ВЕ́ЧЕР

Обы́чная кафи́зма. На Господи, воззва́х: стихи́ры на 6, глас 4.

Подо́бен: Я́ко до́бля:

Ра́ка, содержа́щая, Богоро́дице, по́яс Твой,/ киво́т освяще́ния рабо́м Твои́м,/ и свяще́нное огражде́ние,/ и сла́ва, и похвала́, и исцеле́ний исто́чник/ всегда́ познава́ется./ Иде́же днесь свяще́нно собра́вшеся,/ воспева́ем мно́гая Твоя́ вели́чия/ и чуде́с пучину.

Се ме́сто пресла́вно,/ се храм присносве́тел,/ в не́мже сокро́вище положи́ся,/ Богоотрокови́цы по́яс честны́й, благода́тию./ Присту́пите, челове́цы,/ просвеще́ние и очище́ние проявле́нно почерпи́те,/ и возопи́йте благода́рным се́рдцем:/ Пресвята́я, благослови́м Тя, Де́во,/ спаса́емии Рождество́м Твои́м.

Свято́е положе́ние, Богоро́дице, по́яса Твоего́,/ пра́здник стяжа́хом, веселя́щеся,/ я́ко гра́ду Твоему́ днесь да́ти благоизво́ли свяще́нное препоя́сание,/ храни́лище некра́домо,/ дар че́стен,/ неотъе́млемо бога́тство,/ исцеле́ний реку́, испо́лнену дарова́ний духо́вных.

Сла́ва, и ны́не, глас 2:

Я́ко венце́м пресве́тлым,/ Пречи́стая Богоро́дице,/ по́ясом Твои́м святы́м/ Це́рковь Бо́жия обложи́ся,/ и све́тится, ра́дующися днесь,/ и та́йно ликовству́ет, Влады́чице, вопию́щи Тебе́:/ ра́дуйся, диади́мо честна́я/ и ве́нче Боже́ственныя сла́вы./ Ра́дуйся, еди́на сла́вы исполне́ние/ и ве́чное весе́лие./ Ра́дуйся, к Тебе́ притека́ющим приста́нище,/ и Предста́тельнице, и спасе́ние на́ше.

На стихо́вне стихи́ры, глас 4.

Подо́бен: Дал еси́ зна́мение:

Подала́ еси́ гра́ду Твоему́/ по́яс Твой, Пресла́вная,/ тве́рдое огражде́ние,/ сего́ объе́млющ от вся́кия беды́ Боже́ственными де́йствы/ и непобори́м от враго́в соблюда́ющ,/ любо́вию зову́щу:/ кре́пость моя́, и держа́ва,/ и благоле́пно ра́дование,/ Сын Твой и Госпо́дь еди́н есть Благоутро́бный.

Стих: Воскресни́, Го́споди, в поко́й Твой,/ Ты и Киво́т святы́ни Твоея́.

Честны́м венце́м благоче́стно ца́рствующий,/ Твои́м по́ясом, Пречи́стая, све́тло обложе́ннии,/ Твои́ми хваля́тся Боже́ственными вели́чествы/ и стра́шни враго́м борю́щим при́сно познава́ются,/ хваля́ще Тя и зову́ще/ па́че сло́ва Рожде́нному из Тебе́:/ Иису́се Пресла́вне,/ спаси́ всех, я́ко Благоутро́бен.

Стих: Лицу́ Твоему́ помо́лятся/ бога́тии лю́дстии.

Препоя́ши си́лою нас, Де́во, по́яса Твоего́,/ на враги́ укрепля́ющи,/ стра́сти покаря́ющи,/ при́сно му́чащия и борю́щия,/ и победи́тельное нам безстра́стие при́сно подаю́щи/ чи́сто сла́вити Тя/ и Сы́ну Твоему́ вопи́ти приле́жно:/ Иису́се Всеси́льне,/ спаси́ всех, я́ко Благоутро́бен.

Сла́ва, и ны́не, глас 2:

Смысл очи́стивше и ум,/ со А́нгелы и мы торжеству́ем,/ све́тло начина́юще Дави́дскую песнь Отрокови́це,/ Неве́сте всех Царя́, Христа́ Бо́га на́шего:/ воскресни́, Го́споди, – глаго́люще, – в поко́й Твой,/ Ты и Киво́т святы́ни Твоея́,/ я́ко бо пала́ту красну́, си́ю украси́в/ и причте́ Ю́ гра́ду Твоему́, Влады́ко,/ стро́ити и покры́вати от супоста́тных пога́н/ держа́вною си́лою Твое́ю, моли́твами Ея́.

Тропа́рь, глас 8:

Богоро́дице Присноде́во, челове́ков покро́ве,/ ри́зу и по́яс пречи́стаго Твоего́ телесе́,/ держа́вное гра́ду Твоему́ обложе́ние дарова́ла еси́,/ безсе́менным Рождество́м Твои́м нетле́нна пребыва́ющи,/ о Тебе́ бо и естество́ обновля́ется и вре́мя./ Те́мже моли́м Тя мир гра́ду Твоему́ дарова́ти/ и душа́м на́шим ве́лию ми́лость.

НА У́ТРЕНИ

На Бог Госпо́дь: тропа́рь Богоро́дицы, три́жды.

По 1-й кафи́зме седа́лен, глас 3.

Подо́бен: Красоте́ де́вства:

Красото́ю де́вства Твоего́ Прекра́сное Сло́во ро́ждши/ и сего́ по́ясом Твои́м, Чи́стая, я́ко Младе́нца обвила́ еси́./ сего́ у́бо дарова́ла еси́ рабо́м Твои́м, Влады́чице, покро́в, по́мощь и исто́чник свяще́ния./ Его́же честно́е положе́ние, Пресвята́я Де́во, вси ве́рно пра́зднуем.

Сла́ва, и ны́не, то́йже.

По 2-й кафи́зме седа́лен, глас и подо́бен то́йже:

Рождество́ нетле́нно и де́вство еди́на име́ла еси́, Благослове́нная,/ одея́ние же челове́ком спаси́тельно, Твой святы́й поя́с дарова́ла еси́,/ да́же до ны́не нетле́нно пребыва́ющий, Богоневе́сто,/ его́же ра́ди от Бо́га прие́млем, раби́ Твои́, Чи́стая, ве́лию ми́лость.

Сла́ва, и ны́не, то́йже.

Кано́на два: пе́рвый со ирмосо́м на 8, его́же краегране́сие: Кре́постию мя Твое́ю опоя́ши, Чи́стая Де́во. Творение Ио́сифово, ирмо́с по два́жды, тропари́ на 6, глас 8.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестоо́бра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Кре́постию мя Боже́ственною благоче́стно препоя́ша, песносло́вяща Твой свяще́нный поя́с,/ Боже́ственно су́щи гра́ду Твоему́ опоя́сание, и держа́ва, Отрокови́це,/ и незы́блемо остене́ние, Чи́стая Де́во Препе́тая.

Ты Бо́га си́льнаго родила́ еси́, препоясу́ющаго благочести́выя вся си́лою, Всенепоро́чная./ Те́мже Тя блажи́м/ и Боже́ственный Твой поя́с, ра́достно облобыза́юще, благода́ть почерпа́ем и ми́лость.

Ра́достно поло́жению днесь о́крест лику́ем свяще́ннаго по́яса честны́я Богоотрокови́цы,/ от Нея́же нам препоя́сание нетле́ния истка́ся,/ и нераздира́ема оде́жда, и ри́за свяще́ния.

Под Твою́ Твои́ лю́дие, Всенепоро́чная, притека́ют си́лу,/ под Твой покро́в прибега́ют всегда́,/ всем бу́ди по́мощь и я́же ко спасе́нию всем пода́ждь проше́ния,/ спаса́ющи от бед ду́ши на́ша.

Други́й кано́н на 4, глас 4.

Песнь 1

Ирмо́с: Моря че́рмную пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Свещу́ светоявле́нную и незаходи́мую/ Де́вы храм, я́ко Не́бо, обре́т све́тло,/ Тоя́ пресве́тлый поя́с, вселе́нную днесь чуде́с облиста́ет заря́ми.

Кре́пость же и утвержде́ния сою́з,/ Твои́м, Пречи́стая, Боже́ственным я́ко вои́стинну по́ясом/ мы́сленне опоя́сан град Твой, держа́ву нераздра́нну и́мать,/ те́мже и о Тебе́ хва́лится.

Дре́вле я́ко вои́стинну пречестна́го киво́та Твоя́ ра́ка, Богороди́тельнице,/ яви́ся су́щим на земли́,/ не скрижа́ли нося́щая, но ве́рно соблюда́юща и́стины позна́ния.

Арома́ты та́йныя пролива́ются во хра́ме Чи́стыя от честны́я днесь ра́ки/ и исполня́ют духо́внаго благово́ния всех, любо́вию к той притека́ющих.

Катава́сия: Крест начерта́в:

Песнь 3

Ирмо́с: Небе́снаго круга Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Обновля́ется се́рдце, ве́рою те́плою прикаса́ющеся по́ясу свяще́нному Де́вы,/ и препоясу́ется си́лою непобеди́мою на стра́сти нечи́стыя и враг безпло́тных,/ невреди́мо пребыва́юще.

Пребыва́ет нетле́нен еще́ свяще́нный по́яс Твой,/ и́же Твое́ нетле́нное те́ло, Отрокови́це, опоя́са,/ освяща́ющ благоче́стно присту́пающия/ и тли изыма́ющ неду́г и скорбе́й.

Была́ еси́ дом преудо́брен, Чи́стая, Сло́ва, из Тебе́ воплоще́ннаго,/ и во святе́м хра́ме Твое́м благоволи́ла еси́ по́яс Твой положи́ти:/ его́же облобыза́юще, освяща́емся.

Честны́й Твой по́яс че́стно вси ра́достным се́рдцем облобыза́ем,/ честь су́щую всех ве́рных, Богоро́дице,/ я́ко пречестно́му Твоему́ прикосну́вшуся телеси́.

Ин

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Да почти́м, ве́рнии, я́ко совокупле́ния к Бо́гу сою́з,/ Чи́стыя днесь по́яс,/ и ве́рно да поклони́мся.

Всегда́шнии то́ки благода́тей, Чи́стая,/ от пречи́стыя ра́ки теку́щии,/ всех ве́рных напоя́ют.

Исцеле́ния ве́рным многопе́тый нам днесь Пречестны́я честны́й по́яс/ источа́ет благода́тию.

Я́ко роса у́тренняя, весе́лие Твое́, Чи́стая, точа́щи,/ страсте́й пещь Тя при́сно воспева́ющим угаша́ет.

Кондак, глас 2.

Подо́бен: В моли́твах:

Богоприя́тное Твое́ чре́во, Богоро́дице,/ объе́мший по́яс Твой честны́й/ держа́ва гра́ду Твоему́ необори́ма/ и сокро́вище есть благи́х неоску́дно,/ еди́на ро́ждшая Присноде́во.

Таже седа́лен, глас 4.

Подо́бен: Ско́ро предвари́:

Я́ко Боже́ственное возложе́ние, во хра́ме Бо́жии, Чи́стая, освяти́ся по́яс всечестны́й,/ и́мже препоя́сала еси́ ложесна́ непоро́чная, Бо́га заче́ншая./ Те́мже, сему́ ве́рою прикаса́ющеся и стра́хом че́стно облобыза́юще, освяща́емся.

Сла́ва, и ны́не, други́й, глас то́йже.

Подо́бен: Вознесы́йся:

Поло́жение Твоего́ честна́го по́яса Це́рковь Твоя́ све́тло пра́зднует/ и приле́жно зове́т Ти, Де́во Чи́стая:/ вся опоя́ши на си́лу вра́жию,/ низложи́ шата́ние безбо́жных ва́рвар/ и наш упра́ви живо́т де́лати Госпо́дня Боже́ственная хоте́ния.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й Сла́ва, Человеколю́бче.

Взя́тся к Све́ту незаходи́мому, преста́вльшися,/ оста́вила еси́ Тя блажа́щим вме́сто телесе́ Твоего́, Чи́стая, честны́й по́яс,/ исто́чник чуде́с су́щи, и ме́сто спасе́ния,/ и огражде́ние сему́, чту́щему Тя гра́ду, Пречи́стая.

Я́ко в но́во не́бо, мы входи́м в Твой храм,/ иде́же сокро́вище положи́ся, я́коже со́лнце светоза́рно,/ Твой Боже́ственный по́яс, лучи́ чуде́с испуща́ющ,/ и всех сердца́ озаря́ющ, Отрокови́це, и страсте́й мглу отгоня́ющ.

Ты киво́т мы́сленнаго свяще́ния еси́, Чи́стая Всепе́тая,/ и честну́ю си́ю ра́ку, иму́щую по́яс, его́же на Себе́ носи́ла еси́,/ подае́ши лю́дем Твои́м прибе́жище ве́лие и исто́чник исцеле́ний неистоща́емый.

Принесе́ся Твоему́ гра́ду многобога́тный дар, честны́й по́яс Твой, Всенепоро́чная,/ и положи́ся све́тло в сий день в сем Боже́ственней хра́ме Твое́м,/ и бысть ве́лия пра́здника, Богоро́дице, зри́ши лю́бящим Тя вина́.

Зако́на се́ни и проро́к гада́ния предсказа́ху:/ бы́ти Тебе́, Пречи́стая, Бо́гу Ма́терь всеи́стинную,/ Ею́же кля́тва исчезе́ и процвете́ соверше́нное благосло́вение и спаси́тельная благода́ть/ ве́рою и любо́вию пою́щим Тя.

Ин

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,,/ досто́йно взыва́ющи:/ Сла́ва си́ле Твое́й, Го́споди.

Я́ко пречестно́е утвержде́ние, Богоро́дице, Творец и Созда́тель Тя водрузи́в,/ я́коже звезда́ми, украси́л Тя есть, Боже́ственными сия́нии,/ и́миже просвеща́еши концы́.

Тя держа́ву град Твой, Богоро́дице, и тве́рдое основа́ние име́я,/ Боже́ственным по́ясом Твои́м содержи́тся:/ союз неразори́м сей, в бра́нех протяза́ющ.

От земли́ нас возвлачи́т, Богороди́тельнице, к Небеси́ Боже́ственный по́яс Твой,/ любо́вию Твое́ю и того́ возводи́мых./ Тем Тя сла́вим, я́ко вину́ сла́вы лу́чшия.

Се благода́ть неисчерпа́емая,/ прииди́те вси усе́рдным се́рдцем, почерпи́те ре́ки, точа́щия незави́стно, празднолю́бцы,/ от честны́я раки Пречи́стыя Ма́тере.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

По́ясу Боже́ственному, положе́ну днесь во хра́ме Твое́м, Богора́дованная,/ с ним положи́ся благи́х вся́ко дая́ние тре́бующим,/ и наполня́ется свяще́ния всяк, кто, приходя́й, проше́ния ве́рно прие́мля.

Украси́ся, Де́во, Сло́ва Прекра́снаго поро́ждши,/ и во Твое́м кра́снем благоволи́ла еси́ дому́ положи́тися кра́сному по́ясу,/ и́же Твое́ красно́е те́ло, Богоро́дице, красно́ опоя́са.

Твой святы́й храм, я́коже други́й рай, всем познава́ется:/ посреде́ стяжа́, я́коже благово́нен ши́пок, по́яс Твой,/ благово́ния Боже́ственнаго исполня́ют; сердца́, ве́рно присту́пающим, Всенепоро́чная.

Ту́чи Боже́ственныя о́блак была́ еси́, Пренепоро́чная, иска́пающий спасе́ния во́ду,/ и зе́млю, олядене́вшую грехми́, к плодоно́сию преводя́щи благоче́стия./ сего́ ра́ди ве́рно Тя сла́вим.

Ин

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Ты, Го́споди, Твою́ Ма́терь возвели́чил еси́,/ Ты возвы́сил еси́ над вся мы́сленныя вла́сти,/ без сравне́ния сла́вы Тоя́.

Благода́ть Бо́жия ны́не незавйстно подае́тся,/ Пречи́стая Богоро́дице, от честны́я ра́ки Твоея́/ ве́рою покланя́ющимся Тебе́.

Твое́ю си́лою ве́рнии лю́дие опоясу́ются,/ Тя сою́з, Богоро́дице, Твой град хваля́щи, по́ясом Твои́м честву́ется.

Ве́дома Твоя́ вои́стинну благода́ть показа́ся, Пречи́стая,/ пресла́вно де́йствующая си́лы и зна́мения по всей земли́.

Песнь 6

Ирмо́с: Бе́здна грехо́в и прегреше́ний бу́ря мя смуща́ет/ и во глубину́ ну́жднаго ре́ет мя отча́яния,/ но Твою́ кре́пкую ру́ку мне простри́, я́ко Петро́ви,/ о Упра́вителю! и спаси́.

Но́во родила́ еси́ нам я́ко Отроча́, пре́жде век су́щаго,/ и обновля́еши сердца́, грехми́ обетша́вшая, прие́мшая обновле́ние,/ поло́жением честна́го по́яса Твоего́, Отрокови́це Присноде́во.

Свята́я Твоя́ це́рковь ди́вна в пра́вду есть,/ и́же чу́дный Твой по́яс, точа́щий чудеса́, стяжа́вши,/ бе́дным пучи́на явля́ется исцеле́ний, Богороди́тельнице Ма́ти Де́во.

Возвесели́ся вся́ка душа́, совоку́пльшися во святе́м хра́ме Твое́м/ и в нем зря́щи, Богоро́дице, по́яс Твой, я́коже со́лнце све́тло,/ свет облиста́ющ дарова́ний Вседе́теля и Боже́ственнаго Ду́ха.

Укрепи на́ша, Чи́стая, сердца́, презре́вши вся согреше́ния,/ и препоя́ши си́лою, по́яс Твой ве́рно стяжа́вших,/ я́коже многоце́нно и неотъе́млемо сокро́вище.

Ин

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Всю Тя преесте́ственне просла́ви Госпо́дь, всю возвы́сив Тя еди́ну,/ всю Тя почте́ па́че сло́ва, Богоро́дице,/ храм с по́ясом и Боже́ственною ра́кою.

Истека́ют, я́ко из пучи́ны, струи́ благода́ти, от ра́ки Пречи́стыя/ и тварь всю окружа́ют, напая́юще ве́рно покланя́ющияся Рождеству́ Твоему́.

Кре́пость Тя, ве́рнии, стяжа́вше и похвалу́,/ опоясу́ются сла́вою, честны́й Твой по́яс, Богороди́тельнице, иму́ще,/ я́ко пресве́тлую у́тварь и честну́ю.

Кондак, глас 4.

Подо́бен: Яви́лся еси́ днесь:

Честна́го по́яса Твоего́ положе́ние/ пра́зднует днесь Твой, Препе́тая, храм/ и приле́жно взыва́ет Ти:/ ра́дуйся, Де́во,/ христиа́н похвало́.

И́кос:

Твои́м мя просвети́ све́том, Де́во Богоро́дице,/ и разруши́ мою́ тьму, во уме́ лежа́щую лю́те,/ я́ко да чи́сто Тебе́ приступлю́, Чи́стей, земны́я обожи́вшей,/ воспою́ Твой, Всенескве́рная и Непоро́чная, Боже́ственный по́яс, светле́йший со́лнца,/ его́же мир сей и́мать я́ко тверд покро́в и наде́жду,/ побежда́ют сове́ты враго́в беззако́нных, и сих кова́рства разоря́ющ,/ и всегда́ сохраня́ющ Твоя́ рабы́./ Ра́дуйся, Де́во, христиа́н похвало́.

Песнь 7

Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Всех Цари́ца, к Небе́сным се́лом отше́дши,/ оста́ви бога́тство царю́ всех гра́дов – Свой по́яс,/ и́мже спаса́ются от на́шествия ви́димых и неви́димых враг.

Ко исто́чнику ны́не присту́пим,/ иска́пающему благода́ть и ми́лость, ра́це честне́й, иму́щей по́яс всечестны́й/ поче́тшия челове́ческое смеше́ние честны́м Рождество́м Свои́м, Де́вы же и Ма́тере.

Хвали́те Го́спода, си́лы вся Небе́сныя,/ и сего́ Ро́ждшую, челове́честии язы́цы вси, просла́вите:/ я́ко по́яс Свой дарова́, прибе́жище и́стинно и спасе́ние ве́рным.

Да кропя́т свы́ше пра́вду о́блацы днесь,/ поло́жением по́яса Твоего́, О́блаче Богора́дованный,/ и да сладкопое́т душа́ вся́ка, ра́дующися:/ благослове́н Бог оте́ц на́ших.

Ин

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твое́й, Го́споди.

Ты, я́ко Со́лнце пра́вды, Еди́не сый Светода́вче,/ Боже́ственне храм Чи́стыя просвети́л еси́ разли́чными Твои́ми дарова́нии:/ в не́мже сия́ющи, лучи́ изъясня́ет по́яс Тоя́.

Я́ко злату́ю ста́мну, Твой по́яс окружа́юще, еди́на Чи́стая,/ Боже́ственней вои́стинну причаща́емся ны́не сла́дости благода́тей, Всеблагослове́нная,/ и скрижа́лей вы́шшую Ти, я́ко су́щую, почита́ем сию́.

Источа́ют вои́стинну чуде́с, Отрокови́це Чи́стая, ча́ши, Твоя́ благода́ть ве́рным,/ и незави́стно от Твое́й ра́ки происходя́т, я́ко от ина́го Еде́ма ре́ки.

Ны́не приступи́те с весе́лием вси, и́же на земли́, прииди́те, – ра́ка прорица́ет та́йно Госпожи́ –/ объе́млите Пресла́вную, во мне сокро́виществовавшую по́яс Свой.

Песнь 8

Ирмо́с: Седмери́цею пещь/ халдейский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Я́коже престо́л свят, ковче́г положи́ся/ внутрь невходи́мых свяще́нных све́тло, еди́ныя Богоотрокови́цы и Цари́цы всех Чи́стыя по́яс иму́щий поко́йный:/ от него́же тружда́ющимся во мно́гих боле́знех поко́й соверше́н приходи́т незави́стно.

На земли́ Го́спода свяще́нно воплоти́ла еси́/ и рука́ми святы́ми вои́стинну опо́ясала еси́,/ препоясу́ющаго благочести́выя си́лою;/ ны́не же возше́дши небе́с превы́ше, оста́вила еси́ челове́ком честны́й Твой по́яс,/ Де́во Богоро́дице, держа́ву и покро́в.

Неду́гующих исцеле́ние, поползну́вшихся утвержде́ние и уныва́ющих благоду́шие Боже́ственно,/ корми́ло пла́вающих, заблу́ждших обра́щение,/ после́дующая честно́му Твоему́ по́ясу, Чи́стая Де́во, Боже́ственная благода́ть вои́стинну есть,/ ему́же ве́рою покланя́емся во вся ве́ки.

Соверша́юще днесь свято́е поло́жение по́яса Твоего́ Боже́ственнаго,/ свяще́нное торжество́, раби́ Твой, чтим и ра́достию вопие́м Ти:/ ра́дуйся, Богоро́дице, ра́досте А́нгелов и всех челове́ков, ве́рою пою́щих:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Ин

Ирмо́с: Ру́це распросте́р, Дании́л/ львов зия́ния в ро́ве затче́,/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.

Скрижа́ли Боже́ственныя дре́вле киво́т, руко́ю напи́санныя Бо́жиею, содержа́ше, Пречи́стая:/ Твоя́ же, Чи́стая Влады́чице, чествова́нная и честна́я ра́ка по́яс содержи́т,/ тех законополо́жника содержа́щий в себе́ стра́шное та́инство.

А́нгели, Пречи́стая, Чи́стая, ны́не в честне́м Твое́м хра́ме слику́ют/ и объе́млют, Влады́чице, честны́й и святы́й Твой по́яс,/ ему́же любо́вию, и ра́достию, и весе́лием мно́гим покланя́емся,/ Тя воспева́юще, сла́ву ро́да на́шего.

Жезл, И́же Цвет жи́зни прозя́бший,/ Ты еси́ всех ра́дость, многоце́нная чи́стая Мирополо́жница Ду́ха,/ сокро́вище благи́х, арома́т исто́чник,/ из нея́же ми́ро исцеле́ний излива́ет Боже́ственная ра́ка.

Воспевают, Пречи́стая, Чи́стая, вели́чия Твоя́ мы́сленная во́инства,/ пропове́дуют вси патриа́рси и проро́цы я́вственно,/ апо́столи со свяще́нными и му́чеников ли́кове,/ с ни́миже покланя́емся Тебе́.

Песнь 9

Ирмо́с: У́жасе́ся о сем Не́бо/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Се Боже́ственный одр Соломо́нов, его́же си́льнии окружа́ют шестьдеся́т, рече́ния писа́ний,/ я́коже на одре́ ца́рсте, в ковче́зе че́стне днесь по́яс полага́ет Свой,/ на воззва́ние всем ве́рным и благочести́вым в снабде́ние.

О Гра́де Царя́ Небе́снаго, о не́мже возглаго́лашася пресла́вная!/ Положи́ Твоему́ гра́ду дар честе́н и свят, всесвяты́й Твой по́яс,/ во утвержде́ние всем ве́рным,/ и́мже венцено́сцы побежда́ют супоста́ты, Правосла́вием сия́юще.

Иска́пайте, горы, ны́не сла́дость, и хо́лми, весе́лие ве́чное,/ патриа́рх собо́ри и му́ченик ли́цы, проро́ков же сосло́вие,/ Боже́ственных апо́столов сонм честны́й, весели́теся со все́ми на́ми/ в поло́жении Боже́ственнаго по́яса Богоотрокови́цы.

Освяти́ла еси́ вся Твои́м, Пресвята́я Де́во, рождество́м/ и ны́не нам пода́ла еси́ премно́гое просве́щение – пресвяты́й по́яс Твой,/ его́же поло́жением вся земля́ лику́ет и почита́ет Тя,/ ра́дости неизглаго́ланныя испо́лнившую челове́чество.

Любве́ мя ле́стныя страсте́й и врага́, всегда́ искуша́ющаго грехо́в тягото́ю,/ уны́ния же лю́таго отведе́ния, Пречи́стая, и плене́ния, и греха́,/ к Твое́й прибега́ющего ми́лости, вско́ре, я́ко ми́лостива, Чи́стая, премени́.

Ин

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Черто́г пречестны́й вои́стинну, Богороди́тельнице, ра́ка Твоя́ яви́ся, святы́й Твой по́яс,/ я́ко де́вственную и неве́стническую оде́жду, досто́йне содержа́щи и соблюда́ющи,/ я́ко живота́ сокро́вище.

Боже́ственною диади́мою красоты́ Це́рковь, Богоро́дице, оде́явшися,/ Боже́ственным и всесвяты́м Твои́м по́ясом/ днесь ца́рски весели́тся и красу́ется сла́вою Твое́ю.

Храм, по всему́ подо́бящийся небесе́м,/ благокра́сный днесь Де́вы,/ ве́рнии, прие́мше дарова́ний зари́,/ я́коже зве́здными красота́ми осия́еми, светли́теся.

И́мать святы́й Твой по́яс, Богороди́тельнице, град Твой,/ сою́з ми́ра, и сте́ну, и догма́т Боже́стве́нное еди́нство,/ и правосла́вных похвалу́, и во́ем одоле́тельная.

Воспева́ем неизглаго́ланную сла́ву и неизче́тную Твою́ благода́ть:/ Ты бо еси́ исто́чник прему́дрости,/ из нея́же сло́во всем происхо́дит, чту́щим Тя, Пречи́стая,/ и велича́ющим Рождество́ Твое́.

Свети́лен.

Подо́бен: Жены́, услы́шите:

По́яс честны́й Твой,/ и́мже свяще́нное Твое́ препоя́сала еси́ те́ло, Богоотрокови́це Де́во, чту́ще,/ пра́зднуем сего́ ны́не положе́ние,/ и́мже тли избавля́емся, и бед, и напа́стей,/ Ма́ти Бо́га Вы́шняго.

Сла́ва, и ны́не, то́йже.

На хвали́тех стихи́ры на 4, глас 4.

Подо́бен: Я́ко до́бля:

Я́ко пресве́тлым венце́м, Богоро́дице Пречи́стая,/ святы́м по́ясом Твои́м обложи́ся Це́рковь,/ и, ра́дующися, светле́ется днесь,/ и лику́ет та́йно, вопию́щи Тебе́, Влады́чице:/ ра́дуйся, ве́нче и диади́мо Боже́ственная;/ ра́дуйся, еди́на исполне́ния моего́ Сла́ва/ и весе́лие ве́чное.

Ты, Пречи́стая Влады́чице,/ держа́вное огражде́ние,/ незы́блемо же утвержде́ние и спасе́ние/ Твои́м лю́дем и гра́ду Твоему́ су́щи,/ дала еси́, я́ко све́тло одея́ние,/ пречестны́й по́яс Твой,/ спаса́ющ от вся́ких злоключе́ний/ ве́рою и те́плым усе́рдием сего́ чту́щих, Богоневе́сто.

Храм Твой, Пречи́стая,/ я́ко исто́чник неисчерпа́емый чуде́с днесь показа́ся:/ ре́ки бо благода́ти незави́стно пролива́ются/ от святы́я Твоея́ ра́ки/ и ве́рных помышле́ние увеселя́ют,/ ве́рою и любо́вию Тебе́ вопию́щих:/ ра́дость, и весе́лие, и жи́знь на́ша Ты еси́.

Сла́ва, и ны́не, глас 2: Смысл очи́стивше и ум: пи́сан на вече́рни, на стихо́вне.

Славосло́вие вели́кое. Ектении́ и отпу́ст.

НА ЛИТУРГИ́И

Бла́женны от кано́нов, песни 3-я и 6-я.

Проки́мен, глас 3, песнь Богоро́дицы: Вели́чит душа́ моя́ Го́спода,/ и возра́довася дух Мой о Бозе, Спа́се Мое́м. 

Стих: Я́ко призре́ на смире́ние Рабы́ Свое́й, се бо от ны́не ублажа́т Мя вси ро́ди. 

Апо́стол к Евре́ем, зача́ло 320. Аллилу́ия, глас 2: Воскресни́, Го́споди, в поко́й Твой, Ты и киво́т святы́ни Твоея́. 

Стих: Кля́тся Госпо́дь Дави́ду и́стиною и не отве́ржется ея́.

Ева́нгелие от Луки́, зача́ло 54. Прича́стен: Чашу спасе́ния прииму́: