Ве́чер

Блаже́н муж: 1-й антифо́н; а́ще же в суббо́ту, стихосло́вим кафи́сму всю.

На Го́споди, воззва́х: поста́вим стихо́в 10 и пое́м стихи́ры инди́кта 3. Глас 1.

Подо́бен: Небе́сных чино́в:

Самосло́внаго и Боже́ственнаго уче́ния Христо́ва/ моли́тве научи́вшеся,/ на всяк день возопии́м Зижди́телю:/ о́тче наш, И́же на Небесе́х обита́яй,/ насущный хлеб подава́й нам,// презира́я на́ша прегреше́ния.

И́же на Сина́йстей горе́/ скрижа́ли написа́в иногда́,/ Сам и ны́не во гра́де Назаре́те по пло́ти/ кни́гу прия́л еси́ проро́ческую почести́, Христе́ Бо́же,/ и, сию согну́в, учи́л еси́ лю́ди// испо́лнитися Писа́нию о Тебе́.

Я́коже евре́ев телеса́ в пусты́ни иногда́,/ не покори́вшихся и́стинно Тебе́, всех Влады́це,/ досто́йно падо́ша,/ та́ко и ны́не ко́сти разсы́пли/ злочести́вых и неве́рных ага́рян,// псало́мски, при а́де, Христе́.

Ины стихи́ры преподо́бнаго, глас 5.

Подо́бен: Преподо́бне о́тче:

Преподобне о́тче,/ а́ще бы возмо́жно столпу́ веща́ти,/ не бы преста́л вопи́ти твоя́ боле́зни,/ труды́ и рыда́ния,/ Но он носи́м бя́ше, не́же ноша́ше,/ я́ко дре́во, напая́емо слеза́ми твои́ми./ Удиви́шася Ангели, учуди́шася челове́цы,/ устраши́шася де́мони терпе́ния твоего́,/ Симео́не преподо́бне,/ моли́ спасти́ся душа́м на́шим.

Преподо́бне о́тче,/ си́лою Божественнаго Ду́ха/ Влады́це твоему́ подо́бяся/ на столп вшел еси́, я́ко на Крест./ Но Он рукописа́ние всех растерза́,/ ты же воста́ния страсте́й разруши́л еси́,/ Он я́ко овча́, ты же я́ко закола́ние,/ Он взы́де на Крест, ты же на столп,/ Симео́не преподо́бне,/ моли́ спасти́ся душа́м на́шим.

Преподо́бне о́тче,/ те́ло омочи́в слеза́ми/ и ду́шу очи́стив,/ на высоту́ возше́л еси́ доброде́телей;/ чу́вственное у́бо жили́ще име́я столп твой,/ мы́сленный же и Небе́сный град го́рний Сио́н,/ Ангелы удиви́л еси́, челове́ки ужаси́л еси́,/ де́моны посрами́л еси́ доброде́тельми твои́ми,/ Симео́не преподо́бне,/ моли́ спасти́ся душа́м на́шим.

Други́я стихи́ры свята́го, глас 2, самогла́сны:

От ко́рене блага́го благи́й прозябе́ плод,/ от младе́нства свяще́нный Симео́н/ благода́тию па́че не́же млеко́м воспита́н,/ и, на ка́мень те́ло возвы́сив,/ к Бо́гу же превозвы́сив ра́зум,/ Небе́сное созда́ доброде́тельми жили́ще,/ и, с боже́ственными Си́лами лико́вне ше́ствуя./ Христа́ бысть жили́ще,/ Бо́га и Спа́са душ на́ших.

Па́мять твоя́ во век пребыва́ет,/ преподобне о́тче Симео́не,/ и кро́тость се́рдца твоего́, уго́дниче Христо́в блаже́нне./ Аще бо и преста́вился еси́ от нас, па́стырю до́брый,/ но не отступа́вши от нас ду́хом,/ в любви́ Бо́гу предстоя́/ и со А́нгелы лику́я на Небеса́х,/ с ни́миже моли́ спа́сти́ся душа́м на́шим.

Киприа́ново: Моще́й твои́х ра́ка, всехва́льне о́тче,/ источа́ет исцеле́ния,/ и свята́я твоя́ душа́, со А́нгелы совоку́пльшися, досто́йно ра́дуется./ Име́я у́бо ко Го́споду, преподо́бне, дерзнове́ние/ и со безпло́тными лику́я на Небесе́х,/ с ни́миже моли́ спасти́ся душа́м на́шим.

Ге́рманово: Возлюби́л еси́, богоно́се, го́рнейшее любому́дрие,/ и вне ми́ра был еси́,/ живы́й вы́шше ви́димых,/ и зерца́ло нескве́рно Бо́жие боже́ственно показа́лся еси́,/ и, сый при́сно соединя́яся Све́ту,/ Свет приима́л еси́,/ и ясне́йший, блаже́нне, получи́л еси́ коне́ц.// Моли́ся о душа́х на́ших, му́дре Симео́не.

Сла́ва, глас 6. Ге́рманово:

Боже́ственная благода́ть/ осеня́ет ра́ку моще́й твои́х,/ освяще́нный Симео́не,/ те́мже и, в воию́ ми́ра чуде́с твои́х притека́юще,/ неду́гов исцеле́ние почерпа́ем./ Но, о́тче преподо́бне,/ Христа́ Бо́га моли́ о душа́х на́ших.

И ны́не, инди́кта, глас то́йже. Византи́ево:

И́же со Ду́хом Святы́м соедине́н,/ Безнача́льне Сло́ве и Сы́не,/ всех ви́димых и неви́димых Соде́телю и Зижди́телю,/ вене́ц ле́та благослови́,/ сохраня́я в ми́ре правосла́вных мно́жества/ моли́твами Богоро́дицы и всех святы́х Твои́х.

Та́же вход, проки́мен дне, и чте́ния.

Проро́чества Иса́иина чтение (глава́ 61):

Дух Госпо́день на Мне,/ Его́же ра́ди пома́за Мя, благовести́ти ни́щим посла́ Мя,/ исцели́ти сокруше́нныя се́рдцем, пропове́дати пле́нником отпуще́ние и слепы́м прозре́ние,/ пропове́дати ле́то Госпо́дне прия́тно/ и день воздая́ния Бо́га на́шего, уте́шити вся пла́чущия,/ да́ти пла́чущим Сио́н, сла́ву вме́сто пе́пела,/ пома́зание весе́лия пла́чущим,/ одея́ние сла́вы вме́сто ду́ха уны́ния,/ и нареку́тся ро́ди пра́вды, насажде́ние Госпо́дне в сла́ву./ И сози́ждут пусты́ни ве́чныя, запусте́вшия пре́жде воздви́гнут,/ и обновя́т гра́ды пусты́я, запусте́вшия от ро́да в род./ И прии́дут иноро́днии, пасу́ще о́вцы Твоя́,/ и иноплеме́нницы ра́таи, и виногра́дари ва́ши,/ Вы же свяще́нницы Госпо́дни нарече́теся,/ служи́телие Бо́га ва́шего./ Рече́тся вам: кре́пость язы́ков поя́сте/ и в бога́тстве их чу́дни бу́дете,/ вме́сто стыде́ния ва́шего сугу́баго и вме́сто срамоты́,/ возра́дуется часть их./ Сего́ ра́ди зе́млю свою́ втори́цею насле́дят,/ и весе́лие ве́чное над главо́ю их:/ Аз бо есм Госпо́дь, любя́й пра́вду и ненави́дяй хище́ния от непра́вды./ И дам труд их пра́ведником и Заве́т ве́чен завеща́ю им./ И позна́ется во языцех се́мя их, и вну́цы их посреде́ люде́й./ Всяк ви́дяй их позна́ет я, я́ко си́и суть се́мя, благослове́нное от Бо́га,/ и весе́лием возвеселя́тся о Го́споде.

Леви́тских книг чте́ние (глава́ 26):

Глаго́ла Госпо́дь сыно́м Изра́илевым, глаго́ля:/ Е́ще в повеле́ниях Мои́х хо́дите,/ и за́поведи Моя́ сохраните́, и сотворите́ я:/ и дам вам дождь во вре́мя его́, и земля́ дает рожде́ния своя́,/ и древа́ по́льная отдадя́т плод свой./ И пости́гнет вас млаче́ние, обра́ние вина́,/ и вина́ обра́ние пости́гнет се́ятву,/ и сне́сте хлеб ваш в сы́тость, и вселите́ся с тве́рдостию на земли́ ва́шей./ И дам мир в земли́ ва́шей, и у́спнете,/ и не бу́дет вас устраша́яй./ И погублю́ зве́ри лю́тыя от земли́ ва́шея,/ и брань не про́йдет сквозе́ зе́млю ва́шу./ И пожене́те враги́ ва́ша, и паду́т пред ва́ми убие́ни./ И пожене́те пять из вас сто, и сто вас пожене́те тьмы./ И паду́т врази́ ва́ши пред ва́ми мече́м./ И при́зрю на вы, и возблагословлю́ вы, и возращу́ вы, и умно́жу вы,/ и положу́ заве́т Мой с ва́ми./ И сне́сте ве́тхая и ве́тхая ве́тхих, и ве́тхая от лица́ но́вых изнесе́те./ И положу́ заве́т Мой в вас, и не возгнуша́ется душа́ Моя́ ва́ми./ И похожду́ в вас и бу́ду вам Бог, и вы бу́дете Мне лю́дие./ Аще же не послу́шаете Мене́, ниже́ сотворите́ повеле́ний Мои́х сих,/ но ни покорите́ся им, и суде́б Мои́х вознегоду́ет душа́ ва́ша,/ я́коже вам не твори́ти всех за́поведей Мои́х и я́ко разори́ти заве́т Мой,/ и Аз сотворю́ си́це вам:/ наведу́ на вы ску́дость, и се́ете вотще́ се́мена ва́ша,/ и изъядя́т труды́ ва́ша проти́внии ва́ши./ И поста́влю лице́ Мое́ на вы, и паде́те пред враги́ ва́шими,/ и пожену́т вы ненави́дящии вас, и побе́гнете, никому́же гоня́щу вас./ И сокрушу́ досажде́ние горды́ни вашея,/ и положу́ не́бо вам я́ко желе́зно и зе́млю ва́шу я́ко ме́дяну./ И бу́дет вотще́ кре́пость ва́ша, и земля́ ва́ша не даст Се́мене своего́,/ и древа́ со́льная не дадя́т плода́ своего́./ И послю́ на вы зве́ри ди́вия земны́я, и поядя́т вас, и потребя́т ско́ты ва́ша,/ и ума́лены сотворю́ вы, и погуби́т вы находя́й меч./ И бу́дет земля́ ва́ша пуста́:/ и двори́ ва́ши бу́дут пу́сты,/ я́ко вы ходи́сте ко Мне страно́ю, и Аз пойду́ к вам в я́рости страно́ю:/ глаго́лет Госпо́дь Бог, Святы́й Изра́илев.

Преподобнаго:

Прему́дрости Соломо́новы чте́ние (глава́ 4):

Пра́ведник, Аще пости́гнет сконча́тися, в поко́и бу́дет:/ ста́рость бо честна́ не многоле́тна ниже́ в числе́ лет исчита́ется./ Седи́на же есть му́дрость челове́ком, и во́зраст ста́рости житие́ нескве́рно./ Благоуго́ден Бо́гу быв, возлю́блен бысть,/ и живы́й посреде́ гре́шник преста́влен бысть,/ восхище́н бысть, да не зло́ба изменит ра́зума его́ или́ лесть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разумеете,/ ниже́ положи́вше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На стихо́вне стихи́ры инди́кта, глас 1.

Самогла́сны, Иоа́нна мона́ха:

Наста́ вход ле́та,/ созыва́ющ почита́ти того́ просвещающий,/ Калли́сту, Ево́да и Ермоге́на,/ самобра́тныя страда́льцы,/ Симео́на равноа́нгельнаго и Иису́са Нави́на,/ и́же во Ефе́се седмочи́сленныя о́троки/ и четверодесятосве́тлый святы́х жен лик./ И́хже па́мятем приобща́ющеся, празднолю́бцы, возопии́м благоче́стно:/ Го́споди, благослови́ дела́ рук Твои́х/ и сподо́би ны до́бре прейти́ ле́та обхожде́ние.

Стих: Тебе́ подоба́ет песнь, Бо́же, в Сио́не,/ и Тебе́ возда́стся моли́тва во Иерусали́ме.

Христе́ Бо́же наш, И́же му́дростию вся соде́явый/ и из не су́щих во е́же бы́ти приведы́й,/ благослови вене́ц ле́та,/ и гра́ды на́ша сохраня́й невре́дны,/ и ве́рныя лю́ди си́лою Твое́ю возвесели́,/ побе́ды дая́ на сопоста́ты,/ Богоро́дицы ра́ди,/ да́руя ми́ру ве́лию ми́лость.

Глас 2:

Стих: Испо́лнимся во благи́х до́му Твоего́,/ свят храм Твой, ди́вен в пра́вде.

Киприа́ново: Ди́вен еси́, Бо́же, и чу́дна дела́ Твоя́,/ и путие́ Твой неизсле́дими:/ еси́ бо Му́дрость Бо́жия, и Ипоста́сь соверше́нна, и Си́ла,/ Собезнача́лен же и Соприсносу́щен,/ и соде́тельною всеси́льною вла́стию в мир прише́л еси́,/ ища́ е́же удобри́ти созда́ние Твое́,/ неизрече́нне от неискусому́жныя Ма́тере, не превра́щен Божество́м,/ завеща́в уста́вы и ле́та/ во спасе́ние на́ше неизме́нне./ Сего́ ра́ди вопие́м Ти:/ Благи́й Го́споди, сла́ва Тебе́.

Стих: Благослови́ши вене́ц ле́та/ бла́гости Твоея, Го́споди.

Дамаски́ново: И́же в му́дрости вся соде́тельствовавый,/ Преве́чное Сло́во о́тчее,/ и вся́ческую тварь всеси́льным сло́вом Твои́м соста́вивый,/ благослови́ вене́ц ле́та бла́гости Твоея́/ и е́реси низложи́, Богоро́дицы ра́ди,/ я́ко Благ и Человеколю́бец.

Сла́ва, святаго, гла́с 3:

Преподо́бне о́тче,/ добру́ изобре́л еси́ ле́ствицу,/ е́юже возше́л еси́ на высоту́,/ ю́же обре́те Илия́ колесни́цу о́гненну,/ но он у́бо восхо́да ины́м не оста́ви,/ ты же и по сме́рти и́маши столп твой./ Небе́сный челове́че, земны́й Ангеле,/ свети́льниче неусы́пный вселе́нныя,/ Симео́не преподобне,/ моли́ е́же спасти́ся душа́м на́шим,

И ны́не, инди́кта, глас то́йже.

Иоа́нна мона́ха: Ты, Царю́, сый при́сно/ и пребыва́яй и во ве́ки безконечныя,/ приими́ моле́ние гре́шных, прося́щих спасе́ния,/ и пода́ждь, Человеколю́бче, земли́ Твое́й благопло́дие,/ благорастворе́ны возду́хи да́руя,/ спобо́рствуй на безбо́жныя ва́рвары,/ я́коже иногда́ Дави́ду,/ я́ко приидо́ша си́и во оби́тели Твоя́/ и всесвято́е ме́сто оскверни́ша, Спа́се,/ но Ты да́руй правосла́вным христиа́ном побе́ды, Христе́ Бо́же,/ моли́твами Богоро́дицы,/ Побе́да бо Ты правосла́вных и Хвала́.

Тропа́рь инди́кта, глас 2:

Всея́ тва́ри Соде́телю,/ времена́ и ле́та во Свое́й вла́сти положи́вый,/ благослови́ вене́ц ле́та бла́гости Твоей, Го́споди,/ сохраня́я в ми́ре лю́ди и град Твой,/ моли́твами Богоро́дицы, и спаси́ ны.

Сла́ва, преподобнаго, глас 1:

Терпе́ния столп был еси́,/ ревнова́вый пра́отцем, преподо́бне,/ И́ову во страсте́х, Ио́сифу во искуше́ниих,/ и беспло́тных жи́тельству, сый в телеси́,/ Симео́не, о́тче наш,/ моли́ Христа́ Бо́га спасти́ся душа́м на́шим.

И ныне́, Богоро́дицы, глас то́йже:

Ра́дуйся, обра́дованная Богоро́дице Де́во,/ приста́нище и предста́тельство ро́да челове́ческаго,/ из Тебе́ бо воплоти́ся Изба́витель ми́ра,/ еди́на бо еси́ Ма́ти и Де́ва,/ присноблагослове́нная и препрославленная,/ моли́ Христа́ Бо́га мир дарова́ти всей вселе́нней.

На утрени

На Бог Госпо́дь: тропа́рь инди́кта два́жды. Сла́ва, преподобнаго. И ны́не, Богоро́дицы.

По 1-м стихосло́вии седа́лен инди́кта, глас 4.

Подобен: Удиви́ся Ио́сиф:

Я́ко Влады́це всех и Пода́телю благи́х,/ Тебе́ припа́даем ве́рно, вопию́ще приле́жно:/ от Твоего́ умоляем благоутро́бия, Спа́се,/ и моли́твами Ро́ждшия Тя и всех при́сно благоугожда́ющих Тебе́,/ ле́то благоприя́тно принести́ Тебе́, я́ко Благ, сподо́би,/ во дву существу́ честву́ющих и ве́рно сла́вящих Тя.

Сла́ва, преподобнаго, глас 8.

Подо́бен: Премудрости:

Крест Госпо́день взем, му́дре,/ и Тому́ до конца́ после́довав,/ умо́м не возврати́лся еси́ в мир, богому́дре,/ воздержа́нием и труды́ стра́сти умертви́в,/ и храм угото́вил еси́ себе́ Го́споду твоему́./ Те́мже и дарова́ний возме́здие прия́л еси́,/ исцеля́ти недужныя и ду́хи отгони́ти,/ Симео́не преподо́бнейший,/ моли́ Христа́ Бо́га грехо́в оставле́ние пода́ти/ пра́зднующим любо́вию святу́ю па́мять твою́.

И́ ны́не, инди́кта: я́ко Владьще всех: зри вы́ше.

По 2-м стихословии седа́лен, глас 8.

Подо́бен: Премудрости:

Воздержа́нием, и труды́, и моли́твами ду́шу твою́ обучи́в боголе́пне,/ был еси́ соприча́стник му́чеником, блаже́нне,/ и чуде́с и́стинно дарова́ния приял оси́,/ исцеляти неду́ги ве́рою честву́ющих тя./ Те́мже и де́монския отгоня́еши полки́,/ на сия́ свы́ше вла́стию да́нною тебе́, Симеоне преблаже́нне,/ моли́ Христа́ Бо́га согреше́ний оставле́ние дарова́ти/ пра́зднующим любо́вию святу́ю па́мять твою́.

Сла́ва, глас 4,

Подобен: Ско́ро предвари́;

Вошла́ еси́ в по́двиг муче́ния ве́рно, Калли́сто,/ пропове́дающи со двема́ бра́ты Христа́ Бо́га на́шего,/ жела́нием бо воспита́на, мысленныя сосу́ды и́стинно Христо́вы Це́ркве соверши́ла еси́ сих./ Те́мже сочета́лася еси́ им, му́ченице, в вы́шнюю жизнь.

И ны́не, Богоро́дичен:

Ско́ро приими́, Влады́чице, мольбы́ на́ша/ и сия́ принеси́ Твоему́ Сы́ну и Бо́гу, Госпоже́ Всечи́стая,/ разреши́ обстоя́ния к Тебе́ притека́ющих, разруши́ наве́ты и де́рзости, Де́во,/ ны́не вооружа́ющихся на рабы́ Твоя́.

Зри А́ще есть храм преподобнаго Симео́на, по полиеле́и седа́лен преподо́бнаго, глас 8.

Подо́бен: Премудрости:

Превозше́л еси́ ве́рою, о́тче му́дре,/ и, привре́менная вся презре́в,/ Христу́ после́довал еси́ си́лою ду́ха,/ воздержа́нием иста́ил еси́ те́ло твое́, преподо́бне,/ Небе́сную сла́ву при́сно провидя./ Те́мже и обре́л еси́ к восхо́ду боже́ственному столпа́ ле́ствицу,/ твоего́ жела́ния прили́чну, Симео́не свяще́ннейший./ Моли́ Христа́ Бо́га согреше́ний оставле́ние дарова́ти/ пра́зднующим любо́вию святу́ю па́мять твою́.

Сла́ва, глас 5.

Подо́бен: Собезнача́льное:

Воздержа́нием житие́ твое́ украси́л еси́,/ умертви́в те́ло твое́, в ничто́же обрати́л еси́ вра́жия прило́ги,/ о́тче блаже́нне,/ и преста́вился еси́ к Бо́гу в ве́чную жизнь,/ я́ко досто́ин насле́дник./ Те́мже не преста́й моля́ся поми́ловатися душа́м на́шим.

И ны́не, Богоро́дичен:

Пресвята́я Де́ва, нас поми́луй,/ прибега́ющих ве́рою к Тебе́, Благоутро́бней,/ и прося́щих те́плаго Твоего́ заступле́ния./ Мо́жеши бо, я́ко Благая, всех спасти́,/ я́ко су́щи Ма́ти Бо́га Вы́шняго,/ Ма́терними Твои́ми мольба́ми/ при́сно умоля́ющи, Богоблагода́тная.

Степе́нна, 1-й антифо́н 4-го гла́са. Проки́мен и Ева́нгелие преподобнаго. По 50-м псалме́ стихи́ра хра́ма.

Кано́ни 3.

Инди́кта, со ирмосо́м на 6, ирмо́с по два́жды, тропари́ на 4. Творе́ние кир Иоа́нна мона́ха. Глас 1,

Песнь 1

Ирмо́с: Пои́м, вси лю́дие,/ от го́рькия рабо́ты фарао́ни Изра́иля Изме́ньшему/ и во глубине́ морсте́й нога́ми немо́крыми Наста́вльшему/ песнь побе́дную,// я́ко просла́вися.

Воспои́м вси Христу́,/ И́мже соста́вишася вся́ческая и в Не́мже соверши́шася неразлу́чна,/ я́ко из Безнача́льнаго ро́ждшуся Бо́га Отца́ Ипоста́сному Сло́ву,/ песнь побе́дную, я́ко просла́вися.

Воспои́м вси Христу́,/ о́тчим благоволе́нием я́вльшуся из Де́вы/ и пропове́давшу ле́то Госпо́дне прия́тно нам на избавле́ние,/ песнь побе́дную, я́ко просла́вися.

В Назаре́т прише́д, Пода́тель Зако́на в день суббо́тный уча́ше,/ законополага́я евре́ем прише́ствия Своего́ неизрече́ннаго,/ и́мже, я́ко Ми́лостив, спаса́ет род наш.

Богоро́дичен: Поюще, вси ве́рнии, преди́вную Отрокови́цу,/ Христа́ вселе́нней возсия́вшую/ и ра́дости вся́ческая испо́лнившую присносу́щныя жи́зни,/ при́сно восхваля́ем, я́ко просла́вися.

Ин кано́н святых жен, на 4, его́же краеграие́сие: Тве́рдых жен му́чениц пою боле́зни. Глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Царице Ма́тери,/ и явлю́ся све́тло торжеству́я,// и воспою́, ра́дуяся, Тоя́ чудеса́.

Тве́рдо на противобо́рца подвиза́етеся, му́ченицы,/ посто́м у́бо пе́рвее, второ́е же кро́вным страда́нием,/ сего́ ра́ди ва́ша па́мяти ве́рою почита́ем.

Уязви́вшеся любо́вию нас ра́ди Претерпе́вшаго Крест же и смерть,/ Сего́ стопа́м после́доваша святыя жены́, плотску́ю немощь забы́вше.

Е́ллинския же́ртвы и де́монская водруже́ния ору́жием ве́ры низложи́сте/ и принесо́стеся ко хра́му Небе́сному,/ сосу́ди одушевле́ннии, му́ченицы всечестни́и.

Богоро́дичен: Укре́пльшеся благода́тию от Твоей Возсия́вшаго утро́бы, Всенепоро́чная,/ отрокови́цы де́вы отрази́ша мук треволне́ние/ и в след Тебе́ приведо́шася, ра́дующеся.

Ин кано́н преподобнаго, на 4, его́же краегране́сие: Приими́ пе́ние, о Симео́не всеблаже́нне. Иоа́нна мона́ха. Глас 8.

Песнь 1

Ирмо́с: Пои́м Го́сподеви, вся людие,/ в мо́ри Чермне́м фарао́на погрузи́вшему,// побе́дную песнь поюще, я́ко просла́вися,

Даждь мне, орга́ном язы́ка гнилы́м,/ о богоно́се Симео́не, песнь тебе́ плету́щему,/ мольба́ми твои́ми зна́ния свет богонауче́н.

Позна́ша му́дрость, о́тче, твою́/ пе́рсяне, ефио́пляне, индиа́не, и ски́фяне, и ара́вов мно́жество/ и просла́виша Христа́, тобо́ю прославляемаго.

Благода́ти испо́лнився духо́вныя,/ от пасту́шеских бо ста́нищ, я́ко Иа́ков, Дави́д и Моисе́й,/ началово́ждь слове́сных яви́лся еси́ паств, блаже́нне.

Богоро́дичен: Пречи́стая Богоро́дице, ра́дуйся, Честна́я,/ невмести́маго Бо́га во утро́бе Твое́й вмести́вшая,/ изба́витися лю́тых испроси́ пою́щим Тя.

Катава́сия: Крест начертав, Моисе́й/ впря́мо жезло́м Чермно́е пресече́,/ Израилю пешеходя́щу;/ то́же обра́тно фарао́новым колесни́цам,/ уда́рив, совокупи́,/ вопреки́ написа́в непобеди́мое ору́жие.// Тем Христу́ пои́м, Бо́гу на́шему, я́ко просла́вися.

Пое́м и до отда́ния Честнаго Креста́.

Песнь 3

Ирмо́с: Утверди́ мене́, Христе́,/ на недви́жимом ка́мени за́поведей Твои́х/ и просвети́ мя све́том Лица́ Твоего́: Нест бо свят па́че Тебе́, Человеколюбче.

Утверди́, Бла́же, его́же насади́ любо́вию на земли́ десни́ца Твоя́, плодови́т виногра́д,/ сохраня́я Твою́ Це́рковь, Всеси́льне.

В де́лех духо́вных богокра́сных крася́щияся/ наставшее, Го́споди, ле́то сие́ преведи́, Влады́ко,/ и́же ве́рою Тя песносло́вящия, Бо́же вся́ческих.

Ти́хий ми, Христе́, ле́тный круг давай, Ще́дре,/ и насы́ти мя слове́с Боже́ственных Твои́х,/ я́же яви́лся еси́ глаго́ля иуде́ем в суббо́тах.

Яко еди́ну преесте́ственно па́че челове́ка/ благода́ть во Твою́ утро́бу прие́мшую/ и невра́щно ро́ждшую Христа́ Бо́га на́шего,/ присно Тя сла́вим.

Ин

Ирмо́с: Лук си́льных изнемже,/ и немощству́ющии препоясашася си́лою,// сего ра́ди утверди́ся в Го́споде се́рдце мое́,

Кре́постию всеси́льною укрепля́еми, противобо́рцев попра́сте си́лу,/ сего́ ра́ди я́ко победоно́сицы от Христа́ венча́стеся.

Яви́шася зве́рская зия́ния Боже́ственною си́лою Христо́вою неде́йственна:/ и изба́вистеся, богоно́сицы, невреди́мы, Бо́га почита́юще.

Воззре́нием к Бо́гу обожа́еми, многобо́жия хлад отри́нусте/ и к теплоте́ вы́шния сла́вы, страстоно́сицы, достиго́сте.

Богоро́дичен: Зна́юще благоче́стно, пропове́даем Тя/ всеи́стинную Бо́жию Ма́терь, Всенепоро́чная:/ Тобою́ бо нам Созда́тель приобщи́тися сподо́би.

Ин

Ирмо́с: Страх Твой, Господи,/ всади́ в сердца́ раб Твои́х/ и бу́ди нам утвержде́ние,// Тя во и́стине призыва́ющим.

Ско́ро избе́г зи́мныя беды́ духо́в,/ ко спаси́тельней устреми́лся еси́ оби́тели, Симео́не,/ из нея́же и нестаре́емую жизнь прия́л еси́.

Приклони́л еси́, ра́дуяся,/ покорли́вый слух твой, всеблаже́нне, Влады́це блажа́щу/ и блаже́нную обре́л еси́ жизнь.

Сло́ва прие́м се́мена/ се́рдца твоего́ бразда́ми и слез напое́нии,/ Христу́ умно́жен клас доброде́телей пожа́л еси́.

Богоро́дичен: Неизрече́нно зачала́ еси́, Богоневе́сто,/ Спа́са и Го́спода, избавляющаго ны от лю́тых,/ Тя во и́стине призыва́ющия.

Катава́сия: Жезл во образ та́йны приемлется,/ прозябе́ннем бо предразсужда́ет свяще́нника;/ неплодя́щей же пре́жде Це́ркви,/ ны́не процвете́ Дре́во Креста́,// в держа́ву и утвержде́ние.

Конда́к инди́кта, глас 2:

В Вы́шних живы́й, Христе́ Царю́,/ всех ви́димых и неви́димых Тво́рче и Зижди́телю./ И́же дни и но́щи, времена́ и ле́та сотвори́вый,/ благослови́ ны́не вене́ц ле́та,/ соблюди́ и сохрани́ в ми́ре град и лю́ди Твоя́,// Многоми́лостиве.

Та́же седа́лен инди́кта, глас 8.

Подо́бен: Прему́дрости:

И́же времена́ плодоно́сна/ и дожди́ с небесе́ подая́ су́щим на земли́,/ и ны́не, прие́мля мольбы́ рабо́в Твои́х,/ от вся́кия изба́ви ну́жды град Твой,/ щедро́ты бо Твоя́ и́стинно на всех де́лех Твои́х./ Те́мже вхо́ды благослови́ и исхо́ды,/ дела́ испра́ви в нас рук на́ших/ и согреше́ний проще́ние да́руй нам, Бо́же;/ Ты бо из несу́щих вся́ческая во е́же бы́ти,/ я́ко Си́лен, приве́л еси́.

Ин седа́лен преподобнаго, глас и подо́бен то́йже:

Земна́я вся оста́вив/ и в ми́ре сый теле́сне,/ ду́хом был еси́ Небе́сный А́нгел,/ находя́щия бо стра́сти умертви́в пло́тию,/ Тро́ицы яви́лся еси́ уго́дник, блаже́нне./ Те́мже неду́гующих исцелявши стра́сти/ и сло́вом ду́хи отгоня́вши благода́тию,/ Симео́не преблаже́нне,/ моли́ Христа́ Бо́га согреше́ний проще́ние дарова́ти/ честву́ющим любо́вию святу́ю па́мять твою́.

Сла́ва, ин седа́лен святы́х жен, глас 1.

Подо́бен: Гроб Твой, Спа́се:

А́гницы словесныя,/ Агнцу и Па́стырю приведо́стеся ве́рно муче́нием,/ течение соверши́вше и ве́ру соблю́дше./ Тем ра́достно днесь восхваля́ем, досточу́днии,/ свяще́нную ва́шу па́мять,/ Христа́ велича́юще.

И ны́не, Богоро́дичен:

Наста́ви ны на путь покая́ния,/ уклоняющияся при́сно к злым безпу́тием/ и Преблага́го прогне́вающия Го́спода, Неискусобра́чная, Благослове́нная Мари́е,/ прибе́жище отча́янных челове́ков, Бо́жие обита́лище.

Песнь 4

Ирмо́с: Разуме́х, Всеси́льне,/ Твое́ смотре́ние// и со стра́хом просла́вих Тя, Спа́се.

Нача́ло Тебе́ ле́та лю́дие Твои́ прино́сят,/ а́нгельскими пе́сньми славосло́вяще Тя, Спа́се.

Я́ко Человеколю́бец сподо́би наче́ншим ле́то/ и сконча́ти Тебе́ благоуго́дно, Христе́.

Вседержителю, Еди́не Го́споди,/ лет обхожде́ния, ути́шив, ми́ру да́руй.

Богоро́дичен: Яко приста́нище ны́не душ на́ших и тве́рду наде́жду,/ Богоро́дицу вси воспои́м.

Ин

Ирмо́с: Седя́й в славе/ на Престо́ле Божества́,/ во о́блаце ле́гце,/ прии́де Иису́с Пребоже́ственный/ нетле́нною дла́нию/ и спасе́ зову́щия:// сла́ва, Христе́, силе Твое́й.

Претерпе́вше му́ки и сокруше́ние те́ла разли́чными о́бразы,/ раздробле́ние же уде́с и опале́ние,/ Небе́сная селе́ния насле́доваете,/ насла́ждшеся дре́ва жизни, досточу́днии.

Деви́ц блаже́нных по́двигу удиви́шася Небе́сныя Си́лы,/ я́ко врага́ победи́та в же́нстем естестве́,/ укропля́еми си́лою от Жены́ Возсия́вшаго.

Отве́ргше ми́ра суету́ всю,/ Бо́гу Еди́ному все́ю душе́ю прилепи́стеся,/ тем воздержа́ния боле́зни и страда́ния претерпе́сте,/ неве́сты Христо́вы терпели́выя.

Прекре́пкое я́ко ору́жие Крест обнося́ще,/ к сопоста́тным противоста́сте ополче́нием,/ со Христо́м же побе́ду отнесо́сте,/ победи́вшим мир си́лою Божества́.

Богоро́дичен: Сни́де, я́ко дождь на руно́, во утро́бу Твою́,/ богоглаго́ливый дре́вле рече́ проро́к, Всенепорочная,/ Его́же во дву существу́ родила́ еси́,/ Ему́же взыва́ем: сла́ва, Христе́, си́ле Твое́й.

Ин

Ирмо́с: Услышах, Го́споди, слух Твой и убоя́хся,/ разуме́х дела́ Твоя// и просла́вих держа́ву Твою́, Го́споди.

Не на песце́, преблаже́нне, но на глубоча́йших труде́х твои́х положи́в основа́ние воздержа́ния, доброде́телей созда́л еси́ столп непоколеби́м.

Всели́в те́ло твое́ в жили́ще же́стоко./ Стра́хом пригвозди́л еси́ ду́ха/ и жили́ще насле́дия божественнаго обре́л еси́, преподо́бне.

Укроти́л еси́ теле́сныя сокровенныя стра́сти, пребога́те,/ в гнои́ лежа́ черве́й, о́тче,/ благово́ние обре́л еси́.

По стра́сти во́льней Жизнотвори́вому Мертвецу́ подо́бяся,/ я́коже гро́бу, ро́ву те́мному/ сам себе́ жи́ва пре́дал еси́.

Богоро́дичен: Бо́га, Его́же родила́ еси́, Пречи́стая Мари́е,/ моли́ всегда́ рабо́м Твои́м дарова́ти/ согреше́ний проще́ние.

Катава́сия: Услышах, Господи,/ смотре́ния Твоего́ таинство,/ разуме́я дела́ Твоя́// и просла́вих Твое́ Божество́.

Песнь 5

Ирмо́с: От но́щи утренююще, пое́м Тя, Христе́,/ Отцу́ Собезнача́льна и Спа́са душ на́ших:// мир ми́рови пода́ждь, Человеколюбче.

Исполня́яй вся́ческая бла́гости, Христе́,/ Ты благорастворе́нием и́ благопло́дием, благослове́ньми венча́емо,/ многокру́жное ле́то рабо́м Твои́м да́руй.

Ле́тное воздая́ние покажи́ нам преложе́ние к лу́чшим,/ ми́рное же устрое́ние ве́дущим Тя, Сло́ве Бо́жий,/ уподо́бльшася челове́ком.

На зе́млю прише́л еси́, Собезнача́льне Отцу́,/ пле́нником отпуще́ние, слепы́м же прозре́ние от Отца́ возвеща́я/ и вре́мя прия́тно.

Богоро́дичен: На́ша наде́жды, Богоро́дице Чи́стая,/ и на́ше жела́ние на Тя возлага́ем,/ Ми́лостива нам даждь, Де́во, Его́же родила́ еси́.

Ин

Ирмо́с: Нечести́вии не у́зрят сла́вы Твоей, Христе́,/ но мы Тя, Единоро́дне,/ Оте́ческия сла́вы Сия́ние Божества́,/ от но́щи у́тренююще,// воспева́ем Тя, Человеколю́бче.

Я́ко а́гницы непорочныя, я́ко же́ртвы прия́тныя,/ А́гнцу и́стинному и Па́стырю, му́ченицы, принесо́стеся/ приноше́ния всебогатая и прия́тна всесожже́ния.

Умерщвле́ни бы́вше те́лом, ожи́сте душе́ю,/ Умертви́вшему кре́пость сме́рти, му́ченицы, я́ко уподо́бльшеся,/ и Кресту́, и сме́рти, и стра́сти вольней.

Еди́н ра́зум иму́ще в телесо́х мно́гих,/ Еди́наго Го́спода Иису́са,/ разли́чными ра́нами стру́жеми и огне́м сожига́еми,/ испове́даху богомудрыя.

Богоро́дичен: Воздви́гни па́дша мя в ро́ве искуше́ний/ и упра́ви, Бо́га Ко́рмчию Ро́ждшая,/ еди́на Всенепоро́чная,/ пе́рвее соединившаго разстоя́щияся бла́гостию.

Ин

Ирмо́с: Просвети́ нас повеле́нии Твои́ми, Господи,/ и мы́шцею Твое́ю высокою// Твой мир пода́ждь нам, Человеколю́бче.

Новаго Дании́ла, Симео́не,/ Христо́с тя показа́,/ из ро́ва бо зве́рска тя явле́нием неврежде́на возврати́.

Весь сам себе́ Го́споду возложи́в,/ слоте́¹, и мра́зу, и зно́ю проти́вным озлобле́нием обнажи́лся еси́.

Но́вый Моисе́й и Илия́ показа́лся еси́,/ еди́нощи чрез всю четыредеся́тницу пи́щу прие́мля/ во всей жи́зни твое́й, преподо́бне.

Я́ко златоза́рным, Симео́не, мони́стом, преподо́бне, у́жем облагаем,/ небоше́ственник показа́лся еси́/ Боже́ственными Кри́лы.

Богоро́дичен: Моли́ при́сно Сы́на Твоего́ и Бо́га на́шего,/ Неискусобра́чная Мари́е Чи́стая,/ низпосла́ти нам, ве́рным, ве́лию ми́лость.

Катава́сия: О треблаже́нное Дре́во,/ на не́мже распя́ся Христо́с, Царь и Госпо́дь,/ и́мже надо́ дре́вом прельсти́вый,/ Тобо́ю прельсти́вся,/ Бо́гу пригвозди́вшуся пло́тию,// подаю́щему мир душам на́шим.

Песнь 6

Ирмо́с: Проро́ка спасл еси́ от ки́та, Человеколю́бче,/ и мене́ из глубины́ прегреше́ний// возведи́, молю́ся.

Житие́ нача́ти благоуго́дно Тебе́, Влады́ко,/ с ле́тным начина́нием нас сподо́би.

Дней духо́вных, в поуче́нии Зако́на Твоего́,/ покажи́ испо́лнены, ще́дре Спа́се, пою́щия Тя.

Богоро́дичен: Ро́ждшая Го́спода, Богоро́дице Всенепоро́чная,/ изба́ви от бед ве́рою пою́щия Тя, Пречи́стая.

Ин

Ирмо́с: Возопи́ прообразу́я погребение тридне́вное,/ проро́к Ио́на в ки́те, моля́ся:// от тли изба́ви мя, Иису́се, Царю́ Сил.

Разраже́на и нога́ми же́нскими попира́ема зря́щи,/ прама́терь боже́ственне ра́дуется,/ ту́ю ле́стию из рая́ пе́рвее изгна́вшаго.

Воздержа́нием к страда́нию усе́рдно совоку́пльшеся,/ Жениху́ душ ны́не нетле́ние совокупи́стеся/ и в черто́зе Боже́ственнем ра́достною душо́ю водворя́етеся.

Возвыша́емая мук свере́пая волне́ния/ му́чениц корабле́й потопи́ти не возмого́ша:/ держа́вною бо Руко́ю к Боже́ственным приста́нищем достиго́ша.

Богоро́дичен: Глаго́лов Твои́х сбытия зря́щи,/ возвели́чи наипа́че, Богома́ти, Тя Возвели́чившаго,/ ро́ди бо вси Тя ны́не и́стинно ублажа́ют.

Ин

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,// Многоми́лостиве Христе́ Бо́же наш.

Зна́мений и чуде́с тя Христо́с самоде́теля показа́,/ Боже́ственнаго, блаже́нне, де́йства прия́тно жили́ще.

Возне́сл еси́ те́ло твое́, Симео́не,/ я́ко на крест, на столп./ Тем спросла́вился еси́/ на Дре́во тебе́ ра́ди возне́сшемуся Христу́.

Вы́шнее ше́ствие обре́т, Симео́не чу́дне,/ к высоте́ Небе́сней пою́щия тя ве́рно возведи.

Богоро́дичен: Го́ру, ю́же прови́де Дании́л,/ из Нея́же несеко́мый Ка́мень ве́ры отсече́ся, Христо́с,/ Тя познава́ем.

Катава́сия: Воднаго зве́ря во утро́бе/ дла́ни Ио́на крестови́дно распросте́р,/ спаси́тельную Страсть прообража́ше Я́ве;/ тем, тридне́вен изше́д,/ преми́рное Воскресе́ние прописа́ше,/ пло́тию пригвожде́ннаго Христа́ Бо́га// и тридне́вным Воскресе́нием мир просве́щшаго.

Конда́к преподо́бнаго Симео́на, глас 2:

Вы́шних ища́й, вы́шним совокупля́яйся/ и колесни́цу о́гненную столп соде́лавый,/ тем собесе́дник А́нгелом был еси́, преподо́бне,/ с ни́ми Христу́ Бо́гу/ моля́ся непреста́нно о всех нас.

Икос:

Симео́ново непоро́чное житие́/ кий язы́к челове́чь довле́ет когда́ к похвале́ испове́дати?/ Оба́че воспою́, Бо́жиею му́дростию,/ до́бляго сего́ исполи́на страда́ние же и по́двиги, я́же на земли́,/ я́ко свети́льника я́вльшася всем челове́ком,/ мно́гим терпе́нием в ли́це а́нгельстем возсия́вша,/ с ни́ми бо поя́ непреста́нно Христу́,/ воздержа́нием чистоту́ стяжа́,/ моля́ся непреста́нно о всех нас.

Песнь 7

Ирмо́с: О́троцы, благоче́стию совоспита́ни,/ злочести́ваго веле́ния небре́гше,/ о́гненнаго преще́ния не убоя́шася,/ но, посреди пла́мене стоя́ще, поя́ху:// отце́в Бо́же, благослове́н еси́.

Начина́ющий ле́то, и пе́сней нача́ток сотворя́ем/ ца́рствующему Христу́ Ца́рством безконе́чным,/ правосла́внии лю́дие, благоче́стно пою́ще:/ отце́в Бо́же, благослове́н еси́.

Сый пре́жде век, на век же и еще́ Госпо́дь,/ воспева́ющим Тя, Христе́, Исто́чник бла́гости,/ благи́х Твои́х даро́в ле́то сие́ испо́лни:/ отце́в Бо́же, благослове́н еси́.

Богородичен: Я́ко раби́ Влады́це, на моли́тву/ Чи́стую Ма́терь Твою́ Тебе́ предлага́ем, Христе́,/ от всякаго обстоя́ния лю́ди Твоя́, Бла́же, изба́вити, пою́щия:/ отце́в Бо́же, благослове́н еси́.

Ин

Ирмо́с: Спасы́й во огни́ авраа́мския Твоя́ о́троки/ и халде́и уби́в, / я́же Пра́вда пра́ведно уловля́ше,/ препе́тый Го́споди,// Бо́же оте́ц на́ших, благослове́н еси́.

Коль непобеди́мо твое́ мудрова́ние, Амму́не богоно́се:/ и́бо, нача́льник ли́ка дев, мук не убоя́лся еси́,/ с ни́ми скончева́яся, я́ко диа́кон и таи́нник Божественныя сла́вы, пел еси́:/ препе́тый Го́споди, Бо́же оте́ц, благослове́н еси́.

Я́ко невестоводи́тель мудр,/ словесы́ помазу́еши му́жества,/ к Жениху́ взира́ти и плотски́я терпе́ти боле́зни, зову́щия му́ченицы:/ препе́тый Го́споди, Бо́же оте́ц, благослове́н еси́.

Да не облени́мся,/ се отве́рзеся три́знище, отрокови́цы, ста́нем му́жески,/ Христо́с венцы́ простира́ет,/ те́ла нашего не пощади́м, вопия́ху до́блии на три́знищи:/ препе́тый Го́споди, Бо́же оте́ц, благослове́н еси́.

Богоро́дичен: Благослове́н Плод благослове́ннаго чре́ва Твоего́,/ Его́же благословя́т Небе́сныя Си́лы и челове́честии собо́ри,/ нас Изба́вльшаго кля́твы дре́вния, Благослове́нная.

Ин

Ирмо́с: о́троцы благочести́вии в Вавилоне/ о́бразу злато́му не поклони́шася,/ но, посреде́ пе́щи о́гненныя ороша́еми,/ песнь воспева́ху, глаго́люще:// превозноси́мый отце́в и нас Бо́же, благослове́н еси́.

Разреши́л еси́ у́бо сухоту́ недоуме́ющимся,/ и врата́ тем дожде́вныя отве́рзл еси́,/ и зе́млю коле́блющуюся моли́твами уста́вил еси́,/ и лю́ди зва́ти научи́л еси́:/ благослове́н Бог отце́в на́ших.

Я́ко велича́йший свети́льник церко́вный/ и многосве́тлое, Симео́не, со́лнце,/ всю́ду лучи́ испуща́я, просвети́л еси́/ и лю́ди зва́ти научи́л еси́:/ благослове́н Бог отце́в на́ших.

Во́ды отвсю́ду стеко́шася, уго́дниче Христо́в,/ челове́ков пучи́на во огра́де твоего́ собра́ся воздержа́ния,/ от Тебе́ вопи́ти наказу́еми:/ благослове́н Бог отце́в на́ших.

Дре́вле у́бо ста́рца объя́тии,/ скрижа́льми же твоего́ се́рдца, преподо́бне, неви́димою си́лою Христо́с упоко́йся, Симео́не./ Те́мже взыва́л еси́:/ благослове́н Бог отце́в на́ших.

Богоро́дичен: Подоба́ше безсе́менно Вопло́щшемуся из Тебе́ пройти́, Де́во Чи́стая,/ Ты бо яви́лася еси́ чистото́ю всех пребо́льши,/ Ему́же, вопию́ще, пе́сньми зове́м:/ благослове́н Бог отце́в на́ших.

Катава́сия: Безу́мное веле́ние/ мучителя злочести́ваго лю́ди поколеба́,/ ды́шущее преще́ние и злохуле́ние богоме́рзкое;/ оба́че три о́троки не устраши́ я́рость зве́рская,/ ни огнь снеда́яй,/ но, противоды́шущу росоно́сному Ду́ху,/ со огне́м су́ще, поя́ху:// препе́тый отце́в и нас Бо́же, благослове́н еси́.

Песнь 8

Ирмо́с: Песносло́вцы в пещи́ спа́сшаго де́ти/ и громопла́менную прело́жшаго на ро́су,// Христа́ Бо́га по́йте и превозноси́те во вся ве́ки.

Я́ко Нача́льнику спасе́ния, Христе́,/ нача́ток Тебе́ прино́сит ле́тный честна́я Це́рковь, зову́щи:/ по́йте и превозноси́те Христа́ во ве́ки.

Из не су́щих вся́ческая му́дре обнови́вшаго Созда́теля/ и производя́щаго време́н обраще́ния хоте́нием,/ по́йте и превозноси́те Его́ во ве́ки.

Изводя́щему вся́ческая Бо́гу/ и времена́ изменя́ющему,/ на многообра́зное челове́ков управле́ние, пое́м:/ хвали́те и превозноси́те Христа́ во ве́ки.

Богоро́дичен: Богома́терь Де́ву Чи́стую,/ лет обхожде́ньми же и обраще́ньми,/ правосла́вно, челове́честии собо́ри, пое́м Тя,/ я́ко Богоро́дицу и всех спасе́ние.

Ин

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,// и превозноси́те Его́ во вся ве́ки.

Све́тлы себе́ от крове́й ри́зы му́ченических обложи́сте,/ совле́кшеся и́стинно тле́емаго греха́ми челове́ка/ и воспева́юще; Го́спода по́йте, дела́, и превозноси́те Его́ во вся ве́ки.

Оби́льнаго све́та светоли́тиями,/ Со́лнца мы́сленнаго Боже́ственными светлостьми́, му́ченицы, освеща́еми,/ нощь претеко́сте безбо́жия,/ пою́ще единомышле́нием души́: / Го́спода по́йте, дела́, и превозноси́те Его́ во вся ве́ки.

Я́ко а́гницы, я́ко нескве́рныя ю́ницы,/ я́ко боже́ственныя голуби́цы, я́ко самово́льная́ заколе́ния,/ приведо́стеся, му́ченицы, Зижди́телю,/ и я́ко же́ртвы непоро́чны, согла́сно пою́ще:/ Го́спода по́йте, дела́, и превозноси́те Его́ во вся ве́ки.

Повеле́нием мучи́телей пребеззако́нных непра́ведную подъя́сте смерть,/ на у́ды ссеца́еми, па́лицами сокруша́еми,/ неми́лостивне бие́ми, огне́м всесожига́еми, мече́м посека́еми;/ тем безсмертная прия́сте с ра́достию бога́тная воздая́ния.

Богоро́дичен: Во след Тебе́ теко́ша жены, Ми́ра благово́ннаго ве́дуще,/ Всечестна́я Богоневе́сто,/ еди́на Неискусобра́чная,/ из утро́бы Твоей возсия́вшаго Единоро́днаго Сы́на,/ и с Тобо́ю ца́рствуют и́стинно, песносло́вяще Христа́ во ве́ки.

Ин

Ирмо́с: На горе́ святе́й просла́вльшася/ и в купине́ огне́м Присно де́вы/ Моисе́ови та́йну я́вльшаго,/ Го́спода по́йте// и превозноси́те во вся ве́ки.

От вся́каго отлучи́вся пристра́стия/ и ма́терню не́мощь уще́дрив,/ я́ко живе́й яви́лся еси́ по сме́рти:/ Го́спода по́йте и превозноси́те Его́, вопия́, во ве́ки.

Ю́ношу стя́гнул еси́ разслаблена/ и одр Фи́ларху повелевавши на ра́му нести́, свяще́ннейше, вопия́:/ Го́спода по́йте и превозноси́те Его́ во вся ве́ки.

Благослови́м Отца́ и Сы́на и Свята́го Ду́ха, Го́спода.

Уясни́вый И́ова стра́стию,/ согни́вшия пло́ти твоей гни́лость в би́сер претвори́ многоце́нен,/ тя, Христо́в уго́дниче Симео́не, Сла́вяй во вся ве́ки.

И ны́не, Богоро́дичен: От А́нгела ра́дость прие́мшую,/ и ро́ждшую Го́спода сла́вы,/ и свет ми́ру возсия́вшую,/ вси Тя пое́м, Де́во Богоро́дице, во вся ве́ки.

Та́же: Хва́лим, благослови́м, покланя́емся Го́сподеви,/ пою́ще и превознося́ще во вся ве́ки.

Катава́сия: Благослови́те, о́троцы,/ Тро́ицы равночи́сленнии,/ Соде́теля Отца́ Бо́га,/ по́йте снизше́дшее Сло́во/ и огнь в ро́су претво́ршее/ и превозноси́те всем жизнь подава́ющаго// Ду́ха Всесвята́го во ве́ки.

Иере́й же, покади́в святу́ю трапе́зу, возгласи́т:

Богоро́дицу и Ма́терь Све́та в пе́снех возвели́чим.

И, покади́в святы́й олта́рь и всю Це́рковь, и бра́тию, е́же повсегда́ на 9-й пе́сни у́трени не оставля́ется. Мы же стихосло́вим 9-ю песнь, пою́ще велегла́сно, на глас 6:

Вели́чит душа́ моя́ Го́спода:

Припева́ем же: Честне́йшую Херуви́м:

Песнь 9

Ирмо́с: О́браз чи́стаго рождества́ Твоего́/ огнепали́мая купина́ показа́ неопа́льная,/ и ны́не на нас напа́стей свире́пеющую угаси́ти мо́лимся пещь:/ да Тя, Богоро́дице,// непреста́нно велича́ем.

Сло́во Бо́жие и Си́ла, и́стинная Му́дрость и ипоста́сная,/ содержа́щая и пра́вящая вся́ческая му́дре,/ и ны́не наста́вшее рабо́м Твои́м вре́мя/ во устрое́нии ти́се² произведи́.

Вся дела́ Твоя́, Го́споди,/ небеса́, земля́, свет и мо́ре, во́ды и вси исто́чницы,/ со́лнце же, луна́ и тьма, зве́зды, огнь, челове́цы и ско́ти,/ со А́нгелы восхваля́ют Тя.

Еди́н еси́ Преве́чный, я́ко Творе́ц веко́в,/ и ца́рствующее триипоста́сное Еди́но Божество́ неразде́льное,/ мольба́ми Чистыя Богома́тере/ ле́то плодоно́сно насле́дию Твоему́ покажи́.

Богоро́дичен; Спа́се всего́, и Строи́телю, и Зижди́телю, и Вседержи́телю тва́ри,/ мольба́ми безсе́менно Ро́ждшия Тя мир ми́ру Твоему́ пода́ждь,/ соблюда́я Це́рковь всегда́ немяте́жну.

Ин

Ирмо́с: Е́ва у́бо неду́гом преслуша́ния/ кля́тву всели́ла есть,/ Ты же, Де́во Богоро́дице,/ прозябе́нием чревоноше́ния ми́рови благослове́ние процвела́ еси́,// тем Тя вси велича́ем.

Подаю́т исцеле́ний то́ки тре́бующим, я́ко от исто́чника Всеблаже́нныя,/ уставля́ют па́губу неду́гов и страсте́й отгоня́ют зной,/ сердца́ боголюби́вых напая́ют/ к благопло́дию боже́ственных дея́ний.

Боже́ственный диа́кон Амму́н,/ Келси́на же и к сим четы́редесять боже́ственныя и богому́дрыя жены́,/ пострада́вше зако́нно, венча́шася/ и ны́не со Ангелы лику́ют,/ я́же по до́лгу ублажа́ем.

Вознесо́стеся, держа́ву на враги́ взе́мше,/ и Ангелом уподо́бистеся,/ дре́ва наслажда́етеся невозбра́нно жи́зненнаго в рай, богоневе́сты,/ исто́чник ны́не до́брых прия́сте,/ о ми́ре моля́щеся.

Богоро́дичен: Му́дрости вмести́лище па́че ума́ лу́чшаго яви́лася еси́,/ Отрокови́це непоро́чная,/ одушевле́н Престо́л же и дверь;/ тем я́ко Цари́цу возлюби́ша де́вы Тя, Де́во,/ в след Тебе́ приведо́шася, Богоотрокови́це.

Ин

Ирмо́с: Проявле́нное на горе́ законополо́жнику во огни́ и купине́/ Рождество́ Присноде́вы/ в на́ше, ве́рных, спасе́ние// пе́сньми немо́лчными велича́ем.

Воцари́вшася над страстъми́ терпе́нием,/ Христо́с тя прия́т, Симео́не богоно́се,/ Своему́ о́бщника Ца́рству:/ тем тя пе́сньми почита́ем.

Целе́бней благода́ти сподо́бився/ от некра́домых Ду́ха сокро́вищ, богоно́се Симео́не,/ исцеле́ния подае́ши торжеству́ющим па́мять твою́.

Возше́д, преподо́бне, небе́снаго тече́ния на доброде́тельный возду́х,/ страда́ньми препоя́сан, возлете́в к ски́ниям небе́сным,/ моли́ спасти́ся душа́м на́шим.

Богоро́дичен: Купина́, горя́щая огне́м и неопаля́ема, яви́лася еси́, о Влады́чице,/ заче́нши безсе́менно Бо́га и Спа́са ми́ра,/ Его́же непреста́нно велича́ем.

Катава́сия: Та́ин еси́, Богоро́дице, рай,/ невозде́ланно возрасти́вший Христа́,/ и́мже кре́стное живоно́сное на зе́мли насади́ся Дре́во./ Тем, ны́не возноси́му,// покланя́ющеся Ему́, Тя велича́ем.

Други́й ирмо́с: Сне́дию дре́ва ро́ду прибы́вшая смерть/ Кресто́м упраздни́ся днесь,/ и́бо праматерняя всеро́дная кля́тва разруши́ся Прозябе́нием/ Чи́стыя Богоматере,// ю́же вся Си́лы Не́бесныя велича́ют.

Свети́лен инди́кта.

Подо́бен: Ученико́м:

Бо́же бого́в и Го́споди,/ триипоста́сное Естество́,/ Непристу́пне, Присносу́щне, Несозда́нне/ и всех Соде́телю, Вседержи́телю,/ Тебе́ припа́даем вси́ и Тя мо́лим:/ настоя́щее ле́то сие́ я́ко Благ благослови́в,/ сохрани́ в ми́ре вся лю́ди Твоя́, Ще́дре.

Сла́ва, преподо́бнаго.

Подо́бен то́йже:

Я́коже свети́ло, преподо́бне,/ светоно́сное твое́ житие́ облиста́вшее/ просвети́ подсо́лнечную всю чуде́с луча́ми./ Столпо́м бо, о́тче, возше́л еси́, я́ко ле́ствицею, к Бо́гу,/ иде́же всех жела́ний, Симео́не,/ коне́чное и́стинно восприя́тие есть,/ о нас моля́ся, честву́ющих Тя, блаже́нно.

И ны́не, инди́кта.

Подо́бен то́й же:

Соде́телю и Прави́телю всея́ тва́ри сый,/ времена́ и ле́та положи́в в Твое́й вла́сти,/ ле́тний круг, благослове́ньми, Ще́дре, бла́гости венча́й,/ в ми́ре сохраня́я Твоя́ лю́ди невре́дны и це́лы, мо́лимся,/ моли́твами Ро́ждшия Тя и Боже́ственных А́нгел.

На хвали́тех стихи́ры самогла́сны инди́кта, на 4.

Глас 3. Иоа́нна мона́ха:

Преве́чное Сло́во О́тчее,/ Иже во о́бразе Бо́жии сый/ и соста́вивый тварь из не су́щаго во еже бы́ти,/ времена́ и ле́та в Свое́й вла́сти положи́вый,/ благослови́ вене́ц ле́та бла́гости Твоея́,/ да́руя мир це́рквам Твои́м/ и побе́ды правосла́вным христиа́ном,/ благопло́дие же земли́ и нам ве́лию ми́лость.

Глас 4. Того́же:

Ца́рствие Твое́, Христе́ Бо́же,/ ца́рство всех веко́в,/ и влады́чество Твое́ во вся́ком ро́де и ро́де,/ вся бо му́дростию сотвори́л еси́,/ времена́ и ле́та нам предложи́в./ Те́мже, благодаря́ще о всех и за вся́, вопие́м:/ благослови́ вене́ц ле́та бла́гости Твоея́/ и сподо́би нас неосужде́нно вопи́ти Тебе́:// Го́споди, сла́ва Тебе́.

Андре́я Пи́рскаго:

Ше́ствия Твоя́, Бо́же,/ ше́ствия ве́лия и чу́дна:/ тем строе́ния Твоего́ си́лу велича́ем,/ я́ко Свет от Све́та прише́л еси́ во окая́нный мир Твой/ и пе́рвую погуби́л еси́ кля́тву ветхаго Ада́ма,/ я́ко благоволи́л еси́, Сло́ве,/ и нам му́дростию времена́ и ле́та положи́л еси́,/ е́же сла́вити вседе́тельную Твою́ бла́гость:/ Го́споди, сла́ва Тебе́.

Святы́х жен, глас 2. Ге́рманова:

Егда́ стра́стию Твое́ю, Го́споди,/ вселе́нную утверди́л еси́,/ тогда́ и немощству́ющии препоя́сашася си́лою,/ жены́ му́жествоваша на горча́йшаго мучи́теля/ и, побежде́ние ма́тернее испра́вивше,/ па́ки в сла́дости ра́йстей бы́ша,/ в сла́ву Твою́, ро́ждшагося от Жены́/ и спа́сшаго род челове́ческий.

Сла́ва, преподо́бнаго, глас тойже:

От ко́рене блага́го благи́й прозябе́ плод,/ и́же от младе́нства, свяще́нный Симео́н,/ благода́тию па́че не́же млеко́м воспита́н,/ и, на ка́мень те́ло возвы́сив,/ к Бо́гу же превозвы́сив ра́зум,/ Небе́сное созда́ доброде́тельми жили́ще,/ и, с боже́ственными Си́лами лико́вне ше́ствуя,/ Христа́ бысть жили́ще,/ Бо́га и Спа́са душ на́ших.

И ны́не, инди́кта. Глас 8. Ге́рманово:

Неизрече́нною му́дростию/ соста́вивый вся́ческая, Сло́ве, Христе́ Бо́же,/ времена́ и ле́та нам предложи́вый,/ дела́ рук Твои́х благослови́/ и ве́рныя лю́ди Твоя́ си́лою Твое́ю возвесели́,/ подая́ им кре́пость, я́ко Еди́н Благ и Человеколю́бец.

Та́же славосло́вие вели́кое.

И по Трисвято́м тропа́рь инди́кта. Сла́ва, святаго: И ны́не: Ра́дуйся, Обра́дованная: Ектении́, и отпу́ст, и час 1-й. На I -м часе́ тропа́рь инди́кта. Сла́ва, святаго. И ны́не, Богоро́дичен часо́в. По Трисвято́м конда́к инди́кта и святаго глаго́лем пременя́юще. И про́чая, и соверше́нный отпу́ст.

На литургии

Блаже́нны от кано́на инди́кта, песнь 3-я на 4, и преподо́бнаго, песнь 6-я на 4. По вхо́де тропарь, пре́жде инди́кта, и Богоро́дицы: Ра́дуйся, Обра́дованная: и преподо́бнаго. Сла́ва, конда́к святаго, И ны́не, конда́к инди́кта. (Аще же храм Богоро́дицы: И ны́не, хра́ма Богоро́дицы, инди́кта же конда́к глаго́ли в нача́ле.) Проки́мен инди́кта, глас 3: Ве́лий Госпо́дь наш, и ве́лия кре́пость Его́,// и ра́зума Его́ несть числа́. Стих: Хвали́те Го́спода, я́ко благ псало́м. И преподо́бнаго проки́мен, глас 7: Честна́ пред Го́сподем// смерть преподо́бных Его́. Апо́стол к Тимофе́ю, зача́ло 282: Ча́до Тимофе́е, молю́ у́бо пре́жде: И преподо́бнаго, к Колосса́ем, зача́ло 258: Бра́тие, облецы́теся у́бо: Аллилу́йя, глас 4: Тебе́ подоба́ет песнь, Бо́же, в Сио́не. Стих: Благослови́ши вене́ц ле́та бла́гости Твоея́, Го́споди. И преподобнаго: Блаже́н муж, боя́йся Го́спода, в за́поведех Его́ восхо́щет зело́. Ева́нгелие от Луки́, зача́ло 13: Во вре́мя о́но, вниде Иису́с в Назаре́т, иде́же бе воспита́н: И преподо́бнаго: от Матфе́я, зачало 43: Вся мне предана́ суть: Прича́стен: Благослови́ши вене́ц ле́та бла́гости Твоея́, Го́споди. Други́й: В па́мять ве́чную:

Дневны́й же Апо́стол и Ева́нгелие вычита́ем напреди́.

Подоба́ет ве́дати: Аще прилучи́тся пе́рвый день ме́сяца сентября́ в Неде́лю, оставля́ется слу́жба святы́х жен и пое́тся, егда екклисиа́рх рассудит. Пое́тся же воскре́сна слу́жба со возсле́дованием инди́кта и преподо́бнаго Симео́на си́це.

На ма́лей вече́рни стихи́ры воскре́сны и Богоро́дицы, по обы́чаю. Тропа́рь воскре́сен. Сла́ва, и ны́не, Богоро́дичен.

На вели́цей вече́рни пое́м: Блаже́н муж: кафи́сму всю. На Го́споди, воззва́х: стихи́ры воскре́сны 3, и Анато́лиева еди́на, и инди́кта три, и свята́го три. Сла́ва, инди́кта. И ны́не, Богоро́дичен гла́са. И чте́ний инди́кта два и свята́го еди́но. На лити́и стихи́ра хра́ма и инди́кта стихи́ры стихо́вныя. Сла́ва, свята́го. И ны́не, инди́кта, пи́сана на хвали́тех. На стихо́вне стихи́ры воскре́сны, по алфави́ту, с припе́вы их. Сла́ва, свята́го. И ны́не, инди́кта. На благослове́нии хле́бов: Богоро́дице, Де́во, ра́дуйся: два́жды, и инди́кта еди́ножды. И чте́ние в посла́ниях апо́стольских.

На у́трени, на Бог Госпо́дь: тропа́рь воскре́сен два́жды. Сла́ва, свята́го. И ны́не, инди́кта. По кафи́смах седа́льны воскре́сны с Богоро́дичны их и чте́ние в толкованиях ева́нгельских, е́же на ряду́. По непоро́чнах тропари́, и инакои́, и чте́ние. Степе́нны и проки́мен гла́са. Вся́кое дыха́ние: Ева́нгелие воскре́сное. Воскресе́ние Христо́во: Псало́м 50-й. Стихи́ра воскре́сна. Кано́н воскре́сен со ирмосо́м на 4, и Богоро́дицы на 2, и инди́кта на 4, и свята́го на 4. Катава́сия; Крест начерта́в: По 3-й пе́сня конда́к инди́кта и свята́го, и седа́лен свята́го, два́жды. Сла́ва, и ны́не, инди́кта. И чте́ние жития́ свята́го Симео́на. По 6-й пе́сни конда́к воскре́сен и и́кос. И чтем про́лог. На 9-й пе́сни пое́м Честне́йшую: Свети́лен воскре́сен. Сла́ва, свята́го. И ны́не, инди́кта. На хвали́тех стихи́ры воскре́сны 4 и инди́кта 3, глас 3: Преве́чное Сло́во: с припе́вом инди́кта. Та́же самогла́сен святаго, глас 2, с припе́вом: Честна́ пред Го́сподем/ смерть преподо́бных Его́. От ко́рене блага́го: Сла́ва, стихи́ра ева́нгельская. И ны́не: Преблагослове́нна еси́; Славосло́вие вели́кое. По Трисвято́м тропа́рь воскре́сен то́чию. Ектении́. И отпу́ст. И оглаше́ние. И обычное и схожде́ние. И час 1-й в притво́ре. И коне́чный отпу́ст.

На часа́х глаго́лем тропа́рь воскресен. Сла́ва, инди́кта. И ны́не, Богоро́дичен часо́в. По О́тче наш: конда́к инди́кта. На 3-м часе́ тропа́рь воскре́сен. Сла́ва, свята́го, И ны́не, Богоро́дичен часо́в. По О́тче наш: конда́к свята́го. Та́кожде и на про́чих часа́х, конда́к воскре́сен и инди́кта и свята́го глаго́лем пременя́юще.

На литурги́и блаже́нны воскресла гла́са на 4, и от кано́на инди́кта, песнь 3-я на 4, и свята́го песнь 6-я на 4. По вхо́де тропа́рь воскре́сен, инди́кта и свята́го. Конда́к воскре́сен. Сла́ва, свята́го. И ны́не, инди́кта. Проки́мен, Апо́стол, Аллилу́йя и Ева́нгелие, пре́жде инди́кта, воскре́сно же под зача́ло, та́же свята́го. Прича́стен инди́кта, пото́м свята́го.

Пра́зднование Пресвятой Богоро́дице ра́ди ико́ны Ея, имену́емыя «», во гра́де Каза́ни