НА ВЕЧЕ́РНИ

На Го́споди, воззва́х: стихи́ры, глас 1.

Подо́бен: Небе́сных чинов:

Седмокру́жный све́щник,/ озари́вший седмоче́стных о́трок,/ прииди́те, при́сно воспое́м па́мять, вопию́ще Христу́,/ ты́я венча́вшему:/ моли́твами их, Го́споди Изба́вителю,/ живо́т наш умири́.

И́же по естеству́ уме́ршии па́че естества́ вои́стинну,/ я́коже от сна, а́бие воста́ша,/ вку́пе седмь о́троцы Боже́ственнии./ Чу́до ужа́сное:/ три́ста бо лет и се́дмьдесять и два,/ я́коже ме́ртвии, в пеще́ре спа́ша.

Со Иамвли́хом Боже́ственным и Максимилиа́ном/ Мартиниа́на и Иоа́нна,/ Анто́ния же вкупе с Диони́сием почти́м ны́не,/ я́ко моля́щияся о нас,/ восхваля́юще с си́ми/ и му́драго благоче́стно Ексакустодиа́на.

И́ны стихи́ры Богоро́дицы, подо́бны:

Препросла́вленна еси́ в ро́ды родо́в,/ Де́во Ма́ти Отрокови́це, Богоро́дице Мари́е,/ ми́ра Предста́тельнице,/ ро́ждшая пло́тию Сы́на Безнача́льнаго Отца́,/ соприсносу́щна же .Ду́ху вои́стинну,/ его́же моли́ спасти́ нас.

Одержи́ми прегреше́ньми ненаде́жными, Чи́стая,/ Тя Предста́тельницу еди́ну иму́ще, Де́во,/ вопие́м благода́рно:/ очи́сти ны, Пресвята́я Богоневе́сто,/ Ты бо еси́ ми́ру прибе́жище/ и заступле́ние ро́ду на́шему.

Согреше́ний пучи́ною обурева́емь,/ в ти́хое приста́нище/ чи́стыя моли́твы Твоея́, Богороди́тельнице, прибе́г,/ взыва́ю Ти: спаси́ мя,/ держа́вную Твою́ просте́рши десни́цу,/ рабу́ Твоему́, Пренепоро́чная.

Сла́ва, и ны́не:

Жезло́м Твое́й моли́твы,/ Богороди́тельнице Чи́стая,/ звери́ныя стра́сти окая́нныя души́ мое́й отжени́ вско́ре,/ ми́рно жизнь мою́ управля́ющи,/ и свято́му мя ста́ду избра́нных Твои́х ове́ц причти́.

Крестобогоро́дичен:

У Креста́ предстоия́щи Сы́на и Бо́га Твоего́/ и долготерпе́ние того́ смотря́ющи,/ глаго́лаше, пла́чущи, Ма́ти Чи́стая:/ увы́ Мне, Ча́до сладча́йшее,/ что сий стра́ждеши непра́ведно, Сло́ве Божий,/ да спасе́ши челове́чество?

Тропа́рь, глас 4: Му́ченицы Твои́, Го́споди:

Или́ сей, глас то́и́же:

Ве́лия ве́ры чудесе́,/ в пеще́ре, я́ко в черто́зе ца́рском,/ святи́и седмь о́троцы пребы́ша,/ и умро́ша без тли,/ и по мно́зех вре́менех воста́ша, я́ко от сна,/ во увере́ние воскресе́ния всех челове́ков./ Тех моли́твами, Христе́ Бо́же, поми́луй нас.

Ин тропа́рь, глас 8:

Благоче́стия пропове́дники и Воскресе́ния умё́рших изобрази́тели,/ Це́ркви столпы́ седмочи́сленныя,/ о́троки всеблаже́нныя пе́сньми восхва́лим:/ ти́и бо по мно́гих ле́тех нетле́ния, а́ки от сна воста́вше,/ всем возвести́ша я́ве ме́ртвых воста́ние.

НА У́ТРЕНИ

О́ба кано́на Окто́иха, святы́х кано́н на 4, глас 2.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и настав́льшему лю́ди,/ я́же изведе́ из рабо́ты еги́петския,/ я́ко просла́вися.

Число́м сия́ющия честны́я де́ти седмь, прииди́те, ве́рно почти́м,/ я́ко просвеща́ют Христо́ву Це́рковь, свети́льники седмосве́тлыя,/ лу́чшия зако́нных.

И́же в плотско́е пе́рвее умерщвле́ние, жи́ви суще, Христо́во о́троцы седмь оде́яшася,/ я́коже сон, смерть пресла́вно прие́мше,/ утвержда́юще уче́ние воскресе́ния.

Иерихо́н паде́ся гла́сом труб седми́,/ пре́лести же возноше́ние седмогла́сием ны́не ве́ры страда́лец/ сни́де до а́да и разори́ся.

Богоро́дичен: Новоле́пно рождество́ обновля́вши, Безневе́стная,/ и́бо Отцу́ Собезнача́льное и Боже́ственному Ду́ху соприсносу́щное Сло́во/ из Тебе́ воплоти́ся, спряже́ния не оставль.

Песнь 3

Ирмо́с: Утверди́ нас в Тебе́, Го́споди,/ Дре́вом умерщвле́н грех,/ и страх Твой всади́/ в сердца́ нас, пою́щих Тя.

Зве́зды неукло́нны седмь, яви́стеся, ве́рою сия́юще, страстоте́рпцы,/ и и́же ле́сти, ныря́ющия глубино́ю,/ к приста́нищу спаси́тельному упра́висте.

Пред суди́щем тве́рдо ста́вше, святи́и, мучи́телей, я́коже иногда́ Маккаве́и,/ во́инства измени́стеся тле́нныя жи́зни, вво́инившеся Христу́.

Досто́йно Бо́гу прия́тна яви́стеся же́ртва моли́твы, святи́и о́троцы,/ и воне́ю благоуха́нною смрад обличи́вше пре́лести тве́рдо.

Богоро́дичен: Купина́ в Сина́и прообража́ше твое́, Де́во, пресла́вное рождество́:/ огне́м бо Бо́жества не опали́лася еси́,/ в ложесна́ прие́мши ве́рно.

Ин Конда́к, глас 4:

Просла́вивый на земли́ святы́я Твоя́/ пре́жде втора́го и стра́шнаго прише́ствия Твоего́, Христе́,/ пресла́вным воста́нием о́троков/ показа́л еси́ Воскресе́ние неве́дящим е́,/ нетле́нна одея́ния и телеса́ яви́в,/ и царя́ уве́рил еси́ вопи́ти:/ вои́стинну есть ме́ртвых воста́ние.

Седа́лен, глас 4.

Подо́бен: Ско́ро предвари́:

Я́ко столпи́ су́ще Це́ркве Христо́вы,/ стены разверго́сте неве́рия тве́рдо, седмобра́тнии му́ченицы./ Те́мже пре́жде сме́рти е́ллинский гнев,/ и па́ки по сме́рти ерети́ческую бу́рю отгна́вше, и воскресе́ния ве́ру удержа́вше,/ моли́теся ве́рою утверди́тися нам.

Сла́ва, и ны́не, Богоро́дичен:

Де́во Всенепоро́чная, Я́же Пресу́щнаго Бо́га ро́ждшая,/ со Безпло́тными того́ непреста́нно моли́/ оставле́ние прегреше́ний и исправле́ние жития́ да́ти нам пре́жде конца́,/ ве́рою и любо́вию пою́щим Тя по до́лгу, еди́на Всепе́тая.

Крестобогоро́дичен:

На Кресте́ Тя возвы́шена я́ко узре́ Пречи́стая Ма́ти Твоя́, Сло́ве Бо́жий,/ ма́терски рыда́ющи, веща́ше:/ что но́вое и стра́нное сие́ чу́до, Сы́не Мой?/ Ка́ко, Жизнь всех, вкуша́еши сме́рти,/ оживи́ти ме́ртвыя хотя́, я́ко Милосе́рд?

Песнь 4

Ирмо́с: Услы́шах, Го́споди,/ сла́вное твое́ смотре́ние/ и просла́вих, Человеколю́бче,/ непостижи́мую Твою́ си́лу.

Свяще́нное совокупле́ние и число́м я́ве почте́ное,/ седмери́цу честны́х о́троков воспое́м.

Умудре́на су́етием нечести́ваго пре́лести царя́/ Ефе́сстии о́троцы показа́ша безу́мна.

Же́ртвы пренепоро́чныя я́ко вои́стинну/ и заколе́ния Госпо́дня ве́рою яви́стеся, о́троцы святи́и.

Богоро́дичен: Не пре́зри, моля́щи о нас, при́сно Благослове́нная,/ изба́витися вся́кия скорби, Чи́стая.

Песнь 5

Ирмо́с: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, Бо́га не знаем.

Нечу́вственно пе́рвее, о́бщею уме́рше на земли́ сме́ртию,/ па́че естества́ воскресну́сте а́бие,/ уверя́юще я́ве, Ефе́сстии о́троцы, ме́ртвых воскресе́ние.

Освя́щшеся Бо́гови испове́данием и́стинныя ве́ры,/ я́ко страда́льцы зако́ннии Госпо́дни,/ изба́влени бы́сте, му́дрии, темни́ц и ран и венцы́ прия́сте.

Победи́вше тве́рдо и́дольскую лесть, сла́внии му́ченицы,/ и от нечести́вых ересе́й уче́ния,/ сохраня́йте при́сно испове́дающия ме́ртвых воскресе́ние.

Богоро́дичен: Во двух естества́х и Ипоста́си еди́ней бысть,/ соверше́н сый челове́к неслия́нно и соверше́н Бог,/ рожде́йся от Святы́я Ма́тере Пресу́щный.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Боже́ственныя Прему́дрости равночи́сленнии столпи́,/ да восхва́лятся святи́и о́троцы седмь,/ сло́весы́, я́ко ка́мением, сокру́шше мучи́телей безбо́жное повеле́ние.

Зако́ном Боже́ственнаго промышле́ния соблюда́еми,/ гото́вое прия́сте погребе́ние пеще́ру,/ в не́йже ме́ртви и нетле́нни, многоле́тни, святи́и, яви́стеся.

Нетле́ния воста́сте свиде́тели,/ ве́ру отгоня́юще тлетво́рную и ме́ртвую/ и Бо́гу моля́щеся о наде́ющихся воскресе́ния.

Богоро́дичен: Ны́не естество́ же́нское возра́довася,/ ны́не печа́ль преста́, ра́дость же процвете́,/ я́ко Мари́я роди́ ра́дость, Спа́са Христа́ Бо́га.

Конда́к, глас 4.

Подо́бен: Вознесы́йся:

Ми́ра су́щая тле́нная презре́вше/ и нетле́нныя да́ры прие́мше,/ уме́рше, кроме́ тле́ния пребы́ша./ Те́мже востаю́т по мно́гих ле́тех,/ все погре́бше лю́тых неве́рие,/ я́же во хвале́нии днесь, ве́рнии, восхваля́юще, Христа́ воспои́м.

Песнь 7

Ирмо́с: Те́лу злато́му прему́дрыя де́ти не послужи́ша,/ и в пла́мень са́ми поидо́ша,/ и бо́ги их обруга́ша,/ среди́ пла́мене возопи́ша, и ороси́ я́ А́нгел:/ услы́шася уже уст ва́ших моли́тва.

Прия́телища Бо́жия чи́ста и избра́нна о́троцы яви́шася:/ и́миже преда́ния ересе́й от Це́ркве отго́нятся и правосла́вие сия́ет,/ я́ко есть воскресе́ние вся́кой души́ же и пло́ти, я́коже роди́ся.

Я́ко су́ще тве́рди, пре́жде сме́рти вои́стинну/ во страда́нии свое́м святи́и о́троцы а́бие яви́шася/ и по уме́ртвии жи́ви, сла́вою содержи́ми Боже́ственною,/ благоче́стно уве́ривше собо́ю и́стинное воскресе́ние.

Душа́м вку́пе и телесе́м чу́вственным бу́дет воскресе́ние,/ я́коже бо не мо́щно без те́ла души́ в мир приити́,/ си́це ни телеси́ без души́, – прехва́льнии глаго́лаху, –/ или́ просла́вится душа́, или́ посрами́тся.

Богоро́дичен: Ро́ждшая Бо́га Спа́са всех, Мари́е,/ отча́янных еси́ исправле́ние, гре́шных обновле́ние,/ и ненаде́жных наде́жда, и пою́щих по́мощь:/ благослове́н Бог оте́ц на́ших.

Песнь 8

Ирмо́с: В пещи́ о́трочестей прообрази́л еси́ иногда́ Твою́ Ма́терь, Го́споди,/ о́браз же сия́ из огня́ изыма́ше, неопа́льно входя́щая,/ Ю́же пое́м, я́вльшуюся Тобо́ю конце́м днесь,/ и превозно́сим во вся ве́ки.

Ко́рень го́рести нечести́вых, возра́стший лю́те, Боже́ственнии о́троцы,/ посе́кше пре́лести е́реси, приноша́ют плод ве́ры,/ жи́вы, и погре́бшеся ве́рно, и воскре́сше.

Ефе́сских нача́льников, о́троцы святи́и седмь и страстоте́рпцы,/ Христо́ве Це́ркви и Ца́рству ве́рному, Боже́ственное яви́стеся утвержде́ние,/ его́же превозно́сим во вся ве́ки.

Тве́рди я́вльшеся на земли́ и равночи́сленнии показа́вшеся звезда́м,/ неле́стное ше́ствие Боже́ственныя ве́ры о́троцы творя́ще, взыва́ху:/ Тя превозно́сим, Христе́, во ве́ки.

Богоро́дичен: Никто́же поги́бе, Чи́стая, ве́ры наде́жду име́я на Тя, правосла́вно, Ма́ти Бо́жия,/ то́кмо за́вистию отмета́ющиися Твоего́ не покланя́тися зра́ка воображе́нию.

Песнь 9

Ирмо́с: Я́же пре́жде со́лнца свети́льника Бо́га возсия́вшаго,/ пло́тски к нам прише́дшаго, из боку́ Деви́чу,/ неизрече́нно воплоти́вшая, Благослове́нная, Всечи́стая,/ Тя, Богоро́дице, велича́ем.

Бога́тство чуде́с и Боже́ственных тайн открове́ние святы́х яви́ся ны́не воскресе́ние:/ и́же бо иногда́ есте́ственною пло́тию уме́рше сме́ртию,/ нетле́нно ны́не воскресо́ша, оде́яни, я́коже не уме́рше.

Зна́ния сокро́вище и ве́ры тве́рдое огражде́ние святы́х дете́й яви́ся пеще́ра,/ провозвеща́я бу́дущее всех воскресе́ние:/ не четверодне́внаго Ла́заря, но ве́чныя воскреси́ мертвецы́.

Венце́м муче́ния, пострада́вше, зако́нно оде́ястеся, о́троцы седмь,/ столпы́ прему́дрости Бо́жия,/ и уче́нием правосла́вия воста́ние яви́сте,/ я́ко Це́ркви побо́рницы и моли́твенницы воспева́ющих вас.

Богоро́дичен: Те́ло и ду́шу Твою́ нескве́рно Бо́гу соблюла́ еси́, Чи́стая,/ Царь же возжела́ Твоея́ добро́ты, Христо́с,/ и Ма́терь Своего́ воплоще́ния показа́, Мари́е пресла́вная,/ спасе́ние мне при́сно подава́я.

Свети́лен.

Подо́бен: Жены́, услы́шите:

Ору́жием Честна́го Твоего́ Креста́ воору́жшеся, страстоте́рпцы Твои́, Сло́ве,/ сопроти́вныя си́лы тве́рдо победи́ша/ и с Тобо́ю, Христе́ мой, всех Царю́, Ца́рствуют вку́пе.

Богоро́дичен:

Вои́стинну Богоро́дицу, Тя испове́дуем, Влады́чице, Тебе́ ра́ди спа́сшиися,/ и́бо Бо́га неизрече́нно роди́ла еси́, разо́ршаго Кресто́м смерть,/ к себе́ же привле́кша собо́ры,/ с ни́миже Тя восхваля́ем.

На стихо́вне Окто́иха.

Сла́ва, и ны́не, Богоро́дичен.

Моли́тва

О пречу́днии святи́и седмичи́сленнии о́троцы, Ефе́са гра́да похвало́ и всея́ вселе́нныя упова́ние! Воззри́те с высоты́ Небе́сныя сла́вы на ны, любо́вию па́мять ва́шу чту́щия, наипа́че же на младе́нцы христиа́нския, ва́шему заступле́нию от роди́телей свои́х препоруче́нныя. Низведи́те на ня благослове́ние Христа́ Бо́га, ре́кшаго: оста́вите дете́й приходи́ти ко Мне. Боля́щия у́бо от них исцели́те, скорбя́щия уте́шите, сердца́ их в чистоте́ соблюди́те, кро́тостию испо́лните я́ и в земли́ серде́ц их зерно́ испове́дания Бо́жия насади́те и укрепи́те, во е́же от си́лы в си́лу им возраста́ти. И всех нас, святе́й ико́не ва́шей предстоя́щих, мо́щи же ва́ша с ве́рою лобыза́ющих и те́пле вам моля́щихся, сподо́бите Ца́рствие Небе́сное улучи́ти и немо́лчными гла́сы ра́дования та́мо прославля́ти великоле́пое И́мя Пресвяты́я Тро́ицы, Отца́ и Сы́на и Свята́го Ду́ха, во ве́ки веко́в. Ами́нь.

Пра́зднование Пресвяте́й Богоро́дицы ра́ди Ея́ ико́ны, имену́емыя «Каза́нская-Пе́нзенская»