А́ще храм Нерукотворе́ннаго о́браза, или́ настоя́тель изво́лит, твори́м бде́ние.
НА МА́ЛОЙ ВЕЧЕ́РНИ
На Го́споди, воззва́х: стихи́ры на 4, глас 1.
Подо́бен: Небе́сных чино́в:
Почита́я Спас челове́ческий о́браз,/ вообрази́ся по нам,/ непрело́жный челове́чеством,/ и я́ко са́мую и́стину Своего́ пречи́стаго о́браза/ дале́че су́щим посла́/ приложе́нием убру́са.
Возводя́ на первообра́зное Спас/ о́браз Ада́мов попо́лзшийся,/ на земли́ с челове́ки поживе́,/ зри́мь же, и осяза́емь,/ и опису́емь/ Неопи́санный Существо́м.
Обновля́ет тва́рь обетша́вшую Спас,/ в ра́бий о́браз облече́ся/ и́стиною, а не привиде́нием/ и самоо́бразное начерта́ние/ лю́бящим предаде́/ на поклоне́ние.
Сла́ва, и ны́не, глас 6:
Преклони́л еси́ Небеса́, Непостижи́ме Го́споди,/ сшел еси́ во чре́во Де́выя, Неопи́санне,/ быв из Нея́ Челове́к существо́м же и естество́м,/ да спасе́ши челове́чество/ кра́йния ра́ди Твоея́ ми́лости.
На стихо́вне стихи́ры, глас 2.
Подо́бен: До́ме Евфра́фов:
Псало́мски торжеству́ем,/ духо́вно веселя́щеся,/ с Дави́дом вопию́ще:/ зна́менася дне́сь на нас/ свет лица́ Твоего́, Го́споди.
Стих: Зна́менася на нас/ свет лица́ Твоего́, Го́споди.
В кимва́лех духо́вных/ воспле́щем, ра́дующеся,/ и че́стно предусря́щем/ Влады́чняго о́браза/ свято́е изображе́ние.
Стих: Го́споди, во све́те лица́ Твоего́ по́йдем/ и о И́мени Твое́м возра́дуемся во ве́ки.
От восто́ка к за́паду/ со сла́вою прино́сится/ спаси́тельнаго зра́ка/ тождео́бразная печа́ть,/ сия́я, я́ко со́лнце, незаходи́мо.
Сла́ва, и ны́не, Богоро́дичен,
глас и подо́бен то́йже:
Пода́ждь певце́м о́браза/ пречи́стаго Твоего́, о Го́споди,/ кре́пость на бори́теля/ и грехо́в оставле́ние/ моли́твами Чи́стыя Богома́тере.
Тропа́рь пи́сан на вели́цей вече́рни.
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры на 8, глас 4.
Подо́бен: Зва́нный свы́ше:
И́же во зра́це Бо́жии Бог Сый,/ я́ко сла́вы сия́ние/ и изображе́ние О́тчее,/ за милосе́рдие безме́рное/ хоте́нием Боже́ственным о́браз ви́ден бы́сть,/ раба́ носи́в зрак./ Сего́ подо́бие еди́н, я́коже ве́сть Сам,/ изве́стно вообрази́ богоначерта́нно/ в подо́бии лица́ Своего́./ Его́же прише́ствием совокупи́ с челове́ки А́нгел мно́жество/ и просвети́ мир ви́димый и неви́димый.
Я́же боговиде́нием иногда́ за́дних/ Моисе́ово лице́ просла́вивый Бог/ и тем богоначерта́нный зако́н посла́в/ неве́рующим изра́ильтеским люде́й,/ се прии́де, я́ко от Еги́пта,/ от земли́ единоро́дныя прише́д,/ во христоимени́тый град но́вых люде́й/ Боже́ственным начерта́нием/ первообра́знаго Его́ стра́шнаго о́браза./ Его́же, лице́м к лицу́/ ви́дети сподобля́емии, сла́вим.
И́же ца́рствуяй тва́рию все́ю,/ нищету́ во́льную прие́мь,/ обогаща́ет Божество́м позна́вших Его́ госпо́дство,/ те́мже и ко А́вгарю/ богоначерта́нна пи́сьмена посла́в,/ прося́щему спасе́ния и здра́вия сему́,/ е́же от подо́бия Твоего́ зра́ка Боже́ственнаго./ Его́же прише́ствие ра́достно пра́зднующе ны́не,/ возвесели́мся ве́рою,/ просвеще́ние почерпа́юще.
И́ны стихи́ры, глас 6:
Го́споди, И́же Божество́м вся исполня́яй,/ бла́гостию к челове́ком уедини́вся,/ еди́н от двою́ проше́д от Чи́стыя,/ неви́димь Сый, ви́ден был еси́,/ зра́ка же плотска́го сотворя́еши о́браз,/ Его́же прии́мше,/ на нем покланя́емся Тебе́, я́ко Влады́це,/ Соде́теля позна́вше.
Го́споди, непостижи́мое смотре́ние,/ е́же от ве́ка пронарече́нное,/ прише́д, назна́менуеши,/ и то уверя́я писа́ния ра́ди, е́же ко А́вгарю,/ Твой показа́л еси́ ми́рови о́браз,/ испо́лнил еси́ вся́ческая ра́дости./ И́ ны́не украша́еши вене́ц ца́рски,/ и устроя́еши, и обновля́еши па́ки нам о́браз./ Благослове́н еси́, Спа́се, поми́луй нас.
Го́споди, просла́влена непостижи́маго соше́ствия Твоего́ дела́/ в Вы́шних и земны́х ви́девше,/ вознесе́ни бы́хом./ Тя, И́же в не́дрех О́тчих,/ зра́ка обрето́хом о́браз Твой,/ избавля́емся от страсте́й его́ ра́ди,/ оживля́емся, Спа́се,/ зми́я сопроти́внаго умерщвля́ем,/ чту́щии Тя на нем, Влады́ку./ Благослове́н еси́, Спа́се, поми́луй нас.
Сла́ва, глас 8:
Человеколю́бне Влады́ко,/ вели́ка Твоего́ смотре́ния бе́здна:/ в ро́ды бо родо́в Твое́ благоде́тельствуя созда́ние,/ пречи́стаго Твоего́ лица́ зрак изобрази́в,/ А́вгарю ве́рному посла́л еси́,/ возжела́вшу Тя ви́дети,/ по Божеству́ Херуви́мы неви́димаго./ Я́ко да Твой о́браз зря́ще,/ нас ра́ди вопло́щшагося/ и пострада́вшаго во́лею,/ к Твое́й любви́ распаля́емся,/ ю́же на нас излия́л еси́/ вели́кия ра́ди Твоея́ ми́лости.
И ны́не, глас то́йже:
Деви́честии ли́цы/ дне́сь та́йно одру́ Де́вы и Ма́тере о́крест предстоя́т,/ и души́ пра́ведных, обступи́вше, Цари́цу сла́вят./ О́ви у́бо я́ко дар де́вство вме́сто ми́ра прино́сят,/ о́ви же невеще́ственное пе́ние с доброде́телию прино́сят,/ подоба́ет бо Ма́тери Бо́жии я́ко Цари́це/ ца́рскими доброде́тельми светлосия́ющими дориноси́тися./ С ни́миже и мы, житие́ чи́стое совне́сше,/ изы́дем к погребе́нию су́щия Ма́тере Бо́га на́шего,/ пе́ньми и пе́сньми духо́вными/ согла́сно Ю́ ублажа́юще.
Вход. Проки́мен дне. Чте́ния три.
Втора́го зако́на чте́ние (глава́ 4):
Рече́ Моисе́й к лю́дем:/ ны́не слы́ши Изра́илю оправда́ния и судьбы́,/ ели́ка аз научу́ вас дне́сь твори́ти, да жи́ви бу́дете,/ и сохрани́те, и сотвори́те,/ я́ко сия́ прему́дрость ва́ша и ра́зум пред все́ми язы́ки,/ ели́цы а́ще услы́шат оправда́ния сия́ и реку́т:/ сии́ лю́дие му́дри и худо́жни, и язы́к вели́кий сей./ Я́ко Госпо́дь Бог наш е́сть во всех,/ и́же а́ще Того́ призове́м./ И ны́не внемли́те себе́ ве́сь дом Изра́илев,/ и сохрани́те души́ своя́ зело́,/ и не забу́дите вся словеса́, я́же ви́деста о́чи ва́ши,/ и да не отсту́пят от серде́ц ва́ших во вся дни живота́ ва́шего./ И приведо́сте сы́ны ва́ша и сы́ны сыно́в ва́ших/ в де́нь, во́ньже ста́сте пред Го́сподем Бо́гом в Хори́ве,/ в де́нь, во́ньже рече́ Госпо́дь ко мне:/ собери́ в це́рковь лю́ди, и да услы́шат глаго́лы моя́,/ я́ко да навы́кнут боя́тися Мене́ во вся дни,/ ели́ки поживу́т они́ на земли́, и сы́ны своя́ да науча́т./ И приступи́сте, и ста́сте под горо́ю,/ и гора́ горя́ще огне́м да́же до небесе́, тьма́, сумра́к и дым./ И глаго́ла Госпо́дь Бог к вам на горе́ от среды́ огня́./ Глас слове́с Его́ вы слы́шасте/ и подо́бия не ви́десте, но глас./ И возвести́ вам заве́т Свой, его́же завеща́ вам твори́ти,/ и мне завеща́ Госпо́дь во вре́мя о́но научи́ти вас оправда́нием и судьба́м,/ твори́ти вам та на земли́./ Глаго́ла Госпо́дь к вам на горе́ в Хори́ве/ от среды́ огня́.
Втора́го зако́на чте́ние (глава́ 5):
Собра́ Моисе́й вся лю́ди изра́ильтеския и рече́ к ним:/ слы́ши, Изра́илю, всех оправда́ний мои́х и суде́б мои́х,/ ели́ко аз глаго́лю во у́ши ва́ша,/ во дни ты́я научи́теся им, и сохрани́ти я, и сотвори́ти./ Госпо́дь Бог завеща́ вам заве́т в Хори́ве,/ не еди́ным отце́м ва́шим завеща́ Госпо́дь заве́т сей, но и вам./ Лице́м к лицу́ глаго́ла Госпо́дь в Хори́ве из среды́ огня́ на горе́./ Аз же стоя́х между́ Го́сподем и ва́ми во вре́мя о́но,/ возвести́ти вам глаго́лы Госпо́дня, глаго́ля:/ Аз е́смь Бог твой, изведы́й тя из земли́ Еги́петския, из до́му рабо́ты,/ не су́ть бо́зи и́ни, ра́зве Мене́,/ Аз бо е́смь Госпо́дь Бог твой, Ревни́тель,/ творя́ ми́лость ты́сящами лю́бящим Мя и храня́щим за́поведи моя́./ И бы́сть я́ко услы́шасте глас посреде́ огня́,/ и гора́ горя́ще огне́м,/ и приступи́сте ко мне вси, и реко́сте:/ се показа́ Госпо́дь Бог наш нам сла́ву Свою́,/ и глас слы́шахом посреде́ огня́,/ в де́нь он ви́дехом,/ я́ко возглаго́лет Госпо́дь Бог к челове́ку, и жив бу́дет./ И ны́не да не у́мрем,/ я́ко погуби́т ны о́гнь вели́кий сей,/ а́ще приложи́м послу́шати глас Го́спода Бо́га на́шего еще́, и у́мрем:/ ка́я бо пло́ть или́ кто слы́ша глас Бо́га, глаго́люща посреде́ огня́, и жив бу́дет?/ И слы́ша Госпо́дь Бог глас слове́с, глаго́лющих ко мне,/ и рех к ним за́поведи, оправда́ния и суды́,/ ели́ко запове́да вам Госпо́дь Бог:/ да убоите́ся всех оправда́ний Его́,/ да ми́лостив бу́дет, и умно́житеся на земли́./ Слы́ши, Изра́илю, Госпо́дь Бог ваш – Госпо́дь еди́н е́сть./ И возлю́биши Го́спода Бо́га Твоего́ от всего́ помышле́ния твоего́,/ и от всего́ се́рдца твоего́, и от всея́ души́ твоея́,/ и от всея́ кре́пости твоея́./ И Того́ убои́шися, и Тому́ еди́ному послу́жиши,/ и к Нему́ прилепи́шися, и И́менем Его́ клене́шися,/ и уго́дная Ему́ сотвори́ши:/ да добро́ тебе́ бу́дет.
Царств тре́тиих чте́ние (глава́ 8):
Ста Соломо́н пред лице́м же́ртвенника Госпо́дня,/ пред всем собо́ром изра́илевым,/ и возде́в ру́це свои́ на не́бо, и рече́:/ Го́споди Бо́же Изра́илев,/ не́сть бог, я́коже Ты на небеси́ горе́ и на земли́ до́ле./ А́ще бо не́бо и не́бо небесе́ не довле́ют Тебе́,/ ка́ко дом сей, его́же созда́х и́мени Твоему́?/ Оба́че и при́зриши на моли́тву мою́, Го́споди Бо́же Изра́илев,/ услы́шати моле́ния и моли́тву,/ е́юже раб Твой мо́лится пред Тобо́ю к Тебе́ дне́сь./ Да бу́дут о́чи Твои́ отве́рсты на дом сей день и нощь,/ на ме́сто сие́, о не́мже глаго́лал еси́:/ бу́дет и́мя Мое́ та́мо, е́же услы́шати моли́тву,/ е́юже мо́лится раб Твой на ме́сте сем во дни и но́щи./ И послу́шати мольбы́ раба́ Твоего́ и люде́й Твои́х Изра́иля./ И ели́ка а́ще помо́лятся к Тебе́ на ме́сте сем,/ и Ты услы́шиши на ме́сте жили́ща Твоего́ на Небеси́,/ и сотвори́ши, и ми́лостив бу́деши им.
На лити́и стихи́ры, глас 1:
Прииди́те, ве́рных совокупле́ние,/ прииди́те, лик соста́вим/ в наро́читом пра́зднице сла́внаго пренесе́ния/ богому́жнаго о́браза Спа́сова/ и возопии́м: благослове́н гряды́й во и́мя Госпо́дне,/ о́браз и начерта́ние Первообра́знаго./ Благослови́ нас Твои́м явле́нием/ и Це́рковь соблюди́ от е́реси,/ в не́йже ве́рно покланя́емтися.
Мона́шеская мно́жества, дне́сь усе́рдно собери́теся/ на сре́тение о́браза/ рука́ми челове́ки Созда́вшаго,/ доброде́тели Тому́ вме́сто даро́в принося́ще,/ пою́ще и глаго́люще:/ да зна́менается на нас свет лица́ Твоего́, Го́споди./ Того́ си́лою сохрани́ ста́до Твое́,/ во́лки тя́жкия отгоня́,/ умире́ние подая́ вселе́нней/ и душа́м на́шим ве́лию ми́лость.
Ра́дуйся, Ца́рствующий гра́де,/ Сла́ва бо Госпо́дня на тебе́ возсия́/ прише́ствием убру́са, небе́с простра́ннейшаго:/ Еде́са бо не оста́вль, к тебе́ принесе́ся,/ де́йствуя чудеса́ пресла́вная/ и прогони́ дух лука́вствия,/ во́инству благочести́вому на ва́рвары пода́й кре́пость,/ стена́ же и забра́ло быва́ет/ ве́рою Тому́ покланя́ющимся.
Сла́ва, и ны́не, глас 5:
Недр не отлучи́вся Оте́ческих,/ Многоми́лостиве Го́споди,/ с челове́ки пожи́л еси́, я́коже подоба́ше,/ исполня́я Твоего́ человеколю́бия/ от веко́в та́йну сокрове́нную/ и не́мощь поне́с челове́ческую,/ непрело́жно в ню обле́кся/ от Присноде́вы Богоро́дицы,/ и пречи́стаго Твоего́ зра́ка воображе́ние/ нам на освяще́ние оста́вил еси́,/ уже́ к стра́сти во́льней гото́вяся./ Сла́ва мно́гому Твоему́ о нас милосе́рдию.
На стихо́вне стихи́ры, глас 4.
Подо́бен: Дал еси́ зна́мение:
На го́ру вчера́ Влады́ка/ возведе́ я́же о Петре́,/ пред ни́ми преобрази́ся,/ явля́я Божества́ све́тлость и зари́ несозда́нныя,/ и дне́сь нам показа́ Свое́ воображе́ние./ Ему́же покланя́емся/ и любо́вию целу́ем,/ сла́вяще смотре́ние Иису́са Человеколю́бца/ и Спа́са душ на́ших.
Стих: Зна́менася на нас/ свет лица́ Твоего́, Го́споди.
Па́дше, поклони́шася/ на горе́ святе́й верхо́внии,/ Влады́ку я́ко узре́ша,/ зарю́ обнажи́вша Боже́ственный све́тлости,/ и ны́не мы припа́даем Нерукотворе́нному о́бразу,/ па́че со́лнца сия́ющу,/ сла́вяще дарова́вшаго нам сего́ на утеше́ние/ Иису́са Человеколю́бца/ и Спа́са душ на́ших.
Стих: Го́споди, во све́те лица́ Твоего́ по́йдем/ и о И́мени Твое́м возра́дуемся во ве́ки.
Убели́в очерне́вший челове́ч о́браз, Созда́телю,/ на Фаво́ре показа́л еси́/ Петру́ и сы́ном Гро́мовым,/ отъе́мля сомне́ние е́же о Кресте́ и стра́сти/ и све́тлости наказу́я/ втора́го Твоего́ прише́ствия./ И ны́не нас, Человеколю́бие, благослови́/ и освяти́ озаре́нием, Го́споди,/ пречи́стаго Твоего́ о́браза.
Сла́ва, глас 6: Го́споди, воплоти́лся еси́: (зри день сей выше).
И ны́не, глас 8. Лео́нта деспо́та: Уверя́я Иису́с, Сын Твой, Богоро́дице: (зри день сей выше).
На благослове́нии хле́бов тропа́рь о́браза, два́жды, и Успе́ния, еди́ножды.
Тропа́рь о́браза, глас 2:
Пречи́стому Твоему́ о́бразу покланя́емся, Благи́й,/ прося́ще проще́ния прегреше́ний на́ших, Христе́ Бо́же,/ во́лею бо благоволи́л еси́ пло́тию взы́ти на Крест,/ да изба́виши я́же созда́л еси́ от рабо́ты вра́жия./ Тем благода́рственно вопие́м Ти:/ ра́дости испо́лнил еси́ вся, Спа́се наш,/ прише́дый спасти́ мир.
Тропа́рь Успе́нию (зри день сей выше.
НА У́ТРЕНИ
По 1-й стихоло́гии седа́лен, глас 1.
Подо́бен: Гроб Твой, Спа́се:
Благода́ть Твоя́, Спа́се, на нас излия́ся,/ ви́диму бы́вшу Тебе́, Непостижи́ме, и пре́лести тьма́ угасе́,/ тем во све́те лица́ Твоего́ стопы́ на́ша напра́ви,/ да, в за́поведех Твои́х ходя́ще, Тебе́ сподо́бимся узре́ти,/ Све́те Непристу́пный.
Сла́ва, и ны́не, глас то́йже.
Подо́бен: Ка́мени запеча́тану:
Лик Боже́ственных апо́стол собра́ся погребсти́ Тя прече́стно, Богоро́дице Всечи́стая,/ с ни́миже и а́нгельстии чи́ни воспева́ху преставле́ние Твое́, взыва́юще прехва́льно./ С ни́миже и мы, любо́вию игра́юще, Чи́стая,/ хвалу́ Тебе́ прино́сим гла́сы пе́сненными, ве́рнии, и вопие́м:/ ра́дуйся, Предста́тельнице при́сно чту́щих Тя.
По 2-й стихоло́гии седа́лен, глас 5.
Подо́бен: Собезнача́льное Сло́во:
Собезнача́льный Сын Отцу́, и преве́чный, и неви́димый Существо́м, и неосяза́емый,/ под ле́том быв за ми́лость неизрече́нную, опи́санныя пло́ти Твоея́, Влады́ко,/ нам оста́ви сла́дкое изображе́ние, на спасе́ние душ на́ших.
Сла́ва, и ны́не, глас 4.
Подо́бен: Удиви́ся Ио́сиф:
Зря́ще вои́стинну а́нгельская во́инства преставле́ние Твое́,/ Пресвята́я Влады́чице Чи́стая, Благослове́нная Всепе́тая Богоро́дице,/ иму́ще во́лею рожде́нна из Тебе́,/ лик учени́к собра́вшеся, с весе́лием ноша́ху честно́е в рай те́ло Твое́,/ Христа́ пою́ще, Живода́вца су́ща во ве́ки.
Велича́ние:
Велича́ем Тя,/ Живода́вче Христе́,/ и почита́ем пречи́стаго лица́ Твоего́/ пресла́вное воображе́ние.
И́но велича́ние:
Велича́ем Тя,/ Живода́вче Христе́,/ и чтим о́браз Твой святы́й,/ и́мже нас спасл еси́/ от рабо́ты вра́жия.
Псало́м избра́нный: Ве́лий Госпо́дь и хва́лен зело́: пи́сан Преображе́нию.
По полиеле́и седа́лен, глас 4.
Подо́бен: Удиви́ся Ио́сиф:
Не ктому́ се́тование на лице́ Ада́мове, во Ада́ма обле́кшуся того́ Созда́вшему,/ и лица́ подо́бием Себе́ всем явля́ющу,/ и к любви́ подви́жущу благочести́вых составле́ния единогла́сно вопи́ти:/ Сла́ва, Человеколю́бче, кра́йнему Твоему́ схожде́нию.
Сла́ва, и ны́не, глас и подо́бен то́йже:
Возопи́й, Дави́де, что сей пра́здник,/ его́же воспе́л еси́ дре́вле в кни́зе псало́мстей?/ Я́ко Дще́рь, Богоотрокови́цу и Де́ву, преложи́ Ю на о́ны оби́тели Христо́с,/ И́же из Нея́ без се́мене ро́ждся,/ и сего́ ра́ди ра́дуются ма́тери, и дще́ри, и неве́сты Христо́вы, вопию́ще:/ ра́дуйся, преста́вившаяся к Вы́шнему Ца́рствию.
Степе́нна, 1-й антифо́н 4-го гла́са. Проки́мен: Го́споди, во све́те лица́ Твоего́ по́йдем/ и о И́мени Твое́м возра́дуемся во ве́ки. Стих: Ви́деша вси концы́ земли́ спасе́ние Бо́га на́шего. Ева́нгелие от Луки́, зача́ло 48 от полу́.
По 50-м псалме́ стихи́ра, глас 6:
Го́споди, воплоти́лся еси́, я́коже восхоте́л: (зри день сей выше).
Кано́н Успе́ния 1-го гла́са со ирмосо́м на 6 и о́браза два кано́на на 8.
Кано́н, глас 4.
Пе́снь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
Отве́рзем уста́, челове́цы, и язы́к уясни́м/ в наро́читый де́нь пра́здника на́шего,/ явле́ние Боже́ственнаго о́браза Христа́ Бо́га на́шего све́тло сла́вяще.
Свет Преве́чный, О́тча исполня́я словеса́,/ образноподо́бием пло́ти пре́жде ви́ден бы́сть Челове́ком,/ ны́не же яви́ся о́бразом нерукотворе́нным,/ Боже́ственнаго воплоще́ния свет облиста́я нам.
Сказа́ти хотя́ Свою́ благода́ть,/ Вы́шний прия́т ра́бий о́браз нас ра́ди,/ и на увере́ние естества́ челове́ческаго зра́ка подо́бие ве́рным дне́сь дарова́.
Богоро́дичен: Сказа́ние дне́сь вои́стинну богочелове́ческаго Твоего́ рождества́ позна́хом,/ Тя чту́ще, Всечи́стая,/ сподо́блени бы́вше ви́дети зра́ка о́браз нерукотворе́нный Ро́ждшагося из Тебе́.
Други́й кано́н, глас 6.
Пе́снь 1
Ирмо́с: Волно́ю морско́ю/ Скры́вшаго дре́вле/ гони́теля мучи́теля –/под земле́ю скры́ша спасе́нных о́троцы;/ но мы, я́ко отрокови́цы,/ Го́сподеви пои́м,/ сла́вно бо просла́вися.
Свы́ше благода́ть Боже́ственная, мир ны́не земны́й озаря́ющи,/ свои́ми дарова́нии наполня́ет воспева́ющия:/ Го́сподеви пои́м, сла́вно бо просла́вися.
Подоба́ше принести́ся к Ца́рствующему все́ми гра́ды/ Небесе́ и земли́ Царя́ о́браза начерта́нию,/ е́же он, вопло́щся самоде́льно, омочи́ царе́й христолюби́вых поспеше́ньми.
Богоза́рныя лучи́ исполня́ху,/ все уясня́юще и украша́юще челове́ческое существо́, от о́браза исходя́ще,/ его́же покрыва́ют Серафи́ми сла́вою Христо́вою.
Богоро́дичен: Возвраща́ема к земли́ и́же от земли́, Богоблагода́тная, пре́лестию врага́,/ на Тя соше́дшаго вопло́щши Бо́га па́че ума́,/ от земли́ взе́мши. к Небеси́ вознесла́ еси́.
Катава́сия: Преукраше́нная:
Пе́снь 3
Ирмо́с: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия духо́вно утверди́,/ в Боже́ственней Твое́й сла́ве,/ венце́в сла́вы сподо́би.
Влады́ка сый по существу́, соедини́вся с рабы́ пло́тию/ и на́ше де́тельствуя разли́чно спасе́ние, Христе́, е́же и ны́не промышля́я,/ Свои́м о́бразом ви́ден был еси́ на́ми.
Еде́с честне́йший град/ честны́й Боже́ственный о́браз Твой/ и́же тве́рдый зало́г ве́ры ра́ди прия́т,/ Ца́рский же Твой град дар я́ко лу́чший прие́млет ны́не.
Живо́т Ипоста́сный ны́не вкуси́ сме́рти плотски́я,/ е́юже живо́т источи́л еси́ ме́ртвым, воста́нием Твои́м, Христе́,/ ны́не же, я́ко живота́ хода́тая, зра́ка о́браз Твой пода́л еси́ нам.
Богоро́дичен: Из Тебе́ Спасе́ние, и́же су́ть в ми́ре, возсия́ пре́жде пло́тию,/ ны́не же живо́т яви́ся в ми́ре ве́рным хода́тайством Твои́м,/ светоно́сное прише́ствие пре́жде о́бразнаго подо́бия Христо́ва.
Ин
Ирмо́с: Тебе́, на вода́х/ пове́сившаго всю зе́млю неодержи́мо,/ тва́рь, ви́девши на ло́бнем ви́сима,/ у́жасом мно́гим содрога́шеся,/ не́сть свят,/ ра́зве Тебе́, Го́споди, взыва́ющи.
Тебе́ сотво́ршаго челове́ка по о́бразу пе́рвее,/ во́ньже вообрази́ся а́бие за милосе́рдие,/ прие́мша вои́стинну подо́бие неизме́нное,/ со А́нгелы, Христе́, сла́вим.
Ты жела́ющим благопристу́пен,/ и́щущим же всем благопослушли́в, Ще́дре, за мно́гую благосты́ню,/ ея́же ра́ди приближе́нием, Влады́ко,/ красоте́ Твоего́ раче́ния чуди́мся.
Уста́вил еси́ ме́стному кня́зю жела́ния,/ е́же к Тебе́ любо́вь, вку́пе же и неду́г/ ти́хим Твои́м пода́нием, вседе́тельною держа́вою Твое́ю,/ ви́девшу Тя, Спа́се, во изображе́нии.
Богоро́дичен: Ме́сто Тя Госпо́дне, Всепе́тая, Дави́д преднаписа́, хотя́щее яви́тися,/ И́же бо ника́коже вмести́мый во Твое́ чре́во вмести́ся/ и облага́ется пло́тию ве́щною Невеще́ственный.
Конда́к Успе́ния и и́кос.
Седа́лен, глас 4.
Подо́бен: Вознесы́йся:
Сше́дый с Небесе́ за милосе́рдие ми́лости, Благоутро́бне Спа́се,/ пло́ти Твое́й пресвяты́я дне́сь пречи́стый зрак/ гра́ду чту́щему Тя и лю́дем христоимени́тым сокро́вище пода́л еси́, я́ко тве́рдо всеору́жие,/ от него́же почерпа́юще освяще́ние, сего́ ве́рою те́пле прии́мем.
Сла́ва, и ны́не, подо́бен то́йже:
В ру́це Сы́на Твоего́ и Бо́га ны́не преда́вши ду́шу святу́ю,/ ни те́ло же оста́вила еси́ во гро́бе:/ я́коже бо прия́т Жи́знь всех, си́це по сме́рти к Животу́ преста́вльшися,/ Богоро́дицу Тя и́стинную веду́щим источа́еши живо́т ве́чный.
Пе́снь 4
Ирмо́с: Неизсле́дный Бо́жий Сове́т,/ е́же от Де́вы, воплоще́ния/ Тебе́, Вы́шняго,/проро́к Авваку́м усмотря́я, зовя́ше:/ Сла́ва си́ле Твое́й, Го́споди.
Плотоподо́бный Боже́ственный о́браз пло́тию Прибли́жшагося челове́ком/ прии́де к новоизбра́нному Изра́илю,/ я́ко из Еги́пта дне́сь, и просвеща́ет концы́.
Боговиде́ния сла́вы дре́вле, те́мно Твои́х за́дних сподо́бися Моисе́й, проси́в,/ но́вый же Изра́иль лице́м ны́не в лице́ Тя, Изба́вителя, ви́дит я́сно.
Ви́дите, чу́дная вси, лю́дие,/ и духо́вно ны́не возвесели́теся, Христа́ пою́ще,/ дарова́вшаго нам, я́ко многоце́нное бога́тство, Своего́ зра́ка воображе́ние.
Богоро́дичен: Я́ко на о́блаце, у́бо дре́вле Христо́с яви́ся на земли́ су́щим, седя́ на Твое́ю ру́ку,/ ны́не же напосле́док лю́дем, чту́щим Тя, Всечи́стая,/ Боже́ственным о́бразом яви́ся.
Ин
Ирмо́с: На Кресте́ Твое́ Боже́ственное истоща́ние прови́дя,/ Авваку́м, ужа́сся, вопия́ше:/ Ты си́льных пресе́кл еси́ держа́ву, Бла́же,/ приобща́яся су́щим во а́де,/ я́ко Всеси́лен.
И́же ца́рским благоле́пием обложе́ни ны́не,/ и́же от Него́же ца́рствовати учини́шася,/ сла́вяще, благоле́пное от подо́бия виде́ние Его́ прие́млют.
И́же проро́ком жада́емый пе́рвее Спа́сов зрак лю́дие зрят, все́ми ублажа́емый,/ в самоде́йствии нерукотворне воображе́нный.
Кня́зи вси и судии́ земли́, благослови́те Христа́,/ с первосвяще́нники и святи́тели дне́сь и со все́ми людьми́,/ и́же Того́ зре́ния сподо́бленнии.
Богоро́дичен: Присносу́щнаго Тя Ма́терь Христа́ челове́ком позна́вшим/ Блаже́нство Небе́сное испроси́,/ и́же Твое́ неизрече́нное рождество́ ве́рно песносло́вят.
Пе́снь 5
Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.
Воспле́щем дне́сь рука́ми и воскли́кнем хвале́ния Го́сподеви:/ се бо вои́стинну прии́де и яви́ся, вся озаря́я ве́рныя,/ Боже́ственным подо́бием чи́стыя пло́ти Его́.
Просвети́ся дне́сь правосла́вных со́нмище,/ ерети́ческий же полк да посрами́тся, покланя́емь ви́дя нерукотворе́нный о́браз,/ пло́тию нам Изба́вителя предло́жшийся.
Та́йна вели́ка прише́дшее торжество́:/ свет бо лица́ Госпо́дня ми́рови провозсия́ благоустрое́нным о́бразом/ и богочерта́нными Сама́го руки́ Боже́ственными писа́нии,/ и́миже укрепи́ся пре́жде Авгарь.
Богоро́дичен: Да ка́плют ны́не свы́ше о́блацы земны́м сла́дость хода́тайством Твои́м, Де́во:/ мир бо уще́дри Твой Сын и Бог,/ рог ве́рным спасе́ния дне́сь даро́ва, Свой Боже́ственный о́браз.
Ин
Ирмо́с: К Тебе́ у́тренюю,/ милосе́рдия ра́ди Себе́ истощи́вшему непрело́жно/ и до страсте́й безстра́стно прекло́ншемуся,/ Сло́ве Бо́жий:/ мир пода́ждь ми, па́дшему, Человеколю́бче.
Не в багряни́це, ни в червлени́це, ни в венце́ че́стне Боже́ственнии венцено́сцы,/ но о Го́споде Бо́зе крася́щеся, ра́дуются./ Его́же добро́ту зря́ще, украша́ются.
На пра́ведныя лю́ди о́чи Госпо́дни/ и у́ши на моли́тву люде́й благоче́стно му́дрствующих,/ чту́щим Его́ подо́бие благоле́пия самопи́санное.
Ны́не зря́ще неизме́ннаго Бо́га и Спа́са и неизчерта́емаго зра́ка вид,/ челове́ческое ви́дети предстоя́т,/ я́ко одушевле́ну притека́ти и просвети́тися.
Богоро́дичен: Ни чистоту́ поколеба́вши чи́стым Твои́м рождество́м,/ и Ма́ти позна́лася еси́, а́ще и ма́терское не подъя́ла:/ обоя́ бо на Тебе́, Богома́ти, соверша́йте Боже́ственное хоте́ние.
Пе́снь 6
Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.
Ме́ртвым живо́т возсия́, слепы́м свет уже́ прише́ствова,/ немощны́м лю́те врачевство́ отве́рзеся,/ и всем спасе́ние дне́сь прибли́жися.
Стра́нствует всяк ра́зум,/ невеще́ственна зра́ка ви́дя Боже́ственный о́браз Христо́в, воображе́н ны́не я́сно,/ и просвеще́ние источа́я покланя́ющимся ему́.
Пу́ть Христо́в угото́вим, и ны́не оса́нна Христу́ зову́ще,/ благослове́нно Бо́жия сла́вы и́мя,/ е́же на о́бразе Боже́ственне я́вльшееся су́щим на земли́.
Богоро́дичен: Зна́емо яви́ся страна́м, Богома́ти Чи́стая, спасе́ние,/ воображе́ние Спа́са на́шего, ро́ждшагося из Тебе́,/ ви́дети Твои́м хода́тайством ны́не сподо́бихомся.
Ин
Ирмо́с: Ят бы́сть,/ но не удержа́н в пе́рсех ки́товых Ио́на:/ Твой бо о́браз нося́,/ Страда́вшаго и погребе́нию Да́вшагося,/ я́ко от черто́га, от зве́ря изы́де./ Приглаше́ние же кустоди́и:/ храня́щий су́етная и ло́жная,/ ми́лость сию́ оста́вили есте́.
Содержи́мыя вре́дом челове́ки и подпа́дшия в тле́ние,/ не презре́ стерпе́ти, Соде́телю и Обнови́телю ро́да,/ но излия́в Себе́ Вы́шний и я́влься в подо́бие мое́ и смире́ние,/ назда́ прему́дре, добро́ту пода́в ми первоо́бразную.
Неве́дущу о Ца́рствии Твое́м Небе́снем,/ к нему́же нас, Благи́й, тле́нныя и до́лу лежа́щия, возведе́,/ И́же невеще́ственными Херуви́мы непристу́пен, сни́де же ми до а́да,/ Твоего́ апо́стола А́вгарю царю́, Христе́, посла́л еси́,/ та́инство уверя́юща.
Ви́дев Твоего́, Сло́ве и Му́дросте Всеси́льнаго Отца́, неви́димаго Бо́га,/ неотсту́пне пре́жде век, о́браза всечеловекозра́чна, дивля́шеся Бо́га ве́дый,/ пло́ть, и кро́вь, и ду́шу у́мну прие́мша Тя, ме́стный нача́льник.
Богоро́дичен: Неве́рием о Боже́ственней, сотво́ршим его́, Де́во, стра́шней за́поведи/ родонача́льника безсме́ртна, всегуби́тель премени́л е́сть,/ жи́зни же Пода́теля су́щим ро́ждши,/ нетле́нием нас Еди́на си́лою утверди́ла еси́.
Конда́к, глас 2.
Подо́бен: В моли́твах:
Неизрече́ннаго и Боже́ственнаго Твоего́ к челове́ком смотре́ния,/ неопи́санное Сло́во О́тчее,/ и о́браз непи́санный и богопи́санный победи́телей,/ ве́дуще нело́жнаго Твоего́ воплоще́ния,/ почита́ем, того́ лобыза́юще.
И́кос:
Уверя́я челове́ком Госпо́дь вочелове́чения Своего́ та́йну ужа́сную,/ самопису́ет богому́жный Свой о́браз на убру́се,/ и, первообра́зное у́бо возне́с от го́ры Елео́нския,/ на престо́ле спосажда́ет О́тчи, покланя́тися от безтеле́сных А́нгел/ подо́бию же первообра́знаго нам дарова́ покланя́тися./ Его́же объе́млюще душе́ю же и се́рдцем,/ почита́ем, того́ лобыза́юще.
Пе́снь 7
Ирмо́с: Не послужи́ша тва́ри Богому́дрии/ па́че Созда́вшего,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
Всяк град ра́дуется, пра́зднуя ве́рно с но́вым Сио́ном:/ Ца́рь бо его́ кро́тко прише́л е́сть, не на жребя́ти, я́коже пре́жде,/ на о́бразе же, спаса́я ве́рою пою́щия:/ Бо́же, благослове́н еси́.
Ре́чь Боже́ственная безпло́тных испо́лнися,/ и́же, гла́са Госпо́дня услы́шавшие пре́жде, ны́не ви́дехом обличи́в Его́,/ я́сно просвеща́еми светода́тельными сия́нии того́ явле́ния.
Веселя́тся с земны́ми Небе́сная, и сра́дуются всех святы́х мно́жество,/ мона́си и прости́и, бога́тии и убо́зии пра́зднуют,/ я́вльшуся дне́сь Боже́ственному о́бразу.
Богоро́дичен: Свяще́нницы, в пра́вду облецы́теся,/ и, вси преподо́бнии, возра́дуйтеся све́тло:/ се у́бо угото́ва свети́льник нам Христо́с,/ е́же о́браза Своего́ богоде́льное подо́бие,/ е́же прия́т от Де́вы.
Ин
Ирмо́с: Неизрече́нное чу́до:/ в пещи́ Изба́вивый преподо́бныя о́троки из пла́мене/ во гро́бе мертв, бездыха́нен полага́ется/ во спасе́ние нас, пою́щих:/ Изба́вителю Бо́же,/ благослове́н еси́.
К Боговиде́нию о́чи угото́вим/ и досто́йно потщи́мся о́браз ви́дети Христо́в всем честны́й, во спасе́ние нам, пою́щим:/ Изба́вителю Бо́же, благослове́н еси́.
Я́коже на Фаво́рскую го́ру возноси́ми,/ восхо́дными очесы́ ума́ зарю́ све́тлу в боговочелове́чении Христо́ве ви́дяще,/ единоипоста́сне, в дву же естеству́, богосло́вяще Его́ во ве́ки.
Пра́зднующих и веселя́щихся, усе́рдно же о Го́споде всех глас,/ пе́ние на́ше да соста́вится и да испо́лнится, согла́сно пою́щих:/ Изба́вителю Бо́же, благослове́н еси́.
Богоро́дичен: В де́вства я́ко све́тла еди́на добро́тах/ Соде́теля была́ еси́ Пита́тельница,/ скве́рну на́шу всю очи́стила еси́, Богороди́тельнице, су́щую от греха́, вопию́щих:/ Бо́же, благослове́н еси́.
Пе́снь 8
Ирмо́с: О́троки благочести́выя в пещи́/ Рождество́ Богоро́дичо спасло́ е́сть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.
Соверше́н сый по существу́, Бог и Челове́к ви́ден бы́сть,/ соверше́нно спаса́я по обоему́, Своя́ вои́стинну сво́йства:/ я́ко Бог бо, челове́ческий о́браз уверя́я, безпло́тне вообрази́,/ его́же нам, я́ко сте́ну и покро́в, дарова́л е́сть.
Вознеси́ рог, Бо́жий Сло́ве, испове́дающих Тя, Бо́га и Челове́ка,/ и богоначерта́нному о́бразу покланя́ющихся,/ и́мже живо́т ве́чный всем дарова́ся ве́рным,/ и упраздни́ пога́нская шата́ния Твоея́ неве́дущих Боже́ственный си́лы.
Све́тится но́вая Це́рковь, сла́вы бо свет возсия́л е́сть,/ плотоподобозра́чное обличи́в Бо́га на́шего,/ безпло́тное же украси́, еди́н я́коже ве́сть Сам,/ лице́ Свое́ просвети́в, на спасе́ние люде́й христоимени́тых.
Богоро́дичен: Всю освяти́л е́сть тва́рь,/ пре́жде от свята́го Твоего́ возсия́ чре́ва, Де́во,/ но провозсия́л е́сть того́ па́че дне́сь,/ я́ко от незаходи́мых я́вльшуся, Того́ Боже́ственному о́бразу,/ от земли́ пога́нския пресла́вно дав на спасе́ние ве́рным лю́дем и гра́ду.
Ин
Ирмо́с: Столп зло́бы богопроти́вныя/ Боже́ственнии о́троцы обличи́ша,/ на Христа́ же шата́ющееся беззако́нных собо́рище/ сове́тует тще́тная,/ уби́ти поуча́ется/ живо́т Держа́щаго дла́нию/ Его́же вся тва́рь благослови́т,/ сла́вящи во ве́ки.
По Боже́ственному естеству́, Спа́се, сый всем неви́дим,/ по челове́ческому же, а́ще и ви́дим Челове́к, пи́сан без шаро́в,/ вообрази́в Себе́ просвеще́нием Твоего́ лица́ самозри́маго,/ Твоего́ раба́ не лиши́л еси́, пою́ща:/ благослови́те, вся дела́ Госпо́дня, Го́спода.
Самоначерта́нное первообра́зное Спа́са изображе́ние подо́бозрачно,/ богоде́льный о́браз зря́ще, и́же все́ми владя́щий избра́нный, со благогове́нием и че́стию,/ я́ко наде́ющиися на́нь, покрыва́ются и утвержда́ются.
Па́че Моисе́я Богови́дца, богопи́санныя скрижа́ли прие́мшаго,/ возвели́чился еси́, честны́й местонача́льниче,/ прия́т честно́е посла́ние Бо́жия Сло́ва, блажа́щее тя,/ благоче́стию ве́ровавша, и́же ника́коже ви́де чудоде́йствия.
Богоро́дичен: Во двою́ естеству́ несме́сно, Богома́ти,/ еди́ну Ипоста́сь воплоще́ннаго от пречи́стых Твои́х крове́й ви́дяще,/ Бо́га же и Челове́ка испове́дуем,/ Того́же от Отца́ Безле́тна пре́жде век/ безстра́стно и неслия́нно рожде́нна.
Пе́снь 9
Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.
Ра́дуйся та́йно, Бо́жий христолюби́вый ны́не вели́кий гра́де:/ к тебе́ бо прии́де Ца́рствуяй все́ю тва́рию,/ Боже́ственнаго ра́ди обли́чия первообра́знаго подо́бия,/ и тебе́ изво́лил е́сть избра́ти Себе́ в жили́ще.
Пое́м Бо́гу пе́снь благода́рную, изво́лившему бога́тство превели́ко нам пода́ти,/ сте́ну необори́му и небла́зненно утвержде́ние,/ боговоображе́нный зрак Боже́ственныя пло́ти Его́./ Его́же чту́ще, ве́рнии, велича́ем.
О, па́че ума́ чуде́с Твои́х, Го́споди, я́же сотвори́л еси́ нам, на Тя наде́ющимся!/ Я́коже бо име́л еси́ неизрече́нно рождество́,/ та́ко и стра́нно всем показа́л еси́ воображе́ние зра́ка Твоего́ недоразумева́емое,/ его́же чту́щия ны изба́ви от вся́каго гне́ва.
Богоро́дичен: Высота́ вои́стинну и глубина́ неизрече́нна Твоея́ та́йны, Чи́стая:/ я́коже бо изы́де несказа́нно из Тебе́ Вы́шний, та́ко и ви́ден бы́сть,/ дне́сь прише́д к нам безпло́тным све́том зра́ка Его́,/ пло́тию сме́шся ве́щи с земны́ми.
Ин
Ирмо́с: Честне́йшую Херуви́м/ и сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.
Добро́та недомы́слима вои́стинну, красо́т красне́йши па́че естества́,/ се зри́тся досто́йно жела́ющим,/ притеце́м, ли́ца освяща́юще.
Стена́ и утвержде́ние держа́вно, ору́жие ми́рно,/ забра́ло необори́мо, невреди́мо все́ми хитростьми́ сопроти́вными,/ огражде́ние гра́ду на́шему дарова́ся.
О́бразе неизме́нный Оте́чь,/ Сия́ние сла́вы Присносу́щнаго Све́та,/ печа́ть Вы́шняго, Сло́ве, Си́ло и Му́дросте,/ Тя богосло́вствующим Благопремени́тель бу́ди.
Богоро́дичен: Уста́вила еси́ поноше́ние жена́м,/ взяла́ еси́ от челове́к и потреби́ла еси́ кля́тву,/ источи́ла еси́ всем ра́дость и благослове́ние,/ Де́во Пречи́стая Богороди́тельнице.
Свети́лен.
Подо́бен: Жены́, услы́шите:
Свет невече́рний, Христе́,/ просвети́ нас лица́ Твоего́ зра́ком/ и све́тлости святы́х сподо́би, егда́ ся́деши возда́ти кому́ждо по де́лом его́,/ моли́твами ро́ждшия Тя Богоро́дицы.
Сла́ва, и ны́не, Успе́ния.
Подо́бен: Не́бо звезда́ми:
Апо́столи, от коне́ц совоку́пльшеся зде,/ в Гефсимани́йстей ве́си погреби́те те́ло Мое́,/ и Ты, Сы́не и Бо́же Мой, приими́ дух Мой.
На хвали́тех стихи́ры на 4, глас 5.
Подо́бен: Ра́дуйся:
Ра́дуйся, пречестны́й о́бразе,/ А́нгелы покланя́емый/ и Ада́му созда́тельный,/ челове́ком возжеле́нный/ и бесо́м вои́стинну стра́шный,/ любве́ Бо́жия извеще́ние,/ начерта́ние сла́дкаго Иису́са,/ бу́дущих благ обруче́ние,/ вели́кое сокро́вище вселе́нныя,/ никогда́же нищеты́ боя́щееся./ Да́руй нам единомы́слие,/ мир и ве́лию ми́лость.
Ра́дуйся, Боже́ственный о́бразе,/ его́же Херуви́ми обстоя́т, и Серафи́ми слу́жат,/ и вся Небе́сныя си́лы трепе́щут,/ вся́ка же тва́рь послу́шает, и бе́здны боя́тся,/ и́мже тьма́ отгна́на бы́сть, и диа́вол упраздни́ся,/ и свободи́ся Ада́м от грехо́вных уз,/ и Е́вины утоли́шася сле́зы./ Да́руй нам единомы́слие,/ мир и ве́лию ми́лость.
Ра́дуйся, Ца́рский о́бразе,/ красне́йшаго добро́тою па́че всех сыно́в челове́ческих,/ Иису́са Изба́вителя,/ пло́тию покры́вшагося/ и на взыска́ние прише́дшаго/ заблу́ждшаго волкохи́щнаго овча́те,/ и на ра́му поне́сшаго,/ и Отцу́ прине́сшаго,/ Кресто́м и Кро́вию очище́но./ Да́руй вселе́нней единомы́слие,/ мир и ве́лию ми́лость.
Сла́ва, глас 4: Да ка́плют о́блацы сла́дость: (зри день сей выше).
И ны́не, глас 1: Подоба́ше самови́дцем Сло́ва и слуга́м: (зри день сей выше).
Славосло́вие вели́кое, и про́чее, и отпу́ст.
НА ЛИТУРГИ́И
Блаже́нны Успе́ния, от кано́на 1-го гла́са, пе́снь 1-я, на 4, и убру́са, от кано́на 4-го гла́са, пе́снь 6-я, на 4.
По вхо́де тропа́рь убру́са и Успе́ния. Сла́ва: конда́к убру́са. И ны́не: конда́к Успе́ния. Проки́мен, глас 4: Воспо́йте Го́сподеви пе́снь но́ву,/ я́ко ди́вна сотвори́ Госпо́дь. Стих: Ви́деша вси концы́ земли́ спасе́ние Бо́га на́шего. Апо́стол к Колосса́ем, зача́ло 250, или́ к Кори́нфяном, зача́ло 173. Аллилу́ия, глас 4: Го́споди, во све́те лица́ Твоего́ по́йдем: Ева́нгелие от Луки́, зача́ло 48 от полу́. Прича́стен: Го́споди, во све́те лица́ Твоего́ по́йдем/ и о И́мени Твое́м возра́дуемся во ве́ки.
Подоба́ет ве́дати, я́ко а́ще случи́тся попра́зднство Успе́ния Богоро́дицы и Нерукотворе́ннаго о́браза в Неде́лю, кроме́ хра́ма.
В суббо́ту на ма́лой вече́рни, стихи́ры воскре́сны и Богоро́дицы, по обы́чаю.
На вели́цей вече́рни, по кафи́зме, на Го́споди, воззва́х: стихи́ры воскре́сны 3, и пра́здника 3, и о́браза 4. Сла́ва, о́браза. И ны́не, Богоро́дичен 1-й, гла́са. Вход. На лити́и стихи́ры пра́здника, стихо́вна вече́рняя того́ дне. Сла́ва, о́браза. И ны́не, пра́здника, гла́са 5: Воспо́йте, лю́дие: На стихо́вне стихи́ры воскре́сны. Сла́ва, о́браза. И ны́не, пра́здника.
На благослове́нии хле́бов тропа́рь пра́здника, два́жды, и о́браза, еди́ножды. А́ще не́сть бде́ния, по Ны́не отпуща́еши: тропа́рь воскре́сный. Сла́ва, о́браза. И ны́не, пра́здника. На повече́рии по Досто́йне конда́к о́браза. Сла́ва, и ны́не, пра́здника. На у́трени, на Бог Госпо́дь: тропа́рь воскре́сный, два́жды. Сла́ва, о́браза. И ны́не, пра́здника. И про́чее пое́м и до кано́на воскре́сно. Кано́н воскре́сный со ирмосо́м на 4, и пра́здника на 4, и о́браза на 6. Катава́сия пра́здника: Преукраше́нная: По 3-й пе́сни конда́к и и́кос пра́здника и седа́лен о́браза. Сла́ва, и ны́не, пра́здника. По 6-й пе́сни конда́к и и́кос о́браза. На 9-й пе́сни пое́м Честне́йшую: Свети́лен воскре́сный. Сла́ва, о́браза. И ны́не, пра́здника.
На хвали́тех стихи́ры воскре́сны 4 и о́браза 4, с припе́вы его́. Сла́ва, стихи́ра ева́нгельская. И ны́не: Преблагослове́нна еси́: Славосло́вие вели́кое. Та́же тропа́рь воскре́сный и ектени́й, и отпу́ст, и оглаше́ние, и исхожде́ние в притво́р, и час 1-й.
На часе́х же глаго́лем тропа́рь воскре́сный. Сла́ва, о́браза. И ны́не, Богоро́дичен часо́в. По О́тче наш: конда́к воскре́сный. На 3-м часе́ тропа́рь воскре́сный. Сла́ва, пра́здника. И ны́не, Богоро́дичен часо́в. По О́тче наш: конда́к о́браза. Та́кожде глаго́лем и на про́чих часе́х тропа́рь воскре́сный, о́браза же и пра́здника тропа́рь и конда́к пременя́ем.
На Литурги́и: Блаже́нны гла́са на 4, и пра́здника пе́снь 1-я на 4, и о́браза пе́снь 6-я, на 4. По вхо́де тропа́рь воскре́сный, и о́браза, и пра́здника. Конда́к воскре́сный. Сла́ва, о́браза. И ны́не, пра́здника. Проки́мен, Апо́стол, аллилу́ия, Ева́нгелие и прича́стен, воскре́сныя и о́браза.
А́ще случи́тся попра́зднство Успе́ния Богоро́дицы в суббо́ту.
Глаго́лем на Го́споди, воззва́х: Сла́ва, пра́здника. И ны́не, Богоро́дичен 1-й, настоя́щаго гла́са. На у́трени, кано́н пра́здника на 6 и свята́го на 6.
А́ще случи́тся попра́зднство Успе́ния Пресвяты́я Богоро́дицы в Неде́лю, кроме́ пра́здника Нерукотворе́ннаго о́браза.
В суббо́ту на ма́лой вече́рни стихи́ры воскре́сны и Богоро́дицы, по обы́чаю.
На вели́цей вече́рни, на Го́споди, воззва́х: стихи́ры воскре́сны 3, и восто́чен, Анато́лиев, еди́н, и пра́здника того́ дне на ряду́ 3, и Мине́и свята́го 3. Сла́ва, пра́здника или́ свята́го. И ны́не, Богоро́дичен 1-й гла́са. Вход, проки́мен дне и ектении́. На лити́и стихи́ры пра́здника, стихо́вна вече́рняя того́ дне. Сла́ва, и ны́не, пра́здника. На стихо́вне стихи́ры воскре́сны. Сла́ва, свята́го. А́ще ли ни: Сла́ва, и ны́не, пра́здника. На благослове́нии хле́бов тропари́: Богоро́дице Де́во, ра́дуйся: два́жды, и пра́здника, еди́ножды, и чте́ние во Апо́стольских Посла́ниях.
На у́трени, тропа́рь воскре́сный, два́жды. Сла́ва, свята́го. А́ще ли ни: Сла́ва, и ны́не, пра́здника. По кафи́змах седа́льны воскре́сны с Богоро́дичны их и чте́ние во Ева́нгелии толково́м. Та́же непоро́чны и тропари́, А́нгельский собо́р: и ипакои́ гла́са, и чте́ние. Степе́нна и проки́мен гла́са. Ева́нгелие воскре́сное. Воскресе́ние Христо́во: и псало́м 50, и про́чее воскре́сно. Кано́н воскре́сный со ирмосо́м на 4, и Богоро́дицы на 2, и пра́здника на 4, и свята́го на 4. Катава́сия пра́здника. По 3-й пе́сни конда́к и и́кос пра́здника или́ свята́го и седа́лен. Сла́ва, и ны́не, пра́здника. По 6-й пе́сни, конда́к воскре́сный и и́кос. На 9-й пе́сни, пое́м Честне́йшую: Свети́лен воскре́сный. Сла́ва, свята́го. А́ще ли ни: Сла́ва, и ны́не, пра́здника.
На хвали́тех стихи́ры воскре́сны 4 и пра́здника 4, стихо́вна того́ дне, со Сла́вным, с припе́вы пра́здника. Сла́ва, стихи́ра ева́нгельская. И ны́не: Преблагослове́нна еси́: По славосло́вии тропа́рь воскре́сный то́чию, и ектении́, и отпу́ст, и оглаше́ние, и исхожде́ние в притво́р, и час 1-й.
На 1-м часе́ тропа́рь воскре́сный. Сла́ва, пра́здника. И ны́не, Богоро́дичен часо́в. По О́тче наш: конда́к пра́здника и коне́чный отпу́ст.
На 3-м часе́ тропа́рь воскре́сный. Сла́ва, свята́го. А́ще ли ни: Сла́ва, пра́здника. По трисвято́м конда́к пра́здника и воскре́сный глаго́лем, пременя́юще.
На Литурги́и: Блаже́нны гла́са на 6 и пра́здника, от кано́на пе́снь рядову́ю на 4. По вхо́де тропа́рь воскре́сный и пра́здника, и хра́ма свята́го, и свята́го, а́ще е́сть. Та́же конда́к воскре́сный и хра́ма свята́го или́ святы́я. Сла́ва, свята́го, а́ще е́сть; а́ще ли ни: Сла́ва, хра́ма свята́го. И ны́не, пра́здника. Проки́мен воскре́сный гла́са и пра́здника. Апо́стол, аллилу́ия и Ева́нгелие дне. Прича́стен: Хвали́те Го́спода с небе́с: и пра́здника. А́ще и́мать святы́й Апо́стол и Ева́нгелие, тогда́ пое́м проки́мен воскре́сный гла́са и свята́го. Апо́стол и Ева́нгелие дне, и свята́го. Прича́стен: Хвали́те Го́спода с небе́с: и свята́го.
Моли́тва
Го́споди Ще́дре и Ми́лостиве, Долготерпели́ве и Многоми́лостиве, внуши́ моли́тву на́шу и вонми́ гла́су моле́ния на́шего, сотвори́ с на́ми зна́мение во бла́го, наста́ви нас на пу́ть Твой, е́же ходи́ти во и́стине Твое́й, возвесели́ сердца́ на́ша, во е́же боя́тися И́мене Твоего́ свята́го. Зане́ ве́лий еси́ Ты и творя́й чудеса́, Ты еси́ Бог еди́н, и не́сть подо́бен Тебе́ в бозе́х, Го́споди, си́лен в ми́лости и благ в кре́пости, во е́же помога́ти и утеша́ти и спаса́ти вся упова́ющия на И́мя свято́е Твое́. Ами́нь.
И́на моли́тва
О Преблаги́й Го́споди Иису́се Христе́, Бо́же наш! Ты иногда́ челове́ческаго о́браза Твое́ лице́ пресвято́е омы́в водо́ю и оте́р убру́сом, чуде́сне о́ное на том же убру́се изобрази́ти и Еде́сскому кня́зю А́вгарю во исцеле́ние неду́га его́ посла́ти благоволи́л еси́. Се и мы ны́не, гре́шнии раби́ Твои́, одержи́мии душе́вными и теле́сными неду́ги на́шими, лица́ Твоего́, Го́споди, и́щем и с Дави́дом во смире́нии душ на́ших зове́м: не отврати́ лица́ Твоего́ от нас и уклони́ся гне́вом от рабо́в Твои́х, Помо́щник нам бу́ди, не отри́ни нас и не оста́ви нас. О Всеми́лостивый Го́споди, Спаси́телю наш! Вообрази́ Сам Себе́ в душа́х на́ших, да, во святы́не и пра́вде жи́тельствующе, бу́дем сы́нове Твои́ и насле́дницы Ца́рствия Твоего́, и та́ко Тебе́, Преми́лостиваго Бо́га на́шего, ку́пно со Безнача́льным Отце́м Твои́м и Пресвяты́м Ду́хом, сла́вит и не преста́нем во ве́ки. Ами́нь.
Слу́жба Ипоста́сней Прему́дрости Бо́жией, Спаси́телю на́шему Го́споду Иису́су Христу́
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры, глас 2:
Что Тебе́ принесе́м, Христе́,/ Единоро́дный Сы́не Бо́жий,/ А́нгелы покланя́емый,/ челове́ком возжеле́нный и бесо́м вои́стинну стра́шный,/ зерца́ло Присносу́щныя Сла́вы,/ любве́ Бо́жия извеще́ние,/ бу́дущих благ обруче́ние,/ вели́кое сокро́вище душа́м;/ да́руй нам единомы́слие,/ мир и ве́лию ми́лость.
Ки́я свяще́нныя пе́сни/ воспое́м Тебе́, Собезнача́льное Сло́во О́тчее,/ Его́же Херуви́ми обстоя́т, и Серафи́ми слу́жат,/ и вся Небе́сныя си́лы трепе́щут,/ вся́ка же тва́рь послу́шает, и бе́здны боя́тся./ И́мже тьма́ отгнана бы́сть, и диа́вол упраздни́ся,/ и свободи́ся Ада́м от грехо́вных уз,/ Е́вины утоли́шася сле́зы;/ да́руй нам единомы́слие,/ мир и ве́лию ми́лость.
Ко́е благодаре́ние воздади́м Тебе́,/ Ипоста́сная Прему́дросте Бо́жия,/ Сладча́йший Иису́се, Тво́рче и Изба́вителю наш,/ вели́кия ра́ди ми́лости Твоея́/ пло́тию челове́ком я́влься,/ и заблу́ждшее горохи́щное овча́, взыска́в/ и на ра́мо взем, Отцу́ прине́сший,/ Кресто́м и Кро́вию очище́но;/ да́руй вселе́нней единомы́слие,/ мир и ве́лию ми́лость.
Та́же стихи́ры Успе́ния 3, глас то́йже: 1. Ки́ими недосто́йными устна́ми: 2. Ка́я стра́шная пе́ния: 3. Ка́я духо́вная пе́ния: (зри день сей выше).
Сла́ва, глас 6:
Недр Оте́ческих не разлу́чся,/ Единоро́дный Сы́не Бо́жий,/ яви́лся еси́ на земли́/ и с челове́ки пожи́л еси́,/ исполня́я та́йну Боже́ственнаго смотре́ния Твоего́,/ от век и от родо́в сокрове́нную/ и ны́не нам явле́нную/ в спаси́тельнем прише́ствии Твое́м./ Те́мже, безме́рное Твое́ человеколю́бие велича́юще,/ воспева́ем Тя,/ я́ко Творца́ и Изба́вителя и Бо́га на́шего.
И ны́не, Успе́ния, глас 8: Уверя́я, Иису́с, Сын Твой, Богоро́дице, и Бог наш: пи́сана в сей де́нь на стихо́вне, (зри день сей выше).
Та́же вход. Проки́мен дне. И чте́ния.
При́тчей чте́ние (глава́ 8)
Госпо́дь созда́ Мя нача́ло путе́й Свои́х в дела́ Своя́,/ пре́жде век основа́ Мя;/ в нача́ле, пре́жде не́же зе́млю сотвори́ти/ и пре́жде не́же бе́здны соде́лати,/ пре́жде не́же произы́ти исто́чником водны́м,/ пре́жде не́же гора́м водрузи́тися,/ пре́жде же всех холмо́в ражда́ет Мя./ Госпо́дь сотвори́ страны́ и пусты́ни,/ и концы́ населе́ны под небесе́м./ Егда́ гото́вяше не́бо, с Ним бех,/ и егда́ отлуча́ше Себе́ престо́л на ве́трех,/ егда́ кре́пки творя́ше Вы́шния о́блаки;/ и я́ко тве́рды полага́ше исто́чники поднебе́сныя,/ внегда́ полага́ти мо́рю преде́л его́,/ и во́ды не мимои́дут уст Его́,/ и кре́пка творя́ше основа́ния земли́,/ бех к Нему́ подо́бна./ Аз бех, о не́йже ра́довашеся,/ по вся же дни веселя́хся пред лице́м Его́ на вся́ко вре́мя.
Прему́дрости Соломо́новы чте́ние (глава́ 7):
Всех Художница научи́ мя, Прему́дрость;/ е́сть бо в той Дух ра́зума свят,/ единоро́дный, многоча́стный,/ то́нкий, благодвижный,/ све́тлый, нескве́рный, я́сный,/ невреди́тельный, благолюби́вый, остр,/ невозбра́нен, благоде́лателен, человеколюби́в,/ изве́стный, кре́пкий, безпеча́льный,/ всеси́льный, всеви́дяй/ и сквозе́ вся проходя́й ду́хи разуми́чныя, чи́стыя, тонча́йшия./ Вся́каго бо движе́ния подви́жнейша е́сть Прему́дрость:/ достиза́ет же и проницает сквозе́ вся́ческая ра́ди Свое́й чистоты́./ Па́ра бо е́сть си́лы Бо́жия/ и излия́ние Вседержи́теля сла́вы чи́стое:/ сего́ ра́ди ничто́же оскверне́но на ню напа́дает./ Сия́ние бо е́сть Све́та Присносу́щнаго,/ и зерца́ло непоро́чно Бо́жия де́йствия,/ и о́браз благосты́ни Его́.
Проро́чества Иса́иина чте́ние (глава́ 25):
Го́споди, Бо́же мой, просла́влю Тя,/ воспою́ И́мя Твое́, я́ко сотвори́л еси́ чу́дная дела́,/ сове́т дре́вний и́стинный:/ да бу́дет, Го́споди./ Я́ко положи́л еси́ гра́ды в пе́рсть,/ гра́ды тве́рдыя, е́же па́сти основа́нием их,/ нечести́вых град да не сози́ждется в век./ Сего́ ра́ди благословя́т Тя лю́дие ни́щии,/ и гра́ди челове́ков оби́димых возблагословя́т Тя./ Был бо еси́ вся́кому гра́ду смире́нному Помо́щник,/ и изнемога́ющим за оскуде́ние покро́в,/ от челове́к злых изба́виши их:/ покро́в жа́ждущих и дух челове́ков оби́димых./ А́ки челове́цы малоду́шнии, жа́ждущии в Сио́не,/ я́ко изба́виши их от челове́к нечести́вых,/ и́мже нас пре́дал еси́./ И сотвори́т Госпо́дь Савао́ф всем язы́ком:/ на горе́ сей испию́т ра́дость, испию́т вино́./ Пома́жутся ми́ром на горе́ сей;/ преда́ждь сия́ вся язы́ком:/ той бо сове́т на вся язы́ки./ Поже́рта бу́дет сме́рть возмо́гши,/ и па́ки отъя́т Госпо́дь Бог вся́ку сле́зу от вся́каго лица́;/ поноше́ние люде́й отъя́т от всея́ земли́,/ уста́ бо Госпо́дня глаго́лаша сия́./ И реку́т в де́нь о́ный:/ се Бог наш, На́ньже упова́хом, и спасе́т нас;/ Сей Госпо́дь, потерпе́хом Его́, и возра́довахомся,/ и возвесели́хомся о спасе́нии на́шем.
На лити́и стихи́ры Успе́ния, глас 1: Подоба́ше самови́дцем Сло́ва и слуга́м: Та́же глас 2: Всенепоро́чная Неве́ста: Сла́ва, и ны́не, глас 3: Прииди́те, вси концы́ земни́и (пи́саны на са́мый пра́здник, зри день 15-й).
На стихо́вне стихи́ры Успе́ния со стихи́ их (зри день 15-й).
Сла́ва, Прему́дрости, глас 6:
Го́споди, воплоти́лся еси́, я́коже восхоте́л еси́,/ изво́лил еси́ восприя́ти нищету́ на́шу/ и бога́тство благосе́рдия показа́л еси́./ Сла́вим Тя, Человеколю́бче,/ смотре́ния Твоего́ та́инство почита́юще/ и моля́щеся даро́вати нам оставле́ние прегреше́ний на́ших,/ мир и ве́лию ми́лость.
И ны́не, Успе́ния, глас 4: Егда́ изшла́ еси́, Богоро́дице Де́во: (пи́сана на са́мый пра́здник, зри день 15-й).
На благослове́нии хле́бов тропа́рь Прему́дрости, два́жды. И Успе́ния, еди́ножды.
Тропа́рь Прему́дрости, глас 1:
На Престо́ле огнезра́чием/ в Вы́шних седя́й со Отце́м Безнача́льным и Боже́ственным Твои́м Ду́хом,/ благоволи́л еси́ яви́тися на земли́, я́ко челове́к,/ исполня́я предве́чный о нас Сове́т Святы́я Тро́ицы, Христе́ Иису́се;/ сего́ ра́ди и пострада́л еси́ пло́тию,/ да спасе́ши мир и вознесе́ши избра́нныя Твоя́,/ иде́же при́сно, я́ко Бог, во сла́ве ца́рствуеши./ Сла́ва всеблаго́му Твоему́ Сове́ту,/ Сла́ва прему́дрому смотре́нию Твоему́,/ Сла́ва неизрече́нному снизхожде́нию Твоему́, Еди́не Человеколю́бие.
Ин тропа́рь Прему́дрости, глас 8:
Прему́дрость О́тчая,/ Сия́ние сла́вы и О́бразе Ипоста́си Его́,/ в нача́ле Небеса́ и зе́млю основа́вый,/ благослови́ достоя́ние Твое́,/ сохрани́ в ми́ре Це́рковь и град Твой и лю́ди Твоя́ спаси́.
На У́ТРЕНИ
На Бог Госпо́дь: тропа́рь Прему́дрости, два́жды. Сла́ва, и ны́не, Успе́ния.
По 1-м и 2-м сти́хословиих седа́льны Успе́ния (зри день 15-й)
Велича́ние:
Велича́ем Тя,/ Единоро́дный Сы́не Бо́жий, Иису́се Христе́,/ вся прему́дростию Твое́ю в нача́ле сотво́ршаго/ и челове́ческий па́дший род от ве́чныя сме́рти/ всеми́лостивно искупи́вшаго.
По полиеле́и седа́лен Успе́ния (зри день 15-й).
Та́же степе́нна, 1-й антифо́н 4-го гла́са. Проки́мен, глас 4: Прииди́те, возра́дуемся Го́сподеви,/ воскли́кнем Бо́гу, Спаси́телю на́шему. Стих: Избавле́ние посла́ лю́дем Свои́м, запове́да в век заве́т Свой. Вся́кое дыха́ние: Ева́нгелие от Иоа́нна (глава́ 3, ст. 13–17): Рече́ Госпо́дь: никто́же взы́де на Не́бо: коне́ц: но да спасе́тся Им мир.
По 50-м псалме́, Сла́ва: Вся́ческая дне́сь ра́дости испо́лнишася,/ Бог Госпо́дь, и яви́ся нам.
И ны́не, то́йже.
Та́же Поми́луй мя, Бо́же: и стихи́ра, глас 6 (зри Сла́вник на Го́споди, воззва́х: страницы 144–145).
Кано́ны Иису́су Сладча́йшему, глас 2 и Успе́нию сего́ дне, глас 1.
Кано́н Иису́су Сладча́йшему. Пе́снь 1
Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло е́сть:/ препросла́вленный Госпо́дь сла́вно бо просла́вися.
Иису́се Сладча́йший Христе́, Иису́се Долготерпели́ве,/ души́ моея́ я́звы исцели́, Иису́се,/ и услади́ се́рдце мое́, Многоми́лостиве, молю́ся,/ Иису́се, Спа́се мой, да велича́ю Тя, спаса́емый.
Иису́се Сладча́йший Христе́, Иису́се, отве́рзи покая́ния ми две́рь, Человеколю́бче Иису́се,/ и приими́ мя, Тебе́ припа́дающа и те́пле прося́ща,/ Иису́се, Спа́се мой, согреше́ний проще́ния.
Иису́се Сладча́йший Христе́, Иису́се, исхити́ мя из руки́ льсти́ваго велиа́ра, Иису́се,/ и сотвори́ десна́го предстоя́теля сла́вы Твоея́, Иису́се, Спа́се мой,/ ча́сти шу́ия мя избавля́яй.
Богоро́дичен: Иису́са ро́ждшая Бо́га, Влады́чице,/ моли́ о непотре́бных рабе́х, Пречи́стая,/ я́ко да му́ки моли́твами Твои́ми изба́вимся, Нескве́рная, оскверне́ннии,/ сла́вы присносу́щныя наслажда́ющеся.
Пе́снь 3
Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ не́сть свят, я́коже Бог наш,/ и не́сть пра́веден, па́че Тебе́, Го́споди.
Услы́ши, Человеколю́бче Иису́се мой, раба́ Твоего́, вопию́ща во умиле́нии,/ и изба́ви мя, Иису́се, осужде́ния и му́ки,/ Еди́не Долготерпели́ве, Иису́се Сладча́йший Многоми́лостиве.
Подыми́ раба́ Твоего́, Иису́се мой, припа́дающа со слеза́ми, Иису́се мой,/ и спаси́, Иису́се мой, ка́ющагося мя и гее́нны, Влады́ко, изба́ви,/ Иису́се Сладча́йший Многоми́лостиве.
Вре́мя, Иису́се мой, е́же дал ми еси́, во стра́сти ижди́х, Иису́се мой./ Те́мже, Иису́се мой, не отве́ржи мя, но воззови́, молю́ся,/ Влады́ко, Иису́се Сладча́йший, и спаси́.
Богоро́дичен: Де́во, ро́ждшая Иису́са моего́,/ моли́ изба́вити ми гее́нны,/ еди́но предста́тельство оскорбля́емых, Богоблагода́тная,/ и сподо́би мя жи́зни, Всенепоро́чная, нестаре́ющияся.
Та́же ипакои́ Успе́ния, глас 8 (зри день 15-й).
Пе́снь 4
Ирмо́с: Прише́л еси́ от Де́вы не хода́тай ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: Сла́ва си́ле Твое́й, Го́споди.
Исцели́, Иису́се мой, души́ моея́ я́звы, Иису́се мой, молю́ся/ и руки́ мя исхити́, Иису́се мой Благоутро́бне, душетле́ннаго велиа́ра и спаси́.
Согреши́х, Иису́се мой Сладча́йший, Благоутро́бне,/ Иису́се мой, спаси́ мя, прибега́ющаго к покро́ву Твоему́, Иису́се Долготерпели́ве,/ и Ца́рствия Твоего́ мя сподо́би.
Никто́же согреши́, Иису́се мой, я́коже согреши́х аз, окая́нный,/ но припа́даю, моля́ся:/ Иису́се мой, спаси́ мя и жи́зни, Иису́се мой, насле́дие ми да́руй.
Богоро́дичен: Всепе́тая, Иису́са ро́ждшая Го́спода,/ Того́ моли́ изба́вити му́ки вся, пою́щия Тя,/ и Богоро́дицу вои́стинну имену́ющия.
Пе́снь 5
Ирмо́с: Просвеще́ние во тьме́ лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, бо́га не зна́ю.
Ты просвеще́ние, Иису́се мой, ума́ моего́,/ Ты спасе́ние отча́янныя души́ моея́, Спа́се,/ Ты, Иису́се мой, му́ки изба́ви и гее́нны мя, зову́ща:/ спаси́, Иису́се мой, Христе́, мя, окая́ннаго.
Всеконе́чно, Иису́се мой, к стра́сти безче́стия низве́ржен, ны́не зову́:/ Ты, Иису́се мой, по́мощи ми ру́ку низпосла́в, исто́ргни зову́ща:/ спаси́, Иису́се мой Христе́, мя, окая́ннаго.
Оскверне́н ум, Иису́се мой, обнося́, взыва́ю Ти:/ очи́сти мя от скве́рны прегреше́ний/ и изба́ви мя во глубины́ зло́бы от неве́дения низпопо́лзшагося, Спа́се Иису́се мой,/ и спаси́ мя, молю́ся.
Богоро́дичен: Иису́са ро́ждшая, Отрокови́це Богороди́тельнице,/ Того́ умоли́ спасти́ вся правосла́вныя, мона́хи и мирски́я/ и гее́нны изба́вити зову́щия:/ ра́зве Тебе́ предста́тельства тве́рдаго не зна́ем.
Пе́снь 6
Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.
Иису́се мой, Христе́ Многоми́лостиве,/ испове́дающася приими́ мя, Влады́ко, о Иису́се!/ И спаси́ мя, и от тли, Иису́се, мя исхити́.
Иису́се мой, никто́же бы́сть ин блудни́к, я́коже аз, стра́стный,/ о Иису́се Человеколю́бче,/ но Ты, Иису́се, мя спаси́.
Иису́се мой, блудни́цу, и блу́днаго, и Манасси́ю, и мытаря́ преидо́х, о Иису́се мой, страстьми́,/ и разбо́йника, Иису́се, и ниневи́тяны.
Богоро́дичен: Иису́са Христа́ моего́ ро́ждшая, Пречи́стая Де́во, еди́на нескве́рная,/ оскверне́на су́ща мя моли́тв Твои́х иссо́пом ны́не очи́сти.
Конда́к Прему́дрости, глас 8:
Избра́нному пре́жде век соде́лати спасе́ние ми́ра,/ Вели́каго Сове́та А́нгелу, Сы́ну Бо́жию, Иису́су Христу́,/ прииди́те, ве́рнии, поклони́мся и припаде́м Ему́,/ сла́вяще неизрече́нное о нас Боже́ственное смотре́ние,/ и, я́ко изба́вленным от ве́чныя сме́рти,/ вознесе́м Ему́, Спаси́телю на́шему и Бо́гу, благода́рственную пе́снь,/ душа́ми чи́стыми и нескве́рными устна́ми взыва́юще:/ Сла́ва Тебе́, Го́споди, Сла́ва Тебе́.
И́кос:
И́же пре́жде денни́цы Божество́м Твои́м/ на Небесе́х от Отца́ без ма́тере рожде́н/ и вре́менно челове́чеством на земли́ без отца́ от Пречи́стыя Де́вы возсия́вый,/ и, вочелове́чився, Божество́ Свое́ во пло́ти показа́вый,/ и во́лею пло́тию кре́стную сме́рть прии́мый,/ и погребе́нием еси́ а́да плени́вый,/ и самовла́стно из ме́ртвых пло́тию воскресы́й,/ и на Небеса́ ко Отцу́ пло́тию вознесы́йся, Еди́н сый Святы́я Тро́ицы,/ спокланя́емый со Отце́м и Святы́м Ду́хом./ Сла́ва Тебе́, подаю́щему ве́лию ми́лость, Сла́ва Тебе́.
Пе́снь 7
Ирмо́с: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́ема, поя́ху:/ благослове́н еси́, Бо́же оте́ц на́ших.
Христе́ Иису́се, никто́же согреши́ на земли́ от ве́ка, о Иису́се мой,/ я́коже согреши́х аз, окая́нный и блу́дный./ Те́мже, Иису́се мой, вопию́ Ти:/ пою́ща мя уще́дри, благослове́н еси́, Бо́же оте́ц на́ших.
Христе́ Иису́се, ко стра́ху Твоему́, вопию́, пригвозди́ мя, о Иису́се мой,/ и окорми́ ны́не ко приста́нищу благооти́шному,/ я́ко да, Иису́се мой Ще́дре, пою́ Ти спаса́емый:/ благослове́н еси́, Бо́же оте́ц на́ших.
Христе́ Иису́се, тьма́ми обеща́х Тебе́ стра́стный,/ о Иису́се мой, покая́ние, но солга́х, окая́нный./ Те́мже, Иису́се мой, вопию́ Ти:/ нечу́вственне пребыва́ющую ду́шу мою́ просвети́, Христе́, отце́в Бо́же благослове́н еси́.
Богоро́дичен: Христа́ Иису́са ро́ждшая стра́нно и па́че естества́,/ Того́ моли́, Всенепоро́чная, я́же чрез естество́ моя́ прегреше́ния вся прости́ти ми, Отрокови́це,/ да зову́, спаса́емь:/ благослове́нна еси́ Бо́га пло́тию ро́ждшая.
Пе́снь 8
Ирмо́с: В пе́щь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода/ и превозноси́те во вся ве́ки.
Тя, Иису́се мой, молю́, я́коже блудни́цу, Иису́се мой, изба́вил еси́ мно́гих согреше́ний,/ та́ко и мене́, Иису́се, Христе́ мой, изба́ви,/ и очи́сти оскверне́нную ду́шу мою́, Иису́се мой.
Преклони́вся, Иису́се, безслове́сными сластьми́,/ безслове́сен яви́хся и ското́м вои́стинну, о Иису́се мой, стра́стно окая́нный уподо́бихся, Спа́се:/ те́мже, Иису́се, безслове́сия мя изба́ви.
Впад, о Иису́се, в душетле́нныя разбо́йники,/ обнажи́хся оде́жды, Иису́се мой, боготка́нныя ны́не/ и лежу́, ра́нами уя́звлен;/ еле́й, Христе́ мой, возле́й на мя и вино́.
Богоро́дичен: Иису́са моего́ и Бо́га носи́вшая Христа́ несказа́нно, Богоро́дице Мари́е,/ Того́ моли́ при́сно/ от бед спасти́ся рабо́м Твои́м и певце́м Твои́м, Неискусому́жная Де́во.
Пе́снь 9
Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.
Манасси́ю, Иису́се мой, мытаря́, блудни́цу, блу́днаго, Ще́дре Иису́се,/ и разбо́йника преидо́х, Иису́се мой, в я́слех сту́дных и безме́стных, Иису́се,/ но Ты, Иису́се мой, предвари́в, мя спаси́.
От Ада́ма, Иису́се мой, согреши́вшия вся пре́жде зако́на и в зако́не, Иису́се,/ и по зако́не, окая́нный, и благода́ти, Иису́се мой, победи́х страстьми́ окая́нно;/ но Ты, Иису́се мой, судьба́ми Твои́ми спаси́ мя.
Да не отлуче́н бу́ду, Иису́се мой, неизрече́нныя Твоея́ сла́вы,/ да не улучу́ ча́сти, Иису́се, шу́ия, Сладча́йший Иису́се,/ но Ты мя десны́м овца́м Твои́м, Христе́ Иису́се мой, сочета́в, упоко́й, я́ко Благоутро́бен.
Богоро́дичен: Иису́са, Богоро́дице, Его́же носи́ла еси́, Еди́на Неискусому́жная Де́во Мари́е,/ Того́, Чи́стая, уми́лостиви, я́ко Сы́на Твоего́ и Зижди́теля,/ изба́вити притека́ющия к Тебе́ искуше́ний, и бед, и огня́ бу́дущаго.
На 9-й пе́сни Честне́йшую: не пое́м, но пое́м припе́в Прему́дрости: Велича́й, душе́ моя́,/ соде́лавшаго спасе́ние посреде́ земли́ Христа́ Жизнода́вца.
Свети́лен Успе́ния: Апо́столи от коне́ц: (зри день 15-й).
На хвали́тех стихи́ры Успе́ния на 4, глас 4:
1. В сла́вном успе́нии Твое́м: 2. От коне́ц стеко́шася: 3. И́же Живо́т ро́ждшая: (зри день 15-й).
Сла́ва, глас 6:
Преклони́л еси́ Небеса́, Непостижи́ме Го́споди,/ сшел еси́ во чре́во Де́выя, Неопи́санне,/ быв из Нея́ Челове́к существо́м же и естество́м,/ да спасе́ши челове́чество/ кра́йния ра́ди Твоея́ ми́лости.
И ны́не, Успе́ния, глас 1: Подоба́ше самови́дцем Сло́ва и слуга́м: (зри день 15-й).
Славосло́вие вели́кое. Ектении́. И отпу́ст.
НА ЛИТУРГИ́И
Блаже́нны от кано́на Успе́ния, пе́снь 1-я на 4 и Прему́дрости, пе́снь 6-я на 4. По вхо́де пое́м: Спаси́ ны, Сы́не Бо́жий, прише́дый спасти́ мир, пою́щия Ти: аллилу́ия. Проки́мен, глас 4: Я́ко возвели́чишася дела́ Твоя́, Го́споди,/ вся прему́дростию сотвори́л еси́. Стих: Благослови́, душе́ моя́, Го́спода, Го́споди Бо́же мой, возвели́чился еси́ зело́. Апо́стол, 1 Иоа́ннова посла́ния (глава́ 4, ст. 9–14): Возлю́бленнии, о сем яви́ся любы́ Бо́жия в нас: коне́ц: я́ко Оте́ц посла́ Сы́на Спаси́теля ми́ру. Аллилу́ия, глас 3: Воспо́йте Го́сподеви пе́снь но́ву, воспо́йте Го́сподеви, вся земля́. Стих: Возвести́те во язы́цех сла́ву Его́, во всех лю́дех чудеса́ Его́. Ева́нгелие от Луки́, зача́ло 13. Прича́стен: Избавле́ние посла́ Госпо́дь лю́дем Свои́м.
На моле́бне
Проки́мен у́тренний. Ева́нгелие от Иоа́нна (глава́ 12, ст. 46–50): Рече́ Госпо́дь ко прише́дшим к Нему́ иуде́ом: Аз свет в мир приидо́х: коне́ц: якоже рече́ Мне Оте́ц, та́ко глаго́лю.
Моли́тва
Спаси́телю на́шему, Го́споду Иису́су Христу́
Влады́ко Многоми́лостиве, Го́споди Иису́се Христе́, Безнача́льнаго Отца́ Собезнача́льный и Соприсносу́щный Сы́не, Непостижи́мая Му́дросте, Непристу́пный Све́те, Вседе́тельная и Всесодержи́тельная Си́ло, всемогу́щим сло́вом Твои́м от не су́щих во е́же бы́ти приведы́й вся́ческая и все держа́вною во́лею Твое́ю управля́яй и устроя́яй всем благопотре́бная и поле́зная! Благода́рно испове́дуем Твое́ Боже́ственное о нас промышле́ние, велича́ем непостижи́мую та́йну Твоего́ смотре́ния и с ве́рою прие́млем спаси́тельную благода́ть Твою́. Ты бо, неизглаго́ланная благосты́не, не по беззако́нием на́шим творя́й нам, но по безме́рному благоутро́бию Твоему́ ми́луяй и спаса́яй нас, благоизво́лил еси́, исполня́я Сове́т и изволе́ние О́тчее, истощи́в Себе́, сни́ти на зе́млю и немощно́е естество́ челове́ческое восприя́ти, в не́мже пострада́в во́лею, закла́лся еси́ на кресте́, я́ко а́гнец непоро́чный, за грехи́ ми́ра, и, сим стра́шным и спаси́тельным священноде́йствием преклони́в пра́вду Боже́ственную на ми́лость, Хода́тай Бо́гу и челове́ком яви́лся еси́, и па́дшее и растле́нное естество́ на́ше возста́вил еси́, и обнови́л и освяти́л еси́, я́ко бы́ти ве́рующим в Тя и Небе́снаго Бо́га Отца́ святы́м и непоро́чным, в насле́дие нетле́нно и неувяда́емо, соблюде́но на Небесе́х. Те́мже мо́лимся Тебе́, Спаси́телю наш, при́зри ми́лостивно на нас, и приими́ на́ше испове́дание, хвалу́ и благодаре́ние за вся, я́же возда́л и угото́вал еси́ нам, ве́рующим в Тя и испове́дующим всесвято́е И́мя Твое́. Спаси́, Го́споди, лю́ди Твоя́ и благослови́ достоя́ние Твое́. Помяни́ в щедро́тах Твои́х Це́рковь Твою́ святу́ю, ю́же стяжа́л еси́ честно́ю Твое́ю Кро́вию, утверди́, умири́, разшири́ и сохрани́ ю непреобори́му и непоколеби́му и а́довыми враты́, но да сокруша́тся пред не́ю и исче́знут вся сопроти́вныя си́лы и да расточа́тся вси врази́, ви́димо и неви́димо ополча́ющиися, е́же озло́бити достоя́ние Твое́ и разори́ти заве́т святы́й Твой. Осени́ Боже́ственным благослове́нием Твои́м страну́ Русскую, сохраня́я ю в ми́ре, благоде́нствии и тишине́, побе́ду же и одоле́ние на супоста́ты ея́ да́руя. Отжени́ от правове́рнаго оте́чества на́шего вся́каго ду́ха ле́стча, внося́щаго к нам пле́велы ло́жных уче́ний и си́лящагося водвори́ти у нас нра́вы и обы́чаи, проти́вныя святы́м за́поведем Твои́м; утверди́ нас в Правосла́вием испове́дании ве́ры и соде́лай ны ревни́тели оте́ческих преда́ний и вся́ких до́брых христиа́нских дел, да вы́ну сия́ет в оте́честве на́шем свет и́стинный и сла́вится в род и род пречестно́е и пребоже́ственное И́мя Твое́. Спаси́, Го́споди, и поми́луй град сей, в не́мже живе́м, и вся гра́ды и ве́си, и всю страну́ благослове́нныя па́ствы Русскияския; всех правосла́вно ве́рующих в Тя в ми́ре, тишине́ и благоде́нствии соблюди́, Це́ркви Святе́й и вся́кому нача́лу и вла́сти послу́шны и благопоко́рны соде́лай и все́ми христиа́нскими доброде́тельми украси́, отпа́дшия же и проти́вящияся к едине́нию с Свято́ю Правосла́вною Це́рковию спаси́тельною Твое́ю благода́тию призови́, боже́ственным сло́вом Твои́м просвети́ и обрати́, я́ко Благи́й и Человеколю́бец. Спаси́, Го́споди, и святы́й храм сей, его́же поста́вил и утверди́л еси́, я́ко столп кре́пости, да́же до сего́ дне, мно́гое число́ лет неразруши́мо и невреди́мо сохраня́я, в не́мже в моли́твах призыва́ем Тя и слу́жим Тебе́, живу́щему на Небеси́ Царю́ веко́в, и́мже украша́ется и освяща́ется град наш и низпосыла́ется Твоя́ Боже́ственная благода́ть на вся гра́ды и ве́си страны́ на́шея. Да пребу́дет на нем, мо́лим Тя, Го́споди, и во пре́дняя в род и род Твое́ Боже́ственное благослове́ние, да прино́сится в нем вы́ну благоприя́тная Тебе́ моли́тва и да излива́ется чрез него́ на всех моля́щихся и с ве́рою призыва́ющих Тя Твоя́ спаси́тельная благода́ть, ми́лующая и избавля́ющая нас от всех бед. Помяни́, Го́споди, во Ца́рствии Твое́м раб Твои́х (и́мя рек), воздви́гших Тебе́ сей святы́й и приснопа́мятный дом на земли́ во сла́ву прему́дрости Твое́й, явле́нныя в та́йне спасе́ния ми́ра, и в похвалу́ всечестна́го и всеблаже́ннаго успе́ния Пречи́стыя Ма́тере Твое́й, и, прости́в им вся, я́же соде́лаша, я́ко челове́цы, прегреше́ния, ве́ры ра́ди и любве́ к Тебе́, Бо́гу и Спаси́телю на́шему, возда́ждь им Небе́сными и ве́чными благи́ми в Пренебе́снем и Боже́ственнем до́му Твое́м. Помяни́ в щедро́тах Твои́х, Ми́лостиве, преосвященных иера́рхов, от созда́ния хра́ма сего́ благоукраше́нию его́ усе́рдно послужи́вших, и всех правосла́вных христиа́н, с ве́рою и любо́вию плодоноси́вших и доброде́явших в нем и ны́не святы́ми же́ртвами и благотворе́нии поревнова́вших к благоле́пию и сла́ве его́, и о́нем блаже́нное упокое́ние и ве́чное ра́дование в Ца́рствии Небе́снем, сим же здра́вие, благоде́нствие и в ве́ре и благи́х де́лех преспе́яние ко спасе́нию душ всеми́лостивно да́руй.
Прему́дрый и Всеблаги́й Го́споди, Спаси́телю наш! Просвети́вый сия́нием прише́ствия Твоего́ ми́ра концы́ и сопризва́вый нас в Це́рковь Твою́ Святу́ю с обетова́нием насле́дия нетле́нных и ве́чных благ, при́зри ми́лостивно и на нас, недосто́йных рабо́в Твои́х, и не помяни́ беззако́ний на́ших, но по безме́рному благоутро́бию Твоему́ осла́би, оста́ви, прости́ нам вся прегреше́ния на́ша. А́ще бо и преступа́ем святу́ю во́лю Твою́, но не отмета́емся Тебе́, Бо́га и Спа́са на́шего: Тебе́ еди́ному согреша́ем, но и Тебе́ еди́ному слу́жим, в Тя еди́наго ве́руем, к Тебе́ еди́ному прибега́ем и Твои́ то́чию раби́ бы́ти хо́щем. Помяни́ не́мощь естества́ на́шего и обдержа́щия нас повсю́ду искуше́ния врага́ и пре́лести и собла́зны ми́ра, и́хже ра́ди без Тебе́, я́коже рекл еси́, не мо́жем твори́ти ничесо́же, и Сам очи́сти и спаси́ нас, Сам просвети́ умы́ на́ша, е́же непоколеби́мо ве́ровати в Тя, Еди́наго Спа́са и Изба́вителя на́шего, Сам подви́гни се́рдца на́ша, е́же всеце́ло люби́ти Тя, Еди́наго Бо́га и Творца́ на́шего, Сам напра́ви стопы́ на́ша, е́же непреткнове́нно ходи́ти во све́те за́поведей Твои́х. Ей, Го́споди, Спаси́телю наш, яви́ нам вели́кую и бога́тую ми́лость Твою́, И́же по неизглаго́ланней любви́ Твое́й и страда́ти за нас изво́лил еси́, и всеси́льною Боже́ственною Твое́ю благода́тию, предста́тельством же Пречи́стыя и Пренепоро́чныя Святы́я Ма́тере Твоея́ Мари́и, Е́йже честно́е и Блаже́нное успе́ние и к Тебе́, Сы́ну и Бо́гу, Пренебе́сное возше́ствие ны́не пра́зднуем, и моли́твами уго́дников Твои́х, страну́ на́шу честны́ми телесы́ освяща́ющих и вы́ну пред Тобо́ю за нас хода́тайствующих, сотвори́, да в преподо́бии и пра́вде поживе́м вся дни живота́ на́шего, и та́ко досто́йни бу́дем во второ́е сла́вное прише́ствие Твое́ услы́шати от Тебе́ ми́лостивое призыва́ние в Ца́рствие Небе́сное, е́же получи́ти сподо́би нас, гре́шных и недосто́йных рабо́в Твои́х, и в наслажде́нии неизрече́нных красо́т его́ сла́вит и Тя вку́пе с Безнача́льным Твои́м Отце́м и Присносу́щным Боже́ственным Ду́хом во ве́ки веко́в. Ами́нь.
Пра́зднование Пресвяте́й Влады́чице на́шей Богоро́дице и Присноде́ве Мари́и ра́ди ико́ны Ея́, имену́емыя «Фео́доровская»
НА МА́ЛОЙ ВЕЧЕ́РНИ
На Го́споди, воззва́х: стихи́ры, глас 1.
Подо́бен Небе́сных чино́в:
Небе́сныя си́лы вся ра́дуются и веселя́тся,/ и пресла́вно слу́жат чу́дней Бо́жия Ма́тере ико́не,/ и к весе́лию град Кострому́ и всю страну́ Ру́сскую созыва́ют,/ и спасе́ние ми́рови сказу́ют,/ возвеща́юще Цари́цы пречу́днаго о́браза прише́ствие,/ всем ве́рным тве́рдое огражде́ние и заступле́ние.
Твоего́ о́браза, Пресвята́я Влады́чице, прише́ствие/ и пресла́вное всем ве́рным явле́ние зря́ще,/ ужа́сни бы́ша костромсти́и жи́телие/ и ра́дости вси испо́лнишася,/ ви́дяще таково́е пресла́вное Бо́жия Ма́тере сокро́вище,/ спасе́ние и просвеще́ние душ на́ших.
С преми́рными чи́ны а́нгельскими/ дне́сь вси, наро́ди Ру́сстии, духо́вно возвесели́мся,/ пра́зднующе торжество́ Бо́жия Ма́тере,/ пречу́дное Цари́цына о́браза к нам прише́ствие;/ исто́чник ми́рови приснотеку́щий яви́ся дне́сь,/ незави́стныя да́ры и исцеле́ние всем подая́й.
Сла́ва, и ны́не, глас 5:
Стра́нно чу́до прише́ствия/ Твоего́ пречи́стаго о́браза, Влады́чице,/ удивля́ет же и просвеща́ет земноро́дныя/ светоно́сною свое́ю благода́тию,/ омрача́ет и прогоня́ет полки́ иноплеме́нныя,/ подае́т здра́вие и одоле́ние на сопроти́вныя ве́рным лю́дем,/ но, о Де́во и Ма́ти Чи́стая, ро́ждшая Царя́ Христа́,/ Преблагослове́нная Влады́чице,/ удиви́ и на мне щедро́ты Твоя́ милосе́рдыя,/ да со все́ми и аз пою́ Твоя́ пресла́вная вели́чия.
На стихо́вне стихи́ры, глас 2.
Подо́бен: Егда́ от Дре́ва:
О Де́во Госпоже́ Богоро́дице,/ ко́е Тебе́ ны́не принесе́м благодаре́ние/ мы, недосто́йнии раби́ Твои́,/ или́ ки́я досто́йныя пе́сни воспое́м/ светоза́рнаго Твоего́ о́браза цельбоно́снаго явле́нию/ и Преве́чнаго Младе́нца, Бо́жия Сло́ва,/ Христа́ Бо́га на́шего и Царя́ всех?
Стих: Слы́ши, Дщи, и ви́ждь,/ и приклони́ у́хо Твое́.
О Пресвята́я Госпоже́, Де́во Богоро́дице, Влады́чице,/ не забу́ди нас, смире́нных и недосто́йных раб Твои́х,/ уми́льно чудотво́рней Твое́й ико́не покланя́ющихся/ и благоче́стно восхваля́ющих Твоя́ пресла́вная вели́чия,/ Ты бо спаса́еши нас от всех бед и напа́стей/ Ма́терними Твои́ми моли́твами.
Стих: Лицу́ Твоему́ помо́лятся/ бога́тии лю́дстии.
О Всепе́тая Ма́ти, Де́во Богоро́дице,/ умилосе́рдися на моле́ние на́ше,/ гре́шных и недосто́йных раб Твои́х,/ Твое́ бо есмы́ вси достоя́ние,/ всех нас поми́луй, Пречи́стая,/ на Тя бо вси наде́жду возлага́ем, смире́ннии,/ приими́ сле́зное на́ше приноше́ние/ и изба́ви от вся́кия ско́рби и ну́жды рабы́ Своя́.
Сла́ва, и ны́не, глас то́йже:
О, ти́хое и необори́мое приста́нище/ всем ско́рбным еси́,/ притека́ющим к Тебе́, Де́во Богоневе́сто!/ Ко́е Тебе́ принесе́м благодаре́ние,/ коне́чное на́ше неможе́ние позна́вше?/ Ви́дяще к нам Твоего́ чудотво́рнаго о́браза прише́ствие,/ незави́стныя да́ры целе́бныя нам подаю́ща,/ мо́лимтися, Всепе́тая, и Тебе́ про́сим/ неотсту́пно с на́ми пребыва́ти во ве́ки,/ всем подаю́щи ве́лию ми́лость.
Тропа́рь пи́сан на вели́цей вече́рни.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры на 8, глас 2.
Подо́бен: Ки́ими похва́льными венцы́:
Ки́ими светогла́сными пе́сньми/ воспое́м Богоро́дицу?/ Честне́йшую всея́ тва́ри, и Святе́йшую Херуви́м и Серафи́м,/ и всех святы́х Цари́цу,/ в Не́йже благоизво́ли всели́тися Вы́шний/ и е́же о Ней спасе́ние ми́ру соде́ла,/ ны́не же в Боже́ственнем торжестве́ святы́я Свое́й ико́ны/ подаю́щую всем ве́рным бога́тно целе́бныя ми́лости.
Ки́ими немо́лчными пе́нии/ воспое́м Богоро́дицу?/ В боле́знех Враче́бницу/ и печа́льным всем утеше́ние,/ в ну́ждах су́щим ско́рое поможе́ние,/ злосла́вным всем посрамле́ние,/ Ея́же ра́ди к нам ми́лости, явле́ния святы́я ико́ны,/ шата́ния враго́в Христо́с низложи́,/ име́яй ве́лию ми́лость.
Ки́ими проро́ческими веща́нии/ похва́лим Богоро́дицу?/ В да́льных страна́х вся ви́дящи,/ и отстоя́щих, я́ко близ су́щих, явля́ющися Помо́щница Нело́жная,/ и всю вселе́нную назира́ющи, ны́не Боже́ственным сокро́вищем Свои́м,/ пречу́днаго о́браза явле́нием,/ град Кострому́ и всю страну́ Русскую обогати́ла еси́,/ подаю́щи всем целе́бныя Своя́ ми́лости.
И́ны стихи́ры, глас 5:
Ра́дуйся, наде́ждо на́ша и Засту́пнице,/ Преблагослове́нная Де́во Богоро́дице,/ И́же ра́дость от А́нгела прие́мшая/ и ро́ждшая Бо́жию Ипоста́сную Прему́дрость,/ Сло́во, О́тчее Сия́ние,/ Благослове́нная Пресвята́я Богоневе́сто,/ Еди́на от всех Всепе́тая,/ христиа́ном в беда́х Ско́рая Помо́щнице/ и те́плое на́ше заступле́ние,/ правосла́вных всех похвало́ превысо́кая/ и сла́во ве́рным превознесе́нная,/ Па́стыреначальнице на́ша Ру́сская предо́брая,/ И́же ны́не заблу́ждших нас взыска́вшая/ и пречу́дный Свой о́браз к нам посла́ти изво́лившая,/ подаю́щи нам разреше́ние грехо́в/ и ве́лию ми́лость.
Ра́дуйся, Пресвята́я Де́во Богоро́дице,/ спасе́ния на́шего Хода́таице/ и всем ра́досте и благослове́ние,/ Ты бо Еди́на еси́ Небе́сная Цари́ца,/ красне́йшая А́нгелов и челове́ков,/ Иису́са пло́тию родила́ еси́,/ Прекра́снаго па́че всех сыно́в челове́ческих,/ и на пречи́стых рука́х Твои́х Того́ носи́ла еси́,/ и ны́не пречу́днаго Твоего́ о́браза явле́нием/ ви́дим Того́, Изба́вителя своего́,/ с Тобо́ю к нам прише́дшаго/ на взыска́ние нас, заблу́ждших,/ пода́й очище́ние грехо́в/ и ве́лию ми́лость.
Ра́дуйся, вся христолюби́вая Ру́сская земле́,/ Сла́ва бо Госпо́дня на тебе́ возсия́/ пресла́вным явле́нием пречи́стыя ико́ны Богома́тере,/ пречу́дно бо к нам дне́сь прии́де,/ ди́вным про́мыслом всех Бо́га яви́ся./ Лику́й ны́не и весели́ся, ца́рствующий гра́де Москва́,/ я́ко прия́л еси́ в преде́лы твое́й о́бласти/ свы́ше сия́ющую Божества́ зарю́,/ чуде́с благода́ть неизчерпа́емую,/ весели́ся и све́тло торжеству́й, гра́де Кострома́./ Красу́йся и ра́дуйся, це́ркве Бо́жия,/ уясни́ся бо твоя́ добро́та па́че Ааро́ня киво́та,/ и́бо име́еши в себе́ вели́кое вселе́нныя сокро́вище,/ пречу́дную ико́ну Бо́жия Ма́тере,/ Я́же да́рует нам вели́кую и бога́тую ми́лость.
Сла́ва, и ны́не, глас 6:
Дне́сь ра́дуется ве́рных мно́жество,/ яви́ бо ся Боже́ственная ико́на Твоя́, Влады́чице,/ на ме́сте пусты́ннем,/ на сосно́ве дре́ве стоя́щи,/ я́ко многосве́тлое со́лнце, све́том вели́ким сия́ющи/ и лучи́ ми́лости повсю́ду испуща́ющи,/ вся ве́рныя просвеща́ет./ Дне́сь, ликовству́я, великому́ченик Фео́дор Стратила́т Тебе́ слу́жит/ и, почита́я Тя, от ме́ста на ме́сто ико́ну Твою́ прено́сит, Богома́ти,/ доне́с же Богоизбра́ннаго ме́ста,/ благогове́йно поставля́ет, с досто́йным славосло́вием./ Мы же что Ти принесе́м, бре́ннии,/ и ко́е благохвале́ние прише́ствию Твоему́ сотвори́м?/ Недоумева́ем, то́чию удивля́емся,/ велича́юще Твое́ милосе́рдие,/ е́же на нас показа́ла еси́,/ гра́ду бо Твоему́ щит и побе́ду дарова́ла еси́./ Но, о Пресвята́я,/ моли́ся приле́жно Сы́ну Твоему́ и Бо́гу на́шему/ дарова́ти стране́ на́шей на враги́ побе́ды,/ и ми́ру умире́ние,/ и душа́м на́шим ве́лию ми́лость.
Вход. Проки́мен дне. И чте́ния 3 Богоро́дичная (зри день 15-й).
На лити́и стихи́ры, глас 5:
Прииди́те, возра́дуемся Присноде́ве,/ вси празднолю́бцы, ру́сстии собо́ри,/ пречу́дное явле́ние ико́ны Бо́жия Ма́тере ублажи́м,/ источа́ет бо нам неоску́дныя ми́лости,/ и избавля́ет от вся́ких бед и напа́стей,/ и освеща́ет Свое́ю ми́лостию,/ тем, вси ве́рнии, соше́дшеся в пресла́внем Ея́ торжестве́,/ чи́стыми усты́ и се́рдцы/ и пе́нии духо́вными пра́зднуем све́тло.
Глас 8: Пе́рвее написа́вшейся Твое́й ико́не/ Ева́нгельских та́ин благове́стником/ и Тебе́, Цари́це, принесе́нней,/ да усво́иши ту и си́льну соде́лаеши спасти́ чту́щия Тя,/ пора́довася, я́ко су́щи ми́лостива/ спасе́ния на́шего Соде́тельница,/ я́ко уста́ и глас ико́не бы́вши,/ я́коже и Бо́га внегда́ зачина́ющи во чре́ве,/ пе́снь воспе́ла еси́:/ се отны́не ублажа́т Мя вси ро́ди./ И, на ту зря́щи, глаго́лала еси́ со вла́стию:/ с сим о́бразом благода́ть моя́ и си́ла./ И мы и́стинно ве́руем,/ я́коже рекла́ еси́, Госпоже́,/ сим о́бразом с на́ми еси́./ Тем, благогове́йно предстоя́ще,/ покланя́емся Тебе́, раби́ Твои́,/ посети́ ны Твои́ми Ма́терними щедро́тами.
Кто от земны́х дово́лен/ или́ досто́йно мо́жет пове́дати/ пресла́вная чудеса́ Бо́жия Ма́тере?/ Явле́нием Ея́ чудотво́рнаго о́браза/ страна́ Ру́сская просвети́ся,/ вся же уясни́ся,/ ае́р зарю́ испуща́ет,/ А́нгели веселя́тся и челове́цы духо́вно ра́дуются,/ сла́вный же град Кострома́ ве́село торжеству́ет/ и наро́ди вси псало́мски ликовству́ют,/ ви́дяще неизрече́нное сокро́вище,/ пречу́дную ико́ну Бо́жия Ма́тере,/ вся ве́рныя Своя́ лю́ди озаря́ющия,/ на кра́йнее на́ше спасе́ние/ и утвержде́ние душ на́ших.
Глас 4: Да ка́плют о́блацы вси сла́дость,/ Небеса́ да возвеща́ют нам ра́дость,/ земля́ и мо́ре, вся тва́рь весели́тся,/ челове́цы, духо́вно торжеству́йте,/ восплещи́те рука́ми, гла́сом ра́дования/ во благознамени́тый де́нь явле́ния ико́ны Бо́жия Ма́тере/ воспо́йте, вои́стинну бо ви́дите чу́до пресла́вное,/ ка́ко прии́де к нам пречу́дная ико́на Богома́тере,/ несо́ма уго́дником Свои́м, святы́м Фео́дором Стратила́том,/ ники́м же зна́ема, или́ отку́ду прии́де,/ последи́ же о ней вся явле́на бы́ша./ О, Бо́жие дарова́ние земны́м дарова́ся!/ Красу́йся ты, Богохрани́мый гра́де Кострома́,/ и ра́дуйся, Це́ркве Бо́жия,/ име́ющи в себе́ неизрече́нное сокро́вище,/ Бо́жия Ма́тере пречу́дную ико́ну,/ Ея́же мы благоволе́ние зря́ще/ и уми́льно покланя́ющеся,/ усе́рдно целу́ем ра́достию и стра́хом./ Стра́хом у́бо греха́ ра́ди,/ я́ко недосто́йни су́ще,/ ра́достию же ми́лости Ея́ ра́ди,/ я́ко подае́т нам грехо́в разреше́ние/ и ве́лию ми́лость.
Влады́чице Блага́я ми́ра/ и держа́вная на́ша ве́рных Помо́щнице,/ утверди́ сла́вящия Тя,/ подаю́щи на враги́ побе́ду и одоле́ние,/ я́коже дре́вле ца́рский град спасла́ еси́ от супоста́тных,/ та́ко и ны́не, Госпоже́,/ спаси́ страну́ на́шу Ру́сскую/ от наше́ствия ага́рянскаго/ и от всех наве́т вра́жиих,/ о Тебе́ у́бо ве́рнии лю́дие утвержда́ются/ и сопроти́вных ко́зни разруша́ются,/ Ты бо еси́ всем тве́рдый покро́в и спасе́ние.
Сла́ва, и ны́не, глас 6:
Что Ти принесе́м,/ Пресвята́я Де́во Богоро́дице?/ Я́ко яви́лася еси́ на земли́/ пала́та и престо́л Царе́в/ и ме́сто свяще́ния,/ из Тебе́ бо Бог воплоти́ся,/ и ле́ствица еси́ высо́кая, ю́же Иа́ков ви́де,/ ру́чка Боже́ственныя ма́нны,/ глубина́ неудо́бь ви́димая,/ явля́ешися нам Боже́ственным Твои́м о́бразом,/ па́че сапфи́ра и иле́ктра сия́ющи,/ чудотво́рною Твое́ю ико́ною,/ е́юже мы от вся́ких бед избавля́емся,/ оби́льно душа́м и телесе́м на́шим/ от вся́ких боле́зней здра́вие прие́млюще,/ Твои́ми Богома́терними моли́твами/ к ро́ждшемуся Христу́ Бо́гу на́шему,/ ничто́же бо невозмо́жно хода́тайству Твоему́,/ и не забу́ди, ми́лостивно посеща́ющи нас всегда́,/ я́коже дре́вле обеща́лася еси́ нам,/ стро́ити и покрыва́ти/ христоимени́тое Твое́ ста́до, рабы́ Своя́.
На стихо́вне стихи́ры, глас 2.
Подо́бен: Егда́ от Дре́ва:
Егда́ огне́м веще́ственным/ воспали́ся свята́я собо́рная Це́рковь,/ Пресвята́я Де́во Богоро́дице,/ тогда́ вели́кою печа́лию одержи́м бы́сть/ кня́зь вели́кий и лю́дие вси/ о чудотво́рней ико́не Твое́й, Влады́чице,/ мня́ще ю́ сгоре́вшу во пла́мени о́гненней,/ и по тридне́внем вре́мени чуде́сне обре́теся в пе́пеле/ пречу́дная ико́на Твоя́, Влады́чице, це́ла/ и ника́коже чим вреди́ма сия́ющи./ Тогда́ вси испо́лнишася ра́дости,/ с воздыха́нием и слеза́ми уми́льно вопия́ху Тебе́:/ Сла́ва премногому Твоему́ милосе́рдию, Чи́стая,/ я́ко благоволи́ла еси́ яви́ти нам ве́лию Свою́ ми́лость.
Стих: Слы́ши, Дщи, и ви́ждь,/ и приклони́ у́хо Твое́.
Егда́, Пречи́стая Де́во Богоро́дице,/ изы́де вели́кий кня́зь Васи́лий с людьми́ свои́ми/ в ско́рби и печа́ли вели́цей и недоуме́нии/ проти́ву безбо́жных ага́рян, превознося́щихся и вы́сящихся,/ и, ниотку́ду по́мощи наде́ющеся, раби́ Твои́/ то́кмо на Тя, Всепе́тая, упова́ху,/ нося́ще святу́ю и пречу́дную ико́ну Твою́, Пречи́стая Де́во,/ и уми́льно со слеза́ми вопия́ху Тебе́:/ о Пречи́стая Влады́чице Богоро́дице,/ не да́ждь нас в руки́ безбо́жных,/ хотя́щих закла́ти ни́щих люде́й Твои́х./ Тогда́ ви́деша от пречу́дныя ико́ны Твоея́ пресве́тлыя лучи́,/ па́че со́лнца возсия́вшия на сопроти́вных,/ и внеза́пу вси ослепо́ша беззако́ннии,/ и стра́хом вели́ким ужасо́шася, тре́петнии,/ и вси смято́шася и погибо́ша окая́ннии,/ мы же ра́достию Тебе́ вопие́м, Пречи́стая:/ Сла́ва преблаго́му Твоему́ милосе́рдию, Чи́стая Де́во,/ я́ко спаса́еши ны, рабы́ Твоя́.
Стих: Лицу́ Твоему́ помо́лятся/ бога́тии лю́дстии.
Егда́, Пречи́стая Де́во Богоро́дице,/ второ́е воспали́ся свята́я собо́рная це́рковь,/ и го́рькою печа́лию одержи́м бы́сть/ кня́зь Васи́лий и лю́дие вси,/ и ско́ро стеко́шася, и го́рько рыда́ху/ о пречу́дней ико́не Твое́й, Всечи́стая,/ мня́ще ю́ сгоре́вшу во пла́мени о́гненнем,/ и, внеза́пу чу́дне узре́вше пречу́дную ико́ну Твою́,/ Боже́ственным Про́мыслом на возду́се над пла́менем стоя́щу/ и све́тло блиста́нием сия́ющу,/ со слеза́ми и рыда́нием вопия́ху Тебе́,/ Влады́чице Всепе́тая:/ не оста́ви нас, си́рых,/ без Твоего́ покро́ва и заступле́ния,/ но сни́ди и уте́ши ни́щих люде́й Твои́х./ Но, о, чудесе́ пресла́внаго!/ Я́ко не презре́ла еси́/ моле́ние люде́й Твои́х, Чи́стая Де́во,/ но благоволи́ла еси́ проше́ния их испо́лнити,/ пречу́дно с возду́ха сни́ти к нам/ чи́стым о́бразом Свои́м и Твоего́ Сы́на,/ на ру́ку держа́щи Преве́чнаго Младе́нца и Бо́га на́шего./ Мы же со стра́хом и любо́вию Ему́ вопие́м:/ Сла́ва, Человеколю́бче, кра́йнему Твоему́ соше́ствию,/ я́ко Благослове́н еси́,/ и благоволи́ поми́ловати ны, гре́шныя рабы́ Твоя́.
Сла́ва, и ны́не, глас 8:
Прииди́те, вси ве́рнии Бо́жии лю́дие,/ и вни́дем в пресла́вную и святу́ю Це́рковь Богома́тере,/ се бо благоче́стия свети́ло возсия́ в ней,/ всечестна́я и многоцеле́бная ико́на,/ всех празднолю́бных собо́ры просвеща́ющи,/ чудеса́ неисче́тная содева́ющи,/ всем бо скорбя́щим подае́т исцеле́ние/ и прогоня́ет от челове́к ду́хи лука́выя,/ Я́же в беда́х и напа́стех всем бы́сть Ско́рая Помо́щница,/ стена́ и забра́ло всему́ Правосла́вию и Ру́сстей стране́,/ заступле́нием Ея́ вси утвержда́ются,/ богохрани́мый же град Кострома́/ пресла́вною Ея́ побе́дою весели́тся,/ и на враги́ на́ша вельми́ хода́тайством Ея́ хва́лится,/ и всех нас созыва́ет торжествова́ти Ей./ Прииди́те, вси ве́рнии, и просвети́теся,/ в све́тлем торжестве́ Бо́жия Ма́тере воспо́йте,/ прииди́те, празднолю́бцы, вси возвесели́теся,/ прииди́те и ви́дите Боже́ственное сокро́вище,/ прииди́те, услы́шите, ка́ко прии́де к нам Засту́пница,/ вои́стинну чу́до пресла́вное./ Но кто не удиви́тся о сем, правосла́внии,/ или́ кто не просла́вит Милосе́рдаго Бо́га на́шего/ и ро́ждшую Его́ Пречи́стую Богоро́дицу,/ я́ко Тоя́ ра́ди подае́т нам/ ве́лию и бога́тую Свою́ ми́лость.
Тропа́рь, глас 4:
Дне́сь све́тло красу́ется преимени́тый град Кострома́/ и вся Ру́сская страна́,/ созыва́ющи к весе́лию вся боголюби́выя наро́ды христиа́нския,/ на пресла́вное торжество́ Бо́жия Ма́тере,/ прише́ствия ра́ди чудотво́рнаго Ея́ и многоцеле́бнаго о́браза,/ дне́сь бо яви́ся нам пресве́тлое вели́кое со́лнце,/ прииди́те, вси Богоизбра́ннии лю́дие, но́вый Изра́иль,/ ко исто́чнику цельбоно́сному,/ источа́ет бо нам неоску́дныя ми́лости Пресвята́я Богоро́дица/ и избавля́ет вся гра́ды и страны́ христиа́нския/ невреди́мы от всех наве́т вра́жиих./ Но, о Всеми́лостивая Госпоже́, Де́во Богоро́дице, Влады́чице,/ спаси́ страну́ на́шу, и архиере́и, и вся лю́ди Твоего́ достоя́ния от всех бед/ по вели́цей Твое́й ми́лости, да зове́м Ти:/ ра́дуйся, Де́во, христиа́ном похвало́.
Ин Тропа́рь, глас то́йже:
Прише́ствием честны́я Твоея́ ико́ны, Богоотрокови́це,/ обра́дованный дне́сь Богохрани́мый град Кострома́,/ я́коже дре́вний Изра́иль к киво́ту Заве́та,/ притека́ет ко изображе́нию лица́ Твоего́/ и воплоти́вшагося от Тебе́ Бо́га на́шего,/ да Твои́м Ма́терним к Нему́ предста́тельством/ при́сно хода́тайствуеши всем,/ под се́нь кро́ва Твоего́ прибега́ющим,/ мир и ве́лию ми́лость.
На У́ТРЕНИ
НА Бог Госпо́дь: тропа́рь Богоро́дице, по уста́ву.
По 1-м стихосло́вии седа́лен, глас 4:
Боже́ственными Твои́ми заря́ми просвети́, Чи́стая Де́во, пою́щих Тя/ и ум наш утверди́, кре́пкая Помо́щнице,/ те́мже вси торжеству́ем Твоего́ чудотво́рнаго о́браза прише́ствие,/ не преста́ни, Госпоже́, о нас моли́тися,/ во е́же спасти́ся от бед душа́м на́шим.
Сла́ва, и ны́не, то́йже.
По 2-м стихосло́вии седа́лен, глас 3:
Я́ко звезда́ пресве́тлая прии́де к нам,/ и неизрече́нным сия́нием озаря́ющи нас,/ и просвеща́ющи скорбьми́ одержи́мыя, и отгоня́ющи тьмы́ неразу́мия,/ и от преще́ния враг избавля́ющи нас,/ мо́лимтися, кре́пкая на́ша Помо́щнице и ору́жие на враги́ непосты́дное,/ неотсту́пно с на́ми, Влады́чице, пребыва́ти во ве́ки.
Сла́ва, и ны́не, то́йже.
По полиеле́и седа́лен, глас 5:
О Пресвята́я Богоро́дице Де́во,/ безпо́мощным По́моще и ненаде́ющимся Наде́ждо,/ Ты еси́ похвала́ на́ша и спасе́ние./ О Небе́сная Цари́це и держа́вная на́ша Помо́щнице,/ исцели́ на́ша не́мощи и а́лчущих нас ми́лостию Твое́ю посети́, Влады́чице,/ мо́лимтися приле́жно, поми́луй и спаси́ нас.
Сла́ва, и ны́не, то́йже.
Степе́нна, 1-й антифо́н 4-го гла́са. Проки́мен, глас 4: Помяну́ и́мя Твое́/ во вся́ком ро́де и ро́де. Стих: Слы́ши, Дщи, и ви́ждь, и приклони́ у́хо Твое́. Вся́кое дыха́ние: Ева́нгелие от Луки́, зача́ло 4.
По 50-м псалме́ стихи́ра, глас 6: Дне́сь ра́дуется: (зри день сей выше).
Кано́н Пресвяте́й Влады́чице на́шей Богоро́дице Фео́доровстей, глас 4.
Пе́снь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
Отве́рзем уста́, челове́цы,/ и язы́к уясни́м в наро́читый де́нь пра́здника на́шего,/ явле́ния Бо́жия Ма́тере, чу́днаго Ея́ о́браза прише́ствия, и воскли́кнем, ра́дующеся,/ воспева́юще Ея́ пресла́вная чудеса́.
Отве́рзите врата́ душе́вная и слу́хи разу́мныя, дще́ри Русския,/ изыди́те на сре́тение Бо́жия Ма́тере о́браза,/ одева́ет бо наги́я и просвеща́ет те́мныя,/ подава́ющи всем ве́рным целе́бныя ми́лости.
Отве́рзем сон ле́ности и греха́ тя́гость отложи́м,/ очи́стивше со́весть и ум, вни́дем во врата́ Иерусали́ма прекра́снаго, Це́ркве Бо́жия,/ и у́зрим Небе́сную зарю́, чу́дную ико́ну Бо́жия Ма́тере,/ всем подаю́щу бога́тыя ми́лости.
Отве́рзи не́дра своя́, Бо́жия Це́ркве,/ и восприими́ в сокро́вище всего́ све́та зарю́ чу́дную, Бо́жия Ма́тере ико́ну,/ се бо созыва́ет ве́рныя, исцеля́ет боля́щия, и прогоня́ет от челове́к ду́хи лука́выя,/ и твори́т ве́рным пресла́вная чудеса́.
Пе́снь 3
Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.
Твои́м певце́м, Богоро́дице, ми́лости Твоя́ да́руй,/ сохраня́ющи нас от всех бед и напа́стей Твои́ми Ма́терними моли́твами/ к ро́ждшемуся из Тебе́ Христу́ Бо́гу на́шему,/ да спасе́т ду́ши на́ша от всех наве́т вра́жиих/ и пода́ст нам ве́лию ми́лость.
Твоего́ о́браза прише́ствием, Богоро́дице Де́во, вся́ческая ра́дости испо́лнила еси́,/ Вы́шняя и ни́жняя Ты совокупи́ла еси́,/ А́нгелом и челове́ком еди́на бы́сть Цари́ца./ Мо́лимтися приле́жно, Влады́чице,/ посети́ на́ша не́мощи, исцели́ боле́зни душе́вныя же и теле́сныя.
Твой о́браз, Богоро́дице Де́во, на обновле́ние на́ше прии́де к нам,/ и свет и́стинный яви́ся нам, просвеща́я омраче́нныя, исцеля́я боля́щия,/ всем в ну́ждах Ско́рая Помо́щнице и заступле́ние,/ Ю́же мы, я́ко животу́ на́шему Хода́таицу/ и тве́рдое христиа́ном огражде́ние, велича́ем.
Твоего́ о́браза чу́дному явле́нию, Влады́чице Богоро́дице,/ удиви́шася костромсти́и жи́телие,/ ви́дяще пресла́вная и уми́льно облобыза́юще, созыва́юще вся ро́ды христиа́нския:/ прииди́те, Богоизбра́ннии лю́дие, духо́вно возвесели́теся, пою́ще Христа́ Бо́га,/ дарова́вшаго нам таково́е многоце́нное сокро́вище,/ христиа́нское тве́рдое огражде́ние.
Ин конда́к, глас 8:
Благода́рственная принося́ще Ти, раби́ Твои́, Богороди́тельнице, о всех,/ и́миже благоде́яла еси́ гра́ду на́шему,/ из глубины́ души́ взыва́ем к Тебе́ и ми́ли ся де́ем:/ не преста́ни, Влады́чице,/ Ма́терними к Сы́ну Твоему́ и Бо́гу на́шему моли́твами/ подава́ти вся блага́я и спаси́тельная всем,/ ве́рою и любо́вию вопию́щим Ти:/ ра́дуйся, Де́во, христиа́н похвало́.
Седа́лен, глас 3:
Дне́сь яви́ла еси́ нам чу́дную ико́ну Твою́, Ма́ти Бо́жия,/ ея́же ди́вным прише́ствием вся лю́ди Своя́ возвесели́ла еси́,/ я́ко тве́рдое ору́жие на враги́ дарова́ла еси́,/ гра́ду Твоему́ Костроме́ и всей Русстей стране́ вели́кая похвало́ и утвержде́ние.
Пе́снь 4
Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ Сла́ва, Христе́, си́ле Твое́й.
Седя́й во сла́ве, хвалу́ прие́млеши от А́нгел,/ посла́л бо еси́, Го́споди, к нам о́браз Ма́тере Свое́й, пода́й ве́рным целе́бныя ми́лости./ Возвесели́ся дне́сь, вся тва́рь,/ возду́х же и мо́ре да кропи́т ра́дость,/ я́ко прише́ствием преми́рным Цари́цына о́браза пресла́вно вси освяти́шася.
Седя́й на Престо́ле высо́це, Влады́ко Человеколю́бче,/ благоволи́л еси́ яви́ти пречи́стый о́браз Ма́тере Свое́й./ Дне́сь да возвесели́тся правосла́вных собо́ри,/ ерети́ческий же полк да посрами́тся, ви́дяще Покланя́емую ве́рными,/ прогоня́ет бо Та ду́хи лука́выя и подае́т боля́щим здра́вие и душа́м на́шим спасе́ние.
Сему́ чу́дному Бо́жия Ма́тере о́бразу а́нгельстии чи́нове раболе́пно слу́жат,/ почита́юще, воспева́ют Тя, Цари́цу и Богоро́дицу./ Мы же ка́ко Тебе́ воспое́м, недосто́йнии,/ или́ ко́е Тебе́ принесе́м похвале́ние за мно́гое Твое́ к нам милосе́рдие?/ Я́ко явле́нием Твоего́ чу́днаго о́браза прии́де,/ вся озаря́ющи и подаю́щи всем разреше́ние.
Сироты́ и вдови́цы, не пла́чите, ра́дость ва́ша прии́де дне́сь,/ ме́ртвым живо́т возсия́, слепы́м свет облиста́,/ немощны́м врачевство́ отве́рзеся и всем ве́рным спасе́ние соде́яся/ Бо́жия Ма́тере чу́днаго о́браза явле́нием,/ подава́ет бо всем исцеле́ние.
Пе́снь 5
Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.
Удиви́шася вся ви́димая и неви́димая созда́ния,/ стра́нствует ум челове́ческий Боже́ственныя ико́ны чу́дному явле́нию,/ исто́чник бо животеку́щий яви́ся нам,/ исцеле́ния во́ды источа́ющи, Всенепоро́чная,/ и приста́нище в лю́тых небу́рное,/ и всем в ну́ждах гото́вое спасе́ние, печа́льным утеше́ние.
Удиви́шася вся Небе́сная во́инства, ра́дуютжеся христиа́нстии ро́ди,/ возвесели́шася вси пресла́вному прише́ствию ико́ны Бо́жия Ма́тере/ и, Гаврии́лов глас восприи́мше, вопию́т:/ ра́дуйся, ра́досте А́нгелов и челове́ков, сла́вящих Тя вои́стинну,/ Ты бо еси́ ра́дости Хода́таица и всем ве́рным спасе́ние.
Удивля́ет всяк град и страны́ пресла́вное ико́ны Твое́й явле́ние/ и ужаса́ет но́ваго Изра́иля, наро́ды Русския,/ притека́ющия к Твое́й ми́лости и о́чи се́рдца возпуща́ющия Тебе́, Де́во Богоро́дице./ Не пре́зри, Пречи́стая, на́шего воздыха́ния,/ с пла́чем Тебе́ вопию́щих и коле́ни к земли́ преклоня́ющих,/ мо́лимтися, Всепе́тая, бу́ди нам всегда́ покро́в и Помо́щница во ве́ки.
Удиви́ся, черто́же, Бо́жия Це́ркве свята́я,/ восприими́ Цари́цу Небе́сную и всей вселе́нныя Помо́щницу,/ и ра́дуйся со дще́рьми Русскими,/ Засту́пница бо на́ша прии́де к нам ди́вным явле́нием Своего́ чу́днаго о́браза,/ всех нас на духо́вное весе́лие созыва́ющи,/ одева́ет бо наги́я и просвеща́ет те́мныя,/ пита́ет а́лчущия, и напая́ет жа́ждущия,/ и всем прося́щим дае́т поле́зная.
Пе́снь 6
Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.
Боже́ственное е́сть зело́ честно́е торжество́ Бо́жия Ма́тере, созыва́юще на весе́лие ве́рныя,/ обновля́етбося всяк, приступа́яй с ве́рою,/ скве́рны бо Та вся́кия чисти́тельна е́сть./ Свяще́нницы, в пра́вду вси облецы́теся, и преподо́бнии, возра́дуйтеся,/ му́жие и жены́, ю́ноши и де́вы, возвесели́теся,/ и вси раби́ Бо́га на́шего, воспо́йте,/ почти́м Чи́стую в чистоте́ Богоро́дицу,/ подае́т бо нам неизрече́нныя Своя́ ми́лости.
Боже́ственная и ангелогове́йная ико́на Твоя́, Богоро́дице,/ прии́де к нам за кра́йнее Твое́ человеколю́бие,/ неизрече́нныя да́ры всем подава́ющи,/ но, о Преблага́го Бо́га Ма́ти,/ умоли́ Свое́ Рожде́ние всем нам поле́зная да́ти,/ изба́витися лю́тых, гла́да же и мо́ра,/ и сопроти́внаго нахожде́ния, и во́днаго истопле́ния,/ тру́са и озлобле́ния от тлетво́рных ве́тров./ Ты бо еси́ гото́вая Помо́щница и нело́жная на́ша всем ве́рным Засту́пница.
Боже́ственное и чу́дное явле́ние Бо́жия Ма́тере,/ ди́вное Пречи́стыя о́браза прише́ствие,/ горе́ удивля́ет А́нгелы, до́ле же созыва́ет род челове́ческий единогла́сно вопи́ти:/ Сла́ва Христу́ Бо́гу,/ благоизво́лившему таково́е неизрече́нное сокро́вище нам объяви́ти,/ и ми́лость удиви́ти, и от пла́мени и огня́ невреди́му сохрани́ти ико́ну Богома́тере./ О, Бо́жие дарова́ние дарова́ся!/ Ея́же моли́твами, Христе́, спаси́ ду́ши на́ша, я́ко Милосе́рд.
Боже́ственнаго Твоего́ чу́днаго о́браза явле́ние, Богоро́дице Влады́чице,/ всем ве́рным свет возсия́:/ ме́ртвым живо́т, слепы́м свет, глухи́м слы́шание,/ немы́м глаго́лание, разсла́бленным здра́вие, прокаже́нным очище́ние,/ бесну́ющимся целому́дрие, младе́нцем воспита́ние, вдови́цам и сирота́м промышле́ние,/ непло́дным жена́м разреше́ние,/ плод нося́щим неболе́зненное рожде́ние,/ деви́ческая чистота́ и воздержа́ние всем./ В ну́ждах, Ско́рая Помо́щнице, мо́лимтися, поми́луй нас.
Конда́к, глас 8:
Притеце́м, лю́дие, вси к ти́хому и до́брому приста́нищу,/ в дом Бо́жия Ма́тере,/ чу́дному о́бразу Цари́цы и Богоро́дицы,/ за неизрече́нную ми́лость Ея́ явле́нному,/ ве́рно припа́дающе и вопию́ще:/ о Всеми́лостивая Влады́чице,/ за спаси́тельное Твое́ смотре́ние,/ чу́днаго о́браза к нам прише́ствие,/ посети́ нас, гре́шных, све́тло сотворя́ющих пра́зднество Твое́,/ укрепи́ страну́ на́шу,/ ди́вно на враги́ побе́ду подаю́щи, и ве́ру утверди́./ Це́рковь Сы́на Твоего́ непоколеби́му соблюди́,/ притека́ющих к Тебе́ спаси́, от вся́ких напа́стей изба́ви,/ сохраня́ющи в ми́ре все Правосла́вие, да зове́м Ти:/ ра́дуйся, Неве́сто Неневе́стная.
И́кос:
Пречу́днаго Цари́цина о́браза, к нам прише́дшаго, явле́ние ви́дяще,/ на высоту́ доброде́телей вознесе́мся, ум прело́жше на Не́бо,/ Е́йже ра́ди Вы́шний на земли́ яви́ся, хотя́ привлещи́ к высоте́ вопию́щих Ей:/ ра́дуйся, Благослове́нная Де́во, от всех родо́в Богоизбра́нная;/ ра́дуйся, Небе́сная Цари́це, Ма́ти Го́спода Бо́га, Творца́ всех./ Ра́дуйся, всера́достное а́нгельское немо́лчное пе́ние;/ ра́дуйся, всегда́ жела́тельное и несы́тное челове́ческое зре́ние./ Ра́дуйся, кре́пкое ве́ры обновле́ние;/ ра́дуйся, и́стинное ве́ры позна́ние./ Ра́дуйся, небе́сных со земны́ми соедини́вшая;/ ра́дуйся, земны́х к Бо́гу присвое́ние./ Ра́дуйся, печа́льным душа́м утеше́ние;/ ра́дуйся, больны́м посеще́ние и прокаже́нным очище́ние./ Ра́дуйся, глухи́м слы́шание и хромы́м хожде́ние;/ ра́дуйся, у́зником свобожде́ние и гре́шным проще́ние./ Ра́дуйся, а́лчущим Корми́тельнице и наги́м одея́ние;/ ра́дуйся, стра́нным путю́ води́тельный и обурева́емым приста́нище./ Ра́дуйся, ста́рости же́зле и сирота́м промышле́ние;/ ра́дуйся, младе́нческое воспита́ние и де́вствующим целому́дрие./ Ра́дуйся, всех родо́в весе́лие и всем христиа́ном поможе́ние и заступле́ние,/ и́хже соблюда́й от всех бед, да зове́м Ти:/ ра́дуйся, Неве́сто Неневе́стная.
Пе́снь 7
Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
Не послужи́ша тва́ри па́че Творца́ Богому́дрии наро́ди Русстии,/ но прииди́те, почти́м Чи́стую в чистоте́ Бо́жия Ма́тере ико́ну,/ возде́вше ру́це на высоту́, вопие́м Ей:/ о Преблагослове́нная в жена́х, Де́во, Бо́жие жили́ще,/ христиа́ном еси́ по́мощь и заступле́ние,/ правове́рным и покланя́ющимся Твое́й чудотво́рней ико́не,/ всем поле́зная подаю́щи.
Небе́снии чи́нове со земны́ми веселя́тся/ в све́тлое торжество́, явле́ние Бо́жия Ма́тере ико́ны,/ нас же, предстоя́щих, просвети́, Пресвята́я, све́том Твоея́ ми́лости,/ умоли́ Свое́ Рожде́ние пода́ти стране́ на́шей на враги́ побежде́ние/ и всем ве́рным по́мощь и одоле́ние,/ и от всех наве́т свобожде́ние, и грехо́в оставле́ние,/ и душа́м спасе́ние дарова́ти, мо́лимся.
Не́бо и земля́ дне́сь проро́чески да возвеселя́тся,/ А́нгели и челове́цы духо́вно да торжеству́ют/ и вся тва́рь да пое́т Го́сподеви пе́снь немо́лчную, сотво́ршему вся,/ почита́юще свяще́нное торжество́ Бо́жия Ма́тере, чу́днаго о́браза явле́ние./ О, па́че ума́ чуде́с Твои́х, Го́споди, я́же сотвори́л еси́ на Тя наде́ющимся,/ сте́ну и по́мощь необори́му лю́дем Свои́м дарова́л еси́, о́браз Ма́тере Своея́,/ Ю́же мы почита́юще, вопие́м:/ ра́дуйся, Всеблагослове́нная Богоро́дице, Чи́стая Присноде́во.
Ны́не наста́ вре́мя, освяща́ющее нас/ и очище́ние подаю́щее обремене́нным грехи́ мно́гими,/ Ма́ти Бо́га Вы́шняго ди́вным прише́ствием пречи́стаго Своего́ о́браза/ всем поле́зная подае́т и вся спаса́ет./ О лени́вии, бо́дренно ста́ните, и спя́щии, от сна воста́ните/ и разсла́бленнии, у́ды укрепи́те, к цельбоно́сному Исто́чнику усе́рдно притецы́те./ Покланя́емся чу́дней ико́не Бо́жия Ма́тере и почита́ем ю́ раболе́пно,/ непокланя́ющихся бо омрача́ет и непочита́ющих погубля́ет,/ и покланя́ющихся и чту́щих избавля́ет от вели́ких бед и зол,/ благонра́вныя и богобоя́щияся рабы́ Своя́.
Пе́снь 8
Ирмо́с: О́троки благочести́выя в пещи́/ Рождество́ Богоро́дичо спасло́ е́сть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.
О, пресла́вных чуде́с Твои́х, Пречи́стая Де́во!/ Кто по достоя́нию похвали́ти возмо́жет дне́сь/ или́ воспе́ти пресла́вная Твоя́ вели́чия?/ Дне́сь бо ра́дости вся испо́лнила еси́, Вы́шняя и ни́жняя,/ явле́нием чу́дныя Твоея́ ико́ны, ве́рным яви́ся сокро́вище неоску́дное,/ и правосла́вных ро́ди вси просвети́шася,/ басурма́нския и ерети́ческия ко́зни вся посрами́шася./ Бе́гают же ро́ди че́рнии, не сме́ют взира́ти на си́лу Твою́,/ нас же, ве́рных всех, поми́луй и спаси́, Влады́чице.
О Пресвята́я Де́во Богоро́дице и Небе́сная Цари́це,/ Ма́ти Христа́ Бо́га и Царя́ всех,/ вы́шши еси́ всех А́нгел и Арха́нгел и всея́ тва́ри честне́йши,/ Помо́щница еси́ оби́димых и ненаде́ющимся наде́жда,/ печа́льным утеше́ние и всем в ну́ждах Ско́рая Помо́щница, тве́рдое на́ше огражде́ние./ Что принесе́м Твоему́ вели́честву,/ или́ ка́ко похва́лим, недосто́йнии?/ Но то́чию: ра́дуйся, живота́ на́шего и воскресе́ния Ма́ти,/ всех нас поми́луй, Благослове́нная.
О вели́кое на́ше заступле́ние и похвало́,/ ра́досте на́ша и весе́лие, Пресвята́я Богоро́дице,/ христиа́нский щи́те и ору́жие на враги́, кре́посте на́ша и заступле́ние!/ Кто, притека́я к Тебе́, и посра́млен от Тебе́ исхо́дит,/ или́, призыва́я Тя, не услы́шан быва́ет,/ или́, прося́ от Тебе́, что не прие́млет?/ Ничто́же бо невозмо́жно хода́тайству Твоему́,/ но, о Всепе́тая, мо́лимтися, Пречи́стая:/ Исто́чниче приснотеку́щий, исцели́ не́мощи на́ша, рабо́в Твои́х.
О ди́вная на́ша похвало́, па́стырю наш до́брый и учи́телю наш прему́дрый,/ Небе́сныя прему́дрости испо́лнена, Пресвята́я Богоро́дице,/ приими́ моле́ние на́ше, раб Свои́х,/ испо́лни ра́дости вся правосла́вный,/ не и́мамы бо ины́я по́мощи, кроме́ Тебе́,/ на Тебе́ бо наде́емся и Тобо́ю хва́лимся всегда́,/ Ты бо еси́ неле́стное на́ше приста́нище, поми́луй сро́дное Твое́ достоя́ние,/ пода́ждь утеше́ние всем, поле́зное рабо́м Свои́м.
Пе́снь 9
Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.
Всяк земноро́дный пои́стинне да взыгра́ется, Ду́хом просвеща́емы/ Но кто от челове́к не почуди́тся пресла́вному Бо́жия Ма́тере явле́нию?/ Никто́же бу́ди уны́л,/ отложи́вше се́тование, в ра́дость облецы́теся вси,/ прииди́те на виде́ние пресла́внаго чудесе́./ Ка́ко прии́де к нам Засту́пница ро́да на́шего?/ О, чудесе́ но́ваго!/ Ея́же ра́ди, Христе́ Бо́же, спаси́ ду́ши на́ша, я́ко Милосе́рд.
Всяк род Небе́сных, и земны́х, и преиспо́дних да поклони́тся и пое́т,/ всяк язы́к испове́сть, я́ко вои́стинну чу́до пресла́вно Бо́жия Ма́тере./ О Всепе́тая Чи́стая, Пресвята́я Влады́чице,/ в ми́лости Ско́рая Помо́щнице, при́зри о́ком Свои́м, Милосе́рдая,/ и изба́ви рабы́ Своя́, Тебе́ призыва́ющим, от лю́тых боле́зней и стрел лука́ваго./ Вели́чия бо Твоя́ кто пове́сть?/ Всем бо тре́бующим то́чиши чудеса́, и излива́еши исцеле́ние,/ и мо́лишися за ду́ши на́ша, я́ко су́щи Ми́лостивая всем Засту́пница.
Воспои́м, вси ве́рнии, Бо́жию Ма́терь,/ созыва́юще на пе́ние вся чи́ны Небе́сныя, А́нгелов и Арха́нгелов,/ проро́ков и апо́столов, иера́рхов и му́чеников,/ преподо́бных и пра́ведных и всех святы́х Бо́жиих уго́дников./ Ты же, Влады́чице, плач рабо́в Свои́х обрати́ на весе́лие,/ и исцели́ боле́зни тя́жкия,/ и пода́ждь вме́сто печа́ли весе́лие,/ о Кре́пкая на́ша Помо́щнице, всем печа́льным утеше́ние,/ вонми́ моле́нию раб Твои́х и спаси́ Тебе́ велича́ющих.
О Всепе́тая Ма́ти Благослове́нная,/ ро́ждшая всех святы́х Святе́йшее Сло́во, Христа́ Бо́га на́шего,/ ны́нешнее приноше́ние приими́, от недосто́йных усте́н приноси́мое, бре́нною руко́ю сотворе́нное,/ ника́коже досто́ин е́смь на сие́, Влады́чице,/ но, наде́яся на Твоя́ щедро́ты и милосе́рдие,/ препро́стое пе́ние принесо́х Ти, Всепе́тая./ Вем, Спаси́теля всех родила́ еси́, нас ра́ди на зе́млю соше́дшаго,/ не возгнуша́йся, Де́во, непотре́бнаго,/ но приими́, Цари́це, сие́ и поми́луй мя.
Свети́лен:
Пречи́стый о́браз Твой, Богоро́дице Влады́чице, и́мже посети́ла еси́ нас,/ я́ко неизрече́нный не́кий дар восприе́мше,/ мы, недосто́йнии, пра́зднуем све́тло и ве́село вси торжеству́ем, веселя́щеся,/ от бед и напа́стей свобожда́емся/ и здра́вие прие́млем Твои́ми Богома́терними к Бо́гу моли́твами.
Сла́ва, и ны́не, то́йже.
На хвали́тех стихи́ры на 4, глас 1.
Подо́бен: О, ди́вное чу́до:
О, вели́кое заступле́ние/ печа́льным еси́, Богоро́дице Чи́стая,/ Ско́рая Помо́щнице,/ спасе́ние ми́ру и утвержде́ние,/ ми́лости пучи́но, Бо́жия му́дрости исто́чниче,/ ми́ру покро́ве;/ воспое́м, ве́рнии,/ пречу́дное явле́ние ико́ны Бо́жия Ма́тере:/ Обра́дованная, ра́дуйся, с Тобо́ю Госпо́дь,/ подая́й ми́рови Тобо́ю ве́лию ми́лость.
О, пресла́вное удивле́ние,/ Цари́цына о́браза прише́ствие,/ всем ве́рным спасе́ние и укрепле́ние,/ Боже́ственное и пресла́вное торжество́,/ Бо́жия Ма́тере пречу́дныя ико́ны явле́ние,/ ми́лости бо Та блага́я пучи́на/ и всем ве́рным исцеле́ние,/ воспое́м, правове́рнии,/ Всеми́лостивую христиа́ном Защи́тницу:/ Обра́дованная, ра́дуйся, с Тобо́ю Госпо́дь,/ подая́й ми́рови Тобо́ю ве́лию ми́лость.
О, вели́кое ве́рным дарова́ние пречу́дное/ Засту́пницы на́шея яви́ся/ прише́ствие чудотво́рнаго о́браза,/ всем у́бо быва́ет больны́м исцеле́ние,/ гре́шным спасе́ние и разреше́ние./ Прииди́те, вси правове́рнии,/ и, жа́ждущии, наслади́теся,/ подае́т бо Пречи́стая всем неоску́дныя ми́лости,/ воспое́м, празднолю́бнии,/ Небе́сную Цари́цу и Богоро́дицу:/ Обра́дованная, ра́дуйся, с Тобо́ю Госпо́дь,/ подая́й ми́рови Тобо́ю ве́лию ми́лость.
Сла́ва, и ны́не, глас 5:
Востру́бим трубо́ю пе́сней,/ и взыгра́ем пра́зднственная,/ и ликовству́ем, ра́дующеся,/ в настоя́щее торжество́ явле́ния ико́ны Бо́жия Ма́тере,/ похвала́ми велича́ем Ю́, ублажа́юще./ Лю́дие да стеку́тся/ и Цари́це да воспле́щут в пе́снех, Царя́ ро́ждшей,/ сме́ртию одержи́мыя пе́рвее/ разреши́ти человеколю́бно благоизво́лившаго./ Па́стырие и учи́телие, До́браго Па́стыря/ Пречи́стую Ма́терь, соше́дшеся, восхва́лим,/ све́щник златоза́рный и светоно́сный о́блак,/ Небе́с простра́ннейшую,/ одушевле́нный ковче́г,/ огнезра́чный Влады́чень Престо́л,/ манноприе́мную злату́ю ста́мну,/ заключе́нную Сло́ва две́рь,/ всем христиа́ном Прибе́жище, си́це рцем:/ пала́то Сло́ва, сподо́би нас Небе́снаго Ца́рствия,/ вся бо возмо́жна су́ть хода́тайству Твоему́.
Славосло́вие вели́кое. И отпу́ст.
На Литурги́и слу́жба Богоро́дицы.
Моли́тва
О Пресвята́я Влады́чице Богоро́дице и Присноде́во Мари́е, еди́ная наде́ждо нам, гре́шным! К Тебе́ прибега́ем и Тебе́ мо́лим, я́ко ве́лие и́маши дерзнове́ние пред ро́ждшимся от Тебе́ по пло́ти Го́сподем Бо́гом и Спаси́телем на́шим Иису́сом Христо́м. Не пре́зри слез на́ших, не возгнуша́йся воздыха́ний на́ших, не отри́ни ско́рби на́шея, не посрами́ упова́ния на́шего на Тя, но ма́терними моле́нии Твои́ми умоли́ Го́спода Бо́га, да сподо́бит нас, гре́шных и недосто́йных, свободи́тися от грехо́в и страсте́й, душе́вных и теле́сных, умре́ти ми́ру и жи́ти Ему́ Еди́ному по вся дни живота́ на́шего. О Пресвята́я Влады́чице Богоро́дице, путеше́ствующим спутеше́ствуй и огражда́й и охраня́й о́ныя, изба́ви пле́нных от плене́ния, свободи́ стра́ждущих от бед, уте́ши су́щих в печа́ли, ско́рбех и напа́стех, облегчи́ нищету́ и вся́ко злострада́ние теле́сное и да́руй всем вся потре́бная к животу́, благоче́стию и жи́зни вре́менней. Спаси́, Влады́чице, вся страны́ и гра́ды и сию́ страну́ и сей град, и́мже сия́ чудотво́рная и свята́я ико́на Твоя́ даде́ся в утеше́ние и огражде́ние, изба́ви я от гла́да, губи́тельства, тру́са, пото́па, огня́, меча́, наше́ствия иноплеме́нных, междоусо́бныя бра́ни и отврати́ вся́кий гнев, на ны пра́ведно дви́жимый. Да́руй нам вре́мя на покая́ние и обраще́ние, изба́ви нас от внеза́пныя сме́рти и во вре́мя исхо́да на́шего предста́ни нам, я́вльшися, Де́во Богоро́дице, и изба́ви нас от возду́шных мыта́рств князе́й ве́ка сего́, сподо́би на стра́шнем Суди́щи Христо́ве ста́ти одесну́ю и соде́лай нас насле́дники ве́чных благ, да сла́вим во ве́ки великоле́пое И́мя Сы́на Твоего́ и Бо́га на́шего, со Безнача́льным Его́ Отце́м и Святы́м, и Благи́м, и Животворя́щим Его́ Ду́хом, ны́не, и при́сно, и во ве́ки веко́в. Ами́нь.
И́ну моли́тву Фео́доровстей ико́не Пресвяты́я Богоро́дицы зри 14 ма́рта.
Свята́го му́ченика Диоми́да врача́
Слу́жба свята́го Диоми́да пое́тся на повече́рии
Тропа́рь, глас 3:
Мучи́тельнии сосу́ди устро́иша ти пу́ть к Небесе́м,/ Христо́в во́ине Диоми́де,/ победи́в диа́вольския ко́зни,/ и на Небесе́х у Христа́ просла́вися,/ моли́ся за творя́щих ве́рою па́мять твою́.
Кано́н свята́го Диоми́да, глас 4.
Пе́снь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
Све́том озаря́емь трисо́лнечным,/ разреши́ мрак, блаже́нне, неразу́мия моего́,/ я́ко да воспою́ светоно́сную твою́ па́мять и исправле́ние жития́ твоего́.
Страсте́й неприя́тен по́мысл соде́лав,/ прия́телище, сла́вне, яви́лся еси́ Ду́ха/ и источи́л еси́ исцеле́ний пучи́ну, всю потопля́ющую неду́гов скве́рну.
Жи́зни жела́я безконе́чныя,/ ча́шу сме́ртную, прехва́льне, испи́ти потща́лся еси́, ю́же и получи́л еси́,/ я́коже ве́сть Зва́вый тя к венцу́ неувяда́ющему, му́чениче непобеди́мый.
Богоро́дичен: Гра́де одушевле́нный Царя́, Всенепоро́чная,/ стра́нное рождество́ и Боже́ственное успе́ние показа́вшая,/ град Твой от вся́каго тру́са и паде́ния покажи́ невреди́м.
Пе́снь 3
Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.
Неизглаго́ланным и Боже́ственным рукоде́йством очища́я стра́сти челове́ков,/ от Бо́га дарова́лся еси́ ве́рным врач изря́ден и моли́твенник тепл,/ тя чту́щим, пребога́те.
В пу́ть свиде́ний Твои́х теку́ и Твое́й подо́бяся стра́сти во́льней, –/ му́ченик взыва́ше, на заколе́ние влеко́м, –/ к Тебе́, еди́ному Бо́гу на́шему.
Сла́вный му́ченик Диоми́д, нас созва́в та́йно на трапе́зу дне́сь,/ предлага́ет страда́ния своя́, я́коже бра́шно невеще́ственное,/ ве́рнии, прииди́те, наслади́мся.
Богоро́дичен: Град Твой сей от вся́каго тру́са и паде́ния, Чи́стая,/ я́ко на Тя, Богоблагода́тная, возложе́н е́сть, изба́ви/ и в ми́ре сохрани́ и единомы́слии, Богоневе́сто.
Седа́лен свята́го, глас 4.
Подо́бен: Вознесы́йся:
Даро́в Боже́ственных испо́лнен, душ показа́лся еси́ врач и теле́с,/ и, му́ченическим благосла́вием обогати́вся я́ве,/ ра́дуяся, прише́л еси́ ко оби́телем при́сноживотным./ Те́мже, святу́ю твою́ пра́зднующе па́мять, взыва́ем:/ помяни́ нас, тя чту́щих, Богому́дре и пребога́те.
Пе́снь 4
Ирмо́с: Неизсле́дный Бо́жий Сове́т/е́же от Де́вы, воплоще́ния/ Тебе́, Вы́шняго,/ проро́к Авваку́м усмотря́я, зовя́ше:/ Сла́ва си́ле Твое́й, Го́споди.
Сло́во Боже́ственнаго ра́зума, я́ко реку́, нося́ в се́рдцы,/ потопи́ пре́лести пото́ки и и́дольскую кре́пость до конца́ погрузи́/ му́ченик Диоми́д сла́вный.
Возсия́, я́ко со́лнце на земли́, заре́ю доброде́телей и чуде́с бога́тством/ и просвети́ ве́рных правосла́вныя собо́ры/ му́ченик Диоми́д всему́дрый.
Врачевство́ безме́здно твой храм всем, ве́рою притека́ющим, яви́ся, преблаже́нне,/ и забра́ло тве́рдо Ца́рскому гра́ду,/ упражня́я наше́ствия иноплеме́нных враг.
Богоро́дичен: Стра́нно Твое́ рождество́, я́ко и честно́е успе́ние, показа́ся, Пренепоро́чная Благослове́нная,/ е́же град Твой почита́ет, иноплеме́нных избега́я вре́дов/ те́плым Твои́м предста́тельством.
Пе́снь 5
Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.
Яви́лся еси́ без кро́ве му́ченик досточу́ден,/ без боле́зней вене́чник, без язв победи́тель изря́ден,/ полки́ враго́в низлага́я твои́ми по́двиги, Диоми́де блаже́нне.
Свет тебе́ возсия́, су́щу пра́ведну, неугаси́мый,/ сего́ же супру́г, Богому́дре, тебе́ весе́лие после́дова,/ я́ко пра́ву иму́щу ду́шу, всем после́дующу Спа́са повеле́нием.
Све́та лиша́ются у́бо теле́снаго мучи́тели, твою́ главу́ по кончи́не отсе́кшии,/ но душе́внии светоза́рно зе́ницы отверза́ются,/ Христу́ ве́рою присту́пльше, Диоми́де чу́дный.
Богоро́дичен: Забра́ло име́я Ца́рский град, Тя, Цари́цу и Госпожу́,/ побежда́ет ва́рваров звери́на стремле́ния,/ избавля́ется вся́ких напа́стей, расте́т и утвержда́ется,/ Богома́ти Всенепоро́чная.
Пе́снь 6
Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.
Твои́х по́двиг тече́нием погрузи́л еси́ врага́ безпло́тнаго/ и чуде́с твои́х источе́нием омыва́еши страсте́й многови́дныя скве́рны, досточу́дне.
Боже́ственными дыха́нии дви́жимь, Вы́шним манове́нием окормля́емь,/ к ти́хому приста́нищу пра́ве дости́гл еси́,/ о нас моли́ся, му́чениче прехва́льне.
Страсте́й па́жити потребля́ются неизглаго́ланным рукоде́йствием твои́м, сла́вне,/ и отгоня́ется полк де́монский Боже́ственным твои́м предста́тельством,/ му́чениче присноблаже́нне.
Богоро́дичен: О Тебе́, Де́во, хва́лимся,/ Тобо́ю от враг избавля́емся,/ наде́янием Твои́м наше́ствия не убои́мся враг иноплеме́нных, воспева́ющий Тя.
Конда́к, глас 2.
Подо́бен: Вы́шних ища́:
И́стинный и непобеди́мый страстоте́рпец,/ благоче́стия и благода́ти Небе́сный таи́нник я́влься,/ Диоми́де пресла́вне,/ победи́в мучи́теля и победоно́сец быв,/ венцы́ побе́дными просла́вися.
Пе́снь 7
Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
Отсе́чена бы́вши, глава́ твоя́ свет облиста́ суему́дрым,/ ю́же, я́ко жи́ву, ви́дев, устыде́ся мучи́тель, умерщвле́н умо́м,/ не разуме́ же вопи́ти, пресла́вне:/ Бо́же, благослове́н еси́.
Совле́клся еси́ умерщвле́ния, сла́вне, ри́зы злообра́зныя,/ в безсме́ртия оде́жду кра́сну благода́тию обле́клся./ Те́мже Влады́це твоему́ вопие́ши, ра́дуяся:/ Бо́же, благослове́н еси́.
Огне́м терпе́ння попали́л еси́ ве́щную ле́сть враго́в,/ богосия́нна же звезда́ яви́лся еси́ исцеле́ний, му́чениче, облиста́я лучи́ зову́щим:/ оте́ц на́ших Бо́же, благослове́н еси́.
Богоро́дичен: Цари́ца ми́ра, ро́ждшая Царя́ Христа́,/ изба́ви тли, и тру́са, и язы́к наи́тия Ца́рствующий град, Влады́чице,/ благослове́н, – пою́щий, – Плод чре́ва Твоего́.
Пе́снь 8
Ирмо́с: О́троки благочести́выя в пещи́/ Рождество́ Богоро́дичо спасло́ е́сть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.
Но́ги честны́я твоя́, страстоте́рпче, ко стезя́м муче́ния напра́вишася,/ хо́дят же ны́не, ра́дующеся, во стране́ живу́щих, прему́дре, в ра́йстей пи́щи./ Те́мже и, соше́дшеся, чтим, воспева́юще Христа́ во ве́ки.
Исплете́ся тебе́ вене́ц нетле́ния, тве́рдо подви́гшуся/ и победи́вшу зми́я злонача́льнаго, му́чениче достохва́льне,/ и страда́льческий лик тя прия́т, Го́спода по́йте, – вопию́ща, –/ и превозноси́те Его́ во ве́ки.
Чуде́с испуща́еши лучи́, Боже́ственною оде́ян, му́чениче, си́лою,/ уставля́еши боле́зни, реши́ши неду́ги, отгоня́еши ду́хи лука́выя, вопия́:/ Го́спода по́йте, дела́, и превозноси́те Его́ во ве́ки.
Богоро́дичен: Мно́гими прило́ги грехо́вными преклоне́ни,/ к Твоему́ непрекло́нному покро́ву прибега́ем:/ утверди́ рабы́ Твоя́, на стра́сти укрепи́/ и от тру́са, и гла́да, и язы́к наше́ствия, Де́во, изба́ви Твое́ ста́до,/ я́ко на Тя возложе́но е́сть.
Пе́снь 9
Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.
Обре́л еси́ возме́здие трудо́в, горе́ тебе́ угото́вльшуюся пи́щу,/ иде́же водворя́лся, укра́шен му́ченическими добро́тами,/ наслажда́ешися Зижди́теля твоего́ красоты́,/ прося́, му́чениче, чту́щим тя очище́ния и зол избавле́ния.
Столп доброде́телей и ве́ры утвержде́ние, забра́ло недви́жимо,/ и стена́ непреклони́ма показа́лся еси́, му́чениче, Це́ркви Христо́ве,/ и река́ исцеле́ний, источа́я то́ки врачева́ния безме́здна/ любо́вию творя́щим твою́ па́мять, пресла́вне.
Отгна́л еси́ от земли́ и́дольское безбо́жие, потреби́л еси́ мглу/ и к невече́рней зари́ приложи́лся еси́ светонача́льныя жи́зни,/ ея́же явле́ния, сла́вне, пе́рвее стяжа́л еси́,/ отону́дными сия́нии озаря́емь и ра́дости присносу́щныя исполня́лся.
Богоро́дичен: Гра́де Бо́жий, во́ньже Сам всели́ся, вои́стинну непоколеби́мый,/ изба́ви ста́до Твое́ тру́са, Де́во, и паде́ния, ва́рварскаго плене́ния,/ огня́ и меча́ враго́в, от вся́каго, Пречи́стая, озлобле́ния/ те́плым ко Христу́ предста́тельством Твои́м.
Стихи́ры свята́го Диоми́да, глас 4.
Подо́бен: Я́ко до́бля:
Исцели́ти стра́сти, отгони́ти неду́ги,/ прогна́ти ду́хи лука́выя/ де́йством Свята́го Ду́ха, преблаже́нне, сподо́бился еси́,/ потреби́в му́жески е́ллинския слу́жбы/ противле́нием страда́ния, му́чениче венцено́сче,/ сограждани́не А́нгелом,/ страстоте́рпцем единосе́льниче.
По́двигом подвиза́лся еси́,/ и тече́ние сконча́л еси́,/ и ве́ру, сла́вне, соблю́л еси́,/ и к Бо́гу отше́л еси́,/ дарова́ние чуде́с от Него́ прие́м/ и побе́ды вене́ц неувяда́емый,/ я́ко непобеди́м му́ченик,/ я́ко Вы́шняго Ца́рствия насле́дник,/ о ми́ре моли́ся.
Сла́ва:
В пути́ муче́ния Твоего́,/ я́ко в бога́тстве, красу́яся,/ Диоми́д, Го́споди, во́лею Твое́ю/ свой дух в ру́це Твои́, Христе́, предаде́, усе́чен в главу́,/ и по кончи́не блаже́нней/ быв наста́вник и́стинный безбо́жным,/ ослепшим, и пресла́вно ве́рою прозревшим.
И ны́не, вме́сто Богоро́дична или́ Крестобогоро́дична, пое́м: Досто́йно е́сть:
Преподо́бнаго Иоаки́ма Сарандапо́рскаго, Осого́вскаго
Тропа́рь, глас 1:
Пусты́нный жи́тель, и в телеси́ а́нгел,/ и чудотво́рец яви́лся еси́, Богоно́се о́тче наш Иоаки́ме,/ посто́м, бде́нием, моли́твою,/ Небе́сная дарова́ния прии́м,/ исцеля́еши неду́жныя и души́ ве́рою притека́ющих ти./ Сла́ва Да́вшему тебе́ кре́пость;/ Сла́ва Венча́вшему тя;/ Сла́ва Де́йствующему тобо́ю всем исцеле́ния.
Конда́к, глас 2.
Подо́бен: Тве́рдый ве́ры:
В моли́твах не усыпа́я, преподо́бне,/ восприе́м си́лу на сопроти́внаго врага́,/ терпе́нием бо свои́м, о́тче Иоаки́ме преподо́бне,/ возше́д на Небеса́/ и жи́знь тле́нную оста́вив на земли́,/ на нетле́ние пресели́лся еси́ Небе́сное./ Те́мже тя хвала́ми вси прославля́ем.
