НА ВЕЧЕ́РНИ

На Го́споди, воззва́х: стихи́ры, глас 8.

Подо́бен: Что вы нарече́м:

Что тя ны́не, Пи́мене́, имену́ем?/ Мона́хов о́браз и исцеле́ний самоде́лателя,/ воздержа́ния рана́ми стра́сти уязви́вша душе́вныя,/ граждани́на А́нгелов и собесе́дника,/ Вы́шния митропо́лии жи́теля,/ доброде́телей сосу́д и благочести́вых утвержде́ние./ Моли́ спасти́ся душа́м на́шим.

Что тя ны́не, Пи́мене, провеща́ем?/ Пусты́ни жи́теля и безмо́лвию рачи́теля,/ страсте́й искорени́теля и мона́хов наста́вника,/ наводне́ние уче́ний Боже́ственнаго Ду́ха,/ свети́льника разсужде́ния неусы́пна,/ чудоде́йственника и́стинна,/ стра́сти разли́чныя исцеля́юща./ Моли́ спасти́ся душа́м на́шим.

Свети́льник разсужде́ния быв,/ озаря́я ду́ши присту́пающия к тебе́ ве́рно/ и стезю́ жи́зни показу́я тем, му́дре./ Те́мже тя хвала́ми ублажа́ем,/ соверша́юще свято́е твое́ торжество́,/ Пи́мене́, отце́в похвало́,/ по́стников удобре́ние./ Моли́ спасти́ся душа́м на́шим.

Сла́ва, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду трудо́в твои́х,/ де́монския погуби́л еси́ полки́/ и а́нгельския дости́гл еси́ чи́ны,/ и́хже жити́ю без поро́ка поревнова́л еси́./ Дерзнове́ние име́я ко Христу́ Бо́гу,/ мир испроси́ душа́м на́шим.

И ныне, Богоро́дичен или Крестобогоро́дичен.

Подо́бен: Тридне́вен:

Ви́дящи Тя распина́ема, Христе́,/ Тебе́ Ро́ждшая вопия́ше:/ что стра́нное, еже ви́жу, та́инство, Сыне Мой?/ Ка́ко на Дре́ве умира́еши, пло́тию пове́шен,/ жи́зни Пода́телю?

На стихо́вне Окто́иха.

Сла́ва, глас 8. Самогла́сен:

Мона́хов мно́жества,/ наста́вника тя почита́ем, о́тче наш Пи́мене́:/ твое́ю бо стезе́ю вои́стинну пра́во ходи́ти позна́хом./ Бла́жен еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных./ С ни́миже моли́ся Го́сподеви/ поми́ловатися душа́м на́шим.

И ны́не, Богоро́дичен или Крестобогоро́дичен.

Подо́бен: О, пресла́внаго чудесе́:

А́гница, А́гнца я́ко ви́де,/ на Дре́ве просте́рта во́лею Кре́стнем,/ вопия́ше ма́терски, боле́знующи с пла́чем:/ Сы́не Мой, что стра́нное сие́ виде́ние?/ Всем живо́т дая́й я́ко Госпо́дь,/ ка́ко умерщвля́ешися, Долготерпели́ве,/ земны́м пода́я воскресе́ние?/ Сла́влю Твое́ мно́гое, Бо́же Мой, снизхожде́ние.

Тропа́рь, глас 8:

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́,/ и был еси́ свети́льник вселе́нней, сия́я чудесы́, Пи́мене, о́тче наш,/ моли́ Христа́ Бо́га спасти́ся душа́м на́шим.

НА У́ТРЕНИ

О́ба кано́на Окто́иха и свята́го кано́н на 4, глас 8. Творе́ние Феофа́ново.

Песнь 1

Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко Еди́н сла́вно просла́вися.

Теплото́ю Уте́шителя, о́тче, согрева́емо се́рдце твое́,/ лед де́монский и страсте́й зи́му разруши́.

У́глем Боже́ственнаго стра́ха опали́в страсте́й вещь,/ был еси́ разсужде́ния свети́льник,/ безстра́стие же, блаже́нне, о́гненно.

Нося́ на ра́ме, о́тче, крест твой,/ после́довал еси́ Зову́щему любо́вию/ и свети́льник мона́хов был еси́.

Богоро́дичен: Всего́ мя спаса́ет Сло́во Пребоже́ственное,/ бла́гостию восхоте́в из чре́ва Твоего́ воплоти́тися,/ Чи́стая Ма́ти Де́во.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Стоя́нию всено́щному твоему́ удиви́шася А́нгели,/ и́бо тех име́л еси́ споспе́шников и́же к Бо́гу в моли́твах.

Слепоту́ оттря́сл еси́ страсте́й от ума́ твоего́ оче́с,/ те́мже прозира́л еси́ чи́сто Неви́димаго.

Я́ко млеко́м воздержа́ния воспита́вся, Пи́мене преподо́бне,/ на высоту́ доброде́телей возвы́сился еси́ в соверше́нное безстра́стие.

Богоро́дичен: Име́я Тя Помо́щницу,/ враго́в стремле́ния, Чи́стая, не убою́ся:/ име́я Тя Предста́тельницу, тех побежда́ю полки́.

Седа́лен, глас 3.

Подо́бен: Боже́ственныя ве́ры:

Пасо́м от Го́спода, Сего́ овча́ яви́лся еси́ кро́тко,/ сопроти́вныя, блаже́нне, во́лки побежда́я,/ и, сконча́в Боже́ственный по́двиг твой,/ в Небе́сную огра́ду всели́лся еси́, о́тче преподо́бне./ Христа́ Бо́га приле́жно моли́ дарова́ти нам ве́лию ми́лость.

Сла́ва, и ны́не, Богоро́дичен:

Боже́ственнаго естества́ не отлу́чся, плоть быв во чре́ве Твое́м,/ но Бог вочелове́чся и пребы́сть,/ И́же по рождестве́ Ма́терь Тя Де́ву, я́ко пре́жде рождества́, сохрани́в Всенепоро́чну, еди́н Госпо́дь./ Того́ приле́жно моли́ дарова́ти нам ве́лию ми́лость.

Крестобогоро́дичен:

Нескве́рная А́гница Сло́ва, Нетле́нная Де́ва Ма́ти,/ на Кресте́ зря́щи пове́шена из Нея́ без боле́зни Прозя́бшаго,/ ма́терски подо́бно рыда́ющи, вопия́ше:/ увы Мне, Ча́до Мое́, ка́ко стра́ждеши во́лею,/ хотя́ изба́вити от страсте́й безче́стия челове́ка?

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Нескве́рное зерца́ло, уте́шительную зарю́ прие́м, Богоно́се, был еси́/ и прия́телище Боже́ственных восхожде́ний.

Напая́емо дре́во слеза́ми яви́лся еси́, о́тче, высокора́слено,/ воздержа́нием удобря́емо и плоды́ Боже́ственными направля́емо.

Возде́лал еси́ ни́ву твоего́ ума́ боле́зньми воздержа́ния,/ доброде́телей клас многопло́ден и чуде́с благода́ть разплоди́л еси́.

Богоро́дичен: Де́вства сосу́де и невмести́маго естества́ селе́ние,/ ду́шу мою́ просвети́ омраче́нную, Богоневе́сто.

Песнь 5

Ирмо́с: У́тренююще вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.

Вар поне́с, сла́вне, дневны́й,/ ра́дости сподо́бился еси́ Го́спода твоего́, преподо́бне.

Воздержа́ния удо́лий сладково́нен прозя́бл еси́ шипо́к,/ дыха́нии Бо́жия ра́зума благово́нствуя концы́.

Пе́рвее вельми́ хваля́щагося, о́тче, зми́я,/ к земли́ смири́л еси́, смире́нием огра́ждься.

Богоро́дичен: Де́ву по рождестве́ пое́м Тя, Богоро́дице:/ Ты бо Бо́га Сло́ва пло́тию ми́ру родила́ еси́.

Песнь 6

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.

Умертви́в теле́сная стремлени́я мно́гими по́двиги,/ к жи́зни безсме́ртней отше́л еси́, Пи́мене досточу́дне.

Воздержа́ние при́сно, моли́тву и любо́вь нелицеме́рну стяжа́в, преподо́бне,/ нескве́рно Бо́жие яви́лся еси́ зерца́ло.

В пусты́нях непрохо́дных живы́й,/ страсте́й пусто́шных себе́ обнажи́л еси́/ и граждани́н Небе́сный был еси́.

Богоро́дичен: Я́же еди́на сло́вом пло́тию Сло́во ро́ждши,/ изба́ви, мо́лимся, от се́тей вра́жиих ду́ши на́ша.

Кондак, глас 4.

Подо́бен: Яви́лся еси́:

Све́тлых по́двиг твои́х, преподо́бне о́тче,/ наста́ днесь свята́я па́мять твоя́,/ ду́ши благочести́вых веселя́щи,/ Пи́мене Богому́дре,/ о́тче наш преподо́бне.

И́кос:

Душетле́нныя сла́сти и молвы́ мирски́я вседу́шно возненави́дев/ и Христа́ возжела́в, Крест Его́ взем на свою́ ра́му,/ после́довал еси́ Ему́ неосла́бным жела́нием/ и, воздержа́нии подви́гся, невеще́ственно стяжа́л еси́ житие́,/ в посте́х, и слеза́х, и моли́твах непреста́нных./ Те́мже и Спас тебе́ дарова́ Ца́рство Небе́сное,/ сподо́бль незаходи́маго све́та и зари́ непристу́пныя,/ Пи́мене Богому́дре, о́тче наш преподо́бне.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во веки.

В Боже́ственных упражня́яся виде́ниих,/ просвеща́яся невеще́ственными заря́ми,/ и дне сын и свет су́щим во тьме/ я́ко вои́стинну был еси́, Богоно́се, во ве́ки.

Взя́тся на высоту́ безстра́стия с пло́тию,/ А́нгелом подо́бяся, рая пи́щи был еси́ насле́дник, взыва́я, блаже́нне:/ Бо́же, благослове́н еси́.

Сия́я заре́ю безстра́стия, омрачи́л еси́ де́монская искуше́ния/ и сих мно́ги озлобле́ния изба́ви, вопию́щия, преподо́бне:/ Бо́же, благослове́н еси́.

Богоро́дичен: Се, Ю́же рече́ Де́ву Ду́хом вели́кий Иса́ия,/ во чре́ве Бо́га зача́т и ражда́ет, Ему́же пою́ще, зове́м:/ Бо́же, благослове́н еси́.

Песнь 8

Ирмо́с: Безнача́льнаго Царя́ сла́вы,/ Его́же трепе́щут Небе́сныя си́лы,/ по́йте, свяще́нницы,/ лю́дие, превозноси́те во вся ве́ки.

Недрема́нно душе́вную свещу́ еле́ем твои́х по́двиг соблю́д,/ вшел еси́ с ра́достию в нетле́нен черто́г и живе́ши во ве́ки.

Не поколеба́ша души́ твое́й столпа́ ве́тры нечи́стых духо́в:/ утверди́ бо ся на ка́мени ве́ры, всеблаже́нне Богоно́се.

Злоо́бразную страсте́й совле́кл еси́ ри́зу,/ обле́клся еси́, блаже́нне, в кра́сную оде́жду Боже́ственнаго безстра́стия,/ Христу́ сца́рствуя.

Богоро́дичен: Я́ко честны́й и превознесе́нный престо́л Бо́га Вы́шняго су́щую, воспое́м, лю́дие,/ еди́ну по рождестве́ Де́ву сохра́ньшуюся.

Песнь 9

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.

Заше́л еси́ у́бо, я́коже звезда́, от ми́ра,/ у Христа́ же возсия́л еси́, у́мнаго вои́стинну Пра́вды, всеблаже́нне, Со́лнца,/ и, я́коже зарю́, ве́рным, твоя́ оста́вил еси́ светови́дныя доброде́тели,/ отъе́млющия душ омраче́ние.

Честна́ пред Бо́гом твоя́ сме́рть, сла́вне, бысть:/ и́бо преподо́бно на земли́ пожи́л еси́,/ сего́ повеле́ния и опра́вдания, Пи́мене, соблюд невре́дна./ Те́мже возсия́ я́ко пра́веднику тебе́ Свет невече́рний.

Боже́ственными, о́тче, добро́тами наслажда́яся, и прича́стием обожа́емь,/ и вели́кому Све́ту просвеще́н ны́не предстоя́,/ и кра́йним жела́нием прибли́жился еси́ ясне́йше./ Тя чту́щия, Пи́мене, и творя́щия твою́ па́мять помина́й.

Богоро́дичен: Уста́вила еси́ еди́на в жена́х кля́тву первозда́нных, Богоневе́сто,/ Неопи́саннаго пло́тию ро́ждши опису́ема,/ обнови́ла еси́ зако́ны естества́, Нескве́рная, разстоя́щия пе́рвее,/ пресла́вным хода́тайством Твои́м соедини́ла еси́.

Свети́лен.

Подо́бен: Не́бо звезда́ми:

А́нгельскаго жития́ жела́я, удали́лся еси́, Пи́мене, в пусты́ни/ и стра́сти покори́л еси́ плотски́я, равноа́нгелен яви́лся еси́,/ о́тче наш Богоно́се.

Богоро́дичен:

Держа́вным Твои́м покро́вом/ от враго́в наве́та нас, Чи́стая, Твоя́ рабы́, сохрани́ вся невре́дны:/ Тебе́ бо стяжа́хом еди́ну прибе́жище в ну́ждах.

НА ЛИТУРГИ́И

Бла́женны от кано́на, песни 3-я и 6-я.

Проки́мен, глас 7: Честна́ пред Го́сподем/ сме́рть преподо́бных его́. Стих: Что возда́м Го́сподеви о всех, я́же воздаде́ ми? 

Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех его́ восхо́щет зело́. Стих: Си́льно на земли́ бу́дет се́мя его́. 

Ева́нгелие от Матфе́я, зача́ло 10. Прича́стен: В па́мять ве́чную: