На Го́споди, воззва́х: стихи́ры апо́стола, глас 1.

Подо́бен: Всехва́льнии му́ченицы:

Луча́ми Ду́ха я́ве ты просвеща́емь,/ священноявле́нне Тимофе́е,/ светле́йший я́ко свети́льник яви́лся еси́,/ обтека́я всю зе́млю и просвеща́я благода́тию./ И ны́не моли́ся дарова́ти душа́м на́шим/ мир и ве́лию ми́лость.

Богому́дре Тимофе́е,/ сла́дости пото́к пил еси́/ и Богому́дренно напои́л еси́/ ра́зума Бо́жия те́пле жела́ющия,/ Христу́ подража́я./ К Нему́же ны́не ра́достно отше́л еси́,/ сла́ву созерца́я Тро́ицы пресве́тлую/ и мир безмерноси́льный.

Па́влу повину́яся,/ писа́нием бесе́дуя Ду́ха,/ светосия́нен весь был еси́,/ де́латель неску́ден/ и тепл уго́дник Госпо́день, всему́дре,/ целому́дренне, благоче́стне, о Тимофе́е! жи́тельствовав,/ и венце́в сподо́бился еси́ побе́ды,/ я́ко зако́нный страда́лец.

Стихи́ры преподобному́ченика, глас и подо́бен то́йже:

Му́чеников похвала́,/ све́тлы возста́вив побе́ды на пре́лесть,/ тезоимени́тное, всеблаже́нне, благосла́вие/ твои́м зва́нием но́сиши, всю́ду обноси́мь,/ я́ко тверд победи́тель, Анаста́сие,/ и ны́не возста́ви от грехо́вных паде́ний/ ве́рою чту́щия па́мять твою́.

Му́чениче Анаста́сие,/ све́тлую возста́вив побе́ду на лесть,/ восприя́л еси́ сугу́б вене́ц/ по́стничества твоего́, и тве́рдаго страда́ния,/ и да́же до сме́рти противле́ния,/ и чуде́с тебе́ досто́йно де́йство/ Влады́ка Христо́с дарова́.

Ми́ра концы́ твоя́ ны́не пою́т чудеса́,/ чудоде́йственне Анаста́сие,/ чудоде́йствиями бо возме́здив, Христо́с украси́ тя,/ му́ки Его́ ра́ди претерпе́вша,/ и по сме́рти безсме́ртнаго удосто́ился еси́/ благосла́вия и блаже́нства.

Сла́ва, глас 8:

Бо́гом предопределе́н/ и му́дрому Па́влу учени́к быв,/ научи́лся еси́ Боже́ственным, до́бре жи́тельствовав/ и ве́ру да́же до кро́ве несомне́нно соблю́д,/ и ве́рен архиере́й показа́лся еси́,/ Тимофе́е апо́столе./ Те́мже идолонеи́стовствующия обличи́л еси́,/ дреко́лием и ка́мением ураня́емь,/ прия́л еси́ муче́ния вене́ц./ Сего́ ра́ди, всеблаже́нне, моли́ся о нас,/ ве́рою соверша́ющих всечестну́ю па́мять твою́.

И ны́не, Богоро́дичен и́ли Крестобогоро́дичен.

Подо́бен: Му́ченицы Госпо́дни:

Ю́ница Нескве́рная,/ Юнца́ ви́дящи, на Дре́ве пригвожда́ема во́лею,/ рыда́ющи жа́лостне,-/ увы́ Мне,– вопия́ше, – люби́мейшее Ча́до!/ Что Ти сонм воздаде́ безблагода́тный евре́йский,/ хотя́ Мя обезча́детвовати от Тебе́, Вселюбе́зне?

На стихо́вне Окто́иха, таже глаго́лем припе́в: Во всю зе́млю изы́де веща́ние их/ и в концы́ вселе́нныя глаго́лы их.

И пое́м стихи́ру самогла́сну апо́стола, глас 1:

Свети́льника ве́рных и апо́стола,/ во Ева́нгелии просия́вшего Тимофе́я,/ прииди́те, лю́дие, воспои́м, глаго́люще:/ ра́дуйся, кра́сное ве́ры прозябе́ние,/ Боже́ственнаго Па́вла сынотворе́ния./ Ра́дуйся, честны́й зна́телю доброде́телей,/ многому́драя уста́ Сло́ва./ Ра́дуйся, конце́в Боговеща́нная цевни́це./ Ра́дуйся, ве́ры сто́лпе и Це́ркве утвержде́ние.

Сла́ва, глас 2:

Возвели́чил еси́, Христе́,/ я́ко во Иуде́и и в Вавило́не/ честна́го Креста́ си́лу,/ уве́деша бо его́ ра́ди животво́рнаго воста́ния пра́здник,/ и бысть им плене́нный свободи́тель идолонеи́стовства/ и му́ченик неопи́сан чуде́с,/ ны́не благохва́льный Анаста́сий, сла́вный страда́лец,/ со А́нгелы лику́я/ и моля́ся о душа́х на́ших.

И ны́не, Богоро́дичен и́ли Крестобогоро́дичен.

Подо́бен: Егда́ от Дре́ва:

Боле́зни претерпе́вши мно́гия/ в распя́тии Сы́на и Бо́га Твоего́, Пречи́стая,/ стоня́ше, слезя́щи и восклица́ющи:/ увы́ Мне, Ча́до сла́дкое,/ без пра́вды ка́ко стра́ждеши,/ хотя́ изба́вити я́же от Ада́ма земноро́дныя?/ Те́мже, Пречи́стая Де́во, Тебе́ мо́лим ве́рою:/ ми́лостива нам Того́ соде́лай.

Тропа́рь апо́стола, глас 4:

Бла́гости научи́вся и трезвя́ся во всех,/ благо́ю со́вестию священноле́пно обо́лкся,/ поче́рпл еси́ от сосу́да избра́ннаго неизрече́нная/ и, ве́ру соблю́д, ра́вное тече́ние соверши́л еси́,/ апо́столе Тимофе́е./ Моли́ Христа́ Бо́га/ спасти́ся душа́м на́шим.

Тропа́рь му́ченика, глас то́йже:

Му́ченик Твой, Го́споди, Анаста́сий/ во страда́нии свое́м вене́ц прия́т нетле́нный от Тебе́, Бо́га на́шего,/ име́яй бо кре́пость Твою́,/ мучи́телей низложи́,/ сокруши́ и де́монов немощны́я. де́рзости./ Того́ моли́твами/ спаси́ ду́ши на́ша.

На у́трени

Кано́н Окто́иха еди́н и святы́х два, на 8. Кано́н апо́стола, его́же краегране́сие: Тимофе́я апо́стола пе́сньми честву́ю. Творе́ние Феофа́ново, глас 1.

Песнь 1

Ирмо́с: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,/ изра́ильтяном путь глубины́ новосоде́лавшая.

Воста́ния страсте́й и неве́дения мрак/ моли́твами твои́ми, блаже́нне, разори́ све́тлою безстра́стия благода́тию,/ я́ко да Богоявле́нна ны́не досто́йно воспою́ тя.

Ви́дев Предве́дец и Бог твоего́ ума́ добро́ту, Тимофе́е,/ Боже́ственным апо́столом тя, сослужи́теля удосто́ив, показа́,/ му́дрым про́мыслом о нас промышля́я.

Еди́но Пресу́щественное Нача́ло, проразумева́ющее вся, ве́мы:/ от е́ллин бо апо́стол, Христо́вою просвеще́н благода́тию,/ ны́не Боже́ственному Па́влу счисля́ется Тимофе́й.

Му́ченика

У́тром светле́йшим Твоего́, Христе́, воста́ния осиява́емь,/ сего́ тезоимени́тый, от восто́ка устреми́вся,/ я́ко со́лнце, ны́не Це́рковь озаря́ет чудесы́.

Боже́ственныя любве́ испо́лнен,/ терпели́вно му́ки претерпе́л еси́, му́чениче Анаста́сие,/ и Христу́, по́стническими укра́шен добро́тами, ра́дуяся, приве́лся еси́,/ благово́нная же́ртва, блаже́нне.

Богоро́дичен: Ра́дуйся, благода́ти исто́чниче,/ ра́дуйся, ле́ствице и две́ре Небе́сная,/ ра́дуйся, све́щниче, и ста́мно злата́я, и горо́ несеко́мая,/ Я́же Жизнода́вца Христа́ ми́ру Ро́ждшая.

Песнь 3

Ирмо́с: Еди́не, ве́дый челове́ческаго существа́ не́мощь/ и ми́лостивно в не вообра́жся,/препоя́ши мя с высоты́ си́лою,/ е́же вопи́ти Тебе́, Святы́й:/ одушевле́нный хра́ме неизрече́нный сла́вы Твоея́, Человеколю́бче.

Излия́ся, всеблаже́нне, бога́тно благода́ть во устна́х твои́х/ и ре́ки догма́тов источи́, Це́рковь Христо́ву напая́ющия/ и многопло́ден принося́щий плод,/ Тимофе́е Христопропове́дниче, Богому́дре апо́столе.

Но́ги твоя́ проро́чески, всеблаже́нне, украси́шася,/ всяк бо ум, я́ве преиму́щий, благовести́л еси́ мир, всему́дре,/ дре́внюю разруши́вшаго челове́ков брань Спа́са всех и Го́спода.

Умертви́в твоя́ у́ды плотски́я,/ Сло́ву повину́л еси́ ху́ждшая, блаже́нне Тимофе́е, влады́чество пода́в лу́чшему,/ и, стра́сти удержа́в, ду́шу уясни́л еси́,/ наставля́емь Па́вловыми уче́нии.

Му́ченика

Стезю́ ше́ствовав те́сную,/ пе́рвее у́бо поще́нием к му́ченической сла́ве предуспе́л еси́,/ муче́ния ра́ди наслажде́ние обре́т боле́зньми,/ сла́вне му́чениче Анаста́сие, Небе́сную красоту́ прие́мля.

Боле́знь страда́ния твоего́ во всю изы́де вселе́нную, му́чениче непобеди́ме:/ проти́ву бо греха́ да́же до кро́ве сопроти́вився,/ победоно́сец был еси́ и венце́м побе́ды украси́лся еси́.

Богоро́дичен: Из Тебе́ прозябе́, Чи́стая, Цвет неувяда́емый,/ благоуха́ющий все челове́чество Боже́ственным ми́ром естества́ Своего́,/ И́же Отцу́ Собе́значальный,/ и из Тебе́ быв под ле́том, Де́во Всенепоро́чная.

Седа́лен, глас 4.

Подо́бен: Ско́ро предвари́:

Боже́ственными дарова́нии укра́шен,/ удобри́л еси́, сла́вне, Ефе́сскую све́тлую митропо́лию, апо́столе,/ пропове́дник бо показа́лся еси́,/ с Па́влом Боже́ственным всем провозвести́л еси́ спаси́тельное сло́во./ Те́мже торжеству́ем ве́рою па́мять твою́.

Сла́ва, му́ченика, глас то́йже:

Сла́вою соверше́нства яви́лся еси́ прече́стен,/ я́ко Боже́ственными просвети́в светозаре́нии ум и позна́в Креста́ кре́пость,/ преподо́бен посто́м и кровьми́ му́ченик был еси́, Богому́дренне, Анаста́сие блаже́нне./ Те́мже и чуде́с тобо́ю то́чит дар, Христо́с.

И ны́не, Богоро́дичен:

Де́во Всенепоро́чная, я́же Пресу́щнаго Бо́га ро́ждшая,/ со безпло́тными Того́ непреста́нно моли́/ оставле́ние прегреше́ний, и исправле́ние жития́ да́ти нам пре́жде конца́,/ ве́рою и любо́вию пою́щим Тя по до́лгу, Еди́на Всепе́тая.

Крестобогоро́дичен:

На Кресте́ Тя возвы́шена я́ко узре́/ Пречи́стая Ма́ти Твоя́, Сло́ве Бо́жий,/ ма́терски рыда́ющи, веща́ше:/ что но́вое и стра́нное сие́ чу́до, Сы́не Мой?/ Ка́ко, Жизнь всех, вкуша́еши смерть,/ оживи́ти ме́ртвыя хотя́, я́ко Милосе́рд?

Песнь 4

Ирмо́с: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му/ во спасе́ние на́ше и обновле́ние.

Зако́нно, всеблаже́нне, пострада́ти изво́лив,/ воздержа́нием всеконе́чным треволне́ния страсте́й уму́ покори́л еси́,/ доброде́тели прие́м соверше́ние,/ великопропове́дниче Богому́дре Тимофе́е.

Облиста́в, я́ко со́лнце, Па́вел, испусти́, я́коже зарю́ све́тлу,/ вселе́нную бога́тным све́том просвеща́я,/ светоявле́нно тя, Богоявле́ние Тимофе́е, к наставле́нию на́шему и утвержде́нию.

Возжела́в те́пле жела́ний кра́йнейшее и любо́вию сраствори́вся,/ раче́нием на другу́ю жизнь преше́л еси́, Богоприя́тне,/ всегда́ твоего́ с озира́я Рачи́теля и Того́ виде́ния насыща́яся.

Му́ченика

Ничто́же тя су́щия ко Христу́ любве́ отлучи́:/ ни удо́в отсече́ние, ни ран преще́ние,/ ни меч, ни смерть,/ но ниже́ огнь, ниже́ глад,/ Анаста́сие, Небе́снаго ликова́ния купносе́льниче.

Со усе́рдием на ра́мо крест твой взем,/ после́довал еси́ Христо́вым спаси́тельным за́поведем/ и, Сего́ быв подража́тель да́же до сме́рти, всеизря́днейше,/ ны́не наслажда́ешися Того́ све́тлости.

Богоро́дичен: Ра́дость Тебе́ я́ве с Небесе́ прише́д, – Архистрати́г, Чи́стая, благовести́, рек:/ Бог изы́дет с пло́тию из Тебе́, Де́во Всечи́стая,/ во спасе́ние любо́вию пою́щих Тя.

Песнь 5

Ирмо́с: Бог Сын ми́ра, Оте́ц щедро́т,/ Вели́каго Сове́та Твоего́ А́нгела,/ мир подава́юща, посла́л еси́ нам:/ тем, Богоразу́мия к све́ту наста́вльшеся,/ от но́щи у́тренююще, славосло́вим Тя, Человеколю́бче.

Пе́рваго и всех Вино́внаго Све́та невеще́ственными сия́нии просвеща́емь,/ мир уясни́л еси́ пропове́данием честны́м,/ свети́льник благоче́стия, жи́зни сло́во преиме́ния проявле́нно яви́лся еси́,/ священнотаи́нниче всеблаже́нне.

Па́вла Боже́ственнаго и́стинный учени́к учи́теля стопа́м после́дует,/ сего́ се́я уче́ния ве́рным,/ и́миже благоче́стия к све́ту наставля́еми,/ из но́щи у́тренююще, славосло́вим Тя, Человеколю́бче.

Просвеще́нием Па́вел вторы́й явля́ешися,/ служа́щий пе́рвей све́тлости, сея́ позна́нием просвети́ нас./ Сего́ сво́инник Тимофе́й яви́ся,/ Того́ всеору́жием победи́тельно огражда́емь.

Му́ченика

Дре́вле хваля́йся безме́рно, и зе́млю претя́ объя́ти,/ и всу́е гордя́ся, му́дре, все потреби́ти,/ твои́ми благому́жествы, Анаста́сие му́чениче, попира́ется богопроти́вный.

Зако́нно пострада́в му́ченик Христо́в и победи́в,/ страда́ний возме́здия, чуде́с де́йство прие́млет я́ве:/ неду́ги бо цели́т и де́моны отгоня́ет,/ Христо́вою си́лою чудоде́йствуя, Анаста́сий.

Богоро́дичен: Прокля́тие Е́вы, всех ма́тере, Твои́м Рождество́м, Де́во, упраздни́ла еси́,/ ми́ру благослове́ние израсти́вши, Христа́:/ тем Тя, ра́дующеся, и усты́, и язы́ком, Богоро́дицу вои́стинну испове́дающе, велича́ем.

Песнь 6

Ирмо́с: Из утро́бы Ио́ну младе́нца изблева́ морски́й зверь,/ якова́ прия́т;/ в Де́ву же все́льшееся Сло́во/ и плоть прие́мшее про́йде, сохра́ншее нетле́нну./ Его́же, бо не пострада́ истле́ния,/ Ро́ждшую сохрани́ неврежде́нну.

Колесни́ца Бо́жия яви́лся еси́, Тимофе́е,/ нося́щи Того́ Боже́ственное И́мя,/ пред лице́м безбо́жных мучи́телей, Богоприя́тне, не ужаса́яся сих свере́пства:/ ты бо в непобеди́мую Спа́са кре́пость оде́ялся еси́.

Вене́ц благоле́пен прия́л еси́, пребога́те Тимофе́е, Богому́дре апо́столе,/ и диади́мою Ца́рствия досто́йно обложи́лся еси́,/ и предста́л еси́ престо́лу Влады́ки твоего́,/ с Па́влом ра́дуяся в се́лех Небе́сных, блаже́нне.

Ми́ром у́мнаго, Тимофе́е всече́стне, пло́тию нас ра́ди истоще́ннаго Христа́ обонява́емь,/ благово́ние Сего́ прия́л еси́ и пре́дал еси́ ве́рою тебе́ притека́ющим,/ таи́нниче неизрече́нных свя́те, Того́ мы́сленныя любве́.

Му́ченика

Заре́ю Кре́стного я́ве просвеща́емь, пре́лести мрак разреши́л еси́ и победи́л еси́,/ спле́тся с мучи́телем, всесла́вне,/ и, ра́дуяся, прия́л еси́ твоя́ победи́тельная,/ му́чениче Христо́в Анаста́сие,/ лику́я с му́ченическими во́инствы.

Богоро́дичен: Весь лик от Бо́га науче́н проро́ческий/ Твое́ прорече́ та́инство несказа́ннаго и Боже́ственнаго зача́тия,/ е́же из Тебе́ Боже́ственнаго Сло́ва, Ма́ти Де́во:/ Ты бо и́стиннейший и дре́вний сове́т яви́ла еси́.

Конда́к, глас 1.

Подо́бен: Лик А́нгельский:

Боже́ственнаго ученика́ и спутеше́ственника Па́влова Тимофе́я,/ ве́рнии, воспои́м вси,/ с сим почита́юще му́драго Анаста́сия,/ возсия́вшаго от Перси́ды, я́ко звезду́,/ и отгоня́щаго душе́вныя на́ша стра́сти/ и неду́ги теле́сныя.

И́кос:

Со́лнца мно́жае возсия́ ле́тнее святы́х торжество́,/ и ве́рныя просвети́, и де́монскую тьмообра́зную си́лу отгна́ всю,/ и неду́ги очи́сти, и проше́ния прося́щих испо́лни./ Те́мже притека́ю аз, окая́нный,/ и молю́ся от боле́зни стра́стнаго моего́ се́рдца,/ да прииму́, я́же хощу́, и обря́щу, я́же тре́бую:/ премене́ние печа́ли, и житие́ безпеча́льно, и прегреше́ний оставле́ние,/ и Боже́ственное врачева́ние душе́вное и теле́сное.

Песнь 7

Ирмо́с: Тебе́, у́мную, Богоро́дице, пещь,/ разсмотря́ем, ве́рнии,/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.

Слико́вник Небе́снаго чи́на ты по досто́инству быв, весели́шися ра́достно,/ зари́ светода́тельныя, блаже́нне, насыща́яся, священнотаи́нниче Тимофе́е,/ хва́льнаго возвеща́я Бо́га и препросла́вленнаго.

Священноде́йствуя Христо́во Ева́нгелие,/ от доброде́тельных высо́т Богопи́санная Посла́ния Па́вел Боже́ственнейший, ра́дуяся, посла́/ я́ко ученику́ тебе́, Тимофе́е,/ хва́льнаго возвеща́я Бо́га и препросла́вленнаго.

Немощно́е пло́ти укрепля́ше благомо́щием души́:/ я́ко безтеле́сен бо, на земли́ ты жи́тельствовав,/ му́ченик был еси́, во главу́ сокруша́емь,/ священноде́телю та́инств Бо́жиих, Богоблаже́нне.

Му́ченика

Страда́лец ве́рныя поуща́ет,/ я́ве о́браз показа́в му́жество свое́ Боже́ственней ны́не подража́ти стра́сти во́льней,/ ю́же за ны претерпе́ хва́льный отце́в Бог и препросла́влен.

Равномо́щная Тро́ица ве́руется благоче́стия рачи́телем:/ до́блии бо страда́льцы за Сию́ пострада́ша,/ кро́ви излива́юще, му́ченически борю́щеся,/ и ду́ши предаю́ще я́ве, и убива́еми.

Богоро́дичен: Ра́дуйся, Чи́стая,/ из Тебе́ про́йде Па́стырь, И́же во Ада́мову ко́жу оде́явся,/ вои́стинну превозноси́мый во всего́ мя, челове́ка, за благоутро́бие непости́жное,/ хва́льный отце́в Бог и препросла́влен.

Песнь 8

Ирмо́с: Чу́да преесте́ственнаго/ росода́тельная изобрази́ пещь о́браз:/ не бо, я́же прия́т, пали́т ю́ныя,/ я́ко ниже́ огнь Божества́ Де́вы,/ в Ню́же вни́де утро́бу./ Тем, воспева́юще, воспое́м:/ да благослови́т тварь вся Го́спода/ и превозно́сит во вся ве́ки.

Стоя́ния А́нгельскаго сподобля́емь,/ показа́лся еси́, Тимофе́е блаже́нне, Небе́сных чино́в,/ научи́вся бо преесте́ственно, све́тлости сих подража́л еси́, му́дре./ С ни́миже воспева́еши, веселя́ся:/ да благослови́т тварь вся Го́спода и превозно́сит во вся ве́ки.

Си́лою оде́явся с Небесе́, я́ко апо́стол, яви́лся еси́, Богому́дре,/ наше́дшею страннообра́зно ученико́м Сло́ва и самови́дцем, о Тимофе́е!/ С ни́миже воспева́еши, ра́дуяся:/ да благослови́т тварь вся Го́спода и превозно́сит во вся ве́ки.

Стал еси́ жела́ния я́ве, всеблаже́нне, кра́йнейшаго,/ я́ко дости́гл до́брых, Тимофе́е Богопропове́дниче,/ всегда́ осия́емь све́том Тро́йческим я́сно,/ и ны́не воспева́еши, веселя́ся:/ да благослови́т тварь вся Го́спода и превозно́сит во вся ве́ки.

Му́ченика

От земли́ ты к Небесе́м венцено́сец, му́чениче Анаста́сие, возлете́л еси́,/ ле́сти вся́кия де́монския избе́г,/ и попра́л еси́ и́дольская чти́лища./ Те́мже и зове́ши ны́не, ра́дуяся:/ да благослови́т тварь вся Го́спода и превозно́сит во вся ве́ки.

Омочи́л еси́ му́ченическими твои́ми кровьми́ твою́ оде́жду, пребога́те му́чениче,/ крест же, я́ко скиптр, нося́,/ со Христо́м ца́рствуеши во ве́ки, Анаста́сие,/ Ему́же ны́не воспева́еши, ра́дуяся:/ да благослови́т тварь вся Го́спода и превозно́сит во вся ве́ки.

Богоро́дичен: Арха́нгельскими песносло́вии сла́вимый, Бога́тное Сло́во нас ра́ди обнища́,/ Тя Ма́терь, добро́ту Иа́ковлю, Благослове́нная, избра́в./ Те́мже, воспева́юще, пое́м:/ да благослови́т тварь вся Го́спода и превозно́сит во вся ве́ки.

Песнь 9

Ирмо́с: О́браз чи́стаго Рождества́ Твоего́/ огнепали́мая купина́ показа́ неопа́льная,/ и ны́не на нас напа́стей свире́пеющую угаси́ти, мо́лимся, пещь,/да Тя, Богоро́дице,/ непреста́нно велича́ем.

Рече́ние Дави́дово испо́лнися,/ я́ко бо мо́лния, вселе́нней яви́лся еси́,/ пропове́данием озаря́я концы́, всеприснопа́мятне блаже́нне Тимофе́е,/ тем тя, Богоя́вленне, непреста́нно велича́ем.

Заре́ю светонача́льною, прему́дре,/ Богонача́льным Трисо́лнечным осия́нием насыща́яся и чи́сто наслажда́яся,/ пою́щия тя, блаже́нне, спаса́й от мра́ка прегреше́ний,/ священнотаи́нниче всече́стне.

Ра́вна Тя Отцу́ и Ду́ху, Единоро́дне, пра́ве му́дрствующе, сла́вим,/ уче́ньми апо́столов Твои́х, Влады́ко, утвержда́еми,/ Па́вла, пропове́дника Твоего́ смотре́ния, и Тимофе́я Богому́драго.

Му́ченика

Струя́ми твои́х крове́й, сла́вне, и́дольскую лесть всю погаси́л еси́,/ исполне́ние же Це́ркве уясни́л еси́,/ о не́йже моля́ся, всеизря́днейше, не преста́й Влады́це,/ да тя вси блажи́м.

О, па́че сло́ва сла́вы твоея́/ и неизрече́ннаго Боже́ственнаго вои́стинну осия́ния!/ Его́же причасти́лся еси́ я́ко победи́тель, Анаста́сие, Влады́це Христу́ предстоя́,/ Его́же и ны́не моли́ о нас, воспева́ющих тя.

Богоро́дичен: О, стра́шнаго Твоего́ чудесе́!/ Ты бо, Де́во Богоро́дице,/ та́инство, пре́жде родо́в и пре́жде веко́в сокрове́нное в Бо́зе, вся созда́вшем,/ ро́ждши Бо́га Сло́ва несказа́нно, яви́ла еси́.

Свети́лен.

Подо́бен: Све́те неизме́нный:

Два свети́ла в ми́ре сия́ют светоно́сно,/ Тимофе́й же вели́кий во Христо́вых апо́столех/ и Анаста́сий му́ченик во единообра́зных,/ и́хже восхва́лим вку́пе.

Богоро́дичен:

Вси ве́рнии, Тя Хода́таицу ко из Тебе́ ны́не Ро́ждшемуся предлага́ем, Пресвята́я,/ мы же лу́чшаго ра́ди сраспина́емся Сему́./ Те́мже не преста́й о нас моля́щи.

На стихо́вне Окто́иха.

Сла́ва, глас 5:

Преподо́бне о́тче,/ победи́тель ми́дон и халде́ев быв мы́сленных,/ всю Вавило́на пре́лесть низложи́в си́лою Креста́,/ ни гла́дкостию сласте́й умягчи́лся еси́,/ ни огня́ искуше́ний убоя́лся еси́./ Сего́ ра́ди Христо́с Бог наш/ почестьми́ победи́тельными тя венча́./ Те́мже, со А́нгелы предстоя́, ко Го́споду моли́ся,/ прося́ ми́ра и душа́м на́шим ве́лия ми́лости.

И ны́не, Богоро́дичен и́ли Крестобогоро́дичен.

Подо́бен: Ра́дуйся:

Егда́ Грозд, ненасажде́н сущ,/ я́ко лоза́, отрасти́ла еси́,/ узре́вши на Дре́ве пове́шена,/ прободе́на же копие́м в Боже́ственная ре́бра, -/ что сие́, – глаго́лала еси́, – Сы́не и Бо́же Мой -/ Ка́ко, И́же неду́ги вся и стра́сти исцеля́яй,/ стра́сти терпи́ши, Безстра́стен сый по естеству́ Боже́ственному?/ Что Тебе́ безблагода́тнии лю́дие,/ Благоде́телю, сия́ возда́ша, вме́сто благодея́ний? -/вопия́ла еси́, Пречи́стая./ Но Того́ страстьми́ страсте́й мя свободи́ти моли́ непреста́нно,/ я́ко да сла́влю Тя.

На литурги́и

Блаже́нны Окто́иха, на 4, и апо́стола песнь 3-я, на 4. Проки́мен, глас 8: Во всю зе́млю изы́де веща́ние их,/ и в концы́ вселе́нныя глаго́лы их. Стих: Небеса́ пове́дают сла́ву Бо́жию: Апо́стол к Тимофе́ю, зача́ло 290, от полу́: Ча́до Тимофе́е, благодарю́ Бо́га: Аллилу́йя. Испове́дят Небеса́ чудеса́ Твоя́, Го́споди,/ и́бо и́стину Твою́ в Це́ркви святы́х. Ева́нгелие от Луки́, зача́ло 50. Прича́стен: Во всю зе́млю изы́де веща́ние их:

На ма́лой вече́рни

На Го́споди, воззва́х: стихи́ры на 4, самогла́сны, глас 4:

Да весели́тся све́тло и игра́ет/ честна́я оби́тель Жабы́нская,/ христоимени́тый град Беле́в и страна́,/ свяще́нную па́мять преподо́бнаго отца́ на́шего Мака́рия пра́зднующе,/ при́сно моля́щагося о нас ко Го́споду.

Соше́дшеся днесь, христоимени́тии лю́дие,/ пе́сньми похва́льными венча́им/ вели́каго во смире́нии свое́м Мака́рия,/ блаже́нству соиме́ннаго,/ осеня́ющаго нас покро́вом моли́тв свои́х.

Христо́ва тя раба́, преподо́бне, ве́дуще/ и подви́жника благоче́стия вели́ка,/ к тебе́ возво́дим душе́вная и теле́сная очеса́ на́ша,/ твои́ми предста́тельствы ко Го́споду/ ча́юще спасе́ние улучи́ти.

Земны́й А́нгел и Небе́сный челове́к/ яви́лся еси́, всеблаже́нне,/ и, от Христа́ прии́м чуде́с дарова́ния,/ душе́вныя и теле́сныя на́ша неду́ги/ си́лою твое́ю до конца́ потреби́.

Сла́ва, глас 6:

Весели́тся и ра́дуется Це́рковь Русская,/ ликовству́ет же оби́тель Жабы́нская,/ Влады́це своему́ Христу́,/ я́ко дар благоприя́тен,/ Мака́рия преподо́бнаго принося́,/ его́же моли́твами/ сохрани́ и спаси́ ны, Го́споди.

И ны́не, Богоро́дичен, глас то́йже:

Тебе́ мо́лимся, я́ко Бо́жий Ма́тери,/ Благослове́нная,/ моли́ о спасе́нии душ на́ших.

На стихо́вне стихи́ры, глас 2:

Оста́вив мир, преподо́бне,/ и крест Христо́в на рамена́ своя́ взем,/ Тому́ после́довал еси́/ и свети́льник ми́ру христиа́нскому яви́лся еси́,/ ему́же моли́ спасти́ся.

Стих: Честна́ пред Го́сподем/ смерть преподо́бных Его́.

Пучи́ну жити́я/ по́стнически преплы́в,/ в ти́хое приста́нище Небе́снаго поко́я/ вшел еси́, блаже́нне,/ его́же дости́гнути и нам помоли́ся.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Егда́ преста́вился еси́, о́тче,/ прия́ша тя ли́цы А́нгельстии, срето́ша пра́ведных ли́цы,/ с ни́ми же ликовству́я во сла́ве Небе́сней/ и Боговиде́ния насыща́емь,/ помяни́ ны ко Го́споду Преблаго́му.

Сла́ва, и ны́не, Богоро́дичен, глас то́йже:

Предста́тельница и покро́в/ Ты еси́, Пречи́стая,/ изба́ви нас от бед лю́тых и обстоя́ний/ и ду́ши на́ша спаси́/ Боже́ственными Твои́ми моли́твами.

Тропа́рь пи́сан на вели́цей вече́рни.

На вели́цей вече́рни

Блаже́н муж: 1-й антифо́н. На Го́споди, воззва́х: стихи́ры на 8, глас 4.

Подо́бен: Зва́нный свы́ше:

Преподо́бне о́тче,/ мяте́ж мирски́й оста́вив/ и крест твой взем,/ после́довал еси́ нас ра́ди распе́ншемуся Христу́,/ посто́м и жа́ждею плотски́я стра́сти умерщвля́я,/ грехо́вное же те́рние всено́щными по́двиги искорени́л еси́,/ сле́зными исто́чники напои́л еси́ ни́ву души́ твоея́,/ возде́лав плод стори́чный,/ и ны́не предстои́ши всех Царю́,/ Его́же моли́ спасти́ и просвети́ти ду́ши на́ша.

Преподо́бне о́тче Мака́рие,/ ду́шу и се́рдце от страсте́й очи́стив,/ дом Ду́ха Пресвята́го показа́лся еси́,/ Его́же де́йствием све́тло укра́шен быв,/ зрел еси́ бу́дущая, я́ко настоя́щая,/ и далеча́йшая, я́ко близ су́щая,/ весть бо Госпо́дь прославля́ти Своя́ уго́дники,/ Ему́же ны́не во сла́ве Небе́сней в ли́це святы́х предстоя́,/ моли́ спасти́ и просвети́ти ду́ши на́ша.

Преподо́бне о́тче Мака́рие,/ кто испове́сть труды́ твоя́,/ бде́ния же и сухояде́ния,/ и е́же на земли́ лега́ния,/ и пусты́нная озлобле́ния?/ Безстра́стия сосу́д был еси́,/ благода́ти испо́лнен Свята́го Ду́ха,/ А́нгелом собесе́дниче и преподо́бным сожи́телю,/ Вседержи́телю Бо́гу возложи́в себе́,/ Его́же моли́ спасти́ и просвети́ти ду́ши на́ша.

Преподо́бне о́тче Мака́рие,/ стра́нника и прише́льца себе́ на земли́ помышля́я,/ душе́вныя твоя́ оче́са ко Иерусали́му Небе́сному при́сно возводи́л еси́,/ слеза́ми посте́лю твою́ омыва́я./ Ны́не же Небе́снаго ра́дования в собо́ре святы́х наслажда́яся/ и Бо́гови вы́ну предстоя́,/ моли́ спасти́ и просвети́ти ду́ши на́ша.

И́ны стихи́ры, глас 2.

Подо́бен: Егда́ от Дре́ва:

Егда́ Боже́ственное раче́ние на́йде на тя, преподо́бне,/ мирски́й мяте́ж оста́вль,/ во оби́тель всели́лся еси́,/ в не́йже трудолю́бие подвиза́вся,/ украси́л еси́ ду́шу твою́ доброде́тельми/ и, наста́вник лю́дем христоимени́тым я́влься,/ ввел еси́ ты́я во огра́ду Небе́сную,/ иде́же, ра́дуяся с тобо́ю, взыва́ют ко Го́споду:/ сла́ва, Человеколю́бче, Твоему́ смотре́нию.

Егда́ искуше́ние ве́лие/ наведе́ враг на оби́тель твою́, преподо́бне,/ ю́же ва́рвары разори́ша,/ ты, ре́вности Боже́ственныя испо́лнився/ и упова́ние свое́ на по́мощь Ма́тере Бо́жия возложи́в,/ трудо́м сугу́бым вдал еси́ себе́/ и, из пе́пела ту́ю возсозда́в и бра́тию собра́в,/ с не́ю ку́пно в ра́довании ду́ха воспе́л еси́ Бо́гу:/ сла́ва, Человеколю́бче, Твоему́ благосе́рдию.

Егда́ к после́дним ле́том живота́ твоего́, блаже́нне,/ прибли́зился еси́,/ вся попече́ния земна́я отве́рг/ и в пучи́ну безмо́лвия вшед,/ наедине́ еди́ному Бо́гови рабо́тал еси́,/ душе́вному твоему́ спасе́нию то́кмо внима́я/ и о ми́ре всего́ ми́ра моля́йся,/ наипа́че же о бла́ге возгражде́нныя тобо́ю оби́тели,/ немо́лчно Христу́ вопия́:/ сла́ва, Человеколю́бче, Твоему́ смотре́нию.

Егда́ преставле́ния твоего́ к Бо́гу вре́мя приспе́,/ тогда́ непоро́чная твоя́ душа́/ непреткнове́нно от возду́шных мыта́рств,/ я́ко небопа́рный оре́л,/ крило́ма доброде́телей на Небеса́ востече́/ и ра́дости избра́нных сподо́бися,/ и та́мо с Серафи́мы Го́сподеви пое́ши:/ сла́ва, Человеколю́бче, Твоему́ смотре́нию.

Сла́ва, глас 8:

Прииди́те, по́стников сосло́вия/ и ве́рных мно́жества,/ све́тлую и свяще́ннейшую па́мять отца́ на́шего Мака́рия восхва́лим,/ зову́ще ему́ си́це:/ ра́дуйся, свети́льниче благода́ти пресве́тлый;/ ра́дуйся, звездо́ ми́ру светлосия́нная./ Ра́дуйся, пусты́ни благоукраси́телю и оби́тели возгради́телю;/ ра́дуйся, исто́чниче чуде́с преизоби́льнейший/ и неусыпа́ющий моли́твенниче/ о чту́щих па́мять твою́, преблаже́нне.

И ны́не, Богоро́дичен: Царь Небе́сный:

Вход. Проки́мен дне, и чте́ния три преподо́бническая.

На ли́тии стихи́ры самогла́сны, глас 2:

Ки́ими похва́льными венцы́/ увязе́м Мака́рия преподо́бнаго,/ всея́ страны́ Русския украше́ние?/ Той бо моли́твами свои́ми оби́тель Богоро́дичну возгради́,/ той и по преставле́нии свое́м ве́рным явля́ется/ и моли́твы возно́сит о прибега́ющих под кров его́ ко Христу́,/ иму́щему ве́лию и бога́тую ми́лость.

Всем предста́тельствуеши, преподо́бне,/ притека́ющим с ве́рою под кров твой,/ явля́еши бо ся в ско́рбех уте́шитель,/ в боле́знех благосе́рдый врач,/ на пути́ спасе́ния наста́вник прему́дрый,/ о всех пред Бо́гом моли́твенник тепле́йший./ Сего́ ра́ди, чту́ще святу́ю па́мять твою́,/ к тебе́, я́ко отцу́ милосе́рдому, взыва́ем:/ моли́ Бо́га о нас, свя́те Мака́рие.

Сла́ва, глас 8:

Па́стырю до́брый,/ Пастыренача́льника Сы́на Бо́жия усе́рдный подража́телю,/ услы́ши нас, гре́шных,/ призыва́ющих в по́мощь твое́ немо́лчное хода́тайство,/ и моли́ о нас Всеми́лостиваго Бо́га,/ да избе́гнем вся́ких зол и напа́стей/ и улучи́м ве́чное блаже́нство,/ во е́же ку́пно с тобо́ю, преподо́бне Мака́рие,/ сла́вити и воспева́ти Святу́ю Тро́ицу.

И ны́не, глас то́йже:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

На стихо́вне стихи́ры, глас 5.

Подо́бен: Ра́дуйся:

Ра́дуйся, преподо́бне Мака́рие,/ Це́ркве Русския преела́вное украше́ние,/ оби́тели твоея́ све́тлая похвало́,/ Правосла́вия сто́лпе непоколеби́мый,/ чудотво́рче пресла́вный;/ ра́дуйся, те́плый наш предста́телю пред Бо́гом./ Ему́же вы́ну предстоя́ со все́ми святы́ми,/ моли́ся о спасе́нии душ на́ших.

Стих: Честна́ пред Господем/ смерть преподо́бных Его́.

Ра́дуйся, свяще́нная главо́,/ и́ноков наста́вниче Богому́дрый,/ от ю́ности Христа́ возлюби́вый/ и и́го Его́ благо́е с ра́достию понесы́й;/ ра́дуйся, не сло́вом то́кмо,/ но па́че де́лом и о́бразом жития́ твоего́ всех к Бо́гу приводя́й./ Ему́же и ньше предстоя́,/ моли́ся о ча́дех твои́х,/ ве́рою и любо́вию чту́щих святу́ю па́мять твою́,/ о́тче преподо́бне Мака́рие.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ра́дуйся, А́нгелом собесе́дниче,/ преподо́бне Мака́рие,/ благоче́стно бо на земли́ пожи́в,/ мно́ги, приходя́щия к тебе́, стра́ху Госпо́дню научи́л еси́,/ благода́тию Пресвята́го Ду́ха озаря́емь,/ зрел еси́ бу́дущая, я́ко настоя́щая,/ и умиле́ния и ра́дости мно́ги, скорбя́щия душа́ми, исполня́л еси́./ Тем же мо́лимся ти:/ моли́ся Го́сподеви о чту́щих тя.

Сла́ва, глас 8:

Что́ тя нарече́м, преподо́бне Мака́рие?/ па́стыря до́браго,/ я́ко ду́шу свою́ за па́ству свою́ положи́ти гото́в был еси́;/ оби́тели возгради́теля,/ по́стников похвалу́ и мона́хов украше́ние,/ я́ко труды́, бде́ния и поще́ния и́ноческая подъя́л еси́;/ земна́го А́нгела и Небе́снаго челове́ка,/ присносу́щнаго Све́та ны́не насыща́ющася./ Тем же моли́ся Христу́ Бо́гу/ умири́ти мир и спасти́ ду́ши на́ша.

И ны́не, Богоро́дичен: Безневе́стная Де́во:

Тропа́рь, глас 4:

От мирска́го жития́ изше́д/ в ти́хое приста́нище жи́зни и́ноческия,/ преподо́бне Мака́рие, вшел еси́,/ в не́йже до́бре подвиза́вся,/ ду́шу твою́ доброде́тельми превысо́кими обогати́л еси́/ и яви́лся еси́ добр па́стырь и учи́тель и́ноческому собо́ру,/ ему́же и оби́тель возгради́л еси́,/ та́же в безмо́лвие вшед и Богови́дения сподо́бився,/ ко Го́споду преста́вился еси́,/ И́же да́ром чуде́с тя обогати́./ Его́же ны́не моли́,/ да спасе́т ве́рою и любо́вию/ почита́ющих святу́ю па́мять твою́.

На благослове́нии хле́бов тропа́рь преподо́бнаго, два́жды, и Богоро́дице Де́во: еди́ножды.

На у́трени

На Бог Госпо́дь: тропа́рь преподо́бнаго, два́жды. Сла́ва, и ны́не, Богоро́дичен: Е́же от ве́ка утае́нное:

По 1-м стихосло́вии седа́лен, глас 4:

Вре́менных и до́льних возгнуша́вся,/ высо́кая, при́сно пребыва́ющая, возлюби́л еси́,/ Боже́ственным жела́нием распаля́я Боголюби́вую твою́ ду́шу,/ и, сотвори́в Всевы́шняго во́лю,/ восприя́л еси́ бла́га Небе́сная.

Сла́ва, и ны́не, Богоро́дичен:

Твою́ по́мощь пода́ждь нам, рабо́м Твои́м, Де́во Влады́чице,/ вразуми́ и руково́дствуй нас на пути́ спасе́ния,/ избавля́я ны от бед и скорбе́й,/ я́ко ро́ждшая всех Избавле́ние.

По 2-м стихосло́вии седа́лен, глас 8:

Непостижи́мый Свет от Све́та – Христо́с Госпо́дь, почи́в в тебе́, преподо́бне,/ пресве́тлу свещу́ показа́ тя ми́ру,/ я́ко блиста́еши све́тлым житие́м и сия́еши чудесы́./ Тем же ра́достно пра́зднуем па́мять твою́, преблаже́нне Мака́рие.

Сла́ва, и ны́не, Богоро́дичен:

От любве́ душе́вныя вопию́ Ти, Влады́чице:/ пресве́тлаго Со́лнца заре́, спасе́ния дверь,/ Небе́сная врата́, мы́сленная ле́ствице всех христиа́н,/ мольбы́ приими́ Тя блажа́щих,/ наде́жду душ на́ших, и спасе́ние нам дару́й.

По полиеле́и седа́лен, глас 4:

Псало́мски процве́л еси́, я́ко фи́никс, в посте́ и по́двизех,/ и бесо́вския полки́ прогоня́еши,/ и да́руеши цельбы́ незави́стно всем./ Тем же жите́йскими помышле́ньми ум наш мяту́щийся уцелому́дри,/ да чи́сте воспои́м Христа́.

Сла́ва, и ны́не, Богоро́дичен:

Пречи́стая Де́во,/ не пре́зри ве́рою к Тебе́, Милосе́рдней, прибега́ющих/ и те́плаго Твоего́ заступле́ния прося́щих,/ моля́щи Сы́на Твоего́, Христа́ Бо́га на́шего,/ спасти́ся рабо́м Твои́м.

Таже степе́нна, 1-й антифо́н 4-го гла́са. Проки́мен, глас 4: Честна́ пред Господем/ смерть преподо́бных Его́. Стих: Что возда́м Господеви о всех, я́же воздаде́ ми? Ева́нгелие от Матфе́я, зача́ло 43.

По 50-м псалме́ стихи́ра, глас 6:

Уго́дниче Бо́жий,/ соприча́стниче Христо́в,/ преподо́бне о́тче Мака́рие,/ по и́мени твоему́ та́ко и житие́ твое́,/ блаже́нства тезоиме,нне,/ жизнь твоя́ славна́ и успе́ние со святы́ми,/ моли́ Христа́ Бо́га о душа́х на́ших.

Кано́н Богоро́дице пара́клисис со ирмосо́м на 6 и свято́му на 8. Глас 2.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щщееся же Сло́во всезло́бный грех потреби́ло есть:/ Препросла́вленный Госпо́дь сла́вно бо просла́вися.

Госпо́дь, Царь Сла́вы, прославля́ющия Его́ просла́вити обетова́,/ на тебе́ же, преподо́бне, обоя́ устрои́шася,/ я́коже бо ты просла́вил еси́ Го́спода в житии́ твое́м,/ си́це и тя просла́ви тобо́ю просла́вленный Госпо́дь.

Вели́кий а́нгельский о́браз прия́л еси́,/ кра́йняго смире́ния не оста́вль в житии́ твое́м,/ с ли́ки же а́нгельскими на Небеси́ ны́не лику́еши./ За ны у́бо помоли́ся, о́тче,/ а́нгельскими хвала́ми Препросла́вленному Го́споду.

Труда́ми насади́л еси́,/ слеза́ми моли́твенными ороси́в, я́ко сад Бо́жий, оби́тель твою́, преподо́бне./ Приими́ у́бо и на́ша сле́зы умиле́ния/ и ходата́йственно вознеси́ я к Престо́лу Препросла́вленнаго Го́спода.

Богоро́дичен: К Богоро́дице о нас помоли́ся, о́тче преподо́бне,/ да умоли́т Сы́на Своего́ поми́ловати нас,/ сла́вно да просла́вится в ми́лости Свое́й Препросла́вленный Госпо́дь.

Песнь 3

Ирмо́с: Процвела́ есть пусты́ня, я́ко крин, Го́споди,/язы́ческая неплодя́щая, Це́рковь/прише́ствием Твои́м,/ в не́йже утверди́ся мое́ се́рдце.

Процвела́ есть Жабы́нская пусты́ня/ за моли́твы избра́нника Твоего́, Го́споди, преподо́бнаго пустынножи́теля Мака́рия,/ в не́йже да обря́щем утеше́ние,/ здра́вие же и спасе́ние заступле́нием преподо́бнаго.

Чуде́с дарова́нием благоволи́ Госпо́дь тя просла́вити, смире́ннаго/ и мно́го лет я́ко бы забве́ннаго,/ да немощны́м нам пода́ст благовре́менную по́мощь/ и ве́ре на́шей оскудева́ющей укрепле́ние.

Богоно́се о́тче Мака́рие,/ Бо́гу непреста́нный о нас был еси́ моли́твенник/ и Пресвята́го Уте́шителя Ду́ха в се́рдце твое́м носи́л еси́./ Но у́бо воздви́гни от сна грехо́внаго/ и от искуше́ния диа́вольскаго огради́ ны, моля́щияся тебе́.

Богоро́дичен: Богороди́тельнице Блага́я, моли́ о нас/ и на́ша недосто́йныя моли́твы принеси́ ко Престо́лу Блага́го Сы́на Твоего́,/ и Твои́м да бу́дет сомоли́твенником о нас Мака́рий преподо́бный.

Седа́лен, глас 4:

На тве́рдем ве́ры ка́мени утвержде́н сый,/ в безмо́лвии подвиза́яся, тече́ние по́стничества до́бре сконча́л еси́/ и мздовоздая́ние от Христа́ прия́л еси́,/ Ему́же ны́не моли́ся, всеблаже́нне,/ в ве́ре и доброде́телех нас утверди́ти.

Сла́ва, и ны́не, Богоро́дичен:

Ты покро́в мой от напа́стей вра́жиих, Влады́чице,/ Ты свет се́рдцу моему́,/ печа́льми жите́йскими омраче́нному, при́сно буди́, Богоро́дице, и спаси́ мя.

Песнь 4

Ирмо́с: Прише́л еси́ от Де́вы, не хода́таи, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

От Де́вы Пречи́стыя на зе́млю прише́л еси́, во е́же спасти́ нас, Го́споди,/ и от спасе́нных вели́кое мно́жество просла́вил еси́,/ да не то́кмо Тя у Престо́ла Твоего́ славосло́вят,/ но и о нас хода́тайствуют./ Ве́руем убо, я́ко в со́нме том пресве́тлом/ предста́тельствует о нас преподо́бный оте́ц наш Мака́рий.

От оте́чества на́шего взят был еси́ в Небе́сное Ца́рствие, о́тче преподо́бне./ Не забу́ди у́бо чад твои́х, избра́нниче Бо́жий Мака́рие,/ еще́ прише́льствующих на земли́.

Буди́ с на́ми, о́тче наш Мака́рие,/ да с тобо́ю дерзнове́нно Бо́га Отца́ просла́вим,/ Сы́на превознесе́м и Свято́му Ду́ху покло́нимся.

Богоро́дичен: С Богоро́дицею, вслед Ея́, мы́слию во свята́я вни́дем/ и к Ней во смире́нии притеце́м, в покая́нии зову́ще:/ Спаси́тельнице, спаси́ нас.

Песнь 5

Ирмо́с: Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику, Отцу́ Твоему́,/ от но́щи неве́дения/приведе́ние и́мамы.

Но́щи неве́дения преше́дшей прибли́жися день спасе́ния,/ и Свет ми́ру возсия́ – Христо́с Госпо́дь./ К Сему́ у́бо ны́не, моли́твами преподо́бнаго Мака́рия,/ от грехо́вныя но́щи приведе́ние и́мамы.

Но́щию в петлоглаше́ние,/ и́мже Госпо́дь прише́ствие Свое́ второ́е назна́менова,/ к тебе́ Госпо́дь прии́де ду́шу твою́ прия́ти, преподо́бне,/ моли́твами же твои́ми вложи́ в ду́ши на́ша па́мять сме́ртную.

Нощь многоле́тняя пре́йде,/ в ню́же бе под спу́дом па́мять твоя́, о́тче наш,/ но сия́ ны́не яви́ся, светя́щи всем,/ я́же в твое́й хра́мине суть,/ в ню́же мы, ве́рою и любо́вию влеко́ми, приведе́ние и́мамы.

Богоро́дичен: Не бо́йся, ма́лое ста́до,/ я́ко благоизво́ли Оте́ц ваш да́ти вам Ца́рство, глаго́лет Госпо́дь./ И не изнемо́же глаго́л сей у Го́спода,/ уже́ бо дости́же заве́щаннаго Ца́рства па́стырь наш,/ да привлече́т с собо́ю все ста́до свое́ моли́твами Богоро́дицы.

Песнь 6

Ирмо́с: В бе́здне грехо́вней валя́лся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Бе́здна милосе́рдия Бо́жия бе́здну грехо́в на́ших да превозмо́жет,/ ничесо́же от нас взыску́ющи, ра́зве слез покая́ния умиле́ннаго,/ о сем помоли́ся за ны, преподо́бне о́тче наш.

От бе́здны грехо́вной помози́ нам, Бо́же, возни́кнути,/ моли́твами преподо́бнаго Мака́рия сподо́би ны пре́жде конца́ пока́ятися/ и Твои́х Боже́ственных Тайн прича́стником бы́ти.

Сла́вим Тя, Свята́я Тро́ице,/ и диви́мся бе́здне милосе́рдия Твоего́ к нам, мно́го согреша́ющим./ Но еще́ долготерпи́ о нас, Бо́же наш,/ до́ндеже пока́емся со слеза́ми,/ при́сно помина́юще после́дняя своя́.

Богоро́дичен: Чи́стую чи́сто почти́м/ и устыди́мся пред лице́м Ея́ скве́рнаго жития́ на́шего, о́тче преподо́бне!/ Ты у́бо наста́ви ны досто́йно чти́ти Ма́терь Бо́жию Пречи́стую,

Конда́к, глас 8:

Житие́ чи́стое, терпе́ние, кро́тость и любо́вь нелицеме́рну,/ воздержа́ние соверше́нное,/ умиле́ние Боже́ственное,/ ве́ру же и наде́жду и́стинну и милосе́рдие стяжа́в,/ равноа́нгельно, Мака́рие, на земли́ пожи́л еси́/ и на Небеси́ Бо́гови с ли́ки Безпло́тных предстои́ши./ С ни́ми же, свя́те, моли́ся/ мир Рустей Це́ркви дарова́ти/ и душа́м на́шим ве́лию ми́лость.

И́кос:

А́нгельски на земли́ пожи́вша,/ преподо́бнаго отца́ на́шего Мака́рия, прииди́те, лю́дие, соше́дшеся, восхва́лим,/ си́це к нему́ реку́ще:/ ра́дуйся, на земли́ пожи́вый небе́сно; ра́дуйся, во пло́ти, а́ки безпло́тен, подвиза́выйся./ Ра́дуйся, стра́сти до конца́ умертви́вый и безстра́стия дости́гнувый;/ ра́дуйся, ду́шу твою́ дарова́ньми Ду́ха Свята́го испо́лнивый./ Ра́дуйся, оби́тель возгради́вый и и́ноков собра́вый;/ ра́дуйся, па́стырским жезло́м твои́м во огра́ду Небе́сную ты́я упра́вивый./ Ра́дуйся, гра́да Беле́ва похвало́;/ ра́дуйся, пусты́ни твоея́ непоколеби́мое утвержде́ние./ Ра́дуйся, при́сно моля́щийся Господеви мир Русстей Це́ркви дарова́ти/ и душа́м на́шим ве́лию ми́лость.

Песнь 7

Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ есть./ Христо́с же простре́ Богочести́вым о́троком ро́су духо́вную,/ Сый благослове́н и препросла́влен.

Сый благослове́нный Христо́с Бог наш/ да изба́вит нас огня́ гее́нскаго,/ со слеза́ми покая́нными о сем помо́лимся./ Кто же ны́не даст очесе́м на́шим исто́чник слез,/ а́ще не ты, о́тче, блаже́нство пла́ча позна́вый в житии́ твое́м.

Высо́кий пла́мень неве́рия и нече́стия возно́сит беззако́ннующий./ Но мы сохрани́ти ве́ру потщи́мся,/ убежи́м нече́стия, убои́мся пла́мене гее́нскаго,/ ко Христу́ притеце́м и у Него́ с Мака́рием блаже́нство улучи́м.

Еди́н Сый Святы́я Тро́ицы, Христе́ Бо́же наш!/ Сотвори́ в нас оби́тель, по обетова́нию Твоему́,/ с Преблагослове́нным и Препросла́вленным Твои́м Отце́м и со Святы́м Ду́хом,/ жи́зни и утеше́ния Пода́телем.

Богоро́дичен: Ра́дуйся, Влады́чице, и ра́дость нам пода́ждь, от бед спаси́,/ в ми́ре Це́рковь Сы́на Твоего́ сохрани́/ и умоли́, да благослови́т я́ко достоя́ние Свое́.

Песнь 8

Ирмо́с: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся, дела́ Госпо́дня, Го́спода.

В телеси́ А́нгела, почти́м Мака́рия, блаже́нству тезоимени́таго,/ и, подража́я его́ житию́ во Христе́,/ поне́ еди́наго от блаже́нств Ева́нгельских дости́гнути потщи́мся.

Огнь искуше́ний грехо́вных пали́т мя,/ но стра́ждущую мою́ ду́шу ороси́ росо́ю благода́ти Христо́вой/ и твои́ми моли́твами, блаже́нне.

Да пребу́дет благослове́ние твое́ Богоуго́дное во И́мя Пресвяты́я Тро́ицы/ на оби́тели твое́й, и на земли́ оте́чествия твоего́,/ и на всех, тебе́ усе́рдно призыва́ющих, о́тче преподо́бне.

Богоро́дичен: Доны́не и во ве́ки блажи́м Тя, вси ро́ди, Свята́я Богороди́тельнице./ Спаси́ нас, я́ко Спа́са родила́ еси́ душ на́ших.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Со а́нгельскими чи́нми, хва́лящими Го́спода,/ и с Богоро́дицею Того́ хвали́ти сподо́бился еси́,/ сподо́би же и нас, преподо́бне о́тче наш,/ да с тобо́ю Го́спода сла́вим и Богоро́дицу велича́ем.

А́нгели, вхожде́ние Пречи́стыя во свята́я святы́х зря́ще, удиви́шася./ Мы же диви́мся,/ ка́ко во святы́й храм, труда́ми твои́ми созда́нный на ме́сте, ва́рвары разоре́нном,/ чудотво́рною ико́ною Свое́ю вни́де Пречи́стая,/ Ю́же, я́ко Всепе́тую Богоро́дицу, велича́ем.

Бо́га Отца́ просла́вим, тебе́, Богоно́сному отцу́ на́шему, после́дующе,/ Боже́ственнаго Сы́на возвели́чим,/ да с Ним и всыновле́ние О́тчее прии́мем,/ Свято́му Ду́ху поклони́мся, да научи́т ны моли́тися, я́коже подоба́ет,/ да и Сам, вопия́ в душа́х на́ших,/ укрепи́т нас к Бо́гу сыно́вне вопи́ти: А́вво, О́тче!

Богоро́дичен: Ра́дуйся, Ра́досте на́ша!/ Пребу́ди с на́ми, я́ко да и Госпо́дь, И́же с Тобо́ю, в нас пребу́дет./ Собери́ во двор церко́вный о́вцы расточе́нныя,/ отпа́дшия возврати́ к соедине́нию,/ просвети́ омраче́нных неве́рием,/ да вси вку́пе Тя, Всепе́тую Богоро́дицу, велича́ем.

Свети́лен:

Светоза́рна свети́льника ве́ры, во стране́ на́шей возсия́вша/ и со́лнца светле́йше чудесы́ свои́ми нас просве́щша,/ Мака́рия преподо́бнаго, блаже́нству тезоиме́ннаго, пе́сньми восхва́лим.

Богоро́дичен:

Богоро́дице Де́во, ра́дуйся,/ от А́нгела ра́дость прии́мшая,/ ра́дуйся, Влады́чице, и спаси́ на Тя упова́ющия.

На хвали́тех стихи́ры, глас 8:

Те́сным путе́м в житии́ твое́м,/ преподо́бне Мака́рие, ше́ствовал еси́,/ по́двигом до́брым в пусты́ни подвиза́лся/ и, тече́ние благо́е в преподо́бии соверша́я,/ тем и превели́кое воздая́ние обре́л еси́ у Бо́га,/ Ему́ же, свя́те, моли́ся/ дарова́ти душа́м на́шим ве́лию ми́лость.

Возсия́ нам Богоуго́дное житие́ твое́,/ пресла́вне Мака́рие,/ всем бо яви́лся еси́ пра́вило ве́ры и о́браз кро́тости,/ по́двигов и́ноческих и воздержа́ния зерца́ло,/ любве́ же и смире́ния бога́тство,/ и́хже ра́ди просла́влен еси́ от Го́спода,/ Его́же моли́ спасе́ние душа́м на́шим дарова́ти.

Зна́меньми и чудесы́ тебе́ Госпо́дь просла́ви,/ преподо́бне Мака́рие,/ прого́ниши бо ду́хи и врачу́еши стра́сти,/ ду́ши просвеща́я ве́рных,/ приходя́щих ко свято́му твоему́ гро́бу,/ А́нгелов собесе́дниче и преподо́бных сожи́телю.

Вся оста́вив земна́я,/ к Небе́сным ум твой впери́л еси́,/ в слеза́х и воздыха́ниих жизнь твою́ препроводи́в,/ и́хже ра́ди Небе́сных селе́ний дости́гл еси́,/ иде́же свет невече́рний сия́ет/ Христа́ Бо́га на́шего,/ Его́же непреста́нно моли́ спасти́ ду́ши на́ша.

Сла́ва, глас то́йже:

Оте́ц сиро́т и вдов защи́тник,/ бога́тство ни́щих, боля́щих утеше́ние и исцеле́ние/ и су́щих в бога́тстве наста́вник,/ ста́рости жезл, и наказа́ние ю́ности,/ и мона́шествующим доброде́телей пра́вило яви́лся еси́,/ преблаже́нне о́тче наш Мака́рие.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от всякия ну́жды и печа́ли.

Славосло́вие вели́кое и отпу́ст.

На литурги́и

Блаже́нны, от кано́на пе́сни 3-я и 6-я. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Ева́нгелие от Луки́, зача́ло 24, или́ от Матфе́я, зача́ло 10. Прича́стен: В па́мять ве́чную:

Моли́тва

О свяще́нная главо́! Вели́кий чудотво́рче, преподо́бне о́тче наш Мака́рие, преблаже́нне и пресла́вне, Ду́ха Свята́го испо́лненне! По́стников похвало́, мона́шествующих сла́во, пусты́ни Жабы́нския возгради́телю и украси́телю, те́плый о нас, гре́шных, моли́твенниче! Ны́не со а́нгельскими во́инствы предстоя́й у Престо́ла всех Царя́ сла́вы, Го́спода, и наслажда́яйся све́та Единосу́щныя Тро́ицы, и с го́рними си́лами воспева́яй Трисвяту́ю песнь, я́ко дерзнове́ние име́яй, моли́ся Всеми́лостивому Влады́це спасти́ вся ве́рующия во и́мя Его́, испроси́ мир и тишину́ Святы́м Церква́м низпосла́ти, ве́ре правосла́вней укрепле́ние, проти́вныя язы́ки, бра́ни хотя́щия, ви́димыя и неви́димыя враги́ низложи́ти, гра́ды, ве́си и оби́тели на́ши утверди́ти, мир весь уми́рити. Моли́ Ми́лостиваго Бо́га, да твои́м благоприя́тным хода́тайством вся правосла́вныя христиа́ны изба́вит Он от гла́да, губи́тельства, тру́са, пото́па, огня́, меча́, от наше́ствия иноплеме́нник и междоусо́бныя бра́ни, ста́рыя да подкрепи́т, ю́ныя да наста́вит, нему́дрых умудри́т, боля́щия исцели́т, плене́нныя и ю́зники свободи́т, сиро́т засту́пит, младе́нцы воспита́ет и вся лю́ди сохрани́т от бед и напа́стей, и от нападе́ния вра́жия, и смертоно́сныя я́звы, внеза́пныя сме́рти и от вся́каго зла. Днесь же с ве́рою приходя́щих рабо́в твои́х, со стра́хом и любо́вию припа́дающих к честны́м моще́м твои́м и о́браз подо́бия твоего́ любе́зно целу́ющих, я́ко те́плый нам засту́пниче, сохрани́, в ско́рбных обстоя́ниих на́ших предста́ни, душе́вных и теле́сных страсте́й свободи́, в день Стра́шнаго суда́ шу́ияго стоя́ния изба́ви и с десны́ми овца́ми моли́твами твои́ми ста́ти сподо́би и блаже́нный о́ный глас Влады́ки, Христа́ Бо́га на́шего услы́шати: «Прииди́те, благослове́ннии Отца́ Моего́, насле́дуйте угото́ванное вам Ца́рствие от сложе́ния ми́ра». Ему́же подоба́ет всякая сла́ва, честь и поклоне́ние, со Безнача́льным Его́ Отце́м и со Пресвяты́м, и Благи́м, и Животворя́щим Его́ Ду́хом, ны́не и при́сно и во ве́ки веко́в. Ами́нь.

Тропа́рь, глас 4:

Плотско́е, я́ко безпло́тный А́нгел,вознена́видевши препита́ние,/ духо́вную во и́ноческом чи́ну возлюби́л еси́ пи́щу,/ и в не́м Богови́дцу на Сина́и Моисе́ю/ до́брым жития́ твоего́ по́двигом уподобля́яйся,/ мно́гими на горе́ Бо́жией Пече́рской возвы́сился еси́ доброде́телъми,/ иде́же в моле́нии к Вы́шнему непреста́нно пребыва́л еси́,/ ны́не же со отцы́ преподо́бными Пече́рскими,/ а́ки би́сер многоце́нен, мощми́ нетле́нными/ в пеще́ре твои́ми пресве́тло сия́еши,/ а душе́ю со А́нгелы пред Престо́лом Бо́жиим,/ святы́й преподобному́чениче Анаста́сие, предстои́ши,/ о нас всегда́ моля́ся ко Го́споду/ спасти́ся душа́м на́шим.

Конда́к, глас 8:

По́стническим пло́ти твоея́ умерщвле́нием/ ду́шу оживи́л еси́,/ и́бо твоего́ ра́ди презе́льнаго воздержа́ния/ и привре́меннаго терпе́ния,/ жизнь непрее́мная и диади́ма неувяда́емая/ от пострада́вшего за ны пло́тию/ и из ме́ртвых воскре́сшаго Христа́ Бо́га на́шего,/ тебе́, свя́те, преподобному́чениче Анаста́сие,/ я́ко злочести́вых победи́телю/ несумне́нно и вои́стинну угото́вася,/ зане́же Бо́жие тридне́вное Воскресе́ние/ всем, живу́щим на земли́,/ тобо́ю, я́коже иногда́ от отроко́в Ефе́сских правосла́вно воспропове́дася,/ и сего́ ра́ди, о́тче, днесь к тебе́ вси вопие́м немо́лчно:/ святы́й преподобному́чениче Анаста́сие Пече́рский,/ моли́ приле́жно воста́вшаго Христа́ тридне́вно из ме́ртвых,/ да изба́вит от сме́рти ве́чныя ду́ши на́ша.

Стихи́ра на литии́, глас 2:

Прииди́те, ве́рнии,/ восхва́лим диа́конов украше́ние,/ му́чеников сострада́льника, преподо́бным собесе́дника,/ отце́в сла́ву, чистоты́ рачи́теля,/ по́стников вели́каго наста́вника,/ Воскресе́ния именнопропове́дника -/ Анаста́сия преподобному́ченика,/ до́блественно Христа́ ра́ди пострада́вшего,/ и вене́ц нетле́ния и побе́ды от Него́ восприе́мшаго,/ и ме́ртвых воста́ние неве́рующим в и́мени возвести́вшаго,/ и за ны Влады́ку всех моля́щаго,/ того́ моли́твами, Спа́се, поми́луй нас.