Святи́теля Гу́рия, пе́рваго архиепи́скопа Каза́нскаго
Творе́ние свята́го Дими́трия, митрополи́та Росто́вскаго
НА МА́ЛОЙ ВЕЧЕ́РНИ
Стихи́ры, глас 1.
Подо́бен: Небе́сных чино́в:
Небе́сным причте́н бы́ти жела́я,/ земна́я презре́ от ю́ности,/ предпочте́ Го́рняя па́че до́льних/ святи́тель Христо́в Гу́рий,/ на его́же святы́я за ны к Бо́гу моли́твы/ упова́ние возложи́хом.
Небе́сным присоедини́ся чино́м,/ земны́й А́нгел, Небе́сный челове́к,/ во пло́ти Безпло́тных быв подража́тель,/ с ни́миже ны́не предстоя́ Христо́ви,/ мо́лится о рабе́х свои́х,/ упова́ние по Бо́зе на́нь возлага́ющих.
Небе́сных граждани́не, А́нгелов сожи́телю,/ иера́рхов соприча́стниче,/ насле́дниче Ца́рствия Христо́ва,/ о нас, ча́дех твои́х, моли́ся,/ упова́ние на тя возло́жших.
Сла́ва, глас 2:
Прииди́те, христоимени́тии лю́дие,/ Христо́ва служи́теля па́мять че́стне почти́м,/ иера́рха Гу́рия свята́го:/ той бо, а́ще и оты́де от нас душе́ю,/ оба́че прису́тствует нам честны́ми мощми́ свои́ми./ Со А́нгелы водвори́лся е́сть,/ челове́ком же посо́бствует,/ оста́вил е́сть земна́я, но не оста́вил е́сть чад свои́х,/ отлучи́лся е́сть ста́да своего́ па́стырь наш до́брый,/ но от Го́рняго восше́ствия назира́ет о́вцы своя́/ и мо́лится Христу́ Бо́гу о душа́х на́ших.
И ны́не, Богоро́дичен:
Спаси́ от бед рабы́ Твоя́, Богоро́дице,/ я́ко вси по Бо́зе к Тебе́ прибега́ем,/ я́ко неруши́мей стене́ и предста́тельству.
На стихо́вне стихи́ры, глас 2.
Подо́бен: До́ме Евфра́фов:
Дом Ду́ха Свята́го/ от ю́ности соде́яся/ уго́дник Бо́жий Гу́рий,/ ны́не же в Небе́сный дом/ душе́ю пресели́ся от земны́х.
Стих: Уста́ моя́ возглаго́лют прему́дрость/ и поуче́ние се́рдца моего́ ра́зум.
Храм бы́сть Ду́ху Свято́му/ де́вственное те́ло его́,/ сосу́д духо́внаго ми́ра,/ того́ ра́ди почте́ся/ от Бо́га нетле́нием чу́дным.
Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.
Дом Пречи́стыя Богома́тере,/ име́я в себе́ честны́я твоя́ мо́щи,/ Гу́рие святи́телю,/ весели́тся о источа́емых от Тебе́ цельба́х/ и ра́достно прославля́ет чудеса́ твоя́.
Сла́ва, глас 8:
Душе́вную чистоту́ и теле́сную возлюби́в,/ уго́дниче Бо́жий, добронра́вие стяжа́л еси́,/ смире́нием и кро́тостию украси́лся еси́,/ того́ ра́ди господи́н твой земны́й/ в дому́ свое́м почти́л е́сть тя па́че све́рстник твои́х./ Ты же, преподо́бне, ве́рне тому́ рабо́тая,/ вся чу́вственная устро́ивал еси́ че́стне,/ Ду́хом же Христу́ угожда́л еси́,/ присвоя́яся Тому́ доброде́тельми./ Он же тебе́ в Небе́снем Ца́рствии Свое́м/ возме́здие даде́ ве́чно,/ сотвори́в тя насле́дника неконча́емых Свои́х благ,/ на земли́ же честны́я твоя́ мо́щи чудесы́ обогати́л е́сть./ Ты же, Ему́ ны́не предстоя́,/ моли́ся о чту́щих па́мять твою́.
Ны́не, Богоро́дичен. Тропа́рь пи́сан на вели́цей вече́рни.
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры, глас 5.
Подо́бен: Ра́дуйся:
Ра́дуйся, иера́рше Христо́в,/ вели́кий уго́дниче Бо́жий,/ служи́телю Боже́ственных та́ин досто́йный,/ чи́стый и честны́й сосу́де Свята́го Ду́ха,/ носи́вый Бо́га в се́рдце твое́м вы́ну,/ во уста́х же благода́ть излива́ющуюся име́вый,/ па́стырю до́брый, учи́телю прему́дрый,/ наста́вниче изря́дный,/ ко́рмчию корабля́ церко́внаго иску́сный,/ прави́телю чу́дный, путеводи́телю изве́стный,/ о́тче святи́телю Гу́рие,/ твои́ми моли́твами почерпа́ем от Христа́ Бо́га ве́лию ми́лость.
Ра́дуйся, ле́пото Русская,/ сла́во новопросвеще́нному твоему́ гра́ду,/ красото́ церко́вная, добро́то престо́ла архиере́йска,/ че́сть иера́рхов, похвало́ мона́шествующих,/ весе́лие люде́й ве́рных,/ ра́дование печа́льных, целе́бниче больны́х,/ безме́здный врачу́ неду́жных,/ помо́щниче безпомо́щных,/ сла́досте огорче́нных беда́ми,/ исто́чниче неоску́дный к тебе́ притека́ющим,/ тобо́ю почерпа́ем от Христа́ Бо́га ве́лию ми́лость.
Ра́дуйся, новопросвеще́нный гра́де Каза́нь,/ такова́го сподо́бивыйся име́ти в себе́ граждани́на,/ и́же, я́ко дар, свы́ше от Бо́га дарова́ся тебе́,/ и, я́ко бога́тство неоску́дное, посла́ся тебе́,/ и, я́ко дража́йшее сокро́вище, вве́рися ти,/ нетле́нныя цельбопода́тельныя мо́щи вели́каго Бо́жия архиере́я Гу́рия,/ апо́стольски в стране́ твое́й потру́дившагося,/ тьму́ нече́стия от Тебе́ отгна́вшаго,/ свет же ве́ры в ро́дех твои́х возсия́вшаго,/ защи́тника и засту́пника твоего́,/ стено́ю моли́тв свои́х кре́пце тя огражда́ющаго,/ Бо́гу о тебе́ предста́тельствующаго и моля́щагося вы́ну,/ да прие́млеши всегда́ ве́лию ми́лость.
И́ны стихи́ры, глас 2.
Подо́бен: Ки́ими похва́льными венцы́:
Ки́ими похва́льными венцы́/ венча́ем святи́теля?/ Предстоя́щаго на Небеси́ Бо́гу,/ не оставля́ющаго же нас ду́хом,/ Каза́нстей Це́ркви предстоя́теля,/ трудо́в пропове́днических прича́стника,/ нра́вов апо́стольских подража́теля./ Сей бо вои́стинну е́сть досто́ин безсме́ртныя сла́вы,/ его́же венча́ет на Небеси́ Христо́с Бог наш,/ име́яй ве́лию ми́лость.
Ки́ими пе́сненными добро́тами/ восхва́лим Гу́рия святи́теля?/ Хвалу́ воспе́вшаго Бо́жию посреде́ ро́да неве́рных/ и Богопозна́нием мно́гих вразуми́вшаго,/ гре́шныя от заблужде́ния обрати́вшаго/ и А́нгелом мно́гу ра́дость сотво́ршаго./ Сей вои́стинну досто́ин уста́ Бо́жия нарещи́ся/ и прия́ти вене́ц на Небеси́ от Христа́ Бо́га на́шего,/ иму́щаго ве́лию ми́лость.
Ки́ими духо́вными пе́сньми/ похва́лим святи́теля?/ Ми́ро от моще́й свои́х источи́вша,/ боле́зни от челове́к прогна́вша,/ цельба́м исто́чник я́вльшася,/ Каза́ни прекра́сное удобре́ние/ и всея́ Руси украше́ние,/ но́ваго чудотво́рца, безме́зднаго врача́./ Его́же прославля́ет Христо́с Бог наш,/ име́яй ве́лию ми́лость.
Сла́ва, глас 6:
Свята́я и вели́кая Це́рковь сла́внаго гра́да Каза́ни/ со архиере́и и свяще́нными собо́ры све́тло торжеству́ет,/ пра́зднующи пренесе́ние чудотво́рных моще́й па́стыря своего́,/ хвала́ми, я́коже цве́ты, Госпо́дня служи́теля венча́ет, глаго́лющи:/ ра́дуйся, мирото́чце но́вый, благоуха́яй чудесы́;/ ра́дуйся, в Го́рнем Сио́не с де́вственным лико́м после́дуя А́гнцу;/ ра́дуйся, на брак Того́ во одея́нии бра́чном вше́дый,/ убели́л бо еси́ плотску́ю оде́жду твою́/ мно́гими слеза́ми и до́лгим страда́нием./ Ра́дуйся, я́ко звезда́ у́тренняя, на Небесе́х возсия́вый;/ ра́дуйся, я́коже со́лнце, в Ца́рствии Небе́снем просвети́выйся,/ земна́я же озаря́я чуде́сною благода́тию,/ от моще́й твои́х исходя́щею./ Те́мже мо́лим тя, свя́те:/ предстоя́ Святе́й Тро́ице со А́нгелы,/ испроси́ всей Русстей стране́ и гра́ду твоему́/ мир и душа́м на́шим ве́лию ми́лость.
И ны́не, Богоро́дичен.
Вход. Проки́мен. И чте́ния святи́тельская.
При́тчей чте́ние (гла́вы 3 и 8):
Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти, не́жели зла́та и сребра́ сокро́вища./ Честне́йшая же е́сть ка́мений многоце́нных,/ все же честно́е недосто́йно ея́ е́сть./ Долгота́ бо дний и ле́та живота́ в десни́це ея́,/ в шу́йце же ея́ бога́тство и сла́ва./ От уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да, честна́я бо реку́,/ и блаже́н челове́к, и́же пути́ моя́ сохрани́т:/ исхо́ди бо мой – исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас и предлага́ю мой глас сыново́м челове́ческим:/ я́ко аз, прему́дрость, устро́их сове́т/ и ра́зум и смысл аз призва́х,/ мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая,/ я́ко и́стине поучи́тся горта́нь мой,/ ме́рзки же предо мно́ю устны́ лжи́выя./ С пра́вдою вси глаго́лы уст мои́х,/ ничто́же в них стро́потно, ниже́ развраще́нно./ Вся пра́ва су́ть разумева́ющим и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.
Прему́дрости Соломо́новы чте́ние (гла́вы 10, 6 и 8):
Уста́ пра́веднаго ка́плют прему́дрость,/ устне́ же муже́й му́дрых ве́дят благода́ть./ Уста́ му́дрых поуча́тся прему́дрости,/ пра́вда же избавля́ет их от сме́рти./ Сконча́вшуся му́жу пра́ведну, не поги́бнет наде́жда./ Сын бо пра́веден ражда́ется в живо́т/ и во благи́х свои́х плод пра́вды обы́мет./ Свет пра́ведным всегда́,/ и от Го́спода обря́щут благода́ть и сла́ву./ Язы́к му́дрых до́брая све́сть,/ и в се́рдце их почи́ет му́дрость./ Лю́бит Госпо́дь преподо́бная сердца́,/ прия́тии же Ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго./ Постига́ет бо жела́ющия ю, пре́жде да́же разуме́ти ю,/ и удо́бь у́зрится от лю́бящих ю./ У́треневавый к ней не утруди́тся,/ и бдяй ея́ ра́ди вско́ре без печа́ли бу́дет./ Я́ко досто́йных ея́ сама́ обхо́дит, и́щущи,/ и во стезя́х ея́ явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея́,/ и возлюби́х ю, и поиска́х от ю́ности моея́./ И взыска́х неве́сту привести́ себе́, я́ко всех Влады́ка возлюби́ ю./ Таи́бница бо е́сть Бо́жия хи́трости и обрета́тельница дел Его́./ Труды́ ея́ су́ть доброде́тели,/ целому́дрию же и ра́зуму та учи́т, пра́вде и му́жеству,/ и́хже потре́бнее ничто́же е́сть в житии́ челове́ком./ А́ще же и мно́гаго иску́сства жела́ет кто,/ ве́сть дре́вняя и бы́ти хотя́щая разсмо́трит./ Све́сть изви́тия слове́с и разреше́ния гада́ний:/ зна́мения и чудеса́ проразуме́ет и сбы́тия време́н и лет/ и всем сове́тник е́сть благ,/ я́ко безсме́ртие е́сть в ней и благосла́вие во обще́нии слове́с ея́./ Сего́ ра́ди бесе́довах ко Го́споду, и помоли́хся Ему́,/ и рех от всего́ се́рдца моего́:/ Бо́же отце́в и Го́споди ми́лости,/ сотвори́вый вся сло́вом Твои́м/ и му́дростию Твое́ю устро́ивый челове́ка,/ да владе́ет бы́вшими от Тебе́ тварьми́/ и да управля́ет мир в преподо́бии и пра́вде./ Да́ждь ми Твои́х престо́лов приседя́щую прему́дрость/ и не отлучи́ мене́ от о́трок Твои́х,/ я́ко аз раб Твой и сын рабы́ни Твоея́./ Посли́ ю с Небе́с от свята́го жили́ща Твоего́/ и от престо́ла сла́вы Твоея́,/ да, су́щи со мно́ю, научи́т мя, что благоуго́дно е́сть пред Тобо́ю./ И наста́вит мя в ра́зум,/ и сохрани́т мя в сла́ве свое́й./ Помышле́ния бо сме́ртных вся боязли́ва/ и погреши́тельна умышле́ния их.
Прему́дрости Соломо́новы чте́ние (гла́вы 4, 6, 7 и 2):
Похваля́ему пра́веднику, возвеселя́тся лю́дие./ Безсме́ртие бо е́сть па́мять его́,/ я́ко от Го́спода познава́ется и от челове́к,/ и уго́дна Го́сподеви душа́ его́./ Возлюби́те у́бо, о му́жие, му́дрость, и поживете́,/ восхощи́те ея́, и нака́зани бу́дете./ Нача́ло бо ея́ – любы́ и соблюде́ние зако́на./ Почти́те прему́дрость, да во ве́ки ца́рствуете./ Возвещу́ вам и не скры́ю от вас та́ин Бо́жиих,/ я́ко Той му́дрости наста́вник е́сть, и му́дрых испра́витель,/ и вся́кому смы́слу и де́лу Хитре́ц./ И всем смы́слом научи́т му́дрость,/ е́сть бо в ней Дух разу́мен и Свят,/ и сия́ние Све́та присносу́щнаго, и о́браз бла́гости Бо́жия./ Та дру́ги Бо́жия и проро́ки устроя́ет,/ благоле́пнейши же е́сть со́лнца и па́че вся́каго сотворе́ния звезд,/ све́ту сосужда́ема, обрета́ется пе́рвейши./ Та угожда́ющих ей от боле́зней изба́ви/ и наста́ви на стези́ пра́выя./ Даде́ им ра́зум име́ти свят, и сохрани́ я от ловя́щих,/ и по́двиг кре́пок подаде́ им./ Да разуме́ют вси, я́ко си́льнейши всего́ е́сть благоче́стие./ И никогда́же премо́жет зло́ба му́дрости,/ ниже́ пре́йдет, злы́я облича́ющи, суд./ Реко́ша же в себе́, помы́сливше непра́ведно:/ наси́льствуем пра́ведному, не пощади́м преподо́бства его́,/ не усрами́мся седи́н ста́рости многоле́тны./ Бу́дет бо нам кре́пость зако́н,/ и улови́м пра́веднаго, я́ко неуго́ден нам е́сть,/ и проти́вится дело́м на́шим, и поно́сит нам отпаде́ние зако́на,/ и облича́ет нам согреше́ния наказа́ния на́шего./ Возвеща́ет нам ра́зум име́ти Бо́жий/ и о́трока Госпо́дня себе́ имену́ет./ Бы́сть нам на обличе́ние помышле́нием на́шим, и тя́жек нам е́сть,/ и ви́дим, я́ко неподо́бно ины́м житие́ его́ и измене́ны стези́ его́./ В поруга́ние вмени́хомся ему́,/ и удаля́ется от путе́й на́ших, я́ко от нечисто́т,/ и блажи́т после́дняя пра́ведных./ Ви́дим у́бо, а́ще словеса́ его́ и́стинна су́ть,/ иску́сим, я́же сбыва́ются ему́./ Руга́нием и му́кою истя́жем его́, да разуме́ем кро́тость его́,/ и иску́сим беззло́бство его́, сме́ртию безобра́зною осу́дим его́,/ бу́дет бо посеще́ние от слове́с его́./ Сия́ помы́слиша и прельсти́шася:/ ослепи́ бо я зло́ба их, и не разуме́ша та́ин Бо́жиих,/ и не разсуди́ша, я́ко Ты еси́ Бог еди́н,/ живота́ име́яй и сме́рти вла́сть,/ и спаса́яй во вре́мя ско́рби,/ и избавля́яй от вся́каго зла./ Щедр и Ми́лостив, и дая́ преподо́бным Свои́м благода́ть,/ и Свое́ю мы́шцею го́рдым противля́яся.
На лити́и стихи́ра хра́ма и свято́му, глас 2:
Иера́ршестии со́нми ра́дуются о тебе́, святи́телю Гу́рие,/ с ни́миже и Христо́ва Це́рковь ликовству́ет,/ моще́й твои́х честны́х пренесе́ние пра́зднующи,/ ве́село и благода́рственно Бо́гови воспева́ет,/ вели́кое сокро́вище ей в них дарова́вшему/ и моли́твами твои́ми подаю́щему всем бога́тую ми́лость.
Наста́ све́тлый нам пра́здник/ пренесе́ния честны́х моще́й святи́теля Гу́рия:/ ра́дуйся, ве́рный гра́де Каза́нь,/ се бо не́дра земна́я возврати́ша те́ло нетле́нное/ твоего́ отца́ и па́стыря/ и храм Бо́жия Ма́тере/ восприя́т вну́трь себе́ честны́я того́ мо́щи,/ душа́ же его́ свята́я,/ в Го́рней нерукотворе́нней Це́ркви ликовству́я со иера́рхи,/ мо́лит Архиере́я Вели́каго,/ Небеса́ проше́дшаго, Влады́ку Христа́,/ да ми́лостив бу́дет лю́дем Свои́м/ и пода́ст мир и тишину́ Русстей стране́,/ кре́пость градово́м, изоби́лие земны́х благ/ и Небе́сных да не лиши́т вся ве́рныя.
Сла́ва, глас 8:
Прииди́те, каза́нстии лю́дие,/ принеси́те ны́не пе́ние и моле́ние своему́ первосвяти́телю/ и воспо́йте ему́ кра́сное от души́ хвале́ние:/ той бо нача́ток бы́сть про́поведи Боже́ственныя ага́ряном,/ просвети́тель во тьме́ седя́щим,/ заблу́ждшим наста́вник и руководи́тель ко спасе́нию,/ мно́гия приве́д ко Христу́ Бо́гу./ Ему́же а́ще и вы́ну на Небесе́х предстои́т,/ оба́че и земна́я посеща́ет,/ и на пра́здник свой от Го́рних прихо́дит,/ и возвеселя́ет собра́нныя лю́ди своя́,/ зрит покланя́ющияся свято́му о́бразу Его́/ и слы́шит моли́твы моля́щихся/ и прино́сит я ко Влады́це./ Единогла́сно у́бо воззове́м к нему́:/ о вели́кий о́тче наш, святи́телю Гу́рие,/ никогда́же оста́ви нас, чад твои́х,/ но посеща́й всегда́ ми́лостию твое́ю/ и моли́твами твои́ми соблюда́й нас,/ бу́ди с на́ми, и никто́же на ны.
И ны́не, Богоро́дичен.
На стихо́вне стихи́ры, глас 2.
Подо́бен: Егда́ от Дре́ва:
Егда́ зави́стнии клевре́ти твои́/ оклевета́ша тя к господи́ну,/ непра́вду сплета́юще на тя, пра́веднаго,/ и́стинный ра́бе Христо́в Гу́рие,/ непови́нна рука́ма и чи́ста се́рдцем,/ тогда́, я́ко дре́вняго в Еги́пте Ио́сифа,/ мра́чная темни́ца тя прия́т,/ те́сныя тя у́зы угнето́ша,/ злострада́ние же и глад истни́ твое́ те́ло./ Оба́че Бог тя не оста́ви,/ и в те́мнем бо ме́сте чистота́ со́вести твоея́,/ я́коже заря́, пред Всеви́дцем сия́ше,/ целому́дрие же твое́ и А́нгелом бы́сть изве́стно,/ и гото́вяхуся тебе́ за терпе́ние све́тлыя венцы́./ Ты же благода́рно воспева́л еси́:/ сла́ва смотре́нию Твоему́, Человеколю́бче.
Стих: Уста́ моя́ возглаго́лют прему́дрость/ и поуче́ние се́рдца моего́ ра́зум.
Егда́ нечелове́ческою сне́дию/ в темни́це был еси́ пита́емь, страда́льче,/ на три дни по еди́ному снопу́ овса́ прие́мля,/ тогда́ не́кий от друго́в твои́х,/ та́йно приходя́ к узи́лищу твоему́, обеща́шеся тебе́ приноси́ти пи́щу./ Ты же отню́д не восхоте́л еси́,/ довле́яся скотоподо́бным пита́нием:/ сло́во бо Бо́жие насыща́ше ду́шу твою́/ и наде́жда в Бо́зе укрепля́ше тя,/ непови́нность же твоя́ бы́сть, я́ко пирова́ние,/ сле́зы же твоя́ бы́ша тебе́ хлеб де́нь и но́щь,/ от се́рдца же твоего́ благода́рно к Бо́гу взыва́л еси́:/ сла́ва сицево́му Твоему́ о мне устрое́нию, Человеколю́бче.
Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.
Егда́ по двуле́тнем злострада́нии/ восхоте́ тя Госпо́дь извести́ на свобо́ду,/ тогда́ свет возсия́ тебе́ в две́рех темни́цы/ и невозбра́нное изше́ствие угото́вася тебе́./ Услы́ша бо Вы́шний моли́тву твою́,/ и воздыха́ния твоя́ проидо́ша о́блаки,/ сле́зы же твоя́ пред Бо́га взыдо́ша,/ смотре́ние же Влады́чне, Ио́сифа Еги́пту,/ предустро́яше тя духо́внаго пита́теля/ а́лчущей сло́ва Бо́жия стране́ ага́рянстей/ и престо́л тебе́ в ней гото́вяше,/ да управля́еши но́выя Христо́вы лю́ди/ и насыща́еши я бра́шном, пребыва́ющим в живо́т ве́чный./ Ты же, о всем благодаря́ Творца́ своего́,/ ра́дуяся, воспева́л еси́:/ сла́ва мно́гому милосе́рдию Твоему́, Человеколю́бче.
Сла́ва, глас 6:
Не подоба́ше первопресто́льней Каза́нстей Це́ркви/ лиша́тися своего́ первоседа́теля,/ и́же пе́рвый бы́сть архиере́й новопросвеще́нному гра́ду;/ не подоба́ше и архиере́ю, жениху́ су́шу церко́вному,/ а́ще и по преставле́нии, вне неве́сты своея́ бы́ти,/ с не́юже изнача́ла духо́вным сою́зом сопряже́ся/ и украси́ ю благове́рием и благоче́стием,/ а́ки дража́йшими у́тварьми./ Того́ ра́ди честны́я его́ мо́щи/ в первопресто́льную це́рковь сла́вно принесо́шася,/ и украси́ся па́ки престо́л свои́м первоседа́телем,/ ве́село лику́я, Це́рковь прия́т своего́ святи́теля и воззва́, глаго́ля:/ отку́ду мне сие́, да прии́де служи́тель Го́спода моего́ ко мне?/ Се бо, я́ко косну́ся ра́ка твоя́ пра́га моего́,/ взыгра́ша ча́да моя́ ра́дощами о тебе́, отце́ свое́м,/ аз же тя любе́зне прие́млю в не́дра моя́;/ ты же, о архиере́ю Бо́жий,/ вшед, приими́ твое́ и́стое ме́сто,/ водвори́ся, па́стырю, в твое́й огра́де,/ моле́бная же уста́ твоя́ отве́рз,/ испроси́ мир ми́рови,/ тишину́ Русстей стране́/ и всем ве́рным единомы́слие.
И ны́не, Богоро́дичен.
Тропа́рь, глас 4:
Я́ко крин благово́нный,/ мироточи́выя твоя́ мо́щи/ от вертогра́да Це́ркве Спа́совы/ в вертогра́д Це́ркве Богоро́дичны че́стне принесо́шася,/ святи́телю Гу́рие,/ я́коже бо дар че́стен,/ тя дарова́в Христо́с Пречи́стей Ма́тери Свое́й,/ и испо́лнися храм Ея́ святы́й благоуха́ния твоего́,/ и возра́довася архиере́йский престо́л,/ прие́мый тя, первоседа́теля своего́./ Возвесели́ся же собо́р ве́рных со святи́телем и священнонача́льники/ о пресла́вном цельбоно́сных твои́х моще́й пренесе́нии,/ е́же мы ра́достно пра́зднующе, мо́лим тя, уго́дниче Бо́жий;/ моли́ Христа́ Бо́га/ пода́ти душа́м на́шим мир и ве́лию ми́лость.
Ин тропа́рь, глас 3:
Доброде́тельнаго и благоро́днаго ра́ди твоего́ жития́,/ изве́л тя е́сть Преще́дрый Бог/ на первопресто́льство богоспаса́емаго ца́рства Каза́ни/ и просвети́л е́сть уче́нием твои́м бесерме́ньстии язы́цы./ И мно́гия, святи́телю Гу́рие, во избра́нное Христо́во ста́до приве́л еси́,/ и нищелю́бием богоуго́дно пожи́л еси́,/ и по преставле́нии твое́м мно́го лет сокрове́нное твое́ те́ло/ от недр земны́х на удивле́ние яви́ся,/ и благоуха́ннаго ми́ра гроб напо́лнися приходя́щим с ве́рою,/ взима́ющим ми́ро от ра́ки честны́х моще́й твои́х,/ всем источа́еши исцеле́ния,/ святи́телю Христо́в Гу́рие,/ моли́ Христа́ Бо́га/ спасти́ся душа́м на́шим.
НА У́ТРЕНИ
На Бог Госпо́дь: тропа́рь, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 5:
По́стником во удобре́ние и мона́шествующим во удивле́ние/ бы́сть житие́ твое́ во оби́тели твое́й:/ безропти́во бо и со усе́рдием проходи́л еси́ вся рабо́ты монасты́рския,/ повину́яся наста́вником, по рече́нию апо́стольску, и покоря́яся им,/ ве́дый изве́стно, я́ко нача́льствующии пеку́тся о душа́х, вве́ренных им,/ поне́же сло́во о них возда́ти и́мут пра́ведному Судии́./ Того́ ра́ди ты, и́стинный ра́бе Христо́в,/ наста́внику твоему́, я́ко Христу́, покоря́лся еси́,/ и ра́дость тому́ смире́нием и послуша́нием твои́м соде́лывал еси́, а не воздыха́ние,/ тем у́бо от Бо́га и ты наста́вник люде́й Его́ учине́н был еси́.
Сла́ва, и ны́не, Богоро́дичен:
Боже́ственнаго естества́ о́бщницы бы́хом Тобо́ю, Богоро́дице Де́во:/ Бо́га бо нам воплоще́нна родила́ еси́./ Те́мже Тя по до́лгу вси благоче́стно почита́ем и ве́рно ублажа́ем.
По 2-м стихосло́вии седа́лен, глас 8:
Уче́нием Боже́ственных слове́с твои́х, а́ки мре́жею ры́бы,/ ага́ряны привлача́л еси́ во свято́е Креще́ние,/ во е́же благоче́стно им ве́ровати во Отца́ и Сы́на и Свята́го Ду́ха,/ и благоприя́тными твои́ми моли́твами, а́ки со́лнце, озари́л еси́ престо́льный град твой/ и све́том невече́рним того́ просвети́л еси́./ Те́мже, святи́телю Гу́рие, соше́дшеся, вопие́м ти:/ моли́ Христа́ Бо́га пода́ти грехо́в оставле́ние любо́вию притека́ющим к тебе́/ и с ве́рою каса́ющимся ковче́гу честны́х моще́й твои́х.
Сла́ва: Яви́ся дне́сь пресве́тлая па́мять твоя́/ обре́тением честны́х моще́й твои́х,/ и удиви́л еси́ правосла́вныя лю́ди посреде́ неве́рных челове́к:/ подае́ши многоразли́чная исцеле́ния от ра́ки ми́ра честны́х моще́й твои́х./ И прославля́ет тя Дарова́тель Госпо́дь, Своего́ уго́дника./ Святи́телю Христо́в Гу́рие,/ моли́ся непреста́нно о всех нас.
И ны́не, Богоро́дичен:
Небе́сную две́рь и ковче́г,/ всесве́тлый о́блак и несеко́мую го́ру,/ неопали́мую купину́, слове́сный рай, Е́вино воззва́ние,/ всей вселе́нней вели́каго благода́ти сосу́да, воспои́м Ма́терь Бо́жию,/ я́ко спасе́ние То́ю соде́лася ми́ру и оставле́ние до́лга дре́вняго./ Те́мже и воззове́м к Ней:/ моли́ Христа́ Бо́га согреше́нием оставле́ние дарова́ти/ благоче́стно покланя́ющимся пресвято́му рождеству́ Твоему́.
По полиеле́и седа́лен, глас 1:
Бо́жия Ду́ха светозаре́нием/ служи́тель быв Христу́, вся́ческих Влады́це,/ тьму́ разруши́л еси́ ага́рянскаго нече́стия,/ и научи́л еси́ лю́ди, и просвети́л еси́ Боже́ственным Креще́нием./ Те́мже, пропове́дника тя вси и́стины иму́ще, святи́телю Гу́рие, вопие́м к тебе́:/ моли́ Христа́ Бо́га спасти́ся душа́м на́шим.
Сла́ва, и ны́не, Богоро́дичен:
Наста́ви нас на пу́ть покая́ния,/ уклоня́ющихся всегда́ безпу́тием к заблужде́нию и преблага́го Бо́га прогневля́ющих,/ Неискусобра́чная Де́во, Мари́е Чи́стая, Сло́ву две́ре, Бо́жие вселе́ние,/ прибе́жище бо еси́ отча́янным и спасе́ние душа́м челове́ческим.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Иоа́нна, зача́ло 36.
По 50-м псалме́ стихи́ра, глас 6:
Егда́ мо́щи твоя́ святы́я/ в престо́льную це́рковь приноси́мы бя́ху,/ свяще́нницы, и мона́шествующии, и ве́сь наро́д,/ окружа́юще ра́ку твою́,/ со у́жасом взира́ху на тя./ О́вии у́бо удивля́хуся нетле́нию твоему́,/ о́вии же чудя́хуся благово́нию,/ от мироточи́вых члено́в твои́х исходя́щему,/ ини́и же чуде́сная от Тебе́ быва́ющая исцеле́ния прославля́ху,/ архиере́й же со слеза́ми вопия́ше ти:/ о вели́кий уго́дниче Бо́жий,/ ви́жду те́ло твое́, ны́не ме́ртвости о́браз иму́що,/ е́же в бу́дущей жи́зни, я́ко со́лнце, возсия́ет,/ и́бо ме́ртвое сие́ облече́тся в безсме́ртие/ и поже́рто бу́дет ме́ртвенное живото́м,/ ты же со Христо́м воцари́шися,/ Ему́же от ю́ности порабо́тал еси́;/ но, о святи́телю чу́дный,/ моли́ся приле́жно Христу́ Бо́гу/ спасти́ся гра́ду твоему́ невреди́му.
Кано́н Богоро́дице со ирмосо́м на 6 и свято́му два кано́на на 8. Пе́рвый кано́н зри в слу́жбе на де́нь преставле́ния святи́теля, 5 декабря. Ин кано́н святи́теля, глас 3.
Пе́снь 1
Ирмо́с: Пе́снь но́вую пои́м, лю́дие,/ от Де́вы Ро́ждшемуся во спасе́ние на́ше/ и еди́но Сотво́ршему с Небе́сными земна́я,/ я́ко просла́вися.
Бо́же и Го́споди, Иису́се Христе́, А́гнче,/ да́ждь ми сло́во све́тло,/ да воспою́ а́гнца Твоего́ кро́ткаго и незло́биваго, пе́рваго Каза́нскаго архиере́я Гу́рия чудотво́рца,/ и ублажу́ нетле́ние честны́х моще́й его́.
Ловле́ния льсти́ваго руки́ избе́гл еси́,/ непоро́чно де́вство твое́ сохрани́в;/ того́ ра́ди чи́стое твое́ те́ло нетле́нием от Бо́га почте́ся,/ ему́ же мы удивля́ющеся,/ пое́м Го́спода, в тебе́ просла́вльшагося.
А́нгел был еси́ во пло́ти земны́й и Небе́сный челове́к/ доброде́тельным житие́м на земли́ просия́л еси́,/ по преставле́нии же чудесы́, от моще́й твои́х быва́ющими, Русь удиви́л еси́;/ мы же непреста́нно Го́споду пое́м,/ я́ко в тебе́ просла́вися.
Го́рдаго Голиа́фа духо́внаго, вла́ствующаго ага́ряны,/ дре́вле си́лою кре́стною посрами́л еси́./ Того́жде и ны́не прогоня́еши от челове́ков, притека́ющих к святы́м моще́м твои́м/ и пою́щих Го́сподеви, я́ко просла́вися.
Богоро́дичен: Основа́ние тве́рдое Ты еси́, Пречи́стая Де́во, всем христиа́ном,/ на Тя наде́ющимся вои́стинну/ и Го́сподеви пою́щим, я́ко просла́вися.
Пе́снь 3
Ирмо́с: Утвержде́ние и очище́ние/ пода́ждь нам, Сы́не Бо́жий,/ и спаси́ ны, я́ко Человеколю́бец.
Сло́во Бо́жие пропове́дал еси́ нечести́вым ага́ряном/ и сих научи́л еси́ в Того́ ве́ровати,/ у́чиши же и по преставле́нии твое́м,/ чудесы́, а́ки усты́, велегла́сно вопия́ и уверя́я:/ цельбы́ точа́т честны́я твоя́ мо́щи с ве́рою притека́ющим.
Лю́таго зми́я под но́зе попра́л еси́ и и́долы стерл еси́,/ стира́еши же и ны́не главу́ го́рдаго велиа́ра,/ дале́че бо бежи́т от ра́ки твоея́,/ не терпя́ приближа́тися честны́м моще́м твои́м, святи́телю Гу́рие.
От хра́ма Спа́сова в Богоро́дичен храм преноси́мым бы́вшим моще́м твои́м,/ благоуха́ния град испо́лнися, возду́х освяти́ся,/ ду́си возду́шнии дале́че отбего́ша;/ наро́д же ве́рных, веселя́щеся, прославля́ху Бо́га,/ ди́внаго в тебе́, святе́м свое́м.
Богоро́дичен: Велиа́ра лю́таго рождество́м Твои́м победи́ла еси́,/ Христа́ нам, Де́во, ро́ждши.
Ин конда́к, глас 6:
И́стине основа́ние, и ве́ры утвержде́ние,/ и в поуче́ниих преизря́днаго све́мы тя, благоче́стию споспе́шника,/ апо́столом сопресто́льника, страстоте́рпцем соприча́стника,/ по́стником купноревни́теля похваля́ем тя, Гу́рие святи́телю,/ и ве́лия таи́нника Бо́жия благода́ти.
Ин и́кос:
Храм Ду́ха Пресвята́го был еси́,/ и река́, вод духо́вных наполня́ема,/ и Це́ркве огражде́ние неподви́жно,/ гра́ду же Каза́ни звезда́ пресве́тлая, чистото́ю душе́вною и теле́сною сия́ющая;/ Боже́ственный гром уче́ния воспуща́я,/ трубо́ю же духо́вною глас ве́ры всем провозвеща́я/ и сим ага́рянское злоче́стия отсека́я,/ Тро́ицу во Еди́нице пе́ти научи́л еси́, о́тче наш, вели́кий святи́телю Гу́рие,/ вели́кий таи́нниче Бо́жия благода́ти.
Седа́лен, глас 5:
Чу́ден вои́стинну измла́да был еси́,/ посто́м, и моли́твами, и до́лу лега́нием Бо́гу угоди́в,/ и терпе́нием твои́м темни́цу отве́рзл еси́;/ чу́дно же и пресла́вно и Той о тебе́ соде́ла,/ а́ки друга́го Па́вла с Небеси́ позна́в,/ на архиере́йский престо́л по жре́бию тя избра́л е́сть./ Того́ ра́ди мо́лим тя, вели́кий святи́телю Гу́рие:/ моли́ спасти́ся душа́м на́шим.
Сла́ва, и ны́не, Богоро́дичен:
Стра́нно чу́до зача́тия и несказа́нен о́браз Боже́ственнаго рождества́/ в Тебе́ позна́ся, Чи́стая Присноде́во,/ ужаса́ет ми ум и удивля́ет помышле́ния,/ сла́ва Твоя́, Богоро́дице, всем воспростре́ся на спасе́ние душа́м на́шим.
Пе́снь 4
Ирмо́с: Стра́нна и неизрече́нна рождества́ Твоего́ та́йна!/ Услы́шах слух Твой, и убоя́хся,/ и, веселя́ся, вопию́ Ти:/ си́ле Твое́й сла́ва, Человеколю́бче.
Ели́ко на земли́ сотвори́л еси́ в терпе́нии твое́м, во а́лчбе и жа́жде пребыва́я,/ толи́ко и Христо́с возда́рствова тебе́,/ архиере́йством почти́в тя и чудесы́ просла́вив твоя́ мо́щи,/ и́хже дне́сь пренесе́ние пра́зднующе, вопие́м Христу́:/ си́ле Твое́й сла́ва, Человеколю́бче.
Ни глад, ни темни́ца, ни ску́дость ри́зная возбрани́ тя от любве́ Христо́вы,/ е́же после́довати страсте́м Его́, всехва́льне о́тче наш Гу́рие./ Того́ ра́ди Госпо́дь тебе́, преподо́бному Своему́, ви́дети истле́ния не даде́,/ но чуде́сным нетле́нием облагода́тствова тя,/ ему́же мы удивля́ющеся, вопие́м Христу́:/ си́ле Твое́й сла́ва, Человеколю́бче.
И́го Христо́во на ра́мо взем, после́довал еси́ стопа́м Его́,/ трудолю́бное же твое́ те́ло во гроб положи́в,/ душе́ю вшел еси́ в Го́рнее насле́дие Его́, святи́телю Гу́рие,/ мы же вопие́м Христу́:/ си́ле Твое́й сла́ва, Человеколю́бче.
Богоро́дичен: Е́ллинское буесло́вие, Богома́ти, Твои́м рождество́м искорени́ся,/ нов же сад ве́ры насади́ся/ и благода́ть ве́ры процвете́ моли́твами Твои́ми, Чи́стая.
Пе́снь 5
Ирмо́с: К Тебе́ у́тренюю,/ от Отца́ пре́жде денни́цы возсия́вшему, У́тро ми́рови,/ помраче́нна согреше́ньми, Спа́се,/ предвари́в, озари́, Бо́же.
Мрак грехо́вный и тьму́ сла́стных страсте́й от души́ отри́нул еси́,/ у́треневал еси́ ко Христу́, взыва́я к Нему́:/ Спа́се, предвари́в, озари́ мя, Бо́же.
Ле́ности и вся́каго мирска́го пристра́стия в жи́зни сей уклони́лся еси́,/ пло́ть свою́ и́ноческими труды́ и архиере́йскими по́двиги истни́л еси́,/ свиде́тельствует о житии́ твое́м нетле́ние твое́,/ вы́ну бо пел еси́ Влады́це Христу́:/ предвари́в, озари́ мя, Бо́же.
Ага́рянскаго суетогла́сия и тще́тнаго их буесло́вия обузда́тель,/ святи́телю Гу́рие, был еси́, вопия́:/ предвари́в, озари́ мя, Бо́же.
Богоро́дичен: Виссо́н чи́стый во чре́ве Твое́м истка́ся, Пречи́стая,/ в него́же облече́ся несказа́нно Ца́рь Сла́вы –/ Христо́с Бог наш.
Пе́снь 6
Ирмо́с: Во глубину́ се́рдца морска́го беззако́нии отве́ржен быв,/ я́ко Ио́на, вопию́ Ти: возведи́ мя от тли,/ да возда́м Ти моли́твы моя́, Го́споди.
Ре́вностию Боже́ственною при́сно объя́т быв,/ неукло́нно Бо́гу предстоя́л еси́,/ ми́лостынею и непреста́нными моли́твами Тому́ угожда́я,/ ны́не же моли́ся и о нас, святи́телю,/ пренесе́ние твое́ пра́зднственно почита́ющих.
Ему́же предстоя́л еси́ в жи́зни вре́менней в моли́твах неусы́пных,/ Тому́ ны́не в жи́зни ве́чной наипа́че предстои́ши, Христу́ Бо́гу на́шему,/ помоли́ся у́бо Ему́ за град твой и за вся лю́ди, пою́щия тя/ и пра́зднующия пренесе́ние чудотво́рных моще́й твои́х.
Не бы́сть в тебе́ поро́ка, ниже́ скве́рны в души́ твое́й, о́тче,/ сего́ ра́ди по преставле́нии чудесы́ от Бо́га обогати́лся еси́,/ Гу́рие приснопа́мятне.
Богоро́дичен: Тебе́ ублажа́ем, Бо́жию Ма́терь,/ и под кров Твой с ве́рою прибега́ем, Богоро́дице Де́во:/ спаси́ всех нас, ве́рно пою́щих Тя.
Конда́к, глас 4:
Чу́вственныя стра́сти победи́в,/ чистото́ю, я́ко со́лнце, возсия́л еси́,/ чи́сто житие́ до конца́ сохрани́в,/ и от неве́рия в ве́ру мно́гих ко Христу́ приве́л еси́,/ того́ ра́ди от Бо́га нетле́нием почте́н,/ чудесы́ твои́ми вся удиви́л еси́./ Мо́лим у́бо тя, святи́телю Гу́рие,/ моли́твами твои́ми от бед изба́ви нас, да зове́м ти:/ ра́дуйся, о́тче преди́вный, гра́ду Каза́ни похвало́ и утвержде́ние.
И́кос:
Пе́рвый се́ятель был еси́ духо́вных доброде́телей,/ и пе́рвый па́стырь, и Це́ркви нача́льник,/ пе́рвый архиере́й и учи́тель христиа́нскому зако́ну в новопросвеще́нном гра́де Каза́ни,/ ве́рныя лю́ди пита́я хле́бом уче́ния благода́тнаго зако́на,/ напоя́я пи́вом духо́вныя благода́ти,/ неве́рныя же уча́ позна́ти и́стину и крести́тися святы́м Креще́нием,/ и мно́жество наро́да от неве́рия в ве́ру ко Христу́ приве́л еси́,/ чи́стым житие́м Бо́гу угоди́ти наста́вив их./ Сего́ ра́ди Христо́с свято́му и трудолю́бному твоему́ те́лу дарова́ нетле́ние и дар чудотворе́ния:/ приходя́щии бо с ве́рою к цельбоно́сным твои́м моще́м/ прие́млют неоску́дныя страсте́й премене́ния, и боле́зней исцеле́ния,/ и грехо́в проще́ние твои́ми, свя́те, ко Христу́ моли́твами./ Те́мже зове́м ти:/ ра́дуйся, о́тче преди́вный,/ гра́ду Каза́ни похвало́ и утвержде́ние.
Пе́снь 7
Ирмо́с: Прохлажде́й пла́мень пе́щный/ и Де́ву сохрани́ ро́ждшую Тя Богоро́дицу:/ благослове́н еси́, Го́споди, Бо́же оте́ц на́ших.
Ио́сифа Прекра́снаго чистоту́ возлюби́л еси́,/ диа́вольский наве́т подъя́л еси́,/ беды́ же терпя́, несумне́нно вопия́л еси́:/ благослове́н еси́, Го́споди, Бо́же оте́ц на́ших.
А́ки ка́мень а́нфракс, цветя́ся све́тло,/ смиренному́дрием твои́м в жи́зни сей пребы́л еси́,/ честны́ми же мощми́ твои́ми,/ а́ки дража́йшим би́сером, украша́ется Це́рковь, с ча́ды свои́ми вопия́:/ благослове́н еси́, Бо́же оте́ц на́ших.
Ми́ро источа́я, ми́ро духо́вное яви́лся еси́,/ помазу́я всех, с ве́рою приходя́щих и пою́щих:/ благослове́н еси́, Бо́же оте́ц на́ших.
Богоро́дичен: И́дольская кре́пость разруши́ся,/ зря из Тебе́ Бо́га ражда́ема, да пое́м Ему́:/ Бо́же оте́ц на́ших, благослове́н еси́.
Пе́снь 8
Ирмо́с: Покланя́емаго от святы́х А́нгел/ и Сла́вимаго непреста́нно,/ свяще́нницы, по́йте,/ лю́дие, превозноси́те во вся ве́ки.
Творца́, от всех А́нгел покланя́емаго, славосло́вил еси́, вопия́:/ свяще́нницы, по́йте,/ лю́дие, превозноси́те во вся ве́ки.
Росода́тельну от Ду́ха Свята́го ду́шу твою́ сотвори́л еси́,/ от честны́х же моще́й твои́х реку́ ми́ра целе́бнаго источи́л еси́,/ мы же, благода́ть от Тебе́ почерпа́юще,/ превозно́сим Христа́ во ве́ки.
Отца́ и Сы́на и Свята́го Ду́ха прославля́я при́сно, пел еси́:/ свяще́нницы и лю́дие, превозноси́те Святу́ю Тро́ицу во ве́ки.
Богоро́дичен: Повеле́нное та́инство от Бо́га прие́м, Арха́нгел/ прии́де возвести́ти Тебе́, Чи́стая Де́во./ Ты же, ре́кши: се Раба́ Госпо́дня,/ зачала́ еси́ Бо́жия Сы́на,/ Его́же мы со святи́телем Гу́рием пое́м и превозно́сим во вся ве́ки.
Пе́снь 9
Ирмо́с: Ма́терь Све́та, и по рождестве́ Де́ву,/ и душ на́ших спасе́ния приста́нище,/ ве́рнии, единому́дренно пе́сньми велича́ем.
О тебе́, о́тче святи́телю Гу́рие, изве́стно спасе́ся ага́рянский род,/ о не́мже моля́ся, и нас всех помина́й, покланя́ющихся тебе́/ и тя единому́дренно пе́сньми похваля́ющих.
Ле́торасль измла́да доброво́нна был еси́/ и ны́не ми́ро благоуха́еши./ Те́мже тя единому́дренно похвала́ми велича́ем.
Илии́ подо́бяся,/ меч духо́вный остр от уст твои́х испуща́еши;/ от моще́й же твои́х исходя́щую чуде́сную си́лу,/ я́ко ору́жие, на супоста́ты изощря́еши/ и тем де́монов полки́ прогоня́еши./ Мы же тя единому́дренно велича́ем.
Тве́рдостию смиренному́дрия твоего́ неве́рных удиви́л еси́/ и ве́ровати во Святу́ю Тро́ицу научи́л еси́,/ ны́не же вся ве́рныя благода́тию чуде́сною, от моще́й твои́х излива́ющеюся, удивля́еши,/ и́хже ны́не пренесе́ние ве́село пра́зднующе,/ тя единому́дренно пе́сньми ублажа́ем.
Богоро́дичен: Ааро́нов жезл, и киво́т одушевле́нный,/ и ру́чку ма́нны нетле́нныя испове́дуем Тя, Пречи́стая./ Моли́ спасти́ся всем нам, рабо́м Твои́м.
Свети́лен.
Подо́бен: Пло́тию усну́в:
Пло́ть умертви́л еси́, Гу́рие, посто́м, и бде́нием, и сухояде́нием,/ и диа́вола посрами́л еси́, и си́лу его́, свя́те, разруши́л еси́,/ нечести́вым Тро́ицу пропове́дав, треблаже́нне.
Сла́ва, и ны́не, Богоро́дичен:
О Ма́ти Де́во Пречи́стая,/ Еди́ному от Тро́ицы Ты была́ еси́ прия́телище,/ Ада́мово воззва́ние и Е́вино от кля́твы свобожде́ние,/ спаси́ нас диа́вольскаго лука́вства и нахожде́ния.
На хвали́тех стихи́ры на 4, глас 8.
Подо́бен: О, пресла́внаго чудесе́:
О, пресла́внаго чудесе́!/ По три́десяти и двою́ ле́тех/ в земли́ нетле́нны обрето́шася/ мо́щи Гу́рия святи́теля,/ верху́ ми́ра, я́коже гу́ба, нося́щияся./ О, каково́ дарова́ние но́вому чудотво́рцу дарова́ся!/ Его́же ра́ди, Христе́,/ спаси́ ду́ши на́ша, я́ко Милосе́рд.
О, пресла́внаго чудесе́!/ Не то́кмо те́ло свята́го пребы́сть нетле́нно,/ но и ри́зы его́ крепча́е но́вых бя́ху:/ та́ко Бог соблюде́ раба́ Своего́ це́ла/ и чудотворе́ньми облагода́тствова его́./ О, Бо́жие дарова́ние, досто́йному дарова́нное./ Его́же моли́твами, Христе́,/ спаси́ ду́ши на́ша, я́ко Еди́н Милосе́рд.
О, пресла́внаго чудесе́!/ Престо́льная архиере́йская Це́рковь/ прия́т и по сме́рти, я́ко жи́ва, предстоя́теля своего́:/ пра́ведный бо а́ще и сконча́ется,/ оба́че живе́т безконе́чною жи́знию,/ и́бо да́рует ему́ Христо́с Бог ве́лие дарова́ние/ и моли́твами его́ спаса́ет ду́ши на́ша,/ я́ко Еди́н Милосе́рд.
О, пресла́внаго чудесе́!/ Пречестны́й храм Бо́жия Ма́тере,/ я́коже драгоце́нною у́тварию неве́ста,/ украси́ся мощми́ святи́теля/ и те́ми сла́вится, возсия́ющи./ О, каково́ дарова́ние, Христе́ Бо́же,/ дарова́л еси́ нам,/ я́ко Еди́н Милосе́рд.
Сла́ва, глас 6: Не подоба́ше первопресто́льней Каза́нстей Це́ркви: зри сла́вник на стихо́вне или́ ину́ю стихи́ру, глас 6: И́ноков похвало́: (зри слу́жбу на 5 декабря, на стихо́вне вече́рни)
И ны́не, Богоро́дичен:
Богоро́дице, Ты еси́ лоза́ и́стинная,/ возрасти́вшая нам Плод живота́./ Тебе́ мо́лимся: моли́ся, Влады́чице,/ со апо́столы и все́ми святы́ми/ поми́ловати ду́ши на́ша.
На Литурги́и Слу́жба Святи́тельская.
Моли́тва
Святи́телю о́тче Гу́рие! Предстоя́ свяще́нной ра́це многоцеле́бных моще́й твои́х, мо́лим тя усе́рдно бы́ти всегда́ и везде́ на́шим хода́таем, засту́пником и покрови́телем. Исхода́тайствуй па́стве твое́й мир, тишину́, благоде́нствие, здра́вие и спасе́ние. Бу́ди постоя́нным на́шим засту́пником от всех враго́в, ви́димых и неви́димых, покрыва́й нас от нахожде́ния всех бед, напа́стей и скорбе́й, па́че же от искуше́ний врага́ те́мнаго. Предстоя́щим же зде и моля́щимся испроси́ у Го́спода Бо́га вся, я́же ко спасе́нию своему́ они́ про́сят у Него́ в свои́х ну́ждах и ско́рбех, да вси мы с тобо́ю прославля́ем всесвято́е И́мя Отца́, и Сы́на, и Свята́го Ду́ха, ны́не, и при́сно, и во ве́ки веко́в. Ами́нь.
