НА МА́ЛОЙ ВЕЧЕ́РНИ
На Го́споди, воззва́х: стихи́ры, глас 1.
Подо́бен: Прехва́льнии м́ученицы:
Преподо́бне о́тче Дими́трие,/ земну́ю сла́ву преоби́дев,/ Боже́ственную добро́ту приобре́те,/ со А́нгельскими ли́ки благода́ть пресвято́му твоему́ о́бразу/ испроси́л еси́, блаже́нне,/ Христо́ви моли́ся/ дарова́ти душа́м на́шим мир и ве́лию ми́лость.
Преблаже́нне о́тче Дими́трие,/ от младе́нства Бо́га возлюби́л еси́,/ усе́рдно соверши́л еси́ Боже́ственная Его́ повеле́ния,/ Ему́же ны́не моли́ся/ о и́же благоче́стно ве́рою/ священноле́пный твой о́браз почита́ющих.
О́тче Дими́трие Богому́дре,/ ты от пеле́н Бо́гу обетова́н еси́/ и я́ко служи́тель ве́рен Того́ стопа́м после́дова,/ Ему́же моли́ся спасти́ рабы́ твоя́ от злых обстоя́ний,/ первообра́зную твою́ добро́ту песносло́вящих.
Сла́ва, глас 8:
Мона́хов мно́жества/ наста́вника тя почита́ем, о́тче наш Димитрие,/ твое́ю бо стезе́ю вои́стинну пра́во ходи́ти позна́хом,/ блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче и преподо́бных соприча́стниче и пра́ведных/ с ни́миже моли́ся Го́сподеви/ поми́ловатися душа́м на́шим.
И ны́не, Богоро́дичен:
Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.
На стихо́вне стихи́ры, глас 2.
Подо́бен: До́ме Евфра́фов:
Дом Пресвята́го Ду́ха был еси́, преподо́бне,/ чистоты́ ра́ди души́ твоея́/ хода́тай к Бо́гу о всем ми́ре показа́ся,/ тем духо́вныя пе́сни/ пресвято́му твоему́ о́бразу прино́сим, свя́те.
Стих: Честна́ пред Го́сподем/ смерть преподо́бных Его́.
Досто́йно и́мя зва́ния обре́те,/ преблаже́нне Дими́трие чудотво́рче,/ чудотво́рец бо еси́ вои́стинну показа́лся,/ источа́еши чудеса́/ и́же всесвяты́й твой о́браз пра́зднующим.
Стих: Блаже́н муж, бояйся Го́спода,/ в за́поведех Его́ восхо́щет зело́.
Преблаже́нне о́тче Дими́трие,/ приими́ сие́ моле́ние на́ше,/ Ду́ха благода́тию свы́ше ороси́,/ и испроси́ нам грехо́в оставле́ние,/ и вся на́ша проше́ния поле́зная устро́й.
И ны́не, Богоро́дичен, глас то́йже:
Де́во Пресвята́я Мари́е,/ приими́ сия́ моли́твы на́ша/ и донеси́ к Сы́ну Твоему́ и Бо́гу на́шему,/ да пода́ст нам, Богоро́дице,/ оставле́ние согреше́ний на́ших.
Тропа́рь пи́сан на вели́цей вече́рни.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры, глас 5.
Подо́бен: Ра́дуйся:
Ра́дуйся, преподо́бне о́тче Дими́трие,/ из младе́нства ты ум свой впери́в Бо́гови/ и на Того́ все свое́ возложи́в упова́ние,/ к Небе́сным тече́ние испра́ви/ и та́мо вседу́шно ше́ствие творя́ше,/ порабо́та в жи́зни сей Всеви́дящему Спа́су,/ тем чудотво́рец вселе́нней от Него́ дарова́ся ве́рным на спасе́ние,/ Ему́же моли́ся дарова́ти душа́м на́шим/ мир и ве́лию ми́лость.
Ра́дуйся, честны́й наш учи́телю,/ главо́ доброразсу́дная,/ чудотво́рче Дими́трие,/ ты бо, жела́нием Христо́вым распали́в твою́ блаже́нную ду́шу/ и Того́ зна́мением кре́стным вооружи́в себе́,/ мы́сленных враг четы́ победи́л еси́/ посто́м и моли́твами и, сле́зным мно́жеством/ просвети́в твое́ душе́вное о́ко,/ огнепа́льныя стра́сти погаси́, му́дре,/ тем сосу́д Свято́му Ду́ху обре́теся,/ Ему́же о нас моли́ся, дарова́ти душа́м на́шим/ мир и ве́лию ми́лость.
Ра́дуйся, преблаже́нне Дими́трие,/ и́го Христо́во от ю́ности своея́ взем,/ непокори́вое по́хоти порабо́тив ду́хови,/ всено́щными бде́нии и моли́твенным пристра́стием/ неотсту́пен Бо́гови предстоя́л еси́,/ бо́дрость духо́вную к Нему́ от земны́х возводя́ при́сно,/ тем благоустро́ен дом Пресвяты́я Тро́ицы обре́теся,/ Ея́же ны́не в себе́ име́я, неизрече́нная чудеса́ сотворя́еши/ любе́зне почита́ющим сре́тения твоего́ о́браза пра́здник.
И́ны стихи́ры святому образу, глас 2.
Подо́бен: Ки́ими похва́льными:
Ки́ими похва́льными пе́сньми/ воспое́м пречестны́й о́браз чудотво́рца Дими́трия?/ Той бо есть наставля́емь от Бо́га,/ самозва́н прии́де к нам,/ посети́ти лю́ди правосла́вныя/ и от всех неду́г на́ших разреше́ние пода́ти,/ не от челове́к бо, но от Бо́га Самоде́ржца/ ве́рою прише́ствие пресла́вно творя́ще к нам,/ его́же ра́ди низложи́ враго́в шата́ния,/ Христе́ Бо́же наш, Спа́се всего́ ми́ра,/ име́яй всебога́тую ми́лость.
Ки́ими добро́тными устна́ми/ восхва́лим священноле́пное подо́бие чудотво́рца Дими́трия?/ Пресве́тлое украше́ние Це́ркви Бо́жия,/ исто́чника неисчерпа́емых даро́в Бо́жиих,/ проли́тие духо́вных исцеле́ний,/ ре́ку мно́гих чуде́с неоскудева́емых,/ бесо́м прогони́теля, челове́ком спаси́теля безбе́днаго./ Ему́же лик соста́вльше,/ ра́достно воспева́ем Всеще́драго Спа́са,/ И́же та́ко просла́вльшаго Своего́ уго́дника.
Ки́ими духо́вными пе́сньми/ воспое́м пречу́дный о́браз?/ К нему́же вси свяще́ннии собо́ри вку́пе соше́дшеся,/ непреста́нно пе́ние соста́вльше Спа́су всех, Богу/ за проше́ние вся́кое,/ я́ко да Всеще́дрый Бог уще́дрит благове́рныя лю́ди,/ спаса́я град Свой и страну́ на́шу от злых нахожде́ний/ моли́твами преподо́бнаго Дими́трия.
Слава, глас 8, самогласен:
Укра́шен доброде́тельми духо́вными,/ преподо́бне о́тче наш Дими́трие,/ просла́ви бо тя Госпо́дь Бог житие́м же и чудесы́,/ в преставле́нии же твое́м ду́ши ве́рных облагоуха́л еси́ и телеса́./ Днесь ны́не, блаже́нне,/ и нас моли́твами твои́ми очи́сти от вся́ких грехопаде́ний,/ пра́зднующих святу́ю па́мять твою́,/ и со стра́хом и любо́вию припа́дающих к твоему́ гро́бу чудотво́рному,/ и о́браз подо́бия твоего́ любе́зно целу́ющих,/ не преста́й моля́ся за правосла́вныя лю́ди/ и за твое́ ста́до богозва́нное,/ я́ко да Ми́лостивый Госпо́дь спасе́т ду́ши на́ша.
И ныне, Богоро́дичен: Царю Небе́сный:
Вход. Проки́мен дне и чте́ния три преподо́бническая (зри 1 июня)
На лити́и стихи́ры, глас 8:
Тезоимени́таго ра́ди жития́ твоего́/ и предо́браго ра́ди твоего́ благонра́вия/ наста́вник бысть и́ноком,/ с ни́ми же на Не́бо теку́щую стезю́, путь ше́ствовав,/ Христу́ Бо́гу угоди́л еси́,/ Ему́же ны́не предстои́ши с преподо́бными все́ми,/ испроси́ любоче́стне почита́ющим сре́тения о́браза твоего́ боголюбе́зный пра́здник/ вку́пе со святы́м твои́м ста́дом/ грехо́в оставле́ние и спасе́ние душа́м на́шим.
Прииди́те, ве́рных соедине́ние,/ наро́ди пра́зднолюбе́знии,/ новора́сленая овча́та богослове́сная/ Прекро́ткаго Па́стыря Влады́ки Христа́,/ вку́пе и христоимени́тое ста́до богозва́нное,/ духо́вная ча́да преподо́бнаго,/ днесь совокупи́м ликова́ние духо́вное,/ Боже́ственными пе́нии почти́м пресла́внаго о́браза/ священноле́пное подо́бие чудотво́рца Дими́трия/ и с весе́лием и ве́рою восприи́мем да́ры духо́вныя,/ раздае́мыя рабо́м Бо́жиим,/ приходя́щим к нему́ с ве́рою и любо́вию,/ пра́зднующим сре́тения о́браза его́ пра́здник.
Преподо́бне о́тче Дими́трие,/ кто не удиви́тся, ви́дев твоя́ пресла́вныя от Бо́га дарова́ния:/ коли́ких благ сподобля́еши/ священнообра́зное твое́ подо́бие любо́вию почита́ющих./ Ви́дим бо́, днесь соше́дшемуся наро́ду мно́жеству/ ре́ки чуде́с пролива́еши/ от свята́го твоего́ гро́ба,/ незави́стно здра́вие подава́еши,/ те́мже, преблаже́нне, о́тче наш,/ неотсту́пно пребу́ди с на́ми, с ча́ды твои́ми,/ сохраня́я град твой от вся́ких лю́тых напа́стей/ и спасе́ние подава́я душа́м на́шим.
Сла́ва, глас 6:
Ра́дуйся и весели́ся,/ ру́сская всеосвяще́нная Це́рковь Бо́жия/ со свяще́нники же и с кня́зи благочести́выми,/ и́ноки же и просты́ми,/ блаже́ннаго Дими́трия днесь па́мять почита́юще,/ духо́вне соше́дшеся, пра́зднуем/ и, гроб его́ обстоя́ще,/ любе́зно покланя́ющеся, мо́лимся, реку́ще:/ ра́дуйся, преподо́́бне Дими́трие,/ свети́льниче пресве́тлый и врачу́ боля́щим,/ моли́твенниче ко Спа́су Христу́ Бо́гу на́шему,/ о и́же ве́рою и любо́вию притека́ющих к тебе́,/ спасти́ся душа́м на́шим.
И ны́не, Богоро́дичен: Творе́ц и Изба́витель:
На стихо́вне стихи́ры, глас 5.
Подо́бен: Преподо́бне о́тче:
Преподо́бне о́тче, свя́те Дими́трие,/ из младе́нства Того́ взыска́л еси́ усе́рдно/ и Того́ за́поведи непоро́чно соблюде́,/ сего́ ра́ди и Той просла́ви тя/ и ди́вна сотвори́ тебе́ во вся страны́,/ сотворя́еши бо чудеса́ пресла́вная/ и исцеле́ния то́чиши неоскуде́ема,/ прогоня́еши неду́ги теле́сныя,/ здра́вие пода́еши приходя́щим ти с ве́рою,/ любоче́стне почита́ющим священноле́пное твое́ подо́бие.
Стих: Честна́ пред Го́сподем/ смерть преподо́бных Его́.
Богому́дре свя́те Дими́трие,/ прекра́сное жили́ще Свято́му Ду́ху обре́теся,/ от Него́же прии́м чуде́с дарова́ний Боже́ственных,/ подае́ши ско́рое присеще́ние духо́вными ли́ки/ воспева́ющим ангелоле́пное твое́ подо́бие,/ и сего́ ра́ди того́ любо́вию подвиза́еми,/ моле́ние прино́сим тебе́:/ испроси́ грехо́в оставле́ние/ любоче́стне почита́ющим свята́го твоего́ подо́бия/ вселюбе́зный пра́здник.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Богому́дре Дими́трие,/ от ю́ности любви́ ми́ра не совокупи́ себе́,/ но любы́ Бо́жия Спа́су всего́ ми́ра при́сно совокупи́ тебе́,/ и сего́ ра́ди пресвяты́й твой священноле́пный о́браз/ благода́тен дар всему́ ми́ру дарова́ся,/ пресве́тлыми чудесы́ твои́ми озаря́я ду́ши ве́рных,/ его́же достохва́льными пе́сньми воспева́юще,/ ра́дости наполня́ем ду́ши на́ша,/ исцеле́ния от неду́г прие́млем/ моли́твами твои́ми, свя́те.
Сла́ва, глас 8:
Преподо́бне о́тче наш Дими́трие,/ твоя́ мо́щи честны́я/ оби́льно всегда́ источа́ют исцеле́ния/ ве́рою приходя́щим к тебе́:/ благоуха́ния всех исполня́я духо́внаго/ и тьму бесо́вскую дале́че прогоня́я,/ све́том благоче́стия ве́рных сердца́ озаря́я,/ те́мже мо́лим тя, раби́ твои́,/ вся́каго наве́та вра́жия нас изба́вит,/ я́ко да, ра́достною душе́ю/ свято́е твое́ пра́зднество духо́вно пра́зднующе,/ прославля́ем Спа́са на́шего,/ И́же тебе́ та́ко просла́вльшаго,/ еди́наго во святы́х Свои́х Бо́га на́шего.
И ныне, Богоро́дичен: Безневе́стная Де́во:
Тропа́рь, глас 4:
Возсия́ днесь, я́ко со́лнце,/ пречестны́й о́браз священноле́пнаго твоего́ подо́бия,/ па́че со́лнца луча́ми чуде́с твои́х всех озаря́я,/ тьму бесо́вскую без ве́сти творя́,/ его́же ра́достно срета́ху,/ духо́вныя ли́ки соста́вльше,/ непреста́нно вопие́м ти:/ Дими́трие, о́тче наш, моли́ Спа́са всех/ сохрани́ти град твой и страну́ на́шу,/ ста́ду твоему́ спасе́ние подава́я/ и ве́лию ми́лость.
Сла́ва, и ны́не, Богоро́дичен: Е́же от ве́ка утае́нное:
НА У́ТРЕНИ
На Бог Госпо́дь: тропа́рь свята́го два́жды. Сла́ва, и ны́не, Богоро́дичен.
По 1-м стихосло́вии седа́лен, глас 8:
Приспе́ пресве́тлый пра́здник честна́го о́браза чудотво́рца Дими́трия:/ прииди́те, соше́дшеся, пра́зднуем све́тло,/ псалмы́ и пе́сньми духо́вными почти́м его́,/ да прии́мем оставле́ние согреше́ний на́ших,/ исто́чник бо есть неисчерпа́емых духо́вных дарова́ний/ пра́зднующим све́тло всесвяты́й его́ пра́здник.
Сла́ва, и ны́не, Богоро́дичен:
Да Свой взы́щеши о́браз, страстьми́ погребе́нный, Спа́се,/ Небе́сных утаи́вся суще́ств, от Пресвяты́я Де́вы воплоти́ся,/ Е́йже со А́нгелом возопии́м:/ ра́дуйся, Обра́дованная.
По 2-м стихословии седа́лен, глас 1:
Прииди́те, ликовству́им све́тло/ свята́го дне сего́ свято́е торжество́,/ ра́достно воспева́юще святоле́пнаго подо́бия пресвяту́ю све́тлость чудотво́рца Дими́трия,/ в па́мять предлага́юще к нам его́ пресвята́го о́браза пресла́вное прише́ствие,/ прии́де бо па́ки просвети́ти нас/ и соверше́нно здра́вие от неду́г на́ших дарова́ти нам,/ усе́рдно почита́ющим всесвяты́й его́ пра́здник.
Сла́ва, и ны́не, Богоро́дичен:
Сло́во О́тчее, Христа́ Бо́га на́шего,/ из Тебе́ воплоти́вшееся, разуме́хом, Богоро́дице Де́во,/ еди́на Чи́стая и Благослове́нная,/ Его́же ра́ди Тя, ублажа́юще, непреста́нно велича́ем.
По полиеле́и седа́лен, глас 8:
Пропове́дуются я́ве Боже́ственная твоя́ исправле́ния днесь/ от свята́го твоего́ гро́ба богому́дрых чуде́с твои́х,/ и, велегла́снее трубы́ вопию́ще,/ невеща́тельными вопие́ньми ясне́е всем сказу́юще/ вели́кое еже к Бо́гу твое́ дерзнове́ние, Дими́трие свя́те,/ Ему́же о нас моля́ся непреста́й,/ о и́же ве́рою творя́щих боголюбе́зно твоего́ подо́бия пресвяты́й пра́здник/ и любо́вию почита́ющих святу́ю твою́ па́мять.
Сла́ва, и ны́не, Богоро́дичен:
Я́ко Всенепоро́чная Неве́сто Творца́,/ я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Всепе́тая,/ беззако́ния мя су́ща, скве́рно жили́ще/ и де́монов игра́лище в ра́зуме бы́вша,/ потши́ся от сих злоде́йствия мя изба́вити, све́тло жили́ще доброде́тельми соде́лавши./ Светода́тельная Нетле́нная,/ разжени́ о́блак страсте́й и Вы́шняго прича́стия сподо́би/ и Све́та Невече́рняго моли́твами Твои́ми.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же возда́де ми? Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 6:
Возлю́блен бысть Бо́гом от чре́ва ма́терия,/ я́коже други́й Се́ргий преподо́бный вели́кий,/ о́тче наш Дими́трие,/ и с ним благоду́шественно Спаси́телю Бо́гу угоди́л еси́/ и Свята́го Ду́ха сосу́д яви́лся еси́ избра́нный,/ и́нокующим жезл кре́пости/ и всем тре́бующим чудотво́рный пода́тель,/ испроси́ нам от Христа́ Спа́са, чту́щим тя,/ ве́лию ми́лость.
Кано́н Богоро́дицы со ирмосо́м на 6 и преподо́бному два, на 8. Кано́н преподо́бному, глас 1.
Песнь 1
Ирмо́с: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,/ изра́ильтяном путь глуби́ны невосоде́лавшая.
Трисве́тлаго Божества́ заря́ми просвеща́емь, преподо́бне,/ заре́ю Ду́ха просвети́ моя́ помышле́ния,/ грехо́в оставле́ния проси́ при́сно,/ да с ве́рными воспою́ честна́го твоего́ подо́бия пра́здник.
Любо́вию Бо́жиею разгора́яся,/ житие́ свое́ доброде́тельми соверши́л еси́,/ и́миже Небе́снаго прия́тия насле́дник бы́ти сподо́бился еси́,/ ему́же и нас сотвори́ бы́ти прие́мники,/ да тя у́бо воспева́ем.
В незаходи́мых Све́тех пребыва́я, Дими́трие свя́те,/ при́сно посеща́й чад свои́х,/ ороси́ благода́ть твою́ свы́ше на рабо́в твои́х,/ оставле́ние подая́ от собла́зн на́ших/ непреста́нно воспева́ющим честна́го твоего́ подо́бия пра́здник.
Богоро́дичен: Еди́наго во двою́ благоче́стно ве́мы естеству́,/ И́же от утро́бы Твоея́ рожде́нна, Пренепоро́чная,/ Бо́га вку́пе па́че естества́ и челове́ка,/ иму́ща соверше́нное ко́ждо сво́йство.
Други́й кано́н, глас 4.
Песнь 1
Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.
Благода́рное пе́ние, ны́не приноси́мое, чад свои́х не пре́зри, свя́те,/ но, я́ко оте́ц чадолюби́вый, приими́,/ сия́ доноша́яй Творцу́ и Бо́гу,/ да сре́тения твоего́ пра́здник любо́вию почита́ем.
Па́ки нас честна́го твоего́ подо́бия прише́ствием весели́ши,/ и сего́ прикоснове́нием всех освяща́еши,/ и от всех неду́г исцеле́ния подава́еши,/ при́сно любо́вию, че́стне, почита́ющим пресвяты́й твой пра́здник.
Изба́ви ста́до твое́, преподо́бне, грехо́вныя бу́ри и бед вся́ких,/ наставля́я нас при́сно в приста́нище спасе́ния,/ да в ра́дости мно́зе приноша́ем свяще́нному твоему́ подо́бию духо́вныя пе́сни.
Богоро́дичен: Богоро́дице Пренепоро́чная, Я́же Бо́га прие́мши в ложесна́х Твои́х боже́ственно,/ разреши́ мрак души́ моея́ и просве́ти, Де́во,/ да восхвалю́ Тя.
Песнь 3
Ирмо́с: Еди́не, ве́дый челове́ческаго существа́ не́мощь/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,/ одушевле́нный Хра́ме неизрече́нныя сла́вы Твоея́, Человеколю́бче.
Вся оста́вив ми́ра сего́ тле́нная,/ Спа́са всех взыска́л еси́,/ соверши́л еси́ за́поведи Его́ боже́ственне и до́бре,/ от Него́же цели́тель показа́ся душа́м на́шим/ и моли́твенник непреста́нный о чту́щих свяще́нное твое́ подо́бие.
Маловре́менную сла́ву не восхоте́, блаже́нне,/ но Небе́сную добро́ту получи́л еси́,/ отню́дуже благода́ть прие́м Пресвята́го Ду́ха,/ чудесы́ всех просвеща́еши,/ и́же пресвято́му твоему́ о́бразу пра́зднующих любо́вию.
Житие́м твои́м доброде́тельным благочести́выя просвети́л еси́,/ чудесы́ же твои́ми Богому́дрыми, свя́те, вся удиви́л еси́,/ ве́рно же пою́щих пресвято́му твоему́ подо́бию освяща́еши при́сно.
Богоро́дичен: Све́тлым Тя гла́сом и ны́не от души́/ вои́стинну Богома́терь, Бо́га ро́ждшую, пропове́даем,/ и воплоще́нна из Тебе́ Безпло́тнаго, в нас все́льшася ,/ непреложе́ние прии́мша, несмеше́нием сме́шшася, Пренепоро́чная.
Ин
Ирмо́с: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною му́дростию, Христе́,/ несть бо свят, па́че Тебе́, Человеколю́бче.
Многогре́шнаго, нераде́нием изжи́вша житие́, не возгнуша́йся, преподо́бне,/ но твои́ми моли́твами очи́сти мя́ от вся́ких грехо́в,/ и́же пресвято́му твоему́ о́бразу ны́не воспе́вшаго.
В жи́зни сей мно́гим путь бысть ко спасе́нию/ пресве́тлым житие́м твои́м, прообразова́ше нетле́нная./ Те́мже и по сме́рти твое́й/ Бог прибе́жище всем нам показа́л тя есть и моли́твенника ве́рна,/ чту́щим свяще́нное твое́ подо́бие.
Нищету́ на́шу душе́вную покры́й благода́тию,/ грехо́в разреше́ние прося́ прия́ти нам,/ да сре́тения твое́го пра́здник пречу́днаго о́браза ве́рно пра́зднуем.
Богоро́дичен: И́же в плоть за премно́гую Твою́ бла́гость/ вои́стинну обо́лкся, Бог вку́пе и Челове́к/ сугу́б естествы́ познава́ется.
Седа́лен, глас 4.
Подо́бен: Ско́ро предвари́:
Возжеле́л еси́ он век присносу́щный,/ измени́в при́сно пребыва́ющая ми́ра сего́ тле́нными,/ те́мже к Небе́сным оби́телем невозбра́нно прите́кл еси́, Богому́дре Дими́трие, о́тче наш,/ Спа́су всех моли́ся/ спасти́ и́же честно́е твое́ сре́тение пе́сньми сла́вящих.
Сла́ва, и ны́не, Богоро́дичен:
Свет ро́ждшая пречестны́й,/ от Отца́ возсия́вша пре́жде всех век,/ просвети́, Отрокови́це, ду́шу мою́ и ум,/ дале́че от мене́ отгоня́щи тьму страсте́й,/ да Тя ублажа́ю, Присноблаже́нную, ве́рным упова́ние.
Песнь 4
Ирмо́с: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му,/ во спасе́ние на́ше и обновле́ние.
Вели́ких доброде́телей де́латель, Богому́дре, был еси́,/ и́миже дости́же ве́чная блага́я,/ иде́же с ли́ки святы́х А́нгел веселя́ся,/ испроси́ нам получи́ти ми́лость,/ и́же пресвято́му твоему́ о́бразу пе́ние принося́щим.
Жития́ твоего́ красото́ю богому́дрою красу́ется оби́тель твоя́, свя́те,/ ученицы́ же твои́ боголюбе́знии ра́достно Бо́га воспева́ют,/ тя та́ко просла́вльшаго.
Уче́нии твои́ми богому́дрыми учени́к ста́до непоро́чно приведе́ Бо́гови,/ с ни́ми же моли́ся и нам сохране́нным бы́ти в Боже́ственней Того́ сла́ве,/ и́же священноле́пную твою́ добро́ту хвала́ми почита́ющих.
Богоро́дичен: Чуде́с превы́ше вели́кое чу́до, Чи́стая, рождества́ Твоего́ зри́тся,/ ражда́еши бо Христа́, плоть бы́вша,/ кроме́ при́меса и смеше́ния.
Ин
Ирмо́с: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.
Жили́ще Пресвято́му Ду́ху, прему́дре, обре́теся,/ дости́же кра́ю жела́ния духо́внаго,/ к Нему́ же простира́яся, жизнь сию в посте́х изнури́л еси́;/ те́мже мо́лим тя поми́ловати нас, чад свои́х,/ и́же свято́е твое́ сре́тение ве́рою сла́вящих.
Я́ко крин, в доброде́телех процве́л еси́,/ вино́м умиле́ния ду́ши напои́л еси́, благоче́стие, жа́ждущих,/ страсте́й скве́рну омыва́я слеза́ми свои́ми,/ и сего́ ра́ди любо́вию восхваля́ем при́сно свята́го твоего́ прише́ствия святоле́пный о́браз.
Удиви́л еси́, блаже́нне, пресла́вными чудесы́ твои́ми вси концы́ земли́,/ свята́го же твоего́ подо́бия прише́ствием просвети́ вселе́нную,/ те́мже тя духо́вными пе́сньми непреста́нно воспева́ем.
Богоро́дичен: Бог, посреде́ Тебе́ все́лься, я́коже весть,/ де́вства ключи́ не поколеба́, Чи́стая,/ на недви́жимом ка́мени ве́ры вся утве́рждь.
Песнь 5
Ирмо́с: Бог Сын ми́ра, Оте́ц Щедро́т,/ Вели́каго Сове́та Твоего́ А́нгела,/ мир подава́юща, посла́л еси́ нам,/ тем, Богоразу́мия к све́ту наста́вльшеся,/ от нощи́ у́тренююще,/ славосло́вим Тя, Человеколю́бче.
Земны́х всех небре́гл еси́, блаже́нне,/ Небе́сная блага́я стяжа́, му́дре,/ отню́дуже в чудесе́х изя́щен обре́теся,/ подава́еши приходя́щим к тебе́ ско́рое присеще́ние,/ и сего́ ра́ди тя при́сно хвала́ми почита́ем.
Приста́нище невла́емо всем ве́рным в жи́зни сей, блаже́нне, был еси́,/ ни́щим пита́тель, печа́льных уте́шитель,/ те́мже вопие́м ти:/ и нас не забу́ди в моли́твах свои́х к Бо́гу,/ назира́й нас всегда́.
Миролю́бных душ отвраща́яся,/ Небе́снаго ми́ра – Христа́, взыска́л еси́, о́тче,/ и Того́ обре́те благи́ми де́лы,/ раздава́еши Боже́ственныя да́ры/ свята́го твоего́ подо́бия честны́й о́браз любо́вию почита́ющим.
Богоро́дичен: И́же естество́м Неопи́санный, вообра́жся из Тебе́,/ на́ше писа́ние пло́тски прия́т, Влады́чице,/ в существе́ и хоте́ниих сугу́бых познава́ем.
Ин
Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.
Подража́тель Христо́вых за́поведей был еси́,/ и сего́ ра́ди, преподо́бне, к тре́бующим ми́лостив быва́ше,/ те́мже днесь, любо́вию соше́дшеся,/ свята́го твоего́ подо́бия о́браз хвала́ми почита́ем.
Испо́лни ра́дости и весе́лия сердца́ на́ша,/ и́же в моли́твах тебе́ вы́ну призыва́ющих,/ и испроси́ грехо́в оставле́ние/ свято́му твоему́ о́бразу, блаже́нне, духо́вныя пе́сни воспева́ющим.
Преблаже́нна бысть свята́я оби́тель твоя́, Богому́дре,/ име́ющи внутрь себе́ мо́щи твоя́ и свяще́нное твое́ подо́бие,/ прехва́лен же и град тво́й,/ и́же тобо́ю дарова́ся от всех Бо́га.
Богоро́дичен: Твоя́ чудеса́ прови́дя Боже́ственным Ду́хом, Иса́ия взыва́ше:/ се во чре́ве прии́меши Непостижи́маго воплоща́ема, Чи́стая.
Песнь 6
Ирмо́с: Обы́де нас после́дняя бе́здна,/ несть избавля́яй,/ вмени́хомся, я́ко о́вцы заколе́ния,/ спаси́ лю́ди Твоя́, Бо́же наш,/ Ты бо кре́пость немощству́ющих и исправле́ние.
Посто́м и моли́твами жизнь свою́ препроводи́л еси́,/ возвесели́л еси́ И́же над все́ми при́сно сла́вимаго Бога,/ пресве́тлыми же чудесы́ твои́ми весь мир озари́л еси́,/ те́мже тебе́, преподо́бне, при́сно в пе́снех почита́ем.
Кро́тость и незло́бие в житии́ сем стяжа́л еси́,/ подо́бяся своему́ Влады́це, Прекро́ткому Па́стырю,/ и сего́ ра́ди и́ноком прему́др наста́вник бысть,/ с ни́ми же Спа́су всех угоди́л еси́.
Житию́ А́нгельскому ревни́тель бысть, свя́те,/ подража́я тех ангелоле́пное подо́бие,/ с ни́ми же, блаже́нне, и нас помина́й,/ и́же святы́й твой о́браз ве́рою сла́вящих.
Богоро́дичен: Де́вствуеши, я́коже пре́жде, ро́ждши Христа́,/ млеко́м пита́еши всем пи́щу подаю́щаго, Чи́стая,/ пресла́вно ди́вно чу́до и непостижи́мо.
Ин
Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти́,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.
При́зри, блаже́нне, на предстоя́щия ти свяще́нныя собо́ры/ и на свято́е твое́ ста́до,/ моле́ния принося́щия свято́му твоему́ о́бразу за проше́ние вся́ко,/ и изба́ви град твой и страну́ на́шу от вся́ких скорбе́й.
Свети́льник на све́щнице яви́ся священноле́пный твой образ,/ светя́ всем конце́м земли́ чудесы́ тво́ими,/ богому́дрых всех освяща́я, и́же пресвяты́й твой пра́здник ве́рою сла́вящих.
Вели́кий дар прече́стен – священноле́пный твой о́браз от Бо́га дарова́ся,/ ко всех челове́к спасе́нию же и по́льзе,/ и́мже прогна́на бысть вся́ка си́ла неприя́зненна от вся́каго твоего́ достоя́ния/ и от вся́ка неду́га очи́стися.
Богоро́дичен: Родила́ еси́, Его́же Оте́ц пре́жде всех век роди́ Пребезнача́льна,/ и сосца́ми Пита́теля дои́ла еси́ па́че ума́,/ чу́до па́че сло́ва, Чи́стая, та́инство.
Кондак, глас 8.
Подо́бен: Взбра́нной Воево́де:
Христа еди́наго в жи́зни сей во след идти́ возжела́л еси́/ и, Того́ любо́вию земна́я отри́нув, премину́в Небе́сными ,/ с ли́ки А́нгел водворя́яся, неотсту́пно предстои́ши Бо́гови,/ тем и ны́не пресвято́му твоему́ о́бразу сре́тения пра́здник ра́достно сотворя́юще,/ от неду́г исцеле́ние прие́млем, благода́рно вопию́ще:/ ра́дуйся, преподо́бне о́тче Дими́трие, по́стников удобре́ние.
И́кос:
Боже́ственными доброде́тельми твои́ми, Богому́дре, себе́ украси́л еси́/ и Спа́су Христу́ жили́ще соде́ла, о́тче, му́жественне,/ я́коже зла́то, искуси́ся ве́рою к Бо́гу,/ наде́ждою и любо́вию обе́ты своя́ полага́я,/ воздержа́нием пости́вся, я́коже безпло́тен,/ в целому́дрии и смире́нии вознесе́ся;/ те́мже и мы духо́вная твоя́ ча́да, моли́твами твои́ми просвеща́еми,/ ра́достною душе́ю воспева́ем Боже́ственная твоя́ духо́вная исправле́ния/ и любо́вию пра́зднуем пречу́дному твоему́ пресвято́му о́бразу,/ и благода́рственно вопие́м ти:/ ра́дуйся, я́ко измла́да Бо́гу послужи́л еси́;/ ра́дуйся, притека́ющим к тебе́ ко спасе́нию хода́тай./ Ра́дуйся, лю́дем, правосла́вно ве́рующим, пресла́вная похвало́ и кре́пкое на враги́ одоле́ние;/ ра́дуйся, гра́ду твоему́ вели́кое утвержде́ние./ Ра́дуйся, святе́й оби́тели твое́й благонаде́жное ве́чное весе́лие;/ ра́дуйся, и́ноком пресла́вное украше́ние и наде́ждо спасе́ния./ Ра́дуйся, всем христиа́ном в беда́х прибе́жище и приста́нище спасе́ния;/ ра́дуйся, я́ко твои́ми моли́твами сопроти́вныя ду́хи побежда́ются./ Ра́дуйся, исто́чник чудесе́м неизчерпа́емый,/ да вси, и́же тобо́ю от Бо́га спаса́еми, непреста́нно зове́м ти:/ ра́дуйся, преподо́бне о́тче Дими́трие, по́стников удобре́ние.
Песнь 7
Ирмо́с: Су́щим в пещи́ отроко́м Твои́м, Спа́се,/ не прикосну́ся, ниже́ стужи́ огнь./ Тогда́ трие́, я́ко еди́неми усты́, поя́ху/ и благословля́ху, глаго́люще:/ благослове́н Бог оте́ц на́ших.
На земли́, я́ко безпло́тен, блаже́нне, поживе́ с пло́тию,/ к су́щим мира́ не приплета́яся ничи́мже,/ но, я́ко А́нгел, крило́ма твои́х доброде́телей ду́хом на Не́бо возлете́л еси́/ и сего́ ра́ди непреста́нно вопие́ши:/ оте́ц на́ших Бо́же, благослове́н еси́.
Удиви́л тя есть Госпо́дь, блаже́нне, во всех де́лех Свои́х/ и стра́шна показа́ тя безпло́тным враго́м,/ и сего́ ра́ди пресвято́му твоему́ о́бразу гове́ют вси челове́цы,/ непреста́нно пе́ние вопию́ще при́сно:/ моли́твами твои́ми, свя́те, испроси́ нам у Христа́ ве́лию ми́лость.
Земна́я измени́в Небе́сными, свя́те,/ блага́я ве́чная восприя́л еси́/ и со А́нгельскими ли́ки све́тле весели́шися,/ неизрече́нныя добро́ты с ни́ми наслажда́яся,/ ея́же в слеза́х стяжа́л еси́,/ помина́й чад свои́х при́сно.
Богоро́дичен: Бог из Тебе́ бысть Челове́к,/ смеше́ние, Чи́стая, обожи́в челове́ческое/ и о́бщницы сотвори́в ны естества́ Боже́ственнаго/ в Тебе́, Блаже́нная в жена́х, вои́стинну Благослове́нная, Чи́стая.
Ин
Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.
А́ще и земле́ю покрове́но бысть честно́е те́ло твое́, свя́те,/ но па́че со́лнца заря́ми пресве́тлых чуде́с твои́х весь мир озаря́еши,/ благоче́стие воспева́ющий пресвяты́й твой о́браз.
Стена́ необори́ма гра́ду твоему́ яви́ся/ светоле́пный твой о́браз, свя́те Дими́трие,/ к нему́ же притека́юще, не убои́мся супоста́тных враг,/ моли́твенника тя к Бо́гу те́пла стяжа́вше.
Имену́ется оби́тель твоя́, свя́те, во всех страна́х,/ чудесы́ твои́ми богому́дрыми крася́щеся,/ святоле́пней твое́й добро́те пресла́вно дивя́щися.
Богоро́дичен: Тя, добро́ту Иа́ковлю, еди́ну избра́ Еди́ный, Живы́й на Небесе́х,/ и, все́лься посреде́ Тебе́, Чи́стая,/ ника́коже поколеба́ де́вства Твоего́ ключа́, Благослове́нная.
Песнь 8
Ирмо́с: В пещи́ о́троцы изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.
Исто́чник исцеле́ний яви́лся еси́, преподо́бне,/ духо́вная твоя́ ча́да напая́еши Боже́ственныя сла́дости,/ река́ми же чуде́с твои́х весь мир облагоуха́л еси́,/ те́мже днесь, любо́вию соше́дшеся,/ непреста́нное тебе́ благодаре́ние прино́сим.
Звезда́ пресве́тлая вселе́нней дарова́ся,/ уясни́ на́ша сердца́, благоче́стие тебе́ пе́ние принося́щих,/ душе́вная на́ша чу́вства в поле́зная испра́ви,/ да непреста́нное благодаре́ние всегда́, свя́те, прино́сим Тебе́.
Жития́ мо́ре немяте́жно преплы́л еси́,/ приста́нища о́наго Небе́снаго соверше́нне дости́гл еси́,/ иде́же пребыва́еши с преподо́бными все́ми,/ сла́вяще с ни́ми Творца́, всех Бо́га.
Богоро́дичен: Сень Тя, и трапе́зу, и Боже́ственный ковче́г,/ и ру́чку, вмести́вшую ма́нну, и жизнь, и свя́тую го́ру имену́ем,/ Де́во Мари́е, при́сно Благослове́нная.
Ин
Ирмо́с: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.
На смире́ние на́ше ми́лостивно призира́й,/ и́же пресвяты́й твой о́браз присносла́вящих,/ изба́ви от вся́кия ско́рби ста́до твое́ и град твой,/ тебе́ бо те́пла предста́теля к Бо́гу, блаже́нне, стяжа́хом.
Ба́ня очище́ния, преподо́бне, яви́ся святы́й твой о́браз свято́му твоему́ ста́ду,/ струю́ благода́тну излива́я при́сно,/ очища́я душе́вная на́ша чу́вства, вку́пе и теле́сная.
Лик а́нгельский весели́тся днесь, зря́ще свяще́нное твое́ подо́бие,/ красо́тами чуде́с твои́х пресла́вно венча́емо/ и от всех челове́к благоче́стие почита́емо.
Богоро́дичен: Благослови́т вся тварь, Де́во, Рождество́ Твое́,/ вся́цеми благослове́ньми нас венча́вша и кля́тву отъе́мша,/ еди́на Благослове́нная и Препросла́вленная,/ Я́же род наш облагода́тствовавши.
Песнь 9
Ирмо́с: Та́инство стра́нное ви́жу и пресла́вное:/ Не́бо – верте́п, престо́л Херуви́мский – Де́ву,/ я́сли – вмести́лище,/ в ни́хже возлеже́ Невмести́мый – Христо́с Бог,/ Его́же, воспева́юще, велича́ем.
На земли́, я́ко А́нгел, блаже́нне, стяжа́л жизнь а́нгельскую,/ Творцу́ всех, Бо́гу Спа́су, угоди́л еси́,/ Его́же Престо́лу с ли́ки святы́х ны́не предстои́ши,/ непреста́нно моли́ся всем христиа́ном на враги́ побе́ду и грехо́в оставле́ние дарова́ти,/ ве́рно чту́щим священноле́пный твой о́браз.
Кро́тость с незло́бием в жи́зни сей, преподо́бне, стяжа́л еси́,/ тем и зе́млю кро́тких насле́дова,/ с ни́ми же испроси́ нам грехо́в оставле́ние,/ и́же священнообра́зное твое́ подо́бие непреста́нно ублажа́ющим.
Вступль на ле́ствицу доброде́телей,/ до́лу влеку́щее мудрова́ние, о́тче прему́дре, оплева́л еси́/ и, яко пресве́тлое свети́ло, вселе́нней от Бо́га дарова́ся,/ просвеща́я всех ангелоле́пнаго твоего́ подо́бия Боже́ственными твои́ми дарова́нии.
Богоро́дичен: Грехолюбе́зный нрав и неиспра́влено житие́ зело́ иму́щаго,/ и те́ло, оскверне́но вся́чески, и гре́шну ду́шу,/ Де́во Влады́чице, спаси́ мя, раба́ Твоего́,/ и́же худогла́сное сие́ пе́ние в хвале́нии Твоего́ преподо́бнаго уго́дника воспе́вшаго.
Ин
Ирмо́с: Ка́мень нерукосе́чный от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся Тя, Богоро́дице, велича́ем.
Зерца́лом вои́стинну разре́шшимся/ лице́ Христо́во лице́м зре́ти сподо́бился еси́,/ немерца́ющим све́том от Него́ пресве́тло просвеща́яся,/ Ему́же о нас моля́ся не преста́й, о́тче Дими́трие,/ пребыва́й с на́ми, с ча́ды твои́ми,/ град твой и страну́ на́шу сохраня́я при́сно.
Смире́н нрав и высо́к,/ и́же по Бо́зе, в жи́зни сей стяжа́л еси́, блаже́нне,/ те́мже и Бог сла́вна тя показа́ всем конце́м,/ и сего́ ра́ди святоле́пный твой о́браз при́сно в пе́снех велича́ем.
Я́ко премно́гое дерзнове́ние име́я ко Христу́, свя́те Дими́трие, блаже́нне,/ у Него́ же испроси́ ми обрести́ ми́лость в День су́дный,/ получи́ти оставле́ние грехо́в мои́х,/ и́же твоему́ пресвято́му о́бразу пе́ние любо́вию прине́сшаго,/ да непреста́нно воспева́ю приснохва́льную твою́ добро́ту.
Богоро́дичен: Све́та, и́же в Тебе́, луча́ми, Богоневе́сто, ду́шу мою́ просвети́,/ лежа́щую во гро́бе поги́бели/ возста́ви, враги́ низлага́ющи, оскорбля́ющия при́сно се́рдце мое́/ и к страсте́м порева́ющия мя.
Свети́лен:
Ду́ху Пресвято́му в жили́ще от чресл ма́терних избра́н бысть,/ столп светоза́рен всему́ ми́ру дарова́ся,/ пресве́тлыми заря́ми твои́х исправле́ний ста́ду твоему́ ду́ши просвети́л еси́,/ мрак страсте́й на́ших дале́че прогоня́я,/ те́мже, и́же пресвяты́й твой священноле́пный о́браз хвала́ми почита́ющих,/ непреста́нну моли́тву сотвори́ о нас к Бо́гу.
Сла́ва, и ны́не, Богоро́дичен:
Соединя́ется с пло́тию по соста́ву Пресу́щное Сло́во/ и еди́н от двою́ происхо́дит из Тебе́ несме́сно, Пречи́стая,/ обожи́в, я́же прия́т,/ те́мже прославля́ем вои́стинну Тя, Богоро́дицу.
На хвали́тех стихи́ры на 4, глас 8.
Подо́бен: О, пресла́внаго чудесе́:
О, пресла́внаго чудесе́,/ чудотво́рче Дими́трие,/ ка́ко, земле́н сый пло́тию,/ мы́сленный враги́ победи́л еси́,/ ору́жием, преблаже́нне, кре́стным на тех мы́сленне вооружа́яся,/ тем и ны́не со А́нгелы водворя́яся и преподо́бными все́ми,/ с ни́ми же моли́ся о нас, свя́те,/ любо́вию почита́ющих святоле́пный твой пра́здник.
О, преблаже́нный о́тче Дими́трие,/ граждани́н яви́лся еси́ мы́сленнаго рая́,/ лоза́ пресве́тла виногра́да Христо́ва,/ плод иму́щи ве́чныя жи́зни,/ его́же восприе́млем вси, празднолюбе́знии,/ сла́дость име́им при́сно в душа́х свои́х,/ ра́дости наполня́ем сердца́ на́ша,/ благообра́зную твою́ добро́ту святоле́пную/ при́сно в пе́снех почита́юще.
О, пресла́внаго чудесе́!/ Сокро́вище неоску́дное духо́вных дарова́ний,/ исто́чник животеку́ших исцеле́ний,/ ста́ду твоему́ богозва́нному спасе́ние –/ пресвяты́й твой о́браз, пресла́вне Дими́трие,/ ве́рным же всем прибе́жище благонаде́жное,/ гра́ду твоему́ кре́пкое утвержде́ние,/ его́же сохраня́й необори́му бы́ти.
Сла́ва, глас 6:
Прииди́те, празднолю́бцы и по́стник сосло́вие,/ ве́рою соше́дшеся,/ и́стиннаго по́стника днесь па́мять почита́юще,/ ра́дуяся, ше́ствовавшаго по стопа́м Влады́ки Христа́/ у́зкий путь и безстра́стно житие́,/ я́коже дре́вле Авраа́м пра́ведный,/ о́тче Дими́трие, страннолю́бие притяжа́л еси́,/ та́коже пресели́ся от оте́чества своего́ до ме́ста,/ иде́же ны́не благоуха́еши исцеле́нии/ от честна́го те́ла твоего́ и свята́го о́браза/ всем, притека́ющим к тебе́ и вопию́щим:/ о всеблаже́нне и преподо́бне,/ по́стником похвало́ и собесе́дниче Безпло́тным,/ во́инству на́шему на пога́ныя посо́бниче/ и наста́вниче и́ноком,/ о нас моли́ся Христу́ Бо́гу/ спасти́ ду́ши на́ша.
И ны́не, Богоро́дичен:
Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апо́столы/ поми́ловати ду́ши на́ша.
На литурги́и слу́жба преподо́бническая.