НА МА́ЛОЙ ВЕЧЕ́РНИ
На Го́споди, воззва́х: стихи́ры на 4, глас 7:
Яви́ся де́нь благоволе́ния Бо́жия/ и пра́здник весе́лия,/ стеце́мся у́бо, ве́рнии, на го́ру Поча́евскую/ и воспои́м всеблаже́ннаго И́ова,/ честну́ю па́мять того́ соверша́юще.
Дрема́ния ве́ждома,/ ниже́ сна очи́ма твои́ма дал еси́, преподо́бне,/ бо́дренными моли́твами/ и по́стническим житие́м Го́сподеви угожда́я,/ те́мже ра́достно соверша́ем па́мять твою́, всече́стне.
Прииди́те, ве́рнии, на святу́ю го́ру Поча́евскую,/ иде́же уго́дник Бо́жий подвиза́ся в житии́ свое́м/ и от си́лы в си́лу восхожда́ше,/ и тому́ ны́не помо́лимся,/ да, во оби́телех Небе́сных водворя́лся,/ мо́лится ко Го́споду/ о спасе́нии душ на́ших.
Не мо́жет град укры́тися, верху́ го́ры стоя́,/ ты же, преподо́бне,/ а́ще и в те́мней ка́менней пеще́ре/ почива́еши нетле́нным те́лом твои́м,/ оба́че всех призыва́еши на го́ру Поча́евскую,/ све́тлаго ра́ди пра́здника твоего́,/ моля́ Христа́ Бо́га/ спасти́ся душа́м на́шим.
Сла́ва, И ны́не, глас 6:
Всесвята́я Богоро́дице,/ во вре́мя живота́ моего́ не оста́ви мене́,/ челове́ческому предста́тельству не вве́ри мя,/ но Сама́ заступи́ и поми́луй мя.
На стихо́вне стихи́ры, глас 6:
Па́мять твою́ дне́сь пра́зднующе,/ преподо́бне о́тче наш И́ове, вопие́м ти:/ со А́нгелы предстоя́ в дерзнове́нии мно́зе,/ о всех нас, о́тче, моли́ся ко Влады́це Христу́.
Стих: Блаже́н муж, боя́йся Го́спода,/ в за́поведех его́ восхо́щет зело́.
У́тро и де́нь све́тел/ твой пра́здник яви́ся,/ просвеща́я на́ша сердца ́,/ ве́рою хва́лящих честны́я твоя́ по́двиги,/ о́тче наш И́ове.
Стих: Честна́ пред Го́сподем/ сме́рть преподо́бных его́.
Я́ко со́лнце на земли́/ обре́т всечестну́ю ико́ну Бо́жия Ма́тере/ на горе́ Поча́евстей,/ всесве́тлая звезда́ той показа́лся еси́,/ те́мже и нас, тя пою́щих,/ све́том богоразу́мия озари́,/ моли́твами Богоро́дицы, И́ове, о́тче наш.
Сла́ва, И ны́не, глас то́йже:
Все упова́ние мое́ на Тя возлага́ю,/ Ма́ти Бо́жия,/ сохрани́ мя под кро́вом Твои́м.
Тропа́рь, глас 4: Возло́жь на ся и́го Христо́во: зри на вели́цей вече́рни.
На ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры, глас 8.
Подо́бен: О, пресла́внаго чудесе́:
О́тче преподо́бне И́ове!/ Ты, измла́да возлюби́в Христа́/ и к нему́ жела́ние невозвра́тно имы́й,/ десятоле́тен сый, уклони́лся еси́ от о́чию люби́мых ти роди́телей/ и во оби́тели све́тлаго Преображе́ния Госпо́дня Уго́рницстей всели́лся еси́,/ равноа́нгельнаго жития́ иски́й,/ и по́чести Вы́шняго зва́ния,/ и гра́да Небе́снаго гряду́щаго./ Отону́дуже призира́я ны́не на чту́щих па́мять твою́,/ моли́ Христа́ Бо́га/ дарова́ти нам по́мысл до́брый о спасе́нии/ и ве́лию ми́лость.
О́тче преподо́бне И́ове!/ Ты, от ю́ности возлюби́в Христа́ Бо́га/ и ду́шу твою́ хотя́ украси́ти чи́стых помышле́ний и жела́ний бога́тством,/ вся кра́сная ми́ра сего́ во уме́ты вмени́л еси́,/ сего́ ра́ди по двою́ ле́ту/ кро́ткаго и трудолю́бнаго послуша́ния во оби́тели/ а́нгельский чин восприя́л еси́,/ и́менем древлезако́ннаго И́ова нарече́нный;/ моли́ Христа́ Бо́га/ дарова́ти и нам жела́ние нераска́янное ве́чныя жи́зни/ и ве́лию ми́лость.
О́тче преподо́бне И́ове!/ Многотру́дный пу́ть жи́зни твое́й теки́й/ и к све́ту невече́рнему устремля́я духо́вныя о́чи твоя́,/ вели́кий а́нгельский о́браз восприя́ти на ся изво́лил еси́/ и, я́коже пре́жде в Креще́нии твое́м,/ та́ко и ны́не и́менем Крести́теля и Предте́чи Христо́ва Иоа́нна/ па́ки нарече́н был еси́,/ с ни́мже Христа́ Бо́га моли́/ дарова́ти нам благода́ть спасе́ния/ и ве́лию ми́лость.
И́ны стихи́ры преподо́бнаго, глас 2.
Подо́бен: Ки́и похва́льными венцы́:
Ки́ими похва́льными венцы́/ увязе́м преподо́бнаго,/ мона́хов сла́ву, де́вственных целому́дрие,/ схимона́хов украше́ние и всех учи́теля?/ Еще́ бо су́щу ему́ во оби́тели Уго́рницстей,/ мно́зи нача́ша приходи́ти к нему́ по́льзы ра́ди душе́вныя,/ благочести́вый же Остро́жский кня́зь Константи́н/ испроси́ его́ во игу́мена оби́тели Кре́стныя на о́строве Ду́бенстем,/ да пока́жет о́браз и́стиннаго богоуго́днаго житии́ в Волынстей земли́,/ в не́йже тогда́ во́лцы тя́жцыи расхища́ху правосла́вное ста́до Христо́во,/ в лати́нское соедине́ние совращающе,/ и да научи́т всех в еди́ней и́стинней Кафоли́честей Правосла́вней ве́ре/ пребыва́ти о Го́споде,/ прося́ у Него́ ми́ра ми́рови/ и спасе́ния душа́м на́шим.
Ки́ими похва́льными пе́сньми/ ублажи́м преподо́бнаго?/ Прия́в бо жезл правле́ния игу́менскаго во оби́тели Ду́бенстей,/ неле́ностно подвиза́шеся проти́ву клевре́тов инове́рия,/ свои́х и́ноков во благоче́стии и ве́ре утвержда́я/ и тех подвиза́я писа́ти кни́ги Боже́ственныя/ в защище́ние Це́ркве и ве́ры Правосла́вныя,/ я́коже и сам писа́нием о́нех упражня́шеся,/ ку́пно же и кня́зя Константи́на/ ко изда́нию первопеча́тныя слове́нския Би́блии,/ я́ко оте́ц его́ духо́вный,/ к назида́нию и утеше́нию ве́рных подви́же,/ и ны́не мо́лит Го́спода пода́ти мир ми́рови/ и спасе́ние душа́м на́шим.
Ки́ими похвала́ми возвели́чим преподо́бнаго,/ его́же сла́вою и че́стию венча́ Сам Госпо́дь и Ца́рь сла́вы,/ я́ко не мощи́ ему́ утаи́тися от совреме́нник свои́х?/ Те́мже, вре́менныя че́сти избежа́ти хотя́,/ ку́пно же и озлобле́ний от клевре́тов инове́рия/ за любо́вь к Правосла́вию,/ умы́сли оста́вити нача́льство,/ е́же вя́щши два́десяти лет исправля́ше на о́строве Ду́бенстем,/ и о́тай во о́бразе проста́го и́нока востече́ на го́ру Поча́евскую,/ неви́димою благода́тию Ду́ха Бо́жия води́мь,/ да назида́ет и просла́вит ди́вным житие́м свои́м и оби́тель Поча́евскую,/ прося́ у Христа́ Бо́га ми́ра ми́рови/ и спасе́ния душа́м на́шим.
Сла́ва, глас 5:
Дави́дски дне́сь воспои́м в па́мяти твое́й,/ всеблаже́нне о́тче наш И́ове:/ насажде́н был еси́ вои́стинну в дому́ Госпо́дни на горе́ Поча́евстей/ и, я́ко дре́во благосенноли́ственное,/ процве́л еси́ во дворе́ При́сно де́вы Богома́тере/ при исто́чнице цельбоно́сныя стопы́ Ея́./ Отону́дуже плоды́ прие́млюще многоразли́чных дарова́ний,/ прославля́ем просла́вльшаго тя Го́спода,/ Его́же моли́ дарова́ти нам/ мир и ве́лию ми́лость.
И ны́не, Богоро́дичен: В Чермне́м мо́ри:
Вход. Проки́мен дне. И чте́ния 3 преподо́бническая (зри день сей выше).
На лити́и стихи́ры самогла́сны, глас 3:
О́бщаго жития́ мона́шескаго нача́льнику в Русстей земли́ подо́бяся,/ преподо́бному Феодо́сию Пече́рскому,/ был еси́ первонача́льник о́бщих жити́й на горе́ Поча́евстей,/ преподо́бне о́тче наш И́ове;/ но и пусты́ннаго Анто́ниева боголюбе́знаго жития́ не уклоня́лся,/ в те́сней и те́мней пеще́ре ка́менней,/ богомы́слия ра́ди и моли́твы,/ многокра́тно заключа́лся еси́/ и, та́ко подвиза́лся,/ сугу́бо дости́гл еси́ доброде́телей соверше́нства,/ и́миже украша́ема оби́тель твоя́/ а́бие вели́кое и́мя Ла́вры восприя́т,/ Ла́вре Киевопече́рстей, ма́тери свое́й, после́дующи,/ ея́же и́ноки дре́вле основа́ся;/ и ны́не, всеблаже́нне,/ наставля́й нас ко све́ту богоразу́мия/ и моли́ Христа́ Бо́га спасти́ ду́ши на́ша.
Глас 4: Вседержи́тельною десни́цею укрепля́емь,/ но́вым по́двигом духо́вным вдал еси́ себе́, Богоблаже́нне,/ и, к све́ту незаходи́мому простира́лся,/ укрепля́емь был еси́ благода́тию свы́ше/ и сия́нием све́та неизрече́ннаго от ико́ны Пречи́стыя/ в твое́й пеще́ре озаря́емь,/ те́мже, я́коже дре́вле Се́ргий преподо́бный Ра́донежский/ от лица́ Са́мыя Бо́жия Ма́тере,/ и, преукраше́нный благода́тию Боже́ственною,/ оби́тель твою́ просла́вил еси́,/ и ны́не ве́рных се́рдца просвеща́еши,/ чту́щих любо́вию па́мять твою́.
Глас 7: Кий ра́зум или́ язы́к возмо́жет изрещи́ или́ похвали́ти/ по достоя́нию житие́ твое́, уго́дниче Бо́жий?/ Ре́вностию бо распаля́емь втора́го Илии́,/ Предте́чи и Крести́теля Христо́ва,/ пле́велы инове́рия и собла́зны челове́ческих мудрова́ний отрева́л еси́/ и, благове́рному вели́кому кня́зю Алекса́ндру Не́вскому подража́я,/ уче́ния лати́нская презре́в,/ и пре́лесть их обличи́в, и сами́х укори́в,/ и де́рзость их, и вся неи́стовая шата́ния/ проти́ву тебе́ и оби́тели твое́й нивочто́же вмени́л еси́./ Те́мже правосла́внии вси,/ я́ко опло́т кре́пкий праоте́честей ве́ре в тебе́ иму́ще,/ оби́тели Поча́евстей вели́кое зва́ние Ла́вры усво́иша;/ отону́дуже четы́ри Ла́вры во оте́чествии на́шем,/ я́коже четы́ри вели́кая свети́ла, возсия́ша:/ южная свята́я Ла́вра Пече́рская во Ки́еве,/ Тро́ице-Се́ргиева на восто́цех,/ Александроне́вская же на се́вере, во гра́де свята́го Петра́,/ и Поча́евская на за́паде –/ в просвеще́ние всем конце́м Росси́йския земли́ и в прославле́ние Бо́га,/ да́рующаго нам ве́лию ми́лость.
Сла́ва, глас 1:
Не и́менем то́кмо, но и са́мою ве́щию/ многоболе́зненному о́ному в ве́тсем зако́не И́ову,/ блаже́ннейший о́тче наш И́ове, уподо́бился еси́/ и во всех жития́ проти́вностех и искуше́ниих Бо́гу Еди́ному тебе́ вдава́л еси́./ Те́мже и нас му́жеству и терпе́нию,/ смире́нию же и стра́ху Бо́жию научи́,/ да в напа́стех и ско́рбех взыва́ем о Го́споде непреста́нно:/, я́коже Го́сподеви изво́лися, та́ко бы́сть./ Бу́ди И́мя Госпо́дне благослове́но во ве́ки.
И ны́не, Богоро́дичен, глас то́йже:
Ди́вный прорече́ Иса́ия,/ я́ко бу́дет в после́дния дни явле́на гора́ Госпо́дня/ и дом Бо́жий верху́ го́ры./ И се, я́коже дре́вле на горе́ Сио́ни,/ на горе́ святе́й Бо́жией,/ изво́ли яви́тися Госпо́дь,/ та́ко и в после́дния дни благоволи́ о нас,/ да от гор Ки́евских освяти́ши нас благода́тию Твое́ю, Пренепоро́чная Ма́ти!/ Ты бо напра́вила еси́ стопы́ пече́рских и́нок,/ да, от зла́го наше́ствия Баты́ева спаса́ющеся,/ утвердя́тся на избра́нней Тобо́ю горе́ Поча́евстей,/ иде́же и оби́тель честну́ю во и́мя Твое́/ о́нем благомо́щне устро́ити изво́лила еси́./ Те́мже ве́село ны́не на святе́й горе́ Твое́й пра́зднующе,/ со Арха́нгелом вопие́м Ти:/ Благода́тная, ра́дуйся, с Тобо́ю Госпо́дь,/ подая́й Тобо́ю ми́рови ве́лию ми́лость.
На стихо́вне стихи́ры, глас 4.
Подо́бен: Дал еси́ зна́мение:
Дал еси́ вои́стинну Боже́ственное зна́мение/ твоего́ благоче́стия и благоугожде́ния Го́сподеви, преподо́бне о́тче,/ егда́ в конце́ столе́тния жи́зни твоея́/ толи́кия прозорли́вости сподо́бился еси́,/ я́ко де́нь и час отше́ствия твоего́/ пре́жде седми́цы предре́кл еси́,/ и та́ко во урече́нный час, по Боже́ственней литурги́и,/ тобо́ю сами́м соверше́нней,/ а́бие кроме́ вся́кия боле́зни ми́рно отше́л еси́ ко Го́споду,/ науча́я всех зва́ти тебе́:/ ра́дуйся, И́ове, пресла́вный уго́дниче Бо́жий/ и оби́тели Поча́евския украше́ние.
Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.
Дал еси́ вои́стинну несумне́нное зна́мение/ твоего́ Небе́снаго прославле́ния, преподо́бне,/ егда́ чрез се́дмь лет по успе́нии твое́м/ све́тлость от гро́ба твоего́ исхожда́ше./ Недоумева́ху же вси,/ отку́ду и ко́ея ра́ди вины́ луча́ сия́ исхожда́ше,/ до́ндеже сам яви́лся еси́ в со́ннем виде́нии/ Ки́евскому митрополи́ту Диони́сию,/ известву́я, я́ко хо́щет Бог чрез него́ откры́ти мо́щи твоя́,/ е́же слы́шавше, вси вопия́ху тебе́:/ ра́дуйся, И́ове, пресла́вный уго́дниче Бо́жий/ и оби́тели Поча́евския украше́ние.
Стих: Я́ко не оста́виши ду́ши мое́й во а́де,/ ниже́ да́си преподо́бному твоему́ ви́дети истле́ния.
Дал еси́ вои́стинну непрело́жное зна́мение/ пренебе́снаго е́же о тебе́ промышле́ния Бо́жия, преподо́бне,/ егда́ благочести́вый митрополи́т,/ прите́к а́бие со всем кли́ром на го́ру Поча́евскую/ и испыта́в приле́жно о богоуго́днем житии́ твое́м,/ повеле́ откры́ти гроб,/ в не́мже обре́те честны́я мо́щи твоя́/ кроме́ вся́каго тле́ния,/ благоуха́ния несказа́ннаго испо́лнены,/ и та́ко внесе́ ты́я в це́рковь для всенаро́днаго поклоне́ния,/ ублажа́я тя и поя́ ти ра́достно:/ ра́дуйся, И́ове, пресла́вный уго́дниче Бо́жий/ и оби́тели Поча́евския украше́ние.
Сла́ва, глас 8:
Дне́сь гора́ Поча́евская,/ я́ко сокро́вище неоцене́нное,/ я́ко би́сер многоце́нный/ иму́щи святы́я и многоцеле́бныя мо́щи твоя́, всеблаже́нне,/ духо́вно ра́дуется,/ и земли́ Волы́нская, засту́пника тя при́снаго себе́ иму́щи,/ ве́село торжеству́ет,/ и пеще́ра, в не́йже Богому́дренно подвиза́лся еси́,/ о тебе́ красу́ется,/ пресве́тлая же оби́тель Поча́евская,/ па́мять твою́ пра́зднующи,/ торже́ственная возсыла́ет Го́сподеви,/ тебе́ в сте́ну неразори́му ей да́вшему./ Мы же, ча́да твоя́,/ ко всечестне́й ра́це твое́й припа́дающе, мо́лимтися:/ моли́ спасти́ся душа́м на́шим.
И ны́не, Богоро́дичен, глас то́йже:
Сра́дуются с на́ми у́мная вся чинонача́лия,/ духо́вно совоку́пльше чу́вственный лик,/ ви́дяще Цари́цу и Влады́чицу всех,/ многоиме́нне в цельбоно́сней ея́ стопе́ и ико́не Поча́евстей/ ве́рными сла́виму,/ ра́дуются же и ду́си пра́ведных,/ су́щии зри́телие виде́ния на возду́се,/ зря́ще моле́бно простира́ющу всечестне́и Свои́ ру́це/ над оби́телию Поча́евскою/ и вскрай Ея́ стоя́щаго на о́блацех небе́сных,/ во све́тлости необы́чней, И́ова, чудотво́рца Поча́евскаго,/ моля́щася, да не преда́ст в ру́це враго́в оби́тели,/ прося́ща умире́ния ми́рови,/ Це́ркви укрепле́ния/ и спасе́ния душа́м на́шим.
На благослове́нии хле́бов тропа́рь преподо́бнаго, два́жды. И Богоро́дице, Де́во: еди́ножды.
Тропа́рь, глас 4:
Возло́жь на ся и́го Христо́во от ю́ности,/ преподо́бне о́тче И́ове,/ многоле́тне свя́то подвиза́лся еси́/ на по́прище благоче́стия во оби́тели Уго́рницстей и на о́строве Ду́бенстем,/ и, прише́д к горе́ Поча́евстей,/ зна́менанней цельбоно́сною стопо́ю Пресвяты́я Богоро́дицы,/ в те́сней пеще́ре ка́менней/ богомы́слия ра́ди и моли́твы многокра́тно заключа́лся еси́,/ и, благода́тию Бо́жиею укрепля́яся,/ му́жественно потруди́лся еси́/ на по́льзу Це́ркве Христо́вы и оби́тели твоея́,/ ку́пно же и проти́ву враго́в Правосла́вия и благоче́стия христиа́нскаго,/ и, наста́вив сицево́му ополче́нию и́ночествующих,/ победи́тели тех предста́вил еси́ Влады́це и Бо́гу./ Того́ моли́ спасти́ся душа́м на́шим.
На У́ТРЕНИ
На Бог Госпо́дь: тропа́рь свята́го, два́жды. Сла́ва, и ны́не, Богоро́дичен, глас 4: Предста́тельство христиа́н непосты́дное:
По 1-м стихосло́вии седа́лен, глас 5:
Дне́сь весели́тся Не́бо свы́ше, и оби́тель Поча́евская све́тло ра́дуется,/ свята́я же Це́рковь Бо́жия, я́ко пресве́тлыми луча́ми,/ мно́гими чуде́с све́тлостьми от всечестны́я ра́ки преподо́бнаго озаря́ема, торжеству́ет,/ вся страны́ и всяк язы́к созыва́ющи ублажи́ти вели́каго уго́дника Бо́жия./ Те́мже соше́дшеся вси, того́ сла́вную па́мять в пе́снех и пе́ниих почти́м,/ прося́ще у Христа́ Бо́га на́шего моли́твами его́ ми́ра ми́рови и ве́лия ми́лости.
Сла́ва, и ны́не, Богоро́дичен:
У́треневаху иногда́ пред ико́ною Твое́ю, Пречи́стая,/ и́ноцы Поча́евстии и про́чии Поча́евстии лю́дие,/ от тата́р во оби́тели Твое́й обложе́ннии, Твое́й по́мощи прося́ще,/ и, явле́нием Твои́м и Твоего́ уго́дника, преподо́бнаго отца́ на́шего И́ова,/ благопоспе́шно от враго́в спаса́емии, вопии́ху Тебе́:/ ра́зве Тебе́ и всеблаже́ннаго засту́пника на́шего ины́я по́мощи не ве́мы.
По 2-м стихосло́вии седа́лен, глас 2:
Недоуме́ет всяк язы́к инове́рных благореши́ти по достоя́нию,/ ка́ко, яви́в пренебе́сную сла́ву твою́ в откры́тии моще́й твои́х, преподо́бне,/ на ло́не святы́я Це́ркве Правосла́вный,/ а́ще по́слежде ты́я в ру́це иноси́льных преда́ти и соизво́лил еси́,/ оба́че па́ки о́ныя правосла́вным возврати́ти сотвори́л еси́./ Мы же ве́руем и испове́дуем, я́ко сие́ та́ко устро́ил еси́/ вя́щшаго ра́ди прославле́ния своего́ и оби́тели свое́й Поча́евския,/ я́ко и от латиноуни́тов благогове́йно почита́емь был еси́,/ да яви́ши всем несказа́нно,/ я́ко вои́стинну еди́на е́сть свята́я Це́рковь на́ша Правосла́вная,/ в не́йже Бог прославля́ет святы́я Своя́,/ пода́й нам моли́твами их мир и ве́лию ми́лость.
Сла́ва, и ны́не, Богоро́дичен:
У́тренююще, Всепе́тая, вопие́м Ти:/ спаса́й и нас моли́твами отца́ на́шего И́ова,/ я́коже изба́вила еси́ ку́пно с ним оби́тель Твою́ от влады́чества инове́рнаго./ Ты бо еси́ Еди́на Засту́пница на́ша усе́рдная,/ ра́зве Тебе́ ины́я не ве́мы.
Велича́ние и псало́м избра́нный о́бщии преподо́бным.
По полиеле́и седа́лен, глас 4:
Прииди́те, празднолю́бцы, духо́вный настро́ивше слух,/ прииди́те, собери́теся вси в пеще́ре всеблаже́ннаго отца́ на́шего,/ иде́же почива́ет нетле́нное те́ло его́,/ и, то́е благогове́йно обстоя́ще, услы́шим, что возопие́т пеще́ра сия́,/ а́ки пти́ца, от среды́ ка́мения даю́щи глас свой:/ ка́ко иногда́ чрез три дни, овогда́ же чрез це́лую седми́цу,/ еди́н в ней затворе́нный и ничи́мже, то́чию слеза́ми, от чи́ста се́рдца излива́емыми, пита́выийся,/ о благостоя́нии ми́ра, во зле лежа́щаго, моля́шеся./ Того́ моли́твами пощади́, Го́споди, ду́ши на́ша.
Сла́ва, и ны́не, Богоро́дичен:
Весели́ся, Волы́нская земле́, и вся страны́ Росси́йския,/ го́ры и хо́лми Поча́евстии, восплещи́те рука́ми,/ се бо Цари́ца и Влады́чица от Престо́ла Небе́снаго гряде́т со А́нгелы во спасе́ние оби́тели Свое́й от наше́ствия ага́рянскаго,/ иму́щи одесну́ю Себе́ всеблаже́ннаго уго́дника Своего́ и чудотво́рца Поча́евскаго И́ова,/ и та́ко разгна́ вся полки́ проти́вных,/ Поча́евстей же оби́тели и спаса́емому при́сно наро́ду Росси́йскому изба́ву и безсме́ртную сла́ву соде́ла.
Степе́нна, 1-й антифо́н 4-го гла́са. Проки́мен, глас 4: Восхва́лятся преподо́бнии во сла́ве/ и возра́дуются на ло́жах свои́х. Стих: Я́ко не оста́виши души́ мое́й во а́де, ниже́ да́си преподо́бному Твоему́ ви́дети истле́ния. Ева́нгелие от Матфе́я, зача́ло 24. Коне́ц: Бе бо уча́ их, я́ко вла́сть име́я, и не я́ко кни́жницы и фарисе́е.
По 50-м псалме́ стихи́ра, глас 6:
Желе́зом имену́емь по благоро́дию пло́ти,/ преподо́бне о́тче наш И́ове,/ тверде́е вся́каго адама́нта несокруши́маго/ оста́вил еси́ нам всечестно́е нетле́нное те́ло твое́;/ те́мже дне́сь соше́дшеся в пеще́ре твое́й,/ архиере́и с чи́ны свяще́нников, и и́ночествующих сосло́вие, и благове́рных наро́ди,/ и к ра́це многоцеле́бных моще́й твои́х припа́дающе, мо́лим тя,/ уго́дниче Бо́жий, не забу́ди нас,/ предстоя́ ду́хом Влады́це и его́ Пречи́стей Ма́тери на Небеси́,/ но всегда́ пребыва́й с на́ми,/ да, твое́ю по́мощию и заступле́нием при́сно огражда́емы,/ спаса́еми и избавля́емы от всех зол, ви́димых и неви́димых,/ вопие́м ти до сконча́ния ве́ка:/ ра́дуйся, дре́во, насажде́нное при исто́чнице/ цельбоно́сныя во́ды от стопы́ Бо́жия Ма́тере,/ да вси жа́ждущии от Тебе́ питие́ жи́зни почерпа́ют;/ ра́дуйся, пра́ведниче, по сло́ву псало́мскому,/ а́ки фи́никс, процветы́й на горе́ Поча́евстей,/ да а́лчущих пра́вды и вся́кия благосты́ни и́стиною и благонра́вием напита́еши;/ ра́дуйся, у́зы разруше́ния пе́рстнаго/ в нетле́нии твое́м благода́тию Бо́жиею расто́ргнувый,/ да от вся́ких губи́тельных неду́гов/ стра́ждущим врачевство́ и исцеле́ние пода́еши./ Ра́дуйся, И́ове, пресла́вный уго́дниче Бо́жий/ и оби́тели Поча́евския украше́ние.
Кано́н Богоро́дицы со ирмосо́м на 6 и преподо́бнаго на 8, глас 8.
Пе́снь 1
Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко Еди́н сла́вно просла́вися.
Посли́ ми от Го́спода, о́тче всеблаже́ннейший, оставле́ние мно́гих мои́х согреше́ний/ и сло́во ми да́руй, да по достоя́нию воспою́ похва́льная тебе́,/ в его́же па́мяти и прославле́нии Госпо́дь, я́ко Еди́н, сла́вно просла́вися.
Роди́лся еси́, уго́дниче Бо́жий, от роди́телей правове́рных и христолюби́вых,/ тве́рдо и неизме́нно благоче́стия и́стиннаго держа́щихся,/ в бы́вшей иногда́ Правосла́вней стране́ Га́личстей;/ но, я́ко предви́дя ду́хом иму́щую объя́ти ю́/ и обдержа́щую да́же до дне́шняго дне пре́лесть латиноуни́тскаго омраче́ния,/ зва́нию Остро́жскаго кня́зя Богому́дренно после́довавый,/ прише́л еси́ в преде́лы Волы́нския земли́,/ иде́же о Го́споде сла́вно прославля́ешися.
Богоро́дичен: О Тебе́ ра́дуется, Благода́тная, вся́кая тва́рь,/ гора́ же Поча́евская изря́днее торжеству́ет ны́не,/ соверша́ющи па́мять всеблаже́ннаго уго́дника Твоего́ И́ова,/ в не́мже со стопо́ю цельбоно́сною и чудотво́рною ико́ною Твое́ю,/ я́же во оби́тели Поча́евстей, от лет дре́вних, Пречи́стая, сла́вно просла́вилася еси́.
Пе́снь 3
Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.
Ты еси́ вои́стинну утвержде́ние всех притека́ющих к тебе́, о́тче всеблаже́ннейший,/ зерца́лом доброде́телей твои́х омраче́нныя ду́ши ко све́ту благоче́стия направля́я;/ кто у́бо не восхо́щет подража́ти тебе́,/ я́ко был еси́ зело́ братолюби́в, смире́н, кро́ток, ми́лостив и толи́ко молчали́в,/ я́ко тя́жце бы́ло и́но что слы́ша ти от Тебе́,/ то́кмо при ко́емждо де́ле и движе́нии, а́ки реку́, моли́тву сию́, из уст твои́х исходя́щую:/ Го́споди Иису́се Христе́, Сы́не Бо́жий, поми́луй мя./ Те́мже ве́село пое́т тя дух мой.
Оби́тель твоя́ Поча́евская/ мно́гими ле́ты окормля́ется плоды́ честны́х трудо́в твои́х, уго́дниче Бо́жий,/ я́ко безпреста́нно рукоде́лии многоразли́чными упражня́лся еси́,/ си́есть насажде́нием древе́с садо́вных,/ управле́нием и благоукраше́нием вертогра́дов, сы́панием гре́блей,/ я́же и до дне́сь и́стинствуют на горе́ Поча́евстей,/ и я́же созерца́я, в ра́довании се́рдца пое́т тя дух мой.
Богоро́дичен: И́же от ве́ка сый утвержде́ние притека́ющих и Свет омраче́нных,/ яви́ Тя нам на горе́ Поча́евстей прибе́жище,/ непосты́дную наде́жду, покро́в и огражде́ние от враг ви́димых и неви́димых.
Седа́лен, глас 3:
Возсия́л еси́, я́ко заря́,/ не от восто́ка, но от за́пада Росси́йскаго восходя́щая, уго́дниче Бо́жий,/ егда́ нужд ра́ди церко́вных от обдержа́щия у́нии/ был еси́ в богоспаса́емем гра́де Ки́еве на собо́ре святы́х оте́ц,/ иде́же, во святе́й Киевопече́рстей Ла́вре,/ ея́же преподо́бными отцы́, от зла́го наше́ствия Баты́ева спаса́вшимися,/ и оби́тель Поча́евская дре́вле основа́ся,/ кля́твенно обеща́лся еси́ ку́пно со ины́ми в ве́ре Правосла́вней, оте́честей, кре́пко и неизме́нно стоя́ти,/ николи́же и ника́коже о отступле́нии в инове́рие не мы́слити/ и к сему́ всеросси́йский наро́д увещева́ти, да слы́шиши от всех:/ ра́дуйся, я́сное зерца́ло апо́стольских преда́ний;/ ра́дуйся, живоприи́мный исто́чниче и́стинных Кафоли́ческих пра́вил;/ ра́дуйся, ерети́ческих басносло́вии прему́дрый истреби́телю;/ ра́дуйся, глубины́ Правосла́вных догма́тов иску́сный изме́рителю:/ ра́дуйся, Боже́ственный орга́не, возшуме́вший нам уче́ние спаси́тельное;/ ра́дуйся, И́ове, пресла́вный уго́дниче Бо́жий и оби́тели Поча́евския украше́ние.
Сла́ва, и ны́не, Богоро́дичен:
Просла́вим, ве́рнии, Цари́цу и Влады́чицу Поча́евскую,/ па́че же во усте́х и сердца́х на́ших и́мамы всегда́ свято́е и благослове́нное и́мя Ея́,/ непреста́нно притека́юще к цельбоно́сней стопе́ Ея́ и Пречи́стей ико́не,/ ку́пно же и к моще́м уго́дника ея́ на горе́ Поча́евстей,/ те́ми бо обрета́ем я́же на земли́ блага́я и поле́зная/ и су́щих на Небеси́ сокро́вищ сподобля́емся, вопию́ще Благода́тней:/ ра́дуйся, похвало́ Поча́евская,/ спаси́ ны, моля́щияся Тебе́,/ наде́ждо на́ша и утеше́ние.
Пе́снь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Е́же о тебе́ смотре́ние Свое́ Боже́ственное исполня́я,/ Госпо́дь благомо́щне возврати́, по моли́твам твои́м,/ во оби́тель твою́ пречестну́ю ико́ну Своея́ Ма́тере,/ от безбо́жнаго вельмо́жи, ку́пно со ины́ми монасты́рскими вещьми́, из Поча́ева похи́щенную,/ да разуме́ют вси де́йство си́лы Бо́га Жива́го в тебе́/ и просла́вят его́ Божество́.
Ра́дости несказа́нный испо́лнися богоблаже́нное се́рдце твое́, преподо́бне,/ егда́ ви́дел еси́ и́нока во оби́тели твое́й,/ и́же, от тата́рина обезгла́вленный, взят а́бие главу́ свою́ отсе́ченную/ и сию́ пред чудотво́рною ико́ною Пречи́стыя полжи́;/ и та́ко уразуме́в, Богому́дре, от Го́спода бы́ти де́ло сие́,/ просла́вил еси́ его́ Божество́.
Богоро́дичен: Е́же, ра́дуйся, от А́нгела с Небеси́ прие́мшая,/ обра́довала еси́ несказа́нно всеблаже́ннаго уго́дника Твоего́,/ егда́ све́том неизрече́нным озари́ла еси́ пеще́ру его́ от пречестны́я ико́ны Твоея́,/ явля́ющи е́же о нем благода́тное смотре́ния Своего́ та́инство,/ в прославле́ние Божества́ Сы́на Твоего́,/ такову́ю вла́сть, я́ко Ма́тери Свое́й, Тебе́ дарова́вшаго.
Пе́снь 5
Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ра́зве Тебе́ ино́го не ве́мы.
Имы́й дарова́ния многоразли́чныя от Го́спода, уго́дниче Бо́жий,/ сподо́бился еси́ благода́тию его́ прови́дети пре́жде седми́ дней кончи́ну твою́;/ и та́ко безболе́зненно отше́л еси́ ко преми́рным,/ воспева́я до кончи́ны свое́й о Бо́зе Спа́се твое́м:/ ра́зве Тебе́ ино́го не зна́ю.
Ада́мову ра́йскую жи́знь вои́стинну насле́довал еси́, преподо́бне,/ я́ко душа́ твоя́ не оста́вися во а́де, ниже́ пло́ть твоя́ ви́де истле́ния,/ но и из спу́да земна́го яви́л еси́ нам нетле́нныя мо́щи твоя́,/ да, благодаря́ще Бо́га, сицеву́ю ми́лость на тебе́ показа́вшаго,/ у́тренююще ны́не, вопие́м ему́ ве́село:/ ра́зве Тебе́ ино́го не ве́мы.
Богоро́дичен: Небе́сных не разлуча́ющися, и земны́х не оставля́еши, Влады́чице,/ я́ко низошла еси́ на го́ру Поча́евскую в столпе́ о́гненнем,/ иде́же и стопу́ Твою́ цельбоно́сную оста́вила еси́,/ е́йже вода́ми напая́емый, уго́дник Твой И́ов Поча́евский/ живо́т ве́чный и нетле́ние насле́дова, воспева́я о Тебе́:/ ра́зве Тебе́, Влады́чице, ины́я не зна́ю.
Пе́снь 6
Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.
Досифе́я, ученика́ и списа́теля твоего́ жития́,/ чуде́сно исцели́л еси́ от обдержа́щия его́ боле́зни, уго́дниче Бо́жий,/ со А́нгелы святы́ми во све́тлости необы́чней я́влься во хра́ме Поча́евстем/ и плат, ми́ром целе́бным напое́нный, тому́ посла́в,/ да отре́т им те́ло свое́ и а́бие гряде́т в це́рковь на всено́щное бде́ние/ прилучи́вшагося ра́ди све́тлаго пра́здника Всеми́рнаго Воздви́жения Креста́/ Многоми́лостиваго Христа́ Бо́га на́шего.
Многоцеле́бных моще́й, преблаже́нне, си́лою, по да́нней ти свы́ше благода́ти,/ отгоня́еши де́монов от всех с ве́рою к тебе́ притека́ющих,/ науча́я всех прославля́ти иму́щаго держа́ву сме́рти и а́да Го́спода,/ Многоми́лостиваго Христа́ Бо́га на́шего.
Богоро́дичен: Еди́ну в жена́х и́стинным све́том, я́ко ри́зою, оде́явшуюся,/ ви́деша Тебе́, Богома́ти, Поча́евстии лю́дие во вре́мя бра́ни Збара́жския,/ и омофо́ром белоблестя́щимся покрыва́ла еси́ тогда́ оби́тель Твою́,/ науча́ющи всех, ку́пно с предстоя́щим Ти уго́дником Твои́м, прославля́ти дарова́вшаго Тебе́ си́лу такову́ю/ Многоми́лостиваго Христа́ Бо́га на́шего.
Конда́к, глас 8:
Возсия́ от спу́да земна́го сокро́вище нетле́нное моще́й твои́х,/ уго́дниче Бо́жий,/ я́ко, благоче́стно пожи́в в ве́ре Христа́ Бо́га на́шего,/ дости́гл еси́ доброде́телей соверше́нства,/ и, оста́вль сла́дость жития́ преходя́щаго,/ в пеще́ре го́ры Поча́евския в поще́ниих, моли́твах и труде́х свя́то подвиза́лся еси́,/ и те́ми те́ло твое́ увяди́л еси́./ Ны́не же, преше́д к Бо́гу в безмяте́жный и ве́чный поко́й,/ мо́лишися о всех с ве́рою к тебе́ прибега́ющих./ Ра́дуйся, И́ове, пресла́вный уго́дниче Бо́жий/ и оби́тели Поча́евския украше́ние.
И́кос:
Пою́ще пресла́вное о тебе́ смотре́ние Бо́жие и чудеса́ твоя́, преподо́бне о́тче,/ мо́лим тя всеусе́рдно, раби́ твои́,/ не забу́ди и нас во вся дни живота́ на́шего,/ но всегда́ пребыва́й с на́ми,/ да, твои́м заступле́нием и по́мощию огражда́еми,/ спаса́еми и избавля́еми от всех зол, ви́димых и неви́димых, вопие́м ти:/ ра́дуйся, де́лателю до́брый,/ от у́тра до ве́чера столе́тния твое́й жи́зни де́лавый благоче́стно в вертогра́де духо́вней;/ ра́дуйся, тяготу́ и вар многотру́днаго жития́ твоего́ ра́ди Го́спода охо́тно понесы́й;/ ра́дуйся, я́ко к животу́ нетле́нному и приста́нищу Боже́ственному дости́гл еси́;/ ра́дуйся, благи́й ра́бе и ве́рный, вше́дый в ра́дость Го́спода твоего́;/ ра́дуйся, свети́льниче ве́ры, просвеща́яй ду́ши благогове́йно па́мять твою́ соверша́ющих;/ ра́дуйся, И́ове, пресла́вный уго́дниче Бо́жий/ и оби́тели Поча́евския украше́ние.
Пе́снь 7
Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ща, пою́ще:/ отце́в Бо́же, благослове́н еси́.
И́же от ве́ры оте́ческия в ри́мское соедине́ние доше́дшия инове́рныя латиноуни́ты иногда́/ ве́рою Тро́ическою Правосла́вною вразуми́л еси́, преподо́бне,/ егда́ попуще́нием Бо́жиим оби́тель Поча́евская бя́ше во вла́сти их,/ науча́я их судо́м тя́жким и ве́дении многоразли́чными и чудесы́,/ да и си́и, я́коже и мы, правосла́внии, чтут тя любе́зно,/ я́ко и́стиннаго слугу́ Го́спода, Еди́наго отце́в Бо́га благослове́ннаго.
Христо́с тя устро́и в ли́це святы́х Свои́х,/ Христо́с тя и в попра́ние инове́рным не даде́, о́тче богоно́сный,/ па́ки возврати́в оби́тель Поча́евскую во одержа́ние правосла́вным/ и с не́ю ку́пно святы́я мо́щи твои́,/ во е́же всем с ве́рою припа́дающим и моля́щимся пред ни́ми/ прославля́ти его́ Еди́наго, отце́в Бо́га благослове́ннаго.
Богоро́дичен: О́браз Твой честны́й и стопу́ Твою́ цельбоно́сную от инове́рных охраня́ющи,/ утверди́ла еси́ па́ки Правосла́вие на святе́й горе́ Твое́й, Влады́чице;/ те́мже во хра́ме преподо́бнаго уго́дника Твоего́, от нас, правосла́вных, устрое́нием,/ собра́вшеся дне́сь и от него́ плоды́ чуде́с наслажда́ющеся,/ пое́м Тя и Сы́на Твоего́,/ Еди́наго отце́в Бо́га благослове́ннаго.
Пе́снь 8
Ирмо́с: Царя́ Небе́снаго,/ Его́же пою́т во́и а́нгельстии,/ хвали́те и превозноси́те во вся ве́ки.
И́дем вси в пеще́ру уго́дника Бо́жия и ви́дим,/ ка́ко, возвра́щшейся горе́ Поча́евстей на ло́но Правосла́вия,/ па́ки архиере́йскима рука́ма честны́я мо́щи его́ поставля́ются для всео́бщаго поклоне́ния,/ и, со умиле́нием припа́дающе к ра́це его́,/ правосла́вно просла́вим Царя́ Небе́снаго,/ дарова́вшаго сицеву́ю че́сть избра́нному Своему́,/ хва́ляще и превознося́ще его́ во ве́ки.
Небе́снаго Царя́ зако́ны духо́вными воспита́ни,/ ца́рие Росси́йстии притека́ху к тебе́, всеблаже́нне,/ и, твоему́ нетле́нному те́лу покланя́ющеся и с любо́вию любыза́юще е́,/ прославля́ху Го́спода, просла́вльшаго тя,/ хва́ляще и превознося́ще его́ во ве́ки.
Богоро́дичен: Арха́нгельский глас вопие́м Ти, Чи́стая: ра́дуйся!/ Ра́дуйся, избра́вшая го́ру Поча́евскую во одержа́ние Себе́,/ да вси притека́ющии к Тебе́ и Твое́й цельбоно́сней стопе́ и чудотво́рней ико́не припа́дающии/ просла́вят Царя́ Небе́снаго, Единоро́днаго Сы́на Твоего́ и Бо́га на́шего,/ пою́ще и превознося́ще Его́ во ве́ки.
Пе́снь 9
Ирмо́с: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.
Це́ркве Русския Правосла́вный и́стинный сын,/ возведи́, Богоблаже́нне, о́крест о́чи твой и ви́ждь:/ се бо приидо́хом к тебе́, ча́да твоя́, от восто́ка, се́вера и ю́га,/ и от за́пада сро́дницы твои́ душе́ю и всем помышле́нием свои́м устремля́ются к тебе́,/ на святу́ю го́ру твою́ Поча́евскую,/ от у́нии к праоте́честей ве́ре возврати́тися жела́юще,/ и́хже в еди́ное вои́стинну свято́е соедине́ние с на́ми призови́,/ да, спаса́емии на ло́не Це́ркве Правосла́вныя/ о Го́споде, еди́неми усты́ и еди́нем се́рдцем испове́дуем Его́ вси,/ с Безпло́тными ли́ки велича́юще.
Кре́пость душе́вную пода́ждь ми, уго́дниче Бо́жий, обнаже́нному до́брых дел,/ в ми́ре же и благоче́стии житие́ мое́ устро́й/ и всем при́сным и зна́емым мои́м/ и всем правосла́вным христиа́ном спасе́ние да́руй моли́твами твои́ми,/ да и мы с тобо́ю предста́нем лицу́ Бо́жию по кончи́не свое́й,/ с Безпло́тными ли́ки велича́юще Го́спода во ве́ки.
Богоро́дичен: И да́ждь кре́пость нам, Богоро́дице,/ иму́щи о нас хода́тая всеблаже́ннаго уго́дника Твоего́ И́ова,/ притека́ющим на святу́ю го́ру Твою́/ и от го́ры Твое́й Тя призыва́ющим, от вся́ких бед и напа́стей свободи́ моли́твами преподо́бнаго,/ да Тя ублажа́ем, я́ко вои́стинну Богоро́дицу,/ с Безпло́тными ли́ки Тя велича́юще.
Свети́лен, глас 8:
Избра́нный от Го́спода, благи́й ра́бе и ве́рный,/ уго́дниче Христо́в, преподо́бне о́тче наш И́ове,/ твои́м заступле́нием и предста́тельством огражда́емы,/ похва́льная воспису́ем ти, пове́дающе благи́я по́двиги и чудеса́ твои́,/ и благода́рственная возсыла́ем моле́ния просла́вльшему тя Го́споду и Царю́ сла́вы./ Ты же, я́ко име́яй дерзнове́ние ко Го́споду и Пречи́стей его́ Ма́тери, Присноде́ве Богоро́дице,/ от вся́ких нас бед свободи́, зову́щих ти:/ ра́дуйся, И́ове, пресла́вный уго́дниче Бо́жий/ и оби́тели Поча́евския украше́ние.
Сла́ва, и ны́не, Богоро́дичен:
Взбра́нней Воево́де, избра́вшей го́ру Поча́евскую в ме́сто селе́ния Своего́,/ похва́льная воспису́ем Ти, раби́ Твои́, Богоро́дице,/ я́ко от лет дре́вних просла́вила еси́ ме́сто сие́ явле́нием цельбоно́сныя стопы́ Твоея́/ и Твоего́ Боже́ственнаго о́браза чудоде́йствием./ Те́мже, я́ко изба́вльшая иногда́ оби́тель Твою́ от наше́ствия ага́рянскаго,/ от вся́ких нас бед и напа́стей свобожда́й,/ да всегда́, Твое́ю по́мощию избавля́еми, благодари́в вопие́м Ти:/ ра́дуйся, похвало́ Поча́евская, наде́ждо на́ша и утеше́ние.
На хвали́тех стихи́ры на 6, глас 8.
Подо́бен: Что вас нарече́м, святи́и:
Что тя нарече́м, преподо́бне о́тче наш И́ове?/ А́нгела ли земна́го, во пло́ти су́ща,/ я́ко, равноа́нгельно пожи́в,/ чино́м а́нгельским на Небеси́ приобщи́лся еси́,/ с ни́миже и ви́ден был еси́ над оби́телию Поча́евскою/ во вре́мя бра́ни Збара́жския,/ предстоя́ Цари́це Небе́сней?/ Те́мже пра́зднующе па́мять твою́, ве́село вопие́м ти:/ ра́дуйся, И́ове, пресла́вный уго́дниче Бо́жий/ и оби́тели Поча́евския украше́ние.
Что тя нарече́м, сла́вне?/ Челове́ка ли Небе́снаго житие́м,/ я́ко, одухотвори́в пло́ть твою́/ небоше́ственных доброде́телей дея́нии,/ нетле́ния пренебе́снаго свы́ше сподо́бился еси́?/ Те́мже к ра́це честны́х моще́й твои́х припа́дающе,/ ра́достно зове́м:/ ра́дуйся, И́ове, пресла́вный уго́дниче Бо́жий/ и оби́тели Поча́евския украше́ние.
Что тя провещава́ем, всеблаже́нне?/ Проро́ка ли,/ я́ко прови́дел еси́ Блаже́нную кончи́ну твою́,/ реку́ ли во́ды живо́тныя,/ струи́ многоразли́чных дарова́ний Бо́жиих излива́ющую ве́рным,/ и врача́ всем в боле́знех су́щим и́стинна?/ Те́мже, я́ко ско́рому помо́щнику/ и моли́твеннику о душа́х на́ших,/ к тебе́ прибега́юще, усе́рдно велича́ем тя, зову́ще:/ ра́дуйся, И́ове, пресла́вный уго́дниче Бо́жий/ и оби́тели Поча́евския украше́ние.
И́ны стихи́ры преподо́бнаго, глас 4.
Подо́бен: Зва́нный свы́ше:
Дне́сь в па́мяти твое́й,/ я́ко зва́нный свы́ше уго́дниче Бо́жий,/ Ла́вра Поча́евская весели́тся,/ и́ночествующих же собра́ние честно́е,/ ко гро́бу твоему́ прите́кше,/ во псалме́х и пе́ниих ликовству́ет,/ похваля́юще живу́щаго в Го́рнем гра́де/ и хвали́маго во святы́х Свои́х Бо́га,/ с Ни́мже ны́не живе́ши,/ прие́мля по́честь Го́рняго зва́ния,/ И́ове всеблаже́нне.
На горе́ святе́й,/ иде́же Бо́жия Ма́ти положи́ селе́ние Свое́,/ процве́л еси́, я́ко крин се́льный,/ я́ко кедр, и́же в Лива́не, возвы́сился/ и, я́ко лоза́ благоро́згная, умно́жился еси́, зва́нный свы́ше;/ се́нию у́бо твое́ю осени́ притека́ющих к тебе́,/ заступи́ и сохрани́ от ко́зней враго́в на́ших, борю́щих на ны,/ и вся́каго кова́рства и злоухищре́ния их,/ поста́ви бо тя не всу́е Госпо́дь стра́жа Росси́йстей земли́,/ на кра́йних преде́лех оте́чествия на́шего, во оби́тели твое́й;/ тем, припа́дающе, мо́лимтися:/ держа́ву Росси́йскую в Правосла́вии и ми́ре соблюди́/ и оби́тель твою́, ку́пно со все́ми в ню притека́ющими, до́бре сохрани́/ моли́твами твои́ми, И́ове всеблаже́нне.
Русския вели́кия держа́вы сы́нове,/ ку́пно с живу́щими на Волы́нии/ и в преде́лех Привисля́нских, Лито́вских и Га́лицких,/ напоя́еми струя́ми душеполе́зных веща́ний от хвалы́ преподо́бнаго,/ возвесели́мся духо́вне, скончава́юще пе́снь,/ и к нему́, я́ко вои́стинну свы́ше зва́нному хода́таю/ и засту́пнику на́шему, та́ко рцем:/ ра́дуйся, Преве́чнаго Архиере́я Христа́ ве́рный служи́телю,/ и по сме́ртнем успе́нии точа́й це́ль бы притека́ющим с ве́рою/ и су́щия в ско́рбех лю́ди заступа́яй;/ ра́дуйся, Царя́ Небе́снаго и Влады́ки непобеди́мый ратобо́рче,/ благочести́вейших люде́й на́ших похвало́, кре́посте и утвержде́ние,/ спобо́рниче же и предра́тниче на сопроти́вныя;/ ра́дуйся, моли́твенниче и сопредстои́телю Пресвяты́я Богоро́дицы непреста́нный,/ ку́пно с ико́ною Ея́ честно́ю и стопо́ю цельбоно́сною/ от всех на го́ру Поча́евскую притека́ющих почита́емый;/ ра́дуйся, А́нгелов Бо́жиих и святы́х на Небеси́ купножи́телю преизря́дный;/ ра́дуйся, сто́лпе ве́ры,/ Про́мыслом Бо́жиим на кра́йнем за́паде Русския земли́ водруже́нный,/ да всем от ве́ры и праоте́ческаго благоче́стия отпа́дшим/ сыново́м за́пада инозе́мнаго/ пу́ть до́брый к и́стинному правове́рию показу́еши;/ ра́дуйся, И́ове, пресла́вный уго́дниче Бо́жий/ и оби́тели Поча́евския украше́ние.
Сла́ва, И ны́не, глас 6:
Не умолчи́м никогда́, Богоро́дице,/ си́лы Твой глаго́лати, недосто́йнии,/ но, вели́чеством чуде́с Твои́х,/ и́же на горе́ Поча́евстей, побежда́еми,/ со умиле́нием вопие́м Ти благоче́стно:/ ра́дуйся, моли́твами Твои́ми род челове́ческий спаса́ющая;/ ра́дуйся, всю вселе́нную благода́тию от ико́ны Твое́й заступа́ющая;/ ра́дуйся, всем во вся́кой потре́бе и ну́жде/ водо́ю от стопы́ Твое́й поле́зная подава́ющая;/ ра́дуйся, житие́ на́ше моли́твами уго́дника Твоего́ И́ова Поча́евскаго/ во всех ну́ждах и обстоя́ниих на́ших до́бре устроя́ющая;/ ра́дуйся, похвало́ Поча́евская,/ спаси́ ны, моля́щияся Тебе́, наде́ждо на́ша и утеше́ние.
Славосло́вие вели́кое. Ектении́. И отпу́ст.
НА ЛИТУРГИ́И
Блаже́нны от кано́на пе́сни 3-я и 6-я.
Проки́мен, глас 4: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится. Стих: Я́ко не оста́виши души́ моея́ во а́де, ни́же да́си преподо́бному Твоему́ ви́дети истле́ния.
Апо́стол: Собо́рнаго Посла́ния Иа́ковля, зача́ло 57. Аллилу́ия, глас 6: Ди́вен Бог во святы́х Свои́х, Бог Изра́илев. Стих: Честна́ пред Го́сподем сме́рть преподо́бных его́.
Ева́нгелие от Матфе́я, зача́ло 10. Прича́стен: Ра́дуйтеся, пра́веднии, о Го́споде:
Моли́тва
О всесвяты́й и пресла́вный уго́дниче Бо́жий, преподо́бне о́тче наш И́ове, при́сный о нас ко Го́споду моли́твенниче и те́плый предста́телю о душа́х на́ших, к тебе́ всеумиле́нно ны́не притека́ем и, помина́юще по́двиги и чудеса́ твоя́, я́же сотвори́л еси́ и твори́ши на земли́, про́сим и мо́лим твою́ благосты́ню: я́коже тве́рдо и неизме́нно потруди́лся еси́ в ве́ре Христа́ Бо́га на́шего, и, сию́ до конца́ в себе́ и во всех при́сных твои́х це́лу и невреди́му сохрани́вый от вся́ких прираже́ний вра́жиих и ересе́й тлетво́рных, си́це и нас в Правосла́вии и единомы́слии укрепи́, отгоня́я моли́твами твои́ми вся́кую тьму́ неве́рия и неправомы́слия от серде́ц и помышле́ний на́ших; послужи́вый Го́споду и Бо́гу твоему́ де́лы благи́ми и неизрече́нным самоотверже́нием в труде́х, бде́ниих и поще́ниих, наста́ви нас на пу́ть вся́кия доброде́тели и благосты́ни, избавля́я от искуше́ний и грехо́в, удаля́ющих нас от Бо́га и поверга́ющих в бе́здну зла все житие́ на́ше; яви́выйся иногда́ с Пречи́стою Де́вою Богоро́дицею верху́ го́ры Поча́евския во спасе́ние оби́тели твое́й от наше́ствия и обложе́ния ага́рянскаго, и ны́не ускори́ на по́мощь стране́ на́шей проти́ву всех враго́в на́ших, вне́шних и вну́тренних, утвержда́я мир и тишину́ в земли́ на́шей, да твои́ми моли́твами и предста́тельством ти́хое и безмо́лвное житие́ поживе́м во вся́ком благоче́стии и чистоте́; и всем к тебе́ притека́ющим и припа́дающим к ра́це честны́х и многоцеле́бных моще́й твои́х и твое́й по́мощи и заступле́ния тре́бующим неоску́дныя ми́лости незави́стно подава́яй, не оста́ви и нас, си́рых и безпо́мощных, тебе́ моля́щихся, избавля́я от вся́кия ско́рби, гне́ва и ну́жды, от гла́да, губи́тельства, тру́са, пото́па, огня́, меча́, наше́ствия иноплеме́нник и междоусо́бныя бра́ни. Ей, уго́дниче Бо́жий, при́зри ми́лостивно от Престо́ла Царя́ сла́вы, Ему́же ты ны́не предстои́ши со Арха́нгелы и А́нгелы и со все́ми святы́ми, на оби́тель твою́ Поча́евскую, е́юже ты дре́вле му́дро пра́вил еси́, назда́в ю́ всехва́льным и ди́вным житие́м твои́м, и сохрани́ ю́ моли́твами твои́ми, и вся́кий град, и страну́, и всех отовсю́ду, на мо́ри и на су́ши, в пусты́нях и в заключе́ниих многоразли́чных тебе́ призыва́ющих, от всех зол, ви́димых и неви́димых, да, та́ко твое́ю по́мощию и хода́тайством спаса́еми, в ве́це сем и по сконча́нии живота́ на́шего сподо́бимся ку́пно с тобо́ю сла́вити и воспева́ти всечестно́е И́мя Отца́ и Сы́на и Свята́го Ду́ха во ве́ки веко́в. Ами́нь.
И́на моли́тва, что́мая в Поча́евстей Ла́вре пред моща́ми преподо́бнаго
О всеблаже́нне и Богоно́сне о́тче наш И́ове, и́ноческаго ангелоподо́бнаго жития́ Богому́дрый наста́вниче, ве́ры Правосла́вныя Восточнокафоли́ческия проти́в лжемудрова́ний За́пада непреобори́мый защи́тниче и побо́рниче, богопре́данных уста́вов Це́ркве и преда́ний оте́ческих ве́рный блюсти́телю и стро́гий взыска́телю, свя́тости и чистоты́, целому́дрия и нестяжа́ния, трудолю́бия и богомы́слия, поста́ и бде́ния вели́кий ревни́телю, долготерпе́ния и злострада́ния неутоми́мый и непобеди́мый ратобо́рче, о́бразе кро́тости, зерца́ло смире́ния, приме́ре незло́бия, по́стников удобре́ние, де́вственников похвало́, мона́хов и схимона́хов ра́досте! По и́мени твоему́, преподо́бне о́тче, я́коже и дре́вняго о́наго И́ова, многострада́льна и пра́ведна, и житие́ твое́ бы́сть пра́ведно и непоро́чно от младе́нческих пеле́н, все́ми де́лы благи́ми, я́ко многоце́нным би́сером, благоукраше́нно и благоду́шным терпе́нием чрез мно́га ле́та скорбе́й и боле́зней, па́че зла́та и сребра́, в горни́ле искуше́нных, просия́вше. Еще́ бо сый двана́десяти то́чию лет, восприя́л еси́ на ся и́го Христо́во с вели́ким о́бразом мона́шеским, и да́же до ста́рости и престаре́ния вя́щше девяти́десяти лет благоду́шно и неосла́бно, непоползнове́нно и небла́зненно поне́сл еси́, проше́д всяк пу́ть пра́вды и святы́ни в посте́ и моли́тве, в коленопреклоне́ниих и бде́ниих, и та́ко на высоту́ доброде́телей изря́дну, вспомоществу́емь благода́тию Бо́жиею, по степе́нем возше́л еси́, я́ко всем диви́тися и ублажа́ти тя за премно́гую доброде́тель и любому́дрие твое́, не то́чию в преде́лех оте́чествия твоего́, но и в страна́х, о́крест су́щих; о чесо́м слы́шав боголюби́вый кня́зь Остро́жский и вельми́ возжела́в име́ти тя руководи́теля себе́ на пути́ спасе́ния и Крестовоздви́женстей оби́тели свое́й, я́же на о́строве Ду́бенстем, предстоя́теля и наста́вника, моле́нием любве́ своея́ привлече́ тя, отону́дуже и святе́й оби́тели Поча́евстей, я́ко сокро́вище ве́лие и неоцене́нное, дарова́лся еси́. Те́мже и Пра́ведный Судия́ и Мздовозда́тель Бог, И́же ве́сть су́щия Своя́ пре́жде да́же не бы́ти им, обеща́вый ве́рным рабо́м Свои́м за труды́ и по́двиги их во сла́ву его́ И́мени возда́ти стори́цею, свы́ше призре́ на смире́ние твое́, и вознесе́ тя, и просла́ви тя на земли́ живы́х, дарова́в духоно́сному телеси́ твоему́ дар нетле́ния и благода́ть врачева́ния неду́гов душе́вных и теле́сных для всех с ве́рою и любо́вию ко всечестне́й ра́це твое́й притека́ющих, а моли́тве твое́й си́лу и кре́пость непобеди́мую, враго́в ви́димых и неви́димых устра́шающую и поража́ющую. Егда́ бо иноплеме́нницы о́ны исмасли́тстии, и́хже Госпо́дь Бог еще́ в пра́отце их от ро́да и дому́ Авраа́мля отри́ну, врази́ Креста́ Христо́ва, облего́ша го́ру и оби́тель Поча́евскую, хотя́ще ю́ до конца́ разори́ти, тогда́ ты, о́тче прехва́льне, был еси́ хода́тай святы́ми твои́ми моли́твами ко Всемогу́щему и Всеблаго́му Бо́гу и к Преблагослове́нней Де́ве Мари́и Богоро́дице, и бла́гостию, тебе́ от Бо́га да́нною, и предста́тельством Пресвяты́я Богоро́дицы отгна́л еси́ все безу́мие супоста́тов тех, и, всю я́рость их разруши́в и кре́пость победи́в, сотвори́л еси́ их бежа́ти со стра́хом и тре́петом. При́зри у́бо и ны́не о́ком благоутро́бия твоего́, приле́жно мо́лим тя, обстоя́ще святы́я и многоцеле́бныя мо́щи твоя́ и усе́рдно лобыза́юще я́, при́зри на нас, недосто́йных чад и рабо́в твои́х, вступи́вших в стези́ твоя́, но не могу́щих пра́во по ним ше́ствовати, и на ме́сто сие́, от лет дре́вних богоизбра́нное и чудесы́ просла́вленное, в не́мже и́мя твое́ призыва́ется и его́же ты по́ты трудо́в твои́х богоуго́дных ороси́л и возде́лал еси́, и огради́ его́ и нас моли́твами твои́ми от вся́каго наве́та вра́жия и зла́го обстоя́ния, сохраня́я и соблюда́я всех и ка́ждаго в ми́ре и тишине́, в ве́ре нелицеме́рней и богоуго́днем жи́тельстве. Пода́ждь же, уго́дниче Бо́жий, и всем приходя́щим се́мо и твое́й по́мощи и заступле́ния и́щущим бла́гость и ми́лость от Христа́ Бо́га на́шего и Пречи́стыя его́ Ма́тере, да никто́же изы́дет отсю́ду в туге́ и ско́рби, в печа́ли и се́товании, постыжде́н и посра́млен в наде́янии свое́м, но ки́йждо, по ме́ре ве́ры и любве́ свое́й, да восприи́мет себе́ поне́ не́кую отра́ду и утеше́ние, облегче́ние и подкрепле́ние, защи́ту и по́мощь, во сла́ву Бо́га Трисвята́го, Ему́же подоба́ет вся́кая Сла́ва, че́сть и поклоне́ние, Отцу́ и Сы́ну и Свято́му Ду́ху, ны́не, и при́сно, и во ве́ки веко́в. Ами́нь.