На вели́цей вече́рни

На Го́споди, воззва́х: стихи́ры, глас 2:

Всем скорбя́щим Ра́досте,/ и оби́димым Предста́тельница,/ и а́лчущим Пита́тельница,/ стра́нным Утеше́ние/ и обурева́емым Приста́нище,/ боля́щим Посети́тельница,/ озло́бленным Покро́в и Заступле́ние/ и Жезл слепы́м,/ Ма́ти Бо́га Вы́шняго/ Ты еси́, Пречи́стая,/ потщи́ся, мо́лимся, спасти́ся рабо́м Твои́м.

И́но прибе́жище, Чи́стая,/ челове́цы к Творцу́ и Влады́це не стяжа́хом мы,/ ра́зве Тебе́, Богоневе́сто./ Не отве́рзи нас от Твоего́ заступле́ния,/ ниже́ посрами́ любо́вию прибега́ющих к Покро́ву Твоему́,/ Ма́ти Бо́га Вы́шняго,/ потщи́ся, покажи́ Твоея́ ми́лости бога́тство/ и ны́не от страсте́й нас спаси́.

Страх многообра́зных искуше́ний/ и ну́ждных бу́ря ны́не мя обурева́ют,/ и глубина́ потопля́ет мя отча́яния,/ зима́ прегреше́ний мои́х лю́те мя смуща́ет,/ предвари́ и изба́ви мя, обурева́ема,/ Еди́на ве́рным Тишино́,/ и к приста́нищу Вы́шняго Боже́ственнаго зва́ния возведи́.

Сла́ва, и ны́не, глас то́йже:

О, вели́каго та́инства!/ Ви́дя чудеса́, пропове́даю Божество́,/ Емману́ил у́бо естества́ две́ри отве́рзе, я́ко Человеколю́бец,/ де́вства же затво́ры не разве́рзе, я́ко Бог,/ но та́ко из ложе́сн про́йде, я́коже слу́хом вни́де,/ та́ко роди́ся, я́коже и зача́тся,/ безстра́стно вни́де и неизрече́нно изы́де,/ по глаго́лющему проро́ку:/ та дверь затворе́нна бу́дет, и никто́же про́йде́т сквозе́ ея́,/ то́кмо Еди́н Госпо́дь Бог Изра́илев,/ име́яй ве́лию ми́лость.

Вход. Проки́мен дне. И чте́ния.

Бытия́ чте́ние (глава́ 28):

Изы́де Иа́ков от студенца́ кля́твеннаго и и́де в Харра́нь./ И обре́те ме́сто, и спа та́мо,/ за́йде бо со́лнце,/ и взят от ка́мения ме́ста того́,и положи́ возгла́вие себе́,/ и спа на ме́сте о́ном, и сон ви́де:/ и се ле́ствица утвержде́на на земли́,/ ея́же глава́ досяза́ше до Небе́с,/ и А́нгели Бо́жии восхожда́ху и нисхожда́ху по ней,/ Госпо́дь же утвержда́шеся на ней и рече́:/ Аз Бог Авраа́мов, отца́ твоего́, и Бог Исаа́ков, не бо́йся:/ земля́, иде́же ты спи́ши на ней,/ тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки,/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́, а́може а́ще пои́деши,/ и возвращу́ тя в зе́млю сию́,/ я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́ и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ несть сие́, но дом Бо́жий, и сия́ врата́ Небе́сная.

Проро́чества Иезекии́лева чте́ние (гла́вы 43 и 44):

Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы, глаго́лет Адонаи́ Госпо́дь./ И обрати́ мя на путь врат святы́х вне́шних,/ зря́щих на восто́ки, и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их:/ я́ко Госпо́дь Бог Изра́илев про́йдет и́ми, и бу́дут затворе́на./ Я́ко игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х, су́щих к се́веру, пря́мо хра́му, и ви́дех,/ и се испо́лнь сла́вы храм Госпо́день.

При́тчей чте́ние (глава́ 9):

Прему́дрость созда́ Себе́ дом/ и утверди́ столпо́в седмь./ Закла́ Своя́ же́ртвенная, и раствори́ в ча́ши Свое́й вино́, и угото́ва Свою́ трапе́зу./ Посла́ Своя́ рабы́, созыва́ющи с высо́ким пропове́данием на ча́шу, глаго́лющи:/ и́же есть безу́мен, да уклони́тся ко Мне./ И тре́бующим ума́ рече́:/ прииди́те, яди́те Мой хлеб и пи́йте вино́, е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживете́,/ и испра́вите ра́зум в ве́дении./ Наказу́яй злы́я, прии́мет себе́ безче́стие:/ облича́яй же нечести́ваго, опоро́чит себе́,/ обличе́ния бо нечести́вому – ра́ны ему́./ Не облича́й злых, да не возненави́дят тебе́,/ облича́й прему́дра и возлю́бит тя./ Даждь прему́дрому вину́, и прему́дрший бу́дет;/ сказу́й пра́ведному, и приложи́т приима́ти./ Нача́ло прему́дрости – страх Госпо́день, и сове́т святы́х – ра́зум:/ разуме́ти бо зако́н – по́мысла есть блага́го./ Сим о́бразом мно́гое поживе́ши вре́мя,/ и приложа́тся тебе́ ле́та живота́.

На литии́ стихи́ры, глас 2:

Злата́я кади́льнице, ру́чко и же́зле/ и свети́льниче светоза́рный, сви́тче Боже́ственный,/ в не́мже пе́рстом Бо́жиим написа́ся Сло́во,/ спаси́ нас, Тебе́ велича́ющих.

Да́руй нам по́мощь, Богоро́дице, на Тя наде́ющимся,/ ве́рным прибе́жище,/ изба́ви от бед рабы́ Твоя́, Де́во,/ на Тя бо по Бо́зе упова́ние возлага́ем.

Влады́чице, Ма́ти Изба́вителя,/ приими́ моле́ние рабо́в Твои́х,/ а́ще и недосто́йне моля́щихся Тебе́,/ да мо́лишися за ны к Ро́ждшемуся из Тебе́, Влады́чице ми́ра,/ и бу́ди нам Изба́вительница.

Сла́ва, и ны́не, глас 8:

Тя мо́лим, Предста́тельницу на́шу,/ Пречи́стая Богоро́дице,/ одержи́ми печа́льми,/ не оста́ви до конца́ поги́бнути рабо́м Твои́м,/ но ускори́ изъя́ти нас от настоя́щия ско́рби и печа́ли./ О Пресвята́я Де́во Чи́стая,/ Ты бо еси́ нам по́мощь/ и стена́ необори́мая.

На стихо́вне стихи́ры, глас 4:

Наста́вницу Тя заблу́ждших/ и приста́нище спаси́тельно в пучи́не, Влады́чице,/ и в бу́ри, во искуше́нии же и печа́лех/ Христо́с Тя всем показа́,/ Сын Твой и Бог,/ ве́рно приходя́щим к Тебе́,/ Его́же моли́ от злых бед изба́витися/ ве́дущим Тя, Богоро́дице, вои́стинну Наста́вницу.

Стих: Помяну́ и́мя Твое́/ во вся́ком ро́де и ро́де.

Тле́ние потреби́ла еси́, Всепе́тая,/ и боле́знь дре́внюю всю рождество́м Твои́м,/ Живо́т ми́ру ро́ждши, смерть разруши́вший./ Боле́зни же, я́ко Блага́я, исцеля́еши/ ве́рно Твой чуде́сный о́браз почита́ющих,/ и любо́вию кла́няющихся,/ и чту́щих Тя, Чи́стую Наста́вницу.

Стих: Слы́ши, Дщи, и виждь,/ и приклони́ у́хо Твое́.

Я́ко Исто́чника Тя живота́, Всепе́тая, ве́дуще/ и я́ко чуде́с и целе́б Пода́тельницу,/ страсте́й душе́вных же и теле́сных ско́рое потребле́ние,/ ми́лости и щедро́т неисчерпа́емое мо́ре,/ Тебе́ припада́ем вси,/ прося́ще от ско́рби разреше́ния/ и бу́дущих муче́ний избавле́ния.

Сла́ва, и ны́не, глас 8:

Ра́дуйся, Благослове́нная Богоро́дице,/ Пречи́стая Ма́ти Христо́ва./ Ра́дуйся, ве́рных наде́ждо,/ ра́дуйся, ми́ра очище́ние./ Ра́дуйся, вся́кия ско́рби избавля́ющая рабы́ Твоя́,/ ра́дуйся, челове́ком утеше́ние живоно́сное./ Ра́дуйся, заступле́ние призыва́ющих Тя, Богоблагода́тная./ Ра́дуйся, Бо́жие пребыва́ние и гора свята́я.

Тропа́рь, глас 5:

Утоли́ боле́зни/ многовоздыха́ющия души́ моея́,/ утоли́вшая вся́ку слезу́ от лица́ земли́,/ Ты бо челове́ком боле́зни отго́ниши/ и гре́шных ско́рби разруша́еши,/ Тебе́ бо вси стяжа́хом наде́жду и утвержде́ние,/ Пресвята́я Ма́ти Де́во.

На у́трени

По 1-м стихосло́вии седа́лен, глас 5:

Пречи́стая Де́во Богоро́дице,/ поми́луй нас, прибега́ющих с ве́рою к Тебе́, Милосе́рдой,/ и прося́щих те́плаго заступле́ния Твоего́,/ мо́жеши бо, я́ко Блага́я, всех спасти́/ и, я́ко Ма́ти Бо́га Вы́шняго, ма́терними Твои́ми моли́твами/ всегда́ избавля́еши чту́щих Тя от всех бед и скорбе́й, Благослове́нная.

Сла́ва, и ны́не, то́йже.

По 2-м стихосло́вии седа́лен, глас 1:

Правове́рно чту́щия Тя, и к Тебе́ прибега́ющия,/ и ико́не Твое́й святе́й любе́зно покланя́ющияся, о Бо́жия Ма́ти!/ спаси́ и не даждь в расхище́ние супоста́том,/ ниже́ да на́йдут на ны вся зла́я, я́же грехи́ на́ша угото́ваша нам,/ ниже́ беззако́ния на́ша да превзы́дут на главы́ на́ша,/ но да Твоя́ ма́терняя к Бо́гу преодоле́ет за ны Богоприя́тная моли́тва.

Сла́ва, и ны́не, то́йже.

По полиеле́и седа́лен, глас 1:

Пречи́стая Твоя́ ико́на, Богоро́дице Де́во, – врачевство́ всему́ ми́ру духо́вное,/ к не́йже прибега́юще, лобыза́ем, и почита́ем, и покланя́емся,/ исцеле́ний благода́ть почерпа́юще от нея́/ и неду́г теле́сных и душе́вных страсте́й Твои́ми моли́твами свобожда́ющеся.

Сла́ва, и ны́не, то́йже.

Степе́нна, 1-й антифо́н, 4-го гла́са. Проки́мен глас 4: Помяну́ и́мя Твое́/ во вся́ком ро́де и ро́де. Стих: Слы́ши, Дщи, и виждь, и приклони́ у́хо Твое́. Ева́нгелие от Луки́, зача́ло 4.

По 50-м псалме́ стихи́ра, глас 6:

Не и́мамы ины́я по́мощи,/ не и́мамы ины́я наде́жды,/ ра́зве Тебе́, Пречи́стая Де́во,/ Ты нам помози́,/ на Тебе́ наде́емся/ и Тобо́ю хва́лимся,/ Твои́ бо есмы́ раби́,/ да не постыди́мся.

Кано́н, глас 2.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть,/ препросла́вленный Госпо́дь сла́вно бо просла́вися

Я́же всем удо́бь послу́шная в ско́рби/ и в печа́ли помога́ющая, Богоро́дице Блага́я,/ благода́ть пода́ждь пе́ти Тя дерза́ющим, Влады́чице, скорбя́щих Ра́досте.

Многобога́тную благода́ть стяжа́вши, Влады́чице,/ дерзнове́нною Твое́ю моли́твою́ пресла́вно изми́ мя от напа́стей,/ убо́гаго раба́ Твоего́, скорбя́щих Ра́досте.

От враг ви́димых и неви́димых изба́ви, мо́лимся, к Тебе́ прибега́ющих, Богоро́дице,/ и разори́ всяк сове́т борю́щих нас.

Отыми́ поноше́ние челове́ческое/ и клеветы́ наве́тник от ме́не, Богоро́дице, молю́ Тя,/ да усе́рдно сла́влю Го́спода, Его́же пита́ла еси́.

Песнь 3

Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́ в сердца́ нас, пою́щих Тя.

Враго́в наве́ты разори́ су́етныя, Всепе́тая Богоро́дице,/ и не оскуде́й моли́твами Твои́ми,/ снабдя́щи нас, восхваля́ющих Тя.

При́зри, Чи́стая, ми́лостивным Твои́м о́ком/ и изба́ви мя вся́каго наве́та ви́димых и неви́димых враго́в,/ ослепи́вши зени́цы оче́с их.

Зло́е нападе́ние враго́в, я́ко огнь, паля́щее,/ и́щущих всегда́ погуби́ти нас, Де́во,/ росо́ю моли́тв Твои́х угаси́.

Неугаси́мая лампа́до,/ заря́ присносия́тельная,/ но́щию мя скорбе́й одержи́ма просвети́ моли́твами Твои́ми,/ ро́ждшая Со́лнце сла́вы – Христа́.

Конда́к, глас 6:

Предста́тельство христиа́н непосты́дное,/ хода́тайство ко Творцу́ непрело́жное,/ не пре́зри гре́шных моле́ний гла́сы,/ но предвари́, я́ко Блага́я, на по́мощь нас,/ ве́рно зову́щих Ти,/ ускори́ на моли́тву и потщи́ся на умоле́ние,/ предста́тельствующи при́сно, Богоро́дице, чту́щих Тя.

Седа́лен, глас 2:

Моле́ние те́плое и стена́ необори́мая,/ ми́лости исто́чниче, ми́рови прибе́жище,/ приле́жно вопие́м Ти:/ Богоро́дице Влады́чице, предвари́/ и от бед изба́ви нас,/ Еди́на, вско́ре предста́тельствующая.

Песнь 4

Ирмо́с: Услы́шав, Го́споди, глас Твой, его́же рекл еси́,/ глас вопию́щаго в пусты́ни,/ я́ко возгреме́л еси́ над вода́ми мно́гими,/ Твоему́ свиде́тельствуяй Сы́ну,/весь быв соше́дшаго Ду́ха, возопи́:/ Ты еси́ Христо́с, Бо́жия му́дрость и си́ла.

Моли́тву неусы́пну, заступле́ние тве́рдо мо́лим:/ умилосе́рдися, и виждь на́шу нестерпи́мую печа́ль, боле́зни, ско́рби, стра́сти,/ и благопреме́нно посети́, Ма́ти Бо́жия,/ ра́дость ско́рую подаю́щи.

Не неприча́стни есмы́, Влады́чице, Твоего́ заступле́ния в ско́рбех,/ те́мже и ны́не нам помози́ вско́ре, лю́те обурева́емым, ру́ку простира́ющи, Чи́стая./ Бу́ди ми́лостива боле́знем на́шим, Ма́ти Бо́жия,/ ра́дость ско́рую подаю́щи.

Не упова́ша, Влады́чице, на Тя беззако́ннующии,/ но упова́ша на язы́к челове́ч, при́сно зави́стно излия́вшийся,/ непра́ведно пролия́ти кровь и́скренняго, рыка́юще,/ Ты же, Чи́стая, че́люсти их сокруши́.

Смири́, Влады́чице, враго́в вознесе́нную вы́ю велере́чующих,/ сове́ты, и злонра́вия, и сердца́, поуча́ющаяся злым, на мя по вся дни,/ кре́пость же и побе́ду пода́ждь призыва́ющим Тя, Ма́ти Бо́жия,/ ра́дость ско́рую подаю́щи.

Песнь 5

Ирмо́с: Угль, Иса́ии проявле́йся,/ Со́лнце из де́вственныя утро́бы/ возсия́ во тьме заблу́ждшим,/ Богоразу́мия просвеще́ние да́руя.

Моли́твеннице нело́жная, упова́ние христиа́н, Обра́дованная,/ приими́ мольбы́ от нас, приле́жно призыва́ющих и моля́щихся Тебе́.

Исто́чник Тя жи́зни су́щий, Чи́стая,/ безсме́ртия источа́ющий во́ды,/ земноро́днии, позна́вше, ублажа́ем.

Вооружи́ся на ны лука́вно враг,/ язы́ком, я́коже мече́м, погуби́ти хотя́,/ но Твое́ю, Богороди́тельнице, кре́постию предвари́.

Пучи́ну, Чи́стая, заступле́ний кто изочте́т си́лы Твоея́?/ Те́мже нас, су́щих в нужде́, ско́ро предвари́.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/от тли, Бо́же, мя возведи́.

Целому́дрия су́щи Хода́таица,/ призыва́ющим Тя ны́не яви́ся/ и от вся́ких избави напа́стей и бед, Богоневе́сто.

Злоде́йства вра́жия разори́/ и клеветы́ непра́ведный уста́ви, Благослове́нная Пречи́стая,/ избавля́ющи непови́нныя от ско́рби.

Лю́тыми грехи́ окруже́ни/ и напа́стными беда́ми потопля́еми,/ под Боже́ственный покро́в Твой прибега́ем, Ма́ти Христа́ Бо́га.

Неискусому́жно ро́ждши Го́спода,/ яви́ся по рождестве́ па́ки де́вствующи./ О, пресла́внаго чудесе́, в Тебе́ соде́ланнаго, Богоневе́сто.

Конда́к, глас 6:

Не вве́ри мя челове́ческому предста́тельству,/ Пресвята́я Влады́чице,/ но приими́ моле́ние раба́ Твоего́,/ скорбь бо обдержи́т мя,/ терпе́ти не могу́ де́монскаго стреля́ния,/ покро́ва не и́мам,/ ниже́ где прибе́гну, окая́нный,/ всегда́ побежда́емь,/ и утеше́ния не и́мам, ра́зве Тебе́, Влады́чице ми́ра,/ упова́ние и предста́тельство ве́рных,/ не пре́зри моле́ние мое́,/ поле́зно сотвори́.

И́кос:

Простри́ дла́ни Свои́,/ и́миже всех Влады́ку, я́ко Младе́нца, прия́ла еси́,/ не оста́ви нас, всегда́ наде́ющихся на Тя./ Бо́дренною Твое́ю моли́твою́ и неисче́тною бла́гостию уще́дри нас/ и пода́ждь душа́м на́шим милосе́рдие Свое́, в ве́ки источа́ющи,/ Тебе́ бо и́мамы, гре́шнии, Засту́пницу от находя́щих на ны бед и зол,/ но, я́ко иму́щая милосе́рдия щедро́ты,/ ускори́ на моли́тву и потщи́ся на умоле́ние,/ заступа́ющи при́сно, Богоро́дице, чту́щих Тя.

Песнь 7

Ирмо́с: Да пресла́вное рождество́ Твое́, Христе́, е́же от Де́вы,/ прообрази́ши я́ве,/ неопали́мы в пещи́ о́троки сохрани́л еси́,/ пе́сньми пою́щия Тебе́:/ оте́ц Бо́же, благослове́н еси́.

О, благоутро́бия Твоего́, Дево Чи́стая,/ реши́ши бо безме́рныя печа́ли и напа́сти призыва́ющим в нужде́ и обстоя́нии./ Те́мже и ны́не помози́, Благослове́нная, Тя восхваля́ющим.

Покажи́ ско́рое твое́ заступле́ние,/ покажи́, я́ко мо́жеши я́ко Ма́ти Бо́га,/ призыва́ем Тя от се́рдца, со слеза́ми припа́дающе,/ скорбь укроти́ и боле́знь рабо́в Твои́х вско́ре.

Уста́ челове́ков, я́ко львов лю́тых,/ гро́ба тяжча́йше отверзо́шася го́рько поглоти́ти мя,/ но Ты, Богоро́дице, яви́ся наде́жда ненаде́ющимся/ и низложи́ кре́пость их, Благослове́нная.

Да у́зрят врази́ и постыдя́тся,/ да уразуме́ют и ви́дят Твою́, е́же по нам сопроти́в борю́щую си́лу,/ и в про́пасть преиспо́днюю низложи́ их, Благослове́нная, Наде́ждо ненаде́ющихся.

Песнь 8

Ирмо́с: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

Прибе́жище на́ше и ми́ру ра́дование, Богороди́тельнице,/ умилосе́рдитися потщи́ся/ и спе́шно благода́ть Твою́ пода́ждь нам, оскорбле́нным,/ и заступи́, Блага́я, Твоя́ рабы́.

Сове́т су́етен совеща́ша лю́те на ны безбо́жных со́нмища,/ я́коже пре́жде Ахитофе́л./ Но вопие́м:/ Твои́ми моли́твами сей разори́,/ низло́жши сих кре́пость, Богоро́дице.

Призыва́ющих Тя, Богоро́дице, от души́ нело́жно/ во вся́кой ско́рби, и в боле́знех разли́чных, и бе́дах лю́тых/ спе́шно услы́ши, Влады́чице,/ сих избавля́ющи при́сно моли́твами Твои́ми.

Да и́мя Твое́, Богоро́дице, на земли́ славосло́вится,/ И́же, из Тебе́ возсия́в, гре́шником держа́вную наде́жду и сте́ну Тя дарова́:/ Тобо́ю бо вся́кое дыха́ние к Бо́гу притека́ет.

Песнь 9

Ирмо́с: Недоуме́ет всяк язы́к благохвали́ти по достоя́нию,/ изумева́ет же ум и преми́рный пе́ти Тя, Богоро́дице,/ оба́че, Блага́я су́щи, ве́ру приими́,/ и́бо любо́вь ве́си Боже́ственную на́шу,/ Ты бо христиа́н еси́ Предста́тельница, Тя велича́ем.

Да загради́тся всяк язы́к, лука́вым поуча́яйся,/ да молча́т устна́ льсти́вая и уста́, непра́ведно глаго́лющая на пра́веднаго беззако́ние/ горды́нею и за́вистию вражде́бною вку́пе,/ Богоро́дицы моли́твою́ и святы́х Христо́вых.

В моли́твах бо́друю, Чи́стую Богоро́дицу призыва́ем вси,/ боле́знию и ско́рбию одержи́ми, взыва́юще:/ Влады́чице Чи́стая, ско́ро изба́ви от об держа́щих боле́зней рабы́ Твоя́ при́сно,/ я́ко по Бо́зе Засту́пницы ины́я не и́мамы.

Отча́явшихся ве́лие прибе́жище,/ обурева́емых ти́хое приста́нище Ты еси́, Богоро́дице./ Те́мже и мы притека́ем, взыва́юще:/ да не постыди́мся, Ма́ти и́стиннаго Живота́,/ но да, благодаря́ще, усе́рдно Тя велича́ем.

Приими́, Отрокови́це Пречи́стая, Боже́ственную песнь,/ воздава́ющи благода́ть на Тя наде́ющимся,/ и мир испроси́ Це́рквам при́сно посла́ти/ и оте́честву на́шему одоле́ния и побе́ды,/ да христиа́нский всяк язы́к Тя велича́ет.

Свети́лен:

Те́плое заступле́ние в беда́х,/ в печа́лех утеше́ние, и к Бо́гу примире́ние,/ Е́юже тли изба́вихомся,/ Богоро́дицу, ве́рнии, ублажа́ем.

Сла́ва, и ны́не, Богоро́дичен:

Тя Предста́тельницу и́мамы, гре́шнии, о Пресвята́я Де́во,/ Ты ми́лостива к нам сотвори́ Сы́на Твоего́ и Бо́га на́шего/ ма́терними твои́ми моли́твами.

На хвали́тех стихи́ры, глас 2:

Всем предста́тельетвуеши, Блага́я,/ прибега́ющим с ве́рою в держа́вный Твой покро́в,/ ино́го бо не и́мамы, гре́шнии, к Бо́гу/ в беда́х и ско́рбех при́сно избавле́ния,/ обремене́ни грехи́ мно́гими,/ Ма́ти Бо́га Вы́шняго./ Те́мже Ти припа́даем:/ изба́ви от вся́каго обстоя́ния рабы́ Твоя́.

Всех скорбя́щих Ра́дость,/ и оби́димых Засту́пница,/ и а́лчущих Пита́тельница,/ стра́нных Утеше́ние,/ обурева́емых Приста́нище,/ больны́х Посеще́ние,/ немощны́х Покро́в и Засту́пница,/ Жезл ста́рости,/ Ма́ти Бо́га Вы́шняго Ты еси́, Пречи́стая,/ потщи́ся, мо́лимся, спасти́ся рабо́м Твои́м.

Ра́дуйся, Пречи́стая Де́во,/ ра́дуйся, честны́й ски́птре Царя́ Христа́;/ ра́дуйся, прозя́бшая Грозд та́йный;/ ра́дуйся, две́ре Небе́сная и неопали́мая купино́;/ ра́дуйся, всеми́рный све́те;/ ра́дуйся, всех Ра́досте;/ ра́дуйся, ве́рных спасе́ние;/ ра́дуйся, Засту́пнице всех христиа́н и прибе́жище, Влады́чице.

Сла́ва, и ны́не, глас 8:

Ра́дуйся, вселе́нный Похвале́;/ ра́дуйся, хра́ме Госпо́день,/ ра́дуйся, Горо приосененная;/ ра́дуйся, всех Прибе́жище,/ ра́дуйся, Свещниче златый,/ ра́дуйся, Славо правосла́вных че́стная,/ ра́дуйся, Мари́е, Мати Христа́ Бо́га;/ ра́дуйся раю́,/ ра́дуйся, Боже́ственная трапезо,/ ра́дуйся, се́не,/ ра́дуйся, ручко всезлатая,/ ра́дуйся, всех Упова́ние.

Славосло́вие вели́кое, и отпу́ст, и час 1-й.

На литурги́и

Блаже́нны от кано́на, пе́сни 3-я и 6-я. Проки́мен, Апосто́л, Ева́нгелие и прича́стен Богоро́дице о́бщий.

Моли́тва ко Пресвяте́й Богоро́дице

Наде́ждо всех конце́в земли́, Пречи́стая Де́во, Госпоже́ Богоро́дице, утеше́ние мое́! Не гнуша́йся мене́, гре́шнаго, на Твою́ бо ми́лость упова́ю: угаси́ ми пла́мень грехо́вный и покая́нием ороси́ изсо́хшее мое́ се́рдце, очи́сти ум мой от грехо́вных по́мыслов, приими́ мольбу́, от души́ и се́рдца со воздыха́нием приноси́мую тебе́. Бу́ди о мне Хода́таица к Сы́ну Твоему́ и Бо́гу и укроти́ гнев Его́ ма́терними Твои́ми моли́твами, душе́вный и теле́сный я́звы исцели́, Госпоже́ Влады́чице, утоли́ боле́зни души́ и те́ла, утиши́ бу́рю злых нападе́ний вра́жеских, отъими́ бре́мя грехо́в мои́х, и не оста́ви мене́ до конца́ поги́бнути, и печа́лию сокруше́нное се́рдце мое́ утеши́, да сла́влю Тя до после́дняго издыха́ния моего́. Ами́нь.

А́ще хо́щет настоя́тель, твори́м бде́ние

На ма́лой вече́рни

Стихи́ры, глас 4.

Подо́бен: Я́ко до́бля:

Богосло́вными твои́ми устны́, Богосло́ве Григо́рие,/ Богосло́вным язы́ком твои́м изъяви́л еси́/ в Тро́ице пое́маго Бо́га Единосу́щнаго,/ Отца́, и Сы́на, и Ду́ха Свята́го,/ изсуши́л еси́ бу́йство е́ллинов и лжу,/ и́стину пропове́дуя/ Боговеща́нными твои́ми глаго́лы.

И вид твой че́стен,/ и зрак гове́ин, свяще́нный Григо́рие,/ сего́ ра́ди тя ра́достными песнопе́ньми почита́ем и глаго́лем:/ ра́дуйся, звездо́ у́мная,/ озаря́ющая концы́ све́тлостию/ прему́дрых твои́х глаго́лов;/ ра́дуйся, трубо́, пропове́дующая ми́ру/ Иису́совы за́поведи.

Многогла́сный орга́н,/ гусль мусики́йскую настро́енную,/ свире́ль же и цевни́цу сладкоды́шащую,/ иера́рхов превысоча́йшаго,/ вели́каго учи́теляя́ Це́ркве Христо́вы,/ да похва́лим, пою́ще:/ ра́дуйся, благода́ти Боже́ственный глубино́,/ ра́дуйся, высото́ Небе́сных разуме́ний,/ о́тче отце́в Григо́рие.

Пра́щею слове́с твои́х/ Боже́ственных, Богодохнове́нне,/ держа́вно, пресла́вне, порази́л еси́,/ я́коже во́лка, А́рия,/ и дале́че отгна́в от ста́да Христо́ва,/ па́стырю всеизря́днейший,/ твоя́ о́вцы согрева́я и прохлажда́я/ зла́ком Тро́ицы Единосу́щный./ Сего́ ра́ди тя почита́ем,/ па́стырю па́стырей Григо́рие.

Сла́ва, глас 6:

Иера́рхов нача́льника, патриа́рхов честь,/ таи́нника Богови́дцев/ и разуме́ний Христо́вых ума́ красне́йшаго,/ соше́дшеся, о Богому́дрии,/ духо́вными похвала́ми да похва́лим, глаго́люще:/ ра́дуйся, Богосло́вия исто́чниче, прему́дрости реко́/ и струя́ Боже́ственнаго ра́зума./ Ра́дуйся, звездо́ светле́йшая,/ я́ко весь мир озаря́еши твои́ми догма́ты./ Ра́дуйся, благоче́стия побо́рниче вели́кий/ и нече́стия прогони́телю до́блественный./ Но, о всему́дре Богосло́ве Григо́рие!/ Не преста́й моля́ся Христу́ Бо́гу/ о и́же ве́рою и любо́вию соверша́ющих при́сно/ Богоуго́дную и честну́ю па́мять твою́.

И ны́не: Богоро́дице, Ты еси́ лоза́:

На стихо́вне стихи́ры, глас 2.

Подо́бен: До́ме Евфра́фов:

Други́й сын гро́мов,/ яви́лся еси́/ от промышле́ния Бо́жия,/ и Богосло́в, Григо́рие, ми́ру,/ и учени́к, и напе́рсник.

Стих: Уста́ моя́ возглаго́лют прему́дрость/ и поуче́ние се́рдца моего́ ра́зум.

Я́ко сия́ние мо́лнии,/ изы́де твое́ веща́ние,/ ве́рный у́бо озаря́ющее,/ еретики́ же низлага́ющее,/ громо́вными стре́лами.

Стих: Уста́ пра́веднаго поуча́тся прему́дрости,/ и язы́к его́ возглаго́лет суд.

Ум твой огнесия́нен,/ пламеноно́сна уста́,/ и́мже ерети́чествующих,/ Григо́рие,/ попаля́ются безбо́жная уче́ния.

Сла́ва, глас и подо́бен то́йже:

Тро́ицу Че́стную,/ Отца́, Сло́во, Ду́ха,/ Боже́ственный Богосло́в/ научи́ ве́ровати,/ Еди́наго Бо́га Неразде́льнаго.

И ны́не:

Еди́наго Вседе́тельныя/ Тро́ицы пропове́дуя,/ из Де́вы прозя́бшаго,/ еретико́в загражда́еши,/ Григо́рие, уста́.

Тропа́рь, глас 1: Па́стырская свире́ль:

(зри на вели́цей вече́рни). Сла́ва, и ны́не, Богоро́дичен: Гаврии́лу веща́вшу:

На велицей вече́рни

Пое́м Блаже́н муж: 1-й антифо́н. На Го́споди, воззва́х: стихи́ры на 8, глас 1.

Подо́бен: Всехва́льнии му́ченицы:

О́тче Григо́рие,/ твои́х у́стен/ ни хода́тай забве́ния гроб затвори́:/ Богосло́вия бо яви́лся еси́ уста́,/ благоче́стия догма́ты/ и ны́не вселе́нней веща́я./ Те́мже моли́ся/ дарова́ти душа́м на́шим/ мир и ве́лию ми́лость.

О́тче Григо́рие,/ му́дре пло́ти уклони́лся еси́/ благопребыва́тельнаго и наве́тнаго,/ на неботе́чную же всед/ четвероко́нную доброде́телей колесни́цу,/ впери́лся еси́ к добро́те неизрече́нней./ Ея́же насыща́яся,/ ны́не подае́ши душа́м на́шим/ мир и ве́лию ми́лость.

О́тче Григо́рие,/ Бо́гу и челове́ком/ был еси́ ве́рен хода́тай благода́тию,/ и ны́не благоми́лостивна/ благодерзнове́нными моли́твами/ положи́в нам Христа́,/ не преста́й Го́спода моля́, преподо́бне,/ дарова́ти душа́м на́шим/ мир и ве́лию ми́лость.

И́ны стихи́ры, глас 2.

Подо́бен: Ки́ими похва́льными:

Прииди́те, свяще́нными пе́сньми/ да восхва́лим Богоглаго́ливаго Григо́рия,/ о́ко благода́ти и всему́драя уста́ Ду́ха Свята́го,/ све́тлаго свети́льника вселе́нныя,/ ве́лие Це́ркви оглаше́ние,/ сла́ву Правосла́вия,/ всечу́дную Богосло́вия струю́,/ Боже́ственных догма́тов приснотеку́щую реку́,/ исто́чник, всегда́ кипя́щий/ нетле́ния Боже́ственныя во́ды.

Любо́вию духо́вною днесь да воспои́м иера́рха,/ апо́столов единонра́внаго/ и благоче́стия побо́рника,/ благоглаго́лания наводне́ние,/ пото́к учи́тельства, зело́ сладча́йший,/ слове́с высокоглаго́льных тве́рдость,/ небогро́мная уста́, огнеды́шущий язы́к,/ прему́дрости сокро́вище, Сло́ва пропове́дника,/ ве́рных удобре́ние.

Пе́сньми до́лжными вси да восхва́лим Богосло́ва,/ Христо́вы па́ствы стра́жа, ловца́ волко́в/ и всему́драго пле́велов любоде́йчищных исторга́теля,/ се́ятеля же пра́вых до́гматов всечу́днаго,/ отгони́теля ерети́чествующих зело́ крепча́йшаго,/ возрасти́вшаго же и́стинно бодростию Боже́ственною Христо́вы тала́нты,/ я́коже лепо, и мир просвети́вшаго/ уче́ний Боже́ственными светлостьми́.

Сла́ва, глас 8:

Бо́дрый язы́к твой ко уче́нию,/ во ушесе́х серде́чных возглаша́ющий,/ лени́вых ду́ши возставля́ет,/ и Боговеща́нными глаго́лы ле́ствица обрета́ется,/ от земли́ к Бо́гу возводя́щая./ Те́мже, Григо́рие Богосло́ве,/ не преста́й моля́ся Христу́/ от бед спасти́ ду́ши на́ша.

И ны́не, Богоро́дичен: Царь Небе́сный:

Вход. Проки́мен дне. И чте́ния.

При́тчей чте́ние (гла́вы 10, 3 и 8):

Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти,/ не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва./ От уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да,/ честна́я бо реку́,/ и блаже́н челове́к, и́же пути́ моя́ сохрани́т:/ исхо́ди бо мои́ – исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас/ и предлага́ю мой глас сыново́м челове́ческим./ Я́ко аз, прему́дрость, устро́их сове́т,/ и ра́зум и смысл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущий же мене́ обря́щут благода́ть./ Разуме́йте у́бо, незло́бивии, кова́рство,/ ненака́занный же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая,/ я́ко и́стине поучи́тся горта́нь мой,/ ме́рзки же предо мно́ю у́стны лжи́выя. С пра́вдою вси глаго́лы уст мои́х,/ ничто́же в них стро́потно, ниже́ развраще́нно./ Вся пра́ва суть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

Прему́дрости Соломо́новы чте́ние (гла́вы 10, 6, 8 и 9):

Уста́ пра́веднаго ка́плют прему́дрость,/ устне́ же муже́й му́дрых ве́дят благода́ть./ Уста́ му́дрых поуча́тся прему́дрости,/ пра́вда же избавля́ет их от сме́рти./ Сконча́вшуся му́жу пра́ведну, не поги́бнет наде́жда./ Сын бо пра́веден ражда́ется в живо́т/ и во благи́х свои́х плод пра́вды обы́мет./ Свет пра́ведным всегда́,/ и от Го́спода обря́щут благода́ть и сла́ву./ Язы́к му́дрых до́брая свесть,/ и в се́рдце их почи́ет му́дрость./ Лю́бит Госпо́дь преподо́бная сердца́,/ прия́тни же Ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго./ Постига́ет бо жела́ющий ю,/ пре́жде да́же разуме́ти ю,/ и удо́бь у́зрится от лю́бящих ю./ У́треневавый к ней не утруди́тся,/ и бдяй ея́ ра́ди вско́ре без печа́ли бу́дет./ Я́ко досто́йных ея́ сама́ обхо́дит, и́щущи,/ и во стезя́х ея явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея́,/ и возлюби́х ю, и поиска́х от ю́ности моея́./ И взыска́х неве́сту привести́ себе́,/ я́ко всех Влады́ка возлюби́ ю./ Таи́бница бо есть Бо́жия хи́трости/ и обрета́тельница дел Его́./Труды́ ея́ суть доброде́тели:/ целому́дрию же и ра́зуму та учи́т,/ пра́вде и му́жеству,/ и́хже потре́бнее ничто́же есть в житии́ челове́ком./ А́ще же и мно́гаго иску́сства жела́ет кто,/ весть дре́вняя и бы́ти хотя́щая разсмо́трит./ Свесть изви́тия слове́с и разреше́ния гада́ний,/ зна́мения и чудеса́ проразуме́ет/ и сбытия́ време́н и лет,/ и всем сове́тник есть благ./ Я́ко безсме́ртие есть в ней/ и благосла́вие во обще́нии слове́с ея́./ Сего́ ра́ди бесе́довах ко Го́споду,/ и помоли́хся Ему́,/ и рех от всего́ се́рдца моего́: Бо́же отце́в и Го́споди ми́лости,/ сотвори́вый вся сло́вом Твои́м/ и му́дростию Твое́ю устро́ивый челове́ка,/ да владе́ет бы́вшими от Тебе́ тварьми́/ и да управля́ет мир в преподо́бии и пра́вде./ Даждь ми Твои́х Престо́лов приседя́щую прему́дрость/ и не отлучи́ ме́не от о́трок Твои́х,/ я́ко аз раб Твой и сын рабы́ни Твоея́./ Посли́ ю с Небе́с от свята́го жили́ща Твоего́/ и от Престо́ла сла́вы Твоея́,/ да, су́щи со мно́ю, научи́т мя,/ что благоуго́дно есть пред Тобо́ю,/ и наста́вит мя в ра́зум,/ и сохрани́т мя в сла́ве свое́й./ Помышле́ния бо сме́ртных вся боязли́ва/ и погре́шительна умышле́ния их.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ра хра́ма. Та́же стихи́ры свята́го, глас 4, самогла́сны. Анато́лия:

Сло́вом Бо́жиим отве́рз уста́ твоя́,/ прему́дрости привле́кл еси́ Ду́ха/ и, полн благода́ти быв,/ Боже́ственная возгреме́л еси́ уче́ния, треблаже́нне Григо́рие,/ и, А́нгельским совоку́плься си́лам,/ Тро́йческий пропове́дал еси́ Свет и Неразде́льный./ Те́мже, твои́ми осия́вшеся Богоглаго́лании,/ Тро́ице покланя́емся, во Еди́ном Божестве́ познава́емей,/ во спасе́ние душ на́ших.

О́гненным язы́ком твои́м Богоглаго́ливым, Григо́рие,/ богобо́рная попали́л еси́ ерети́чествующих языкобо́лия,/ Боже́ственная я́ко и́стинно яви́лся еси́ уста́,/ Ду́хом возглаго́лавшая вели́чия Бо́жия/ и писа́ньми вообрази́вшая/ сокровеннота́йныя Тро́ицы Единоси́льное Существо́,/ и, Трисо́лнечным све́том просвети́в земны́й мир,/ мо́лишися непреста́нно о душа́х на́ших.

Сла́ва, глас то́йже:

Боже́ственными дея́ньми те́ло с душе́ю зако́нно очи́стив,/ Богосло́вия преде́лы проше́л еси́,/ Боже́ственным тайнонауча́я, Богоявле́ние Григо́рие,/ и, в незаходи́мый вшед мрак,/ Богоначерта́нное прия́л еси́ законоположе́ние,/ Единосу́щную напи́сану Тро́ицу./ Е́йже покланя́ющеся тобо́ю, воспева́юще, глаго́лем:/ в Тро́ице разумева́емая Едини́це, поми́луй нас.

И ны́не, Богоро́дичен: Призри́ на моле́ния:

На стихо́вне стихи́ры, глас 5.

Подо́бен: Ра́дуйся:

Ра́дуйся, Богосло́вия исто́чниче/ и Богозре́ния высо́каго оби́тель:/ вы́шнюю бо глубину́, о́тче,/ с благочести́вым по́мыслом испыта́в,/ всем уясни́л еси́/ в Трие́х Со́лнцех Еди́но Све́та бы́ти растворе́ние,/ соединя́емое то́ждеством Божества́,/ тро́ичествуемое же Честны́ми Ипоста́сьми,/ жития́ у́бо чистото́ю и слове́с све́тлостию/ чествова́ти науча́я Тро́ицу Всесвяту́ю, Богодохнове́нне./ От Нея́же низпосла́тися душа́м на́шим моли́ ве́лию ми́лость.

Стих: Уста́ моя́ возглаго́лют прему́дрость,/ и поуче́ние се́рдца моего́ ра́зум.

Заре́ю Богосло́вия твоего́/ ересе́й темнонеи́стовство разруши́л еси́,/ исто́чник бо озаре́ний/ Богочести́вым по́мыслом, Богосло́ве, предвари́в и Богому́дрым,/ све́тлостем су́щим, отону́ду подава́емым, приобщи́лся еси́./ Просия́телен бо твой ум, я́коже зерца́ло, соде́лавый,/ Тро́ичный Божества́, о́тче, Свет и Неразде́льный/ прия́л еси́ светле́йший,/ и Лучу́, бога́тно еди́нственную, вмести́л еси́,/ Ю́же ны́не умоли́/ душа́м на́шим дарова́ти ве́лию ми́лость.

Стих: Уста́ пра́веднаго поуча́тся прему́дрости,/ и язы́к его́ возглаго́лет суд.

Ра́дуйся, реко́ Бо́жия,/ я́же при́сно полна́ вод благода́ти,/ всяк веселя́щая град Царя́ Христа́/ Боже́ственными словесы́ и уче́ньми;/ сла́достный пото́к, неисчерпа́емая пучи́на,/ догма́тов изве́стный храни́тель зако́нный;/ тепле́йший Тро́ицы побо́рник,/ орга́н Ду́ха Свята́го,/ ум бо́дрый, благогла́сный язы́к,/ глубину́ писа́ний сказу́ющий./ Христа́ ны́не моли́/ душа́м на́шим дарова́ти ве́лию ми́лость.

Сла́ва, глас 8:

Сердца́ ве́рных земледе́лая язы́ком твои́м, Григо́рие,/ благоче́стия в них присноцвету́щия израсти́л еси́ плоды́ Бо́гу,/ терно́вныя е́реси посека́я из ко́рене/ и украша́я смы́слы чистото́ю./ Те́мже, прие́мля на́ша похвалы́,/ Боже́ственная цевни́це, бо́дрое о́ко,/ па́стырей па́стырь, волко́в лове́ц,/ моли́ся приле́жно, Богосло́ве, Сло́ву/ о душа́х на́ших.

И ны́не, Богоро́дичен: Безневе́стная Де́во:

Тропа́рь, глас 1:

Па́стырская свире́ль Богосло́вия твоего́/ ри́торов победи́ трубы́,/ я́коже бо глубины́ ду́ха изыска́вшу,/ и добро́ты веща́ния приложи́шася тебе́./ Но моли́ Христа́ Бо́га, о́тче Григо́рие,/ спасти́ся душа́м на́шим.

На у́трени

На Бог Госпо́дь: тропа́рь, два́жды. Сла́ва, и ны́не: Гаврии́лу веща́вшу:

По 1-й стихоло́гии седа́лен, глас 3.

Подо́бен: Боже́ственныя ве́ры:

Боже́ственное осия́ние насле́довав,/ житие́ невеще́ственно изобучи́л еси́,/ единоиме́нным свяще́нством преизя́ществовав,/ преесте́ственно бо уясни́в догма́ты,/ правосла́вием ве́ру утверди́л еси́./ О́тче преподо́бне,/ Христа́ Бо́га моли́ дарова́ти нам ве́лию ми́лость.

Сла́ва:

Столп был еси́ Це́ркве,/ бога́тство некра́домо благоче́стия яви́лся еси́, Богосло́ве Григо́рие,/ безстра́стием уясни́в житие́ твое́ и Тро́ицы изъясни́в догма́ты./ О́тче преподо́бне, Христа́ Бо́га моли́/ дарова́ти нам ве́лию ми́лость.

И ны́не, Богоро́дичен:

Боже́ственная ски́ния была́ еси́ Сло́ва,/ еди́на Всечи́стая Де́во Ма́ти, чистото́ю Анге́лы превозше́дшая./ Па́че всех мене́, персть бы́вша,/ оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.

По 2-й стихоло́гии седа́лен, глас 5.

Подо́бен: Собезнача́льное Сло́во:

Бо́дрствовав сло́вом и́стины,/ Тро́йческую держа́ву Богосло́вив,/ А́риево злоче́стие и пребеззако́нное злосла́вие низложи́в,/ я́ко благоче́стия до́блественник и побо́рник, святи́телю,/ просвети́л еси́ во тьме неве́дения седя́щия.

Сла́ва, и ны́не, Богоро́дичен:

Души́ моея́ стра́сти многоболе́зненныя и плоти́ моея́ неду́ги вско́ре исцели́,/ ума́ моего́ блуже́ния уста́ви, Всенепоро́чная,/ и в тишине́ по́мыслов моли́твы приноси́ти чи́сты Царю́ вся́ческих сподо́би, Богоро́дице,/ и испроси́ти прегреше́ний оставле́ние.

По полиеле́и седа́лен, глас 8.

Подо́бен: Прему́дрости:

Облича́я лесть злочести́вых, писа́ния отверза́я Боголе́пно,/ посла́л еси́ догма́ты, па́че ме́да наслажда́ющий ве́рных сердца́,/ я́ве, досточу́дне, Тро́ице служи́ти во Еди́нстве Божества́./ Те́мже Спа́са о́браз на ико́не предста́вил еси́ облобыза́ти имуществи́тельно челове́чество,/ Богосло́ве Григо́рие./ Моли́ Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять твою́.

Сла́ва, и ны́не, Богоро́дичен:

Егда́ прии́дет суди́ти всю зе́млю всех Влады́ка и Творе́ц,/ овца́м мя сопричти́ десны́м, осужде́ннаго,/ и кроме́шния тьмы, и вся́каго муче́ния/ твоего́ непотре́бнаго раба́ исхи́ти, молю́ся./ Да благода́рно велича́ю бога́тство Твоея́ бла́гости,/ Богоро́дице Всенепоро́чная,/ и вопию́ Ти, ра́дуяся:/ моли́ся Христу́ Бо́гу, прегреше́ний оставле́ние да́ти мне,/ Тебе́ бо и́мам наде́жду, раб Твой.

И чтем от жития́ свята́го.

Степе́нна, 1-й антифо́н 4-го гла́са. Проки́мен, глас 4: Уста́ моя́ возглаго́лют прему́дрость,/ и поуче́ние се́рдца моего́ ра́зум. Стих: Услы́шите сия́, вси язы́цы,/ внуши́те вси, живу́щии по вселе́нней. Вся́кое дыха́ние: Ева́нгелие от Иоа́нна, зача́ло 35, от полу́.

По 50-м псалме́ стихи́ра, глас 6:

Преподо́бне треблаже́нне, святе́йший о́тче,/ па́стырю до́брый и Началопа́стыря Христа́ учениче́,/ положи́вый ду́шу за о́вцы,/ ты и ны́не, всехва́льне Богосло́ве Григо́рие,/ проси́ моли́твами твои́ми/ дарова́ти нам ве́лию ми́лость.

Кано́н Пресвяты́я Богоро́дицы со ирмосо́м на 6 и свята́го два, на 8. Кано́н Богоро́дицы, глас 8.

Песнь 1

Ирмо́с: Пои́м Го́сподеви,/ прове́дшему лю́ди Своя́ сквозе́ Че́рмное мо́ре,/ я́ко Еди́н сла́вно просла́вися.

Пречи́стая Богоро́дице,/ вопло́щшееся Присносу́щное и Пребоже́ственное Сло́во па́че естества́ ро́ждшая,/ пое́м Тя.

Грозд Тя живоно́сен, всеми́рнаго иска́пающ сла́дость спасе́ния,/ Де́ва Христа́ роди́.

Род Ада́мль, к су́щему па́че ума́ блаже́нству Тобо́ю возведе́нный, Богоро́дице,/ досто́йно сла́вит Тя.

Та́же кано́н свята́го, его́же краегране́сие: Богоглаго́ливаго Григо́рия приснопа́мятнаго пою́. Творе́ние Феофа́ново, глас 1.

Песнь 1

Ирмо́с: Христо́с ражда́ется – сла́вите!/ Христо́с с Небе́с – сря́щите!/ Христо́с на земли́ – возноси́теся!/ По́йте Го́сподеви, вся земля́,/ и весе́лием воспо́йте, лю́дие,/ я́ко просла́вися.

Богосло́ва втора́го, столпа́ Све́та Небе́снаго,/ му́дрости Бо́жия трубу́,/ прииди́те, сего́ слове́с рачи́телие, любо́вию соше́дшеся,/ восхва́лим того́, я́ко Богопропове́дника.

Сло́во О́тчее Безнача́льное,/ всех я́ко Бог промы́сленник, промысли́тельною си́лою тя, блаже́нне, Це́ркви,/ я́коже ма́тери, сло́вом и му́дростию облагодати́в твой ум, дар да́рует.

Ум влады́ку творя́, стра́сти плотски́я удержа́л еси́/ и, вмести́телен быв Боже́ственных озаре́ний,/ Еди́наго Бо́га в Трие́х Ли́цех просвети́л еси́ ны чествова́ти, Григо́рие.

Богоро́дичен: Бо́жия му́дрость храм Себе́ созда́,/ в Твое́й всенепоро́чней утро́бе всели́вшися,/ Благода́тная,/ и па́че ума́ Сему́ соедини́вшися по Ипоста́си, Чи́стая,/ яви́ся я́ко Челове́к.

Ин кано́н, творе́ние Ко́смы мона́ха, глас то́йже.

Песнь 1

Ирмо́с: Похвалу́ Богови́дец Моисе́й Изра́илю предвозглаша́ет,/ начина́ет же Мариа́м прему́дрым жена́м песнь побе́дную:/ Изба́вителю Бо́гу вси воспои́м.

Изба́ву началоро́днаго, о на́ших же страсте́х/ кровь Богото́чную, стал еси́, в же́ртву принося́,/ и ны́не ве́рным, Григо́рие всему́дре, Бо́га пода́ждь нам удобопримири́тельна.

Скрижа́ли Богоначерта́нныя, во мрак Моисе́й вшед, прия́т не́когда,/ ты же, во уме́ поста́вив Богоприя́тную трапе́зу,/ приле́жно Бо́га умоли́л еси́.

Богоро́дичен: Хотя́ за благоутро́бие Свое́ от сме́рти и тли па́ки воззва́ти естество́ челове́ческое,/ Пребоже́ственный, Де́во Всенепоро́чная, в чи́стую утро́бу Твою́ всели́ся.

Катава́сия: Су́шу глубороди́тельную зе́млю:

Песнь 3

Ирмо́с: Ты еси́ утвержде́ние притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой.

Даждь нам по́мощь Твои́ми моли́твами, Всечи́стая,/ прило́ги отража́ющи лю́тых обстоя́ний.

Е́вы прама́тере Ты исправле́ние была́ еси́,/ Нача́льника жи́зни, ми́ру Христа́, Богоро́дице, ро́ждши.

Препоя́ши мя си́лою, Всечи́стая,/ я́же и́стинно Бо́га ро́ждши пло́тию,/ О́тчую Ипоста́сную Си́лу.

Ин

Ирмо́с: Пре́жде век от Отца́ рожде́нному нетле́нно Сы́ну/ и в после́дняя от Де́вы воплоще́нному безсе́менно, Христу́ Бо́гу возопии́м:/ вознесы́й рог наш,/ Свят еси́, Го́споди.

Име́я прему́дрости исто́чник, непреста́нно источа́ющ твои́х всему́дрых уче́ний,/ Христо́ву Це́рковь, всеблаже́нне, испо́лнил еси́,/ над все́ми вопию́щую Бо́гу:/ Свят еси́, Го́споди.

Благоче́стия велегла́сен пропове́дник и благознамени́т Богосло́вия Богосло́в,/ сокро́вище Боговиде́ния оби́льно предлага́ется/ и раздае́т бога́тно нам бога́тство неотъе́млемо.

Ри́тор огнедухнове́нный, Боговеща́нная цевни́ца благода́ти,/ Богосло́вным вдохнове́нием и веща́нием Богодухо́вным благознамени́те возшуме́в,/ Триипоста́снаго Существа́ нам песнь воспе́.

Богоро́дичен: Богороди́тельнице, Цари́це всея́ тва́ри,/ Царя́ вся́ческих моля́щи не преста́й, Христа́,/ Его́же нам родила́ еси́ на спасе́ние су́щих на земли́,/ спасти́ пою́щия Тя.

Ин

Ирмо́с: Пре́жде зача́тия честна́го Саму́ила/ несомне́нно Бо́гу обеща́вши священнома́ти А́нна,/ ны́не ра́дующися, пое́т с на́ми:/ утверди́ся в Го́споде се́рдце мое́.

И́же пре́жде изы́тия из утро́бы ро́ждшей тя/ был еси́ предвозвеще́н, преподо́бне о́тче,/ пронарече́ние нося́ досто́йное, священнонача́льниче прему́дре./ Вседу́шно, – ра́дуйся, о́тче, – тебе́ зове́м.

И́же пре́жде да́же изво́лити лука́вая,/ супру́жницу и споспе́шницу избра́л еси́/ изъявле́ньми Боже́ственными – Богови́дную чистоту́ и целому́дрие, побо́рниче ве́рных./ Веселя́щеся, – ра́дуйся, о́тче, – тебе́ зове́м.

Богоро́дичен: Е́вы прама́тере испра́вила еси́ пре́жде бы́вшее поползнове́ние,/ прие́мши в Себе́ низве́рженныя восправля́ющее Сло́во О́тчее/ непобеди́мою си́лою, Ма́ти Де́во.

Катава́сия: Утвержде́ние на Тя:

Седа́лен, глас 8.

Подо́бен: Прему́дрости:

Отве́рз уста́ сло́вом Бо́жиим,/ отры́гнул еси́ прему́дрость, пропове́дниче Све́та,/ и мудрова́ние Боже́ственное вселе́нней все́ял еси́,/ отце́в вои́стинну утверди́л еси́ догма́ты,/ по Па́влу яви́лся еси́ ве́ры побо́рник./ Тем и А́нгелов сограждани́н еси́ и сих собесе́дник яви́вся, блаже́нне,/ Богосло́ве Григо́рие, моли́ Христа́ Бо́га прегреше́ний оставле́ние дарова́ти/ пра́зднующим любо́вию святу́ю па́мять твою́.

Сла́ва, и ны́не, Богоро́дичен:

Помышле́ньми попо́лзся лука́выми, во глубину́ впадо́х грехо́вную/ и, стеня́, зову́ Ти от се́рдца, Всечи́стая:/ на мне удиви́ бога́тую ми́лость,/ и Твоего́ благоутро́бия безме́рную пучи́ну,/ и щедро́т Твои́х неисчи́сленное бога́тство/ и даждь ми покая́ние и прегреше́ний проще́ние, да любо́вию зову́ Тебе́:/ моли́ Христа́ Бо́га прегреше́ний оставле́ние дарова́ти мне,/ Тя бо наде́жду име́ю, раб Твой.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Клас возрасти́вшая животво́рный, неора́нная ни́во,/ Подаю́щаго ми́ру жизнь,/ Богоро́дице, спаса́й пою́щия Тя.

Богоро́дицу Тя, Всечи́стая, просве́щшиися вси, зна́ем:/ Со́лнце бо пра́вды родила́ еси́, Присноде́во.

Очище́ние нам дару́й на́ших неве́дении, я́ко Безгре́шен,/ и умири́ Твой мир, Бо́же, моли́твами Ро́ждшия Тя.

Ин

Ирмо́с: Жезл из ко́рене Иессе́ева/ и цвет от него́, Христе́,/ от Де́вы прозя́бл еси́,/ из горы́, Хва́льный, приосене́нныя ча́щи/ прише́л еси́, воило́щься от Неискусому́жныя, Невеще́ственный и Бо́же,/ сла́ва си́ле Твое́й, Го́споди.

Таи́нник Тро́ицы быв, Сея́ просвети́л еси́ вселе́нную ра́зумом, му́дре, догма́тов лучи́ изблиста́я, преподо́бне, твоего́ изве́стнаго учи́тельства,/ емуже поуча́ющеся при́сно, вси благоче́стно восхваля́ем тя.

У́тро благоче́стия све́тлое, зарю́ трисо́лнечную в себе́ прие́м, возсия́л еси́,/ и нощь мра́чную злочести́вых ересе́й заре́ю твои́х догма́тов му́дрых отгна́л еси́,/ и ду́ши, о́тче, ве́рных уясни́л еси́.

Ум Пресу́щный, исто́чник Сло́ва и Ду́ха, из Присносу́щнаго Богосло́вным гро́мом, всеблаженне, Богосло́вствуя,/ благоче́стно научи́л еси́, сему́ от Него́ науча́емь,/ я́ко предочи́стив твой ум ве́щных, о́тче, прия́тии.

Возше́л еси́ на го́ру доброде́телей,/ от до́льных пресели́вся и ме́ртвых дел отступи́в,/ и скрижа́ли, руко́ю Бо́жиею напи́санныя,/ догма́ты твоего́ чи́стаго Богосло́вия прия́л еси́,/ тайноводи́телю Боже́ственных та́инств, Григо́рие.

Богоро́дичен: Ра́зумом па́дшаго Ада́ма возста́вила еси́, Всенепоро́чная,/ Ипоста́сную ро́ждши Жизнь из ложе́сн деви́ческих, очище́нных Ду́хом,/ и к безстра́стней, и Боже́ственнейшей, и нетле́нней пи́щи/ сего́ возвела́ еси́, Влады́чице.

Ин

Ирмо́с: С чу́дным став Авваку́мом/ на Боже́ственней твое́й стра́жи, Григо́рие,/ и Су́щаго на ра́мех Херуви́мских позна́в,/ всеми́рнаго был еси́ возвести́тель спасе́ния, при́сно зовы́й:/ сла́ва си́ле Твое́й, Го́споди.

Близ явля́ющимся и пред Бо́гом стоя́щим чинонача́лием подо́бяся, всему́дре,/ я́же вы́шше тех умо́м облета́я,/ во глубину́ же не дости́гл еси́ превысоча́йшее стоя́ние,/ отто́ле бога́тство нося́ челове́ком неотъе́млемое.

В непостижи́мый вшед мрак/ и, я́ко из пеще́ры ка́менны, узре́в за́дняя,/ срастворе́нное веще́ственное Невеще́ственному Естеству́,/ и несли́тнаго смеше́ния был еси́ сказа́тель, Христо́в уго́дник,/ Того́ рабо́м Его́ умоля́ет бы́ти ми́лостива.

Богоро́дичен: Гора́ показа́лася еси́ Ты мы́сленная,/ от нея́же отсече́ся неизрече́нно честны́й Ка́мень,/ истня́я мра́чныя пре́лести о́браз/ и просвеще́нием благода́ти озаря́я ве́рою при́сно вопию́щия:/ сла́ва си́ле Твое́й, Го́споди.

Катава́сия: Покры́ла есть Небеса́:

Песнь 5

Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.

Утоли́ нестерпи́мую бу́рю страсте́й мои́х,/ я́же Бо́га Ро́ждшая, Ко́рмчию и Го́спода.

Слу́жат Рождеству́ Твоему́, Пречи́стая Богоро́дице, А́нгельстии чи́ни/ и челове́ков собо́ри.

Мари́е Богоро́дице Безневе́стная,/ упова́ния враго́в осуети́,/ а пою́щия Тя возвесели́.

Ин

Ирмо́с: Бог Сый ми́ра, Оте́ц щедро́т,/ Вели́каго Сове́та Твоего́ А́нгела,/ мир подава́юща, посла́л еси́ нам./ Тем Богоразу́мия к све́ту наста́вльшеся,/ от но́щи у́тренююще,/ славосло́вим Тя, Человеколю́бче.

Глаго́л твои́х Боже́ственное веща́ние и догма́тов благода́ть Боже́ственная,/ я́ко ско́рость мо́лнии, всю обтече́ зе́млю,/ Тро́ице во Едини́це, Еди́нице в Тро́ице, покланя́тися, Богосло́ве,/ Богосло́вствуя и науча́я нас.

Возжела́л еси́ и́стинно му́дрости Бо́жия, и слове́с добро́ту возлюби́л еси́,/ и всех предпочти́л еси́ кра́сных, су́щих на земли́,/ те́мже тя венце́м, всеблаже́нне, дарова́ний благоле́пно украси́ и Богосло́ва соде́ла.

Разу́мно ты Су́щаго, я́ко дре́вле Моисе́й, ви́дети, Богоглаго́ливе, вожделе́л еси́,/ и Сего́ за́дняя, ка́менем покры́вся, ви́дети сподо́бился еси́,/ и пучи́ны научи́лся еси́ Боже́ственныя му́дрости, непости́жно явля́емыя.

Богоро́дичен: И́же дре́вле Е́ву, прама́терь Твою́, Созда́вый из Тебе́ зи́ждется,/ тоя́ осужде́ние и преслуша́ние я́ве исцеля́я и разреша́я,/ я́ко Щедр и Влады́ка всех,/ Богороди́тельнице Ма́ти Де́во.

Ин

Ирмо́с: Угль горя́щий, и́же Иса́ииным устно́м Серафи́м приложи́ не́когда,/ клеще́ю взем и приложе́н: он же, очище́н, – пра́вде научи́теся, – всем пропове́даше.

Всему́ огню́ Боговиде́ния, всеблаже́нне Григо́рие, присту́пль,/ чистото́ю ума́ же и души́/ несы́тне самору́чно Трисия́нный поче́рпл еси́ Свет Равнови́дный.

Заря́ми объя́т Трисо́лнечнаго озаре́ния,/ от облиста́ния же разжже́н и Боже́ственными луча́ми ум освеща́я,/ и противосия́тельныя лучи́ всем изблиста́л еси́.

Богоро́дичен: Свет от Све́та,/ О́тчее Единоро́дное Сло́во Безнача́льное прие́мши, Ма́ти Де́во,/ дверь Све́та я́ве была́ еси́,/ пра́вды Со́лнце всем возсия́вши.

Катава́сия: Я́ко ви́де Иса́ия:

Песнь 6

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.

Храм Тя Бо́жий, и ковче́г,/ и черто́г одушевле́нный, и дверь Небе́сную,/ Богоро́дице, ве́рнии, возвеща́ем.

И́долов разруши́тель я́ко Бог,/ бы́вшее Рождество́ Твое́, Марие́ Богоневе́сто,/ покланя́емо есть со О́тцем и Ду́хом.

Сло́во Бо́жие Тя земны́м, Богоро́дице, показа́ Небе́сную ле́ствицу:/ Тобо́ю бо к нам сни́де.

Ин

Ирмо́с: Из утро́бы Ио́ну мла́денца изблева́ морски́й зверь,/ якова́ прия́т./ В Де́ву же все́льшееся Сло́во/ и плоть прие́мшее про́йде, сохра́ншее нетле́нну,/ Его́же бо, не пострада́ нетле́ния,/ Ро́ждшую сохрани́ неврежде́нну.

Струя́ми му́дрых уче́ний твои́х, всему́дре, А́риев ум му́тнейший изсуши́л еси́,/ в тишине́ храня́ па́ству твою́ непотопле́ну, я́коже слове́сный ковче́г,/ в не́мже благоче́стия се́мена положи́л еси́ добро́тою слове́с твои́х.

Да Честны́я Тро́ицы осия́нием обогати́ши ум, о́тче, уясни́л еси́,/ я́коже нескве́рное и новоочище́нное зерца́ло, воздержа́нием изря́дным соде́лав./ Те́мже и Богови́днейший показа́лся еси́ Боже́ственными явле́ньми.

Весь сраствори́вся заре́ю Ду́ха, был еси́ свети́льник, о́тче, всесве́тел,/ све́тлостию твои́х слове́с просвеща́яй концы́/ и Богосло́вия чистото́ю украша́яй кра́сное торжество́ ве́рных, Богосло́ве Григо́рие.

Нов Саму́ил Богода́нен яви́лся еси́, дан Бо́гу,/ и пре́жде зача́тия, всеблаже́нне, целому́дрием и чистото́ю украша́емь/ и свяще́нства всесвято́ю оде́ждею, о́тче, удобре́н,/ хода́тайствуя Зижди́телю и зда́нию.

Богоро́дичен: Сви́ток чист, Сло́во прие́мый напи́санное, пре́жде неопи́санное, Божество́м,/ предзна́лася еси́ проро́ки и пе́рвее, Ма́ти Де́во, Мари́е Богоневе́сто:/ Ты бо Неодержи́маго во утро́бе Твое́й неска́занно вмести́ла еси́.

Ин

Ирмо́с: И́же в по́нте подъемый заключе́ние/ убежа́нием бу́ри и верже́нием жре́бия/ и усты́ ят быв морска́го зве́ря, невреди́м пребы́в,/ но вопия́ше Ио́на:/ к Тебе́ живо́т мой да взы́дет, Христе́.

Потопле́н ра́зумом не быв, и до дна испыта́в глубины́ Бо́жия,/ и отто́ле би́сер поче́рп ты Влады́це,/ и молча́ние, я́коже сло́во, Григо́рие, положи́л еси́ всеизря́днейше.

Моли́твою́ чи́стою свере́пеющееся ути́шил еси́ мо́ре/ и, стра́нных оплева́в слове́с слати́ну,/ ты Владыце, я́ко Небе́сная ка́пля, лю́ди верныя испра́вил еси́, Григорие.

Богоро́дичен: Непости́жное челове́ческими по́мыслы та́инство, Ма́ти Бо́жия,/ неизрече́ннаго и стра́шнаго рожде́ния Твоего́:/ Ты бо, Де́во, всех Творца́ ро́ждши, Де́ва пребыла́ еси́.

Катава́сия: Возопи́ к Тебе́:

Конда́к, глас 3.

Подо́бен: Де́ва днесь:

Богосло́вным язы́ком твои́м сплете́ния ри́торская разруши́вый, сла́вне,/ правосла́вия оде́ждею, свы́ше истка́нною, Це́рковь украси́л еси́,/ ю́же и нося́щи, с на́ми зове́т, твои́ми ча́ды:/ ра́дуйся, о́тче,/ Богосло́вия у́ме кра́йнейший.

И́кос:

От Богосло́вныя и высо́кия му́дрости твоея́/ испо́лни мой ум, убо́гий и стра́стный,/ я́ко да воспою́ житие́ твое́, о́тче:/ не могу́ бо сло́ва принести́ тебе́, а́ще не ты пода́си ми кре́пость сло́ва,/ и ра́зум, и му́дрость, я́ко да от твои́х твоя́ принесу́ тебе́,/ и от бога́тства доброде́телей твои́х отту́ду обря́щу вину́,/ и увенча́ю честну́ю и святу́ю твою́ главу́, с ве́рными взыва́я:/ ра́дуйся, о́тче, Богосло́вия у́ме кра́йнейший.

Песнь 7

Ирмо́с: От Иуде́и, доше́дше, о́троцы,/в Вавило́не иногда́/ ве́рою Тро́йческою пла́мень пе́щный попра́ша, по́юще:/ отце́в Бо́же, благослове́н еси́.

Из де́вственных ложе́сн воплоти́вся, яви́лся еси́ на спасе́ние на́ше./ Те́мже Твою́ Ма́терь ве́дяще Богоро́дицу, правосла́вно зове́м:/ отце́в на́ших Бо́же, благослове́н еси́.

Жезл прорасти́ла еси́, Де́во, от ко́рене Иессе́ева, Всеблаже́нная,/ плод цветонося́щий спаси́тельный ве́рою Сы́ну Твоему́ зову́щим:/ отце́в на́ших Бо́же, благослове́н еси́.

Прему́дрости испо́лни вся и си́лы Боже́ственный,/ Ипоста́сная му́дросте Высоча́йшаго, Богоро́дицею, ве́рою Тебе́ пою́щих:/ отце́в на́ших Бо́же, благослове́н еси́.

Ин

Ирмо́с: О́троцы, благоче́стию совоснита́ни,/ злочести́ваго веле́ния небре́гше,/ о́гненнаго преще́ния не убоя́шася,/ но, посреди́ пла́мене стоя́ще, поя́ху:/ отце́в Бо́же, благослове́н еси́.

Все жела́ние и сла́дость я́ве сло́во твое́,/ все, Григо́рие, по́лно весе́лия и све́тлости,/ благоуха́ния насыща́я ве́рою пою́щия:/ отце́в Бо́же, благослове́н еси́.

Умо́м просвеще́нным Исто́чника просвеще́нии дости́гл еси́/ и, отону́дными мо́лниями распаля́емь,/ опали́л еси́ Евно́миево языкобо́лие, Тро́ице вопия́:/ отце́в Бо́же, благослове́н еси́.

Отве́рз хля́би бе́здны му́дрых догма́тов твои́х,/ заусти́в же Исто́чника му́дрости, покры́л еси́ пре́лести началовожди́,/ облиста́емь ве́чным Све́том и Трисо́лнечным.

Богоро́дичен: Я́ко дождь на руно́, низше́д, в Твою́ всели́ся утро́бу/ ми́ра река́, исто́чник бла́гости, и́же ка́пли дожде́вныя исчита́я,/ отце́в Бо́же, благослове́н еси́.

Ин

Ирмо́с: Проидо́ша, я́ко черто́г,/ пе́щный пла́мень нестерпи́мый/ и́же за благоче́стие иногда́ о́троцы святи́и, показа́вшеся я́ве,/ и, согла́сно воспева́юще, песнь поя́ху:/ отце́в Бо́же, благослове́н еси́.

Непра́ведных иге́монов пред суди́щами став, Григо́рие,/ ерети́чествующих огня́ люте́е ды́шущая стремле́ния благоче́стием соже́гл еси́,/ Тро́ице вопия́:/ отце́в Бо́же, благослове́н еси́.

Тро́ицу Всесвяту́ю – догма́тов благочести́вых, Григо́рие, нему́тный Исто́чник,/ от усте́н излия́вый на зе́млю, цветоно́сну, жесто́кую напая́я, показа́л еси́:/ отце́в Бо́же, благослове́н еси́.

Богоро́дичен: Умерщвля́ется пра́отец, я́ко безвре́менне сада́ вкуси́вый;/ Ты же безконе́чную Жизнь, о Де́во, прозя́бшая,/ в раи́ сего́ обита́ти возста́вила еси́,/ Богороди́тельнице Чи́стая Благослове́нная.

Катава́сия: Тебе́, во огни́ ороси́вшаго:

Песнь 8

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

Проти́вных льсти́тельныя и пла́менныя на нас угаси́ стре́лы,/ я́ко да пое́м Тя, Чи́стая, во ве́ки.

Преесте́ственне Соде́теля и Спа́са, Бо́га Сло́ва родила́ еси́, Де́во,/ те́мже Тя пое́м и превозно́сим во вся ве́ки.

Просвети́тельную Тя и златоза́рную/ все́льшийся в Тя Свет Непристу́пный, Де́во,/ пока́за свещу́ во вся ве́ки.

Ин

Ирмо́с: Чу́да преесте́ственнаго/ росода́тельная изобрази́ пещь о́браз:/ не бо, я́же прия́т, пали́т ю́ныя,/ я́ко ниже́ огнь Божества́ Де́вы,/ в Ню́же вни́де утро́бу./ Тем, воспева́юще, воспое́м:/ да благослови́т тварь вся Го́спода/ и превозно́сит во вся ве́ки.

Ра́вно Отцу́ Сло́во и Дух бла́гостию и ца́рством,/ благочести́во научи́л еси́,/ су́щественно и есте́ственно то́ждество зна́я и едине́ние./ Те́мже вопие́ши, ра́дуяся:/ да благослови́т тварь вся Го́спода и превозно́сит во вся ве́ки.

Сла́вы А́нгельския удосто́ился еси́, я́ко бо А́нгел, просия́л еси́ ми́ру,/ Тро́ице, всему́дре, очи́стив приле́жно ду́шу же, и те́ло, и мысль./ Е́йже ны́не воспева́еши, веселя́ся:/ да благослови́т тварь вся Го́спода и превозно́сит во вся ве́ки.

Ми́лостива моли́твами твои́ми Влады́ку соде́лав,/ испроси́, о́тче, прегреше́ний оставле́ние/ ве́рою свяще́нную и всепра́зднственную твою́ па́мять пра́зднующим./ В не́йже, веселя́щеся, воспева́ем:/ да благослови́т тварь вся Го́спода и превозно́сит во вся ве́ки.

Таи́нник Триипоста́снаго Единонача́лия и Божества́, су́щаго в Тро́ице,/ доброде́телей обуче́ньми быв,/ Тро́йческий Богосло́в показа́лся еси́, всеблаже́нне./ И ны́не воспева́еши, ра́дуяся:/ да благослови́т тварь вся Го́спода и превозно́сит во вся ве́ки.

Богоро́дичен: И́же Арха́нгельскими песносло́вии сла́вимое бога́тное Сло́во нас ра́ди обнища́,/ Тя Ма́терь, добро́ту Иа́ковлю благослове́нную, избра́в./ Те́мже, воспева́юще, пое́м:/ да благослови́т тварь вся Го́спода и превозно́сит во вся ве́ки.

Ин

Ирмо́с: И́же пи́щею не оскверни́вшиися о́троцы ца́рския тра́пезы/ во огнь, ра́дующеся, внидо́ша не́когда/ и, в пла́мени ороша́еми,/усе́рдно поя́ху:/ благослови́те, дела́ Госпо́дня, Го́спода.

Вавило́нскаго, о́тче, пла́мене превозвы́сився и па́че того́ благоче́стием распали́вся,/ Тро́йческий неботаи́нник показа́вся и пропове́дник, вопие́ши:/ благослови́те, дела́ Госпо́дня, Го́спода.

Напа́стныя разли́чне, о́тче, и желе́зныя пе́щи огнь угаша́я,/ удо́бно напа́стей произше́д, к Небеси́ возлете́л еси́, вопия́:/ благослови́те, вся дела́ Госпо́дня, Го́спода.

Богоро́дичен: Златови́дный свети́льник/ Твое́ знамени́тельне явля́ше Боже́ственное Рождество́, Непоро́чная Чи́стая:/ Ты бо Свет Непристу́пный ми́рови возсия́ла еси́, Ему́же вопие́м:/ по́йте, вся дела́ Госпо́дня, Го́спода.

Катава́сия: Нестерпи́мому огню́:

Песнь 9

Ирмо́с: Вои́стинну Богоро́дицу, Тя испове́дуем,/ спасе́ннии Тобо́ю, Де́во Чи́стая,/ с безпло́тными ли́ки Тя велича́юще.

Ра́дости и весе́лия полна́ есть па́мять Твоя́/ приступа́ющим, исцеле́ния точа́щи,/ и благоче́стно Богоро́дицу Тя возвеща́ющим.

Псалмы́ Тя воспева́ем, Обра́дованная,/ и немо́лчно, – е́же ра́дуйся! – зове́м:/ Ты бо источи́ла еси́ всем ра́дость.

Красе́н, Богоро́дице, прорасте́ Плод Твой,/ не тли причаща́ющимся хода́тайствен,/ но жи́зни, ве́рою Тя велича́ющим.

Ин

Ирмо́с: О́браз чи́стаго рождества́ Твоего́/ огнепали́мая купина́ показа́ неопа́льная,/ И ны́не на нас напа́стей свире́пеющую угаси́ти, мо́лимся, пещь,/да Тя, Богоро́дице,/ непреста́нно велича́ем.

Дае́т тебе́ жизнь нетле́нную Нача́льная Тро́ица,/ Ю́же богосло́вил еси́,/ прие́мши Ея́ ра́ди по́двиги твоя́, и уче́ния, и боре́ния,/ Е́йже ны́не, о́тче, предстои́ши, о ми́ре моли́твенник изя́щнейший.

Заре́ю Трисия́нныя све́тлости, от Еди́наго происходя́щею Божества́,/ осия́емь, священнотаи́нниче Григо́рие,/ пою́щия тя ве́рою спаса́й/ и твои́х догма́тов Богосло́вием светово́ждствуй.

Тече́ние до́брое соверши́л еси́, за Нача́льную Тро́ицу подвиза́вся,/ и обоже́ние я́ко Богосло́в получи́л еси́,/ и Боже́ственнаго твоего́ жела́ния исполне́ние прия́л еси́ досто́йно,/ Це́рквей благоукраше́ние.

Богоро́дичен: О, стра́шнаго Твоего́ чудесе́! Ты бо, Богоро́дице, та́инство, пре́жде родо́в/ и пре́жде веко́в сокрове́нное в Бо́зе, вся́ческая Созда́вшем,/ ро́ждши Бо́га Сло́ва, несказа́нно яви́ла еси́.

Ин

Ирмо́с: И́же вы́шнюю глубину́ Боже́ственнаго непостиже́ния благоче́стно отве́рз,/ ум, я́ко из ка́мене, необъя́тный/ Богонача́льныя возвы́сил еси́ Тро́ицы, всеблаже́нне о́тче, тя велича́ем.

И́же худу́ю оде́жду зако́ннаго расто́рг писа́ния/ и, ю́же в не́м, Боже́ственную добро́ту/ и та́инственную Боже́ственных Ду́ха нам истолкова́в писа́ний,/ треблаже́нне о́тче, тя велича́ем.

Го́рним лико́м сочи́слен сый, преподо́бне о́тче,/ и́бо с ни́ми во ве́ки водворя́ешися./ О твое́й па́стве мольбы́ твори́ к Бо́гу, всеблаже́нне о́тче, тя велича́ем.

И́же Боже́ственным научи́вся/ от Боже́ственнаго и па́че ума́ вдохнове́ния, преподо́бне о́тче,/ и к тех та́инственно соверши́вся ненауче́нному соедине́нию безме́рным твои́м жела́нием,/ всеблаже́нне о́тче, тя велича́ем.

Богоро́дичен: Ты вмести́лище, Чи́стая, Боже́ственнаго необъя́тия, вы́шше естества́ была́ еси́,/ я́ко Бо́гу плоть заи́мство́вавшая, и Твои́х де́вственных не разве́рзшему ложе́сн,/ внегда́ ражда́ти без се́мене, Тя велича́ем.

Катава́сия: В зако́не се́ни и писа́нии:

Свети́лен.

Подо́бен: Ду́хом:

Меч слове́с твои́х и си́ла сего́ язы́ки отсече́ неве́рных до конца́,/ я́ко вещь бо терно́вную, тех попали́л еси́ безбо́жная новосече́ния,/ Тро́ице научи́л еси́ покланя́тися боголе́пно,/ Григо́рие Богосло́ве.

Сла́ва.

Подо́бен: Со ученики́:

Еди́нице Триипоста́сней и Тро́ице соверше́нней в Еди́ном Божестве́,/ всему́дре Богосло́ве, научи́л еси́ покланя́тися:/ Свет, реки́й, Отца́ и Сы́на Свет,/ па́ки же Свет Ду́ха Свята́го./ Но Еди́н Свет, Неразде́лен, Неслия́нен,/ Еди́н бо Бог, уясня́яй Единосу́щное, о Григо́рие блаже́нне.

И ны́не, Богоро́дичен:

С Богома́терию и Де́вою Мари́ею/ и Васи́лием, всему́дре, предстоя́й Вели́ким Непристу́пней Тро́ице,/ мир ми́ру, тишину́ Це́ркви и нам спасе́ние испроси́, ны́не восхваля́ющим тя,/ Богосло́ве архиере́ю Григо́рие, ри́торе церко́вный.

На хвали́тех стихи́ры свята́го на 4, глас 4.

Подо́бен: Зва́нный свы́ше:

Пресе́к пи́сьмене ты мрак,/ вшел еси́ ду́хом к Све́ту Высоча́йшему/ и, отону́дное прие́м светолия́ние,/ Богосло́вием вся обогати́л еси́,/ Григо́рие всему́дре, Це́ркве свети́ло,/ блиста́ньми же слове́с твои́х/ мра́чныя о́блаки ересе́й разгна́л еси́./ Те́мже водворя́ешися, иде́же глас пра́зднующих,/ А́нгелом собесе́дник,/ моля́ся непреста́нно, е́же спасти́ся душа́м на́шим.

Богосло́в вторы́й и таи́нник Боже́ственнаго осия́ния,/ и́же Тро́ицы све́тлый прописа́тель,/ и́же о неизрече́ннем и Боже́ственнем естестве́/ преесте́ственно науча́я, Григо́рие,/ и ны́не светле́е наслажда́йся Бо́га,/ почита́ющих тя помина́й/ и побо́рствуй о Це́ркви, ю́же собра́л еси́:/ твое́ бо веща́ние во вся вселе́нныя изы́де концы́,/ науча́я сла́вити Тро́ицу Единосу́щную.

Возде́лав зе́млю язы́ком, Богоглаго́ливе,/ се́рдца бразда́м се́мя Боже́ственное,/ Богосло́вием обогати́л еси́ высоча́йшим Це́ркве всю полноту́./ Те́мже пле́велы огне́м Ду́ха/ ерети́ческия попали́л еси́,/ филосо́фии Боже́ственный пита́емый раче́нием,/ о́тче отце́в, и па́стырю па́стырей,/ и сло́во ве́рных, свяще́нников свети́льниче,/ вселе́нныя сла́ва, всеблаже́нне Григо́рие.

К прему́дрости ча́ши прибли́жив/ честна́я твоя́ уста́, о́тче Григо́рие,/ Богосло́вия поче́рпл еси́ Боже́ственную во́ду/ и ве́рным оби́льно препода́л еси́,/ ересе́й загради́л еси́ тече́ние душегу́бное,/ хуле́ния испо́лненное./ И́бо я́ко ко́рмчия тя обре́те Дух Святы́й,/ отре́юща и отгоня́ща, я́ко ве́тров дыха́ния, злочести́вых стремле́ния,/ во Еди́нице существа́ Тро́ицу возвеща́юща.

Сла́ва, глас 1:

Цевни́цу Ду́ха,/ ересе́й победи́теля и правосла́вных наслажде́ние,/ втора́го напе́рсника Сло́ва,/ самови́дца догма́том бы́вшаго,/ му́драго пастыренача́льника,/ церко́вныя пито́мцы, Богосло́вными пе́сньми приреце́м:/ ты еси́ па́стырь до́брый,/ да́вый тебе́ сама́го, Григо́рие,/ я́ко Учи́тель Христо́с за вы,/ и с Па́влом лику́еши/ и мо́лишися о душа́х на́ших.

И ны́не, Богоро́дичен. Славосло́вие вели́кое и отпу́ст.

На литурги́и

Блаже́нны от кано́на свята́го, пе́сни 3-я и 6-я. Проки́мен, глас 1: Уста́ моя́ возглаго́лют прему́дрость,/ и поуче́ние се́рдца моего́ ра́зум. Стих: Услы́шите сия́, вси язы́цы, внуши́те;вси, живу́щии по вселе́нней. Апо́стол к Кори,нфяном, зача́ло 151. Аллилу́йя, глас 2: Внемли́те, лю́дие Мои́, зако́ну Моему́,/ приклони́те у́хо ва́ше во глаго́лы уст Мои́х. Ева́нгелие от Иоа́нна, зача́ло 36. Прича́стен: В па́мять ве́чную: На трапе́зе утеше́ние бра́тии. И чтем житие́ свята́го.

На ма́лой вече́рни

На Го́споди, воззва́х: стихи́ры на 4, глас 1:

Подо́бен: Небе́сных чино́в:

Тро́ическим Све́том озари́вся,/ со А́нгелы лику́еши,/ Престо́лу предстоя́ всех Царя́/ и по́честь прие́мля трудо́м твои́м,/ Моисе́е, преблаже́нне святи́телю,/ Его́же при́сно моли́/ о чту́щих па́мять твою́.

И́же от любве́ пе́ние принося́щих ти/ не забу́ди, святи́телю,/ но моле́ние простри́ ко Го́споду/ и изба́ви нас бесо́вскаго нахожде́ния и лю́таго озлобле́ния,/ да не посра́млени бу́дем/ в день стра́шнаго испыта́ния.

Исцеле́ний и чуде́с да́ром/ просла́ви тя Госпо́дь по сме́рти твое́й,/ Его́же сла́ву, блаже́нне,/ сло́вом и житие́м твои́м пове́дал еси́,/ се бо яви́ нам честны́я мо́щи твоя́,/ я́ко сокро́вище некра́домо,/ к ни́мже притека́юще, прие́млем благода́ть,/ Моисе́е святи́телю.

Сла́ва, глас 5:

Днесь воспое́м святи́теля,/ благоче́стия наста́вника,/ Це́ркве столпа́ непоколе́блема,/ исто́чника исцеле́ний неизчерпа́ема,/ проли́тие дарова́ний духо́вных,/ вели́кому же Но́вугра́ду просвети́теля/ и о всех моли́твенника те́пла,/ к нему́же возопие́м:/ святи́телю Моисе́е,/ не преста́й моля́ся о душа́х на́ших.

И ны́не, Богоро́дичен:

Ра́дуйся, вселе́нныя похвало́;/ ра́дуйся, хра́ме Госпо́день;/ ра́дуйся, горо́ приосене́нная;/ ра́дуйся, всех прибе́жище;/ ра́дуйся, све́щниче златы́й;/ ра́дуйся, сла́во правосла́вных честна́я;/ ра́дуйся, Мари́е, Ма́ти Христа́ Бо́га;/ ра́дуйся, раю́; ра́дуйся, Боже́ственная трапе́зо;/ ра́дуйся, се́не; ра́дуйся, ру́чко всезлата́я;/ ра́дуйся, всех упова́ние.

На стихо́вне стихи́ры, глас 2.

Подо́бен: До́ме Евфра́фов:

Дом Ду́ха Пресвята́го,/ соверше́нный ве́рою Христу́ Бо́гу,/ Правосла́вия утвержде́ние/ показа́лся еси́,/ Моисе́е прехва́льне.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Дом прему́дрости Бо́жия,/ ея́же при́сно наслажда́емся,/ и ве́ры и́стинный учи́тель/ яви́лся еси́,/ достоблаже́нне.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Дом неоску́дныя благода́ти,/ и град кре́пкий,/ и на враги́ побе́да,/ возвы́си рог правосла́вных/ моли́твами твои́ми ко Го́споду.

Сла́ва, глас 6:

Излия́ся благода́ть во устну́ твое́ю,/ преподо́бне о́тче, святи́телю Моисе́е,/ и был еси́ па́стырь Христо́вей Це́ркви,/ уча́ своя́ слове́сныя о́вцы/ ве́ровати во Единосу́щную и Нераздели́мую Тро́ицу,/ во Еди́но Божество́.

И ны́не, Богоро́дичен:

Богоро́дице, Ты еси́ лоза́ и́стинная,/ возрасти́вшая нам Плод Живота́,/ Тебе́ мо́лимся:/ моли́ся, Влады́чице, со святи́телем Моисе́ем/ поми́ловати ду́ши на́ша.

Тропа́рь пи́сан на вели́цей вече́рни.

Сла́ва, и ны́не, Богоро́дичен: И́же нас ра́ди рожде́йся от Де́вы:

На вели́цей вече́рни

На Го́споди, воззва́х: стихи́ры, глас 2.

Подо́бен: Егда́ от Дре́ва:

От ю́ности, преподо́бне, кра́сная ми́ра презре́л еси́/ и, Христо́ви прилепи́вся,/ поще́нием, и бде́нием, и моли́твами непреста́нными/ Тому́ угоди́л еси́,/ Безкро́вныя Же́ртвы принося́ Ему́/ и о всем ми́ре моля́ся,/ Моисе́е преблаже́нне,/ и ны́не моли́ся Го́сподеви,/ спасти́ся душа́м на́шим.

Оттря́с, я́ко ле́ностный сон, мирска́я треволне́ния,/ и к ти́хому приста́нищу притече́,/ и́го Христо́во на ра́мо возложи́в,/ жела́тельно Тому́ после́довал еси́,/ по́мощь име́я Ро́ждшую Того́ Богоро́дицу, Всеми́рную Засту́пницу,/ ста́до свое́ до́бре упа́сл еси́,/ и ко Христу́ приве́л еси́,/ и ны́не моли́ся Го́сподеви,/ спасти́ся душа́м на́шим.

Избра́н Бо́гом быв, пресла́вне,/ и чи́сте Тому́ послужи́в,/ яви́лся еси́ весь освяще́н, святи́телю,/ предстоя́ днесь Престо́лу Святы́я Тро́ицы,/ созерца́я добро́ту неизрече́нную/ и наслажда́яся весе́лия присносу́щнаго и ра́дости несказа́нныя./ Те́мже вопие́м ти:/ моли́ся Го́сподеви, Моисе́е приснопа́мятне,/ спасти́ся душа́м на́шим.

Сла́ва, глас 6:

Све́тлое и светоно́сное днесь, бра́тие, торжество́/ в па́мять преди́внаго святи́теля Моисе́я ра́достно соверша́юще/ и пе́сни плету́ще, псало́мски взыва́ем Христо́ви/ и, побе́дныя о́бразы принося́ще, глаго́лем:/ кто подо́бен Тебе́, Го́споди,/ прославля́яйся во святы́х/ и удивля́яй на них ми́лости Твоя́?/ я́коже сего́ до́бляго святи́теля просла́вил еси́/ и по сме́рти чудесы́ обогати́л еси́,/ яви́в нам честны́я его́ и многоцеле́бныя мо́щи,/ от ни́хже прие́млем исцеле́ния душа́м же и телесе́м/ и бесо́вских наве́т избавля́емся./ К нему́же возопии́м:/ ра́дуйся, свяще́нная главо́,/ па́стырю наш и учи́телю до́брый,/ подража́вый И́стиннаго Па́стыря, Христа́,/ ста́до упасл еси́ до́бре,/ и к преми́рному Ца́рствию наста́вил еси́,/ и ны́не моли́ся ко Го́споду/ спасти́ правосла́вных, град твой и страну́,/ в не́йже при́сно почита́ется па́мять твоя́.

И ны́не, Богоро́дичен: Кто Тебе́ не ублажи́т:

Вход. Проки́мен дне и чте́ния три святи́тельская.

На ли́тии стихи́ры, глас 1:

Богому́дре святи́телю Моисе́е,/ ты, твои́ми моли́твами и посто́м,/ бде́нием же и ми́лостынею Бо́гови соедини́вся,/ дом Ду́ху Пресвято́му и жили́ще показа́лся еси́,/ те́мже и архиере́й Це́ркве Христо́вы, о́тче, был еси́,/ моли́ у́бо спасти́ся душа́м на́шим.

Повину́яся за́поведи Го́спода Иису́са,/ от ю́ности Того́ стопа́м, святи́телю, после́довал еси́,/ те́мже от Него́ благода́ть прия́л еси́/ де́йствовати пресла́вная чудеса́/ и ду́хи прогоня́ти лука́выя от всех,/ и́же любо́вию чту́щих тя.

Кро́ток и незло́бив во всем житии́ твое́м был еси́,/ святи́телю Моисе́е,/ сего́ ра́ди и обре́л еси́ вожделе́нный на Небесе́х поко́й./ Те́мже почита́ем святу́ю па́мять твою́,/ Богоблаже́нне и всече́стне.

Глас 4: Моисе́я блаже́ннаго/ свяще́нную па́мять днесь соверша́юще,/ Боже́ственными пе́сньми, прииди́те, вси почти́м,/ я́ко архиере́я вели́каго,/ о нас всегда́ моля́щася ко Го́споду,/ да пода́ст мно́жество щедро́т/ и спасе́ние душа́м на́шим.

Сла́ва, глас то́йже:

Ева́нгельских уче́ний рачи́теля/ и Христо́вым за́поведем подража́теля/ днесь па́мять соверша́юще,/ исцеле́ния прие́млем незави́стно./ Те́мже, ве́рно торжеству́юще,/ любо́вию возопии́м к нему́:/ ра́дуйся, Моисе́е, о́тче наш,/ я́ко в тле́ннем сем житии́ Христо́ви усе́рдно послужи́л еси́,/ от Него́же и вене́ц нетле́нный в безконе́чнем Ца́рствии прия́л еси́,/ иде́же ны́не наслажда́ешися, со А́нгелы лику́я,/ со проро́ки и апо́столы Го́сподеви моля́ся, блаже́нне,/ стране́ низпосла́ти мир/ и душа́м на́шим спасе́ние и ве́лию ми́лость.

И ны́не, Богоро́дичен: Призри́ на моле́ния:

На стихо́вне стихи́ры, глас 4.

Подо́бен: Дал еси́ зна́мение:

Дал еси́ утвержде́ние вели́кому Нову́гра́ду, Го́споди,/ ди́внаго Твоего́ святи́теля Моисе́я,/ неистощи́мое сокро́вище,/ изоби́льна чуде́с мно́гих,/ кре́пка побо́рника и засту́пника,/ его́же моли́твами спаси́ оте́чество на́ше и лю́ди,/ Иису́се Всецарю́ и Спа́се душ на́ших.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Дал еси́ украше́ние. Го́споди,/ оби́тели Архистрати́га Твоего́/ цельбоно́сныя мо́щи Моисе́я святи́теля,/ соде́йственника быва́юща чудесе́м мно́гим/ и моля́щася Тебе́ непреста́нно,/ Иису́су Человеколю́бцу, Спа́су душа́м на́шим.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Дал еси́ зна́мениее ве́рующим в Тя тве́рдо, Го́споди,/ и́стинным Твои́м уго́дником,/ прие́млют бо исцеле́ния душа́м же и телесе́м/ с ве́рою притека́ющии к ним./ Те́мже у́бо и мы, днесь соше́дшеся в па́мять Моисе́я святи́теля,/ ве́рно Ти вопие́м:/ того́ моли́твами спаси́ нас,/ Иису́се Человеколю́бче, Спа́се душ на́ших.

Сла́ва, глас 5:

Что шум пра́зднующих быва́ет/ и и́ноцы ра́достию веселя́тся?/ Днесь обрето́хом, глаго́лют, сокро́вище некра́домо,/ целе́б пода́тельныя мо́щи Моисе́я, вели́каго святи́теля./ Сей бо во вре́меннем житии́ потруди́ся/ и прему́дрости Бо́жия престо́л украси́л есть,/ ны́не же Престо́лу Госпо́дню предстои́т/ с первопресто́льники Це́ркве Руския,/ к ни́мже возопие́м в пе́снех, ра́дующеся:/ ра́дуйся, отце́м сла́во, Пе́тре,/ рукоположе́нием освяти́вый отца́ на́шего;/ ра́дуйся, до́брый учи́телю Алекси́е,/ на престо́л его́ па́ки взы́тие благослови́вый;/ ра́дуйся, Моисе́е, их ревни́телю,/ и вку́пе с ни́ми моли́ся Го́сподеви/ спасти́ся душа́м на́шим.

И ны́не, Богоро́дичен: Храм и дверь еси́:

Тропа́рь, глас 8:

Чистоты́ ра́ди жития́ твоего́,/ поще́ния же, и моли́тв, и трудо́в,/ сосу́д благопотре́бен был еси́ Влады́це Христу́,/ И́же дарова́ тя ста́ду твоему́,/ я́ко сокро́вище неотъе́млемо, чудесы́ всех обогаща́юща./ Тем и мы, соше́дшеся в па́мять твою́,/ ве́рою и любо́вию вопие́м:/ моли́ о нас, пречестны́й архиере́ю Моисе́е, о́тче наш.

Сла́ва, и ны́не, Богоро́дичен: И́же нас ра́ди рожде́йся от Де́вы:

На у́трени

На Бог Госпо́дь: тропа́рь святи́телю, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 1.

Подо́бен: Небе́сных чино́в:

Разу́мнаго адама́нта, до́бляго святи́теля, Моисе́я днесь, ве́рнии, почти́м,/ све́тло пра́зднующе всечестну́ю па́мять его́,/ той бо моли́твами свои́ми к Бо́гу/ от свои́х многоцеле́бных моще́й подава́ет нам неоску́дно исцеле́ния исто́чник,/ велегла́сно нас науча́я Христо́ви вопи́ти:/ прославля́яй святы́х Твои́х, Го́споди, сла́ва Тебе́.

Сла́ва, и ны́не, Богоро́дичен:

Спасе́ния на́шего Хода́таица Ты яви́лася еси́, Всенепоро́чная,/ ду́шу мою́ окая́нную изба́ви бесо́вскаго мучи́тельства/ и пода́ждь ми прегреше́ний очище́ние:/ ра́зве бо Тебе́, раби́ Твои́, не име́ем помо́щницы.

По 2-м стихосло́вии седа́лен, глас 5:

Су́етныя му́дрости возгнуша́вся,/ и́стинным после́дуя Ева́нгельским за́поведем, преблаже́нне святи́телю Моисе́е,/ це́рковь Прему́дрости Бо́жия украси́л еси́/ и сла́вити,Тро́ицу Единосу́щную лю́ди своя́ научи́л еси́,/ Ю́же моли́ о чту́щих тя.

Сла́ва, и ны́не, Богоро́дичен:

Де́вствуеши ро́ждши, Де́во Всенепоро́чная, Неискусому́жная Ма́ти:/ му́жеска ло́жа не прие́мши, родила́ еси́ Бо́га воплоще́нна,/ Его́же моли́ о пою́щих Тя.

По полиеле́и седа́лен, глас 8:

Лука́ваго лови́тельства изба́ви ста́до твое́, о́тче,/ сове́ты льсти́ваго разруши́ моли́твами твои́ми/ и язы́ков шата́ния низложи́,/ я́коже дре́вле вооружи́вшихся на твою́ оби́тель,/ и разбо́йнически прише́дших обличи́л еси́,/ ста́до же твое́ от злых невреди́мо спасл еси́,/ чи́стаго ра́ди жития́ твоего́ нетле́нный вене́ц прии́м от руки́ Вседержи́теля,/ сего́ ра́ди вопие́м ти:/ Моисе́е преблаже́нне, моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Просвети́ ду́шу мою́ омраче́нную, Ма́ти Богоро́дице,/ и лю́таго виде́ния изба́ви,/ я́ко да во хвале́нии сла́влю Тя, Всенепоро́чная,/ и, дерза́ющи, со А́нгелом вопию́ Ти ве́рно:/ благослове́н Плод Твоего́ чре́ва.

По 50-м псалме́ стихи́ра, глас 6:

Днесь, празднолю́бных собо́ры,/ ра́достно духо́вный лик соста́вльше,/ не в кимва́лех иуде́йских, ни в орга́нех лати́нских,/ но в сокруше́нии душ и серде́ц на́ших/ восхва́лим Христа́ Бо́га на́шего,/ прославля́ющего ди́внаго Своего́ уго́дника, святи́теля Моисе́я,/ его́же па́мять ны́не соверша́юще/ и честны́я мо́щи чту́ще, возопии́м:/ о пречестны́й и вели́кий архиере́ю Моисе́е,/ па́стырю и учи́телю наш,/ я́ко име́я дерзнове́ние ко Христу́ Бо́гу,/ мир ми́рови испроси́/ и душа́м на́шим ве́лию ми́лость.

Кано́н, глас 4.

Песнь 1

Ирмо́с: Триста́ты кре́пкия,/ Рожде́йся от Де́вы,/ безстра́стия во глубине́ души́ трича́стное потопи́, молю́ся,/ да Тебе́, я́ко в тимпа́не, во умерщвле́нии телесе́/ побе́дное воспою́ пе́ние.

Иису́су: Отве́рзи устне́ мои́, Го́споди, и просвети́ смысл мой омраче́нный,/ разреши́ ю́зу язы́ка моего́,/ я́ко да све́тле и ра́достне восхвалю́ до́бляго святи́теля Моисе́я, Твоего́ уго́дника.

А́ще и не кра́сно приноси́мое тебе́ пе́ние,/ но от усе́рдия приими́, о́тче, я́коже две ца́ты вдови́цы прия́т Христо́с,/ и не лише́на мя сотвори́ твои́х даро́в,/ и согреше́нием мои́м испроси́ проще́ние твои́ми к Бо́гу моли́твами.

Блага́го Бо́га подража́тель был еси́, преблаже́нне Моисе́е,/ милосе́рдие к ни́щим и любо́вь нелицеме́рну ко всем стяжа́в,/ помина́я и де́лом показу́я рече́нная:/ возлю́биши и́скренняго твоего́, я́ко сам себе́.

Богоро́дичен: Всепе́тая Богоро́дице,/ я́же Всеми́лостиваго Бо́га ро́ждшая,/ ду́шу мою́, омраче́нную бесо́вскими прило́ги, просвети́, Всенепоро́чная,/ и ума́ моего́ я́звы уврачу́й, и заступи́ мя,/ я́ко да по достоя́нию сла́влю Тя.

Песнь 3

Ирмо́с: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́.

Го́спода своего́ во́лю сотвори́в, сугу́б тала́нт приобре́л еси́,/ сего́ ра́ди благи́й он слы́шшпи глас:/ до́брый ра́бе и ве́рный,/ вни́ди в ра́дость Го́спода твоего́.

Душе́вную чистоту́ стяжа́в,/ без нея́же никто́же у́зрит Го́спода, Моисе́е, о́тче наш,/ стра́сти окая́нныя души́ моея́ и сла́сти теле́сныя утоли́ моли́твами твои́ми.

Христу́ Бо́гу производя́щу тя на лу́чшая,/ мирска́я вся оплева́л еси́/ и, благи́й яре́м на ра́мо взем, усе́рдно Тому́ после́довал еси́.

Богоро́дичен: Живо́т ро́ждшая составны́й, Де́во Всенепоро́чная,/ се́рдца моего́ стру́пы исцели́ хода́тайствы Твои́ми,/ е́же к Сы́ну Твоему́, Богоблагода́тная.

Песнь 4

Ирмо́с: Любве́ ра́ди, Ще́дре, Твоего́ о́браза/ на Кресте́ Твое́м стал еси́,/ и раста́яшася язы́цы:/ Ты бо еси́, Человеколю́бче,/ кре́пость моя́ и хвале́ние.

Зе́льных ра́ди поще́ний, и моли́тв непреста́нных, и чистоты́ серде́чный/ всели́ся в тя Христо́с, преблаже́нне святи́телю Моисе́е,/ на Него́же наде́жду всю возложи́л еси́.

Земна́я отри́нув, Небе́сная насле́довал еси́,/ от си́лы бо в си́лу восходя́, к преми́рному Ца́рствию пресели́лся еси́,/ иде́же терпе́ния ра́ди твоего́/ угото́вася ти вене́ц нетле́нный и ве́чное весе́лие.

Изволе́нием Бо́жиим и избра́нием по́стников сосло́вия/ па́стырь поставля́ешися и наста́вник, и́же ко спасе́нию,/ вводя́ ста́до твое́ во огра́ду Небе́сную.

Богоро́дичен: И ражда́еши, и де́вствуеши, Де́во Всенепоро́чная,/ иску́са бо му́жеска не прие́мши, родила́ еси́ Бо́га воплоще́нна,/ Его́же моли́ о пою́щих Тя.

Песнь 5

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющии Тя.

Кре́пко вооружи́вся на неви́димый враги́,/ я́коже тве́рдый адама́нт, вы́я их сокруши́л еси́,/ го́рдостная шата́ния утоли́л еси́, Го́споду тя прославля́ющу.

От лука́вых бесо́в ла́яния ста́до твое́ сохраня́я,/ и́стиннаго Па́стыря – Христа́ – и́стинный учени́к был еси́, святи́телю Моисе́е,/ сего́ ра́ди избра́нием первосвяти́теля Петра́/ наме́стник блаже́ннаго святи́теля Иоа́нна в це́ркви Прему́дрости Бо́жия устроя́ешися.

Ми́лостивно наказу́я, о́тче, о Христе́ поруче́нное тебе́ ста́до,/ упа́сл еси́ на па́житех зако́на живоно́снаго:/ тобо́ю бо о́браз показа́л еси́, возвеща́я путь ко спасе́нию/ и е́же от злых премене́нию.

Богоро́дичен: На́шего спасе́ния Хода́таица Ты яви́лася еси́, Всенепоро́чная,/ ду́шу мою́ окая́нную изба́ви бесо́вскаго мучи́тельства/ и пода́ждь прегреше́нием очище́ние:/ ра́зве бо Тебе́, раби́ Твои́, не и́мамы помо́щницы.

Песнь 6

Ирмо́с: Да не погрузи́т мене́ бу́ря водна́я,/ ниже́ да пожре́т мене́ глубина́,/ отве́ржен бо есмь/ во глубины́ се́рдца морска́го зол мои́х./ Тем ззову́, я́ко Ио́на:/ да взы́дет от тли зол живо́т мой/ к Тебе́, Бо́же.

Зли́и челове́цы приидо́ша ко оби́тели,/ в не́йже твое́ честно́е те́ло положе́но бысть, святи́телю Моисе́е,/ не ве́дуще, я́ко ты заступа́еши ста́до твое́ и по отше́ствии твое́м от жития́ твоего́,/ ты же, еди́наго коего́ждо их, ми́лостивно наказа́в,/ на путь пра́вый наста́вил еси́.

Почто́ совеща́етеся, зли́и,/ ка́ко дерзну́ете умы́слити зла́я на оби́тель мою́? – святи́тель Моисе́й глаго́лаше./ Или́ не ве́сте си́лы непобеди́маго воево́ды Госпо́дня, вели́каго Арха́нгела Михаи́ла?/ А́ще не пока́етеся, то вси зде лю́те поги́бнете./ Они́ же, с пла́чем и слеза́ми пока́явшеся тебе́/ и ви́девше тя, моля́щася о них,/ Бо́гу хвалу́ возсыла́ху.

Ра́зум от Бо́га прии́м,/ благочести́выя па́че приводя́ к благоразу́мию,/ нечести́вым же уста́ загражда́я, Моисе́е святи́телю:/ го́рдостнаго бо епи́скопа, бы́вша во оби́тели твое́й и уничижи́вша тя,/ ума́ отъя́тием смири́в, во святи́тельстве непотре́бна сотвори́л еси́.

Богоро́дичен: Святе́йшая Херуви́м и Серафи́м яви́лася еси́, Пречи́стая,/ Зижди́теля бо их несказа́нно родила́ еси́, не опа́льшися огне́м Божества́,/ и ны́не блажа́т Тя вси ро́ди, я́коже прорекла́ еси́, Всепе́тая.

Конда́к, глас 3:

Я́ко венце́м пресве́тлым украси́вся днесь, вели́кий Но́вгра́д/ лику́ет в па́мять па́стыря своего́ и учи́теля,/ и, я́ко диади́му ца́рскую возложи́вши,/ честна́я о́на оби́тель све́тло ра́дуется:/ просла́ви бо тя Бог, уго́дника Своего́,/ и прояви́ после́днему ро́ду на́шему цельбоно́сныя мо́щи твоя́,/ святи́телю Моисе́е,/ Це́рковь же Бо́жия весели́тся,/ созыва́ющие и́нок сосло́вие велегла́сно вопи́ти:/ ра́дуйся, гра́ду твоему́ и оби́тели похвало́/ и всея́ Русския страны́ пресве́тлый свети́льниче.

И́кос:

Я́ко из мра́чна о́блака пресве́тлая звезда́ возсия́,/ та́ко ны́не от вели́каго Но́вагра́да/ Небе́снаго Ца́рствия граждани́н произы́де, вели́кий Моисе́й,/ и всех озари́ чуде́с луча́ми,/ и́же с ве́рою приходя́щих к нему́ и честны́я его́ мо́щи чту́щих. Те́мже и мы днесь серде́чною любо́вию ве́рно возопии́м:/ ра́дуйся, я́ко от мла́дости Бо́гу порабо́тал еси́;/ ра́дуйся, я́ко мирска́я вся оплева́л еси́./ Ра́дуйся, я́ко Христо́в яре́м на ра́мо взем, усе́рдно Тому́ после́довал еси́;/ ра́дуйся, я́ко вруче́нное тебе́ ста́до до́бре упасл еси́./ Ра́дуйся, я́ко престо́лом наме́стник быв блаже́ннаго Иоа́нна,/ того́ стопа́м после́довал еси́;/ ра́дуйся, Прему́дрости Бо́жия престо́л украси́вый./ Ра́дуйся, чудесы́ град свой озари́вый;/ ра́дуйся, ни́щих и а́лчущих пита́телю./ Ра́дуйся, сирота́м печа́льным и вдови́цам утеше́ние;/ ра́дуйся, я́ко спасл еси́ му́жа,/ от потопле́ния водна́го погря́знути уже́ хотя́ща./ Ра́дуйся, я́ко того́же сохрани́л еси́ от иноплеме́нных разбо́йник;/ ра́дуйся, засту́пниче гра́ду твоему́ и всем, живу́щим в не́м,/ и моли́твенниче те́плый ко Влады́це Христу́ Бо́гу./ Ра́дуйся, па́стырю до́брый, во все́м подража́яй Влады́це твоему́,/ Его́же моли́ о чту́щих святу́ю па́мять твою́,/ да вси в весе́лии се́рдца вопие́м ти:/ ра́дуйся, святи́телю Моисе́е, вели́кому Но́вугра́ду похвало́/ и всея́ Русския земли́ пресве́тлый свети́льниче.

Песнь 7

Ирмо́с: Спасы́й огни́ авраа́мския Твоя́ о́троки/ и халде́и уби́в,/ я́же Пра́вда пра́ведно уловля́ше,/ препе́тый Го́споди,/ Бо́же оте́ц на́ших, благослове́н еси́.

Терпе́ния ра́ди твоего́ и му́жества/ возлюби́ тя И́же над все́ми су́щий Бог/ и чудесы́ обогати́л тя есть, пою́ща:/ препе́тый Го́споди, Бо́же оте́ц, благослове́н еси́.

Устроя́ет тя Госпо́дь Це́ркви Свое́й архиере́я,/ слове́сным овца́м па́стыря всеизря́дна,/ ты же, прему́дре Моисе́е, святи́тельства па́ству прии́м,/ в бо́льший по́двиги вда́лся еси́, Христо́ви поя́:/ препе́тый Го́споди, Бо́же оте́ц, благослове́н еси́.

Уже́ погря́знути хотя́ше во глубине́ во́дней,/ его́же ты, святи́телю, а́бие от потопле́ния спасл еси́,/ под ру́це подъе́мля и держа́, до́ндеже па́ки прия́ша его́ в ладию́,/ та́кожде и мене́, погря́знути хотя́ща в ти́не беззако́ний мои́х,/ спаси́, и соблюди́, и умоли́ Влады́ку Христа́,/ да прии́мет мя в ве́чныя жи́зненный кро́вы, пою́ща:/ препе́тый Го́споди, Бо́же оте́ц, благослове́н еси́.

Богоро́дичен: Фарисе́йскаго бу́яго киче́ния ненави́дети ми сотвори́, Богоро́дице,/ и мытаре́ву смире́нию поревнова́ти сподо́би,/ умоли́, Его́же родила́ еси́, Христа́,/ да просвети́т ду́шу мою́ омраче́нную и лю́таго паде́ния изба́вит,/ я́ко да во явле́нии сла́влю Тя, Всенепоро́чная, Сы́ну Твоему́ вопия́:/ препе́тый Го́споди, Бо́же оте́ц, благослове́н еси́.

Песнь 8

Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.

Храм Свято́му Ду́ху, святи́телю Моисе́е, сотвори́л,/ и сам во оби́тель Тому́ был еси́,/ те́мже и нас моли́твами твои́ми селе́ния Ему́ соде́лай/ и от вся́ких напа́стей и озлобле́ния изба́ви,/ я́ко да пое́м в ра́дости се́рдца:/ благослови́те, вся дела́ Госпо́дня, Го́спода.

Отве́рзи нам ра́йский вход моли́твами твои́ми, святи́телю Моисе́е,/ и не пре́зри нас в ско́рбех мно́зех,/ тебе́ бо засту́пника гра́ду твоему́ живу́щии в нем, и́мамы,/ я́ко да в ра́дости се́рдца пое́м:/ благослови́те, вся дела́ Госпо́дня, Го́спода.

Царю́ Небе́сному Влады́це и Бо́гу моля́ся,/ гряду́щаго ку́плю де́яти от потопле́ния и от разбо́йник спасл еси́,/ по́мощь име́я и заступле́ние Бо́жия Ма́тере;/ той бо не ве́дяше, кто есть спаса́яй его́,/ до́ндеже ты, святи́телю Моисе́е, яви́вся ему́ в то́нце сне, сказа́л еси́,/ я́ко тобо́ю сотвори́ Бог избавле́ние ему́,/ и запове́дал еси́ сотвори́ти покро́в на честне́й ра́це твое́й./ Он же в ра́дости повеле́нная тобо́ю сотвори́, поя́ Го́сподеви:/ благослови́те, вся дела́ Госпо́дня, Го́спода.

Богоро́дичен: Чи́стая и Сла́вная Влады́чице, Ма́ти Бо́га Вы́шняго,/ щедро́ты низпосли́ нам от неистощи́мых сокро́вищ Твои́х/ и пода́ждь в ну́ждах терпе́ние, да в весе́лии пое́м:/ благослови́те, вся дела́ Госпо́дня, Го́спода.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Ше́ствовати нас сотвори́ во след сохрани́вших за́поведи Бо́га на́шего,/ и спаси́ моли́твами твои́ми, святи́телю Моисе́е, па́стырю и учи́телю наш,/ от всех зол, находя́щих на ны,/ и наста́ви на путь живота́, моля́ся о нас Человеколю́бцу Бо́гу и Спа́суу́ душ на́ших.

Ще́драго Человеколю́бца Бо́га моли́ о нас, па́стырю наш до́брый,/ тезоимени́тый Богови́дцу, святи́телю Моисе́е:/ и́мать бо послу́шати Ма́тере Своея́, Засту́пницы гра́да на́шего,/ и твои́х пречестны́х моле́ний и поми́лует нас.

Ле́гко, я́коже оре́л крило́ма, на Небе́сную высоту́ дости́гл еси́/ и терпе́ния и чи́стаго ра́ди жития́ твоего́ по́честь прия́л еси́ от Мздовоздая́теля,/ и ны́не Госпо́дь яви́ нам цельбоно́сныя мо́щи твоя́,/ точа́щия исцеле́ния с ве́рою приходя́щим./ Те́мже мо́лим тя, святи́телю Моисе́е:/ помяни́ нас, и́же ве́рою чту́щих тя и достодо́лжно ублажа́ющих тя.

Богоро́дичен: Из пречи́стых ложе́сн Твои́х про́йде у́мное Со́лнце, Богоро́дице,/ просвеща́я и́же во тьме седя́щих, омраче́нныя неве́дением,/ и приводя́ к све́ту Богоразу́мия,/ страда́вшим Его́ ра́ди нетле́нныя венцы́ подава́я и ве́чное ра́дование./ Его́же моли́ о нас, Влады́чице, не лиши́ти нас десна́го стоя́ния в час испыта́ния,/ да Тя вси велича́ем.

Свети́лен:

Ско́ро предвари́, святи́телю Моисе́е, ве́рным побо́рниче,/ и Христа́ Бо́га умоли́ просвети́ти иноплеме́нный язы́ки,/ да навы́кнут сла́вити Святу́ю Тро́ицу;/ нас же, чту́щих твою́ святу́ю па́мять, спаса́й от вся́каго зла.

Сла́ва, и ны́не, Богоро́дичен:

Всеблага́я Влады́чице,/ я́же Ще́драго Бо́га пло́тию ро́ждшая,/ поми́луй нас, озло́бленных прило́ги лука́ваго,/ и устра́ншихся за́поведей Сы́на Твоего́ и Бо́га на́шего,/ и греху́ порабо́тивших себе́,/ Свои́м хоте́нием привлецы́, Пречи́стая, к повеле́нием Бо́жиим/ и не лиши́ нас ве́чнаго наслажде́ния моли́твами Твои́ми.

На хвали́тех стихи́ры на 4, глас 8:

Неукло́нно, преблаже́нне, путь жи́зненный ше́ствовал еси́,/ по́стническими боре́нии вся плотска́я мудрова́ния умертви́л еси́,/ кра́сная ми́ра оста́вил еси́,/ Небе́сную красоту́ возлюби́л еси́,/ иде́же со А́нгелы лику́еши,/ святи́телю Моисе́е,/ моли́ спасти́ся душа́м на́шим.

В ю́ности целому́дрие стяжа́л еси́,/ в ста́рости ра́зум обостри́л еси́,/ ду́шу пресве́тлу сотвори́л еси́,/ архиере́йства сан восприя́л еси́,/ це́рковь добро́тами украси́л еси́,/ сего́ ра́ди тя почита́ем, святи́телю Богому́дре,/ ты же не преста́й моля́ся о творя́щих па́мять твою́.

Собери́теся, празднолю́бцы,/ днесь в па́мять Моисе́я святи́теля,/ и сию́ ку́пно вси торжеству́йте:/ се бо благоче́стия подража́тель/ и о ста́де свое́м те́плый моли́твенник,/ Русския страны́ удобре́ние,/ вели́кому же Но́вугра́ду похвала́ и утвержде́ние,/ к нему́же возопии́м:/ святи́телю, моли́ Христа́ Бо́га/ о чту́щих святу́ю па́мять твою́.

Сла́ва, глас 6:

О́трок яви́лся еси́ смире́н,/ беззло́бием украша́лся,/ сего́ ра́ди Христо́с Бог овца́м Свои́м па́стыря тя поста́ви,/ я́ко неисче́тно бога́тство Свои́х даро́в/ яви́ тя вели́кому Но́вугра́ду,/ обурева́емым в ско́рбех ти́хое приста́нище./ И ны́не, святи́телю Моисе́е,/ не премолчи́, вопия́ за ны ко Го́споду.

И ны́не, Богоро́дичен:

Богоро́дице, Ты еси́ лоза́ и́стинная,/ возрасти́вшая нам Плод Живота́,/ Тебе́ мо́лимся:/ моли́ся, Влады́чице, со святи́телем Моисе́ем/ поми́ловати ду́ши на́ша.

Славосло́вие вели́кое и отпу́ст.

На литурги́и слу́жба святи́тельская.

Моли́тва

О свяще́ннейший о́тче, святи́телю Христо́в Моисе́е, па́стырю и учи́телю наш, не отри́ни нас, с ве́рою притека́ющих к моще́м твои́м и твоему́ заступле́нию и те́плою моли́твою тя призыва́ющих, но ско́ро потщи́ся помоли́тися Царю́ ца́рствующих и Го́споду госпо́дствующих, да изба́вит ста́до Свое́ от волко́в, гу́бящих е, и вся́ку страну́ христиа́нскую огради́ и сохрани́ святы́ми твои́ми моли́твами от мирска́го мяте́жа и тру́са, наше́ствия иноплеме́нник и междоусо́бныя бра́ни, от гла́да же и губи́тельства, пото́па, и меча́, и огня́, и напра́сныя сме́рти, и, я́коже поми́ловал еси́ гряду́щаго ку́плю де́яти от потопле́ния и от разбо́йников, спасл еси́ святу́ю оби́тель твою́, та́ко поми́луй и нас, умо́м, сло́вом и де́лом во тьме грехо́вней су́щих, и изба́ви нас гне́ва Бо́жия и ве́чныя ка́зни, я́ко да твои́м хода́тайством и по́мощию, Свои́м же милосе́рдием и благода́тию, Христо́с Бог ти́хое и безгре́шное житие́ даст нам пожи́ти в ве́це сем и изба́вит нас шу́ияго стоя́ния, сподо́бит же десна́го со все́ми святы́ми. Ами́нь.

На вели́цей вече́рни

Блаже́н муж: 1-й антифо́н.

На Го́споди, воззва́х: стихи́ры на 6, глас 4:

О́тче святи́телю Влади́мире,/ измла́да Христу́ порабо́тати пла́менне вожделе́л еси́/ и сего́ ра́ди во граде́х Тамбо́ве и Ки́еве/ богому́дрию неле́ностно поуча́лся еси́,/ иде́же сло́во Ева́нгелия се́рдцем чи́стым восприи́м/ и на нем все житие́ твое́ утвержда́я,/ Христу́ ве́рен яви́лся еси́ да́же до сме́рти.

Боже́ственное смотре́ние о тебе́ испо́лнися, святи́телю,/ егда́ к па́стырскому де́ланию призва́ тя Бог,/ та́же и святи́тельством увенча́/ и ду́ши слове́сных ове́ц/ твоему́ попече́нию предаде́,/ да соблюде́ши я во еди́нем ста́де/ Еди́наго Па́стыря, Христа́ Бо́га на́шего.

Чистоту́ душе́вную, вку́пе и теле́сную/ призыва́л еси́ храни́ти,/ блуднико́м и винопи́йцем был еси́ обличи́тель нелицеприя́тный,/ ти́и бо, я́коже рече́ апо́стол,/ Ца́рствия Бо́жия не насле́дуют./ Сего́ ра́ди смире́нно мо́лим тя, досточу́дне,/ лю́дем, стра́ждущим грехи́ си́ми,/ помо́щник буди́ непосты́дный.

Па́стырь до́брый, милосе́рдия испо́лнен,/ яви́лся еси́ па́стве твое́й, святи́телю Христо́в:/ егда́ мор же́сток и глад ве́лий зе́млю сама́рскую пости́же,/ о лю́дех стра́ждущих и а́лчущих/ попече́ние непреста́нное полага́я,/ мно́гия от сме́рти изба́вил еси́./ Те́мже моли́ от бед и гла́да душе́внаго нас изба́вити.

Да ра́дуется земля́ Киевская,/ прославля́ющи богому́драго святи́теля Влади́мира,/ той бо во дни ра́спрей и нестрое́ний/ дух мяте́жный ве́ка сего́ обличи́,/ к благоустрое́нию и ми́ру призыва́я,/ о согреши́вших братоуби́йством хода́тай быв,/ и ны́не Престо́лу Бо́жию предстои́т,/ моля́ся о всех вы́ну Го́споду,// спасти́ и просвети́ти ду́ши на́ша.

Сла́ва, глас 8:

Боголюби́вому отцу́ твоему́, иере́ю Ники́фору,/ я́ко и́стинный сын, свя́те Влади́мире,/ в служе́нии Бо́гу уподо́бился еси́./ Ны́не же вку́пе с ли́ки испове́дников Русских/ Престо́лу Отца́ Небе́снаго предстои́ши,/ вы́ну моля́ся о душа́х на́ших.

И ны́не, Богоро́дичен, глас то́йже: Царь Небе́сный:

Вход. Проки́мен дне. И чте́ния.

Проро́чества Иса́иина чте́ние (глава́ 43):

Та́ко глаго́лет Госпо́дь:/ вси язы́цы собра́шася вку́пе, и соберу́тся кня́зи от них./ Кто возвести́т сия́ в них?/ Или́ я́же от нача́ла, кто слы́шана сотвори́т вам?/ Да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели, и Аз Свиде́тель, глаго́лет Госпо́дь Бог,/ и О́трок, Его́же избра́х,/ да позна́ете и ве́руете Ми,/ и разуме́ете, я́ко Аз есмь:/ пре́жде Мене́ не бысть ин Бог, и по Мне не бу́дет./ Аз есмь Бог, и несть ра́зве Ме́не спаса́яй./ Аз возвести́х, и спасо́х;/ уничижи́х, и не бе в вас чужди́й./ Вы Мне свиде́тели, и Аз Госпо́дь Бог,/ и еще́ от нача́ла Аз есмь;/ и несть от рук Мои́х избавля́яй./ Сотворю́, и кто отврати́т то?/ Си́це глаго́лет Госпо́дь Бог,/ избавля́яй вас Святы́й Изра́илев.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие сокруше́ние,/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я, и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину,/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́,/ и посеще́ние во избра́нных Его́.

Прему́дрости Соломо́новы чте́ние (главы́ 5 и 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут ца́рствие благоле́пия,/ и вене́ц добро́ты от руки́ Госпо́дни:/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды,/ и возложи́т шлем, суд нелицеме́рен./ Прии́мет щит непобеди́мый, преподо́бне;/ поостри́т же напра́сный гнев во ору́жие;/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им Дух Си́лы/ и, я́ко ви́хор, разве́ет их./ И опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́ков,/ я́ко дана́ есть от Го́спода держа́ва вам/ и си́ла от Вы́шняго.

На ли́тии стихи́ры, глас 6:

Ны́не к тебе́ прибега́ем,/ святи́телю Влади́мире,/ не преста́й моли́тися о нас ко Го́споду,/ да ве́ру на́шу чи́сту соблюде́м,/ и́стинную же любо́вь и единомы́слие/ ки́йждо друг ко дру́гу в де́лех свиде́тельствуим./ Зане́ иде́же быва́ют явля́ема сия́,/ та́мо пребыва́ет Бог,/ спаса́яй и освяща́яй ду́ши на́ша.

Собо́р святы́х ру́сских/ воспо́лнил еси́ в по́двизе твое́м, святи́телю,/ ве́ру бо Христо́ву соблю́д, тече́ние сконча́,/ те́мже даде́ся тебе́ вене́ц пра́вды,/ его́же да́рует Госпо́дь лю́бящим Его́,/ спаса́яй и освяща́яй ду́ши на́ша.

При́зри с Небесе́, Бо́же, и виждь,/ и посети́ виногра́д сей,/ и утверди́ его́,/ усе́рдно взыва́л еси́ ко Го́споду/ о па́стве твое́й, святи́телю./ Та́кожде и о нас моли́ся, де́лателю до́брый,/ да вси еди́ни во Христе́,/ я́коже ве́тви с лозо́ю, пребыва́им,/ во е́же спасти́ся нам.

На стихо́вне стихи́ры, глас 8.

Подо́бен: О, пресла́внаго чудесе́:

Прииди́те, ве́рнии,/ ви́дим иера́рха всече́стна,/ пра́во пра́вивши сло́во Боже́ственный и́стины/ и жесто́кий му́ки да́же до сме́рти небоя́зненно претерпе́вша,/ си́ми же страда́нии и сме́ртию/ Го́спода просла́вивша,/ и вене́ц сла́вы от Него́ прии́мшаго,/ и моля́щагося вы́ну/ о спасе́нии душ на́ших.

Стих: Честна́ пред Го́сподем/ смерть преподо́бных Его́.

Трезве́ние ума́ сохрани́в/ и во́ли твое́й не попусти́в поколеба́тися,/ та́же се́рдце чи́сто/ и чу́жде показа́в ду́ху озлобле́ния,/ си́це твою́ ду́шу/ це́лу и невреди́му соблю́д,/ му́жественне и небоя́зненно/ Христа́ ра́ди смерть прия́л еси́,/ Его́же возлюби́л еси́, святи́телю.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Име́я ре́вность о сла́ве Бо́жией,/ святи́телю Влади́мире,/ вся труды́ твоя́ подъя́л еси́/ во бла́го Це́ркве,/ я́же есть неве́ста Христо́ва,/ сего́ ра́ди и Бог просла́ви тя/ и дарова́ ти/ дерзнове́ние ве́лие/ моли́тися о чту́щих святу́ю па́мять твою́.

Сла́ва, глас то́йже:

Бу́ди и́мя Госпо́дне/ благослове́нно от ны́не и до ве́ка,/ се бо от сро́дник на́ших русских/ ны́не свети́льник ве́ры возсия́/ и правосла́вие кре́пце храни́ти при́сно нас науча́ет,/ во е́же спасти́ся нам.

И ны́не, глас то́йже: Безневе́стная Де́во: и́ли сей Богоро́дичен:

Прииди́те, лю́дие, ублажи́м Засту́пницу усе́рдную ро́да христиа́нскаго,/ се бо предстои́т Престо́лу Царя́ Сла́вы/ и со слеза́ми мо́лит о земне́м уде́ле Свое́м,/ с Не́юже вку́пе и собо́ри святы́х новому́чеников вопию́т немо́лчно:/ Влады́ко Христе́, спаси́ зе́млю Ру́сскую.

По Ны́не отпуща́еши: тропа́рь священному́ченика еди́ножды.

Тропа́рь, глас 2:

Ве́ры правосла́вныя непоро́чный блюсти́телю/ и за́поведей Христо́вых усе́рдный исполни́телю,/ священному́чениче Влади́мире,/ Христа́ всем се́рдцем возлюби́в,/ па́ству твою́ до́бре упа́сл еси́,/ незлоби́во му́ченическую смерть прия́л еси́./ Сего́ ра́ди в ве́чней сла́ве пребыва́я,/ моли́ спасти́ся душа́м на́шим.

Ин тропа́рь, глас 4:

По́двигом до́брым я́ко святи́тель Христо́в подвиза́лся еси́,/ ве́ру правосла́вную непоро́чно соблю́д,/ во дни гоне́ния лю́таго мучи́телей преще́ния не убоя́вся,/ священному́чениче Влади́мире,/ я́ко первому́ченик Стефа́н, убива́ющим тя рекл еси́:/ Госпо́дь да прости́т вас/ Сего́ ра́ди угото́вася ти вене́ц пра́вды,/ его́же да возда́ст Госпо́дь моли́твами твои́ми/ всем почита́ющим тя.

Сла́ва, и ны́не, Богоро́дичен.

На у́трени

На Бог Госпо́дь: тропа́рь священному́ченика два́жды. Сла́ва, и ны́не, Богоро́дичен.

По 1-м стихосло́вии седа́лен, глас 4:

Ве́рен был еси́ Христу́ да́же до сме́рти, святи́телю Влади́мире,/ и, я́коже Стефа́н апо́стол, моли́лся еси́ о убива́ющих тя:/ Госпо́дь да прости́т вас/ Сего́ ра́ди к тебе́ усе́рдно взыва́ем:/ дар всепроще́ния и незло́бия нам испроси́,/ мно́гими грехи́ обремене́нным.

Сла́ва, и ны́не, Богоро́дичен:

Ублажи́м Влады́чицу ми́ра, ра́дующуюся о сла́ве новому́ченика,/ и́мать бо дерзнове́ние мно́гое в моли́твах об оте́честве на́шем./ Ея́же предста́тельством и мольба́ми святи́теля/ да сподо́бит Госпо́дь и нас ми́лости Своея́.

По 2-м стихосло́вии седа́лен, глас 4:

Му́жественне с терпе́нием и благодаре́нием Бо́гу/ восприя́л еси́ промышле́ние Бо́жие о тебе́, святи́телю./ И, по сме́рти супру́жницы и ча́да твоего́, по́двиг и́ноческаго жития́ избра́в,/ Бо́гови со тща́нием и вся́ким смире́нием порабо́тати возжеле́л еси́, богому́дре./ Сего́ ра́ди и нас в по́двизех благоче́стия утверди́, мо́лимтися.

Сла́ва, и ны́не, Богоро́дичен:

Досто́йно есть велича́ти Тя, Богоро́дице Де́во,/ я́ко роди́вшую Христа́, Бо́га на́шего,/ и Ма́тернее дерзнове́ние к Нему́ иму́щую, ру́це моле́бне при́сно простира́ющи,/ да спасе́т и поми́лует оте́чество на́ше,/ я́ко Благи́й и Человеколю́бец.

По полиеле́и седа́лен, глас 4:

Во́нмем, о христолюби́вии лю́дие,/ днесь бо святи́тель Влади́мир в со́нме святы́х земли́ на́шея предстои́т/ и моли́твы о нас к Бо́гу вы́ну возно́сит./ Таково́е милосе́рдие Ббжие о нас ве́дяще, согла́сно воспои́м:/ Бо́же, ди́вный во святы́х Свои́х,/ моли́твами и предста́тельством уго́дника Твоего́ Влади́мира/ поми́луй и спаси́ всех нас.

Сла́ва, и ны́не, Богоро́дичен:

Кто возмо́жет разлучи́ти нас от бога́тства милосе́рдия Твоего́, о Богома́ти,/ а́ще не греси́ на́ши, и́ми́же отлуча́ем себе́ от любве́ Бо́жия?/ Ты же, Блага́я, не оста́ви нас,/ но благода́тию, да́нною Ти от Бо́га,/ возведи́ от тли грехо́вныя и призови́ к покая́нию,/ да сподо́бимся со святы́ми сро́дники на́шими жи́зни ве́чныя.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Луки́, зача́ло 67.

По 50-м псалме́ стихи́ра, глас 6:

Прииди́те, ве́рнии,/ но́ваго первому́ченика, святи́теля Влади́мира,/ пе́сньми боголе́пными восхва́лим,/ той бо, сме́рти от беззако́нных пре́дан быв,/ жи́зни ве́чныя на Небеси́ сподо́бися/ и ны́не предстои́т пред Бо́гом,/ вы́ну моля́ся о душа́х на́ших.

Кано́н Богоро́дицы со ирмосо́м на 6, ирмосы́ по два́жды, глас 8: Во́ду проше́д: и священному́ченика кано́н на 8, глас 6.

Песнь 1

Ирмо́с: Я́ко по суху:

Прииди́те, ве́рнии, пе́сньми благоле́пными Влади́мира, пе́рваго новому́ченика, восхва́лим,/ той бо в со́нме Русских святы́х всели́лся есть.

Кро́тостию и смире́нием, добро́тою и чистото́ю серде́чною украше́н,/ николи́же иски́й свои́х си,/ до́бре служе́ние твое́ соверши́л еси́, святи́телю.

Смерть не разлучи́ тя от любве́ Бо́жия, святи́телю,/ му́жественне бо претерпе́л еси́ сию́ ра́ди возлюби́вшаго тя Христа́.

Богоро́дичен: О Ма́ти Де́во,/ неизрече́нно Сы́на Твоего́ и Бо́га на́шего ро́ждшая,/ моли́ся приле́жно спасти́ся нам.

Песнь 3

Ирмо́с: Несть свят:

Помяни́ нас, свя́тче Бо́жий,/ и́мя твое́ в ско́рбех и печа́лех призыва́ющих/ и ча́ющих от Тебе́ по́мощи во обстоя́ниих тя́жких, находя́щих на ны.

О́браз неусы́пнаго стра́жа Це́ркве Христо́вы яви́л еси́ себе́, святи́телю,/ и небоя́зненно предста́л еси́ пред беззако́нными,/ сме́рти твоея́ иска́вшими.

Жестокосе́рдие, неразу́мие и грехо́вное ослепле́ние мучи́телей твои́х/ препобеди́л еси́, святи́телю, кро́тостию и смире́нием,/ та́же и к Бо́гу моли́твенным призыва́нием о проще́нии их.

Богоро́дичен: Кре́пкое утвержде́ние на Тя наде́ющихся, Богоро́дице Де́во,/ кре́пость и си́лу подава́й нам ра́ди Ро́ждшагося от Тебе́, Влады́чице.

Седа́лен, глас 8:

Ка́я по́льза челове́ку, а́ще мир весь приобря́щет, ду́шу же свою́ погуби́т?/ или́ что даст челове́к в изме́ну за ду́шу свою́? Рече́ Госпо́дь./ Си́ми словесы́ от ю́ности наставля́ем,/ те́ло твое́ на смерть угото́вал еси́, святи́телю,/ да ду́шу жи́ву сохрани́в, со Христо́м пребыва́еши.

Сла́ва, и ны́не, Богоро́дичен:

Ве́лия ра́дость быва́ет на Небеси́, Влады́чице,/ егда́ обраща́ем сердца́ своя́ сокруше́нная к Сы́ну Твоему́ и Бо́гу на́шему./ Той бо да́рует нам прегреше́ний проще́ние моли́твами Твои́ми/ и прелага́ет Свой пра́ведный гнев на милосе́рдие./ Сего́ ра́ди вопие́м Ти:/ ра́дуйся, ра́досте на́ша, гре́шников ка́ющихся упова́ние.

Песнь 4

Ирмо́с: Христо́с моя́ си́ла:

Вои́стину апо́стольский прее́мник был еси́, святи́телю,/ егда́ в годи́ну тя́жких испыта́ний, му́жество и тве́рдую ве́ру яви́в,/ безбоя́зненно за Го́спода ду́шу свою́ пре́дал еси́.

Егда́ лю́тии уби́йцы, сме́рти преда́ти тя хотя́ще,/ вне святы́х врат ведо́ша тя,/ воспева́л еси́, святи́телю:/ Госпо́дь мне прибе́жище и си́ла.

Пе́рвенствующий иера́рх Це́ркве Русския быв,/ пе́рвый и пра́вом, и дея́нием в по́двизе иера́ршаго служе́ния яви́лся еси́,/ пе́рвый же и в годи́ну лихоле́тий му́ченически пострада́л еси́, святи́телю.

Богоро́дичен: Ты еси́ по́мощь и заступле́ние моля́щимся Тебе́, Влады́чице держа́вная,/ бу́ди и нам предста́тельство и покро́в,/ егда́ предста́нем Сы́ну Твоему́, нелицеприя́тному Судии́.

Песнь 5

Ирмо́с: Бо́жиим све́том Твои́м, Бла́же:

Ско́рби и разлуче́ние с па́ствою́ первопресто́льнаго гра́да му́жественне восприя́л еси́, святи́телю./ Оба́че и но́вей па́стве твое́й богоспаса́емаго гра́да Ки́ева/ сокро́вище и приобре́тение безце́нное яви́лся еси́.

Тезоимени́тому ти равноапо́столу в ре́вности по Бо́зе уподобля́яся,/ па́ству твою́ в правосла́вней ве́ре утвержда́л еси́, святи́телю,/ и, я́ко но́вое Кра́сное Со́лнце, на гора́х ки́евских возсия́л еси́.

Русь свята́я, вода́ми Креще́ния омы́тая,/ све́том Христо́ва уче́ния равноапо́стольным кня́зем Влади́миром просвеще́нная/ и кро́вию страстоте́рпец и новому́ченика святи́теля Влади́мира ороше́нная,/ храни́ ве́ру правосла́вную, в не́йже тебе́ утвержде́ние.

Богоро́дичен: К кому́ возопии́м, Влады́чице, в напа́стех на́ших и лю́тых обстоя́ниих,/ а́ще не к Тебе́, Цари́це Не́ба и земли́,/ по́мощь Твою́ при́сно нам подава́й, те́пле Тебе́ моля́щимся.

Песнь 6

Ирмо́с: Жите́йское мо́ре:

Жесто́кая глумле́ния, поруга́ния и смерть/ не возмого́ша отлучи́ти тя от любве́ Христо́вы,/ но́вый испове́дниче ки́евский и всерусский, за Христа́ му́чениче./ Сего́ ра́ди мо́лим тя: в тве́рдей ве́ре и нас укрепи́,/ пра́зднующих любо́вию святу́ю па́мять твою́.

Мно́гими ра́нами уязвле́нное честно́е те́ло твое́, кро́вию исте́кшее,/ я́ко свиде́тельство любве́ же́ртвенныя ко Христу́ яви́л еси́, святи́телю,/ и, быв ве́рен Ему́ да́же до сме́рти,/ вене́ц жи́зни от Него́ прия́л еси́.

Согреше́ния моя́ прости́, Го́споди, и в ми́ре дух мой приими́,/ та́же не вмени́ греха́ предаю́щим мя сме́рти,/ сле́зно моли́лся еси́, священному́чениче достохва́льне.

Богорбдичен: Что Тя нарече́м, о Благода́тная?/ Засту́пницу ли на́шу, я́ко ру́це Твои́ вы́ну к Сы́ну Твоему́ просте́рты о нас и́маши?/ Кре́пость ли и си́лу, я́ко ро́ди христиа́нстии в ве́ре и любви́ к Сы́ну Твоему́ утвержда́ются./ Вся бо мо́жеши, я́ко Ма́ти Творца́ и Влады́ки Не́ба и земли́.

Конда́к, глас 2:

О́браз Христо́ва милосе́рдия явля́я,/ покро́в и защище́ние па́стве твое́й был еси́,/ святи́телю о́тче Влади́мире,/ в кро́тости и незло́бии страда́ния прие́мля,/ безбо́жных мучи́телей, благословля́я, прости́л еси́./ Те́мже и нам испроси́ у Христа́ Бо́га/ дух ми́рен и ве́лию ми́лость.

И́кос:

Име́яй вы́ну попече́ние о ча́дех Бо́жиих,/ сия́ оте́чески к богоуго́дней жи́зни направля́л еси́, святи́телю Влади́мире,/ глаго́лы му́дрыми и пра́ведными де́лы,/ посто́м, моли́твою и сме́ртию честно́ю/ преди́вный по́двиг в подража́ние святы́м Христо́вым показа́вый./ Мы же твоя́ па́стырския доброде́тели хва́ляще,/ тя ублажа́ем, боголю́бче, и взыва́ем си́це:/ испроси́ нам у Христа́ Бо́га/ дух ми́рен и ве́лию ми́лость.

Песнь 7

Ирмо́с: Росода́телъну у́бо пещь:

Мно́гия бе́ды и напа́сти беззако́ннии отсту́пницы воздвиго́ша на тя, испове́дниче,/ оба́че в кро́тости и смире́нии чистоту́ ве́ры храни́ти/ и в ло́не еди́ныя Правосла́вныя Русския Це́ркве пребыва́ти/ ве́рныя призыва́л еси́.

Глумле́ния и поруга́ния, и́мже подверго́ша тя гони́телие твои́,/ не возмого́ша пону́дити тя в жесто́кия дни оста́вити возлю́бленную па́ству,/ сего́ ра́ди и яви́лся еси́ па́стырь до́брый, полага́яй ду́шу за о́вцы Христо́вы.

Ве́рныя непреста́нно науча́л еси́ пребыва́ти в сою́зе любве́,/ и́мже связу́еми бы́ша во Христе́ апо́столи, па́стырю до́брый./ Сего́ ра́ди ны́не ти взыва́ем:/ и нас соблюди́ моли́твами твои́ми в любви́ Христо́ве.

Богорбдичен: В любви́ кре́пцей к Сы́ну Твоему́ и Бо́гу на́шему соблюди́ нас, Де́во Богоро́дице,/ и проще́ние грехо́в и беззако́ний на́ших испроси́/ при́сно Тя блажа́щим.

Песнь 8

Ирмо́с: Из пла́мене преподо́бным:

Стра́ха не иму́,/ гото́во се́рдце мое́, гото́во смерть прия́ти на вся́кое вре́мя Це́ркве ра́ди Христо́вы,/ да утверди́тся ве́ра правосла́вная во оте́честве на́шем,/ рекл еси́ во дни испыта́ний твои́х, па́стырю му́жественнейший,

До́брый де́латель быв в вертогра́де Госпо́дни, святи́телю Христо́в,/ ду́шу твою́ положи́л еси́, во е́же це́ло и неврежде́нно соблюсти́ достоя́ние Его́./ Сего́ ра́ди и досто́ин яви́лся еси́ услы́шати глас, зову́щий ти:/ благи́й и ве́рный ра́бе, вни́ди в ра́дость Го́спода твоего́.

Пра́во пра́вил еси́ сло́во Боже́ственный и́стины,/ те́мже и Ца́рствия Бо́жия сподо́бился еси́, святи́телю,/ в не́мже пребыва́я во сла́ве со все́ми святы́ми,/ не преста́й моли́тися Влады́це,/ да и мы насле́дники сего́ бу́дем.

Богорбдичен: Ра́дуйся, Благода́тная Богоро́дице Де́во,/ приле́жно вопие́м Ти, Влады́чице,/ изба́ви нас от пле́на грехо́внаго и вся́каго прило́га вра́жия,/ сохрани́ от злых челове́к, востаю́щих на ны;/ на Тебе́ кре́пце наде́емся и пред враги́ на́шими хва́лимся,/ Ты бо еси́ Засту́пница ро́да христиа́нскаго.

Песнь 9

Ирмо́с: Бо́га челове́ком невозмо́жно ви́дети:

Пра́вило ве́ры и благоче́стия яви́лся еси́, святи́телю./ Сию́ бо ве́ру, любо́вию ко Христу́ и лю́дем споспешеству́ему,/ до́бре свиде́тельствовал еси́ пред враги́ твои́ми,/ та́же и благоче́стие, во е́же умрети́ тоя́ ра́ди любве́, изря́дно показа́л еси́.

Ум наш просвети́, святи́телю, моли́твами твои́ми к Бо́гу,/ да пра́вый путь избра́вше, Христа́ обря́щем и в черто́зех Его́ водвори́мся.

Стра́стию озлобле́ния обурева́емии,/ злочести́вии лю́дие сме́рти лю́тей преда́ша тя,/ та́же телеси́ твоему́ глумля́хуся и честно́му погребе́нию его́ претя́ху,/ оба́че не имя́ху вла́сти над душе́ю твое́ю, непобеди́мый страда́льче,/ и оста́влени бы́ша тщи во зло́бе свое́й.

Богоро́дичен: Преукраше́нна еси́ Боже́ственною сла́вою, Ма́ти Безневе́стная,/ Бог бо Сло́во из Твои́х ложе́сн изы́де, во е́же угото́вати нам спасе́ние./ Ему́же не преста́й моли́тися, Влады́чице,/ да свободи́т нас от рабо́ты вра́жия, я́ко Милосе́рд.

Свети́лен:

Во тьме беззако́ний су́щий све́том Христо́вым просвеща́ются/ и любы́ Христо́ва в сердца́х гре́шных возжига́ется,/ егда́ па́стырие попече́ние изря́дное о лю́дех и́мут,/ та́ко поуча́л еси́, святи́телю, жре́бий па́стырскаго служе́ния прие́млющих.

Сла́ва, и ны́не, Богоро́дичен:

Преблагослове́нна еси́, Богоро́дице Де́во, Ма́ти Неизрече́ннаго Све́та,/ Тя велича́ем и предста́тельства о нас пред Сы́ном Твои́м всеусе́рдно про́сим,/ Тя бо еди́ну наде́жду и́мамы.

На хвали́тех стихи́ры, глас 8.

Подо́бен: О, пресла́внаго чудесе́:

О, пресла́внаго чудесе́:/ храм, во сла́ву Христа́ Спаси́теля воздви́гнутый,/ рука́ми же нечести́вых в ле́та беззако́ния разру́шенный,/ ны́не во благоле́пии преди́вно возсозда́ся./ В не́мже святи́телем Влади́миром/ смире́нный Ти́хон Всеруский Патриа́рх нарече́н бысть./ Тех моли́твами, Христе́ Бо́же,/ прости́ лю́дем грехи́ и беззако́ния/ и спаси́ ду́ши на́ша.

О, пресла́внаго чудесе́,/ я́ко во дни безбо́жнаго лю́таго гоне́ния/ восхоте́ Госпо́дь ве́ру в лю́дех укрепи́ти/ по́двигом Патриа́ршаго служе́ния./ Те́мже, святи́телю Влади́мире,/ смире́ннаго архипа́стыря Ти́хона, свы́ше избра́ннаго,/ ты пе́рвый удосто́ился еси́/ святе́йшего отца́ возгласи́ти./ С ни́мже ны́не моли́ся о душа́х на́ших.

О, ди́внаго чудесе́:/ святе́йший Ти́хон, первосвяти́тель Русский,/ кончи́ну твою́ услы́шав, свя́те Влади́мире,/ ско́рбию ве́лиею объя́т бысть, оба́че свиде́тельствова:/ смерть твоя́ я́ко же́ртва благово́нная/ во очище́ние грехо́в наро́да на́шего яви́ся./ Сего́ ра́ди приле́жно вопие́м ти:/ моли́ ми́лостиваго Бо́га о земне́м оте́честве твое́м,/ и спасе́нии душ на́ших.

Сла́ва, глас то́йже:

Святи́телие Це́ркве Русский,/ до́бре в по́двизех ва́ших той послужи́вшии,/ гряди́те днесь во сре́тение сослужи́теля ва́шего,/ любо́вь ко Христу́ му́ченически свиде́тельствующаго,/ да вку́пе с ва́ми вя́щшия сла́вы, е́же на Небеси́, сподо́бится/ и при́сный хода́тай пред Бо́гом о лю́дех ве́рных яви́тся.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Славосло́вие вели́кое.

На литурги́и

Блаже́нны, песнь 3-я на 4 и песнь 6-я на 4.

Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол ко Евре́ем, зача́ло 334. Аллилу́йя, глас 2: Свяще́нницы Твои́ облеку́тся в пра́вду, и преподо́бнии Твои́ возра́дуются. Стих: Блаже́н муж, боя́йся Го́спода, в за́поведех Его́ восхо́щет зело́. Ева́нгелие от Иоа́нна, зача́ло 36. Прича́стен: В па́мять ве́чную бу́дет пра́ведник:

А́ще неде́ля, или́ в неде́лю, ближа́йшую по́сле 25-го дне

На ма́лей вече́рни

На Го́споди, воззва́х: стихи́ры воскре́сны гла́са.

Сла́ва, глас 1:

О вели́цыи страстоте́рпцы,/ новому́ченицы Русстии,/ с любо́вию припа́даем к вам/ и, благогове́йно лобыза́юще ра́ны ва́ша,/ прославля́ем ва́ша по́двиги и мо́лимся:/ моли́те о душа́х на́ших.

И ны́не, Богоро́дичен гла́са.

На стихо́вне стихи́ры новому́чеников, глас 6.

Подо́бен: Тридне́вен:

Помяни́, Го́споди, и́же о Тебе́ пострада́вшия,/ но́выя страстоте́рпцы,/ от родо́в на́ших прозя́бшия/ и му́ки многоразли́чныя претерпе́вшия,/ и приими́ их моле́ния/ о спасе́нии на́шем.

Стих: Мне же зело́ че́стни бы́ша/ дру́зи Твои́, Бо́же.

Дарова́л еси́, Судие́ пра́ведный,/ испове́дником Це́ркве Русския/ Ца́рство Небе́сное/ и блаже́нство ве́чное./ Приими́ ны́не, Го́споди, моле́ние их/ о спасе́нии душ на́ших.

Стих: Изочту́ их/ и па́че песка́ умно́жатся.

Я́ко зве́зды пресве́тлыя,/ сия́ют на Небеси́ новому́ченицы Русстии,/ кровь же их свята́я удобри́ зе́млю Ру́сскую/ во освяще́ние и благослове́ние./ Тех моли́твами, Христе́ Бо́же,/ поми́луй и спаси́ ду́ши на́ша.

Сла́ва, глас и подо́бен то́йже:

О Тро́ице Пресвята́я,/ род наш от грехо́внаго плене́ния изба́ви/ и на путь пра́вый наста́ви/ предста́тельством новому́ченик Русских,/ и́же мо́лят Тя, Триипоста́сный Бо́же,/ о спасе́нии душ на́ших.

И ны́не, Богоро́дичен:

О Благода́тная и Пречи́стая Де́во Мари́е,/ Хода́таице и Засту́пнице всех ве́рных,/ предста́тельством новому́чеников и испове́дников Русских/ расточе́нныя собери́, малоду́шныя возста́ви,/ отпа́дшия же от святы́я ве́ры обрати́/ и в церко́вное ло́но возврати́.

Тропа́рь воскре́сен. Сла́ва, новому́чеников. И ны́не, Богоро́дичен.

На вели́цей вече́рни

Блаже́н муж: 1-й антифо́н.

На Го́споди, воззва́х: стихи́ры воскре́сны гла́са и стихи́ры новому́чеников, глас 5.

Подо́бен: Ра́дуйся:

Ра́дуйтеся, новому́ченицы и испове́дницы Русстии,/ правосла́вных удобре́ние,/ новозакла́ннии а́гнцы,/ ве́ры побо́рницы и храни́телие,/ хода́таи о нас к Бо́гу непосты́днии,/ в ле́та после́дняя/ страда́ньми подража́телие пе́рвым му́чеником яви́стеся,/ терпе́ния столпи́ непоколеби́мии,/ душа́м на́шим испроси́те ве́лию ми́лость.

Ра́дуйтеся, страстоте́рпцы сла́внии,/ стопа́м после́дующе дре́вних му́ченик,/ ве́ры ра́ди подвиза́стеся тве́рдо/ в лю́тая времена́ земли́ на́шея/ и ны́не всех подвиза́ете к сла́ве и хвале́нию Бо́га,/ укре́пльшаго ва́ше немощно́е естество́/ и обогати́вшаго вас дарова́ньми Ду́ха,/ во спасе́ние душ на́ших.

Глас и подо́бен то́йже.

Творе́ние святи́теля Афана́сия Ковро́вскаго:

Прииди́те, Небе́снии предста́телие на́ши, к нам,/ ва́шего ча́ющим ми́лостивнаго посеще́ния,/ и изба́вите озло́бленныя мучи́тельскими преще́нии/ лю́таго неи́стовства неве́рных,/ от ни́хже, я́ко пле́нницы и на́зи, гони́ми есмы́,/ от ме́ста на ме́сто ча́сто преходя́ще/ и заблужда́юще в верте́пех и гора́х./ Уще́дрите у́бо, прехва́льнии,/ и да́руйте нам осла́бу,/ утоли́те бу́рю/ и угаси́те е́же на ны негодова́ние,/ Бо́га моля́ще,/ подаю́щаго ва́ми земли́ на́шей ве́лию ми́лость.

И́ны стихи́ры новому́чеников, глас 6.

Подо́бен: Все отло́жше:

Святи́телю о́тче Ти́хоне,/ архипа́стырю многострада́льне,/ ты в годи́ну лю́тых безбо́жных гоне́ний/ ве́рная ча́да Це́ркве Русския,/ утеша́я, призыва́л еси́/ за Христа́ и ве́ру Правосла́вную му́жественне стоя́ти,/ сам же, по вся дни умира́я за па́ству твою́,/ испове́дник непоколеби́мый яви́лся еси́./ Сего́ ра́ди тя с любо́вию прославля́ем.

Па́стырю и́стинный,/ священному́чениче Влади́мире,/ егда́ беззако́ннии понужда́ху тя/ Це́ркве Руския отступи́ти,/ ве́рен де́лом и сло́вом/ святи́телю Ти́хону пребы́л еси́/ и я́ко свяще́нная же́ртва от Ки́ева, ма́тере гра́дов ру́сских,/ Бо́гу прине́слся еси́,/ моля́ся о убива́ющих тя./ Сего́ ра́ди тя усе́рдно прославля́ем.

Священному́чениче Вениами́не,/ Це́ркве Христо́вы и́стинный сы́не/ и благостоя́ния ея́ усе́рдный ревни́телю,/ проти́ву лжепа́стырей, тща́щихся расхи́тити ста́до твое́,/ му́жественне стал еси́/ и, не убоя́вся преще́ний и лжесвиде́тельств мучи́телей,/ обрати́л еси́ суд на главу́ суди́вших тя,/ та́же сме́ртию твое́ю/ Правосла́вие утверди́л еси́./ Сего́ ра́ди тя усе́рдно ублажа́ем.

Сла́ва, новому́чеников, глас 5:

Всевы́шний Влады́ко,/ в Трои́це сла́вимый и поклоня́емый,/ уще́дри ны благоприя́тными мольба́ми/ но́вых му́ченик Твои́х,/ пред мучи́тели дерзнове́нно испове́давших Тя/ Еди́наго и́стиннаго Бо́га/ и Твое́, Сы́не Бо́жий,/ неизрече́нное от Ма́тере Де́вы/ спаси́тельное воплоще́ние.

И ны́не, Богоро́дичен.

Вход. Проки́мен дне. И чте́ния новому́чеников.

Дея́ний святы́х апо́стол чте́ние (глава́ 4):

В ты́я дни собра́шася во Иерусали́м кня́зи, ста́рцы, кни́жницы/ и ели́цы бе́ша от ро́да архиере́йска./ И, поста́влыне Петра́ и Иоа́нна посреде́, вопроша́ху:/ ко́ею си́лою или́ ко́им и́менем исцели́ста хрома́го?/ Петр, испо́лнился Ду́ха Свя́та, рече́:/ кня́зи лю́дстии и ста́рцы Изра́илевы,/ а́ще мы днесь истязу́еми есмы́ о благодея́нии челове́ка не́мощна,/ о че́сом сей спасе́ся,/ разу́мно буди́ всем вам и всем лю́дем Изра́илевым,/ я́ко во и́мя Иису́са Христа́ Назоре́я,/ Его́же вы распя́сте,/ Его́же Бог воскреси́ от ме́ртвых,/ о Сем сей стои́т пред ва́ми здрав./ Сей есть ка́мень, укоре́нный от вас, зи́ждущих,/ бы́вый во главу́ у́гла,/ и несть ни о еди́нем же ине́м спасе́ния;/ несть бо ино́го и́мене под небесе́м, да́ннаго в челове́цех,/ о не́мже подоба́ет спасти́ся нам./ Ви́дяще же Петро́во дерзнове́ние и Иоа́нново и разуме́вше,/ я́ко челове́ка некни́жна еста́ и проста́, дивля́хуся,/ знаху же их, я́ко со Иису́сом бе́ста;/ ви́дяще же исцеле́вшаго челове́ка с ни́ма стоя́ща,/ ничто́же имя́ху проти́ву рещи́./ Повеле́вше же и́ма вон из со́нмища изы́ти,/ стяза́хуся друг со дру́гом, глаго́люще:/ что сотвори́м челове́кома си́ма?/ Я́ко у́бо наро́читое зна́мение бысть и́ма,/ всем живу́щим во Иерусали́ме я́ве,/ и не мо́жем отврещи́ся;/ но да не бо́лее простре́тся в лю́дех,/ преще́нием да запрети́м и́ма ктому́ не глаго́лати о и́мени сем ни еди́ному от челове́к./ И призва́вше их,/ запове́даша и́ма отню́д не провещава́ти, ниже́ учи́ти о и́мени Иису́сове./ Петр же и Иоа́нн, отвеща́вше к ним, ре́ста:/ а́ще пра́ведно есть пред Бо́гом/ вас послу́шати па́че, не́жели Бо́га?/ Суди́те: не мо́жем бо мы, я́же ви́дехом и слы́шахом, не глаго́лати./ Они́ же, призапре́щше и́ма, пусти́ша я,/ ничто́же обре́тше, ка́ко му́чити их, люди́й ра́ди,/ я́ко вси прославля́ху Бо́га о бы́вшем:/ лет бо бя́ше мно́жае четы́редесяти челове́к той,/ на не́мже бысть чу́до сие́ исцеле́ния./ Отпу́щена же бы́вша, приидо́ста ко свои́м и возвести́ста,/ ели́ка к ни́ма архиере́и и ста́рцы ре́ша./ Они́ же, слы́шавше, единоду́шно воздвиго́ша глас к Бо́гу и реко́ша:/ Влады́ко, Ты, Бо́же, сотвори́вый не́бо и зе́млю и мо́ре и вся, я́же в них,/ И́же Ду́хом Святы́м усты́ отца́ на́шего Дави́да, о́трока Твоего́, рекл еси́:/ вску́ю шата́шася язы́цы и лю́дие поучи́шася тще́тным?/ Предста́ша ца́рие зе́мстии,/ и кня́зи собра́шася вку́пе на Го́спода и на Христа́ Его́./ Собра́шася бо вои́стину во гра́де сем на свята́го О́трока Твоего́ Иису́са,/ Его́же пома́зал еси́,/ И́род же и Понти́йский Пила́т, с язы́ки и людьми́ изра́илевыми,/ сотвори́ти, ели́ка рука́ Твоя́ и сове́т Твой преднарече́ быти́./ И ны́не, Го́споди, при́зри на преще́ния их/ и даждь рабо́м Твои́м со вся́ким дерзнове́нием глаго́лати сло́во Твое́,/ внегда́ ру́ку Твою́ простре́ти Ти во исцеле́ния,/ и зна́мением и чудесе́м быва́ти, и́менем святы́м О́трока Твоего́ Иису́са./ И помоли́вшимся им, подви́жеся ме́сто, иде́же бя́ху со́брани,/ и испо́лнишася вси Ду́ха Свя́та,/ и глаго́лаху сло́во Бо́жие со дерзнове́нием.

К Тимофе́ю посла́ния свята́го апо́стола Па́вла чте́ние (глава́ 4):

Ча́до Тимофе́е,/ засвиде́тельствую у́бо аз пред Бо́гом и Го́сподем на́шим Иису́с Христо́м,/ хотя́щим суди́ти живы́м и ме́ртвым в явле́нии Его́ и ца́рствии Его́:/ пропове́дуй сло́во,/ насто́й благовре́мение и безвре́менне,/ обличи́, запрети́, умоли́ со вся́ким долготерпе́нием и уче́нием./ Бу́дет бо вре́мя, егда́ здра́ваго уче́ния не послу́шают,/ но по свои́х по́хотех изберу́т себе́ учи́тели, че́шеми слу́хом,/ и от и́стины слух отвратя́т, и к ба́снем укло́нятся./ Ты же трезви́ся о всем, злопостражди́,/ де́ло сотвори́ благове́стника,/ служе́ние твое́ изве́стно сотвори́./ Аз бо уже́ жрен быва́ю,/ и вре́мя моего́ отше́ствия наста́./ По́двигом до́брым подвиза́хся,/ тече́ние сконча́х, ве́ру соблюдо́х./ Про́чее у́бо соблюда́ется мне вене́ц пра́вды,/ его́же возда́ст ми Госпо́дь в день он, пра́ведный Судия́,/ не то́кмо же мне, но и всем возлю́бльшим явле́ние Его́.

Ко Евре́ем посла́ния свята́го апо́стола Па́вла чте́ние (глава́ 11):

Бра́тие,/ и́же ве́рою победи́ша ца́рствия,/ соде́яша пра́вду, получи́ша обетова́ния,/ загради́ша уста́ львов,/ угаси́ша си́лу о́гненную,/ избего́ша о́стрея меча́,/ возмого́ша от не́мощи,/ бы́ша кре́пцы во бране́х,/ обрати́ша в бе́гство полки́ чужди́х./ Прия́ша жены́ от воскресе́ния ме́ртвых свои́х./ Ини́и же избие́ни бы́ша, не прие́мше избавле́ния,/ да лу́чшее воскресе́ние улуча́т./ Друзи́и же руга́нием и ра́нами искуше́ние прия́ша,/ еще́ же и уз и темни́ц./ Ка́мением побие́ни бы́ша,/ претре́ни бы́ша, искуше́ни бы́ша,/ уби́йством меча́ умро́ша,/ проидо́ша в ми́лотех и в ко́зиях ко́жах,/ лишени, скорбяще, озлбблени./ Йхже не бе досто́ин весь мир,/ в пусты́нях скита́ющеся, и в гора́х, и в верте́пах, и в про́пастех земны́х./ И си́и вси, послу́шествовани бы́вше ве́рою, не прия́ша обетова́ния,/ Бо́гу лу́чшее что о нас предзре́вшу,/ да не без нас соверше́нство прии́мут.

На ли́тии стихи́ра новому́чеников, глас 6.

Подо́бен: Отча́янная:

Творе́ние святи́теля Афана́сия Ковро́вскаго:

Отча́янии есмы́/ жития́ ра́ди/ и не и́мамы нра́ва доброде́тельна,/ я́ко ми́ро, прино́сим Ти, Го́споди,/ моли́твы святы́х сро́дников на́ших./ Не отве́ржи Русь, издре́вле Святу́ю,/ ны́не же грехо́в на́ших ра́ди люте стра́ждущую./ Не пре́зри сле́зы ве́рных сыно́в,/ коле́н свои́х пред Ваа́лом не преклоня́вших,/ и и́хже не порази́л еси́, согреша́ющих./ Приими́ нас, ка́ющихся, Бо́же,/ святы́х Твои́х мольба́ми.

Сла́ва, глас 8:

Прииди́те, мучениколю́бцы,/ прииди́те, соста́вим лик,/ торжеству́юще и Бо́га прославля́юще/ в ра́достный пра́здник новому́чеников и испове́дников Русских,/ си́и бо не уклони́шася ско́рби,/ ни убоя́шася темни́цы,/ го́рькими рабо́тами, гла́дом и хла́дом изморе́ни/ и многови́дными му́ками умерщвля́еми,/ я́ко а́гнцы незло́бивии, смерть прия́ша./ И ны́не в ра́дости святы́х/ мо́лят Триеди́наго Бо́га о земне́м оте́честве свое́м.

И ны́не, глас то́йже:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

На стихо́вне стихи́ры воскре́сны гла́са. Сла́ва, новому́чеников, глас 2: Но́вый до́ме: И ны́не, Богоро́дичен, глас 8: О, пресла́внаго чудесе́:

Стихи́ры новому́чеников, глас 2.

Подо́бен: До́ме Евфра́фов:

Творе́ние святи́теля Афана́сия Ковро́вскаго:

Земле́ Ру́сская,/ гра́де святы́й,/ украша́й твой дом,/ в не́мже Боже́ственный/ ве́лий сонм святы́х просла́ви.

Стих: Го́споди, Госпо́дь наш,/ я́ко чу́дно и́мя Твое́ по всей земли́.

Це́рковь Ру́сская,/ красу́йся и лику́й,/ се бо ча́да твоя́/ Престо́лу Влады́чню/ во сла́ве предстоя́т, ра́дующеся.

Стих: Святы́м, и́же суть на земли́ Его́,/ удиви́ Госпо́дь вся хоте́ния Своя́ в них.

Собо́ре святы́х ру́сских,/ по́лче Боже́ственный,/ моли́теся ко Го́споду/ о земно́м оте́честве ва́шем/ и о почита́ющих вас любо́вию.

Сла́ва, глас и подо́бен то́йже:

Но́вый до́ме Евфра́фов,/ уде́ле избра́нный,/ Русь Свята́я,/ храни́ ве́ру Правосла́вную,/ в не́йже тебе́ утвержде́ние.

И ны́не, Богоро́дичен, глас 8.

Подо́бен: О, пресла́внаго чудесе́:

О, пресла́внаго чудесе́!/ Небесе́ и земли́ Цари́ца,/ от святы́х сро́дников на́ших умоля́емая,/ до ны́не зе́млю Ру́сскую покрыва́ет/ и ли́ка Своего́ изображе́нии ми́лостивно обогаща́ет./ О Влады́чице Держа́вная!/ Не преста́ни и на бу́дущее вре́мя/ во утвержде́ние на Ру́си Правосла́вия/ ми́лости и чудеса́ излива́ти до ве́ка. Ами́нь.

На благослове́нии хле́бов Богоро́дице Де́во: два́жды и тропа́рь новому́чеников еди́ножды.

Тропа́рь новому́чеников, глас 4:

Днесь ра́достно лику́ет Це́рковь Ру́сская,/ прославля́ющи новому́ченики и испове́дники своя́:/ святи́тели и иере́и,/ ца́рственныя страстоте́рпцы,/ благове́рныя кня́зи и княги́ни,/ преподо́бныя му́жи и жены́/ и вся правосла́вныя христиа́ны,/ во дни гоне́ния безбо́жнаго/ жизнь свою́ за ве́ру во Христа́ положи́вшия/ и кровьми́ и́стину соблю́дшия./ Тех предста́тельством, долготерпели́ве Го́споди,/ страну́ на́шу в Правосла́вии сохрани́/ до сконча́ния ве́ка.

На у́трени

На Бог Госпо́дь: тропа́рь воскре́сен, два́жды. Сла́ва, новому́чеников. И ны́не, Богоро́дичен.

По 1-м стихосло́вии седа́лен, глас 4:

Новому́ченицы Русстии,/ кро́вию свое́ю ве́ру запечатле́вшии,/ Влады́ку всех моли́те/ Це́рковь Ру́сскую в Правосла́вии утверди́ти,/ зе́млю на́шу от скверн очи́стити,/ лю́ди во благоче́стии сохрани́ти/ во о́бщее всех спасе́ние.

По 2-м стихосло́вии седа́лен, глас 4:

И́же в земли́ Русстей новому́ченик и испове́дник Твои́х,/ я́ко багряни́цею и ви́ссом,/ кровьми́ Це́рковь Ру́сская украси́вшися, Христе́ Бо́же, те́ми вопие́т Ти:/ лю́дем щедро́ты Твоя́ низпосли́,/ мир жи́тельству Твоему́ да́ру́й/ и душа́м на́шим ве́лию ми́лость.

Велича́ние: Велича́ем вас,/ святи́и новому́ченицы и испове́дницы Русстии,/ и чтим че́стная страда́ния ва́ша,/ я́же за Христа́/ претерпе́ли есте́.

Псало́м и́бра́нный: Бог нам прибе́жище и си́ла:

По полиеле́и седа́лен, глас 6.

Творе́ние святи́теля Афана́сия Ковро́вскаго:

Мужа́йся, Христо́ва Це́рковь,/ и держа́вствуй над всу́е борю́щими,/ Христо́ви бо дру́зи о тебе́ пеку́тся,/ и предстоя́ще, и обстоя́ще,/ и́хже о́бщий пра́здник/ ны́не соверша́еши све́тло.

Аще храм новому́чеников, проки́мен, глас 4: Прои́дохом сквозе́ огнь и во́ду,// и изве́л еси́ ны в поко́й. Стих: Разже́гл ны еси́, я́коже разжиза́ется сребро́. Ева́нгелие от Матфе́я, зача́ло 36.

По 50-м псалме́ стихи́ра, глас 6:

Це́ркве Ру́сския столпи́ непоколеби́мии,/ собо́ре новому́чеников и испове́дников Русских,/ се́рдцем ве́рующе в пра́вду,/ усты́ Го́спода Иису́са Христа́ испове́дали есте́ во спасе́ние/ и заточе́ния, изгна́ния, го́рькия рабо́ты и смерть/ Бо́га ра́ди сла́дце претерпе́ли есте́./ Те́мже те́пле моли́теся ко Го́споду,/ Русь Святу́ю в Правосла́вии утверди́ти/ и спасти́ ду́ши на́ша.

Кано́н новому́чеников, глас 6.

Песнь 1

Ирмо́с: Се́ченное сече́тся/ мо́ре Че́рмное,/ волнопита́емая же изсуша́ется глубина́,/ та́яжде ку́пно безору́жным бы́вши проходи́ма/ и всеору́жным гроб./ Песнь же богокра́сная воспева́шеся:/ сла́вно просла́вися Христо́с, Бог наш.

Припе́в: Святи́и новому́ченицы и испове́дницы Русстии,/ моли́те Бо́га о нас.

Го́споди, Бо́же наш, при́сно прославля́яй вся святы́я,/ ны́не и нас, недосто́йных, сподо́би сыно́вне просла́вити святы́х сро́дников на́ших,/ новому́чеников и испове́дников Русских.

Кровьми́ ва́шими, священному́ченицы, я́ко в Чермне́м мо́ри, потопи́ли есте́ безбо́жныя мучи́тели,/ Це́рковь же Ру́сская, ва́ми крася́щися,/ похвалы́ побе́дныя, я́ко земля́ обетова́нная ме́д и млеко́, вам источа́ет.

Егда́ даде́ся вам благода́ть не то́чию во Христа́ ве́ровати,/ но и по Нем страда́ти,/ немо́кренно пучи́ну кро́вных мук проидо́сте, святи́и му́ченицы,/ ве́рным сыново́м русским о́браз я́вльше,/ и со дерзнове́нным испове́данием во врата́ Небе́сная внидо́сте.

Богоро́дичен: Приими́ песнь хвале́бную, от недосто́йных уст возноси́мую,/ препросла́вленная Ма́ти Бо́жия.

Песнь 3

Ирмо́с: Госпо́дь Сый всех и Зижди́тель Бог,/ созда́нное, Безстра́стный, обнища́в, Себе́ соедини́,/ и Па́сха, за я́же хотя́ше умре́ти,/ Сам, Сый, Себе́ предпожре́:/ яди́те, вопия́, Те́ло Мое́/ и ве́рою утверди́теся.

Егда́ бу́ря нече́стия на Це́рковь Ру́сскую воздви́жеся,/ вы, святи́и новому́ченицы, страда́ньми ва́шими со тща́нием укроти́сте ю/ и по́двиги ва́шими Правосла́вие утверди́сте.

Му́ки ве́лия за Це́рковь Христо́ву претерпе́сте, святи́и новому́ченицы,/ моли́те утверди́тися ей незы́блемей и непоколеби́мей до сконча́ния ве́ка.

Страда́ньми и испове́данием Христа́, святи́и сро́дницы на́ши,/ вше́дше в Небе́сная селе́ния, я́ко дре́вле Изра́иль в зе́млю обетова́нную,/ оте́чество ва́ше земно́е, Русь Святу́ю, в любви́ сохраня́йте моли́твами ва́шими.

Богоро́дичен: Небе́сных круго́в вы́шшая/ и сла́вою Боже́ственною преукраше́нная, Де́во Ма́ти Бо́жия,/ спаси́ ду́ши на́ша.

Седа́лен, глас 2:

Но́вии страстоте́рпцы Русстии,/ му́ченически по́прище земно́е сконча́вший и страда́ньми дерзнове́ние ко Го́споду приобре́тшии,/ моли́теся Ему́, вас укре́пльшему,/ и́да и мы, егда́ на́йдет на ны испыта́ния час,/ му́жества дар Бо́жий восприи́мем.

Песнь 4

Ирмо́с: Прови́дев проро́к/ та́йну Твою́ неизрече́нную, Христе́, провозгласи́:/ положи́л еси́ тве́рдую любо́вь кре́пости, О́тче Ще́дрый,/ Единоро́днаго бо Сы́на, Благи́й,/ очище́ние в мир посла́л еси́.

Всем конце́м земли́ яви́ся чу́до смотре́ния Твоего́, Влады́ко,/ кро́вию бо новому́ченик, я́ко водо́ю, угаси́л еси́ в Русстей земли́ пла́мень нече́стия и развраще́ния/ и спасл еси́ лю́ди Твоя́.

Сла́ву Бо́жию унасле́довасте, новому́ченицы, просия́вшии в земли́ на́шей,/ отве́ргшеся бо себе́ и страх сме́ртный препобеди́вше,/ любо́вь к Бо́гу да́же до сме́рти му́жественно сохрани́ли есте́.

По́двигом до́брым подвиза́вшиися, святи́и новому́ченицы Русстии,/ к покая́нию и доброде́тельному житию́ подви́гните нас,/ да и мы ва́шими моли́твами сподо́бимся прославля́ти Го́спода во Ца́рствии Его́.

Богоро́дичен: На Твой наде́ющеся покро́в, Ма́ти Бо́жия,/ со святы́ми новому́ченики и испове́дники Русскими прославля́ем милосе́рдие Твое́.

Песнь 5

Ирмо́с: Сою́зом любве́/ связу́еми, апо́столи,/ влады́чествующему все́ми себе́ Христу́ возло́жше,/ кра́сны но́ги очища́ху,/ благовеству́юще всем мир.

Дерзнове́нно, святи́и, испове́дали есте Го́спода пред отсту́пники и гони́тели:/ с на́ми Бог, взыва́юще, разуме́йте и покаря́йтеся,/ стра́ха ва́шего не убои́мся, ниже́ смути́мся, я́ко с на́ми Бог.

Уврачу́йте моли́твами ва́шими, святи́и новому́ченицы Русстии,/ лю́ди богобо́рныя, враждо́ю и уби́йствы ды́шущия,/ и мир стране́ на́шей и ве́рным лю́дем да́руйте.

Предстоя́ще Христу́, власть иму́щу суди́ти всему́ ми́ру,/ святи́и новому́ченицы и испове́дницы Русстии,/ очи́стите нас от грехо́в на́ших моли́твами ва́шими,/ да не с ми́ром осужде́ни бу́дем.

Богоро́дичен: Водворя́ет ны змий во юдо́ль пла́ча и ча́яния злых,/ не мо́жем терпе́ти ско́рби своея́, взыва́ху новому́ченицы,/ Ты же, Богороди́тельнице, просте́рла еси́ им покро́в Свой/ и спасла́ еси́ от сете́й вра́жиих.

Песнь 6

Ирмо́с: Бе́здна после́дняя грехо́в обы́де мя,/ и, волне́ния не ктому́ терпя́,/ я́ко Ио́на Влады́це, вопию́ Ти:/ от тли мя возведи́.

Во́лны безбо́жнаго нече́стия тща́хуся потопи́ти кора́бль Це́ркве Ру́сския,/ Ты же, И́стинный Ко́рмчий, спасл еси́ ше́ствующия на нем моли́твами страстоте́рпцев Русских, вопию́щих:/ Го́споди Сил, из смертоно́сный глубины́ возведи́ ны.

Безбо́жнии Ка́иновы вну́цы святы́ни церко́вныя поруга́нию и огню́ преда́ша,/ оби́тели разори́ша, хра́мы я́ко ово́щная храни́лища соде́яша,/ христолюби́выя лю́ди в темни́цы заключи́ша и уму́чиша./ Вы же, страстоте́рпцы, с любо́вию учи́ли есте́:/ сие́ бысть по грехо́м на́шим, лю́дие, пока́йтеся.

Увы́ нам, увы́, вопия́ху испове́дницы Русстии,/ ви́дяще, я́ко безу́мнии богобо́рцы святы́ни земли́ на́шея разори́ша,/ оби́тели я́ко узи́лища темни́чная соде́яша,/ хра́мы Бо́жий в скве́рная и позо́рищная места́ обрати́ша/ и кровь христиа́нскую в них пролия́ша./ Сего́ ра́ди опустоши́шася сердца́ нечести́вых/ и живо́т их а́ду прибли́жися.

Богоро́дичен: Изведи́ нас из ро́ва поги́бели/ и уврачу́й на́ша грехо́вныя я́звы, Пресвята́я Ма́ти Де́во,/ да неосужде́нно сподо́бимся при́сно прославля́ти новому́ченики Сы́на Твоего́ и Бо́га на́шего.

Конда́к новому́чеников, глас 3.

Подо́бен: Де́ва днесь:

Днесь новому́ченицы Русстии/ в ри́зах бе́лых предстоя́т А́гнцу Бо́жию/ и со А́нгелы песнь побе́дную воспева́ют Бо́гу:/ благослове́ние, и сла́ва, и прему́дрость,/ и хвала́, и честь,/ и си́ла, и кре́пость/ на́шему Бо́гу/ во ве́ки веко́в. Ами́нь.

Песнь 7

Ирмо́с: О́троцы в Вавило́не/ пе́щнаго пла́мене не убоя́шася,/ но, посреде́ пла́мене вве́ржени,/ ороша́еми, поя́ху:/ благослове́н еси́, Го́споди, Бо́же оте́ц на́ших.

О́троцы в Вавило́не дре́вле, я́ко основа́ние,/ новому́ченицы же Русстии ны́не, я́ко увенча́ние,/ с ли́ки страстоте́рпец при́сно взыва́ют:/ благослове́н еси́, Го́споди, Бо́же оте́ц на́ших.

О́троцы в Вавило́не пе́щнаго пла́мене не убоя́шася,/ новому́ченицы же Русстии, тем подража́юще,/ гоне́ния безбо́жных в ничто́же вмени́ша,/ те́мже ны́не согла́сно с ни́ми воспева́ют:/ благослове́н еси́, Го́споди, Бо́же оте́ц на́ших.

Днесь торжеству́ет Це́рковь Ру́сская,/ святи́и бо новому́ченицы, сро́дницы на́ши,/ к ликостоя́нием святы́х, от ве́ка Бо́гу благоугоди́вших, присовокупи́вшеся,/ согла́сно с ни́ми воспева́ют хвале́бную песнь:/ благослове́н еси́, Бо́же оте́ц на́ших.

Богоро́дичен: Предстоя́щи Ти Кресту́ Сы́на Твоего́, Богома́ти,/ ору́жие про́йде ду́шу Твою́,/ те́мже и попече́ние сугу́бое о возлюби́вших Его́ прия́ла еси́,/ и́же Тя сыно́вне велича́ют:/ благослове́на Ты в жена́х еси́, Всенепоро́чная Влады́чице.

Песнь 8

Ирмо́с: За зако́ны оте́ческия/ блаже́ннии в Вавило́не ю́ноши, предбе́дствующе,/ царю́ющаго оплева́ша повеле́ние безу́мное/ и, совоку́плени, и́мже не свари́шася огне́м,/ Держа́вствующему досто́йную воспева́ху песнь:/ Го́спода по́йте, дела́,/ и превозноси́те во вся ве́ки.

Зако́ны Христо́вы возлюби́ша новому́ченицы и испове́дницы Русстии,/ безбо́жная же повеле́ния отри́нуша/ и, ре́вностию о Бо́зе связу́емии,/ Бо́гу побе́дную песнь воспева́ху:/ да благослови́т Го́спода Русь Свята́я и превозно́сит Его́ во ве́ки.

Егда́ земля́ Русская тьмо́ю безбо́жия и Ка́иновым озлобле́нием объя́та бысть,/ тогда́ мно́зи христолюби́вии лю́дие на го́рькия рабо́ты изгна́ни бы́ша/ и глад, мраз, зной и смерть лю́тую му́жественне претерпе́ша,/ ве́рою же, наде́ждею и любо́вию совоку́плени,/ досто́йную воспева́ху песнь:/ да благослови́т Го́спода Русь Свята́я и превозно́сит Его́ во ве́ки.

А́нгелов хвалу́ и новому́чеников славосло́вие ми́лостивно прие́мляй,/ не отри́ни, Триипоста́сный Бо́же, от со́нма их и нас, недосто́йных,/ но сподо́би вку́пе с ни́ми воспева́ти:/ да благослови́т Го́спода Русь Свята́я и превозно́сит Его́ во ве́ки.

Богоро́дичен: Зря́щи поруга́ние свята́го уде́ла Своего́,/ скорбя́ше Пречи́стая Ма́ти и держа́вную по́мощь ве́рным лю́дем простира́ше,/ Сы́на же Своего́ усе́рдно моля́ше, взыва́ющи:/ да благослови́т Го́спода Русь Свята́я и превозно́сит Его́ во ве́ки.

Песнь 9

Ирмо́с: Стра́нствия Влады́чня/ и безсме́ртныя тра́пезы/ на Го́рнем ме́сте высо́кими умы́,/ ве́рнии, прииди́те, наслади́мся,/ возше́дша Сло́ва,/ от Сло́ва научи́вшеся,/ Его́же велича́ем.

Безсме́ртныя трапе́зы и жи́зни ве́чныя во Ца́рствии Бо́жием/ наслажда́ются ны́не новому́ченицы и испове́дницы Русстии,/ испо́лнися бо на них обетова́ние Госпо́дне:/ побежда́ющим дам се́сти со Мно́ю на Престо́ле Мое́м.

Да просла́вятся с ли́ки новому́чеников и испове́дников Русских жены́ богому́дрыя земли́ на́шея,/ я́же, мироно́сиц восприе́мша чин и му́жески Христу́ после́довавша,/ страда́ния за и́мя Его́ претерпе́ша/ и ве́рно отце́м, муже́м и бра́тиям на́шим, Христа́ ра́ди му́чимым, послужи́ша./ Сего́ ра́ди ны́не в жи́зни ве́чней вку́пе с ни́ми/ трапе́зы безсме́ртныя наслажда́ются.

Жизнода́вче Го́споди,/ моли́твами новому́чеников и испове́дников Русских/ упоко́й со все́ми пра́ведными верныя рабы́ Твоя́, за и́мя Твое́ пострада́вшия:/ святи́тели и иере́и, мона́хи и мирски́я,/ ста́рыя, ю́ныя и всяк во́зраст, имену́емыя и неимену́емыя,/ я́ко и́стинный сы́ны и дру́ги Бо́жия.

Богоро́дичен: Я́ко взбра́нная Воево́да во́инства новому́чеников и испове́дников Русских,/ держа́вный покро́в и ми́лостивное заступле́ние яви́ла еси́, Пресвята́я Де́во, земли́ на́шей,/ опустоша́емей ско́рбными и безбо́жными наведе́нии./ Сего́ ра́ди ны́не мо́лим Тя:/ прости́ лю́ди согре́шшия и сохрани́ Святу́ю Русь.

Свети́лен новому́чеников:

Я́ко отре́бие ми́ру бы́ша святи́и новому́ченицы и испове́дницы Русстии,/ ка́мением побие́ни бы́ша, претре́ни бы́ша,/ искуше́ни бы́ша, уби́йством меча́ умро́ша,/ свидете́льствующе о Све́те И́стиннем, Иису́се Христе́, Го́споде на́шем.

На хвали́тех стихи́ры новому́чеников, глас 8.

Подо́бен: О, пресла́внаго чудесе́:

О, пресла́внаго чудесе́!/ В после́дняя времена́ возсиява́ют му́ченицы/ и пре́лести мрак отгоня́ют,/ ве́ра христиа́нская ны́не возвыша́ется/ и па́дает нече́стие,/ ра́дуются ве́рнии/ и пра́здник новоявле́нным составля́ют,/ вопию́ще Христу́ Бо́гу:/ му́чеников похвала́ и побе́да Ты еси́, Всеси́льне.

Творе́ние святи́теля Афана́сия Ковро́вскаго:

Ве́ры броня́ми,/ и щито́м благода́ти,/ и креста́ копне́м вооружи́вшеся,/ сопроти́вным си́лам непобеди́ми бы́сте/ и, я́ко Боже́ственнии хра́борницы,/ де́монская ополче́ния победи́вше,/ со А́нгелы лику́ете,/ ве́рныя же заступа́ете, и освяща́ете,/ и спаса́ете, призыва́емии.

О, пресла́внаго чудесе́!/ Чуде́с светлостьми́/ со́лнца светле́йше/ при́сно святи́и сро́дницы на́ши/ све́тят конце́м Ру́сския земли́,/ от невече́рняго Све́та облиста́еми,/ и́хже сия́нии/ о́блацы от страны́ на́шея отгоня́ются ва́рварстии/ и де́мони побежда́ются.

Сла́ва, глас 6:

Новоявле́нный зве́зды днесь/ на церко́вней показа́шася тве́рди,/ во мно́зех ме́стех бы́вший му́ченицы Христо́вы,/ и́хже ублажа́юще, мучениколю́бцы,/ по до́лгу им прирце́м, глаго́люще:/ ра́дуйтеся, благоче́стия утвержде́ние и нече́стия обузда́ние;/ ра́дуйтеся, Руския Це́ркве сла́во и безбо́жных посрамле́ние;/ ра́дуйтеся, о́брази терпе́ния и за Христа́ страда́ния./ Ста́ните, непобеди́мии, посреде, нас у́мне,/ от бед и искуше́ний избавля́ющее,/ и моли́теся о спасе́нии душ на́ших.

И ны́не, Богоро́дичен.

На литурги́и

Проки́мен, Апо́стол, Ева́нгелие и прича́стен воскре́сны гла́са. И новому́чеников проки́мен, глас 7: Бог нам Прибе́жище/ и Си́ла. Стих: Помо́щник в ско́рбех, обре́тших ны зело́. Апо́стол к Ри́мляном, зача́ло 99. Ева́нгелие от Луки́, зача́ло 105 – 106. Коне́ц: В терпе́нии ва́шем стяжи́те ду́ши ва́ша. Прича́стен: Ра́дуйтеся, пра́веднии, о Го́споде:

Моли́тва

О святи́и новому́ченицы и испове́дницы Русстии:/ святи́телие и па́стырие Це́ркве Христо́вы,/ ца́рственнии страстоте́рпцы,/ благове́рнии кня́зие и княги́ни,/ до́блии во́ини, мона́си и мирсти́и,/ благочести́вии му́жие и жены́,/ во вся́цем во́зрасте и сосло́вии за Христа́ пострада́вшии,/ ве́рность Ему́ да́же до сме́рти свиде́тельствовавшии/ и вене́ц жи́зни от Него́ прия́вший!/ Вы во дни гоне́ния лю́таго,/ зе́млю на́шу от безбо́жных пости́гшаго,/ на суди́щах, в заточе́ниих и про́пастех земны́х,/ в го́рьких рабо́тах и вся́ких ско́рбных обстоя́ниих/ о́браз терпе́ния и непосты́днаго упова́ния му́жественне яви́ли есте́./ Ны́не же, в рай сла́дости наслажда́ющеся,/ пред Престо́лом Бо́жиим во сла́ве предстои́те/ и при́сно хвалу́ и хода́тайство со А́нгелы и все́ми святы́ми Триеди́ному Бо́гу возно́сите./ Сего́ ра́ди мы, недосто́йнии,/ мо́лим вас, святи́и сро́дницы на́ши:/ не забу́дите земна́го оте́чества ва́шего,/ грехо́м Ка́инова братоуби́йства,/ поруга́нием святы́нь, безбо́жием и на́шими беззако́нии отягче́ннаго./ Умоли́те Го́спода Сил,/ да утверди́т Це́рковь Свою́ непоколеби́му в ми́ре сем многомяте́жнем и лука́вом;/ да возроди́т в земли́ на́шей дух ра́зума и благоче́стия, дух свя́тости и стра́ха Бо́жия, дух братолю́бия и ми́ра;/ да па́ки бу́дем мы ца́рское свяще́ние,/ род Бо́жий, избра́нный и святы́й,/ при́сно с ва́ми сла́вящий Отца́ и Сы́на и Свята́го Ду́ха во ве́ки веко́в. Ами́нь.