На Го́споди, воззва́х: стихи́ры на 6, глас 4:

Подо́бен: Я́ко до́бля:

Богосло́вов кра́йний быв прее́мник,/ о́ных стопа́м после́довал еси́,/ от восто́ка устреми́вся,/ и на за́паде явля́яся,/ и просвеща́я мо́лниями Боже́ственнаго пропове́дания:/ иде́же, всему́дре, от ми́ра у́бо заше́д,/ к Бо́гу же возсия́л еси́,/ сия́нием венча́емь благода́ти.

Свяще́нне отда́шася твоя́ гра́ду твоему́ мо́щи,/ Богоно́се всему́дре,/ страда́ния ра́ди освяще́ны светле́е/ и благода́тию сия́ющия,/ возвраще́нием нам торжества́ хода́тая соде́лавша,/ весе́лия наполня́юще Богодохнове́ннаго/ и обоня́нием насыща́юще/ благоче́стно тя почита́ющия.

От восто́ка у́бо пе́рвее денни́ца, Игна́тие,/ на за́падех просия́л еси́ светле́йше,/ ны́не же Боже́ственных моще́й твои́х возвраще́нием/ зари́ на земли́ от ве́чера просте́рл еси́/ и мо́ли́шися Христу́ от тли и бед изба́вити/ ве́рою соверша́ющих всечестну́ю па́мять твою́.

Сла́ва, глас 8. Анато́лиево:

Богоно́се Игна́тие,/ твоего́ жела́емаго Христа́ вперси́в,/ мзду восприя́л еси́ священноде́йства Ева́нгелия Христо́ва,/ е́же сконча́тися кро́вию./ Тем, пшени́ца быв безсме́ртнаго Де́лателя,/ зубы́ звере́й сомле́лся еси́/ и хлеб сла́док Тому́ показа́лся еси́./ Моли́ о нас, страда́льче блаже́нне.

И ны́не, Богоро́дичен или́ Крестобогоро́дичен.

Подо́бен: О, пресла́внаго чудесе́!

Что́ зри́мое виде́ние,/ е́же Мои́ми очесы́ ви́дится, о Влады́ко!/ Содержа́й всю тварь на Дре́во воздви́жен быв,/ и умира́еши, всем Дая́й жизнь, -/ Богоро́дица, пла́чущи, глаго́лаше,/ егда́ узре́ на Кресте́ возноси́ма/ из Не́я неизрече́нно возсия́вшаго Бо́га и Челове́ка.

На стихо́вне Окто́иха.

Сла́ва, глас 1. Студи́тово:

О, тве́рдыя и адама́нтския твоея́ души́,/ достоблаже́нне Игна́тие!/ Ты бо, к су́щему твоему́ Рачи́телю/ неосла́бно име́я жела́ние, глаго́лал еси́:/ несть во мне огнь любовеще́ствен,/ вода́ же па́че жива́я и глаго́лющая во мне,/ внутрь ми глаго́лющи:/ гряди́ ко Отцу́./ Те́мже, Боже́ственным Ду́хом распаля́емь,/ зве́ри изво́лил еси́ ми́ра тя скоре́е разлучи́ти/ и к жела́емому препосла́ти Христу́,/ Его́же моли́ спасти́ ду́ши на́ша.

И ны́не, Богоро́дичен и́ли Крестобогоро́дичен.

Подо́бен: Всехва́льнии му́ченицы:

У Креста́ предстоя́щи Сы́на и Бо́га Твоего́/ и долготерпе́ние Того́ смотря́ющи,/ глаго́лала еси́, пла́чущи, Ма́ти Чи́стая:/ увы́ Мне, Ча́до сладча́йшее,/ что́ сия́ стра́ждеши непра́ведно, Сло́ве Бо́жий,/ да спасе́ши челове́чество?

Тропа́рь, глас 4:

И нра́вом прича́стник,/ и престо́лом наме́стник апо́столом быв,/ дея́ние обре́л еси́, Богодохнове́нне,/ в виде́ния восхо́д,/ сего́ ра́ди сло́во и́стины исправля́я,/ и ве́ры ра́ди пострада́л еси́ да́же до кро́ве,/ священному́чениче Игна́тие./ Моли́ Христа́ Бо́га/ спасти́ся душа́м на́шим.

На у́трени

О́ба кано́на Окто́иха и свята́го на 6, его́же краегране́сие: Игна́тия восто́чную в пе́снех звезду́ пою́. Феофа́ново. Глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Напра́вив к доброде́тели житие́ мое́,/ све́том озари́ всели́вшияся благода́ти в тебе́, Богоно́се Игна́тие,/ и страсте́й смуще́ние твои́ми моли́твами разори́.

Я́коже земля́ ро́днейшая, был еси́,/ стори́чествующи плодонося́й се́мя Христу́, Богоно́се Игна́тие,/ ду́ши напоя́ющему одожде́нием Ду́ха.

Разуме́в прозна́тельною си́лою твоея́ благоро́дие души́, всех Влады́ка и Бог,/ Богоно́се Игна́тие,/ сия́ньми благода́ти Богосве́тлыми просвети́.

Луча́ми у́мнаго осия́емь со́лнца, всему́дре,/ от восто́ка устреми́лся еси́ све́тло, я́коже чу́вственное со́лнце,/ мрак за́падный озаря́я пропове́данием.

Богоро́дичен: Тро́ицы Пребоже́ственныя, Всечи́стая, Еди́наго родила́ еси́,/ из Тебе́ пло́тию я́вльшагося по нам/ благоволе́нием Роди́теля и соде́йством Ду́ха Всесвята́го,/ Богоневе́сто.

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Исцели́ ум мой, озло́бленный лю́тыми страстьми́ плотски́ми, Игна́тие,/ му́чениче Христо́в всеприснопа́мятне.

Единому́дренна тя Христо́с апо́столов до́бре ве́дый,/ поста́ви, Боже́ственным све́том сия́юща всем Це́рквам учи́теля.

Умерщвля́ема тебе́ ра́ди Жизнода́вца зря,/ поте́кл еси́ Того́ ра́ди смерть любо́вию претерпе́ти, Игна́тие.

Богоро́дичен: Сло́во О́тчее, предочи́стившися, о Чи́стая, Ду́хом,/ слове́снаго естества́ на благодея́ние родила́ еси́.

Седа́лен, глас 3

Подо́бен: Боже́ственныя ве́ры:

Боже́ственным Ду́хом просвеще́н,/ свере́пство мучи́телей дерзнове́нием па́стырским велему́дренно посрами́л еси́/ и, преве́зся пре́лести пучи́ну,/ ко приста́нищу Боже́ственному дости́гл еси́,/ о́тче преподо́бне, Христа́ Бо́га моли́ дарова́ти нам ве́лию ми́лость.

Сла́ва, и ны́не, Богоро́дичен:

Боже́ственнаго естества́ не отлу́чся, плоть быв во чре́ве Твое́м,/ но Бог, вочелове́чся, пребы́сть,/ и́же по Рождестве́ Ма́терь Тя Де́ву,/ я́ко пре́жде Рождества́, сохрани́в Всенепоро́чну, Еди́н Госпо́дь./ Того́ приле́жно моли́ дарова́ти нам ве́лию ми́лость.

Крестобогоро́дичен:

Нескве́рная А́гница Сло́ва,/ нетле́нная Де́во Ма́ти,/ на Кресте́ зря́щи пове́шена/ и́же из Ней безболе́зненно прозя́бшего,/ матероле́пно рыда́ющи, вопия́ше:/ увы́ Мне, Ча́до Мое́,/ ка́ко стра́ждеши во́лею,/ хотя́ изба́вити от страсте́й безче́стия челове́ка?

Песнь 4

Ирмо́с: Вознесе́на Тя ви́девши Це́рковь на Кресте́,/ Со́лнце пра́ведное/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди,

Богоно́сец нарица́емь тезоиме́нно, во Христа́ бо оде́яся житие́м,/ вся помазу́еши све́тло, му́чеников утвержде́ние,/ жела́нием венцы́ восприя́ти.

Вжиля́емь, Игна́тие, си́лою на Кресте́ пригво́ждшагося тебе́ ра́ди, Богоно́се,/ зве́ри бо изво́лил еси́ ми́ра отлучи́ти тя к твоему́ жела́емому Рачи́телю.

Возжела́в красоты́ Влады́чни и к Нему́ раче́ние неосла́бно име́я,/ Сего́ страда́нием усе́рдно поревнова́л еси́,/ му́чениче Богоноси́е Игна́тие.

Укра́шен багряни́цею твои́х крове́й, святи́телю,/ и ма́стию свяще́нства, таи́нниче, сия́еши, Христу́ зовы́й, ра́дуяся:/ сла́ва си́ле Твое́й, Го́споди.

Богоро́дичен: Из не су́щих вся́ческая Боже́ственною си́лою содева́я,/ роди́ся из Тебе́, Богома́ти,/ мир просвеща́я све́тлыми луча́ми Божества́ и Богоразу́мия све́тлостию.

Песнь 5

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́й из мра́чна неве́дения/ ве́рою воспева́ющий Тя.

Ны́не ты, лице́м к лицу́ Христа́ зря, Игна́тие,/ зерца́лом вои́стинну разре́шшимся, соедини́лся еси́ твоему́ Рачи́телю.

Привле́кл еси́ просвеще́ние от исто́чника светода́тельнаго, Игна́тие:/ пречи́стыми бо тя Христо́с дла́ньми держа́в, освяти́.

Ум Ду́хом Бо́жиим стяжа́в просвеще́н, Игна́тие,/ Богопи́санныя посыла́еши, я́ко скрижа́ли, зако́ны благода́ти.

Богоро́дичен: Свы́ше Тебе́ глас ра́достно возопи́ А́нгел, Богоро́дице,/ Влады́ки неизрече́нно возвеща́я Тебе́ зача́тие.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х исте́кшею кро́вию.

Му́дрости е́ллинския разори́л еси́ догма́ты,/ Ипоста́сную име́я Бо́жию му́дрость, священнотаи́нниче,/ и с шу́мом пре́лести па́мять погуби́л еси́.

Не преста́й о соверша́ющих па́мять твою́ моля́ся, всеблаже́нне,/ напа́стей изба́витися люте́йших и бед,/ свяще́нник яви́вся Богоприя́тен.

Му́жеством и му́дростию преизя́ществовав, преподо́бне,/ пра́вды же добро́тою, Богоно́се му́чениче, и целому́дрия,/ и окруже́нием доброде́телей яви́лся еси́ украша́емь.

Богоро́дичен: Тя еди́ну посреде́ те́рния обре́т,/ я́ко пречи́стый крин и удо́льный цвет, о Богома́ти,/ Жени́х из утро́бы Твое́й, Сло́во, происхо́дит.

Конда́к, глас 4.

Подо́бен: Яви́лся еси́ днесь:

От восто́ка днесь возсия́вый/ и тварь всю просвети́вый уче́ньми,/ му́ченичеством украси́ся Богоно́сный и Боже́ственный Игна́тий.

И́кос:

Иереми́ю Бог из утро́бы освяти́в,/ и пре́жде, е́же роди́тися, ве́дый, я́ко Прове́дец,/ прия́телище бы́ти того́ Ду́ха Свята́го,/ наполня́ет сего́ а́бие от ю́ностна жития́ и проро́ка же сего́ и пропове́дника/ всем предвозвеща́ти посыла́ет свято́е на зе́млю Свое́ прише́ствие:/ ро́ждся у́бо и Сам Бог от Де́вы, к про́поведи прише́д,/ обре́те от младе́нства досто́йна Своея́ благода́ти ученика́,/ Богоно́снаго и Боже́ственнаго Игна́тия.

Песнь 7

Ирмо́с: В пе́щи Авраа́мстии о́троцы перси́дстей,/ любо́вию благоче́стия па́че, не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Свяще́нства укра́шен ми́ром, преподо́бне, Боже́ственным/ и му́ченическою кро́вию удобре́н,/ во обои́х просия́л еси́,/ благослове́н еси́ в хра́ме, зовы́й, сла́вы Твоея́, Го́споди.

Законоположе́нием просвети́в мир весь,/ хле́бом Небе́сным напита́л еси́ ве́рныя,/ Влады́це твоему́ зову́щия:/ благослове́н еси́ в хра́ме сла́вы Твоея́, Го́споди.

Светолу́чными заря́ми, всеблаже́нне, просвеща́емь,/ заре́ю светонача́льнаго ли́тия осия́вся,/ Небе́сное прия́л еси́, ра́дуяся, наслажде́ние, Богоно́се,/ му́чеников похвало́.

Пшени́ца сый Бо́жия, я́коже рекл еси́, всеприснопа́мятне,/ челюстьми́ сомле́н был еси́, му́чениче, звере́й/ и Пита́ющему вся́ческая Боже́ственною бла́гостию/ чисте́йший хлеб был еси́.

Богоро́дичен: Вы́шняго освяще́нное Боже́ственное селе́ние, ра́дуйся,/ Тобо́ю бо даде́ся ра́дость, Богоро́дице, зову́щим:/ благослове́на Ты в жена́х еси́, Всенепоро́чная Влады́чица.

Песнь 8

Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.

Стоя́ на суди́щи, му́дре,/ Тро́ицу несозда́нную богосло́вил еси́ ума́ чистото́ю, свя́те,/ мы́сленною же све́тлостию не устраши́вся мучи́тельских престо́лов суровства́,/ но вопия́л еси́:/ благослови́те, вся дела́ Госпо́дня, Го́спода.

Упра́вив разу́мне твои́ ум Боже́ственными догма́ты, блаже́нне Игна́тие,/ злоде́мона томи́теля, пре́лести предста́теля,/ му́дрости то́ки весьма́ потопи́л еси́, вопия́:/ благослови́те, вся дела́ Госпо́дня, Го́спода.

Безме́рным сия́я све́том Божества́, му́чениче непобеди́ме,/ безбо́жия непостоя́нную прогна́л еси́ тьму,/ посла́ния светови́дная посыла́я пою́щим:/ благослови́те, вся дела́ Госпо́дня, Го́спода.

Неи́стовства и зия́ния звере́й не устраши́лся еси́, Боже́ственный Игна́тие,/ Высоча́йшаго бо си́ла, из Де́вы возсия́вши,/ всеору́жием Креста́ тя обложи́, пою́ща:/ благослови́те, вся дела́ Госпо́дня, Го́спода.

Богоро́дичен: Ты Еди́на во всех ро́дех, Де́ва Пречи́стая,/ Ма́ти яви́лася еси́ Бо́жия,/ Ты Божества́ была́ еси́ жили́ще, Всенепоро́чная,/ не опали́вшися огне́м Непристу́пнаго Све́та./ Те́мже вси Тя благослови́м,/ Мари́е Богоневе́стная.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Раче́ние Боже́ственнейшее, блаже́нне, удержа́в души́ твое́й,/ ми́ра веще́ственныя печа́ли огне́м невеще́ственным вся попали́/ и жела́ний кра́ю венцено́сца тя предста́ви.

В приста́нище све́тло устреми́лся еси́ тиша́йшее, Богоно́се, бу́ри волне́ний избе́г,/ стремле́ния свере́пых и слове́сных звере́й,/ и ны́не наслажда́ешися, прии́м ве́чное наслажде́ние.

Испещре́нным украша́емь венце́м, священнотаи́нниче, преизя́ществуеши:/ свяще́нства бо в тебе́ в еди́но сни́деся и свиде́тельства сла́ва,/ и обои́ми я́ко прича́стник твоему́ Влады́це спросла́вился еси́.

Я́ко священноявле́н сый, дерзнове́ние име́я к твоему́ Влады́це и Бо́гу,/ соверша́ющим ве́рою па́мять твою́/ от напа́стей, Игна́тие, ны́не изба́витися моли́ся.

Богоро́дичен: Угаси́ страсте́й мои́х пла́мень росолу́чною Твое́ю моли́твою́,/ я́же во утро́бе прие́мши огнь Боже́ственный неопа́льно, Всечи́стая:/ Тя бо наде́жду и́мам спасе́ния моего́, Богоневе́сто.

Свети́лен.

Подо́бен: Све́те неизме́нный:

И́мать све́тлый пра́здник твой Христо́ва Це́рковь,/ я́ко неотъе́млемое бога́тство, твоя́ прие́мши Боже́ственныя мо́щи,/ иде́же и ми́ро источа́ют всем, Игна́тие Богоно́се.

Богоро́дичен:

Свет, возсия́вый безле́тне от Отца́ пре́жде век,/ в ле́та ны́не напосле́док из Тебе́, Де́во, изы́де на спасе́ние ми́ра,/ к Нему́же не преста́й о лю́дех Твои́х моли́ти.

На стихо́вне Окто́иха.

Сла́ва, глас 1. Студи́тово:

Столп одушевле́н и вдохнове́нный о́браз,/ ле́тний твой наста́ пра́здник, Богоно́се Игна́тие,/ та́инства твоя́ и до́блести твоя́ пропове́дающий,/ е́же за ве́ру да́же до кро́ве противостоя́ние./ Блаже́нный он и приснопа́мятный глас,/ и́же я́ко пшени́ца есмь Бо́жия, глаго́лющий,/ и зу́бы звере́й мелю́ся./ Те́мже подража́тель стра́сти Христа́ твоего́ быв,/ моли́ спасти́ся душа́м на́шим.

И ны́не, Богоро́дичен и́ли Крестобогоро́дичен.

Подо́бен: Всехва́льнии му́ченицы:

Заколе́ние Твое́ непра́ведное, Христе́, Де́ва зря́щи,/ пла́чущи, вопия́ше Ти:/ Ча́до сладча́йшее,/ ка́ко без пра́вды умира́еши?/ Ка́ко на Дре́ве ви́сиши,/ всю зе́млю повеси́вый на вода́х?/ Не оста́ви Мене́ еди́ну,/ Благоде́телю Многоми́лостиве,/ Ма́терь и рабу́ Твою́, молю́ся.

На литурги́и

Блаже́нны Окто́иха, на 4 и свята́го песнь 3-я, на 4. Проки́мен, глас 7: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой, внегда́ моли́ти ми ся к Тебе́. Апо́стол ко Евре́ем, зача́ло 311. Аллилу́йя, глас 4: Пра́ведник, я́ко фи́никс, процвете́т/ и, я́ко кедр, и́же в Лива́не, умно́жится. Ева́нгелие от Ма́рка, зача́ло 41. Прича́стен: В па́мять ве́чную бу́дет пра́ведник:

Моли́тва

О вели́кий святи́телю Богоно́сный Игна́тие! К тебе́ припа́даем и мо́лим тя, при́зри на ны гре́шныя, прибега́ющия к твоему́ заступле́нию! Умоли́ Го́спода, да прости́т нам вся согреше́ния на́ша: ты му́ченически ду́шу твою́ за ве́ру положи́л еси́, да́руй и нам му́жество во всем подража́ти тебе́. Ничто́ в жи́зни не возмогло́ отлучи́ти тя от любве́ ко Го́споду, ни ле́стныя обеща́ния, ни преще́ния, ни угро́зы, ниже́ са́мыя му́ки: ты с ра́достию предста́л пред зверьми́ на смерть лю́тую и, я́ко а́нгел, возлете́л еси́ во оби́тели Отца́ на́шего Небе́снаго; и моли́тва твоя́ мно́го мо́жет пред Го́сподем. Бу́ди же, святы́й уго́дниче, предста́телем у Го́спода: за ны, недосто́йнии рабы́ твоя́; помога́й и всем правосла́вным христиа́ном святы́ми твои́ми моли́твами ко всемогу́щему Бо́гу, да изба́вит ны от гла́да, тру́са, гра́да, бездо́ждия и смертоно́сных боле́зней, и да да́рует нам здравие и спасе́ние. Бу́ди же нам помо́щник ско́рый во вся́кой ско́рби, наипа́че в час кончи́ны на́шея яви́ся нам све́тлым защи́тником и хода́таем и умоли́ Го́спода сподо́битися всем нам, тебе́ ны́не те́пле моля́щимся, получи́ти по христиа́нской кончи́не Небе́сное Ца́рствие, иде́же вси святи́и вку́пе с тобо́ю ве́чно сла́вят Отца́ и Сы́на и Свята́го Ду́ха. Ами́нь.

На ма́лой вече́рни

На Го́споди, воззва́х: стихи́ры, глас 8.

Подо́бен: О, пресла́внаго чудесе́:

Святи́телие, отцы́ всечестни́и,/ Гера́симе, Питири́ме и Ио́но,/ доброде́тельми вше́дше, я́ко на колесни́цу,/ к Бо́гу востеко́сте,/ побе́дныя прие́млюще по́чести,/ я́ко ми́лоть, нам оста́висте телеса́ ва́ша, положе́на во гробе́х,/ источа́ти исцеле́ния и прогоня́ти ду́хи лука́выя,/ тем блажи́м вас, прехва́льнии.

Святи́телие, отцы́ преблаже́ннии,/ Гера́симе, Питири́ме и Ио́но,/ слепы́м подае́те свет,/ боля́щим исцеле́ния,/ притека́ющим с ве́рою к вам/ и прося́щим по́мощи ва́шея,/ вас бо засту́пники, и предста́тели, и храни́тели,/ ве́рнии, вси обрето́хом.

Лико́м святи́тельским сочета́стеся,/ по́стническим житие́м украси́вшеся,/ Гера́симе, Питири́ме и Ио́но,/ ны́не в Небе́сных живе́те, веселя́щеся,/ иде́же предстои́те Христу́,/ со А́нгелы ликовству́юще,/ Све́том Боже́ственным обожа́еми,/ помина́йте всегда́ блажа́щих вас на земли́/ и све́тлое ва́ше соверша́ющих пра́зднество.

Сла́ва, глас 6:

Возсия́ све́тлая святи́телей Христо́вых па́мять,/ ве́рных сердца́ разу́мно просвеща́ющи,/ ю́же мы све́тло соверша́юще днесь,/ моле́бно возопии́м:/ ра́дуйтеся, па́стырие и учи́телие лю́дем Зыря́нския земли́;/ ра́дуйтеся, церко́вное украше́ние,/ архиере́ев добро́то, мона́хов похвало́,/ му́чеников соприча́стницы,/ трие́ святи́телие, Гера́симе, Питири́ме и Ио́но,/ Христа́ Бо́га моли́те/ спасти́ся душа́м на́шим.

На стихо́вне стихи́ры, глас 2.

Подо́бен: До́ме Евфра́фов:

Дом духо́вный/ поспеше́нием благода́ти,/ Гера́симе, яви́лся еси́./ Те́мже, ны́не соше́дшеся,/ тебе́ воспои́м.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Святи́телем похвало́/ и свяще́нником сла́во,/ пра́вило мона́шествующих,/ Питири́ме свя́те,/ ра́дуйся, Це́ркве утвержде́ние.

Стих: Честна́ пред Го́сподем/ смерть преподо́бных Его́.

Храм всесве́тел/ тричи́сленныя зари́ сый,/ озаря́еши ду́ши/ пита́ющихся словесы́ твои́ми,/ свя́те Ио́но.

Сла́ва, и ны́не, Богоро́дичен:

Ра́дуйся, Богоро́дице Де́во,/ ра́дуйся, похвало́ всей вселе́нней,/ ра́дуйся, Чи́стая,/ Ма́ти Бо́гу, Благослове́нная.

Тропа́рь пи́сан на вели́цей вече́рни.

На вели́цей вече́рни

На Го́споди, воззва́х: стихи́ры, глас 4.

Подо́бен: Я́ко до́бля:

Я́коже зве́зды многосве́тлыя,/ утвержде́ни, прехва́льнии,/ зе́млю Зыря́нскую украси́сте, всечестни́и,/ сию́ луча́ми просвети́вше ве́ры Правосла́вный/ и язы́ческую тьму отгна́вше, святи́телие./ И ны́не моли́теся/ от скорбе́й и бед изба́витися/ ве́рою соверша́ющим всечестну́ю па́мять ва́шу.

Сия́нии духо́вными/ просвети́вше зе́млю Зыря́нскую,/ светода́тельная со́лнца яви́стеся,/ уче́ния благоче́стия/ лю́дем па́ствы ва́шея простира́юще,/ ве́рных сердца́ и до ны́не просвеща́ете, блаже́ннии,/ отгоня́юще тьму скорбе́й вся́ческих/ си́лою от Де́вы Возсия́вшаго.

Апо́столом равнопропове́дателие,/ святи́телем единому́дреннии,/ по́стником сподви́жницы,/ па́стырие су́ще избра́ннии,/ ми́лости благоутро́бия пода́телие,/ люде́й зыря́нских просвети́телие, досто́йно восхваля́ем вас, святи́телие,/ А́нгелом собесе́дницы/ и моли́твенницы о душа́х на́ших.

Ины стихи́ры, глас 6:

Вои́стинну, свяще́ннейший и Богоно́снии,/ я́вльшеся пома́зание Боже́ственное, святи́и,/ Святы́м Ду́хом освяще́ни/ и Богонача́льными светлостьми́ благода́ти облиста́еми,/ я́ко просвети́телие су́ще страны́ Зыря́нския,/ и ны́не моли́тися не преста́йте о лю́дех па́ствы ва́шея/ и о всех, почита́ющих вас.

Та́ко просвети́ся пред челове́ки/ свет жития́ ва́шего,/ святи́телие блаже́ннии,/ я́ко ви́дяще ва́ша до́брая дела́,/ не то́кмо ве́рнии/ просла́виша Отца́ на́шего Небе́снаго,/ но и неве́рнии, Того́ позна́вше,/ ко Христо́вой ве́ре приидо́ша,/ тем светоно́сный ваш пра́здник соверша́ем/ и, веселя́шеся, вас ублажа́ем.

Нощь потреби́сте язы́ческую,/ священнонача́льницы всему́дрии, трие́ святи́телие,/ Гера́симе, Питири́ме и Ио́но,/ блиста́ньми духо́вными просвеща́еми/ и ве́рным всем, сла́внии,/ помышле́ния озари́вше благода́тною/ и Тро́ицу Несозда́нную сла́вити научи́вше./ Тем, светоза́рную ва́шу па́мять ра́достно соверша́юще,/ моли́теся, про́сим Всеблага́го Бо́га,/ мир вселе́нней дарова́ти/ и душа́м на́шим ве́лию ми́лость.

Сла́ва, глас то́йже:

Челове́цы Бо́жий и ве́рнии раби́,/ служи́телие Госпо́дни,/ му́жие жела́ний, сосу́ди избра́ннии,/ столпи́ и утвержде́ние Це́ркве,/ Ца́рствия сонасле́дницы,/ не премолчи́те о нас вопи́ти ко Го́споду.

И ны́не, Богоро́дичен.

Вход. Проки́мен дне и чте́ния три святи́тельская.

На лити́и стихи́ры, глас 2:

Прииди́те, зыря́нстии наро́ди,/ псало́мски восплещи́те рука́ми,/ просвети́тели ва́ша воспева́юще,/ печа́льным уте́шители,/ о гре́шных ко Го́споду моли́твенники,/ три святи́тели, Гера́сима, Питири́ма и Ио́ну,/ похвалу́ земли́ Зыря́нския/ и всея Руси вели́кое украше́ние,/ ре́ки ми́лости вои́стинну,/ Боже́ственнаго Христо́ва смире́ния ревни́тели,/ при́сно моля́щияся о душа́х на́ших.

Име́юще дерзнове́ние ко Го́споду,/ па́стырие всесвяще́ннии,/ трие́ святи́телие пресла́внии,/ ве́рных утвержде́ние,/ любо́вию соверша́ющим всечестну́ю па́мять ва́шу/ моли́те изба́витися вся́каго обстоя́ния, и искуше́ний, и бед/ ва́шими ко Влады́це моли́твами.

Сла́ва, глас то́йже:

Разу́мнии церко́виии свети́льницы,/ Тро́ицы побо́рницы,/ святи́телие Христо́вы, Гера́симе, Питири́ме и Ио́но,/ мглу пре́лести отгна́вше/ и Правосла́вия све́том зе́млю Зыря́нскую просвети́вше,/ Боже́ственныя сла́вы прича́стницы бы́ти сподо́бистеся,/ те́мже моли́теся Христу́ Бо́гу/ дарова́ти нам ве́лию ми́лость.

И ны́не, Богоро́дичен.

На стихо́вне стихи́ры, глас 2.

Подо́бен: Ки́ими похва́льными:

Ки́ими пе́сненными добро́тами/ воспои́м три святи́тели,/ люде́й зыря́нских наста́вники ко све́ту Богоразу́мия,/ страны́ сия́ храни́тели/ и всея́ Руси засту́пники,/ Це́ркве Правосла́вный побо́рники,/ и́хже моли́твами враго́в Це́ркве возста́ния Христо́с низложи́,/ име́яй ве́лию ми́лость.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Ки́ими бо́дренными устна́ми/ похва́лим три святи́тели,/ Христо́вы Це́ркви све́тлое украше́ние,/ благоче́стия наста́вники,/ исто́чники Боже́ственных исцеле́ний неисчерпа́емый,/ проли́тие дарова́ний духо́вных,/ ре́ки мно́гих чуде́с,/ о́бласть Зыря́нскую и всю зе́млю Ру́сскую веселя́щий тече́нием,/ Гера́сима, Питири́ма и Ио́ну,/ ве́ры Правосла́вный посо́бники,/ и́хже ра́ди враго́в Це́ркве возста́ния Христо́с низложи́,/ име́яй ве́лию ми́лость.

Стих: Честна́ пред Го́сподем/ смерть преподо́бных Его́.

Ки́ими укра́шенными гла́сы/ воспое́м три святи́тели, ди́вныя в чудесе́х,/ Гера́сима, Питири́ма и Ио́ну,/ освяще́нныя от пеле́н столпы́ Це́ркве неподви́жимыя,/ Безпло́тным сожи́тели, пра́вды побо́рники,/ оби́димых засту́пники, немощны́м врачи́ безме́здныя,/ и́хже ра́ди, Христе́,/ да́руй Це́ркве Твое́й мир и ве́лию ми́лость.

Сла́ва, глас 3:

Святи́телие всечестни́и,/ преблаже́ннии отцы́ и чудотво́рцы,/ уго́дницы Христо́вы,/ Зыря́нския земли́ просвети́телие,/ Гера́симе, Питири́ме и Ио́но,/ вы, проро́ческим житие́м просия́вше,/ апо́стольских сподо́бистеся даро́в,/ Спа́су служа́ще со А́нгелы непреста́нно,/ моли́те изба́вится нам от вся́каго прегреше́ния/ и душа́м на́шим пода́ти мир и ве́лию ми́лость.

И ны́не, Богоро́дичен.

Тропа́рь, глас 8:

Равноапо́стольному святи́телю Стефа́ну насле́довавший/ и Правосла́вия све́том страну́ Зыря́нскую озари́вшии,/ святи́телие Христо́вы Гера́симе, Питири́ме и Ио́но,/ Престо́лу Пресвяты́я Тро́ицы ны́не предстоя́ще,/ моли́теся па́стве ва́шей от враго́в ненаве́тованней бы́ти/ и всем правосла́вным лю́дем в ми́ре спасти́ся.

Ин тропа́рь, глас 4:

Первопресто́льницы Пе́рмстии/ и и́стиннии храни́телие апо́стольских преда́ний,/ столпи́ непоколеби́мии,/ благоче́стия учи́телие, Пе́рмстии наста́вницы,/ Гера́симе, Питири́ме и Ио́но,/ Влады́ку всех моли́те мир вселе́нней дарова́ти/ и душа́м на́шим ве́лию ми́лость.

Ин тропа́рь, глас 8:

Правосла́вия наста́вницы,/ благоче́стия учи́телие и ми́лости сокро́вища,/ архиере́ом украше́ние,/ ду́ши своя́ за па́ству свою́ положи́вшии,/ Гера́симе, Питири́ме и Ио́но,/ святи́телие Це́ркве Пе́рмския,/ со равноапо́стольным Стефа́ном моли́те Христа́ Бо́га/ мир вселе́нней дарова́ти/ и душа́м на́шим ве́лию ми́лость.

На у́трени

По 1-м стихосло́вии седа́лен, глас 5.

Подо́бен: Собезнача́льное Сло́во:

Я́ко драго́е украше́ние Це́ркве, святи́тели Госпо́дни восхва́лим,/ церко́вных преда́ний сокро́вище неоску́дное,/ си́ми бо ти́и вся научи́ша Тро́ицу почита́ти Святу́ю,/ соедине́нну бо Существо́м, разделе́нну же Ипоста́сьми.

Сла́ва, и ны́не, Богоро́дичен:

Ско́рый Твой покро́в, и по́мощь, и ми́лость покажи́ на рабы́ Твоя́,/ и во́лны суе́тных по́мыслов укроти́, Чи́стая,/ и па́дшую мою́ ду́шу возста́ви, Богоро́дице,/ вем бо, вем, Де́во, я́ко мо́жеши, ели́ка и хо́щеши.

По 2-м стихосло́вии седа́лен, глас 3.

Подо́бен: Боже́ственныя ве́ры:

Столпи́ бысте Це́ркве и бога́тство некра́домое благоче́стия яви́стеся, пресла́внии святи́телие,/ безстра́стием осия́ли есте́ житие́ свое́/ и пре́жде неве́дущим Тро́йческое изъясни́сте уче́ние./ Отцы́ преподо́бнии, Христа́ Бо́га моли́те о спасе́нии душ на́ших.

Сла́ва, и ны́не, Богоро́дичен:

Красоте́ де́вства Твоего́/ и пресве́тлой чистоте́ Твое́й Гаврии́л удиви́вся, вопия́ше Ти, Богоро́дице:/ кую́ Ти похвалу́ принесу́ досто́йную?/ Что же возымену́ю Тя?/ Недоумева́ю и ужаса́юся./ Те́мже, я́ко повеле́н бых, вопию́ Ти:/ ра́дуйся, Благода́тная.

По полиеле́и седа́лен, глас 4:

Прему́дрии учи́телие, Бо́га просла́вившии на земли́ словесы́ и де́лы свои́ми,/ да возвели́чатся днесь, я́ко спасе́ния нам су́ще хода́тай.

Сла́ва, и ны́не, Богоро́дичен:

Воспита́вшейся во хра́ме, во свята́я святы́х,/ оде́янней ве́рою и прему́дростию и безме́рным де́вством,/ Архистрати́г Гаврии́л принесе́ с Небесе́ целова́ние и е́же ра́дуйся:/ ра́дуйся, Благослове́нная, ра́дуйся, Препросла́вленная, Госпо́дь с Тобо́ю.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Иоа́нна, зача́ло 36.

По 50-м псалме́ стихи́ра, глас 6:

Боже́ственная благода́ть осеня́ет всечестну́ю па́мять ва́шу, преблаже́ннии,/ тем, во благоуха́ние чуде́с ва́ших притека́юще к вам, усе́рдно вопие́м:/ трие́ святи́телие пресла́внии,/ Гера́симе, Питири́ме и Ио́но,/ Христа́ Бо́га моли́те о душа́х на́ших.

Кано́н, глас 8.

Песнь 1

Ирмо́с: Пои́м Го́сподеви,/ прове́дшему лю́ди Своя́ скво́зе Чермно́е мо́ре,/ я́ко Еди́н сла́вно просла́вися.

Сло́во благода́ти пода́ждь ми, Человеколю́бче Го́споди,/ я́ко да возмогу́ досто́йне просла́вити три святи́тели,/ и́хже Ты Сам до́бре просла́вил еси́.

Вы в ми́ре просия́ете, прему́дрии святи́телие,/ исполне́нием Боже́ственных веле́ний Царя́ ца́рствующих,/ того́ ра́ди от Него́ просла́вистеся.

Просия́вшия в ми́ре благоче́стия све́том/ и нече́стия тьму в земли́ Зыря́нстей разгна́вшия,/ три святи́тели, ве́рнии, просла́вим.

Богоро́дичен: Я́ко заче́ншую Предве́чное Сло́во/ и пло́тию па́че сло́ва Того́ ро́ждшую,/ Тя, Пречи́стая, по до́лгу вси ро́ди земни́и прославля́ют.

Песнь 3

Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.

Воздержа́нием и́стинным и моли́твою непреста́нною,/ прему́дрии святи́телие Гера́симе, Питири́ме и Ио́но,/ возшли́ есте́ в Вы́шний град, вопию́ще:/ несть свят, па́че Тебе́, Еди́не Человеколю́бче.

Я́ко иму́щие дерзнове́ние к Бо́гу, святи́телие преподо́бнии,/ моли́те спасти́ся нам, ве́рою почита́ющим па́мять ва́шу и Христу́ вопию́щим:/ несть свят, па́че Тебе́, Еди́не Человеколю́бче.

Я́ко со́лнце, просия́ете доброде́тельми ва́шими, святи́телие,/ и тьму идолобе́сия от люде́й, вам вве́ренных, отгна́вше,/ всех научи́сте взыва́ти/ несть свят, па́че Тебе́, Еди́не Человеколю́бче.

Богоро́дичен: Не́бо и престо́л Бо́жий Тя почита́ем вси, Богороди́тельнице Де́во,/ и немо́лчно Тебе́ вопие́м:/ несть Пречи́стыя, па́че Тебе́, еди́на Богома́ти.

Седа́лен, глас 3:

Сосу́ди честни́и воздержа́ния/ и бога́тство некра́домое благоче́стия яви́стеся вои́стинну, блаже́ннии,/ безстра́стием жизнь просвети́вше и неве́дущих Бо́га Богопозна́нием обогати́вше,/ отцы́ преподо́бнии, Христа́ Бо́га моли́те/ и нам всем в правове́рии и благоче́стии сохране́нными бы́ти.

Сла́ва, и ны́не, Богоро́дичен:

Ки́йждо, иде́же спаса́ется, та́мо пра́ведно и притека́ет,/ и ко́е ино́е таково́е прибе́жище, я́ко Ты, Богоро́дице,/ покрыва́ющее ду́ши на́ша.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Прему́дростию, во усте́х ва́ших излия́вшеюся, святи́телие,/ ко Христо́ву позна́нию наста́висте лю́ди,/ и́же и просла́виша Того́ Божество́.

Спасти́ся моли́те лю́дем, и́хже уче́нии ва́шими ко Влады́це приведо́сте/ и научи́сте прославля́ти Того́ Божество́.

Преподо́бнии отцы́, Гера́симе, Питири́ме и Ио́но,/ приле́жно моли́те и нам всем дела́ Бо́жии разуме́ти/ и просла́вити Того́ Божество́.

Богоро́дичен: Безневе́стная Неве́сто и Неискусобра́чная Чи́стая Ма́ти Христа́ Бо́га,/ моли́ спасти́ся душа́м прославля́ющих Того́ Божество́.

Песнь 5

Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.

Апо́стольски лю́ди от тьмы и́дольския просвети́вше, научи́сте вся взыва́ти:/ Го́споди, спаси́ ны, кро́ме бо Тебе́, ино́го не ве́мы.

От Бо́га прие́мше свяще́нства избра́ние, Боже́ственною си́лою свы́ше оде́яни,/ род Зыря́нский научи́ли есте́ испове́дати:/ кро́ме Еди́наго Бо́га, ино́го не ве́мы.

Ревни́телю Илии́ и Моисе́ю Богови́дцу возревнова́вше, отцы́ всечестни́и,/ посрами́сте идолослужи́телей, не восхоте́вшия пе́ти:/ кро́ме Еди́наго Бо́га, ино́го не ве́мы.

Богоро́дичен: Я́ко Цари́цу, всех Царя́ ро́ждшую,/ прииди́те, ве́рнии вси, Благослове́нную почти́м,/ кро́ме бо Ея́, Помо́щницы таковы́я не ве́мы.

Песнь 6

Ирмо́с: Ри́зу мне пода́ждь све́тлу,/ оде́яйся све́том, я́ко ри́зою,/ Многоми́лостиве Христе́ Бо́же наш.

Це́рковь Правосла́вную украси́сте, отцы́ блаже́ннии,/ доброде́тельными ва́шими дея́нии/ и нече́стие из ко́рене изсуши́ли есте́.

Ри́зою благода́ти оде́яннии,/ покро́вом моли́тв свои́х осеня́йте при́сно па́ству ва́шу/ и всю зе́млю Ру́сскую.

Вме́сто ору́жия сло́во взе́мше, святи́телие,/ и язы́ческая посе́кли есте́ уче́ния вся/ и изъясни́ли есте́ Тро́ицу лю́дем зыря́нским я́вственно.

Богоро́дичен: Роди́вся от Де́вы, мир просвети́л еси́, Христе́ Бо́же,/ и мене́ све́том лица́ Твоего́ озари́ и спаси́ мольба́ми Ро́ждшия Тя.

Конда́к, глас 4:

Во святи́телех благоче́стно пожи́вше/ и Пе́рмския лю́ди к Богоразу́мию наста́вивше,/ до́бре Бо́гу угоди́сте./ Сего́ ра́ди Устьвы́мь и земля́ Зыря́нская хва́лятся,/ име́юще мо́щи ва́ша/ я́ко исто́чник исцеле́ний/ всем, с ве́рою притека́ющим к вам,/ вы бо чудесы́ просла́вистеся,/ я́ко ученицы́ Бо́жия благода́ти.

И́кос:

Равноапо́стольнаго Стефа́на прее́мницы и Великопе́рмстии святи́телие,/ трие́ свети́лъницы пресве́тлии, Гера́симе, Питири́ме и Ио́но,/ Тро́ицы побо́рницы, Правосла́вию наста́вницы,/ в ми́ре благоче́стно пожи́сте и новокреще́нныя лю́ди уче́нием свои́м просвети́сте./ Сего́ ра́ди Ца́рствию Небе́сному насле́дницы бы́сте/ и от него́ чудесы́ просла́вистеся,/ я́ко ученицы́ Бо́жия благода́ти.

Песнь 7

Ирмо́с: В нача́ле зе́млю основа́вый/ и Небеса́ сло́вом утверди́вый,/ благослове́н еси́ во ве́ки, Го́споди, Бо́же оте́ц на́ших.

И́стинныя святи́тели Боже́ственный ста́ду Твоему́ па́стыри показа́вый,/ благослове́н Бог оте́ц на́ших.

Страсте́й пла́мень погаси́сте, святи́телие,/ и ду́ши благочести́вых Боже́ственне ороси́сте, вопию́щих:/ благослове́н Бог оте́ц на́ших.

Воздержа́нием, и бде́нием, и ве́рою и́стинною труди́вшеся, святи́телие, взыва́сте:/ благослове́н Бог оте́ц на́ших.

Богоро́дичен: Нас ра́ди рожде́йся от Де́вы и от врага́ изба́вивый мир,/ благослове́н Бог оте́ц на́ших.

Песнь 8

Ирмо́с: На горе́ святе́й просла́вльшася/ и в купине́ огне́м Присноде́вы Моисе́ови та́йну я́вльшаго,/ Го́спода по́йте/ и превозноси́те во вся ве́ки.

Еле́ем Боже́ственнаго ра́дования я́ко святи́телие пома́зани бы́вше,/ но́вые лю́ди ко Христо́ву позна́нию приведо́сте и всех научи́сте взыва́ти:/ благослове́н Бог оте́ц на́ших.

Бе́гают побежде́ннии ва́ми нача́льницы идолонеи́стовства,/ мудрова́ния же их и зло́бы изба́вльшиися вопию́т Христу́:/ благослове́н Бог оте́ц на́ших.

Ва́ми дре́вле просвеще́нных ча́да/ к вам, я́ко живы́м су́щим, глаго́лют:/ не оста́вите и нас ко благоче́стию путеводи́ти, да с ва́ми вопие́м:/ благослове́н Бог оте́ц на́ших.

Богоро́дичен: Все́льшемуся в чре́во Святы́я Де́вы/ и па́че сло́ва ве́тхаго Ада́ма обно́вльшему, Го́споду пое́м:/ благослове́н Бог оте́ц на́ших.

Песнь 9

Ирмо́с: Проявле́нное на горе́ законополо́жнику во огни́ и купине́/ Рождество́ Присноде́вы/ в на́ше, ве́рных, спасе́ние/ пе́сньми немо́лчными велича́ем,

Безстра́стием и ве́рою, наде́ждою и любо́вию/ путь к жи́зни ве́чной нам показа́вшии, прему́дрии святи́телие,/ пе́сньми немо́лчными вас велича́ем.

Я́ко упа́сших лю́ди жезло́м Ду́ха Свята́го/ и от Бо́жия Це́ркве отгна́вших во́лки лю́тыя,/ вас, трие́ святи́телие всечестни́и, пе́сньми велича́ем.

Мо́щи ва́ша честны́я, блаже́ннии святи́телие Гера́симе, Питири́ме и Ио́но, с любо́вию обстоя́ще,/ пе́сньми достодо́лжными вас велича́ем.

Богоро́дичен: Ра́дуйся, присноживо́тный Исто́чниче нетле́ния,/ ра́дуйся, всесве́тлый со́лнца О́блаче./ Ра́дуйся, Ма́ти Бо́жия, Ю́же немо́лчно велича́ем.

Свети́лен:

Оте́чество свое́ и род оста́вльшия,/ страну́ же Зыря́нскую све́том ве́ры Правосла́вный просвети́вшия/ и ко Христо́ву позна́нию лю́ди неве́рныя приве́дшия,/ Богоно́сных восхва́лим отце́в.

Сла́ва, и ны́не, Богоро́дичен:

Тебе́ пе́сньми немо́лчными ублажа́ем, Де́во,/ Я́же от Тро́ицы Еди́наго во чре́ве прие́мши, Богоро́дице,/ Боже́ственными рука́ми Пресу́щно Сло́во носи́вшая, непрело́жно и неизме́нно.

На хвали́тех стихи́ры на 4, глас 8:

Име́я ду́шу ми́лостиву,/ и чист по́мысл, и се́рдце несмуще́но,/ и ве́ру непоро́чну, и любо́вь нелицеме́рну,/ учи́тельство изря́дно и святи́тельства досто́инство,/ лико́м святи́телей и му́чеников сопричта́лся еси́ на Небесе́х./ Сего́ ра́ди почита́ем тя, святи́телю Гера́симе,/ и свяще́нными пе́сньми благоче́стно вси ублажа́ем.

О пречестны́й о́тче, досточу́дне,/ прему́дре Питири́ме!/ Ты и́ноческим житие́м Бо́гу угоди́л еси́,/ тя Бог пре́жде избра́ от ю́ности/ па́стыря овца́м слове́сным и вели́ка учи́теля,/ ты свяще́нником наста́вник яви́лся еси́/ и всей Зыря́нстей стране́ звезда́ пресве́тлая,/ кровь же свою́ излия́в за Христа́,/ же́ртву Богоприя́тну за лю́ди твоя́ себе́ приве́л еси́./ Тем святи́телей лик тя восприя́т,/ с ни́ми же моли́ся,/ прося́ ста́ду твоему́ грехо́в оставле́ние.

О́тче Ио́но, Богому́дре святи́телю,/ ты, усе́рдно Христа́ возлюби́в/ и от Него́ Пресвята́го Ду́ха Боже́ственными заря́ми се́рдце твое́ просвети́в,/ светови́ден вои́стинну был еси́/ и лю́ди, во тьме и се́ни сме́ртней седя́шия,/ ко Христо́ву све́ту приве́л еси́./ Те́мже тя свяще́нными пе́сньми/ благоче́стно вси ублажа́ем.

О пречестни́и и досточу́днии трие́ святи́телие,/ Гера́симе, Питири́ме и Ио́но./ Поруче́нный вам тала́нт умно́живше,/ ра́дости сподо́бистеся Го́спода своего́/ и ны́не предстои́те с ли́ки святи́телей,/ укра́шени благода́тию Боже́ственнаго сия́ния./ Те́мже ве́рою и любо́вию/ пресве́тлую ва́шу па́мять восхваля́ем.

Сла́ва, глас 6:

До́брии раби́, блази́и и ве́рнии,/ и до́брии де́лателие виногра́да Христо́ва,/ вы тяготу́ дневну́ю понесли́ есте́,/ да́нный вам тала́нт возрастаи́вше/ и по вас прише́дшим не зави́девше./ Те́мже и дверь Небе́сная вам отве́рзеся/ и внидо́сте в ра́дость Влады́ки Христа́,/ моля́щеся о нас, трие́ святи́телие.

И ны́не, Богоро́дичен:

Богоро́дице, Ты еси́ лоза́ и́стинная,/ возрасти́вшая нам Плод Живота́./ Тебе́ моли́мся: моли́ся, Влады́чице, со святи́тели и все́ми святы́ми/ поми́ловатися душа́м на́шим.

На литурги́и

Блаже́нны от кано́на пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех, я́же воздаде́ ми? Апо́стол ко Евре́ем, зача́ло 335. Аллилу́йя, глас 2: Свяще́нницы Твои́ облеку́тся в пра́вду, и преподо́бнии Твои́ возра́дуются. Стих: Уста́ моя́ возглаго́лют прему́дрость и поуче́ние се́рдца моего́ ра́зум. Ева́нгелие от Матфе́я, зача́ло 11. Прича́стен: Ра́дуйтеся, пра́веднии, о Го́споде, пра́вым подоба́ет похвала́.

Моли́тва

О святи́телие Христо́вы, Гера́симе, Питири́ме и Ио́но! К вам я́ко ча́до ко отце́м, в смире́нии се́рдца с ве́рою и любо́вию вси притека́ем и умиле́нно мо́лимся: предста́тельством ва́шим со равноапо́стольным Стефа́ном испроси́те у Го́спода нам покая́ние и проще́ние всех во́льных и нево́льных согреше́ний на́ших, да, преуспева́юще в и́стинней ве́ре и благоче́стии, яви́мся досто́йни ми́лости Его́ неизрече́нныя. Бу́дите, святи́телие Христо́вы, те́плии о нас пред Бо́гом засту́пницы, да умири́т и укрепи́т Госпо́дь Святу́ю Це́рковь Свою́, да просвети́т лю́ди, седя́­щия во тьме и се́ни сме́ртней. Огражда́йте хода́тайствы ва́­шими зе́млю Русскую, да ти́хое и безмо́лвное житие́ поживе́м в ве́це сем, христиа́нскую кончи́ну и до́брый отве́т на Стра́шнем суде́ Бо́жи­ем полу́чим и насле́дницы бу́дем Небе́снаго Его́ Ца́рствия во ве́ки веко́в. Ами́нь.

Тропа́рь, глас 8:

Всеблаже́нне Лавре́нтие,/ затвори́вый себе́ Го́спода ра́ди в ме́сте те́сне/ и в не́м мно́га ле́та трудолю́бне пожи́вый,/ моли́ся о нас ко Го́споду,/ я́ко да и мы от вся́каго греха́ чу́вства затво́рше,/ полу́чим отверзе́ние двере́й ми́лости Госпо́дни в День су́дный.

Конда́к, глас 6:

Усе́рдие Ла́вре Пече́рстей жела́я от чуде́с прославле́ния,/ себе́ же сама́го смиря́я,/ отре́клся еси́ о́наго,/ бе́дне диа́волом му́чима, исцели́ти,/ отсла́в его́ ко пеще́ре,/ иде́же он исцели́вшися,/ блаже́нне Лавре́нтие,/ просла́ви с тобо́ю Го́спода,/ прославля́ющего святы́х Свои́х.