НА МА́ЛОЙ ВЕЧЕ́РНИ

На Го́споди, воззва́х: стихи́ры на 4, глас 8.

Подо́бен: О, пресла́внаго чудесе́:

Ра́зума све́тлостию украша́лся/ и за́поведьми Боже́ственными просвети́в ду́шу твою́,/ о тле́нных и мимотеку́щих небре́гл еси́/ и зе́млю с земны́ми оста́вил еси́,/ в пусты́нях же жи́ти изво́лил еси́/ и Христа́ па́че всех возлюби́л еси́,/ Иоа́нне преблаже́нне,/ Его́же моли́, да спасе́т ду́ши на́ша, я́ко Милосе́рд.

Любе́зне Влады́це после́довал еси́,/ от млады́х ногте́й Того́ соверша́я повеле́ния,/ и, благода́тию па́че не́жели млеко́м воспита́н,/ возра́сл еси́ в целому́дрии и чистоте́,/ и, в дом Бо́жий приходя́ и поуча́лся,/ Христа́ обре́л еси́, Иоа́нне преблаже́нне,/ Его́же моли́, да спасе́т ду́ши на́ша, я́ко Милосе́рд.

Поще́нием и бде́нием ум свой очи́стив,/ возше́л еси́ на высоту́ Небе́сную/ ле́ствицею доброде́телей,/ и, в сла́ве со А́нгелы при́сно водворя́лся,/ на враги́ Небе́сную побе́ду нам испроси́/ у Царя́ веко́в, Христа́ Бо́га на́шего,/ Иоа́нне преблаже́нне,/ Его́же моли́, да спасе́т ду́ши на́ша, я́ко Милосе́рд.

Весели́ся, пусты́не Ры́льская,/ прие́мый в себе́ свети́ло мы́сленное,/ светолу́чными сия́нии ве́сь мир просвеща́ющее/ и чудесы́ лю́ди ко Христу́ приводя́щее,/ исцеле́ний бо оби́льно пото́ки излива́ет/ и боле́зни вся исцеля́ет./ Но моли́ся Христу́ Бо́гу, Иоа́нне преблаже́нне,/ да спасе́т ду́ши на́ша, я́ко Милосе́рд.

Сла́ва, глас 6:

Гла́са послу́шав Влады́чня, преподо́бне Иоа́нне,/ Спа́су глаго́лющу:/ и́же хо́щет вслед Мене́ идти́, да отве́ржется себе́/ и, крест свой взем, да после́дует Мне,/ оста́вил еси́ житие́ тле́нное/ и сама́го себе́ сраспя́л еси́,/ я́ко па́стырю овца́, Христу́ после́довал еси́/ и в Еде́мскую па́жить, ра́дуяся, всели́лся еси́.

И ны́не, пра́здника, глас 4: Прииди́те, воспое́м, лю́дие,/ Пресвяту́ю Де́ву Чи́стую: (зри день сей выше).

На стихо́вне стихи́ры попра́зднства, глас 2: 1-я: Вси Небе́снии: 2-я: Собра́ся лик: 3-я: Две́ри Небе́сныя: (зри день сей выше).

Сла́ва, самогла́сен, глас 5:

Преподо́бне о́тче Иоа́нне,/ от младе́нства доброде́тель приле́жно стяжа́в,/ сосу́д был еси́ Свята́го Ду́ха/ и, от Него́ чуде́с де́йство прии́м,/ уве́рил еси́ челове́ки преоби́дети сла́дкая./ Ны́не же Боже́ственным све́том чи́сте просвеще́н,/ просвети́ на́ша мы́сли и чу́вства.

И ны́не, пра́здника, глас то́йже: Воспо́йте, лю́дие,/ ма́тери Бо́га на́шего: (зри день 15-й).

Тропа́рь пи́сан на вели́цей вече́рни.

Сла́ва, и ны́не, пра́здника.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8.

Стихи́ры пра́здника, глас 2: 1-я: Ки́ими недосто́йными устна́ми/ ублажи́м Богоро́дицу: 2-я: Ка́я стра́шная пе́ния: 3-я: Ка́я духо́вная пе́ния: (зри день сей выше).

И́ны стихи́ры преподо́бнаго, глас 1.

Подо́бен: Небе́сных чино́в:

В по́стницех возсия́вшаго прообразова́ние,/ пусты́нное воспита́ние, ры́льскаго свети́льника/ словесы́ и пе́сньми, вси ве́рнии, да восхва́лим,/ зову́ще и глаго́люще:/ ра́дуйся, вели́кая сла́во, я́же в на́ша дни яви́ся,/ Иоа́нне преблаже́нне.

Всю наде́жду возложи́в Творцу́ твоему́ и Бо́гу,/ сама́го себе́ приве́л еси́ Влады́це,/ И́же, не́дра отве́рз, млеко́м тя воспита́/ ду́шу пита́ющих писа́ний и Небе́снаго Ца́рствия насле́дника тя сотвори́,/ все́ми ве́рными почита́ема,/ Иоа́нне преблаже́нне.

Ра́дуешися, ви́дев соверше́ние трудо́в твои́х,/ и́хже бо о́ко не ви́де, ни у́хо слы́ша,/ добро́ты ра́йския восприя́л еси́,/ све́тлое воздая́ние по́двигов твои́х,/ и ра́ка твоя́ на земли́ благода́ть источа́ет,/ те́ло твое́ неруши́мо иму́щи,/ Иоа́нне преблаже́нне.

Сла́ва, глас 6:

Прииди́те, правосла́вных собо́ри,/ духо́вне возра́дуимся дне́сь,/ иде́же Богому́дрый Иоа́нн,/ в па́мять свою́ собра́л ны е́сть, к нему́ вопию́щих:/ ра́дуйся, пусты́нная красото́ и а́нгелов совсе́льниче;/ ра́дуйся, Ры́льская похвало́ и болга́ром сограждани́не;/ не преста́й моля́ся Христу́ Бо́гу/ о и́же ве́рою и любо́вию почита́ющих/ присночестну́ю и всепра́зднственную па́мять твою́.

И ны́не, пра́здника, глас то́йже: Прииди́те, всеми́рное успе́ние/ Всенепоро́чныя Богоро́дицы пра́зднуем: (зри день 15-й).

Вход. Проки́мен дне. И чте́ния 3 преподо́бническая (зри день 14-й).

На лити́и стихи́ры самогла́сны, глас 2:

Воздержа́тельное обуче́ние на земли́ собра́в,/ преподо́бне о́тче Иоа́нне,/ и страсте́й прило́ги вся угаси́в тече́нием слез твои́х,/ ле́ствица боже́ственная и честна́я,/ на Не́бо возводя́щая,/ всем яви́ся богоприя́тное житие́ твое́;/ благоче́стия бо плоды́ показу́я,/ исцеля́еши не́мощи страсте́й ве́рно тебе́ вопию́щих:/ ра́дуйся, восто́ка звездо́ светоза́рная/ и мона́шествующих до́брый па́стырю;/ ра́дуйся, пресла́вное пусты́нным овца́м кре́пкое огражде́ние/ и Це́ркве честно́е утвержде́ние;/ ра́дуйся, заблу́ждшим вели́кий наста́вниче/ и вселе́нней све́тлое ра́дование.

Земна́го а́нгела и Небе́снаго челове́ка,/ ми́рови благоукраше́ние,/ сла́дость доброде́телей и наслажде́ние благи́х,/ по́стников похвалу́, Иоа́нна почти́м,/ насажде́н бо в дому́ Бо́жии пра́ведно,/ я́ко кедр в пусты́ни,/ умно́жи ста́до Христо́вых ове́ц/ в преподо́бии и пра́вде.

Глас 4: Возсия́ дне́сь пресве́тлая па́мять твоя́,/ богому́дре Иоа́нне,/ нас созыва́ющи к похвале́нию Христа́ Бо́га на́шего./ Те́мже притека́юще к ра́це моще́й твои́х/ и исцеле́ния да́ры прие́млюще,/ Спа́са, тя просла́вльшаго,/ воспева́ем во ве́ки.

Чи́стый душе́ю и се́рдцем,/ а́нгеле земны́й и челове́че Небе́сный,/ де́вства учи́телю и воздержа́ния изве́стное ме́рило,/ Иоа́нне блаже́нне,/ живы́й с Влады́кою твои́м/ и немо́лчное славосло́вие со а́нгелы и преподо́бными Тому́ принося́,/ творя́щия твою́ свяще́нную па́мять/ спаса́й непреста́нными моли́твами твои́ми.

Глас 5: Преподо́бне о́тче Иоа́нне,/ ты вои́стинну яви́лся еси́ по́стником похвала́,/ кре́пость Правосла́вию и вселе́нней свети́ло незаходи́мое,/ льсти́ваго врага́ не убоя́вся/ и устраше́ний его́ не смути́вся,/ но благода́тию боже́ственною/ прему́дренно попра́л еси́ всю ле́сть его́,/ от нея́же и нас изба́ви, мо́лим тя.

Сла́ва, глас 5:

Ра́дуйся, пусты́нное украше́ние,/ благоуха́ния вселе́нную исполня́ющее,/ и го́ру Ры́льскую пе́нием оглаша́ющее,/ и Це́рковь Болга́рскую венча́ющее,/ а́нгелом бо был еси́ сожи́тель,/ полко́в бесо́вских прогони́тель,/ ересе́й же разори́тель/ и вся́кия ле́сти из ко́рене потреби́тель./ Те́мже в Вы́шнее всели́вся жили́ще,/ преподо́бне о́тче Иоа́нне,/ Христу́ Бо́гу моли́ся/ дарова́ти душа́м на́шим мир и ве́лию ми́лость.

И ны́не, пра́здника, глас то́йже: Прииди́те, празднолю́бных собо́р,/ прииди́те, и лик соста́вим: (зри день 15-й).

На стихо́вне стихи́ры, глас 5.

Подо́бен: Ра́дуйся, по́стнических:

Ра́дуйся, богому́дре Иоа́нне,/ Крести́телю тезоиме́нный/ и в утро́бе ма́терней от А́нгела нарече́нный,/ и непло́дови благода́тию ложесна́ разве́рзый,/ посто́м же и моли́твою стра́сти плотски́я умертви́вый,/ и в пусты́ни Ры́льстей я́ко звезда́ незаходи́мая возсия́вый,/ мрак грехо́вный всю́ду прогоня́ющая/ и тьму́ ересе́й облича́ющая/ си́лою Христа́ Бо́га на́шего,/ Его́же моли́ дарова́ти душа́м на́шим/ мир и ве́лию ми́лость.

Стих: Честна́ пред Го́сподем/ сме́рть преподо́бных его́.

Ра́дуйся, богому́дре Иоа́нне,/ струя́ми сле́зными пусты́ню напои́вый/ и па́жить зла́чную удобри́вый,/ и ста́до мона́шествующих на ней воспита́вый,/ и, к Бо́гу бесе́дуя пресве́тлою чистото́ю души́ твое́й,/ я́ко столп пресве́тлый, све́том благоче́стия/ сих путеводи́вый во двор о́вчий Па́стыря До́браго,/ Ца́рствие Христа́ Бо́га на́шего,/ Его́же моли́ дарова́ти душа́м на́шим/ мир и ве́лию ми́лость.

Стих: Блаже́н муж, боя́йся Го́спода,/ в за́поведех его́ восхо́щет зело́.

Ра́дуйся, богому́дре Иоа́нне,/ а́нгельских лико́в собесе́дниче/ и Вы́шняго Ца́рствия соприча́стниче,/ житие́ на земли́ пра́ведное вои́стинну/ доброде́тельне пожи́вый/ и пречи́стое зерца́ло яви́выйся,/ светозаре́ния лучи́ блиста́ющее;/ Ду́ха же Свята́го пребога́тне в себе́ всели́в,/ озаре́нием бу́дущая зрел еси́/ и вся предглаго́лал еси́/ светоявле́нием Христа́ Бо́га на́шего,/ Его́же моли́ дарова́ти душа́м на́шим/ мир и ве́лию ми́лость.

Сла́ва, глас 4:

Пусты́нное возлюби́в житие́/ и а́нгельское восприи́м служе́ние,/ ми́ра возненави́дел еси́ ле́сть вре́менную/ и яви́лся еси́ Це́ркви свети́ло пресве́тлое,/ А́нгелом соприча́стник и пусты́нным боже́ственное украше́ние,/ скорбя́щим ра́дость, немощны́м исцеле́ние/ и всем ве́рным спасе́ние./ Но моли́ся Христу́ Бо́гу, всеблаже́нне Иоа́нне,/ мир вселе́нней дарова́ти/ и душа́м на́шим ве́лию ми́лость.

И ны́не, пра́здника, глас то́йже: Дави́дскую пе́снь дне́сь, лю́дие, воспое́м Христу́ Бо́гу: (зри день 15-й).

На благослове́нии хле́бов тропа́рь преподо́бнаго два́жды и пра́здника еди́ножды.

Тропа́рь преподо́бнаго, глас 1:

Покая́ния основа́ние, прописа́ние умиле́ния,/ о́браз утеше́ния, духо́внаго соверше́ния/ равноа́нгельное житие́ твое́ бы́сть, преподо́бне./ В моли́твах у́бо и в поще́ниих и в слеза́х пребыва́вый,/ о́тче Иоа́нне,/ моли́ Христа́ Бо́га о душа́х на́ших.

НА У́ТРЕНИ

На Бог Госпо́дь: тропа́рь пра́здника два́жды. Сла́ва, преподо́бнаго. И ны́не, пра́здника.

По 1-м стихосло́вии седа́лен, глас 4.

Подо́бен: Вознесы́йся на Крест:

Зва́нию Го́спода твоего́ после́довал еси́,/ мир оста́вил еси́ и вся ми́ра прекра́сная, преблаже́нне о́тче Иоа́нне,/ претерпе́л же еси́ усе́рдно озлобле́ние пусты́нное/ и му́жески отрази́л еси́ полки́ бесо́вския./ Те́мже при́сно твою́ па́мять пе́сньми восхваля́ем ве́рно.

Сла́ва, и ны́не, пра́здника, глас 4.

Подо́бен: Яви́лся еси́ дне́сь:

В сла́вней па́мяти Твое́й вселе́нная, невеще́ственным Ду́хом преукра́шена,/ у́мно с весе́лием зове́т Ти:/ ра́дуйся, Де́во, христиа́н похвало́.

По 2-м стихосло́вии седа́лен, глас 5.

Подо́бен: Собезнача́льное Сло́во:

Пресе́льник быв от земли́ оте́чества твоего́/ и любо́вь всю земну́ю оста́вив,/ на го́ру возше́л еси́ и до Небе́с возвы́сился еси́ я́ко столп,/ челове́ки наставля́яй на пу́ть спасе́ния./ Те́мже и всели́лся еси́ в зе́млю кро́тких, Иоа́нне преподо́бне, о́тче наш.

Сла́ва, и ны́не, пра́здника, глас и подо́бен то́йже:

А́нгел мно́жества славосло́вят Тя/ и, челове́ческий род, ве́рно пое́м Тя,/ я́ко преста́вилася еси́ от земли́ к Ро́ждшемуся из Тебе́, Богоро́дице Чи́стая,/ и ны́не мо́лишися приле́жно изба́витися от бед/ ве́рою соверша́ющим Твое́, Де́во, преставле́ние.

По полиеле́и седа́лен, глас 8.

Подо́бен: Прему́дрость и Сло́во:

Виде́ние и дея́ние восприи́м, чу́вствия украша́я,/ житие́ упра́вил еси́ к Боже́ственным повеле́нием,/ и́ноком же яви́лся еси́ свети́льник пресве́тлый, наставля́яй к позна́нию./ Те́мже тя восхваля́юще, воспева́ем успе́ние твое́, богоно́се Иоа́нне, и любо́вию взыва́ем:/ моли́ Христа́ Бо́га согреше́ний проще́ние дарова́ти/ чту́щим любо́вию святу́ю па́мять твою́.

Сла́ва, и ны́не, пра́здника, глас и подо́бен то́йже:

Я́же Бо́га заче́нши без се́мене: (зри день сей выше).

Та́же Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Гора́ Небеси́ подо́бяшеся,/ я́ко ма́ти младе́нца,/ во объя́тия прие́млющи свети́льника пусты́ннаго Иоа́нна,/ и́же, я́коже оре́л Святы́м Ду́хом/ прелета́я го́ры Ры́льския и верте́пы,/ отту́ду вы́спрь взя́тся на Не́бо ко Го́споду,/ Его́же и возлюби́./ Но, о кра́снодушне,/ просвеща́яй ве́рныя, притека́ющия к честне́й ра́це моще́й твои́х/ и почита́ющия всечестно́е твое́ успе́ние,/ с Богоро́дицею моли́ся о спасе́нии душ на́ших.

Кано́н пра́здника пе́рвый, глас 1, кир Космы́ (зри день 15-й) и преподо́бнаго кано́н, глас то́йже, его́же краегране́сие: Ди́вен Бог во святы́х Свои́х, Бог Изра́илев.

Пе́снь 1

Ирмо́с: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,/ изра́ильтяном пу́ть глубины́ новосоде́лавшая.

Да́ждь ми, блаже́нне, кре́пкую с высоты́ по́мощь и просвеще́ние ра́зума,/ я́ко да равноа́нгельное твое́ на земли́ житие́ восхвалю́,/ и́мже исто́чник чуде́с яви́лся еси́.

И́же в Лива́не ке́дру уподо́бился еси́, доброде́тели боже́ственныя преумно́жив,/ и, я́ко дре́во насади́вся при исхо́дищих воды́ живы́я,/ осеня́еши ны́не неду́жных благода́тию.

Вы́спрь житие́ на́ше я́ко слы́шав и на Небесе́х пребыва́ние,/ оста́вил еси́ зе́млю оте́чества твоего́, и ми́ра кра́сная презре́л еси́,/ и к Вы́шней жи́зни впери́лся еси́.

Богоро́дичен: Егда́ восхожда́ху Небе́снии у́ми ле́ствицу Иа́ковлю и низхожда́ху,/ Твое́ стра́шное тогда́ рождество́ та́йно яви́ша, Богоро́дице,/ и́мже у́бо Бог на зе́млю сни́де, да челове́ки на Не́бо вознесе́т.

Пе́снь 3

Ирмо́с: Еди́не, ве́дый челове́ческаго существа́ не́мощь/ и ми́лостивно в не́ воображе́н,/препоя́ши мя с высоты́ си́лою,/ е́же вопи́ти Тебе́, Святы́й,/ одушевле́нный хра́ме неизрече́нныя сла́вы Твоея́, Человеколю́бче.

Не роди́вся от по́хоти плотски́я, я́ко безпло́тен пожи́л еси́ на земли́,/ и ча́до был еси́ Вы́шняго благода́тию,/ и я́ко жре́бий оте́ческий прия́л еси́ угото́ванное Ца́рство Того́ возлю́бльшим.

Благода́тию Ду́ха исполня́я за́поведь изра́ильтяном Моисе́йскую,/ очи́стил еси́ те́ло и ду́шу де́ньми мно́жайшими,/ на го́ру возше́д, и я́ко безпло́тен пребыва́л еси́ та́мо,/ и Боговиде́ния сподо́бился еси́.

От ю́ности украси́вся ра́зумом, Соломо́нову му́дрость стяжа́л еси́/ и, всю ми́ра сего́ сла́стную пи́щу премину́в,/ а́лчбою и боле́знию потща́лся еси́ нетле́нную получи́ти, всеблаже́нне.

Богоро́дичен: Госпо́дь пе́рстом написа́ в Тебе́ Сло́во Безнача́льное,/ я́коже в глави́зне кни́жней, Всепе́тая;/ те́мже припа́даю Ти, моля́ся, в кни́зе живо́тней мя написа́ти,/ грехо́в рукописа́ние растерза́ющи.

Конда́к и и́кос пра́здника.

Ин конда́к преподо́бнаго, глас 2:

Моля́щим тя тепле́йший засту́пниче/ и прося́щим скоре́йший послу́шателю,/ преподо́бне о́тче Иоа́нне,/ приими́ моле́ние на́ше/ и Христа́ умоли́ поми́ловати нас,/ Еди́наго Преблага́го и Многоми́лостиваго.

Седа́лен преподо́бнаго, глас 6.

Подо́бен: Милосе́рдия две́ри:

По́стническия по́двиги поне́сл еси́ и страда́льческим венце́м увяза́лся еси́,/ с безпло́тными бо враги́ в телеси́ боря́ся и во́инства их низлага́я,/ удиви́л еси́ терпе́нием твои́м А́нгелы,/ и́хже житию́ во пло́ти поревнова́л еси́./ Но моли́ся Христу́ Бо́гу, о́тче Иоа́нне, спасти́ся нам.

Сла́ва, и ны́не, пра́здника,

глас и подо́бен то́йже:

Твое́ преставле́ние, Чи́стая, вси ве́рнии, похваля́юще, пое́м Тя,/ преста́вилася бо еси́ от земли́, от живота́ в живо́т,/ и, су́щи на Небесе́х, Бо́гу мо́лишися изба́витися от бед ро́ду челове́ческому.

Пе́снь 4

Ирмо́с: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаше́ние Свято́му/ во спасе́ние на́ше и обновле́ние.

Ви́дение Дании́лово разсмотри́в,/ я́ко от горы́ отто́ржеся ка́мень несече́нный и в прах и́дольское сокруши́ мучи́тельетво,/ обре́л еси́ на горе́ краеуго́льный Ка́мень, Христа́,/ зло́бу всю сокруша́юща.

Огне́м да не опали́тся содо́мским,/ А́нгел Ло́тови повелева́ше на горе́ спасти́ся,/ ты же, ра́вное Тому́ рве́ние восприи́м и на го́ру возше́д,/ та́мо жи́ти изво́лил еси́ и пла́мене стра́стнаго избежа́л еси́.

Смире́нно после́довал еси́ жезло́м позва́вшему тя Па́стырю/ и, я́ко овча́ незло́биво, зе́лием Го́рним пита́лся еси́;/ ны́не же на па́жити ра́йстей поко́ище обре́т,/ на вода́х пи́щных насыща́ешися.

Богоро́дичен: Вкуси́ Ада́м печа́ль плода́ дре́вняго, жену́ послу́шав,/ Ты же, Чи́стая, глас Арха́нгела восприи́мши;/ се Раба́ Госпо́дня! возопи́вши и Бо́га поро́ждши,/ ра́дость в мир ввела́ еси́.

Пе́снь 5

Ирмо́с: Просвети́вый сия́нием/ прише́ствия Твоего́, Христе́,/ и освети́вый Кресто́м Твои́м ми́ра концы́,/ се́рдца просвети́ све́том Твоего́ Богоразу́мия/ правосла́вно пою́щих Тя.

Я́коже А́нгел на земли́ пребы́в,/ воздержа́нием Крести́телю уподо́бился еси́, пусты́нному воспита́нию, преподо́бне;/ ны́не же хле́бом а́нгельским пита́лся по пи́санному,/ насы́ти ду́ши на́ша благода́тию.

Твое́ дерзнове́ние, е́же к Бо́гу, неоранно прозябы́й слану́ток пропове́дует, о́тче,/ и́мже сама́го себе́ ди́вно пита́л еси́, я́коже естество́м пло́ти обложе́ннаго,/ и и́же к тебе́ приходя́щия.

И́стинная наде́жда не посрами́ тебе́, блаже́нне, уве́девша бу́дущую сла́ву,/ к не́йже недосто́йна вмени́л еси́, я́же на земли́ боре́ния/ и дерзнове́нно к по́стническим страсте́м устреми́лся еси́.

Богоро́дичен: Хи́тростию зми́я Ада́м боже́ственныя ри́зы совлече́ся и в ри́зу ко́жаную оде́яся;/ от Тебе́ же пло́ть прии́м, Зижди́тель мой дебельства́ пло́ти совлече́ мя/ и в пе́рвую мя па́ки оде́жду оде́я.

Пе́снь 6

Ирмо́с: Обы́де нас после́дняя бе́здна,/ не́сть избавля́яй,/ вмени́хомся, я́ко о́вцы заколе́ния,/ спаси́ лю́ди Твоя́, Бо́же наш,/ Ты бо кре́пость немощству́ющих и исправле́ние.

Све́том пе́рвым облиста́вся, был еси́ свети́льник, блаже́нне, и А́нгелом подо́бник,/ безпреста́нно поя́ в моли́твах всено́щных Еди́наго Бо́га,/ Его́же и сын благода́тию яви́лся еси́.

Волну́ющееся бу́рею мо́ре жития́ оста́вил еси́,/ погружа́ющее нехотя́щих на Не́бо вознести́ся,/ и вся преше́л еси́ мирски́я прило́ги, наг бе́гая искуше́ний лука́ваго.

Обре́л еси́ Бо́га, все́льшася в тя,/ не дав поко́я скраниа́ма твои́ма, ни ве́ждома твои́ма дрема́ния,/ и, я́ко безпло́тен во пло́ти пожи́в,/ в Небе́сныя хра́мы всели́лся еси́.

Богоро́дичен: Иска́пай ка́пли щедро́т, о́блаче Небе́сный, Чи́стая Де́во,/ я́коже руно́ прии́мшая до́ждь и я́коже ка́плю Бо́га во чре́ве,/ и страсте́й мои́х пото́ки изсуши́.

Конда́к, глас 2.

Подо́бен: В моли́твах Неусыпа́ющую:

В моли́твах бо́дренно не усыпа́я/ и в пе́ниих непреста́нных А́нгелом подо́бяся,/ в гроб вшел еси́, тле́нную жи́знь оста́вив,/ и к Небеси́ преше́л еси́/ на нетле́ние, Иоа́нне о́тче,/ от сме́рти бо к животу́ ве́чному/ тя пресели́ Христо́с Бог, я́ко Своего́ уго́дника.

И́кос:

И́же па́че естества́ в телеси́ ме́ртвеннем а́нгельскому поревнова́вшаго житию́,/ прииди́те, воспои́м Иоа́нна преблаже́ннаго,/ той бо я́ко о́треби вмени́ мир и я́же в ми́ре,/ и, на го́ру возше́д, я́коже дре́вле вели́кий Моисе́й, посто́м очи́стися,/ и ви́дети сподо́бися Тро́ическую све́тлость не во мра́це, ни во ви́хре, но во све́те благода́ти./ Тем и чуде́с лучи́ облиста́ет,/ и ре́ки исцеле́ний ве́рным источа́ет от гро́ба своего́,/ от сме́рти бо к животу́ ве́чному пресели́ его́ Христо́с Бог, я́ко Своего́ уго́дника.

Пе́снь 7

Ирмо́с: Тебе́, у́мную, Богоро́дице, пе́щь/ разсмотря́ем, ве́рнии,/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.

Хра́брый ревни́тель быв Илии́ проро́ку,/ на стра́сти устреми́лся еси́ ору́жием поста́/ и, на горе́ водворя́йся, а́лчбою па́че челове́к по́стнически умертви́л еси́ сра́мныя по́мыслы.

Бо́жия пути́ пра́ваго восхоте́в, и мирска́го жела́ния отве́ргся,/ и на ка́мени разу́мнем стопы́ души́ твое́й утверди́в,/ ка́мене собла́зна при стези́ всех избавля́еши и прило́гов искуше́ний.

О́крест ра́ки моще́й твои́х то́чатся чудеса́ исцеле́ний приходя́щим,/ Бо́гу бо коне́чне угоди́л еси́,/ ве́рующим обещавшему ре́ки из чре́ва источи́ти Боже́ственныя благода́ти.

Богоро́дичен: Глубину́ слы́шим прему́дрости, Пречи́стая,/ я́ко Созда́вшаго руко́ю Ада́ма и от ре́бра его́ жену́ Сотво́ршаго Сло́ва воплоти́ла еси́,/ И́же, в ре́бра на Кресте́ пробожде́н, род челове́ческий обнови́.

Пе́снь 8

Ирмо́с: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.

Иску́с врага́ доблему́дренно отрази́в во бра́ни кре́пцей/ и непобеди́м яви́вся бесо́вскими кова́рствы,/ побе́дными венцы́ увяза́лся еси́/ и, Го́сподеви ны́не предстоя́, мо́лишися о воспева́ющих тя.

Сме́ртней кончи́не приспе́вшей вре́менней,/ оста́вил еси́ труды́ по́стническия,/ и, ве́чный поко́й восприи́м, Бо́гу предстои́ши,/ и, посреде́ луче́й неизрече́ннаго Божества́ сия́я, о нас мо́лишися.

Ра́вне дре́внему патриа́рху Иа́кову вар дневны́й поне́с и сту́день нощну́ю претерпе́в,/ возше́л еси́ ле́ствицею доброде́телей на высоту́ боговиде́ния,/ о́тче Иоа́нне, чуде́с исто́чниче.

Богоро́дичен: А́гнице Пречи́стая, к Тебе́ прибега́ю:/ ду́шу мою́, страстьми́ оскверне́нную, вода́ми омы́й сле́зными,/ вода́ми благода́ти Ду́ха Бо́жия глубо́кий кал грех челове́ческих омы́вшая.

Пе́снь 9

Ирмо́с: О́браз чи́стаго рождества́ Твоего́/ огнепали́мая купина́ показа́ неопа́льная;/ и ны́не на нас напа́стей свире́пеющую угаси́ти мо́лимся пе́щь,/да Тя, Богоро́дице,/ непреста́нно велича́ем.

Изя́щныя по́чести по́двига твоего́ восприя́л еси́ терпе́нием твои́м,/ его́же ра́ди со А́нгелы водворя́ешися/ и за наготу́ теле́сную в Небе́сную ри́зу обле́клся еси́, в по́стницех всеизря́дне.

Любому́дрых собо́рище, ви́ждь,/ каковы́ми благода́тьми воздае́т Бог и́стинно Того́ добро́ты вожделе́вшим:/ ни естество́ бо, ни вре́мя телесе́ Иоа́нна пустыннолю́бнаго победи́,/ точа́щаго чудеса́ да́же доны́не.

Ели́ко си́ла скрижа́ли се́рдца моего́ распросте́р,/ вся написа́х мно́гия твоя́ благода́ти,/ но досто́йна ничесо́же принесо́х тебе́;/ те́мже молю́ тя:/ ве́ру приими́ и любо́вь, преблаже́нне.

Богоро́дичен: Вонми́ Дави́дских гуслей провеща́нию, Дщи Царе́ва, и приклони́ у́хо Твое́./ Люде́й Твои́х не забу́ди, но уще́дри, Деви́це,/ и́же непреста́нно Тя сла́вящих.

Свети́лен, глас 2.

Подо́бен: Жены́, услы́шите:

Пустынножи́теля вси Иоа́нна ве́рно восхва́лим,/ А́нгела земна́го и челове́ка Небе́снаго,/ чуде́с мно́жество неиждива́емо нам точа́щаго.

Сла́ва, и ны́не, пра́здника, глас 3:

Апо́столи, от коне́ц совоку́пльшеся зде: (зри день 15-й).

На хвали́тех стихи́ры на 6. Стихи́ры пра́здника, глас 4: 1-я: В сла́вном успе́нии Твое́м: 2-я: От коне́ц стеко́шася/ апо́столов лу́чшим: 3-я: Я́же Живо́т ро́ждшая: (зри день 15-й).

И́ны стихи́ры преподо́бнаго, глас 6.

Подо́бен: Все отло́жше:

Десни́цею укрепля́емь Вседержи́теля,/ все отве́рг страсте́й безслове́сие,/ пло́ть ду́ху покори́л еси́/ и доброде́телей был еси́ пра́вило,/ мона́хов утвержде́ние,/ по́стников прописа́ние,/ преподо́бных удобре́ние./ И ны́не, неизрече́нную добро́ту зря Неразде́льныя Тро́ицы,/ Иоа́нне прему́дре,/ со дерзнове́нием моли́ся о душа́х на́ших.

Илии́ подо́бяся и Предте́чи Иоа́нну,/ возлюби́л еси́ безмо́лвие/ пусты́ни непрохо́дныя/ и, преспева́я в доброде́телех,/ дости́гл еси́ жела́ния кра́йняго,/ Иоа́нне прему́дре,/ те́мже, ра́дуяся, предстои́ши Трисия́нному Све́ту Святы́я Тро́ицы,/ от него́же нехода́тайственне/ Боже́ственный прие́мля зари́,/ со дерзнове́нием моли́ся о душа́х на́ших.

Любве́ ра́ди Христо́вы вся оста́вил еси́/ и в пусты́ню всели́лся еси́,/ ника́коже устраша́лся боре́ний врага́ неви́димаго,/ мно́гажды на тя мечта́нии находя́щаго/ и привиде́ния показу́ющаго,/ па́че же моли́твами твои́ми/ того́, я́ко прах, без ве́сти сотворя́я./ О, непоро́чныя души́ и кре́пкаго терпе́ния!/ Христу́ со дерзнове́нием моли́ся/ о душа́х на́ших.

Сла́ва, глас 3:

Ра́дуется дне́сь страна́ Болга́рская,/ гора́ же Ры́льская весели́тся,/ торжеству́ющи во успе́нии твое́м, преподо́бне о́тче./ Ве́рных мно́жества земли́ Бо́лгарския,/ востру́бим трубо́ю пе́сней,/ благода́ть бо Ду́ха вся́кия трубы́/ благоле́пнейше нас созыва́ет к пе́нию Богоно́снаго отца́,/ в доброде́телех све́тлаго, в ве́ре богоразу́мнаго,/ в виде́нии высо́каго, во уче́нии неистощи́маго,/ наста́вника заблу́ждшим, изба́вителя плене́нным,/ исцеле́ние боля́щим, оте́честву всему́ вели́кое украше́ние./ Те́мже, того́ восхваля́юще, си́це к нему́ возопии́м:/ преподо́бне о́тче Иоа́нне,/ предста́ни рабо́м твои́м/ и спаса́й ста́до твое́ всегда́ моли́твами твои́ми.

И ны́не, глас 4: Всечестно́е Твое́ успе́ние,/ Пресвята́я Де́во Чи́стая: (зри день 15-й).

Славосло́вие вели́кое. Ектении́. И отпу́ст.

НА ЛИТУРГИ́И

Блаже́нны пра́здника и свята́го. Проки́мен глас 7: Честна́ пред Го́сподем/ сме́рть преподо́бных его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 8: Блаже́н муж, боя́йся Го́спода, в за́поведех его́ восхо́щет зело́. Стих: Си́льно на земли́ бу́дет се́мя его́. Ева́нгелие от Матфе́я, зача́ло 10. Прича́стен: В па́мять ве́чную:

Моли́твы преподо́бному Иоа́нну зри день сей ниже.

Кано́ны 8-ми гласо́в преподо́бному Иоа́нну Ры́льскому, пева́емии во оби́тели его́ на моле́бнех в четверто́к, и́же и на у́трени чита́емии по суббо́там

Благослови́вшу свяще́ннику, начина́ем: Го́споди, услы́ши: (псало́м 142). Сла́ва, и ны́не: Бог Госпо́дь: со стихи́.

Тропа́рь, глас 1:

Покая́ния основа́ние, прописа́ние умиле́ния,/ о́браз утеше́ния, духо́внаго соверше́ния,/ равноа́нгельное житие́ твое́ бы́сть, преподо́бне./ В моли́твах у́бо, и в поще́ниих, и в слеза́х пребыва́вый,/ о́тче Иоа́нне,/ моли́ Христа́ Бо́га о душа́х на́ших.

Сла́ва, и ны́не, Богоро́дичен: Гаврии́лу веща́вшу: Та́же псало́м 50.

Кано́н, глас 1, его́же краегране́сие: Ди́вен Бог во святы́х Свои́х, Бог Изра́илев (зри день сей выше).

По 3-й пе́сни

Катава́сия: Еди́не, ве́дый челове́ческаго существа́ не́мощь/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,/ одушевле́нный хра́ме неизрече́нныя сла́вы Твоея́, Человеколю́бче.

По сих а́бие пое́м:

Спаси́ от бед рабы́ твоя́, преподо́бне о́тче Иоа́нне,/ я́ко вси по Бо́зе к тебе́ прибега́ем,/ я́ко неруши́мому столпу́ и предста́телю.

При́зри благосе́рдием, Всепе́тая Богоро́дице,/ на мое́ лю́тое телесе́ озлобле́ние/ и исцели́ души́ моея́ боле́знь.

Ектения́: Поми́луй нас, Бо́же: и седа́лен, глас 2:

Моле́ние те́плое и стена́ние серде́чное/ принося́ще тебе́, преподо́бне о́тче Иоа́нне,/ приле́жно вопие́м ти:/ предвари́ и от бед изба́ви нас,/ я́ко ско́рый помо́щник и те́плый наш предста́тель.

По 6-й пе́сни

Катава́сия: Обы́де нас после́дняя бе́здна,/ не́сть избавля́ли,/ вмени́хомся, я́ко о́вцы заколе́ния,/ спаси́ лю́ди Твоя́, Бо́же наш,/ Ты бо кре́пость немощству́ющих и исправле́ние.

И па́ки: Спаси́ от бед рабы́ твоя́: и При́зри благосе́рдием: я́коже по 3-й пе́сни. Та́же ектения́ ма́лая и по возгла́се а́бие конда́к, глас 2.

Подо́бен: В моли́твах Неусыпа́ющую:

Моля́щим тя тепле́йший засту́пниче/ и прося́щим скоре́йший послу́шателю,/ преподо́бне о́тче Иоа́нне,/ приими́ моле́ние на́ше/ и Христа́ умоли́ поми́ловати нас,/ Еди́наго Преблага́го и Многоми́лостиваго.

Проки́мен преподо́бнаго и Ева́нгелие от Матфе́я, зача́ло 43.

Та́же стихи́ра, глас 6:

Моле́бное пе́ние творя́ще Богоно́сному отцу́,/ прииди́те, припаде́м к честне́й ра́це моще́й его́,/ из глубины́ серде́чныя взыва́юще:/ уго́дниче Христо́в, преподо́бне Иоа́нне,/ не пре́зри ма́лаго на́шего пе́ния,/ недосто́йными устна́ми тебе́ приноси́маго,/ но приими́ моле́ние на́ше/ и низпосли́ нам свы́ше бога́тую по́мощь,/ от напа́стей ны избавля́я твои́ми к Бо́гу моли́твами,/ всеблаже́нне и досточу́дне о́тче.

Спаси́, Бо́же, лю́ди Твоя́: Го́споди, поми́луй, 12. Ми́лостию и щедро́тами:

По 9-й пе́сни

Досто́йно е́сть: и велича́ния, глас 2:

А́нгела земна́го в пе́снех почти́м, Иоа́нна,/ и граждани́на Небе́снаго,/ при́сно предстоя́щаго в све́тлостех со а́нгельскими ли́ки/ Престо́лу Святы́я Тро́ицы.

От мно́гих мои́х и лю́тых грехо́в немощству́ет те́ло,/ немощству́ет и душа́ моя́:/ к тебе́ прибега́ю, моля́ся, преподо́бне,/ спаси́ мя, окая́ннаго, в сих погиба́юща.

Ско́ро приими́ мольбы́ на́ша,/ плач же и сле́зы недосто́йных раб твои́х,/ и при́сно о нас моли́ся Преблаго́му Бо́гу,/ Иоа́нне блаже́нне, Бо́жий уго́дниче.

Пое́м вси приле́жно пе́снь тебе́ ны́не,/ всеблаже́нне Иоа́нне, и вопие́м:/ от бед нас изба́ви и бу́ди нам помо́щник,/ честну́ю твою́ па́мять ве́рно почита́ющим.

Вся А́нгелов во́инства. Предте́че Госпо́день,/ апо́столов ли́че ве́сь и всех святы́х чи́ни,/ приле́жно с Богоро́дицею благо́му Бо́гу/ о нас при́сно моли́теся.

Трисвято́е по О́тче наш: Тропа́рь: Покая́ния основа́ние: Сла́ва, и ны́не: Гаврии́лу веща́вшу: Ектения́ и моли́тва, ка́я ли́бо из ака́фистных (зри день сей нмже) или́ сия́:

О преподо́бне о́тче Иоа́нне, уго́дниче Госпо́день преизря́дный, те́плый наш засту́пниче и везде́ в ско́рбех ско́рый помо́щниче! Помози́ мне, гре́шному и уны́лому, в настоя́щем сем житии́ и умоли́ Го́спода Бо́га дарова́ти ми оставле́ние всех мои́х грехо́в, ели́ко согреши́х от ю́ности мое́й во всем житии́ мое́м де́лом, сло́вом, помышле́нием и все́ми мои́ми чу́вствы. И во исхо́де души́ мое́й помози́ ми, окая́нному, и умоли́ Го́спода Бо́га, всея́ тва́ри Соде́теля, изба́вити мя возду́шных мыта́рств и ве́чнаго муче́ния, да всегда́ прославля́ю Отца́ и Сы́на и Свята́го Ду́ха и твое́ ми́лостивное предста́тельство, и ны́не, и при́сно, и во ве́ки веко́в. Ами́нь.

Та́же отпу́ст.

Ин кано́н, глас 2.

Пе́снь 1. Ирмо́с: Во глубине́ постла́ иногда́:

Присносу́щным све́том ны́не озаря́яся/ и со А́нгелы ве́сь све́тел предстоя́ Вседе́телю,/ се́рдца моего́ омраче́ние прожени́, о́тче,/ я́ко да све́тло пропове́даю жития́ твоего́ до́блести.

Вкорени́вшееся в души́ твое́й жела́ние неизрече́нныя красоты́ Христо́вы стяжа́в,/ чу́вственный две́ри всем тле́нным и мимотеку́щим затвори́л еси́/ и мно́гими по́двиги получи́л еси́ жела́емое.

Вели́кое смотре́ние Бо́жие от утро́бы мате́рии тя освяти́/ и сосу́д показа́ благоприя́тен Свята́го Ду́ха,/ те́мже от младе́нства при́сно был еси́ стра́хом Бо́жиим огражда́емь.

Богоро́дичен: Та́инства стра́шнаго яви́лася еси́ Де́лательница,/ разстоя́щая соеди́нивши существа́:/ Бо́га бо безпло́тнаго, заче́нши, пло́тию сопряже́нна произвела́ еси́/ во еди́ном Лице́, во двою́ же естеству́, Чи́стая.

Пе́снь 3. Ирмо́с: На ка́мени мя ве́ры утверди́в:

Бо́дренно очи́ма души́ твое́й ви́дев, я́ко вся су́етна су́ть,/ отве́ргл еси́ мирску́ю красоту́, и ни́щим име́ния твоя́ разда́л еси́,/ и сокро́вище некра́домое на Небеси́ стяжа́л еси́.

Боже́ственных послу́шав за́поведей, в смире́нии пребыва́л еси́ все житие́ твое́/ и, я́ко непотре́бен, во оте́чествии твое́м вмене́н был еси́ поноше́нием,/ и́стинныя сла́вы жела́нием пита́лся.

Отврати́л еси́ плещи́ твоя́ от ми́ра/ и возве́л еси́ в го́ры о́чи твои́, ча́я по́мощи отту́ду Боже́ственныя;/ те́мже от го́ры святы́я Своея́ услы́ша тя Бог и вознесе́ тя чудесы́.

Богоро́дичен: Вопие́т Дави́д Богооте́ц к Деви́це:/ у́хо Твое́ приклони́, Дщи Царе́ва,/ и ви́ждь люде́й Твои́х озлобле́ние,/ гла́сы услы́ши блажа́щих Тя и Твою́ велича́ющих ми́лость.

Катава́сия: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ не́сть свят, я́коже Бог наш,/ и не́сть пра́веден, па́че Тебе́, Го́споди.

Моле́бному пе́нию приложи́ преднапи́санная (зри день сей ниже).

Пе́снь 4. Ирмо́с: Прише́л еси́ от Де́вы:

Воззва́ тя Госпо́дь от Сио́на, живы́й во Иерусали́ме,/ я́коже дре́вле пра́отца Авраа́ма,/ изы́ти от земли́ оте́чества твоего́ повелева́я,/ ты же после́довал еси́ словеси́ его́ со усе́рдием.

Свети́льник положи́л еси́ нога́ма твои́ма зако́нная повеле́ния и свет стезя́м твои́м,/ тем во све́те изы́де пра́вда твоя́/ и, я́коже полу́дне, всему́ ми́ру возсия́л еси́.

Оде́жда пло́ти твое́й ри́за ко́жаная бы́сть,/ в ню́же оо́блкся, умертви́л еси́ страстна́я взыгра́ния, о́тче,/ и дебе́льство ко́жное ри́зы Ада́мския до конца́ истни́л еси́.

Богоро́дичен: Уподо́би Тя Дави́д голуби́це,/ посре́бренне криле́ иму́щей и злата́я междура́мия, Препе́тая;/ те́мже покры́й мя от стрел, летя́щих во дни, и изба́ви мя.

Пе́снь 5. Ирмо́с: Просвеще́ние во тьме́ лежа́щих:

Собла́зн при стези́ угото́вав,/ препя́ти души́ твое́й тече́ние диа́вол тща́шеся/ и разбо́йники посла́ отгна́ти тя от пеще́ры пе́рвыя;/ ты же, я́ко за Христа́ гони́м, бе́гая, ра́довался еси́.

Слеза́ми оче́с твои́х зе́млю напои́в пребога́тно,/ прозябе́ слану́ток тебе́ неора́нно, преблаже́нне,/ и́мже немощно́му те́лу твоему́ ма́лое утеше́ние подава́л еси́,/ Пищеда́телю благода́рственная воспева́я.

Зако́ном Христо́вым науче́нный, о пи́щи и оде́жди не попе́клся еси́,/ но, небе́сных птиц де́ло исполня́я, в дре́во ду́пленное всели́лся еси́/ и без покро́ва на мно́ги дни пребы́л еси́.

Богоро́дичен: Ке́дры лива́нския превозше́дшая, горо́ ту́чная и конце́м блиста́ющая доброде́телию,/ си́лою без руки́ от Тебе́ отсе́кшагося Ка́мене/ сокруши́ и́долы страсте́й мои́х и ду́шу утверди́, Блага́я.

Пе́снь 6. Ирмо́с: В бе́здне грехо́вней валя́яся:

Обновле́нное ра́лом по́стническим се́рдце твое́ восприи́м, Бог/ в пусты́ни неора́нней плод тебе́ произрасти́.

От мно́гих лет диа́вол му́чаше челове́ка,/ его́же ты, к тебе́ приведе́нна, вско́ре исцели́л еси́ моли́твою.

Илия́ проро́к го́рстию му́ки вдови́цу пита́ше со ча́ды,/ ты же, чудотворя́, ма́лою пи́щею напита́л еси́ пасу́щих.

Богоро́дичен: От язы́ка льсти́ваго изба́ви мя, Ма́ти Бо́жия Благосе́рдая, неду́гов же и скорбе́й,/ ра́дость да́рующи се́рдцу моему́.

Катава́сия: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Моле́бному пе́нию приложи́ преднапи́санная (зри день сей выше)

Пе́снь 7. Ирмо́с: О́бразу злато́му:

Поще́нием мно́гим и бо́дренною моли́твою,/ нестяжа́нием и сле́зными исто́чники украси́л еси́ твой душе́вный дом, о́тче,/ Сердцеве́дец же, обре́т, всели́ся в нем,/ испо́лнив его́ Свои́х дарова́ний.

Победи́л еси́ тьмочи́сленная кова́рства врага́, стезе́ю те́сною ше́ствовав,/ и Подвигополо́жнику Го́споду угоди́л еси́,/ от Него́же вене́ц прии́м, чуде́с исто́чник стяжа́л еси́ све́тлое воздая́ние.

Боже́ственная ра́ка моще́й твои́х, я́коже рай, благоуха́ет, па́че ины́х арома́т,/ чу́вства всех притека́ющих и се́рдца наслажда́ющи, преподо́бне,/ и явле́ние иму́щи нема́лое у́мных дарова́ний.

Богоро́дичен: Не обре́те Бог святе́йшия па́че Тебе́, смы́слом и те́лом де́вствующия,/ его́же ра́ди вожделе́ добро́ты Твоя́ и в Тя всели́ся,/ от пречи́стых крове́й пло́ть прии́м,/ да со земны́ми поживе́т.

Пе́снь 8. Ирмо́с: В пе́щь о́гненную:

В телеси́ ме́ртвеннем твоему́ па́че естества́ терпе́нию дивя́щеся,/ а́нгельстии ли́цы оби́тель тебе́ на Небеси́ све́тло предугото́ваша,/ в ню́же тя и пришла́, от земли́ преста́вльшагося.

Боже́ственное дарова́ние чудесы́ открыва́ет/ сокрове́нное в земли́ те́ло твое́ де́вственное, Иоа́нне преблаже́нне,/ и исто́чник излива́ет благода́ти всем ве́рным,/ твое́й по́мощи прося́щим.

Словесы́ да воспое́тся Бог Триипоста́сный, Еди́н Сый по существу́:/ Сло́во, Е́же к Бо́гу, Оте́ц, И́же в не́дрех Того́ нося́й,/ и Дух Боже́ственный, от Отца́ исходя́й.

Богоро́дичен: Се, я́коже изреко́ша злата́я Твоя́ и пречи́стая уста́, Богоро́дице,/ блажа́т Тя вси ро́ди ве́рно,/ поне́же Бог Тя возвели́чи и Херуви́м честне́йшую яви́ Тя.

Пе́снь 9. Ирмо́с: Безнача́льна Роди́теля Сын, Бог и Госпо́дь:

Боже́ственную твою́ Це́рковь исто́чник чуде́с яви́ Бог/ па́че, не́жели дре́вле иуде́ом о́вчую купе́ль:/ не еди́н бо, но безчи́сленное мно́жество, приходя́ще,/ прие́млют исцеле́ния, преблаже́нне Иоа́нне.

Жи́зни нетле́нныя на земли́ кро́тких сподо́бился еси́ и со А́нгелы водворе́ния,/ сном же на мно́зе вре́мени усну́в,/ во гро́бе я́ко жив явля́ешися и неруши́м, Богоблаже́нне Иоа́нне.

Благода́ть твою́ и благи́х хоте́ние свы́ше нам да́руй,/ по си́ле тебе́ словеса́ истка́вшим хвале́ния от жела́ния серде́чнаго, Иоа́нне прехва́льне,/ чуде́с неоску́дный исто́чниче.

Богоро́дичен: Ле́ствице Небе́сная, све́щниче златы́й и трапе́зо пречи́стая,/ от земли́ на Не́бо возведи́ мя,/ сия́нием Сы́на Твоего́ освети́ мя и хле́бом Боже́ственным насы́ти,/ се́рдце мое́ утвержда́ющи пе́ти Тя во ве́ки.

Моле́бному пе́нию приложи́ преднапи́санная (зри день сей выше).

Ин кано́н, глас 3.

Пе́снь 1. Ирмо́с: Во́ды дре́вле ма́нием Боже́ственным:

Луча́ми Вы́шняго светоли́тия ве́сь озаря́емь, треблаже́нне,/ и мою́ просвети́ омраче́нную ду́шу,/ я́ко да воспою́ светоно́сный по́двиги твоя́,/ и́миже помрачи́л еси́ кня́зя те́мнаго.

Илиино́ житие́ и Предте́чево ты ре́вностию подража́я,/ в пусты́нях водвори́лся еси́, преподо́бне,/ ча́я Бо́га, при́сно спаса́ющаго тя от се́ти и треволне́ния де́монскаго.

Сраспя́лся еси́ распя́тому нас ра́ди Христу́;/ умертви́в же ся ми́рови, к животу́ преше́л еси́, преподо́бне,/ иде́же све́тло ны́не кра́сных твои́х по́двиг по́чести прие́млеши.

Богоро́дичен: Соломо́н Тя одр прови́де,/ на не́мже па́че сло́ва Сло́во почи́ло е́сть,/ подава́я претружде́нным лю́те Боже́ственный поко́й, Влады́чице,/ Его́же моли́ Вы́шнее ми дарова́ти поко́ище.

Пе́снь 3. Ирмо́с: И́же от несу́щих вся Приведы́й:

Безпло́тное житие́ на земли́ стяжа́в,/ враги́ безпло́тныя умертви́л еси́,/ Помо́щника име́я живо́т вдыха́ющаго умерщвле́нным страстьми́.

Жезло́м Боже́ственным за нас Поже́ршагося, я́ко овча́ священнопасо́мо,/ на па́жить приспе́л еси́ безстра́стия, Иоа́нне Богому́дре.

В ко́жу о́вчую прему́дренне обле́кся,/ во́лка расто́ргл еси́ ди́вияго,/ я́коже а́гнца ко льву́ спле́тшагося к тебе́, преподо́бне.

Богоро́дичен: Неизме́римую глубину́ све́дущи безчи́сленных мои́х собла́знов,/ Ты мя упра́ви в спасе́нное приста́нище, Влады́чице Богома́ти.

Катава́сия: И́же от несу́щих вся Приведы́й,/ Сло́вом созида́емая,/ соверша́емая Ду́хом,/ Вседержи́телю Вы́шний,/ в любви́ Твое́й утверди́ мене́.

А́ще моле́бен, зде приложи́ преднали́санная (зри день сей выше).

Пе́снь 4. Ирмо́с: Положи́л еси́ к нам:

Преклони́ти кре́пость души́ твое́й отню́дь не возмого́ша, мета́юще тя низ ка́мене, врази́,/ столп бо ты яви́лся еси́ вои́стинну непоколе́блемыи́,/ основа́ние водрузи́вый на Ка́мени краеуго́льнем.

Зе́млю души́ твое́й напои́в слеза́ми,/ земля́ неора́нная тебе́ слану́ток прозябе́, всеблаже́нне,/ те́лу твоему́ в ма́лое утеше́ние.

Во пло́ти безпло́тных житие́ пожи́в,/ зно́ем опаля́емь и мра́зом устужда́емь,/ Боже́ственную свы́ше благода́ть име́л еси́, помога́ющу ти.

Богоро́дичен: Ру́чка Тя злата́я и све́щник, Деви́це,/ и трапе́за дре́вле прообразова́ху нело́жно, Бо́га Роди́тельницу быва́ющую,/ пита́ющаго вся́ческая си́лою Свое́ю и ве́рою просвеща́ющаго.

Пе́снь 5. Ирмо́с: Я́ко ви́де Иса́ия:

Пома́зав главу́ твою́ ма́слом поще́ния, покрыва́лом тоя́ не покрыва́л еси́,/ и́бо Покрыва́ющаго небеса́ о́блаки име́л еси́/ неизрече́нно тя от всех прило́гов вра́жиих покрыва́юща.

Труды́ по́стническими и ме́дом безстра́стия наслажда́лся еси́,/ посажде́н, я́коже пчела́, в ду́плине древе́снем,/ скрыва́я себе́ мирска́го мяте́жа и ды́ма де́монскаго бе́гая.

Боле́зни твоя́ неболе́зненное восприя́тие исхода́таиша, треблаже́нне:/ неоску́дный исто́чник слез твои́х сла́дость умиле́ния серде́чнаго приобре́те,/ по́ти же по́стничестии вар страсте́й угаси́ша.

Богоро́дичен: Зако́нов кроме́ челове́ческих/ Боже́ственнаго Законода́вца родила́ еси́, Де́во Ма́ти,/ все беззако́ние челове́ческое отъе́млющаго за премно́гую человеколю́бия бе́здну.

Пе́снь 6. Ирмо́с: Бе́здна после́дняя грехо́в:

Мно́зи твои́ по́двизи ужа́сни удивле́ния и испо́лнь по́честей па́че ума́,/ я́же тебе́ Христо́с дарова́,/ Его́же на земли́ почти́л еси́, Иоа́нне.

Све́щник души́ твое́й ма́слом напое́н трудо́в твои́х, преблаже́нне,/ тя, я́ко звезду́ све́тлу, всей земли́ явля́ет и облиста́ет чудесы́.

Восприе́млют хро́мии благотече́ние,/ ви́дят слепи́и пресве́тло/ и разсла́бленнии ве́рою Христо́вою исцелева́ют моли́твами твои́ми.

Богоро́дичен: В кал углебо́х мно́гими прегреше́ньми/ и в ров снидо́х зло́бы, Деви́це Пречи́стая,/ но, ро́ждшая из глубины́ Ио́ну Изба́вльшаго,/ и мене́ возведи́, молю́ся.

Катава́сия: Бе́здна после́дняя грехо́в обы́де мя,/ и исчеза́ет дух мой;/ но, простры́й, Влады́ко, высо́кую Твою́ мы́шцу,/ я́ко Петра́, мя, Упра́вителю, спаси́.

Моле́бному пе́нию приложи́ преднапи́санная (зри день сей выше).

Пе́снь 7. Ирмо́с: Я́коже дре́вле:

Не дал еси́ сна свои́ма очи́ма, ни ве́ждома свои́ма дрема́ния,/ до́ндеже стра́стная успи́л еси́ стремле́ния/ и к све́ту преста́вился еси́ незаходи́мому, Влады́ку всех воспева́я.

По́стническия по́двиги жесто́кия претерпе́л еси́,/ с кня́зи те́мными и со властьми́ му́жески боря́ся при́сно,/ и побе́дный вене́ц прия́л еси́ от живонача́льныя руки́ Влады́чни.

Зимы́ мирски́я избе́г, ве́сну получи́л еси́ преми́рнаго пребыва́ния/ и, стра́стную бу́рю прете́к, к тишине́ доше́л еси́ безстра́стия,/ со А́нгелы непреста́нно Христа́ восхваля́я.

Богоро́дичен: На Престо́ле херуви́мсте благоле́пно седя́й Соде́тель/ в Твои́х не́дрех стра́шно седи́т, Пречи́стая,/ си́льныя со престо́л низлага́я, я́коже прорекла́ еси́, и вознося́ смире́нныя.

Пе́снь 8. Ирмо́с: А́нгелами немо́лчно:

Ны́не, Его́же возлюби́л еси́, Христа́ ви́диши не се́нию, ни привиде́нием,/ но незазо́рным зерца́лом, я́сно, лице́м к лицу́/ и па́че естества́ и́стинным явле́нием, преблаже́нне.

Твои́ ны́не но́зе ра́дуетеся благостоя́нию на Небесе́х,/ не связа́сте бо ся на земли́ плотски́ми у́зами, пребога́те,/ сего́же ра́ди не кры́ешися, я́коже Ада́м,/ но при ногу́ предстои́ши Влады́це.

Стра́стная пре́жде разжже́ния росо́ю слез твои́х угаси́л еси́,/ и о́гнь всея́дущий вода́ми моли́тв твои́х воспяти́л еси́,/ и, к о́гненным слуга́м ны́не причита́яся, воспева́еши Влады́ку.

Богоро́дичен: Ле́ствицу Тя прови́де Иа́ков, Всенепоро́чная,/ е́юже Бог на зе́млю сни́де, и челове́ческое естество́ на Небеса́ вознесе́,/ и Оте́ческим почте́ соседе́нием.

Пе́снь 9. Ирмо́с: На Сина́йстей горе́:

Тезоимени́т Бо́жией благода́ти яви́лся еси́,/ е́юже соблюда́емь, и по сме́рти неруши́м пребыва́еши,/ на земли́ лежа́, Бо́гу та́ко благоволи́вшу,/ ве́ру бо его́ да́же до кончи́ны твоея́, правосла́вие, соблю́л еси́.

Я́ко фи́никс, в дому́ Бо́жии процве́л еси́, Иоа́нне,/ и умно́жился еси́, я́ко кедр многове́твен, осеня́я ве́рныя,/ псало́мски же, я́ко ма́слина плодови́та, вся умаща́еши ма́слом чуде́с твои́х, преблаже́нне.

Ди́вному Бо́гу, тобо́ю при́сно чудеса́ творя́щему, моли́ся, Богодухнове́нне,/ да удиви́т на мне ми́лости Своя́ и пода́ст ми оставле́ние прегреше́ний,/ ве́дением и неве́дением мно́ю зле соде́янных.

Богоро́дичен: Я́же Свет заче́нши Незаходи́мый, просвети́ мою́ ду́шу,/ Ле́ствице Небе́сная, от земли́ на Не́бо мя возвы́си,/ Две́ре спаси́тельная, в живо́т ве́чный введи́ мя, Господоимени́тая.

Моле́бному пе́нию приложи́ предука́занная (зри день сей выше).

Ин кано́н, глас 4.

Пе́снь 1. Ирмо́с: Отве́рзу уста́ моя́:

Серде́чным жела́нием и́скру Бо́жию восприи́м и огне́м невеще́ственным разже́гся,/ от зно́я же страсте́й плотски́х ма́ло уте́шився,/ пе́сни тебе́ ны́не, Иоа́нне, провозвеща́ю.

Мимотеку́щая настоя́щая преоби́дев,/ прите́кл еси́ к исто́чнику живо́тных вод,/ от него́же то́чиши Боже́ственныя ре́ки воды́ душеспаси́тельныя,/ приснотеку́щия и живы́я в пусты́ни.

Процве́л еси́ душе́ю и те́лом, дарова́ний испо́лнь Ду́ха Свята́го,/ и, мно́гажды поноше́нием злых люде́й во оте́чествии твое́м безче́стии,/ свы́ше прославля́емь был еси́ чудесы́ Боже́ственными.

Богоро́дичен: О́браз ви́димый от Тебе́ восприи́м, Пренепоро́чная,/ совлече́ грехо́вныя оде́жды челове́чество Зижди́тель/ и па́ки в пе́рвую ри́зу облече́ Ада́ма,/ утаи́вся губи́тельства, того́ прельсти́вшаго.

Пе́снь 3. Ирмо́с: Твоя́ песносло́вцы, Богоро́дице:

Единообра́зна тя враг ви́дя прекра́сному Ио́сифу,/ подо́бную Тому́ бра́нь тебе́ устро́и:/ поноше́нием бо бра́та твоего́ тща́шеся оскорби́ти тя,/ но оба́че яви́ся па́ки посра́млен.

Жите́йское сплете́ние, я́коже ри́зу, оста́вив и душе́ю обнажи́вся,/ еги́петския зло́бы избе́гл еси́ искуше́ний/ и ца́рский вене́ц, я́ко самоде́ржец страсте́м, восприя́л еси́.

Слы́ша в Повелева́ющаго прах от ногу́ отрясти́ гра́да,/ не прие́млющаго про́поведи доброде́тельныя,/ оста́вив вся, избе́гл еси́ оте́чества твоего́,/ с тобо́ю неединому́дрствовавшаго.

Богоро́дичен: Та́инство е́сть вои́стинну ве́лие рождество́ Твое́, Богоро́дице:/ Голуби́ца бо су́щи, злата́я междора́мия иму́щая, Орла́ породила́ еси́,/ И́же нас, я́коже птенцы́ крыло́ма, благода́тию покры́л е́сть.

Катава́сия: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшя, духо́вно утверди́,/в Боже́ственней Твое́й сла́ве/ венце́в сла́вы сподо́би.

А́ще моле́бен, зде приложи́ преднапи́санная (зри день сей выше).

Пе́снь 4. Ирмо́с: Седя́й в сла́ве:

На ка́мени испра́вив стопы́ души́ твоея́,/ прило́ги разли́чных искуше́ний непоколеби́м яви́лся еси́/ и, волне́ние суеты́ мирски́я преплы́в,/ на го́ру возше́л еси́ спасе́ния.

Уподо́бился еси́ реце́ теку́щей и с высоты́ го́рныя па́дающей,/ исто́чник благода́ти точа́ и то́ю пла́мень страсте́й чу́вственных угаша́я,/ нача́ло имы́й на воде́ упокое́ния.

Пасо́м быв жезло́м Пасу́щаго и Наставля́ющаго, я́ко овча́, Ио́сифа,/ я́коже о́вцы, пита́л еси́ мног наро́д пасу́щих,/ с любо́вию к кро́ву твоему́ притека́ющих и ве́рою моля́щих тя.

Богоро́дичен: Я́коже све́щник, просвети́ мя,/ я́ко ле́ствица, возведи́ мя,/ я́ко клеща́, от огня́ исхити́ мя,/ я́ко Киво́т, от вод мно́гих изба́ви мя,/ ве́дущаго Тя, и́стинную Ма́терь Бо́жию.

Пе́снь 5. Ирмо́с: Ужасо́шася вся́ческая:

Сочета́в житие́ ревни́теля Илии́ с чудесы́,/ ре́вностию по Бо́зе в го́ру всели́лся еси́/ и го́рстию бра́шна мно́жество пасу́щих напита́л еси́,/ сию́ име́я на времена́ мно́га неоскудева́ющу.

Извести́ тя тща́шеся из пусты́ни змий,/ и́же дре́вле Ада́ма из Еде́ма Боже́ственнаго за́вистию изгна́,/ разбо́йники бо на тя наведе́,/ но ты, пре́лесть проразуме́в, еще́ глубже в го́ру угонза́л еси́.

Ме́ртвость совлещи́ потща́лся еси́ с оде́ждею ку́пно/ и в ко́жаную то́кмо оде́ялся еси́,/ на́гло бра́тися слы́шав и́стинному стра́ннику,/ и, вся́кую стра́сть умертви́в, о Бо́зе ны́не живе́ши безсме́ртно.

Богоро́дичен: Пою́т Тя уста́ херуви́мская, Пречи́стая,/ но приими́ окая́ннаго язы́ка пе́снь приноси́мую, благосе́рдию Сы́на Твоего́ подража́ющи,/ и благода́ть мне да́руй.

Пе́снь 6. Ирмо́с: Боже́ственное сие́ и всечестно́е:

Жениха́, приити́ хотя́ща в полу́нощи, я́ко слы́шав,/ не дал еси́ сна твои́ма очи́ма,/ но, всено́щная стоя́ния и моли́твы непреста́нно соверша́я,/ му́дрым де́вам сопричта́лся еси́.

По́ты по́двигов твои́х, я́коже ма́слом, просвети́в свещу́ души́ твое́й,/ разу́мно поте́кл еси́ к черто́гу Небе́сному,/ его́же и нам две́ри отве́рзи богоприя́тными твои́ми моли́твами.

Я́ко ревни́тель Влады́чних Боже́ственных за́поведей,/ не стужа́ешися, гони́м от пусты́ни в пусты́ню/ и от челове́ческаго жи́тельства в дом Отца́ Небе́снаго.

Богоро́дичен: Ада́м, наде́явся бог бы́ти, я́дию лиши́ся безсме́ртия,/ мертв же положе́н быв во гро́бе но́вый Ада́м, Сын Твой, Деви́це,/ обнови́ того́ обоже́нием.

Катава́сия: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от нея́ ро́ждшагося Бо́га сла́вим.

А́ще моле́бен, зде приложи́ преднапи́санная (зри день сей выше).

Пе́снь 7. Ирмо́с: Не послужи́ша тва́ри Богому́дрии:

Разу́мно пита́лся еси́ а́нгельским хле́бом, я́коже безпло́тен,/ и на мно́ги дни а́лчен пребыва́я,/ чудотворя́, Госпо́дь кормля́ше тя несе́янными слану́тки земли́ неора́нныя.

Но́вому Изра́илю сопричта́лся еси́,/ я́коже бо дре́вний в пусты́ни ма́нною свы́ше пита́шеся,/ си́це и ты слану́ток от Вы́шняго манове́ния приима́л еси́,/ Маннода́теля Го́спода воспева́я.

Процве́л еси́, я́коже фи́никс свяще́н, в дому́ Бо́га на́шего,/ от пеще́ры пе́рвыя бо изринове́н и в дре́во дупле́но всели́вся,/ дал еси́ сла́дкия плоды́ твоя́ во вре́мя свое́,/ исцеля́я неду́ги вся́кия боля́щих.

Богоро́дичен: Рожде́йся от Тебе́, Пренепоро́чная,/ Лев нарече́ся и А́гнец, о́гнь нестерпи́м и до́ждь на руно́:/ я́ко роса́ у́бо да вмени́т ми ся,/ я́ко о́гнь, да не попали́т мя,/ ни да устраши́т мя, я́ко лев,/ но я́ко А́гнец Непоро́чен да во́зьмет на Ся прегреше́ния моя́.

Пе́снь 8. Ирмо́с: О́троки благочести́выя в пещи́:

Мирски́я бу́ри бе́гая и гоне́нием воздая́ние обрести́ хотя́,/ в хралу́пине дре́ва, ра́дуяся, всели́лся еси́/ и, я́коже корабле́м, преплы́л еси́ к ра́йскому приста́нищу Боже́ственными Ду́ха Свята́го ве́янии.

Пропове́дники боже́ственных доброде́телей твои́х/ слу́хи разосла́л еси́, не хотя́, я́коже со́лнце лучи́,/ и всем, к тебе́ притека́ющим, неду́гов исцеле́ние дарова́л еси́ моли́твами твои́ми.

Из покро́ва при́сно на зной и мра́зе пребыва́я, я́коже Иа́ков, подвиза́лся еси́/ и и́долы вся страстны́я сокруши́л еси́,/ к краеуго́льному же прите́к Ка́мени,/ на высоту́ возше́л еси́ безстра́стия.

Богоро́дичен: Ми́лостив у́бо Сын Твой по Существу́,/ но и лук напряза́ет, и ча́шу, испо́лнь гне́ва, растворя́ет./ Ты же моли́твами Твои́ми/ я́ростный пла́мень угаси́ и стре́лы разже́нныя, Богоро́дице.

Пе́снь 9. Ирмо́с: Всяк земноро́дный:

Кто изчести́ мо́жет зве́зды небе́сныя?/ Кто же ли чуде́с твои́х мно́жество испове́сть, преблаже́нне?/ Слепы́м бо свет дае́ши, хромы́м хожде́ние,/ проше́ния вся исполня́еши и прегреше́ний оставле́ние дае́ши.

Я́ко мертв, ми́рови сраспну́в пло́ть твою́, сном сме́ртным усну́л еси́/ и неруши́м премину́л еси́ мно́гих лет тече́ние,/ дыха́ние то́кмо оста́вив, жив в чудесе́х явля́ешися.

Ю́же ти раболе́пно принесо́х, пе́снь приими́, преблаже́нне,/ и возда́ждь свы́ше благода́ть, неду́гов избавля́я и искуше́ний,/ внегда́ же суди́ти ми ся, предста́в, изба́ви муче́ния, собесе́дниче А́нгелов.

Богоро́дичен: Иска́пай нам ороше́ние ми́лости Твоея́,/ уставля́ющи зло́бу благода́тию рождества́ Твоего́, Богоро́дице,/ объе́млющи, просвети́/ и, исхити́вши родства́ о́гненнаго, препита́й на воде́ упокое́ния.

Моле́бному пе́нию приложи́ преднапи́санная (зри день сей выше).

Ин кано́н, глас 5.

Пе́снь 1. Ирмо́с: Коня́ и вса́дника:

На гора́х пусты́нных всели́выйся,/ пусты́нников преподо́бных ве́рше и по́стников изря́дная похвало́,/ ум мой плодоно́сен покажи́ воспе́ти твоя́ Боже́ственная чудеса́.

Гла́са Влады́ки Христа́ послу́шав и, я́ко ве́рный раб, за́поведи соблю́д,/ две́ри черто́га Небе́снаго отверзо́шася тебе́/ и в ра́дость прия́ша тя Го́спода твоего́.

На го́ру возше́дшу ти доброде́телей,/ возсия́ нам све́тло луча́ чуде́с твои́х и дея́ний,/ не подоба́ет бо, рече́ Госпо́дь, гра́ду укры́тися, верху́ го́ры стоя́щему.

Богоро́дичен: Исцели́ ду́шу мою́, стрела́ми стра́стными уя́звленную, Богоро́дице,/ ма́тернею Твое́ю моли́твою Боже́ственное врачева́ние прилага́ющи,/ и изба́ви мя родства́ о́гненнаго, Купино́ Неопали́мая.

Пе́снь 3. Ирмо́с: Водрузи́вый на ничесо́мже зе́млю повеле́нием Твои́м:

Отложи́в земна́я и на Не́бо возлете́в,/ со безпло́тными ны́не чи́нми а́нгельскими в Вы́шних кро́вех водворя́ешися/ и в конце́х вселе́нныя с ве́рою прося́щим тьму́ стра́стную отгоня́еши.

Во́лки неви́димыя сокруши́л еси́ ору́жием Креста́/ и, кровопи́йц утаи́тися хотя́ на горе́,/ я́ко овча́ незло́биво, потща́лся еси́ ко А́гнцу притещи́,/ всем во спасе́ние закла́нному.

Тесноту́ а́лчбную прете́к, в широте́ ра́йстей водвори́лся еси́/ и, у́зкую стезю́ мона́шескую преше́д, житие́ насле́довал еси́ безпеча́льное,/ отону́дуже ста́до твое́ присеща́еши чудесы́ пресла́вными.

Богоро́дичен: О́блаче благода́ти, до́ждь Боже́ственный ми́рови одожди́вый,/ изсо́хшия ны ва́ром прегреше́ний напои́ росо́ю спасе́ния/ и на вода́х поко́йных упасе́нным бы́ти нам благоволи́, Пречи́стая.

Катава́сия: Водрузи́вый на ничесо́мже зе́млю повеле́нием Твои́м/ и пове́сивый неодержи́мо тяготе́ющую/ на недви́жимем, Христе́, ка́мени за́поведей Твои́х,/ Це́рковь Твою́ утверди́, Еди́не Бла́же и Человеколю́бче.

Моле́бному пе́нию приложи́ преднапи́санная (зри день сей выше).

Пе́снь 4. Ирмо́с: Боже́ственное Твое́ разуме́в:

Во́зрасты по́стническия преше́л еси́,/ хотя́ вене́ц побе́дный восприя́ти,/ и вра́жие наси́лие попра́л еси́ си́лою в тя все́льшагося Ду́ха.

Обнови́в души́ твоея́ бразду́ на благопло́дие доброде́тели,/ соугото́вал еси́ себе́ несе́яннаго слану́тка пита́ние, чудотво́рче Иоа́нне.

Ви́ден быв И́менем Бо́жиим прогони́тель де́монских нападе́ний,/ одержи́мыя страстьми́ пропове́дники сотвори́л еси́ благода́ти твоея́.

Богоро́дичен: Пое́т Дави́д, пра́дед Твой, Тебе́, Де́во Богоро́дице,/ я́ко благоле́пно одесну́ю Бо́га предстои́ши, Цари́це:/ десны́м мя у́бо овца́м сопричти́, А́гнице Всечи́стая.

Пе́снь 5. Ирмо́с: Одея́йся све́том, я́ко ри́зою:

Но́вым о́бразом обре́лся еси́ Бо́гу уго́дник и учени́к,/ Того́ словеса́ слу́хом предава́я/ и прича́стник Вы́шния сла́вы явля́яся.

Разу́мно завеща́л еси́ себе́ Вы́шняя му́дрствовати,/ я́коже Па́вел пи́шет, прему́дрый апо́стол,/ земны́х же любве́ отвраща́тися.

Во Христа́ обо́лкся,/ младе́нческия стре́лы вмени́л еси́ де́монская на горе́ нападе́ния,/ те́мже по́мощь то́чиши обурева́емым непреста́нно.

Богоро́дичен: Смуща́емое страстьми́ се́рдце мое́/ от бед изба́ви, Де́во Ма́ти, напа́стей же и скорбе́й/ и Твоея́ по́мощи мя сподо́би, Чи́стая.

Пе́снь 6. Ирмо́с: Неи́стовствующееся бу́рею душетле́нною:

Пра́во ходи́ти хромы́м сотвори́л еси́/ и глухи́м слы́шати благопослу́шно/ и, сам молча́, немы́я глаго́лати научи́л еси́.

Явля́яся помо́щник, о́чи слепы́х просвеща́еши,/ све́том пра́ведных дел твои́х озаря́я/ и ра́достию Боже́ственною облиста́я.

Восприи́м проше́ние, огне́м жего́мое мое́ те́ло дре́вле исцели́л еси́,/ тем к тебе́ жела́ние возжего́х се́рдца, при́сно горя́щее.

Богоро́дичен: Изве́стная Покрови́тельнице Пречи́стая,/ обою́ду покры́й мя, я́коже Стена́ необори́мая,/ и льсти́ваго врага́ кре́пость разори́.

Катава́сия: Неи́стовствующееся бу́рею душетле́нною,/ Влады́ко Христе́, страсте́й мо́ре укроти́/ и от тли возведи́ мя,/ я́ко Благоутро́бен.

Моле́бному пе́нию приложи́ преднапи́санная (зри день сей выше).

Пе́снь 7. Ирмо́с: Превозноси́мый отце́в Госпо́дь:

Ве́чная проразуме́в пребыва́юща, ми́ра удали́лся еси́, и, бе́гая усе́рдно, в пусты́ню всели́лся еси́,/ и к Бо́гу прибли́зился еси́.

Возрасти́л еси́ тала́нт, я́ко до́брый купе́ц,/ ка́мень краеуго́льный и Боже́ственный би́сер приобре́т Христа́,/ позлащшаго тя чудесы́.

Впери́в на Не́бо о́чи твои́ и мимотеку́щая возненави́дев,/ души́ твое́й ве́жды недре́млемы соблюда́еши,/ я́ко засту́пник неусыпа́ющий.

Богоро́дичен: Да Тя сла́вим, Пречи́стая Влады́чице, Твоя́ моли́твенники,/ нас от страсте́й свободи́/ и Влады́це, Сы́ну Твое́му, я́ко це́рковь освяще́нну, принеси́.

Пе́снь 8. Ирмо́с: Тебе́, Вседе́телю:

На го́ру возше́д, за́дняя Бо́га ви́де Моисе́й;/ ты же, посреде́ добро́ты Влады́чния озаря́емь,/ не зерца́лом при́сно Того́ ви́диши.

Це́ло соблю́д чи́стое се́рдце, рука́ма же явля́лся непови́нен,/ на го́ру возше́л еси́ Госпо́дню/ и на ме́сте святе́м его́ стал еси́.

Я́ко да свяще́ннеи́ твои́ на простра́нне поста́виши но́зе,/ те́ми ходи́л еси́ стезе́ю Боже́ственною,/ пости́вся на горе́ пусты́нней.

Богоро́дичен: Ра́дуйся, Влады́чице!/ Пе́снь от души́ Препе́той Де́ве принесе́м,/ Еди́наго Бо́га и всех Царя́ роди́вшей,/ ра́дости Пода́теля.

Пе́снь 9. Ирмо́с: Иса́ие, лику́й:

Просвети́вся све́том до́брых дел, Богодухнове́нне,/ яви́лся еси́ нам свети́льник и столп о́гненный,/ наставля́яй но́ваго Изра́иля/ и но́щь отгоня́яй страсте́й омраче́ния.

Исцеле́ний мо́ре и чуде́с кипя́щий исто́чниче,/ приснотеку́щий ве́рным во спасе́ние и ре́ки источа́яй сугу́быя Бо́жиих дарова́ний,/ зол мои́х струю́ изсуши́ твои́ми моли́твами.

Жела́ние души́ мое́й ве́си, чудотво́рче,/ и любо́внаго к тебе́ огня́ опале́нием разжже́нна мя ви́диши:/ разреше́ние грехо́в приити́ ми да́руй/ и вся́каго проше́ния исполне́ние.

Богоро́дичен: Спасе́ние родила́ еси́ челове́ком,/ кля́тву же дре́внюю разреши́ла еси́/ и обновле́ние принесла́ еси́ нам, обетша́вшим грехми́, Де́во, Ма́ти Бо́жия.

Моле́бному пе́нию приложи́ преднапи́санная (зри день сей выше).

Ин кано́н, глас 6.

Пе́снь 1. Ирмо́с: Я́ко по су́ху:

Да дел твои́х свет вели́кий, в нощи́ жите́йстей блиста́ющий,/ пред челове́ки воспою́,/ зарю́ ми благода́ти твое́й возсия́й, о́тче Иоа́нне.

Я́ко морски́я пучи́ны бу́рею носи́м и вся разуме́в,/ сама́го себе́ соблю́л еси́/ и, на го́ру возше́д, морски́х волн мно́гия изыма́еши.

Отве́ргся ми́ра и сама́го себе́, крест взял еси́,/ и, Позва́вшаго тя в пусты́ни обре́т, Тому́ после́довал еси́,/ и сла́ву получи́л еси́.

Богоро́дичен: Черто́г злат Небе́сному Жениху́ была́ еси́, Пречи́стая:/ ри́зы бра́чныя неиму́щаго мя облецы́,/ я́ко да Го́спода моего́ ра́дости не лишу́ся.

Пе́снь 3. Ирмо́с: Не́сть свят:

Умертви́в у́ды на земли́ посто́м и мно́гими труды́,/ живе́ши па́че челове́к на Небесе́х,/ живу́ща име́я в себе́ Иису́са Спа́са Христа́.

Сла́дка горта́ни твоему́ па́че ме́да словеса́ Госпо́дня,/ тем, жите́йския сла́дости преше́д,/ нетле́нную получи́л еси́ сла́ву и сла́дость.

Вод испо́лнь быв Бо́жия Ду́ха, ре́ки то́чиши исцеле́ний/ и мо́ре страсте́й изсуша́еши с ве́рою к тебе́ притека́ющим.

Богоро́дичен: Утеша́еши, я́ко жезло́м кре́пким, ду́шу мою́/ и му́чиши враг мои́х полки́;/ но све́том Рождества́ Твоего́ ум мой просвети́.

Катава́сия: Не́сть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Моле́бному пе́нию приложи́ преднапи́санная (зри день сей выше).

Пе́снь 4. Ирмо́с: Христо́с моя́ си́ла:

Не носи́ти па́че еди́ныя ри́зы Спас ученико́м повеле́,/ ты же, за́поведь превозше́д,/ раболе́пно обнажи́лся еси́ во еди́ней ко́жи.

Ра́зума острото́ю помы́слив Ада́ма,/ изгна́нна от ме́ста еде́мскаго не пости́вшася,/ потща́лся еси́ вни́ти в не́ посто́м и моли́твою.

Ви́дев Бог терпе́ние твое́ без вся́каго бра́шна в пусты́ни,/ слану́тком тя напита́,/ кроме́ ра́ла того́ израсти́в, о тебе́ пеки́йся.

Богоро́дичен: Но́ва Твоя́ вся, Пречи́стая:/ в рождестве́ бо боле́зни ма́терния не яви́шася/ и в де́встве препо́ни рождеству́ не бы́ша.

Пе́снь 5. Ирмо́с: Бо́жиим све́том Твои́м, Бла́же:

Дави́да слы́шав, пою́ща на го́ру взы́ти Госпо́дню,/ в пусты́нныя го́ры устреми́лся еси́/ и, всю зе́млю разуме́в Госпо́дню,/ лице́ Бо́га Иа́ковля та́мо узре́л еси́.

Уве́дев получи́ти я́же рабу́, несо́нныма очи́ма Го́спода своего́ жду́щему,/ но́щи и дни мно́ги соверши́л еси́,/ я́ко безпло́тен, Бо́га срета́я.

Жела́ние Христо́во неразсу́дно восприи́м/ и повеле́ние де́лом усе́рдно соверши́в,/ любо́вь сро́дства и бога́тства пусты́нею измени́л еси́.

Богоро́дичен: Е́ву в тлю введе́ ле́сть змии́на,/ Ты же, воспроси́вши: ка́ко без му́жа зачну́, неви́на су́щи? –/ и стра́шное рождество́ уве́девши, Бо́га породила́ еси́,/ от тли нас изба́вльшаго.

Пе́снь 6. Ирмо́с: Жите́йское мо́ре:

Я́коже град высо́кий, на горе́ предлежи́ши, преподо́бне о́тче,/ и ка́ко мо́жеши укры́тися,/ Бог бо, чудесы́ тя просла́вив, откры́л е́сть.

Я́коже Дави́да слы́шав,/ на го́ру возше́л еси́ Госпо́дню и в дом Бо́га Иа́ковля/ и был еси́ дом одушевле́н Тро́ицы Безнача́льный.

Ка́плями слез твои́х ка́мение го́рское, окропля́я, извая́л еси́,/ тем, к Ка́мени та́йному прите́к, Христу́,/ то́чиши ре́ки исцеле́ний.

Богоро́дичен: Уязвля́емь страстьми́ боле́зненными,/ к Тебе́ прибега́ю, Пречи́стая,/ моли́твами, раствори́вши, услади́ и страсте́й мя очи́сти.

Катава́сия: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.

Моле́бному пе́нию приложи́ преднапи́санная (зри день сей выше).

Пе́снь 7. Ирмо́с: Росода́тельну у́бо пе́щь:

В ри́зу спасе́ния облече́ тя Госпо́дь,/ раздра́в вре́тище жесто́каго жития́ твоего́,/ тем ны́не те́пло согрева́еши земны́ми неду́ги одержи́мыя моли́твами твои́ми.

Возмога́емь благода́тию Христа́,/ Свою́ си́лу возвеща́юща па́че в не́мощи соверша́ти, преподо́бне,/ боле́зньми те́ло твое́ сокруша́л еси́,/ и́мже безпло́тныя враги́ победи́ти возмо́гл еси́.

Восприи́м всеору́жие на те́мныя си́лы, я́коже Па́вел пропове́да,/ побе́ду поста́вил еси́ све́тлую/ и венце́м та́йно венча́лся еси́.

Богоро́дичен: Возвели́чи Тя Госпо́дь,/ из утро́бы Твоея́ проше́д, в жена́х Благослове́нная,/ удиви́ у́бо на нас вели́чия Твоя́.

Пе́снь 8. Ирмо́с: Из пла́мене преподо́бным:

Тяготу́ на ся возложи́л еси́ ле́гкаго и́га Госпо́дня,/ и, ру́ку на ра́ло возло́ж, вспя́ть не обрати́лся еси́,/ и в Ца́рство вшел еси́.

Земна́я звезда́ чуде́сная облиста́л еси́ на за́паде,/ и на тве́рди явля́ешися церко́вней,/ и сия́еши па́че восто́ка, Иоа́нне преблаже́нне.

Вели́кому Анто́нию подо́бяся,/ еди́нотрудным воздержа́нием и́ноческаго жития́ Тому́ после́довав,/ ра́вен от Бо́га вене́ц прия́л еси́.

Богоро́дичен: Я́ко купина́ неопали́мая, огне́м Твои́м страсте́й мои́х те́рние попали́,/ и, я́ко трапе́за, Твои́м мя хле́бом напита́й,/ и, я́ко голуби́ца, крило́ма Твои́ма покры́й мя.

Пе́снь 9. Ирмо́с: Бо́га челове́ком:

Изба́влься от глубо́ких вод и от ка́ла ти́ннаго,/ разреши́лся еси́ от те́ла непоро́чно/ и, ду́шу не оскверни́в мирски́ми сластьми́,/ чист Бо́гови предстои́ши, на вода́х поко́йных утеша́яся.

Проразуме́в Госпо́дь, я́ко сосу́д избра́н бы́ти и́маши,/ восприя́т тя вну́трь в ра́йская селе́ния,/ иде́же А́нгели ликовству́ют в преставле́нии твое́м,/ сожи́теля тя и подо́бника иму́ще.

Се коне́ц твоего́ преложе́ния,/ Бо́га ви́диши и со А́нгелы ра́дуешися,/ с проро́ки и апо́столы, с му́ченики же и по́стники./ Но всех к тебе́ приходя́щих проше́ния испо́лни твои́ми моли́твами, блаже́нне.

Богоро́дичен: Ме́рилы пра́ведными всей земли́ судя́щаго Бо́га умоли́, Богома́ти,/ щедро́т Свои́х до́ждь на мя источи́ти,/ и плени́цу мои́х прегреше́ний растерза́ти,/ и в су́дное вре́мя доброде́тельми мя украси́ти.

Моле́бному пе́нию приложи́ преднапи́санная (зри день сей выше).

Ин кано́н, глас 7.

Пе́снь 1. Ирмо́с: Ма́нием Твои́м:

Благода́ть имы́й в себе́ от Вы́шния прему́дрости,/ тоя́ дар пода́ждь ми, рабу́ твоему́,/ я́ко да, ра́дуяся, воспою́ по́двиги твоя́, прему́дре.

По́ты по́стническими, я́коже в мо́ри Чермне́м, потопи́л еси́ фарао́на прего́рдаго/ и в зе́млю обетова́ния дости́гл еси́, преблаже́нне.

Ду́хом Святы́м укрепи́вся,/ духо́в зло́бы победи́л еси́ жезло́м ве́ры,/ храня́ще бо тя И́же жезло́м мо́ре лю́дем раздели́вый.

Богоро́дичен: Де́ва и Ма́ти па́че естества́ яви́лася еси́,/ Еди́наго от Еди́наго роди́вши,/ вся исполня́ющаго, я́коже Сам ве́сть.

Пе́снь 3. Ирмо́с: В нача́ле Небеса́:

Земна́я я́ко тле́нна прему́дренно оста́вив,/ после́довал еси́ возсия́вшему воздержа́нием Предте́чи/ и, в пусты́ню всели́вся,/ тезоимени́т вои́стинну де́лы Боже́ственными Тому́ показа́лся еси́.

В ко́жу обле́кся и кре́стным огра́ждься ору́жием,/ мо́ре страсте́й плотски́х преплы́л еси́ немо́кренно,/ я́коже Елиссе́й иногда́ ми́лотию Илиино́ю быстрину́ реки́ Иорда́на.

Я́коже столп яви́лся еси́,/ основа́н на Ка́мени, усе́кшемся от го́ры деви́ческия,/ тем, де́монское каменомета́ние му́жески отрази́в,/ я́коже степе́ньми, к Небе́сному восхожде́нию восте́кл еси́.

Богоро́дичен: Ле́ствицу Тя прови́деша, до Небесе́ утвержде́нну, Влады́чице Чи́стая,/ Е́юже от земли́ к Небе́сным род челове́ческий Бог с Собо́ю вознесе́/ и в сла́ве Свое́й спосади́.

Катава́сия: В нача́ле Небеса́/ всеси́льным сло́вом Твои́м утвержде́й, Го́споди Спа́се,/ и Вседе́тельным и Бо́жиим Ду́хом, всю си́лу их,/ на недви́жимем мя ка́мени испове́дания Твоего́ утверди́.

Моле́бному пе́нию приложи́ преднапи́санная (зри день сей выше).

Пе́снь 4. Ирмо́с: О́тча не́дра не оста́вль:

А́нгельское житие́ на земли́ явля́я,/ а́лчен пребыва́л еси́, преблаже́нне,/ хле́бом ве́рным укрепля́емь всю тва́рь Пита́ющаго.

Процве́л еси́, я́коже крин в те́рниих,/ и сия́ возвели́чил еси́ воня́ми по́двиг твои́х,/ благоуха́нно венча́я род твой благода́тию.

Боже́ственным серпо́м стра́стное отсе́к те́рние от ни́вы души́ твоея́, слеза́ми, о́тче,/ и клас безстра́стия пожа́л еси́, ра́дуяся.

Богоро́дичен: Авваку́м Тя го́ру прови́де осене́нную,/ из Тебе́ бо про́йде Святы́й, Пренепоро́чная,/ Небеса́ покрыва́я доброде́телию Свое́ю.

Пе́снь 5. Ирмо́с: Го́споди Бо́же мой:

Возве́л еси́ о́чи твои́ к Бо́гу, спасти́ могу́щему,/ и шата́ния врага́ лука́ваго на зе́млю низве́ргл еси́,/ те́мже от него́ бори́мым помога́еши.

Блюды́й пяты́ твоя́ и но́зе главу́ свою́ сокруши́,/ ты же на Небеса́ возше́л еси́ невозбра́нно,/ от уз свобожде́н плотски́х.

Я́коже юне́ц, яре́м Госпо́день поне́с и души́ твоея́ зе́млю удобри́в,/ несе́янно слану́ток возрасти́л еси́ себе́ на ма́лую пи́щу.

Богоро́дичен: Ма́нием Боже́ственным вся́ческая Нося́щаго во чре́ве Твое́м име́ла еси́, Влады́чице,/ и млеко́м пита́ла еси́ от сосцу́ Твое́ю/ младе́нцы во чре́ве мате́рии Пита́ющаго.

Пе́снь 6. Ирмо́с: Ио́на из чре́ва а́дова:

Во дре́ве кры́яся ду́пленне, сете́й лука́ваго избе́гл еси́/ и к Боже́ственным жили́щем, я́коже оре́л, высо́ко паря, восте́кл еси́.

Не вола́ закла́л еси́,/ Тро́ицу в ду́бе странноприе́мля, я́коже Авраа́м дре́вле,/ но сама́го себе́, доброде́тельми соверша́ема.

Па́че живота́ умре́ти изво́лил еси́ по сло́ву апо́стола/ и спогре́блся еси́ Христу́,/ за ны уме́ршему и тридне́вно воскре́сшему.

Богоро́дичен: Окрада́ема хоте́нием Божества́, Е́ва дре́вле кля́тву введе́;/ Ты же, Бо́га поро́ждши,/ благослове́ние ввела́ еси́, Ма́ти Де́во.

Катава́сия: Ио́на из чре́ва а́дова вопия́ше:/ возведи́ от тли живо́т мой./ Мы же Тебе́ вопие́м:/ Всеси́льне Спа́се, поми́луй нас.

Моле́бному пе́нию приложи́ преднапи́санная (зри день сей выше).

Пе́снь 7. Ирмо́с: Пе́щь о́троцы огнепа́льну:

Во́ду проше́д непостоя́нную, Иоа́нне преблаже́нне,/ ны́не на вода́х поко́йных всели́лся еси́/ и ороша́еши ду́ши притека́ющих ти.

Яви́лся еси́ ми́лостив и кро́ток, Иоа́нне блаже́нне,/ се́рдцем же чист и непоро́чен,/ тем Бо́га ви́дел еси́, при́сно чи́стыя утеша́ющаго.

Но́щь страсте́й преше́д и ко дни дости́г безстра́стия,/ сын был еси́ невече́рния благода́ти,/ озаря́я ве́рою блажа́щия тя.

Богоро́дичен: Го́ру Тя прови́де Дании́л, Де́во,/ от нея́же отсече́ся Ка́мень,/ и́долы сокруши́вый и зе́млю всю благода́тию испо́лнивый.

Пе́снь 8. Ирмо́с: Еди́наго Безнача́льнаго Царя́ сла́вы:

Кипят от ра́ки моще́й твои́х исто́чницы благодея́ний/ и ве́рных веселя́т се́рдца,/ я́коже ре́ки дре́вле еде́мскаго рая́, Богому́дре.

В броню́ ве́ры те́ло оде́яв,/ лице́ же свое́ без покрыва́ла имы́й,/ бде́ния претерпе́л еси́ кре́пко и Бо́га зрел еси́ моисе́йски.

Уз теле́сных, я́ко мертв, разреши́лся еси́,/ но, я́ко жив, неруши́м пребыва́еши,/ многоле́тныя ре́ша боле́зни си́лою сме́рть претерпе́вшаго Влады́ки Христа́.

Богоро́дичен: На горе́ Сина́йстей прови́де Тя Моисе́й купину́, огне́м неопали́мую, Влады́чице,/ пребыла́ бо еси́ неопали́ма отню́дь,/ Боже́ственный О́гнь неизрече́нно прие́мый во утро́бе Твое́й.

Пе́снь 9. Ирмо́с: Нетле́ния искуше́нием ро́ждшая:

С ли́ки преподо́бных водворя́лся,/ у Престо́ла Влады́ки твоего́ предстои́ши, ра́дуяся,/ Его́же моли́ от вся́ких скорбе́й изба́витися предстоя́щим ра́це моще́й твои́х/ и твоему́ предста́тельству моля́щимся.

Всесве́тел сый, я́коже со́лнце, це́рковь твою́ озаря́еши, преподо́бне,/ просвети́ у́бо твои́ми светоли́тии мра́ком одержи́мыя и лю́тыми неду́ги к тебе́ притека́ющия/ и страсте́й разли́чных изба́ви.

Дерзну́в, пе́снь ны́не принесо́х ти, преподо́бне,/ от Бо́га благода́ть тобо́ю получи́ти моля́ся и страсте́м всем разреше́ние,/ житию́ же исправле́ние и души́ спасе́ние,/ да, ра́дуяся, при́сно прославля́ю тя.

Богоро́дичен: Разноли́чно проро́цы Тя пропове́даша:/ ру́чку злату́ю и све́щник, две́рь и мост, го́ру осене́нную и ле́ствицу./ Мы же, сбытие́ сих ве́рою ви́дяще,/ Богоро́дицу Тя пропове́дуем.

Моле́бному пе́нию приложи́ преднапи́санная (зри день сей выше).

Ин кано́н, глас 8,

его́же краегране́сие: Ра́дуйся, Иоа́нне, свети́льниче пресве́тлый.

Пе́снь 1. Ирмо́с: Во́ду проше́д:

Разу́мный свет му́дрости возсия́й ми ны́не, молю́ся ти, преподо́бне о́тче,/ пе́ти начина́ющу ми твое́ честно́е житие́/ и Боже́ственныя благода́ти испо́лни уста́ моя́.

А́нгелу подо́бяся вои́стинну,/ удали́лся еси́ всех, я́же в ми́ре,/ и, бежа́в те́лом и душе́ю, водвори́лся еси́ в пусты́ни,/ я́коже Моисе́й, бога́тно Боговиде́ния наслажда́лся.

Дово́льно исто́чника пив ева́нгельскаго вод оби́льных,/ из чре́ва ны́не ре́ки чуде́с источа́еши, преподо́бне Иоа́нне,/ и напая́еши ве́рою тебе́ притека́ющия.

Богоро́дичен: Утро́бу Твою́ обита́ Бог Сло́во, Де́во Чи́стая,/ я́коже ка́пля, соше́д, ка́пающая на зе́млю,/ и естество́ челове́ческое, пла́менем зло́бы горе́вшее, обнови́ ороше́нием.

Пе́снь 3. Ирмо́с: Ты еси́ утвержде́ние:

Испо́лнь Ду́ха и ум на Не́бо просте́р,/ о тле́нней пи́щи не попе́клся еси́,/ но хле́бом а́нгельским пита́лся еси́.

Струя́ми слез твои́х зе́млю пусты́нную напои́л еси́/ и плод приноси́ти тебе́ слану́тка неора́нно утучни́л еси́.

Я́ко птене́ц, к Бо́гу возлете́ти жела́я, преподо́бне о́тче,/ гнездо́ себе́ в дре́ве сотвори́л еси́,/ от земны́х облегчи́вся.

Богоро́дичен: Иису́са, Сы́на Твоего́, ми́лостива мне сотвори́,/ зло́е творя́щему, Пречи́стая,/ во е́же не ви́дети ми Того́ лице́ отвраща́юща.

Катава́сия: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Моле́бному пе́нию приложи́ преднапи́санная (зри день сей выше).

Пе́снь 4. Ирмо́с: Услы́шах, Го́споди:

Обре́л еси́ Бо́га утвержде́на на версе́ Боже́ственныя ле́ствицы доброде́телей,/ е́юже возше́д, почи́л еси́ от трудо́в и боле́зней.

А́гня тя до́браго Па́стыря, в горе́ кры́ющееся, преподо́бне о́тче, яви́ша овча́та,/ от свое́й огра́ды убежа́вшая.

На тя наше́дшии па́стырие всем пропове́даша стра́нное терпе́ние твое́/ и Бо́гу в Вы́шних сла́ву возсыла́ху.

Богоро́дичен: Неневе́стная Ма́ти,/ Тобо́ю уве́дана бы́ша ше́ствия Бо́га на́шего,/ от Твои́х пречи́стых крове́й прии́мшаго челове́чество.

Пе́снь 5. Ирмо́с: У́тренююще, вопие́м Ти:

Ели́цы боголюби́ви, преподо́бне о́тче, глаго́лов послу́шающе па́стырских,/ на ви́дение твое́ в пусты́ню прихожда́ху.

Сла́ва твоя́ дале́че су́щия к тебе́ созыва́ше,/ я́коже глас в пусты́ни вопию́щаго всю́ду пронося́щися.

В дре́ве уедини́вся, я́коже пти́ца, преблаже́нне о́тче,/ оправда́ния Бо́жия де́лая,/ не почива́л еси́, Го́сподеви моли́ся.

Богоро́дичен: Еди́наго в Тебе́, я́коже в глави́зне кни́жней напи́саннаго, Бо́га поноси́вши, Чи́стая,/ в пра́ведных мя кни́зе напиши́.

Пе́снь 6. Ирмо́с: Очи́сти мя, Спа́се:

Твори́ши дела́ Фесви́тянина Илии́, преподо́бне о́тче:/ ма́лым бо хле́бом мно́гих пита́еши/ и в сы́тость чу́дом ко́рмиши.

Изво́лиша мно́зи с тобо́ю жи́ти, блаже́нне,/ ми́ра сего́ преоби́девше сла́дость/ и твоему́ началообра́зному поревнова́вше житию́.

Лече́бную си́лу от Бо́га прии́м,/ слепы́м свет дае́ши, глухи́м слы́шание, хромы́м хожде́ние/ и всем, ве́рою приходя́щим, здра́вие.

На главу́ твою́ ми́ро сни́де и на браду́ твою́ ма́сло ра́дости,/ е́же свещу́ се́рдца твоего́ неугаси́му соблюде́, преподо́бне.

Богоро́дичен: Избра́нная А́гнице Чи́стая,/ Льва́ стра́шнаго ро́ждшая, и А́гнца бы́вшаго,/ и на заколе́ние безгла́сна приведе́ннаго,/ и беззако́ния моя́ на Ся восприи́мшаго.

Катава́сия: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Моле́бному пе́нию приложи́ преднапи́санная (зри день сей выше).

Пе́снь 7. Ирмо́с: От Иуде́и доше́дше, о́троцы:

Честну́ю це́рковь воздви́гл еси́, я́коже огра́ду овца́м,/ себе́ це́рковь жи́ву сотвори́в, Го́сподеви поя́:/ отце́в Бо́же, благослове́н еси́.

Е́же ми́ру распя́тие претерпе́в и я́же на земли́ у́ды умертви́в,/ не ктому́ же жил еси́, но Христо́с в тебе́, Ему́же взыва́л еси́:/ отце́в Бо́же, благослове́н еси́.

Пра́вило души́ твое́й разруши́ти не возмого́ша ни по́тове, ниже́ боле́зни,/ ни теле́сное изможде́ние, ни ста́рость претружде́нная,/ но, Влады́ки твоего́ жела́я, неуста́нно взыва́л еси́:/ отце́в Бо́же, благослове́н еси́.

Богоро́дичен: Руно́ ороше́нное, Де́во, пла́мень грехо́в мои́х угаси́,/ купино́ неопали́мая, страсте́й мои́х те́рние попали́,/ подаю́щи ми на воде́ жи́ти упокое́ния/ и гее́нскаго мя огня́ свобожда́ющи.

Пе́снь 8. Ирмо́с: Седмери́цею пе́щь:

Егда́, со́лнце пресве́тлое, на за́паде жи́зни земны́я себе́ уразуме́л еси́,/ ученики́ наказа́в и во стра́се Бо́жии утверди́в,/ возвести́л еси́ боле́зней твои́х возме́здие/ и, ра́дуяся, дух твой Го́сподеви пре́дал еси́.

Сме́рть не лиши́ телесе́ твоего́ живу́щая в тебе́ благода́ти Боже́ственныя,/ но преше́дшим днем четыредесяти́м сам явля́ешися,/ и в зе́млю погребсти́ тя повелева́еши; и чуде́с струи́ источа́еши.

Ви́дяще пучи́ну чуде́с твои́х,/ храм твой сокро́вище проразумева́ем многоце́нное:/ вси бо, неду́гом одержи́мии, в той притека́юще,/ ско́ро от гро́ба твоего́ здра́вие прие́млют,/ тя просла́вльшаго Бо́га сла́вяще.

Богоро́дичен: А́ще светле́е све́та со́лнечнаго проразуме́ваем де́вства Твоего́ све́тлое сия́ние, Пречи́стая:/ Све́та бо безле́тнаго и со́лнцу Творца́ во чре́ве Твое́м име́ла еси́,/ из Тебе́ возсия́вшаго, и тьму́ пре́лести разгна́вшаго,/ и ве́сь мир све́том Богоразу́мия просвети́вшаго.

Пе́снь 9. Ирмо́с: Ужасе́ся о сем Не́бо:

Те́ло твое́ честно́е, во гро́бе положе́нное,/ разре́шшуся сою́зу есте́ственному и тебе́ Бо́гу дух преда́вшу,/ облагоуха́ет вся приходя́щия/ и Бо́га прославля́ет чудесы́, Иоа́нне преблаже́нне.

Ли́ку мона́шествующих и мно́жеству ве́рных те́плый обрета́ешися засту́пник,/ и́же зло́бу разруша́яй и проше́ния исполня́яй,/ Бог бо возвели́чи тя, при́снаго раба́ Своего́,/ челове́ки и скоты́ тобо́ю исцеля́я.

Испо́лни се́рдца моего́ жела́ние, чуде́с исто́чниче,/ да́руй ми благода́ть твою́, от вся́каго искуше́ния мя избавля́я,/ на Суде́ же гряду́щем во еде́мстей мя всели́ па́жити моли́твами твои́ми,/ от горя́ща се́рдца тебе́ пе́снь прине́сшаго.

Богоро́дичен: Изря́дно предочи́стившися во Свята́я Святы́х вселе́нием/ и а́нгельскою руко́ю пита́нием,/ челове́ком Бо́га породила́ еси́,/ от Твои́х пречи́стых крове́й пло́ть прии́мшаго/ и, я́коже пре́жде рождества́, Де́ву Тя соблю́дшаго.

Моле́бному пе́нию приложи́ преднапи́санная (зри день сей выше).

Моли́тва

О преподо́бне и Богоно́сне о́тче наш Иоа́нне, зри́телю неизрече́нные сла́вы в Небе́снем Ца́рствии и помо́щниче благода́тный всем к тебе́ притека́ющим, не оста́ви ме́ста сего́, на не́мже труды́ и по́двиги о Христе́ подъя́л еси́ и зе́млю слеза́ми твои́ми ороси́л еси́! Да пребу́дет оби́тель твоя́, в не́йже благоволи́ Бог святы́м твои́м моще́м почива́ти, незы́блема от ухищре́ний враго́в ви́димых и неви́димых. Укрепи́ в доброде́лании ча́да твоя́, и́хже во оби́тель твою́ собра́л еси́, я́ко да позна́ют зва́ние свое́ и после́дуют стопа́м твои́м. Страну́ на́шу в ми́ре соблюди́. Правосла́вным лю́дем во бране́х на сопроти́вныя спобо́рствуй. Посети́ с высоты́ Небе́сныя всех, ве́рно к тебе́ притека́ющих и прося́щих твоего́ кре́пкаго заступле́ния; в мо́ри пла́вающих упра́ви, жите́йскаго мо́ря волне́ние ути́ши, церко́вныя раздо́ры укроти́, мир всему́ ми́ру у Го́спода испроси́, боля́щих уврачу́й спаси́тельным посеще́нием, ско́рбных уте́ши благода́тию, всем бу́ди вся, я́коже был еси́ в земне́м житии́ твое́м. Сотвори́ о нас к Бо́гу моли́тву, дана́ бо ти е́сть благода́ть моли́тися за ны, я́ко да сподо́бимся твои́м хода́тайством улучи́ти ве́чное блаже́нство ку́пно с тобо́ю и все́ми святы́ми во Христе́ Иису́се, Го́споде на́шем, Ему́ же подоба́ет вся́кая сла́ва, че́сть и поклоне́ние со Отце́м и Святы́м Ду́хом во ве́ки веко́в. Ами́нь.

И́на моли́тва

Земна́я звездо́ чуде́сная, облиста́вшая преде́лы гра́да Сре́дца, преди́вный по́стниче и уго́дниче Бо́жий, о́тче Иоа́нне, преподо́бных ра́дование, Це́ркве Бо́лгарския украше́ние, кре́пкий адама́нте ве́ры Правосла́вный и живы́й све́щниче, всю зе́млю Бо́лгарскую све́том пра́вды Бо́жия осия́вый! Ты еси́ ско́рый помо́щник с ве́рою и любо́вию к тебе́ притека́ющим и вели́кий предста́тель пред Го́сподем о всех нас. Приими́, преблаже́нне, на́ша моле́ния и умоли́ Христа́ Бо́га на́шего, да вси тобо́ю наставля́емии лю́дие слове́нстии пребыва́ют сою́зом бра́тския любве́ связу́еми, в ми́ре и благоче́стии, и да изба́вит их Госпо́дь и вся гра́ды и страны́ христиа́нския от враг ви́димых и неви́димых и от наше́ствия иноплеме́нник, от неду́га и гла́да и вся́кия ско́рби, наипа́че же от искуше́ний врага́ те́мнаго. Предстоя́щим же зде и моля́щимся пред пречи́стым твои́м о́бразом испроси́, преподо́бне, у Го́спода Бо́га на́шего вся, я́же ко спасе́нию своему́ ни про́сят, да вси с тобо́ю прославля́ем Всесвято́е И́мя Отца́ и Сы́на и Свята́го Ду́ха, ны́не, и при́сно, и во ве́ки веко́в. Ами́нь.