На Го́споди, воззва́х:стихи́ры на 6, глас 1.

Подо́бен: Небе́сных чино́в:

Пребы́в в ве́ре, я́коже в виногра́де Христо́ве,/ во вре́мя прия́л еси́ де́лание боле́зней,/ му́чениче, многообра́зно,/ те́мже плод спасе́ния израсти́л еси́,/ царю́ тезоимени́тно и де́лателю,/ священному́чениче Кли́менте сла́вне.

Четверосугу́бна седми́ца твоя́ муче́ния, му́дре,/ честна́ яви́ся вои́стинну и Бо́гу, и А́нгелом, и всем челове́ком,/ огня́ у́бо го́рькаго, и сече́ния, и ра́ны мно́гия,/ гра́ды обходя́ и страны́, иску́с прие́м,/ не отступи́л еси́ любве́ Христо́вы.

Па́стырски просия́в, священному́чениче Христо́в,/ страда́льческия по́двиги подъя́л еси́ до́блественне:/ еди́н чрез обоя́ вене́ц прие́м,/ во обе́их украша́емь,/ свяще́нстве и боле́знех страда́льческих. Те́мже моли́ спасти́ся нам.

И́ны стихи́ры, глас 2.

Подо́бен: Егда́ от Дре́ва:

Лоза́ виногра́да живо́тнаго яви́лся еси́,/ та́инственным де́ланием окопова́ема,/ боле́зньми у́бо по́стничества, о́тче, посека́ема,/ мече́м же объе́млема муче́ния,/ вино́ умиле́ния нам раствори́л еси́,/ и́мже ны́не насыща́еми вси,/ ве́рою всеевяще́нную па́мять твою́ пра́зднуем, блаже́нне.

Егда́ священноде́йствовал еси́/ Стра́шную, и Соверше́ннейшую Же́ртву, и Преми́рную,/ тогда́ прине́слся еси́, священноде́йствуемь,/ твою́ же кровь, всему́дре,/ преусе́рдным се́рдцем кро́ви примеси́л еси́ Влады́ки твоего́,/ е́юже ты окропля́емь, блаже́нне,/ весь чист показа́лся еси́, весь свяще́ннейший, Богоглаго́ливе.

Жря А́гнца Бо́жия,/ грехи́ ми́ра очищаю́щаго/ и тлю и смерть истреби́вшаго,/ я́ко овча́ непоро́чно, поже́рлся еси́, Богому́дре,/ сра́слен быв подо́бием, блаже́нне, Живоно́сныя сме́рти./ Ны́не же Его́ Ца́рствия, достоблаже́нне, получи́л еси́.

Сла́ва, глас 8:

Време́н четвери́щно обхо́д, Богозва́нне,/ седмоусугу́бил еси́, бие́мь, стру́жемь,/ изменя́я гра́ды и страны́, распина́емь за Христа́,/ но ни́же огнь, ниже́ меч, ни́же ра́ны/ души́ твоея́ разреши́ша тве́рдость,/ погуби́л же еси́ де́монов кре́пость,/ священному́чениче Кли́менте./ Тем моли́ся Христу́/ спасти́ся душа́м на́шим.

Ины́не, Богоро́дичен и́ли Крестобогоро́дичен.

Подо́бен:Му́ченицы Госпо́дни:

Не терплю́, Ча́до, ви́дети Тя, на Дре́ве усну́вша,/ бо́дрость всем даю́щаго,/ я́ко да дре́вле преступле́ния плодо́м,/ сном поги́бельным усну́вшим/ Боже́ственную и спаси́тельную бо́дрость пода́си, -/ Де́ва глаго́лаше, пла́чущи, Ю́же велича́ем.

На стихо́вне стихи́ры Окто́иха.

Сла́ва, глас 1. Анато́лиево:

Чу́днаго во свяще́нницех му́ченика Кли́мента/ в до́лгом вре́мени искуше́ние мук/ в при́сно благи́х получи́ти сподо́би сла́дости и бога́тства Боже́ственнаго,/ мно́гия к подвиго́м пома́зав свои́м подо́бием/ и покори́в плоть вы́ше му́дрствовати сме́рти./ К нему́же, ве́рнии, возопии́м:/ великому́чениче сла́вне,/ ко Христу́ моли́твами твои́ми/ ле́тная настоя́ния разреши́ страсте́й на́ших/ и изба́ви от лю́тых моли́твами твои́ми.

И ны́не, Богоро́дичен и́ли Крестобого́родичен.

Подо́бен: Небе́сных чино́в:

У Креста́ предстоя́щи Сы́на и Бо́га Твоего́/ и долготерпе́ние Того́ сматря́ющи,/ глаго́лала еси́, пла́чущи, Ма́ти Чи́стая:/ увы́ Мне, Ча́до сладча́йшее,/ что сия́ стра́ждеши непра́ведно, Сло́ве Бо́жий?/ Да спасе́ши челове́чество.

Тропа́рь, глас 4:

Лоза́ преподо́бства и стебль страда́льчества,/ цвет свяще́ннейший и плод Богода́нный,/ ве́рным, всесвяще́нне, присноцвету́щ, дарова́лся еси́,/ но я́ко му́чеников сострада́лец/ и священнонача́льников сопресто́льник,/ моли́ Христа́ Бо́га/ спасти́ся душа́м на́шим.

На у́трени

О́ба кано́на Окто́иха и свята́го на 4, его́же краегране́сие: Пою́ розгу́ у́мныя лозы́. Творе́ние Феофа́ново, глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/гони́теля фарао́на ви́дя потопля́ема,/ Бо́гу побе́дную песнь, пои́м, вопия́ше.

С Го́рними ли́ки я́ко иере́й и я́ко му́ченик сла́вен Христу́ предстоя́,/ приле́жно моли́ получи́ти осия́ния твоего́ восхваля́ющим тя.

Просте́ртыя по́двиги по земли́ препроводи́в, преподо́бне,/ Ца́рствия Небе́снаго сподо́бился еси́ вене́ц прия́ти/ и ве́чную жизнь и неразори́мую.

Изба́влен стра́стию Безстра́стнаго,/ страда́нием потща́лся еси́ к Нему́ востещи́,/ подража́тель быв я́ве страсте́й Его́, А́нгелов ссе́льниче.

Богоро́дичен:Преиспещре́нна добро́тою доброде́телей, Богома́ти Пречи́стая,/ Бо́га и́стиннаго доброде́тель зачала́ еси́ нам,/ исто́чник благи́х источа́юща.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Красны́ прине́сл еси́ плоды́,/ розга́ жизноно́сныя быв Лозы́,/ и, сия́ му́ченическими украси́в блиста́ньми,/ Спа́су всех освяти́л еси́.

Па́вла яви́лся еси́ подража́тель,/ всю вселе́нную претека́я, всеблаже́нне, креще́нием Богоде́льным/ и кро́вию кропле́ния освяща́я испове́дания твоего́.

Богоро́дичен: Несть непоро́чна, я́коже Ты, Всечи́стая Богоро́дице:/ еди́на бо от ве́ка Бо́га и́стиннаго и всех Соде́теля,/ Бо́га Сло́ва, па́че сло́ва родила́ еси́.

Ин конда́к Кли́мента, глас 4.

Подо́бен: Яви́лся еси́ днесь:

Сад благоцвету́щ израсте́ во оте́чествии свое́м,/ красе́н плод прозябе́ по вселе́нней во вре́мя страда́ний твои́х,/ те́мже па́мять твою́ чтим, преподо́бне Кли́менте./ Сего́ ра́ди источа́еши ми́ро, веселя́щее ду́ши на́ша.

Седа́лен, глас 8.

Подо́бен: Прему́дрости:

От Анки́ры звезду́ Богосия́нную,/ Каппадо́ков похвалу́,/ благоче́стно Кли́мента почти́м, многострада́льнаго му́ченика,/ свяще́нников сла́ву, преподо́бных похвалу́,/ си́рых предста́теля, ни́щих побо́рника,/ и́же и, пострада́в в два́десять осьмо́е ле́то, мно́гия просвети́,/ и оте́чество освяти́ многострада́льный му́ченик,/ мо́лится же Христу́ Бо́гу прегреше́ний оставле́ние дарова́ти/ чту́щим любо́вию святу́ю па́мять его́.

Сла́ва,и ны́не, Богоро́дичен:

Я́ко Де́ву и Еди́ну в жена́х, Тя, без се́мене ро́ждшую Бо́га пло́тию,/ вси блажи́м, ро́ди челове́честии:/ Огнь бо всели́ся в Тя Божества́,/ и я́ко Младе́нца мле́ком пита́еши Зижди́теля и Го́спода./ Тем, А́нгельский и челове́ческий род,/ досто́йно сла́вим Пресвято́е Рождество́ Твое́ и согла́сно вопие́м Ти:/ моли́ Христа́ Бо́га прегреше́ний оставле́ние дарова́ти/ покланя́ющимся ве́рою Пресвято́му Рождеству́ Твоему́.

Крестобогоро́дичен:

А́гнца, и Па́стыря, и Избави́теля/ А́гница зря́щи на Кресте́, восклица́ше, пла́чущи,/ и, го́рько рыда́ющи, вопия́ше:/ мир у́бо ра́дуется, прие́мля Тобо́ю избавле́ние,/ утро́ба же Моя́ гори́т, зря́щи Твое́ распя́тие,/ е́же терпи́ши за милосе́рдие ми́лости./ Долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и дару́й согреше́ний оставле́ние/ ве́рою пою́щим Боже́ственныя стра́сти Твоя́.

Песнь 4

Ирмо́с: Христо́с моя́ си́ла,/ Бог и Госпо́дь, честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Обте́к всю зе́млю, просте́рл еси́ подвиго́в розгу́,/ страда́льческое иска́пая ра́дование и благово́ния сла́дость,/ страстоте́рпче всеблаже́нне.

Верт зря́ще твоего́ страда́ния,/ ран цве́ты, блаже́нне, твои́х, ра́дующеся, пожина́ем/ и разли́чными чудесы́ чу́вства обвеселя́ем.

Дне был еси́ сын, чу́дне, и Све́та Невече́рняго,/ непреста́нно озаря́емь Трисо́лнечным Све́том/ и сия́нием пропове́дания.

Богоро́дичен: Мари́е Всечи́стая,/ чистоты́ бы́вши прия́телище вмести́тельное Боже́ственнаго вселе́ния,/ душе́вную мою́ скве́рну и окаля́ние истреби́.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́вного взыва́юща.

Ра́ны, всему́дре, терпя́ многоле́тныя и должа́йшия,/ многострада́телен был еси́,/ ны́не же нетле́ннаго блаже́нства сла́дость насле́довал еси́ ве́чнующую.

Ве́ру, я́ко анки́ру тве́рдую,/ и наде́жду, и любо́вь основа́ние положи́в,/ Честне́й Тро́ице себе́ возложи́л еси́ храм освяще́н, о́тче всебога́те.

Богоукра́шенный сопру́т пресве́тлый подвиза́ся на три́знищи страда́ния,/ прие́м ве́чную жизнь, со А́нгелы лику́ет и сра́дуется.

Богоро́дичен: Спасти́ хотя́ от тли истле́вшее челове́ческое естество́,/ Зижди́тель и Госпо́дь во утро́бу очище́ну Святы́м Ду́хом всели́вся,/ неизрече́нно вообрази́ся.

Песнь 6

Ирмо́с: Жите́йское мо́ре/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/Многоми́лостиве.

Зако́нно пострада́вше, венцы́ от руки́ Влады́чния прия́сте,/ даро́в разли́чных раздаяния, и благода́ть исцеле́ний,/ и ве́рных врачева́ти неду́ги.

Житие́ Боже́ственное,/ подвиго́в пробавле́ние, ран изпростре́ние,/ благоле́пия венча́ние та́йное, и добро́ты диади́ма,/ и оде́жда нетле́ния тебе́ бы́ша.

Богоро́дичен: Всечи́стая Влады́чице, ро́ждшая земны́м ко́рмчия Го́спода,/ страсте́й мои́х непостоя́нное и лю́тое утоли́ смуще́ние/ и тишину́ пода́ждь се́рдцу моему́.

Конда́к,глас 4.

Подо́бен: Яви́лся еси́ днесь:

Лозы́ был еси́ честна́я розга́ Христо́ва,/ многострада́льне Кли́менте всехва́льне, я́влься,/ со стра́ждущими же взыва́л еси́:/ Ты му́чеников, Христе́, све́тлое ра́дование.

И́кос:

От младе́нства свяще́нно воздое́ннаго,/ розгу́ лозы́ Царя́ Христа́, пе́сньми почти́м ве́рно:/ той бо яви́ся весе́лием и́стинно и добро́тою че́стен,/ в му́ках и страда́ниях непрекло́нен,/ во свяще́нстве, воображе́н иера́рх и о́бщник Бо́жия Ца́рства,/ и́дольская бо ка́пища и я́рость мучи́телей в ничто́же вмени́в,/ на три́знищи Еди́наго ра́достию Спа́са испове́дуя:/ Ты му́чеников, Христе́, све́тлое ра́дование.

Песнь 7

Ирмо́с: О́троцы в Вавило́не/ пе́щнаго пла́мене не убоя́шася,/ но, посреде́ пла́мене вве́ржени, ороша́ема, поя́ху:/ благослове́н еси́, Го́споди, Бо́же оте́ц на́ших.

Заре́ю муче́ния вселе́нную уясни́л еси́,/ воспева́я Христу́ мы́сли и души́ чистото́ю:/ благослове́н еси́, Го́споди, Бо́же отце́в на́ших.

Твои́х исправле́ний свяще́ннейшее торжество́,/ Небе́сным све́том сия́ющо, озаря́ет зову́щия:/ благослове́н еси́, Го́споди, Бо́же отце́в на́ших.

Богоро́дичен: Му́дрости прему́дрыя, Де́во, Ма́ти была́ еси́,/ вся му́дре пра́вящия есте́ственною бла́гостию./ Благослове́н, Всечи́стая, Плод Твоего́ чре́ва.

Песнь 8

Ирмо́с: За зако́ны оте́ческия/ блаже́ннии в Вавило́не ю́ноши предбе́дствующе,/ царю́ющаю оплева́ша повеле́ние безу́мное,/ и, совоку́плени и́мже, не свари́шася огне́м,/ Держа́вствующему досто́йную воспева́ху песнь:/ Го́спода по́йте, дела́, и превозноси́те во вся ве́ки.

Яви́вшеся светле́йшии на земли́ свети́льницы,/ озаря́ете твердь, всебога́тии, честны́я Це́ркве,/ на Небесе́х же сия́нием страда́ния ва́шего/ перворо́дных торжество́, весели́теся, вопию́ще:/ Го́спода по́йте, дела́, и превозноси́те во вся ве́ки.

С весе́лием ра́достную твои́х подвиго́в па́мять ны́не пра́зднуем:/ я́коже бо безпло́тен, претерпе́л еси́ ран треволне́ния,/ но вме́сто сих ве́чнующую пи́щу досто́йно восприя́л еси́, воздая́ние бога́тное, -/ Го́спода по́йте, дела́, – взыва́я, – и превозноси́те во вся ве́ки.

Во упещре́нную и пресве́тлую оде́жду ты сла́вы оде́явся вме́сто ду́ха, пребога́те, лю́таго уны́ния,/ вме́сто мук А́нгельское пребыва́ние премени́л еси́,/ прие́м Жи́зни Присносу́щныя, -/ Го́спода по́йте, дела́, – зовы́й, – и превозноси́те во вся ве́ки.

Богоро́дичен: Из Присносу́щнаго Роди́теля Соприсносу́щное Сло́во и Сразумева́емое,/ напосле́док же веко́в вопло́щся от Де́вы,/ челове́ческий весь богосоде́ла зрак, Себе́ по Ипоста́си неслия́нно соедини́в,/ Го́спода по́йте, дела́, и превозноси́те во вся ве́ки.

Песнь 9

Ирмо́с: Бо́га челове́ком невозмо́жно ви́дети,/ на Него́же не сме́ют чи́ни А́нгельстии взира́ти./ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Ба́нею светови́днаго креще́ния соверши́вся, и свяще́нства ма́стию,/ и му́ченическою кро́вию омы́вся, блаже́нне,/ укра́шен, ра́дуяся, восте́кл еси́ к Небе́сным во́инством, Богоблаже́нне.

Святы́х му́чеников вене́ц – Сло́во Бо́жие,/ венце́м дарова́ний украси́ твой святы́й верх, чу́дне,/ Пра́вды незаходи́мое Со́лнце,/ Его́же ра́ди по́двиги до́лгия, ра́дуяся, претерпе́л еси́.

Богоро́дичен: Сын и Сло́во Бо́жие Безнача́льное,/ вопло́щся, Сын Де́вы быва́ет благоволе́нием Отца́ и Ду́ха Боже́ственнаго соде́йством,/ весь обнови́ истле́вший мой зрак, я́ко Всеси́лен.

Свети́лен.

Подо́бен: Жены́, услы́шите:

Я́коже Па́вел апо́стол, зе́млю обте́кл еси́ всю,/ и до́лгими твои́ми по́двиги просте́рл еси́, Кли́менте, розгу́,/ и мре́жею ве́ры уловля́еши Агафанге́ла, соо́бщника и сму́ченика,/ блага́го веща́ния тезоимени́тнаго страда́льца.

Богоро́дичен:

Ты мое́ заступле́ние, Пречи́стая, и кре́пкое прибе́жище,/ Ты и предста́тельница, и покро́в, и к Тебе́ припа́даю, зовы́й:/ от бед мои́х изба́ви мя, я́ко Ра́дость ро́ждшая,/ и от огня́ исхи́ти ве́чнаго, Де́во,/ на Тя наде́ющагося.

На литурги́и

Блаже́нны Окто́ихаи свята́го песнь 3-я на 4. Проки́мен, глас 7: Честна́ пред Господа́м/ смерть преподо́бных Его́. Стих: Что возда́м Го́сподеви о всех, я́же возда́де ми? Апо́стол ко Еврее́м, зачало 334. Аллилу́йя, глас 2: Свяще́нницы Твои́ облеку́тся в пра́вду,/ и преподо́бнии Твои́ возра́дуются. Ева́нгелие от Иоа́нна, зачало 36. Прича́стен. В память ве́чную бу́дет пра́ведник:

На ма́лой вече́рни

На Го́споди, воззва́х: стихи́ры на4, глас 1.

Подо́бен: Всехва́льнии му́ченицы:

Избра́нниче Бо́жий!/ От ю́ности твоея́ испо́лнен сый ду́ха ра́зума и благоче́стия,/ ду́ха стра́ха Госпо́дня,/ презре́л еси́ вся су́етная и тле́нная,/ в пусты́ни же водворя́яся,/ я́ко А́нгел, во пло́ти был еси́,/ Генна́дие блаже́нне,/ те́мже, к тебе́ ве́рою притека́юще, мо́лимся:/ моли́ Христа́ Бо́га спасти́ся душа́м на́шим.

Уподо́бился еси́ купцу́, и́щущему би́сера многоце́ннаго,/ оста́вль бо кров о́тчий/ и вменя́я вся тщету́ бы́ти,/ да Христа́ приобря́щеши,/ Тому́ после́довал еси́,/ Его́ ра́ди стра́сти и озлобле́ния претерпе́л еси́,/ с Ни́мже и прославля́ешися днесь, о́тче Богому́дре.

Прии́м вся ору́жия Бо́жия,/ препоя́сав чре́сла твои́ и́стиною,/ обо́лкся в броня́ пра́вды/ и обу́в но́зе в угото́вание благовествова́ния ми́ра,/ над все́ми же восприи́м щит ве́ры,/ возмо́гл еси́ вся стре́лы лука́ваго разжже́нныя угаси́ти./ Сего́ ра́ди сла́вяще Го́спода,/ и мы, гре́шнии, мо́лимся,/ изба́вится нам моли́твами твои́ми, о́тче преподо́бне,/ от ко́зней вра́жиих, от всех зол и напа́стей.

Сла́ва, глас 6: Прииди́те, ве́рнии, возвесели́мся днесь: (зри Сла́ву вели́кой вече́рни на Го́споди, воззва́х.

И ны́не, Богоро́дичен:

Творе́ц и Избави́тель мой,/ Христо́с Госпо́дь,/ вопло́щся из Тебе́, Пречи́стая Ма́ти и Де́во,/ пе́рвую кля́тву, я́же от Ада́ма, разруши́./ Те́мже немо́лчно со Арха́нгелом вопие́м Ти:/ ра́дуйся, Благода́тная, ра́дуйся, Влады́чице,/ ми́ра Засту́пнице, Покро́ве и спасе́ние душ на́ших.

На стихо́вне стихи́ры, глас 2.

Подо́бен: До́ме Евфра́фов:

Подвиза́йся до́брым по́двигом ве́ры,/ нощь же и день в терпе́нии и моли́тве пребыва́я,/ преподо́бне Генна́дие,/ тече́ние твое́, я́ко добр во́ин, сконча́в,/ обетова́ния ве́чнаго насле́дия прия́л еси́.

Стих: Честна́ пред Го́сподем/ смерть преподо́бных Его́.

Отложи́в ве́тхаго челове́ка с дея́ньми его́,/ обновля́лся же вы́ну ду́хом ума́ твоего́,/ обле́клся еси́, о́тче всечестны́й,/ в но́ваго челове́ка, созда́ннаго по Бо́гу,/ в пра́вде и в преподо́бии и́стины.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Блажи́м тя, благоугоди́вшаго пред Го́сподем,/ блажи́м сохра́ншаго от ю́ности/ чистоту́ душе́вную и теле́сную,/ досто́йно есть при́сно ублажа́ти тя,/ преподо́бне Генна́дие.

Сла́ва, глас 8:

Чту́ще тя, преподо́бне: (зри страни́цу 299). И ны́не, Богоро́дичен: Влады́чице, приими́: По Ны́не отпуща́еши:тропа́рь преподо́бному, глас 4: Я́ко пустыннолюби́вая го́рлица: (зри навели́цей вече́рни). Сла́ва, и ны́не, Богоро́дичен: Е́же от ве́ка утае́нное:

На вели́цей вече́рни

На Го́споди, воззва́х: стихи́ры, глас 8.

Подо́бен: О, пресла́внаго чудесе́:

Измла́да умудре́н быв Боже́ственным Писа́нием,/ возмога́я же во благода́ти,/ я́же о Христе́ Иису́се, Го́споде на́шем,/ потща́лся еси́, преподо́бне Генна́дие,/ подвиза́тися по́двигом до́брым,/ себе́ иску́сна поста́вите пред Бо́гом,/ де́лателя непосты́дна, ду́хом горя́ща,/ Го́сподеви рабо́тающая./ Те́мже и был еси́ о́браз ве́рным,/ сло́вом и житие́м, лю́бовию, ве́рою и чистото́ю./ Ны́не же водворя́яся в селе́ниих Небе́сных/ и та́мо с ли́ки Безпло́тных сил прославля́я Триипоста́снаго Бо́га,/ моли́, преподо́бне, о рабе́х,/ чту́щих всехва́льную па́мять твою́.

Возгрева́я дар Бо́жий,/ живу́щий в тебе́, о́тче всечестны́й,/ отрева́я же вся́ку жите́йскую суету́,/ очи́стив себе́ от вся́кия скве́рны пло́ти и ду́ха,/ соде́лался еси́ сосу́д в честь,/ освяще́н и благопотре́бен Влады́це,/ на вся́ко де́ло благо́е угото́ван./ Те́мже угото́вася ти неувяда́емый вене́ц Боже́ственныя сла́вы,/ его́же сподоби, Го́споди, и нас, гре́шных,/ моли́тв ра́ди уго́дника Твоего́.

Тала́нты прии́м от руки́ Госпо́дни,/ потща́вся до́бре,/ и други́я приобре́л еси́ и́ми,/ да благоуго́дная сотвори́ши Го́сподеви./ Сего́ ра́ди и услы́шал еси́ от Него́ сладча́йший глас:/ до́брый ра́бе, благи́й и ве́рный,/ вни́ди в ра́дость Го́спода твоего́.

Я́коже иногда́ му́дрыя де́вы,/ прие́мше еле́й в сосу́дех со свети́льники свои́ми,/ изыдо́ша в сре́тение жениху́,/ изше́л еси́, о́тче преподо́бный,/ в пусты́ню Любимогра́дскую,/ нося́ в чи́стом се́рдце свое́м,/ я́ко в сосу́де, благоприя́тном Влады́це,/ свети́льник ве́ры, еле́й же любви́ Боже́ственный,/ и Спа́са Го́спода взыску́я,/ Его́ же и обре́л еси́,/ и в черто́г Его́ вшел еси́./ Те́мже вопие́м ти:/ блаже́н еси́, Генна́дие,/ зва́нный на ве́черю бра́ка А́гнча.

Сла́ва, глас 6:

Прииди́те, ве́рнии,/ духо́вно возвесели́мся днесь,/ я́ко в наро́читом дни пра́здника,/ и, ликовству́юще, возопие́м:/ ра́дуйся, Генна́дие, ве́ры благочести́выя пра́вило;/ ра́дуйся, о́бразе кро́тости духо́вныя;/ ра́дуйся, свети́льниче Пресвяты́я Тро́ицы,/ Е́йже предстоя́ со А́нгелы,/ моли́ся, уго́дниче Бо́жий,/ да благода́ть и мир пода́ст душа́м на́шим.

И ны́не, Богоро́дичен: Кто Тебе́ не ублажи́т:

Вход. Проки́мен дне. И чте́ния преподо́бническая.

На литии́ стихи́ры самогла́сны, глас 2:

Избра́нниче Бо́жий,/ от ю́ности твоея́ испо́лнен сый ду́ха ра́зума и благоче́стия,/ ду́ха стра́ха Госпо́дня,/ презре́л еси́ вся су́етная и тле́нная,/ в пусты́ни же водворя́яся,/ я́ко А́нгел во пло́ти, был еси́,/ Генна́дие блаже́нне./ Те́мже, к тебе́ ве́рою притека́юще, мо́лимся:/ моли́ Христа́ Бо́га/ спасти́ся душа́м на́шим.

Отбе́г, я́же в ми́ре, по́хотныя тли,/ Христу́ после́довал еси́,/ сокро́виществуя основа́ние себе́ добро́ в бу́дущее,/ да прии́меши ве́чную жизнь./ Сего́ ра́ди от ю́ности твоея́, о́тче преподо́бный,/ со стра́хом и тре́петом спасе́ние свое́ соде́лывая,/ был еси́ непоро́чен посреде́ ро́да стропти́ваго и развраще́ннаго/ и яви́лся еси́ мудр наста́вник ста́ду твоему́./ Те́мже и па́мять твою́ пе́сньми духо́вными/ благоле́пно восхваля́ем.

Сла́ва, глас 6:

Влады́чнему богому́дренно внима́я гла́су:/ а́ще кто хощет по Мне ити́,/ да отве́ржется себе́,/ и во́змет крест свой, и по Мне гряде́т, -/ вои́стинну, о́тче Генна́дие,/ себе́ измла́да отве́рглся еси́/ и, взем крест свой,/ Христу́ после́довал еси́,/ вся терпя́ Его́ ра́ди./ Те́мже еще́ сый во пло́ти,/ чудоде́йственныя благода́ти был еси́ прича́стник./ По блаже́нном же успе́нии твое́м,/ насле́дствуя ве́чную жизнь/ и с ли́ки святы́х водворя́яся,/ мо́лиши, преподо́бне, Всесвяту́ю Тро́ицу/ о чту́щих па́мять твою́.

И ны́не, Богоро́дичен: Богоро́дице, Ты еси́ лоза́ и́стинная:

На стихо́вне стихи́ры, глас 2:

Пусты́ню облагоуха́вый доброде́тельми твои́ми,/ благоуха́еши днесь, преподо́бне,/ источа́я исцеле́ния притека́ющим с ве́рою к честны́м моще́м твои́м./ К ни́мже и мы благогове́йно припа́даем, моля́ще/ дарова́ти нам исцеле́ние душе́вное, вку́пе и теле́сное.

Стих: Честна́ пред Го́сподем/ смерть преподо́бных Его́.

Страсте́й бу́рю укроти́вый/ и де́монския по́лчища низложи́вый,/ ны́не с ли́ки святы́х водворя́яся,/ мо́лиши е́же изба́вится ми́рови/ от лю́тых обстоя́ний.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Совле́кся ве́тхаго челове́ка с дея́ньми его́/ и обле́кся в но́ваго,/ обновля́емаго в ра́зум по о́бразу Созда́вшаго его́,/ не лиши́лся еси́ ни во еди́ном дарова́нии./ Иму́щи у́бо дерзнове́ние е́же хода́тайствовать за ны,/ моли́ся ко Го́споду,/ да, оправди́вшеся благода́тию Его́,/ насле́дницы бу́дем жи́зни ве́чныя.

Сла́ва, глас 6:

Прииди́те, ве́рнии,/ духо́вно возвесели́мся днесь,/ я́ко в наро́читом дни пра́здника,/ и, ликовству́юще, возопие́м:/ ра́дуйся, Генна́дие, ве́ры благочести́выя пра́вило;/ ра́дуйся, о́бразе кро́тости духо́вныя./ Ра́дуйся, свети́льниче Боже́ственный Тро́ицы,/ Е́йже предстоя́ со А́нгелы,/ молися, уго́дниче Бо́жий,/ да благода́ть и мир пода́ст душа́м на́шим.

И ны́не, Богоро́дичен, глас то́йже: Творе́ц и Изба́витель мой:

На благослове́нии хле́бов тропа́рь преподо́бнаго, два́жды, и Богоро́дице Де́во: еди́ножды.

Тропа́рь преподо́бнаго, глас 4:

Я́ко пустыннолюби́вая го́рлица,/ от су́етнаго и многомяте́жнаго ми́ра в пусты́ню удали́вся,/ чистото́ю и гове́нием, моли́твами и тружде́нием/ просла́вил еси́ Бо́га в душе́ и телеси́ свое́м./ И та́ко благоче́стно пожи́в,/ яви́лся еси́, преподо́бне Генна́дие, пусты́ни Любимогра́дския украше́ние,/ и́ноком честна́го жития́ о́браз/ и те́плый моли́твенник за всех,/ притека́ющих к тебе́ с ве́рою.

На у́трени

На Бог Госпо́дь: тропа́рь преподо́бнаго, два́жды. Сла́ва и ны́не, Богоро́дичен: Е́же от ве́ка утае́нное:

По 1-м стихосло́вии седа́лен, глас 3:

В зако́не Госпо́днем поуча́яся день и нощь/ и свиде́ния Его́ испыту́я,/ не дал еси́, о́тче, сна очи́ма твои́ма,/ ни ве́ждома твои́ма дрема́ния,/ до́ндеже в се́рдце свое́м обре́л еси́ ме́сто Го́сподеви,/ селе́ние Бо́гу Иа́ковлю./ Сего́ ра́ди, я́ко храм духо́вен, благода́тию Бо́жиею приосене́нный,/ и до́брое приста́нище всем, притека́ющим к тебе́, яви́лся еси́,/ и неоску́дный от че́стных моще́й твои́х/ источа́еши ве́рным исто́чник исцеле́ний.

Сла́ва, и ны́не, Богоро́дичен:

Пречи́стая и Преблагослове́нная Де́во,/ Боже́ственным Рождество́м Твои́м истле́вшее страстьми́ земноро́дных естество́ обнови́ся/ и, свобо́ждся от сме́рти и а́довых уз, приведе́ся к насле́дию жи́зни ве́чныя./ Те́мже Тя вси ро́ди досто́йно ублажа́ют.

По 2-м стихосло́вии седа́лен, глас 6:

Облече́нный в ви́ссон чистоты́ и пра́вды,/ благоуха́я ми́рами доброде́телей/ и ни во еди́ном от благода́тных дарова́ний лиша́яся, всечестны́й Генна́дие,/ ве́мы, я́ко с ли́ки пра́ведных и с со́нмы Безпло́тных сил предстои́ши пред Престо́лом Бо́жиим,/ сла́вя вы́ну Царя́ Сла́вы, Го́спода Вседержи́теля, и моля́ся приле́жно,/ да и мы, многогре́шнии и неключи́мии раби́,/ оправди́вшеся благода́тию Его́,/ насле́дницы бу́дем жи́зни ве́чныя.

Сла́ва,и ны́не, Богоро́дичен:

Непостижи́мому и неизрече́нному,/ ку́пно же сла́вному и ужа́сному та́инству вочелове́чения Бо́га Сло́ва дивя́щеся,/ в преклоне́нии душ и серде́ц на́ших пред Тобо́ю,/ Де́во Пречи́стая, ликовству́я, взыва́ем:/ ра́дуйся, Благода́тная, Госпо́дь с Тобо́ю.

По полиеле́и седа́лен, глас 1:

Скорбь и тесноту́, поноше́ния и озлобле́ния/ Ца́рствия ра́ди Небе́снаго и за И́мя иску́пльшаго нас/ и преда́вшего Себе́ за ны, Го́спода на́шего Иису́са Христа́,/ претерпе́л еси́, о́тче преподо́бне, и не изнемо́гл еси́./ Сего́ ра́ди блаже́н еси́, соблю́дший за́поведи и Бо́гови ве́рный да́же до сме́рти,/ неувяда́емый бо сла́вы вене́ц угото́вася ти./ Его́же, Царю́ и Го́споди, не лиши́ и нас, гре́шных,/ моли́тв ра́ди уго́дника Твоего́, Генна́дия.

Сла́ва, и ны́не, Богоро́дичен:

Я́ко к неруши́мей стене́ и ти́хому приста́нищу,/ к покро́ву Твоему́, Преблагослове́нная Богоро́дице, притека́юще,/ вла́емии волна́ми жите́йских попече́ний, вопие́м:/ Влады́чице, покры́й, соблюди́ и спаси́ на Тя упова́ющий.

Степе́нна 1-й антифон 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же возда́де ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Прии́м вся ору́жия Бо́жия,/ препоя́сав чре́сла твоя́ и́стиною,/ обо́лкся в броня́ пра́вды/ и обу́в но́зе во угото́вание благовествова́ния ми́ра,/ над все́ми же восприи́м щит ве́ры,/ возмо́гл еси́ вся стре́лы лука́ваго разжже́нныя угаси́ти./ Сего́ ра́ди, сла́вяще Го́спода,/ и мы, гре́шнии, мо́лимся, изба́витися нам моли́твами твои́ми,/ всечестны́й Генна́дие,/ от ко́зней вра́жиих, от всех зол и напа́стей.

Кано́н Пресвяте́й Богоро́дице на 6 и преподо́бному Генна́дию на 8, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Вся́кое пло́ти умертви́в мудрова́ние,/ с ли́ки Безпло́тных водворя́ешися в Небе́сных черто́зех,/ преподо́бне Генна́дие.

Озаре́нный Све́том невече́рним/ и Влады́це всех предстоя́,/ моли́, о́тче, изба́витися нам от тьмы грехо́вныя.

Ми́ром доброде́телей облагоуха́нныя святы́я мо́щи твоя́, преподо́бне,/ блаже́нным безсме́ртием благоуха́я,/ источа́ют ве́рным исцеле́ние.

Богоро́дичен: Лю́тыя пло́ти моея́ стра́сти утоли́, Пресвята́я Де́во,/ и заблу́ждшаго мя к ти́хому приста́нищу напра́ви.

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

По́хоть пло́ти, по́хоть оче́с и го́рдость жите́йскую отри́нув,/ яви́лся еси́, Генна́дие, сосу́д че́стен, Влады́це благопотре́бен.

Вери́гами желе́зными, посто́м и бде́нием/ отягчи́л еси́, о́тче, бре́нную, вку́пе же и многомяте́жную плоть,/ да ду́шу свободи́ши от лю́тости страсте́й.

Я́звы Го́спода на те́ле свое́м носи́в и стопа́м Его́ после́довав,/ воше́л еси́ и в ра́дость Его́,/ я́ко благи́й и ве́рный раб.

Богоро́дичен: Пресла́вная Ма́ти Де́во Богоро́дице,/ во утро́бе име́в Преве́чнаго Бо́га,/ вознеси́ к Нему́ моли́твы на́ша, я́ко Блага́я Хода́таица.

Седа́лен, глас 8:

Уподо́бился еси́ купцу́, и́щущему би́сера многоце́ннаго,/ оста́вль бо кров о́тчий/ и вменя́я вся тщету́ бы́ти, да Христа́ приобря́щеши,/ Тому́ после́довал еси́,/ Его́ ра́ди стра́сти и озлобле́ния претерпе́л еси́,/ с Ни́мже и прославля́ешися днесь, о́тче Богому́дре.

Сла́ва, и ны́не, Богоро́дичен:

Мно́гими скорбьми́ и напа́стьми от враг ви́димых и неви́димых вы́ну обдержи́ми су́ще,/ к Тебе́, Ма́ти Бо́жия, притека́юще, мо́лимся:/ не отри́ни нас, на Тя упова́ющих.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Очи́стив себе́ от вся́кия скве́рны пло́ти и ду́ха,/ храм Бо́жий был еси́ на земли́,/ по успе́нии же твое́м во хра́ме невече́рния сла́вы предстои́ши Го́споду.

На всяк день и час моля́ся,/ тружда́яся и при́сно рабо́тая Го́споду,/ пребы́л еси́ непоколеби́м, я́ко утвержде́нный на ка́мени за́поведей Госпо́дних.

Сла́вим Отца́, Сы́на и Свята́го Ду́ха – Бо́га,/ да́рующаго благода́ть святы́м Свои́м/ и тех моли́твами избавля́ющего нас от лю́тых обстоя́ний.

Богоро́дичен: Влады́чице, прии́ми моли́твы на Тя наде́ющихся:/ Твои́ бо есмы рабы́, да не постыди́мся.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́жд нам,/ Человеколю́бче.

От ю́га в се́верныя страны́ прите́кл еси́, преподо́бне,/ горя́ любо́вию Боже́ственною,/ ея́же пла́менем наве́ты вра́жия, я́ко бы́лие травно́е, сожго́шася.

Гра́де Могиле́ве, ра́дуйся!/ Ты бо произрасти́л еси́ благода́тный клас,/ и́мже процвете́ пусты́ня Любимогра́дская/ и сла́вою его́ возвели́чися.

Ве́рнии, прииди́те, ублажи́м преподо́бнаго отца́ на́шего Генна́дия,/ прозорли́вец бо и чудотво́рец в жити́и быв,/ по сме́рти источа́ет исцеле́ния от святы́х моще́й свои́х.

Богоро́дичен: Богода́нный души́ моея свети́льник угаси́х/ и све́та стезе́й Госпо́дних не уве́дех,/ оба́че, Ма́ти Све́та!/ из мра́ка грехо́внаго вопию́:/ озари́ мя, омраче́ннаго, и заблу́ждшаго напра́ви ко приста́нищу спасе́ния.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Е́зеро Су́рское!/ Во́ды твои́ да воспле́щут днесь, я́ко в имени́тый день пра́здника,/ со струя́ми бо твои́ми сли́ястася умиле́нныя сле́зы,/ и́ми́же пла́кася преподо́бный Генна́дий,/ призыва́я благослове́ние земле Русстей и сыново́м ея́.

Кладенцы́, иско́паннии преподо́бным,/ и́не вся рук его́ тружде́ния,/ да науча́т нас, ка́ко подоба́ет умерщвля́ти плоть,/ рабо́тая при́сно Го́сподеви.

Я́звы Го́спода Иису́са и Крест Его́, я́ко вене́ц злат, с ра́достию прии́м,/ услы́шал еси́, преподо́бне, вожделе́нный глас:/ до́брый ра́бе, благи́й и ве́рный, вни́ди в ра́дость Го́спода твоего́.

Богоро́дичен: Богода́нный души́ моея́ свети́льник угаси́х,/ и тьма обы́де мя, окая́ннаго,/ оба́че к Тебе́ зову́, Ма́ти Све́та:/ озари́ ду́шу мою́ омраче́нную и спаси́ мя.

Конда́к, глас 3:

Моли́твою и посто́м, тружде́нием и терпе́нием/ умертви́вый вся́кое пло́ти мудрова́ние,/ чистоты́ сосу́д благоле́пен,/ Боже́ственных даро́в и чуде́с прича́стник,/ и́ноком же до́блий наста́вник был еси́,/ сподвиза́яся блаже́нному Корни́лию, о́тче Богому́дре./ Сего́ ра́ди вопие́м:/ моли́ся ко Го́споду,/ да моли́твами твои́ми дару́ет мир и спасе́ние душа́м на́шим.

И́кос:

Свети́льник нога́ма твои́ма положи́вый зако́н Госпо́день/ и свет стезя́м твои́м,/ се́рдце же утверди́вый на ка́мени ве́ры,/ в не́йже стоя́ и хваля́ся упова́нием сла́вы Бо́жия,/ избе́гл еси́ жите́йския тли, преподо́бне,/ и, ко све́ту Ца́рствия Бо́жия упра́влен сый,/ призира́еши на ны, моля́ся ко Го́споду,/ да обря́щемся сына́ми Све́та/ и Ца́рствие Его́ насле́дити сподо́бимся.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ о́тцев Бо́же, благослове́н еси́.

О́тче Генна́дие, с дру́гом твои́м Фео́дором прише́л еси́ к преподо́бному Алекса́ндру,/ и́же до́блестно на Сви́ре реце́ подвиза́ся,/ и того́ житию́ поревнова́л еси́.

Семена́ слове́с прему́дрости Бо́жия прия́в в се́рдце свое́ от преподо́бнаго Корни́лия,/ возрасти́л еси́ я, о́тче Генна́дие, в дре́во благосенноли́ственное,/ я́ко приити́ к тебе́ со́нму и́ноков и вита́ти, благогове́нствуя,/ под се́нию благода́ти, я́же в тебе́.

Ликовству́я днесь, принесе́м, ве́рнии, хвалу́ и благодаре́ние Бо́гови,/ нетле́нием просла́вившему уго́дника Своего́/ и дарова́вшему ему́ благода́ть исцеле́ний.

Богоро́дичен: Вы́шняго освяще́нное Боже́ственное селе́ние, ра́дуйся,/ Тобо́ю бо даде́ся ра́дость, Богоро́дице, зову́щим:/ Благослове́на Ты в жена́х еси́, Всенепоро́чная Влады́чице.

Песнь 8

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

Царя́ Небе́снаго ве́рный ра́бе!/ Тому́ порабо́тал еси́, подвиза́яся по́двигом до́брым,/ Того́ ра́ди вся претерпе́л еси́,/ да насле́диши обетова́ния жи́зни ве́чныя.

Моли́ся и о нас, преподо́бне,/ да благоче́стно пожи́вше и Богови благоугоди́вше,/ прича́стницы бу́дем жи́зни ве́чныя.

Не челове́ческую, а Бо́жию возлюби́л еси́ сла́ву, о́тче Генна́дие,/ сего́ ра́ди Бог тя просла́ви,/ да́руя тобо́ю по́мощь и спасе́ние притека́ющим к тебе́ с ве́рою.

Богоро́дичен: Досто́йно есть блажи́ти Тя, Богоро́дице:/ Благослове́на Ты в жена́х/ и благослове́н Плод чре́ва Твоего́.

Песнь 9

Ирмо́с: Вои́стияну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Воспомина́юще подви́жничество твое́, преподо́бне Генна́дие,/ честно́е успе́ние твое́ и зна́мения, я́же соде́я Госпо́дь руко́ю твое́ю,/ со умиле́нием глаго́лем:/ вои́стинну ди́вен Бог во святы́х Свои́х.

Да весели́тся пусты́ня Любимогра́дская,/ во́ды Су́рския да воспле́щут:/ та́мо бо просия ди́вный уго́дник Бо́жий.

Сла́вна и всехва́льна па́мять твоя́, о́тче Генна́дие,/ сла́вою бо, я́же от Отца́, Сы́на и Свята́го Ду́ха, просла́влен еси́.

Богоро́дичен: Ма́ти Бо́жия!/ ника́коже по достоя́нию мо́жем восхвали́ти Тя./ Оба́че Блага́я су́щи, приими́ моли́тву рабо́в Твои́х/ и принеси́ Сы́ну Твоему́ и Бо́гу на́шему, да спасе́т ду́ши на́ша.

Свети́лен:

Я́ко заря́ у́тренняя/ и я́ко луна́ полна́ во днех свои́х, был еси́, преподо́бне, в житии́ сем,/ горя́ ре́вностию, я́же по Бо́зе,/ богате́я святы́ми де́лы и словесы́ благи́ми./ Те́мже мо́лимся:/ не забу́ди чту́щих святу́ю па́мять твою́/ и моли́ся ко Го́споду спасти́ и просвети́ти ду́ши на́ша.

Сла́ва, и ны́не, Богоро́дичен:

Дивя́щеся непостижи́мому та́инству вочелове́чения Бо́га Сло́ва,/ Тя, Богоро́дицу, немо́лчно велича́ем,/ я́ко Сла́внейшую во́инств Небе́сных/ и при́сную Хода́таицу ро́да христиа́нскаго.

На хвали́тех стихи́ры на 4, глас 8, самогла́сны:

Благоле́пно просия́ свяще́нная па́мять твоя́, преподо́бне,/ луча́ми бо доброде́телей,/ све́том же чуде́с твои́х озаря́еши сердца́ ве́рных,/ сию́ у́бо пра́зднующе с ра́достию, ублажа́ем тя,/ принося́ песнь хвалы́ и благодаре́ния Го́споду.

В зако́не Госпо́днем поуча́яся день и нощь/ и свиде́ния Его́ испыту́я,/ не дал еси́, о́тче, сна очи́ма твои́ма,/ ни ве́ждома твои́ма дрема́ния,/ до́ндеже в се́рдце свое́м обре́л еси́ ме́сто Го́сподеви,/ селе́ние Бо́гу Иа́ковлю./ Сего́ ра́ди, я́ко храм духо́вен, благода́тию Бо́жиею приосене́нный,/ и до́брое приста́нище всем, притека́ющим к тебе́, яви́лся еси́,/ и неоску́дный от честны́х моще́й твои́х/ источа́еши ве́рным исто́чник исцеле́ний.

Сла́ва, глас то́йже:

Чту́ще тя, преподо́бне, сла́вим Отца́, Сы́на и Свята́го Ду́ха Бо́га,/ Его́же ра́ди вся претерпе́л еси́,/ Его́же мы́шцею си́лы мно́ги соверши́л еси́:/ пусты́ня бо Любимогра́дская/ озари́ся све́том дел твои́х,/ челове́цы возвесели́шася,/ я́ко А́нгела во пло́ти, ви́девше тя,/ оби́тель же твоя́ пребы́сть, я́ко дре́во, насажде́нное при вода́х,/ и, я́ко крин, процвете́./ Сего́ ра́ди вопие́м:/ хва́льна и просла́вленна па́мять твоя́,/ уго́дниче Бо́жий, Генна́дие.

И ны́не, Богоро́дичен: Влады́чице, приими́ моли́тву раб Твои́х/ и изба́ви нас/ от вся́кия ну́жды и печа́ли.

Славосло́вие вели́кое и отпу́ст.

На литурги́и

Блаже́нны свята́го, от кано́на пе́сни 3-я и 6-я́ на 4. Проки́мен, глас 7: Честна́ пред Го́сподем/ смерть преподо́бных Его́.Стих: Что возда́м Госпо́деви о всех, я́же воздаде́ ми? Апо́стол к Гала́том, зача́ло 213. Аллилу́йя: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя Его́. Ева́нгелие от Луки́, зача́ло 24. Прича́стен: В па́мять ве́чную:

Моли́тва

Избра́нниче Бо́жий и чудотво́рче, преподо́бный о́тче Генна́дие! От ю́ности твоея́ испо́лнен сый Ду́ха прему́дрости и ра́зума, Ду́ха благоче́стия и стра́ха Госпо́дня, и прии́м вся ору́жия Бо́жия, препоя́сав чре́сла твоя́ и́стиною, обо́лкся в броня́ пра́вды и обу́в нозе во угото́вание благовествова́ния ми́ра, над все́ми же восприи́м щит ве́ры, возмо́г л еси́, я́ко добр во́ин Христо́в, вся стре́лы лука́ваго разжже́нныя угаси́ти. Сего́ ра́ди водворя́лся днесь с ли́ками Безпло́тных сил в оби́телях Отца́ Небе́снаго, неувяда́емым венце́м увязе́н еси́ и, предстоя́ Престо́лу Царя́ Сла́вы, Го́спода сил, и́маши дерзнове́ние возноси́ти к Нему́ моле́ния и благохвале́ния твоя́. Мы же, окая́ннии, возводи́ из глубины́ зол о́чи и сердца́ на́ша к Го́рнему Сио́ну, Жили́щу Бо́га Иа́ковля, мо́лим тя, преподо́бне Генна́дие: бу́ди засту́пником и хода́таем на́шим пред Бо́гом и Го́сподем на́шим, Судие́ю пра́веднейшим, Его́же вы́ну прогневля́ем, согреша́юще пред Ним. И я́коже во дни пло́ти своея́ ди́вная и пресла́вная соверши́л еси́, о́тче всехва́льне, та́ко и ны́не, преше́д от нас в оби́тели Отца́ Небе́снаго, удиви́ хода́тайством свои́м ми́лость Госпо́дню на нас. Да, отбе́гше нече́стия и мирски́х по́хотей, Бо́гови же благоугоди́вше, обря́щем по́мощь Его́ во вре́мя благопотре́бно и благослове́ние на ны и на дела́ рук на́ших, и да сподо́бит нас насле́дити Ца́рство Небе́сное и с ли́ки святы́х сла́вити и воспева́ти пречестно́е и великоле́пое И́мя Отца́ и Сы́на и Свята́го Ду́ха, ны́не, и при́сно, и во ве́ки веко́в. Ами́нь.

(слу́жбу зри 23 декабря́)

Тропа́рь, глас 3:

Бо́жия Сло́ва Прему́дрости изря́дный служи́тель,/ А́нгельскаго жи́тельства и́стинный подража́тель,/ Боже́ственныя чистоты́ рачи́тель,/ архиере́ом сопресто́льниче, преподо́бным сожи́тельниче,/ па́стырская красота́,/ Вели́кому Но́вуграду похвала́,/ святи́телю пречестны́й Феокти́сте, о́тче наш,/ Ему́же, Сло́ву Бо́жию, в житии́ сем послужи́л еси́,/ моли́ спасти́ся душа́м на́шим.

Конда́к,глас 8:

Архиере́йское украше́ние,/ Вели́кому Новугра́ду Богодухнове́нное удобре́ние,/ су́щия бо в не́м лю́ди на па́житех живоно́снаго зако́на Госпо́дня упа́сл еси́,/ и сего́ ра́ди в ли́це святы́х водворя́тися сподо́бися,/ и святу́ю твою́ па́мять мно́гими ле́ты сотвори́ неоскверне́нну,/ в не́йже, тя почита́юще, – ра́дуйся, – от души́ вопие́м ти,/ святи́телю о́тче Феокти́сте,/ Вели́кому Новугра́ду похвала́ и утвержде́ние.