НА МА́ЛОЙ ВЕЧЕ́РНИ

Творе́ние Патриа́рха Се́ргия

На Го́споди, воззва́х: стихи́ры, глас 4:

Чу́дным явле́нием Твои́м, Ма́ти Боголюби́вая,/ ме́сто сие́ освяти́ла еси́,/ луч сла́вы от Сы́на Твоего́ и благода́ть тому́ испроси́вши./ Те́мже, Влады́чице, николи́же оста́ви рабы́ Твоя́,/ избавля́ющи нас от всех бед.

О́браз пречи́стый Твой, Боголюби́вая Влады́чице,/ исто́чник чуде́с и исцеле́ний реку́ показа́ла еси́/ всем, приходя́щим к нему́ с ве́рою,/ вся́кия стра́сти утоля́ющи и неду́ги врачу́ющи,/ и избавля́ющи лю́ди Твоя́ от всех бед.

Боже́ственною си́лою соблюда́еши/ любо́вию пра́зднующия пресла́вное явле́ние Твое́, Боголюби́вая,/ Ты еси́ кре́пость на́ша и ра́дование боголе́пное./ Моли́ся Сы́ну Твоему́ и Бо́гу на́шему,/ да спасе́т ду́ши на́ша, я́ко Милосе́рд.

Сла́ва, и ны́не, глас 8:

Ра́дуйся, Богоро́дице Присноблаже́нная;/ ра́дуйся, ми́ру свети́льниче светоза́рный;/ ра́дуйся, исцеле́ний исто́чниче неоску́дный;/ ра́дуйся, обурева́емым приста́нище;/ ра́дуйся, Спору́чнице гре́шных усе́рдная;/ ра́дуйся Боголюби́вая.

На стихо́вне стихи́ры, глас 1:

Дне́сь, ве́рнии, собра́вшеся, восхваля́ем, Пресвята́я Де́во,/ мно́гая Твоя́ вели́чия и чуде́с пучи́ну,/ Ты бо еси́ нам похвала́ и исто́чник исцеле́ний./ Те́мже пра́зднующе свято́му Твоему́ о́бразу,/ мо́лимся Тебе́, глаго́люще:/ спаси́ ду́ши на́ша, я́ко Милосе́рдная.

Стих: Помяну́ и́мя Твое́/ во вся́ком ро́де и ро́де.

Кня́зю Андре́ю яви́вшися,/ оби́тель сию́ созда́ти повеле́ла еси́/ и гра́ду на́шему и всей стране́/ покро́в ми́лости Твоея́ обеща́ла еси́./ Не преста́й и ны́не, Влады́чице,/ ру́це к Сы́ну Твоему́ простира́ющи, моли́тися Ему́,/ да спасе́т ду́ши на́ша, я́ко Милосе́рд.

Стих: Слы́ши, Дщи, и ви́ждь,/ и приклони́ у́хо Твое́.

Богоро́дице Пречи́стая,/ огради́ и покры́й град и оби́тель Твою́/ и вся христиа́ны заступи́,/ о́браз Твой святы́й почита́ющия./ Вси бо к Тебе́ прибега́ем с ве́рою и любо́вию те́плою/ и мо́лимся Ти приле́жно:/ спаси́ ду́ши на́ша, я́ко Милосе́рдная.

Сла́ва, и ны́не, глас 5:

Ты еси́ А́нгелом ра́дость, Богоро́дице,/ Ты еси́ челове́ком сла́ва,/ Ты на́ша наде́жда непосты́дная,/ ико́ною Твое́ю да́ры целе́бныя нам источа́ющая./ Те́мже, Цари́це Боголюби́вая,/ при́сно покры́й нас от вся́каго зла.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры на 8, глас 4:

Ны́не страна́ Русская о Тебе́ хва́лится и весели́тся,/ име́ющи Тя Засту́пницу Непосты́дную,/ и сте́ну неруши́му,/ гра́ду на́шему непоколеби́мое основа́ние,/ стра́жа неусы́пна земли́ Русския./ Не преста́й и ны́не Твои́ми моли́твами, Влады́чице Боголюби́вая,/ избавля́ти Твоя́ лю́ди от всех бед.

Тебе́ припа́дают, Госпоже́, святи́телей сосло́вие/ и ве́сь наро́д, уми́льно моля́щеся,/ и любе́зно целу́ют Твой о́браз, Боголюби́вая, глаго́люще:/ чту́щий Тя град всегда́ спаса́й от всех бед.

Боже́ственными де́тельми соблюда́еши/ и покрыва́еши от вра́жиих нахожде́ний/ любо́вию пра́зднующая пресла́вное явле́ние Твое́, Боголюби́вая,/ благове́рному кня́зю Андре́ю,/ и зову́щия Ти:/ Ты еси́ кре́пость на́ша и утвержде́ние,/ и ра́дование боголе́пное./ Ви́дя же Тя, моля́щуюся о нас,/ и мы покланя́емся Сы́ну Твоему́ и Бо́гу на́шему и глаго́лем:/ Иису́се Всеси́льне,/ спаси́ ду́ши на́ша, я́ко Милосе́рд.

Дне́сь, свяще́нно собра́вшеся, восхва́лим Богоро́дицу:/ Пресвята́я Де́во,/ мно́гая Твоя́ вели́чия и чуде́с пучи́на,/ Ты бо еси́ нам свято́е огражде́ние,/ и похвала́, и сла́ва, и исто́чник исцеле́ний./ Пра́зднующе свято́му Твоему́ о́бразу, Боголюби́вая,/ мо́лимся, глаго́люще:/ Иису́се Всеси́льне,/ спаси́ ду́ши на́ша, я́ко Милосе́рд.

Благоче́стно, Пречи́стая,/ честны́ми Твои́ми моли́твами/ огради́ и сохрани́/ и стра́шны враго́м и нерабо́тны яви́/ творя́щия пра́зднество Твоему́ о́бразу, Боголюби́вая,/ да Сы́ну Твоему́ зове́м:/ Иису́се Всеси́льне,/ спаси́ ду́ши на́ша, я́ко Милосе́рд.

Сла́ва, и ны́не, глас 8:

Прииди́те, возра́дуемся Держа́вней Засту́пнице ро́да на́шего,/ Цари́це Богоро́дице,/ прииди́те, поклони́мся Ей в чу́дном и почита́емом А́нгелы/ честно́м Ея́ о́бразе:/ да́рует бо Богоро́дица ве́рным оби́льныя да́ры целе́бныя/ от неистощи́маго исто́чника святы́я ико́ны Боголю́бския,/ искуше́ний, и бед, и вся́каго греха́ избавля́ет нас,/ благоче́стно и богоприя́тно прославля́ющих/ и чту́щих све́тлую ико́ну Ея́./ Тем, воспева́юще, воззове́м Боголюби́вей:/ ра́дуйся, Любе́зная ве́рным Помо́щнице,/ во спасе́ние душ на́ших.

Вход. Проки́мен дне. И чте́ния Богоро́дице

На лити́и стихи́ры, глас 6:

Небе́сный Царю́, Человеколю́бче Го́споди,/ Долготерпели́ве и Многоми́лостиве,/ при́зри от свята́го жили́ща Твоего́,/ ви́ждь смире́ние на́ше, ви́ждь и озлобле́ние на́ше,/ и не я́ростию Твое́ю обличи́ши нас,/ ниже́ гне́вом Твои́м нака́жеши нас,/ и не преда́ждь нас в наше́ствие язы́ком/ или́ в ру́ки враго́м,/ да не когда́ реку́т язы́цы:/ где е́сть Бог их?/ Мы же лю́дие Твои́ и о́вцы па́жити Твоея́/ и И́мя Твое́ призыва́ем./ И́маши есте́ственную бла́гость Твою́,/ сего́ ра́ди покрыва́й ме́сто сие́ и оби́тель сию́./ И́маши Присноде́ву Моли́твенницу,/ ро́ждшую Тя, Сло́ве Бо́жий,/ и́маши лик апо́столов и мно́жество му́чеников и преподо́бных,/ приими́ моле́ние их о лю́дех согре́шших и отча́янных/ и спаси́, Незло́биве, достоя́ние Твое́.

Глас 3: Прииди́те, вси концы́ земли́,/ честно́му о́бразу Бо́жия Ма́тере поклони́мся:/ Та бо, ру́це к Сы́ну возде́ющи, мо́лится о нас/ и Тоя́ святы́м о́бразом на́ша страна́ оживлена́ бы́сть./ Мы же, псалмы́ и пе́сньми духо́вными/ поя́ Ей со все́ми святы́ми,/ пра́зднуем дне́сь све́тло.

Вельми́ добро́тою украси́ Тя Бог,/ я́ко челове́ком Свет даде́ на руку́ Твое́ю, Боголюби́вая;/ Ты же, в сия́нии Его́ су́щи,/ упова́ние христиа́ном,/ Помо́щница им в ну́ждах и ско́рбех, Боголюби́вая,/ и приста́нище тружда́ющимся,/ моли́ изба́вится нам от напа́стей,/ любо́вию пою́щим Тя/ и моля́щимся всечестно́му Твоему́ о́бразу, Боголюби́вая.

Сла́ва, и ны́не, глас 8:

Тя мо́лим, Предста́тельницу на́шу, Пречи́стая Боголюби́вая,/ одержи́ми печа́льми,/ не оста́ви до конца́ поги́бнути рабо́м Твои́м,/ но ускори́ изъя́ти нас от настоя́щаго гне́ва и ско́рби./ О Пресвята́я Де́во Чи́стая,/ Ты бо еси́ нам стена́ и по́мощь, Боголюби́вая.

На стихо́вне стихи́ры, глас 8:

Ра́дуйся, Богоро́дице Всепе́тая;/ ра́дуйся, исто́чниче живота́ ве́рным, притека́ющим к Тебе́;/ ра́дуйся, всех Влады́чице, Госпоже́ тва́ри, Благослове́нная;/ ра́дуйся, Всенепоро́чная и Препросла́вленная;/ ра́дуйся, пала́то; ра́дуйся Боже́ственное селе́ние;/ ра́дуйся, Всепречи́стая;/ ра́дуйся Ма́ти Де́во, ра́дуйся, Боголюби́вая.

Стих: Помяну́ и́мя Твое́/ во вся́ком ро́де и ро́де.

Ра́дуйся, Боголюби́вая Богоро́дице, Пречи́стая Ма́ти Христо́ва;/ ра́дуйся ве́рных наде́ждо;/ ра́дуйся, ми́ра очище́ние;/ ра́дуйся, вся́кия, ско́рби избавля́ющая рабы́ Твоя́;/ ра́дуйся, челове́ком утеше́ние живоно́сное;/ ра́дуйся, заступле́ние призыва́ющим Тя, Боголюби́вая;/ ра́дуйся, Бо́жие пребыва́ние и горо́ свята́я.

Стих: Слы́ши, Дщи, и ви́ждь,/ и приклони́ у́хо Твое́.

Ра́дуйся, Боголюби́вая Богоро́дице,/ Пречи́стая Ма́ти Христо́ва;/ ра́дуйся, еди́на наде́жда челове́ком и заступле́ние;/ ра́дуйся, освяще́нная пала́то;/ ра́дуйся, прибе́жище;/ ра́дуйся, свети́льниче Све́та све́тлый;/ ра́дуйся, раю́; ра́дуйся, Боже́ственное селе́ние;/ ра́дуйся, исто́чниче, источа́ющий во́ду жи́зни/ притека́ющим к Тебе́, Боголюби́вая.

Сла́ва, и ны́не, глас 4:

Ты еси́, Богоро́дице, А́нгелов ра́дость;/ Ты еси́ челове́ком сла́ва, Боголюби́вая;/ Ты ве́рным наде́жда,/ Богоро́дице Всепе́тая, Предста́тельнице на́ша,/ и к Тебе́ прибега́ем во вся́кой нужде́,/ я́ко да моли́твами Твои́ми от стрел вра́жиих,/ и па́губы душетле́нныя, и вся́ких скорбе́й изба́вимся вси,/ воспева́ющии Тя, Боголюби́вая.

Тропа́рь, глас 1:

Боголюби́вая Цари́це,/ Неискусому́жная Де́во, Богоро́дице Мари́е,/ моли́ за ны Тебе́ Возлюби́вшаго/ и ро́ждшагося от Тебе́ Сы́на Твоего́, Христа́ Бо́га на́шего,/ пода́ти нам оставле́ние прегреше́ний,/ ми́рови мир, земли́ плодо́в изоби́лие,/ па́стырем святы́ню/ и всему́ челове́чу ро́ду спасе́ние./ Гра́ды на́ша и страны́ Русския от нахожде́ния иноплеме́нных заступи́/ и от междоусо́бныя бра́ни сохрани́./ О Ма́ти Боголюби́вая Де́во!/ О Цари́це Всепе́тая!/ Ри́зою Свое́ю покры́й нас от вся́каго зла,/ от ви́димых и неви́димых враг защити́/ и спаси́ ду́ши на́ша.

Ин тропа́рь, глас то́йже:

Всепе́тая и Всесла́вная Цари́це Богоро́дице,/ Ма́ти всея́ тва́ри Соде́теля,/ христиа́нская наде́ждо и Засту́пнице,/ печа́льных утеше́ние, ненаде́ющихся и отча́явшихся ско́рое наде́яние,/ мо́лим Тя: ми́лостива бу́ди нам, гре́шным,/ и не оста́ви раб Свои́х,/ и не отри́ни моле́ния ве́рных,/ в ско́рбех и беда́х пред честны́м о́бразом Твои́м избавле́ния тре́бующих./ О Влады́чице, Блага́я Помо́щнице!/ Ри́зою Твое́ю честно́ю нас защити́ и от всех зол изба́ви,/ моля́щи Сы́на Твоего́, Христа́ Бо́га на́шего,/ да спасе́т ду́ши на́ша, я́ко Милосе́рд.

НА У́ТРЕНИ

На Бог Госпо́дь: тропа́рь Богоро́дицы, два́жды. Сла́ва, и ны́не, то́йже.

По 1-м стихосло́вии седа́лен, глас 5:

Пречи́стая Де́во Боголюби́вая,/ поми́луй нас, прибега́ющих с ве́рою к Тебе́, Милосе́рдой,/ и прося́щих те́плаго заступле́ния Твоего́:/ мо́жеши бо, я́ко Блага́я, всех спасти́/ и, я́ко Ма́ти Бо́га Вы́шняго, Ма́терними Твои́ми моли́твами/ всегда́ избавля́еши чту́щих Тя от всех бед, Боголюби́вая.

Сла́ва, и ны́не, то́йже.

По 2-м стихосло́вии седа́лен, глас 1:

Ма́терь Тя Бо́жию мо́лим вси вои́стинну/ и к щедро́там Твои́м вопие́м, любо́вию прибега́юще к Твое́й бла́гости:/ Тя бо и́мамы, гре́шнии, засту́пницу, Боголюби́вая,/ и Тебе́ стяжа́хом в напа́стех спасе́ние, Еди́ну Пречи́стую.

Сла́ва, и ны́не, то́йже.

Велича́ние о́бщее Богоро́дице или́ сие́:

Велича́ем Тя,/ Пресвята́я Де́во,/ и чтим о́браз Твой святы́й,/ его́же благове́рный кня́зь Андре́й даде́ нам на враги́ в побе́ду/ и всем ве́рным во спасе́ние.

По полиеле́и седа́лен, глас 1:

Стена́ необори́мая нам, христиа́ном, еси́, Богоро́дице Де́во,/ к Тебе́ бо прибега́юще, невреди́мы пребыва́ем/ и, па́ки согреша́юще, и́мамы Тя Моли́твенницу, Боголюби́вая./ Тем, благодаря́ще, вопие́м Ти:/ ра́дуйся, Благода́тная, Госпо́дь с Тобо́ю.

Сла́ва, и ны́не, то́йже.

Степе́нна, 1-й антифо́н 4-го гла́са. Проки́мен, глас 4: Помяну́ и́мя Твое́/ во вся́ком ро́де и ро́де. Стих: Слы́ши, Дщи, и ви́ждь, и приклони́ у́хо Твое́. Вся́кое дыха́ние: Ева́нгелие от Луки́, зача́ло 4.

По 50-м псалме́ стихи́ра, глас 6:

Не вве́ри мя челове́ческому предста́тельству,/ Пресвята́я Влады́чице,/ но приими́ моле́ние раба́ Твоего́,/ ско́рбь бо обдержи́т мя,/ терпе́ти не могу́ де́монскаго стреля́ния,/ покро́ва не и́мам,/ ниже́ где прибе́гну, окая́нный,/ всегда́ побежда́емь,/ и утеше́ния не и́мам, ра́зве Тебе́, Влады́чице ми́ра,/ упова́ние и предста́тельство ве́рных,/ не пре́зри моле́ние мое́,/ поле́зно сотвори́.

Кано́н, глас 4.

Пе́снь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Благогове́ют пред Тобо́ю, Богоро́дице, А́нгелов нача́льницы/ и святы́х чи́ни че́стно слу́жат Ти,/ пра́веднии красу́ются, кня́зь же Андре́й мо́лится,/ и град Влади́мир похваля́ется све́тло./ Мы же, гре́шнии, припа́дая к Твое́й свято́й ико́не, Боголюби́вая, ми́лости про́сим:/ озари́ на́ша сердца́, Пресвята́я Де́во Богоро́дице.

Кня́зь Андре́й вопия́ше со слеза́ми:/ Пресвята́я Цари́це Богоро́дице, упова́ние христиа́ном,/ умоли́ Сы́на Своего́, Христа́ Бо́га на́шего, о держа́ве Твое́й,/ Ты бо изво́лила еси́ в преде́лех страны́ Влади́мирския/ оби́тели Свое́й сла́вно созда́тися во и́мя Твое́, Боголюби́вая.

Прииди́те, христоимени́тии лю́дие,/ умы́ та́йно очи́стившеся,/ притеце́м в храм Ма́тере Христа́ Бо́га на́шего,/ Боголюби́мое ме́сто страны́ Влади́мирския/ я́ко Богоприя́тное селе́ние ви́дяще:/ в нем бо явля́ет нам Свою́ ми́лость Влады́чица.

Под кров Твой, Богоро́дице Де́во, прибега́ем вси, ро́ди челове́честии:/ просвети́, Боголюби́вая, ме́сто свято́е торжества́ Твоего́,/ и мы, гре́шнии раби́ Твои́, моля́щеся Пречи́стей Твое́й ико́не,/ про́сим от Тебе́ прия́ти вели́кия ми́лости.

Ин кано́н экзаметри́ческий, глас то́йже.

Творе́ние Патриа́рха Се́ргия

Пе́снь 1, ирмо́с то́йже

Сло́во рабу́ Твоему́ пода́ждь, Госпоже́ Пресвята́я,/ Сло́во бо сни́де на Тя, я́коже свы́ше роса́,/ гре́шную ду́шу мою́ очи́сти, Цари́це Блага́я,/ я́ко да, ра́дуяся, сла́влю Твоя́ чудеса́.

Кня́зю Андре́ю в нощи́ предста́вши, Небе́сная Ма́ти,/ в се́рдце смяте́нном его́/ бу́рю сомне́ний Ты всех кро́тце смири́ла еси́,/ подви́гши того́ воспева́ти ми́лость и си́лу Твою́,/ ди́вну всегда́ в чудесе́х.

Ру́це просте́рла еси́, моли́твенно Сы́ну предста́вши:/ сла́вы и ми́лости луч, Сы́не, да схо́дит с небе́с/ лю́дем и ме́сту сему́./ Того́ умоли́ о созда́вших храм и оби́тель сию́,/ Ро́ждшая бе́здну чуде́с.

Боголюби́вая всех Цари́це, оби́тели сла́во,/ гре́шных, моля́щихся нас дне́сь, приими́ словеса́,/ де́рзость враго́в низложи́, неве́рных разруши́ держа́ву,/ ве́рным же при́сно пода́ждь пе́ти Твоя́ чудеса́.

Пе́снь 3

Ирмо́с: Твоя́ песносло́вцы, Богоро́дице,/ Живы́м и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Засту́пнице и покро́в гра́ду Влади́миру и вся́кому гра́ду и стране́,/ бу́ди нам Помо́щница и прибе́жище, Боголюби́вая,/ всех нас заступи́, Госпоже́ Цари́це и Богоро́дице,/ и во вся́ких злых ме́стех ве́рныя сохрани́.

Приими́ хвалу́ от уст на́ших недосто́йных, о Пресвята́я Богоро́дице, Де́во Боголюби́вая,/ наде́ждо на́ша и похвало́!/ Покланя́емся Твоему́ пресла́вному о́бразу:/ мольбу́ приими́ о рабе́х Твои́х.

Пречи́стеи ру́це Твои́, Цари́це и Богоро́дице,/ ми́лостивно воздви́гни к Сы́ну Твоему́ и Бо́гу на́шему,/ прося́щи отпуще́ния согреше́ний на́ших, и житие́ на́ше испра́ви,/ и вся́кия благода́ти испо́лни нас и ми́лости сподо́би.

Пресвята́я Де́во, Ма́ти Боголюби́вая,/ сохрани́ рабы́ Твоя́ от вся́кия сопроти́вныя си́лы,/ и изба́ви от вся́кия напа́сти,/ и ра́дость ми́ру сотвори́ душе́вную и теле́сную,/ и пре́зри нам вся согреше́ния.

Ин, ирмо́с то́йже

Чту́ще ико́ну Твою́, вси в ско́рби к Тебе́ прибега́ем,/ то́чиши бо, Госпоже́, Ты утеше́ние всем,/ в ра́дости па́ки Тебе́, Пречи́стая, пе́снь воспева́ем./ Те́мже пода́ждь, да и аз ми́лость Твою́ испове́м.

Све́тло красу́ется дне́сь оби́тель сия́ всечестна́я,/ о́браз иму́щая Твой, я́ко исто́чник цельба́м,/ Ты же, Засту́пнице всех, Спору́чнице гре́шных свята́я,/ Спа́са Христа́ преклони́ к на́шим смире́нным мольба́м.

В бу́ри приста́нище всем Ты, Боголюби́вая Ма́ти,/ су́щим в пути́ и в беда́х, в мо́ри дале́че покро́в,/ спу́тница ве́рна всем:/ Тебе́ бо даде́ся спаса́ти ду́ши убо́гих Твои́х,/ Тя вознося́щих рабо́в.

Ве́чныя му́ки и тьмы́,/ губи́тельных вра́жиих сете́й,/ Чи́стая Де́во, спаси́, Тя призыва́ем в мольбе́,/ сла́ву же Бо́га духо́в безсме́ртных/ сподо́би нас зре́ти в све́тлых черто́зех Его́:/ вся бо возмо́жна Тебе́.

Седа́лен, глас 2:

Моле́ние те́плое и стена́ необори́мая,/ ми́лости исто́чниче, ми́рови прибе́жище,/ приле́жно вопие́м Ти:/ Богоро́дице Влады́чице, предвари́/ и от бед изба́ви нас,/ еди́на вско́ре Предста́тельствующая.

Пе́снь 4

Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Ева́нгелия Христо́ва Богогла́сный списа́тель Лука́/ написа́ о́браз Твой чу́дный, Всенепоро́чная Влады́чице,/ и Младе́нца Ти Преве́чнаго на руку́ изобрази́;/ святы́й же кня́зь Андре́й в нощно́м виде́нии узре́в Тя, моля́щуюся за ны,/ даде́ нам о́браз Твоего́ моле́ния,/ к Нему́же притека́ющия бед и напа́стей избавля́еши.

О Пресвята́я Де́во Богоро́дице,/ Ты изво́лила еси́ изы́ти из Гре́ческия страны́ в чудотво́рнем о́бразе Твое́м/ и дойти́ до свята́го ме́ста, иде́же и яви́лася еси́ кня́зю Андре́ю;/ он же, моля́ся Тебе́, со слеза́ми вопия́ше:/ Пресвята́я Де́во Богоро́дице,/ изба́ви нас от вся́ких бед и скорбе́й.

На Тя упова́ние возложи́хом, Боголюби́вая Ма́ти Де́во,/ Предста́тельницу Тя живота́ тве́рду и непоколеби́му стяжа́хом,/ моли́ о нас, рабе́х Твои́х, Всеще́драго Бо́га.

Ты еси́ похвала́ и вене́ц святы́м всем,/ вси на Тя по Бо́зе наде́жду возложи́хом/ и Тебе́ мо́лимся, Боголюби́вая Цари́це, Бо́жия Ма́ти,/ Помо́щнице гре́шным и спасе́ние рабо́м Твои́м.

Ин, ирмо́с то́йже

О́блаком ле́гким носим, Твой Сын, Пресвята́я, прии́де,/ Ма́тере во́лю творя́./ Кня́зь же блаже́нный Андре́й паде́ со слеза́ми во прах, просла́ви о всех, я́же ви́де,/ сла́ва, Христе́, вопия́,/ Бо́жией си́ле Твое́й.

С ве́том Твои́м просвеще́н, на Го́рнюю сла́ву взира́я,/ глас Пребоже́ственный Твой слы́ша блаже́нный Андре́й,/ Ду́хом же Святы́м взыгра́в, воспе́ о Тебе́, Пресвята́я:/ сла́ва, Христе́ Всецарю́, Бо́жией си́ле Твое́й.

Ми́лость Его́ и покро́в моля́щимся нам ниспосла́ти/ Сы́на и Бо́га моли́, Чи́стая, ве́рных люде́й щи́те, забра́ло Церкве́й,/ вселе́нней реко́ благода́ти,/ я́ко да пе́снь принесе́м ве́лией си́ле Твое́й.

О́блаче све́тлый Христо́в, неве́рия мглы нас изба́ви,/ ве́рным осла́бу пода́ждь в жи́зни привре́менней сей,/ Це́рковь Святу́ю Твою́ незы́блему в ми́ре упра́ви,/ я́ко да вси воспое́м:/ сла́ва держа́ве Твое́й.

Пе́снь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Вся́кое ме́сто, Пресвята́я Де́во Богоро́дице, Свое́ю ми́лостию просвеща́еши,/ гра́ду же Влади́миру и ме́сту Боголюби́мому вели́кая похвала́ и утвержде́ние,/ в беда́х су́щим ско́рая Помо́щница.

Пропове́дует пресла́вно вели́чия Твоя́ Ла́вра,/ я́же во Твое́ и́мя нача́ло прия́, Ма́ти Бо́жия Боголюби́вая,/ хва́лят моле́бницы, и велича́ют чудотво́рный о́браз Твоего́ моле́ния о нас, и глаго́лют:/ утверди́, Го́споди, оби́тель сию́.

Приспе́ дне́сь па́мять твоя́, кня́же Андре́е,/ ра́дуется пресла́вный град Влади́мир/ и Боголюби́мое ме́сто красу́ется, зову́ще:/ Пресвята́я Де́во Богоро́дице, спаси́ нас/ и изба́ви от вся́кия ну́жды и печа́ли.

Мари́е, злата́я кади́льнице,/ стра́сти па́губныя отжени́ от нас/ и утверди́ нас непоколеби́мых, Пресвята́я Де́во Боголюби́вая,/ не и́мамы бо и́ныя по́мощи, ра́зве Тебе́, Влады́чице.

Ин, ирмо́с то́йже

Сы́на Безле́тнаго Ты носи́ла еси́ несказа́нно,/ гре́шным спасе́ние всем све́тло веща́ющая;/ ны́не о нас, Госпоже́, моли́ся Тому́ непреста́нно,/ всем воспева́ющим Тя мир подава́ющая.

При́сно Твоя́ благода́ть, Цари́це, нисхо́дит на ме́сто,/ е́же избра́ла еси́, всем источа́ющая да́ры целе́бныя,/ тем пое́м Тебе́, Богоневе́сто,/ ве́рою сла́вящим Тя мир подава́ющая.

Обремене́ннии вси страстьми́ и неду́ги, гряди́те,/ во́ду спаси́тельную, всех исцеля́ющую,/ зде от ико́ны сея́ в весе́лии дне́сь почерпи́те,/ сла́вяще Ма́терь Христа́, мир подава́ющую.

Гла́да, огня́ и меча́, наше́ствия иноплеме́нных,/ язв губи́тельных при́сно спаса́ющая,/ Ма́ти Всепе́тая, дне́сь услы́ши мольбу́ нас, смире́нных,/ бу́рю страсте́й ути́ши, мир подава́ющая.

Пе́снь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Прише́ствием честна́го о́браза Твоего́, Цари́це Богоро́дице,/ освяти́ла еси́ ме́сто Боголюби́мое,/ на не́мже оби́тель Свою́ от дре́вних лет сохраня́еши,/ иде́же и нас сподо́би Тебе́ пе́ти чи́стыми се́рдцы.

Не ужаса́йся, кня́же Андре́е, и не диви́ся,/ ви́дев о́браз Пречи́стыя Богоро́дицы, от Гре́ческия страны́ изше́дший,/ доити́ же гра́да Росто́ва не изво́ливший:/ се бо до́йде до ме́ста свята́го, свы́ше пронарече́ннаго,/ и подви́же вопи́ти тебе́ к Преблагослове́нней:/ о Всеми́лостивая!/ моли́ о нас Сы́на Своего́, Христа́ Бо́га на́шего.

Воздви́гнем ру́це свои́ горе́ и вознесе́м хвале́ния Го́сподеви:/ се бо вои́стинну прии́де Пречи́стая Де́ва и Богоро́дица Боголюби́вая:/ вся озаря́я ве́рныя Боже́ственною Свое́ю ико́ною.

Храм живы́м и освяще́нный су́щи, Пренепоро́чная,/ Пребезнача́льное Сло́во пло́тию родила́ еси́, безслове́сия мир изба́вльшее,/ изба́ви и нас от напа́стей Твои́ми моли́твами, Боголюби́вая.

Ин, ирмо́с то́йже

Боголюби́вая дне́сь к весе́лию вся созыва́ет,/ храм преукраси́вши сей о́бразом чу́дным Свои́м,/ благочести́вых собо́р Небе́сными да́ры венча́ет./ Тем, Богому́дрии вси, Ма́терь Христо́ву почти́м.

Ра́достно, ве́рнии вси, гряди́те, воспле́щим рука́ми,/ зря́ще Превы́сшую всех а́нгельских го́рних чино́в/ Де́ву, Цари́цу Небе́с, во хра́ме дне́сь су́щую с на́ми,/ всем источа́ющую то́ки целе́бных даро́в.

Ра́зве Тебе́, Госпоже́, не и́мам наде́жды ины́я:/ Ты мя изба́ви от бед, Ты помози́ до конца́/ по́прище мне преити́ небла́зненно жи́зни земны́я,/ да воспою́ Тя всегда́, ро́ждшую ми́ру Творца́.

При́зри, Свята́я, с Небе́с, к рабо́м Твои́м в по́мощь потщи́ся,/ вся́кую я́зву, боле́знь, вся́кий неду́г исцели́./ Ста́рцу согбе́нному жезл, Засту́пница си́рым яви́ся,/ Ма́ти Оте́ршаго вся го́рькия сле́зы земли́.

Конда́к, глас 3. Творе́ние Патриа́рха Се́ргия.

Подо́бен: Де́ва дне́сь:

Де́ва дне́сь предстои́т Сы́ну,/ ру́це Свои́ к Нему́ простира́ющи,/ святы́й кня́зь Андре́й ра́дуется,/ и с ним Русская страна́ торжеству́ет,/ нас бо ра́ди мо́лит Богоро́дица Преве́чнаго Бо́га.

И́кос:

Де́во и Ма́ти Боголюби́вая, Цари́це Мари́е Богоро́дице,/ Ми́лостивая Хода́таице к Сы́ну Своему́ и Бо́гу на́шему за ны, рабы́ Твоя́!/ Ты, Отрокови́це, благоизво́лила еси́ Твоему́ пречу́дному о́бразу,/ его́же написа́ Богоглаго́ливый Лука́,/ пе́рвее от страны́ Гре́ческия, пото́м же и от ца́рствующаго гра́да Ки́ева изы́ти,/ по умоле́нию благове́рнаго кня́зя Андре́я,/ и яви́ти ми́лость Свою́ новопросвеще́нным лю́дем страны́ сея́,/ но, не изво́ливши дости́гнути гра́да Росто́ва, возлюби́ла еси́ пребыва́ти в преде́лех Влади́мирских,/ иде́же и яви́лася еси́ ве́рному рабу́ Твоему́, кня́зю Андре́ю,/ моля́щися о лю́дех Твои́х Сы́ну и Бо́гу Твоему́,/ я́коже дре́вле свято́му Андре́ю в хра́ме Влахе́рнстем./ Те́мже святы́й кня́зь Андре́й, новописа́в Тебе́, Моли́твенницу о лю́дех Твои́х,/ оста́ви нам сей моли́твенный лик Твой, Боголюби́вая Ма́ти,/ и основа́ оби́тель в ме́сте Твоего́ явле́ния,/ из нея́же от чудотво́рныя Твоея́ ико́ны и по всей стране́ Русстей/ ми́лость, и по́мощь, и исцеле́ние подае́ши с ве́рою приходя́щим к Тебе́:/ нас бо ра́ди мо́лиши, Богоро́дице, Преве́чнаго Бо́га.

Пе́снь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́сте,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Боголюби́вому житию́ первонача́льник и наста́вник, кня́же Андре́е, был еси́/ и моле́бно подвиза́лся еси́ пред пречу́дным о́бразом Бо́жия Ма́тере:/ светле́йши бо со́лнца возсия́ пречестна́я ико́на Пресвяты́я Богоро́дицы,/ Е́йже моли́ся спасти́ся нам.

Херуви́м и Серафи́м превы́шши яви́лася еси́, Богоро́дице:/ Ты бо еди́на прия́ла еси́ Невмести́маго Бо́га во утро́бе Свое́й/ и благоволи́ла доити́ о́бразу Твоему́ Боголюби́маго ме́ста./ Мы же, раби́ Твои́, вси ве́рнии, пе́сньми Тя ублажа́ем.

Пресвята́я Госпоже́ Де́во Богоро́дице, Ма́ти Христа́ Бо́га на́шего,/ вся́ко мо́жеши нам бы́ти Помо́щница,/ посети́вшая чу́дным о́бразом Твои́м Боголюби́мое ме́сто сие́, Боголюби́вая Влады́чице,/ посети́ и нас и не оста́ви, я́коже Сама́ ве́си,/ с ве́рою приходя́щих к Тебе́.

Приступи́ к чу́дному о́бразу Боголюби́выя Богома́тере вели́кий кня́зь Андре́й/ и, просте́р ру́це свои́, взем я́ко безце́нное сокро́вище, и возвести́ отцу́ своему́,/ ка́ко чуде́сно из Вышегра́да посети́ ме́сто Боголюби́мое.

Ин, ирмо́с то́йже

Сла́вит Тя при́сно страна́ Русская, Де́во,/ иму́щи к Бо́гу Хода́таицу те́плую на Небеси́,/ те́мже и пра́зднует дне́сь, Тебе́ благодари́в пою́щи:/ Ма́ти Христо́ва, во век благослове́на еси́.

Град и оби́тель сию́ Твои́м омофо́ром, Честна́я, при́сно покры́й/ и мольбу́ на́шу горе́ вознеси́ к Сы́ну и Бо́гу щедро́т,/ да сла́вим Тя вси, Преблага́я,/ Боголюби́вая, Ты благослове́на еси́.

Зно́я паля́щаго вся изба́ви,/ до́ждь ра́нний и по́здний жа́ждущей лю́те земли́/ Ще́драго да́ти проси́,/ ни́вы от вре́да спаси́,/ да ми́лость Госпо́дню сла́вим,/ Тебе́ же пое́м: благослове́на еси́.

Лю́дем Твои́м, Госпоже́, земли́ устрое́ние зре́ти,/ му́дрость в прави́телех, суд пра́вый сподо́би,/ да вси в ми́ре всегда́ поживе́м, немо́лчно дерза́юще пе́ти:/ ми́ру Храни́тельнице, благослове́на еси́.

Пе́снь 8

Ирмо́с: О́троки благочести́выя в пещи́/ Рождество́ Богоро́дичо спасло́ е́сть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Приими́ моле́ние на́ше, Пречи́стая Богоро́дице,/ сохрани́ и заступи́ от вся́каго зла/ и не отри́ни нас от Своего́ честна́го о́браза:/ Тя бо и́мамы Моли́твенницу те́плу, и сте́ну тве́рду, и покро́в неруши́мый,/ и земли́ на́шей вели́кую похвалу́ и утвержде́ние.

Ра́дуемся душе́ю и весели́мся се́рдцем,/ взира́юще на о́браз Твой, Пресвята́я Богоро́дице Боголюби́вая,/ иму́ще Тя держа́ву непобеди́мую и утвержде́ние непоколеби́мое,/ наде́жду, и упова́ние, и душа́м на́шим спасе́ние.

Помо́щница еси́ в ско́рбех, и в напа́стех, и беда́х/ и в темни́цах избавле́ние,/ на бра́ни и в ра́тех заступле́ние, Богоотрокови́це Чи́стая,/ и избавле́ние всем ве́рным челове́ком, и похвала́,/ и гра́ду на́шему вели́кое утвержде́ние.

Ин, ирмо́с то́йже

О́бразом, Де́во, святы́м обхо́диши ве́си и до́мы,/ вся́кому во́зрасту че́сть, всем христиа́ном хвала́,/ всех ты наде́жда еси́,/ Тобо́ю бо род наш блюди́мый сла́вит усе́рдно Творца́:/ Го́спода по́йте, дела́.

Ве́ру мою́ приими́, приста́нище ти́хое бу́ди;/ ду́шу, Блага́я, спаси́,/ Ты бо еси́ родила́ Спа́са нам, гре́шным, Христа́./ Убо́гих Твои́х не забу́ди,/ да́руй нам зва́ти всегда́:/ Го́спода по́йте, дела́.

Те́ло мое́ исцели́,/ страсте́й треволне́ние вско́ре, Де́во, в души́ укроти́./ Ты бо еси́ низвела́/ свы́ше Боже́ственный мир на во́лны жите́йскаго мо́ря/ ве́рно пою́щим всегда́:/ Го́спода по́йте, дела́.

В де́нь о́ный стра́шный конца́,/ егда́ пробужде́нии вста́нем гла́сом после́дней трубы́,/ бу́ди нам Ты похвала́,/ ру́це возде́вши Твои́,/ Благо́му за гре́шных предста́ни,/ да одесну́ю Того́, Го́спода, хва́лим, дела́.

Пе́снь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Се Тебе́, Пресвята́я Цари́це Боголюби́вая,/ посыла́ется с Небесе́ Арха́нгел Гаврии́л,/ Царя́ всех и Бо́га провозвести́ти прише́ствие и возгласи́ти Тебе́:/ ра́дуйся, Благода́тная, Госпо́дь с Тобо́ю.

Ра́дуйся, Ма́ти Де́во, ра́дуйся, Пречи́стая, прия́телище Бо́жие,/ ра́дуйся, све́щниче Све́та, Ада́мово воззва́ние и Е́вино избавле́ние,/ горо́ свята́я и пресла́вная и свяще́нный черто́же.

Ты еси́ похвала́ христиа́ном, Влады́чице,/ Ты ору́жие на враги́ и стена́,/ к Тебе́ прибега́ем, Тя и ны́не на по́мощь призыва́ем:/ Госпоже́ Цари́це Богоро́дице,/ спаси́ и сохрани́ правове́рныя лю́ди Твоя́, Боголюби́вая.

О Всеми́лостивая христиа́ном Помо́щнице!/ Не мо́жет Тя воспе́ти досто́йно ум челове́ческий и а́нгельский,/ я́ко всея́ тва́ри Честне́йшую, Небе́сных и земны́х сил сла́внейшую,/ всех бо Творца́ родила́ еси́ и Бо́га./ Но, о Влады́чице!/ приими́ ми́лостивно на́ше моле́ние,/ всегда́ бо на Тя наде́емся.

Ин, ирмо́с то́йже

Всяк земноро́дный в сей де́нь, Святы́м просвеща́емый Ду́хом,/ ве́село ра́дуяся Го́рних умо́в естеству́,/ та́йно пою́щему зде, да вне́млет очище́нным слу́хом,/ вся да покло́нится тва́рь де́вственному Рождеству́.

И́ноков ли́ки и дев, Пречи́стыя пра́здник почти́те,/ му́жи, и жены́, и вси, ра́достно дне́сь к торжеству́/ с на́ми соше́дшеся зде, псало́мски игра́юще, рцы́те:/ Де́во, да бу́дет во век че́сть Твоему́ Рождеству́.

Ве́рных пресве́тлый собо́р, Пречи́стая, дне́сь назира́ет/ свы́ше Свою́ благода́ть, душ и теле́с врачевство́,/ гре́шным проще́ние, всем осла́бу долго́в обеща́ет:/ Ма́терь бо слы́шит Свою́ при́сно Той Рождество́.

Боголюби́вей возда́х усте́н похвалу́ и молю́ся:/ бу́ди Спору́чница ми, хра́ме святы́й Божества́, в час испыта́ния дел,/ егда́ пред суди́щем явлю́ся,/ Де́во, уми́лостиви суд Твоего́ Рождества́.

Свети́лен.

Подо́бен: Посети́л ны е́сть:

Боголю́бскому дре́вле Андре́ю предста́вшая/ и ико́ну исто́чник чуде́с показа́вшая,/ Боголюби́вая Ма́ти пе́сненно дне́сь да почти́тся.

Сла́ва Отцу́, и Сы́ну, и Свято́му Ду́ху:

Тя Предста́тельницу и́мамы, гре́шнии, о Пресвята́я Де́во:/ Ты благопреме́нна сотвори́ Сы́на Твоего́ и Бо́га на́шего/ ма́терними Твои́ми моли́твами.

И ны́не, и при́сно, и во ве́ки веко́в. Ами́нь.

Те́плое заступле́ние в беда́х, и Помо́щницу на́шу,/ и к Бо́гу примире́ние,/ Е́юже тли изба́вихомся, Богоро́дицу, ве́рнии, ублажа́ем.

На хвали́тех стихи́ры, глас 6:

Велича́ем Тя вси,/ Пренепоро́чная Ма́ти Христа́ Бо́га на́шего,/ я́же пре́жде рождества́ Де́ва,/ и в рождестве́ Де́ва,/ и по рождестве́ па́ки пребыва́еши Де́ва./ Неве́сто Неневе́стная,/ низложи́ враго́в на́ших,/ мо́лим Тя, Влады́чице.

Преблагослове́нна и Препросла́вленна еси́,/ Богоро́дице Де́во,/ я́ко родила́ еси́ всех Творца́,/ Ма́ти су́щи Живота́,/ Тобо́ю прия́хом мы, гре́шнии,/ паде́ния на́шего воста́ние,/ Еди́на Благослове́нная.

Блажи́м Тя, вси ро́ди, Богоро́дице,/ я́ко ра́дости вся ны испо́лнила еси́/ явле́нием Твои́м кня́зю Андре́ю/ и дарова́нием нам честна́го о́браза Твоего́, Пречи́стая,/ ему́же дне́сь покланя́ющеся, уми́льно мо́лим Тя:/ сподо́би, Влады́чице, Твоя́ рабы́/ в бу́дущем ве́це избра́нных ра́дости.

И́ны стихи́ры, глас то́йже.

Творе́ние Патриа́рха Се́ргия:

Неземны́м све́том сия́ющи,/ в нощи́ предста́ла еси́, Пречи́стая, благове́рному Андре́ю/ и ра́доватися того́ сотвори́ла еси́,/ град же и оби́тель Твою́ просла́вила еси́./ Но отжени́, Госпоже́, те́мную но́щь прегреше́ний на́ших/ и собла́зны упраздни́, мо́лимся.

Сы́на Твоего́ на о́блацех зря́щи,/ ру́це к Нему́ возде́ла еси́/ и за страну́ сию́ и род наш те́пле моли́лася еси́,/ благода́ть Того́ и сла́ву призыва́ющи./ Но, о Пречи́стая, моли́тися о нас никогда́же умолчи́,/ да предста́тельство Твое́ при́сно пое́м, велича́юще Тя.

Велича́ем Тя, Ма́ти Боголюби́вая,/ явле́нием бо Твои́м ме́сто сие́ освяти́ся/ и страна́ на́ша благода́ти и ра́дости испо́лнися./ Те́мже мо́лим Тя:/ не отступи́ от нас, Влады́чице, до конца́,/ но при́сно спаса́й воспева́ющия Тя.

Све́тло красу́ется дне́сь оби́тель Твоя́,/ о́бразом Твои́м хва́лящися,/ от него́же источа́еши ве́рным исцеле́ния/ и вся́кую ско́рбь и неду́г отгоня́еши./ Но, о Влады́чице Боголюби́вая,/ и во Ца́рствии Сы́на Твоего́/ сподо́би нас избра́нных ра́дости.

Сла́ва, и ны́не, глас 8:

О, пресла́внаго чудесе́!/ Во всех страна́х Тебе́ ра́ди/ прославля́ема оби́тель Твоя́, Богоневе́сто,/ я́ко и́мать в себе́ чудотво́рную Твою́ ико́ну,/ от нея́же неизрече́нныя це́ль бы прие́млюще,/ благода́рственная вопие́м Тебе́ и уми́льно мо́лим Тя:/ Пресвята́я Де́во,/ спаси́ ду́ши на́ша, я́ко Милосе́рдая.

НА ЛИТУРГИ́И

Блаже́нны, от пе́рваго кано́на пе́сни 3-я и 6-я. Проки́мен, Апо́стол, Ева́нгелие, и прича́стен Богоро́дице о́бщии.

Моли́тва

О Пречи́стая Госпоже́ Богоро́дице, Ма́ти Боголюби́вая, наде́ждо на́шего спасе́ния! Воззри́ ми́лостивно на предстоя́щия с ве́рою и любо́вию и покланя́ющияся пречи́стому о́бразу Твоему́, приими́ на́ше хвале́бное пе́ние сие́ и проле́й те́плую Твою́ моли́тву о нас, гре́шных, ко Го́споду, да, презре́в вся на́ша согреше́ния, спасе́т и поми́лует нас. О Преди́вная Влады́чице! покажи́ на нас чу́дныя ми́лости Твоя́: изба́ви нас от вся́кия ско́рби, наста́ви на пу́ть вся́кия доброде́тели и благосты́ни, спаси́ от искуше́ний, бед и боле́зней, изми́ от нас оклевета́ния и ссо́ры, сохрани́ от молниено́снаго гро́ма, от запале́ния о́гненнаго, от гла́да, тру́са, пото́па и смертоно́сныя я́звы, пода́й нам Свою́ ми́лостивую по́мощь на пути́, в мо́ри и на су́ше, да не поги́бнем лю́те. О Всеми́лостивая Боголюби́вая Ма́ти, с тве́рдым упова́нием возсыла́ем к Тебе́ на́шу убо́гую моли́тву! Не отри́ни на́ших слез и воздыха́ний, не забу́ди нас во вся дни живота́ на́шего, но всегда́ пребыва́й с на́ми и Твои́м заступле́нием и хода́тайством у Го́спода пода́ждь нам отра́ду, утеше́ние, защи́ту и по́мощь, да вы́ну сла́вим и велича́ем преблагослове́нное и всепе́тое и́мя Твое́. Ами́нь.