НА ВЕЧЕ́РНИ

На Го́споди, воззва́х: стихи́ры му́чеников, глас 4.

Подо́бен: Дал еси́ зна́мение:

Огня не у́боя́стеся,/ ни секу́щаго орудия,/ ни я́рости свире́пыя без ума́ претя́щаго,/ ни стремле́ния львов,/ ни вре́ния коно́бнаго,/ ни удо́в отсече́ния,/ ни сме́рти го́рькия отве́та,/ вас безсме́ртствующаго,/ к Бо́гу безсме́ртному сла́вно отсыла́юща,/ страда́льцы до́блии.

Блаже́нную и всечестну́ю/ и досто́йно жела́емую кончи́ну восприя́сте/ и ве́чныя, до́блии, наде́жды,/ излива́ете нам то́ки чуде́с,/ опале́ние отъе́млюще/ страсте́й душ и теле́с/ благоче́стно моле́бный пра́здник ваш/ всегда́ соверша́ющих, прехва́льнии.

Фо́тий сла́вный/ и Богому́дрый Аники́т,/ дво́ица вседо́бляя,/ Тро́ичною све́тлостию украша́ема/ и преиспещре́нна ран добро́тами,/ со А́нгелы при́сно ра́дуется,/ и и́же ве́рою сла́вное/ и свяще́нное их страда́ние пра́зднующим/ подаю́т просвеще́ние и ми́лость.

И́ны стихи́ры преподо́бнаго,

глас то́йже.

Подо́бен: Я́ко до́бля:

За милосе́рдие бы́вша Челове́ка,/ я́коже благоизво́ли,/ во дву хоте́нию,/ де́йствах же разуме́ваема, преподо́бне,/ пропове́дал еси́, Макси́ме,/ загражда́я скве́рных незатворе́нная уста́/ единово́льна, единоде́йственна Сего́ сла́вящих,/ искуше́нием диа́вольским,/ злобу просте́ршаго.

Жи́лами уче́ний твои́х/ Пи́рра, о́тче, удави́л еси́ лжу́ща,/ Макси́ме, безу́мнаго/ и гоне́ния претерпе́л еси́/ и ско́рби, приснопа́мятне,/ ураня́емь зело́, и язы́к уре́заемь,/ и ю́же всегда́ к Бо́гу простира́емую Боже́ственную ру́ку,/ е́юже пиша́, соверши́л еси́ высо́кая сло́веса.

Скоропи́сца я́коже трость,/ омоче́на Ду́хом,/ святы́й бысть, блаже́нне, язы́к твой,/ добропи́шущ благода́тию/ на скрижа́лех серде́ц на́ших/ зако́н Боже́ственных доброде́телей,/ и уче́нием изве́стие,/ и воплоще́ние во двою́ Су́ществу челове́ком/ и во еди́ной Ипоста́си яви́тися восхоте́вша.

Сла́ва, глас 8:

Мона́хов мно́жества,/ наста́вника тя почита́ем, о́тче наш Макси́ме:/ твое́ю бо стезе́ю вои́стинну право ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных,/ с ни́миже моли́ся Го́сподеви/ поми́ловатися душа́м на́шим.

И ны́не, глас то́йже:

Мрак зако́нный/ све́тлый преображе́ния прия́т о́блак,/ в не́мже Моисе́й и Илия́ бы́вше/ и пресве́тлыя сла́вы сподо́бльшеся, Бо́гови глаго́лаху:/ Ты еси́ Бог наш, Царь веко́в.

На стихо́вне стихи́ры, глас 2.

Подо́бен: До́ме Евфра́фов:

К горе́ Фаво́рстей/ присту́пим усе́рдно,/ ви́дети сла́ву/ всех Царя́ Христа́,/ Изба́вителя на́шего.

Стих: Твоя́ суть Небеса́,/ и Твоя́ есть земля́.

Яви́лся еси́ с Моисе́ом/ и Илие́ю, Спа́се мой,/ и ученико́в лу́чшии/ на горе́ Фаво́рстей/ облиста́в па́че со́лнца.

Стих: Фаво́р и Ермо́н/ о И́мени Твое́м возра́дуетася.

Слы́шаху Отеческий глас,/ произвеству́ющ сла́ву Твою́,/ Спа́се мой,/ и ученико́в лу́чшии/ ни́цы на зе́млю па́даху.

Сла́ва, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду трудо́в твои́х,/ де́монския погуби́л еси́ полки́/ и а́нгельския дости́гл еси́ чи́ны,/ и́хже житию́ без поро́ка поревнова́л еси́./ Дерзнове́ние име́я ко Христу́ Бо́гу,/ мир испроси́ душа́м на́шим.

И ны́не, глас 5:

Божества́ Твоего́, Спа́се,/ ма́лу зарю́ обнажи́в/ совозше́дшим с Тобо́ю на го́ру,/ преми́рныя Твоея́ сла́вы сотвори́л еси́ рачи́тели./ Те́мже ужа́сно зовя́ху:/ добро́ есть нам зде бы́ти./ С ни́миже и мы Тебе́ преобра́жшагося, Спа́са Христа́/ пое́м во ве́ки.

Тропа́рь, глас 4:

Му́ченицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего:/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами/ спаси́ души на́ша.

Сла́ва, преподо́бнаго, глас 8:

Правосла́вия наста́вниче,/ благоче́стия учи́телю и чистоты́,/ вселе́нныя свети́льниче,/ мона́шествующих богодухнове́нное удобре́ние,/ Макси́ме прему́дре,/ уче́ньми твои́ми вся просвети́л еси́, цевни́це духо́вная./ Моли́ Христа́ Бо́га спасти́ся душа́м на́шим.

И ны́не, пра́здника, глас 7:

Преобрази́лся еси́ на горе́, Христе́ Бо́же,/ показа́вый ученико́м Твои́м сла́ву Твою́,/ я́коже можа́ху,/ да возсия́ет и нам, гре́шным,/ Свет Твой присносу́щный/ моли́твами Богоро́дицы,/ Светодавче, сла́ва Тебе́.

НА У́ТРЕНИ

По 1-й стихоло́гии седа́лен, глас 4.

Подо́бен: Вознесы́йся:

Возше́д со ученики́ на го́ру и во сла́ве О́тчи облиста́в,/ с Моисе́ом Илия́ Тебе́ предстоя́т,/ зако́н и проро́цы бо я́ко Бо́гу служат./ Ему́же и сыновство́ есте́ственное Роди́тель испове́дал, нарица́ше Сы́на,/ Его́же воспева́ем с Тобо́ю и Ду́хом.

Сла́ва, и ны́не, то́йже.

По 2-й стихоло́гии седа́лен, глас то́йже.

Подо́бен: Удиви́ся Ио́сиф:

На горе́ Фаво́рстей преобрази́лся еси́, Иису́се,/ и о́блак све́тел, протяза́ющся, я́ко сень, апо́столы сла́вою покры́,/ Те́мже и на зе́млю ниц па́даху,/ не те́рпяще зре́ти све́тлости непристу́пныя сла́вы Лица́ Твоего́,/ Безнача́льне Спа́се, Христе́ Бо́же./ и́же тогда́ сим Свет Твой возсия́вый, просвети́ души на́ша.

Сла́ва, и ны́не, то́йже.

Кано́н пра́здника, со ирмосо́м на 6, глас 8.

Песнь 1

Ирмо́с: Во́ду проше́д, я́ко сушу,/ и еги́петскаго зла избежа́в,/Изра́ильтянин вопия́ше:/Изба́вителю и Бо́гу на́шему пои́м.

Моисе́й, на мо́ри проро́чески ви́дев/ о́блаком и столпо́м дре́вле о́гненным сла́ву Госпо́дню, вопия́ше:/ Изба́вителю и Бо́гу на́шему пои́м.

Я́ко ка́менем, те́лом покры́вся,/ обоже́нием Неви́димаго зря, Моисе́й Богови́дец взыва́ше:/ Изба́вителю и Бо́гу на́шему пои́м.

Ты на горе́ зако́нней и на Фаво́рстей/ ви́ден был еси́ Моисе́ем во мра́це дре́вле,/ во Све́те же ны́не непристу́пнем Божества́.

Ин кано́н му́чеников на 4, его́же краегране́сие: Кра́сную похваля́ю му́чеников дво́ицу. Ио́сиф, глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Боле́зни тела, прехва́льнии, претерпе́вше, тверде́йшим по́мыслом ве́ры,/ к неболе́зненней жи́зни, ра́дующеся, преста́вистеся,/ о нас при́сно моля́щеся.

Боже́ственными огра́ждся, Аники́то, ору́жии ве́ры,/ к боре́нию безпло́тных враг тве́рдо отлучи́лся еси́/ и тех во́инства Боже́ственною си́лою потреби́л еси́.

Вити́йское глумле́ние, сла́вне, и ум неиску́сен е́ллинский,/ ра́зумом Боже́ственным просвеща́емь, посрами́л еси́/ и себе́ сама́го, Аники́то, всего́ к страда́нию отда́л еси́.

Богоро́дичен: Де́ва и пре́жде рождества́, Чи́стая,/ и по рождестве́ я́ко вои́стинну яви́лася еси́,/ Бо́га бо па́че сло́ва роди́ла еси́,/ святы́я му́ченики страда́вшия венча́вшаго.

Ин кано́н преподо́бнаго на 4, глас 8.

Песнь 1

Ирмо́с: Изра́иля от рабо́ты изба́вил еси́, Го́споди,/ десни́цею Твое́ю держа́вною,/ я́ко о́наго спасл еси́,/ ны́не нас спаси́.

Вы́шния прему́дрости сокро́вище стяжа́в в се́рдцы, преподо́бне,/ тоя́ ра́ди обога́ти́л еси́ мир уче́нии.

А́нгельское показа́л еси́ житие́, на земли́ живы́й,/ и был еси́ храм Бо́гу, христопропове́дниче преподо́бне,/ Те́мже и возложи́лся Ему́.

Еди́но мы́сляще друг ко дру́гу, во еди́ну Твою́ ве́ру, Христе́,/ преподо́бнии пропове́даху Тя в безъязы́чных усте́х,/ я́ко тру́бы боговеща́нныя.

Богоро́дичен: Ра́дуйся, Чи́стая Богоро́дице,/ Я́же пре́жде су́щаго Сло́ва Бо́жия ро́ждши в после́дняя пло́тию,/ ра́дуйся, стено́ всем нам и покро́ве чту́щим Тя.

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Осеня́ющая сла́ва в се́ни пе́рвее и Моисе́еви бесе́дующи, Твоему́ уго́днику,/ о́браз бысть облиста́вшаго неизрече́нно/ на Фаво́ре, Влады́ко, Твоего́ преображе́ния.

Совзыдо́ша Ти, Сло́ве Единоро́дный,/ Вы́шнии апо́стольстии верси́ на го́ру Фаво́рскую,/ и сопредста́ша Ти Моисе́й же и Илия́, я́ко Бо́жия слуги́, Еди́не Человеколю́бче.

Бог Сло́во сый, весь зе́млен бысть,/ всему́ Бо́жеству смеси́в челове́чество во ипоста́си Свое́й,/ ю́же во двою́ су́ществу Моисе́й и Илия́ же ви́деша на горе́ Фаво́ре.

Ин

Ирмо́с: Весе́лится о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Победи́в со Христо́м ополче́ния вра́жия,/ вене́ц побе́дный прия́л еси́, му́чениче страстоте́рпче Аники́то.

Неради́ша о пло́ти я́ко тле́ющей Христо́вы му́ченицы/ и лю́тая муче́ния ра́зумом тве́рдым претерпе́ша.

Вод животво́рных испо́лнены,/ му́тныя то́ки пре́лести, му́дрии му́ченицы,/ тече́нии кро́вными уста́висте.

Богоро́дичен: Всели́ся во утро́бу Твою́ живы́й на Небесе́х Госпо́дь/ и от нас вся́ку пре́лесть, Богоро́дице, отгна́л есть.

Ин

Ирмо́с: Несть свят, я́ко Госпо́дь,/ и несть пра́веден, я́ко Бог наш,/ Его́же пое́т вся тварь:/ несть пра́веден, па́че Тебе́, Го́споди.

Кро́ви ка́плют честны́я Твоея́ руки́,/ и уче́ния теку́т целому́дреннаго язы́ка твоего́,/ изве́стна вопию́ща по отсече́нии его́ Христа́ во двою́ естеству́.

Рука́ твоя́ писа́ньми не преста́ вопия́,/ и язы́к уче́нии тру́бит ве́ру твою́, Богоглаго́ливе треблаже́нне:/ Бог бо бе обоя́ движа́, слага́я глаго́лати.

Треми́ у́бо теле́сы, во еди́ной же души́,/ единому́дренно сопроти́вистеся, отцы́ чу́днии,/ зле отъе́млющим Христо́вы стра́сти и сугу́бое де́йство.

Богоро́дичен: Жены у́бо ражда́ют, Ма́ти Де́во Чи́стая,/ но не ктому́ де́вы пребыва́ют, я́коже Ты:/ ниже́ бо еди́на от сих Бо́га породи́, токмо Ты, Богоро́дице Чи́стая.

Ин конда́к му́чеников, глас 2.

Подо́бен: В моли́твах:

Боже́ственныя, ве́рнии, и храбрыя/ ублажи́м супру́ги Христо́вы сла́вныя,/ и похва́лим, я́ко тве́рдыя пропове́дники благоче́стию/ и су́ща рачи́тели, Фо́тия и Аники́ту,/ и пе́сньми и хвала́ми венча́ем.

Ин конда́к преподо́бнаго, глас 6.

Подо́бен: Е́же о нас:

Свет трисия́нный, все́льшийся в ду́шу твою́,/ сосу́д избра́н показа́ тя, всеблаже́нне, явля́юща Боже́ственная конце́м,/ неудобопости́жных разуме́ний ты сказу́яй, блаже́нне,/ и Тро́ицу всем, Макси́ме, воспропове́дуяй я́сно,/ Пресущную Безнача́льну.

И́кос:

Подража́тель я́влься Спа́совых страсте́й/ и Того́ в души́ твое́й име́я, всеблаже́нне,/ восхожде́ния в се́рдцы твое́м возложи́л еси́, пребога́те,/ Той же тебе́ подаде́ благода́ть с Небесе́./ Сопроти́вився бо еси́ мучи́телем, му́дре, му́жески,/ Безнача́льную, и Боже́ственную, и Еди́носущную Тро́ицу пропове́дуя/ и облича́я злосла́вныя и богобо́рныя,/ безме́рныя претерпе́л еси́ напа́сти, всехва́льне,/ язы́ка отре́зание богосло́внаго, преподо́бне, и Твоея́ руки́ вку́пе,/ не преста́л же еси́ ты со дерзнове́нием глаго́ля/ и утвержда́я ве́рныя Боже́ственными твои́ми уче́нии,/ Тро́ицу всем лю́дем пропове́дуя я́сно, Пресу́щную Безнача́льну.

Седа́лен му́чеников, глас 4.

Подо́бен: Вознесы́йся:

Низло́жше вра́жия возноше́ния терпе́нием лю́тых мук, страстоте́рпцы,/ на Небесе́х живете́ ны́не, ра́дующеся, Фо́тие сла́вный и Аники́то блаже́нне./ Те́мже ублажа́етеся во ве́ки веко́в, о нас моля́щеся Христу́,/ творя́щих ва́шу па́мять.

Сла́ва, преподо́бнаго, глас 3.

Подо́бен: Боже́ственныя ве́ры:

Уче́ние Боже́ственное держа́, столп был еси́ Правосла́вия и держа́ва, Богому́дре, ве́ры:/ во двою́ существу́ и дву хоте́нию/ пропове́дал еси́ Христа́ Бо́га на́шего, о́тче Макси́ме,/ Его́же приле́жно моли́ дарова́ти нам ве́лию ми́лость.

И ны́не, пра́здника, глас то́йже.

Подо́бен: Красоте́ де́вства Твоего́:

Боже́ственныя Твое́я сла́вы сия́ние, я́коже можа́ху,/ показа́л еси́, Сло́ве Бо́жий, ученико́м Твои́м, на Фаво́рстей горе́ преобразу́ющийся,/ и́миже просвети́хомся и мы, пою́щии Тя,/ Еди́не Неизме́нне и Безсме́ртне Го́споди./ Тебе́ бо ве́рою вопие́м:/ сла́ва, Христе́, Ца́рствию Твоему́.

Песнь 4

Ирмо́с: Из пло́ти Твое́й лучи́ Божества́/ исхожда́ху проро́ком и апо́столом./ Тем нача́льницы, пою́ще, взыва́ху:/ сла́ва си́ле Твое́й, Го́споди.

И́же купину́ сохрани́вый неврежде́ну, прикосну́вшуюся огню,/ Моисе́ю богосия́нную плоть показа́л еси́, Влады́ко, пою́щему́:/ сла́ва си́ле Твое́й, Го́споди.

Скры́ся заре́ю Божества́ чу́вственное со́лнце,/ я́ко на горе́ Фаво́ре ви́дев Тя преобразу́ющася, Иису́се мой:/ сла́ва си́ле Твое́й, Го́споди.

Огнь, не опаля́я ве́щи теле́сныя, ви́ден бысть невеще́ствен,/ я́коже Моисе́ю и апо́столом яви́лся еси́, Илии́ же, Влады́ко,/ еди́н от двою́, во дву соверше́нну естеству́.

Ин

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Распала́еми любо́вию Бо́жиею,/ усе́рдно пла́мень огня́ проидо́сте,/ пребы́вше росо́ю неопа́льни духо́вною, непобеди́мии му́ченицы,/ Боже́ственнии моли́твенницы о душа́х на́ших.

Отверго́шася те́ла, разли́чными о́бразы страда́льцы стру́жеми,/ всем бо умо́м к Бо́гу взира́ху,/ сим подаю́щему́ терпе́ние ве́ры ра́ди.

Кре́пцы, я́ко столпи́ благоче́стия, сте́ны вра́жия низложи́сте/ и гра́да Боже́ственнаго, му́ченицы, гражда́не бысте, вопию́ще:/ сла́ва си́ле Твое́й, Го́споди.

Дрема́нием не воздрема́сте злоче́стия,/ но бо́дростию Боже́ственною, му́ченицы,/ спя́щия всегда́ в сме́рти к Све́ту наста́висте богора́зумия благода́тию.

Богоро́дичен: Я́ко кра́сна породи́ла еси́ Кра́снаго, Де́во Ма́ти Чи́стая,/ кра́сны показа́вшаго му́ченики,/ тве́рдо пострада́вшия и безбо́жие потре́бльшия.

Ин

Ирмо́с: Из горы́ приосене́нныя, Сло́ве, проро́к,/ еди́ныя Богоро́дицы,/ хотя́ща воплоти́тися богови́дно усмотри́/ и со стра́хом славосло́вяше си́лу Твою́.

Ты Моисе́ю подо́бяся, Богому́дре,/ скрижа́ли разу́мно прия́т уче́ний:/ во мрак бо вшел еси́ виде́ний и обогати́лся еси́ ра́зума све́том.

Ты Авраа́му поревнова́в, Богому́дре,/ друга́го Исаа́ка приве́л еси́ Го́сподеви,/ твое́ же́ртвовав, о́тче, се́рдце во огни́ со́вестне.

Еди́наго Христа́ пропове́давше, отцы́,/ еди́наго Сы́на во двою́ су́ществу испове́дасте,/ хотя́ща по су́ществу и де́йствующа обоя́.

Богоро́дичен: Безле́тна Сы́на роди́ла еси́ в ле́то нетле́нно/ и чи́ста пребыла́ еси́, ро́ждши нас ра́ди Воплоще́ннаго во утро́бе Твое́й,/ Богороди́тельнице Присноде́во.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Вети́йствующий язы́к Твоего́ вели́чества не мо́жет веща́ти:/ я́ко бо, Держа́й живо́т и сме́ртию Влады́й,/ предста́вил еси́ на Фаво́рстей горе́ Моисе́я и Илию́,/ свиде́тельствующия твое́ Бо́жество́.

И́же рука́ми неви́димыми созда́в по о́бразу Твоему́, Христе́, челове́ка,/ началообра́зную Твою́ в созда́нии добро́ту показа́л еси́,/ не я́ко во о́бразе, но я́ко Сам Сый по су́ществу,/ Бог был еси́ и Челове́к.

Сраствори́вся неслия́нно, угль горя́щ показа́л еси́ нам Божества́,/ попаля́ющ у́бо грехи́, ду́ши же просвеща́ющ, на Фаво́рстей горе́,/ Моисея́ со Илие́ю, ученико́в же старе́йшия удиви́л еси́.

Ин

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Премно́гими ра́нами умерщвле́но те́ло твое́, Аники́то,/ живо́т тебе́ нестаре́емый, преблаже́нне, преподо́бно исхода́таи.

Потребле́ние огню́ жгу́щему́ был еси́, о Фо́тие,/ Боже́ственнаго сия́ния соприча́стниче/ и дне незаходи́маго ча́до при́сное!

Теку́щих тле́ние до конца́ отри́нуша,/ возжеле́вше пребыва́ющая кра́сная,/ единоду́шно, му́ченицы сла́внии.

Богоро́дичен: Кто мо́жет сказа́ти твое́ та́инство, о Влады́чице Богоро́дице?/ Па́че ума́ бо и сло́ва Бо́га неизрече́нно роди́ла еси́.

Ин

Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.

Не усече́ твоего́, о́тче, меч дерзнове́ния,/ не угаси́, преподо́бне, заточе́ние ве́ры твое́й.

Пропове́дует у́бо Рим ре́вность твою́, Богоно́се,/ тру́бит же, преподо́бне, Це́рковь сло́веса твоя́.

Пред кня́зи пропове́давше Спа́са,/ му́ченицы бы́сте произво́лением, Богому́дрии.

Богоро́дичен: Исто́чник безсме́ртия пое́м Тя, Богоро́дице,/ Ты бо приснотеку́щий живо́т ми́ру роди́ла еси́.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Я́ко ве́лие и стра́шное узре́ся ви́дение днесь:/ с небесе́ у́бо чу́вственное, от земли́ же несравне́нное/ облиста́ Со́лнце пра́вды мы́сленное на горе́ Фаво́рстей.

Пре́йде у́бо сень зако́нная, изнемо́гшая,/ прии́де же я́ве Христо́с и́стина, – Моисе́й возопи́,/ на Фаво́ре ви́дев твое́ Бо́жество́.

Столп о́гненный – Христа́ преобразу́ющася,/ о́блак же – яве благода́ть Ду́ха, осени́вшую на Фаво́ре,/ предсказа́ша явле́ннейше.

Ин

Ирмо́с: Пожру́ Ти со гла́сом хвале́ния. Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Возвы́шен был еси́, неми́лостивно на дре́ве стру́жемь,/ умерщвле́ния дебельство́ отметая,/ в Боже́ственную оде́жду с Небесе́ одева́емь, му́чениче Аники́то.

Расторга́ю у́зы пре́лести, святи́и, внегда́ свя́зани бы́сте кре́пко,/ терпе́нием же и пожда́нием, Боже́ственными у́жи,/ предста́теля тьмы удави́сте.

Яви́стеся я́ко вели́цыи свети́льницы,/ просвеща́юще луча́ми исцеле́ний и заря́ми Боже́ственных по́двиг всю тварь,/ страда́льцы Христо́вы предо́блии.

Богоро́дичен: Зако́нных породи́ла еси́ кроме́, Всенепоро́чная, и́стиннаго Зако́ноположника,/ Его́же моли́ зако́ном греха́ побежда́емую ду́шу мою́ уще́дрити и спасти́ мя.

Ин

Ирмо́с: Из чре́ва а́дова/ во́пля моего́ услы́шал еси́ глас мой/ и изба́вил еси́ от тли живо́т мой, Многоми́лостиве.

Удиви́ твое́, треблаже́нне, испове́дание,/ в Тебе́ веща́вый Иису́с,/ со стра́ждущими Тебе́.

Ни князей киче́ния, ни меча́,/ ни огня́, претя́щего Тебе́, убоя́ся, преподо́бне,/ ве́рою был еси́ кре́пок.

Не поколеба́ твоего́ столпа́ правосла́вия вселука́вый враг,/ но победи́ся и поги́бе.

Треплете́нною твое́ю пра́щею/ преще́ние А́риево мы́сленно стреля́ется,/ стрела́ми та́ин Христо́вых.

Богоро́дичен: Па́че ума́ и сло́ва, Де́во,/ Пита́теля всех от сосцу́ пита́ющи,/ ма́те́рних не разуме́ла еси́.

Конда́к, глас 7. Самогла́сен:

На горе́ преобрази́лся еси́,/ и я́коже вмеща́ху ученицы́ Твои́,/ сла́ву Твою́, Христе́ Бо́же, ви́деша,/ да егда́ Тя у́зрят распина́ема,/ страда́ние у́бо уразуме́ют во́льное,/ ми́рови же пропове́дят,/ я́ко Ты еси́ вои́стинну О́тчее сия́ние.

И́кос:

Воста́ните, лени́вии, и́же всегда́ ни́зу пони́кшии в зе́млю души́ моея́ по́мыслы,/ возми́теся и возвы́ситеся на высоту́ Боже́ственнаго восхожде́ния./ Притеце́м к Петру́ и к Зеведе́евым/ и вку́пе со о́неми Фаво́рскую го́ру дости́гнем,/ да ви́дим с ни́ми сла́ву Бо́га на́шего, глас же услы́шим,/ его́же свы́ше слы́шаша и пропове́даша О́тчее сия́ние.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Ны́не ви́дена бы́ша апо́столом неви́димая Божества́ во пло́ти,/ на горе́ Фаво́рстей облиста́вша, вопию́щим:/ благослове́н еси́, Го́споди Бо́же, во ве́ки.

Ужасо́шася стра́хом, уди́вльшеся благоле́пию Боже́ственнаго Ца́рства,/ на горе́ Фаво́рстей апо́столи, вопию́ще:/ благослове́н еси́, Го́споди Бо́же, во ве́ки.

Ны́не неуслы́шанная услы́шана бы́ша:/ без отца́ бо Сын от Де́вы Оте́ческим гласом сла́вно свиде́тельствуется,/ я́ко Бог и челове́к То́йже во ве́ки.

Положе́нием не был еси́ Вы́шняго, существо́м же Сын возлю́блен,/ пре́жде Сый, нам прибли́жился еси́ непрело́жно:/ благослове́н еси́, Го́споди Бо́же, во ве́ки.

Ин

Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Стра́нен по́двиг проше́дше, стра́нни яви́стеся вои́стинну мудрова́ний, сла́внии, плотски́х,/ А́нгелом согражда́не, снасле́дницы же Христу́,/ великоимени́тии му́ченицы.

Терпе́нием же и пожда́нием победи́сте всех враго́в безбо́жныя наве́ты/ и, све́тлы боле́зньми бы́вше,/ к сия́нию незаходи́мому преста́вистеся, пресла́внии.

Храм Тро́ицы Пребоже́ственныя бы́вше,/ столпы́ и хра́мы низложи́ша му́жески безбо́жных, прехва́льнии,/ и к Небе́сному хра́му преста́вистеся, ра́дующеся.

Богоро́дичен: Я́ко простра́ннейши Небе́с, Чи́стая, прия́ла еси́ Сло́ва,/ ника́коже вме́стна па́че ума́, те́сным ходя́щия путе́м, Пренепоро́чная,/ к простра́нству вводя́ща Боже́ственныя жи́зни.

Ин

Ирмо́с: В нача́ле зе́млю основа́вый/ и Небеса́ сло́вом утверди́вый,/ благослове́н еси́ во ве́ки, Го́споди, Бо́же оте́ц на́ших.

Ты оде́жду есте́ственнаго досто́инства кро́вию твое́ю украси́л еси́, Богому́дре,/ молча́щ язы́к, о́тче, и веща́ющ,/ явле́ние подава́я се́ю слове́с твои́х.

Гроб ва́ших не уста́ви язы́ков,/ земля́ же да́льняя не скры словеса́,/ я́коже пи́шет Дави́д в пе́снех,/ во всю вои́стинну зе́млю пропове́дашася.

Я́коже зла́то, трие́ искуси́вшеся во огни́ искуше́нию о́нех,/ чисте́йшу ве́ру ва́шу возрасти́сте Христу́, отцы́ честни́и.

Богоро́дичен: Та́йны о́браз – Де́вы/ в Сина́и Ты прообрази́л еси́ купино́ю горя́щею и неопаля́емою:/ благослове́н еси́, Го́споди, Бо́же оте́ц на́ших.

Песнь 8

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Услы́шавше, Влады́ко, от Отца́ свиде́тельствуема,/ и я́ко челове́ческа тверде́йша зра́ка зре́ти лица́ Твоего́ блиста́ния не терпя́ще,/ Твоя́ ученицы́ на зе́млю ниц па́даху, со стра́хом пою́ще:/ свяще́нницы, благослови́те, лю́дие, превозноси́те во вся ве́ки.

Ца́рствующим еси́ Царь прекра́сен и и́же всюду владя́щим Госпо́дь си́лен,/ Блаже́н и во све́те живы́й непристу́пнем,/ Ему́же ученицы́ уди́вльшеся, Моисе́й же и Илия́ вопия́ху:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Я́ко Не́бом владу́щему́, и земле́ю госпо́дствующему́,/ и над преиспо́дними о́бласть иму́щему, Христе́, предста́ша Ти:/ от земли́ у́бо – апо́столи, я́ко с Небесе́ же – Фесви́тянин Илия́,/ Моисе́й же – от ме́ртвых, пою́ще согла́сно:/ лю́дие, превозноси́те во вся ве́ки.

Уны́ние ражда́ющия печа́ли на земли́ оста́виша апо́столов избра́ннии, Человеколю́бче,/ я́ко Тебе́ после́доваша, ко и́же от земли́ преложе́нию Боже́ственнаго жития́./ Те́мже и, по достоя́нию Твоего́ Богоявле́ния улучи́вше, поя́ху:/ лю́дие, превозноси́те Его́ во ве́ки.

Ин

Ирмо́с: Руце распросте́р, Дании́л/ львов зия́ния в рове затче́,/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.

Тве́рд ум, му́дрии, показу́юще,/ зве́рей стремле́ния не убоя́стеся,/ вре́ния коно́б не ужасо́стеся, ни удо́в отсече́ния,/ ни мучи́телей преще́ния, вопию́ще:/ благослови́те, вся дела́ Госпо́дня, Го́спода.

Исцеля́ете стра́сти ве́рных,/ изобрази́вше страсть блаже́нную ва́шими страстьми́, святи́и,/ и отъе́млете неду́ги, и отгоня́ете лю́тыя ду́хи, вопию́ще:/ благослови́те, вся дела́ Госпо́дня, Го́спода.

Дво́ице страда́лец предо́брая Тро́ицу Несозда́нную испове́да,/ и тьмосла́вных погуби́ супоста́т вои́стинну полк,/ и тьмам мы́сленных совокупи́ся, пою́щи:/ благослови́те, вся дела́ Госпо́дня, Го́спода.

Богоро́дичен: Свята́я Де́во, и́же Бо́га Пресвята́го поро́ждши,/ венча́вшаго благода́тию святы́я Твоя́ му́ченики,/ спаси́, освяти́ нас, усе́рдно пою́щих:/ благослови́те, вся дела́ Госпо́дня, Го́спода.

Ин

Ирмо́с: На горе́ святе́й просла́вльшася/ и в купине́ огне́м Присноде́вы Моисе́ови та́йну я́вльшаго,/ Го́спода по́йте/ и превозноси́те во вся ве́ки.

Зарю́ Боже́ственнаго уче́ния в се́рдцы прие́м, Богому́дре,/ просвеще́нней ра́зума́ обогати́лся еси́/ и Прему́дрости сокро́вище вложи́л еси́ в ду́шу твою́, о́тче.

Уче́ния предложи́в, Богоблаже́нне,/ е́реси отгна́л еси́ от среды́/ и, Христо́вым поревнова́в страсте́м,/ был еси́ же́ртва чиста́ и прия́тна Бо́гу произволе́нием.

В чистоте́ соблю́дше житие́ и ве́рою украси́вше дела́,/ Небе́сныя сла́вы сподо́бистеся, честни́и отцы́,/ Те́мже воспева́ете Христа́ во ве́ки.

Богоро́дичен: Ра́дуйся, две́ре и одушевле́нный о́блаче;/ ра́дуйся, горо́, и купино́, и све́щниче;/ ра́дуйся, хра́ме, и престо́ле, и раю́;/ ра́дуйся, ро́ждшая Соде́теля всех, Благослове́нная.

Песнь 9

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.

Да твое́ пока́жеши я́ве неизрече́нное второ́е сни́тие,/ я́ко да Вы́шний Бог яви́шися,/ стоя́ посреде́ богов, апо́стол на Фаво́ре,/ Моисе́я же и Илию́, неизрече́нно осия́л еси́./ Те́мже вси Тя, Христе́, велича́ем.

Прииди́те, Мне покори́теся, лю́дие, возше́дше на го́ру святу́ю пренебе́сную,/ невеще́ственно ста́нем во гра́де Жива́го Бо́га/ и у́зрим мы́сленно Бо́жество́ невеще́ственное,/ Отца́ и Ду́ха, в Сы́не Единоро́днем облиста́ющее.

Привле́кл еси́ любо́вию мя, Спа́се,/ и премени́л еси́ Боже́ственным Твои́м жела́нием,/ но попали́ огне́м невеще́ственным грехи́ моя́/ и насы́титися Твое́й пи́щи сподо́би,/ да, обое́ игра́я, велича́ю, Бла́же, вели́чия Твоя́.

Ин

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Се све́тлый, и светоно́сный, и испо́лнен благода́ти день возсия́ Фо́тия Боже́ственнаго и Аники́ты,/ вся просвеща́я в нем пра́зднующия светоза́рная сих страда́ния.

Яви́стеся, я́ко у́глие, всю вещь зло́бы попаля́юще,/ яви́стеся, я́ко честни́и а́гнцы, во́льне закала́еми/ и Агнцу, взе́млющему грехи́, приводи́ми.

Ра́ны ва́ша, страстоно́сцы, страда́ния, и боле́зни, и па́че ума́ терпе́ние,/ и по́двиги, и кончи́ну пресла́вно сла́вяще,/ днесь вси возра́дуемся.

Процвето́ша во удо́лиях преподо́бно му́ченических,/ я́коже шипо́к, преудо́бреннии страда́льцы,/ и сердца́ благоуха́ют благочести́вых Ду́хом,/ смрад пре́лести отгоня́юще.

Богоро́дичен: Просвети́ нас, ро́ждшая Свет непристу́пный, Де́во,/ испо́лни нас весе́лия, и ра́дости, и Боже́ственнаго ра́зума,/ чи́стым се́рдцем Тя богому́дренно велича́ющия.

Ин

Ирмо́с: Проявле́нное на горе́ законополо́жнику во огни́ и купине́/ Рождество́ Присноде́вы/ в на́ше, ве́рных, спасе́ние,/ пе́сньми немо́лчными велича́ем.

Ты безстра́стием и виде́нием, треблаже́нне, научи́л еси́ словесы́ нас жи́зни ве́чныя,/ столп одушевле́н Правосла́вия ми́рови,/ испове́дание твое́ оста́вил еси́.

Ты, Финее́су подо́бяся, Богоно́се,/ я́ко ине́м копие́м, мече́м сло́ва/ новонасажде́нную посека́еши ве́ру,/ огрева́я хуля́щия Христа́.

Вои́стинну просла́вистеся, Богоно́снии отцы́,/ ра́нами и бие́нии, гоне́нии и беда́ми,/ во у́зах же, и темни́цах, и желе́зах,/ и в заточе́ниих пострада́вше.

Богоро́дичен: Купину́, горя́щу огне́м и неопаля́ему,/ предзря́ше дре́вле Моисе́й, Богома́ти Де́во,/ богоприя́тну прообразу́я Твою́ утро́бу, прие́мшую нетле́нный Огнь.

Свети́лен свята́го.

Подо́бен: Све́те неизме́нный:

Труба́ яви́лся еси́ прему́дрости,/ благогла́сным язы́ком твои́м сопроти́вных ужаса́я полки́, Макси́ме, свет мона́шествующих,/ Те́мже, твои́ми пита́ющеся словесы́,/ разум познава́ем су́щих.

Сла́ва, и ны́не, пра́здника:

Све́те неизме́нный, Сло́ве, Све́та Отца́ нерожде́нна, в явле́ннем све́те твое́м,/ днесь на Фаво́ре Свет ви́дехом Отца́, Свет и Ду́ха,/ Све́том наставля́ющаго всю тварь.

На стихо́вне стихи́ры пра́здника, глас 2.

Подо́бен: До́ме Евфра́фов:

Просия́л еси́, о Христе́,/ бело́ па́че сне́га,/ Твое́ обнажа́я/ ученико́м существо́/ непристу́пныя сла́вы Твоея́.

Стих: Твоя́ суть небеса́/ и Твоя́ есть земля́.

Показа́ти ученико́м/ сла́ву Твою́ восхоте́в,/ с Моисе́ем и Илие́ю/ на горе́ Фаво́рстей/ я́ко ви́деша Тя, Спа́се, ужасо́шася.

Стих: Фаво́р и Ермо́н/ о И́мени Твое́м возра́дуетася.

Днесь Христо́с/ на горе́ Фаво́рстей/ Ада́мово обно́вль/ омрачи́вшееся естество́,/ просвети́в, богосоде́ла.

Сла́ва, и ны́не, глас и подо́бен то́йже:

Гора́ Бо́жия Фаво́р/ о И́мени Твое́м,/ Спа́се, ра́дуется,/ Отцу́ возлю́бленна Тя/ Сы́на пропове́дая.

НА ЛИТУРГИ́И

Блаже́нны пра́здника, песни 7-я и 8-я от обоих кано́нов, со ирмосо́м на 6.