НА ВЕЧЕ́РНИ

На Го́споди, воззва́х: стихи́ры пра́здника, глас 6.

Подо́бен: Всю отложи́вше:

К жи́зни присносу́щней/ Жи́знь ро́ждшая преста́вися,/ подаю́щи ве́рным ми́лость,/ Всенепоро́чная Богоро́дица днесь,/ и тварь вся ны́не, игра́ющи, ра́дуется,/ а́нгельская совокупле́ния ны́не,/ я́ко Цари́це сра́дующеся, провожда́ют,/ пра́зднственное пе́ние соверша́юще в пе́снех:/ еди́ный же Сея́ Сын и всех Царь/ с Собо́ю всели́, я́ко все́ми влады́чествующую.

О́блаки носи́ми,/ богогла́снии от всея́ земли́/ приидо́ша в Сио́н взе́млеми апо́столи,/ ви́дети сла́вное Ма́тере Госпо́дни/ и свято́е вои́стинну успе́ние,/ и светоза́рны глаго́лы принести́,/ и чу́дно погребе́ние соде́лати Сей,/ я́ко ро́ждшей Го́спода,/ и ве́рным всем прибе́жище,/ и покро́в держа́вен,/ и́же на земли́ Боже́ственный/ и непобори́мый вои́стинну бы́вши.

Све́тло пра́зднуем в Боже́ственнем успе́нии,/ Я́же всех вы́шши тва́рей,/ принося́ще Сей сла́вныя и све́тлыя вси да́ры,/ вои́стинну боже́ственны,/ я́же суть Сей ле́потны,/ ве́ру, и наде́жду, и любо́вь несму́тну,/ чистоту́, освяще́ние и пра́вду,/ и́миже наслажда́ется,/ да и прича́стники Ей сподо́бит нас бы́ти,/ и Ца́рствия Вы́шняго удостоит.

Ины стихи́ры свята́го, глас 4.

Подо́бен: Дал еси́ зна́мение:

Дар благоприя́тен,/ от мате́рних тя рук возложи́ ро́ждшая,/ моли́твы досто́ин, Саму́иле, плод тя насле́довавши/ и отда́вши Бо́гу Благоде́телю, я́коже обеща́ся./ Те́мже в тебе́ упоко́ися благода́ть Ду́ха, сла́вне,/ беззло́бием возрасти́вши/ и му́дростию украси́вши.

Ма́стию свяще́нною я́ко свяще́нник обложи́мь/ и проро́к явля́емь, прозира́еши пре́дняя,/ и повеле́нием Боже́ственным помазу́еши царя́,/ и бу́дущая сказу́еши,/ судя́ пра́ведно изра́ильтеским лю́дем,/ непреста́нно согреша́ющим/ и от Бо́га удаля́ющимся,/ Саму́иле досточу́дне, Богоно́се пребога́те.

Ны́не не в гада́ниих,/ ниже́ в се́нех, я́ко пе́рвее,/ к лицу́ же лице́м зри́ши,/ Его́же возжела́л еси́,/ плотски́й мрак и тяготу́ отложи́в,/ и, Небеса́ обходя́, ра́дуешися,/ проро́че всече́стне,/ проро́ком равностоя́телю,/ пра́ведным собесе́дниче/ и А́нгелом соприча́стниче.

Сла́ва, и ны́не, глас 6:

На безсме́ртное Твое́ успе́ние,/ Богоро́дице, Ма́ти Живота́,/ о́блацы апо́столы по возду́ху восхища́ху,/ и, по ми́ру разсе́янныя,/ во еди́ном ли́це предста́ша пресвято́му Твое́му те́лу,/ е́же и погре́бше че́стно,/ глас Тебе́ Гаврии́лов пою́ще, вопия́ху:/ ра́дуйся, Благода́тная, Де́во,/ Ма́ти Безневе́стная,/ Госпо́дь с Тобо́ю./ С ни́миже,я́ко Сы́на Твоего́ и Бо́га на́шего, моли́/ спасти́ся душа́м на́шим.

На стихо́вне стихи́ры, глас 6.

Подо́бен: Тридне́вен:

Глаго́лом Боже́ственнаго Гаврии́ла после́дующе,/ ра́дуйся, Тебе́ зове́м, Чи́стая./ Ты у́бо Пресвята́я и Ма́ти Госпо́дня,/ к Сему́ преста́вльшися,/ помина́й о воспева́ющих Тя.

Стих: Воскресни́, Го́споди, в поко́й Твой,/ Ты и Киво́т святы́ни Твоея́.

Неизме́рная Прему́дрость Бо́жия/ храм Себе́ па́че ума́, Богоро́дице, созда́/ из Тебе́ Ду́хом Святы́м,/ и ны́не Тя к невеще́ственным селе́нием/ преста́ви, Всепе́тая.

Стих: Кля́тся Госпо́дь Дави́ду и́стиною,/ и не отве́ржется ея.

Раб, ны́не прихожду к Тебе́,/ Ма́тери всех Бо́га,/ от вся́ких изба́витися напа́стей моля́ся,/ но, о Богороди́тельнице,/ ца́рствующи с Сы́ном Твои́м,/ христиа́нский род сохраня́й.

Сла́ва, и ны́не, глас то́йже. Самогла́сен:

Егда́ преставле́ние пречи́стаго Твоего́ те́ла готовля́шеся,/ тогда́ апо́столи, обстоя́ще одр,/ с тре́петом зря́ху Тя,/ и о́ви у́бо, взира́юще на те́ло,/ у́жасом одержи́ми бяху,/ Петр же со слеза́ми вопия́ше Ти:/ о Де́во,/ ви́жду Тя я́сно просте́рту про́сту, Живота́ всех,/ и удивля́юся,/ в Не́йже всели́ся бу́дущия жи́зни наслажде́ние./ Но, о Пречи́стая,/ моли́ся приле́жно Сы́ну и Бо́гу Твое́му/ спасти́ся ста́ду Твое́му невреди́му.

Тропа́рь, глас 2:

Дар многоче́стен дан бысть непло́дней утро́бе/ и принесе́н в же́ртву, я́ко всесожже́ние благоприя́тно, Го́сподеви своему́,/ послужи́в Тому́ в преподо́бии и пра́вде,/ тем тя почита́ем, проро́че Бо́жий Саму́иле,/ я́ко моли́твенника о душа́х на́ших.

Ин Тропа́рь, глас 5:

От ма́тере умоле́нный, тезоимени́те да́ния Бо́жия,/ от Бо́га зва́ния во младе́нчестве сподо́бися,/ честны́й проро́че Саму́иле,/ до́бре пасы́й непокори́выя лю́ди/ и царе́м яви́выйся устрои́тель,/ и о нас, ве́рно чту́щих тя, моли́ И́стиннаго Бо́га,/ да спасе́т души на́ша.

Ин тропа́рь, общий, глас 2:

Проро́ка Твоего́ Саму́ила па́мять, Го́споди, пра́зднующе,/ тем Тя моли́м:/ спаси́ души на́ша.

Сла́ва, и ны́не, тропа́рь пра́здника, глас 1:

В рождестве́ де́вство сохрани́ла еси́,/ во успе́нии ми́ра не оста́вила еси́, Богоро́дице,/ преста́вилася еси́ к животу́, Ма́ти су́щи Живота́,/ и моли́тва́ми Твои́ми избавля́еши от сме́рти ду́ши на́ша.

На У́ТРЕНИ

По 1-й стихоло́гии седа́лен, глас 4.

Подо́бен: Удиви́ся Ио́сиф:

Ши́ршая небе́с я́вльшися на земли́, ро́ждшая пло́тию всех Соде́теля,/ ны́не в са́мая Небе́сная от земли́ преста́вилася еси́./ Пра́ведных у́бо ду́ши смотря́юще Тя, а́нгельстии же ли́цы зря́ще,/ я́ко Цари́це хвалу́ досто́йно всегда́ Тебе́ принося́т./ Те́мже моля́щи не преста́й о воспева́ющих Тя.

Сла́ва, и ны́не, то́йже.

По 2-й стихоло́гии седа́лен, глас 5.

Подо́бен: Собезнача́льное:

А́нгел мно́жества сла́восло́вят Тя, и челове́ческий род ве́рно пое́т Тя,/ я́ко преста́вилася еси́ от земли́ к Ро́ждшемуся из Тебе́, Богоро́дице Чи́стая./ И ны́не мо́лишися приле́жно, изба́витися от бед/ ве́рою пра́зднующим Твое́, Де́во, преста́вле́ние.

Сла́ва, и ны́не, то́йже.

Кано́н пра́здника со ирмосо́м на 8, глас 1.

Песнь 1

Ирмо́с: Преукраше́нная Боже́ственною сла́вою,/ свяще́нная и сла́вная, Де́во, па́мять Твоя́/ вся собра́ к весе́лию ве́рныя,/ начина́ющей Мариа́ме, с ли́ки и тимпа́ны,/ Твое́му пою́щия Единоро́дному:/ сла́вно я́ко просла́вися.

Да провожда́ют невеще́ственнии чи́нове/ небоше́ственное в Сио́н Боже́ственное те́ло Твое́,/ внеза́пу же сте́кшеся апо́стол мно́жество от коне́ц, Богоро́дице, Тебе́ предста́ша а́бие,/ с ни́миже, Чи́стая, Твою́ честну́ю, Де́во, па́мять сла́вим.

Побе́дныя по́чести взяла́ еси́ на естество́, Чи́стая, Бо́га ро́ждши,/ оба́че же, подо́бящися Творцу́ Твое́му и Сы́ну,/ па́че естества́ повину́ешися есте́ственным зако́ном./ Те́мже уме́рши, с Сы́ном востае́ши, ве́чнующи.

Ин кано́н свята́го на 4, его́же краегране́сие: Зря́щаго Саму́ила пою́ сла́ву. Творе́ние Ио́сифово, глас 4.

Песнь 1

Ирмо́с: Триста́ты кре́пкия,/ Рожде́йся от Де́вы,/ безстра́стия во глубине́/ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́/ побе́дное воспою́ пе́ние.

Непло́дней мое́й души́ доброде́телей благопло́дие израсти́ти/ твои́ми моли́тва́ми сподо́би, му́дре, непло́дныя прозябе́ние,/ я́ко да твое́ восхвалю́ светоно́сное торжество́ свяще́нными, Саму́иле, пе́сньми.

Разве́рзый дре́вле ложесна́ Са́рры и А́ннину моли́тву исполня́ет проявле́нно,/ и непло́дную плодови́ту благода́тию сотвори́, Саму́иле,/ я́ко звезду́, тя из нея́ возсия́ти благоизво́ли.

Боже́ственную свяще́нно омочи́в, преблаже́нне, оде́жду,/ ду́шу же заря́ми та́йными просвети́л еси́ Ду́ха,/ вся́кой та́йне, Богому́дре, научи́вся/ и, я́ко А́нгел, служи́в Бо́гу Вседержи́телю.

Богоро́дичен: Сый со Отце́м, я́ко Сын преве́чен, в после́дняя вопло́щся,/ Сын Твой и́стинно бысть, Чи́стая,/ всех же сыноположи́в Бо́гу ве́ры ра́ди, рабо́тавший лю́тому бори́телю.

Песнь 3

Ирмо́с: Соде́тельная и содержи́тельная всех/ Бо́жия Му́дросте и Си́ло,/ непрекло́нну, недви́жиму Це́рковь утверди́, Христе́,/ еди́н бо еси́ Свят,/ во святы́х почива́яй.

Жену Тя ме́ртвенну, но па́че естества́ и Ма́терь Бо́жию/ ви́девше, Всенепоро́чная, сла́внии апо́столи/ ужа́сно прикаса́хуся рука́ми сла́вою облиста́ющей,/ я́ко богоприя́тное Селе́ние ви́дяще.

Пости́же ру́це досади́тельныя де́рзаго, усече́нней суд нане́с,/ Бо́гу сохра́ньшу честь одушевле́нному Киво́ту, сла́вою Божества́,/ в Не́мже Сло́во плоть бысть.

Ин

Ирмо́с: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною Му́дростию, Христе́,/ несть бо свят, па́че Тебе́, Человеколю́бче.

Высоча́йше Бо́гу прилепи́вся, сла́вне,/ возлю́блен был еси́ от Него́,/ му́дростию Боже́ственною украша́емь и це́лостию удобря́емь.

Житие́ а́нгельское на земли́, Саму́иле, показу́я,/ собесе́дующия я́ве А́нгелы име́л еси́, блаже́нне,/ и я́же па́че ума́ науча́ющия тя.

Све́тло о́ко душе́вное стяжа́в,/ зри́ши вои́стинну да́льная, я́ко настоя́щая, благода́тию,/ проро́к показу́яся Вседержи́теля.

Богоро́дичен: Из Тебе́ про́йде Иису́с Христо́с воплоща́емь/ и обожи́ нас пло́ти прия́тием, Всенепоро́чная,/ те́мже я́ко Ма́терь Тя Сего́ почита́ем.

Конда́к проро́ка, глас 8:

Я́ко многоче́стный дар, пре́жде зача́тия вдан Бо́гу,/ и из мла́да Тому́, я́ко А́нгел, послужи́л еси́, всеблаже́нне,/ и сподо́бился еси́ предбу́дущая веща́ти./ Те́мже вопие́м ти:/ ра́дуйся, проро́че Бо́жий Саму́иле, архиере́ю вели́кий.

Ин кондак, проро́ка, глас 5:

Пома́зателю ца́рский,/ па́че же свята́го богови́дца Дави́да,/ вели́кий Саму́иле,/ потщи́ся умоли́ти о нас,/ да пома́жемся Свята́го Ду́ха ма́стию/ и будем стра́нни неприя́зни,/ я́коже Дави́д нечи́стому духу Сау́лову.

Седа́лен, глас 3.

Подо́бен: Боже́ственныя ве́ры:

Зако́на судьба́ми воспита́н, пома́зание че́стно яви́лся еси́,/ я́коже Ааро́н, свяще́нствовав, и, просвети́в се́рдце Ду́хом,/ я́ко настоя́щая, да́льная прови́дел еси́, проро́че честны́й./ Христа́ Бо́га моли́ дарова́ти душа́м на́шим мир и ве́лию ми́лость.

Сла́ва, и ны́не, глас то́йже.

Подо́бен: Красоте́ де́вства:

В рождестве́ Твое́м зача́тие безсе́менное,/ во успе́нии Твое́м ме́ртвость нетле́нная,/ чу́до в чудеси́ сугу́бо стече́ся, Богоро́дице:/ ка́ко бо Неискусому́жная, Младопита́тельница чиста́ су́щи?/ Ка́ко же Ма́ти Бо́гу мертвоно́сна мироуха́ющи?/ Те́мже со А́нгелом вопие́м Ти:/ ра́дуйся, Благода́тная.

Песнь 4

Ирмо́с: Ре́чи проро́ков и гада́ния/ воплоще́ние прояви́ша от Де́вы Твое́, Христе́:/ сия́ние блиста́ния Твоего́ во свет язы́ков изы́дет,/ и возгласи́т Тебе́ бе́здна с весе́лием:/ си́ле Твое́й Сла́ва, Человеколю́бче.

Ви́дите, лю́дие, и чуди́теся:/ Гора́ бо свята́я и я́вственная Бо́гу в Небе́сныя оби́тели превы́шше взе́млется,/ Не́бо земно́е в Небе́сное и нетле́нное селе́ние вселя́емо.

Жи́зни присносу́щныя и лу́чшия сме́рть Твоя́ бысть прехожде́ние, Чи́стая,/ от привре́менныя к Боже́ственней вои́стинну и непреходи́мей преставля́я Тя, Чи́стая,/ в весе́лии Сы́на зре́ти Твоего́ и Го́спода.

Взя́шася две́ри Небе́сныя, и А́нгели воспе́ша,/ и прия́т Христо́с де́вства Свое́й Ма́тере сосу́д;/ Херуви́ми подъя́ша Тя с весе́лием,/ Серафи́ми же сла́вят, ра́дующеся.

Ин

Ирмо́с: Седя́й в сла́ве на Престо́ле Божества́,/во о́блаце ле́гце/ прии́де Иису́с Пребоже́ственный/ Нетле́нною Дла́нию и спасе́ зову́щия:/ Сла́ва, Христе́, си́ле Твое́й.

Изря́дным житие́м священноукраша́емь,/ Бо́жия зако́ны спаси́тельныя вве́рени тебе́ бы́ша,/ Изра́илю возвеща́ти преступа́ющу/ и Милосе́рдаго всегда́ прогне́вающу.

Или́й жрец, беззако́ннующим сыно́м, осужда́ется,/ и пра́ведным судо́м Боже́ственныя слу́жбы отлуча́ется,/ свяще́нный же Саму́ил, я́ко послу́шник Зову́щаго, неле́стною душе́ю вво́дится.

Зако́нным опра́вданием предстоя́ изря́дно,/ я́коже Ааро́н дре́вле, Всецарю́ служи́л еси́/ и зако́нныя же́ртвы приноси́л еси́,/ прообразу́ющия Христово заколе́ние спаси́тельное.

Безу́мным лю́дем твои́м, Саму́иле, не пребыва́ющим всех Царя́ в Боже́ственных повеле́ниих,/ помазу́еши манове́нием богоде́льным царя́, я́коже проси́ша,/ рогопосека́юща тех кре́пость безу́мную.

Богоро́дичен: Недр не истощи́в О́тчих,/ в не́дрех Твои́х я́коже нов Младе́нец восклони́тися благоволи́,/ на воззва́ние, Де́во, душ на́ших, Ему́же зове́м:/ Сла́ва, Христе́, си́ле Твое́й.

Песнь 5

Ирмо́с: Бо́жию и неизрече́нную добро́ту/доброде́телей Твои́х, Христе́, испове́м:/ от Присносу́щныя бо сла́вы/ Соприсносу́щное и Ипоста́сное возсия́вый Сия́ние,/ из де́вственныя утро́бы/ су́щим во тьме и се́ни вопло́щся,/ возсия́л еси́ Со́лнце.

Я́ко на о́блаце, Де́во, апо́стольский лик носи́мь,/ к Сио́ну от коне́ц служи́ти Тебе́, О́блаку ле́гкому, собира́шеся:/ от Нея́же Вы́шний Бог су́щим во тьме и се́ни Пра́ведное возсия́ Со́лнце.

Труб богоприя́тнии язы́цы богосло́вных му́жей благогла́снейше Богоро́дице вопия́ху,/ исхо́дную возглаша́юще песнь Ду́хом:/ ра́дуйся, нетле́нный Исто́чниче/ Бо́жия живонача́льнаго и спаси́тельнаго всем воплоще́ния.

Ин

Ирмо́с: Нечести́вии не у́зрят сла́вы Твоея́, Христе́,/ но мы Тя, Единоро́дне,/ Оте́ческия сла́вы Сия́ние Божества́,/ от но́щи у́тренююще,/воспева́ем Тя, Человеколю́бче.

Умудри́вся Ду́хом Боже́ственным, из младе́нства служи́тель был еси́ Бо́гу,/ еле́ем, сла́вне, пома́зания цари́ благода́тию помазу́я,/ Боже́ственными манове́ньми.

Непоко́рно пребыва́ющу предре́кл еси́ Сау́лу безчи́нная преложе́ния, Саму́иле блаже́нне,/ Боже́ственное хоте́ние и оставле́ние я́ве Боже́ственнаго Ду́ха.

Беззло́бием всегда́ со изра́ильтяны живы́й,/ злое преложе́ние я́ве облича́ше,/ исправля́я, я́ко свяще́нник Боже́ствен, я́ко проро́к и́стиннейший.

Богоро́дичен: С на́ми быв за милосе́рдие,/ Спас от крове́й Твои́х свяще́нных па́че ума́, Всенепоро́чная, воплоща́ется/ и Бог и Челове́к Человеколю́бец познава́ется.

Песнь 6

Ирмо́с: Морски́й пучиноро́дный ки́тов вну́тренний огнь –/ тридне́внаго Твоего́ погребе́ния проображе́ние,/ его́же Ио́на проро́к показа́ся./ Спасе́н бо, я́ко и предпосла́ся, неврежде́н, вопия́ше:/ пожру́ Ти со гласом хвале́ния, Го́споди.

Дае́т Тебе́ я́же Превы́ше естества́ Царь всех Бог:/ в рождестве́ бо Де́ву я́коже сохрани́, та́ко во гро́бе те́ло соблюде́ нетле́нно/ и спросла́ви Боже́ственным преставле́нием,/ честь Тебе́, я́ко Сын Ма́тери, да́руя.

Вои́стинну Тя, я́ко све́тел све́щник невеще́ственнаго Све́та,/ кади́льницу злату́ю Боже́ственнаго У́гля, во Свята́я святы́х всели́,/ ру́чку и жезл, скрижа́ль богопи́санную, ковче́г святы́й,/ трапе́зу Сло́ва жи́зни, Де́во, Рождество́ Твое́.

Ин

Ирмо́с: Возопи́, прообразу́я погребе́ние тридне́виое,/ проро́к Ио́на, в ки́те моля́ся:/ от тли изба́ви мя, Иису́се, Царю́ сил.

Сло́во твое́, Сло́ва обожа́емо благода́тию, проявля́ше да́льняя, я́ко близ су́щая,/ Саму́иле проро́че, сосу́де Боже́ственнаго Ду́ха.

Возвыша́емь высо́кими виде́нии и дея́ньми,/ я́ко проро́к и Бо́жий свяще́нник Вседержи́теля,/ зако́нными служе́нии очи́щаеши лю́ди, досточу́дне.

Непотре́бствовася Сау́л, престу́пник быв,/ и Бог тебе́ вме́сто о́наго Дави́да кро́ткаго,/ Саму́иле Богому́дре, повелева́ет пома́зати ма́стию.

Богоро́дичен: Изба́вися от боле́зней Е́ва, Пренепоро́чная,/ без боле́зни бо Ты родила́ еси́ Христа́ Бо́га на́шего,/ страсти́ всех и боле́зни я́ве исцели́вшаго.

Кондак, глас 2:

В моли́твах Неусыпа́ющую Богоро́дицу/ и в предста́тельствах непрело́жное упова́ние/ гроб и умерщвле́ние не удержа́ста,/ я́коже бо Живота́ Ма́терь/ к животу́ преста́ви/ во утро́бу Всели́выйся присноде́вственную.

И́кос:

Огради́ моя́ помышле́ния, Христе́ мой,/ и́бо Сте́ну ми́ра воспе́ти дерза́ю, Чи́стую Ма́терь Твою́,/ на столпе́ глаго́л укрепи́ мя и в тя́жких мы́слех заступи́ мя,/ Ты бо взыва́ющим и прося́щим ве́рою моле́ния исполня́еши./ Ты мне у́бо да́руй язы́к прино́сен и по́мысл непосты́ден:/ вся́кое бо дая́ние сия́ния от Тебе́ низпосыла́ется, Светопода́телю,/ во утро́бу всели́выйся присноде́вственную.

Песнь 7

Ирмо́с: Безсту́дней я́рости же и огню́/ Боже́ственное жела́ние сопротивля́яся,/ огнь у́бо ороша́ше,/ я́рости же смея́шеся,/ богодохнове́нною слове́сною преподо́бных тривеща́нною цевни́цею/ противовеща́я мусики́йским орга́ном посреди́ пла́мене:/ препросла́вленный отце́в и наш Бо́же, благослове́н еси́.

Богоде́ланныя скрижа́ли Моисе́й, пи́санныя Боже́ственным Ду́хом, я́ростию сокруши́,/ но сего́ Влады́ка Ро́ждшую неврежде́нну в Небе́сныя сохра́нь до́мы ны́не внутрь всели́./ С Не́ю игра́юще, вопие́м Христу́:/ препросла́вленный отце́в и наш Бо́же, благослове́н еси́.

В кимва́лех – усты́ чи́стыми, мусики́йски же – се́рдцем све́тлым,/ доброгла́сною трубо́ю – высо́кою мы́слию,/ Де́вы и Чи́стыя в наро́читый избра́нный день преставле́ния,/ де́тельными пле́щуще рука́ми, вопие́м:/ препросла́вленный отце́в и наш Бо́же, благослове́н еси́.

Богому́дрии, собери́теся, лю́дие:/ Бо́жия бо сла́вы Селе́ние от Сио́на преставля́ется к Небе́сному жили́щу,/ иде́же глас чист пра́зднующих,/ глас несказа́ннаго ра́дования, и в весе́лии вопи́ющих Христу́:/ препросла́вленный отце́в и наш Бо́же, благослове́н еси́.

Ин

Ирмо́с: Ю́ноши три в Вавило́не,/веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди,/ Бо́же оте́ц на́ших.

Вели́к тя ро́ждшая дар всех Царю́ приво́дит, блаже́нне,/ моли́тву свяще́нну соверши́вши и пою́щи:/ Го́споди Бо́же оте́ц на́ших, благослове́н еси́.

Внутрь су́ща хра́ма тя и по чи́ну Ааро́ню служа́ща Небе́сному Влады́це,/ Боже́ственная благода́ть, сла́вне Саму́иле, просвети́.

Сло́вом Боже́ственным су́диши, блаже́нне, люде́й Изра́илевым,/ сим опра́вдание всегда́ Бо́жие возвеща́я/ и отвраща́я всяк вред враго́в моли́твою́ приле́жною.

Вся́ку вещь упраздни́в, сла́вне, твоего́ ума́,/ зерца́ло Ду́ха показа́лся еси́, вопия́ немо́лчно:/ благослове́н еси́, Го́споди Бо́же оте́ц на́ших.

Богоро́дичен: Яви́лася еси́ неопа́льно ро́ждши, Пречи́стая, я́ко вои́стинну Огнь Божества́./ Те́мже, ве́щныя моя́ стра́сти, Богороди́тельнице, попали́,/ я́ко ми́лостива и благолюби́ва.

Песнь 8

Ирмо́с: Пла́мень, ороша́ющ преподо́бныя,/ злочести́выя же попаля́ющ,/ А́нгел Бо́жий всемо́щный показа́ о́троком,/ живонача́льный же исто́чник соде́ла Богоро́дицу,/ тлю сме́рти и живо́т точа́щу пою́щим:/ Соде́теля еди́наго пои́м, изба́вленнии,/ и превозноси́м во вся ве́ки.

Глаго́лы после́доваху Боже́ственному Ковче́гу свяще́нному/ все мно́жество Богосло́вов в Сио́не:/ ка́мо и́деши ны́не, Ски́ние, – зову́ще, – Бо́га Жива́го?/ Не преста́й призира́ющи ве́рою пою́щия:/ Соде́теля еди́наго пое́м, изба́вле́ннии, и превозно́сим во вся ве́ки.

Я́коже, возде́вши ру́це, исхо́диши, Всенепоро́чная,/ ру́це, и́миже Бо́га носи́ла еси́ пло́тию,/ со дерзнове́нием, я́ко Ма́ти, рекла́ еси́ к Рожде́нному:/ я́же Ми дал еси́, во ве́ки сохрани́, вопи́ющия Тебе́:/ Соде́теля еди́наго пое́м, изба́вленнии, и превозно́сим во вся ве́ки.

Ин

Ирмо́с: Изба́вителю всех Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.

Украси́вся Ааро́нею оде́ждою, во святы́х Свята́я вшел еси́,/ же́ртвами, преблаже́нне, Изра́иля очища́я,/ провозвеща́ющими закла́ние А́гнца спаси́тельное.

По́мыслом чи́стым прие́м зарю́, Саму́иле, Ду́ха,/ я́коже проро́к Боже́ствен, провозвеща́еши да́льная, я́ко настоя́щая,/ сего́ ра́ди ве́рно восхваля́ем тя.

Избра́н Дави́д бысть в сыне́х Иессе́евых,/ я́коже яви́л еси́, помазу́я того́ ма́стию, Саму́иле, свято́ю и взыва́я:/ благослови́те, вся дела́ Госпо́дня, Го́спода.

И́же твое́ соверша́юще торжество́, Саму́иле, пра́ведным собесе́дниче,/ твои́ми моли́твами да улучи́м Ца́рство Вы́шнее, вопию́ще:/ благослови́те, вся дела́ Госпо́дня, Го́спода.

Богоро́дичен: Милосе́рдия Твоего́ мя сподо́би, ми́лостивая и благолюби́вая Влады́чице,/ и гее́нны изба́ви мя и тьмы о́ныя кроме́шния,/ да ве́рою и любо́вию почита́ю Тя.

Песнь 9

Ирмо́с: Побежда́ются естества́ уста́вы/ в Тебе́, Де́во Чи́стая:/ де́вствует бо рождество́ и живо́т предобруча́ет сме́рть,/ по рождестве́ Де́ва и по сме́рти жива́,/ спаса́еши при́сно, Богоро́дице, насле́дие Твое́.

Дивля́хуся А́нгельския си́лы, в Сио́не смотря́юще своего́ Влады́ку,/ же́нскую ду́шу рука́ми нося́щаго,/ пречи́сто бо Ро́ждшей сыноле́пно провозглаша́ше:/ гряди́, Чи́стая, с Сы́ном и Бо́гом просла́влена бу́ди.

Опря́та лик апо́стольский богоприя́тное те́ло Твое́,/ со стра́хом зря́ще и гла́сом ве́лиим веща́юще:/ в Небе́сныя до́мы к Сы́ну восходя́щи, спаса́еши при́сно, Богоро́дице, насле́дие Твое́.

Ин

Ирмо́с: Е́ва у́бо неду́гом преслуша́ния/ кля́тву всели́ла есть,/ Ты же, Де́во Богоро́дице,/прозябе́нием чревоноше́ния ми́рови Благослове́ние процвела́ еси́./ Тем Тя вси велича́ем.

Стоя́ я́ко служи́тель пред лице́м Влады́ки и Бо́га на́шего, блаже́нне,/ непоро́чным житие́м укра́шен, Тому́ служи́л еси́,/ Боже́ственныя лучи́ прие́мля и проро́чествуя явле́ннее.

Яви́лся еси́ от утро́бы ма́терни, сла́вне, Свята́го Ду́ха сосу́д:/ свяще́нною же проси́яв оде́ждою, Бо́гу угоди́л еси́/ кро́тостию се́рдца, пребога́те, и по́мысла красото́ю.

Днесь па́мять твоя́ нам, я́ко со́лнце, Богоно́се, возсия́ лучи́ бога́тых дарова́ний,/ просвеща́ющи ду́ши чту́щих тя, мглу же лю́тых отгоня́щи./ Те́мже тя вси ублажа́ем.

Взя́тся ко оби́телем светови́дным и просия́л еси́ со́лнца светле́йше,/ ви́диши, я́же ви́дят проро́цы, и апо́столи, и вси пра́веднии,/ обожа́емь прича́стием, Богодохнове́нне./ Те́мже тя вси ублажа́ем.

Богоро́дичен: Тлени́я не позна́вши му́жеска,/ Нетле́ннаго во утро́бе прия́ла еси́ Сло́ва,/ нас, истле́вшия, избавля́ющаго мно́гими грехи́,/ стра́стию нетле́нныя пло́ти Его́, нетле́нная еди́на, Всенепоро́чная.

Свети́лен.

Подо́бен: Не́бо звезда́ми:

Саму́ил пет бу́ди,/ пре́жде зача́тия да́нный дар Бо́гу Вы́шнему от ма́тере всеблагосла́вныя,/ и цари́ помазу́яй сей, я́ко иере́й и проро́к.

Сла́ва, и ны́не, пра́здника:

Апо́столи, от коне́ц совоку́пльшеся зде,/ в Гефсимани́йстей ве́си погреби́те те́ло Мое́,/ и Ты, Сыне и Бо́же Мой, приими́ дух Мой.

На стихо́вне стихи́ры, глас 2.

Подо́бен: До́ме Евфра́фов:

О, па́че есте́ственных,/ Чи́стая, Твои́х та́инств:/ Бо́жия бо Ма́ти,/ к Сему́, Богоро́дице, све́тло/ ны́не прешла еси́.

Стих: Воскресни́, Го́споди, в поко́й Твой,/ Ты и Киво́т святы́ни Твоея́.

Ле́ствица к Небеси́/ гроб Пречи́стыя Богоро́дицы есть,/ возводя́ пою́щия/ Боже́ственное/ Сея́ успе́ние.

Стих: Кля́тся Госпо́дь Дави́ду и́стиною/ и не отве́ржется ея.

Егда́ ко из Тебе́/ Рожде́нному преста́вилася еси́,/ снидо́шася на о́блацех/ те́ло Твое́ погребсти́,/ Де́во, апо́столи.

Сла́ва, и ны́не, глас и подо́бен то́йже:

Вси земноро́днии,/ стеце́мся усе́рдно/ со Безпло́тными/ погребсти́ Ро́ждшую/ Творца́ тва́ри.

НА ЛИТУРГИ́И

Бла́женны пра́здника, песнь 6-я, обою́ кано́нов со ирмосо́м на 6.

Кано́н моле́бный святи́телем Иоа́нну и Фео́дору, епи́скопом Су́ждальским