НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Господи, воззва́х: стихи́ры, глас 8.

Подо́бен: О, пресла́внаго чудесе́:

Блаже́нне Лавре́нтие Богому́дре,/ Чи́стая твоя́ душа́, правове́рным смы́слом сия́ющи,/ облиста́ющи доброде́телей светлостьми́,/ озаря́ет ве́рных исполне́ние,/ бесо́вскую тьму отгоня́ющи./ Те́мже, я́ко прича́стника тя невече́рней благода́ти,/ ублажа́ем благоче́стно вси, досточу́дне.

Име́я ду́шу ми́лостивну,/ и чист по́мысл, и се́рдце бо́дрственно,/ ве́ру небла́зненну, и любо́вь вои́стинну нелицеме́рну,/ от земли́ преста́вился еси́ к Небе́сным/ и с ли́ки пра́ведных водворя́ешися./ Те́мже тя почита́ем свяще́нными пе́сньми/ и благоче́стно вси сла́вим, досточу́дне Лавре́нтие.

Боже́ственными уче́нии укрепля́яся,/ стра́сти плотски́я от души́ отгна́л еси́/ и Святе́й Тро́ице селе́ние преочище́нное был еси́./ Тем к боже́ственней жи́зни преста́вился еси́,/ сего́ ра́ди соблюда́ет Госпо́дь невреди́мо твое́ блаже́нное те́ло/ и мно́гими чудотворе́нии от твоего́ гро́ба/ прославля́ет тя я́ве, блаже́нне Лавре́нтие.

Сла́ва, глас 1:

Я́ко тече́ние до́бре сконча́вшему,/ и ве́ру соблю́дшему непоро́чну,/ и враги́ безпло́тныя терпе́нием свои́м попра́вшему,/ возложи́ся на честны́й твой верх/ побе́ды вене́ц пресве́тел/ от руки́ Вседержи́теля Бо́га,/ Его́же ра́ди мир и я́же в нем су́етства преоби́дел еси́;/ тем и свята́я твоя́ Чи́стая душа́/ на Небеса́ востече́, ра́дующися,/ пра́ведных же ли́цы срето́ша тя, веселя́щеся,/ и Небе́сная селе́ния восприя́ша ю;/ честно́е же те́ло твое́ на земли́ пребыва́ет нетле́нно,/ ве́рным подава́юще исцеле́ние./ Те́мже с ве́рою пра́вою и те́плым жела́нием/ свято́му твоему́ гробу припа́дающе, богому́дре Лавре́нтие,/ про́сим испроси́ти у Христа́ Бо́га на́шего/ гра́ду твоему́ непоколеби́му и безмяте́жну пребы́ти/ от наве́т вра́жиих и пога́нскаго наше́ствия,/ умире́ния ми́ру и спасе́ния душа́м на́шим.

И ны́не, пра́здника.

Вход. Проки́мен дне. И чте́ния преподо́бническая (зри день 3-й).

На лити́и стихи́ры, глас 2:

Юро́дством Прему́дрости дости́г глубину́, преблаже́нне,/ и ра́йская селе́ния насле́див,/ и ны́не веселя́ся с ли́ки пра́ведных,/ и че́сти зря Влады́чния добро́ты,/ и со А́нгелы предстоя́ Святе́й Тро́ице,/ помина́й, блаже́нне, всегда́ чту́щия па́мять твою́.

Те́сным ше́ствовав путе́м,/ дости́гл еси́ ра́йския широты́,/ ны́не же изря́дне наслажда́яся Небе́сныя пи́щи,/ и венце́м нетле́ния венча́лся еси́ от руки́ Вседержи́телевы./ Его́же ны́не моли́, блаже́нне Лавре́нтие,/ о е́же сохрани́тся гра́ду твоему́ от враг ненаве́тну/ и душа́м на́шим дарова́ти ве́лию ми́лость.

Ле́гкостию крил прелете́в/ от многомяту́щаго и треволнова́тельнаго ми́ра/ и вне бу́рнаго приста́нища дости́г,/ заступа́я от напа́стей вся призыва́ющия тя ве́рно,/ покрыва́й, преблаже́нне, и нас, прите́кших в храм твой,/ о преблаже́нне Лавре́нтие,/ спаси́ ста́до твое́ моли́твами твои́ми ко Го́споду.

Я́ко со́лнце светоза́рно,/ доброде́тельнаго ра́ди жития́ твоего́,/ повсю́ду просия́л еси́,/ хра́му у́бо, иде́же лежа́т честны́я твоя́ мо́щи,/ я́коже ца́рскую иму́щу у́тварь,/ гра́ду же всю́ду, я́ко трубе́, велегла́сно вопию́щу и хва́лящуся,/ име́ющу в себе́ процве́тша чуде́с исто́чника неисчерпа́емаго,/ и изоби́льно всем подава́юща бога́тно дарова́ния чуде́с,/ о преблаже́нне и чудоно́сче Лавре́нтие,/ испроси́ моли́твами твои́ми у Христа́ Бо́га,/ е́же дарова́ти правосла́вным лю́дем посо́бие на ва́рвары,/ и и́же твое́ пра́зднество творя́щим че́стно,/ очище́ние и спасе́ние душа́м на́шим.

Сла́ва, глас 8:

Доброде́телей твои́х, Богому́дре, исправле́ния/ уясни́ша ве́рных сердца́,/ кто бо, слы́ша в безме́рное твое́ смире́ние и терпе́ние, не удиви́тся,/ е́же ко всем кро́тость и беззло́бие,/ к скорбя́щим ми́лование и к су́щим в бе́дах ско́рое поможе́ние,/ в путь ше́ствующим благо́е поспеше́ние/ и к пла́вающим немяте́жное приста́нище?/ Вся боголе́пно предвари́, досточу́дне Лавре́нтие,/ и ны́не неувяда́емым оде́яся венце́м от руки́ Вседержи́теля Бо́га,/ Его́же моли́ спасти́ся душа́м на́шим.

И ны́не, пра́здника.

На стихо́вне стихи́ры, глас 2.

Подо́бен: До́ме Евфра́фов:

Дом и жили́ще/ Ду́ха Пресвята́го,/ прему́дре Лавре́нтие, был еси́./ Те́мже и нас до́мы того́ соде́лай,/ святу́ю твою́ па́мять почита́ющих.

Стих: Возвесели́тся пра́ведник о Го́споде/ и упова́ет на Него́.

Житие́ твое́, я́ко со́лнце,/ в сердца́ ве́рных возсия́,/ чуде́с зарю́ испуща́юще./ Те́мже и нас све́том невече́рним озари́,/ всечестну́ю твою́ па́мять почита́ющих.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Не преста́й, моля́ся, Лавре́нтие,/ о при́сных твои́х рабе́х,/ и́хже духо́вным твои́м житие́м просвети́л еси́,/ да вси честно́е твое́ успе́ние,/ веселя́щеся, почита́ем.

Сла́ва, глас то́йже. Самогла́сен:

Све́том разу́мным от Бо́га просвеще́н,/ мирска́го пристра́стия отбе́гл еси́,/ бу́йство Христа́ ра́ди стяжа́в,/ тем гра́да на́шего Калу́ги засту́пник быв,/ в не́мже чи́стым и непоро́чным житие́м Го́сподеви угоди́л еси́/ и мно́гия лю́ди удиви́л еси́ чудесы́, преблаже́нне Лавре́нтие./ Но и ны́не, име́я дерзнове́ние ко Влады́це всех, Христу́ Бо́гу,/ моли́ о ве́рою творя́щих всечестну́ю па́мять твою́/ и притека́ющих со усе́рдием к чудотво́рному гро́бу твоему́,/ изба́витися страсте́й, душе́вных же вку́пе и теле́сных,/ и вся́ких бед и скорбе́й/ и спасти́ся душа́м на́шим.

И ны́не, пра́здника.

Тропа́рь, глас 4:

Просвети́вся боже́ственною благода́тию, Богому́дре,/ и весь ра́зум и се́рдце от су́етнаго ми́ра сего́/ к Зижди́телю неукло́нно возложи́в,/ целому́дрием и мно́гим терпе́нием во вре́менней жи́зни тече́ние до́бре сконча́л еси́/ и ве́ру соблю́л еси́ непоро́чну./ Те́мже и по сме́рти яви́ся све́тлость жития́ твоего́,/ источа́еши бо чудесе́м исто́чник неисчерпа́емый/ ве́рою притека́ющим ко свято́му твоему́ гро́бу, Лавре́нтие всеблаже́нне,/ моли́ Христа́ Бо́га, да спасе́т ду́ши на́ша.

Ин Тропа́рь, глас 3:

Святы́й пра́ведный Лавре́нтие,/ моли́ Ми́лостиваго Бо́га,/ да прегреше́ний оставле́ние/ пода́ст душа́м на́шим.

НА У́ТРЕНИ

На Бог Госпо́дь: тропа́рь пра́здника два́жды. Сла́ва, свята́го. И ны́не, пра́здника.

По 1-й стихоло́гии седа́лен, глас 8:

От ю́ности, я́ко свети́льник, возсия́л еси́, блаже́нне,/ зе́льным воздержа́нием умертви́л еси́ плотска́я взыгра́ния,/ тем и на высоту́ восте́кл еси́ богора́зумия, пресла́вне,/ пожи́в в ми́ре богоуго́дно, посрами́л еси́ бесо́вская ополче́ния, Лавре́нтие всеблаже́нне./ сего́ ра́ди вопие́м ти:/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Помышле́ния нечи́ста и устны́ льсти́вы, дела́ же моя́ вся оскверне́на,/ и что сотворю́, ка́ко усря́щу Судию́?/ Влады́чице Де́во, моли́ Сы́на Твоего́ и Зижди́теля и Го́спода,/ я́ко да в покая́нии прии́мет дух мой, я́ко еди́н Благоутро́бен.

По 2-й стихоло́гии седа́лен, глас 4:

Был еси́ бездо́мен на земли́, Богому́дре Лавре́нтие,/ вся́ко озлобле́ние претерпева́я,/ до́брыя де́тели, я́коже фимиа́м благово́нен и же́ртву благоприя́тну, Бо́гу прине́сл еси́./ Тем ны́не на Небеси́ дерзнове́ние стяжа́в к Нему́,/ моли́ дарова́ти согреше́ний очище́ние ве́рою хваля́щим святу́ю па́мять твою́.

Сла́ва, и ны́не, Богоро́дичен:

Обнови́ла еси́, Чи́стая, Боже́ственным Рождество́м Твои́м/ истле́вшее во страсте́х земноро́дных ме́ртвенное существо́/ и воздви́гла еси́ вся от сме́рти к животу́ нетле́ния./ Те́мже Тя по до́лгу блажи́м вси, Де́во Препросла́вленная,/ я́коже прорекла́ еси́.

По полиеле́и седа́лен, глас 8:

Я́ко врача́ прему́дра и уго́дника Госпо́дня благоприя́тна,/ к чу́доносному твоему́ гро́бу прикаса́ющеся, Богому́дре,/ соше́дшеся любо́вию и ве́рою, во псалме́х и пе́ниих возра́дуемся, сла́вяще Христа́,/ такову́ю благода́ть Тебе́ дарова́вшаго исцеле́ний./ Лавре́нтие всеблаже́нне, моли́ Христа́ Бо́га согреше́ний оставле́ние дарова́ти/ ве́рою и любо́вию пра́зднующим всечестну́ю па́мять твою́.

Сла́ва, и ны́не, Богоро́дичен:

Тя мо́лим, Пречи́стая, Предста́тельницу нашу,/ смуща́емыя в печа́лех, не пре́зри до конца́ поги́бнути рабы́ Твоя́,/ но ускори́ изъя́ти нас настоя́щего гне́ва и печали,/ о Богора́дованная Пресвята́я Чи́стая,/ Ты бо нам еси́ стена и по́мощь необори́ма.

Степенна, 1-й антифо́н 4-го гла́са. Проки́мен, глас 4: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой, внегда́ моли́тимися к Тебе́. Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Челове́че Бо́жий,/ ве́рный ра́бе, уго́дниче Христо́в,/ соверши́телю Того́ боже́ственных повеле́ний,/ му́же, ди́вный в чудесе́х,/ сто́лпе и утвержде́ние гра́да на́шего,/ Ца́рствия Небе́снаго насле́дниче,/ Богоблаже́нне Лавре́нтие,/ дерзнове́ние име́я ко Христу́ Бо́гу,/ не преста́й моли́тися о душа́х на́ших.

Кано́н пра́здника со ирмосо́м на 6. И свята́го Лавре́нтия на 8, глас 2.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть:/ препросла́вленный Госпо́дь сла́вно бо просла́вися.

Припев: Святы́й пра́ведный Лавре́нтие, моли́ Бо́га о нас.

Высоко́ житие́ име́я и восхожде́нии боже́ственными весь све́тел быв,/ просвеще́ние ми испроси́, похваля́ющему́ честны́я твоя́ по́двиги,/ и́миже до́бре пожи́в, получи́л еси́, и́хже наде́ялся еси́, блаже́нне Лавре́нтие.

Мироуха́нная любя́ уче́ния/ и во чте́нии святы́х писа́ний упражня́яся,/ сласте́й уклони́лся еси́, блаже́нне, смра́дных и безче́стных,/ и облагово́нился еси́, боже́ственными дарова́нии удобря́яся.

Дрема́ние ве́ждома от души́, блаже́нне, отгна́л еси́,/ бдя и Бо́гу приединева́яся¹¹ всено́щными стоя́нии,/ непрекло́нен ну́ждами есте́ственными,/ Те́мже ко дню невече́рнему́ преше́л еси́.

Богоро́дичен: Я́ко черто́г одушевле́нный Бо́жий/ и кади́льницу разу́мнаго и светоно́снаго у́гля,/ Приснора́дованную блажи́м Богоро́дицу, зову́ще:/ ра́дуйся, Хода́таице спасе́ннаго воззва́ния.

Песнь 3

Ирмо́с: На ка́мени мя ве́ры утверди́в,/ разшри́л еси́ уста́ моя́ на враги́ моя́,/ возвесе́ли бо ся дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.

Глаго́лом живото́чным внима́я,/ испи́л еси́ воду спасе́ния, возгнуша́вся го́рькаго греха́,/ и, поя́, глаго́лал еси́ Бо́гу, Лавре́нтие:/ я́ко несть свят, па́че Тебе́, Го́споди.

Ми́лование стяжа́л еси́ христоподо́бно,/ разда́л еси́ бога́тство тре́бующим,/ Небе́сное бога́тство хода́тайствующее тебе́, его́же и получи́л еси́, вопия́, Лавре́нтие:/ я́ко несть свят, па́че Тебе́, Го́споди.

Присво́ився Зижди́телю любо́вию боже́ственною,/ прия́л еси́ Небе́сное насле́дие,/ Дре́ва живо́тнаго получи́ти сподо́бился еси́, блаже́нне,/ боготворе́нием обожа́яся и поя́, сла́вне:/ я́ко несть свят, па́че Тебе́, Го́споди.

Богоро́дичен: Су́щи А́нгел святе́йши,/ Зижди́теля А́нгелов во Твою́ боку́ носи́ла еси́/ и роди́ла еси́, Богома́ти, на избавле́ние челове́ком, пою́щим Ти:/ я́ко несть Пречи́сты, ра́зве Тебе́, Влады́чице.

Конда́к и и́кос пра́здника.

Седа́лен свята́го, глас 4:

Благоволи́в благи́ми дея́нии,/ искуси́лся еси́, я́ко зла́то в пещи́, напа́стьми, Лавре́нтие сла́вне./ Те́мже и по сме́рти источа́еши чудеса́ бога́тно, я́ко во́ды, неду́ги уставля́еши./ О нас при́сно моли́ся,/ я́ко да согреше́ний проще́ние прии́мем.

Сла́ва, и ны́не, Богоро́дичен:

Чи́стая Всенепоро́чная и Неискусому́жная,/ и́же еди́на безле́тнаго Сы́на и Сло́ва Бо́жия в ле́то ро́ждши,/ сего́ со святы́ми и честны́ми патриа́рхи, и му́ченики, и проро́ки, преподо́бными моли́/ дарова́ти нам очище́ние и ве́лию ми́лость.

Песнь 4

Ирмо́с: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Повеле́ния оте́ческая храня́ невреди́мо,/ правове́рным смы́слом ты от ю́ности имел еси́ житие́ чи́сто/ и ми́лостивен нрав, досточу́дне.

Ни смуще́ние мирско́е, ни вла́сти держа́ние,/ ни сла́ва вре́менная твоего́ к Бо́гу раче́ния, Лавре́нтие, преврати́,/ но благоволи́л еси́ вои́стинну боже́ственным дея́нием.

Возне́сся Боже́ственными поуче́нии вы́ну, врага́ смири́л еси́,/ исцеле́ния де́тель прия́л еси́, Лавре́нтие,/ судо́м пра́ведным вся́ческая Пра́вящаго.

Богоро́дичен: Препе́тая, во́инствы горе́ Препе́таго Бо́га роди́ла еси́,/ Челове́ка вои́стинну бы́вша,/ Его́же за рабы́ Твоя́ моля́щи не преста́й, Присноде́во.

Песнь 5

Ирмо́с: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, Бо́га не зна́ю.

Све́том чи́стым Святы́я Тро́ицы просвеще́н, зако́ном же Ея́ огражде́н,/ нощь жите́йскую без претыка́ния преше́л еси́./ Виде́нии боже́ственными возвыша́яся, блаже́нне,/ в боже́ственный живо́т всели́лся еси́.

Ны́не на Тебе́ чу́до Бо́жие ви́дится, и у́жаса испо́лнено:/ ка́ко по погребе́нии вои́стинну надо́лзе соблюда́ется невреди́мо, блаже́нне, твое́ те́ло, во гро́бе лежа́ще!/ Судо́м, и́мже весть Бог, прославля́яй тя.

Блаже́нне Лавре́нтие, твое́ дерзнове́ние к Бо́гу/ и любо́вь, ю́же от се́рдца, к Тому́ име́ти благоволи́в,/ и́стинно имени́то же возсия́в пресла́вно Боже́ственными светлостьми́,/ просвети́ ве́рных со́нмища.

Богоро́дичен: За ны из Тебе́ вопло́щшагося, Де́во Ма́ти, всегда́ моли́,/ благоче́стно Тя блажа́щим изба́витися бед, душетле́нных страсте́й,/ и печа́лей, и ве́чнующаго пла́мене муче́ния.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Ка́пли сла́дкия иска́павше, блаже́нне, пот твои́х сла́дость/ и исцеле́ний сия́ния на хвалу́ Христа́ Бо́га на́шего.

Во дво́рех Бо́га процве́л еси́,/ виногра́д многопло́ден прозя́б/ и доброде́телей гро́здие Де́лателю, душа́м оби́лие пода́в.

Ца́рства Бо́жия возжеле́л еси́, над страстьми́ ца́рствовав, Лавре́нтие,/ и по произволе́нию лу́чшему ра́дость пра́ведных получи́л еси́.

Богоро́дичен: Избра́нно Бо́гу бы́вши,/ я́ко прекра́сное селе́ние и простра́нное, Сему́, Де́во, была́ еси́,/ и чертог, и све́щник, и трапе́за.

Конда́к, глас 8:

Избра́нному и ди́вному в пра́ведницех,/ и́же у́бо от Христа́ дар чуде́с прии́мшему,/ похва́льныя ны́не принесе́м глаго́лы,/ но я́ко име́я дерзнове́ние ко Святе́й Тро́ице,/ Ю́же моли́ изба́витися от бед рабо́м твои́м, да зове́м ти:/ ра́дуйся, Богому́дре Лавре́нтие.

И́кос:

Ка́ко возмогу, гре́шный и скве́рный аз душе́ю вку́пе и те́лом,/ исписа́ти во пло́ти су́щее равноа́нгелом житие́ твое́ и пресла́вная чудеса́,/ а́ще у́бо мно́зи прему́дрии не дости́гнут испове́дати мно́гаго твоего́ терпе́ния, и смире́ния, и те́плыя ко Христу́ любве́./ Но оба́че, наде́яся на твое́ беззло́бие, о блаже́нне, си́це вопи́ю ти:/ ра́дуйся, пресве́тлая звездо́,/ от восто́ка доброде́телей возсия́вшая и вселе́нную чудесы́ озари́вшая./ Ра́дуйся, возненави́девый роди́тельскую любо́вь,/ Христа́ же, еди́наго над все́ми Бо́га, всем се́рдцем возлюби́вый/ и Тому́ невозвра́тным жела́нием после́довавый./ Ра́дуйся, я́ко бу́йственное и юро́дственное, е́же по апо́столу, жи́тельство избра́вый./ Ра́дуйся, премени́вый тле́нная и настоя́щая наде́ждею бу́дущих благ./ Ра́дуйся, дре́внему Ио́ву уподо́бивыйся терпе́нием./ Ра́дуйся, страстоте́рпче Христо́в непобеди́мый,/ но при́сно победи́вый диа́вола твои́м смире́нием./ Ра́дуйся, я́ко дре́вний он Ла́зарь ни́щий, ны́не почива́еши в не́дрех Авраа́млих./ Ра́дуйся, и́же по отше́ствии ми́ра сего́/ су́щих в беда́х и искуше́ниих гото́в обрета́яйся предста́тель и засту́пник./ Ра́дуйся, везде́ призыва́ющия тя бы́стро предваря́яй,/ мо́лиши бо Христа́ Бо́га непреста́нно пода́ти грехо́в на́ших проще́ние.

Песнь 7

Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ есть./ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Кре́постию возмо́г Живода́вца,/ плотско́е удержа́л еси́ жела́ние, пребога́те,/ и ум возвы́сил еси́ на Небе́сная, поя́ кре́пко:/ Сый благослове́н и препросла́влен.

Сам неблагоро́ден сотвори́вся,/ благоро́дны нра́вы стяжа́л еси́ умо́м це́лым,/ поуче́нием же упражня́яся богодохнове́нных писа́ний,/ все жела́ние твое́ к Бо́гу Всеви́дцу, блаже́нне, возложи́л еси́.

Го́рнее Ца́рство, Вы́шний град, Бо́жий рай,/ пра́ведных наслажде́ние и пи́щу несоде́янную,/ бога́тство некра́домое, свет невече́рний/ обрести́ сподо́бился еси́, блаже́нне Лавре́нтие.

Богородичен: Его́же породи́ла еси́, Влады́чице,/ при́сно моли́ от рабо́ты изба́вити мя страсте́й,/ и осужде́ния, и стужа́ющаго ми лю́таго окамене́ния,/ и оскорбля́ющаго, Чи́стая, одержа́ния, Богора́дованная.

Песнь 8

Ирмо́с: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ госпо́дня, го́спода.

Огнь помышля́я стра́шный, пред Престо́лом Христо́вым хотя́щ изы́ти,/ умиле́нием се́рдца те́плы пролива́еши пото́ки сле́зныя,/ погаша́я те́ми страсте́й пещь, Лавре́нтие Богому́дре.

Любо́вию предложи́л еси́ твою́, му́дре, к Бо́гу ду́шу/ и к Тому́ прилепи́лся еси́, вопия́ пе́сненно:/ Христе́ мой, Ты ны́не мя изба́ви страсте́й смертоно́сных во ве́ки.

Терпе́нием пожда́тель и се́рдцем смире́н ты ви́ден был еси́,/ ми́лостив тре́бующим, обы́чай при́сно благ име́я/ и нрав доброде́тельный, всече́стне,/ в них же до́бре пожи́в, чуде́с то́чиши благода́ть.

Богоро́дичен: Ада́мов Соде́тель от крове́й Твои́х чи́стых зи́ждется/ и млеко́м пита́ется, пита́яй вся́кое дыха́ние, Де́во Богоро́дице./ Тем я́ко Ма́терь Тя Бо́жию прославля́ем.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Ви́дети желая сла́ву Бо́га на́шего,/ доброде́тельми богора́зумия себе́ удобри́л еси́/ и, свещу́ нося́, вшел еси́ во све́тлый черто́г,/ со А́нгелы живы́й, ясне́е наслажда́яся Божества́.

Я́ко у́треннее со́лнце, взы́де па́мять твоя́,/ су́щия во мра́це сердца́ просвеща́ющи,/ ты бо све́та и дне яви́лся еси́ вои́стинну сын, Богому́дре Лавре́нтие,/ сего́ ра́ди тя почита́ем.

Му́дростию украша́лся и ра́зумо́м просвеща́яся,/ смире́нием се́рдца красу́яся, высото́ю жития́, досточу́дне,/ в разу́мныя дворы́ вшел еси́,/ иде́же нас помяни́, чту́щих тя, блаже́нне Лавре́нтие.

Богоро́дичен: Све́та жили́ще, вся озари́вшаго,/ и сень ви́дена была́ еси́, Богоблагода́тная,/ мост и ле́ствица, на высоту́ земны́я возводя́щи, Де́во./ Тем Тя ублажа́ем и ве́рно велича́ем.

Свети́лен.

Подо́бен: Жены́, услы́шите:

Удали́лся еси́, бе́гая, мирска́го сожи́тельства/ и Христу́, су́щему над все́ми Бо́гу на́шему,/ непоро́чным житие́м благоугоди́л еси́, всеблаже́нне Лавре́нтие,/ Его́же и ны́не моли́ о нас, рабе́х твои́х,/ ве́рою пра́зднующих всечестну́ю па́мять твою́.

Сла́ва, и ны́не, пра́здника или́ Богоро́дичен:

Прему́дрость Ипоста́сную, Сло́во О́тчее При́сносущное,/ Врача́ челове́ком, Христа́, ро́ждшая, Де́во Пречи́стая,/ я́звы и стру́пы се́рдца моего́ исцели́, лю́тыя и многовре́менныя,/ и страстна́я взыгра́ния утиши́ пло́ти мое́й.

На хвали́тех стихи́ры свята́го на 4, глас 4.

Подо́бен: Дал еси́ зна́мение:

Дал еси́ при́тчу терпе́ния и му́жества,/ Преблаги́й Го́споди,/ пра́веднаго Лавре́нтия и многочуде́снаго,/ доброде́тельми, и словесы́, и де́лы сия́юща,/ целому́дрием украша́ема и кро́тостию./ Тем твое́ неизрече́нное смотре́ние сла́вим,/ Иису́се Всеси́льне/ и Спа́се душ на́ших.

Пра́веден и незло́бив,/ и́стинен же и непоро́чен и ве́рен,/ уклоня́яся от вся́кия зло́бныя вещи,/ показа́лся еси́, Лавре́нтие блаже́нне,/ просвеще́н доброде́тельми и благоче́стием сия́я./ Тем тя ублажа́ем/ и свято́е твое́ и честно́е днесь пра́зднуем успе́ние,/ ра́дующеся, Богому́дре.

Целому́дрием и благове́рием,/ я́ко багряни́цею многоце́нною, оде́явся, Лавре́нтие,/ пра́вдою же и кро́тостию,/ я́ко Боже́ственным венце́м, увя́злся еси́,/ со стра́ждущими Христа́ ра́ди Ца́рствовати возжеле́л еси́./ И ны́не Царю́ сил предстои́ши,/ Иису́су Всеми́лостивому и Спа́су душ на́ших.

Сла́ва, глас 8:

Доброде́телей твои́х, Богому́дре, исправле́ния/ уясни́ша ве́рных сердца́,/ кто бо, слы́ша в безме́рное твое́ смире́ние и терпе́ние, не удиви́тся,/ е́же ко всем кро́тость и незло́бие,/ к скорбя́щим ми́лование/ и к су́щим в бе́дах ско́рое поможе́ние,/ в путь ше́ствующим благо́е поспеше́ние/ и к пла́вающим немяте́жное приста́нище,/ вся боголе́пно предвари́л еси́, досточу́дне Лавре́нтие./ И ны́не неувяда́емым увя́злся еси́ венце́м от руки́ Вседержи́теля Бо́га,/ Его́же моли́ спасти́ся душа́м на́шим.

И ны́не, Богоро́дичен:

Все упова́ние мое́ на Тя возлагаю,/ Ма́ти Бо́жия,/ сохрани́ мя под кро́вом Твои́м.

Славосло́вие вели́кое. Ектении́. И отпу́ст.

НА ЛИТУРГИ́И СЛУЖБА ПРА́ЗДНИКА И ПРЕПОДО́БНАГО.

Моли́тва

О святы́й и Богопросла́вленный пра́ведниче и чудотво́рче Лавре́нтие, ско́рый помо́щниче и усе́рдный засту́пниче всех с ве́рою и любо́вию моли́твенно к Тебе́ прибега́ющих! Се и мы, смире́ннии и гре́шнии, обремене́нии и́гом тя́жким мно́гих беззако́ний на́ших, во умиле́нии глубо́цем к Тебе́ прибега́ем и, припа́дающе к многоцеле́бней ра́це святы́х моще́й твои́х, мо́лим и про́сим тя: помоли́ся за нас ко Го́споду Бо́гу, да не погуби́т нас со беззако́нии на́шими, но обрати́т нас на стезю́ покая́ния и спасе́ния. Ве́мы бо, ве́мы, я́ко мно́го мо́жет пред Ним моли́тва пра́веднаго. Тебе́ же, вои́стинну пра́ведника су́ща, на умоле́ние к Нему́ предлага́ем со упова́нием кре́пким, я́ко твоего́ ра́ди Небе́снаго предста́тельства пред Ним и мы, недосто́йнии, поми́лованы бу́дем. Испроси́ нам у Созда́теля на́шего вели́кия и бога́тыя да́ры бла́гости его́: земли́ плодоно́сие, возду́ха благорастворе́ние, дожди́ благовре́менны, мир во днех на́ших, благоче́стия умноже́ние, боля́щим здра́вие, скорбя́щим утеше́ние, уныва́ющим ободре́ние, сиро́тствующим призре́ние, убо́гим снабде́ние, подвиза́ющимся преуспе́яние, умира́ющим благу́ю христиа́нскую кончи́ну и всем правове́рующим ве́чное спасе́ние. Страну́ на́шу сохрани́ святы́ми моли́твами твои́ми в благоде́нствии невреди́му от вся́каго зла, град же твой и святу́ю оби́тель твою́ соблю́ди в ми́ре и благоустрое́нии, я́ко страж и храни́тель их неотсту́пный. Ей, уго́дниче Бо́жий! Не посрами́ упова́ния на́шего, но яви́ нам свято́е твое́ заступле́ние, да велича́ем тя немо́лчно, я́ко вели́каго предста́теля на́шего, и прославля́ем неизрече́нное человеколю́бие ди́внаго во святы́х Свои́х Триеди́наго Бо́га, Отца́ и Сы́на и Свята́го Ду́ха, во ве́ки веко́в. А минь.