НА МАЛОЙ ВЕЧЕ́РНИ

На Го́споди, воззва́х: стихи́ры на 4, глас 1. Подо́бен: Всехва́льнии му́ченицы:

Зри́тель был еси́ умо́м мы́сленных Сил,/ я́ко де́телен Боже́ственных слове́с,/ полага́я во твое́м се́рдце,/ в не́мже и восхожде́ния,/ я́ко ле́ствицу, утверди́л еси́,/ преподо́бне Са́вво, о́тче наш,/ и ны́не моли́ся/ дарова́ти душа́м на́шим мир и ве́лию ми́лость.

Са́вво преподо́бнейше,/ твою́ из младе́нства возложи́л еси́ жи́знь Христу́ Бо́гу на́шему,/ от него́же укрепля́емь,/ плотски́я стра́сти по́мыслу пови́нул еси́,/ ху́ждшее покаря́я лу́чшему./ Те́мже моли́ся/ дарова́ти душа́м на́шим мир и ве́лию ми́лость.

Богому́дре о́тче наш,/ свети́льник яви́лся еси́ велича́йший,/ просвеща́я подсо́лнечную чуде́с сия́ньми и Боже́ственными де́лы./ Те́мже по успе́нии Незаходи́мый тя Свет прия́т./ И ны́не моли́ся/ дарова́ти душа́м на́шим мир и ве́лию ми́лость.

Сла́ва, глас 2:

Преподо́бне о́тче,/ из младе́нства доброде́тели приле́жно обучи́вся,/ орга́н был еси́ Свята́го ду́ха,/ и, от него́ прие́м чуде́с де́йство,/ увеща́л еси́ челове́ки преоби́дети сла́дкая./ Ны́не же, Боже́ственным све́том чисте́йше осиява́емь,/ просвети́ и наши мы́сли, Са́вво, о́тче наш.

И ны́не, Богоро́дичен:

Все упова́ние мое́ на Тя возлага́ю,/ Ма́ти Бо́жия,/ сохрани́ мя под кро́вом Твои́м.

На стихо́вне стихи́ры, глас 2.

Подо́бен: До́ме Евфра́фов:

Яви́лся еси́/ от ма́терних пеле́н,/ Богоно́се о́тче наш,/ освяще́нный сосу́д/ и дом Всесвята́го ду́ха.

Стих: Честна́ пред Го́сподем/ сме́рть преподо́бных Его́.

Нося́ на ра́мех твои́х/ крест Го́сподень,/ де́монская мечта́ния,/ о́тче наш Са́вво,/ до конца́ истреби́л еси́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ле́сти лука́вых де́монов/ обличи́в креста́ си́лою,/ уясни́л же еси́/ сла́ву Христо́ву,/ Са́вво, о́тче наш.

Сла́ва, и ны́не, Богоро́дичен, подо́бен то́йже:

Влады́чице бла́гая,/ святы́я Твоя́ руки́/ к Сы́ну Твоему́ вознеси́,/ душелюби́вому Соде́телю,/ уще́дрити рабы́ Твоя́.

Тропа́рь пи́сан на вели́цей вече́рни

Сла́ва, и ны́не, Богоро́дичен: И́же нас ра́ди рожде́йся:

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8, глас 5.

Подо́бен: Преподо́бне о́тче:

Са́вво Богому́дре,/ А́нгелов равностоя́телю,/ единосе́льниче преподо́бных,/ собесе́дниче проро́ков,/ му́чеников и апо́столов снасле́дниче,/ во Све́те Невече́рнем ны́не обита́яй./ его́же луча́ми сия́я Боже́ственными,/ кра́йнейшим жела́нием,/ ему́же предстоя́ со дерзнове́нием,/ просвеще́н и наслажда́лся того́ виде́ньми/ и пита́лся того́ добро́тами непреста́нно,/ Христа́ моля́, Христа́ умоли́, преподо́бне,/ дарова́ти Це́ркви единомышле́ние,/ мир и ве́лию ми́лость.

Са́вво Богому́дре,/ воздержа́ния свети́ло неугаси́мое,/ свети́лъниче мона́шествующих пресве́тлейший,/ любве́ луча́ми просвеща́емь,/ сто́лпе непрекло́нный терпе́ния,/ утвержде́ние и си́ла ве́рою тя чту́щих,/ исцеле́ний сокро́вище,/ жи́телю пусты́нный я́ко вои́стинну,/ я́ко рай сию́ Боже́ственный показа́в,/ Боже́ственныя плоды́ принося́щу спа́саемых,/ Христа́ моля́, Христа́ умоли́, преподо́бне,/ дарова́ти Це́ркви единомышле́ние,/ мир и ве́лию ми́лость.

Са́вво Богому́дре,/ доброде́телей сто́лпе о́гненный,/ свети́лъниче, и́же из мо́ря мирска́го лю́ди к приста́нищу Боже́ственному наста́вляя,/ пре́лести ду́ха низложи́вый,/ ду́ха Свята́го чи́стое прия́телище,/ наста́вниче мона́шествующих,/ изве́стная ме́ра воздержа́ния,/ смире́ния све́тлая высото́,/ исто́чниче, точа́щий врачева́ний пучи́ну,/ Христа́ моля́, Христа́ умоли́, преподо́бне,/ дарова́ти Це́ркви единомышле́ние, мир и ве́лию ми́лость.

Сла́ва, глас 6:

Е́же по о́бразу соблю́д невреди́мо,/ ум влады́ку на стра́сти па́губныя по́стнически поста́вив,/ во е́же по подо́бию, я́ко мо́щно, возше́л еси́,/ му́жески бо естество́ пону́див,/ потща́лся еси́ ху́ждшее покори́ти лу́чшему/ и плоть порабо́тити ду́ху./ Те́мже мона́шествующих яви́лся еси́ верх,/ жи́тель пусты́нный, благотеку́щих обучи́тель,/ пра́вило доброде́тели изве́стнейшее./ И ны́не на Небесе́х зерца́лом разре́шшимся,/ о́тче наш Са́вво,/ чи́сте зри́ши Святу́ю Тро́ицу,/ моля́ся несре́дственне о и́же ве́рою и любо́вию чту́щих тя.

И ны́не, Богоро́дичен: Кто Тебе́ не ублажи́т

Вход. Проки́мен дне. Чтения 3. Прему́дрости Соломо́новы чте́ние

(глава 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние;/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, по́теку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут ему́./ Я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние

(главы́ 5, 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни;/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бне,/ поостри́т же напра́сный гнев во ору́жие,/ споборе́т же с ним мир на безу́мныя./ По́йдут праволу́чныя стре́лы мо́лниины,/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же пото́пят я на́гло./ Сопроти́в ста́нет им дух си́лы,/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние

(глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник, преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его́,/ сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных его́/ и посеще́ние во избра́нных Его́.

На лити́и стихи́ра храма.

И свята́го самогла́сны, глас 2:

По́стническое обуче́ние собра́в на земли́, преподо́бне Са́вво,/ и страсте́й прило́ги тече́нием слез твои́х вся притупи́л еси́;/ ле́ствице Боже́ственная и честна́я, на Не́бо возводя́щая,/ всем позна́ся Богоприя́тное житие́ твое́,/ благоче́стия бо плоды́ в нем показа́в,/ врачу́еши ими не́мощи страсте́й ве́рно вопию́щих ти:/ ра́дуйся, восто́чная звездо́ златоза́рнейшая,/ и мона́шествующих лампа́до све́тлая, и па́стырю;/ ра́дуйся, приснопева́емый,/ пусты́нное зело́ добре́йшее воспита́ние/ и Це́ркве непоколеби́мое утвержде́ние;/ ра́дуйся, заблу́ждших вели́кий путево́жде;/ ра́дуйся, на́ша хвало́/ и вселе́нныя све́тлое ра́дование.

На земли́ А́нгела и на Небесе́х челове́ка Бо́жия,/ ми́ра благокрасо́тство,/ сла́дость благи́х и доброде́телей по́стнических похвалу́,/ Са́вву да почти́м:/ насажде́н бо в дому́ Бо́жии,/ процвете́ пра́ведно/ и, я́ко кедр в пусты́ни,/ умно́жи па́ству Христо́ву слове́сных ове́ц/ в преподо́бии и пра́вде.

И́же еди́н на святы́х опочива́яй Бог,/ освяще́нную ду́шу твою́ чи́стое обре́т жили́ще,/ в ню всели́ся и Боже́ственных благода́тей сию́ испо́лни,/ и́миже ко Све́ту наставля́еши пою́щих тя,/ освяще́нный Са́вво блаже́нне.

Сла́ва, глас 2:

Е́же па́че ума́ благи́х прие́м жела́ние,/ вся я́же в ми́ре кра́сная презре́л еси́, Богоприя́тне,/ отту́ду бо плодо́м не запя́лся еси́, я́коже Ада́м;/ зми́я же отрази́в воздержа́нием,/ а́нгельски житие́ пожи́л еси́/ и ны́не на Небесе́х водворя́ешися,/ наслажда́лся дре́ва жи́зненнаго,/ Бо́га моля́ о нас,/ ве́рно соверша́ющих, освяще́нне Са́вво, па́мять твою́.

И ны́не, Богоро́дичен: О, чудесе́ новаго!

На стихо́вне стихи́ры, глас 5.

Подо́бен: Ра́дуйся:

Ра́дуйся, по́стнических вои́стинну по́двигов бла́гово́нный сосу́де:/ крест бо на ра́мо взем/ и Влады́це Христу́ себе́, всеблаже́нне, возложи́в,/ пло́ти попра́л еси́ долувлеку́щее мудрова́ние;/ доброде́тельми же ду́шу просвети́л еси́/ и к Боже́ственному впери́лся еси́ жела́нию./ Тем всесвяту́ю твою́ окружи́вше ра́ку, всехва́льне Са́вво,/ Боже́ственнаго Человеколю́бия про́сим получи́ти твои́ми моли́твами/ и ми́ру дарова́ти ве́лию ми́лость.

Стих: Честна́ пред Го́сподем/ смерть преподо́бных Его́.

Угль Богосия́нен огню прибли́жився, Богоно́се, ду́ха,/ показа́лся еси́ в ми́ре, Са́вво,/ просвеща́я ду́ши, ве́рно, Богому́дре,приступа́ющих к тебе́,/ к Све́ту путеводя́ ты́я Невече́рнему́, преподо́бне;/ пусты́нное же, ороша́емь свы́ше Боже́ственною благода́тию,/ увяди́л еси́ у́глие./ Тем и побе́ды тебе́ проявле́нно даро́ва вене́ц, блаже́нне,/ Боже́ственныя пра́вды строи́тель Христо́с,/ его́же моли́ дарова́ти душа́м на́шим ве́лию ми́лость.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ле́ствица Небоме́рная я́ве житие́ твое́ бысть, Богому́дре,/ е́юже на высоту́ возвы́сился еси́/ и Влады́це Христу́ бесе́довати, всеблаже́нне, сподо́бился еси́;/ ум просвети́в та́мо су́щими осия́нии,/ луча́ми же того́ просвеща́емь,/ равноа́нгельну прия́л еси́ све́тлость./ ему́же и ны́не предстоя́, моли́ся, преподо́бне,/ соверша́ющия Боже́ственную и всесвяще́ннуто па́мять твою́/ с тобо́ю предста́вити и ми́ру дарова́ти ве́лию ми́лость.

Сла́ва, глас 8:

Мона́хов мно́жества/ наста́вника тя почита́ем, о́тче наш Са́вво:/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных./ С ни́миже моли́ся Го́споду/ поми́ловатися душа́м на́шим.

И ны́не, Богоро́дичен: Безневе́стная Де́во:

На благослове́нии хлебов.

Тропа́рь, глас 8:

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́,/ и был еси́ свети́льник вселе́нней, сия́я чудесы́, Са́вво, о́тче наш,/ моли́ Христа́ Бо́га спасти́ся душа́м на́шим.

И Богоро́дице Дево:

НА У́ТРЕНИ

На Бог Госпо́дь: тропа́рь свята́го два́жды. Сла́ва, и ны́не, Богоро́дичен воскре́сен.

По 1-м стихосло́вии седа́лен, глас 1.

Подо́бен: Лик А́нгельскии:

Житие́ благоче́стно на земли́ сконча́в,/ прия́телище чи́стое ты ду́ха яви́лся еси́,/ просвеща́я ве́рою к тебе́ притека́ющия, блаже́нне./ Те́мже моли́ твоего́ Влады́ку просвети́ти ду́ши на́ша,/ воспева́ющих тя, Са́вво Богому́дре,о́тче наш.

Сла́ва, и ны́не, Богоро́дичен:

Всех Творца́ и Бо́га же и Соде́теля, Всенепоро́чная Чи́стая,/ Ду́хом Боже́ственным в ложесна́х зачала́ еси́/ и без истле́ния родила́ еси́./ его́же сла́вяще, Тя воспева́ем, Де́во,/ я́ко пала́ту Царя́ всех и ми́ра защище́ние.

По 2-м стихосло́вии седа́лен, глас 4.

Подо́бен: Яви́лся еси́ днесь:

Возсия́в, я́коже со́лнце, луча́ми облиста́еши, преподо́бне,/ всему́ ми́ру, далечесия́тельными уче́нии твои́ми,/ чу́дный Са́вво светоно́сче, преподо́бных похвало́.

Сла́ва, и ны́не, Богоро́дичен:

В кров Твой, Всечи́стая Де́во,/ прибега́ющих нас мольбу́ прие́мши,/ не преста́й моля́щи Челове́колюбца спасти́ рабы́ Твоя́.

По полиеле́и седа́лен, глас 8.

Подо́бен: Прему́дрости:

Из утро́бы освяти́лся еси́ я́ко вои́стинну свяще́ннейший, Са́вво,/ и на земли́, я́ко А́нгел, пожи́л еси́:/ плоть бо умертви́л еси́ воздержа́нием,/ Евфи́мия бо Вели́каго нра́ву досто́йно поревнова́л еси́/ и Тро́ицы показа́лся еси́ уго́дник, блаже́нне./ Те́мже и к ре́вности Боже́ственнаго твоего́ жития́/ ли́ки совоку́пи́л еси́ мона́шествующих,/ приснопа́мятне, Богоно́се о́тче наш,/ моли́ся Христу́ Бо́гу грехо́в оставле́ние пода́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Небе́сную дверь и киво́т,/ всесвяту́ю гору, све́тлый о́блак воспои́м,/ неопали́мую купину́, слове́сный рай,/ Е́вы воззва́ние, вселе́нныя всея́ вели́кое сокро́вище,/ я́ко спасе́ние в Ней соде́яся ми́ра/ и оставле́ние дре́вних согреше́ний./ Сего́ ра́ди и вопие́м Ей:/ моли́ся Сы́ну Твоему́ прегреше́ний оставле́ние дарова́ти/ благоче́стно покланя́ющимся всесвято́му Рождеству́ Твоему́.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных его́.

Стих: Что возда́м Го́сподеви о всех, я́же воздаде́ ми. Вся́кое дыха́ние:

Ева́нгелие от Луки́, зачало 24.

По 50-м псалме́ стихи́ра, глас 6:

Преподо́бне о́тче,/ во всю зе́млю изы́де веща́ние исправле́ний твои́х./ Тем на Небесе́х обре́л еси́ мзду́ трудо́в твои́х,/ де́монския погуби́л еси́ полки́/ и А́нгельския дости́гл еси́ чи́ны,/ и́хже житию́ непоро́чно поревнова́л еси́./ Дерзнове́ние име́я ко Христу́ Бо́гу,/ мир испроси́ душа́м на́шим.

Кано́н Пресвяты́я Богоро́дицы на 6, глас 2, его́же краегране́сие: Пою́ хвалу́ Живоно́сней Отрокови́це.

Песнь 1

Ирмо́с:

Нетре́ну, необы́чну,/ немо́кренно морску́ю ше́ствовав стезю́,/ избра́нный вопия́ше Изра́иль:/ Господе́ви пои́м, я́ко просла́вися.

Невеще́ственная дре́вле ле́ствица/ и стра́нно олядене́вщий путь мо́ря/ Твое́ явля́ше Рождество́, Чи́стая,/ ю́же пое́м вси, я́ко просла́вися.

Си́ла Вы́шняго, ипоста́сь соверше́нная, Бо́жия Му́дрость,/ вопло́щшаяся, Пречи́стая, из Тебе́,/ челове́ком бесе́дова, я́ко просла́вися.

Про́йде сквозе́ дверь непрохо́дную/ заключе́нный утро́бы Твоея́ пра́вды Со́лнце, Чи́стая,/ и ми́ру возсия́, я́ко просла́вися.

Кано́н преподо́бнаго на 8, глас 8, его́же краегране́сие: Всеизря́днаго в по́стницех Са́вву любе́зно пою́. Творе́ние Феофа́ново.

Песнь 1

Ирмо́с:

Колесницегони́теля фарао́ня погрузи́/ чудотво́ряй иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Светозаре́нием Свята́го ду́ха, Са́вво,/ озари́ благоче́стною любо́вию пе́сньми восхваля́ющия тя,/ по́стников похвалу́, мона́шествующих сла́ву,/ пусты́ни украси́теля, бла́гочестия учи́теля.

Всю любо́вь к Бо́гу возложи́в от ю́ности,/ и к Нему́, ра́дуяся, все твое́ жела́ние име́я,/ пло́ти дви́жения и страсте́й нахо́ды воздержа́нием умертви́л еси́,/ Са́вво Богоно́се всехва́льне.

Победи́в плодо́м, сокрове́ннаго зми́я попра́л еси́/ и того́ се́ти легко́ премину́л еси́,/ Богоче́стия кри́лы впери́вся, о́тче;/ жи́знь же, ра́дуяся, объя́л еси́ от са́да кре́стнаго.

Просвеща́емь Све́том благода́ти, во огнь вшел еси́,/ я́коже трие́ о́троцы пребы́л еси́ неопале́н,/ Бо́гу тя сохра́ншу/ и явля́ющу всем бу́дущее тебе́ преспе́яние,/ по́слежде, о́тче, и соверше́ние.

Богоро́дичен: Неуде́ржными на нас смерть стремле́ньми я́тся,/ но, Твоему́ Рождеству́ прибли́жившися, поги́бе/ и, прирази́вшися, упраздни́ся, Богоро́дице Де́во,/ Жи́знь бо вои́стинну присносу́щную воплоти́вшуюся родила́ еси́.

Катава́сия: Спасе́ лю́ди чудоде́йствуяй Влады́ка:

Песнь 3

Ирмо́с:

Лук сокруши́ся си́льных/ держа́вою Твое́ю, Христе́,/ и си́лою не́мощствующии/ препоя́сашася.

И́же вре́мене вне вся́каго, я́ко време́н Творец,/ из Тебе́, Де́во, во́льно Младе́нец созда́ся.

Чре́во, простра́ншее Небе́с, воспои́м,/ и́мже Ада́м на Небесе́х, ра́дуяся, жи́тельствует.

Ин ирмо́с:

Утвержде́н в нача́ле Небеса ́ра́зумом/ и зе́млю на вода́х основа́вши,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.

Ум влады́ку над страстьми́, всебога́те, поста́вив,/ пода́тель пра́вды показа́лся еси́,/ лу́чшему бо я́ве ху́ждшее пови́нул еси́./ Те́мже, я́ко фи́никс, о́тче, в пусты́нях процве́л еси́.

После́довати разуме́в стопа́м Влады́ки,/ пресе́льник оте́чества был еси́/ и, в пусты́ни обита́я, побе́ду воздви́гл еси́ на противобо́рныя,/ Боже́ственною си́лою укрепля́емь.

Тве́рдостию ра́зума, всеблаже́нне, укрепля́емь,/ разли́чная вра́жия кова́рства обличи́л еси́, му́дре,/ и всем яви́л еси́/ и горды́ню о́наго возвы́шенную низложи́л еси́.

Свяще́нна тя душе́ю/ и простоты́ изво́ления доброде́тельми укра́шена ви́дя,/ светле́йшая звезда́ Евфи́мий прия́т,/ проро́чески веща́я твою́, всеблаже́нне, све́тлость.

Богоро́дичен: Спаси́тельнаго нас ра́ди Сло́ва строе́ния/ све́тлая Ты, Ма́ти Де́во, дверь позна́лася еси́ вои́стинну:/ Ты бо нам ввела́ еси́ у́мную лучу́ Пребоже́ственнаго Божества́.

Катава́сия: При́зри на пе́ния рабо́в, Благоде́телю:

Седа́лен, глас 8.

Подо́бен: Прему́дрости:

Земна́я вся оста́вив, в ми́ре сый теле́сно,/ ду́хом был еси́ А́нгелом соприча́стник:/ настоя́щий бо стра́сти теле́сныя умертви́в,/ Тро́ицы показа́лся еси́ служи́тель, блаже́нне./ Те́мже и неду́гующих врачу́еши стра́сти/ и сло́вом ду́хи отгони́ши благода́тию, Богоно́се о́тче наш;/ моли́ся Христу́ Бо́гу прегреше́ний оставле́нию дарова́тися/ пра́зднующим любо́вию святу́ю па́мять твою́.

Сла́ва:

Молвы́ жите́йския оста́вив,/ крест твой на ра́мена взем,/ всего́ возложи́л еси́ тебе́ Бо́гу,/ пло́ти же и ми́ра вне быв,/ Ду́ху был еси́ Свято́му собесе́дник./ Те́мже и к ре́вности лю́ди воздвиза́я,/ гра́ды истощи́л еси́/ и пусты́ни гра́ды сотвори́л еси́, Богоно́се о́тче наш,/ моли́ Христа́ Бо́га прегреше́ний оставле́нию дарова́тися/ пра́зднующим любо́вию святу́ю па́мять твою́.

И ны́не, Богоро́дичен:

Я́ко Всенепоро́чная Неве́сто Творца́,/ я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Всепе́тая,/ беззако́нию мя су́ща скве́рное оби́телище/ и де́моном игра́лище в разуме́ бы́вша,/ потщи́ся и тех злоде́йствия мя изба́вити/ и све́тлое жили́ще доброде́телей соверши́, Светоно́сная, Нетле́нная,/ отжени́ о́блак страсте́й и Вы́шняго прича́стия сподо́би/ и Све́та Невече́рняго моли́твами Твои́ми.

Песнь 4

Ирмо́с: Услы́шах, Го́споди,/ сла́вное Твое́ смотре́ние/ и просла́вих, Человеколю́бче,/ непостижи́мую твою́ си́лу.

Се превозвы́сися Боже́ственная гора́ до́му́ Госпо́дня превы́шше сил,/ Богома́терь я́вственнейший.

Зако́нов есте́ственных кроме́, Еди́на Де́во,/ ро́ждши Влады́чествующего тва́рию,/ сподо́билася еси́ Боже́ственнаго зва́ния.

Ин ирмо́с:

Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Душе́вное о́чища́я устрое́ние/ и разширя́я Боже́ственными виде́нии,/ вме́стну сию́ вои́стинну Боже́ственных дарова́ний соде́лал еси́, Богоблаже́нне:/ возложе́нием же рук твои́х не́мощствующия исцели́л еси́,/ подража́тель Влады́ки быв.

И́же на тя, о́тче, лю́те разсвире́пев,/ поглоти́ся, я́ко Дафа́н окая́нный, и, я́ко Авиро́н, потреби́вся:/ тя бо неви́димо Боже́ственная храня́ше благода́ть,/ мно́гих промышля́ющи спасе́ние, всеблаже́нне,/ сла́вный Са́вво Богому́дре.

Зако́ном Бо́жиим наказа́в, Богоглаго́ливе, чу́вства,/ к разуме́нию безтеле́сных и мы́сленных/ твою́ худо́жную упра́вил еси́ мысль,/ проходя́ неосла́бно от сла́вы в сла́ву,/ от си́лы, о́тче, в си́лу.

Благоде́тельствовати единоплеме́нныя предложи́в,/ в пусты́ни гра́ды созда́л еси́ Боголе́пны и душеполе́зны,/ и в земли́ жа́ждущей исто́чники вод изве́л еси́,/ и ту́чи с Небесе́ пресла́вно, Богому́дре,/ в безво́дных се́лех низве́л еси́.

Богоро́дичен: Новоцве́тный безсме́ртия рай/ и кра́сен вои́стинну показа́лася еси́,/ Дре́во жи́зни, в Тебе́ насажде́нное, Богонача́льнейше чревонося́щи и ражда́ющи,/ всем искапа́ющее спаси́тельныя наде́жды,/ ве́рно Богоро́дицу му́дрствующим Тя.

Катава́сия: Ро́да челове́ча обновле́ние:

Песнь 5

Ирмо́с:

Угль Иса́ии проявле́йся,/ Со́лнце из де́вственныя утро́бы,/ возсия́ во тьме заблу́ждшим,/ Богоразу́мия просвеще́ние да́руя.

О́блацы, весе́лия сла́дость кропи́те су́щим на земли́,/ я́ко Отроча́ даде́ся, Сый пре́жде век,/ из Де́вы вопло́щся Бог наш.

Житию́ и пло́ти мое́й Свет возсия́/ и дря́хлость греха́ разруши́,/ напосле́док из Де́вы без се́мене вопло́щся, Высоча́йший.

Ин ирмо́с:

Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Неукло́нною мы́слию к твоему́ Жела́емому простира́яся,/ от него́ благода́ть велича́йших чуде́с незави́стну прия́л еси́, о́тче,/ и ве́рно приходя́щия сострада́тельно уврачева́л еси́, преподо́бне.

Плотски́х тя́жестей дебельство́ отло́жив,/ сосу́д Богоде́ланен избра́н был еси́ Свята́го, чу́дне, ду́ха,/ оша́янием сне́дей, и моли́твою, и терпе́нием, и сми́реномудрием укра́ша́емь.

Пропове́дник Боже́ственных догма́т велегла́снейший рукоположе́н еси́,/ собо́ров, о́тче, святы́х соо́бщник был еси́, цари́ умудря́я,/ и́миже я́ве, благода́тию Боже́ственною огражда́емь, яви́лся еси́, блаже́нне.

От Бо́га да́вшаяся благода́ть тебе́, Богодохнове́нне, провозгласи́ся,/ раздаде́ся всем бо вселе́нныя концы́,/ я́ве творя́щи боголе́пно показа́ния чуде́с Боже́ственное де́йство.

Богоро́дичен: Ве́рных Предста́тельница,/ стена́ неразруши́ма бла́гохваля́щих Тя,/ я́ко всему́ ро́ду челове́ческому я́вльшееся спасе́ние,/ Бо́га ро́ждши теле́сне я́вльшася,/ ду́шу мою́ спаси́, Пречи́стая.

Катава́сия: Из но́щи дел омраче́нныя пре́лести:

Песнь 6

Ирмо́с:

Глас глаго́л моле́бных/ от боле́зненный, Влады́ко, души́ услы́шав,/ от лю́тых мя изба́ви:/ Еди́н бо еси́ на́шего спасе́ния вино́вен.

Естество́ челове́ческое, рабо́тающее греху́, Влады́чице Чи́стая,/ Тобо́ю свобо́ду улучи́:/ Твой бо Сын я́ко А́гнец за всех закала́ется.

Вопие́м Ти вси и́стинней Ма́тери Бо́жии:/ прогне́вавшия рабы́ изба́ви,/ Еди́на бо дерзнове́ние к Сы́ну и́маши.

Ин ирмо́с:

Очи́сти мя, Спа́се,/ многа́ бо беззако́ния моя́,/ и из глубины́ зол возведи́, молю́ся,/ к Тебе́ бо возопи́ху и услы́ши мя,/ Бо́же спасе́ния моего́.

Любо́вь к Бо́гу и бли́жнему стяжа́в,/ зако́на и проро́ков исполня́я глави́зну,/ преиму́щую бо всех несосу́дно доброде́тель, о́тче, испра́вил еси́.

Равноа́нгельное на земли́ ты жи́тельство стяжа́л еси́,/ равноа́нгельну же честь Христо́с тебе́ дарова́,/ святы́х чи́ны спутьше́ствующия души́ твое́й посла́в.

Прему́дрости поро́д яви́вся,/ нача́ло прему́дрости возжеле́л еси́ – страх Бо́жий,/ и́мже укрепля́емь, к соверше́нию вме́стному челове́ком, о́тче, дости́гл еси́.

Богоро́дичен: Спа́са и Изба́вителя, Бо́га всех и Го́спода ро́ждши,/ нам пло́тию приобщи́вшася,/ спаса́й, Пречи́стая, призыва́ющия Тя от бед, Влады́чице.

Катава́сия: Обита́я Ио́на:

Конда́к, глас 8.

Подо́бен: Взбра́нной:

Я́ко от младе́нства Бо́гу же́ртва непоро́чная/ прине́слся еси́ доброде́телию, Са́вво блаже́нне,/ садоде́латель быв благоче́стия;/ те́мже был еси́ преподо́бных удобре́ние,/ граждани́н же пусты́нный достохва́лен./ Те́мже зове́м ти:/ ра́дуйся, Са́вво пребога́те.

И́кос:

О отце́в верхо́вниче и преподо́бных красото́,/ по́стников ко Христу́ дерзнове́ние,/ пусты́нный граждани́не и садоде́лателю./ Ка́ко воспою́ твое́ житие́, преподо́бне?/ блиста́еши бо конце́м, я́ко со́лнце./ Тем вопию́ ти:/ ра́дуйся, кра́сная каппадо́ков сла́во;/ ра́дуйся, честно́е вселе́нныя зна́мение;/ ра́дуйся, пусты́ни добре́йшее прозябе́ние;/ ра́дуйся, пра́ведных Боже́ственное наслажде́ние;/ ра́дуйся, я́ко презре́л еси́ теку́щая и тле́нная;/ ра́дуйся, я́ко на Небесе́х со А́нгелы обита́еши;/ ра́дуйся, мона́шествующих исправле́ние и пра́вило;/ ра́дуйся, ленящихся к Бо́гу воздви́жение;/ ра́дуйся, исто́чниче чуде́с Богото́чный:/ ра́дуйся, честны́й ду́ха орга́не;/ ра́дуйся, и́мже украси́ся восто́к;/ ра́дуйся, и́мже за́падная сия́ют;/ ра́дуйся, Са́вво пребога́те.

Песнь 7

Ирмо́с:

Вити́и яви́шася о́троцы любому́дрейшим дре́вле,/ от Богоприя́тныя бо души́, богосло́вяще устна́ми, поя́ху:/ Пребоже́ственный отце́в и наш Бо́же,/ благослове́н еси́.

Зряше в нощи́ у́бо Иа́ков я́ко в гада́нии Бо́га,/ воплоще́н же из Тебе́, све́тлостию яви́ся пою́щим:/ Пребоже́ственный отце́в Бог и препросла́влен.

Зна́мения, е́же в Тебе́, неизрече́ннаго проявля́я сплете́ния,/ со Иа́ковом бо́рется,/ чрез е́же во́льно соедини́ся челове́ком, Чи́стая,/ Пребоже́ственный отце́в Бог и препросла́влен.

Ме́рзок не пропове́дуяй Еди́наго Де́вы Тя Сы́на от Всепе́тыя Тро́ицы,/ и несомне́нною мы́слию, и язы́ком вопия́:/ Пребоже́ственный отце́в Бог и препросла́влен.

Ин ирмо́с:

Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ногою,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Отло́жил еси́ привре́менная, ве́чными возме́здився,/ и со А́нгелы лику́еши, я́ко А́нгельское пожи́в житие́./ С ни́миже и пел еси́:/ благослове́н Бог оте́ц на́ших.

Вопие́т бла́годарно ко Го́споду твоя́ вели́кая и всечестна́я Ла́вра,/ жи́теля, и Зижди́теля, и граждани́на тя предлага́ющи, му́дре,/ и хва́лящися зове́т:/ благослове́н Бог оте́ц на́ших.

Непреста́нно моли́ Го́спода, Са́вво Богому́дре, о па́стве твое́й,/ приле́жно же испроси́ твои́м трудо́м ве́чновати при́сно/ плодонося́щим и любо́вию зову́щим:/ благослове́н Бог оте́ц на́ших.

Богоро́дичен: Неве́стник Пречи́ст па́че словесе́ Сло́ва воплоще́ния,/ и черто́г, и престо́л пра́вая му́дрствующий Тя имену́ем/ и, ра́дующеся, Твоему́ Сы́ну зове́м:/ благослове́н Бог оте́ц на́ших.

Катава́сия: Всецаря́ любо́вию уловле́ннии о́троцы:

Песнь 8

Ирмо́с:

О подо́бии зла́те небре́гше треблаже́ннии юноши,/ неизме́нный и живы́й Бо́жий о́браз ви́девше,/ среди́ огня́ воспева́ху:/ осуществова́нная да пое́т Го́спода вся тварь/ и превозно́си́т во вся ве́ки.

Ви́ден бысть на земли́ Тобо́ю/ и с челове́ки поживе́, и́же бла́гостию несравне́нный и си́лою./ ему́же, пою́ще, вси ве́рнии, зове́м:/ осуществова́нная да пое́т Го́спода вся́кая тварь/ и превозно́си́т во вся ве́ки.

Вои́стинну Тя, Чи́стую, возвеща́юще, сла́вим, Богоро́дице./ Ты бо Еди́наго родила́ еси́, от Тро́ицы воплоще́нна./ Ему́же со Отце́м и Ду́хом вси пое́м:/ да пое́т Го́спода вся́кая тварь/ и превозно́си́т во вся ве́ки.

Ин

Ирмо́с:

Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозно́си́те во вся ве́ки.

С весе́лием, преподо́бне, святы́х чи́ны чисте́йшей твое́й души́ предтеку́т/ на место отра́дно в све́тлая селе́ния,/ иде́же пра́ведных ли́цы веселя́тся./ С ни́миже ны́не пое́ши:/ свяще́нницы, воспо́йте, лю́дие, превозно́си́те Христа́ во ве́ки.

Стра́нна твоя́ чудеса́:/ зве́ри бо укроти́л еси́, ути́шив страсте́й во́лны,/ предглаго́леши бу́дущая проро́ческим да́ром,/ полки́ де́монския прогоня́я,/ язви́ши благомо́щными бде́нии же и моли́твами, и поще́ньми,/ и креста́ си́лою непобеди́мою, Богоно́се.

И́же Моисе́ю пе́рвее от столпа́ веща́вый,/ столп от земли́ до Небесе́ всесве́тел просте́рт тебе́ показа́,/ иде́же ны́не лежи́т терпели́вое твое́ и многострада́льное те́ло./ Ему́же, ве́рою предстоя́ще, благоче́стно пое́м:/ лю́дие, превозно́си́те Христа́ во ве́ки.

Ра́достно па́мять твоя́ соверша́ется, всехва́льне:/ в радостотво́рную бо оде́ялся еси́ доброде́тель,/ и́стинную ри́зу спасе́ния, и чи́стую,/ и светови́дную весе́лия оде́жду,/ в не́йже ны́не, красу́яся, пое́ши непреста́нно:/ свяще́нницы, воспо́йте, лю́дие, превозноси́те Христа́ во ве́ки.

Богоро́дичен: Неискусобра́чно родила́ еси́, Де́ва пребы́вши,/ и стра́нным Рождество́м Твои́м совокупи́ла еси́ вся,/ вре́менную брань и да́льнее разстоя́ние разруши́вши,/ Христа́, ми́ра да́теля, нося́щи в не́дрех Твои́х./ его́же ве́рно пое́м и превозно́си́м во ве́ки.

Катава́сия: Утро́бу неопа́льно образу́ют:

Песнь 9

Ирмо́с:

Весь еси́ жела́ние, весь сла́дость,/ Сло́ве Бо́жий, Де́вы Сы́не,/ Бо́же бого́в, Го́споди, святы́х Пресвяты́й,/ тем Тя вси с Ро́ждшею велича́ем.

Жезл кре́пости даде́ся естеству ́тле́нному/ Сло́во Бо́жие во утро́бе Твое́й, Чи́стая,/ и сие́ возста́ви, ко а́ду попо́лзшееся./ Те́мже Тя, Всечи́стая, я́ко Богоро́дицу велича́ем.

Ю́же изво́лил еси́, Влады́ко,/ приими́ ми́лостивно моли́твенницу, Ма́терь твою́, о нас,/ и Твоей бла́гости вся́ческая испо́лня́тся;/ да Тя вси я́ко Благоде́теля велича́ем.

Ин ирмо́с:

Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком плотски́/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Благоуха́ет твоя́ ра́ка духо́вное благово́ние,/ бога́тно веселя́щи твоя́ сы́ны, тя обстоя́щия и́скренно,/ помина́ющия, преподо́бне, А́нгельское твое́ пребыва́ние,/ и тебе́ да́нную све́тлость, и сла́ву, и присносу́щную красоту́.

Прото́ржеся в пусты́ни вода́,/ и земля́ жа́ждущая в бла́то бысть, моли́твами претвори́тся, о́тче, твои́ми:/ по́стничестии бо полки́ сию́ населя́ют, я́ко ре́чну,/ страна́ Иорда́нова процвете́, я́ко крин,/ напая́ема твои́ми слеза́ми.

Све́тлость святы́х на Небесе́х/ я́ко пра́веднику тебе́ возсия́, о́тче,/ Христа́ бо пра́вду и́стинную проявле́нно возлюби́л еси́;/ его́же жи́тельству после́дуя, всеблаже́нне,/ уподо́бився сего́ живоно́сней, я́ко мо́щно бе, святы́ни.

Бога́тным, Богоно́се, сия́я Све́том и ли́ки А́нгельския ви́дя,/ светови́дны обходя́щия Тро́ический Све́т/ и прие́млющия благода́тию Боговиде́ния лучи́,/ не преста́й моля́ оста́вле́ния грехо́в сподо́битися пою́щим тя.

Богоро́дичен: Я́ко всех превы́шши земноро́дных несравне́нными, Чи́стая, пе́рвенствы:/ Бо́га бо, всех тварей Творца́, во утро́бу твою́ вмести́ла еси́./ Того́ моли́ я́ко ми́лостива/ единомышле́ние, мир, благостоя́ние ти́хое Це́рквам дарова́ти.

Катава́сия: Люби́ти у́бо нам:

Свети́лен:

Пусты́ню град сотвори́л еси́ любому́дрыми нра́вы,/ отце́в красото́, Са́вво, о́тче Богому́дре,/ и сию́ соверши́л еси́ мы́сленный рай,/ цвету́щь цве́ты Боже́ственными, единонра́вных мно́жества,/ досто́йно соверша́ющих твою́ честну́ю па́мять.

Сла́ва, и ны́не, Богоро́дичен:

Я́ко иму́щи сострада́тельное и ми́лость ве́лию,/ при́зри, Всепе́тая Богоро́дице Де́во, на мое́ смире́ние/ и страсте́й молву́, и собла́знов жития́ разори́, Отрокови́це,/ и огня́ гее́нскаго изба́ви мя моли́твами Твои́ми.

На хвали́тех стихи́ры, на 4, глас 1.

Подо́бен: Небе́сных чино́в:

Презира́тель до́льних и пресе́льник,/ рачи́тель Го́рних/ и пусты́нный граждани́н, Са́вво Богому́дрый,/ всем нам пра́здновати повелева́ет/ к Бо́гу отше́ствия его́ ве́рно день спаси́тельный.

Вне пло́ти и ми́ра доброде́тельми быв,/ и те́ми на земли́ в житии́/ просла́вил еси́ Го́спода сла́вы, о́тче му́дре,/ и по достоя́нию от него́ просла́вился еси́,/ и врачева́ний показа́лся еси́ Боже́ственный исто́чник,/ Са́вво Богоприя́тне.

Смире́н, незло́бив, кро́ток, прост,/ молчали́в я́ко был еси́, о́тче,/ па́че челове́ка вои́стинну,/ и невеще́ствен в вещи дом Бо́жий яви́лся еси́, вседосто́йный,/ я́же от него́ прибы́вшая тебе́ дарова́ния/ ми́лостивно подава́я нам.

Сла́ва, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду́ трудо́в твои́х,/ де́монския погуби́л еси́ полки́/ и А́нгельския дости́гл еси́ чи́ны,/ и́хже житию́ непоро́чно поревнова́л еси́./ Дерзнове́ние име́я ко Христу́ Бо́гу,/ мир испроси́ душа́м на́шим.

И ны́не: Богоро́дице, Ты еси́ лоза́ и́стинная:

Славосло́вие вели́кое. И отпу́ст.

НА ЛИТУРГИ́И

Блаже́нны от кано́на свята́го, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных его́.

Стих: Что возда́м Го́сподеви о всех, я́же воздаде́ ми?

Апо́стол к Гала́том, зачало 213.

Аллилу́ия, глас 8: Блаже́н муж, боя́йся Го́спода:

Стих: Си́льно на земли́ бу́дет се́мя его́.

Ева́нгелие от Матфе́я, зачало 43. Прича́стен: В па́мять ве́чную бу́дет пра́ведник:

НА МАЛОЙ ВЕЧЕ́РНИ

Стихи́ры, глас 1.

Подо́бен: Небе́сных чино́в:

Небе́сным причте́н бы́ти жела́я,/ земна́я презре́ от ю́ности,/ предпочте́ Го́рняя па́че до́льних/ святи́тель Христо́в Гу́рий,/ на его́же святы́я за ны к Бо́гу моли́твы/ упова́ние возложи́хом.

Небе́сным присоедини́ся чино́м,/ земны́й А́нгел, Небе́сный челове́к,/ во пло́ти Безпло́тных был подража́тель,/ с ни́мже ны́не предстоя́ Христо́ви,/ мо́лится о рабе́х свои́х,/ упова́ние по Бо́зе нань возлага́ющих.

Небе́сный граждани́не, А́нгелов сожи́телю,/ иера́рхов соприча́стниче,/ насле́дниче Ца́рствия Христо́ва,/ о нас, ча́дех твои́х, моли́ся,/ упова́ние на тя возло́жших.

Сла́ва, глас 2:

Прииди́те, христоимени́тии лю́дие,/ Христо́ва служи́теля па́мять че́стне почти́м,/ иера́рха Гу́рия свята́го:/ той бо, а́ще и оты́де от нас душе́ю,/ оба́че прису́тствует нам честны́ми мощми́ свои́ми./ Со А́нгелы водвори́лся,/ челове́ком же посо́бствует,/ оста́вил земна́я, но не оста́вил чад свои́х,/ отлучи́лся ста́да своего́ па́стырь наш до́брый,/ но от Го́рняго восше́ствия назира́ет о́вцы своя́/ и мо́лится Христу́ Бо́гу о душа́х на́ших.

И ны́не, Богоро́дичен:

Спаси́ от бед рабы́ Твоя́, Богоро́дице,/ я́ко вси по Бо́зе к Тебе́ прибега́ем,/ я́ко неруши́мей стене́ и предста́тельству.

На стихо́вне стихи́ры, глас 2.

Подо́бен: До́ме Евфра́фов:

Дом ду́ха Свята́го/ от ю́ности соде́яся/ уго́дник Бо́жий Гу́рий,/ ны́не же в Небе́сный дом/ душе́ю пресели́ся от земны́х.

Стих: Уста́ моя́ возглаго́лют прему́дрость и поуче́ние се́рдца моего́ ра́зум.

Храм бысть Ду́ху Свято́му/ де́вственное те́ло его́,/ сосу́д духо́внаго ми́ра,/ того́ ра́ди почте́ся/ от Бо́га нетле́нием чу́дным.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Дом Пречи́стыя Богома́тере,/ име́я в себе́ честны́я твоя́ мо́щи,/ Гу́рие святи́телю,/ весели́тся о источа́емых от Тебе́ це́льбах/ и ра́достно прославля́ет чудеса́ твоя́.

Сла́ва, глас 8:

Душе́вную чистоту́ и теле́сную возлюби́в,/ уго́дниче Бо́жий, добронра́вие стяжа́л еси́,/ сми́рением и кро́тостию украси́лся еси́,/ того́ ра́ди господи́н твой земны́й почти́л тя па́че све́рстник твои́х./ Ты же, преподо́бне, ве́рне тому́ рабо́тая,/ вся чу́вственная устро́ивал че́стне,/ ду́хом же Христу́ угожда́л еси́,/ присвоя́яся тому́ доброде́тельми./ Он же тебе́ в Небе́снем Ца́рствии Свое́м/ возме́здие даде́ ве́чно,/ сотвори́в тя насле́дника неконча́емых Свои́х благ,/ на земли́ же честны́я твоя́ мо́щи чудесы́ обогати́л есть./ Ты же, ему́ ны́не предстоя́,/ моли́ся о чту́щих па́мять твою́.

И ны́не, Богоро́дичен гла́са.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 5.

Подо́бен: Ра́дуйся:

Ра́дуйся, иера́рше Христо́в,/ вели́кий уго́дниче Бо́жий,/ служи́телю Боже́ственных та́ин досто́йный,/ чи́стый и честны́й сосу́де Свята́го ду́ха,/ носи́вый Бо́га в се́рдце твое́м вы́ну,/ во уста́х же благода́ть излива́ющуюся име́вый,/ па́стырю до́брый, учи́телю прему́дрый,/ наста́вниче изря́дный, ко́рмчию корабля́ церко́внаго иску́сный,/ прави́телю чу́дный, путеводи́телю изве́стный,/ о́тче святи́телю Гу́рие,/ его́же моли́твами почерпа́ем от Христа́ Бо́га ве́лию ми́лость.

Ра́дуйся, ле́пото Руссская,/ сла́ва новопросвеще́нному твоему́ гра́ду,/ красото́ церко́вная, добро́то престо́ла архиере́йска,/ честь иера́рхов, похвало́ мона́шествующих,/ весе́лие люде́й ве́рных,/ ра́дование печа́льных, целе́бниче больны́х,/ безме́здный врачу́ неду́жных,/ по́мощниче безпо́мощных,/ сла́досте огорче́нных беда́ми,/ исто́чниче неоску́дный к тебе́ притека́ющим,/ и́мже почерпа́ем от Христа́ Бо́га ве́лию ми́лость.

Ра́дуйся, новопросвеще́нный гра́де Каза́нь,/ такова́го сподо́бивыйся име́ти в себе́ граждани́на,/ и́же я́ко дар свы́ше от Бо́га дарова́ся тебе́,/ и я́ко бога́тство неоску́дное посла́ся тебе́,/ и я́ко дража́йшее сокро́вище вве́рися ти –/ нетле́нныя цельбопода́тельныя мо́щи вели́каго Бо́жия архиере́я Гу́рия,/ апо́стольски в стране́ твое́й потруди́вшагося,/ тьму нече́стия от Тебе́ отгна́вшаго,/ свет же ве́ры в ро́дех твои́х возсия́вшаго,/ защи́тника и засту́пника твоего́,/ стеною моли́тв свои́х кре́пце тя огражда́ющаго,/ Бо́гу о тебе́ предста́тельствующаго и моля́щагося вы́ну,/ да прие́млеши всегда́ ве́лию ми́лость.

Ины стихи́ры, глас 2.

Подо́бен: Ки́ими похва́льными венцы́:

Ки́ими похва́льными венцы́/ венча́ем святи́теля, предстоя́щаго на Небеси́ Бо́гу?/ Не оставля́ющаго же нас ду́хом,/ Каза́нстей Це́ркви предстоя́теля,/ трудо́в пропове́днических прича́стника,/ нра́вов апо́стольских подража́теля./ Сей бо вои́стинну есть достои́н безсме́ртныя сла́вы,/ его́же венча́ет на Небеси́ Христо́с Бог наш,/ име́яй ве́лию ми́лость.

Ки́ими пе́сненными добро́тами/ восхва́лим Гу́рия святи́теля?/ Хвалу́ воспе́вшаго Бо́жию посре́де ро́да неве́рных/ и Богопозна́нием мно́гих вразуми́вшаго,/ гре́шныя от заблужде́ния обрати́вшаго/ и А́нгелам мно́гу ра́дость сотво́ршаго./ Сей вои́стинну достои́н уста́ Бо́жия нарещи́ся/ и приия́ти вене́ц на Небеси́ от Христа́ Бо́га на́шего,/ иму́щаго ве́лию ми́лость.

Ки́ими духо́вными пе́сньми/ похва́лим святи́теля?/ Ми́ро от моще́й свои́х источи́вша,/ боле́зни от челове́к прогна́вша,/ це́льбам исто́чник я́вльшася,/ Каза́ни прекра́сное удобре́ние/ и всея́ Руси укра́шение,/ но́ваго чудотво́рца́, безме́зднаго врача́./ Его́же прославля́ет Христо́с Бог наш,/ име́яй ве́лию ми́лость.

Сла́ва, глас 6:

Святи́теля вели́каго,/ во иера́рсех изря́днаго,/ в ликостоя́нии святы́х сла́внаго,/ в чудотво́рца́х чу́днаго, архиере́я свята́го,/ соше́дшеся в па́мять его́, о пра́зднолюбцы,/ пе́сненными похвала́ми ублажи́м, глаго́люще:/ ра́дуйся, пра́ведне, его́же душа́ в руце́ Бо́жии,/ и не прико́снется ей му́ка;/ ра́дуйся, преподо́бне, дости́гнувы́й Небе́сныя сла́вы/ и возра́довавыйся на ло́жи поко́я ве́чнаго./ Ра́дуйся, блаже́нне, чи́стый се́рдцем, я́сно ны́не Бо́га зря́й;/ ра́дуйся, свя́те, всех святы́х Святе́йшему благоугоди́вый./ Ра́дуйся, иера́рше, в Го́рняя че́стне прия́тый;/ ра́дуйся, до́брый ра́бе Го́сподень, вше́дый в ра́дость Го́спода своего́,/ ему́же ны́не моли́ся/ о чту́щих любо́вию всечестно́е твое́ преста́вление.

И ны́не, Богоро́дичен:

Посла́н бысть с Небесе́ Гаврии́л Арха́нгел/ бла́говести́ти Де́ве зача́тие/ и, прише́д в Назаре́т, помышля́ше в себе́, чудеси́ удивля́яся:/ О, ка́ко в Вы́шних непостижи́м Сый от Де́вы ражда́ется!/ Име́яй престо́л Не́бо и подно́жие зе́млю,/ во утро́бу вмеща́ется Деви́чу,/ на него́же Шестокрила́тии и Многоочи́тии зре́ти не мо́гут,/ сло́вом еди́ным от сея́ воплоти́тися благоизво́ли,/ Бо́жие есть Сло́во настоя́щее./ Что у́бо стою́ и не глаго́лю Де́ве:/ ра́дуйся, Благода́тная, Госпо́дь с Тобо́ю;/ ра́дуйся, Чи́стая Де́во;/ ра́дуйся, Неве́сто Неневе́стная;/ ра́дуйся, Ма́ти Живота́,/ благослове́н Плод чрева Твоего́.

Вход. Проки́мен дне. Чтения три святи́тельская

(зри день 6-й).

На литии́ стихи́ры, глас 3:

Архиере́ю преосвяще́нне Гу́рие,/ Каза́нский свети́льниче, па́стырю до́брейший,/ смотря́яй свы́ше на ста́до твое́,/ подо́бниче верхо́внейшаго Петра́:/ я́коже бо тому́ па́ству слове́сных ове́ц Христо́с вручи́л есть,/ си́це поста́вил тя па́стыря новопросвеще́нным лю́дем Свои́м,/ да наставля́еши я на стезю́ спасе́ния/ и введе́ши в огра́ду Небе́сную./ Виждь собра́вшияся ча́да твоя́ в па́мять твою́/ и любе́зно пра́зднующим честно́е преставле́ние твое́/ и моли́ па́стырей Нача́льника соблю́стйся па́стве твое́й ненаве́тованней,/ и гра́ду твоему́ от ви́димых и неви́димых враго́в изба́витися,/ и спасти́ся душа́м на́шим.

Глас 5:

Небе́сный челове́че, земны́й А́нгеле,/ бла́гоче́стия о́бразе, до́ме доброде́телей духо́вных,/ учи́телей украше́ние благоле́пное,/ сла́вий добропе́снивый, воспева́вый догма́ты Христо́вы ве́ры,/ язы́че о́гненный, опали́вый Магоме́тово злочести́вое уче́ние,/ Каза́нский светйлъниче, Гу́рие святи́телю,/ Христа́ моли́ пода́ти правосла́вным на ага́ряны одоление.

Сла́ва, глас 2:

Орга́не добро́гласный,/ возгреме́вый Христо́во Ева́нгелие исмаильтяном/ и тем возвести́вый Сло́ва Бо́жия смотре́ние,/ уме Го́рний, доле жи́тельствуя/ и в Небе́сных Бо́гомы́слием пребыва́вый:/ ты, управля́я Каза́нскую па́ству,/ умно́жил еси́ церко́вная ча́да,/ от тьмы неве́рия в свет ве́ры приве́дя/ и усынови́в я Небе́сному Отцу́./ И ны́не, святи́телю Гу́рие,/ не забу́ди, моли́ся о рабе́х твои́х,/ всеблаже́нную па́мять твою́ ра́достно пра́зднующих.

И ны́не, Богоро́дичен.

На стихо́вне стихи́ры, глас 2.

Подо́бен: Егда́ от Дре́ва:

Егда́ зави́стнии клевре́ти твои́ оклеветаша тя к господи́ну,/ непра́вду сплета́юще на тя, пра́веднаго,/ и́стинный ра́бе Христо́в Гу́рие,/ непови́нна рука́ма и чи́ста се́рдцем, тогда́, я́ко дре́вняго в Еги́пте Ио́сифа,/ мра́чная темни́ца тя прия́т,/ те́сныя тя у́зы угнето́ша,/ злострада́ние же и глад истни́ твое́ те́ло./ Оба́че Бог тя не оста́ви,/ и в те́мнем бо ме́сте чистота́ со́вести твоея́, я́коже заря́, пред Всеви́дцем сия́ше,/ целому́дрие же твое́ и А́нгелом бысть изве́стно,/ и гото́вяхуся тебе́ за терпе́ние све́тлые венцы́./ Ты же благода́рно воспева́л еси́:/ сла́ва смотре́нию Твоему́, Человеколю́бче.

Стих: Уста́ моя́ возглаго́лют прему́дрость/ и поуче́ние се́рдца моего́ ра́зум.

Егда́ нечелове́ческою сне́дию в темни́це был еси́ пита́ем, страда́льче,/ на три дни по еди́ному снопу́ овса́ прие́мля,/ тогда́ не́кий от друго́в твои́х, та́йно приходя́ к узи́лищу твоему́,/ обеща́шеся тебе́ приноси́ти пи́щу./ Ты же отню́д не восхоте́л еси́,/ довле́яся скотоподо́бным пита́нием:/ сло́во бо Бо́жие насыща́ше ду́шу твою́/ и наде́жда в Бо́зе укрепля́ше тя,/ непови́нность же твоя́ бысть, я́ко пирова́ние,/ сле́зы же твоя́ бы́ша тебе́ хлеб день и нощь,/ от се́рдца же твоего́ благода́рно к Бо́гу взыва́л еси́:/ сла́ва сицево́му Твоему́ о мне устрое́нию, Человеколю́бче.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Егда́ по двуле́тнем злострада́нии восхоте́ тя Госпо́дь извести́ на свобо́ду,/ тогда́ свет возсия́ тебе́ в две́рех темни́цы,/ и невозбра́нное изше́ствие угото́вася тебе́./ Услы́шал бо Вы́шний моли́тву твою́,/ и воздыха́ния твоя́ проидо́ша о́блаки,/ сле́зы же твоя́ пред Бо́га взыдо́ша,/ смотре́ние же Влады́чне, я́коже Ио́сифа Еги́пту,/ предустроя́ше тя духо́внаго пита́теля а́лчущей сло́ва Бо́жия стране́ ага́рянстей/ и престо́л тебе́ в ней гото́вяше,/ да управля́еши но́выя Христо́вы лю́ди/ и насыща́еши я бра́шном, пребыва́ющим в живо́т ве́чный./ Ты же, о всем благода́ря Творца́ своего́,/ ра́дуяся, воспева́л еси́:/ сла́ва мно́гому милосе́рдию Твоему́, Человеколю́бче.

Сла́ва, глас 6:

И́ноков похвалу́, иера́рхов удобре́ние и отце́в сла́ву,/ исто́чника целе́бнаго ми́ра,/ чудесе́м ре́ку, ми́ру Русскому духо́вное напое́ние,/ а́лчущим пита́теля, си́рым и вдови́цам засту́пника/ и всем скорбя́щим уте́шителя, Гу́рия преблаже́ннаго,/ пе́рваго архиере́я сла́внаго гра́да Каза́ни,/ соше́дшеся, о пра́зднолюбцы, пе́сненными похвала́ми воспое́м, глаго́люще:/ ра́дуйся, Каза́нский пе́рвый учи́телю,/ ва́рваров просвети́телю и правосла́вных ти́хий наказа́телю,/ в моли́твах сто́лпе преутвержде́нный./ Ра́дуйся, в ю́ности твое́й темни́цу моли́твами просвети́вый/ и ску́дныя ра́ди та́мо пи́щи а́нгельский хлеб насле́довавый./ Ра́дуйся, в жи́зни твое́й кре́пкий подви́жниче/ и неле́ностный виногра́да Христо́ва де́лателю./ И ны́не, вели́кий святи́телю Гу́рие,/ не преста́й моля́ся Христу́ Бо́гу/ за весь освяще́нный собо́р и за вся лю́ди,/ ве́рою и любо́вию чту́щия пречестну́ю па́мять твою́,/ да изба́вимся вси от ва́рварскаго нахожде́ния/ и от вся́ких наве́тов ви́димых и неви́димых враго́в на́ших/ моли́твами твои́ми.

И ны́не, Богоро́дичен.

Тропа́рь, глас 4:

Пра́вило ве́ры и о́браз целому́дрия,/ учи́теля до́брых дел/ и наста́вника спасе́ния даде́ тя Госпо́дь/ новопросвеще́нному гра́ду Каза́ни,/ в не́мже приобре́л еси́ но́выя от язы́к лю́ди/ и приве́л еси́ я Христо́ви./ Сего́ ра́ди в па́мять твою́ ра́достно соше́дшеся,/ че́стне пра́зднуем свято́е твое́ успе́ние,/ ты же, о́тче наш, святи́телю Христо́в Гу́рие,/ моли́ Христа́ Бо́га/ спасти́ся душа́м на́шим.

Ин тропа́рь, глас 4:

От младости удаля́яся земна́го мудрова́ния/ и после́довав ско́рбным путе́м Законоположи́телю своему́ Христу́ Бо́гу./ Те́мже и Он тя воздарова́ на земли́ нетле́нием,/ на Небесе́х же со угоди́вшими ему́ архиере́и ликовству́еши,/ Гу́рие святи́телю,/ моли́ Христа́ Бо́га/ пода́ти оте́честву на́шему на враги́ побе́ду,/ и мир ми́рови,/ и душа́м на́шим ве́лию ми́лость.

НА У́ТРЕНИ

На Бог Госпо́дь: тропа́рь два́жды. Сла́ва, и ны́не, Е́же от ве́ка утае́нное:

По 1-м стихосло́вии седа́лен, глас 5: 

По́стником во удобре́ние и мона́шествующим во удивле́ние/ бысть житие́ твое́ во оби́тели твое́й:/ безропти́во бо и со усе́рдием прохо́дил еси́ вся рабо́ты монасты́рския,/ пови́нуяся наста́вником, по рече́нию апо́стольску, и покоря́яся им,/ ве́дый изве́стно, я́ко нача́льствующий пеку́тся о душа́х, вве́ренных им,/ поне́же сло́во о них возда́ти и́мут пра́ведному Судии́./ Того́ ра́ди ты, и́стинный ра́бе Христо́в, наста́внику твоему́, я́ко Христу́, покоря́лся еси́,/ и ра́дость тому́ сми́ре́нием и послуша́нием твои́м соде́лывал еси́, а не воздыха́ние,/ тем у́бо от Бо́га и ты наста́вник люде́й его́ учине́н был еси́.

Сла́ва, и ны́не, Богоро́дичен:

Боже́ственнаго естества́ о́бщницы бы́хом Тобо́ю, Богоро́дице Де́во:/ Бо́га бо нам воплоще́нна родила́ еси́./ Те́мже Тя по до́лгу вси благоче́стно почита́ем и ве́рно ублажа́ем.

По 2-м стихосло́вии седа́лен, глас 8:

Уче́нием Боже́ственных слове́с твои́х,/ а́ки мре́жею ры́бы, ага́ряны привлача́л еси́ во свято́е Креще́ние,/ во е́же благоче́стно им ве́ровати во Отца́ и Сы́на и Свята́го ду́ха,/ и благоприя́тными твои́ми моли́твами, а́ки со́лнце, озари́л еси́ престо́льный град твой и Све́том Невече́рним того́ просвети́л еси́./ Те́мже, святи́телю Гу́рие, соше́дшеся, вопие́м ти:/ моли́ Христа́ Бо́га пода́ти грехо́в оставле́ние любо́вию притека́ющим к тебе́/ и с ве́рою каса́ющимся ковче́гу честны́х моще́й твои́х.

Сла́ва, и ны́не, Богоро́дичен:

Небе́сную дверь и ковче́г,/ всесве́тлый о́блак и несеко́мую гору,/ неопали́мую купину́, слове́сный рай, Е́вино воззва́ние,/ всей вселе́нней вели́каго благода́ти сосу́да, воспои́м Ма́терь Бо́жию,/ я́ко спасе́ние то́ю соде́лася ми́ру и оставле́ние до́лга дре́вняго./ Те́мже и воззове́м к Ней:/ моли́ Христа́ Бо́га согреше́нием оставле́ние дарова́ти/ благоче́стно покланя́ющимся Пресвято́му Рождеству́ Твоему́.

По полиеле́и седа́лен, глас 1:

Бо́жия ду́ха светозаре́нием,/ служи́тель быв Христу́, вся́ческих Влады́це,/ тьму разруши́л еси́ ага́рянскаго нече́стия,/ и научи́л еси́ лю́ди, и просвети́л еси́ Боже́ственным Креще́нием./ Те́мже, пропове́дника тя вси и́стины иму́ще, святи́телю Гу́рие, вопие́м к тебе́:/ моли́ Христа́ Бо́га спасти́ся душа́м на́шим.

Сла́ва, и ны́не, Богоро́дичен:

Наста́ви нас на путь покая́ния,/ уклоня́ющихся всегда́ безпути́ем к заблу́ждению и преблага́го Бо́га прогневля́ющих,/ Неискусобра́чная Де́во, Марие́ Чи́стая, Сло́ву две́ре, Бо́жие вселе́ние,/ прибе́жище бо еси́ отча́янным и спасе́ние душа́м челове́ческим.

Степе́нна, 1-й антифо́н 4-го гла́са.

Проки́мен: Честна́ пред Го́сподем/ смерть преподо́бных его́.

Стих: Что возда́м Го́сподеви о всех, я́же воздаде́ ми?

Ева́нгелие от Иоа́нна, зачало 36.

По 50-м псалме́ стихи́ра, глас 6:

Ты еси́ па́стырь до́брый,/ взыска́вый заблу́ждшия лю́ди/ и поги́бшия ду́ши обрати́вый,/ коз́лища во о́вцы претвори́вый/ и во Христо́ву приве́дый я огра́ду./ Те́мже днесь о́вцы твоя́,/ в па́мять твою́ соше́дшеся,/ еди́ногласно восхваля́ем, глаго́люще:/ ра́дуйся, святи́телю Бо́жий, пе́рвый Каза́ни архиере́ю;/ ра́дуйся, пропове́дниче ве́ры и о́бразе до́брых дел./ Ра́дуйся, гра́ду твоему́ утвержде́ние;/ ра́дуйся, учи́телю, научи́вый ага́рянский род покланя́тися в Тро́ице еди́ному Бо́гу,/ Отцу́ и Сы́ну и Свято́му Ду́ху./ ему́же ны́не предстоя́ со святи́тели,/ моли́ся о спасе́нии пра́зднующих святу́ю и всечестну́ю па́мять твою́.

Кано́н Богоро́дице со ирмосо́м на 6 и святи́телю Гу́рию на 8, глас 8.

Песнь 1

Ирмо́с:

Изра́иля от рабо́ты изба́вил еси́, Го́споди,/ десни́цею Твое́ю держа́вною,/ я́ко о́наго спасл еси́,/ ны́не нас спаси́.

Тро́ице Пресвята́я,/ песнь Тебе́ принести́ и досто́йными похвала́ми уго́дника Твоего́, святи́теля Гу́рия, воспе́ти пода́ждь ми,/ да, ра́дуяся, сла́влю Тя во ве́ки.

Повеле́нием самоде́ржца царя́ и вели́каго князя/ первопресто́льник церко́вный гра́ду новопросвеще́нному явля́ешися/ и апо́стольски научи́л еси́ ве́ровати Тро́ице во Еди́ном Су́ществе́.

Моли́твенный храм в дому́ твое́м име́я,/ в том многотру́дне подвиза́лся еси́,/ всено́щная стоя́ния и моли́твы принося́ вы́ну Бо́гу.

Богоро́дичен: Бо́жия Ма́ти,/ ро́ждшая еди́наго от Святы́я Тро́ицы,/ сло́весное ми недоуме́ние разреши́/ и сло́во ми пода́ждь, и́мже Тя просла́влю.

Песнь 3

Ирмо́с:

Утвержде́н сло́вом Небеса ́/ и зе́млю основа́вый на вода́х мно́гих,/ утверди́ мя к пе́нию славосло́вия Твоего́, Го́споди.

А́гнца Непоро́чнаго, Бо́жие Сло́во Соприсносу́щное, святи́телю Гу́рие, моли́,/ да пода́ст стране́ на́шей благоде́нство и на сопроти́вных побе́ду.

Его́же измла́да возлюби́л еси́, Того́ наслажда́тися жела́я,/ вся тле́нная ми́ра сего́ в ничто́же вмени́л еси́, преходя́щая презре́в,/ да в бу́дущем утверди́шися сла́вити Го́спода.

Благове́рных зако́ну наказу́я благоче́стия,/ неве́рныя же научи́л еси́ позна́ти ве́ру благочести́ву и и́стинну/ и пе́ти при́сно песнь, А́нгелы пева́емую в Тро́ице Бо́гу:/ Свят еси́, Го́споди.

Богоро́дичен: Под кров Твой держа́вный с ве́рою прибега́ем, Богоро́дице:/ покрый и соблюди́, Госпоже́, моли́твами Твои́ми/ и спаси́ от бед и от злых челове́к рабо́в Твои́х,/ при́сно пою́щих Тя.

Конда́к, глас 6:

И́стине основа́ние и ве́ры утвержде́ние/ и в поуче́ниих преизя́щнаго све́мы тя благоче́стию споспе́шника,/ апо́столом сопресто́льника, страстоте́рпцем соприча́стника,/ по́стником ку́пно ревни́теля, похваля́ем тя, Гу́рие святи́телю,/ и ве́лия таи́нника Бо́жия благода́ти.

И́кос:

Храм ду́ха Пресвята́го был еси́,/ и река́, вод духо́вных наполня́ема,/ и Це́ркве огражде́ние неподви́жимо,/ гра́ду же Каза́ни звезда́ пресве́тлая, чистото́ю душе́вною и теле́сною сия́ющая,/ Боже́ственныя уче́ния гром воспуща́я,/ трубо́ю же духо́вною глас ве́ры всем провозвеща́я/ и сим ага́рянское злоче́стие отсека́я,/ Тро́ицу во еди́нице пе́ти научи́л еси́, о́тче наш, вели́кий святи́телю Гу́рие,/ вели́кий таи́нниче Бо́жия благода́ти.

Седа́лен, глас 5:

Чу́ден вои́стинну измла́да был еси́,/ посто́м и моли́твами и долулега́нием Бо́гу угоди́в,/ и терпе́нием твои́м темни́цу отве́рзл еси́;/ чу́дно же и пресла́вно и Той о тебе́ соде́ла,/ а́ки друга́го Па́вла с Небеси́ позва́в,/ на архиере́йский престо́л по жре́бию тя избра́л есть./ того́ ра́ди мо́лим тя, вели́кий святи́телю Гу́рие,/ моли́ спасти́ся душа́м на́шим.

Сла́ва, и ны́не, Богоро́дичен:

Стра́шно чу́до зача́тия и несказа́нен о́браз Боже́ственнаго рождества́ в Тебе́ позна́ся, Чи́стая Присноде́во,/ ужаса́ет ми ум и удивля́ет помышле́ния,/ сла́ва Твоя́, Богоро́дице, всем воспростре́ся на спасе́ние душа́м на́шим.

Песнь 4

Ирмо́с:

Из горы́ приосене́нныя, Сло́ве, проро́к,/ едины́я Богоро́дицы,/ хотя́ща воплоти́тися Богови́дно усмотри́/ и со стра́хом славосло́вите си́лу твою́.

Благ нрав и послуша́ние к твоему́ наста́внику име́л еси́/ и, во Све́те Святы́я Тро́ицы свеселя́ся, с ним пое́ши:/ сла́ва си́ле Твое́й, Го́споди.

Благослове́нием первосвяти́теля поставля́ешися па́стырь и учи́тель новопросвеще́нному гра́ду Каза́ни,/ иде́же пре́лестию врага́ омраче́нныя лю́ди све́том Богора́зу́мия просвети́л еси́.

И́ова пра́веднаго терпе́нию подража́л еси́,/ в боле́зни слежа́ на одре́,/ но а́ще те́лом изнемога́л еси́, оба́че ду́хом был еси́ си́лен,/ поя́ Творцу́ твоему́ пе́ние непреста́нно.

Богоро́дичен: Богоневе́сто и Богома́ти,/ Плотоно́сца без боле́зни ро́ждши и по рождестве́ Де́ва я́вльшися,/ того́ моли́, Влады́чице, да изба́вимся бед и скорбе́й.

Песнь 5

Ирмо́с:

Мрак души́ моея́ разжени́, Светода́вче Христе́ Бо́же,/ началоро́дную тьму изгна́в бе́здны,/ и да́руй ми свет повеле́ний Твои́х, Сло́ве,/ да, у́тренюя, сла́влю Тя.

Архиере́й сый, архиере́ем на́шим в моли́твах спосо́бствуй,/ да возмо́гут стране́ на́шей, благоче́стие содержа́щей,/ и всему́ христиа́нскому наро́ду испроси́ти у Христа́ ми́ра и ве́лия ми́лости.

Ны́не, преблаже́нне Гу́рие, душа́ твоя́ почива́ет на Небесе́х, предстоя́ Престо́лу Христо́ву,/ честны́я же твоя́ мо́щи, нетле́нием почте́ны,/ даю́т исцеле́ния приходя́щим с ве́рою.

Дре́вле помраче́нный зми́евою пре́лестию,/ ны́не же просвеще́нный Христо́вою благода́тию град Каза́нь,/ ви́дя в себе́ мо́щи твоя́, ра́дуется;/ мы же, ча́да твоя́, чудесы́ обогаща́емы, весели́мся/ и, Христа́ сла́вяще, зове́м: спаси́ нас, Го́споди.

Богоро́дичен: Богоро́дице, всех Цари́це,/ стране́ на́шей на враги́ побе́ду да́руй,/ и сопроти́вных сове́ты разори́, и от междоусо́бныя бра́ни изба́ви,/ и клеветнико́в че́люсти сокруши́, Влады́чице,/ и от всех бед моли́твами Твои́ми спаси́ нас.

Песнь 6

Ирмо́с:

Я́ко во́ды морски́я, Человеколю́бче,/ волна́ми жите́йскими обурева́юся./ Те́мже, я́ко Ио́на, та́ко вопию́ Ти:/ возведи́ от тли живо́т мой, Благоутро́бне Го́споди.

Утеша́я скорбя́щия, заступа́я оби́димыя,/ накормля́я а́лчущия и вся всем подава́я неоску́дно,/ Гу́рие святи́телю, Христа́ Бо́га моли́ спасти́ся нам.

Недосто́йное на́ше моле́ние, усе́рдное пе́ние/ и приноси́мое твои́м трудо́м похвале́ние, преподо́бне чудотво́рче, не отри́ни,/ но приими́ и моли́ Христа́, да изба́вит нас шу́ияго стоя́ния.

Тече́ние наче́н до́бре, путь по́двига соверши́л еси́ пресла́вно/ и зе́млю непло́дную моли́твами твои́ми добро́пло́дну показа́л еси́;/ умоли́ у́бо Христа́ и о нас, принося́щих тебе́ пе́ние сие́, святи́телю,/ да пода́ст нам принести́ покая́ния плоды́ и изба́вит ны ве́чнаго муче́ния.

Богоро́дичен: Богоблаже́нная, и от А́нгел покланя́емая,/ и от земны́х всегда́ славосло́вимая,/ Творца́ Твоего́ и Бо́га, его́же родила́ еси́, Пресвята́я Де́во,/ моли́ спасти́ся нам.

Конда́к, глас 4:

Чу́вственныя стра́сти победи́в, чистото́ю, я́ко со́лнце, возсия́л еси́,/ чи́сто житие́ до конца́ сохрани́в,/ и от неве́рия в ве́ру мно́гих ко Христу́ приве́л еси́;/ того́ ра́ди от Бо́га нетле́нием почте́н, чудесы́ твои́ми вся удиви́л еси́./ мо́лим у́бо тя, святи́телю Гу́рие,/ моли́твами твои́ми от бед изба́ви нас, да зове́м ти:/ ра́дуйся, о́тче преди́вный,/ гра́ду Каза́ни похвала́ и утвержде́ние.

И́кос:

Пе́рвый сея́тель был еси́ духо́вных доброде́телей,/ и пе́рвый па́стырь, и Це́ркви нача́льник,/ пе́рвый архиере́й и учи́тель христиа́нскому зако́ну в новопросвеще́ннем гра́де Каза́ни,/ ве́рныя лю́ди пита́я хле́бом уче́ния благода́тнаго зако́на,/ напоя́я пи́вом духо́вныя благода́ти,/ неве́рныя же уча́ позна́ти и́стину и крести́тися святы́м Креще́нием,/ и мно́жество наро́да от неве́рия в ве́ру ко Христу́ приве́л еси́,/ чи́стым житие́м Бо́гу угоди́ти наста́вив их./ Сего́ ра́ди Христо́с свято́му и трудолюби́вому твоему́ те́лу дарова́ нетле́ние и дар чудотворе́ния:/ приходя́щии бо с ве́рою к цельбоно́сным твои́м моще́м прие́млют неоску́дныя страсте́й премене́ния,/ и боле́зней исцеле́ния, и грехо́в проще́ние/ твои́ми, свя́те, ко Христу́ моли́твами./ Те́мже зове́м ти:/ ра́дуйся, о́тче преди́вный, гра́ду Каза́ни похвала́ и утвержде́ние.

Песнь 7

Ирмо́с:

О́троцы Богочести́вии в Вавило́не/ о́бразу злато́му не поклони́шася,/ но посреди́ пе́щи о́гненныя, ороша́еми,/ песнь воспева́ху, глаго́люще:/ превозно́си́мый отце́в и нас Бо́же, благослове́н еси́.

Не то́кмо те́ло твое́ нетле́нием просла́ви Бог, святи́телю Гу́рие,/ но и погреба́льная вся пребы́ша кре́пчае но́вых./ Мы же, сим дивя́щеся, зове́м:/ благослове́н Бог оте́ц на́ших.

Подвиго́в твои́х ра́ди и трудо́в, преподо́бне,/ те́ло твое́ нетле́нно показа́ Подвигополо́жник,/ гро́бу же и ри́зам вместо тле́ния кре́пость дарова́,/ благослове́н Бог оте́ц на́ших.

Не еди́но те́ло твое́, святи́телю, тле́нию бысть неприча́стно,/ но и погре́бшихся с ве́рою во еди́ной гробни́це с тобо́ю:/ моли́твами твои́ми дву и́ноков нетле́нием одари́ Бог. Ему́же зове́м:/ благослове́н еси́, Го́споди, Бо́же оте́ц на́ших.

Богоро́дичен: О всепе́тая и Всенепоро́чная Влады́чице, моли́ Сы́на Твоего́, Христа́ Бо́га на́шего, да изба́вит нас ве́чнаго муче́ния, да пое́м: благослове́н Бог оте́ц на́ших.

Песнь 8

Ирмо́с:

Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,/ я́ко Соде́телю всех во ве́ки.

Пречестна́я ра́ка, в не́йже положе́но бысть че́стное те́ло твое́, святи́телю Гу́рие,/ ми́ра благоуха́нна преиспо́лнися,/ и́мже с ве́рою ма́жущиися неоску́дна исцеле́ния прии́маху, зову́ще:/ да благослови́т тварь вся Го́спода/ и превозноси́т его́ во ве́ки.

Новопросвеще́нному гра́ду Каза́ни первопресто́льник посла́н быв,/ мно́жество неве́рных к твоему́ Влады́це Христу́ приве́л еси́ и научи́л я еси́ пе́ти:/ благослови́те, по́йте и превозноси́те Го́спода во ве́ки.

Па́стырский жезл прие́м, святи́телю,/ но́вым лю́дем учи́тель был еси́, пресла́вне Гу́рие,/ и мно́ги лю́ди ага́рянска язы́ка святы́м Креще́нием обнови́л еси́,/ да вси с тобо́ю зову́т:/ благослови́те, по́йте и превозноси́те Го́спода во ве́ки.

Богоро́дичен: Богоизбра́нная, еди́на Всенепоро́чная, Пречи́стая Богоневе́сто Богома́ти,/ приими́ мольбы́ ве́рою упова́ющих на Тя/ и сотвори́ моле́ние ко Свя́тей Тро́ице, изба́вится нам от всех бед,/ Тя сла́вящим и превознося́щим Го́спода во ве́ки.

Песнь 9

Ирмо́с:

Сне́дию дре́ва ро́ду прибы́вшая смерть/ Кресто́м упраздни́ся днесь,/ и́бо прама́терняя всеро́дная кля́тва разруши́ся прозябе́нием/ Чи́стыя Богома́тере,/ ю́же вся си́лы Небе́сныя велича́ют.

Прия́л еси́ от Христа́ Боже́ственное дарова́ние:/ от мно́гих бо лет сокро́венны честны́я твоя́ мо́щи/ в три́десять второ́е ле́то обрето́шася, ничи́мже вреди́мы,/ исцеле́ния разли́чна подава́юще.

Па́мять преста́вления твоего́ наста́ нам све́тло пра́зднество,/ пречу́дный святи́телю Христо́в, прехва́льне Гу́рие,/ душа́ бо твоя́ свята́я, рука́ма Бо́жиима прия́та бы́вши, всели́ся в Небе́сныя,/ те́ло же твое́ честно́е прия́т от Го́спода благода́ть нетле́ния и чуде́сных целе́б./ Те́мже ти зове́м:/ уврачу́й на́ша душе́вныя боле́зни и теле́сныя неду́ги/ и изба́ви нас от враг на́ших.

Благода́рственныя пе́сни принесе́м Христу́ Бо́гу на́шему,/ такова́го нам святи́теля дарова́вшему,/ Це́ркви Свое́й пречестно́е удобре́ние/ и гра́ду Каза́ни вели́кое утвержде́ние.

Богоро́дичен: Умири́ мир, Христе́, мольба́ми Чи́стыя Богоотрокови́цы,/ и низложи́ вра́жия си́лы, и тишину́ неизглаго́ланну устро́й и во ве́ки сохрани́.

Свети́лен.

Подо́бен: Пло́тию усну́в:

Плоть умертви́л еси́, Гу́рие, посто́м, и бде́нием, и сухояде́нием,/ и диа́вола посрами́л еси́, и си́лу его́, свя́те, разруши́л еси́,/ нечести́вым Тро́ицу пропове́дав, треблаже́нне.

Сла́ва, и ны́не, Богоро́дичен:

О Ма́ти Де́во Пречи́стая,/ еди́ному от Тро́ицы Ты была́ еси́ Прия́телище,/ Ада́мово воззва́ние и Е́вино от кля́твы свобожде́ние,/ спаси́ нас от диа́вольскаго лука́вства и нахожде́ния.

На хва́литех стихи́ры, глас 8:

Благода́ть духо́вная от ю́ности в тя всели́ся/ и научи́ тя правове́рным смы́слом сия́ти,/ и блиста́ти доброде́телей светлостьми́,/ и озаря́ти ве́рных испо́лне́ние,/ де́монскую же тьму отгоня́ти,/ те́мже я́ко прича́стника тя Невече́рнему́ Све́ту/ ублажа́ем благочестно́ вси,/ досточу́дне о́тче наш святи́телю Гу́рие.

Благода́тию духо́вною име́я ду́шу обогаще́нну,/ стяжа́л еси́ чист по́мысел и се́рдце бо́дро,/ ве́ру небла́зненну и любо́вь вои́стинну нелицеме́рну;/ от земли́ же преста́вився к Небе́сным,/ с ли́ки пра́ведных водворя́ешися./ Те́мже чтим тя свяще́нными пе́сньми/ и благоче́стно вси сла́вим успе́ние твое́, святи́телю Гу́рие.

Благода́тию духо́вною ага́рянская ча́да просвети́в,/ стра́сти и́дольския от душ их отгна́л еси́/ и Святе́й Тро́ице покланя́тися научи́л еси́,/ селе́ние Той преочи́щенно соде́лал еси́,/ те́мже к Небе́сней жи́зни преста́вился еси́./ Бог же соблюде́ честны́я твоя́ мо́щи на земли́ нетле́нны,/ архиере́ю, о́тче наш Гу́рие.

Сла́ва, глас 8:

Егда́ от царя́ земна́го повеле́ние/ и от всего́ свяще́ннаго собо́ра/ на Каза́нскую па́ству по жре́бию благоволе́ние даде́ся свято́му Гу́рию,/ тогда́ и той неле́ностно попече́ние творя́ше о ста́де Христо́вых слове́сных ове́ц,/ наипа́че же во всено́щных бде́ниях при́сно Бо́гови предстоя́,/ моля́шеся о обраще́нии в ве́ру ага́рянских чад,/ всем же лю́дем в поще́нии и моли́твах сам о́браз быва́ше/ и о любви́ поуча́ше я./ Ага́ря́не же, ви́дяще нелицеме́рное его́ во всем целому́дрие,/ сла́достне уче́нию его́ внима́ху/ и мно́зи Креще́ние прие́мляху,/ ве́рующе во Святу́ю Тро́ицу,/ Отца́ и Сы́на и Свята́го ду́ха./ Егда́ же прибли́жися к блаже́нней кончи́не свое́й,/ даде́ ему́ Бог предуве́да́ти преста́вление за четверонощедне́вное вре́мя,/ и та́ко, все упова́ние возло́жи́в на Христа́ и на Пречи́стую его́ Ма́терь,/ пре́йде ра́достно от зде́шних зре́ти непреста́нно сла́ву Бо́жию.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Славосло́вие вели́кое и отпу́ст.

НА ЛИТУРГИ́И

Блаже́нны от кано́на свята́го, пе́сни 3-я и 6-я. Проки́мен: Уста́ моя́ возглаго́лют прему́дрость/ и поуче́ние се́рдца моего́ ра́зум.

Стих: Услы́шите сия, вси язы́цы, внуши́те, вси живу́щии по вселе́нней.

Апо́стол ко Евре́ем, зачало 311, от полу.

Аллилу́ия.

Стих: Уста́ пра́веднаго поуча́тся прему́дрости, и язы́к его́ возглаго́лет суд.

Ева́нгелие от Матфе́я, зачало 11. Прича́стен: В па́мять ве́чную: