В 14-й день

НА ВЕЧЕ́РНИ

Бла́жен муж: 1-й антифо́н. На Го́споди, воззва́х: стихи́ры на 6. Предпра́зднства 3. И преподо́бного 3, глас 4.

Подо́бен: Зва́нный свы́ше:

Егда́ о спасе́нии твое́м по́двиг восприя́л еси́/ и све́том осия́лся еси́ от Небе́с неви́димо, преподо́бне,/ тогда́ лука́вым духо́м прогони́тель яви́ся,/ Бо́гом по́сланное же тебе́ зла́то прие́мь,/ ми́лостыни ще́дрый был еси́ пода́тель тре́бующим,/ пра́здныя сосу́ды жи́тницы напо́лнил еси́,/ оби́димым изба́витель гото́вейший/ и пропове́дник ве́ры Христа́ Бо́га на́шего,/ Его́же моли́ спасти́ и просвети́ти ду́ши на́ша.

Зарю́ вели́кую я́ко ви́де,/ я́ве а́нгельскую све́тлость уразуме́в бы́ти,/ явле́ние честны́х твои́х моще́й,/ в стра́се и ра́дости притече́ ско́ро досточу́дный Стефа́н,/ пребыва́я издале́ча зря,/ и ви́де твоя́ соста́вы це́лы и нетле́нны пребы́вшия,/ прославля́ющу тя Христу́ Бо́гу на́шему,/ Его́же моли́ спасти́ и просвети́ти ду́ши на́ша.

Егда́ приидо́ша в пеще́ру твою́, преподо́бне,/ хотя́щим пренести́ те́ло твое́,/ тогда́, гроб откры́вше, ра́дующеся,/ ви́деша лежа́щия твоя́ мо́щи святоле́нно,/ соста́вы вся це́лы/ и тле́нию неприча́стны,/ и гла́вныя власы́ присо́хша к главе́,/лице́ же све́тлостно,/ очи́ и устне́ богосло́внеи соедине́ны,/ прославля́ющу тя Христу́ Бо́гу на́шему,/ Его́же моли́ спасти́ и просвети́ти ду́ши на́ша.

Сла́ва, глас 6:

Приспе́ днесь пра́здник пренесе́ния честны́х твои́х моще́й,/ преподо́бне о́тче наш Феодо́сие,/ созыва́я всех ве́рно торжествова́ти,/ в па́мять твою́ глаго́люще:/ ра́дуйся, Боже́ственнаго Ду́ха жили́ще всеосвяще́нное и сто́лпе благоче́стия./ Ра́дуйся, и́же Бо́гом да́нный тебе́ тала́нт умно́живы́й, преподо́бным похвало́./ Ра́дуйся, ми́ру свети́льниче всесве́тлый и на́ше утеше́ние./ И ны́не, предстоя́ Христо́ву Престо́лу,/ моли́ изба́витися нам от вся́каго гне́ва и ско́рби/ и бу́дущую сла́ву получи́ти,/ ве́рно пра́зднующим святу́ю твою́ па́мять.

И ны́не, предпра́зднства: Всечестно́е Твое́ успе́ние: (зри день сей вы́ше).

Вход. Проки́мен дне. И чте́ния три.

Прему́дрости Соломо́ни чте́ние (главы́ 5 и 6):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ сего́ ра́ди прии́мут ца́рствие благоле́пия/ и вене́ц добро́ты от руки́ Госпо́дни/ зане́ десни́цею покры́ет я́ и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бне,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение по́летят,/ и от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же пото́пят я́ на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́ни чте́ние (гла́ва 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ и́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дит язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут ему́,/ я́ко благода́ть и ми́лость в преподо́бных его́/ и посеще́ние во избра́нных его́.

Прему́дрости Соломо́ни чте́ние (гла́ва́ 4):

Пра́ведник, а́ще пости́гнет сконча́тися, в поко́и будет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Богов и быв, возлю́блен бысть/ и живы́й посреде́ гре́шных преста́влен бысть./ Восхище́н бысть, да не зло́ба изме́нит ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных его́/ и посеще́ние во избра́нных его́.

На стихо́вне стихи́ры предпра́зднства (зри день сей вы́ше).

Сла́ва, преподо́бнаго, глас 8:

Мона́хов мно́жества, наста́вника тя почита́ем, о́тче наш Феодо́сие,/ твое́ю бо стезе́ю вои́стинну пра́во ходи́ти позна́хом./ Бла́жен еси́, Христу́ рабо́тав/ и вра́жию обличи́вый си́лу,/ А́нгелов собесе́дниче, преподо́бных соприча́стниче и пра́ведных,/ с ни́ми же моли́ся Го́сподеви/ поми́ловатися душа́м на́шим.

И ны́не, предпра́зднства, глас 2: И́же Небе́с вы́шшая су́щи: (зри день сей выше).

Тропа́рь преподо́бнаго, глас 8:

Правосла́вия наста́вниче,/ благоче́стия учи́телю и чистоты́,/ вселе́нныя свети́льниче,/ архиере́ев богодухнове́нное удобре́ние,/ Феодо́сие прему́дре,/ уче́ньми твои́ми вся просвети́л еси́, цевни́це духо́вная,/ моли́ Христа́ Бо́га спасти́ся душа́м на́шим.

Сла́ва, и ны́не, предпра́зднства: Лю́дие, предыгра́йте: (зри день сей вы́ше).

НА У́ТРЕНИ

На Бог Госпо́дь: тропа́рь предпра́зднства два́жды. Сла́ва, свята́го. И ны́не, предпра́зднства.

По 1-м сти́хословии седа́лен, глас 1.

Подо́бен: Гроб Твой, Спа́се:

Гроб, иде́же поло́жен был еси́ в це́ркви твое́й, преподо́бне,/ благоуха́ние испуща́ет приходя́щим ве́рою,/ и па́мять твоя́ весели́т сердца́ ве́рных./ Тем, Влады́це предстоя́, о́тче, помина́й нас,/ ве́рою творя́щих па́мять твою́ светоно́сную и всеосвяще́нную.

Сла́ва, и ны́не, Богоро́дичен:

Всех Творца́ Бо́га же и Соде́теля, Всенепоро́чная Чи́стая,/ Ду́хом Боже́ственным в ложесна́х зача́ла еси́,/ Его́же сла́вяще, Тя воспева́ем, Де́во,/ я́ко Пала́ту Царя́ всех и ми́ра заступле́ние.

По 2-м сти́хословии седа́лен, глас 5.

Подо́бен: Собезнача́льное Сло́во:

Ра́дуется Це́рковь Христо́ва, я́ко на све́щник свяще́нный взира́ющи,/ и, свети́льника светоно́сна и Боже́ственное сокро́вище,/ ра́ку моще́й твои́х, иму́щи,/ вся созыва́ет в па́мять твою́ сла́вити Го́спода,/ Его́же моли́ спасти́ся душа́м на́шим.

Сла́ва, и ны́не, предпра́зднства, глас 4.

Ши́ршая небес я́вльшися: (зри день сей вы́ше).

По полиеле́и седа́лен, глас 8.

Подо́бен: Прему́дрости:

Днесь а́нгельская явлени́я ви́дена бы́ша, преподо́бне, во обре́тении моще́й твои́х,/ явля́хубося всем, я́ко столпи́ о́гненнии/ и я́ко ду́ги светоза́рны, стоя́ще над пеще́рою./ И оттуду приидо́ша на верх святы́я це́ркве, на ме́сто гро́ба твоего́,/ угото́ваннаго на положе́ние те́ла свята́го твоего́, преблаже́нне Феодо́сие,/ Го́споду вельми́ тя прославля́ющу./ Сего́ ра́ди вопие́м ти:/ моли́ Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять твою́.

Сла́ва, и ны́не, предпра́зднства, глас 5.

А́нгел мно́жества сла́восло́вят Тя:

Степенна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бне о́тче Феодо́сие,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду трудо́в твои́х./ Де́монския погуби́л еси́ полки́/ и а́нгельския дости́гл еси́ чи́ны,/ и́хже житию́ без поро́ка поревнова́л еси́./ Дерзнове́ние име́я ко Христу́ Бо́гу,/ мир испроси́ душа́м на́шим.

Кано́н предпра́зднства со ирмосо́м на 6 (зри день сей вы́ше) и преподо́бнаго Феодо́сия на 8, глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Пренесе́ния твоего́ честну́ю восхваля́ющу ми, о́тче преблаже́нне, па́мять,/ с Небесе́ просвеще́ние пода́ти мне моли́, Феодо́сие,/ и душетле́нных прегреше́ний проще́ние.

После́довати восхоте́в Го́споду, блаже́нне,/ ко преподо́бному Анто́нию прише́л еси́,/ с ни́мже в пеще́ре затвори́вся ми́ра кроме́,/ Бо́гу неотлуче́н пребы́л еси́.

Поревнова́в Вели́кому Феодо́сию,/ о́бщаго жити́я нача́льнику, нра́вом и житие́м, преподо́бне,/ того́ после́дуя по́двигом и трудо́м,/ Влады́це Христу́ благоугоди́л еси́.

Богоро́дичен: Освяти́, Влады́чице, оскверне́нное се́рдце мое́,/ Яже Пресвятое Сло́во ро́ждшая,/ су́щи всех Святе́йшая Вы́шних сил, Еди́на Всепе́тая.

Катава́сия: Преукраше́нная Боже́ственною сла́вою:

Песнь 3

Ирмо́с: Твоя́ песносло́вцы, Богоро́дице,/живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Свет немерца́ющий возсия́ тебе́, я́ко пра́веднику,/ его́же от ю́ности пра́вым се́рдцем взыска́л еси́, Феодо́сие./ сего́ ра́ди во Све́те непристу́пнем ве́чно весели́шися.

Собра́ся тогда́ мно́жество и́ночествующих с наста́вником,/ е́же пренести́ мо́щи преподо́бнаго Феодо́сия,/ с ни́ми и мы днесь в па́мять пренесе́ния его́ духо́вно пра́зднуем.

Многоле́тное поще́ние, я́ко в чужде́м телеси́,/ страда́льчески преше́д, ко Го́споду взы́де,/ насыща́тися пи́щи нетле́нныя со все́ми святы́ми.

Богоро́дичен: Кропле́нием ми́лости Твоея́, Де́во,/ у́глие погаси́ мои́х страсте́й, Богора́дованная,/ и уга́сший возжзи́ свети́льник се́рдца моего́,/ златы́й све́щниче, Всенепоро́чная.

Седа́лен преподо́бнаго, глас 4.

Подо́бен: Яви́лся еси́ днесь:

Па́мять боя́щихся Бо́га весели́т ве́рных,/ прииди́те у́бо, и мы в па́мять пренесе́ния преподо́бнаго отца́ на́шего Феодо́сия/ воспое́м Бо́га, сего́ просла́вльшаго.

Сла́ва, и ны́не, предпра́зднства, глас 3.

Подо́бен: Красоте́ де́всіва:

Предпра́зднственная преставле́ния торжеству́юще Богома́тере,/ ра́дующеся, све́тло к Ней воззове́м:/ ра́дуйся, взе́млющаяся от земли́ к Небеси́;/ ра́дуйся, вся концы́ Твои́м Успе́нием оживи́вшая./ Те́мже ныне преходя́щи, воспомина́й мир, Обра́дованная.

Песнь 4

Ирмо́с: Седя́й в сла́ве на Престо́ле Божества́,/во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ Сла́ва, Христе́, си́ле Твое́й.

Умертви́в плотско́е мудрова́ние,/ страсте́й мо́ре мяте́жное изсуши́л еси́,/ еди́ною наде́ждею ве́чных благ укрепи́вся,/ я́же ны́не прия́л еси́, преподо́бне, изве́стно.

Несть ле́по овца́м своего́ лише́нным бы́ти па́стыря,/ ни па́стырю та́кожде своя́ о́вцы оставля́ти,/ твои́ ученицы́, собра́вшеся, глаго́лаху, о́тче Феодо́сие.

Не добро́ есть пребыва́ти учи́телю на́шему/ вне оби́тели и це́ркве свое́й, ю́же сам осно́вал есть,/ твои́ ученицы́ глаго́лаху, о́тче преподо́бне.

Богоро́дичен: Смире́нное, Еди́на Чи́стая,/ и прокаже́нное се́рдце мое́ нечи́стыми страсте́й наведе́нии,/ я́ко врач, исцели́ и руки́ бесо́вския исхи́ти.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й./ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Просвети́ся днесь пресла́вно храм Богома́тере,/ прие́м своего́ служи́теля преподо́бнаго,/ сия́юща светови́дно и лучи́ исцеле́ний испуща́юща всем неоску́дно/ с ве́рою к нему приходя́щим.

Благо́е совеща́ние ва́ше, о богоблаже́ннии отцы,/ кра́сное совокупле́ние, по́стнический собо́ре,/ я́ко потща́стеся пренести́ ва́шего па́стыря и учи́теля,/ светоза́рнаго свети́льника, бо́драго ума́.

Ме́сто, иде́же поло́жены́ бы́ша честны́я мо́щи твоя́, преподо́бне, прокопа́вше,/ егда́ обрето́ша, а́бие наслади́шася благоуха́ния Ду́ха Свята́го,/ оби́льным исцеле́нием всех сердца́ веселя́щаго.

Богоро́дичен: Песнопоя́ Тя, Всепе́тая, сла́влю вели́чия Твоя́./ Те́мже нечи́стых мя страсте́й изба́ви/ и ве́чныя сла́вы сподо́би.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от нея́ ро́ждшагося Бо́га сла́вим.

Прииди́те, ве́рнии, пе́сни духо́вныя принося́ще,/ Феодо́сия любо́вию ублажи́м и по до́лгу воспое́м,/ па́мять пренесе́ния его́ све́тло пра́зднующе.

Воспое́м све́тлаго, изря́днаго в чудесе́х,/ вели́каго в доброде́телех, до́бляго житие́м,/ сла́внаго уго́дника Христо́ва и Пречи́стыя Богоро́дицы, блаже́ннаго Феодо́сия.

На Небесе́х ны́не ликовству́я со а́нгельскими во́инствы ра́достно,/ о́тче пребога́те Феодо́сие,/ благода́ть и спасе́ние дарова́ти моли́ся любо́вию пою́щим тя.

Богоро́дичен: Ума́ моего́ уврачу́й сокруше́ние, Всенепоро́чная,/ исцели́ страсти́ душй мое́й и уны́ния тьму потреби́,/ я́ко да во хвале́нии Тя пою́, Присноблаже́нную, Богоро́дице Всепе́тая.

Кондак, глас 8.

Подо́бен: Взбра́нной:

Насле́дник отце́в был еси́, преподо́бне,/ тех после́дуя жити́ю и уче́нию,/ обы́чаю и воздержа́нию,/ моли́тве же и предстоя́нию./ С ни́миже, име́я дерзнове́ние ко Го́споду,/ проще́ние согреше́ний и спасе́ние испроси́ вопи́ющим ти:/ ра́дуйся, о́тче Феодо́сие.

И́кос:

А́нгельски пожи́в на земли́, преподо́бне,/ А́нгелов похвалы́ на Небеси́ сподо́бился еси́:/ ка́ко у́бо воспою́ твое́ пресве́тлое житие́ и премно́гия твоя́ доброде́тели,/ зна́мения же и чудеса́, и́миже вся просвеща́еши, я́ко со́лнце?/ Те́мже вопи́ю тебе́ такова́я:/ ра́дуйся, от младе́нства Христу́ после́довавый;/ ра́дуйся, вся земна́я я́ко уме́ты вмени́вый;/ ра́дуйся, прило́ги страсте́й умертви́вый;/ ра́дуйся, обличи́вый нача́ла тьмы и вла́сти;/ ра́дуйся, Небе́сных взыска́вый па́че земных;/ ра́дуйся, вожделе́вый прему́дрости Бо́жия;/ ра́дуйся, сподо́бивыйся зре́ти Непостижи́маго;/ ра́дуйся, Тро́ицы Пресвяты́я пропове́дниче;/ ра́дуйся, Богоро́дицы служи́телю;/ ра́дуйся, и́ноков сла́во и похвало́;/ ра́дуйся, и́мже изба́вля́емся от вре́да вра́жия;/ ра́дуйся, о не́мже спаса́емся вси./ Ра́дуйся, о́тче Феодо́сие.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Ми́ра попече́ние отри́нув и сла́ву его́ нивочто́же вмени́в,/ сла́вы бу́дущия взыска́л еси́,/ молча́нием возлюби́в Бо́гу угоди́ти на земли́./ Тем Той тя просла́ви, преподо́бне, на Небесе́х.

Плотски́я страсти́ от ю́ности возненави́дев и су́етную красоту́ попра́в,/ поще́нием к Бо́гу превозвы́сился еси́,/ и ны́не, со А́нгелы предстоя́ Го́сподеви,/ моли́ о чту́щих па́мять твою́.

Явля́ешися, преподо́бне, сокруше́нному хулы́ ра́ди Васи́лию,/ возвеща́я ему́, коли́кия сла́вы лиши́ся;/ его́же на свою ра́ку положи́ти повеле́в,/ сего́ в том часе́ исцели́л еси́.

Богоро́дичен: Предста́тельство ми бу́ди, Пречи́стая, к Ро́ждшемуся из Тебе́,/ оставле́ние лю́тых долго́в, и Ца́рствия Бо́жия Боже́ственный вход,/ и пи́щи восприя́тие, и Све́та прича́сти́е мне подаю́щи.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́, у́бо о́бразу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Душе́ю живы́й в Вы́шних,/ в земли́ и́щущим явля́еши честны́я твоя́ мо́щи,/ я́же ви́девше це́лы и нетле́нны и благоуха́ние испуща́ющия,/ возра́довашася ду́хом, глаго́люще:/ Го́спода по́йте, дела́, и превозноси́те Его́ во ве́ки.

Подо́бно есть нам всегда́ очи́ма на́шима ви́де́ти честну́ю ра́ку отца́ на́шего Феодо́сия/ и досто́йное поклоне́ние всегда́ Тому́ приноси́ти,/ пренося́щии честны́я мо́щи глаго́лаху, пою́ще:/ Го́спода по́йте, дела́, и превозноси́те Его́ во ве́ки.

Ме́сто, на не́мже сам пре́жде сме́рти свое́й проре́кл еси́ положе́ну тебе́ бы́ти,/ прие́мше ны́не честно́е те́ло твое́,/ исцеле́ние подава́ет приходя́щим с ве́рою.

Богоро́дичен: Яви́лася еси́ А́нгелов вы́шши, ро́ждши Го́спода,/ сего́ у́бо моли́, Влады́чице Всенепоро́чная, плотски́х вы́шшу ми бы́ти искуше́ний/ и Суда́ изба́витися бу́дущаго и ве́чныя му́ки, Де́во.

Песнь 9

Ирмо́с: Всяк земноро́дный/ да взыгра́ется, Ду́хом просвеща́ем,/да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Победи́тель мироде́ржца, кня́зя тьмы, яви́лся еси́,/ вражде́бныя его́ стре́лы ору́жием кре́стным и ве́рою до конца́ сокруши́в, взыва́я:/ Бог нам прибе́жище и си́ла.

Ты па́стырь и́стинный Христо́ва стада был еси́,/ о не́мже моли́ти не преста́й всегда́, преподо́бне,/ дарова́ти нам согреше́ний оставле́ние,/ Боже́ственное заступле́ние и ве́чное ра́дование.

Прозря́ исхожде́ние свое́ от те́ла и бу́дущее тебе́ воздая́ние от Бо́га,/ моли́лся еси́ приле́жно, преподо́бне, о ста́де твое́м/ и сих ско́рбных уте́шил еси́, глаго́ля:/ се обеща́ю вам, бра́тие и отцы́,/ я́ко а́ще и те́лом отхожду́ от вас,/ но ду́хом при́сно бу́ду с ва́ми.

Богоро́дичен: Спаси́ мя, Чи́стая, Спа́са ро́ждшая Всеще́драго,/ уще́дри раба́ Твоего́ и к покая́ния пути́ наста́ви,/ лука́ваго же собла́зны от среды́ отжени́,/ и того́ мя изба́ви ловле́ния,/ и огня́ ве́чнаго исхи́ти.

Свети́лен.

Подо́бен: Не́бо звезда́ми:

Па́мять пренесе́ния честны́х твои́х моще́й днесь пра́зднующе, вопие́м:/ со А́нгелы предстоя́ в дерзнове́нии мно́зе,/ всех нас, о́тче, помина́й ко Влады́це Христу́.

Сла́ва, и ны́не, предпра́зднства: Твоего́ честна́го успе́ния: (зри день сей выше).

На хвали́тех стихи́ры предпра́зднства, сти́ховныя 3 (зри день сей выше) И преподо́бнаго 3, глас 8.

Подо́бен: О, пресла́внаго чудесе́:

Преподо́бне о́тче Феодо́сие,/ па́стыря тя поста́ви Госпо́дь/ Своему́ ста́ду;/ ты бо, себе́ назда́в/ на основа́нии доброде́телей,/ це́рковь бы́ти Бо́гу, блаже́нне, сподо́бися,/ всегда́ разу́мному Све́ту предстоя́,/ по достоя́нию от Него́ прославля́емь./ Те́мже тя чти́м и ублажа́ем.

Преподо́бне о́тче Феодо́сие,/ ты усе́рдно Бо́гу послужи́л еси́,/ и́ночествовав молча́нием/ и воздержа́нием ше́ствуя,/ смире́нием украша́йся/ и все́ми доброде́тельми просвеще́н,/ ве́чных благ получи́л еси́./ Тем и мы, честну́ю твою́ обстоя́ще ра́ку,/ тя прославля́ем.

Преподо́бне о́тче Феодо́сие,/ а́ще и те́лом отлучи́лся еси́ от нас,/ но ду́хом с на́ми всегда́ пребыва́еши;/ се бо, и по сме́рти явля́яся, нас посеща́еши,/ от напа́стей изба́вля́я/ и печа́льныя утеша́я,/ поги́бшая явля́я/ и больны́я исцеля́я предста́тельством твои́м./ Те́мже тя вси́ ве́рою ублажа́ем.

Сла́ва, глас 6:

Днесь архиере́е, с чи́ны свяще́нных прише́дше,/ и мно́жество и́ночествующих, и благове́рных наро́ди/ прия́ша от пеще́ры пречестны́я твоя́ мо́щи, о́тче Феодо́сие,/ со свеща́ми и фимиа́мом, че́стно провожда́юще,/ в богозда́нную це́рковь прине́сше,/ положи́ша свяще́нно./ Его́же мы ле́тное воспомина́ние пра́зднуем/ и, велегла́сно пою́ще, взыва́ем ти:/ я́ко Престо́лу Христо́ву предстоя́, преподо́бне,/ не преста́й моля́ся изба́витися всем от вся́каго вреда́ вра́жия/ и спасти́ся душа́м на́шим.

И ны́не, предпра́зднства, глас 3: Прииди́те, вси концы́ земни́и: (зри день сей вы́ше).

Славосло́вие вели́кое, и отпу́ст.

На Литурги́и слу́жба преподо́бнаго.

Моли́тва

О свяще́нная главо́, А́нгеле земны́й и челове́че Небе́сный, преподо́бне и Богоно́сне о́тче наш Феодо́сие, изря́дный слуго́ Пресвяты́я Богоро́дицы, во и́мя ея́ свято́е оби́тель пречу́дну на гора́х Пече́рских сооруди́вый и в ней чуде́с мно́жеством просия́вый! Моли́м тя со усе́рдием мно́гим: моли́ся за нас ко Го́споду Бо́гу и испроси́ нам от Него́ вели́кия и бога́тыя ми́лости: ве́ру пра́ву, наде́жду спасе́ния несомне́нну, любо́вь ко всем нелицеме́рну, благоче́стие непоколеби́мое, душ и теле́с здра́вие, жите́йских потре́б дово́льство, и да не во зло обрати́м блага́я, дару́емая нам от щедрода́тельныя Его́ десни́цы, но в сла́ву И́мене́ Его́ свята́го и во спасе́ние на́ше. Сохрани́, уго́дниче Бо́жий, предста́тельством твои́м святы́м страну́ на́шу, Це́рковь Православную, град твой и Ла́вру твою́ невреди́мы от вся́каго зла, и вся лю́ди, притека́ющия на поклоне́ние к честно́му твое́му гро́бу и пребыва́ющия во святе́й оби́тели твое́й, осени́ Небе́сным твои́м благосло́вением и от вся́ких зол и бед ми́лостивно изба́ви. Наипа́че же в час кончи́ны на́шея покажи́ нам многомо́щное твое́ покрови́тельство: да изба́вимся моли́тва́ми твои́ми ко Го́споду вла́сти лю́таго мироде́ржца и сподо́бимся насле́дити Ца́рство Небе́сное. Яви́ нам, о́тче, благосе́рдие твое́ и не оста́ви нас, си́рых и безпо́мощных, да вы́ну славосло́вим ди́внаго во святы́х Свои́х Бо́га, Отца́, и Сы́на, и Свята́го Ду́ха, и твое́ свято́е заступле́ние, во ве́ки веков. Ами́нь.

Преподо́бнаго Арка́дия, Новото́ржскаго чудотво́рца