Аллилу́ия или́ тропа́рь.

Ве́дати подоба́ет, я́ко от сего́, 11-го дне, начина́ется Неделя́ пра́отеческая и восхо́дит сего́ же декабря до 17 дне. Устав зри день 12-й.

ВЕ́ЧЕР

На Го́споди, воззва́х: стихи́ры 3, глас 8.

Подо́бен: Что вы нарече́м:

Что тя, Дании́ле, провеща́ем?/ страсте́й искорени́теля и садотща́теля доброде́телей,/ и́стинна чудоде́лателя и моли́твенника о гре́шных,/ духо́в прогони́теля до́блественнейша,/ свети́льника, благочести́ем сия́юща,/ Це́ркве побо́рника./ моли́ спасти́ся душа́м на́шим.

Что тя, Дании́ле, возыменуем?/ по́стника, я́ко стра́сти покори́л еси́ уму́,/ страда́льца, я́ко вся́ку претерпе́л еси́ лю́тость,/ на высоту́ от земли́ столпа́ воздвиза́ема,/ на ка́мени и́стины водружа́ема,/ подви́жника усе́рднейша и врача́ иску́снейша./ Моли́ спасти́ся душа́м на́шим.

Что тя, Дании́ле, ны́не нарече́м?/ мона́шествующих о́браз и воздержа́ния наказа́теля,/ украше́ние ве́рных и целе́ний самоде́теля,/ свети́льника, су́щим во тьме свет облиста́юща,/ А́нгелов сограждани́на и равноче́стна,/ ра́я жи́теля и Небе́снаго челове́ка./ моли́ спасти́ся душа́м на́шим.

И́ны стихи́ры Пресвяты́я Богоро́дицы, глас и подо́бен то́йже.

А́ще аллилу́ия, пою́тся си́и стихи́ры пре́жде:

Стра́нно та́инство, Чи́стая,/ безсе́меннаго Твоего́ рождества́, Де́во, и ужа́сно,/ превосходя́що вели́чеством вся́ку мысль челове́чу./ его́же бо не терпя́т зре́ти многоочи́тии,/ и чи́ни вси святы́х А́нгел трепе́щут,/ нам пло́тию породила́ еси́/ неотсту́пльша же О́тча су́щества:/ сла́вим ро́ждшую Тя, Богоневе́сто.

Кому уподо́билася еси́, окая́нная,/ к покая́нию ника́коже возни́чущи, душе́?/ и огня́ не ужаса́ешися, злых жду́щаго,/ воста́ни, и Еди́ну к заступлени́ю/ ско́рую призови́, и возопи́й:/ Де́во Ма́ти, моли́/ Твоего́ Сы́на и Бо́га на́шего/ изба́вити мя сете́й льсти́ваго.

Огнь ро́ждши нестерпи́мый,/ попаля́ющий грехи́ и ороша́ющий ве́рныя,/ ве́щная безме́рных мои́х, Пренепоро́чная, Чи́стая, согреше́ний/ попали́ моли́твами Твои́ми/ и росо́ю иста́явшую страстьми́/ ду́шу мою́ прохлади́,/ я́ко да твою́ велегла́сно ми́лость и си́лу/ велича́ю, раб Твой.

Сла́ва, и ны́не, Богоро́дичен, глас и подо́бен то́йже:

Всех заступле́ние, Влады́чице,/ пучи́ною обурева́емому мне тьмы/ и лю́тых жития́ треволне́ньми/ погружа́ему ми при́сно,/ ка́плю ми́лости Твоея́ низпосли́,/ и ру́ку по́мощи Твоея́ пода́ждь ми,/ и ча́сти сподо́би мя/ избра́нных и пра́ведных,/ я́ко бе́здну ро́ждшая – Человеколю́бца.

А́ще ли среда или́ пяток: И ны́не, Крестобогоро́дичен, глас и подо́бен то́йже:

А́гница А́гнца я́ко ви́де/ на Дре́ве, просте́рта во́лею, кре́стнем,/ вопия́ше ма́терски, боле́знующи с пла́чем:/ Сы́не Мой, что стра́нное сие́ виде́ние?/ Всем живо́т дая́й я́ко Госпо́дь,/ ка́ко умерщвля́ешися, Долготерпели́ве,/ земны́м подая́ воскресе́ние?/ сла́влю Твое́ мно́гое, Бо́же мой, снизхожде́ние.

А́ще ли, Бог Госпо́дь:

Сла́ва, глас 5. Студи́тово:

Вве́ренный тебе́ тала́нт от Христа́ до́бре дела́в, преподо́бне о́тче,/ яви́лся еси́ и по сме́рти де́монов прогони́тель/ и врач разли́чных боле́зней,/ столп и утвержде́ние и гора́ свята́я Це́ркве Христо́вы./ Тем тя мо́лим, Дании́ле чудотво́рче,/ ми́р испроси́ и душа́м на́шим ве́лию ми́лость.

И ны́не, Богоро́дичен. На стихо́вне Окто́иха.

Тропа́рь, глас 1:

Терпе́ния столп был еси́,/ ревнова́вый пра́отцем, преподо́бне,/ И́ову во страсте́х, Ио́сифу во искуше́ниих,/ и Безпло́тных жи́тельству/ сый в телеси́, Дании́ле, о́тче наш,/ моли́ Христа́ Бо́га спасти́ся душа́м на́шим.

НА УТРЕНИ

Оба кано́на Окто́иха и преподо́бнаго на 4, глас 8, его́же краегране́сие: Пе́сньми честву́ю Дании́ла Сто́лпника.

Песнь 1

Ирмо́с:

Пои́м Го́сподеви,/ прове́дшему лю́ди Своя́ скво́зе Чермно́е мо́ре,/ я́ко Еди́н сла́вно просла́вися.

Пе́сньми благовосхва́лити хотя́щу па́мять твою́, блаже́нне,/ светоно́сную ми зарю́, Дании́ле, с Небесе́ низпосли́.

Ве́лие со́лнце и́стинно, о́тче, возсия́л еси́ конце́м,/ доброде́телей све́тлостию озаря́яй ве́рных собра́ния.

Зако́ном Влады́чним, о́тче, повину́яся,/ умертви́л еси́ воздержа́нием плоть/ и пови́нул еси́ сию Ду́ху.

Богоро́дичен: Весь Челове́к яви́ся, пребы́в е́же бе и по вопло́щении,/ и́же из Тебе́, Богоро́дице, роди́выйся неизме́нный Госпо́дь.

Песнь 3

Ирмо́с:

Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Жезло́м воздержа́ния страсте́й мо́ре, о́тче, растерза́в,/ преше́л еси́ непотопле́н,/ и го́ру дости́гл еси́ и́стиннаго безстра́стия,/ и Бо́гу бесе́довал еси́ ума́ чистото́ю.

Возше́д на высоту́ доброде́телей,/ зна́емь был еси́ ми́ру:/ на столпе́ бо стоя́ возвы́шен/ и сия́нием пресла́вных чуде́с озаря́яй ве́рою к тебе́ притека́ющия.

Водруже́н на ка́мени Бо́жия зна́ния,/ все́ми козньми́ бесо́вскими яви́лся еси́ непоколеби́мы/ на столп у́бо те́ло твое́ на земли́ возвы́сил еси́,/ ду́шу же впери́л еси́ к Небе́сным.

Богоро́дичен: Изба́ви мя страсте́й наше́ствия, Влады́чице,/ и борю́щия мя враги́ ны́не пребори́;/ утверди́ мя на ка́мени Бо́жия во́ли,/ ду́шу мою́ просвети́, две́ре Боже́ственнаго Све́та.

Седа́лен, глас 1.

Подо́бен: Гроб Твой:

На столп тебе́ сама́го возвы́сив, о́тче,/ воздержа́нием, Дании́ле, плоть изнури́л еси́./ Тем и ду́ха сосу́д досто́ин был еси́;/ благода́ть же Боже́ственную восприе́м, треблаже́нне,/ неду́г вся́кий отго́ниши ве́рою чту́щих па́мять твою́.

Сла́ва, и ны́не, Богоро́дичен:

Упова́ние христиа́н, Пресвята́я Де́во,/ его́же родила́ еси́, Бо́га, па́че ума́ и сло́ва,/ непреста́нно моли́ о воспева́ющих Тя,/ пода́ти оставле́ние грехо́в на́ших всех и исправле́ние жития́/ ве́рою и любо́вию при́сно сла́вящим Тя.

Крестобогоро́дичен:

Нескве́рная А́гница,/ А́гнца и Па́стыря, пове́шена на Дре́ве, ме́ртва зря́щи,/ пла́чущи, веща́ше, ма́терски восклица́ющи:/ ка́ко претерплю́ Твое́, е́же па́че сло́ва, Сы́не Мой, сни́тие/ и во́льныя стра́сти, Бо́же Преблаги́й?

Песнь 4

Ирмо́с:

Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Я́ко светоза́рное со́лнце, о́тче приснопа́мятне,/ на сто́лпе блиста́юща ви́дел еси́ Бо́жия раба́ Симео́на/ и истека́ющими от того́ Боже́ственными светлостьми́/ Боже́ственно озари́лся еси́, Дании́ле,/ и во след того́ жи́тельства ходи́л еси́.

Де́монския полки́ ору́жием ве́ры победи́л еси́,/ струя́ми же потопи́л еси́ моли́тв,/ па́губу тех, о́тче, отгна́в, ю́же творя́ху пла́вающим,/ и спасл еси́ ве́рою Бо́гу песнопою́щия:/ си́ле Твое́й сла́ва, Человеколю́бче.

Возстолпля́я, о́тче, тебе́ сама́го, всеблаже́нне,/ всено́щне стоя́л еси́,/ я́ко безпло́тен, не высо́ко душе́вное о́ко стяжа́в/ и чи́сто, я́коже зерца́ло, ду́ха зарю́/ и Боже́ственная явле́ния чи́стым по́мыслом прие́мля.

Богоро́дичен: Зако́ни в Тебе́ естества́ обновля́ются:/ Законода́вца бо Сло́ва родила́ еси́,/ па́че вины я́ко и́стинно, Пречи́стая,/ и Сло́ва, безслове́сия́ изба́вльшаго род челове́ческий, ве́рно песнопою́щих:/ си́ле Твое́й сла́ва, Человеколю́бче.

Песнь 5

Ирмо́с: Вску́ю мя отри́нул еси́/ от лица́ Твоего́, Свете Незаходи́мый,/ и покры́ла мя есть чужда́я тьма, окая́ннаго,/ но обра́ти мя и к све́ту за́поведей Твои́х/ пути́ моя́ напра́ви, молю́ся.

Да безсме́ртныя сла́вы получи́ши,/ плотска́я умертви́л еси́ жела́ния, о́тче,/ и страсте́й стремле́ния обузда́л еси́ воздержа́ния труды́,/ и река́ чуде́с яви́лся еси́,/ и исто́чник врачева́ний, приснопа́мятне.

Е́же хожда́ше стезе́ю, о́тче, на земли́,/ Симео́н чу́дный, во у́жасе, блаже́нне, бы́вшу тебе́ яви́ся,/ показу́я тебе́ со двема́ А́нгелы,/ гряди́, – вопия́, – и ста́ни у мене́,/ к Бо́гу возвыша́лся благода́тию.

Просвеща́емь заре́ю, о́тче, невече́рнею и Боже́ственным осия́нием,/ бесо́вский мрак и страсте́й мглу́ отгна́л еси́/ и яви́лся еси́ столп светови́ден/ и ле́ствица, и́стинно к Бо́гу ве́рныя возводя́щая.

Богоро́дичен: Влады́ку ро́ждшая, яви́лася еси́ превы́шши Го́рних сил/ и земны́х естество́ обожи́ла еси́, Отрокови́це Богоневе́стная./ Тем Богоро́дицу Тя всеи́стинную душе́ю и язы́ком, ве́рнии, Де́во, сла́вим.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Ум твой к Бо́гу приближе́нием облиста́емь,/ нея́тен сла́достей огне́м, о́тче, пребы́сть,/ и страсте́й го́рнший, и к пло́ти пристра́стия вы́шший.

Вод живо́творных дарова́ний ду́ха/ испо́лншися твоя́ душа́, Богому́дре всеблаже́нне,/ ре́ки источи́ врачева́ний и́стинно, то́ки страсте́й суша́щия.

Богоро́дичен: Тя, Предста́тельницу, ве́рнии, и сте́ну вси стяжа́хом,/ во глубине́ злых и молве́ скорбе́й при́сно бе́дствующе, Богоро́дице,/ еди́на земны́х прибе́жище.

Конда́к, глас 8.

Подо́бен: Я́ко нача́тки:

Я́коже звезда́ многосве́тлая, ты, возше́д, блаже́нне, на столп,/ ми́р просвети́л еси́ преподо́бными де́лы твои́ми/ и тьму пре́лести отгна́л еси́, о́тче./ Те́мже мо́лим тя:/ и ны́не облиста́й в се́рдца́х раб твои́х незаходя́щий свет ра́зума.

И́кос:

Песнь скве́рна к похвале́нию по́двиг твои́х, о́тче, прино́сится:/ не и́мам бо чи́сто се́рдце мое́, я́ко сие́ сра́мно окаля́х,/ но пода́ждь ми сло́во, свя́те, чи́сте воспе́ти твое́ житие́,/ ему́же удиви́шася вои́стинну и А́нгели,/ и́бо был еси́, я́коже безтеле́сен,/ прие́м свет незаходя́щий ра́зума.

Песнь 7

Ирмо́с:

О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще;/ благослове́н еси́, Го́споди Бо́же, во ве́ки.

Чи́ни А́нгельсти́и твоему́ стоя́нию удиви́шася, всеблаже́нне Богоно́се:/ с те́лом бо тех жи́тельство восприе́м, взыва́л еси́:/ благослове́н еси́, Го́споди Бо́же, во ве́ки.

Высотою невеще́ственнаго жи́тельства и проро́чества сия́я светозаре́нием,/ врачева́ний нам облиста́л еси́ лучи́,/ благоче́стно чту́щим тя, Дании́ле чудоно́сне.

Разреши́ страсте́й мои́х мглу све́тлостию, всеблаже́нне, твоея́ моли́твы/ и на стезю́ жи́зни наста́ви, вопию́ща:/ благослове́н еси́, Го́споди Бо́же, во ве́ки.

Богоро́дичен: Ми́лостива мне бу́ди, Де́во,/ и уя́звлена мя ору́жием греха́ врачевство́м Твоей моли́твы излечи́,/ благослове́н, зову́ща, Плод чре́ва Твоего́.

Песнь 8

Ирмо́с:

Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Жела́ний коне́чное, до́брых кра́йнейшее,/ о́тче, Богоно́се, изве́стно дости́гл еси́,/ кри́лы облегчева́яся доброде́тельных дея́ний,/ и со Безтеле́сными, Дании́ле, взыва́еши:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Бо́жия тя си́ла проявле́нне укрепи́вши,/ терпе́ти зимы́ злосту́жное сотвори́,/ и со́лнца зной, и гни́лости твоея́ пло́ти,/ и от ней бы́вших черве́й озло́бление: вопию́ща:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Но́вый И́ов ты яви́лся еси́, Дании́ле досточу́дне,/ мно́жеством искуше́ний обдержи́м и скорбе́й,/ Дави́дову кро́тость, и Иа́ковле беззло́бие,/ и целому́дрие Ио́сифово подража́л еси́, вопия́ благода́рственне:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Богоро́дичен: Богоро́дицу, Влады́чице Всесвята́я, му́дрствующии Тя,/ глаго́лом после́дующе Твои́м, Всепе́тая, Тя ны́не блажи́м,/ я́ко Бо́га блаже́ннаго родила́ еси́ нам,/ его́же, во дву существа́х, еди́ней же ипоста́си, воспева́юще, вопие́м:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Песнь 9

Ирмо́с:

Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де даже и до пло́ти,/ от деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.

Се, тебе́ две́ри Небе́сныя отве́рзошася,/ преставльшемуся и тече́ние сконча́вшему, о́тче,/ и А́нгелов чи́ни восприя́ша,/ Венцедавец же Христо́с сла́вою венча́ тя пра́вды./ Его́же пою́ще, ве́рнии, велича́ем.

Я́ко крин, о́тче, се́льный в рай воздержа́ния процве́л еси́/ и, я́ко кипари́с, на высоту́ возвы́сился еси́ соверше́нства,/ я́ко ма́слина, псало́мски яви́лся еси́,/ ли́ца и се́рдца́ на́ша умаща́я еле́ем боле́зней твои́х.

Столп тя, основа́нием доброде́телей утвержда́емь, тварь позна́,/ забра́ло непоколеби́мо, чуде́с исто́чник,/ приста́нище благоути́шное, врачева́ний сокро́вище, прия́телище ду́ха./ Тем твою́ днесь, Дании́ле, сотворя́ем па́мять.

Со́лнца днесь нам возсия́ светле́е, преподо́бне, Боже́ственная па́мять твоя́,/ ве́рных сердца́ просвеща́ющи све́том пра́вды,/ мрак же отгоня́щи душетле́нных страсте́й:/ ю́же соверша́юще, благоче́стно воспева́ем тя.

Богоро́дичен: Пощади́ мя, Спа́се, рожде́йся и сохрани́в Ро́ждшую Тя нетле́нну по рождестве́,/ егда́ ся́деши суди́ти дела́ моя́,/ беззако́ния презира́я и грехи́ моя́, я́ко безгре́шен,/ я́ко Бог, Ми́лостив и Человеколю́бец.

Свети́лен Окто́иха.

Сла́ва, свята́го.

Подо́бен: Свете Неизме́нный:

Твоя́ по́двиги столп вопие́т гла́сы неглаго́льными,/ стра́ждуща безпокро́вно ка́чествы проти́вными,/ отону́дуже, я́ко свети́льник светоно́сен,/ просия́л еси́, о́тче, озаря́я всю тварь.

И ны́не, Богоро́дичен:

Тя пе́сньми немо́лчными блажи́м, Де́во,/ я́ко от Тро́ицы Еди́наго родила́ еси́, Богоро́дице,/ и но́сиши Боже́ственными рука́ми Пресу́щное Сло́во, невра́щно и неизме́нно.

На стихо́вне Окто́иха.

Стихи́ры на Го́споди, воззва́х: глас 4.

Подо́бен: Дал еси́ зна́мение:

Сто́лпе терпе́ния,/ Ни́коне сла́вне и Богоно́сне,/ водруже́ние в любви́ Бо́жией,/ в нея́же пребы́л еси́ неподви́жимь мно́гими искуше́нии,/ тем тя сла́вим, о́тче,/ во дне́шний день па́мять твою́ соверша́юще,/ я́ко на Небеси́ сла́вимаго от Иису́са Человеколю́бца/ и Спа́са душ на́ших.

Огне́м искушаемь и озло́бляемь вся́чески,/ благода́рственная возсыла́л еси́, блаже́нне, Творцу́ и Бо́гу,/ тем, изба́влься от руки́ нечести́вых,/ стал еси́ в це́ркви свя́тей,/ и ны́не, предстоя́ в Це́ркви торжеству́ющих,/ да изба́вимся и мы от искуше́ний,/ моли́ Иису́са Человеколю́бца и Спа́са душ на́ших.

Огнь любве́ твоея́, я́же к Бо́гу,/ угаси́ огнь чу́вственный,/ струи́ же крове́й твои́х потопи́ша мы́сленыаго врага́ полки́,/ и победи́л еси́ му́чащих тя, преподо́бне,/ тем и дарова́ тебе́ по́честь вы́шних чинонача́лий Иису́с Человеколю́бец/ и Спас душ на́ших.

Сла́ва, глас 6:

Мона́хов мно́жества/ терпе́нию твоему́ удивля́ются,/ ка́ко, от неве́рных озло́бляемь,/ огне́м искуша́емь и ножи́ ссека́емь,/ вар и зной, глад и жа́жду терпя́/ и на Бо́га име́я наде́жду спасе́ния своего́,/ легко́ те́сный путь преше́л еси́/ и кра́йняго доспе́л еси́ блаже́нства./ Блаже́н еси́, си́це Христо́ви рабо́тав,/ и прия́л еси́ мзду́ де́лания своего́:/ с А́нгелы селе́ние/ и Боже́ственнаго Све́та прича́стие./ Тем мо́лим тя, Ни́коне преблаже́нне,/ я́ко име́я дерзнове́ние ко Христу́ Бо́гу,/ ми́ра испроси́ ми́рови/ и душа́м на́шим ве́лию ми́лость.

И ны́не, Богоро́дичен или́ Крестобогоро́дичен.

На стихо́вне во Окто́ихе.

Сла́ва, глас 6:

Прииди́те, Русстии христолюби́вии собо́ри/ и и́ноческих лико́в совоку́плени́я,/ прииди́те благоче́стно к святе́й Пеще́ре,/ похва́льныя пе́сни любому́дренно в дар принесе́м/ и поклони́мся моще́м Ни́кона сла́внаго,/ я́ко да его́ святы́ми моли́твами/ прии́мем вене́ц неувяда́емыя сла́вы/ от Христа́ Бо́га и Спа́са душ на́ших.

Тропа́рь, глас 8:

Бо́га Блага́го возлюби́в,/ и́ноческое прия́л еси́ житие́/ и, до́бре в нем подвиза́вся,/ плене́н был еси́ поло́вцы,/ и́миже мно́го му́чим, крепкоду́шне Ни́коне,/ благода́тию Христо́вою свободи́лся еси́ от них неви́димо,/ и ны́не во Све́те пребыва́я непристу́пнем,/ моли́ спасти́ся нам, твою́ па́мять почита́ющим.

Кано́н свято́му, глас 4.

Песнь 1

Ирмо́с:

Воспою́ Тебе́, Го́споди Бо́же мой,/ я́ко изве́л еси́ лю́ди из рабо́ты еги́петския,/ покры́л же еси́ колесни́цы фарао́новы и си́лу.

Воспе́ти ми всечестну́ю па́мять преподо́бнаго Твоего́ спосо́бствуй, Го́споди Бо́же мой,/ и песносло́вии почти́ти Ни́кона сла́внаго, посли́ Паракли́та Пресвята́го,/ да, бо́дростию препоя́сан, песнь Тебе́ принесу́,/ подаю́щему всем си́лу.

Кто тя досто́йно восхва́лит, о́тче блаже́ннейший,/ от ю́ности возлюби́вшаго Го́спода своего́/ и тому́ во́льною нището́ю после́довавшаго да́же до сме́рти?/ Тем ны́не, живы́й со А́нгелы, моли́ и нам посла́ти к терпе́нию си́лу.

Тьму и мрак любостра́стнаго ми́ра/ любо́вию ко Христу́ пыла́ющею непреткнове́нно преше́д/ и све́тлости а́нгельскаго о́браза приче́тся, а́ки вне пло́ти был еси́,/ сего́ ра́ди пое́ши Пода́вшему ти си́лу.

Богоро́дичен: Тьму, ослепи́вшую страстьми́ мы́сленныя ми о́чи,/ молю́ся, прожени́, Чи́стая Де́во:/ Ты бо еси́ светоприе́мная свеща́ во тьме су́щим,/ огне́м возжже́нная невеще́ственным,/ и наставля́еши на ра́зум Боже́ственный пою́щих:/ ра́дуйся, Свети́ло Незаходи́маго Све́та.

Песнь 3

Ирмо́с:

Я́ко непло́ды́, ро́ди от язы́к Це́рковь,/ и мно́гое в ча́дех изнемо́же со́нмище,/ чу́дному Бо́гу на́шему возопии́м:/ Свят еси́, Го́споди.

Я́ко непло́ды́ ра́дуется, прие́мшая во утро́бе,/ та́ко весели́тся Пече́рская гора́, стяжа́вшая тя свети́льника преподо́бным,/ и с и́ноческими чи́нми пое́т:/ Свят еси́, Го́споди.

Пе́рвым отце́м подража́я,/ ра́достию крест возложи́в на ра́мо, Ни́коне сла́вне,/ того́ великоду́шие носи́л еси́ да́же до сме́рти,/ любве́ ра́ди Го́спода своего́,/ ему́же пое́ши ны́не:/ Свят еси́, Го́споди.

Кре́пкия ве́ры щито́м вооружся, шел еси́ в плен, преподо́бне,/ и плени́ти хотя́щаго врага́ та́мо в развраще́ние великоду́шием связа́л еси́, наступи́в ного́ю,/ укрепля́ющему же тя Бо́гу воспе́л еси́:/ Свят еси́, Го́споди.

Богоро́дичен: Кре́постию страсте́й воста́ющаго на мя врага́ не моги́й одоле́ти,/ к Тебе́ прибега́ю, Ма́ти Бо́жия, помози́ ми,/ Ты бо еси́ столп кре́пкий, ору́жие на бра́ни/ и непреобори́мая Воево́да́.

Седа́лен, глас 8:

Ни́ву души́ свое́й хотя́ возде́лати,/ крест, а́ки яре́м, во́льнаго терпе́ния возложи́л еси́ на ся,/ и сим, а́ки ра́лом, возде́лал еси́ непло́дствующую страсте́й зе́млю,/ се́яв слеза́ми, мета́ющи се́мя по́стнических трудо́в,/ из ни́хже ны́не ра́достныя пожина́еши рукоя́ти, предстоя́ Христу́ Бо́гу,/ Его́же моли́, Ни́коне сла́вне,/ я́ко при́сно сый моли́твенник о блажа́щих любо́вию святу́ю па́мять твою́.

Сла́ва, и ны́не, Богоро́дичен:

Ра́дуйся, неоранная Ни́во, возрасти́вшая Клас несе́янный,/ из него́же хлеб спаси́тельный ми́ру сотвори́ся,/ сим напита́й ду́ши любо́вию чту́щих непоро́чное зача́тие Твое́, Чи́стая Де́во.

Песнь 4

Ирмо́с:

Любве́ ра́ди, Ще́дре, Твоего́ о́браза/ на Кресте́ Твое́м стал еси́,/ и раста́яшася язы́цы:/ Ты бо еси́, Человеколю́бче,/ кре́пость моя́ и хвале́ние.

Любо́вь твоя́ бысть, о́тче, крепка́ к Бо́гу,/ за него́же страда́ти от неве́рных жела́я,/ ника́коже искупле́н бы́ти восхоте́л еси́,/ возлюби́вшаго тя Го́спода/ и, на того́ наде́яся, взыва́л еси́:/ Свят еси́, Го́споди.

Наказа́ние Госпо́дне прие́м любезно,/ сла́дце искуше́ние боле́зней преше́л еси́, блаже́нне, глаго́ля с Дави́дом:/ блаже́н челове́к, его́же нака́жеши, Го́споди, тем и зову́ Ти:/ сла́ва си́ле Твоей, Го́споди.

На бу́дущая взира́я,/ настоя́щия боле́зни ни во что же вмени́л еси́, Ни́коне чу́дне,/ а́ще и огнь, и мраз, и желе́зо прирази́шася тебе́,/ но вся сия́ истаева́ху,/ ты же, а́ки адама́нт кре́пкий, пребы́л, реки́й:/ Свят еси́, Го́споди.

Богоро́дичен: На бу́дущая не взира́я, прильпе́ земли́ душа́ моя́/ и уподо́бихся ското́м несмы́сленным,/ но Ты, Чи́стая Де́во, отве́рзи ми мы́сленныя о́чи/ и удиви́ ми́лость твою́ на мне, да, разуме́я, вопию́:/ свята́ еси́ и ди́вна в пра́вду.

Песнь 5

Ирмо́с:

Ты, Го́споди, мой Свет,/ в ми́р пришел еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Ты, о́тче, вся́чески от неве́рных озло́бляемь, неради́л еси́ о сем,/ но, благода́рственная возсыла́я Бо́гу, глаго́лал еси́:/ спаси́ мя, Бо́же,/ я́ко внидо́ша воды до души́ мое́й,/ Ты бо Еди́н еси́, изводя́й окова́нныя му́жеством, ве́рою воспева́ющия Тя.

Терпе́ние твое́, преблаже́нне, смути́ плени́вшаго тя половча́нина,/ сего́ ра́ди три ле́та пребы́сть, му́ча тя на всяк день,/ озлобля́ющи гла́дом, жа́ждою, сту́дению и ва́ром,/ но ты, свя́те, наде́жду имел на Бо́га,/ я́ко Той избавля́ет ве́рою воспева́ющия его́.

Струи́ крове́й твои́х, подре́зания лы́стов и ины́я му́ки ви́дя,/ враг мы́сленный наусти́ половча́нина,/ и́же слы́ша иму́щее тебе́ бы́ти свобожде́ние свы́ше,/ тя́жкия вери́ги возложи́ти на тя,/ но ты, о́тче, псало́мски взыва́л еси́:/ Бо́же, в по́мощь мою́ вонми́,/ Ты бо Еди́н еси́, спаса́яй ве́рою воспева́ющия Тя.

Богоро́дичен: Струя́ми по́мощи Твоея́, Богоневе́стная Де́во,/ потопи́ неви́димыя враги́, влеку́щия вери́гами страсте́й ду́шу мою́ во а́дову про́пасть,/ да, свобо́дь сый от сих, вопию́ Ти:/ ра́дуйся, Мо́ре, потопи́вшее мы́сленнаго фарао́на.

Песнь 6

Ирмо́с:

Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ сил.

Желе́зо скорбе́й пронза́ше ду́шу твою́, Ни́коне сла́вне,/ до́ндеже Евстра́тий му́ченик даде́ извеще́ние свобожде́ния, посла́ннаго ти вско́ре от Бо́га,/ к Нему́же взыва́л еси́:/ на Тя, Го́споди, упова́х,/ пра́вдою Твое́ю изба́ви мя, Иису́се, Царю́ сил.

Я́ко Авваку́ма, неви́димо восхи́ти тя Вы́шняго десни́ца,/ стрегу́щии же тя удиви́шася, глас свы́ше слы́шаще,/ и постыде́шася, неве́дуще Бо́га,/ я́ко Той Еди́н есть Царь сил.

Богоро́дичен: Изба́вительнице кре́пкая,/ изба́ви мя от рук сопроти́вных,/ се бо понре́т глава моя́ в про́пасть и не изы́ду от а́довых закле́п ве́чных,/ а́ще не Ты ми да́си по́мощь, су́щи Ма́ти Царя́ сил.

Конда́к, глас 6:

Первому́ченику подо́бяся,/ о мучи́теле твое́м моли́лся еси́/ и, изба́вив того́ от сме́рти, приве́л еси́ ко Христу́,/ преподобному́чениче Ни́коне сла́вне,/ те́мже, с первострада́льцем зря Христа́ одесну́ю Отца́,/ моли́ся о нас, да не пребу́дем вне черто́га Христо́ва.

Песнь 7

Ирмо́с:

Авраа́мстии иногда́ в Вавило́не о́троцы/ пе́щный пла́мень попра́ша,/ пе́сньми взыва́юще:/ оте́ц на́ших Бо́же, благослове́н еси́.

Стра́шнаго обще́ния Та́ин вре́мени су́щу в це́ркви,/ си́лою Бо́жиею восхище́н от плена,/ стал еси́ среди́ бра́тии, Ни́коне сла́вне/ и вси, узре́вше у́зы твоя́ и кровь, ка́плющую от лы́стов,/ возде́ша ру́це о свобожде́нии твоем, глаго́люще:/ Бо́же, благослове́н еси́.

И́же пе́рвее име́ тя, о́тче, в пле́не,/ се той последи́ узре́в тя свобо́дна десни́цею Вы́шняго среди́ бра́тии,/ умили́вся и крести́вся, плени́ себе́ в послуша́ние Христо́во, зовы́й:/ Бо́же, благослове́н еси́.

Блаже́нни пле́нницы, иму́ще тя спле́нника, му́дре,/ тобо́ю бо от неду́га свобожде́ни, от рук нечести́вых избего́ша,/ и испо́лнися рече́нное в Писа́нии:/ мно́го мо́жет моли́тва пра́веднаго поспешеству́ема.

Богоро́дичен: Плене́н сый от враго́в мы́сленных/ и свя́зан вери́гами страсте́й от лю́таго велиа́ра,/ к Тебе́ вопию́, Неискусобра́чная Ма́ти:/ исхи́ти мя от сих, да, свобо́дь сый, воззову́:/ ра́дуйся, Ро́ждшая Свободи́теля плене́нным.

Песнь 8

Ирмо́с:

Изба́вителю всех, Всеси́льне,/ посреде́ пла́мене благоче́ствовавший,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.

Изба́вителя всех и Спа́са своего́ нося́й незло́бие,/ не убоя́лся еси́, о́тче, мучи́теля, распя́ти тя хотя́ща,/ но, благи́м за зло́е возда́вая, исцели́л еси́ его́, в боле́зни лежа́ща,/ да и той, обра́щся, благослови́т Го́спода, и превозно́си́т во веки.

В скуде́льном тела твоего́ сосу́де,/ коль мно́гое чтем бы́ти сокро́вище чудотворе́ния, блаже́нне,/ и сла́вим Небе́снаго Отца́, да́вшаго ти сицева́я на по́льзу на́шу,/ сим и нас испра́ви, мо́лим тя,/ да тобо́ю пресла́вная Де́ющаго воспое́м и превозноси́м во веки.

Стал еси́ проти́ву ми́ру и пло́ти/ и, обоя́ связа́в, покори́л еси́ ду́ху,/ те́мже, к Вы́шнему́ ми́ру возше́д,/ ра́дуешися, и со А́нгелы пое́ши,/ и превозноси́ши Го́спода во ве́ки.

Богоро́дичен: Предста́ни нам в по́мощь, ско́ро призыва́ющим Тя, Пречи́стая Де́во,/ и укрепи́ ны, проти́ву ми́ра и пло́ти на ду́ха похотству́ющия,/ се бо приво́дим Ти Ни́кона сла́внаго в моли́тву,/ его́же ра́ди даждь нам во Све́те святы́х превозноси́ти Тя во ве́ки.

Песнь 9

Ирмо́с:

Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови Благослове́ние процвела́ еси́./ Тем Тя вси велича́ем.

Е́вин неду́г в души́ свое́й исцели́ти хотя́ще,/ собра́ся полк доблему́дрых оте́ц на горе Пече́рстей,/ от ни́хже Ни́кон сла́вный, я́ко звезда́, просия́/ и луча́ми свои́х моли́тв просвеща́ет нас,/ те́мже его́ велича́ем.

Све́том мы́сленным озари́лся еси́,/ и́же пе́рвее отверже́нием страсте́й отврати́л еси́ о́чи твои́ не ви́дети суеты́,/ те́мже Поста́вльшаго рабу́ Своему́ сло́во Свое́ в страх Свой Христа́ велича́ем.

Ди́вна дела́ Твоя́, Несозда́нная Тро́ице,/ и сла́вишися во святы́х Свои́х, Бо́же Изра́илев,/ мольба́ми уго́дника Твоего́ Ни́кона удиви́ и на нас благода́ть Твою́,/ отвраще́нием от дел неподо́бных, да Тя вы́ну велича́ем.

Богоро́дичен: Ди́вна дела́ смотре́ния Своего́ сотвори́ на Тебе́ Вы́шний, Безневе́стная Де́во,/ и велича́ют Тя, блажа́ще от ро́да в род, вся земноро́дных коле́на;/ мольба́ми преподо́бных Пече́рских даждь нам,/ да и мы Тя во веки велича́ем.

Свети́лен:

Воздержа́нием кре́пким и муче́нием от неве́рных/ блюду́щаго пяты́ твоея́ зми́я уби́л еси́, о́тче,/ по кончи́не свое́й вене́ц сугу́бый до́блестей твои́х прия́л еси́,/ и ны́не, живы́й на Небеси́,/ я́ко преподо́бным сла́ва и му́чеником сый похвала́,/ моли́ся о нас, да и мы прича́стницы сла́вы твоея́ бу́дем, Ни́коне му́дре.

Сла́ва, и ны́не, Богоро́дичен:

Невоздержа́нием во тьму все́льшийся род наш/ Рождество́м Твои́м приве́дшая к Све́ту,/ нас невоздержа́ния изба́ви/ и к све́ту за́поведей Сы́на Твоего́ наста́ви, да пое́м Ти, Богоро́дице:/ ра́дуйся, воздержа́ния неувяда́емый ве́нче.

На стихо́вне Сла́ва, глас 5:

Земна́го А́нгела и Небе́снаго граждани́на,/ преподо́бным равностоя́теля,/ Ни́кона сла́внаго, прииди́те, лю́дие, ублажи́м:/ той бо сугу́быми страда́нии подвиза́ся/ и, по́двигом свои́м приемь сугу́быя венцы́,/ предстои́т Христу́ Бо́гу,/ непреста́нно моля́ за град и оби́тель сию,/ во е́же получи́ти ей ве́лию ми́лость.

И ны́не, Богоро́дичен или́ Крестобогоро́дичен по гла́су.

На Господи, воззва́х: стихи́ры воскре́сны, и восточны 3, Анато́лиевы, и пра́отцев на 4, глас 8.

Подобен: И́же во Еде́ме:

Пра́отцев днесь, ве́рнии, соверша́юще па́мять,/ воспои́м Христа́ Изба́вителя,/ возвели́чившаго их во всех язы́цех/ и чуде́с пресла́вная ве́рно соверши́вшаго Го́спода,/ я́ко держа́вна и си́льна,/ и от них показа́вша жезл си́лы нам –/ Еди́ну Неискусому́жную и Богоотрокови́цу Мари́ю Чи́стую,/ из Нея́же цвет про́йде – Христос,/ израсти́вый всем жи́знь,/ и неиждива́емую пи́щу, и спасе́ние ве́чное.

И́же святы́я отроки из огня́ изба́вивый, Влады́ко,/ и от уст льво́вых Дании́ла,/ благослови́вый Авраа́ма, и Исаа́ка, раба́ Твоего,/ и сего Сы́на Иа́кова,/ благоволи́вый от се́мене их бы́ти по нам,/ да пре́жде поползну́вшияся спасе́ши пра́отцы на́ша/ Кресто́м Твои́м и Воскресе́нием/ и, расто́ргнув сме́ртныя у́зы, совозста́виши вся,/ я́же от ве́ка су́щия в ме́ртвых,/ покланя́ющияся Тебе́, Христе́, Царю́ веков.

Я́коже в хла́де, посреде́ пла́мене/ росо́ю ду́ха, ра́дующеся, о́троцы Божии хожда́ху,/ та́инственно в нем прообрази́вше Тро́ицу/ и воплоще́ние Христо́во,/ и, я́ко му́дрии, ве́рою угаси́ша си́лу о́гненную,/ и Дании́л же пра́ведный львов яви́ся обузда́тель;/ и́хже моли́твами умоле́н быв, Человеколю́бче Спа́се,/ и нас негаси́маго ве́чнаго изба́ви огня́/ и сподо́би ны Ца́рствия Твоего́, Го́споди.

Я́коже в росе́ су́ще,/ ве́рнии и святи́и о́троцы Твои́/ в пещи́ пла́мене о́гненнаго предживописа́ху та́инственно/ е́же из Де́вы Твое́ прише́ствие,/ неопа́льно возсия́вшее нам,/ и Дании́л же пра́ведный и во проро́цех чу́дный,/ я́сно Боже́ственное второ́е Твое́ прише́ствие проявля́я,/ ви́дех, до́ндеже престо́ли поста́вишася, – глаго́лет,/ – и Судия́ се́де, и о́гненная потече́ река́,/ ея́же да изба́вимся, Христе́, моли́твами их, Влады́ко.

Сла́ва, глас 6. Анато́лиево:

И́же пре́жде зако́на/ отцы́ вся восхва́лим днесь, ве́рнии,/ Авраа́ма Боголю́би́ваго,/ и Исаа́ка, от обеща́ния рожде́ннаго,/ и Иа́кова, и двана́десять патриа́рхи,/ Дави́да кротча́йшаго,/ и Дани́ила, жела́ний проро́ка,/ и три о́троки с ни́ми сла́вяще,/ пещь в ро́су преложи́вшия,/ прося́ще оставле́ния от Христа́ Бо́га,/ прославля́емаго во святы́х Свои́х.

И ны́не, Богоро́дичен первый гла́са.

На лити́и стихи́ра хра́ма.

Сла́ва, глас 1:

Луча́ми облиста́вшеся Богоглаго́лания,/ великоимени́тии проро́цы при́сно блажа́тся/ и, рече́ния ду́ха пло́дствующе,/ несказа́нное рождество́ Христа́ Бо́га всем пропове́даша;/ зако́нно же кончи́ну соверши́ша,/ пожи́вше жи́знь пречу́дную.

И ны́не, Богоро́дичен: Се, испо́лнися Иса́иино прорече́ние:

Стихо́вна воскре́сна.

Сла́ва, глас 3. Ге́рманово:

Пра́отцев собо́р, празднолю́бцы,/ прииди́те, псало́мски да восхва́лим: Ада́ма пра́отца, Ено́ха, Но́я, Мелхиседе́ка,/ Авраа́ма, Исаа́ка и Иа́кова,/ по зако́не Моисе́я, и Ааро́на,/ Иису́са, Самуи́ла и Дави́да,/ с ни́миже Иса́ию, Иереми́ю, Иезекии́ля,/ и Дании́ла, и двана́десять,/ ку́пно Или́ю, Елиссе́я и вся,/ Заха́рию, и Крести́теля, и пропове́давшия Христа́,/ жи́знь и воскресе́ние ро́да на́шего.

И ны́не, Богоро́дичен: Без се́мене:

Тропа́рь, воскре́сен.

Сла́ва, и ны́не, пра́отцем, глас 2:

Ве́рою пра́отцы опра́вдал еси́,/ от язы́к те́ми предобручи́вый Це́рковь:/ хва́лятся в сла́ве святи́и,/ я́ко от се́мене их есть Плод благосла́вен,/ без се́мене Ро́ждшая Тя./ Тех моли́твами, Христе́ Бо́же, поми́луй нас.

НА У́ТРЕНИ

На Бог Госпо́дь: тропа́рь воскре́сен два́жды. Сла́ва, и ны́не, пра́отцем. По обои́х кафи́змах седа́льны воскре́сны, с Богоро́дичны их. По полиеле́и ипакои́ гла́са.

И седа́лен пра́отцев, глас 8.

Подо́бен: Прему́дрости:

Авраа́ма, Исаа́ка же и Иа́кова восхва́лим вси пе́сненно,/ Дави́да кро́ткаго, Иису́са и двана́десять патриа́рхи/ ку́пно с треми́ ю́ношами, угаси́вшими о́гненный пла́мень си́лою духо́вною,/ ра́дуйтеся, – вопию́ще к ним, – пре́лесть до́блественне обличи́вше царя́ безу́мнаго,/ и Христу́ моли́теся/ согреше́ний оставле́ние дарова́ти пра́зднующим любо́вью святу́ю па́мять вашу. Два́жды.

Сла́ва, и ны́не, Богоро́дичен:

Благода́рственное похвале́ние до́лжно,/ я́коже вдови́ца о́ная два лепта,/ приношу Тебе́, Влады́чице, о всех дарова́ниих Твои́х:/ Ты бо яви́лася еси́ покро́в, ку́пно и по́мощь,/ напа́стей и скорбе́й при́сно мя изыма́ющи./ Те́мже, я́ко от среды́ горя́щия пещи́, изба́влься оскорбля́ющих мя,/ от се́рдца взыва́ю Тебе́:/ Богоро́дице, помози́ ми,/ моля́щи Христа́ Бо́га согреше́ний оставле́ние да́ти мне,/ Тя бо име́ю наде́жду, раб Твой.

Кано́ны три: воскре́сен на 4, и святы́х трие́х отроко́в на 4, и пра́отцев на 6. Кано́н святы́х трие́х отроко́в, глас 8, его́же краегране́сие: Три о́троки пою́ и Дани́ила вели́каго. 

Песнь 1

Ирмо́с:

Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Безнача́льное Сло́во,/ из Отца́ пре́жде всех веков рожде́нно боголе́пно,/ в пещи́ ю́ношам обра́зно ви́дено бы́вшее, просла́вим.

Глаго́лы мучи́теля злочести́ваго/ благоро́днии о́троцы оплева́вше терпели́вно,/ сне́дьми беззако́нных оскверни́тися халде́йски не восхоте́ша.

Пита́стеся у́бо сло́вом душе́вне,/ сне́дьми же самора́сленными плотски́,/ па́че пита́ющихся дебе́лыми сне́дьми,/ царю́ красне́йший ли́цы яви́стеся.

Богоро́дичен: Яд змии́н, в слу́хи го́рько излия́вшийся Е́вины,/ я́же из Дави́да возра́стшая, Отрокови́це, исцеля́еши,/ Изба́вителя ро́ждши.

Ин кано́н святы́х пра́отцев, глас 1, его́же краегране́сие: Отце́м хвалу́ в ле́поту ны́не приноша́ю.

Песнь 1

Ирмо́с:

Христо́с ражда́ется – сла́вите!/ Христо́с с Небе́с – сря́щите!/ Христо́с на земли́ – возно́ситеся!/ По́йте Го́сподеви, вся земля́,/ и весе́лием воспо́йте, лю́дие,/ я́ко просла́вися.

Отце́м пе́ние принесе́м, пре́жде зако́на и в зако́не воссия́вшим,/ и из Де́вы возсия́вшему Го́споду и Влады́це во́лею пра́вою угоди́вшим,/ и незаходи́маго просвеще́ния ны́не наслажда́ющимся.

Ада́ма пе́рваго почти́м, руко́ю почте́ннаго Зижди́теля,/ и всех нас пра́отца уже́ бы́вшаго,/ и в ски́ниях Небе́сных со все́ми избра́нными почива́юща.

А́веля, да́ры прине́сшаго душе́ю благоро́днейшею,/ прия́т всех Бог и Госпо́дь;/ сего́ же па́ки, скве́рноуби́йственною руко́ю умерщвле́на,/ принесе́ к све́ту я́ко Боже́ственна му́ченика.

Богоро́дичен: Рече́ний Боже́ственных услы́шим, вопию́щих Христо́во явле́ние:/ се бо в верте́пе ражда́ется из Отрокови́цы Неискусому́жныя,/ его́же стра́шное Рождество́ провозвеща́ет звездосло́вцем звезда́ я́вльшаяся.

Катава́сия: Христо́с ражда́ется – сла́вите:

Песнь 3

Ирмо́с:

Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Ра́зум стяжа́вше Богонауче́нный, Влады́ко, о́троцы Дави́довы/ зако́ны оте́ческия Богому́дренно соблю́доша.

Огнь не опали́ чисте́йшая телеса́ благочести́вых:/ посто́м бо душепита́тельным напая́хуся.

Хвалу́ всеми́рную и многопе́тую пою́т о́троцы трие́,/ посреде́ пе́щи чу́дно ороша́еми.

Богоро́дичен: Да рождество́, Влады́ко, из де́вствующаго телесе́ пока́жеши нам,/ спа́саеши в пещи́ де́вствующая телеса́.

Ин ирмо́с:

Пре́жде век от Отца́ рожде́нному нетле́нно Сы́ну/ и в после́дняя от Де́вы/ воплоще́нному безсе́менно,/ Христу́ Бо́гу возопии́м:/ вознесы́й рог наш,/ Свят еси́, Го́споди.

Пое́тся в ми́ре Си́фово к Зижди́телю разжже́ние,/ и́бо в непоро́чнем жи́тельстве и душе́вней любви́ тому́ и́стинно угоди́,/ и ны́не во стране́ живы́х вопие́т:/ Свят еси́, Го́споди.

Усты́, и язы́ком, и се́рдцем Ен́ос чу́дный/ призва́ти Богому́дрено Влады́ку всех и Бо́га наде́яшеся в Ду́се/ и, благоуго́дно пожи́в на земли́, сла́ву восприя́т.

Свяще́ннословии свяще́нными Ено́ха ублажи́м,/ благоугоди́в бо Го́споду, преста́вися в сла́ве,/ яви́вся лу́чши сме́рти, я́коже писа́ся,/ и́мже Бо́жий быв раб и́скреннейший.

Богоро́дичен: Ны́не ча́яние язы́ков от Де́вы предгряде́т,/ и Вифлее́м заключе́нный отверза́ет све́тло Еде́ма,/ Сло́во воплоща́емое прие́мля, и в я́слех пло́тию возле́гшаго.

Катава́сия: Пре́жде век:

И ипакои́, глас 2:

В ро́су де́тем огнь прелага́шеся,/ плач в ра́дость жена́м пременя́шеся:/ А́нгел бо во обои́х служа́ше чудесе́х,/ о́вым у́бо во упокое́ние претвори́вый пещь,/ сим же Воскресе́ние возвести́вый тридне́вное./ Нача́льниче жи́зни на́шея, Го́споди, сла́ва Тебе́.

Песнь 4

Ирмо́с:

Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Дани́ил му́дрейший, Боже́ственне умо́м просвеща́емь,/ со́ния разреши́ самоде́ржцев Боже́ственною благода́тию.

Облиста́ет чудесми́, е́же в пещи́, отроко́в страда́ние:/ мучи́теля бо улови́ша к позна́нию Твоему́, Веси́льне.

Согла́сия орга́ны и мусики́и пе́сни/ всесли́чныя до́блественных не привлеко́ша/ и зла́тому о́бразу не подклони́ша.

Богоро́дичен: Пе́сньми, Всепе́тая,/ и́же в Вавило́не де́ти почита́ют Сы́на Твоего́ Пребоже́ственнаго,/ его́же в пещи́ позна́ша.

Ин

Ирмо́с:

Жезл из ко́рене Иессе́ова/ и цвет от него́, Христе́,/ от Де́вы прозя́бл еси́,/ из горы, Хва́льный, приосене́нныя ча́щи/ прише́л еси́, вопло́щся от Неискусому́жныя,/ Невеще́ственный и Бо́же./ Сла́ва си́ле Твое́й, Го́споди.

Хвалу́ принесе́м Бо́гу,/ чту́ще пе́сньми Ноя, вои́стинну су́ща пра́веднаго:/ во всех бо за́поведех Боже́ственных украша́емь яви́ся, Христу́ благоугоди́в,/ ему́же песнопое́м, ве́рнии:/ сла́ва си́ле Твое́й, Го́споди.

Ви́дев твое́ Бог благоро́дное нра́ва, и просто́е,/ и по всему́, Но́е, соверше́на, втора́го ми́ра я́ве началовождя́ тя показу́ет,/ спа́сшаго тому́ вся́каго ро́да от пото́па чу́вственнаго се́мя,/ я́коже Сам повеле́.

Но́я, сохра́ньшаго Бо́жий зако́н невреди́мь,/ и обре́тшася тогда́ пра́ведна в ро́де свое́м,/ и дре́вяным спа́сша дре́вле ковче́гом безслове́сных ро́ды повеле́нием Вседе́тельным,/ пе́сньми благоче́стно ублажи́м.

Вино́ умиле́ния нам то́чит,/ чту́щим тя, Но́е блаже́нне, па́мять твоя́,/ веселя́щее и ду́ши, и сердца́ всегда́/ чи́сте блажа́щих нра́вы твоя́ честны́я и жи́тельство Боже́ственное.

Богоро́дичен: Ны́не Избавле́ние на́ше в я́слех возлегает/ и пелена́ми повива́ется, я́коже Младе́нец./ И волсви́, восто́чнии ца́рие, прихо́дят/ сего́ я́ко Бо́га и Царя́ ро́ждшагося от Чи́стыя, ви́дети/ и поклони́тися с да́ры ве́рно.

Катава́сия: Жезл из ко́рене Иессе́ова:

Песнь 5

Ирмо́с:

Вску́ю мя отри́нул еси́/ от лица́ Твоего́, Свете Незаходи́мый,/ и покры́ла мя есть чужда́я тьма, окая́ннаго;/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Научи́вшеся зако́ну, Спа́се,/ не отвергошася Твои́ уго́дницы,/ Дании́л вели́кий с треми́ ю́ношами Богому́дрыми,/ но, кре́пость прие́мше от Тебе́, Благоде́теля,/ мучи́тели му́жески победи́ша.

Мы́сленно науча́шеся Дании́л, Человеколю́бче, Твои́м та́йнам:/ на о́блаце бо я́ко Сы́на Тя Челове́ча гряду́ща,/ язы́ков всех я́ко Суди́ю и Царя́ зря́ше ума́ чистото́ю.

Украси́ся, о де́ти! па́че ка́мене сапфи́ра ва́ше совокупле́ние,/ я́ко заря́ зла́тая, благочести́я ре́вностию распа́льшеся,/ ходя́ще ра́достно в пещи́ и собира́юще ликова́ние всеми́рное.

Богоро́дичен: Дании́л Тя, Де́во, го́ру прописа́ я́ве Боже́ственный,/ трие́ же о́троцы, ви́девше пла́мень ороша́ющ,/ Твое́ Боже́ственное Рождество́ песнопе́сненно восхваля́ют/ я́ко Спа́са, и Зижди́теля, и Го́спода.

Ин ирмо́с:

Бог Сый мира, Оте́ц щедро́т,/ Вели́каго Сове́та Твоего́ А́нгела,/ ми́р подава́юща, посла́л еси́ нам;/ тем, Богоразу́мия к све́ту наста́вльшеся,/ от но́щи у́тренююще,/ славосло́вим Тя, Человеколю́бче.

Хвала́ми Боже́ственными да почти́тся Сим,/ оте́ческое благослове́ние приплоди́в,/ и, пред Бо́гом благоуго́ден я́влься,/ к пра́отеческим лико́м причте́ся,/ и во стране́ живы́х ра́достно почива́ет.

Ви́дети сподо́бися я́ко друг Бо́жий Авраа́м день Зижди́теля своего́/ и испо́лнь быва́ет ра́дости духо́вныя;/ сего́ у́бо, ума́ пра́востию чту́ще, ублажи́м вси,/ я́ко Христо́ва Боже́ственна пра́отца.

Ви́дел еси́, я́коже есть мо́щно челове́ку ви́дети, Тро́ицу/ и Ту́ю угости́л еси́, я́ко друг при́сный, преблаже́нне Авраа́ме;/ те́мже мзду́ прия́л еси́ стра́ннаго гоще́ния,/ е́же бы́ти тебе́ безчи́сленных язы́ков отцу́ ве́рою.

Богоро́дичен: По́лный истощава́ется пло́тию нас ра́ди,/ и нача́ло Безнача́льный прие́млет;/ обнищева́ет же бога́тый,/ и Сло́во – Сый Бог–в я́слех безслове́сных возлежи́т, я́ко Младе́нец,/ воззва́ние всех су́щих от ве́ка соде́ловая.

Катава́сия: Бог Сый ми́ра:

Песнь 6

Ирмо́с:

Бе́здна грехо́в и прегреше́ний бу́ря мя смуща́ет/ и во глубину́ ну́жднаго ре́ет мя отча́янияу/ но твою́ кре́пкую ру́ку мне простри́, я́ко Петро́ви,/ о Упра́вителю! и спаси́.

Облада́вше душе́вными страстьми́ си́лою сло́ва,/ страны́ язы́к халде́йских вла́стели бы́сте,/ весть бо доброде́тель честь дарова́ти стяжа́вшим ю,/ о Дави́довы му́дрии вну́цы!

В ме́ртвость Дании́л живоно́сную оде́явся дре́вле,/ я́ко Бо́га, халде́ем злочести́вно мни́маго,/ уби́ва́ет сне́дию зми́я зле́йшаго./ Свяще́нники же злочести́выя му́дре уби́л есть.

Богоро́дичен: Ми́лостива ми Суди́ю, Сы́на Твоего́, Богоро́дице Де́во,/ Твои́ми моли́твами бы́ти в день Суда́/ Изба́вителя же лю́тых, Ма́ти, умоли́:/ на Тя бо еди́ну наде́жду мою́ возлага́ю.

Ин ирмо́с:

Из утро́бы Ио́ну младе́нца изблева́ морски́й зверь,/ якова́ прия́т;/ в Де́ву же все́льшееся Сло́во/ и плоть прие́мшее про́йде, сохра́ншее нетле́нну:/ его́же бо не пострада́ истле́ния,/ Ро́ждшую сохрани́ невре́жде́нну.

О́браз Христо́вы сме́рти был еси́ я́ве, Исаа́че преблаже́нне,/ возводи́мь о́тчим благопокоре́нием, е́же закала́тися./ Сего́ ра́ди ублажи́лся еси́ и раб Бо́жий вои́стинну яви́лся еси́ бли́жний,/ со все́ми пра́ведными вселя́яся.

Яви́ся Иа́ков уго́дник, ве́рнейший всех Бо́га;/ те́мже и бра́ся со А́нгелом, ум зря Бо́га нарече́ся/ и, спя, Боже́ственную ле́ствицу ви́де,/ на не́йже Бог утвержда́шеся, пло́тию обложи́выйся за благосты́ню.

Любя́ Ио́сиф ко отцу́ благопокоре́ние,/ в ров вве́ржен, продаде́ся/ во о́браз закла́ннаго и в ро́ве положе́ннаго Христа́;/ пшеницода́вец же Еги́пта бысть, целому́др быв и пра́веден,/ царь же страсте́й и́стиннейший.

Богоро́дичен: Мла́до на земли́ Отроча́ познава́ется,/ Сый со Отце́м при́сно и Ду́хом,/ пелена́ми же повива́ется, и́же зе́млю повива́яй мгло́ю я́ве,/ и в я́слех безслове́сных возлежи́т./ Сего́ ны́не предпра́зднуем, ра́дующеся, безсе́менное рождество́.

Катава́сия: Из утро́бы Ио́ну:

Конда́к, глас 6

Рукопи́саннаго о́браза не поче́тше,/ но Неописанным существо́м защити́вшеся, треблаже́ннии,/ в по́двизе огня́ просла́вистеся,/ среде́ же пла́мене нестерпи́маго стоя́ще, Бо́га призва́сте:/ ускори́, о Ще́дрый, и потщи́ся, я́ко Ми́лостив, в по́мощь на́шу,/ я́ко мо́жеши хотя́й.

И́кос:

Простри́ твою́ ру́ку,/ е́юже дре́вле прия́ша искуше́ние еги́птяне борю́щии и евре́е бори́мии./ Не оста́ви нас, да не пожре́т нас смерть, жа́ждущая нас,/ и сатана́, ненави́дяй нас,/ но прибли́жися нам и пощади́ ду́ши на́ша,/ я́коже пощади́л еси́ иногда́ о́троки Твоя́,/ су́щия в Вавило́не, непреста́нно сла́вящия Тя,/ и вве́рженныя Тебе́ ра́ди в пещь,/ и от сея́ вопию́щия Ти:/ ускори́, Ще́дрый, и потщи́ся, я́ко Ми́лостив, на по́мощь на́шу,/ я́ко мо́жеши хотя́й.

Песнь 7

Ирмо́с:

О́троцы Богочести́вии в Вавило́не/ о́бразу зла́тому не поклони́шася,/ но посреде́ пещи́ о́гненный, ороша́еми,/ песнь воспева́ху, глаго́люще:/ превозноси́мый отце́в и нас Бо́же, благослове́н еси́.

Глас Боголюбе́зе́н поя́шеся из среды́ огня́ Вседержи́телю,/ Аза́рия бо, Боже́ственный лик соста́вив,/ песнь воспева́я, глаго́лаше:/ благослове́н Бог оте́ц на́ших.

Цевни́ца ю́ношей богосло́вствует всех Бо́га и Вседержи́теля,/ тем в пещи́ я́сно я́вльшагося,/ и песнь воспева́ху, глаго́люще:/ благослове́н Бог оте́ц на́ших.

Три, в пещь вве́рженныя, ви́дев царь,/ я́ко узре́ четве́ртаго вид,/ Сы́на пронарече́ Бо́жия и всем возопи́:/ благослове́н Бог оте́ц на́ших.

Богоро́дичен: Име́я просвеще́н Боже́ственною заре́ю ум, Дании́ле Богоблаже́нне,/ Де́вы рождество́ я́ве предви́дел еси́, та́инственными о́бразы образу́емо,/ благослове́н, – вопия́,– Бо́же оте́ц на́ших.

Ин

Ирмо́с:

О́троцы, благочести́ю совоспита́ни,/ злочести́ваго веле́ния небре́гше,/ о́гненнаго преще́ния не убоя́шася,/ но, посреди́ пла́мене стоя́ще, поя́ху:/ отце́в Бо́же, благослове́н еси́.

Да воспое́тся Ана́ния, Аза́рия, Мисаи́л с Дании́лом,/ пещь угаси́вше о́гненную, и львов обузда́вше стремле́ния,/ и Христу́ согла́сно пою́ще:/ отце́в Бо́же, благослове́н еси́.

Зако́нно пострада́в в напа́стех и неосла́бных ско́рбех,/ уго́дник нарече́ся И́ов Бо́жий всеи́стиннейший,/ кро́ток, незло́бив, прав, соверше́н, непоро́чен, вопия́:/ отце́в Бо́же, благослове́н еси́.

Ве́рою Моисе́я, Ааро́на же и О́ра почти́м,/ восхваля́юще Иису́са и Леви́ю свяще́ннейшаго,/ Гедео́на же и Сампсо́на, и взыва́ем:/ отце́в Бо́же, благослове́н еси́.

Богоро́дичен: Се, я́коже прорече́ проро́к,/ во чре́ве зача Неискусобра́чная Бо́га/ и роди́ти я́ве и́дет в верте́пе Вифлее́мле./ ему́же вси пое́м:/ отце́в Бо́же, благослове́н еси́.

Катава́сия: О́троцы благочести́ю совоспита́ни:

Песнь 8

Ирмо́с:

Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Авраа́мово благоро́дие сохрани́ти тща́шеся,/ сво́йственное к нему́ стяжа́сте основа́ние ве́ры и наде́жды, преподо́бнии,/ терпе́ние и напа́стем пожда́ние, вопию́ще:/ благослови́те, свяще́нницы, Влады́ку,/ лю́дие, превозноси́те его́ во ве́ки.

Я́ко свети́ла просия́вше, и зе́млю онебеси́вше,/ и благоче́стия просвеще́нней осия́вшеся,/ всеми́рное соста́вльше ликостоя́ние, пою́т от напа́стей спа́сшему Влады́це:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Ю́ношески погаси́вше распали́мую пещь/ и львов че́люсти загра́ждше, Дави́довы вну́цы,/ ны́не ра́дующеся, пою́т Тя, Благоде́теля, Царя́ всех:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Богоро́дичен: Тайнонауча́ет, Пречи́стая, Дании́л мудре́йший,/ и предживопису́ют о́троцы трие́ Рождество́ Твое́, Богому́дреннии,/ о́бразы зря́ще из утро́бы Твоея́ Проше́дшаго несказа́нно;/ его́же де́ти благословя́т, свяще́нницы воспева́ют,/ лю́дие превознося́т во вся ве́ки.

Ин ирмо́с:

Чу́да преесте́ственнаго/ росода́тельная изобрази́ пещь о́браз:/ не бо, я́же прия́т, пали́т ю́ныя,/ я́ко ниже́ огнь Божества́ – Де́вы,/ в Ню́же вни́де утро́бу./ Тем, воспева́юще, воспое́м:/ да благослови́т тварь вся Го́спода/ и превозно́си́т во вся ве́ки.

Днесь су́щих от ве́ка Боже́ственную па́мять соверша́ем честны́х оте́ц,/ Ада́ма, А́веля же, Си́фа, и Но́я,/ и Ено́са, и Ено́ха, и Авраа́ма,/ Мелхиседе́ка и И́ова, Исаа́ка и ве́рнаго Иа́кова,/ да благослови́т тварь, вопию́ще, Го́спода/ и превозно́си́т во вся ве́ки.

Полк Богокра́сный Боже́ственных оте́ц да восхва́лим,/ Вара́ка, и Нафа́на, и Елеаза́ра,/ Иоси́ю и Дави́да, Иеффа́я, Самуи́ла же,/ пре́дняя зря́ща че́стне и взыва́юща:/ да благослови́т тварь вся Го́спода/ и превозно́си́т его́ во ве́ки.

Похвалу́ песнопе́сненно да принесе́м Бо́жиим проро́ком,/ восхваля́юще Иоси́ю и Михе́я, Софо́ния и Авваку́ма,/ Заха́рию и Ио́ну, Агге́я же и Амо́са/ и со Авди́ем Малахи́ю и Нау́ма,/ Иса́ию, и Иереми́ю, и Иезекии́ля,/ ку́пно Дании́ла, Или́ю и Елиссе́я.

Глаго́лы Тро́ическими Всесвяту́ю воспое́м, ве́рнии, Тро́ицу,/ Отца́ Безнача́льнаго, Сы́на же и Пра́ваго ду́ха Свята́го – Еди́ницу Триипоста́сную,/ ю́же вся́кое дыха́ние сла́вит, зову́ще:/ да благослови́т тварь вся Г оспода/ и превозно́си́т во вся ве́ки.

Богоро́дичен: Яви́лся еси́ от де́вственных, Христе́, крове́й,/ вопло́щаемь неизрече́нным сло́вом/ и я́ко Младе́нец соверше́н в верте́пе премно́жеством благоутро́бия, Иису́се, ражда́яся;/ звезда́ же Тя издале́ча возвести́ звездосло́вцем,/ по́йте, ве́рою зову́щим, и превозноси́те Христа́ во ве́ки.

Катава́сия: Чу́да преесте́ственнаго:

Песнь 9

Ирмо́с:

Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Достиго́сте кончи́ну жела́емую/ и жела́ний Кра́йнейшему предстоите́ в Небе́сных черто́зех,/ о́троцы всеблаже́ннии.

Ра́дующеся, рукоя́тие, е́же от слез, до́браго ва́шего земледе́лания прия́сте,/ нетле́ния клас плодоноси́вше.

Возсия́ све́тлость ны́не вам досто́йно,/ и весе́лие се́рдца процвете́:/ отону́дуже бо отбеже́ печа́ль, всели́стеся.

Богоро́дичен: Па́жить сме́ртную уста́вила еси́, Де́во,/ Жизнода́вца ро́ждши и Го́спода,/ животворя́щаго ве́рою велича́ющия Тя.

Ин ирмо́с:

Та́инство стра́нное ви́жу и пресла́вное:/ Не́бо – верте́п, престо́л Xеруви́мский – Де́ву,/ я́сли – вмести́лище,/ в ни́хже возлеже́ Невмести́мый – Христо́с Бог,/ его́же, воспева́юще, велича́ем.

Кре́постию Твое́ю дре́вле си́лы сотвори́ша дще́ри, Го́споди,/ А́нна, и Иуди́ф, и Дево́ра, Олда́, Иаи́ль же,/ Есфи́рь, Са́рра, Мариа́м же Моисе́ева,/ Рахи́ль, и Реве́кка, и Руфь, велему́дрыя.

Я́ко угаси́вшия о́троки святы́я пещь свяще́нно почти́м/ ку́пно с Дании́лом проро́ком и все́ми пра́ведными я́ве,/ пре́жде зако́на облиста́вшими до́бре/ и в зако́не Влады́це угоди́вшими.

Прему́дрии Боже́ственнии проро́цы бы́вше Авраа́мовы вну́цы,/ е́же от Авраа́ма и Иу́ды ро́ждшееся Сло́во Бо́жие провозвести́ша Ду́хом,/ тех мольба́ми, Иису́се, вся уще́дри.

Освяти́ся вся тварь па́мятию ва́шею/ и, торжеству́ющи, зове́т, ра́бски вопию́щи:/ мольбу́ Го́споду при́сно принеси́те, блаже́ннии,/ улучи́ти ве́чных благ благохваля́щим вас.

Богоро́дичен: Облеки́йся в мя, от Де́вы предгряде́т,/ и в верте́пе ражда́ется Сло́во О́тчее несли́тно:/ лику́й, тварь, гла́сы благода́рственными велича́ющи/ того́ е́же за милосе́рдие всесвято́е снизше́ствие.

Катава́сия: Та́инство стра́нное:

Свети́лен воскре́сен. Сла́ва, пра́отцев.

Подо́бен: Жены́, услы́шите:

Ада́ма восхва́лим,/ А́веля, Си́фа и Ено́са, Ено́ха и Но́я,/ Авраа́ма, Исаа́ка и Иа́кова,/ Моисе́я, И́ова и Ааро́на, Елеаза́ра и Иису́са,/ Вара́ка, Сампс́она и Иеффа́я,/ Дави́да и Соломо́на.

И ны́не:

Со́лнце вели́кое – Созда́тель – от Неискусому́жныя Де́вы,/ я́же от Ада́ма просвети́ти в Вифлее́м тщи́тся./ Те́мже возвеща́ет чу́до пра́отец всесветле́йшая па́мять.

На хвали́тех стихи́ры воскре́сны 4 и святы́х пра́отцев 4, глас 2.

Подо́бен: До́ме Евфра́фов:

Вси честны́х ны́не пра́отец па́мять соверша́ем,/ пою́ще Богоуго́дное сих житие́,/ его́же ра́ди возвели́чишася. Два́жды

Стих: Благослове́н еси́, Го́споди Бо́же оте́ц на́ших,/ и хва́льно, и просла́влено и́мя Твое́ во ве́ки.

Угаси́ша си́лу о́троцы о́гненную,/ лику́юще посреде́ пе́щи/ и пою́ще Бо́га всеси́льнаго.

Стих: Я́ко пра́веден еси́ о всех,/ я́же сотвори́л еси́ нам.

В ро́ве заключе́н, звере́м сообита́тель,/ Дании́л проро́к/ неприча́стен сих показа́ся озлобле́ния.

Сла́ва, глас 7. Ге́рманово:

Прииди́те вси, ве́рно торжеству́им/ пре́жде зако́на оте́ц,/ Авраа́ма и су́щих с ним ле́тнюю па́мять./ Иу́дово пле́мя досто́йно почти́м,/ и́же в Вавило́не о́троки, угаси́вшия пе́щный пла́мень,/ я́ко Тро́ицы о́браз с Дании́лом восхва́лим,/ проро́ческая прорече́ния изве́стно держа́ще,/ со Иса́ием велегла́сно возопии́м:/ се Де́ва во чре́ве прии́мет/ и роди́т Сы́на Емману́ила,/ и́же есть с на́ми Бог.

И ны́не, Богоро́дичен: Преблагослове́нна еси́:

Славосло́вие вели́кое. Ектении́, и отпу́ст, и стихи́ра Ева́нгельская. Час 1-й и коне́чный отпу́ст.

НА ЛИТУРГИ́И

Блаже́нны Окто́иха, на 6; пра́отцев песнь 3-я, на 4. По входе тропа́рь воскре́сен и пра́отцев. Сла́ва, и ны́не, конда́к пра́отцев. Проки́мен, песнь отце́в, глас 4: Благослове́н еси́, Го́споди Бо́же оте́ц на́ших,/ и хва́льно и просла́влено И́мя Твое́ во ве́ки.

Стих: Я́ко пра́веден еси́ о всех:

Апо́стол пра́отцев, к Колосса́ем, зача́ло 257.

Аллилу́ия, глас 4: Моисе́й и Ааро́н во иере́ех его́,/ и Самуи́л в призыва́ющих И́мя его́.

Ева́нгелие от Луки́, зача́ло 76. Прича́стен: Хва́лите Го́спода с Небе́с:

Други́й: Ра́дуйтеся, пра́веднии, о Го́споде:

Ве́дати подоба́ет, я́ко от сего́ 11-го дне начина́ется неде́ля пра́отеческая и восхо́дит сего́ же декабря́ до 17 дне. Бывает же си́це:

А́ще у́бо случи́тся Рождество́ Христо́во в неде́лю, и тогда́ пра́отеческая неде́ля быва́ет декабря́ в 11-й день.

А святы́х оте́ц неде́ля, я́же пре́д Рождество́м Христо́вым, декабря́ в 18-й день.

А́ще ли случи́тся Рождество́ Христо́во в понеде́льник, и тогда́ пра́отеческая неде́ля быва́ет декабря́ в 17-й день.

А неде́ля святы́х оте́ц, я́же пред Рождество́м Христо́вым, тогда́ быва́ет декабря́ в 24-й день.

А́ще ли случи́тся Рождество́ Христо́во во вто́рник, и тогда́ пра́отеческая неде́ля быва́ет декабря́ в 16-й день.

А святы́х оте́ц неде́ля, я́же пред Рождество́м Христо́вым, декабря́ в 23-й день.

А́ще ли случи́тся Рождество́ Христо́во в сре́ду, и тогда́ быва́ет пра́отеческая неде́ля декабря́ в 15-й день.

А святы́х оте́ц неде́ля декабря́ в 22-й день.

А́ще ли случи́тся Рождество́ Христо́во в четверто́́к, и тогда́ быва́ет пра́отеческая неде́ля декабря́ в 14-й день.

А святы́х оте́ц неде́ля декабря́ в 21-й день.

А́ще ли случи́тся Рождество́ Христо́во в пято́к, и тогда́ быва́ет пра́отеческая неде́ля декабря́ в 13-й день.

А святы́х оте́ц неде́ля в 20-й день.

А́ще ли случи́тся Рождество́ Христо́во в субботу, и тогда́ быва́ет пра́отеческая неде́ля декабря́ в 12-й день.

А неде́ля святы́х оте́ц, я́же пред Рождество́м Христо́вым, декабря́ в 19-й день.

От зде блю́ди неде́лю святы́х пра́отец, в ко́е число́ прилучи́тся.

А́ще и пре́жде неде́ли 28-я или́ по́слежде: И на Литурги́и Ева́нгелие чти неде́ли 28-я, от Луки́, зача́ло 76: Челове́к не́кий сотвори́ ве́черю ве́лию: непреме́нно еди́но.

А в 28-ю неде́лю чти рядовое, ко́е прилучи́тся ины́я неде́ли.

Подоба́ет ве́дати о неде́ли святы́х пра́отец.

Егда́ у́бо быва́ет неде́ля святы́х пра́отец, оставля́ется после́дование прилучи́вшагося свята́го в ту неде́лю, и пое́м пре́жде в пяток на пове́черии.

В суббо́ту на ма́лой вече́рни пое́м по обы́чаю. На вели́цей вече́рни на Го́споди, воззва́х: стихи́ры вокре́сны 3 и восто́чны 3, Анато́лиевы, и святы́х пра́отец 4, глас 8. Подо́бен: И́же во Еде́ме:

Сла́ва, пра́отцев, глас 6: И́же пре́жде зако́на:

И ны́не, Богоро́дичен настоя́щаго гла́са. На литии́ стихи́ра хра́ма. Сла́ва, пра́отцев, глас 1:

Луча́ми облиста́вшеся Богоглаго́лания:

И ны́не, Богоро́дичен: Се, испо́лнися Иса́иино:

На стихо́вне стихи́ры воскре́сны: Сла́ва, пра́отцев, глас 3: Пра́отец собо́р:

И ны́не, Богоро́дичен: Без се́мене от Боже́ственнаго Ду́ха:

На благослове́нии хле́бов тропа́рь: Богоро́дице Де́во: два́жды и пра́отцев еди́ножды, глас 2:

Ве́рою пра́отцы опра́вдал еси́:

На у́трени: На Бог Госпо́дь: тропа́рь воскресе́н два́жды, Сла́ва, и ны́не пра́отцев. По 1-й и по 2-й кафи́зме седа́льны воскре́сны и чте́ние во Ева́нгелии толковом, неде́ля ряд. Посе́м полиеле́й и тропарй воскре́сны.

А́нгельский собо́р:

Та́же ипакои́ гла́са, и седа́лен пра́отцев, и чте́ние. Степе́нна и проки́мен гла́са.

Вся́кое дыха́ние:

Ева́нгелие воскре́сное и Воскресе́ние Христо́во: Псалом 50. Стихи́ра воскре́сна. Кано́н воскре́сен со ирмосо́м на 4, и отроко́в на 4, глас 8, и пра́отцев на 6, глас 1. Катава́сия: Христо́с ражда́ется:

По 3-й пе́сни ипакои́ пра́отцев еди́ножды, глас 2: В ро́су де́тем:

По 6-й пе́сни конда́к пра́отцев, глас 6:

Рукопи́саннаго о́браза не поче́тше: и и́кос.

По 9-й пе́сни свети́лен воскре́сен. Сла́ва, пра́отцев. И ны́не, Богоро́дичен. На хвали́тех стихи́ры воскре́сны 4 и святы́х пра́отцев 4, глас 2. Подо́бен: До́ме Евфра́фов:

Сла́ва, пра́отцев, глас 7: Прииди́те вси ве́рно:

И ны́не, Преблагослове́нна еси́:

Славосло́вие вели́кое и отпу́ст: Стихи́ру же Ева́нгельскую пое́м в притво́ре. И час 1-й, и коне́чный отпу́ст.

НА ЛИТУРГИ́И

Блаже́нны гла́са на 6 и пра́отцев песнь 3-я, на 4. По входе тропа́рь воскре́сен и пра́отцев. Сла́ва, и ны́не, конда́к пра́отцев. Проки́мен, песнь отце́в, глас 4: Благослове́н еси́, Го́споди Бо́же оте́ц на́ших:

Сти́х: Я́ко пра́веден еси́:

Апо́стол пра́отцев к Колосса́ем, зача́ло 257.

Аллилу́ия, глас 4: Моисе́й и Ааро́н:

Ева́нгелие от Луки́, зача́ло 76. Ряд же неде́ли оставля́ется.

Прича́стен: Хвали́те Го́спода:

Други́й: Ра́дуйтеся: