Стихи́ры святи́теля, на 6, глас 4.

Подо́бен: Я́ко до́бля:

Сия́нии духо́вными/ просвети́в твой ум,/ светолу́чно со́лнце был еси́,/ я́коже лучи́, уче́ния/ во вся концы́ простира́я,/ и ве́рных озаря́я/ исполне́ние, преблаже́нне,/ и отгоня́я тьму, Богоно́се, ересе́й/ си́лою от Де́вы Возсия́вшаго.

Благосказа́нием слове́с твои́х,/ свяще́нне Кири́лле,/ Це́рковь вся украша́ется,/ и благоче́стно удобря́ется кра́сными добро́тами,/ и почита́ет свяще́нно/ твою́ святу́ю и благонаро́читую па́мять,/ правосла́вных похвало́,/ отце́в верхо́вниче, и́же на собо́ре Всесвяты́я побо́рниче.

О́гненными твои́ми уче́нии/ ересе́й вся́ка хвра́стная/ попаля́ется вещь, прему́дре,/ разу́мными глубина́ми/ погружа́ется во́инство/ неповину́ющихся злочести́вых,/ свяще́нне Кири́лле,/ уче́ньми украша́ется ве́рных всегда́ Це́рковь,/ велегла́сно чту́щи тя.

Сла́ва, глас 6:

Благи́й ра́бе ве́рный,/ де́лателю виногра́да Христо́ва,/ ты и тяготу́ дневну́ю поне́сл еси́,/ ты и да́нный тебе́ тала́нт возрасти́л еси́,/ и по тебе́ прише́дшим не зави́дел еси́./ Те́мже врата́ Небе́сная отверзо́шася тебе́,/ вни́ди в ра́дость Го́спода твоего́/ и моли́ о нас, Кири́лле, о́тче наш.

И ны́не, пра́здника или Богоро́дичен.

Крестобогоро́дичен.

Подо́бен: Всю отложи́вше:

А́гнца Своего́/ А́гница нескве́рная дре́вле/ и непоро́чная Влады́чица/ на дре́ве Кре́стнем я́ко узре́,/ ма́тереки восклица́ше/ и, дивя́щися, вопия́ше:/ Ча́до Сладча́йшее,/ что зре́ние сие́,/ но́вое и пресла́вное?/ Ка́ко сонм безблагода́тный суди́щу Пила́тову предаде́ Тя/ и осужда́ет на смерть/ Живота́ вся́ческих?/ Но воспева́ю Твое́ неизрече́нное,/ Сло́ве, снизхожде́ние.

На стихо́вне Окто́иха.

Сла́ва, глас 6:

Челове́че Бо́жий и ве́рный ра́бе,/ слуго́ Госпо́день, му́жу жела́ний,/ сосу́де избра́нный,/ сто́лпе и утвержде́ние Це́ркве,/ Ца́рствия насле́дниче,/ не премолчи́, вопия́ за ны ко Го́споду.

И ны́не, пра́здника или Богоро́дичен.

Крестобогоро́дичен.

Подо́бен: Тридне́вен:

Ви́дящи Тя распина́ема, Христе́,/ Тебе́ Ро́ждшая вопия́ше:/ что́ стра́нное, е́же ви́жу, та́инство, Сы́не Мой?/ Ка́ко на Дре́ве умира́еши, пло́тию пове́шен,/ жи́зни Пода́телю?

Тропа́рь, глас 8:

Правосла́вия наста́вниче,/ благоче́стия учи́телю и чистоты́,/ вселе́нныя свети́льниче,/ архиере́ов Богодухнове́нное удобре́ние,/ Кири́лле прему́дре,/ уче́ньми твои́ми вся просвети́л еси́,/ цевни́це духо́вная,/ моли́ Христа́ Бо́га спасти́ся душа́м на́шим.

НА У́ТРЕНИ

О́ба кано́на Окто́иха и свята́го на 6, его́же краегране́сие: Зре́ний Кири́лл Боже́ственных цевни́ца. Феофа́ново, глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

От Бо́га светода́тельну благода́ть, Кири́лле, прие́м и све́тел свети́льник я́влься,/ слове́сныя облиста́л еси́ нам лучи́ па́мятию твое́ю,/ я́ко да досто́йно тя воспо́ем.

Испо́лнился еси́ светоявле́ния, Кири́лле прему́дре, духо́внаго,/ я́ко за́поведей Христо́вых храни́тель, от страсте́й очище́н,/ Пребоже́ственныя был еси́ вои́стинну Тро́ицы жили́ще.

Я́ко ре́вности и дерзнове́ния испо́лнен, Кири́лле сла́вне,/ богобо́рная вся нело́жно языковре́дия изобличи́л еси́ злочести́вых ересе́й,/ по пра́вей ве́ре боря́ся.

Богоро́дичен: Исцели́ла еси́ сокруше́ние, Всенепоро́чная, челове́чества,/ Тво́рца ро́ждшая всех,/ возве́дшаго ны, низве́рженныя паде́нием пра́отчим, Богоневе́сто.

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Укрепля́емь о Христе́,/ ко́зни лука́ваго зми́я тве́рдым умо́м, Кири́лле,/ я́коже тка́ние паучи́нное, расто́ргнул еси́.

Ти́ну страсте́й от души́ оттря́сл еси́, Кири́лле,/ низло́ж вся́каго по́мысла возноше́ние,/ на Христа́ превозноша́ющееся.

Я́ко благополу́чен страда́лец, о́тче,/ уклони́лся еси́ тве́рдо вся́каго плотска́го сладостра́стия,/ я́ко тще́тнаго и пакостнотво́рнаго.

Богоро́дичен: Еди́ну в жена́х Тя, Благослове́нную,/ я́ко Бо́жие селе́ние,/ вееблаголе́пно вси ра́достию просла́вим.

Седа́лен, глас 3.

Подо́бен: Красоте́ де́вства:

Столп и же́ртва Це́ркве Христо́вы, о́тче, быв,/ сию́ непоколеби́му от искуше́ний лука́ваго прему́дро соблю́л еси́:/ все бо Несто́риево злоде́йство разори́л еси́/ и Богома́терь Богоро́дицу пропове́дал еси́./ Те́мже тя, соше́дшеся, почита́ем, Кири́лле Богоблаже́нне.

Слава, и ны́не, пра́здника или́ Богоро́дичен:

Я́ко невозде́ланная, Де́во, лоза́, красне́йший Грозд прозябла́ еси́,/ источа́ющ нам вино́ спасе́ния, всех веселя́щее ду́ши же и телеса́./ Те́мже, я́ко вину́ Тя до́брых блажа́ще при́сно, со А́нгелом вопие́м Ти:/ ра́дуйся, Благода́тная.

Крестобогоро́дичен:

Неискусобра́чная Чи́стая и Ма́ти Твоя́, Христе́,/ ви́дящи Тя ме́ртва ви́сяща на Кресте́, ма́терски пла́чущи, глаго́лаше:/ что́ Тебе́ воздаде́ евре́йский беззако́нный собо́р и неблагода́рный,/ и́же мно́гих и вели́ких Твои́х, Сы́не Мой, даро́в наслади́выйся?/ Пою́ Твое́ Боже́ственное снизхожде́ние.

Песнь 4

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Победи́вша стра́сти душетле́нныя/ и помы́сл удержа́вша плотски́й, Богоно́се Кири́лле, ви́дев, Христо́с/ Боже́ственныя тя Це́ркве председа́теля, о́тче, поста́ви.

Насле́довав, я́ко сын возлю́блен, оте́ческую Ма́ркову доброде́тель,/ и престо́ла был еси́ прее́мник,/ Боже́ственнаго стопа́м евангели́ста после́дуя.

От Христа́ у́бо, я́ко овча́, упасе́н быв,/ я́коже па́стырь, упа́сл еси́ ста́до, о́тче, словесы́ душепита́тельными твои́ми,/ я́ко трава́ми и цветы́, бога́тно напита́я благода́ти.

Богоро́дичен: Воплоще́нно Безпло́тное пре́жде ро́ждши Сло́во Бо́жие,/ Всепе́тая Обра́дованная, мир обнови́ла еси́./ Те́мже Тя, Богоневе́сто, ве́рою правосла́вною пропове́дуем.

Песнь 5

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Тече́нию вои́стинну зе́льному, наводня́ющему ре́ки,/ твое́, о Кири́лле, уподо́бися сло́во,/ злосла́вных отвраща́я ухищре́ние.

Ра́вне ме́рзкое А́риево разделе́ние, о Кири́лле,/ скве́рное же Саве́ллиево слия́ние/ из глубины́ изве́ргл еси́.

Словеса́ богатотво́рная, я́ко зла́то, оста́вил еси́, о Кири́лле,/ сокро́вища же, я́коже ка́мения честна́я, твоя́ Це́ркви Христо́ве.

Богоро́дичен: Да кропи́т Не́бо весе́лие и благода́ть на земли́:/ возда́ст бо ей ны́не весе́лие в высоту́, еди́ну Богома́терь.

Песнь 6

Ирмо́с: Пожру́ Ти со гла́сом хвале́ния. Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Клеща́ми Серафи́м проро́ку угль,/ Це́ркви же Христо́ве твои́ма рука́ма подае́ши, священнотаи́нниче,/ е́же от Боже́ственнаго огня́ у́глие очище́ния.

Единопреде́льныя, я́ко Сампсо́н, иноплеме́нники не потреби́л еси́,/ иноро́дныя же вся иносла́вных уче́ния низложи́л еси́/ и держа́ву правосла́вным дал еси́, Кири́лле.

Собо́ру Богоизбра́нному я́ве предводи́тельствовав,/ злоче́стие Несто́риево, христобо́рную де́рзость, о́тче, низложи́л еси́,/ ре́вностию дыха́я по и́стинней Богома́тери.

Богоро́дичен: Ра́зума нетле́ннаго Плод прозябла́ еси́, Богороди́тельнице, ми́ру присноживо́тный,/ Хода́тай нетле́ния явля́емь ве́рою и любо́вию пою́щих Тя.

Кондак, глас 6.

Подо́бен: Е́же о нас:

Бе́здну нам уче́ний богосло́вия источи́л еси́/ я́ве от исто́чник Спа́совых,/ е́реси погружа́ющую, блаже́нне Кири́лле,/ и ста́до невреди́мо от треволне́ний спаса́ющую,/ страна́м бо всем наста́вник, преподо́бне,/ я́ко Боже́ственная явля́я.

И́кос:

Красно́ при у́трени показу́ется вельми́ со́лнце, су́що светоно́сно,/ тьма отгоня́ется и луна́ охужда́ется, нощь бо не состои́тся;/ уясня́ет день, просвеща́ет возду́х, не́бо красно́ показу́ет нам,/ зе́млю удобря́я, цвето́м творя́ израще́ние,/ мо́ре же облиста́ет и вку́пе весь украша́ет мир,/ е́же во всем сего́ светле́йши Кири́лл,/ его́же му́драя уче́ния спаса́ют поднебе́сную./ Озаря́ет бо той ве́рных ду́ши и побежда́ет благоче́стно е́реси при́сно,/ страна́м бо той наста́вник, я́ко Боже́ственная явля́я.

Песнь 7

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

В Сина́йстей горе́, во мрак дре́вле вшед,/ зако́н прия́т, блаже́нне Кири́лле, Моисе́й, убива́ющий пи́сменем,/ ты же разгну́л еси́ сокрове́нную добро́ту Ду́ха.

Законоположе́ния гада́ньми, я́коже младе́нцем, пе́рвее, о́тче, да́ннаго покрыва́лу покрове́ния,/ я́коже ши́пки, разуме́ния ты откры́л еси́,/ сказа́в о́бразы я́вственнейше.

В несли́тном соедине́нии Боже́ственном и несеко́мем я́ве, о́тче, разделе́нии/ три у́бо богосло́вствуяй Ипоста́си, рекл еси́, Кири́лле,/ непреме́нныя же в Существе́ еди́ном и Божестве́.

Богоро́дичен: Ви́деша А́нгели, Богома́ти, стра́нная рождество́м Твои́м:/ естество́ тле́нное ро́да земна́го/ к нетле́нному па́ки теку́ще житию́ и сла́ве Небе́сней.

Песнь 8

Ирмо́с: Ру́це распросте́р, Дании́л/ львов зия́ния в ро́ве затче́,/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.

Я́ко волна́ морска́я вои́стинну, в тебе́ истече́ прему́дрости исто́чник,/ и́бо приснотеку́щия потеко́ша ре́ки от чре́ва твоего́, о́тче,/ уче́ний благочести́вых, я́коже прорече́ Христо́с/ Прехо́дят бо песка́ твоя́ словеса́ Богоизбра́нная.

Па́стырь и учи́тель мудр Це́ркве яви́лся еси́,/ о́ба, Кири́лле, я́ве разгну́л еси́, преподо́бне, заве́ты, я́ко бо анки́ру  ,/ и оте́ческая насле́дия, твоя́ иму́щи словеса́, вопие́т:/ благослови́те, вся дела́ Госпо́дня, Го́спода.

Сло́ва, вопло́щшагося нас ра́ди, Всехитреца́,/ ты неизрече́нному науча́еши соедине́нию, Кири́лле,/ неразде́льное, неслия́нное, по ко́ейждо во́ли ра́вне уклони́л еси́, вопия́:/ благослови́те, вся дела́ Госпо́дня, Го́спода.

Богоро́дичен: Естество́м непристу́пный всю́ду,/ Сын и Сло́во Бо́жие в Тя всели́ся, Чи́стая,/ и, обо́лкся, Пречи́стая, в на́ше существо́, я́ко Милосе́рд,/ яви́ся благопристу́пен пло́тию, и водвори́ся с на́ми, вопию́щими:/ благослови́те, вся дела́ Госпо́дня, Го́спода.

Песнь 9

Ирмо́с: Е́ва у́бо неду́гом преслуша́ния/ кля́тву всели́ла есть,/ Ты же, Де́во Богоро́дице,/ прозябе́нием чревоноше́ния ми́рови благослове́ние процвела́ еси́./ Тем Тя вси велича́ем.

Возноше́ние на Христо́в взе́млющееся ра́зум и Сего́ Богома́терь, Кири́лле,/ вся́ку держа́ву низложи́л еси́ Несто́рия безбо́жнаго,/ сыно́внюю дво́ицу, та́коже и слия́ние безгла́вных есте́ств.

Си́лою ра́зума и просвеще́нием благода́ти/ Тро́ицу Единосу́щную, Сы́на же воплоще́нна Бо́га богосло́вил еси́, блаже́нне,/ яви́в же ся Богоро́дицы побо́рник, в Вы́шних ны́не прославля́ешися.

Свы́ше ны, певцы́, приснопа́мятна, назира́еши, о́тче, ми́лостивно,/ побе́ды во́инству подая́ и возвыша́я моли́твами твои́ми рог правосла́вных,/ уясня́я же твою́ па́мять велича́ющия.

Богоро́дичен: Утесня́емь паде́нии мно́гими, Препе́тая, и лю́тостию бед,/ ны́не Тебе́ хвале́ний же́ртву приноша́ю и приле́жно взыва́ю Ти:/ Свята́я Богоро́дице, помози́ ми,/ Тя бо сла́вя, песнь скончава́ю.

Свети́лен.

Подо́бен: Ученико́м:

Чу́вство и ра́зум премину́вшаго и глубине́ Ду́ха нау́чшася,/ Боже́ственнаго тайнопи́сца Пребоже́ственныя Тро́ицы воспое́м,/ я́ко святи́теля Госпо́дня и побо́рника благоче́стия.

Слава, и ны́не, пра́здника или Богоро́дичен:

И́же Твоего́, Непоро́чная Богоро́дице, о́браза не целу́ет с любо́вию,/ во огнь вмета́ется гее́нский, я́коже безу́мный Несто́рий./ Мы же Тя, Пресвята́я, облобыза́ем любо́вию.

На стихо́вне Окто́иха.

Сла́ва, глас 6:

Насле́дниче Бо́жий,/ соприча́стниче Христо́в,/ служи́телю Госпо́день,/ Кири́лле, о́тче наш,/ по и́мени твоему́ тако и житие́ твое́:/ спросия́ бо седи́не ра́зум,/ свиде́тельствоваше све́тлость лица́ твоего́ душе́вное незло́бие,/ изве́ствоваше кро́тость сло́во молчали́вое./ Жизнь твоя́ сла́вна и успе́ние со святы́ми,/ моли́ о душа́х на́ших.

И ны́не, Богоро́дичен или́ Крестобогоро́дичен.

Подо́бен: Тридне́вен:

Предстоя́щи у Дре́ва иногда́ во вре́мя распя́тия Де́ва/ с де́вственным ученико́м/ и пла́чущи, вопия́ше:/ увы́ Мне, ка́ко стра́ждеши,/ всех, Христе́, Сый безстра́стие?

НА ЛИТУРГИ́И

Блаже́нны пра́здника или́ Окто́иха и свята́го, песнь 3-я. Проки́мен, глас 1: Уста́ моя́ возглаго́лют прему́дрость: Стих: Услы́шите сия́, вси язы́цы: Апо́стол ко Евре́ем, зача́ло 334. Аллилу́ия, глас 2: Уста́ пра́веднаго поуча́тся прему́дрости: Стих: Зако́н Бо́га его́ в се́рдце его́. Ева́нгелие от Матфе́я, зача́ло 11. Прича́стен: В па́мять ве́чную бу́дет пра́ведник:

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 1.

Подо́бен: Всехва́льнии му́ченицы:

О́тче блаже́нне Кири́лле,/ в моли́твах, и бде́ниих, и в воздержа́нии приле́жном/ те́ло с душе́ю Го́сподеви чи́сто предста́вил еси́/ и отту́ду жили́ще и дом Ду́ха Пресвята́го был еси́./ Те́мже, я́ко преподо́бным сожи́тель и пра́ведным,/ вене́ц от руки́ Госпо́дни досто́йно прия́л еси́./ Его́же моли́, Богому́дре,/ дарова́ти душа́м на́шим/ мир и ве́лию ми́лость.

И́же непра́ведно и разбо́йнически по́сланный/ тебе́ оскорби́ти, преподо́бне,/ ви́де Боже́ственную си́лу,/ того́ напра́сное суровство́ возбраня́ющу,/ отону́дуже позна́ свое́ безчелове́чное согреше́ние/ и к тебе́ притече́ покаян́ием,/ ты же ми́лостивно его наказа́л еси́./ Богоблаже́нне, о нас моли́,/ дарова́ти душа́м на́шим/ мир и ве́лию ми́лость.

О́тче Кири́лле,/ и́же иногда́ челове́ка, вра́жия сове́та послу́шавша/ и огне́м па́кость хотя́ща тебе́ сотвори́ти,/ но по́мощь Бо́жию, с тобо́ю быва́ющую, позна́вша/ и к тебе́ прибе́гша покая́нием,/ любо́вию прия́л еси́ и, ми́лостивно наказа́в,/ твоему́ ста́ду о́наго сочта́л еси́./ Те́мже моли́ дарова́ти душа́м на́шим/ мир и ве́лию ми́лость.

Сла́ва, глас 6:

Преподо́бне о́тче,/ явле́нием Бо́жия Ма́тере наставля́емь/ и Тоя́ сия́ньми озаря́емь,/ пусты́ню, явле́нную тебе́ от Тоя́, дости́гл еси́/ и, в ней трудолю́бне подвиза́вся,/ вшел еси́ в незаходи́мый свет ра́зума,/ иде́же мно́ги ревни́тели житию́ твоему́ сотвори́л еси́./ Того́ ра́ди и по сме́рти дарова́ния прия́т бе́сы прогоня́ти,/ и исцеле́ния разли́чных неду́гов челове́ком да́руеши,/ ве́рою от души́ притека́ющим к хра́му твоему́ всечестно́му,/ и мо́лишися спасти́ почита́ющих любо́вию па́мять твою́.

И ны́не, Богоро́дичен, а́ще Пятдеся́тница, и ны́не, пра́здника.

На стихо́вне стихи́ры, глас 2.

Подо́бен: До́ме Евфра́фов:

Я́ко преходя́щую жизнь,/ я́же на земли́, преоби́дел еси́, блаже́нне,/ и та́мо Боже́ственныя улучи́ти сподо́бився,/ тоя́ сия́ние/ прия́л еси́, Богоно́сне.

Стих: Честна́ пред Го́сподем/ смерть преподо́бных Его́.

Христо́вы ра́ди любве́,/ преподо́бне Кири́лле,/ пло́ти рачи́тельное умертви́л еси́ мудрова́ние/ и ду́шу, свобо́дну от страсте́й,/ Бо́гу предста́вил еси́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Бо́дренными моли́твами/ и сле́зными исто́чники/ Це́ркви ве́рных/ обогати́л еси́,/ Богоблаже́нне.

Сла́ва, и ны́не, Богоро́дичен:

Вы́шнии Тя ли́цы,/ Богоро́дице Де́во,/ пою́т с ни́жними,/ сла́вяще непреста́нно/ Рождество́ Твое́ Пречи́стое.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Пое́м Блаже́н муж: Стихи́ры на 8. Глас 4.

Подо́бен: Зва́нный свы́ше:

Егда́ Пречи́стыя гла́сом/ по́зван быв Богома́тере,/ тогда́ вся су́щая, я́ко не су́щая, преоби́дел еси́/ и в пусты́ню да́льнюю всели́лся еси́, преподо́бне,/ иде́же и теле́сная мудрова́ния/ по́стническими труды́ духу повину́л еси́/ и, стада́ учени́к твои́х в той умно́жив,/ Христу́ приве́л еси́./ Того́ моли́, блаже́нне Кири́лле,/ спасти́ и просвети́ти ду́ши на́ша.

Егда́ Пречи́стыя глас/ услы́шал еси́, пребога́те,/ тогда́ стремле́ние плотско́е/ обузда́л еси́, преподо́бне о́тче,/ и, я́ко Илия́ дре́вле, ум очи́щ,/ в пусты́ню всели́лся еси́,/ и та́мо непреста́нными моли́твами/ к Бо́гу прибли́жился еси́,/ стопа́м вели́каго Анто́ния после́дуя./ Тем и по сме́рти чудесы́ сия́я,/ Христу́ моли́ся/ спасти́ и просвети́ти ду́ши на́ша.

Боже́ственный глас/ егда́ услы́шал еси́, блаже́нне Кири́лле,/ тогда́, крест твой взем,/ после́довал еси́ Христу́/ и, любо́вию к Нему́ распала́емь,/ кро́ток и смире́н се́рдцем был еси́./ Те́мже и кро́тких селе́ния насле́довал еси́/ и отту́ду источа́еши/ исто́чник исцеле́ний чту́щим тя./ Христу́, Ему́же рабо́тал еси́,/ Тому́ моли́ся/ спасти́ и просвети́ти ду́ши на́ша.

Ины стихи́ры, глас 8.

Подо́бен: Что вы нарече́м:

Что тя нарече́м, Кири́лле?/ Реку́, духо́вных вод наполня́ему/ и напоя́ющу жа́ждущих непло́дствующая сердца́;/ исто́чника, источа́юща всегда́ исцеле́ния ве́рным;/ ча́шу, Боже́ственное вино́ иму́щу;/ свети́льника, оте́чество твое́ просвеща́юща./ Мно́га ти имена́/ и бо́льша дарова́ния,/ моли́ спасти́ся душа́м на́шим.

Что тя нареку́, Кири́лле пречу́дне?/ Ученика́, я́ко Госпо́день учени́к был еси́;/ учи́теля, я́ко мно́гих учени́к ко Христу́ приве́л еси́;/ пусты́ни жи́теля, я́ко ту град сотвори́л еси́;/ граждани́на, и́бо в Небе́сный град всели́лся еси́;/ кро́ткаго, я́ко Христа́, кро́ткаго Пастьфенача́льника,/ кро́ткое овча́ был еси́./ Его́же моли́/ спасти́ся душа́м на́шим.

Что тя, чу́дне Кири́лле, имену́ем?/ Прему́драго, Христа́ бо ра́ди юро́дство творя́ был еси́;/ беззло́бива, я́ко незло́бив ко озло́бившим тебе́ был еси́;/ стра́нных прии́мника, я́ко Авраа́мле страннолю́бив стяжа́л еси́;/ Исаа́ка, я́ко сам себе́ же́ртву прине́сл еси́;/ чудоде́йственника, я́ко чуде́с дарова́ния от Бо́га прия́л еси́./ Мно́га именова́ния твоя́,/ бо́льша же даро́в прия́тия,/ моли́ спасти́ся душа́м на́шим.

Сла́ва, глас 6:

Е́же по о́бразу соблю́д невреди́мо,/ ум влады́ку на стра́сти па́губныя по́стнически поста́вив,/ во еже по подо́бию, я́ко мо́щно, возше́л еси́,/ му́жески бо естество́ пону́див,/ потща́лся еси́ ху́ждшее покори́ти лу́чшему/ и плоть порабо́тити ду́ху./ Те́мже мона́шествующих яви́лся еси́ верх,/ жи́тель пусты́нный, благотеку́щих обучи́тель,/ пра́вило доброде́тели изве́стнейшее./ И ны́не на Небесе́х зерца́лом разре́шшимся,/ о́тче наш Кири́лле,/ чи́сте зри́ши Святу́ю Тро́ицу,/ моля́ся несре́дственне о и́же ве́рою и любо́вию чту́щих тя.

И ны́не, Богоро́дичен, а́ще Пятдесятница, и ны́не, пра́здника.

Вход. Проки́мен дне. Чте́ния 3 (зри 1 июня)

На лити́и стихи́ры, глас 2:

В ти́хое и небу́рное приста́нище безмо́лвия/ вшел еси́, преподо́бне,/ и та́мо Влады́чицу Богоро́дицу сподо́бился еси́ ви́дети,/ и сла́дкий глас, я́ко Авраа́м, у слы́шав,/ изы́ти отту́ду глаго́лющ/ и ити́ та́мо, иде́же ме́сто ти угото́вах,/ и па́ки послу́шав,/ Боже́ственных дарова́ний та́мо сподо́бился еси́/ бе́сы прогоня́ти и боля́щия исцеля́ти./ Те́мже мо́лимся и нас душе́вных страсте́й изба́вити,/ соверша́ющих любо́вию честно́е твое́ успе́ние.

Я́ко пресве́тлым венце́м пресла́вно/ от вседержи́тельныя десни́цы Вы́шняго венча́вся,/ Тому́, блаже́нне Кири́лле преподо́бне,/ со дерзнове́нием мно́гим предстоя́,/ приле́жно моли́ся о почита́ющих жизнь твою́/ и пречестно́е твое́ успе́ние ве́рно сла́вящих,/ вся́каго вре́да лука́ваго изба́витися/ свяще́нному ста́ду твоему́/ и душа́м на́шим низпосла́ти мир и ве́лию ми́лость.

Сла́ва, глас 8:

Исцеле́ния оби́льно честны́я мо́щи твоя́/ всегда́ источа́ют ве́рою приходя́щим,/ Богоно́се Кири́лле,/ благоуха́ния всех исполня́юще/ и тьму бесо́вскую дале́че отгоня́юще,/ све́том благоче́стия просвеща́юще ве́рных./ Те́мже мо́лим тя, раби́ твои́,/ вся́каго наве́та вра́жия нас изба́вите,/ я́ко да твой пресве́тлый пра́здник благоче́стно воспева́ем псало́мски/ и, сла́вное успе́ние днесь пе́сньми торжеству́юще,/ прославля́ем тебе́ та́ко просла́вльшаго,/ еди́наго во святы́х Бо́га на́шего.

И ны́не, Богоро́дичен, а́ще Пятдеся́тница, и ны́не, пра́здника.

На стихо́вне стихи́ры, глас 1.

Подо́бен: Небе́сных чино́в:

Блиста́нием Боже́ственнаго све́та,/ преподо́бне о́тче, при́сно озаря́емь,/ весь светови́ден был еси́./ Мно́гими укра́шен от Бо́га дарова́ньми,/ во оби́тели дости́гл еси́ Небе́сныя,/ в ни́хже мо́лишася о и́же ве́рою пою́щих тя.

Стих: Честна́ пред Го́сподем/ смерть преподо́бных Его́.

Водвори́лся еси́ в пусты́ню безмо́лвия, блаже́нне,/ и та́мо Небе́сное бога́тство стяжа́л еси́, преподо́бне Кири́лле,/ препроводи́в бо твое́ житие́ во умиле́нии и слеза́х./ Те́мже ра́дости и све́та сын был еси́,/ со А́нгелы всегда́ веселя́ся,/ моли́ о чту́щих тя.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ста́до, еже стяжа́л еси́ труды́ твои́ми, о́тче,/ не оста́ви, но посеща́й, преподо́бне,/ и, я́ко жив, с на́ми водворя́яся,/ та́ко и ны́не с преподо́бными Влады́це предстоя́,/ моли́ изба́витися всем вся́каго гне́ва и преще́ния/ и бу́дущаго гре́шным томле́ния.

Слава, глас 6:

Тезоимени́тое зва́ние Пречи́стыя я́ко услы́шав,/ по́стническими труды́ себе́ обложи́л еси́,/ ми́ру и страсте́м себе́ умертви́в,/ со Христо́м изво́лил еси́ жи́ти./ Тем и по сме́рти исцеле́ния источа́ет гроб твой,/ преподо́бне Кири́лле,/ ве́рою притека́ющим./ Но, я́ко име́я дерзнове́ние ко прославля́емому во святы́х Христу́,/ моли́ся о и́же ве́рою соверша́ющих па́мять твою́ честну́ю/ и чту́щих труды́ твоя́,/ я́же за Христа́ претерпе́л еси́,/ и нам улучи́ти дерзнове́ние в День Суда́, мо́лимся.

И ны́не, Богоро́дичен, а́ще Пятдеся́тница, и ны́не, пра́здника.

Тропа́рь, глас 1:

Я́ко крин, в пусты́ни дави́дски процве́л еси́, о́тче Кири́лле,/ злостра́стия те́рние искореня́я,/ и собра́л еси́ в ней учени́к мно́жество,/ стра́хом Бо́жиим и уче́нием твои́м наставля́емых,/ и́хже и до конца́, я́ко чадолюби́вый оте́ц,/ не оста́вил еси́, посеща́я, да вси вопие́м:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Сла́ва, и ны́не, пра́здника или́ Богоро́дичен.

НА У́ТРЕНИ

На Бог Госпо́дь: тропа́рь, два́жды, и Богоро́дичен.

По 1-й стихоло́гии седа́лен, глас 3.

Подо́бен: Красоте́ де́вства:

Я́ко безпло́тен, о́тче, пожи́л еси́ на земли́/ и превознося́щагося врага́ смири́л еси́./ Те́мже, ны́не с Невеще́ственными ли́ки, блаже́нне, водворяя́ся,/ та́мо блаже́нства наслажда́ешися,/ помина́й па́мять твою́ днесь пра́зднующих,/ да вси ра́достными гла́сы воспева́ем Христа́ Бо́га на́шего,/ да́вшаго тебе́ благода́ть исцеле́ний.

Сла́ва, и ны́не, Богоро́дичен:

Боже́ственная ски́ния была́ еси́ Сло́ва,/ еди́на Пречистая Ма́ти Де́во, чистото́ю А́нгелы превозше́дшая,/ па́че всех мене́, пе́рсть бы́вша, оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.

По 2-й стихоло́гии седа́лен, глас 8.

Подо́бен: Повеле́нное:

Страсте́й тьму моли́твами твои́ми, о́тче, отгна́л еси́/ и се́рдце твое́ с чу́вствы чи́сто Бо́гу предста́вил еси́./ Сего́ ра́ди в тя всели́ся благода́ть Ду́ха Пресвята́го,/ е́же прови́дети бу́дущая и, я́ко близ су́щая, та проявля́ти,/ и проси́вшим у тебе́ с ве́рою непло́дствия соу́з разреши́л еси́./ Те́мже и нам, мо́лимся, проси́ от Христа́ ве́лию ми́лость.

Сла́ва, и ны́не, Богоро́дичен:

Я́же непреме́ннаго Бо́га поро́ждшая,/ пременя́емое при́сно се́рдце мое́ грехо́м и ле́ностию, прило́гми льсти́ваго/ утверди́, Блага́я, моли́твами ма́терними Твои́ми,/ я́ко да и аз благода́рно сла́влю Тя, Богороди́тельнице Мари́е,/ поми́луй ста́до Твое́, е́же стяжа́ла еси́, Всенепоро́чная.

По полиеле́и седа́лен, глас 8.

Подо́бен: Прему́дрости:

В пусты́ню, преблаже́нне, всели́лся еси́,/ и в ней прече́стен храм Бо́жия Ма́тере воздви́гл еси́,/ и мно́жество мона́шествующих та́мо собра́л еси́,/ Го́сподеви с тобо́ю рабо́тающих,/ и́хже сохраня́й от вся́каго прило́га лука́ваго, да вси благода́рственно вопие́м ти:/ преблаже́нне Кири́лле, моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Де́ву и еди́ну в жена́х,/ Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ Огнь бо всели́ся в Тя Божества́/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Степе́нна, 1-й антифо́н 4-го гла́са. Проки́мен: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43. По 50-м псалме́ стихи́ра, глас 6: Тезоимени́тое зва́ние: пи́сана на стихо́вне.

Кано́н Богоро́дицы со ирмосо́м на 6. И свята́го два кано́на на 8. Кано́н свята́го Кири́лла. Творе́ние Пахо́мия, иеромона́ха Святы́я Горы́, его́же краегране́сие: Похвалу́ пою́ Кири́ллу, но́вому чудотво́рцу. Глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь/ пои́м, вопия́ше.

Прекра́сная лоза́ виногра́да Христо́ва был еси́, прему́дре Кири́лле,/ и грозд пресла́дкий яви́лся еси́,/ Боже́ственную сла́дость ве́рным источа́еши, блаже́нне,/ ку́пно же и ра́дование пою́щим тя.

О́тче Кири́лле, не терпя́, враг в нача́ле твоего́ жития́ бу́рю воздви́же,/ дре́вом напра́сно хотя́ умертви́ти тебе́,/ а́ще не бы Боже́ственный глас возгласи́л тя, Богому́дре.

Христа́, нас ра́ди смири́вшагося, подража́в/ и крест твой взем, преподо́бне, Того́ стопа́м после́довал еси́,/ вся́ко мирско́е пристра́стие от Тебе́ оттря́сл еси́, пребога́те.

Богоро́дичен: Во двою́ естеству́ Еди́н от Святы́я Тро́ицы,/ от чи́стых крове́й Твои́х воплоти́вся, боголе́пно про́йде,/ и́же от Ада́ма спаса́я, Пречи́стая, бла́гостию.

Други́й кано́н, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Я́ко вели́ко вои́стинну дерзнове́ние стяжа́в, преподо́бне, к Бо́гу,/ сбыти́ю зри́тель сподо́бился еси́ бы́ти/ и непло́дная ложесна́ многопло́дна моли́твами твои́ми показа́л еси́.

На воде́ поко́я и на зла́це воздержа́ния, о́тче,/ учени́к твои́х стада́ му́дре упа́сл еси́/ и, ны́не с на́ми неви́димо водворя́яся, моли́ о чту́щих па́мять твою́.

Ум твой к Бо́гу любо́вию впери́в,/ тле́нными нетле́нная искупи́л еси́./ Те́мже вся́ка душа́, спаса́ема тобо́ю, тя прославля́ет.

Богоро́дичен: Ма́нием вся Содержа́й/ из Тебе́ па́че сло́ва ражда́ется, Ма́ти Чи́стая,/ преподо́бныя венча́вый, ве́рно Тебе́ сла́вящия, Ма́терь Бо́жию.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

А́ще и в ми́ре су́щая, о́тче, преоби́дел еси́,/ но та́мо преми́рная и нетле́нная стяжа́л еси́,/ иде́же глас пра́зднующих и ра́йское наслажде́ние.

Льсти́вый враг хотя́ тебе́ па́кость сотвори́ти, преподо́бне,/ лука́выя челове́ки на тя вооружа́ет,/ тебе́ же прирази́вся, постыде́ся, Христу́ бо тя соблюда́ющу.

Уже́ пресла́вное твое́ житие́ всю́ду, преподо́бне, прославля́ется,/ и чудеса́ твоя́ в конце́х пропове́даются,/ те́мже, в па́мять твою́ соше́дшеся, почита́ем тя.

Богоро́дичен: Пло́ти бре́нней соедини́вся, И́же от Отца́ единоро́дный, в ложесна́х Твои́х,/ еди́н от двою́ про́йде без истле́ния/ и соблюде́ невреди́мо де́вство Твое́, Всепе́тая.

Ин

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Волна́м, преподо́бне, и́менем Госпо́дним запрети́в и е́зеро укроти́в,/ лю́ди от потопле́ния спасл еси́ моли́твами твои́ми, Кири́лле блаже́нне.

Жела́нием, е́же к Бо́гу, и Того́ любо́вию па́че огня́ распала́емь, о́тче,/ целому́дренно в преподо́бии и пра́вде пожи́л еси́, преподо́бне Кири́лле.

Те́ло твое́ посто́м и моли́твами, о́тче, удручи́л еси́/ и сего́ ра́ди наслажда́ешися ве́чнаго блаже́нства,/ иде́же святы́х собо́ри и преподо́бных ли́цы веселя́тся.

Богоро́дичен: Боговиде́нием просвеща́емь,/ проро́к явле́нно зрит го́ру Бо́жию благослове́нную,/ земны́х украше́ние, еди́ну Всепе́тую.

Седален, глас 4.

Подо́бен: Вознесы́йся:

Приспе́ пра́здник честна́го твоего́ успе́ния, блаже́нне Кири́лле,/ просвеща́я всех пра́зднующих па́мять твою́ све́тло/ и Христа́ непреста́нно пе́сньми всегда́ сла́вящих.

Сла́ва, и ны́не, пра́здника или́ Богоро́дичен:

И́же на престо́ле Херуви́мстем седя́й и в не́дрех О́тчих водворя́яся/ я́ко на престо́ле святе́м седи́т Свое́м, Влады́чице, в не́дрех Твои́х;/ вопло́щся бо Бог вои́стинну, воцари́ся над все́ми язы́ки,/ и разу́мно ны́не пои́м Ему́,/ Его́же умоли́ спасти́ся рабо́м Твои́м.

Песнь 4

Ирмо́с: Христо́с моя́ си́ла,/ Бог и Госпо́дь,/ Честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

О́тче преподо́бне, сна твои́ма очи́ма не дал еси́, ни ве́ждома дрема́ния,/ до́ндеже сподо́бился еси́ ви́дети пра́ведных селе́ния,/ я́же угото́ва Бог лю́бящим Его́.

Уже́ не ктому́ врази́, ниже́ челове́цы лука́вии,/ мо́гут к тебе́ прибли́житися, Кири́лле преподо́бне:/ ви́деша бо благода́ть Бо́жию, тебе́ всегда́ соблюда́ющую.

Богоро́дичен: На Тя упова́ние мое́ возложи́х, Ма́ти Присноде́во, спасе́ния моего́/ и Тя Предста́тельницу име́ю живота́ моего́,/ тве́рду же и непоколеби́му.

Ин

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Бо́дренными моли́твами, о́тче, и сле́зными пото́ки/ Це́рковь ве́рных напои́л еси́,/ блаже́нне Кири́лле.

Еже на земли́ вре́менное житие́ твое́/ в безмо́лвии мно́зе пожи́л еси́, Христу́ поя́:/ сла́ва си́ле Твое́й, Го́споди.

От млада́го во́зраста в воздержа́нии, о́тче, пре́был еси́,/ плод мног доброде́тели Бо́гу, преподо́бне, прине́сл еси́/ и сего́ ра́ди от Не́го просла́вился еси́.

Богоро́дичен: Всели́вся в Тя Невмести́мый/ и, вмести́вся, показа́ Тя небе́с ши́ршу, Де́во,/ те́мже Тя ублажа́ем.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Изря́дно твое́ житие́ в после́дния ро́ды и пресла́вно яви́ся,/ чудеса́ же твоя́ всю́ду ве́рным излия́шася./ Те́мже тя вси, о́тче, ублажа́ем.

Ра́йския добро́ты жела́я, преподо́бне Кири́лле,/ и тоя́ ра́ди в слеза́х и воздыха́ниих, бде́ниих же и моли́твах твою́ жизнь препроводи́л еси́/ и отту́ду насле́дил еси́ жела́емое тебе́ блаже́нство.

Пресве́тлый твой пра́здник, о́тче, благоче́стно пра́зднующим/ подава́й свы́ше спасе́ние и избавле́ние,/ да тя вси, блаже́нне Кири́лле, непреста́нно воспева́ем.

Богоро́дичен: Лю́дем я́ко вои́стинну ти́хое приста́нище Христо́с Тебе́ яви́,/ ве́рою и любо́вию Тя, и́стинную Влады́чицу, Всенепоро́чная,/ от со́вести чи́сты Богоро́дицу испове́дающим.

Ин

Ирмо́с: Вску́ю мя отрину́л еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пу́ти моя́ напра́ви, молю́ся.

Пото́ки сле́зными, о́тче, страсте́й пучи́ну изсуши́л еси́,/ и в зе́млю обетова́ния преше́л еси́,/ и та́мо ра́йское житие́ прия́л еси́, е́же угото́ва Бог лю́бящим Его́.

Христа́, тобо́ю слепы́м да́рующая здра́вие, о́тче, моли́,/ и мне о́чи душе́вныя просвети́ти,/ до́ндеже не обря́щет мя негото́ва нощь глубо́кая/ и тьма отча́яния, молю́ся.

Богоро́дичен: Украси́лася еси́ де́вства пречи́стыми добро́тами/ и пе́рвый Е́вы покры́ла еси́ студ злообра́зный, Христа́ ро́ждши,/ одея́ние безсме́ртия да́рующего Тебе́ чту́щим.

Песнь 6

Ирмо́с: Ят бысть,/ но не удержа́н в пе́рсех ки́товых Ио́на:/ Твой бо о́браз нося́,/ страда́вшаго и погребе́нию да́вшагося,/ я́ко от черто́га, от зве́ря изы́де./ Приглаша́ше же кустоди́и:/ храня́щии су́етная и ло́жная,/ ми́лость сию́ оста́вили есте́.

Влады́ку ум поста́вил еси́ над страстьми́ теле́сными, блаже́нне,/ те́мже и Пресвята́го Ду́ха селе́ние, Богоно́се, был еси́./ Его́же моли́ и нас свободи́ти от страсте́й, да тя почита́ем.

Я́ко победи́в ве́ка сего́ кня́зя тьмы, возше́л еси́ к Небе́сным,/ побе́ды вене́ц нося́ от вседержи́тельныя руки́ Бо́га на́шего,/ моли́ от бед спасти́ся тебе́ почита́ющим.

Плотско́е мудрова́ние, е́же на земли́, о́тче, умертви́л еси́/ и на Небесе́х житие́ стяжа́л еси́,/ иде́же святы́х ду́си ра́дуются, пою́ще с тобо́ю Влады́ку твоего́.

Богоро́дичен: Пречи́стая Влады́чице, ро́ждшая челове́ком ко́рмчию и Го́спода,/ страсте́й мои́х непостоя́нное и лю́тое отжени́ смуще́ние/ и тишину́ пода́ждь се́рдцу моему́.

Ин

Ирмо́с: Очи́сти мя, Спа́се/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

В пусты́ни безмо́лвия водвори́лся еси́, преподо́бне,/ и отту́ду к Небе́сному гра́ду преше́л еси́, иде́же Бо́гу угоди́вших жили́ща,/ с ни́миже о нас, блаже́нне, моли́ся.

Чи́сто житие́ твое́ от ю́ности име́л еси́, блаже́нне,/ и того́ ра́ди Пречи́стыя Бо́жия Ма́тере изря́дный служи́тель был еси́,/ и прече́стен храм Той воздви́гл еси́, в не́мже Госпо́дь сла́вится.

От страсте́й тиме́ния чи́ста тя обре́т, всели́ся в тя Дух Пресвяты́й,/ тем и чуде́с дарова́ния тебе́ да́рует/ еди́н во святы́х прославля́емый Бог наш.

Богоро́дичен: Зачала́ еси́ вои́стинну Боже́ственное Сло́во во утро́бе Твое́й/ и Сие́ па́че естества́, Всенепоро́чная, родила́ еси́,/ Его́же моли́ от бед всем изба́витися, рабо́м Твои́м.

Конда́к, глас 8.

Подо́бен: Взбра́нной:

Яко преоби́дев тле́нная и до́лу влеку́щая мудрова́ния, о́тче,/ к Вы́шнему тече́нию ра́достно устреми́лся еси́,/ и та́мо со святы́ми Пресвяте́й Тро́ице предстоя́,/ моли́ от враг сохрани́тися ста́ду твоему́,/ я́ко да, свято́е твое́ успе́ние пра́зднующе, вопие́м:/ ра́дуйся, преблаже́нне Кири́лле, о́тче наш.

И́кос:

А́ще и челове́к, о́тче, был еси́ по естеству́,/ но па́че челове́ка житие́ соверши́л еси́:/ вся бо, я́же в ми́ре сла́дкая и кра́сная, преоби́дев, после́довал еси́ Христу́./ Те́мже и от всех слы́шиши:/ ра́дуйся, я́ко, Пречи́стою наставля́емь, пусты́ню дости́гл еси́./ Ра́дуйся, я́ко в той прече́стен храм Бо́жии Ма́тери воздви́гнувый;/ ра́дуйся, я́ко в нем Бог прославля́ется./ Ра́дуйся, собра́вый та́мо учени́к мно́жество;/ ра́дуйся, я́ко с те́ми приле́жно Го́сподеви рабо́тал еси́./ Ра́дуйся, удиви́вый А́нгелы житие́м твои́м;/ ра́дуйся, я́ко тобо́ю челове́цы по́льзовашася./ Ра́дуйся, и́же чудесы́ всех удиви́вый;/ ра́дуйся, преше́дый от земны́х на Небе́сная./ Ра́дуйся, я́ко, Тро́ице предстоя́, о нас мо́лишися;/ ра́дуйся, исто́чниче чуде́с неисчерпа́емый./ Ра́дуйся, ве́рных пле́нник изба́вителю;/ ра́дуйся, преблаже́нне Кири́лле, о́тче наш.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти/ благослове́н еси́, Бо́же оте́ц на́ших.

Очи́стив от страсте́й, преподо́бне о́тче, ум твой/ и Вседержи́телю с преподо́бных ли́ки и пра́ведных предстоя́, всегда́ вопие́ши:/ благослове́н Бог оте́ц на́ших.

Врач преизря́дный ми́ру яви́лся еси́, блаже́нне,/ исцеля́я всех, ве́рою притека́ющих ко хра́му твоему́ свято́му/ и Христу́ от души́ вопию́щих непреста́нно:/ благослове́н Бог отец на́ших.

Посто́м и воздержа́нием лице́ твое́ украси́л еси́, преподо́бне,/ светле́йши наипа́че яви́лся еси́ многоразли́чными бра́шны пита́ющихся./ Те́мже и Христу́ вопие́ши:/ благослове́н Бог оте́ц на́ших.

Богоро́дичен: Тя, Пресвята́я Ма́ти Присноде́во, позна́хом, земни́и, спасе́ние,/ и́бо в не́дрех Отца́ неразлу́чно живы́й из Тебе́ воплоща́ется./ Те́мже благослове́на еси́ в род и род.

Ин

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.

От мирска́го треволне́ния избе́г, преподо́бне,/ в ти́хое приста́нище дости́гл еси́ Небе́снаго пребыва́ния, вопия́:/ оте́ц на́ших Бо́же, благослове́н еси́.

В пусты́ню, я́коже дре́вний Анто́ний, всели́лся еси́/ и в ней вели́каго Ефре́ма слеза́ми и посто́м подража́л еси́, Христу́ поя́:/ благослове́н еси́, Го́споди Бо́же оте́ц на́ших.

Вся́кими, о́тче, о́бразы и́же с тобо́ю ученики́ направля́л еси́/ по стезя́м пра́вым путе́й твои́х ходи́ти и с тобо́ю Христу́ пе́ти:/ оте́ц на́ших Бо́же, благослове́н еси́.

Богоро́дичен: Го́ру Тя проро́к Дании́л Боже́ственным Ду́хом прорече́, Де́во,/ из нея́же ка́мень – Христо́с без руки́ отсече́ся/ и сокруше́ние соде́ла истука́нней пре́лести.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти,/ Тя превозно́сим во вся ве́ки.

Гроб, иде́же положено́ бысть честно́е те́ло твое́, преподо́бне,/ освяти́ всех, к нему́ притека́ющих,/ исто́чник исцеле́ния источа́я от души́ Христу́ вопию́щим/ и превознося́щим Его́ во ве́ки.

Во вре́мя гла́да, раздробля́я, преподо́бне, ни́щим хлеб твой,/ тех а́лчбу уста́вил еси́,/ и мене́, та́ющего гла́дом, Боже́ственных дея́ний напита́й:/ да возмогу́ и аз со все́ми пе́ти Го́спода во вся ве́ки.

И́же с тобо́ю ученицы́ твои́, уче́нию твоему́ повину́ющеся, преподо́бне,/ земна́я оста́вльше, во след тебе́ к Небе́сным преидо́ша,/ и с тобо́ю пою́т Христу́, и превозно́сят Его́ во ве́ки.

Богоро́дичен: В рождестве́ боле́зни избежа́ла еси́, Пречи́стая,/ и, ро́ждши, па́ки Де́вою пребыла́ еси́:/ вся бо твори́т Иису́с, Бог и Челове́к,/ Его́же превозно́сим во ве́ки.

Ин

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

Бу́дущаго ра́ди жития́ на Небесе́х на земли́ ми́ру умертви́лся еси́, о́тче./ Сего́ ра́ди жив Бо́гу предстоя́, вопие́ши:/ Тя превозно́сим, Го́спода, во ве́ки.

Све́том Тройческим, о́тче, просвеща́емь,/ твою́ жизнь благоче́стно сконча́л еси́/ и по́стных собо́ры приве́л еси́ Христу́ вопи́ти:/ Тя превозно́сим, Го́спода, во ве́ки.

С Небе́сными во́инствы всегда́, преподо́бне, Тро́ицу несозда́нную,/ неразде́льное Божество́ славосло́виши, блаже́нне, и превозно́сиши во ве́ки.

Богоро́дичен: Во утро́бе Твое́й пе́рвейша Тебе́ заче́нши, Богома́ти, Чи́стая Де́во,/ родила́ еси́ несказа́нно Бо́га и Царя́,/ Его́же превозно́сим во ве́ки.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти,/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Жития́ сего́ непостоя́нную пучи́ну немяте́жно преше́л еси́, преподо́бне,/ ко́рмчию Ма́терь Бо́жию име́я, на сие́ наставля́ющую тя./ Те́мже и ко приста́нищем приста́л еси́ А́нгельскаго пребыва́ния.

Я́ко зре́лая и чисте́йшая пшени́ца, кроме́ всех зло́бных пле́вел,/ в Небе́сных жи́тницах соблю́лся еси́, преподо́бне,/ хлеб сла́дкий жела́я принести́ся Небе́сному Царю́,/ Его́же ра́ди вся в ми́ре преоби́дел еси́.

Вели́ким отце́м, дре́вле в посте́х и по́двизех просия́вшим, подо́бяся, о́тче,/ вся дни жи́зни твоея́ во слеза́х и труде́х препроводи́л еси́,/ до́ндеже дости́гл еси́ блаже́нную кончи́ну, ю́же и они́ насле́доваша.

Богоро́дичен: Сы́на Безле́тна, от Отца́ возсия́вша,/ Ты, во утро́бе несказа́нно заче́нши, родила́ еси́, Богома́ти Чи́стая Де́во,/ моли́ непреста́нно о рабе́х Твои́х Того, я́ко Человеколю́бца Бо́га,/ спасти́ род наш.

Ин

Ирмо́с: Чи́стую сла́вно почти́м,/ лю́дие, Богоро́дицу,/ Огнь Божества́ прии́мщую во чре́ве неопа́льно,/ пе́сньми велича́ем.

Потреби́ страстна́я двиза́ния ума́ моего́, Христе́, и ле́ность уны́ния отжени́,/ в пра́вый путь Твой ходи́ти наста́ви моли́твами уго́дника Твоего́ Кири́лла,/ да я́ко Благоде́теля велича́ю Тя.

Певце́м, тебе́ пою́щим, о́тче, и во хвале́нии сла́вящим,/ пода́ждь свы́ше спасе́ние и избавле́ние,/ да ктому́ тебе́ мно́жае в пе́снех велича́ют.

Руко́ю моею недосто́йною приноси́мое тебе́ с трудо́м от усе́рдия хвале́ние/ приими́, Богоблаже́нне Кири́лле, и хода́тай к Бо́гу бу́ди ми, молю́ся,/ изба́вити мя та́мошняго муче́ния,/ да непреста́нно в пе́снех велича́ю тя.

Богоро́дичен: В Тя всели́вся, Пренепоро́чная,/ пе́рвее родонача́льным злообра́зно запе́ншаго человекоуби́йцу низложи́, роди́вся,/ и всех нас спасе́.

Свети́лен.

Подо́бен: Посети́л ны:

Пречестну́ю и свяще́нную па́мять твою́ соверша́ющих, преподо́бне Кири́лле,/ и мно́гая труды́ твоя́ пою́щих,/ не преста́й, моля́ Изба́вителя от напа́стей избавля́ти нас/ и селе́нию святы́х сподо́бити.

Богоро́дичен: Почита́ют Рождество́ Твое́ Безпло́тных чи́ни,/ ра́дости бо земны́я Ты еди́на испо́лнила еси́./ Те́мже Тя, Всенепоро́чная, ве́рнии, сла́вим, пе́сньми славосло́вяще:/ Свет бо су́щим во тьме возсия́ла еси́ и Со́лнце незаходя́щее.

На хвали́тех стихи́ры, на 4, глас 8.

Подо́бен: О, пресла́внаго чудесе́:

Свы́ше дарова́ния чуде́с/ от Бо́га сподо́бился еси́,/ блаже́нне Кири́лле:/ бе́сы от челове́к, ве́рою приходя́щих, прогони́ти/ и разли́чными неду́ги одержи́мыя/ испеля́ти моли́твами твои́ми./ Те́мже вси, в па́мять твою́ соше́дшеся,/ любо́вию тебе́ почита́ем.

Свяще́нными твои́ми, о́тче, моли́твами/ хле́бы во вре́мя гла́да умно́жил еси́/ и а́лчущих мно́гих препита́л еси́./ Те́мже тя мо́лим, преподо́бне Кири́лле:/ и нас душе́внаго гла́да премени́/ и Боже́ственными бра́шны/ напита́й, мо́лимся,/ я́ко да любо́вию тя почита́ем.

Вина́ недоста́тки Бо́жией це́ркви,/ моли́твами твои́ми, о́тче,/ сосу́д испо́лнил еси́/ и на мно́га времена́/ довле́ти той дарова́л еси́./ Те́мже и нас, почита́ющих па́мять твою́,/ вино́м Бо́жия любве́ напо́и всех,/ да прославля́ем пречестно́е успе́ние твое́.

Сла́ва, глас 2:

Пусты́ня, я́же иногда́ бесо́м жили́ща иму́щи,/ ны́не же учени́к твои́х, Кири́лле,/ мно́жеством наполня́ема, украша́ется,/ храм в себе́ прече́стен Ма́тере Бо́жия иму́щи,/ разли́чными добро́тами удобре́н./ Те́мже, в нем днесь соше́дшеся,/ и честны́й гроб твой обстоя́ще,/ и любе́зно покланя́ющеся, мо́лимся:/ Це́рквам единомы́слие дарова́ти моли́ся,/ и оте́честву на́шему на враги́ посо́бствуй моли́твами твои́ми,/ и душа́м на́шим испроси́ мир и ве́лию ми́лость.

И ны́не, Богоро́дичен.

Славосло́вие вели́кое. И отпу́ст.

НА ЛИТУРГИ́И

Блаже́нны 1-го кано́на, песнь 3-я на 4, и 2-го кано́на, песнь 6-я на 4. Проки́мен: Честна́ пред Го́сподем: Стих: Что возда́м Го́сподеви: Апо́стол к Гала́том, зача́ло 213. Аллилуи́я, глас 6: Блаже́н муж, боя́йся Го́спода: Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник:

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 5:

Преподо́бне о́тче Алекса́ндре Богому́дре,/ те́плый предста́телю,/ доброде́тели сокро́вище, равностоя́телю святы́х А́нгел,/ и зерца́ло нескве́рное Бо́жие Боже́ственное показа́лся еси́/ и А́нгелы удиви́л еси́,/ бе́сы посрами́л еси́ доброде́тельми твои́ми,/ си́лою Боже́ственнаго Ду́ха,/ своему́ Влады́це подо́бяся:/ Он возше́л есть на Крест,/ рукописа́ние всех растерза́,/ ты же, взем на ра́мо крест свой,/ в пусты́ню всели́вся, стра́сти умертви́л еси́/ и, ду́шу очи́стив, на высоту́ взы́де доброде́телей,/ единокро́вниче преподо́бных, во Све́те невече́рнем живы́й,/ Его́же луча́ми Боже́ственными просвеща́емь,/ и, сия́я чудесы́, бысть свети́льник вселе́нней,/ Того́ моли́, преподо́бне,/ дарова́ти Це́рквам единомы́слие,/ мир и ве́лию ми́лость.

Преподо́бне о́тче Алекса́ндре Богому́дре,/ дом Пресвята́го Ду́ха соде́яся,/ свяще́н сосу́д от ма́терних пеле́н показа́ся, о́тче наш,/ нося́ на ра́му свое́ю крест Госпо́день,/ в пусты́нях и гора́х живя́ше/ любве́ ра́ди Христо́вы,/ Ему́же и порабо́тал, Его́же и жела́ше,/ а́бие же и узре́л еси́./ Те́мже неувяда́емым венце́м увязе́ся,/ весе́лие, и ра́дость, и сла́ву ве́чную восприя́т,/ и украси́ тя Небе́сными дара́ми Христо́с,/ в чудесе́х сла́вна тя показа́ Руси,/ о́тче Алекса́ндре,/ цели́ти неду́ги и ду́хи прогоня́ти,/ источа́я неду́жным исцеле́ний струи́,/ те́мже мо́лим тя: моли́ся Христо́ви,/ помина́й ста́до, е́же собра́л еси́, му́дре,/ и не забу́ди, я́коже обеща́лся еси́,/ посеща́ти чад свои́х./ Мы бо, ча́да твоя́, тя на по́мощь призыва́ем,/ грехо́в проще́ние тобо́ю прия́ти и оставле́ние,/ Того́ моли́, преподо́бне,/ дарова́ти мир ми́рови/ и душа́м на́шим ве́лию ми́лость.

Преподо́бне о́тче Алекса́ндре Богому́дре,/ кто испове́сть труды́ твоя́ и боле́зни,/ или́ кий язы́к изрече́т жесто́кое твое́ житие́,/ бде́ние же и сухояде́ние,/ и е́же на земли́ лега́ние,/ и моли́твы непрестаю́щия,/ простоту́ душе́вную и теле́сную?/ Устна́ма и умо́м соверше́нное безмо́лвие стяжа́л еси́,/ ху́дость ри́зную и па́мять сме́ртную име́л еси́,/ того́ ра́ди па́мять твоя́ во ве́ки пребыва́ет,/ преподо́бне Алекса́ндре, уго́дниче Христо́в;/ а́ще бо и преста́вился еси́ от нас, блаже́нне,/ па́стырю до́брый,/ но не отступа́еши ду́хом,/ всех нас помина́й,/ соверша́ющих па́мять твою́ свяще́нную;/ приле́жно, пою́ще, мо́лим тя:/ моли́ся, преподо́бне,/ побе́ды дарова́ти на враги́ правосла́вным христиа́ном,/ и це́рквам благоле́пие, и ми́ру смире́ние,/ и душа́м на́шим мир и ве́лию ми́лость.

Сла́ва, глас 8:

Преподо́бне и Богоблаже́нне о́тче Алекса́ндре,/ вои́стинну сподо́бися Боже́ственныя жи́зни,/ посто́м бо и бде́нием изнуря́я свое́ те́ло,/ о́браз был еси́ и́ноком,/ а́ще бо теле́сный язы́к умолче́,/ но чудеса́ свиде́тельствуют,/ пусты́ня, пропове́дающи, хва́лится,/ име́ющи в себе́ неотъе́млемо сокро́вище,/ лю́дие бо, зря́ще честну́ю ра́ку моще́й твои́х/ и чудеса́ быва́емая,/ просла́вляют просла́вльшаго тя Го́спода./ Ему́же моли́ся, преподо́бне, непреста́нно,/ дарова́ти правосла́вным христиа́ном побе́ды на враги́/ и вселе́нней мир и ве́лию ми́лость.

И ны́не, Богоро́дичен: Влады́чице, приими́ моли́твы раб Твои́х:

На стихо́вне стихи́ры, глас 2.

Подо́бен: До́ме Евфра́фов:

Яви́лся еси́/ от ма́терних пеле́н,/ Богоно́сне преподо́бне Алекса́ндре,/ сосу́д избра́нный/ и дом Пресвята́го Ду́ха.

Стих: Честна́ пред Го́сподем/ смерть преподо́бных Его́.

Нося́ на ра́му свое́ю/ крест Госпо́день,/ Алекса́ндре о́тче преподо́бне,/ бесо́вския мечта́ния до конца́ потреби́л еси́,/ и ве́рным исцеле́ние дарова́л еси́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Пре́лести лука́вых бесо́в/ обличи́л еси́ кре́стною си́лою,/ бо́дренными моли́твами и сле́зными исто́чники/ це́ркви ве́рных обогати́л еси́,/ Богоблаже́нне Алекса́ндре преподо́бне.

Сла́ва, глас 1:

Погре́бл еси́ страсте́й все возста́ние/ умерщвле́нием пло́ти, свяще́нный о́тче,/ жизнь безконе́чную по сме́рти прия́л еси́,/ те́мже днесь Христо́ва Це́рковь пра́зднует/ твою́ доеточу́дную па́мять, преподо́бных украше́ние.

И ны́не, глас 6: Богоро́дице, Ты еси́ лоза́ и́стинная:

Тропа́рь зри на вели́цей вече́рни

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 1:

Небе́сных красо́т жела́я,/ к Бо́гу ум впери́л еси́,/ к Небеси́ ле́ствицы степе́ни тве́рды труды́ твои́ми огради́л еси́,/ по нейже взы́де да́же до са́мых Вы́шних Бо́жиих/ и неизрече́нных Трисо́лнечных красо́т,/ зря Боже́ственныя и неизрече́нныя сла́вы Бо́га,/ Царя́ своего́ – Христа́,/ престо́лу Безпло́тных и всех святы́х с ли́ки предстоя́,/ преподо́бне Алекса́ндре, моли́ о нас,/ я́ко тобо́ю упова́ние к Бо́гу возложи́хом.

Небе́сным нра́вом вы́ну день и нощь поуча́яся,/ вся земна́я красоты́ преходя́щия нивочтоже вмени́в,/ уподо́бися до́брому купцу́,/ прода́в вся земна́я и купи́в Небе́сный би́сер,/ и́мже просве́щся, освяща́еши ве́рных пресла́вными твои́ми чудесы́,/ уго́дниче Бо́жий и чудотво́рче Алекса́ндре, моли́ о нас,/ я́ко на тя упова́ние по Бо́зе возложи́хом.

Небе́сных дости́гл еси́, на земли́ живы́й,/ доброде́тельных твои́х ра́ди дел,/ любве́ и терпе́ния, трудо́в и поста́,/ во пло́ти бо быв, Безпло́тных нра́вом после́довал еси́,/ те́мже и на безпло́тныя враги́ си́лу я́ко о́гненну прия́л еси́,/ не мо́гут бо и по преставле́нии твое́м противодержа́тися/ с ве́рою припа́дающим к цельбоно́сному твоему́ гро́бу,/ те́мже и ны́не Христо́ви моли́ся,/ с Небе́сных круг на вся, почита́ющия тя, взира́я,/ я́ко на тя упова́ние возложи́хом.

Ины стихи́ры, глас 4.

Подо́бен: Дал еси́ зна́мение:

Пе́рвее пости́вся,/ пло́ти взыгра́ние воздержа́нием умертви́л еси́,/ второ́е побе́ду взял еси́ на враги́/ и низложи́л еси́ их кова́рства свои́ми по́двиги,/ Алекса́ндре Богоблаже́нне,/ те́мже тя венча́ сугу́быми венцы́/ Иису́с Человеколю́бец и Спас душ на́ших.

Струя́ми слез твои́х/ се́мя Боже́ственное напои́л еси́,/ я́ко земля́ благоплодови́та, Богодухнове́нне,/ стори́цею воздая́ плод преподо́бия,/ прозя́бл еси́ и́стину/ и в жи́тницы собра́л еси́ мы́сленныя си́лою духо́вною/ тебе́ Претво́ршаго премене́нием лу́чшим,/ Алекса́ндре преподо́бне.

Ве́рою и любо́вию, о празднолю́бцы, соше́дшеся днесь,/ псало́мски пе́сньми восхва́лим/ Небе́снаго челове́ка и земна́го А́нгела,/ к нему́же возопие́м:/ о всеблаже́нне преподо́бне,/ пусты́нный жи́телю, по́стником похвало́,/ о нас моли́ся ко Го́споду спасти́ся душа́м на́шим.

Сла́ва, глас 2:

Челове́ческим естество́м роди́вся,/ а́нгельскому житию́ поревнова́л еси́,/ в телеси́ бо быв, я́ко безпло́тен,/ на земли́ живы́й пло́тию,/ умо́м же всегда́ в Небе́сных,/ те́мже, и жела́нии не погреши́в свои́ми,/ от Бо́га в Небе́сных обогати́лся еси́,/ иде́же свято́е твое́ те́ло почива́ет,/ прикаса́ющиися с ве́рою прие́млют исцеле́ние;/ име́я у́бо дерзнове́ние ко Влады́це Христу́, святы́й о́тче,/ о всех нас помоли́ся,/ пра́зднующих ве́рою и любо́вию святу́ю па́мять твою́.

И ны́не, догма́тик: Пре́йде сень зако́нная:

Вход. Проки́мен дне. И чте́ния три преподо́бническая ( зри 1 июня )

На лити́и стихи́ры, глас 2:

Преподо́бне о́тче Алекса́ндре,/ и́ноков удобре́ние, прозябе́ние кра́сное пусты́ни,/ преподо́бным похвало́ и ве́рным утвержде́ние,/ и́же любо́вию творя́щих всечестну́ю па́мять твою́/ и моще́м твои́м приступа́ющих,/ изба́ви вся́каго обстоя́ния и о́гненнаго осужде́ния.

Тро́ицы храм сам себе́ соде́ла, о́тче Богоблаже́нне,/ в пусты́ни непроходи́мыя за́йде,/ я́ко Моисе́й, в Сина́йскую го́ру всели́вся,/ прии́м Боже́ственный зако́н;/ ты же и́ноков мно́жество вои́стинну науча́еши изря́дным пра́вилом,/ прикаса́ющимся к моще́м твои́м/ подае́ши всем исцеле́ние.

Име́я дерзнове́ние ко Христу́ Бо́гу,/ моли́ся о ста́де свое́м, преподо́бне о́тче,/ сохрани́ти от искуше́ний вра́жиих,/ и язы́ческих нахожде́ний, и огня́, и меча́,/ и от вся́каго прило́га и наве́та лука́ваго,/ тебе́ бо град и покро́в име́ем,/ на тя наде́жду, блаже́нне, стяжа́хом.

И́ны стихи́ры, глас 8.

Подо́бен: Что́ тя нарече́м:

Что́ тя ны́не нарече́м, свя́те Алекса́ндре?/ Реку́ разу́мнаго рая́, исходя́щу из Еде́ма,/ пото́ка от Бо́га раздава́емых даро́в,/ наводне́ние уче́ния, благода́ти ча́шу,/ прему́дрости ра́зум, моле́бника крепча́йша/ и учи́теля де́йственнаго,/ моли́ спасти́ся душа́м на́шим.

Что тя имену́ем, преподо́бне Александре?/ Де́лателя безсме́ртных садо́в,/ сади́теля разу́мнаго рая́ ве́рных,/ зако́нов благода́тных иску́снаго,/ повеле́ний духо́вных худо́жника,/ сказа́теля благостоя́нна и наказа́теля дово́льнейша,/ моли́ спасти́ся душа́м на́шим.

Что тя ны́не нареку́, чу́дне Алекса́ндре?/ Уста́ва поло́жника своему́ ста́ду сопряже́ну,/ целому́дрия пода́теля,/ сказа́теля и́ночествующим и де́вству наста́вника,/ пра́ведно обои́м ме́ряща,/ я́ко иску́сом проше́дша обою́ду,/ мно́гая твоя́ дея́ния и о Бо́зе ти поще́ния,/ моли́ спасти́ся душа́м на́шим.

Сла́ва, глас то́йже:

На Не́бо теку́щую возше́д колесни́цу доброде́телей,/ дости́гл еси́ кра́йнего жития́ воздержа́нием в пусты́ни,/ смотря́я Вы́шняго Иерусали́ма красо́ты,/ и, боле́зней по́двигом досто́йно по́чести восприи́м,/ с Небе́сными ра́дуешися чинонача́лии, преблаже́нне,/ ве́чных благ насле́дник яви́ся,/ и, Небе́снаго Ца́рствия жи́тель сый,/ помоли́ся, Богоно́сне Алекса́ндре, Спа́су всех,/ умири́ти мир и спасти́ ду́ши на́ша.

И ны́не, Богоро́дичен: Безневе́стная Де́во:

На стихо́вне стихи́ры, глас 3:

Ве́лию ве́ру к Бо́гу простре́, преподо́бне,/ и ве́лие терпе́ние стяжа́в,/ ве́лию ми́лость от Него́ получи́л еси́,/ не земны́м бо ви́димым бога́тством обогати́ тя,/ но таковы́м, его́же земно́е у́хо не слы́ша/ и на се́рдце не взы́де,/ е́же Бог угото́ва лю́бящим Его́,/ с ни́миже, у Бо́га веселя́ся,/ моли́ о душа́х на́ших.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ве́лия к Бо́гу труды́,/ боле́зни по́стническия в жи́зни свое́й соверши́л еси́,/ темже ны́не ве́лие дерзнове́чние к Бо́гу име́я,/ исцеля́еши боле́зни теле́сныя./ Те́мже мо́лим тя: потщи́ся, святы́й о́тче,/ и моли́ о душа́х на́ших.

Стих: Пра́вда Его́/ пребыва́ет в век ве́ка.

Ве́лия, Христе́ Бо́же, уго́дника Твоего́ си́ла,/ во гро́бе бо лежа́щее те́ло его́ бе́сы прогоня́ет,/ упраздни́в вра́жию власть ве́рою Тро́йческою,/ подви́глся еси́, о́тче преподо́бне,/ труды́ и воздержа́нием,/ мольба́ми и любо́вию по благоче́стию,/ и моли́ Го́спода всех сил о душа́х на́ших.

Сл́ва, глас 4:

От вся́ких бед душе́вных и теле́сных,/ преподо́бне о́тче Алекса́ндре,/ моли́твами твои́ми рабы́ твоя́ изба́ви,/ да тя во ве́ки ублажа́ем,/ я́ко хода́тая к Бо́гу и засту́пника/ от належа́щих на ны скорбе́й/ душе́вных вку́пе и теле́сных.

И ны́не, Богоро́дичен: При́зри на моле́ния:

Тропа́рь, глас 4:

Иже плотски́м дебе́льством Бо́гови рабо́тати изво́ли,/ в пусты́ню всели́вся,/ в не́йже мно́гими по́ты и труды́/ безтеле́снаго равноа́нгельнаго пребыва́ния возмо́же дости́гнути,/ та́же от Бо́га узре́н быв,/ сподо́бися вели́ких чуде́с в жи́зни и по преставле́нии,/ на нечи́стыя ду́хи си́лу восприи́м,/ изго́ниши от приходя́щих к тебе́ с ве́рою,/ те́мже, о́тче Алекса́ндре,/ за вся ны моли́,/ спасти́ся душа́м на́шим.

Ин тропа́рь, глас 8:

Во плоти́, я́ко А́нгел, на земли́ подвиза́ся,/ жела́нием духо́вным в пусты́ню всели́ся/ и, со зверьми́ живы́й, весь Христо́ви быв,/ Тому́ невозвра́тно ше́ствовал еси́, ведо́м к Небеси́,/ после́дуя Боже́ственным стезя́м, о́тче блаже́нне Алекса́ндре,/ я́ко чу́ден, чудеса́ источа́еши/ и отгоня́еши неду́ги к тебе́ приходя́щих с ве́рою,/ но я́ко имея дерзнове́ние ко Го́споду,/ помина́й нас, чту́щих честну́ю па́мять твою́.

Сла́ва, и ны́не, Богоро́дичен.

НА У́ТРЕНИ

На Бог Госпо́дь: тропа́рь преподо́бнаго, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 2:

Путь жи́зненный обре́л еси́, преподо́бне,/ по нему́же до́йде Боже́ственнаго приста́нища,/ всели бо ся, блаже́нне, в пусты́ню,/ в не́йже, яко крин, процве́л еси́ труды́ твои́ми,/ и ны́не, я́ко благово́нное кади́ло,/ моле́нии твои́ми прино́сиши от Бо́га свы́ше дар чуде́с с весе́лием,/ сего́ ра́ди зове́м ти:/ ра́дуйся, обреты́й простра́нное селе́ние в пресве́тлем Христо́вем Ца́рствии.

Ин седа́лен, глас 3.

Подо́бен: Красоте́ де́вства:

Сою́зом любве́ привяза́лся еси́ Христо́ви,/ земна́я и мимотеку́щая возненави́дев, Богому́дре,/ пусты́нное озлобле́ние усе́рдно подъе́м,/ бесо́вская ополче́ния и их многоко́зненную си́лу посрами́л еси́,/ и Подвигополо́жник Христо́с дарова́нием чуде́с обогати́ тя,/ те́мже тя почита́ем, Алекса́ндре Богому́дре.

Сла́ва, и ны́не, Богоро́дичен:

От Бо́га Отца́ пре́жде век ро́ждшееея Сло́во/ прия́т в пречи́стое Твое́ чре́во, Богоро́дице Мари́е,/ Того́ я́ко Сы́на и Зижди́теля умоли́/ изба́вимся душе́вных бед рабо́м Твои́м.

По 2-м стихосло́вии седа́лен, глас 6:

В теле́сных чу́вствиих Безпло́тных святы́х име́я ра́зум,/ в не́мже, о́тче, наслади́вся воздержа́ния,/ бысть целому́дрия непоколеби́мый столп,/ в пусты́ни со зверьми́ чу́вственными живы́й, мы́сленныя зве́ри победи́ пло́тию,/ смире́н духо́вными де́йствии ви́дяшеся,/ преди́вен ра́тник на диа́вола показа́ся, до́блий во́ине Алекса́ндре, о́тче наш.

Ин седа́лен, глас 1.

Подо́бен: Лик А́нгельский:

Житие́ благоче́стно на земли́ стяжа́в,/ прия́телище чи́сто Ду́ху ты яви́ся,/ просвеща́я и́же с ве́рою к тебе́ приступа́ющия, блаже́нне,/ те́мже моли́ своего́ Влады́ку просвети́ти ду́ши на́ша,/ воспева́ющих тя, Алекса́ндре преподо́бне, о́тче наш.

Сла́ва, и ны́не, Богоро́дичен:

От ве́ка еди́на обре́тшися Благослове́нная,/ в де́встве прии́мши пречи́стое родоноше́ние,/ в рождестве́ же де́вство пречи́стое сохрани́в,/ и по рождестве́ во ве́ки пречи́сто де́вствующи,/ и Соде́теля Сы́на иму́щи, вся преиму́ща,/ я́ко су́щи Ма́ти всех Бо́га, спаси́ рабы́ Твоя́.

По полиеле́и седа́лен, глас 8.

Подо́бен: Прему́дрости:

Окормля́емь си́лою Вседе́тельною и ве́трилом кре́стным обложе́н,/ легко́ преплы́л еси́ жития́ мо́ре/ и Боже́ственным вои́стинну приста́нищем дости́гл еси́,/ доброде́телей ку́плю мно́гу стяжа́в,/ ю́же всех Влады́це прине́сл еси́,/ и́же, – благи́й ра́бе! – слы́шал еси́,/ неду́гующих исцели́л еси́, ско́рчащихся ру́це испра́вил еси́,/ слепы́я просвеща́я, немы́м повеле́ вопи́ти,/ Алекса́ндре преподо́бне о́тче, моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

В напа́сти многоплете́нныя впад от враг ви́димых и неви́димых,/ бу́рею одержи́м безме́рных согреше́ний мои́х,/ я́ко к те́плому заступле́нию и покро́ву моему́, Чи́стая,/ к приста́нищу притека́ю Твоея́ бла́гости./ Те́мже, Пречи́стая, и́же из Тебе́ Воплоще́нному без се́мене моли́ся о всех рабе́х Твои́х,/ непреста́нно пою́щих Тя, Богоро́дице Пречи́стая,/ моля́щи Того́ приле́жно согреше́ниям оставле́ние дарова́ти/ ве́рою поклоня́ющихся рождеству́ Твоему́.

Степе́нна, 1-й антифо́н, 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бне о́тче,/ отри́нув на земли́ вре́менная и мимотеку́щая бла́га,/ стяжа́л еси́ Небе́сная, нело́жная и ве́чная бла́га,/ в жи́зни сей живы́й ви́дим бя́ше, я́ко ничто́же имы́й,/ ны́не же яви́ся, я́ко от Бо́га невозбра́нно вся содержа́й,/ моли́твою твое́ю, я́ко о́гненным копие́м,/ от призыва́ющих тя бе́сы прогоня́еши,/ те́мже всяк правове́рный хвалу́ ти прино́сит,/ ра́достно творя́ святу́ю па́мять твою́,/ Богоуго́дниче Алекса́ндре, о́тче наш.

По 50-м псалме́ и́на стихи́ра, глас 2:

Ра́дуйся, преподо́бне о́тче наш Алекса́ндре всече́стне,/ и́же, зако́н Госпо́день до́бре извы́к и ве́ру соблю́д непобеди́му,/ хода́тай яви́ся о ста́де твое́м Христу́ Бо́гу,/ Того́ моли́ умири́ти мир и спасти́ ду́ши на́ша.

Кано́н преподо́бному Алекса́ндру, глас 1.

Песнь 1

Ирмо́с: Го́рькия рабо́ты изба́влься Изра́иль,/ непроходи́мое про́йде, я́ко су́шу,/ врага́ зря потопля́ема,/ песнь я́ко Благоде́телю пое́т Бо́гу,/ чудоде́ющему мы́шцею высо́кою,/ я́ко просла́вися.

Лю́тыя рабо́ты вра́жия от младе́нчества возненави́дев,/ устреми́лся еси́ всем жела́нием к Еди́ному Благоде́телю,/ преподо́бне прему́дре Алекса́ндре.

Лю́тыя вра́жия по́мыслы нивочтоже вмени́в,/ в богоуго́дие еди́ное ум свой отлучи́л еси́,/ в не́мже без враще́ния кре́пце пребы́л еси́, Богоуго́дне Алекса́ндре.

Лю́тых звере́й зия́ния кре́постию се́рдца не устраши́ся,/ сего́ ра́ди, Боже́ственною по́мощию вооруже́н,/ в пусты́ни тех, я́ко о́вцы, укроти́л еси́,/ му́же му́дре Алекса́ндре.

Богоро́дичен: Лю́тых мук изба́ви нас, Богоневе́сто,/ Твои́ми бо пречи́стыми моли́твами вся спаса́еши,/ я́ко Ма́ти Бо́жия су́щи.

Ин кано́н, глас 8.

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Озаре́нием Свята́го Ду́ха озари́ нас, благоче́стно любо́вию пе́сньми восхваля́ющия тя,/ по́стником похвало́, и́нокующим сла́во, пусты́ни украси́теля/ и благоче́стия учи́теля похваля́ем тя, Алекса́ндре.

От ю́ности жела́ние к Бо́гу возложи́в,/ к Нему́, ра́дуяся, возше́л еси́, име́я к Нему́ все свое́ помышле́ние,/ взыгра́ние пло́ти и страсте́й нахожде́ние воздержа́нием умертви́л еси́, Алекса́ндре прехва́льне.

Попра́в зми́я и того́ се́ти легко́ преше́л еси́,/ кры́лы благоче́стно впери́вся, живо́т бо, ра́дуяся, обре́л еси́ от са́да кре́стнаго,/ блаже́нне Алекса́ндре преподо́бне.

Богоро́дичен: Уста́ви помышле́ние и смуще́ние се́рдца моего́,/ Пречи́стая Де́во Ма́ти Бо́жия,/ к Сы́ну направля́ющи движе́ния.

Песнь 3

Ирмо́с: Ка́мень, его́же небрего́ша зи́ждущии,/ сей бысть во главу́ у́гла:/ Той есть Ка́мень,/ на не́мже утверди́ Це́рковь Христо́с,/ ю́же от язы́к искупи́.

Ка́мень – Христо́с – утверди́ се́рдце твое́ ко стра́ху Своему́,/ те́мже до́блестию жития́ твоего́/ получи́л еси́ от Него́ несконча́емое блаже́нство.

Ка́мень ве́ры яви́ся, о́тче,/ и, ви́дев тя, вся́ческая Све́дый/ сподобля́ет чуде́сных даро́в, я́коже Сам рече́:/ прославля́ющия Мя просла́влю.

Ка́менну плоть свою́ показа́л еси́, о́тче,/ о не́йже неради́в был еси́,/ но я́ко в чужде́м соста́ве нося́ ду́шу, во́лею я́звы терпя́,/ мня́ше ма́лы труды́ своя́, страда́ние, бде́ние же и моли́твы,/ сего́ ра́ди ра́дуешися во святы́х поко́их.

Богоро́дичен: Ка́мень Боже́ственный де́вства,/ ка́менно се́рдце мое́ в нераде́нии мя иму́ща/ умягчи́ ма́нием Твои́м Боже́ственным, Богоро́дице,/ еди́на бо еси́ по́мощию Твое́ю Боже́ственною вся мра́чная просвеща́еши.

Ин

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Во све́те невеще́ственне,/ от печа́лей веще́ственных востече́ к Небе́сным и невеще́ственным чино́м, преподо́бне,/ моли́твами твои́ми нас просвети́.

Воздержа́ния сла́дость иска́пав, отри́нув го́ресть страсте́й,/ те́мже па́че ме́да и со́та наслади́л еси́, о́тче, чу́вствия на́ша.

Возше́д на высоту́ доброде́телей, до́лу влеку́щая мудрова́ния оплева́л еси́ сла́сти,/ сла́дость показа́ся спасе́ния, о́тче преподо́бне,/ ста́ду твоему́ проси́ грехо́в оставле́ние.

Богоро́дичен: Прему́дрость и Сло́во О́тчее несказа́нно родила́ еси́,/ души́ моея́ лю́тую я́зву и серде́чную боле́знь утоли́, Пречи́стая.

Ин конда́к, глас 6:

Пусты́нный жи́телю,/ опусте́вшая ны от благотво́рных помышле́ний вра́жиими прило́гми,/ презе́льным твои́м к Бо́гу моле́нием сердца́ на́ша очи́сти,/ я́ко да благода́рственно вопие́м ти:/ ра́дуйся, я́ко земны́м пустынножи́тельствием, Алекса́ндре,/ доше́д Небе́снаго Ца́рствия.

Ин и́кос:

Храм Бо́гу я́ко вои́стинну себе́ соде́лав, о́тче,/ и Вы́шняго Иерусали́ма яви́ся граждани́н,/ Боже́ственными доброде́тельми твои́ми Безпло́тных че́сти сподо́бился,/ те́мже и чудеса́ твоя́, похвале́нию досто́йна, удивля́ют нас и науча́ют тебе́ зва́ти такова́я:/ ра́дуйся, благочести́ваго отца́ о́трасль;/ ра́дуйся, ма́тере благогове́йны ветвь./ Ра́дуйся, целому́дрия сто́лпе, и́мже бесо́вская шата́ния искорени́шася;/ ра́дуйся, свети́льниче многосве́тлый./ Ра́дуйся, яко увяди́л еси́ плотска́я мудрова́ния;/ ра́дуйся, пусты́ни до́брое прозябе́ние./ Ра́дуйся, пра́ведным Боже́ственное наслажде́ние;/ ра́дуйся, я́ко презре́л еси́ теку́щих и тле́нных./ Ра́дуйся, я́ко на Небеси́ со А́нгелы живе́ши;/ ра́дуйся, я́ко и́нокующим исправле́ния пра́вило./ Ра́дуйся, исто́чниче чудесе́м богото́чный;/ ра́дуйся, честны́й сосу́де./ Ра́дуйся, наста́вниче на́шего спасе́ния./ Ра́дуйся, Алекса́ндре преподо́бне, пусты́нный жи́телю.

Седа́лен, глас 8:

Столп целому́дрия высо́к яви́ся, Алекса́ндре,/ в Небе́сная главо́ю честны́х твои́х уставле́ний досяза́ше,/ и вну́тренними твои́ми твердостьми́ бе́сы устраша́еши,/ вне́шними красо́тами наде́ющихся на тя удивля́еши,/ моли́твы принося́ Христу́ Бо́гу.

Ин седа́лен, глас 8:

Красоты́ мирски́я от млады́х ногте́й, преподо́бне, возненави́дев,/ еди́наго Христа́ от се́рдца возлюби́л еси́/ и, Тому́ все́ю душе́ю прилепи́вся,/ я́ко безпло́тен, на земли́ поживе́ с пло́тию,/ сла́ву же и бога́тство мимотеку́щее нивочтоже вмени́в,/ Небе́сное бога́тство восприя́л еси́ и сла́ву ве́чную./ Те́мже ублажа́ем свято́е твое́ успе́ние/ и, в нем торжеству́юще, вопие́м ти:/ Богоблаже́нне о́тче наш Алекса́ндре,/ моли́ Христа́ Бо́га согреше́нием оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Всенепоро́чная Неве́ста Творца́,/ я́ко Неискусому́жная Ма́ти Изба́вителя,/ прия́телище я́ко су́ща Уте́шителя, Всепе́тая,/ беззако́нию мя су́ща скве́рно жили́ще и де́монов игра́лище в ра́зуме бы́вша,/ потщи́ся от сих злоде́йствия мя изба́вити,/ све́тло жили́ще доброде́тельми соде́лавши,/ Светода́тельная, Нетле́нная, разжени́ о́блак страсте́й/ и Вы́шняго прича́стия сподо́би и Све́та Невече́рняго моли́твами Твои́ми.

Песнь 4

Ирмо́с: Ду́хом прови́дя, проро́че Авваку́ме, Словесе́ воплоще́ние,/ пропове́дал еси́, вопия́:/ внегда́ прибли́житися ле́том – позна́ешися,/ внегда́ приити́ вре́мени – пока́жешися./ Сла́ва си́ле Твое́й, Го́споди.

Ду́ху Пресвято́му дом показа́лся еси́, преподо́бне,/ сохраня́я вся Его́ повеле́ния,/ во всех исправле́ниих твои́х, досточу́дне Алекса́ндре, воспева́я Христа́ Бо́га.

Ду́хом Святы́м дви́жим, изше́л еси́, му́дре, ме́ста близ жили́ща взыска́ти,/ от Него́же наставля́емь, обре́те со земны́м, нижа́йшим поко́ищем вы́шнее, Небе́сное Ца́рство,/ воспева́я Христа́ Бо́га.

Духо́вная и Боже́ственная му́дрствуя,/ ду́хи лука́выя под но́зе твои́ покори́л еси́,/ зако́ну Бо́жию уго́дник яви́ся,/ я́ко и ме́сто освяти́ся, иде́же лежи́т честно́е твое́ те́ло/ и всем ве́рным исцеле́ния источа́ет.

Богоро́дичен: Ду́хи лука́выми прельща́ема мя, Чи́стая, соблюди́,/ отгоня́я скве́рныя их нало́ги,  / запрети́ окая́нныя стези́ их, Цари́це и Влады́чице всего́ ми́ра,/ свободи́ мя, Госпоже́, от рабо́ты их и греха́.

Ин

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету посетив./ Тем с пророком Аввакумом зову Ти:/ силе Твое́й сла́ва, Человеколю́бче.

Душе́вное очища́я чу́вство и расширя́я Боже́ственными виде́нии,/ Боже́ственных дарова́ний сподо́бился еси́, блаже́нне,/ и к моще́м твои́м прикаса́ющимся, Алекса́ндре преподо́бне,/ подае́ши ско́рое исцеле́ние.

Зако́ну Бо́жию повину́яся, преподо́бне,/ к смотре́нию Безпло́тных и мы́сленных свое́ худо́жество упра́вил еси́,/ преходя́ вы́ну от сла́вы в сла́ву, от си́лы, о́тче, в си́лу.

Богоуго́дно пожи́в, пусты́ню, я́ко град, сотвори́л еси́, Богоподо́бне,/ и душеполе́зный исто́чник исцеле́ний пролива́еши/ ве́рою притека́ющим к моще́м твои́м.

Богоро́дичен: Новора́сленный безсме́ртия рай и красе́н вои́стинну показа́ся,/ дре́во жи́зни в Тебе́ насажде́ся, Бо́га во чре́ве нося́щи, и ражда́еши,/ е́же всем иска́пая спасе́ния наде́жду,/ ве́рно, Богоро́дице, испове́дующим Тя.

Песнь 5

Ирмо́с: Све́тлый нам возсия́й Свет Присносу́щный,/ у́тренюющим о судьба́х за́поведей Твои́х,/ Влады́ко Человеколю́бче, Христе́, Бо́же наш.

К све́тлому и невеще́ственному потща́вся поко́ю,/ све́тлостию Боже́ственною на земли́ просвети́ся,/ ди́вен, прему́дре, показа́лся еси́,/ просвеща́я с ве́рою к тебе́ приходя́щих.

Све́тлых ра́ди по́двиг твои́х све́тлость в души́ стяжа́вшему,/ прииди́те, ве́рнии, принесе́м хвалу́ победи́телю вражде́бных полко́в,/ Алекса́ндру, на́шему предста́телю и от напа́стей вра́жиих изба́вителю.

Светоно́сный душе́ю,/ от Бо́га прие́мый светоно́сную си́лу цели́ти неду́ги и отгоня́ти бе́сы,/ и све́тлый яви́ся безме́здный врач душа́м и телесе́м/ ве́рою притека́ющих к тебе́.

Богоро́дичен: Све́та Преми́рнаго Ма́ти,/ просвети́ ду́ши на́ша моли́твами Твои́ми,/ еди́на к Бо́гу па́че всех дерзнове́ние иму́щи,/ те́мже ма́терним дерзнове́нием Твои́м я́ко Сы́на Твоего́, объе́мши, умоли́.

Ин

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя напра́ви, молю́ся.

Угаси́в пла́мень страсте́й росо́ю по́двиг твои́х, о́тче блаже́нне Алекса́ндре,/ бога́тно вжегл еси́ огне́м любве́, ве́ры и воздержа́ния/ свети́льник просвеще́ния и безстра́стия/ и сын дне яви́лся еси́.

Ве́ры грозд Боже́ственным де́ланием, о́тче, воспита́л еси́,/ и, в точи́лех поста́вив, возгнете́ боле́зньми поще́ния,/ и ча́шу напо́лнил еси́ духо́вную воздержа́ния,/ весели́ши сердца́ ста́ду твоему́.

До́блественне претерпе́в бие́ние неви́димых враг,/ показа́лся еси́ столп непоколеби́м,/ утвержда́я ста́до твое́, я́ко па́лицею Боже́ственною, словесы́ свои́ми медото́чными,/ блаже́нне Алекса́ндре преподо́бне.

Богоро́дичен: Еди́на ро́ждши Де́ва, еди́на муженеиску́сная яви́ся, Всенепоро́чная,/ во утро́бе прие́мши Сло́во О́тчее Безнача́льное,/ Того́ мле́ком пита́ла еси́, Деви́це,/ чу́до стра́шно: де́вствуеши и зако́ны обновля́еши естества́.

Песнь 6

Ирмо́с: Отве́ргл мя еси́ во глубины́ се́рдца морска́го,/ и спасл еси́ мя, Спа́се, от рабо́ты сме́ртныя,/ и разреши́л еси́ узы беззако́ний мои́х.

Отве́рже мятежи́ мирски́я и, вда́вся еди́ному Влады́це,/ Его́же крест на ра́мо взем, распе́нся ми́рови,/ страстьми́ по́стническими посрами́л еси́ велиа́ра/ и спа́слся еси́ у Христа́ в Ца́рствии Небе́снем.

Отве́ргл еси́ душему́дренно главы́ своея́ власы́,/ отве́ргл еси́ и плотска́я взыгра́ния,/ отве́ргл еси́ и мы́сленный томле́ния, наноси́мая от бесо́в,/ и, укрепи́вся на ня, бысть во́ин Небе́снаго Царя́ и Бо́га.

Отве́ргшихся целому́дрия и привлече́нных к многоцеле́бному твоему́ гро́бу,/ от бесо́вских уз и чу́вственных разреша́еши/ си́лою Боже́ственнаго дарова́ния.

Богоро́дичен: Отве́рзи, Богоро́дице, Небе́снаго Ца́рствия две́ри/ ве́рою испове́дающим Тя,/ еди́ну от ве́ка избра́нную Пречи́стую всех Бо́га Ма́терь.

Ин

Ирмо́с: Очи́сти мя, Спа́се,/ мно́га бо беззако́ния моя́,/ низ глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Исцеле́ний ре́ки источа́еши,/ стра́сти земноро́дных боже́ственно очища́еши,/ те́мже, ра́дующеся, ве́рою восхваля́ем твоя́ по́двиги, чу́дне.

От всех Соде́теля десни́цею венча́лся еси́, преподо́бне Алекса́ндре,/ Небе́сный граждани́не, А́нгелов равностоя́телю.

Нетле́ннаго и Боже́ственнаго пребыва́ния и непости́жных наслажда́яся ны́не благи́х,/ А́нгелов собесе́дниче, Алекса́ндре Богому́дре,/ восхваля́ющих тя спаса́й.

Богоро́дичен: Бо́га ро́ждши, вся́кия тва́ри, Влады́чице,/ я́ко вои́стинну еди́на, Богоро́дице,/ превы́шши всех яви́лася еси́.

Конда́к, глас 8:

Иже земна́я оста́вль,/ в пусты́ню всели́вся,/ Христо́вым стопа́м после́довал еси́, те́пле,/ и Того́, сла́вне, на ра́му свое́ю честны́й крест взем,/ умертви́л еси́ пло́ти взыгра́ния/ труды́ по́стническими и жела́нием духо́вным, всеблаже́нне,/ те́мже зове́м ти:/ ра́дуйся, Алекса́ндре, пусты́нный жи́телю.

И́кос:

Учи́телю кро́тости и смире́ния, предстоя́телю Престо́ла Христо́ва,/ при́зри на моля́щих ти ся от свяще́нных высо́т,/ услы́ши хва́лящих тя,/ а́ще и недоуме́ем, но по ми́лости твое́й вонми́, возлю́бленне,/ я́ко ма́терь де́тская немова́ния  , прии́м с ве́рою моля́щих тя:/ приими́ моле́ния на́ша, честны́й наш учи́телю;/ приими́, освяще́нный па́стырю, прибе́жище на́ше и утвержде́ние;/ приими́, те́плый к Бо́гу моли́твенниче и нело́жный о нас хода́таю,/ да благода́рственно вопие́м:/ ра́дуйся, Алекса́ндре, пусты́нный жи́телю.

Песнь 7

Ирмо́с: Су́щим в пещи́ отроко́м Твои́м, Спа́се,/ не прикосну́ся, ниже́ стужи́ огнь./ Тогда́ трие́, я́ко еди́неми усты́, по́яху/ и благословля́ху, глаго́люще;/ благослове́н Бог оте́ц на́ших.

И́же к Бо́гу положив по́мысл неизме́нный/ и быв нело́жный жела́тель безсме́ртнаго Живота́,/ пре́был еси́ в наде́жди Бо́жий,/ благословля́я и сла́вя Христа́:/ отце́в Бог, благослове́н еси́.

И́же в пусты́ни вся стра́сти теле́сныя умерщвля́я,/ и от враг озлобле́ния прие́мля,/ и искуше́ния вся терпя́, наде́жды ра́ди Боже́ственных и безконе́чных благ,/ во пло́ти, я́ко безпло́тен, яви́лся еси́, на свою́ плоть ра́тованием,/ и, Бо́гом спаса́емь, без ско́рби пре́был еси́.

И́же от Бо́га по́мощь на бори́тельная враги́ прие́мый,/ пода́ждь нам по́мощь, я́ко да в благоугожде́нии свя́тости твое́я яви́мся,/ и моли́твами твои́ми получи́м от Бо́га ми́лость.

Богоро́дичен: Я́же еди́на, Бо́га пло́тию ро́ждшая,/ к Сы́ну Твоему́ моли́твами оживи́ мя, уме́ршаго грехми́,/ Пречи́стая Ма́ти Де́во.

Ин

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.

И́же к Бо́гу положи́в по́мысл непреста́нно моли́ти Его́, Алекса́ндре Богому́дре,/ о ста́де твое́м приле́жно моли́ся,/ тебе́ на моли́тву призыва́ющем, и плоды́ принося́щем, и любо́вию пою́щем:/ благослове́н Бог оте́ц на́ших.

Во зла́це Вы́шняго Ца́рствия ста́до твое́, о́тче, воспита́л еси́/ и жезло́м свои́х уче́ний упасе́, пою́щия:/ благослове́н Бог оте́ц на́ших.

Вре́менная отложи́в, ве́чными украси́лся еси́,/ со А́нгелы лику́еши, я́ко а́нгельское пожи́в житие́,/ с ни́ми же пое́ши:/ благослове́н Бог оте́ц на́ших.

Богоро́дичен: Избавля́емся вси от страсте́й, и бед, и обстоя́ний, Бо́же, и неду́г многообра́зных/ моли́твами Пречи́стыя Твоея́ Ма́тере и преподо́бнаго Алекса́ндра, пою́ще:/ благослове́н Бог оте́ц на́ших.

Песнь 8

Ирмо́с: Чу́да преесте́ственнаго/ показа́ о́браз огнеро́сная пещь дре́вле,/ огнь бо не опали́ ю́ныя де́ти,/ Христо́во явля́я безсе́менное от Де́вы Боже́ственное рождество́./ Тем, воспева́юще, воспои́м:/ да благослови́т тварь вся Го́спода/ и превозно́сит во вся ве́ки.

Чу́ден показа́в о́браз, преподо́бне о́тче, по́двиг доброде́телей твои́х,/ е́же к Бо́гу моле́ния со слеза́ми и воздыха́ниями,/ бде́ния же, и поще́ния, и трудо́в изволе́ния,/ рабо́ты же и вся́кия преоби́дения те́лу –/ вся бо, о́тче, вы́ше челове́ческаго терпе́ния во́лею претерпе́л еси́.

Чу́дна терпе́ния твоя́, чу́дна страда́ния,/ чу́дна во́льная твоя́ сокруше́ния пло́ти,/ те́мже и Христо́с ми́лостивно тя прия́т/ и ра́достна и поко́йна во Ца́рствии Свое́м устро́и;/ мо́лим тя, о́тче честны́й:/ о нас, рабе́х твои́х, помоли́ся.

Чуде́сный от Бо́га дар прия́л еси́, о́тче Алекса́ндре,/ цели́ти неду́ги и отгоня́ти бе́сы,/ те́мже и ду́ши на́ша, от бесо́вских нало́г стра́ждущия, исцели́/ е́же к Бо́гу, о́тче, бо́дренными твои́ми моли́твами.

Богоро́дичен: Чу́до еди́но в земны́х па́че всех преесте́ственных чуде́с показа́ся,/ пло́тию бо Отрокови́ца Преве́чному естеству́ Ма́терь бысть/ и Боже́ственным естество́м плоть Ея́ без истле́ния сохрани́ся,/ и, по рождестве́ де́вствующи, всем Небе́сным си́лам Госпожа́ и Цари́ца я́вльшися,/ моли́ Сы́на Твоего́ спасти́ ду́ши на́ша.

Ин

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

Столп тя одушевле́н я́ко вои́стинну/ и о́браз воздержа́ния, о́тче, стяжа́вши,/ вси твою́, Алекса́ндре, почита́ем па́мять.

Собо́р ра́дуется и́ноческий и лик преподо́бных,/ с ни́миже и пра́ведных вене́ц досто́йно прия́л еси́.

Укра́шен доброде́тельми,/ в поко́ищи неизре́ченныя сла́вы возле́гл еси́,/ песнь воспева́я Христу́ во ве́ки.

Богоро́дичен: Поглоще́нна боле́зньми и па́дшася, возста́ви мя, Богома́ти,/ я́ко да Тя сла́влю во ве́ки.

Песнь 9

Ирмо́с: Неизглаго́ланное Де́вы та́инство:/ Не́бо бо Сия́, и престо́л Херуви́мский/ и светоно́сный черто́г показа́ся/ Христа́ Бо́га Вседержи́теля./ Сию́ благоче́стно я́ко Богоро́дицу велича́ем.

Неизглагола́нно, отче, е́же к Бо́гу изволе́ние жития́ твоего́,/ преподо́бне о́тче Алекса́ндре,/ а́ще бо и тщи́мся воспева́ти тя,/ но превосше́ствия твоего́ ра́ди до́брых благодея́ний/ ни ма́ло стези́ каса́емся похвале́ния,/ но, о Богому́дре о́тче, сам на́ша неразу́мия испра́ви.

Неизглаго́ланным твои́м, о́тче, к Бо́гу моле́нием,/ исто́чники слез и понужде́нием те́ла/ утверди́лся еси́ в преди́вных доброде́телех;/ всех, я́же в ми́ре, удали́лся еси́, вся возненави́дев, и к Бо́гу прибли́жился еси́,/ Его́же моли́ о нас, чту́щих тя.

Неизглаго́ланная от Бо́га, преподо́бне, чудеса́ сотво́ршаго, ка́ко тя восхва́лим,/ иму́щаго и от саме́х похвале́ние А́нгел,/ но недоуме́нием ели́ко мо́жем хвали́ти тя, почита́ем же и велича́ем,/ я́ко да Христа́ ми́лостиваго умоли́ши о нас, чту́щих тя.

Богоро́дичен: Неизглаго́ланно заче́нши без се́мене/ и несказа́нно ро́ждши без истле́ния,/ и в рождестве́ и по рождестве́, я́коже и пре́жде рождества́, Де́ва пребыва́еши, Богоро́дице Мари́е:/ Бог бе рожде́йся и ро́ждшую Тя, я́ко Сам весть, сохрани́в,/ те́мже всяк язы́к челове́ческий, па́че же а́нгельский,/ не мо́жет по достоя́нию похвали́ти Рождества́ Твоего́ Боже́ственнаго, Богома́ти Всепе́тая.

Ин

Ирмо́с: Чи́стую сла́вно почти́м, лю́дие, Богоро́дицу,/ Огнь Божества́ прии́мшую во чре́ве неопа́льно,/ пе́сньми велича́ем.

В неду́ги па́дающим цели́тель от Бо́га показа́лся еси́, блаже́нне,/ и прогони́тель лука́вых духо́в, Богоно́се Алекса́ндре,/ тем тя вси велича́ем.

Я́ко ле́тно жили́ще, зе́млю оста́вил еси́, о́тче,/ все́лься в зе́млю кро́тких,/ с ни́миже и ра́дуешися, Боже́ственным наслажда́яся сия́нием.

Неукло́нен в ве́ре приме́р и о́браз воздержа́ния иму́ще по́двиги твоя́,/ вои́стинну пе́сньми тя велича́ем.

Богоро́дичен: В Тя всели́ся, Богоро́дице Всенепоро́чная, Бог непрело́жно,/ И́же человекоуби́йцу низложи́, из Тебе́ роди́вся,/ и всех нас спасл есть.

Свети́лен:

Па́стырю до́брый, посеща́й моля́щихся тебе́ ве́рою/ и спаса́й твое́ ста́до, иму́щее тя те́пла предста́теля,/ и к Бо́гу хода́тая, и ско́раго побо́рника на враги́ на́ша.

Слава:

Подо́бен: Жены́, услы́шите:

Пристра́стия мирска́го, я́ко от скве́рны, уклони́лся еси́,/ разу́мнаго Со́лнца светоза́рная луча́,/ возсия́ свети́льник многосве́тлый, пусты́нное воспита́ние и чистоты́ оби́телище,/ Христо́вы добро́ты я́сно взира́я,/ Его́же сия́нием ум свой озари́/ и сла́вою обогати́ся Небе́сною, Алекса́ндре сла́вне,/ мо́лим тя в ми́ре сохране́нным бы́ти па́мять твою́ почита́ющим.

И ны́не, Богоро́дичен:

Спаси́ нас, Благослове́нная Богоро́дице Де́во,/ да не поги́бнем от борю́щих нас неви́димых враг,/ к Тебе́ бо прибега́юще, невреди́мы пребыва́ем/ и, па́ки согреша́юще, и́мамы Тя тве́рду Моли́твенницу о душа́х на́ших.

На хвалитех стихи́ры, глас 4:

Хотя́, Богому́дре, слеза́ми очи́ститися,/ изше́л еси́ в ме́сто уедине́нно,/ в не́мже возмо́же смышле́ние свое́ де́лом испо́лнити,/ терпя́ше бо вся, приклю́чшаяся тебе́, благода́рственне,/ и ни о чем же оскорбля́шеся, я́ко непобеди́м,/ темже и по преставле́нии/ у Зижди́теля, ра́дуяся, живе́ши в Вы́шних све́тлостех/ и от многотру́днаго свята́го твоего́ те́ла исцеле́ние/ с ве́рою прикаса́ющимся бога́тно излива́еши.

К Бо́гу ве́рою, Богому́дре, прине́слся еси́,/ я́ко кади́ло благово́нно,/ и я́ко неле́стен дар,/ и я́ко чи́ста же́ртва,/ испуща́я духо́внаго твоего́ труда́ по́ты,/ я́ко ми́ра че́стна,/ те́мже и Христо́с Бог внят на же́ртву твою́:/ сего́ ра́ди име́я к Нему́ дерзнове́ние,/ моли́ о ве́рно почита́ющих тя.

Благоче́стие и ве́ра,/ кро́тость и целому́дрие,/ любо́вь соверше́нна и воздержа́ние –/ сия́ вся в жи́зни твое́й/ преумно́жися в тебе́, о́тче Алекса́ндре,/ ны́не, о́тче, ве́чную жизнь приобре́т/ и та́мо у́бо пребо́льшую благода́ть имы́й,/ предстоя́ Святе́й Тро́ице,/ не преста́й, благоутро́бне о́тче,/ прося́ у Ми́лостиваго Бо́га/ пода́ти оставле́ние грехо́в че́стно тя блажа́щим.

Сла́ва, глас 8:

Богому́дре Алекса́ндре,/ от млады́х ногте́й созва́н,/ прише́дый на Вы́шняго ве́черю,/ душе́вная одея́ния бра́чно нося́/ и без закосне́ния в Ца́рский черто́г вшед,/ Све́том немерца́ющим вы́ну освяща́ешися./ Сего́ ра́ди ра́дуйся,/ сия́ неизрече́нная и неизжива́ющая приобреты́й/ и утверди́выйся в них во ве́ки несконча́емый,/ и мы у́бо, убо́зи, призыва́ем тя ве́рою:/ да умоли́ши о спасе́нии душ на́ших.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

НА ЛИТУРГИ́И

Блаже́нны от кано́нов свята́го, песнь 3-я на 4 и втора́го кано́на песнь 6-я на 4. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник