Аллилу́ия или́ тропа́рь.

На Го́споди, воззва́х: стихи́ры му́ченика, глас 4.

Подо́бен: Дал еси́ зна́мение:

Благозва́ния возжела́л еси́,/ нарече́ннаго му́чеником,/ страстоте́рпче многострада́льне, и боле́зни претерпе́л еси́/ де́рзостным ра́зумом,/ к неболе́зненному поко́ю преложи́тися ожида́я/ и по́чести ища́ прия́ти, всеблаже́нне, Небе́сныя,/ и ра́йское селе́ние,/ и Свет Невече́рний, и жи́знь ве́чную.

Ногте́й терза́ния,/ и лю́тая боде́ния, и о́лова вре́ние,/ главы́ отъя́тие/ и свире́пейшия претерпе́л еси́ боле́зни/ и приложи́лся еси́ ли́ку страстоте́рпец, ра́дуяся, многострада́льне./ Те́мже ле́тнее твое́ соверша́ем торжество́,/ страда́льче Вонифа́тие,/ А́нгелом собесе́дниче.

Раба́ тя предпосла́вши,/ Боже́ственнаго влады́ку восприя́/ Аглаи́да, Вонифа́тие./ Страстьми́ облада́вша,/ ца́рствовавша над мучи́тели,/ низло́жша враги́ и побе́ды венце́м оде́янна./ Те́мже храм тебе́ святы́й и прекра́сен созда́вши,/ в не́мже положи́ла есть, свяще́нно восхваля́ющи тя.

И́ны стихи́ры Пресвяте́й Богоро́дице, глас и подо́бен то́йже:

Одожди́ ми, Влады́чице,/ Твоея́ ми́лости бе́здну,/ и опальшееся зно́ем страсте́й се́рдце мое́,/ я́ко ми́лостива, напои́, Отроко́вице,/ и умиле́ния ка́пли точи́ти/ непреста́нно сотвори́, молю́ся,/ и́миже утеше́ния сподо́блюся, Чи́стая,/ е́же получи́ти и́мут/ и́же и́скренно пла́кавшийся.

Де́монскими коле́блема прило́ги/ и в ров поги́бели вве́ржена, уще́дри, Влады́чице,/ и утверди́ мя на ка́мени доброде́телей,/ и, сове́ты враго́в разори́вши,/ сподо́би мя твори́ти повеле́ния Сы́на Твоего́ и Бо́га на́шего,/ я́ко да получу́ оставле́ние в День суда́.

В разбо́йники впадо́х/ скверноуби́йственныя, Всенепоро́чная,/ и нетле́нныя оде́жды Вы́шния све́тлости/ сих нахожде́ньми совлече́н бых, Отрокови́це,/ и от них неми́лостивно уязви́хся,/ и низве́ржен бых в ме́сто озлобле́ния е́ле жив,/ но предвари́, и ру́ку твою́ простри́,/ и воздви́гни мя, молю́ся.

Сла́ва, и ны́не, глас и подо́бен то́йже:

На одре́ низлежу́ уны́ния, Всенепоро́чная,/ и ле́ностно прохожду́ житие́,/ и ужаса́юся конца́ моего́ вре́мене, Богоро́дице,/ да не, я́коже лев, неща́дно расто́ргнет/ смире́нную мою́ ду́шу змий вселука́вый./ Те́мже Твое́ю бла́гостию,/ пре́жде конца́ предвари́вши,/ к покая́нию мя воздви́гни.

Крестобогоро́дичен.

Подо́бен: Я́ко до́бля:

Распина́ема Христа́ Человеколю́бца ви́дящи, Пречи́стая,/ и ре́бра ископова́ема копие́м,/ пла́чущи, вопия́ше:/ что сие́, Сы́не Мой?/ что Ти безблагода́тнии лю́дие возда́ша,/ за я́же сотвори́л еси́ до́брая им,/ и тщи́шися безча́дствовати Мя, Вселюбе́знейший?/ Удивля́юся, Благоутро́бне, Твоему́ во́льному распя́тию.

Тропа́рь, глас 4:

К сосло́вию по́слан му́чеников,/ му́ченик был еси́ и́стинен,/ пострада́в за Христа́ крепча́йше, всехва́льне,/ мощми́ же возврати́лся еси́ ве́рою посла́вшей тя, Вонифа́тие блаже́нне,/ моли́ Христа́ Бо́га прия́ти нам грехо́в проще́ние.

НА У́ТРЕНИ

Оба кано́на Окто́иха и свята́го на 4, глас 4. его́же краегране́сие: Ве́рне тя пою́, му́чениче пресве́тле. Творе́ние Ио́сифено

Песнь 1

Ирмо́с:

Триста́ты кре́пкия,/ Рожде́йся от Де́вы,/ безстра́стия во глубине́ души́ тричастное потопи́, молю́ся,/ да Тебе́, я́ко в тимпа́не,/ во умерщвле́ние телесе́/ побе́дное воспою́ пе́ние.

Усе́рдным по́мыслом по́двигом ревнова́в до́блих страда́льцев,/ пострада́л еси́ кре́пко и зми́я умертви́л еси́ страда́нии твои́ми живоно́сными,/ страда́льче Вонифа́тие, святы́х А́нгелов собесе́дниче.

Ви́дев на земли́ вра́жию лесть, излия́нну лю́те, до́блий страда́льче,/ ду́шу распали́в жела́нием Боже́ственнейшим,/ вшел еси́ в три́знище небоя́зненным, треблаже́нне, мудрова́нием.

Му́дростию Боже́ственною просвеща́емый, блаже́нне,/ нему́дрыя враги́ объюро́дил еси́, Христа́ возвеща́я,/ дебельство́м пло́ти уподо́бльшася,/ и́мже яви́тися восхоте́, Вонифа́тие, му́чениче многострада́льне.

Богогоро́дичен: Го́ру Бо́жию, ю́же прови́де Дании́л,/ ски́нию мы́сленную, Мари́ю Чи́стую, сла́вы свяще́ние,/ трапе́зу, Боже́ственный хлеб вме́щшую,/ вси ве́рнии, единому́дренно воспои́м.

Песнь 3

Ирмо́с:

Я́ко непло́ды ро́ди от язы́к Це́рковь,/ и мно́гое в ча́дех изнемо́же со́нмище,/ чу́дному Бо́гу на́шему возопии́м:/ Свят еси́, Го́споди.

Я́коже возжеле́л еси́, сла́вне, свобо́ду Вы́шнюю,/ от и́га рабо́ты избавля́ешися,/ страсте́м честны́м поревнова́в, сла́вне,/ и́же за милосе́рдие раба́ бы́вшаго.

Плотски́х вы́шший я́влься мудрова́ний измене́нием Боже́ственным,/ внеза́пу в сяк прило́г лю́тых претерпе́л еси́, ра́дуяся,/ му́чениче Вонифа́тие.

Тебе́ сама́го отве́рглся еси́,/ и к подвиго́м и боре́нием врага́ , изше́л еси́,/ Креста́ ору́жием укрепи́вся, и, победи́тель быв,/ просла́вился еси́, му́чениче Вонифа́тие.

Богоро́дичен: Себе́ Сама́го истощи́,/ Оте́ческих не истощи́в во чре́ве Твое́м недр, пресу́щный Бог/ и Твой Сын бысть, Всенепоро́чная,/ спаса́я челове́чество.

Конда́к, глас 4.

Подо́бен: Вознесы́йся:

Изы́де к прия́тию страстоте́рпческих моще́й и стра́ждущих зако́нне ве́ры ра́ди зря,/ показа́л еси́ му́жески кре́пость свою́,/ устреми́вся на стра́сти испове́данием во Христа́,/ и́же прие́м по́честь побе́ды твоего́ страда́ния,/ Вонифа́тие, при́сно моли́ за ны.

Седа́лен, глас 4.

Подо́бен: Вознесы́йся:

К сосло́вию по́слан му́чеников, му́ченик был еси́ и́стинен,/ пострада́в за Христа́ крепча́йше, всехва́льне,/ бре́мя же, блаже́нне, отда́лся еси́ ве́рою/ посла́вшей тя, Вонифа́тие блаже́нне./ Но приле́жно моли́ прийти всем согреше́ний соверше́нное проще́ние.

Сла́ва, и ны́не, Богоро́дичен:

Грехолюби́в сый, молю́ Тя, безгре́шнаго Бо́га ро́ждшую,/ взе́млющаго грехи́ ми́ра, Пречи́стая,/ многогре́шную ду́шу мою́ уще́дрити/ и грехи́ моя́ мно́гия очи́стити:/ гре́шным бо Ты еси́ очище́ние, и спасе́ние ве́рным, и заступле́ние.

Крестобогоро́дичен:

Из Безнача́льнаго Отца́ рожде́ннаго,/ напосле́док Тя пло́тию Ро́ждшая, на Кресте́ ви́сяща зря́щи, Христе́,/ увы́ Мне, Любе́знейший Иису́се, вопия́ше:/ ка́ко сла́вимый я́ко Бог от А́нгел,/ от беззако́нных ны́не челове́к, Сы́не, хотя́ распина́ешися?/ Пою́ Тя, Долготерпели́ве.

Песнь 4

Ирмо́с:

Любве́ ра́ди, Ще́дре, Твоего́ о́браза/ на Кресте́ Твое́м стал еси́,/ и раста́яшася язы́цы:/ Ты бо еси́, Человеколю́бче,/ кре́пость моя́ и хвале́ние.

Ублажа́я стра́ждущих терпе́ние,/ подо́бием, му́чениче, честны́х страда́ний/ сим уподо́бился еси́, Богому́дре пребога́те.

Иды́й ве́рою к му́чеников Боже́ственному сосло́вию, блаже́нне,/ тебе́ сама́го жела́ющей бре́мя досточу́дное, Богому́дре,отда́л еси́.

Очище́н, я́коже зла́то, му́чениче, я́зв горни́лом,/ чисте́йший яви́лся еси́,/ нося́ Зижди́теля страсте́й изображе́ние.

Богоро́дичен: Де́вство по Рождестве́ запеча́танно познава́ющи, Отрокови́це,/ несказа́нно рожде́ннаго Сло́ва из боку́ Твое́ю ве́рно велича́ла еси́.

Песнь 5

Ирмо́с:

Просвеще́ние Твое́, Го́споди, низпосли́ нам/ и от мглы прегреше́ний разреши́ ны, Бла́же,/ Твой ми́р да́руяй.

Я́ко светоза́рная возше́л еси́ звезда́ от за́пад,/ и заше́л еси́, му́чениче, страда́ньми терпели́вно,/ а́бие к за́падом возсия́л еси́, озаря́я концы́.

Му́ченически подвиза́лся еси́,/ ногте́й терза́ния, о́стрыми, му́чениче, тростьми́ сбода́емь,/ и лука́ваго жа́ла ве́рно притупля́я благода́тию.

Вра́жия изнемого́ша, Богому́дре,на тя кова́рствия,/ и́бо к Бо́гу воззре́нием неукло́нным/ плотски́я ра́ны, я́коже безпло́тен, терпе́л еси́.

Богоро́дичен: Скве́рны вся́кия омы́й, Де́во, ду́шу мою́, вопию́ Ти,/ и спаси́ мя, Чи́стая,/ я́же и́стиннаго Бо́га Спа́са на земли́ вопло́щшая.

Песнь 6

Ирмо́с:

Возопи́, прообразу́й погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ сил.

Бие́мый, ра́нами плотски́ми уязви́л еси́ безбо́жныя,/ неисце́льно неду́гующия неве́дением,/ и боля́щим яви́лся еси́ врач, страда́льче Вонифа́тие.

Возвыша́емь к Бо́гу, блаже́нне, прило́гом по́двигов,/ враги́ неви́димыя разрази́л еси́/ и низринове́нным помо́щник, страстоте́рпче, был еси́.

Влачи́мь по земли́, я́коже ка́мень многоце́нен, страда́льче,/ пре́лести низложи́л еси́ утвержде́ние,/ ве́рных же сердца́ наипа́че ве́рою утверди́л еси́.

Богоро́дичен: Купина́ Тя прообража́ше, Всенепоро́чная, пе́рвее,/ горя́щи и ника́коже опаля́ема, Пречи́стая,/ и́бо, я́коже она́, не опали́лася еси́, Бо́га вопло́щши.

Конда́к, глас 4.

Подо́бен: Яви́лся еси́:

Свяще́ние непоро́чное самово́льне Тебе́ приве́л еси́, и́же от Де́вы тебе́ ра́ди роди́тися хотя́щему,/ свя́те венчено́сче, прему́дре Вонифа́тие.

Песнь 7

Ирмо́с:

Авраа́мстии иногда́ в Вавило́не о́троцы/ пе́щный пла́мень попра́ша,/ пе́сньми взыва́юще:/ отце́в на́ших Бо́же, благослове́н еси́.

Коле́н не преклони́в истука́нным,/ во искуше́ние ве́рглся еси́ велича́йшее, и́стинно, му́чениче, в пещь,/ в не́йже ороша́емый, благода́рствовал еси́ Христу́ во ве́ки.

Разори́ти кре́пость твоего́ испове́дания тща́ся,/ льстивому́дренный во вну́тренняя твоя́ клоко́чущее о́лово неми́лостивно влива́ет,/ но я́ве посрами́ся.

Посе́чен быв усе́рдно в честну́ю твою́ главу́,/ врага́ льсти́ваго многоко́зненную главу́ отсе́кл еси́ твоего́ му́жества мече́м,/ му́чениче Христо́в Богому́дре.

Богоро́дичен: Да гла́сы подоба́ющими песносло́влю Тя, Отрокови́це,/ страсте́й мя изба́ви моли́твами Твои́ми,/ бед же и скорбе́й и лука́вых челове́к,/ озло́бити мя и́щущих.

Песнь 8

Ирмо́с: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.

Поле́зно твое́ де́лая спасе́ние Христо́с, Вонифа́тие,/ взыска́юща моще́й добропобе́дных му́чеников, тя укрепля́ет,/ е́же ве́рно взыскал еси́ сам бы́ти.

Блаже́нней госпожи́ блаже́нно сокро́вище пода́лся еси́, блаже́нне,/ и́мже обогати́вшися, поя́ше весе́лым се́рдцем:/ вся дела́, благослови́те, по́йте Го́спода.

Со тща́нием сла́вная жена, воздви́гши храм свяще́ннейший,/ тя в нем положи́, су́щий Боже́ственныя Тро́ицы храм,/ страстоте́рпче Христо́в Вонифа́тие.

Умертви́вся за любо́вь Зижди́теля, умерщвля́ющаго стра́сти тлетво́рныя,/ животворя́й моли́твою твое́ю я́сно вопию́щия:/ вся дела́, благослови́те, по́йте Го́спода.

Богоро́дичен: На Тя, Чи́стую, Пребоже́ственный, низше́д, я́коже весть,/ воплоти́ся и челове́ки обожи́, песнопою́щия, Де́во:/ вся дела́, благослови́те, по́йте Го́спода.

Песнь 9

Ирмо́с:

Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови Благослове́ние процвела́ еси́./ Тем Тя вси велича́ем.

Ви́девши тя, бре́мя свяще́нное, ра́довашеся, вопию́щи, приснопо́мнимая:/ раба́ посла́х тя, блаже́нне, господи́на и́стинна прие́млю,/ рабо́ты мя зол избавля́юща твои́ми благоприя́тными мольба́ми.

Я́ко крин, во удо́лиих мы́сленных процве́л еси́ му́чеников, Вонифа́тие,/ я́коже фи́никс, возвы́сился еси́,/ я́ко кедр, позна́лся еси́ миродыха́нен,/ яви́лся еси́ избра́нный, я́ко кипари́с,/ благово́нствуя ду́ши на́ша.

Днесь па́мять твоя́ нам возсия́, страстоте́рпче,/ я́коже со́лнце, сия́нием Боже́ственных дарова́ний,/ просвеща́ющи ду́ши пою́щих тя, страсте́й же мглу отгоня́ющи,/ му́чениче Богому́дре всеблаже́нне.

Я́ко со́лнце от за́пад, возсия́л еси́/ и восто́чнаго гра́да дости́гл еси́,/ иде́же пострада́в и сме́ртию заше́д, к жи́зни восте́кл еси́/ и Рим све́тлый дости́гл еси́,/ сего́ огражда́я мольба́ми твои́ми.

Богоро́дичен: Све́том мя озари́ Твои́м, Всенепоро́чная,/ во тьме содержи́маго грехо́вней, Богоро́дице,/ и пода́ждь во дне ходи́ти Боже́ственных повеле́ний, Богоневе́сто,/ я́ко да пою́ Тя, Всепе́тую.