На Го́споди, воззва́х: стихи́ры, глас 6.

Подо́бен: Всю отложи́вше:

Весь освяще́н/ Богоно́сец показа́ся,/ пома́зание Бо́жие свято́е,/ Святы́м Ду́хом обложе́н,/ и све́тло входя́ вы́ну/ во свята́я святы́х,/ Богонача́льными светлостьми́ озаря́емь,/ благода́ти причаща́яся Святы́х Та́ин,/ я́ко и́стинный святи́тель пресла́вен,/ со дерзнове́нием моля́ся/ о душа́х на́ших.

Просвети́ся житие́ твое́/ доброде́тельными светлостьми́,/ ве́рныя просвети́л еси́/ и ле́сти тьму разгна́л еси́,/ и́стинное бо яви́лся еси́ светоза́рное со́лнце,/ святи́телю преблаже́нне Митрофа́не,/ и ны́не всели́лся еси́,/ иде́же сия́ет Свет невече́рний,/ и сын дне благода́тию Ду́ха Свята́го быв./ Те́мже твою́ Боже́ственную па́мять и светоно́сную/ че́стно соверша́юще, приснопа́мятне,/ любо́вию почита́ем.

Ум твой, манове́нием е́же к Бо́гу,/ Богому́дре, ве́рою удобря́емь,/ све́тел яви́ся, всесла́вне:/ в ме́ртвенном те́ле и тле́ннем, прему́дре,/ нетле́нию поучи́вся,/ притяжа́л еси́ Безпло́тных све́тлости/ и страсте́й вне быв,/ безстра́стием украша́яся, Митрофа́не,/ о́тче святи́телю прему́дре,/ све́тлый свети́льниче/ и моли́твенниче о чту́щих любо́вию па́мять твою́.

Сла́ва, и ны́не, пра́здника или́ Богоро́дичен:

Ра́дуйся, зако́на исполне́ние./ Ра́дуйся, хра́ме Святы́я Тро́ицы,/ Неве́сто нетле́нная./ Ра́дуйся, Боже́ственное носи́ло всех Царя́./ Ра́дуйся, огню́ невеще́ственный,/ я́ко клеща́, нося́щи на рука́х Твои́х У́гля,/ но́вый раю́, вертогра́д затворе́нный,/ трапе́за Боже́ственная пресве́тлая,/ Голуби́це нескве́рная,/ престо́ле Вы́шняго,/ одр Боже́ственный мы́сленный,/ Ю́же Дух Святы́й, Отрокови́це, осени́.

Крестобогоро́дичен:

А́гнца Своего́/ А́гница нескве́рная дре́вле и непоро́чная Влады́чица/ на Кресте́ воздви́жена я́ко узре́,/ ма́терски восклица́ше/ и, дивя́щися, вопия́ше:/ Ча́до сладча́йшее,/ что́ виде́ние сие́ но́вое и пресла́вное?/ Ка́ко собо́р безблагода́тный суди́щу Пила́тову предаде́ Тя/ и осужда́ет на смерть всех Живота́?/ Но воспева́ю Твое́ неизрече́нное, Сло́ве, схожде́ние.

Тропа́рь, глас 4:

Пра́вило ве́ры и о́браз кро́тости,/ воздержа́ния учи́теля/ яви́ тя ста́ду твоему́/ Я́же веще́й И́стина./ Сего́ ра́ди стяжа́л еси́ смире́нием высо́кая,/ нището́ю бога́тая,/ о́тче священнонача́льниче Митрофа́не,/ моли́ Христа́ Бо́га/ спасти́ся душа́м на́шим.

Кано́н, егоже краегранесие: Вели́каго Митрофа́на пою́ сла́ву. Глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь/ пои́м, вопия́ше.

С Вы́шними ли́ки я́ко святи́тель, я́ко Бо́жий служи́тель предстоя́,/ о нас приле́жно моли́ся,/ получи́ти нам ве́чная блага́я моли́твами твои́ми.

Избра́н быв Го́сподеви служи́ти честно́му Ева́нгелию, блаже́нне Митрофа́не,/ во благоразу́мии лю́ди уче́нии прему́дрыми, о́тче, возрасти́л еси́.

Ра́зумом Бо́жиим обога́щся, сло́во живо́тное от се́рдца источи́л еси́,/ напоя́я ду́ши, оляде́вшия страстьми́,/ прему́дре святи́телю Бо́жий, Митрофа́не Богоблаже́нне.

Богоро́дичен: Свяще́нный лик проро́ческий проявля́ше издале́ча/ хотя́щую Тя бы́ти Бо́жию и́стинную Роди́тельницу, Чи́стая,/ вы́шшую Херуви́м и всея́ тва́ри.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Иска́пая Боже́ственную сла́дость из усте́н твои́х, о́тче,/ и го́рькаго безбо́жия изсуши́л еси́ ка́пли,/ напои́в благочести́вых питие́м Бо́жияго ра́зума, блаже́нне.

Бо́жиим судо́м произбра́н быв, святи́тель показа́лся еси́,/ безкро́вны же́ртвы Бо́гу принося́, поже́ршемуся нас ра́ди,/ о́тче святи́телю Митрофа́не.

Гроб, иде́же лежи́т честно́е те́ло твое́,/ благово́ние источа́ет, я́ко рай Бо́жий, облагоуха́я ве́рныя,/ святи́телю пресла́вне и всече́стне Митрофа́не.

Богоро́дичен: Разуме́ти рождества́ Твоего́, Чи́стая,/ неизрече́нныя глубины́ недоуме́ет ум челове́ч:/ Бог бо, Себе́ смири́в щедро́т ра́ди,/ во чре́ве Твое́м всего́ мя обнови́.

Конда́к, глас 2.

Подо́бен: Вы́шних ища́:

Ве́ру Христо́ву я́сно ты пропове́дал еси́/ и, сию́ соблюда́я,/ во мно́жество вои́стинну возрасти́л еси́ ве́рное твое́ ста́до./ Те́мже со А́нгелы, Митрофа́не, сра́дуешися,/ Христу́ моля́ся непреста́нно о всех нас.

Таже седа́лен, глас 8.

Подо́бен: Прему́дрости:

Над страстьми́ ца́рствовав плотски́ми, святи́тель яви́лся еси́ богоподо́бен/ и ца́рствующий град пресла́вно упа́сл еси́,/ отгна́в полки́ ерети́ческия, преподо́бне,/ па́лицею слове́с Боже́ственных, Богодохнове́нне,/ те́мже по кончи́не неконча́емую благода́ть досто́йно насле́довал еси́, святи́телю блаже́нне./ Сего́ ра́ди вопие́м ти:/ моли́ Христа́ Бо́га грехо́в оставле́ние дарова́ти/ чту́щим всечестну́ю твою́ па́мять.

Сла́ва, и ны́не, пра́здника или́ Богоро́дичен:

В напа́сти многоплете́нныя впад от враг ви́димых и неви́димых,/ бу́рею одержи́м безчи́сленных согреше́ний мои́х,/ и, я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости./ Те́мже, Пречи́стая, И́же из Тебе́ воплоще́нному без се́мене/ моли́ся приле́жно о всех рабе́х Твои́х, непреста́нно моля́щих Ти ся, Богоро́дице Пречи́стая,/ моля́щи Его́ при́сно согреше́ний оставле́ние дарова́ти/ воспева́ющим досто́йно сла́ву Твою́.

Крестобогоро́дичен:

А́гнца, и Па́стыря, и Изба́вителя А́гница зря́щи на Кресте́,/ восклица́ше, пла́чущи,/ и, го́рько рыда́ющи, вопия́ше:/ мир у́бо ра́дуется, прие́мля Тобо́ю избавле́ние,/ утро́ба же Моя́ гори́т, зря́щи Твое́ распя́тие,/ е́же терпи́ши за милосе́рдие ми́лости./ Долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя стра́сти Твоя́.

Песнь 4

Ирмо́с: Христо́с моя́ си́ла,/ Бог и Госпо́дь,/ Честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Ты, испо́лнен Свята́го Ду́ха, свяще́нный о́тче Митрофа́не,/ лука́выя ду́хи от челове́к отгна́л еси́,/ ве́рны же духо́вными уче́нии твои́ми сотвори́л еси́.

Еди́ницу несозда́нную богосло́вил еси́,/ Треми́ Ли́цы разделя́ему, непресеко́му и несме́сну,/ просвеща́я благочести́выя свяще́нными богосло́вии твои́ми.

Умертви́в пе́рвее плотска́я мудрова́ния воздержа́нием и труды́,/ святи́тель Боже́ствен показа́лся еси́/ и предста́тель Тро́ице всесвяще́н.

Богоро́дичен: Кля́тва разори́ся пра́бабняя Тобо́ю, Богома́ти:/ Ты бо нам, Пречи́стая, Исто́чника породила́ еси́ святы́ни,/ присносу́щнаго Живота́.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Бо́жия боже́ственне соверша́я и чисте́йшим по́мыслом чи́стым прикаса́яся,/ непоро́чен яви́лся еси́, служа́ Бо́гу,/ я́ко Бо́жий святи́тель свяще́ннейший.

И́дольстии уго́дницы бы́ша уго́дницы Бо́гу твои́ми уче́нии честны́ми,/ и́хже от недосто́йных изыма́я,/ досто́ин яви́лся еси́ уго́дник Бо́гу Вседержи́телю.

Благода́тию призва́н быв, разруши́л еси́ безбо́жия и́дольская/ одожде́нием слове́с твои́х, преподо́бне,/ олядене́вшая сердца́ плодоно́сна соде́лал еси́ Бо́жиею благода́тию.

Богоро́дичен: По рождестве́ Твое́м стра́ннем пребыла́ еси́ Де́вою, я́коже пре́жде:/ Бог бо бе рожде́йся и претворя́й вся волею,/ безму́жная Мари́е Богоневе́стная.

Песнь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.

Язы́к твой, Ду́хом изощре́н разу́мно, я́ко трость скоропи́сца,/ написа́ в сердца́ благочести́вых сло́во благода́тное, всесвяще́нне о́тче,/ Бо́жиим манове́нием.

Боже́ственным поуча́яся, я́ко входя́ в мы́сленна́я свята́я свя́тых,/ верных соверша́еши Ду́хом, Трои́ческою заре́ю,/ свяще́нный о́тче всесоверше́ннейший Митрофа́не.

Струя́ми веле́ний твои́х загради́в му́тная нечести́вых веле́ния,/ я́ко река́ показа́лся еси́ ми́рная,/ благоче́стия напоя́я составле́ния ве́рных, святи́телю всече́стне.

Богоро́дичен: Сло́во во чре́ве Твое́м всели́ся без се́мене,/ и Челове́к яви́ся соверше́н, обновля́я естество́ боголе́пно,/ я́коже Сам весть еди́н, Богоприя́тная Отрокови́це Всенепоро́чная.

Кондак, глас 4.

Подо́бен: Яви́лся еси́ днесь:

От младе́нства яви́лся еси́ честе́н сосу́д,/ святи́тель быв избра́н Бо́гу, Ему́же с весе́лием взыва́л еси́:/ ра́вен еси́, Христе́, Отцу́ и Ду́ху.

И́кос:

Тако́в подоба́ше нам архиере́й, и таи́нник Сло́ва, и слу́житель,/ я́коже Па́вел взыва́ет, Боже́ственный орга́н Христо́в,/ слу́жбы принося́ всегда́ Бо́гу, я́ко непоро́чен и че́стен:/ те́лом у́бо тле́нным ви́димь обложи́м,/ со Безпло́тными же бесе́дуя в служе́нии/ и лю́дем согреше́ния отъе́мля ме́рилом пра́ведным,/ я́коже вели́кий святи́тель ны́не Митрофа́н яви́ся нам,/ пропове́дав со дерзнове́нием:/ ра́вен еси́, Христе́, Отцу́ и Ду́ху.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Просвеща́емь духо́вною благода́тию я́же к Боже́ственному манове́нию причаще́нии,/ светода́тельная был еси́ звезда́, просвеща́я, му́дре, пою́щия:/ благослове́н Бог оте́ц на́ших.

Святе́йшая церковь быв, озаря́ема доброде́тельными дея́нии,/ живу́щу име́л еси́ в тебе́, свяще́нне, Тро́ицу несозда́нную, вопия́:/ благослове́н Бог оте́ц на́ших.

Дрема́ние от о́чию отри́нув Боже́ственными бодростьми́,/ Бо́жия сия́ния прия́л еси́ от А́нгела све́та,/ столп и подпо́р ве́рным, святи́теля и́стинна соверша́юща тя.

Богоро́дичен: Седя́й в не́дрех Роди́теля неопи́сан,/ в не́дрех Твои́х, Пречи́стая, ны́не седи́т опи́сан, Твои́м обложе́н зра́ком,/ за спасе́ние Ада́мле опи́сан быв.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти,/ Тя превозно́сим во вся ве́ки.

Го́рдаго зми́я смире́нием твои́м смири́л еси́, блаже́нне,/ возвыша́емь к Бо́гу чи́стыми твои́ми ра́зумы,/ те́мже тя чтим, Христа́ превознося́ще во ве́ки.

Воплоще́нно Сло́во богосло́вил еси́ и лю́ди от рабо́тныя ле́сти спасл еси́;/ отгоня́я и́дольская нече́стия,/ о́тче святи́телю Митрофа́не, прему́дре и Богоно́се.

Житие́ твое́ Влады́це твоему́ име́я подо́бно и сло́во житию́ име́я подо́бящееся,/ испо́лнен быв дней духо́вных, о́тче,/ в Вы́шняя преше́л еси́ поко́ища.

Богоро́дичен: Изба́вльшеся пе́рвыя кля́твы Твои́м Рождество́м,/ Преблагослове́нная Отрокови́це Богора́дованная,/ глас Гаврии́лов возсыла́ем Ти:/ ра́дуйся, вина́ всех спасе́ния.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстин взира́ти,/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и/ Тя ублажа́ем.

В зе́млю кро́тких ты всели́лся еси́, святи́телю, кро́ток и незло́бив быв,/ с Вы́шними совокупля́яся во́инствы, весь укра́шен доброде́тельными светлостьми́/ и све́том доброде́телей преоде́ян.

Зри́ши Бо́жия и А́нгельския све́тлости, патриа́рх и му́ченик, и апо́стольския красоты́,/ моля́ с ни́ми Человеколю́бца оставле́ние грехо́в и жития́ исправле́ние/ дарова́ти нам, преподо́бне, хва́лящим тя.

Я́ве престол пе́рвее украси́л еси́ све́тло всех председя́щих градо́в,/ в не́мже пожи́в, я́ко А́нгел, и, святи́тельством сей украси́в,/ пома́зав, освяти́л еси́, соверши́в лю́ди богому́дры.

Богоро́дичен: Я́коже ка́пля небе́сная,/ во Твое́ чре́во, Де́во, Дождь сни́де и изсуши́ пото́ки ле́стныя,/ одожди́ нетле́ние всем челове́ком,/ и избавле́ние Тобо́ю, Богора́дованная, дарова́ся.

Свети́лен.

Подо́бен: Жены́, услы́шите:

Звезду́ тя многосве́тлую Це́ркве зна́ем, Митрофа́не святи́телю, Патриа́рхов све́тлость:/ А́риево бо хуле́ние собо́рне низложи́л еси́,/ правосла́вными уче́нии Це́рковь уясни́в./ Те́мже ве́рно тя пое́м.

Сла́ва, и ны́не, Богоро́дичен:

Прему́дрость Ипоста́сную, и Сло́во Пресу́щное, и Врача́ душ и теле́с ро́ждшая,/ гное́ние и я́звы души́ моея́ исцели́ лю́тыя и ле́тныя/ и се́рдца моего́ уста́ви боле́зни, Де́во.

Тропа́рь, глас 3:

Пра́веднаго Ла́заря Боголюби́выя се́стры,/ Ма́рфо и Мари́е пресла́вныя,/ чи́стым се́рдцем Христа́ в житии́ ва́шем возлюби́ли есте́,/ мироно́сиц взе́мше чин,/ и Его́, я́ко Сы́на Бо́жия, безбоя́зненно испове́дали есте́,/ сего́ ра́ди ны́не во оби́телех Отца́ Небе́снаго/ со А́нгелы и все́ми святы́ми сла́вно ца́рствуете./ Умоли́те, Его́же возлюби́ли есте́,/ и нам, гре́шным, в ве́ре и любви́ Христо́вой утверди́тися/ и Ца́рствия Небе́снаго сподо́битися.

Моли́тва

О святы́я и всехва́льныя учени́цы Христо́вы, Боголюби́выя Ма́рфо и Мари́е! Умоли́те возлю́бленнаго ва́ми и вас возлюби́вшаго Сладча́йшаго Иису́са, Его́же вы испове́дали есте́, Христа́, Сы́на Бо́жия, да даст и нам, гре́шным, грехо́в оставле́ние, в ве́ре пра́вой нелицеме́рное и тве́рдое стоя́ние. Всели́те в сердца́ на́ша дух стра́ха Бо́жия, смире́ннаго на Бо́га упова́ния, терпе́ния и к бли́жним милосе́рдия. Изба́вите нас моли́твами ва́шими от искуше́ний жите́йских, бед и напа́стей, да, ти́хое и ми́рное житие́ пожи́вше зде, с по́мыслы непоро́чными и се́рдцем чи́стым, с дерзнове́нием ве́ры и упова́ния предста́нем на о́ный Стра́шный Суд и, до́брый отве́т на нем возда́вше, ра́дости ве́чныя в Ца́рствии Небе́снем сподо́бимся. Ами́нь.

О блаже́нныя и святы́я жены́, ве́рою и любо́вию Христу́ Бо́гу после́довавшия и во оби́тели Отца́ Небе́снаго всели́вшияся! К вам ны́не аз, гре́шная, прибега́ю и смире́нно молю́: научи́те мя и помози́те ми ходи́ти пред Бо́гом путьми́ ва́шими непреткнове́нно и ве́чную ку́пно с ва́ми жизнь насле́довати.

О Ма́рфо пра́ведная, тве́рдым испове́данием ве́ры твоея́ Христу́ угоди́вшая, укрепи́ сла́бую ве́ру мою́. О слу́жбе Го́споду и бра́тиям нелицеме́рне и всеусе́рдне прилежа́вшая, помози́ и мне служе́ние мое́ безро́потне и вседуше́вне проходи́ти. Сестру́ твою́ иногда́, в ско́рби су́щу, ко Христу́ воззва́ла еси́, о́тай ре́кши: Учи́тель прише́л есть и глаша́ет тя. Ны́не у́бо предста́ни мне в тру́дный час испыта́ния ве́ры и любве́ моея́ и в глубине́ се́рдца возвести́ ми, я́ко Госпо́дь Иису́с незри́мо гряде́т, да путе́м испыта́ний привлече́т мя к Себе́! Испроси́ мне, о ма́ти свята́я, у Го́спода на́шего си́лу и кре́пость, да, воста́вши ско́ро притеку́ к Нему́, поклоню́ся Ему́ и в смире́нней любви́ Его мир и спасе́ние души́ обря́щу.

И ты, о Боголюби́вая Мари́е, у ногу́ Иису́сову еди́ное на потре́бу обре́тшая, помоли́ся Ему́ благу́ю часть спаса́емых и мне, гре́шней, улучи́ти. Ми́ро благово́нное в дар благодаре́ния Христу́ Жизнода́вцу прине́сшая, умоли́ ны́не Его́ и души́ мое́й пода́ти ми́ро моли́твы и покая́ния сле́зы, чистоты́ и до́брых дел благоуха́ние, та́ко да во обновле́нное все́ми си́ми се́рдце мое́ Госпо́дь прии́дет и оби́тель Себе́ сотвори́т.

К вам, о святы́я пра́ведныя жены́, Ма́рфо и Мари́е, припа́даю и смире́нно молю́: не оста́вите мя в дни тя́жких испыта́ний, да не соблазню́ся тле́нными и кра́сными ми́ра сего́, наипа́че же в час го́рький разлуче́ния души́ мое́й с те́лом предста́ните мне и о́бщаго Влады́ку на́шего умоли́те, да при́зрит на мя в оскуде́нии сил мои́х ми́лостивым о́ком и, прости́в вся прегреше́ния моя́, возста́вит мя к жи́зни несконча́емей в блаже́нных оби́телях Отца́ Небе́снаго. Ами́нь.