НА ВЕЧЕ́РНИ

На Го́споди, воззва́х: стихи́ры Евти́ха, глас 8.

Подо́бен: О, пресла́внаго чудесе́:

Му́чениче Евти́хе, блаже́нне,/ учи́вся свяще́нно Сло́ва у честна́го ученика́,/ богослове́снаго пропове́дника,/ от него́ вся́каго уче́ния свяще́ннаго научи́лся еси́/ и свет яви́лся еси́,/ освеща́я благода́тию вся́кую мысль,/ богосло́вии твои́ми свяще́нными./ Те́мже святу́ю твою́ па́мять почита́ем.

Пре́лести низложи́л еси́ утвержде́ние/ по́двигом тве́рдым терпе́ния, пребога́те,/ и у́зами, и ра́нами,/ и сла́вною сме́ртию,/ те́мже безсме́ртие получи́л еси́,/ с ли́ки му́ченик/ и со а́нгельскими чи́ны водворя́яся,/ прича́стием лу́чшим боголе́пно,/ до́бре обожа́емь и соверше́нне.

В темни́це затворя́емь,/ хлеб прия́л еси́ жи́зни с Небесе́, сла́вне,/ вве́ржен же быв в пла́мень,/ неопале́н пребы́л еси́./ ра́ны подъя́т, лю́те стру́жемь,/ стремле́ния звере́й моли́твами укроти́л еси́./ Мече́м гла́ва твоя́ отсе́чена бысть,/ кровьми́ к Небеси́ облегча́емь,/ я́ко Боже́ственною колесни́цею.

Сла́ва, и ны́не, Богоро́дичен, глас то́йже:

Спаси́ мя, Влады́чице Пречи́стая,/ Я́же Спа́са Христа́ неизрече́нно ро́ждшая:/ Тя бо еди́ну стяжа́х Предста́тельницу,/ и необори́мую сте́ну,/ и покро́в и ра́дование,/ и ду́ши моея́ Боже́ственное утеше́ние./ Ты у́бо мя изба́ви неусыпа́ющаго че́рвия/ и огня́ ве́чнующаго, Ма́ти Христа́ Бо́га.

Крестобогоро́дичен:

Что зри́мое виде́ние,/ е́же Мои́ма очи́ма ви́дится, о Влады́ко!/ Содержа́й всю тварь, на Дре́во воздви́жен быв,/ и умира́еши, всем дая́й жи́знь, –/ Богоро́дица, пла́чущися, глаго́лаше,/ егда́ узре́ на Кресте́ возноси́ма/ из нея́ неизрече́нно возсия́вшаго Бо́га и Челове́ка.

На стихо́вне Окто́иха.

Тропа́рь, глас 4:

И нра́вом прича́стник,/ и престо́лом наме́стник апо́столом быв,/ дея́ние обре́л еси́, Богодохнове́нне,/ в виде́ния восхо́д,/ сего́ ра́ди, сло́во и́стины исправля́я,/ и ве́ры ра́ди пострада́л еси́ да́же до кро́ве,/ священному́чениче Евти́хе,/ моли́ Христа́ Бо́га/ спасти́ся душа́м на́шим.

НА У́ТРЕНИ

О́ба кано́на Окто́иха и свята́го кано́н на 4, глас 8. Творе́ние Ио́сифово.

Песнь 1

Ирмо́с: Колесницегони́теля фарао́ня погрузи́ / чудотворя́й иногда́/ Моисе́йский жезл, крестоо́бра́зно порази́в/ и раздели́в мо́ре,/ Изра́иля же беглеца, пешехо́дца спасе́,/ песнь Бо́гови воспева́юща.

Апо́столом и му́чеником сожи́тель явля́емый/ и Боже́ственныя зари́ всегда́ исполня́емь,/ честны́й твой днесь пра́здник творя́щия све́та прича́стники покажи́,/ му́чениче Евти́хе достосла́вне.

Возлю́бленнаго ученика́, блаже́нне, учени́к быв благоче́стно/ и того́ нра́вы вельми́ подража́я, Го́спода возлю́би́л еси́,/ Того́ Боже́ственныя зако́ны испо́лнив,/ и страсте́м сего́, Евти́хе, уподо́бился еси́.

Зако́ну Боже́ственному благоче́стно повину́яся,/ плоть умертви́л еси́ по́стными боле́зньми,/ ми́ра удаля́яся, и в гора́х, сла́вне, пребыва́я, му́чениче,/ и ду́шу очи́щая, и богови́ден познава́емь.

Богоро́дичен: На Тя, Де́во, наде́жду положи́х спасе́ния моего́:/ грехо́вныя скве́рны всего́ мя омы́й/ и чи́ста соде́лай, Сы́ну Твоему́ изря́дно благоугожда́юща/ и творя́ща сего́ всесвяту́ю волю.

Песнь 3

Ирмо́с: Утвержде́н в нача́ле Небеса́ ра́зумом/ и зе́млю на вода́х основа́вый,/ на ка́менн мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.

Облиста́юща све́том пропове́дания прему́драго,/ я́коже со́лнца, обре́т Па́вла ходи́ти с ним,/ я́ко звезда́ ве́лия, просвеща́я сердца́, блаже́нне Богому́дре, Ду́хом.

Богосло́вов основа́ние, ученико́в верх, Иоа́нн, при́сный друг Спа́сов,/ от земли́ боже́ственно прело́жся,/ тебе́ Бо́жие ста́до, блаже́нне, пасти́ предаде́.

Прекра́сен, и светоза́рен, и испо́лнен Ду́ха Боже́ственнаго,/ судя́щему непра́ведно предста́л еси́,/ облича́я того́ злоче́стие, пребога́те,/ и Христо́во Боже́ственное испове́да вочелове́чение.

Богоро́дичен: Ра́дуйся, И́же еди́на ра́дость несказа́нно ро́ждши;/ ра́дуйся, колесни́це и о́блаче Сло́ва:/ ра́дуйся, Ма́ти Бо́жия, Де́во Неискусобра́чная;/ ра́дуйся, преподо́бных сла́во;/ ра́дуйся, му́чеников венча́ние.

Седа́лен, глас 3.

Подо́бен: Боже́ственныя ве́ры:

Сия́ние облиста́в богоразу́мия,/ тьму разори́л еси́ многобо́жия, му́ченически сконча́в тече́ние твое́,/ и исцеле́ний источа́еши дарова́ния, приходя́щих очища́еши неду́ги,/ му́чениче сла́вне, Христа Бо́га моли́/ дарова́ти душа́м на́шим ве́лию ми́лость.

Сла́ва, и ны́не, Богоро́дичен:

Боже́ственная ски́ния была́ еси́ Сло́ва,/ еди́на Пречи́стая Ма́ти Де́во, чистото́ю А́нгелы превозше́дшая,/ па́че всех мене́, персть бы́вша, оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.

Крестобогоро́дичен:

Нескве́рная А́гница Сло́ва, Нетле́нная Де́ва Ма́ти,/ на Кресте́ зря́щи пове́шена из Ней без боле́зни Прозя́бшаго,/ ма́терски подо́бно рыда́ющи, вопия́ше:/ увы Мне, Ча́до Мое́, ка́ко стра́ждеши во́лею,/ хотя́ изба́вити от страсте́й безче́стия челове́ка?

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча,/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й Сла́ва, Человеколю́бче.

Всем умо́м отше́д ко Го́споду, не чувствова́ше, всю́ду бие́мь и растерза́емь лю́те,/ и, я́коже благово́нное кади́ло, достосла́вне, благово́ния предстоя́щия испо́лнил еси́ Боже́ственнаго,/ де́йством, Богому́дре, Ду́ха.

Бо́гом, му́чениче Богому́дре, соблюда́емь, в темни́це же свя́зан седя́,/ хлеб Небе́сный ви́димо, ра́дуяся, прия́л еси́,/ Бо́гу тя укрепля́ющу, еди́ному Подвигополо́жнику, Евти́хе Богоно́се,/ Его́же стра́сти Боже́ственней поревнова́л еси́.

Твоя́ честна́я уста́ отве́рзл еси́ Ду́хом,/ пред суди́щем, прему́дре, стоя́ мучи́телей,/ и́стинную ве́ру Трои́ческую уясни́л еси́ я́ве,/ и́дольскую же пре́лесть обличи́л еси́, блаже́нне,/ и мучи́телей безбо́жных мудрова́ния.

По мно́гих ины́х ра́нах теле́сных, Боже́ственною любо́вию, блаже́нне, распаля́емь,/ запале́нный пла́мень огня́, ра́дуяся, проше́л еси́,/ преще́нием мучи́теля ника́коже опали́вся,/ и́бо Боже́ственная тя роса́, Евти́хе, с Небесе́ ороша́ше.

Богоро́дичен: В жена́х еди́на Де́ва пребыла́ еси́ и пре́жде рождества́ и по рождестве́:/ Бог бо бе обновля́я естества́ па́че сло́ва,/ из Тебе́ неизрече́нно воплоща́емь,/ И́же горе́ пре́жде век и на земли́ в после́дняя ле́та ро́ждся, Всенепоро́чная.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Сло́вом Боже́ственным обога́щся,/ всем тре́бующим, му́чениче, пода́л еси́/ и Христо́во ста́до, свяще́нник быв, упа́сл еси́,/ утеша́я, нака́зуя и наставля́я ко спасе́нию, Евти́хе, страстоно́сче многострада́льне.

Душепа́губную пре́лесть си́лою Боже́стве́ннаго Ду́ха оттря́с,/ ко Христу́ приступи́л еси́/ и мно́жества Сему́, му́чениче, приве́л еси́ спаса́емых ве́рою,/ твои́ми честны́ми боговеща́нии, Евти́хе, страда́льцев удобре́ние.

Я́ко красны́ но́ги твоя́, преблаже́нне, стезе́ю ходи́вшия свиде́ний Боже́ственных,/ и в сих до́бре ступа́вшия,/ и к широте́ вели́цей Небе́снаго Ца́рства дости́гшия, му́чениче сла́вне.

Богоро́дичен: Де́во Ма́ти Отрокови́це, Непостижи́маго пло́тию ро́ждши,/ А́нгелов сла́во и де́монов я́зва, Богоневе́сто,/ мое́ сердце, уя́звенное грехми́, исцеле́ния Боже́ственнаго сподо́би.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся;/ к Тебе́ бо возопи́х, и услы́ши мя,/ Бо́же спасе́ния моего́.

Во Ефе́се прие́м е́же за Христа́ кончи́ну,/ от Ефе́са, му́дре, у́зник устреми́лся еси́/ и во оте́чествии твое́м честне́м, страда́ньми украша́емь, почи́л еси́.

Храм сый Бо́жий красе́н и пречи́ст,/ хра́мы и́дольския скве́рныя низложи́л еси́ благода́тию/ и к Небе́сному хра́му возне́слся еси́, Евти́хе, Бо́гу предста́ти.

Укрепи́ тя, путе́м ше́ствующа, Боже́ственный А́нгел,/ предглаго́ля тебе́ я́ве хотя́щая бы́ти, Евти́хе, пребога́те,/ равноа́нгельну су́щу и пло́ти вне ду́хом.

Богоро́дичен: Ума́ моего́ извраще́ния и души́ двиза́ния страстна́я и лю́тая, Де́во, испра́ви/ и це́ла мя соблюди́ от всегда́ неми́лостивно находя́щих ми.

Кондак, глас 3.

Подо́бен: Де́ва днесь:

Апо́столов сопресто́льник/ и святи́телей красота́ быв, Евти́хе,/ му́ченически просла́вился еси́,/ просия́л еси́, я́ко со́лнце, всех просвеща́я,/ и разори́л еси́ безбо́жия нощь глубо́кую;/ сего́ ра́ди тя почита́ем,/ я́ко Боже́ственнаго вои́стинну/ священнотаи́нника Христо́ва.

И́кос:

Я́ко Бо́жий свяще́нник, я́ко служи́тель Небе́сный,/ я́ко па́стырей па́стырь, я́ко страда́лец непобеди́м,/ с Вы́шними ны́не ли́ки водворя́яся, священнотаи́нниче,/ свет ми низпосли́ и сло́во ми вдохни́ восхвали́ти Боже́ственныя стра́сти твоя́,/ и гоне́ния, и боре́ния изря́дная и му́жественная,/ сломле́ния косте́й, удо́в ссече́ния,/ и́хже ра́ди был еси́, блаже́нне, причте́н А́нгелом,/ я́ко Боже́ственный вои́стинну священнотаи́нник Христо́в.

Песнь 7

Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Бо́жиим манове́нием огнь угасе́, на па́губу тебе́ разжже́нный, Богому́дре:/ с Небесе́ бо гром слы́шашеся и сне́жныя ка́пли пуща́хуся,/ неве́дущия Христа́ покры́вающе.

Кре́пко стру́жемь, благово́ния ми́ро, му́чениче, испусти́л еси́, во благово́ние страсте́й излия́вшагося./ и́бо прите́к к Сло́ву и Соде́телю, к Нему́же взыва́л еси́:/ благосло́вен еси́, Бо́же отец на́ших.

Житие́ твое́ непоро́чно, муче́ние, му́дре, пречу́дно и спаси́тельно/ всем, присту́пающим моще́й твои́х ко святе́й ра́це,/ исцеле́ния точа́щи и скве́рнения страсте́й мно́гих изыма́ющи.

Богоро́дичен: Разуме́вше издале́ча честни́и проро́цы та́инства Твоего́ неизрече́нную глубину́,/ многоо́бразно всем уясни́ша Твое́ рождество́, Де́во, взыва́юще:/ благослове́н еси́, Бо́же оте́ц на́ших.

Песнь 8

Ирмо́с: Седмери́цею пещь/ халдейский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Ру́це просте́р, сла́вне, ко Христу́ Бо́гу на́шему,/ посреде́ суди́ща боря́ся со львы, невреди́м был еси́,/ я́коже проро́к пре́жде Дании́л,/ А́нгела, при́сно соблюда́юща тя, име́я и поя́ непреста́нно:/ свяще́нницы, благослови́те, лю́дие, превозноси́те во вся ве́ки.

Ско́тски ви́де тя, беззако́нными осужде́на,/ зверь, твое́й угото́вленный поги́бели, я́сно провеща́ всеси́льным манове́нием/ и вели́чия Спа́са Христа́ пропове́да, удивля́я вопию́щия:/ свяще́нницы, благослови́те, лю́дие, превозноси́те во вся ве́ки.

Си́лою Бо́жиею и благода́тию по́двиг вели́кий муче́ния проше́д,/ венцы́ улучи́л еси́ побе́ды, ра́дуяся,/ и ли́ком приче́лся еси́ всех апо́стол и му́ченик,/ с ни́миже вопие́ши непреста́нно:/ свяще́нницы, благослови́те, лю́дие, превозноси́те во вся ве́ки.

Богоро́дичен: Умерщвле́нную угрызе́нием ду́шу мою́ змии́ным,/ еди́на явле́нно живо́т ро́ждшая, Всенепоро́чная, оживи́/ и твори́ти сподо́би нас ра́ди из Тебе́, Де́во, Ро́ждшагося хоте́ние, вопию́щу:/ свяще́нницы, благослови́те, лю́дие, превозноси́те во вся ве́ки.

Песнь 9

Ирмо́с: У́жасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком плотски́/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Исцеле́ния источа́еши разли́чна и неду́ги утиша́еши тя́жкия,/ от Христа́ благода́ть прии́м вои́стинну, до́бре подви́гся/ и победи́в враги́, Богому́дре страстоте́рпче,/ А́нгелов сограждани́не и му́чеников верх.

Красе́н в по́двизех я́влься, в кра́сныя черто́ги всели́лся еси́,/ усе́чен быв мече́м во святу́ю твою́ главу,/ ю́же Иису́с венча́ побе́ды венце́м благоле́пным, свети́льниче Це́ркве,/ утвержде́ние и похвала́ благоче́стно блажа́щих тя.

Сокруши́л еси́ держа́ву лука́ваго, Евти́хе страстоте́рпче прехва́льне,/ и на него́ побе́ду поста́вль ю́ношески,/ и победи́тель преизря́ден ны́не еси́ на Небесе́х,/ Престо́лу Тро́ическому со дерзнове́нием мно́гим све́тло предстоя́.

Па́мять твоя́ Боже́ственная и светоза́рная па́че со́лнца всем просия́,/ све́тлыми сия́нии просвеща́ющи ве́рно и благоче́стно всегда́ сие́ пра́зднующих, Евти́хе,/ в не́йже тя моли́м, я́ко име́я дерзнове́ние, спасе́ние нам испроси́.

Богоро́дичен: Глас Ти провозглаша́ем Гаврии́лов: ра́дуйся, земле́ избра́нная./ Ра́дуйся, трапе́зо златови́дная./ Ра́дуйся, челове́ков приб́е́жище./ Ра́дуйся, му́чеников похвало́./ Ра́дуйся, А́нгелов ра́дование, Свята́я Богоро́дице,/ держа́во ве́рою чи́стою блажа́щих Тя.

Свети́лен.

Подо́бен: Жены́, услы́шите:

И престо́лов я́ко прее́мник,/ и нра́вов я́ко прича́стник свяще́нных апо́столов ты быв, богому́дре,/ ве́рою свято́е твое́ страда́ние пра́зднующия с Небесе́ назира́й,/ я́ко учени́к Сло́ва, Евти́хе святи́телю.

Богоро́дичен:

При́зри, Чи́стая, на достоя́ние Твое́/ и непобеди́мым Твои́м сие́ соблюди́ предста́тельством:/ Це́рковь упра́ви, ве́ру утверди́, язы́ки укроти́ и изле́й мир в концы́ ми́ра.

НА ВЕЛИ́ЦЕЙ ВЕЧЕ́РНИ

Бла́жен муж: 1-й антифо́н. На Го́споди, воззва́х: стихи́ры, глас 1.

Подо́бен: О, ди́внаго чудесе́:

О, ди́внаго чудесе́!/ Исто́чник чуде́с, под земле́ю сокрове́нный,/ днесь пресла́вно всем явля́ется,/ и самоде́ржца ку́пно со архиере́йскими свяще́нными рука́ми/ пресла́вно в це́рковь но́сится,/ и́же от нас ду́хом не разлуча́яся,/ и свои́м пренесе́нием всех освяща́ет./ Ему́же, ве́рнии, возопие́м:/ святи́телю Пе́тре, ра́дуйся/ и Христу́ моли́ся/ дарова́ти моли́твами твои́ми ми́рови ве́лию ми́лость.

О, ди́внаго чудесе́!/ И́же иногда́ земле́ю покрове́ный,/ днесь пресла́вно, я́ко на херуви́мском носи́ле,/ на плещу́ архиере́йску и самоде́ржца но́сится,/ всенаро́дное же мно́жество,/ свяще́нники и лю́дие, честно́ после́дствующе,/ ра́достная глаго́лют:/ архиере́ю Пе́тре, ра́дуйся/ и моли́ дарова́ти твои́м пренесе́нием/ ми́рови ве́лию ми́лость.

Твое́ пресла́вное пренесе́ние/ сла́вят архиере́и/ ку́пно со свяще́нных собо́ры/ и всенаро́дным мно́жеством,/ в пресла́внем твое́м пренесе́нии крася́щеся,/ пра́зднственная ликова́ния тебе́ воспева́юще, глаго́лют:/ пресла́вне Пе́тре, ра́дуйся/ и моли́ дарова́ти моли́твами твои́ми ми́рови/ ве́лию ми́лость.

И́ны стихи́ры, глас 2.

Подо́бен: Ки́ими похва́льными:

Ки́ими похва́льными пе́сньми/ ны́не соста́вим ликова́ние/ в честне́м пра́зднице твоего́ пренесе́ния, святи́телю?/ Духо́вно пра́зднующе, мо́лимся:/ моли́ во́инству на́шему победи́тельная на враги́ дарова́ти,/ тебе́ бо те́пла моли́твенника ко Влады́це стяжа́хом,/ подаю́щему ми́рови ве́лию ми́лость.

Ки́ими похва́льными добро́тами/ воспое́м во архиере́ех сла́внаго,/ и в ве́ре вели́каго,/ и в повеле́ниих доброразсу́днаго,/ и во уче́нии язы́ка сла́достнаго,/ уче́нием Це́рковь обогаща́юща?/ Его́же венцы́ венча́ет Христо́с, Бог наш,/ име́яй ве́лию ми́лость.

Ки́ими духо́вными пе́сньми/ воспое́м святи́теля,/ уче́нием к богоразу́мию всех наста́вльшаго,/ исто́чника чуде́с пречу́днаго,/ и пресве́тлаго Це́ркви свети́льника,/ и учи́теля прему́дра,/ Русския земли́ прекра́сное удо́брение?/ Его́же ра́ди Христо́с враго́в шата́ние низложи́,/ име́яй ве́лию ми́лость.

Сла́ва, глас 6:

Архиере́ов похвалу́, и свяще́нных всех украше́ние,/ и к Бо́гу моли́твенника непрестае́ма,/ и исто́чника чудес преизоби́льна,/ днесь любо́вию соше́дшеся,/ святи́теля Петра́ восхва́лим/ и, честны́я его́ мо́щи обстоя́ще,/ благода́рная тому́ прино́сим, глаго́люще:/ ра́дуйся, святи́телю Пе́тре,/ свети́льниче пресве́тлый,/ озаря́я изря́дно твое́ достоя́ние,/ оте́чество же и лю́ди,/ о ни́хже непреста́нно Христу́ моли́ся,/ ми́рно житие́ дарова́ти,/ да вси честно́е твое́ пренесе́ние любо́вию ублажа́ем и мо́лимся:/ моли́ спасти́ся душа́м на́шим.

И ны́не, Богоро́дичен: Кто Тебе́ не ублажи́т:

Вход. Проки́мен дне. И чте́ния.

При́тчей чте́ние (главы 10, 3 и 8):

Па́мять пра́веднаго с похвала́ми,/ и благосло́вение Госпо́дне на главе́ его́./ Бла́жен челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо си́ю купова́ти, не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е не досто́йно ея́ есть./ Долгота́ бо дней и ле́та живота́ в десни́це ея́,/ в шуи́це же ея́ бога́тство и Сла́ва./ От уст ея́ исхо́ди́т пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да, честна́я бо реку,/ и Бла́жен челове́к, и́же пути́ моя́ сохрани́т:/ исхо́ди бо мои́ – исхо́ди живота́,/ и уготовля́ется хоте́ние от Го́спода./ сего́ ра́ди молю́ вас и предлага́ю мой глас сыново́м челове́ческим:/ я́ко аз, прему́дрость, устро́их сове́т,/ и ра́зум и смы́сл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки, честна́я бо реку,/ и отве́рзу от усте́н пра́вая,/ я́ко и́стине поучи́тся горта́нь мой,/ ме́рзски же предо мно́ю устны́ лжи́выя./ С пра́вдою вси глаго́лы уст мои́х,/ ничто́же в них стро́потно, ни́же развраще́нно./ Вся пра́ва суть разумева́ющим/ и про́ста обрета́ющим разум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

Прему́дрости Соломо́ни чте́ние (главы 4 и 5):

Пра́ведник а́ще пости́гнет сконча́тися, в поко́и бу́дет./ Осу́дит же пра́ведник умира́яй живу́щия нечести́выя./ У́зрят бо кончи́ну пра́веднаго, и не разуме́ют, что совеща́ша о нем?/ Я́ко пове́ржет Госпо́дь нечести́выя безгла́сны ниц/ и поколе́блет их от основа́ний, и до после́дняго исче́знут в боле́зни,/ и па́мять их поги́бнет./ Прии́дут бо в помышлени́е согреше́ний свои́х ужа́сни,/ и обличи́т их сопроти́в беззако́ния их./ Тогда́ ста́нет в дерзнове́нии мно́зе пра́ведник пред лице́м оскорби́вших его́/ и отмета́ющих труды́ его́./ Ви́девше же его́, смяту́тся стра́хом мно́гим/ и ужа́снутся о пресла́вном спасе́нии его́./ Ре́кут бо в себе́, ка́ющеся,/ и в тесноте́ ду́ха воздохну́т, и реку́т:/ сей бе, его́же име́хом не́когда в посме́х/ и в при́тчу поноше́ния./ Безу́мнии, житие́ его́ вмени́хом неи́стово и кончи́ну его́ безче́стну./ Ка́ко вмени́ся в сыне́х Бо́жиих и во святы́х жре́бий его́ есть?/ У́бо заблуди́хом от пути́ и́стиннаго,/ и пра́вды свет не облиста́ нам, и со́лнце не возсия́ нам./ Беззако́нных испо́лнихомся стезь и поги́бели,/ и ходи́хом стези́ непрохо́дны,/ пути́ же Госпо́дня не разуме́хом.

Прему́дрости Соломо́ни чте́ние (главы 10, 6, 8 и 9):

Уста́ пра́веднаго ка́плют прему́дрость,/ устне́ же муже́й мудрых ве́дят благода́ть./ Уста́ мудрых поуча́тся прему́дрости,/ пра́вда же избавля́ет их от сме́рти./ Сконча́вшуся мужу пра́ведну, не поги́бнет наде́жда./ Сын бо пра́веден ражда́ется в живо́т/ и во благи́х свои́х плод пра́вды обы́мет./ Свет пра́ведным всегда́,/ и от Го́спода обря́щут благода́ть и сла́ву./ Язы́к му́дрых до́брая свесть,/ и в се́рдце их почи́ет му́дрость./ Лю́бит Госпо́дь преподо́бная сердца́,/ прия́тни же ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго./ Постига́ет бо жела́ющия ю, пре́жде да́же разуме́ти ю,/ и удо́бь у́зрится от лю́бящих ю./ У́треневавый к ней не утруди́тся,/ и бдяй ея́ ра́ди вско́ре без печа́ли бу́дет./ Я́ко досто́йных ея́ сама́ обходи́т, и́щущи,/ и во стезя́х ея́ явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея́,/ и возлю́би́х ю, и поиска́х от ю́ности моея́./ И взыска́х неве́сту привести́ себе́,/ я́ко всех Влады́ка возлю́би́ ю́./ Таи́бница бо есть Бо́жия хи́трости/ и обрета́тельница дел Его́./ Труды ея́ суть доброде́тели,/ целому́дрию же и ра́зуму та учи́т, пра́вде и му́жеству,/ и́хже потре́бнее ничто́же есть в житии́ челове́ком./ А́ще же и мно́гаго иску́сства жела́ет кто,/ весть дре́вняя и бы́ти хотя́щая разсмо́трит./ Свесть изви́тия сло́вес и разреше́ния гада́ний,/ зна́мения и чудеса́ проразуме́ет и сбытия́ време́н и лет,/ и всем сове́тник есть благ,/ я́ко безсме́ртие есть в ней и благосла́вие во обще́нии слове́с ея́./ Сего́ ра́ди бесе́довах ко Го́споду, и помоли́хся ему́,/ и рех от всего́ се́рдца моего́:/ Бо́же отце́в и Го́споди ми́лости,/ сотвори́вый вся сло́вом Твои́м и му́дростию Твое́ю устро́ивый челове́ка,/ да владе́ет бы́вшими от Тебе́ тварьми́/ и да управля́ет мир в преподо́бии и пра́вде./ Даждь ми Твои́х престо́лов приседя́щую прему́дрость/ и не отлучи́ мене́ от о́трок Твои́х,/ я́ко аз раб Твой и сын рабы́ни Твоея́./ Посли́ ю́ с Небе́с от свята́го жили́ща Твоего́/ и от престо́ла сла́вы Твоея́,/ да, су́щи со мно́ю, научи́т мя, что благоуго́дно есть пред Тобо́ю./ И наста́вит мя в ра́зум,/ и сохрани́т мя в сла́ве свое́й./ Помышле́ния бо сме́ртных вся боязли́ва/ и погреши́тельна умышле́ния их.

На литии́ стихи́ры, глас 2. Самогласны:

Христо́во ста́до слове́сных ове́ц/ на зла́це благоче́стия до́бре упасл еси́, святи́телю,/ те́мже и по преставле́нии/ це́рковная твоя́ ча́да не оста́ви, посеща́я,/ и, я́ко Тро́ице со святи́тели предстоя́,/ моли́ся спасти́ всех,/ твое́ честно́е пренесе́ние любо́вию почита́ющих,/ Пе́тре всехва́льне.

Тезоимени́таго ра́ди твоего́ жития́,/ и сла́дости язы́ка,/ и разсужде́ния доброразсу́днаго/ па́стыря тя лю́дем Христо́с вруча́ет./ Егоже моли́ спасти́ и уще́дрити всех,/ пресве́тлую па́мять твою́ пра́зднующих/ и честно́е пренесе́ние моще́й твои́х любо́вию почита́ющих,/ Пе́тре пресла́вне,/ моли́твенниче те́плый о душа́х на́ших.

Днесь пресла́вно, святи́телю,/ от твои́х и к твои́м че́стно преходи́ши,/ да твои́м ше́ствием всех освяти́ши/ и ра́дости напо́лниши па́мять твою́ любо́вию пра́зднующих,/ и честно́е прехожде́ние твое́ ве́рно сла́вящих,/ и приле́жно вопию́щих:/ моли́, мо́лимся, спасти́ся душа́м на́шим.

Сла́ва, глас 8:

Град освяти́ся,/ и наро́ди благослови́шася,/ и Це́рковь перворо́дных ду́хом ликовству́ет/ в пренесе́нии честны́х моще́й твои́х,/ святи́телю Пе́тре, с людьми́ зову́щи:/ ты моя́ кре́пость и утвержде́ние,/ ты моя́ добро́та, и тобо́ю хвалю́ся./ Моли́ спасти́ся всем,/ любо́вию всеми́рное твое́ пренесе́ние при́сно сла́вящим.

И ны́не, Богоро́дичен.

На стихо́вне стихи́ры, глас 2.

Подо́бен: До́ме Евфра́фов:

От Вы́шняго промысла/ прему́дрости навы́к,/ лю́ди твоя́/ твои́м уче́нием просвети́л еси́,/ о ни́хже не преста́й, святи́телю, моля́ся.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Дом Ду́ха Пресвята́го/ от ю́ности, святи́телю, был еси́,/ те́мже и нас Тому́ жили́ще/ моли́твами твои́ми покажи́,/ да вси честно́е твое́ пренесе́ние почита́ем.

Стих: Восхваля́тся преподо́бнии во сла́ве/ и возра́дуются на ло́жах свои́х.

Всех архиере́ов Русских/ похвалу́ тя све́мы, святи́телю,/ и свяще́нников благоле́пие,/ спаса́й всех, честно́е твое́ пренесе́ние/ пе́сньми сла́вящих.

Сла́ва, глас то́йже, самогла́сен:

Ви́ден бысть, такова́я могу́щим ви́дети,/ на угото́ваннем тебе́, о́тче, ме́сте/ пресла́вно го́лубь паря́щ:/ я́ве бо всем назна́менав показа́,/ я́ко и по честне́м преставле́нии твое́м/ Дух Пресвяты́й де́йствует всегда́ тобо́ю./ Его́же моли́ спребыва́ти лю́бящим тя/ и честно́е твое́ пренесе́ние духо́вне пра́зднующим,/ да вси тебе́ дерзнове́нно,/ я́ко чадолюби́ва отца́, пе́сньми почита́ем.

И ны́не, Богоро́дичен.

Тропа́рь, глас 4:

Наста́ днесь всечестны́й пра́здник/ пренесе́ния честны́х моще́й твои́х, святи́телю Пе́тре,/ веселя́ изря́дно твое́ ста́до,/ и ве́рное отече́ство, и лю́ди,/ о ни́хже не оскудева́й, моля́ся Христу́ Бо́гу,/ еже от Него́ дарова́нней ти па́стве сохрани́тися от враг ненаве́тованней/ и спасти́ся душа́м на́шим.

Ин Тропа́рь, глас то́йже:

Благове́рно пожи́в в мире,/ житие́м чи́стым просвети́вся,/ уче́нием святи́тельства прия́т па́ству,/ апо́столом насле́дниче./ Тем прие́м дар чуде́с от Бо́га, о́тче Пе́тре,/ моли́ Христа́ Бо́га,/ да спасе́т ду́ши на́ша.

Сла́ва, и ныне, Богоро́дичен.

НА У́ТРЕНИ

По 1-й стихоло́гии седа́лен, глас 3.

Подо́бен: Боже́ственныя ве́ры:

Град и лю́ди, честно́е твое́ пренесе́ние со свяще́нными пра́зднующия,/ невече́рним све́том просвети́/ и свы́ше тем Боже́ственную благода́ть низпосли́,/ да вси тебе́ ублажа́ем при́сно и любо́вию вопие́м:/ Пе́тре прехва́льне, моли́ Христа́ Бо́га спасти́ся душа́м на́шим.

Сла́ва, и ны́не, Богоро́дичен:

Боже́ственная Ски́ния была́ еси́ Сло́ва, еди́на Пречи́стая Ма́ти Де́во,/ чистото́ю А́нгелы превозше́дшая./ Па́че всех мене́, персть бы́вша, оскве́рнена плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.

По 2-й стихоло́гии седа́лен, глас 8.

Подо́бен: Повеле́нное:

Возлюби́л еси́ о́ный век, при́сно пребыва́ющий, измени́в тле́нными ве́чнующая./ Те́мже к Го́рним ше́ствие невозбра́нно име́л еси́, святи́телю Пе́тре прему́дре,/ Христа́ Бо́га моли́ спасти́ всех,/ честно́е твое́ пренесе́ние пе́сньми сла́вящих.

Сла́ва, и ны́не, Богоро́дичен:

Я́же непреме́ннаго Бо́га поро́ждшая,/ пременя́емое при́сно се́рдце мое́ грехо́м и ле́ностию,/ прило́гми льсти́ваго утверди́, Блага́я, моли́твами мате́рними Твои́ми,/ я́ко да и аз благода́рно сла́влю Тя, Богороди́тельнице Мари́е./ Поми́луй ста́до Твое́, еже стяжа́ла еси́, Всенепоро́чная.

По полиеле́и седа́лен, глас 8.

Подо́бен: Прему́дрости:

Украша́емь жития́ све́тлостию, благи́ми нра́вы обога́тился еси́,/ те́мже и по преставле́нии чудоде́йствуеши, святи́телю Пе́тре прехва́льне./ Моли́ Христа́ Бо́га согреше́ний оставле́ние дарова́ти/ любо́вию почита́ющим честно́е твои́х моще́й пренесе́ние.

Сла́ва, и ны́не, Богоро́дичен:

Я́ко Всенепоро́чная Неве́ста Творцу́,/ я́ко Неискусому́жная Ма́ти Изба́вителю,/ прия́телище я́ко су́щи Уте́шителя, Препе́тая,/ беззако́нию мя су́ща скве́рное оби́телище и бесо́м игра́лище в ра́зуме бы́вша,/ потщи́ся от тех злоде́йства мя изба́вити/ и све́тлое жили́ще доброде́телей соверши́, Светоно́сная Нетле́нная,/ отжени́ о́блак страсте́й и Вы́шняго прича́стия сподо́би/ и Све́та невече́рняго моли́твами Твои́ми.

Таже Степе́нна, 1-й антифо́н 4-го гла́са. Проки́мен, глас 4: Уста́ моя́ возглаго́лют прему́дрость/ и поуче́ние се́рдца моего́ разум. Стих: Услы́шите сия, вси язы́цы, внуши́те, вси, живу́щии по вселе́нней. Вся́кое дыха́ние: Ева́нгелие от Иоа́нна, зача́ло 35 от полу́.

По 50-м псалме́ стихи́ра, глас 6:

Егда́ пренесе́ние честны́х твои́х моще́й, о́тче, бя́ше,/ тогда́ князь вели́кий со кня́зи и со святи́тели, подъе́мше мо́щи,/ че́стно ноша́ху тебе́,/ наро́ди же, зря́ще тя, све́тло носи́ма,/ любо́вию одержи́ми бяху./ Князь же вели́кий Иоа́нн со слеза́ми вопия́ше ти:/ о влады́ко,/ ко́е благохвале́ние твоему́ пренесе́нию сотвори́м?/ Недоуме́ю и удивля́юся твоему́ милосе́рдию,/ е́же на нас показа́л еси́./ Но у́бо, святи́телю Пе́тре,/ моли́ся приле́жно Христу́ Бо́гу на́шему,/ сохрани́ти лю́ди и град твой,/ пренесе́ние твое́ ве́рно сла́вящия.

Кано́на два пренесе́ния, и́маже краегране́сие внима́й у червле́ных сло́вес. Глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Повеле́нием Влады́ки твоего́, святи́телю, подо́бяся,/ кро́ток и смире́н был еси́/ и отсю́ду в чину́ ублажа́емых быти сподо́бился еси́./ Те́мже днесь пресла́вное твое́ пренесе́ние почита́ем.

Благочести́ваго ко́рене пресве́тлая отра́сль,/ пресла́вно прозя́бл еси́, архиере́ю Пе́тре,/ и, в доброде́тели соверше́нне пожи́в,/ сосу́д чист Ду́ха Пресвята́го, о́тче, был еси́.

Сопресто́льник и учи́тель всея́ земли́ Русския, о́тче, был еси́,/ тем ны́не соше́дшеся в пречестны́й храм/ на пренесе́ние честны́х моще́й твои́х, святи́телю Пе́тре пречу́дне,/ про́сим грехо́в проще́ния.

Богоро́дичен: Ты еди́на, Богоневе́сто, в Вы́шних Седя́щаго на ру́ку пло́тию носи́ла еси́,/ Тебе́ избра́ от всех родо́в прия́телище досто́йно Вседержи́тель.

Ин кано́н, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Вели́каго кня́зя рука́ма честно́, архиере́ю, ше́ствие твори́ши,/ да вся твои́м прикоснове́нием освяти́ши,/ пренесе́ние твое́ сла́вящия.

Иоа́нна Ми́лостиваго нра́вом подо́бяся,/ и сего́ ра́ди ми́лостив к тре́бующим, святи́телю, был еси́,/ те́мже днесь твое́ пренесе́ние че́стно прославля́ем.

Всея́ Руси́и архиере́й, о́тче, был еси́/ и всех научи́л еси́ сла́вити в Тро́ице еди́но Божество́, при́сно пребыва́ющее./ Те́мже тя вси пе́сньми ублажа́ем.

Богоро́дичен: Засту́пнице скорбя́щих и спасе́ние ненаде́ющихся, Богоро́дице Всепе́тая,/ моли́ приле́жно изба́витися нам от бед.

Песнь 3

Ирмо́с: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Благослове́нием твои́м вся возмо́гл еси́, о укрепля́ющем тя Христе́,/ и олядене́вшия иногда́ лю́дем бразды́ душе́вныя/ прему́дрыми твои́ми уче́ньми, святи́телю, очи́стил еси́/ и плодоно́сны сотвори́л еси́.

Фарисе́йское киче́ние от ю́ности, о́тче, возненави́дев/ и мытаре́ву смире́нию поревнова́в,/ кро́ток и смире́н ко всем был еси́,/ сего́ ра́ди вси тя, я́ко вину́ и о́браз благи́х, почита́ем.

Испо́лни ра́дости и весели́я тебе́ при́сно, святи́телю Пе́тре, лю́бящия/ и торже́ственная твоему́ честно́му пренесе́нию в пе́снех всегда́ пою́щия.

Богоро́дичен: Тя, заступле́ние небла́знено, Богома́ти, стяжа́вше/ и упова́ние на Тя возлага́юще, спаса́емся/ и, к Тебе́ прибега́юще, сохраня́емся.

Ин

Ирмо́с: Небе́снаго круга Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Лице́м к лицу́, зерца́лом разре́шшимся, зри́ши Святу́ю Тро́ицу,/ Е́йже со святи́тели о нас, Пе́тре, моли́ся,/ ве́рою твое́ пренесе́ние сла́вящих.

Испо́лнен ра́дости днесь день пренесе́нием твои́м, святи́телю,/ и всех к торжеству́ воздвиза́еши, Христо́ви с весе́лием вопи́ти:/ несть свя́та, па́че Тебе́, Человеколю́бче.

Па́ки нас честны́м твои́м явле́нием, святи́телю Пе́тре, весели́ши,/ па́ки твои́м прикоснове́нием всех освяща́еши и учи́ши Христо́ви вопи́ти:/ несть свя́та, па́че Тебе́, Го́споди.

Богоро́дичен: Живота́ нетле́ннаго Бо́жия Ски́ния была́ еси́,/ еди́на от ве́ка я́вльшися Де́ва Ма́ти Чи́стая./ В се́ни мя су́ща сме́ртней к животу́ наста́ви моли́твами Твои́ми.

Ин кондак, глас 4.

Подо́бен: Яви́лся еси́ днесь:

Яви́ся днесь пресве́тлая па́мять твоя́,/ святи́телю преблаже́нне Пе́тре,/ в ми́ре све́тло сия́ющи/ и явля́ющи всем/ Боже́ственное сия́ние.

Седа́лен, глас 4.

Подо́бен: Вознесы́йся:

Моли́твам и ми́лостыням, святи́телю Пе́тре, при́сно прилежа́,/ ми́лостив к тре́бующим, о́тче, незави́стно был еси́,/ те́мже тя почита́ющих от сопроти́вных зол избавля́й,/ да вси твое́ пренесе́ние любо́вию почита́ем.

Сла́ва, и ны́не, Богоро́дичен:

Све́та ро́ждшая Пречи́стаго, от Отца́ возсия́вшаго пре́жде век,/ просвети́, Отрокови́це, ду́шу мою́ и ум,/ дале́че от мене́ отгоня́щи тьму страсте́й,/ да Тя ублажа́ю, Присноблаже́нную, ве́рным упова́ние.

Песнь 4

Ирмо́с: Седя́й в сла́ве на Престо́ле Божества́,/во о́блаце ле́гце/ прии́де Иису́с Пребоже́ственный/ Нетле́нною Дла́нию и спасе́ зову́щия:/ Сла́ва, Христе́, си́ле Твое́й.

Митрополи́та тя Русская страна́ пресла́вно, святи́телю Пе́тре, стяжа́вши,/ тобо́ю красу́ется с мона́си, и архиере́и, и со всенаро́дным мно́жеством, Христа́ воспева́ющими,/ сим тебе́ при́сно дарова́вшаго.

Всея́ Русси́и первопресто́льный и архиере́й, святи́телю Пе́тре, был еси́/ и всех твои́м уче́нием просвети́л еси́./ Те́мже па́мять твою́ почита́ем и, пренесе́ние твое́ сла́вяще, вопие́м:/ моли́ о всех, пою́щих тя.

Богоро́дичен: Кре́пкое Тя ору́жие на враги́ предлага́ем,/ и ско́рби вся́кия лю́тых обстоя́ний отрева́ем вред,/ и ерети́ческих возмуще́ний, Ма́ти Бо́жия, избега́ем.

Ин

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Благода́рное сие́ пе́ние принося́щих ти чад не пре́зри, святи́телю,/ но приими́ сие́ и доноша́й Творцу́ и Бо́гу,/ да вси честно́е твое́ пренесе́ние любо́вию почита́ем.

Принесе́ся дар Бо́гу – тобо́ю мно́жество спаса́емых,/ твоему́ уче́нию при́сно после́дующих и Христа́ во хвале́нии воспева́ющих,/ тебе́ сим дарова́вшаго.

Рук твои́х к Бо́гу воздея́нием, святи́телю, пресла́вная чудоде́йствуеши,/ ве́рою приходя́щим исцеле́ния подая́,/ те́мже вси твое́ пренесе́ние че́стно почита́ем.

Богоро́дичен: С Бо́гом Тя Засту́пницу стяжа́хом:/ Ты бо Ма́ти Бо́жия была́ еси́ Творца́ и Соде́теля,/ на́ше воображе́ние прие́мша, Всенепоро́чная,/ всех от сме́рти и тли спа́сшаго.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Многогре́шнаго, нераде́нием изжи́вша житие́, не возгнуша́йся, святи́телю,/ но твои́ми моли́твами очи́сти,/ твое́ пренесе́ние пе́сньми при́сно трудолю́бию сла́вящаго.

Пахо́мия а́нгельскому виде́нию сподо́бившася, сего́ пра́вилу навы́к,/ мно́гажды без сна в моли́тве всю нощь, святи́телю, пребы́л еси́,/ отону́дуже сподо́бился еси́ Го́рняго зва́ния.

Смире́н нрав и высо́ко е́же по Бо́зе житие́ стяжа́л еси́, святи́телю./ Те́мже и Всеви́дящее о́ко, ви́дев до́брое твое́ произволе́ние,/ сла́вна тя всем конце́м показа́, Христо́с, Спас душ на́ших.

Богоро́дичен: Еди́ну Тебе́, Всенепоро́чная, от родо́в избра́в Пречи́стую,/ всели́ся в Тя и челове́ки обожи́./ Те́мже, я́ко ма́терне дерзнове́ние к нему́ стяжа́вши,/ моли́ о и́же Богоро́дицу Тя имену́ющих.

Ин

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́нного?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Рыда́ют попремно́гу го́рце бе́сове,/ моли́твами твои́ми от челове́к отгони́ми;/ изря́дная же ча́да твоя́, ны́не тебе́ че́стно, святи́телю Пе́тре, преноси́ма ви́дяще, ра́дуемся.

Боже́ственную благода́ть в честне́м твое́м пренесе́нии зря́ще,/ попремно́гу свяще́нная твоя́ ча́да ра́дуются:/ зра́ком бо голуби́ным извеща́ет всем лю́бящим тя Ду́ха Свята́го спребыва́ние.

К Бо́гу моли́твами твои́ми, о́тче, ми́рно житие́ дарова́ти моли́ся/ и укрепи́ оте́чество и все правосла́вие;/ да тобо́ю от злых избавля́емы,/ почита́ем честно́е твое́ пренесе́ние, Пе́тре прехва́льне.

Богоро́дичен: Наслажда́ющеся, Пречи́стая, Твои́х дарова́ний,/ благода́рственное воспева́ем пе́ние,/ ве́дуще Тя Богома́терь.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от нея́ ро́ждшагося Бо́га сла́вим.

На смире́ние на́ше свы́ше ми́лостивно назирай, ве́рно тебе́ при́сно сла́вящих,/ и моли́ся, вся́кия ско́рби изба́вити,/ тебе́ те́пла предста́теля к Бо́гу, святи́телю, стяжа́вшия.

Селе́ние яви́лся еси́ прекра́сно Ду́ха Свята́го,/ богодохнове́нными уче́нии твои́ми оби́льно пита́я слове́сная твоя́ чада./ Отню́дуже и по преставле́нии спребыва́еши лю́бящим тя, святи́телю.

Богоро́дичен: Пое́м, Де́во Богома́ти, па́че естества́ рождество́ Твое́ и Твою́ нетле́нную чистоту́,/ и́бо из Тебе́ ди́вно сочта́ся де́вство и рождество́ нетле́нно, Богоневе́сто.

Ин

Ирмо́с: Моли́тву проли́ю ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися,/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

А́ще и преста́вился еси́ от земны́х, святи́телю,/ но жив в Вы́шних со А́нгелы Бо́гу предстои́ши./ Помина́й нас, честно́е твое́ пренесе́ние при́сно сла́вящих.

Блаже́ни роди́телие, и́же тебе́ роди́вшии,/ Бла́женно же и ме́сто, е́же тебе́ воспита́вшее,/ блаже́н же и преблаже́н и град,/ и́же тебе́ такова́ учи́теля стяжа́вый, Пе́тре пресла́вне.

Не терпи́ши, святи́телю, про́чее вре́мя под земле́ю сокрове́н бы́ти/ те́мже и всем себе́ явля́вши,/ я́ко да всех твои́м явлени́ем освяти́ши, блаже́нне.

Богоро́дичен: Вседержи́тельною си́лою нося́й вся́ческая,/ немощно́ю пло́тию из Тебе́ оде́яся, Де́во Пренепоро́чная,/ на благодея́ние челове́ков, Человеколю́бец.

Конда́к, глас 8:

Я́ко врача́ преизря́дна и исто́чника чудесе́м оби́льна,/ днесь соше́дшеся любо́вию, духо́вная твоя́ чада,/ в пренесе́ние честны́х моще́й твои́х,/ архиере́ю Пе́тре, мо́лим тя:/ моли́ Христа́ Бо́га дарова́ти честны́м твои́м пренесе́нием/ ве́рному во́инству на́шему на враги́ победи́тельная,/ да твои́ми к Бо́гу моли́твами находя́щих зол изба́вльшеся,/ ра́достною душе́ю и весе́лием се́рдца/ благода́рная ти воспое́м, глаго́люще:/ ра́дуйся, о́тче Пе́тре, архиере́ев и всея́ Русския земли́ удобре́ние.

И́кос:

От ю́ности Боже́ственное твое́ житие́, святи́телю, до́бре испра́вль,/ внима́тельным о́ком всегда́ к Вы́шним зря и та́мошних непреста́нно жела́я,/ отню́дуже вели́кия ра́ди доброде́тели и прему́дрости язы́ка/ архиере́йства са́ном укра́шен быв,/ Це́рковь и лю́ди твои́ми уче́нии обогати́л еси́./ Те́мже и тече́ние благоче́стно соверши́в,/ к Бо́гу пресла́вно ду́хом преше́л еси́,/ нам честны́я мо́щи в па́мять оста́вль,/ и́хже ны́не честно́е и пресла́вное пренесе́ние пра́зднующе, мо́лимся,/ победи́тельная на враги́ ве́рному во́инству дарова́ти,/ я́ко да в тишине́ богоуго́дно пожи́вше,/ тебе́ ра́достною душе́ю благода́рная воспое́м, глаго́люще:/ ра́дуйся, о́тче Пе́тре, архиере́ев и всея́ Русския земли́ удобре́ние.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Свы́ше от Бо́га дар тезоимени́тому гра́ду и всей земли́ дан был еси́, святи́телю Пе́тре,/ удивля́я уче́нием вся, Христу́ вопию́щия:/ благосло́вен Бог отец на́ших.

Архиере́ов пресве́тлая добро́та, о́тче Пе́тре, был еси́/ и Христо́вы Це́ркве столп и утвержде́ние./ Те́мже помина́й честно́е твое́ пренесе́ние сла́вящия, пресла́вне.

Богоро́дичен: Всем челове́ком Хода́таица еди́на яви́ся Боже́ственнаго избавле́ния,/ Изба́вителя всех ро́ждши, Всенепоро́чная, Ему́же пое́м:/ препе́тый оте́ц на́ших Бо́же, благослове́н еси́.

Ин

Ирмо́с: От Иуде́и доше́дше, о́троцы/ в Вавило́не иногда́/ ве́рою Трои́ческою пла́мень пе́щный попра́ша, пою́ще:/ отце́в Бо́же, благослове́н еси́.

Твое́ пренесе́ние чту́щих, святи́телю,/ архиере́я же, и лю́ди, и свяще́нных собо́ры,/ моли́твами твои́ми о́гненнаго родства́ изба́ви, Христу́ вопию́щия:/ благослове́н Бог оте́ц на́ших.

Всеви́дящее О́ко, прови́дев твоего́ ра́зума доброразсу́дное,/ па́стыря тя Свои́м лю́дем поставля́ет,/ да всех научи́ши Христу́ воспева́ти:/ благослове́н Бог оте́ц на́ших.

Во всем житии́ твое́м, святи́телю, нака́затель и учи́тель всем был еси́/ и свети́льник многосве́тлый, просвеща́я во мра́це неве́дения лежа́щия, и Христу́ вопия́:/ благослове́н Бог оте́ц на́ших.

Богоро́дичен: Зача́ла еси́, Пречи́стая, над все́ми Бо́га и Го́спода,/ благоволи́вшаго спасти́ челове́ческий род от тле́ния и сме́рти,/ Ему́же по достоя́нию пою́ще, зове́м:/ благослове́н Бог оте́ц на́ших.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Боже́ственное пребыва́ние Свята́го Ду́ха, о́тче, был еси́,/ те́мже и в житии́ сем я́ко вне ми́ра быв, к та́мошним всегда́ раче́ние имы́й./ Те́мже и всех научи́л еси́ Христо́ви пе́ти:/ Го́спода воспева́йте, дела́, и превозноси́те Его́ во ве́ки.

По Бо́зе засту́пника тя превели́ка, святи́телю, духо́вная твоя́ чада стяжа́вше,/ вся́кия сопроти́вныя ве́щи тобо́ю да изба́вимся/ и в тишине́ поживе́м, Христо́ви пою́ще:/ Го́спода воспева́йте, дела́, и превозноси́те Его́ во ве́ки.

Богоро́дичен: Глаго́лом проро́ческим после́дующе, Де́во, Богоро́дицу Тя возвеща́ем:/ родила́ бо еси́ Отроча́, всех дре́внейшее, Емману́ил нарица́емо./ Ему́же ны́не зове́м:/ Го́спода по́йте, дела́, и превозноси́те Его́ во ве́ки.

Ин

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

Влады́ку за ны моли́, святи́телю, пресве́тлый храм тебе́ воздви́гшаго,/ ве́дяще, я́ко и́маши дерзнове́ние,/ тебе́ бо ко Христу́ предлага́ем хода́тая и неусы́пна моли́твенника, Пе́тре прехва́льне.

Пресла́вным твои́м явле́нием, святи́телю, вся́ко сомне́ние твой храм зда́ти хотя́щим отго́ниши/ и на де́ло возставля́еши, Творцу́ вопи́ти:/ благослови́те, вся дела́ Госпо́дня, Го́спода,/ по́йте и превозноси́те Его́ во ве́ки.

По боже́ственнем твое́м преставле́нии, святи́телю,/ ю́ношу, разсла́бленне ру́це иму́ща от рожде́ния, исцели́л еси́/ и я́ко ничто́же зла пострада́вша сотвори́л еси́, Христо́ви вопию́ща:/ благослови́те, вся дела́, Го́спода,/ по́йте и превозноси́те Его́ во ве́ки.

Богоро́дичен: Помышле́ния моя́, Чи́стая, окорми́ к Твоему́ ти́хому приста́нищу,/ Твоего́ безстра́стия и чистоты́, да Твоему́ Сы́ну воспева́ю:/ благослови́те, вся дела́ Госпо́дня, Го́спода/ и превозноси́те Его́ во ве́ки.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Све́тел честны́й пра́здник преставле́ния твоего́, архиере́ю Пе́тре,/ светле́йше же пренесе́ние твое́,/ его́же вси сла́вяще, тебе́ велича́ем.

Исто́чник благоче́стия яви́лся еси́, святи́телю, це́рковная твоя́ ча́да напоя́я;/ те́мже, соше́дшеся, благоче́стно свяще́нное твое́ пренесе́ние любо́вию почита́ем.

Слове́с твои́х, о́тче, сла́дкое веща́ние, ве́рных сердца́ к любви́ Бо́жии привлече́,/ чуде́с же све́тлостию вся челове́ки удиви́л еси́./ Те́мже тя вси благоче́стно велича́ем.

Богоро́дичен: В плоть из Тебе́, Всенепоро́чная, оде́явся,/ в ми́ре я́ко Челове́к поживе́/ и дре́вле всех му́чащаго Боже́ственною Свое́ю си́лою низложи́.

Ин

Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Прему́дрости сокро́вище быв, святи́телю,/ сердца́ ве́рных люде́й озаря́я уче́нием твои́м./ Те́мже я́ко учи́теля тя прему́дра ублажа́ем/ и свяще́нное твое́ пренесе́ние почита́ем.

Боже́ственным уче́нием твои́м, святи́телю,/ еретика́, чужда́я от Це́ркве уче́ния иму́ща, отрази́л еси́/ и не хотя́ща повину́тися сего́ ана́феме пре́дал еси́.

Певце́м тебе́, святи́телю Пе́тре, похва́льная пою́щим, свы́ше по́мощи низпосли́,/ да тебе́ всегда́ в пе́снех велича́ем.

Богоро́дичен: Ми́ро та́йно имену́ем Тя, Пречи́стая,/ я́ко ро́ждши Бо́га пло́тию,/ благоуха́ния источа́юща дарова́ние.

Свети́лен:

Архиере́ю Пе́тре, вои́стинну тезоимени́те верхо́вному,/ досто́йно зва́ние от дел прие́м,/ да́нный ти талант до́бре умно́жив,/ внутрь черто́га быв, иде́же со святы́ми живе́ши,/ помина́й твое́ пренесе́ние сла́вящих.

Богоро́дичен:

Держа́вным Твои́м покро́вом от враг наве́та нас, Чи́стая, Твоя́ рабы́, сохрани́ вся невре́дны:/ Тя бо стяжа́хом еди́ну прибе́жище в ско́рбех.

На хвали́тех стихи́ры на 4, глас 8.

Подо́бен: О, Пресла́внаго чудесе́:

О́тче святи́телю Пе́тре,/ всем благи́м о́браз дово́лен был еси́,/ к Го́рнему житию́ веду́щ,/ смире́нием и кро́тостию./ Те́мже отсю́ду Христо́с/ па́стыря тя лю́дем Свои́м устроя́ет,/ Его́же моли́ спасти́ и уще́дрити всех,/ ве́рою и любо́вию/ честно́е пренесе́ние твое́ при́сно сла́вящих.

О́тче святи́телю Пе́тре,/ ты, я́ко архиере́й свяще́н,/ пресве́тло внутрь Небе́снаго черто́га быв,/ сца́рствуеши все́ми ца́рствующему Влады́це Христу́,/ Ему́же с Вы́шними ликостоя́нии/ пресла́вно предстои́ши./ Моли́ся спасти́ и уще́дрити вся,/ ве́рно Боже́ственное твое́ и честно́е пренесе́ние/ пе́сньми сла́вящия.

О́тче Богоно́се Пе́тре,/ днесь пресла́вно в це́ркви теле́сне/ свяще́нных рука́ми све́тло но́сишися,/ и́же всегда́ ду́хом живы́й на Небесе́х,/ и, со святы́ми водворя́яся,/ не забу́ди, моля́ся,/ спасти́ и уще́дрити вся,/ пресве́тлое успе́ние твое́/ пе́сньми при́сно сла́вящия.

Сла́ва, глас 6:

Еще́ от ю́наго во́зраста/ Бо́гу освяще́н быв, святи́телю,/ и прему́дрости рачи́тель был еси́,/ сего́ ра́ди и потща́лся еси́/ тле́нными ве́чнующая стяжа́ти,/ воздержа́ния брозда́ми себе́ обложи́в,/ плоть духу повину́л еси́./ Те́мже и по честне́м твое́м преставле́нии/ с Небе́сными совокупля́ешися ликостоя́нии,/ и́хже и жити́ю во пло́ти поревнова́л еси́./ Христу́, Ему́же от ю́ности послужи́л еси́,/ моли́ся спасти́ся всем,/ честно́е пренесе́ние твое́ пе́сньми при́сно сла́вящим.

И ны́не, Богоро́дичен.

Славосло́вие вели́кое.

НА ЛИТУРГИ́И служба святи́тельская.

Моли́тва

О вели́кий святи́телю, пресла́вный чудотво́рче, Русския Це́ркве первопресто́льниче, гра́да нашея храни́телю и о всех нас усе́рдный моли́твенниче, о́тче наш Пе́тре! К тебе́ смире́нно припа́даем и мо́лимся: простри́ ру́це твои́ ко Го́споду Бо́гу и помоли́ся за ны, гре́шныя и недосто́йныя рабы́ Его́, да проба́вит нам ми́лость Свою́ и низпосле́т нам вся благопотре́бная к вре́менному жити́ю и ве́чному спасе́нию на́шему, да́ры бла́гости Его́, наипа́че же да огради́т нас ми́ром, братолю́бием и благоче́стием от всех искуше́ний врага́ диа́вола и да́рует нам бы́ти ве́рным ча́дом твои́м, не по и́мени токмо, но и всем житие́м на́шим. Моли́м тя, святи́телю Христо́в, сохрани́ предста́тельством твои́м Небе́сным град наш и лю́ди ея́. Ей, уго́дниче Бо́жий! Услы́ши нас благоутро́бно и бу́ди всем нам помо́щник и засту́пник во вся́ких беда́х и напа́стех, не забу́ди нас и в час кончи́ны на́шея, егда́ наипа́че твоего́ заступле́ния потре́буем, да при по́мощи моли́тв твои́х святы́х сподо́бимся и мы, гре́шнии, кончи́ну благу́ю получи́ти и Ца́рствие Небе́сное унасле́дити, сла́вяще ди́внаго во святы́х Свои́х Бо́га на́шего, Отца́ и Сы́на и Свята́го Ду́ха, во ве́ки веков. Ами́нь.

НА МА́ЛОЙ ВЕЧЕ́РНИ

На Го́споди, воззва́х: стихи́ры на 4, глас 2:

Преподо́бне о́тче Арсе́ние,/ любве́ ра́ди Христо́вы,/ вся, я́же в житии́ су́етная, презре́л еси́,/ облече́ся во о́браз смире́ния,/ пи́щу возненави́дел еси́,/ воздержа́ние стяжа́/ и пра́вду возлю́би́л еси́,/ те́мже, блаже́нне, помина́й нас всегда́/ в преподо́бных свои́х моли́твах ко Го́споду.

Преподо́бне о́тче Арсе́ние,/ ты святы́я Ла́вры вели́каго Сергия дости́гл еси́,/ и судом Бо́жиим ту сподо́бися па́стырем бы́ти,/ и я́ко безпло́тен во пло́ти пожи́л еси́,/ о́браз мно́гим доброде́телию яви́ся,/ и и́нех ту во оби́тели житие́м свои́м удиви́л еси́,/ моли́ся Го́сподеви, о́тче,/ спасти́ся душа́м на́шим.

Преподо́бне о́тче, всечестны́й Арсе́ние,/ ты жесто́кое житие́ по Бо́зе пожи́л еси́,/ по́мыслом благи́м стра́сти удержа́л еси́,/ и бесо́м шата́ние разори́л еси́,/ и ны́не, блаже́нне, жи́веши в Небе́сных се́лех,/ всех чту́щих святу́ю па́мять твою́ помина́й,/ Христу́ со дерзнове́нием предстоя́, пребога́те.

Сла́ва, глас 6:

Прииди́те, и́ноческое боголюбе́зное собра́ние/ и вси правове́рнии лю́дие,/ воспои́м све́тло всечестну́ю па́мять блаже́ннаго Арсе́ния/ и припаде́м с ве́рою к честне́й и цельбоно́сней и чудотво́рней ра́це его́,/ от нея́же Госпо́дня благода́ть сия́ет/ и благи́х арома́т воню́ испуща́ет,/ мы же освяща́емся,/ и, неду́гом исцеле́ние прие́млюще, ему́ возопии́м, реку́ще:/ ра́дуйся, пресве́тлый свети́льниче/ и моли́твенниче ко Спа́су, Христу́ Бо́гу на́шему,/ о и́же с ве́рою и любо́вию притека́ющих к ра́це моще́й твои́х,/ моли́ Христа́ Бо́га/ спасти́ся душа́м на́шим.

И ны́не, Богоро́дичен: Богоро́дице, Ты еси́ лоза́ и́стинная:

На стихо́вне стихи́ры, глас 2.

Подо́бен: До́ме Евфра́фов:

Наста́ па́мять/ блаже́ннаго Арсе́ния,/ по́стника, и возде́ржника,/ и и́ноком наста́вника,/ Христо́ва уго́дника.

Стих: Честна́ пред Го́сподем/ сме́рть преподо́бных его́.

Прииди́те,/ и́ноческая собра́ния/ и вси ве́рнии лю́дие,/ ублажи́м преподо́бнаго Арсе́ния/ ве́рою и любо́вию.

Стих: Блаже́н муж, боя́йся Го́спода,/ в за́поведех его́ восхо́щет зело́.

Преподо́бне о́тче Арсе́ние,/ Христо́в уго́дниче/ и Пречи́стыя Богома́тере,/ пусты́нный жи́телю,/ ты еси́ и́ноком похвала́.

Сла́ва, и ны́не, Богоро́дичен:

Влады́чице Блага́я,/ святе́и Свои́ ру́це к Сы́ну Своему́ воздежи́,/ душелюби́вому Соде́телю,/ уще́дрити рабы́ Своя́.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8, глас 8.

Подо́бен: О, пресла́внаго чудесе́:

Преподо́бне о́тче Арсе́ние,/ и́стинно все́ю душе́ю/ возложи́лся еси́ Бо́гу Вседержи́телю,/ мирски́й мяте́ж оста́вль,/ после́довал еси́ Христу́ ти́хим и безмо́лвным житие́м/ и был еси́ упра́влен в Ца́рствие Бо́жие,/ блаже́нне о́тче,/ моли́ Христа́ Бо́га/ спасти́ся душа́м на́шим.

Преподо́бне о́тче Арсе́ние,/ своему́ Влады́це Христу́ подража́тель был еси́,/ ми́ра оста́вль, бога́тство и сла́ву ни во что́же поче́л еси́,/ Крест Христо́в на ра́мо свое́ восприя́т/ и тем попра́л еси́ ко́зни бесо́вския,/ мы же тя ве́рою и любо́вию почита́ем,/ моли́ Христа́ Бо́га/ спасти́ся душа́м на́шим.

Преподо́бне о́тче Арсе́ние,/ Христо́вы ра́ди любве́/ оте́чество, род, и дру́ги, и сла́ву маловре́менную оста́вль,/ Влады́це после́довал еси́, благоподвиза́вся,/ моли́твою́, и посто́м, и слеза́ми Бо́гу угоди́л еси́,/ и сего́ ра́ди мы вопие́м ти, блаже́нне:/ моли́ Христа́ Бо́га/ спасти́ся душа́м на́шим.

Ины стихи́ры, глас 4.

Подо́бен: Зва́нный свы́ше:

Егда́ Боже́ственное ране́ние на́йде на тя, блаже́нне Арсе́ние,/ тогда́, мирска́я мудрова́ния дале́че отри́нув,/ Христа́ еди́наго возлю́би́л еси́,/ Боже́ственно вооружи́вся,/ Ла́вры вели́каго Се́ргия дости́гл еси́/ и судо́м Бо́жиим та́мо па́стырем поставля́емь быва́еши,/ мно́гим доброде́тели о́браз быв./ Те́мже моли́м тя:/ моли́, преподо́бне,/ спасти́ и просвети́ти ду́ши на́ша.

Егда́ Боже́ственное раче́ние на́йде на тя, блаже́нне Арсе́ние,/ тогда́ мирска́я возненави́дел еси́,/ и в Ла́вру Святы́я Тро́ицы отше́л еси́,/ и та́мо о Го́споде труди́лся еси́,/ и, ревни́тель быв житие́м свои́м вели́кому отцу Се́ргию,/ равноа́нгельное житие́ пожи́л еси́,/ мно́гим воздержа́нием и моли́твами/ подо́бник ему́ во всем быв./ Те́мже моли́м тя:/ моли́ся, преподо́бне,/ спасти́ и просвети́ти ду́ши на́ша.

Егда́ Боже́ственное раче́ние на́йде на тя,/ Богому́дре и всеблаже́нне Арсе́ние,/ тогда́ вся су́щая в ми́ре преоби́дел еси́,/ и Христа́ еди́наго от ду́ши возлю́би́л еси́,/ и, Того́ живоно́сным стопа́м после́дуя,/ пусты́ню дости́гл еси́,/ и, си́ю насе́яв се́мены трудо́в твои́х/ и напои́в ту́чами слез твои́х,/ умно́жил еси́ плоды́ доброде́телей,/ и, те́ми напита́в ча́да, приве́л еси́ Христу́,/ Его́же моли́ спасти́ и просвети́ти ду́ши на́ша.

Сла́ва, глас 5:

Воструби́м тру́бою пе́сней,/ взыгра́ем пра́зднственная в це́ркви Бо́жии,/ возвели́чим па́мять отца́ на́шего, Богому́драго Арсе́ния,/ пе́сньми и пе́нием просла́вим Спа́са Христа́,/ И́же такова́ уго́дника нам дарова́,/ к нему́ же воспои́м и ра́достно ему́ рцем:/ ра́дуйся, ру́сская похвало́/ и и́ноком наста́вниче, Арсе́ние вели́кий,/ прииди́ и ны́не и о нас помоли́ся,/ пра́зднующих твое́ торжество́,/ да твои́ми моли́твами да́рует Христо́с Бог наш/ всем ве́рным ве́лию и бога́тую ми́лость.

И ны́не, Богоро́дичен: В Че́рмне́м мо́ри:

Та́же вход. Проки́мен дне. И чте́ния 3 преподо́бническая (зри день 28-й).

На литии́ стихи́ры, глас 1:

Днесь, ве́риии, соше́дшеся, лико́вствуем ра́достно/ в па́мять честна́го отца́ на́шего,/ Богому́драго Арсе́ния,/ сей бо, измла́да возненави́дев суету́ ми́ра сего́,/ и сла́ву ни во что́же вмени́в,/ да Христа́ еди́наго приобря́щет,/ и Тому́ прилепи́вся вседу́шно,/ по́стническими труды́ уясни́л есть житие́ свое́,/ тем и благода́ть прия́л есть/ стра́сти лю́тыя исцеля́ти/ и бе́сы от челове́к прогоня́ти./ сего́ ра́ди вопие́м ему́, глаго́люще:/ о́тче Арсе́ние, моли́ Христа́ Бо́га/ спасти́ся душа́м на́шим.

Глас 2: Пусты́ни иногда́ бесо́вская страши́лища име́ша,/ ны́не же, Арсе́ние, учени́к твои́х мно́жеством исполня́емы, украша́ются,/ честна́я же твоя́ оби́тель весели́тся,/ в себе́ име́ющи храм прече́стен Бо́жия Ма́тере,/ разли́чными добро́тами укра́шен,/ в не́мже соше́дшеся, ученицы́ твои́,/ честны́й гроб твой обстоя́ще/ и любе́зно покланя́ющеся, мо́лимся:/ моли́твами свои́ми нам испроси́ оставле́ние грехо́в/ и душа́м на́шим ве́лию ми́лость.

Глас 5: По преставле́нии твое́м, преподо́бне о́тче Арсе́ние,/ уте́шительница быва́ет нам честна́я твоя́ ра́ка,/ всегда́ бо излива́ющимися чудесы́ вопие́т,/ возводя́щи к трудо́м и по́двигом, глаго́лющи:/ возлюби́те Го́спода,/ да обря́щете благода́ть ве́чную,/ и ничто́же па́че его́ предпочти́те,/ да, егда́ прии́дет во сла́ве,/ обря́щете поко́й со избра́нными,/ его́же да и мы улучи́м твои́ми моли́твами.

Сла́ва, глас 6:

Прииди́те днесь, и́ночестии ли́цы/ и вси правове́рнии лю́дие,/ воспои́м све́тлый и всепра́зднственный день,/ честну́ю па́мять преподо́бнаго Арсе́ния,/ та бо я́коже второ́е со́лнце возсия́,/ вся празднолю́бных собо́ры просвеща́ющи/ и мглу отгоня́ющи дре́вняго помраче́ния,/ присту́пим со стра́хом и любо́вию к честне́й и чудотво́рней ра́це его́,/ любе́зно облобыза́ем и мо́лимся/ во́инству на́шему побе́дное одолени́е на супоста́ты дарова́ти,/ и плене́нным свобожде́ние,/ и ми́ру устрое́нне,/ и Це́рквам соедине́ние,/ и душа́м на́шим ве́лию ми́лость.

И ны́не, Богоро́дичен.

На стихо́вне стихи́ры, глас 1.

Подо́бен: Прехва́льнии му́ченицы:

Прехва́льне о́тче Арсе́ние,/ стопа́м вели́каго Се́ргия после́довал еси́,/ он бо Ла́вру свою́ град сотвори́л есть/ и А́нгелом собесе́дник бы́ти сподо́бися,/ ты же Го́сподеви потруди́ся,/ и да́льную страну́ дости́же,/ и свет неизрече́нный зре́ти сподо́бися,/ о́ного жити́ю поревнова́в,/ с ни́мже Святе́й Тро́ице предстоя́,/ моли́ спасти́ся душа́м на́шим.

Стих: Честна́ пред Го́сподем/ сме́рть преподо́бных его́.

Преподо́бне о́тче Арсе́ние,/ я́ко пресве́тлое свети́ло,/ в да́льней стране́, в пусты́нях, просия́л еси́,/ и, я́ко фи́никс, в дому́ Бо́жии проро́чески процве́л еси́,/ и плод прече́стен сам себе́ Влады́це,/ жи́ву же́ртву без кро́ве, прине́сл еси́,/ те́мже тя, любо́вию соше́дшеся,/ по досто́инству при́сно ублажа́ем.

Стих: Блаже́н муж, боя́йся Го́спода,/ в за́поведех его́ восхо́щет зело́.

Пусты́ня, в не́йже лежи́т свяще́нное те́ло твое́,/ преподо́бне о́тче Арсе́ние,/ Ду́ха Пресвята́го си́лою/ неду́ги разли́чныя исцеля́ет с ве́рою приходя́щим,/ бе́си отгони́ми быва́ют,/ и разсла́бленнии здра́вие прие́млюще отхо́дят,/ мы же, похваля́юще Го́спода, глаго́лем:/ честна́ пред Го́сподем/ сме́рть преподо́бных его́.

Сла́ва, глас 8:

Мона́хов мно́жества,/ наста́вника тя почита́ем, о́тче наш Арсе́ние,/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных,/ с ни́миже моли́ся Го́сподеви/ поми́ловатися душа́м на́шим.

И ныне, Богоро́дичен: Безневе́стная Де́во:

Тропа́рь, глас 4:

Удали́вся ми́ра, и водвори́вся в пусты́ню,/ и ту подвиза́вся до́брым по́двигом,/ посто́м, и моли́твами, и мно́гим терпе́нием,/ и жив показа́л еси́ мно́гая чудеса́,/ и по преставле́нии свое́м источа́еши разли́чная исцеле́ния/ с ве́рою приходя́щим к честно́му гро́бу твоему́,/ Арсе́ние, о́тче наш,/ моли́ Христа́ Бо́га/ спасти́ся душа́м на́шим.

НА У́ТРЕНИ

На Бог Госпо́дь: тропа́рь преподо́бнаго, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 4.

Подо́бен: Ско́ро предвари́:

Зва́нию Го́спода твоего́ после́довал еси́,/ мир отве́рг и вся, я́же в ми́ре кра́сная, всеблаже́нне Арсе́ние,/ претерпе́л еси́ пусты́нное озлобле́ние усе́рдно,/ полки́ же отрази́л еси́ де́монов му́жественне./ Те́мже твою́ па́мять при́сно пе́сньми восхваля́ем ве́рно.

Сла́ва, и ны́не, Богоро́дичен:

Обнови́ла еси́, Чи́стая, Боже́ственным Рождество́м Твои́м/ истле́вшее страстьми́ земноро́дных ме́ртвенное существо́/ и воздви́гла еси́ вся от сме́рти к жи́зни нетле́ния./ Те́мже Тя по до́лгу блажи́м вси, Де́во Препросла́вленная,/ я́коже прорекла́ еси́.

По 2-м стихосло́вии седа́лен, глас 5.

Подо́бен: Собезнача́льное Сло́во:

По́стника Госпо́дня пе́сньми почти́м,/ я́ко умертви́вша вся прило́ги страсте́й воздержа́нием и тве́рдым терпе́нием вои́стинну,/ и посрами́вша зело́ противобо́рца врага́ и всю его́ горды́ню,/ и ны́не моля́щася Го́сподеви поми́ловатися душа́м на́шим.

Сла́ва, и ны́не, Богоро́дичен:

Ужа́сно чу́до зача́тия и несказа́нен о́браз рождества́ в Тебе́ позна́ся, Присноде́во Чи́стая,/ ужаса́ет мой ум и удивля́ет помышлени́е./ Сла́ва Твоя́, Богоро́дице, во всех простре́ся ко спасе́нию душ на́ших.

По полиеле́и седа́лен, глас 1.

Подо́бен: Гроб Твой, Спа́се:

Погре́бл еси́ страсте́й все воста́ние умерщвле́нием пло́ти, свяще́нный о́тче,/ жи́знь безконе́чную по сме́рти прия́л еси́./ Те́мже днесь Христо́ва Це́рковь пра́зднует твою́ досточу́дную па́мять, преподо́бных украше́ние.

Сла́ва, и ны́не, Богоро́дичен:

Наста́ви ны на путь покая́ния,/ уклоня́ющийся при́сно к злым безпу́тием/ и Преблага́го прогне́вающия Го́спода, Неискусобра́чная Благослове́нная Мари́е,/ прибе́жище отча́янных челове́ков, Бо́жие обита́лище.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных его́. Стих: Что воздам Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бне о́тче Арсе́ние,/ во всю зе́млю изы́де веща́ние исправле́ний твои́х,/ те́мже на Небесе́х обре́л еси́ мзду трудо́в твои́х,/ де́монская разори́л еси́ по́лчища/ и а́нгельския дости́гл еси́ чи́ны,/ и́хже жити́ю непоро́чно поревнова́л еси́./ Дерзнове́ние име́я ко Христу́ Бо́гу,/ мир испроси́ душа́м на́шим.

Кано́н Богоро́дице, со ирмосо́м на 6 и преподо́бному на 8, глас 2.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наставльшему лю́ди,/ я́же изведе́ из рабо́ты еги́петския,/ я́ко просла́вися.

Го́споди Иису́се Христе́, отве́рзи ми устне́ недосто́йнеи/ и даждь ми орга́н све́тлогласен/ досто́йно воспе́ти све́тлую па́мять уго́дника Твоего́, Арсе́ния преподо́бна.

Госпо́дня словеса́ услы́шав,/ тогда́ су́щая вся оста́вль, и во ум свой прия́т сло́во Бо́жие,/ и бысть сосу́д избра́н Свята́го Ду́ха,/ того́ ра́ди обре́л еси́ спасе́ние души́ свое́й.

Госпо́дню зако́ну повину́яся, о́тче,/ усе́рдно к мы́сленным влече́ся дея́нием,/ побежда́я бесо́вская ополче́ния и де́йства всегда́шним Боже́ственным посо́бием.

Богоро́дичен: Госпо́дню Ма́терь воспева́ем Тя, Пречи́стая Богоро́дице Де́во./ От враг наве́та нас, Чи́стая, Своя́ рабы́, сохрани́ вся невре́дно,/ ве́рно сла́вящия Тя.

Песнь 3

Ирмо́с: Процвела́ есть пусты́ня, я́ко крин, Го́споди,/ язы́ческая неплодя́щая Це́рковь/ прише́ствием Твои́м,/ в не́йже утверди́ся мое́ се́рдце.

Процве́л еси́, преподо́бне Арсе́ние, о́тче наш,/ в по́стнических труде́х и во бде́ниих, я́ко фи́никс Дави́дский,/ ду́шу свою́ с те́лом очи́стив,/ и до конца́ подвиза́ся благи́м житие́м свои́м, всеблаже́нне.

Процве́л еси́, Арсе́ние преподо́бне, восприя́тием Свята́го Ду́ха,/ и, роди́телей любве́ возгнуша́вся, сла́дкую пи́щу от себе́ отри́нул еси́,/ и еди́ну за́поведь Христо́ву возлюби́л еси́, блаже́нне и Богому́дре.

Процве́л еси́ житие́м свои́м светосия́нно,/ и яви́ся пресве́тло пребыва́ние твое́,/ Святы́м Ду́хом бесо́вское кова́рство до конца́ посрами́л еси́,/ преблаже́нне Арсе́ние и пусты́нником украше́ние.

Богоро́дичен: Пе́сньми Боже́ственными почти́м Тя, ро́ждшую Бо́га,/ вопло́щшагося из Тебе́ и па́че со́лнечных луч возсия́вшаго,/ жи́ти бо с челове́ки благоизво́лил есть.

Седа́лен, глас 8:

Простри́ дла́ни свои́ ко Всеми́лостивому Спа́су Христу́, преподо́бне о́тче Арсе́ние,/ Ему́же, от ю́ности до́бре потруди́вся, и угоди́,/ и тре́бующим твое́й по́мощи пода́й неоску́дное утеше́ние,/ и устне́ свои́ простри́ на моли́тву, и́миже Бо́га хвали́,/ и нас, чад свои́х, на благора́зумие наста́ви, и ускори́ на по́мощь на́шу,/ и изба́ви нас от находя́щих бед и зол и вся́кия ну́жды,/ и моли́ Христа́ Бо́га дарова́ти чту́щим пресла́вную святу́ю па́мять твою́/ спасти́ся душа́м на́шим.

Сла́ва, и ны́не, Богоро́дичен:

Яко Всенепоро́чная Неве́ста Творца́,/ я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Всепе́тая,/ беззако́нию мя су́ща скве́рно жили́ще и де́монов игра́лище в ра́зуме бы́вша,/ потщи́ся от сих злоде́йствия мя изба́вити,/ све́тло жили́ще доброде́тельми соде́лавши,/ Светода́тельная и Нетле́нная, разжени́ о́блак страсте́й и Вы́шняго прича́стия сподо́би/ и све́та невече́рняго моли́твами Твои́ми.

Песнь 4

Ирмо́с: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: Сла́ва си́ле Твое́й, Го́споди.

Преподо́бне о́тче Арсе́ние,/ ше́ствия твоя́ напра́вишася ко спасе́ния пути́/ наставлени́ем Боже́ственнаго Ду́ха, И́же в тя все́льшагося, блаже́нне.

Преподо́бне о́тче Арсе́ние,/ ты храм Пресвяты́я Богоро́дицы воздви́гл еси́,/ и уго́дно Ей послужи́л еси́,/ и огра́ду и́ночествующим во спасе́ние созда́.

Преподо́бне о́тче Арсе́ние,/ ты бысть и́ноком наста́вник,/ име́л бо еси́ ра́зум, му́дростию устро́ен,/ и кра́сно чистото́ю сия́я, благи́м смире́нием.

Богоро́дичен: Прииди́те, вси воспои́м Богоро́дицу Чи́стую/ и, ве́рно моля́щеся, возопии́м Ей:/ не преда́ждь нас враго́м во изможде́ние/ и моли́твами Свои́ми спаси́ нас.

Песнь 5

Ирмо́с: Xодатай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику, Отцу́ Твоему́,/ от но́щи неве́дения/приведе́ние и́мамы.

Xода́тай ты к Бо́гу, преподо́бне, быв,/ Живоно́сный Крест на ра́мо свое́ взем,/ после́довал еси́ ему́ ти́хим и безмо́лвным житие́м,/ того́ ра́ди всели́ся душа́ твоя́ в се́ла Небе́сная.

Xода́тай ты, блаже́нне Арсе́ние, до конца́ быв,/ возлюби́л еси́ еди́наго Бо́га,/ разже́гся заре́ю мы́сленною,/ ревну́я житие́м свои́м в чудесе́х свои́х вели́кому Се́ргию преподо́бному.

Хоте́вше тя окая́ннии бе́сове от сего́ свята́го ме́ста отлучи́ти,/ иногда́ же на тя люде́й вооружи́вша,/ ты же, блаже́нне, оты́де в да́льную пусты́ню,/ Бог же тебе́ возврати́ в пребыва́ние твое́.

Богоро́дичен: Христиа́ном Засту́пницу, ве́рнии, ублажа́ем:/ укрепи́ нас, Влады́чице, недосто́йных раб Свои́х,/ и град наш соблюди́ и жи́тельство сие́/ моли́твами уго́дника Твоего́ Арсе́ния преподо́бнаго.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

В пусты́ни, я́ко во огра́де, поживе́, блаже́нне,/ моли́твы непреста́нныя, я́ко меч в руце́, име́л еси́/ и всю бесо́вскую я́рость до конца́ сокруши́л еси́.

Влады́це своему́ подо́бяся,/ воздержа́ние и терпе́ние стяжа́, ве́ру и любо́вь и́стинну/ и всено́щное стоя́ние возлю́би,/ моли́твы, и сле́зы, и воздыха́ние в се́рдцы име́я, блаже́нне.

В па́мять твою́ ра́достно веселя́тся и лику́ют и́ноческая собра́ния, вопию́ще тебе́:/ помина́й нас всегда́,/ почита́ющих тя, преблаже́нне Арсе́ние.

Богоро́дичен: В бе́здне грехо́вней одержи́м есмь аз, окая́нный,/ и припа́даю к Тебе́, Влады́чице:/ приими́ моли́твы на́ша,/ и сохрани́ нас от вся́каго наве́та вра́жия, и спаси́ нас.

Кондак, глас 8.

Подо́бен: Взбра́нной Воево́де:

Жите́йския молвы́ отбе́г,/ и в пусты́ню всели́лся еси́,/ и та́мо житие́м жесто́ким пожи́л еси́,/ и зве́ря свире́паго а́ркуда⁴¹ моли́твами укроти́л еси́,/ и мно́гим был еси́ наста́вник ко спасе́нию,/ и того́ ра́ди получи́л еси́ жи́знь ве́чную на Небесе́х./ Всегда́ зря Святу́ю Тро́ицу,/ моли́ изба́витися нам от бед, да зове́м ти:/ ра́дуйся, о́тче наш Арсе́ние, пусты́нный жи́телю.

И́кос:

Ева́нгельский глас услы́шав,/ мир оста́вль, возлю́би́л еси́ Христо́вы Боже́ственныя за́поведи/ и, сла́дкия пи́щи оша́явся⁴² , му́дре,/ поще́ние и воздержа́ние изве́стно показа́,/ пусты́нное житие́ возлюби́л еси́,/ мы же вопие́м ти:/ ра́дуйся, ра́зума дарова́ние прия́л еси́;/ ра́дуйся, Арсе́ние преподо́бне, Небе́сный челове́че и земны́й а́нгеле;/ ра́дуйся, притека́ющим к тебе́ хода́тай быв ко спасе́нию;/ ра́дуйся, стране́ на́шей похвало́ и утвержде́ние;/ ра́дуйся, я́ко твои́х ра́ди моли́тв бе́сове сопроти́внии побежда́ются;/ ра́дуйся, я́ко с ве́рою прося́щим да́руеши дар, от Го́спода дарова́нный ти, исцеле́ния;/ ра́дуйся, Арсе́ние преподо́бне, пусты́нный жи́телю.

Песнь 7

Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ есть,/ Христо́с же простре́ Богочести́вым о́троком ро́су духо́вную,/ Сый благослове́н и препросла́влен.

Блаже́нне Арсе́ние,/ ты ми́лованием безме́рным укра́шаемь,/ и нищелю́бием мно́гим удобря́емь,/ и тих ду́хом был еси́, о́тче, поя́ Христо́ви:/ благосло́вен Бог оте́ц на́ших.

Блаже́нне Арсе́ние,/ ты, всем жела́нием ко Христу́ иды́й,/ доса́ды, и безче́стия, и я́звы, преподо́бне, терпе́л еси́,/ Христу́ Бо́гу песнь непреста́нную поя́:/ благослове́н Бог оте́ц на́ших.

Блаже́нне Арсе́ние,/ безмо́лвно свою́ сконча́л еси́ отече́скую жи́знь,/ не стяжа́в, просвеща́лся и воздержа́нием украша́яся, поя́ Христо́ви:/ благослове́н Бог оте́ц на́ших.

Богоро́дичен: Без се́мене, Всенепоро́чная, родила́ еси́ Христа́ Бо́га на́шего,/ освяще́ние, и избавле́ние, и оставле́ние грехо́в ве́рным хода́тайством Твои́м подаю́щаго,/ мольба́ми Пречи́стыя Своея́ Ма́тере, я́ко еди́н Многоми́лостив.

Песнь 8

Ирмо́с: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

Преблаже́нне о́тче Арсе́ние,/ тече́нием твои́х усте́н медото́чных слове́с, я́коже Боже́ственным исцеле́нием,/ напая́еши хваля́щия тя, поя́ Бо́гови:/ благослови́те, вся дела́ Госпо́дня, Го́спода.

Преблаже́нне о́тче Арсе́ние,/ я́ко со́лнце многосве́тло от восто́ка, возсия́л еси́ заря́ми доброде́телей/ и чуде́с твои́х сия́ние бога́тно просте́рл еси́, поя́ Бо́гови:/ благослови́те, вся дела́ Госпо́дня, Го́спода.

Преблаже́нне о́тче Арсе́ние,/ ты зве́ря свире́паго моли́твами укроти́л еси́,/ он же смире́н быва́ше, ничто́же ти ско́рбная показу́я,/ но и повеле́нию твоему́ повину́яся./ Те́мже вопие́м:/ благослови́те, вся дела́ Госпо́дня, Го́спода.

Богоро́дичен: Просвеще́ние нам, рабо́м Свои́м, испроси́, Препе́тая Богоро́дице Де́во,/ мольбы́ всех прие́млющи,/ тем вси а́нгельски зове́м Ти, Богора́дованная, всех Влады́чице.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Боже́ственными блиста́яся сия́нии, свети́льник был еси́,/ наставля́я с ве́рою к тебе́ приходя́щих, блаже́нне и Богому́дре Арсе́ние,/ плотски́я стра́сти Влады́чнею си́лою умертви́л еси́.

Богому́дре свяще́нниче, к све́ту незаходи́мому преше́л еси́,/ светови́ден быв доброде́тельми,/ всели́лся еси́, ра́дуяся, иде́же преподо́бных ду́си,/ и о ста́де свое́м моли́ся.

Благода́тию Боже́ственнаго Ду́ха напая́ема,/ приноша́ет честна́я ра́ка твоя́ исцеле́ние./ Прииди́те и почерпи́те, вси ве́рнии лю́дие, и освяти́те ду́ши,/ и от неду́г очи́ститеся моли́твами преподо́бнаго.

Богоро́дичен: Богоро́дице Де́во, упова́ние нам, гре́шным,/ Ты бо породи́ красне́йша па́че всех сыно́в челове́ческих и и́стиннаго Бо́га,/ се уже ви́дима на́шим существо́м, я́ко Челове́к, спаса́я челове́ки.

Свети́лен:

А́нгельское житие́ пожи́в,/ удали́л еси́ себе́ всех кра́сных жития́,/ водвори́ся во дво́рех за́поведей Госпо́дних/ и со А́нгелы всегда́ ра́дуешися.

Сла́ва, и ны́не, Богоро́дичен:

Богоро́дицу пе́сньми почти́м немо́лчными,/ благоче́стно пое́м, вопию́ще:/ ра́дуйся, А́нгелом ра́досте и преподо́бным похвало́.

На хвали́тех стихи́ры на 4, глас 2:

Преподо́бне о́тче Арсе́ние,/ основа́ние име́я доброде́телей,/ дре́вняго челове́ка совле́кся с похотьми́,/ и во Христа́ облече́ся вои́стинну./ Тем обличи́л еси́, блаже́нне,/ мно́гая кова́рствия вра́жия,/ наста́вник и́ноком быв,/ моли́ спасти́ся душа́м на́шим.

Преподо́бне о́тче Арсе́ние,/ любве́ ра́ди Христо́вы,/ вся, я́же на земли́ кра́сная, преоби́дел еси́/ и в пусты́ню всели́ся,/ по́стническими труды́ уясни́л еси́ житие́ свое́,/ тем и Христо́с чуде́с да́ры обогати́ тя,/ моли́ спасти́ся душа́м на́шим.

Преподо́бне о́тче Арсе́ние,/ вси почита́ют све́тло па́мять твою́,/ сподо́би твои́ми моли́твами/ лю́тых напа́стей и страстны́х бурь всех избы́ти ны́не,/ и грехо́м проще́ние получи́ти,/ и доити́ ми́лости и ра́дости неизрече́нныя,/ моли́ спасти́ся душа́м на́шим.

Сла́ва, глас 6:

Днесь вели́кий град Во́логда/ пресла́вно ра́дуется,/ име́я в преде́лех свои́х Богора́дованное сокро́вище,/ преподо́бнаго Арсе́ния блаже́ннаго,/ оби́тель твоя́, иму́щи мо́щи твоя́ в себе́, зело́ весели́тся,/ и Ла́вра Се́ргиева лику́ет,/ прославля́ющи па́стыря своего́,/ мы же, ча́да твоя́, воспева́ем пресла́вную святу́ю па́мять твою́./ О всеблаже́нне, вели́кий о́тче,/ пусты́нный жи́телю и засту́пниче наш и моле́бниче,/ ускори́ на моли́тву, и потщи́ся на по́мощь,/ и моли́ Христа́ Бо́га изба́вити нас от всех бед/ и спасти́ся душа́м на́шим.

И ны́не, Богоро́дичен, глас 6:

Богоро́дице, Ты еси́ лоза́ и́стинная,/ возрасти́вшая нам Плод Живота́,/ Тебе́ мо́лимся:/ моли́ся, Влады́чице, со святы́ми апо́столы/ поми́ловати ду́ши на́ша.

Славосло́вие вели́кое. Ектении́. И отпу́ст.

НА ЛИТУРГИ́И

Блаже́нны от кано́на, песни 3-я и 6-я.

Проки́мен, глас 7: Честна́ пред Го́сподем/ сме́рть преподо́бных его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех его́ восхо́щет зело́. Стих: Си́льно на земли́ бу́дет семя его́. 

Ева́нгелие от Матфе́я, зача́ло 10. Прича́стен: В па́мять ве́чную:

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 5:

Свет возсия́ Небе́сный в хра́мине твое́й,/ преподо́бне о́тче Се́ргие,/ и послы́шася глас неве́домый:/ се Пречи́стая гряде́т!/ И по ма́ле зри́ши Влады́чицу ми́ра/ со двема́ апо́столома,/ и, припа́д к нога́м Ея́,/ моля́ся о заступле́нии ме́ста сего́/ и о всех во Христе́ ча́дех твои́х,/ сего́ ра́ди и мы, ча́да твоя́, мо́лимся,/ моли́ся не преста́й/ получи́ти нам у Христа́ ве́лию ми́лость.

Петр, верхо́вный апо́стол,/ и де́вства храни́тель, Иоа́нн Богосло́в,/ учени́к Христо́в, друг и напе́рсник,/ после́доваху Пречи́сте́й Деве Мари́и,/ посеща́юще отца́ на́шего Се́ргия,/ вку́пе же и смире́ннаго Михе́я,/ сподобля́юще ра́дости Небе́сныя,/ и ме́сто сие́ све́та исполня́юще,/ благи́ми обетова́нии утеша́юще,/ и моли́тву прие́млюще о спасе́нии душ на́ших.

Пе́ние хвале́бное ака́фистово/ уго́дно есть Влады́чице ми́ра,/ вы бо, отцы́ блаже́ннии,/ соверша́юще сие́ бо́дренно,/ посеще́ния от Нея́ сподо́бистеся,/ ди́внаго зре́ния, бесе́ды и чу́днаго виде́ния/ и предвкуше́ния Ца́рствия Небе́снаго,/ его́же получи́ти Христа́ умоли́те/ и нам, ублажа́ющим по́двиги ва́ша.

Глас 8: Егда́ в но́щи соверша́л еси́ бде́ние,/ преподо́бне о́тче Се́ргие,/ пред о́бразом Чи́стыя Богома́тере,/ взира́я часто, к Ней глаго́лал еси́:/ о Пречи́стая Ма́ти Христа́ моего́!/ Кре́пкая По́мощнице ро́ду челове́ческому,/ бу́ди нам, недосто́йным, Хода́таице,/ при́сно моля́щися к Сы́ну Твоему́ и Бо́гу на́шему,/ да при́зрит на ме́сто сие́ ми́лостивно,/ Еди́ному в Тро́ице Бо́гу возлага́емое,/ и спасе́т ду́ши зде иму́щих жи́тельствовати/ Ца́рствия ра́ди Небе́снаго.

О, пресла́внаго чудесе́!/ О, неизрече́ннаго снизхожде́ния!/ Рука́ми бо Пречи́стая косну́ся Се́ргия, веща́ющи:/ не ужаса́йся, избра́нниче Мой,/ приидо́х бо посети́ти тебе́,/ моли́тва бо твоя́ о ученице́х услы́шана есть,/ и да не скорби́ши про́чее,/ неотсту́пна бу́ду при́сно ме́ста сего́/ и по твое́м е́же ко Го́споду отхожде́нии,/ потре́бная изоби́льно подава́ющи,/ сохраня́ющи оби́тель твою́ и покрыва́ющи./ И си́ми благи́ми обетова́нии уте́шивши, неви́дима бысть.

О́тче преподо́бне Михе́е,/ ужасе́ся дух твой в ди́вном посеще́нии,/ и по отше́ствии в Го́рняя Цари́цы со апо́столы/ ко учи́телю твоему́ взыва́л еси́:/ извести́ ми, о́тче, Го́спода ра́ди,/ что сие́ бысть чу́дное виде́ние?/ Поне́же дух мой вма́ле не разлучи́ся от мене́,/ блиста́ния ра́ди, его́же не мого́х зре́ти,/ покры́х оде́ждою лице́ мое́./ Он же отвеща́ тебе́:/ ма́ло потерпи́, ча́до мое́,/ и́бо и во мне дух мой трепе́щет,/ призови́ ско́ро Исаа́ка и Си́мона,/ с ни́ми же просла́вим Ма́терь всех Бо́га,/ подаю́щую нам ве́лию ми́лость.

Сла́ва, глас 5:

В пост Рождества́ Христо́ва,/ но́щи субботней преполовля́ющейся,/ ти́хия стопы́ Цари́цы Небе́сныя услы́шал еси́,/ преподо́бне о́тче Се́ргие, вели́кия ра́дости испо́лнился еси́,/ и потща́ся изы́ти в сре́тение Ея́,/ и послы́шася глас неве́домый:/ се Пречи́стая гряде́т!/ И по ма́ле зри́ши Влады́чицу ми́ра со двема́ апо́столома,/ и, припа́д к нога́м Ея́, моля́ся о заступле́нии ме́ста сего́,/ и рука́ми Пречи́стая косну́ся Се́ргия, веща́ющи:/ не ужаса́йся, избра́нниче Мой,/ приидо́х бо посети́ти тебе́,/ моли́тва бо твоя́ о ученице́х услы́шана есть,/ и да не скорби́ши про́чее,/ неотсту́пна бу́ду при́сно ме́ста сего́.

И ны́не, глас 6:

Пречи́стая Ма́ти Христа́ моего́,/ Хода́таице и Засту́пнице,/ и Кре́пкая Помо́щнице ро́ду челове́ческому,/ бу́ди и нам Хода́таица и Моли́твенница/ к Сы́ну Своему́ и Бо́гу на́шему,/ я́ко да при́зрит на свято́е ме́сто сие́,/ е́же и возложе́нно есть/ в похвалу́ и честь/ Трисвята́го Его́ И́мене́./ Тебе́ же, Ма́ти сла́дкаго моего́ Христа́,/ Хода́таицу предлага́ем, раби́ Твои́./ Ты бо еси́ всем спаси́тельное упокое́ние и очисти́лище/ и благоути́шное приста́нище обурева́емым во гресе́х.

На стихо́вне стихи́ры, глас 2:

Прииди́те, лю́дие, ублажи́м Ма́терь Бо́жию,/ посети́вшую ме́сто свято́е сие́/ и обеща́вшуюся неотсту́пна бы́ти от оби́тели сея́/ до сконча́ния ве́ка.

Стих: Воскресни́, Го́споди, в поко́й Твой,/ Ты и киво́т святы́ни Твоея́.

Богоро́дице, всех Цари́це,/ умоли́ над все́ми ца́рствующаго Сы́на Твоего́, Христа́ Бо́га на́шего,/ да изба́вит оби́тель си́ю от бед и напа́стей,/ я́коже предрекла́ еси́.

Стих: Кля́тся Госпо́дь Дави́ду и́стиною/ и не отве́ржется ея́.

Удивля́ются всяк язы́к и страна́,/ зря́ще, Влады́чице, сбытие́ сло́вес Твои́х,/ и́бо да́же и до днесь неоску́дна пребыва́ет вели́кая Ла́вра,/ оби́тель Се́ргиева.

Сла́ва, глас то́йже:

А́нгелов Цари́цу/ и мона́шескаго чи́на а́нгельскаго Влады́чицу,/ прииди́те вси, восхва́лим и поклони́мся Ей,/ Та бо нело́жно обеща́ся бы́ти неотсту́пна ме́ста сего́/ до сконча́ния ве́ка.

И ны́не, глас то́йже:

О сла́дкаго Твоего́ гла́са,/ Ма́ти Христа́ моего́,/ о чу́дныя любве́ и Твоего́ посеще́ния, Влады́чице,/ о неизрече́ннаго Твоего́ обеща́ния,/ е́же с на́ми пребыва́ния,/ о сла́дкаго Твоего́ гла́са,/ Ма́ти Христа́ моего́.

Тропа́рь, глас 4: К Богоро́дице приле́жно: или́ сей, глас то́йже:

В пресла́внем явлени́и Твое́м, Де́во Богоро́дице,/ припаде́ к стопа́м Твои́м преподо́бный а́вва Се́ргий/ и мольбу́ о святе́й оби́тели изря́дно сотвори́,/ да Твои́м Ма́терним ко Христу́ предста́тельством/ усе́рдно при́сно хода́тайствуешь о всех под свяще́нный покро́в Твой прибега́ющих,/ прося́щи нам оставле́ния грехо́в и ве́лия ми́лости.

НА У́ТРЕНИ

По 1-м сти́хословии седа́лен, глас 4:

Богоро́дице Де́во, Держа́вная По́мощнице,/ ны́не оби́тель Се́ргиева о Тебе́ хва́лится и весели́тся,/ име́ющи Тя Засту́пницу непосты́дную и сте́ну неруши́мую,/ непоколеби́мое основа́ние, стра́жа неусы́пна,/ не преста́й Твои́ми, Госпоже́, моли́твами/ и всегда́ избавля́ти Твою́ оби́тель и вся лю́ди от всех напа́стей.

По 2-м сти́хословии седа́лен, глас 4:

Днесь, благове́рнии лю́дие, све́тло пра́зднуем, осеня́еми Богома́тере прише́ствием,/ с ве́рою прие́млюще в Ней стра́жа нам неотсту́пна,/ и возопи́и́м Богоро́дице:/ покры́й нас от вся́каго зла и спаси́ ду́ши на́ша.

Величание:

Величаем Тя,/ Пресвята́я Дево,/ Богоизбра́нная Отрокови́це,/ и чтим явлени́е Твое́,/ и́мже то́чиши обетова́ние/ покрыва́ти при́сно ме́сто сие́.

Псало́м избра́нный: Помяни́, Го́споди, Дави́да и всю кро́тость его́.

По полиеле́и седа́лен, глас 6:

Притеце́м к ти́хому приста́нищу и Засту́пнице ро́да на́шего, Де́ве Мари́и,/ поклони́мся честно́му Ея́ образу́, уми́льно зову́ще:/ при́зри, Благосе́рдая Ма́ти, на лю́тыя ско́рби, нас обдержа́щия,/ и исцели́ боле́зни душ на́ших.

Степенна, 1-й антифо́н 4-го гла́са. Проки́мен, глас 4: Помяну и́мя Твое́/ во вся́ком ро́де и ро́де. Стих: Отры́гну се́рдце мое́ сло́во благо, глаго́лю аз дела́ моя́ Царе́ви. Вся́кое дыха́ние: Ева́нгелие от Луки́, зача́ло 4.

По 50-м псалме́ стихи́ра, глас 6:

Се Пречи́стая гряде́т!/ Услы́шав, преподо́бный Се́ргий/ тече́т во сре́тение,/ и свет ве́лий осени́ его́,/ па́че со́лнца сия́я,/ и зрит Пресвяту́ю Де́ву со двема́ апо́столома,/ све́тлостию Ея́ облиста́ющимася,/ и паде́, моля́ся о заступле́нии оби́тели сея́/ и всех живущих в ней.

Или́ и́на стихи́ра, глас то́йже: Не и́мамы ины́я по́мощи:

Кано́н, глас 4. Песнь 1

Ирмо́с: Отве́рзу уста́ моя́,/ и наполнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Ю́ноши и ста́рцы и всяк во́зраст,/ прииди́те ны́не, восхва́лим Преблагослове́нную в жена́х Ма́терь Де́ву Отрокови́цу,/ я́вльшуюся со апо́столы преподо́бным отце́м Се́ргию и Михе́ю.

Очи́стим чу́вствия, и у́зрим в непристу́пном све́те Ма́терь Све́та,/ и ра́дуемся, реку́ще:/ ра́дуйся, Ма́ти Госпо́дня.

Небеса́ у́бо досто́йно да веселя́тся,/ земля́ же да ра́дуется,/ да пра́зднует же оби́тель сия, почита́ющая заступле́ние Богома́тере.

Лю́бящая ме́сто сие́, Ма́ти Бо́жия Препросла́вленная,/ угаси́ пещь страсте́й на́ших милосе́рдием Твои́м,/ да воспева́ем Тя со избра́нники Твои́ми.

Песнь 3

Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Ны́не вся испо́лнишася ра́дости неизрече́нныя,/ ви́димая же и неви́димая,/ ны́не пра́зднует све́тло ста́до Твое́, Влады́чице,/ Тобо́ю обеща́нное заступле́ние.

Виждь, Чи́стая, и́ноков собо́ры па́ствы Твоея́,/ окружа́ющих всечестны́й о́браз Твой,/ грехо́в разреше́ния прося́щих, и жития́ исправле́ния,/ и прича́стия Боже́ственныя сла́вы Твоея́, Всенепоро́чиая.

Тече́т благода́ть незави́стная/ от Твоего́, Богоро́дице, о́браза,/ всем источа́ющи, моля́щимся те́пло,/ зол избавле́ние, и здра́вие, и ми́лость.

Все́ю душе́ю и мы́сли пра́востию/ в па́стве Твое́й вси лику́юще,/ псалмы́, и пе́сньми духо́вными, и пе́нием Боже́ственным,/ обстоя́т о́браз Твой, Пречи́стая,/ Ты же, неотсту́пна су́щи,/ пода́ждь по́мощь, Богоневе́сто.

Ин кондак, глас 6:

Освяти́ся Твои́м посеще́нием,/ Де́во Пречи́стая,/ оби́тель Пресвяты́я Тро́ицы,/ и возра́довася возлю́бленный избра́нник Твой,/ Се́ргий Богоно́сный,/ благосло́венному обетова́нию/ Твоего́ неотсту́пнаго заступле́ния.

Ин и́кос:

Егда́ моли́ся в нощи́ Се́ргий преподо́бный,/ озари́ся ке́ллия све́том неизрече́нныя сла́вы Небе́сныя/ в явлени́и Твое́м, Пресвята́я Богоро́дице, со двема́ апо́столома, Петро́м и Иоа́нном,/ и испо́лнися се́рдце его́ несказа́ннаго блаже́нства,/ и нападе́ страх на всечестна́го ученика́ его́ Михе́я, самови́дца пречу́днаго посеще́ния Небе́снаго./ Глас же Твой, Пречи́стая Де́во, возвести́ избра́ннику Твоему́ обетова́ние,/ я́ко не оста́виши честны́я оби́тели сея́ любо́вию,/ заступле́нием и хода́тайством пред Престо́лом Святы́я Тро́ицы./ Мы же, ра́дующеся, зове́м Ти:/ моли́ся непреста́нно на Небеси́, Влады́чице Богоро́дице, сохраня́ющи нас под кро́вом Твои́м.

Седа́лен, глас 4:

Пресве́тлое Твое́ явле́ние ра́дость прино́сит всем ве́рующим,/ оби́тели же Се́ргиевой подае́т благода́ть неоску́дную,/ те́мже пое́м Ти, Пречи́стая:/ покрыва́й нас при́сно покро́вом Твои́м.

Песнь 4

Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ Сла́ва, Христе́, си́ле Твое́й.

Моли́твеннице Те́плая, Засту́пнице ро́да христиа́нскаго,/ приими́ мольбы от нас, приле́жно призыва́ющих и моля́щихся Тебе́:/ покры́й оби́тель си́ю покро́вом Твоея́ бла́гости.

Не ужаса́йся, избра́нниче Мой, – глаго́лет Богома́ти,–/ приидо́х посети́ти тебе́,/ услы́шана бысть моли́тва твоя́ о ученице́х твои́х/ и о всех, о ни́хже моли́шися,/ и о оби́тели твое́й про́чее да не скорби́ши, –/ веща́ла еси́, Влады́чице.

Богооте́ц у́бо Дави́д пред се́нным ковче́гом скака́ше, игра́я,/ Твои́м же заступле́нием весели́тся блаже́нное ста́до Твое́,/ сбытие́ сло́вес Твои́х зря́ще, Богоневе́сто.

Реку́ Тя сла́дкую и пото́к насыще́ния,/ ма́нну Небе́сную, мед от ка́мене,/ изоби́лие и благода́ть приснотеку́щую стяжа́вше, Отрокови́це, во оби́тели обита́ющии/ благода́рно пою́т о Твое́м заступле́нии.

Песнь 5

Ирмо́с: У́жасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Безме́рное Твое́ предста́тельство,/ еже показу́еши при́сно, Всепречи́стая, ста́ду Твоему́,/ зря́ще, вопие́м Ти ны́не весе́лою душе́ю:/ ра́дуйся, Мари́е Богоневе́сто.

Присту́пим, свещено́снии, ко о́бразу Де́вы днесь, мно́жество мона́шествующих,/ и спра́зднуем любопра́зднственными чи́нми/ посеще́ние Богома́тере.

Неотсту́пна у́бо бу́ду от оби́тели твое́й, –/ веща́ла еси́, Влады́чице, избра́ннику Твоему́ Се́ргию, –/ отны́не всем изоби́льствует в житии́ и по твое́м ко Го́споду отхожде́нии,–/ и се со сло́вом де́ло явля́еши, Цари́це.

Пева́емая Отрокови́це Де́во,/ чудеса́ Твоего́ заступле́ния удивля́ют челове́ков помышле́ния,/ па́че бо сло́ва спасе́ние улучи́ Тобо́ю храни́мая оби́тель.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от нея́ ро́ждшагося Бо́га сла́вим.

При́зри благосе́рдно на па́ству Твою́, Пречи́стая,/ и, я́коже обещалася еси́, потре́бная подава́й неоску́дно,/ снабдя́щи и покрыва́ющи Твое́й по́мощи и заступле́ния те́пле и́щущия.

Спа́се мой Преблаги́й и вся́ческих Тво́рче,/ Чи́стыя Богоро́дицы благоприя́тными мольба́ми/ соблюди́ Твоя́ певцы́ невреди́мы от вся́ких бед.

Да изба́витися от всех злоключе́ний/ чту́щая Тя оби́тель, Богоро́дице Де́во,/ вражды́, огня́ и гла́да,/ во единомы́слии воспева́ющи,/ По́мощницу Тя иму́щи.

Пое́м Тя, и покланя́емся Ти, Богома́ти,/ не пре́зри моле́ний рабо́в Твои́х,/ заступи́ в беда́х на́ших, я́ко су́щи ми́лостива.

Кондак, глас 1:

Исто́чник исцеле́ний и ве́ры Правосла́вныя утвержде́ние/ посеще́ние Твое́, Богоро́дице, яви́ся,/ те́мже и нас, к Тебе́ притека́ющих,/ от бед и искуше́ний свободи́,/ Ла́вру си́ю невреди́му сохрани́,/ Правосла́вие во окрест живу́щих утверди́/ и грехи́ разреши́ моли́твенник Твои́х,/ ели́ка бо хо́щеши, мо́жеши.

И́кос:

Прииди́те, празднолю́бных собо́ри, Пресвяту́ю Де́ву воспои́м и глаго́лем Ей:/ ра́дуйся, оби́тели сея́ сла́вное украше́ние;/ ра́дуйся, посеще́нием Твои́м преподо́бнаго Се́ргия ра́дости вели́кия испо́лнившая;/ ра́дуйся, обеща́вшаяся неотсту́пна бы́ти от оби́тели сея́;/ ра́дуйся, я́ко сохраня́еши и покрыва́еши оби́тель си́ю от всех напа́стей;/ ра́дуйся, оби́тели на́шея огражде́ние.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

О́троки от пещи́ Изба́вльшаго, Чи́стая,/ Ты родила́ еси́ нетле́нною Твое́ю Богора́дованною утро́бою,/ по рождестве́, я́ко пре́жде рождества́, Сохра́ньшаго Тя,/ Его́же и моля́щи не преста́й о нас, воспева́ющих Тя.

Вси ны́не собери́теся, пле́щуще пра́зднственная во оби́тели сей,/ и Христо́ву Ма́терь просла́вите,/ еди́ну па́че Херуви́м несравне́нную/ и Серафи́м препросла́вленную.

Я́ко вои́стинну свяще́нный, и спаси́тельный, и зарено́сный, Де́во, о́браз посеще́ния Твоего́,/ покланя́ющимся бо сему́ здра́вие раздае́ши и ми́лость теле́с же и душ,/ и взыска́ющим наде́жная еси́ Помо́щнице,/ Бо́га пло́тию ро́ждшая.

Мона́шествующии и вси челове́цы,/ стра́хом и ра́достию ны́не поклони́мся о́бразу посеще́ния Богоотрокови́цы,/ моля́щеся с преподо́бным Се́ргием/ и еже ра́дуйся Гаврии́лово, Благода́тная, вопию́ще.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Сей нарече́нный и Святы́й День/ всех созыва́ет к духо́вному весе́лию,/ сря́щим у́бо сей ра́достно и возопие́м:/ ра́дуйся, Богоро́дице, во вся ве́ки.

Прииди́те, мона́хов мно́жества,/ испо́лнимся Боже́ственнаго благоуха́ния заступле́нием Бо́жия Ма́тере/ и, си́ю прославля́юще, поклони́мся,/ пою́ще при́сно во вся ве́ки.

Возведи́ о́крест о́чи Твои́, Чи́стая, и виждь:/ се бо приидо́ша к Тебе́, я́ко Богосве́тлая свети́ла,/ от за́пада, и се́вера, и мо́ря, и восто́ка ча́да Твоя́/ поклони́тися Твоему́ всепречи́стому образу́.

Есть вои́стинну сей Святы́й День,/ в о́ньже собра́ нас Ма́ти Бо́жия просла́вити по́двиги преподо́бных оте́ц, зде просия́вших,/ и́хже па́мять пребыва́ет во ве́ки.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Свети́ся, ра́дуйся, мона́шествующих мно́жество,/ изря́днее же игра́й, оби́тель сия,/ лику́й ны́не и весели́ся све́тло,/ и́бо обрела́ еси́ Чи́стую Де́ву, Блюсти́тельницу Непобеди́мую.

О Боже́ственнаго, о любе́знаго,/ о неистощи́маго пролия́ния Твои́х безме́рных чуде́с,/ и́миже, Чи́стая, оби́тель си́ю обога́щаеши,/ и́бо сла́ва ея́ в Твое́м заступле́нии,/ Ты еси́ Врата́рница ея́ и утвержде́ние.

О Ма́ти Де́во!/ В моли́тву прино́сим Тебе́ мольбы́ уго́дника Твоего́, мо́лим Тя вси:/ изба́ви нас от вся́кия напа́сти и озлобле́ния.

Да сохрани́ши, Де́во, стадонача́льника оби́тели Твоея́,/ ра́дуйся, Неискусобра́чная Честна́я,/ сохрани́ ста́до Твое́ от вся́каго озлобле́ния,/ Еди́на Богоневе́стная.

Свети́лен:

Па́че со́лнечных луч Твои́м сла́вным явле́нием/ освеща́еши оби́тель си́ю и всех с ве́рою приходя́щих/ и тьму грехо́в на́ших отгоня́еши посеще́нием Твои́м, Богоро́дице,/ к Сы́ну Твоему́ и Бо́гу за ны моля́щися.

На хвали́тех стихи́ры, глас 4:

Прииди́те, празднолю́бцы/ и по́стников сосло́вие,/ ве́рою соше́дшеся,/ хвале́бныя пе́сни принесе́м Де́ве Мари́и,/ днесь бо наста́ све́тлое торжество́,/ явле́ние преподо́бному Се́ргию,/ и мы, пра́зднующе со стра́хом и любо́вию, воспои́м Богоро́дице:/ ра́дуйся, неисповеди́мая Ра́досте всем,/ ра́дуйся, явле́нием Свои́м святы́м оби́тель си́ю посеща́вшая;/ ра́дуйся, всем похвало́ и утвержде́ние;/ ра́дуйся, спасе́ние душ на́ших.

Красу́йся, оби́тель Се́ргиева!/ Се бо Пречи́стая гряде́т со апо́столы,/ све́том неизрече́нным сия́ющая,/ мрак скорбе́й и печа́лей прогоня́ющи/ и всех озаря́ющи луча́ми Свое́й ми́лости.

Пода́ждь утеше́ние рабо́м Твои́м, Чи́стая,/ напа́стьми одержи́мым,/ и рог ве́рных вознеси́, Богороди́тельнице,/ спаси́ моли́твами Твои́ми оби́тель си́ю/ и всех благоче́стно живу́щих в ней.

Сла́ва, и ны́не, глас 8:

Что Тя нарече́м, Богоро́дице Де́во,/ столп ли о́гненный,/ руководя́щий нас к ве́чному насле́дию,/ сте́ну ли кре́пкую,/ я́ко Ты правосла́вный род защища́еши,/ стра́жа ли неусы́пна,/ я́ко охраня́еши и спаса́еши оби́тель си́ю?/ Те́мже, от належа́щих бед избавля́еми, возопии́м Влады́чице:/ ра́дуйся, благи́х Вино́вная,/ изве́стное христиа́н упова́ние.

НА ЛИТУРГИ́И Служба Богоро́дице.