На Го́споди, воззва́х: стихи́ры, глас 8.

Подо́бен: Му́ченицы Твои́, Го́споди:

Селе́ние Го́спода твоего́/ и храм одушевле́н быв/ жития́ све́тлостию и пребыва́нием,/ безду́шный воздви́гл еси́ храм,/ дре́вле па́дший, всече́стне,/ вселе́нныя Ца́рствующему,/ того́ твои́ми моли́твами моли́/ всем дарова́ти ве́лию ми́лость.

Сосу́д яви́лся еси́ ду́ха,/ с Небе́с тебе́ подае́мая прие́мля светоли́тия,/ и сия́ний прия́тен./ Тем прорица́еши спаси́тельное всем челове́ком избавле́ние;/ того́ твои́ми моли́твами умоли́/ всем дарова́ти ве́лию ми́лость.

Заре́ю лучено́сною облия́емь,/ и виде́ния сподо́бля́емь,/ и чисте́йшаго и невече́рняго просвеще́ния/ я́влься, блаже́нне, испо́лнен,/ тя воспева́ющия соблюди́,/ моля́ Еди́наго Го́спода/ всем да́ти ве́лию ми́лость.

И́ны стихи́ры Пресвяте́й Богоро́дице, глас и подо́бен то́йже:

Исхити́ мя, Влады́чице,/ из руки́ зми́я человекоуби́йцы,/ борю́щаго мя ле́стию пожре́ти до конца́,/ сокруши́ че́люсти сего́, молю́ся,/ и кова́рствия разори́,/ я́ко да, изба́влься сего́ ногте́й,/ велича́ю си́лу твою́.

Аз есмь дре́во непло́дное, Всенепоро́чная,/ непло́дя́щее плода́ спасе́ннаго;/ те́мже и трепе́щу посече́ния,/ да не ка́ко вве́ржен бу́ду/ во огнь негасимый, окая́нный./ Те́мже Ти припа́даю:/ сего́ изба́ви мя/ и плодоно́сна покажи́, Чи́стая, Сы́ну Твоему́/ хода́тайством Твои́м.

Помышле́ния нечи́ста и уста́ льсти́ва,/ дела́ же моя́ вся оскверне́на,/ и что сотворю́?/ ка́ко усря́щу Судию́?/ Влады́чице Де́во, моли́ Сы́на Твоего́/ и Зижди́теля и Го́спода,/ я́ко да в покая́нии прии́мет дух мой,/ я́ко Еди́н Благоутро́бен.

Сла́ва, и ны́не, Богоро́дичен:

Го́ре прогне́вавшему своего́ Бо́га,/ увы́ мне, в неве́дении/ и пребыва́ющу во уны́нии и ле́ности, я́коже аз./ Влады́чице Де́во! Ты помози́ ми, омраче́нному,/ и моли́ся Твоему́ Сы́ну и Соде́телю/ да́ти ми согреше́ний проще́ние.

Крестобогоро́дичен:

Ю́ница Нескве́рная/ Юнца́ ви́дящи на Дре́ве, пригвожда́ема во́лею,/ рыда́ющи жа́лостне:/ увы́ Мне! – вопия́ше,–/ люби́мейшее Ча́до!/ что Ти сонм воздаде́ безблагода́тный евре́йский,/ хотя́ Мя обезча́дствовати от Тебе́, Вселюбе́зне?

НА УТРЕНИ

Оба кано́на Окто́иха и проро́ка кано́н на 4, глас 7, его́же краегране́сие:  Богода́нная пое́м Агге́ева словеса́.

Песнь 1

Ирмо́с: Изме́ншему Бо́гу Изра́иля/ от мо́ря Чермнаго/ побе́дную песнь пои́м,/ я́ко просла́вися.

Богови́днейший, Бо́гу предстоя́, я́ко проро́к и́стинен,/ пою́щих честну́ю па́мять твою́, блаже́нне, помина́й.

На основа́нии тве́рдем доброде́телей тебе́ сама́го назда́в,/ возложи́лся еси́ храм одушевле́н, Богоблаже́нне.

Чисте́йший твой ум, при́сно зря Бо́га, я́ко мо́щно,/ та́мошними далечесия́тельно дарова́нии, блаже́нне, облиста́.

Богоро́дичен: Тя, безма́терня пе́рвее, Сло́во Бо́жие,/ Де́ва, во утро́бе заче́нши плотски́, родила́ есть, Сы́на безо́тча.

Песнь 3

Ирмо́с: Утверди́ся ве́рою Христо́ва Це́рковь,/ и́бо непреста́нно пе́сньми вопие́т, пою́щи:/ Свят еси́, Го́споди,/ и Тя пое́т дух мой.

Си́лою Боже́ственною де́монскаго лю́таго плене́ния нас разреши́в,/ хра́мы твоя́ честны́, Спа́се, покажи́,/ Свят еси́, – зову́щия, – спаса́яй ду́ши на́ша.

В Высоча́йших обита́яй и исполня́я вселе́нную святы́ни, проро́че,/ храм тя показу́ет,/ Свят еси́, – зову́ща, – спаса́яй ду́ши на́ша.

Боже́ственный Дух, всем благода́ть разда́ваяй,/ в твое́ се́рдце всели́вся, вопи́ти тя науча́ет:/ Свят еси́, Го́споди, спаса́яй ду́ши на́ша.

Богоро́дичен: Сло́вом всю тварь му́дре соде́тельствовавый,/ соде́тельствуется из Тебе́ по нам, Богоро́дице,/ Челове́к быв за милосе́рдие, Человеколю́бец.

Седа́лен, глас 3.

Подо́бен: Боже́ственныя ве́ры:

Боже́ственным Ду́хом просвеще́ну мысль име́я, проро́че,/ Бо́жия прорица́еши та́инства, открыва́я бу́дущих явле́ние/ и сказу́я веще́й сбытие́, Агге́е всеблаже́нне,/ Христа́ Бо́га моли́ дарова́ти нам ве́лию ми́лость.

Сла́ва, и ны́не, Богоро́дичен:

Боже́ственнаго естества́ не отлу́чся, плоть быв во чре́ве Твое́м,/ но Бог вочелове́чся и пребы́сть,/ и́же по рождестве́ Ма́терь Тя Де́ву,/ я́ко пре́жде рождества́, сохрани́в Всенепоро́чну, Еди́н Госпо́дь;/ того́ приле́жно моли́ дарова́ти нам ве́лию ми́лость.

Крестобогоро́дичен:

Нескве́рная А́гница,/ Сло́ва Нетле́нная Де́ва Ма́ти на Кресте́ зря́щи пове́шена/ из Ней без боле́зни прозя́бшаго,/ ма́терски подо́бно рыда́ющи, вопия́ше:/ увы́ Мне, Ча́до Мое́, ка́ко стра́ждеши во́лею,/ хотя́ изба́вити от страсте́й безче́стия челове́ка?

Песнь 4

Ирмо́с: Услы́шах слух Твой, Го́споди,/ я́ко яви́лся еси́ на земли́,/ за е́же спасти́ ны,/ тем вопие́м: сла́ва си́ле Твое́й, Го́споди.

Показа́л еси́ из Де́вы одушевле́нный прия́тый тебе́ дом/ Твоему́ проро́ку, Христе́, с ни́мже вопие́м:/ сла́ва си́ле Твое́й, Го́споди.

Собра́л еси́ отринове́нныя, Го́споди,/ рабо́ты вра́жия свобожде́й нас,/ я́коже проро́к глаго́лет Богоприя́тный.

Яви́л еси́ бу́дущее последи́ спасе́ние язы́ков/ Твоему́ проро́ку, Христе́, Тебе́ вопию́щу:/ сла́ва си́ле Твое́й, Го́споди.

Богоро́дичен: Преложи́ла еси́ на благослове́ние, Влады́чице,/ прокля́тство Ада́мово, нам ро́ждши Христа́./ К Нему́же вопие́м:/ сла́ва си́ле Твое́й, Г осподи.

Песнь 5

Ирмо́с:

К Тебе́ у́тренюю/ и Тебе́ вопию́, благоутро́бне Го́споди:/ омраче́нную грехми́ ду́шу мою́,/ све́том озари́в за́поведей Твои́х, наста́ви.

Хра́мы бы́ти Бо́га Жива́го, блаже́нне, сподо́би/ светоно́сный твой соверша́ющия пра́здник,/ на ка́мени утверди́в твои́х догма́тов моли́твами твои́ми.

Я́ко Благоде́тель, Твой ми́р даждь нам, Го́споди,/ я́же на устрое́ние, ми́р душе́вный,/ его́же Боже́ственный Агге́й Ду́хом Боже́ственным предглаго́ла.

Вели́ко бу́дет Це́ркве и́стинно благосла́вие,/ па́че пе́рваго Изра́илева со́нмища/ вопло́щшагося Сло́ва и челове́ком приобщи́вшася.

Богоро́дичен: Благослове́нная препросла́вленная Ма́ти Неискусому́жная,/ умерщвле́нную грехми́ ду́шу мою́/ и страстьми́ невоздержа́ния погребе́нную оживо́твори́.

Песнь 6

Ирмо́с: Ио́на из чре́ва а́дова вопия́ше:/ возведи́ от тли живо́т мой./ Мы же Тебе́ вопие́м:/ Всеси́льне Спа́се, поми́луй нас.

Ю́ношески благочести́ю, блаже́нне, уча́,/ воздви́гл еси́ Влады́це всех храм освяще́н,/ оби́лие благи́х обеща́я.

Возве́л еси́ от да́льняго, Спа́се, плене́ния челове́ка,/ из глубины́ до́льнейшия,/ и к Го́рнему гра́ду возве́л еси́ его́ я́ко Человеколю́бец.

Ра́дуяся, ду́ха заре́ю, проро́че,/ проре́кл еси́ де́ятельных словеса́/ и благочести́я наказа́л еси́ нас опра́вданием.

Богоро́дичен: Хоте́нием пад, изгна́ся Ада́м из ра́я,/ Сло́во же, вопло́щся из Де́вы,/ сего́ взыва́ет и к Го́рней сла́дости возводи́т.

Песнь 7

Ирмо́с: В пещь о́гненную вве́ржени, преподо́бнии о́троцы/ огнь в ро́су преложи́ша,/ воспева́нием си́це вопию́ще:/ благослове́н еси́, Го́споди, Боже оте́ц на́ших.

Очи́стив твой ум,/ восприя́л еси́ сия́ния я́ве, проро́че, ду́ха, све́тло прорицая и взыва́я:/ благослове́н еси́, Го́споди, Бо́же оте́ц на́ших.

Свяще́ннейшую тя жи́знь проходя́ща ви́дев Бог,/ проро́ка предлага́ет Своего́ прише́ствия, всем вопию́ща:/ благослове́н еси́, Го́споди, Бо́же оте́ц на́ших.

Богоро́дичен: В пещи́ о́гненней три о́троки спасы́й, Де́во,/ Той, всели́вся во утро́бу твою́,/ на того́ наде́ющияся спа́сает, вопию́щия:/ благослове́н, Всечи́стая, Плод чре́ва Твоего́.

Песнь 8

Ирмо́с: Еди́наго Безнача́льнаго Царя́ Сла́вы,/ его́же благословя́т Небе́сныя си́лы/ и трепе́щут чи́ни А́нгельсти́и,/ по́йте, свяще́нницы,/ лю́дие, превозноси́те его́ во ве́ки.

Песносло́вим тя, всех Влады́ку,/ его́же проро́к Богови́дец Агге́й показа́ покланя́тися же и пе́ти:/ по́йте, свяще́нницы, лю́дие, превозноси́те его́ во ве́ки.

Сло́ву Безнача́льному в после́дних вре́мене́х яви́тися, Богови́дче проро́че,/ провозвести́л еси́ явле́нно, взыва́я:/ по́йте, свяще́нницы, лю́дие, превозноси́те его́ во ве́ки.

Богоро́дичен: Пре́жде Неви́денный и Невмести́мый естество́м,/ во чре́во Твое́ вме́щся, ви́ден бысть, Всечи́стая./ ему́же ве́рно вопие́м:/ по́йте, свяще́нницы, лю́дие,. превозноси́те его́ во ве́ки.

Песнь 9

Ирмо́с: Всепе́тая, Небе́с превы́шная,/ Безнача́льное Сло́во безсе́менно заче́ншая/ и воплоще́ннаго Бо́га ро́ждшая челове́ком,/ тем Тя вси велича́ем.

Вкуси́в е́же па́че сло́ва Богови́де́ния,/ оттря́сл еси́, проро́че, попече́ния земна́я/ и препросла́вленному Бо́гу предста́л еси́ досто́йно./ Те́мже вси тя, ве́рнии, ублажа́ем.

Боже́ственное и чу́дное твое́, блаже́нне, житие́/ предста́теля тя Бо́гу показа́, Богому́дре,/ и со Безпло́тными ли́ки весели́шися ве́чно./ Те́мже вси тя при́сно ублажа́ем.

Подоба́ше тебе́, я́ко благочести́я учи́телю, с Бо́гом бы́ти/ и сего́ страствори́тися Пречи́стейшему Све́ту,/ его́же, блаже́нне, ны́не моли́ изба́вити искуше́ний ду́ши на́ша.

Богоро́дичен: Ты была́ еси́ преесте́ственно, Богороди́тельнице, жили́ще и́стинно всех Царя́/ и златови́дный ковче́г, Еди́наго Законода́вца внутрь име́я,/ Христа́ воплоща́ема.

Творе́ние Го́сподина Преосвяще́ннаго Серапио́на, архиепи́скопа Су́ждальскаго и Тару́сскаго

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 4.

Подо́бен: Я́ко до́бля:

Я́ко со́лнце, возсия́ нам пресла́вная па́мять твоя́,/ Софи́е Богому́драя,/ ма́ти и́нокиням, Христо́ва неве́сто,/ апо́стольским уче́нием воспита́нна,/ Су́ждальскую страну́ чудесы́ свои́ми просвети́ла еси́,/ си́лою Свята́го Ду́ха просвеще́нна,/ его́ же моли́ о творя́щих па́мять твою́.

Ра́зумом духо́вным посрами́ла еси́ вра́жию кре́пость,/ Крестны́м бо ору́жием сего́ попра́ла еси́/ и Бо́жия Ма́тере оби́тель украси́ла еси́ чудесы́ свои́ми,/ в нем же дре́во живо́тное, крест, водрузи́./ Трапе́зу Бо́жию Ма́терь иму́щи,/ исто́чник неисчерпа́емый благода́ть Бо́жию,/ его́ же моли́ непреста́нно о творя́щих па́мять твою́.

Духо́вно возвесели́ся, вся Су́ждальская страна́,/ па́мять чту́щи Софи́и Богому́дрыя,/ она бо мо́лится ны́не ко Христу́ с ли́ки преподо́бных жен,/ помо́щницу иму́щи Пресвяту́ю Богоро́дицу,/ изба́витися гра́ду Су́ждалю от бед и печа́лей,/ ве́рою творя́щим всечестну́ю па́мять твою́.

Сла́ва, глас 4:

Ра́дуйся, всеблаже́нная Софи́е,/ я́ко от младе́нства Христо́ву красоту́ возлюби́ла еси́,/ от Сама́го бо Вседержи́теля утвержда́ема,/ духо́вною пи́щею наслади́тися па́че всех вожделе́ла еси́,/ и земны́я красоты́ не восхоте́ла еси́,/ и Су́ждальскую страну́ чудесы́ свои́ми удиви́ла еси́,/ и бысть Небе́сным Си́лам собесе́дница,/ с ни́ми же у Престо́ла Влады́чня ликовству́еши,/ дерзнове́ние иму́щи, преблаже́нная Софи́е,/ Христа́ Бо́га моли́ непреста́нно о всех нас, и́же ве́рою чту́щих святу́ю па́мять твою́.

И ны́не, Богоро́дичен: И́же Тебе́ ра́ди:

Вход, проки́мен дне и чте́ния 3 преподо́бническая (зри день 5-й).

На стихо́вне стихи́ры, глас 6:

Преподо́бная ма́ти Софи́е,/ твоя́ пресла́вная па́мять по́стницам украше́ние и тве́рдое заступле́ние,/ твои́м бо житие́м чудесы́ Христо́с благода́ть да́рует/ с ве́рою приходя́щим к моще́м твои́м,/ его́же моли́ дарова́ти душа́м на́шим/ ми́р и ве́лию ми́лость.

Стих: Ди́вен Бог во святы́х Свои́х,/ Бог Изра́илев.

Преподо́бная ма́ти Софи́е,/ тебе́ Богоро́дица поручи́ па́ствити слове́сное ея́ ста́до,/ украси́ла бо еси́ ея́ пресла́вную оби́тель чудесы́ свои́ми,/ в ней же лежа́т пречестны́я твоя́ мо́щи во гро́бе неразруши́мы,/ исцеле́ние подаю́т к ним притека́ющим,/ Христа́ у́бо умоли́ дарова́ти душа́м на́шим ми́р и ве́лию ми́лость.

Стих: В це́рквах благослови́те Бо́га,/ Го́спода от исто́чник Изра́илевых.

Преподо́бная ма́ти Софи́е,/ испроси́ я́же к Бо́гу моли́твами свои́ми Су́ждалю утвержде́ние,/ и стране́ на́шей побе́ды на враги́ да́руй моли́твами свои́ми,/ всем, ве́рою притека́ющим к мощем твои́м,/ Христо́ви моли́ся дарова́ти ми́р и ве́лию ми́лость.

Сла́ва, глас 8:

Ра́дуйся и весели́ся, гра́де Су́ждалю,/ и лику́й, све́тло торжеству́ющи, це́рковь Бо́жия Ма́тере,/ в ней же лежи́т сокро́вище – пречестны́я мо́щи преподо́бныя Софи́и,/ не восхоте́ бо земны́я красоты́ самодержа́вства/ и всели́ся во оби́тель Пречи́стыя Бо́жия Ма́тере,/ сего́ ра́ди прииди́те, вси лю́дие,/ тецы́те и собери́теся в це́рковь Бо́жия Ма́тере,/ поклони́мся с ве́рою моще́м преподо́бныя Софи́и,/ лику́й и ра́дуйся, Су́ждальская и вся окре́стныя страны́,/ Софи́я Богому́драя гра́ду на́шему утвержде́ние,/ и́нокиням похвала́ и удобре́ние/ и нам, ве́рным, спасе́ние,/ испроси́ моли́твами твои́ми дарова́ти нам ве́лию ми́лость.

И ны́не, Богоро́дичен: Безневе́стная Де́во:

Тропа́рь, глас 4:

Вы́шняго красото́ю я́вственно украша́яся,/ по́стническими бо труды́ подвиза́ся преподо́бная Софи́я,/ и бысть насле́дница Небе́сному Ца́рствию,/ и вни́де в Небе́сный Черто́г наслади́тися Христо́вы красоты́,/ его́ же моли́ спасти́ся гра́ду Су́ждалю/ от пога́ных нахожде́ний и междоусо́бныя бра́ни/ и пода́ждь душа́м на́шим ве́лию ми́лость.

НА У́ТРЕНИ

На Бог Госпо́дь: тропа́рь два́жды.

Сла́ва, и ны́не, Богоро́дичен.

По 1-м стихосло́вии седа́лен, глас 1:

И́ноческое житие́ возлюби́ла еси́, преподо́бная,/ и Христу́ после́довала еси́, Софи́е Богому́драя,/ отовсю́ду бо просия́ла еси́ доброде́тельным житие́м свои́м,/ в моли́твах, поще́ниих и бде́ниих о́браз была́ еси́ и́нокиням, тем вопие́м ти:/ сла́ва Да́вшему тебе́ кре́пость,/ сла́ва Венча́вшему тя,/ сла́ва Подаю́щему тобо́ю всем исцеле́ния.

Сла́ва, и ны́не, Богоро́дичен:

Упова́ние христиа́н, Пресвята́я Де́во,/ его́ же родила́ еси́, Бо́га, па́че ума́ и сло́ва,/ непреста́нно мо́лишися с Вы́шними си́лами да́ти оставле́ние грехо́в на́ших и исправле́ние жития́/ и́же ве́рою и любо́вию при́сно Тя сла́вящих.

По 2-м стихосло́вии Седа́лен, глас 3:

Иму́щи дух и́стинный, прему́драя Софи́е,/ тем же и мы, соше́дшеся, пе́сньми па́мять твою́ возвели́чим и облобыза́ем честну́ю твою́ ра́ку,/ исцеле́ние получи́вше неоску́дно и пою́ще, рцем си́це:/ Софи́е преподо́бная,/ Христо́ви моли́ся сохрани́ти оте́чество твое́ неруши́мо от инопле́менных нахожде́ний,/ и укроти́ти междоусо́бную брань твои́ми моли́твами,/ и дарова́ти нам ве́лию ми́лость.

Сла́ва, и ны́не, Богоро́дичен:

Красоте́ де́вства Твоего́ и пресве́тлой чистоте́ Твоей Гаврии́л удиви́ся, вопия́ше Ти, Богоро́дице:/ ку́ю Ти похвалу́ принесу́ досто́йную,/ что же возымену́ю Тя?/ Недоумева́ю и ужаса́юся,/ те́мже, я́ко повеле́н бых, вопию́ Ти:/ ра́дуйся, Благода́тная.

По полиеле́и седа́лен, глас 4:

Вели́кий град Су́ждаль торжеству́ет о Бо́зе и Пресвяте́й Богоро́дице в па́мять твою́, преподо́бная Софи́е,/ моли́твами бо твои́ми спаса́еши ста́до твое́ от искуше́ний и бед/ и от вся́каго преще́ния, находя́щаго на ны,/ и па́ки, преподо́бная Софи́е, непреста́нно моли́ся Христу́ Бо́гу спасти́ся душа́м на́шим.

Сла́ва, и ны́не, Богоро́дичен:

Мно́гими прегреше́нии аз, гре́шный и умо́м помраче́нный,/ вопию́ Твоему́ кре́пкому и те́плому заступле́нию, Богоро́дице:/ просвети́ души́ моея́ зени́цы,/ возсия́й ми покая́ния све́тлую зарю́/ и облецы́ мя во ору́жие Све́та, Де́во Богороди́тельнице Чи́стая.

Степе́нна, 1-й антифо́н 4-го гла́са. Проки́мен: Ди́вен Бог во святы́х Свои́х,/ Бог Изра́илев.

Стих: В це́рквах благослови́те Бо́га, Го́спода от исто́чник Изра́илевых. Вся́кое дыха́ние:

Ева́нгелие от Матфе́я, зача́ло 104.

По 50-м псалме́ стихи́ра, глас 6:

Всяк гра́де и страно́,/ сла́вному гра́ду Су́ждалю воскли́кнем псало́мски/ и воспле́щем рука́ми вку́пе,/ духо́вное торжество́ пра́зднующе,/ Софи́ю Богому́друю пе́сньми восхва́лим,/ в честно́й оби́тели Бо́жия Ма́тере соверша́юще и в весе́лии вопию́ще:/ о, преблаже́нная и преподо́бная ма́ти Софи́е,/ приими́ пе́ние люде́й свои́х/ и моли́ся Го́сподеви,/ да пода́ст нам неоску́дное исцеле́ние от всех зол и скорбе́й, находя́щих на ны,/ и спасе́т ду́ши на́ша.

Кано́н преподо́бныя Софи́и, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Песнь Твоей уго́днице Софи́и принести́, Бо́же, да́руй ми,/ и́же на земли́ Тебе́ просла́вльшей,/ я́ко да Смы́слодавца пе́сньми Тя возвели́чу.

Благочести́ваго ко́рене о́трасль была́ еси́,/ и роди́телей лише́ние никто́ же ти возбрани́,/ но всем жела́нием и тща́нием обрати́лася еси́ ко еди́ному Соде́телю.

Спа́сову за́поведь послуша́ла еси́ от ю́ности, прему́драя Софи́е,/ и жи́знь свою́ нивочто́же вмени́вши,/ и крест Госпо́день носи́ти возжеле́вши,/ и земное ца́рство презре́вши, на Небе́сное взира́юще.

Богоро́дичен: Мольбу́ Тебе́ прино́сим, Богоро́дице, от уст на́ших недосто́йных/ сию́ приими́, Влады́чице, я́ко вдовы́ о́ныя две ца́те,/ тем же со умиле́нием вопие́м Ти, о Преблагослове́нная Ма́ти,/ прибега́юще к покро́ву Твоему́.

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твоей,/ жела́ний кра́ю, ве́рных утвержде́ние,/ Еди́не Человеколю́бче.

Безпо́мощным бу́ди помо́щница, преблаже́нная Софи́е,/ и печа́льным ми́лостивное утеше́ние,/ да твои́ми моли́твами от всех зол избавля́еми, почита́ем тя.

Прему́дрости жела́нием ко гра́ду Су́ждалю, Софи́е преподо́бная,/ дойде́, я́ко пчела́ му́драя,/ и любоде́льно чистоте́ совоку́пльшися/ и неполе́зная оста́вила еси́.

Уста льсти́вых зверей загради́ла еси́, отве́рсты бо ю́ностныя,/ самоде́ржцу супру́га предо́брая была́ еси́ и ца́рство земное оста́вила еси́,/ наста́вле́ние восприи́м Боже́ственнаго ра́зума.

Богоро́дичен: Напа́стьми мно́гими одержи́ми есмы́,/ боле́зньми и пла́чем вопие́м Ти:/ изба́ви, Богоро́дице, от обдержа́щих нас скорбе́й и ве́чнаго муче́ния/ и Ца́рствия Сы́на Твоего́ сподо́би нас моли́твами уго́дницы Твоея́ блаже́нныя Софи́и.

Седа́лен, глас 4:

Я́ко всесве́тлая звезда́, возсия́вши светолу́чными сия́нии,/ просвети́ла еси́ чудесы́ свои́ми, Софи́е преподо́бная,/ Святы́м Ду́хом наставля́ема, пришла́ еси́ во оби́тель Бо́жия Ма́тере,/ в не́йже трудолю́бно подвиза́ся, от земны́х к Небе́сному селе́нию/ ны́не преста́вилася еси́, преблаже́нная Софи́е,/ моли́ся непреста́нно о творя́щих па́мять твою́.

Сла́ва, и ны́не, Богоро́дичен:

Сло́во О́тчее, Христа́ Бо́га на́шего, из Тебе́ воплоти́вшагося, позна́хом, Богоро́дице Де́во,/ еди́на Чи́стая и Благослове́нная,/ непреста́нно Тебе́ велича́юще, воспева́ем.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Я́ко в Небе́сных оби́телех с ли́ки преподо́бных и пра́ведных веселя́ся, предстои́ши Пресвяте́й Богоро́дице,/ непреста́нно моля́ся о душа́х на́ших.

Прии́мши и́го ле́гкое Спа́са Христа́,/ того́ бо стра́хом составля́ема, очи́щши ду́шу и те́ло воздержа́нием,/ и́нокиням наста́вница была́ еси́, преподо́бная.

Лю́тый вселука́вый враг тща́шеся отлучи́ти от Тебе́ жела́емая тобо́ю, Софи́е преподо́бная,/ ты же сего́ ни во что вмени́ла еси́, непреста́нно вопия́ше:/ сла́ва си́ле Твое́й, Го́споди.

Богоро́дичен: На Престо́ле высо́це стра́шно седя́й/ на Ма́тернюю ру́ку Младе́нец быв,/ ниспа́дший о́браз возводя́ и обоже́ние су́щим подава́я.

Песнь 5

Ирмо́с: Вску́ю мя отри́нул еси́/ от лица́ Твоего́, Свете Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Освяти́ся пречестна́я оби́тель Бо́жия Ма́тере твое́ю ра́кою, Софи́е преблаже́нная,/ от нея́ же источа́вши чудеса́,/ с ве́рою приходя́щим ти неоску́дно благода́ть подава́еши.

Зако́ну Бо́жию после́дуя и повеле́нию его́ пови́нуяся,/ наста́вница бо и пра́вило изве́стнейшее и́нокиням бысть,/ наказа́тельница заблу́ждшим и свети́льница те́мным, Софи́е преблаже́нная.

Све́тлыми заря́ми по́двиг твои́х/ отгони́ми бы́ша лю́тых бесо́в мно́жество от жили́ща твоего́,/ поспе́шествова бо тебе́ благода́ть Свята́го Ду́ха,/ его́ же осене́нием исцеле́ние подава́еши, Софи́е преподо́бная.

Богоро́дичен: Ума́ моего́ превраще́ние исцели́, Пречи́стая,/ и уврачу́й стра́сти души́ моея́ и ле́ностную тьму отжени́,/ я́ко да хвала́ми Тя ублажа́ем, Всенепоро́чная.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

О преподо́бная ма́ти Софи́е, вели́кая свети́льнице,/ освяти́ и просла́ви святу́ю оби́тель Бо́жия Ма́тере/ и и́же любо́вию тя в пе́снех сла́вящих.

И́нокиням наста́вница и о́браз доброде́телей,/ всех украеи́ла еси́, во оби́тели су́щих без супру́жнаго пребыва́ния.

Моли́твами, и бде́нием, и псало́мским пе́нием непреста́нным/ ду́шу свою́ рай живоно́сен сотвори́в,/ в нем же просла́ви Спа́са Го́спода.

Богоро́дичен: Все вре́мя живота́ на́шего во страсте́х ижди́хом/ и ны́не на́ша моле́ния прино́сим Тебе́, Пречи́стая:/ разреше́ние пода́ждь нам и ве́чнаго нас изба́ви муче́ния.

Конда́к, глас 1:

Но́щи стра́стныя избе́гши, Богому́драя Софи́е преподо́бная,/ к Незаходи́мому же Со́лнцу, Христу́, прише́дши,/ умертви́ла еси́ плотско́е мудрова́ние посто́м же, воздержа́нием и моли́твами,/ показа́ся равна́ А́нгелом,/ на земли́ бо поживе́ и ду́хи нечи́стыя от челове́к отгна́ла еси́,/ и разли́чная исцеле́ния подава́еши, от мно́гих бед и зол избавля́е́ши,/ Софи́е преподо́бная,/ моли́ спасти́ся душа́м на́шим.

И́кос:

Измла́да Бо́гови вдала́ся еси́, Софи́е преподо́бная, я́ко зда́ние благо́е,/ и Госпо́дне благо́е и́го усе́рдно от ю́ности взе́мши,/ отлучи́ся своего́ самоде́ржца/ и невкуси́мо ло́жа жите́йскаго восхоте́ пребыва́ти во святе́й оби́тели Бо́жия Ма́тере./ Те́мже, я́ко Безпло́тная, подвиза́лася,/ воздержа́нием же и моли́твами равна́ А́нгелам показа́лася,/ в нейже отхо́диши в Небе́сная селе́ния,/ и по преставле́нии своем от Пречи́стыя твоея́ ра́ки разли́чная исцеле́ния подава́еши,/ и от мно́гих бед и зол избавля́еши,/ Софи́е преподо́бная, моли́ спасти́ся душа́м на́шим.

Песнь 7

Ирмо́с: От Иу́деи доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

В боле́знех и́же к тебе́ прибега́ющих/ избавля́еши от неду́г разли́чных и от духо́в нечи́стых, Софи́е преподо́бная,/ ко Христу́ вопию́щи:/ оте́ц на́ших Бо́же, благослове́н еси́.

Всю обтече́ тварь житие́ твое и исправле́ние, Софи́е преподо́бная,/ и в пресла́вную оби́тель Бо́жия Ма́тере пришла́ еси́,/ в ней же Христу́ вопию́щи:/ оте́ц на́ших Бо́же, благослове́н еси́.

Воздержа́нием истяза́ние жития́ своего́ показа́ла еси́, Софи́е преподо́бная,/ поще́нием бо кра́йним со Безпло́тными соедини́вшися, вопия́ше:/ оте́ц на́ших Бо́же, благослове́н еси́.

Богоро́дичен: Храм, освяще́н Бо́гови, бы́вши, Мари́е Богороди́тельнице,/ сего́ моли́ я́ко Человеколю́бца, Чи́стая, уще́дрити лю́ди согреши́вшия/ и спасти́ от бед лю́тых и страсте́й треволне́ния.

Песнь 8

Ирмо́с: Царя́ Небе́снаго,/ его́же пою́т во́и А́нгельстии,/ хва́лите и превозноси́те во вся ве́ки.

Очи́сти и прости́ согреше́ния на́ша, Го́споди,/ моли́твами Твоея́ уго́дницы преподо́бныя Софи́и,/ да пое́м Тя, Христа́, во ве́ки.

На земли́ я́ко челове́к ходя́чи житие́ на Небесе́х вои́стинну стяжа́ла еси́,/ со А́нгелы непреста́нно пое́ши Христа́ во ве́ки.

Твоя́ по́двиги воспе́ша А́нгельския си́лы, Софи́е преподо́бная,/ и твое́ житие́ ли́ки святы́я похвали́ша,/ с ни́ми же согла́сно зове́ши Христа́ во ве́ки.

Богоро́дичен: Твоя́ ми́лости и на мне удиви́, Чи́стая,/ уязвле́нную ду́шу мою́ исцели́, и бу́дущаго изба́ви муче́ния,/ и Ца́рствию Сы́на Твоего́ сподо́би мя.

Песнь 9

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.

Ра́дуйся, гра́де Су́ждалю,/ восприи́м бо от Бо́га сокро́вище некрадо́мо,/ помо́щницу вели́кую и засту́пницу те́плую и Богоблаже́нную преподо́бную Софи́ю,/ и́же ны́не с ли́ки и́нокинь весели́тся и Богоро́дицу сла́вит.

От ю́ности своея́ чи́сту совесть иму́щи к Бо́гу/ и его́ ра́ди благоче́стно пожи́вши, к Вы́шнему́ пре́йде,/ моли́ Христа́ Бо́га о нас, да тя любо́вию почита́ем.

В чистоте́ и целому́дрии, и в чи́стем пребыва́нии,/ и в житии́ нескве́рне, я́ко Безпло́тна, на земли́ поживе́,/ востекла́ еси́ в Небе́сныя оби́тели, и с ли́ки святы́х ра́дуешися,/ с преподо́бными и пра́ведными моли́ о всех Христа́ Человеколю́бца.

Богоро́дичен: Львы, ры́кающия на мя, ути́ши, Пречи́стая,/ мене́ же цельбы́ Боже́ственный сподо́би, Влады́чице,/ да узрю́ Свет Богоразу́мия и с ра́достию воспою́ покро́в Твой, Богоро́дице.

Свети́лен:

Все житие́ оста́вила еси́/ и Христа́ Еди́наго возжела́ла еси́, трудополо́жно пожи́вши,/ и смерть сла́вно восприя́ла еси́,/ те́мже па́мять твою́ почита́ем, Софи́е Богому́драя.

Сла́ва, и ны́не, Богоро́дичен:

Бо́га нам, Пречи́стая, родила́ еси́,/ и вси, прароди́тельныя кля́твы изба́вльшеся, воспева́ем Тя, Пречи́стая.

На хвали́тех стихи́ры, глас 8:

О, пресла́вное чу́до,/ ка́ко премени́ся ра́зум твой от су́еты ми́ра на благочести́е,/ смире́нна и целому́дренна показа́ся,/ и́нокиням наста́вница бысть ко спасе́нию,/ по́стницам похвала́ и утвержде́ние,/ молча́льницам удобре́ние,/ те́мже любо́вию па́мять твою́, Софи́е преподо́бная, ублажа́ем.

Име́ Боже́ственную благода́ть,/ Софи́е, ма́ти преподо́бная,/ благода́тию Свята́го Ду́ха наставля́ема к жела́нию Боже́ственному,/ отону́дуже мирску́ю красоту́ оста́вила еси́/ и к ра́зуму и́стинному возшла́ еси́,/ боле́зненныя труды́ возлюби́ла еси́,/ Софи́е преподо́бная, моли́ спасти́ся нам.

Исто́чник чуде́с показа́ла еси́ и ре́ку дарова́ний,/ ра́ку моще́й твои́х, Софи́е преподо́бная,/ слепы́м е́же ви́дети дарова́ла еси́,/ прокаже́нным очище́ние,/ одержи́мым от нечи́стых духо́в целому́дрие подава́еши/ и от всех скорбе́й избавля́вши.

Сла́ва, глас 2:

Преподо́бная ма́ти Софи́е,/ измла́да в доброде́тели приле́жно подвиза́лася еси́,/ сосу́д бысть Свята́го Ду́ха,/ те́мже и чуде́с дарова́ние от Бо́га прия́ла еси́,/ и́нокини научи́ла еси́ сла́вити Святу́ю Тро́ицу,/ воздержа́нием и моли́твами преоби́дети маловре́менных/ и ны́не же неизрече́нным Све́том све́тло сия́еши,/ просвети́ ду́ши на́ша помраче́нныя,/ ма́ти Софи́е преподо́бная.

И ны́не, Богоро́дичен.

Славосло́вие вели́кое

НА ЛИТУРГИ́И

Блаже́нны от кано́на, пе́сни 3-я и 6-я. Апо́стол к Галатам, зача́ло 209. Ева́нгелие от Матфе́я, зача́ло 104. Прича́стен: В па́мять ве́чную: