ВЕ́ЧЕР

Бла́жен муж: На Го́споди, воззва́х: стихи́ры на 8, глас 4.

Подо́бен: Я́ко до́бля:

Я́ко светоно́сная пала́та/ и одр всезлаты́й, Богоро́дице Влады́чице:/ Ты бо Сло́во/ Бо́жие/ во Твои́х ложесна́х вмести́ла еси́,/ и, ро́ждши нам Со́лнце незаходи́мое,/ Свет невече́рний,/ на́ша пре́жде неразу́мием омраче́нная сердца́/ благора́зумием освети́ла еси́,/ и льсти тьму разори́ла еси́.

Твои́м Рождество́м а́дова кре́пость разори́ся,/ и все челове́чество спасе́но бысть,/ ны́не же Твои́ми моли́твами/ враго́в на́ших шата́ние низложи́,/ и кре́пость их сокруши́,/ и лю́дем Твои́м побе́ды на враги́ да́руй,/ да посрамя́тся вси,/ явля́ющим рабо́м Твои́м зла́я.

Богоро́дице Влады́чице,/ держа́вная Помо́щнице,/ укрепи́ сла́вящую Тя страну́ на враги́,/ да я́коже дре́вле спасла́ еси́ Ца́рский град от нахожде́ния пога́ных,/ та́ко и ны́не спаси́ страну́ нашу от нахожде́ния вра́жия,/ от междоусо́бныя ра́ти,/ от гла́да же и тру́са,/ Де́во Неискусобра́чная./ сего́ ра́ди Тя сла́вит страна́ Русская,/ челове́ком Помо́щницу.

Ны́не страна́ Русская/ о Тебе́ хва́лится и весели́тся,/ име́ющи Тя Засту́пницу непосты́дную/ и сте́ну неруши́му,/ гра́ду на́шему непоколеби́мое основа́ние,/ стра́жа неусы́пна земли́ нашея./ Не преста́й ны́не Твои́ми, Госпоже́, моли́твами/ избавля́ти Твой град и лю́ди от всех бед.

Тебе́ припа́дают, Госпоже́,/ святи́телей сосло́вие и собо́ри,/ совокупле́ние всех, мона́си и прости́и/ и весь наро́д, уми́льно моля́щеся,/ Тебе́ ны́не кла́няющеся,/ и любе́зно целу́юще Твой о́браз,/ и моля́щеся, глаго́лют:/ чту́щий Тя град всегда́ спаса́й от всех бед.

И́ны стихи́ры, глас 8.

Подо́бен: О, пресла́внаго чудесе́:

О, пресла́внаго чудесе́!/ И́же невмести́мый небесы́,/ и А́нгелы сла́вимый,/ и от Серафи́мов пое́мый,/ на зе́млю соше́д, в Твою́ утро́бу вмести́ся/ и ключа́ де́вства не разруши́,/ на́ше естество́, дре́вле от диа́вола му́чимо, изъя́т/ и весь род челове́ческий свободи́,/ Тебе́ же, Госпоже́, Засту́пницу нам дарова́./ Тем не преста́й сохраня́ти/ и спаса́ти ду́ши на́ша, я́ко Милосе́рда.

О, пресла́внаго чудесе́!/ Се заступле́ние прии́де,/ супротивле́ние низложи́ся,/ град наш спаси́,/ враги́ на́ша прожени́/ и нас, рабо́в Твои́х, Твое́ю ми́лостию возвесели́./ О Бо́жия Сло́ва селе́ние!/ Род челове́ческий, чту́щий Тя,/ всегда́ спаса́й от всех бед.

Пода́ждь утеше́ние Твои́м рабо́м, Чи́стая,/ напа́стьми одержи́мым,/ и рог ве́рных вознеси́,/ Богороди́тельнице Мари́е,/ спаси́ моли́твами Твои́ми град Твой неразруши́м,/ и ва́рварская шата́ния низложи́,/ и нас, рабо́в Твои́х, Безневе́стная,/ хва́лящих Тя, спаси́.

Сла́ва, и ны́не, глас 8:

Прииди́те, русстии собо́ри,/ прииди́те, ве́рных совоку́пле́ния,/ в сре́тение Цари́цы Богоотрокови́цы:/ се бо гряде́т Цари́ца Свои́м о́бразом честны́м,/ спасти́ град и лю́ди, от сопоста́тных пога́н невоева́ны./ О, чу́до ве́лие и пресла́вное/ и пребо́льши ума́!/ Ка́ко прише́ствием честна́го Ея́ о́браза сопроти́внии побежда́ются/ и оте́чество на́ше утвержда́ется?/ Нощь упраздни́ся, и день прибли́жися./ Его́же ра́ди Тебе́, вину́ спасе́ния на́шего, естество́ на́ше прие́млет/ и вся тварь воспева́ет, Ти зову́щи:/ ра́дуйся, Предста́тельнице, и По́мощнице,/ и спасе́ние душ на́ших.

Вход. Проки́мен дне. Чтения три.

Бы́тия́ чте́ние (глава́ 28):

Изы́де Иа́ков от студенца́ кля́твеннаго и и́де в Харра́нь./ И обре́те ме́сто, и спа та́мо,/ за́йде бо со́лнце;/ и взят от ка́мения ме́ста того́,/ и положи́ возгла́вие себе́,/ и спа на ме́сте о́ном, и сон ви́де./ И се ле́ствица, утвержде́на на земли́,/ ея́же глава́ досяза́ше до небе́с,/ и А́нгели Бо́жии восхожда́ху и низхожда́ху по ней./ Госпо́дь же утвержда́шеся на ней и рече́:/ Аз Бог Авраа́мов, отца́ твоего́, и Бог Исаа́ков, не бо́йся./ Земля́ , иде́же ты спи́ши на ней,/ тебе́ дам ю́ и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки,/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́, а́може а́ще по́йдеши./ И возвращу́ тя в зе́млю си́ю, я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́ и рече́:/ я́ко есть Госпо́дь на ме́сте сем, аз же не ве́дех./ И у́боя́ся, и рече́:/ я́ко стра́шно ме́сто сие́,/ несть сие́, но дом Бо́жий,/ и сия́ врата́ Небе́сная.

Проро́чества Иезекйи́лева чте́ние (главы́ 43 и 44):

Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы, глаго́лет Адонаи́ Госпо́дь./ И обрати́ мя на путь врат святы́х вне́шних, зря́щих на восто́ки, и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их,/ я́ко Госпо́дь, Бог Изра́илев, про́йдет ими, и бу́дут затворе́на./ Я́ко игу́мен сядет в них сне́сти́ хлеб,/ по пути́ ела́мских врат вни́дет и по пути́ его́ изы́дет./ И введе́ мя по пути́ врат святы́х, су́щих к се́веру, пря́мо хра́му,/ и ви́дех, и се испо́лнь сла́вы храм Го́спо́день.

При́тчей чте́ние (глава́ 9):

Прему́дрость созда́ себе́ дом и утверди́ столпо́в седмь./ Закла́ своя́ же́ртвенная, и раствори́ в чаше свое́й вино́,/ и угото́ва свою́ трапе́зу./ Посла́ своя́ рабы́, созыва́ющи с высо́ким пропове́данием на ча́шу, глаго́лющи:/ и́же есть безу́мен, да уклони́тся ко мне./ И тре́бующим ума́ рече́:/ прииди́те, яди́те мой хлеб и пи́йте вино́, е́же раствори́х вам./ Оста́вите безу́мие, и жи́ви бу́дете./ И взыщи́те ра́зума, да поживете́/ и испра́вите ра́зум в ве́дении./ Наказу́яй злы́я прии́мет себе́ безче́стие,/ облича́яй же нечести́ваго опоро́чит себе́,/ обличе́ние бо нечести́вому – ра́ны ему́./ Не облича́й злых, да не возненави́дят тебе́,/ облича́й прему́дра, и возлю́бит тя./ Даждь прему́дрому вину́, и прему́дрший бу́дет./ Сказу́й пра́ведному, и приложи́т приима́ти./ Нача́ло прему́дрости – страх Госпо́день,/ и сове́т святы́х – ра́зум./ Разуме́ти бо зако́н по́мысла есть блага́го:/ сим бо о́бразом мно́гое поживе́ши вре́мя,/ и приложа́тся тебе́ ле́та живота́.

На лити́и стихи́ры, глас 2. Самогласны:

Я́ко вои́стинну дре́вняго киво́та пречестне́е,/ егда́ Дави́д, собра́в чи́ны, ликовствова́ше,/ ны́не Твоя́, Богоро́дице, ико́на,/ Е́йже предстоя́т архиере́ев собо́ри,/ и с чи́нми А́нгел,/ и все христоимени́тых люде́й мно́жество/ досто́йно блажа́т Тя, Ма́терь Бо́жию,/ и прославля́ют раболе́пно,/ и че́ствуют, и покланя́ются,/ и мо́лятся Тебе́ по Бо́зе:/ да мир умири́ши в правосла́вии,/ и оте́чество утверди́ши,/ и спасе́ши от всех зол Твоя́ рабы́,/ я́ко еди́на Благосло́венная.

Предстоя́т Ти, Госпоже́ Богоро́дице,/ пред Твои́м, Пречи́стая, о́бразом,/ архиере́ев сосло́вие и вси лю́дие,/ мона́си и прости́и,/ ве́дуще Тя вои́стинну Помо́щницу си́льну и непобеди́му,/ моле́ния Тебе́ приноси́ти от всея́ души́ подвиза́ются/ и поуща́ют на моли́тву к Бо́гу,/ тре́бующе Твое́й по́мощи,/ да простре́ши богоно́сныя Твоя́ ру́ки/ и умо́лиши за мир./ Вонми́ и услы́ши, Влады́чице,/ и пода́ждь утеше́ние рабо́м Твои́м,/ до́ндеже не одоле́ют ны грехи́ на́ша тя́жкия и лю́тыя:/ Твое́й бо всегда́ тре́буем вси по́мощи.

Глас 8: Пе́рвее написа́вшейся Твое́й ико́не/ ева́нгельских та́ин благове́стником/ и к Тебе́, Цари́це, принесе́нней,/ да усво́иши ту/ и си́льну соде́лаеши спасти́ че́ствующия Тя./ И пора́довалася еси́, я́ко су́щи Ми́лостива,/ спасе́ния на́шего Соде́тельница,/ я́ко уста́ и глас ико́не бы́вше,/ я́коже и Бо́га внегда́ зачина́ющи во чре́ве,/ песнь воспе́ла еси́:/ се отны́не ублажа́т Мя вси ро́ди./ И, на ту зря́щи, глаго́лала еси́ со вла́стию:/ с сим о́бразом благода́ть моя́ и си́ла./ И мы и́стинно ве́руем, я́ко се рекла́ еси́, Госпоже́:/ сим о́бразом с на́ми еси́./ Тем благогове́йно предстоя́ще, покланя́емся Тебе́, раби́ Твои́:/ посети́ ны Твои́ми Ма́терними щедро́тами.

Глас 7: Гора́ еси́ вели́кая и пресла́вная,/ па́че горы Сина́йския, Богоро́дице./ Она бо, не терпя́ше сни́тия сла́вы Бо́жия, во о́бразех и се́нех,/ огне́м возгара́шеся,/ и гро́ми и мо́лнии та́мо бы́ша./ Ты же, весь Боже́ственный огнь сущ,/ Бо́жие Сло́во во чре́ве Твое́м неопа́льно носи́ла еси́/ и от сосе́ц Твои́х млеко́м питала еси́ ма́нием Нося́щаго вся./ И Ма́тернее дерзнове́ние к Нему́ иму́щи,/ помози́, Влады́чице, ве́рно пра́зднующим Твой честны́й пра́здник/ и не забу́ди, ми́лостивно посеща́ющи,/ прия́ла бо еси́ от Бо́га дар/ стро́ити и покры́вати христоимени́тое ста́до, рабы́ Твоя́.

Сла́ва, и ны́не, глас 6:

Тебе́ вси роди челове́честии/ хва́льныя да́ры прино́сят, Влады́чице,/ и моля́тся я́ко Цари́це и Ма́тери Бо́жии,/ проро́цы Тя прему́дро пропове́даша,/ леви́ти благослови́ша,/ апо́столи и му́ченицы испове́даша,/ вся сосло́вия покланя́ются,/ архиере́е пропове́дают,/ мона́си и прости́и благогове́ют,/ бога́тии и убо́зии, сироты́ и вдовы́,/ и всяк во́зраст, и вся́ко преспе́яние,/ ста́рческое и младе́нческое,/ под кров Твой держа́вный с ве́рою прибега́ем:/ покрый и соблюди́, Госпоже́, моли́твами Твои́ми/ и спаси́ от бед ду́ши на́ша.

На стихо́вне стихи́ры, глас 8.

Подо́бен: Что вас нарече́м:

Что Тя нарече́м, Богоро́дице Влады́чице?/ Ко́рень ли Иессе́ов?/ от Тебе́ бо нам Христо́с, я́ко цвет, изы́де./ Ма́нну ли, ве́рных сердца́ услажда́ющую Твои́м Рождество́м?/ Руно́ Гедео́ново?/ На Тя бо Христо́с, я́ко роса́, сни́де/ и Тя Засту́пницу нам показа́./ Его́же моли́ спасти́ ду́ши на́ша.

Стих: Слы́ши, Дщи, и виждь,/ и приклони́ у́хо Твое́.

Да вси похва́лим, ве́рнии,/ таково́ нам заступле́ние да́вшую непосты́дное,/ и непребори́мое на враги́ одоле́ние побе́дное,/ и нам всем спасе́ние,/ и гра́ду на́шему сте́ну и покро́в,/ и основа́ние непоколеби́мое,/ и оте́честву на́шему на сопоста́ты пособие,/ и непобеди́мую побе́ду.

Стих: Кля́тся Госпо́дь Дави́ду и́стиною/ и не отве́ржется ея.

Досто́йно Тя блажи́т челове́ческий род, Чи́стая,/ я́ко спаса́еши чту́щия Тя от всех бед./ Ты бо, Госпоже́ Де́во Чи́стая,/ Засту́пница непосты́дная Твои́м рабо́м показа́лася еси́/ и Моли́твенница тепла́ к Бо́гу/ от находя́щих скорбе́й./ Тобо́ю ва́рварская шата́ния разруша́ются/ и стре́лы вра́жия упражня́ются,/ и, раби́ Твои́, от одержа́щих бед изба́влышеся,/ Тя, Богома́ти, пе́сньми ублажа́ем.

Сла́ва, и ны́не, глас то́йже. Самогла́сен:

Да ра́дуются русстии собо́ри,/ да лико́вствует естество́,/ я́ко Твоего́, Чи́стая, честна́го о́браза прише́ствием/ град наш спаса́ется,/ раби́ Твои́, от одержа́щия ну́жды изба́вльшеся,/ Тебе́, Чи́стая, взыва́ют:/ ра́дуйся, до́брых вино́вная,/ и Засту́пнице непосты́дная,/ и спасе́ние душ на́ших.

Тропа́рь, глас 4:

Днесь све́тло красу́ется сла́внейший град Москва́,/ я́ко зарю́ со́лнечную, восприе́мши, Влады́чице,/ чудотво́рную Твою́ ико́ну,/ к не́йже ны́не мы притека́юще и моля́щеся Тебе́, взыва́ем си́це:/ о пречу́дная Влады́чице Богоро́дице!/ Моли́ся из Тебе́ воплоще́нному Христу́ Бо́гу на́шему,/ да изба́вит град сей и вся гра́ды и страны́ христиа́нския/ невреди́мы от всех навет вра́жиих/ и спасе́т ду́ши на́ша, я́ко Милосе́рд.

НА У́ТРЕНИ

По 1-й стихоло́гии седа́лен, глас 4.

Подо́бен: Удиви́ся Ио́сиф:

Боже́ственными заря́ми просвети́ пою́щия Тя и умы́ утверди́, Непоро́чная Де́во,/ кре́пкая Засту́пнице ми́ра всего́./ Те́мже торжеству́ем вси, любо́вию пою́ще Тя и прише́ствие Твоего́ о́браза сла́вяще:/ не преста́й, Де́во, моли́твами Твои́ми спаса́ющи рабы́ Твоя́ от вся́кия беды́,/ еди́на Благослове́нная.

Сла́ва, и ны́не, Богоро́дичен:

Неве́сто Неискусобра́чная, прему́дрости село́ показа́ся утро́ба Твоя́ Бо́га Сло́ва:/ Ты бо еди́на, Ма́ти Бо́жия, благи́х Хода́таица яви́вшися,/ вся́ких страсте́й изба́ви рабы́ Твоя́, непреста́нно воспева́ющия сла́ву Твою́.

По 2-й стихоло́гии седа́лен, глас 3.

Подо́бен: Красоте́ де́вства:

Я́ко звезда́ многосве́тлая, взы́де от восто́ка к за́паду Твой о́браз, Богома́ти,/ озари́ ско́рби тьмо́ю одержи́мых, и преще́ния враг изба́ви,/ и, вся тех се́ти разруши́в, яви́ся Предста́тельница кре́пкая,/ ору́жие непобеди́мое на враги́ ми́ру всему́:/ из Тебе́ бо всех Влады́ка плоть прии́м, вся челове́ки обожи́.

Сла́ва, и ны́не, то́йже.

По полиеле́и припе́в:

Досто́йно есть велича́ти Тя, Богоро́дице,/ честне́йшую Херуви́м/ и сла́внейшую без сравне́ния Серафи́м.

Псало́м избра́нный: Бо́же, суд Твой царе́ви даждь:

Таже Седа́лен, глас 1:

Блаже́нна еси́ Ты, Богоро́дице Чи́стая, вели́чествия Твоя́ кто воспе́ти мо́жет?/ Е́же чу́до стра́шно и чу́до ве́лие соде́явши,/ Твои́ми моли́твами, Богома́ти, чту́щий Тя град всегда́ свобожда́ется от всех бед,/ тьмы и меча́, пога́ных плене́ния и вся́каго гнева./ Те́мже мы, зря́ще честно́е о́браза Твоего́ прише́ствие,/ хва́лим, я́ко Цари́цу воспеваю́ще, ве́рнии,/ словесы́ Тя, Чи́стая, блажа́ще, глаго́лем:/ Богоро́дице Чи́стая, моли́ воплоще́ннаго из Тебе́ спасти́ся душа́м на́шим.

Сла́ва, и ны́не, то́йже.

Степенна, 1-й антифо́н 4-го гла́са. Проки́мен: Помяну́ и́мя Твое́/ во вся́ком ро́де и ро́де. Стих: Слы́ши, Дщи, и виждь, и приклони́ ухо Твое́. Вся́кое дыха́ние: Ева́нгелие от Луки́, зача́ло 4.

По 50-м псалме́ стихи́ра, глас 2:

Гото́вися, всечестны́й гра́де Москва,/ на сре́тение Де́вы Богома́тере:/ се бо гряде́т к тебе́/ све́тлое вели́кое со́лнце от врат затворе́нных./ Тьма у́бо ско́рби твое́й отгоня́ется,/ свет же твоего́ весе́лия исполня́ется,/ бу́ря сопроти́вных ве́тров уставля́ется,/ му́жие и свяще́нницы в печа́лех сла́дкое утеше́ние прие́млют,/ Цари́це еди́ной покланя́ются/ и, моля́щеся, глаго́лют:/ Пречи́стая Де́во,/ мольба́ми Твои́ми изба́ви рабы́ Твоя́/ от ве́яния беды́ и печа́ли.

Кано́н похвале́ Богоро́дицы со ирмосо́м на 6 и пра́здника, глас 4, на 8.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Просвети́, Влады́чице, ду́ши на́ша заре́ю Боже́ственною, па́че ума́ благода́тию Твое́ю,/ и незави́стный дар пода́ждь ми воспе́ти Тя,/ я́ко Помо́щницу челове́ческому существу́, Препе́тая,/ ве́рное заступле́ние, на враги́ побе́ду оте́честву на́шему.

Прииди́те, собери́теся, Русстии собо́ри,/ в пречестны́й храм Всенепоро́чныя Влады́чицы/ и возопи́йте, уми́льно моля́щеся, к честно́му о́бразу взира́юще:/ Богоро́дице Безневе́стная, хваля́щия Тя спаси́.

Твой, Богома́ти, всечестны́й о́браз/ Богогла́сный Ева́нгелия Христо́ва списа́тель, пребоже́ственный Лука́, написа́в,/ Творца́ всех на Твои́х честны́х рука́х вообрази́,/ к Нему́же притека́ющия напа́сти и печа́ли избавля́еши/ и вся покрыва́еши Твое́ю ми́лостию.

Храм прекра́сный, Соде́тель всех еди́ну Тя обре́т,/ в Тя всели́ся и челове́ки обожи́./ К Нему́же за ны, Богоро́дице, моли́ся,/ спасти́ ны от пога́ных плене́ния и вся́кия ины́я ско́рби, находя́щия на ны,/ да Твоего́ днесь о́браза сре́тение всече́стно пра́зднуем.

Песнь 3

Ирмо́с: Твоя́ песносло́вцы, Богоро́дице/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Все помышлени́е отве́ргше, Богому́дрии, прииди́те в сре́тение прекра́сныя зари́,/ держа́щия пресве́тлую лучу́, вся просвеща́ющую/ и ми́лостию весь мир обога́щшую.

Твою́, Богома́ти, всечестну́ю и чудотво́рную ико́ну наша лю́ди стяжа́вше,/ я́ко заступле́ние кре́пко и сте́ну неруши́му,/ моля́тся Ти, на враги́ побе́ду дарова́ти оте́честву на́шему.

О́блак светоза́рный показа́ся,/ росо́ю благода́ти вся омыва́ющи теле́сныя скве́рны/ и ду́ши просвеща́ющи, еди́на Всепе́тая.

Дре́во многопло́дно яви́лася еси́, пи́щею неги́блющею вся насыща́ющи,/ ду́ши же веселя́щи, Богоневе́сто Чи́стая,/ добродея́ния всем источи́/ и от скорбе́й ну́ждных спаси́.

Ин кондак, глас 8.

Подо́бен: Взбра́нной:

К Взбра́нней Воево́де и Засту́пнице, Де́ве и Богоро́дице,/ в чисте́й со́вести, ве́рою утверди́вшеся, ру́сстии наро́ди,/ невозвра́тно наде́жду иму́ще, притеце́м,/ к чудотво́рному Ея́ и пречи́стому образу́, и возопие́м Е́й:/ ра́дуйся, Неве́сто Неневе́стная.

Седа́лен, глас 4.

Подо́бен: Удиви́ся Ио́сиф:

Наро́ди боголюби́вии, прииди́те в сре́тение:/ се бо приходи́т Де́ва, всех проро́ков превы́шши,/ честны́м Свои́м о́бразом, Жи́знодателя ми́ру на рука́х име́ющи,/ град Свой сохраня́ти стра́ждущий, ва́рварскую де́рзость низложи́ти,/ вообрази́тися всем Храни́тельница тверда́,/ держа́ва и огражде́ние ве́рно моля́щимся.

Сла́ва, и ны́не, то́йже.

Песнь 4

Ирмо́с: Неизсле́дный Бо́жий Сове́т,/ еже от Де́вы воплоще́ния/ Тебе́, Вы́шняго,/ проро́к Авваку́м усмотря́я, зовя́ше:/ Сла́ва си́ле Твое́й, Го́споди.

Го́ру преве́лию, ю́же Дании́л ви́де, от нея́же ка́мень отсече́ся без руки́/ и вся собла́зны истни́, ве́рныя же просвети́,/ и́стинное светоза́рное со́лнце показа́, луча́ми просвеща́ющи, Богоро́дице Присноде́во.

Вооружа́ются на лю́ди Твоя́, Чи́стая Богоро́дице, сы́нове Ага́рины,/ злый сове́т творя́ще, гра́ды разоря́юще, ве́рныя же погубля́юще,/ но Ты, Всепе́тая, Твое́ю ми́лостию вся низложи́,/ исма́ильтяны враги́ покаря́ющи оте́честву на́шему.

Не́бо одушевле́но, еди́на Богома́ти, Свет ве́лий прие́мши,/ вся просвеща́ющи, тьму держа́щих бед разжени́/ и нас Вы́шняго прича́стия сподо́би.

Дави́д пред киво́том ликовству́ет, леви́ти же воспева́ют,/ па́че же пред Тобо́ю, Богороди́тельнице Чи́стая,/ Руси хвала́ми я́ко Цари́цу воспева́ет,/ гласы моле́бными приле́жно Ти вопию́щи:/ ра́дуйся, Засту́пнице гра́да на́шего.

Песнь 5

Ирмо́с: У́жасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Тебе́, Богома́ти, вели́кий во проро́цех Иса́ия прови́де ду́хом,/ Угль име́ющу во чре́ве, ве́рныя просвеща́ющ и собла́зны вся пожига́ющ,/ спаса́я род челове́ч.

Жезл Ааро́нов прозя́бла еси́/ и зло́бный ко́рень исто́ргнула еси́, Де́во Богоневе́стная,/ Жизнода́теля ро́ждши ми́ру,/ Его́же моли́ сему́ гра́ду спасти́ся от мно́гих напа́стей.

Ны́не у́бо приступи́те с весе́лием, Богоизбра́нное ста́до, Русстии собо́ри,/ ко Всечестне́й Бо́жией Ма́тери и честны́й Ея́ о́браз любе́зно приими́те:/ се бо благода́ть неисчерпа́емая, во́ды точа́щи Боже́ственныя неоску́дно,/ Ю́же, ве́рнии, почти́м и честно́му образу́ Ея́ поклони́мся.

От ко́рене Иессе́ева дре́во возрасте́ всем животное,/ Плод у́бо прозя́бла еси́ во утро́бе Твое́й, Де́во Чи́стая,/ вся лю́ди насыща́ющи Твое́ю ми́лостию.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Ней ро́ждшагося Бо́га сла́вим.

От Тебе́, Богома́ти, истече́ поток сла́дкий,/ вся напая́я лю́ди, душ измыва́я скве́рны, Богоро́дице Влады́чице,/ спаси́ всех, покланя́ющихся ве́рно честно́му о́бразу Твоему́.

Вси у́бо, совоку́пльшеся вку́пе, воспое́м Чи́стую Де́ву,/ Богоизбра́нную ле́ствицу Иа́ковлю, Гедео́ново же руно́, ра́дости Хода́таицу,/ кре́пость и похвалу́ спаса́емых, Богороди́тельницу Чи́стую.

Се ны́не весе́лие приближа́ется,/ скорбь же потребля́ется, ве́рнии спаса́ются,/ я́ко от исто́чника ра́дость почерпа́юще, вы́ну хвала́ми воспева́ют:/ ра́дуйся, Чи́стая Влады́чице, спасе́ния на́шего нача́ток/ и всех ве́рных стена́ и похвала́.

Пода́ждь нам по́мощь мольба́ми Твои́ми, Пречи́стая Богоро́дице,/ ско́рби у́бо нахо́дят на ны и печа́ли умножа́ются, врази́ ополча́ются,/ но Ты, Пречи́стая, предста́вши, изба́ви,/ враго́в на́ших шата́ние низложи́, на враги́ побе́ду да́руй,/ да посра́мятся вси, явля́ющии рабо́м Твои́м зла́я.

Кондак, глас 8.

Подо́бен: Взбра́нной:

Взбра́нной Воево́де победи́тельная,/ я́ко изба́вльшеся от злых/ прише́ствием Твоего́ честна́го о́браза, Влады́чице Богоро́дице,/ све́тло сотворя́ем пра́зднество сре́тения Твоего́ и обы́чно зове́м Ти:/ ра́дуйся, Неве́сто Неневе́стная.

И́кос:

А́нгел Предста́тель с Небесе́ по́слан бысть рещи́ Богоро́дице: ра́дуйся,/ и, со безпло́тным гла́сом воплоща́ема Тя зря, Го́споди, ужаса́шеся,/ и стоя́ше, зовы́й к Ней такова́я:/ ра́дуйся, Е́юже ра́дость возсия́ет;/ ра́дуйся, Ею́же кля́тва исче́знет./ Ра́дуйся, па́дшаго Ада́ма воззва́ние;/ ра́дуйся, слез Е́виных избавле́ние./ Ра́дуйся, высото́ неудобовосходи́мая челове́ческими по́мыслы;/ ра́дуйся, глубино́ неудобозри́мая и а́нгельскима очи́ма./ Ра́дуйся, я́ко еси́ Царе́во седа́лище;/ ра́дуйся, я́ко но́сиши Нося́щаго вся./ Ра́дуйся, звездо́, явля́ющая со́лнце;/ ра́дуйся, утро́бо Боже́ственнаго воплоще́ния./ Ра́дуйся, Ею́же обновля́ется тварь;/ ра́дуйся, Ею́же покланя́емся Творцу́./ Ра́дуйся, Неве́сто Неневе́стная.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Я́ко порфи́рою и ви́ссом, червле́ною хлами́дою, Де́во Богоро́дице Влады́чице,/ град Твой Тобо́ю оде́явся, Христа́ велича́ет/ и прише́ствие честна́го Твоего́ о́браза сла́вит,/ я́вльшася па́че луч со́лнечных/ и немра́чным све́том просвеща́юща велегла́сно хваля́щия Тя.

Скрижа́ли, богопи́санныя пе́рстом Ду́ха, в я́рости Моисе́й сокруши́;/ но в Тебе́, Чи́стая, пресла́вный Творе́ц всели́вся, невре́дну Тя сохрани́./ Ему́же пое́м:/ оте́ц на́ших Бо́же, благослове́н еси́.

Приими́ Твои́х раб мольбы, Пречи́стая Де́во Богоро́дице,/ непостоя́нную бу́рю ути́ши моли́твами Твои́ми/ и сове́ты проти́вных враго́в разжени́,/ напада́ющих на ста́до Твое́, Всенепоро́чная Влады́чице.

Тебе́ еди́ну Помо́щницу ро́ду челове́ческому, Богоро́дице Мари́е,/ Зижди́тель всех рождество́м Свои́м назна́мена и проро́цы прообрази́ша:/ ов Тя дверь, ин же Тя ло́жницу Бо́жию;/ мы же Тя воспева́ем Роди́тельницу Бо́жию, и Хода́таицу к Бо́гу,/ и Засту́пницу от всех зол, находя́щих на ны.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Ка́ко Тя, Де́во, по достоя́нию воспое́м?/ По́мощь тве́рдую, Храни́тельницу жи́зни на́шея/ и Хода́таицу непрело́жну к Сы́ну Твоему́ и Бо́гу на́шему,/ Его́же воспева́ем и превозно́сим во ве́ки.

Цве́те прекра́сный и во́ня пи́щная, облагоуха́еши, Богоро́дице Мари́е, вся,/ и спаса́еши, и от неду́г исцеля́еши, бе́сы прогоня́еши./ Те́мже Ти вопие́м:/ ра́дуйся, Помо́щнице всем моля́щимся ве́рным.

Столп я́вльшися, Богома́ти, нахожде́ния проти́вных отгоня́:/ Тя бо чту́щим се́рдцем те́плым яви́лася еси́ стена́, и огражде́ние,/ и спаси́тельное прибе́жище.

Дави́дски воспева́ем Ти песнь, го́ру Бо́жию Тя имену́юще, Пречи́стая Де́во:/ Исто́чника бо су́щим приснотеку́щаго источи́ла еси́./ Его́же пое́м и превозно́сим во ве́ки.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Ра́дости Хода́таице, возвесели́ наш смысл вопи́ти Тебе́, Богоро́дице Чи́стая:/ ра́дуйся, Храни́тельнице на́ша,/ держа́во, и огражде́ние, и спаси́тельное прибе́жище.

Да восхваля́т согла́сно Тя не́бо и земля́ ,/ я́ко Жизнода́теля ми́ру ро́ждши:/ ра́дуйся, ти́хое приста́нище, живо́тныя воды исто́чниче неисчерпа́емый, Влады́чице.

Собра́вшеся днесь, лю́дие, во сре́тение Пречи́стыя Бо́жия Ма́тере,/ Я́же виногра́да мы́сленнаго грезн нося́щи,/ вино́ источа́ющ всегда́ и весе́лия всех исполня́ющ,/ я́ко Богоро́дицу по до́лгу сла́вим.

Боже́ственная река вод живо́тных, вся удо́лия напоя́ющи,/ на́ша собла́зны, Богома́ти, погрузи́ и до конца́ потре́би́.

Свети́лен.

Подо́бен: Посети́л ны:

Да почти́тся днесь Богома́ти, Зижди́теля ро́ждшая,/ ра́йских две́рей отверзе́ние и всего́ ми́ра очище́ние,/ побе́ду да́вшая христолюби́вому во́инству,/ о Сей бо проро́цы глаго́лаша, Той поклони́мся.

Сла́ва, и ны́не:

Пресве́тлая днесь ми́лостивная све́тлость,/ Бо́жия благода́ть, вся ра́достно одождя́ет небе́сными ту́чами,/ на стези́ сла́дкия направля́ющи, Богоро́дице Влады́чице,/ всех, позна́вших Тя земны́х, Присноде́во,/ ны́не бо вся земля́ наша ра́дуется, ве́рою Тя сла́вящи.

На хвали́тех стихи́ры, на 4, глас 4.

Подо́бен: Я́ко до́бля:

Наста́вницу Тя заблу́ждшим/ и приста́нище спаси́тельное/ в пучи́не, Влады́чице, и в бу́ри,/ и во искуше́ниих, и в печа́лех/ Христо́с Тя всем показа́,/ Сын Твой и Бог наш,/ ве́рно приходя́щим к Тебе́./ Его́же моли́ от злых бед изба́витися/ ве́дущим Богоро́дицу Тя вои́стинну.

Тлени́е потре́би́ла еси́/ и боле́знь, Всепе́тая, дре́внюю всю Рождество́м Твои́м:/ Живо́т бо ми́рови ро́ждши/ и сме́рть разруши́вши,/ боле́зни, Блага́я, исцеля́еши/ ве́рно о́браза Твоего́ чудеса́ воспева́ющих,/ и любо́вию кла́няющихся,/ и чту́щих Тя, Святу́ю и честне́йшую Наста́вницу.

Я́ко исто́чник Тя, Препе́тая,/ живота́ и благода́ти, источа́ющий чудеса́/ и цельбу́ страсте́й душе́вных и теле́сных,/ я́ко быстрину́ оставле́ния,/ ми́лости щедро́т неисчерпа́емое мо́ре ви́дяще,/ Тебе́ припа́даем, вси, оскорбля́емии ны́не,/ прося́ще вси разреше́ния бу́дущаго муче́ния.

Сла́ва, и ны́не, глас 8:

И́же на Херуви́мех е́здяй/ и пева́емый от Серафи́м,/ сшел еси́ с Небесе́ проро́чески, Бла́же,/ и всели́лся еси́ во утро́бу Чи́стыя Богоотрокови́цы,/ Ю́же А́нгели воспе́ша та́йно:/ ра́дуйся, ра́достная Де́во,/ необъя́тнаго я́ко Бо́га во чре́ве Твое́м прие́мши па́че сло́ва,/ от неве́рия в ве́ру мир преводя́ща./ Сла́ва Тебе́, Христе́, еди́не Ми́лостиве и Человеколю́бче.

Славосло́вие вели́кое. И отпу́ст.

НА ЛИТУРГИ́И

Бла́женны, от кано́на песни 3-я и 6-я. Служба вся Богоро́дицы.

Моли́тва

О Всеми́лостивая Госпоже́ Богоро́дице, Небе́сная Цари́це, Всемо́щная Засту́пнице, непосты́дное на́ше Упова́ние! Благодаря́ще Тя о всех вели́ких благодея́ниях, в ро́ды родо́в лю́дем нашим от Тебе́ бы́вших, пред пречи́стым о́бразом Твои́м моли́м Тя: сохрани́ град сей (или: весь си́ю, или: святу́ю оби́тель сию́) и предстоя́щия рабы́ Твоя́ и всю Зе́млю Ру́сскую от гла́да, губи́тельства, земли́ трясе́ния, пото́па, огня́, меча́, наше́ствия иноплеме́нных и междоусо́бныя бра́ни. Сохрани́ и спаси́, Госпоже́, Господи́на и Отца́ на́шего (и́мя рек), Блаженнейшего Митрополита Киевскаго и всея Украины, и Господи́на на́шего (и́мя рек), Преосвяще́ннейшаго (епископа, или: архиепи́скопа, или: митрополи́та)  и вся Преосвяще́нныя митрополи́ты, архиепи́скопы и епи́скопы правосла́вныя. Даждь им Церковью Украинскою до́бре упра́вити, ве́рныя о́вцы Христо́вы неги́блемы соблюсти́. Помяни́, Влады́чице, и весь свяще́ннический и мона́шеский чин и спасе́ние их, согре́й сердца́ их ре́вностию Бо́зе и досто́йно зва́ния своего́ ходи́ти коего́ждо укрепи́. Спаси́, Госпоже́, и поми́луй и вся рабы́ Твоя́ и да́руй нам путь земна́го по́прища без поро́ка преити́. Утверди́ нас в ве́ре Христо́вей и во усе́рдии ко Правосла́вней Це́ркви, вложи́ в сердца́ на́ша дух стра́ха Бо́жия, дух благоче́стия, дух смире́ния, в напа́стех терпе́ние нам пода́ждь, во благоде́нствии – воздержа́ние, к бли́жним любо́вь, ко враго́м всепроще́ние, в до́брых де́лех преуспе́яние. Изба́ви нас от вся́каго искуше́ния и от окамене́ннаго нечу́вствия, в стра́шный же день Суда́ сподо́би нас хода́тайством Твои́м ста́ти одесну́ю Сы́на Твоего́, Христа́ Бо́га на́шего, Ему́же подо́бает вся́кая Сла́ва, честь и поклоне́ние со Отце́м и Святы́м Ду́хом, ны́не и при́сно и во ве́ки веков. Ами́нь.

Пра́зднование Пресвяте́й Влады́чице на́шей Богоро́дице и Присноде́ве Мари́и ра́ди ико́ны Ея́, имену́емыя «Еле́цкая-Влади́мирская»

НА ВЕЧЕ́РНИ

На Го́споди, воззва́х: стихи́ры святы́х, глас 4.

Подо́бен: Я́ко до́бля:

Пречестно́е страда́ние,/ до́блественная боре́ния му́чеников, сла́вне, узре́в,/ самово́льне вда́лся еси́ к по́двигом му́жеским умо́м,/ не пощади́в пло́ти любве́ ра́ди Боже́ственныя./ Те́мже проше́л еси́ до́блественныя по́двиги,/ смири́в го́рдость сопроти́внаго,/ Адриа́не терпеливоду́шне.

В темни́цах затворя́емь,/ волу́ями жи́лами бие́мь,/ желе́зами же, сла́вне, отягчева́емь/ и ка́мением сокруша́емь,/ со мно́жеством му́ченик,/ с ни́миже блага́я Небе́сная получи́л еси́,/ споспе́шницу супру́жницу име́я Ната́лию,/ на Бо́га упова́вшую,/ Адриа́не до́блественный.

Ада́ма супру́жница из рая изгна́/ сове́том змии́ным;/ Ната́лия же Адриа́на в рай прему́дро введе́,/ свяще́нными бесе́дами,/ уче́нии наказу́ющи/ боле́зненная страда́ния терпе́ти,/ Небе́сная воздая́ния хода́тайствующи/ и ве́чнующую сла́ву.

Сла́ва, глас 6:

О супру́же святы́й и избра́нный Го́споду!/ О версто́ изря́дная и блаже́нная Бо́гу!/ О вожделе́нная дво́ице и возлю́бленная Христу́!/ Кто не удиви́тся о сем,/ услы́шав сих я́же вы́ше челове́ка дея́ния?/ Ка́ко же́нский пол вмужи́ся на го́рькаго мучи́теля/ и своего́ све́рстника укрепи́/ не вда́тися лю́тым,/ но о ве́ре избра́ти, е́же умре́ти па́че, не́же жи́ти?/ О, богоплете́нных глаго́л Ната́лии прему́дрыя!/ О, поуче́ний Боже́ственных,/ небеса́ преше́дших и к самому́ Престо́лу Вели́каго Царя́/ Адриа́на сла́внаго зна́ема поста́вльших!/ Но, о дво́ице свята́я,/ о нас Бо́гу моли́теся,/ любо́вию творя́щих па́мять ва́шу,/ напа́стей изба́вити и вся́кия ско́рби.

И ны́не, Богоро́дичен или́ Крестобогоро́дичен.

Подо́бен: Всю отложи́вше:

Ору́жие, я́коже рече́ Симео́н,/ се́рдце Твое́ про́йде,/ Пречи́стая Влады́чице,/ егда́ узре́ла еси́ из Тебе́ Возсия́вшаго/ неизрече́нным сло́вом,/ от беззако́нных я́ко осужде́на,/ возноси́ма на Крест,/ о́цтом и же́лчию напая́емаго,/ ре́бра же пробода́ема,/ и ру́це и но́зе пригвожда́емы,/ и, рыда́ющи, восклица́ше,/ ма́терски вопию́щи:/ что сие́, Ча́до Сладча́йшее, но́вое та́инство?

На стихо́вне Окто́иха.

Сла́ва, глас 1. Ефре́ма Кари́я:

Ре́вность му́жа благочести́ва/ привлече́ жену боголюби́вую к поуче́нию све́тлу;/ Адриа́н бо всеизря́дный,/ Ната́лииными глаго́лы приведе́ся,/ страда́ния тече́ние соверши́л есть./ О, жены́ боголюби́выя нра́ва!/ Не я́коже бо Е́ва принесе́ Ада́му тле́ние,/ но жи́знь несконча́ему супру́гу исхода́таи./ Си́ю с му́жем похваля́юще, возопие́м Христу́:/ даждь нам по́мощь моли́твами святы́х Твои́х.

И ны́не, Богоро́дичен или́ Крестобогоро́дичен.

Подо́бен: Небе́сных чино́в:

У Креста предстоя́щи Сы́на и Бо́га Твоего́/ и долготерпе́ние Того́ смотря́ющи,/ глаго́лаше, пла́чущи, Ма́ти Чи́стая:/ увы Мне, Ча́до Сладча́йшее,/ что сия́ стра́ждеши непра́ведно, Сло́ве Бо́жий,/ да спасе́ши челове́чество.

Тропа́рь, глас 4:

Му́ченицы Твой, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего:/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами/ спаси́ ду́ши на́ша.

Ин тропа́рь му́ченику Адриа́ну, глас 3:

Бога́тство неиждиву́щее вмени́л еси́/ ве́ру спасе́нную, треблаже́нне,/ оставль оте́ческое нече́стие/ и Влады́ки стопа́ми ше́ствуя,/ Боже́ственными дарова́нии обогати́лся еси́,/ Адриа́не сла́вне;/ Христа́ Бо́га моли́/ спасти́ся душа́м на́шим.

НА У́ТРЕНИ

Оба кано́на Окто́иха и святы́х на 4, глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь пои́м, вопия́ше.

В нощи́ мя жития́, сном лю́тым одержи́ма дея́ний,/ к свету покая́ния, Бо́же, воздви́гни моли́твами му́ченик Твои́х, Христе́,/ да сла́влю Тя.

Восто́ком мы́сленнаго со́лнца озари́вшеся му́ченицы/ и дне сыно́ве бы́вше,/ всю и́дольскую мглу кре́пко потреби́сте.

От усте́н, иска́пающих сла́дости Боже́ственнаго ра́зума, наслади́вся, Адриа́не,/ яд изблева́л еси́ пре́жняго неразу́мия, вои́стинну, Богоблаже́нне.

Богоро́дичен: Твоего́ прие́мши Соде́теля, я́ко Сам восхоте́,/ от безсе́менна Твоего́ чре́ва па́че ума́ воплоща́ема, Чи́стая,/ тва́рей вои́стинну яви́лася еси́ Влады́чица.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Уз избежа́в и́дольскаго су́етства, му́чениче,/ связа́лся еси́ жела́нием любве́ Христо́вы/ и у́зам страда́лец его́ ра́достию приобщи́лся еси́.

Заво́рами желе́зными го́лени сокруша́еми, страстоте́рпцы Госпо́дни,/ нече́стия ко́сти терпе́ния заво́рами и му́жеством вои́стинну сокруши́сте.

Огне́м любве́ Боже́ственныя ду́шу опаля́ему супру́га/ распали́ла еси́ жела́нием ко Христу́,/ любо́вь пло́тскую, Ната́лие, до конца́ возненави́девши.

Богоро́дичен: Боже́ственнаго рождества́ Твоего́, Чи́стая,/ вся́кий естества́ чин превосхо́дит чу́до:/ Бо́га бо преесте́ственне зачала́ еси́ во чре́ве,/ и, ро́ждши, пребыва́еши Присноде́ва.

Кондак, глас 4:

Жены́ Богому́дрыя Боже́ственная словеса́ в се́рдце положи́в,/ Адриа́не, му́чениче Христо́в, к муче́нием усе́рдно устреми́лся еси́,/ с супру́гою вене́ц прие́мь.

Седа́лен, глас 4.

Подо́бен: Удиви́ся Ио́сиф:

Нече́стия запале́ние благоче́стия ороше́нием угаси́л еси́, страстоте́рпче,/ сокруше́нием твои́х удо́в и́дольскую кре́пость истни́л еси́,/ супру́жницу обре́т помо́щницу ко всем лю́тым, му́чениче, ополче́нием,/ с не́юже в Вы́шнее всели́лся еси́ Ца́рство, Адриа́не, крепкоду́шне./ Христу́ моли́ся да́ти всем, чту́щим тя, ми́лость.

Сла́ва, и ны́не, Богоро́дичен:

Треволне́нии страстны́ми безсо́вестный аз обурева́емь, Чи́стая, призыва́ю Тя те́пле,/ да не пре́зриши мене́, окая́ннаго, поги́бнути, бе́здну милосе́рдия ро́ждши,/ ра́зве бо Тебе́, наде́жды не и́мам./ Да не, враго́м у́бо обра́дование и смех, наде́явся на Тя, явлю́ся,/ и́бо мо́жеши, ели́ко хо́щеши, я́ко Ма́ти су́щи всех Бо́га.

Крестобогоро́дичен:

Де́ва и А́гница, ви́девши на Кресте́ без се́мене из Ней А́гнца ро́ждшагося/ и копие́м прободе́на, печа́ли уя́звлена стрела́ми, вопия́ше боле́зненно, восклица́ющи:/ что но́вое та́инство?/ Ка́ко умира́еши, И́же живота́ еди́н Госпо́дь?/ Те́мже воскресни́, па́дшаго воздвиза́я пра́отца .

Песнь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Христа́ му́ченицы кре́пость стяжа́вше,/ некре́пкое суровство́ гони́телей вои́стинну попра́вше/ и венцы́ побе́ды с Небесе́ прия́ша.

Гно́ем, всю́ду обтека́ющим святы́х телесе́м,/ ми́ро Бо́гу вои́стинну принесе́ся,/ гное́ние пре́лести очи́щающее держа́вно.

Твои́ми кровьми́ оде́жду обагри́л еси́ себе́ нетле́ния,/ совле́к тле́ния оде́жду,/ и Христу́, Адриа́не, со сла́вою ны́не предстои́ши.

Богоро́дичен: Я́ко вои́стинну неизвеща́нна и непостижи́ма/ я́же Твоего́ боголе́пнаго, Богоро́дице, суть рождества́,/ су́щим на земли́ и на Небеси́, Присноде́во, та́инства.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Десяти́ца сугу́ба страда́лец с про́стою тро́ицею, Христа́ ны́не моля́ще,/ разреши́ша соу́з нече́стия,/ су́ща безкре́постна, кре́постию Тро́ичною, до́блественнии.

Я́коже со́лнце, посреде́ стоя́ звезд све́тлых, Адриа́не,/ с тобо́ю стра́ждущих облиста́л еси́ све́том благоче́стия,/ нече́стия мглу отгна́в, и просвети́л еси́ ми́ра концы́.

Роса́ глаго́л твои́х честны́х/ исцеле́ние боле́зней вои́стинну твоему́ супру́жнику бысть,/ вкуси́вшу лу́чших любо́вь, Богому́драя Ната́лие, му́чеников сожи́тельнице.

Богоро́дичен: Богоро́дицу Тя от души́, Влады́чице ми́ра Блага́я, испове́дающих спаси́:/ Тя бо предста́тельство непобори́мое и́мамы,/ и́стинную Богороди́тельницу.

Песнь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.

Христо́вою окормля́еми дла́нию благоче́стно,/ безбо́жия пучи́ну преидо́сте/ и ко приста́нищу ти́хому Вы́шния све́тлости, страда́льцы Госпо́дни, устреми́стеся.

Я́ко цве́ти, благоуха́ют по́двиг твои́х, му́дре, я́же па́че естества́ одоле́ния,/ и́бо Бо́жие яви́лся еси́, Адриа́не, благово́нно кади́ло,/ огне́м мук опаля́емь.

Добро́тою ве́ры свята́я твоя́ душа́ укра́шена, всечестна́я,/ и, добро́ту и́щущи, я́ко вои́стинну Христо́ву безме́рную, Ната́лие,/ жела́ния не погреши́.

Богоро́дичен: Всечи́стая Влады́чице, ро́ждшая челове́ком Ко́рмчия Го́спода,/ страсте́й мои́х непостоя́нное и лю́тое утоли́ смуще́ние/ и тишину́ пода́ждь се́рдцу моему́.

Кондак, глас 4.

Подо́бен: Яви́лся еси́ днесь:

Му́ченик возсия́ Боже́ственная па́мять/ и земны́я озари́ вся концы́ све́тло, с весе́лием зову́щих:/ Ты еси́ му́чеников, Христе́, ра́дование.

И́кос:

На Дре́ве Кре́стнем пло́тию пригвожде́ннаго Христа́ Царя́ возжела́вше до́блественне, во́ини,/ усе́рдно боле́зни лю́тыя и му́ки стра́шныя претерпе́ша,/ попра́вше и́дольское нече́стие все и беззако́нных сопротивле́ния низло́жше,/ десяти́ца сугу́бая и тро́ица му́ченик./ Те́мже Адриа́н и Ната́лия, супру́г кра́сный сих зря́ще,/ поревнова́ша им и, ра́дующеся, вопию́т:/ Ты еси́ му́чеников, Христе́, ра́дование.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным о́троком,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Необори́мы я́коже столпы́ яви́стеся, Сио́на Вы́шняго му́ченицы,/ низложи́вше утвержде́ния вся вра́жия терпе́нием страда́ния ва́шего./ Те́мже почита́ем благоче́стно ва́шу па́мять при́сно.

Помо́щница Адриа́ну Ната́лия я́ко единоду́шна от Бо́га дарова́ся,/ извлача́щи угле́бша сего́ во глубине́ пре́лести и уверя́ющи вопи́ти:/ благосло́вен Бог оте́ц на́ших.

Я́ко многоце́нно сокро́вище, му́ченика ру́ку скры́вши,/ не предала́ еси́ целому́дрия твоего́ сокро́вища украсти́ тща́щимся, честна́я,/ окормля́ема руко́ю отце́в Бо́га.

Богоро́дичен: Свяще́ннии проро́цы провозвести́ша, Чи́стая, явле́нно та́инство честна́го рождества́ Твоего́,/ и ны́не мы, сбытия́ издале́ча смотря́юще, благоче́стно Тя ублажа́ем.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Огне́м муче́ния всесожига́еми,/ нече́стия пла́мень весь угаси́сте кровьми́ ва́шими, страда́льцы, зову́ще:/ Тя превозно́сим, Христе́, во вся ве́ки.

Жены́ чу́дныя кто не удиви́тся су́щия к Бо́гу любви́?/ Я́ко возненави́де жела́ние плотско́е/ и супру́жника уве́ри чести́ и сла́вити Христа́ во ве́ки вся.

Посрами́в безбо́жных су́етства и возжела́в Христо́ву красоту́,/ столп благоче́стия ве́рным был еси́, му́чениче, страстоте́рпче Адриа́не всеблаже́нне.

Богоро́дичен: От Све́та Светода́вца Сло́ва зача́ла оси́/ и ро́ждши несказа́нно Пресу́щественнаго:/ Дух бо в Тя, Де́во, Бо́жий всели́ся./ Те́мже Тя пое́м, Чи́стая, во ве́ки.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Удо́в сокруше́ние, лю́тых преще́ния ни меч, ни огнь, ни сме́рть пло́ти тле́нныя/ Христо́вы любве́ разлучи́ти вас, сла́внии страда́льцы, отню́д возмого́ша./ Те́мже во ве́ки с Ним при́сно веселите́ся.

Свещи́ богосве́тлы, зве́зды сия́ющия, свети́льницы,/ нам свет благоче́стия озаря́юще, со́лнца сла́вы сия́ния,/ ча́да невече́рняго блаже́нства, му́ченицы яви́стеся Христо́вы всечестни́и.

Исто́чник, вод испо́лнен духо́вных,/ и река́, Боже́ственных дарова́ний испо́лнена,/ и ча́ша, страда́ния пролива́ющая то́ки,/ пучи́ны спасе́ния, му́ченицы, яви́стеся,/ бу́ри напа́стей разли́чных нас избавля́юще.

Богоро́дичен: Ме́ртвым воста́ние ны́не дарова́ся/ Твои́м несказа́нным и неизрече́нным рождество́м, Богоро́дице Всечи́стая:/ Жи́знь бо из Тебе́, пло́тию обложе́на, всем возсия́/ и сме́ртную дря́хлость я́ве разруши́.

Свети́лен.

Подо́бен: Жены́, услы́шите:

Адриа́н всему́дрый, страда́льцев утвержде́ние,/ с честно́ю Ната́лиею пе́сньми досто́йно да почти́тся,/ с ни́миже облиста́ет му́ченик собо́р святы́й./ И́хже све́тлое торжество́ соверша́юще благочестному́дренно,/ пое́м пе́сньми Боже́ственными.

Богоро́дичен:

И́же дре́вле ми обоже́нию во Еде́ме позави́девша,/ томи́теля зми́я, Де́во, смири́вся во утро́бе Твое́й, Творе́ц тва́ри и Зижди́тель естества́/ боголе́пно погуби́ Кресто́м и сме́ртию, источа́я ми нетле́ни́е.

На стихо́вне Окто́иха. Сла́ва, и ны́не, Богоро́дичен.

Моли́тва

О свяще́нная дво́ице, святи́и му́ченицы Христо́ви, Адриа́не и Ната́лие, блаже́ннии супру́зи и до́блии страда́льцы! Услы́шите нас, моля́щихся вам со слеза́ми, и низпосли́те на ны вся благопотре́бная душа́м и телесе́м на́шим, и моли́те Христа́ Бо́га, да поми́лует нас и сотвори́т с на́ми по ми́лости Свое́й, да не поги́бнем во гресе́х на́ших. Ей, святи́и му́ченицы, приими́те глас моле́ния на́шего и изба́вите ны моли́твами ва́шими от гла́да, губи́тельства, тру́са, пото́па, огня́, гра́да, меча́, на́шествия иноплеме́нников и междоусо́бныя бра́ни, от напра́сныя сме́рти и от всех бед, печа́лей и боле́зней, да вы́ну, ва́шими моли́твами и предста́тельством укрепля́емии, просла́вим Го́спода Иису́са Христа́, Ему́же подоба́ет вся́кая Сла́ва, честь и поклоне́ние, со Безнача́льным его́ Отце́м и Пресвяты́м Ду́хом, во ве́ки веков. Ами́нь.