На Го́споди, воззва́х: стихи́ры предпра́зднства 3 и свята́го 3. Стихи́ры предпра́зднства, глас 1. Самогла́сны. Анато́лия:

Предпра́зднуим, лю́дие, Христо́во Рождество́,/ и, возне́сше ум к Вифлее́му, вознесе́мся мы́слию,/ и усмотри́м Де́ву душе́вными очесы́,/ иду́щую роди́ти в верте́пе всех Го́спода и Бо́га на́шего./ его́же Ио́сиф ви́дев чуде́с вели́чество,/ мня́ше челове́ка зре́ти,/ я́ко младе́нца, пелена́ми повива́ема,/ поразумева́ше же от веще́й Бо́га бы́ти и́стиннаго,/ подаю́щаго душа́м на́шим ве́лию ми́лость.

Предпра́зднуим, лю́дие, Христо́во Рождество́,/ и, ум возне́сше к Вифлее́му, вознесе́мся мы́слию,/ и у́зрим в верте́пе ве́лие та́инство:/ отве́рзеся бо Еде́м/ от Де́вы Чи́стыя Бо́гу происходя́щу,/ соверше́н Сый тойжде в Бо́жестве́ и челове́честве./ Те́мже воззове́м:/ Святы́й Бо́же – О́тче Безнача́льный,/ Святы́й Кре́пкий – Сы́не Воплоти́выйся,/ Святы́й Безсме́ртный – Уте́шительный Ду́ше:/ Тро́ице Свята́я, сла́ва Тебе́.

Слы́ши, Не́бо, и внуши́, земле́:/ се бо Сын и Сло́во Бо́га и Отца́/ прихо́дит роди́тися от Отрокови́цы Неискусому́жныя/ благоволе́нием роди́вшаго его́ безстра́стно/ и соде́йством Свята́го Ду́ха./ Вифлее́ме, гото́вися, отве́рзи врата́, Еде́ме,/ я́ко Сый быва́ет, е́же не бе,/ и Соде́тель всея́ тва́ри назида́ется,/ подая́й ми́ру ве́лию ми́лость.

И́ны стихи́ры свята́го, глас 4.

Подо́бен: Зва́нный свы́ше:

Богоно́сец нарица́емый досто́йно,/ егда́ Влады́ка тя, блаже́нне Игна́тие,/ я́ко ми́лостив, объя́т,/ любому́дрия го́рнейшаго явля́я догма́ты,/ тогда́ многосве́тлую лучу́ восприя́л еси́,/ я́коже гу́ба во́ды,/ от бе́здны просвеще́ний поче́рпл еси́./ Тем и стопа́м после́довал еси́/ зову́щему Христу́ Бо́гу на́шему,/ его́же моли́ спасти́ и просвети́ти ду́ши на́ша.

Уя́звен любо́вию соверше́нною,/ егда́ спасе́нное раче́ние разжже́ твою́ ду́шу, свяще́ннейше,/ ко Влады́це тя понужда́ющее, о́тче, ити́./ Тогда́ приснопе́тое сло́во возопи́л еси́:/ пшени́ца есмь Созда́вшего./ и зубы́ звере́й подоба́ет ми вся́ко смоло́тися,/ да Сло́ву чисте́йший хлеб явлю́ся и Бо́гу на́шему,/ его́же моли́ спасти́ и просвети́ти ду́ши на́ша.

Сраспя́лся еси́ Христу́, священноявле́нне,/ егда́ Богодухнове́нное сло́во возопи́л еси́:/ мое́ раче́ние распя́тися/ и приобщи́тися того́ стра́сти зело́ тщ́уся./ Отсю́ду, Игна́тие,/ я́коже со́лнце от восто́ка, устреми́вся на за́пад,/ просвеща́я, блаже́нне, обте́кл еси́/ и, ца́рскою диади́мою укра́шен,/ Христу́ приве́лся еси́,/ его́же моли́ спасти́ и просвети́ти ду́ши на́ша.

Сла́ва, глас 8. Анато́лиево:

Богоно́се Игна́тие,/ твоего́ жела́емаго Христа́ вперси́в,/ мзду́ восприя́л еси́ священноде́йства Ева́нгелия Христо́ва,/ е́же сконча́тися кро́вию./ Те́мже, пшени́ца быв безсме́ртнаго Де́лателя,/ зубы́ звере́й смеле́н был еси́/ и хлеб сла́док тому́ яви́лся еси́;/ моли́ о нас, страда́льче блаже́нне.

И ны́не, глас то́йже:

Восприми́, Вифлее́ме, Бо́жию митропо́лию,/ Свет бо незаходи́мый в тебе́ роди́тися прихо́дит./ А́нгели, удиви́теся на Небеси́,/ челове́цы, просла́вите на земли́,/ волсви́, от Перси́ды пресла́вный дар принеси́те,/ па́стырие, свиря́юще, трисвято́е пе́ние сла́дце воспо́йте:/ вся́кое дыха́ние да хва́лит Вседе́теля.

А́ще случйтся предпра́зднство Рождества́ Христо́ва в субботу: В пяток ве́чера Богоро́дичен 1-й мимоше́дшаго гла́са не пое́тся. Та́кожде и в предпра́зднство святы́х Богоявле́ний.

На стихо́вне стихи́ры, самогла́сны, глас 2.

Киприаново: Се, вре́мя прибли́жися спасе́ния на́шего, гото́вися, верте́пе:/ Де́ва приближа́ется, е́же роди́ти./ Вифлее́ме, земле́ Иу́дова,/ красу́йся и весели́ся,/ я́ко из тебе́ возсия́ Госпо́дь наш./ Услы́шите, го́ры, и хо́лми,/ и окре́стныя стра́ны Иуде́йския,/ я́ко гряде́т Христо́с,/ да спасе́т, егоже созда́, челове́ка,/ я́ко Человеколю́бец.

Стих: Бог от ю́га прии́дет/ и Святы́й из горы́ приосене́нныя чащи.

Вифлее́ме, земле́ Иу́дова,/ е́же по пло́ти жи́тельство,/ све́тло угото́ви Боже́ственный верте́п,/ в не́мже Бог пло́тию ражда́ется/ от Неискусому́жныя Святы́я Де́вы,/ во е́же спасти́ род наш.

Стих: Го́споди, услы́шах слух Твой и убоя́хся,/ Го́споди, разуме́х дела́ Твоя́ и ужасо́хся.

Андре́я Пи́рскаго: Приидите вси, Христо́во Рождество́ ве́рно предпра́зднуим/ и, мы́сленне пе́ние, я́ко звезду́, предлага́юще,/ волхво́в славосло́вия с па́стырьми возопии́м:/ прии́де Спасе́ние челове́ком из де́вственных ложе́сн,/ ве́рныя воззывая.

Сла́ва, глас 1. Студитово:

О, тве́рдыя и адама́нтския твоея́ души́,/ достоблаже́нне Игна́тие!/ ты бо к су́щему твоему́ Рачи́телю/ неосла́бное име́я жела́ние, глаго́лал еси́:/ несть во мне огнь любовеще́ствен,/ вода́ же, па́че жива́я и глаго́лющая во мне,/ внутрь ми глаго́лющи:/ гряди́ ко Отцу́./ Те́мже, Боже́ственным Ду́хом распаля́емь,/ зве́ри избра́л еси́ ми́ра тя скоре́е разлучи́ти/ и к жела́емому препосла́ти Христу́,/ его́же моли́ спасти́ ду́ши на́ша.

И ны́не, глас то́йже: Предпра́зднуим, лю́дие, Христо́во Рождество́,/ и, возне́сше ум к Вифлее́му,/ вознесе́мся мы́слию,/ и усмо́трим Де́ву душе́вными очесы́,/ идущую роди́ти в верте́пе всех Го́спода и Бо́га на́шего,/ его́же Ио́сиф ви́дев чуд́ес вели́чество,/ мня́ше челове́ка зре́ти,/ я́ко младе́нца, пелена́ми повива́ема,/ поразумева́ше же от веще́й Бо́га бы́ти и́стиннаго,/ подаю́щаго душа́м на́шим ве́лию ми́лость.

Тропа́рь, глас 4:

Апо́стольских нравов подража́телю/ и престо́ла их снасле́дниче,/ архиере́ев удобре́ние/ и му́чеников сла́во, Богодухнове́нне,/ на огнь, и меч, и зве́ри дерзну́л еси́ ве́ры ра́ди/ и, сло́во и́стины исправля́я,/ до кро́ве пострада́л еси́, свяще́нномучениче Игна́тие,/ моли́ Христа́ Бо́га/ спасти́ся душа́м на́шим.

Сла́ва, и ны́не, предпра́зднства глас то́йже:

Гото́вися, Вифлее́ме,/ отве́рзися всем, Еде́ме,/ красу́йся, Евфра́фо,/ я́ко дре́во живота́ в верте́пе процвете́ от Де́вы:/ рай бо О́ноя чре́во яви́ся мы́сленный,/ в не́мже Боже́ственный сад,/ от него́же я́дше, жи́ви бу́дем,/ не я́коже Ада́м у́мрем./ Христо́с ражда́ется пре́жде па́дший возста́вити о́браз.

НА ПОВЕЧЕ́РИИ

Пое́м трипе́снец, глас 2.

Ирмо́с: Непроходи́мое волня́щеся: по два́жды, тропари́ на 6 и последи́ ирмос оба ли́ка вку́пе. А иде́же двоирмо́сен трипе́снец, и пое́м 1-го творца́ ирмо́с, два́жды. Тропари́ же обою́ творцо́в на 6 и последи́ ирмо́с 2-го кано́на оба ли́ка вку́пе. Си́це пое́м кано́н и ирмосы́, и на прочих повече́риих в предпра́зднство Христо́ва Рождества́.

Припева́ем на трипе́снце: Сла́ва Тебе́, Бо́же наш, сла́ва Тебе́.

Ве́домо же бу́ди и сие́: Я́ко на пове́черии в предпра́зднства Христо́ва Рождества́, на трипеснце и на кано́нех на 8-й пе́сни поем:  Хва́лим, благослови́м: и поем ирмос 8-я пе́сни оба ли́ка вку́пе и поклон. На пове́черии конда́к предпра́зднства: Де́ва днесь:

Ведомо же и сие́ да бу́дет: Я́ко от двадесятаго дне декабря́ до 14 января, до́ндеже зри отдастся пра́здник святы́х Богоявле́ний, Окто́их не поется, кроме́ еди́ных неде́ль, в ни́хже поется воскресна слу́жба.

Полиелея же не поем, кроме́ вели́каго свята́го. На у́трени стихословим по две кафизмы, на вече́рни кафизма рядовая. Седа́льны глаго́лются предпра́зднства и попра́зднства. Не поется же и междочасие, и кано́н Богоро́дицы на пове́черии.

Трипе́снец, глас 2. Егоже краегране́сие: Второ́му.

Песнь 1

Ирмо́с: Непроходи́мое волня́щееся мо́ре/ Бо́жиим Свои́м веле́нием изсуши́вшему/ и пешеше́ствовати сквозе́ е́ изра́ильтеския лю́ди наста́вльшему,/ Го́сподеви пои́м, сла́вно бо просла́вися.

Припе́в: Сла́ва Тебе́, Бо́же наш, сла́ва Тебе́.

Неизрече́нное Сло́ва Бо́жия низше́ствие:/ Сам бо я́ко Богочелове́к Христо́с познава́ется,/ Бог нехище́ние бы́ти вменя́емь,/ воображе́нием раба́ показу́ется всем нам,/ сла́вно бо просла́вися.

Послужи́ти Христо́с во́льно прихо́дит,/ Его́же о́браз Зижди́тель ны́не прие́млет,/ обнища́вшаго Ада́ма обогаща́я Божество́м,/ стра́нное обновле́ние и возрожде́ние, я́ко благоутро́бен, да́руя.

Песнь 8

Ирмо́с: Устраши́ся отроко́в благочести́вых/ сообра́знаго души́ нескве́рнаго тела/ и устрани́ся воспита́нный в безме́рном веществе́/ неутружде́н огнь,/ присноживу́щу же, изувя́дшу пла́меню,/ ве́чнующая песнь воспева́шеся:/ Го́спода, вся дела́, по́йте/ и превозноси́те во вся ве́ки.

Вас, Моя́ вся сро́дники, ны́не положу,/ а́ще Моя́ за́поведи соблюдете́, глаго́лет Христо́с челове́ком,/ из утро́бы Чи́стыя проше́дый, и́мже ми́р дая́й,/ и смире́нная мудрствова́ти ны́не предлага́ет,/ и Го́спода зна́юще Мя, по́йте и превозноси́те во вся ве́ки.

Чи́на проти́внаго в Тебе́ плотска́го есть Рождество́, Сло́ве Бо́жий,/ не кровь бо и плоть твою́ святу́ю плоть соста́виша,/ но Ду́ха Свята́го прише́ствие и Вы́шняго Боже́ственное осене́ние,/ я́ко, Го́спода ве́дяще Тя, пое́м и превозно́сим во вся ве́ки.

Ин двопе́снец, его́же краегране́сие: И тре́тиему.

Ирмо́с: Веле́нию мучи́телеву:

Ле́ности сон от нас отложи́м/ и душе́вным бо́дрством ражда́ющагося от Отрокови́цы Чи́стыя Христа́ сря́щим, зову́ще:/ благослови́те, дела́ Госпо́дня, Го́спода.

Дово́льно бу́ди дея́ние благо́е, на́ше душе́вное сокро́вище,/ я́ко да све́тлым лице́м Христу́ ражда́емому пое́м:/ благослови́те, дела́ Госпо́дня, Го́спода.

Тала́нт де́лы благи́ми возрасти́вше, я́коже да́ры да́вшему,/ вме́сто зла́та, и лива́на, и сми́рны принесе́м Христу́,/ гряду́щему роди́тися из Де́вы Богоотрокови́цы.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Ирмо́с: Веле́нию мучи́телеву/ преподо́бнии трие́ о́троцы не пови́нувшеся,/ в пещь вве́ржени, Бо́га испове́даху, пою́ще:/ благослови́те, дела́ Госпо́дня, Го́спода.

И поклон.

Песнь 9

Ирмо́с: Возвели́чил еси́, Христе́, ро́ждшую Тя Богоро́дицу,/ от Нея́же, Созда́телю наш,/ в подобостра́стное нам обле́клся еси́ те́ло,/ на́ших прегреше́ний реши́тельное:/ сию́ ублажа́юще, вси ро́ди,/ Тебе́ велича́ем.

Ки́йждо лик, пропе́в ирмос, твори́т поклон.

Скве́рну всю стра́стную отри́нувше,/ досто́йно прише́ствие Христо́во ра́зумом восприи́мем целому́дрым,/ и́бо нескве́рно предгряде́т плоть понести́/ и всем дарова́ти Боже́ственное Ду́хом обновле́ние.

Взира́юще на Христа́ смиря́ющагося,/ возвы́симся от долере́тных страсте́й;/ ре́вностию же до́брою не му́дрствовати высо́кая,/ ве́ре научи́вшеся, в ду́се да смири́мся,/ я́ко да ражда́емаго высокотво́рными де́лы возвы́сим.

Ин ирмо́с: Невмести́маго Бо́га:

Благоразу́мным Христо́с бо́дрствовати запове́дает/ того́ наде́ющимся прише́ствия из Де́вы:/ се бо прихо́дит роди́тися.

Во второ́м Твое́м, Христе́, прише́ствии,/ сожи́теля десны́м мя причти́ овца́м Твои́м,/ Твое́ чту́щаго в пло́ти прише́ствие.

Ирмо́с: Невмести́маго Бо́га/ во чре́ве вмести́вшая/ и Ра́дость ми́ру роди́вшая,/ Тя пое́м, Богоро́дице Де́во.

И поклон.

НА УТРЕНИ

На Бог Госпо́дь: тропа́рь предпра́зднства два́жды:

Сла́ва: свята́го.

И ны́не: предпра́зднства.

По 1-й стихоло́гии, седа́лен, глас 1.

Подо́бен: Гроб Твой, Спа́се:

Весели́ся, Вифлее́ме, Евфра́фо, гото́вися:/ се бо А́гница, Па́стыря вели́каго в ложесна́х нося́щи, роди́ти гряде́т,/ и, предви́дяще Боже́ственную звезду́, волсви́ ра́дуются,/ с па́стырьми пою́ще се́рдца пра́востию.

Сла́ва, и ны́не:

Приклони́вый Небеса ́и в Де́ву всели́выйся/ происхо́дит пло́тию в Вифлее́мстем верте́пе роди́тися, я́коже писа́ся,/ ви́детися же Младе́нец,/ младе́нцы оживля́яй во утро́бе,/ сего́, ра́дующеся, ны́не сря́щем вси се́рдца пра́востию.

По 2-й стихологии седа́лен, глас 4.

Подо́бен: Ско́ро предвари́:

Де́вы, предначни́те деви́ческую ра́дость;/ ма́тери, восхвали́те провожде́ние Ма́тере Христа́ Бо́га на́шего;/ волсви́ со А́нгелы, с на́ми па́стырие:/ гряде́т бо Де́ва во гра́де Вифлее́ме роди́ти Сы́на Преве́чнаго Бо́га,/ спаса́ющаго ми́р от тле́ния.

Сла́ва, и ны́не, глас то́йже:

Ра́дуйся, Сионе, Вифлее́ме, украси́ся,/ всех Содержи́тель, звезду́ предпосла́в, возвести́ безме́рное Свое́ схожде́ние,/ его́же трепе́щут Небе́сныя си́лы,/ вои́стинну ражда́ется от Де́вы непрело́жно Еди́н Человеколю́бец.

По кафи́змах чтем муче́ние свята́го Игна́тия на дво́е и сло́во Зла́тоустово, е́же о блаже́ннем Фило́гонии, на дво́е. Псало́м 50.

Ве́домо же бу́ди, я́ко от дне́шняго днеГо́сподеви пое́м: в пе́снех не глаго́лем, до́ндеже отдастся пра́здник святы́х Богоявле́ний.

Кано́на два предпра́зднства со ирмосо́м на 8 и свята́го на 6. Кано́н предпра́зднства, глас 1, его́же краегранесие: Пое́тся сия́ предпра́зднственная.

Ио́сиф.

Песнь 1

Ирмос, по два́жды: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися.

Начне́м днесь предпра́зднетвовати Христо́во Рождество́,/ ро́ждшагося пло́тию от Де́вы Ма́тере в верте́пе Вифлее́мстем/ за благоутро́бие мно́гое.

Уз отреша́я мя грехо́вных,/ пелена́ми повива́ется и в я́слех полага́ется Младе́нец ви́димь, Преве́чный Бог./ Сла́ва держа́ве его́.

Богоро́дичен: Еде́м отверза́ется Тебе́, ро́ждшуся от Де́вы Богоотрокови́цы/ во гра́де, Влады́ко, Вифлее́ме пло́тию./ Песносло́вим стра́шное смотре́ние Твое́.

Ин кано́н свята́го Игна́тия, глас и ирмо́с то́йже. Творе́ние преподо́бнаго Андре́я Кри́тскаго.

Све́тло пра́зднующе, да учреди́мся,/ му́ченик Игна́тий свяще́нно созыва́ет Це́рковь Христо́ву/ на страда́ние его́ многопе́тое.

Свети́льник пресветле́йший Це́ркве сый, Игна́тие,/ просвеща́еши вся земны́я концы́/ и за́падная озаря́еши, от восто́ка прише́д.

Па́вловым подо́бяся по ме́стом беда́м, Игна́тие,/ и сый ю́зник, не стужи́л еси́,/ утвержда́я писа́ньми ча́стыми Це́ркви Христо́вы.

Сла́вную па́мять твою́ вси пое́м, всеблаже́нне Игна́тие,/ и пе́сньми почита́ем Венча́вшаго/ твой всечестны́й верх, Богоблаже́нне.

Да стру́жется плоть моя́, кровь да лие́тся,/ жела́нием тщу́ся, ко звере́м гото́в, к сомле́нию укра́шен,/ ко огню́, к меч́, к снеде́нию, му́ченик вопия́ше.

Богоро́дичен: Еде́ме, украси́ся,/ Евфра́фа бо Созда́телю угото́вася,/ роди́тися хотя́щу от Де́вы Ма́тере в верте́пе Вифлее́мстем/ за благоутро́бие мно́гое.

Песнь 3

Ирмо́с: Ка́мень, его́же небрего́ша зи́ждущим,/ сей бысть во главу́ угла́,/ Той есть Ка́мень,/ на Не́мже утверди́ Це́рковь Христо́с,/ ю́же от язы́к искупи́.

Песнь предпра́зднственную вся да припева́ет тварь/ пре́жде денни́цы от Отца́ ро́ждшемуся, и ны́не из Де́вы неизрече́нно просия́вшему,/ и ражда́ющемуся пло́тию в Вифлее́ме за милосе́рдие мно́гое.

Звезда́ уже́ возсия́ от пле́мене Иу́дова,/ ю́же позна́вше, ца́рие дви́жение от восто́ков творя́т/ и дости́гнути тща́тся, я́ко да у́зрят Христа́,/ в Вифлее́ме пло́тию ражда́ема.

Богоро́дичен: Сие́ вопло́щение Христо́во уве́дев,/ Иса́ия Ду́хом Святы́м я́ве предглаго́лет:/ Отроча́ из Де́вы ражда́ется, Госпо́дь, в возрожде́ние на́ше,/ его́же власть на ра́ме его́.

Свята́го. Ирмо́с то́йже

О́браз свяще́ннаго страда́ния показа́лся еси́, о́тче,/ столп терпе́ния, и пра́вило му́жества, и столп Це́ркве,/ и ве́ры утвержде́ние, и доброде́тели подписа́ние,/ страда́ньми честны́ми венча́вся во Христе́.

Вои́стинну тезоиме́нно наре́клся еси́ Богоно́сец, о́тче:/ младе́нец бо еще́ во́зрастом сый,/ на рука́х носи́мь Го́спода поста́вился еси́, возглаша́ющаго к нам:/ бу́дите Мне, я́ко отроча́ сие́.

Пшени́ца чи́ста Бо́жия есмь, вопия́л еси́, о́тче:/ тщу́ся от звере́й ди́виих смоло́тися, да сокруши́тся мое́ те́ло,/ да снедя́тся удеса́ моя́, и снедь да бу́ду звере́м,/ да Бо́гу чист хлеб явлю́ся.

Стра́нное муче́ния три́знище терпели́вне соверши́л еси́,/ чу́дно па́че всех предпострада́вших му́жество показа́л еси́,/ любо́вию разжига́емь неосла́бнаго рачения,/ я́коже бо огнь твою́ возжже́ ду́шу.

Горя́й при́сно ду́хом, священному́ченик взыва́ше с любо́вию посреде́ бед:/ Христа́ гоню́, ра́дуяся, Христу́ сраспина́юся;/ живу́ же не ктому́ у́бо аз,/ живе́т же, – глаго́лет,– во мне еди́н Христо́с.

Богоро́дичен: Гряди́, Иса́ие, возопи́й:/ се Де́ва и́мать во чре́ве Изба́вителя ми́ра и роди́т в верте́пе,/ и бу́дет и́мя ражда́емаго Иису́с, Бог с на́ми,/ Емману́ил Савао́ф.

Конда́к предпра́зднства, глас 3.

Подо́бен: Де́ва днесь:

Де́ва днесь преве́чное Сло́во в верте́пе гряде́т роди́ти неизрече́нно:/ лику́й, вселе́нная, услы́шавши,/ просла́ви со А́нгелы и па́стырьми/ хотя́щаго яви́тися Отроча́ Младо, Преве́чнаго Бо́га.

И́кос:

О, ужа́снаго и́стинно и па́че сло́ва чудесе́!/ Е́же бы́ти дая́й всем ра́ди бла́гости, во чре́во Святы́я Де́вы вни́де,/ и в верте́пе роди́тися гряде́т,/ и в я́слех положи́тися./ Звезда́ же сего́ пропове́дует свы́ше волхво́м, иду́щим на поклоне́ние его́ с да́ры,/ издале́ча привлача́щи со тща́нием, после́дующия Валаа́мову прорече́нию, ре́кшаго:/ звезда́ хо́щет провозвести́ти Отроча́ Мла́до, Преве́чнаго Бо́га.

Седа́лен, глас 3.

Подо́бен: Красоте́ де́вства:

Рукополага́емь от Христа́ Бо́га, просвети́л еси́ свяще́нную твою́ оде́жду,/ свиде́тельство и́стинно получи́в, Богоно́се:/ зве́ри бо раздражи́л еси́ от ми́ра отлучи́ти тя,/ Па́влу подо́бяся, чу́дному апо́столу./ Те́мже и в Ри́ме сконча́л еси́, о́тче, досто́йне муче́ние.

Сла́ва, глас 8.

Подо́бен: Прему́дрости:

От восто́ка возсия́в, я́коже звезда́,/ и луча́ми слове́с озаря́я, ми́р просвети́л еси́, и тьму отгна́л еси́,/ и, я́ко Па́вел, тече́ние до́блественне соверши́л еси́,/ претерпе́в бе́ды в язы́цех же и граде́х./ Отону́дуже и, я́ко пшени́ца, звере́й зубы́ сомле́лся еси́, блаже́нне,/ приноше́ние Го́споду твоему́, Богоно́се Игна́тие./ моли́ся Христу́ Бо́гу прегреше́ний разреше́ние дарова́ти/ чту́щим любо́вию святу́ю па́мять твою́.

И ны́не: Из чре́ва пре́жде век от Отца́ возсия́в неслия́нне, Сло́ве Бо́жий,/ безсе́менно предгряде́т от Твоея́ утро́бы, Пречи́стая, вре́менми последи́,/ вознося́й и́же дре́вле лю́те попо́лзшагося/ и к дре́вней добро́те возводя́, я́ко Милосе́рд./ Его́же Рождеству́ во́инства Безпло́тных предъи́дут/ и челове́ком побе́дная та́йно возсыла́ют,/ сла́ва, – взыва́юще, – Бо́гу, дарова́вшему нам мир,/ разруши́вшему средосте́ние вражды́, я́коже изво́ли.

Песнь 4

Ирмо́с: Ду́хом прови́дя, проро́че Авваку́ме, Словесе́ вопло́щение,/ пропове́дал еси́, вопия́:/ внегда́ прибли́житися ле́том – позна́ешися,/ внегда́ приити́ вре́мени – пока́жешися./ Сла́ва си́ле Твое́й, Го́споди.

Го́ры, хо́лми же и дре́ва дубра́вная,/ ре́ки, и моря́, и вся́кое дыха́ние, в весе́лии взыгра́йте:/ ны́не приближа́ется спасе́ние,/ Иису́с из Де́вы во гра́де Вифлее́ме роди́тися.

Восприими́, проро́че Дави́де, псалти́рь и песнопо́й Ду́хом Святы́м я́ве:/ от Де́вы бо ражда́ется неслия́нно пре́жде денни́цы из чре́ва О́тча возсия́вый,/ Госпо́дь сла́вы, Христо́с Бог.

Ка́ко прии́мет Тя, Сло́ве, ражда́ема пло́тию, верте́п мале́йший и зело́ худы́й?/ Ка́ко же повие́шися пелена́ми, Одеява́яй не́бо о́блаки?/ Ка́ко в я́слех безслове́сных возля́жеши, я́ко Младе́нец?

Свята́го. Ирмо́с то́йже

Уясни́л еси́ заре́ю страда́ний твои́х зе́млю,/ свяще́нне Игна́тие, у́зник яви́вся:/ обте́к бо, я́ко со́лнце, луча́ми муче́ния,/ ве́чер от восто́ка, весь уясня́я, просвети́л еси́.

Я́коже Па́вел, свя́зан зверьми́ слове́сными,/ в Рим текл еси́, Игна́тие му́дре,/ но не преста́л еси́ и свя́зан сый, утвержда́я Це́ркви,/ посыла́я по вся гра́ды всем Христо́вым иера́рхом дерза́ти.

Христо́в тщу́ся бы́ти, Христа́ еди́наго жела́ю:/ весь бо Христо́в есмь, – вопия́л еси́, страда́льче. – Того́ гоню́, того́ иду́ дости́гнути,/ и сего́ ра́ди огнь, и меч, и зве́ри – вси терплю́,/ да получу́, е́же жи́ти.

Сладка́ мне скорбь, любе́зны у́зы за жела́емаго, –/ вопия́л еси́, страда́льче:/ гоне́ния ми сла́ждшая оте́чества, и сомле́ния моя́ па́че вся́каго весе́лия,/ боле́зни па́че вся́каго здра́вия теле́снаго.

Звере́й мне да бу́дут уста́ закла́ние/ и чре́ва гро́бы, – вопия́л еси́, страда́льче. –/ Никто́же да стужа́ет, никто́же ми сокруша́ет кре́пость:/ аз бо тщу́ся сомле́тися,я́коже пшени́ца,/ и хлеб обрести́ся Бо́гу чист.

Богоро́дичен: В верте́пе землене́м роди́тися нас ра́ди Бог сый изво́лил еси́,/ обнища́в, Бла́же, на́шею нището́ю за милосе́рдие/ и из Де́вы проше́д, воплоще́н,/ пребы́в еди́н Сын из Отца́ и Ма́тере.

Песнь 5

Ирмо́с: Твой ми́р даждь нам,/ Сы́не Бо́жий:/ ино́го бо, ра́зве Тебе́, Бо́га не зна́ем,/ и́мя Твое́ имену́ем,/ я́ко Бог живы́х и ме́ртвых еси́.

Да кропя́т, ра́дующеся, о́блацы сла́дость:/ уже́ бо приближа́ется Госпо́дь роди́тися я́коже Младе́нец из Чи́стыя Де́вы/ в худе́м верте́пе.

Боже́ственнии ны́не взыгра́йте, проро́цы Бо́жии:/ прихо́дит бо Христо́с И́стина/ исполни́т про́поведи ва́шего Боже́ственнаго язы́ка,/ ражда́яся я́ко Младе́нец.

Богоро́дичен: Еде́ме, заключи́выйся мне дре́вле,/ отве́рзися про́чее, ви́дя Христа́, младе́нствующа пло́тию/ и во гра́де, я́ко благоволи́, Вифлее́ме/ от Де́вы ражда́ющася Отрокови́цы.

Свята́го. Ирмо́с то́йже

Таков нам подоба́ше мудр Архиере́й,/ преподо́бен, ве́рен, нескве́рнен, незло́бив, – вопия́ Па́вел,/ преднаписа́ свяще́нный о́браз свяще́нных твои́х нра́вов.

Свя́зан, отводи́мь пострада́ти, архиере́й, у́зник Христо́в, Игна́тие,/ писа́л еси́ Це́рквам и градо́м, утвержда́я вся во испове́дании.

Па́вловым исправле́нием поревнова́в благочести́вно,/ вся его́ бе́ды претерпе́л еси́, священному́чениче досточу́дне,/ восто́чная све́тлосте и вече́рняя звездо́.

Жела́нием ретя́ся Па́вловым, у́зы име́я на рука́х,/ ми́р обте́кл еси́, священному́чениче,/ да благоявле́н свяще́нными твои́ми страда́ньми яви́шися всем.

Пое́м по́двиги твоя́,/ честву́ем у́зы кажде́нии и псалмы́,/ персть че́ствуем твои́х моще́й, я́ко арома́ты мирома́занную, му́чениче,/ свяще́нными твои́ми страда́ньми.

Богоро́дичен: Бог челове́ком подо́бен быв из Тебе́,/ Младе́нец нас ра́ди ражда́ется, Богоневе́сто, и пребыва́ет весь неизме́нен,/ и во пло́ти ви́дится Бог вочелове́чивыйся.

Песнь 6

Ирмо́с: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́щи: сла́ва Тебе́.

Не́бо на земли́ Небе́снаго показу́ет звездо́ю све́тлою/ Царя́, нас ра́ди ражда́ющагося,/ звездосло́вцем ны́не во гра́де Дави́дове.

Вити́йствует и вопие́т проро́к я́ве:/ до́ме ты Евфра́фов, Вифлее́ме,/ в не́мже Бог яви́тся от Де́вы,/ игра́й и лику́й.

Богоро́дичен: В верте́пе Вифлее́мстем Де́ва ражда́ет я́вственне Го́спода, всех Творца́,/ и я́ко Челове́ка пови́вши пелена́ми, в я́слех восклоняет ны́не.

Свята́го. Ирмо́с то́йже

Я́ко вои́стинну Жела́теля возлюби́в неукло́нно/ и огнь и́же к Нему́ воспали́в разу́мне, Игна́тие,/ во́ду имел еси́ в тебе́ живу́щую и глаго́лющую.

Свиде́тельство твоей со́вести исполня́я,/ не удово́лился еси́, зря звере́й стремле́ния,/ не устраши́лся еси́, я́коже пшени́ца хотя́ члено́вными сомле́тися.

До́лгая твоя́ гоне́ния и нереши́мыя у́зы,/ я́же в Ри́ме терзания и огнь гони́телей в ничто́же вменя́л еси́, священному́чениче,/ за твоего́ Рачи́теля.

Вельми́ горя, страда́льче, любо́вию Христо́вою,/ ко огню́ искуше́ний я́ко на ро́су у́треннюю поте́кл еси́,/ О́наго пости́гнути сущо су́щаго Рачи́теля.

А́ще и пил еси́ Христо́ву ча́шу жажда́,/ но пре́был еси́ при́сно е́же пострада́ти, па́че е́же жи́ти./ И вопия́л еси́:/ ничто́же мне сия́, ко е́же получи́ти мне е́же жи́ти.

Богоро́дичен: Украси́ся, Вифлее́ме, угото́вися, Евфра́фо:/ без ма́тере бо от Отца́/ и без отца́ Ма́терию чревоно́сится/ и ражда́ется, спаса́я ны.

Конда́к, глас 3.

Подо́бен: Де́ва днесь:

Све́тлых по́двиг твои́х светоно́сный день/ предпропове́дует всем в верте́пе рожде́ннаго:/ сего́ бо жа́ждая от любве́ наслади́тися,/ потща́лся еси́ от звере́й снеде́н бы́ти;/ сего́ ра́ди и Богоно́сец наре́клся еси́, Игна́тие всему́дре.

И́кос:

Авраа́м у́бо иногда́ сы́на жря́ше,/ закла́ние предвообража́я вся Содержа́щаго/ и ны́не в верте́пе тща́щагося роди́тися,/ ты же, Богому́дре, всего́ прине́сл еси́ тебе́ сама́го, я́коже заколе́ние,/ и, звере́й снедь быв,/ пшени́ца чи́ста яви́лся еси́ Зижди́телю твоему́,/ в жи́тницах Небе́сных ве́чнуяй вои́стинну/ и твоего́ раче́ния наслажда́лся./ Его́же ра́ди весь ми́р оста́вив, Богоно́сец наре́клся еси́,/ Игна́тие всему́дре.

Песнь 7

Ирмо́с: Су́щим в пещи́ отроко́м Твои́м, Спа́се,/ не прикосну́ся, ниже́ стужи́, огнь./ Тогда́ трие́, я́ко еди́неми усты́, поя́ху/ и благословля́ху, глаго́люще:/ благослове́н Бог оте́ц на́ших.

Христо́во во пло́ти показу́я явле́ние, Иереми́я вопия́ше:/ на земли́, вопло́щся, Бог яви́ся;/ худо́жества же обре́те всяк путь, рожде́йся в Вифлее́ме из Ма́тере.

Се из ко́рене Иессе́ева прозябе́ жезл, цвет, прозяба́ющ Христа́,/ и на нем, ны́не ражда́емем в верте́пе,/ Дух почи́ет ра́зума, и сове́та,/ и Боже́ственнаго ве́дения.

Да услы́шим словеса́ свяще́нная:/ Госпо́дь ражда́ется, Отроча́ ра́ди нас,/ его́же нача́льство на ра́ме бысть,/ и нарица́ется А́нгел Сове́та Вели́ка О́тча,/ Нача́льник Ми́ра – Христо́с.

Свята́го. Ирмо́с то́йже

Не имел еси́ огня́ любове́щна в тебе́, Игна́тие,/ во́ду же живу́ю па́че и глаго́лющую, во́ду зову́щую:/ гряди́ ко Отцу́;/ во́ду, теку́щую от жи́зни в жи́знь, преводя́щую нас.

Звере́й зу́бы, – глаго́лет, – да бу́дут мне меч, и ору́жия, и закла́ния;/ гроб же мне льво́вы утро́бы да бу́дут,/ и огнь да поя́ст мя пре́жде тли ко́жныя останки.

Мне сла́дка смерть, – глаго́лет, –/ сла́дка мне вся трудо́в боле́зненная,/ зве́рие ра́достни, огнь сей роса́ мне есть,/ а́ще е́же жи́ти воздержу́./ Те́мже и тщу́ся умре́ти, да живу́ со Христо́м.

Е́же жи́ти мне не есть рачи́тельно в телеси́,/ ду́хом бо жи́ти жела́ю./ Мне е́же жи́ти Христо́с, Боже́ственное рачи́тельство;/ к Нему́ иду́, Того́, – глаго́лет, – люблю,/ Того́ получи́ти наде́юся.

Богоро́дичен: Проро́ком дре́вле прорече́нный,/ приближа́ется мне Младе́нец, из Де́вы рожде́йся,/ ра́дуется Ада́м, и прама́ти Е́ва боле́зней разреши́ся,/ и сликовству́ет Дави́д, ражда́ющия оте́ц.

Песнь 8

Ирмо́с: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки.

Госпо́дь гряде́т стра́нным Рождество́м я́ве во Своя́,/ прии́мем его́, я́ко да устра́ншияся ра́йския сла́дости па́ки присво́ит,/ ражда́яся в верте́пе.

Се Воззва́ние на́ше прихо́дит,/ возгласи́м пе́ния ра́достная тща́нием/ и воспои́м пе́сни предпра́зднственныя/ в мале́йшем Вмеща́ющемуся верте́пе.

Богоро́дичен: Я́ко кля́тся Госпо́дь, испо́лни уже́,/ от се́мене дав нам Дави́дова Свою́ Ма́терь Де́ву;/ из Нея́же Младе́нец пло́тию роди́ся во гра́де Вифлее́ме па́че сло́ва.

Свята́го. Ирмо́с то́йже

Пет бу́ди Игна́тий, Боже́ственный иере́й,/ сугу́бо венча́емь, я́ко му́ченик и па́стырь:/ страда́в бо сей за любо́вь Бо́жию,/ жела́я возжеле́н бы́ти, пострада́ти не отмета́шеся.

Тече́нии ве́ры, я́ко со́лнце, зе́млю до́блественне прете́кл еси́ от коне́ц Небесе́/ и, заше́д незаходи́мо от земли́ ко Христу́,/ облистава́еши ми́ру свет нетле́ния.

Жа́ждая ча́ши стра́сти Христо́вы,/ свя́зан, текл еси́, Игна́тие му́дре,/ и дости́г три́знища, не престал еси́, вопия́:/ жа́жду жа́жда́ти Христа́ во ве́ки.

О, любве́ и теплоты Боже́ственнаго раче́ния!/ Жела́нием распя́тся и да живе́т Рачи́телю;/ жа́ждет, е́же возжажда́тися, и люби́т, е́же люби́тися,/ за е́же па́ки жи́ти, умре́ти произволя́я.

Персть отложи́в,/ невеще́ственно к су́щему ум впери́л еси́, жела́я Рачи́теля:/ Той бо есть при́сное жела́ние,/ и и́стинно му́дрость, и жи́знь бы́вших.

Богоро́дичен: Звезда́ возсия́, Христо́с от Иа́кова,/ и волсви́ стека́ются во град Вифлее́м пе́ти, чествова́ти и поклони́тся ему́,/ рожде́нному из ложе́сн Чи́стыя Богоро́дицы.

Песнь 9

Ирмо́с: Живоприе́мный Исто́чник приснотеку́щий,/ светоно́сный свети́льник благода́ти,/ храм одушевле́нный, сень Пречи́стую,/ Небесе́ и земли́ простра́ннейшую,/ Богоро́дицу, ве́рнии, велича́ем.

С патриа́рхи, и пра́ведными все́ми, и со святы́ми проро́ки взыгра́им, от Де́вы Госпо́дь Иису́с, избавле́ние, просвеще́ние, и жи́знь, и спасе́ние,/ ны́не во гра́де Дави́дове ражда́ется.

Уже Боже́ственнаго Сло́ва воплоще́ния всем отверзо́шася я́ве преддве́рия./ Небеса́, ра́дуйтеся, А́нгели, взыгра́йте,/ и да весели́тся земля́ с челове́ки,/ с па́стырьми и волхвы́ ду́хом.

Богоро́дичен: Но́сит Христа́, я́коже ми́ро неистоще́нное, у́мный Де́ва алава́стр,/ и сие́ предъи́дет в верте́пе излия́ти Ду́хом я́ве,/ я́ко да напо́лнит благоуха́ния его́ ду́ши на́ша.

Свята́го. Ирмо́с то́йже

Презира́тель до́льних Игна́тий и служи́тель вы́шних та́ин,/ я́ко слу́жбу непоро́чну соверша́я, и, соверша́емь, свяще́нноде́йствует себе́ сама́го муче́нием,/ и к звере́м и огню́ гото́вится.

Е́же по о́бразу любя́ оде́ятися,/ ве́тхия о́бразы измени́л еси́./ Те́мже но́востию, а не ве́тхостию первообра́знаго зра́ка пе́рвую добро́ту восприе́м,/ Христо́ви соводворя́ешися.

Свяще́нную твою́ оде́жду, свяще́ннейше, свяще́ннейшу соде́лал еси́ страда́ньми твои́ми,/ те́мже и вене́ц сугу́б восприе́м,/ с му́ченики пое́ши и па́стыри, священному́чениче,/ Христа́ Бо́га на́шего.

Пшени́ца Бо́жия чи́ста есмь, – глаго́лал еси́, –/ и зубы́ звере́й мелю́ся,/ да хлеб бу́ду священносоверша́емь, Рачи́телю и Бо́гу очище́н,/ Его́же и любя, умре́ти не отрица́юся.

Непристу́пным све́том осиява́емь/ и в вы́шних оби́телех водворя́лся, свяще́нне Игна́тие,/ Бо́гу и Зижди́телю твоему́ о ста́де твое́м сем моля́ся неоску́дно не преста́й, мо́лимся.

Богоро́дичен: Ра́дуйся, Чи́стая, Бо́жий гра́де одушевле́нный,/ в не́мже Бог вмести́тися благоволи́,/ не оста́вль бо го́рних, к Тебе́ сни́де,/ я́ко дождь на зе́млю, Богороди́тельнице,/ и во гра́де Вифлее́ме Младе́нец ражда́ется.

Свети́лен.

Подо́бен: Ду́хом во святи́лищи:

Сло́во Пребезнача́льное, Бо́жия Му́дрость,/ неизрече́нною бла́гостию земны́м приобщи́вся,/ уча́ дре́вле лю́ди, на рука́х держа́ше тя, Игна́тие Богоно́се;/ в Бо́зе же жив, муче́ние проше́л еси́, страда́ния ра́дуяся.

Сла́ва, и ны́не, предпра́зднства.

Подо́бен: Предугото́вися:

Украси́ся, Вифлее́ме, но́вое жили́ще,/ я́сли и верте́п, па́стырей со́нмища,/ волсви́ от восто́ков в него́ предвари́те звезды́ све́тлостию:/ Де́ва бо уже́ Всесоверше́ннаго я́ко Младе́нца в том ражда́ет.

На хвали́тех стихи́ры предпра́зднства, глас 6, на 4, по алфави́ту.

Творе́ние Рома́на певца́.Самоподо́бен:

А́нгельския предъиди́те си́лы,/ и́же в Вифлее́ме угото́вайте я́сли:/ Сло́во бо ражда́ется,/ Му́дрость происхо́дит,/ прие́млет целова́ние Це́рковь./ На ра́дость Богоро́дицы,/ лю́дие, рце́м:/ благослове́н прише́дый/ Бо́же наш, сла́ва Тебе́.

Го́ры сла́дость да ка́плют,/ се бо прихо́дит Бог от ю́га,/ язы́цы, покаря́йтеся,/ ра́дуйтеся, проро́цы,/ патриа́рси, взыгра́йте,/ челове́цы, восплещи́те рука́ми:/ Кре́пкий и Вели́кий Князь Христо́с ражда́ется,/ Царь Небе́с на зе́млю прихо́дит.

От земли́ вознося́ челове́чество,/ Зижди́тель прии́де,/ ца́рский обновля́я па́ки о́браз./ Сра́дуйтеся, Го́рних Си́лы, и воспо́йте,/ вражды́ средосте́ние, разори́ся,/ прии́де, ему́же прилежа́ше:/ Бог бо Челове́к быва́ет,/ Царь Изра́илев,/ Христо́с Бог наш.

Гряди́, Изра́илю тяжкосе́рдый,/ отве́ржи и́же в души́ твое́й надлежа́щий тебе́ о́блак,/ позна́й Созда́теля, в верте́пе ражда́ющагося,/ Сей язы́ков ча́яние,/ Сей разори́т пра́здники твоя́,/ вопи́ти бо не повину́ешися:/ Царь Изра́илев,/ Христо́с прихо́дит.

Сла́ва, глас и подо́бен то́йже:

Приближа́ется Христо́с,/ Вифлее́ме, предугото́вися,/ уже́ язы́ков спасе́ние озаря́ет,/ благоукраси́ я́сли,/ па́стыри собери́,/ призови́ волхвы́ от Перси́ды,/ во́инства Безпло́тных умов, воззови́те:/ Царь Небе́с/ на зе́млю прихо́дит.

И ны́не, глас и подо́бен то́йже:

За́висть же и огнь поя́ст тя,/ безу́мный преле́стниче, вои́стинну/ и зако́нная кля́тва:/ се бо Де́ва,/ я́коже Иса́ия прорече́,/ име́ во чре́ве/ и в я́слех восклони́т Царя́,/ И́мже вси от колена Иу́дова/ си́льнии оскуде́ют.

На стихо́вне стихи́ры самогла́сны, глас 4:

Вифлее́ме, украша́йся,/ воспо́й, гра́де Сио́не,/ ра́дуйся, пусты́не, предобруча́ющи ра́дость:/ звезда́ бо предъи́дет в Вифлее́м,/ возвеща́ющи хотя́щаго роди́тися Христа́,/ и верте́п прие́млет Невмести́маго все́ми,/ и я́сли гото́вятся восприя́ти Жи́знь ве́чную./ тому́ вси воспои́м и возопии́м:/ спаси́ ду́ши на́ша, Иису́се Бо́же,/ воплоти́выйся нас ра́ди.

Стих: Бог от ю́га прии́дет/ и Святы́й из горы́ приосене́нныя чащи.

Христо́с гря́дый – я́ве Бог наш,/ прии́дет и не укосни́т,/ от Неискусобра́чныя Отрокови́цы яви́тся,/ в верте́пе же про́чее препочи́ет/ и в я́слех безслове́сных,/ его́же не вмеща́ет Не́бо,/ приими́ хотя́щаго пелена́ми пови́тися в тебе́,/ сло́вом разре́шшаго ны от безслове́сия./ Звезда́ возвеща́ет,/ волсви́ покланя́ются,/ па́стырие свиря́ют,/ чу́до зря́ще стра́шное,/ и А́нгели воспева́ют на земли́,/ ви́дяще избавле́ние ро́да на́шего.

Стих: Го́споди, услы́шах слух Твой и убоя́хся,/ Го́споди, разуме́х дела́ Твоя́ и ужасо́хся.

Иса́ие, лику́й,/ Сло́во Бо́жие восприе́м,/ прорцы́ Отрокови́це Мари́и,/ купине́ горе́ти и огне́м не сгара́ти заре́ю Божества́./ Вифлее́ме, благоукраси́ся,/ отве́рзи врата́, Еде́ме,/ и волсви́, иди́те ви́дети Спасе́ние, в я́слех повива́емое,/ его́же звезда́ показа́ верху́ верте́па,/ Жизнода́вца Го́спода,/ спаса́ющаго род наш.

Сла́ва, свята́го, глас 1. Студитово:

Столп одушевле́н и вдохнове́нный о́браз,/ ле́тный твой наста́ пра́здник, Богоно́се Игна́тие,/ тайново́дства твоя́ и до́блести твоя́ пропове́даяй,/ е́же за ве́ру да́же до кро́ве противостоя́ние,/ блаже́нный он и приснопа́мятный глас:/ я́ко пшени́ца есмь Бо́жия, – глаго́лющий, –/ и зубы́ звери́ными мелю́ся./ Те́мже, подо́бник страсте́й Христа́ твоего́ быв,/ моли́ спасти́ся душа́м на́шим.

И ны́не, глас 6:

Верте́пе, благоукраси́ся,/ А́гница бо гряде́т, чревонося́щи Христа́;/ я́сли же, подъими́те сло́вом разреши́вшаго/ от безслове́снаго дея́ния нас, земноро́дных./ Па́стырие, свиря́юще, свиде́тельствуйте чудеси́ стра́шному,/ и волсви́ от Перси́ды,/ зла́то, и лива́н, и смирну Царю́ принеси́те,/ я́ко яви́ся Госпо́дь из Де́вы Ма́тере./ Ему́же и, прини́кши, ра́бски Ма́ти поклони́ся/ и привеща́ше к держи́мому на объя́тиих Ея:/ Ка́ко все́ялся еси́ Мне?/ или́ ка́ко прозя́бл еси́ во Мне,/ Изба́вителю Мой и Бо́же?

На часе́х тропа́рь предпра́зднства: Сла́ва, свята́го, И ны́не, Богоро́дичен часов. По О́тче наш: конда́к предпра́зднства еди́н на всех часе́х.

НА ЛИТУРГИ́И

Блаже́нны от кано́на предпра́зднства песнь 3-я, со ирмосо́м на 4 и свята́го песнь 6-я, на 4. Проки́мен: Возвесели́тся пра́ведник о Го́споде:

Стих: Услы́ши, Бо́же, глас мой:

Апо́стол к Евре́ем, зача́ло 311.

Аллилу́ия, глас 4: Пра́ведник, я́ко фи́никс, процвете́т:

Стих: Насажде́ни в до́му́ Госпо́дни:

Ева́нгелие от Ма́рка, зача́ло 41.

Прича́стен: В па́мять ве́чную:

А́ще случи́тся неде́ля святы́х оте́ц в предпра́зднстве, внутрь 20-го дне, сиречь, в 20-й, в 21-й, в 22-й и в 23-й день.

Бывает слу́жба си́це: На ма́лой вече́рни стихи́ры воскресны и Богоро́дицы по обы́чаю.

На вели́цей вече́рни, на Го́споди, воззва́х: стихи́ры воскресны 3, и восто́чен 1, Анато́лиев, и предпра́зднства 3, глас 6,

Подо́бен: Все отло́жше: и отцев 3, глас и подо́бен то́йже.

Сла́ва, глас 6: Дани́ил, муж жела́ний:

И ны́не, предпра́зднства, глас то́йже: Верте́пе, благоукраси́ся:

Вход. Проки́мен дне. И чте́ния 3 отцев.

На литии́ стихи́ры предпра́зднства на ряду, коего дне Неде́ля сия́ поется, стиховныя, и отцев, глас 1: Луча́ми облиста́вшеся:

Сла́ва, глас 3: Пра́отцев собо́р:

И ны́не, предпра́зднства, глас то́йже: Благоукраси́ся, Вифлее́ме:

На стихо́вне стихи́ры воскресны:

Сла́ва, глас 2: Ра́дуйтеся, проро́цы:

И ны́не, предпра́зднства, глас то́йже: Се время прибли́жися:

На благослове́нии хлебов тропа́рь: Богоро́дице Дево: два́жды, и отцев: Ве́лия ве́ры: еди́ножды.

Бу́ди и́мя Госпо́дне: трижды. И чте́ние в толкованиих апо́стольских.

НА УТРЕНИ

на Бог Госпо́дь: тропа́рь воскресе́н два́жды:

Сла́ва, отцев, глас 2: Ве́лия ве́ры:

И ны́не, предпра́зднства, глас 4: Гото́вися, Вифлее́ме:

И обы́чныя кафизмы, и седа́льны воскресны, и Богоро́дичны их. И чте́ние во Ева́нгелии толковом, е́же от Матфе́я, в само́м нача́ле: Книга родства Иису́са Христа́:

По непоро́чнах тропари их: А́нгельский собо́р: ипакои́ и чте́ние во Ева́нгелии толковом, е́же на ряду.

Степе́нна гла́са, проки́мен. Вся́кое дыха́ние: Ева́нгелие воскресно, и Воскресе́ние Христо́во:

По 50-м псалме́ стихи́ра воскресна. Кано́н воскресе́н со ирмосо́м на 4, и предпра́зднства на 4, и отцев на 6. Катава́сия: Христо́с ражда́ется:

По 3-й пе́сни ипакои́ отцев, глас 8:

А́нгел отроко́м ороси́ пещь: и чте́ние.

По 6-й пе́сни конда́к, глас 1, Подо́бен: Лик А́нгельский:

Весели́ся, Вифлее́ме: и и́кос. И чтем пролог.

По 9-й пе́сни: Свят Госпо́дь Бог наш: Свети́лен воскресе́н.

Сла́ва, отцев. И ны́не, предпра́зднства.

На хва́литех стихи́ры воскресны 4, и отцев 4, глас 5, Подо́бен: Ра́дуйся:

Сла́ва, отцев, глас 8: Зако́нных учений:

И ны́не, Преблагослове́нна еси́, Богоро́дице Дево:

Славосло́вие вели́кое. Тропа́рь воскресе́н. Ектении́. И отпу́ст. Стихи́ра Ева́нгельская в притворе. И час 1. И конечный отпу́ст.

На Литурги́и:

Блаже́нны гла́са, на 4: и отцев от кано́на песнь 3-я, на 4, и предпра́зднства песнь 6-я, на 4. По входе тропа́рь воскресе́н, и отцев, и предпра́зднства. 

Сла́ва, конда́к отцев.

И ны́не, предпра́зднства. Проки́мен, песнь отцев, глас 4: Благослове́н еси́, Го́споди Бо́же оте́ц на́ших,/ и хва́льно и просла́влено и́мя Твое во веки.

Апо́стол ко Евре́ем, зача́ло 328.

Аллилу́ия, глас 4: Бо́же, уши́ма на́шима:

Ева́нгелие от Матфе́я, зача́ло 1. Ряд же неде́ли оставля́ется.

Прича́стен: Хвали́те Го́спода:

Други́й: Ра́дуйтеся, пра́веднии:

О предпра́зднстве Христо́ва Рождества́ ве́дати подоба́ет.

От 20-го дне начина́ется предпра́зднство. Пост у́бо есть, поклоны же в це́ркви не быва́ют.

НА МА́ЛОЙ ВЕЧЕ́РНИ

Стихи́ры свята́го, глас 1:

Небе́сным чино́м поревнова́л еси́, святи́телю Дани́иле,/ на земли́ же, Богоно́се, освяще́н сосу́д яви́лся еси́/ и жили́ще Свята́го Ду́ха,/ те́мже тя ублажа́ем/ и свято́е твое́ днесь честно́, ра́дующеся, пра́зднуем успе́ние.

Небе́сных чино́в ра́дование/ и на земли́ архиере́ем похвала́,/ свяще́нником сла́ва, Дании́ле прему́дре,/ мона́шествующим пра́вило и Це́ркве утвержде́ние./ Тем тя мо́лим:/ не оскуде́й, спо́моществуя нам,/ притека́ющим и облобыза́ющим ра́ку моще́й твои́х.

На Небесе́х водворя́лся,/ приими́ ны́не хвалу́ чад твои́х, о́тче,/ пра́зднующих честно́ па́мять успе́ния твоего́,/ и даждь исполне́ние их проше́ниям,/ моля́ся приле́жно Пречи́стей Ма́тери Бо́жией/ спасти́ся от бед душа́м на́шим.

Сла́ва, глас 6, самогла́сен: Боже́ственная благода́ть в па́мяти успе́ния твоего́,/ осеня́ющи притека́ющия к ра́це моще́й твои́х,/ неду́гов исцеле́ние подава́ет,/ святи́телю о́тче Дани́иле,/ моли́ся о душа́х на́ших.

И ны́не, предпра́зднства.

На стихо́вне стихи́ры, глас 2:

Дом духо́вный яви́ся Дании́л/ поспеше́нием благода́ти Свята́го Ду́ха,/ те́мже, ны́не соше́дшеся, того́ воспои́м.

Стих: Свяще́нницы Твои́ облеку́тся в пра́вду,/ и преподо́бнии Твои возра́дуются.

Ра́дуйся, Дании́ле, святи́телей похвало́,/ свяще́нником сла́во,/ мона́хом пра́вило, Це́ркве утвержде́ние.

Стих: Восхва́лятся преподо́бнии во сла́ве/ и возра́дуются на ло́жах свои́х.

Приими́ ны́не пе́ние чад твои́х, о́тче,/ и подава́й лю́бящим тя/ обы́чная проше́ния.

Сла́ва, и ны́не, предпра́зднству, глас то́йже: Доме Евфра́фов, гра́де святы́й,/ украси́ дом,/ в не́мже Боже́ственный ражда́ется.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Блаже́н муж:

1-й антифо́н. На

Го́споди, воззва́х: стихи́ры на 8: предпра́зднству 3 и свято́му 5. Стихи́ры свято́му Дании́лу, глас 2:

Ки́ими похва́льными венцы́/ увязе́м святи́теля?/ Свяще́нства вене́ц, благоче́стия управле́ние,/ све́тлое Це́ркве Се́рбския украше́ние,/ исто́чник Боже́ственных исцеле́ний неисчерпа́емый,/ проли́тие даро́в духо́вных,/ реку́ мно́гих чуде́с,/ веселя́щую Се́рбскую зе́млю тече́ньми,/ Дании́ла, те́плаго предста́теля на́шего и храни́теля.

Ки́ими смире́нными устна́ми/ воспои́м святи́теля?/ Ди́внаго в чудесе́х и Безпло́тных сожи́теля,/ освяще́ннаго столпа́ Це́ркве Се́рбския неподви́жима,/ ея́ побо́рника и весе́лие земли́ на́шея,/ пра́вды пра́вило, сиро́та́м пода́теля,/ оби́димых засту́пника/ и больны́м врача́ безме́здна?

Ки́ими всехва́льными венцы́/ воспои́м и соста́вим ликова́ние/ в честне́м пра́зднице твоего́ успе́ния, иера́рше?/ Оба́че, духо́вно пра́зднующе, мо́лимся ти:/ моли́ Влады́ку всех/ дарова́ти побе́ду правосла́вным на сопроти́вныя,/ тебе́ бо те́пла моли́твенника к Влады́це стяжа́хом,/ подаю́щему ми́ру ве́лию ми́лость.

Ки́ими похва́льными добро́тами/ воспои́м во архиере́ех сла́внаго,/ в ве́ре вели́каго и пелена́х доброразсу́днаго,/ во уче́нии язы́ка сла́дкаго,/ уче́нием Се́рбскую Це́рковь обогаща́юща струя́ми слове́с свои́х?/ Тем мо́лим тя,/ святи́телю Христо́в Дании́ле:/ моли́ся Христу́ Бо́гу и Пресвяте́й Богоро́дице,/ да изба́вимся от бед моли́твами твои́ми.

Ки́ими духо́вными пе́сньми/ воспои́м архиере́я?/ Уче́нием к Богоразу́мию всех наста́вльшаго,/ исто́чника чуде́с пречу́дна и учи́теля прему́дра,/ столпа́ непоколеби́ма патриа́ршеския ла́вры,/ и всея́ Се́рбския земли́ удобре́ние,/ и тве́рдое защище́ние,/ и моли́твенника о душа́х на́ших.

Сла́ва, глас 6: Архиере́ев похвалу́,/ свяще́нником украше́ние,/ к Бо́гу моли́твенника непреста́ннаго,/ исто́чника чуде́с преизоби́льна,/ днесь любо́вию соше́дшеся, Се́рбский наро́де,/ иера́рха Дании́ла похва́лим/ и, честны́я мо́щи его́ обстоя́ще, лобже́м и рцем:/ ра́дуйся, архиере́е Дании́ле, свети́льниче све́тлый,/ озари́ изря́дное достоя́ние, лю́ди твоя́,/ о ни́хже непреста́нно Христу́ моли́ся,/ дарова́ти им ми́рное житие́,/ да вси честно́е твое́ успе́ние любо́вию почита́ем.

И ны́не, предпра́зднства, глас 8.

Вход. Проки́мен дне, чте́ния 3 святи́тельская (зри день 21-й)

На литии́ стихи́ры свята́го, глас 4, самогла́сен:

Све́тло днесь Це́рковь Се́рбская украша́ется/ и ра́дуется, зову́щи:/ уясни́ся моя́ добро́та па́че всех,/ святи́телем бо красота́, сла́вный Дании́л/ взы́де на Небеса ́к Царю́, все́ми ца́рствующему.

Прииди́те у́бо, празднолю́бцы,/ правосла́вных собо́ри,/ и принесе́м ему́ пе́ния и похвалы́, зову́ще:/ о святи́телей добро́то и Се́рбская хвало́,/ моли́ся Христу́ Бо́гу/ изба́вит христоимени́тыя лю́ди от вся́кия ско́рби/ и спасти́ ду́ши на́ша.

Духа Боже́ственная благода́ть/ святи́теля тя показа́ и учи́теля изря́дна яви́,/ те́мже мрак нече́стия обличи́л еси́/ и лю́ди Богоразу́мия уче́ньми просвети́л еси́,/ святи́телю Богому́дре Дании́ле,/ архиере́ем сла́ва и красота́,/ ро́ду же Се́рбскому и всем был еси́ изве́сте́н о́браз уче́ния,/ дерзнове́ние име́я ко Христу́ Бо́гу,/ того́ при́сно моли́ спасти́ся душа́м на́шим.

До́блестей твои́х, свяще́нне о́тче Дании́ле,/ плод уясни́ ве́рных сердца́./ Кто бо, слы́ша безме́рное твое́ смире́ние,/ и терпе́нию не удиви́тся,/ и е́же к ни́щим ти́хость и скорбя́щим ми́лование./ Вся бо боголе́пно научи́л еси́,/ святи́телю о́тче Дании́ле,/ и ны́не на Небесе́х, неувяда́емым венча́вся венце́м,/ моли́ Христа́ Бо́га и Пресвяту́ю Богоро́дицу о душа́х на́ших.

Сла́ва, глас 6: Ты еси́ па́стырь до́брый/ и учи́тель те́плый, святи́телю о́тче Дании́ле,/ тя всегда́ хваля́ще, вопие́м ти:/ тобо́ю украси́ Бог Це́рковь,/ и Ма́тере Своея́ чудотво́рный о́браз в хра́ме предстои́т/ и неисчерпа́емую благода́ть ро́ду Се́рбскому подае́т,/ иде́же и твоя́ нетле́нныя мо́щи покрове́нны лежа́т от толи́ких лет./ Те́мже тя мо́лим и вопие́м:/ о святи́те́лю Христо́в Дании́ле,/ моли́ся непреста́нно о хваля́щих и чту́щих святу́ю па́мять твою́,/ грехо́в оставле́ние получи́ти во спасе́ние душ на́ших.

И ны́не, предпра́зднства, глас 1: Приими́те, я́сли,/ его́же в купине́ Моисе́й законополо́жник прови́де в Хори́ве,/ ны́не ражда́ема от Де́вы Ду́хом Боже́ственным./ Та есть, Я́же в зако́не рече́нная,/ Та есть проро́ческая печа́ть,/ Я́же Бо́га пло́тию тле́нным явля́ющи,/ ему́же поклони́мся.

На стихо́вне стихи́ры предпра́зднству, глас 2, самогла́сны:

Се́ вре́мя прибли́жися спасе́ния на́шего,/ гото́вися, верте́пе:/ Де́ва приближа́ется е́же роди́ти./ Вифлее́ме, земле́ Иу́дова, красу́йся и весели́ся,/ я́ко из тебе́ возсия́ Госпо́дь наш./ Услы́шите, горы́ и хо́лми/ и окре́стныя стра́ны Иуде́йския,/ я́ко гряде́т Христо́с,/ да спасе́т, его́же созда́, челове́ка,/ я́ко Человеколю́бец.

Стих: Бог от ю́га прии́дет/ и Святы́й из горы́ приосене́нныя чащи.

Вифлее́ме, земле́ Иу́дова,/ е́же по пло́ти жи́тельство,/ све́тло угото́ви Боже́ственный верте́п,/ в не́мже Бог пло́тию ражда́ется/ от Неискусому́жныя Святы́я Де́вы,/ во е́же спасти́ род наш.

Стих: Го́споди, услы́шах слух Твой и убоя́хся,/ Го́споди, разуме́х дела́ Твоя́ и ужасо́хся.

Прииди́те, вси Христо́во Рождество́ ве́рно предпра́зднуим/ и, мы́сленне пе́ние, я́ко звезду́, предлага́юще,/ волхво́в славосло́вия с па́стырьми возопии́м:/ прии́де спасе́ние челове́ков из де́вственных ложе́сн,/ ве́рныя воззы́вая.

Сла́ва, свято́му, глас 4: Я́ко со́лнце пресве́тлое,/ просвеща́еши страну́ всю Се́рбскую,/ тебе́ бо показа́ Бог от ю́ности,/ святи́телю блаже́нне Дании́ле,/ па́стыря слове́сному своему́ ста́ду и оте́честву твоему́./ Ты украси́л еси́ всечу́дно це́рковь Бо́жия Ма́тере,/ в не́йже и до ны́не лежа́т честны́я мо́щи твоя́,/ иму́щи в себе́ дар исцеле́ния благода́тию./ Сего́ ра́ди не забу́ди в моли́твах/ испроси́ти благове́рному и христолюби́вому наро́ду Се́рбскому/ побе́ды на сопроти́вныя враги́./ Тебе́ бо Христо́с показа́ свети́ло вели́кое патриа́ршеской собо́рной Це́ркви,/ ты еси́ похвала́ земли́ на́шей и кре́пкое заступле́ние./ Те́мже, пра́зднующе днесь све́тло па́мять твою́,/ мо́лим тя, святи́телю Христо́в Дании́ле,/ ми́р ми́ру испроси́ти/ и душа́м на́шим ве́лию ми́лость.

И ны́не, предпра́зднства, глас 5: Вифлее́ме, гото́вися на сре́тение Де́ве Мари́и и Богома́тере:/ се бо гряде́т к тебе́, Младе́нца нося́щи Христа́,/ Собезнача́льнаго Отцу́ и Ду́ху при́сно,/ его́же во верте́пе роди́т/ и по рожде́стве Де́ва па́ки яви́тся.

Тропа́рь, глас 3:

Чу́до яви́ся извеще́ния,/ дела́ми доброде́телей Бо́жиих возсия́л еси́,/ мона́шествующих ли́ки упасл еси́,/ архиере́йская седа́лища утверди́л еси́,/ ерети́ческаго нападе́ния не усумне́вся,/ Це́рковию Христо́вою управля́я,/ преподо́бне о́тче, Дании́ле прему́дре,/ усну́в, я́ко спя,/ те́ло же твое́ це́ло и нетле́нно соблю́дено бысть,/ и подае́т цельбы́ боля́щим от разли́чных неду́гов,/ и де́моны прогоня́ет./ Сего́ ра́ди мо́лим тя:/ моли́ спасти́ся душа́м на́шим.

Сла́ва, и ны́не, предпра́зднству.

НА У́ТРЕНИ

На Бог Госпо́дь: тропа́рь предпра́зднству, два́жды. Сла́ва, свято́му, и ны́не, предпра́зднству.

По 1-м стихосло́вии седа́лен, глас 1: Служи́тель быв Христу́, вся́ческих Влады́це,/ просвети́л и научи́л еси́ лю́ди Боже́ственным поуче́нием,/ к разу́мению наставля́я, святи́телю Дани́иле./ Те́мже тя вси имену́ем пропове́дника и́стины,/ учи́теля и уго́дника Христо́ва.

Сла́ва, и ны́не, предпра́зднства, глас то́йже:

Весели́ся, Вифлее́ме, Евфра́фо, гото́вися:/ се бо А́гница, Па́стыря Вели́каго в ложесна́х нося́щи, роди́ти гряде́т,/ и, предви́дяще Боже́ственную звезду́, волсви́ ра́дуются,/ с па́стырьми пою́ще се́рдца пра́востию.

По 2-м стихосло́вии седа́лен, глас 4:

От ю́ности взем крест свой, благоче́стно после́довал еси́ Христу́,/ усекну́в плотско́е мудрова́ние воздержа́нием,/ те́мже, на святи́тельстем седа́лищи сед, святи́телю,/ непреста́нно украша́вши Це́рковь Христо́ву во сла́ву Влады́ки твоего́ и Пречи́стыя Ма́тере его́./ того́ ра́ди и Христо́с разли́чными дарова́ньми украси́ твою́ ра́ку, Дании́ле всеблаже́нне.

Сла́ва, и ны́не, предпра́зднству, глас то́йже:

Де́вы, предначни́те деви́ческую ра́дость,/ ма́тери, восхвали́те провожде́ние Ма́тере Христа́, Бо́га на́шего,/ волсви́ со А́нгелы, с на́ми па́стырие,/ гряде́т бо Де́ва во гра́де Вифлее́ме роди́ти Сы́на, Преве́чнаго Бо́га,/ спаса́ющаго ми́р от тле́ния.

По полиеле́и, седа́лен, глас 8: Святи́теля вели́каго Дании́ла ка́ко досто́йно воспое́м?/ Му́жа чи́стаго ума́, Богоза́рнаго све́та,/ освеща́ющаго нас и Боже́ственный ра́зум подаю́щаго,/ тайн глуби́нных пове́дателя,/ ему́же согла́сно вси рцем: ра́дуйся, о́тче отце́в, Дании́ле.

Сла́ва, и ны́не, предпра́зднству, глас 5:

Вифлее́ме, гото́вися на сре́тение Де́вы Мари́и и Богома́тере:/ се бо гряде́т к тебе́, Младе́нца нося́щи Христа́,/ Собезнача́льнаго Отцу́ и Ду́ху при́сно,/ его́же во верте́пе роди́т и по рождестве́ па́ки яви́тся Де́ва.

Таже, степе́нна, 1-й антифо́н 4-го гла́са. Проки́мен, глас 4: Уста́ моя́ возглаго́лют прему́дрость/ и поуче́ние се́рдца моего́ ра́зум.

Стих: Услы́шите сия́, вси язы́цы,/ внуши́те, вси, живу́щим по вселе́нней. Вся́кое дыха́ние:

Ева́нгелие от Иоа́нна, зача́ло 35 от полу.

По 50-м псалме́ стихи́ра, глас 6:

Егда́ преставле́ние честна́го твоего́ те́ла, о́тче, приспе́,/ тогда́ мно́жество ве́рных, обступи́вше одр твой,/ уми́льно провожда́ху тя,/ и, зря́ще тя благословя́ща,/ лю́ди удивля́хуся./ Царь же Душа́н со слеза́ми вопия́ше:/ о влады́ко, что ти возда́м за Богове́дение,/ е́же нам дарова́л еси́, прие́м благода́ть от Бо́га?/ Те́мже, святи́телю Дании́ле,/ моли́ся приле́жно Христу́ Бо́гу и Пресвяте́й Богоро́дице,/ да призира́ет на нас неотсту́пно Пречи́стым Свои́м чудотво́рным о́бразом,/ и́мже ты храм украси́л еси́,/ оте́честву и ста́ду своему́ непоколеби́мый столп оставля́я./ Твои́ми моли́твами да спасе́мся.

Кано́н свято́му Дании́лу на 6, глас 1.

Песнь 1

Ирмо́с: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися.

О́тче Богому́дре,святи́телю Дании́ле,/ отве́рзи моя́ недосто́йная уста́ воспева́ти тя/ и приими́, я́ко благово́нное кади́ло, от убо́жества моего́,/ е́же тебе́ принесо́х недосто́йный аз.

Воспои́м вси вели́каго святи́теля Дании́ла,/ почти́м засту́пника и утвержде́ние земли́ Се́рбския,/ его́же дарова́ Госпо́дь оби́тели собо́рной храни́теля бо́дра.

Спаси́тельным Христо́вым за́поведем после́довал еси́, прему́дре святи́телю Дании́ле,/ вдов и сиро́т был еси́ предста́тель/ и земли́ Се́рбстей вели́кое защище́ние.

Вели́кий ны́не Дании́л, па́стырь Це́ркве собо́рныя,/ па́стыри вку́пе и пасо́мыя и всю Це́рковь в па́мять свою́ призыва́ет./ Те́мже, собра́вшеся, торжеству́им све́тло в день па́мяти его́.

Благода́ть ду́ха прие́м, о́тче, во свое́ се́рдце, Христо́в святи́телю,/ уясни́ язы́к и се́рдце просве́ти твои́х певце́в,/ е́же святу́ю твою́ па́мять воспе́ти све́тло, Дании́ле преподо́бне.

А́ще и побежда́ют твоя́ исправле́ния словеса́ на́ша и помышле́ния, о́тче Дании́ле,/ оба́че душе́вное на́ше предложе́ние, по си́ле прино́симое тебе́,/ приими́ с любо́вию, досточу́дне,/ е́же бо по досто́инству пе́сни тебе́ соплести́ невозмо́жно есть нам.

Богоро́дичен: Пречи́стая Богоро́дице,/ Соде́теля и Спа́са ро́ждши,/ спаси́ от бед град твой,/ непреста́нно моля́щи Сы́на Твоего́ и Бо́га на́шего за ны.

Песнь 3

Ирмо́с: Ка́мень, его́же небрего́ша зи́ждущим,/ сей бысть во главу́ угла́:/ Той есть Ка́мень,/ на Не́мже утверди́ Це́рковь Христо́с,/ ю́же от язы́к искупи́.

Ты прояви́л еси́, Влады́ко, в после́днем ро́де на́шем святи́теля вели́каго Са́вву,/ и́же просве́ти свое́ оте́чество со святи́тели и архиере́и,/ ему́же после́дует Дании́л, цвет пречу́дный.

Тебе́ прикосну́выйся, свя́те, су́щему в честне́м гро́бе твое́м,/ исцеле́ние получи́ти сподо́бися:/ рука́м бо того́, к пе́рсем со́гбенным, Бо́жиею благода́тию дае́ши простира́тися.

Сокруши́ ага́ряны и вся супоста́ты безбо́жныя, преподо́бне Дании́ле,/ моле́нием твои́м к Творцу́ и Бо́гу на́шему,/ и си́лу их, борю́щую на ны, не́мощну покажи́,/ и покори́ их.

С мире́н яви́лся еси́, кро́ток же и тих, Дани́иле,/ отоню́дуже ду́ха благода́ть, преложи́е излия́вшися на тя,/ вели́ка показа́ тя, чуде́с луча́ми зе́млю на́шу осиява́юща.

Жезлом воздержа́ния страсте́й мо́ре раздели́в, блаже́нне,/ я́ко Моисе́й, на безстра́стия гору возше́л еси́/ и, прие́м мы́сленныя скрижа́ли, па́ству твою́ научи́л еси́ зако́ну Христо́ву.

Богоро́дичен: Бу́ди ми, Де́во, прибе́жище и приста́нище,/ стена́ необори́мая и Засту́пница,/ Бо́га пло́тию ро́ждшая, Пречи́стая, Изба́вителя Всеще́драго/ и Спа́са пою́щих Тя, Богоневе́стная.

Седа́лен свято́му, глас 4:

Свети́льник светосия́нен яви́лся еси́ земли́ Се́рбстей,/ просвеща́яй блиста́ньми Боже́ственных твои́х слове́с ве́рных помышле́ния, святи́телю о́тче Дании́ле./ Тем вси свяще́нную твою́ и Боже́ственную па́мять днесь ра́достно соверша́ем.

Сла́ва, и ны́не, предпра́зднства, глас то́йже.

Де́вы, предначни́те деви́ческуто ра́дость,/ ма́тери, восхвали́те провожде́ние Ма́тере Христа́ Бо́га на́шего,/ волсви́ со А́нгелы, с на́ми па́стырие,/ гряде́т бо Де́ва во гра́де Вифлее́ме роди́ти Сы́на, Преве́чнаго Бо́га,/ спаса́ющаго ми́р от тле́ния.

Песнь 4

Ирмо́с: Ду́хом прови́дя, проро́че Авваку́ме, Словесе́ вопдоще́ние,/ пропове́дал еси́, вопия́:/ внегда́ прибли́житися ле́том – позна́ешися,/ внегда́ прии́ти вре́мени – пока́жешися./ Сла́ва си́ле Твое́й, Го́споди.

Благода́тию ду́ха пома́зался еси́, архиере́е всеизря́дне Дании́ле,/ во Христа́ бо оде́яся жития́ ра́ди чи́стаго,/ те́м научи́л еси́ сла́вити в Тро́ице Еди́наго Бо́га.

Изба́ви твое́ ста́до от бурь греха́, преподо́бне святи́телю Дании́ле, бед же и скорбе́й,/ приводя́ ны в приста́нища ти́хая Боже́ственныя во́ли Христо́вы.

Христо́в яви́лся еси́ уго́дник, о́тче преподо́бне Дании́ле, преосвяще́нне архиере́е./ Тем моля́ся непреста́й ко Го́споду/ от напа́стей, бед и скорбе́й изба́вити ста́до твое́ от искуше́ний.

Умертви́ мудрова́ние, прему́дре, пло́ти моея́ неисце́льное/ и к Боже́ственным стезя́м наста́ви ны, я́ко кре́пок и си́лен,/ зако́ном же благи́м повини́ мя, блаже́нне,/ и раба́ покажи́ мя Христо́ва, порабоще́нна лю́тыми страстьми́.

Сна очесе́м твои́м и дрема́ния ве́ждома не дал еси́,/ до́ндеже обре́те ме́сто поко́йно се́рдце твое́, о́тче./ Тем, очи́стившеся досто́йне, узре́ жили́ще сла́вы всех Соде́теля, Царя́ и Бо́га ве́чнаго.

Весь у́бо ум впери́в к высоте́/ и земна́я нивочто́же вмени́в, смире́нием, достоблаже́нне Дании́ле,/ высо́кая прия́л еси́.

Богоро́дичен: Ка́я сия́, я́ко вои́стинну близ Бо́га,/ я́ко превозше́дшая вся а́нгельския чины́,/ еди́на, добро́тою де́вства сия́ющи,/ я́ко Ма́ти Вседержи́теля?

Песнь 5

Ирмо́с: Твой ми́р даждь нам,/ Сы́не Бо́жий:/ ино́го бо, ра́зве Тебе́, Бо́га не зна́ем,/ и́мя Твое́ имену́ем,/ я́ко Бог живы́х и ме́ртвых еси́.

Окрест стоя́ще ра́ки твое́я, святи́телю преподо́бне Дании́ле,/ име́ем тя хода́тая к Бо́гу и заступле́ние земли́ Се́рбстей,/ утвержде́ние же незы́блемое.

Ми́лостив быв убо́гим, ми́лость душе́вную испроси́, прехва́льне,/ ми́лостынею бо стяжа́л еси́, о́тче Дании́ле, свещу́/ и ту́ю све́тло украси́л еси́.

Жили́ще был еси́ Свята́го Ду́ха вои́стинну, блаже́нне Дании́ле,/ и того́ явле́ньми разбогате́л еси́ до́бре Боже́ственными дара́ми.

Кро́ток яви́лся еси́ ку́пно и смире́н де́лом и сло́вом/ и сим вся к себе́ привле́кл еси́,/ любо́вию же и до́брыми де́лы вся укроти́л еси́/ и се́рдца́ возвесели́л еси́ твои́ми чудеса́ми.

Вели́кий Па́стырь всех Христо́с/ ове́ц Свои́х па́стыря тя, блаже́нне, показа́ и учи́теля слове́сных./ Те́мже заблужда́ющаго мя на гора́х поги́бели,/ я́ко па́стырь, твоего́ овча́те взыщи.

Я́ко вели́кое бога́тство твои́х щедро́т яви́ся в земли́ на́шей/ безчи́сленное проли́тие ми́лости твоея́, слуго́ Христо́в,/ ты бо прося́щим су́щая подае́ши и ты́я насы́тити тщи́шися твои́м предложе́нием, блаже́нне.

Богоро́дичен: Ми́ро Тя имену́ем, Пречи́стая,/ я́ко ро́ждшую Бо́га пло́тию/ и благода́тное ми́ро точа́щую всем, притека́ющим под кров Твой.

Песнь 6

Ирмо́с: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́.

Житие́ твое́ целому́дренно соверши́л еси́, священноявле́нне,/ пра́вдою украси́вся и му́жеством смы́сла доброде́тели сочета́в себе́,/ преблаже́нне святи́телю Дании́ле.

Храни́ град твой, святи́телю Дании́ле преблаже́нне,/ от безбо́жных и чужеве́рных нахожде́ний и от междоусо́бныя бра́ни./ Моли́ся же непреста́нно Влады́це Христу́ и Пресвяте́й Богоро́дице,/ е́же ми́р дарова́ти па́стве свое́й.

Ты у́бо и по сме́рти сла́вим, я́ко жив, чудоде́йствуеши./ Не́мощны́м бо сличе́нным дае́ши исцеле́ние Боже́ственною благода́тию,/ зане́ глаго́лет Госпо́дь:/ прославля́ющаго Мя просла́влю.

Испо́лнился еси́ светоявле́ния, Дании́ле му́дре,/ я́ко храни́тель за́поведей Христо́вых,/ очище́н же от страсте́й, был еси́ вои́стинну жили́ще Пребоже́ственныя Тро́ицы.

Му́жие свяще́ннии ра́достно с наро́дом/ днесь твою́, о́тче, па́мять пра́зднующе, торжеству́ют,/ и́мже согла́сно и́стиннии безмо́лвницы и прости́и вси/ о́бще тя воспева́ют, предста́теля вку́пе и учи́теля.

Ти́ну страсте́й от души́ оттря́сл еси́, Дании́ле,/ низложи́в вся́кое по́мыслов возноше́ние,/ на Христа́ превознося́щееся.

Богоро́дичен: Сове́та преве́чнаго храм воздви́гл еси́, святи́телю,/ Архистрати́га Гаврии́ла ра́достное провеща́ние Богоро́дице вседне́вно воспева́я:/ ра́дуйся, Неве́сто Неневе́стная.

Конда́к, глас 8:

Возбра́нному и ди́вному на́шея земли́ свети́льнику днесь любо́вию притека́ем/ и песнь тебе́, Богоно́се, плете́м,/ я́ко иму́щему дерзнове́ние ко Го́споду:/ изба́ви нас от многообра́зных обстоя́ний, да зове́м ти:/ ра́дуйся, утвержде́ние оте́честву на́шему и вели́кий покрови́телю оби́тели своея́.

И́кос:

Вели́кий свети́льник яви́лся еси́ ро́ду Се́рбскому,/ струя́ми сло́вес твои́х ве́рныя просвеща́я/ и всеусе́рдно приходя́щим к тебе́ исцеле́ния подава́я./ Христо́вы бо лю́ди, Богоно́се, неви́димо посеща́еши/ и тем зе́млю на́шу просвеща́еши,/ сего́ ра́ди согла́сно зове́м ти си́це:/ ра́дуйся, све́та безстра́стнаго доме;/ ра́дуйся, страсте́й те́мных прогони́телю./ Ра́дуйся, де́монския разруши́вый ко́зни;/ ра́дуйся, а́нгельския возвесели́вый чи́ны./ Ра́дуйся, высо́то Богови́дения чи́стаго;/ ра́дуйся, глубино́ смире́ния, боле́зни омыва́ющая./ Ра́дуйся, я́ко был еси́ зри́тель неви́димых;/ ра́дуйся, я́ко сообщи́лся еси́ ли́ку святи́телей./ Ра́дуйся, земли́ Се́рбския па́стырю и учи́телю;/ ра́дуйся, святи́телем изря́дная похвало́./ Ра́дуйся, я́ко тебе́ ра́ди посла́ Бог в оби́тель твою́ чудотво́рный о́браз Ма́тере Своея́;/ ра́дуйся, я́ко тебе́ ра́ди пресвята́я чудотво́рная ико́на Ма́тере Бо́жия сла́вится./ Ра́дуйся, я́ко украша́еши престо́л первосвяти́телей Се́рбских./ Ра́дуйся, утвержде́ние ро́ду Се́рбскому.

Песнь 7

Ирмо́с: Су́щим в пещи́ отроко́м Твои́м, Спа́се, не при́косну́ся, ниже́ стужи́, огнь./ Тогда́ трие́, я́ко еди́неми усты́, поя́ху/ и благословля́ху, глаго́люще:/ благослове́н Бог оте́ц на́ших.

Отве́рзи ми две́ри покая́ния, преблаже́нне архиере́е Дании́ле,/ да омы́ю скве́рну окая́нныя моея́ души́,/ мое́ те́ло, и вся чу́вства, и со́весть, во е́же пе́ти Бо́гу:/ отце́в Бо́же, благослове́н еси́.

И́мамы тя засту́пника те́пла, твои́ раби́,/ и сте́ну необори́му Це́ркве твоея́, и утвержде́ние ро́ду Се́рбскому,/ не бои́мся враго́в и супоста́тов,/ но побежда́ем ты́я си́лою чудотво́рныя ико́ны, пою́ще:/ Христе́, Богоро́дицею благослове́н еси́.

Уста́вы оте́ческия утверди́л еси́, му́дре,/ и це́рковь Пресвяты́я Бо́жия Ма́тере чудотво́рным о́бразом украси́л еси́,/ и свяще́нства ле́потою прекра́сну устроил еси́,/ уче́ньми же твои́ми лю́ди наказа́л еси́ пе́ти:/ Бо́же, Богоро́дицею благослове́н еси́.

Земля́ на́ша и страна́ согла́сно, о́тче, поуче́ния твоя́ возвеща́ет,/ науче́нна тобо́ю пе́ти всю́ду Христа́:/ отце́в на́ших Бо́же, благослове́н еси́.

Жени́х, кра́сен добро́тою па́че всех сыно́в челове́ческих, я́коже пи́сано есть,/ неве́сте, блаже́нне, Свое́й Це́ркви, красне́йша тя показа́ жениха́,/ того́ нося́ща о́браз и подо́бие.

Украси́в свое́ житие́ ми́лостынею и кро́тостию,/ любо́вию же и и́стиною, подража́тель показа́лся еси́ изря́дный Па́стыря до́браго,/ избра́в того́ доброде́тели до́бре.

Богоро́дичен: Прихо́дит Влады́ка во верте́п роди́тися, я́ко Челове́к./ Предусря́щим, ве́рнии, Де́ву Чи́стую, воспева́юще Ей ра́достно:/ ра́дуйся, ми́ру ра́досте./ Ра́дуйся Де́во, Ма́ти Христо́ва.

Песнь 8

Ирмо́с: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся веки.

Побежде́н быв от врага́ прегреше́ньми мно́гими и от молв жите́йских,/ прихожду́ с ве́рою и, я́ко Манасси́я, в покая́нии вопию́ Ти, Христе́:/ Го́спода по́йте, дела́, и превозноси́те его́ во ве́ки.

Моли́твы, преблаже́нне, и моле́ния твори́ приле́жно к Бо́гу при́сно за рабы́ твоя́,/ в печа́лех засту́пника бо и побо́рника тя иму́ще,/ спаса́емся от бед, Го́спода пою́ще и превознося́ще во вся ве́ки.

Вооружа́ются на лю́ди твоя́ смире́нныя, святи́телю пречестны́й о́тче Дании́ле, сы́нове ага́рянстии,/ сокруши́ их неви́димою силою моли́тв твои́х ко Владьще и Богоро́дице/ нас ра́ди, Го́спода пою́щих и превознося́щих во вся ве́ки.

Окорми́ моли́твою твое́ю па́ству сию́ многочелове́чную твою́/ и уста́ви бу́рю ве́тров проти́вных, чу́вственных и мы́сленных, моли́твами твои́ми,/ изба́ви же вся́ких искуше́ний и смуще́ний/ и да́же до конца́ неврежде́нну сохрани́.

Неизрече́нное твое́ чадолюби́е, о́тче,/ превосходя́щее оте́ческую любо́вь, посещает нас всегда́ твои́ми моли́твами,/ испрошая нам спасе́ние и подава́я нам с ти́хостию, Дании́ле, ра́доватися.

Во́здух у́бо освяти́ся благово́нием моще́й твои́х, Дании́ле, прему́дре Христо́в святи́телю,/ Це́рковь же, веселя́щися, вопие́т:/ благослове́н Бог оте́ц на́ших.

Богоро́дичен: Звезда́ возсия́, Христо́с от Иа́кова,/ и волсви́ стека́ются во град Вифлее́м пе́ти, че́ствовати и поклони́тися ему́,/ рожде́нному из ложе́сн Чи́стыя Богоро́дицы.

Песнь 9

Ирмо́с: Живоприе́мный исто́чник приснотеку́щий,/ светоно́сный свети́льник благода́ти,/ храм одушевле́нный, сень Пречи́стую,/ Небеси́ и земли́ простра́ннейшую,/ Богоро́дицу, ве́рнии, велича́ем.

Я́ко блудни́ца, и разбо́йник, и мыта́рь вопию́ Ти от се́рдца, Христе́:/ согреши́х, прости́ мне, Влады́ко, мно́гая моя́ согреше́ния/ и изба́ви мя от вся́каго гне́ва Твоего́ святи́теля моли́твами,/ я́ко да Тя непреста́нно велича́ю.

Прииди́те, собери́теся, вси се́рби,/ ко блаже́ннаго святи́теля Дании́ла гро́бу/ и со слеза́ми возопи́йте к Бо́гу:/ изба́ви, Го́споди, от бед лю́ди Твоя́,/ да Тя велича́ем во ве́ки.

Вельми́ ра́дуется о тебе́, пречестны́й о́тче, святи́телю Дании́ле, род твой,/ помо́щника и засту́пника тя име́я,/ и ны́не, влады́ко, не отходи́ ду́хом от нас,/ моли́тву творя́ за ны ко Го́споду Бо́гу и Пресвяте́й Богоро́дице,/ я́ко да изба́вит от наси́лия безбо́жных ага́рянов, враго́в на́ших,/ да тя всегда́ велича́ем.

Сла́ву твою́ воспе́ти по досто́инству невозмо́жно,/ чудеса́ бо премно́га и исцеле́ния оби́льно подае́ши/ с те́плою ве́рою приходя́щим к тебе́, Дании́ле святи́телю,/ похвало́ земли́ на́шея.

Положи́ тебе́ Це́ркве свое́й основа́ние Христо́с/ и столпа́, кре́пка и незы́блема во век,/ соблюда́юща оби́тель твою́ до конца́ от враго́в.

Святи́телие у́бо, свяще́нницы, мона́си и вси лю́дие,/ му́жие и жены́, ста́рцы с младе́нцами,/ и всяк во́зраст, и вся́кое досто́инство,/ святи́теля на́шего па́мять све́тло да пра́зднуим.

Богоро́дичен: Украси́ся, Вифлее́ме, гото́вися, Евфра́фо:/ без ма́тере бо от Отца́ и без отца́ Ма́терию чревоно́сится/ и ражда́ется, спаса́я нас.

Свети́лен предпра́зднства: Предпра́зднственныя, ве́рнии, рождества́ пе́сни, прииди́те, принесе́м вси:/ гряде́т уже́ Христо́с в Вифлее́м роди́тися,/ спасти́ вселе́нную, я́ко еди́н Человеколю́бец.

Сла́ва, свято́му: Дух Святы́й пома́за тя, святи́телю Дании́ле блаже́нне,/ Христо́ву па́ству пасти́ на па́житех спаси́тельных./ Тем и потща́лся еси́ наставля́ти лю́ди пра́выми стезя́ми,/ того́ ра́ди ны́не сугу́быя венцы́ от Венцеда́вца прия́л еси́.

И ны́не, предпра́зднства: Гото́вися, Вифлее́ме,/ укра́си домы твоя́,/ к тебе́ бо гряде́т Де́ва, Младе́нца нося́щи Христа́, Отцу́ Собезнача́льнаго:/ прии́де бо, да спасе́т род челове́ческий.

На хвали́тех стихи́ры предпра́зднству 3 и свято́му 3, глас 8:

Что тя нарече́м, святи́телю?/ А́нгела, я́ко безпло́тен на земли́ пожи́л еси́?/ Апо́стола ли, я́ко благове́рию научи́л еси́ Се́рбскую зе́млю?/ Му́ченика ли, я́ко Христа́ ра́ди подвиза́лся еси́ до сме́рти,/ обраща́я лю́ди от тьмы нече́стия/ и приводя́ их на па́жить Богоразу́мия?/ моли́ спасти́ся душа́м на́шим.

Что тя имену́ем, Богоблаже́нне Дании́ле?/ Реку́, духо́вных вод наполня́ему/ и проходя́щу Се́рбския концы́,/ жа́ждущая сердца́ напая́ющу твои́м уче́нием?/ Ча́шу, Боже́ственнаго Ду́ха наполня́ему,/ свещу́, Це́рковь озаря́ющую,/ свети́льника, я́ко па́ству свою́ просвеща́еши?/ Мно́га ти имена́ и бо́льшая дарова́ния./ моли́ спасти́ся душа́м на́шим.

Святи́телю Христо́в, Боже́ственных преда́ний учи́телю,/ церко́вное украше́ние,/ тебе́, я́ко и́стиннаго па́стыря, Христо́с показа́л есть/ новои́збраному своему́ слове́сному ста́ду, Се́рбским лю́дем,/ и́хже и от собла́знов спасл еси́/ и укрепи́л еси́ их бы́ти в Правосла́вии,/ те́мже ны́не мо́лим тя, Дании́ле досточу́дне:/ моли́ся Бо́гу Спа́су/ о и́же ве́рою пра́зднующих пречестну́ю па́мять твою́.

Сла́ва, глас 6:

Се прибли́жися весе́лое торжество́/ и пресве́тлая па́мять Богоно́снаго отца́./ Ра́дуйся и красу́йся, Патриархи́е Се́рбская,/ весели́ся, Пе́кская Митропо́лие, глаго́лющи:/ ра́дуйся, Це́ркве Се́рбския храни́телю;/ ра́дуйся, царе́й Се́рбских венча́телю./ Ра́дуйся, пома́завый царя́ Душа́на на ца́рство;/ ра́дуйся, ро́ду Се́рбскому честны́й наста́вниче и сто́лпе неподви́жимый./ Ра́дуйся, Це́рквам вели́кое пра́вило;/ ра́дуйся, сопресто́льниче престо́ла Се́рбскаго./ Ра́дуйся, учи́телю царе́й благочести́вых;/ ра́дуйся, свети́льниче всесве́тлый, просвеща́ющ Се́рбския концы́ уче́ньми свои́ми./ Ра́дуйся, скорбя́щих Боже́ственное утеше́ние/ и оби́димых те́плый побо́рниче./ Тем непреста́й моля́ся Христу́ Бо́гу и Пресвяте́й Богоро́дице/ спасти́ся душа́м на́шим.

И ны́не, предпра́зднству, глас 6:

Приближа́ется Христо́с:/ Вифлее́ме, предугото́вися,/ уже́ спасе́ние язы́ков озаря́ет,/ благоукраси́ я́сли,/ па́стыри собери́,/ призови́ волхвы́ от Перси́ды./ во́инства Безпло́тных умов, воззови́те:/ Царь Небе́с на зе́млю прихо́дит.

Славосло́вие вели́кое и отпу́ст.

НА ЛИТУРГИ́И

Блаже́нны от кано́на предпра́зднству и свято́му. Проки́мен, глас 1: Уста́ моя́ возглаго́лют прему́дрость/ и поуче́ние се́рдца моего́ ра́зум.

Стих: Услы́шите сия́, вси язы́цы, внуши́те, вси, живу́щии по вселе́нней.

Апо́стол ко Евре́ем, зача́ло 318 от полу.

Аллилу́ия: Уста́ пра́веднаго поуча́тся прему́дрости,/ и язы́к его́ возглаго́лет суд.

Ева́нгелие от Матфе́я, зача́ло 11.

Прича́стен: В па́мять ве́чную:

Тропа́рь, глас 4:

Чи́стаго ра́ди и непоро́чнаго твоего́ жития́,/ Богоно́се о́тче Игна́тие,/ прие́мый от Го́спода чудотво́рныя да́ры исцеля́ти немощны́я,/ исцели́, мо́лим тя, и не́мощи на́ша,/ моля́ о нас Еди́наго Человеколю́бца.

Конда́к, глас 1:

Проходя́, всеблаже́нне, доброде́тельми от си́лы в си́лу,/ и всех, с тобо́ю су́щих, о́ными превозвыша́я,/ всем служи́л еси́, Игна́тие, и угожда́л,/ тем избра́н был еси́ всем, в дому́ Бо́жия Ма́тере су́щим, в старе́йшину и вождя́,/ в чесо́м па́че Го́сподеви благоуго́ждь и ста́до его́ до́бре упа́сши,/ моли́ся о нас, ча́дех твои́х.

Краегране́сие: Свети́льниче земли́ Ру́сския, пра́ведне о́тче Иоа́нне, моли́ся Бо́гу о принося́щих ти похвалу́ сию.

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 2:

Свети́льника ве́ры и благоче́стия,/ моли́твенника к Бо́гу те́плаго,/ восхва́лим, ве́рнии, в пе́ниих и пе́снех духо́вных,/ Иоа́нна, пра́веднаго па́стыря Кроншта́дтскаго,/ его́же Христо́с чудесы́ мно́гими просла́ви/ и ди́вна Це́ркви Русстей показа́.

Всех ра́дость Христо́с/ возвесели́ се́рдце твое́, Иоа́нне,/ егда́ о́троку еще́ ти сущу,/ подви́гшуся на моли́тву ко Исто́чнику Прему́дрости,/ даде́ся ти ра́зум и смысл ко уче́нию,/ е́же утеша́ти и наставля́ти всех ко спасе́нию.

Ели́цы Христо́ви суть,/ плоть распя́ша со страстьми́ и похотьми́,/ я́коже апо́стол Па́вел рече́./ Сего́ ра́ди и ты, свя́те Иоа́нне,/ измла́да потща́лся еси́/ пра́вилом сим жи́тельствовати, о́браз показу́я всем ко спасе́нию.

Теле́сныя не́мощи препобежда́я,/ духо́вне восходи́л еси́ от си́лы в си́лу,/ преуспева́я во́зрастом и прему́дростию,/ созида́я себе́ в жили́ще Бо́жие Ду́хом,/ сподо́бился еси́, о́тче Иоа́нне,/ виде́ния хра́ма Бо́жия,/ в не́мже во свяще́нстве до кончи́ны Бо́гу послужи́л еси́.

Сла́ва, глас 8: Иоа́нне пра́ведне и ми́лостиве,/ доброде́тель любве́ стяжа́вый,/ я́же, по апо́столу, николи́же отпада́ет,/ яви́ и нам благода́тную по́мощь твою́,/ да обря́щем бога́тство благотворе́ния/ моли́твами твои́ми.

И ны́не, предпра́зднства, глас то́йже: Восприими́, Вифлее́ме: (зри день 20-й).

А́ще кроме́ пра́здника, Богоро́дичен, глас то́йже:

Любо́вию Твое́ю, Ма́ти Де́во Влады́чице,/ покрыва́еши всех притека́ющих к Сы́ну Твоему́ и Бо́гу на́шему,/ мы же, гре́шнии, ка́ющеся,/ все упова́ние на Тя возлага́ем и мо́лимся:/ сохрани́ нас под кро́вом Твои́м.

На стихо́вне стихи́ры, глас 1.

Подо́бен: Небе́сных чино́в ра́дование:

Никто́же притека́яй к тебе́,/ святы́й па́стырю наш,/ тощь и неуте́шен оты́де,/ но всем в ра́дость бысть/ виде́ние ли́ка твоего́/ и наставле́ние ко спасе́нию.

Стих: Свет возсия́ пра́веднику/ и пра́вым се́рдцем весе́лие.

Име́я се́рдце твое́ при́сно обраще́нное ко Го́споду,/ испо́лнился еси́ ми́лости и сострада́ния/ к уничиже́нным и отве́рженным лю́дем Бо́жиим,/ и́мже и ны́не не престае́ши благоде́йствовати,/ подая́ моли́твами твои́ми, о́тче Иоа́нне,/ потре́бная ко спасе́нию.

Стих: Гото́во се́рдце его́/ упова́ти на Го́спода.

Чистоту́ душе́вную храни́ти/ поуча́л еси́ па́ству твою́, свя́те Иоа́нне,/ чистоту́ мы́сли и сло́ва,/ я́ко о́браз чистоты́ и непоро́чности, в себе́ явля́я./ Сподо́би и нас моли́твами твои́ми чистоту́ серде́чную стяжа́ти.

Сла́ва, глас 6:

Е́же о нас испо́лнив смотре́ние,/ любо́вию земна́я с Небе́сными соедини́л еси́, Го́споди,/ си́це глаго́ля:/ иде́же есмь Аз, та́мо и слуга́ Мой бу́дет./ Ве́руем, я́ко и служи́тель Твой Иоа́нн/ во оби́телех святы́х мо́лится,/ о е́же пребыва́ти нам с Тобо́ю, Го́споди.

И ны́не, предпра́зднства, глас 1: Предпра́зднуим, лю́дие, Христо́во Рождество́: (зри день 20-й).

А́ще кроме́ пра́здника, Богоро́дичен, глас 6:

Земля́ неора́нная яви́лася еси́,/ Ма́ти благослове́нная,/ возрасти́вшая нам Клас живота́,/ от него́же всяк я́дый не умира́ет,/ я́коже рече́, Богороди́тельнице, всех Пита́тель.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры предпра́зднства 3, глас 1 (зри день 20-й) и свята́го 5.

А́ще кроме́ пра́здника, стихи́ры свята́го на 8, глас 6.

Подо́бен: Все отло́жше:

Единоро́днаго Сы́на Бо́жия возлюби́л еси́,/ и тому́ Еди́ному служи́ти возжеле́л еси́,/ свя́те Иоа́нне,/ ему́же вве́рился еси́, глаго́ля:/ жи́знь моя́ во Христе́ есть./ Сего́ ра́ди потща́лся еси́/ вся ко благоугожде́нию Го́сподеви// и му́дрствовати, и де́яти.

Моли́твенника те́плаго/ и благода́тнаго па́стыря ви́дим тя, о́тче Иоа́нне,/ мно́зем бо лю́дем, к тебе́ притека́ющим,/ явля́еши в ско́рбех утеше́ние,/ в неду́зех многора́зличных исцеле́ние,/ в ну́ждах су́щим и стра́ждущим/ при́сное вспоможе́ние// и до ны́не в чудоде́йствиих не оскудева́еши.

Ле́ствицею доброде́телей ше́ствуя,/ де́латель неле́ностный/ вертогра́да Госпо́дня яви́лся еси́, о́тче Иоа́нне,/ от у́тра жи́зни да́же до после́дняго часа/ до́бре потруди́лся еси́./ Та́ко и нас моли́твенно укрепи́// Го́сподеви рабо́тати.

Иоа́нне пра́ведне,/ врачу́ благода́тный,/ си́лою моли́тв твои́х/ исцеля́л еси́ бли́жних и да́льних,/ любо́вию во Христе́ объе́мля,/ тех наставля́л еси́ обраща́тися к Бо́гу,// всем по ве́ре по́мощь подаю́щему.

Разли́чен ми́лования о́браз/ и широ́ка за́поведь сия́,/ рече́ златослове́сный Иоа́нн./ Ты же, па́стырю ми́лостивый,/ в сих доброде́телех многоразли́чно подвиза́выйся,/ дом трудолюби́я созда́вый,// нас бы́ти чу́ждых пра́здности научи́.

Уедине́нному пустынножи́телю,/ преподо́бному Иоа́нну Ры́льскому подража́я,/ его́же и́менем во святе́м Креще́нии нарече́н был еси́,/ Иоа́нне пра́ведне,/ удали́лся еси́ от вся́каго мирска́го пристра́стия,/ во Христе́ еди́нем житие́ свое́ утверди́в,// научи́ и нас благоче́стному жи́тельству.

Сла́ва, глас то́йже:

Селе́ния святы́х насле́довал еси́,/ о́тче Иоа́нне пра́ведне,/ во све́те лица́ Бо́жия/ зри́ши ну́жды с ве́рою притека́ющих к тебе́,/ коему́ждо потре́бная я́же ко спасе́нию подава́я./ Сего́ ра́ди и мы,/ на по́мощь твою́ упова́юще, мо́лимся:/ моли́ Христа́ Бо́га/ спасти́ся душа́м на́шим.

И ны́не, предпра́зднства, глас то́йже: Верте́пе, благоукраси́ся: (зри день 20-й).

Вход. Проки́мен дне. И чте́ния.

Прему́дрости Соломо́новы чте́ние (глава́3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озло́бление исхо́д их./ И е́же от нас ше́ствие сокруше́ние, они́ же суть в ми́ре./ И́бо пред лице́м челове́ческим а́ще и му́ку прии́мут, упова́ние их безсме́ртия испо́лнено./ И вма́ле наказа́ни бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле искуси́ их, и я́ко всепло́дие же́ртвенное прия́т я./ И во вре́мя посеще́ния их возсия́ют и, я́ко и́скры по сте́блию, потеку́т./ Су́дят язы́ком и облада́ют людьми́, и воцари́тся Госпо́дь в них во ве́ки./ Наде́ющиися Нань разуме́ют и́стину и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́, и посеще́ние во избра́нных Его́.

Прему́дрости Соломо́новы чте́ние (главы́ 5 и 6):

Пра́ведницы во ве́ки живу́т, и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние Свое́ и вооружи́т тварь в месть враго́м./ Облече́тся в броня́ пра́вды и возложи́т шлем, суд нелицеме́рен./ Прии́мет щит непобеди́мый, преподо́бне./ Поостри́т же напра́сный гнев во ору́жие;/ спобо́рет же с ним ми́р на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка о́блаков, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я, ре́ки же потопя́т я на́гло./ Сопроти́в ста́нет им дух си́лы, и, я́ко ви́хор, разве́ет их/ и опустоши́т всю зе́млю беззако́ние, и злоде́йство преврати́т престо́лы си́льных./ Слы́шите у́бо, ца́рие, и разуме́йте, навы́кните судии́ конце́в земли́./ Внуши́те, держа́щии мно́жества и гордя́щиися о наро́дех язы́ков,/ я́ко дана́ есть от Го́спода держа́ва вам и си́ла от Вы́шняго.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется./ Седи́на же есть му́дрость челове́ком, и во́зраст ста́рости житие́ нескве́рное./ Благоуго́ден Бо́гу быв, возлю́блен бысть, и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́, или́ лесть прельсти́т ду́шу его́./ Раче́ние бо зло́бы помрача́ет до́брая, и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга. Уго́дна бо бе Го́споду душа́ его́, сего́ ра́ди потща́ся от среды́ лука́вствия./ Лю́дие же ви́девше и не разуме́вше, ниже́ положи́вше в помышле́нии таково́е./ Я́ко благода́ть и ми́лость в преподо́бных Его́, и посеще́ние во избра́нных Его́.

На лити́и стихи́ры, глас 2:

Сло́ва Бо́жия служи́телю,/ словесы́ ева́нгельскими назида́л еси́ се́рдце твое́,/ в моли́тве и Богомы́слии при́сно пребыва́я,/ ра́зум богопросвеще́н стяжа́л еси́, о́тче Иоа́нне,/ путь к Бо́гу писа́ньми твои́ми нам указу́я,// моли́ся, да пра́во к Нему́ ше́ствуем.

Ко Христу́, Со́лнцу пра́вды, моли́твенно обраща́лся,/ поуче́ния душеспаси́тельная о Нем/ в кни́зе твое́й изложи́л еси́,/ о́тче пра́ведне,/ да вси ве́рнии, та́йнам Бо́жия домострои́тельства спасе́ния на́шего поуча́ющеся,// жи́знь ве́чную насле́дуют.

И́стинныя ве́ры пропове́дниче,/ сло́вом и писа́ньми догма́ты Правосла́вия изъясня́л еси́,/ лжеучи́телем противобо́рствуя,/ на недви́жимем ка́мени ве́ры утвержда́лся,/ во сла́ву Це́ркве Христо́вы потруди́лся еси́./ Укрепи́ и нас моли́твами твои́ми, о́тче Иоа́нне,/ в ве́рности Правосла́вней Це́ркви пребыва́ти// и в ней спаса́тися.

Сла́ва, глас 7:

Яви́лся еси́ лю́дем Бо́жиим/ наста́вник спасе́ния,/ о́браз сострада́ния и духо́внаго утеше́ния:/ не то́чию бо па́стве Кроншта́дтстей,/ но и всей Руси́, о́тче Иоа́нне Богому́дре,/ благодея́ния источа́вши./ Сего́ ра́ди, пра́зднующе па́мять твою́,// сла́вим Го́спода, ди́внаго во святы́х Свои́х.

И ны́не, предпра́зднства, глас 8: Восприими́, Вифлее́ме:

А́ще кроме́ пра́здника, Богоро́дичен, глас 7:

Притека́юще под кров Твой, Де́во Богоро́дице,/ ве́мы Тя христиа́н Предста́тельницу,/ к Сы́ну бо Твоему́ и Бо́гу на́шему/ при́сно моле́бне ру́це Твои́ о нас простира́еши, Всенепоро́чная,// и спаса́еши от бед ве́рою и любо́вию Богоро́дицу Тя почита́ющих.

На стихо́вне стихи́ры предпра́зднства со стихи́ их, глас 2 (зри день 20-й).

А́ще кроме́ пра́здника, стихи́ры свята́го, глас 5:

Ре́вностию о сла́ве Бо́жии распаля́ем,/ поуча́л еси́ па́ству твою́/ вся́чески храни́ти се́рдце свое́ от страсте́й,/ ду́шу растлева́ющих и от Бо́га разлуча́ющих./ моли́ о нас, о́тче святы́й Иоа́нне// да упра́вим житие́ на́ше к сла́ве и́мене Бо́жия и спасе́нию.

Стих: Свет возсия́ пра́веднику/ и пра́вым се́рдцем весе́лие.

Апо́стольским по́двигом подража́я,/ о́тче Иоа́нне преди́вне,/ ду́шу о спасе́нии бли́жних полага́л еси́,/ взыску́я не свои́х си,/ но и́хже любы́ Бо́жия объе́млет./ Ны́не же, предстоя́ Престо́лу Святы́я Тро́ицы,// непреста́нно моли́ся о почита́ющих па́мять твою́.

Стих: Гото́во се́рдце его́/ упова́ти на Го́спода.

Все бога́тство ве́ры/ откры́л ми еси́, Го́споди, –/ благодари́в взыва́л еси́, Иоа́нне пра́ведне,/ ко Исто́чнику любве́ и прему́дрости – Бо́гу,/ от него́же позна́л еси́ словеса́ спаси́тельная.// И́миже согре́й хла́дная сердца́ на́ша и ко спасе́нию напра́ви.

Сла́ва, глас 8: Еди́ному Бо́гу любо́вию прилепля́яся, свя́те Иоа́нне,/ при́сно попече́ние о стра́ждущих и отве́рженных име́я,/ ско́рый помо́щник тем яви́лся еси́,/ сего́ ра́ди си́ла благода́ти Бо́жия/ содева́ет тобо́ю ве́лия чудеса́,// обращая неве́рных к ве́ре во Христа́ и к жи́зни во сла́ву Бо́жию.

И ны́не, предпра́зднства, глас 1: Предпра́зднуим, лю́дие, Христо́во Рождество́: (зри день 20-й).

А́ще кроме́ пра́здника, Богоро́дичен, глас 8:

Де́вственнии ли́цы святы́х на Небеси́/ и подви́жницы благоче́стия на земли́/ де́вству и чистоте́ от Тебе́, Де́во безневе́стная, научи́вшиися,/ воплоти́вшемуся от Тебе́ Сы́ну и Бо́гу покланя́ющеся,// сла́вят Рождество́ Твое́, Благода́тная.

Тропа́рь, глас 1:

Правосла́вныя ве́ры побо́рниче,/ земли́ Русския печа́льниче,/ па́стырем пра́вило и о́бразе ве́рным,/ покая́ния и жи́зни во Христе́ пропове́дниче,/ Боже́ственных Та́ин благогове́йный служи́телю/ и дерзнове́нный о лю́дех моли́твенниче,/ о́тче пра́ведный Иоа́нне,/ цели́телю и преди́вный чудотво́рче,/ гра́ду Кроншта́дту похвало́/ и Це́ркве на́шея украше́ние,/ моли́ всеблага́го Бо́га// умири́ти ми́р и спасти́ ду́ши на́ша.

Ин тропа́рь, глас 4:

Русския земли́ па́стырь до́брый показа́лся еси́,/ в служе́нии пресви́терстем жи́знь во Христе́ стяжа́в,/ Богому́дре о́тче Иоа́нне./ Благода́ть изоби́льную от Влады́ки Христа́ прия́л еси́:/ неду́ги отгоня́ти,/ малоду́шныя утеша́ти,/ в Та́йне Пречи́стаго Те́ла и Кро́ве ве́рныя со Христо́м соединя́ти./ Сего́ ра́ди восхваля́ем тя,// я́ко моли́твенника о душа́х на́ших.

Сла́ва, и ны́не, предпра́зднства, глас 4: Гото́вися, Вифлее́ме: (зри день 20-й).

А́ще кроме́ пра́здника, Богоро́дичен.

НА У́ТРЕНИ

По 1-м стихосло́вии седа́лен, глас 4:

Неизрече́нно ми́лостив и долготерпели́в Госпо́дь ко мне,/ рекл еси́, свя́те Иоа́нне,/ та́ко и мне подоба́ет ми́лостиву бы́ти./ Сего́ ра́ди ни́щия и убо́гия возлюби́л еси́,/ я́ко ме́ньшую Христо́ву бра́тию,/ и́мже всеусе́рдно послужи́в,/ Ца́рствия Небе́снаго насле́дник яви́лся еси́.

Сла́ва, и ны́не, предпра́зднства или́ Богоро́дичен.

По 2-м стихосло́вии седа́лен, глас 5:

Ежеде́нное соверше́ние Боже́ственных Та́ин/ благода́тною си́лою в моли́твеннем по́двизе укрепля́ше тя, свя́те Иоа́нне./ Сего́ ра́ди поуча́л еси́,/ я́ко Безкро́вная Же́ртва торжество́ любве́ Бо́жия к ро́ду челове́ческому есть/ и всеси́льное хода́тайство о спасе́нии на́шем./ Ны́не же, свя́те Иоа́нне, при́сно Бо́гу предстоя́,/ моли́ся и нам сея́ благода́ти досто́йным прича́стником бы́ти.

Сла́ва, и ны́не, предпра́зднства или́ Богоро́дичен.

По полиеле́и седа́лен, глас 8:

Оте́ческою любо́вию всех объемля,/ самых па́дших во глубину́ греха́ не отвраща́лся еси́,/ ненави́дя грех, ко гре́шным милосе́рдуя,/ к покая́нию их приводи́л еси́,/ А́нгелом Небе́сным подо́бяся,/ обраще́нию заблу́ждших и покая́нию их ра́дуяся,/ Иоа́нне пра́ведне.

Сла́ва, и ны́не, предпра́зднства или́ Богоро́дичен.

Степе́нна, 1-й антифо́н 4-го гла́са. Проки́мен, глас 4: Возвесели́тся пра́ведник о Го́споде/ и упова́ет на него́.

Стих: Услы́ши, Бо́же, глас мой, внегда́ моли́тимися к Тебе́. Вся́кое дыха́ние:

Ева́нгелие от Матфе́я, зача́ло 16.

По 50-м псалме́ стихи́ра, глас 6:

Тя земна́го а́нгела,/ Небе́снаго челове́ка,/ любве́ Христо́вы носи́теля,/ земли́ Руссския печа́льника/ и о всем ми́ре моли́твенника,/ засту́пника оби́димых,/ о́браз трудолю́бия, чудотво́рца преди́внаго/ почита́ем, Иоа́нне пра́ведне,/ благодаря́ще Бо́га,// прославля́ющаго святы́я Своя́.

Кано́н предпра́зднства на 6, глас 1 (зри день 20-й), и свята́го на 8. А́ще кроме́ пра́здника, кано́н Богоро́дицы на 6 и свята́го на 8.

Кано́н свята́го, глас 1.

Песнь 1

Ирмо́с: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,// я́ко просла́вися.

Чистоту́ помышле́ний даждь ми, Спа́се мой,/ е́же воспе́ти чистото́ю А́нгелом подо́бнаго, пра́веднаго Иоа́нна пресви́тера,/ я́ко А́нгела Го́спода Вседержи́теля.

Е́же лю́бити Христа́ и ему́ служи́ти, Иоа́нне свя́те,/ де́лом и сло́вом испо́лнил еси́,/ во свяще́нстве ве́рным о́браз быв сло́вом и житие́м.

Иоа́нну Крести́телю подража́я,/ покая́ния пропове́дниче, о́тче Иоа́нне пра́ведне,/ о́браз воздержа́ния, целому́дрия и де́вственника чистоту́ яви́л еси́.

Богоро́дичен: Облагодати́ нас, Ма́ти Бо́жия,/ е́же к богоугожде́нию житие́ на́ше упра́вити,/ да Твое́ю по́мощию и моли́твами пра́веднаго Иоа́нна живо́т ве́чный насле́дуем.

Песнь 3

Ирмо́с: Ка́мень, его́же небрего́ша зи́ждущим,/ сей бысть во главу́ угла́:/ Той есть Ка́мень,/ на Не́мже утверди́ Це́рковь Христо́с,// Ю́же от язы́к искупи́.

Апо́стольски труди́лся еси́/ от утра па́стырскаго жития́ твоего́ да́же до ве́чера, о́тче Иоа́нне,/ николи́же в любви́ к Бо́гу и бли́жнему оскудева́я.

Небе́снаго Ца́рствия взыску́я,/ усе́рдный де́латель благи́х на земли́ яви́лся еси́,/ моли́твою ве́ры неду́ги исцеля́я и заблу́ждшия к покая́нию призыва́я, свя́те.

Никого́же отвраща́лся еси́,/ то́кмо отверга́ющихся Го́спода Иису́са Христа́ и Це́ркве его́ Святы́я,/ Е́йже сы́ны ве́ка сего́ противля́ются./ Но и о сих заблу́ждших в ско́рби мно́зей моле́ние твое́ к Бо́гу возно́сити не преста́вал еси́.

Богоро́дичен: Еди́не́ние ве́рных в Це́ркви Сы́на Твоего́ и Бо́га на́шего сохрани́,/ Пречи́стая Де́во Ма́ти,/ да при́сно в любви́ Христо́ве друг ко дру́гу утверди́мся.

Конда́к и И́кос предпра́зднства, глас 3 (зри день 20-й).

Седа́лен, глас 2:

Мы, не́мощнии, к тебе́, пра́ведне Иоа́нне,/ я́ко си́льному моли́твеннику пред Бо́гом, притека́ем,/ прося́ще неду́гом душе́вным и теле́сным исцеле́ния,/ в ско́рбех о гресе́х на́ших покая́нием избавле́ния,/ стране́ на́шей и лю́дем ея́ ми́рное жи́тельство/ и вся потре́бная ко спасе́нию.

Сла́ва, и ны́не, предпра́зднства: Из чре́ва пре́жде век: (зри день 20-й).

А́ще кроме́ пра́здника, Богоро́дичен:

Отрокови́це благода́тная,/ Ма́ти безневе́стная, Наде́ждо на́шего спасе́ния,/ даждь нам в ве́ре утвержде́ние и во благочести́вем житии́ преуспея́ние,/ в ско́рбех и печа́лех утеше́ние./ Тя бо, я́ко Ро́ждшую Спа́са Христа́, при́сно велича́ем.

Песнь 4

Ирмо́с: Ду́хом прови́дя, проро́че Авваку́ме, Словесе́ вопло́щение,/ пропове́дал еси́, вопия́:/ внегда́ прибли́житися ле́том – позна́ешися,/ внегда́ приити́ вре́мени – пока́жешися.// Сла́ва си́ле Твое́й, Го́споди.

Ло́жная мудрова́ния сыно́в ве́ка сего́, возста́ющих проти́ву и́стины Святы́я Це́ркве Христо́вы,/ отве́ргл еси́, свя́те Иоа́нне,/ сло́вом и житие́м Правосла́вие утвержда́л еси́, поя́:/ сла́ва си́ле Твое́й, Го́споди.

И́мя Христо́во при́сно в се́рдце нося́, свято́му Богоно́сцу Игна́тию подража́я,/ в себе́ само́м вся́кое прираже́ние греха́ истреби́л еси́, поя́:/ сла́ва си́ле Твое́й, Го́споди.

Си́ла Бо́жия, в не́мощи соверша́ющаяся, яви́ тя ди́внаго чудотво́рца,/ цели́теля неду́жных и не́мощны́х, учи́теля покая́ния, моли́твы де́лателя, пою́ща:/ сла́ва си́ле Твое́й, Го́споди.

Богоро́дичен: Яви́лася еси́, Влады́чице Богоро́дице, благода́тная Помо́щница пра́ведному пресви́теру Иоа́нну,/ при́сно моля́щемуся Ти и Сы́ну Твоему́ и благода́рно пою́щему:/ сла́ва си́ле Твое́й, Го́споди.

Песнь 5

Ирмо́с: Твой ми́р даждь нам,/ Сы́не Бо́жий:/ ино́го бо, ра́зве Тебе́ Бо́га не зна́ем,/ и́мя Твое́ имену́ем,// я́ко Бог живы́х и ме́ртвых еси́.

Бла́го мне, я́ко смири́л мя еси́, Го́споди, –/ си́це моли́лся еси́, терпя́ поноше́ния хули́телей твои́х, свя́те Иоа́нне,/ храня́ ми́р се́рдца Твоего́ непреста́нною моли́твою и незло́бием.

Обле́кся во Христа́ ве́рою и причасти́ем Святы́х Таин,/ был еси́ тверд, я́ко скала, глаго́ля:/ мне Христо́с полнота́ всех благ, живо́т и мир, превосходя́й всяк ум.

Госпо́дни Трапе́зы при́сно причаща́яся,/ стяжа́л еси́ свет Христо́в, просвеща́ющий вся́каго челове́ка, гряду́щаго в мир./ Сим же и нас просвети́, Иоа́нне светоно́сче, тя почита́ющих.

Богоро́дичен: Ужасо́шася вся́ческая о Боже́ственней сла́ве Твое́й, Пречи́стая Де́во,/ о́бщники сла́вы Твоея́ соде́лай и нас,/ Тя при́сно ублажа́ющих.

Песнь 6

Ирмо́с: Проро́ка Ио́ну подража́я, вопию́:/ живо́т мой, Бла́же, свободи́ из тли// и спаси́ мя, Спа́се ми́ра, зову́ща: сла́ва Тебе́.

Оживля́я ду́шу непреста́нною ко Го́споду моли́твою,/ си́це взыва́л еси́, Иоа́нне Богому́дре:/ Го́споди, даждь ми лю́бити вся́каго челове́ка, я́ко сама́го себе́./ сию́ доброде́тель помози́ и нам стяжа́ти.

Призыва́я и́мя Бо́жие во спасе́ние твое́,/ спасе́нию мно́гих послужи́л еси́./ Да пребу́дем и мы в едине́нии с Бо́гом и в любви́ между́ собо́ю,/ мо́лимтися, о́тче Иоа́нне.

Ра́зум богопросвеще́нный стяжа́л еси́, Иоа́нне прему́дре,/ о Святе́й Тро́ице богосло́вствуя, рекл еси́:/ высота́ и́стины сея́ живо́творна душе́, в простоте́ се́рдца ве́рующей.

Богоро́дичен: Изба́вителя на́шего неизрече́нно ро́ждшая, Пресвята́я Де́во,/ бу́ди нам гре́шным прибе́жище спасе́ния/ и ве́чныя жи́зни Хода́таица.

Конда́к, глас 3:

Днесь па́стырь Кроншта́дтский/ предстои́т Престо́лу Бо́жию/ и усе́рдно мо́лит о ве́рных/ Христа́ Пастыренача́льника,/ обетование да́вшаго:/ сози́жду Це́рковь мою́/ и врата́ а́дова// не одоле́ют ей.

И́кос:

Восхва́лим, ве́рнии, ди́внаго па́стыря Кроншта́дтскаго, благода́ти тезоимени́таго,/ свети́льника, присногоря́щаго у Престо́ла Святы́я Тро́ицы,/ с Богоро́дицею и со все́ми святы́ми земли́ Русския/ моля́щагося о спасе́нии всех, и́мя Госпо́дне призыва́ющих,/ да укрепи́тся в стране́ на́шей Правосла́вие/ си́лою Христа́ Пастыренача́льника, обетова́ние да́вшаго:/ Сози́жду Це́рковь мою́ и врата́ а́дова не одоле́ют ей.

Песнь 7

Ирмо́с: Су́щим в пещи́ отроко́м Твои́м, Спа́се,/ не прикосну́ся, ниже́ стужи́ огнь./ Тогда́ трие́, я́ко еди́неми усты́, поя́ху/ и благословля́ху, глаго́люще:// благослове́н Бог оте́ц на́ших.

Наста́ви нас, па́стырю до́брый, жи́зни во Христе́,/ по сло́ву бо твоему́, вели́ко де́лание есть, е́же побежда́ти грех, в нас живу́щий./ Да не опали́тся душа́ на́ша пла́менем его́, помоли́ся.

Очище́ние на́ше и избавле́ние есть Христо́с Спаси́тель,/ ему́же ты, па́стырю пречу́дный,/ о на́шем духо́внем возрожде́нии, чрез покая́ние и исправле́ние, помоли́ся.

Си́лою Ду́ха Свята́го в непреста́нней моли́тве/ безстра́стие стяжа́вый, до́брый па́стырю Иоа́нне,/ страсте́й любогрехо́вных нам изба́витися помоли́ся.

Богоро́дичен: Яви́ нам ми́лость твою́, Богоро́дице Де́во, Ма́ти Живота́,/ к Тебе́ с ве́рою притека́ющим/ и Сы́ну Твоему́ и Бо́гу покая́ние принося́щим.

Песнь 8

Ирмо́с: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,// и превозноси́те во вся ве́ки.

Ще́дрою руко́ю твое́ю ми́лостыню прося́щим подава́л еси́, Иоа́нне ми́лостиве./ Не ве́де бо шу́йца, е́же твори́ десни́ца твоя́,/ тщету́ бо земна́го стяжа́ния на Небе́сная премени́л еси́.

Иму́щему дано бу́дет и преизбу́дет, рече́ Госпо́дь,/ та́ко и ты, о́тче Иоа́нне, тща́нием ве́лиим благода́ть Ду́ха Свята́го стяжа́л еси́,/ е́юже и нас моли́твами твои́ми ны́не уще́дри.

Хране́ние усто́м полага́я, николи́же су́етная возгла́голал еси́, Иоа́нне,/ зако́на Госпо́дня взыску́я,/ и нас в нем ходи́ти при́сно науча́еши.

Богоро́дичен: Тя, Богоро́дицу, вы́шшую Небе́с и чи́стшую све́тлостей со́лнечных,/ в пе́снех немо́лчных воспева́ют Херуви́ми и Серафи́ми./ С ни́миже и мы, недосто́йнии, Тя ублажа́ем.

Песнь 9

Ирмо́с: Живоприе́мный Исто́чник приснотеку́щий,/ светоно́сный Свети́льник благода́ти,/ Храм одушевле́нный, Сень Пречи́стую,/ Небесе́ и земли́ простра́ннейшую,// Богоро́дицу, ве́рнии, велича́ем.

Иису́са Христа́ Пастыренача́льника о́браз в себе́ нося́, Иоа́нне,/ угото́вал еси́ по вся дни ду́шу твою́ за па́ству полага́ти/ и во гресе́х погиба́ющих к Бо́гу обраща́ти.

Принося́щих ти похвалу́ сию, о́тче Иоа́нне,/ не отри́ни, но ми́лость Христа́ Бо́га испроси́/ к проще́нию мно́гих прегреше́ний.

Очи́ма твои́ма при́сно взира́я ко Го́споду, о́тче Иоа́нне,/ врата́ се́рдца твоего́ отве́рста ему́ имел еси́,/ да отве́рзется и нам дверь покая́ния моли́твами твои́ми.

Богоро́дичен: Христа́ Бо́га на́шего, пре́жде век от Отца́ рожде́ннаго без ма́тере,/ Ро́ждшагося же от Тебе́ без отца́ нас ра́ди,/ моли́, Чи́стая Богоневе́сто, да спасе́ние улучи́м, Тя велича́юще.

Свети́лен: Весь испо́лнился еси́ Све́та Христо́ва, освяти́в себе́ Бо́гови,/ просвети́ и нас све́том благода́ти Ду́ха Свята́го/ моли́твами твои́ми, Иоа́нне светоно́сне.

Сла́ва, и ны́не, предпра́зднства: Украси́ся, Вифлее́ме: (зри день 20-й).

А́ще кроме́ пра́здника, Богоро́дичен:

А́нгели на Небеси́ и челове́цы на земли́ Тя,/ Богоро́дице, я́ко Ма́терь Све́та,/ непреста́нно велича́ем.

На хвали́тех стихи́ры предпра́зднства 3, глас 4 (зри день 20-й на стихо́вне) и свята́го 3. а́ще кроме́ пра́здника, стихи́ры свята́го на 4.

Стихи́ры свята́го на 4, глас 8:

Лику́й све́тло гра́де свята́го Петра́,/ име́я в себе́ днесь просла́вленный святы́я уго́дники Бо́жия:/ Ксе́нию блаже́нную, ди́вную моли́твенницу,/ и пра́веднаго Иоа́нна, па́стыря Кроншта́дтскаго,/ свети́льника ве́ры и чудотво́рца изря́дна./ Взыгра́йте, лю́дие Бо́жии,/ в пе́снех и пе́ниих ра́дующеся,/ Христа́ сла́вяще и уго́дники его́,// при́сно моля́щияся о душа́х на́ших.

Устне́ твои́ ра́зума испо́лнистася,/ и зако́ну Госпо́дню от уст твои́х поуча́хуся лю́дие,/ Иоа́нне преди́вне, иере́ю Бо́жий,/ ны́не же со А́нгелы предстоя́ Свя́тей Тро́ице,/ моли́ся о почита́ющих па́мять твою́.

Словесы́ твои́ми/ и пи́саньми вдохнове́нными/ путь к Бо́гу указу́еши/ и жи́зни во Христе́ поуча́еши,/ Со́лнце пра́вды, Христа́, пропове́дуя,/ и́стинный Клас живота́,/ Трапе́зу безсме́ртия в Та́йне Пречи́стых Те́ла и Кро́ве/ нам уготовля́ющаго.

Сла́ва, глас 6:

И́стиннаго па́стыря тя почита́ем,/ о́тче Иоа́нне пра́ведне,/ яви́л бо еси́ в себе́ о́браз Пастыренача́льника Христа́,/ ны́не же зре́нием неизрече́нныя сла́вы его́ наслажда́ешися/ и проше́ния на́ша слы́шиши,/ моли́ся дарова́ти нам поле́зная ко спасе́нию.

И ны́не, предпра́зднства, глас то́йже: Приближа́ется Христо́с: (зри день 20-й).

А́ще кроме́ пра́здника, Богоро́дичен, глас то́йже:

Ю́жика Твоя́, Пресвята́я Де́во,/ Елисаве́т, ма́ти Предте́чева,/ пе́рвее всех земноро́дных/ Богоро́дицу Тя нарече́, глаго́лющи: отку́ду мне сие́,/ да прии́де Ма́ти Го́спода моего́ ко мне./ Мы же Тя, благослове́нную в жена́х,/ вси ро́ди христиа́нстии,/ без истле́ния Бо́га Сло́ва Ро́ждшую,/ при́сно велича́ем.

НА ЛИТУРГИ́И

Проки́мен, глас 7: Возвесели́тся пра́ведник о Го́споде/ и упова́ет на Него́.

Стих: Услы́ши, Бо́же, глас мой, внегда́ моли́тимися к Тебе́.

Апо́стол к Евре́ем, зача́ло 311.

Аллилу́ия, глас 4: Пра́ведник, я́ко фи́никс, процвете́т,/ и я́ко кедр, и́же в Лива́не, умно́жится.

Стих: Насажде́ни в до́му Госпо́дни во дворе́х Бо́га на́шего процвету́т.

Ева́нгелие от Матфе́я, зача́ло 11.

Прича́стен: В па́мять ве́чную бу́дет пра́ведник:

Моли́тва

О вели́кий чудотво́рче и преди́вный уго́дниче Бо́жий, богоно́сне о́тче Иоа́нне! При́зри на нас и внемли́ благосе́рдно моле́нию на́шему, я́ко вели́ких дарова́ний сподо́би тя Госпо́дь, да хода́тай и при́сный моли́твенник за нас бу́деши. Се бо страстьми́ грехо́вными обурева́еми и зло́бою снеда́еми, за́поведи Бо́жия пренебрего́хом, покая́ния серде́чнаго и слез воздыха́ния не принесо́хом, сего́ ра́ди мно́гим ско́рбем и печа́лем досто́йни яви́хомся.

Ты же, о́тче пра́ведне, ве́лие дерзнове́ние ко Го́споду и сострада́ние к бли́жним свои́м име́я, умоли́ Всеще́драго Влады́ку ми́ра, да проба́вит ми́лость Свою́ на нас и потерпи́т непра́вдам на́шим, не погуби́т нас грех ра́ди на́ших, но вре́мя на покая́ние ми́лостивно нам да́рует.

О свя́тче Бо́жий, помози́ нам ве́ру Правосла́вную непоро́чно соблюсти́ и за́поведи Бо́жии благоче́стно сохрани́ти, да не облада́ет на́ми вся́кое беззако́ние, ниже́ посрами́тся пра́вда Бо́жия в непра́вдах на́ших, но да сподо́бимся дости́гнути кончи́ны христиа́нския, безболе́зненныя, непосты́дныя, ми́рныя и Та́ин Бо́жиих прича́стныя.

Еще́ мо́лим тя, о́тче пра́ведне, о е́же Це́ркви на́шей Свя́тей до сконча́ния ве́ка утвержде́нней бы́ти, оте́честву же на́шему ми́р и пребыва́ние в пра́вде Бо́жией испроси́ и от всех зол сохрани́, да та́ко наро́ди наши, Бо́гом храни́ми, в единомы́слии ве́ры и во вся́ком благочести́и и чистоте́, в ле́поте духо́внаго бра́тства, трезве́нии и согла́сии свиде́тельствуют: я́ко с на́ми Бог! В Не́мже живе́м, и дви́жемся, и есмы́, и пребу́дем во ве́ки. Ами́нь.