НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры, глас 1:

Прииди́те, ве́рных собо́ри,/ пресла́вное избавле́ние гра́да Москвы́ воспра́зднуем,/ се бо по́лчища вра́жеская,/ я́ко пото́цы во́ды быстротеку́щия,/ на прилежа́щия ве́си устреми́шася,/ и мно́жество до́брых во́инов/ ду́ши своя́ положи́ша./ О, чу́до пресла́вное,/ о, си́ла моли́твы Богома́тере!/ Тече́ние неукроти́мое ико́ною прегражда́ется/ и в бе́гство обраща́ется,/ лю́дие сия́ ви́деша,/ ра́достию испо́лнишася/ и вопия́ху Богоро́дице:/ ра́дуйся, побе́до непобеди́мая.

Весели́тся дне́сь све́тло/ сла́внейший град Москва́/ и оби́тель Твоя́, Богоро́дице,/ я́ко чудотво́рную ико́ну Твою́/ та́мо просла́вила еси́/ чудесы́ Боже́ственными,/ заступле́ние Твое́ держа́вное е́ю показа́вши/ и ага́ряны победи́вши,/ да вси благода́рственно вопие́м Ти:/ ра́дуйся, Благода́тная, Госпо́дь с Тобо́ю/ и Тобо́ю с на́ми во спасе́ние душ на́ших.

Ди́вна дела́ Твоя́, Го́споди,/ Пречи́стую Ма́терь Твою́ це́ркви дарова́л еси́:/ безпо́мощным ско́рую Послу́шницу,/ беззащи́тным Изба́вительницу кре́пкую,/ безотве́тным те́плое хода́тайство,/ приста́нище обурева́емым,/ поги́бшим взыска́ние,/ предстоя́щи бо Тебе́, всех Влады́це,/ мо́лится непреста́нно о всех нас.

Ди́вное вели́чие Твое́ испове́мы,/ Пресвята́я Де́во:/ взо́ру ве́ры предстои́ши,/ я́ко гора́ велича́йшая доброде́телей,/ луча́ми Со́лнца Пра́вды, Христа́, озаре́нная,/ чистото́ю де́вства при́сно блиста́ющая,/ живоно́сную во́ду благода́ти Свята́го Ду́ха/ преизоби́льно излива́ющая/ на всех, с ве́рою и любо́вию/ к Тебе́ притека́ющих.

Сла́ва, и ны́не, глас 4:

Гряди́, гряди́, Богоро́дице,/ избавле́ние нося́щи от сопроти́вных,/ Воево́да еси́ полку́ святи́телей,/ я́ко Тобо́ю Сы́на Бо́жия позна́хом,/ Воево́да еси́ полку́ му́чеников,/ я́ко пред Кресто́м стоя́вшая,/ Тебе́ же Са́мой ору́жие се́рдце про́йде,/ Воево́да еси́ полку́ преподо́бных,/ я́ко Присноде́ва, чистото́ю А́нгелы превозше́дшая,/ те́мже и нас защити́,/ еди́на Засту́пнице Преблагослове́нная.

Вход. Проки́мен дне и чте́ния Богоро́дичныя (зри день 15-й).

На лити́и стихи́ры, глас 2:

Осужде́ния изба́ви, Пресвята́я Богоневе́сто,/ и лю́тых прегреше́ний/ смире́нную мою́ ду́шу,/ и сме́рти измени́ моли́твами Твои́ми,/ и да́руй оправда́ние получи́ти в де́нь испыта́ния,/ е́же получи́ша святы́х собо́ри;/ покая́нием очище́на мя пре́жде конца́ покажи́/ и сле́зными излия́нии.

Сле́зы покая́ния,/ я́ко ми́ро многоце́нное,/ в чи́стый плат со тща́нием собира́еши, Засту́пнице,/ да, егда́ Стра́шному Суду́ гре́шная душа́ предста́нет,/ плат сей, слеза́ми испо́лненный,/ на весы́ Бо́жия правосу́дия возложи́ши,/ да не иму́щей, чим грехи́ покры́ти,/ милосе́рдие Бо́жие приклони́ши/ и а́дския му́ки моле́нием кре́пким свободи́ши,/ ка́ющихся прибе́жище.

Сла́ва, и ны́не, глас то́йже:

Слеза́ми ра́дости па́че же́мчуга/ ико́на Твоя́, Де́во, украша́ется,/ мно́жество пла́чущих неча́янную ра́дость обрета́ют,/ гре́шницы от внеза́пныя сме́рти избавля́ются,/ моли́твами Твои́ми, Всеще́драя.

На стихо́вне стихи́ры, глас 8:

Сла́вное ико́ны Твое́й на по́ле бра́ни прише́ствие,/ Богоро́дице Непоро́чная, песносло́вим зде́сь/ и Твое́ держа́вное нам заступле́ние/ от наше́ствия ага́рян досто́йно пра́зднуем,/ я́ко бо, Ма́ти су́щи Живота́,/ от напра́сныя сме́рти непови́нных изба́вила еси́/ и гра́ды и ве́си от огня́ и меча́ сохрани́ла еси́,/ Путеводи́тельнице Нело́жная на́шего спасе́ния.

Стих: Помяну́ и́мя Твое́/ во вся́ком ро́де и ро́де.

О, пресла́внаго чудесе́!/ О, боже́ственнаго к нам, гре́шным, долготерпе́ния,/ я́ко, наше́дшим на зе́млю на́шу лю́тым враго́м/ и ве́ре зело́ поруга́емей,/ непостижи́мое возме́здие от ико́ны соверша́ется./ Зри́те у́бо, лю́дие русстии,/ коли́ко мо́жет моли́тва Де́вы Пречи́стыя,/ ка́ко дре́вних чуде́с подо́бие дне́сь нам явля́ется,/ ка́ко страх сме́рти на враги́ обраща́ется,/ беззащи́тный же град, во́пли жен оглаша́емый,/ весе́лием и ра́достию внеза́пу исполня́ется./ Сла́ва Тебе́, Засту́пнице на́ша Блага́я и Ско́рая.

Стих: Слы́ши, Дщи, и ви́ждь,/ и приклони́ у́хо Твое́.

Что Тя нарече́м, Пречи́стая?/ Ре́ку ли ти́ху и многово́дну,/ я́ко скорбьми́ изсуше́нная сердца́ на́ша/ благода́тию напая́еши?/ Сте́ну ли необори́му Христо́вы Це́ркве,/ стра́жа ли гра́да неусы́пна,/ я́ко спаса́еши от враг ви́димых и неви́димых?/ Те́мже, от напа́стей внеза́пных избавля́емии,/ возопии́м Влады́чице:/ ра́дуйся, Всеми́лостивая,/ наде́жды ве́рных не посрамля́ющая.

Сла́ва, и ны́не, глас 4:

Пресла́вная дне́сь соверша́ются,/ Возбра́нная Воево́да и Цари́ца Небе́сная/ гряде́т Сама́ на супоста́ты/ и чудотво́рную ико́ну, я́ко щит несокруши́м,/ проти́ву злочести́вых поставля́ет,/ стра́хом ве́лиим и смяте́нием по́лчища вра́жия поража́ет,/ в бе́гство неудержи́мое обраща́ет,/ спаса́ющи от огня́ и лю́тых град и ча́да Своя́.

Тропа́рь, глас 4:

Засту́пнице ве́рных Преблага́я и Ско́рая,/ Пречи́стая Богоро́дице Де́во!/ Мо́лим Тя пред святы́м и чудотво́рным о́бразом Твои́м,/ да, я́коже дре́вле от него́ заступле́ние Твое́/ гра́ду Москве́ дарова́ла еси́,/ та́ко и ны́не нас от вся́ких бед и напа́стей ми́лостивно изба́ви/ и спаси́ ду́ши на́ша, я́ко Милосе́рдая.

НА У́ТРЕНИ

На Бог Госпо́дь: тропари́ по уста́ву.

По 1-м и 2-м сти́хословиих седа́льны зри во ино́й Слу́жбе (зри день сей ниже).

Велича́ние:

Велича́ем Тя,/ Пресвята́я Де́во,/ и чтим о́браз Твой святы́й,/ и́мже ди́вную побе́ду на ага́ряны/ правосла́вным дарова́ла еси́.

И́но велича́ние:

Велича́ем Тя,/ Пресвята́я Де́во,/ и чтим о́браз Твой святы́й,/ и́мже заступле́ние ди́вное/ гра́ду Твоему́ дарова́ла еси́.

По полиеле́и седа́лен зри во ино́й Слу́жбе (зри день сей ниже).

Та́же Степе́нна, 1-й антифо́н 4-го гла́са. Проки́мен, глас 4: Помяну́ и́мя Твое́/ во вся́ком ро́де и ро́де. Стих: Слы́ши, Дщи, и ви́ждь, и приклони́ у́хо Твое́. Вся́кое дыха́ние: Ева́нгелие от Луки́, зача́ло 4.

По 50-м псалме́ стихи́ра, глас 6:

Зна́мение побе́дное ви́девше,/ восхва́лим Возбра́нную Го́рних Сил Воево́ду,/ Всемо́щную Засту́пницу./ О́браз Твой чу́дный чтим, Пресвята́я Де́во,/ и́мже ско́рое заступле́ние Твое́ получа́ем,/ Покро́в бо еси́ наш,/ ди́вную си́лу о́наго издре́вле ве́дуще,/ и́мя Твое́ призыва́ем./ Прииди́те, вси ве́рнии,/ поклони́мся о́бразу Донски́я Бо́жия Ма́тере,/ град бо наш от огня́ и меча́ защища́ет./ Возблагодари́м же и Влады́ку Го́спода/ и Честно́му Кресту́ его́ поклони́мся,/ Сим бо побежда́ем враги́ на́ша,/ зле нам досажда́ющия.

Кано́н, глас 4. Пе́снь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Отве́рзи слух мой, Богоизбра́нная Де́во,/ во е́же разуме́ти словеса́ открове́ния и позна́ти пу́ть спасе́ния,/ да ве́ру иму́ тве́рдую Изба́вителю Бо́гу/ и воспою́ преди́вное его́ о нас промышле́ние.

Отве́рзи, душе́ моя́, о́чи ве́ры,/ и у́зриши мно́гая благодея́ния Бо́жия Ма́тере,/ во дни тя́жких обстоя́ний оте́честву на́шему издре́вле явля́емая,/ и воспо́й, ра́дующися, ми́лостивое тоя́ заступле́ние.

Немощны́х здра́вие, разсла́бленных исцеле́ние,/ оби́димых защище́ние, от наси́лия и зло́бы спасе́ние,/ ско́рбных в ну́ждах Помо́щнице,/ не преста́й моли́тися о чту́щих Тя.

Позна́й, душе́ моя́, си́лу Честна́го и Животворя́щаго Креста́ Госпо́дня,/ сим бо при́сно побежда́ем полки́ враг ви́димых и неви́димых,/ моли́твами Богоро́дицы и всех святы́х, в земли́ Рecстей просия́вших.

Гро́зное Боже́ственное преще́ние врази́ разуме́ша/ прише́ствием чудотво́рнаго о́браза Твоего́, Небе́сная Цари́це,/ стра́хом бо одержи́мии, в бе́гство внеза́пное обрати́шася,/ си́лою свы́ше гони́мии.

Глас хвалы́ и благодаре́ния прино́сим Ти, Влады́чице,/ и покланя́емся пречи́стому о́бразу Твоему́,/ и́мже мно́гажды на ага́ряны побе́ду дарова́ла еси́/ и рог наш вознесла́ еси́,/ Защи́тнице ско́рая ро́да христиа́нскаго.

Пе́снь 3

Ирмо́с: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве,/ венце́в сла́вы сподо́би.

Жите́йскими попече́нии и сластьми́ искуша́емии,/ Тебе́, исто́чнику тишины́ и богомы́слия, пе́сни прино́сим:/ утоли́ жа́жду духо́вную,/ ум наш к Не́бу возведи́, превы́шшая Го́рних Сил.

Ума́ моего́ просвеще́ние, во́ли сла́быя укрепле́ние,/ се́рдца уны́лаго ра́дование Ты еси́, Преблагослове́нная,/ молю́ Тя усе́рдно:/ вся си́лы души́ мое́й обнови́.

Сла́ва Тебе́, Всенепоро́чная,/ лю́бящим Тя де́вам неотъе́млемое сокро́вище,/ целому́дрия исто́чниче, Небе́сныя сла́дости открове́ние,/ уны́ния и печа́ли истребле́ние,/ смире́нных и боголю́бцев венча́ние и по́стников удобре́ние.

Изгла́ди грехопаде́ния ю́ности,/ приими́ покая́ние ста́рости мое́й, Цари́це Небе́сная,/ се бо от чре́ва ма́тере мое́й да́же доны́не враг не отступа́ет,/ не попусти́ мя твори́ти по́хоти его́,/ но у́зы грехо́вныя разреши́ и поми́луй мя.

Ка́ко умолю́ Тя, Богоневе́сто, усты́, злосло́вия испо́лненными,/ или́ ку́ю пе́снь вознесу́, со́вестию облича́емь?/ Возмогу́ ли позна́ти и́стину, лжи сослужи́тель, сосу́д гне́ва Бо́жия сый?/ Но, Жизнеда́тельнице, страстьми́ умерщвле́нную ду́шу мою́ оживи́.

Врагу́ лю́тому подступа́ющу,/ мно́гое мно́жество ста́рцев и жен простира́ют Ти немощне́и ру́це с во́плем кре́пким:/ прииди́, Ма́ти Милосе́рдия,/ прииди́, от лю́тыя сме́рти избавля́ющая,/ ускори́ спасти́ град и лю́ди Твоя́.

Седа́лен по 3-й пе́сни зри во ино́й Слу́жбе (день сей ниже).

Пе́снь 4

Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный,/ Нетле́нною Дла́нию, и спасе́ зову́щия:/ Сла́ва, Христе́, си́ле Твое́й.

О, вели́кая си́ла слез! О, незло́бие Влады́ки!/ За мене́, па́дшаго, Сам стра́ждет!/ Ты же, Богома́ти, у Креста́ Сы́на Своего́ стоя́вшая,/ неизсле́дную глубину́ Бо́жия снизхожде́ния нам покажи́/ и неосужде́нно причасти́тися святы́х и стра́шных Та́ин сподо́би.

Ма́ти ча́да злонра́внаго побежда́ется сердобо́лием/ и не мо́жет его́ презре́ти,/ те́мже па́че Ты, Благоутро́бная,/ преукра́шенное жили́ще Бо́жия снизхожде́ния,/ мене́, после́днейшаго, не оставля́еши/ и друг дру́га тяготы́ носи́ти нас науча́еши.

Облиста́й мя све́том Боже́ственнаго ли́ка Твоего́, Отра́до моя́ Пречи́стая,/ да ночна́я вознесу́ Ти моле́ния,/ услы́ши воздыха́ния немо́лчная/ и па́мятию сме́ртною от пре́лести греха́ спаси́.

Пла́чет ста́рость моя́, лиши́ся бо сыно́в и дще́рей,/ не́сть опо́ры в жи́зни одино́цей,/ но бу́ди мне столп и кре́пость, свобожде́ние печа́лей, Блага́я Уте́шительнице,/ и до конца́ дний мои́х сохрани́ мя от зла.

Неизрече́нною си́лою благода́ти возбрани́ скве́рным по́мыслом,/ обурева́ющим мя, Де́во Чи́стая,/ запрети́ им, и дале́че отгони́,/ и Боже́ственных песнопе́ний де́лателя мя сотвори́,/ да неле́ностно послужу́ Бо́гу моему́.

Во́инств благопоспеше́ние, борце́в му́жество,/ хра́брых спобо́рнице, Воево́до Возбра́нная,/ мо́лим Тя кре́пость ору́жию на́шему дарова́ти,/ да низложены́ бу́дут востаю́щии на ны,/ Тобо́ю бо побе́ды воздви́жутся.

Пе́снь 5

Ирмо́с: Ужасо́шася вся́ческая/ о Боже́ственней сла́ве Твое́й,/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя,/ мир подава́ющая.

Прама́ти Е́ва, в раю́ согреши́вши,/ мук рожде́ния соде́ла мя прича́стну,/ но Ты, Благода́тная, неболе́зненно Христа́ ро́ждшая,/ чадоро́дия ра́ди ду́шу мою́ спаси́.

Я́ко цвет се́льный, яви́ся ча́до мое́ в мир скорбе́й/ и дыха́нием сме́рти уже́ опали́ся,/ но по сло́ву Госпо́дню воспою́:/ блаже́нно де́тство, и́бо Ца́рство Небе́сное насле́дит,/ Ты же, Влады́чице, прекраще́ние воздыха́ний,/ Сама́, я́коже ве́си, ско́рбь мою́ облегчи́.

О́чи Твои́ све́тлеи с любо́вию на ни́щих призира́ют,/ и рука́ всегда́ сирота́м и вдови́цам просте́рта,/ сла́вим неусы́пное о них хода́тайство/ и, о́браз Твой честны́й лобыза́юще, про́сим:/ не отврати́ лица́ Твоего́ от нас, в ну́жде ожесточе́нных.

Та́йны грех мои́х обличе́ние ужаса́ет мя, Пречи́стая,/ но ничто́же возмо́жно утаи́ти от Всеви́дящаго О́ка,/ се прибега́ю к Твоему́ милосе́рдию,/ да́ждь ми си́лу к покая́нию и Твои́ми моли́твами покры́й мою́ наготу́.

Гнев, ревнова́ние и зло́ба в души́ мое́й го́рдей и тщесла́вней гнездя́тся,/ сам па́даю и па́дших осужда́ти дерза́ю,/ к Тебе́ прибего́х, обурева́емых Спаси́тельнице,/ страсте́й мои́х смра́дное мо́ре изсуши́.

Ужаса́ет мя де́нь Суда́ Бо́жия,/ Го́споду бо ве́дома вся помышле́ния,/ не наде́юся на до́брая дела́ моя́, не́сть бо тех у мене́,/ но прошу́ моли́тв Твои́х, гре́шных Спору́чнице.

Пе́снь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от нея́ ро́ждшагося Бо́га сла́вим.

Окая́нную мою́ ду́шу, влеко́мую лука́выми страстьми́,/ свободи́ из пле́на, па́дших воста́ние,/ ра́дуется бо Влады́ка Твоему́ о гре́шных предста́тельству,/ проше́ния Твоя́, я́ко Сын, исполня́яй.

Воздыха́ния тя́жкая слы́шиши, Преблагослове́нная,/ ско́рбь се́рдца моего́ ве́дущи,/ ми́ро утеше́ния и вино́ весе́лия возле́й на ра́ны душе́вныя,/ мрак уны́ния прогоня́ющи.

Помышля́ю труды́ подви́жников:/ пост непреста́нный, сле́зы сокруше́ния, моли́твы всено́щныя,/ послуша́ние нелицеме́рное, терпе́ние поноше́ний,/ ужаса́юся, Ма́ти Судии́ Пра́веднаго, моему́ нераде́нию о спасе́нии,/ от сна безчу́вствия мя пробуди́.

Су́щии во а́де не мо́гут Го́спода моли́ти,/ Ты же, Всемо́щная Предста́тельнице, я́ко Ма́ти, дерзнове́ние к Сы́ну и́маши,/ мо́лим Тя о сро́дницех на́ших и всех преста́вльшихся,/ испроси́ им грехо́в разреше́ние.

В сме́ртный час слы́шу глас Го́спода, проро́ком веща́ющ:/ предоста́ви Ми чад твои́х,/ Аз поддержу́ и препита́ю си́рых твои́х./ И Ты, Ма́ти Бо́жия, бу́ди ча́дом мои́м прибе́жище в де́нь ско́рби.

На по́ли бра́ни сме́рть ца́рствует,/ Ты же, Влады́чице, ве́рным во́ином моли́твою ма́тере жи́знь сохраня́еши,/ убие́нных же души́ в Ца́рство све́та незаходи́маго вселя́еши/ и та́ко от ве́чныя сме́рти избавля́еши.

Конда́к, глас 8:

Взбра́нной Воево́де победи́тельная,/ я́ко изба́вльшеся от злых,/ благода́рственная воспису́ем Ти, раби́ Твои́, Богоро́дице,/ но, я́ко иму́щая держа́ву непобеди́мую,/ от вся́ких нас бед свободи́, да зове́м Ти:/ ра́дуйся, Неве́сто Неневе́стная.

И́кос:

А́нгел Предста́тель с Небесе́ по́слан бы́сть рещи́ Богоро́дице: ра́дуйся!/ И, со безпло́тным гла́сом воплоща́ема Тя зря, Го́споди, ужаса́шеся,/ и стоя́ше, зовы́й к Ней такова́я:/ ра́дуйся, Е́юже ра́дость возсия́ет;/ ра́дуйся, Е́юже кля́тва исче́знет./ Ра́дуйся, па́дшаго Ада́ма воззва́ние;/ ра́дуйся, слез Е́виных избавле́ние./ Ра́дуйся, высото́, неудобовосходи́мая челове́ческими по́мыслы;/ ра́дуйся, глубино́, неудобозри́мая и а́нгельскима очи́ма./ Ра́дуйся, я́ко еси́ Царе́во седа́лище;/ ра́дуйся, я́ко но́сиши Нося́щаго вся./ Ра́дуйся, звездо́, явля́ющая Со́лнце;/ ра́дуйся, утро́бо Боже́ственнаго воплоще́ния./ Ра́дуйся, Е́юже обновля́ется тва́рь;/ ра́дуйся, Е́юже покланя́емся Творцу́./ Ра́дуйся, Неве́сто Неневе́стная.

Пе́снь 7

Ирмо́с: Не послужи́ша тва́ри Богому́дрии/па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

А́ще вся ве́си, Бо́га же не ве́си, ничто́же ве́си,/ и́щущим му́дрости вити́я возвеща́ет./ О Ма́ти Бо́жия!/ Неизсле́димая глубина́ Бо́жиих открове́ний Тобо́ю яви́ся,/ просвети́ мой ум, во е́же Го́спода Искупи́теля позна́ти,/ Бо́га оте́ц на́ших.

Чего́ ра́ди оскверня́ются путие́ гре́шника?/ Отвеща́ет проро́к Дави́д:/ того́ ра́ди, я́ко не́сть Бо́га пред ним./ Откро́й о́чи мои́ омраче́ннеи, Чи́стая,/ да позна́ю вездесу́щие Творца́ вся́ческих,/ Бо́га оте́ц на́ших.

Ви́жду покая́ние Дави́дово:/ во вре́тище облека́ется, ду́шу посто́м смиря́ет,/ питие́ пла́чем покая́ния растворя́ет,/ полу́нощи встае́т на моли́тву,/ моя́ же моли́тва Бо́гом отвергается,/ поне́же не явля́ю трудо́в, ни по́двигов,/ и́мже мя, Благода́тная, научи́.

Небе́сных Сил Цари́це,/разсе́й о́блаки печа́ли, смяте́ния и бу́рю по́мыслов укроти́,/ да́руй ми дух сокруше́ния и смире́ния,/ да из глубины́ се́рдца моего́ принесу́ чи́стую моли́тву Бо́гу оте́ц на́ших.

Се́рдце услажда́ется, егда́ благода́ть Твоя́ явля́ется,/ мир, умиле́ние и сле́зы ражда́ются,/ о Де́во, ра́досте моя́ неизрече́нная,/ не пре́зри мя, ожесточе́ннаго,/ но Сама́ посети́, да мук томле́ния изба́вит мя Бог оте́ц на́ших.

Никто́же изба́вит мя от сме́рти,/ ни роди́телие, ни ча́да,/ не спасе́т дар, ни́же приноше́ние,/ зна́емии прово́дят то́кмо до гро́ба,/ греси́ же мои́ оста́нутся,/ услы́ши, Милосе́рдая, во́пль мой,/ да спасе́т мя огня́ ве́чнаго Бог оте́ц на́ших.

Пе́снь 8

Ирмо́с: О́троки благочести́выя в пещи́/ Рождество́ Богоро́дичо спасло́ е́сть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Во́зраст ю́ности и жа́жда наслажде́ния пленя́ют мою́ ду́шу, Благода́тная,/ но к ве́чному Блаже́нству и сла́ве святы́х обрати́ моя́ помышле́ния,/ да славосло́влю Го́спода моего́/ и превознесу́ его́ во вся ве́ки.

Во́лны неве́рия и скорбе́й лю́тых покрыва́ют мою́ ду́шу,/ но слы́шу глас Го́спода, глаго́люща:/ малове́рный, почто́ усумни́лся еси́?/ К Тебе́ прибего́х, Ма́ти Бо́жия,/ спаси́ мя и ча́да моя́,/ в Тебе́ бо утвержде́ние ве́ры и́мамы,/ да превозно́сим Го́спода Творца́ во ве́ки.

Чревоуго́дию, нечистоте́ служу́ приле́жно,/ за оби́ды ме́стию воздаю́,/ облича́емь, гне́ваюся напра́сно,/ злосло́влю не оказа́вших ми по́мощи, сам же немощны́х презира́ю,/ о Спору́чнице гре́шных, яви́ долготерпе́ние/ и от греха́ свободи́ мя во ве́ки.

Невозмо́жно е́сть ма́лою слезо́ю вели́кия скве́рны омы́ти и о́гнь гее́нский угаси́ти,/ о Всеми́лостивая Ма́ти,/ ви́жду ожесточе́ние мое́ и молю́ся Ти:/ да́ждь ми сле́зы покая́ния,/ да убелю́ одея́ние души́ мое́й.

С мольбо́ю неотсту́пною, наде́ждою кре́пкою припа́даю Ти, Держа́вная Влады́чице:/ зри́ши врага́ лю́таго приближе́ние,/ услы́ши в слеза́х прите́кших,/ воста́ни ско́ро и, я́ко Блага́я, защити́,/ да сла́влю Тя, Ма́ти Бо́га моего́, во ве́ки.

Плач мой в ра́дость обрати́ и се́тование в весе́лие, Ма́ти Милосе́рдия,/ и го́рдыя за́мыслы враг мои́х сокруши́,/ да благослови́т Тя всяк язы́к и вся́ка пло́ть отны́не и до ве́ка.

Пе́снь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

При́зри на нищету́ душе́вную и вся́кую го́речь услади́,/ непосты́дная наде́ждо на́ша,/ скорбя́щих ободре́ние, пла́чущих ско́рое утеше́ние,/ неистощи́ма бо сокро́вища Твоя́/ и, ра́дующися, дае́ши я всем, по́мощи тре́бующим.

Вкуси́те и ви́дите, я́ко благ Госпо́дь,/ за любо́вию бо сле́дует Го́спода позна́ние./ О Трапе́зо та́инственных дарова́ний!/ Сподо́би мя неосужде́нно Животворя́щих Та́ин причаща́тися,/ во очище́ние грехо́в мои́х.

Пред ико́ною Твое́ю, зри, Влады́чице, жите́йское мо́ре волну́ется,/ спаси́ погиба́ющих в волна́х неве́рия и зло́бою истоще́нных,/ волно́ю Твоего́ милосе́рдия изнеси́ на брег спасе́ния, да зову́т Ти:/ ра́дуйся, от ве́чныя сме́рти избавле́ние.

Самомне́нием ослепле́н, навыко́х укоря́ти бра́та моего́./ Ка́ко сообщу́ свет бли́жнему, тьмо́ю лжи покры́т сый?/ Да́руй ми, о Ма́ти све́та, зре́ти моя́ прегреше́ния/ и бра́та моего́ согреше́ния терпе́ти и с любо́вию исправля́ти.

А́нгел сме́рти нападе́ на мя,/ презира́ет моле́ния, пла́чу не вне́млет,/ разлуча́ет мя безжа́лостно со ча́ды, влече́т мя наси́льно./ О Богома́ти, с Сы́ном Твои́м кре́стныя му́ки раздели́вшая,/ ма́тернюю ско́рбь о бли́жних утоли́.

Зе́млю Русскую в достоя́ние Себе́ избра́вшая и утверди́вшая нас во благоче́стии,/ под покро́вом Твои́м соблюди́, Всепе́тая,/ о́бразом Твои́м честны́м от всех напа́стей сохрани́, да зове́м Ти:/ ра́дуйся, Всеми́лостивая, в напа́стех ско́рая Засту́пнице.

Свети́лен зри во ино́й Слу́жбе (зри день сей ниже).

На хвали́тех стихи́ры, глас 5.

Подо́бен: Ра́дуйся:

Красу́йся, страно́ Русская,/ ра́дуйся и весели́ся, гра́де Москва́,/ се бо свята́я и чудотво́рная Богома́тере ико́на/ от донски́х преде́л чуде́с заря́ми возсия́/ и бы́сть нам во спасе́ние от наше́ствия иноплеме́нных/ и ины́х враг, ви́димых и неви́димых,/ и от вся́кия напа́сти.

Ра́дуйся, земле́ Русская,/ торжеству́й и весели́ся, всечестны́й гра́де Москва́,/ се о́браз Богоро́дицы/ с по́ля бра́ни гряде́т к тебе́,/ се ра́дость побе́ды ми́лостию Бо́жиею возвеща́ется,/ тьма́ у́бо ско́рби твое́й ны́не отгони́ется,/ лю́дие сла́дкое прие́млют утеше́ние,/ воспо́йте, свяще́нницы,/ воспо́йте пе́сни хвале́бныя,/ вели́чия Богома́тере досто́йныя,/ припаде́м, ве́рнии, к Влады́чице всех,/ да пребу́дут покро́в и ми́лость Ей над на́ми во ве́ки.

Красу́йся, зла́тоглавый чу́дный гра́де Москва́,/ ра́дуйся и весели́ся, оби́теле Донска́я,/ се бо ше́ствует к тебе́ ико́на Бо́жия Ма́тере,/ рука́ми ве́рных, я́ко зна́мение побе́дное, носи́ма,/ блиста́нием зра́ка Своего́ враги́ прогоня́ющи,/ ча́дом же подаю́щи живо́ти ве́лию ми́лость.

Сла́ва, и ны́не, глас 2:

Гряди́те, христоимени́тии лю́дие,/ пра́здник че́стен соста́вим/ и пе́сньми ра́достными воспое́м Пресла́вную Ма́терь Бо́жию,/ я́ко от ико́ны ея́ святы́я,/ нарица́емыя Донски́я,/ заступле́ние гра́ду Москве́ яви́ся,/ те́мже пое́м Тебе́, Влады́чице, пе́сни хвале́бныя,/ я́ко Засту́пнице Росси́йския земли́/ и Хода́таице на́шего спасе́ния.

Славосло́вие вели́кое. Ектении́. И отпу́ст.

НА ЛИТУРГИ́И Слу́жба вся Богоро́дице.

Моли́тва

О Всеми́лостивая Ма́ти, Пречи́стая Де́во Богоро́дице! Ты еси́ свет ума́ моего́, ра́дость се́рдца моего́, си́ла во́ли моея́. Услы́ши и приими́ моле́ние мое́. При́зри на я́звы души́ и те́ла моего́, обогати́хся страстьми́, обнища́х смире́нием. Испо́лнен е́смь студа́ за зла́я дела́ и трепе́щу суда́ Бо́жия. Греси́ ю́ности, забве́ннии и утае́ннии греси́ отягча́ют со́весть мою́. Омы́й мя струя́ми сле́зными, сними́ бре́мя тя́жкое, грехо́вное, да сотворю́ плоды́ досто́йныя покая́ния. Те́рнием скорбе́й усы́пан е́сть пу́ть мой. Вем, я́ко пра́вда Бо́жия наказу́ет мя. Умоли́ милосе́рдие Бо́жие о мне, при́зри на сле́зы моя́ и испра́ви и спаси́ мя и ча́да моя́, бу́ди ми сокро́вище ве́ры и храни́лище благоче́стия. Да́руй несокруши́мое терпе́ние в беда́х, от ве́ры проистека́ющее, отыми́ дух пра́здности, уны́ния, любонача́лия. Изгони́ гнев, за́висть, памятозло́бие, нечистоту́, ле́ность, си́ми и бо́льшими поро́ки неду́гует душа́ моя́. Примири́ вражду́ющия, оправда́й оклеве́танныя. Просвети́ нас све́том Сы́на Твоего́ и да́ждь нам глаго́лати сло́во и́стины, тве́рдое в пра́вде, ми́рное любве́ ра́ди, растворе́нное благоразу́мием. Посети́ в боле́знех и печа́лех су́щих, да вси, под держа́вным покро́вом Твои́м сохраня́еми, безбе́дно Ца́рствия Небе́снаго дости́гнем, хвалу́ воздава́юще за вся Человеколю́бцу Бо́гу. Ами́нь.

И́ны моли́твы зри день сей ни́же.

И́на слу́жба Пресвяте́й Влады́чице на́шей Богоро́дице ра́ди ико́ны Ея́, имену́емыя «Донская»

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 4:

Седя́й на Херуви́мех/ и от А́нгелов воспева́емый,/ Пребоже́ственный Иису́се, Спа́се наш,/ за милосе́рдие на земли́ Ма́терию но́сишися Неискусому́жною./ Си́це и к нам ны́не благоутро́бно приити́ благоизво́лил еси́/ на о́бразе боже́ственне.

Непобеди́мая побе́до,/ ра́досте А́нгелов и челове́ков,/ нерукотворе́нная ски́ние,/ ле́ствице и две́ре боговхо́дная,/ к нам приити́ благоизво́лила еси́,/ Ма́ти Го́спода на́шего,/ и вся освяти́ти пречи́стым зра́ком ико́ны Твое́й, Влады́чице.

Сокро́вище безсме́ртия,/ исто́чник чуде́сный и дар Небе́сный вои́стинну,/ освяще́ние церко́вное,/ зна́мение побе́ды на враго́в,/ Правосла́вныя Це́ркве великоле́пие/ и ра́дость ве́лия благочести́вых/ яви́ся пречи́стый зрак ико́ны Твое́й, Влады́чице.

Сла́ва, и ны́не, глас 6:

Возсия́ ца́рствующему гра́ду Москве́/ Честне́йшая Богоотрокови́ца,/ я́ко пресве́тлая зари́,/ иму́щая Христа́, Со́лнца пра́вды,/ де́нь спаси́тельный нам да́рует,/ тьмо́ю но́щи одержи́мым,/ Скорбя́щих ра́дость/ и ненаде́ющихся Наде́жда, Богороди́тельница.

На стихо́вне стихи́ры, глас 2.

Подо́бен: До́ме Евфра́фов:

Собо́ри ве́рных/ и христоимени́тых люде́й,/ усе́рдно совокупи́теся/ воспе́ти пе́сньми/ еди́ну Богома́терь.

Стих: Помяну́ и́мя Твое́/ во вся́ком ро́де и ро́де.

Ты, И́же из Нея́/ возсия́вый неизрече́нно,/ сыноле́пно моли́твы те́плыя/ за ны приими́/ Богоро́дицы, Влады́ко.

Стих: Слы́ши, Дщи, и ви́ждь,/ и приклони́ у́хо Твое́.

Егда́ ико́ною Твое́ю/ град наш Москву́ изба́вила еси́,/ стеко́шася воспе́ти Тя/ все мно́жество ве́рных,/ Чи́стая.

Сла́ва, и ны́не, глас то́йже:

Две́ри милосе́рдия Твоего́/ нам отве́рзи, Богоро́дице, Твои́ми Ма́терними к Сы́ну и Бо́гу моли́твами.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры, глас 4:

И́же в де́встве пренепоро́чнем и пло́ти подобозра́чием/ су́щим на земли́ сложила́ еси́/ и по успе́нии ве́рныя не оста́вила еси́,/ с Первообра́зным бо горе́ взяла́ся еси́,/ в поклоне́ние безтеле́сных А́нгелов,/ до́ле же лю́бящим Тя/ во спасе́ние подо́бие Первообра́знаго дарова́ла еси́,/ о́браз многочу́дный, Влады́чице,/ на него́же взира́юще,/ кра́сною Тя добро́тою ублажа́ем, Цари́це,/ Ма́терь Христа́ Бо́га на́шего.

И́же Твоего́ Боговиде́ния сподо́бився лице́м к лицу́, Богома́ти,/ Боже́ственный благове́стник/ о́браз, Пречи́стая, зра́ка Твоего́ напису́ет Боже́ственным манове́нием,/ первообра́зному изя́щно уподо́бив;/ сей благода́ти испо́лнила еси́/ и тем пребыва́ти с на́ми рекла́ еси́./ О, е́же ве́лия о нас Твоего́ промышле́ния!/ О, неизрече́ннаго благоутро́бия!/ О, пресла́вных чуде́с Твои́х,/ гра́ду на́шему Москве́ явля́емых, Пречи́стая!

Я́ко дар честне́йший ца́рствующему гра́ду Москве́ дарова́ся/ чуде́сная Твоя́ ико́на, Богоотрокови́це,/ от восто́ка возсия́вшая/ и се́верныя страны́ просвеща́ющая./ Луча́ми Твое́й ми́лости и нас ны́не озари́ла еси́,/ и тьму́ скорбе́й отгна́ла еси́,/ и мир вселе́нней дарова́ла еси́/ и Русстей стране́ благостоя́ние,/ я́ко еси́ ве́рных предста́тельство/ и я́ко еси́ всех прибе́жище./ И ны́не, Госпоже́, изба́ви от бед/ и спаси́ ду́ши на́ша.

Облача́ется, я́коже в преми́рную у́тварь ца́рскую,/ Тобо́ю земли́ Русская, Богоро́дице,/ град же Москва́ торжеству́ет,/ и с ним все мно́жество правосла́вных све́тло ликовству́ют/ пред чуде́сною Твое́ю ико́ною, Влады́чице,/ Взбра́нную Тя Воево́ду христолюби́ваго во́инства сла́вят,/ победи́тельная Тебе́ воспису́юще,/ благове́рнии во́ини припа́дают,/ мона́си же и вси лю́дие благода́рственно вопию́т Тебе́:/ Ты еси́ избавле́ние на́ше, Пренепоро́чная.

Сла́ва, и ны́не, глас 2:

Стека́ются все мно́жество благочести́вых дне́сь,/ да Цари́цу и Влады́чицу всех песносло́вят похвала́ми./ О, торжества́ ди́внаго!/ О, ра́дости неизрече́нныя:/ всех бо Бо́га и Спа́са Ро́ждшая/ матероле́пно с высоты́ приклоня́ется,/ благослове́нием венча́ющи воспева́ющия Ю́./ Го́споди Человеколю́бче, нас ра́ди вочелове́чивыйся,/ ве́лия Твоя́ ми́лость, Сла́ва Тебе́.

Вход. Проки́мен дне. И чте́ния Богоро́дичная (зри день 15-й).

На лити́и стихи́ры, глас 2:

Приноси́му бы́вшу иногда́ киво́ту заве́та/ ко гра́ду Дави́дову,/ веселя́щеся Изра́иль, в шу́ме пра́зднующе,/ и Дави́д, ли́ки собра́в, игра́ше;/ си́це и ны́не пред Тобо́ю, Пречи́стая,/ предноси́мей Твоего́ о́браза ико́не,/ дре́вняго и́стинно киво́та пречестне́йшей,/ ра́дуются а́нгельская во́инства,/ иера́рхов собо́ри предсрета́ют,/ благове́рнии лю́дие благогове́ют,/мона́си честву́ют и лобыза́ют,/ и все мно́жество правове́рных покланя́ются/ и, смире́нно благодаря́ще, припа́дают:/ и́маши бо на святы́х Твои́х объя́тиих Изба́вителя и Спа́са всех,/ к Нему́же Ма́терним Твои́м хода́тайством/ всем, ко изображе́нию лица́ Твоего́ прибега́ющим,/ про́сиши ми́ра и ве́лия ми́лости.

Глас 6: О Пресла́вная Богоро́дице Де́во,/ вы́шшая всех А́нгел и Арха́нгел/ и прибе́жище ро́да челове́ческаго!/ Что досто́йное воздади́м Тебе́?/ Ка́ко же возымену́ем Тя?/ Проро́цы Тя многообрази́е прообрази́ша,/ апо́столи многому́дренне пропове́даша,/ му́ченицы со иера́рхи благослови́ша/ и всех святы́х ли́цы воспе́ша Тя,/ ве́дуще, я́ко Тобо́ю, Богома́ти,/ вси ро́ди христиа́нстии Бо́гови притека́ют,/ удивля́емся и мы, велича́юще Твое́ милосе́рдие,/ е́же о нас показа́ла еси́/ пречестно́ю Твое́ю ико́ною.

Сла́ва, и ны́не, глас то́йже:

Единоро́дный Сын Безнача́льнаго Отца́,/ изво́ливый милосе́рдия ра́ди небеса́ преклони́ти/ и на земли́ яви́тися непрело́жно,/ зрак раба́ прии́м,/ и да́же до Креста́ и страсте́й к нам сни́де,/ неду́ги понесе́ ро́да на́шего./ И мытаре́м и гре́шником позна́ся,/ о́вцы призыва́я поги́бшия до́му Изра́илева./ Блудни́цы почерпа́ху милосе́рдие от кра́йняго Того́ благоутро́бия,/ искупи́вшаго вся Свое́ю Кро́вию от рабо́ты вра́жия./ Блаже́нно чре́во Твое́, Богоро́дице, носи́вшее/ и сосца́ Твоя́, воздои́вшая/ Спасе́ние душа́м на́шим.

На стихо́вне стихи́ры, глас 5:

Ра́дуйся, пречестны́й о́бразе Живода́вца Спа́са Христа́/ и Честне́йшия Де́вы Богоотрокови́цы,/ первопи́санный благове́стником Ева́нгелия Христо́ва/ и к первообра́зней Влады́чице принесе́нный,/ Той благослове́нием освяще́нный/ и Боже́ственный благода́ти испо́лненный./ Тебе́ ны́не покланя́ются Небе́сная и земна́я,/ ублажа́юще первоо́бразную Ма́терь Христа́ Бо́га на́шего,/ из Ней нас ра́ди воплоти́вшагося преесте́ственно и неизрече́нно/ и подаю́щаго ми́рови ве́лию ми́лость.

Стих: Помяну́ и́мя Твое́/ во вся́ком ро́де и ро́де.

Ра́дуйся, Боже́ственный о́бразе сла́дчайщаго Иису́са/ и Де́вы, Пренепоро́чныя Ма́тере,/ А́нгелов и челове́ков благогове́йный/ и де́монов вои́стинну тре́петный,/ побе́ды на враго́в предзнамена́тельный,/ ве́рных прибе́жище, предста́тельство ми́ра,/ неистощи́мое сокро́вище всей вселе́нныя,/ нищету́ на́шу обогаща́яй/ и бу́дущее Ца́рство нам отверза́яй,/ изображе́ние Пречи́стаго лица́ Богома́тере/ и Преве́чнаго Младе́нца, Христа́ Го́спода,/ подаю́щаго ми́ру ве́лию ми́лость.

Стих: Слы́ши, Дщи, и ви́ждь,/ и приклони́ у́хо Твое́.

Ра́дуйся, Богоно́сный о́бразе/ носи́маго, я́ко Младе́нца,/ во объя́тиях Де́вы Иису́са,/ из Ней воплоти́вшагося непрело́жно,/ О́тчая же не́дра не истощи́вшаго,/ Еди́наго Сы́на, в сла́ве Отца́/ нас ра́ди к нам снизше́дшаго,/ во двою́ соверше́нну естеству́,/ Бо́га и́стинна и Челове́ка,/ челове́ки обожи́вшаго,/ Кресто́м потреби́вшаго дре́внюю кля́тву/ и свободи́вшаго мир от пре́лести и рабо́ты вра́жия,/ жи́знь безконе́чную нам дарова́вшаго и ве́лию ми́лость.

Сла́ва, и ны́не, глас 2:

Пра́здник ра́достен Присноде́вы соверши́м дне́сь/ и Ей Богоно́сней ико́не с ве́рою припаде́м,/ в дар христолюби́вым кня́зем иногда́ принесе́нней,/ ны́не же ми́ру подава́ющей/ незави́стныя да́ры исцеле́ний.

Тропа́рь, глас 4:

Всепе́тая и Всесла́вная Цари́це Богоро́дице,/ Ма́ти всея́ тва́ри Соде́теля,/ христиа́нская наде́ждо и Засту́пнице,/ ненаде́ющимся и отча́явшимся ско́рое наде́яние, мо́лим Тя:/ ми́лостива бу́ди нам, гре́шным,/ не оста́ви раб Твои́х и не отри́ни моле́ния недосто́йных./ Мо́лимся, взира́юще ко о́бразу Твоему́ честно́му/ святы́я и чудотво́рныя ико́ны Твое́й и вопию́ще:/ с пла́вающими и путеше́ствующими да пребу́дет ми́лость Твоя́./ О Влады́чице, ри́зою Твое́ю честно́ю защити́,/ и во вся́ких ме́стех злых ве́рныя соблюди́,/ и моли́ся к Ро́ждшемуся из Тебе́ Христу́ Бо́гу на́шему,/ да спасе́т от грех ду́ши на́ша.

НА У́ТРЕНИ

По 1-м стихосло́вии седа́лен, глас 1:

Твоего́ милосе́рдия сподо́бившеся, Богоро́дице Де́во,/ благода́рственная Тебе́ прино́сим,/ зра́ку Пречи́стаго лица́ Твоего́ моля́щеся и дави́дски вопию́ще:/ Ты еси́ гора́ усыре́нная и колесни́ца Боже́ственная,/ нося́щая Спа́са душ на́ших.

Сла́ва, и ны́не, пра́здника.

По 2-м стихосло́вии седа́лен, глас 4:

Бе́здну благоутро́бия ро́ждшая, Де́во,/ исто́чник ми́лости нам источа́еши, к Тебе́ ве́рою прибега́ющим,/ яви́лася бо еси́ спасе́ние душ на́ших.

Сла́ва, и ны́не, пра́здника.

По полиеле́и седа́лен, глас 1:

Ра́дуйся, Благода́тная Богоро́дице Де́во,/ предста́тельство и прибе́жище ро́да христиа́нскаго,/ из Тебе́ возсия́ Со́лнце пра́вды, Христо́с Бог наш,/ и весели́тся богохрани́мый град Москва́,/ восприе́м чудотво́рную Твою́ ико́ну и Преве́чнаго Твоего́ Младе́нца,/ подаю́щаго нам ве́лию ми́лость.

Сла́ва, и ны́не, пра́здника.

Та́же Степе́нна, 1-й антифо́н 4-го гла́са. Проки́мен, глас 4: Помяну́ и́мя Твое́/ во вся́ком ро́де и ро́де. Стих: Слы́ши, Дщи, и ви́ждь, и приклони́ у́хо Твое́. Вся́кое дыха́ние: Ева́нгелие от Луки́, зача́ло 4.

По 50-м псалме́ стихи́ра, глас 6:

Глас целова́ния Твоего́ Елисаве́т услы́шавши,/ ра́довашеся, Ма́ти Госпо́дня,/ со устна́ми и утро́ба ея́ подвиза́шеся/ к благохвале́нию Твоего́ вели́чествия,/ мы же, недоуме́юще ны́не воспе́ти Тя, Чи́стая,/ прино́сим глаго́ланная Тебе́ от Го́спода:/ ра́дуйся, Благода́тная, и благослове́н Плод чре́ва Твоего́,/ Госпо́дь с Тобо́ю.

Кано́н, глас 4.

Пе́снь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Отку́ду начну́ похвалы́/ или́ ко́е положу́ нача́ло ны́нешняго песнопе́ния Цари́це Ма́тери?/ Недоуме́нней содержу́ся,/ оба́че, язы́ку умо́лкшу, вся ко́сти моя́ реку́т/ Тоя́ пресла́вная чудеса́.

Милосе́рдия ра́ди Бог Челове́к быва́ет,/ И́мже и преесте́ственная вся соде́яшася;/ тем, Де́во, и на́ше приими́ с любо́вию приноси́мое песнопе́ние,/ воспева́ющих Твоя́ пресла́вная чудеса́.

Гряди́ к славосло́вию, Не́бо, и ра́дуйся, земле́,/ свет бо ве́лий возсия́ на вы от лица́ Ма́тере Госпо́дни,/ освяща́яй и просвеща́яй всю тва́рь пресла́вными чудесы́.

Собира́ются пред ико́ною Твое́ю, Богоро́дице, чи́нове святы́х неви́димо,/ предстоя́т же и а́нгельская вся во́инства, тре́петно благогове́юще./ Приими́ же с ни́ми и нас, воспева́ющих ра́достно чудеса́ Твоя́.

Пе́снь 3

Ирмо́с: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Из нача́ла вели́кая о Тебе́ прообразова́ше/ и в после́дняя пресла́вная соверша́ше/ от всех родо́в предызбра́вый в ма́терь Себе́ Тебе́ Влады́ка, Чи́стая.

Сина́йская гора́, огнепали́мая иногда́,/ и разделя́ющияся во́ды Чермна́го мо́ря,/ егда́ наставля́хуся лю́дие, супоста́том потопля́емым,/ то́чию бы́ша проображе́ние, Чи́стая, чуде́с Твои́х.

Пла́менем купины́ в Сина́и и росо́ю пе́щи халде́йския Де́вы рождество́ прообрази́вый,/ из нея́же воплоти́тися благоизво́ли,/ спаса́яй тва́рь прему́дростию, Иису́се,/ и зако́н и проро́ки исполня́я.

Ра́дуйся, хра́ме Госпо́день,/ ра́дуйся, киво́те, ра́дуйся, ста́мно,/ ра́дуйся, горо́ приосене́нная,/ ра́дуйся, ле́ствице и две́ре Небе́сная, проро́ки пропове́данная,/ и всея́ святы́ни вмести́лище и носи́ло, Пречи́стая.

Ипакои́, глас 8:

Блажи́м Тя, вси ро́ди, Богоро́дице Де́во,/ в Тя бо Невмести́мый Христо́с Бог наш вмести́тися благоволи́./ Блаже́ни есмы́ и мы, предста́тельство Тя иму́ще,/ де́нь бо и но́щь мо́лишися о нас, и ро́ди христиа́нстии Твои́ми моли́твами утвержда́ются./ Тем, воспева́юще, вопие́м Ти:/ ра́дуйся, Благода́тная, Госпо́дь с Тобо́ю.

Пе́снь 4

Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ Сла́ва, Христе́, си́ле Твое́й.

Седя́й на Престо́ле сла́вы Ца́рствия Твоего́, Царю́ высо́кий,/ от смире́ннаго естества́ земноро́дных престо́л свят Себе́ предугото́вал еси́, утро́бу Де́вы Ма́тере./ Сла́ва неизрече́нному Твоему́ сове́ту.

Превознесе́ннаго и́менем па́че вся́каго и́мене,/ Его́же всяк язы́к испове́дает, Бо́жию Си́лу и Прему́дрость,/ Единоро́днаго Сы́на в сла́ве Бо́га Отца́, Де́во, пло́тию родила́ еси́,/ Бо́га и Челове́ка.

Смири́вшаго Себе́ да́же до ра́бия о́браза послуша́нием Бо́гу Отцу́/ и да́же до страсте́й и Креста́ преклони́вшагося,/ Того́ за ны смотре́нию, о Де́во,/ и непостижи́мым та́йнам послужи́ла еси́.

Дае́т Тебе́ преесте́ственная, Богоро́дице,/ И́же па́че естества́ Сын Твой,/ рождество́м бо Твои́м от тли я́ко воззва́ челове́чество,/ и ны́не Тобо́ю призыва́ет лю́ди отринове́нныя/ во язы́к избра́нный и имени́тый по всей земли́.

Пе́снь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Блаже́нно чре́во, носи́вшее Тя, Спа́се,/ и честне́йшая вои́стинну сосца́, воздои́вшая Тя, нас ра́ди младе́нствовавшаго./ Те́мже мо́лим Тя:/ слы́шащим сло́во Твое́ и храня́щим е́/ блаже́нство угото́ви безконе́чное/ Ро́ждшия Тя моли́твами.

Мари́е Преблагослове́нная, благу́ю и́стинно ча́сть избра́ла еси́/ и Еди́на Благода́тная яви́лася еси́./ В Тебе́ Оте́ц благоволи́, Сло́во Всевино́вное в Тя всели́ся, и Дух осени́ Святы́й,/ пребыва́еши нетле́нная и нам, любо́вию пою́щим Тя, спасе́ние подава́ющая.

Единоро́дный Сын Бо́жий, снизше́дый на зе́млю за человеколю́бие изба́вити челове́чество,/ еди́ное на земли́ поко́ище обре́т Тя, Чи́стую и Пренепоро́чную,/ всели́тися и жи́ти в Тебе́ благоволи́, освяти́в, украси́в и просла́вив./ И нас хода́тайствы Твои́ми хра́мы чи́стыя Тому́, Богоро́дице, соде́лай.

Хра́ме всеосвяще́нный Бо́га на́шего,/ в хра́ме Твое́м ны́не торжеству́ющия, Богоневе́сто,/ с высоты́ при́зри и осени́ Боже́ственною ико́ною Твое́ю,/ ве́рою кла́няющияся ей освяща́ющи:/ с не́ю бо Твоя́ благода́ть во ве́ки пребыва́ет, спаси́тельная всем подаю́щи.

Пе́снь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от нея́ ро́ждшагося Бо́га сла́вим.

Пра́здник пра́зднуем, празднолю́бцы, Де́вы и Богома́тере,/ благодаря́ще за ве́лие милосе́рдие Ея́,/ и в нас де́йствуемая пресла́вная чудеса́ просла́вим.

Благода́рственная прино́сим Тебе́, Де́во, и мо́лимся:/ да не оскуде́ет ве́ра чту́щих Тя,/ и да не похва́лятся врази́, глаго́люще:/ где е́сть Бог их?/ Твоя́ бо чуде́сная ико́на и всесвята́я по́мощь с на́ми е́сть.

Устна́ми воспева́ем Тя,/ умо́м же и язы́ком моле́ние прино́сим/ и се́рдца с коле́ны преклоня́ем пред чудотво́рным о́бразом Твои́м, Пречи́стая,/ да ми́лость Твою́ низпо́слеши на град и лю́ди Твоя́.

Ты еси́ проро́ков глави́зна,/ Ты еси́ святы́х похвала́, Богоотрокови́це, и всех христиа́н упова́ние,/ к Тебе́ прибега́юще, спаса́емся,/ упова́юще же, не посрами́мся,/ Тобо́ю бо хва́лится, Богоро́дице, вся́кое дыха́ние.

Конда́к, глас 2:

В Небе́сныя оби́тели пресели́вшаяся с пло́тию,/ су́щия на земли́ ника́коже оста́вила еси́, Богоро́дице,/ о́браз Боже́ственный и многочуде́сный Пречи́стаго Лица́ Твоего́/ зре́ти лю́бящим Тя и покланя́тися дарова́ла еси́,/ я́ко зна́мение Твое́й благода́ти;/ чтим его́, лобыза́юще.

И́кос:

Явля́ющи челове́ком Пречи́стая неизглаго́ланнаго Своего́ милосе́рдия сокро́вище,/ лю́бящим Ю́ незави́стныя да́ры подава́ет,/ благослове́ние, и моли́твы, и мир, всяк ум превосходя́щий./ И е́же пресла́вное от пречи́стыя Своея́ ико́ны,/ я́ко от исто́чника, источа́ет ми́ру оставле́ния во́ды, в Боже́ственнейшем Ея́ хра́ме./ Та́мо бо о́чи Ея́ отве́рсте де́нь и но́щь/ и у́ши, вне́млющим моли́тве всех./ сего́ ра́ди покланя́емся сей всечестне́й ико́не и чтим ю́, лобыза́юще.

Пе́снь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Тва́рь вся пра́зднует, и стихи́и Тебе́ повину́ются, Ма́тери вся́ческих Соде́теля,/ ра́дуются А́нгели в Боже́ственнем торжестве́ Твое́м,/ мы же из Тебе́ Ро́ждшемуся зове́м:/ препе́тый отце́в Бо́же, благослове́н еси́.

Ди́вная чудеса́, Блага́я, слы́ша на сотвори́ла еси́ по всей земли́,/ мы же, благоле́пие красоты́ Твоея́ от Сио́на зря́ще, добро́те диви́мся/ и из Тебе́ Ро́ждшемуся зове́м:/ препе́тый Бо́же, благослове́н еси́.

Мона́шествующих собо́ри Наста́вницу Тя ублажа́ют, Де́во,/ мно́жества же немощству́ющих излия́нием милосе́рдия Твоего́ благода́ть прие́млют/ и, о́бщницы бы́вше чуде́с Твои́х, вопию́т:/ Пречи́стая, благослове́нна еси́.

Исто́чник еси́ у́мный, живоприе́мный и приснотеку́щий,/ струи́ жи́зни источи́вший челове́ком,/ да́ждь ми от во́ды Твое́й, Де́во, во изсуше́ние мои́х согреше́ний/ и ороси́, молю́ся, мой ум, се́рдце и по́мысл,/ Еди́на Всепе́тая и Благослове́нная.

Пе́снь 8

Ирмо́с: О́троки благочести́выя в пещи́/ Рождество́ Богоро́дичо спасло́ е́сть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

У́жасу обдержа́щу иногда́ Русскую страну́ наше́ствием ага́рян,/ печа́ли умно́жившейся лю́дем Твои́м,/ тогда́, не на лук упова́юще, ниже́ ору́жием спаса́еми,/ но на Тя Еди́ну наде́ющеся, с рыда́нием моля́хуся:/ ви́ждь бед належа́ние/ и воста́ни, Богоро́дице, в по́мощь на́шу.

Обыдо́ша иногда́, я́ко пси мно́зи, ста́до Твое́, Чи́стая,/ оскверни́ша жили́ще и́мене Твоего́/ и совеща́ху на ны лука́вная;/ мы же возведо́хом о́чи на́ши на ико́ну Твою́, да уще́дриши ны;/ и разуме́ша язы́цы, я́ко Ты, Госпоже́, с на́ми еси́ во вся ве́ки.

Взбра́нная Воево́да яви́лася еси́ ца́рствующаго гра́да Москвы́, язы́ки побежда́ющая,/ христолюби́вое же во́инство укрепля́ющая,/ военача́льники си́лою Твое́ю препоясу́ющая;/ те́мже Твоя́ торжеству́юще победи́тельная, раби́ Твои́,/ воспева́ем Сы́на Твоего́ во вся ве́ки.

Богоро́дице, те́плая христиа́ном Предста́тельнице,/ приими́ моле́ние недосто́йных раб Твои́х,/ при́зри ми́лостивно на не́мощи на́ша и всем поле́зная да́руй,/ немощству́ющим исцеле́ние, гре́шным спасе́ние,/ вся бо мо́жеши, Ма́ти су́щи Зижди́теля Всеми́лостивая.

Пе́снь 9

Ирмо́с: Всяк земноро́дный/ да взыгра́ется, Ду́хом просвеща́емь,/да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Вели́чит Тя душа́ моя́,/ и ра́дуется дух мой о Тебе́, Ма́ти Го́спода на́шего,/ я́ко призре́ла еси́ на смире́ние раб Твои́х,/ си́льныя со престо́лов низложи́ла еси́, смире́нныя вознесла́ еси́/ и Русь всю Твои́х даро́в испо́лнила еси́.

Се ны́не ублажа́ем Тя, вси наро́ди великорусстии, Де́во,/ с на́ми бо вели́чие сотвори́ла еси́/ и сла́ву Твою́ показа́ла еси́ всем язы́ком;/ свя́то и́мя Твое́, Богоро́дице,/ ве́лия и неизрече́нная ми́лость Твоя́ на всех, призыва́ющих Тя.

Восприя́т ны от паде́ния на́шего Госпо́дь,/ помяну́в ми́лость Свою́ от ве́ка,/ и дре́вняя чудеса́ оте́ц на́ших обнови́ нам, ча́дом их, ико́ною Твое́ю, Богома́ти;/ е́юже хва́лимся, спа́сшиися,/ и живота́ неразруши́маго насле́дие прие́млем.

Богоро́дице Влады́чице, Присноде́во,/ нело́жно спребыва́ти с на́ми обеща́вшая до сконча́ния ве́ка,/ испроси́ нам на бу́дущем Суде́ Сы́на Твоего́ десна́го ему́ предстоя́ния/ ве́рою и любо́вию Тебе́ пою́щих,/ уми́льно припа́дающих и со стра́хом те́пле моля́щихся.

Свети́лен:

Торжеству́ем дне́сь, правове́рнии, во хра́ме Твое́м, Влады́чице,/ и Ты, Пречи́стая, приими́ любо́вию приноси́мыя Тебе́ пе́сни благода́рственныя.

На хвали́тех стихи́ры, глас 4:

От земли́ преставля́ющися к невеще́ственным,/ ра́дости испо́лнила еси́,/ и́хже совокупи́ла еси́,/ зря́щия благода́ть Твою́, Де́во, апо́столы;/ ны́не же пред Твое́ю ико́ною ра́дуется все мно́жество ве́рных, Чи́стая,/ я́ко Са́мую Тебе́ зря́ще,/ моли́твы из Тебе́ Ро́ждшемуся и Тебе́ прино́сят,/ да спасе́ши мир моли́твами Твои́ми.

Хотя́щи, Богома́ти, со сла́вою взя́тися на Го́рняя,/ лю́бящим Тя благослове́ние и мир оста́вила еси́,/ ри́зу нетле́нную и по́яс и всечестну́ю Твою́ ико́ну,/ с ни́миже благода́ти Твое́й пребыва́ти обеща́ла еси́ во ве́ки;/ ю́же и мы зря́ще, благогове́йно кла́няемся,/ сла́вяще благоутро́бие Твое́, Пречи́стая.

В рождестве́ Твое́м, Богоро́дице, мир спасла́ еси́/ и в Боже́ственнем Твое́м успе́нии сего́ не оста́вила еси́,/ но с на́ми, Твои́ми рабы́, нело́жно пребыва́ти обеща́лася еси́,/ избавля́ти, предста́тельствовати и покрыва́ти от бед,/ е́же и свиде́тельствует честна́я Твоя́ ико́на,/ во спасе́ние душ на́ших.

Сла́ва, и ны́не, глас 6:

На безсме́ртное Твое́ успе́ние, Богоро́дице,/ апо́столи, на о́блацех носи́ми,/ воспе́ти Тя совокупи́шася;/ ны́не же все мно́жество ве́рных, отвсю́ду собра́вшееся,/ в Боже́ственнем Твое́м пра́зднице воспева́ют Тя./ Не преста́й, Влады́чице, к Сы́ну Твоему́ хода́тайствующи,/ побе́ды на враги́ дарова́ти/ и душа́м на́шим ве́лию ми́лость.

На Литурги́и слу́жба Богоро́дице.

Моли́тва

О Пресвята́я Влады́чице, Де́во Богоро́дице, Засту́пнице на́ша блага́я и ско́рая! Воспева́ем Ти вси благода́рственная за чу́дная дела́ Твоя́. Песносло́вим от лет дре́вних неотъе́млемое заступле́ние Твое́ гра́ду Москве́ и стране́ на́шей, чудотво́рным о́бразом Твои́м Донски́м всегда́ явля́емое: в бе́гство обраща́ются полцы́ чужди́х, гра́ди и ве́си невреди́ми сохраня́ются, лю́дие же от лю́тыя сме́рти избавля́ются. Осуша́ются о́чи слезя́щеи, умолка́ют стена́ния ве́рных, плач в ра́дость о́бщую претворя́ется. Бу́ди и нам, Пречи́стая Богоро́дице, утеше́ние в бе́дствиих, возрожде́ние наде́жды, о́браз му́жества, исто́чник ми́лости и в ско́рбных обстоя́ниих неистощи́мое терпе́ние нам да́руй. Пода́ждь коему́ждо по проше́нию и ну́жде его́: младе́нцы воспита́й, ю́ныя уцелому́дри и стра́ху Бо́жию научи́, уныва́ющия обо́дри и немощну́ю ста́рость поддержи́. Посети́ в боле́знех и печа́лех су́щия, зла́я сердца́ умягчи́, братолю́бие укрепи́, ми́ра и любве́ всех нас испо́лни. Примири́, Благосе́рдая Ма́ти, вражду́ющия и оправда́й оклеве́танныя. Истреби́ поро́ки, да не восхо́дят греси́ на́ши пред Судие́ю вся́ческих, да не пости́гнет нас пра́ведный гнев Бо́жий. Твои́ми моли́твами, всемо́щным Твои́м покро́вом огради́ нас от наше́ствий вра́жиих, от гла́да, губи́тельства, огня́, меча́ и вся́каго ино́го злострада́ния. Упова́ем моли́твами Твои́ми получи́ти от Всевы́шняго Бо́га грехо́в проще́ние и изглажде́ние и с Бо́гом примире́ние. Умоли́ стяжа́ти нам Ца́рствие Небе́сное и по сконча́нии жи́зни на́шея одесну́ю Престо́ла Бо́жия ста́ти, иде́же Ты, о Всепе́тая Де́во, Святе́й Тро́ице в ве́чней сла́ве предстои́ши. Удосто́й и нас с ли́ки А́нгелов и святы́х та́мо восхвали́ти Пречестно́е И́мя Сы́на Твоего́, со Безнача́льным его́ Отце́м и Всесвяты́м и Благи́м и Животворя́щим его́ Ду́хом, во ве́ки веко́в. Ами́нь.

И́на моли́тва

О Всеми́лостивая Ма́ти, Пречи́стая Де́во Богоро́дице! У слы́ши и приими́ моле́ние мое́. При́зри на я́звы души́ и те́ла моего́, греси́ ю́ности, забве́ннии и утае́ннии, отягча́ют со́весть мою́, омы́й мя струя́ми сле́зными, сними́ бре́мя тя́жкое, укрепи́ мя, да сотворю́ плоды́ досто́йныя покая́ния. Те́рнием скорбе́й усы́пан е́сть пу́ть мой. Вем, я́ко пра́вда Бо́жия нака́жет мя, умоли́ милосе́рдие Бо́жие о мне. При́зри на стена́ние мое́, и испра́ви пу́ть мой, и спаси́ мя и ча́да и бли́жния моя́. Бу́ди ми сокро́вище ве́ры и Храни́тельница благоче́стия. Да́руй несокруши́мое терпе́ние в беда́х, от ве́ры проистека́ющее. Изгони́ гнев, за́висть, уны́ние, памятозло́бие, нечистоту́, ле́ность; си́ми и бо́льшими поро́ки неду́гует душа́ моя́! Примири́ вражду́ющих, оправда́й оклеве́танных, просвети́ нас, Влады́чице, све́том Сы́на Своего́ и да́ждь нам глаго́лати друго́м и ча́дом свои́м сло́во и́стины, тве́рдое в пра́вде, ми́рное любве́ ра́ди, растворе́нное благоразу́мием, посети́ в боле́знех и печа́лех су́щих, да вси, под держа́вным покро́вом Твои́м сохраня́еми, безбе́дно Ца́рствия Небе́снаго дости́гнем, хвалу́ воздаю́ще за вся Человеколю́бцу Бо́гу всегда́, ны́не, и при́сно, и во ве́ки веко́в. Ами́нь.

Святи́теля Питири́ма, епи́скопа Великопе́рмскаго

(Слу́жбу трие́м святи́телем, Гера́симу, Питири́му и Ио́не Великопе́рмским, зри 29 января)