю, ю́оже не ви́де;/ лю́таго врага́ вода́ потопи́,/ и непроходи́мое про́йде Изра́иль./ Песнь же воспева́шеся:/ Го́сподеви пои́м, сла́вно бо просла́вися.

Сыноположи́вся благода́тию, Сильве́стре, Бо́гу Отцу́,/ чи́сто житие́ облобыза́в и Боже́ственными блиста́нии душе́ю светови́ден быв,/ преше́л еси́ к Све́ту, зовы́й, невече́рнему:/ Го́споду воспои́м, сла́вно бо просла́вися.

Велему́дренно стра́сти удержа́л еси́/ и плоть по́стным житие́м повину́л еси́ ду́ху, му́дре,/ и, Боже́ственное жили́ще Тро́ицы быв све́тло,/ лука́вствия ду́хи, Го́споду поя́, смири́л еси́:/ сла́вно бо просла́вися.

Зако́ну Боже́ственному Боже́ственне повину́яся/ и Богодухнове́ннаго писа́ния ра́зумом укра́шен,/ е́ллинския мудрецы́ и́стинне наказа́л еси́/ Христа́ испове́дати со Отце́м и Ду́хом, вопию́щия:/ Го́споду воспои́м, сла́вно бо просла́вися.

Во Ипоста́си Еди́ней познава́ема,/ вопло́щшагося Христа́, блаже́нне, пропове́дал еси́,/ во двух во́лях и де́йствиих, Сильве́стре, разумева́ема/ и ве́рою Тому́ обожи́вша зову́щия:/ Го́споду воспои́м, сла́вно бо просла́вися.

Богоро́дичен: Да ни́жния с Вы́шними совокупи́т Еди́ный всех Бог,/ во чре́во Неискусобра́чныя вни́де и в подо́бии пло́тстем яви́ся,/ вражды́ средогра́дие разо́рь, мир введе́,/ и жизнь подаде́, и Боже́ственное избавле́ние.

Песть 3

Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́ в сердца́ нас, пою́щих Тя.

Яви́ся Христо́с, – вопие́т Предте́ча, -/ и на струи́ восхо́дит Иорда́нския,/ сре́сти Сего́ потщи́мся, чи́стыми помышле́нии просвеща́еми.

Ища́ мя, безпу́тием заблу́ждшаго, Бо́же мой,/ нището́ю бога́тною оде́явся, предстои́ши крести́тися,/ всех Избавле́ние.

Земля́ и Не́бо ны́не да лику́ют:/ всех креща́ется Благоде́тель,/ в вода́х погружа́я на́ше мно́жество безме́рных прегреше́ний.

Ин

Ирмо́с: Страх Твой, Го́споди,/ всади́ в сердца́ раб Твои́х/ и бу́ди нам утвержде́ние,/ Тя во и́стине призыва́ющих.

Ума́ чистоту́ стяжа́в, святи́тель был еси́, пома́зание свято́е восприе́м./ Тем тя, Богоно́се о́тче, восхваля́ем.

На Кресте́ просте́ршаго дла́ни пло́тию/ Бо́га Сло́ва уясни́л еси́ слове́сными твои́ми показа́ньми/ и иуде́йское суровство́ погуби́л еси́, всеблаже́нне.

В чудесе́х вели́к быв,/ отгоня́еши ду́хи и очища́еши неду́ги ве́рою прося́щим,/ Сильве́стре Богому́дре.

Богоро́дичен: Де́ва Чи́стая по Рождестве́, Всесвята́я, пребы́ла еси́,/ Бо́га бо Сло́ва родила́ еси́,/ нам уподо́бльшася кроме́ греха́.

Конда́к свята́го, глас 4,

Подо́бен: Вознесы́йся:

Во свяще́нницех свяще́нник яви́лся еси́ Царя́ и Бо́га, Богоно́се,/ по́стником собесе́дник быв,/ отону́дуже сра́дуешися ны́не лико́м А́нгельским, о́тче, веселя́ся в Небе́сных,/ Сильве́стре, сла́вне па́стырю,/ спаса́й любо́вию соверша́ющия па́мять твою.

Ин конда́к, глас 4.

Подо́бен: Яви́лся еси́ днесь:

Яко звезду́ тя вселе́нней, свя́те,/ яви́ И́же сла́вы Госпо́дь,/ доброде́тели предложив па́че денни́цы, блаженне./ Свет бо еси́ нам,/ о́тче Сильве́стре.

Седа́лен, глас 8.

Подо́бен: Прему́дрости:

Река́ благоче́стия яви́вся,/ уче́ний твои́х струя́ми всю зе́млю напои́л еси́, Сильве́стре, я́ко святи́тель Боже́ственный, и чуде́с ту́чами страсте́й скве́рну омы́л еси́,/ и пи́щньй пото́к досто́йно насле́довал еси́./ Те́мже, соше́дшеся, благоче́стно тя чтим пе́сньми днесь/ и ве́рно вопие́м ти:/ моли́ Христа́ Бо́га прегреше́ний оставле́ние пода́ти/ чту́щим любо́вию святу́ю па́мять твою́.

Сла́ва, и ны́не, глас то́йже.

Подо́бен: Свире́лей па́стырских:

Неви́димый Бо́же, Непостижи́мый Сло́ве,/ роди́лся еси́ от Отца́ па́че естества́ и сло́ва,/ па́ки же в после́дняя от Де́вы, не измени́в, е́же бе,/ гряде́ши и во струя́х Иорда́нских ны́не крести́тися пло́тию,/ благоволи́вый спасти́ я́ко Бог род челове́ческий.

Песнь 4

Ирмос: Прише́л еси́ от Де́вы,/ не хода́тай, ни А́нгел, но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Чуди́тся Твоему́, Иису́се Благоде́телю, прихо́ду вели́кий Предте́ча/ и, ужаса́яся, вопие́т Тебе́:/ Огнь сый, Влады́ко, да не опали́ши мене́, се́но су́ща.

Стоя́ща в вода́х сих во́лею зря⁴ Мя ны́не,/ приступи́, о, Иоа́нне, и крести́,/ я́ко да водо́ю благода́ть челове́ческому ро́ду соде́лаю.

Кры́ющееся я́ко во о́блацех Тя позна́х со́лнце, Бо́же мой, пло́тию./ Ка́ко у́бо на́га Тя, вода́ми ны́не оде́янна, зрю? -/ Иоа́нн вопия́ше, удивля́яся.

Просвеща́ется челове́ческое естество́,/ и избавле́ние тьмы прие́млет грехо́вныя,/ и свы́ше Боже́ственною одева́ется нетле́ния оде́ждою, обнажа́ему Мне.

Ин

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Святи́тель Богоприя́тен, помазу́я свяще́нники Боже́ственным Ду́хом,/ показа́лся еси́, о́тче Сильве́стре,/ и лю́ди просвеща́яй, свяще́ннейше.

Соде́йством Ду́ха неду́ги отгоня́я,/ стра́сти неисце́льныя исцели́л еси́, пребога́те,/ обраща́я от ле́сти заблужде́нныя.

Ересе́й, Сильве́стре, лесть отгна́л еси́,/ па́ству упа́сл еси́ на вода́х благоче́стия,/ на зла́це Боже́ственнаго позна́ния.

Излия́ся во устна́х твои́х благода́ть Боже́ственного Ду́ха./ Сего́ ра́ди тя свяще́нника лю́дем Свои́м Бог, всеблаже́нне о́тче, пома́за.

Богоро́дичен: Исцели́, Отрокови́це, я́звы се́рдца моего́/ и наведи́ души́ моея́ движе́ния к Бо́жиим, Де́во, хоте́нием.

Песнь 5

Ирмо́с: Све́та Пода́телю/ и веко́в Тво́рче, Го́споди,/во све́те Твои́х повеле́ний наста́ви нас,/ ра́зве бо Тебе́, ино́го бо́га не зна́ем.

Пока́йтеся, – вопия́, – Ца́рствие Бо́жие прибли́жися:/ свяще́нный Предте́ча яви́ся из пусты́ни,/ опусте́вшия в злых обновля́я.

Зако́н, его́же дре́вле рече́ и проро́к свяще́нное сосло́вие, прии́де – Христо́с,/ нас обновля́я Боже́ственным Креще́нием,/ обветша́вшия мно́гими прегреше́ньми.

Стра́нна, – рече́, – и ужа́сна, – Иоа́нн, – зрю днесь:/ ны́не бо Исто́чник безсме́ртия прии́де,/ от ма́лыя ка́пли Боже́ственное проси́ти Креще́ние.

Ин

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Плете́ньми твои́х слове́с весь разреши́л еси́ су́етен соу́з/ и к Боже́ственней ве́ре ле́стию свя́занныя связа́л еси́,/ отверза́я, о́тче, сих ум прочита́нием писа́ний, святи́телю блаже́нне.

Се́рдце твое́, о́тче, непоро́чно бысть во оправда́ниих о́бщаго Влады́ки,/ Его́же вожделе́в, плоть удержа́л еси́ и чуде́с благода́тию обога́щься/ неду́ги исцеля́ти и душе́вныя лю́тыя я́звы.

Беся́щаяся сердца́ неду́гом душегу́бным лю́тыя е́реси го́рькаго Ма́нента/ ско́рыми лечба́ми слове́с твои́х, Богоно́се, уста́вил еси́, я́ко врач,/ благода́тию Боже́ственною, Честны́м отгна́л еси́ Ду́хом.

Богоро́дичен: Ра́дуйся, Еди́на, ро́ждшая Преси́льнаго, пло́тию обнища́вшаго./ Ра́дуйся, па́дшаго ми́ра исправле́ние, Всенепоро́чная./ Ра́дуйся, печа́ли разреше́ние./ Ра́дуйся, ве́рных спасе́ние./ Ра́дуйся, Престо́ле Бо́жий превысо́кий.

Песнь 6

Ирмо́с: Бе́здна согреше́ний обы́де мя после́дняя,/ но, я́ко проро́ка Ио́ну, Го́споди,/ Го́споди, возведи́ из истле́ния живо́т мой.

Одожди́ согреше́ний на́ших, Человеколю́бче, разреше́ние,/ И́же Иорда́нскими струя́ми погрузи́вый прегреше́ния земноро́дных, за ми́лость вели́кую.

Пучи́на сый, Христе́, пра́вды,/ предгряде́ши ны́не на Иорда́нскую реку́ потопи́ти зми́я/ и Ада́мово преступле́ние изсуши́ти.

Струю́ Тя нетле́ния, Христе́, су́ща вои́стинну,/ струи́ ка́ко вместя́т ре́чныя? – вопия́ше Предте́ча,/ сла́вя Твое́ мно́гое благоутро́бие.

Ин

Ирмо́с: Молитву́ пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же возведи́ мя.

Неисхо́дна и в темни́це ве́чне затворе́нна соде́лал еси́ моли́твами твои́ми/ лука́ваго, погубля́ющаго за́вистию приходя́щия, блаже́нне, зми́я,/ и я́ко две́ри же и я́ко вереи́, Креста́ зна́мение положи́в.

Глаго́л твои́х медото́чных веща́ние во вся́ческая изы́де, всеблаже́нне,/ и уче́ний в концы́ всея́ вселе́нныя сия́ние облиста́,/ чуде́с же све́тлость и дел Боже́ственное показа́ние.

Исцеле́ния и дарова́ния Боже́ственная/ ту́чами источа́я бога́тно Вседе́теля, святи́телю всеблаже́нне,/ и Всесвята́го всегда́ Ду́ха, ве́рою тебе́ чи́стою приступа́ющия цели́ти благода́тию.

Богоро́дичен: Разуме́вше Богоглаго́ливии проро́цы та́инства Твоего́, Де́во, глубину́,/ проро́чески провозвести́ша сие́, наставля́еми Боже́ственным Ду́хом,/ и ны́не мы, прера́достно сбытия́ зря́ще, ве́руем.

Конда́к, глас 4.

Подо́бен: Яви́лся еси́ днесь:

Во струя́х днесь Иорда́нских быв, Госпо́дь/ Иоа́нну вопие́т:/ не убо́йся крести́ти Мя,/ спасти́ бо приидо́х/ Ада́ма первозда́ннаго.

И́кос:

Не истязу́ю тя, Крести́телю, преде́лы преходи́ти,/ не глаго́лю тебе́;/ рцы Ми, я́же глаго́леши беззако́нным и учи́ши гре́шники./ То́чию крести́ Мя молча́ и ча́я, я́же от Креще́ния:/ прии́меши бо сего́ ра́ди досто́инство, е́же не бысть А́нгелом,/ и́бо всех проро́ков бо́льша тя сотворю́./ От о́ных у́бо ни еди́н я́ве Мя ви́де,/но во о́бразех, и се́нех,и гада́ниих,/ ты же пред тобо́ю стояща́ ви́дел еси́,/ спасти́ бо приидо́х Ада́ма первозда́ннаго.

Песнь 7

Ирмо́с: О́бразу злато́му, на по́ле Деире служи́му,/ три́е Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших.

Во оде́жду свяще́нную одева́я мя, Христе́, обнажи́вшагося сове́том льсти́ваго,/ наг проити́ сквозе́ во́ды прише́л еси́ бла́гости бога́тством./ Воспева́ю Твое́ милосе́рдие и покланя́юся чу́дному Твоему́ смотре́нию.

Что́ сие́, Христе́, мно́гое Твое́, е́же к нам, смотре́ние?/ Что́ нищета́? Что́ неизрече́нное и па́че ума сни́тие? -/ рече́, егда́ Тя ви́де Иоа́нн обнаже́на и крести́тися от него́ повелева́юща.

Возже́гл еси́, Христе́, я́коже свети́льник, честну́ю плоть Твою́ среди́ Иорда́на,/ и взыска́л еси́ погребе́нный страстьми́ и грехо́м о́браз,/ и, обре́т, удобри́л еси́ Креще́нием Твои́м, Бла́же./ Те́мже пое́м Тя.

Ин

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.

Пра́ведник, я́коже фи́никс, в дому́ Госпо́дни, о́тче, процве́л еси́ пло́ды пра́вды,/ и́миже чту́щии тя пита́ются, пою́ще:/ отце́в на́ших, Бо́же, благослове́н еси́.

Кре́пкими твои́х слове́с явле́ньми обличи́л еси́ суему́дренники, неду́гующия неве́рием,/ и, ра́дуяся, пое́ши, пресла́вне Сильве́стре:/ отце́в на́ших Бо́же, благослове́н еси́.

Пребыва́ет сла́ва во ве́ки твоя́, о́тче, и па́мять со все́ми пра́ведными,/ с ни́ми же нас, ве́рою пою́щих, помина́й:/ отце́в на́ших Бо́же, благослове́н еси́.

Сла́вный святи́тель, духо́вною заре́ю просвеща́емь,/ тьму зло́бы разори́ и вся пою́щия просвети́:/ отце́в на́ших Бо́же, благослове́н еси́.

Богоро́дичен: Пречу́дная Отрокови́це, Су́щаго пре́жде всех веко́в родила́ еси́,/ нам уподо́бльшагося за кра́йнее благоутро́бие, да спасе́т пою́щия:/ отце́в на́ших Бо́же, благослове́н еси́.

Песнь 8

Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода,/ и превозноси́те во вся ве́ки.

Глас вопию́щаго в пусты́ни я́вственно, предста́в Иоа́нн,/ обраща́я сердца́ пока́явшихся те́пле/ сла́вити я́вльшагося во Иорда́не Спа́са и Влады́ку.

Пото́к еси́ пи́щный, И́же моря́ и исто́чники соде́лавый,/ и ка́ко на во́ды восхо́диши?/ Что́ отмы́ти ища́й, И́же всех омове́ние и очище́ние,/ песносло́вящих Тя, Христе́, во ве́ки?

Изсуши́ти струи́ ища́й зло́бы вра́жия, и моря́ страсте́й уста́вити,/ и ве́рным очище́ние источи́ти и оставле́ние,/ Влады́ко, гряде́ши крести́тися во струя́х Иорда́нских.

Часо́в и лет Тво́рче, под ле́ты быв за благоутро́бие,/ безле́тно возсия́в из Пребезнача́льнаго Отца́,/ прише́л еси́ ле́тняя прегреше́ния всех отмы́ти во струя́х Иорда́нских.

Ин

Ирмо́с: Победи́тели мучи́теля и пла́мене/ благода́тию Твое́ю бы́вше,/ за́поведем Твои́м зело́ прилежа́ще,/ о́троцы вопия́ху:/ благослови́те, вся дела́ Госпо́дня, Го́спода.

Еди́но естество́, о́тче, Еди́наго Божества́ богосло́вив,/ в Трех Ли́цех разумева́емаго, пел еси́ непреста́нно:/ благослови́те, вся дела́ Госпо́дня, Го́спода.

И́стины, о́тче, и́стинен учи́тель наре́клся еси́,/ те́мже лжеиме́нныя ле́сти обличи́л еси́ лесть, поя́:/ благослови́те, вся дела́ Госпо́дня, Го́спода.

Верхо́вник яви́лся еси́ свяще́ннаго Собо́ра, священнотаи́нниче,/ и верхо́внаго ученико́в украси́л еси́ престо́л, вопия́:/ благослови́те, вся дела́ Госпо́дня, Го́спода.

Доброде́тельми Боже́ственными, о́тче, се́рдце твое́ удобри́л еси́, весь украси́вся,/ и с Вы́шними чи́нми, вопия́, совокупи́лся еси́:/ благослови́те, вся дела́ Госпо́дня, Го́спода,

Богоро́дичен: Глаго́лом Твои́м Боже́ственным после́дующе, ро́ди челове́честии,/ ублажа́ем Тя, Присноблаже́нную, и воспева́ем:/ благослови́те, вся дела́ Госпо́дня, Го́спода.

Песнь 9

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.

Ви́дев Тя Иоа́нн к себе́ Благоде́теля гряду́ща/ и прося́ща от него́ смире́нием Креще́ния, уди́влься, ужасеся,/ ника́коже руко́ю пракосну́тися сме́я Прикаса́ющагося всем гора́м, и воздымя́тся.

Я́ко ла́стовица пречестна́я, провозвеща́ющая ве́сну мы́сленную,/ предста́ Крести́тель в зиме́ су́щим безме́рных прегреше́ний/ и бурю терпя́щим при́сно сопроти́вных духо́в, лука́вых страсте́й.

Тя, озаре́ние сла́вы Отчия, просия́вшее во тьме седя́щим лю́тых,/ Незаходи́мое Со́лнце, Го́споди, и гряду́ща вся просвети́ти свяще́нным Твои́м Креще́нием,/ я́ко Бо́га и Спа́са пе́сньми велича́ем.

Сме́ртная секи́ра, при ко́рени лежа́щи,/ я́ко дре́ву прети́т изсече́нием, непло́дие твое́ ви́дящи./ Не у́бо безпло́дна пребу́ди, душе́ моя́, но возопи́й Бо́гу те́плым покая́нием:/ согреши́х Ти, спаси́ мя.

Глас вопию́щаго слы́шан бысть в пусты́х сердца́х:/ возвесели́теся, предста́ Христо́с, оставле́ние всем да́руя./ Освяти́теся вся:/ мо́ре, исто́чницы и ре́ки, и удо́лия,/ и лу́жная места́, и вся подсо́лнечная.

Ин

Ирмо́с: Вои́стинну Богоро́дицу/ Тя испове́дуем,/ спасеннии Тобо́ю, Де́во Чи́стая,/ с безпло́тными ли́ки Тя велича́юще.

Свяще́нствовав усе́рдно самаго́ себе́, всеблаже́нне, сласте́й умерщвле́нием,/ и был еси́ нас ра́ди Умертви́вшемуся же́ртва благоприя́тна.

Я́ко Боже́ственный верхо́вник свяще́нных отце́в, свяще́нное уче́ние утверди́в,/ еретико́в загради́л еси́ безбо́жная уста́.

Совокупи́лся еси́ с ли́ки безпло́тных,/ безпло́тныя враги́ с те́лом све́тло, святи́телю, побори́в.

Па́мять твоя́ ми́ру, о́тче святи́телю, я́ко светоза́рное возсия́ со́лнце,/ световодя́щи ве́рою восхваля́ющая тя.

Богоро́дичен: Благолюби́вая Де́во, озло́бленную грехми́ ду́шу мою́ ублажи́,/ Блага́го ро́ждшая Бо́га и Го́спода.

Свети́лен.

Подо́бен: Жены́, услы́шите:

Глас вопию́щаго возгласи́:/ и го́ры, взыгра́йте, лику́й, ро́де челове́ческий,/ и́бо Пребезнача́льное Сло́во плоть прие́м, я́ко Челове́к,/ прии́де креща́яся от рук, я́же созда́,/ во Иорда́не погружа́яй ми́ра грех.

Сла́ва, и ны́не:

Ка́ко струи́ Тя ре́чныя приимут, Человеколю́бче,/ ре́ки и моря́ сотво́ршаго от не су́щих?/ Ка́ко на верх пречи́стый Твой дерзне́т Предте́ча ру́ку положи́ти, Влады́ко?/ Пое́м, трепе́щуще, Сло́ве, Твоея́ нище́ты высоту́.

На хвали́тех стихи́ры на 4 (и́хже краегране́сие: Пе́сни Феофа́новы на све́ты), глас 6.

Подо́бен: А́нгельския:

А́нгельския, предыди́те, си́лы,/ от Вифлее́ма ко струя́м Иорда́нским;/ предгряди́, Иоа́нне, оста́вль пусты́ню;/ ра́дуйся, реко́, и угото́вися,/ вся же земля́ да ра́дуется:/ Христо́с гряде́т грех Ада́мов очи́стити,/ я́ко Благоутро́бен.

Усты́ чи́стыми и душа́ми измове́нными,/ прииди́те, та́йно Вифлее́м оста́вльше/ и ко Иорда́ну со Христо́м иду́ще,/ воспои́м Ему́ с весе́лием,/ оте́чествия земна́я вся, ве́рно глаго́люще:/ благослове́н, прише́дый Бо́же наш,/ сла́ва Тебе́.

Ве́лие и стра́шно та́инство есть,/ я́ко Бог челове́ком уподо́бися,/ и, греха́ отню́д не ве́дый, я́ко пови́нен,/ от Иоа́нна крести́тися в реце́ Иорда́нстей про́сит днесь./ Благослове́н, яяле́йся Бо́же наш,/ сла́ва Тебе́,

Цвет Дави́дов возсия́в из Де́вы,/ прии́де Христо́с ко струя́м Иорда́нским/ грехи́ омы́ти пра́отца вода́ми./ Лику́й, Ада́ме, весели́ся, Е́во,/ Не́бо да ра́дуется,/ лю́дие, рцем:/ благослове́н, прише́дый Бо́же наш,/ сла́ва Тебе́.

Сла́ва, глас и подо́бен то́йже:

Трепе́щет рукою, ужаса́яся рукоположи́ти,/ ра́дуется душе́ю, помышля́я, Иоа́нн,/ я́ко верх Твой подклони́ти благоволи́л еси́,/ в ра́бий зрак оде́ян,/ да челове́ки от рабо́ты изба́виши вра́жия, зову́щия:/ благослове́н, прише́дый Бо́же наш,/ сла́ва Тебе́.

И ны́не;

Вся земля́ та́йно да ра́дуется ны́не проро́чески,/ и го́ры да игра́ют./ Возврати́ струи́, Иорда́не, я́коже пи́шет,/ ужасни́ся от лица́ Влады́чня,/ я́ко Бог, вочелове́чився,/ челове́ки вся от греха́ Ада́мля очи́стити прии́де.

На стихо́вне стихи́ры самогла́сны, глас 6:

Светле́йший со́лнца бысть преше́дший пра́здник Рождества́ Христо́ва,/ я́сен и прееве́тел показа́ся приходя́й Боже́ственнаго явле́ния Его́./ Во он па́стырие со А́нгелы, славосло́вяще,/ поклони́шася Бо́гу вочелове́чшемуся;/ в сем же Влады́це Иоа́нн, прикосну́вся десно́ю руко́ю,/ с тре́петом глаго́лаше:/ освяти́ мене́ и во́ды,/ Еди́ный, име́яй ве́лию ми́лость.

Стих: Сего́ ра́ди помяну́х Тя/ от земли́ Иорда́нски и Ермонии́мски.

Гото́вися, Иорда́не реко́:/ се бо прихо́дит Христо́с Бог крести́тися от Иоа́нна,/ да змие́в неви́димыя главы́ сокруши́т Божество́м в вода́х твои́х./ Ра́дуйся, пусты́не Иорда́нская,/ го́ры, игра́йте с весе́лием:/ прихо́дит бо Ве́чный Живо́т воззва́ти Ада́ма./ Глас вопию́щаго возопи́й, о Иоа́нне Предте́че:/ угото́вайте пути́ Госпо́дни/ и стези́ Его́ пра́вы соде́лайте.

Стих: Ви́деша Тя во́ды, Бо́же,/ ви́деша Тя во́ды и убояшася.

Да возра́дуется пусты́ня Иорда́нова/ и да процвете́т, я́ко крин,/ глас бо вопию́щаго услы́шася в ней:/ угото́вайте путь Госпо́день./ Го́ры бо положи́вый ме́рилом и ме́ста дубра́вная ве́сом,/ вся исполня́яй, я́ко Бог, креща́ется от раба́,/ обнищава́ти нача́т, бога́тныя да́ры да́руяй./ Услы́ша Е́ва: в печа́лех роди́ши чада./ Ны́не же услы́ша Де́ва: ра́дуйся, Обра́дованная, Госпо́дь с Тобо́ю,/ име́яй ве́лию ми́лость.

Сла́ва, и ны́не, глас 8. Анатолиево:

Иоа́нне Крести́телю,/ во утро́бе позна́вый Мя А́гнца,/ на реце́ Мне послужи́,/ со А́нгелы Мне слу́жбу принеси́,/ просте́р, косни́ся дла́нию верху́ Моему́ пречи́стому./ И, егда́ у́зриши го́ры трепе́щущия и Иорда́на возвраща́ющася,/ с си́ми возопи́й воплоти́выйся из Де́вы в на́ше спасе́ние,/ Го́споди, сла́ва Тебе́.

На литурги́и

Блаже́нны предпра́зднства; пе́сни 3-я и 6-я. По вхо́де тропа́рь предпра́зднства и хра́ма Богоро́дицы, а́ще есть, и хра́ма свята́го, та́же тропа́рь свята́го и конда́к хра́ма Богоро́дицы, а́ще есть, или́ хра́ма свята́го. Сла́ва, конда́к свята́го. И ны́не, конда́к предпра́зднства.

Си́це глаго́лем тропари́ и кондаки́, в предпра́зднстве Богоявле́ния по вся дни, кроме́ неде́ли, и полиеле́я свята́го.

Проки́мен, глас 1: Уста́ моя́ возглаго́лют прему́дрость,/ и поуче́ние се́рдца моего́ ра́зум. Стих: Услы́шите сия́, вси язы́цы, внуши́те, вси, живу́щии по вселе́нней. Апо́стол ко Евре́ем, зача́ло 318. Аллилу́ия, глас 2: Уста́ пра́веднаго поуча́тся прему́дрости,/ и язы́к его́ возглаго́лет суд. Стих: Зако́н Бо́га его́ в се́рдце его́,/ и не за́пнутся стопы́ его́. Ева́нгелие от Иоа́нна, зача́ло 8. Прича́стен: В па́мять ве́чную бу́дет пра́ведник: