На Го́споди, воззва́х: стихи́ры на 6, глас 4.

Подо́бен: Я́ко до́бля:

Пре́лесть связа́л еси́, по Го́споде вя́жемь,/ и в темни́це, апо́столе, заключа́емь./ Те́мже тя любо́вию почита́ем/ и ве́рою вери́ги облобыза́ем твоя́:/ от ни́хже почерпа́юще здра́вие телесе́ и души́ спасе́ние,/ по до́лгу восхваля́ем тя, Богови́дче,/ безпло́тных собесе́дниче.

Тобо́ю ра́зум при́емлют неразу́мием одержи́мии,/ язы́ков многосе́меннии ро́ди пе́рвее,/ и́хже о́браз показа́, с высоты́ носи́мь,/ сосу́д, внутрь вмеща́ющ вся́кое живо́тно, апо́столе./ Те́мже всяк тя во́зраст сла́вит,/ покланя́яся, я́же носи́л еси́, вери́гам,/ за Христа́ усе́рднейше.

Его́же отве́рглся еси́, суди́ма,/ воста́вша воспе́л еси́ из ме́ртвых, апо́столе,/ и пропове́дал еси́ в конце́х ми́ра,/ Бо́га же и Челове́ка,/ бла́гостию мно́гою земны́м приобщи́вшася./ Те́мже любо́вию тя блажи́м, Пе́тре,/ покланя́ющеся, я́же носи́л еси́, вери́гам,/ за Христа́, пресла́вне.

Сла́ва, глас 6. Византи́ево:

Днесь нам основа́ние Це́ркве,/ Петр – ка́мень ве́ры/ предлага́ет честны́я своя́ вери́ги в душе́вное благоче́стие./ Прииди́те вси, сия́ облобыза́юще,/ благохва́льными пе́сньми того́ увенча́им:/ ра́дуйся, те́плый ве́ры побо́рниче,/ и́же те́плым ра́зумом Христа́ испове́дав/ и Сы́на Бо́жия в дерзнове́нии мно́зем./ Ра́дуйся, вселе́нныя ра́дование/ и Небе́снаго Ца́рствия ключарю́,/ благода́ть подава́й любо́вию тя чту́щим/ и честны́я твоя́ вери́ги облобыза́ющим жела́нием,/ я́ко предстоя́ престо́лу всех Царя́ Христа́,/ моли́тву творя́ о нас,/ соверша́ющих па́мять твою́.

И ны́не, Богоро́дичен.

Аще среда́ и́ли пято́к, Крестобогоро́дичен.

Подо́бен: Тридне́вен:

На Дре́ве Живо́т наш зря́щи Всенепоро́чная Богоро́дица ви́сящ,/ ма́терски рыда́ющи, вопия́ше:/ Сы́не Мой и Бо́же Мой,/ спаси́ любо́вию пою́щия Тя.

На стихо́вне стихи́ры Окто́иха.

Сла́ва, глас 6:

Па́ки нас те́плый предста́тель совоздвиза́ет к духо́вней трапе́зе,/ Петр – ка́мень ве́ры,/ честны́я своя́ вери́ги предложи́в нам,/ я́коже снедь многоце́нну,/ неду́гов во врачева́ние,/ скорбя́щих во утеше́ние,/ в приста́нище обурева́емых./ Прииди́те вси, сия́ облобыза́юще,/ того́ Просла́вльшаго умо́лим:/ моли́твами его́, Христе́, спаси́ ду́ши на́ша.

И ны́не, Богоро́дичен и́ли Крестобогоро́дичен.

Подо́бен: Тридне́вен:

Ви́дящи Тя распина́ема, Христе́,/ Тебе́ Ро́ждшая вопия́ше:/ что стра́нное, е́же ви́жу, та́инство, Сы́не Мой?/ Ка́ко на Дре́ве умира́еши, пло́тию пове́шен,/ жи́зни Пода́телю?

Тропа́рь, глас 4:

Ри́ма не оста́вль, к нам прише́л еси́/ честны́ми вери́гами, я́же носи́л еси́, апо́столов первопресто́льне./ И́мже ве́рою покланя́ющеся, мо́лимся:/ твои́ми к Бо́гу моли́твами/ да́руй нам ве́лию ми́лость.

На у́трени

О́ба кано́на Окто́иха и апо́стола на 6. Кано́н апо́стола, его́же краегране́сие: Петра́ честву́ю, основа́ние догма́т. Творе́ние Ио́сифово. Глас 4.

Песнь 1

Ирмо́с: Ли́цы Изра́ильтестии,/ невла́жными стопа́ми понт Чермны́й и вла́жную глубину́ прогна́вше,/ вса́дники триста́ты враги́ ви́дяще, в ней погруже́ны,/ с весе́лием поя́ху:/ пои́м Бо́гу на́шему, я́ко просла́вися.

Торжеству́ет, лику́ющи, вся Христо́ва Це́рковь ду́хом, благохва́лящи тя ве́рою/ и твоя́, апо́столе первопресто́льне, облобыза́ющи вери́ги честны́я от любве́,/ я́же носи́л еси́ свя́зан, связу́я мучи́теля.

Из глубины́ пре́лести ловя́, Петре́, челове́ки,/ я́ко ры́бы, приве́л еси́ тебе́ Избра́вшему от ры́барей/ и́стинно в верхо́внаго всех ученико́в./ Сего́ ра́ди вери́ги, я́же носи́л еси́, облобыза́ем.

Основа́нием ве́ры всех ду́ши ве́рных назда́л еси́/ и, хра́мы пре́лести, Пе́тре, низложи́в, созда́л еси́ Це́ркви,/ тя велегла́сно чту́щия всегда́ и вери́ги, я́же носи́л еси́.

Богоро́дичен: Ору́жия вся льсти́ваго врага́, Пречи́стая Де́во,/ соверше́нно оскуде́ша,/ отне́леже копие́м уязви́ся в Твою́ утро́бу нескве́рную всели́вшееся Сло́во./ Его́же сладча́йшим ны́не уязви́тися жела́нием се́рдцу моему́, молю́ Тя.

Песнь 3

Ирмо́с: Лук си́льных изнемо́же,/ и немотству́ющий препоя́сашася си́лою,/ сего́ ра́ди утверди́ся в Го́споде се́рдце мое́.

Весь Све́ту соединя́яся чисте́йшему,/ Того́ Боже́ственными причаще́нии, свет яви́лся еси́ вторы́й, Пе́тре,/ озаря́ющий ду́ши на́ша.

Зако́ны Христо́вы утверди́л еси́ и пребеззако́ннующия благозако́нию научи́л еси́,/ я́ко апо́столов верхо́вный,/ я́ко догма́тов основа́ние недви́жимо.

Язы́ком свяще́нным пропове́дал еси́ Бо́га, пострада́вша и на Кресте́ распе́ншагося./ Сего́ ра́ди, Петре́, почита́ем связа́вшии тя вери́ги.

Богоро́дичен: Стоя́ше да́же до Тебе́ смерть неодержи́маго стремле́ния:/ Ты бо родила́ еси́ Исто́чник безсме́ртия, Богоро́дице Ма́ти Де́во.

Конда́к, глас 2.

Подо́бен: Вы́шних ища́:

Ка́мень Христо́с ка́меня ве́ры прославля́ет све́тло, ученико́в первопресто́льника:/ созыва́ет бо вся пра́здновати, Пе́тре, чудеси́ твоея́ честны́я вери́ги/ и подае́т согреше́ний проще́ние.

Седа́лен, глас 4.

Подо́бен: Вознесы́йся:

Я́ко верхо́внаго му́дрых апо́столов/ и я́ко ключаря́ Небе́снаго Ца́рствия восхваля́ем ве́рою тя, апо́столе,/ и облобыза́ем чи́стою со́вестию, Пе́тре, я́же носи́л еси́, я́ко злоде́й, вери́ги,/ злоде́йства разруша́я вра́жия,/ от ни́хже изба́вится нам помоли́ся.

Сла́ва, и ны́не, Богоро́дичен:

Херуви́мов и Серафи́мов превы́шши,/ Небесе́ же и земли́ простра́ннейши/ и ви́димыя тва́ри и неви́димый яви́лася еси́ преиму́щи неразсу́дным разсужде́нием:/ Его́же бо простра́нствия Небеса́ не вмеща́ют,/ во Твое́й утро́бе вмести́ла еси́, Чи́стая,/ Его́же моли́ спасти́ся рабо́м Твои́м.

Крестобогоро́дичен:

Из Безнача́льнаго Отца́ Рожде́ннаго,/ напосле́док Тя пло́тию Ро́ждшая,/ на Кресте́ ви́сяща зря́щи, Христе́, -/ увы́ Мне, любе́знейший Иису́се! – вопия́ше:/ Ка́ко сла́вимый я́ко Бог от А́нгелов,/ от беззако́нных ны́не челове́ков, Сы́не, хотя́, распина́ешися?/ Пою́ Тя, Долготерпели́ве.

Песнь 4

Ирмо́с: Любве́ ра́ди, Ще́дре, Твоего́ о́браза,/ на Кресте́ Твое́м стал еси́, и раста́яшася язы́цы:/ Ты бо еси́, Человеколю́бче,/ кре́пость моя́ и хвале́ние.

Вити́йствуя Влады́ки вели́чия,/ непокори́вых евре́ев сердца́ к ве́ре обрати́л еси́ Боже́ственней,/ я́ко основа́ние ве́ры.

Ше́ствия твоя́ позна́на бы́ша на вода́х/ преоби́льною любо́вию Ходи́вшаго верху́ сих, Петре́,/ и стези́ тебе́ Боже́ственныя Сказа́вшаго.

Врачевство́ иму́ще неду́гов всеразли́чных,/ Боже́ственныя вери́ги твоя́, блаже́нне,/ сия́ облобыза́ем ве́рою, тя почита́юще.

Богоро́дичен: Я́ко в пала́ту простра́нную,/ все́лься Царь всех во святу́ю Твою́ утро́бу,/ яви́ся воплоща́емь, Всенепоро́чная Влады́чице.

Песнь 5

Ирмо́с: Просвеще́ние Твое́, Го́споди, низпосли́ нам/ и от мглы прегреше́ний разреши́ ны, Бла́же,/ Твой мир да́руяй.

Отцу́ Собезнача́льнаго пропове́дал еси́ Сы́на открове́нием, всехва́льне, Боже́ственным/ и блаже́нства сподо́бился еси́ блаже́ннаго из уст,

Егда́ Свет узре́л еси́, возсия́вший на Фаво́ре, со́лнечный покрыва́ющий лучи́,/ Све́том су́щим от Све́та озари́лся еси́, Пе́тре,/ и ве́рныя просвети́л еси́.

Ме́ртва тридне́вновавша пропове́дал еси́ Христа́,/ Его́же ра́ди вери́ги носи́л еси́, Пе́тре./ И́мже поклони́тися сподо́бившеся, благоче́стно тя чтим.

Богоро́дичен: Отягоще́ннаго, Пречи́стая, бре́менем мно́гих грехо́в,/ облегчи́ мя ны́не носи́ти и́го, укрепля́ющи, Христо́во легча́йшее.

Песнь 6

Ирмо́с: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тля изба́ви мя, Иису́се, Царю́ сил.

Стремгла́вное пресла́вно претерпе́л еси́ распя́тие,/ угото́вил еси́ к Небе́сней стези́ но́ги твоя́,/ е́юже нас ходи́ти, учениче́ Христо́в, укрепи́.

Всели́лся еси́ в жизнь живу́щих/ и, вя́жемь ея́ ра́ди, у́зы велиа́ра сокруши́л еси́, связа́вшаго тя./ Сего́ ра́ди чтим твоя́ вери́ги.

Моли́ Влады́ку, всеблаже́нне, тва́ри низпосла́ти очище́ние,/ и мир, и ми́лость сла́вящим тя,/ я́ко Того́ учени́к и́скреннейший.

Богоро́дичен: Умерщвле́ния ко́жных риз совлече́ся пра́отец:/ Зижди́тель бо в того́ облачи́тся от Твои́х крове́й,/ воплоти́вся па́че сло́ва, Всенепоро́чная.

Конда́к, глас 2.

Подо́бен: В моли́твах неусыпа́ющую:

Верхо́внаго и пе́рваго апо́столов,/ и́стины Боже́ственнаго ученика́,/ Петра́ вели́каго восхва́лим/ и того́ ве́рою целу́ем вери́ги,/ прегреше́ний разреше́ние прие́млюще.

И́кос:

Сла́внаго и вели́каго Госпо́дня ученика́/ досто́йно кий язы́к челове́ков похвали́ти возмо́жет?/ Его́же бо благосло́вне Боже́ственное Сло́во ублажи́,/ кий ум восхва́лит?/ Оба́че, е́же кто по си́ле стя́жет,/ до́лжно есть Бо́гу приноси́ти,/ сие́ же и сотвори́ти покуша́юся./ Но, о празднолю́бцы,/ благоче́стно первопресто́льнаго пе́сньми увенча́им,/ прегреше́ний разреше́ние прие́млюще.

Песнь 7

Ирмо́с: Авраа́мстии иногда́ в Вавило́не о́троцы/ пе́щный пла́мень попра́ша, пе́сньми взыва́юще:/ оте́ц на́ших Бо́же, благослове́н еси́.

Три́жды отве́рглся еси́ Христа́,/ те́мже вопроше́нием трикра́тным исцеля́ет твое́ согреше́ние, Пе́тре пресла́вне,/ и утвержде́ние показу́ет мно́гих коле́блющихся.

Я́ко у́зник Христо́в,/ сладча́йшим жела́нием у́зам разли́чным приобщи́лся еси́,/ те́мже и твои́м вери́гам, разреша́ющим стра́сти, Петре́,/ ве́рою покланя́емся.

Нощь глубо́кую лю́таго многобо́жия реши́ши, вселе́нную проходя́,/ я́коже велича́йшее со́лнце, Пе́тре,/ Христо́в самови́дче, апо́столов сла́ва.

Сла́ва Христу́ был еси́,/ Сего́ твои́ми удесы́ просла́вил еси́, Пе́тре пресла́вне./ Те́мже тя сла́вим и связа́вшим тя вери́гам покланя́емся.

Богоро́дичен: Соше́дый на зе́млю, я́ко дождь, Де́во,/ Богоразу́мием всю напои́ зе́млю/ и показа́ Тя А́нгелов всех, Чи́стая, честне́йшую.

Песнь 8

Ирмо́с: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.

Земледе́льствуя сердца́, Пе́тре, жесто́кая,/ благопло́днейшая сия́ соверши́л еси́ Де́лателю тва́ри,/ ключи́ тебе́ Боже́ственныя преда́вшему/ вяза́ти же и реши́ти согреше́ния.

Блажи́м тя, Пе́тре, всегда́ и твоя́ целу́ем вери́ги,/ я́же, я́ко злоде́й, носи́л еси́, убива́я зло́бы нача́льника/ и связу́я у́зами твои́ми, апо́столе.

Неукло́нным твои́м ка́менем, Пе́тре, ве́ры/ соблюда́я Це́ркве исполне́ние,/ от среды́ собла́зны отжени́, Пе́тре́,/ и ми́рное испроси́ сей, блаже́нне, устрое́ние.

У́зами и стра́стию пречи́стою Связа́вшаго ад и смерть све́тло пропове́дал еси́,/ сего́ ра́ди, всеблаже́нне, вери́ги твоя́ целу́юще, освяща́емся.

Тро́ичен: Я́коже чи́ни Го́рнии, возопии́м трисвяты́ми гла́сы,/ Всевино́внаго Отца́ ны́не сла́вяще, и Сы́на, и Ду́ха,/ Еди́но Существо́, Еди́ну Си́лу и Еди́но Де́йство.

Богоро́дичен: Мы́сленный Тя све́щник преднаписа́ проро́к,/ Боже́ственную свещу́, Богороди́тельнице, нося́щий,/ просве́щшу пе́рвее омраче́нныя мно́гими зол омраче́ньми.

Песнь 9

Ирмо́с: Рождество́ Твое́ нетле́нно яви́ся:/ Бог из бо́ку Твое́ю про́йде,/ я́ко Плотоно́сец яви́ся на земли́/ и с челове́ки поживе́./ Тя, Богоро́дице, тем вси велича́ем.

Ви́дети сподо́бился еси́ да́льняя, ве́рно наде́емая тебе́, Петре́,/ и трудо́в по́чести от Бо́га Человеколю́бца, ра́дуяся, прие́млеши,/ Его́же пло́тию твое́ю страсть Боже́ственную изобрази́л еси́.

Я́ко Боже́ственный ключа́рь Ца́рствия,/ сего́ отве́рзи вхо́ды ве́рно тя чту́щим на земли́/ и честны́я твоя́ целу́ющим вери́ги, Пе́тре,/ и́миже свя́зан, носи́л еси́.

С Сы́ном сый на Фаво́ре, гла́са Оте́ческаго, Сего́ явля́юща, сподо́бился еси́ услы́шати:/ Боже́ственным бо Ду́хом, Пе́тре,/ твое́ се́рдце очища́емо пресла́вно озари́ся.

Нам, любо́вию тя чту́щим и вери́ги твоя́ целу́ющим,/ и́миже, Пе́тре, связа́лся еси́,/ очище́ние, и долго́в испроси́ разреше́ние,/ и Ца́рствия Небе́снаго наслажде́ние.

Богоро́дичен: Све́та жили́ще была́ еси́,/ те́мже Све́том наста́ви мя, Отрокови́це, омраче́на все́ми вра́жиими искуше́ньми,/ я́ко да ве́рою Тя, Всечи́стая, велича́ю, Ма́ти Де́во.

Свети́лен.

Подо́бен: Ду́хом во святилищи:

Вери́гами свя́зана страсте́й мя, окая́ннаго, разреши́, блаже́нне,/ я́коже иногда́ вери́ги разреши́ А́нгел Бо́жий/ и от темни́цы изве́д пресла́вно заключе́на тя в ней,/ апо́столов верхо́вниче, блаже́ннейше Пе́тре.

Богоро́дичен:

Де́во Всенепоро́чная, Ты позна́лася еси́ я́ко Ма́ти,/ я́ко Бо́га же и Челове́ка па́че естества́ ро́ждши,/ и спасе́ние бысть рожде́ние Твое́ пою́щим любо́вию:/ сла́ва подоба́ет, и честь, и поклоне́ние/ Тро́ице Непристу́пней и Боже́ственней.

На стихо́вне стихи́ры Окто́иха.

Сла́ва, глас 4. Иоа́нна мона́ха:

Трикра́тным вопроше́нием,/ еже́: – Пе́тре, лю́биши ли Мя? -/ трикра́тное отверже́ние Христо́с испра́ви./ Те́мже и к Тайнове́дцу Си́мон:/ Го́споди, вся ве́си, вся зна́еши,/ Ты ве́си, я́ко люблю́ Тя./ Те́мже к нему́ Спас:/ паси́ о́вцы Моя́,/ паси́ избра́нныя Моя́,/ паси́ а́гнцы Моя́,/ я́же Свое́ю кро́вию стяжа́х во спасе́ние./ Того́ моли́, Богоблаже́нне апо́столе,/ даровати́ нам ве́лию ми́лость.

И ны́не, Богоро́дичен и́ли Крестобогоро́дичен.

Подо́бен: Я́ко до́бля:

А́гнца и Па́стыря Тя на Дре́ве я́ко ви́де,/ А́гница ро́ждшая рыда́ше/ и ма́терски Тебе́ веща́ше:/ Сы́не вожделе́ннейше,/ ка́ко на Дре́ве Кре́стнем пове́шен еси́, Долготерпели́ве?/ Ка́ко ру́ки и но́ги Твоя́, Сло́ве,/ пригвозди́шася от беззако́нных/ и кровь Твою́ излия́л еси́, Влады́ко?

На литурги́и

Блаже́нны от кано́на апо́стола пе́сни 3-я и 6-я. Проки́мен, глас 8: Во всю зе́млю изы́де веща́ние их/ и в концы́ вселе́нный глаго́лы их. Стих: Небеса́ пове́дают сла́ву Божию: Апо́стол Дея́ний, зача́ло 29. Аллилу́йя, глас 1: Исповедят Небеса́ чудеса́ Твоя́, Го́споди,/ и́бо и́стину Твою́ в Це́ркви святы́х. Ева́нгелие от Иоа́нна, зача́ло 67. Прича́стен: Во всю зе́млю изы́де веща́ние их:

Моли́тва

О святы́й Пе́тре, вели́кий апо́столе, самови́дче и сотаи́нниче Бо́жий, всемо́щною десни́цею Учи́теля твоего́ прия́тый из вод волну́ющихся и кра́йняго потопле́ния свобо́ждшийся! Не забуди́ и нас, убо́гих, в ти́не грехо́вной увя́зших и во́лнами жите́йскаго мо́ря залива́емых, пода́ждь нам твою́ ру́ку кре́пкую, помози́ нам и удержи́ нас от потопле́ния в страсте́х, похоте́х, лжах и клевета́х. Сотвори́ и ты с на́ми ми́лость, тебе́ от Го́спода явле́нную, да не в сомне́нии и малове́рии изги́бнем. Научи́ нас, учи́телю наш, пролия́ти слезу́ покая́ния, да пла́чемся го́рько дея́ний на́ших в ве́це сем. И а́ще твою́ слезу́, в покая́ние излия́нную, ми́лостию Свое́ю покры́ Госпо́дь и Учи́тель твой, испроси́ и нам, с дерзнове́нием апо́стольским, проще́ния в бу́ести на́шей ежеча́снаго от Христа́ отрече́ния. Град сей, ко святы́м стопа́м твои́м пове́рженный, сохрани́ и от прилуча́ющихся ко́зней лука́вых врага́ спасе́ния на́шего огради́; воздви́гни твои́ преподо́бнии ру́це ко Го́споду за наро́д наш, да ти́хое и безмо́лвное житие́ поживе́м в ве́це сем до часа́, в онь же и́мать призва́ти нас Влады́ка Госпо́дь, наш Судия́ неумы́тный. Ты же, о всехва́льный апо́столе, не отве́ргни во́пля на́шего и стена́ний к тебе́ о заступле́нии нас пред Христо́м, да вы́ну сла́вим Его́ милосе́рдие к нам со Отце́м и Святы́м Ду́хом. Ами́нь.

Тропа́рь, глас 4:

Непоро́чным свяще́нством Бо́гови послужи́в,/ посреде́ мирска́го мяте́жа юро́дство избра́л еси́,/ взем бо крест, после́довал еси́ Христу́ невозвра́тным по́мыслом/ и, с любо́вию к Нему́ доброде́тельми приближа́яся,/ земна́я оста́вив, Небе́сная восприя́л еси́,/ блаже́нне Макси́ме, о́тче наш,/ моли́ Христа́ Бо́га/ сохрани́тися гра́ду То́тьме невреди́му/ и спасти́ся душа́м на́шим.

Сла́ва, и ны́не, Богоро́дичен: Еже́ от ве́ка утае́нное:

Кано́н, глас 8.

Песнь 1

Ирмо́с: Песнь возсле́м, лю́дие,/ чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопию́ще,/ пои́м Тебе́, Еди́ному Влады́це.

Приими́ моле́ние, Христе́ мой, мене́, недосто́йнаго,/ и отве́рзи ми недоуме́нный ум и язы́к,/ да возмогу́ Твоего́ уго́дника Макси́ма воспе́ти прославле́ние.

В Вы́шних предстоя́ Престо́лу Вседержи́теля, блаже́нне Макси́ме,/ испроси́ соверша́ющим свяще́нное твое́ торжество́ грехо́в оставле́ние,/ да воспое́м песнь Еди́ному Влады́це.

Предстоя́ще днесь на ме́сте погребе́ния твоего́,/ про́сим, Макси́ме, о́тче наш,/ получи́ти твои́ми моли́твами от злых избавле́ние и неду́гов исцеле́ние.

Богоро́дичен: Влады́чице Пречи́стая, ро́ждшая Спа́са всех Го́спода,/ утоли́ страсте́й на́ших лю́тое смуще́ние/ и тишину́ пода́ждь невозмути́мую,/ да Тебе́, Богоро́дице, непреста́нно велича́ем.

Песнь 3

Ирмо́с: Страх Твой, Го́споди,/ всади́ в сердца́ раб Твои́х/ и бу́ди нам утвержде́ние,/ Тя во и́стине призыва́ющих.

От ю́ности твоея́, о́тче наш, име́я нача́ло прему́дрости – страх Бо́жий,/ да́же и до кончи́ны соблю́л еси́,/ Бо́га Помо́щника себе́ призыва́я.

На земли́ предстоя́л еси́ Престо́лу Бо́жию во стра́се и смире́нии,/ Безкро́вныя Же́ртвы принося́ Бо́гу, блаже́нне Макси́ме,/ и ми́лостива Того́ нам соде́ловая.

С ве́рою и любо́вию тебе́ призыва́ем в моли́тву, пра́ведный Макси́ме,/ умоли́ Всебла́гаго Бо́га,/ да изба́вит нас от вся́кия напа́сти и гее́нскаго муче́ния.

Богоро́дичен: Сни́де во утро́бу Твою́ Влады́ка и Госпо́дь воплоща́емь, Влады́чице Всепе́тая,/ да изба́вит от пре́лести род челове́ческий/ и Ца́рствия Своего́ сподо́бит нас.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

В чи́стом се́рдца стремле́нии о лю́дех принося́ моли́твы, свя́те Макси́ме,/ благопотре́бная испроси́л еси́ от Бо́га,/ прославля́я Того́ вели́чие.

Апо́стольский глас, Макси́ме, уразуме́в,/ я́ко отре́бие ми́ру есмы́,/ Христа́ ра́ди сам себе́ всем в попра́ние вмени́л еси́.

Притека́юще днесь к тебе́, вопие́м ти:/ блаже́нне Макси́ме, испроси́ нам грехо́в оставле́ние.

Богоро́дичен: Недоуме́ние предлежи́т от обыше́дших нам зол, Пречи́стая Влады́чице,/ но изба́ви от сих ско́ро,/ к Тебе́ бо еди́ней прибега́ем.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.

От младе́нчества просвети́вся душе́ю,/ в мяте́жех благооти́шное житие́ стяжа́ти потща́лся еси́,/ воспева́я Еди́наго Человеколю́бца.

Нагото́ю теле́сною, я́коже багряни́цею, мня́ше себе́ оде́яна бы́ти,/ в зиме́, я́коже в ле́те, пребыва́я, вопия́л еси́, пра́ведный Макси́ме:/ благодарю́ Тя, Человеколю́бче.

Доброто́ю духо́вною сия́я,/ обнаже́нных нас вся́каго де́ла блага́го/ покры́й предета́тельством твои́м, всеблаже́нне Макси́ме.

Богоро́дичен: Умерщвле́нную мою́ ду́шу страстьми́ скве́рными оживи́, Всенепоро́чная,/ Живота́ – Спа́са ро́ждшая,/ и к стези́ спаси́тельной и блаже́нному житию́ напра́ви.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Я́коже Ио́на от кита́, та́ко и ты, о́тче, от мирски́х мяте́жей бу́яя восприя́л еси́/ и в по́двизе юро́дства к Небе́сным пресели́лся еси́.

Безстра́стием украша́яся, Макси́ме,/ я́ко безпло́тен, на земли́ пожи́л еси́,/ поруга́ния и досажде́ния претерпева́я, о досажда́ющих моли́лся еси́:/ Го́споди, не поста́ви им греха́ неве́дения.

Я́ко восприя́л еси́ благода́ть, о́тче,/ моли́тися ко Го́споду о лю́дех и гра́де твое́м То́тьме,/ да сохрани́т его́ невреди́ма и изба́вит нас от искуше́ний и бед,/ да вси ра́достно пра́зднуем свято́е твое́ преставле́ние.

Богоро́дичен: Пое́м Тя, ве́рнии, Богоблагода́тная Влады́чице,/ Преве́чнаго Бо́га пло́тию ро́ждшая,/ Его́же умоли́, Пречи́стая, гра́ду и людем Твои́м в ми́ре спасти́ся.

Конда́к, глас 4:

Боже́ственному гла́су после́дуя,/ возревнова́л еси́ наставля́ти па́ству свою́/ не му́дростию сло́ва, но бу́йством жити́я безмяте́жнаго,/ непреста́нными моли́твами и сле́зными струя́ми/ ду́шу и те́ло омыва́я,/ возду́шными стихи́ями плоть изнуря́я,/ те́мже и по сме́рти чудесы́ тя Госпо́дь просла́ви,/ да с ве́рою зове́м к тебе́:/ ра́дуйся, Богому́дре о́тче наш Макси́ме.

И́кос:

Ка́ко возмо́жем восхвали́ти равно́ангельское житие́ твое́,/ и испове́дати мно́гое твое́ терпе́ние, и смире́ние, и те́плыя ко Христу́ моли́твы?/ Но я́ко благосе́рдному и незло́бивому па́стырю/ и Богому́дрому отцу́ прино́сим похвалы́ сицева́я:/ ра́дуйся, пресве́тлая звездо́, на се́вере доброде́тельми возсия́вшая/ и полу́нощный стра́ны озари́вшая;/ ра́дуйся, возненави́девый су́етный мир,/ Христа́ же еди́наго всем се́рдцем возлюби́вый и Тому́ неукло́нно после́довавый./ Ра́дуйся, я́ко бу́йственное и юро́дственное, по апо́столу, жи́тельство избра́вый;/ ра́дуйся, премени́вый тле́нная и скоропреходя́щая наде́ждою бу́дущих ве́чных благ./ Ра́дуйся, пра́ведному Иову уподобивыйся терпе́нием;/ ра́дуйся, подвйжниче Христо́в непобеди́мый,/ но побежда́яй ко́зни диа́вола свои́м смире́нием./ Ра́дуйся, я́коже дре́вний Ла́зарь убо́гий, ны́не почива́еши на ло́не Авраа́мли;/ ра́дуйся, и по отше́ствии твое́м от ми́ра су́щим в беда́х гото́в засту́пник обрета́ешися./ Ра́дуйся, всегда́ в моли́твах усе́рдно тя призыва́ющим ско́рый помо́щник явля́ешися;/ ра́дуйся, Богому́дре Макси́ме, отче наш.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Нескве́рну добро́ту душе́вную соблю́л еси́ ума́ чисто́тою,/ бу́йство ми́ра избра́в, да Бо́гу прему́др яви́шися, вопия́:/ благослове́н еси́, Го́споди Бо́же, во ве́ки.

Пещь страсте́й и пла́мень искуше́ний росо́ю моли́тв твои́х погаси́в, отче Макси́ме,/ а́нгельски на земли́ пожи́л еси́, вопия́:/ благослове́н еси́, Го́споди Бо́же, во ве́ки.

Украси́ тебе́ Тро́ица, блаже́нне Макси́ме, венце́м пра́вды за труды́ и по́двиги твоя́,/ Е́йже в весе́лии вопие́ши:/ благослове́н еси́, Го́споди Бо́же, во ве́ки.

Богоро́дичен: Я́ко престо́л огнезра́чен, Царя́ но́сиши тва́ри,/ Его́же умоли́, Дево, со блаже́нным Макси́мом Ца́рствия Небе́снаго сподо́бити нас,/ песносло́вящих ве́рно предста́тельство Твое́.

Песнь 8

Ирмо́с: А́нгели и Небеса́,/ на Престо́ле Сла́вы Седя́щаго/ и я́ко Бо́га непреста́нно сла́вимаго/ благослови́те, по́йте/ и превозноси́те Его́ во ве́ки.

Безпло́тных жи́тельству на земли́ подража́я/ и любо́вь к Бо́гу и бли́жнему нелицеме́рну име́я, вы́ну взыва́л еси́:/ благослови́те, по́йте Го́спода и превозноси́те во вся ве́ки.

Небе́сныя красо́ты возлюби́в, земна́я пристра́стия отри́нул еси́/ и, дости́гнув Го́рняго черто́га, со святы́ми взыва́еши:/ благослови́те, вся дела́ Госпо́дня, Го́спода.

В ра́йския селе́ния пресели́вся ны́не,/ у Престо́ла сла́вы со Безпло́тными ли́ки предстои́ши/ и с ни́ми хвале́бную песнь вопие́ши:/ да благослови́т вся́ка тварь Го́спода и превозно́сит во ве́ки.

Богоро́дичен: По́мощи, еже́ от Тебе́ требующия, не презри́, Дево,/ поющия и превознося́щий Тя во ве́ки.

Песнь 9

Ирмо́с: Благослове́н Госпо́дь, Бог Изра́илев,/ воздви́гнувый рог спасе́ния нам/ в дому́ Дави́дове, о́трока Своего́,/ в ни́хже посети́ нас Во́сток с высоты́/ и напра́вил ны есть на путь ми́ра.

Благослове́н Госпо́дь Бог, просла́вивый на земли́ па́мять твою́, блаже́нне Макси́ме,/ и град твой То́тьму просвети́вый житие́м твои́м,/ я́коже ле́ствицею, наставля́я к Небе́сным добро́там.

По́двигом до́брым подвиза́лся еси́ и пра́ведным сном почи́л еси́,/ да и по кончи́не свое́й поле́зная всем подае́ши,/ с ве́рою к тебе́ притека́ющим и прося́щим ско́раго заступле́ния, блаже́нне Макси́ме.

Припа́дающе, вси взыва́ем к тебе́, блаже́нне о́тче Макси́ме:/ испроси́ Це́рквам соедине́ния, христолюби́вым лю́дем на супоста́ты одоле́ние,/ ми́ру всему́ умире́ние и душа́м на́шим спасе́ние.

Богоро́дичен: Влады́чице и Ма́ти Изба́вителя,/ приими́ моле́ние недосто́йных раб Твои́х,/ да хода́тайствуеши к Ро́ждшемуся от Тебе́./ О Влады́чице ми́ра, бу́ди Хода́таица.

Моли́тва

О преблаже́нне и досточу́дне уго́дниче Бо́жий, Макси́ме пра́ведный! Восприя́в благода́ть Свя́таго Ду́ха, пе́рвее послужи́л еси́ непоро́чным свяще́нством Пресвяте́й Тро́ице, предстоя́ Престо́лу Бо́жию и принося́ о лю́дех Безкро́вныя Же́ртвы. Егда́ же, ко Го́споду кра́йним жела́нием одержи́м, юро́дивое житие́ Христа́ ра́ди избра́л еси́, мирски́я пре́лести отри́нул еси́, нагото́ю теле́сною, я́коже багряни́цею, оде́яся, со́лнечный зной и вели́кий мраз с любо́вию претерпе́, подвиза́яся во гра́де То́тьме, и сего́ ра́ди насле́довал еси́ Небе́сный Черто́г в селе́ниях пра́ведных. Но я́ко име́яй дерзнове́ние ко Христу́ Бо́гу, проле́й о нас, о свя́тче Бо́жий, те́плыя моли́твы, да изба́вимся мы вся́кия ну́жды и вся́каго сопроти́внаго зла. Не преста́й моли́ти Сло́ва, Христа́ Бо́га на́шего, о гра́де и лю́дех, сохрани́тся им неврежде́нным от гла́да и я́звы, огня́ и меча́ и от наше́ствия супоста́тов. Низпосли́ с Небесе́, о свяще́нная главо́, преблаже́нне Макси́ме, на нас, усе́рдно притека́ющих к тебе́ и с любо́вию лобыза́ющих святы́й о́браз твой, мир, благода́ть и спасе́ние душа́м на́шим, да и мы со все́ми святы́ми насле́дницы бу́дем Небе́снаго Ца́рствия, воспева́юще ку́пно Святу́ю Тро́ицу, Отца́, и Сы́на, и Свята́го Ду́ха, ны́не, и при́сно, и во ве́ки веко́в. Ами́нь.