На Го́споди, воззва́х: стихи́ры на 6, глас 4.

Подо́бен: Дал еси́ зна́мение:

Блаже́нства су́щаго па́че ума́ жела́я,/ вмени́л еси́, чу́дне,/ пи́щу воздержа́ние,/ нищету́ – бога́тство,/ нестяжа́ние – име́ние и́стинное/ и благосла́вие – смире́ние./ Те́мже и жела́ния, е́же по ра́зуму, улучи́л еси́,/ в жили́щах водворя́яся святы́х, Мака́рие.

Тече́ние воздержа́ния непрело́жно соверши́л еси́/ и ве́ру соблю́л еси́,/ отону́дуже и вене́ц прия́л еси́, о́тче, пра́вды,/ его́же тебе́ угото́ва Христо́с,/ по досто́инству дая́й воздая́ния,/ и че́сти да́руяй, и боле́зней возме́здие./ И́хже и ны́не нам, сла́вне, пода́ти моли́ся.

Вся́кое сладостра́стие,/ удруча́я те́ло твое́,/ отве́ргл еси́, Богому́дре,/ огорча́я чу́вства воздержа́нии кре́пкими и жестокожи́тием,/ терпе́нием же напа́стей и пожда́нием обстоя́ний./ И́хже ра́ди безконе́чное восприе́млеши наслажде́ние,/ и пи́щу непрее́мную, и ра́дость неизглаго́ланную.

Сла́ва, глас 8. Анато́лиево:

Весели́ся, Еги́пте,/ процве́тший такова́го граждани́на, во блаже́нных Мака́рия,/ сей бо,прему́дростию Свята́го Ду́ха украси́вся,/ вся́ко поще́ние в доброде́тельном житии́ свое́м произобрази́./ Того́ и мы хода́тая приводя́ще про́сим умоли́ти Христа́/ спасти́ся душа́м на́шим.

И ны́не, Богоро́дичен и́ли Крестобогоро́дичен.

Подо́бев: Му́ченицы Твои́, Го́споди:

Ю́ница Нескве́рная,/ Юнца́ ви́дящи, на Дре́ве пригвожда́ема во́лею,/ рыда́ющи жа́лостне, – увы́ Мне, – вопия́ше,/ люби́мейшее Ча́до!/ Что́ Ти сонм воздаде́ безблагода́тный евре́йский,/ хотя́ Мя обезча́дствовати от Тебе́, Вселюбе́зне?

На стихо́вне Окто́иха.

Сла́ва, глас 6:

Преподо́бне о́тче,/ во всю зе́млю изы́де веща́ние исправле́ний твои́х./ Тем на Небесе́х обре́л еси́ мзду трудо́в твои́х,/ де́монския погуби́л еси́ полки́/ и А́нгельския дости́гл еси́ чи́ны,/ и́хже житию́ непоро́чно поревнова́л еси́,/ дерзнове́ние име́я ко Христу́ Бо́гу,/ мир испроси́ душа́м на́шим.

И ны́не, Богоро́дичен и́ли Крестобогоро́дичен.

Подо́бен: Тридне́вен:

На Дре́ве Живо́т наш зря́щи, Всенепоро́чная Богоро́дице, ви́сящ,/ ма́терски рыда́ющи, вопия́ла еси́:/ Сы́не Мой и Бо́же Мой,/ спаси́ любо́вию пою́щия Тя.

Тропа́рь, глас 4:

Пусты́нный жи́тель, и во пло́ти А́нгел,/ и чудотво́рец яви́лся еси́, Богоно́се о́тче наш Мака́рие,/ посто́м, бде́нием, моли́твою Небе́сная дарова́ния прии́м,/ исцеля́еши неду́жныя и ду́ши ве́рою приходя́щих ти./ Сла́ва Да́вшему тебе́ кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

На у́трени

О́ба кано́на Окто́иха и свята́го кано́н на 6, его́же краегране́сие: Всеизря́днаго в по́стницех Мака́рия сла́влю. Феофа́ново, глас 4.

Песнь 1

Ирмо́с: Ли́цы Изра́ильтестии,/ невла́жными стопа́ми понт Чермны́й и вла́жную глубину́ прогна́вше,/ вса́дники триста́ты враги́ ви́дяще, в ней погруже́ны,/ с весе́лием поя́ху:/ пои́м Бо́гу на́шему, я́ко просла́вися.

Боже́ственным све́том сия́я/ и со А́нгелы, о́тче, ны́не водворя́яся,/ моли́твами твои́ми спаса́й соверша́ющия всесвященную твою́ па́мять/ и в ра́дости вопию́щия:/ пои́м Бо́гу на́шему, я́ко просла́вися.

Путь, к жи́зни веду́щий,/ неукло́нно, преблаже́нне, ше́ствуяй, соверши́л еси́,/ избе́г мяте́жей, и бесо́вская смуще́ния разори́л еси́,/ ра́достно взыва́я:/ пои́м Бо́гу на́шему, я́ко просла́вися.

Умертви́в плотско́е мудрова́ние по́стническими твои́ми боре́нии,/ Боже́ственному Ду́ху покори́л еси́, о́тче,/ и, Сего́ управля́емь Боже́ственною си́лою, в ра́дости вопия́л еси́:/ пои́м Бо́гу на́шему, я́ко просла́вися.

Вся кра́сная оста́вил еси́,/ непреста́нную возлюби́в, о́тче, красоту́ в дому́ Госпо́дни,/ иде́же шум чи́сте пра́зднующих, в ра́дости вопию́щих:/ пои́м Бо́гу на́шему, я́ко просла́вися.

Богоро́дичен: Безле́тнаго Сы́на Безнача́льнаго Отца́,/ плоть нас ра́ди, челове́ков, бы́вша, Чи́стая, во утро́бе заче́нши,/ под ле́том Сего́ родила́ еси́ несказа́нно./ Ему́же и, ра́дующеся, вопие́м:/ пои́м Бо́гу на́шему, я́ко просла́вися.

Песнь 3

Ирмо́с: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́.

Зако́ну повину́лся еси́ Ду́ха,/ Его́же всеору́жием препоя́сався, преподо́бне,/ не зако́ну греха́ произволе́ние подклони́л еси́.

Горе́ к Бо́гу мудрова́ние име́я, Богоно́се,/ я́же на земли́ оста́вил еси́,/ боле́зньми воздержа́ния непреста́нно облегча́емь.

Расто́рг у́зы естества́, преесте́ственным и чи́стым твои́м житие́м, Богоно́се,/ су́щих па́че естества́ прия́л еси́ де́йство.

Да Бо́гу, блаже́нне, в безмяте́жии бесе́дуеши,/ в пусты́ни, о́тче, жи́ти изво́лил еси́, от молв удаля́яся.

Богоро́дичен: Спасти́ хотя́ челове́ка на поле́зное, я́ко Благоде́тель Человеколю́бец,/ в Твою́ утро́бу неопи́санно, Богома́ти, всели́ся.

Конда́к, глас 4.

Подо́бен: Яви́лся еси́:

Вдому́ Госпо́дь воздержа́ния вои́стинну тя положи́,/ я́коже звезду́ непреле́стную, световодя́щу концы́,/ о́тче отце́в, Мака́рие преподо́бне.

Седален, глас 1,

Подо́бен: Гроб Твой, Спа́се:

Воздержа́ния огне́м, я́ко зла́то в пещи́, му́дре, искуси́вся,/ светле́йший яви́лся еси́,/ сего́ ра́ди к Небе́сному преста́вился еси́ Ца́рствию./ Те́мже, ве́рою восхваля́юще тя, вопие́м:/ благода́ть, ми́лость и очище́ние прегреше́ний на́ших, о́тче, испроси́.

Сла́ва, и ны́не, Богоро́дичен:

Напра́ви ны на путь покая́ния,/ укло́ньшияся при́сно к безпу́тием зол и Преблага́го прогне́вавший Го́спода,/ Неискусобра́чная, Благослове́нная Мари́е,/ прибе́жище отча́янных челове́ков, Бо́жие жили́ще.

Крестобогоро́дичен:

Нескве́рная А́гница/ А́гнца и Па́стыря, пове́шена на Дре́ве, ме́ртва зря́щи,/ пла́чущи, веща́ше, ма́терски восклица́ющи:/ ка́ко претерплю́ Твое́, е́же па́че сло́ва, Сы́не Мой, сни́тие и во́льныя стра́сти,/ Бо́же Преблаги́й?

Песнь 4

Ирмо́с: Седя́й в сла́ве на престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Тле́емаго а́бие ве́тхаго челове́ка совле́клся еси́, о́тче,/ с грехо́вными страстьми́ воздержа́нием незави́стным,/ обле́клся же еси́ в но́ваго по Христе́, всече́стне.

Светле́йшее твое́ житие́/ я́ко пра́вило изве́стнейшее вся́кия, о́тче, Боже́ственный доброде́тели показа́ся/ в моли́твах и посте́х, бде́ниих же и мольба́х ко Христу́ Человеколю́бцу.

Дрема́ния твои́м ве́ждом, Богему́дре, не дал еси́,/ до́ндеже, о́тче, дом себе́ сотвори́л еси́ красне́йший Всеви́дцу Влады́це,/ к Нему́же взыва́л еси́:/ сла́ва, Христе́, си́ле Твое́й.

В ю́ности целому́дрие, в ста́рости ра́зум,/ во все́м же житии́ пожда́ние и долготерпе́ние/ и ко всем любо́вь показа́л еси́, взыва́ющим:/ сла́ва, Христе́, си́ле Твое́й.

Богоро́дичен: Умерщвле́нныя, Всечи́стая, челове́ки оживи́ла еси́,/ па́дшия сия́ к тле́нию возста́вила еси́,/ Жизнода́вца ро́ждши, избавля́ющаго взыва́ющия:/ сла́ва, Христе́, си́ле Твое́й.

Песнь 5

Ирмо́с: Просвеще́ние Твое́, Го́споди, низпосли́ нам/ и от мглы прегреше́ний разреши́ ны, Бла́же,/ Твой мир да́руяй.

Просте́р, сла́вне, души́ у́мное/ и чу́вства, му́дре, упра́вив,/ был еси́ храм освяще́н Бо́гу и всече́стен.

Стропти́вейшаго зми́я увяди́в кова́рства/ и того́ го́рькия ко́зни притупи́л еси́,/ при́сно в Боже́ственном зако́не ду́шу устроя́я.

Украси́л еси́, Преподо́бне, души́ трича́стное/ и, влады́ку ум поста́вив, име́л еси́ Христа́,/ наставля́ющаго к ше́ствию Небе́сному.

Богоро́дичен: Де́ва роди́ Пречи́стаго Бо́га, законополага́юща всем чистоту́/ и святы́ню благоче́стия су́щим на земли́ возвеща́юща.

Песнь 6

Ирмо́с: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ сил.

В пусты́ни жи́ти усе́рдно возлюби́л еси́, Богоно́се,/ в ней Бо́га прие́мля,/ избавля́ющаго тя и соблюда́юща твоя́ стопы́.

Непрекло́нен в поще́нии, Богому́дре, пребы́л еси́ да́же до конца́,/ храня́ сие́ опасе́ние,/ и́мже нетле́ннаго сподо́бился еси́ я́ве наслажде́ния.

Равноа́нгельно на земли́ житие́ пожи́л еси́,/ равноа́нгельную и честь досто́йно получи́л еси́,/ со А́нгелы всех Бо́гу предстоя́.

Богоро́дичен: Зачала́ еси́ во утро́бе, Богома́ти, Безнача́льнаго Бо́га Сло́ва,/ нас ра́ди, челове́ков, бы́вша непрело́жна по нам,/ во двою́ зна́емаго естеству́.

Конда́к, глас 1.

Подо́бен: Лик А́нгельский:

Блаже́нную жизнь сконча́в в житии́ с му́ченическими ли́ки,/ в земли́ кро́тких досто́йно водворя́ешися, Богоно́сне Мака́рие,/ и пусты́ню, я́коже град, насели́в, благода́ть прия́л еси́ от Бо́га чуде́с,/ те́мже тя почита́ем.

Икос:

Богоно́снаго быв убо Анто́ния учени́к, о́тче, и́скренний,/ я́коже воск, изобразу́я,/ вся́кую изобрази́л еси́ того́ пои́стинне доброде́тель и страда́ния./ Тем и, я́ко Илия́ сугу́бо,/ я́коже ино́му Елиссе́ю, тебе́ чуде́с благода́ть даде́ся,/ и предве́дения осия́ние и́стины получи́вшему,/ ве́лие положи́ся во всем ми́ре дея́ние жития́ твоего́,/ воздвиза́я спя́щия в поги́бельней про́пасти,/ те́мже тя почита́ем.

Песнь 7

Ирмо́с: Спасы́й во огни́ Авраа́мския Твоя́ о́троки/ и халде́и уби́в,/ я́же пра́вда пра́ведно уловля́ше,/ препе́тый Го́споди, Бо́же о́тец на́ших,/ благослове́н еси́.

Свы́ше манове́нием и Бо́жиею по́мощию враги́ низложи́в,/ победоно́сец, зовы́й, был еси́:/ препе́тый Го́споди, Бо́же отце́в на́ших, благослове́н еси́.

Очи́стив мглу, от страсте́й бы́вшую,/ безстра́стия просвеще́нием озари́лся еси́, зовы́й, блаже́нне:/ препе́тый Го́споди, Бо́же отце́в на́ших, благослове́н еси́.

Уясни́в ду́шу доброде́тельными благоле́потами,/ красе́н добро́тою Бо́гу быв, песнопе́л еси́, ра́дуяся:/ препе́тый Го́споди, Бо́же отце́в на́ших, благослове́н еси́.

Богоро́дичен: Призыва́я ны, плене́нный, Де́во, во е́же бе́хом в нача́лех,/ во чре́во Твое́ всели́вся, воплоти́ся Человеколю́бец Госпо́дь,/ Бог отце́в на́ших Благослове́нный.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Глаго́лы жи́зни ве́чныя, всеблаже́нне, в се́рдцы твое́м прие́м,/ плоть увяди́л еси́,/ ми́ру же умертви́лся еси́/ и, в живоно́сную ме́ртвость оде́явся, – Го́спода по́йте, – взыва́еши, -/ и превозноси́те Его́ во вся ве́ки.

Ми́лостива бы́ти, Богоно́сне, еди́наго Благода́теля моли́/ твою́ всесвяще́нную па́мять пра́зднующим,/ согреше́ний оставле́ние сим испроша́я:/ Го́спода по́йте, дела́, и превозноси́те Его́ во вся ве́ки.

Ма́нием к Бо́гу непреста́нным внима́я/ и отону́днаго осия́ния зарю́ прие́мля,/ свет противосия́ющий проза́рный, я́ко зерца́ло, посыла́еши пою́щим:/ Го́спода по́йте, дела́, и превозноси́те Его́ во вся ве́ки.

На ле́стницу, к Небеси́ просте́ртую,/ на не́йже утвержде́н яви́ся Госпо́дь,/ о́тче, возше́л еси́,/ Боже́ственными восхожде́ньми при́сно предуспева́я, Преподо́бне,/ до́ндеже дости́гл еси́ пою́щих:/ Го́спода по́йте, дела́, и превозноси́те Его́ во вся ве́ки.

Богоро́дичен: Пое́м Тя, Обра́дованная,/ Бо́га бо воплоще́нна нам родила́ еси́./ Те́мже Богоро́дицу Тя вси имену́ем,/ Богоприя́тную трапе́зу, добро́ту Иа́ковлю,/ Го́спода по́йте, дела́, – вопию́ще, -/ и превозноси́те Его́ во вся ве́ки.

Песнь 9

Ирмо́с: Е́ва убо неду́гом преслуша́ния кля́тву всели́ла есть,/ Ты же, Де́во Богоро́дице,/прозябе́нием чревоноше́ния/ ми́рови благослове́ние процвела́ еси́,/ Тем Тя вси велича́ем.

Слеза́ми убо по́стническими ни́ву се́рдца твоего́ напои́л еси́,/ ра́дуйся же, о́тче Богоно́се,/ ны́не в ра́дости рукоя́ти собира́еши подвиго́в по́чести,/ те́мже тя вси ублажа́ем.

Незаходи́мый возсия́ тебе́ Свет,/ и присносу́щное весе́лие восприя́,/ иде́же, ликуя́ со А́нгелы о́крест Царя́ и Го́спода,/ ве́рою соверша́ющии па́мять твою́ поми́най,/ о́тче всеблаже́нне.

Возмо́гл еси́ избежа́ти де́монов стреля́ния и кова́рствий лука́вых,/ спасе́ся, блаже́нне, душа́ твоя́,свята́, чиста́ и нескве́рна,/ насле́дия Небе́снаго сподо́бися,/ помина́й у́бо пою́щия тя.

Зако́ном, о́тче, страда́льческим подвиза́лся еси́ досто́йне и победи́л еси́./ Те́мже тя сла́вы венце́м Еди́н Благоде́тель почте́/ и Боже́ственнаго светоявле́ния сподо́би и блаже́нных наслажде́ний.

Богоро́дичен: Я́ко всех тва́рей Творца́ ро́ждши, Богома́ти,/ превозшла́ еси́ всю тварь Боже́ственною сла́вою,/ и святы́нею, и благода́тию, и вся́кими доброде́тели пе́рвшествы./ Те́мже Тя вси велича́ем.

Свети́лен.

Подо́бен: Не́бо звезда́ми:

А́нгельскаго жития́ жела́я, удали́л еси́ тебе́ сама́го в пусты́нях/ и, стра́сти покори́в плотски́я,/ равноа́нгелен показа́лся еси́,/ о́тче наш Богоно́сне.

Богоро́дичен:

Держа́вным Твои́м покро́вом от враго́в наве́та/ Твоя́ ра́бы, Чи́стая, соблюди́ вся ны невре́дны:/ Тя бо и́мамы Еди́ну прибе́жище в ну́ждах.

На стихо́вне Окто́иха.

Сла́ва, глас 4:

Просия́ша до́брая дела́ твоя́, я́ко со́лнце,/ на земли́ и на Небеси́,/ Христо́в уго́дниче Мака́рие,/ правосла́вно бо пропове́дал еси́ нам и́стинную и непоро́чную ве́ру Христо́ву./ Те́мже моли́ся, Преподо́бне о́тче,/ в па́мяти твое́й, Богоно́сне,/ дарова́ти нам ве́лию ми́лость.

И ны́не, Богоро́дичен и́ли Крестобогоро́дичен.

Подо́бен: Я́ко до́бля:

А́гнца и Па́стыря Тя на Дре́ве я́ко ви́де,/ А́гница ро́ждшая рыда́ше и ма́терски Тебе́ веща́ше:/ Сы́не вожделе́нне,/ ка́ко на Дре́ве Кре́стнем пове́шен еси́, Долготерпели́ве?/ Ка́ко ру́ки и но́ги Твоя́, Сло́ве,/ пригвоздишася от беззако́нных,/ и кровь Твою́ излия́л еси́, Влады́ко?

На литурги́и

Блаже́нны Окто́иха, на 4, и свята́го песнь 6-я, на 4, и вся слу́жба сего́ ме́сяца в 15 день.

 

На вече́рни

Блаже́н муж: 1-й антифо́н. На Го́споди, воззва́х: стихи́ры на 8, глас 4, Иоа́нна Евге́ника.

Подо́бен: Зва́нный свы́ше:

От чре́ва ма́терня быв просвеще́н,/ егда́ непостоя́нство мирски́х ра́достей,/ тле́нность же и суету́ благоразу́мно позна́л еси́,/ тогда́, возненави́дев мир и вся кра́сная и веселя́щая его́,/ прите́кл еси́ к Боже́ственней схи́ме,/ вмени́в боле́зни в наслажде́ние,/ бде́ние в ра́дование и упокое́ние,/ на земли́ лега́ние и всено́щное стоя́ние/ вои́стинну в прия́тное наслажде́ние,/ пост в сла́дость, воздержа́ние в весе́лие.

Це́ркве после́дний воево́да,/ труба́ великозву́чная,/ гром Боже́ственный,/ благоче́стия учи́тель,/ соверше́нства свяще́нных догма́тов ве́ры ве́датель изя́щнейший,/ Ду́ха Свята́го исхожде́ние богосло́вивый я́ко влады́ка,/ и учи́тели собо́ров святы́х,/ и всесвята́го Симво́ла непобеди́мый побо́рник,/ и предста́тель по до́лгу све́тло да восхва́лится.

Вселе́нныя вели́кое свети́ло,/ егда́ возше́л еси́ от восто́ка, све́тло ра́дуяся,/ я́ко исполи́н, путь Госпо́день тещи́/ и к за́паду приплы́л еси́,/ тогда́ лучи́ твоя́ свяще́нная испусти́л еси́,/ ве́рныя у́бо просвеща́я,/ отпа́дшия же в беззако́нное и противозако́нное но́вшество/ во всесвяте́м и всесвяще́ннем Симво́ле ве́ры/ и пока́ятися не восхоте́вшия,/ я́ко мо́лния, попали́л еси́.

Глас то́йже, подо́бен: Я́ко до́бля в му́ченицех:

Мануи́лово: Свяще́ннейший храм был еси́ Свята́го Ду́ха,/ Ма́рко всехва́льне,/ доброде́телей блиста́нии весь, просвети́в ум./ Сего́ ра́ди ны́не предстоя́ со А́нгелы Творцу́ твоему́,/ моли́ от тли и бед изба́витися/ ве́рою соверша́ющим всечестну́ю па́мять твою́.

Умно́жив тала́нт, его́же прия́л еси́, преподо́бне,/ от руки́ всех Творца́,/ приснопева́еме, в ра́дость вшел еси́, му́дре, Го́спода твоего́,/ я́ко раб до́брый и слуга́ верне́йший,/ и ны́не моли́ от тли и бед изба́витися/ ве́рою соверша́ющим всечестну́ю па́мять твою́.

Ма́рка восхва́лим,/ в концы́ ми́ра возвести́вшаго Свята́го Ду́ха,/ от Оте́ческия Ипоста́си бытие́ иму́ща,/ но не у́бо, и от Сы́на,/ я́ко не двема́ вина́ма бы́ти,/ но еди́на вина́ есть Оте́ц обою́,/ И́же и всего́ Божества́ есть Исто́чник/ и Еди́ный Безвино́вный.

Сла́ва, глас 1, Иоа́нна Евге́ника:

Взира́юще на равноа́нгельное житие́ твое́,/ Богоно́сне Ма́рко,/ я́ко во о́бразе тя ви́дим пе́рваго челове́ка,/ пре́жде преступле́ния бы́вша ма́лым чим ме́ньша от А́нгел,/ я́ко безче́стное пораже́ние,/ е́же от преступле́ния, исправля́я/ и е́же по о́бразу удержа́в соверше́нным де́ланием за́поведей,/ во е́же по подо́бию Бо́жию,/ па́че ины́х восте́кл еси́/ и до́брым испове́данием и Богосло́вием благочести́выя на́шея ве́ры/ пред цари́, и мучи́тели, и всем ми́ром/ соверше́нно украси́лся еси́./ Сего́ ра́ди челове́ческое естество́,/ хваля́щися твои́ми добро́тами,/ и вселе́нная, чудя́щися твои́м исправле́нием,/ Це́рковь же Христо́ва, укра́шена су́щи всему́дрыми твои́ми Богонаставле́нии,/ вку́пе ны́не прино́сят ти ра́дование,/ и мы, утве́ржденнии тобо́ю, усе́рдно вопие́м ти:/ моли́ сохрани́тися нам в до́бром испове́дании твое́м.

И ны́не, догма́тик.

Вход. Све́те ти́хий. Проки́мен и чте́ния 3 святи́тельская.

На стихо́вне, стихи́ры глас 5.

Подо́бен: Ра́дуйся:

Иоа́нна Евге́ника: Ра́дуйся, Це́ркве звездо́,/ за ню́же излия́ Кровь Свою́ Вели́кий Па́стырь/ и пе́рвый Архиере́й Христо́с,/ Ему́же до́бре па́че ины́х уподобля́яся, му́дре,/ по си́ле ду́шу твою́ готове́йше полага́л еси́ о па́стве Его́/ и сама́го себе́ отда́л еси́ проти́ву бездве́рных уст:/ ухищре́ния вити́йствования соверше́нным Богосло́вием/ и му́дростию Ду́ха, о Не́мже и боре́ние бысть,/ постыди́л и загради́л еси́, приснохва́льне.

Стих: Уста́ моя́ возглаго́лют прему́дрость/ и поуче́ние се́рдца моего́ ра́зум.

Ра́дуйся, вселе́нныя свети́льниче,/ путево́ждствуяй хо́тящий разу́мный души́ кора́бль/ в небу́рное и ве́лие до́брое приста́нище упра́вити,/ и Правосла́вную ве́ру непоро́чну показу́яй,/ и благода́тию услажда́яй,/ и веды́й ко спаси́тельным догма́там основа́ния ве́ры./ Ра́дуйся, свети́льниче многосве́тлый,/ и́мже неврежде́нны всем показу́ются отце́в словеса́,/ не омраче́нным вну́тренними очесы́,/ я́коже у отпа́дших.

Стих: Уста́ пра́веднаго поуча́тся прему́дрости,/ и язы́к его́ возглаго́лет суд.

Ра́дуйся, прему́дрости сосу́де,/ ю́же возлюби́л еси́ от ю́ности/ и в супру́жницу и подру́гу до́бре стяжа́л еси́;/ ра́дуйся, Писа́ний Свяще́нных реко́,/ вели́кая и неиждива́емая, и преде́льная чистото́/ и всем удободосту́пная;/ ра́дуйся, мирополо́жнице слове́с,/ ю́же вку́пе соста́вите учи́тели о святе́м исхожде́нии Ду́ха,/ и мечу́ обоюдоо́стрый,/ из ко́рене посеца́яй но́вшеская язы́ки благода́тию Богосло́вия;/ ра́дуйся, искипе́ние сла́дкое и некта́роизлия́нное.

Сла́ва, глас 6:

Дух Всесвяты́й, И́же изде́тска всели́ся в се́рдце твое́м/ и обита́ в тебе́ ра́достно,/ я́ко во хра́ме таи́нственней,/ и укрепи́ тя к боре́нию проти́ву миродержи́телей и к одоле́нию,/ Сей угото́ва тя посреде́ вселе́нный хра́брствовати о Нем,/ и благоче́стно богосло́вит свято́е Его́ бытие́ от Отца́,/ и побо́рствовати за святы́й Си́мвол,/ и́же по благода́ти Того́ от оте́ц напи́санный,/ и утверди́ти во все́м ми́ре ду́ши люде́й христоимени́тых/ во и́стинней ве́ре, от оте́ц преда́нней,/ отпа́дшия же от нас и пре́жде и ны́не/ си́лою Боговеща́нных слове́с твои́х устраши́ти и постыди́ти./ Те́мже о Це́ркви усе́рдно моли́ся, мо́лимся,/ Богоно́сче Ма́рко приснопева́еме.

И ны́не, Богоро́дичен.

Тропа́рь, глас 8. Иоа́нна Евге́ника:

Правосла́вия наста́вниче, но́вшеств противобо́рниче,/ сте́пень ве́ры, Це́ркве свети́льниче,/ учи́телей Богодухнове́нная печа́те, Ма́рко всему́дре,/ писа́нии твои́ми вся просвети́л еси́, цевни́це духо́вная,/ моли́ Христа́ Бо́га спасти́ся душа́м на́шим.

На у́трени

По 1-м стихосло́вии седа́лен, глас 8.

Подо́бен: Прему́дрость и Сло́во:

Мануи́лово: Исто́чника прему́дрости преиспо́лнив уста́, и се́рдце, и ум, му́дре,/ отону́дуже привле́кл еси́ уче́ния струи́,/ те́ми ду́ши напоя́я, ве́рных соверши́л еси́/ и догма́тов Боже́ственных пра́вило показа́лся еси́:/ Отца́ я́ко еди́наго Вино́вника ве́дал еси́ Сы́на и Ду́ха и Исто́чник Божества́,/ Ма́рко присноблаже́нне, моли́ Христа́ Бо́га прегреше́ний да́ти оставле́ние/ любо́вию пра́зднующим святу́ю па́мять твою́.

Сла́ва, и ны́не, Богоро́дичен.

По 2-м стихосло́вии седа́лен, глас 8.

Подо́бен: Прему́дрость и Сло́во:

Иоа́нна Евге́ника: Прему́дрость возлюби́в, я́ко Соломо́н,/ целому́дрию поревнова́в Ио́сифову,/ Моисе́еву незло́бию, Илиине́ Боже́ственней ре́вности,/ Дави́довой кро́тости, Па́влову пропове́данию,/ Иоа́ннову свы́ше Богосло́вию,/ я́ко мудр у́бо вои́стинну, лжему́дрыя постыди́л еси́,/ я́ко целому́др, сохрани́л еси́ себе́ чисте́йша, незло́бна и кротча́йша,/ ре́вностию испепели́в мы́сленно преда́телей ве́ры/ и пропове́дав еди́ное благоче́стие.

По полиеле́и седа́лен еди́н от обо́ю вы́ше.

Степе́нна. Проки́мен и Ева́нгелие святи́тельское.

По 50-м псалме́, стихи́ра, глас 6.

Ману́илово: И злия́ся благода́ть из усте́н твои́х,/ Ма́рко, о́тче наш,/ свети́льниче Богодухнове́нне,/ и был еси́ свети́льник Христо́вы Це́ркве,/ уча́ слове́сныя о́вцы/ ве́ровати в Тро́ицу Единосу́щную/ во Еди́ном Божестве́.

Кано́н святи́телю, глас 4, его́же краестро́чие: Язы́к единоро́дный да бу́дет по обы́чаю родны́й брат, пое́т кир Иоа́нн. Творе́ние кир Иоа́нна Евге́ника Номофи́лакса.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Земна́го исхити́ и веще́ственнаго пристра́стия мой ум,/ содержа́щая Не́бо и зе́млю Ипоста́сная Бо́га Отца́ Му́дросте,/ и сло́во ми да́руй, венча́ющему служи́теля твоего́.

Благода́ть слове́с, сладча́йших ме́да, богодухнове́нно объе́мши свяще́нную твою́ ду́шу,/ соверши́ наслажде́ние стра́нное,/ о́бщее ве́рным услажде́ние, бра́шно спаси́тельное.

Я́ко вели́кое жи́зни свети́ло мировожделе́нное, возсия́л еси́ от восто́ка,/ и восте́кл еси́, я́ко исполи́н держа́внейший,/ и просвети́л еси́ концы́ ми́ра луча́ми слове́с твои́х, Ма́рко Боже́ственне.

Уста́ благода́ти бы́ша Богоглаго́ливии устне́ твои́ и глас медото́чный,/ язы́к же свяще́нный твой, я́ко трость писца́, показа́ся,/ му́дрость соста́ви, благода́ть излия́.

Богоро́дичен: Ум Небе́сный, чи́стую и возвы́шенную ду́шу/ и помышле́ний и та́инственных Писа́ний открове́ние,/ преде́л прему́дрости лик умо́в прия́т с Ма́терию Бо́жиею.

Ин кано́н, глас 8, его́же краестро́чие: Архиере́я Аси́и знамени́тейшаго пою́, Ма́рка. Творе́ние вели́каго ри́тора вели́кой це́ркви Ману́ила.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/песнь Бо́гови воспева́юща.

Добро́ты ра́ди доброде́телей сия́ния Вы́шняго прия́телище быв,/ па́ству Христо́ву, Ма́рко, просвети́л еси́,/ Сего́ ра́ди к Све́ту невече́рнему преста́влься,/ воспева́ющим Боже́ственную па́мять твою́ вдохни́ сло́ву озаря́ющую благода́ть, сла́вне.

Тща́щемуся ми досто́йно дости́гнути похва́л твои́х, блаже́нне,/ глубоча́йший зри́тся бы́ти исто́чник слове́с Боже́ственных твои́х исправле́ний,/ но, о́тче, моли́твами твои́ми любви́ ра́вную благода́ть и си́лу ми даждь.

Благода́тей Боже́ственных всесвяты́й храм,/ от него́же благово́ния та́инственная всем, благоче́стно живу́щим,/ раскры́шаея во сла́ву и хвалу́ Несозда́нныя Тро́ицы,/ Еди́наго естество́м Бо́га на́шего,/ да восхва́лится Марк всечестны́й.

Богоро́дичен: Дре́вле проро́ков свяще́нныя прови́деша взо́ры, Чи́стая, Тя у́мную го́ру,/ купину́ неопали́мую и врата́ непроходи́мая,/ ста́мну и манноприе́мницу,/ мы же ве́рою возвеща́ем Тя Богоро́дицу вои́стинну, Богоневе́сто.

Песнь 3

Ирмо́с: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ ве́нцев сла́вы сподо́би.

Отве́рз Боже́ственныя хля́би му́дрости и ве́дения твоего́,/ всю зе́млю наводни́л еси́,/ правосла́внейше богосло́вя бытие́ Свята́го Ду́ха то́чию от Отца́.

Ре́вность до́му Госпо́дня, ре́вность догма́тов оте́ческих,/ свяще́нное се́рдце твое́ объе́м, согре́/ и честны́й язы́к твой на но́вшества изостри́.

Велича́йшая боре́ния и ну́жды благоду́шно, преблаже́нне, подъе́м/ и доброде́тель избра́в и оте́ческое благоче́стие,/ велича́йшую сла́ву на Небесе́х ны́не насле́довал еси́.

Ве́лий свети́льник и́же в мо́ри су́щим,/ ве́лия в ми́ре жива́я звезда́,/ свет сла́дкий и всеуслади́тельный,/ соль земли́ кре́пкая, дре́во Боже́ственнаго зна́ния,/ чу́дный Марк да венча́ется.

Богоро́дичен: С остаре́вшееся естество́ челове́ческое,/ я́ко ро́ждши всех Творца́,/ о всех преесте́ственно Челове́ка бы́вшаго по естеству́ невеще́ственному,/ Ты, Богоро́дице, обнови́ла еси́.

Ин

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Зерца́ло сия́ний Всетво́рческаго Ду́ха, блаже́нне, показа́лся еси́,/ просвеща́я ве́рных исполне́ния незаблу́дными твои́ми уче́нии/ и уверя́я воспева́ти Тро́ицу Несозда́нную.

Ри́торствуя посреде́ собо́рнаго ря́да,/ утверди́л еси́ быти́е Ду́ха Свята́го, от Оте́ческия Ипоста́си происходя́щее,/ и ве́рных составле́ния, Ма́рко, возвесели́л еси́.

Весело́чная труба́, мусики́йский орга́н,/ духодви́жимый язы́к и сладкозву́чный,/ испо́лненный благода́ти исто́чник и́стинный прему́дрости,/ да похва́лится днесь Марк всечестны́й.

Богоро́дичен: Неизъясни́мое чу́до, е́же на Тебе́, Всечи́стая,/ я́ко всех Бо́га неизрече́нно родила́ еси́/ и по рождестве́ Де́ва су́щи яви́лася еси́,/ сего́ ра́ди Богоро́дицу Тя и́стинную почита́ем.

Конда́к, глас 4. Ману́илово.

Подо́бен: Яви́лся еси́:

Прему́дрыми слове́с твои́х исплете́нии, всеблаже́нне,/ вся́кая уста́ ху́льная загради́л еси́/ и ве́рныя Боговеща́нии просвети́л еси́ чести́ Тро́ицу в то́ждестве естества́.

Седа́лен, глас 8.

Подо́бен: Прему́дрость и Сло́во:

Иоа́нна Евге́ника: Облета́я луг свяще́нный и рай, воистинну благоцвету́щий, я́ко не́кая пчела́,/ от писа́ний Ду́ха и святы́х оте́ц пе́рвых,/ ве́ры основа́ний возвести́телей и учи́телей, преподо́бне,/ ро́су поче́рпл еси́ прия́тную и благово́нную,/ от нея́же соде́лал еси́ со́ты ве́ры и ме́д ве́дения,/ его́же му́дрии и простецы́ во здра́вие прие́млюще, благода́рственная вси восггасу́ют тебе́, всему́дре:/ моли́ Христа́ Бо́га прегреше́ний да́ти оставле́ние/ пра́зднующим любо́вию святу́ю па́мять твою́.

Сла́ва, и ны́не, Богоро́дичен.

Песнь 4

Ирмо́с: Неизсле́дный Бо́жий Сове́т,/ е́же от Де́вы, воплоще́ния/ Тебе́, Вы́шняго,/проро́к Авваку́м усмотря́я, зовя́ше:/ сла́ва си́ле Твое́й, Го́споди.

Одоле́тель изя́щнейший трепобеди́тельный/ проти́ву лука́ваго мироде́ржца изде́тска му́жественно яви́лся еси́,/ проти́ву же пре́лести но́вшества последи́ ра́товал еси́.

Кре́пкое благобо́рственное кре́стное ору́жие и зна́мение нося́ на пре́лесть,/ я́ко Моисе́й, разсе́кл еси́ мо́ре страсте́й,/ та́же супоста́ты твоя́ потопи́л еси́.

Все твое́ жела́ние ко Христу́ просте́р изде́тска, приснохва́льне,/ к необы́чному наслажде́нию, к сла́дости душе́вней, к добро́те неизрече́нней,/ сла́дкая ми́ра возненави́дел еси́.

Зна́мения Боже́ственнаго внутрьу́ду и а́нгельскаго нра́ва светле́йший/ и святы́я твое́я души́ ле́пота, и Боже́ственность лица́ твоего́ изобрази́.

Богоро́дичен: Отве́рзла еси́, ю́же заключи́ преслуша́ние, ра́йскую дверь, Всечи́стая,/ угото́вав Себе́ к те́плому послуша́нию за́поведей Творца́ Твоего́,/ и жи́зни путь показа́лася еси́, Влады́чице.

Ин

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вил Твое́ Божество́.

В твои́х, всеблаже́нне, устна́х благода́ть излия́ся/ и просвети́ Це́ркве твердь сла́достию разсужде́ний Боже́ственных.

Свяще́ннейший храм Свята́го Ду́ха был еси́,/ Боже́ственное благоуха́ние Богосло́вия в сем испуска́я, свяще́ннейший.

Све́тлая твоя́ возсия́ па́мять/ и просвети́ мы́сли любо́вию восхваля́ющих твоего́ Богосло́вия соверше́нство.

Богоро́дичен: Во́инство невеще́ственных умо́в превзошла́ еси́, Чи́стая,/ ро́ждши вся Осуществова́вшаго и нас от пре́лести Изба́вившего.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Всего́ себе́ сама́го же́ртву возноси́л еси́ благоприя́тную Бо́гу, за ны погребе́нному,/ храм украси́в Боже́ственный – те́ло твое́/ и же́ртвенник святы́й – чи́стое се́рдце твое́,/ я́ко заколе́ние светоза́рное – ду́шу твою́.

Избе́гл еси́ до́блейше жития́ волне́ния,/ вся благоразу́мно, блаже́нне, отве́рг,/ я́ко да приобря́щеши еди́ное многоче́стное, еди́ный би́сер – Христа́,/ и возсокро́виществуеши Боже́ственное просвеще́ние и ве́дение Бо́га.

Ма́лая и недосто́йная ны́нешняго ве́ка страда́ния/ к иму́щей яви́тися светле́й и Боже́ственней сла́ве непрестаю́щей разсужда́я,/ вся искуше́ния кре́пко и до́бле претерпе́л еси́ с Па́влом, блаже́нне.

Кре́пость необори́мую и си́лу тебе́ даде́ Еди́ный Си́льный и Влады́ка/ я́ко всеце́ло проти́ву зми́я,/ та́ко и коне́чне проти́ву лука́ваго смеше́ния ве́ры и догма́тов наруше́ния.

Богоро́дичен: Святы́ня оскудева́вшая святы́я неве́сты Сы́на Бо́жия, Це́ркве Христо́вы,/ Свята́я Де́во Всечи́стая, исправля́ется и возстановля́ется све́тло в сла́ве оте́ческой/ по благода́ти Твое́й Ма́рком Твои́м.

Ин

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Посреде́ Це́ркве песнь Богодухнове́нную сла́дко воспе́л еси́,/ Отца́ то́чию Божества́ уча́ Вино́вника бы́ти,/ Роди́теля у́бо Сы́на и Изводи́теля Свята́го, всесла́вне, Ду́ха.

Словесе́м оте́ц и Боже́ственным разсужде́нием, блаже́нне, после́дуя,/ Сы́на и Ду́ха, Отцу́ равноче́стна бы́ти, возгласи́л еси́,/ я́ко бытие́ и́ма от Отца́, я́ко от Вины́,/ от Него́же вку́пе и происхо́дят Обоя́.

Богоро́дичен: Ра́дуйся, ле́ствице Иа́ковля, е́юже сни́де Бог/ и привлече́ сме́ртное естество́ в Небе́сную сла́ву, Богоневе́сто,/ ра́дуйся, А́нгелов ра́досте, ве́рных же всех упова́ние и тве́рдое прибе́жище.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́м а воспле́щим,/ от Нея́ ро́ждшагося Бо́га сла́вим.

Благода́тию Еди́наго, укрепля́ющаго упова́ющия на Него́,/ сокруши́л еси́ главы́ беззако́нных наси́льников человеконенави́стных/ и мече́м Ду́ха посе́кл еси́ язы́ки вводя́щих но́вшества.

Вся земля́ пое́т, и мо́ре чуди́тся,/ и возвеща́ет Це́рковь чудеса́ твоя́ и победи́тельная и ра́дуется,/ супоста́ты вся обраща́ющи в бе́гство, всему́дре.

Пото́цы Ни́ловы златостру́йныя и сладча́йшия ме́да/ яви́шася то́ки нектароизлия́нныя Богоглаго́ливаго язы́ка твоего́,/ Правосла́вия всем иска́пающия догма́ты.

Река́ приснотеку́щая устремле́нии весели́т лице́ Бо́жияго гра́да,/ Це́ркве исполне́ние, Богоглаго́ливый Ма́рко, пра́выми догма́ты.

Богоро́дичен: Но́во Отроча́ родила́ еси́, Безле́тнаго Сы́на О́тча, Всечисте́йшая,/ и была́ еси́ честне́йшая тва́ри,/ я́ко всех Творца́ тва́ри яви́ла еси́.

Ин

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х,/ и услы́ши мя,/ Бо́же спасе́ния моего́.

Пропове́дателей Христо́вых ве́ру насле́довав неума́ленную,/ невре́дну соблю́л еси́, сла́вне, пред власти́тели,/ ничто́же страша́ся итали́йских ко́зней.

Удали́в себе́ скве́рнаго смеше́ния, всеблаже́нне,/ к духо́вному и ра́достному отше́л еси́ стоя́нию,/ иде́же Трисо́лнечный зри́ши Свет, нам благода́ть прося́.

Догма́тов благочести́вых смысл нам изъясни́л еси́/ и мня́щих то́ежде бы́ти Существо́ и де́йство до́блестно отгна́л еси́,/ я́ко Су́щаго прису́щее есть, блаже́нне, разли́чие.

Богоро́дичен: Сотвори́ Тебе́ вели́чия Си́льный, Всечи́стая,/ посреде́ те́рний крин обре́т Тя,/ и́мже испо́лни всю тварь благоуха́нии Божества́.

Конда́к, глас 8.

Подо́бен: Взбра́нной Воево́де:

Иоа́нна Евге́ника: Богосло́вов Богому́драя писа́ния,/ я́ко Богоглаго́льник и́стинен, прие́м в се́рдцы,/ исхожде́ние Ду́ха Свята́го возвести́л еси́, я́ко до́лжно есть, приснохва́льне,/ и всесвяты́й запечатле́л еси́ Си́мвол,/ сего́ ра́ди пое́м:/ ра́дуйся, Ма́рко Богоглаго́ливе.

И́кос:

А́нгел убо, предста́в, ра́доватися благовести́ иногда́ Богоро́дице со стра́хом,/ аз же еди́н от зря́щих тя, вы́ше естества́ я́вльшася, я́ко А́нгела,/ я́ко челове́к удивля́юся и пою́ ти с любо́вию такова́я:/ ра́дуйся, чистоты́ святы́я прия́телище;/ ра́дуйся, прему́дрости Бо́жия сокро́вищнице./ Ра́дуйся, Богосло́вов святы́х печа́те;/ ра́дуйся, учи́телей отце́в преде́ле./ Ра́дуйся, пучи́но неизмери́мая мышле́ний духо́вных;/ ра́дуйся, мо́ре простра́нное та́инственных писа́ний./ Ра́дуйся, я́ко показа́лся еси́ Це́ркве свет ве́лий;/ ра́дуйся, я́ко до ны́не постыжда́еши противомы́слящия./ Ра́дуйся, исто́чниче догма́тов ве́ры;/ ра́дуйся, закола́телю но́вшеских ухищре́ний./ Ра́дуйся, и́мже утверди́хомся вси;/ ра́дуйся, и́мже и́стина сия́ет./ Ра́дуйся, Ма́рко Богоглаго́ливе.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Не поколеба́ столпа́ неруши́маго кре́пости твое́я искуше́ний тя́жкая зима́,/ ни́же в нача́ле, ниже́ по́зде,/ я́ко на ка́мени, тве́рдо основа́ни бы́ша благочести́вый дея́ния и словеса́.

Оскверне́ну зря неприкоснове́нну иму́щую сохрани́тся чи́стую ри́зу Христо́ву,/ ю́же Христо́с Кровьми́ Свои́ми удобри́ и даде́ Це́ркви,/ возстена́л еси́ и великоду́шно побо́рствовал еси́.

Непревра́тен по́мысл стяжа́в, испыта́нию бы́вшу о Бо́зе и святы́х о́гма́тах ве́ры,/ я́ко лев, обрати́л еси́ в бе́гство/ и порази́л еси́ ца́рским ры́канием но́вшествующих полки́.

Весе́лостию и нра́ва удобре́нием, слове́с ле́потою и жития́ свя́тостию/ вся́каго челове́ка я́ве привле́кл еси́, я́ко си́ла магни́та желе́зо, Богому́дре,/ и к сла́ве подви́гл еси́ Бо́жией.

Богоро́дичен: Угрызе́нием зми́я истле́вший челове́ческий род,/ Клас ро́ждши Живота́, всем да́рующа дыха́ние,/ оживи́ла еси́, и назда́ла, и рая́ о́бщника соде́лала еси́, Богоро́дице.

Ин

Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Возше́л еси́, ра́дуяся, к Трисо́лнечному Све́ту/ и прича́стием Того́ наслажда́ешися,/ я́ко правосла́вно на земли́, уча́, явля́л еси́ всем:/ благослове́н Бог оте́ц на́ших.

От еди́ныя Ипоста́си Оте́ческия безвре́менно возсия́ша Сын и Дух,/ Ов у́бо рожде́нием, Сей же исхожде́нием, -/ догма́тствовал еси́ и ве́рныя пе́ти утверди́л еси́:/ благослове́н Бог оте́ц на́ших.

Возвести́л еси́ всем Уте́шителя Боже́ственное и схожде́ние,/ су́щее то́кмо от Отца́, я́ко от Вины́, му́дре,/ и постыди́л еси́ богоку́пцев гнила́я мне́ния, не ве́дущих вопи́ти:/ благослове́н Бог оте́ц на́ших.

Богоро́дичен: Свободи́ся Плодо́м Твои́м, Богороди́тельнице, естество́ сме́ртное от дре́вния кля́твы/ и благослове́ния удосто́йся свята́го,/ сего́ ра́ди сла́вит и воспева́ет, зову́ще:/ благослове́н Бог оте́ц на́ших.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Вели́кий Домострои́тель всего́, вся содержа́яй же и промысля́яй,/ Сей, предумы́сливый о́бщее, блаже́нне, всеблагоче́стное испове́дание,/ о́бщаго тя учи́теля, отца́, па́стыря всем устроя́ет и побо́рника кре́пкаго.

Младе́нцев стреля́ния противомы́слящих догма́тов софисти́ческая ухищре́ния показа́шеся,/ де́тское игра́лище, паучи́нное тка́ния исплете́ние,/ и си́ла язы́ков тех ослабе́ проти́ву твоего́, Богоглаго́ливе, Богодви́жимаго и Богосло́вскаго язы́ка.

Возве́д о́чи по́мысла и всего́ себе́ спросте́р ко Го́споду,/ во е́же сокруши́ти у́бо си́льнаго, спасти́ же благочести́выя,/ Сего́ необори́маго обре́л еси́ Спобо́рника, сло́во ти да́рующа,/ я́ко досто́йному и мно́гою си́лою благовеству́ющему.

Бо́гу взаимода́в любо́вь к бли́жнему и благодея́ние,/ многокра́тное, я́коже Той обеща́, обре́л еси́ воздая́ние в настоя́щем и в бу́дущем ве́це,/ бога́тство Небе́сное, и сла́ву, и наслажде́ние неиждива́емое,/ и живо́т во ве́ки, и Ца́рство.

Богоро́дичен: Изри́ну за́висть дре́вняго льстеца́ и отсту́пника/ изря́дное творе́ние Творца́, род челове́ческий,/ в тмочи́сленныя преле́сти, и пре́жде и ны́не,/ от ни́хже ны́не спасе́ни есмы́ Твои́м, Влады́чице, споборе́нием Боговеща́нному Ма́рку.

Ин

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ священницы, воспо́йте,/ лю́дие, превозноси́те во вся ве́ки.

От главы́ до стоп озаря́емь, Богоно́сче блаже́нне,/ святи́тельства честно́е и свято́е Ева́нгелие чи́сто священноде́йствовал еси́/ и, ве́рныя уча́ ему́, уверя́л еси́ пе́ти:/ де́ти, благослови́те, свяще́нницы, воспо́йте,/ лю́дие, превозноси́те во вся ве́ки.

Я́ко со́лнце от восто́ка, возсия́л еси́, преподо́бне,/ и Богосло́вия блиста́нии осия́л, и просвети́л еси́ вселе́нную,/ и ве́рныя научи́л еси́ Тро́ице воспева́ти со стра́хом:/ де́ти, благослови́те, свяще́нницы, воспо́йте,/ лю́дие, превозноси́те во вся ве́ки.

Не Друг от Дру́га име́ют бытие́,/ Я́же от Еди́ныя Вины́ происхо́дят, сла́вне, всем возвеща́л еси́,/ я́ко Сын и Дух я́ве Обоя́ от Отца́, не Друг от Дру́га вся́ко,/ я́коже о́трасли от корене еди́наго неувяда́емаго;/ сего́ ра́ди убо па́мять твою́ честву́ем во ве́ки.

Богоро́дичен: Всесве́тлая Пала́то всех Влады́чествующаго,/ омраче́нную страстьми́ ду́шу мою́ испра́ви к доброде́тельным стезя́м, Чи́стая,/ да, спасе́н быв ми́лостию Твое́ю, пою́:/ де́ти, благослови́те, свяще́нницы, воспо́йте,/ лю́дие, превозноси́те во вся ве́ки.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/да торжеству́ет же Безплотных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Се ны́не да соберу́тся христоимени́тии лю́дие, ра́дующеся,/ и правосла́вных Свята́я Непоро́чная Це́рковь да возвесели́тся днесь/ и благода́рственная да воспое́т Христу́,/ исто́ргшему лови́тельство но́вшества чрез еди́наго му́драго.

Знамени́тость нело́жную и сла́ву Небе́сную, блаже́нне, насле́довал еси́,/ сла́ву бо ги́бнущую со ины́м вся́ким жития́ угожде́нием/ от души́, я́ко не су́щая, отря́с,/ с чи́нми Богосло́вов учи́телей, я́ко единонра́вный, сора́дуешися.

Голуби́ца, свобожде́ние от бе́дствования нам возвести́вшая,/ напа́ствуемым тягча́йшим волне́нием но́выя пре́лести,/ Уте́шителя благода́тною доброде́телей кры́лы позлаще́нными прелете́вши,/ предвари́ во святы́я ски́нии святы́х.

Избавле́ние всего́ ми́ра,/ че́стную Кровь Творца́ твоего́, блаже́нне, предлага́я в ско́рбных испыта́ниях ве́ры,/ хода́тай Бо́гу и чина́м ве́рных поста́влен был еси́,/ благоприя́тными моли́твами умилостивля́я И́же по существу́ су́щаго Человеколю́бца.

Богоро́дичен: Укрепи́ся зия́вый, о Всечи́стая Влады́чице,/ а́дский льсти́вый змий началозло́бный,/ и́же, я́ко младе́нца, порази́ челове́ка./ Но́ваго же, я́ко новорожде́нна Младе́нца, неизмери́маго Бо́га Сло́ва Ты ро́ждши, земле́ неора́нная,/ изба́вила еси́ род челове́ческий, Всехва́льная.

Ин

Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Благода́ть слове́с и Богосло́вия твоего́ Це́рковь Христо́ву возвесели́,/ е́йже сохрани́тися в ми́ре не преста́й моли́тися всегда́.

До́бре ны́не наслажда́ешися жела́ннаго, всеблаже́нне,/ кра́йняго и Боже́ственнаго просвеще́ния,/ его́же уча́стники моли́твами твои́ми и нас сотвори́.

Ре́вность Правосла́вия, воспыла́в в твое́й чи́стей души́,/ испепели́ еретико́в языкобо́лия, Ма́рко блаже́нне.

Богоро́дичен: Я́ко вы́сшая умо́в и Бо́гу бли́жняя, Деви́це Чи́стая,/ ум мой просвети́,/ из глубины́ многови́дных нужд изыма́ющи мя.

Свети́лен, глас 6.

Подо́бен: Све́те неизме́нный:

Ману́илово: Уте́шителева благода́ть в тебе́ обита́вши, Ма́рко,/ Боже́ственнейших до́гматов яви́ тя реку́,/ еретико́в потопля́ющую полки́, ве́рныя же вся веселя́щую.

Богоро́дичен: Тя, Госпожу́ всех, я́ве воспева́я, мо́лим, Богоро́дице:/ буди́ нам Боже́ственный покро́в,/ отгоня́ющи дале́че от нас мра́чный стре́лы велиа́ра.

На хвали́тех стихи́ры на 4, глас 1.

Подо́бен: Небе́сных чино́в:

Пребоже́ственныя Тро́ицы быв жили́ще,/ всему́дре святи́телю,/ доброде́телей сия́нии и твои́х уче́ний све́том/ Христо́ву Це́рковь озари́л еси́/ и происхожде́ние Ду́ха Свята́го то́чию от Отца́/ пропове́дал еси́.

Существо́ Боже́ственное/ и де́йствие то́ежде бы́ти испове́дающия,/ о́гненными твои́ми словесы́ посрами́л еси́, всеблаже́нне,/ я́ко Существо́ разли́чно есть от сво́йства,/ а́ще и обоя́ несотворе́нна,/ и́стинна и присносу́щна суть.

Глас 8.

Подо́бен: О, пресла́внаго чудесе́:

О, пресла́внаго чудесе́!/ Исто́чник жи́зни, Христо́с Бог наш,/ исто́чника тя свяще́нных догма́тов яви́,/ веселя́ща ве́рныя жизнето́чными словесы́,/ я́ко струя́ми, напоя́юща сердца́ благочести́вых,/ непоколеби́мо соблюда́ющих до́брое испове́дание отце́в, всему́дре,/ о не́мже ре́вность и ве́ру/ показа́л еси́ Боже́ственнейше.

Сла́ва, глас 1. Иоа́нна Евге́ника:

Я́ко в златоистка́нную оде́жду,/ и многочестны́й вене́ц, и несокруши́мая броня́,/ в светле́йшее житие́ твое́ и Боговеща́нное сло́во/ Христо́ва Це́рковь обле́кшися,/ све́тло ра́дующися и кре́пко огражда́ющися/ проти́ву супоста́т, приснохва́льне, несе́т победи́тельная,/ и тебе́, до́блему одоле́телю,/ мы́сленныя вку́пе и чу́вственныя враги́/ мо́щно победи́вшему во Христе́,/ да́вшем власть и си́лу,/ пра́ведно побе́ду воспису́ющи,/ пе́ние ти, я́ко мзду за боре́ние, по си́ле прино́сит/ и ве́рою и любо́вию вопие́т ти:/ непреста́нно моли́, к Нему́же отше́л еси́,/ Триипоста́снаго Бо́га, Отца́ и Сы́на/ и от Отца́ исходя́щаго Ду́ха Всесвята́го,/ в правосла́вном испове́дании твое́м сохрани́тися во ве́ки/ и от лови́тельства мы́сленных волко́в соблюсти́/ па́ству Христо́ву бе́дствующую.

И ны́не, Богоро́дичен.

Славосло́вие вели́кое, и про́чая.

На Литурги́и слу́жба святи́тельская.

Ве́чер

Блаже́н муж: 1-й антифо́н, на Го́споди, воззва́х: стихи́ры, глас 6:

В Вы́шних ве́чная взыска́л еси́,/ до́льняя, я́ко мимоше́дшая, вмени́л еси́,/ и́го Христо́во на ра́мо взем,/ и в Но́вград всели́лся еси́,/ посреде́ ми́ра жесто́ким и приско́рбным путе́м ше́ствовал еси́,/ доброде́тельми же свои́ми, я́ко плодови́т виногра́д,/ на высоту́ возше́л еси́.

Юро́дивыми притворе́нии мудреца́ зло́бы обезу́мил еси́,/ жела́нием, е́же к Бо́гу, распаля́емь,/ усе́рдно к мы́сленным восте́кл еси́,/ дея́нием побежда́я вра́жия полки́,/ Боже́ственным посо́бием Ду́ха, Фео́доре блаже́нне.

Смире́н мудрова́нием, и ми́лостив, и Боголюби́в,/ и любве́ испо́лнен яви́лся еси́, блаже́нне Фео́доре,/ чу́вствием украша́яся, житие́ испра́вил еси́,/ Боже́ственным повеле́нием вели́кому Но́ву гра́ду яви́лся еси́ свети́льник све́тел,/ наставля́я нас к позна́нию.

Сла́ва, глас 5:

Ра́дуйся, преблаже́нная главо́,/ и́же от млады́х ногте́й/ кре́постию ума́ от Бо́га Вседержи́теля утвержда́емь,/ Боже́ственный за́поведи соблю́л еси́/ и яви́лся еси́ насле́дник дре́вним ю́родом, бы́вшим Христа́ ра́ди,/ житие́ бо твое́, о́тче, вои́стинну доброде́тельми удержа́в, пожи́л еси́,/ па́мятию сме́ртною всегда́ поуча́яся,/ те́мже в невеще́ственней жи́зни, иде́же а́нгельския чи́ни,/ с весе́лием всели́лся еси́, Фео́доре блаже́нне./ Но моли,ся Христу́ Бо́гу на́шему/ спасти,ся душа,м на́шим.

И ны́не, Богоро́дичен: В Чермнем мори́:

Вход. Проки́мен дне. Чте́ния преподо́бническая.

На стихо́вне стихи́ры, глас 2.

Подо́бен: До́ме Евфра́фов:

Дом и жили́ще/ Ду́ха Пресвята́го,/ прему́дре Фео́доре, был еси́,/ тем же и нас до́мы Того́ соде́лай,/ святу́ю твою́ па́мять почита́ющих.

Стих: Возвесели́тся пра́ведник о Го́споде/ и упова́ет на Него́.

Житие́ твое́, я́ко со́лнце,/ в сердца́х ве́рных возсия́,/ чуде́с зарю́ испуща́я,/ те́мже и нас Све́том невече́рним озари́,/ всечестну́ю твою́ па́мять почита́ющих.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Не преста́й моля́ся, Фео́доре,/ о при́сных твои́х рабе́х,/ и́хже духо́вным твои́м житие́м просвети́л еси́,/ да вси честно́е твое́ успе́ние,/ веселя́щеся, почита́ем.

Сла́ва, глас 6:

Я́ко Боже́ственная жизнь твоя́/ и всеосвяще́нный твой коне́ц, о́тче Фео́доре,/ в той бо мно́жество соше́дшеся, наро́ди Вели́каго Нова́ гра́да,/ я́ко ви́деша на одре́ тя без дыха́ния,/ глаго́лы велегла́сными вопия́ху:/ даждь коне́чное сло́во рабо́м твои́м, свя́те,/ научи́, где оставля́еши ча́да твоя́, о́тче,/ и,хже уще,дри, я́ко оте́ц пои́стине ми́лостив и любе́зен,/ оба́че а́ще и зде гроб покрыва́ет,/ но на Небеси́ тя вси и́мамы предста́теля и моли́твенника к Бо́гу/ любо́вию чту́щих тя./ Тем убо, Фео́доре,/ не преста́й моля́ся Христу́ Бо́гу/ о гра́де сем и всех ве́рных,/ почита́ющих всечестно́е твое́ успе́ние.

И ны́не, Богоро́дичен: Творе́ц и Избави́тель мой:

Тропа́рь, глас 8:

И́же на земли́ Христа́ ра́ди во́лею в бу́йство преложи́вся,/ ми́ра сего́ красоты́ отню́д возненави́дел еси́/ и, плотска́я игра́ния увяди́в посто́м и жа́ждею и на земли́ лега́нием,/ от зно́я же и сту́дени, от дождя́ и сне́га/ и от про́чия возду́шныя тя́гости никогда́же уклони́лся еси́,/ ду́шу же очи́стил еси́ доброде́тельми, я́ко зла́то в горни́ле,/ о́тче преблаже́нне Фео́доре,/ и ны́не на Небесе́х предстои́ши Престо́лу Пресвяты́я Тро́ицы,/ но я́ко име́я дерзнове́ние мно́гое,/ моли́ Христа́ Бо́га спасти́ся душа́м на́шим.

Ин тропа́рь, глас 8:

На земли́ Христа́ ра́ди в бу́йство преложи́вся,/ ми́ра сего́ красоты́ отню́д возненави́дел еси́,/ пло́тская взыгра́ния увяди́в,/ от дождя́ и сне́га и от про́чия возду́шныя тя́гости никогда́ же уклони́лся еси́,/ от неразу́мных челове́к поруга́ние, ра́дуяся, претерпе́л еси́,/ подо́бяся Творцу́ твоему́ и вопия́:/ Го́споди, не поста́ви им гре́ха сего́;/ ду́шу же предочи́стил еси́, я́ко зла́то в горни́ле,/ и сию́ Христо́с прия́т/ и, я́ко светоза́рную звезду́, Свое́й сла́ве прича́стну соде́ла./ Предстоя́ ны́не Святе́й Тро́ице, преблаже́нне Фео́доре,/ моли́ за град же и лю́ди,/ почита́ющия любо́вию пречестну́ю па́мять твою́.

Сла́ва, и ны́не, Богоро́дичен: И́же нас ра́ди рожде́йся от Де́вы:

На у́трени

На Бог Госпо́дь: тропа́рь святаго, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 5.

Подо́бен: Собезнача́льное Сло́во:

Согла́сием Боже́ственным озаря́емь, в пути́, веду́щем к жи́зни ве́чней,/ Боже́ственным сия́нием ходи́л еси́ ве́рно, о́тче праведне Фео́доре,/ вра́жиих отбе́г прило́гов, сын Све́та и Дне яви́лся еси́, Фео́доре Богоблаже́нне.

Сла́ва, и ны́не, Богоро́дичен:

Ма́ти Бо́жия Пречи́стая, гра́де христиа́нский,/ изба́ви лю́ди Твоя́ от бед, приле́жно зову́щия,/ и проти́вися враго́м го́рдым, мы́сленным, да вопие́м Ти:/ ра́дуйся, Благослове́нная.

По 2-м стихосло́вии седа́лен, глас 4.

Подо́бен: Ско́ро предвари́:

Посто́м, и воздержа́нием, и на земли́ лега́нием увяде́л еси́ плотски́я стра́сти,/ ду́шу же просвети́л еси́ и на Небесе́х от Христа́ вели́кое возме́здие восприя́л еси́./ Тем благоугоди́л еси́ Бо́гу, досто́ин сосу́д чуде́с и по кончи́не яви́лся еси́/ притека́ющим к моще́м твои́м, Фео́доре блаже́нне,/ моли́ Христа́ Бо́га спасти́ся душа́м на́шим.

Сла́ва, и ны́не, Богоро́дичен:

Обнови́ла еси́, Чи́стая, Боже́ственным Рождество́м Твои́м/ истле́вшее во страсте́х земноро́дных ме́ртвенное существо́/ и воздви́гла еси́ вся от сме́рти к жи́зни нетле́ния./ Те́мже Тя по до́лгу блажи́м вси, Де́во Препросла́вленная,/ я́коже прорекла́ еси́.

По полиеле́и седа́лен, глас 4.

Подо́бен: Ско́ро предвари́:

Яви́лся еси́ чу́ден в терпе́нии свое́м,/ вся́чески Христо́ви угоди́л еси́, преблаже́нне Фео́доре,/ му́дрою мы́слию утверди́л еси́ ду́шу твою́,/ порабо́тив плотска́я мудрова́ния Ду́ху/ и избра́в до́брая, е́же Бо́га ра́ди тружда́тися, му́жески глаго́лал еси́:/ а́ще и я́ра зима́, но сла́док рай,/ боле́зненно е́же тружда́тися, но блаже́нно восприя́тие./ Те́мже, преблаже́нне Фео́доре, моли́ Христа́ Бо́га спасти́ ду́ши на́ша.

Сла́ва, и ны́не, Богоро́дичен:

Тебе́ велича́ем, Богоро́дице, вопию́ще:/ Ты еди́на Благослове́нная,/ из Тебе́ бо неизрече́нно роди́ся Христо́с Бог наш.

Та́же степе́нна, 1-й антифо́н 4-го гла́са. Проки́мен: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой, внегда́ моли́ти ми ся к Тебе́. Ева́нгелие от Матфе́я, зача́ло 43.

По 50-м псалме́ стихи́ра, глас 8:

Челове́че Бо́жий, Фео́доре чу́дный,/ ты у́бо, возше́д на ле́ствицу доброде́телей,/ по не́йже возше́л еси́ к Го́рнему Иерусали́му/ и та́мо узре́л еси́ жела́емаго Христа́,/ Его́же ра́ди плоть твою́ изнури́л еси́/ и те́ло ме́ртвенное на беземе́ртную жизнь измени́л еси́./ И о нас непреста́нно моли́ся,/ дарова́ти душа́м на́шим мир и ве́лию ми́лость.

Кано́н Богоро́дицы со ирмосо́м на 6, глас 2: Нетре́ну, необы́чну: и кано́н свята́го на 8, глас 4.

Песнь 1

Ирмо́с: Триста́ты кре́пкий,/ Рожде́йся от Де́вы,/ безстра́стия во глубине́/ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́/ побе́дное воспою́ пе́ние.

Пода́ждь ми, Христе́, Ду́ха Твоего́ благода́ть,/ да по достоя́нию воспою́ песнь но́ву от у́стен мои́х/ в па́мять Твоего́ уго́дника, Фео́дора преблаже́ннаго.

И́же крест на ра́мо взем, блаже́нне,/ и жела́емаго ти оте́чества дости́г, Го́рняго Иерусали́ма,/ и в нем со А́нгелы лику́еши, ю́роде прему́дрый,/ моли́ся о нас, чту́щих па́мять твою́ пречестну́ю.

Бу́йством премени́в мирско́е мудрова́ние, о́тче,/ непокрове́но те́ло име́я, блаже́нне,/ покры́й на́ша стра́сти, Богому́дре,/ да твои́ми моли́твами от бед избавля́емся.

Богоро́дичен: Успи души́ мое́й свере́пую во́лну,/ я́ко мно́жество прегреше́ний, искуше́ний и печа́ли, Влады́чице, воста́ша на мя,/ но Сама́ мя спаси́.

Песнь 3

Ирмо́с: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́.

Умо́м весь к преми́рным взе́мся, блаже́нне,/ ю́род прозва́лся еси́, о́тче,/ и нас, умовре́дных, сохрани́,/ да не врежде́ни пребу́дем ко́зньмн чужда́го,/ и тебе́ ублажа́ем, Фео́доре преблаже́нне.

Ва́ром со́лнечным опаля́емь, о́тче,/ и нас, пали́мых грехо́вными страстьми́, ороси́ твои́ми моли́твами,/ да непреста́нно воспева́ем па́мять твою́, Фео́доре прехва́льне.

Зимо́ю томи́м, свято́е, небре́гл еси́ о те́ле пе́рстнем,/ и ны́не наслажда́ешися ра́йския добро́ты,/ и нам проси́ оставле́ние, озло́бленным прило́ги чужда́го,/ да тебе́ ублажа́ем, о́тче Богому́дре.

Богоро́дичен: Я́же еди́на в напа́стех и ско́рбех защища́ющи/ под кров Твой, Пречи́стая, прибе́гша те́пле,/ приими́, я́ко Преблага́я, е́же от се́рдца моего́ моле́ние.

Седален, глас 4:

Егда́ Боже́ственное зва́ние прии́де на тя, Богому́дре,/ тогда́, Святы́м Ду́хом подвиза́емь, возни́кл еси́ от мирска́го сладостра́стия к све́ту Богоразу́мия/ и оте́ческия сла́вы и любве́ избежа́ти потща́лся еси́./ Бога́тство убо́ и сла́ву, я́ко не су́щая, презре́л еси́/ и, Еди́наго возлюби́в И́стиннаго Живота́, Христа́ Бо́га на́шего,/ крест твой взем, Того́ живоно́сным стопа́м после́довал еси́./ Его́же моли́, Фео́доре блаже́нне, спасти́ся душа́м на́шим.

Сла́ва, и ны́не, Богоро́дичен:

Предста́тельнице необори́мая оскорбля́емых и те́плое заступле́ние упова́ющих на Тя,/ от бед мя изба́ви, Ты бо еси́ всех Помо́щница.

Песнь 4

Ирмо́с: Любве́ ра́ди, Ще́дре, Твоего́ о́браза/ на Кресте́ Твое́м стал еси́,/ и раста́яшася язы́цы:/ Ты бо еси́, Человеколю́бче,/ кре́пость моя́ и хвале́ние.

Любве́ сро́дников отре́кся, блаже́нне, любо́вию Христо́вою уязвля́емь,/ и плоть, я́коже рабы́ню, ду́хови покори́в, над страстьми́ царь показа́лся еси́, о́тче,/ и нас, плене́нных грехо́вными страстьми́, свободи́, Богому́дре.

Стезю́ приско́рбнаго пути́ ше́ствовав, блаже́нне,/ и простра́ннаго жили́ща дошед,/ с Безпло́тными ликовствова́ти сподо́бился еси́, о́тче Богоно́се.

Власть прии́м на ду́сех нечи́стых, о́тче Фео́доре,/ сих от челове́к прогоня́еши,/ вся́кими неду́ги боля́щия исцеля́еши, с ве́рою приходя́щия к моще́м твои́м.

Богоро́дичен: Ми́лости Твое́й сподо́би мя, Благоми́лостивное Сло́во ро́ждши,/ и ны́не, Влады́чице, прибега́юща мя к Тебе́ спаси́.

Песнь 5

Ирмо́с: Возсия́й ми, Го́споди, свет повеле́ний Твои́х,/я́ко к Тебе́ дух мой у́тренюет и пое́т Тя:/ Ты бо еси́ Бог наш,/ и к Тебе́ прибега́ю, Царю́ ми́ра.

Ю́род яви́лся еси́ изволе́нием, о́тче,/ и о́ному ди́вному Андре́ю после́довал еси́,/ и, я́коже той ви́де духо́вныма очи́ма Богоро́дицу, на возду́се моля́щуюся,/ ты же ны́не зри́ши Святу́ю Тро́ицу,/ моля́ся непреста́нно о душа́х на́ших.

Ревни́тель быв ди́вному Симео́ну, пусты́ню и све́рстника оста́влынему,/ и юро́дство на ся возложи́вшему, и Го́рния митропо́лии дости́гшу,/ с ни́мже ны́не и ты наслажда́ешися, и нас помина́й, пра́зднующих па́мять твою́ всечестну́ю.

Вторы́й Твердисло́в в Руси показа́лся еси́, о́тче Фео́доре, непокрове́нно те́ло име́я,/ покры́й нас покро́вом моли́тв твои́х,/ да не уязви́т нас уязви́вый пра́отца преступле́нием.

Богоро́дичен: От ко́рене Исто́чник и Вину́ нетле́ния Тя, Дево́, вси ве́рнии, хвала́ми почита́ем,/ Ты бо Ипоста́сное нам Безсме́ртие роди́ла еси́.

Песнь 6

Ирмо́с: Очище́ние нам, Христе́,/ и спасе́ние, Влады́ко,/ возсия́л еси́ от Де́вы,/ да, я́ко проро́ка от зве́ря морска́го пе́рсей Ио́ну,/ от тли исхити́ши/ всего́ Ада́ма всеро́дна па́дшаго.

На безстра́стия го́ру возше́д доброде́тельми,/ и на враги́ храбо́рник чу́ден показа́лся еси́,/ и ны́не моли́ся Христу́ Бо́гу о стране́ на́шей, на иноплеме́нныя посо́бствуя,/ я́ко да твои́ми моли́твами проти́внии побежда́ются.

Чуде́с исто́чник мо́щи твои́ яви́ся, Фео́доре блаже́нне,/ от ни́хже оби́льно вси притека́ющии/ прие́млют телесе́м здра́вие и душа́м спасе́ние твои́ми моли́твами.

Прему́дростию ра́зума объя́т, о́тче,/ су́етную му́дрость бу́йством премину́л еси́/ и утае́нная от му́дрых и разу́мных Тро́йческим благоволе́нием позна́л еси́.

Богоро́дичен: Моисе́й в купине́ Тя ви́дев,/ в горе́ прие́млющу нестерпи́мый Божества́ Огнь неопа́льно,/ тем Тя вси пе́сньми велича́ем.

Конда́к, глас 8:

Вы́шния красоты́ жела́я,/ ни́жния сла́дости и теле́сная одея́ния то́щно оста́вил еси́/ и нестяжа́ние па́че су́етнаго ми́ра возлюби́л еси́,/ а́нгельское житие́ проходя́, сконча́лся еси́, Фео́доре блаже́нне,/ с ни́миже Христа́ Бо́га моли́ непреста́нно о всех нас.

И́кос:

Ка́ко возмогу́ гре́шный аз и скве́рный душе́ю вку́пе и те́лом/ исписа́ти, е́же во пло́ти сый, равноа́нгельное житие́ твое́ и пресла́вная чудеса́,/ а́ще у́бо мно́зи прему́дрии не дости́гнут испове́дати мно́го твоего́ терпе́ниями смире́ния,и те́плыя ко Христу́ любве́?/ Но оба́че наде́яся на твое́ беззло́бие, о блаже́нне, си́це вопию́ ти:/ ра́дуйся, пресве́тлая звездо́,/ от восто́ка доброде́телей возсия́вшая и вселе́нную чудесы́ озари́вшая./ Ра́дуйся, возненави́девый роди́тельскую любо́вь,/ Христа́ же еди́наго, над все́ми су́щаго Бо́га, всем се́рдцем возлюби́вый/ и Тому́ невозвра́тным жела́нием после́довавший еси́./ Ра́дуйся, я́ко бу́йственное и юро́дственное, по апо́столу, жи́тельство избра́вый./ Ра́дуйся, премени́вый тле́нная и несто́ящая наде́ждею бу́дущих благ./ Ра́дуйся, и́же дре́внему И́ову уподо́бивыйся терпе́нием./ Ра́дуйся, страстоте́рпче Христо́в непобеди́мый,/ но при́сно побежда́яй диа́вола твои́м терпе́нием и смире́нием./ Ра́дуйся, и́же я́ко дре́вний он Ла́зарь ни́щий, почива́я ны́не в ло́нех Авраа́млих,/ с ни́миже Христа́ Бо́га моли́ непреста́нно о всех нас.

Песнь 7

Ирмо́с: Сласы́й во огни́ авраа́мския Твоя́ о́троки/ и халде́и уби́в,/ я́же Пра́вда пра́ведно уловля́ше,/ препе́тый Го́споди,/ Бо́же оте́ц на́ших, благослове́н еси́.

Прича́стием Свята́го Ду́ха просвеще́н, блаженне,/ измени́вся добро́ты теле́сныя и позо́р быв челове́ком,/ непокрове́нно те́ло тле́нными оде́ждами име́я, Христу́ вопия́л еси́:/ благослове́н Бог оте́ц на́ших.

Нищету́ и юро́дство изво́лив, преблаже́нне, нас ра́ди Обнища́вшего/ и Сего́ ле́гкий яре́м на рамена́ взем, Тому́ после́довал еси́, Христу́, вопия́:/ благослове́н Бог оте́ц на́ших.

Злому́драго врага́ ко́зни премудри́в, ю́роде прехва́льне,/ и сего́, я́ко ры́бу безгла́сну, сотвори́л еси́, Богому́дре, Христу́ вопия́:/ благослове́н Бог оте́ц на́ших.

Богоро́дичен: Я́коже Ло́жницу Бо́жию и Кади́льницу разу́мнаго и светоно́снаго У́гля,/ Приснора́дованную воспое́м, зову́ще:/ ра́дуйся, Вина́ спаси́тельнаго воззва́ния, благослове́нная во ве́ки.

Песнь 8

Ирмо́с: Избави́телю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.

Присво́ив ся Соде́телю всех, о́тче, и грехо́вныя я́зи удали́вся,/ прия́л еси́ Небе́сное насле́дие и, со А́нгелы лику́я, вопия́л еси́:/ благослови́те, вся дела́ Госпо́дня, Го́спода.

Ю́ношеских и плотски́х страсте́й удержа́л еси́ взыгра́ния,/ очи́стив вся́кия скве́рны ду́шу же и те́ло, Фео́доре преблаже́нне,/ храм показа́лся еси́ нескве́рнен Бо́гу./ Ему́же непреста́нно вопие́ши:/ благослови́те, вся дела́ Госпо́дня, Го́спода.

Незаходи́мый возсия́ тебе́ свет, о́тче Богому́дре, присносу́щнаго весе́лия,/ в не́мже наслажда́ешися, предстоя́ Святе́й Тро́ице/ и воспева́я Христа́ во вся ве́ки.

Богоро́дичен: Тя ору́жие непобеди́мое на враги́ предлага́ем,/ Тя основа́ние и наде́жду на́шего спасе́ния, Богоневе́сто, и́мамы/ и Тя воспева́ем во ве́ки.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Дево,/ краеуго́льный отсечеся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Я́коже тве́рдый адама́нт, душе́ю показа́лся еси́, непоколеби́м вра́жиими прило́ги, о́тче,/ и нам тве́рдое забра́ло буди́, блаже́нне,/ моли́твами твои́ми от нахожде́ний проти́вных.

Освяти́ся возду́х, Фео́доре блаже́нне, па́мятию твое́ю,/ и нас торжествова́ти подвиза́ет ра́достно свяще́нное твое́ пра́зднество.

Жезло́м доброде́телей страсте́й мо́ре пресе́к/ и го́рдаго врага́, я́коже ина́го фарао́на, моли́твами твои́ми погрузи́в,/ избра́нное ста́до но́ваго Изра́иля невре́дно соблюди́,/ Фео́доре блаже́нне, моли́твами твои́ми.

Богоро́дичен: Ски́ния свиде́тельства Тя прообрази́,/ Хлеб и́стинный жи́зни прие́мшую, Чи́стая,/ Сло́во Отца́ Соприсносу́щное.

Свети́лен:

Удали́вся, бе́гая мирски́х сожи́тельства,/ Христу́, над все́ми Бо́гу на́шему, непоро́чным житие́м благоугоди́л еси́,/ Его́же ны́не моли́ о нас, рабе́х твои́х,/ ве́рою пра́зднующих всечестну́ю па́мять твою́, Богому́дре Фео́доре.

Сла́ва, и ны́не, Богоро́дичен:

Му́дрость Ипоста́сную, и Сло́во Пресу́щное,/ и Врача́ всех поро́ждшая, Де́во,/ стру́пы и я́звы души́ моея́ исцели́, лю́тыя и многовре́менныя,/ и стра́стная утоли́ се́рдца моего́ помышле́ния.

На хвали́тех стихи́ры, глас 4.

Подо́бен: Дал еси́ зна́мение:

Дал еси́ при́тчу/ терпе́ния и му́жества,/ Преблаги́й Го́споди,/ пра́веднаго Фео́дора и многочуде́снаго,/ доброде́тельми, и словесы́, и де́лы сия́юща,/ целому́дрием украша́ема и кро́тостию./ Тем твое́ неизрече́нное строе́ние сла́вим,/ Иису́се Всеси́льне, Спа́се душ на́ших.

Пра́веден и незло́бив,/ и́стинен же, и непоро́чен, и ве́рен,/ уклоня́яся от вся́кия зло́бныя ве́щи,/ показа́лся еси́, Фео́доре блаже́нне, просвеще́н доброде́тельми/ и благоче́стием сия́я./ Тем тя ублажа́ем/ и свято́е твое́ и честно́е днесь пра́зднуем успе́ние,/ ра́дующеся, Богому́дре.

Целому́дрием и благове́рием,/ я́ко багряни́цею многоце́нного, одея́вся, Фео́доре,/ пра́вдою же и кро́тостию,/ я́ко Боже́ственным венце́м, венча́лся еси́,/ со стра́ждущими Христа́ ра́ди ца́рствовати возжеле́л еси́/ и ны́не Царю́ сил предстои́ши,/ Иису́су Всеми́лостивому и Спа́су душ на́ших.

Сла́ва, глас 8:

Весели́ся, Богохрани́мый Вели́кий Но́вегра́де,/ имы́й в себе́ такова́го граждани́на,/ преблаже́ннаго Фео́дора:/ сей бо прему́дростию Свята́го Ду́ха украси́ся,/ вся́ко воздержа́ние доброде́тельным свои́м житие́м премину́/ и целому́дрием ду́шу просвети́,/ нагото́ю, я́ко Безпло́тен, на земли́ пожи́в,/ возвы́сився к Бо́гу серде́чным жела́нием,/ ми́рови умертви́ся вои́стинну,/ се́рдцем боле́знуя вы́ну, зря муче́ния та́мошняя,/ мы́сленными очи́ма смотря́я бу́дущую жизнь,/ и по́лнаго стра́нствования Го́спода ра́ди при́ял труды́,/ до́лгия пути́ ше́ствуя,/ жа́жду и глад, сту́день же и зной Христа́ ра́ди претерпе́,/ в посте́ и слеза́х препроводи́ дни своя́,/ до́ндеже стра́сти теле́сныя умертви́./ Те́мже сподо́бися пра́ведных ра́дования/ и с ни́миже мо́лится Го́сподеви спасти́ся душа́м на́шим.

И ны́не, Богоро́дичен: Влады́чице, приими́ моли́твы раб Твои́х:

Славосло́вие вели́кое и отпу́ст.

На литурги́и

Блаже́нны, от кано́на свята́го пе́сни 3-я и 6-я на 8. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́йя, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя Его́. Ева́нгелие от Матфе́я, зача́ло 10. Прича́стен: В па́мять ве́чную:

На ма́лой вече́рни

На Го́споди, воззва́х: стихи́ры на 4, глас 1.

Подо́бен: Небе́сных чино́в:

Ка́ко тя по достоя́нию ублажи́м,/ Преподо́бне о́тче Мака́рие,/ или́ ки́я пе́сни хвале́бный воспое́м ко прославле́нию твои́х по́двигов?/ А́нгел во пло́ти вои́стинну яви́лся еси́/ и уго́дник Бо́жий, чудесы́ просла́вленный.

Дави́дски, о́тче Мака́рие, на всяк день/ посте́лю твою́ слеза́ми омыва́л еси́,/ очища́я ду́шу твою́ от скве́рны грехо́вныя,/ те́мже и всели́ся в тя Пресвяты́й Дух,/ Его́же оби́тель яви́лся еси́/ и таи́нник ве́лий Бо́жия благода́ти.

Помина́я, о́тче Мака́рие, исхо́д души́ твое́,/ вся красоты́ мирски́я презре́л еси́,/ оте́чество же, ве́тхий Рим, оста́вил еси́/ и, в землю Русскую прише́д,/ в пусты́ню бла́тную и непроходи́мую всели́лся еси́,/ иде́же по́стническими труды́ до́бре Бо́гу угоди́л еси́,/ я́ко сад прекра́сен, цве́ты доброде́телей процветы́й.

Пусты́ни кра́сное прозябе́ние,/ от ве́тхаго Ри́ма восте́кл еси́, о́тче Мака́рие,/ и вели́кий Но́вград озари́л еси́ твои́ми по́двиги,/ бесо́вская же во́я ополче́ния победи́л еси́,/ моли́твою непреста́нною на них вооружи́вся,/ те́мже ны́не со А́нгелы лику́еши.

Сла́ва, глас 6:

Преподо́бне о́тче Мака́рие,/ ты от ю́ности за́поведи Ева́нгелия Христо́ва возлюби́л еси́/ и, крест твой взем,/ Христу́ после́довал еси́,/ умо́м чи́стым непреста́нно моли́твы Ему́ возсыла́я/ и при́сно помышля́я о сла́ве невече́рней Ца́рствия Небе́снаго,/ е́же получи́ти сподо́бился еси́,/ те́мже тя, преподо́бне, ублажа́ем.

И ны́не, Богоро́дичен, глас то́йже:

Богоро́дице, Ты еси́ лоза́ и́стинная,/ возрасти́вшая нам Плод живота́./ Тебе́ мо́лимся:/ моли́ся, Влады́чице, со святы́ми апо́столы и преподо́бным Мака́рием/ поми́ловатися душа́м на́шим.

На стихо́вне стихи́ры, глас 2.

Подо́бен: До́ме Евфра́фов:

До́му Бо́жия строи́теля Богому́драго/ и па́стыря слове́сных ове́ц Христо́вых до́браго/ яви́ тя Христо́с в земле́ Русстей,/ о́тче Мака́рие,/ моли́твенниче усе́рдный о душа́х на́ших.

Стих: Честна́ пред Го́сподем/ смерть преподо́бных Его́.

Дом Ду́ха Свята́го душа́ твоя́ бысть,/ о́тче Мака́рие,/ в ней бо доброде́тели высо́кия возрасти́л еси́/ и дости́гл еси́ в му́жа соверше́нна о Христе́,/ си́льна и непобеди́ма во бране́х со враги́ неви́димыми.

Стих: Блаже́н муж, боя́йся Го́спода,/ в за́поведех Его́ восхо́щет зело́.

До́му Госпо́дню примета́тися возжеле́л еси́/ и в само́м себе́ храм Триипоста́сному Бо́гу угото́вал еси́,/ в не́мже Христо́с со Отце́м и Ду́хом всели́ся,/ Мака́рие Богоблаже́нне,/ моли́твенниче о душа́х на́ших

Сла́ва, глас 8:

Кто изрещи́ возмо́жет твоя́ по́двиги и труды́,/ о́тче преподо́бне Мака́рие,/ бде́ния, и сухояде́ния, и непреста́нныя моли́твы,/ и́миже в пусты́ни многоле́тне подвиза́лся еси́?/ Вои́стинну дре́вним Богоносным отце́м подо́бен был еси́,/ с ни́миже ра́вное воздая́ние от Го́спода прие́м,/ непреста́нно молися,/ поми́ловатися душа́м на́шим.

И ны́не, Богоро́дичен, глас то́йже:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Тропа́рь пи́сан на вели́цей вече́рни.

Сла́ва, и ны́не, Богоро́дичен: Е́же от ве́ка утае́нное:

На вели́цей вече́рни

Блаже́н муж: 1-й антифо́н. На Го́споди, воззва́х: стихи́ры на 8, глас 8.

Подо́бен: О, пресла́внаго чудесе́:

О, пресла́внаго чудесе́!/ Во стране́ полу́нощней свети́льник Бо́жия благода́ти возсия́,/ и пусты́ня бла́тная ши́пок ра́йский плодопринесе́,/ благоуха́нием духо́вным ве́рных сердца́ услади́вший,/ к нему́же, вопию́ще, рцем:/ о преподо́бне Мака́рие, моли́ся ко Го́споду,/ Ему́же соверше́нно угоди́л еси́,/ дарова́ти нам мир и ве́лию ми́лость.

О, пресла́внаго чудесе́!/ В Ри́ме плотско́е рожде́ние прие́м,/ в Русстей хла́дней земле духо́вно возра́сл еси́, преподо́бне,/ и яви́лся еси́ дре́во благопло́дное,/ сладкопита́ющее ду́ши на́ша./ Те́мже тебе́ взыва́ем:/ о преподо́бне Мака́рие, моли́ся ко Го́споду, тя венча́вшему,/ дарова́ти нам мир и ве́лию ми́лость.

О, пресла́внаго чудесе́!/ Ка́ко ты, о́тче, в бре́нней пло́ти/ а́нгельское житие́ проходи́л еси́/ и, сме́ртен те́лом, от сме́рти грехо́вныя ду́шу твою́ свободи́л еси́?/ Те́мже всегда́ моли́ся, преподо́бне Мака́рие,/ о нас, чту́щих па́мять твою́,/ е́же спасе́ным нам бы́ти/ и тобо́ю получи́ти мир и ве́лию ми́лость.

Сла́ва, глас 6:

Егда́, о́тче преподо́бне,/ прибли́жися вре́мя сконча́ния твоего́/ и уразуме́л еси́ ду́хом твое́ ко Го́споду отше́ствие,/ тогда́ со слеза́ми помоли́лся еси́/ о оби́тели твое́й и ученице́х твои́х/ и вся ну́жная ко спасе́нию им завеща́л еси́,/ гла́сом ти́хим веща́я,/ всех же благословля́я,/ моли́тве бы́вшей на усте́х твои́х,/ пре́дал еси́ ду́шу твою́ в ру́це Го́сподеви./ Тому́ у́бо моли́ся,/ не лише́ным бы́ти и нам кончи́ны благи́я/ и насле́дия Небе́наго.

И ны́не, Богоро́дичен: Кто Тебе́ не ублажи́т:

Вход. Проки́мен дне и чте́ния три преподо́бническая.

На лити́й стихи́ры, глас 2.

Подо́бен: Егда́ от Дре́ва:

Егда́ Боже́ственное зва́ние/ прии́де на тя, преподо́бне о́тче Мака́рие,/ тогда́ оте́чество твое́, ве́тхий Рим, оста́вив,/ во землю Русскую прише́л еси́/ и, в преде́лех вели́каго Нова́гра́да пусты́ню бла́тную обре́т,/ в ней всели́лся еси́, я́ко в рай сла́дости,/ и зде же́стоко житие́ пожи́л еси́/ и мно́гим путеводи́тель ко спасе́нию был еси́./ Те́мже моли́ся Христу́ Бо́гу/ спасти́ и просвети́ти ду́ши на́ша.

Егда́ Боже́ственная благода́ть/ призва́ тя в пусты́ню, Мака́рие Богоно́сне,/ тогда́, все пло́тское мудрова́ние отложи́в,/ во страну́ ди́кую и хла́дную отше́л еси́,/ посто́м, моли́твами и слеза́ми/ сию́ духо́вно уплодоноси́л еси́/ и оби́тель святу́ю та́мо устро́ил еси́,/ да сла́вится в ней от челове́к И́мя Христа́ Бо́га./ Тому́ моли́ся, преподо́бне,/ да спасе́т и просвети́т ду́ши на́ша.

Егда благода́ть Свята́го Ду́ха/ тя осени́, преподо́бне Мака́рие,/ и рука́ми архиере́я Бо́жия/ иере́я освяще́ннаго тя соверши́,/ тогда́ со стра́хом и мно́гими слеза́ми Же́ртву Безкро́вную Го́сподеви приноси́л еси́/ и игу́мен был еси́ твои́м ученико́м,/ приме́ром твои́м их поуча́я/ и словесы́ Богодухнове́нными их наставля́я благоугожда́ти Христу́ Бо́гу./ Тому́ моли́ся, Богоно́сне,/ да спасе́т и просвети́т ду́ши на́ша.

Сла́ва, глас 6:

Прииди́те, правосла́вных собо́ри,/ пе́сньми духо́вными восхва́лим пустынножи́теля/ и Христо́ва и́стиннаго рачи́теля,/ преподо́бнаго отца́ на́шего Мака́рия,/ и́же пусты́ню благоуха́ния духо́внаго испо́лни/ и чуде́с благода́ть свы́ше получи́./ Те́мже всечестну́ю па́мять его́ похвала́ми ублажи́м,/ мо́лится бо Христу́ Бо́гу/ дарова́ти ми́ру мир/ и душа́м на́шим ве́лию ми́лость.

И ны́не, Богоро́дичен: Творе́ц и Изба́витель мой, Пречи́стая:

На стихо́вне стихи́ры, глас 1:

В честне́й па́мяти твое́й,/ преподо́бне о́тче Мака́рие,/ ве́рныя благода́тно озаря́еши/ и неду́ги челове́ческия безме́здно врачу́еши/ еди́ным прикоснове́нием к моще́м твои́м,/ те́мже, с любо́вию припа́дающе, уми́льно глаго́лем:/ моли́ся, чудотво́рче преподо́бне, Триипоста́сному Бо́гу/ поми́ловати ду́ши на́ша.

Стих: Честна́ пред Го́сподем/ смерть преподо́бных Его́.

Преподо́бне о́тче Мака́рие,/ ты, измла́да Христа́ возлюби́в,/ все плотско́е мудрова́ние умертви́л еси́,/ потща́вся ху́ждшее покори́ти лу́чшему/ и плоть порабо́тити ду́ху,/ те́мже сосу́д чист и освяще́н Бо́гови яви́лся еси́/ и чуде́с исто́чник соде́лался еси́./ Моли́ся о нас, преподо́бне, Триипоста́сному Бо́гу,/ поми́ловати ду́ши на́ша.

Стих: Блаже́н муж, бояйся Го́спода,/ в за́поведех Его́ восхо́щет зело́.

Чу́вственныя стра́сти победи́в воздержа́нием,/ пусты́ню озари́л еси́ чуде́с луча́ми,/ просвеща́я ду́ши, грехо́вною тьмо́ю помраче́нныя,/ и ны́не нас, о́тче Мака́рие,/ твои́ми моли́твами благода́тно озари́/ и просвети́ сердца́ на́ша к де́ланию за́поведей Госпо́дних.

Сла́ва, глас 8:

По́стника Госпо́дня пе́сньми духо́вными, бра́тие, почти́м,/ преподо́бнаго отца́ на́шего Мака́рия,/ ри́мское рожде́ние и Нова́гра́да украше́ние,/ пусты́ни же вои́стинну благода́тное процвете́ние,/ к нему́ же возопии́м:/ А́нгелов подо́бниче и челове́ков наста́вниче,/ наста́ви ыы ходи́ти путе́м по́двигов твои́х/ и моли́твами твои́ми соде́лай нас/ прича́стники бы́ти Ца́рствия Небе́снаго.

И ны́не, Богоро́дичен: Безневе́стная Де́во:

На благослове́нии хле́бов тропа́рь преподо́бнаго, два́жды, и Богоро́дице Де́во: еди́ножды.

Тропа́рь преподо́бнаго, глас 4:

Рим, оте́чество твое́, оста́вив,/ в пусты́ню всели́лся еси́,/ и та́мо, в пу́сте ме́сте обре́т жили́ще себе́,/ отбе́гл еси́ суеты́ ми́ра сего́,/ и в безмо́лвнем приста́нищи до́бре направля́л еси́ себе́ ко Го́споду./ Сего́ ра́ди и мы, чту́щий тя,/ притека́юще, мо́лим тя, о́тче Мака́рие:/ моли́ о нас Го́спода,/ да поми́лует нас в День су́дный.

Ин тропа́рь, глас то́йже:

Оте́чество твое́, ве́тхий Рим, оста́вив,/ во страну́ Русскую прише́л еси́, преподо́бне,/ и в пусты́ни бла́тней всели́вся,/ та́мо приста́нище ти́хое ко спасе́нию обре́л еси́/ и безмо́лвное житие́ богоуго́дно провожда́л еси́,/ направля́я себе́ ко Го́споду моли́твами непреста́нными./ Сего́ ра́ди Христо́с тя возлюби́/ и чудесы́ просла́ви, о́тче Мака́рие,/ яви́в тя па́стыря до́бра слове́снаго ста́да Своего́./ Те́мже и мы, притека́юще к тебе́, уми́льно глаго́лем:/ моли́ Просла́вльшаго тя спасти́ся душа́м на́шим.

На у́трени

На Бог Госпо́дь: тропа́рь преподо́бнаго, два́жды. Сла́ва, и ны́не, Богоро́дичен: Е́же от ве́ка утае́нное:

По 1-м стихосло́вии седа́лен, глас 4:

Подо́бен: Ско́ро предвари́:

Зва́нию Госпо́дню после́довав, о́тче преподо́бне Мака́рие,/ в пусты́ню всели́лся еси́,/ и та́мо храм во и́мя Пресвяты́я Богоро́дицы, честна́го и сла́внаго Ея́ Успе́ния, воздви́гл еси́,/ и ны́не вку́пе с Не́ю моли́ся Христу́ Бо́гу/ спасти́ся душа́м на́шим.

Сла́ва, и ны́не, Богоро́дичен:

Богоро́дице, Ты обнови́ла еси́, Пречи́стая, святы́м Рождество́м Твои́м/ земны́х челове́к па́дшее естество́,/ сего́ ра́ди Тя пе́сненно велича́ем.

По 2-м стихосло́вии седа́лен, глас 6.

Подо́бен: А́нгельский си́лы:

Крест Христо́в на ра́мо взем,/ к боре́нию со враги́ неви́димыми устреми́лся еси́, Мака́рие преподо́бне,/ и полки́ бесо́вския в пусты́ни победи́л еси́,/ сего́ ра́ди, я́ко победоно́сец, чуде́с дарова́ние от Христа́ прия́л еси́,/ Человеколю́бца и Спаса́ душ на́ших.

Сла́ва, и ны́не, Богоро́дичен:

Ки́йждо, иде́же ча́ет спасти́ся, та́мо пра́ведно и притека́ет./ Мы же, обре́тше Тя прибе́жище спаси́тельное, Богоро́дице,/ приле́жно мо́лимся Тебе́:/ покры́й нас ма́терним покро́вом Твои́м от вся́каго зла/ и спаси́ ду́ши на́ша.

По полиеле́и седа́лен, глас 4.

Подо́бен: Ско́ро предвари́:

Егда́ прише́л еси́ от Ри́ма во страну́ Русскую, о́тче Мака́рие,/ тогда́ я́ко стра́нник и пришле́ц пребыва́л еси́, Влады́це Христу́ подо́бяся,/ не име́я ме́ста, где главу́ подклони́ти,/ до́ндеже дарова́ тебе́ Бог пусты́ню в ме́сто селе́ния,/ в не́йже ра́достно водвори́лся еси́ на по́двиги духо́вныя./ Того́ моли́, преподо́бне, не лише́ным бы́ти и нам спасе́ния ве́чнаго.

Сла́ва, и ны́не, Богоро́дичен:

Призри́, Влады́чице, на рабы́ Твоя́/ и умилосе́рдися на лю́ди согреши́вшия,/ яви́, я́ко при́сно, си́лу Твою́,/ да непреста́нно Тя по до́лгу ублажа́ем.

Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Блаже́нства тезоимени́те,/ преподо́бне о́тче Мака́рие,/ ты усе́рдно претерпе́л еси́ пусты́нное озлобле́ние,/ и мшиц угрызе́ние, и бесо́вская страхова́ния,/ вери́гами желе́зными связа́в твое́ те́ло,/ да свобо́ду Вы́шняго зва́ния получи́ши./ Сего́ ра́ди почита́ем святу́ю и всечестну́ю па́мять твою́.

Кано́н Богоро́дице со ирмосо́м на 6 и преподо́бному на 8, глас 8.

Песнь 1

Ирмо́с: Мо́ре огусти́л еси́,/ погрузи́вый со ору́жием го́рдаго фарао́на,/ и лю́ди сласл еси́ немо́кренно, Го́споди,/ и ввел еси́ я в Го́ру Святы́ни, вопию́щия:/ пои́м Тебе́, Бо́гу на́шему, песнь побе́дную, я́ко просла́вися.

Мо́ря жите́йскаго волна́ми обурева́еми,/ к Тебе́, Иису́се Всеблаги́й, прибега́юще, вопие́м:/ от ти́ны страсте́й нас изба́ви,/ да в тишине́ ду́ха уго́днику Твоему́, преподо́бному Мака́рию, песнь хвале́бную принесе́м,/ его́же чудесы́ сла́вно просла́вил еси́.

Мо́ря песо́к преде́л положи́вый,/ Госпо́дь избра́ тя от ри́мскаго ро́да, преподо́бне о́тче Мака́рие,/ служи́ти Ему́ в преподо́бии и чистоте́/ и в Русстей стране́ показа́ тя чудотво́рца изря́дна:/ в чудесе́х бо мно́гих сла́вно просла́вился еси́.

Мо́ря жите́йскаго треволне́ние не потопи́ ладии́ твоея́, о́тче Мака́рие,/ но, ве́янием Ду́ха Бо́жия управля́емь, в ти́хое приста́нище спасе́ния вшел еси́/ и чуде́с дарова́нием от Го́спода просла́вился еси́.

Богоро́дичен: Мо́ре слез испроси́ нам, Влады́чице Преблага́я,/ у Ми́лостиваго Сы́на Твоего́ и Бо́га на́шего,/ да, и́ми угаси́вше пещь страсте́й,/ омы́ем скве́рну грехо́вную душ на́ших/ и, спасе́ние ве́чное получи́вше, воспое́м Христу́ песнь побе́дную, я́ко просла́вися.

Песнь 3

Ирмо́с: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,/ возвесели́хся о спасе́нии твое́м.

Утверди́л еси́ на ка́мени за́поведей Христо́вых се́рдце твое́, преподо́бне о́тче Мака́рие,/ у́зким и приско́рбным путе́м ше́ствовал еси́,/ алчбо́ю, и жа́ждою, и вери́гами желе́зными плоть твою́ изнуря́я блаже́ннаго ра́ди бу́дущаго поко́я,/ его́же получи́в, весели́шися ве́чно со святы́ми.

Житию́ дре́вних Богоно́сных оте́ц поревнова́в,/ в пусты́ню бла́тную и суро́вую удали́лся еси́, о́тче Мака́рие,/ не име́вшую никоего́же челове́ческаго утеше́ния,/ в не́йже многоле́тне потруди́вся, оби́тель и́ноком созда́л еси́, во спасе́ние мно́гим.

Утвержда́л еси́ бра́тию твою́ словесы́ Богодухнове́нными, о́тче Мака́рие,/ па́че же о́бразом святоподви́жнаго твоего́ жития́;/ ти́и же, тобо́ю наставля́еми, подража́тели бы́ша подвиго́м твои́м/ и вку́пе с тобо́ю получи́ша спасе́ние.

Богоро́дичен: Утвержде́ние на Тя наде́ющихся, Пресвята́я Богоро́дице Влады́чице,/ не посрами́ упова́ния на́шего, е́же по Бо́зе на Тя возлага́ем,/ но буди́ нам Засту́пница от нападе́ний диа́вольских,/ да, Тобо́ю помоществу́еми, возвесели́мся о спасе́нии на́шем.

Седа́лен, глас 4.

Подо́бен: Ско́ро предвари́:

Ско́рый помо́щник явля́ешися, преподо́бне о́тче Мака́рие,/ с ве́рою в моли́твах Тя призыва́ющим,/ и ме́сто пусты́нное твои́х по́двигов от запусте́ния коне́чнаго соблю́л еси́ ди́вно,/ на не́мже с любо́вию честву́ем святу́ю и всера́достную па́мять твою́.

Сла́ва, и ны́не, Богоро́дичен:

Ско́рый Твой покро́в, и по́мощь, и ми́лость покажи́ на рабе́х Твои́х,/ и во́лны, Чи́стая, укроти́ су́етных помышле́ний,/ и па́дшую мою́ ду́шу возста́ви, Богоро́дице:/ вем бо, вем, Де́во, я́ко мо́жеши, ели́ка и хо́щеши.

Песнь 4

Ирмо́с: Проро́к Авваку́м у́мныма очи́ма/ прови́де, Го́споди, прише́ствие Твое́,/ тем и вопия́ше:/ от ю́га прии́дет Бог./ Сла́ва си́ле Твое́й, сла́ва снизхожде́нию Твоему́.

Проро́ком Бо́жиим Илии́ и Крести́телю поревнова́л еси́, преподо́бне о́тче Мака́рие,/ пусты́нное житие́ возлюби́в, я́ко го́рлица уедине́нная,/ славосло́вия же еди́н Еди́ному Христу́ возноси́л еси́,/ воспева́я Того́ Боже́ственное снизхожде́ние.

Проро́чески, о́тче Мака́рие, по́мыслы челове́ческия прозрева́л еси́,/ чистоты́ ра́ди твоея́ серде́чныя,/ и бра́тию твою́ ве́рно поуча́л еси́ в моли́твах бо́дрствовати/ и немо́лчно воспева́ти гла́сы преподо́бными Спа́сово Боже́ственное снизхожде́ние.

Проро́ка и царя́ Дави́да песнь во усте́х твои́х всегда́ име́л еси́, преподо́бне Мака́рие,/ и се́ю Бо́га немо́лчно славосло́вил еси́,/ о́браз тобо́ю бра́тии твое́й подава́я,/ да во псалме́х и пе́снех духо́вных воспева́ют при́сно Христо́во Боже́ственное снизхожде́ние.

Богоро́дичен: Проро́ческая рече́ния на Тебе́ сбы́шася, Де́во Богоро́дице:/ Ты бо Сло́во Бо́жие нетле́нно воплоти́ла еси́/ и Невмести́маго во утро́бе Твое́й де́вственней нете́сно вмести́ла еси́./ Те́мже Тя хвале́бно ублажа́ем/ и воспева́ем спаси́тельное Христо́во снизхожде́ние.

Песнь 5

Ирмо́с: Го́споди Бо́же наш, мир даждь нам,/ Го́споди Бо́же наш, стяжи́ ны,/ Го́споди, ра́зве Тебе́, ино́го не ве́мы,/ И́мя Твое́ имену́ем.

Го́спода Бо́га освяти́л еси́ в души́ твое́й, преподо́бне о́тче Мака́рие,/ и же́ртвенник мы́сленный ду́шу твою́ соде́лал еси́,/ на не́мже же́ртву хвалы́ Го́сподеви возноси́л еси́,/ во смире́нии ду́ха немо́лчно призыва́я И́мя Бо́жие спаси́тельное.

Госпо́дни за́поведи животво́рный име́л еси́,/ напи́саны на скрижа́лех се́рдца твоего́, преподо́бне о́тче Мака́рие,/ и пропове́дник бра́тии твое́й был еси́ Ева́нгельскаго уче́ния,/ к Небеси́ возводя́щего челове́ки,/ и́же, послу́шающе сего́, моли́твенно призыва́ют Боже́ственное Христо́во И́мя.

Госпо́день раб был еси́, Мака́рие Богому́дре,/ день и нощь труди́вся во сла́ву Бо́жию и на по́льзу душе́вную бли́жним твои́м,/ и́хже, я́ко сама́го себе́, возлюби́л еси́,/ усе́рдно подвиза́я их сла́вити о тебе́ Христо́во И́мя.

Богоро́дичен: Го́спода Ма́ти и Влады́чица всея́ тва́ри яви́лася еси́, Богоро́дице Мари́е,/ нетле́нно пло́тию ро́ждши Еди́наго от Тро́ицы, Бо́га Сло́ва./ Его́же моли́, Чи́стая, от безслове́сных страсте́й нас изба́вити,/ да в тишине́, безстра́стия се́рдцем и усты́ воспева́ем свято́е И́мя Его́.

Песнь 6

Ирмо́с: Я́ко во́ды морски́я, Человеколю́бче,/ волна́ми жите́йскими обурева́юся./ Те́мже, я́ко Ио́на, та́ко вопию́ Ти:/ возведи́ от тли живо́т мой, Благоутро́бне Го́споди.

Я́ко кипари́с высокове́рхий, возра́сл еси́, преподо́бне Мака́рие,/ в пусты́ни бла́тней и непло́дней/ и плодоноше́нии духо́вными просла́вился еси́ в ней,/ я́ко и́стинный уго́дник Христа́ Бо́га,/ к Нему́же и на́ша стопы́ напра́ви/ и моли́твами твои́ми от тле́ния грехо́внаго нас изба́ви, мо́лимся.

Я́ко и́стинный после́дователь Иису́сов,/ во смире́нии глубо́це жизнь твою́ провожда́л еси́, Мака́рие блаже́нне,/ власяны́ми ру́бы и вери́гами желе́зными утесня́я твое́ те́ло,/ да свободи́шися от тле́ния грехо́внаго и полу́чиши спасе́ние.

Я́ко во́ин благоиску́сный, о́тче Мака́рие,/ стре́лы вра́жия изощре́нныя со у́гльми пусты́нными сле́зными пото́ки устуди́л еси́/ и победоно́сец показа́лся еси́ во бране́х со враги́ неви́димыми,/ и́же не возмого́ша тя низри́нути в про́пасть и тле́ние грехо́вное,/ си́лою Христа́ утвержде́ннаго.

Богоро́дичен: Я́ко вои́стинну прибе́жище непосты́дное христиа́ном,/ и щит, и покро́в, Ма́ти Бо́жия,/ воспева́ющия Тя от бед и скорбе́й свободи́:/ Тя бо Еди́ну, благослове́нную в жена́х,/ Тобо́ю от тле́ния грехо́внаго изба́вльшиися, немо́лчными хвала́ми ублажа́ем.

Конда́к, глас 7:

От Ри́ма возсия́л еси́, я́коже звезда́ пресве́тлая,/ преподо́бне о́тче наш Мака́рие,/ и, в пусты́ни всели́вся,/ просвети́л еси́ чи́стым житие́м твои́м/ ве́рно притека́ющия к тебе́./ Те́мже и мы, прославля́юще све́тлую па́мять твою́, вопие́м ти:/ ра́дуйся, преподо́бне о́тче Мака́рие.

Ин конда́к, глас 8:

Якоже пресве́тлая звезда́, от Ри́ма возсия́л еси́, преподо́бне,/ и, Бо́гом наставля́емь, Русскую страну́ све́том чуде́с твои́х озари́л еси́ духо́вно,/ созыва́я ве́рныя к моще́м твои́м,/ от ни́йхже исцеле́ния неду́жным подае́ши./ Те́мже мо́лимся тебе́:/ научи́ нас, о́тче, твоему́ Богоразу́мию/ и уврачу́й неду́ги на́ша душе́вныя и теле́сныя,/ да зове́м ти:/ ра́дуйся, преподо́бне о́тче Мака́рие.

И́кос:

Возлюби́в Христо́вы Боже́ственный за́поведи,/ возненави́дел еси́ ми́ра сего́ наслажде́ние:/ плоть твою́, преподо́бне,/ посто́м, бде́нием, до́лу лега́нием и вери́гами желе́зными изнури́л еси́/ и во умерщвле́нием телеси́ пе́сни благоприя́тный,/ хвалы́ и славосло́вия Триеди́ному Бо́гу немо́лчно приноси́л еси́, о́тче Мака́рие./ Сего́ ра́ди приими́ от нас по достоя́нию такова́я:/ ра́дуйся, А́нгеле земны́й и челове́че, Небе́сный,/ А́нгелы удиви́вый жития́ твоего́ чистото́ю/ и челове́ки научи́вый благоугожда́ти Бо́гу;/ ра́дуйся, свети́льниче немерца́яй Боже́ственныя благода́ти,/ в житии́ и по сме́рти сия́яй чудесы́./ Ра́дуйся, озаря́яй ду́ши и сердца́ челове́ческая невече́рним све́том твоея́ сла́вы,/ е́юже и ме́сто по́двигов твои́х прославля́еши преди́вно;/ ра́дуйся, преподо́бне о́тче Мака́рие.

Песнь 7

Ирмо́с: Халде́йская пещь, огне́м распаля́емая,/ ороша́шеся Ду́хом, Бо́жиим предстоя́нием,/ о́троцы поя́ху:/ благослове́н еси́, Бо́же оте́ц на́ших.

В пещи́ искуше́ний пусты́нных, о́тче Мака́рие,/ благода́ть Госпо́дню, тя ороша́ющую, стяжа́л еси́./ Те́мже непобеди́м враго́м неви́димым показа́лся еси́/ и вся прило́ги диа́вольския кре́пко сокруши́л еси́, зовы́й немо́лчно:/ благослове́н еси́, Бо́же оте́ц на́ших.

Поревнова́л еси́, преподо́бне о́тче, соиме́нному ти вели́кому во отце́х Мака́рию,/ его́же нра́ву и чистоте́ непреста́нно поуча́яся,/ я́ко безпло́тен, на земли́ подвиза́лся еси́,/ сего́ ра́ди сосу́д избра́н Ду́ху Свято́му сподо́бился еси́ бы́ти,/ Его́же де́йством чудеса́ пресла́вная соде́лал еси́ в житии́ и по сме́рти,/ о ни́хже ве́рнии благословля́ют Бо́га оте́ц на́ших.

Я́ко крин, в пусты́ни процве́л еси́, преподо́бне,/ и благоуха́ния Христо́ва испо́лнил еси́ ме́сто по́двигов твои́х земны́х./ Све́том до́брых дел твои́х озари́л еси́ сердца́ челове́ков,/ просвеща́я их уче́нии твои́ми и науча́я пе́ти Го́сподеви:/ благослове́н еси́, Бо́же оте́ц на́ших.

Богоро́дичен: В пещи́ халде́йстей та́инство Рождества́ Твоего́ проразумева́юще, Богоро́дице,/ ро́ждшимся от Тебе́ Искупи́телем спасе́ние обрето́хом/ и, подо́бящеся отроко́м Богосло́вцем, Сы́ну Твоему́ и Го́споду благода́рно зове́м:/ благослове́н еси́, Бо́же оте́ц на́ших.

Песнь 8

Ирмо́с: А́нгели и Небеса́,/ на Престо́ле Сла́вы Седя́щаго/ и я́ко Бо́га непреста́нно Сла́вимаго/ благослови́те, по́йте/ и превозноси́те во вся ве́ки.

А́нгелы собесе́дники име́л еси́, преподо́бне Мака́рие,/ и, си́ми укрепля́емь, в пусты́ни безлю́дней и бла́тней многоле́тне пребы́л еси́,/ еди́н Еди́ному Бо́гу рабо́тая;/ сего́ ра́ди ны́не со Безпло́тными водворя́ешися и пое́ши хвале́бную песнь Триеди́ному Бо́гу,/ препе́тому и превозноси́мому во ве́ки.

А́нгела тя пло́тянаго ве́мы, преподо́бне о́тче Мака́рие,/ ангелоподо́бно бо на земли́ пожи́л еси́/ и чистоту́ души́ и те́ла ре́вностно соблю́л еси́,/ ны́не же водворя́ешися та́мо, иде́же ничто́же скве́рно вхо́дит,/ и пое́ши немо́лчную песнь Бо́гу, препе́тому и превозноси́мому во ве́ки.

А́нгелов Творе́ц и всея́ тва́ри Соде́тель подви́жника доброде́телей яви́ тя, Мака́рие преподо́бне,/ Его́же си́лою укрепля́емь, путе́м те́сным ше́ствуя,/ дости́гл еси́ соверше́нства духо́внаго,/ Ца́рствие Христо́во унасле́довал еси́/ и со святы́ми пое́ши ра́достно:/ Го́спода по́йте и превозноси́те Его́ во ве́ки.

Богоро́дичен: А́нгельское целова́ние прино́сим Ти с любо́вию, Богоро́дице Чи́стая:/ ра́дуйся, Благода́тная, Госпо́дь с Тобо́ю./ Ты же ра́дости нетле́нный сподо́би Тя по до́лгу ублажа́ющий,/ ро́ждшагося же от Тебе́ Го́спода пою́щия и превознося́щий во ве́ки.

Песнь 9

Ирмо́с: Чу́жде ма́терей де́вство,/ и стра́нно де́вам деторожде́ние:/ на Тебе́, Богоро́дице, обоя́ устро́ишася./ Тем Тя, вся племена́ земна́я, непреста́нно велича́ем.

Чуждь был еси́, преподо́бне Мака́рие, превозноше́ния тщесла́внаго/ и во смире́нии глубо́це житие́ твое́ провожда́л еси́,/ о́браз смире́ния был еси́ твои́м ученико́м,/ и́хже при́сно поуча́л еси́ бе́гати душепа́губныя го́рдости/ и во смире́нии ду́ха велича́ти Христа́ Жизнода́вца.

Чуждь и стра́нен был еси́ во стране́ Русстей, Мака́рие,/ взыску́яй вы́шняго гра́да, Иерусали́ма Небе́снаго,/ и к нему́ непреста́нно воспаря́яй по́мыслми Боголюби́выя твоея́ души́,/ я́же ны́не со А́нгелы Христа́ велича́ет.

Чуждь пра́здности яви́лся еси́, блаже́нне,/ но при́сно в моли́твах и труде́х пусты́нных подвиза́лся еси́/ и вери́гами желе́зными плоть твою́ утесня́л еси́,/ си́лою Го́спода сил укрепля́емь,/ Его́же гла́сы хвале́бными немо́лчно велича́л еси́.

Богоро́дичен: Чу́ждих нас яви́, Влады́чице, вла́сти лю́таго мироде́ржца/ и в час кончи́ны на́шея на по́мощь ускори́ к нам, безпомо́щным:/ мно́го бо мо́жет Ма́терняя моли́тва Твоя́ ко Го́споду,/ и трепе́щут пред Тобо́ю ду́си тьмы,/ от и́хже наси́лия нас изба́ви, Всеблага́я,/ да Тя славосло́вии ра́достными велича́ем.

Свети́лен:

Процве́л еси́ в по́стнических по́двизех, преподо́бне о́тче Мака́рие,/ и плод чудотворе́ния прине́сл еси́ Христо́ве Це́ркви,/ и о́ную пусты́ню, в не́йже подвиза́лся еси́,/ благоуха́ния духо́внаго испо́лнил еси́,/ во утеше́ние с ве́рою и любовию к тебе́ притека́ющим.

Сла́ва, и ны́не, Богоро́дичен:

Тя пе́сньми немо́лчными ублажа́ем, Де́во,/ я́ко от Тро́ицы Еди́наго родила́ еси́, Богоро́дице,/ и яви́ла еси́ нам, потемне́нным, свет спасе́ния/ Боже́ственным и Пречи́стым Твои́м Рождество́м.

На хвали́тех стихи́ры на 4, глас 5.

Подо́бен: Ра́дуйся, по́стником:

Ра́дуйся, о́тче Мака́рие,/ звездо́ пресве́тлая, от Ри́ма возсия́вшая/ и Русскую страну́ благода́тно озари́вшая;/ ра́дуйся, вели́кий пустынножи́телю,/ дре́вним Богоно́сным отце́м равноче́стный;/ ра́дуйся, предста́телю и помо́щниче ско́рый в моли́твах тя призыва́ющим./ Предвари́ и подви́гни святы́я моли́твы твоя́ о нас ко Го́споду/ и да́нною ти от Него́ благода́тию/ неду́ги на́ша душе́вныя и теле́сныя исцели́,/ прося́ дарова́ти нам мир и ве́лию ми́лость.

Ра́дуйся, главо́ освяще́нная,/ жили́ще Ду́ха Свята́го,/ сосу́де избра́нный Бо́жия благода́ти; ра́дуйся, боля́щих цели́телю,/ печа́льных уте́шителю, заблу́ждших путеводи́телю./ Наста́ви и нас, о́тче Мака́рие,/ ходи́ти путе́м Богоуго́дных исправле́ний твои́х/ и помяни́ нас в моли́твах твои́х ко Го́споду,/ прося́ нам у бла́гости Его́ ве́лия ми́лости.

Ра́дуйся, пусты́нный граждани́не,/ преподо́бных красото́, чуде́с Боже́ственных соверши́телю,/ Мака́рие Богоно́сне,/ блиста́ньми чуде́с твои́х озаря́яй нас благода́тно/ и си́ми утвержда́яй нас во Правосла́вной ве́ре./ Честну́ю па́мять твою́ соверша́ющим/ пода́ждь да́ры целе́бный, коему́ждо по потре́бе,/ и моли́ Христа́ Бо́га/ дарова́ти нам ве́лию ми́лость.

Сла́ва, глас 6:

Преподо́бне о́тче Мака́рие,/ кто изочте́т труды́ твоя́ пусты́нныя,/ бде́ния и сухояде́ния/ и мно́гая моле́ния,/ и́миже Христу́ соверше́нно угоди́л еси́?/ Мы же, чту́ще тя/ я́ко ве́рнаго слугу́ Госпо́дня и чудотво́рца сла́внаго,/ честву́ем святу́ю па́мять твою́/ и умиле́нно глаго́лем:/ о́тче преподо́бне, моли́ся Го́сподеви/ поми́ловатися душа́м на́шим.

И ны́не, Богоро́дичен:

Никто́же, притека́яй к Тебе́, посра́млен от Тебе́ исхо́дит,/ Пречи́стая Богоро́дице Де́во,/ но про́сит благода́ти/ и прие́млет дарова́ние к поле́зному проше́нию.

Славосло́вие вели́кое и отпу́ст

На литурги́и

Блаже́нны, от кано́на пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, яже воздаде́ ми? Апо́стол к Гала́том, зача́ло 213. Аллилу́йя, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя Его́. Ева́нгелие от Луки́, зача́ло 24. Прича́стен: В па́мять ве́чную:

Моли́тва

О свяще́нная главо́, земны́й А́нгеле и Небе́сный челове́че, преподо́бне и Богоно́сне о́тче наш Мака́рие! Припа́даем ти с ве́рою и любо́вию и мо́лимся приле́жно: яви́ нам, смире́нным и гре́шным, свято́е твое́ заступле́ние. Се бо, грех ра́ди на́ших, не и́мамы свобо́ды чад Бо́жиих проси́ти о потре́бах на́ших Го́спода и Влады́ку на́шего, но тебе́ моли́твенника благоприя́тнаго к Нему́ предлага́ем и про́сим тя со усе́рдием мно́гим: испроси́ нам у бла́гости Его́ благопотре́бныя да́ры душа́м и телесе́м на́шим: ве́ру пра́ву, наде́жду спасе́ния несомне́нну, любо́вь ко всем нелицеме́рну, во искуше́ниих му́жество, в злострада́ниих терпе́ние, в моли́твах постоя́нство, душ и теле́с здра́вие, земли́ плодоно́сие, возду́ха благорастворе́ние, жите́йских потре́б дово́льство, ми́рное и безмяте́жное житие́, благу́ю христиа́нскую кончи́ну и до́брый отве́т на стра́шнем Суде́ Христо́ве. Испроси́, уго́дниче Бо́жий, у Царя́ ца́рствующих и Го́спода госпо́дствующих стране́ на́шей мир, тишину́ и благострое́ние, не забу́ди, преподо́бне о́тче, и пусты́нное ме́сто по́двигов твои́х, но благоволи́ о не́м и просла́ви е чудотворе́нии твои́ми; и всех, приходя́щих на поклоне́ние моще́м твои́м святы́м, от искуше́ний диа́вольских и вся́каго зла ми́лостивно изба́ви. Ей, чудотво́рче святы́й! Не лиши́ нас по́мощи твое́й Небе́сныя, но моли́твами твои́ми вся ны приведи́ во приста́нище спасе́ния и насле́дники яви́ нас всесве́тлаго Ца́рствия Христо́ва, да пое́м и сла́вим неизрече́нныя щедро́ты Человеколю́бца Бо́га, Отца́ и Сы́на и Свята́го Ду́ха, и твое́ свято́е оте́ческое заступле́ние, во ве́ки веко́в. Ами́нь.

Тропарь, глас 4:

Бы́вший нестяжа́телем Христа́ ра́ди/ и Того́ за мно́гия твоя́ доброде́тели/ в се́рдце твое́ всели́вый,/ блаже́нне Мака́рие,/ моли́ся о нас, пою́щих тя.

Конда́к, глас 2:

Вы́шних ища́, ни́жних не стяжа́л еси́/ и, нестяжа́ние, я́ко колесни́цу о́гненну к Небеси́, себе́ угото́вав,/ со А́нгелы жи́ти сподо́бился еси́,/ Мака́рие сла́вне,/ с ни́миже Христа́ Бо́га моли́ о всех нас.

 

Тропа́рь, глас 7:

От ю́ности Христа́ усе́рдне возлюби́в,/ вда́лся еси́ Тому́ весь, я́ко непоро́чна же́ртва,/ и, и́го Его́ благо́е на себе́ взем,/ рабо́тал в не́м, всече́стне Мака́рие, спе́шне,/ те́мже у́бо мо́лим тя:моли́ся о душа́х на́ших.

Конда́к, глас 4:

Вда́вшагося Христу́ Бо́гу на служе́ние от младе́нства/ и Тому́ во и́ночестве и диа́констве послужи́вша священноле́пно,/ восхваля́ем тя любо́вию, Мака́рие свяще́нне, и мо́лим:/ я́ко имы́й дерзнове́ние,/ моли́ Христа́ Бо́га о нас, пою́щих тя.