На Го́споди, воззва́х: стихи́ры на 6, глас 1.

Подо́бен: Небе́сных чино́в:

Ра́йския добро́ты смотря́я/ и бога́тно наслади́вся нетле́нных цветнико́в,/ процве́л еси́ ми́ру ра́зум Бо́жий,/ его́же причаща́ющеся, преподо́бне, духо́вною любо́вию,/ душа́ми возраста́ем духо́вно.

Судии́ прише́ствие написа́в,/ сле́зными струя́ми душ свещи́ запали́ти науча́еши,/ всем вопия́ Жениха́ прише́ствие,/ да оде́ждемся вси оде́ждею све́тлою, сре́сти Жениха́ Христа́.

Воздержа́нием те́ло огради́в,/ страсте́й движе́ния умертви́л еси́, о́тче,/ моли́твами и бде́ньми./ Те́мже в тя Ду́ха си́ла все́льшаяся/ показа́ мы́сленна тя свети́льника и всеми́рнаго.

Сла́ва, глас 6:

Смы́сленно мяте́жных жития́ отступи́в,/ Ефре́ме приснопа́мятне,/ любомолча́нием пусты́ню дости́гл еси́/ и, тоя́ ра́ди к Бо́гу де́тельне возводи́м/ ми́ру просия́л еси́ свети́ло/ и глаго́лы живо́тныя челове́ком источи́л еси́./ Те́мже не преста́й моли́твами твои́ми утвержда́я нас,/ от вреда́ чужда́го изба́вити ду́ши на́ша,/ преподо́бне о́тче.

И ны́не, Богоро́дичен и́ли Крестобогоро́дичен:

На Дре́ве Живо́т наш зря́щи, Всенепоро́чная Богоро́дице, ви́сящ,/ ма́терски рыда́ющи, вопия́ла еси́:/ Сы́не Мой и Бо́же Мой,/ спаси́ любо́вию пою́щия Тя.

На стихо́вне Окто́иха.

Сла́ва, глас 4. Анато́лиево:

Проро́чески омака́я посте́лю слеза́ми/ и поуче́нием жития́ творя́ покая́ние,/ Суда́ страх де́лы нам от слове́с показа́л еси́,/ и твою́ почита́ем вси, соше́дшеся, всеблаже́нне, па́мять,/ пресла́вных дея́ний самоде́телю Госпо́день,/ Ефре́ме приснопа́мятне./ Те́мже и ны́не мо́лим тя:/ моли́ся Христу́ Бо́гу о душа́х на́ших.

И ны́не, Богоро́дичен и́ли Крестобогоро́дичен.

Подо́бен: Я́ко до́бля:

А́гнца и Па́стыря Тя на Дре́ве я́ко ви́де,/ А́гница ро́ждшая рыда́ше/ и ма́терски Тебе́ веща́ше:/ Сы́не вожделе́ннейше,/ ка́ко на дре́ве Кре́стнем пове́шен еси́, Долготерпели́ве?/ Ка́ко ру́ки и но́ги Твоя́, Сло́ве,/ пригвозди́шася от беззако́нных,/ и кровь Твою́ излия́л еси́, Влады́ко?

Тропа́рь, глас 8:

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодономи́л еси́,/ и был еси́ свети́льник вселе́нней, сия́я чудесы́, Ефре́ме, о́тче наш,/ моли́ Христа́ Бо́га спасти́ся душа́м на́шим.

На у́трени

О́ба кано́на Окто́иха, и свята́го на 6.

Его́же краегране́сие: Ефре́ма честву́ю, у́мнаго Евфра́та. Феофа́ново. Глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на ви́дя потопля́ема,/ Бо́гу, побе́дную песнь, пои́м, вопия́ше.

Евфра́тским одожде́нием твои́х моли́тв ду́шу мою́ напо́й,/ изсо́хшую зно́ем страсте́й,/ и сло́во ми вдохни́, твой восхваля́ющу пра́здник, всеблаже́нне.

Свет мы́сленный облиста́в,/ све́тлое яви́лся еси́ со́лнце светолу́чными доброде́тельми/ и уче́ний добро́тами, Ефре́ме, озаря́я ве́рных все исполне́ние.

Струя́ми слез пла́мень страсте́й погаси́в,/ был еси́ сосу́д че́стен, Ефре́ме, Свята́го Ду́ха,/ исто́чники источа́я уче́ний, Богоблаже́нне.

Богоро́дичен: Нетле́нно Сло́во во утро́бе прии́мши,/ родила́ еси́ избавля́ющего от тли Тому́ служа́щия при́сно,/ Ма́ти Де́во Чи́стая, две́ре и́стинно Жи́зни.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бли́же,/ и утверди́вый нас на ка́мени/ испове́дания Твоего́.

Ти́ны вся́кия страстны́я себе́ очи́стив,/ яви́лся еси́ прия́телище доброде́телей я́ко и́стинно/ и сосу́д вмести́телен дарова́ний Свята́го Ду́ха.

Ника́коже сна очи́ма дав,/ храм яви́лся еси́ Святы́я Тро́ицы и прему́дрости сокро́вище,/ мир обогаща́я златоза́рными уче́нии, блаже́нне.

Познава́ет друга́го тя Христо́ва честна́я Це́рковь златото́чнаго Евфра́та,/ наводня́юща му́дрых уче́ний пото́ками и тварь всю напоя́юща.

Богоро́дичен: Во двою́ естеству́ Еди́ный от Святы́я Тро́ицы,/ из чи́стых Твои́х крове́й воплоще́н, боголе́пно про́йде,/ су́щия от Ада́ма спаса́я, Всечи́стая, бла́гостию.

Седа́лен, глас 5:

Подо́бен: Собезнача́льное Сло́во:

Сокро́вище прему́дрости,/ та́ин Христо́вых ча́шу Боже́ственнаго умиле́ния,/ воспои́м, ве́рнии, в па́мять его́:/ тезоиме́нно бо при́сно сердца́ ве́рных весели́т словесы́ Боже́ственными Ефре́м,/ я́ко де́латель и таи́нник Госпо́дних открове́ний.

Сла́ва, и ны́не, Богоро́дичен:

Те́плая Предста́тельнице и непобеди́мая,/ упова́ние изве́стное и непосты́дное,/ стено́, и покро́ве, и приста́нище притека́ющих к Тебе́, Присноде́во Чи́стая,/ Сы́на Твоего́ и Бо́га моли́ со А́нгелы/ мир да́ти ми́ру, и спасе́ние, и ве́лию ми́лость.

Крестобогоро́дичен:

Кресто́м Сы́на Твоего́, Богоблагода́тная, и́дольская пре́лесть вся упраздни́ся/ и де́монская кре́пость попра́ся,/ сего́ ра́ди, ве́рнии, по до́лгу Тя при́сно пое́м, и благослови́м,/ и, Богоро́дицу вои́стинну испове́дающе, Тя велича́ем.

Песнь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь боголе́пно пое́т, взыва́ющи,/ от смы́сла чи́ста о Го́споде пра́зднующи.

Глаго́лов си́ла твои́х протече́ весь мир,/ высокотво́рным сия́нием смире́ния слепоту́ душ отгоня́щи, блаже́нне.

Непоро́чно соверши́л еси́ житие́, слеза́ми себе́ омыва́я/ и Судии́ всем прише́ствие напису́я словесы́ му́дрыми, Богоявле́ние досточу́дне.

Ви́дев твоего́ Госпо́дь смире́ния пресла́вную высоту́,/ высокотво́рное сло́во тебе́ да́рует,/ и́мже ересе́й лю́тая смири́шася возноше́ния.

Укрепи́вся благода́тию Вседержи́теля,/ к нача́лом ополчи́лся еси́ де́монским, о́тче, и победи́л еси́,/ о нас моля́ся те́пле, восхваля́ющих тя.

Богоро́дичен: Я́ко Боже́ственный храм,/ я́ко го́ру святу́ю, я́ко исто́чник нетле́ния,/ я́ко и́збранну еди́ну бы́вшую Зижди́телю на́шему Бо́гу,/ Де́ву ублажи́м.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Слез пото́ками сласте́й до конца́, о́тче, изсуши́л еси́ пучи́ну/ и источе́нии твои́х уче́ний ересе́й пото́ки, блаже́нне, потопи́л еси́.

Ум твой манове́нием е́же к Бо́гу, о́тче, просвеща́емь, Ефре́ме,/ Богови́ден весь бысть, я́коже зерца́ло Боже́ственнаго Ду́ха,/ невеще́ственно явле́ния прие́мля.

Храм был еси́ вмести́телен, о́тче, Тро́ицы во и́стинну и испещре́н благода́тию,/ и озаре́нием чи́стых доброде́телей, и уче́ний це́лостию.

Богоро́дичен: Мертва́ мя показа́ во Еде́ме вкуше́ние дре́ва лука́вым наве́том зми́я,/ Ты же, Жизнода́теля Христа́ ро́ждши, оживи́ла мя еси́,/ Еди́на Богора́дованная.

Песнь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.

Не песо́к основа́ние, но ве́ру нерасте́рзну, Богоно́се, положи́в,/ от вра́жиих вся́ческих наве́тов непрекло́нен пребы́л еси́,/ непобеди́мою дла́нию окормля́емь.

Язы́к твой, я́ко трость пи́сменника скоропи́сца, вои́стинну бысть,/ повеству́ющ ра́зум всеблагочести́в,/ на скрижа́лех начерта́ющ серде́чных, о́тче, зако́н Ду́ха.

Твою́ пла́вающии догма́тов тишину́, Ефре́ме Богому́дре,/ пучи́ны треволне́ний избавля́ются душевре́дных/ и бу́ри ересе́й, возни́чуще, ве́рою спаса́ются.

Богоро́дичен: Вся́кия вы́шши разумева́емыя, я́ко Бог, и ви́димыя тва́ри,/ вопло́щен, про́йде из Твоего́ чре́ва,/ соблю́д Тя нетле́нну, я́коже бе пре́жде Рождества́,/ Ма́ти Де́во.

Конда́к, глас 2.

Подо́бен: Вы́шних ища́:

Час при́сно прови́дя Суда́,/ рыда́л еси́ го́рько, Ефре́ме, я́ко любобезмо́лвный,/ де́лателен же был еси́ в де́лех учи́тель, преподо́бне./ Те́мже, о́тче всеми́рный, лени́выя воздвиза́еши к покая́нию.

И́кос:

От вод благода́ти твоея́ иска́пи в ду́шу мою́,/ омыва́я ю от вся́кия скве́рны нечи́стый,/ я́ко да от сих очи́стится/ и, ревни́тельно житие́ по всему́ духо́вно/ про́чее ле́то сконча́вши, сла́дости Боже́ственныя наслади́тся,/ ея́же наслади́лся еси́ и напои́л еси́ вся, от страсте́й пали́мыя./ Се бо словесы́ твои́ми лени́выя воздвиза́еши к покая́нию.

Песнь 7

Ирмо́с: Росода́тельну у́бо пещь соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Законоположи́тель мона́шествующих изве́стнейший яви́лся еси́, прече́стне,/ изыма́тель же от вра́жиих вся́ческих сплете́ний./ Те́мже твою́ почита́ют честну́ю и свяще́нную на земли́, блаже́нне, па́мять.

Изря́ден Ду́ха, приснопа́мятне, орга́н был еси́,/ возглаша́ющий твои́ми всегда́ дохнове́ньми,/ и песнь спаси́тельную нам покая́ния песнопоя́, воспева́ющим тя.

Богоро́дичен: Па́че сло́ва́ Твое́ зача́тие, Богоневе́сто,/ Бо́га бо Сло́во родила́ еси́,/ изба́вльшаго от безслове́сия вся челове́ки и сло́во подаю́ща вопи́ти:/ благослове́н еси́, Бо́же оте́ц на́ших.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/вся бо твори́ши, Христе́, то́кмо е́же хоте́ти,/ Тя превозно́сим во вся ве́ки.

Светоно́сен я́ко ино́е показа́лся еси́ со́лнце,/ уче́ний лучи́ испуща́я конце́м,/ тьму несве́тлую отгна́л еси́, блаже́нне, вся́каго греха́ све́том покая́ния.

Струя́ми Боже́ственных догма́тов окружа́емь,/ я́коже ина́я река́, из Еде́ма теку́щи,/ лице́ земли́ напая́я, чу́дне, и нече́стия пле́велы подавля́я.

Богоро́дичен: И́стинную Богоро́дицу испове́дающе Тя,/ а́нгельски, е́же ра́дуйся, ве́рою вопие́м Ти:/ еди́на бо Ра́дость на земли́ родила́ еси́,/ Обра́дованная, при́сно Благослове́нная.

Песнь 9

Ирмо́с: Бо́га челове́ком невозмо́жно ви́дети,/ на Него́же не сме́ют чи́ни А́нгелъстии взира́ти./ Тобо́ю же, Всечи́стая, яви́ся челове́ком Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Уязви́вся любо́вию Вседержи́теля, все твое́ житие́, рыда́я, сконча́л еси́,/ вопия́ со у́жасом, преподо́бне:/ осла́би во́лны́ Твоея́, Спа́се, благода́ти,/ се́ю мя бога́тно соблюда́я в бу́дущей жи́зни.

Сла́дко сло́во твое́, умиле́ния пода́тельно,/ испо́лнено просвеще́ния притека́ющим, Богоно́се Ефре́ме досточу́дне,/ непоро́чно же житие́,/ все́ми украша́емо Богосия́нными доброде́тельми и просвеща́емо.

Храм Ду́ха был еси́ и река́, вод живото́чных исполня́ема,/ Це́ркве основа́ние незы́блемое, утвержде́ние мона́шествующих,/ струя́ приснотеку́щая Боже́ственнаго умиле́ния, Ефре́ме досточу́дне.

Богоро́дичен: Разуме́ти не мо́жет ум челове́ческий/ е́же па́че ума́ Рождества́ Твоего́, Де́во, та́инство:/ Бог бо, всели́вся во утро́бу Твою́, ключа́ де́вства не поколеба́,/ я́коже весть Еди́н Сам Непостижи́мый.

Свети́лен.

Подо́бен: Не́бо звезда́ми:

Ча́ша сокрове́нных Христо́вы му́дрости сокро́вищ, Ефре́ме,/ твои́м умиле́нием, преподо́бне о́тче, яви́лся еси́/ и уче́нии твои́ми Боже́ственными ду́ши ве́рных весели́ши.

Богоро́дичен:

Держа́вным Твои́м кро́вом/ от враго́в наве́та ны, Чи́стая, Твоя́ рабы́, сохрани́ вся невреди́мы:/ Тя бо еди́ну и́мамы прибе́жище в ну́ждах.

На стихо́вне Окто́иха.

Сла́ва, глас 2. Киприа́ново:

Я́коже фи́никс, дави́дски процве́л еси́, преподо́бне о́тче,/ язы́ки ху́лящих отсе́кл еси́ мече́м, Ефре́ме,/ бе́здны страсте́й измуши́л еси́ воздержа́нием,/ орга́н яви́лся еси́ Свята́го Ду́ха,/ кре́стное ору́жие прие́м./ Христа́ непреста́нно моли́ о нас,/ ве́рою соверша́ющих при́сно честну́ю па́мять твою́.

И ны́не, Богоро́дичен и́ли Крестобогоро́дичен.

Подо́бен: Егда́ от Дре́ва:

Доса́ды претерпе́вшаго мно́ги/ и на Крест возвы́шеннаго вся́ческих Творца́/ ви́девши, Всечи́стая, стеня́ше, глаго́лющи:/ препе́тый Го́споди, Сы́не и Бо́же Мой,/ ка́ко, почести́ хотя́ созда́ние Твое́, Влады́ко,/ терпи́ши пло́тию безче́стие?/ Сла́ва мно́гому благоутро́бию/ и соше́ствию Твоему́, Человеколю́бче.

На литурги́и

Блаже́нны Окто́иха на 4 и свята́го, песнь 3-я, на 4. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́йя, глас 6: Блаже́н муж, бо́яйся Го́спода,/ в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Матфе́я, зача́ло 43. Прича́стен: В па́мять ве́чную бу́дет пра́ведник:

Ве́чер

Блаже́н муж: 1-й антифо́н. На Го́споди, воззва́х: стихи́ры, глас 4.

Подо́бен: Зва́нный свы́ше:

Егда́ изволе́нием Вы́шняго/ па́стырей Нача́льника, Иису́са,/ зван был еси́, преподо́бне,/ тогда́, ми́ра тле́нная ни во что же вмени́в/ и вся кра́сная предержа́ния оста́вль,/ поше́л еси́ невозвра́тным жесто́ким путе́м, в живо́т веду́щим,/ его́же посо́бием Влады́ки своего́ доше́д,/ ра́дуешися в Небе́сных кро́вех ны́не,/ с чи́ны преподо́бных водворя́яся,/ иде́же потщи́ся мольбу́ приноси́ти Христу́ Бо́гу,/ е́же умири́ти мир и спасти́ ду́ши на́ша.

Егда́ Ду́ха Свята́го пома́занием/ избра́н был еси́, Ефре́ме преподо́бне,/ пасти́ слове́сное ста́до Небе́снаго Царя́,/ тогда́, я́ко до́брый па́стырь и учи́тель,/ вруче́нныя тебе́ о́вцы/ непреста́нно благи́м наказа́нием наставля́я, вразумля́л еси́,/ и, сло́вом утеше́ния пита́я, утвержда́л еси́,/ сама́го себе́ им о́браз сло́вом и де́лом показу́я,/ и, до́бре на па́житех духо́вных упа́с,/ приве́л еси́ це́лы к проше́дшему Небеса́/ па́стырей Нача́льнику, Христу́ Бо́гу,/ Его́же моли́ сохрани́ти и спасти́ и нас от враго́в невреди́мых.

Егда́ благоволе́ние Бо́жие/ разжже́ всех сердца́ в любо́вь к тебе́,/ о́тче преблаже́нне,/ тогда́ по жела́нию диади́му нося́щаго/ о́бщим всех сове́том/ поста́влен был еси́ архиере́й сла́вному гра́ду,/ в не́мже да ве́рне, я́ко ве́рный раб, Влады́це своему́ послужи́ши,/ ве́лие тща́ние о созида́нии в еписко́пии свое́й хра́мов име́л еси́/ и сие́ па́че всех честне́йшее/ и любе́знейшее де́ло себе́ вмени́л еси́,/ е́же умно́жити хвале́ние в сла́ву Христа́ Бо́га на́шего,/ Его́же моли́ спасти́ и просвети́ти ду́ши на́ша.

Сла́ва, глас 6:

Святи́телей удобре́ние,/ преблаже́нне о́тче свяще́ннейший,/ изря́дный учениче́ Христо́в,/ па́стырю до́брый,/ упасы́й ста́до свое́ на па́житех духо́вных,/ Ефре́ме досточу́дне,/ ны́не со святи́тели предстоя́ Престо́лу Христо́ву,/ не преста́й моля́ся о нас,/ пою́щих честно́е твое́ успе́ние.

И ны́не, Богоро́дичен: Кто Тебе́ не ублажи́т:

Вход. Проки́мен дне, и чте́ния святи́тельская.

На стихо́вне стихи́ры, глас 6.

Подо́бен: Все отло́жше:

Чистото́ю жития́ твоего́/ и све́тлостию многотру́дных твои́х по́двиг/ озари́в ви́дящих благоле́пие лица́ твоего́,/ всех в любо́вь свою́ привле́кл еси́,/ был бо еси́, я́ко светоза́рное со́лнце,/ сын су́щи невече́рняго Све́та,/ и вшел еси́, иде́же облиста́ет Свет непристу́пный,/ тем, я́ко имы́й дерзнове́ние ко Христу́ Бо́гу,/ моли́ся о почита́ющих твою́ па́мять честну́ю,/ Ефре́ме, о́тче свяще́ннейший.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Ти́хостию и ра́зумом смиренному́дрия твоего́/ к Высоча́йшему Уму́ возше́дши,/ вшел еси́ во свята́я святы́х,/ я́ко архиере́й преподо́бен/ и я́ко священнотаи́нник благосла́вен,/ причасти́лся еси́ Святы́х Та́ин,/ отню́дуже све́том Боговиде́ния озари́лся еси́,/ тем со дерзнове́нием моли́ся о нас,/ пою́щих па́мять твою́, Ефре́ме досточу́дне.

Стих: Восхва́лятся преподо́бнии во сла́ве,/ и возра́дуются на ло́жах свои́х.

Весь ра́зум и тща́ние/ ко благоле́пию Це́ркве Христо́вы восприя́л еси́,/ ю́же, я́ко неве́сту,/ всезлато́ю гри́вною уче́ния твоего́ украси́л еси́/ и, Богодухнове́нными твои́ми словесы́ опоя́сав,/ предста́вил еси́ всекра́сну Влады́це своему́,/ Ему́же ны́не приле́жно моли́ся/ от тли и бед изба́витися/ ве́рою соверша́ющим всечестну́ю па́мять твою́,/ святи́телю Ефре́ме блаже́ннейший.

Сла́ва, глас то́йже:

В благонаро́читый день пра́здника твоего́,/ о́тче преподо́бне,/ ра́дуются согла́сно и игра́ют Русстии собо́ри/ и та́йно лику́ет Христо́ва Це́рковь,/ похва́льная тебе́ принося́щи/ и Христа́ Бо́га в па́мяти твое́й прославля́ющи.

И ны́не, Богоро́дичен: Богоро́дице, Ты еси́ лоза́ и́стинная:

Тропа́рь, глас 8:

Ду́хом горя́ путеше́ствия к святы́м место́м,/ стра́нствовал еси́ в Гре́ческую зе́млю,/ святи́телю Ефре́ме,/ отню́дуже со мно́гою по́льзою возвраща́яся,/ уста́в свята́го Студи́йскаго монастыря́ списа́в,/ а́ки не́кий многоче́стен дар, се́мо прине́сл еси́,/ и́мже и днесь Це́рковь Русская управля́ема/ сла́вит тебе́, и́стиннаго о ней промы́сленника.

Сла́ва, и ны́не, Богоро́дичен: И́же нас ра́ди:

На у́трени

На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 1:

Подо́бен: Гроб Твой:

В Вы́шних предстоя́ ны́не Непристу́пному Све́ту,/ нам, па́мять твою́ восхваля́ющим, Ефре́ме, о́тче свяще́ннейший,/ моли́ улучи́ти благода́ть и очище́ние прегреше́ний,/ в день же стра́шнаго испыта́ния ве́лию ми́лость,/ да сподо́бимся с тобо́ю сла́вити вси Еди́наго Человеколю́бца.

Сла́ва, и ны́не, Богоро́дичен:

Всех Созда́тель и Спаси́тель ми́ра,/ пре́жде век от Оте́ческих недр рожде́йся,/ То́йже в ле́то от Тебе́ произше́д, Богоневе́стная Де́во,/ обнови́ истле́вшее челове́ческое естество́/ и Тебе́ показа́ всем спасе́ния на́шего Хода́таицу.

По 2-м стихосло́вии седа́лен, глас 4.

Подо́бен: Яви́лся еси́:

Жесто́кий путь в жи́зни сей ше́ствовал еси́, о́тче,/ и вожделе́ннаго приста́нища мно́гими труды́ свои́ми дости́гл еси́,/ и, вшед в Вы́шнее простра́нство Небе́сное,/ нам оста́вил еси́ ле́ствицу доброде́тельнаго восхожде́ния твоего́,/ Ефре́ме, па́стырю блаже́ннейший.

Сла́ва, и ны́не, Богоро́дичен:

Простра́нным путе́м разли́чных собла́зн ходя́щу/ и к спасе́нному приста́нищу улучи́ти не могу́щу,/ предста́ни ми ско́ро, Пречи́стая Де́во:/ Ты бо еси́ Руководи́тельница Блага́я всем, Тебе́ призыва́ющим.

По полиеле́и седа́лен, глас 5.

Подо́бен: Собезнача́льное Сло́во:

Душе́вных и теле́сных страсте́й отсече́нием/ в пра́вду евну́х проименова́н был еси́, преподо́бне./ Тем, я́ко потопле́ния стра́стнаго мо́ря избежа́вый,/ потщи́ся о нас, любо́вию почита́ющих па́мять твою́, мольбу́ сотвори́ти ко Христу́ Бо́гу,/ да прии́мем благода́ть, и ми́лость, и страсте́й всех свобожде́ние.

Сла́ва, и ны́не, Богоро́дичен:

Мо́лим Тя приле́жно, Богоневе́стная Де́во,/ я́ко иму́щая дерзнове́ние к Сы́ну Своему́ и Бо́гу,/ при́сно моли́ за ны, непотре́бныя рабы́ Твоя́,/ да обря́щем благода́ть и ми́лость в День су́дный.

Та́же степе́нна, 1-й антифо́н 4-го гла́са. Проки́мен, глас 4: Свяще́нницы Твои́ облеку́тся в пра́вду,/ и преподо́бнии Твои́ возра́дуются. Стих: Услы́шите сия́, вси́ язы́цы,/ внуши́те, вси, живу́щии́ по вселе́нней. Вся́кое дыха́ние да хва́лит Го́спода. Ева́нгелие о́бщее святи́телю.

По 50-м псалме́ стихи́ра, глас 6: Святи́телей удобре́ние: зри сла́вник на Го́споди, воззва́х:

Кано́н Богоро́дицы со ирмосо́м на 6 и свята́го на 6, глас 2.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Гряди́, Бо́гом со́бранная Це́рковь Христо́ва,/ и пе́сненными венцы́ венча́й венча́ннаго свы́ше благода́тию святи́телем удобре́ние, Ефре́ма чу́днаго,/ побе́дное принося́щи хвале́ние Бо́гу, я́ко просла́вися.

Ты, свяще́ннейший о́тче, нося́ Учи́телев о́браз кро́тости и смире́ния,/ оте́ц ни́щим, сирота́м и вдови́цам был еси́/ и оби́димым ско́рый засту́пник.

По достоя́нию зван был еси́ от Вели́каго Архиере́я,/ И́же се́де одесну́ю Отца́ на высо́ких, пасти́ избра́нное Его́ ста́до, е́же снабде́ Кро́вию Свое́ю,/ и сие́ упа́с до́бре, вшел еси́ в Небе́сная/ предстоя́ти со святи́тели па́стырей Нача́льнику – Христу́.

Па́стырским венце́м твой верх обложе́н ви́дя, свя́те,/ Херуви́м отве́рзе тебе́ Еде́мская врата́./ И вшел еси́, иде́же дре́во жи́зни и пото́к сла́дости безконе́чныя избра́нных насыща́ет.

Богоро́дичен: Отве́рзшая всем врата́ Небе́сная Рождество́м Твои́м, Ма́ти Де́во,/ отве́рзи нам две́ри ми́лости Твое́й/ и введи́ нас в Оте́чество Небе́сное.

Песнь 3

Ирмо́с: Лук сокруши́ся си́льных/ держа́вою Твое́ю, Христе́,/ и си́лою немощетву́ющии/ препоя́сашася.

Лук напряже́н, ум свой име́л еси́ от ю́ности, о́тче, подража́ти А́нгельскому житию́,/ тем, оста́вив служи́ти кня́зю Изясла́ву,/ прише́л еси́ ко Анто́нию в пеще́ру/ и от него́ научи́лся, ка́ко на врага́ препоя́сатися си́лою.

Любо́вию ко Христу́ распали́вся и обнажи́вся ми́ра,/ обле́клся еси́ в ри́зу спасе́ния/ и, шлем на главу́ твою́ рука́ма блаже́ннаго Ни́кона возложи́в,/ пожи́л еси́, аки А́нгел, на земли́,/ быв вне ми́ра и пло́ти.

Ви́дя тя, преподо́бне, лю́тый велиа́р,/ я́ко, презре́в мир, причти́лся еси́ ко ста́ду свято́му Богоно́сных оте́ц,/ умы́сли о́но распу́дити,/ но ты, прие́мь ору́жие – моли́тву, пост и бде́ние, препоя́сался еси́ на него́ духо́вною си́лою.

Был еси́, повину́яся во всем наказа́нию отца́ твоего́, преподо́бнаго Анто́ния,/ я́ко и́стинен подража́тель Иису́су, да́же до сме́рти послушли́ву,/ те́мже превозне́слся еси́ от Него́ на доброде́тели, препоя́сан си́лою.

Богоро́дичен: Немощству́я душе́ю и те́лом,/ к Тебе́, я́ко к си́льной и многомо́щной Цари́це, Богоро́дице,/ всеусе́рдно притека́ю и молю́ся Ти:/ си́лою свы́ше на доброде́тели препоя́сати мя благоволи́,/ да благода́рно воспою́ Твою́ бла́гость, Препе́тая.

Седа́лен, глас 2:

Моли́твенника те́пла, и церко́внаго благоле́пия люби́теля,/ святи́телем удобре́ние, иера́рха Бо́жия Ефре́ма во дне́шний день хвала́ми почти́м:/ той бо, на земли́ во пло́ти Безпло́тным уподо́бився,/ глаго́лом те́плыя моли́твы посе́кл вся плотски́я стра́сти/ и прия́ дерзнове́ние всем в ну́ждах посо́бствовати.

Сла́ва, и ны́не, Богоро́дичен:

К Тебе́, Моли́твеннице те́плой и неруши́мой Стене́,/ всеусе́рдно прибега́ем, Благослове́нная Богоро́дице Де́во, по́мощи прося́ще,/ изба́ви нас от бед и скорбе́й безме́рных:/ и́маши бо благода́ть и си́лу всем в ну́ждах посо́бствовати.

Песнь 4

Ирмо́с: Услы́шах, Го́споди,/ сла́вное Твое́ смотре́ние/ и просла́вих, Человеколю́бче,/ непости́жимую Твою́ си́лу.

Услы́шав, о́тче, а́нгельское житие́ оте́ц Богоно́сных,/ возгоре́лся еси́ ду́хом к святы́м место́м,/ жела́я бы́ти жития́ сих самови́дец и доброде́телем их подража́тель.

В ца́рствующий град Гре́ческия страны́ хотя́ путь ше́ствовати,/ жела́л еси́, преподо́бне, наста́вника своего́ благослове́ния и моли́твы,/ ве́дый, я́ко с благослове́нием се́яй благослове́нныя пожина́ет кла́сы.

Прие́м, свя́те, две криле́ – благослове́ние и моли́тву отца́ своего́,/ а́ки го́лубь из ковче́га, излете́л еси́ в гре́ки,/ ища́ мы́сленныя ве́тви доброде́телей и по́льзы оте́ц Богоно́сных.

Обре́т, е́же жела́л еси́, прему́дре,/ ви́дев святоле́пных оте́ц, а́ки ке́дры в Лива́не или́ фи́ники, посреде́ рая́ Бо́жия процве́тшии,/ от их же цвето́в прине́сл еси́ нам плоды́ – Студи́йскаго монастыря́ уста́вы.

Богоро́дичен: Дре́во души́ моея́, ле́ностию непло́дное, враг всезло́бный сотвори́,/ но да не посече́тся, я́ко о́ная смоко́вница,/ напо́й от исто́чника бла́гости Твоея́, Ма́ти Де́во,/ да принесу́ плод во вре́мя свое́ – житие́ испра́вление.

Песнь 5

Ирмо́с: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем,

Све́та Пода́тель – Иису́с, ви́дя ду́шу твою́, чистото́ю блеща́щуюся,/ не даде́ тебе́ бы́ти под спу́дом,/ но поста́ви тя на све́щнице архиере́йства,/ да све́тиши в Це́ркви Его́, ю́же снабде́ че́стною Свое́ю Кро́вию.

Возра́довася град Перея́славль, прие́м тя свети́льника свои́м гра́жданом,/ и исплете́ тебе́ вене́ц похвалы́, я́ко просвети́л еси́ Богодухнове́нными словесы́,/ па́че же о́бразом чи́стаго жития́ твоего́.

Жезло́м па́стырским мы́сленнаго во́лка прогна́л еси́ дале́че от ста́да своего́, о́тче,/ е́же на духо́вную па́жить уче́ния безмяте́жно изве́д,/ подтвержда́л еси́ де́тельными свои́ми и Богодухнове́нными труды́.

Обте́кл еси́, а́ки оре́л, круг еписко́пии твоея́,/ разгоня́я мы́сленныя вра́ны, ду́хи зло́бы поднебе́сныя,/ птенцы́ же своя́ во единомы́слии защища́я от всех вра́жиих наве́тов.

Богоро́дичен: Враг мы́сленный мно́жицею зло́бными кова́рствы на ны напа́дает,/ тща́щися в снедь себе́ похи́тити,/ но Ты, Чадолюби́вая Ма́ти, не преда́ждь нас ловле́нию того́,/ и́бо, а́ки пти́ца, зде создала́ еси́ Себе́ хра́мину/ и го́рлица гнездо́ – оби́тель сию́,/ иде́же положи́ла еси́ ны, а́ки птенцы́, Твоя́ певцы́.

Песнь 6

Ирмо́с: Ко Го́споду от ки́та Ио́на возопи́:/ Ты мя возведи́ из глубины́ а́да, молю́ся,/да я́ко Изба́вителю во гла́се хвале́ния,/ и́стины же ду́хом пожру́ Тебе́.

Ко Го́споду любо́вию и моле́нием распаля́емь,/ мно́гия воздви́гл еси́ це́ркви,/ в ни́хже о всех слове́сных твои́х овца́х приноси́л еси́ безкро́вныя же́ртвы,/ помоли́ся ны́не и о нас, мо́лимтися,/ да в ду́се сокруше́нном зде принесе́м хвале́ние на́шему Влады́це.

Укра́сив, а́ки неве́сту кра́сну, благоле́пием и разли́чными ша́рами Це́рковь Христо́ву,/ был еси́ в ней, а́ки златоза́рный свети́льник, доброде́тельми сия́я, Богому́дре Ефре́ме./ Светоно́сными твои́х моли́тв луча́ми,/ в достоле́пную ти похвалу́ просвети́ ум тя хва́лящих.

Седя́ на престо́ле твое́м, о́тче свяще́ннейший,/ мно́гих, во тьме грехолю́бия седя́щих, уче́нием к покая́нию возста́вил еси́:/ нас, прегреше́ньми па́дших, возста́ви,/ да во гла́се хвале́ния и́стинным ду́хом принесе́м жития́ исправле́ние на́шему Влады́це.

Мно́гия труды́ и по́двиги о ста́де твое́м, блаже́нне, подъя́л еси́,/ доне́леже е́ от собла́зн мы́сленнаго врага́ очи́стил,/ нас, тьмо́ю грехолю́бия омраче́нных, наста́ви к све́ту покая́ния моли́твами твои́ми, Ефре́ме досточу́дне.

Богоро́дичен: Лю́тыми и безчи́сленными страстьми одержи́ми, вопие́м к Тебе́,/ в ро́дех всех Преблаже́нная Ма́ти Бо́га на́шего, возведи́ нас к све́ту безстра́стия,/ да во гла́се хвале́ния принесе́м Ти смире́нныя на́ша моли́твы.

Конда́к, глас 8:

Це́ркви Правосла́вной Русской по жела́нию Богоно́снаго Феодо́сия уста́в Студи́йский прине́сшаго,/ во святи́телех же све́тло просия́вшаго/ и ста́до свое́ до́бре упа́сшаго,/ восхваля́ем тя, Ефре́ме,/ я́ко моля́щася Го́сподеви о всех нас.

Песнь 7

Ирмо́с: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших,

Ду́шу твою́ благово́нными цве́ты, посто́м, моли́твою и смиренному́дрием украси́в,/ предста́вил еси́ ю, а́ки неве́сту чи́сту, Влады́це своему́,/ Ему́же предстоя́, пое́ши:/ благослове́н Бог оте́ц на́ших.

Я́коже в жи́зни сей любо́вию к наста́внику своему́, блаже́нному Феодо́сию, привяза́лся еси́,/ та́ко и по кончи́не неотсту́пен пребыва́я,/ на пренесе́ние моще́й того́ с про́чиими епи́скопы приспе́л еси́,/ и́хже нетле́ние ви́дев, воспе́л еси́:/ благослове́н Бог оте́ц на́ших.

От ю́ности зва́нию Влады́ки своего́ после́довав,/ по мно́гих твои́х труде́х, я́же на престо́ле еписко́пии Перея́славския подъя́л еси́,/ позва́н еси́ на Престо́л Небе́сный в ра́йское селе́ние,/ иде́же со святи́тели и преподо́бных чи́ны пое́ши:/ благослове́н Бог оте́ц на́ших.

Зубы́ скрежета́ху возду́шнии бе́сове,/ ви́дяще тя, от земны́х к ве́чной жи́зни А́нгелами проводи́ма,/ но от дале́че стоя́ху:/ непристу́пен бо им был еси́, огражде́н Небе́сным све́том,/ иде́же и о нас моли́ся, о́тче свяще́ннейший Ефре́ме.

Богоро́дичен: Яря́щияся на мя враги́ посрами́, Богоневе́стная Де́во,/ зу́бы их сотри́ и члено́вныя львов мы́сленных сокруши́, молю́ся Ти,/ да без стра́ха и наве́та сих воспою́, Госпоже́:/ Благослове́нна еси́.

Песнь 8

Ирмо́с: О подо́бии зла́те небре́гше треблаже́ннии ю́ноши,/ неизме́нный и живы́й Бо́жий о́браз ви́девше,/ среди́ огня́ воспева́ху:/ осуществова́нная, да пое́т Го́спода вся тварь/ и превозно́сит во вся ве́ки.

Я́ко благоле́пием Це́рковь Христо́ву, свя́те, украси́л еси́,/ сего́ ра́ди и Христо́с по кончи́не твое́й украси́ храм души́ твое́я́,/ те́ло твое́ нетле́нием поче́тше,/ его́же ра́це кла́няющеся, пое́м с пою́щими Го́сподеви во вся ве́ки.

От си́льнаго Воево́ды чино́в Небе́сных,/ в его́же и́мя храм красе́н созда́л еси́,/ введе́н еси́, Ефре́ме, в храм торжеству́ющих/ пе́ти Го́спода во ве́ки.

Апо́столов Первозва́нный, ему́же дом моли́твенный при врате́х созда́л еси́,/ с великому́чеником Фео́дором предусрето́ша тя, о́тче,/ и любе́зно прия́ша в дом Бо́жий Небе́сный, с собо́ю пе́ти Го́спода во ве́ки.

О нас, святи́телю Ефре́ме,/ я́ко имы́й дерзнове́ние к Живонача́льней Тро́ице, не преста́й моля́щи,/ да сподо́бимся дости́гнути в ме́сто кро́ва ди́вна, да́же до до́му Бо́жия,/ иде́же глас ра́дования и пресла́дким шу́мом пою́т Го́спода во ве́ки.

Богоро́дичен: Еди́но Божество́, Тро́ице Свята́я,/ моле́нием Пречи́стыя Богоро́дицы и уго́дника Твоего́ Ефре́ма/ в ра́йских селе́ниих нам да́руй Тя пе́ти во ве́ки вся.

Песнь 9

Ирмо́с: Я́же пре́жде со́лнца свети́льника Бо́га возсия́вшаго,/ пло́тски к нам прише́дшаго из боку́ Деви́чу,/ неизрече́нно воплоти́вшая, Благослове́нная, Всечи́стая,/ Тя, Богоро́дице, велича́ем.

Оста́вив земны́я преде́лы, вшел еси́ в Небе́сная селе́ния,/ иде́же живо́тнаго дре́ва наслажда́яся,/ моли́ не лиши́тися и нам прича́стия о́наго, Ефре́ме преблаже́нне.

Ра́дуется град Перея́славль, помина́я тя, па́стыря своего́,/ мы же торжеству́ем, веселя́щеся, и кла́няемся моще́м твои́м,/ нетле́ние тех ви́дяще, о́тче свяще́ннейший.

Не мо́жет пеще́ра моще́й твои́х, преподо́бне, укры́ти,/ не бо утаи́т свети́льника, в ней тебе́ горя́ща,/ я́ко той похвала́ еси́ и украше́ние.

Нетле́ние моще́й твои́х, свя́те, ви́дяще,/ свет доброде́телей твои́х помина́ем и сла́вим Отца́ Небе́снаго,/ я́ко подаде́ тебе́ просия́ти пред А́нгелы и челове́ки.

Богоро́дичен: Нетле́нным Рождество́м Твои́м, Пречи́стая, от тле́ния свобо́ждшеся,/ воспева́ем немо́лчными гла́сы/ и, покланя́ющеся Рождеству́ Твоему́, Тя, Богоро́дице, велича́ем.

Свети́лен:

Чистоты́ твоея́, о́тче, раче́нием,/ отгна́л еси́ тьму плотски́я стра́сти/ и показа́лся еси́, я́ко светоза́рная звезда́, просвеща́ющая на́ша мы́сли и сердца́, Ефре́ме му́дре,/ отце́в сла́во и преподо́бных украше́ние.

Сла́ва, и ны́не, Богоро́дичен:

Вся красна́ и без поро́ка су́щи, А́нгелов Честне́йшая Де́во,/ души́ моея́ безобра́зие благода́тию Твое́ю в благообра́зие претвори́:/ Ты бо всем еси́ украше́ние и похвала́.

На хвали́тех стихи́ры, глас 1.

Подо́бен: Небе́сных чино́в:

Ми́ром, Богому́дре,/ свы́ше прие́м пома́зание свяще́нное,/ был еси́ па́стырь Христо́ву ста́ду,/ е́же упа́с на па́житех Ева́нгельскаго уче́ния,/ и, приве́д всеце́ло к па́стырей Нача́льнику,/ прия́л еси́ возме́здие до́брых де́лателей,/ с ни́ми́же ны́не ликовству́я,/ помяни́ чту́щих любо́вию па́мять твою́, святи́телю Ефре́ме.

Дом Ду́ха Пресвя́таго был еси́,/ его́же пе́рвее водо́ю смире́ния предочи́стив/ и ми́ром благода́ти и чистоты́ душе́вныя пома́зав,/ свеще́ю доброде́телей просвети́л еси́,/ и, прише́д, Оте́ц с Сы́ном оби́тель в тебе́ сотвори́,/ те́мже мо́лим тя, о́тче свяще́ннейший,/ моли́ся Христу́ Бо́гу,/ да прии́мем и мы благода́ть тобо́ю и ве́лию ми́лость.

Я́ко благоче́стия учи́теля,/ и виногра́да Христо́ва ве́рна де́лателя,/ и святи́теля прече́стна,/ в ле́тнюю па́мять соше́дшеся днесь, лю́дие,/ ублажи́м пе́сньми и пе́нии, глаго́люще:/ о́тче преподо́бне Ефре́ме,/ не забу́ди нас, любо́вию чту́щих твое́ успе́ние,/ но моли́ся Христу́ Бо́гу дарова́ти нам ве́лию ми́лость.

Сла́ва, глас 2:

Святи́теля Христо́ва,/ Богоно́снаго отца́ на́шего Ефре́ма,/ прииди́те днесь, празднолю́бных собо́ри,/ пе́сненными похвала́ми воспое́м, глаго́люще:/ ра́дуйся, па́стырю и наста́вниче слове́сных ове́ц Христо́вых избра́ннейший;/ ра́дуйся, святи́телей че́стное удобре́ние./ Ра́дуйся, пресве́тлый свети́льниче и краси́телю церко́вный;/ ра́дуйся, моле́бниче те́плый всем, ве́рно к тебе́ прибега́ющим./ Нас ны́не, любо́вию па́мять твою́ пра́зднующих/ и ра́достною душе́ю к ра́це моще́й твои́х припа́дающих,/ моли́твами твои́ми от бед изба́ви/ и моли́ся Христу́ Бо́гу/ умири́ти мир и спасти́ ду́ши на́ша.

И ны́не, Богоро́дичен: Спаси́ от бед рабы́ Твоя́, Богоро́дице:

Славосло́вие вели́кое и отпу́ст.

На ма́лой вече́рни

На Го́споди, воззва́х: стихи́ры, глас 1.

Подо́бен: Небе́сных чино́в:

Доброде́телию Боже́ственною,/ я́коже ле́ствицею, на Небе́сныя кру́ги возше́д,/ я́ко со́лнце, во сла́ве ве́чней просвети́лся еси́,/ о́тче Ефре́ме преблаже́нне,/ прие́мля неизрече́нная сия́ния.

Ум просвеще́н стяжа́в,/ ду́шу луча́ми доброде́телей озари́л еси́,/ плотска́я же взыгра́ния воздержа́нием умертви́в,/ свети́льник пресве́тлый яви́лся еси́ в по́стницех./ Тем ны́не во Ца́рствии Бо́жии/ пи́щи приснопребыва́ющия насыща́ешися,/ Боже́ственною сла́вою озаря́емь.

Тро́ица Безнача́льная и Единосу́щная/ избра́ тя в свяще́нное Себе́ селе́ние,/ от мяте́ж бо жите́йских уклони́вся се́рдцем,/ Безпло́тных во пло́ти подража́л еси́, Богоно́се,/ с ни́миже ны́не на Небеси́/ жизнь ве́чную приобре́л еси́.

Сла́ва, глас 6:

Прииди́те, мона́шествующих собо́ри,/ Ефре́ма, благоче́стию подража́теля,/ пе́сньми и пе́ньми восхва́лим/ и, честны́я его́ и многоцеле́бныя мо́щи чту́ще, любе́зно рцем:/ ра́дуйся, Богому́дре о́тче Ефре́ме,/ оби́тели свое́й пресве́тлый свети́льниче./ Ра́дуйся, чи́стый чисте́йшаго Све́та прича́стниче./ Ра́дуйся, Тро́ицы ве́рный служи́телю,/ Е́йже ны́не предстоя́ со А́нгелы,/ моли́ся дарова́ти душа́м на́шим ве́лию ми́лость.

И ны́не, Богоро́дичен:

Богоро́дице, Ты еси́ лоза́ и́стинная,/ возрасти́вшая нам Плод Живота́,/ Тебе́ мо́лимся: моли́ся, Влады́чице, со святы́ми апо́столы/ поми́ловати души́ на́ша.

На стихо́вне стихи́ры, глас 2.

Подо́бен: До́ме Евфра́фов:

Дом и жили́ще/ Ду́ху Пресвято́му,/ прему́дре Ефре́ме, был еси́./ Те́мже и нас до́мы Тому́ соде́лай,/ святу́ю твою́ па́мять пра́зднующих.

Стих: Честна́ пред Го́сподем/ смерть преподо́бных Его́.

Дом и сокро́вище доброде́телей,/ по́стником сла́ва/ и преподо́бным похвала́,/ соверше́нный ве́рою/ ты еси́, Ефре́ме преподо́бне.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Дом неоску́дныя благода́ти/ и гра́ду на́шему утвержде́ние/ иму́ще тя, о́тче, мо́лимся:/ возвы́си рог христиа́н правосла́вных/ моли́твами твои́ми ко Го́споду.

Сла́ва, глас 2:

Я́ко фи́никс, насажде́нный в до́му Бо́жии,/ доброде́телию процве́л еси́, Ефре́ме всехва́льне./ Кре́стное бо ору́жие восприи́м,/ сосу́д яви́лся еси́ Ду́ху Свято́му/ и страсте́й бе́здны изеуши́л еси́ воздержа́нием мно́гим./ Те́мже моли́ся о нас ко Го́споду,/ ве́рою и любо́вию пра́зднующих всечестну́ю па́мять твою́.

И ны́не, Богоро́дичен:

Все упова́ние мое́ на Тя возлага́ю,/ Ма́ти Бо́жия,/ сохрани́ мя под кро́вом Твои́м.

Тропа́рь пи́сан на вели́цей вече́рни. Сла́ва, и ны́не, Богоро́дичен: Гаврии́лу веща́вшу Тебе́, Де́во:

На вели́цей вече́рни

На Го́споди, воззва́х: стихи́ры на 8, глас 2.

Подо́бен: Егда́ от Дре́ва:

Преподо́бне о́тче Ефре́ме преблаже́нне,/ ты, от ю́ности Христа́ Бо́га возлюби́в/ и ле́гкое Его́ и́го на себе́ восприя́в,/ крест свой на ра́мо взем, поне́сл еси́,/ Боже́ственною бо си́лою вооружи́вся,/ на сла́дость вре́менную ника́коже воззре́л еси́,/ терпе́нием же свои́м, посто́м, и бде́нием,/ и ча́стыми моли́твами/ плоть свою́ ду́хови покори́л еси́/ и сего́ ра́ди был еси́ упра́влен во Ца́рствие Бо́жие,/ иде́же ны́не предстоя́ во сла́ве,/ моли́ Христа́ Бо́га спасти́ся душа́м на́шим.

Преподо́бне о́тче Ефре́ме всехва́льне,/ ты, Христа́ Бо́га возлюби́в/ и се́рдце свое́ Боже́ственными заря́ми просвети́в,/ светови́ден весь вои́стинну был еси́./ Тем по достоя́нию блаже́нныя жи́зни сподо́бился еси́,/ ея́же прича́стники и нас соде́лай,/ притека́ющих с ве́рою к честны́м моще́м твои́м,/ непреста́нными твои́ми ко Го́споду моли́твами.

Преподо́бне о́тче Ефре́ме пресла́вне,/ ты любве́ ра́ди Христо́вы,/ вся, я́же на земли́, презре́в, оста́вил еси́/ и, по́стническими труды́ житие́ укра́сив,/ ум свой безстра́стием просвети́л еси́./ Сего́ ра́ди по́стников похвала́/ и мона́шествующих удобре́ние был еси́./ С ни́миже ны́не моли́ Христа́ Бо́га/ спасти́ся душа́м на́шим.

И́ны стихи́ры, глас 4.

Подо́бен: Я́ко до́бля:

Яко до́бля па́стыря тя и наста́вника на́шего,/ преподо́бне о́тче Ефре́ме преблаже́нне,/ соше́дшеся днесь в честне́м хра́ме твое́м/ и чудотво́рныя мо́щи твоя́ обстоя́ще,/ ве́рою и любо́вию сия́ облобыза́ем,/ песньми и пе́нии прославля́я Просла́вльшаго тя/ и дарова́вшаго тя Це́ркви Свое́й пресве́тлое свети́ло,/ сему́ гра́ду утвержде́ние/ и моли́твенника о душа́х на́ших.

Я́ко до́брый де́латель виногра́да Христо́ва,/ виногра́д доброде́телей из У́горския земли́ прене́сл еси́/ и насади́л еси́ его́ при исхо́дищах воды́ присноживо́тныя,/ и́же даде́ во вре́мя свое́ спаси́тельный плод,/ его́же, правосла́вных собо́р, причаща́ющеся,/ духо́вное и теле́сное исцеле́ние прие́млем,/ о́бщаго Врача́ душ на́ших, Христа́, прославля́юще,/ Ему́же ны́не со А́нгелы предстои́ши/ и мо́лишися о душа́х на́ших.

Я́ко светоблиста́тельная заря́,/ просия́л еси́ на тве́рди Це́ркве Христо́вы./ По́стническими труды́ житие́ твое́ украси́л еси́,/ ум над страстьми́ воцари́в/ и плоть поработи́в ду́хови,/ во пло́ти живя́ на земли́,/ земный А́нгел и Небе́сный челове́к был еси́./ Те́мже, те́лом со земны́ми водворя́яся,/ ду́хом с Вы́шними мо́лишися о душа́х на́ших.

Сла́ва, глас 8:

Преподо́бне и Богоно́се о́тче Ефре́ме,/ ты, пресла́вных Христо́вых му́чеников,/ Рома́на и Дави́да,/ непра́ведное от бра́та своего́ заколе́ние узре́в,/ Боже́ственным жела́нием распали́лся еси́/ и, земна́я вся мудрова́ния жите́йская,/ я́ко паучи́ну, ни во что вмени́в,/ Христа́ Еди́наго возлюби́л еси́./ Сего́ ра́ди приста́нища доше́д,/ це́рковь прекра́сну страстоте́рпцем Христо́вым воздви́гл еси́/ и, оби́тель че́стну соста́вив,/ мно́жества мона́хов наста́вник был еси́,/ иде́же ны́не лежи́т всечестно́е и свято́е те́ло твое́,/ Ефре́ме, о́тче наш,/ притека́ющим с ве́рою исцеле́ние неоску́дно подава́ющее/ и душетле́нныя стра́сти и бесо́в мно́жества прогоня́ющее./ Тем, христоимени́тое мона́хов мно́жество,/ твои́ми чудесы́ удивля́емо,/ ра́достно от души́ вопие́т к тебе́:/ Богоблаже́нне и преподо́бне о́тче наш Ефре́ме,/ моли́ Христа́ Бо́га/ умири́ти мир и спасти́ ду́ши на́ша.

И ны́не, Богоро́дичен: Царь Небе́сный:

Та́же вход, и проки́мен дне, и чте́ния преподо́бническая.

На ли́тии стихи́ры, глас 1:

Наста́, Богоно́се, со́лнца светле́йший твой пра́здник,/ озаря́яй приходя́щия к тебе́ с ве́рою:/ душе́вным бо страсте́м и теле́сным подае́ши исцеле́ние/ от свята́го твоего́ телесе́, Ефре́ме преподо́бне,/ моли́твенниче о душа́х на́ших.

Чу́вственныя стра́сти укроти́в/ воздержа́ния брозда́ми, о́тче Ефре́ме,/ и ре́вность на земли́ Безпло́тных показа́в,/ все жела́ние плотско́е ду́хови покори́л еси́./ Те́мже ны́не во дво́рех Небе́сных водворя́яся,/ моли́ о душа́х на́ших.

Све́тлая твоя́ па́мять, преподо́бне о́тче Ефре́ме,/ просвеща́ет сердца́ на́ша./ С любо́вию бо чту́ще тя,/ врачевство́ страсте́м, неудо́бь цели́мым, прие́млем./ Сего́ ра́ди прославля́ем просла́вльшаго тя Го́спода,/ Его́же моли́ спасти́ и просвети́ти ду́ши на́ша.

Глас 8: Преподо́бне о́тче, всече́стне Ефре́ме,/ Боже́ственною доброде́телию, я́коже колесни́цею,/ на высоту́ Небе́сную восте́кл еси́,/ иде́же ду́хом побе́дныя по́чести прие́мля,/ те́ло твое́ многотру́дное,/ я́ко ми́ро многоце́нное, во гро́бе оста́вил еси́,/ боле́знем исцеле́ния источа́ющее/ и ду́хи лука́вствия прогоня́ющее./ Те́мже тя ублажа́ем, всече́стне.

Сла́ва, глас 6:

Ра́дуйся и весели́ся, Русская всеосвяще́нная Це́ркве/ со архиере́и и свяще́нники,/ мона́си же и прости́и,/ блаже́ннаго Ефре́ма днесь па́мять почита́юще,/ духо́вно соше́дшеся, пра́зднуем,/ и, честны́й его́ гроб обсто́яще, любе́зно поклони́мся,/ и, моля́щеся, усе́рдно зове́м:/ ра́дуйся, преблаже́нне Ефре́ме,/ свети́льниче пресве́тлый,/ врачу́ боля́щим и моли́твенниче ко Спа́су Христу́ Бо́гу на́шему/ о и́же ве́рою и любо́вию притека́ющих к моще́м твои́м.

И ны́не, Богоро́дичен: Творе́ц и Изба́витель мой, Пречи́стая:

На стихо́вне стихи́ры, глас 5.

Подо́бен: Ра́дуйся:

С ве́рою и любо́вию, празднолю́бцы, соше́дшеся,/ псалмы́ и пе́сньми восхва́лим днесь/ Небе́снаго челове́ка и земна́го А́нгела./ О всеблаже́нне преподо́бне,/ по́стником похвало́,/ моли́ся о нас ко Го́споду, Ефре́ме, о́тче наш,/ поми́ловатися душа́м на́шим.

Стих: Честна́ пред Го́сподем/ смерть преподо́бных Его́.

Честны́й и светоно́сный, преподо́бне, твой пра́здник,/ испо́лнен есть ра́дости и весе́лия духо́внаго./ Те́мже соше́дшеся, мона́хов мно́жество/ и христоимени́тии лю́дие,/ любо́вию восхваля́юще,/ ублажи́м неизрече́нная чудодея́ния твоя́,/ и́миже, я́ко крин во удо́ле, процве́л еси́,/ облагоуха́яй ду́ши на́ша и чу́вства,/ Ефре́ме о́тче наш,/ моли́ спасти́ся душа́м на́шим.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Боже́ственным уязви́вся жела́нием,/ преподо́бне о́тче наш Ефре́ме,/ и крест свой на ра́мо восприи́м,/ невозвра́тно после́довал еси́ Влады́це Христу́/ и плотска́я вся мудрова́ния умертви́л еси́./ Сего́ ра́ди насле́довал еси́ кро́тких зе́млю./ Тем неизрече́ннаго о́наго весе́лия наслажда́яся,/ помина́й нас, творя́щих всечестну́ю па́мять твою́.

Сла́ва, глас 8:

Мона́хов мно́жества,/ наста́вника тя почита́ем, о́тче наш Ефре́ме,/ твое́ю бо стезе́ю пра́во вои́стинну ходи́ти позна́хом,/ блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче и преподо́бных соприча́стниче и пра́ведных,/ с ни́ми́же моли́ся Го́сподеви/ поми́ловатися душа́м на́шим.

И ны́не, Богоро́дичен: Безневе́стная Де́во:

На благослове́нии хле́бов тропа́рь преподо́бнаго, два́жды, и Богоро́дице Де́во: еди́ножды.

Тропа́рь преподо́бнаго, глас 1:

Боже́ственною свы́ше просвети́вся благода́тию, преподо́бне,/ мно́гим терпе́нием во вре́менной жи́зни по́двиг соверши́л еси́./ Те́мже источа́еши чуде́с благода́ть/ всем, с ве́рою приходя́щим к моще́м твои́м, Ефре́ме преблаже́нне./ Сего́ ра́ди зове́м:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

На у́трени

На Бог Госпо́дь: тропа́рь, два́жды. Сла́ва, и ны́не, Богоро́дичен воскре́сен.

По 1-м стихосло́вии седа́лен, глас 3:

Я́коже безпло́тен, о́тче, на земли́ пожи́л еси́/ и превознося́щагося врага́ смири́л еси́ вы́ю./ Те́мже ны́не с невеще́ственными во́инствы водворя́яся, блаже́нне,/ и та́мо су́щаго блаже́нства наслажда́яся,/ помина́й нас, днесь пра́зднующих па́мять твою́,/ да вси ра́достными гла́сы воспева́ем Го́спода,/ неоску́дную благода́ть исцеле́ний тебе́ дарова́вшаго.

Сла́ва, и ны́не, Богоро́дичен:

Боже́ственная была́ еси́ сень Сло́ва, Еди́на Пречи́стая Де́во,/ чистото́ю А́нгелы превосходя́щая,/ мене́, па́че всех персть бы́вшаго, оскверне́нна плотски́ми прегреше́нии,/ очи́сти Твои́ми моли́твами,/ Боже́ственными вода́ми омыва́ющи и подаю́щи, Чи́стая, ве́лию ми́лость.

По 2-м стихосло́вии седа́лен, глас 4.

Подо́бен: Ско́ро предвари́:

Благоче́стно крест свой взем, Христу́ после́довал еси́,/ воздержа́нием плотска́я мудрова́ния умертви́в,/ и, на доброде́тели ле́ствицу возше́д, Влады́ку и Го́спода возвели́чил еси́,/ и Его́ уго́дником, Рома́ну и Дави́ду, храм че́стен воздви́гл еси́,/ в не́мже ны́не твоя́ честны́я мо́щи лежа́т,/ источа́юще исцеле́ния с ве́рою притека́ющим к тебе́, о́тче наш, Ефре́ме преподо́бне.

Сла́ва, и ны́не, Богоро́дичен:

Де́во Всенепоро́чная, Пресу́щественнаго Бо́га ро́ждшая челове́ком,/ со преподо́бным Того́ непреста́нно моли́ о нас,/ согреше́нием оставле́ние и жития́ исправле́ние нам пре́жде конца́ дарова́ти,/ ве́рою пою́щим Тя по до́лгу, Еди́на Всепе́тая.

На полиеле́и, седа́лен, глас 8:

Ца́рствовав над страстьми́ плотски́ми, А́нгелом подо́бно житие́ на земли́ име́л еси́/ и, и́ноков мно́жество собра́в, уче́нием твои́м просвети́л еси́, преподо́бне,/ в трие́х бо Ипоста́сех Еди́наго Бо́га сла́вити наказа́л еси́./ Ему́же ны́не предстоя́ во сла́ве ве́чней, о́тче наш Ефре́ме Богоно́се,/ моли́ согреше́нием оставле́ние дарова́ти/ с ве́рою притека́ющим к моще́м твои́м/ и почита́ющим всечестну́ю па́мять твою́.

Сла́ва, и ны́не, Богоро́дичен:

Небе́сную дверь и ковче́г,/ всесвяту́ю го́ру, све́тлый о́блак,/ воспои́м Мари́ю, неопали́мую купину́, слове́сный рай,/ Е́вино воззва́ние, вселе́нней всей вели́кий сосу́д,/ я́ко спасе́ние в не́м соде́лася ми́рови и оставле́ние дре́вних согреше́ний./ Е́йже усе́рдно возопии́м:/ моли́ Христа́ Бо́га согреше́нием оставле́ние дарова́ти/ благоче́стно покланя́ющимся Пресвято́му Рождеству́ Твоему́.

Та́же степе́нна, 1-й антифо́н, 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех,/ я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра самогла́сна, глас 6:

Преподо́бне о́тче,/ ми́ра красоту́ и пи́щи вре́менное наслажде́ние возненави́дев,/ мона́шеское житие́ па́че возлюби́л еси́,/ тем А́нгелом собесе́дник быти сподо́бился еси́,/ и свети́льник многосве́тлый был еси́ Русския земли́./ Помина́й нас, соверша́ющих всечестну́ю па́мять твою́:/ мы бо, ча́да твоя́ и о́вцы слове́сных твои́х уче́ний,/ тебе́ на по́мощь призыва́ем,/ прося́ще тобо́ю от Христа́ Бо́га прия́ти мир и ве́лию ми́лость.

Кано́н Богоро́дицы со ирмосо́м на 6, его́же краестро́чие сицево́: Четве́ртая песнь Всехва́льней Отрокови́це. Глас 4.

Песнь 1

Ирмо́с: Триста́ты кре́пкия,/ Рожде́йся от Де́вы,/ безстра́стия во глубине́,/ души трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́/ побе́дное воспою́ пе́ние.

Сотрясо́шася лю́дие, смято́шася язы́цы,/ ца́рствия же держа́вная уклони́шася, Чи́стая, от стра́ха Рождества́ Твоего́:/ прии́де бо Царь мой, и низложи́ мучи́теля, и мир от тли изба́ви.

Жили́ще Свое́ Живы́й в Вы́шних, к челове́ком соше́д, освяти́, Христе́,/ и непоколеби́мо яви́:/ Еди́на бо по рождестве́ де́вства сокро́вище, Зижди́теля ро́ждши, пребыла́ еси́.

И преподо́бнаго кано́н на 8, глас то́йже.

Песнь 1

Ирмо́с: Мо́ря че́рмную пучи́ну/ невла́жными стопа́ми/ дре́вний пешеше́ствовав Изра́иль,/крестообра́зныма Моисе́овыма рука́ма/ Амали́кову си́лу в пусты́ни победи́л есть.

Твоя́ похвалы́ хотя́щему нача́ти, Ефре́ме,/ моли́твами свои́ми посли́ ми благода́ть Ду́ха,/ стра́сти души́ и телесе́ очища́ющую и ум просвеща́ющую,/ я́ко да, ра́дуяся, воспою́ твоя́ по́двиги, преподо́бне.

Просвеще́нием Трисо́лнечнаго Божества́ озари́вея, прему́дре,/ свети́льник светоза́рный яви́лся еси́,/ просвеща́яй ве́рою чту́щих светоно́сную па́мять твою́.

Весь Тро́ицы быв жили́ще,/ та́мо все душе́вное жела́ние возложи́л еси́, преподо́бне./ Сего́ ра́ди беземе́ртную восприя́л еси́ па́мять и жизнь неконча́емую.

Богоро́дичен: Без се́мене О́тчею во́лею от Боже́ственнаго Ду́ха Бо́жия зачала́ еси́ Сы́на/ и пло́тию родила́ еси́:/ И́же из Отца́ без ма́тере,/ нас же ра́ди из Тебе́ без отца́.

Песнь 3

Ирмо́с: С высоты́ снизше́л еси́ во́лею на зе́млю/ превы́шше вся́каго нача́ла/ и смире́нное возне́ся еси́/ из а́да преиспо́дняго/ естество́ челове́ческое:/ несть бо свят, па́че Тебе́, Человеколю́бче.

Очища́ется челове́ков существо́,/ Тобо́ю присовоку́плышееся нестерпи́мому Боже́ственному огню́,/ я́ко сокрове́нный, Пречи́стая Де́во, в Тебе́ хлеб испе́кшийся,/ И́же и Тебе́ неврежде́нну сохра́ншему.

Ка́я Сия́, Я́же вои́стинну близ Бо́га?/ я́ко превозше́дши вся А́нгельский чи́ны,/ Еди́на добро́тою де́вства, я́ко Ма́ти сия́ющи Вседержи́теля.

Ин

Ирмо́с: Весели́тся о Тебе́ Це́рковь Твоя́, Христе́, зову́щи/ Ты моя́ кре́пость, Го́споди,/ и прибе́жище, и утвержде́ние.

Напо́лнив се́рдце свое́ сле́зными пото́ки, преподо́бне Ефре́ме,/ плодоно́сно вся́ких доброде́телей соде́лал еси́ то,/ износя́щее чуде́с твои́х показа́ние, преблаже́нне

Ны́не, преподо́бне о́тче Ефре́ме,/ с ли́ки проро́ков, и апо́столов, и му́чеников,/ преподо́бных же и пра́ведных во Све́те Святы́я Тро́ицы соводворя́яся,/ помина́й чад свои́х, ве́рно творя́щих па́мять твою́.

Воздержа́нием кра́йним плоть свою́ умертви́л еси́, преподо́бне Ефре́ме./ Сего́ ра́ди, Ду́хом Боже́ственным окрили́вся,/ дости́гл еси́ священнонача́льных служи́телей,/ иде́же Небе́сных Бо́жиих Безпло́тных ра́дования.

Богоро́дичен: Неора́нныя ни́вы бразда́ яви́лася еси́, Клас Живо́тный ро́ждшая/ и всем причаща́ющимся безсме́ртию Хода́тая,/ во святы́х Свята́го и на святы́х почива́ющаго.

Седа́лен, глас 4:

Страстно́е покори́л еси́ пло́тское мудрова́ние/ и ху́ждшее порабо́тил еси́ лу́чшему,/ о́тче Ефре́ме пресла́вне,/ сокруши́л еси́ бесо́вския ко́зни посто́м/ и возсия́л еси́ в ми́ре, я́ко луча́ со́лнечная,/ сия́нии твои́х доброде́телей./ Сего́ ра́ди тя воспева́ем.

Сла́ва, и ны́не, Богоро́дичен:

Пое́м Тя, Богоневе́сто, Ма́ти Христа́ Бо́га,/ сла́вяще Рождество́ Твое́ непостижи́мое,/ И́мже изба́вихомся льсти диа́воли и вся́ких бед./ Влады́чице Богоро́дице, ве́рно вопие́м Ти:/ поми́луй ста́до Твое́, Еди́на Пречи́стая.

Песнь 4

Ирмо́с: Седя́и в сла́ве на Престо́ле Божества́/ во о́блаце ле́гце,/ прии́де Иису́с Пребоже́ствеиный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Поживе́ с челове́ки, ви́дим быв Неви́димый,/ во зра́це Сый непостижи́маго Божества́,/ и, вообра́жен из Тебе́, Отрокови́це, в чужде́е,/ ве́дущих Тя Чи́стую Богома́терь спаса́ет.

Прия́т в веще́ственне Де́ва/ невеще́ственнаго в прича́стии вещества́, Младе́нца от Не́я бы́вша,/ те́мже во дву Существу́ Еди́н познава́ется, Плотоно́сец Бог и Челове́к пресу́щественный.

По рождестве́ Тя Де́ву И́же в Де́ву Тя всели́ся,/ и ро́ждся без се́мене Сло́во, и Бог пребы́сть,/ и в рождестве́ Де́ву сохрани́,/ я́ко Влады́ка и Зижди́тель всея тва́ри.

Ин

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Житие́ твое́, о́тче Ефре́ме, чу́дно на земли́ показа́л еси́,/ вели́кое поще́ние и смире́ние,/ сего́ ра́ди на Небе́сех жизнь ве́чную насле́довал еси́,/ моли́ спасти́ся от бед пою́щим тя.

Посто́м и моли́твами те́ло твое́, о́тче Ефре́ме, изнури́л еси́,/ сего́ ра́ди сподо́бился еси́ ви́дети неизрече́нная блага́я, я́же святы́м угото́вана,/ с ни́ми́же, о́тче, о нас моли́ся.

Ду́ху Пресвято́му храм, о́тче, был еси́,/ и живо́тных вод река́ наполня́ема,/ и основа́ние Це́ркве непоколеби́мо, и и́ночествующих утвержде́ние, Ефре́ме преподо́бне.

Богоро́дичен: Покро́в, и заступле́ние, и прибе́жище буди́ ми, Де́во, рабу́ Твоему́,/ и исцели́ мя, Влады́чице, от безме́рных зол мои́х/ воспева́ти Тя, Пречи́стая:/ сла́ва Рождеству́ Твоему́.

Песнь 5

Ирмо́с: Ны́не воста́ну, проро́чески рече́ Бог,/ ны́не просла́влюся, ны́не вознесу́ся,/ па́дшаго прие́м от Де́вы/ и к све́ту у́мному вознося́й Моего́ Божества́.

Дом Тя сла́вы, го́ру Бо́жию святу́ю, Чи́стая,/ Неве́сту, черто́г, храм освяще́ния/ Сын Бо́жий,в Тя всели́выйся, и рай сла́дости присносу́щныя нам соде́ла.

Плоть от кро́ве де́вственныя прия́л еси́, Христе́,/ безсе́менну, пречи́сту, Ипоста́сну, слове́сну и у́мну,/ одушевле́нну, де́йственну, хоте́тельну, самовлады́чну и самовла́стну.

Мучи́телей ра́зум де́вственное посрами́ чре́во:/ Младе́нец бо я́зву а́спидную душегу́бную испыта́ руко́ю/ и, отсту́пника го́рдаго низло́ж, ве́рных под но́зе покори́.

Ин

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Я́ко преоби́дев тле́нная,/ ве́чная, о́тче, восприя́л еси́ по нело́жному словеси́:/ проси́те и прии́мете./ Те́мже, я́ко проси́л еси́, сия́ по досто́инству прия́л еси́.

Ме́сто, е́же сподо́бися прия́ти честны́я мо́щи тво́я, преподо́бне, освяти́ся/ и по мно́гим страна́м прославля́емо есть,/ я́ко в себе́ мо́щи твоя́ иму́щее.

Исцеле́ния соде́ловают честны́я мо́щи твоя́, Ефре́ме,/ и отго́нят разли́чныя неду́ги от челове́к,/ и укрепля́ют ум их восхвали́ти труды́ твоя́, всече́стне.

Богоро́дичен: Христа́ нам ро́ждшая, Пречи́стая Де́во, Богора́дованная Влады́чице,/ спаси́ град и лю́ди, на Тя упова́ющия,/ Богоро́дице Всенепоро́чная.

Песнь 6

Ирмо́с: Прии́дох во глубины́ морски́я,/ и потопи́ла мя есть бу́ря мно́гих грехо́в,/ но, я́ко Бог, из глубины́ возведи́ живо́т мой,/ Многоми́лостиве.

Дре́вле у́бо прельсти́ мя змий и умори́ мя прама́терию мое́ю Е́вою,/ ны́не же, Чи́стая, Тобо́ю Созда́вый мя/ из нетле́ния воззва́.

Бе́здна Тя бе́здну неизрече́нно благоутро́бия, Отрокови́це, избра́нную показа́ чуде́с,/ и́бо из Тебе́ мо́лниею Божества́/ би́сер Христо́с возсия́.

Ин

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́цшися/ ра́ди ми́лости от ребр Твои́х/ исте́кшею Кро́вию.

Моли́твами предваря́я к Бо́гу и Тому́ предстоя́ со А́нгелы,/ за весь мир помоли́ся, брань неприя́зненну всю́ду потреби́ти/ и побе́ду изве́стну да́ти на супоста́ты стране́ на́шей.

Гроб честна́го твоего́ телесе́ показа́л еси́ ве́рным лю́дем/ душа́м освяще́ние, телесе́м здра́вие и от страсте́й избавле́ние,/ от твои́х бо моще́й исцеле́ния почерпа́ем.

Глаго́лов и зако́нов Влады́чних испо́лнитель быв,/ испо́лнился еси́, преподо́бне о́тче Ефре́ме, Боже́ственных даро́в./ Тем и чуде́с лучи́ всем испусти́л еси́.

Богоро́дичен: Изсуши́вшая сады́ безбо́жных люде́й, Пренепоро́чная Де́во, Свои́м Прозябе́нием,/ прозя́бшую во мне зло́бу искорени́, Богоневе́сто.

Конда́к, глас 8:

Я́ко Богоявле́нная Русская звезда́,/ днесь сия́я чудесы́, яви́лся еси́, преподо́бне о́тче Ефре́ме,/ Тем не преста́й моля́ся о ста́де свое́м,/ сохраня́яй оте́чество твое́, град же и лю́ди,/ и́же тебе́ ве́рою почита́ющих/ и к честны́м моще́м твои́м усе́рдно притека́ющих,/ да велегла́сно тебе́ вопие́м:/ ра́дуйся, Богому́дре Ефре́ме, о́тче наш.

И́кос:

Я́ко свети́льник всесве́тлый/ и во пло́ти А́нгел, яви́лся еси́, преподо́бне,/ и, я́ко живота́ дре́во ра́йское, ве́рою быв возраща́емь,/ поще́нием и моли́твами свои́ми процве́л еси́./ Сего́ ра́ди Небе́сную благода́ть прии́м,/ врач изря́дный боля́щим показа́лся еси́./ Исцеля́еши бо телеса́ неду́жных и ду́ши/ ве́рою притека́ющих к моще́м твои́м./ Тем, мо́лимся, моли́ся о ста́де свое́м/ и сохраня́й оте́чество свое́, гра́ждан же и лю́ди, да зове́м ти:/ ра́дуйся, преподо́бне Ефре́ме, о́тче наш.

Песнь 7

Ирмо́с: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди,/ Бо́же оте́ц на́ших.

Привлачи́т мя к пе́нию любо́вь де́вственная,/ огнь, я́же в се́рдцы, вопи́ти Ма́тери и Де́ве:/ Благослове́нная, Госпо́дь си́лам с Тобо́ю.

Превышши тва́ри явйлася еси́,/ я́ко Творца́ рожда́ли и Го́спода./ Темже Ти вопию:/ Богоро́дице Благослове́нная, Госпо́дь си́лам с Тобо́ю.

Тро́ичен: Госпо́дство Тя Еди́но чтый, в Трие́х Свяще́ниих неразде́льно,/ воспева́ю Триипоста́сное Естество́, Благослове́нная, взыва́я Тебе́,/ Я́же вся управля́ющая.

Ин

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Приле́жныя моли́твы, по́двиги же и труды́ твоя́ почита́юще,/ сла́дости уче́ния твоего́ почерпа́ем, преподо́бне о́тче Ефре́ме,/ и́мже и научи́л еси́ воспева́ти Триипоста́сное Существо́:/ оте́ц на́ших Бо́же, благослове́н еси́.

Чу́дно житие́ твое́, и кончи́на безсме́ртна, преподо́бне о́тче Ефре́ме./ Сего́ ра́ди тя Христо́с свы́ше украси́ венце́м пресве́тлым/ и чуде́с дея́нием обогати́, и́миже просвеща́еши нас, науча́я вопи́ти:/ благослове́н Бог оте́ц на́ших.

Яви́лся еси́ гра́ду Торжку́, Ефре́ме Богоблаже́нне, столп непоколеби́м,/ стена́ неруши́мая, вели́кое избавле́ние от бед и исто́чник благода́ти неоску́дный,/ подаю́щи всем исцеле́ние, зову́щим при́сно:/ оте́ц на́ших Бо́же,, благослове́н еси́.

Богоро́дичен: Без се́мене О́тчею во́лею заче́нши Творца́ всех, Христа́ Бо́га,/ неизрече́нно родила́ еси́,/ Его́же моли́, я́ко дерзнове́ние иму́щи к Нему́,/ да ны спасе́т, вопию́щих Ему́:/ Бо́же, благослове́н еси́.

Песнь 8

Ирмо́с: Изба́вителю всех Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.

От ребра́ Ада́мова, созда́вый Тя/ от Твоего́ де́вства воплоти́ся, И́же всех Госпо́дь,/ Его́же пою́ще, вопие́м:/ вся дела́, благослови́те, по́йте Го́спода/ и превозноси́те Его́ во ве́ки.

В се́ни Авраа́м узре́ е́же в Тебе́, Богоро́дице, та́инство,/ Сы́на бо Твоего́ безпло́тнаго прия́т, поя́:/ вся дела́, благослови́те, по́йте Го́спода/ и превозноси́те Его́ во ве́ки.

Равночи́сленный Тро́ицы спасло́ есть Твоего́ де́вства преображе́ние,/ в де́вственных бо телесе́х попира́ху пла́мень, Отрокови́це, вопию́ще:/ благослови́те, по́йте Го́спода/ и превозноси́те Его́ во ве́ки.

Ин

Ирмо́с: Ру́це распросте́р, Дании́л/ льво́в зия́ния в ро́ве затче́,/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.

Любо́вию и ве́рою чту́ще па́мять твою́,/ приле́жно мо́лим тя, преподо́бне о́тче Ефре́ме:/ непреста́нно за ны Христа́ Бо́га моли́ вку́пе с Рома́ном и Дави́дом,/ непра́ведное заколе́ние любве́ ра́ди Бо́жия претерпе́вшими,/ и́мже и храм че́стен воздви́гл еси́ во сла́ву Христа́ Бо́га, поя́ при́сно:/ вся дела́ Госпо́дня, Го́спода по́йте/ и превозноси́те Его́ во ве́ки.

Лику́ют на Небесе́х чи́нове а́нгельстии, блаже́нне Ефре́ме,/ и ве́рных собо́ри на земли́ твою́ па́мять похваля́ют, пою́ще:/ благослови́те, вся дела́ Госпо́дня, Го́спода.

Помоли́ся Христу́ Бо́гу, всеблаже́нне Ефре́ме, о приходя́щих к тебе́ с ве́рою/ и хотя́щих от Тебе́ почерпсти́ исцеле́ния неоску́днаго и благода́ти, пою́щих:/ благослови́те, вся дела́ Госпо́дня, Го́спода.

Богоро́дичен: Из пречи́стаго Твоего́ чре́ва, Богома́ти Влады́чице,/ Небе́снаго дождя́ Ка́пля нам ука́ну на омове́ние скверн душе́вных,/ на здра́вие телесе́м и на прогна́ние лука́вых духо́в./ Те́мже Тя блажи́м, Чи́стую, во ве́ки.

Песнь 9

Ирмо́с: Сокрове́нное Бо́жие неизрече́нное/ в Тебе́ соверша́ется я́вственное та́инство,/ Де́во Пречи́стая,/ и́бо Бог из Тебе́ воплоти́ся за милосе́рдие./ Те́мже Тя я́ко Богоро́дицу велича́ем.

Зрим, я́ко крин, Тя, ри́зою обагре́ною украше́ну, Пречи́стая, Боже́ственнаго Ду́ха,/ посреде́ те́рния сия́ющу и благоуха́ния исполня́ющу/ и́же Тебе́ и́скренно велича́ющих.

Тле́нное прии́м челове́ческое естество́ из Твоего́, Всенепоро́чная, чре́ва Нетле́нный,/ в Себе́ показа́ нетле́нно за благоутро́бие,/ те́мже Тя я́ко Богоро́дицу велича́ем.

Я́же все́ми влады́чествующая тва́рьми,/ лю́дем Твои́м да́руй побе́дное одоле́ние,/ врага́ полага́ющи примири́тельна Це́ркви,/ да Тя я́ко Богоро́дицу велича́ем.

Ин

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

На земли́, я́ко А́нгел, пожи́л еси́ пло́тию/ и, я́ко безпло́тен, безпло́тныя враги́ под но́зе свои́ покори́л еси́,/ чистоту́ стяжа́в посто́м и моли́твами./ Тем ны́не со А́нгелы на Небесе́х све́тло лику́я,/ за ны Христо́ви помоли́ся.

Ны́не вхо́дят во святы́й храм сей свяще́нницы и про́стии, бога́тии же и у́бозии,/ и́же вси, припа́дающе к честны́м моще́м твои́м,/ про́сят от Тебе́ получи́ти здра́вие телесе́м/ и спасе́ние душа́м твои́ми к Бо́гу моли́твами.

Ны́не у́бо помоли́ся Го́споду, всечу́дне Ефре́ме,/ я́ко да прикоснове́нием свяще́нных моще́й твои́х/ слепи́и восприи́мут прозре́ние, хроми́и хожде́ние/ и неду́жнии вси здра́вие и исцеле́ние твои́ми к Бо́гу моли́твами.

Богоро́дичен: Я́же все́ми влады́чествующая тва́рьми,/ лю́дем Твои́м да́руй побе́ду и одоле́ние,/ непокори́выя враги́ покоря́я под но́зе ве́рным, да Тя вси я́ко Богоро́дицу велича́ем.

Свети́лен:

Мирска́го пристра́стия, я́ко от скве́рны, уклони́вся,/ а́лчбою и жа́ждою плоть свою́ увяди́л еси́, о́тче./ Тем Небе́сною сла́вою со А́нгелы обогати́лся еси́,/ с ни́миже непреста́нно моли́ о нас Христа́ Бо́га, преподо́бне Ефре́ме.

Сла́ва, и ны́не, Богоро́дичен:

Тя Предста́тельницу, вси гре́шнии, и́мамы, о Пресвята́я Де́во Влады́чице!/ Ты ми благопреме́нна сотвори́ Сы́на Твоего́/ ма́терними Свои́ми моли́твами.

На хвали́тех стихи́ры на 4, глас 5.

Подо́бен: Преподо́бне о́тче:

Преподо́бне о́тче и Богоно́се Ефре́ме,/ во вре́менией жи́зни подвиза́вся,/ моли́твами, посто́м и воздержа́нием мно́гим/ ду́шу свою́ с те́лом очи́стил еси́./ Сего́ ра́ди Ду́ху Свято́му прекра́сная оби́тель яви́лся еси́,/ И́же сла́вна тя, преблаже́нне, вселе́нней соде́ла/ и в чудесе́х вели́каго свети́льника показа́,/ просвети́вшаго су́щих во мра́це./ Тем мы я́ко наста́вника тя мона́хов/ велему́дренно ублажа́ем.

Преподо́бне о́тче и Богоно́се Ефре́ме,/ ты, на Бо́га упова́ние во все́м возложи́в,/ це́рковь прекра́сну страстоте́рпцем Христо́вым Рома́ну и Дави́ду воздви́гл еси́,/ иде́же и оби́тель че́стну соста́вил еси́,/ в пребыва́ние хотя́щим спасти́ся,/ сам о всех моле́ние принося́ ко Влады́це, Христу́ Бо́гу на́шему,/ Ему́же моли́ся, преподо́бне,/ пода́ти душа́м на́шим мир и ве́лию ми́лость.

Преподо́бне о́тче и Богоно́се Ефре́ме,/ свети́льника тя стяжа́вше,/ свяще́нную твою́ па́мять восхваля́ем вси,/ свяще́нными пе́сньми тя ублажа́юще./ Ты це́рковь Бо́жию украси́л еси́/ и ча́да твоя́ уче́ньми просвети́л еси́./ Тем, ны́не любо́вию и со стра́хом/ припа́дающе к честны́м моще́м твои́м, преподо́бне,/ мо́лимся тобо́ю прии́ти́ нам ве́лию ми́лость.

Сла́ва, глас 6:

Преподо́бне о́тче Ефре́ме,/ не дал еси́ сна свои́ма очи́ма,/ ни ве́ждома свои́ма дрема́ния,/ до́ндеже ду́шу и те́ло от страсте́й свободи́в,/ угото́вал еси́ себе́ Пресвяте́й Тро́ице жили́ще,/ прише́д бо, Христо́с со Отце́м и Ду́хом/ оби́тель в тебе́ сотвори́./ Тем, я́ко име́я дерзнове́ние ко Го́споду,/ великопропове́дниче Христо́в преподо́бне Ефре́ме,/ моли́ся о душа́х на́ших.

И ны́не, Богоро́дичен:

Богоро́дице, Ты еси́ лоза́ и́стинная,/ возрасти́вшая нам Плод Живота́,/ Тебе́ мо́лимся; моли́ся, Влады́чице, со святы́ми апо́столы/ поми́ловатися душа́м на́шим.

Славосло́вие вели́кое.

На литурги́и

Блаже́нны от кано́на пе́сни 3-я и 6-я. Апо́стол к Гала́том, зача́ло 213. Ева́нгелие от Луки́, зача́ло 24. Прича́стен: В па́мять ве́чную.

Моли́тва

О пресла́вный Госпо́день уго́дниче и Бо́гом со́браннаго зде о тебе́ ста́да Христо́ва предо́брый па́стырю и наста́вниче, преподо́бне и Богоно́се о́тче наш Ефре́ме! Приими́ убо́гое сие́ на́ше и ма́лое от любви́ душе́вныя приноси́мое тебе́ моле́ние и не пре́зри нас, гре́шных, тре́бующих твоея́ по́мощи и заступле́ния. Се бо мы, предста́теля тя в ну́ждах непосты́днаго стяжа́вше, ве́рою несумне́нною тебе́ в хода́тайство призыва́ем, ты же, я́ко ве́лие име́яй дерзнове́ние ко Го́споду и Пречи́стей Его́ Ма́тери, бу́ди моли́твенник, по́мощник и хода́тай о всех, со тща́нием в Боже́ственный твой храм приходя́щих, честны́х же и многоцеле́бных моще́й твои́х со стра́хом и благогове́нием прикаса́ющихся, услы́ши ны, свя́тче Бо́жий, и при́зри ми́лостивым о́ком на предстоя́щия цельбоно́сному твоему́ гро́бу лю́ди. Ве́мы бо вои́стину, я́ко а́ще по отше́ствии твое́м пло́тию и разлучи́лся еси́ от нас, но ду́хом неотсту́пно пребыва́еши с на́ми, тем и вся нам, я́же ко спасе́нию поле́зная, усе́рдне прося́щим, моли́твами твои́ми пода́ти мо́жеши. Простри́ у́бо преподо́бныя дла́ни твоя́, о до́брый и вели́кий наш засту́пниче, и не преста́й моли́тися о стране́ на́шей и о лю́дях, на вся́ком ме́сте благоче́стно тебе́ на по́мощь призыва́ющих. Сохрани́ же вся гра́ды и страны́ Русския от наше́ствия иноплеме́нник, междоусо́бныя бра́ни, тлетво́рных ветр и от вся́каго губи́тельнаго зла. Всех нас изба́ви от вся́ких бед и скорбе́й. Я́ко да тобо́ю управля́еми, многомяте́жное маловре́меннаго жития́ сего́ мо́ре безбе́дне преплы́вше, дости́гнем в жела́емое о́ное Небе́сное приста́нище и просла́вим Всесвяту́ю, Равноче́стную и Единосу́щную Тро́ицу, Отца́, и Сы́на, и Свята́го Ду́ха, ны́не и при́сно и во ве́ки веко́в. Ами́нь.

На ма́лой вече́рни

На Го́споди, воззва́х: стихи́ры на 4, глас 1.

Подо́бен: Небе́сных чино́в ра́дование:

Небе́сная возжеле́л еси́ ви́дети,/ до́лу влеку́щая презре́л еси́,/ тве́рдым смы́слом чистоту́ соблю́д./ Не пре́зри у́бо нас, к тебе́ прибега́ющих:/ тя бо к Бо́гу и́мамы хода́тая/ и моли́твенника о душа́х на́ших.

Непреста́нным раче́нием влеко́м/ к Го́рним добро́там Царя́ Христа́,/ сле́зными струя́ми и все́нощными бде́нии/ злостра́стия те́рние искорени́л еси́/ и, я́коже крин, дави́дски процве́л еси́,/ Богоблаже́нне о́тче Феодо́сие.

Яви́ся нам исто́чник спасе́ния/ и река́ цельбоно́сных вод/ гроб преподо́бнаго Феодо́сия,/ струи́ исцеле́ний излива́я,/ прииди́те, почерпе́м усе́рдно вси/ злолю́тых всех избавле́ние.

Сла́ва, глас 6:

Прииди́те, вси ве́рнии,/ духо́вно торжеству́йте,/ прииди́те и ви́дите,/ е́же ны́не яви́ся от веще́ственнаго сосу́да,/ невеще́ственную благода́ть, от гро́ба Богому́драго Феодо́сия кипя́щую,/ к нему́же с весе́лием возопии́м, глаго́люще:/ о всеблаже́нне,/ Христа́ моли́ непреста́нно спасти́ся душа́м на́шим.

И ны́не, Богоро́дичен:

Богоро́дице, Ты еси́ лоза́ и́стинная,/ возрасти́вшая нам Плод Живота́,/ Тебе́ мо́лимся: моли́ся, Влады́чице, со святы́ми апо́столы/ поми́ловати ду́ши на́ша.

На стихо́вне стихи́ры, глас 2.

Подо́бен: До́ме Евфра́фов:

Две́ри Небе́сныя/ восприя́ша по́стника,/ пустыннолю́бную го́рлицу,/ све́тло сия́ющую чуде́с зарю́,/ Феодо́сия Богому́драго.

Стих: Честна́ пред Го́сподем/ смерть преподо́бных Его́.

Ду́ха Свята́го/ озаре́н благода́тию,/ град оте́чества земна́го оста́вил еси́,/ пресе́льник яви́лся еси́, о́тче,/ и ны́не в Вы́шних Влады́це предстои́ши.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Небе́снаго граждани́на,/ земна́го А́нгела,/ мо́лим тя, о́тче Феодо́сие,/ испроси́ у Христа́ Бо́га/ спасе́ние душа́м на́шим.

Сла́ва, глас 8:

Преподо́бне о́тче,/ орга́н был еси́ Пресвята́го Ду́ха,/ по́стническими по́двиги плоть покори́л еси́ ду́хови,/ те́мже и чуде́с дарова́ние восприя́л еси́, Богому́дре Феодо́сие./ И ны́не со А́нгелы ликовству́еши/ у Христа́ Бо́га и Спа́са душ на́ших.

И ны́не, Богоро́дичен: Влады́чице, приими:

Тропа́рь пи́сан на вели́цей вече́рни.

На Вели́цей вече́рни

Блаже́н муж: 1-й антифо́н. На Го́споди, воззва́х: поста́вим стихо́в 8 и пое́м стихи́ры, глас 4.

Подо́бен: Зва́нный свы́ше:

Преподо́бне о́тче,/ мяте́ж мирски́й оста́вив/ и крест твой взем,/ после́довал еси́ нас ра́ди распе́ншемуся Христу́,/ посто́м и жа́ждею плотски́я стра́сти умертви́л еси́,/ грехо́вное же те́рние всено́щными по́двиги искорени́л еси́,/ сле́зными исто́чники напои́л еси́ ни́ву души́ твоея́,/ возде́лав плод стори́чный./ И ны́не предстои́ши всех Царю́,/ Его́же моли́ спасти́ и просвети́ти ду́ши на́ша.

Преподо́бне о́тче,/ ю́ностная взыгра́ния покори́в ду́хови,/ яви́лся еси́ нам безме́здный врач,/ многоразли́чныя неду́ги исцеля́яй к ра́це твое́й притека́ющих,/ небовосхо́дная доброде́телей ле́стница,/ по не́йже восте́кл еси́ к восприя́тию трудо́в по́чести,/ к жела́емому Христу́,/ Его́же моли́ спасти́ и просвети́ти ду́ши на́ша.

Преподо́бне о́тче Феодо́сие,/ кто́ испове́сть труды́ твоя́,/ бде́ние же и сухояде́ние,/ и е́же на земли́ лега́ние,/ и пусты́нное озлобле́ние?/ Безстра́стия сосу́д был еси́,/ благода́ти испо́лнен Свята́го Ду́ха,/ А́нгелом собесе́дниче и преподо́бным сожи́телю,/ Вседержи́телю Бо́гу возложи́л еси́ себе́,/ Его́же моли́ спасти́ и просвети́ти ду́ши на́ша.

И́ны стихи́ры, глас то́йже.

Подо́бен: Я́ко до́бля:

Я́ко свети́ло, просия́л еси́/ по́двиги и терпе́нием,/ яви́вся благоче́стия тве́рдое основа́ние/ и стена́ незы́блема гра́ду на́шему,/ миротле́нную красоту́ презре́л еси́/ любве́ ра́ди Вседержи́теля Бо́га,/ Его́же о нас моли́,/ усе́рдно творя́щих всечестну́ю па́мять твою́.

Я́ко непобеди́мый ратобо́рец,/ Богому́дре Феодо́сие,/ ору́жием кре́стным победи́л еси́ вра́жия полки́,/ вме́сто мя́гких риз вери́гами стягну́в те́ло твое́,/ и восприя́л еси́ от Бо́га безконе́чное блаже́нство,/ Его́же моли́ о чту́щих твое́ честно́е успе́ние.

Я́ко на ка́мени ве́ры/ утверди́в себе́, Феодо́сие,/ ника́коже поколеба́лся еси́ жите́йскими прило́ги,/ власяни́цею те́ло твое́ оде́яв,/ обнажи́л еси́ кова́рство дре́вле в раи́ предобнажи́вшаго,/ и, во Све́те невече́рнем веселя́ся,/ помина́й тя воспева́ющий.

Сла́ва, глас 6:

Возсия́ нам пресве́тлое торжество́/ целому́дрия стяжа́теля,/ соше́дшеся у́бо,/ пе́сненными похвала́ми досто́йно сего́ ублажи́м, глаго́люще:/ ра́дуйся, по́стником насле́дниче и печа́ть изве́стная;/ ра́дуйся, свети́льниче пресве́тлый,/ чудесы́ многоразли́чными притека́ющия озаря́яй;/ ра́дуйся, скорбя́щих утеше́ние/ и в беда́х су́щим те́плый засту́пниче./ И ны́не, Богому́дре Феодо́сие,/ не преста́й моля́ся о чту́щих ве́рно па́мять твою́.

И ны́не, Богоро́дичен: Кто Тебе́ не ублажи́т:

Вход. Проки́мен дне и чте́ния три преподо́бническая.

На ли́тии стихи́ры самогла́сны. Глас 1:

По́стника и́стиннаго почти́м днесь,/ с весе́лием ше́ствовавша по стопа́м Влады́чним,/ во пло́ти безпло́тныя враги́ победи́вшего./ Да ликовству́ют у́бо вси благоче́стно,/ изря́днее же со́бранное им честно́е ста́до./ Те́мже, соше́дшеся в па́мять его́,/ воспое́м Христа́ Бо́га на́шего,/ да пода́ст нам моли́твами его́ мир и ве́лию ми́лость.

Глас 2:

Яви́лся еси́ де́латель милосе́рдаго Влады́ки,/ И́же и во единонадеся́тый час прише́дшия и де́лавшия/ от пе́рваго часа́ де́лавшим уподобля́ет;/ ты же, вся дни жития́ твоего́/ недрема́нно де́тели духо́вныя соверша́я/ и в после́днее вре́мя по́стническия по́двиги обновля́я,/ к неизрече́нней ра́дости дости́гл еси́,/ возду́шная мыта́рства прелете́в./ Моли́ у́бо спасти́ся душа́м на́шим.

Ве́чная в Вы́шних взыска́л еси́,/ до́лу же влеку́щая вся оста́вил еси́,/ кре́стною па́лицею стра́стное жития́ мо́ре пресе́кл еси́,/ мы́сленнаго же фарао́на погрузи́л еси́;/ де́тельми, я́ко заря́ми, облиста́еши,/ хра́му у́бо, в не́мже лежа́т честны́я мо́щи твоя́,/ я́ко ца́рскую у́тварь, иму́щу,/ гра́ду же, я́ко трубе́, велегла́сно вопию́щу/ и хва́лящуся неисчерпа́емым исто́чником чуде́с/ и моли́твенником о душа́х на́ших.

Сла́ва, глас 5:

Воспои́м согла́сно в пе́снех/ духо́вною цевни́цею преблаже́ннаго Феодо́сия,/ све́тлость благоче́стия,/ любве́ Христо́вы де́лателя усе́рднаго,/ реку́ незави́стну смире́ния,/ чистоты́ сокро́вище, пра́вило воздержа́ния,/ столп терпе́ния,/ Ду́ха Боже́ственнаго си́лою злоко́зненнаго лестца́ победи́вшаго,/ ни́щим утеше́ние, боля́щим исцеле́ние,/ стра́нным прие́мника,/ гра́ду на́шему засту́пника./ Те́мже, похваля́юще его́, вси та́ко рцем:/ в Вы́шних всех Влады́це предстоя́, Феодо́сие,/ предста́ни, о́тче, чту́щим тя всегда́/ и спаси́ ста́до твое́ моли́твами твои́ми.

И ны́не, глас то́йже:

Ве́тхий де́ньми, младе́нствовав пло́тию,/ Мате́рию Де́вою в це́рковь прино́сится,/ Своего́ зако́на исполня́я обеща́ние,/ Его́же Симео́н прии́м, глаго́лаше:/ ны́не отпуща́еши с ми́ром,/ по глаго́лу Твоему́, раба́ Твоего́:/ ви́деста бо о́чи мои́ спасе́ние Твое́, Святы́й.

На стихо́вне стихи́ры, глас 2.

Подо́бен: Егда́ от Дре́ва:

Егда́ распали́ тя, Богому́дре,/ Боже́ственное жела́ние,/ преоби́дел еси́ пло́ти мудрова́ние,/ невозвра́тно после́дуя Христу́:/ те́ло твое́ удручи́л еси́ бде́нием,/ омыва́я ду́шу слез тече́ньми,/ сокруши́л еси́ бесо́вская стремле́ния/ и, я́коже зла́то горни́лом,/ очи́стив себе́ добродете́льми,/ ра́дуяся, взыва́еши:/ сла́ва, Человеколю́бче, Твоему́ снизхожде́нию.

Стих: Честна́ пред Го́сподем/ смерть преподо́бных Его́.

Егда́ основа́ние кре́пко/ положи́л еси́ в души́ твое́й, о́тче,/ тогда́ Авраа́мле стяжа́в удобре́ние,/ град оте́чества оста́вил еси́/ и по пло́ти сро́дники/ и, вся во уме́ты вмени́в,/ я́ко пресе́льник, уедини́лся еси́ в междоре́чии,/ еди́н Еди́ному рабо́тая Христу́,/ немо́лчным славосло́вием ра́дуяся и вопия́:/ сла́ва, Человеколю́бче, Твоему́ смотре́нию.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Егда́ преставле́ния твоего́ к Бо́гу вре́мя приспе́,/ тогда́ непоро́чная твоя́ душа́/ непреткнове́нно от возду́шных мыта́рств,/ я́ко небопа́рный оре́л,/ крило́ма доброде́телей на высоту́ востече́,/ и ра́дости избра́нных сподо́бися,/ и та́мо с Серафи́мы Го́сподеви вопие́т:/ сла́ва, Человеколю́бче, Твоему́ смотре́нию.

Сла́ва, глас то́йже:

Благода́ть Боже́ственная созыва́ет нас/ к похвале́нию Спа́сова и́стиннаго рачи́теля:/ сей бо, ду́шу и те́ло очи́стив от страсте́й,/ Пресвято́му Ду́ху яви́ся прекра́сное селе́ние,/ А́нгельским чи́ном присовокупи́ся,/ и́хже житию́ на земли́ поревнова́;/ сего́ ра́ди со дерзнове́нием предстои́т Святе́й Тро́ице/ и мо́лит спасти́ся душа́м на́шим.

И ны́не, Богоро́дичен: О, чудесе́ но́ваго:

На благослове́нии хле́бов, тропа́рь преподо́бнаго, два́жды, и Богоро́дице Де́во: еди́ножды.

Тропа́рь преподо́бнаго, глас 1:

От ю́ности, преподо́бне Феодо́сие,/ жела́ние твое́ ко Христу́ Бо́гу впери́л еси́,/ его́же ра́ди град и оте́чество оста́вль/ и сла́ву су́етную, я́ко прах, вмени́в,/ после́довал еси́ преподо́бному Дими́трию/ и оби́тели его́ сожи́тель был еси́,/ пресели́вся ко гра́ду То́тьме/ и в междоре́чие всели́вся,/ посто́м и бде́нием, и власяны́м одея́нием,/ и вери́гами те́ло твое́ удручи́л еси́./ Сего́ ра́ди Бог, ви́дев твоя́ труды́,/ по преставле́нии твое́м чудесы́ обогати́ тя:/ бе́сы изгоня́еши и слепы́я просвеща́еши,/ от вся́ких неду́г и бед избавля́еши приходя́щия к тебе́ с ве́рою и вопию́щия:/ сла́ва Да́вшему ти кре́пость,/ сла́ва Венча́вшему тя,/ сла́ва Даю́щему тобо́ю всем исцеле́ние.

Ин тропа́рь, глас 2:

От мирска́го мяте́жа изше́д,/ преподо́бне о́тче наш Феодо́сие,/ и в ти́хое приста́нище дости́г,/ преподо́бному Дими́трию сожи́тель был еси́,/ и отту́ду, Бо́жиим Ду́хом направля́емь,/ во град То́тьму пресели́лся еси́,/ и во ото́цех водны́х оби́тель себе́ воздви́гл еси́,/ иде́же равноа́нгельное житие́ пожи́в,/ после́довал еси́ Христу́,/ Его́же ра́ди влася́ну ри́зу и вери́ги на те́ле твое́м носи́л еси́./ Смире́нием и нищелю́бием украси́вся,/ сла́ву су́етную презре́л еси́/ и оте́ческое име́ние до́бре расточи́л еси́,/ моле́нием же к Бо́гу и сле́зными струя́ми бе́сы посрами́л еси́,/ те́мже по успе́нии твое́м Христо́с да́ром чуде́с обогати́ тя./ Име́я у́бо дерзнове́ние ко Го́споду,/ преподо́бне о́тче наш Феодо́сие,/ моли́ Христа́ Бо́га, да спасе́т ду́ши на́ша.

Сла́ва, и ны́не, Богоро́дичен.

На у́трени

На Бог Госпо́дь: тропа́рь преподо́бнаго. Сла́ва, ин тропа́рь. И ны́не, Богоро́дичен 2-го гла́са.

По 1-м стихосло́вии седа́лен, глас 8.

Подо́бен: Прему́дрости Сло́ва:

Воздержа́ния кре́постию изобрази́л еси́ зако́нная веле́ния/ не на дсце́, но на скрижа́лех се́рдца:/ свое́ю во́лею, о́тче Феодо́сие, а́ки ко кресту́, пригвозди́в себе́,/ претерпе́л еси́ жесто́кое одея́ние и пусты́нное озлобле́ние,/ неви́димыя же враги́ победи́л еси́ му́жески./ Те́мже успе́ние твое́ пра́зднуем и ве́рно пе́сньми восхваля́ем.

Сла́ва, и ны́не, Богоро́дичен:

Возбра́нной воево́де и засту́пнице на́шей,/ к Тебе́ прибега́ем, Пречи́стая Богоро́дице:/ возбрани́, Чи́стая, плену́ющу нас диа́волу/ и вводя́щу в стра́сти безче́стия./ Те́мже припада́ем ко Твоему́ пречестно́му о́бразу,/ прося́ще изба́витися вся́кия му́ки и огня́ ве́чнаго./ Заступи́ нас, Ма́ти Христа́, Царя́ Небе́снаго, да зове́м Ти:/ ра́дуйся, Неве́сто Неневе́стная.

По 2-м стихосло́вии седа́лен, глас 4.

Подо́бен: Ско́ро предвари́:

Притеце́м усе́рдно к моще́м преподо́бнаго Феодо́сия/ и почерпе́м сугу́бую благода́ть, душа́м спасе́ние и телесе́м здра́вие,/ восхваля́юще Христа́ Бо́га на́шего,/ И́же Своего́ уго́дника просла́ви и да́ром чуде́с обогати́,/ па́мять же преподо́бнаго святу́ю почита́юще.

Сла́ва, и ны́не, Богоро́дичен:

Ум челове́ческий по достоя́нию пе́ти Тя, Влады́чице Пречи́стая Богоро́дице, недоуме́ет./ Но мы зове́м Ти, я́коже Арха́нгел Гаврии́л провеща́:/ ра́дуйся, Ада́мово свобожде́ние;/ ра́дуйся, прама́тере Е́вы оправда́ние;/ ра́дуйся, ми́ру спасе́ние;/ ра́дуйся, Ма́ти Христа́ Бо́га.

По полиеле́и седа́лен, глас 8.

Подо́бен: Прему́дрости на пе́рси возле́г:

Весели́ся, гра́де Во́логда,/ воспита́вый в по́стницех просия́вшаго, о́трасль благу́ю;/ красу́йся, гра́де, при не́мже обита́ преподо́бный,/ и лику́й, междоре́чие, я́ко име́я в себе́ сожи́тельствующа Богому́драго Феодо́сия,/ ра́ку же моще́й его́, точа́щу исцеле́ния и бесо́вския полки́ прогоня́ющу./ Сего́ ра́ди вси просла́вим Христа́ Бо́га на́шего:/ о Влады́ко! Ве́лие милосе́рдие Твое́,/ я́ко прояви́л еси́ нам вели́ка чуде́с дарова́теля,/ земли́ Русстей украше́ние/ и моля́щася изба́витися нам от вся́ких лю́тых обстоя́ний.

Сла́ва, и ны́не, Богоро́дичен:

О Тебе́ ра́дуется, Благода́тная, вся́кая тварь,/ А́нгельский собо́р и челове́ческий род,/ освяще́нный хра́ме и раю́ слове́сный,/ де́вственная похвало́,/ из Нея́же Бог воплоти́ся и Младе́нец бысть, пре́жде век Сый Бог наш:/ ложесна́ бо Твоя́ престо́л сотвори́/ и чре́во Твое́ простра́ннее Небе́с соде́ла./ О Тебе́ ра́дуется, Благода́тная, вся́кая тварь, сла́ва Тебе́.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое ды́хание: Ева́нгелие от Матфе́я, зача́ло 43.

По 50-м. псалме́ стихи́ра, глас 6:

Днесь све́тло торжеству́ет Це́рковь Твоя́, Го́споди,/ я́ко багряни́цею многоце́нною, крася́щися/ неистощи́мым сокро́вищем моще́й Богому́драго Феодо́сия,/ и, я́ко ца́рским ски́петром, хва́лящися, вопие́т:/ сицева́ моя́ рожде́ния,/ такови́и мои́ сы́нове,/ и́хже породи́х Креще́нием,/ воспита́х же стра́хом Госпо́дним,/ ны́не ви́жду и́стинне вене́чника избра́ннаго,/ да мо́лится ко Го́споду о вселе́нней,/ о стране́ и гра́дех на́ших и о чту́щих ве́рно честну́ю па́мять преподо́бнаго.

Кано́н Богоро́дицы, на 6 и преподо́бнаго два кано́на, на 8. Кано́н преподо́бному Феодо́сию пе́рвый, глас 8.

Песнь 1

Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко Еди́н сла́вно просла́вися.

Озари́, Христе́ Бо́же Преве́чный, Све́те от Све́та, омраче́ннаго мя,/ да Богому́драго пою́ Феодо́сия.

Све́та сподо́би, о́тче, прине́сшаго тебе́ пе́ние невече́рняго улучи́ти,/ в не́мже лику́еши.

Любве́ Боже́ственный теплото́ю разже́гся, преподо́бне,/ изсуши́л еси́ пото́ки стра́стнаго взыгра́ния.

Богоро́дичен: Во утро́бе Твое́й вме́щши Невмести́маго, всех Творца́,/ изба́ви от лю́тых пою́щия Тя, Всенепоро́чная.

Ин кано́н, в не́мже о чудесе́х преподо́бнаго. Глас 6.

Песнь 1

Ирмо́с: Се́ченое, сече́тся/мо́ре Чермнно́е,/ волнопита́емая же изсуша́ется глубина́,/ та́яжде ку́пно безору́жным бы́вши проходи́ма/ и всеору́жным гроб./ Песнь же Богокра́сная воспева́юща:/ сла́вно просла́вися Христо́с, Бог наш.

А́гнче Пречи́сте, Бо́жий Сло́ве,/ низпосли́ мне сло́во, недосто́йному, воспе́ти чудеса́ преподо́бнаго Твоего́ Феодо́сия,/ его́же в по́двизех просла́вил еси́, усе́рдно к Тебе́ воспева́юща:/ сла́вно просла́вися Христо́с Бог наш.

Весь возло́жся Зижди́телеви/ и сла́ву вре́менную презре́ти жела́я,/ желе́зы те́ло твое́ стягну́в, к по́двигу устреми́лся еси́,/ Боже́ственною разже́гся ре́вностию, в моли́твах же к Бо́гу воспева́я:/ сла́вно просла́вися Христо́с Бог наш.

Го́рдаго зми́я смире́нием твои́м попра́в,/ плотска́я взыгра́ния умертви́л еси́,/ и жите́йския сла́сти терпе́нием, а́ки мече́м, посе́кл еси́,/ преподо́бне Феодо́сие, Го́сподеви вопия́:/ сла́вно просла́вися Христо́с Бог наш.

Богорбдичен: Де́вство сохрани́вши некра́домо,/ от Ду́ха Свя́та заче́нши, родила́ еси́ Бо́га Сло́ва/ и по Рождестве́ пребыла́ еси́, я́коже и пре́жде, Богоневе́сто Влады́чице./ Те́мже спаси́ нас, вопию́щих:/ сла́вно просла́вися Христо́с Бог наш.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Возлюби́л еси́ от ю́ности усе́рдно Христо́ви рабо́тати,/ Его́же ра́ди вся презре́л еси́, до́лу влеку́щая.

Очи́стив ум, те́ло и дух, треблаже́нне,/ дом был еси́ Трисо́лнечнаго Све́та,/ укра́шен доброде́тельми.

Естество́ пло́ти воздержа́нием утончи́л еси́,/ Христа́ име́я, Феодо́сие, укрепля́юща тя к по́двигом.

Богоро́дичен: Моли́, Всечи́стая и Неискусобра́чная Мари́е, Сы́на Твоего́ и Бо́га на́шего,/ посла́ти нам ве́лию ми́лость.

Ин

Ирмо́с: Госпо́дь Сый всех и Зижди́тель Бог,/ созда́нное Безстра́стный, обнища́в, Себе́ соедини́,/ и Па́сха, за я́же хотя́ше умре́ти,/ Сам Сый, Себе́ предпожре́:/ яди́те, – вопия́, – Те́ло Мое́/ и ве́рою утверди́теся.

Еди́наго возлюби́л еси́ Христа́, преподо́бне Феодо́сие,/ во пло́ти безпло́тных полки́ посрами́л еси́/ и по преставле́нии твое́м чудеса́ то́чиши:/ явле́нием бо со ико́ною Пречи́стыя Богома́тере деви́цу разсла́бленную от одра́ возста́вил еси́.

Житие́ непоро́чно на земли́ соверши́л еси́, преподо́бне,/ ны́не же стра́сти неду́жных исцеля́еши:/ стра́ждущему бо на но́вый ме́сяц от лука́ваго ду́ха триле́тное вре́мя здра́вие по́дал еси́,/ прише́дшу ко свято́му гро́бу твоему́.

Зижди́телю предстои́ши к Нему́ дерзнове́ние и́маши, о́тче./ К ра́це бо твое́й прише́дшая жена́,/ шум, и дво́ицы глаго́лание, и пе́ния у́бо слы́шавши, ужасе́ся;/ ма́нием же каса́ния оче́с прозре́ние пода́л еси́ ей,/ назна́менуя святы́я воды́ кропле́ние.

Богоро́дичен: Из ко́рене Иессе́ова изра́стши жезл, цвет нося́щий – Христа́, Соде́теля вся́кия тва́ри,/ увяди́вшаго сады́ непло́днаго ра́зума,/ Де́во Богоро́дице, спаси́ ны от грехо́вных страсте́й,/ прибега́ющия в кров Твой с ве́рою.

Седа́лен, глас 8.

Подо́бен: Прему́дрости наста́вниче:

Премно́жеством доброде́телей от младе́нства житие́ украси́л еси́,/ помы́слив от зе́мных на Небе́сная,/ и, де́лом соверши́в, о́тче Феодо́сие, сла́ву и бога́тство тле́нное ни во что же вмени́л еси́;/ посто́м и власяны́м одея́нием плоть твою́ изнуря́л еси́,/ всено́щным же стоя́нием и моли́твами собесе́дник а́нгельским лико́м показа́лся еси́./ Моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ Огнь бо всели́ся в Тя Божества́/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род, досто́йно сла́вим Пресвято́е Рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою Пресвято́му Рождеству́ Твоему́.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Си́лою Влады́чнею лестна́ кова́рство разруши́л еси́,/ преше́д немяте́жно в ра́йская селе́ния.

Па́че бу́дущаго ничто́же и́но предпочти́ л еси́/ и сего́ ра́ди насле́довал еси́ ве́чное блаже́нство, о́тче наш Феодо́сие.

Сле́зными пото́ки омы́л еси́ нечистоту́ грехо́вную,/ бде́нием же и моли́твами ли ко́м святы́х сопричте́н был еси́.

Богоро́дичен: Ед и́ну Тя пое́м и по рождестве́ Де́ву, Богоро́дице:/ Ты бо Сло́во пло́тию нетле́нно родила́ еси́ ми́рови.

Ин

Ирмо́с: Удиви́ся Твой ра́зум от мене́,/ услы́шавшу пресла́вная веле́ния смотре́ния Твоего́,/ укрепи́ся же возлюбле́нием Твоего́ схожде́ния,/ Ты бо моея́ нищеты́ не отве́рглся еси́.

Феодо́сие блаже́нне, воздержа́нием во пло́ти/ стра́сти чу́вственный умертви́л еси́/ и по успе́нии твое́м стра́сти неду́жных разреша́еши:/ одержи́маго бо тряса́вицею свободи́л еси́ от неду́га.

Исто́чники сле́зными напои́в ни́ву души́ твоея́, о́тче,/ чудесы́ просия́л еси́, я́ко звезда́, многосве́тлая:/ боле́знующаго очи́ма уврачева́л еси́,/ младе́нца же спасл еси́, му́чима от лука́ваго ду́ха.

Ко Творцу́ о нас мо́лишися, преподо́бне,/ и да́руеши цельбы́ неоску́дно припада́ющим к ра́це твое́й:/ хрома́го от боле́зни уврачева́л еси́/ и ходи́ти непреткнове́нно устро́ил еси́.

Богоро́дичен: Лю́дем яви́ся обновле́ние, Влады́чице:/ Ты бо родила́ еси́ во вре́мени от Отца́ рожде́ннаго пре́жде век,/ нас же ра́ди от Тебе́ воплоти́вшегося/ и спа́сшаго от пе́рвыя кля́твы род челове́ческий.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.

О́ко се́рдца упра́вив ко Творцу́ всех, Феодо́сие,/ и разсмотри́в, ко́зни вра́жия/ твои́м тве́рдым смы́слом низложи́л еси́.

Мудрова́ния пло́ти покори́л еси́ ду́хови,/ умо́м к Вы́шнему возревнова́в,/ и от Него́ прия́л еси́ духо́вную благода́ть.

Основа́ние, его́же проти́вник не подви́же,/ кре́пко положи́в в души́ твое́й,/ живу́ща име́л еси́ Свята́го Ду́ха.

Богоро́дичен: Щедро́т бе́здну иму́щи, Де́во Богоро́дице,/ при́зри на мя, озло́бленнаго грехми́,/ и в ров па́дша возведи́ к покая́нию.

Ин

Ирмо́с: Богоя́вления Твоего́, Христе́,/ к нам ми́лостивно бы́вшего,/ Иса́ия Свет ви́дев Невече́рний,/ из но́щи у́треневав, взыва́ше:/ воскре́снут ме́ртвии,/ и воста́нут су́щии во гробе́х,/ и вси земноро́днии возра́дуются.

Мно́гое име́я дерзнове́ние к Зижди́телю, о́тче Феодо́сие,/ мно́гими мя, лю́тыми страстьми́ содержи́маго, исцели́,/ я́коже и деви́цу, все́ми у́ды разсла́бленную,/ прикосну́вшуюся ра́це твое́й, исцели́л еси́.

Недрема́нно после́дуя Христу́,/ плоть нас ра́ди прие́мшу и о́чи слепа́го отве́рзшу, Феодо́сие,/ жене́ слепе́й и о́ком неви́дящему прозре́ние по́дал еси́,/ и нас просвети́, пою́щих тя.

К Серафи́мом приобщи́вся, преподо́бне Феодо́сие,/ вся́ческих Творца́ и Влады́ку преклони́л еси́ на милосе́рдие:/ седмоле́тное вре́мя не слы́шавшему уши́ма, дарова́л еси́ здра́вие.

Богоро́дичен: Огнь Боже́ственный во утро́бе поне́сши, Богоневе́сто Пречи́стая,/ попали́ на́ша стра́сти душетле́нныя/ и просвети́ сердца́ пою́щих,/ да вси Тебе́ прославля́ем, ро́ждшую Го́спода, всю тварь содержа́щего.

Песнь 6

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.

Авраа́му подо́бяся, оста́вив земна́го оте́чества град,/ мно́гим тща́нием Христу́ после́довал еси́.

Бога́тство и сла́ву презре́в,/ одея́ние жесто́кое носи́л еси́,/ сим истка́в себе́ оде́жду нетле́ния.

Удобри́л еси́ себе́, Богому́дре,/ кра́сными восхожде́нии к Небе́сным восте́к, Боже́ственными кри́лы.

Богоро́дичен: Де́вство чи́сто соблю́дши/ и Безле́тное Сло́во под коне́ц ле́том ро́ждши,/ Твои́м моле́нием спаси́ пою́щия Тя.

Ин

Ирмо́с: Зве́рю бе́здны предае́тся проро́к Ио́на,/ глубине́ морско́й,/ прообразу́я Твое́, Сло́ве, тридне́вное воста́ние./ Тем и взыва́ше:/ из глубины́ преиспо́дния возведи́ живо́т мой,/ Благоутро́бне.

Пресвяте́й Тро́ице дом себе́ устро́ив,/ пусты́ню возлюби́л еси́/ и по преселе́нии твое́м к Бо́гу посеща́еши ученики́ твоя́,/ ста́рца разсла́бленнаго укрепи́л еси́/ и младе́нцу разреши́л еси́ слепоту́.

Ра́ка моще́й твои́х, о́тче Феодо́сие, неоску́дно исцеле́ния источа́ет приходя́щим с ве́рою:/ главну́ю боле́знь и разслабле́ние те́ла жене́ разреши́л еси́,/ челове́ка же одержи́маго от лука́ваго ду́ха свободи́л еси́.

Све́том Боже́ственным озаря́емь свы́ше,/ чудесы́ просия́л еси́/ и мрак де́монский разруша́еши;/ нас же, прегреше́ньми объюроде́вших, уцелому́дри,/ я́коже изсту́пльших ума́ уцелому́дрил еси́.

Богоро́дичен: Тя прови́де Дании́л несе́ченную го́ру,/ из нея́же отто́ржеся ка́мень без руку́,/ прообразу́я от Тебе́ воплоще́ние Безле́тнаго в ле́то./ Нас же, во глубине́ злых прегреше́ний тружда́ющихся, спаса́еши, Богоро́дице,/ еди́на земны́м прибе́жище.

Конда́к, глас 8.

Подо́бен: Взбра́нной:

Воздержа́нием плоть изнури́л еси́/ и непреста́нными моли́твами, я́ко А́нгел, возвы́сился еси́,/ струя́ми же сле́зными бесо́вския полки́ погрузи́л еси́./ И ны́не во Све́те невече́рнем лику́еши у Христа́ Бо́га/ и приходя́щим ко свято́му твоему́ гро́бу неоску́дно исцеле́ние подае́ши,/ ве́рою вопию́щим тебе́:/ ра́дуйся, о́тче Феодо́сие Богому́дре.

И́кос:

Возревнова́в о Боже́ственных бде́ниих/ и те́сным на земли́ ше́ствовав путе́м,/ Небе́сных простра́нствия ра́достне дости́гл еси́,/ иде́же зри́ши Пресвяту́ю Тро́ицу,/ дарова́ньми чуде́с обогаща́емь./ Мы же, терпе́нию твоему́ дивя́щеся, си́це вопие́м:/ ра́дуйся, чи́стое Свята́го Ду́ха прия́телище;/ ра́дуйся, земны́й А́нгеле и Небе́сный челове́че;/ ра́дуйся, любве́ ра́ди Христо́вы град оте́чества земна́го оста́вивый/ и в междоре́чии жи́ти изво́ливый;/ ра́дуйся, дре́во доброде́телей, при вода́х насажде́нное;/ ра́дуйся, я́ко плод прине́сл еси́ благоцвету́щ послуша́ния;/ ра́дуйся, я́ко терпе́нием твои́м стра́сти плотски́я умертви́л еси́;/ ра́дуйся, я́ко ору́жием кре́стным мы́сленнаго Амали́ка посе́кл еси́;/ ра́дуйся, сто́лпе, непоколеби́мый жите́йскими ве́тры;/ ра́дуйся, лука́вых духо́в прогони́телю;/ ра́дуйся, я́ко исцеле́ний источа́еши реку́;/ ра́дуйся, я́ко стра́ждущих от бед избавля́еши;/ ра́дуйся, и́ноком исправле́ние;/ ра́дуйся, о́тче Феодо́сие Богому́дре.

Песнь 7

Ирмо́с: А́нгелом о́троки из огня́ спасы́й/ и гремя́щую пещь преложи́вый на ро́су,/ благослове́н еси́, Бо́же оте́ц на́ших.

Пло́тию обложе́н, безпло́тныя победи́л еси́,/ непреста́нно Христо́ви зовы́й:/ благослове́н еси́, Бо́же оте́ц на́ших.

Огне́м Боже́ственным те́рние грехо́вных страсте́й попали́л еси́, Богому́дре, поя́:/ благослове́н еси́, Бо́же оте́ц на́ших.

Ю́ности раче́ния оплева́в разу́мно,/ всего́ себе́ Бо́гови возложи́л еси́, поя́:/ благослове́н еси́, Бо́же оте́ц на́ших.

Богоро́дичен: Небесе́ ши́ршую Де́ву показа́ пра́вды Со́лнце, из Нея́ возсия́в, Спас пою́щих:/ благослове́н еси́, Бо́же оте́ц на́ших.

Ин

Ирмо́с: Три ю́ноши не опали́ дре́вле возвыша́емый пла́мень,/ неща́дно мя зной к тле́нию положи́./ Но, я́ко о́ныя изба́вил еси́ сия́нием Твои́м,/ пою́щаго с ни́ми спаси́ мя:/ благослове́н еси́, Бо́же оте́ц на́ших.

У Влады́ки Творца́ предстоя́ в Вы́шнем Ца́рствии, Феодо́сие преподо́бне,/ боле́знующую очи́ма исцели́л еси́;/ просвети́ и на́ша серде́чная очеса́ све́том Богоразу́мия/ и научи́ к Нему́ пе́ти:/ благослове́н еси́, Бо́же оте́ц на́ших.

Фарисе́йское киче́ние отве́ргше,/ усе́рдно присту́пим вси ко гро́бу Богому́драго Феодо́сия:/ источа́ет бо нам неоску́дную струю́ исцеле́ний./ О́троку страсть телесе́ и соу́з язы́ка разреши́в,/ да отве́рзет и на́ши устне́ пе́ти Христу́:/ благослове́н еси́, Бо́же оте́ц на́ших.

Излия́нием чуде́с от Бо́га обогати́лся еси́, о́тче,/ те́мже приходя́щих облегча́еши боле́зни,/ расте́ния утро́бы, и струп ноги́, и кро́ви тече́ние уста́вил еси́./ Утверди́ у́бо и на́ша мы́сли зва́ти Христу́:/ благослове́н еси́, Бо́же оте́ц на́ших.

Богоро́дичен: Христа́ ро́ждши, Влады́ку и Врача́ вся́ческих, Богоро́дице,/ ра́нами грехо́вными нас, уя́звленных лю́те от душетле́ннаго стрельца́/ и неисце́льно боля́щих, исцели́, Влады́чице, моли́твами Твои́ми/ и пла́стырь приложи́ покая́ния Сы́ну Твоему́ зову́щим:/ благослове́н еси́, Бо́же оте́ц на́ших.

Песнь 8

Ирмо́с: Богоглаго́ливии о́троцы в пещи́,/ со огне́м пла́мень попира́юще, поя́ху:/ благослови́те, дела́ Госпо́дня, Го́спода.

Славосло́вием всено́щным при́сно соодоле́л еси́ страсте́м, преблаже́нне, поя́:/ благослови́те, дела́ Госпо́дня, Го́спода.

Неприкоснове́ннаго улучи́в све́та,/ с ли́ки святы́х водворя́ешися, о́тче, поя́:/ благослови́те, дела́ Госпо́дня, Го́спода.

Го́рняго Иерусали́ма дости́гнути сподо́би, о́тче Феодо́сие, пою́щия:/ благослови́те, дела́ Госпо́дня, Го́спода.

Богоро́дичен: Обожи́л есть, из Тебе́ вопло́щеся, Госпо́дь, Влады́чице, земны́х существо́, пою́щих:/ благослови́те, дела́ Госпо́дня, Го́спода.

Ин

Ирмо́с: За зако́ны оте́ческая/ блаже́ннии в Вавило́не ю́ноши, предбе́дствующе,/ царю́ющаго оплева́ша повеле́ние безу́мное/ и, совоку́плени и́мже, не свари́шася огне́м,/ Держа́вствующему досто́йную воспева́ху песнь:/ Го́спода по́йте, дела́,/ и превозноси́те во вся ве́ки.

Псало́мски процве́л еси́, я́ко фи́никс, в посте́ и по́двизех,/ и бесо́вския полки́ прогоня́еши, и да́руеши цель бы незави́стно./ Жите́йскими помышле́ньми мой ум мяту́щийся уцелому́дри, да воспою́:/ Го́спода по́йте, дела́, и превозноси́те во вся ве́ки.

Царе́ви всех и Бо́гу предстоя́, о́тче Феодо́сие,/ нам испроси́ одоле́ние на враги́ ви́димыя и неви́димый/ и дви́жимая сердца́ на́ша утверди́, да в ра́дости душе́вней воспое́м:/ Го́спода по́йте, дела́, и превозноси́те во вся ве́ки.

Чи́сте зре́ти сподо́бився Пресвяту́ю Тро́ицу,/ до конца́ чи́сто житие́ сохрани́л еси́/ и чистото́ю А́нгелы удиви́л еси́./ Мене́ же, жите́йскими сластьми́ оскверне́ннаго,/ очи́сти моли́твами твои́ми, да воспою́:/ Го́спода по́йте, дела́, и превозноси́те во вся ве́ки.

Богоро́дичен: О Све́та прия́телище, пресве́тлаго Со́лнца о́блаче, Богора́дованная Влады́чице,/ ле́ствице мы́сленная, Небе́сная врата́, спасе́ния две́ри!/ Бог бо из Твои́х ложе́сн про́йде неизрече́нно,/ Его́же прославля́ем во ве́ки.

Песнь 9

Ирмо́с: Чи́стую сла́вно почтим, лю́дие, Богоро́дицу,/ огнь Божества́ прии́мшую во чре́ве неопа́льно,/ пе́сньми велича́ем.

Любе́зно по́двиг сконча́в и возде́лав ни́ву душе́вную,/ плод стори́чный пожа́л еси́, о́тче Феодо́сие, тя чту́щих.

Ве́чныя дости́гл еси́ жи́зни кра́йним воздержа́нием/ и Свет Присносу́щныя Тро́ицы зре́ти сподо́бился еси́, о́тче Богому́дре.

Ко Влады́це име́я дерзнове́ние, то́чиши исцеле́ния,/ и всем, чту́щим па́мять твою́, о́тче, ми́лость испроси́.

Богоро́дичен: Ада́мовым вкуше́нием приста́вленное ору́жие Тобо́ю, Пречи́стая, вход дае́т./ стыдя́ся копи́я, пробо́дшаго Ро́ждшагося из Тебе́.

Ин

Ирмо́с: Стра́нствия Влады́чня/ и Безсме́ртныя Тра́пезы/на Го́рнем ме́сте высо́кими умы́,/ ве́рнии, прииди́те, наслади́мся,/ возше́дша Сло́ва,/ от Сло́ва научи́вшеся, Его́же велича́ем.

Граждани́н Вы́шний жела́я бы́ти,/ земна́го оте́чества град оста́вил еси́, пресе́льник яви́вся, о́тче Феодо́сие,/ к Го́рним легко́ преше́л еси́, во све́те пра́ведных водворя́яся,/ ду́хом же неотсту́пно с на́ми пребыва́еши,/ сохраня́й у́бо нас, тя воспева́ющих.

Распросте́р преподо́бнии твои́ ру́це,/ принеси́ моле́ние ко Всеще́дрому Бо́гу, о́тче Богому́дре Феодо́сие,/ сохрани́ти град твой невреди́м от ва́рварскаго наше́ствия и междоусо́бныя бра́ни/ и спасти́ нас, тебе́ велича́ющих.

Глаго́л мои́х недосто́йных гру́бое веща́ние,/ е́же по си́ле принесо́х тебе́, преподо́бне Феодо́сие,/ приими́ и не пре́зри,/ но Творца́ на́шего, Влады́ку и Го́спода, моли́ за мя,/ в день стра́шнаго испыта́ния ми́лость обрести́/ и та́мошняго муче́ния изба́витися.

Богоро́дичен: Ря́сны златы́ми преукра́шена,/ одесну́ю Царя́ Бо́га предстои́ши, Богоро́дице Де́во,/ моли́ у́бо Сы́на Твоего́ и Влады́ку/ ми́лость обрести́ нам в день после́дняго испыта́ния,/ и стоя́ния сподо́би нас со избра́нными,/ и стра́шнаго муче́ния свободи́, да вси Тебе́ велича́ем.

Свети́лен.

Подо́бен: Ученико́м зря́щим:

Умертви́л еси́ до́лу влеку́щая мудрова́ния,/ и, мирска́го пристра́стия удали́вся, я́ко скве́рны,/ процве́л еси́, я́ко фи́никс, дави́дски, о́тче Феодо́сие,/ и Небе́сною сла́вою со А́нгелы обогати́лся еси́ от Бо́га,/ Его́же в пе́снех восхваля́ем.

Сла́ва, и ны́не, Богоро́дичен:

Честне́йши еси́ всея́ тва́ри, Богоро́дице Де́во, Христа́ ро́ждшая,/ Того́ у́бо моли́ сохрани́тися ста́ду Твоему́ невреди́му/ от вся́каго наве́та сопроти́внаго.

На хвали́тех стихи́ры на 4, глас 8.

Подо́бен: О, пресла́внаго чудесе́:

О, пресла́внаго чудесе́!/ В ме́ртвенней телеси́, я́ко Безпло́тен, подвиза́вся,/ Бо́гови себе́ усе́рдно возложи́л еси́,/ преподо́бне Феодо́сие,/ любве́ ра́ди Его́ всю твою́ жизнь в по́двизех сконча́л еси́,/ брозда́ми воздержа́ния плотски́я стра́сти смири́л еси́/ и чудесы́ обогати́лся еси́./ С тобо́ю у́бо вопие́м Христу́:/ спаси́ ду́ши на́ша, я́ко Еди́н Милосе́рд.

О́тче блаже́нне Феодо́сие,/ я́ко тезоимени́т Бо́жию дая́нию был еси́,/ сего́ ра́ди и ра́ку моще́й твои́х Госпо́дь челове́ком показа́,/ я́же я́ко неистощи́мый исто́чник чуде́с/ и река́ дарова́ний духо́вных,/ слепы́м е́же ви́дети подае́т/ и всем боля́щим исцеле́ние да́рует,/ одержи́мыя от нечи́стых духо́в изба́вляет/ и целому́дрствовати твори́т.

Богому́дре Феодо́сие,/ а́ще и на Небесе́х жи́тельствуеши,/ ду́хом же назира́еши нас с Пречи́стою Богома́терию:/ хва́лящагося крестопресту́пника,/ я́ко пти́цу ху́ду, пре́дал еси́ в ру́ки безору́жных,/ град же твой от междоусо́бныя бра́ни спасл еси́./ О, вели́кое Бо́жие дарова́ние,/ я́ко даде́ нам вели́каго в ско́рбех помо́щника!

Сла́ва, глас 2:

Прииди́те, и́ночестии ли́цы и христолюби́вии лю́дие,/ ко гро́бу досточу́днаго отца́ Феодо́сия:/ днесь бо па́мять его́ почита́ем,/ духо́вне торжеству́юще,/ моля́щеся Христу́ Бо́гу на́шему/ и прося́ще грехо́в проще́ния и соедине́ния Це́рквам,/ стране́ на́шей посо́бия на сопоста́ты,/ и плене́нным свобожде́ния,/ и душа́м на́шим ве́лия ми́лости.

И ны́не: Все упова́ние:

Славосло́вие вели́кое и отпу́ст.

На литурги́и

Блаже́нны от кано́на 8-го гла́са, песнь 3-я, на 4, и 6-го гла́са, песнь 6-я, на 4. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́йя: Блаже́н муж, боя́йся Го́спода,/ в за́поведех Его́ восхо́щет зело́. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник:

Моли́тва

О до́брый наш па́стырю и Богому́дрый наста́вниче, преподо́бне о́тче Феодо́сие! Услы́ши нас гре́шных, моля́щихся тебе́, и призыва́ющих в по́мощь ско́рое предста́тельство твое́: виждь нас гре́шных в толи́цех обстоя́ниих су́щих, виждь нас не́мощных отвсю́ду уловля́емых, вся́каго бла́га лише́нных и умо́м от малоду́шия помраче́нных; потщи́ся уго́дниче Бо́жий, не оста́вити нас в грехо́внем плену́ бы́ти, да не бу́дем в ра́дость враго́м на́шым, и не у́мрем в лука́вых дея́ниих на́ших. Моли́ о нас недосто́йных Спа́са Го́спода, Ему́же ты со безпло́тными ли́ки предстои́ши. Ми́лостива к нам сотвори́ Соде́теля на́шего в ны́нешнем ве́це и в бу́дущем, да не возда́ст нам по дело́м на́шым, и по нечистоте́ серде́ц на́ших, но по Свое́й бла́гости возда́ст нам: на твое́ бо хода́тайство упова́юще, твои́м предста́тельством хва́лимся, твое́ заступле́ние на по́мощь призыва́ем и к цельбоно́сному гро́бу твоему́ припа́дающе недосто́йнии исцеле́ния про́сим: изба́ви нас, уго́дниче Христо́в, от злых находя́щих на нас, и укроти́ во́лны страсте́й и бед востаю́щих на нас, да ра́ди святы́х твои́х моли́тв не объи́мет нас на́пасть, и не погря́знем в пучи́не грехо́вней и в ти́не страсте́й на́ших. Моли́, преподо́бне о́тче Феодо́сие, Христа́ Бо́га на́шего: стра́ждущую страну́ Русскую от лю́тых безбо́жник и вла́сти их Госпо́дь да свободи́т, и да возста́вит престо́л правосла́вных прави́телей; ве́рных рабо́в Его́, в ско́рби и печа́ли день и нощь вопию́щих к Нему́, многоболе́зный вопль да услы́шит и да изведе́т от поги́бели живо́т наш; да пода́ст нам ми́рное жи́тельство, оставле́ние грехо́в, душа́м на́шым спасе́ние и ве́лию ми́лость. Ами́нь.