Стихи́ры, глас 4.

Подо́бен: Я́ко до́бля:

Я́ко зве́зды многосве́тлыя,/ страстоте́рпцы прехва́льнии,/ Боже́ственными светлостьми́ озаря́ете вселе́нныя концы́,/ де́монскаго омраче́ния,/ и страсте́й тлетво́рных, и бед изыма́юще,/ Те́мже дне́сь све́тлое, и светоно́сное,/ и свято́е ва́ше торжество́,/ соше́дшеся, восхва́лим, сла́внии.

Ману́ил чу́дный,/ и Саве́л блаже́нный,/ и Исма́ил прему́дрый/ пе́сньми свяще́нными да почту́тся:/ Тро́ицу бо Несозда́нную пред враги́ свяще́ннопропове́дающе,/ многобо́жную угаси́ша ле́сть/ кро́вными излия́нии/ и сла́ву прия́та неувяда́емую.

Царя́ беззако́ннаго,/ беззако́нно повелева́ющаго поклони́тися/ и че́сти принести́ безслове́сным бо́гом безду́шным,/ блаже́ннии, му́дре посрами́сте,/ Ману́иле, и Исма́иле, и Саве́ле великоимени́тии,/ и, пострада́вше терпели́вно и зако́нно,/ венцы́ исплето́сте побе́ды, о ми́ре моля́щеся.

И́ны стихи́ры святы́м, глас 8.

Подо́бен: О, пресла́внаго чудесе́:

Трие́ от Перси́ды яви́шася/ Богоразу́мия свети́льницы,/ сия́нием Ду́ха,/ Ману́ил сла́вный, и Саве́лий прехва́льный,/ и Исма́ил до́блий,/ всю тва́рь страсте́й све́тлостию просвеща́ют./ И́хже па́мять дне́сь светоза́рную,/ доброде́тельми сия́юще, соверша́ем.

Храни́телие Боже́ственнии бы́вше повеле́нием Христо́вым,/ царя́ беззако́нна прея́вственно обличи́сте/ и зако́нно пострада́сте,/ Влады́це же́ртвы соверше́ны я́вльшеся./ Кро́вными тече́нии, святи́и му́ченицы,/ фарао́на неви́димаго с полко́м его́ погуби́сте,/ побе́ду взе́мше.

Кровьми́ ва́шими обагри́сте му́ченическими/ себе́ порфи́ру, блаже́ннии, в ню́же оде́явшеся,/ и, я́ко скиптр держа́ще Крест Боже́ственный,/ Христо́ви сца́рствуете,/ И́же по естеству́ и́стинною ца́рствующу,/ святи́и му́ченицы,/ Сего́ моля́ще вы́ну/ спасти́ ду́ши на́ша, воспева́ющих вас.

Сла́ва, глас 8:

Чи́сто возлю́бльше Тя, Сло́ве Бо́жий, сла́внии му́ченицы,/ огню́ служи́ти оста́вльше,/ небре́гше же и о халде́йстей земли́,/ Твои́м све́том озари́шася;/ вооружи́вшеся же и ору́жием ве́ры,/ посрами́ша Иулиа́на мучи́теля/ Ману́ил сла́вный, и Саве́л ди́вный,/ и Исма́ил требога́тый;/ со Отце́м и Ду́хом пою́ще Тя,/ мо́лят спасти́ся душа́м на́шим.

Крестобогоро́дичен.

Подо́бен: О, пресла́внаго чудесе́:

Что зри́мое виде́ние,/ е́же Мои́ма очи́ма ви́дится, о Влады́ко!/ Содержа́й всю тва́рь, на Дре́во воздви́жен быв,/ и умира́еши, всем дая́й жи́знь, –/ Богоро́дица, пла́чущи, глаго́лаше,/ егда́ узре́ на Кресте́ возноси́ма/ из Нея́ неизрече́нно возсия́вшаго Бо́га и Челове́ка.

Тропа́рь, глас 4:

Му́ченицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего:/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами/ спаси́ ду́ши на́ша.

НА У́ТРЕНИ

О́ба кано́на Окто́иха и святы́х на 4, глас 8.

Пе́снь 1

Ирмо́с: Истря́сшему в мо́ри мучи́тельство фарао́не/ и Изра́иля су́шею наста́вльшему,/ пои́м Христу́,/ я́ко просла́вися во ве́ки.

Пое́м пе́снь вси Зижди́телю и Вседержи́телю Бо́гу,/ страстоте́рпцев досто́йно поче́тшему,/ сла́внаго Ману́ила и страда́вшия с ним, во ве́ки.

Оте́ческое служе́ние отве́ргше огнепоклоне́ние,/ гони́теля стремле́ние возрази́ша/ и бы́ша страда́льцы е́же в Тро́ице честны́м испове́данием.

Я́ко единочи́слени Тро́ице, пострада́вше Ея́ ра́ди,/ достоле́пно венча́стеся, му́ченицы,/ моли́теся у́бо непреста́нно изба́вити всех нас от бед.

Богоро́дичен: Е́же от Де́вы рождество́ вы́ше естества́,/ Рожде́йся утаи́ кня́зя тьмы́, я́коже пи́шет,/ и отве́рзе Еде́м Богоро́дицу Ю испове́дающим.

Пе́снь 3

Ирмо́с: Не́сть свят, я́ко Госпо́дь,/ и не́сть пра́веден, я́ко Бог наш,/ Его́же пое́т вся тва́рь:/ не́сть пра́веден, па́че Тебе́, Го́споди.

Не́сть, святи́и, по достоя́нию восхвали́ти свяще́нное ва́ше страда́ние,/ и́мже увязо́стеся небоплете́нными венцы́,/ Бо́гу, Изба́вителю на́шему, моля́щеся спасти́ся нам.

Огне́м опаля́еми, неоскудева́еми умо́м,/ ра́нами око́вани, боле́зньми изощре́ни,/ небокова́ннии мечи́ бы́сте, му́ченицы, на нечести́выя враги́.

Посрами́ся томи́тель, паде́нием ужа́сным па́дся отсту́пник и беззако́нник,/ Христу́ укре́пльшу му́ченик тро́ицу до́бле ополчи́тися на нече́стие его́.

Богоро́дичен: Са́мую Тебе́ приво́дим, ро́ждшую Тя пло́тию,/ на мольбу́ держа́ве Твое́й, Христе́ Бо́же наш, и му́чеников собо́ры,/ тех мольба́ми умири́ мир Твой.

Седа́лен, глас 1.

Подо́бен: Гроб Твой, Спа́се:

Я́ко трисве́тлая свеща́, огне́м Тро́ическим вже́гшеся,/ пе́рсов, огню́ служа́щих, тьму́ попали́сте и Христа́ со дерзнове́нием пропове́даете,/ возсия́вшаго от Неискусому́жныя Де́вы,/ и блаже́нную прия́сте кончи́ну, тричи́сленнии му́ченицы.

Сла́ва, и ны́не, Богоро́дичен:

Наста́ви ны на пу́ть покая́ния, укло́ншияся при́сно к безпу́тием зол/ и Преблага́го прогне́вавшия Го́спода,/ Неискусобра́чная благослове́нная Мари́е,/ прибе́жище отча́янных челове́ков, Бо́жие жили́ще.

Крестобогоро́дичен:

Зря́щи Тя, Христе́, Всенепоро́чная Ма́ти/ ме́ртва на Кресте́ просте́рта, вопия́ше:/ Сы́не Мой, Собезнача́льне Отцу́ и Ду́ху,/ что неизрече́нное Твое́ сие́ смотре́ние,/ и́мже спасл еси́ пречи́стых рук Твои́х, Ще́дре, созда́ние?

Пе́снь 4

Ирмо́с: Из го́ры приосене́нныя, Сло́ве, проро́к,/ еди́ный Богоро́дицы,/ хотя́ща воплоти́тися богови́дно усмотри́/ и со стра́хом славосло́вяше си́лу Твою́.

От ко́рене волше́бна тро́ица благослове́нная,/ отца́ неблагочести́ва, ма́тере же благоче́ствующия, му́ченик прозябе́,/ бра́тия, возрасти́вшии плоды́ благоче́стия.

Зве́зды неле́стны бы́сте ве́ры,/ я́ко со́лнце, я́ве возсия́вше ми́ру, трисия́нная тро́ица,/ светоно́сный Ману́ил, Саве́л и со Исма́илом.

Моли́теся трие́, я́коже еди́н, Тро́ице/ да́ти очище́ние и оставле́ние согреше́ний/ творя́щим ве́рою и́стинною, святи́и му́ченицы, па́мять ва́шу.

Богоро́дичен: Пала́та красна́ всех Царя́ показа́ся вои́стинну, и престо́л Вы́шняго,/ и вы́шши тва́ри Богома́ти, и Предста́тельница душ на́ших.

Пе́снь 5

Ирмо́с: От но́щи неве́дения,/ Богове́дением просвети́вый концы́,/ просвети́ мя у́тром человеколю́бия Твоего́, Го́споди.

Достодо́лжно вси му́чеников соверша́ем па́мять:/ сих бо кро́вию ве́сь освяти́ся мирски́й возду́х.

Нощеборю́щую дре́вле ве́рных Це́рковь,/ му́ченицы сию́ просвети́ша заре́ю пра́выя их ве́ры.

Авраа́мова не́дра му́ченическия ду́ши прия́ша,/ и́миже, я́коже о́браз напи́сан, Вы́шнее Ца́рство пропове́дается.

Богоро́дичен: Я́же от Тро́ицы еди́наго воплоще́нна ро́ждши Бо́га вои́стинну, Богома́ти,/ моли́ бед изба́вити рабы́ Твоя́.

Пе́снь 6

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.

Избего́ша скве́рны мы́сленныя святи́и му́ченицы,/ спа́сшеся без волне́ния, окормле́нием Креста́ наставля́еми.

Кро́ви ва́ша, зи́нувши, земля́ покры́, святи́и,/ и внеза́пу мо́щи в до́льних сокро́вищах сокрове́ни бы́ша.

Умири́ мир, Бо́же, и спаси́, я́ко Милосе́рд,/ ста́до Твое́ неврежде́нно/ моли́твами сла́вных страстоте́рпец Твои́х.

Богоро́дичен: Без се́мене заче́нши Бо́га,/ Зижди́теля естества́ нетле́нно родила́ еси́,/ Того́ моли́, Богома́ти, спасти́ся нам.

Конда́к, глас 2.

Подо́бен: Вы́шних ища́:

Ве́рою Христо́вою уя́звлени, всеблаже́ннии,/ и Сего́ ве́рно испи́вше ча́шу,/ пе́рсская служе́ния и де́рзость на зе́млю низложи́сте,/ Тро́ицы равночи́сленнии,/ моли́твы творя́ще о всех нас.

И́кос:

И́же испе́рва Боже́ственною Твое́ю добро́тою, Иису́се Жизнода́вче, озари́ мя я́ве,/ я́ко да воспою́ му́ченики, за Тя подви́гшияся да́же до сме́рти,/ и вра́жию всю кре́пость низложи́вшия до́бле,/ и и́дольския ле́сти отбе́гшия, кре́стною си́лою укрепля́еми./ Му́ки бо претерпе́вше, Тро́йческую сла́ву восприя́ша,/ Того́ у́бо о всех моли́те.

Пе́снь 7

Ирмо́с: В нача́ле зе́млю основа́вый/ и небеса́ сло́вом утверди́вый,/ благослове́н еси́ во ве́ки,/ Го́споди Бо́же оте́ц на́ших.

Трие́ от еди́наго све́та свети́льники возжже́ Христо́ва светоно́сная Це́рковь,/ венцено́сца и победоно́сца сла́внаго Ману́ила и страда́вшия с ним.

Халде́йское оста́вльше оте́чество, волше́бныя отбего́ша ве́ры/ трие́ Тро́ице честни́и ору́жницы, вопию́ще:/ благослове́н еси́ во ве́ки, Го́споди Бо́же оте́ц на́ших.

Трие́ во огни́, и́же о Аза́рии, халде́йския избего́ша слу́жбы,/ и трие́ ору́жницы, и́же от Перси́ды, пострада́вше по Христе́,/ и́же о Ману́иле.

Богоро́дичен: В жена́х не ро́ди де́ва, то́кмо Ты еди́на, Де́во Богоро́дице:/ отца́ бо до́ле и ма́тере горе́, Младе́нцу вся́ко не бе:/ сугу́б бо бе Христо́с.

Пе́снь 8

Ирмо́с: На горе́ святе́й просла́вльшася/ и в купине́ огне́м Присноде́вы Моисе́ови та́йну я́вльшаго,/ Го́спода по́йте/ и превозноси́те во вся ве́ки.

Воздержа́нием вжили́вше те́ло, благоче́стием укре́пльше дух,/ страда́льческое совокупи́ша все удержа́ние к неви́димым князе́м тьмы́/ Христо́вы страстоте́рпцы.

Я́коже цве́ты, венцы́ венча́ема му́ченик Христо́ва Це́рковь/ неве́стническою оде́ждою оде́яся, кро́вию омоче́ною,/ я́ко от нетле́ния обагре́ния му́ченик.

Ча́сти, Христе́, спаса́емых, и жре́бия улучи́ти Твои́х му́ченик,/ и неотъе́млемыя сла́вы сподо́бил еси́ испове́дающих еди́наго Тя, Сы́на О́тча и Де́вы.

Богоро́дичен: Я́ко еди́наго ро́ждши от Тро́ицы, моля́щи не преста́й, Богоро́дице,/ да изба́вимся от беззако́ний на́ших и сподо́бимся явле́ния Его́ и Ца́рствия.

Пе́снь 9

Ирмо́с: Проявле́нное на горе́ законополо́жнику во огни́ и купине́/ рождество́ Присноде́вы/ в на́ше, ве́рных, спасе́ние/ пе́сньми немо́лчными велича́ем.

Трегу́бным у́жем вас совокупи́ благода́ть, Ману́иле, Саве́ле и Исма́иле,/ незы́блемою ве́рою собра́вши единому́дренный нрав/ и́же по Христе́ испове́дания ва́шего.

Иулиа́на смра́днаго и отсту́пника,/ льсти́ваго мучи́теля треплете́нною пра́щею победи́сте,/ Тро́ицы ору́жницы, трие́ увязо́стеся венцы́ вку́пе.

Достопа́мятное чу́до му́ченик, по кончи́не бо сия́нием земля́ покры́вши,/ пома́ле, я́ко светолу́чны зве́зды, от земны́х недр облиста́ша.

Богоро́дичен: Я́же от Твое́ю боку́ ро́ждшая несказа́нным сло́вом/ е́же от Безнача́льна Отца́ пресу́щное Сло́во, Богома́ти,/ и в ма́терех Де́ва, спаса́й ду́ши воспева́ющих Тя.

Свети́лен:

Чу́дная и треплете́нная во плени́цах златы́х,/ му́ченик наста́ всесвяще́нная па́мять:/ вели́каго вои́стинну Ману́ила, и Саве́ла, и Исма́ила пресла́вных,/ и всех ве́рных се́рдца озаря́ет све́том и ду́ши весели́т.

Богоро́дичен:

Я́ко иму́щи милосе́рдие и ми́лость вели́ку,/ при́зри, Всепе́тая Богоро́дице Де́во, на мое́ смире́ние,/ и страсте́й молву́ и собла́зн жития́ разори́, Отрокови́це,/ и огня́ гее́нскаго изба́ви мя Твои́ми моли́твами.

НА ЛИТУРГИ́И

Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га,/ Го́спода от исто́чник Изра́илевых. Апо́стол ко Ефесе́ем, зача́ло 233. Аллилу́ия, глас 4: Воззва́ша пра́веднии и Госпо́дь услы́ша их,/ и от всех скорбе́й их изба́ви их. Стих: Мно́ги ско́рби пра́ведным и от всех их изба́вит я Госпо́дь. Ева́нгелие от Луки́, зача́ло 106. Прича́стен: Ра́дуйтеся, пра́веднии, о Го́споде:

Преподо́бных братьев Алфановых, Ники́ты, Кири́лла, Ники́фора, Кли́мента и Исаакия, Новгоро́дских

(Слу́жбу зри 4 мая)

Тропа́рь, глас 1:

Послу́шаша Госпо́дня гла́са,/ до́брии рачи́тели бы́вше,/ благи́й Его́ яре́м на ся взе́мше,/ усе́рдно понесо́сте/ и по́стничества пу́ть дости́гше,/ преподо́бнии отцы́, святи́и чудотво́рцы,/ во́ини Небе́снаго Царя́ Христа́,/ Ники́то, Кири́лле, Ники́форе, Кли́менте и Исаа́кие,/ сего́ ра́ди от Вседержи́тельныя десни́цы/ венцы́ неувяда́емыми увязо́стеся, и Небе́сною сла́вою оде́ястеся,/ и чудотворе́нии обогати́стеся,/ те́мже и о нас моли́ти не преста́йте,/ да полу́чим ве́чных благ,/ мы же си́це взыва́ем:/ сла́ва Да́вшему вам к по́двигу кре́пость,/ сла́ва Венча́вшему вас,/ сла́ва Даю́щему ва́ми всем исцеле́ния.

Конда́к, глас 8:

Благода́ть прие́мше исцеле́нием,/ простира́ете здра́вие су́щим в боле́знех,/ преподо́бнии отцы́ и чудотво́рцы сла́внии,/ Ники́то чу́дне, и Кири́лле блаже́нне, и Ники́форе прече́стне,/ Кли́менте свя́те и Исаа́кие преподо́бне,/ но моли́твами ва́шими проти́вных шата́ние разори́те,/ и боле́зни на́ша исцели́те,/ и грехо́в проще́ние испроси́те,/ да благода́рне воззове́м вам:/ ра́дуйтеся, вели́кому Новугра́ду похвала́ и утвержде́ние.