Аллилу́ия или́ тропа́рь.

Стихи́ры, глас 2.

Подо́бен: Егда́ от Дре́ва:

Обре́те духо́вная заря́ твоего́ ума́, проро́че,/ чистоту́, сия́ющую, я́коже зерца́ло, я́вственно,/ и мир озари́ Богоразу́мия сия́нием блиста́ющую/ и прообразу́ющую Боже́ственных та́ин о́бразы,/ благода́ть же, всем челове́ком хотя́щую пода́тися, пречу́дне.

Уста́ быв Бо́жия,/ нече́стия де́латели я́ве обличи́л еси́,/ судо́м неизбе́жным ты́я осуди́в, пребога́те,/ пра́ведным уче́нием после́дуя/ и Боже́ственным судо́м./ Те́мже прему́дрым твои́м глаго́лом/ ви́дяще возведе́ние, блаже́нне,/ пе́сньми досто́йно восхваля́ем тя.

Престо́лу Влады́чню предстоя́/ и неизрече́нныя и Боже́ственныя сла́вы насыща́емь,/ добро́ты же зря преми́рныя/ и све́та наполня́емь,/ Амо́се Богоглаго́ливе,/ вся, чту́щия тя, ве́рою помина́й,/ сим душе́вное спасе́ние,/ разреше́ния же согреше́ний/ всем прося́, Богоприя́тне.

И́ны стихи́ры Богоро́дицы, глас и подо́бен то́йже:

Ра́дуйся, солнцезра́чная звездо́./ Ра́дуйся, вино́вная всех до́брых, Пренепоро́чная./ Ра́дуйся, вмести́вшая Бо́га Невмести́маго,/ Я́же клас прозя́бшая безсме́ртия./ Ра́дуйся, Боже́ственное носи́ло и две́ре всесве́тлая./ Ра́дуйся, кля́твы убие́ние прароди́тельныя на́шея, Отрокови́це,/ благи́х Хода́таица су́щи.

Всех скорбя́щих ра́досте,/ и оби́димых Предста́тельнице,/ и убо́гих Пита́тельнице,/ стра́нных же утеше́ние/ и же́зле слепы́х,/ немощны́х посеще́ние,/ тружда́ющихся покро́ве и Засту́пнице/ и си́рых Помо́щнице,/ Ма́ти Бо́га Вы́шняго/ Ты еси́, Пречи́стая,/ потщи́ся, мо́лимся, спасти́ся рабо́м Твои́м.

Покро́в и заступле́ние нам, христиа́ном, Ты еси́/ и прибе́жище держа́вно, Ма́ти Бо́га Вы́шняго./ Но и ны́не, я́ко при́сно,/ бо́дренною Твое́ю моли́твою не преста́й моля́щи/ спасти́ рабы́ Твоя́ от обстоя́ний всех,/ я́ко Тя с Бо́гом и́мамы заступле́ние,/ вси христиа́не, и прибе́жище.

Сла́ва, и ны́не, Богоро́дичен:

Ина́го держа́внаго прибе́жища,/ и кре́пости столпа́, и стены́ необори́мыя/ вои́стинну не стяжа́хом,/ ра́зве Тебе́, Пречи́стая./ К Тебе́ прибега́ем и Тебе́ вопие́м:/ Влады́чице, помози́, да не поги́бнем,/ покажи́ Твою́ благода́ть на ны, и кре́пости сла́ву,/ и милосе́рдия Твоего́ вели́чество.

Крестобогоро́дичен:

Егда́ нескве́рная А́гница ви́де Своего́ А́гнца,/ на заколе́ние я́ко Челове́ка во́лею влеко́ма,/ пла́чущи, глаго́лаше:/ безча́дствовати Мя ны́не тщи́шися, Христе́, ро́ждшую Тя./ Что сие́ сотвори́л еси́, Изба́вителю вся́ческих?/ Оба́че воспева́ю и славлю́ Твою́,/ ю́же па́че ума́ и сло́ва,/ кра́йнюю бла́гость, Человеколю́бче.

Кано́н, глас 7.

Песнь 1

Ирмо́с: Потря́сшему Бо́гу/ фарао́на в мо́ри Чермне́м/ песнь побе́дную пои́м,/ я́ко просла́вися.

Очи́стив мой ум от страсте́й мра́чнаго по́мысла,/ проро́ка Твоего́, Влады́ко, Амо́са пе́ти озари́.

Таи́нник я́влься и́же па́че ума́ та́ин Бо́жиих,/ сподо́бился еси́ прозре́ти, сла́вне, быва́емая.

Я́ко нескве́рное Бо́жие и чи́стое поко́ище я́влься,/ я́же Ду́ха, Амо́се, прия́л еси́ Боже́ственную де́тель.

Богоро́дичен: Ты па́дшую Ада́мову проро́чески возста́вила еси́ ски́нию,/ Спа́са и Бо́га, Пречи́стая, во чре́ве носи́вши.

Песнь 3

Ирмо́с: Утверди́ся ве́рою Христо́ва Це́рковь,/ и́бо непреста́нно пе́сньми вопие́т, пою́ще:/ Свят еси́, Го́споди,/ и Тя пое́т дух мой.

Ты, беззако́нныя облича́я, Амо́се,/ Госпо́дню пра́вду пока́зовал еси́, вопия́, Богоявле́нне:/ Свят еси́, Го́споди, спаса́яй ду́ши на́ша.

Показа́лся еси́ столп, проро́че, но́ваго заве́та,/ отъе́мля сего́ покро́в и ве́рою зовы́й:/ Свят еси́, Го́споди, спаса́яй ду́ши на́ша.

Навы́к Боже́ственная, проро́че Богоглаго́льниче, Амо́се Боже́ственне,/ просвеща́я лю́ди, вопия́л еси́:/ Свят еси́, Го́споди, спаса́яй ду́ши на́ша.

Богоро́дичен: Утверди́хся, испове́дав Боже́ственное Твое́ рождество́,/ и Предста́тельницу Тя, Де́во, богате́я, зову́:/ ра́дуйся, Богоневе́стная, наде́ждо моя́ и по́моще.

Седа́лен, глас 3.

Подо́бен: Боже́ственныя ве́ры:

Боже́ственный орга́н Уте́шителев,/ подглаша́емь Сего́, блаже́нне, благода́тию всегда́ я́сно,/ проро́к был еси́:/ возглаша́еши бо безве́стных явле́ние/ и озаря́еши ве́рою притека́ющия, Амо́се сла́вне,/ Христа́ Бо́га моли́ дарова́ти нам ве́лию ми́лость.

Сла́ва, и ны́не, пра́здника или́ Богоро́дичен:

Боже́ственнаго естества́ не отлу́чся, плоть быв во чре́ве Твое́м,/ но Бог вочелове́чся и пребы́сть, И́же по рождестве́ Ма́терь Тя Де́ву,/ я́ко пре́жде рождества́, сохрани́в Всенепоро́чну, еди́н Госпо́дь,/ Того́ приле́жно моли́ дарова́ти нам ве́лию ми́лость.

Крестобогоро́дичен:

Нескве́рная А́гница Сло́ва, нетле́нная Де́ва Ма́ти,/ на Кресте́ зря́щи пове́шена из Нея́ без боле́зни прозя́бшаго,/ ма́терски подо́бно рыда́ющи, вопия́ше:/ увы́ Мне, Ча́до Мое́, ка́ко стра́ждеши во́лею,/ хотя́ изба́вити от страсте́й безче́стия челове́ка?

Песнь 4

Ирмо́с: Услы́шах слух Твой, Го́споди,/ я́ко яви́лся еси́ на земли́,/ за е́же спасти́ ны./ Тем вопие́м: сла́ва си́ле Твое́й, Го́споди.

Служа́щия глухи́м и́долом обличи́л еси́ лю́ди Изра́илевы,/ тем плене́нным бы́ти сим рекл еси́, досточу́дне.

Проро́ка тя, и́же пе́рвее па́стыря показа́ Бог,/ восприе́м, священноявле́нне Амо́се./ Тем тя вси ве́рою ублажа́ем.

Я́ко зерца́ло, Свята́го Ду́ха прие́м,/ блиста́нием светолу́чная, Амо́се, всем проявля́еши, ра́дуяся, благоче́стие.

Богоро́дичен: Сло́во в Тя всели́ся, Чи́стая, существо́ мое́ возобрази́/ па́дшее пре́жде преступле́нием.

Песнь 5

Ирмо́с: К Тебе́ у́тренюю/ и Тебе́ вопию́, Благоутро́бне Го́споди:/ омраче́нную грехми́ ду́шу мою́,/ све́том озари́в за́поведей Твои́х, наста́ви.

Умерщвле́нныя сне́дною стрело́ю, блаже́нне, укори́л еси́,/ я́ко непщу́ющим испа́днути  вну́тренним, и прело́жно бы́ти,/ и тле́нно наслажде́ние  .

Бога́тыми светоли́тии осия́емь, яви́лся еси́ Богоглаго́лив и собесе́дник Бо́жий,/ возвеща́я всем благоче́стия и́стинный путь.

Изба́вити вся, тя пою́щия, блаже́нне, моли́ от льще́ний и се́тей вра́жиих/ и све́том осия́ти Небе́сным Ца́рства Христо́ва.

Богоро́дичен: Богоро́дицу испове́дающии Тя, Ма́ти Де́во,/ непрее́мнаго Ца́рствия и пи́щи Тобо́ю, Богома́ти,/ получи́ти да сподо́бимся.

Песнь 6

Ирмо́с: Ио́на из чре́ва а́дова вопия́ше:/ возведи́ от тли живо́т мой./ Мы же Тебе́ вопие́м:/ Всеси́льне Спа́се, поми́луй нас.

Све́тлыми и́стины заря́ми сия́я,/ зауши́л еси́ лжи проро́ка, кре́пко облича́я/ и предглаго́ля того́ потребле́ние.

Омрачи́л еси́ пре́лести пла́мень, проро́че,/ я́ко со́лнце, благоче́стия зарю́ всем возсия́я,/ я́ко Ду́ха сия́ние восприи́м.

Богоро́дичен: Пречи́стаго Твоего́ де́вства пою́, Де́во, несказа́нное и честно́е рождество́/ и сла́влю, Пречи́стая, и́мже спаса́юся тли и сме́рти.

Конда́к, глас 4.

Подо́бен: Яви́лся еси́ днесь:

Очи́стив ду́хом, проро́че,/ твое́ светоза́рное се́рдце, сла́вный Амо́се,/ проро́чествия дар свы́ше прие́мь,/ возопи́л еси́ велегла́сно во страна́х:/ се Бог наш, и не приложи́тся ин к Нему́.

Песнь 7

Ирмо́с: В пещь о́гненную вве́ржени, преподо́бнии о́троцы/ огнь в ро́су преложи́ша,/ воспева́нием си́це вопию́ще:/ благослове́н еси́, Го́споди, Бо́же оте́ц на́ших.

Е́же предглаго́лал еси́, Боже́ственное спасе́ние яви́ся,/ Амо́се, проро́че чу́дне,/ просвеще́нии благоче́стия осия́я мир, вопия́л еси́:/ благослове́н еси́, Го́споди, Бо́же оте́ц на́ших.

Вжиля́емь Боже́ственною си́лою, богопроти́вными враги́ неврежде́н был еси́,/ терпели́вно, я́коже адама́нт, пребы́л еси́, зовы́й:/ благослове́н еси́, Го́споди, Бо́же оте́ц на́ших.

Богоро́дичен: Непостижи́мое рождество́ Де́вы славосло́вим, и́мже сме́рти изба́вихомся./ Его́же ра́ди ро́ждшеся в нетле́ние, зове́м:/ благослове́н еси́, Го́споди, Бо́же оте́ц на́ших.

Песнь 8

Ирмо́с: Еди́наго Безнача́льнаго Царя́ сла́вы,/ Его́же благословя́т Небе́сныя си́лы/ и трепе́щут чи́ни А́нгельстии,/ по́йте, свяще́нницы,/ лю́дие, превозноси́те Его́ во ве́ки.

Весь восте́кл еси́ на Го́рнюю высоту́, и навы́кл еси́ неизрече́нных ра́зума,/ и был еси́ сказа́тель Сло́ва воплоще́ния, Амо́се./ Те́мже тя воспева́ем во вся ве́ки.

Ума́ острото́ю всех Влады́ку разуме́ти, я́коже есть мо́щно, сподо́бился еси́,/ науча́юща тя неизрече́нных ра́зуму, зовы́й:/ свяще́нницы, по́йте, лю́дие, превозноси́те во вся ве́ки.

Блаже́нство, и ра́дость несказа́нную, и Ца́рство Небе́сное, я́ко проро́к, получи́л еси́,/ Небе́сных ви́дче, зовы́й благоче́стно:/ лю́дие, превозноси́те Его́ во вся ве́ки.

Богоро́дичен: Во двою́ естеству́ от Тро́ицы Еди́наго боголе́пно без се́мене, Богома́ти, родила́ еси́ Спа́са ми́ра./ Тем Тя, ве́рнии, любо́вию превозно́сим во ве́ки.

Песнь 9

Ирмо́с: Всепе́тая, Небе́с превы́шшая,/ Безнача́льное Сло́во безсе́менно заче́ншая/ и воплоще́ннаго Бо́га ро́ждшая челове́ком,/ тем Тя вси велича́ем.

Быв проро́ческим явле́нием богодви́жим язы́к, Боже́ственная веща́ющ,/ всем возвести́л еси́, Амо́се, Боже́ственное милосе́рдие./ Те́мже вси тя при́сно ублажа́ем.

Несказа́нно проро́ческое благосла́вие:/ и́бо Святы́й Дух, в сих все́лься, светоли́тия Своего́ показа́ прича́стники,/ от ни́хже, вси ве́рнии, просвеща́емся.

Богоро́дичен: Ме́ртвости и тли мою́ ри́зу отъя́ла еси́, Де́во,/ спаси́тельную ри́зу –воплоще́ннаго Бо́га – ро́ждши челове́ком./ Тем Тя вси при́сно велича́ем.