На Го́споди, воззва́х: стихи́ры, Окто́иха 3, и святы́х 3, глас 1.

Подо́бен: Всехва́льнии:

Му́чениче пресла́вне Ми́но,/ по плесна́м бие́мь, и очесы́ избода́емь,/ и отъе́млему Богосло́вному язы́ку/ тверде́йше терпе́л еси́,/ на Боже́ственная воздая́ния зря./ Те́мже моли́ дарова́ти душа́м на́шим/ ми́р и ве́лию ми́лость.

Рук отсече́ние и ног лю́бит отъя́тие/ Ермоге́н сла́вный/ и, взира́я на огнь,/ мно́жайшу теплоту́ серде́чну явля́ше,/ Бо́гу прилепля́яся. ему́же и мо́лится ны́не/ дарова́ти душа́м на́шим/ ми́р и ве́лию ми́лость.

Удесы́ сокруша́еми, му́дрии,/ во глубину́ морску́ю вве́ржени бы́сте, святи́и,/ ма́нием же лу́чшим/ к ти́хому приста́нищу сла́дости напра́вистеся,/ пото́пльше зло́бу зми́еву./ Те́мже моли́теся дарова́ти душа́м на́шим ми́р и ве́лию ми́лость.

Сла́ва, и ны́не, Богоро́дичен. Глас и подо́бен то́йже:

Нетле́нно родила́ еси́ Бо́га,/ тлю потреби́вшаго и нетле́ние источи́вшаго,/ Нетле́нная, Непоро́чная./ Те́мже молю́ Тя:/ лю́тыми истле́вшаго мя/ моли́твами Твои́ми, Чи́стая, обнови́,/ да сла́влю Тя,/ да любо́вию велича́ю Тя,/ род наш возвели́чившую.

Крестобогоро́дичен, глас и подо́бен то́йже:

Де́ва Нескве́рная/ иногда́ на дре́ве ви́девши,/ его́же роди́ из безсе́менныя утро́бы,/ не терпя́щи утрбо́наго уязвле́ния,/ власы́ терза́ющи, глаго́лаше:/ ма́нием содержа́й тварь всю,/ ка́ко, я́ко осужде́нный,/ на Крест вознесе́н еси́,/ вся́ко хотя́й спасти́ челове́чество.

На стихо́вне Окто́иха.

Тропа́рь, глас 8:

Воздержа́нием страсте́й огнепа́льныя/ умертви́вше зра́ки и движе́ния, Христо́вы му́ченицы/ прия́ша благода́ть неду́ги отгоня́ти немощны́х/ и жи́вше и по кончи́не чудоде́йствовати./ Вои́стинну чу́до пресла́вно,/ я́ко ко́сти наги́ источа́ют исцеле́ния,/ сла́ва Еди́ному и Созда́телю Бо́гу.

НА У́ТРЕНИ

Оба кано́на Окто́иха и святы́х кано́н на 4, глас 1, его́же краегране́сие: Тве́рдыя воспою́ му́ченики венцено́сныя. Ио́сиф.

Песнь 1

Ирмо́с:

Го́рькия рабо́ты изба́влься Изра́иль,/ непроходи́мое про́йде, я́ко су́шу,/ врага́ зря потопля́ема,/ песнь я́ко Благоде́телю пое́т Бо́гу,/ чудоде́ющему мы́шцею высо́кою,/ я́ко просла́вися.

Венцы́ сла́вы украша́емии, и Престо́лу Бо́жию предстоя́щий,/ и Боже́ственнаго све́та исполня́емии,/ любо́вию светоно́сную па́мять вашу соверша́ющия/ омраче́ния страсте́й, му́ченицы, изба́вите.

Боже́ственное лю́бяще бла́госла́вие, Бо́жия добро́ты жела́юще,/ жития́ кра́сная отри́нусте и всю си́лу прея́вственно/ и сме́ртию безконе́чную жи́знь, му́ченицы, обрето́сте.

Боже́ственною ре́вностию распаля́еми, огнь нече́стия угаси́ша,/ и свети́льницы, свет сия́юще всем благочести́я пресве́тло,/ яви́шася ве́рою, Ермоге́н и Ми́на велему́дреннии.

Богоро́дичен: Изба́витися, Отрокови́це Всенепоро́чная,/ страсте́й одержа́ния рабо́м Твои́м/ Твоего́ приле́жно моли́ Го́спода и Влады́ку,/ его́же из Твои́х, Пречи́стая, крове́й воплоти́ла еси́,/ нам приобщи́вшагося.

Песнь 3

Ирмо́с:

Пре́жде век от Отца́ рожде́нному нетле́нно Сы́ну/ и в после́дняя от Де́вы/ воплоще́нному безсе́менно,/ Христу́ Бо́гу возопии́м:/ вознесы́й рог наш,/ Свят еси́, Го́споди.

Заре́ю Небе́сною я́сно просвети́вшеся му́ченицы,/ тьму разори́ша и́дольския ле́сти/ и сия́ние нам исцеле́ний облиста́ша,/ песнопою́щим всех Бо́гу:/ свят еси́, Го́споди.

Ме́ртвости жива́го после́дуя Влады́ки,/ Ми́но чу́дне, плесна́ми сокруша́ешися/ и главу́ мучи́теля сокруша́еши врага́,/ утвержда́я но́ги твоя́ на тве́рдем муче́ния пути́,/ му́чениче му́жественнейше.

Пое́т Спа́са Ермоге́н, рука́ми усека́емь,/ свяще́нства оде́жду светле́йшу крове́й омоче́ньми я́сно содела́в/ и подража́тель страда́вшаго пло́тию благода́тию явля́емь.

Богоро́дичен: Еди́ну в жена́х Тя Кра́сный Кра́сную обре́т,/ Плотоно́сец из чре́ва Твоего́ произы́де, Отрокови́це, Христо́с,/ Боже́ственными красота́ми просвеща́я род наш:/ тем Тя почита́ем.

Конда́к, глас 1.

Подо́бен: Лик А́нгельский:

Ми́ну чу́днаго, Ермоге́на Боже́ственнаго и Евгра́фа ку́пно/ свяще́нными сладкопе́нии почти́м вси,/ я́ко почествова́вшия Го́спода, и страда́льчествовавшия за него́,/ и ли́ка Безпло́тных на Небесе́х дости́гшия,/ и чудеса́ точа́щия.

Седа́лен, глас 8.

Подо́бен: Прему́дрости:

Презре́вше сла́ву мирску́ю,/ окрили́вшеся сла́вою Боже́ственною, Ми́на, Ермоге́н же и сла́вный Евгра́ф/ и усе́рдным нра́вом тя́гость претерпе́ша лю́тых муче́ний,/ пло́ти не пощаде́вше./ Те́мже, по кончи́не во глубину́ морску́ю вве́ржени бы́вше,/ напра́вишася к Боже́ственному хоте́нию./ И́мже ве́рою возопие́м:/ моли́те Христа́ Бо́га грехо́в оставле́ние дарова́ти/ чту́щим любо́вию святу́ю па́мять вашу.

Сла́ва, и ны́не, Богоро́дичен:

В напа́сти многоплете́нныя впад от враг ви́димых и неви́димых,/ бу́рею одержи́мь безчи́сленных согреше́ний мои́х,/ и я́ко к те́плому заступле́нию и покро́ву моему́, Чи́стая,/ ко приста́нищу притека́ю Твоея́ бла́гости./ Те́мже, Пречи́стая, из Тебе́ воплоще́нному безсе́менно/ моли́ся приле́жно о всех рабе́х Твои́х,/ непреста́нно моля́щих Ти ся, Богоро́дице Пречи́стая,/ моля́щи его́ при́сно согреше́ний оставле́ние дарова́ти/ воспева́ющим досто́йно сла́ву Твою́.

Крестобогоро́дичен:

А́гнца, и Па́стыря, и Изба́вителя/ А́гница зря́щи на Кресте́,/ восклица́ше, пла́чущи, и, го́рько рыда́ющи, вопия́ше:/ ми́р у́бо ра́дуется, прие́мляй Тобо́ю избавле́ние,/ утро́ба же моя́ гори́т, зря́щи Твое́ распя́тие,/ е́же терпи́ши за милосе́рдие ми́лости./ Долготерпели́ве, Го́споди,/ ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя стра́сти Твоя́.

Песнь 4

Ирмо́с:

Жезл из ко́рене Иессе́ова/ и цвет от него́, Христе́,/ от Де́вы прозя́бл еси́,/ из горы́, Хва́льный, приосене́нныя ча́щи/ прише́л еси́, вопло́щся от Неискусому́жныя,/ Невеще́ственный и Бо́же./ Сла́ва си́ле Твое́й, Го́споди.

Зако́ны возвеща́я светоза́рныя,/ беззако́нно твои́х оче́с избоде́ние, Ми́но, претерпе́л еси́,/ се́рдца очеса́ к Све́ту незаходи́мому име́я приле́жно смотря́ющая/ и поя́ ра́достно:/ сла́ва си́ле Твое́й, Го́споди.

Яви́ся язы́к твой огне́м ду́ха мудре́йше изощре́н, внегда́ отсещи́ся:/ глаго́лаше бо, поя́ Бо́жия чудеса́/ и мучи́теля безгла́сие преводя́/ во благочести́вую сла́ву я́ве Сотво́ршаго.

Вельми́ страсть терпя́,/ нога́ми отсеца́ется Ермоге́н, змии́ную попира́я главу́/ и путь гото́вя нра́вом неукло́нным свиде́тельства,/ вводя́щь к жи́зни Небе́сныя све́тлости.

Неуя́звлену соблюда́ющу ду́шу, Христо́с тебе́ явля́ется,/ твоя́ я́звы, Ми́но, исцеля́я,/ му́жески же терпе́ти тебе́ повелева́я:/ я́ко да тебе́ ра́ди спасе́ние ми́лости хоти́тель всех зря́щих соде́лает.

Богоро́дичен: Жезл из ко́рене Иессе́ева израстти́ла еси́,/ процве́тшая Садоде́лателя всея́ тва́ри,/ увяди́вшаго сады́ непло́днаго зна́ния,/ ве́ру же нам и́стиннейшую всади́вшаго благоче́стно,/ Чи́стая Де́во Всепе́тая.

Песнь 5

Ирмо́с:

Бог Сый ми́ра, Оте́ц щедро́т,/ Вели́каго Сове́та Твоего́ А́нгела,/ ми́р подава́юща, посла́л еси́ нам;/ тем, Богоразу́мия к све́ту наста́вльшеся,/ от но́щи у́тренююще,/ славосло́вим Тя, Человеколю́бче.

Что всуе мяте́шися? –/ вопия́ху ку́пно судии́ пребеззако́нному му́ченицы, –/ си́лу подая́й предстои́т нам,/ Еди́н в кре́пости непобеди́мь Сый,/ его́же ра́ди ра́ны терпи́м крепча́йше.

Бя́ше внеза́пное преложе́ние чу́днаго Ермоге́на ко Го́споду:/ ба́нею бо очища́ется и судо́м Боже́ственным архиере́йства свет восприе́млет,/ уче́ньми озаря́яй в нощи́ лю́тых су́щия.

Вити́й оста́вльше неиску́сный ум,/ непи́смяников плете́ньми улови́стеся,/ умудри́вшу Ду́ху вы, я́ко и́стинно му́ченицы,/ и ко вся́кой мук бу́ри си́льны в кре́пости соде́лавшу ве́рою.

Богоро́дичен: Святы́х А́нгел, Де́во Чи́стая, преиму́щи яви́лася еси́,/ ро́ждшая Сове́та Вели́каго А́нгела – Бо́га Емману́ила,/ челове́ки Небе́сными Свои́м сни́тием соде́лавша, Отрокови́це,/ за благоутро́бие неисповеди́мое.

Песнь 6

Ирмо́с:

Из утро́бы Ио́ну младе́нца изблева́ морски́й зверь,/ якова́ прия́т;/ в Де́ву же все́льшееся Сло́во/ и плоть прие́мшее про́йде, сохра́ншее нетле́нну:/ его́же, бо не пострада́ нетле́ния,/ Ро́ждшую сохрани́ невре́жде́нну.

Спасл еси́ Ио́ну от зве́ря тридне́внаго,/ образу́юща погребе́ние твое́, Всеси́льне;/ телеса́ же му́ченик, в пучи́ну вве́ржена,/ напра́вил еси́ к тиша́йшему приста́нищу погребе́ния,/ иде́же твое́ Боже́ственное хоте́ние, в на́ше ве́рных снабде́ние.

Телеса́ ваша, непобеди́мии му́ченицы,/ глубина́ невре́дно су́ши подае́т,/ предводя́щим Небе́сным А́нгелом, блаже́ннии,/ и всем поло́жение пове́дающим ва́ше,/ су́щее исцеле́ний источе́ние и страсте́й дуще́вных избавле́ние.

Чи́ни А́нгельсти́и ва́шему удиви́шася терпе́нию,/ ка́ко безпло́тнаго с те́лом победи́сте, му́ченицы, зми́я/ и побе́ды венцы́ увязо́стеся, Престо́лу Бо́жию предстоя́ще и Боже́ственными заря́ми освеща́еми.

Богоро́дичен: Преста́ Тобо́ю, Де́во, смерть,/ Жи́знь бо – Христа́ – родила́ еси́,/ да́рующаго чи́сте ве́рующим в того́ беземе́ртие и Боже́ственное ра́дование;/ сему́, Всесвята́я, моли́ся/ изба́вити от бед рабы́ Твоя́.

Конда́к, глас 4.

Подо́бен: Вознесы́йся:

Добропе́сненный глас твои́х слове́с,/ Ермоге́на из глубины́ поги́бели возве́д,/ поста́ви на ка́мени жи́зни,/ отону́дуже и Евгра́ф, царя́ обличи́в,/ ра́дуяся, посека́ется в сла́вную главу́,/ но приле́жно моли́, Ми́но, спасти́ся всем, любо́вию чту́щим тя.

И́кос:

Житие́ твое́ Боголе́пно, и сла́дко твое́ сло́во,/ мно́гое дерзнове́ние, Ми́но, и уче́ние твое́,/ и му́жество чу́дно бя́ше к беззако́нником,/ показу́яся тве́рдо, ника́коже убоя́вся;/ но, наказу́я, вся научи́л еси́ в Трех Ли́цех покланя́тися Бо́гу Еди́ному/ и служи́ти несомне́нною мы́слию,/ и, па́ки нас ра́ди ны́не в после́дняя Сы́на Бо́жия плоть прие́мша,/ его́же испове́дуя, улови́л еси́ Ермоге́на./ Тем с ним моли́ спасти́ся всем,/ любо́вию чту́щим тя.

Песнь 7

Ирмо́с:

О́троцы, благочести́ю совоспита́ни,/ злочести́ваго веле́ния небре́гше,/ о́гненнаго преще́ния не убоя́шася,/ но, посреди́ пла́мене стоя́ще, поя́ху:/ отце́в Бо́же, благослове́н еси́.

Глас пра́зднующих чи́сте, иде́же и шум слы́шится,/ ра́достною душе́ю, страда́льцы, всели́стеся,/ весе́лия исполня́еми и пою́ще:/ отце́в Бо́же, благослове́н еси́.

Сла́дка мне, вопия́ше Ермоге́н, е́юже умира́ю, смерть:/ мне е́же жи́ти есть Христо́с,/ е́же умре́ти же – приобре́тение безме́рно;/ да отсеку́тся мои́ у́ды, любо́вию пою́щу:/ отце́в Бо́же, благослове́н еси́.

Му́дростию тверде́йшею в живу́щих тебе́ сама́го написа́л еси́ Кни́зе,/ о Евгра́фе му́дре,/ главе́ бо отсе́ченей, я́коже на колесни́цу, твое́ю всел еси́ кро́вию/ и к невече́рнему́ Све́ту преста́вился еси́.

Богоро́дичен: Не опали́в Твоего́ чре́ва, не поколеба́в де́вства зна́мений,/ вопло́щшееся Сло́во из Тебе́ про́йде,/ подая́ нетле́ние и жи́знь нам, Отрокови́це, пою́щим:/ отце́в Бо́же, благослове́н еси́.

Песнь 8

Ирмо́с:

Чу́да преесте́ственнаго/ росода́тельная изобрази́ пещь о́браз:/ не бо, я́же прия́т, пали́т ю́ныя,/ я́ко ниже́ огнь Божества́ – Де́вы,/ в Ню́же вни́де утро́бу./ Тем, воспева́юще, воспое́м:/ да благослови́т тварь вся Го́спода/ и превозно́си́т во вся ве́ки.

Па́дает пред нога́ми твои́ми суему́дренный, попира́емь, Ми́но Богому́дре,/ оче́с бо лиши́в тя и язы́ка,/ твоего́ по́мысла не поколеба́ стоя́ния лу́чшаго./ Те́мже ра́достно взыва́л еси́:/ да благослови́т тварь вся Го́спода и превозно́си́т во вся ве́ки.

Егда́ суро́вейшим произво́лением/ обои́х рук и ног тя мучи́тель лиши́ пребезу́мный,/ тогда́, му́дре, натрижне́ния жела́я, Ермоге́не,/ Христу́ песнопе́л еси́, ра́дуяся:/ да благослови́т тварь вся Го́спода и превозно́си́т во вся ве́ки.

Пою́ твоя́, Ми́но, Боже́ственная страда́ния,/ чту Ермоге́новы по́двиги, покланя́юся моще́м,/ воспева́ю ра́ны, ю́зы, гоне́ния и смерть,/ и́миже к жи́зни взя́стеся, вопию́ще:/ да благослови́т тварь вся Го́спода и превозно́си́т во вся ве́ки.

Богоро́дичен: Ста́мну Тя, ма́нну иму́щую Божества́, позна́хом, Отрокови́це,/ киво́т, и трапе́зу, и све́щник,/ Престо́л Бо́жий, и пала́ту, и мост,/ преводя́щь к Боже́ственней жи́зни воспева́ющия:/ да благослови́т тварь вся Го́спода и превозно́си́т во вся ве́ки.

Песнь 9

Ирмо́с:

О́браз чи́стаго рождества́ Твоего́/ огнепали́мая купина́ показа́ неопа́льная;/ и ны́не на нас напа́стей свире́пеющую угаси́ти, мо́лимся, пещь,/ да Тя, Богоро́дице,/ непреста́нно велича́ем.

Се светоза́рное торжество́ светови́дных му́чеников всем просия́,/ озаря́ющее вселе́нныя концы́ и душ слепоту отъе́млющее;/ стеце́мся преусе́рдно, свяще́ние почерпе́м.

И́хже благ получи́сте Небе́сныя сла́вы, ея́же сподо́бистеся,/ ве́рою све́тлую па́мять ва́шу чту́щим, я́ко Бо́гу предстоя́ще всегда́,/ получи́ти моли́теся, великому́ченицы, мо́лимся.

Те́ло и ду́шу принесо́сте Творцу́ всех, же́ртву непоро́чну,/ всесожже́гшеся огне́м муче́ний, и му́чеников лико́м причи́слистеся,/ Све́том чисте́йшим просвеща́еми, всехва́льнии.

Взя́тся, ко оби́телем вселя́яся, светови́дный му́чеников лик Боже́ственный/ и предстои́т Отцу́, Сы́ну же и Ду́ху, наслажда́яся я́сно обоже́ния,/ Ми́на со Ермоге́ном и Евгра́фом, Богому́дрии.

Богоро́дичен: Сия́ние блиста́ния Рождества́ Твоего́ отри́нувшееся/ естество́ на́ше, Всенепоро́чная, ви́де/ и из но́щи неве́дения изба́вися и страсте́й те́мнаго смуще́ния./ Тем Тя я́ко вино́вну спасе́ния на́шего чтим.

Свети́лен.

Подо́бен: Не́бо звезда́ми:

Вити́йскими твои́ми словесы́ и Боже́ственными чудесы́, Ми́но,/ сострада́льца привле́кл еси́ свяще́ннаго Ермоге́на,/ с ни́мже тя и со Евгра́фом ны́не прера́достно бла́гохва́лим.

Сла́ва, и ны́не, Богоро́дичен:

Гора́, ю́же прови́де дре́вле Боже́ственный Авваку́м,/ присе́нная и часта́ Ты показа́лася еси́, Де́во,/ и Тя Дави́д имену́ет усыре́нную и ту́чную.

НА ЛИТУРГИ́И

Проки́мен, глас 4: Святы́м, и́же суть на земли́ его́,/ удиви́ Госпо́дь вся хоте́ния Своя́ в них.

Стих: Предзре́х Го́спода предо мно́ю вы́ну:

Апо́стол ко Ефесе́ем, зача́ло 233.

Аллилу́ия, глас 4: Воззва́ша пра́веднии,/ и Госпо́дь услы́ша их.

Стих: Мно́ги ско́рби пра́ведным:

Ева́нгелие от Луки́, зача́ло 106. Прича́стен: Ра́дуйтеся, пра́веднии:

(Слу́жбу зри 4 сентября).

Тропа́рь, глас 3:

Святи́телю Христу́ Бо́гу возлю́бленне,/ пра́вило ве́ры и о́браз милосе́рдия лю́дем был еси́,/ бде́нием же, посто́м и моли́твою,/ я́ко свети́льник пресве́тлый, просия́л еси́/ и просла́влен от Бо́га яви́лся еси́:/ телом у́бо в нетле́нии почива́я,/ ду́хом же Престо́лу Бо́жию предстоя́,/ чудеса́ пресла́вная источа́вши./ моли́ Христа́ Бо́га,/ да утверди́т нас в Правосла́вии и благочести́и/ и спасе́т ду́ши на́ша.

Конда́к, глас 8:

Многоразли́чныя по́двиги жития́ твоего́ кто испове́сть?/ многообра́зныя ми́лости Бо́жия тобо́ю явле́нныя кто исчи́слит?/ Дерзнове́ние же твое у Пречи́стыя Богоро́дицы и Всеще́драго Бо́га до́бре ве́дуще,/ во умиле́нии серде́чнем зове́м ти:/ не лиши́ и нас твоей по́мощи и заступлени́я,/ святи́телю Христо́в и чудотво́рче Иоаса́фе.

НА МАЛОЙ ВЕЧЕ́РНИ

На Го́споди воззва́х: поста́вим стихи́ры на 4, глас 1.

Подо́бен: Прехва́льнии му́ченицы:

Красу́йся, Це́ркве Бо́жия, свята́я митропо́лие,/ ликовству́й, Сербских наро́дов Богосо́бранная чето́,/ зря́ще вещь ди́вну и пресла́вну,/ лежа́щу во святе́м хра́ме Бо́жия Ма́тере,/ мо́щи сего́ блаже́ннаго Иоа́нна де́спота,/ исцеле́ния подаю́щия всем, приходя́щим с ве́рою к нему́,/ любо́вию почита́ющим и Христа́ усе́рдно воспева́ющим.

Весели́ся, свята́я митрополие,/ хра́ме Бо́жия Ма́тере,/ иму́щи в себе́ многоце́нное сокро́вище,/ мо́щи новаго сего́ на́шего предста́теля и моле́бни ка к Бо́гу, благочести́ваго сего́ Иоа́нна, и́же вы́ну предстои́т ему́,/ и зрит неизрече́нную его́ сла́ву,/ и мо́лится при́сно/ дарова́ти душа́м на́шим ми́р и ве́лию ми́лость.

Возра́довашася пра́ведных ли́цы,/ удиви́шася наро́ды Се́рбстии,/ зря́ще сию́ пра́ведную ду́шу,/ я́ко многосве́тлую лучу́, от земли́ на не́бо возноси́му/ и покланя́ющуся Боже́ственному Престо́лу, мо́лимся:/ и та́мо о нас не преста́й моля́ся Благоде́телю Бо́гу/ дарова́ти душа́м на́шим ми́р и ве́лию ми́лость.

Сла́ва, глас 6:

Прииди́те, Богосо́бра́ннии собо́ри,/ кра́сный ли́че и́ноческий,/ прииди́те и вси Се́рбстии наро́ди,/ ста́рии же и ю́нии,/ бога́тии и ни́щии,/ стеце́мся в це́рковь Бо́жия Ма́тере,/ иде́же лежи́т многоцеле́бное те́ло пра́веднаго Иоа́нна,/ све́том вселе́нную озаря́ющее./ Сей бо блаже́нный разли́чная дарова́ния исцеле́ний,/ я́ко и́скры, испуща́ет./ Тем и мы возопие́м к нему́, си́це глаго́люще:/ Ра́дуйся, благочести́я ца́рская о́трасле,/ ско́рый наш помо́щниче и те́плый засту́пниче,/ я́ко вели́каго да́ра сподо́бился еси́ зде и во о́ном ве́це./ Те́мже мо́лимся:/ сподо́би и нас теле́снаго здра́вия/ и душе́внаго спасе́ния моли́твами твои́ми, преблаже́нне.

И ны́не, Богоро́дичен:

Чи́стая, Еди́на Бо́га ро́ждшая,/ душе́вных прегреше́ний изба́ви мя, Де́во, молю́ся,/ и спаси́ мя, умерщвле́ннаго:/ Ты бо наде́жда еси́ ненаде́ющихся/ и По́мощница ми́ра,/ иму́щи, е́же мощи́, Отрокови́це, я́ко Ма́ти Госпо́дня,/ не презри́ мое́ моле́ние,/ ниже́ оста́ви, всегосподова́нная Влады́чице,/ но, я́ко Благолюби́вая, спаси́ мя.

На стихо́вне стихи́ры, глас 2.

Подо́бен: До́ме Евфра́фов:

Дом Пресвята́го и Животворя́щаго ду́ха/ поспеше́нием и благода́тию/ яви́лся еси́, Иоа́нне,/ те́мже и мы, соше́дшеся,/ тому́ воспои́м песнь.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Ра́дуйся, царе́й правосла́вных похвало́,/ во́инов соблю́дение,/ ва́рваров побежде́ние,/ сиро́т и вдови́ц и люде́й твои́х/ засту́пниче те́плый.

Стих: Насажде́ни в до́му́ Госпо́дни,/ во дво́рех Бо́га на́шего процвету́т.

Приими́ ны́не пе́ние/ люде́й твои́х, Богоблаже́нне,/ и моля́щимся ти/ у Христа́ испроси́ от грехо́в избавле́ние,/ да ублажа́ют тя, приснопа́мятне.

Сла́ва глас 3:

Кто, ны́не зря, не удиви́тся/ Богодарова́нному тебе́ восприя́тию, прехва́льне?/ Блаже́нна бо имену́ю тя,/ я́ко блаже́нство насле́довал еси́/ и измла́да за́поведи Христа́ Бо́га испо́лнил еси́,/ того́ неотло́жно взыску́я,/ сиро́т пита́тель, пле́нных свободи́тель был еси́,/ тем вшел еси́ в ра́дость Го́спода твоего́./ ему́же со а́нгелы предстоя́,/ моли́ о ве́рою творя́щих па́мять твою́.

И ны́не, Богоро́дичен:

Под Твое́ держа́вное предста́тельство прибега́ющий при́сно,/ Богороди́тельнице Де́во,/ страсте́й мучи́тельства и лука́вых помышле́ний избавля́ются./ Те́мже рабы́ Твоя́ спаси́ от вся́каго вре́да и тли,/ благоприя́тною Твое́ю моли́твою изба́вивши,/ я́ко Благосе́рдна,/ да ве́рою вси благослови́м держа́ву твою́, Влады́чице.

Тропа́рь зри на вели́цей вече́рни

НА ВЕЛИЦЕЙ ВЕЧЕ́РНИ

Стихи́ры, глас 2.

Подо́бен: Ки́ими похва́льными:

Ки́ими златокова́нными венцы́/ увязе́м Иоа́нна, блаже́ннаго новопроя́вленнаго,/ благочести́я побо́рника, свети́льника незаходи́маго,/ со́лнце ми́рови, пра́вды пра́вило,/ весе́лие земли́ Се́рбския/ и оби́тели свое́й све́тлое украше́ние,/ си́рых и оби́димых засту́пника,/ столпа́ непоколеби́маго?/ Его́же ра́ди шата́ния враго́в Христо́с низложи́,/ име́яй ве́лию ми́лость.

О, ка́ко недосто́йными устна́ми/ воспое́м Иоа́нна прему́драго,/ ева́нгельских слове́с подража́теля,/ и роди́телем свои́м в послуша́нии венца́ светлосия́тельнаго,/ и ста́ду своему́ по кончи́не неотъе́млема назира́теля,/ Всечестны́я Тро́ицы моли́твенника,/ чуде́с мно́гих пода́теля оби́льна?/ Мо́лится бо о душа́х на́ших.

Све́тлое украше́ние це́ркви Бо́жия Ма́тере/ твоя́ мо́щи яви́шася, преблаже́нне Иоа́нне,/ сия́ют бо па́че зла́та и сапфи́ра,/ созыва́юще нас на духо́вное торжество́,/ и просвеща́ет ду́ши и телеса́ всех, ве́рою приходя́щих к нему́,/ и мо́лится Го́сподеви поми́ловати лю́ди своя́.

И́ны стихи́ры, глас 8.

Подо́бен: О, пресла́внаго чудесе́:

О, пресла́внаго чудесе́!/ Ка́ко многовре́менное тече́ние лет/ не истли́ многоцеле́бное сокро́вище,/ те́ло твое́, преблаже́нне Иоа́нне?/ Бог, его́же от младе́нства возлюби́л еси́,/ Той тя ны́не прославля́ет вои́стинну в похвалу́ и утвержде́ние ве́ры на́шея./ Мы же, обстоя́ще ра́ку моще́й твои́х,/ зря́ще зна́мения и чудеса́,/ дивя́щеся, вопие́м:/ о, кра́снаго твоего́ дарова́ния, свя́те,/ и́мже Христо́с одари́л тя есть, я́ко Благоутро́бен.

О, какова́го дарова́ния от Спа́са причасти́хомся/ и обогати́хомся вои́стинну!/ Святи́телие и вси лю́дие, бога́тии и ни́щии, ра́дуйтеся,/ и све́тлое днесь торжество́ пра́зднуим/ о́бщаго на́шего засту́пника, Иоа́нна пра́веднаго./ Воспо́йте, пусты́ннии безмо́лвницы/ и прости́и лю́дие./ О, неизрече́ннаго Твоего́ милосе́рдия, Влады́ко Го́споди,/ и́мже просла́вил еси́ Тебе́ сла́вящия.

О, пресла́внаго твоего́ восприя́тия, свя́те,/ е́же от Бо́га получи́л еси́./ Кто, зря, не удиви́тся в тебе́, блаже́нне Иоа́нне?/ С роди́тели бо твои́ми в ра́йстей пи́щи весели́шися,/ я́ко отню́дь невозмо́же тебе́, блаже́нне,/ ни цвет ю́ности, ни земна́го во́инства попече́ние/ я́же к Бо́гу любве́ отлучи́ти,/ пра́вдою бо и ми́лостынями украша́лся./ О, кра́снаго твоего́ селе́ния, свя́те,/ и́мже тя Христо́с Бог прия́т, веселя́щася.

Сла́ва, глас 6:

Ра́дуйся, Са́вво святи́телю,/ Правосла́вия наста́внике и чистоте́ учи́телю./ Ра́дуйся, Симео́не, ко́рене благочести́я./ Ра́дуйся, Стефа́не де́споте,/ из тебе́ бо произы́де красе́н плод духо́внаго наслажде́ния,/ и́мже пита́ется Це́рковь Христо́ва и наслажда́ется./ Ра́дуйся, Макси́ме преблаже́нне,/ святи́телей удобре́ние,/ и́ноков и бельце́в и всех ве́рных све́тлое просвеще́ние./ Ра́дуйся, Ангели́но преподо́бная, лозо́ честна́я,/ от Тебе́ бо прозябе́ нам грозд виногра́да спасе́ннаго,/ от него́же пита́ющеся, услажда́ем ду́ши на́ша./ Ра́дуйся, Иоа́нне,/ це́ркве Богома́тере све́тлое украше́ние/ и земли́ Се́рбския утвержде́ние./ Ра́дуйся, стра́нных и безкро́вных покрови́телю./ Ра́дуйся, вдови́ц и сиро́т пита́телю./ Ра́дуйся, похвало́ ве́ры на́шея/ и те́плый моли́твениче о душа́х на́ших.

И ны́не, Богоро́дичен: Кто Тебе́ не ублажи́т:

Вход, проки́мен дне и чтения.

При́тчей чте́ние (глава 3):

Сы́не, мои́х зако́нов не забыва́й,/ глаго́лы же моя́ да соблюда́ет твое́ се́рдце,/ долготу́ бо жития́, и ле́та жи́зни,/ и ми́р приложа́т тебе́./ Ми́лостыни и ве́ры да не оскудева́ют ти,/ обложи́ же я о твое́й вы́и,/ напиши́ я на скрижа́ли се́рдца твоего́,/ и обря́щеши благода́ть, и промышля́й до́брая пред Го́сподем Бо́гом и челове́ки./ Бу́ди, наде́яся всем се́рдцем на Бо́га,/ о твое́й же прему́дрости не возноси́ся,/ во всех путе́х твои́х позна́вай ю,/ да исправля́ет пути́ твоя́,/ нога́ же твоя́ да не преткне́тся,/ не бу́ди му́дрый у себе́,/ бо́йся же Бо́га и уклоня́йся от вся́каго зла./ Тогда́ исцеле́ние бу́дет телеси́ твоему́/ и попече́ние косте́м твои́м./ Чти Го́спода от твои́х пра́ведных трудо́в/ и нача́тствуй Ему́ от твои́х плодо́в пра́вды./ Да напо́лнятся сокро́вища твоя́ насыще́ния пшени́цы,/ вино́ же точи́ла твоя́ да источа́ют.

При́тчей чте́ние (глава 10):

Сын прему́дрый весели́т отца́,/ сын же безу́мный опечаля́ет ма́терь./ Не по́льзуют сокро́вища беззако́нных,/ пра́вда же изба́вит от сме́рти./ Не убие́т гла́дом Госпо́дь ду́шу пра́веднаго,/ живо́т же нечести́вых отврати́т,/ у́бо́жество му́жа смиря́ет,/ руки́ же му́жественных обогаща́ются,/ сын нака́занный му́дрый бу́дет,/ безу́мный же слуго́ю употреби́тся./ Спасе́ся от зно́я сын у́мный,/ ветротле́нен же быва́ет в жа́тву сын беззако́нный./ Благослове́ние Госпо́дне на главе́ пра́веднаго,/ уста́ же нечести́вых покры́ет плач безвре́менный./ Па́мять пра́веднаго с похвала́ми,/ и́мя же нечести́вых угаса́ет./ Му́дрый се́рдцем прии́мет за́поведи,/ непокро́венный же, устна́ма остроптева́я, поползне́тся./ и́же ходи́т про́сто, ходи́т, наде́яся,/ развраща́яй же пути́ своя́ позна́ется./ Намиза́яй о́ком с ле́стию/ собира́ет муже́м печа́ли,/ облича́яй же со дерзнове́нием миротвори́т./ Исто́чник жи́зни в руце́ пра́веднаго,/ уста́ же нечести́вых покры́ет па́губа./ Нена́висть воздвиза́ет свар,/ вся же нелюбопри́тельныя покрыва́ет любо́вь./ и́же от усте́н произно́сит прему́дрость,/ жезло́м бие́т му́жа безсе́рдна./ Му́дрый скры́ет чу́вство,/ уста́ же безсту́днаго приближа́ются сокруше́нию,/ стяжа́ние бога́тых град тве́рдый,/ сокруше́ние нечести́вых убо́жество./ дела́ пра́ведных живо́т творя́т,/ пло́дове же нечести́вых грехи́. Пути́ жи́зни храни́т нака́зание,/ нака́занием же необличе́нный причаща́ется./ Покрыва́ют вражду́ устны́ пра́ведныя,/ износя́щии же укори́зны немы́сленейшии суть./ От многосло́вия не избежи́ши греха́,/ щадя́й же устне́, разу́мен бу́деши,/ сребро́ раждеже́нное язы́к пра́веднаго,/ се́рдце же нечести́ваго исче́знет./ Устне́ пра́ведных ве́дят высо́кая,/ безу́мнии же в ску́дости сконча́ются./ Благослове́ние Госпо́дне на главе́ пра́веднаго,/ сие́ обогаща́ет,/ и не приложи́тся ему́ печа́ль в се́рдцы.

Прему́дрости Соломо́новы чте́ние (глава 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ немноголе́тна, ниже́ в числе́ лет исчита́ется./ Седи́на же есть му́дрость челове́ком, и во́зраст ста́рости житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше, ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На литии́ стихи́ры, глас 2. Самогла́сны:

Лику́й ны́не и взыгра́й, но́вый Изра́илю,/ я́коже иногда́ Богооте́ц проро́к,/ та́ко и мы днесь, ра́ки ва́ша обстоя́ще многоцеле́бныя,/ не скрижа́ли ка́менныя в себе́ иму́щия,/ но сокро́вища четверосия́тельная, заря́ми па́че со́лнца осиява́юща/ и вся чу́вствия на́ша проходя́щая/ воня́ми ми́рными облагоуха́ющая./ Оте́ц с сыно́м, ма́ти с ча́дом/ прославля́ют Бо́га, просла́вльшаго их./ Те́мже усе́рдно возопие́м к ним:/ благи́и наши засту́пницы,/ прииди́те ко Христу́ Бо́гу,/ о нас моля́щеся, да спасе́т ду́ши на́ша.

Глас 3:

Прииди́те, славеносе́рбскаго наро́да собо́ри,/ прииди́те, ма́тери с ча́ды,/ припаде́м ма́тери на́шей, ско́рой по́мо́щнице,/ преподо́бной А́нгели́не,/ и пе́сненными похвала́ми воспои́м ю,/ я́ко в после́днее время в ма́терех просла́вися,/ таково́е сокро́вище от утро́бы свое́й произне́сши,/ и́мже мы днесь обога́ти́хомся,/ многоцеле́бными телесы́ Макси́ма блаже́ннаго и Иоа́нна преподо́бнаго,/ и возопии́м к ним:/ о прехва́льнии,/ моли́теся Христу́ Бо́гу о нас, да спасе́т ду́ши на́ша.

Глас 4:

Весели́ся и лику́й, Сирмие со окре́стными стра́нами,/ днесь бо предлага́ет нам трапе́зу духо́вную/ те́плый наш засту́пник Иоа́нн де́спот,/ не бра́шно и питие́, ни сне́дей тли́тельных иму́щи,/ но слаждча́е ме́да благоуха́нное его́ те́ло./ К нему́ же прини́кнувше, чу́вства на́ша услади́м,/ душе́вная вку́пе и теле́сная,/ почерпа́юще вино́ весе́лия от исто́чника приснотеку́щаго,/ и мо́лимся ему́:/ да помо́лит Христа́ Бо́га и спасе́т ду́ши на́ша.

Глас 6:

Богоприя́тне пребога́те блаже́нне Иоа́нне,/ от ложе́сн порожде́ние свя́то,/ Бо́гови нарече́н еси́,/ благи́ми де́лы све́тло украси́лся еси́,/ ми́лостынями, чистото́ю и пра́вдою/ сосу́д Свята́го ду́ха был еси́,/ и́мже де́йствуеши пресла́вная чудеса́/ ве́рою приходя́щим к ра́це моще́й твои́х/ и мо́лишися о душа́х на́ших.

Глас 7:

Иоа́нне Боговенча́нне,/ ты яви́лся еси́ царе́й держа́ва светоно́сна,/ всех похвала́ всече́стна,/ христиа́н всех побо́рник непобеди́м,/ о ни́хже жив сый, ду́шу твою́ полага́я си́це,/ и по сме́рти неотсту́пно оте́чество твое́ сохраня́й/ и правосла́вным воем на́шим на ага́ряны посо́бствуй/ моли́твами твои́ми.

Глас 8:

Красна́ похвала́ еси́ и весе́лие земли́ Се́рбския/ и украше́ние, святы́й хра́ме Бо́жия Ма́тере,/ име́я в себе́ мо́щи благочести́ваго Стефа́на/ и Макси́ма блаже́ннаго,/ преподо́бныя Ангели́ны, Иоа́нна пра́веднаго./ Тем ра́достно сей пра́здник духо́вно восхва́лим,/ и пе́сньми почти́м,/ и мо́лимся я́ко те́плым на́шим засту́пником,/ да мо́лятся о душа́х на́ших.

Сла́ва, глас 5:

Воструби́м трубо́ю пе́сней/ и гла́сом ра́достнаго весе́лия пра́здник сей воспои́м,/ свы́ше бо Небеса ́ра́дуются/ и земля́ весели́тся,/ челове́ком же се́рдца́ игра́ют./ Лю́дие, стецы́теся, друголюби́е показу́юще,/ рабы́, Влады́ку воспо́йте./ Да дивя́тся язы́цы новода́нней нам благода́ти./ Да красу́ется свята́я Це́рковь Бо́жия Ма́тере,/ име́ющи в нача́ле Симео́на и Са́вву утвержде́ние,/ напосле́док же Стефа́на де́спота/ и преподо́бную Ангели́ну,/ я́же породи́ста нам ро́ждие виногра́да спасе́ннаго,/ Макси́ма блаже́ннаго и Иоа́нна пра́ведна./ К ним у́бо припаде́м со слеза́ми и возопие́м:/ о те́плии наши засту́пницы/ и ско́рии помо́щницы,/ убеди́те роди́тели своя́/ и вку́пе умоли́те Влады́ку Христа́/ мона́хом и бельце́м, ста́рым и ю́ным,/ му́жем и жена́м/ душа́м спасе́ние и тела́м здра́вие дарова́ти/ и ве́лию ми́лость.

И ны́не, Богоро́дичен:

Храм и дверь еси́,/ пала́та и престо́л Царе́в,/ Де́во Всечестна́я,/ Е́юже Изба́витель мой, Христо́с Госпо́дь,/ во тьме спя́щим яви́ся,/ Со́лнце Сый пра́вды,/ просвети́ти хотя́,/ я́же созда́ по о́бразу Своему́ руко́ю Свое́ю./ Те́мже, Всепе́тая,/ я́ко ма́тернее дерзнове́ние к Нему́ стяжа́вшая,/ непреста́нно моли́ спасти́ся душа́м на́шим.

На стихо́вне стихи́ры, глас 1.

Подо́бен: Небе́сных чино́в:

Па́че со́лнечныя лучи́ просия́л еси́, преблаже́нне Иоа́нне,/ Се́рбския земли́ свети́ло яви́лся еси́,/ зна́меньми же и чудесы́ просвеща́еши лю́ди твоя́./ Тем вси, соше́дшеся, Христа́ воспое́м,/ спаса́ющаго нас от бед моли́твами твои́ми, свя́те.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Све́том Боже́ственным облиста́я,/ чудоде́йствуеши непреста́нно:/ Це́рковь твою́ зна́меньми уясня́еши,/ и лю́ди твоя́ от напа́стей избавля́еши,/ и ра́достию весели́ши./ И ны́не Христа́ Бо́га моли́, всехва́льне Иоа́нне,/ от бед изба́витися душа́м на́шим.

Стих: Насажде́ни в дому́ Госпо́дни,/ во дворе́х Бо́га на́шего процвету́т.

Земля́ ва́ша Сирмия/ и лик Богосо́бранный,/ мона́си и бельцы́ чудеса́ твоя́ вселе́нней возвеща́ют, преблаже́нне,/ и свята́я Це́рковь Бо́жия Ма́тере, крася́щися,/ воспева́ет велехва́льными пе́сньми./ Христо́с бо тя свети́льника лю́дем твои́м дарова́,/ просвеща́юща и освяща́юща ду́ши на́ша.

Сла́ва, глас 6:

Прииди́те ны́не, благоимени́тии собо́ри,/ кра́сный ли́че и́ноческий/ с благочести́выми людьми́,/ вку́пе же и святи́тели с христолюби́вым мно́жеством во́инственных чино́в,/ све́тло воспои́м пе́сньми/ новода́нней нам благода́ти/ ско́раго предста́теля и те́плаго засту́пника на́шего,/ Це́ркве Бо́жия Ма́тере и украше́ние,/ и и́ноком ра́дование,/ и земли́ Се́рбския окормле́ние,/ прииди́те, и припаде́м ему́, моля́щеся,/ я́ко да убеди́т роди́тели своя́,/ да предста́нут Влады́це Христу́, о нас моля́щеся,/ во е́же и нам сподо́битися весе́лия ве́чнаго.

И ны́не, Богоро́дичен: Творе́ц и Изба́витель мой, Пречи́стая:

На благослове́нии хлебов тропа́рь, глас 4:

Ди́вен, творя́й пресла́вная чудеса́/ и прославля́яй по кончи́не сла́вящия Тя,/ нетле́нная телеса́ их явля́я/ и чудоде́йствии лю́ди обогаща́я/ во сла́ву свята́го И́мене Своего́,/ дарова́вый нам те́ло уго́дника Своего́ Иоа́нна,/ моля́щагося о душа́х на́ших.

И Богоро́дице Де́во:

НА У́ТРЕНИ

По 1-м стихосло́вии седа́лен, глас 4.

Подо́бен: Удиви́ся Ио́сиф:

Красу́йся и лику́й, свята́я це́ркви Бо́жия Ма́тере,/ в не́йже лежи́т пречестно́е те́ло Иоа́нна пра́веднаго/ и всем, к нему́ приходя́щим, ми́лостивно подае́т разли́чная исцеле́ния./ Сего́ ра́ди и мы вопие́м ему́:/ моли́твами, свя́те, твои́ми/ исцели́ неду́ги и боле́зни на́ша/ и от вся́кия вражды́ нас изба́ви и искуше́ний,/ да ве́рою и любо́вию па́мять твою́ почита́ем.

Сла́ва, и ны́не, Богоро́дичен:

Удиви́ся Ио́сиф, е́же па́че естества́ зря и внима́ше мы́слию,/ и́же на руно́ дождь,/ в безсе́менном зача́тии Твое́м, Богоро́дице, купину́, огне́м неопали́мую, жезл Ааро́нов прозя́бший,/ и, свиде́тельствуя, обру́чник Твой и храни́тель свяще́нником взыва́ше: Де́ва ражда́ет и по рождестве́ па́ки Де́вою пребыва́ет.

По 2-м стихосло́вии седа́лен, глас 5.

Подо́бен: Собезнача́льное Сло́во:

Я́ко луча́ светоза́рная, от за́пада прише́д,/ вселе́нную просвети́л еси́ и лю́ди оте́чества твоего́ расточе́нныя собра́л еси́,/ пра́вдою и ми́лостынею Святы́я Тро́ицы в себе́ дом сотвори́л еси́;/ сего́ ра́ди и по успе́нии твое́м от мно́гих лет обрето́шася во гро́бе нетле́нны мо́щи твоя́./ Тем же и мы, припа́дающе, мо́лимся:/ моли́ Христа́ Бо́га грехо́м оставле́ние пода́ти служи́телем твои́м,/ прославля́ющим па́мять твою́.

Сла́ва, и ны́не, Богоро́дичен:

Неискусобра́чная Неве́сто, Присноде́во,/ со преподо́бными и пра́ведными восхваля́ем Тя,/ я́ко Тобо́ю нам вели́чия сотвори́ Сын Твой и Бог наш,/ и́же в ложесна́ Твоя́ вмести́тися благоизво́ли,/ да от ле́сти свободи́т род наш.

По полиелеи седа́лен, глас 8.

Подо́бен: Повеле́нное та́йно:

От младых ногтей произбра́ тя Госпо́дь в Небе́сное селе́ние, благоро́дне Иоа́нне,/ от Вседержи́теля Бо́га нетле́нныя по́чести восприя́л еси́/ и, осия́н еси́ от него́ Боже́ственным светозаре́нием,/ вы́ну насыща́ешися ра́дости и весе́лия,/ те́мже моли́ся за твое́ оте́чество и за вся лю́ди, в правосла́вии живу́щия/ и твоя́ мо́щи ве́рою почита́ющия.

Сла́ва, и ны́не, Богоро́дичен:

Со́лнца разу́мнаго родила́ еси́, Пречи́стая,/ от него́же вся ви́димая и неви́димая просвеща́ются/ и те́рние грехо́вное искоренива́ется./ Тем и аз, убо́гий и недосто́йный раб Твой, молю́ся Ти:/ просвети́ мрак души́ моея́/ и сподо́би получи́ти ми́лость в День стра́шнаго испыта́ния/ Твои́ми ма́терними к Нему́ моли́твами.

Степе́нна 1-й антифо́н 4-го гла́са. Проки́мен, глас 4: Честна́ пред Го́сподем смерть преподо́бных его́.

Стих: Что возда́м Го́сподеви о всех, я́же воздаде́ ми:

Ева́нгелие от Матфе́я, зача́ло 10.

По 50-м псалме́ стихи́ра, глас 6:

Прииди́те, Богосо́браннии правосла́вных собо́ри,/ духо́вно возвесели́мся,/ лик соста́вльше, рука́ми воспле́щем,/ пе́сньми похва́льными воспое́м,/ и, святы́м моще́м его́ приступа́юще, лобза́ем,/ и, со слеза́ми мольбу́ смеси́вше,/ к нему́ си́це рцем:/ Иоа́нне пра́ведне,/ нас, мона́хи и бельцы́,/ и́хже собра́л еси́ зде,/ собери́ и та́мо, в Ца́рствии Небе́снем.

Кано́н Богоро́дице со ирмосо́м на 6, глас 8, ирмо́с: Во́ду проше́д, я́ко су́шу: и свято́му два кано́на на 8, глас 1.

Песнь 1

Ирмо́с:

Го́рькия рабо́ты избавлься Изра́иль,/ непроходи́мое про́йде, я́ко су́шу,/ врага́ зря потопля́ема,/ песнь я́ко Благоде́телю пое́т Бо́гу,/ чудоде́ющему мы́шцею высо́кою,/ я́ко просла́вися.

Прииди́те, ны́не предпра́зднственная возгласи́м,/ с волхвы́ Христу́ да́ры принесе́м/ и со А́нгелы возопие́м:/ Свят еси́, Го́споди.

Отца́ ва́шего по отше́ствии, благочести́ваго Стефа́на де́спота,/ ма́ти ва́ша Ангели́на преподо́бная,/ наказу́ющи вас, жа́лостно вам глаго́лаше:/ ны́не, ча́дца моя́, оте́ц ваш к Бо́гу пресели́ся,/ кто отны́не воско́рмит вы?/ То́чию наде́йтеся на Го́спода Бо́га, не забу́дет бо Свои́х рабо́в,/ оба́че учи́теся со А́нгели зва́ти:/ сла́ва в Вы́шних Бо́гу.

Во смире́нии, я́ко в цве́те,/ прему́дростию и ра́зумом о́троцы укра́шени, исполни́тели яви́шася,/ послуша́нием и покоре́нием ма́тери свое́й, я́ко венцы́ све́тлыми, украша́хуся,/ за́поведи Христа́ Бо́га исполня́юще, вопия́ху:/ сла́ва в Вы́шних Бо́гу.

Богоро́дичен: А́ще и еди́н разуме́вается лице́м Емману́ил,/ но естество́м сугу́б,/ сего́ две возвеща́ем в Нем во́ли и де́йства./ Его́же Роди́тельницу Богоро́дицу испове́дуем и с Не́ю вопие́м:/ сла́ва в Вы́шних Бо́гу.

Ин кано́н, глас 8.

Песнь 1

Ирмо́с:

Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Ликовству́юще пе́сньми,/ благочести́ваго Иоа́нна де́спота, соше́дшеся днесь, по достоя́нию восхва́лим,/ я́ко мно́гих чуде́с пода́теля оби́льна,/ мо́лится бо о нас Го́сподеви./ Тем и мы с ним возопие́м:/ сла́ва смотре́нию Твоему́, Го́споди.

У́грин он, а́ще и инове́рен бя́ше,/ но егда́ ви́де вас, о́троцы преблаже́ннии,/ жа́луя сиро́тства ва́шего, ра́достно вас прие́млет,/ и подае́т вам Сирмию во обдержа́ние,/ и, зря красоту́ лица́ ва́шего, ди́вится:/ красне́йши же душе́ю вои́стинну яви́стеся, о преблаже́ннии!/ Тем с ва́ми воспое́м:/ сла́ва смотре́нию Твоему́, Го́споди.

Вельми́ тя хра́бра и оружено́сна на сопроти́вныя Бог показа́,/ отгоня́ их от ста́да твоего́, а́ки волки суро́выя,/ соблюда́я лю́ди оте́чества твоего́ неврежде́нни,/ и ны́не мо́лим тя, преблаже́нне Иоа́нне:/ сохрани́ и нас, служи́тели твоя́, от нахожде́ний чад ага́рянских,/ да вси песнь пое́м:/ сла́ва смотре́нию Твоему́, Го́споди.

Богоро́дичен: Алава́стр, Чи́стая, мы́сленный Ты еси́,/ ми́ра, излия́вшагося на зе́млю с Небесе́,/ и мене́ ны́не благоуха́ния испо́лни, да воспою́ песнь: чу́дная дела́ Тобо́ю сотвори́ Сын Твой и Бог, Пречи́стая Де́во.

Катава́сия: Спасе́ лю́ди:

Песнь 3

Ирмо́с:

Не му́дростию и бога́тством да хва́лится сме́ртный свои́м,/ но ве́рою Госпо́днею,/ правосла́вно взыва́я Христу́ Бо́гу и поя́ при́сно:/ на ка́мени Твои́х за́поведей/ утверди́ мя, Влады́ко.

Стефа́н де́спот, роди́тель твой, Бо́гу хотя́щу от жития́ сего́ отхо́дит,/ тебе́, я́ко а́гня незло́бивое, в чу́ждем ста́де оставля́ет./ Ты же, свя́те, Христа́ Бо́га любя́ и ма́тере твоея́ за́поведи сохраня́я,/ наказа́нием до́бре утвержда́ем,/ непреста́нно Бо́гу поя́: Свят еси́, Го́споди.

Пома́занник Ри́мския держа́вы а́ще и восхоте́,/ но не возмо́же вас удержа́ти от полу́ченнаго вам путеше́ствия, Бо́гу ему́ возбраня́ющу,/ но с ми́ром и дарми́ отпуще́ние вам да́рует./ Вы же, путеше́ствие творя́ще и Бо́га благода́ряще, поете́:/ Свят еси́, Го́споди.

Любо́вию приходя́щим к ра́це моще́й ва́ших и́ноком и бельце́м, благочести́ве Стефа́не, Макси́ме преблаже́нне, Ангели́но преподо́бная и Иоа́нне пра́ведне,/ душа́м спасе́ние и телесе́м здра́вие всем нам дарова́ти мо́лимся к Бо́гу ва́шими моли́твами,/ да с ва́ми вопие́м: Свят еси́, Го́споди.

Богоро́дичен: Его́же трепе́щет, Чи́стая, вся́кое созда́ние,/ сего́ на руку́ име́ла еси́, за милосе́рдие нас ра́ди Младе́нца бы́вша,/ сего́ моли́ спасти́ся всем, ве́рою зову́щим:/ Свят еси́, Го́споди.

Ин ирмо́с:

Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Тебе́ отню́д невозмо́же, блаже́нне, ничто́же от Правосла́вия отлучи́ти:/ ни сиро́тство роди́телей, ни чужестра́нствие, ниже́ цвет ю́ности./ Страх Бо́жий в се́рдце твое́м име́я, после́довал еси́ стопа́м роди́телей твои́х,/ до́йде и пости́же с ни́ми вку́пе во дворы́ Госпо́дни, веселя́ся, вопия́:/ спасе́ мя десни́ца Твоя́, Го́споди.

О, я́ко Бо́гу изво́лившу просла́вити святы́я Своя́,/ та́ко и просла́ви. Ю́ноша не́кий на одре́ слежа́ше осмь лет, от враче́в исцеле́ния не получи́,/ слы́ша зна́мения и чудеса́, де́ема тобо́ю, преблаже́нне, отцу́ и ма́тери глаго́лаше:/ неси́те мя к моще́м пра́веднаго Иоа́нна,/ да и аз насы́щуся, я́ко пес,/ от крупи́ц, па́дающих от трапе́зы бога́таго./ О́ле зна́мений и чуде́с де́емых!/ Еще́ ему́ во врата́ це́ркве Богома́тере внесе́ну бы́вшу,/ здрав бысть, я́ко и не боле́, ве́лиим гла́сом возопи́:/ моли́твами пра́веднаго Иоа́нна спасе́ мя десни́ца Твоя́, Го́споди.

Ны́не весе́лия испо́лнися храм Богома́тере,/ в не́мже лежи́т сокро́вище неги́блемо, те́ло блаже́ннаго, чудесы́ удивля́емо:/ вси у́бо, приближа́ющеся к ра́це моще́й его́ с ве́рою,/ исцеле́ния да́ры прие́млют, здра́ви отходя́т и, Бо́га благода́ря́ще, пою́т:/ спасе́ нас десни́ца Твоя́, Го́споди.

Богоро́дичен: Изба́ви нас гее́нны и вся́каго преще́ния в час Суда́, рабы́ Твоя́, Пренепоро́чная,/ и прича́стники сотвори́ Сы́на и Бо́га Твоего́ Ца́рствию,/ да вси пое́м ему́: спасе́ нас десни́ца Твоя́, Го́споди.

Седа́лен, глас 4.

Подо́бен: Ско́ро предвари́:

Я́ко цвет прекра́сен, процве́л еси́ во оте́чествии твое́м, благоро́дне Иоа́нне,/ и́маши бо мо́щи твоя́, пребыва́ющим во хра́ме Бо́жия Ма́тере,/ и лежа́щим в честне́й ра́це, це́лы,/ невреди́ми, я́ко крин благоуха́нный/ и я́ко ки́тра доброво́нная, облагоуха́ющая вся, приходя́щия к ним с ве́рою,/ и исцеле́ний да́ры невозбра́нно подава́ющая,/ и ны́не не забу́ди рабы́ твоя́, мо́лимся.

Сла́ва, и ны́не, Богоро́дичен:

Я́же от всех родо́в предызбра́нная,/ от всех проро́ков пронарече́нная,/ и от всех челове́к препросла́вленная,/ и от А́нгел удивля́ема, Ма́ти Бо́га Вы́шняго,/ удиви́ на ны ми́лость твою́./ Умоли́ Сы́на Твоего́ и Бо́га на́шего,/ изба́витися нам от вся́каго зла,/ да Тя непреста́нно, я́ко Ма́терь Бо́жию, велича́ем.

Песнь 4

Ирмо́с:

Слы́ша дре́вле Авваку́м, Христе́, чу́дный Твой слух/ и стра́хом взыва́ше:/ от ю́га Бог прии́дет и Святы́й от горы́ приосене́нныя ча́щи/ спасти́ пома́занныя./ Сла́ва си́ле Твое́й, Го́споди.

Красу́йся, Це́ркви Бо́жия,/ ликовству́йте, Се́рбстии наро́ди,/ Богосо́бранный ли́че, зря́ще вещь ди́вну и прекра́сну, в це́ркви Бо́жия Ма́тере лежа́щу,/ мо́щи Богопросла́вленных де́спот, оте́ц с сы́ны, ма́ти с ча́ды,/ мо́лятся бо непреста́нно о лю́дех свои́х, я́ко чадолю́бцы,/ и оби́тель свою́ сохраня́ют от вся́кия напа́сти,/ тем и мы песнь воспое́м:/ сла́ва си́ле Твое́й, Го́споди.

А́ще и посреде́ иноязы́чных учи́телей водворя́ешися, Богоблаже́нне,/ но Правосла́вия оте́ческаго николи́же погреши́, Бо́гу сохраня́ющу тя,/ до́ндеже жела́емый глас получи́л еси́:/ вни́ди, ра́бе, в ра́дость Го́спода твоего́./ тому́ и мы наде́емся, зову́ще:/ сла́ва си́ле Твое́й, Го́споди.

Ни са́на вели́чество, ни во́инственное попече́ние,/ ниже́ бра́чное совокупле́ние возмо́же тебе́ отдали́ти от любве́ Христо́вы,/ пра́ваго пути́ держа́ся неотсту́пно,/ до́ндеже вшел еси́ в ра́йская селе́ния, иде́же пра́ведник совокупле́ния, веселя́ся с роди́тели твои́ми./ Те́мже и мы мо́лимся, блаже́нне Иоа́нне:/ помяни́те и нас во весе́лии Го́спода своего́,/ да вси вопие́м: сла́ва си́ле Твое́й, Го́споди.

Богоро́дичен: О преукра́ше́нна добро́тою добро́- де́телей Богома́ти Чи́стая,/ со благочести́вым Стефа́ном и Макси́мом блаже́нным,/ Ангели́ною преподо́бною и Иоа́нном пра́ведным/ моли́ о нас, его́же родила́ еси́, Христа́, Человеколю́бца Бо́га,/ изба́вится нам от вся́каго зла, да вси пое́м ему́:/ сла́ва си́ле Твое́й, Го́споди.

Ин ирмо́с:

Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу ни́щету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Ру́це твои́, преблаже́нне, име́я просте́рте к тре́бующим и маломо́щныя заступа́я,/ бога́тство твое́ во утро́бы ни́щих влага́я, отону́дуже тя богатода́вец Христо́с сугу́бою мздо́ю обогати́/ и дарова́ тебе́ с роди́тели твои́ми ве́чное наслажде́ние./ Моли́теся, святи́и, та́мо и нам с ва́ми улучи́ти ма́лое утеше́ние,/ да вси пое́м: ди́вен Бог во святы́х Свои́х.

Нака́зу́я словесы́ твоя́ лю́ди, преблаже́нне,/ и бди́те, моли́теся, глаго́ля, и внима́йте,/ не ве́мы бо, в кой час тать прии́дет,/ кре́пко ста́нем, не пощади́м пло́ти на́шея,/ проти́ву бра́ни бори́теля ополчи́мся, Бо́га Помо́щника призове́м,/ да держа́ву оте́чества на́шего сохрани́т,/ сохрани́ и нас, свя́те, моли́твами твои́ми, пою́щия:/ ди́вен Бог во святы́х Свои́х.

Еще́ от ю́ности, свя́те, Бо́га любя́,/ того́ ища́, того́ гоня́, до́ндеже и пости́гл еси́,/ и Той тя во весе́лие прия́т, и оби́тель в тебе́ ду́ха Свята́го сотвори́,/ и просла́ви во вселе́нней чудесы́ в хвалу́ и увере́ние ро́ду на́шему./ Да вси вопие́м: ди́вен Бог во святы́х Свои́х.

Богоро́дичен: Ди́вный и прекра́сный ли́че, свята́я и Богоизбра́нная четвери́це,/ мы, смире́ннии служи́тели ва́ши, мо́лимся:/ с Богоро́дицею и Арха́нгелом Гаврии́лом моли́теся Христу́ Бо́гу/ изба́витися нам безго́дныя боле́зни и го́рькия сме́рти,/ да Тя непреста́нно, Ма́терь Бо́жию, в пе́снех велича́ем.

Песнь 5

Ирмо́с:

Свет Твой незаходи́мый возсия́й, Христе́,/ в сердца́ ве́рно пою́щих Тя,/ ми́р подава́яй нам па́че ума́./ Тем, от но́щи неве́дения ко дню све́том Твои́м теку́ще,/ славосло́вим Тя, Человеколю́бче.

О, Богода́ннаго вам ра́зума, святи́и!/ Чу́дныя гра́ды и стра́ны проходя́ще от ме́ста на ме́сто,/ я́коже иногда́ дре́вний Изра́иль по пусты́ни, Бо́гу вас сохраня́ющу,/ отню́дь не погреши́сте оте́ческаго преда́ния,/ до́ндеже изво́ли Бог просла́вити зе́млю и лю́ди оте́чества ва́шего:/ земны́м бо ца́рством Небе́сное восприя́сте,/ и со А́нгели непреста́нно лику́ете, и нас та́мо не забу́дите, ве́рою воспева́ющих вы.

Сей блаже́нный ревну́я и поревнова́ по лю́дех оте́чества своего́,/ Бо́га николи́же отступа́я,/ день и нощь моли́твами и ми́лостынями себе́ тому́ приводя́./ Той тя и прия́т и сотвори́ в тебе́ оби́телище Свято́му Ду́ху./ Сподо́би и нас ду́ха Свята́го моли́твами, свя́те, твои́ми, ве́рою воспева́ющих тя.

О, та́ко Бо́гу изво́лившу:/ Георгий, старе́й брат твой, остриза́ет власы́ своя́, ма́тери, и всем лю́дем, и тебе́, преблаже́нне,/ изво́ли лу́чше рабо́тати Бо́гу, не́жели име́ти вре́менную сего́ ми́ра сла́дость./ Сего́ ра́ди обре́те на Небесе́х ра́дость,/ и нас та́мо не забу́ди, свя́те, ве́рою воспева́ющих тя.

Богоро́дичен: О лозо́, Ду́хом Святы́м насажде́нна,/ о четвери́це Богоизбра́нная,/ мо́щи бо ва́ша светосия́ельны мно́га зна́мения и чудеса́ содева́ют во хра́ме Богома́тере./ С Не́юже и со Арха́нгелом Гаврии́лом моли́теся Человеколю́бцу Бо́гу о нас,/ да в ми́ре пое́м из нея́ ро́ждшагося Го́спода.

Ин ирмо́с:

Вску́ю мя отри́нул еси́/ от лица́ Твоего́, Свете Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

И не хотя́щу ти, блаже́нне Иоа́нне, де́спотства сан вруча́ется ти./ Ты же, свя́те, я́ко во́ин кре́пок, обою́ду о́стрым ору́жием на ага́ряны хра́брствуя/ и Влады́це Христу́ безле́ностно рабо́тая, своего́ оте́чества лю́ди от бед избавля́я/ и нас к Небе́сному Ца́рствию направля́я, да вси зове́м:/ чу́дна дела́ Твоя́, Го́споди.

Ничто́же возмо́же вас премени́ти от Богода́ннаго вам ра́зума и благоче́стия. О Богоблаже́ннии,/ ни чужестра́нствия хожде́ние, ни иносла́вных вели́чество,/ но, я́ко адама́нти тве́рдии, соблюдо́сте телеса́ ва́ша чи́ста./ Те́мже и Тро́ицы Святы́я жили́ще в себе́ сотвори́сте,/ и благода́ть Свята́го Духа всели́ся в вас, и си́ла Бо́жия де́йствует вами./ Те́мже мо́лимся:/ и о нас моли́теся Святе́й Тро́ице, я́ко те́плии на́ши засту́пницы, да вси зове́м:/ чу́дна дела́ Твоя́, Го́споди.

И́хже о́ко не ви́де, у́хо не слы́ша, и на се́рдце челове́ку не взыдо́ша,/ я́же у гото́ва Бог лю́бящим его́,/ вам сия́ дарова́нна бы́ша, о благочести́ве Стефа́не, преблаже́нне Макси́ме,/ Ангели́но преподо́бная и Иоа́нне пра́ведне,/ мо́лимся и мы получи́ти грехо́в проще́ние, душ спасе́ние и теле́с здра́вие,/ и́ноком, и бельце́м, и всем,приходя́щим к ра́це моще́й ва́ших, да вси зове́м:/ чу́дна дела́ Твоя́, Го́споди.

Богоро́дичен: Вси к воде́ медото́чнаго Твоего́ исто́чника, Богоро́дице Де́во,/ еди́на ра́досте ро́да на́шего, притека́ем, зову́ще, Пресвята́я:/ ми́р испроси́ це́рквам Твои́м, да вси Сы́ну Твоему́ зове́м:/ чу́дна дела́ Твоя́, Го́споди.

Песнь 6

Ирмо́с: Весь от страсте́й безме́рных содержу́ся/ и ки́том зол снизпадо́х,/ но возведи́ из истле́ния мя, Бо́же,/ я́коже пре́жде Ио́ну,/ и ве́рою безстра́стие ми да́руй,/ я́ко да во гла́сех хвале́ния и спасе́ния/ ду́хом пожру́ Ти.

Лику́й, Сирмие, страно́ Се́рбская, весели́ся, свята́я митропо́лие,/ хра́ме Бо́жия Ма́тере, красу́йся/ положе́нием святы́х моще́й Стефа́на благочести́ваго, Макси́ма блаже́ннаго, Ангели́ны преподо́бныя, Иоа́нна пра́веднаго,/ моля́тся бо о лю́дех свои́х, я́ко отечестволю́бцы, да в ми́ре песнь пое́м:/ сла́ва Бо́гу, сотво́ршему пресла́вная.

Ага́рянин не́кий бя́ше бесну́яся, жив бо бес во чре́ве его́ валя́шеся./ Мно́гия беды и труды́ на те́ло его́ нанесе́,/ мно́жицею бо на земли́ лежа́, я́ко мертв, зря́шеся./ Приве́дше же его́ к ра́це моще́й ва́ших, о преди́вная четвери́це!/ Он, а́ще и неве́рен, оба́че рыда́я, бя́ше пла́чася./ Вы же, святи́и, я́ко богатода́вцы,/ и псом невозбра́нно от крупи́ц святы́я ва́шея трапе́зы неща́дно подае́те,/ та́ко и ага́рянину ско́рое исцеле́ние./ Он же, здрав быв, возопи́:/ несть ве́ры, па́че ве́ры христиа́нския./ Сла́вы же ра́ди земны́я не возлюби́ Небе́сныя, оба́че бя́ше поя́:/ сла́ва Бо́гу, сотво́ршему чудеса́ пресла́вная.

Ди́вно дре́во, кра́сны же ве́тви,/ но и плод вои́стинну сладча́йший ме́да,/ прииди́те, ны́не вкуси́вше оби́льно, чу́вства на́ша теле́сна вку́пе и душе́вна услади́м,/ и в ра́дости со святы́ми Христа́ Бо́га возвели́чим, и пе́сньми воспои́м:/ сла́ва Бо́гу, сотво́ршему пресла́вная.

Богоро́дичен: Исцели́ я́звы мое́й души́, и многому́тное помышле́ний волне́ние, Влады́чице, утиши́,/ и ми́рное ми устрое́ние пода́ждь,/ да в ми́ре Сы́ну Твоему́ пое́м:/ сла́ва Бо́гу, сотво́ршему пресла́вная.

Ин ирмо́с:

Моли́тву пролию́ ко Го́споду/ и тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Ко твоему́ оте́честву приити́ тебе́ сотвори́ Бог и не хотя́ща, преблаже́нне Иоа́нне,/ обогаща́я тя да́ры сла́вою немимотеку́щею./ Тем приходя́щии к ра́це моще́й твои́х почерпа́ют пи́во от исто́чника приснотеку́щаго,/ исцеле́ния от Тебе́ бога́тыя да́ры, да вси зове́м:/ славосло́вим Тя, Человеколю́бче.

А́ще и лише́ни роди́теля,/ но вас, о Богоблаже́ннии, ке́сарь, в держа́ве свое́й че́стне назира́я/ и я́ко сиро́тства ва́шего жале́я, ца́рскими вас учрежда́ет,/ вы же, святи́и, я́ко рабы́ Бо́га Вы́шняго, и в чу́ждей земли́ непогреши́сте десна́го стоя́ния. И нас та́мо приведи́те ваши́ми моли́твами, песнь Бо́гу пою́щия:/ славосло́вим Тя, Человеколю́бче.

По преставле́нии твое́м, Иоа́нне преблаже́нне,/ я́ко го́лубь целому́дренный, на фи́никс доброде́телей возше́л еси́, кри́ле име́я позлаще́ни,/ и́маже возлете́в, в ра́йстей красоте́ водвори́лся еси́/ и, Боже́ственныя пи́щи наслажда́лся, с ра́достию пое́ши:/ славосло́вим Тя, Человеколю́бче.

Богоро́дичен: Еди́ну Пречи́стую, Еди́ну Нескве́рную молю́ Тя, Отрокови́це:/ сла́стными оскве́рншуюся страстьми́ ду́шу мою́ окая́нную Твои́ми моли́твами очи́сти,/ да досто́йно воспою́ Сы́ну Твоему́, зовы́й:/ славосло́влю Тя, Человеколю́бче.

Конда́к, глас 8.

Подо́бен: Взбра́нной:

Прииди́те, достодо́лжно почти́м Иоа́нна, но́выя благода́ти служи́теля новопросла́вленнаго,/ сла́ву ве́ры на́шея и на́шего моли́твенника,/ созыва́ет бо пе́ти благода́рными гла́сы/ и просла́вити Просла́вльшаго святы́я Своя́/ и мо́лится о творя́щих па́мять его́ и о зову́щих ему́:/ ра́дуйся, Иоа́нне, но́вое процвете́ние.

И́кос:

Вели́ка тя Се́рбстей земли́ свети́льника Бог показа́ в после́дняя времена́, Иоа́нне блаже́нне:/ неви́димо Христо́выя лю́ди непрестае́ши посеща́я/ и ско́рая исцеле́ния подава́я всем, ве́рою приходя́щим к ра́це моще́й твои́х./ Тем вси согла́сно вопие́м ти сия́:/ ра́дуйся, сто́лпе пресве́тлый, просвеща́я нас чудесы́ и зна́меньми./ Ра́дуйся, отца́ благочести́ваго ко́рене./ Ра́дуйся, преподо́бныя ма́тере ве́тви прекра́сная./ Ра́дуйся, наги́х покрови́телю и плене́ных свободи́телю./ Ра́дуйся, я́ко восприя́л еси́ вме́сто тле́нных нетле́нныя./ Ра́дуйся, зри́телю Све́та Непристу́пнаго./ Ра́дуйся, са́де, новосажде́нный в ра́йстем селе́нии./ Ра́дуйся, я́ко лику́еши со А́нгелы./ Ра́дуйся, о́блаче ро́сный, ве́рных се́рдца́ ороша́я./ Ра́дуйся, земли́ Се́рбстей засту́пниче./ Ра́дуйся, це́ркви твое́й све́тлое украше́ние./ Ра́дуйся, благочести́вым де́спотом на́шим ра́дование./ Ра́дуйся, во́ином правосла́вным во бра́нех кре́пкий по́мощниче./ Ра́дуйся, всем нам нело́жный храни́телю и похвало́./ Ра́дуйся, Иоа́нне, но́вое процвете́ние.

Песнь 7

Ирмо́с:

О́бразу служи́ти/ мусики́йскому согла́сию созыва́ющу лю́ди,/ от пе́сней сио́нских пою́ще, о́троцы Дави́довы/ мучи́телево разори́ша злочести́вое веле́ние/ и пла́мень в ро́су преложи́ша,/ песнь воспева́юще:/ превозноси́мый отце́в и наш Бо́же, благослове́н еси́.

Чу́до пресла́вно на земли́ яви́ся, о преблаже́нне Иоа́нне:/ по изнесе́нии от земны́х недр свята́го твоего́ те́ла/ мно́гий наро́д стече́ся, разсла́бленныя принесо́ша, слепы́я приведо́ша,/ и, егда́ святы́я твоя́ мо́щи облагоуха́ша, тогда́ вси, ки́йждо от свои́х я́зв, здра́ви бы́ша,/ сла́ву Бо́гу и тебе́, уго́днику его́, возда́ша,/ с ни́мже и мы воспои́м: благослове́н Бог оте́ц на́ших.

Украси́л еси́ оте́чества твоего́ лю́ди/ и был еси́ похвала́ роди́телей твои́х, Иоа́нне пра́ведне:/ яви́ся бо те́ло твое́, я́ко ки́тра благово́нная,/ зна́мения и чудеса́, я́ко и́скры, испуща́ющая/ и всем, ве́рою приходя́щим к ра́це моще́й твои́х, исцеле́ния подава́ющая./ Тем вси вопие́м: благослове́н Бог оте́ц на́ших.

Я́же мы зна́ем, сия́ и глаго́лем, и от мно́гих ма́ло рече́м:/ жену́ не́кую, бесну́ему, желе́зы око́ванну, роди́тели ея́ приведо́ша к ра́це моще́й ва́ших, преблаже́ннии,/ я́же гла́сы испуща́ше, и, ска́чущи, неле́пая глаго́лаше./ Вы же, благочести́ве Стефа́не, Макси́ме преблаже́нне, Ангели́но преподо́бная и Иоа́нне пра́ведне,/ напра́снаго бе́са ско́рым исцеле́нием от нея́ отгна́сте./ Она же здра́ва, зря́щи сия́, диви́тся,/ со слеза́ми от ра́дости ниц на зе́млю па́дши,/ вели́чия Бо́гу и вам, уго́дником его́, возда́вше, пою́щи:/ благослове́н Бог оте́ц на́ших.

Богоро́дичен: Стени́ и пла́чися, душе́ моя́, и себе́ отню́д рыда́й,/ моля́щися Ма́тери Бо́жией и глаго́лющи:/ мене́, осужде́ннаго, стра́шныя изба́ви му́ки, да возмогу́ Сы́ну Твоему́ зва́ти:/ благослове́н Бог оте́ц на́ших.

Ин ирмо́с:

От Иу́деи доше́дше, о́троцы/ в Вавило́не иногда́/ ве́рою Трои́ческою пла́мень пе́щный попра́ша, пою́ще:/ отце́в Бо́же, благослове́н еси́.

Красе́н виде́нием, красне́йший же душе́ю во исправле́ниих твои́х, свя́те, яви́лся еси́, е́же к Бо́гу име́л еси́, в таковы́х же тя и коне́ц пости́же,/ и процве́л еси́, блаже́нне Иоа́нне, я́ко фи́никс во дво́рех Го́спода твоего́, иде́же, веселя́ся, пое́ши:/ благослове́н Бог оте́ц на́ших.

Я́ко дре́во масли́нное при исхо́дищих вод, псало́мски вои́стинну насажде́н еси́,/ и вся, ели́ка а́ще плоди́т, успе́ют,/ та́ко и вы, преблаже́ннии, принесо́сте плод красе́н Христу́ Бо́гу:/ Макси́ма блаже́ннаго и Иоа́нна пра́веднаго, Стефа́не де́споте и Ангели́но преподо́бная,/ те́мже и Христо́с вас вку́пе прия́т и введе́ в ра́йское селе́ние./ Сподо́бите и нас с ва́ми ра́дости Го́спода своего́, пою́щих:/ оте́ц на́ших Бо́же, благослове́н еси́.

В ле́то преставле́ния ва́шего, о Богоблаже́ннии,/ осироте́ престо́л Се́рбскаго Влады́чества,/ ага́рянская же ча́да, я́ко пси безобра́знии, нападо́ша на зе́млю люде́й оте́чества ва́шего./ Вы же, святи́и, моли́твами ва́шими, я́ко пра́щею, отжени́те от ста́да своего́/ и отны́не мече́м моли́тв ва́ших ссецы́те враги́ на́ша, мо́лимся,/ да Влады́це Христу́ непреста́нно песнь пое́м:/ оте́ц на́ших Бо́же, благослове́н еси́.

Богоро́дичен: Украше́на красото́ю, ро́ждши Вседе́теля,/ утро́бою ши́ршая Небе́с еси́, Де́во Всепе́тая,/ оледене́вшую ду́шу мою́ любо́вию Твое́ю прохлади́,/ у Сы́на же Твоего́ и Бо́га прича́стника Ца́рствия сотвори́,/ да Тя непреста́нно, Ма́терь Бо́жию, в пе́снех велича́ю.

Песнь 8

Ирмо́с:

Чу́да преесте́ственнаго/ показа́ о́браз огнеро́сная пещь дре́вле,/ огнь бо не опали́ ю́ныя де́ти,/ Христо́во явля́я безсе́менное от Де́вы Боже́ственное рождество́./ Тем, воспева́юще, воспои́м:/ да благослови́т тварь вся Го́спода/ и превозно́си́т во вся ве́ки.

Прему́дростию и ра́зумом о́троцы украше́ни,/ исполни́тели яви́шася послуша́нием и покоре́нием ма́тери свое́й,/ я́ко венцы́ све́тлыми, украша́хуся и, за́поведи Христа́ Бо́га своего́ исполня́юще, крепля́хуся, пою́ще:/ благослови́те, вся дела́ Госпо́дня, Го́спода/ и превозноси́те во вся ве́ки.

Ра́дуйся, благочести́ваго царя́ о́трасле, ско́рый наш по́мощниче и те́плый засту́пниче Иоа́нне пра́ведне,/ мо́лимся: непреста́й моля́ся ко Влады́це Христу́ Бо́гу, мир, и здра́вия, и и́но, а́ще что, на потре́бу лю́дем твои́м дарова́ти, пою́щим:/ благослови́те, вся дела́ Госпо́дня, Го́спода/ и превозноси́те во вся ве́ки.

Изво́ли Бог просла́вити тобо́ю зе́млю оте́чества твоего́, пребога́те Иоа́нне,/ яви́ бо тя посреде́ люде́й твои́х, я́ко ки́тру благово́нну,/ и вси, приходя́ще к ра́це моще́й твои́х, ду́ши на́ши и телеса́ наполня́ем ми́ра благово́нна, пою́ще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.

Богоро́дичен: Изба́ви мя страсте́й и бед, Богоневе́сто, Ма́ти Христа́ Бо́га,/ Тебе́ бо положи́ Бог к Нему́ Хода́таицу моему́ смире́нию, да вси зове́м:/ благослове́н плод чре́ва Твоего́, Пречи́стая Де́во.

Ин ирмо́с:

Победи́тели мучи́теля и пла́мене/ благода́тию Твое́ю бы́вше,/ за́поведем Твои́м зело́ прилежа́ще,/ о́троцы вопия́ху:/ благослови́те, вся дела́ Госпо́дня, Го́спода.

Го́споди Бо́же мой, припа́даю и молю́тися,/ да осени́т нас благода́ть Свята́го ду́ха Твоего́,/ да возгла́си́м песнь но́ву от уст недосто́йных,/ е́же похвала́ми просла́вити пра́здник уго́дника Твоего́ Иоа́нна и воспе́ти Тебе́, Бо́гу:/ да Тя тварь благослови́т во вся ве́ки.

У Жениха́ Христа́ водворя́яся, на земли́ чуде́с лучи́ испусти́л еси́/ и разли́чныя неду́ги и боле́зни от челове́к отгна́л еси́,/ от ковче́га моще́й твои́х благода́ть источа́еши/ и здра́вие о Бо́зе всем подава́еши, преблаже́нне Иоа́нне./ Тем вси зове́м:/ да благослови́т тварь вся Го́спода и превозно́си́т во вся ве́ки.

Мо́лимся тебе́, преблаже́нне Иоа́нне,/ та́мо, иде́же водвори́лся еси́ у Христа́ Царя́, со святы́ми веселя́ся,/ и нас, мона́хи, и бельцы́, и вся, служа́щия ти, помяни́ во весе́лии Го́спода твоего́, пою́щия:/ да благослови́т тварь вся Го́спода/ и превозно́си́т во вся ве́ки.

Богоро́дичен: На Тя всю наде́жду на́шу возложи́хом, Пречи́стая Де́во./ Храм бо Твой святы́й четы́рьмя мощми́ светосия́тельными краси́тся,/ удивля́ют бо всяк ра́зум и прему́дрость/ и всем, во храм Твой приходя́щим, исцеле́ния да́ры подава́ют./ Тем мо́лимся Ти, Ма́ти Бо́жия:/ моли́твами святы́х Твои́х спаси́ нас.

Песнь 9

Ирмо́с:

Светоно́сный о́блак, в о́ньже всех Влады́ка,/ я́ко дождь с Небесе́ на руно́, сни́де/ и воплоти́ся нас ра́ди,/ быв Челове́к, Безнача́льный,/ велича́ем вси я́ко Ма́терь Бо́га на́шего Чи́стую.

Удиви́шася Небе́снии ли́цы, возра́довашася Се́рбстии наро́ди,/ зря́ще твою́ ду́шу, пра́ведне, от земли́ на Не́бо возноси́му/ и с роди́тели в ра́йском селе́нии водворя́ему./ Мо́лимтися, преблаже́нне Иоа́нне: и нас, си́рых, не оста́ви без твоея́ по́мощи, да в пе́снех пою́:/ вели́чит душа́ моя́ Го́спода.

Любо́вию нас не забыл еси́,/ а́ще и от нас преста́влен был еси́, я́коже дре́вле Или́я,/ но нам оста́вил еси́ святы́я твоя́ мо́щи, я́ко ми́лоть честне́йшую;/ и́миже нас, преблаже́нне, покрыва́я, сохраня́й, да в ми́ре воспева́ю:/ вели́чит душа́ моя́ Го́спода.

Егда́ принесо́ша во храм Бо́жия Ма́тере те́ло твое́, о пребога́те и пра́ведне Иоа́нне,/ тогда́ мно́жество наро́да Се́рбскаго стече́ся, принося́ще неду́жныя,/ и вси, твоя́ мо́щи лобыза́вшии, от неду́г здра́ви бы́ша:/ слепи́и зря́ху, немы́й глаго́лаше, хромы́й, скача́, игра́ше,/ сла́ву Бо́гу и тебе́, уго́днику его́, возда́ваше, поя́:/ вели́чит душа́ моя́ Г оспода.

Богоро́дичен: О Ма́ти вся́ческих Творца́, Де́во Всепе́тая,/ печа́льных уте́хо, потопля́емых Предста́тельнице и пренемога́ющихся Засту́пнице,/ до живота́ моего́ Ты мя сохрани́.

Ин ирмо́с:

Ужасе́ся о сем Не́бо/ и земли́ удиви́шася концы́,/ я́ко Бог яви́ся челове́ком плотски́/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Ничи́мже по достоя́нию похвали́ти тя уме́ем:/ оба́че а́ще и недосто́йными устна́ми сие́ ма́лое гране́сие прино́сим тебе́, преблаже́нне Иоа́нне/ и, честны́я твоя́ вельми́ похваля́юще мо́щи,/ в пе́снех Христа́ Бо́га велича́ем,/ тебе́ да́вшему такову́ю благода́ть и си́лу./ Приими́ же от нас ма́лое моле́ние и посо́бствуй, да принесе́м Бо́гу хвале́ние.

Те́плою любо́вию и ве́рою притека́ющим к ра́це моще́й твои́х, благоро́дне Иоа́нне, и́ноком и бе́льцем/ пода́ждь душа́м спасе́ние и телесе́м здра́вие и изба́ви лю́тых бед и обстоя́ний./ Приими́ же от нас ма́лое моле́ние и посо́бствуй, да принесе́м Бо́гу хвале́ние.

И те́сно и недоуме́тельно ума́ моего́ хвале́ние,/ но приими́, о всече́стне Иоа́нне, а́ще и неле́по и гру́бо соплето́х сие́ ма́лое пе́сни моле́ние,/ и твои́м предста́тельством, е́же к Бо́гу, во благо́е претвори́ и в ле́поту учини́./ Приими́ же от нас ма́лое моле́ние и посо́бствуй,/ да принесе́м Бо́гу хвале́ние.

Богоро́дичен: Ю́же принесо́хом, приими́те похвалу́ и пе́ние, о преблаже́нная и Богопросла́вленная четвери́це,/ мы, недосто́йнии, мо́щи ва́ша обстоя́ще, во хра́ме Бо́жия Ма́тере мо́лимся:/ с Госпоже́ю Богоро́дицею и с Арха́нгелом Гаврии́лом умоли́те Человеколю́бца Бо́га ми́р це́рквам и тишину́ земли́ Се́рбстей,/ и́ноком, и бе́льцем, и всем лю́дем теле́сное здра́вие и душе́вное спасе́ние дарова́ти,/ да в ми́ре Христа́ Бо́га и Пречи́стую его́ Ма́терь непреста́нно велича́ем.

Свети́лен.

Подо́бен: Со ученики́ взы́дем:

Яви́ся све́тлое украше́ние це́ркве Бо́жия Ма́тере,/ от пра́ведну бо боку́ происхо́дит Иоа́нн де́спот, просвеща́я на́ша ду́ши и телеса́,/ це́рковь же свою́ исполня́я ми́ра благово́нна, и здра́вие подае́т неду́жным всем, и́же ве́рою приходя́щим к ра́це моще́й его́,/ неоску́дно насыща́я весе́лия теле́снаго, вку́пе и душе́внаго.

Богоро́дичен: Неизрече́ннаго прижи́тия была́ еси́, Всенепоро́чная Неве́сто,/ я́ко су́щи честне́йший храм, Богоро́дице,/ Свет бо Преве́чный в Тя всели́ся, и породи́ Бо́га./ Пою́ще у́бо Твое́ Рождество́, велича́ем Тя досто́йно, Всенепоро́чная Отрокови́це.

На хвали́тех, стихи́ры, глас 2.

Подо́бен: Егда́ от Дре́ва:

Ты яви́лся еси́ све́тлое украше́ние це́ркве Бо́жия Ма́тере,/ пра́ведне Иоа́нне,/ мо́щи бо твоя́ све́том вселе́нную просвеща́ют,/ сия́ют бо па́че зла́та и ка́мене че́стна,/ созыва́юще нас на духо́вное торжество́,/ да просвети́м ду́ши на́ша и телеса́/ твои́ми моли́твами, досточу́дне.

Похвала́ еси́ земли́ Се́рбстей/ и вели́цей це́ркви Бо́жия Ма́тере,/ просвеще́ние же и щит лю́дем оте́чества твоего́,/ и побе́да на сопроти́вныя,/ и всем нам побо́рник и засту́пник./ Те́мже, преблаже́нне Иоа́нне,/ и отны́не рабы́ твоя́ не забу́ди,/ но всегда́ покрыва́й, заступа́й и сохраня́й/ от враг ви́димых и неви́димых, мо́лимся.

Прииди́те, Се́рбстии наро́ди вси,/ возра́дуемся и возвесели́мся днесь,/ во всечестны́й сей пра́здник Иоа́нна де́спота,/ и сла́ву и хвалу́ Христу́ Бо́гу возда́ди́м,/ да́вшему нам такова́го к Нему́ предста́теля/ и моли́твенника о душа́х на́ших.

Днесь весели́тся це́рковь Богома́тере,/ име́ющи в себе́ многоцеле́бныя мо́щи пра́веднаго Иоа́нна,/ све́том вселе́нную озаря́юща,/ ду́ши и телеса́ на́ша просвеща́юща,/ лю́ди же своя́ зна́меньми и чудесы́ удивля́юща,/ разли́чная дарова́ния всем, от него́ прося́щим, подава́юща,/ це́рковь же свою́ от вся́кия ско́рби и беды́ избавля́юща/ и служа́щия в ней мона́хи и бельцы́ душе́внаго весе́лия наслажда́юща./ Тем мо́лимся, преблаже́нне,/ не преста́й моля́ся о нас Человеколю́бцу Бо́гу/ дарова́ти душа́м на́шим ми́р и ве́лию ми́лость.

Сла́ва, глас 6:

Лику́й, Сирмие,/ и, страно Се́рбская, весели́ся,/ красу́йся, хра́ме Бо́жия Ма́тере,/ положе́нием святы́х моще́й Стефа́на благочести́ваго/ и Макси́ма блаже́ннаго, Ангели́ны преподо́бныя и Иоа́нна пра́веднаго./ Я́ко бо со́лнце многосве́тлое, вселе́нную всю луча́ми просвеща́ют,/ и мрак душе́внаго паде́ния озаря́ют,/ и от них ве́рою прося́щим исцеле́ний бога́тыя да́ры, я́ко и́скры, испуща́ют,/ и неща́дно тре́бующим подава́ют./ Те́мже и мы со слеза́ми си́це рцем:/ о прекра́сная и преди́вная четвери́це,/ мы, смире́ннии мона́си и бельцы́,/ ста́рии же и ю́нии, бога́тии и ни́щии,/ про́сим оте́честву ва́шему ми́р и це́рквам в любви́ единомы́слие,/ нам же и всем лю́дем здра́вие теле́сное и душе́вное спасе́ние дарова́ти/ е́же к Бо́гу ва́шими моли́твами.

И ны́не: Богоро́дице, Ты еси́ лоза́ и́стинная:

Славосло́вие вели́кое и отпу́ст.

НА ЛИТУРГИ́И

Блаже́нны от кано́на пе́сни 3-я и 6-я на 8. Проки́мен, глас 7: Возвесели́тся пра́ведник о Го́споде и упова́ет на него́.

Стих: Услы́ши, Бо́же, глас мой.

Апо́стол к Римляном, зача́ло 97.

Аллилу́ия.

Стих: Пра́ведник, я́ко фи́никс, процвете́т:

Ева́нгелие от Матфе́я, зача́ло 43. Прича́стен: В па́мять ве́чную: