НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: поста́вим стихо́в 8 и пое́м стихи́ры, глас 4:

Да возвесели́тся дне́сь земля́ Сиби́рская,/ наста́ бо пресве́тлый де́нь па́мяти/ вели́каго святи́теля и чудотво́рца Иоа́нна,/ да ра́дуются насе́льницы сея́ страны́,/ име́юще святы́я и многоцеле́бныя мо́щи сла́внаго уго́дника Бо́жия,/ да возра́дуются го́ры, и хо́лми, и пусты́ни, и доли́ны Сиби́рския,/ восхваля́юще Го́спода,/ да́вшаго всем нам до́браго па́стыря,/ непреста́нно моля́щагося о спасе́нии душ на́ших.

О вели́кий святи́телю и чудотво́рче Иоа́нне,/ при́зри ми́лостивно в де́нь торжества́ твоего́/ на со́бранная для моли́твы твоя́ духо́вная ча́да,/ да́руй нам моли́твами твои́ми теле́сное здра́вие и душ спасе́ние,/ да, подкрепля́емы твои́м предста́тельством пред Бо́гом,/ дерзнове́нно просла́вим Го́спода,/ да́вшаго нам такова́го святи́теля и чудотво́рца,/ вы́ну моля́щагося о спасе́нии душ на́ших.

К тебе́, честны́й о́тче,/ мы в де́нь торжества́ твоего́ прибега́ем/ и, припа́дающе, мо́лимся тебе́:/ помози́ нам крест земна́го на́шего жития́ благоду́шно носи́ти/ и за Бо́жия посеще́ния хвалу́ Го́споду воздава́ти,/ в ми́ре и покая́нии до́бре жи́тельствовати/ и тебе́, уго́дниче Бо́жий, восхваля́ти,/ я́ко непреста́нно моля́щагося о спасе́нии душ на́ших.

Дне́сь, благове́рнии лю́дие,/ вси мы, предстоя́ще ра́це моще́й святи́теля Тобо́льскаго Иоа́нна,/ со умиле́нием да взыва́ем ему́:/ о вели́кий сиби́рский подви́жниче,/ не забу́ди чад твои́х, в боле́знех и ско́рбех к тебе́ прибега́ющих,/ с ве́рою твоея́ по́мощи прося́щих,/ я́ко вы́ну моля́щагося о спасе́нии душ на́ших.

Мно́го мо́жет моли́тва пра́ведника поспешеству́ема:/ взира́юще на честну́ю ра́ку моще́й святи́теля Иоа́нна,/ ста́нем со дерзнове́нием и упова́нием взыва́ти ко Го́споду,/ да моли́тву вели́каго святи́теля за нас, гре́шных, прии́мет Госпо́дь/ и даст спасе́ние душа́м на́шим.

Сла́ва, глас 7:

Святи́телей украше́ние и мона́шествующих добро́ту,/ восхва́лим вси святи́теля Тобо́льскаго,/ и́стиннаго люби́теля сло́ва Бо́жия,/ му́драго наста́вника и подви́жника,/ архипа́стыря нищелюби́ваго и бла́гостнаго,/ в земли́ Сиби́рстей по́двиг святи́тельский сконча́вшаго/ и блаже́нною кончи́ною свое́ю свя́тость свою́ яви́вшаго,/ его́же дне́сь восхваля́юще, та́ко рцем:/ о вели́кий моли́твенниче,/ не преста́й взыва́ти о нас ко Го́споду,/ да сохрани́т страну́ на́шу в ми́ре и тишине́/ и на пути́ к ве́чному спасе́нию да утверди́т нас,/ по вели́цей Свое́й ми́лости.

И ны́не, Богоро́дичен.

Вход. Проки́мен дне и чте́ния 3 святи́тельская (зри 15 июня)

На лити́и стихи́ры, глас 1:

Ра́дуйтеся, Сиби́рстии наро́ди,/ торжеству́йте, вси, лю́бящии вели́каго Тобо́льскаго святи́теля./ Сей бо, в Руси и́ноческий по́двиг и святи́тельское служе́ние подъя́в,/ на коне́ц жития́ своего́ во хла́дную Сиби́рь притече́,/ вели́кую ста́рческую му́дрость сюда́ принесе́/ и блаже́нную кончи́ну восприя́т,/ сего́ ра́ди и просла́ви его́ Госпо́дь, и да́ром чуде́с обогати́,/ и те́ло его́ нетле́нным сохрани́.

Ты еси́ сла́ва градо́в Черни́гова и Тобо́льска,/ всечестне́йший святи́телю;/ ты еси́ прее́мник святи́теля Черни́говскаго Феодо́сия,/ и́же тебе́ возлюби́/ и боля́щему тебе́ здра́вие дарова́;/ ты еси́ единоревни́тель вели́кому апо́столу Сиби́ри Инноке́нтию/ и смиренному́дрому Софро́нию;/ ты еси́ свети́льник, на горе́ Тобо́льстей поста́вленный,/ твое́й святе́й жи́зни и мы вси подража́ти да потщи́мся,/ да все́ми на́ми прославля́ется И́мя Отца́ на́шего Небе́снаго.

Ди́вный во святы́х Свои́х Госпо́дь/ в тебе́, святи́телю, показа́ нам о́браз смире́ния и кро́тости,/ всепроще́ния и нищелю́бия./ Возлю́бим и мы, бра́тие, сия́ вели́кия доброде́тели,/ да и нам даст Госпо́дь безболе́зненную христиа́нскую кончи́ну/ и ве́чное насле́дие со все́ми святы́ми.

Сла́ва, глас 3:

Твои́м святы́м житие́м/ сла́вится и ю́жный край Руси́ святы́я/ и се́верный ея́ преде́л;/ твоя́ вели́кая любо́вь к Бо́гу и к лю́дем живопису́ется;/ твоя́ му́дрость в па́стырском води́тельстве твои́х пасо́мых/ в душа́х и сердца́х их печатле́ется;/ твой непреста́нный моли́твенный по́двиг/ влече́т всех нас к подража́нию./ О вели́кий уго́дниче Христо́в!/ соде́лай лю́бящих тебе́/ до́брыми исполни́телями Христо́ва зако́на,/ да вси прии́мем ми́лость/ и благода́ть обря́щем во благовре́менную по́мощь.

И ны́не, глас то́йже:

Без се́мене от Боже́ственнаго Ду́ха,/ во́лею же О́тчею зачала́ еси́ Сы́на Бо́жия,/ от Отца́ без ма́тере пре́жде век су́ща,/ нас же ра́ди из Тебе́ без отца́ бы́вша,/ пло́тию родила́ еси́/ и Младе́нца млеко́м пита́ла еси́./ Те́мже не преста́й моли́ти/ изба́витися от бед душа́м на́шим.

На стихо́вне стихи́ры, глас 5:

Ра́дуйся, святи́телю о́тче Иоа́нне,/ Сиби́рския страны́ храни́телю,/ моля́щимся кре́пкое упова́ние,/ боля́щих безме́здный целе́бниче,/ ни́щих пита́телю/ и всем христиа́ном му́дрый наста́вниче,/ бу́ди всем нам засту́пник необори́мый/ и о всем ми́ре моли́твенник.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Ра́дуйся, пече́рское воспита́ние,/ ю́ношей благи́й и духо́вный учи́телю,/ Черни́говския земли́ подви́жниче,/ святи́телю Феодо́сию подо́бниче,/ Еле́цкия оби́тели нача́льниче/ и Черни́говский архипа́стырю бла́гостный,/ не преста́й моля́ся о всех,/ к твое́й по́мощи прибега́ющих.

Стих: Храни́т Госпо́дь вся ко́сти их,/ и ни еди́на от них сокруши́тся.

Ра́дуйся, мона́шескаго жития́ све́тлый о́бразе/ моли́твенное пра́вило, о́ко недре́млющее,/ собесе́дниче А́нгелов, па́стырю учи́тельный,/ на свое́ ста́до с Небесе́ взира́ющий./ Моли́ся Го́сподеви поми́ловатися душа́м на́шим.

Сла́ва, глас 8:

Святи́телю Христо́в Иоа́нне,/ хла́дныя Сиби́ри моли́твенниче,/ гра́да Тобо́льска стено́ необори́мая,/ Руси стра́же благода́тный,/ преподо́бных и пра́ведных соприча́стниче,/ святи́телей похвало́,/ не забу́ди чад твои́х и моли́ся Го́сподеви/ дарова́ти нам ве́лию ми́лость.

И ны́не, Богоро́дичен.

На благослове́ние хле́бов Тропа́рь свята́го два́жды и Богоро́дице Де́во: еди́ножды.

Тропа́рь свята́го, глас 8:

Наста́вниче благоче́стия,/ сиро́тствующих пита́телю,/ скорбя́щих уте́шителю, неду́гующих врачу́ безме́здный,/ душе́ю стра́ждущих ско́рый помо́щниче,/ те́плый моли́твенниче о всех ко Го́споду,/ святи́телю о́тче Иоа́нне,/ моли́ Христа́ Бо́га спасти́ся душа́м на́шим.

НА У́ТРЕНИ

На Бог Госпо́дь: Тропа́рь свята́го, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 4:

Боля́щу ти, святи́телю Иоа́нне, и на одре́ сме́ртнем лежа́щу,/ яви́ся тебе́ святи́тель Феодо́сий и повеле́ тебе́:/ служи́ зау́трие, и здрав бу́деши./ Нима́ло же усумне́вся во обеща́нии,/ ты повеле́л еси́ вся пригото́вити к твоему́ служе́нию во хра́ме,/ и, ми́лостию Бо́жиею соверши́в в по́лном здра́вии Литурги́ю,/ своему́ Небе́сному цели́телю соста́вил еси́ похвалу́,/ и всем лю́дем возвести́л еси́ чудоде́йственную тебе́ по́мощь святи́теля Феодо́сия.

Сла́ва, и ны́не, Богоро́дичен:

Бо́га, из Тебе́ воплоти́вшагося, разуме́хом, Богоро́дице Де́во,/ Того́ со святи́телем Иоа́нном моли́/ спасти́ся гра́ду на́шему Тобо́льску/ и всей стране́ Сиби́рстей.

По 2-м стихосло́вии Седа́лен, глас 2:

Пастыренача́льник Госпо́дь, на коне́ц жития́ твоего́, святи́телю Иоа́нне,/ повеле́ тебе́ из со́лнечныя и те́плыя страны́ Черни́говския/ прия́ти зва́ние митрополи́та Тобо́льскаго и всея́ Сиби́ри./ Повину́яся во́ле Бо́жией,/ ты, святи́телю, смире́нно прия́л еси́ на себе́ тяготу́ сиби́рскаго служе́ния,/ назида́я коего́ждо от нас в путе́х своего́ жития́ ви́дети прему́друю ру́ку Го́спода./ Сла́ва тебе́, смире́нный и кро́ткий святи́телю.

Сла́ва, и ны́не, Богоро́дичен:

Обнови́ла еси́, Чи́стая, Боже́ственным рождество́м Твои́м/ истле́вшее страстьми́ земноро́дных ме́ртвенное существо́/ и воздви́гла еси́ вся от сме́рти к жи́зни нетле́ния,/ те́мже Тя по до́лгу блажи́м вси, Де́во Препросла́вленная,/ прорекла́ еси́.

По полиеле́и седа́лен, глас 8:

Па́стырскую му́дрость смиренному́дрием стяжа́в,/ ты, вели́кий святи́телю,/ и в кра́ткое пребыва́ние свое́ в Сиби́ри/ не те́сно в се́рдце свое́м вмести́л еси́/ забо́ты о просвеще́нии све́том Христо́ва уче́ния/ многочи́сленныя наро́ды Тобо́льскаго кра́я:/ вогу́лы, остя́ки, тата́ры./ Те́мже моще́й нетле́нием просла́ви тя Мздовоздая́тель Госпо́дь,/ Его́же непреста́нно моли́ прегреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Небе́сную две́рь и киво́т,/ всесвяту́ю го́ру, све́тлый о́блак воспои́м,/ неопали́мую купину́, слове́сный рай, Е́вы воззва́ние,/ вселе́нныя всея́ вели́кое сокро́вище,/ я́ко спасе́ние в Ней соде́лася ми́ру и оставле́ние дре́вних согреше́ний./ Сего́ ра́ди и вопие́м Ей:/ моли́ся Сы́ну Твоему́ прегреше́ний оставле́ние дарова́ти/ благоче́стно покланя́ющимся всесвято́му рождеству́ Твоему́.

Степе́нна 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Иоа́нна, зача́ло 35.

По 50-м псалме́ стихи́ра, глас 6:

Преподо́бне о́тче,/ всея́ Сиби́ри чудотво́рче,/ святи́телю Иоа́нне,/ умоли́ Го́спода дарова́ти нам ве́ру непоколеби́мую,/ наде́жду све́тлую, любо́вь нелицеме́рную,/ я́коже ты сам, о́тче, си́ми доброде́тельми/ Отца́ на́шего Небе́снаго просла́вил еси́./ Не забу́ди в моли́твах твои́х чад твои́х,/ честны́я твоя́ мо́щи лобыза́ющих и чту́щих па́мять твою́,/ нищелю́бца и моли́твенника.

Пара́клисис Богоро́дице на 6 и святи́телю кано́н на 8, глас 1.

Пе́снь 1

Ирмо́с: Пе́снь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися.

Сло́ве Бо́жий,/ помози́ ми досто́йно воспе́ти чудотво́рца Сиби́рскаго, святи́теля Иоа́нна,/ моя́ прегреше́ния презира́я и подава́я му́дрость се́рдцу и усто́м мои́м.

Был еси́, святи́телю Иоа́нне, ю́ноша благочести́в,/ роди́телем утеше́ние, кни́жному уче́нию приле́жен,/ умудря́я ра́зум свой высо́кими позна́нии/ и к Го́сподеви всем се́рдцем прилепля́яся.

Глубо́кия ве́ры прича́стник был еси́, преподо́бне,/ егда́, обуча́я ю́ношей,/ стремле́ние ко Го́споду в сердца́х их му́дро пробужда́л еси́,/ наставля́я их вся обраща́ти во сла́ву Го́спода.

Богоро́дичен: Пресвята́я Де́во,/ со святи́телем Тобо́льским Иоа́нном/ моли́ся к Сы́ну Твоему́, Го́споду на́шему Иису́су Христу́,/ да пода́ст нам оставле́ние прегреше́ний на́ших и от вся́ких бед спасе́т.

Катава́сия по уста́ву.

Пе́снь 3

Ирмо́с: Ка́мень, его́же небрего́ша зи́ждущии,/ сей бы́сть во главу́ у́гла:/ Той е́сть Ка́мень,/ на не́мже утверди́ Це́рковь Христо́с,/ ю́же от язы́к искупи́.

Ки́ево-Пече́рская Ла́вра всеце́ло плени́ тя, святи́телю Иоа́нне,/ и в се́рдце твое́м возгоре́ся о́гнь:/ мир и я́же в ми́ре оста́вити/ и во и́ночестем зва́нии Бо́гу послужи́ти.

Умудри́л еси́, святи́телю Бо́жий, ра́зум твой веле́нием сло́ва Бо́жия/ и, в зва́нии иеромона́ха быв,/ яви́л еси́ вели́кия тала́нты в пропове́дании сло́ва Бо́жия/ и наро́дную любо́вь стяжа́л еси́.

Бра́тию Ла́вры умиля́л еси́, святи́телю,/ егда́ в пути́ и́ноческаго жития́ своего́/ все́ю душе́ю предава́лся еси́ уси́ленным моли́твенным по́двигом,/ усе́рдному и постоя́нному посеще́нию служб церко́вных/ и воздава́л еси́ сла́ву Бо́гу,/ та́ко о тебе́ благоволи́вшему.

Богоро́дичен: О, Ма́ти Бо́жия!/ Твои́ми всеси́льными мольба́ми соде́лай нас подража́тели жития́ святи́теля Иоа́нна,/ да и на́шим житие́м сла́вится Бог,/ в Тро́ице Святе́й почива́яй.

Седа́лен, глас 6:

Дне́сь све́тло красу́ется сла́вный град Тобо́льск,/ и вси сы́ны Це́ркве страны́ Сиби́рския ра́дуются,/ прославля́я де́нь блаже́нныя кончи́ны святи́теля Иоа́нна,/ и ре́вностию ко спасе́нию просвеща́ются,/ зря́ще нетле́нием просла́вленныя мо́щи его́, и ко Го́споду взыва́ют:/ моли́твами уго́дника Твоего́, Го́споди,/ спаси́ ду́ши на́ша.

Пе́снь 4

Ирмо́с: Ду́хом прови́дя, проро́че Авваку́ме, Словесе́ воплоще́ние,/ пропове́дал еси́, вопия́:/ внегда́ прибли́житися ле́том – позна́ешися,/ внегда́ приити́ вре́мени – пока́жешися./ Сла́ва си́ле Твое́й, Го́споди.

До́бре подвиза́лся еси́, святи́телю, во святе́й Ла́вре,/ моли́твенное уедине́ние соде́ла тя избра́нным сосу́дом благода́ти Боже́ственныя,/ и, позна́в твое́ чи́стое в мона́шестве житие́,/ святи́тель Черни́говский Феодо́сии призва́ тя в Черни́гов,/ и в сан архимандри́та возво́дит,/ и Еле́цкую оби́тель во управле́ние тебе́ поручи́.

С любо́вию и до́брым послуша́нием рабо́тал еси́, святи́телю Иоа́нне, святи́телю Феодо́сию,/ по блаже́нней же кончи́не его́/ наро́дом правосла́вным избра́н был еси́ прее́мником его́ святи́тельскаго служе́ния/ и Святе́йшим Патриа́рхом Адриа́ном рукополо́жен был еси́ в архиепи́скопа Черни́говскаго.

Я́ко свети́льник све́тлый, на высоте́ архиере́йскаго престо́ла поста́вленный,/ ты, святи́телю, свои́ми вели́кими доброде́тельми сниска́л еси́ вели́кую любо́вь па́ствы твоея́./ Дай и нам, гре́шным, моли́твами твои́ми свет Христо́в жи́знию свое́ю явля́ти/ и бы́ти о́бразом для всех, спасе́ния и́щущих.

Богоро́дичен: Моли́, Пречи́стая, Бо́га, без се́мене от Тебе́ ро́ждшагося,/ да упра́вим житие́ свое́ ко благоугожде́нию Го́споду/ и в любви́ к бра́тиям на́шим.

Пе́снь 5

Ирмо́с: Твой мир да́ждь нам,/ Сы́не Бо́жий:/ ина́го бо, ра́зве Тебе́, бо́га не зна́ем./ И́мя Твое́ имену́ем,/ я́ко Бог живы́х и ме́ртвых еси́.

С вели́кою печа́лию Черни́говския духо́вныя де́ти твоя́/ провожда́ху тя, святи́телю, в град Тобо́льск,/ но оби́тели Тобо́льска ра́достно срето́ша тебе́,/ я́ко ве́стника ми́ра и учи́теля благоче́стия./ Ны́не же вся Сиби́рь благогове́йно соверша́ет па́мять твою́ и мо́лится тебе́,/ да огради́ши ми́ром всю зе́млю сию́/ и в Ца́рствие Бо́жие введе́ши моля́щихся тебе́.

Святи́телю Христо́в!/ ве́сь досу́г свой ты посвяща́л еси́ составле́нию книг душеполе́зных,/ и ча́да твоя́ духо́вная, пита́яся и́ми,/ о мирско́м попече́ние оставля́ху/ и устремля́хуся к получе́нию ве́чнаго блаже́нства.

Кто мо́жет изобрази́ти твое́, святи́телю бла́гостный, нищелю́бие,/ твоя́ та́йныя посеще́ния обита́лищ бе́дных,/ твоя́ бесе́ды с заключе́нными?/ Научи́ и нас не для себе́ жи́ти,/ но и о бе́дных помышля́ти и стра́ждущих посеща́ти,/ да получи́м благослове́ние от Го́спода.

Богоро́дичен: Святи́тель Иоа́нн святу́ю ико́ну Богома́тере, сия́ющую чудесы́,/ дарова́ гра́ду Тобо́льску,/ да ве́рнии лю́дие прославля́ют чу́дное заступле́ние Богома́тере/ и моли́твы своего́ святи́теля.

Пе́снь 6

Ирмо́с: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́.

Благовествова́ние твое́ и́стин Ева́нгельских,/ благогове́йное соверше́ние Богослуже́ний,/ кро́тость и смире́ние/ стяжа́ша тебе́ не́жную и святу́ю любо́вь наро́дную:/ помина́й и нас, гре́шных, у Престо́ла Царя́ Сла́вы/ и да́ждь нам не о вре́меннем пещи́ся,/ но о приобре́тении благ Ца́рствия Небе́снаго.

Вдовы́, и сироты́, и вси бе́днии обита́тели Тобо́льска/ вои́стинну ви́деша в тебе́ отца́ своего́/ и, получа́юще от Тебе́ по́мощь, прославля́ху Го́спода,/ еди́наго милосе́рдия Учи́теля.

Ты, святи́телю, наипа́че де́лом и все́ю свое́ю жи́знию/ учи́л еси́ всех жи́ти по Христо́ву Ева́нгелию./ Твои́ми моли́твами соде́лай и нас неле́ностными испо́лнительми Ева́нгельских за́поведей,/ да с тобо́ю сподо́бимся во ве́ки в ра́йских оби́телех прославля́ти на́шего Спаси́теля.

Богоро́дичен: Усе́рдная Моли́твеннице на́ша,/ при́зри на на́ша стена́ния,/ боле́зни на́ша исцели́,/ грехо́в бре́мя разреши́,/ любо́вь к Бо́гу и бра́тиям в се́рдца на́ша всади́,/ да, изба́вльшеся от злых, просла́вим Тебе́,/ Вино́вницу на́шего спасе́ния.

Конда́к, глас 2:

Яви́лся еси́ во тьме́ неве́дения пребыва́ющим просвети́тель,/ вдов и сиро́т уте́шитель,/ ди́вный врач немощству́ющих,/ младе́нцев и отроко́в наста́вник,/ роди́телем же пресве́тлое ра́дование,/ святи́телю о́тче Иоа́нне,/ моли́ Христа́ Бо́га пода́ти стране́ на́шей в ве́ре утвержде́ние,/ во́инству на́шему на враги́ побе́ду и одоле́ние,/ лю́дем же свои́м ве́лию ми́лость.

И́кос:

Блаже́нна кончи́на твоя́, святи́телю:/ по Боже́ственней Литурги́и пита́я дру́ги своя́, с ни́миже труди́лся еси́, и ни́щих,/ ты сам трапе́зы не вкуша́л еси́,/ но по о́бразу Спаси́теля, был еси́ я́ко служа́й:/ кро́тко бесе́довал еси́ со свои́ми детьми́ духо́вными,/ к ве́черу же, удали́вшися в свою́ моли́твенную ке́ллию,/ в моли́тве излива́л еси́ ду́шу свою́ пред Го́сподем и Пречи́стою Богоро́дицею/ и коленопреклоне́нно пре́дал ду́шу свою́ Го́споду./ Сего́ ра́ди мы вси со умиле́нием взыва́ем ти:/ о вели́кий святи́телю!/ умоли́ Го́спода и нам пода́ти кончи́ну непосты́дную/ и всем, живу́щим в ми́ре, ве́ры укрепле́ние,/ в до́брых де́лех утвержде́ние,/ да получи́м от Христа́ Бо́га ве́лию ми́лость.

Пе́снь 7

Ирмо́с: Су́щим в пещи́ отроко́м Твои́м, Спа́се,/ не прикосну́ся, ниже́ стуши́ о́гнь./ Тогда́ трие́, я́ко еди́ными усты́, поя́ху/ и благословля́ху, глаго́люще:/ благослове́н Бог оте́ц на́ших.

Возлюби́л еси́, святи́телю, просвеще́ние духо́вное:/ и в Черни́гове, и во гра́де Тобо́льске усе́рдно обуча́л еси́ бу́дущих па́стырей,/ сам посеща́я шко́лу,/ и учи́л еси́ наста́вников и пито́мцев шко́лы взыва́ти Го́споду:/ благослове́н Бог оте́ц на́ших.

Кто не восхва́лит па́стырския труды́ твоя́, сиби́рский моли́твенниче,/ кто не восхва́лит твоего́ попече́ния о язы́чницех Тобо́льскаго кра́я,/ кто не удиви́тся твоему́ руково́дству па́стырей Це́ркви в пропове́дании сло́ва Бо́жия/ и в непреста́нней восклица́нии Го́споду:/ благослове́н Бог оте́ц на́ших.

И при жи́зни твое́й/ стра́ждущии и боля́щии утеше́ние и исцеле́ние от Тебе́ получа́ху,/ по блаже́нней же кончи́не твое́й ко гро́бу твоему́ прибега́ху,/ и благода́тную по́мощь ты, святи́телю, оби́льно источа́л еси́,/ да вси благода́рно воспева́ют, глаго́люще:/ благослове́н Бог оте́ц на́ших.

Богоро́дичен: Приклони́ся на́шим мольба́м, Чи́стая Богороди́тельнице,/ моли́твою ми́лостивно подви́гнися к Бо́гу/ и Сего́ ми́лостива сотвори́ нам,/ на Тя, Блага́я, при́сно наде́ющимся и взыва́ющим:/ благослове́н Бог оте́ц на́ших.

Пе́снь 8

Ирмо́с: Песносло́вцы в пещи́ спа́сшаго де́ти/ и громопла́менную прело́жшаго на ро́су,/ Христа́ Бо́га по́йте и превозноси́те во вся ве́ки.

Глас наро́дный – глас Бо́жий по кончи́не твое́й, блаже́нне,/ именова́ше тебе́, святи́телю, ми́лостивым чудотво́рцем/ и Го́споду, дарова́вшему тебе́ благода́ть исцеле́ний, взыва́ше:/ Христа́ Бо́га по́йте и превозноси́те во вся ве́ки.

В зно́йное ле́тнее вре́мя сконча́лся еси́, святи́телю Бо́жий,/ и те́ло твое́ до́лгия дни пребы́сть без погребе́ния,/ до́ндеже блаже́нный Филофе́й из миссионе́рскаго стра́нствования не возврати́ся,/ и, ви́дя нетле́нным твое́ те́ло, взыва́ше:/ Христа́ Бо́га по́йте и превозноси́те во вся ве́ки.

Устремля́хуся ко гро́бу твоему́, святи́телю Иоа́нне,/ вси, душе́ю стра́ждущии и грехи́ обремене́ннии,/ и, твои́м моли́твенным заступле́нием благода́тную от Го́спода по́мощь получи́вше, ра́достно взыва́ху:/ Христа́ Бо́га по́йте и превозноси́те Его́ во вся ве́ки.

О вели́цем дерзнове́нии твое́м пред Бо́гом свиде́тельствоваху ве́рнии/ и, повеству́юще о твое́м мо́щнем предста́тельстве,/ всех уча́ху Спаси́телю восклица́ти:/ Христа́ Бо́га по́йте и превозноси́те во вся ве́ки.

Богоро́дичен: Бе́здна после́дняя обы́де мя безме́рных прегреше́ний/ и во глубину́ низво́дит мене́ лю́таго отча́яния./ Ро́ждшая бе́здну милосе́рдия, ускори́ и спаси́ мя,/ да из глубины́ се́рдца вопию́:/ Христа́ Бо́га по́йте и превозноси́те во вся ве́ки.

Пе́снь 9

Ирмо́с: Светоно́сный о́блак,/ в о́ньже всех Влады́ка,/ я́ко до́ждь с небесе́ на руно́, сни́де/ и воплоти́ся нас ра́ди,/ быв Челове́к, Безнача́льный,/ велича́ем вси я́ко Ма́терь Бо́га на́шего Чи́стую.

О святи́телю Иоа́нне,/ моли́ Го́спода и Пречи́стую Его́ Ма́терь/ дарова́ти всем нам си́лу,/ Го́спода от всея́ души́ и всего́ се́рдца люби́ти/ и И́мя Его́ Пречи́стое сла́вити и воспева́ти:/ сла́ва Го́споду, да́вшему святи́телю кре́пость,/ сла́ва Го́споду, чрез святи́теля благода́тно нам помога́ющему.

О, коли́ка чуде́с твои́х си́ла!/ О, коли́ка назида́тельна жития́ твоего́ све́тлость!/ Ка́ко, земна́я вся оста́вив,/ на Небеси́ несказа́нным блаже́нством наслажда́ешися,/ не забу́ди нас в твои́х святы́х моли́твах,/ ди́вный святи́телю.

О вели́кий сиби́рский святи́телю Иоа́нне, митрополи́те Тобо́льский,/ гре́шных на́шу моли́тву приими́/ и оте́чество твое́ в ми́ре сохрани́,/ земна́я бла́га не отыми́ от нас/ и упра́ви пу́ть наш к Ца́рству Небе́сному.

Богоро́дичен: О Пресвята́я Де́во!/ При свое́й жи́зни святи́тель Иоа́нн/ усе́рдно своя́ излива́ше моли́твы пред чудотво́рным Твои́м о́бразом,/ ны́не же на Небеси́ созерца́ет сла́ву Твою́/ и слы́шит моли́твы Твоя́ о всем ми́ре./ Со святи́телем Тобо́льским моли́ся, Пренепоро́чная, о стране́ Сиби́рстей/ и упра́ви пу́ть наш к Небе́сному Ца́рствию.

Свети́лен:

Святи́тель Тобо́льский и моли́твенник всея́ страны́ Сиби́рския/ дне́сь Це́рковию прославля́ется, я́ко му́дрый упра́витель церко́вный,/ я́ко милосе́рдия о́браз, я́ко святи́телей украше́ние.

Сла́ва, и ны́не, Богоро́дичен:

Седмосве́тлый Тя све́щник,/ о́гнь Богоразу́мия нося́щ, Отрокови́це, проро́к дре́вле прови́дя,/ светя́щ во тьме́ неве́дения бе́дствующим,/ те́мже вопие́м Ти, Всенепоро́чная:/ со святи́телем Иоа́нном моли́ся дарова́ти нам свет ра́зума,/ дух прему́дрости и просвеще́ние очесе́м се́рдца на́шего/ к позна́нию Еди́наго Бо́га на́шего.

На хвали́тех стихи́ры на 4, глас 8.

Подо́бен: О, пресла́внаго чудесе́:

О, пресла́внаго чудесе́!/ Во гра́де Тобо́льстем/ нетле́нными мощми́ святи́тель Иоа́нн Го́сподом прославля́ется,/ Свята́я Це́рковь в лице́ святы́х его́ имену́ет,/ ве́рнии благогове́йно честны́м моще́м его́ поклоня́ются,/ скорбя́щии и боля́щии утеше́ние получа́ют,/ и вси единоду́шно ко святи́телю взыва́ют:/ о Сиби́рския страны́ покрови́телю,/ сохрани́ страну́ сию́ и град твой/ от вся́кия ну́жды и печа́ли.

О, пресла́внаго чудесе́!/ Дво́ица сиби́рских святи́телей –/ вели́кий Инноке́нтий и Богому́дрый Софро́ний –/ чрез но́ваго чудотво́рца и святи́теля Иоа́нна/ тро́ицею стано́вятся во сла́ву Святы́я, Единосу́щныя, Недели́мыя и Животворя́щия Тро́ицы./ О, ко́ль вели́ка Твоя́ к нам ми́лость,/ в Тро́ице хвали́мый Бо́же!/ приими́ моли́твы трие́х сиби́рских святи́телей/ и пода́ждь их духо́вным ча́дом/ в до́брых де́лех утвержде́ние,/ во сла́ву Пресвята́го Твоего́ И́мене.

О, пресла́внаго чудесе́!/ Тро́ица сиби́рских святи́телей/ заве́ты преподо́бнаго Анто́ния и Феодо́сия/ в страну́ Сиби́рскую принесо́ша,/ и се́мя их благовествова́ния, прозя́бше,/ сотвори́ плод оби́льный./ Потщи́мся, о бра́тие, заве́ты сиби́рских на́ших наста́вников храни́ти:/ сии́ отцы́ путево́дными на́шими звезда́ми да имену́ются,/ сия́ сиби́рския зве́зды пу́ть к Небесе́м показу́ют,/ да бу́дут имена́ их благослове́нны во ве́ки.

О, пресла́внаго чудесе́!/ Святи́тель Иоа́нн, нищелю́бец,/ пред чудотво́рной ико́ной Богома́тере/ дух свой чи́стый Го́сподеви предаде́./ Госпо́дь награди́ его́ да́ром чудотворе́ний и нетле́нием его́ те́ла;/ на Небеси́ святи́тель неусы́пным на́шим моли́твенником явля́ется./ Не забу́дем, о празднолю́бцы,/ све́тлаго о́браза на́шего сиби́рскаго святи́теля,/ под се́нию моли́тв его́/ да благоустро́ено бу́дет на́ше ше́ствие к Небесе́м,/ да ве́чно бу́дем прославля́ти на́шего Го́спода.

Сла́ва, глас 6:

Дне́сь святи́тель Иоа́нн Тобо́льский прославля́ется,/ дне́сь Свята́я Це́рковь хвалы́ ему́ прино́сит,/ дне́сь ве́рнии сы́ны Це́ркве Правосла́вныя/ его́ многоцеле́бным моще́м покланя́ются,/ дне́сь скорбя́щии благода́тное утеше́ние прие́млют,/ и вси боля́щии о благода́тной по́мощи взыва́ют;/ дне́сь и мы, гре́шнии, от чи́стаго се́рдца взыва́ем:/ о вели́кий святи́телю и чудотво́рче,/ моли́ся Го́сподеви о спасе́нии душ на́ших.

И ны́не, глас то́йже:

Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся: моли́ся, Влады́чице,/ со святы́ми апо́столы и святи́телем Иоа́нном/ поми́ловати ду́ши на́ша.

НА ЛИТУРГИ́И

Блаже́нны от кано́на свята́го, пе́сни 3-я и 6-я. Проки́мен, глас 1: Уста́ моя́ возглаго́лют прему́дрость,/ и поуче́ние се́рдца моего́ ра́зум. Стих: Услы́шите сия́, вси язы́цы, внуши́те, вси, живу́щий по вселе́нней. Апо́стол ко Евре́ем, зача́ло 335. Аллилу́ия, глас 2: Уста́ пра́веднаго поуча́тся прему́дрости и язы́к его́ возглаго́лет суд. Стих: Зако́н Бо́га его́ в се́рдце его́ и не за́пнутся стопы́ его́. Ева́нгелие от Иоа́нна, зача́ло 36. Прича́стен: В па́мять ве́чную:

Моли́тва

О святи́телю Христо́в Иоа́нне, Бо́жию Престо́лу со святы́ми предстоя́й! Ты еси́ оте́ц наш любвеоби́льный и моли́твенник наш те́плый. Умоли́ Го́спода Бо́га, да пода́ст нам коего́ждо потре́бно поле́зная: скорбя́щим утеше́ние, немощны́м здра́вие, заблу́ждшия да наста́вит и обрати́т на пу́ть покая́ния, ра́спри и раздо́ры умири́т, неве́дущия Христа́ лю́ди на пу́ть спасе́ния да обрати́т и всех нас едине́нием ду́ха и любве́ в Еди́ней Святе́й Свое́й Це́ркви соедини́т, да сохрани́т нас от гла́да, гра́да, тру́са, пото́па, огня́, меча́, междоусо́бныя бра́ни и напра́сныя сме́рти, наипа́че же от искуше́ний, облежа́щих нас в жи́зни сей, да да́рует нам ми́рное пожи́ти зде житие́ и ве́ру свою́ Правосла́вную невреди́му соблюсти́. О святы́й уго́дниче Христо́в, архипа́стырю, предо́брый, моли́твенниче наш неусы́пный! От ю́ности всего́ себе́ Бо́гу посвяти́в, равноа́нгельное житие́ стяжа́л еси́, испо́лнен бе ра́дости духо́вныя, я́же озаря́ше све́тлость ли́ка твоего́ и се́рдца ве́рных утеша́ше, пои́стине бе свети́льник горя́й и светя́й, святоле́пно пожи́в, от Го́спода сподо́блен бе да́ра прозре́ния, вре́мя кончи́ны своея́ предуве́да, моля́ся пред о́бразом Пречи́стыя Богоро́дицы, коленопреклоне́ние преста́вися; ны́не проси́ Ю о нас, да бу́дет нам Покрови́тельница в сей многотру́дней жи́зни и в час кончи́ны на́шея да умо́лит Всеблага́го Го́спода сподо́битися нам в лице́ благоугоди́вших предста́ти Престо́лу Его́ и восхвали́ти в Тро́ице сла́вимаго Бо́га, Отца́, и Сы́на, и Свята́го Ду́ха, во ве́ки веко́в. Ами́нь.