Слу́жба их пое́тся на повече́рии.

На Го́споди, воззва́х: стихи́ры Макси́ма, на 6, глас 4.

Подо́бен: Яко до́бля:

На милосе́рдие бы́вша Челове́ка, я́ко благоизво́ли,/ во дву хоте́ниих, де́йствах же разумева́ема, преподо́бне,/ пропове́дал еси́, Макси́ме,/ загражда́я скве́рных незатворе́нная уста́,/ единово́льна, единоде́йственна Того́ сла́вящих,/ искуше́нием диа́вольским зло́бу соде́лавшаго.

Жи́лами уче́ний твои́х/ Пи́рра, о́тче, удави́л еси́,/ буесло́вяща, Макси́ме, злому́дреннаго,/ и гоне́ния претерпе́л еси́, и ско́рби, приснопа́мятне,/ ураня́емь лю́те, и язы́к отре́зуемь,/ и ю́же всегда́ к Бо́гу простира́емую Боже́ственную ру́ку,/ е́юже пиша́, соверши́л еси́ высо́кая словеса́.

Скоропи́сца я́ко трость, наостре́на Ду́хом,/ святы́й бысть, блаже́нне, язы́к твой,/ добропи́шущ благода́тию на скрижа́лех серде́ц на́ших/ зако́н Боже́ственных доброде́телей, и уче́нием изве́стие,/ и воплоще́ние во дву существа́х челове́ком/ и Еди́ней Ипоста́си яви́тися восхоте́вшаго.

И́ны стихи́ры му́ченика Неофи́та, глас 8.

Подо́бен: О, пресла́внаго чудесе́:

О, пресла́внаго чудесе́!/ Го́лубь бесе́дует Неофи́ту му́ченику/ челове́ческим веща́нием,/ от Вы́шних прише́дший,/ его́же ра́ди и облиста́ет житие́ равноа́нгельно,/ и́мже, ю́ношствуя, стра́ждет кре́пко./ О, Боже́ственных дея́ний пятострада́льнаго му́ченика!/ Его́же моли́твами спаси́ ду́ши на́ша, Христе́,/ я́ко Благоутро́бен.

О, пресла́внаго чудесе́!/ От пеле́н саме́х совершенному́дрый Неофи́т/ соверша́ет чудеса́ де́йством Ду́ха:/ из ка́мене во́ду моли́твами источа́ет,/ ме́ртвую воздвиза́ет,/ ея́же яви́ся поро́д./ О, Боже́ственных дея́ний пятострада́льнаго му́ченика!/ Его́же моли́твами спаси́ ду́ши на́ша, Христе́,/ я́ко Благоутро́бен.

О, пресла́внаго чудесе́!/ За Христа́ стражда́ треблаже́нный Неофи́т,/ враги́ устраши́ изря́дными виде́нии,/ огнь угаса́ет сему́ вмета́ему,/ свере́пыя зве́ри устраши́вшияся показу́ет./ О держа́во непобеди́мая,/ в не́йже удивля́ется страда́лец!/ Но моли́твами его́ спаси́ ны, Бо́же.

Сла́ва, преподо́бнаго, глас 6:

Преподо́бне о́тче,/ во всю зе́млю изы́де веща́ние исправле́ний твои́х./ Тем на Небесе́х обре́л еси́ мзду трудо́в твои́х,/ де́монския погуби́л еси́ полки́/ и А́нгельския дости́гл еси́ чи́ны,/ ихже житию́ без поро́ка поревнова́л еси́,/ дерзнове́ние име́я ко Христу́ Бо́гу,/ мир испроси́ душа́м на́шим.

И ны́не, Богоро́дичен.

А́ще среда́ и́ли пято́к, Крестобогоро́дичен.

Подо́бен: Всю отложи́вше:

А́гнца Своего́/ А́гница нескве́рная дре́вле и Непоро́чная Влады́чица/ на Дре́ве Кре́стнем я́ко узре́,/ ма́терски восклица́ше/ и, дивя́шися, вопия́ше:/ Ча́до сладча́йшее,/ что зре́ние сие́, но́вое и пресла́вное?/ Ка́ко сонм безблагода́тный/ суди́щу Пила́тову преда́де Тя/ и осужда́ет на смерть Жизнь вся́ческих?/ Но воспева́ю Твое́ неизрече́нное,/ Сло́ве, снизхожде́ние.

На стихо́вне Окто́иха.

Сла́ва, глас 8:

Мона́хов мно́жества,/ наста́вника тя почита́ем, о́тче наш Макси́ме:/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных,/ с ни́миже моли́ся Го́сподеви/ поми́ловатися душа́м на́шим.

И ны́не, Богоро́дичен и́ли Крестобогоро́дичен.

Подо́бен: О, пресла́внаго чудесе́!

Что зри́мое виде́ние,/ е́же Мои́ми очесы́ ви́дится,/ о Влады́ко!/ Содержа́й всю тварь,/ на Дре́во воздви́жен быв,/ и умира́еши, всем Дая́й жизнь? -/ Богоро́дица, пла́чущи, глаго́лаше,/ егда́ узре́ на Кресте́ возноси́ма/ из Нея́ неизрече́нно возсия́вшаго/ Бо́га и Челове́ка.

Тропа́рь, глас 8:

Правосла́вия наста́вниче,/ благоче́стия учи́телю и чистоты́,/ вселе́нныя свети́льниче,/ мона́шествующих Богодухнове́нное удобре́ние,/ Макси́ме прему́дре,/ уче́ньми твои́ми вся просвети́л еси́,/ цевни́це духо́вная,/ моли́ Христа́ Бо́га спасти́ся душа́м на́шим.

Други́й тропа́рь, му́ченика, глас 4:

Му́ченик Твой, Го́споди, Неофи́т/во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами/ спаси́ ду́ши на́ша.

На повече́рии

После́дование му́чеников пое́тся на повече́рии. Кано́н, его́же краегране́сие: Четвери́цу пою́ му́чеников победоно́сных, глас 2.

Песнь 1

Ирмо́с: Нетре́ну, необы́чну,/ немо́кренно морску́ю ше́ствовав стезю́,/ избра́нный вопия́ще Изра́иль:/ Го́сподеви пои́м, я́ко просла́вися.

Све́тлостию Трисо́лнечныя благода́ти, сла́внии му́ченицы, озаря́еми,/ воспева́ющия ва́шу па́мять всечестну́ю просвети́те,/ от тьмы избавля́юще страсте́й и обстоя́ний.

Освеща́еми Всесвяты́м Ду́хом, ми́ра оста́вльше бу́рю,/ удали́стеся в гора́х, му́дрии му́ченицы сла́внии,/ к Боже́ственному страда́нию обуча́еми,/ е́же и све́тло соверши́сте.

Утвержда́еми держа́вною Зижди́теля и всекре́пкою си́лою,/ Боже́ственнии му́ченицы,/ обурева́ньми мно́гими яви́стеся непрекло́нни в му́ках,/ всю попра́вше враго́в си́лу.

Богоро́дичен: Ми́лости мя, благослове́нная Влады́чице,/ Боже́ственныя получи́ти сподо́би предста́тельствы Твои́ми,/ ро́ждшая пло́тию Сло́во Ми́лостивнейшее и Благопремени́тельное,/ прие́млющее к Нему́ притека́ющия.

Песнь 3

Ирмо́с: На ка́мени мя ве́ры утверди́в,/ разши́рил еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.

Любо́вию уязвля́еми Влады́чнею, му́ки претерпе́сте многообра́зныя:/ жи́лами бо суро́вейше, страда́льцы, бие́ми,/ огне́м же отвсю́ду лю́то опаля́еми, непрекло́нни пребы́сте.

Укрепля́еми си́лою Госпо́днею, изыдо́сте к боре́нию врага́/ и сего́ низложи́сте, страстоте́рпцы, Христу́ зову́ще:/ Ты еси́ Бог наш, и несть пра́веден, па́че Тебе́, Го́споди.

Со А́нгелы лику́юще в Вы́шних и с собо́ры соединя́еми му́чеников,/ с си́ми моли́теся/ изба́вити вся́кия ско́рби и обстоя́ния вас чту́щия,/ Боже́ственнии му́ченицы.

Богоро́дичен: Согла́сно Тя, Всепе́тая, благосло́вим,/ Е́юже нам возси́я неизрече́нно Сия́ние Невече́рнее, и вопие́м:/ спаса́й рабы́ Твоя́ вся́каго озлобле́ния,/ ве́рных бо Помо́щница Ты еси́.

Песнь 4

Ирмо́с: Пою́ Тя, слу́хом бо, Го́споди, услы́шах и ужасо́хся:/ до ме́не бо и́деши, мене́ ища́, заблу́ждшаго./ Тем мно́гое Твое́ снизхожде́ние, е́же на мя, прославля́ю,/ Многоми́лостиве.

Пою́ще благоче́стно, почти́м Евге́ниево дерзнове́ние,/ Аки́лы противле́ние,/ Кани́диево же терпе́ние,/ ку́пно с ни́ми почита́юще и Валериа́нову кре́пость.

Неи́стовством одержа́н, мучи́тель/ у́жами растя́гнена неми́лостивно би́ти тя повелева́ет,/ и желе́зом вельми́ строга́ти тя, Евге́ние,/ и свеща́ми опаля́ти те́ло твое́.

Непщева́в пребезу́мный мучи́тель/ тве́рдость ва́шу му́ками разори́ти, му́дрии му́ченицы,/ му́кам подлага́ет вас горча́йшим,/ но благода́тию Вседе́теля Христа́ сего́ посрами́сте.

Богоро́дичен: Я́ко еди́на ве́рных по́моще,/ Всеблагослове́нная Богоро́дице,/ от вся́ких изба́ви скорбе́й Твоя́ рабы́,/ те́пле блажа́щия Тя и в Боже́ственный кров Твой притека́ющия.

Песнь 5

Ирмо́с: Просвеще́ние во тьме лежа́щих,/ спасе́ние отча́янных, Христе́ Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м:/ ино́го бо, ра́зве Тебе́, бо́га не зна́ю.

Му́ченическое показу́я вои́стинну терпе́ние,/ стал еси́, я́ко адама́нт, го́рькия му́ки подъе́мля/ и взыва́я Зижди́телю благода́рно, му́чениче Евге́ние:/ ино́го бо, ра́зве Тебе́, бо́га не зна́ем.

Безве́стию бо́ги и́дольския препосла́л еси́/ свяще́ннейшими твои́ми к Зижди́телю моли́твами,/ подъя́л еси́ ра́ны многообра́зныя по всему́ те́лу,/ му́чениче Евге́ние,/ па́лицами неща́дно ураня́емь.

Богоро́дичен: Изба́ви нас, Всесвята́я Дево, вся́каго вре́да,/ Ты бо Предста́тельница еси́ на́ша,/ наде́ющихся на Тя, Богоро́дице, и вопию́щих Боже́ственному Рождеству́ Твоему́:/ ино́го бо, ра́зве Тебе́, бо́га не зна́ем.

Песнь 6

Ирмо́с: Ко Го́споду от ки́та Ио́на возопи́:/ Ты мя возведи́ из глубины́ а́да, молю́ся,/да я́ко Изба́вителю во гла́се хвале́ния/ и́стины же Ду́хом пожру́ Тебе́.

Простира́еми на дре́ве, и желе́зом стру́жеми я́ростию судя́щаго/ и жи́лами ссека́еми по плеще́м неща́дно, и огне́м опаля́еми,/ добропобе́днии му́ченицы ра́довахуся.

Терпе́л еси́ те́лом, свеща́ми опаля́емь,/ и на дре́ве, сла́вне, протяза́емь, Евге́ние,/ и со́лию ра́ны неща́дно посыпа́емы/ беззако́ннаго мучи́теля суровство́м.

Богоро́дичен: Да изба́вимся вся́каго наве́та и ско́рби, Богора́дованная,/ и́же в Твой покро́в притека́ющии,/ и любо́вию Тя при́сно благоче́стно сла́вяще,/ я́ко Ма́терь Бо́жию Всенепоро́чную.

Седа́лен, глас 4.

Подо́бен: Яви́лся еси́ днесь:

Красота́ просия́вши тве́рдых му́чеников,/ четвери́ца озари́ четы́ре концы́ ми́ра заря́ми,/ страда́ньми му́чеников и си́лами,/ от ни́хже сия́ет вели́кий Евге́ний.

Песнь 7

Ирмо́с: О́бразу злато́му, на по́ли Деи́ре служи́му,/ три́е Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́емы, поя́ху:/ благослове́н еси́, Бо́же оте́ц на́ших.

По́двиги све́тлыми обле́клся еси́ му́жески на пре́лесть/ и, победоно́сец, о Евге́ние, Боже́ственным манове́нием быв,/ обре́л еси́ воздая́ния трудо́в, со А́нгелы же пое́ши:/ благослове́н еси́, Бо́же отце́в на́ших.

Крест Христо́в иму́ще, страда́льцы, я́ко Боже́ственное ору́жие,/ диа́воле ополче́ние и мучи́телей противле́ние вку́пе низложи́сте,/ побе́ды венцы́ прие́мше от жизноно́сныя десни́цы Страстополо́жника Бо́га.

Умо́м чи́стым мук прило́ги не поколеба́лся еси́,/ но непреста́нно, о Евге́ние, па́лицами бие́мь,/ изря́днейше посе́кл еси́, му́чениче, сопротивле́нием страда́ний твои́х/ главы́ враго́в и неви́димых супоста́тов.

Богоро́дичен: Се вои́стинну, я́ко прорекла́ еси́,/ ро́ди Тя, Всечи́стая, вси досто́йно ублажа́ем и по до́лгу сла́вим:/ Ты бо Собезнача́льное Сло́во О́тчее родила́ еси́,/ за е́же спасти́ челове́ки,/ воплоще́нное из Тебе́.

Песнь 8

Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/по́йте, дела́, я́ко Го́спода/ и превозноси́те во вся ве́ки.

Вся́кому лука́вному кова́рству гони́телей сопроти́вися/ Валериа́н же, и сла́вный с ним Аки́ла,/ и Боже́ственный Евге́ний/ ку́пно со страда́льцем Кани́дием до́блественным.

Богоза́рная чу́дных страстоте́рпцев Христо́вых наста́ па́мять,/ Валериа́на же и Евге́ния ку́пно,/ Аки́лы Боже́ственнаго и Кани́дия,/ ю́же ра́достно соверша́ем любо́вию.

Светови́дными луча́ми облиста́ющи нам све́тло,/ наста́ ле́тняя па́мять страстоте́рпцев Христо́вых,/ Аки́лы Боже́ственнаго и Кани́дия ку́пно,/ и Евге́ния, и Валериа́на.

Богоро́дичен: Соприсносу́щный Отцу́ и Собезнача́льный Сын из Тебе́ про́йде, в после́дняя ле́та,/ за е́же спасти́ ны, Де́во Чи́стая Неискусобра́чная,/ Его́же не преста́й нам умилостивля́ющи.

Песнь 9

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рный, единому́дренно пе́сньми велича́ем.

Стремле́ние победи́л еси́ мучи́телей,/ по множа́йших му́ках преше́д к Бо́гу прера́достно,/ побе́ды по́чести прие́м, я́ко ору́жник до́блественный,/ я́ко вели́к хра́брник, я́ко избра́нный Христо́в во́ин, Евге́ние всеизя́щнейший.

Со А́нгельскими ли́ки, и му́ченическими собо́ры совоку́пльшеся, и пра́ведных чи́ны,/ ны́не с ни́ми моли́теся/ вас воспева́ющим дарова́ти очище́ние грехо́в/ и вся́ких бед, му́ченицы, избавле́ние.

О нас, соверша́ющих све́тлую ва́шу па́мять, Евге́ние Богому́дре, благоче́стно,/ му́чениче Аки́ло всесла́вне и Валериа́не с Кани́дием сострада́льцем,/ приле́жно умоли́те Христа́ Преблага́го.

Богоро́дичен: Тя, Всесвята́я Де́во,/ А́нгелов мно́жества и всех челове́к ро́ди прера́достно ублажа́ют:/ всех бо Спа́са, и Зижди́теля, и Влады́ку, и Бо́га породила́ еси́,/ Его́же о нас моли́.

Стихи́ры, глас 2.

Подо́бен: Егда́ от Дре́ва:

Пе́сньми восхва́лим, ве́рнии,/ и́стинно Боже́ственныя ору́жники и страда́льцы Христо́вы:/ му́драго Евге́ния и Валериа́на,/ Кани́дия сла́внаго и сострада́льца/ ку́пно со Аки́лою,/ ве́рно ублажа́юще сия́, я́ко пострада́вшия стра́нно,/ я́ко да в час осужде́ния нас изъе́млют муче́ния.

Му́чениче страстоте́рпче Христо́в,/ твое́ ве́рвьми те́ло наляца́емо/ я́ростию мучи́теля зе́льно строга́шеся,/ неща́дно же опаля́шеся,/ бие́мо, му́чениче, свеща́ми опаля́емо/ и притрыва́емо со́лию и о́цтом люте́йшим,/ ты же претерпе́л еси́ вся, Евге́ние блаже́нне, ра́ди Го́спода.

Зако́н спаси́тельный я́ве име́я в се́рдцы твое́м, му́чениче,/ мир оста́вил еси́,/ гора́м же прибли́жился еси́,/ к Боже́ственному страда́нию обуча́яся, блаже́нне,/ вои́стинну соверше́нному;/ е́же и прие́мля, ра́дуяся,/ претерпе́л еси́ все телесе́ строга́ние/ и огня́ люте́йшее, Валериа́не му́чениче, попале́ние.

Сла́ва, и ны́не, Богоро́дичен:

Ра́дуйся! – вся тварь Тебе́ вопие́т:/ ра́дуйся, Всесвята́я Де́во,/ ра́дуйся, скиптре Дави́дов;/ ра́дуйся, прозя́бшая грозд та́йный;/ ра́дуйся, две́ре Небе́сная и неопали́мая купино́;/ ра́дуйся, све́те всеми́рный;/ ра́дуйся, всех ра́досте;/ ра́дуйся, заступле́ние;/ ра́дуйся, чи́сте притека́ющих в Твою́ по́мощь, Всенепоро́чная.

Крестобогоро́дичен:

Егда́ нескве́рная А́гница/ ви́де Своего́ А́гнца,/ на заколе́ние я́ко Челове́ка во́лею влеко́ма,/ пла́чущи, глаго́лаше:/ безча́дствовати Мя ны́не тщи́шися, Христе́, ро́ждшую Тя,/ что сие́ сотвори́л еси́, Избави́телю вся́ческих?/ Оба́че воспева́ю/ и сла́влю Твою́, ю́же па́че ума́ и сло́ва,/ кра́йнюю бла́гость,/ Человеколю́бче.

На у́трени

Еди́н кано́н Окто́иха и святы́х два. Кано́н преподо́бнаго, его́же краегране́сие кроме́ Богоро́дичное: Всевелича́йший Макси́м да сла́вится. Творе́ние Иоа́нна мона́ха, глас 8.

Песнь 1

Ирмо́с: Пои́м Го́сподеви,/ прове́дшему лю́ди Своя́ сквозе́ Че́рмное мо́ре,/ я́ко Еди́н сла́вно просла́вися.

Всю мне Богодухнове́нную от медото́чнаго и сла́дкаго твоего́ иска́пай язы́ка,/ Боже́ственный Макси́ме, благода́ть Ду́ха.

Огнь горя́щ яви́лся еси́ на е́реси, блаже́нне:/ я́ко бо тро́стие, сия́ изнури́л еси́ ре́вностию Ду́ха.

Безслове́сное предложи́ся от злочести́вейшаго произволе́ния единово́льное уче́ние,/ словесы́ же твои́ми, о́тче, обличи́ся.

Богоро́дичен: Весь жела́ние, из утро́бы Твоея́, Богоневе́сто, благоизво́ливый роди́тися,/ и Сла́дость есть, и Свет незаходи́мый.

Кано́н му́ченика, глас то́йже, его́же краегране́сие: Христо́в сад тя, му́чениче, благохвалю́ но́вый. Творе́ние Иосифово.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Христо́в тя, всеблаже́нне, но́вый сад, в вертогра́де процве́тший му́ченичестем,/ и свяще́нныя плоды́ благоче́стия израсти́вша, позна́вше, пое́м, Неофи́те.

Глаго́лов Боже́ственных испо́лнитель показа́вся, блаже́нне,/ от младе́нства благу́ю часть му́дре избра́л еси́/ и наста́вник заблу́дшим был еси́.

Ви́дети жела́я Христа́, пло́тию из Де́вы младе́нствовавшаго нас ра́ди,/ младе́нец сый, младе́нцев к соверше́нству водя́й мудрова́ние.

Иска́паяй, Богому́дре, сла́дость Богоразу́мия из уст свяще́нных,/ ду́ши, очарова́нныя зло́бою чужда́го, че́стно услади́л еси́.

Богоро́дичен: Ро́ждшая естество́м Соде́теля, обожи́ла еси́ все существо́ земноро́дных,/ те́мже Тя, вои́стинну Богоро́дицу, испове́дуем, Де́во Богоневе́сто.

Песнь 3

Ирмо́с: Ты еси́ утвержде́ние притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой.

Велича́йший Макси́м, благочести́выя Христо́вы ве́ры/ всеи́стинно пропове́дник же и му́ченик показа́ся кро́вию.

Макси́ме блаже́нне,/ ты поще́нием был еси́ Боголе́пное любому́дрия и чи́стое жили́ще.

Излия́ язы́к твой реку́ Христо́вых уче́ний благоче́стие,/ Макси́ме всеблаже́нне,/ прему́дрости пита́тель.

Богоро́дичен: Да стезю́, Влады́ко, ко святы́ни веду́щую, пока́жеши нам,/ во утро́бу всесвяту́ю всели́лся еси́.

Ин. Ирмо́с то́йже

Всего́ возложе́на тя Всеще́дрому Сло́ву/ Чи́стый Дух соблюда́ше невреди́ма, сла́вне.

Воспе́ша Го́спода мно́жества люде́й ве́рных,/ ви́девше тобо́ю, му́чениче, ро́ждшия тя из ме́ртвых воста́ние.

Све́том облиста́ющая голуби́ца,/ гла́сом живы́м тя и путе́м спаси́тельным призыва́ет, Неофи́те.

Богоро́дичен: Пе́ние ра́достное род челове́ческий при́сно приноша́ет Тебе́, Ма́ти Бо́жия,/ безсме́ртие Тебе́ ра́ди восприе́мший.

Конда́к, глас 8.

Подо́бен: Взбра́нной:

Тро́ицы рачи́теля и вели́каго Макси́ма,/ науча́юща я́сно ве́ре Боже́ственней,/ е́же сла́вити Христа́, во дву́ естества́х, во́лях же и де́йствах су́ща,/ в пе́снех досто́йных, ве́рнии, почти́м, взыва́юще:/ ра́дуйся, пропове́дниче ве́ры.

Та́же седа́лен, глас 5.

Подо́бен: Собезнача́льное Сло́во:

Гоне́ния претерпе́в за ве́ру,/ отгна́л еси́, о́тче, вся́ку е́ресь,/ отсе́чен же с руко́ю язы́к, Макси́ме,/ испове́дания благоле́пный от руки́ Творца́ прия́л еси́ вене́ц, блаже́нне./ Его́же ны́не непреста́нно моли́/ поми́ловатися душа́м на́шим.

Сла́ва, му́ченика, глас 4.

Подо́бен: Вознесы́йся на Крест:

Новоцве́тный я́коже сад, прозя́бл еси́/ в вертогра́дех Христо́вых страстоте́рпцев,/ плоды́ Боже́ственнаго ра́зума прине́сл еси́,/ и́миже пита́ются ве́рно тя чту́щия, сла́вне Неофи́те,/ страда́льче доблему́дренный,/ но твои́ми моли́твами/ нас всегда́ спаса́й, Бо́гу предстоя́.

И ны́не, Богоро́дичен.

По Бо́зе в Твой, Богоро́дице, прибе́г смире́нный покро́в Боже́ственный,/ припа́дая, молю́ся:/ поми́луй, Пречи́стая, я́ко превзыдо́ша главу́ мою́ греси́,/ и бою́ся, Влады́чице, мук, и трепе́щу./ Моле́ние сотвори́, Чи́стая, к Сы́ну Твоему́/ от сих изба́вити мя.

Крестобогоро́дичен:

Из Безнача́льнаго Отца́ рожде́ннаго,/ напосле́док Тя пло́тию Ро́ждшая/ на Кресте́ ви́сяща зря́щи, Христе́, -/ увы́ Мне, любе́знейший Иису́се! – вопия́ше, -/ ка́ко сла́вимый я́ко Бог от А́нгел,/ от беззако́нных ны́не челове́ков, Сы́не, хотя́, распина́ешися?/ Пою́ Тя, Долготерпели́ве.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Земноро́дных тя почита́ют, и Небе́сных чи́ни чудя́тся,/ любо́вию бо му́дрости показа́лся еси́, о́тче, я́ко безпло́тен.

Су́ров убо мучи́тель, но терпе́ние твое́ непрекло́нно,/ тем ты у́бо ублажи́лся еси́, вселука́вый же изве́ржеся.

Состра́ждет тебе́, Макси́ме, ученико́в дво́ица преблаже́нная,/ твои́м страда́нием приобши́вшеся,/ те́мже и по́честей ра́вно получи́ша.

Тече́нием твоея́ кро́ве напая́ема,/ Це́рковь Христо́ва прозяба́ет оте́ческаго преда́ния Боже́ственное се́мя/ твои́м уче́нием, преподо́бне.

Богоро́дичен: Изба́вльшеся Рождество́м Твои́м грехо́внаго до́лга, Всенепоро́чная,/ ра́достное пе́ние возсыла́ем Тебе́, Богоневе́сто.

Ин. Ирмо́с то́йже

Жития́ твоего́ непоро́чное и ра́зума неужа́сное/ мно́жества премно́га зря́ще, к Бо́гу приступи́ша, му́чениче сла́вне.

Го́ру дости́г, всели́лся еси́, Боже́ственным наставля́емь, блаже́нне, Ду́хом,/ от А́нгела же пита́емь, А́нгелов яви́лся еси́ равностоя́телен.

Сострада́тельно расточи́в, дал еси́ убо́гим, я́коже повеле́но бысть,/ возме́здие прие́мля, блаже́нне, во ве́ки непроходи́мыя.

Богоро́дичен: Во́льно обнища́вшаго бога́тством бла́гости,/ Пребоже́ственнаго, Богоро́дице, родила́ еси́,/ на́шу нищету́ уще́дрившаго.

Песнь 5

Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.

Ра́зум земноро́дных собра́в и Небе́сных,/ впра́вду филосо́ф имену́ется Макси́м.

Прему́дрости безме́рным жела́нием/ Христа́ твоего́ подо́бник изря́днейший яви́лся еси́, сла́вный Макси́ме.

Гне́вом изгна́н был еси́ мучи́теля,/ обре́л же еси́, блаже́нне, Иису́са утеше́ние.

Богоро́дичен: Тя Богоро́дицу неве́дущии, Богома́ти,/ Све́та да не у́зрят, ро́ждшагося из Тебе́, Пречи́стая.

Ин

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Та́ин неизрече́нных испо́лнен быв, досточу́дне,/ к предлежа́щим страда́ния, ра́дуяся, отлучи́лся еси́ му́жеским подвиго́м,/ не убоя́вся мук, ниже́ сме́рти,/ му́чениче Неофи́те.

Неизрече́нным промышле́нием твоя́ Направля́ющего ше́ствия, сла́вне,/ предста́вше, Боже́ственнии А́нгели к по́двигу влеча́ху тя от горы́, я́коже друга́го Моисе́я,/ просла́вленна лице́м Боже́ственными светлостьми́.

Глаго́л жив в се́рдце име́я, всесла́вне му́чениче Неофи́те,/ дерзнове́нным умо́м гони́телем вопия́л еси́:/ самозва́н не и́щущим мя обрето́хся ны́не обличи́ти вашея ве́ры не́мощь.

Богоро́дичен: Е́же пре́жде всех веко́в, Отрокови́це Всенепоро́чная,/ Боже́ственное та́инство сокрове́нное Тобо́ю позна́ся конце́м:/ Сын и Сло́во Бо́жие, плоть быв и обожи́в, Де́во, челове́ка.

Песнь 6

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.

Непреста́нно прино́сиши Бо́гу, Богому́дре, мольбу́,/ душе́вных же и теле́сных страсте́й и тле́ния мя изба́вити.

Изсуши́ся ересе́й исто́чник му́тный весь, сла́вне Макси́ме,/ загражда́емь шу́мом язы́ка твоего́.

Очи́сти мя, Еди́не Бла́же,/ и исто́чник благода́ти, Христе́,/ се́рдцу моему́ Твоего́ преподо́бнаго моли́твами источи́.

Богоро́дичен: Красне́йший па́че всех челове́к Сын Твой, Всечи́стая, добро́тою Божества́,/ а́ще и плоть нас ра́ди бысть.

Ин

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Иона́:/ от тли, Бо́же, возведи́ мя.

Возвыша́емь на дре́ве, всеблаже́нне,/ желе́зом по ре́бром стро́ган был еси́ неми́лостивно/ и льсти́ваго обличе́ньми ожесточе́нное се́рдце расто́ргл еси́,/ повелева́ющего жре́ти бого́м и Бо́га отврещи́ся Безсме́ртнаго.

Растерзаемь и вяжемь, мучениче, связа́л еси́ до конца́ лесть,/ и врага́ безчи́нная ше́ствия безде́льна показа́л еси́ си́лою Ду́ха,/ и поте́кл еси́ к Небеси́ венцено́сец Го́споду предста́ти.

Услади́вся добро́тами Влады́ки и Тому́ прилепи́лся еси́, зовы́й:/ Сло́ве Бо́жий, Тебе́ ра́ди, поже́ршагося во́лею, аз закала́юся,/ подо́бяся прея́вственне честны́м Твои́м и Боже́ственным страда́нием.

Богоро́дичен: Пресве́тлый яви́лася еси́ Престо́л Царя́ Небе́снаго, Де́во,/ на Не́мже пло́тию воспочи́ во́лею, и мно́гий наш долг отъя́т,/ и посади́ на О́тчем престо́ле Челове́ка, я́коже благоволи́л есть.

Конда́к, глас 6.

Подо́бен: Е́же о нас испо́лнив:

Свет Трисия́нный, все́льшийся в ду́шу твою́,/ сосу́д избра́н показа́ тя, всеблаже́нне,/ явля́юща Боже́ственная конце́м,/ неудобопости́жных разуме́ний ты сказу́яй, блаже́нне,/ и Тро́ицу всем, Макси́ме, возпропове́дуяй я́сно,/ Пресу́щную, Безнача́льную.

И́кос:

Подража́тель яви́вся Спа́совых страсте́й/ и Того́ в души́ твое́й име́я, всеблаже́нне,/ восхожде́ния в се́рдцы твое́м возложи́л еси́, пребога́те./ Той же тебе́ подаде́ благода́ть с Небесе́,/ сопроти́вил бо ся еси́ мучи́телем, му́дре, му́жески,/ Безнача́льную, и Боже́ственную, и Единосу́щную Тро́ицу пропове́дуя/ и облича́я злосла́вныя и богобо́рныя./ Безчи́сленныя претерпе́л еси́ напа́сти, всехва́льне,/ язы́ка отре́зание Богосло́внаго, преподо́бне, и твоея́ руки́ вку́пе./ Не преста́л же еси́ ты, со дерзнове́нием глаго́ля/ и утвержда́я ве́рныя Боже́ственными твои́ми уче́нии,/ Тро́ицу всем лю́дем пропове́дуя я́сно,/ Пресу́щную, Безнача́льную.

Песнь 7

Ирмо́с: От Иуде́и доше́дше, о́троцы/в Вавило́не иногда́/ ве́рою тро́йческою пла́мень пе́щный попра́ша, пою́ще:/ отце́в Бо́же, благослове́н еси́.

Еди́но естество́ Тро́ицы, еди́но хоте́ние рекл еси́, еди́но де́йство,/ Бо́га же, вопло́щшагося во двою́ естеству́,/ хоте́нию же и де́йству пропове́дал еси́./ Отце́в на́ших Бо́же, благослове́н еси́.

Не во́ли две разделя́емый ра́зума проти́вностию,/ ка́чеством же па́че пропове́дал еси́, о́тче, есте́ственным ра́знствующия./ Отце́в на́ших Бо́же, благослове́н еси́.

Столп правосла́вия Боже́ственная твоя́ словеса́, о́тче, держа́ще,/ Еди́наго от Трои́цы во двух Существа́х и во́лях почита́ем./ Отце́в на́ших Бо́же, благослове́н еси́.

Богоро́дичен: И́наго носящи Младе́нца,/ пре́жде всех веко́в Бо́га, Всенепорочная, из Тебе́ воплощшагося,/ не престай молящи спасти́ поющия:/ отцев на́ших Бо́же, благословен еси́.

Ин

Ирмо́с: Отроцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Пещь живогоря́щу сотвори́в, пребеззако́нный в сей заключа́ет на три дни,/ не опали́лся же еси́ отню́д, вопия́, Неофи́те:/ благослове́н еси́, Го́споди Бо́же, во ве́ки.

Наслажда́ешися пе́сней пресла́вно,/ стоя́щу ти посреде́ пла́мене, блаже́нне,/ роса́ бо Бо́жия прохлажда́ше тя, му́чениче, вопию́ща:/ благослове́н еси́, Го́споди Бо́же, во ве́ки.

Велича́йшее чу́до удивля́я всяк ум, в тебе́ соде́янное:/ и́бо огнь ника́коже опали́ тя, Богому́дре,/ разлия́вся же, попали́ огня́ насле́дники.

Богоро́дичен: Яви́лася еси́ А́нгелов превы́шши,/ Сове́та Вели́каго А́нгела ро́ждши, Богоро́дице Чи́стая,/ Ему́же вси песнопое́м:/ благослове́н еси́, Го́споди Бо́же, во ве́ки.

Песнь 8

Ирмо́с: Победи́тели мучи́теля и пла́мене/ благода́тию Твое́ю бы́вше,/ за́поведей Твои́м зело́ прилежа́ще, о́троцы вопия́ху:/ благослови́те, вся дела́ Госпо́дня, Го́спода.

Весьма́ возлюби́в Превозлюби́вшаго род челове́ческий,/ крест Твой взял еси́ и Тому́, блаже́нне, сраспя́лся еси́,/ благослови́те, поя́, дела́ Госпо́дня, Го́спода.

Устрани́вся вся́кия сла́сти, блаже́нне, смертоно́сныя,/ тебе́ соде́лал еси́ всего́ нескве́рно зерца́ло Боже́ственное, поя́:/ благослови́те, вся дела́ Госпо́дня, Го́спода.

Живоно́сну зарю́ от Еди́наго Божества́ Триипоста́снаго прие́м,/ яви́лся еси́ су́щим во тьме со́лнце заблу́ждшим,/ благослови́те, – поя́, – вся дела́ Госпо́дня, Го́спода.

Богоро́дичен: Жи́зни Тя Ма́терь и Бо́га Роди́тельницу позна́вше,/ правосла́вною ве́рою вси блажи́м, Богороди́тельнице,/ благосло́вяще ку́пно Рождество́ Твое́, Чи́стая, и превознося́ще во ве́ки.

Ин

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Юны́м, всеблаже́нне, те́лом и соверше́нным мудрова́нием/ началозло́бнаго лука́вство погуби́л еси́,/ Сад красне́йший, прозя́бший во дво́рех, от Иессе́ева изра́стшаго ко́рене,/ к Нему́же вопия́л еси́ непреста́нно:/ свяще́нницы, воспо́йте,/ лю́дие, превозноси́те во вся ве́ки.

На суди́щи зве́рие тебе́, страстоте́рпче, устыде́шася,/ я́коже Дании́ла свяще́ннаго пе́рвее,/ Христо́вых бо тя позна́ша страда́ний свиде́теля./ Его́же испове́дуя, нестерпи́мыя му́ки претерпе́л еси́, взыва́я:/ свяще́нницы, воспо́йте,/ лю́дие, превозноси́те во вся ве́ки.

Позна́вый тя пе́рвее в горе́, Неофи́те, лев превели́кий,/ на суди́щи свя́зану приведе́н, напуща́ется в муче́нии твое́м, страда́льче/ и, позна́в, покланя́шеся тебе́ со стра́хом, студо́м одержи́м/ и исто́чники умиле́нием слез благочу́вственне пролива́я, Богоблаже́ние.

Богоро́дичен: Но́во Отроча́ родила́ еси́,/ пре́жде всея́ тва́ри ро́ждшагося из Отца́ несказа́нно, Всечи́стая./ Того́ у́бо моли́ обветша́вшаго прегреше́ньми ны́не обнови́ти и вопию́ща мя спасти́:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Песнь 9

Ирмо́с: Проявле́нное на горе́ законополо́жнику/ во огни́ и купине́ Рождество́ Присноде́вы/ в на́ше, ве́рных, спасе́ние/ пе́сньми немо́лчными велича́ем.

Еще́ твоя́, я́ко А́велева, кровь и во ве́ки Богодохнове́нныя догма́ты/ гла́сом я́сным Христо́ве Це́ркви пропове́дует,/ Макси́ме всеблаже́нне и превели́кий.

Отсече́ся рука́, пи́шет же Боже́ственным пе́рстом,/ я́ко тро́стию и черни́лом,/ отре́занным язы́ком и твое́ю кро́вию честно́ю ве́ру в сердца́х правосла́вную.

Стал еси́ пред престо́лом Боже́ственным с му́ченики,/ и́хже ре́вности и ве́ры приобщи́лся еси́, о́тче,/ и нас усво́й Влады́це и твоя́ подража́тели соде́лай.

Богоро́дичен: Ты еси́, Богоро́дице, ору́жие на́ше и стена́,/ Ты еси́ заступле́ние к Тебе́ прибега́ющих,/ Тя и ны́не на моли́тву предлага́ем, да изба́вимся от враго́в на́ших.

Ин

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к,/ те́мже Пречи́стую Богоро́дицу, ве́рнии, велича́ем.

Стал еси́, я́коже а́гнец, к заколе́нию во́льне предлежа́/ убива́ющим тя го́рьким мучи́телем, му́чениче Неофи́те,/ и, прободе́н в твоя́ ре́бра копие́м, блаже́нный коне́ц восприя́л еси́,/ страстоте́рпче Христо́в до́блественнейше.

Я́ко же́ртва, я́ко добро́ а́гня, я́ко честно́е заколе́ние,/ я́коже возложе́ние хра́ма свята́го, я́коже приноше́ние чи́стое,/ я́коже пти́ца избра́нна, я́коже юне́ц многоце́нен,/ я́коже нов, блаже́нне, сад ра́йский, Бо́гу прине́слся еси́.

Сообра́зен был еси́ страсте́м Пострада́вшаго нас ра́ди бла́гостию,/ и ра́венством копия́, му́чениче, вои́стинну просла́вился еси́,/ и ны́не живе́ши на Небесе́х, побе́ды диади́мою украша́емь/ и ра́дости непрее́мныя исполня́емы

Богоро́дичен: Нося́щи, я́коже клеща́, Небе́сный, Богоро́дице, Угль,/ хвра́стныя моего́ се́рдца стра́сти вся попаля́ющий,/ и гее́нскаго огня́ изба́ви мя, молю́ся,/ да прославля́ю Тя, Наде́жду ве́рных, Всенепоро́чная.

Свети́лен.

Подо́бен: Све́те неизме́нный:

Труба́ яви́лся еси́ прему́дрости, благогла́сным язы́ком твои́м/ проти́вных ужаса́я полки́, Макси́ме, свет мона́шествующих,/ те́мже, твои́ми пита́ющеся словесы́, ра́зум познава́ем су́щих.

Богоро́дичен:

Свет мы́сленнаго весе́лия возсия́ла еси́ в ми́ре,/ Богороди́тельнице Де́во, Изба́вителя и Влады́ку,/ те́мже помоли́ся души́ моея́ зе́ницы просвети́ти/ све́том све́тлости Боже́ственный.

На литурги́и

Проки́мен, глас 4; Святы́м, и́же суть на земли́ Его́, удиви́ Госпо́дь вся хоте́ния Своя́ в них. Стих: Предзре́х Го́спода предо́ мно́ю вы́ну, я́ко одесну́ю ме́не есть, да не подви́жуся. Апо́стол ко Евре́ем, зача́ло 330. Аллилу́йя, глас 4: Воззва́ша пра́веднии,/ и Госпо́дь услы́ша их. Ева́нгелие от Луки́, зача́ло 64. Прича́стен: Ра́дуйтеся, пра́веднии, о Го́споде:

На ма́лой вече́рни

На Го́споди, воззва́х: стихи́ры и Сла́ва святаго. И ны́не, глас 6:

Устраши́в су́щих в Ватопе́де наказа́нием,/ поми́ловал еси́, Влады́ко, рабы́ Твоя́,/ спа́сши их от уби́йственных рук разбо́йников/ заступле́нием Пресвяты́я Твоея́ Ма́тере./ Буди́ у́бо и на нас ми́лость Твоя́, Го́споди,/ и путь непра́вды отста́ви от нас,/ наста́ви же на стезю́ за́поведей Твои́х/ Богоро́дицею, Еди́не Человеколю́бче.

На стихо́вне стихи́ры, глас 2.

Подо́бен: До́ме Евфра́фов:

В ве́дении и неве́дении/ согреша́ем при́сно/ Тебе́, Дево, и Бо́гу,/ но не лиши́ ны, Пречи́стая,/ заступле́ния Твоего́, Богоро́дице.

Стих: Помяну́ и́мя Твое́/ во вся́ком ро́де и ро́де.

Умоли́ Сы́на Твоего́/ поми́ловати зде рабы́ Твоя́/ и на бу́дущем Суде́ Его́/ и му́ки изми́ ны/ Твои́м, Влады́чице, предста́тельством.

Стих: Лицу́ Твоему́ помо́лятся/ бога́тии лю́дстии.

Ве́мы, я́ко мно́го мо́гут/ Твоя́ моли́твы/ ко из Тебе́ Ро́ждшемуся:/ негоду́юща бо грех ра́ди/ милосе́рда Того́ твори́ши Ты еди́на.

Сла́ва, и ны́не, глас 6:

Ужасо́шася Ватопе́дстии и́ноцы,/ зря́ще на святе́й ико́не/ Богоро́дицу и Преве́чнаго Младе́нца:/ ка́ко иму́щая ма́тернее дерзнове́ние/ уклоне́нием лица́ Своего́/ от руки́ Сы́на Ея́ и Бо́га/ отклони́ от них пра́ведное Его́ преще́ние?/ Те́мже с тре́петом просла́виша Ма́терь щедро́т,/ Отра́ду рабо́в Ея́ и Утеше́ние.

Тропа́рь святаго. Сла́ва, и ны́не, глас 4: Не умолчи́м никогда́, Богоро́дице:

На вели́цей вече́рни

На Го́споди, воззва́х: стихи́ры, глас 2:

Прииди́те, ве́рнии,/ воспое́м Всепе́тую Богоро́дицу,/ и, святы́й о́браз Ея́ обстоя́ще,/ Боже́ственная великодея́ния Ея́ просла́вим,/ и любо́вию рцем:/ ра́дуйся, покро́ве ми́ра,/ ра́дуйся, Отра́до и Утеше́ние скорбя́щих,/ ра́дуйся, Ма́ти Присноде́во,/ ро́ждшая Многоми́лостиваго Спа́са душ на́ших.

Ка́ко по достоя́нию восхва́лим/ милосе́рдие Твое́, Влады́чице?/ Ты бо моли́твами Свои́ми/ отво́диши ту́чи гне́ва Бо́жия,/ грех ра́ди находящаго,/ и ма́терним дерзнове́нием утоля́еши/ преще́ние Сы́на Твоего́,/ Пра́веднаго всех Судии́/ и Многоми́лостиваго Спа́са душ на́ших.

Я́ко радостотво́рная дуга́,/ по всеми́рном пото́пе положе́нная/ во о́блацех Созда́телем/ в зна́мение примире́ния Его́ с Свои́м созда́нием,/ ра́дуеши и Ты, Богоневе́сто,/ Го́рний и до́льний мир ве́чным примире́нием/ и не престае́ши утеша́ти рабы́ Твоя́,/ мир и спасе́ние низводя́щи/ от примири́вшаго Собо́ю вся́ческая,/ Многоми́лостиваго Спа́са душ на́ших.

Воспомина́ние творя́ще днесь/ ди́внаго и ужа́снаго зна́мения,/ явленнаго в Ватопе́дской оби́тели/ от ико́ны Твоея́, Влады́чице,/ мо́лимтися приле́жно:/ пода́ждь житию́ на́шему исправле́ние,/ я́ко да, во страсе́ Бо́жии пожи́вше,/ и́збранных ча́сти моли́твами Твои́ми/ сподо́бимся от Сы́на Твоего́,/ Многоми́лостиваго Спа́са душ на́ших.

Та́же стихи́ры и Сла́ва свята́го Макси́ма.

И ны́не, глас 7:

Иде́же яви́тся заступле́ние Твое́, Влады́чице,/ та́мо стре́лы вра́жия сокруша́ются/ и си́ла сопроти́вных, я́ко дым, исчеза́ет,/ те́мже и со́нмище губи́телей а́бие исчезе́ от Ватопе́да,/ егда́ испроси́ся Тобо́ю проще́ние согреши́вшим,/ благода́рственная у́бо воспису́юще,/ уми́льно зове́м Ти, Чи́стая:/ не отста́ви и ны́не ми́лости Твоя́ от нас,/ да не реку́т врази́: несть избавля́яй их,/ но храни́ при́сно рабы́ Твоя́/ неулови́мы от ко́зней вра́жиих,/ моля́щися о проще́нии грехо́в,/ ми́ре и спасе́нии душ на́ших.

На литии́ стихи́ра, глас 4:

Прия́вши в жре́бий Себе́ Го́ру Афо́нскую,/ рекла́ еси́, Влады́чице:/ Аз бу́ду Засту́пница ме́сту сему́/ и Бо́гу о не́м те́плая Хода́таица./ Те́мже и оби́тель Ватопе́дская,/ враги́ иногда́ окруже́нная,/ я́ко Твое́ достоя́ние, изба́вися от сих/ ди́вным заступле́нием Твои́м,/ и отвраще́но бысть от и́ноков преще́ние Бо́жие/ те́плыми моли́твами Твои́ми./ Припа́дающе у́бо святе́й ико́не Твое́й,/ на нейже доны́не зрим зна́мение/ Твоего́ вели́каго милосе́рдия к рабо́м Твои́м/ и к Сы́ну Твоему́ и Бо́гу дерзнове́ния,/ пра́зднуем Ти днесь, Пресвята́я Де́во,/ и усе́рдно мо́лим Тя:/ бу́ди при́сная Засту́пница Горы́ Твоея́,/ земли  Русския,/ оби́тели се́я и вся́каго ме́ста,/ в нем же велича́ется препе́тое и́мя Твое́, Благослове́нная.

Сла́ва, свята́го Макси́ма. И ны́не, глас 8:

Ды́шущии огне́м и уби́йством,/ вто́ргшеся, Госпоже́, в насле́дие Твое́,/ друг ко дру́гу глаго́лаху:/ госпо́дствовати бу́дут в Ватопе́де ру́ки на́ша,/ убие́м мече́м и́ноки,/ раздели́м коры́сть, огню́ оби́тель преда́вше;/ но посрами́шася неве́давшии,/ я́ко Ты еси́ Горы́ насе́льников неусыпа́ющая Храни́тельница,/ подаю́щая нам ве́лию ми́лость.

На стихо́вне стихи́ры и Сла́ва, свята́го Макси́ма. И ны́не, глас 6:

Ле́та и дни́е жи́зни на́шея/ име́яй во Свое́й вла́сти, Го́споди,/ прогне́вавшия Тя гото́в был еси́ преда́ти разбо́йником,/ но от благоутро́бия Твоего́ возбрани́лся еси́,/ умоле́н быв Пресвято́ю Мате́рию Твое́ю,/ Ея́же моли́твами и нас пощади́,/ я́ко Щедр и Человеколю́бец.

Тропа́рь, глас 4:

К Богоро́дице приле́жно ны́не притеце́м,/ гре́шнии и смире́ннии, и припаде́м,/ в покая́нии зову́ще из глубины́ души́:/ Влады́чице, помози́, на ны милосе́рдовавши,/ потщи́ся, погиба́ем от мно́жества прегреше́ний./ Не отврати́ Твоя́ рабы́ тщи,/ Тя бо и еди́ну наде́жду и́мамы.

На у́трени

На Бог Госпо́дь: тропа́рь, глас 4: К Богоро́дице приле́жно: два́жды. Сла́ва, свята́го Макси́ма. И ны́не: Не умолчи́м:

По 1-м стихосло́вии седа́лен:

Благодари́м Тя, Богоро́дице,/ о благодея́ниях и чудесе́х Твои́х,/ я́же твори́ши чту́щим Тя./ Разбо́йники бо, устреми́вшияся на Ватопе́д,/ заступле́нием Твои́м неде́йственны и изгна́нны сотвори́ла еси́,/ скорбь и́ноков на весе́лие преложи́вши,/ я́ко печа́льных Отра́да и Утеше́ние.

По 2-м стихосло́вии седа́лен:

Велича́ем благоутро́бие Твое́, Всеблага́я Влады́чице,/ и́мже су́щии в Ватопе́де изба́вишася от злых./ Но и ны́не заступа́й рабы́ Твоя́, на Тя по Бозе упова́ние возлага́ющия./ Поми́луй нас, Госпоже́, и сохрани́ от вся́каго зла,/ спаса́ющи в ми́ре ду́ши на́ша.

По полиеле́и седа́лен:

Я́коже и́ноки Ватопе́да умилостивле́нием Присноде́вы свободи́л еси́, Бла́же, от ви́димых разбо́йников,/ та́ко и нас свобожда́й от неви́димых губи́телей, и́щущих кого́ поглоти́ти,/ и неврежде́нных от тех соблюди́ Твои́м, Христе́, милосе́рдием.

По 50-м псалме́ стихи́ра, глас 6:

Держа́вная Всецари́це,/ враго́м христиа́нским воспяща́ющая/ и от ко́зней тех рабы́ Твоя́ избавля́ющая,/ не преста́й ускоря́ти на по́мощь и защище́ние/ Тебе́ с ве́рою призыва́ющим.

Кано́н Богоро́дицы. Глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопи́яше:/ Изба́вителю и Бо́гу на́шему пои́м.

Бо́жиею благода́тию озари́ мя, Богоблагода́тная,/ благогове́йно пе́ти пред свято́ю ико́ною Твое́ю/ Тебе́, необори́му Засту́пницу и держа́ву неразруши́му ста́да Твоего́.

Тя, Всенепоро́чная, и́мамы предста́тельство, Отра́ду же и Утеше́ние./ Сего́ ра́ди, сла́вяще бла́гость Твою́, моли́мтися: поми́луй нас.

Храни́тельница су́щи Горы́,/ наше́дшим разбо́йником на оби́тель Ватопе́дскую/ не предала́ еси́, Госпоже́, рабо́в Твои́х в ру́ки вра́жия.

Кто подо́бен Тебе́, Де́во, сла́вно творя́щая чудеса́?/ Наста́вив бо и́ноки пра́вдою Сы́на Твоего́, е́же боя́тися Его́,/ изба́вила и уте́шила еси́ их кре́постию Твое́ю.

Враче́вско есть е́же ре́зати и же́щи, здра́вия вино́вное,/ но Ты нас, Сы́не Бо́жий, мя́гкими лечба́ми щедро́т Твои́х уврачу́й,/ Ма́тере Твоея́ мольба́ми.

Услы́ши, Блага́я, мольбы́ христоимени́тых люде́й,/ при́зри на озлобле́ние утесня́емых,/ виждь сле́зы су́щих в ско́рбех/ и умилосе́рдитися потщи́ся на рабы́ Твоя́.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Под кров Твой притека́ем, лю́дие Твои́,/ Засту́пница буди́ нам, Влады́чице,/ подаю́щи отра́ду и утеше́ние пою́щим Тя.

Возвесели́шася ватопе́дцы о спасе́нии Твое́м, Де́во,/ немощству́ющих бо препоя́сала еси́ си́лою/ на прогна́ние разбо́йников.

Не преста́й, Всеми́лостивая Госпоже́, спаса́ти рабы́ Твоя́ от неча́емых напа́стей,/ да благода́рственно сла́вим Тя.

Моли́, Богороди́тельнице, е́же изба́витися нам вся́каго гне́ва и преще́ния Бо́жия,/ Тебе́ почита́ющим.

Хода́таица благоприя́тная и си́льная к Бо́гу,/ прегреше́ний оставле́ние испроси́ нам у Него́, Богоневе́сто.

Смертоно́сных неду́гов душе́вных и теле́сных изми́ ны, Влады́чице,/ ве́чнующую Жизнь ми́ру ро́ждшая.

Седа́лен:

Ви́димыми и неви́димыми враги́ окружа́емии,/ к Тебе́, Де́во, прибега́юще, зове́м:/ не удали́ по́мощь Твою́ от нас, я́коже от и́ноков ватопе́дских не удали́ла еси́,/ но держа́вною си́лою Твое́ю побори́ борю́щия ны,/ ми́рное и Богоуго́дное житие́ нам устроя́ющи.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Убо́я́ся се́рдце игу́мена в моли́тве усте́н его́/ от гла́са Твоего́, Богома́ти, и преще́ния Сы́на Твоего́,/ и смяте́ся кре́пость его́, возвеще́ну бы́вшу нападе́нию от разбо́йников.

Внегда́ смути́тися Ватопе́ду во гне́ве Твое́м, Го́споди,/ ми́лость Твою́ помяну́л еси́ предста́тельством Присноде́вы,/ от Нея́же яви́лся еси́ на спасе́ние люде́й Твои́х.

Не преда́ждь в ру́ки враго́в насле́дие Твое́, Чи́стая,/ да некогда́ реку́т:/ где есть Богороди́тельница, на Ню́же упова́ша?/ но не вре́дно и ненаве́тно соблюди́ ста́до Твое́.

Свято́му о́бразу Твоему́ припа́дающе, мо́лим Тя:/ разори́ сове́ты хотя́щих нам зла́я и живо́т наш напра́ви твори́ти в ми́ре Боже́ственную во́лю Сы́на Твоего́.

Во искуше́ниих буди́ нам, Влады́чице, спаси́тельное прибе́жище,/ в боле́знех врачева́ние,/ во обурева́нии ти́хое приста́нище/ и в ско́рбех Отра́да и Утеше́ние.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те Незаходи́й,/ и покры́ла мя есть чужда́ тьма, окая́наго?/ Но обрати́ мя и к све́ту за́поведей Твои́х/ пути́ моя́ напра́вимолю́я.

Сте́ну тве́ду и столп непоколеби́м Тя имать Гора́ в наше́ствиих ва́рварских:/ студа́ бо исполня́еши вра́жия ли́ца/ и возвраща́тися твори́ши им вспять тще́тным и безде́льным, Влады́чице.

Ма́тернее промышле́ние о су́щих в Горе́ иму́щей Ти,/ стра́ха ра́ди Сы́на Твоего́, Де́во, поболе́ Ватопе́д, уве́дев о разбо́йницех,/ и роди́ дух спасе́ния предста́тельством Твои́м, Преблагослове́нная.

Я́ко же настоя́теля Ватопе́дскаго, по у́трени бде́вша и моли́вшася,/ наста́вила еси́, Блага́я, ка́ко спасти́ся от напа́сти,/ та́ко и нам пода́ждь тща́ние от но́щи у́треневати к Бо́гу/ и ко спасе́нию наста́ви ны, избавля́ющи от всех бед.

Я́ко же запрети́ла еси́, Госпоже́, отверза́ти врата́/ гото́вой су́щей поги́бели от враго́в,/ та́ко положи́ в нас благода́тную дверь огражде́ния,/ да не обря́щется вхо́да всезло́бным губи́телем и их пле́велом.

Я́ко же повеле́ла еси́, Влады́чице, возше́дше на сте́ны, разгна́ти разбо́йники,/ та́ко укрепи́ бы́ти нам на четверосте́нии му́жества и пра́вды, му́дрости и целому́дрия,/ да отража́ем борю́щия ны.

Я́ко же уми́лостивила еси́, Де́во, Сы́на Твоего́, прогне́вавшася на су́щия в Ватопе́де,/ та́ко умилостивля́й Его́ о нас, во мно́гия грехи́ впада́ющих,/ мно́го бо мо́жет моле́ние ма́тернее ко благосе́рдию Влады́ки.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Возвеща́юще Ти печа́ли на́ша, мо́лимтися, Ма́ти Бо́жия:/ обвесели́ благода́тию Твое́ю скорбя́щих сердца́, всех Раосте,/ и от тли возведи́ ны.

Не стяжа́хом на земли́ ино́го утеше́ния и кре́пкаго заступле́ния,/ ра́зве Тебе́, Всеблага́я,/ покры́й у́бо от вся́каго зла любо́вию воспева́ющих Тя.

Благосты́ню и ми́лость прие́млем от Сы́на Твоего́, Де́во, моли́твами Твои́ми:/ от молвы́ бо храни́ши ны, смуще́ния, лови́твы/ и вся́каго кова́рства вра́жия, Всепе́тая.

Ми́ру Спаси́тельнице,/ необори́мою си́лою Твое́ю не преста́й соблюда́ти ста́до Твое́, зову́щее:/ Отра́да и Утеше́ние на́ше Ты еси́, Благослове́нная.

Всех благи́х вина́, сме́ртных оживле́ние,/ поги́бших взыска́ние,/ изба́ви, Госпоже́, чада Твоя́ от напра́сныя сме́рти/ и от тли грехо́вныя возведи́ ны.

Конда́к, глас 8:

Взбра́нной Воево́де победи́тельная,/ я́ко изба́вльшеся от злых,/ благода́рственная воспису́ем Ти, раби́ Твои́, Богоро́дице,/ но я́ко иму́щая держа́ву непобеди́мую,/ от вся́ких нас бед свободи́, да зове́м Ти:/ Ра́дуйся, Неве́сто Неневе́стная.

И́кос:

А́нгели Тя, Ма́терь Бо́га на́шего, пе́сньми славосло́вят,/ и мы земни́и воспева́ем ра́достно, Тебе́ вопию́ще:/ ра́дуйся, Светода́вца селе́ние,/ Е́юже лучи́ спасе́ния ми́рови возсия́ша;/ ра́дуйся, Обра́дованная, Е́юже исполня́емся Боже́ственнаго весе́лия./ Ра́дуйся, две́ре Восто́ка,/ от врат смертоно́сных греха́ нас отводя́щая;/ ра́дуйся, свети́льниче пресве́тлый,/ просвеща́яй омраче́нных./ Ра́дуйся, бе́здно Бо́жия к нам человеколю́бия;/ ра́дуйся, цены́ вся́кия превы́сший дар,/ нам от Бо́га дарова́нный./ Ра́дуйся, я́ко и́маши ве́лие к Нему́ дерзнове́ние;/ ра́дуйся, стра́же Афо́на и та́мо обита́ющих Храни́тельнице./ Ра́дуйся, всекре́пкая стенд, е́юже сохраня́емся необори́мы враги́ христиа́нскими;/ ра́дуйся,я́зво неви́димых враго́в и от них уязвля́емых врачева́ние./ Ра́дуйся, безси́льных си́ло и по́моще безпо́мощных;/ ра́дуйся, Отра́до и Утеше́ние скорбя́щих./ Ра́дуйся, Неве́сто Неневе́стная.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Трои́ческою пла́мень пе́щныя попра́ша, пою́ще:/ отце́в Бо́же, благослове́н еси́.

Вопло́щся от утро́бы Твоея́ Госпо́дь, госпо́дствуяй тва́рию,/ и Тебе́, Де́во, Госпожу́ показа́ ви́димым же всем и неви́димым,/ я́ко Ма́терь Свою́ прославля́я Тя.

Согреши́хом, Го́споди, но не отступи́хом от Тебе́/ и ино́го не ве́мы, ра́зве Тебе́,/ не преда́ждь нас до конца́ Ма́тере Твоея́ мольба́ми, отце́в Бо́же благослове́нный.

Гора́ Бо́жия осене́нная, Всечи́стая,/ покры́й су́щия в Горе́ се́нию Твои́х моли́тв/ и от се́ти ловя́щих изба́ви пою́щия:/ оте́ц на́ших Бо́же, благослове́н еси́.

Непобеди́мая еси́ кре́пость, Госпоже́,/ и несокруши́мое огражде́ние с ве́рою призыва́ющих Тя:/ разруша́еши бо сове́ты вооружа́ющихся на сла́вящий Тебе́.

Уныва́ющим Отра́до, печа́льным Утеше́ние, заблужда́ющим Наста́внице,/ соблюди́ нас, Де́во, от вся́каго зла,/ чту́щих святы́й о́браз Твой.

Песнь 8

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

Преблагослове́нная Ма́ти Всеще́драго Бо́га,/ уще́дри ны, недосто́йный, дара́ми милосе́рдия Твоего́,/ да превозно́сим Тя во ве́ки.

Кре́пость и держа́ва бу́ди рабо́м Твои́м, Всецари́це,/ си́ла, ору́жие и меч, враги́ спасе́ния секу́щий,/ да сла́вим Тя во ве́ки.

Сия́ющая па́че А́нгел святы́нею,/ храни́ нас, Всенепоро́чная, от грехо́вных дея́ний, глаго́ланий и помышле́ний,/ да благословля́ем Тя во ве́ки.

Освяти́, Всесвята́я, благогове́йно лобыза́ющих святу́ю ико́ну Твою́/ и Твои́м ма́терним дерзнове́нием ми́лостива нам твори́ Сы́на Твоего́,/ да пое́м Его́ во ве́ки.

Отра́до и Утеше́ние моля́щихся Тебе́,/ вре́менных и ве́чных лю́тых изба́ви ны, да хва́лим Тя/ и Сы́на Твоего́ превозно́сим во вся ве́ки.

Путь и Живо́т, Де́во, ро́ждшая,/ стопы́ на́ша напра́ви по словеси́ Бо́жию,/ да, живо́т ве́чный насле́довавше, пое́м Тя,/ Сы́на Твоего́ превознося́ще во вся ве́ки.

Песнь 9

Ирмо́с: Проявле́нное на горе́ законополо́жнику во огни́ и купине́/ Рождество́ Присноде́вы/ в на́ше, ве́рных, спасе́ние/ пе́сньми немо́лчными велича́ем.

Весели́ся, Ватопе́де,/ неусы́пная бо Афо́на Назира́тельница/ я́же на Тя кова́рство вра́жие ма́нием Свои́м разруши́/ и изгна́нны сотвори́ разруше́ние Тебе́ угото́вавшия.

О, вели́каго дерзнове́ния Твоего́, Де́во, к Бо́гу и благоутро́бия к рабо́м Твои́м!/ Возвеща́ющи бо о вразе́х,/ уклони́ла еси́ лице́ Свое́ от руки́ Сы́на Твоего́,/ я́коже до ны́не зри́шися на ико́не Твое́й.

Пото́к све́тлости, отра́ды и утеше́ния неистощи́мый Ты еси́, Богора́дованная Ма́ти Све́та,/ тьму у́бо страсте́й прожени́ от нас,/ обстоя́щих све́тлое подо́бие лица́ Твоего́,/ и несвети́маго огня́ изба́ви.

Спасе́ние бу́ди при́сное, Госпоже́, от враг на́ших/ и из руки́ всех, ненави́дящих нас,/ и напра́ви но́ги на́ша на путь ми́рен/ милосе́рдия ра́ди ми́лости Сы́на Твоего́ и Бо́га на́шего, Преблагослове́нная.

Влады́чествующая все́ми я́ко Всецаря́ Ма́терь,/ стране́ на́шей пода́ждь благоде́нствие, мир, спасе́ние/ и на сопоста́ты побе́ды и одоле́ние.

Моле́бное пе́ние от души́ принесо́х со стра́хом Тебе́, Де́во, ро́ждшей Христа́ Бо́га,/ Его́же моля́щи, благоприя́тна сотвори́ моле́ния на́ша,/ да Тя пе́сньми немо́лчными велича́ем.

Свети́лен:

Озаря́еми благода́тным све́том от ико́ны Твоея́, Влады́чице,/ благогове́йно зове́м Ти:/ ра́дуйся, светоза́рная луно́, в нощи́ греха́ су́щих путеводя́щая к све́ту покая́ния;/ ра́дуйся, Ма́ти Изба́вителя, избавля́ющая нас от напа́стей неча́емых./ Ра́дуйся, Отра́до и Утеше́ние душ на́ших.

На хвали́тех стихи́ры, глас 1:

Мона́шествующих и мирски́х сосло́вия,/ со благогове́нием и любо́вию/ Ма́терь Бо́га на́шего воспои́м,/ Херуви́м и Серафи́м преиму́щую,/ ми́ра Всеблагу́ю Влады́чицу,/ отра́ду рабо́в Ея́ и утеше́ние.

Дея́ния и мы́сли исправля́юще,/ благодаре́ние и моли́твы/ от чиста́ се́рдца Пречи́стей принесе́м,/ стра́нное соде́явшей в Ватопе́де чу́до/ во исправле́ние согреша́ющих,/ во отра́ду рабо́в Свои́х и утеше́ние.

Афо́на Храни́тельница и стена́ необори́мая ве́рных/ разбо́йники, окружи́вшая оби́тель Ватопе́дскую,/ всемо́щным заступле́нием Свои́м/ су́етны и ничто́же успе́вшия показа́/ во отра́ду рабо́в Свои́х и утеше́ние.

Таже стихи́ры и Сла́ва, свята́го. И ны́не, глас 6:

Несть челове́ка, и́же поживе́т/ и не согреши́т Тебе́, Безгре́шный Влады́ко,/ и, а́ще беззако́ния на́зриши, кто постои́т?/ Ка́ко убо избега́ли бы мы, гре́шнии,/ пра́веднаго гне́ва Твоего́,/ а́ще не бы умилостивля́ла Тя Ма́терь Твоя́,/ Ея́же моли́твами поми́луй рабы́ Твоя́.

На вели́цей вече́рни

На Го́споди, воззва́х: стихи́ры, глас 2.

Подо́бен: Егда́ от Дре́ва:

Егда́ вся мирска́я мудрова́ния/ отве́ргл еси́, о́тче Макси́ме,/ кресто́м ра́зум просвети́в,/ обре́л еси́ бесце́нный би́сер – Христа́,/ И́же тя прему́дра показа́,/ улови́в мре́жею ве́ры./ Сего́ ра́ди мо́лимся ти, о́тче Макси́ме:/ моли́ Христа́ Бо́га умудри́ти нас/ и спасти́ ду́ши на́ша.

Егда́ Христа́ ра́ди стра́нствия/ подъя́л еси́, прему́дре Макси́ме,/ кресто́м вся стре́лы лука́ваго разжже́нныя,угаси́в,/ стяжа́л еси́ благода́ть Свята́го Ду́ха,/ И́же тя чудото́чца просла́ви,/ явля́я исцеле́ния и цельбы́./ Сего́ ра́ди мо́лимся ти, о́тче Макси́ме:/ моли́ Христа́ Бо́га благода́ть пода́ти нам/ и спасти́ ду́ши на́ша.

Егда́ мно́гия кни́ги от гре́ческаго на слове́нский язы́к/ преве́л еси́, преподо́бне Макси́ме,/ кресто́м ве́ру уясни́в,/ оклеве́тан был еси́ и в темни́цу осужде́н,/ иде́же Свято́му Ду́ху кано́н написа́л еси́,/ не иму́щу ти черни́л,угле́м по сте́нам./ Сего́ ра́ди мо́лимся ти, многострада́льне Макси́ме:/ моли́ Христа́ Бо́га укрепи́ти нас/ и спасти́ ду́ши на́ша.

Егда́ ле́стный мрак уны́ния/ просвети́л еси́, свя́те Макси́ме,/ кресто́м ду́шу утверди́в,/ позна́л еси́ Бо́га – И́стиннаго Отца́,/ И́же тя, я́ко сы́на, в Ца́рствие Небе́сное призва́,/ па́че сне́га убели́в./ Сего́ ра́ди мо́лимся ти, о́тче Макси́ме:/ моли́ Христа́ Бо́га умири́ти нас/ и спасти́ ду́ши на́ша.

Сла́ва, глас 1:

В преставле́нии твое́м к Бо́гу, преподо́бне Макси́ме,/ жа́лостию сердца́ на́ша исполня́ются,/ и сле́знии исто́чницы излива́ются,/ и мона́хов мно́жество уми́льными словесы́/ тя, отца́,и учи́теля, и наста́вника венчава́ют,/ вся же страна́ Русская безпреста́ни красу́ется/ сла́дкими словесы́ твои́ми.

И ны́не, Богоро́дичен.

Вход. Проки́мен дне. Чте́ния три преподо́бническая.

На стихо́вне стихи́ры, глас 2.

Подо́бен: До́ме Евфра́фов:

Дом Ду́ха Свята́го/ и Ца́рствия насле́дник/ ты еси́, Макси́ме,/ моли́ся о нас,/ чту́щих святу́ю па́мять твою́.

Стих: Честна́ пред Го́сподем/ смерть преподо́бных Его́.

Дом благода́ти/ яви́лся есть гроб твой,/ Макси́ме прему́дре,/ моли́ся о нас,/ притека́ющих к тебе́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Дом твой но́вый -/ свята́я Ла́вра,/ вку́пе и Афо́н/ пе́сненно да восхва́лят/ по́двиги и страда́ния твоя́.

Сла́ва, глас то́йже:

До́ме Святы́я Тро́ицы,/ красу́йся и лику́й,/ име́я свети́льник,/ и́же под спу́дом/ сия́ет па́че со́лнечных луч.

И ны́не, глас то́йже:

Дом Бо́жий,/ и пала́та Ца́рская,/ и черто́г Небе́сный/ ты еси́, Пречи́стая,/ упова́ние и покро́в.

Тропа́рь, глас 8.

Заре́ю Ду́ха облиста́емь,/ вити́йствующих богому́дренно сподо́бился еси́ разуме́ния,/ неве́дением омраче́нная сердца́ челове́ков све́том благоче́стия просвеща́я,/ пресве́тел яви́лся еси́ Правосла́вия свети́льник, Макси́ме преподо́бне,/ отону́дуже ре́вности ра́ди Всеви́дящаго/ оте́чества чужд и стра́нен, Русския земли был еси́ пресе́льник,/ страда́ния темни́ц и заточе́ния от самодержа́внаго претерпе́в,/ десни́цею Вы́шняго венча́ешися и чудоде́йствуеши пресла́вная./ И о нас хода́тай буди́ непрело́жен,/ чту́щих любо́вию святу́ю па́мять твою́.

И ны́не, Богоро́дичен.

На у́трени

По 1-м стихосло́вии седа́лен, глас 8:

Тве́рдыя и Боговеща́нныя глаго́лы со тща́нием изъясня́я и нечести́выя писа́нии облича́я/ ум свой впери́в в Го́рняя к Бо́гу,/ у́зы страда́льческий от наве́т проти́вных претерпе́л, Макси́ме преподо́бне,/ и сих ра́ди и́ноком яви́лся еси́ о́браз, па́че же и похвала́.

Сла́ва, и ны́не, Богоро́дичен:

Тя, превосходя́щую безпло́тныя Боже́ственныя чи́ны несравне́нною чистото́ю,/ молю́, Всепе́тая:/ скве́рную мою́ ду́шу очи́сти от беззако́нных помышле́ний,/ я́ко да досто́йно сла́влю Тя.

По 2-м стихосло́вии седа́лен, глас 8:

Все свое́ у́мное жела́ние к Бо́гу впери́л еси́,/ и Того́ зва́нию невозвра́тно от души́ после́довал еси́,/ во оби́тель преподо́бнаго Се́ргия коне́чно всели́вся,и,та́мо а́нгельски пожи́в,/ мно́гим путь был еси́ ко спасе́нию,/ сего́ ра́ди и Госпо́дь тебе́ просла́ви, чудесы́ обогати́в,/ те́мже вси вопие́м ти:/ ра́дуйся оби́тели Тро́ицкия чудесото́чное похвало́, Макси́ме о́тче наш.

Сла́ва, и ны́не, Богоро́дичен:

Молю́ Тя, Пречи́стая,/ не пре́зри мене́, потопля́ема лю́те в скве́рную ти́ну греха́,/ но измы́й мене́ от злосмра́дия благоуха́нным ми́ром моле́ний Твои́х/ и све́том сладча́йшим Боже́ственный Твоея́ любве́ всю тьму души́ моея́ просвети́.

По полиеле́и седа́лен, глас 4:

Я́ко звезда́ пресве́тлая, обте́кшая восто́чныя стра́ны и к се́веру прише́дшая,/ озаря́ет мглу, те́мность мра́ка просвеща́я вся́ческую,/ та́ко и ты, преподо́бне Макси́ме, уподо́бился еси́ сей,/ держа́внаго испроше́нием стра́нен яви́лся еси́ и пресе́льник от Афо́на в вели́цей Руси,/ в исправле́нии Боже́ственных Писа́ний преди́вен, изя́щен показа́ся,/ но наве́тующими льсти́ваго борца́ науще́нии пострада́л еси́,/ и за страда́ния своя́ и в темни́це заточе́ния от Бо́га свы́ше прия́т чудоде́йствия дар,/ и ны́не мо́лим тя:/ при́сно проси́ Христа́ мир вселе́нней дарова́ти/ и душа́м на́шим ве́лию ми́лость.

Сла́ва, и ны́не, Богоро́дичен:

Уще́дри мене́, Влады́чице, к Тебе́ прибега́ющего,/ и изба́ви мя сту́днаго наси́лия зло́бных предста́телей лю́таго, зми́я,/ и́же, я́ко ехи́дны, уязвля́ют ду́шу мою́./ А́ще бо аз и неключи́мый раб Твой, Влады́чице, но упова́ю на Тя.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, яже воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Подо́бен: Егда́ преставле́ние:

Егда́ страда́ния претерпева́л еси́, преподо́бне Макси́ме,/ тогда́, пла́ча и рыда́я,/ моли́л еси́ святи́теля Мака́рия:/ даждь ми узре́ти Святу́ю Го́ру -/ моли́твенницу о вселе́нней./ Он же со слеза́ми вопия́ше ти:/ о Макси́ме!/ Ви́жду тя невино́вна/ моли́твенника и сокруша́юся,/ у́зы твоя́ я́ко еди́наго от святы́х целу́ю,/ а помощи́ не могу́ ти./ Но, о преподо́бне о́тче,/ моли́ся приле́жно Бо́гу и Ма́тери Его́/ спасти́ся се́тей вра́жиих/ нам невреди́мым.

Кано́н Пресвяте́й Богоро́дице ра́ди Ея ико́ны, нарица́емыя Ватопе́дския,и преподо́бному Макси́му Гре́ку кано́н, глас 1.

Песнь 1

Ирмо́с: Пои́м, вси лю́дие,/ от го́рькия рабо́ты фарао́ни Изра́иля изме́ншему/ и во глубине́ морсте́й нога́ми немо́крыми Наста́вльшему/ песнь побе́дную,/ я́ко просла́вися.

Воспе́ти кий язы́к возмо́жет по достоя́нию/ твоя́, преди́вный о́тче, ве́лия исправле́ния, высо́кое учи́тельство,/ в темни́це и во у́зах му́ченическое страда́ние и долготерпе́ние?

Ка́ко воспое́м и что тя нарече́м, предо́блий о́тче?/ Проро́ка ли, я́ко провеща́ неудо́бь разумева́емая и ве́домая нам,/ апо́стола ли, я́ко зы́блемую проти́вными нам ве́тры/ утверди́ христиа́нскую ве́ру Боже́ственных писа́ний уче́нии,/ учи́теля ли, но вои́стинну ничи́м же ху́ждши и ни́жши еси́ вели́ких о́нех вселе́нских учи́тель.

Воспе́ти Свята́го и поклоня́емаго Паракли́та в те́мнице извеще́ние от А́нгела, прии́м,/ сотвори́л еси́ кано́н Свято́му Ду́ху,/ И́мже еще́ в во́ли просвеще́н, свяще́нныя и Богодухнове́нныя кни́ги соста́вил еси́.

Богоро́дичен: Пои́м, вси лю́дие, святы́ню и сла́ву Пречи́стыя и Всепе́тыя Бо́жия Ма́тере,/ вы́шшую Небе́с и всех у́мных Сил,/ поноси́вшую в пречи́стой Свое́й утро́бе Емману́ила,/ я́ко свя́та и пресла́вна есть.

Песнь 3

Ирмо́с: Утверди́ ме́не, Христе́, на недви́жимом ка́мени за́поведей Твои́х/ и просвети́ мя све́том лица́ Твоего́:/ несть бо свят, па́че Тебе́, Человеколю́бче.

Утверди́л еси́, преподо́бне Макси́ме, в се́рдце свое́м Боже́ственный страх,/ вся по́хоти плотска́я возненави́дев,/ се́го ра́ди умудри́лся еси́, я́коже прост младе́нец,/ и вслед Го́сподеви восте́кл еси́.

Утвержде́нием име́я распе́ншагося Го́спода Иису́са Христа́,/ стра́нен, незна́ем, бездо́мен, безоте́чествен,/ безъиме́нен, безсмы́слен был еси́, преподо́бне Макси́ме,/ пред свои́ми сро́дники, зна́емыми и дру́ги.

Утвержда́яся на за́поведех Госпо́дних,/ от го́рести темни́чныя был еси́ на мног час, я́ко мертв,/ но де́ял еси́ о злонра́вных моли́тву, си́це глаго́ля:/ Го́споди, Иису́се Христе́, Сы́не Бо́га Жива́го,/ не поста́ви им греха́ сего́, клеве́щущих на мя непра́вду.

Богоро́дичен: Утверди́ нас к хвале́нию Твоему́, Де́во,/ и сохрани́ без вре́да от вся́кия ко́зни лука́ваго,/ и сподо́би стоя́ния одесну́ю Единоро́днаго Сы́на Твоего́,/ Ему́же подоба́ет вся́кая сла́ва, честь и поклоне́ние во ве́ки веко́в.

Седа́лен, глас 4:

Ум украси́в поуче́нии Богодохнове́нных Писа́ний,/ тре́звенною моли́твою и бде́нии Богоуго́дными,/ утверди́л еси́ се́рдце свое́ в Го́споде исполне́нием за́поведей спаси́тельных Его́,/ сего́ ра́ди прославля́ют тя вы́ну русстии лю́дие и Афо́н,/ и оби́тель Ватопе́дская вку́пе с на́ми вопие́т:/ Макси́ме прему́дре, не оста́ви нас, моля́щихся тебе́.

Сла́ва, и ны́не, Богоро́дичен:

Молю́ Тя, Пречи́стая Ма́ти Бо́га Вы́шняго,/ еди́но души́ моея́ утеше́ние, упова́ние, сла́досте,/ Боже́ственный покро́ве, све́те, заступле́ние и спасе́ние!/ Сподо́би мя Твои́ми моли́твами услы́шати глас,/ благослове́нных призыва́ющий внутрь черто́га Влады́ки.

Песнь 4

Ирмо́с: Ве́лия та́йна/ Твоего́, Христе́, смотре́ния:/ сию́ бо свы́ше прови́дя богозри́тельно, Авваку́м,/ изше́л еси́, вопия́ше Тебе́,/ во спасе́ние люде́й Твои́х, Человеколю́бче.

От та́йных ерети́ческих лжеуче́ний/ ничто́же утаи́ся от Тебе́, преподо́бне Макси́ме,/ но благода́тию Свята́го и поклоня́емаго Ду́ха вся тебе́ открове́на суть.

Та́инственных догма́тов Правосла́вный ве́ры/ не то́чию побо́рника и́стинна и ве́рна себе́ показа́,/ но и па́че прео́стра секи́ра/ на вся, я́же под небесе́м, е́реси́ яви́лся еси́.

Я́ко таи́н Свята́го Ду́ха строи́тель,/ и Небе́снаго жи́тельства рачи́тель, и зако́на Госпо́дня учи́тель/ вои́стинну показа́лся еси́, прему́дре Макси́ме.

Богоро́дичен: Ве́лию та́инству Моисе́й Богови́дец науче́н, зря купину́ неопали́му:/ купина́ – не́мощь челове́ческаго естества́,/ огнь же – Божество́ Единоро́днаго Сы́на Вы́шняго,/ и́бо Бог наш – огнь есть, пояда́яй грехи́ на́ша,/ я́коже Боже́ственный апо́стол рече́.

Песнь 5

Ирмо́с: От но́щи у́тренююще, пое́м Тя, Христе́,/ Отцу́ Собезнача́льна и Спа́са душ на́ших,/ мир ми́рови пода́ждь, Человеколю́бче,

Но́щию луна́, днем со́лнце просвеща́ют и веселя́т тварь всю ви́димую,/ житие́ же и прему́дрость святы́х просвеща́ют и веселя́т ду́ши всех челове́ков,/ хотя́щих спасти́ся и в ра́зум и́стины прии́ти́./ Си́це и писа́ния преподо́бнаго Макси́ма Гре́ка, я́ко богодухнове́нныя труды́, велегла́сно вопию́т.

В нощи́ моля́щуся тебе́ в темни́це,/ Богонача́льныя и Преблаги́я Тро́ицы про́мыслом внем А́нгел Госпо́день и ре́че:/ о ста́рче! Си́ми му́ками избу́деши ве́чных мук.

В нощи́, я́ко сладкогла́сный и добропе́снивый сла́вий,/ воспе́л еси́, прему́дре Макси́ме:/ не тужи́, не скорби́, ниже́ тоску́й о ни́хже, -/ любе́зна ми душе́, -/ стра́ждеши без пра́вды,/ твоя́ бо мзда ве́лия на Небесе́х.

Богоро́дичен: От но́щи у́тренююще, пое́м Тя, Де́во,/ Дщерь Царе́ву, ря́сны златы́ми оде́яну и преиспещре́ну,/ ле́ствицу, ю́же Иа́ков ви́де,/ го́ру, ю́же благоволи́ Бог жи́ти в ней, и́бо Госпо́дь всели́тся до конца́.

Песнь 6

Ирмо́с: Проро́ка спасл еси́ от ки́та, Человеколю́бче,/ и мене́ из глубины́ прегреше́ний возведи́, молю́ся.

Проро́чески, преподо́бне Макси́ме, лю́ди облича́л еси́, к покая́нию приводя́:/ заблуди́хом, заблуди́хом от пра́ваго и незаблу́днаго жи́тельства преподо́бных и́нок/ и без ума́ тече́м к по́чести вы́шняго зва́ния.

Проро́к покая́ния яви́лся еси́, преподо́бне Макси́ме,/ души́ трезве́ние снабдева́я Боже́ственными словесы́/ и из ро́ва страсте́й возводя́ омраче́нных грехми́.

Проро́ческия писа́ния, в та́йне глаго́ланныя,/ я́вны соде́лал еси́, прему́дре Макси́ме,/ сего́ ра́ди послу́шают тя оби́льно вси лю́дие.

Богоро́дичен: Проро́ки Тя провозвести́ша, Де́во Чи́стая,/ апо́столи пропове́даша, святи́и вси ублажи́ша,/ мы же со Арха́нгелом вопие́м:/ ра́дуйся, Благода́тная, Госпо́дь с Тобо́ю.

Конда́к, глас 8.

Подо́бен: Прему́дрости:

Богодухнове́нным Писа́нием и Богосло́вия пропове́данием/ неве́рствующих суему́дрие обличи́л еси́, всебога́те,/ па́че же, в Правосла́вии исправля́я, на стезю́ и́стиннаго позна́ния наста́вил еси́,/ я́коже свире́ль Богогла́сная, услажда́я слы́шащих ра́зумы,/ непреста́нно веселиши, Макси́ме досточу́дне,/ сего́ ра́ди мо́лим Тя:/ моли́ Христа́ Бо́га грехо́в оставле́ние низпосла́ти/ ве́рою пою́щим всесвято́е твое́ успе́ние, Макси́ме, о́тче наш.

И́кос:

Ка́ко воспое́м велича́йшему тезоимени́таго, Макси́ма предо́бляго?/ преподо́бных кра́сна венца́, страда́льцев тве́рдаго пра́вила,/ еретико́в нело́жнаго посрамле́ния, Це́ркви столпа́ непоколеби́маго,/ де́вственник изве́стнаго наста́вника и супру́жества честна́го засту́пника,/ филосо́фов прему́дршаго мудреца́, и́стины исто́чника приснотеку́щаго,/ и́нок похвалу́ и всех люде́й вои́стинну украше́ние,/ сего́ ра́ди мо́лим тя, досточу́дне Макси́ме:/ моли́ Христа́ Бо́га грехо́в оставле́ние низпосла́ти/ ве́рою пою́щим всесвято́е твое́ успе́ние, Макси́ме, о́тче наш.

Песнь 7

Ирмо́с: О́бразу служи́ти,/ мусики́йскому согла́сию созыва́ющу лю́ди,/ от пе́сней сио́нских по́юще оте́чески, о́троцы Дави́довы/ мучи́телево разори́ша злочести́вое веле́ние/ и пла́мень в ро́су преложи́ша,/ песнь воспева́юще:/ превозноси́мый отце́в и наш Бо́же, благослове́н еси́.

О́бразу промышле́ния Пресвяты́я Тро́ицы песнь благода́рственну возда́в, преподо́бне Макси́ме,/ вся ны призва́л еси́ благослови́ти небла́зненно Отца́, и Сы́на, и Свята́го Ду́ха,/ Еди́наго Бо́га в Трие́х Ипоста́сех.

О́браз злострада́ния, терпе́ния и моли́твы показа́лся еси́, свя́те Макси́ме, па́че же и упова́ния,/ я́ко Бог Судия́ пра́веден, и кре́пок, и долготерпели́в есть,/ и Той возда́ст коему́ждо по дело́м его́.

О́браз превы́спренняго Богосло́вия стяжа́л еси́, прему́дре Макси́ме,/ сии́ есть догма́ты Боже́ственных апо́стол и оте́ц,/ от Свята́го Паракли́та излия́нныя, и́мже и нас науча́еши Богому́дрыми свои́ми писа́нии.

Богоро́дичен: О́браз пречи́стаго Твоего́ рождества́, Де́во Ма́ти,/ неизрече́нен и недове́дом есть,/ Ты бо вселе́ние преве́чнаго Единоро́днаго Сы́на О́тча была́ еси́, не опали́вшися от Него́.

Песнь 8

Ирмо́с: В пла́мени о́гненне горя́щия пе́щи/ сохра́ншаго де́ти/ и во зра́це А́нгела снизше́дшаго к ним/ по́йте Го́спода/ и превозноси́те Его́ во ве́ки.

Пла́мене Боже́ственнаго Паракли́това облиста́ния возжеле́в, преподо́бнее Макси́ме,/ сего́ ра́ди и сладча́йшим све́том уче́ния и чуде́с огне́м/ отгна́л еси́ вся́кий мрак бесо́вский.

Пла́мене гее́ннскаго бе́гати лю́ди научи́л еси́, преподо́бне Макси́ме,/ сих призыва́я де́лом соверша́ти за́поведи Христо́вы/ и отступи́ти зло́бы, блуда́, лжи, го́рдости, льсти и хище́ния непра́веднаго чужи́х име́ний.

Пла́менно нече́стие ерети́ческое попали́л еси́, прему́дре Макси́ме,/ ве́ры же христиа́нския непоро́чныя Боже́ственное испове́дание изъясни́в.

Богоро́дичен: В пла́мени о́гненне горя́щия купины́ ви́де Тя Моисе́й Богови́дец,/ провозвести́в безсе́менное рождество́ Твое́, Де́во Пречи́стая,/ сего́ ра́ди и нас плотски́х страсте́й свободи́.

Песнь 9

Ирмо́с: Тебе́, све́тлую свещу́ и Ма́терь Бо́жию,/ пречу́дную сла́ву и вы́шшую всех тва́рей,/ пе́сньми велича́ем.

Тебе́, све́тлую свещу́, и ум крайне́йший, и столп непоколеби́м ве́мы,/ па́че же наста́вника мона́хов и ересе́й наказа́теля пропове́дуем.

Све́тло от полу́денных стран возсия́л еси́, преподо́бне Макси́ме,/ све́тло житие́ показа́в, мрак лука́вствия прогоня́я/ и благоприя́тною моли́твою просия́в.

Свеща́ Боже́ственнаго ра́зума быв, дости́гл еси́ в позна́ние Сы́на Бо́жия,/ в му́жа соверше́нна, в ме́ру во́зраста Христо́ва,/ сего́ ра́ди и мы вопие́м ти:/ блаже́н ты еси́ вои́стинну по всему́,/ и по́двиги, и сла́вою, и благода́тию, я́же еси́ свы́ше получи́л.

Богоро́дичен: Тебе́, и све́тлую свещу́ в нощи́ страсте́й,/ и покро́в благосты́ни, и сте́ну необори́му от наве́т вра́жиих,/ пе́сньми велегла́сно велича́ем.

Свети́лен:

Свет возсия́л есть преподо́бному Макси́му Боже́ственных слове́с и повеле́ний,/ сего́ ра́ди я́ко свет вторы́й и ум крайне́йший нам яви́ся.

Сла́ва, и ны́не, Богоро́дичен:

Ужасо́шася а́нгельский си́лы, зря́ще Де́ву,/ Свет от Све́та в рука́х держа́щу,/ чи́сте Ро́ждшей вопия́ше:/ Свет возсия́л есть нам от деви́ческих ложе́сн.

На хвали́тех стихи́ры, глас 8:

Отре́клся еси́ себе́, преподо́бне Макси́ме,/ и стра́нна себе́ показа́ всего́ жития́ сего́ су́етнаго,/ ни пи́ще сла́дкой, ни сла́ве, ни име́нием ктому́ ра́дуяся,/ ниже́ дру́жбам си́льных./ Вся же вку́пе отри́нул еси́ нестяжа́тельным житие́м,/ и слеза́ми, и безмо́лвием, моли́твами, и бде́нии, и кни́жными прочита́нии,/ Боже́ственною добро́тою мы́сленно пита́яся, ра́дуешися,/ весе́лия при́сно наполня́емь.

Макси́м преподо́бный, я́коже и дре́вле отцы́,/ не ху́де боре́ния показа́,/ о́во еретики́ словесы́ свои́ми бия́,/ о́во же ве́рныя неподви́жимо ве́ре стоя́ния укрепля́я,/ не поколеба́ша бо сего́ отца́ лю́тыя бу́ри прира́жения,/ ни темни́ца, ни у́зы, те́ло держа́щии,/ а ду́шу просвеща́ющии.

Макси́м прему́дрый,/ вторы́й земны́й и многострада́льный херуви́м,/ Боже́ственную трапе́зу нам предлага́ет в па́мяти свое́й,/ усе́рдно теце́м, о празднолю́бцы,/ на пресла́дкий сей и изоби́льный исто́чник,/ распали́вшуюся жа́жду от ло́жных ерети́ческих уче́ний угаша́юще/ и ду́ши в Го́рния оби́тели возво́дяще.

Сла́ва, глас 3:

Спаси́ нас Твое́ю благода́тию, Пресвята́я Тро́ице,/ Соде́телю всех и Содержа́телю,/ сохрани́ нас чи́сты, в настоя́щем убо жити́и благове́рно служа́щих Ти,/ в бу́дущем ве́це сподо́би соучини́тися нам/ Боже́ственному ли́ку избра́нных Твои́х,/ иде́же шум чист пра́зднующих и глас неизрече́ннаго весе́лия.

И ны́не, Богоро́дичен:

Славосло́вие вели́кое.

На Литурги́и слу́жба преподо́бническая.