А́ще восхо́щет настоя́тель, твори́м бде́ние.

На ма́лой вече́рни

Стихи́ры, глас 2.

Подо́бен: Егда́ от Дре́ва Тя:

Егда́ во гро́бе тебе́ сама́го,/ ра́дуяся, заключи́л еси́, о́тче,/ любве́ ра́ди Христо́вы,/ терпе́л еси́ крепча́йше от де́монов искуше́ния,/ моли́твою же и благода́тию/ отгна́л еси́ сих паучи́ны немощне́йшия сове́тования./ Тогда́ собра́шася чи́ни А́нгельстии, зову́ще:/ сла́ва Укре́пльшему тя, Анто́ние.

Други́й яви́лся еси́ Илия,/ имеяй славныя ученики́ твоя́, якоже Елиссея, мудре,/ имже и благода́ть твою́ сугубу оста́вил еси́,/ восхи́щен, я́ко на колесни́це возду́шней, о́тче./ Темже, живяй ду́хом,/ ны́не срадуешися им./ Вся помина́й, всеблаженне,/ соверша́ющии любовию твое́ че́стное торжество́, Антоние.

Я́коже Богови́дец Моисе́й,/ во мрак мы́сленный вшел еси́ виде́ний вои́стинну,/ а́бие же ви́дел еси́, его́же жела́л еси́, я́сно:/ просла́вився же лице́м, заре́ю о́ною, о́тче,/ наста́вити во спаси́тельныя оби́тели./ Те́мже, соше́дшеся, Богому́дре,/ ра́дующеся, взыва́ем:/ сла́ва Укре́пльшему тя Христу́ Бо́гу.

Сла́ва, глас 3. Анато́лия:

Преподо́бне Анто́ние,/ тверде́йшаго страда́льчества зно́йное и мра́зное житие́,/ я́ко в незаходи́мых воспочива́я, соверши́л еси́:/ пусты́ннейшим бо тебе́ сама́го совокупи́в духо́вне,/ огнепа́льныя стре́лы де́монския попра́л еси́./ И, превы́шши вся́кия доброде́тели быв,/ водворя́ешися со А́нгелы во Ца́рствии Небе́снем,/ с ни́миже моли́ Христа́ Бо́га/ спасти́ся душа́м на́шим.

И ны́не, Богоро́дичен.

На стихо́вне стихи́ры, глас 2.

Подо́бен: До́ме Евфра́фов:

Яви́лся еси́/ от ма́терних пеле́н,/ Богоно́се,/ освяще́н сосу́д, Анто́ние,/ и дом Всесвята́го Ду́ха.

Стих: Честна́ пред Го́сподем/ смерть преподо́бных Его́.

Ле́сти лука́вых/ де́монов посрами́в/ Креста́ си́лою,/ уясни́л еси́ сла́ву Христо́ву,/ о́тче Анто́ние.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Возне́слся еси́, я́ко Илия́,/ на колесни́це о́гненней/ и преше́л еси́, блаже́нне,/ нехода́тайственне к Тро́ице,/ Анто́ние всеми́рне.

Сла́ва, и ны́не, Богоро́дичен:

Го́рнии Тя ли́цы,/ Богоро́дице Де́во,/ пою́т с до́льними,/ сла́вяще непреста́нно/ Рождество́ Твое́ Пречи́стое.

На вели́цей вече́рни

Пое́м Блаже́н муж: 1-й антифо́н. На Го́споди, воззва́х: поста́вим стихо́в 8 и пое́м стихи́ры, глас 4.

Подо́бен: Зва́нный свы́ше:

Просвети́выйся Ду́ха луча́ми,/ егда́ тя Боже́ственное жела́ние распали́,/ и ду́шу впери́/ Того́ возжела́ти любве́ вои́стинну кра́йнейшее:/ тогда́ преоби́дел еси́ плоть и кровь,/ и вне ми́ра был еси́ мно́гим воздержа́нием,/ и безмо́лвием Сему́ соединя́яся./ Те́мже напо́лнился еси́,/ я́ко проси́л еси́, отту́ду до́брых/ и просия́л еси́, я́коже звезда́,/ озаря́я ду́ши на́ша, Анто́ние.

Де́монов лу́ки и стре́лы сокруши́в/ благода́тию Боже́ственнаго Ду́ха,/ и зло́бу и ловле́ния их/ всем явле́нно сотвори́л еси́/ Боже́ственными уче́ньми,/ Боже́ственными сия́ньми облиста́емь./ Мона́шествующих Богоза́рнейший свети́льник был еси́,/ и пусты́ни пе́рвый украси́тель,/ и неду́гующих иску́снейший и честны́й врач/ и началообра́зное начерта́ние доброде́тельнаго жития́,/ о́тче Анто́ние.

Чи́стый душе́ю и се́рдцем,/ А́нгел земны́й, челове́к Небе́сный,/ де́вства учи́тель,/ воздержа́ния изве́стное ме́рило, Анто́ние,/ живы́й со Влады́кою твои́м/ и немо́лчное славосло́вие, блаже́нне,/ со А́нгелы, и преподо́бными,/ и все́ми му́ченики Сему́ принося́,/ соверша́ющия твою́ свяще́нную па́мять всегда́/ от лю́тых бед и прегреше́ний свободи́.

Сла́ва, глас 6:

Еже́ по о́бразу соблю́д невреди́мо,/ ум Влады́ку над страстьми́ па́губными по́стнически поста́вив,/ во е́же по подо́бию я́ко мо́щно возше́л еси́,/ му́жески бо естество́ пону́див,/ потща́лся еси́ ху́ждшее покори́ти лу́чшему/ и плоть порабо́тити ду́ху./ Те́мже мона́шествующих яви́лся еси́ верх,/ гражда́нин пусты́нный,/ благотеку́щих обучи́тель,/ пра́вило доброде́тели изве́стнейшее,/ и ны́не на Небесе́х зерца́лом разре́шшимся,/ о́тче наш Анто́ние,/ чи́сте зри́ши Святу́ю Тро́ицу,/ моля́ся несре́дственне/ о и́же ве́рою и любо́вию чту́щих тя.

И ны́не, Богоро́дичен: Кто Тебе́ не ублажи́т:

Вход. Проки́мен дне. И чте́ния.

Прему́дрости Соломо́ни чте́ние (глава́ 3):

Пра́ведных ду́ши в руце Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и еже́ от нас ше́ствие – сокруше́ние,/ они́ же суть в ми́ре./ И́бо, пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние (гла́вы 5 и 6);

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возло́жит шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йду́т праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы,/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества и гордя́щиися о наро́дех язы́к./ Я́ко дана́ есть от Го́спода держа́ва вам/ и си́ла от Вы́шняго.

На ли́тии стихи́ра хра́ма. И свята́го, глас 2.

Самогла́сны.

Студи́тово: По́стническое обуче́ние собра́в на земли́,/ преподо́бне Анто́ние,/ и страсте́й прило́ги в тече́нии слез твои́х вся потопи́л еси́,/ ле́стница Боже́ственная и честна́я, на Небеса́ возводя́щая,/ всем позна́ся Богоприя́тное житие́ твое́:/ благоче́стия бо плоды́ в себе́ показа́в,/ исцеля́еши те́ми не́мощи страсте́й/ ве́рно вопию́щих тебе́:/ ра́дуйся, восто́ка звездо́ златоза́рнейшая,/ и мона́шествующих свети́льниче, и па́стырю./ Ра́дуйся, приснопа́мятне,/ пусты́ни добре́йшее воспита́ние/ и Це́ркве непозы́блемое утвержде́ние./ Ра́дуйся, заблужда́ющих вели́кий наста́вниче./ Ра́дуйся, на́ша похвало́/ и вселе́нныя све́тлое ра́дование.

На земли́ А́нгела и на Небесе́х челове́ка Бо́жия,/ ми́ра благоукраше́ние,/ наслажде́ние благи́х и доброде́телей,/ по́стников похвалу́, Анто́ния почти́м:/ насажде́н бо в до́му Бо́жии, процвете́ пра́ведно/ и, я́ко кедр, в пусты́ни,/ умно́жи па́ству Христо́ву слове́сных ове́ц/ в преподо́бии и пра́вде.

Преподо́бне о́тче,/ из младе́нства доброде́тели приле́жно обучи́вся,/ орга́н был еси́ Свята́го Ду́ха/ и, от Него́ прие́м чуде́с де́йство,/ увеща́л еси́ челове́ки преоби́дети сла́дкая./ Ны́не же Боже́ственным све́том чисте́е осиява́емь,/ просвети́ и на́ша мы́сли, о́тче Анто́ние.

Сла́ва, глас 5:

Преподо́бне о́тче,/ глас Ева́нгелия Госпо́дня услы́шав,/ мир оста́вил еси́,/ бога́тство и сла́ву в ничто́же вмени́в./ Тем всем вопия́л еси́:/ возлюби́те Бо́га и обря́щете благода́ть ве́чную,/ ничто́же предпочти́те па́че любве́ Его́,/ да егда́ прии́дет в сла́ве Свое́й,/ обря́щете поко́й со все́ми святы́ми./ Его́же моли́твами, Христе́,/ сохрани́ и спаси́ ду́ши на́ша.

И ны́не, Богоро́дичен:

Блажи́м Тя, Богоро́дице Де́во,/ я́ко из Тебе́ возсия́ Со́лнце пра́вды, Христо́с,/ име́яй ве́лию ми́лость.

На стихо́вне стихи́ры, глас 5.

Подо́бен: Ра́дуйся, по́стников:

Ра́дуйся, А́нгельским счета́яся ликостоя́нием в Вы́шних, Анто́ние:/ житие́ бо тех, о́тче, на земли́,/ вои́стинну доброде́телию обучи́вся, пожи́л еси́,/ я́влься чисте́йшее и нескве́рное зерца́ло,/ лучеза́рная блиста́ния прие́мшее Ду́ха Пресвята́го, вееблаже́нне./ Те́мже, озаря́емь, зрел еси́ бу́дущая,/ вся предглаго́ля,/ от Боже́ственнаго светоявле́ния науча́емь Христо́ва,/ Его́же моли́/ душа́м на́шим да́ти ве́лию ми́лость.

Стих: Честна́ пред Го́сподем/ смерть преподо́бных Его́.

Ра́дуйся, по́стников началово́ждь бы́вый/ и непобеди́мый побо́рник:/ страсте́й бо изсека́я коре́ния и де́монов стремле́ния,/ сопроти́вився му́жески,/ обличи́л еси́ тех не́мощь и душегу́бную пре́лесть,/ Спа́сова же Креста́ де́йство/ и непобеди́мую яви́л еси́ си́лу,/ е́юже и препоя́сався, победи́л еси́ вся,/ отмета́ющия Боже́ственное во пло́ти явле́ние Христо́во, Его́же моли́/ душа́м на́шим да́ти ве́лию ми́лость.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Столп светови́ден доброде́тели утвержде́н и о́блак, осеня́ющ су́щия в пусты́ни, яви́лся еси́,/ к Небеси́ от земли́ Бо́га зря́щих предводя́щий./ Креста́ па́лицею страсте́й расто́рг мо́ре,/ мы́сленнаго же Амали́ка победи́в,/ невозбра́нен Небе́сный восхо́д обре́л еси́, Богоблаже́нне,/ и насле́дие нетле́нное,/ со безпло́тными престо́лу ра́достно предстоя́ Христо́ву,/ Его́же моли́/ душа́м на́шим да́ти ве́лию ми́лость.

Сла́ва, глас 8:

Мона́хов мно́жества,/ наста́вника тя почита́ем, о́тче наш Анто́ние,/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, Па́влу соприча́стниче Фиве́йскому,/ с ни́мже моли́ся Го́сподеви/ поми́ловатися душа́м на́шим.

И ны́не, Богоро́дичен: Безневе́стная Де́во:

Тропа́рь, глас 4:

Ревни́теля Илию́ нра́вы подража́я,/ Крести́телю пра́выми стезя́ми после́дуя,/ о́тче Анто́ние,/ пусты́ни был еси́ жи́тель/ и вселе́нную утверди́л еси́ моли́твами твои́ми./ Те́мже моли́ Христа́ Бо́га/ спасти́ся душа́м на́шим.

На у́трени

На Бог Госпо́дь: тропа́рь два́жды. Сла́ва, и ны́не, Богоро́дичен: Е́же от ве́ка утае́ное:

По 1-й стихоло́гии седа́лен, глас 4.

Подо́бен: Ско́ро предвари́:

Зва́нию Го́спода твоего́ после́довал еси́,/ мир отве́рг и вся, я́же в ми́ре, кра́сная, всеблаже́нне Анто́ние,/ претерпе́л еси́ пусты́нное озлобле́ние усе́рдно,/ полки́ же отрази́л еси́ де́монов му́жественне./ Те́мже твою́ и па́мять при́сно пе́сньми восхваля́ем ве́рно.

Сла́ва, и ны́не, Богоро́дичен:

Обнови́ла еси́, Чи́стая, Боже́ственным Рождество́м Твои́м/ истле́вшее страстьми́ земноро́дных ме́ртвенное существо́/ и воздви́гла еси́ вся от сме́рти к жи́зни нетле́ния./ Те́мже Тя по до́лгу блажи́м вси, Де́во Препросла́вленная,/ я́коже прорекла́ еси́.

По 2-й стихоло́гии седа́лен, глас 5.

Подо́бен: Собезнача́лъное Сло́во.

По́стника Госпо́дня пе́сньми почти́м,/ я́ко умертви́ша вся прило́ги страсте́й/ воздержа́нием и тве́рдым терпе́нием вои́стинну,/ и посрами́вша зело́ противобо́рца врага́ и всю сего́ горды́ню,/ и ны́не моля́щася Го́сподеви/ поми́ловатися душа́м на́шим.

Сла́ва, и ны́не, Богоро́дичен:

Ужа́сно чу́до зача́тия и несказа́нен о́браз Рождества́/ в Тебе́ позна́ся, Присноде́во Чи́стая,/ ужаса́ет мой ум и удивля́ет помышле́ние,/ сла́ва Твоя́, Богоро́дице, во всех простре́ся,/ ко спасе́нию душ на́ших.

По полиеле́и седа́лен, глас 8.

Подо́бен: Прему́дрости:

Па́стырскую хи́трость восприи́м/ и мона́шествующих столп и основа́ние,/ кре́пце упа́сл еси́ разу́мную па́ству твою́:/ Христо́ва бо возжеле́в Боже́ственная уче́ния,/ в ни́хже сло́во, посе́ял еси́, преподо́бне./ Те́мже и к ре́вности А́нгельскаго жи́тельства/ воздви́гл еси́ вся единому́дренно сла́вити Бо́га, Богоно́се Анто́ние,/ моли́ Христа́ Бо́га прегреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Небе́сную дверь и киво́т, всесвяту́ю го́ру,/ све́тлый о́блак воспои́м,/ неопали́мую купину́,/ слове́сный рай, Е́вы воззва́ние,/ вселе́нныя всея́ вели́кое сокро́вище,/ я́ко спасе́ние в Ней соде́лася ми́ру/ и оставле́ние дре́вних согреше́ний./ Сего́ ра́ди вопие́м Ей:/ моли́ся Сы́ну Твоему́ прегреше́ний оставле́ние дарова́ти/ благоче́стно покланя́ющимся Всесвято́му Рождеству́ Твоему́.

Степе́нна, 1-й антифо́н, 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду трудо́в твои́х,/ де́монския погуби́л еси́ полки́/ и А́нгельския дости́гл еси́ чи́ны,/ и́хже жити́ю без поро́ка поревнова́л еси́,/ дерзнове́ние име́я ко Христу́ Бо́гу,/ мир испроси́ душа́м на́шим.

Кано́н Богоро́дицы на 6. И свята́го на 8. Кано́н Богоро́дицы, его́же краегране́сие: Пою́ хвалу́ живоно́сней Отрокови́це. Творе́ние Иоа́нна Дамаскина́, глас 2.

Песнь 1

Ирмо́с: Нетре́ну, необы́чну,/ немо́кренно морску́ю ше́ствовав стезю́,/ избра́нный вопия́ше Изра́иль:/ Го́сподеви пои́м, я́ко просла́вися.

Невеще́ственная дре́вле ле́ствица и стра́нно олядене́вщий путь мо́ря/ Твое́ явля́ше Рождество́, Чи́стая,/ Ю́же пое́м вси, я́ко просла́вися.

Си́ла Вы́шняго, Ипоста́сь соверше́нная,/ Бо́жия му́дрость, вопло́щшаяся, Пречи́стая, из Тебе́,/ челове́ком бесе́дова, я́ко просла́вися.

Про́йде сквозе́ дверь непрохо́дную заключе́нныя утро́бы Твое́я пра́вды Со́лнце, Чи́стая,/ и ми́ру возсия́, я́ко просла́вися.

Кано́н преподо́бнаго, его́же краегране́сие: Анто́ния Боже́ственнаго восхвали́ти ле́по. Творе́ние Феофа́ново, глас 8.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре, Изра́иля же беглеца́, пешехо́дца спа́се,/ песнь Бо́гови воспева́юща.

Безсме́ртия и жи́зни е́мься ве́чныя я́ве/ и Трисия́нныя зари́, о́тче, насыща́яся,/ просвеще́нием благода́ти омраче́нную ду́шу мою́ озари́ти помоли́ся,/ я́ко да досто́йно воспою́ тя.

Млад сый во́зрастом телесе́,/ нов путь доброде́тели восприе́м, сим безбе́дно ше́ствовал еси́,/ зако́ну но́вому повину́яся Спа́сову, треблаже́нне,/ и живоно́сным повеле́нием Ева́нгелия после́дуя.

Трисо́лнечным сия́нием, всему́дре, озаря́емь,/ злоу́мное, блаже́нне, де́монов свере́пство, и звере́й зия́ния,/ и ран боле́зни, я́коже паучи́ну, разори́л еси́,/ Боже́ственным разжиза́емь жела́нием.

Богоро́дичен: Я́ко Бо́жия Ма́ти,/ дерзнове́ние иму́щи к ро́ждшемуся из Тебе́ Единоро́дному Сло́ву,/ и Отцу́ Собезнача́льному, и Соесте́ственному Ду́ху,/ моля́щи не преста́й от бед спасти́, Всенепоро́чная,/ Тя, Богоро́дицу, сла́вящия.

Катава́сия: Су́шу глубороди́тельную, зе́млю/ со́лнце наше́ствова иногда́:/ я́ко стена́, бо огусте́ обапо́лы вода́/ лю́дем пешомореходя́щим и богоуго́дно пою́щим:/ пои́м Го́сподеви, сла́вно бо просла́вися.

Песнь 3

Ирмо́с: Лук сокруши́ся си́льных/ держа́вою Твое́ю, Христе́,/ и си́лою немощству́ющии/ препоя́сашася.

И́же вре́мене превы́шший вся́каго,/ я́ко време́н Творе́ц, из Тебе́, Де́во, во́лею Младе́нец созда́ся.

Чре́во, простра́ннейшее Небе́с, воспои́м,/ и́мже Ада́м на Небесе́х, ра́дуяся, живе́т.

Ин

Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.

Утвержде́нным по́мыслом и кре́пким терпе́нием страсте́й увяди́л еси́ пла́мень,/ в безстра́стия све́тлую оде́жду, Анто́ние, оде́ялся еси́, о́тче, и спасе́ния ри́зу.

Крепчашия прило́ги де́монов дерза́ющих/ и зве́рскими о́бразы подо́бящихся,/ пренебре́гл еси́ тех не́мощную си́лу,/ кре́пкаго бо име́л еси́ во бране́х Спомо́щника.

Богоно́сец, нача́ла тьмы и вла́сти обличи́в воздержа́нием кре́пким,/ до́блественный победи́тель, Анто́ние, был еси́,/ по́стников сла́ва, мона́шествующих похвала́.

Богоро́дичен: Умерщвле́нный мой ум живо́тным де́йством,/ из Тебе́ я́вльшимся ми́ру, воздви́гни, Чи́стая, и к жи́зни наста́ви,/ я́же сме́рти две́ри разо́ршая еди́на Рождество́м Твои́м.

Катава́сия: Утвержде́ние на Тя наде́ющихся,/ утверди́, Го́споди, Це́рковь,/ ю́же стяжа́л еси́/ Че́стною Твое́ю Кро́вию.

Седа́лен, глас 8.

Подо́бен: Прему́дрости:

Ду́шу твою́ связа́в любо́вию Христо́вою,/ земна́я возненави́дев вся му́дре,/ водвори́лся еси́, о́тче преподо́бне, в пусты́нях и гора́х,/ разу́мнаго бо дре́ва вкуси́в, сла́вне,/ я́ко от незаходи́мых, таи́нниче, а́нгельски просия́л еси́./ Те́мже и, мрак проше́д пло́ти твое́я,/ тьму отгна́л еси́ де́монов, Анто́ние,/ и, мона́шествующих предызбра́нный,/ моли́ Христа́ Бо́га прегреше́ний оставле́ние пода́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Всенепоро́чная Неве́сто Творца́,/ я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Всепе́тая,/ беззако́ния мя су́ща скве́рное оби́телище и де́монов игра́лище в ра́зуме бы́вша,/ потщи́ся от тех злоде́йства мя изба́вити/ и све́тлое жили́ще доброде́телей соверши́, Светоно́сная Нетле́нная./ Отжени́ о́блак страсте́й, и Вы́шняго прича́стия сподо́би,/ и Све́та Невече́рняго моли́твами Твои́ми.

Песнь 4

Ирмо́с: Услы́шах, Го́споди,/ сла́вное Твое́ смо́трение/ и просла́вих, Человеколю́бче,/ непостижи́мую Твою́ си́лу.

Се превознесе́ся Боже́ственная гора́ до́му Госпо́дня превы́шше сил,/ Богома́терь я́вственнейши.

Зако́нов есте́ственных кроме́, еди́на, Де́во, ро́ждши Влады́чествующего тва́рию,/ сподо́билася еси́ Боже́ственнаго зва́ния.

Ин

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Доброде́телей ле́ствицу Боже́ственную употреби́в,/ к высоте́, о́тче, возше́л еси́/ и Бо́га ви́дел еси́, на ней утвержде́на/ и да́ры раздава́юща руко́ю богате́йшею ве́рно пою́щим:/ си́ле Твое́й сла́ва, Человеколю́бче.

Весь Бо́гу освяти́лся еси́, Анто́ние,/ еди́н Еди́ному, всему́дре, единя́яся доброде́телию и бесе́дами/ и Богоявле́ния, я́ко чист, сподобля́емь/ земли́ бо и земны́х отступи́в,/ досто́йно Небе́сное обре́л еси́ наслажде́ние.

Ум и ду́шу очи́стив, Анто́ние, пре́лесть, о́тче, душегу́бную,/ и кова́рствия, и ле́сти го́рькия, и мечта́ния враго́в обличи́л еси́,/ пострада́в бо, навы́кл еси́/ и, научи́вся, учи́ши мона́шествующих мно́жества, всеблаже́нне.

Богоро́дичен: Бо́га, из Тебе́ воплоще́ннаго, моли́, непрело́жно, еже́ бе, пребы́вша/ и есте́ственно равна́ Отцу́, и Тебе́, Ро́ждшей, бы́вша Единосу́щна,/ проще́ние прегреше́ний и душ спасе́ние пою́щим Тя ве́рою дарова́ти.

Катава́сия: Покры́ла есть Небеса́ доброде́тель Твоя́, Христе́:/ из киво́та бо проше́д святы́ни, Твое́й нетле́нныя Ма́тере,/ в хра́ме сла́вы Твое́й яви́лся еси́,/ я́ко Младе́нец руконоси́мь,/ и испо́лнишася вся Твоего́ хвале́ния.

Песнь 5

Ирмо́с: Угль, Иса́ии проявле́йся,/ Со́лнце из де́вственныя утро́бы возсия́/ во тьме заблу́ждшим,/ Богоразу́мия просвеще́ние да́руя.

О́блацы, весе́лия сла́дость кропи́те су́щим на земли́,/ я́ко Отроча́ даде́ся, Сый пре́жде век,/ от Де́вы вопло́щся, Бог наш.

Житию́ и пло́ти мое́й свет возсия́ и дря́хлость греха́ разруши́,/ напосле́док от Де́вы без се́мене вопло́щся Вы́шний.

Ин

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Живу́ща в тебе́ име́я вся ви́дящаго Бо́га, блаже́нне,/ науча́юща тя, и просвеща́юща, и умудря́юща,/ душ, треблаже́нне, чи́стых и блаже́нных восхо́ды зре́ти сподо́бился еси́.

Исцеле́ний тебе́ благода́ть на неду́ги разли́чныя дарова́/ и на ду́хи нечи́стыя Христо́с власть, му́дре:/ естество́ бо, о́тче, победи́в,/ па́че естества́ даро́в причасти́лся еси́ Ду́ха.

Богоро́дичен: Тя сте́ну иму́ще и предста́тельством Твои́м соблюда́еми,/ Твое́ю Боже́ственною сла́вою хваля́щеся, Тя блажи́м:/ Ты бо, Всечи́стая, душа́м на́шим источа́еши весе́лие и ра́дование.

Катава́сия: Я́ко ви́де Иса́ия обра́зно на престо́ле превознесе́на Бо́га,/ от А́нгел сла́вы дориноси́ма, -/ о, окая́нный, – вопия́те, -аз:/ прови́дех бо воплоща́ема Бо́га,/ Све́та Невече́рня и ми́ром влады́чествующа.

Песнь 6

Ирмо́с: Глас глаго́л моле́бных/ от боле́зненныя, Влады́ко, души́ услы́шав,/ от лю́тых мя изба́ви:/ Еди́н бо еси́ на́шего спасе́ния вино́вен.

Естество́ челове́ческое, рабо́тающее греху́, Влады́чице Чи́стая,/ Тобо́ю свобо́ду улучи́:/ Твой бо Сын, я́ко А́гнец, за всех закала́ется.

Вопие́м вси Тебе́, и́стинней Богома́тери:/ прогне́вавшия рабы́ изба́ви,/ Еди́на бо дерзнове́ние к Сы́ну Твоему́ и́маши.

Ин

Ирмо́с: Бе́здна грехо́в и прегреше́ний бу́ря мя смуща́ет/ и во глубину́ ну́жднаго ре́ет мя отча́яния,/ но Твою́ кре́пкую ру́ку мне простри́, я́ко Петро́ви,/ о Управи́телю! и спаси́.

Зако́нное страда́льчески житие́ от мя́гких ногте́й восприи́м, Богому́дре,/ да́же до конца́ соблю́л еси́/ и, я́ко Боже́ствен до́блественник,/ вене́ц прия́л еси́ побе́ды от всех Ца́рствующаго.

Иму́ще тя к Бо́гу моли́твенника крепча́йша, блаже́нне,/ и о́бщника попече́ний, и предста́теля, и побо́рника, и хода́тая благоче́стна,/ от вся́ких спаса́емся бед, и напа́стей, и обстоя́ний.

Богоро́дичен: Вознесла́ еси́ всеи́стинно па́дшееся челове́ческое существо́, во зра́це Боже́ственнем/ и Отца́ в ра́венстве, ви́димаго Сы́на неизме́ннаго, Богома́ти,/ без се́мене во чре́ве поноси́вши.

Катава́сия: Возопи́ к Тебе́, ви́дев ста́рец очи́ма спасе́ние,/ е́же лю́дем прии́де от Бо́га:/ Христе́,Ты Бог мой.

Конда́к, глас 2.

Подо́бен: Вы́шних ища:

Жите́йския молвы́ отри́нув,/ безмо́лвно житие́ сконча́л еси́,/ Крести́теля подража́яй вся́ким о́бразом, преподо́бнейший,/ с ним у́бо тя почита́ем,/ отце́в нача́льниче, Анто́ние.

И́кос:

Христо́в глас услы́шав, ше́ствовал еси́ в след Того́ за́поведей,/ наг жития́ быв, и отве́ргл еси́ попече́ния вся/ стяжа́ний, име́ний и рабо́в твои́х,/ и сестры́ любле́ние, Богоно́се Анто́ние,/ и, еди́н в пусты́нях Бо́гу бесе́дуя чисте́йше, ра́зума благода́ть прия́л еси́,/ ю́же ми посли́, в пе́снех тя пою́щему,/ отце́в нача́льниче, Анто́ние.

Песнь 7

Ирмо́с: Ветии́ яви́шася о́троцы любому́дрейшии дре́вле,/ от Богоприя́тныя бо души́ богосло́вяще,/ устна́ми поя́ху:/ Пребоже́ственный отце́в и наш Бо́же, благослове́н еси́.

Зря́ше в нощи́ Иа́ков, у́бо я́ко в гада́нии,/ Бо́га, воплоще́нна же из Тебе́,/ све́тлостию яви́ся пою́щим:/ Пребоже́ственный отце́в Бог и препросла́влен.

Зна́мения, е́же в Тебе́, неизрече́ннаго проявля́я сплете́ния,/ со Иа́ковом бо́рется, и́мже во́лею соеди́нися челове́ком, Чи́стая,/ Пребоже́ственный отце́в Бог и препросла́влен.

Ме́рзок, и́же не пропове́дует Еди́наго Де́вы Тя Сы́на от всепе́тыя Тро́ицы,/ и несомне́нною мы́слию, и язы́ком вопия́:/ Пребоже́ственный отце́в Бог и препросла́влен.

Ин

Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Ча́ши бы́ша арома́т лани́ты твоя́,/ доброде́телей благово́ние и спасе́ние благоуха́ющий, я́ко от цве́тника, ве́рою зову́щим:/ благослове́н Бог оте́ц на́ших.

Благода́ть Ду́ха Всесвята́го, в тя все́льшися,/ духо́в гони́теля лука́вствия, о́тче, соде́ла/ и мона́шествующих обучи́теля, зову́ща:/ благослове́н Бог оте́ц на́ших.

Богоро́дичен: Мари́ю Пречи́стую и Всесвяту́ю восхва́лим:/ То́ю бо благода́ть нам источа́ется па́че ума́ даро́в,/ я́ко от пото́ка Боже́ственныя бла́гости,/ Ю́же благочести́вым по́мыслом ны́не ублажи́м.

Катава́сия: Тебе́, во огни́ ороси́вшаго о́троки Богосло́вившия/ и в Де́ву Нетле́нну все́льшагося,/ Бо́га Сло́ва пои́м, благоче́стно по́юще:/ благослове́н Бог оте́ц на́ших.

Песнь 8

Ирмо́с: О подо́бии зла́те небре́гше треблаже́ннии ю́ноши,/ неизме́нный и живы́й Бо́жий о́браз ви́девше, среди́ огня́ воспева́ху:/ осуществова́нная да пое́т Го́спода вся тварь/ и превозно́сит во вся ве́ки.

Ви́ден бысть на земли́ Тобо́ю и с челове́ки поживе́/ И́же бла́гостию несравне́нный и си́лою./ Ему́же пою́ще, вси ве́рнии, зове́м:/ осуществова́нная да пое́т Го́спода вся тварь и превозно́сит во вся ве́ки.

И́стинно Тя, Чи́стую, пропове́дающе, сла́вим Богоро́дицу:/ Ты бо Еди́наго родила́ еси́, от Тро́ицы воплоще́нна,/ Ему́же со Отце́м и Ду́хом вси пое́м:/ да пое́т Го́спода вся тварь и превозно́сит во вся ве́ки.

Ин

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́./ Си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

В моли́твах бо́дрое, в поще́ниих благомо́щное, терпели́вное в напа́стех, Анто́ние,/ ума́ чистото́ю на земли́, я́ко А́нгел, показу́я, Бо́гу вопия́л еси́:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Моли́твами, преподо́бне, и мольба́ми приближа́яся ты непреста́нно к Бо́гу,/ восте́кл еси́ к высоте́ превзя́тей, де́монских сете́й избе́гл,/ свободи́вся же тех мучи́тельства, Богому́дре, воспева́еши:/ свяще́нницы, по́йте,/ лю́дие, превозноси́те во вся ве́ки.

Но́вый Моисе́й быв, в пусты́ни побе́ду на враги́ и бори́тели поста́вил еси́,/ лю́ди предводя́, по́стников собо́р в весе́лии и но́вом жи́тельстве,/ вопию́щих Влады́це:/ свяще́нницы, благослови́те, лю́дие, превозноси́те во вся ве́ки.

Богоро́дичен: Богороди́тельнице Всечи́стая,/ души́ моея́ я́звы и грехо́вныя стру́пы очи́сти,/ исто́чниками омыва́ющи, су́щими из боку́ Рождества́ Твоего́/ и су́щими из того́ очища́ющи струя́ми,/ к Тебе́ бо взыва́ю, и к Тебе́ прибега́ю,/ и Тя призыва́ю, Богоблагода́тную.

Катава́сия: Нестерпи́мому огню́ соедини́вшеся, Богоче́стия предстоя́ще ю́ноши,/ пла́менем же неврежде́ни, Боже́ственную песнь поя́ху:/ благослови́те, вся дела́ Госпо́дня, Го́спода и превозноси́те во вся ве́ки.

Песнь 9

Ирмо́с: Весь еси́ жела́ние, весь сла́дость, Сло́ве Бо́жий,/Де́вы Сы́не, Бо́же бого́в,/Го́споди, святы́х Пресвяты́й,/ тем Тя вси с Ро́ждшею велича́ем.

Жезл кре́пости даде́ся естеству́ тле́нному,/ Сло́во Бо́жие во утро́бе Твое́й, Чи́стая,/ и сие́ возста́ви, до а́да попо́лзшееся./ Те́мже Тя, Всечи́стая, я́ко Богоро́дицу велича́ем.

Ю́же изво́лил еси́, Влады́ко,/ приими́ ми́лостивно моли́твенницу Ма́терь Твою́ о нас,/ и Твое́й бла́гости вся́ческая испо́лнятся,/ да Тя вси, я́ко Благоде́теля, велича́ем.

Ин

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с/ Тем Тя, Богоро́дицу,/ А́нгелов и челове́к чинонача́лия велича́ют.

Наста́ светоно́сный твой пра́здник, всеблаже́нне о́тче Анто́ние,/ испо́лнь ра́дости, испо́лнь весе́лия духо́внаго,/ испо́лнь Свята́го Ду́ха, испо́лнь благоуха́ния и просвеще́ния,/ и ны́не, иму́ще тя поще́ния пра́вило и законополо́жника, ра́дуемся.

Не преста́й моля́ Изба́вителя, всечестны́й о́тче,/ дарова́ти благогове́йно па́мять твою́ соверша́ющим свяще́нную прегреше́ний оставле́ние,/ дарова́ний раздая́ние, Боже́ственное предста́тельство,/ душ спасе́ние, ве́чное ра́дование.

Равноа́нгелен пожи́в на земли́, равноа́нгельну обре́л еси́ све́тлость,/ тех бо Богови́днейшим сия́нием в прича́стии был еси́./ С ни́миже и ра́дуешися всегда́, я́ко Боже́ственный проро́к,/ я́ко му́ченик венцено́сец,/ я́ко мона́шествующих верхо́вник.

Богоро́дичен: Зачала́ еси́, Де́во, без се́мене/ вся́ческая созда́вшаго Сло́во Бо́жие, кроме́ хоте́ний плотски́х,/ и без истле́ния родила́ еси́, без боле́зней ма́терних./ Тем Тя, Богоро́дицу, и язы́ком, и се́рдцем испове́дующе, велича́ем.

Катава́сия: В зако́не се́ни и писа́ний/ о́браз ви́дим, ве́рнии:/ всяк му́жеский пол, ложесна́ разверза́я, свят Бо́гу./ Тем перворожде́нное Сло́во/ Отца́ безнача́льна,/ Сы́на, первородя́щася Ма́терию неискусому́жно,/ велича́ем.

Свети́лен.

Подо́бен: Све́те неизме́нный:

Свет единонра́вных показа́лся еси́,/ Све́та ходи́ти стезя́ми благочести́выя научи́в,/ Анто́ние, отце́в о́тче,/ и пла́мень мо́лнии па́ки огнь испуща́я и попаля́я де́монов полки́.

Сла́ва, и ны́не:

Тя песньми немо́лчными ублажа́ем, Дево,/ я́ко от Тро́ицы Еди́наго родила́ еси́, Богоро́дице,/ и носи́ла еси́ на Боже́ственных объятиих Пресущественное Сло́во,/ невращно и неизме́нно.

На хвалитех стихи́ры, на 4, глас 8.

Подо́бен: О, пресла́внаго чудесе́:

Преподо́бне о́тче Анто́ние,/ ты, и́го Христо́во на ра́мена взем,/ до́блественне наи́тие вра́жие попра́л еси́/ и в пусты́ни гра́ды показа́л еси́,/ сего́ ра́ди тя вси ве́рою почита́ем,/ о всеблаже́нне,/ мона́шествующих похвало́./ Те́мже Христа́ непреста́нно моли́,/ о е́же спасти́ся нам.

Ве́рою соше́дшеся вси,/ я́ко по́стника Христо́ва/ тя почита́ем, Анто́ние:/ ра́дуяся бо, ше́ствовал еси́ в пусты́ни непрохо́дней, му́дре,/ наста́вник сея́ был еси́ че́стен./ Те́мже тебе́ мы ве́рою взыва́ем:/ о всеблаже́нне,/ мона́шествующих похвало́,/ о нас моли́ся ко Го́споду,/ е́же спасти́ся нам.

Преподо́бне о́тче Анто́ние,/ и́стинныя ра́ди жи́зни/ во гро́бе заключи́лся еси́,/ ника́коже боя́ся неви́димых враго́в:/ иногда́ бо, толца́ния творя́ще, приидо́ша к тебе́,/ ты же моли́твами твои́ми сих бе́з ве́сти сотворя́л еси́,/ о терпеливоду́шне,/ пусты́ни первонача́льниче./ Те́мже тя ве́рно вси почита́ем и ублажа́ем.

Сла́ва, глас 8:

На Не́бо теку́щую возше́д колесни́цу, чу́дне, доброде́телей,/ дости́гл еси́ краегра́дие поще́нием,/ из пусты́ни обходя́ Го́рняго Иерусали́ма прекра́сная,/ и, от боле́зненных подвиго́в досто́йно по́чести прие́м,/ с Небе́сными ра́дуешися чинонача́лии, всеблаже́нне,/ ве́чных благи́х насле́дник и Ца́рствия жи́тель быв,/ но моли́ся, Богоно́се Анто́ние, Спа́су всех/ умири́ти мир и спасти́ ду́ши на́ша.

И ны́не, Богоро́дичен: Влады́чице, приими́:

Славосло́вие вели́кое и отпу́ст.

На литурги́и

Блаже́нны, от кано́на свята́го, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же возда́де ми? Апо́стол ко Евре́ем, зача́ло 335. Аллилу́ия, глас 6: Бла́жен муж, боя́йся Го́спода,/ в за́поведех Его́ восхо́щет зело́. Стих: Си́льно на земли́ бу́дет се́мя его́,/ род пра́вых благослови́тся. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник: