НА МА́ЛОЙ ВЕЧЕ́РНИ
На Го́споди, воззва́х: стихи́ры на 4, глас 1.
Подо́бен: Небе́сных чино́в:
Небе́сных чино́в ра́дование/ и на земли́ челове́ков но́вое весе́лие,/ ви́дяще тя, на Небе́сныя кру́ги возлете́вша,/ и вше́дша в жела́емая ти ра́достно,/ и сла́вы Боже́ственныя наслажда́ющася, Ла́заре.
Да́нный ти тала́нт держа́вный, Богому́дре,/ возрасти́л еси́ сугу́бо благода́тию,/ о не́мже и кровь свою́ излия́л еси́, Ла́заре./ Те́мже слы́шиши:/ благи́й ра́бе и ве́рный,/ вни́ди в ра́дость Го́спода твоего́.
Ко́рене блага́го блаже́ннейшая о́трасль был еси́,/ при исто́чницех благоче́стия насажде́н,/ дре́во плодови́то,/ всяк вид доброде́телей нося́й, был еси́/ и сего́ во времена́ Соде́телю и Творцу́ твоему́ отда́л еси́.
Сла́ва, глас 2:
Прииди́те, собо́ри ве́рных,/ му́драго почти́м Ла́заря в пе́снех:/ ве́рою бо Бо́гу благоугоди́,/ и муче́ния венцу́ сподо́бися,/ и со А́нгелы селе́ние стяжа́./ Ему́же любо́вию вопие́м:/ прииди́ и ста́ни с на́ми, свя́те,/ и предначина́й торжество́ па́мяти твоея́,/ и моли́ Христа́ Бо́га о душа́х на́ших.
И ны́не, Богоро́дичен:
Все упова́ние мое́/ на Тя возлага́ю, Ма́ти Бо́жия,/ сохрани́ мя под кро́вом Твои́м.
На стихо́вне стихи́ры, глас 2.
Подо́бен: До́ме Евфра́фов:
Прииди́те, лю́дие,/ Триипоста́сное Божество́ сла́вяще,/ торжество́ похва́льне соверши́м но́ваго Ла́заря,/ сла́вяще того́ я́ко Бо́жия уго́дника.
Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.
Добро́тами доброде́телей/ оде́явся пе́рвее,/ муче́ния же венце́м украси́вся по́слежде,/ кра́сен во сла́ве/ предстои́ши Влады́це.
Стих: Насажде́ни в дому́ Госпо́дни,/ во дво́рех Бо́га на́шего процвету́т.
Пра́ведников и му́чеников украше́ние,/ ца́рствующих похвала́/ и своему́ оте́честву,/ приими́ пе́ние/ ве́рою тя сла́вящих.
Сла́ва, и ны́не, Богоро́дичен:
Дом Тя пречи́ст/ Бо́жия Прему́дрость обре́тши,/ от крове́й Твои́х пречи́стых/ воплоща́ется, Де́во,/ и по рождестве́ нетле́нну Тя показа́.
Тропа́рь, глас 3, пи́сан на вели́цей вече́рни.
Сла́ва, и ны́не, Богоро́дичен.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры на 8, глас 2.
Подо́бен: Егда́ от Дре́ва:
Егда́ ве́рою и любо́вию и́стинною/ весь присво́ился еси́ да́вшему тя Бо́гу,/ и сокро́вище доброде́телей обре́лся еси́,/ тогда́ и Вы́шний сугу́бою сла́вою прославля́ет тя,/ ски́птры ца́рственныя вруча́ет в земны́х,/ в Небе́сных же Ца́рство Небе́сное тебе́, свя́те, дарова́.
Егда́ промышле́нием Всеви́дящаго Очесе́/ тебе́ держа́ва вручи́ся ста́да христоимени́таго,/ тогда́ недрема́нное о́ко о нем име́л еси́/ и, я́ко бо́дрый па́стырь, труди́лся еси́ до сме́рти./ Сего́ ра́ди слы́шиши:/ до́брый де́лателю и ве́рный,/ о ма́ле я́ко был еси́ ве́рен,/ над мно́гими тя поста́влю.
Егда́ безбо́жное наше́ствие на тя устреми́ся,/ во благоче́стии ви́девше тя, гобзу́юща со ста́дом,/ и хотя́ще то расхи́тити, я́коже зве́рие неми́лостивии,/ тогда́ ты, свя́те, но́вый Дави́д яви́ся сопротивле́нием,/ я́ко ина́го Голиа́фа, со мно́жеством язы́к порази́л еси́/ и я́ко му́ченик до кро́ве побе́дным венце́м увя́злся еси́.
И́ны стихи́ры, глас 8.
Подо́бен: О, пресла́внаго чудесе́:
О, пресла́внаго чудесе́!/ Ликовству́ют днесь А́нгели на Небесе́х/ и челове́цы на земли́, в па́мяти но́ваго Ла́заря./ А́нгели венча́ют того́ я́ко победи́теля,/ челове́цы же пе́ние с похвало́ю прино́сят,/ чудя́щеся и глаго́люще:/ о, ка́ко тече́ние соверши́!/ о, несказа́ннаго твоего́ весе́лия, прему́дре,/ его́же приобщи́тися вои́стинну сподо́бился еси́.
О, ди́внаго чудесе́!/ Что бо нарече́м тя, чу́дне?/ Пра́ведника, я́ко за́поведи Бо́жия на земли́ сохрани́л еси́,/ му́ченика ли, я́ко непра́ведне глава́ твоя́ усече́ся?/ Во обои́х бо благоугоди́л еси́ Бо́гу/ и со А́нгелы селе́ние стяжа́л еси́./ О, неизглаго́ланнаго твоего́ селе́ния, Ла́заре,/ в не́мже тя всели́ Христо́с,/ я́ко му́ченика че́стна.
О, пресла́внаго чудесе́,/ о, ди́внаго премене́ния и прославле́ния десни́цы Вы́шняго,/ е́же на тебе́ соде́я Госпо́дь, пребога́те Ла́заре,/ И́же и по сме́рти просла́ви тя, я́ко Своего́ уго́дника:/ твое́ бо честно́е те́ло, во гро́бе лежа́щее, нерастле́но отню́д,/ но облагоуха́емо явля́ет,/ уверя́я всех, каковы́я по́чести получи́л еси́/ и сла́ву, ю́же стяжа́л еси́ на Небесе́х.
Сла́ва, глас 6:
Кто тебе́ не блажи́т,/ бо́драго де́лателя за́поведей Бо́жиих?/ Или́ кто не похва́лит всекра́сное твое́ житие́?/ Собра́л бо еси́, я́ко пчела́ любоде́льная, многоцве́тныя доброде́тели,/ бу́дущую сла́ву иски́й приобрести́,/ земну́ю измени́в,/ о́ко слепы́х, нога́ хромы́х,/ жезл ста́рости,/ и всем вся был еси́ ми́лостивною руко́ю,/ муче́ния же венце́м главу́ твою́ украси́л еси́,/ Христу́ Бо́гу предстои́ши,/ Того́ сла́вы наслажда́яся./ Ему́же и моли́ся, мо́лим тя, Ла́заре му́дре,/ трудо́м твои́м ве́чновати в тишине́,/ и спасти́ся душа́м на́шим.
И ны́не, Богоро́дичен: Кто Тебе́ не ублажи́т:
Вход. Проки́мен дне и чте́ния 3 му́ченическая
На лити́и стихи́ра хра́ма и свята́го, глас 1:
Собо́ри празднолю́бных вси, прииди́те,/ но́вый бо Ла́зарь нас днесь высо́ким пропове́данием,/ вопия́, созыва́ет на трапе́зу духо́вную,/ со тща́нием, веселя́щеся, теце́м/ и па́мять сконча́ния его́ почти́м,/ сла́вяще того́, я́ко Бо́жия уго́дника.
Глас 2: Вы́шния возжеле́в сла́вы,/ благ, кро́ток и незло́бием укра́шен,/ и́стиною же и пра́вдою оде́ян/ и вся́кия злы́я ве́щи огреба́яся/ показа́лся еси́, блаже́нне,/ в ню́же и вшел еси́, я́ко досто́ин,/ и со дерзнове́нием Христу́ Бо́гу предстои́ши,/ Его́же ны́не нам благопреме́нна твои́ми моли́твами сотвори́.
Благозра́чием доброде́телей украси́вся, пребога́те,/ уясни́лся еси́ боле́зньми добротво́рными от страда́ний,/ и с му́ченики по достоя́нию приче́лся еси́, Ла́заре,/ и к сла́ве несконча́емей от земны́х премину́л еси́,/ и равностоя́тель святы́м показа́лся,/ с ни́миже проси́ нам от Христа́ ве́лию ми́лость.
Сла́ва, глас 5:
Воструби́м трубо́ю благогла́сных пе́сней,/ и́же Боже́ственным Ду́хом со́браннии днесь,/ во всечестны́й пра́здник уго́дника Христо́ва,/ всех любопра́зднственных к похвале́нию созыва́юще,/ воспе́ти с любо́вию па́мять его́./ Ца́рие и кня́зие, стецы́теся,/ дивя́щеся и чудя́щеся новопросия́вшаго житию́ и по́двигу,/ и восхвали́те целому́дрия рачи́теля,/ Правосла́вия столпа́ непоколеби́маго,/ церко́внаго зда́теля,/ ни́щим пода́теля оби́льна,/ побо́рника Правосла́вия тве́рдаго,/ вся́кою доброде́телию и пре́жде страда́ния украше́ннаго,/ по́двигом до́брым подвиза́вшася/ и тече́ние соверши́вша,/ со и́же Бо́гови угоди́вшими селе́ние обре́тша,/ держа́вных похвалу́ и благоле́пие,/ предста́теля и засту́пника на́шего,/ в пе́снех благогла́сных похваля́юще, си́це рцем:/ Тро́ице я́ко при́сно, Ла́заре, предстои́ши,/ моли́ изба́витися нам от вся́каго обстоя́ния/ твои́ми моли́твами.
И ны́не, Богоро́дичен. Ге́рмана Патриа́рха:
Воструби́м трубо́ю пе́сней:/ прекло́ншися бо свы́ше, Всецари́ца Ма́ти Де́ва/ благослове́ньми венчава́ет воспева́ющия Ю./ Ца́ри и кня́зи да стеку́тся/ и Цари́цу да воспле́щут в пе́снех,/ Царя́ ро́ждшую,/ сме́ртию одержи́мыя пе́рвее,/ разреши́ти человеколю́бно благоизво́лившаго./ Па́стырие и учи́телие,/ до́браго Па́стыря Пречи́стую Ма́терь, соше́дшеся, да восхва́лим,/ све́щник златоза́рный, светоно́сный о́блак,/ небе́с простра́ннейшу,/ одушевле́нный же киво́т, огнезра́чный Влады́чень престо́л,/ манноприе́мную злату́ю ста́мну,/ заключе́нную Сло́ва дверь,/ всех христиа́н прибе́жище,/ пе́сньми богоглаго́ливыми похваля́юще, си́це рцем:/ пала́то Сло́ва,/ сподо́би смире́нных нас Небе́снаго Ца́рствия,/ ничто́же бо невозмо́жно хода́тайству Твоему́.
На стихо́вне стихи́ры, глас 2.
Подо́бен: Ки́ими похва́льными:
Ки́ими похва́льными пе́сньми/ воспое́м Ла́заря,/ и́же торжеству́ вино́внаго?/ Сла́вен бо в житии́ на земли́ показа́лся еси́,/ сла́внейший же от до́брых дел яви́вся,/ за́поведем после́дуя Влады́ки твоего́./ Но а́ще и недоуме́ем, хвали́ти досто́йне,/ укрепи́ ны, му́дре, пою́щих тя,/ и проси́ от Христа́ ве́лию ми́лость.
Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.
Ки́ими язы́ки бре́нными/ украси́м Ла́заря му́драго?/ Та́ко просия́вшаго в после́дния на́ша ро́ди,/ и́же от ю́ности Бо́жиим Ду́хом возлю́бленнаго,/ благоче́стия столпа́ непоколеби́маго,/ преиспещре́нна добро́тами доброде́телей,/ о лю́дях свои́х моля́ща Бо́га./ Ему́же моли́ся, Богоприя́тне,/ и испроси́ сла́вящим тя мир и ве́лию ми́лость.
Стих: Насажде́ни в дому́ Госпо́дни,/ во дво́рех Бо́га на́шего процвету́т.
Ко́е по достоя́нию пе́ние принесе́м ти, Ла́заре?/ На земли́ бо пожи́л еси́ во благоче́стии и чистоте́,/ украси́вся доброде́тельми вои́стинну,/ по́двиг же до́брый и тече́ние соверши́в,/ агаря́нскому наше́ствию и горды́ни сопроти́вился еси́, му́дре,/ не терпя́ благоче́стию разоря́ему зре́тися;/ отню́дуже я́ко му́ченик ра́ди боле́зней твои́х мзду прия́л еси́,/ му́ченическая ме́ста насле́довал еси́,/ с ни́миже проси́ нам мир и ве́лию ми́лость.
Сла́ва, глас 4:
Днесь Це́рковь правосла́вная/ та́йно ликовству́ет,/ но́вою оде́явшися оде́ждею,/ я́ко порфи́рою и ви́ссоном, но́ваго Ла́заря,/ и, се́ю оде́яна, крася́щися, взыва́ет:/ вели́чит сла́ва моя́ Го́спода,/ дарова́вшаго ми моего́ краси́теля./ И па́ки со дерзнове́нием зове́м:/ И́же просла́вивый Твоего́ страда́льца, Христе́ Бо́же,/ умири́ мир и спаси́ ду́ши на́ша.
И ны́не, Богоро́дичен:
При́зри на моле́ния Твои́х раб, Всенепоро́чная,/ утоля́ющи лю́тая на ны воста́ния,/ вся́кия ско́рби нас изменя́ющи,/ Тя бо еди́ну, тве́рдое и изве́стное утвержде́ние и́мамы/ и Твое́ предста́тельство стяжа́хом;/ да не постыди́мся, Влады́чице, Тя призыва́ющии,/ потщи́ся на умоле́ние Тебе́ ве́рно вопию́щих:/ ра́дуйся, Влады́чице, всех по́моще,/ ра́досте, и покро́ве, и спасе́ние душ на́ших.
На благослове́нии хлебо́в тропа́рь свята́го два́жды и Богоро́дице Де́во: еди́ножды.
Тропа́рь свята́го, глас 3:
Красоту́ возжеле́в сла́вы Бо́жия,/ в земне́й Тому́ благоугоди́л еси́/ и, поруче́нный ти тала́нт до́бре возде́лав, усугуби́л еси́,/ о не́мже и подвиза́вся до кро́ве./ Отону́дуже и мзду боле́зней твои́х,/ я́ко му́ченик, прия́л еси́ от Христа́ Бо́га:/ Его́же моли́ спасти́ся/ пою́щим тя, Ла́заре.
НА У́ТРЕНИ
На Бог Госпо́дь: тропа́рь свята́го два́жды. Сла́ва, и ны́не, Богоро́дичен.
По 1-м стихосло́вии седа́лен, глас 1.
Подо́бен: Ка́мени запеча́тану:
На ка́мени непоколеби́мыя ве́ры но́зе твои́ утверди́л еси́, Богому́дре,/ ника́коже бу́ря тебе́ треволне́ния поколеба́,/ но немо́кренно сию́ преше́л еси́, к Бо́гу возвы́сився,/ Ему́же и соводворя́яся, ра́достно Тому́ зове́ши:/ сла́ва милосе́рдию Твоему́, Спа́се,/ сла́ва Ца́рствию Твоему́,/ сла́ва смотре́нию Твоему́, Еди́не Человеколю́бче.
Сла́ва, и ны́не, Богоро́дичен:
Ру́це Твои́ Боже́ственнии,/ и́миже Соде́теля носи́ла еси́, Де́во Пресвята́я, воплоще́нна Божество́м,/ просте́рши, умоли́ изба́витися нам от искуше́ний, и страсте́й, и бед,/ восхваля́ющим Тя любо́вию и вопию́щим Тебе́:/ сла́ва Все́льшемуся в Тя, сла́ва Проше́дшему из Тебе́;/ сла́ва Свободи́вшему нас рождество́м Твои́м.
По 2-м стихосло́вии седа́лен, глас 3.
Подо́бен: Красоте́ де́вства:
Красото́ю жития́ твоего́ и страда́нием боле́зней твои́х,/ А́нгелы удиви́л еси́/ и челове́ки возвесели́л еси́,/ сего́ ра́ди смерть яви́ся тебе́ поко́й,/ и к непреста́нному весе́лию премину́л еси́, Ла́заре,/ в не́мже я́ко сый, проси́ нам от Христа́ ве́лию ми́лость.
Сла́ва, и ны́не, Богоро́дичен:
Красоте́ де́вства Твоего́ и пресве́тлой чистоте́ Твое́й/ Гаврии́л удиви́вся, вопия́ше Ти, Богоро́дице:/ ку́ю Ти похвалу́ принесу́ досто́йную?/ Что же возымену́ю Тя?/ Недоумева́ю и ужаса́юся./ Те́мже, я́ко повеле́н бых, вопию́ Ти:/ ра́дуйся, Благода́тная.
По полиеле́и седа́лен, глас 8.
Подо́бен: Повеле́нное та́йно:
Повеле́нныя ти за́поведи прие́мь,/ разу́мне страх Бо́жий в себе́ прия́л еси́ пе́рвее,/ и́мже и окормля́емь, стезю́ пра́вую не погреши́л еси́,/ е́юже и ше́ствуя, во две́ри му́ченическия вшел еси́,/ с ни́миже проси́ пою́щим тя смире́ние,/ я́ко да благода́рно пое́м ти, му́дре:/ ра́дуйся, Ла́заре пребога́те.
Сла́ва, и ны́не, Богоро́дичен:
Повеле́нное та́йно прие́м в ра́зуме,/ в кро́ве Ио́сифове тща́нием предста́ Безпло́тный, глаго́ля Неискусобра́чней:/ Приклони́вый схожде́нием небеса́, вмеща́ется неизме́нно весь в Тя./ Его́же и ви́дя в ложесна́х Твои́х, прие́мша ра́бий зрак, ужаса́юся зва́ти Тебе́:/ ра́дуйся, Неве́сто Неневе́стная.
Та́же степе́нна, 1-й антифо́н 4-го гла́са. Проки́мен, глас 4: Мно́ги ско́рби пра́ведным,/ и от всех их изба́вит я Госпо́дь. Стих: Воззва́ша пра́веднии, и Госпо́дь услы́ша их. Вся́кое дыха́ние: Ева́нгелие от Луки́, зача́ло 63.
По 50-м псалме́ стихи́ра, глас 6:
И́же благода́тию Боже́ственнаго Ду́ха/ со́брании днесь празднолю́бцы,/ лик соста́вльше, пое́м песнь но́ву,/ па́мять сотворя́ще треблаже́ннаго Ла́заря,/ в ню́же соше́дшеся, Спа́са велича́ем/ и торжества́ вино́внику моле́бне рцем:/ я́ко имы́й дерзнове́ние у Царя́ Сла́вы,/ моли́ изба́витися вре́да вся́каго/ от души́ сла́вящим тя.
Кано́н Богоро́дицы со ирмосо́м на 6, глас 2 и свята́го два кано́на на 8. Кано́н свята́го, глас 4, его́же краегране́сие: Ла́заря похвали́ти, Бо́же мой, ра́зум да́руй ми.
Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
Лику́я со а́нгельскими собо́ры при́сно,/ у Престо́ла Боже́ственнаго, светови́дныя зари́ исполня́емь,/ омраче́нную ду́шу мою́ озари́ти моли́ся,/ я́ко да по до́лгу возмогу́ воспе́ти па́мять твою́, Ла́заре.
А́ще и по достоя́нию восхвали́ти тя недоуме́ем, чту́щии тя,/ но, ели́ко по си́ле, песнь плете́м сла́вней твое́й па́мяти,/ пропове́дающе твое́ житие́ и страда́ние:/ любоча́ден, приими́ сие́, а́ще и не по достоя́нию хвале́ние.
Зача́ло доброде́тельнаго твоего́ жития́, страх Госпо́день взял еси́ от ю́ности, Ла́заре,/ и сей име́л еси́, наставля́ющ тя к пути́ пра́вому,/ и́мже ше́ствуя, во дворы́ Госпо́дни вшел еси́.
Богоро́дичен: А́нгельских сил ве́мы Тя превы́шшую, лю́дие ве́рнии,/ Спа́са и Бо́га прославля́ем, Де́во Всепе́тая,/ и, Богоро́дицу Тя от души́ сла́вяще, мо́лимся:/ от супоста́тных наше́ствия пою́щия Тя изба́ви.
Ин кано́н свята́го, глас 8.
Песнь 1
Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.
И́же на тя разсвирепе́вшии иноплеме́нницы потреби́шася, я́ко Дафа́н и Авиро́н окая́ннии:/ тебе́ бо неви́димо храня́ще Боже́ственная си́ла,/ Бо́гу вся́ко над ни́ми тя устро́ившу,/ мно́гим по́слежде тобо́ю промышля́я заступле́ние.
Ви́дев Созда́вший еди́н сердца́ челове́ков, Богому́дре Ла́заре,/ се́рдца твоего́, е́же к Нему́, нра́ва же кро́ткое и незло́бивое,/ на престо́ле ца́рствующих посади́/ и па́стыря тя христокра́сных люде́й устро́и.
Егда́ на стра́жи твое́й стал еси́ богода́нныя ти вла́сти, Ла́заре,/ тогда́ недрема́нное о́ко стяжа́л еси́, к соблюде́нию богода́ннаго ти ста́да,/ о не́мже труди́вся до сме́рти,/ отню́дуже и мзду прия́л еси́ трудо́в твои́х.
Новопросия́вшая звезда́ яви́лся еси́ на за́паде,/ сия́я све́тлыми луча́ми твои́х моще́й всем ве́рным,/ па́че же твоему́ оте́честву,/ и сих привлача́ к пресве́тлому сия́нию твои́х по́двиг/ и избавля́я тех от тьмы несве́тлыя, Ла́заре,/ и от приходя́щих то́е расхи́тити звере́й.
Богоро́дичен: Вседе́рзостную кре́пость иноплеме́нников, о Влады́чице, потреби́,/ лю́ди же ве́рныя, Тебе́ сла́вящия, спаси́ и укрепи́,/ и́же Сы́ну и Бо́гу Твоему́ песнь воспева́ющих.
Катава́сия по уста́ву.
Песнь 3
Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́;/ в Боже́ственней Твое́й сла́ве/ венце́в сла́вы сподо́би.
Ра́зума от пеле́н испо́лнен ты был еси́ и благода́ти Боже́ственныя,/ вся́ческих доброде́телей оби́лен,/ ни́щим же и убо́гим твое́ бога́тство расточи́л еси́,/ сего́ ра́ди тя Христо́с на Небесе́х мно́гим бога́тством обогати́.
Авраа́му на земли́ страннолю́бием подо́бяся,/ име́л еси́ десни́цу благопода́тну:/ стра́нныя, и больны́я, и мимоходя́щия прие́мля,/ сподо́бился еси́ и Бо́га прия́ти в тебе́, Ла́заре.
Преиспещре́нный и сла́вный дом твой, достоблаже́нне Ла́заре,/ его́же на земли́ доброде́тельными ле́потами украси́л еси́,/ жела́я ве́чных благ получи́ти, му́дре,/ отню́дуже и Ца́рствия Небе́снаго сподо́бился еси́.
Богоро́дичен: О Господоимени́тая Де́во Всенепоро́чная,/ возбране́ние име́я и по́мощь Твое́й моли́твы,/ до́блий во́ин Твоего́ Сы́на и Бо́га первонача́льника безбо́жнаго победи́,/ себе́ же исхода́тай сла́ву му́ченическую.
Ин
Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.
И́же на высоту́ хулу́ глаго́лавый,/ го́рдым о́ком ви́дев твоя́ поле́зная, Ла́заре,/ ле́стными ухищре́ньми укра́сти тя покуси́ся;/ ты же, Му́дрость су́щую – Христа́ Бо́га в дому́ се́рдца твоего́ имы́й,/ того́ под но́зе твои́ покори́л еси́, вопия́:/ несть свят, па́че Тебе́, Го́споди.
Беся́щася пе́рсянина я́ко ви́дев,/ со мно́жеством язы́к на тя прише́дша,/ дави́дски, Ла́заре, к боре́нию того́ изше́л еси́/ и, я́коже о́наго втора́го победи́л еси́ Голиа́фа, взыва́я:/ несть свят, па́че Тебе́, Го́споди.
Я́ко побо́рнику Правосла́вия и му́ченику неле́стну/ хвалу́ и сла́ву вси тебе́, ве́рнии, прино́сим, Ла́заре:/ богора́тнаго бо зве́ря, я́ко не убоя́вшася рещи́:/ прииди́те, и потреби́м пра́вую ве́ру сла́вящих от земли́,/ и не помяне́тся и́мя Правосла́вия в них,/ – кре́пко низложи́л еси́ .
Богоро́дичен: Благопремене́нна сотвори́, Влады́чице Всепе́тая, бо́дрыми Твои́ми моли́твами/ от Твое́й утро́бы я́вльшагося челове́ком пло́тию,/ я́ко да обря́щем, Тебе́ сла́вящии, грехо́в оставле́ние/ и насле́дницы яви́мся сла́вы Сы́на и Бо́га Твоего́.
Седа́лен, глас 8.
Подо́бен: Прему́дрости сло́во:
Прему́дростию и ра́зумом украше́н,/ му́жеским и тве́рдым сия́я смы́слом,/ благ же, и кро́ток, и ми́лостив был еси́/ и вруче́нную ти па́ству до́бре упа́сл еси́,/ язы́ческих же наше́ствий непра́ведное заколе́ние претерпе́л еси́,/ те́мже и вене́ц боле́зней твои́х прия́л еси́./ Сего́ ра́ди вопие́м ти, Ла́заре:/ моли́ Христа́ Бо́га согреше́ний оставле́ние дарова́ти,/ чту́щим любо́вию святу́ю па́мять твою́.
Сла́ва, и ны́не, Богоро́дичен:
Я́ко Всенепоро́чная Неве́сто Творца́,/ я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Всепе́тая,/ беззако́нию мя су́ща скве́рно жили́ще/ и де́монов игра́лище в ра́зуме бы́вша,/ потщи́ся от сих злоде́йствия мя изба́вити/ све́тло жили́ще доброде́тельми соде́лавши,/ Светода́тельная и Нетле́нная,/ разжени́ о́блак страсте́й, и Вы́шняго прича́стия сподо́би,/ и Све́та невече́рняго моли́твами Твои́ми.
Песнь 4
Ирмо́с: Седя́й в сла́ве, на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.
Храм Бо́жий яви́лся еси́ по достоя́нию,/ храм бо Тому́ благоле́пен соде́лал еси́,/ всех приводя́щ во удивле́ние, оби́лием кипя́ вся́ким, Ла́заре,/ в не́мже и ли́ки и́ноческия собра́л еси́.
Вве́ренный тебе́ тала́нт держа́вный, Ла́заре,/ не в земли́ скрыл еси́, я́ко раб лени́вый,/ но де́лав, я́ко раб бо́дрый своего́ Влады́ки,/ его́же и многоусугу́бленна Тому́ прине́сл еси́.
Авситиди́йскаго И́ова житию́ всекра́сному подо́бяся му́дростию и ра́зумом,/ просвеще́н яви́лся еси́,/ смире́нием се́рдца укра́шен и высото́ю жития́ сия́я,/ и па́че сих высоча́йшая испра́вил еси́, Ла́заре.
Богоро́дичен: Лю́дие ве́рнии, сла́вящия Тя, Ма́терь Бо́жию,/ припа́дающе, мо́лимся чистоте́ Твое́й:/ моли́ся, Влады́чице, со святы́м му́чеником о чту́щих Тя:/ вся бо мо́жеши, я́ко Христа́ ро́ждши, Богоблаже́нная.
Ин
Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.
Я́ко Гедео́н всекре́пкий, к наше́дшему мно́жеству пе́рсскому дерзну́л еси́,/ хра́мы моли́твенныя и сосу́ды святы́я не терпя́ зре́ти пожига́емы,/ любя́ о сих умре́ти и ду́шу твою́ положи́ти;/ от них же главно́е усече́ние претерпе́л еси́, взыва́я:/ сла́ва си́ле Твое́й, Го́споди.
Всекре́пким твои́м усе́рдием спле́лся еси́ велехва́льному пе́рсянину/ и, того́ победи́в, взыва́л еси́:/ да пролие́тся кровь моя́ о любви́ Христа́ моего́,/ изво́лих бо примета́тися в дому́ Бо́га моего́ па́че,/ не́жели жи́ти ми в тле́нных.
Досточу́ден и му́жествен в бра́нех был еси́, но́вый в му́ченицех Ла́заре,/ ра́ны мно́гия и главно́е отсече́ние любве́ ра́ди Бо́жия от беззако́нных претерпе́л еси́,/ дух же пре́дал еси́ в ру́це Бо́гу, ра́дуяся.
Богоро́дичен: Возсия́л еси́ от Де́вы, я́коже от о́блака звезда́ озаря́ющая,/ показу́я му́чеником красоту́/ и всем, до́бре подвиза́вшимся и страстьми́ распе́ншимся, Ще́дре, си́лу Твою́.
Песнь 5
Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.
Ио́сифа целому́дреннаго чистоте́ и Боже́ственному житию́ подо́бяся,/ пшеницеда́тель и ми́лостив ни́щим был еси́:/ сию́ посе́яв в бразде́х, нището́ю изсо́хших,/ отону́дуже во вре́мя плодо́в весе́лием рукоя́ти пожа́л еси́.
Твоего́ ра́ди ми́лования, е́же на земли́ стяжа́л еси́,/ пра́вды ра́ди твое́й,/ приобре́тение стои́т тебе́ нетле́нно,/ е́же и получи́в, обре́л еси́ трудо́в твои́х возме́здие/ и живе́ши с ли́ки пра́ведник и му́ченик, ра́дуяся.
И́же нището́ю угнета́емии лю́те/ и и́же в плене́ных и вся́ких ну́ждах озлобля́емии/ тру́бят в подсо́лнечней, Ла́заре, твои́х, досточу́дне,/ ми́лований пучи́ну неизсле́диму.
Богоро́дичен: Без се́мене Сло́во Бо́жие, Неискусобра́чная, о Богоро́дице, родила́ еси́,/ я́коже Той благоизво́ли,/ Его́же ра́ди, Бо́га, му́жески сла́вный му́ченик Ла́зарь, пропове́дуя, вожделе́нно пострада́.
Ин
Ирмо́с: Вску́ю мя отри́нул еси́,/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.
Да подви́жится к твоему́ похвале́́нию всяк язы́к,/ я́ко хва́лен ста́ду твоему́ был еси́ вождь,/ и я́ко, сих приве́д, упа́сл еси́ на па́житех живо́тных,/ и я́ко засту́пник тем в животе́ и по сме́рти яви́вся,/ и я́ко о нем подвиза́лся еси́ до сме́рти.
Нача́льствующу тебе́ ста́ду христоимени́тому в зве́рских нахожде́ниих,/ не нае́мник, но па́стырь до́брый был еси́,/ за́поведи Пастыренача́льника потща́лся еси́ испо́лнити,/ расхища́ющим ста́до Христо́во возбраня́я, убие́н был еси́.
Светя́щую тя свещу́ во дни и нощи́, Ла́заре,/ твоя́ честны́я светоза́рныя мо́щи стяжа́вши, Це́рковь весели́тся,/ просвеща́ема днесь заре́ю, ю́же свы́ше прия́л еси́ Ду́ха Свята́го осене́нием,/ и́миже вся́кия ле́сти избежа́вши, тя прославля́ет.
Богоро́дичен: Ду́шу мою́ озари́, омраче́нную прегреше́ньми и ослепле́нную лю́тыми похотьми́,/ Я́же Со́лнце ро́ждшая Пра́ведное, Присноде́во:/ ели́ка бо хо́щеши, мо́жеши.
Песнь 6
Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.
О, всекра́сныя ку́пли твоея́, свя́те,/ о, чу́днаго твоего́ измене́ния:/ маловре́менною бо сла́вою ве́чную искупи́л еси́,/ в не́йже ны́не живе́ши, о нас моли́ся.
Житию́ твоему́, Ла́заре, кто не удиви́тся,/ собра́л бо еси́, я́коже пчела́ благоразу́мная, мно́жество цветови́дных доброде́телей:/ в ни́хже, красу́яся, нас облагоуха́еши.
Е́же по достоя́нию чу́днаго твоего́ жития́,/ досто́йно жела́ему сла́ву, ты от Христа́ Бо́га получи́л еси́,/ иде́же ны́не предстои́ши,/ в ри́зу све́тлу от доброде́телей облече́н, ра́дуяся.
Богоро́дичен: Ма́ти Присноде́во,/ я́ко Чи́стую Тя, Сло́во Чи́стое возлюби́,/ из Тебе́ вопло́щся, обнови́ челове́ка/ и Своего́ уго́дника просла́ви чудесы́.
Ин
Ирмо́с: Очисти́ мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Страны́ вся окре́стныя, Ла́заре, пропове́дуют твое́ житие́ и по́двиги,/ изря́днее же твое́ оте́чество, свя́те;/ труби́т же и Це́рковь Свята́я, па́мять твою́ сла́вящи,/ я́ко о той кровь твою́ излия́л еси́, но́вый в му́ченицех Ла́заре.
Гобзу́юща тя в поле́зных я́ко ви́де пе́рсянин,/ на тя свире́по рыка́я, со мно́жеством язы́к прихо́дит,/ от ни́хже и главно́е отсече́ние претерпе́л еси́, я́ко му́ченик,/ того́же возгнеще́ние ве́чному огню́ мече́м соде́лал еси́.
Бог, И́же во гро́бе забве́ния не оста́ви твое́ те́ло,/ земно́му же естеству́ повеле́ не растли́ти,/ но це́ло и облагоуха́емо явля́ет,/ всех ве́рных чу́вствия и зре́ние во удивле́ние привлача́.
Богоро́дичен: И́же вся приведы́й от небытия́ в бытие́,/ И́же от Де́вы Неискусому́жныя нас ра́ди вопло́щся,/ исмаи́ля врага́ покори́, борю́щаго нас,/ кня́зю на́шему побе́ду да́руя,/ мольба́ми Твоего́ Ла́заря и Ро́ждшия Тя, Сло́ве Бо́жий.
Конда́к, глас 8.
Подо́бен: Взбра́нной Воево́де:
Возбра́нника благоче́стия всеизря́дна/ и му́ченика о и́стине непосты́дна,/ че́стне и по до́лгу восхваля́ет тя ста́до твое́, Богому́дре,/ но я́ко име́я дерзнове́ние ко Христу́ Бо́гу,/ тебе́ сла́вящим смире́ние испроси́, да зове́м ти:/ ра́дуйся, Ла́заре приснопа́мятне.
И́кос:
И́мать тебе́ твое́ оте́чество и па́ства, я́ко жи́ва и по сме́рти:/ дар прече́стен и бога́тство неиждива́емое, засту́пника вели́ка/ и возбра́нника кре́пка, о благолюбе́зне;/ те́мже и в день сконча́ния твоего́ пе́сни достохва́льныя прино́сим ти,/ и, велича́юще тя, взыва́ем тебе́ такова́я:/ ра́дуйся, отца́ благочести́ва прозябе́ние;/ ра́дуйся, ма́тере благогове́йныя прижи́тие./ Ра́дуйся, я́ко от ю́ности после́довал еси́ за́поведем Бо́жиим;/ ра́дуйся, сто́лпе Правосла́вия непоколеби́мый./ Ра́дуйся, зда́телю и краси́телю святы́х церкве́й;/ ра́дуйся, оби́льное ми́лование ни́щих./ Ра́дуйся, па́стырю до́брый, положи́вый ду́шу твою́ о лю́дех Бо́жиих;/ ра́дуйся, я́ко о благоче́стии кровь твою́ излия́л еси́./ Ра́дуйся, я́ко сих ра́ди с му́ченики причте́ся и водворе́ние с ни́ми получи́л еси́;/ ра́дуйся, я́ко тобо́ю украси́шася правосла́внии./ Ра́дуйся, я́ко сла́ва о тебе́ протече́ по вселе́нней;/ ра́дуйся, наш засту́пниче и изба́вителю./ И сия́ тебе́ прино́сим, свя́те, я́ко досто́йну, и мо́лим тя:/ возме́здие сла́вящим тя пода́ждь/ и вся́каго озлобле́ния нас изба́ви, да зове́м ти:/ ра́дуйся, Ла́заре приснопа́мятне.
Песнь 7
Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
О Бо́зе ве́рою усе́рдною возмога́я,/ мно́жество хра́мов святы́х обнови́л еси́,/ мно́жайшия же от основа́ния воздви́гл еси́ Го́споду в славосло́вие,/ и́хже ра́ди дом Ду́ха Свята́го себе́ соде́лал еси́, вопия́,/ благослове́н Бог оте́ц на́ших.
Испещре́нну ле́ствицу, и до Небе́с досяжу́щу, на земли́, я́ко худо́г , хитре́ц Ла́заре, устро́ил еси́:/ бы́ша во тебе́, я́коже степе́ни ле́ствичныя, блага́я дела́,/ и́миже восте́к, иде́же жела́л еси́, зовы́й:/ благослове́н Бог оте́ц на́ших.
Ра́зума све́тлости в доброде́тели жития́/ и пре́жде страда́ния ты, му́дре, испо́лнь был еси́,/ красне́йший же яви́лся еси́ по по́двизех чуде́сных./ Те́мже тя я́ко Бо́жия уго́дника почита́ем, зову́ще:/ благослове́н Бог оте́ц на́ших.
Богоро́дичен: Ада́м от тли рождество́м Твои́м изба́вися,/ кроме́ бо тле́ния челове́ческаго ро́ждши,/ те́мже тле́ния зла́го мя, Отрокови́це, изба́ви/ мольба́ми Твоего́ Ла́заря, Влады́чице.
Ин
Ирмо́с: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же, оте́ц на́ших.
Не терпя́, Богому́дре, зре́ти хра́мом моли́твенным безбо́жными пожига́емым/ и ста́до христоимени́тое расхища́емо,/ ре́вностию Бо́жия любве́ разже́гся, изше́л еси́,/ и му́ченическое от сих главно́е отсече́ние претерпе́л еси́, зовы́й:/ благослове́н Бог оте́ц на́ших.
С ли́ки а́нгельскими в све́тлем пребыва́нии/ и с му́ченическими собо́ры водворя́яся я́ко му́ченик, Ла́заре,/ у Престо́ла всех Царя́ и Бо́га на́шего, лику́я, зове́ши:/ благослове́н Бог оте́ц на́ших.
Днесь весели́тся вся́ка душа́ ве́рных,/ собра́вшихся на свято́е торжество́,/ во всесвяты́й храм твой,/ и, зря́ще в нем, я́коже со́лнце, святы́я твоя́ мо́щи, ра́дуется, взыва́юще:/ благослове́н Бог оте́ц на́ших.
Богоро́дичен: Восхваляе́м Тя, похвалу́ му́чеников/ и ве́рных спасе́ние, вси ро́ди челове́честии, Пренепоро́чная:/ Бо́га бо родила́ еси́ и пребыва́еши Де́вою нетле́нна, Ему́же зове́м:/ благослове́н Бог оте́ц на́ших.
Песнь 8
Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.
Заре́ю солнцеви́дною достоле́пно, Ла́заре, украше́н/ и багряни́цею, ю́же от крове́й твои́х очервлени́л еси́, был еси́ оде́ян,/ держа́ крест твое́ю руко́ю,/ Христу́, просла́вльшему тя, предстои́ши./ Тем мо́лим тя:/ труда́м твои́м ве́чновати Ему́ моли́ся.
Услы́ши мольбы́ и пе́ния глас люде́й твои́х, свя́те,/ вонми́ воздыха́нию ста́да твоего́, я́ко отечестволю́бец,/ и проти́вися гне́вне на нас вою́ющим:/ ве́мы бо многомо́щную моли́тву пра́веднаго.
Ма́лаго и худа́го моле́ния на́шего не пре́зри, мо́лим тя,/ жи́телю Вы́шняго Ца́рствия Ла́заре,/ но призира́й на твое́ ста́до, я́коже при животе́ и по сме́рти,/ и смире́ние испроси́ хва́лящим тя.
Да ра́дуется днесь мно́жество Боже́ственное:/ яви́ся бо на за́паде пресве́тлая звезда́,/ во вре́мя после́днее сия́ющи досточу́дными луча́ми свои́х исправле́ний/ и озаря́ющи ве́рныя, Ла́заре всебога́те./ Те́мже торжеству́им, зову́ще:/ благослови́те, вся дела́ Госпо́дня, Го́спода/ и превозноси́те во вся ве́ки.
Богоро́дичен: А́нгелов Ти глас, Богоневе́сто, приноша́ем:/ ра́дуйся, Помо́щнице ве́рно чту́щих Тя челове́ков,/ проро́ков сбытие́, апо́столов и му́чеников украше́ние боголе́пное.
Ин
Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Не пожда́в сме́рти есте́ственныя,/ но, я́коже жела́в, получи́л еси́,/ всекра́сное твое́ житие́ муче́нием удобротвори́л еси́,/ и преше́л еси́ к Вы́шним оби́телем,/ иде́же зри́ши добро́ту неизрече́нную,/ и, я́ко му́ченик име́я дерзнове́ние, зове́ши:/ о́троцы, благослови́те,/ свяще́нницы, воспо́йте,/ лю́дие, превозноси́те Христа́ во вся ве́ки.
Полку́ богосо́бранному предсия́я, я́коже звезда́ благозра́чная,/ и сих во све́тлая селе́ния приве́л еси́ путе́м страда́льческим,/ и лико́м му́ченическим приче́т сих с собо́ю,/ кре́пко бо о благоче́стии кровь твою́ пролия́л еси́, свя́те, зовы́й:/ о́троцы, благослови́те,/ свяще́нницы, воспо́йте,/ лю́дие, превозноси́те Христа́ во вся ве́ки.
Во сла́ву и све́тлость Боже́ственную преше́д ду́хом, я́ко любоча́ден,/ нас, си́рых, не оста́вил еси́,/ но, я́коже Илия́ Елиссе́ю ми́лоть во утеше́ние,/ си́це честно́е те́ло твое́ це́ло и благоуха́нно нам оста́вил еси́,/ любя́ и по сме́рти пито́мцы твоя́, пою́щия:/ о́троцы, благослови́те,/ свяще́нницы, воспо́йте,/ лю́дие, превозноси́те Христа́ во вся ве́ки.
Богоро́дичен: Сын Единоро́дный, И́же пре́жде век неви́димый,/ напосле́док же веко́в Пе́рвенец бысть,/ ви́дим пло́тию из Тебе́, Ма́ти Де́во, нас ра́ди вочелове́чися,/ да земны́я обожи́т, Бог спасе́ния моего́, Ему́же зове́м:/ благослови́те, вся дела́ Госпо́дня, Го́спода/ и превозноси́те во вся ве́ки.
Песнь 9
Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.
Ра́дующися во всепра́зднственный день твоего́ сконча́ния,/ Це́рковь ве́рных днесь, со все́ми окре́стными совоку́пльшися, пра́зднует,/ храни́теля и засту́пника бо́дра стяжа́вши:/ ю́же огражда́й твои́м предста́тельством, я́ко да тя велича́ем.
Украси́в ду́шу твою́ Боже́ственными ле́потами,/ кра́сному Сло́ву сла́вен предстои́ши во дерзнове́нии мно́зе./ Сего́ ра́ди мо́лим тя:/ свы́ше нас, певцы́ твоя́, назира́й ми́лостивно,/ стране́ на́шей победи́тельная на супоста́ты испроси́,/ я́ко да тя ублажа́ем.
И́же празднолю́бных собо́ри,/ и́же в торжество́ ны́не хвали́маго Ла́заря собра́вшеся,/ наслади́мся торжества́ спасе́ннаго,/ зря́ще проро́ческих днесь сбы́вшихся слове́с:/ е́же пра́ведницы во ве́ки живу́т и от Го́спода сим прославле́ние,/ Его́же велича́ем.
Многоце́нное бога́тство и неиждива́емое – те́ло твое́ стяжа́в,/ храм твой, свя́те, крася́щеся тобо́ю, и взыва́ет, веселя́ся:/ вели́чит сла́ва моя́ Го́спода,/ дарова́вшаго мое́ украше́ние, покро́в и заступле́ние от супоста́тов.
Богоро́дичен: И́стинную Богоро́дицу ве́дый му́ченик Ла́зарь,/ и из Тебе́ рожде́ннаго Бо́га пропове́дуя,/ к безбо́жному мно́жеству от Того́ любве́ ополчи́ся,/ и му́жески проти́вися да́же и до сме́рти, Богоро́дице, Тя велича́ем.
Ин
Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.
Тебе́ мо́лим, свя́те, приле́жно:/ о Це́ркви ве́рней помоли́ся,/ о ней же и кровь твою́ му́ченически излия́л еси́,/ Правосла́вней же ве́ре кре́пость на е́реси враго́в испроси́,/ смире́ние же – чту́щим тя, Ла́заре.
Я́ко шипо́к багрянови́дный, и я́блоко благово́нно,/ я́ко крин се́льный и я́ко ми́ро благоуха́нно, ра́ка твоя́, Ла́заре, нас облагоуха́ющи, весели́т:/ ю́же и посреде́ иму́ще, я́коже сокро́вище многоце́нное,/ то́ю красу́емся, Спа́са велича́юще.
В пра́здник святы́я твоея́ па́мяти, Ла́заре, соше́дшеся, ли́цы веселя́тся,/ с ни́миже и мы пе́сньми тя почита́ем./ Прииди́ же и ты, свя́те, и предначина́й торже́ственная,/ озлобле́ния же нас вся́каго изба́ви,/ я́ко твое́ есмы́ ста́до.
Богоро́дичен: О Всепе́тая Цари́це,/ Я́же Безнача́льнаго ро́ждши Царя́ Сла́вы,/ пою́щим Тя согреше́ний проще́ние и житию́ устрое́ние благоприбы́тно пода́ждь/ Твоего́ Ла́заря мольба́ми.
Свети́лен.
Подо́бен: Со ученики́ взы́дем:
Оте́чество твое́, израсти́вшее тя,/ твои́ми пелена́ми хва́лится,/ по́двиги же и страда́ньми красу́ется, но́вый в му́ченицех Ла́заре,/ светле́ется же и це́рковь Спа́са и Бо́га,/ сокро́вище бога́тое иму́щи – святы́я твоя́ мо́щи;/ мы же, ве́рнии, па́мять твою́ соверша́юще, моле́бно зове́м:/ изба́ви почита́ющих тя озлобле́ния вся́каго твои́ми моли́твами.
Богоро́дичен: Приими́ моле́ние, Всечи́стая Ма́ти Бо́жия Сло́ва, Твои́х люде́й,/ ве́рно сла́вящих Тя, Богоро́дицу,/ и сохраня́й Твое́ ста́до ненаве́тно от сопроти́вных,/ непреста́нно сла́вящее Тя, Непосты́дную Засту́пницу:/ ины́я бо Помо́щницы не и́мамы, ра́зве Тебе́, Влады́чице.
На хвали́тех стихи́ры на 4, глас 4.
Подо́бен: Я́ко до́бля:
До́бляго исполни́теля за́поведей Бо́жиих,/ соше́дшеся, восхва́лим по достоя́нию но́ваго Ла́заря,/ блага́го ко́рене о́трасль сладча́йшую,/ сла́внаго в житии́ земна́го влады́чествия,/ красне́йшаго же в доброде́телех показа́вшася,/ и́же вся́кою доброде́телию оби́льнаго,/ и со А́нгелы Христу́ предстоя́щаго,/ и о и́же па́мять Его́ с любо́вию пою́щих моля́щагося.
До́бляго и му́жественнаго во бра́нех/ и адама́нта тверде́йшаго,/ побо́рника всеи́стинна о Правосла́вии,/ благоче́стия столпа́ непоколеби́маго,/ чу́днаго Ла́заря ублажи́м,/ ревни́теля и подража́теля Авраа́ма о́наго,/ и́же о и́стине му́ченика я́вльшагося,/ у Христа́ предстоя́щаго,/ о нас моля́щагося.
Кро́вию новоизлия́нною твое́ю/ ве́рных Це́рковь украша́ется,/ па́че же труды́ твои́ми соде́ланная,/ я́ко о той сию́ излия́л еси́,/ и, се́ю обагри́вшися,/ та́йно лику́ет, веселя́щися,/ и почита́ет достопа́мятное твое́ сконча́ние,/ му́чеников удобре́ние/ и держа́вных похвало́, Ла́заре, и мо́лимтися:/ огражда́й сию́ от обстоя́ний.
Сла́ва, глас 8:
В нача́ле доброде́тельнаго твоего́ жития́,/ страх Бо́жий в ду́шу твою́ всели́л еси́,/ и́мже окормля́емь,/ стезю́ десну́ю не погреши́л еси́,/ и, се́ю ше́ствуя,/ Тому́ угоди́л еси́,/ и да́нный ти тала́нт до́бре возде́лал еси́,/ о не́мже главно́е отсече́ние прия́л еси́,/ отону́дуже и мно́жае Христо́ви присво́ился еси́./ Те́мже Боже́ственная селе́ния и град Небе́сный/ всекра́сную твою́ ду́шу прия́,/ иде́же ны́не лику́еши близ Царя́ и Бо́га,/ тем мо́лим тя:/ моли́ о сла́вящих тя любо́вию, Ла́заре.
И ны́не, Богоро́дичен:
Чи́стая Де́во, Сло́ва врата́,/ Бо́га на́шего Ма́ти,/ моли́ спасти́ся нам.
Славосло́вие вели́кое и отпу́ст.
НА ЛИТУРГИ́И
Блаже́нны 1-го кано́на, песнь 3-я, 2-го кано́на, песнь 6-я. Проки́мен, глас 7: Возвесели́тся пра́ведник о Го́споде,/ и упова́ет на Него́. Стих: Услы́ши, Бо́же, глас мой, внегда́ моли́тимися к Тебе́. Апо́стол в Дея́ниях, зача́ло 29. Аллилу́ия, глас 4: Пра́ведник, я́ко фи́никс, процвете́т, я́ко кедр, и́же в Лива́не, умно́жится. Стих: Насажде́ни в дому́ Госпо́дни, во дво́рех Бо́га на́шего процвету́т. Ева́нгелие от Иоа́нна, зача́ло 52. Прича́стен: В па́мять ве́чную: