На Го́споди, воззва́х, стихиры пра́здника, глас 8.

Подо́бен: Го́споди, а́ще и на суди́щи:

Го́споди,/ а́ще и крести́тися претерпе́л еси́ пло́тию, Безгре́шне,/ свободи́ти мир от греха́ хотя́,/ но Бо́га Тя мы ве́дуще, сла́вим:/ крести́вся бо изба́вил еси́ от рабо́ты/ ду́ши на́ша.

Го́споди, егда́ на Иорданския струи́,/ воплоти́вся прише́л еси́,/ да освяти́ши во́ду/ сла́вным Твои́м Креще́нием, Иоа́нну Твой верх/ преклони́ти изво́лил еси́/ и креща́ешися от раба́,/ да спасе́ши ду́ши на́ша.

Го́споди,/ спасти́ восхоте́в от ле́сти мир,/ его́же созда́л еси́,/ из Неискусобра́чныя Де́вы/ воплоти́тися изво́лил еси́:/ и Ада́ма от тли изба́вил еси́,/ я́ко Человеколю́бец,/ и крести́вся же дарова́л еси́ просвеще́ние/ душа́м на́шим.

Ины стихиры святы́я, глас 2.

Подо́бен: Егда́ от Дре́ва:

Егда́ Ду́ха све́том осиява́ема бога́тно,/ бога́тство возненави́дела еси́,/ еди́но возлюби́вши Небе́сное,/ в му́ченическую кре́пость я́ве облекла́ся еси́/ и к безме́рным боле́знем отлучи́лася еси́./ Те́мже врага́ низложи́вши,/ побе́ды исплела́ еси́ венцы́,/ му́ченице страстоте́рпице пресла́вная.

Егда́ смрад пло́ти и греха́ пла́мень,/ честна́я, угаси́ла еси́/ росо́ю Боже́ственнаго Ду́ха, соде́йствующаго тебе́,/ тогда́ зве́ри обузда́ла еси́ посреде́ суди́ща,/ те́ло твое́ преда́вши на ра́ны му́жески./ Те́мже врага́ низложи́вши,/ побе́ды исплела́ еси́ венцы́,/ о Татиа́но Богоблаже́нная.

Ни ме́чь, ни огнь, ни ра́ны,/ ни ско́рби, ни глад,/ ни вся́кий вид муче́ния твоего́,/ е́же ко Го́споду притупи́ша раче́ния:/ разжже́нным бо се́рдцем Того́ и́щущи,/ вся ви́димая еди́нощи оплева́ла еси́, му́ченице,/ и вну́трь Боже́ственнаго черто́га всели́лася еси́,/ неве́ста всех Царя́ бы́вши.

Сла́ва, и ны́не, глас 5:

Зря́щи Тя естество́ вся́кое земноро́дных, на́га в вода́х,/ Соде́теля Креще́ния прося́ща,/ изменя́шеся стра́хом и ужаса́шеся./ Предте́ча же тре́петом содержи́мь бя́ше,/ не сме́я прибли́житися Тебе́./ Мо́ре побеже́, Иорда́н струи́ возврати́./ Го́ры взыгра́шася зря́ще,/ и А́нгельския си́лы удивля́хуся, глаго́люще:/ о чудесе́!/ Спас обнажа́ется,/ оде́яти хотя во спасе́ние челове́ки и обновле́ние.

На стихо́вне стихиры, глас 6.

Подо́бен: А́нгельския:

Ны́не проро́чески возопии́м Го́споду:/ яви́лся еси́ нам, Спа́се наш и Зижди́телю,/ сокруши́л же еси́, Сло́ве,/ зми́ев уста́ во Иорда́не, я́ко Ще́др,/ и ослепле́нныя све́том Твои́м, Христе́, просвети́л еси́./ Благослове́н, явле́йся Бо́же наш, сла́ва Тебе́.

Стих: Мо́ре ви́де и побеже́,/ Иорда́н возврати́ся вспя́ть.

Держа́ву на враги́ Креще́нием Твои́м, Сло́ве, дал еси́ нам/ любо́вию чту́щим Твое́ смотре́ние,/ е́же во́лею соверши́л еси́,/ разреши́в челове́ки от кля́твы во Еде́ме пребы́вшия./ Ему́же пое́м:/ благослове́н, явле́йся Бо́же наш, сла́ва Тебе́.

Стих: Что ти есть, мо́ре, я́ко побе́гло еси́?/ И тебе́, Иорда́не, я́ко возврати́лся еси́ вспя́ть?

И́же о Ада́ме в ри́зы ко́жныя/ во́лею иногда́ обле́кшиися паде́нием,/ в струя́х Иорда́нских совле́кшеся днесь Креще́нием Госпо́дним,/ богосло́вяще со А́нгелы,/ Тому́ возопие́м:/ благослове́н, явле́йся Бо́же наш, Сла́ва Тебе́.

Сла́ва, и ны́не, глас то́йже, самогла́сен:

Воспои́м, ве́рнии, е́же о нас Бо́жия благодея́ния вели́чество:/ о нашем бо прегреше́нии быв Челове́к,/ на́шим очище́нием очища́ется во Иорда́не,/ Един Чи́стый и Нетле́нный,/ освяща́яй мене́ и во́ды,/ и главы змие́в сокруша́яй в воде́./ Почерпе́м у́бо во́ду с весе́лием, бра́тие:/ благода́ть бо Ду́ха,/ ве́рно почерпа́ющим, невидимо подава́ется/ от Христа Бо́га, и Спа́са душ на́ших.

Тропа́рь пра́здника, глас 1:

Во Иорда́не креща́ющуся Тебе́, Го́споди,/ Тро́ическое яви́ся поклоне́ние:/ Роди́телев бо глас свиде́тельствоваше Тебе́,/ возлю́бленнаго Тя Сы́на имену́я,/ и Дух, в виде голуби́не,/ изве́ствоваше словесе́ утвержде́ние./ Явле́йся Христе́ Бо́же/ и мир просвеще́й, сла́ва Тебе́.

На у́трени

По 1-й стихоло́гии седа́лен, глас 4.

Подо́бен: Удиви́ся Ио́сиф:

Иорда́не реко́,/ что удиви́лся еси́, зря Невидимаго на́га?/ Ви́дех и вострепета́х, рече́:/ и ка́ко бо Сего́ не хоте́х устраши́тися и заити́?/ А́нгели Его́ устраши́шася зря́ще,/ ужасе́ся Не́бо, и земля́ вострепета́,/ и смяте́ся мо́ре, и вся ви́димая и неви́димая./ Христо́с яви́ся на Иорда́не, освяти́ти во́ды.

Сла́ва, и ны́не, то́йже.

По 2-й стихоло́гии седален, глас 8.

Подобен: Свире́лей па́стырских:

Креща́ется Христо́с, просвеща́яй мир,/ с высоты́ Оте́ц свиде́тельствова, глаго́ля:/ Сей есть Сын Мой, в Не́мже благоизво́лих,/ Того́ послу́шайте./ Сей есть просвеща́яй вселе́нную благоутро́бием Свои́м,/ крести́выйся и спасы́й я́ко Бог род челове́ческий.

Сла́ва, и ны́не, то́йже.

Кано́н пра́здника пе́рвый со ирмосо́м на 8, и святы́я, творе́ние Игна́тиево, глас 2.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре, и наста́вльшему лю́ди, я́же изведе́ из рабо́ты еги́петския,/ я́ко просла́вися.

Му́ченическими озаре́на светлостьми́,/ чи́стому предстои́ши, му́ченице, Жениху́ твоему́,/ душетле́нных прегреше́ний прося́щи изба́витися хва́лящим тя.

Бога́тство тле́нное, му́ченице, соверше́нно пренебрегла́ еси́,/ на Небесе́х нетле́нное и пребыва́ющее и́щущи усе́рдно,/ и ра́дующися прошла́ еси́ му́ченическое страда́ние.

К ра́нам, к боле́знем и бие́нием многови́дным/ безбоя́зненно, му́ченице, отлучи́лася еси́:/ споспешеству́ющую бо име́ла еси́ благода́ть Спасову, и укрепля́ющую тя.

Богоро́дичен: Исто́чник безстра́стия ро́ждшая,/ уя́звленнаго страстьми́, Отрокови́це, исцели́,/ и огня́ ве́чнаго исхи́ти мя,/ Еди́на Богоблагода́тная.

Ин. Песнь 3

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,/ и несть пра́веден па́че Тебе́, Го́споди.

Не поколеба́ столпа́ твоего́ се́рдца сте́кшее мук треволне́ние,/ утверди́ся бо на ка́мени любве́ Христо́вы, всехва́льная./ К Нему́же взыва́ла еси́:/ я́ко несть свят па́че Тебе́, Го́споди.

Челове́ческую не́мощь Понесы́й,/ впери́ си́лою не́мощь твою́ на некре́пкаго зми́я./ Тем, му́ченице, на зе́млю низве́ргла еси́, ве́рно зову́щи:/ я́ко несть свят па́че Тебе́, Го́споди.

Пото́ки изсуши́ла еси́ беззако́ния струя́ми крове́й твои́х, блаже́нная,/ сла́дости же пото́ка ны́не наслажда́ешися,/ и во Све́те Невече́рнем обита́еши, зову́щи:/ я́ко несть свят па́че Тебе́, Го́споди.

Богоро́дичен: Зача́тие и рождество́ Твое́ па́че сло́ва,/ ве́ки бо Созда́вшаго сло́вом родила́ еси́,/ Изба́вльшаго безслове́сия ми́ра концы́, Отрокови́це Неискусому́жная,/ Его́же моли́ всегда́, е́же спасти́ нас.

Конда́к му́ченицы, глас 4

Подо́бен: Яви́лся еси́ днесь:

Све́тло во страда́нии твое́м возсия́ла еси́, страстоте́рпице,/ от крове́й твои́х приспещре́на,/ и я́ко кра́сная голуби́ца к Небеси́ возлете́ла еси́, Татиа́но,/ те́мже моли́ при́сно за чту́щия тя.

Седа́лен, глас 4

Подо́бен: Ско́ро предвари́:

Сугу́б соверши́вши, му́ченице, по́двиг на земли́,/ сугу́б и вене́ц сподо́билася еси́ прия́ти от руки́ Жениха́ твоего́:/ пости́лася бо еси́, стра́сти пло́тския обузда́ющи,/ пострада́вши же зако́нно, врага́ низложи́ла еси́./ Те́мже мольба́ми твои́ми спаси́ ны от напа́стей.

Сла́ва, и ны́не, глас и подо́бен то́йже:

Све́том я́ко ри́зою одея́йся,/ струя́ми одева́ется Иорда́нскими Христо́с Бог наш,/ свы́ше свиде́тельствующу Отцу́ сопресто́льнаго,/ до́ле прише́дшу Ду́ху сла́вы:/ То́й есть Просвеща́яй и Освяща́яй нас.

Ин. Песнь 4

Ирмо́с: Пою́ Тя, слу́хом бо, Го́споди, услы́шах и ужасо́хся:/ до мене́ бо и́деши, мене́ ищя́ заблу́ждшаго./ Тем мно́гое Твое́ снизхожде́ние, е́же на мя, прославля́ю,/ Многоми́лостиве.

Красно́ душе́вное устрое́ние, благоле́пием благоче́стия Татиа́на нося́щи,/ еще́ же муче́ния све́том пресла́вно сия́ющи,/ к чи́стому Жениху́ вселя́ется.

Желе́зом твое́ лице́ стру́жущия пребеззако́нныя/ невиде́нием Небе́снии А́нгели му́чаху,/ по́сланнии к твое́й от Бо́га, му́ченице, по́мощи,/ и́же твоему́ терпе́нию удиви́шася.

Зако́нно Христа пропове́дающи, победи́ла еси́ пребеззако́ннующия,/ же́ртва же непоро́чна, благоприя́тна, соверше́ннейшая Тому́ принесла́ся еси́, взыва́ющи:/ Тебе́ лю́бящи, Спа́се, закала́юся.

Богоро́дичен: Ко пристанищу ти́хому мя напра́ви, Богоневе́сто Всесвята́я:/ бу́ря бо мя волну́ет, и смуще́ние греха́ лю́те,/ ве́тры коле́блемь лука́вых духо́в оскорбля́ющих мя.

Ин. Песнь 5

Ирмо́с: Просвеще́ние во тме лежа́щих,/ спасе́ние отча́янных, Христе́ Спа́се мой,/ к Тебе́ у́тренюю, Царю́ мира,/ просвети́ мя сия́нием Твои́м:/ ино́го бо, ра́зве Тебе́, Бо́га не зна́ю.

Твою́ честну́ю и блаже́нную стра́сть подража́ющи,/ безстра́стием Тебе́ сочта́вшаяся, стра́ждет преусе́рдно,/ на у́ды ссека́емая, Жизнода́вче Христе́, зову́щи:/ ино́го, ра́зве Тебе́, Бо́га не зна́ю.

Страх Бо́жий во утро́бе мы́слию прие́мши,/ дух спаси́тельнаго испове́дания и муче́ния/ родила́ еси́ пресла́вно, доблему́драя, тве́рдым страда́нием/ и сопроти́вная нача́ла посрами́ла еси́.

Све́тлыми сия́еши заря́ми, уясня́ема Ду́ха Свята́го светоли́тием,/ и озаря́еши ве́рных сердца́, грехо́вный мрак разоря́ющи, му́ченице,/ страстоте́рпице Христо́ва досточу́дная.

Богоро́дичен: Све́тлый Со́лнца О́блаче, осия́й ми́ зарю́,/ реша́щу мрак мои́х прегреше́ний,/ даждь ми ру́ку впа́дшему в ти́ну грехо́вную,/ воздви́гни мя лежа́щаго, Еди́на па́дшаго Ада́ма исправле́ние.

Ин. Песнь 6

Ирмо́с: В бездне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли́, Бо́же, мя возведи́.

На дре́ве я́ко позна́ просте́рта Тя му́ченица честна́я,/ терпи́т пове́шение и строга́ния теле́сная, за любо́вь Твою́, Всемо́щне.

Свире́пейшии зве́рие устыде́шася посреди́ три́знища му́жески стра́ждушия тя,/ я́коже Фе́клы пе́рвее первому́ченицы,/ ея́же ре́вность стяжа́ла еси́, приснопа́мятная.

Предста́вше Небе́снии А́нгели посреди́ темни́цы, тя све́том осия́ша,/ от боле́зней изима́юще, и я́ко Бо́жию а́гницу прославля́юще.

Богоро́дичен: От всех родо́в избра́ Тя добро́ту Иа́ковлю,/ Ю́же возлюби́ Творе́ц, Всенепоро́чная,/ и из Тебе́ возсия́в яви́ся.

Конда́к и и́кос пра́здника.

Ин. Песнь 7

Ирмо́с: Богопроти́вное веле́ние беззако́ннующаго мучи́теля,/ высо́к пла́мень вознесло́ есть./ Христо́с же простре́ Богочести́вым отроко́м ро́су духо́вную,/ Сый бла́гослове́н и препросла́влен.

Благомо́щно непобеди́мая се́чема,/ сосце́в отъя́тие претерпе́ла еси́ терпели́вейше,/ огне́м же Небе́сным, му́ченице, попали́ла еси́ чти́ти не хотя́щия Бо́га,/ Его́же вся тварь пое́т сла́вящи.

В се́рдцы нося́щи огнь Боже́ственныя любве́, непоро́чная, пла́мень попра́,/ огня́ подобора́бнаго не ужасе́ся,/ отроко́в образу́ющи дре́вних и му́жество и кре́пость.

Звере́й свире́пство тебе́ повине́ся, льво́в зия́ния невре́дно премину́ла еси́,/ Бо́гу тя просла́вльшу, Того́ просла́вившую,/ Его́же страда́ния твое́ю исполня́ющи пло́тию, всехва́льная.

Богоро́дичен: Жи́знь Ипоста́сную нам ро́ждши, сме́ртию сме́рть я́ве потре́бльшую,/ стра́сти умертви́ пло́ти на́шея, ве́рою чту́щих Тя, Чи́стая,/ я́ко Богоро́дицу и Всесла́вную.

Ин. Песнь 8

Ирмо́с: В пещь о́гненную ко отроко́м евре́йским снизше́дшаго,/ и пла́мень в ро́су прело́жшаго Бо́га,/ по́йте дела́ я́ко Го́спода,/ и превозноси́те во вся ве́ки.

Удобри́вшися доброде́тельми, украси́лася еси́ добро́тами муче́ния,/ и Жениху́ обручи́лася еси́, па́че всех челове́ков красне́йшему,/ добро́тою сия́ющему безсме́ртия, Татиа́но Богому́драя.

С безпло́тными слуга́ми в темни́це Творца́ славосло́вила еси́,/ сия́ющи сла́вою Боже́ственнаго блиста́ния,/ и всем непристу́пна пребыва́ющи, держи́мым тмо́ю пре́лести.

Сокруше́ние твоих уде́с истни́ враго́в кова́рства,/ крове́й тече́ние нече́стия лю́тыя пото́ки, честна́я, изсуши́,/ пучи́на чуде́с нам я́вльшися.

Богоро́дичен: Спаси́, уще́дри ны,/ ще́драго Бо́га нам Спа́са ро́ждшая, па́че сло́ва,/ огнепа́льных помышле́ний и страсте́й изима́ющи зно́я, Твои́ми моли́твами,/ Чи́стая Препросла́вленная.

Ин. Песнь 9

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.

По мно́гих му́ках ме́чным тя судо́м лю́тый осужда́ет судия́,/ ея́же восхожде́нием восплеска́ша Небе́снии чи́ни./ Христо́с же всеси́льною десни́цею венча́ тя, му́ченице, зако́нно пострада́вшую.

Сочта́ся с му́ченическими светле́йшими ста́ды,/ ясне́йши прибли́жившися Бо́гу, ви́диши я́же ви́дят А́нгели,/ я́ко Де́ва в черто́зе водворя́ешися, Жениха́ твоего́, честна́я,/ моля́щи, спасти́ся любо́вию тя почита́ющим.

Запеча́танный исто́чник тя, заключе́н же огра́д,/ возложе́ние че́стно и свяще́нно, неве́сту Христо́ву нетле́нную,/ заколе́ние и же́ртву, а́гницу и до́брую голуби́цу Влады́ки вся́ческих,/ Татиа́но, пропове́дуем.

Богоро́дичен: Гла́сы прекланя́ема те́пле тя моля́щих,/ Еди́на ве́рных Прибе́жище, спаси́, уще́дри, Влады́чице,/ соблюди́ от вре́да, и вся́каго язы́ков наше́ствия,/ ве́рою и любо́вию при́сно тя велича́ющия.

Свети́лен.

Подо́бен: Посети́л ны́:

Яви́ся Спас, Благода́ть и И́стина во струя́х Иорда́нских,/ и су́щия во тме и се́ни спя́щия просвети́л есть,/ и́бо прии́де и яви́ся Свет Непристу́пный.

Сла́ва, и ны́не, то́йже.

На стихо́вне стихиры, глас 6.

Подо́бен: А́нгельския:

Сия́ние от Све́та, Свет сый, Иису́се мой,/ просвети́л еси́ нас неизрече́нным Твои́м осия́нием,/ пре́жде ослепле́нныя во Еде́ме от зми́я,/ во Иорда́не ны́не Свет вси́ Све́том Твои́м зря́ще, ве́рно пое́м:/ благослове́н, явле́йся Бо́же наш, сла́ва Тебе́.

Стих: Мо́ре ви́де и побеже́,/ Иорда́н возврати́ся вспя́ть.

Таи́нниче и стра́шных строи́телю та́ин,/ Предте́че, ра́дости и Ду́ха самови́дче,/ кре́щшагося Сло́ва от Тебе́, я́ко благоволи́, проси́/ нам согреше́ний избавле́ние при́сно пода́ти,/ Ему́же пое́м:/ благослове́н, явле́йся Бо́же наш, сла́ва Тебе́.

Стих: Что ти есть, мо́ре, я́ко побе́гло еси́?/ И тебе́, Иорда́не, я́ко возврати́лся еси́ вспя́ть?

Вознесе́м, ве́рнии, в ра́зуме сердца́,/ потеце́м со тща́нием к струя́м Иорда́нским,/ и уви́дим Зижди́теля, пло́тски креща́ема от Иоа́нна Предте́чи,/ и с ни́м богосло́вяще, воспои́м:/ бла́гослове́н, явле́йся Бо́же наш, сла́ва Тебе́.

Сла́ва, и ны́не, то́йже подо́бен:

О па́че ума́ Боже́ственнаго смотре́ния!/ Ка́ко Творе́ц тва́ри предста́, и преклоня́ет сему́ главу́?/ Указа́нием бо нам о́браз смире́ния вво́дит,/ и́же о Не́м просвеще́нным,/ Ему́же пое́м:/ благослове́н, явле́йся Бо́же наш, сла́ва Тебе́.

На литурги́и

Бла́же́нна пра́здника, песнь 7-я на 6.

На ма́лой вече́рни

На Го́споди, воззвах: стихи́ры Богоро́дицы на 4, глас 1.

Подо́бен: О, ди́вное чу́до:

А́нгельския Небе́сныя си́лы/ Твою́ святу́ю ико́ну, Богоро́дице Де́во,/ неви́димо окружа́ют и боголе́пно че́ствуют,/ ви́дяще на ней всех Творца́ и Го́спода,/ я́ко Младе́нца, мле́ком Твои́м пита́ема,/ и, дивя́щеся чудеси́, ра́достно вопию́т:/ Благода́тная, ра́дуйся, с Тобо́ю Госпо́дь,/ подая́й ми́рови Тобо́ю ве́лию ми́лость.

Це́рковь Христо́ва ра́дуется,/ подо́бие пречи́стаго ли́ка Твоего́,/ я́ко у́тварь драгу́ю, стяжа́вши,/ Богоро́дице Де́во, Пита́тельнице жи́зни на́шея,/ христиа́ном Блага́я Помо́щнице,/ и́же и вопию́т Тебе́ ра́достно:/ Благода́тная, ра́дуйся, с Тобо́ю Госпо́дь,/ подая́й Тобо́ю нам ве́лию ми́лость.

Сей день весе́лия и пра́здник све́тел на́ста/ в честь чудотво́рныя ико́ны Твоея́, Богоро́дице Де́во,/ я́же, я́ко исто́чник приснотеку́щий, неду́жным показа́ся,/ да́ры исцеле́ния неоску́дно источа́яй,/ те́мже, ве́рнии, духо́вне возвесели́мся,/ ви́дяще Богомладе́нца Иису́са,/ млеко́м Пречи́стыя пита́ема,/ и пе́сненно Пита́тельницу жи́зни на́шея почти́м,/ ра́достно зову́ще:/ Благода́тная, ра́дуйся, с Тобо́ю Госпо́дь,/ подая́й Тобо́ю нам ве́лию ми́лость.

Сла́ва, и ны́не, глас 5:

Пресла́вное виде́ние о́браза Твоего́, Влады́чице,/ и мно́гая чудеса́, от него́ быва́емая,/ удивля́ет земноро́дных,/ Пита́теля бо вселе́нныя пита́еши мле́ком Твои́м, Де́во/ Его́же моли́, Чи́стая,/ в пресла́вном торжестве́ Твое́м/ дарова́ти нам просвеще́ние благода́тное/ и ве́лию ми́лость.

На стихо́вне стихи́ры, глас 2.

Подо́бен: До́ме Евфра́фов:

Прииди́те, вси лю́дие,/ восхва́лим Всепе́тую/ Млекопита́тельницу Спа́са на́шего,/ да́рующую нам просвеще́ние/ и ве́лию ми́лость.

Стих: Помяну́ и́мя Твое́/ во вся́ком ро́де и ро́де.

Влады́чице, Ма́ти Изба́вителя,/ приими́ моле́ния раб Твои́х,/ да почерпе́м от Твое́й ико́ны/ благода́ть незави́стную/ и очище́ние прегреше́ний.

Стих: Слы́шши, Дщи, и виждь,/ и приклони́ у́хо Твое́.

Врата́ Небе́сная, Влады́чице,/ отве́рзи нам, Всеблага́я,/ Млекопита́тельнице Спаси́теля на́шего,/ о Тебе́ вси хва́лимся/ и на Тя по Бо́зе упова́ем.

Сла́ва, и ны́не, глас и подо́бен то́йже:

Вмести́лище пречи́стое/ Све́та Невече́рняго,/ сла́вим Тя по до́лгу,/ я́ко виде́нием пречи́стаго Твоего́ о́браза/ освяща́еши ду́ши на́ша.

Тропа́рь, глас 3 (зри на вели́цей вече́рни).

На вели́цей вече́рни

Блаже́н муж: 1-й антифо́н. На Го́споди, воззва́х: стихи́ры на 8, глас 6:

Велича́ем тя, Богоро́дице Де́во,/ возвели́чившую род наш,/ из Тебе́ бо воплоти́ся Избави́тель Госпо́дь/ и роди́ся я́ко Младе́нец млекопита́емый,/ Сый Бог наш,/ спаса́яй при́сно Тя велича́ющия.

Велича́ем Тя, Богоро́дице Де́во,/ Засту́пницу усе́рдную ро́да христиа́нскаго,/ покро́вом ми́лости Твоея́/ покрыва́ющую всю вселе́нную,/ се бо ико́на Твоя́ свята́я/ чуде́с мно́жество источа́ет/ и я́ко дар Боже́ствен/ Це́ркви Христо́вой дарова́ся/ бла́гостию Творца́, все́льшагося в Тя пло́тию,/ И́же пита́шеся от сосе́ц Твои́х я́ко Младе́нец,/ Сый Предве́чный Бог,/ спаса́яй при́сно Тя велича́ющия.

Велича́ем Тя, Богоро́дице Де́во,/ я́ко одушевле́нный киво́т Божества́/ и манноприе́мную ста́мну,/ позлаще́нную Ду́хом Святы́м,/ ложесна́ бо Твоя́ престо́л Себе́ сотвори́/ и от сосе́ц Твои́х пита́тися изво́ли/ Сый Бог наш,/ спаса́яй при́сно Тя велича́ющия.

А́ще Рождество́ Христо́во, и́ны стихи́ры Млекопита́тельнице, глас 4:

Звезда́ возсия́ от Иа́кова в верте́пе,/ прии́дем и мы, пра́зднственная соверша́юще,/ теце́м с волхвы́, с па́стырьми и́дем,/ ви́дим Бо́га в пелена́х,/ ви́дим Де́ву млекопита́ющую,/ о, ужа́сно виде́ние,/ Царь Изра́илев – Христо́с – прихо́дит.

Глас 1: Ношу́ Тя я́ко Младе́нца рука́ми,/ вся́ческая нося́щаго, и удивля́юся, -/ глаго́лаше Неискусобра́чная, -/ ка́ко Тя мле́ком воспита́ю, пита́ющаго вся,/ Сы́не Мой, Тво́рче Мой,/ сла́влю Твое́ безме́рное к челове́ком снизше́ствие,/ и́мже спаса́еши мир погиба́ющий.

Глас 4: О блаже́нное Богоотрокови́цы чре́во,/ я́же мы́сленне Небесе́ бо́льши показа́ся!/ Его́же бо не вмеща́ет Не́бо,/ Ты содержи́ши, в Себе́ нося́щи./ О блаже́нны сосцы́ Де́вы,/ я́же соссе́т пита́яй вся́ко дыха́ние Христо́с,/ в ложесна́х плоть Себе́ созда́в безму́жныя Отрокови́цы.

Аще Рождество́ Христо́во, Сла́ва, глас 6:

Днесь раждается от Де́вы/ руко́ю всю содержай тварь,/ пелена́ми якоже землен, повива́ется/ И́же существо́м  неприкоснове́нен Бог,/ в яслех во́зле- жит утверди́вый Небе́са́ Сло́вом в началех,/ от сосцев мле́ком пита́ется/ И́же в пустьши ма́нну одожди́вый людем,/ волхвы́ призыва́ет Жени́х Церко́вный,/ дары́ сих приемлет Сын Де́вы./ Поклоня́емся рождеству́ Твоему́, Христе́,/ покло- няемся рождеству́ Твоему́, Христе́,/ поклоня́емся рождеству́ Твоему́, Христе́,/ покажи́ нам и Бо́же- ственная Твоя́ Богоявления.

И ны́не, глас то́йже:

От святы́я ико́ны Твое́я, Влады́чице Преблага́я,/ исцеле́ний струи́ истека́ют,/ и́миже напая́ются благода́тно ду́ши на́ша,/ темже Тя, ми́лостивую Ма́терь/ и Млекопитательницу Спаси́теля на́ше- го,/ при́сно в песнех велича́ем.

Вход. Проки́мен дне. И чте́ния.

Бытия чте́ние (глава́ 28):

Изы́де Иа́ков от студенца́ кля́твеннаго и и́де в Харра́нь./ И обре́те ме́сто, и спа та́мо, за́йде бо со́лнце,/ и взят от ка́мения ме́ста того́, и положи́ возгла́вие себе́,/ и спа на ме́сте о́ном, и сон ви́де:/ и се ле́ствица утвержде́на на земли́,/ ея́же глава́ досяза́ше до Небе́с,/ и А́нгели Бо́жий восхожда́ху и низхожда́ху по ней,/ Госпо́дь же утвержда́шеся на ней и рече́:/ Аз Бог Авра́амов, отца́ твоего́,/ и Бог Исаа́ков, не бо́йся:/ земля́, иде́же ты спи́ши на ней,/ тебе́ дам ю и се́мени твоему́./ И бу́дет се́мя твое́, я́ко песо́к земный,/ и распространи́тся на мо́ре,и ли́ву, и се́вер, и на восто́ки,/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́, а́може аще по́йдеши./ И возвращу́ тя в зе́млю сию́,/ я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́ и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ несть сие́, но дом Бо́жий, и сия́ врата́ Небе́сная.

Проро́чества Иезекии́лева чте́ние (гла́вы 43 и 44):

Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы, глаго́лет Адонаи́ Госпо́дь./ И обрати́ мя на путь врат святы́х вне́шних,/ зря́щих на восто́ки, и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет скво́зе их,/ я́ко Госпо́дь Бог Изра́илев про́йдет и́ми, и бу́дут затворе́на./ Я́ко игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х, су́щих к се́веру, пря́мо хра́му, и видех,/ и се испо́лнь сла́вы храм Госпо́день.

При́тчей чте́ние (глава́ 9):

Прему́дрость созда́ Себе́ дом/ и утверди́ столпо́в седмь./ Закла́ своя́ же́ртвенная,и раствори́ в ча́ши Свое́й вино́,/ и угото́ва Свою́ тра́пезу./ Посла́ Своя́ рабы́, созыва́ющи с высо́ким пропове́данием на ча́шу, глаго́лющи:/ и́же есть безу́мен, да уклони́тся ко Мне,/ и тре́бующим ума́ рече́:/ прииди́те, яди́те Мой хлеб и пи́йте вино́, е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживете́,/ и испра́вите ра́зум в ве́дении./ Наказу́яй злы́я, прии́мет себе́ безче́стие,/ облича́ли же нечести́ваго, опоро́чит себе́,/ обличе́ния бо нечести́вому – ра́ны ему́./ Не облича́й злых, да не возненави́дят тебе́,/ облича́й прему́дра, и возлю́бит тя./ Даждь прему́дрому вину́, и прему́дрший бу́дет;/ сказу́й пра́ведному, и приложи́т приима́ти./ Нача́ло прему́дрости – страх Госпо́день, и сове́т святы́х – ра́зум:/ разуме́ти бо зако́н, по́мысла есть блага́го./ Сим бо о́бразом мно́гое поживе́ши вре́мя,/ и приложа́тся тебе́ ле́та живота́.

На ли́тии стихи́ры, глас 7:

Гора́ еси́ вели́кая и пресла́вная,/ па́че горы́ Сина́йския, Богоро́дице,/ она́ бо не терпя́ше сни́тия сла́вы Бо́жия во о́бразех и се́нех,/ огне́м возгара́шеся, и гро́ми и мо́лнии та́мо бы́ша,/ Ты же весь Боже́ственный огнь сущ,/ Бо́жие Сло́во во чре́ве Твое́м неопа́льно носи́ла еси́/ и от сосе́ц Твои́х млеко́м пита́ла еси́/ ма́нием Нося́щего вся,/ и, ма́тернее дерзнове́ние к Нему́ иму́щи,/ помози́, Влады́чице, ве́рно пра́зднующим/ Твой честны́й пра́здник,/ и не забу́ди, ми́лостивно посеща́ющи,/ прия́ла бо еси́ от Бо́га дар/ стро́ити и покрыва́ти христоимени́тое ста́до, рабы́ Твоя́.

Глас 6: Прииди́те, вси концы́ земли́,/ честно́му о́бразу Бо́жией Ма́тери поклони́мся,/ Млекопита́тельница ви́дишися на ико́не Твое́й святе́й,/ де́вство и ма́терство преди́вно сочета́вши,/ те́мже мо́лим Тя,/ воста́ние страсте́й на́ших утоли́, и боле́зни исцели́,/ и любо́вию пою́щих Тя не пре́зри,/ но посети́, и от скорбе́й изба́ви,/ и не оста́ви до конца́ поги́бнути рабы́ Твоя́.

Сла́ва, и ны́не, глас 8:

Тя мо́лим, Предста́тельницу на́шу,/ Богороди́тельнице Мари́е,/ и к Тебе́ со умиле́нием и любо́вию припа́даем,/ яви́ нам многомо́щное Твое́ заступле́ние/ и уско́ри изъя́та от облежа́щих нас бед,/ мно́го бо мо́жет Твоя́ ма́терняя моли́тва/ ко благосе́рдию Влады́ки,/ воздви́гни убо к Нему́ ру́це,/ и́миже Того́ я́ко Младе́нца носи́ла еси́/ и от сосце́в Твои́х млекопита́ла еси́,/ и заступи́ лю́ди согре́шшия,/ да ра́достию Тебе́ зове́м:/ ра́дуйся, Ра́досте и Спасе́ние душ на́ших.

На стихо́вне стихи́ры самогла́сны, глас 2:

Пресвята́я Ма́ти Бо́жия,/ ка́ко Тя возблагодари́м досто́йно,/ я́ко пресла́вно ико́ну Твою́/ в покро́в и утеше́ние ве́рным нам дарова́ла еси́/ и в защище́ние оби́тели на́шея,/ и тоя́ чудотворе́нием утвержда́еши Правосла́вную ве́ру.

Стих: Слы́ши, Дщи, и ви́ждь,/ и приклони́ у́хо Твое́.

Влады́чице Преблага́я,/ не забу́ди нас, смире́нных,/ ве́рно поклоня́ющихся Твое́й чудотво́рней ико́не/ и умиле́нно на ней созерца́ющих/ млекопита́ние Тобо́ю Христа́ Бо́га,/ я́ко Младе́нца во объя́тиях Твои́х держи́маго,/ Его́же моли́, Всеблага́я,/ изба́вити ны скорбе́й вре́менных и ве́чных/ и спасти́ ду́ши на́ша.

Стих: Помяну́ и́мя Твое́/ во вся́ком ро́де и ро́де.

О Всепе́тая Ма́ти и Де́во,/ преклони́ся ми́лостивно к моли́твам на́шим,/ пред пречи́стым о́бразом Твои́м приноси́мым днесь,/ покры́й нас ма́терним Твои́м покро́вом от вся́каго зла/ и защити́ от искуше́ний вра́жиих,/ да вси непреста́нно Тя велича́ем,/ Млекопита́тельницу Спа́са на́шего.

А́ще Рождество́ Христо́во, Сла́ва, глас 5:

Но́сиши Ада́мов зрак,/ во о́бразе Бо́жий Сый всесоверше́нный,/ и хо́щещи рука́ми держа́тися/ руко́ю вся содержа́й си́лою Твое́ю, -/ Чи́стая, Всенепоро́чная провещава́ше, глаго́лющи:/ ка́ко Тя пелена́ми повию́ я́ко Младе́нца?/ Ка́ко сосца́ми пита́ю Тя, вся́ческая пита́ющаго?/ Ка́ко Твое́й па́че ума́ нищете́ удивля́юся?/ Ка́ко Тя Сы́на Моего́ нареку́, раба́ Твоя́ ны́не су́щи?/ Пою́, благословлю́ Тя,/ подаю́щаго ми́ру ве́лию ми́лость.

И ны́не, глас 2:

Ны́не наста́ день ра́достен,/ день честна́го торжества́, Засту́пницы на́шея, Влады́чицы Богоро́дицы,/ Я́же дарова́ нам ико́ну Свою́ святу́ю в покро́в и утеше́ние,/ сию́ у́бо обы́мем любо́вию серде́чною/ и, лобыза́я, рцем изображе́нней на ней Млекопита́тельнице Спа́са на́шего:/ о Всеблага́я, сотвори́ ны досто́йны бы́ти/ такова́го да́ра ми́лости Твоея́/ и чту́щих Тя всегда́ спаса́й от вся́ких бед,/ Богоро́дице Чи́стая и Неискусобра́чная.

На благослове́нии хле́бов тропа́рь, глас 3:

Без се́мене от Боже́ственнаго Ду́ха,/ во́лею же О́тчею зачала́ еси Сы́на Бо́жия,/ от Отца́ без ма́тере пре́жде век су́ща,/ нас же ра́ди из Тебе́ без отца́ бы́вша,/ пло́тию родила́ еси́/ и Младе́нца млеко́м пита́ла еси́,/ те́мже не преста́й моли́ти/ изба́вится от бед душа́м на́шим. Три́жды.

На у́трени

На Бог Госпо́дь: тропа́рь, глас 3: Без се́мене: два́жды. Слава и ны́не, то́йже.

По 1-м стихосло́вии седа́лен, глас 4:

Боже́ственною благода́тию осени́ Госпо́дь пречи́стый о́браз Твой, Влады́чице,/ и сей, я́ко многоцеле́бное сокро́вище, оби́тели вели́каго во проро́цех яви́,/ слепыя просвеща́ти, разсла́бленныя укрепля́ти,/ да та́ко, прославля́юще о́браз Твой,/ научи́мся сла́вити и велича́ти Тя,/ Су́щую Богоро́дицу и Пита́тельницу жи́зни на́шея.

Сла́ва, и ны́не, то́йже.

По 2-м стихосло́вии седа́лен, глас 8:

Я́ко звезда́ многосве́тлая, ико́на Твоя́, Богоро́дице Де́во,/ благода́тию чуде́с нас просвеща́ет и созыва́ет днесь/ сла́вити и воспева́ти многопе́тое и́мя Твое́,/ е́же лю́бящим Тя рабо́м Твои́м ми́ро есть излиянное./ О Госпоже́ Пречи́стая, мо́лим Тя,/ и в час кончи́ны живота́ на́шего не оста́ви нас Твои́м заступле́нием.

Сла́ва, и ны́не, то́йже.

Велича́ние:

Велича́ем Тя,/ Пресвята́я Де́во,/ Млекопита́тельнице Спа́са на́шего,/ и чтим о́браз Твой святы́й,/ от него́же благода́ть исцеле́ния/ нам при́сно подае́ши.

Псало́м избра́нный.

По полиеле́и седа́лен, глас 4:

Прииди́те, ве́рнии,/ прииди́те, просла́вим чу́дную ико́ну Бо́жия Ма́тере Млекопита́тельницы,/ пресла́вно бо и боголе́пно на тве́рди церко́вней та возсия́вши,/ чудесы́ вели́кими всех просвеща́ет духо́вно/ и созыва́ет ве́село вопи́ти Богома́тери песнь ра́достную:/ ра́дуйся, Обра́дованная, Госпо́дь с Тобо́ю.

Сла́ва, и ны́не, то́йже.

Степе́нна, 1-й антифо́н 4-го гла́са. Проки́мен, глас 4: Помяну́ и́мя Твое́/ во вся́ком ро́де и ро́де. Стих: Слыши, Дщи, и ви́ждь, и приклони́ у́хо Твое́. Вся́кое дыха́ние: Ева́нгелие от Луки́, зача́ло 4.

По 50-м псалме́ стихи́ра, глас 6:

Вели́кое сокро́вище дарова́ла еси́ нам, Влады́чице,/ прославле́нием чудотво́рнаго Твоего́ о́браза,/ Млекопита́тельнице Спа́са на́шего,/ исцеле́ния бо мно́гия от него́ неду́жным быва́ют,/ те́мже Твои́ми ми́лостями, Госпоже́, хва́лимся/ и Твоя́ чудеса́ велегла́сно пропове́дуем,/ я́ко Ты еси прибе́жище на́ше/ и к Бо́гу Ми́лостивая о нас Хода́таица.

Кано́на два Богоро́дице, глас 8. Пе́рвый, ирмосы́ по два́щи, тропари́ на 6. Вторы́й на 4.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Водо́ю моли́тв Твои́х, Де́во, ороси́ нас к плодоно́сию духо́вному/ и воспламени́ хла́дное на́ше се́рдце Боже́ственною любо́вию,/ да Тебе́, Млекопита́тельнице Пита́теля на́шего,/ пе́ние хвале́бное воспои́м досто́йно, Чи́стая.

Во́ды стра́стныхх помышле́ний обурева́ют нас, Госпоже́ Всеблага́я,/ но ина́го приста́нища ко спасе́нию не и́мамы,/ то́кмо Тебе́, Всенепоро́чная, млекопита́вшая Спа́са душ на́ших/ и от ико́ны Твоея́ святы́я всем да́рующая утеше́ние.

Во́ду непостоя́нную жите́йских треволне́ний/ прейти́ безбе́дно помози́ нам, Чи́стая,/ и от лю́тых неду́гов исцеле́ние нам пода́ждь, Млекопита́тельнице Свята́я,/ и покажи́ прича́стники нас бы́ти насле́дия Небе́снаго, Богоневе́стная.

Во́ды целе́бныя источа́ет нам ико́на Твоя́ всечестна́я, Богоро́дице Де́во,/ и стра́сти многоразли́чныя исцеля́ет и по́мощь в беда́х ве́рным от Тебе́ подае́т,/ да сла́вим чудеса́ Твоя́ и пое́м Тя, благи́х вино́вную,/ воплоти́вшую и дои́вшую Богомладе́нца Иису́са.

Ин кано́н Богоро́дице

Чи́стая – Отроча́ ражда́еши, Де́ва – мле́ком дои́ши!/ Ка́ко в сию́ двою́ девствуеши, ро́ждши?/ Бог есть соде́явый, не взыску́й от Ме́не, е́же ка́ко.

Недоуме́нием покрыва́ется рождество́ Твое́,/ стра́нно бо, Де́во, дои́ши Пита́теля, и мле́ком пита́еши Невеще́ственнаго,/ и на руку́ держи́ши Зижди́теля.

Сла́ва: Нося́щи Емману́ила на руку́ Твое́ю, Чи́стая, я́коже Младе́нца, Богора́дованная, вопия́ла еси́:/ Ча́до Мое́ сладча́йшее, ка́ко пода́м Тебе́ сосе́ц, пита́ющему вся́ческая?/ Ка́ко повию́ Тебе́ пелена́ми, мгло́ю повива́ющаго мо́ре?

И ны́не: Безо́тча родила́ еси́, безма́терня пре́жде Тебе́,/ и я́ко Младе́нца дои́ла еси́ пита́ющаго вся,/ Его́же моли́ спасти́ся ве́рно пою́щим Тя госпо́дьственно, Богоро́дицу Чи́стую.

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Небе́сных ра́дование и земны́х упова́ние еси́, Богоро́дице Де́во,/ све́тлая пала́то Царя́ царе́й, млекопита́вшая Его́ от сосцу́ Твое́ю./ Того́ убо моли́ приле́жно с вели́ким Предте́чею Иоа́нном и чудотво́рцем Никола́ем/ спасти́ и просвети́ти ду́ши на́ша, Еди́на Всеблагослове́нная.

Небе́с превы́шшая, и зе́млю рождество́м Твои́м освяти́вшая,/ и млекопита́вшая Зижди́теля Твоего́, Богоневе́сто Мари́е,/ ико́ною сла́дкаго подо́бия Твоего́ нас утеша́еши/ и неду́жным исцеле́ние подае́ши, Еди́на Пречи́стая.

Небе́сная Цари́це, Всеми́лостивая Влады́чице,/ нетле́нно роди́вшая и дои́вшая святы́х Святе́йшее Сло́во,/ кую́ досто́йную похвалу́ принесе́м Ти, недосто́йнии,/ а́ще не Сама́ Ты нау́чиши нас неосужде́нно сла́вити Тя/ и пе́ти Твоя́ чудеса́, Еди́на Всеблаже́нная.

Небе́сное а́нгельское славосло́вие слы́шиши, Госпоже́, в Сио́не Го́рнем,/ отону́дуже нас, до́льних, ма́терним Твои́м о́ком назира́еши/ и вы́ну мо́лиши за нас Сы́на Твоего́ и Бо́га,/ да ве́чнаго избе́гнем осужде́ния, Еди́на Пренепоро́чная.

Ин кано́н

Я́ко Де́ву и Еди́ну в жена́х Тя, без се́мене ро́ждшую Бо́га, пло́тию,/ вси ублажа́ем, ро́ди челове́честии,/ О́гнь бо всели́ся в Тя Божества́/ и я́ко Младе́нца до́иши Зижди́теля и Го́спода.

Украси́вшися, Чи́стая, наи́тием Пресвята́го Ду́ха,/ Бо́га сосца́ми дои́ши и Сего́ держи́ши объя́тии,/ всю тварь дла́нию содержа́щаго.

Сла́ва: Некра́домое бога́тство де́вства Твоего́,/ Ма́ти пло́тию яви́лася еси́ Вседержи́теля,/ Неве́сто Неискусому́жная, Де́во Богоро́дице,/ воспита́вши я́ко Младе́нца, пита́ющаго я́ко Зижди́теля весь мир и освяща́юща.

И ны́не: Отыми́ поноше́ние челове́ческое/ и клеветы́ наве́тник от мене́, Богоро́дице, молю́ Тя,/ да усе́рдно сла́влю Го́спода, Его́же пита́ла еси́.

Седален, глас 8:

Вели́чия Твоя́ кто испове́сть, Богоро́дице?/ прославле́нием бо чудотво́рный ико́ны Твое́й Млекопита́тельницы/ возвесели́ла еси́ ду́ши правосла́вных,/ мно́гия неду́ги то́ю врачу́ющи и от вся́ких бед избавля́ющи,/ и́же по Бо́зе упова́ние на Тя возлага́ющих, о Влады́чице Всеми́лостивая,/ и нас Твоего́ заступле́ния не лиши́,/ оби́тель же на́шу от вся́каго зла сохрани́,/ да, Тобо́ю хва́лящеся, не постыди́мся во ве́ки.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разумех дела́ Твоя́/ и просла́вих Твое́ Божество́.

Услы́ши гла́сы на́ша хвале́бныя, Богоро́дице Преблага́я,/ и на́ше поклоне́ние приими́, пред свято́ю ико́ною Твое́ю днесь приноси́мое:/ ви́дим бо Тя на ико́не, Спа́са Христа́ млекопита́ющую,/ и ра́дуемся, гре́шнии, ро́ждшагося от Тебе́ Бо́га сла́вяще.

Услы́шала еси́, Пречи́стая Влады́чице, благове́щение Арха́нгелово:/ ра́дуйся, Благода́тная, Госпо́дь с Тобо́ю,/ и зачала́ еси́ во утро́бе Твое́й предве́чнаго Бо́га,/ Его́же нетле́нно ро́ждши, млеко́м Твои́м я́ко Младе́нца пита́ла еси́ во спасе́ние на́ше.

Услы́ша первосвяти́тель Се́рбский Са́вва заве́т вели́каго во отце́х Са́ввы Освяще́ннаго/ о святе́й ико́не Твое́й Млекопита́тельнице, Богоро́дице Де́во,/ и прия́т ю со благогове́нием, я́ко зало́г Твоего́ благоволе́ния, Преблага́я.

Услы́шаши и́ноцы Святы́я Горы́ Афо́нския,/ я́ко свята́я ико́на Твоя́ Млекопита́тельница от Иерусали́ма к ним .прино́сится,/ о Ма́ти Сло́ва и Де́во,/ и, ра́достию сла́вяще и пою́ще многопе́тое Твое́ и́мя, потеко́ша во сре́тение ей.

Ин кано́н

Утро́ба Твоя́ препе́тая и сосца́ блаже́нна, Де́во,/ тех бо ради жизнь вси обрето́хом.

В рождестве́ Твое́м зача́тие безсе́менно,/ во успе́нии Твое́м ме́ртвость нетле́нная,/ чу́до в чудеси́ сугу́бо стече́ся, Богоро́дице:/ ка́ко бо, Неискусому́жная, Младопита́тельница чи́ста сущи?/ Ка́ко же Ма́ти Бо́гу мертвоно́сна мироуха́ющи?

Сла́ва: Млеко́м пита́ла еси́, Де́во, плотоно́сца Твоего́ Бо́га рожде́ннаго,/ я́ко да боле́знь Ада́мову, су́щую во а́де, обле́гчит,/ от дре́ва сне́дша зна́ния и за́поведь преслу́шавша.

И ны́не: Кто ви́де отроча́, его́же не все́я оте́ц, млеко́м пита́емое?/ Или́ где ви́дена бысть де́ва ма́ти?/ И́стинно па́че ума́ обоя́, Богороди́тельнице Чи́стая.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.

Просвети́ нас, греха́ми потемне́нных, Влады́чице, сия́нием Бо́жией благода́ти/ и сподо́би чи́сто зре́ти святу́ю Твою́ ико́ну и на ней чу́до чуде́с благогове́йно созерца́ти,/ сие́ есть Творца́ вселе́нныя я́ко Младе́нца, от сосцу́ Твое́ю пита́емаго.

Просвеще́ние и спасе́ние на Тя наде́ющихся, Богоро́дице Де́во,/ облагодати́ наш по́мысл досто́йно сла́вити Тя и пе́ти Твоя́ чудеса́,/ я́же от ико́ны Твоея, Млекопита́тельница имену́емыя, яви́ла еси́/ и при́сно явля́еши во утеше́ние и спасе́ние на́ше.

Просвети́вый не́бо со́лнцем и земли́ основа́ние утверди́вый Сло́вом Свои́м,/Зижди́тель вся́ческих во утро́бе Твое́й, Пречи́стая, не тесновмести́ся/ и от сосцу́ Твое́ю я́ко Младе́нец пита́шеся,/ нам же святу́ю ико́ну Твою́ исто́чник чуде́с дарова́, Преблага́я.

Просвети́ся Боже́ственною благода́тию оби́тель вели́каго проро́ка и Богови́дца Илии́,/ ико́ну Твою́, Богома́ти Влады́чице, в насле́дие себе́ прие́мши,/ сию́ у́бо и мы достодо́лжным поклоне́нием почита́ем/ и Тя, Предста́тельницу на́шу, в пе́снех немо́лчно ублажа́ем.

Ин кано́н

Из недр Оте́ческих низше́л еси́/ и несказа́нным истоща́нием ю́же по нам нищету́ восприя́л еси́ па́че естества́, Человеколю́бче,/ в верте́п всели́тися благоволи́л еси́, Го́споди,/ и я́ко Младе́нец сосцы́ пита́ешися, Зижди́тель и Госпо́дь.

Веко́в Зижди́тель пелена́ми повива́ется, я́ко Челове́к, и млеко́м пита́ется,/ И́же вся безме́рною кре́постию я́ко Бог содержа́в и манове́нием возводя́й.

Сла́ва: Еди́на Чи́стая пребыла́ еси́ и по Рождестве́,/ Еди́на то́кмо яви́лася еси́ безму́жная, млеко́м пита́ющая Сло́во О́тчее И́стинное,/ Ду́хом Святы́м прии́мшее ра́бий зрак по нам, Де́во Богоро́дице,/ Его́же, Боже́ственное чту́ще зра́ка подо́бие, почита́ем.

И ны́не: Я́ко но́сиши на ру́ку, Мари́е,/ и от сосцу́ пита́еши пита́ющаго вся́кое дыха́ние,/ Его́же, Богоро́дице, чту́ще, пропове́дуем,/ моли́ся Ему́, Чи́стая, о всех нас.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Моли́твы множа́йшия здесь, пред ико́ною Влады́чицы, возно́сятся,/ егда́ сия́ в правосла́вную Русь от Святы́я Горы́ и́ноками оби́тели Ильи́нския принесе́ся,/ ве́рным во утеше́ние и в ра́дость несконча́емую.

Моли́тву всяк принося́й Тебе́ с ве́рою и любо́вию/ пред пречи́стым о́бразом Твои́м, Богоро́дице Преблага́я,/ не неуслы́шан от Тебе́ оты́дет,/ всем бо вся блага́я да́руеши, я́ко Бо́га и Пита́тельнице Пита́теля вселе́нный.

Моли́твенно Тя сла́вим, Пречи́стая Млекопита́тельнице,/ и, с любо́вию припа́дающе к многоцеле́бному Твоему́ о́бразу, се́рдцем и усты́ сей целу́ем,/ ви́дяще в не́м зало́г благода́тный Твоего́ к нам ма́терняго благоволе́ния.

Моли́тися всегда́ усе́рдно жела́ние пода́ждь нам, Преблага́я Влады́чице,/ вся бо мо́жеши я́ко Ма́ти и Млекопита́тельница воплоти́вшагося Бо́га,/ Его́же ми́лостива нам сотвори́ всеси́льным предста́тельством Твои́м/ и не попусти́ до конца́ поги́бнути рабо́м Твои́м.

Ин кано́н

По́лный истощава́ется нас ра́ди,/ и прие́млет Безнача́льный от Тебе́ нача́ло, Дево Пренепоро́чная,/ и ви́дится Неви́димый, и Пита́яй вся́ческая млеко́м пита́ется, обнови́ти челове́ка промышля́я.

И́же, всея́ земли́ го́рстию содержа́й концы́,/ ка́ко ма́терними не́драми объе́млется,/ млеко́м же пита́ется от сосе́ц, насыща́я вся́ко живо́тно благоволе́ния,/ и бога́тый излия́ние обнищава́ет, воплоща́емь.

Сла́ва: Его́же тьмы а́нгельския и серафи́мская мно́жества ужаса́ются/ и разу́мная тварь трепе́щет,/ Того́ я́ко Младе́нца, Де́во, пита́еши,/ Его́же обра́зно на руку́ Твое́ю ви́дяще, всегда́ поклоня́емся.

И ны́не: Ада́мов Соде́тель от крове́й Твои́х чи́стых зи́ждется/ и млеко́м пита́ется, пита́яй вся́кое дыха́ние, Де́во Богоро́дице,/ те́мже я́ко Бо́жию Тя сла́вим Ма́терь.

Конда́к, глас 5:

Душ на́ших чу́вствия очи́стивше,/ у́зрим на ико́не та́инство пресла́вное,/ Творца́ Вселе́нныя и Го́спода вы́шних сил,/ во объя́тиих держи́ма и от сосцу́ Твое́ю я́ко Младе́нца пита́ема,/ и, со стра́хом и ра́достию покланя́ющеся Тебе́/ и ро́ждшемуся от Тебе́ Спа́су на́шему, воззове́м:/ ра́дуйся, Влады́чице, жи́зни на́шея Пита́тельнице.

И́кос:

Арха́нгельское целова́ние услы́шала еси́, Присноде́во,/ и в чистоте́ де́вственней Бо́га зачала́ и Христа́ безболе́зненно родила́ еси́,/ Его́же я́ко Младе́нца от сосцу́ Твое́ю млеко́м пита́ла еси́,/ А́нгелы и челове́ки вели́чием Твои́х доброде́телей удиви́ла еси́./ Те́мже ублажа́ем Тя, и́стинную Богоро́дицу, возвели́чившую на́ше естество́/ и милосе́рдием неизрече́нным на род христиа́нский призира́ющую./ Те́мже умиле́нно зове́м Ти:/ ра́дуйся, Влады́чице, Пита́тельнице жи́зни нашея.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.

От свята́го чудотво́рнаго о́браза Твоего́, Богоро́дице Де́во, Млекопита́тельнице Спа́са на́шего,/ струи́ исцеле́ний истека́ют и воня́ живо́тная благоуха́ет,/ е́юже ме́ртвость грехо́вная душ на́ших потребля́ется/ и плодоно́сие духо́вное подае́тся зову́щим:/ отце́в Бо́же, благослове́н еси́.

От Иерусали́ма на Святу́ю Го́ру Афо́нскую/ ико́на Твоя́ благода́тная, имену́емая Млекопита́тельница, Богома́ти Влады́чице, принесе́ся/ во изъявле́ние благоволе́ния Твоего́ к избра́нному Тобо́ю жре́бию на земли́,/ его́же насе́льницы гла́сы немо́лчными воспева́ют Сы́ну Твоему́:/ отце́в Бо́же, благослове́н еси́.

От глубины́ зол мно́гих к Тебе́ припа́даем, о Ма́ти, Млекопита́тельнице Сло́ва и Де́во,/ и мо́лимся приле́жно, Твою́ благода́тную по́мощь нам пода́ждь/ и не попусти́ поги́бнути нам до конца́,/ но спаси́ нас десни́цею Твое́ю и воздви́гни пе́ти всех Творцу́:/ отце́в Бо́же, благослове́н еси́.

Ин кано́н

Неизглаго́ланно, Чи́стая, Изба́вителя ро́ждши,/ несказа́нно дои́ла еси́, Де́ва пребы́вши,/ Его́же у́бо моли́ о пою́щих Тя и славосло́вящих во вся ве́ки.

Свята́я святы́х су́щи, Чи́стая, во храм святы́й возлюби́ла еси́ всели́тися/ и со А́нгелы, Де́во, бесе́дующи, пребыва́еши пресла́вне,/ с Небесе́ хлеб прие́млющи, Пита́тельнице жи́зни.

Сла́ва: Ка́ко дои́ши млеко́м Сы́на, Чи́стая,/ без отца́ питающаго вся́кое дыха́ние, Ма́ти Пречи́стая?/ Ка́ко на руку́ но́сиши вся Содержа́щего?/ Па́че ума́ чу́до Твое́, тем пое́м вели́чия Твоя́.

И ны́не: О чу́до пресла́вно!/ Ка́ко ражда́еши иску́са му́жеска не позна́вши?/ Ка́ко же пита́еши, Де́во Ма́ти, Пода́теля вои́стинну млека́ и Пита́теля всея́ тва́ри.

Песнь 8

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

Царя́ Небесе́ и земли́ воплоти́ла еси́, Богоро́дице,/ от де́вственных крове́й Твои́х багряни́цу пло́ти Ему́ истка́вши/ и я́ко Младе́нца от сосцу́ Твое́ю Того́ млекопита́вши,/ и́стиннаго Бо́га и Челове́ка, хвали́маго и превозноси́маго во вся ве́ки.

Цари́це на́ша Преблага́я и Засту́пнице, Пресвята́я Ма́ти Го́спода Вы́шних сил,/ с ни́ми моли́ Его́ приле́жно мир ми́рови дарова́ти,/ плодоно́сие земли́ и всем нам здра́вие и спасе́ние,/ да хва́лим и превозно́сим Его́ во вся ве́ки.

Ца́рство и Госпо́дство дарова́ Тебе́, Богоро́дице Мари́е, Сын Твой и Бог,/ ца́рствуеши бо с Ним ве́чно и покрыва́еши лю́ди, честно́ю Его́ кро́вию иску́пленный,/ и́же сла́вят многопе́тое и́мя Твое́ и с ве́рою поклоня́ются чудотво́рному Твоему́ о́бразу, Млекопита́тельнице,/ хва́ляще и превознося́ще просла́вльшаго Тя Го́спода во ве́ки.

Царя́ Небе́снаго безпло́тныя слу́ги ужаса́ет, Богоро́дице, та́йны Твоея́ глубина́,/ бе́сы же смуща́ет Твоя́ ико́на, имену́емая Млекопита́тельница,/ е́йже мы кла́няемся, чту́ще Тя, Бо́жию Ма́терь.

Ин кано́н

Еди́на нетле́нно рожда́еши,/ Еди́на дои́ши Младе́нца без бра́ка,/ Еди́на Созда́теля Твоего́ рожда́еши и Влады́ку, а́ще и Мать, и Раба́,/ Тя, Ма́ти Де́во, пое́м во ве́ки.

Бо́га ка́ко на руку́ но́сиши, рцы,/ и ка́ко дои́ши вся́ческая руко́ю Содержа́щего, о Де́во Всеблаже́нная?/ Аз, – рече, – чиста́ пребыва́ю и по рождестве́, Христа́ Бо́га ро́ждши,/ ада́мов долг и прама́терний отъе́мши.

Сла́ва: Ложесны́ Сло́во прия́ла еси, вся нося́щаго носи́ла еси́,/ ма́нием пита́ющаго Вселе́нную всю, Чи́стая, Емуже пое́м:/ Го́спода по́йте, дела́, и превозноси́те во вся ве́ки.

И ны́не: Со́лнце победися Твое́ю све́тлостию, Мари́е,/ Ты бо свети́лы Не́бо украси́вшего рука́ма объя́ла еси́/ и от Твое́ю сосцу́ пита́ла еси́.

Песнь 9

Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Вои́стинну никто́же, притека́яй к Тебе́ моли́твенно,/ тощ от Тебе́ исхо́дит, Пречи́стая Богоро́дице Де́во,/ всех бо Ты ми́луеши и ущедря́еши, я́ко любоблагоутро́бная Ма́ти, Млекопита́тельнице Спа́са на́шего,/ те́мже, вси ро́ди земни́и, благода́рно Тя велича́ем.

Вои́стинну зало́г благода́тный яви́ся свята́я Твоя́ и чудотво́рная ико́на,/ Богоро́дице, Млекопита́тельнице Преблага́я,/ на ню́же взира́юще, сия́ние Бо́жией благода́ти в ду́ши на́ша неви́димо прие́млем/ и по до́лгу пе́сньми хвале́бными Тя велича́ем.

Вои́стинну щит и покро́в оби́тели на́шей свята́я ико́на Твоя́ даде́ся,/ Преблага́я Де́во, Млекопита́тельнице,/ сию́ у́бо с любо́вию объе́млюще, се́рдцем и усты́ целу́ем/ и Тя, Благоде́тельницу на́шу, непреста́нно велича́ем.

Вои́стинну всех святы́х вы́шше еси́, Богоро́дице Де́во,/ ро́ждшая Святе́йшее Сло́во и млекопита́вшая я́ко Младе́нца воплоще́ннаго Бо́га,/ нас ра́ди Челове́ка бы́вша, да изба́вит па́дший род челове́ческий от поги́бели ве́чныя./ Те́мже Тя, я́ко Вино́вницу спасе́ния на́шего, немо́лчно велича́ем.

Ин кано́н

Дави́д, пра́отец Твой, воспе́ Тя дре́вле, Де́во Богоневе́сто,/ Дщерь глаго́ля Тя Царя́ Христа́,/ Его́же и роди́вши, ма́терски Младе́нца пита́ла еси́.

О Ча́до сладча́йшее!/ Ка́ко пита́ю Тя, пита́ющего?/ Ка́ко держу́ Тя, держа́щаго вся ма́нием?/ Ка́ко же пелена́ми повию́, повива́ющаго всю зе́млю мгло́ю? -/ вопия́ше Всечи́стая Влады́чица, Ю́же непреста́нно велича́ем.

Сла́ва: Но́сиши вся Нося́щаго и млеко́м пита́еши всем пи́щу Даю́щаго,/ ве́лие и стра́шное, е́же па́че ума́, Твое́ та́инство,/ ковче́же честна́го свяще́нства, Де́во Богоро́дице,/ те́мже Тя вси ублажа́ем.

И ны́не: Возвы́си рог благочести́вых и низложи́ ва́рваров шата́ния, Богороди́тельнице,/ необори́мо спаса́ющи сие́ ста́до Твое́,/ в не́мже вели́кое Твое́ и́мя и многосла́вное ве́рно велича́ется.

Свети́лен, глас 4:

Пречи́стаго о́браза Твоего́ явле́ние, Ма́ти Бо́жий, пра́зднуем све́тло,/ и́бо в нем познава́ем знаме́ние Твоего́ к нам благоволе́ния, Преблага́я,/ покрыва́еши и спаса́еши на Тя упова́ющий, Богоро́дице Всепе́тая и Неискусобра́чная.

На хвали́тех стихи́ры, глас 8.

Подо́бен: О, пресла́внаго чудесе́:

О, пресла́внаго чудесе́!/ ве́лия ра́дость Горе Афо́нстей свы́ше дарова́ся,/ свята́я и благода́ти прича́стная ико́на Твоя́, Богоро́дице,/ Млекопита́тельница имену́емая,/ от Иерусали́ма к ней принесе́нная,/ те́мже, о принесе́нии тоя́ ра́дующеся,/ Тебе́, Влады́чице, мо́лимся,/ спаси́ ду́ши на́ша, я́ко Милосе́рда.

О, пресла́внаго чудесе́!/ исто́чник исцеле́ний нам днесь яви́ся,/ ико́на Твоя́ многочуде́сная, Богоро́дице,/ Млекопита́тельница имену́емая,/ е́юже свята́я оби́тель вели́каго во проро́цех Илии́ духо́вно обогати́ся/ и чуде́с Твои́х благода́тию просла́вися,/ сию́ у́бо Боголе́пным поклоне́нием че́ствуем/ и со умиле́нием Тебе́ вопие́м:/ Правосла́вие утверди́ в нас непоколе́блемо, Влады́чице,/ и спаси́ ду́ши на́ша, я́ко Милосе́рда.

О, ра́дости неисчерпа́емыя!/ ди́вный святи́тель Са́вва зало́г ми́лостей Твои́х,/ ико́ну Твою́ святу́ю, Богоро́дице Млекопита́тельнице,/ от Иерусали́ма прино́сит/ и вся ны призыва́ет благогове́йно ей поклони́тися./ Сего́ ра́ди, с любо́вию к ней припа́дающе,/ моле́бно Тебе́ вопи́ем:/ от бед изба́ви нас, Влады́чице,/ и спаси́ ду́ши на́ша, я́ко Милосе́рда.

Сла́ва, и ны́не, глас 6:

Блажи́м Тя, вси ро́ди, Богоро́дице,/ я́ко ра́дости вся ны испо́лнила еси́/ явле́нием чудотво́рный Твое́я ико́ны Млекопита́тельницы/ и дарова́нием мно́гих от нея́ исцеле́ний,/ ду́ши бо и телеса́ врачу́еши/ и от вся́ких бед избавля́еши/ честна́го о́браза Твоего́ осене́нием,/ ему́же днесь поклоня́ющеся,/ усе́рдно мо́лим Тя:/ сподо́би, Влады́чице, Твоя́ рабы́/ в бу́дущем ве́це избра́нных ра́дости/ и в настоя́щем житии́ вели́кия Твоея́ ми́лости.

Славосло́вие вели́кое и отпу́ст.

На литурги́и слу́жба Богоро́дице.

На ма́лой вече́рни

На Го́споди, воззва́х: стихи́ры на 4, глас 4.

Подо́бен: Дал еси́ зна́мение:

Святи́тель Богоприя́тен,/ и па́стырь и́стинен,/ столп непревра́тен,/ основа́ние ве́ры неподви́жимо,/ благоче́стия степе́нь непоколе́блемый,/ забра́ло Це́ркве неруши́мо,/ святи́телем добро́та,/ и чуде́с исто́чник, Са́вво, был еси́:/ тем тя ублажа́ем бла́гочести́вно пе́сньми,/ и всесвяще́нную твою́ соверша́ем па́мять.

Со́лнца светле́йши/ просвеще́нная па́мять твоя́,/ ве́рным возсия́ лю́дем твои́м,/ Боже́ственными блиста́нии сия́ просвеща́ющи,/ Са́вво вседо́блий о́тче свяще́нне,/ и де́монов тму отгоня́щи. Те́мже тя ублажа́ем,/ и моле́бно воспева́ем,/ я́ко отечестволю́бца и предста́теля,/ и моли́твенника о душа́х на́ших.

Благоуха́ет ра́ка свята́го твоего́ те́ла,/ святи́телю Богодухнове́нне:/ Христо́во бо вселе́ние и благоуха́ние был еси́,/ и словесы́ твои́ми Богодохнове́нными/ е́реси злосмра́дныя низложи́в,/ лю́ди твоя́ облагоуха́л еси́./ и ны́не мо́лим тя:/ помяни́ вся, ве́рою тя помина́ющия,/ ко Го́споду дерзнове́ние я́ко стяжа́в, Богоно́се.

Сла́ва, глас 8. Самогла́сен:

Олядене́вшую зе́млю се́рдца люде́й твои́х/ словесы́ твои́ми возде́лав,/ и присноцвету́щия плоды́ благоче́стия в них израсти́л еси́ Бо́гу,/ и чистото́ю жития́ твоего́ ра́зумы их украси́л еси́,/ и на ре́вность подви́гл еси́ с собо́ю А́нгельскому мона́шествующих житию́,/ преоби́дети же привре́менная увеща́л еси́,/ Боже́ственная цевни́це, бо́дрое о́ко,/ па́стырей па́стырю,/ Са́вво блаже́нне о́тче свяще́нн,/ приими́ и нас, хва́лящих тя,/ Христу́ Богу моля́ся о душа́х на́ших.

И ны́не, Богоро́дичен: Кро́в тво́й, Богоро́дице:

На стихо́вне стихи́ры, глас 2.

Подо́бен: До́ме Евфра́фов:

Ум влады́ку/ на стра́сти поста́вив,/ плотолю́бием не порабо́тився,/ А́нгельски чи́стото́ю,/ Са́вво, пожи́л еси́.

Стих: Честна́ пред Го́сподем сме́рть преподо́бных Его́.

Влады́ка сый/ своеплеме́нным,/ апо́стол же па́ки и первосвяти́тель,/ лю́дем твои́м/ от Христа, о́тче, дарова́лся еси́.

Стих: Блаже́н му́ж боя́йся Го́спода, в за́поведех Его́ восхо́щет зело́.

Ста́до твое́/ слове́сное, о́тче,/ проти́вными нерасточа́емо,/ ко Христу́ моли́твами,/ Са́вво, соблюда́й.

Сла́ва, глас 4:

От пеле́н лю́бящия тя лю́ди твоя возлюби́л еси́,/ о ни́хже и до сме́рти труди́вся,/ и по сме́рти сих не оста́вил еси́,/ и́же це́ла и благоуха́юща от чуждестра́нствия прие́мше тя,/ и я́ко у́тварь ца́рскую иму́ще тя веселя́тся:/ украси́ бо сих престо́лом первосвяти́тельства,/ и ца́рствием удобри́в почи́л еси́,/ и ве́рою Тро́ическою утверди́л еси́./ И ны́не пе́нием пе́сней боголе́пных/ твою́ па́мять почита́ют моля́щеся:/, Богоно́се о́тче Са́вво всесвяще́нне,/ Христа́ Бо́га моли́, спасти́ся душа́м на́шим.

И ны́не, Богоро́дичен: Изба́ви нас от бед:

Тропа́рь, глас 3: Пути́, вводя́щаго в жи́знь: (зри на вели́цей вече́рни).

Сла́ва, и ны́не, Богоро́дичен: Тя, хода́тайствовавшую:

Та́же, ектениая, и отпу́ст.

На вели́цей вече́рни

Стихологису́ем: Бла́же́н му́ж: 1-й антифо́н. На Го́споди, воззва́х, поставим стихо́в 8, и пое́м стихи́ры, глас 4.

Подо́бен: Я́ко до́бля:

Отца́, су́щаго на Небесе́х, возлюби́в,/ земна́го оста́вил еси́,/ и пусты́ню пости́гл еси́./ отону́дуже поще́нием и моли́твами/ Ду́ха Свята́го зарю́, о́тче, восприе́м,/ во тме неве́дения лю́ди твоя́,/ па́че со́лнца прише́д просвети́л еси́,/ Христа́ пропове́дая во двою́ Существу́,/ нас ра́ди из Де́вы возсия́вшаго.

Апо́столов равнопропове́дателя,/ святи́телем единому́дренна,/ по́стником сподви́жника,/ па́стыря су́ща избра́нна,/ ми́лости же благоутро́бна пода́теля,/ досто́йно восхваля́ем тя, Са́вво о́тче Богому́дре,/ и Богото́чную реку́ уче́ний,/ беззако́нныя е́реси потопи́вшую.

Слове́с твои́х уче́нием/ Се́рбская Це́рковь украси́ся, и ны́не ра́дующися Правосла́вием,/ с Боже́ственными твои́ми ча́ды,/ свя́ще́нную твою́ па́мять све́тло почита́ет,/ Са́вво о́тче свяще́нне,/ святи́телем равноче́стне,/ и А́нгелом спредстоя́телю,/ и моли́твенниче о душа́х на́ших.

И́ны стихи́ры, глас 6.

Подо́бен: Все отло́жше:

Ве́сь освяще́н,/ Богоно́сец показа́лся еси́,/ ма́стию Боже́ственною свято́ю,/ Святы́м Ду́хом обложе́н,/ и све́тло всегда́ лику́я, преподо́бне,/ во Свята́я Святы́х входя́:/ и лю́ди твоя́, я́ко свя́щеннотаинник,/ спаси́тельным та́йнам научи́л еси́,/ я́ко вои́стинну иера́рх избра́нен,/ Са́вво о́тче Богоно́се,/ со дерзнове́нием моля́ся/ о душа́х на́ших.

От ю́ности облиста́ твое́ житие́/ доброде́телей луче́ю,/ святи́телю всеблаже́нне,/ и лю́ди твоя́ просвети́л еси́,/ пре́лести мрак разори́в вои́стинну./ И ны́не всели́лся еси́,/ иде́же Свет Невече́рний,/ иде́же А́нгел ликостоя́ния./ С ни́миже предстоя́, преподо́бне,/ помина́й нас, твою́ па́мять,/ Са́вво о́тче, соверша́ющих,/ со дерзнове́нием моля́ся/ о душа́х на́ших.

Ум твой манове́нии,/ су́щими в Боже́ственных, Богому́дре,/ ве́рою удобре́н,/ и све́тло обложе́н, пресла́вне, в ме́ртвеннем телеси́ и тле́нне,/ нетле́нию поучи́вся,/ и страсте́й вне́ быв,/ притяжа́л еси́ безпло́тных све́тлость,/ святи́телю Са́вво Богоприя́тне,/ све́тлый оте́чества твоего́ свети́льниче, и моли́твенниче дерзнове́нне/ о душа́х на́ших.

Сла́ва, глас 2:

Сла́вы у всех Царя́ Христа́ взыска́в,/ влады́чествующа отца́ оста́вив,/ горы́ Афо́на доше́л еси́,/ иде́же высоту́ благоро́дия в раба́ смире́ние измени́в,/ труды́ мно́гими те́ло удручи́л еси́,/ моли́твами же ду́шу просвети́л еси́,/ до́бре мона́шески пребы́в,/ а́нгельски в пусты́ни пожи́л еси́,/ апо́стольски в ми́ре научи́л еси́,/ боле́зньми поще́ния, и стра́нствия хожде́нием,/ му́ченическия по́двиги соверши́л еси́./ Кто изглаго́лет твоя́ доброде́тели,/ и́миже Небе́сная на земли́ притяжа́л еси́,/ Са́вво блаже́нне о́тче,/ па́стырю и учи́телю?/ Но я́ко ны́не предстоя́ Христу́ Богу,/ моли́ спасти́ся душа́м на́шим.

И ны́не, Богоро́дичен. Вхо́д, проки́мен дне́. Чте́ния 3.

На лити́и стихи́ры самогласны, глас 2:

Ум преподо́бен, я́ко при́сно к Бо́гу внима́ющ,/ свобо́ден же и самоизво́лен, я́ко страстьми́ непорабоще́н,/ ду́шу чи́сту поще́нием,/ се́рдце ми́лостивно и слеза́ми умиле́нно,/ те́ло же моли́твами к Бо́гу служе́бно,/ Са́вво блаже́нне, стяжа́л еси́,/ и сло́во му́дростно смире́нием украси́л еси́,/ ве́сь от ю́ности благонра́вием Христу́, о́тче, усво́ився,/ от Него́же первосвяти́тель, я́ко апо́стол,/ лю́дем твои́м дарова́лся еси́ досто́йно,/ я́же Ева́нгелием породи́л еси́,/ и Правосла́вием обогати́л еси́./ И ны́не предстоя́ Христу́ Бо́гу,/ от вся́ких бед сия́ изба́вити/ и спасти́ ду́ши на́ша, моли́ся.

Глас 4:

Ева́нгельских исто́чник,/ словесы́ твои́ми, святи́телю, люде́й твои́х сердца́ напои́л еси́,/ и се́мя благоче́стия в них моли́твами твои́ми возрасти́л еси́,/ и сия́ прине́сл еси́ Христу́ плод изря́ден./ Ны́не, я́ко предстоя́ у Него́ с ли́ки апо́стол и святи́тель,/ помина́й к Нему́ моли́твами твои́ми,/ сохрани́ти ны́ от вся́каго озлобле́ния,/ я́ко в мире соверша́ти па́мять твою́.

Се́рбская вели́кая Це́рковь,/ со свяще́нными и все́ми ве́рными пра́зднующи,/ в па́мять благу́ю па́стыря и учи́теля,/ и веселя́щися зове́т:/ ду́ши пра́ведных в руце́ Бо́жии,/ нам же дарова́ святы́я их мо́щи./ Прииди́те, ве́рнии, духо́вно возвесели́мся,/ успе́ние и моще́й пренесе́ние,/ о́ба пра́зднства святы́х почита́юще,/ и сих, я́ко цве́ты, хвала́ми увязе́м, реку́ще:/ ра́дуйся, ми́лостыни пода́телю, Симео́не блаже́нне,/ челове́че Небе́сный:/ ра́дуйся, чистоты́ оби́телище, Са́вво свяще́нне,/ земны́й А́нгеле:/ ра́дуйся, дво́ице свята́я,/ апо́стольски лю́ди своя́ научи́вшая/ и предте́кшая им пути́ живо́тнаго./ Но я́ко Тро́ице со А́нгелы предстоя́ще,/ мир земли́ на́шей испроси́те,/ и душа́м на́шим ве́лию ми́лость.

Сла́ва, глас 5:

Апо́столов сро́дныя чистоты́ жела́нием/ плотски́я любве́ измла́да избежа́в,/ те́ло же неудобопокори́вое брозда́ми воздержа́ния обузда́в,/ благопокори́во души́ повину́л еси́,/ по́мысла си́лою го́ршее лу́чшему покори́в,/ Боже́ственнаго Ду́ха сосу́д удосто́ився,/ пе́рвый седа́лище Се́рбское украси́л еси́,/ и лю́ди твоя́ Богому́дрию научи́л еси́./ И ны́не у Христа́ предстоя́ дерзнове́нно,/ Са́вво блаже́нне, святи́телю Богому́дре,/ приле́жно к Нему́ моли́ся,/ спасти́ ду́ши пою́щих святу́ю па́мять твою́.

И ны́не, Богоро́дичен, глас то́йже.

Ра́дуйся, две́ре Бо́жия:/ ра́дуйся, раю́, Де́во Чи́стая:/ ра́дуйся, стено́ и покро́ве:/ ра́дуйся, Пречи́стая;/ ра́дуйся, ве́рных забра́ло необори́мое;/ ра́дуйся, ти́хое приста́нище к Тебе́ прибега́ющих, Чи́стая.

На стихо́вне стихи́ры глас 2:

Ки́ими, я́ко венцы́, похвала́ми/ укра́сим Са́вву всеблаже́ннаго?/ и́же от восто́ка мы́сленнаго Христа́, со́лнце разу́мное возсия́,/ и лю́ди своя на за́паде Богоразу́мием научи́в просвети́,/ и я́ко ве́рный ра́б Влады́це своему́ в благоче́стии сих умно́жи./ Сего́ у́бо Еди́ный досто́йне,/безсме́ртныя сла́вы у́тварию украси́,/ Христо́с Человеколю́бец, име́яй ве́лию ми́лость.

Стих: Честна́ пред Го́сподем/ смерть преподо́бных Его́.

Ки́ими духо́вными пе́сньми похва́лим Са́вву свяще́ннаго?/ И́мже Но́ваго Заве́та Бо́жия, скрижа́ли Ева́нгелиа уразуме́хом,/ и́мже Правосла́вия ве́ру и́стинно позна́хом,/ в Тро́ице служи́ти Еди́ному Бо́гу,/ и Бо́жиих та́ин дале́че су́ще и учужде́ны,/ близ и самосоверши́теле бы́хом,/ зако́ном и обы́чаем христоимени́тии лю́дие бы́хом,/ царя́ венча́ем, и святи́теля соверша́ем,/ и все́ми благи́ми пра́вы украша́еми,/ Христа́ прославля́ем, иму́щаго ве́лию ми́лость.

Стих: Бла́же́н Му́ж боя́йся Го́спода,/ в за́поведех Его́ восхо́щет зело́.

Ки́ими пе́сненными добро́тами/ ублажи́м тя, Са́вво о́тче досточу́дне,/ жития́ бо све́тлостию в Бо́жий ра́зум приводя́ща вся?/ И чудесы́ ди́вными удивля́еши:/ я́коже бо Илия́ огнь дре́вле, гра́д с Небе́с моли́твою све́л еси́,/ бра́та же уме́рша оживи́л еси́,/ разсла́бленнаго воздви́гл еси́,/ мо́ре ры́бою дароноси́во тебе́ повину́л еси́,/ и слука́го го́рбом испра́вил еси́,/ мно́га чудеса́ о Бо́зе сотвори́л еси́./ Тем твою́ па́мять любо́вию пра́зднуем,/ Христа́ велича́юще, иму́щаго ве́лию ми́лость.

Сла́ва, глас 4:

Боже́ственнаго Ду́ха благода́тию собра́ннии веселя́щеся,/ Симео́на ло́зу благоче́стия ублажи́м,/ от нея́же грозд чистоты́ Са́вва всесвяще́нный израсте́./ Обои́х же пе́сньми похва́лим мы́сленныя Це́ркве свети́льники,/ Тро́ическия побо́рники, е́ресей низложи́тели,/ иере́ев ле́поту, мона́хов собра́ние,/ ни́щих же утеше́ние,/ вся́кою доброде́телию бо́гатыя,/ и́же у Христа́ ны́не предстоя́ще,/ апо́стольскими я́ко досто́йно/ и по́стническими венцы́ украша́еми./ К ни́мже моле́бно возопие́м:/ проси́те ми́ру ми́ра,/ и душа́м на́шим ве́лия ми́лости.

И ны́не, Богоро́дичен.

Тропа́рь, глас 3:

Пути, вводя́щаго в жизнь,/ наста́вник, и первопресто́льник, и учи́тель был еси́:/ пе́рвее бо прише́д, святи́телю Са́вво,/ оте́чество твое́ просвети́л еси́/ и, породи́в то́е Ду́хом Святы́м,/ я́ко дре́ва ма́слинная,/ в мы́сленнем раи́ насади́л еси́ всеосвяще́нная твоя́ ча́да./ Тем, я́ко апо́столом и святи́телем сопресто́льна/ чту́ще тя, мо́лим:/ моли́ Христа́ Бо́га/ дарова́ти нам ве́лию ми́лость.

На у́трени

На Бог Госпо́дь, тропа́рь, глас 8:

Правосла́вия наста́вниче,/ благоче́стия учи́телю и чистоты́,/ вселе́нныя свети́льниче,/ архиере́ев Богодухнове́нное удобре́ние,/ Са́вво прему́дре,/ уче́ньми твои́ми вся просвети́л еси́,/ цевни́це духо́вная./ Моли́ Христа Бо́га, спасти́ся душа́м на́шим. Два́жды.

Сла́ва, други́й тропа́рь, глас 3: Пути́, вводя́щаго: И ны́не, Богоро́дичен: Тя хода́тайствовавшую:

По 1-й стихоло́гии седа́лен, глас 8.

Подо́бен: Прему́дрости:

Лесть ми́ра, бога́тства и све́тлости,/ вся ели́ка ви́димых добро́т малоле́пия,/ и высо́кую любо́вь роди́теля преоби́дев,/ смире́нием же к нищете́ уча́щему, Влады́це Христу́ после́довал еси́./ От Него́же поще́нием и моли́твами, и́стинное бога́тство и су́щую све́тлость,/ Ца́рство недви́жимо, и во ве́ки благобы́тие, Са́вво о́тче, насле́довал еси́./ К Нему́же ны́не моли́ся, грехо́в оставле́ние пода́ти/ чту́щим любо́вию святу́ю твою́ па́мять.

Сла́ва, и ны́не, Богоро́дичен:

Небе́сную две́рь и киво́т, пресвяту́ю го́ру, све́тлый о́блак воспои́м,/ неопали́мую купину́, слове́сный ра́й, Е́вы воззва́ние,/ вселе́нныя всея́ вели́кое сокро́вище,/ я́ко спасе́ние в Ней соде́лася ми́ру/ и оставле́ние дре́вних согреше́ний. Сего́ ра́ди вопие́м Ей:/ моли́ся Сы́ну Твоему́, прегреше́ний оставле́ние дарова́ти/ благоче́стно покланя́ющимся Всесвято́му Рожде́ству́ Твоему́.

По 2-й стихоло́гии седа́лен, глас 3.

Подо́бен: Боже́ственныя ве́ры:

Доброде́телей де́ланием, Це́ркви вели́кое возсия́л еси́ со́лнце,/ и сия́нием слове́с твои́х, просвети́л еси́ ве́рных люде́й твои́х собо́ры,/ и потреби́л еси́ страсте́й очерне́ние,/ Святи́телю Са́вво, Христа Бо́га моли́/ дарова́ти нам ве́лию ми́лость.

Други́й седален.

Подо́бен: Красоте́ де́вства:

Столп и утвержде́ние Це́ркве Христо́вы, о́тче, быв,/ сию́ непоколеби́му от искуше́ний лука́ваго, прему́дре, соблю́л еси́:/ вся бо е́реси злоде́йства разори́л еси́/ и лю́ди твоя́ научи́л еси́/ Тро́ице Единосу́щней, во Еди́ном Божестве́ служи́ти./ Те́мже соше́дшеся, почита́ем тя, Са́вво Богому́дре.

Сла́ва, и ны́не, Богоро́дичен:

Я́ко невозде́ланная, Де́во, лоза́, красне́йший грозд прозябла́ еси́,/ источа́ющ нам вино́ спасе́ния, всех веселя́щее ду́ши же и телеса́./ Те́мже я́ко вину́ Тя до́брых блажа́ще при́сно,/ со А́нгелом вопие́м Ти:/ ра́дуйся, Благода́тная.

По полиеле́и седа́лен, глас 8.

Подо́бен: Прему́дрости:

Воздержа́нием житие́ украси́в, и житие́м му́дрости сло́во уверя́я,/ изря́ден к доброде́тели наказа́нием яви́лся еси́,/ от зако́на и проро́ков апо́стольски науча́я о Христе́ Иису́се,/ лю́ди твоя́ Ева́нгелием породи́л еси́/ и сия́ правосла́вия ве́рою возрасти́л еси́./ Те́мже и по конце́ неконча́ему благода́ть прия́л еси́/ и во гро́бе лежа́, неразруши́м пребыва́еши,/ Са́вво о́тче, святи́телю Богоблаже́нне./ Моли́ Христа́ Бо́га, согреше́ний проще́ние пода́ти/ чту́щим любо́вию святу́ю твою́ па́мять.

Сла́ва, и ны́не, Богоро́дичен. Подо́бен то́йже:

Я́ко Всенепоро́чная Неве́сто Творца́,/ я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Всепе́тая,/ беззако́ния мя су́ща скве́рное оби́телище, и де́монов игра́лище в ра́зуме бы́вша,/ потщи́ся от те́х злоде́йства мя изба́вити/ и све́тло жили́ще доброде́телей соверши́,/ Светоно́сная Нетле́нная: отжени́ о́блак страсте́й, и Вы́шняго прича́стия сподо́би/ и Све́та Невече́рняго, моли́твами Твои́ми.

Та́же степе́нна, 1-й антифо́н 4-го гласа. Проки́мен, глас 4: Свяще́нницы твои́ облеку́тся в пра́вду,/ и преподо́бнии Твои́ возра́дуются. Стих: Та́мо возращу́ рог Дави́дови, угото́вах свети́льник пома́занному Моему́. Всякое дыха́ние: Ева́нгелие Матфе́я, зача́ло 11. Псало́м 50.

Стихи́ра, глас 6:

Ду́ха Свята́го благода́ть/ в твои́х уста́х излия́ся, о́тче,/ и был еси́ па́стырь Христо́вы Це́ркве,/ учя́ слове́сныя о́вцы, лю́ди твоя́,/ ве́ровати в Тро́ицу, во Еди́но Божество́.

Кано́н Богоро́дицы на 6, и свята́го два кано́на, на 8. Кано́н Богоро́дицы. Глас 6.

Песнь 1

Ирмо́с: Волно́ю морско́ю Скры́вшаго дре́вле гони́теля мучи́теля,/ под земле́ю скры́ша спасе́нных о́троцы./ Но мы́, я́ко отрокови́цы,/ Го́сподеви пои́м,/ сла́вно бо просла́вися.

Ра́дуйся, отце́м благопохва́льная держа́во,/ ра́дуйся, пресла́вное украше́ние ро́да на́шего,/ ра́дуйся, исто́чниче спасе́ния,/ источа́ющая ми́лость ве́рно прося́щим у тебе́, Мари́е Неискусобра́чная.

Приими́ от уст скве́рных хвалу́, Де́во Пречи́стая, Богороди́тельнице Чи́стая,/ Ты бо еси́ ми́ру защище́ние и спасе́ние,/ приле́жно моли́, спасти́ся душа́м на́шим.

Хлеб жи́зни Христа́ родила́ еси́, Де́во, вся́ческих Творца́,/ к Нему́же моли́твами Твои́ми, Ма́ти,/ свободи́ от вся́каго греха́, бед и печа́лей вся́ких пою́щия Тя.

Кано́н свята́го Са́ввы, его́же краестро́чие: Са́вву похвали́ти ра́зума, Бо́же мой, да́руй ми́. Глас 2.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре, и наста́вльшему лю́ди, я́же изведе́ из рабо́ты еги́петския,/ я́ко просла́вися.

Свет от Све́та, Христе́ Бо́же, от Отца́ пре́жде век рожде́йся,/ и в нача́ле Сый со Отце́м и Ду́хом,/ мра́к души́ моея́ отгна́в, озари́ ум мой, молю́ся,/ я́ко да возмогу́ пе́ти Твоего́ уго́дника, Са́вву свя́ще́ннаго.

А́ще и челове́к еси́, о́тче, естество́м,/ но а́нгельски на земли́ пожи́л еси́,/ десна́го из ю́ности пути́ е́мься, целому́дрия рачи́тель быв,/ Ду́ха Свята́го честно́е оби́телище, Са́вво всесвяще́нне, яви́лся еси́.

Возлюби́в му́дрости нача́ло – стра́х Бо́жий,/ и за́поведем Его́ при́сно поуча́яся,/ дре́во насади́лся еси́ при исхо́дищих во́д духо́вных,/ от ни́хже, о́тче, напая́емь,/ плод Христу́, Са́вво, прине́слся еси́.

Богоро́дичен: Услы́ша Е́ва прама́ти, Чи́стая:/ в печа́лех роди́ши ча́да. Ты же, Де́во, услы́шала еси́:/ Госпо́дь с Тобо́ю, ра́дуйся!/ и ра́дованным гла́сом, Богоневе́сто, печа́ль прама́тере потреби́ла еси́.

Кано́н вторы́й свята́го Са́ввы: в не́мже о чудотворе́нии его́. Глас 8.

Песнь 1

Ирмо́с: Колесницегони́теля фарао́ня погрузи́,/ чудотворя́й иногда́/ Моисе́йский жезл, крестообра́зно порази́в,/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Похваля́ющу мне твое́ житие́, ко Христу́ твое́ дерзнове́ние я́ко стяжа́в,/ от бога́тых Ду́ха сокро́вищ/ ка́плю ра́зума, о́тче, да́ти ми́ молю́ся,/ я́ко да досто́йно похвали́ти тя возмогу́, хвалы́ досто́йнаго.

Из ко́рене блага́го ближа́йшая о́трасль прозя́бл еси́,/ Бо́жия ра́зума вода́ми напая́емь,/ и плод бла́гоуха́нен яви́лся еси́, житие́м твои́м из ю́ности, Богоно́се,/ сердца́ и ду́ши весели́ши пою́щих тя.

О прему́драго твоего́ к Богу ра́зума!/ И́мже прехи́трил еси́ отца́ твоего́,/ еле́ня лови́твою Христу́, о́тче, въеле́нив ду́шу твою́,/ его́же любо́вию жго́мый, ко исто́чнику безсме́ртия Тому́ прите́кл еси́.

Па́че ума́ су́щих любо́вию Небе́сных добро́т подви́жим,/ земны́х малоле́пия избежа́в, еле́ня тече́нием Христа́ взыска́л еси́,/ от него́же жела́емых, Са́вво о́тче, не погреши́л еси́.

Чистоты́ любо́вию одержи́м, благоро́дие души́ плотолю́бием не порабо́тив,/ тем ны́не чистоты́ венцы́ прие́мля, со А́нгелы у Христа́ весели́шися,/ к Нему́же о нас, Са́вво о́тче, моли́ся.

Богоро́дичен: Я́же от земли́ до небе́с дося́гшая Ле́ствица, показа́ся Иа́кову,/ Е́юже Бог Челове́ком сподо́бися бы́ти,/ Благослове́нная Пречи́стая,/ неизрече́нно чу́до, и недоумева́емо виде́ние./ Спаса́й к Тебе́ прибега́ющия.

Катава́сиа по уставу.

Песнь 3

Ирмо́с: Тобо́ю, Христе́, Небеса́ утвержда́ема вся,/ Сло́во Бо́жие и Си́ла,/ испове́дуют сла́ву неизрече́нну,/ и вседе́тельныя руки́ Твоея́ сотворе́ние:/ несть бо пресвя́т, ра́зве Тебе́, Го́споди.

Тебе́ вси, Всесвята́я, сла́вят чи́ни А́нгел,/ мы же, Богоро́дице, непреста́нно зове́м, и благода́рно пое́м:/ ра́дуйся, Влады́чице, еди́на по́моще всех и заступле́ние.

Кто по достоя́нию, Ма́ти, воспое́т Рождество́ Твоея́ утро́бы?/ Тварь ви́девши соверше́нное в Тебе́ та́инство, чуде́сно зовя́ше:/ несть у́бо, Влады́чице, па́че Тебе́ ино́го спасе́ния нам.

Приложи́ прося́щим от Тебе́ ми́лость, Ма́ти Де́во,/ держа́вною Твое́ю руко́ю су́щим в беда́х просте́рши, и в напа́стех предвари́вши/ Тя бо стяжа́хом вси́ избавле́ние в ско́рбех.

Ин

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́бося дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.

Презре́в ни́жняя, я́ко попира́емая, и любо́вь роди́телей преоби́дев,/ пустыннолю́бно Христа́ взыска́л еси́,/ Его́же мече́м любве́ уязви́в душу твою́,/ Того́ любя́, и Того́ ищя́ ненасыща́емыя красоты́.

О всех су́щих на земли́ неради́в,/ звере́й лови́твою у роди́телей испроси́вся, пусты́ню, о́тче, пости́гл еси́,/ иде́же мно́гим поще́нием, ско́рым же бде́нием/ и моли́твами, душегуби́тельныя зве́ри, стра́сти умертви́л еси́.

Христа́ нас ра́ди смири́вшагося во́лею до ра́бия о́браза, возлюби́в смире́ние,/ и́мже высо́к быв, го́рдаго смири́л еси́,/ и во пло́ти мно́гим воздержа́нием Тро́ицы дом благооби́телен, Са́вво свяще́нне, удосто́ился еси́.

Богоро́дичен: Во ине́х жена́х ма́ти, до́ндеже Де́ва не позна́ся,/ ни ма́ти по рождестве́ де́вствовати сподо́бися,/ на тебе́ же, Де́во Богома́ти, обоя́ сбы́шася./ Тем весе́лием ду́ха воспева́ю:/ несть непоро́чны па́че Тебе́, Влады́чице.

Ин

Ирмо́с: Утвержде́й в нача́ле небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.

На го́ру ра́зума доброде́телей возше́д,/ в чу́вственней же горе́ Афо́н, я́ко ина́го Исаа́ка подо́бно сама́го себе́ возве́л еси́,/ иде́же я́ко всесожже́ния овча́ се́рдце твое́ мы́сленно поже́рл еси́.

Свети́льник твою́ ду́шу слеза́ми украша́я, ра́но ко Христу́ у́тренюя,/ рук же просте́ртием в моли́твах Амали́ка те́ло умертви́л еси́,/ и на го́ру безстра́стия возше́л еси́.

Безстра́стия любо́вию пострека́емь, пло́тская взыгра́ния изсуши́л еси́,/ ду́шу же твою́ Боже́ственными сия́нии просвети́в,/ и нам у́бо свет разу́мный, Са́вво о́тче, улучи́ти, моли́ся.

Ю́ности цве́т гла́дом увяди́в, воздержа́нием у́ды умертви́в,/ поще́нием те́ла отве́рглся еси́,/ бде́нием и моли́твами возмога́я,/ о Го́споде же любо́вию верха́ доброде́телей, Са́вво, дости́гл еси́.

Благоро́дием высо́к, и доброду́шием изя́щен,/ ра́зума му́дростию удивле́н бы́л еси́,/ цве́т я́ко прекра́сный чисто́тою сия́я,/ и све́тлым смире́нием, Са́вво о́тче, украси́лся еси́.

Богоро́дичен: Ма́ти Бо́жия Пречи́стая, Бла́гослове́нная и Всенепоро́чная,/ души́ моея́ стру́пы исцели́,/ и стра́сти пло́тския отжени́,/ и свободи́ ум мой от вся́каго вре́да,/ и от вра́жия мя напа́сти изми́, Влады́чице.

Седа́лен, глас 8

Подо́бен: Прему́дрости:

Па́влово насажде́ние, и Аполло́сово прие́мый напое́ние,/ и ва́шея ве́ры насажде́ние, и уче́нием напое́ние,/ вся возраща́яй Бог прия́л есть./ Люде́й ва́ших бла́гоче́стия ве́рою, моли́твами ва́шими возрасти́в умно́жи,/ и от Того́ я́ко ве́рнии раби́ и де́латели разу́мнии,/ трудо́в возме́здия досто́йно прия́ли есте́,/ Симео́не преподо́бне, Са́вво свяще́нне, Богоно́снии отцы́,/ па́стырие и учи́телие,/ Первопа́стыря и Учи́теля Христа́ моли́те,/ ста́до ва́ше в ми́ре сохрани́ти, и спасти́ ду́ши на́ша.

Сла́ва, и ны́не, Богоро́дичен:

О тебе́ ра́дуется, Благода́тная, вся́кая тварь,/ А́нгельский собо́р и челове́ческий ро́д,/ освя́ще́нный хра́ме, и раю́ слове́сный,/ де́вственная похвало́, из Нея́же Бог воплоти́ся,/ и Младе́нец бы́сть, пре́жде век Сый Бог наш:/ ложесна́ бо Твоя́ престо́л сотвори́,/ и чре́во Твое́ простра́ннее Небе́с соде́ла./ О Тебе́ ра́дуется, Благода́тная, вся́кая тварь, сла́ва Тебе́.

Песнь 4

Ирмо́с: На Кресте́ Твое́ Боже́ственное истоща́ние/ прови́дя Авваку́м, ужа́сся вопия́ше:/ Ты си́льных пресе́кл еси́ держа́ву, Бла́же,/ приобща́яся су́щим во а́де, я́ко Всеси́лен.

Ты еси́ мира заступле́ние, Богоро́дице Чи́стая, и спасе́ние всех./ Те́мже Тя гла́сы, Влады́чице, вся коле́на Богоро́дицу и́стинно пропове́дуем.

Стена́ еси́ и утвержде́ние и наде́жда ве́рных, и столп спасе́ния,/ я́же на ны́ нахо́ды низложи́, Пресвята́я Чи́стая,/ наде́жды бо вся на Тя возложи́хом.

Ра́дуйся, гра́де одушевле́нный,/ ра́дуйся, пала́то и престо́ле Царя́ Христа́./ Ра́дуйся, преподо́бных похвало́ и святи́телей удобре́ние./ Ра́дуйся, всех к Бо́гу мо́сте./ Ра́дуйся, ми́ра ра́досте.

Ин

Ирмо́с: Пою́ Тя, слу́хом бо, Го́споди, услы́шах и ужасо́хся:/ до мене́ бо и́деши, мене́ ищя́ заблу́ждшаго./ Тем мно́гое Твое́ снизхожде́ние, е́же на мя, прославля́ю,/ Многоми́лостиве.

А́нгельскому житию́ ревнова́в,/ влады́чествующа отца́ оста́вив, горы́ Афо́на дости́гл еси́./ Отону́дуже поще́нием и моли́твами к мы́сленному Восто́ку Христу́ восте́кл еси́,/ и от Того́ со́лнце за́падным возсия́л еси́.

Любому́дрием мо́ре жите́йское испыта́в, и позна́в су́етства глубину́,/ бога́тство, и сие́ я́ко гни́ло отве́ргл еси́,/ словеса́ же Христо́ва избра́в, в сосу́де се́рдца твоего́ скры́л еси́,/ и о́ная я́ко че́стная изво́лил еси́ храни́ти.

И́же в гора́х тесноживу́щия босы́ми нога́ми обходя́, преподо́бне,/ и сих те́плыми хле́бы насыща́я, те́плыя их приима́л еси́ моли́твы/ и от всех ко Христу́ поуче́ньми, восхожде́ния в се́рдцы твое́м полага́л еси́.

Ты ро́ждшаго тя пло́тию Ду́хом породи́л еси́,/ увеща́в его́ влады́чество све́рстницу же и ча́да оста́вити,/ и́же я́ко Авраа́м из оте́чества на зе́млю чу́жду,/ к тебе́, о́тче, в пусты́ню пресе́льник и спо́стник бы́сть.

Богоро́дичен: И́стинно Тя сень свиде́тельствова, многоразли́чно образу́юща,/ я́ве показу́ющи воплоще́ннаго из Тебе́ Еди́наго от Тро́ицы, Пречи́стая,/ неизме́нно, Богома́ти, Влады́чице, и мир обно́вльша.

Ин

Ирмо́с: Ты моя́ кре́пость, Го́споди,/ ты моя́ и си́ла,/ Ты мой Бог, ты мое́ ра́дование,/ не оста́вль не́дра О́тча,/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Многочи́сленное зла́то со отце́м разда́вше,/ о́ба я́ко му́дрии домовлады́ки тле́нными нетле́нная измени́вше,/ я́же ны́не восприе́млюще ра́дуетеся,/ и нас ко Христу́ моли́твами ва́шими пою́щих вы́ спаса́йте.

Челове́ка отца́ призва́л еси́,/ А́нгела же ко Христу́ предпусти́л еси́,/ его́же посто́м истая́вшия святы́я мо́щи, мироточе́ние моли́твами твои́ми устро́ил еси́,/ в кра́йнее извеще́ние се́рдца твоего́ проше́ния.

Суему́дренный Го́тфин, братовоскормле́ние ва́ше и стра́х Бо́жий и кля́тву преоби́дев,/ потща́ся оте́чество твое́ озло́бити,/ его́же такова́го умы́сла премени́ти не возмо́г,/ Бо́жию суду́ того́ пре́дал еси́.

Поху́лен и́же му́др о себе, я́ко и сей несмы́сленный,/ благосове́тующа тя не прие́мь, Бо́жию месть на ся́ привлече́:/ ме́чь бо, его́же на па́ству твою́, о́тче, наостри́,/ А́нгелом всеконе́чно в се́рдце свое́ прия́ше.

Просвеща́еми бла́года́тию Креста́ Твоего́ святи́и Твои́, Влады́ко,/ страну́ люде́й свои́х Тебе́ ве́рою приведо́ша,/ сын со отце́м, Са́вва и Симео́н Богому́дреннии,/ и́хже моли́твами спаси́ от пога́ных нахо́да пою́щия:/ си́ле Твое́й сла́ва, Милосе́рде.

Богоро́дичен: Но́в я́коже Моисе́й яви́вся, устро́ил еси́ я́ко о́н ски́нию в пусты́ни,/ в горе́ святе́й огра́ду, ю́же превозрасти́л еси́ трудо́в твоих по́ты,/ и возложи́л еси́ Бо́жии Ма́тери,/ ю́же и сохраня́й ко Го́споду с Не́ю моли́твами.

Песнь 5

Ирмо́с: К Тебе́ у́тренюю,/ милосе́рдия ра́ди Себе́ истощи́вшему непрело́жно,/ и до страсте́й безстра́стно прекло́ншемуся, Сло́ве Бо́жий,/ мир пода́ждь ми́ па́дшему, Человеколю́бче.

Ра́дуйся, стено́ ве́рных, держа́вная хода́таице Пречи́стая./ Ра́дуйся, горо́ свята́я Всепе́тая./ Ра́дуйся, ле́ствице одушевле́нная, Влады́чице./ Ра́дуйся, всех ра́досте, и по́моще безпомо́щных,/ и покро́ве вседу́шно притека́ющих к Тебе́.

Велегла́сно взыва́я проро́ческий лик, пропове́даше ужа́сное рождества́ Твоего́ та́инство:/ я́ко еди́на име́ла еси́ Го́спода в ложесна́х Свои́х,/ И́же и по рождестве́ па́ки соблю́д Тя Де́ву,/ я́коже и пре́жде рождества́ сохрани́.

Кто возмо́жет Твоя́, Чи́стая, я́же па́че ума́,/ несказа́нная та́инства челове́ков изрещи́, Пречи́стая?/ Ты бо еди́на всех превы́шши еси́,/ Светоно́сная и Боже́ственная се́не, Свеще́ и Престо́ле Бо́жий, Де́во Мари́е,/ из Нея́же нам возсия́ Садоде́латель жи́зни.

Ин

Ирмо́с: Просвеще́ние во тме лежа́щих,/ спасе́ние отча́янных, Христе́ Спа́се мой,/ к тебе́ у́тренюю, Царю́ мира,/ просвети́ мя сия́нием Твои́м:/ ино́го бо, ра́зве Тебе́, бо́га не зна́ю.

Ра́зума твоего́ ре́вность Предве́дый ви́дев,/ пе́рваго тя па́стыря на за́паде лю́дем Свои́м устро́и,/ и́мже мы́сленнаго Восто́ка, Того́ вопло́щшася Сло́ва Христа́, пропове́дал еси́,/ ра́вна же Отцу́, и Ду́ху Свято́му сопресто́льна.

Авситиди́йскаго И́ова нра́вом вои́стинну, о́тче, подо́бяся,/ дом твой отве́рст име́л еси́,/ и язы́ка дверь па́че ме́да сла́достию а́лчущим спасе́ние отверза́я,/ ду́ши испо́лнил еси́ слове́с А́нгельския пи́щи.

Зако́ном Боже́ственным после́дуя, законополо́жник яви́лся еси́,/ архиере́й Богоприя́тен, пра́вило изве́стнейшее,/ наста́вник заблу́ждших, свети́льник всесве́тел,/ оте́чество твое́ просвеща́я, Са́вво Богому́дре.

Богоро́дичен: Упра́ви ум мой, Влады́чице, тружда́ющийся в пучине скорбей,/ и потопля́емый наше́ствием тлетво́рных страсте́й,/ мене́ же спаси́, Богоро́дице, к Тебе́ прибега́ющаго,/ ины́я бо по́мощи, Чи́стая, ра́зве Тебе́, не зна́ю.

Ин

Ирмо́с: Вску́ю мя отринул еси́/ от лица́ Твоего́, Све́те Незаходи́мый,/ и покры́ла мя есть чужда́я тма окая́ннаго?/ Но обрати́ мя, и к све́ту за́поведей Твои́х/ пути́ моя́ напра́ви, молю́ся.

Я́ко Госпо́день учени́к, Влады́ки твоего́ благоутро́бие, о́тче, подража́я,/ разсла́бленнаго в це́рковь несл еси́./ Врачева́нием же, ко Христу́ моли́твами и слеза́ми,/ обно́щно прилежа́в ему́, здра́ва от земли́ воздви́гл еси́.

Ста́рцу свято́му, твоему́ отцу́ в животе́ его́ послушли́в был еси́,/ у́мер же о́н, и во гро́бе тебе́ еди́наго послу́ша:/ ми́ро бо его́ мно́гими проси́мо и не улучи́мо,/ твои́м, о́тче, посла́нием оби́льно лю́дем свои́м сие́ источи́.

Други́й Илия́ ты яви́лся еси́,/ град с Небесе́ моли́твою, я́коже он огнь, свел еси́,/ и сим царя́ удиви́в ужаси́л еси́:/ в сла́ву Бо́жию и проти́вным на удивле́ние сия́, о́тче, сотвори́л еси́,/ о всех возмога́ющу тя Христу́ Бо́гу на́шему.

Сопоста́т царь У́грин, на оте́чество твое́ подви́гся,/ твои́ми словесы́ свире́пства премени́ся,/ дивя́ся су́щей в тебе́ свя́тости, умили́вся возврати́ся,/ гра́дное же ка́мение лобза́я, глаго́лаше:/ ди́вен Бог во святы́х Свои́х.

Ка́мене краеуго́льна, иму́ща в се́рдцы Христа́ утвержде́ние,/ пре́лести утвержде́ние си́льно испрове́ргша, Це́ркви же необори́мое основа́ние яви́стеся,/ Ю́же сохраня́йте непоколеби́му, Са́вво свяще́нне и Симео́не Богоно́се, моли́твами ва́шими.

Богоро́дичен: Ко Христу́ Бо́гу вхо́да жела́юще, предводя́щую Тя взыска́вше,/ су́щей Ти́ Небесней Бо́жией Це́ркви,/ храм Твоего́ вхо́да на земли́ Твои́ уго́дницы, Богома́ти, воздвиго́ша,/ в не́мже не преста́й даю́щи по́мощь сла́вящим Тя.

Песнь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.

Тебе́ припа́даю, Пречи́стая Богоро́дице Блага́я,/ Твои́ми моли́твами умоли́ вся́кия бла́гости Пода́теля,/ Сы́на Твоего́ и Го́спода,/ изба́вити мир от вся́каго гне́ва.

Во глубину́ отве́ржен бых бу́ри лю́тыя,/ мо́рю волну́ющу мя от безме́рных прегреше́ний мои́х и бе́дных./ Бу́рю утоли́, и тишину́ пода́ждь се́рдцу моему́.

Ты утеше́ние и прибе́жище, Чи́стая, рабо́м Твои́м еси́:/ неоску́дно твори́, е́же к Бо́гу, умиле́нное моле́ние/ о и́же ве́рою и любо́вию моля́щих Тя.

Ин

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Мра́ком е́реси покрыва́ема земля́ люде́й твои́х иногда́/ ны́не правосла́вия све́том светле́ется,/ ве́тхия пре́лести изме́ншися, но́вый Изра́иль, и лю́дие Бо́жии бы́вше,/ на и́стинный зако́н тобо́ю, Богоно́се, наставля́еми.

Апо́стол я́ко от Христа посла́ся,/ и сло́вом Ева́нгелиа науча́я, су́щия в нощи́ неве́дения просвети́л еси́;/ исцеле́ния же творя́, и чудеса́ ве́лия,/ и си́ми удивля́я, привле́кл еси́ к Нему́ ве́рою люде́й твои́х исполне́ния.

Бо́льших ищя́, лу́чшая жела́я,/ Иерусали́ма у́бо, Еги́пта же и Сина́я доше́д,/ и вся та́мо су́щия в пусты́нях обходя́, оби́льною руко́ю на всех призира́я,/ и́хже моли́твами оте́чество твое́, Са́вво, обогати́л еси́.

Богоро́дичен: Обветша́вшия ны го́рьким дре́ва пре́жде вкуше́нием/ и па́дшия поползнове́нием, Пречи́стая, обнови́ла еси́,/ Зижди́теля ро́ждши, Сло́во Ипоста́сное,/ Де́во Ма́ти Влады́чице.

Ин.

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зо́л душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Пресве́тлыя Тро́ицы пе́рвее же́ртвенник се́рдце твое́ сотвори́л еси́/ и це́рковь Бо́гу Спа́су во оте́честве твое́м воздви́гл еси́,/ в не́йже, о́тче, первопресто́лен равноапо́стольный учи́тель от Христа́ удосто́ился еси́/ и сло́во жи́зни лю́дем твои́м источи́л еси́.

Бра́та твоего́ уме́рша слы́шав,/ А́нгелу, ко Христу́ дерзнове́нием, ду́шу его́ возврати́ти повеле́л еси́,/ и сего́ вдушевле́нна прише́д обре́л еси́./ Оле ве́ры! Оле дерзнове́ния!/ Чу́до, о́тче, вои́стинну ужа́сно:/ зе́мен сый, Небе́сному повеле́л еси́.

Мы́сленное мо́ре страсте́й успи́в поще́нием,/ чу́вственное же бе́здну ми́лости призва́в, свире́по волну́емо сло́вом укроти́л еси́,/ кора́бль же спасл от потопле́ния, и в не́м су́щия в ве́ру приве́л еси́.

Его́же вся боя́тся и трепе́щут, я́ко Творца́ и Го́спода,/ Иису́са Христа́ всего́ стяжа́в,/ Христа́ в се́рдцы твое́м нося́, Христа́ в себе́ име́я глаго́люща,/ мо́рю и ве́тром Того́ си́лою запрети́л еси́,/ и вся, о́тче, повину́шася тебе́, я́ко Того́ изя́щну ученику́.

Тро́ичен: Пренача́льное Естество́ и Триипоста́сное Еди́нство:/ О́тче и Сы́не и Ду́ше Пресвяты́й,/ Све́те и Животе́ Богонача́льный,/ приими́ моли́твенники о нас Твоя́ уго́дники,/ спаса́й Це́ркви Твоя́, в Тя ве́рующия,/ и сподо́би ны́ в ми́ре сла́вити Твою́ держа́ву.

Богоро́дичен: Ви́дети жела́юще Твоего́ Сы́на и Бо́га, Небе́снаго сла́ву Ца́рствия, Богоро́дице,/ Са́вва и Симео́н преподо́бнии, сла́ву земна́го ца́рствия оста́вивше,/ и Сего́ Крест на ра́му взе́мше, после́доваша/ живоно́сным Его́ и Боже́ственным стопа́м.

Конда́к, глас 8.

Подо́бен: Взбра́нной:

Я́ко первосвяти́теля вели́каго и апо́столов соо́бщника,/ Це́рковь прославля́ет тя люде́й твои́х, преподо́бне,/ но я́ко име́я дерзнове́ние ко Христу́ Бо́гу,/ моли́твами твои́ми от вся́ких нас бед спаса́й, да зове́м ти:/ ра́дуйся, о́тче Са́вво Богому́дре.

И́кос:

Житие́м я́ко А́нгел на земли́, о́тче, яви́лся еси́,/ челове́к бо сый естество́м, и безпло́тных чистоте́ уподо́бился еси́./ Те́мже и похва́льная удивля́еши нас зва́ти такова́я:/ ра́дуйся, отца́ благочести́ва прозябе́ние,/ и ма́тере благогове́йны прижи́тие./ Ра́дуйся, моли́твами Богода́нне, и да́вшему тя измла́да после́довав./ Ра́дуйся, поще́ния све́тлый ра́сте, чистото́ю благоуха́нне./ Ра́дуйся, целому́дрия сто́лпе,/ и́мже вся́кая стра́сть попра́ся./ Ра́дуйся, смире́нием высо́кий,/ де́монов горды́ню низложи́вый./ Ра́дуйся, свети́льниче многосве́тлый,/ возведы́й ко Христу́ лю́ди твоя́./ Ра́дуйся, Це́рквей воздви́жение и святи́телем освяще́ние./ Ра́дуйся, сиро́т пита́телю и ни́щим пода́телю благоутро́бный./ Ра́дуйся, апо́столов равноре́вностне Ева́нгельским науче́нием./ Ра́дуйся, му́чеником сострада́льне стра́нствия хожде́нием./ Ра́дуйся, чудоде́лателю ди́вных о Бо́зе и ужа́сных чуде́с./ Ра́дуйся, похвало́ оте́честву твоему́,/ спаса́й пою́щих тя./ Ра́дуйся, о́тче Са́вво Богому́дре.

Песнь 7

Ирмо́с: О́троцы в Вавило́не/ пе́щнаго пла́мене не убоя́шася,/ но посреде́ пла́мене вве́ржени, ороша́еми поя́ху:/ благослове́н еси́, Го́споди, Бо́же оте́ц на́ших.

Не преста́й, Де́во Ма́ти, моля́щи Го́спода/ изба́витися нам от бед и скорбе́й, Влады́чице,/ да усе́рдно пое́м Влады́це:/ Бо́же оте́ц наших, благослове́н еси́.

Страша́т мя и смуща́ют прегреше́ний мои́х во́лны,/ но Ты, Блага́я Пречи́стая, проще́ние испроси́ в час испыта́ния,/ спасе́ние подаю́щи.

И ражда́еши и де́вствуеши,/ и по рождестве́ пребыва́еши, я́коже пре́жде рождества́,/ Чи́стая Богоро́дице:/ не опали́шася бо ложесна́ Твоя́, Благослове́нная Пречи́стая,/ Предста́тельнице ро́да на́шего.

Ин

Ирмо́с: Богопроти́вное веле́ние/ беззако́ннующаго мучи́теля, высо́к пла́мень вознесло́ есть./ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Жития́ твоего́ Богоуго́дное зря́ исправле́ние,/ прове́дец, я́ко всех Бог, избра́в тебе́, сочта́ апо́стольскому ли́ку первосвяти́тель Богоно́се,/ и благода́тию просвети́ се́рдце твое́;/ ты же лю́ди твоя́ Тому́ просвети́л еси́ вопи́ти:/ бла́гослове́н Бог и препросла́влен.

Ева́нгельских слове́с луча́ми лю́ди твоя́ разу́мно озари́в,/ от недосто́йнаго в досто́йное изве́л еси́/ и изсо́хшая их сердца́ злове́рием, о Бо́зе ве́рою плодови́та,/ Са́вво о́тче, возде́лал еси́.

Ми́лостив у́бо и кро́ток, преподо́бен, и беззло́бив,/ тих же и уве́тлив яви́лся еси́,/ я́коже Па́вел о Христе́ похваля́я рече́:/ тако́в нам подоба́ше Архиере́й./ Его́же моли́, Са́вво архиере́ю, в ми́ре сохрани́ти ста́до твое́.

Богоро́дичен: Обновля́ются в Тебе́ зако́ны естества́:/ вы́ше естества́ бо, естество́м Непости́жнаго Бо́га, Де́во, Емману́ила пресла́вно, Чи́стая, родила́ еси́/ в на́ше ве́рных возрожде́ние.

Ин

Ирмо́с: Бо́жия снизхожде́ния огнь устыде́ся в Вавило́не иногда́./ Сего́ ра́ди о́троцы в пещи́ ра́дованною ного́ю,/ я́ко во цве́тнице лику́юще, поя́ху:/ благослове́н еси́, Бо́же оте́ц на́ших.

Христа́ нас ра́ди пло́тию на земли́ во́лею стра́нствовавша, любо́вию, о́тче, побежда́емь,/ престо́ла высоту́ во́лею оста́вив,/ восто́ку же и за́паду и глубина́м морски́м я́ко со́лнце обхо́дно стра́нствовал еси́.

Я́ко Христо́в учени́к, и нача́льник от Него́ поста́влен,/ оте́чествия чужди́х обходя́, прие́млем сый от них и люби́м,/ удивле́н же, о́тче, и дароноси́м:/ покаря́ше бо вся су́щая в тебе́ Бо́жия любо́вь, кро́тость же и беззло́бие.

И́же бездну Сотвори́вый веле́нием,/ Того́ ученика́ сия́ позна́вши тя,/ в боле́зни твое́й тебе́, о́тче, послужи́,/ ры́бу вели́ку, я́ко рука́ми, волно́ю взе́мши,/ и в корабли́ тебе́ возлежа́щу, в твои́ ру́це предложи́.

В корабли́ пучи́ну с тобо́ю плову́щии,/ мо́ре повину́вшееся тебе́ и дароноси́мо ви́девше,/ у́жасом, о́тче, одержи́ми бы́вше,/ от безду́шнаго научи́вшеся в Бо́жий ра́зум, умили́вшеся поклони́шася твое́й свя́тости.

Твоего́ се́рдца жела́ние исполня́я, его́же ра́ди по земли́ стра́нствовал еси́,/ в чужестра́нственнем гра́де Бог дух тво́й прие́млет,/ и́хже в животе́ чудесы́, и по сме́рти пе́рстию гро́ба и гро́бом удиви́л еси́.

Богоро́дичен: Стопа́м после́дуя собо́р преподо́бных из чре́ва Твоего́ неизрече́нно Возсия́вшему/ неизглаго́ланным рождество́м, Дево Ма́ти, с Небесными ли́ки сочта́ся./ С ни́миже мо́лимся:/ испроси́ нам, чту́щим Тя, грехо́в оставле́ние.

Песнь 8

Ирмо́с: За зако́ны оте́ческия/ блаже́ннии в Вавило́не ю́ноши предбе́дствующе,/ царю́ющаго оплева́ша повеле́ние безу́мно/ и совоку́плени, и́мже не свари́шася, огне́м,/ Держа́вствующему досто́йную воспева́ху песнь:/ Го́спода по́йте, дела́, и превозноси́те во вся ве́ки.

Ты прибе́жище на́ше еси́, и утеше́ние всех, Пречи́стая Де́во:/ се бо И́же всех Госпо́дь ро́ждся из ложе́сн Твои́х,/ Де́ву Тя соблюде́ по рожде́стве́./ Его́же вси́ бла́гослови́м устна́ми недосто́йными/ и превозно́сим во ве́ки.

О ки́й язы́к дово́лен вели́чия Твоя́ пове́дати, Чи́стая!/ Се бо все свободи́ся земноро́дных мно́жество от вся́каго осужде́ния пе́рваго/ и Тебе́ вопию́ще пое́т, источа́юще пе́ния/ и превознося́ще Пречи́стое Твое́ Рожде́ство́.

Ми́лостива испроси́ нам и благопреме́нна Сы́на Твоего́ и Бо́га бы́ти, Чи́стая,/ ны́не рабо́м Твои́м,/ и соблюди́ нас от вся́каго прило́га сопроти́вна,/ и ага́рянскую горды́ню низложи́ вско́ре,/ да Тя пое́м во вся ве́ки.

Ин

Ирмо́с: Свещено́сцы душе́ю, све́тлии па́че сне́га пресия́юще,/ преподо́бнии о́троцы посреде́ пла́мене не опали́шася:/ вся бо вку́пе, ели́ка под тва́рию,/ к Бо́жии пе́сни себе́ созыва́юще, с ра́достию поя́ху:/ по́йте, дела́ Госпо́дня, Го́спода.

Во святы́х почива́ющаго Свята́го Ду́ха благода́тию, Са́вво святи́телю,/ лю́дем твои́м пропове́дал еси́, Сына собезнача́льна Отцу́ и сопресто́льна,/ Челове́ка бы́вша, челове́ком спасе́ние содева́юща пою́щим:/ дела́ вся, Го́спода по́йте и превозноси́те Его́ во ве́ки.

До́бре тече́ние соверши́в, к жела́емому концу́ преста́вился еси́ ра́дуяся./ Те́мже светоно́сную твою́ па́мять Це́рковь твоя́, о́тче соверша́ющи,/ созыва́ет преподо́бныя па́стыри же и учи́тели, и́же просвеща́еми пою́т:/ дела́ вся, Го́спода по́йте и превозноси́те Его́ во ве́ки.

Ага́ри ча́дом пога́ным изма́ильтяном,/ внегда́ устремля́тися на ста́до твое́, возбрани́, святи́телю, моли́твами твои́ми,/ я́ко мно́го дерзнове́ние ко Христу́ стяжа́вый,/ да в ми́ре свяще́нную твою́ па́мять соверша́юще, ра́достно пое́м:/ дела́ вся, Го́спода по́йте и превозноси́те Его́ во ве́ки.

Богоро́дичен: Распя́тие и погребе́ние, И́же от Тебе́ небра́чно, Де́во, про́йде,/ претерпе́в нас ра́ди и муче́ние,/ Его́же стра́стем ревну́юще преподо́бнии/ крестови́дно муче́нием поще́ния, Тому́, Чи́стая, после́доваша.

Ин

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Земля́ от свои́х недр предаде́ тя священноле́пна, це́ла же и неразруши́ма,/ благоуха́нием и чудесы́ удивля́юща гра́да жи́тели/ пе́рстию гро́ба твоего́, проро́чески вопию́щия:/ пра́ведницы во ве́ки живу́т.

Ка́мене сапфи́ра, облежа́щая персть страда́льнаго твоего́ те́ла, дража́йши, о́тче, показа́ся:/ целе́бна бо и чудотвори́ва, и па́че зла́та ве́рными разделя́ема пою́щими досто́йно:/ честна́ пред Го́сподем смерть святы́х Его́.

Царе́й благочести́вых святы́ню и благослове́ние,/ твое́ свято́е и честно́е те́ло держа́щих, со́нным явле́нием пода́ти увещава́еши,/ е́же чада твоя́ со святи́тели и свяще́нными,/ я́ко пребога́тое сокро́вище во своя́ принесо́ша.

Христолюби́вый Владисла́в самоде́ржец, я́ко дре́вле Дави́д пред киво́том,/ предходя́ пред святы́м твои́м те́лом, ра́довашеся поя́:/ вели́чит душа́ моя́ Го́спода, я́ко даде́ мне отца́ и учи́теля./ И в це́ркви свое́й ра́дуяся положи́.

Я́ко ны́не престо́лу Влады́ки своего́ предстоя́ще,/ и отону́дными заря́ми осия́еми, Симео́не Богоно́се, Са́вво Богому́дре,/ моли́твами ва́шими, святи́и, страсте́й греха́ нас изба́вите,/ и пога́ных нахо́да, и разли́чных обстоя́ний.

Богоро́дичен: Плеща́ми Херуви́мскими стра́шными носи́мый Влады́ка, на престо́ле я́коже о́гненнем,/ в Твою́, Чи́стая, всели́ся утро́бу/ и пло́ти прия́тием челове́ческое обожи́ существо́./ К Нему́же спаси́ моли́твами Твои́ми пою́щия Тя Ма́терь Его́.

Песнь 9

Ирмо́с: Безсе́меннаго зача́тия/ Рожде́ство́ несказа́нное,/ Ма́тере безму́жныя нетле́нен плод,/ Бо́жие бо рожде́ние обновля́ет естества́./ Те́мже Тя, вси ро́ди, я́ко Богоневе́стную Ма́терь,/ правосла́вно велича́ем.

Ра́дуйся, стено́ необори́мая./ Ра́дуйся, покро́ве ми́ра./ Ра́дуйся, Це́ркви./ Ра́дуйся, свеще́. Ра́дуйся, престо́ле Бо́жий./ Ра́дуйся, всех ра́дость и по́моще на враги́ неви́димыя су́щи, Чи́стая,/ спасе́ние и ору́жие непобеди́мое.

Не забу́ди, Де́во Неискусобра́чная Неве́сто, Твои́х раб, притека́ющих к це́ркви Твое́й:/ ты бо еди́на еси́ христиа́н наде́жда/ и утвержде́ние всем притека́ющим Тебе́, Чи́стая,/ на́ша моле́ния, Влады́чице, испо́лни.

Ты А́нгелов сла́ва, проро́ков зерца́ло,/ патриа́рхов и апо́столов похвала́ све́тлая:/ ты му́чеников Христо́вых украше́ние,/ по́стников и пра́ведников освяще́ние красно́, и всего́ ми́ра ра́дость./ Те́мже Тя вси́, Чи́стая, по до́лгу пе́сньми велича́ем.

Ин

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.

Укра́шен, о́тче, вои́стинну доброде́тельными дея́нии яви́лся еси́,/ украси́ся светоно́сная твоя́ па́мять, благода́тными луча́ми нас просвеща́ющи,/ в не́йже бед и напа́стей изба́витися/ твои́ми ко Христу́ моли́твами, мо́лимся.

Израсти́вшее тя Христу́ оте́чество твое́ ра́дуется,/ и светле́ется Це́рковь Спа́са и Бо́га,/ це́ла и благоуха́нна иму́щи тя,/ и па́мять твою́ днесь ра́достно пра́зднует./ Е́йже возме́здие возда́в, святи́телю,/ вся́каго озлобле́ния изба́ви ю.

Моле́ний и пе́ний гла́сы услы́ши, иера́рше Христо́в,/ ве́ре же и любви́ вонми́ люде́й твои́х,/ и я́ко отечестволю́бец, проти́вися, о́тче, ко гне́вом нас вою́ющих,/ и свы́ше покро́в тво́й да́руй хва́лящим тя.

Богоро́дичен: Исцели́ла еси́ сокруше́ние, Всенепоро́чная, и ве́тхое страда́ние земны́х,/ Бо́га поро́ждши Царя́ Христа́, поне́сшаго пло́тию неду́ги на́ша./ Те́мже Тя вси ро́ди, Де́во Влады́чице, ублажа́юще,/ Богоневе́сто, велича́ем.

Ин

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем тя Богоро́дицу,/ А́нгелов и челове́к чинонача́лия велича́ют.

Мно́г в терпе́нии и к зло́бе благоотда́тлив/ в животе́ и по сме́рти, о́тче, показа́лся еси́:/ слуки́й бо припо́лз, и гро́ба твоего́ верху́ возле́г,/ во отмще́ния ме́сто здра́ва поста́вил еси́,/ и́же в це́ркви ходя́ велича́ше Го́спода.

Преизя́щная ко Христу́ ва́ша любо́вь/ ны́не объяви́ся благода́тию да́нною вам, Симео́не и Са́вво:/ мо́щи ва́ша благоуха́нны и мироточи́вы, па́мять сла́вна и святопочита́ема./ И́миже уверя́емии глаго́лем:/ па́мять пра́ведников с похвала́ми быва́ет.

Ны́не ви́димых глаго́лем, су́щих же я́же лю́бящих Бо́га,/ иде́же А́нгели прини́кнути жела́ют, я́же вам досто́йно угото́ванная,/ о́ко не ви́де, и у́хо не слы́ша, Па́вел веща́ет,/ и кто пости́жет сих изглаго́лати?

Зря́ще А́нгельския и Бо́же́ственныя све́тлости, и всех святы́х ли́ки,/ Са́вво свяще́нне и Симео́не Богоно́се,/ с ни́ми моли́те Человеколю́бца/ жития́ исправле́ние и грехо́в оставле́ние пода́ти хва́лящим ве́рою ва́шу па́мять.

О́ба в житии́ единоду́шна, о́ба в пусты́ни спо́стника,/ о́ба вы́ше ума́ бла́гих получи́вша,/ о́ба Тро́ице ны́не предстоя́ща,/ обе́ма о́бщее хвалосло́вие прино́сим: е́же прие́мше, отцы́,/ певцы́ ва́ша моли́твами ва́шими спаса́йте.

Богоро́дичен: Еди́на преиму́щая дерзнове́ние, Влады́чице, за весь мир Сы́ну Твоему́ моли́ся./ Не помяни́ безчи́сленных собла́зн на́ших,/ покры́й лю́ди вопию́щия Ти уми́льным гла́сом:/ спаси́, Чи́стая Богоро́дице, Тебе́ досто́йно велича́ющих.

Свети́лен:

Свети́льник тя многосве́тлый, святи́телю, зна́ем,/ моли́твы ча́до, пусты́ни воспита́ние, чистоты́ оби́телище,/ мона́хом спо́стника, ни́щим пита́теля, святи́телем све́тлость./ Те́мже тя, о́тче, ве́рнии пое́м.

Други́й свети́лен обе́ма.

От Восто́ка мы́сленнаго Со́лнца Христа́, светоза́рныя лучи́ возсия́вшия/ и мра́чную страну́ на за́паде люде́й свои́х просвети́вшия/ све́тлостию слове́с, и доброде́тели де́ланием,/ и ны́не не преста́йте Го́споду моля́щеся, и сия́ в ми́ре сохрани́ти,/ Са́вво и Симео́не, па́мять ва́шу почита́ющих.

Сла́ва, и ны́не, Богоро́дичен:

Прему́дрость Ипоста́сную и Пресу́щное Сло́во,/ и Врача́ всех ро́ждшая, Всечи́стая Цари́це,/ гное́ния и я́звы исцели́ душ на́ших/ и сохраня́й неприкоснове́нны вся́каго нахо́да/ всегда́ Тя моля́щих, Засту́пнице ми́ра.

На хвали́тех стихи́ры на 4, глас 8.

Подобен: О, пресла́внаго чудесе́!

О́тче свяще́нне Са́вво Богому́дре,/ воздержа́нием до́бре воспита́вся,/ в пресла́вную доброде́телей возра́сл еси́ высоту́,/ Христо́вы та́йныя добро́ты взира́я./ Его́же сия́ньми ум тво́й озари́в,/ лю́ди твоя́ просвети́л еси́,/ е́реси отри́нул еси́ от Це́ркве Христо́вы./ те́мже свети́льника тя стяжа́вше,/ пресве́тлую твою́ па́мять хва́лим, свяще́нно ублажа́юще.

Вруче́нный тебе́ тала́нт умно́жив,/ ра́дости сподо́бился еси́ Го́спода твоего́./ и ны́не предстои́ши с ли́ки святи́тель и по́стников,/ свяще́нства оде́ждею, преблаже́нне, и венце́м поще́ния укра́шен,/ благода́тию Боже́ственнаго сия́ния,/ и заре́ю мы́сленною блистая́ духо́вно./ отону́дуже просвеща́й моли́твами твои́ми,/ пра́зднующих, Са́вво о́тче свяще́нне,/ твою́ светлую и святу́ю па́мять.

Прие́мше твоя́ честны́я мо́щи, Са́вво блаже́нне,/ ве́рою и любо́вию почита́ем:/ орга́н бо яви́лся еси́ Свята́го Ду́ха,/ возглаша́я несказа́нное спаси́тельное та́инство/ Бо́же́ственными твои́ми уче́нии велегла́сно,/ пропове́дующи нам Сло́ва воплоще́ние,/ Его́же чи́стее тобо́ю, о́тче, позна́хом./ К Нему́же ны́не моли́твенника тя предлага́ем,/ в твои́х преда́ниих сохрани́тися нам.

Сла́ва, глас 6:

Возсия́ солнцеобра́зно святи́теля Христо́ва па́мять,/ ве́рных сердца́ мы́сленно просвеща́ющи,/ я́же и мы све́тло соверша́юще днесь,/ моле́бно тому́ возопие́м:/ ра́дуйся, держа́ва целому́дрия,/ непорабоще́нно души́ соблю́д стоя́ние,/ воздержа́ния щито́м обложи́вся./ Ра́дуйся, первопа́стырю и учи́телю христоимени́тых люде́й свои́х./ Ра́дуйся, церко́вное украше́ние,/ архиере́ев добро́то и мона́хов похвало́./ Са́вво преосвяще́нне и всеблаже́нне о́тче,/ Христа́ Бо́га моли́ непреста́нно,/ мир посла́ти вселе́нней,/ и спасти́ся душа́м на́шим.

И ны́не, Богоро́дичен: Богоро́дице, Ты еси́ лоза́ и́стинная: Та́же, Славосло́вие вели́кое. И дае́тся еле́й бра́тии от канди́ла свята́го.

Пою́ще вку́пе стихи́ры, глас 5, самогла́сны:

Прииди́те, христолюби́вии вси́,/ прииди́те, пра́здник па́мяти соверша́юще,/ Са́вву священнопропове́дника Ева́нгелиа пе́сньми восхва́лим, реку́ще:/ ра́дуйся, пото́че слове́сный мы́сленнаго рая́,/ и́же бразды́ серде́ц наших,/ духо́вными вода́ми Бо́жиих слове́с напои́в, плодоно́сны показа́ Христу́ Богу,/ подаю́щему всем проще́ние и ве́лию ми́лость.

Стих: Честна́ пред Го́сподем/ сме́рть преподо́бных Его́.

Ра́дуйся, благове́рия наста́вниче,/ Боже́ственных повеле́ний служи́телю,/ Богосве́тлый же свети́льниче,/ и́же во мра́це неве́дения сердца́ вше́дшая Богоглаго́ливыми словесы́ просвети́в,/ к све́ту Святы́я Тро́ицы возве́л еси́,/ Са́вво о́тче Богоно́се,/ Се́рбская похвало́ и удобре́ние./ И ны́не предстоя́ Христу́ Бо́гу,/ моли́ся о творя́щих святу́ю твою́ па́мять.

Сла́ва, глас 8:

Ум впери́в, а́може духо́вными возлете́л еси́ кри́лы/ к высоте́ Бо́жия ра́зума,/ тогда́ же и отца́ земна́го оста́вив, Небе́снаго возлюби́л еси́./ Но и ро́ждшаго тя пло́тию духо́вне породи́л еси́,/ и Небе́сному Отцу́ присво́ил еси́,/ и обою́ду у Него́ просла́вил еси́,/ на Небесе́х су́щих благ наслади́л еси́ его́,/ на земли́ же те́ло его́ че́стно и мироточи́во/ моли́твами твои́ми устро́ил еси́/ и лю́ди твоя́ ве́рою просвети́л еси́./ Тем и апо́стольских даро́в досто́йна яви́ тя прославля́емый тобо́ю Христо́с,/ име́яй ве́лию ми́лость.

И ны́не, Богоро́дичен: А́з, Де́во Свята́я Богоро́дице:

На литурги́и

Блаже́нна, от кано́на 2-го гла́са, песнь 3, и 8-го гла́са, песнь 6-я. Проки́мен, глас 7: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол ко Евре́ем, зача́ло 318. Аллилу́иа, глас 2: Свяще́нницы Твои́ облеку́тся в пра́вду, и преподо́бнии Твои́ возра́дуются. Ева́нгелие от Иоа́нна, зача́ло 36. Прича́стен: В па́мять ве́чную:

Ве́чер

На Го́споди, воззвах: стихи́ры, глас 5:

Преподо́бне о́тче, свяще́нниче Са́вво,/ свире́ль гла́са спасе́ния,/ глася́щая уче́ние правосла́вное всем нам,/ гре́шным и ве́рным душа́м,/ Богозва́нная гусль Божия Паракли́та,/ вели́кий орга́н Божий,/ достохва́льная труба́ и́стинная,/ сла́дкий исто́чник благода́тный,/ Христа́ моли́, преподо́бне,/ дарова́ти пою́щим тебе́ мир и ве́лию милость.

Преподо́бне о́тче, достохва́льне Са́вво,/ обре́те, егоже возжеле́, твою́ ду́шу чи́стую,/ благода́ть Пресвята́го Ду́ха в тя всели́ся,/ я́ко Незаходи́мый свет,/ Его́же поспеше́нием ду́хи лука́выя отгоня́еши ныне/ и исцеля́вши боле́зни и неду́ги/ приходя́щих к тебе́ с ве́рою, чи́стым се́рдцем/ и пра́зднующих твою па́мять светоно́сную,/ Христа́ моли́, преподо́бне,/ дарова́ти оте́честву твоему́ едине́ние, мир и ве́лию ми́лость.

Ра́дуйся, святи́телем пра́вило,/ Це́ркви неподви́жимое утвержде́ние,/ сла́во правове́рных,/ любому́дрия исто́чниче,/ любве́ водо́ неизлива́емая,/ свети́ло многосве́тлое,/ духо́вный сосу́де,/ у́ме Бо́жий, кро́ткий и чи́стый,/ смире́нием и́стинным украша́яся,/ челове́че Небе́сный и земны́й А́нгеле,/ виногра́да де́лателю, Христо́в дру́же при́сный,/ Того́ моли́ пода́ти чту́щим тя ве́лию ми́лость.

Кто не диви́тся и кто не блажи́т/ пречестна́го твоего́ жития́, блаже́нне,/ сме́ртию бо на безсме́ртную жизнь преложи́ся, святе,/ и освяща́еши всех, призыва́ющих тя:/ от ско́рби и напа́стей спаси́/ и освяща́й ста́до твое́ всегда́/ моли́твами твои́ми ко Го́споду.

Сла́ва, глас то́йже:

Боже́ственное торжество́ торжеству́юще, ве́рнии,/ и во я́слех от Де́вы рожде́нному Бо́гу/ со па́стыри и волхвы́ покло́ньшеся,/ и све́тлость Богоявле́ния и Креще́ния Госпо́дня пости́гше,/ имже сподо́блени пра́здновати/ пресве́тлую па́мять Богоно́снаго отца́, ве́рнии,/ соше́дшеся, си́це рцем:/ аще и преста́вися от нас, святи́телю благи́й,/ но не оста́вил еси́ ста́да твоего́, непреста́нно моля́ся,/ от не́мощнаго естества́ на́шего любо́вную мольбу́ прие́м,/ и просвеща́й, и освяща́й, и спаса́й/ мольба́ми свои́ми ду́ши на́ша.

И ны́не, Богоро́дичен.

На ли́тий стихи́ра, глас 8:

О, пресла́вное чу́до,/ земна́я не́мощь, Божество́м укре́пльшися,/ бесо́вския полки́ низложи́/ и разстоя́щаяся ча́да Ду́хом собра́,/ о, пресла́внаго Твоего́ милосе́рдия,/ благи́м же, Христе́ Спа́се,/ просла́вися в све́тлости святы́х Твои́х.

На стихо́вне стихи́ры, глас 4:

О́тче отце́м, свяще́ния пра́вило,/ целому́дрия о́браз,/ мона́хом кре́пость,/ церко́вное утвержде́ние,/ любве́ свети́льник, престо́л чу́вствию,/ исто́чник ми́лости,/ язы́к огнедохнове́нный,/ уста́ сладкоглаго́ливая,/ сосу́д Бо́жий,/ у́мный рай бысть,/ Богоблаже́нный иера́рше Христо́в.

Стих: Честна́ пред Го́сподем/ смерть преподо́бных Его́.

Подоба́ше Се́рбстей земли́/ Са́вву име́ти архиере́я,/ я́ко не́кую у́тварь ца́рскую,/ украси́ бо престо́л оте́чества своего́/ и увязе́ триплете́нным венце́м,/ спасе́ния заве́ты предложи́ ве́рным/ и вся собира́я к пе́нию пе́сней Боголе́пных,/ к нему́ же возопии́м:/ Богоблаже́нне и Богосло́ве,/ Христа́ Бо́га моли́ о душа́х на́ших.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Архиере́ом пра́вило,/ и́ноком законополо́жник,/ правове́рным учи́тель,/ пра́вило правле́ния,/ за́поведей ме́рило,/ свяще́нником све́тлость Бо́жия,/ секи́ра, уста́ посека́ющая вся/ находя́щий на ста́до твое́ проти́вныя полки́,/ яви́лся еси, преблаже́нне о́тче наш, архиере́ю Са́вво,/ ны́не све́та Боже́ственнаго весь исполня́яся,/ Христу́ моли́ся неосла́бно о ста́де твое́м.

Сла́ва, глас 8:

Ю́ностное процвете́ние и де́вственный плод,/ по́стническое воздержа́ние,/ свяще́нное подо́бие,/ ца́рское украше́ние,/ си́рым пита́тель, ни́щим бьвз оте́ц,/ оби́димым ско́рое заступле́ние,/ о, пресла́внаго твоего́, Са́вво, чудотво́рства,/ имже, Христе́, спаси́ мир, грехо́м запусте́вший.

И ны́не, Богоро́дичен.

Тропа́рь, глас 8:

Правосла́вия наста́вниче,/ благоче́стия учи́телю и чистоты́,/ вселе́нный свети́льниче,/ архиере́ов Богодухновенное удобре́ние,/ Са́вво прему́дре,/ уче́ньми твои́ми вся просвети́л еси́,/ цевни́це духо́вная,/ моли́ Христа́ Бо́га спасти́ся душа́м на́шим.

На у́трени

По 1-м стихосло́вии седа́лен, глас 8:

Погре́бл еси лука́вых духо́в ла́яния/ моли́тв свои́х труды́ мно́гими, святи́телю,/ и по преставле́нии Боже́ственном ме́ртв во гро́бе положе́н, и нетле́нен бысть,/ темже, ра́дующеся, святу́ю твою́ па́мять пра́зднуем и согла́сно вопие́м ти:/ моли́ Христа́ Бо́га грехо́в оставле́ние нам дарова́ти.

Сла́ва и ны́не, Богоро́дичен.

По 2-м стихословии седален, глас 4:

Успе́ние твое́ хва́ляще досто́йно и ра́ку твою́,/ честны́м моще́м твоим кла́няемся и прах сла́вим ве́рно,/ ихже ради про́сим, святи́телю Са́вво, грехо́в избавле́ния.

Сла́ва, и ны́не, Богоро́дичен.

По полиеле́е седа́лен, глас 4:

А́нгельская во́инства удиви́шася житию́ твоему́ чи́стому,/ а́нгельски бо в ми́ре пожи́л еси,/ устраши́ся род челове́ческий, зря́ще пречи́стое твое́ те́ло,/ ви́дяще, ка́ко тле́нное в нетле́нное преложи́ся,/ и, с радостию припа́дающе, любезно лобыза́ют Христа,/ пою́ще Просла́вльшаго тя во ве́ки веко́в.

Сла́ва, и ны́не, Богоро́дичен.

Таже степе́нна, 1-й антифо́н 4-го гла́са. Проки́мен и Ева́нгелие святи́телю.

По 50-м псалме́ стихи́ра, глас 6:

Челове́че Бо́жий/ и ве́рный ра́бе, Са́вво,/ Госпо́день муж жела́ний,/ сосу́де избра́нный,/ сто́лпе избра́нный Це́ркве,/ Ца́рствия насле́дниче,/ не премолчи́, вопия́ за ны́ ко Го́споду.

Кано́н пе́рвый свято́му Са́вве, глас 1.

Песнь 1

Ирмо́с: Твоя́ победи́тельная десни́ца/ боголе́пно в кре́пости просла́вися:/ та́ бо, Безсме́ртне,/ я́ко всемогу́щая, проти́вный сотре́,/ изра́ильтяном путь глубины́ новосоде́лавшая.

Па́стыря Христо́вых ове́ц и наста́вника спасе́ния ве́рных уче́ний,/ чудесы́ возсия́вшаго нам, Све́та Боже́ственнаго благода́ти,/ святи́теля Са́вву досто́йно почти́м.

Я́ко фи́никс, в дому́ Госпо́дни дави́дски процве́л еси́ доброде́тельми,/ те́лом и ду́хом весь яви́ся сла́дость,/ Боже́ственной благода́тию пи́щу безсме́ртия, Са́вво, пода́я оте́честву своему́.

Преше́д плотски́й о́блак и доброде́телей на го́ру возше́д,/ самови́дец Боже́ственнаго ра́зума быв,/ яко Моисе́й, на скрижа́лех се́рдца своего́ прие́м зако́н благода́тный, святи́телю Са́вво.

Богоро́дичен: Чистоты́ сокро́вище, ра́дуйся,/ Е́юже от паде́ния на́шего воста́хом./ Ра́дуйся, сладкоуха́нный кри́не, Влады́чице, ве́рных благоуха́яй,/ кади́ло благово́нное и ми́ро многоце́нное.

Ин кано́н, глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь поим, вопия́ше.

На Престо́ле Небе́сном седя́щаго Бо́га вожделе́л еси́ всем се́рдцем, блаже́нне,/ разуме́ убо блага́я, мирски́х дел убо избеже́,/ па́че ума́ бо яви́ся кро́ток во смире́нии.

Да Своея́ сла́вы вся́ческая исполня́я, Бог и тебе́ возлюби́,/ от пеле́н твои́х, блаже́нне, избра́в тя,/ чистото́ю бо украси́в тя/ и доброде́телию просвети́в,/ и во гро́бе тле́ннем, я́ко Нетле́ннаго, сохрани́.

Богоро́дичен: Души́ мое́й смерть притека́ет,/ искуше́ния же ненави́дящих, я́ко а́спиды, обыдо́ша погуби́ти мя,/ но Сама́ мя, Богоро́дице, спаси́.

Песнь 3

Ирмо́с: Еди́не, ве́дый челове́ческаго существа́ не́мощь/ и ми́лостивно в не вообра́жен,/ препоя́ши мя с высоты́ си́лою,/ е́же вопи́ти Тебе́, Святы́й,/ одушевле́нный хра́ме неизрече́нный сла́вы Твое́я, Человеколю́бче.

Доброде́телем прия́телище быв/ и церко́вный сосу́д о́цта Бо́гу, святи́телю Са́вво,/ на тебе́ почи́ Дух Пресвяты́й.

Ми́ром Боже́ственным пома́зан Вседе́теля Ду́ха,/ тем и Се́рбский престо́л, о́тче, украси́л еси,/ облагоуха́л еси́ ве́рных ра́зумы доброде́тельми и чудесы́, о́тче Са́вво.

Венча́ется словесы́ твои́ми,/ я́ко ка́мением драгоце́нным, блаже́нне, блаже́нная твоя́ Це́рковь/ и ве́чнует ве́рным, ца́рствующи.

Богоро́дичен: Ра́дуйся, Две́ре еди́на,/ Е́юже Сло́во про́йде еди́но,/ вереи́ и врата́ а́дова, Влады́чице, рождество́м Твои́м сокруши́вшая./ Ра́дуйся, Боже́ственный вхо́де спаса́емых, Богоневе́сто.

Ин

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Просте́рл еси́ ру́це ко Вы́шнему в моли́твах бо́дренных/ и собра́л еси́ ча́да твоя́ вку́пе соедине́нием Ду́ха,/ разуме́ти Ду́ха, крести́вшаго тя, и Бо́га славосло́вити и пе́ти:/ несть свят, ра́зве Тебе́, Го́споди.

Вели́к о́браз благоче́стия на спасе́ние показа́л еси,/ смире́нною бо му́дростию, и ми́лостынями, и уче́нием всех воздвига́я пе́ти:/ несть свят, ра́зве Тебе́, Го́споди.

Богоро́дичен: Яже ми́рови спасе́ние подаю́щи/ Боже́ственным рождество́м Твои́м,/ от бед мя премени́.

Конда́к, глас 2:

Струя́ми слез твои́х, Богоно́сне Са́вво,/ це́рковь теле́сную очи́стив,/ слуга́ бысть Святы́я Тро́ицы,/ сохраня́й оте́чество свое́ непобеди́мо,/ тому́ бо ты еси́ утвержде́ние.

И́кос:

Уясни́ мой язы́к, Спа́се мой,/ и устне́ мои́ отве́рзи,/ я́ко да возмогу́ досто́йную похвалу́ принести́ сему́ преподо́бному отцу́ отце́м, Са́вве,/ на конце́х век просия́вшему чудесы́,/ его́же труды́ и по́двиги кто сказа́ти от челове́к мо́жет?/ Но, о́тче преблаги́й,/ моли́ся о ста́де свое́м и сохраня́й оте́чество свое́ непобеди́мо,/ тому́ бо ты еси́ утвержде́ние.

Песнь 4

Ирмо́с: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му/ во спасе́ние на́ше и обновле́ние.

Терпе́нием напа́сти известву́я,/ и любо́вию Боже́ственною удобря́яся,/ и ревни́тель Боже́ственных быв,/ искуша́емых те́плый, Са́вво, побо́рник.

Плотска́я взыгра́ния воздержа́нием умертви́в,/ Беспло́тный в телеси́, стра́шен бе́сом яви́ся все́ми делы́ свои́ми.

Небе́сный Госпо́дь на тве́рди ве́ры, я́ко звезду́, тебе́ утверди́,/ светя́ща ми́ру свои́ми уче́нии.

Богоро́дичен: Тя, испле́тшую ми́рови нерукоплете́нный вене́ц, песносло́вим,/ – ра́дуйся, – Тебе́, Де́во, зову́ще:/ храни́лище всех, и огражде́ние, и утвержде́ние, и свяще́нное прибе́жище.

Ин

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Глаго́лом Бо́жиим вразуми́вся/ и себе́ Бо́гови предложи́в,/ оста́вль оте́чество свое́, и пости́же на Святу́ю Го́ру,/ доброде́телию же вы́ше превзы́де.

Преше́д от небытия́ в бытие́ и от земны́х в Небе́сная,/ плотска́я же взыгра́ния и скве́рны плотски́я Бо́жией любо́вию покори́л еси́.

Богоро́дичен: От вели́ких и разли́чных прегреше́ний же и напа́стей всегда́ спаса́еши мя,/ темже я́ко ро́ждшую Тя Го́спода молю́/ и к Тебе́ прибега́ю, непобеди́мей по́мощи скорбя́щим:/ от бед изведи́ мольба́ми Твои́ми.

Песнь 5

Ирмо́с: Просвети́вый сия́нием/ прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия/ правосла́вно пою́щих Тя.

Му́дрый святи́тель, па́стырь святы́й и благи́й/ и свети́льник Це́ркве яви́лся еси́,/ свяще́нный о́тче Са́вво, Бо́гу служа́/ и лю́ди оте́чества просвеща́я све́том своего́ Богоразу́мия.

В Боже́ственную твою́ па́мять святи́телей собо́р, о́тче, ра́дуется/ и ве́рных ли́ки со Безпло́тными веселя́тся,/ пита́ется днесь духо́вно Це́рковь словесы́ твои́ми, о́тче Са́вво.

Вдови́цам помо́щник, оте́ц си́рым,/ засту́пник скорбя́щим, побо́рник бе́дным был еси́ лю́дем Бо́жиим, священному́чениче Са́вво,/ тем с ве́рою блажи́м тя.

Богоро́дичен: Простра́нное селе́ние Сло́ва, ра́дуйся, Пречи́стая,/ Сосу́де, Боже́ственный Би́сер произве́дшая./ Ра́дуйся, всечу́дное всех к Бо́гу примире́ние,/ блажа́щих Тя, Богоро́дице, всегда́.

Ин

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию, озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Ду́хом духо́вная умно́жив и жела́нием к Бо́гу разже́гся,/ Иса́иино исполня́я прорече́ние, издале́че ше́л еси, Сио́на дости́г,/ и поклони́ся ме́сту, иде́же стоя́ста но́зе Боже́ственне,/ и Гроб Госпо́день облобыза́л еси́ любе́зно.

От Пренепоро́чныя проше́д, Собезнача́льное Сло́во, о́тче,/ плотску́ю оби́тель Себе́ сотвори́ со Отце́м Свои́м в души́ твое́й, свяще́нне,/ ба́ня бо Боже́ственная от пречи́стых твои́х исто́чник, слез твое́ю о́чию,/ во ца́рствии служа́щу ти непреста́нная быва́ше.

Богорбдичен: Приле́жно Ти припада́ю, моля́ся:/ я́ко Ма́ти Зижди́теля моего́,/ одержа́щих мя бед свободи́.

Песнь 6

Ирмо́с: Обы́де нас после́дняя бе́здна,/ несть избавля́яй,/ вмени́хомся, я́ко о́вцы заколе́ния,/ спаси́ лю́ди Твоя́, Бо́же наш,/ Ты бо кре́пость немощству́ющих и исправле́ние.

Прие́м Сло́ва Спаси́теля, му́дре, тала́нт,/ я́ко уго́дник ве́рный на трапе́зе воздержа́нием умно́жил еси/ и прине́сл еси́ себе́ чи́стою любо́вию Влады́це своему́, святи́телю Са́вво.

Просвети́л еси ри́зу свяще́нную во труде́х свои́х и яви́лся па́стырь слове́сных ове́ц, му́дре,/ и́же па́лицею своего́ уче́ния на па́стбище изгоня́еши Боже́ственное.

Отпуще́н пло́ти до́лжным,/ пра́ведным усну́л еси сном, му́дре святи́телю Са́вво,/ и со А́нгелы Боже́ственныя зари́ насыща́ешися/ и све́тлыми украша́ешися луча́ми.

Богоро́дичен: Ра́дости вина́,/ облагодати́ наш по́мысл, е́же зва́ти Тебе́:/ ра́дуйся, неопали́мая купино́,/ о́блаче всесве́тлый,/ ве́рныя непреста́нно осеня́ющий.

Ин

Ирмо́с: Жите́йское мо́ре/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.

Ца́рствующий все́ми, Бог тя испе́рва возлюби́, свя́те,/ тобо́ю бо ю́ности обузда́ние всем показа́/ и власте́м же покоре́ние, ми́лостыни же рачи́теля,/ си́рым засту́пника те́пла, скорбя́щим утеше́ние.

Ца́рства Бо́жия вожделе́в, блаже́нне Са́вво,/ Сио́на бо дости́гнув, труды́ же и по́ты Сина́йский Горы́ доше́д и Еги́пта вари́в,/ порабоща́юще ра́бскую плоть, и Ду́ху же весь примеси́ся,/ и со Христо́м ца́рствуеши во вся ве́ки.

Богоро́дичен: Отверзо́шася на мя непра́вды уста́, Влады́чице,/ те́мже мя, я́ко Засту́пница, сих вско́ре свободи́.

Конда́к, глас 2:

Избра́нного от пеле́н Христо́вою благода́тию/ и возлю́бленнаго от ю́ности Бо́жиим Ду́хом,/ ю́ностный цвет, Са́вву блаже́ннаго,/ похва́льныя венцы́, ве́рнии, днесь спле́тше/ и Боже́ственную главу́ его́ венча́юще, воззове́м:/ ра́дуйся, о́тче, Бо́жие жили́ще.

И́кос:

А́нгел на земли́ Небе́сным житие́м я́влься,/ благовести́л еси́ всем ра́дость/ и со Беспло́тными ли́ки всех учи́л еси водворя́тися,/ и тя ви́жду, во Небе́сных водворя́ема,/ и, чудя́ся ужа́сно тому́, си́це зову́:/ ра́дуйся, благоче́стия наста́вниче и нече́стия потреби́телю;/ ра́дуйся, Небе́сным сожи́телю и земны́м пра́вило./ Ра́дуйся, ю́ности воздержа́ние и ста́рости подпо́ро;/ ра́дуйся, правове́рным побо́рниче и еретико́в низложи́телю./ Ра́дуйся, святи́телей добро́то и преподо́бным, сла́во;/ ра́дуйся, Небе́сный челове́че и земны́й А́нгеле./ Ра́дуйся, па́стырю Бо́жиих слове́сных ове́ц;/ ра́дуйся, кро́тости о́бразе и безу́мных наказа́телю./ Ра́дуйся, омраче́нных све́те и мона́хов сла́во;/ ра́дуйся, чадолюби́вый о́тче, вся с собо́ю приве́дший Бо́гу./ Ра́дуйся, имже избавля́емся грехо́в;/ ра́дуйся, я́ко тобо́ю Ца́рства Небе́снаго сподо́бихомся.

Людие: ра́дуйся, о́тче, Бо́жие жили́ще.

Песнь 7

Ирмо́с: Тебе́, у́мную, Богоро́дице, пещь,/ разсмотря́ем, ве́рнии,/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.

Благоче́стием житие́ соверши́в, святи́телю Са́вво,/ от земли́ на Небеса́ преста́вился еси́/ и со А́нгелы Бо́гу слу́жиши непреста́нно,/ те́мже к нам, с ве́рою пою́щим тя, прииди́ ду́хом,/ просвеща́я нам у́мное о́ко.

Честно́му о́бразу твоему́ покланя́ющихся, святи́телю честны́й Са́вво,/ па́мять твою́ сла́вящих и честну́ю ра́ку твои́х моще́й,/ от напа́сти и бед свободи моли́твами, Са́вво, к Бо́гу твои́ми.

Достодо́лжно чтим па́мять твою́, уго́дниче Христо́в,/ ра́це покланя́ющеся Боже́ственных моще́й твои́х,/ наслажда́ющеся слове́с твои́х, я́коже и чуде́с, преподо́бне.

Богоро́дичен: Мо́лим, раби́ Твои́, и приклоня́ем коле́но се́рдца на́шего:/ приклони́ у́хо Твое́, Чи́стая,/ и спаси́ скорбьми́ погружа́емый при́сно,/ и соблюди́ от вся́каго вра́жия плене́ния Твой град, Богоро́дице.

Ин

Ирмо́с: Росода́тельну убо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Бога́тство ми́ра и всю сла́ву красоты́, о́тче, оста́вил еси́ сла́вы ра́ди Боже́ственныя и присносу́щия/ и научи́л еси́ вся пе́ти:/ Изба́вителю Бо́же, благослове́н еси́.

Еди́на благода́ть Отца́, Сы́на же и Ду́ха,/ изво́льшая тя, святи́теля и по́стника/ и со апо́столы причте́ннаго, любо́вию вопию́щим:/ Избави́телю Бо́же, благослове́н еси́.

Богоро́дичен: Предста́тельством Твои́м избавля́емся бед и скорбе́й/ и обрета́ем бога́тство ве́лие неистоща́емое.

Песнь 8

Ирмо́с: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.

Успил еси́ стра́сти и жите́йский во́лны/ Боже́ственными восхожде́нии и неосла́бными очище́ниями,/ тем в Невече́рнем све́те успе́нием возсия́л еси́.

Благоуха́ют дела́ твои́х трудо́в,/ блиста́ют уче́ний твои́х словеса́,/ чудотворе́ния всю́ду оглаша́ют,/ уго́дниче Са́вво, Христо́в священноучениче́.

Я́звы Христо́вы поне́с, Са́вво, душе́ю,/ пло́тию свое́ю о́бщник бысть му́дрых апо́стол,/ тем чтим тя, ве́рнии, я́ко святи́теля.

Богоро́дичен: Ми́ру ро́ждшая Спасе́ние,/ Имже от земли́ на высоту́ взя́ти бы́хом./ Ра́дуйся, Всеблагослове́нная, покро́ве и держа́во, стено́ и утвержде́ние пою́щим, Чи́стая:/ Го́спода по́йте, дела́,/ и превозноси́те во вся ве́ки.

Ин

Ирмо́с: Из пла́мене преподо́бным ро́су источи́л еси/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Избавле́ние Христо́с дав тя и оте́честву яви́в тя свяще́нника,/ ста́до бо честно́ю кро́вию искупи́в, даст тя па́стыря, просвеща́ти, и учи́ти, и пе́ти:/ де́ти, благослови́те, свяще́нницы, воспо́йте,/ лю́дие, превозноси́те во вся ве́ки.

О, пресла́вных даро́в, имиже просла́ви тя в ми́ре Бог,/ житие́ бо благоче́стно твое́ в ми́ре показа́в, смерть же, я́ко свята́го, честну́,/ житие́ же на Небеси́ ди́вно и препросла́вленно, и вопи́ти же всех научи́:/ де́ти, благослови́те, свяще́нницы, воспо́йте,/ лю́дие, превозноси́те во вся ве́ки.

Обнови́в непло́дную ни́ву,/ насе́ял еси семя́н словеса́,/ стори́цею пожа́л еси́ слове́сные кла́сы,/ Богопло́дия де́лателю, днесь угобзи́вшия, и́же пою́т:/ благослови́те, вся дела́ Госпо́дня, Го́спода.

Богоро́дичен: И́же нра́вом прельща́емь есмь,/ без отве́та сый, Богоро́дице, зову́:/ вся́ческих мя изба́ви зол.

Песнь 9

Ирмо́с: О́браз чи́стаго рождества́ Твоего́/ огнепали́мая купина́ показа́ неопа́льная;/ и ны́не на нас напа́стей свире́пеющую угаси́ти, мо́лимся, пещь,/ да Тя, Богоро́дице,/ непреста́нно велича́ем.

Ца́рское прозябе́ние,/ святи́тельскую красоту́,/ мона́хом сла́ву и Боголе́пие,/ Се́рбское свети́ло на земли́, Са́вву я́вльшагося вси досто́йно ублажи́м.

Освяти́ся па́мятию твое́ю оте́чество твое́, святи́телю Са́вво,/ и, торжеству́я, зове́т, и моле́бно вопие́т:/ мольбу́ Го́сподеви принеси́ о нас, блаже́нне,/ получи́ти ве́чных благ похваля́ющим ны́не па́мять твою́.

Богоно́снии веселя́тся, преставле́ния своего́ па́мять предлага́я нам,/ о христолю́бцы, прииди́те, свяще́нную объе́млюще его́ ра́ку,/ та́йными кра́снаго пе́ния цветы́ и главы́ своя́ увенча́ем.

Богоро́дичен: Пощади́, Бо́же, насле́дие Твое́,/ грехи́ на́ша вся пре́зрев ны́не,/ на сие́ име́я моля́щую Тя,/ на земли́ безсе́менно Тебе́ ро́ждшую,/ вели́кия ра́ди ми́лости восхоте́вшаго вообрази́тися, Христе́, в челове́чество.

Ин

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни а́нгельстии взира́ти./ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными вон Тя ублажа́ем.

Земля́, покры́вшая те́ло твое́ свято́е, всегда́ весели́тся, благоуха́ющи,/ всех стра́нных сла́вно призыва́ющи,/ аще бо и стра́нно во стра́нных, свя́те, почи́л еси́,/ Влады́ка бо тя, Христо́с, Своему́ стра́нствию сла́вно причте́.

Да ра́дуется Це́рковь, славосло́вящи днесь,/ и да славосло́вит же Небе́сный круг с не́ю,/ и со пе́сньми, земноро́днии, ны́не да усря́щем преосвяще́нное те́ло,/ ны́не от стра́нных Боже́ственным манове́нием во своя́ си преноси́м, пою́ще:/ Тебе́ велича́ю, Бо́же мой, Иису́се.

Богоро́дичен: Тя, наде́жду и заступле́ние, тве́рдо стяжа́в, Чи́стая,/ велича́я Тя я́ко Богоро́дицу, песнь ве́рою скончава́ю.

Свети́лен:

Святи́теля Христо́ва да восхва́лим,/ па́мять его́ че́стно торжеству́юще,/ сей бо нам предста́ви трапе́зу духо́вную,/ ея́же насыща́яся и Ду́хом наслажде́ни,/ Боже́ственно Светода́вца прославляем.

Сла́ва, и ны́не, Богоро́дичен:

О святы́й, всесве́тлый день сей све́тлаго Са́ввы,/ моли́твами того́ и Богоро́дицы, мо́лим Тя, Человеколю́бче Ще́дрый,/ мир пода́ждь нам, ве́рою Тебе́ сла́вящих.

На хвали́тех стихи́ры, глас 1:

Влады́чества престо́л украша́я доброде́тельми,/ Ду́хом Бо́жиим святи́тельский престо́л прия́т,/ тем ве́рный смотри́тель/ благода́ти в обо́ю, святи́телю Са́вво, быв,/ сугу́б вене́ц прия́л еси́.

Воздержа́нием, и боле́зньми, и беда́ми мно́гими,/ и моли́твами непреста́нными/ ду́шу и те́ло очи́стив,/ Богому́дре святи́телю Са́вво,/ тем сосу́д избра́нный Бо́гу на́шему бысть/ и яви́ся апо́стол, а́бие яви́вся,/ прия́л еси́ дарова́ния.

Глас Ева́нгелия Христо́ва послу́шав/ и Того́ пре́жде возлюби́в,/ Богоно́сне о́тче наш Са́вво,/ чи́стым житие́м пожи́в, превозлюби́в ча́да своя́,/ не о су́щем бо то́кмо пе́клся еси́,/ но и реча́ми и де́лы на Не́бо возводя́ ны,/ душеспа́сныя кни́ги оста́вив нам и доброде́тельный зако́ны,/ и́же любо́вию собра́вшеся, ча́да твоя́, сво́йственно взыва́ем:/ не пре́зри, ихже возлюби́л еси,/ ихже о Христе́ уче́нием породи́л еси,/ зало́гом и́мамы твоя́ обеща́ния,/ а́ще и разлучи́ся от нас, па́стырю до́брый,/ дерзнове́нию от Го́спода и наде́жд не погреши́л еси./ Отдаждь до́лги, еди́ного по еди́ному прие́мля/ и принося́ ко Христу́ моли́твами твои́ми.

Сла́ва, глас 8:

Ца́рское свяще́ние,/ во святи́тельскую оде́жду обо́лкся, преподо́бне,/ и на земли́ послужи́л еси́ во пло́ти, я́ко Безпло́тен,/ и Тро́ице ны́не предстои́ши,/ со Безпло́тными ли́ки веселя́ся и вопия́:/ Трисвята́я Еди́нице Трисоста́вная,/ спаси́ лю́ди Своя́, всегда́ согреша́ющия Тебе́,/ Свое́ю бла́гостию.

И ны́не, Богоро́дичен.

Творе́ние мона́ха Феодо́сия. Глас 6.

Песнь 1

Ирмо́с: Воздвиза́емое мо́ре/ немо́крыми нога́ми проходя́ дре́вле Изра́иль,/ егда́ ви́дяше погружа́ема го́рдаго фарао́на,/ ра́достно взыва́ше;/ пои́м Го́сподеви,/ сотво́ршему сла́вная чудеса́.

Внегда́ воззове́м, Го́споди, услы́ши ны/ и, оби́димых, изба́виши ны,/ гне́ва Своего́ во́лны укроща́я,/ не преда́ждь нас нечести́выми поглоще́ны бы́ти, да не реку́т:/ где есть Христо́с, Бог их?/ су́етно рабо́тая Ему́.

Мно́го, я́ко Христу́ иму́ще дерзнове́ние,/ от бед жите́йских, мо́лимся, и от сете́й вра́жиих нас изба́вите,/ облегча́юще бре́мя грехо́в на́ших моли́твами свои́ми,/ Симео́не Богоно́се и Са́вво свяще́нне, Христа́ моли́те.

Волну́еми стра́стных по́мыслов бу́рею, ко приста́нищу моли́тв ва́ших прибега́ем,/ потопле́ния грехо́внаго изба́вите/ пою́щих ва́шу па́мять, отцы́, ве́рою се́рдца и души́ ра́достию.

Тебе́, Го́споди, испове́дуем, согреши́хом и беззако́нновахом,/ свяще́нницы же и лю́дие, вси́ вку́пе уклони́хомся,/ мно́га беззако́ния и крепки́ грехи́ на́ши,/ моли́твами святы́х Свои́х не отврати́ся нас за грехи́ на́ши.

Богоро́дичен: Не умолчу́ вопи́ти ясне́йше вели́чия Твоя́:/ а́ще бо не Ты, Отрокови́це, всегда́ предстоя́ла еси́,/ о мне моля́щи Сы́на Твоего́,/ кто бы от толи́кия бу́ри и лю́тых бед изба́вил мя?

Песнь 3

Ирмо́с: Госпо́дь, Сый, всех и Зижди́тель Бог,/ созда́нное, Безстра́стный, обнища́в, Себе́ соедини́,/ и Па́сха, за я́же хотия́те умре́ти,/ Сам, Сый, Себе́ предпожре́:/ яди́те, – вопия́, – Те́ло Мое́/ и ве́рою утверди́теся.

Госпо́дь, Сый, всем Зижди́тель,/ ру́це Твои́ вся сотвори́ста и созда́ста,/ и, ра́зве Тебе́, несть спаса́ющаго, де́ло руку́ Твое́ю,/ не пре́зри нас, Еди́не, во бла́гости неизме́нный и неизсле́димый во щедро́тах.

Вниз влеку́щия сла́вы, я́ко из се́ти, исто́ргшеся,/ к Боже́ственней высоте́ смире́нием све́тло, преподо́бнии, возвы́сившеся,/ свети́льники све́тлы яви́стеся,/ сердца́ на́ша моли́твами свои́ми ко Христу́ просвеща́йте.

Потемне́вшую мра́ком е́реси пе́рвее,/ па́че со́лнца ве́рою Трои́це страну́ Се́рбскую просвети́вшии,/ и нас у́бо греха́ нечистоты́ ко Христу́ ны́не моли́твами свои́ми,/ Симео́не и Са́вво, омы́ти потщи́теся.

Лю́дие зако́на и благода́ти, без зако́на су́щим уподо́бихомся,/ му́жие кро́ве и льсти́ви бы́хом/ и стезю́, я́же на ны гне́ва Твоего́, ше́ствовахом,/ Го́споди, моли́твами святы́х Свои́х не погуби́ нас по беззако́ниям на́шим.

Богоро́дичен: И́стинную Богоро́дицу испове́дую, Влады́чице, Тя,/ сме́рти держа́ву потреби́вшую:/ я́ко бо оживля́ющая,/ от уз а́довых к животу́ возвела́ еси́ мя, в зе́млю те́кшаго.

Седален, глас 4:

Шестокры́лыми и Многоочи́тыми неви́димый и все́ми непостижи́мый, Влады́ко,/ милосе́рдием ми́лости сподо́бився нам ви́ден бы́ти пло́тию,/ ве́дый не́мощь на́шу, я́ко в ню обле́кшийся,/ поми́луй мно́го Ти согреши́вших, пою́щих Тебе́ раб Твои́х, Благопреме́нне Го́споди.

Песнь 4

Ирмо́с: Удиви́ся Твой ра́зум от мене́,/ услы́шавшу пресла́вная веле́ния смотре́ния Твоего́,/ укрепи́ся же возлюбле́нием Твоего́ схожде́ния,/ Ты бо моея́ нищеты́ не отве́рглся еси́.

В сердца́ на́ша я́ко прия́т страх Твой, Твои́м судо́м устро́иши,/ не гне́вом же Твои́м, Долготерпели́ве,/ щедро́тами бо па́че о нас и кро́тостию ми́лость Свою́ прояви́ши, Человеколю́бче.

Царю́ Царе́й, Еди́ному Небе́сному, Его́же Ца́рствия рачи́телие бы́вше,/ ца́рствие земно́е оста́вивше, после́довасте./ Христа́, преподо́бнии, моли́те, ца́рствующаго в нас,/ грехи́ до конца́ потреби́ти и ду́ши на́ша свободи́ти.

Егда́ на Суде́ моли́твами свои́ми огня́ гее́нскаго изба́вите,/ душетле́ние ско́рби свободи́вше, ра́я вход отве́рзти потщи́теся/ и та́мо су́щаго весе́лия насле́дники покажи́те, Са́вво и Симео́не, пою́щих вас.

Мно́жеством дре́вле беззако́ний при Но́е су́щих потопи́л еси́,/ преестество́м греха́ содоми́ты запали́л еси́./ Го́споди, моли́твами святы́х Свои́х такова́го нра́ва нечи́стаго изба́ви ду́ши на́ша и спаси́ ны.

Богоро́дичен: Ка́ко изрещи́ Твоя́ по досто́инству возмогу́ безме́рныя щедро́ты, о Влады́чице!/ я́же мою́ всегда́ ду́шу лю́те оскорбля́емую, я́ко во́ды обыше́дшия?/ Но, о, Твоего́ про́мысла и благодея́ния,/ его́же безу́мно окая́нный погуби́х!

Песнь 5

Ирмо́с: От но́щи песнь возсыла́ем Тебе́:/ возниспосли́ нам ми́лость Твою́, Го́споди,/ Ты бо еси́ Бог наш,/ ра́зве Тебе́, ино́го не ве́мы.

Из но́щи злых дел мои́х, от мглы лю́тыя грех ра́ди уны́ния,/ псало́мски, Све́та Пода́телю, Бо́же, Бо́же мой, к Тебе́ у́тренюю/ и извести́ ду́шу мою молю́ся, приклони́ у́хо Твое́ к моле́нию моему́.

И высоту́ благоро́дия и златопоя́санных оста́вившее в пусты́не жи́ти изво́лили есте́,/ весь бо мир преоби́дим есть, и́мже еди́н Бог жела́ем.

Греха́ отбе́гнути и слеза́ми умили́тися, стена́ти же покая́нием,/ моли́твами свои́ми нас удосто́йте,/ я́ко избе́гнути бу́дущий боле́зни,/ егда́ слеза́ не бу́дет при́нята и стена́ние бу́дет преоби́димо.

Не нам, Го́споди, не нам излие́ши ча́шу гне́ва Твоего́,/ мы бо, лю́дие Твои́ христоимени́тии, а́ще и согреши́хом,/ бо́гу ино́му не послужи́хом, моли́твами святы́х Твои́х.

Богоро́дичен: Кий Тебе́ дар принесу́ благодаре́ния,/ за я́же наслади́хся Твои́х дарова́ний и Твое́я безме́рныя благосты́ни?/ Те́мже у́бо сла́влю, песносло́влю и велича́ю Твою́ неизрече́нную ко мне ми́лость.

Песнь 6

Ирмо́с: Возопи́х всем се́рдцем, Го́споди,/ злы́ми де́лы одержи́м,/ возведи́, молю́ся, изринове́на от тли,/ Тя бо помяну́х, Спа́се,/ и возвесели́ся се́рдце мое́.

Секи́ра, яже при ко́рене, смерть секу́щая, прибли́жися,/ дре́ву непло́дному претя́щая сожже́нием,/ вострепещи́, душе́ моя́, и ты, се́рдце мое́, потряси́ся,/ плоды́ покая́ния принеси́, вопию́щи:/ пощади́ мя, Го́споди, и спаси́ мя.

Не помина́юще зла, и́миже Бо́га прогне́вахом,/ о нас, преподо́бнии, умоли́ти Его́ потщи́теся,/ презре́ти согреше́ния и в покая́ние привести́,/ не хо́щет бо сме́рти гре́шных жи́зни Пода́тель.

С чи́ны Небе́сными Влады́це Христу́ я́ко предстоя́ще,/ с ни́ми, преподо́бнии, моли́теся благовре́менно житие́ пода́ти,/ умно́жити же плоды́ доброде́телей, Са́вво и Симео́не, пою́щих ва́шу па́мять.

Твои́м, Го́споди, убежде́н милосе́рдием, приклони́ у́хо Твое́ на моли́тву на́шу,/ люде́й на́ших в правове́рии соблюди́ и Це́рковь си́лою Свое́ю утверди́,/ прости́ нам вся согреше́ния моли́твами святы́х Твои́х.

Богоро́дичен: Обыдо́ша мя жите́йския бу́ри, я́ко пче́лы сот, Де́во,/ и мое́ содержа́щия се́рдце уязвля́ют стре́лы скорбе́й:/ но да обря́щу Тя Помо́щницу, и Гони́тельницу, и Изба́вительницу, Всепречи́стая.

Песнь 7

Ирмо́с: Яви́ся на ны благода́ть Твоя́, Спа́се,/ и свет Креста́ Твоего́ возсия́ ми́рови:/ благослове́н еси́, Го́споди,/ Бо́же оте́ц наши́х,

Боже́ственным Свои́м, Го́споди, призре́нием при́зри на ны, лю́ди Твоя́,/ и вонми́ мольбе́ раб Твои́х, Человеколю́бче, и изба́ви нас греха́ сме́рти душегу́бныя,/ и супроти́вных нахо́да, и вся́каго муче́ния.

Нетле́нную сла́ву прия́сте на Небесе́х,/ на земли́ же па́мять ва́шу ублажа́ем, Симео́не и Са́вво достохва́льнии,/ ов бо миропода́телен, други́й же чист и благоуха́нен,/ о́ба ко Христу́ моли́твами нас спаси́те.

Егда́ престо́лы поста́вятся и кни́ги дел отве́рзутся,/ ко́злищ у́части, гре́шных стоя́ния изба́вити,/ овца́м же десны́м святы́м Его́ причти́ти, преподо́бнии,/ Христу́ Царю́ моли́теся пою́щих ва́шу па́мять.

Бог ми́лостив и щедр, Бог ревни́в и наказа́ющ,/ мно́го у тебе́ ми́лости, мно́го же и осужде́ния,/ на ли́ца не взира́еши, коему́ждо по де́лом его́ су́диши,/ моли́твами святы́х Твои́х не преда́ждь нас пра́ведному Твоему́ Суду́.

Богоро́дичен: Виждь ми́лостивым о́ком Твои́м, и посети́ озлобле́ние, еже́ и́мам,/ и лю́тых напа́стей, и вреда́, и бед, и от искуше́ний мя изба́ви/ безме́рною ми́лостию Твое́ю.

Песнь 8

Ирмо́с: Угрожа́й царь иногда́ ю́ношам/ пещь угото́ва/ и непови́нным повеле́ вве́рженным бы́ти,/ испове́дающим Бо́га препросла́вленнаго,/ Его́же благословя́т творе́ния всея́ тва́ри во ве́ки.

Те́ло зло́биво, души́ сопроти́вно, пренечи́сто име́я,/ всем житие́ блу́дно исхода́тайствовав,/ бесо́м жили́ще себе́ поста́вих, и́же при́сно уби́ти мя поуча́ются,/ к Тебе́, Го́споди, прибега́ю:/ в руку́ Твое́ю дыха́ние всея тва́ри.

Мно́гих удиви́сте, ева́нгельски Христу́ после́довавше,/ поще́нием же и смире́нием оби́льно в пусты́не обогати́стеся,/ Симео́не блаже́нне и Са́вво свяще́нне, дво́ице святодуше́вная,/ Тро́ице ны́не о нас моли́теся.

Вся, я́же на земли́, оста́вивше, всех Царю́, Христу́, усе́рдно после́довасте,/ тем на Небесе́х Вы́шняго Иерусали́ма гра́ждане вас досто́йно всели́л есть,/ иде́же чту́щих вас усе́рдно, а́ще и вели́ко есть проси́мое, в свое́ покрови́тельство приими́те.

Меч, блиста́ющ с Небе́с, упи́вшийся кро́вию,и серп летя́щ, я́же ви́де проро́к, -/ гнев Твой, Го́споди, на согреша́ющия и до возме́здия сме́рти необрати́мых,/ я́ко Ми́лостив и Благоутро́бен, отврати́ от нас моли́твами святы́х Свои́х.

Богоро́дичен: Ра́дуйся, престо́ле огнеобра́зный Госпо́день./ Ра́дуйся, Боже́ственная и манноприе́мная ру́чко./ Ра́дуйся, златы́й свети́льниче, свеще́ неугаси́мая./ Ра́дуйся, де́вам сла́во и ма́терем украше́ние и похвало́.

Песнь 9

Ирмо́с: Стра́нствия Влады́чия/ и Безсме́ртныя Трапе́зы/ на Го́рнем ме́сте высо́кими умы́,/ ве́рнии, прииди́те, наслади́мся,/ возше́дша Сло́ва,/ от Сло́ва научи́вшеся, Его́же велича́ем.

Стра́нствующа мя за́поведи преступле́нием,/ пло́ти прия́тием Ты, Влады́ко, ми́лостивно Себе́ приедини́л еси́,/ и безсме́ртныя тра́пезы со́общника мя прия́л еси́, и ве́рою, Сло́ве, насади́л еси́,/ пою́ Твою́ безме́рную ми́лость.

Мно́жество согреше́ний испове́дающе,/ се́рдце и уста́ оскверни́хом, глубину́ беззако́ния открыва́юще,/ и возду́х нечистото́ю помрачи́хом, Тебе́, Го́споди, сих очисти́телю, вопие́м:/ Твоя́ есмы́ тварь, поми́луй нас вели́кия ра́ди ми́лости Твоея́.

Кто не диви́тся и кто не сла́вит Твое́, Влады́ко, долготерпе́ние:/ презре́ беззако́ния,и преступа́я непра́вды, премину́еши нече́стие,/ и, все грехи́ на́ша обраща́я, ми́луеши, и гне́ва не наво́диши,/ кто изглаго́лет щедро́ты Твоя́?

Кто есть Бог, я́ко Ты, Бог наш, Его́же Небеса́ со А́нгелы ужаса́ются и земля́ с челове́ки потряса́ется,/ бе́здны смуща́ются, и ад испромеща́ется,/ вся тварь со стра́хом изменя́ется,/ кто изглаго́лет си́лы Твоя́?

Богоро́дичен: Моле́ние мое́ приими́ убо́гое/ и пла́ча моего́ не пре́зри, и слез, и стена́ния;/ но заступи́ мя, я́ко Блага́я, и проще́ния испо́лни:/ мо́жеши бо вся, я́ко Всемо́щнаго Влады́ки Бо́га Ма́ти,/ а́ще возмога́еши то́кмо моему́ окая́нному смире́нию.

Моли́тва

О свяще́нная главо́, пресла́вный чудотво́рче, святи́телю Христо́в Са́вво, Се́рбския земли́ первопресто́льниче, храни́телю и просвети́телю, всех же христиа́н благонаде́жный пред Го́сподем предста́телю, тебе́ припа́даем и мо́лимся: даждь нам бы́ти прича́стником любве́ твоея́ к Бо́гу и бли́жнему, е́юже при жи́зни свята́я душа́ твоя́ преиспо́лнена бысть. Озари́ нас и́стиною, просвети́ ум и се́рдце на́ше све́том Боже́ственнаго уче́ния, научи́ нас тебе́ подража́ти ве́рно, Бо́га и бли́жняго на́шего люби́ти и за́поведи Госпо́дни соверша́ти непогреши́тельно, да бу́дем и мы ча́да твоя́ не по и́мени то́кмо, но всем житие́м на́шим. Моли́ся, святы́й архиере́ю, о Святе́й Правосла́вней Це́ркви и оте́честве твое́м земно́м, при́сно тя любо́вию чту́щем. При́зри благоутро́бно на вся́ку ду́шу ве́рных твои́х чти́телеи, ми́лости и по́мощи твоея́ и́щущих, бу́ди всем нам в боле́знех цели́тель, в ско́рбех уте́шитель, в печа́лех посети́тель, в беда́х и ну́ждах помо́щник, в час же сме́ртный ми́лостивый покрови́тель и защи́титель, да, при по́мощи моли́тв твои́х святы́х, сподо́бимся и мы, гре́шнии, спасе́ние ве́рное получи́ти и Ца́рствие Христо́во унасле́довати. Ей, свя́тче Бо́жий, не посрами́ упова́ния на́шего, е́же на тя кре́пко возлага́ем, но яви́ нам твое́ многомо́щное заступле́ние, да сла́вим и пое́м ди́внаго во святы́х Свои́х Бо́га, Отца́ и Сы́на и Свята́го Ду́ха, всегда́, ны́не и при́сно и во ве́ки веко́в. Ами́нь.

На ма́лой вече́рни

На Го́споди, воззвах: стихи́ры на 4, глас 1.

Подо́бен: Небе́сных чино́в:

Ны́не приспе́ пресве́тлая па́мять/ блаже́ннаго Мартиниа́на,/ прииди́те днесь, празднолю́бцы,/ псалмы́, и пе́сньми, и пе́нии духо́вными/ честно́е его́ преставле́ние ублажи́м,/ любо́вию почита́юще.

Ны́не наста́вшее хвале́ние/ принесе́м отцу́ Богому́дрому,/ и́же во мно́зе по́двизе, в посте́х, и в моли́твах, и бде́нии/ жизнь свою́ непоро́чно препроводи́вшему,/ и Бо́гу до́бре угоди́вшему,/ и насле́довавшу Ца́рствие Небе́сное.

Ны́не да торжеству́ет све́тло Це́рковь Христо́ва,/ и мно́жество и́нок любо́вию да пра́зднуют/ че́стную па́мять отца́ всеблаже́ннаго,/ предстои́т бо на Небесе́х престо́лу Вседержи́теля/ и мо́лится за ду́ши на́ша.

Сла́ва, глас 6:

Прииди́те днесь, празднолю́бных собо́ри,/ вку́пе совоку́пльшеся, да пра́зднуем/ па́мять вели́каго отца́, па́стыря на́шего,/ и достохва́льная пе́ния воспое́м ему́:/ блаже́н еси́ и треблаже́н, о́тче Мартиниа́не,/ я́ко от ю́ности Бо́га возлюби́л еси́,/ и мирску́ю возненави́дев суету́,/ и притече́ ко всеблаже́нному Кири́ллу,/ и во все́м после́дуя ему́ невозвра́тным по́мыслом,/ и уго́дник Бо́гу вели́к показа́ся,/ и наста́вник и́ноком преди́вен был еси́,/ и, ны́не на Небесе́х предстоя́ Христу́,/ со а́нгельскими чи́нми моли́ся за ны,/ и́же ве́рою и любо́вию пра́зднующих святу́ю па́мять твою́.

И ны́не, пра́здника, глас то́йже: Прихо́дит ко Иорда́ну Христо́с:

На стихо́вне стихи́ры, глас 2.

Подо́бен: До́ме Евфра́фов:

Ду́ха Свята́го благода́ть/ име́еши в себе́,/ ду́хи бо прого́ниши,/ и неду́ги исцеля́еши,/ и согреше́ниям испро́сиши оставле́ние.

Стих: Честна́ пред Го́сподем/ смерть преподо́бных Его́.

Благопослушли́в еси́, преподо́бне,/ ко всем, с ве́рою приходя́щим к моще́м твои́м,/ и прося́щим исцеле́ния/ испроси́ душа́м и те́лом,/ и спасе́ние получи́ти сподо́би.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Богоуго́дну жизнь свою́/ и све́тлы по́двиги соверши́в, всеблаже́нне,/ в Вы́шних ликоству́еши,/ помина́й нас,/ пра́зднующих па́мять твою́.

Сла́ва, и ны́не, глас и подо́бен то́йже:

И́же во Иорда́не крести́выйся от Иоа́нна,/ Тво́рче веко́м и Зижди́телю,/ с Богоро́дицею мо́лит Тя Мартиниа́н, уго́дник Твой,/ да спасе́ши нас/ и Ца́рствия Небе́снаго сподо́биши.

Тропа́рь, глас 2, зри на вели́цей вече́рни.

На вели́цей вече́рни

Блаже́н муж: На Го́споди, воззвах: стихи́ры преподо́бнаго, глас 4.

Подо́бен: Свы́ше зван:

Егда Боже́ственное жела́ние на́йде на тя, всеблаже́нне,/ тогда́ от ю́на во́зраста роди́теля своя́ оста́вил еси́,/ и мирску́ю суету́ до конца́ возненави́дев,/ и притече́ к преподо́бному Кири́ллу,/ поревнова́в честно́му и Богоуго́дному житию́ его́,/ после́дова ему́ со вся́цем усе́рдием и в посте́х,/ и в моли́твах, и бде́нии, и воздержа́нии,/ и по мно́зе по́двизе Бо́гови благоугоди́л еси́,/ Его́же моли́ спасти́ и просвети́ти ду́ши на́ша.

Егда́ свы́ше Всеви́дящее О́ко ви́де благо́е изволе́ние твое́,/ тогда́ укрепля́ет тя на духо́вныя по́двиги/ и побе́ду ти да́рует на неви́димаго бори́теля,/ ты же, преподо́бне, равноа́нгелом житие́ пожи́л еси́,/ Боже́ственныя благода́ти сподо́бися,/ чуде́сным де́йствием обогати́ся,/ Христу́ Бо́гу прославля́ющу тя,/ Его́же моли́ спасти́ и просвети́ти ду́ши на́ша.

Егда ми́ра оста́вил еси́/ и и́ноческое житие́ восприя́т,/ тогда́ крест свой на ра́мо взем,/ Христу́ после́довал еси́,/ плотска́я стремле́ния посто́м и воздержа́нием ду́хови повину́л еси́,/ бде́нием и моли́твами ум свой к Бо́гу впери́л еси́,/ смире́ние, и молча́ние, и кро́тость с незло́бием,/ и любо́вь нелицеме́рную, ра́вну ко всем, име́л еси́/ и мног плод доброде́телей к Бо́гу прине́сл еси́,/ Его́же моли́ спасти́ и просвети́ти ду́ши на́ша.

И́ны стихи́ры, самогла́сны. Глас 5:

Преподо́бне о́тче Мартиниа́не,/ Бо́га измла́да взыска́л еси́/ и Тому́ еди́ному рабо́тая день и нощь,/во псалме́х, и пе́ниих, и пе́снех духо́вных,/ моли́твы возсыла́я к Вы́шнему,/ у́мным а очи́ма при́сно взира́я на Созда́теля,/ ми́лости прося́ и спасе́ния,/ и услыша Госпо́дь моле́ние твое́,/ низпосла тебе́ благода́ти дар Святаго Ду́ха/ и Ца́рствию Небе́сному сотвори́ тя прича́стника,/ в не́мже ны́не с преподо́бными ликоству́я,/ моли́ся Влады́це Христу́/ спасти́ся Богосо́бранному ти ста́ду/ и мир ми́рови дарова́ти/ и душа́м на́шим ве́лию ми́лость.

Преподо́бне о́тче Мартиниа́не,/ приле́жно моли́ся,/ прибли́жился еси́ ко Го́споду несумне́нною ве́рою,/ и на Него́ наде́жду и упова́ние возложи́л еси́,/ и глаго́лаше су́щим с тобо́ю:/ Бра́тие, подвиза́йтеся неосла́бно во вре́менней жи́зни сей,/ мно́зи бо суть соплете́ныя се́ти вра́жия на земли́ просте́рты./ Го́рько терпе́ние, но сла́дко воздая́ние,/ томи́тельно бде́ние и всено́щное моле́ние,/ но поко́йно восприя́тие жи́зни ве́чныя,/ печа́льно о гресе́х се́тование и со слеза́ми покая́ние,/ но ра́достно спасе́ние и мук избавле́ние,/ еже́ ты, всеблаже́нне, се́ял еси́ слеза́ми,/ ра́достию же пожа́л еси́ жизнь ве́чную во Ца́рствии Небе́снем,/ в не́мже с преподо́бными ликоству́я,/ моли́ся Влады́це Христу́ спасти́ся Богосо́бранному ти ста́ду/ и мир ми́рови дарова́ти/ и душа́м на́шим ве́лию ми́лость.

Преподо́бне о́тче Мартиниа́не,/ многи по́двиги и труды́,/ терпе́нием и злострада́нием житие́ свое́ препроводи́л еси́,/ жили́ще себе́ предугото́вив Свято́му Ду́ху,/ И́же и всели́ся в тя,/ и Пресвяте́й Тро́ицы служи́тель непоро́чен был еси́,/ принося́ Же́ртву безкро́вну и благоприя́тну,/ о о́бщем спасе́нии возсыла́я моли́твы к Вы́шнему,/ благосе́рд же и ми́лостив, всеблаже́нне, был еси́,/ свято́е смире́ние и благо́е молча́ние весьма́ при́сно име́л еси́,/ и́ми же врага́ победи́в,/ ду́шу свою́ спасл еси́/ и, Богоуго́дно житие́ соверши́в,/ ве́чное блаже́нство получи́л еси́,/ и ны́не на Небесе́х предстоя́ при́сно со А́нгелы Пресвяте́й Тро́ице,/ моли́ спасти́ся Богосо́бранному ти ста́ду/ и мир ми́рови дарова́ти/ и душа́м на́шим ве́лию ми́лость.

Сла́ва, глас 6:

Прииди́те днесь, христолюби́вое ста́до/ и вси благове́рнии лю́дие,/ собра́вшеся в це́рковь Бо́жия Ма́тере,/ пра́зднуем, ра́дующеся в пе́снех и пе́ниих,/ ублажа́юще в преподо́бных предо́бляго Мартиниа́на всеблаже́ннаго,/ и с ве́рою и любо́вию вопие́м ему́:/ ра́дуйся, ше́ствовавый путе́м Влады́ки Христа́/ и жизнь свою́ без поро́ка преше́дый посто́м,и бде́нием,/ и непреста́нными к Бо́гу моли́твами,/ ра́дуйся, и́ноческому житию́ пресве́тлый свети́льниче/ и слове́сному ста́ду своему́ преди́вный наста́вниче,/ те́мже и мы днесь, ча́да твоя́,/ пра́зднующе любо́вию пресве́тлую па́мять твою́,/ притека́ем к многоцеле́бным моще́м твои́м/ и, припа́дающе, мо́лим тя:/ моли́ся, преподо́бне, в Тро́ице сла́вимому Бо́гу,/ да спасе́т ду́ши на́ша твои́ми моли́твами.

И ны́не, пра́здника, глас 2: Приклони́л еси́ главу́ Предте́чи:

Вход. Прокимен дне и чте́ния три преподо́бническая.

На лити́и стихи́ры хра́му: та́же стихи́ры пра́здника, что пи́саны на Го́споди, воззвах: того́ дни 12-го числа́, подо́бен: Го́споди, а́ще и на суди́щи: По сих чудотво́рцу стихи́ры самогла́сны, глас 1:

Воспое́м ны́не в пе́снех и пе́ниих, собра́вше лик,/ и восхва́лим преподо́бнаго Мартиниа́на труды́, и по́двиги,/ и зе́льное воздержа́ние, и безчи́сленное слез тече́ние./ Не возлюби́ бо из де́тска во́зраста/ многомяте́жнаго жития́ и мимотеку́щаго,/ но, жела́я насле́дити живо́т ве́чный,/ вре́менным искупи́ ве́чная и тле́нным нетле́нная,/ бде́нием наедине́ со А́нгелы на Небесе́х, в ли́це пе́нием,/ посто́м и воздержа́нием поко́й безконе́чный стяжа́л еси́,/ слеза́ми и воздыха́нием – ми́лость Бо́жию,/ труды́, и боле́зньми, и злострада́нием – Ца́рство Небе́сное,/ его́же ны́не и получи́л еси́, о́тче всеблаже́нне,/ те́мже и мы днесь, пра́зднующе па́мять твою́, мо́лим тя:/ моли́ся Христу́ Бо́гу/ спасти́ и поми́ловати ду́ши на́ша.

Глас 2: Прииди́те, восхва́лим до́бляго сего́ подви́жника/ и Богоуго́днаго Це́ркви предста́теля, глаго́люще:/ ра́дуйся, о́тче всеблаже́нне Мартиниа́не,/ я́ко богоуго́дно на земли́ житие́ пожи́л еси́,/ до́бре бо де́лал еси́ зе́млю серде́чную,/ блага́я семена́ духо́вных дел се́ял еси́,/ и мног плод доброде́телей к Бо́гу прине́сл еси́,/ и вели́ких дарова́ний от Него́ сподо́бися:/ боле́зни исцеля́еши, бе́сы прогоня́еши,/ и стра́сти облегча́еши,/ и от бед и скорбе́й избавля́еши./ Весть бо Госпо́дь прославля́ющих Его́ прославля́ти/ и чудоно́сными дарова́нии обогаща́ти,/ я́ко же и тебе́ чудесы́ исцеле́ния обогати́л есть, о́тче преподо́бне,/ сего́ ра́ди мо́лим тя, Богоблаже́нне,/ душа́м и телесе́м на́шим пода́ждь исцеле́ние и согреше́нием испроси́ оставле́ние/ и ве́лию ми́лость.

Глас 4: Духо́вное житие́ твое́ и подвиза́ние/ и до́брое де́лание/ бысть нам духо́вная ле́ствица,/ к Небеси́ возводя́щая,/ утвержде́на ве́рою несумне́нною,/ твоя́ же пресвяты́я мо́щи содева́ют мно́гая чудеса́/ и подаю́т разли́чная исцеле́ния приходя́щим и моля́щимтися с ве́рою,/ те́мже и мы, пра́зднующе днесь светоно́сную па́мять твою́, мо́лим тя:/ моли́ся, преподо́бне, Влады́це Христу́,/ И́же во Иорда́не крести́вшемуся,/ и ми́лостива Того́ нам сотвори́,/ и засту́пник нам буди́ от вся́каго обстоя́ния зла́го,/ и смире́ние ми́ру испроси́,/ и спасе́ние душа́м на́шим пода́ждь,/ и́же ве́рою и любо́вию пра́зднующим пресве́тлую па́мять твою́.

Сла́ва, глас 6:

Преподо́бне и треблаже́нне, Богому́дре о́тче Мартиниа́не,/ Христо́вы ра́ди любве́ измла́да оста́вил еси́ роди́теля,/ бога́тство и сла́ву су́етную нивочто́же вмени́в,/ и притече́ к преподо́бному Кири́ллу,/ и после́довал еси́ во все́м Богоуго́дному житию́ его́,/ бде́нием и сухояде́нием, смире́нием и молча́нием,/ кро́тостию и незло́бием,/ чистоту́ же душе́вную и любо́вь духо́вную/ по премно́гу име́л еси́/ и про́чая стяжа́л еси́ Боже́ственный доброде́тели,/ и́мже навы́че от прему́драго своего́ учи́теля,/ те́мже и Христо́с, Всеви́дящее О́ко,/ устро́ил тя па́стыря и учи́теля бы́ти и́ноком./ Ты же, всеблаже́нне, упасе́ до́бре ста́до Христо́во на зла́це воздержа́ния/ и приведе́ ко Христу́ мно́жество спаса́емых,/ те́мже и мы днесь мо́лим тя приле́жно:/ не преста́й моли́ся Христу́ Бо́гу/ дарова́ти нам спасе́ние и ве́лию ми́лость.

И ны́не, пра́здника, глас 8: Днесь тварь просвеща́ется:

На стихо́вне стихи́ры самогла́сны, глас 8:

Преподо́бне о́тче Мартиниа́не,/ ты измла́да Бо́га взыска́л еси́/ и Того́ за́поведи непоро́чно сохрани́л еси́./ Сего́ ра́ди и Той тя просла́ви чуде́сным де́йствием/ и обогати́ благода́тию исцеле́ния:/ ду́хи лука́выя прогоня́еши,/ боле́зни исцеля́еши/ и от вся́ких неду́гов здра́вне подава́еши/ с ве́рою притека́ющим к че́стным моще́м твои́м,/ те́мже и мы мо́лим тя, о́тче преподо́бне,/ моли́ся спасе́ние получи́ти нам и ве́лию ми́лость.

Стих: Честна́ пред Го́сподем/ смерть преподо́бных Его́.

Богому́дре о́тче Мартиниа́не,/ ты воздержа́нием мно́гим/ стра́стное те́рние из ко́рене исто́ргнул еси́,/ посто́м и моли́твами вся ко́зни вра́жия разруши́л еси́,/ пото́ки сле́зными полки́ бесо́вския потопи́л еси́,/ тем и Христо́с побе́ду ти дару́ет на неви́димый бори́тели,/ и по преставле́нии твое́м честны́я мо́щи твоя́/ источа́ют исцеле́ния да́же и до днесь/ с ве́рою несумненною и с чи́стою совестию притека́ющим к тебе́./ Тем и мы мо́лим тя, преподо́бне,/ моли́ся спасе́ние получи́ти нам и велию ми́лость.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Богоно́се о́тче Мартиниа́не,/ ты Бо́гом возлю́блен бысть от ю́наго во́зраста/ и сосу́д чист яви́ся Пресвято́му Ду́ху,/ вели́кий Христо́в уго́дниче и пресве́тлый свети́льниче,/ А́нгелом собесе́дниче и преподо́бным украше́ние,/ по́стником удобре́ние, и́ноком наста́вниче,/ ублажа́ем свято́е и Богоуго́дное житие́ твое́,/ почита́ем честны́я твоя́ труды́ и по́двиги,/ восхваля́ем тя, преподо́бне,/ я́ко те́сным и приско́рбным путе́м ше́ствовал еси́/ и доше́л еси́ Ца́рства Небе́снаго,/ в не́мже ны́не с преподо́бными ликовству́я,/ моли́ся спасе́ние получи́ти нам и ве́лию ми́лость.

Сла́ва, глас тойже:

Прииди́те, и́ночестии собо́ри и правосла́вный лю́дие,/ блаже́ннаго отца́ на́шего Мартиниа́на днесь па́мять почти́м,/ и, соше́дшеся, духо́вно пра́зднуем/ и, честны́й обстоя́ще гроб его́,/ любо́вию поклоня́емся и с ве́рою вопие́м ему́:/ ра́дуйся, земны́й А́нгеле,/ поне́же ра́вно А́нгелом на/ земли́ пожи́л еси́,/ ра́дуйся, Небе́сный челове́че,/ я́ко на Небесе́х Пресвяту́ю Тро́ицу со А́нгелы сла́вши,/ ра́дуйся, я́ко и по сме́рти от Бо́га восприя́л еси́ дар чудотворе́ния,/ ра́дуйся, благосе́рдый врачу́ душа́м и тело́м/ и моле́бниче ко Го́споду,/ Ему́же не преста́й моля́ся/ дарова́ти нам здра́вие и спасе́ние,/ и на сопоста́ты побе́ду и одоле́ние,/ и ми́ру всему́ смире́ние и ве́лию ми́лость.

И ны́не, пра́здника, глас 6: Е́же от Де́вы Со́лнце:

Тропа́рь, глас 2:

Бо́гу от ю́ности, о́тче, избра́вшу и возлюби́вшу тя/ и прови́дящу твое́ до́брое произволе́ние,/ наставля́ет тя приити́ к преподо́бному Своему́ уго́днику -/ Кири́ллу всеблаже́нному,/ от него́же наста́влен бысть на путь спасе́ния,/ стра́хом Бо́жиим, и чистото́ю душе́вною, и благогове́нием,/ и непреста́нными к Бо́гу моли́твами/ во мно́зе по́двизе жизнь свою́ препроводи́л еси́/ и за́поведи Бо́жия непоро́чно соблю́л еси́,/ па́стырь и наста́вник и́ноком преди́вен был еси́,/ и ны́не Престо́лу Христо́ву со дерзнове́нием предстои́ши на Небесе́х,/ со А́нгелы светлоликоству́я,/ о́тче преподо́бне, Мартиниа́не всеблаже́нне,/ не преста́й моля́ся Христу́ Бо́гу/ спасти́ и поми́ловати ду́ши на́ша.

На у́трени

На Бог Госпо́дь: тропа́рь пра́здника, два́жды. Сла́ва, свята́го, и ны́не, пра́здника.

По 1-м стихосло́вии седа́лен, глас 5.

Подо́бен: Собезнача́льное Сло́во:

От ю́ности, преподо́бне, Бо́га возлюби́л еси́,/ и ко блаже́нному Кири́ллу приведе́ся от свои́х роди́телей,/ и вда́лся еси́ ему́ со вся́цем усе́рдием,/ от него́же навы́че Боже́ственному ра́зуму,/ и богоуго́дно на земли́ житие́ соверши́л еси́,/ и чудесе́м от Бо́га дар восприя́л еси́,/ Его́же моли́ дарова́ти нам спасе́ние и ве́лию ми́лость.

Сла́ва, и ны́не, пра́здника, что на ряду́ того́ числа́ 12-го.

По 2-м стихосло́вии седа́лен, глас 4.

Подо́бен: Удиви́ся Ио́сиф:

Безсме́ртную жизнь, о́тче, возлюби́л еси́,/ маловре́менное житие́ возненави́дел еси́,/Ца́рство Небе́сное получи́ти вожделе́л еси́/ и сего́ ра́ди в посте́х, и бде́нии, в слеза́х и воздыха́ниях,/ в труде́ и по́двизе жизнь свою́ препроводи́л еси́,/ тем и яви́ся чи́сто жили́ще Пресвято́му Ду́ху,/ Его́же де́йствием све́тло ны́не украша́яся,/ моли́ спасти́ нас, воспева́ющих тя.

Сла́ва, и ны́не, пра́здника.

По полиеле́е седа́лен, глас 8.

Подо́бен: Прему́дрости:

Наста́ днесь, Богоно́се, пресве́тлая па́мять твоя́,/ в ню́же соше́дшеся, ра́достию тя восхваля́ем/ и духо́вныя по́двиги твоя́ почита́ем,/ и́хже до́бре сверши́л еси́, и Христу́ благоугоди́л еси́,/ и чуде́с де́йствие от Него́ восприя́л еси́,/ бесо́вскую тьму от челове́к прогоня́еши/ и разли́чный неду́ги и я́зи исцеля́еши притека́ющим ти с ве́рою./ Тем и мы мо́лим тя, преподо́бне Мартиниа́не, о́тче наш,/ моли́ Христа́ Бо́га согреше́нием оставле́ние дарова́ти/ пра́зднующим любо́вию святу́ю па́мять твою́.

Сла́ва, и ны́не, седа́лен пра́здника, что на са́мый пра́здник пи́сан на полиеле́осе.

Таже степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 10.

По 50-м псалме́ стихи́ра, глас 6:

Егда́ преставле́ние пресвята́го твоего́ те́ла готовля́шеся,/ тогда́, всеблаже́нне, призва́л еси́ тоя́ оби́тели настоя́теля и бра́тию,/ наказу́я их, глаго́ля:/ бра́тие, подвиза́йтеся о свое́м спасе́нии,/ до́ндеже вре́мя и́мате,/ я́ко житие́ се кра́тко есть и ско́ро прехо́дит,/ потщи́теся восприя́ти жизнь ве́чную/ и любо́вь име́йте ме́жду собо́ю,/ я́коже и Христо́с возлюби́л есть нас/ И сия́ си́це глаго́лаше/ и предаде́ святу́ю свою́ ду́шу в ру́це Бо́жий./ Восприе́мше же свято́е те́ло твое́/ со псалмы́ и пе́сньми и со слеза́ми/ че́стно во гро́бе положи́ша./ Аще же и те́лом, о́тче, почива́еши,/ но чудеса́ содева́еши/ и разли́чная исцеле́ния подава́еши/ с ве́рою притека́ющим к многоцеле́бным моще́м твои́м./ И ны́не, всеблаже́нне Мартиниа́не,/ со дерзнове́нием предстоя́ Престо́лу Пресвяты́я Тро́ицы,/ не преста́й о нас моля́ся/ и не забуди, Богоблаже́нне,/ я́ко сохрани́тися нам от враго́в ненаве́тным/ и спасти́ся душа́м на́шим.

Пра́зднику кано́н пе́рвый твори́м со ирмосо́м на 6. Кано́н преподо́бному Мартиниа́ну чудотво́рцу, ему́же краегране́сие си́цево: Восхвали́ти уго́дника твоего́, Христе́, Мартиниа́на, словоотверзе́ние уст мои́х даждь ми, молю́ Ти ся. Глас 8,

Песнь 1

Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко Еди́н сла́вно просла́вися.

Песнь ти приношу́, всеблаже́нне Мартиниа́не, от недосто́йных уст мои́х,/ приими́ бла́го се́рдце и спаси́ мя, сла́вяща Го́спода, просла́вльшаго тя,/ сла́вно бо просла́вися.

Пое́м твою́ светоно́сную па́мять,/ в ню́же соше́дшеся, духо́вно пра́зднуем,/ и, у свята́го твоего́ гро́ба исцеле́ние с ве́рою прие́млюще, здра́ви отхо́дят, сла́вяще Го́спода,/ сла́вно бо просла́вися.

Пое́м и почита́ем, преподо́бне, твоя́ честны́я по́двиги, боле́зни же и труды́,/ и́миже потруди́ся во вре́менней сей жи́зни,/ и сла́вим Го́спода, просла́вльшаго тя,/ сла́вно бо просла́вися.

Богоро́дичен: Пое́м Тя, Ма́ти Бо́жий,/ я́ко породи́ нам Спа́са и Изба́вителя ро́ду на́шему,/ изба́вльшаго нас от а́довых нереши́мых уз и се́ни сме́ртныя,/ и сла́вим Рождество́ Твое́, сла́вно бо просла́вися.

Ин кано́н, глас 2.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная сила́,/ вопло́щшееся же Сло́во всезло́бный грех потреби́ло есть,/ препросла́вленный Госпо́дь сла́вно бо просла́вися.

В глубине́ зло́бы от неразу́мия погря́знувшаго испра́ви мя, преподо́бне Мартиниа́не,/ и ми́лостив бу́ди дерзну́вшу воспе́ти тя,/ и ра́зум очище́н пода́ждь ми,/ да по достоя́нию хвалу́ принесу́ тебе́.

В ю́ности, о́тче, зе́льне роди́телей свои́х отлучи́ся,/ и Христа́ Бо́га взыска́л еси́,/ и Того́ от всея́ души́ возлюби́л еси́,/ и горя́щею ве́рою Тому́ порабо́тал еси́,/ и ничто́же ти возбрани́ ю́ность цвету́щая,/ но и многоле́тных превзы́де разу́мною тве́рдостию.

В посте́х и в моли́твах,/ в терпе́нии и злострада́нии стра́стное взыгра́ние умертви́л еси́/ и плоть свою́ изнури́л еси́ и души́ пови́нну сотвори́л еси́,/ до́ндеже возмо́же бра́тися проти́ву неви́димых боре́ний,/ и кре́пким свои́м противле́нием победи́ всю неприя́зненную си́лу.

Богоро́дичен: Виждь, Влады́чице Богоро́дице, мно́гое на ны враг на́ших воста́ние/ и непреста́нное душ на́ших ра́тование/ и вонми́ на́шему неможе́нию на их противле́ние,/ умилосе́рдися, Всепе́тая,/ потщи́ся ско́ро свободи́ти нас от всех се́тей неприя́зненных.

Катава́сия пра́здника.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Ты еси́, преподо́бне, утвержде́ние и кре́пость разсла́бленно житие́ иму́щим,/ ты же и просвеще́ние страстьми́ омраче́нным,/ с ве́рою к тебе́ прибега́ющим.

Ты, блаже́нне Мартиниа́не, мно́гими труды́ и по́двиги плоть свою́ истощи́л еси́,/ чистоту́ же душе́вную посто́м и воздержа́нием в себе́ соблю́л еси́,/ тем и Свято́му Ду́ху жили́ще чи́сто показа́ся.

Ты, Богому́дре, свои́м подвиза́нием и труды́ духо́вную бразду́ до́бре де́лал еси́,/ и, сле́зною вла́гою напои́,/ безстра́стия клас возрасти́л еси́,/ и та́мо пожа́л еси́ жизнь ве́чную.

Богоро́дичен: Ты еси́, Пречи́стая, гора́ Бо́жия присе́нная,/ Ты Боже́ственная трапе́за мы́сленная,/ прие́мшая Хле́ба – Христа́, живота́ всех и Пита́теля,/ и Тебе́ воспева́ем, сла́вяще.

Ин

Ирмо́с: Процвела́ есть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием Твои́м,/ в не́йже утверди́ся мое́ се́рдце.

Просия́ житие́ твое́, Богоно́се, всесве́тло, я́ко со́лнце,/ просвеща́я ду́ши, и́же ве́рою и любо́вию к тебе́ приходя́щия,/ и обраща́ющийся к Бо́гу наставля́еши на путь спасе́ния.

Просия́ днесь па́мять твоя́, Богоблаже́нне, све́тлыми исцеле́ний луча́ми,/ ея́же ве́рою пра́зднующих духо́вный благода́ти исполня́еши,/ душа́м же и телесе́м здра́вие и спасе́ние подава́еши.

Богоро́дичен: Преудиви́шася а́нгельстии чи́нове/ и устраши́шася челове́ческа существа́ в пречи́стем рождестве́ Твое́м, Богоро́дице,/ я́ко Безпло́тный Бог плоть от Тебе́ нас ра́ди восприя́т,/ И́мже утверди́шася вся́ческая.

Конда́к и и́кос пра́здника.

Седа́лен, глас 8:

От ю́наго во́зраста, преподо́бне, страх Бо́жий всели́ся в тя,/ Его́же любо́вию разгора́ем,/ го́рько душе́вную жизнь сию́ презре́л еси́,/ сла́дкому Влады́це после́довати возжеле́л еси́,/ посто́м, и бде́нием, и зе́льным воздержа́нием у́ды телеси́ своего́ умертви́л еси́,/ несумне́нною же ве́рою и благи́ми де́лы доброде́телей ду́шу свою́ оживотвори́л еси́,/ тем и по преставле́нии твое́м чуде́с дар от Бо́га восприя́л еси́,/ те́мже, о всеблаже́нне Мартиниа́не, о́тче наш преподо́бне,/ моли́ Христа́ Бо́га грехо́м оставле́ние дарова́ти/ пра́зднующим любо́вию святу́ю па́мять твою́.

Сла́ва, и ны́не, пра́здника.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Услы́шаша о́крестнии лю́дие твоя́, преподо́бне, чудеса́ и исцеле́ния,/ и уве́девше чу́дная и Богоуго́дная дела́ твоя́,/ и просла́виша тя, Всеблаже́нне.

Услыши нас, смире́нных раб свои́х, мо́лим тя, всеблаженне,/ и многообра́зных сете́й вражиих потщи́ся свободи́ти нас/ и спасе́ние получи́ти сподоби.

Услы́ши, благосе́рде, мно́гими грехи́ обремене́нных нас/ и не заме́дли, Христо́в уго́дниче, пода́ти душа́м спасе́ние и телесе́м здра́вие/ ве́рою и любо́вию почита́ющим тя.

Богоро́дичен: Услы́ши, Богоро́дице, нас, вопию́щих Ти и сла́вящих Твое́ вели́чие,/ и изба́ви нас от вся́каго зла́го обстоя́ния,/ и наста́ви нас твори́ти во́лю Сы́на Твоего́ и Бо́га на́шего,/ и ча́емых мук свободи́ нас, мо́лим Тя.

Ин

Ирмо́с: Прише́л еси́ от Де́вы, не хода́тай, ни А́нгел,/ но Сам, Го́споди, вопло́ще́ся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Путь жития́ своего́ преше́л еси́ во мно́зе по́двиге,/ воздержа́нием и злострада́нием плоть свою́ истощи́л еси́,/ ду́шу же свою́ благи́ми де́лы обогати́л еси́,/ тем ны́не, в жи́зни ве́чней ра́дуяся, Влады́це пое́ши:/ сла́ва си́ле Твое́й, Го́споди.

Посто́м и бде́нием, Богому́дре Мартиниа́не,/ и сле́зными исто́чники душе́вныя о́чи просвети́л еси́/ и ум свой над страстьми́ воцари́л еси́ кре́пким воздержа́нием,/ кро́ткаго Ду́ха сосу́д избра́н яви́ся.

Па́мять сме́ртную и чистоту́ душе́вную при́сно име́л еси́,/ тем и Бо́га зри́ши всегда́,/ непреста́нными же моли́твами, смиренному́дрием и молча́нием на врага́ побе́ду взял еси́, Богоприя́тне.

Богоро́дичен: Пода́ждь, Влады́чице, свы́ше побе́ду на борю́щая нас лука́выя ду́си,/ и́щущих на́шу поги́бель,/ Тебе́ бо еди́ну Засту́пницу и необори́мую сте́ну и́мамы,/ я́ко да, спасае́ми Тобо́ю, благода́рственно воспева́ем Тя.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бие.

Просвети́л еси́, о́тче, ду́шу свою́ непреста́нными моли́твами и слеза́ми те́плыми/ и душе́вныя о́чи выспрь вы́ну име́л еси́,/ до́лу же теле́сных оче́й зре́ние, смиренному́дрием обогаща́яся.

Просвети́, Богоблаже́нне, ду́шу мою́, помрачи́вшуюся лю́те,/ и наста́ви на стезю́ Богоразу́мия,/ и укрепи́ мя в благи́х дея́ниих,/ да, в путь твой ше́ствуя, непреста́нно ублажа́ю тя.

Просвети́л еси́ всех Боже́ственным житие́м свои́м/ и был еси́, преподо́бне, вене́ц и́ноком,/ не ка́мением многоце́нным, но доброде́телию обложе́н, яви́л бо ся еси́ Богора́дованное воистинну украше́ние.

Богоро́дичен: Просвети́ла еси́ Боже́ственным рождество́м Твои́м во тьме и се́ни сме́ртней седя́щая,/ Изба́вителя бо нам, Пречи́стая, родила́ еси́, Ему́же вопие́м:/ Твоего́ ми́ра пода́ждь нам, Еди́не Человеколю́бче.

Ин

Ирмо́с: Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику, Отцу́ Твоему́,/ от но́щи неве́дения/приведе́ние и́мамы.

Хода́тая тя к Бо́гу стяжа́хом, всеблаже́нне, и моле́бника те́пла,/ моли́, о́тче, многоко́зненных неви́димых кова́рств изба́витися нам/ и на суди́щи Христо́ве предста́ти неосужде́нных сподо́би нас.

Хода́тай ко Влады́це, о́тче Мартиниа́не, буди́ о нас, воспева́ющих тя/ и ве́рою пра́зднующих че́стную па́мять твою́,/ и наста́ви нас на путь покая́ния,/ и сподо́би избежа́ти му́ки ве́чныя.

Христа́ изде́тска возлюби́л еси́/ и Тому́ невозвра́тно после́дова, житие́ свое́ непоро́чно сконча́л еси́, пресла́вне,/ и яви́лся еси́ Тро́ицы чи́сто жили́ще,/ Е́йже ны́не предстоя́, помина́й нас, ве́рою почита́ющих тя.

Богоро́дичен: Хода́таица к Бо́гу и челове́ком Помо́щница Ты еси́, Богоро́дице,/ Тобо́ю бо, Влады́чице, Безле́тнаго Сы́на Твоего́ и Бо́га на́шего уве́дехом/ и от тьмы неве́дения на Богоразу́мие приведо́хомся.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/к Тебе́ бо возопи́х, и услы́ши мя,/ Бо́же спасе́ния моего́.

Очи́стил еси́ ум свой бде́нием и моли́твами/ и сле́зными тече́нии ду́шу свою́ чи́сту соде́лал еси́,/ смире́нием же и кро́тостию к жи́зни ве́чней возвы́сися.

Очи́сти мя, преподо́бне Мартиниа́не, от страсте́й тиме́ния, належа́щих на мя,/ в сих бо побежда́юсь при́сно,/ но, победи́вый боре́ния вра́жия,/ победи́ и мою́ грехо́вную напа́сть, востаю́щую на мя.

Очи́сти мя, всеблаже́нне, от скве́рных зол мои́х/ и сла́бость мою́ стягни́ ми,/ в воздержа́нии же и целому́дрии жи́ти укрепи́ мя/ и чистоту́ пода́ждь се́рдцу моему́, молю́тися.

Богоро́дичен: Очи́сти мя, Богоро́дице, от всех мои́х согреше́ний,/ Ты бо еси́ нам, ве́рным, наде́жда и спасе́ние и гре́шным заступле́ние,/ и из глубины́ зол возведи́ мя, молю́ Ти ся.

Ин

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

В глубину́ ста́рости, о́тче, дости́же,/ но ника́коже от духо́внаго по́двига ослабе́,/ не бо дал еси́ сна свои́ма очи́ма,/ но тща́ся до конца́ сохрани́ти душе́вную све́тлость,/ во благи́х же по́двизех сконча́вся, блаже́нней жи́зни сподо́бися.

Во оби́тели был еси́ преподо́бнаго Се́ргия па́стырь и учи́тель слове́сному ста́ду/ и не оста́ви сея́ оби́тели,/ но па́ки прии́де в дом Пресвяты́я Богоро́дицы/ и втори́цею просвети́л еси́ нас Боже́ственным житие́м свои́м/ и оты́де в ве́чную жизнь.

Вели́ко дерзнове́ние ко Го́споду и́маши, всеблаже́нне,/ и вели́кому дарова́нию от Него́ сподо́бися,/ я́ко всяк неду́г и вся́ку я́зю исцеля́еши приходя́щим ти с ве́рою,/ да всяк убо, и́же отложи́т сомне́ние, не погреши́т своего́ жела́ния.

Богоро́дичен: Во оби́тели сей, Пречи́стая Богома́ти, не забу́ди раб Свои́х,/ с ве́рою притека́ющих к це́ркви святе́й Твое́й/ и ми́лости прося́щих и очище́ния своему́ согреше́нию,/ и от вся́кия ско́рби и печа́ли изба́ви нас,/ и из глубины́ страсте́й возведи́, и спаси́ мя.

Конда́к, глас 8:

Благоизво́лив, преподо́бне,/ от ю́наго во́зраста рабо́тати Го́сподеви день и нощь,/ в стра́се Бо́жий и благогове́нии чистоту́ душе́вную соблю́л еси́,/ в моли́твах же и бде́ниих ум твой предочи́стил еси́,/ в по́двизех же, злострада́ниих те́ло твое́ изнури́в,/ вся доброде́тели духо́вныя испра́вил еси́/ и о́браз хотя́щим по тебе́ спасти́ся яви́лся еси́./ Те́мже ны́не, при́сно зря на Небесе́х Пресвяту́ю Тро́ицу,/ моли́ся, всеблаже́нне, дарова́ти душа́м на́шим спасе́ние,/ и житию́ на́шему исправле́ние,/ да вси ве́рою вопие́м ти:/ ра́дуйся, преподо́бне Мартиниа́не, о́тче наш.

И́кос:

Ка́ко возмогу́ по достоя́нию восхвали́ти тя, о всеблаже́нне,/ испо́лнен бо есмь вся́кий зло́бы,/ но ве́рою и любо́вию восхваля́ю тя,/ а́ще бо и челове́к бе подо́бием, о́тче,/ но а́нгельски на земли́ пожи́л еси́, я́ко безпло́тен,/ те́мже, преподо́бне, похва́льная тебе́ воспева́ем си́це:/ ра́дуйся, Богоблаже́нне, я́ко от ю́на во́зраста роди́телема свои́ма приведе́ся к преподо́бному Кири́ллу/ и Бо́жиим про́мыслом к нему́ вожделе́ вда́тися./ Возьми́ ме́не, – ре́че,– о честны́й о́тче, и наста́ви на путь спасе́ния./ И от него́ навы́че духо́вному по́двигу./ Ра́дуйся, я́ко испо́лнитель был еси́ Боже́ственным за́поведей;/ ра́дуйся, я́ко Богоуго́дным житие́м свои́м А́нгелы возвесели́л еси́./ Ра́дуйся, я́ко чудесы́ свои́ми челове́цы удиви́л еси́;/ ра́дуйся, по́стником украше́ние и преподо́бным похвала́./ Ра́дуйся, и́ноком предста́тель и засту́пник,/ те́мже и мы согла́сно вопие́м ти:/ ра́дуйся, преподо́бне Мартиниа́не, о́тче наш.

Песнь 7

Ирмо́с: О́троцы Богочести́вии в Вавило́не/ о́бразу злато́му не поклони́шася,/ но посреде́ пещи́ о́гненный, ороша́еми,/ песнь воспева́ху, глаго́люще:/ превозноси́мый отце́в и нас Бо́же, благослове́н еси́.

Ди́вен Бог, прославля́яй святы́х Свои́х,/ я́коже просла́ви тебе́, всеблаже́нне, мно́гими чудесы́ и разли́чными исцеле́нии,/ ве́рою припа́дающим к ра́це моще́й твои́х/ исцеле́ния оби́льна подава́еши, вопию́щим:/ благослове́н Бог оте́ц на́ших.

Доброде́тели мно́ги, о́тче, стяжа́л еси́,/ и, за́поведи Бо́жия до́бре испра́вив,/ житие́ непоро́чно сверши́в,/ блаже́нную жизнь получи́л еси́,/ и ны́не в лице́ преподо́бных пое́ши:/ благослове́н Бог оте́ц на́ших.

Да пое́тся и прославля́ется днесь преподо́бный Мартиниа́н,/ и Боже́ственный по́двиги его́ да почита́ются,/ и ди́вныя чудеса́ его́ да пропове́даются,/ Небе́сным бо све́том просвеща́ет и духо́вный благода́ти исполня́ет ве́рою вопию́щих:/ благослове́н Бог оте́ц на́ших.

Богоро́дичен: Де́во Влады́чице Богоро́дице,/ необори́мая стено́ и тве́рдое прибе́жище/ и те́плое заступле́ние от вся́ких напа́стей и скорбе́й ве́рою призыва́ющим пречи́стое и́мя Твое́,/ изба́ви мене́, грехо́вными беда́ми содержи́ма/ и ча́стыми напада́нии лю́те стра́ждуща,/ да, свобожде́н, воспева́ю Тя:/ благослове́н, Пречи́стая, Плод прижи́тия Твоего́.

Ин

Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ есть./ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Богоподо́бным житие́м свои́м А́нгелы возвесели́л еси́/ и челове́цы по́льзы испо́лнил еси́,/ бе́сов посрами́л еси́ и нам о́браз оста́ви сопротивля́тися кова́рством их./ И ны́не в па́мяти твое́й пода́ждь тре́бующим спаси́тельная проше́ния и от души́ вопию́щим:/ Сый благослове́н Бог и препросла́влен.

Бу́дущую сла́ву жела́я получи́ти,/ мимоше́дшую презре́л еси́,/ и жите́йския молвы́ отлучи́ся, и к Бо́гу, о́тче, прилепи́ся,/ и, вседу́шно рабо́тав Ему́ день и нощь,/ прославля́л Его́ во псалме́х, и пе́ниих, и пе́снех духо́вных,/ те́мже и Той тя просла́ви в Ца́рствии Небе́снем,/ и ны́не, ра́дуяся, пое́ши:/ Сый благослове́н Бог и препросла́влен.

Боже́ственною си́лою укрепля́ем,/ посто́м, и моли́твами, и смиренному́дрием вра́жию горды́ню до конца́ смири́л еси́,/ и того́ многоконе́чныя се́ти покры́л еси́,/ и чи́стым житие́м свои́м Бо́гу благоугоди́л еси́,/ и Боже́ственный сла́вы прича́стник яви́ся,/ и ны́не, с преподо́бными веселя́ся, пое́ши:/ Сый благослове́н Бог и препросла́влен.

Богоро́дичен: Благослове́нна еси́, Обра́дованная, Богоро́дице Де́во, в род и род,/ я́ко родила́ еси́ Сы́на, И́же пре́жде век Бо́га на́шего, нетле́нным зача́тием и рождество́м неизрече́нным,/ те́мже честне́йши еси́, Богоро́дице, Небе́сных сил и всея́ тва́ри превы́ше и сла́внее,/ и мы, раби́ Твои́, ве́рою вопие́ Ти:/ благослове́н, Пречи́стая, плод Твоего́ чре́ва и препросла́влен.

Песнь 8

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Избави́телю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Свята́го Ду́ха в себе́ жили́ще име́л еси́,/ стра́хом Бо́жиим и чистото́ю душе́вною устро́ився,/ тем и одарова́ся от Бо́га Боже́ственною благода́тию,/ весть бо Госпо́дь прославля́ти просла́вльших Его́,/ я́коже ты, преподо́бне, просла́ви Его́ чу́дным и Богоуго́дным житие́м Свои́м на земли́,/ та́ко и тебе́ просла́ви в Ца́рствии Небе́снем,/ в не́мже ны́не, не премолча́я, пое́ши:/ де́ти, благослови́те, свяще́нницы, воспо́йте,/ лю́дие, превозноси́те Его́ во ве́ки.

Свята́го Ду́ха благода́ть де́йствует тобо́ю и до ны́не,/ чудеса́ бо содева́еши и разли́чная исцеле́ния подава́еши к святы́м моще́м твои́м с ве́рою приходя́щим,/ но, о всеблаже́нне Мартиниа́не,/ исцели́ и моя́ теле́сныя боле́зни, я́же грехми́ роди́л,/ и ду́шу мою́ просвети́ и согреше́нием оставле́ние испроси́, пою́щу:/ де́ти, благослови́те, свяще́нницы, воспо́йте,/ лю́дие, превозноси́те Его́ во ве́ки.

Све́та трисо́лнечнаго, Богому́дре, соприча́стник ны́не бысть с преподо́бными Кири́ллом и Ферапо́нтом,/ предстоя́ престо́лу Вседержи́теля тва́ри, со А́нгелы воспева́я непостижи́мую Его́ держа́ву,/ с ни́ми же, Богоблаже́нне Мартиниа́не, при́сно о нас моли́ся,/ любо́вию ублажа́ющих и почита́ющих тя во вся ве́ки.

Богоро́дичен: Сняты́й Дух на́йде на Тя и Си́ла Вы́шняго осени́ Тя, Де́во Чи́стая,/ и воплоти́ся от пречи́стаго Твоего́ чре́ва, я́коже изво́ли,/ да нас свободи́т от рабо́ты вра́жия,/ но что Ти принесе́м, Богоро́дице,/ ко́е ли пе́ние воспое́м, и́ли ку́ю похвалу́ воздади́м,/ досто́йно бо восхвали́ти Твое́ вели́чество ника́коже недоуме́ем мы,/ но ве́рою и любо́вию пое́м и превозно́сим Тебе́, Чи́стую Богома́терь, во ве́ки.

Ин

Ирмо́с: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рный же ороша́ющая, пою́щия:/ благослови́те, вся дела́ Госпо́дня, Го́спода.

Па́мять твоя́, о́тче Мартиниа́не, иногда́ забве́нию предана́ бысть от неиму́щих к тебе́ от се́рдца те́плыя ве́ры,/ ны́не же, преподо́бне, сия́ет па́мять твоя́ пресве́тлая, я́ко заря́ невече́рняя, испуща́ющи лучи́ исцеле́ния,/ и мы пра́зднуем днесь ве́рою и лю́бовию,/ просвеща́еши бо пою́щих и превознося́щих Христа́,/ просла́вльшаго тя, во вся ве́ки.

Прииди́те, стеце́мся днесь,/ да пра́зднуем ра́достно пресве́тлую па́мять Христо́ва уго́дника, Мартиниа́на всеблаже́ннаго,/ почита́юще пресве́тлыя его́ по́двиги и мно́гия доброде́тели, и духо́вно возвесели́мся,/ Боже́ственную бо благода́ть подае́т/ ве́рою и любо́вию соверша́ющим святу́ю па́мять его́ во вся ве́ки.

Просия́ днесь вселе́тная па́мять уго́дника Бо́жия,/ созыва́ющи многочи́сленное христиа́нское со́нмище,/ и притека́ющии к моще́м его́ исцеле́ния оби́льна прие́млют,/ и тьмо́ю грехо́вною омраче́нныя просвеща́ются,/ и духо́вных даро́в исполня́ются,/ и, с ве́рою пра́зднующе святу́ю и светоно́сную па́мять его́,/ сла́вим и превозно́сим Христа́ и Его́ уго́дника во вся ве́ки.

Богоро́дичен: Пресвята́я Богоро́дице, по до́лгу воспева́ем Тя,/ и́же иногда́ во тьме неве́дения бы́вшая ны,/ ны́не же на свет ве́дения возведо́хомся,/ и от тьмы свободи́хомся пречи́стым Рождество́м Твои́м,/ и Тобо́ю позна́хом, Пренепоро́чная, Бо́га И́стиннаго, Созда́теля и Соверши́теля вся́кой тва́ри,/ Его́же, я́ко Сы́на Своего́ и Зижди́теля, моли́ при́сно за воспева́ющий Тя/ и превознося́щия во вся ве́ки.

Песнь 9

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком плотски/ и чре́во Твое́ бысть простра́ннейшее Небе́с/ Тем Тя, Богоро́дицу,/ А́нгелов и челове́к чинонача́лия велича́ют.

Удиви́шася а́нгельстии чи́нове равноа́нгельскому житию́ твоему́, преподо́бне,/ ка́ко подвиза́ся во пло́ти су́щей и безпло́тнаго врага́ победи́л еси́/ и вене́ц победи́тельный от Подвигополо́жника Бо́га восприя́л еси́,/ те́мже тя, всеблаже́нне Мартиниа́не,/ и́ночестии чи́нове, велича́ем.

Удиви́шася челове́цы пресве́тлому и Богоуго́дному житию́ твоему́, Богому́дре,/ не дал бо еси́ сна свои́ма очи́ма, ни ве́ждома дрема́ния,/ до́ндеже сподо́бися ра́йскаго наслажде́ния,/ иде́же угото́ва Бог поко́й лю́бящим Его́,/ труды́ же твои́ и злострада́ния и великоду́шное терпе́ние кто исчести́ мо́жет?/ Тем тя вси велича́ем.

Удиви́шася то́гда о́крестный лю́дие,/ егда́ во оби́тели блаже́ннаго Кири́лла роди́телей свои́х отлучи́лся еси́,/ и ка́ко, в толи́це ю́ности су́щей, столе́тен смысл иму́щи,/ прии́де бо, и припаде́ к нему́, и рече́:/ возьми́ мене́, святы́й о́тче, к своему́ преподо́бству/ и наста́ви на путь спасе́ния./ Он же прови́де тебе́, хотя́ща бы́ти сосу́да избра́нна,/ прия́т тебе́ и наста́ви на духо́вный по́двиги,/ и уго́дник Бо́гу вели́к показа́ся,/ тем тя вси велича́ем.

Богоро́дичен: Удиви́шася а́нгельстии собо́ри и челове́честии ро́ди о сем,/ Его́же бо трепе́щут вся́ческая, Сего́, Чи́стая, во чре́ве Свое́м понесла́ еси́/ и роди́ Собезнача́льна Сы́на и Сопресто́льна Отцу́ и Ду́хови па́че у́ма и сло́ва,/ за милосе́рдие ми́лости сообра́зна бы́вша/ и изба́вльшаго челове́чество от вра́жия губи́тельства,/ тем тя, Богоро́дице, А́нгел и челове́к чинонача́лия, велича́ем.

Ин

Ирмо́с: Безнача́льна Роди́теля Сын, Бог и Госпо́дь, вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Безнача́льному Царю́ веко́м послужи́л еси́, преподо́бне, в посте́х, и моли́твах, и бде́ниих день и нощь/ и во сто труды́ уплодоноси́л еси́, от ни́хже восприя́л еси́,/ в не́мже ликоству́я, моли́ся, всеблаже́нне, за пра́зднующий ве́рою и любо́вию святу́ю па́мять твою́.

Безнача́льный Влады́ка Госпо́дь, ви́дев твоя́ Божественныя по́двиги и труды́,/ Пресвята́го Ду́ха благода́тию обогаща́ет тя/ и по преставле́нии твое́м исто́чник чуде́с дарова́ тебе́,/ а́ще бо и последи́ всех возсия́л еси́, но пе́рвых че́сти сподо́бися,/ те́мже тя вси, уго́дника Христо́ва, велича́ем.

Боже́ственных и блаже́нных оте́ц на́ших Ферапо́нта и Мартиниа́на в пе́снех и пе́ниих днесь да ублажи́м,/ о́вого убо я́ко нача́льника оби́тели сей,/ о́вого же я́ко соверши́теля,/ и, ве́рою моля́щеся, вопие́м им:/ о всеблаже́ннии Христо́вы уго́дницы,/ о дво́ице пресвята́я!/ А́ще и теле́сне разлуче́ны есте́,/ но, ду́хом вку́пе предстои́те Пресвяте́й Тро́ице,/ Е́йже при́сно о ста́де свое́м моли́теся,/ да вас в пе́снех непреста́нно велича́ем.

Богоро́дичен: Безнача́льнаго Отца́ Сын Соприсносу́щен, воплоти́вся из Тебе́, Де́во Богоро́дице, нам яви́ся,/ и возведе́ и просвети́ во тьме и се́ни сме́ртней седя́щая,/ и совокупи́ расточе́нный И́мени ра́ди Его́,/ Тебе́ ра́ди, Ма́ти Бо́жия, сме́рти ве́чныя избы́хом и живо́т получи́хом/ и тем Тя, всехва́льную Богоро́дицу, велича́ем.

Свети́лен.

Подо́бен: Посети́л ны:

Просвети́, преподо́бне, на́ши серде́чныя о́чи воззре́ти на Боже́ственную добро́ту/ и освяти́ на́ша ду́ши и телеса́,/ да досто́йными устна́ми песнь хвале́ния ти прино́сим,/ и моли́ся, преподо́бне, за чту́щия тя/ и ве́рою пра́зднующий па́мять твою́ присноблаже́нную.

Сла́ва, и ны́не, пра́здника.

На хвали́тех стихи́ры на 4, глас 8.

Подо́бен: О, пресла́внаго чудесе́:

О́тче преподо́бне Мартиниа́не,/ ты измла́да житие́ богоуго́дно и чистото́ю укра́шено име́л еси́/ и вся доброде́тели тяжа́л еси́,/ в ни́хже соде́лал еси́ духо́вную ле́ствицу,/ по не́йже дои́де Го́рняго Иерусали́ма посто́м и бде́нием/ и непреста́нными моли́твами,/ и ны́не со А́нгелы на Небе́сех сла́виши Пресвяту́ю Тро́ицу, ра́дуяся,/ Ея́же моли́ о воспева́ющих тя/ и ве́рою пра́зднующих святу́ю па́мять твою́.

О́тче Богому́дре Мартиниа́не,/ честны́я мо́щи твоя́, исто́чник чудесе́м/ и ре́ку исцеле́ния, дарова́ Госпо́дь челове́ком:/ слепы́м прозре́ние, хромы́м хожде́ние,/ разсла́бленным кре́пость,/ прокаже́нным очище́ние,/ нечи́стым духово́м от челове́к прогна́ние/ и вся́кия боле́зни облегче́ние/ с ве́рою несумне́нною приходя́щим и моля́щим ти ся/ и любо́вию пра́зднующим святу́ю па́мять твою́.

О́тче всеблаже́нне Мартиниа́не,/ твое́ Богоуго́дное житие́ бысть нам просвеще́ние,/ и сла́дость духо́вная, и благ путь ко спасе́нию,/ и́мже богоуго́дне ше́ствовал еси́,/ и по́двиг свой непоколеби́м до конца́ соблю́л еси́,/ и получи́л еси́ Ца́рство Небе́сное,/ но, я́ко дерзнове́ние име́я нехода́тайственно,/ помина́й нас, предстоя́ Пресвяте́й Тро́ице,/ восхваля́ющих тя и ве́рою пра́зднующих святу́ю па́мять твою́.

Сла́ва, глас 5:

Прииди́те, празднолюби́вии и́ноцы, духо́вное сосло́вие,/ прииди́те, лик соста́вим в настоя́щее пра́зднество/ вселе́тныя па́мяти блаже́ннаго отца́ на́шего, си́це рцем:/ ра́дуйся, избра́нниче возлю́бленне Христу́ Бо́гу и преподо́бным похвало́,/ пра́ведным единовсе́льниче, по́стником удобре́ние,/ и́ноком пресве́тлое украше́ние,/ гре́шным к Бо́гу те́плый моле́бниче,/ заблу́ждшим наста́вниче,/ печа́льным утеше́ние, в напа́стех засту́пниче,/ в беда́х помо́щниче, в ско́рбех исцели́телю,/ и всем, и́же с ве́рою прося́щим и приле́жно моля́шимся ти ся,/ пода́еши вся, я́же на по́льзу,/ те́мже, о всеблаже́нне Мартиниа́не,/ предста́тель и засту́пник бу́ди нам от вся́кия беды́ и печа́ли/ и спаси́ ста́до свое́ моли́твами свои́ми.

И ны́не, пра́здника: Днесь Христо́с на Иорда́н прише́д крести́тися:

На литурги́и

Блаже́нны пра́зднику, песнь 7-я, а преподо́бному песнь 3-я. Апо́стол ко Евре́ем, зача́ло 335. Ева́нгелие от Луки́, зача́ло 24.

На моле́бне

Ева́нгелие от Матфе́я, зача́ло 43.

Сей же Богоро́дичен глаго́лется по 3-й пе́сни на моле́бне и́ли в ке́ллии.

Глас 8:

Напа́сти многоко́зненныя приидо́ша на мя от враго́в ви́димых и неви́димых,/ и бу́ря одержи́т мя,/ и волне́ние потопля́ет мя безчи́сленных мои́х согреше́ний,/ и неча́яние сумня́ет мя, окая́ннаго,/ ра́ди моего́ беззако́ния,/ и ны́не, Милосе́рдая Госпоже́ Богоро́дице,/ прибега́ю аз, убо́гий раб Твой,/ к Твоему́ те́плому заступле́нию и покрову́/ и к ти́хому приста́нищу бла́гости Твоея́./ Изба́ви мя, Влады́чице, от враго́в мои́х, ви́димых и неви́димых,/ и от напа́стей и бед спаси́,/ и от согреше́ний мои́х свободи́,/ и моли́ся, Пречи́стая, о всех рабе́х Твои́х, непреста́нно восхваля́ющих Тя/ и ве́рою кла́няющихся Пречи́стому Рождеству́ Твоему́.

Ве́чер

Блаже́н муж: На Го́споди, воззва́х: стихи́ры пра́здника 3 и преподо́бнаго 5, глас 4.

Подо́бен: Дал еси́ зна́мение:

Ум предочи́стив от страстна́го движе́ния,/ пома́зание свято́е прия́л еси́, преподо́бне,/ па́стырь Богоизбра́нен быв, всеблаже́нне,/ Ду́хом Боже́ственным и пресла́вными твои́ми уче́нии/ наста́вил еси́ ста́до к зла́ку Богоразу́мия/ и к пути́ спасе́нному./ Сего́ ра́ди почита́ем тя свяще́нными пе́сньми.

Лоза́ благора́сленна Боже́ственнаго виногра́да быв,/ доброде́телей Боже́ственный гро́зды прине́сл еси́, преподо́бне,/ исцеле́нием ка́пля, всем челове́ком иска́пающа при́сно,/ священнотаи́нниче всече́стне,/ темже, торжеству́юще пресла́вную па́мять твою́,/ покланя́емся честны́м моще́м твои́м,/ просвеще́ние почерпа́юще.

Благосказа́нием слове́с твои́х,/ преподо́бне отче Мартиниа́не,/ Це́рковь Христо́ва украша́ется,/ честны́ми твои́ми уче́нии доброде́телей,/ темже почита́ем свяще́нное твое́ торжество́ и преставле́ние пресла́вное,/ и́нокующим похвало́, святы́й побо́рниче.

Ины стихи́ры преподо́бнаго, глас 8:

Подо́бен: О, пресла́внаго чудесе́:

О́тче Богому́дре Мартини́ане,/ ты от утро́бы Бо́гу приложи́ свой смысл,/ весь прилежа́ Вседержи́телю,/ плоды́ досто́йны принося́ Ему́ от свои́х по́двиг, преподо́бне,/ венча́емь доброде́тельными венцы́,/ тем благи́х обре́те восприя́тие, досточу́дне.

Ты мни́хом наказа́тель/ и Ру́сской земли́ звезда́ пресве́тлая,/ осия́ющи чудесы́ вся стра́ны на́ша,/ тя бо Бог пре́же избра́ от ю́ности, о́тче,/ па́стыря овца́м слове́сным,/ тем преподо́бных лик тя восприим,/ с ни́ми же моля́ся,/ проси́ ста́ду твоему́ грехо́в оставле́ние.

Отче Богому́дре Мартиниа́не,/ сле́зными исто́чники просвети́вый мысль,/ Бо́гови бесе́довал еси́,/ непреста́нными очище́нии и сия́нии/ столп све́тел благоче́стия огнесия́нен яви́ся, блаже́нне,/ и́нокующих учи́тель и похвала́,/ и ны́не всех нас соблюди́ хода́тайством твои́м.

Сла́ва, глас тойже. Самогла́сен:

Боже́ственнаго испо́лнь ра́зума,/ ста́ду слове́сному Христо́ву яви́лся еси́ Боже́ственный учи́тель,/ сия́ воспита́я богому́дренно и благоче́стно на па́жити Боже́ственнаго славосло́вия,/ те́мже ны́не твое́ честно́е преставле́ние почита́ем,/ просла́вльшаго тя Го́спода велегла́сно сла́вяще,/ Того́ моли́, преподо́бне о́тче Мартиниа́не,/ стране́ на́шей на враги́ одоле́ние побе́ды дарова́ти,/ и Це́ркви правосла́вных благоче́стное единомышле́ние,/ и спасе́ние душа́м на́шим.

И ны́не, пра́здника.

Вход. Проки́мен дне. Чте́ния преподо́бническая.

На ли́тии стихи́ры самогла́сны. Глас 6:

Богоно́се преблаже́нне Мартиниа́не,/ все плотско́е мудрова́ние ду́хови повину́л еси́, поще́ния страда́ньми утверди́вся,/ я́ко зла́то, искуше́но в горни́ле, сия́я, яви́ся,/ прия́телище бысть Ду́ху Пресвято́му,/ собра́в и́ночествующих мно́жества/ и уче́нии свои́ми, я́ко не́коею ле́ствицею восхо́дною на Не́бо,/ на высоту́ доброде́телей возведе́,/ помина́й нас, чту́щих па́мять твою́ присносвяще́нную,/ и моли́ спасти́ся душа́м на́шим.

Возсия́ днесь пресве́тлая и всепра́зднественная па́мять твоя́,/ пресла́вне Мартиниа́не,/ созыва́ющи многочи́сленный по́стник и преподо́бных ликостоя́ния,/ А́нгели же со челове́ки я́ко вои́стинну к похвале́нию/ И́же в Тро́ице покланя́ема Христа́ Бо́га на́шего,/ те́мже, притека́ют;е к свяще́нным моще́м твои́м,/ исцеле́ния да́ры оби́льно прие́млем/ и тебе́ венча́вшаго Христа́ прославля́ем,/ Спа́са душа́м на́шим.

Богоно́се преблаже́нне о́тче Мартиниа́не,/ ты проро́чески слеза́ми зе́млю омака́ше,/ не дал еси́ сна очи́ма свои́ма,/ ни ве́ждома свои́ма дрема́ния,/ серде́чное жела́ние е́же ко Христу́ явля́я,/ Его́же возлюби́л еси́,/ тем и́ноком о́браз был еси́/ и вся́кия доброде́тели вид испра́ви,/ сего́ ра́ди тя ублажа́ем, Христа́ велича́юще,/ тебе́ просла́вльшаго.

Сла́ва, глас 8:

Егда́, блаже́нне, к Боже́ственному жела́нию ум свой впери́в,/ тогда́ оста́вил еси́ вся до́лу влеку́щая мудрова́ния,/ и процве́л еси́, я́ко крин прекра́сный, доброде́телию,/ и страсте́й те́рние искорени́,/ и насади́ плоды́ трудо́в свои́х,/ те́мже и пожа́т рукоя́ти – неотъе́млемо бога́тство на Небесе́х,/ Мартиниа́не преподо́бне, моли́ Христа́ Бо́га грехо́в оставле́ние дарова́ти/ воспева́ющим досто́йно сла́ву твою́.

И ны́не, пра́здника.

На стихо́вне стихи́ры, глас 2. Самогла́сен:

Ду́ха Свята́го теплото́ю, прему́дре,/ жела́ние се́рдца своего́ е́же к Бо́гу согре́яв/ и зи́му страсте́й умертви́в,/ многоко́зненную си́лу бесо́вскую низложи́л еси́/ и до конца́ не́мощных сих показа́,/ Небе́сная же во́инства удиви́л еси́ терпе́нием свои́м,/ но,я́ко по́стником подража́тель и преподо́бным сожи́тель/ моли́ спасти́ся душа́м на́шим.

Стих: Честна́ пред Го́сподем/ смерть преподо́бных Его́.

Взем крест, преподо́бне Мартиниа́не,/ кре́пко после́довал еси́ И́же нас ра́ди Распя́тому,/ и Его́ ра́ди любве́ вся оста́вил еси́,/ и Того́ Еди́наго Христа́ возлюби́л еси́,/ Ему́же со А́нгелы предстоя́,/ моли́ уще́дрити мир и спасти́ ду́ши на́ша.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Я́ко прии́м Небе́сное се́мя,/ плод стори́чествующий доброде́тели прине́сл еси́,/ Мартиниа́не, о́тче наш,/ пита́я благода́тственно и́же гла́дом та́ющих доброде́тели,/ отню́дуже исцеле́ния ве́рою приходя́щим подава́еши,/ но я́ко име́я дерзнове́ние ко Христу́,/ моли́, преподо́бне о́тче Мартиниа́не,/ спасти́ и́же ве́рою чту́щих тя/ и пра́зднующих любо́вию святу́ю па́мять твою́.

Сла́ва, глас 5:

Преподо́бне о́тче наш Мартиниа́не,/ егда́ Боже́ственным манове́нием подви́гся от млада́го во́зраста,/ пусты́ню пости́г и та́мо всели́ся,/ единомы́шленно вели́каго учи́теля спасе́нию обре́т/ и того́ стопа́м богому́дренно после́довал еси́,/ и́нокующим чинонача́льник был еси́/ и Святы́я Тро́ицы служи́тель и́стинный,/ Тоя́ моли́, свя́те, и́же благоче́стно пра́зднующим/ и всечестно́е твое́ успе́ние соверша́ющим,/ спасти́ся душа́м на́шим.

И ны́не, пра́здника.

Тропа́рь, глас 7:

От ю́ности, о́тче, избра́н и возлю́блен был еси́ Го́сподом Бо́гом,/ И́же, прови́дя до́брое твое́ произволе́ние,/ научи́ тя приити́ к преподо́бному уго́днику Своему́, Кири́ллу всеблаже́нному,/ от него́же наста́влен быв на путь спасе́ния,/ в стра́се Бо́жии и чистоте́ душе́вней,/ в благогове́нии же и непреста́нных к Бо́гу моли́твах/ житие́ твое́ непоро́чно преше́л еси́,/ и ны́не, со дерзнове́нием предстоя́ на Небесе́х Престо́лу Христо́ву,/ о́тче Мартиниа́не всеблаже́нне,/ не преста́й моля́ Христа́ Бо́га спасти́ и поми́ловати ду́ши на́ша.

Сла́ва, и ны́не, пра́здника.

На у́трени

На Бог Госпо́дь: тропа́рь пра́здника, два́жды. Сла́ва, святаго. И ны́не, пра́здника.

По 1-м стихосло́вии седа́лен, глас 8.

Подо́бен: Прему́дрости:

Весь освяще́н и Богоно́сен показа́ся,/ мир и бога́тство, све́тлость и всю ели́ка ви́димую добро́ту маловре́менную преоби́дев,/ смире́нием же и нището́ю Влады́це Христу́ после́довал еси́,/ собра́в и́нок мно́жество, и сих Правосла́вия уче́ньми просвети́л еси́./ Тем и по кончи́не нестаре́емую благода́ть прия́л еси́/ и, во гро́бе лежа́, нетле́нен пребы́сть, Богоблаже́нне Мартиниа́не,/ моли́ Христа́ Бо́га согреше́нием проще́ние дарова́ти нам.

Сла́ва, и ны́не, пра́здника.

По 2-м стихословии седален, глас 8.

Подо́бен: Повеле́нное та́йно:

Страсте́й тьму отгна́л еси́ моли́твами свои́ми, о́тче,/ и се́рдце свое́ с чу́вствы в честь Бо́гу предста́вил еси́./ Те́мже в тя всели́ся благода́ть Пресвята́го Ду́ха,/ еже́ прови́дети бу́дущая, я́ко близ настоя́щая/ и непло́дствия соу́з разреши́ти./ Те́мже и мы мо́лим тя:/ проси́ нам от Христа́ Бо́га оставле́ния грехо́в.

Сла́ва, и ны́не, пра́здника.

По полиеле е седа лен, глас 4,

Подо́бен: Яви́лся еси́:

Вели́каго отца́ и учи́теля учени́к предо́бр я́влься, преподо́бне,/ и невозвра́тным жела́нием от души́ тому́ равноа́нгелъно после́довал еси́,/ лобза́в рети́вно о́тчее наказа́ние и безмо́лвие ума́ сохрани́в немяте́жно, препроводи́л дни своя́,/ тем мо́лим тя, преблаже́нне:/ и нас сохрани́ немяте́жно от неви́димых и ви́димых враг,/ заступа́я и покрыва́я во спасе́ние ду́ши на́ша.

Сла́ва, и ны́не, Богоро́дичен:

Удиви́ся Ио́сиф, е́же па́че естества́ зря и внима́ше мы́слию,/ и́же на руно́ дождь, в безсе́менном зача́тии Твое́м, Богоро́дице,/ купину́, огне́м неопали́мую, жезл Ааро́нов прозя́бший./ И, свиде́тельствуя, обру́чник Твой и храни́тель свяще́нником взыва́ше:/ Де́ва ражда́ет и по рождестве́ па́ки Де́вою пребыва́ет.

Степе́нна, 1-й антифо́н 4-го гла́са. Прокимен: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие преподо́бническое.

По 50-м псалме́ стихи́ра, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ те́мже на Небесе́х обре́те мзду трудо́в твои́х,/ де́монския разори́л еси́ по́лчища/ и а́нгельский дости́гл еси́ чи́ны,/ ихже житию́ без поро́ка поревнова́л еси́,/ дерзнове́ние име́я ко Го́споду,/ мир испроси́ душа́м на́шим.

Кано́н пра́здника со ирмосо́м на 6 и преподо́бнаго два кано́на на 8. Кано́н преподо́бнаго, его́же краегране́сие си́це: Мартиниа́на похвали́ти ра́зум, Бо́же мой, да́руй ми. Глас 8.

Песнь 1

Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко Еди́н сла́вно просла́вися.

Песнь воспе́ти и восхвали́ти, Христе́ Бо́же наш,/ Своя́ рабы́ досто́йно сподо́би/ блаже́ннаго отца́, наста́вника и учи́теля спасе́ния на́шего.

Я́ко младе́нец, блаже́нне, в весе́лии и ра́дости усе́рдно прите́кл еси́ всех ма́тери – благода́ти Утеши́теля./ И нас, чад свои́х, наста́ви бо́дренными твои́ми к Бо́гу моли́твами,/ о́тче преподо́бне Мартиниа́не.

И́же от Тро́ицы Еди́наго, Иорда́нския во́ды освяти́ти прише́дшаго,/ Тому́, преподо́бне, усе́рдно после́довал еси́,/ моли́ Его́ и о нас, о́тче, присночту́щих честну́ю па́мять твою́.

Богоро́дичен: Во оби́тель Пречи́стыя Богома́тере от млады́я версты́ всели́вся,/ неукло́нным ра́зумом вперя́емь жела́ния доброде́телей,/ Тоя́ умоли́ спасти́ и нас, во еди́ном рве́нии до́брых соде́яний.

Други́й кано́н, глас 2.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть:/ препросла́вленный Госпо́дь сла́вно бо просла́вися.

От Све́та Свет, Христе́ мой, от Отца́ пре́жде век рожде́йся,/ И́же искони́ со Отце́м и Ду́хом,/ согреше́ния мрак души́ моея́ отгна́в, озари́ ум мой, молю́ся,/ да возмогу́ пе́ти Мартиниа́на, Твоего́ уго́дника.

От ко́рене блага́го блаже́ннейша о́трасль прозя́бл еси́,/ земны́х и маловре́менных жития́, избе́гл еси́,/ тем ны́не чистоте́ вене́ц прие́мля,/ со А́нгелы Христу́ воспева́еши, я́ко просла́вися.

Земна́я и мимотеку́щая, я́ко уме́ты, нивочто́же вмени́л еси́/ и Христа́ Еди́наго приобре́л еси́,/ Его́же сою́зом любве́ уязви́в ду́шу,/ и Того́ потща́лся еси́ обрести́ ненасыща́емыя доброты́.

Богоро́дичен: Услы́шав Е́ва прама́ти: в печа́лех роди́ши ча́да./ Ты же, Де́во Чи́стая, услы́ша: Госпо́дь с Тобо́ю, ра́дуйся, -/ и ра́дованным гла́сом, Богоневе́сто, печа́ль прама́тери потре́блыпи.

Катава́сия пра́здника.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

По апо́столу, о́тче, вы́шняя ища́, мудрова́ние е́же име́я к Бо́гу,/ и вся, я́же на земли́, оста́вил еси́, да Христа́ Еди́наго приобря́щеши,/ и пачеесте́ственныя добро́ты сподо́бился еси́, преблаже́нне.

Еще́ и ю́ноша во оби́тель свята́го Кири́лла прише́л еси́,/ но мно́гих ра́зумом све́рстник превозше́л еси́/ и я́ко и́скренний учени́к тому́ благонра́вно после́довал еси́,/ с ним моли́ Христа́ Бо́га, о́тче, и нам спасе́ния получи́ти.

Стра́хом Боже́ственным, преподо́бне, огражда́лся,/ во смире́нный путь спасе́ния прише́л еси́, Того́ Еди́наго жела́я,/ ища́ получи́ти Христа́ Бо́га, во святы́х прославля́емаго.

Богоро́дичен: Му́дрость соста́вную и Сло́во присносу́щное, Врача́ всем – Христа́, ро́ждшая, Де́во,/ гное́ния я́звы души́ моея́ исцели́,/ лю́тыя и многовре́менныя стра́сти се́рдца моего́ уста́ви.

Ин

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.

По апо́столу, о́тче, вы́шняя ища́ и мудрова́ние име́я, еже́ к Бо́гу,/ вся, я́же на земли́, оста́вил еси́/ и пачеесте́ственныя добро́ты сподо́бися.

Све́том Боже́ственным осия́емь,/ о не́м путь, е́же к жи́зни веду́щ, позна́л еси́, о́тче Мартиниа́не,/ и равноа́нгельнаго жития́ чудотво́рец исцеле́нием нарече́ся.

Зако́ны пита́яся всех Творца́ и Влады́ки,/ тем невече́рний облиста́в Свет и неле́стное со́лнце яви́лся еси́,/ прему́дрости сокро́вище, мир обогаща́я.

Богоро́дичен: Во ины́х жена́х ма́ти, до́ндеже де́ва, не позна́ся, ни ма́ти по рождестве́ де́вства сподо́бися,/ на Тебе́ же, Де́во Ма́ти, обоя́ сбы́стся,/ тем весе́лием души́ воспева́юще:/ несть непоро́чны, па́че Тебе́, Влады́чице.

Конда́к и и́кос пра́здника.

Седа́лен преподо́бнаго, глас 4.

Подо́бен: Яви́лся еси́:

Столп и утвержде́ние Це́ркви Христо́ве я́влься,/ пребога́те и преблаже́нне о́тче наш Мартиниа́не,/ о́браз и надписа́ние быв ве́ре благоче́стия,/ и́нокующим яви́ся Богоприя́тен же наказа́тель/ и Живонача́льный Тро́ицы и́стый служи́тель,/ святы́м оби́телем непреле́стен побо́рник, Це́рковь Богома́тере украси́в святы́м пе́нием,/ Тою́ умоли́, свя́те,/ спасти́ и́же ве́рою и любо́вию благоче́стно поклоня́ющихся Че́стному Рождеству́ Ея́.

Сла́ва, и ны́не, пра́здника.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вил Твое́ Божество́.

Боже́ственнаго святи́теля в увере́нии смы́слом и ра́зумом был еси́, преподо́бне,/ мно́гое тща́ние показа́в в Це́ркви Бо́жий,/ и сию́, я́ко неве́сту, украси́л еси́ пе́нием и пе́сньми духо́вными.

Нас свы́ше, ста́до свое́, назира́й, о́тче, ми́лостивно,/ стране́ на́шей побе́ды дая́ти на враги́ от всех ца́рствующаго Христа́ Бо́га моли́/ и спасти́ся всем нам.

Све́том Боже́ственным осия́емь, со А́нгелы ны́не на Небесе́х водворя́яся,/ помина́й с ве́рою чту́щих па́мять твою́,/ преподо́бне Мартиниа́не, о́тче приснопа́мятне.

Богоро́дичен: Сло́ва и Сы́на Бо́жия поро́ждшая без се́мене,/ Пита́теля жи́зни на́шея пита́ла еси́,/ и И́же в муж до́йде соверше́н, крести́тися восхоте́ Всесоверше́нный.

Ин

Ирмо́с: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щен,/ и спасл еси́ всего́ мя, челове́ка,/ Тем зову́ Ти: сла́ва си́ле Твое́й, Го́споди.

Ду́ха Свята́го зарю́ прие́м,/ я́ко звезда́ пресве́тлая, просвеща́еши страну́ Ру́сскую благода́тию чуде́с твои́х,/ днесь у́бо, све́тло торжеству́я, весели́тся, име́я тебе́ в себе́ сокро́вище неистощи́мое.

Житие́ твое́, Богоно́се преблаже́нне Мартиниа́не,/ пра́вило изве́стно и́нокующим бысть и ны́не живу́щим,/ и́же твои́м после́дующим повеле́нием, о́тче, Боже́ственному уче́нию.

А́ще у́бо, о́тче, боле́зненный и те́сный путь ше́ствовал еси́ в житии́,/ но от Бо́га нетле́нную жизнь восприя́л еси́,/ отоню́дными светлостьми́ бога́тно просвеща́яся, Богоблаже́нне Мартиниа́не.

Богоро́дичен: Я́ко приста́нище спасе́нию и сте́ну недви́жиму,/ Богоро́дице Влады́чице, ве́рнии, стяжа́хом,/ Ты бо мольба́ми Свои́ми от бед избавля́еши ду́ши на́ша.

Песнь 5

Ирмо́с: У́тренююще, вопие́м Ти:/ Го́споди, спаси́ ны, Ты бо еси́ Бог наш,/ ра́зве Тебе́, ино́го не ве́мы.

Вели́каго Мака́рия, блаже́нне, подо́бием я́влься, втора́го Еги́пта,/ попече́нием и труды́ свои́ми мно́гия ра́зумы утверди́в,/ просвети́л еси́ на па́жити Боже́ственнаго зва́ния.

Воздержа́нием мно́гим и труды́ по́стническими/ показа́л еси́, о́тче преподо́бне, о́браз ученико́м свои́м/ и сих собира́я, я́коже пче́лы,/ во угото́ванное приста́нище спасе́ния Боже́ственнаго.

Служи́тель яви́ся Вседержа́вней Тро́ице/ и прему́дрости духо́вное сокро́вище,/ мир обогаща́я златови́дными уче́нии и всех ко спасе́нию приводя́.

Богоро́дичен: Свет Преве́чный от Отца́ Безнача́льна по́слан,/ Сын Собезнача́лен и Сопресто́лен/ проше́л есть из Тебе́ роди́тися, Богоро́дице, Ма́ти Присноде́во,/ и всем спасе́ние дарова́ти.

Ин

Ирмо́с: Просвеще́ние во тьме́ лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, бо́га не зна́ю.

Яре́м Госпо́день от ю́ности взем, прему́дре,/ после́довал еси́ Христу́ скорбьми́ и слеза́ми, преподо́бне, мы́сленно о́ко к Нему́ име́я,/ до́ндеже святы́х селе́ние дости́же, обре́те поко́ище Го́рняго гра́да.

Страсте́й отгна́в мглу я́ве заря́ми, о́тче, доброде́телей,/ просвеще́ние Ду́ха в се́рдцы прии́м, Мартиниа́не,/ и́мже попали́л еси́ вся бесо́вская ополче́ния, по́стническим лико́м сопричте́ся.

Насажде́н во дворы́ Госпо́дни и в до́му Бо́га на́шего процве́л еси́,/ прии́м Небе́сное се́мя Богодухнове́нное серде́чною браздо́ю,/ клас стори́чествующий прине́сл еси́,/ те́мже обогати́ся ве́нцем чуде́с исцеле́ния.

Богоро́дичен: Упра́ви ум мой, Влады́чице, тружда́ющся,/ в пучи́не скорбе́й потопля́емь наше́ствием тлетво́рных страсте́й,/ спаси́, Богоро́дице, к Тебе́ прибега́ющия, ино́й бо по́мощи, Чи́стая, ра́зве Тебе́, не зна́ем.

Песнь 6

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.

Торжество́ сие́ и все пра́зднества сего́ совокупле́ние да́стся рабо́м твои́м, преподо́бне отче Мартини́ане,/ и сие́ приими́, блаже́нне, от чад свои́х/ и не осужде́нны нас сотвори́ ко Го́споду моли́твами твои́ми.

Наста́вник показа́ся стра́нам, све́том явля́я Боже́ственная повеле́ния,/ кня́зя умудря́я и вельмо́жи све́тлы творя́ заря́ми по́двиг твои́х,/ и всех Творца́ благода́ть, сла́вне, тя яви́, Мартиниа́не.

Свяще́ннаго Фео́дора ревни́тель еси́,/ служи́тель же Боже́ственный и своему́ отцу́ возлю́блен учени́к,/ с ним мо́лим тя, преблаже́нне, не осужде́нны нас предста́вити в день Стра́шнаго прише́ствия Христо́ва.

Богоро́дичен: Вси ве́рнии, пое́м и любовию ублажа́ем Тебе́, Бо́жию роди́тельницу,/ Христа́ Бо́га ро́ждшую,/ всем земны́м спасе́ние соде́лавшаго и обновле́ние.

Ин

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Мо́ря жите́йскаго любому́дрием испыта́в/ и разуме́в су́етна су́ща, я́ко вско́ре погиба́юща от враг,/ еди́ному прилепи́ся Христу́, Его́же ра́ди тяготу́ дневну́ю поне́сл еси́,/ от всех Тому́ восхожде́ния в се́рдцы свое́м полага́ше.

Ве́трилом окормля́емь воздержа́ния, отту́ду дости́же в приста́нище благоути́шно,/ поще́нием пита́я ду́шу свою́, преподо́бне, и све́тлу всех Творцу́ ту предста́ви./ Те́мже и Христо́с прия́т ю́, я́ко светоза́рную звезду́,/ и Свое́й сла́ве прича́стну соде́ла.

А́нгельская во́инства и́же во пло́ти житию́ твоему́ удиви́шася, о́тче Мартиниа́не,/ бу́ри бо страсте́й отбе́г, скве́рнаго жития́,/ ве́трилом воздержа́ния дости́же в благоутишное приста́нище Христо́во.

Богоро́дичен: Обетша́ны го́рьким дре́вле дре́ва вкуше́нием и па́дшаяся поползнове́нием/ Пречи́стая обнови́ла есть,/ Зижди́теля ро́ждши, Сло́во Соста́вное, Де́во Ма́ти Влады́чице.

Конда́к, глас 8.

Подо́бен: Я́ко нача́тки естества́:

От ю́наго во́зраста Боже́ственным жела́нием разже́гся,/ че́стному учи́телю в дан был еси́/ и в воздержа́нии мно́зе, о́тче, пребы́л еси́,/ ревну́я благо́му наказа́нию,/ плод многодоброде́телен Бо́гу прине́сл еси́,/ тем мо́лим тя, отче Мартиниа́не,/ моли́ Христа́ Бо́га спасти́ся душа́м на́шим.

И́кос:

Посети́вый, Го́споди, во Еги́пте Изра́иля возлю́бленными Ти воево́ды,/ сия́ зде сотвори́л еси́ чу́дным Твои́м и всеси́льным благоисполне́нием -/ прише́ствием уго́дника Твоего́ Мартиниа́на/ и его́же дарова́л еси́ нам ко́рмчия и прави́теля/ во спасе́ние и в снабде́ние и Це́ркве Твое́й украше́ние./ Тем и мо́лим Тя, Го́споди, Христе́ Бо́же наш,/ низпосли́ наро́ду на́шему и во́инству правосла́вному побе́ду и одоле́ние на вся враги́ на́ша,/ и на Стра́шнем Твое́м Суде́ отве́т благ получи́ти, и спасти́ся душа́м на́шим.

Песнь 7

Ирмо́с: От Иуде́и доше́дше, о́троцы/в Вавило́не иногда́/ ве́рою Тро́йческою пла́мень пе́щный попра́ша, по́юще:/ отце́в Бо́же, благослове́н еси́.

Написа́ние се, о́тче, уче́нии Богокре́пкими прему́дрых слове́с твои́х, блаже́нне, утверди́/ и, я́ко оте́ц чадолюби́в, незлоби́вых ти дете́й мно́жество усво́й в Це́ркви, увеща́ вопи́ти:/ благослове́н Бог оте́ц на́ших.

Яре́м Госпо́день от ю́ности взем,/ после́довал еси́ Христу́ скорбьми́ и слеза́ми, преподо́бне, мы́сленно о́ко к Нему́ име́я,/ до́ндеже святы́х селе́ний дости́же,/ обре́т поко́ище кра́йняго ра́дования, вопия́:/ благослове́н Бог оте́ц на́ших.

Пра́вило доброде́тельное и обоже́ное житие́ твое́/ ви́дено бысть ве́рными, вои́стинну, Мартиниа́не,/ благоче́стия же прави́тель сло́во твое́ и повеле́ние,/ Еди́наго Бо́га в Тро́ицы пропове́дающе, несозда́ннаго во ве́ки вся.

Богоро́дичен: Всея́ тва́ри честне́йши обре́т Тя,/ Бо́жие Сло́во в Твое́ чре́во всели́ся, Чи́стая,/ из Тебе́ Бог и Челове́к про́йде и соде́ла спасе́ние всему́ ми́ру./ Благослове́н Бог оте́ц на́ших.

Ин

Ирмо́с: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших.

Зе́льным поще́нием, я́ко благово́нного пи́щею, пита́я ду́шу свою́, преподо́бне Мартиниа́не,/ те́мже Трисо́лнечному Божеству́ предстоя́ со А́нгелы, пое́ши:/ благослове́н Бог оте́ц на́ших.

Возсия́л еси́, я́коже невече́рнее со́лнце, всю зе́млю просвеща́я, преподо́бне Мартиниа́не,/ от тьмы изба́ви страсте́й, и́же на нас наве́ты разори́/ и не воева́ны нас соблюди́, пою́щия:/ благослове́н Бог оте́ц на́ших.

Я́ко на Боже́ственную доброде́телей ле́ствицу воздержа́нием, о́тче, вшед,/ смотрели́выма очи́ма Христа́ Царя́ ви́дел еси́,/ незави́стною десни́цею по числу́ доброде́телей, Мартиниа́не,/ дарова́ния дару́я от души́ пою́щим:/ благослове́н Бог оте́ц на́ших.

Богоро́дичен: Правосла́вную му́дрость ты стяжа́в,/ Еди́ницу Трисо́лнечную, Тро́ицу Единосу́щную, пребла́женне, пропове́дал еси́/ и Сло́ва стра́шное воплоще́ние научи́л еси́ пе́ти от Богоро́дицы Присноде́вы.

Песнь 8

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

Многогре́шною душе́ю тебе́ чту́щим и пою́щим, о́тче преблаже́нне, предложи́х,/ низпосли́ нам свы́ше Бо́гом дарова́нное спасе́ние и избавле́ние,/ да мно́жаи тебе́ хвале́ние и благодаре́ние принося́ще, вопие́м:/ благослови́те, вся дела́, Го́спода и превозноси́те Его́ во ве́ки.

Ду́ха Свята́го благода́ть в тя всели́ся, лука́вым духо́м прогони́теля тя соде́ла,/ и́нокующим же наста́вника тя и учи́теля показа́ и́стинна,/ Го́спода, зовы́, по́йте, благослови́те и превозноси́те Его́ во ве́ки.

Тро́ичен: Еди́нончальная Тро́ице, все́ми влады́чествующая и тобо́ю воспева́емая, блаже́не,/ сим одари́ тя манове́нием Боже́ственным,/ це́ло и нетле́нно свяще́нное твое́ те́ло сохрани́,/ сла́вящих бо Ея́прославля́ет во ве́ки.

Богоро́дичен: Бога́тство неизда́емо и Божество́ неизрече́нно Ты яви́л еси́, Го́споди,/ чин А́нгельский, в не́мже и нас укрепи́, милосе́рдый Христе́,/ моли́твами и моле́нии ро́ждшия Тя Пречи́стыя Богоро́дицы.

Ин

Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода/ и превозноси́те во вся ве́ки.

Дрема́ния отню́дь и сна очи́ма свои́ма не дал еси́,/ до́ндеже от Христа́ возме́здие трудо́м обре́те – Небе́снаго Ца́рствия наслажде́ния,/ и́же угото́ва Бог ве́рою пою́щим:/ благослове́н Бог оте́ц на́ших.

Слеза́ми свои́ми, о́тче Мартиниа́не, омыва́яся, житие́ проше́л еси́/ и те́ми мно́жество бесо́в потопи́л еси́, ве́рных же мы́сли возвесели́л еси́, пою́щих:/ благослови́те, вся дела́ Госпо́дня, Го́спода,/ по́йте и превозноси́те Его́ во ве́ки.

Уязви́ся Боже́ственным жела́нием, всеблаже́нне,/ те́мже непоро́чное и пра́ведное житие́ проходя́,/ до́ндеже дости́же Ца́рскаго престо́ла,/ отню́дными светлостьми́ осия́ пою́щия:/ благослови́те, вся дела́ Госпо́дня, Го́спода и превозноси́те Его́ во ве́ки.

Богоро́дичен: Распя́тие и погребе́ние, И́же от Тебе́ небра́чно, Де́во, произы́де,/ претерпе́в нас ра́ди муче́ния,/ Его́же страсте́м ревну́я,/ преподо́бный Мартиниа́н крестомуче́нием поще́ния Тому́ после́дова.

Песнь 9

Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Преименова́ние взят Икони́дскаго, преподо́бне о́тче наш Мартиниа́не,/ самоде́ржца, уцелому́дрил еси́,/ непра́вду же отгна́в, пра́вду же, я́ко со́лнце, поставля́я,/ я́коже он дре́вле.

От млады́х ногте́й житие́ свое́ чи́сто име́л еси́, блаже́нне,/ тем от Христа́ Бо́га возлю́блен бысть,/ и сего́ ра́ди Пречи́стыя Его́ Богома́тере изря́дный служи́тель был еси́, отче преподо́бне.

О́бщий: И́же па́мять ва́шу свяще́нную творя́щим/ непреста́нно моли́те Изба́вителя дарова́ти оставле́ние грехо́м/ и Небе́сное Ца́рствие получи́ти, отцы́ святи́и.

Блаже́нное собра́ние, свято́е совокупле́ние,/ тро́ичным жела́нием пострада́вшая, Ферапо́нте и Мартиниа́не,/ я́ко име́ета дерзнове́ние ко Святе́й Тро́ице,/ моли́та о чтуих па́мять ва́шу.

Богоро́дичен: Возвели́чим Тя вси, возвели́чени Рождество́м Твои́м, Богоро́дице Присноде́во,/ ненаде́ющимся заступле́ние, боля́щих цели́тельнице,/ веселя́щеся, вси ро́ди, Тя велича́ем.

Ин

Ирмо́с: Я́же пре́жде со́лнца свети́льника Бо́га возсия́вшаго,/ пло́тски к нам прише́дшаго из боку́ Деви́чу,/ неизрече́нно воплоти́вшая, Благослове́нная, Всечи́стая,/ Тя, Богоро́дице, велича́ем.

Пожи́в на земли́ равноа́нгельно, те́мже и равноа́нгельную обре́те све́тлость,/ моли́ непреста́нно Изба́вителя, Мартини́ане,/ о творя́щих, блаже́нне, че́стно святу́ю па́мять твою́,/ улучи́ти оставле́ние грехо́м в День Су́дный.

У́зкий и приско́рбный путь ше́ствовав, о́тче Мартиниа́не,/ и теле́сне у́бо преста́вися, ду́хом же жив предстои́ши./ Но я́ко име́я дерзнове́ние, Ему́же в житии́ порабо́тав,/ моли́ спасти́ся душа́м на́шим.

Исцеле́нием яви́ся струя́ незави́стная,/ многомяте́жнаго пла́мене страсте́й угаси́л еси́,/ ум бо свой некра́дом, преподо́бне, соблю́л еси́,/ я́ко кре́пок, о́тче Мартиниа́не, победи́л еси́ искуси́теля.

Богоро́дичен: Еди́на иму́щая дерзнове́ние, Влады́чице, за весь мир Тому́ моли́ся,/ не помяни́ безчи́сленных на́ших грехо́в, закры́й лю́ди, вопию́щия Ти уми́льным гла́сом:/ спаси́, Чи́стая Богоро́дице, Тебе́ досто́йно велича́ющий.

Свети́лен.

Подо́бен: Ду́хом прови́дя:

Чу́дная и двоюплете́нная Ду́хом златови́дная плени́ца оте́ц блаже́нных,/ наста́ всесвяще́нная ва́ша па́мять,/ усе́рдно с любо́вию вас почита́ем, Ду́ха Свята́го прославля́юще,/ И́же вас до́бре просла́вльшаго.

Сла́ва, ин свети́лен.

Подо́бен: Не́бо звезда́ми:

А́нгельское житие́ жела́я, удали́лся еси́ в пусты́нях/ и сла́сти плотски́я покори́л еси́ уму́,/ равноа́нгелен показа́ся, Мартиниа́не Богоно́се.

И ны́не, пра́здника и́ли Богоро́дичен сей:

Пречи́стая Влады́чице, изба́ви нас от вся́ких напа́стей и скорбе́й/ и прило́ги бе́сов отжени све́том Твоего́ прише́ствия:/ Ты бо Све́та, еди́наго Христа́, родила́ еси́.

На хвали́тех стихи́ры на 4, глас 5.

Подо́бен: Преподо́бне:

Преподо́бне о́тче Мартиниа́не,/ егда́ вседе́тельным манове́нием подви́гся,/ ду́шу свою́ доброде́тельми с те́лом очи́стив,/ тогда́ дом свой укра́шен оста́вль,/ прему́дростию Ду́ха изше́л еси́,/ кра́йнее безмо́лвие любому́дрия хотя́ испра́вити./ И егда́ Пречи́стыя оби́тели дости́г,/ и в ней любому́дренно, блаже́нне, житие́ показа́./ Тем, соше́дшеся вси, преподо́бне, тя ублажа́ем.

Яви́ся, Богому́дре и Богоблаже́нне,/ му́дра плени́ца духо́вная,/ связа́я мно́гая враго́м ополче́ния./ И егда́ во и́ну страну́ отше́д,/ тогда́ чужд дом, я́ко свои́, до́бре упра́вил еси́,/ гла́са Боже́ственнаго послу́шав:/ до́брый ра́бе, ве́рный сподо́бился бы́ти./ Те́мже и за доброде́тель Госпо́дь сла́вна тя конце́м показа́,/ прему́дре Мартиниа́не и Богоблаже́нне,/ моли́ дарова́ти мир ми́рови/ и душа́м на́шим ве́лию ми́лость.

Преподо́бне о́тче Мартиниа́не,/ мно́гими труды́ и воздержа́нием/ Пречи́стыя Богома́тере оби́тель до́бре снабде́л еси́/ и мно́жество и́ночествующих любому́дренно собра́л еси́,/ уста́в и наказа́ние сим сотвори́л еси́,/ о́браз и нача́ло уче́ния всем я́сно изъяви́./ Тем и Христо́с Небе́сными тя да́ры украси́,/ Его́же моли́, блаже́нне,/ мир дарова́ти вселе́нней/ и душа́м на́шим ве́лию ми́лость.

Сла́ва, глас 8.

И́нок мно́жество,/ нача́льника тя чтим, о́тче наш Мартиниа́не,/ тобо́ю бо стезю́ пра́вую су́щу ходи́ти позна́хом./ Блаже́н еси́, я́ко Христу́ рабо́тав/ и вра́жию обличи́л еси́ си́лу,/ А́нгелом собесе́дниче, единокро́вне преподо́бным и пра́ведным,/ с ни́ми же моли́ся Го́сподеви/ поми́ловатися душа́м на́шим.

И ны́не, пра́здника, глас 2.

Днесь Христо́с на Иорда́н прии́де крести́тися,/ днесь Иоа́нн каса́ется верху́ Влады́чню./ Си́лы Небе́сныя ужасо́шася,/ пресла́вное ви́дяще та́инство./ Мо́ре ви́де и побеже́,/ Иорда́н, ви́дев, возврати́ся./ Мы же, просве́щшеся, вопие́м:/ сла́ва яви́вшемуся Бо́гу,/ и на земли́ ви́денному,/ и просвети́вшему мир.

Таже. Славосло́вие вели́кое. И час 1. И коне́чный отпуст.

На литурги́и

Блаже́нны, пра́здника, песнь 7-я, и свято́му, песнь 3-я. Проки́мен: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́йя, глас 6. Блаже́н муж, боя́йся Го́спода, в за́поведех Его́ восхо́щет зело́. Ева́нгелие от Луки́, зача́ло 24. Прича́стен; В па́мять ве́чную:

Моли́тва преподо́бным отце́м Ферапо́нту и Мартиниа́ну Белоезе́рским

О Богоблаже́ннии и преподо́бнии отцы́ на́ши, Ферапо́нте и Мартиниа́не! Мо́лимся вам и от се́рдца с любо́вию вопие́м, да нас, непотре́бных, вразуми́те и просвети́те и свои́ми моли́твами укрепи́те не́кая похва́льная словеса́ принести́ в па́мять ва́шего преставле́ния не бо в му́дрости сло́ва дерза́ю глаго́лати, но со мно́гою ве́рою и любо́вию чадолюби́вым отца́м сия́ приношу́. Вы у́бо, преподо́бнии, са́ми на́ши недоста́тки напо́лните, без ва́шея бо по́мощи, блаже́ннии, ничто́же мо́жем бла́го сотвори́ти, но, пребыва́юще в до́му Пречи́стыя Богоро́дицы ва́шея огра́ды, наде́емся ва́ми, благи́ми предста́телями, свобо́дни пред Бо́гом яви́тися, необлада́нными бы́ти от враг ви́димых и неви́димых. О па́стырие до́брии, и́стиннии строи́тели виногра́да Христо́ва, отце́м сла́во, преподо́бным единонра́внии, пра́ведным единовсе́льницы, и́ноком наста́вницы и о́бщему жити́ю соверши́тели изря́днии. Ны́не на Небесе́х Святе́й Тро́ице предстои́те со все́ми угоди́вшими Ей. Ны́не у́бо, о Богоблаже́ннии и преподо́бнии отцы́, помяни́те ста́до свое́, е́же му́дре собра́сте, и соблюди́те Богодарова́нную ва́шу па́ству и, я́ко чадолюби́вии отцы́, посеща́йте и не пре́зрите нас, чту́щих ве́рою и любо́вию пречестну́ю и многора́достную ва́шу па́мять. Сохраня́йте нас и соблюда́йте от всех ви́димых и неви́димых враг, прииди́те посреде́ нас неви́димо и всех нас моле́ния, Бо́гови возсыла́емая, приими́те и принеси́те, сия́ хода́тайственне всех Творцу́ и Изба́вителю, И́же в Тро́ице Святе́й покланя́емому и́стинному Бо́гу на́шему, я́ко да согреше́нием на́шим оставле́ние полу́чим в День Су́дный благода́тию и человеколю́бием Го́спода на́шего Иису́са Христа́, с Ни́мже Отцу́ сла́ва и Свято́му Ду́ху вку́пе, Трисия́нному Божеству́, ны́не, и при́сно, и во ве́ки веко́в. Ами́нь.